ཐེག་པ་ཆེན་པོ་ཉི་ཤུ་པ།
གཉིས་མེད་རྡོ་རྗེ།
རྒྱ་གར་སྐད་དུ། མ་ཧཱ་ཡཱ་ན་བིང་ཤ་ཏི། །བོད་སྐད་དུ། །ཐེག་པ་ཆེན་པོ་ཉི་ཤུ་པ། །སྙིང་པོའི་སྐུ་ལ་ཕྱག་འཚལ་ལོ། །ཟུང་འཇུག་གོ་འཕང་ཡང་དག་སོན། །རྣམ་པ་ཀུན་གྱི་མཆོག་ལྡན་པ། །མཚན་ཉིད་མེད་ཅིང་འདུས་མ་བྱས། །གཉུག་མའི་སྐུ་ལ་ཕྱག་
འཚལ་ལོ། །འདི་ནི་ཆོས་དང་ལོངས་སྤྱོད་སྦྲུལ། །སྙིང་པོ་དེ་ཡི་རང་བཞིན་པས། །དེ་ལ་འདི་མཐོང་ལྡན་པ་ཡིས། །ཡང་དག་རྫོགས་པའི་བྱང་ཆུབ་འགྲུབ། །འདི་ལ་མཐོང་བར་གྱུར་པ་ཡིས། །སྒྲོ་མ་བཏགས་པས་ལྷག་པར་མཐོང༌། །གསང་སྔགས་ཐེག་པའི་རྗེས་འབྲངས་ནས། །དེ་འདིར་ད་ལྟར་བཤད་པར་བྱ། །སྣ་ཚོགས་རྟོག་པའི་གཞུང་ནི་མེད། །ཆད་པར་སེམས་པའང་མེད་པ་སྟེ། །རྟག་དང་ཆད་པའང་གཉིས་ཀ་མེད། །གཉིས་པོ་མེད་པས་གཉིས་མིན་ཏེ། །མཐའ་བཞི་རྣམ་གྲོལ་དེ་ཉིད་ནི། །དེ་ཉིད་རིག་པ་མཁས་པས་ཤེས། །མཐའ་བཞི་རྣམ་པར་དག་པ་ཉིད། །མཐའ་བཞི་ལ་ནི་རྣམ་པར་བརྟེན། །ནམ་མཁའ་དང་མཉམ་ཞི་བ་དང༌། །ཐོག་མ་དབུས་དང་ཐ་མ་སྤངས། །བསམ་གྱིས་མི་ཁྱབ་སེམས་ཉིད་ནི། །དངོས་པོ་ཀུན་གྱི་རང་བཞིན་ནོ། །འགྲོ་བ་རོ་གཅིག་པར་རྟོགས་ན། །རྙོག་པ་མེད་ཅིང་འོད་གསལ་བའོ། །ཀུན་དུ་རྟོག་པས་འཇིགས་མེད་ན། །ཇི་ལྟར་བདེ་བ་ཁྱོད་གནས་བྱོས། །བྱང་ཆུབ་ཉོན་མོངས་ཐ་དད་མེད། །ཉོན་མོངས་བྱང་ཆུབ་ལས་མི་འབྱུང༌། །འཁྲུལ་པས་ཉོན་མོངས་རྟོགས་པ་སྟེ། །འཁྲུལ་པའི་ངོ་བོ་དྲི་མ་མེད། །ལུས་ཀྱི་ལས་སུ་སྤྱོད་ལམ་སྟེ། །ངག་གི་ལས་ནི་ཆོས་སྟོན་ཏེ། །ཡིད་ཀྱི་ལས་སུ་ཡང་དག་འཛིན། །རྣམ་པར་མི་རྟོག་བློ་ལྡན་པའོ། །འགྲོ་བ་སྒྱུ་མ་སྒྱུ་མ་འདི། །སྒྱུ་མས་སྒྱུ་མ་མི་བྱ་སྟེ། །སྒྱུ་མ་རྨོངས་པས་འཁྲུལ་པ་ཆེ། །འཁྲུལ་འགྱུར་འཁྲུལ་པ་དམ་པའི་ལུགས། །ཇི་ལྟར་རང་བཞིན་རྣམ་ཤེས་ན། །སངས་རྒྱས་ལ་སོགས་བསྡུས་པ་སྟེ། །ཀུན་ནས་ཀུན་དུ་ལོངས་སྤྱོད་ན། །དེ་ཉིད་རིག་པར་རབ་ཏུ་འགྲུབ། །ཆོས་ཀྱི་ཕུང་པོ་སྟོང་ཕྲག་གིས། །རྟོག་པ་ཞེས་བྱ་སྟོང་པ་ཉིད། །རྟག་པ་འདི་ནི་དཔྱད་པས་མིན། །བླ་མས་དཔྱད་པ་མིན་པར་འགྱུར། །སྐྱེས་བུ་རྣམ་རྟོག་བྲལ་བ་ནི། །རྣམ་ཀུན་བདེ་བའི་དེ་ཉིད་དོ། །སྟོང་ཉིད་བདེ་བའི་དེ་ཉིད་མིན། །བསམ་མི་ཁྱབ་མིན་བདེ་བ་མིན། །དེས་ན་སངས་རྒྱས་སྒྲོ་མ་བཏགས། །དེ་ནི་དོན་དམ་མཐོང་བ་མེད། །གང་ལ་སྤྱོད་པ་ཇི་ལྟར་བདེ། །དེ་ལྟ་རིག་པ་མཐོང་བ་མེད། །གཉིས་སུ་མེད་པ་གཉིས་མེད་མིན། །བྱང་ཆུབ་དག་པའི་མཚན་ཉིད་མེད། །རེ་བ་མེད་འདི་རྣལ་འབྱོར་ཆེ། །
རྣམ་པ་ཐམས་ཅད་རྟོགས་པའོ། །ཇི་ལྟར་གསུངས་པ་དང་པོའི་ལས། །རྣལ་འབྱོར་ཀུན་གྱི་བྱ་བ་ཡིན། །སྟོང་དང་སྙིང་རྗེ་དབྱེར་མེད་པ། །དེ་ནི་སངས་རྒྱས་ཡེ་ཤེས་འདོད། །སྟོང་ལས་སྙིང་རྗེ་གཞན་མིན་ཏེ། །སྙིང་རྗེ་ཡི་ནི་མིང་གཞན་ཡིན། །བདག་གིས་འདུས་བྱས་སུ་མི་བརྗོད།། བརྗོད་པ་ཟུང་དུ་འཇུག་པར་རོ། །བུམ་པ་ལ་སོགས་འཛིན་གང་ལ། །རྣལ་འབྱོར་ཀུན་གྱི་བསམ་གཏན་བྱ། །འདིས་ནི་སངས་རྒྱས་ཆེན་པོར་འགྱུར། །རྣམ་པ་ཀུན་གྱི་ལུས་གཅིག་པའོ། །འདུས་མ་བྱས་སེམས་ཆོས་ཡིན་ཏེ། །རྟོགས་པའི་ལོངས་སྤྱོད་རྫོགས་མཚན་ཉིད། །སྣ་ཚོགས་སེམས་ནི་སྦྲུལ་པའོ། །གཉུག་མ་ཀུན་གྱི་རང་བཞིན་ནོ། །དེ་ལྟར་འདི་ཡིས་ཐོབ་པ་ནི། །བསོད་ནམས་ལྡན་པའི་བསོད་ནམས་ཀྱིས། །དེ་ནི་འཇིག་རྟེན་མ་ལུས་པ། །སངས་རྒྱས་བྱང་ཆུབ་ཐོབ་པར་ཤོག །ཐེག་པ་ཆེན་པོ་ཉི་ཤུ་པ་སློབ་དཔོན་གཉིས་མེད་རྡོ་རྗེས་མཛད་པ་རྫོགས་སོ།། །།པ་རི་པ་ཏ་པྲཛྙཱ་ཤ་ར་ས་མ་དྷྱ་ན། རྒྱ་གར་གྱི་མཁན་པོ་དེ་བཱ་ཀ་ར་ཙནྡྲ་དང༌། བོད་ཀྱི་ལོ་ཙཱ་བ་དགེ་སློང་ཤཱ་ཀྱ་བརྩོན་འགྲུས་ཀྱིས་བསྒྱུར་ཅིང་ཞུས་ཏེ་གཏན་ལ་དབབ་པའོ།།