འཇམ་དཔལ་ཁྲོ་བོར་སྒྲུབ་པ།
རྒྱ་གར་སྐད་དུ། མཉྫུ་ཤྲཱི་ཀྲོ་དྷ་སཱ་དྷ་ནཾ། བོད་སྐད་དུ། འཇམ་དཔལ་ཁྲོ་བོར་སྒྲུབ་པ། སྨྲ་བའི་སེང་གེ་ལ་ཕྱག་འཚལ་ལོ། །དཔལ་ལྡན་ཁྲོ་བོ་གཤིན་རྗེ་གཤེད། །ཁྲོ་རྒྱལ་གཙོ་ལ་རབ་འདུད་ནས། །དེ་ཡི་ཟབ་མོ་སྒྲུབ་པའི་ཐབས། །སྒྱུ་འཕྲུལ་དྲ་བའི་ཚུལ་དུ་བྲི། །དེ་ལ་འཇམ་དཔལ་གཤིན་རྗེ་སྒྲུབ་པར་འདོད་པའི་རྣལ་འབྱོར་པས་དུར་ཁྲོད་ལ་སོགས་པ་ཡིད་དང་རྗེས་སུ་མཐུན་པར་གནས་སུ་སྟན་བདེ་བ་ལ་འདུག་སྟེར་རང་གི་སྙིང་གར་ཉི་མའི་དཀྱིལ་འཁྲོ་བསྒོམ། དེའི་དབུས་སུ་ཧཱུཾ་མཐིང་ནག་རབ་ཏུ་འབར་བ་བསྒོམ། དེ་ལས་འོད་འཕྲོས་པས་བར་ཆད་ཐམས་ཅད་སྲུང་ཞིང་བདེ་བར་གཤེགས་པ་རྣམས་ཀྱི་ཐུགས་དམ་བསྐུར་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་གྱི་ནམ་མཁའ་ལ་སྤྱན་དྲངས་ལ། ཡན་ལག་བདུན་པ་བྱ་ཞིང་ཚད་མེད་པ་བཞི་བསྒོམས་ཏེ་དེ་ནི་སྦོད་ནམས་ཀྱི་ཚོགས་བསག་གོ །དེ་ནས་ཨོཾ་སརྦ་དྷརྨཱ་བྷཱ་བ་སྭ་བྷཱ་ཝ་ཤུདྡྷོ྅ཧཾ། ཞེས་པས་ཆོས་ཐམས་ཅད་ནམ་མཁའ་ལྟ་བུར་བསྒོམ། །དེའི་ངང་
ལས་རང་གི་རིག་པ་ཧཱུཾ་མཐིང་ནག་རབ་ཏུ་འབར་བར་བསྒོམ། དེ་གྱུར་པ་ལས་རྡོ་རྗེ་ཁྲོ་བོ་ཧཱུཾ་གིས་མཚན་པར་བསམ། དེ་ལས་བྱུང་བའི་བཅོམ་ལྡན་འདས་འཇམ་དཔལ་གཤིན་རྗེ་གཤེད་མཐིང་ནག་ཞལ་གཅིག་པ་སྤྱན་གསུམ་པ། ཁྲོ་གཉེར་དཔྲལ་བར་བསྡུས་པ། མཆེ་བ་གཙིགས་ཤིང་སྐྲ་གྱེན་དུ་བརྫེས་པ། ཕྱག་གཡས་ཀྱིས་རལ་གྲི་རྡོ་རྗེའི་ཡུ་བ་ཅན་བཟུང་བ། གཡོན་སྡིགས་མཛུབ་ཨུཏྤལས་མཚན་པ། གཅེར་བུ་དུར་ཁྲོད་ཀྱི་རྒྱན་གྱིས་བརྒྱན་པ། ཡུམ་རྡོ་རྗེ་ཕག་མོ་དང་རོལ་ཞིང་ཡེ་ཤེས་ཀྱི་མེ་འབར་བ། མ་ཧེ་གདན་དུ་བཏིང་ནས་ལས་ཀྱི་གཤིན་རྗེ་འདུལ་བར་བསྒོམ། དེའི་ཐུགས་ཀ་ནས་ཧཱུཾ་ལས་འོད་འཕྲོས་པས་དེ་ལྟ་བུའི་ཡེ་ཤེས་སེམས་དཔའ་སྤྱན་དྲངས་ལ་ཕྱག་དང་མཆོད་པ་དབུལ་ཏེ། ཨོཾ་བཛྲ་པུཥྤེ་ཧཱུཾ། ཧཱུ་པེ་ཧཱུཾ། དཱི་པེ་ཧཱུཾ། གནྡྷེ་ཧཱུཾ། ནི་རི་ཏེ་ཧཱུཾ། ནཻ་བི་དྷྱེ་ཧཱུཾ། ནི་བི་དྱེ་ཧཱུཾ། ཤབད་ཧཱུཾ། །ཞེས་མཆོད་པ་དབུལ་གཏོར་མ་གཏང་ངོ༌། །གཏོར་སྣོད་མི་དམིགས་པ་ལས་རིན་པོ་ཆེའི་སྣོད་དུ་བསམ། ཧཱུཾ་ཞེས་བརྗོད་པས་བདུད་རྩིར་བསམ། འདོད་པའི་དོན་ལ་གསོལ་བ་གདབ་པར་བྱའོ། །ཛཿཧཱུཾ་བཾ་ཧོཿས་དགུག་གཞུག་ལ་སོགས་པ་བྱ་ཞིང༌། ཡི་གེ་གསུམ་གྱིས་སྐུ་གསུང་ཐུགས་བྱིན་གྱིས་བརླབས། དབང་བསྐུར། མི་སྐྱོ་བར་དུ་བསྒོམ། དེ་ནས་བཟླས་པའི་སྔགས་འདི་ཡིན་ཏེ། ཨཱོཾ་ཧྲཱིཿཥྚྲྀཿ་བི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ནམ་མཁའི་དཀྱིལ་ནས་ཐོག་བབས་པ་ལྟར་ཤིན་ཏུ་དྲག་པར་བཟླས་སོ། །དེ་ནས་སྒྱུ་མ་ལྟ་བུའི་རང་བཞིན་འོད་གསལ་བ། ཟུང་དུ་འཇུག་པ། །རྡོ་རྗེའི་བཟླས་པ་སེམས་དེ་ལ་གཏད་པའོ། །ནག་པོ་ཐུགས་ཀྱི་དཔལ་བེའུ་ནས། །ཟབ་མོ་བདུད་རྩིའི་བཅུད་ཐིགས་པས། །སྐལ་ལྡན་རིན་ཆེན་ལྟ་བུ་ཡི། །འཇམ་དཔལ་གཤིན་རྗེ་གྲུབ་པར་ཤོག །འཇམ་དཔལ་ཁོར་བོར་སྒྲུབ་པ་རྗེ་བཙུན་ཀ་མ་ལ་ཤཱི་ལས་མཛད་པ་རྫོགས་སོ།།