ཀླུ་ཁྲོ་བོ་གསད་པའི་ཕྲིན་ལས་ཞེས་བྱ་བ།
སློབ་དཔོན་ཛཱ་བ་རི་པ།

[Full Size]

རྒྱ་གར་སྐད་དུ། ནཱ་ག་ཀརྨ་ཀྲོ་དྷ་མ་ར་ན་ནཱ་མ། བོད་སྐད་དུ། ཀླུ་ཁྲོ་བོས་གསད་པའི་ཕྲིན་ལས་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་བསྙེན་བཟླས་པའི་རྟགས་བྱུང་ན། །འགའ་ཞིག་དབང་དུ་བསྡུ་དགོས་པས། །དེ་དབང་བྱ་ཕྱིར་མན་ངག་རིམ། །མགོན་ལ་ལུས་བཏུད་མན་ངག་དྲན། །དུར་ཁྲོད་ལ་སོགས་གནས་དག་ཏུ། །སྔོན་དུ་བསྙེན་པ་རྫོགས་པ་ཡི། །ནག་པོའི་ཕྱོགས་ཀྱི་ཟླ་བ་ལ། །བདུན་དང་དགུ་དང་ལྔ་དུས་ལ། །དཀྱིལ་འཁོར་གྲུ་གསུམ་ཁྲུ་གང་ཚད། །མགོ་ནི་ལྷོ་རུ་བསྟན་པར་བྱ། །སྦྲུལ་དང་སྦལ་པའི་ཤ་དང་ནི། །སྐེ་ཚེ་ཇུ་ཆེ་ཁྲི་དང་ཏིལ། །ཐལ་བ་ས་དང་ལན་ཚྭ་དང། །བུ་རམ་འབྲས་ཕྱེ་རྣམས་ལས་ནི། །སོར་བརྒྱད་ཚད་ཀྱི་སྨད་འཁྱིལ་བ། །དགུ་དད་བདུན་དང་ལྔ་དང་གསུམ། །ཀླུ་ཡི་རྒྱལ་པོའི་གཟུགས་བྱས་ཏེ། །མཐིང་ནག་ཧཱུཾ་ཕཊ་སྙིང་གར་གཞུག །གྲུ་གསུམ་ནང་དུ་མགོ་བོ་ལྷོར། །བསྟན་ཏེ་གན་རྐྱལ་ལྟ་བུར་གཞག །དེ་ལྟར་རྫས་རྣམས་

[Full Size]

བསགས་ནས་ནི། །ལྷ་ཡི་རྣལ་འབྱོར་བདག་ལྡན་པས། །ལྕགས་ཀྱུ་ལྔ་དང་ས་བོན་ལྔ། །འདོད་པའི་ལྟ་ལ་དབུལ་བ་སྟེ། །སྦྲུལ་དང་སྦལ་པའི་ཤ་ཁྲག་སོགས། །བསྒྲུབ་བྱ་དེ་ཉིད་ལ་ནི་སྦྱིན། །རྟ་ཤ་ལ་སོགས་སྣ་ཚོགས་ཤ་།ནང་གི་བཀའ་སྲུང་རྣམས་ལ་སྦྱིན། །འབྲས་ཆན་ལ་སོགས་གཏོར་མ་ནི། །ཕྱི་ཡི་བསྟན་སྲུང་རྣམས་ལ་སྦྱིན། །བདག་ཉིད་ལྷ་ཡི་རྣལ་འབྱོར་བྱ། །ས་བོན་ལས་ནི་སྣ་ཚོགས་པའི། །ཁྲོ་བོ་མཚོན་ཆ་འཛིན་པ་ཡིས། །བསྒྲུབ་བྱའི་ཆོ་ག་དང་བྲལ་ནས། །དྲངས་ཏེ་ས་བོན་ལ་ནི་བསྟིམ། །སྔ་མའི་ས་བོན་ཉིད་གྱུར་པས། །འགུགས་པར་བྱེད་པའི་ས་བོན་བྱུང༌། །ཛཿཧཱུཾ་བཾ་ཧོཿནཱི་ལཱཾ་བ་ར་བཛྲ་པཱ་ཎི་ཨཾ་ཀུ་ཤ་ཛཿཨཱ་ཀཪྵ་ཡ་ཆེ་གེ་མོ་ཧཱུཾ་ཛཿཧཱུཾ་ཕཊ། གསང་སྔགས་འདི་ནི་བརྗོད་བ་ལས། །ལྕགས་ཀྱུ་ཐོགས་པའི་ལྷ་མོ་ནི། །དཔག་ཏུ་མེད་པ་བཀུག་པར་བསམ། །ཛཿཧཱུཾ་བཾ་ཧོཿནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་པྲ་བེ་ཤ་ཡ་ཕཊ། གཟུགས་བརྙན་ཁ་ཕྱེ་བསྟིམས་ལ་གཞག །སྣ་ཚོགས་ནད་ཀྱིས་གཟིར་བ་དང༌། །ལུས་འདར་སེམས་ནི་གདུང་བར་བསམ། །སྟ་རེ་ལ་སོགས་མཚོན་གྱིས་གཟིར། །རླུང་ནག་གིས་གཡེངས་གྲང་བས་ཁྱབ། །གཅན་གཟན་སོགས་ཀྱིས་ལུས་ཟོས་བསམ། །དམ་ཚིག་བསྲུང་ཕྱིར་གཏོར་མ་སྦྱིན། །དེ་ནས་ཕུར་བུ་མཚོན་ཆ་ཐོགས། །གསད་ཐབས་གསུམ་གྱིས་གསད་པར་བྱ། །གནས་བདུན་དུ་ནི་ཕུང་བུས་གདབ། །ཧཱུཾ་ང་ནི་ཕྱག་ན་རྡོ་རྗེ་སྟེ། །དུས་གསུམ་སངས་རྒྱས་ཐམས་ཅད་ཀྱིས། །གདུག་པ་འདུལ་ཕྱིར་དབང་བསྐུར་བས། །སྟོབས་ཆེན་ཕྱིན་ལས་དྲག་པོ་ཡིས། །སྐད་ཅིག་ཙམ་ཡང་མི་གནས་ཕྱིར། །ལུས་ཀྱི་གནད་དུ་གཟིར་བར་གྱིས། །ཨོཾ་ནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་ཀཱི་ལི་ཀཱི་ལ་ཡ་ཧཱུཾ་ཕཊ་ཕཊ། གསང་བའི་བདག་པོར་བཀའ་སྲུང་ཕྱིར། །གསང་བའི་དམ་ཚིག་བསྟན་པར་བྱ། །ཨོཾ་ནཱི་ལཱཾ་བར་བཛྲ་པཱ་ཎི་ས་མ་ཡེ་ཧཱུཾ་ཕཊ། ཕྱག་ན་རྡོ་རྗེའི་དམ་ཚིག་སྟེ། །ཕུར་པའི་ལྷ་དང་ཆེ་གེ་མོ། །དམ་ཚིག་གཉན་གྱིས་འདའ་བར། །ཅི་བསྒོ་ཐམས་ཅད་མཉན་པར་གྱིས། །ཧཱུཾ་ང་རོ་སྟོབས་ཆེན་དྲག་པོའི་སྒྲ། །གདུག་པ་གང་ཞིག་འདའ་མི་བྱེད། །ང་ཡི་མཐུ་སྟོབས་དྲག་པོའི་སྒྲ། །མགོ་བོ་ཚལ་པ་བརྒྱ་རུ་འགེམས། །ཉོན་ཅིག་ལྟོས་འགྲོ་

[Full Size]

ཐམས་ཅད་ཀུན། །མཐུ་སྟོབས་དྲག་པོའི་བཀའ་མ་འདའ། །ཨོཾ་ནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་ཧ་ར་ཧ་ར། པྲ་ཧ་ར་པྲ་ཧ་ར། ཙྪིནྡ་ཙྪིནྡ། བྷིནྡྷ་བྷིནྡྷ་ཧཱུཾ་ཕཊ། ཧཱུཾ་རྡོ་རྗེ་ཆེན་པོ་རབ་འབར་ཐོ། །བཀའ་ལས་འདའ་བྱེད་ཆེ་གེ་མོ། །རྡོ་རྗེ་ཆེན་པོས་སྙིང་བསྲེགས་ནས། །ལུས་སེམས་ཕྲ་རབ་རྡུལ་དུ་རློག ། རྡོ་རྗེ་ཐོ་བའི་གཏུན་ཁུང་དུ། །རྡོ་རྗེ་ཐོ་བས་གཏམས་བྱས་ནས། །ལྷ་ཡང་ཐལ་བར་རླག་བྱེད་འགྱུར། །ལྷ་ཡི་ཆེ་གེ་མོ་དེས་གསོད། །ཨོཾ་ནཱི་ལཱཾ་བ་ར་བཛྲ་པཱ་ཎི་ཆེ་གེ་མོ་ཧ་ན་ཧ་ན། ཧ་ས་ཧ་ས་དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། ཧཱུཾ་ཕཊ། རིམ་པས་གཏོར་མ་འདི་སྦྱིན་ནོ།། བདག་མེད་དངོས་པོས་བཏབ་ཅིང་དབུལ། །ངེས་པར་སོད་ནས་མནན་པ་བྱ། །དཀོན་མཆོག་གསུམ་ལ་ལྡང་བའི་དགྲ་།མན་ངག་རིམ་པས་གསད་པར་བྱ། །ཐོས་པ་མང་ཞིང་ཤེས་རབ་ཅན། །བླ་མ་ལ་གུས་སེར་སྣ་མེད། །ཡིན་གྱི་གཞན་དུ་སྦྱིན་མི་བྱ། །བག་མེད་པས་ནི་གལ་ཏེ་བྱིན། །འབྲས་བུ་མི་འདོད་སྣ་ཚོགས་ནི། །ཚེ་འདི་ཉིད་ལ་མྱོང་བར་འགྱུར། །སྡང་དང་གདུག་པས་ཟིན་པའི་ཐབས། །ཟབ་མོའི་མན་ངག་ཅུང་ཟད་སྨྲས། །དེ་ཡི་བསོད་ནམས་ཅི་བསགས་པ། །སྡང་དང་གདུག་པ་འདུལ་བར་ཤོག །།སློབ་དཔོན་ཛཱ་པ་རི་བའི་ཞལ་ལྔ་ནས་མཛད་པའི་ཁྲོ་བོས་གསད་པའི་ཕྲིན་ལས་པཎྜི་ཏ་དེ་བ་པཱུརྞ་མ་ཏི་དང༌། ལོ་ཙཱ་བ་ཆོས་ཀྱི་བཟང་པོས་བཅོས་པའོ།།