གནོད་སྦྱིན་སྤུན་གཉིས་ཀྱི་སྒྲུབ་ཐབས།
ཨ་ཛི་མི་ཏྲ།
རྒྱ་གར་སྐད་དུ། ཤྲཱི་དྭ་ཡ་བྷ་ཏ་ར་ཡ་ཀྵ་སཱ་དྷ་ནཾ། བོད་སྐད་དུ། གནོད་སྦྱིན་སྤུན་གཉིས་ཀྱི་སྒྲུབ་ཐབས། དཔལ་རྡོ་རྗེ་འཛིན་པ་ལ་ཕྱག་འཚལ་ལོ། །གང་གི་བཀའ་སྡོད་འཇིགས་པའི་གཟུགས། །གཞོན་ནུ་
ཁྲོས་པ་རྔམས་པའི་ཚུལ། །གནོད་སྦྱིན་རྒྱལ་པོ་ནོར་སྦྱིན་དང༌། །གྲགས་ཆེན་འཇིགས་པ་མཁས་པས་བསྒྲུབས། །དུར་ཁྲོད་ལ་སོགས་ཡ་ང་བར། །འཇིག་རྟེན་མགོན་པོའི་ལྟས་མཐོང་བས། །དེ་ཉིད་རིག་པ་དྲན་བྱས་ལ། །ཚར་གཅོད་རྗེས་སུ་འཛིན་པ་ཡིས། །བྱང་ཆུབ་སེམས་གཉིས་ཡང་དག་བསྒོམ།། སྟོང་དང་སྙིང་རྗེ་དབྱེར་མེད་ལས། །རང་ཉིད་སྤྱན་རས་གཟིགས་ཁོར་བསྒོམ། །ཞབས་མཐིལ་འཁོར་ལོའི་ཧཱུ༵་གཉིས་ལས། །རི་རབ་བྱང་ནས་གནོད་སྦྱིན་དགུག །འདམ་སྐྱེས་ཐོད་པ་དབུགས་བྲལ་གྱི། །གདན་ནི་གཡས་དང་གཡོན་བསམས་ལ། །དེ་སྟེང་ཟར་མ་ལི་ཁྲིའི་མདོག །ཧཱུ༵་ལས་གནོད་སྦྱིན་གཉིས་གཟུགས་བལྟ། །བསད་གྲི་ཙཏྟི་གཡས་དང་གཡོན། །དེ་བཞིན་རྔ་ཆེན་མགོ་ཕྱེད་འཛིན། །རུས་པ་རིན་ཆེན་སྟག་ལྤགས་བརྒྱན། །ཁྲོ་ཞིང་ཞི་ལ་རབ་ཏུ་མཛེས། །མཆོད་ཅིང་བྱིན་རླབས་དབང་བསྐུར་དང༌། །རྒྱས་གདབ་བཀའ་ལ་གདགས་པ་དང༌། །དམ་ཚིག་བརྗོད་ཅིང་བསྐུལ་བ་དང༌། །ཐམས་ཅད་བདག་པོའི་བཀའ་ཡིས་བྱ། །དཀར་དམར་བ་དན་གྱིས་མཚན་པའི། །དཀར་དམར་གཏོར་མ་གཉིས་བཤམས་ལ། །རང་སྔགས་འབྲུ་གསུམ་ལྡན་པ་ཡིས། །བདུད་རྩིར་བསྒྱུར་ལ་ཐོག་མར་སྦྱིན། །དེ་རྗེས་འགྲོ་ལ་ཕན་ཡིད་ཀྱིས། །ནོར་འཕེལ་གནོད་སྦྱིན་སྲོག་སྙིང་ནི། །སྙིང་གར་བཀོད་ལ་འདོད་པས་བཟླས། །འོད་འཕྲོས་རིན་ཆེན་ཆར་ཕབ་བསམ། །ཨོཾ་ཨཱཿཧཱུཾ་ཀཾ་བཛྲ་ཀཱ་ལ་མ་ཧཱ་དྷ་ནཾ་ཧཱུཾ་ཕཊ་སྭཱ་ཧཱ། གནོད་སྦྱིན་ཀཱ་ལའི་སྙིང་པོའོ། །དེ་བཞིན་ཕྱོགས་བཅུར་གྲགས་འདོད་པས། །གཉིས་པའི་སྙིང་གར་འབབ་པའི་སྔགས། །ཕྱོགས་བཅུར་སྣང་བྱེད་གསལ་བྱས་ལ། །གང་འདོད་འདུན་པས་རིག་པ་བཟླས། །ཨོཾ་ཨཱཿཧཱུཾ་བཾ་བཛྲ་བི་ཀ་ལ་མ་ཧཱ་ཀཱི་རྟི་ཧཱུཾ་ཕཊ་སྭཱ་ཧཱ། གནོད་སྦྱིན་པ་ཀ་ལའི་སྙིང་པོའོ། །ཡིག་འབྲུའི་གྲངས་ཀྱིས་ཁྲིར་བསྙེན་ལ། །སྦྱིན་སྲེག་བརྒྱ་རྩ་བརྒྱད་སྔོན་འགྲོས། །མགོན་པོས་སྲོག་སྙིང་དབང་མཛད་དེ། །ལས་སྒྲུབ་སྔགས་ནི་དེ་རྗེས་སོ། །ཨོཾ་ཨཱཿཧྲཱིཿཤྲཱི་ཀཱ་ལ་མ་མ་དྷ་ན་པུཥྚིཾ་ཀུ་རུ་ཡེ་ཧཱུཾ་སྭཱ་ཧཱ། །གནོད་སྦྱིན་ཀཱ་ལའི་ལས་སྔགས་སོ། །ཨོཾ་ཨཱཿཧྲཱིཿཤྲཱི་བི་ཀཱ་ལ་མ་མ་པྲ་སིདྡྷཾ་སྥ་ར་ཡེ་ཧཱུཾ་སྭཱ་ཧཱ། གནོད་སྦྱིན་བི་ཀ་ལིའི་ལས་སྔགས་སོ། །གལ་ཏེ་འདི་དག་ཁྲོ་བྱེད་ནས། །བསྒོ་བའི་ལས་མྱུར་མི་བྱེད་ན། །དཔའ་མོ་རལ་པ་གཅིག་ཁྲོས་པས། །བདུན་ཕྲག་བདུན་དུ་གཟིར་བར་བྱ། །སྒྲུབ་
པོ་རྣམས་ལ་ཕན་གདགས་ཕྱིར། །ཕྱི་ནང་རྙེད་གྲགས་སྒྲུབ་བྱེད་འདི། །རྐུན་པོས་རྙེད་པའི་ནོར་བཞིན་དུ། །འབད་དེ་གསང་བས་བསྒྲུབ་པར་བྱ། །དཔལ་གནོད་སྦྱིན་སྤུན་གཉིས་ཀྱི་སྒྲུབ་ཐབས། །སློབ་དཔོན་ཨ་ཇི་མི་ཏྲས་མཛད་པ་རྫོགས་སོ།། །།རྣལ་འབྱོར་གྱི་དབང་ཕྱུག་མི་ཏྲ་ཨཱ་ནནྡཱི་ཕྲིན་ལས་ཀྱི་ལྷའི་རིགས་གནུབས་ལོ་ཙཱ་བ་བྱམས་པ་དཔལ་གྱིས་བསྒྱུར་བའོ།།