དབུ་མ་དྲུག་པ།
རྒྱ་གར་སྐད་དུ། མདྷྱ་མ་ཤ་ཏ། བོད་སྐད་དུ། དབུ་མ་དྲུག་པ། སངས་རྒྱས་ལ་ཕྱག་འཚལ་ལོ། །མཐའ་བཞི་ལས་ནི་རྣམ་གྲོལ་བའི། །ཤེས་པ་སྐད་ཅིག་མ་ཡོད་དེ། །རྟོག་པས་སྟོང་ཞིང་དམིགས་པ་མེད། །རྣམ་བཅས་སྨྲ་བར་ཤེས་པར་བྱ། །ཆད་པ་མ་ཡིན་རང་རིག་ནི། །སྔོན་པོ་ལ་སོགས་པར་སྣང་བ། །དེ་ནི་མཚན་ཉིད་ཀྱིས་མ་སྐྱེས། །དབུ་མ་པ་ཡི་ལམ་དུ་འདོད། །མཐའ་བཞི་ལས་ནི་རྣམ་གྲོལ་བའི། །གསལ་བ་བརྫུན་པའི་མཚན་ཉིད་དེ། །དེ་ནི་སྒྱུ་མ་ལྟར་གཉིས་མེད།། ཚད་མར་ལྡན་པའི་གྲུབ་མཐའོ། །དངོས་པོ་སྟོང་པར་རིག་པ་གང༌། །སྣང་བ་མེད་ཅིང་སྒྲིབ་གཡོགས་མེད། །དེ་ཉིད་དབུ་མ་པ་ཡི་ལམ། །རྗེས་ཐོབ་དག་པའི་ཀུན་རྫོབ་ཡིན། །གསལ་བ་འམ་ནི་མི་གསལ་བ། །དེ་ཉིད་ལ་ནི་དམིགས་སུ་མེད། །རྣམ་ཀུན་མ་སྐྱེས་བ་རང་བཞིན། །གཞན་དག་དབུ་མ་པ་རུ་འདོད། །མཐའ་བཞི་ལས་ནི་རྣམ་གྲོལ་བའི། །གསལ་བ་ལྷ་ཡི་བདག་ཉིད་ཅན། །གཉིས་མེད་མཆོག་ཏུ་བདེ་བའི་དངོས། །རྟེན་ཅིང་འབྲེལ་འབྱུང་ཙམ་བདག་ཉིད། །དབུ་མ་དྲུག་པ་ཞེས་བྱ་བ། །སློབ་དཔོན་མཁས་པ་མཻ་ཏྲིས་མཛད་པ་རྫོགས་སོ།། །། བླ་མ་བཛྲ་པཱ་ཎི་དང༌། ནགས་ཚོས་བསྒྱུར་བའོ།།