རབ་ཏུ་མི་གནས་པ་གསལ་བར་སྟོན་པ་ཞེས་བྱ་བ།
གཉིས་མེད་རྡོ་རྗེ།
རྒྱ་གར་སྐད་དུ། ཨ་པྲ་ས་ཧ་པྲ་ཀ་ས་ནཱ་མ། བོད་སྐད་དུ། རབ་ཏུ་མི་གནས་པ་གསལ་བར་སྟོན་པ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཤེས་པ་རབ་ཏུ་མི་གནས་པ། །
སངས་རྒྱས་ཕ་ནོར་ཐམས་ཅད་འདོད། །འོན་ཀྱང་འབད་མེད་སྦྱོར་བ་ཡིས། །གང་ཚེ་སེམས་ཅན་དོན་བྱེད་ནའོ། །གང་ཕྱིར་གཞན་སེལ་སྒྲུབ་ལས་སྐྱེས། །དེ་ནི་རྟག་དང་ཆད་ལ་གནས། །རྟག་ཏུ་མ་སྐྱེས་མི་འགག་ཉིད། །སྐྱེ་དང་འགག་པ་བྱོལ་སོང་ཚིག །གལ་ཏེ་རང་རིག་ཚད་མ་ནི། །རིག་དེ་སེམས་ཅན་འདོད་མ་ཡིན། །སྣང་བ་ཐམས་ཅད་སྤང་བའི་ཕྱིར། །སེམས་ཅན་བདེན་པ་མ་ཡིན་ནོ། །རྗེས་ལ་སེམས་ཅན་འདོད་ཅེ་ན། །དེ་ཚེ་སེམས་ཅན་རྫས་ཡོད་མིན། །དམ་བཅས་གཅོད་པ་གནོད་པའི་དོན། །རྗེས་སུ་རྟག་པ་ཞེས་བརྗོད་དོ། །དངོས་གཞི་ལ་ཡང་རིག་པ་ཡོད། །རྗེས་ལ་དེ་ལྟར་སྣང་བའི་ཕྱིར། །དང་པོ་མི་རྟོག་པར་འགྱུར་གྱིས། །དེ་ལས་འཛིན་པའི་ཤེས་པའོ། །འདས་དང་མ་འོངས་ལ་སོགས་པའོ། །སེམས་ནི་གནས་པ་ཡོད་མ་ཡིན། །དེས་ན་དེ་དག་མེད་པར་ནི། །འགྲོ་ལ་འགྲོ་བའི་མགོན་པོས་བསྟན། །ཆོས་རྣམས་ཀྱི་ནི་སྐྱེ་བ་ཉིད། །རང་ཉིད་གཉུག་མ་བསམ་མི་ཁྱབ། །དེ་ཉིད་སྟོང་པ་ཉིད་ཅེས་བརྗོད། །ཆད་པའི་རྗེས་འགྲོ་མ་ཡིན་ནོ། །རབ་ཏུ་མི་གནས་ས་བོན་ལས། །འབྲས་བུ་རབ་ཏུ་མི་གནས་འབྱུང༌། །སྐྱོབ་པ་དེ་ཉིད་དམ་པ་སྟེ། །བཅོས་མའི་བཅོས་མ་དེ་བཞིན་ནོ། །དེ་བཞིན་བསམ་གཏན་ཡོད་མེད་ཅེས། །ཆགས་མེད་སྤྱོད་ལ་བརྗོད་དུ་མེད། །གང་ཕྱིར་རྟེན་ནས་འབྱུང་བ་རྣམས། །ཉམས་མྱོང་ཇི་བཞིན་རྟག་ཏུ་སྐྱེ། །རྟེན་ནས་འབྱུང་བ་གང་དང་གང༌། །དེ་དེ་གཉིས་མེད་སྣ་ཚོགས་སེམས། །སྟོང་དང་སྣ་ཚོགས་སེམས་དབྱེ་བས། །ཆོས་དང་ལོངས་སྤྱོད་སྤྲུལ་པ་ཉིད། །བདག་གིས་མི་གནས་བརྗོད་པ་ལས། །བདེ་བ་བསྒགས་པ་གང་ཡོད་དེས། །ཉེ་བར་སྤྱོད་པ་ཐམས་ཅད་དང༌། །འགྲོ་རྣམས་མི་གནས་ཐོབ་པར་ཤོག །རབ་ཏུ་མི་གནས་པ་གསལ་བར་བསྟན་པ། སློབ་དཔོན་གཉིས་མེད་རྡོ་རྗེས་མཛད་པ་རྫོགས་སོ།། །།བཛྲ་པཱ་ཎི་དང༌། ནགས་ཚོས་བསྒྱུར་བའོ།།