གནོད་སྦྱིན་གྱི་སྡེ་དཔོན་རྣམས་སྦྱོང་ཞིང་སེལ་བ་ཞེས་བྱ་བའི་སྒྲུབ་ཐབས།

[Full Size]

རྒྱ་གར་སྐད་དུ། ཡཀྵ་སེ་ནཱ་པ་ཏ་ཡེ་བི་ཤོདྷ་ན་ཧ་ར་སཱ་དྷ་ནཱ་མ། བོད་སྐད་དུ། གནོད་སྦྱིན་གྱི་སྡེ་དཔོན་རྣམས་སྦྱོང་ཞིང་སེལ་བ་ཞེས་བྱ་བའི་སྒྲུབ་ཐབས། དཔལ་ཕྱག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །སྐུ་མདོག་མཐིང་ནག་ཁྲོས་པའི་གཟུགས་ལྡན་ཤིན་ཏུ་འཇིགས། །གནོད་སྦྱིན་འདུལ་མཛད་མ་འབར་རྡོ་རྗེ་འཛིན་ལ་གུས་བཏུད་དེ། །ལས་དང་ཉོན་མོངས་ལས་དང་རྐྱེན་གྱིས་རབ་བསྐུལ་ནས། །འབྲས་བུ་སྡུག་བསྔལ་གནོད་སྦྱིན་དུག་ནི་བསལ་ཕྱིར་བྲི། །ལྷ་ཡི་བསྙེན་པ་རབ་རྫོགས་ཤིང༌། །དུལ་ལ་སྙིང་བརྩེར་ལྡན་པ་དང༌། །ཆོ་ག་ཐབས་ལ་མཁས་པ་དང༌། །དབང་རྫོགས་ནུས་པ་ལྡན་པས་བཟློག །ཁྲུས་ལ་སོགས་པ་དང་ལྡན་པས། །བུམ་པ་ཡུངས་ཀར་ལེགས་པར་བརྟག །རྟགས་བྱུང་སྒྲུབ་པ་རབ་ཏུ་བརྩམ། །གནས་ནི་ཡིད་འོད་དེར་འདུག་སྟེ། །བསྲུང་དང་ས་ཆོག་རྫོགས་པ་དང༌། །མཎྜལ་ལེགས་པར་བྱས་ནས་ནི། །སྟ་གོན་རྫོགས་པར་བྱས་པ་དང༌། །དམར་གཏོར་བུམ་པ་ལྔ་རྣམས་དང༌། །འབྲུ་སྣ་སྨན་སྣ་རིན་ཆེན་དང༌། །ཁྲག་དང་ཤ་དང་སྙིང་ལ་སོགས། །རྫས་དང་སྟ་གོན་རྫོགས་པར་བསགས། །དེ་ནས་ཐིག་གིས་གདབ་བྱ་བ། །བྱིན་རླབས་དམ་ཚིག་ཅན་གྱིས་བྱ། །དང་པོ་ཚངས་ཐིག་གདབ་པ་དང༌། །ཟུར་དང་ལོགས་དང་ཆ་ཆེན་དབྱེ། །སྒོ་རྒྱན་ལྷ་སྣམ་གཉིས་བཏབ་ནས། །དེ་ནས་ཚོན་རྣམས་བྱིན་གྱིས་བརླབ། །དགེ་བ་འཁོར་ལོ་ལྟེ་བར་བ་ཅས། །ལྟེ་བར་ཉི་མའི་དཀྱིལ་འཁོར་ལ། །རྡོ་རྗེ་སྔོན་པོ་བྲི་བར་བྱ། །འཁོར་ལོའི་རྩིབས་བརྒྱད་སེར་པོ་སྟེ། །ཤར་དུ་རལ་གྲི་ལྷོར་དབྱུག་པ། །ནུབ་ཏུ་མདུང་སྟེ་དགྲ་སྟ་བྱང༌། །ཤར་ལྷོ་འཁོར་ལོ་ལྷོ་ནུབ་མདའ། །ནུབ་བྱང་གྲི་གུག་བྱང་ཤར་ཏྲི་ཤཱུལ་དགོད། །ལྷ་སྣམ་ཕྱོགས་སྐྱོང་བཅུ་དགོད་དོ། །དེ་ནས་རྫས་རྣམས་དགྲམ་པ་ནི། །དབུས་སུ་བུམ་པ་སྔོན་པོ་དགོད། །ཕྱོགས་བཞིར་རིགས་དང་བསྟུན་པའོ། །མཚམས་བཞིར་ཁྲག་གི་གཏོར་མ་གཞག །གྲྭ་རྣམས་མཆོད་པ་སྔོན་པོ་བཤམ། །ཕྱོགས་སྐྱོང་གཏོར་མ་སྒོ་བཞིར་གཞག །ནད་པ་ཁྲུས་བྱས་བྱང་འདུག་ལྷོ། །བདག་ཉིད་ལྷོར་འདུག་བྱང་དུའོ། །ལས་

[Full Size]

ཀྱི་བུམ་པ་བྱང་དུའོ། །དེ་ལྟར་རྫས་རྣམས་རྫོགས་པ་དང༌། །མཆོད་བསྟོད་སྔོན་དུ་རྫོགས་པ་དང༌། །སྔགས་ཀྱིས་སྟོང་ཉིད་བསྒོམས་ནས་ནི། །དེ་རྗེས་ས་བོན་ཧཱུཾ་ཡིག་ལས། །རྡོ་རྗེ་གུར་ས་གཞིར་གྱུར། །དེ་སྟེང་བྷཱུཾ་ལས་གཞལ་ཡས་ནི། །དུར་ཁྲོད་འཇིགས་པར་བསྐྱེད་པར་བྱ་དེ་ནས་གྲུ་བཞི་སྒོ་བཞི་པ། །འཁོར་ལོ་རྩིབས་བརྒྱད་མུ་ཁྱུད་བཅས། །དྲ་བ་དྲ་ཕྱེད་རྟ་བབས་སོ། །དབུས་སུ་ཉི་མ་དབང་པོའི་སྟེང༌། །ཧཱུཾ་ལས་བསྐྱེད་པའི་རྡོ་རྗེ་ཅན། །ཞལ་གསུམ་ཕྱག་དྲུག་རབ་བསྐྱེད་ནས། །རེ་པ་ལ་གནས་ཧཱུཾ་མཐིང་ནག །ཐུགས་ཀར་རབ་ཏུ་བསྒོམས་པ་ལས། །རྩིབས་བརྒྱད་རེ་ཕ་བརྒྱད་སྟེང་དུ། །ཀྵ་ལས་བསྐྱེད་པའི་གནོད་སྦྱིན་ནི། །ཤ་ཟ་དང་ནི་རལ་པ་ཅན། །གདོང་སེར་དང་ནི་སེང་གདོང་སྟེ། །མོ་བཞི་མཚམས་སུ་རབ་བསམ་བྱ། །རབ་ཏུ་སྨུག་ནག་ཤིན་ཏུ་དམར་བ་དང༌། །རབ་ཏུ་འབར་བའི་གསེར་བསྲེགས་དུང་མདོག་གོ །འཁོར་ལོ་མདའ་དང་གྲི་གུག་ཏྲི་ཤཱུ་ལ། །གཡས་ན་དེ་རྣམས་གཡོན་ཐོད་པའོ།། ཤིན་ཏུ་འཇིགས་པའི་གནོད་སྦྱིན་མོ། །ཉི་མའི་དཀྱིལ་ན་གཡས་བསྐུམ་བཞུགས། །བོང་བུ་སྣ་དང་རྣ་བ་འཕྱང༌། །རལ་པ་གྱེན་འགྲེང་རལ་གྲི་སོ། །ཐལ་བའི་མདོག་དང་དུད་ཀ་དང༌། །དམར་ནག་ཤིན་ཏུ་གནག་པའོ། །རལ་གྲི་དབྱུག་བ་མདུང་དང་སྒྲ་སྟ་དང༌། །གཡས་ན་དེ་རྣམས་གཡོན་ན་ཐོད་པའོ། །ཤིན་ཏུ་འཇིགས་པའི་གནོད་སྦྱིན་ནི། །ཉི་མའི་དཀྱིལ་ན་བརྒྱང་བསྐུམ་བཞུགས། །ཡེ་ཤེས་སྤྱན་དྲངས་མཆོད་ནས་བསྟིམ་པར་བྱའོ། །ཡཀྵ་པིདད་ར་ཎཱ་ཡ་ཧཱུཾ་ཕཊ། །ཡཀྵ་ཀྲོ་དྷ་སཱ་དྷ་ནཱ་ཡ་ཧཱུཾ་ཕཊ། ཡཀྵ་ནཱི་ལཱཾ་བ་ས་ན་ཡ་ཧཱུཾ་ཕཊ། ཡཀྵ་ཨ་པྲ་ཏི་ཧ་ཏ་པཱ་ལ་ཡ་ཧཱུཾ་ཕཊ།གནོད་སྦྱིན་མ་རྣམས་གཡོ་སྐོར་ནས། །འཇིགས་བྱེད་གནོད་སྦྱིན་གསང་སྔགས་བཟླས། །ཡཀྵ་པ་ར་ཀྲ་མཱ་ཡ་ཕཊ། །རཀྵ་ཀྲྀ་ཧཱ་ནྟ་ཡ་ཕཊ། ཡཀྵ་བི་དྷན་ཏ་རཱུ་པ་ཡ་ཕཊ། རཀྵ་རོ་ཥ་ཎ་ཡ་ཕཊ། ཅེས་པ་བརྒྱ་རྩ་བརྒྱད་དུ་བཟླས། །དུས་གསུམ་ཆོད་པ་རྣམས་ལྡས་མཆོད། །བཟློག་དང་ལས་བཅལ་མན་ངག་བཞིན། །བགེགས་དང་ལོག་འདྲེན་ལས་བཅོལ་བྱ། །ཐོད་པ་དུར་དུ་ངེས་པར་གཞུག །བཟློག་ན་ཡུངས་ཀར་རྟགས་ཀྱིས་བརྟག །མི་ལྡོག་རྟགས་སུ་ཤེས་པར་བྱའོ། །ཧཱུཾ་ཞལ་གསུམ་ཕྱག་དྲུག་འཇིགས་པའི་སྐུ། །མཐིང་ནག་མི་འགྱུར་ཐུགས་རྗེ་ཅན། །གནོད་སྦྱིན་གདུག་པ་འདུལ་མཛད་པ། །རྡོ་རྗེ་བསྣམས་ལ་ཕྱག་འཚལ་བསྟོད། །ཨོཾ་བཛྲ་

[Full Size]

མུཿ་ཞེས་པས་གཤེགས་སུ་གསོལ་ལོ། །བདག་གིས་འགྲོལ་ཕན་ཕྱིར་བརྩམས། །དེས་ནི་འབྲས་བུ་བདེ་ཐོབ་ཤོག །གནོད་སྦྱིན་གྱི་སྒྲུབ་པའི་ཐབས་ནམ་གྲུའི་རིགས་ལས་བྱུང་བ་དངོས་གྲུབ་བརྙེས་པའི་སློབ་དཔོན་ཛཱ་བ་རི་པས་མཛད་པ་རྫོགས་སོ།། །།བལ་པོའི་མཁན་པོ་དེ་བ་པཱུ་རྞམ་ཏི་དང༌། ལོ་ཙཱ་བ་བནྡེ་ཆོས་ཀྱི་བཟང་པོས་བསྒྱུར་བའོ།།