ཐབས་དང་ཤེས་རབ་རྩེ་བ་ལྔ་པ།
གཉིས་མེད་རྡོ་རྗེ།
རྒྱ་གར་སྐད་དུ། པྲཛྙོ་པཱ་ཡ་བེ་ཡ་པཉྩ། བོད་སྐད་དུ། ཐབས་དང་ཤེས་རབ་རྩེ་བ་ལྔ་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རབ་ཏུ་སྣང་བའི་མཆོག་རྩེ་བ། །རྟེན་ཅིང་འབྲེལ་པར་འབྱུང་བ་ཙམ། །གལ་ཏེ་མེད་གྱུར་འཆིང་འགྱུར་ཉིད། །སྟོང་ཉིད་ཡོད་པའི་འདོད་ཙམ་མ། །སྟོང་ཉིད་ཤིན་ཏུ་མཆོག་རྩེ་བའི། །གང་གི་ལུས་ནི་དཔེ་མེད་པ། །གལ་ཏེ་བརྒྱལ་ཐ་དད་གྱུར། །རྩེ་བའི་
གཙོ་བོ་ཐ་དད་འགྱུར། །དེ་ཕྱིར་དོགས་པ་ཁྱོ་ཤུག་གཉིས། །བླ་མ་དམ་པའི་སྤྱན་སྔར་གནས། །གཉུག་མའི་རྩེ་བ་དེ་དང་དེའི། །ལྷན་ཅིག་སྐྱེས་པའི་རྩེ་བར་མཛོད། །ཨེ་མའོ་བླ་མ་དམ་པ་མཁས། །ངོ་མཚར་འདི་འདྲའི་ཐབས་མཁས་པ། །གཉུག་མ་དབྱེར་མེད་དམིགས་པ་མེད། །བླ་ན་མེད་པ་གཉི་ག་སྟེ། །མཚན་ཉིད་ཐམས་ཅད་ཡང་དག་རྫོགས། །མཐའ་གཉིས་དག་ནི་རྣམ་པར་སྤངས། །དངོས་པོ་ཀུན་གྱི་རང་བཞིན་ནི། །རང་བཞིན་མེད་པ་རྟག་ཏུ་ཤར། །ཐབས་དང་ཤེས་རབ་རྩེ་བ་ལྔ་པ་སློབ་དཔོན་ཨ་བ་དྷཱུ་ཏཱི་པ་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།། །།རྒྱ་གར་གྱི་མཁན་པོ་བཛྲ་པཱ་ཎི་དང༌། བོད་ཀྱི་ལོ་ཙཱ་བ་མཚུར་ཛྙཱ་ན་ཨཱ་ཀ་རས་བསྒྱུར་ཅིང་ཞུས་ཏེ་གཏན་ལ་ཕབ་བའོ།།