ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས།
རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷཱ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས། འཇམ་དཔལ་སྨྲ་བའི་སེང་གེ་ལ་ཕྱག་འཚལ་ལོ། །ཡུམ་གྱི་སྒྲུབ་པ་བཤད་པར་བྱ། །ཤེས་རབ་ཕ་རོལ་ཕྱིན་འབྱུང་བའི། །གང་ཞིག་བསྒོམས་བཙམ་གྱིས་ནི། །རྒོལ་བ་ཐམས་ཅད་ཚར་གཅོད་པ། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་དཀར་ཞིང་ཡིད་འོང་མ། །སྐྲ་བཅིངས་པ་ལ་ཅུང་ཞིག་འཕྱང༌། །ཆུ་སྐྱེས་དཀར་ལ་ལེགས་གནས་པ། །ཕྱག་གཡས་སུ་ནི་པདྨ་སྟེ། །ཁ་དོག་དམར་བའི་རྣམ་པར་བསྒོམ། །ཤེས་རབ་ཕ་རོལ་ཕྱིན་པ་གཡོན། །རྡོ་རྗེ་སྐྱིལ་ཀྲུང་ལེགས་པར་བཅས། །རྒྱན་ཀུན་གྱིས་ནི་ལེགས་པར་བརྒྱན། །ལྟེ་བའི་དཀྱིལ་འཁོར་དག་ཏུ་བསྒོམ། །ཨ་ཡིག་ཡི་གེ་ལ་ཞུགས་ཤིང༌། །མཆོག་ཏུ་དགའ་བར་བྱེད་པའོ། །དམ་ཚིག་སེམས་དཔའ་རྣམ་བསྐྱེད་ལ། །ཡེ་ཤེས་སེམས་དཔའ་རྣམ་པར་བསྒོམ། །ཟླ་བ་དྲུག་གི་སྦྱོར་བ་ཡིས། །ཤེས་རབ་ཕ་རོལ་ཕྱིན་པར་འགྱུར། །མཚན་མ་བདུན་གྱི་སྦྱོར་བ་ཡིས། །བསྟན་བཅོས་ཀུན་ལ་མཁས་པར་འགྱུར། །ཟླ་བ་ཤར་བའི་རིམ་གྱིས་ནི། །ཟླ་བ་ཕྱེད་ནི་བསྒོམ་པར་བྱ། །བཟླས་པ་འབུམ་བྱས་སྦྱོར་བ་ཡིས། །ཉིན་རེ་བཞིན་དུ་ཚིགས་བཅད་བརྒྱ། །འབད་པ་མེད་པར་སྦྱོར་བ་འབྱུང༌། །གཞུང་ཡང་བརྒྱ་ཙམ་འཛིན་བར་འགྱུར། །དེ་ལ་སྔགས་ནི་འདི་ཡིན་ཏེ། །ཨོཾ་པི་ཙུ་པི་ཙུ་པྲཛྙཱ་བརྡྷ་ནི། ཛྭ་ལ་ཛྭ་ལ་མེ་དྷ་བརྡྷ་ནི། །དྷི་རི་དྷི་རི་བུདྷི་བརྡྷ་ནི་སྭཱ་ཧཱ། བྱ་རོག་གི་སྐད་མ་གྲག་པར་སྔགས་འདི་ལན་བདུན་དུ་མངོན་པར་བསྔགས་པར་བྱས་ནས། མ་བརླང་པའི་སྐྱུར་པོའི་ཁུ་བ་འཐུངས་ན་ཟླ་བ་དྲུག་ཏུ་
གང་འཐུང་བར་བྱེད་པ། དེ་ཤེས་རབ་ཆེན་པོ་དང་ལྡན་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས། །རྗེ་བཙུན་ཀ་མ་ལ་ཤཱི་ལས་མཛད་པ་རྫོགས་སོ།།