དཔལ་བཅོམ་ལྡན་འདས་རལ་པ་གཅིག་པའི་སྒྲུབ་ཐབས།
རོལ་པའི་རྡོ་རྗེ།
― DTG049_Page_0340 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཤྲཱི་བྷ་ག་ཝཱན་ཨེ་ཀ་ཛཱ་ཊི་སཱ་དྷ་ནཾ། བོད་སྐད་དུ། དཔལ་བཅོམ་ལྡན་འདས་རལ་པ་གཅིག་པའི་སྒྲུབ་ཐབས། རྗེ་བཙུན་རལ་པ་གཅིག་མ་ལ་ཕྱག་འཚལ་ལོ། །ཤིན་ཏུ་གསང་བའི་རྟོག་པ་ལས། །རྣལ་འབྱུར་པ་ལ་ཕན་བྱེད་པ། །བླ་མའི་དྲིན་ཐོབ་དགའ་བའི་མཐུས། །རལ་པ་གཅིག་འཕྱང་སྒྲུབ་ཐབས་བྲི། །རབ་ཏུ་བསྔགས་པའི་གནས་སུ་ནི། །བློ་མཆོག་སྒྲུབ་པ་པོ་
― DTG049_Page_0341 ―
[མ་དཔེ་གཟིགས་ན་འདིར་གནོན།]
ཡིད་ཐུལ། །དམ་ཚིག་ཚ་དང་རབ་ལྡན་པས། །དང་པོ་སྟོང་ཉིད་བསྒོམས་པར་བྱ། །ཨོཾ་སྭཱ་བྷཱ་བྴུདྡྷཿསརྦ་དྷརྨཱཿསྭ་བྷ་བ་ཤུདྡྷོ྅ཧཾ། དེ་རྗེས་འཁོར་ལོ་བཅིང་བྱས་ལ། །སྣ་ཚོགས་པད་སྟེང་ཉི་ཟླ་དང༌། །ཐོད་པ་དང་བཅས་དབུགས་བྲལ་ལ། །ཧཱུཾ་ཡིག་འབར་བ་བསམ་པར་བྱའོ། །ཧཱུ༵་བཾ་མ་ཨ་ཀྵཾ་དོན་གཉིས་མཛད་དེ་ཡོངས་གྱུར་པས། །རྡོ་རྗེས་མཚན་པའི་གྲི་གུག་ཅན། །རྡོ་རྗེའི་འོད་ཀྱིས་རྣམ་བརྒྱན་པ། །ཡི་ཤེས་སྐུ་མཆོག་བསྒོམ་པའོ། །ཨོཾ་ཨཱཿཧཱུ༵་བརྐྱང་བསྐུམ་ཞབས་གཉིས་སྟབས་མཛད་ཅིང༌། །ཞལ་གསུམ་ཕྱག་བཞི་འགྱིང་བག་ཅན། །རྡོ་རྗེ་དང་ནི་ཐོད་ཁྲག་འཛིན། །རལ་གྲི་ཨུཏྤལ་གཡས་དང་གཡོན། །ནམ་མཁའི་མདོག་ཅན་ཞི་ཞིང་ཁྲོ། །དམར་སེར་རལ་པ་གཅིག་འཕྱང་མ། །མི་ཐུང་གཟུགས་ཅན་བཞད་མོ་ཆེ། །རྡོ་རྗེ་རིན་ཆེན་རུས་པས་བརྒྱན། །སངས་རྒྱས་ལྔ་ཡིས་དབུ་བརྒྱན་ཅིང༌། །དུས་གསུམ་སངས་རྒྱས་རྟགས་འཆང་མ། །གར་གྱི་ཉམས་དགུས་དགྱེས་བཞུགས་ཉིད། །ཕྱག་རྒྱ་ལྔ་ཡིས་རྣམ་བརྒྱན་པའོ། །སྐུ་གསུང་ཐུགས་ཀྱི་དག་པ་ཡིས། །རྡོ་རྗེའི་ཕྱག་རྒྱ་བརྟན་བྱས་ལ། །ལྕགས་ཀྱུ་ཞགས་པ་ལྕགས་སྒྲོག་དང༌། །རྡོ་རྗེ་དྲིལ་བུའི་རིགས་པས་སྦྱང༌། །དེ་རྗེས་མཆོད་སོགས་སྔོན་འགོ་བས།། སྙིང་རྗེ་ཆེན་པོ་མདུན་བཞག་སྟེ། །ས་གསུམ་རྣམ་པར་སྦྱང་པ་ཡི། །རིག་སྔགས་རྒྱལ་པོ་བཟླས་པར་བྱ། །ཧྲཱིཾ་ཏྲིཾ་ཧཱུ༵་ཕཊ། ཏིང་འཛིན་ཚོགས་པ་ཚང་པ་ཡི། །སྒྲུབ་པ་པོ་ནི་རབ་དང་ལྡན། །བླ་མ་མཉེས་བྱེད་རྣལ་འབྱོར་བརྩོན། །འབུམ་ཕྲག་བཞི་ཡིས་དངོས་གྲུབ་བྱེད། །སྡིག་པ་ཐམས་ཅད་འཇིག་བྱེད་ཅིང༌། །དོན་ཀུན་སྒྲུབ་བྱེད་གསང་སྔགས་འདི། །དེ་རྗེས་ལུས་ཅན་སྙིང་བརྩེ་བས། །གཙོ་བོ་ཉེ་བར་བྱ་ཕྱིར་བཟླས། །ཨོཾ་ཨཱཿཧཱུ༵་བཛྲོད་བྷ་བ་ཀ་ར་ཛྙཱ་ན་པྲ་ཏིཥྛ་ཏ་ཧཱུ༵་ཕཊ་སྭཱ་ཧཱ། སངས་རྒྱས་ཀུན་གྱི་ཐུགས་རྗེ་བ། །གསང་སྔགས་རྒྱལ་པོ་རྡོ་རྗེ་ཅན། །རལ་པ་གཅིག་མཆོག་དཔལ་ལྡན་མ། །དེ་མཉེས་མན་ངག་འདི་ཡིན་ནོ། །དཔལ་བཅོམ་ལྡན་འདས་རལ་པ་གཅིག་མའི་སྒྲུབ་ཐབས་སློབ་དཔོན་ཆེན་པོ་རོལ་པའི་རྡོ་རྗེས་མཛད་པ་རྫོགས་སོ།། །།རྣལ་འབྱོར་གྱི་དབང་ཕྱུག་མ་ཧཱ་ཤྲཱི་ཛཱ་ག་ཏ་མི་ཏྲ་ཨཱ་ན་ནྡ་རཱ་ཛ་དང༌། གནུབས་ལོ་ཙ་བ་མཻ་ཏྲི་ཤྲཱིས་བསྒྱུར་བའོ།།
| 
