ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས་མདོར་བསྡུས་པ་ཞེས་བྱ་བ།

[Full Size]

རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་ན་ནོ་པི་ཀ་ཙནྡྷ་ནཱ་མ། བོད་སྐད་དུ། ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས་

[Full Size]

མདོར་བསྡུས་པ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །སྔར་ཉིད་དོན་དམ་ཐུགས་ཆུད་འགྲོ་བའི་དོན་དུ་རྡོ་རྗེའི་སྐུ། །གནས་མཛད་མཐུ་སྟོབས་ཁྱད་འཕགས་གདུག་པ་རྣམས་ཀྱི་དགྲར་གྱུར་པ། །རྒྱ་མཚོར་ཞབས་གཞག་འཇིག་དུས་མེ་དཔུང་དང་ལྡན་སྙིང་རྗེས་ཁྲོས། །རྟོག་པའི་སྡུག་བསྔལ་ཐར་མཛད་ཁྱོད་ལ་དངོས་བོ་ཀུན་གྱིས་འདུད། །རྩོད་པའི་དུས་གང་ཕྲད་གྱུར་བརྩོན་འགྲུས་ཆུང་ཞིང་བློ་ཞེན་པས། །ཤིན་ཏུ་བསྡུས་ལ་དགའ་ཞིང་མ་བཙལ་འབྲས་བུ་འདོད་ལ་གཟུད་ཕྱིར་དྲན། །དེ་ལ་སྙིང་རྗེ་ཆེན་པོ་དང་ལྡན་པའི་རྣལ་འབྱོར་པས་ཁྲུས་བྱས་ཏེ། ཡིད་དུ་འོང་བའི་བསམ་གཏན་གྱི་ཁང་པར་སྟན་བདེ་བ་ལ་འདུག་ནས་རང་གི་སྙིང་གའི་ས་བོན་གྱི་འོད་ཟེར་གྱིས་ཕྱོགས་བཅུ་གངྒཱའི་ཀླུང་གི་སངས་རྒྱས་རྣམས་དང་དེའི་སྲས་རྣམས་མདུན་དུ་སྤྱན་དྲངས་ཏེ། མཆོད་པའི་ཡོ་བྱད་ལྔས་ཡང་དག་པར་མཆོད་པ། སྡིག་པ་བཤགས་པ་ལ་སོགས་པ་བྱའོ། །དེའི་རྗེས་སུ་ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་པ་དང་བཅས་པས་སྟོང་པ་ཉིད་དུ་བསྒོམ་མོ། །དེ་ནས་པཾ་ལས་པདྨའི་སྟེང་དུ་ཟླ་བའི་དཀྱིལ་འཁོར་ཧཱུཾ་དང་བཅས་པ་བསམས་ཏེ། དེ་ཡང་རིང་པོའི་སྒྲ་དང་ལྡན་ཞིང་འོད་ཟེར་འཕྲོ་བ་ཅན་ནོ། །དེ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་དང་ལྡན་བའི་ས་བོན་ལས་འོད་འཕྲོས་ཏེ། ཕྱོགས་བཅུ་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་སྤྱན་དྲངས་ཏེ། དེ་ཉིད་ལ་ཐིམ་ནས། དེ་ཡོངས་སུ་གྱུར་པ་ལས་སངས་རྒྱས་གོས་སྔོན་པོ་ཅན། ཞལ་གཅིག་ཕྱག་གཉིས་པ། གཡོན་བརྐྱང་བ་གཡས་བསྐུམ་པ། སྐུ་མདོག་མཐིང་ནག་སྤྱན་མེའི་ཕུང་པོ་འདྲ་བ། ཡ་སོས་མ་མཆུ་མནན་པ། འབྲུག་སྒྲ་ཅན་གྱི་དབུགས་ཚ་བ། སྐྲ་གྱེན་དུ་བརྫེས་པ། ཕྱག་གཡས་ན་རྡོ་རྗེ་རྩེ་ལྔ་པ་བསྣམས་པ། གཡོན་ན་སྡིགས་མཛུབ་མཛད་པ། གོས་སྔོན་པོ་ཅན་ལ་ལྟོས་འགྲོ་བརྒྱད་ཀྱིས་བརྒྱན་པ། བདུད་ལ་སོགས་པ་ཚར་གཅོད་པའི་ཚུལ་ཅན་དུ་བདག་ཉིད་བསམ་མོ། །རང་གི་སྙིང་གའི་ས་བོན་གྱིས་རང་དང་འདྲ་བའི་ཡེ་ཤེས་སེམས་དཔའ་སྤྱན་དྲངས་ཏེ། སྙིང་པོ་བཞིས་ཐ་མི་དད་པར་བྱ། དེ་ནས་བྱིན་གྱིས་བརླབ་ཅིང་དབང་བསྐུར་རོ། །ཇི་སྲིད་སྐྱོ་བར་མ་གྱུར་གྱི་བར་དུ་བསྒོམ་ཞིང༌། སྐྱོ་བའི་ཚེ་སངས་རྒྱས་གངྒཱའི་ཀླུང་གི་རྗེས་སུ་

[Full Size]

གནང་བའི་ཕྲེང་བའི་སྔགས་ཁོ་ན་བཟླས་པར་བྱའོ། །བསྡུས་པ་དག་ལ་དགའ་བས་ནི། ཨོཾ་ནཱི་ལཱཾ་བར་དྷ་ར་བཛྲ་པཱ་ཎི་ཧྲྀ་ད་ཡ་མ་ཧོ་ཀྲོ་དྷ་སཱ་དྷ་ཧཱུཾ་ཕཊ། སྙིང་པོའི་སྔགས་ཉི་ཤུ་རྩ་གཅིག་པའོ། །ཨོཾ་ནཱི་ལཱཾ་བར་དྷ་ར་བཛྲ་པཱ་ཎི་དྷར་མ་ཧཱ་ཀྲོ་དྷ་སཱ་དྷ་ཧཱུཾ། ཉེ་བའི་སྙིང་པོ་དང༌། ཡང་སྙིང་སྟེ་བཅུ་བདུན་པའོ། །གཏོང་བར་འདོད་པའི་ཆོ་གཏོར་མ་ཕུལ་ལ། ཡེ་ཤེས་སེམས་དཔའ་ཕྱུང་སྟེ་གཤེགས་སུ་གསོལ་ལོ། །སྤྱོད་ལམ་ཐམས་ཅད་དུ་ཡང་རང་ལྷའི་ང་རྒྱལ་དང་ལྡན་པས་གནས་པར་བྱའོ། །ཁ་ཟས་གོས་སོགས་ཟས་སྐོམ་དང༌། །དབུལ་བ་ཀུན་ཟད་ནད་མེད་དང༌། །འཇིགས་ཆེན་བརྒྱད་དང་སྡུག་བསྔལ་སོགས། །འཇིགས་པ་མེད་ཅིང་གང་བསམ་པའི། །འདོད་བའི་དོན་རྣམས་ཐམས་ཅད་ནི། སྒྲུབ་ཐབས་འདི་ལས་འབྱུང་འགྱུར་རོ། །འགྲོ་རྣམས་འདོད་པ་ཐ་དད་པས། །དེ་ལ་དགོངས་ནས་བདེ་གཤེགས་ཀྱིས། །བྱང་ཆུབ་ལམ་ནི་སྣ་ཚོགས་གསུངས། །རང་འདོད་ལམ་ནི་ཐོབ་བྱའི་ཕྱིར། །དད་པས་བླ་མ་བཟང་བཅལ་ཏེ། །ཇི་སྲིད་བླ་མ་མཉེས་བྱས་ནས། །འདོད་དོན་མན་ངག་བླང་བར་བྱ། མཉེས་པས་ཡིན་གྱི་གཞན་གྱིས་མིན། །བདག་གིས་སྒྲུབ་ཐབས་མདོར་བསྡུས་སྨྲས། །སྨྲས་པས་ཟླ་བ་ལྔར་གསལ་བའི། །དག་ཅིང་ནམ་མཁར་མི་ཤོང་བའི། །དགེ་བ་གང་གིས་ཐོབ་པ་གང༌། །འདིར་བཞུགས་འདོད་ལྷའི་ཞལ་མཐོང་ཤོག །དཔལ་ཕྱག་ན་རྡོ་རྗེའི་སྒྲུབ་ཐབས་མདོར་བསྡུས་པ་ཞེས་བྱ་བ། ནམ་གྲུའི་རིགས་ལས་བྱུང་བ། དངོས་གྲུབ་བརྙེས་པའི་སློབ་དཔོན་ཆེན་པོ་ཛཱ་བ་རི་པས་མཛད་པ་རྫོགས་སོ།། །།བལ་པོའི་པཎྜི་ཏ་དེ་ཝ་པཱུ་རྞ་མ་ཏི་དང༌། བོད་ཀྱི་ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།།