གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་དཀྱིལ་འཁོར་གྱི་ཆོ་ག་ཞེས་བྱ་བ།
སློབ་དཔོན་བྷ་བ།
― DTG049_Page_0645 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། མ་ཧཱ་ཡཀྵ་སེ་ནཱ་པ་ཏ་ཡེ་ནཱི་ལྰཾ་བ་ར་དྷ་ར་བཛྲ་པཱ་ཎི་མཎྜལ་བི་དྷི་ནཱ་མ། བོད་སྐད་དུ། གདོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་གྱི་དཀྱིལ་འཁོར་གྱི་ཆོ་ག་ཞེས་བྱ་བ། བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །བདུད་རྣམས་ཐམས་ཅད་ཚར་གཅོད་པའི། །མཐུ་སྟོབས་ཅན་ལ་ཕྱག་འཚལ་ནས། །ཆགས་ལ་མོས་པར་གྱུར་པ་ཡི། །རྣལ་འབྱོར་ལམ་པའི་དོན་ཆེད་དུ། །རྒྱུད་རྣམས་ཀུན་དང་མི་འགལ་བའི། །དཀྱིལ་འཁོར་ཆོ་ག་བཤད་པར་བྱ། །སློབ་དཔོན་མཚན་ཉིད་ལྡན་པ་ཡིས། །སྔོན་དུ་བསྙེན་པ་རྫོགས་བྱས་ཏེ། །དེ་ནས་དཀྱིལ་འཁོར་བྲི་བར་བྱ། །ཡིད་དུ་འོང་བའི་གནས་དག་ཏུ། །དྲི་བཟང་ཙནྡན་སྤོས་ཀྱིས་བྱུགས། །དྲི་ཞིམ་མེ་ཏོག་མཆོད་བཀྲམ་ནས། །ལྷོ་རུ་ཁ་བལྟས་རོལ་པའི་འདུག་སྟངས་བྱ། །ཡང་ན་བསྙེན་པ་ཞི་བའི་ཚུལ་ཡིན་པས། །ཤར་དུ་ཁ་བལྟས་སེམས་དཔའི་སྐྱིལ་ཀྲུང་བཅའ། །འཁོར་བའི་འདམ་དུ་བྱིང་བ་ཡི། །འགྲོ་ལ་ཕན་དང་སྐྱོབ་པའི་ཕྱིར། །སྙིང་རྗེ་ཆེན་པོས་དམིགས་པར་བྱ། །བསྐྱེད་པའི་རིམ་པའི་ཚུལ་བསྒོམ་བྱ། །དེ་ནས་བཟླས་བརྗོད་ཚུལ་བཞིན་བྱ། །དཀྱིལ་འཁོར་གཙོ་བོའི་འབུམ་དུ་བཟླས། །དེ་ལས་གཞན་པ་ཁྲི་རུ་བཟླས། །མཚན་མ་རྣམ་གསུམ་ཐོབ་པ་ཡིས། །ཡང་ན་བསྙེན་སྦྱོར་གོམས་པས་ནི། །རྡུལ་ཚོན་དཀྱིལ་འཁོར་བརྩམ་པར་བྱའོ། །སློབ་མ་སྣོད་དང་ལྡན་པ་ཡིས། །དང་པོར་གསོལ་གསུམ་བཏབ་ནས་ནི། །བསྙེན་རྫོགས་གཏིང་ལ་གདབ་པར་བྱ། །དང་པོར་ས་ནི་བརྟག་པར་བྱ། །ཕྱོགས་གཅད་དབྱིབས་ལྡན་སྐྱོན་བྲལ་བའི། །མཁས་པས་ཅི་
― DTG049_Page_0646 ―
[མ་དཔེ་གཟིགས་ན་འདིར་གནོན།]
ནུས་བརྟག་པར་བྱ། །མཎྜལ་ལགས་བྱས་མེ་ཏོག་དགྲམ། །ལྷ་ཡི་གནས་དང་གདན་དུ་བསམ། །ལྷ་བསྐྱེད་ལ་སོགས་བྱས་ནས་ནི། །མཆོད་དང་བསྟོད་པ་ཚུལ་བཞིན་བྱ། །དགོངས་ཤིག་དུས་གསུམ་མགོན་པོ་རྣམས། །སངས་རྒྱས་ཐམས་ཅད་མཆོད་པ་དང༌། །སློབ་མ་རྣམས་ལ་སྨན་སླད་དུ། །བདག་མིང་འདི་ཞེས་བགྱི་བ་ཡིས། །དཔལ་ལྡན་རྡོ་རྗེ་འཛིན་པ་ཡི། །དཀྱིལ་འཁོར་དམ་པ་འདྲི་བར་འཚལ། །རྒྱལ་བ་སྲས་དང་བཅས་རྣམས་ཀྱིས། །བདག་ལ་བྱིན་གྱིས་བརླབ་ཏུ་གསོལ། །ཞེས་ལན་གསུམ་དུ་བརྗོད་དེ་གསོལ་བ་གདབ་པར་བྱའོ། །དེ་ནས་ཆོས་སྐྱོད་པའི་སྲུང་མ་རྣམས་ལ། མཆོད་དང་གཏོར་མ་བྱིན་ནས་ནི། །བསྟོད་ཅིང་གསོལ་བ་གདབ་པར་བྱ། །དེ་ནས་ལས་ཐམས་ཅད་པའི་ཐབ་ཁུང་དུ་སྦྱིན་སྲེག་གིས་སྦྱང་བར་བྱའོ། །སྦྱིན་སྲེག་གྲུབ་པར་མ་གྱུར་ན། །ལས་ཐམས་ཅད་པའི་གསང་སྔགས་ཆུས། །བགེགས་ནི་ཉེ་བར་ཞི་བར་བྱའོ། །དེ་ནས་ཇི་ལྟར་བརྟགས་པའི་དབུས་སུ། བྱིན་རླབས་རྡོ་རྗེས་ཁྲུ་གང་བརྐོ། །སྐྱོན་རྣམས་སྤངས་ནས་ས་རིམ་བཅའ། །འཐས་པར་བཅགས་ལ་བྱུག་པར་བྱ། །སྔགས་དང་ཕྱག་རྒྱས་བྱིན་རླབས་པའི། །རི་རབ་གཞལ་ཡས་བསྐྱེད་ནས་ནི། །ལྷ་བསྐྱེད་ལ་སོགས་རྫོགས་བྱས་ལ། །དེ་ནས་སྐད་ཅིག་མྱུར་དུ་ཁྲོས། །འཁོར་རྣམས་ཀྱིས་ནི་གསོལ་བ་གདབ། །ཁྲོ་བོའི་མིག་དང་རྐང་སོགས་བྱིན་གྱིས་བརླབ། །རྡོ་རྗེ་དྲིལ་བུ་གཉིས་བཟུང་ནས། །སྟང་སྟབས་སྦྱོར་བ་ལ་སོགས་ཀྱིས། །བགེགས་རྣམས་མ་ལུས་ཚར་གཅད་དོ། །དེ་ནས་ས་ཡི་ལྷ་མོ་ལ།། མཆོད་བསྟོད་གསོལ་བ་བཏབ་པ་ཡིས། །དབང་པོ་ཕྱིར་ནི་སྟ་གོན་གནས། །བདུད་རྩི་ཐིག་ལེ་ལ་སོགས་བྱ། །ལྷ་རྣམས་ཆོ་ག་ལ་སོགས་རྫོགས། །དེ་ནས་གསོལ་བ་གདབ་པར་བྱ། །བདུག་སྤོས་ལག་ཐོགས་པུས་བཙུགས་ལ། །བཅོམ་ལྡན་རྡོ་རྗེ་འཛིན་པ་མཆོག །རིག་སྔགས་རྒྱལ་ལ་ཕྱག་འཚལ་ལོ། །ཐུགས་རྗེའི་བདག་ཉིད་ཅན་རྣམས་ཀྱིས། །དཀྱིལ་འཁོར་དག་ནི་བྲི་བར་བྱ། །སློབ་མ་རྣམས་ལ་བརྩེ་བ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། །དེ་ནི་གནང་བ་མཛད་པར་རིགས། །སངས་རྒྱས་འགྲོ་དོན་བྱ་དོན་
― DTG049_Page_0647 ―
[མ་དཔེ་གཟིགས་ན་འདིར་གནོན།]
གསོལ། །བྱང་ཆུབ་སེམས་དཔའ་གསང་སྔགས་ལྷ། །འཇིག་རྟེན་སྐྱོང་དང་མཐུ་ཆེན་དང༌། །གང་ཡང་རྡོ་རྗེའི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་མིང་འདི་ཞེས་བགྱི་བ་ཡིས། །རྡོ་རྗེ་འཛིན་གྱི་དཀྱིལ་འཁོར་དུ། །ཡོ་བྱད་ཅི་ཡོད་པས་འདྲིན། །དེང་བདག་སློབ་མར་བཅས་པ་ལ། །ཐུགས་བརྩེ་བར་ནི་དགོངས་སུ་གསོལ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །དེ་ལྟར་ལན་གསུམ་གསོལ་བཏབ་ནས། །རབ་དྲ་བས་མཚམས་བྱའོ། །གསེར་ལ་སོགས་པའི་བུམ་པ་ཡི། །ལྟོ་བ་ཆེ་བ་མགྲིན་རིང་བ། །སྐྱོན་སྤངས་ཉེས་པ་བྲལ་བ་དང༌། །ཡོན་ཏན་ལ་སོགས་ལྷ་གྲངས་བསྟུན། །རྫས་དང་ཁ་རྒྱན་མགུལ་ཆིངས་ལྡན། །མཚན་མ་རྫོགས་ནས་བྱིན་གྱིས་བརླབ། །རྣམ་རྒྱལ་ལས་ཀྱི་བུམ་པ་ལ། །ཁྱད་པར་ཆོ་ག་ལ་སོགས་བྱ། །དེ་ནས་སློབ་མ་བློ་ལྡན་ལ། །སློབ་དཔོན་གྱིས་ནི་ཆོ་ག་བྱ། །སློབ་མ་སྒོ་ཡི་དྲུང་གནས་ཏེ། །དགའ་ཆེན་ཁྱོད་བདག་སྟོན་པས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ནི་སྩལ་དུ་གསོལ། །བྱང་ཆུབ་སེམས་ནི་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ཉིད་འཇུག་པར་འཚལ། །དེ་ལྟར་ལན་གསུམ་གསོལ་བཏབ་ནས། །སློབ་དཔོན་གཙོ་བོའི་ཏིང་འཛིན་ཞུགས། །ཚིགས་བཅད་འདི་ནི་གསང་སྔགས་སྦྱིན། །བུ་ཚུར་ཐེག་པ་ཆེན་པོ་ཡིས། །གསང་སྔགས་ཚུལ་སྤྱོད་ཆོ་ག་འདི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་ཏེ། །དུས་གསུམ་འབྱུང་བའི་སངས་རྒྱས་རྣམས། །སྐུ་གསུང་ཐུགས་ཀྱི་རྡོ་རྗེ་དང༌། །རྡོ་རྗེ་གསང་སྔགས་རབ་བསྒོམ་པའི། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་ཡིས་
― DTG049_Page_0648 ―
[མ་དཔེ་གཟིགས་ན་འདིར་གནོན།]
བཅོམ། །འཇིག་རྟེན་རྗེས་འཇུག་པར་རྟོགས་ནས། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་སྨྲས་སོ། །དེ་ནས། སྐྱབས་འགྲོ་སྡིག་བཤགས་ལ་སོགས་ཀུན། །ཕྱག་རྒྱའི་དཀྱིལ་འཁོར་ཉིད་དུ་ཤེས་པར་བྱ། །སྲོག་ཆགས་རྣམས་ནི་གསད་མི་བྱ། །མ་བྱིན་བར་ཡང་མི་བླང་ངོ༌། །འདོད་པ་དག་ཀྱང་སྤྱད་མི་བྱ། །བརྫུན་དུ་སྨྲ་བར་མི་བྱའོ། །ཉེས་པ་ཀུན་གྱི་རྩ་བ་ཡི། །ཆང་ནི་མྱོས་པར་བཏུད་མ་ཡིན། །སེམས་ཅན་གདུལ་བྱ་མ་གཏོགས་པ། །བྱ་བ་མ་ཡིན་ཐམས་ཅད་སྤང༌། །དམ་པ་ཉེ་བར་བསྙེན་བྱ་ཞིང། །རྣལ་འབྱོར་ཅན་དུ་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང༌། །ངག་གི་ལས་ནི་རྣམ་པ་བཞི། །ཡིད་ཀྱི་ལས་ནི་རྣམ་གསུམ་དང༌། །ཅི་ནུས་པ་རུ་རྗེས་སུ་བསྲུང༌། །སེམས་ཅན་དོན་ལ་རྒྱབ་མི་ཕྱོགས། །ཐེག་པ་དམན་ལ་འདོད་མི་བྱ། །འཁོར་བ་དག་ཀྱང་སྤང་མི་བྱ། །རྟག་ཏུ་མྱ་ངན་འདས་མི་བྱ། །ལྷ་དང་ལྷ་མི་གསང་བ་པ། །དེ་ལ་བརྙས་པར་མི་བྱ་ཞིང༌། །ཕྱག་རྒྱ་བོན་པ་མཆོད་ཆ་དང༌། །མཚན་མ་འགོམ་པར་མི་བྱའོ། །དེ་ལྟར་དམ་ཚིག་ཕོག་པ་དག །བློ་ལྡན་ཁྱོད་ཀྱིས་རྟག་ཏུ་བསྲུང༌། །མདོར་ན་རྩ་བ་ཡན་ལག་གི །དམ་ཚིག་ཉིན་མཚན་བགྲང་ཞིང་བསྲུང༌། །དེ་ནས་བླ་མས་གསུངས་པ་ཡིས། །སྡོམ་པ་ལེགས་པར་གཟུང་བར་བྱ། །ཚུལ་ཁྲིམས་ཞེས་བྱ་སོགས་པ་ནི། །དུས་འདི་ནས་ནི་བཟུང་ནས་ནི། །ཇི་སྲིད་བྱང་ཆུབ་སྙིང་པོའི་བར། །བདག་ནི་རབ་ཏུ་ལྡོག་པར་བགྱི། །དེ་ལྟར་སྡོམ་པ་དང་ལན་པའི་སློབ་མ་ལ། སྙིང་གདང་མགྲིན་པ་དང་དཔྲལ་བ་གསུམ་དུ་རྡོ་རྗེ་ཁུ་ཚུལ་གྱིས་དྲིའི་ཐིག་ལེ་གསུམ་དུ་བྱ་སྟེ། །ཉི་མ་དང་ཟླ་བ་དང་པདྨ་གསུམ་ལ་ཡི་གེ་གསུམ་སོ་སོར་བཀོད་ལ། སྐུ་གསུང་ཐུགས་སུ་བྱིན་གྱིས་བརླབ་ཅིང་ལས་ཐམས་ཅད་པའི་སྔགས་ཀྱིས་བསྲུང་བར་བྱའོ། །དེ་ནས་མཆོད་པ་བྱ་སྟེ། སྤྱི་བོར་མེ་ཏོག་དང་སྤོས་སོ། །མར་མེ་དང་དྲི་ནི་སྙིང་གར་རོ། །ལྷ་བཤོས་མདུན་དུའོ། །དེ་ནས་ཚིག་ནི་འདིས་སུ་སྦྱིན། །དུས་འདི་ནས་ནི་བཟུང་ནས་སུ། །འཁོར་བའི་ཉེས་པས་མ་གོས་པར། །མཆོད་པ་དག་དང་ལྡན་པར་ནི། །དུས་ཀུན་དུ་ནི་བདེ་བར་མནོས། །དེ་ནས་ཚེམས་ཤིང་ལ་
― DTG049_Page_0649 ―
[མ་དཔེ་གཟིགས་ན་འདིར་གནོན།]
སོགས་སྦྱིན་པར་བྱ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་ཏོག་བཞིན། །བརྒྱ་ལམ་ཞེས་བྱ་བ་ལ་སོགས་པའི་ཆོས་བཤད་པར་བྱའོ། །དེ་ནས་ཐིག་བྱིན་གྱིས་བརླབ་པ་ལ་སོགས་པ་ཤེས་པར་བྱའོ། །དེ་ནས་ཐིག་སྐུད་གདབ་པ་ནི། །དཀྱིལ་འཁོར་སྤྱི་དང་མཐུན་པས་ན། །ཚོན་རྣམས་བྱིང་ཡི་བརླབས་ནས་ནི། །ཚོན་རྣམས་བཀྱེ་བའི་ལས་བྱའོ། །པདྨ་འདབ་མ་བརྒྱད་དཀྱིལ་དུ། །ཟླ་བ་ཉི་མའི་གདན་སྟེངས་སུ། །གཙོ་བོ་བྲི་བར་བྱ་བ་ཡིན། །འདབ་མ་བརྒྱད་ལ་ལྷ་བརྒྱད་ཁྲི། །གྲུ་ཆད་པ་ནི་ལ་ལྷ་མོ་བཞི། །སྒོ་བཞིར་སྒོ་བ་བཞི་བྲིའོ། །དེ་ནས་རྒྱན་སོགས་བྲི་བར་བྱ། །དེ་འོག་ལྷག་ཆད་བསྐང་བྱའོ། །ནམ་མཁའ་འདེགས་པར་འདོད་པ་དང༌། །ཡང་བསྐྱེད་ཡང་སྡུད་བྱེད་པ་གཉིས། །གོང་ལྟར་མོས་པ་འཇུག་པ་ཡིས། །གཙོ་བོ་སྔོན་དུ་འགྲོ་བ་རྫོགས་པ་ཡིན། །འཁོར་རྣམས་སྤྲུལ་པའི་ཚོགས་བསྐྱེད།། དབུས་སུ་གཙོ་བོ་སྐུ་མདོག་སྔོན་པོ་སྟེ། །ཞལ་གཟིག་ཕྱག་གཡས་རྡོ་རྗེ་བསྣམས། །གཡོན་ནི་གདུལ་བྱའི་སྐབས་དང་སྦྱར། །ཤར་གྱི་པདྨར་རྣམ་པར་རྒྱལ། །སྐུ་མདོག་དམར་པོ་དབུ་གསུམ་པ། །ཕྱག་གཡས་རྡོ་རྗེ་རྩེ་ལྔ་འཛིན། །གཡོན་པས་དགྲ་སྟ་བར་མ་གཉིས། །གུང་མོ་མཐེ་བོ་ངོས་མདུད་ནས། །གཞན་རྣམས་ཡོངས་སུ་དཔྱད་བ་ཡིན། །དེ་ཉིད་སྙིང་གར་བཟུང་ནས་ནི། །དེ་འོག་ཞགས་པ་རལ་གྲི་བསྣམས། །ལྷོ་ཡི་པདྨར་མགོན་པོ་ནི། །སྐུ་མདོག་ནག་པོ་ཞལ་གཅིག་ཕྱག་གཉིས་པ། །གཡས་གཡོན་ཙནྡན་བིང་ཆེན་ཞགས་པ་བསྣམས།། ནུབ་ཀྱི་འདབ་མར་ལུས་ངན་པོ། །སྐུ་མདོག་ལྗང་གུ་ཞལ་གཅིག་པ། །ཕྱག་གཉིས་མཆོད་རྟེན་ནེ་ལེ་བསྣམས། །བྱང་གི་འདབ་མར་བདུད་རྩི་འཁྱིལ། །སྐུ་མདོག་སྔོན་པོ་ཞལ་གཅིག་པ། །ཕྱག་གཉིས་བྲང་བསྣོལ་སྡིགས་མཛུབ་འཕྱར། །ཤར་ལྷོའི་འདབ་མར་གནོད་སྦྱིན་བསྐྱེད། །སྐུ་མདོག་དམར་ན་གཞལ་གཅིག་པ། །ཕྱག་གཉིས་གྲི་གུག་ཅང་ཏེའུ་བསྣམས། །ལྷོ་ནུབ་པདྨར་རོ་ལངས་མ། །སྐུ་མདོག་སྔོ་སྐྱ་ཞལ་གཅིག་མ། །ཕྱག་གཉིས་རྡོ་རྗེ་ལྕགས་སྒྲོག་བཟུང་ནས་སུ། །གུང་མོ་སྲིན་ལག་ལ་སོགས་གསུམ་པོ་རྣམས། །དམ་པོར་བཀུག་
― DTG049_Page_0650 ―
[མ་དཔེ་གཟིགས་ན་འདིར་གནོན།]
ནས་ཡོངས་སུ་བསྡམ། །མཐེ་བ་མཛུབ་བཞི་རྣམས་རབ་བརྐྱང་སྟེ། །སྤྱི་བོར་ངེས་པར་བསྣོལ་བ་བསྣམས། །ནུབ་བྱང་འདབ་མར་རྡོ་རྗེ་མཁའ་འགྲོ་མ། །སྐུ་མདོག་དམར་སྐྱ་ཞལ་གཅིག་མ། །ཕྱག་གཉིས་སྤྱི་བོར་སྦྱར་ནས་སུ། །མེ་ལྕེ་ཕྲེང་བ་ཡོངས་སུ་འཛིན། །བྱང་ཤར་མཚམས་ཀྱི་འདབ་མ་ལ། །འཇིགས་བྱེད་ཁ་དོག་སྔོ་ནག་ལ། །ཞལ་གསུམ་ཕྱག་དྲུག་ཞབས་གཉིས་པ། །གཡས་ཀྱི་དང་པོས་གླང་པོ་བསྣམས། །གཡོན་པས་གླང་ཆེན་པགས་པ་བསྣམས། །དེ་འོག་དགྲ་སྟ་རྡོ་རྗེ་བསྣམས། །ཐམས་མི་མགོ་ལྕགས་ཀྱུ་བསྣམས། །གྲུ་ཆད་བཞི་ལ་ལྷ་མོ་བཞི། །འོད་བསྐྱེད་སྐུ་མདོག་དཀར་མོ། ཞལ་གཅིག་ཕྱག་གཉིས་མེ་ཏོག་བསྣམས། །ཡིད་འཕྲོག་མ་སྐུ་མདོག་སེར་མོ། ཞལ་གཅིག་ཕྱག་གཉིས་དྲིའི་སྤོས་ཕོར་བསྣམས། །ཀུན་བཟང་མ་སྐུ་མདོག་དཀར་མོ། ཞལ་གཅིག་ཕྱག་གཉིས་རོ་མཆོག་བསྣམས། །གླུ་སྒྲ་མ་སྐུ་མདོག་སྔོན་མོ། ཞལ་གཅིག་ཕྱག་གཉིས་སྒྲ་སྙན་གར། ཤར་གྱི་སྒོ་རུ་སྲོག་གཅོད་མ། ཞལ་གཅིག་ཕྱག་གཉིས་སྐུ་མདོག་མཐིང༌། །ཕྱག་གཉིས་ཐོ་བ་ཞགས་པ་བསྣམས། ལྷོ་སྒོར་དབུགས་རྔུབ་མ་སེར་མོ། ཞལ་གཅིག་ཕྱག་གཉིས་ཧོ་མ་གཟར་ཞགས། །ནུབ་སྒོར་ཁྲག་འཐུང་མ་སྐུ་མདོག་དམར་མོ། ཞལ་གཅིག་ཕྱག་གཉིས་གྲི་གུག་ཞགས། །བྱང་སྒོར་ཤ་ཟ་མ་སྐུ་མདོག་སྔོན་མོ། ཞལ་གཅིག་ཕྱག་གཉིས་རྣོན་པོ་ཞགས། །དེ་ལྟར་གསལ་བར་བསྐྱེད་ནས་སུ། །ཡེ་ཤེས་དཀྱིལ་འཁོར་སྤྱན་དྲངས་ནས། །ནམ་མཁར་བཞུགས་པ་དེ་ཉིད་ལ། །མཆོད་བསྟོད་བྱས་ནས་དམ་ཚིག་གི །དཀྱིལ་འཁོར་དག་ལ་བསྟིམ་པར་བྱ། །དེ་ནས་བདག་ཉིད་ཤར་སྒོ་རུ། །དང་པོ་ཉིད་ནས་མེས་པོའི་ཚུལ། །ཤར་སྒོ་རུ་ནི་གནས་པའམ། །ཡང་ན་ཕྱི་ནས་སྲས་ཀྱི་ཚུལ། །དེ་ནས་བྱིན་རླབས་དབང་བསྐུར་བྱ། །མཆོད་དང་བསྟོད་པ་རྫོགས་བྱས་ལ། །སྒྲུབ་པའི་བཟླས་བརྗོད་ཐིམ་པ་དང༌། །སློབ་མ་དཀྱིལ་འཁོར་གཞུག་པར་བྱ། །དེ་ནས་ཡོལ་བས་བཅད་བར་དུ། །ལས་ཀྱི་ཆུ་བོ་གཏོར་བ་དང༌། །གདོང་གཡོགས་བཅིང་བ་དང༌། །ཡོན་ཕུལ་ནས་ནི་མཐོང་བ་དྲི། །ཆུ་བླུད་
― DTG049_Page_0651 ―
[མ་དཔེ་གཟིགས་ན་འདིར་གནོན།]
བཀའ་བསྒོ་བྱས་ནས་མེ་ཏོག་དོར། །མིག་དབྱེ་ལྷ་ངོ་དེ་ནི་རིམ་བཞིན་བསྟན། །དེ་ནས་དབང་བསྐུར་རིམ་བཞིན་བྱ། །ཡབ་ཡུམ་སྙོམས་ཞུགས་འོད་ཟེར་ལས། །བདེ་གཤེགས་འོད་བསྐུལ་བུམ་པར་ཐིམ། །མ་འདྲེས་པས་ནི་འོད་ཞུ་ནས། །སྤྱི་བོར་ཆུ་ཡི་དབང་བསྐུར་རོ། །ཚིགས་བཅད་འདིས་ནི་སྦྱིན་པར་བྱ། །སྐུ་གསུང་དམ་ཚིག་ལས་བྱུང་བའི། །ཡེ་ཤེས་བདུད་རྩི་དྲི་མ་མེད། །ལྷ་ཡི་ཆུ་ནི་དག་པ་ཡིས། །མི་བསྐྱོད་པ་ཡི་དབང་བསྐུར་རོ། །ཨོཾ་བཛྲ་ཨཱ་དཪྴ་ཛྙཱ་ན་ཨ་བྷི་ཥིཉྩ་ཞེས་པས་སོ། །དབུ་རྒྱན་མན་ངག་ཤེས་བྱས་ལ། །འདི་སྐད་དོ། །སངས་རྒྱས་ཀུན་གྱི་རྒྱལ་སྲིད་དེ། །དབུ་རྒྱན་རིན་ཆེན་དམ་པ་སྟེ། །དབུ་རྒྱན་རིན་ཆེན་མཆོག་འགྲོ་བས། །རྫོགས་སངས་རྒྱས་ལ་ཕྱག་འཚལ་ལོ། །ཨོཾ་སམནྟ་ཛཉཱ་ན་རཏྣ་ནཱ་མ་ཧཱུཾ་ཏིཥྛ་ཨ་བྷི་ཥྙྩི་ཞེས་པས་སོ། །རྡོ་རྗེའི་མན་ངག་ཤེས་བྱས་ལ། །སངས་རྒྱས་ཀུན་གྱི་རྡོ་རྗེའི་དབང༌། །མི་ཕྱེད་རྡོ་རྗེ་འོད་གསལ་བ། །དམ་ཆོས་འབྱུང་པའི་སྒོར་གྱུར་པ། །རྡོ་རྗེ་ཆོས་ཀྱི་དབང་བསྐུར་རོ། །ཨོཾ་པྲ་ཏ་ཨ་བྷི་ཥེ་ཀ་ཛྙཱ་ན་བཛྲ་ཨ་བྷི་ཥིཉྩ། དྲིལ་བུའི་མན་ངག་ཤེས་བྱས་ལ། །ཐབས་དང་ཤེས་རབ་ལྡན་པ་ཡིས། །འགྲོ་དོན་མཉམ་མེད་བྱེད་པ་དང༌། །མཆོད་པའི་ལས་རྣམས་རྫོགས་བྱེད་པས། །རྡོ་རྗེ་ལས་ཀྱི་དབང་བསྐུར་རོ། །ཨོཾ་ཀྲི་ཏ་ཨ་ནུཏྟ་ཛྙཱ་ན་བཛྲ་ཨ་བྷི་ཥིཉྩ། མིང་གི་མན་ངག་ཤེས་བྱས་ལ། །རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོའི་བར་དུ་ནི། །ཅིས་ཀྱང་མི་ཤིགས་མི་གཡོ་བས། །རྡོ་རྗེའི་མིང་དུ་རབ་ཏུ་གྲགས།། ཨོཾ་པྲ་ཏི་ཤོདྷ་དྷ་རྨ་དྷཱ་ཏུ་ཛྙཱ་ན་ནཱ་མ་ཨ་བྷི་ཥིཉྩ་མི། དེ་ནས་དམ་ཚིག་གསུམ་གྱི་དབང་བསྐུར་བྱ་སྟེ། །དཀྱིལ་འཁོར་ཕྱི་རྒྱུད་ཆོ་ག་བཞིན། །ཚིགས་བཅད་རྣམས་ཀྱང་བསྒྲག་པར་བྱ། །ཨོཾ་ཨཱཿ་ཧཱུཾ། དེ་གསུམ་མན་ངག་འོད་ཟེར་ནི། །བླ་མ་ལས་ནི་ཤེས་པར་བྱ། །དེ་ནས་མེ་ལོང་དབང་བསྐུར་བྱ། །གོང་མ་བཞིན་དུ་མན་ངག་གཙོ། །དེ་ནས་ཁྱད་པར་དབང་བསྐུར་ནི། །ཕྱག་རྒྱའི་དཀྱིལ་འཁོར་ཇི་བཞིན་ནོ། །གོས་སྔོན་སྒྲུབ་པའི་དབང་བསྐུར་བ་རྫོགས་སོ།། །།རྡོ་རྗེ་སློབ་དཔོན་འདོད་པ་ཡིས། །ཡོན་གྱིས་བླ་མ་མཉེས་བྱས་ལ། །ཕྱག་འཚལ་ནས་ནི་
― DTG049_Page_0652 ―
[མ་དཔེ་གཟིགས་ན་འདིར་གནོན།]
གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཅིང་སྩོལ་མཛད་པ། །བདག་ལ་སྲུང་བའི་དོན་གྱི་ཕྱིར། །ནམ་མཁའི་རྡོ་རྗེ་བ་དག་ལ་སྩོལ། །ཞེས་གསོལ་བ་གདབ་བོ། །དེ་ནས་ཤར་ཕྱོགས་སུ་དཀྱིལ་འཁོར་ཆེན་པོ་དང༌། བར་དུ་འདོམ་གྱིས་ཆོད་པར་ནི་དབང་གི་དཀྱིལ་འཁོར་ཚུལ་བཞིན་བྲིས་ལ་དེའི་སྟེང་དུ་དབང་སྟེགས་ཀྱི་ཁྲི་བྱས་ལ་རས་ལ་གདན་པདྨ་འདབ་མ་བརྒྱད་པ་སེང་གེས་མཚན་པ་བཞག་སྟེ། དེ་ལ་གདུགས་ལ་སོགས་པ་ཐམས་ཅད་ཀྱིས་བཀླུབས་ལ། རྣམ་པར་རྒྱལ་བ་དང༌། ལྷ་ཐམས་ཅད་ཀྱི་བུམ་པ་དང་ལས་ཐམས་ཅད་ཀྱི་བུམ་པས་མན་ངག་ཇི་ལྟ་བ་བཞིན་དབང་བསྐུར་རོ། །དེ་ནས་རྡོ་རྗེ་བརྟུལ་ཞུགས་དང༌། ལུང་བསྟན་པ་དང༌། རྡོ་རྗེ་འཛིན་པ་དབུགས་དབྱུང་བ་དང༌། དུང་དང་འཁོར་ལོ་ལ་སོགས་པའི་དབང་བྱིན་ལ། དེ་ནས་དཀྱིལ་འཁོར་དེ་ཉིད་བསྟན། །དེ་ནས་ཡོན་ཕུལ་ལ། དེ་ནས་གསང་བའི་དབང་བསྐུར་བར་གསོལ་བ་གདབ་བོ། །གསང་བའི་དབང་བསྐུར་བ་ཡང་འོད་དང་གྲིབ་མའི་ཚུལ་དུ་གཡོན་དུ་བསམས་ལ། མན་ངག་བཞིན་དུ་བྱང་སེམས་དབབ། །ཕབ་པས་སྦྱིན་པར་བྱ་བ་དང༌། །ཡང་ན་བདུད་རྩི་རྣམ་ལྔ་ནི། །མཚན་དང་ལྡན་པའི་སྣོད་བཞག་ནས། །ས་བོན་ལྔ་ལ་རིགས་ལྔ་ནི། །སྙོམས་ཞུགས་བདུད་རྩིར་ཞུ་པར་བསམ། །ཡང་ན་དབབ་པའི་ཚུལ་དུ་བྱ། །ཡང་ན་དངོས་སུ་དབབ་པ་དང༌། །ཡང་ན་གཉིས་ཀས་བྱ་བ་ཡིན། །ཅུ་གང་གིས་ནི་འདེ་གུ་སྦྱར། །ཆ་གཉིས་བསྲེས་པས་གོང་བཞིན་ནོ། །ཚིགས་བཅད་འདིས་ནི་གསོལ་བ་གདབ། །རྡོ་རྗེ་སེམས་དཔའ་ཁྱོད་ཀྱི་མཐུས། །སངས་རྒྱས་ཀྱི་ནི་བདེ་བ་འགྲུབ། །རྣམ་དག་བྱང་ཆུབ་སེམས་དཔའ་ནི། །རྒྱ་ཆེར་སྲས་སུ་བཅས་པ་རྣམས། །ཡུན་རིང་སྟོང་ཉིད་སྒོམ་གདུང་ལ། །དགའ་བས་ཡིད་འོད་བདེ་ཆེན་གྱིས་ནི་དགྱེས་པར་མཛོད། །ཀྱེ་འདོད་ཆགས་དྲི་མེད་ཀུན་ཏུ་བཟང་པོའི་སྤྱོད་པ་སྟེ། །དགའ་བའི་འདོད་ཆགས་རྡོ་རྗེའི་དམ་ཚིག་ལ་ནི་ཕྱེ་མཛད་ནས། །དགའ་བ་རྣམ་པ་དྲུག་པོ་སྤྱོད་པས་ཤིན་ཏུ་གདུང་བ་ནི། །རབ་ཏུ་དགྱེས་དབང་འདོད་པའི་བདེ་བ་ཉིད་ཀྱིས་འཇུག་པར་འཚལ། །བྱང་ཆུབ་སེམས་ནི་རིན་ཆེན་འབར་འབྱུང་བའི། །མ་ལུས་རྒྱལ་
― DTG049_Page_0653 ―
[མ་དཔེ་གཟིགས་ན་འདིར་གནོན།]
བ་རྣམས་ནི་ལུས་སྐམས་ལ། །རྣམ་དག་རྡོ་རྗེ་ལས་བྱུང་ཡེ་ཤེས་ཆུ། །དྲི་མེད་རིན་ཆེན་སྦྱིན་དབབ་དབང་བསྐུར་རོ། །མཉམ་དང་མི་མཉམ་འདོད་ཆགས་ཚུལ་དག་པས། །པདྨའི་གནས་སུ་རྡོ་རྗེ་གཏོང་མཛད་པ། །སྣ་ཚོགས་སེམས་དཔའ་སེམས་ཅན་བརླག་གྱུར་པ།། སྤྱོར་བ་གཞན་པ་ཡིན་པ་མ་ཐོགས་བཤད་པར་གསོལ། །རྡོ་རྗེ་སེམས་ཁྱོད་དབང་མཆོག་བདེ་བར་བྱེད་པ་ཡི། །རྡོ་རྗེ་པདྨ་དབྱེ་བའི་ཚུལ་གྱིས་སྦྱོར་མཛད་དེ། །རྒྱལ་བ་ཀུན་གྱི་གཟུགས་སྐུ་རབ་སྟོན་ནས། །ཐམས་ཅད་བདེ་གྲུབ་ཉིད་ཀྱིས་བདག་ལ་དགྱེས་པར་མཛོད། །དེ་ནས་ཚོགས་ཀྱིས་མཆོད་བྱས་ལ། །མཚན་ལྡན་སྣོད་ནས་བླངས་ནས་ནི། །རྡོ་རྗེ་སྲིན་མཐེབ་བྱིན་རླབས་ལ། །ཨོཾ་ཨ་མྲྀ་ཏ་གུ་ཧྱ་ཨ་བྷི་ཥིཉྩ་ཞེས་པས་མགྲིན་པར་གསུང་ལ་དབུལ་བར་བྱའོ། །སློབ་མས་ཀྱང་བདུད་རྩི་ཆེན་པོར་བསམས་ལ་ཨ་ཧོ་སུ་ཁ་ཞེས་པས་བཏུང་བར་བྱའོ། །དེ་ནས་གསང་བའི་དབང་བསྐུར་བའི་བསྟོད་པ་ཡང་བྱའོ། །ད་ནི་ཤེས་རབ་ཡེ་ཤེས་ཀྱི་དབང་བསྐྱུར་བར་བྱ་སྟེ། ཕྱག་རྒྱ་ལ་བརྟེན་མི་འཇུག་ལ། །མན་ངག་འདི་ནི་བསྟན་པ་ཡིན། །ཡིད་ཀྱི་ལྷ་མོ་གཟུགས་མཛེས་ལ། །བདུད་རྩི་ཆེན་པོ་མན་ངག་སྦྱར་བར་བྱ། །ཡང་ན་རྡོ་རྗེ་ལྕེ་ཐུང་གི །སྦྱོར་བའི་མན་ངག་བསྟེན་པ་དང༌། །ཡང་ན་རྩ་ནི་གཉིས་པོ་ལ། །ཕྱག་རྒྱའི་སྦྱོར་བ་བསྟན་པ་དང༌། །ཡང་ན་རྫས་རྣམས་མཐུ་ཆེན་གྱིས། །བྱུང་པས་དགའ་བ་སྐྱེ་འགྱུར་རོ། །སློབ་མས་ཡོན་དབུལ་གསོལ་བ་གདབ། །མཆོད་ཅིང་བསྟོད་པས་མཉེས་བྱས་ལ། །འདི་སྐད་ཚིག་ཀྱང་བརྗོད་པར་བྱ། །ཁམས་གསུམ་ལས་ནི་རྣམ་གྲོལ་ཞིང༌། །ནམ་མཁའ་དང་ནི་མཉམ་གྱུར་བ། །འདོད་པ་རྣམས་ཀྱིས་མ་གོས་པ། །དམིགས་མེད་ཁྱོད་ལ་ཕྱག་འཚལ་ལོ། །ཕུང་པོ་རྣམས་དང་ཁམས་རྣམས་དང༌། །སྐྱེ་མཆེད་རྣམས་ལ་མི་བརྟེན་ཅིང༌། །ཕྱིན་ཅི་ལོག་པས་རྣམ་གྲོལ་ཞིང༌། །ནམ་མཁའ་དང་ནི་མཉམ་འགྱུར་ཞིང༌། །འདོད་པ་དག་གིས་མ་གོས་པ། །དམིགས་མེད་ཁྱོད་ལ་ཕྱག་འཚལ་ལོ། །རྣམ་རྟོག་མེད་ཅིང་ཀུན་རྟོག་མེད། །ཐུགས་ནི་རབ་ཏུ་མི་གནས་པ། །བསམ་གྱིས་མི་ཁྱབ་པ་ཡི་ཐུགས། །དམིགས་མེད་ཁྱོད་ལ་ཕྱག་འཚལ་ལོ། །
― DTG049_Page_0654 ―
[མ་དཔེ་གཟིགས་ན་འདིར་གནོན།]
ཇི་ལྟར་ནམ་མཁའ་གནས་མེད་ཅིང༌། །སྤྲོས་མེད་གོས་པ་མེད་པ་ལྟར། །མཁའ་དང་མཉམ་པའི་ཐུགས་མངའ་བའི། །དམིགས་མེད་ཁྱོད་ལ་ཕྱག་འཚལ་ལོ། །ཐམས་ཅད་སྟོང་པའི་རང་བཞིན་ཅན། །མངོན་པར་བྱང་ཆུབ་བལྟ་པར་འཚལ། །དགའ་མཆོག་སྒོ་ནས་བསྟོད་མཛད་པ། །ལྷན་ཅིག་ཡེ་ཤེས་ཁྱོད་ཕྱག་འཚལ། །དེ་ནས་སྔགས་འདི་བརྗོད་པར་བྱའོ། །ཨོཾ་པྲཛྙཱ་ཛྙཱ་ན་ཨ་བྷི་ཥིཉྩཱ་མི། ཞེས་པ་ལན་བདུན་ནམ་ཉི་ཤུ་རྩ་གཅིག་བཟླས་སོ། །དེ་ནས་དབང་བཞི་བསྟན་པ་ནི། །གཞུང་ལུགས་མི་འདྲ་མང་མོད་ཀྱང༌། །དང་པོའི་ཚིག་རྟེན་མན་ངག་ནི། །རྣབ་དག་ཏུ་བརྒྱུད་པ་ཡིན། །ཐ་མ་ལྷན་ཅིག་དགའ་བ་ཡིན། །དང་པོ་བུམ་པའི་དབང་གིས་ནི། །མན་ངག་རྣམས་ནི་བསྟན་པ་ཡིན། །དེ་ནས་གསང་བ་ཡི་བསྟན་ལ། །ཁྱད་པར་སྔགས་ཀྱི་དོན་རྣམས་བསྟན། །སྔགས་རྣམས་དོན་དང་བཅས་རྣམས་ནི། །རྣ་བ་བརྒྱུད་པར་བྱ་བ་ནི། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ་ཧཱུཾ་ཕཊ། ཨོཾ་པྲཛྙཱ་ཏི་ས་ཏ་ནི་ཡ་ཧཱུཾ་ཕཊ། ཨོཾ་ཤ་སྦ་གཱ་པ་ཡ་ཧཱུཾ་ཕཊ། ཨོཾ་ག་ཏི་པྲྀ་ཡ་ནི་ཧཱུཾ་ཕཊ། ཨོཾ་མཾ་ས་བྷ་ཀཥ་ནི་ཧཱུཾ་ཕཊ། ཨོཾ་ཏྲཻ་ལོ་ཀྱ་བི་ཛ་ཡ་ཧཱུཾ་ཕཊ། ཨོཾ་བཛྲ་ཡ་ཀཥ་ཧཱུཾ་ཕཊ། ཨོཾ་མ་ཧཱ་ཀའ་ལ་རོ་ཥ་ཎ་ཧཱུཾ་ཕཊ། ཨོཾ་བཛྲ་བེ་ཏཱ་ལཱི་ཧཱུཾ་ཕཊ། ཨོཾ་བཻ་ཤྲ་བ་ཎ་ཡེ་ཧཱུཾ་ཕཊ། ཨོཾ་བཛྲ་ཌཱ་ཀི་ཡེ་ཧཱུཾ་ཕཊ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་བཛྲ་བྷ་ར་ཡ་ཧཱུཾ་ཕཊ། ཨོཾ་པྲ་བིད་པ་ན་ཡ་ཧཱུཾ་ཕཊ། ཨོཾ་མ་ན་མ་ཧ་ར་ནཱ་ཡ་ཧཱུཾ་ཕཊ། ཨོཾ་ས་མནྟ་བྷ་དྲ་ཡ་ཧཱུཾ་ཕཊ། ཨོཾ་ཤབྟ་གཱི་ཏི་ཡ་ཧཱུཾ་ཕཊ། ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་མཧཱ་ཡཀྵ་སེ་ན་པ་ཏ་ཡེ་ཧཱུཾ་ཧཱུཾ་ཕཊ། སྔགས་ཀྱི་དོན་རྣམས་མ་ཤེས་ན། །ངག་གི་སྒྲིབ་པ་མི་དག་ཕྱིར། །དེས་ན་སློབ་དཔོན་རྣ་བརྒྱུད་ཀྱི། །མན་ངག་དེ་ལ་ནན་ཏན་བྱ། །དེ་ནས་ཤེས་རབ་ཡེ་ཤེས་ཀྱི། །མན་ངག་དེ་ནི་བསྟན་པར་བྱ། །དགའ་བ་བུམ་པའི་དོན་བསྟན་ལ། །མཆོག་དགའ་གསང་བའི་དོན་བསྟན་ནོ། །ཁྱད་པར་ཤེས་རབ་ཡེ་ཤེས་བསྟན། །ལྷན་ཅིག་སྐྱེས་པའི་དགའ་བ་ནི། །བཞི་པ་ཁོ་ན་བསྟན་པ་ཡིན། །ཡང་ན་བུམ་པའི་དབང་བསྐུར་ནས། །བསྐྱེད་པའི་རིམ་པ་བསྟན་པ་ཡིན། །དེ་ནས་གསང་བའི་དབང་བསྐུར་ན། །རྡོ་རྗེ་བཟླས་པ་བསྟན་པར་བྱ། །ཤེས་རབ་ཡེ་ཤེས་དབང་བསྐུར་
― DTG049_Page_0655 ―
[མ་དཔེ་གཟིགས་ན་འདིར་གནོན།]
ནས། །སེམས་དབེན་པར་ནི་བསྟན་པར་བྱ། །དེ་ནས་སྒྱུར་མ་ལ་གནས་པས། །བཞི་པའི་མན་ངག་བསྟན་པར་བྱ། །དེ་ནས་འོད་གསལ་ལ་བརྟེན་ནས། །ཟུང་འཇུག་ཏིང་འཛིན་བསྒོམ་པར་བྱ། །ཟུང་འཇུག་ཏིང་འཛིན་མཐར་ཕྱིན་པ། །ཆོས་ཀྱི་སྐུ་ཞེས་དེ་ལ་བྱ། །དེ་ལྟར་བཞི་པའི་རྣ་བརྒྱུད་བསྟན། །དབང་བསྐུར་རྫོགས་ནས་ཚོགས་འཁོར་བྱ། །གཏོར་མ་བཏང་ནས་མཁའ་འགྲོ་བསྐང༌། །སྦྱིན་སྲེག་གིས་ནི་ལྷག་ཆད་བསྐང༌། །ཡི་གེ་བརྒྱ་པ་ཟློས་བྱེད་ཅིང༌། །དཀྱིལ་འཁོར་བསྐོར་ཞིང་སྒྲ་རྣམས་བརྡུང༌། །ཡེ་ཤེས་གཤེགས་ནས་ཏིང་འཛིན་བསྡུ། རྡུལ་ཚོན་ཕྱགས་ལ་ཆུ་ལ་དོར། །མཎྜལ་ཞལ་བསིལ་དགའ་སྟོན་བྱ། །རྣལ་འབྱོར་ལམ་པའི་དོན་ཆེད་དུ། །རྒྱུད་རྣམས་ཀུན་དང་མི་འགལ་བའི། །དཀྱིལ་འཁོར་ཆོ་ག་འདི་བྱས་པས། །འདི་བྱས་དགེ་བའི་རྩ་བ་ཡིས། །བདག་དང་མཐའ་ཡས་སེམས་ཅན་རྣམས། །ཐམས་ཅད་བྱང་ཆུབ་ཐོབ་པར་ཤོག །དཀྱིལ་འཁོར་གྱི་ཆོ་ག་སློབ་དཔོན་བྷ་བས་མཛད་པ་རྫོགས་སོ།། །།ལོ་ཙཱ་བ་དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་གཏན་ལ་ཕབ་པ།། ༈། །ལུང་བསྟན་སྦྱོར་བའི་མན་ངག་བཞུགས།
| 
