རང་བཞིན་ལྔ་མ།
གཉིས་མེད་རྡོ་རྗེ།
རྒྱ་གར་སྐད་དུ། པཉྩ་སྭ་བྷཱ་བ། བོད་སྐད་དུ། རང་བཞིན་ལྔ་མ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྤྲོས་པ་མེད་ཅིང་བླ་ན་མེད། །རྡོ་རྗེ་སེམས་དཔའ་ལ་ཕྱག་འཚལ། །མདོར་བསྡུས་སློབ་མས་རྟོགས་བྱའི་ཕྱིར། །རྣམ་པ་ལྔ་ནི་བདག་གིས་བཤད། །ཨོཾ་ཨཱཿཧཱུཾ་ཞེས་པ་འདིས་བདག་དང་གནས་དང་རྣལ་འབྱོར་བསྲུངས་བར་བྱས་ལ། །དྲི་ཞིམ་པོ་ལ་སོགས་པས་བྱུགས་པའི་སའི་ཆ་གྲུབ་བཞི་པ་ལ་སོགས་པའི་དཀྱིལ་འཁོར་གྱི་དབུས་སུ། །དེ་བཞིན་གཤེགས་པ་ལྔ་དང༌། །རྣལ་འབྱོར་མ་ལྔ་རྣམས་མཆོད་དེ། །དེ་ལ་དབུས་སུ་ཁ་དོག་སྣ་ཚོགས་པའི་བཾ་ཡོངས་སུ་གྱུར་པ་ལས་སྣ་ཚོགས་པདྨ་འདབ་མ་བརྒྱད་པ་ཁ་བྱེ་བའི་ལྟེ་བའི་སྟེང་དུ་རཾ་དམར་པོ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་ལ་གནས་པའི་ཧཱུཾ་སྔོན་པོ་ལས་མི་བསྐྱོད་བ་ཞལ་གཅིག་ཕྱག་གཉིས་པས་གནོན་གྱི་ཕྱག་རྒྱ་མཛད་པ། །རྡོ་རྗེའི་སྐྱིལ་ཀྲུང་བཅས་པ། མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པའི་སྐུ་སྟོབས་བཅུ་དང་མི་འཇིགས་པ་ལ་སོགས་པའི་ཡོན་ཏན་གྱི་ཚོགས་ཀྱི་གནས་བུ་ག་དང་ཤ་དང་རུས་པ་སྤངས་པ། རབ་ཏུ་སྣང་བ་ཙམ་སྟེ་མེ་ལོང་གི་གཟུགས་བརྙན་དང་མཚུངས་པ། བདེན་པ་མ་ཡིན་བརྫུན་པ་མ་ཡིན་པ། བྱམས་
པ་ཆེན་པོའི་བདག་ཉིད་ཡིན་པའི་ཕྱིར་ཁ་དོག་ནག་པོ། །རྡོ་རྗེ་ནག་པོའི་ཕྱག་མཚན་ཅན་ཆོས་ཀྱི་དབྱིངས་རྣམ་པར་དག་པ་ཕུང་པོ་ལྔའི་རང་བཞིན་ཏེ། སྐྲ་དང་ཁ་སྦུ་བྲེགས་པ་ཆོས་གོས་གྱོན་པའི་སྐུ། །སྤྱི་བོར་རྡོ་རྗེ་སེམས་དཔས་མཚན་པ། །རྡོ་རྗེ་སེམས་དཔའི་རང་བཞིན་སྟོང་པ་ཉིད་དང་སྙིང་རྗེ་དབྱེར་མེད་པའོ། །དེ་ཉིད་རྒྱུ་དང་འབྲས་བུའི་བདག་ཉིད་རྣམ་པ་ཐམས་ཅད་མཆོག་དང་ལྡན་པའི་སྟོང་པ་ཉིད་ཀྱི་མཚན་ཉིད་འདུས་མ་བྱས་ཤིང༌། དེ་བཞིན་ཉིད་ཀྱི་བདག་ཉིད་ཡིན་པའི་ཕྱིར་ཆོས་ཀྱི་སྐུའོ། །རབ་ཏུ་སྣང་བ་ཙམ་ཡིན་པའི་ཕྱིར་ལངས་སྤྱོད་རྫོགས་པའི་སྐུའོ། །བརྟགས་པའི་རྣམ་པར་ཤེས་པའི་ངོ་བོ་ཡིན་པའི་ཕྱིར་སྦྲུལ་པའི་སྐུའོ། །དེ་སྐད་དུ་གསུངས་པ། འདུས་མ་བྱས་སེམས་ཆོས་ཀྱི་སྐུ། །རྟག་པ་ལོངས་སྤྱོད་རྫོགས་མཚན་ཉིད། །སྣ་ཚོགས་དེ་ཉིད་སྦྲུལ་པའོ། །གཉུག་མ་ཀུན་གྱི་རང་བཞིན་ནོ། །ཞེས་པའོ། །རྣམ་པར་རྟོག་པ་ལ་སོགས་པས་མི་རིག་པའི་ཕྱིར་རྡོ་རྗེའི་རིགས་ཅན་དང༌། །རྡོ་རྗེའི་རིགས་དེ་འཇིག་རྟེན་པ་རྣམས་ཀྱིས་མི་རིག་པའི་ཕྱིར་རོ། །ཞེ་སྡང་དང༌། རྡོ་རྗེ་ཆུ་དང༌། དྲང་བ་དང༌། ཉི་མ་ཕྱེད་དང༌། རོ་ཚ་བ་དང༌། ཐོས་པ་དང༌། ནམ་མཁའ་དང༌། སྒྲ་དང་ཙའི་སྡེ་ཚན་ཏེ། འདི་དག་ནི་མི་བསྐྱོད་པའི་རྣམ་པར་དག་པ། །ཕྱི་རོལ་དང་ནང་གི་བདག་ཉིད་ཀྱི་རྣམ་པར་གཞག་པའོ། །འདིར་ཡང་སྐུ་བཞིའི་རྣམ་པར་གཞག་པ་ནི་སྔ་མ་བཞིན་ནོ། །ཨོཾ་ཨཱཿབཛྲ་དྷྲྀཀ་ཧཱུཾ། འདི་ནི་བཟླས་པའི་སྔགས་སོ། །རྡོ་རྗེ་སེམས་དཔའ་ཡང་ཧཱུཾ་ལས་སྐྱེས་པ་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དྲིལ་བུ་འཛིན་པ་ཡིད་ཀྱི་རང་བཞིན། །སྟོང་པའི་རྒྱས་བཏབ་པ། རོ་བསྐ་བའི་ལུས། སྟོན་ཀའི་དུས་རྣམ་པར་དག་པ། ཡ་ར་ལ་ཝ་ལ་སོགས་པའི་བདག་ཉིད་ནམ་ཕྱེད་ནས་ནམ་ལངས་པའི་བར་ཏེ། ཆོས་ཀྱི་དབྱིངས་ཞེས་བྱ་བ་མིང་གཞན་ནོ། །ཤར་གྱི་འདབ་མ་ལ་ཟླ་བའི་དཀྱིལ་འཁོར་གྱི་སྟེང་དུ། ཨོཾ་ལས་སྐྱེས་པའི་རྣམ་པར་སྣང་མཛད་མདོག་དཀར་བོ་འཁོར་ལོ་དཀར་པོའི་ཕྱག་མཚན་དང༌། བྱང་ཆུབ་མཆོག་གི་ཕྱག་རྒྱ་ཅན། གཟུགས་ཀྱི་ཕུང་པོ་རང་བཞིན་དང༌། གཏི་མུག་གི་ལུས་ཀྱི་རང་བཞིན་
དང། བཤད་པའི་རྣམ་པར་དག་པ་དང༌། དེ་བཞིན་གཤེགས་པའི་རིགས་ཅན་དང༌། མེ་ལོང་ལྟ་བུའི་ཡེ་ཤེས་རབ་ཏུ་གནས་པ་དང༌། དགུན་གྱི་དུས་རྣམ་པར་དག་པ་དང༌། རོ་མངར་བའི་ལུས་དང༌། ཀའི་སྡེ་ཚན་དང༌། སྔ་དྲོའི་ཐུན་གྱི་བདག་ཉིད་དང༌། ལུས་ཀྱི་རང་བཞིན་ནོ། །ཨོཾ་ཨཱཿཛི་ན་ཛི་ཀ་ཧཱུཾ་ཞེས་བྱ་བ་འདི་ནི་སྔགས་སོ། །ལྷོའི་འདབ་མའི་ཉི་མའི་དཀྱིལ་འཁོར་གྱི་སྟེང་དུ་ཏྲཱཾ་ལས་སྐྱེས་པའི་རིན་ཆེན་འབྱུང་ལྡན་ཁ་དོག་སེར་པོ་རིན་པོ་ཆེའི་ཕྱག་མཚན་དང༌། མཆོག་སྦྱིན་གྱི་ཕྱག་རྒྱ་འཛིན་པ། ཚོར་བའི་ཕུང་པོའི་རང་བཞིན་དང་ཕྲ་མའི་ལུས་དང༌། ཁྲག་གི་བདག་ཉིད་རིན་པོ་ཆེའི་རིགས། མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་དང་ལྡན་པ། དཔྱིད་ཀྱི་དུས་རྣམ་པར་དག་པ། ལན་ཚྭའི་ལུས་ཀྱི་རང་བཞིན། ཊའི་སྡེ་ཚན་གྱིས་ཁྱབ་པ་ཐུན་ཚོད་གསུམ་པའི་བདག་ཉིད་དོ། །འདིའི་སྔགས་ནི་ཨོཾ་ཨཱཿརཏྣ་དྷྲྀཀ་ཧཱུཾ་ཞེས་པའོ། །དེའི་ནུབ་ཀྱི་འདབ་མ་ལ་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿདྨར་པོ་ལས་ཡང་དག་པར་བྱུང་བའི་འོད་དཔག་མེད་ཁ་དོག་དམར་པོ་པདྨའི་ཕྱག་མཚན་དང༌། ཏིང་ངེ་འཛིན་གྱི་ཕྱག་རྒྱ་འཛིན་པ། །འདུ་ཤེས་ཀྱི་ཕུང་པོའི་རང་བཞིན་དང༌། འདོད་ཆགས་ཀྱི་ལུས་དང༌། ཁུ་བའི་བདག་ཉིད་དང༌། པདྨའི་རིགས་ཅན་དང༌། སོ་སོར་རྟོག་པའི་ཡེ་ཤེས་ཀྱི་མཚན་ཉིད་དང༌། སོས་ཀའི་དུས་ཀྱི་རང་བཞིན་དང་རོ་སྐྱུར་བའི་ལུས། །ཏའི་སྡེ་ཚན་གྱི་བདག་ཉིད་དོ། །ནུབ་མོའི་ཐུན་དང་པོའོ། །འདིའི་བཟླས་པའི་སྔགས་ནི། ཨོཾ་ཨཱཿཨ་རོ་ལི་ཀ་ཧཱུཾ་ཞེས་པའོ། །དེའི་བྱང་གི་འདབ་མ་ལ་ཉི་མའི་དཀྱིལ་འཁོར་གྱི་སྟེང་དུ་ཁཾ་ལྗང་གུ་ལས་སྐྱེས་པའི་དོན་ཡོད་གྲུབ་པ་ལྗང་གུ། ཤའི་རང་བཞིན་རལ་གྲིའི་ཕྱག་མཚན་དང༌། མི་འཇིགས་པའི་ཕྱག་རྒྱ་འཛིན་པ། འདུ་བྱེད་ཀྱི་ཕུང་པོའི་བདག་ཉིད་དང༌། ལས་ཀྱི་རིགས་དང༌། ཕྲག་དོག་གི་རང་བཞིན་བྱ་བ་ནན་ཏན་གྱི་ཡེ་ཤེས་དང༌། ཆར་གྱི་དུས་ཀྱི་རང་བཞིན་དང༌། རོ་བསྐ་བའི་རང་བཞིན། པའི་སྡེ་ཚན་གྱི་རྣམ་པར་དག་པ་དང༌། ནམ་ཕྱེད་ཀྱི་དུས་བཞིན་ནོ། །འདིའི་བཟླས་པའི་སྔགས་ནི། ཨོཾ་ཨཱཿཔྲཛྙཱ་དྷྲྀཀ་ཧཱུཾ་ཞེས་པའོ། །དེ་དག་ནི་རྡོ་རྗེའི་སྐྱིལ་ཀྲུང་ཅན། །ཞལ་གཅིག་ཕྱག་གཉིས་པ་གཙུག་ཏོར་ཅན་སྐྲ་དང་ཁ་སྤུ་བྲེགས་པ། ཆོས་གོས་གྱོན་པ། མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་
པ། སྟོབས་བཅུ་དང་མི་འཇིགས་པ་ལ་སོགས་པའི་ཡོན་ཏན་གྱི་གཞིར་གྱུར་བ་བུ་ག་དང༌། ཤ་དང༌། རུས་པ་སྤངས་པ། མེ་ལོང་གི་གཟུགས་བརྙན་ལྟ་བུ་སྟེ། བདེན་པ་དང་བརྫུན་པ་ལ་སོགས་པ་མཐའ་དག་དང་བྲལ་བ་དྲི་མ་མེད་པ་རབ་ཏུ་སྣང་བ་ཙམ་སྟེ་ལོངས་སྤྱོད་རྫོགས་བའི་སྐུའོ། །སྐུ་གསུམ་རོ་གཅིག་པ་ངོ་བོ་ཉིད་ཀྱི་སྐུའོ། །འདུས་བྱས་པའི་དེ་བཞིན་ཉིད་ཀྱི་བདག་ཉིད་ཆོས་ཀྱི་སྐུའོ། །བརྟགས་པའི་རྣམ་པར་ཤེས་པའི་སྐུ་ཐ་མི་དད་པའོ། །གཟུགས་དང་ཚོར་བ་དང༌། འདུ་ཤེས་དང༌། འདུ་བྱེད་ཀྱི་ཕུང་པོའི་བདག་ཉིད་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་རྣམ་པར་ཤེས་པ་ཙམ་དུ་རྟོགས་པར་བྱ་བའི་ཕྱིར་མི་བསྐྱོད་པས་རྒྱས་བཏབ་པ་ཡིན་ཏེ། མི་བསྐྱོད་པས་དབུ་ལ་བརྒྱན་པའོ། །རྣམ་པར་ཤེས་པའི་རང་བཞིན་མེད་བ་སྟོང་བ་དང་སྙིང་རྗེའི་བདག་གཉིད་དུ་རྟོགས་པར་བྱ་བའི་ཕྱིར་མི་བསྐྱོད་པ་ལས་ཡང་རྡོ་རྗེ་སེམས་དཔས་རྒྱས་བཏབ་པ་ཡིན་ཏེ། དེ་དག་གིས་རྒྱུ་དང་འབྲས་བུའི་བདག་ཉིད་སྲིད་པ་དང་མྱ་ངན་ལས་འདས་པར་རོ་གཅིག་པ་ཙམ་དུ་འགྲོ་བ་འདི་དག་རྟོགས་པར་འགྱུར་རོ། །དེ་ལྟར་ཡང༌། སྟོང་ཉིད་སྙིང་རྗེ་དབྱེར་མེད་པ། །གང་ལས་སེམས་ནི་རྣམ་བསྒོམས་པ། །དེ་ནི་སངས་རྒྱས་དང་ནི་ཆོས། །དགེ་འདུན་དུ་ཡང་བསྟན་པའོ། །བུ་རམ་མངར་ཞིང་མེ་ཚ་བ། །ཇི་བཞིན་པ་ཡི་རང་བཞིན་ཏེ། །ཆོས་རྣམས་ཐམས་ཅད་སྟོང་པ་ཉིད། །དེ་བཞིན་རང་བཞིན་འདོད་པ་ཡིན། །དེ་ལྟར་ཡང༌། སྲིད་པ་དག་ནི་ཡོངས་ཤེས་ན། །མྱ་ངན་འདས་ཞེས་དེ་ལ་བརྗོད། །མེའི་མཚམས་ཀྱི་འདབ་མ་ལ་ཟླ་བའི་དཀྱིལ་འཁོར་གྱི་སྟེང་དུ་ལཾ་དཀར་པོ་ལས་སྐྱེས་པའི་སྤྱན་མ་ཁ་དོག་དཀར་མོ། །མིག་གི་མཚན་མ་ཅན་སའི་ཁམས་ཀྱི་རང་བཞིན། །དེ་བཞིན་གཤེགས་པའི་རིགས་ལས་བྱུང་བ། གཏི་མུག་དགའ་མའོ། །འདིའི་ས་བོན་དང་སྔགས་ནི། ཨོཾ་ཨཱཿལཾ་ཧཱུཾ་སྭཱ་ཧཱ་ཞེས་པའོ། །བདེན་བྲལ་དུ་ཟླ་བའི་དཀྱིལ་འཁོར་གྱི་སྟེང་དུ་མཾ་ནག་པོའི་ས་བོན་ལས་ཡང་དག་པར་བྱུང་བ། མཱ་མ་ཀཱི་ཁ་དོག་ནག་མོ་རྡོ་རྗེ་ནག་པོའི་མཚན་མ་ཅན་ཆུའི་ཁམས་ཀྱི་རང་བཞིན་རྡོ་རྗེའི་རིགས་ཞེ་སྡང་ལ་དགའ་མའོ། །འདིའི་ས་བོན་དང་སྔགས་ནི། །ཨོཾ་ཨཱཿམཾ་
ཧཱུཾ་སྭཱ་ཧཱ་ཞེས་བྱའོ། །རླུང་གི་ཕྱོགས་སུ་ཟླ་བའི་དཀྱིལ་འཁོར་གྱི་སྟེང་དུ་བཾ་གྱི་ས་བོན་ལས་ཡང་དག་པར་བྱུང་བ། གོས་དཀར་མོ་ཅན་ཞེས་བྱ་བའི་མིང་ཅན་ཁ་དོག་དམར་པོ་པདྨའི་མཚན་མ་ཅན་མེའི་ཁམས་ཀྱི་རང་བཞིན་པདྨའི་རིགས་འདོད་ཆགས་ལ་དགའ་མའོ། །འདིའི་ས་བོན་དང་སྔགས་ནི། ཨོཾ་ཨཱཿབཾ་ཧཱུཾ་སྭཱ་ཧཱ་ཞེས་པའོ། །དབང་ལྡན་གྱི་ཕྱོགས་སུ་ཟླ་བའི་དཀྱིལ་འཁོར་གྱི་སྟེང་དུ་སྔོ་བསངས་ཏཱི་ཡོངས་སུ་གྱུར་བ་ལས་སྒྲོལ་མ་ཁ་དོག་སྔོ་བསངས་ཨུཏྤལ་སྔོན་པོའི་མཚན་མ་ཅན། རླུང་གི་ཁམས་ཀྱི་རང་བཞིན་ལས་ཀྱི་རིགས་ཕྲག་དོག་དགའ་མའོ།། འདིའི་ས་བོན་དང་སྔགས་ནི། ཨོཾ་ཨཱཿཏཱཾ་ཧཱུཾ་སྭཱ་ཧཱ་ཞེས་པའོ། །དེ་ལ་ལྷ་མོ་བཞི་ནི་ལོ་བཅུ་དྲུག་ལོན་པ་ཐུན་མོང་མ་ཡིན་པར་མཛེས་པ། གཟུགས་དང་ལང་ཚོ་དང་ལྡན་པ་ཇི་ལྟར་མཛེས་པར་ཡང་དག་པར་གནས་པའོ། །སྐུ་བཞིའི་བདག་ཉིད་སྔོན་བཞིན་ཡིད་དུ་འོང་བ་རྒྱལ་བའི་ཡོན་ཏན་ཐམས་ཅད་ཀྱི་རང་བཞིན་དུ་གྱུར་པ། དེ་བཞིན་གཤེགས་པ་ལྔའི་རང་བཞིན་ཅན་དེ་དག་གི་དབུས་སུ་ཨཱ་ལིའི་རང་བཞིན་རྡོ་རྗེ་སེམས་དཔའི་གཟུགས་འདི་ནི་རྡོ་རྗེ་དབྱིངས་དང་པོ་ནས་གྲུབ་པའོ། །གཞུང་འདི་བྱས་པའི་དགེ་བ་གང་ཕྱིར་འབད་བ་ཅུང་ཟད་མདོར་བསྡུས་སློབ་མས་རྟོགས་བྱའི་ཕྱིར། །ཆོ་ག་འདི་ནི་བསྡུས་པས་སེམས་ཅན་རྣམས་ལ་ཕན་པ་ཡུན་རིང་དུ། །རྒྱལ་བ་ཀུན་གྱི་ལུང་དང་རིགས་པར་ལྡན་པའི་ཕྱིར། །མ་ལུས་དགེ་བ་འདི་ནི་བདག་གིས་ཐོབ་པས་འགྲོ་བ་རྣམས་ནི་རྒྱལ་གྱུར་ཅིག །འདི་ནི་རྡོ་རྗེ་སེམས་དཔའི་རང་བཞིན་ལྔ་པ་དཔལ་གཉིས་མེད་རྡོ་རྗེས་མཛད་པ་རྫོགས་སོ།། །།ཨ་མྲྀ་དེ་བས་ཞུས་ཏེ་གསོལ་བ་བཏབ་ནས་བརྩམས།།