རླུང་གནས་ནད་ཀྱི་བརྟག་པ།
ཨ་ཛོ་ཀི
― DTG053_Page_0060 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། བཱ་ཡུ་སྠཱ་ན་རོ་ག་པ་རི་ཛྙཱ་ན་ནཱ་མ། བོད་སྐད་དུ། རླུང་གནས་ནད་ཀྱི་བརྟག་པ་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ།། དགེ་དང་མི་དགེའི་ཆགས་པས་འཁོར་བའི་གཞི། །དེ་དག་ཆགས་བྲལ་རྣལ་འབྱོར་མྱ་ངན་འདས། །མེ་རླུང་ཆགས་པའི་གནས་སུ་གནས་འགྱུར་བ། །རླུང་གི་ཆུ་གནས་གཡོ་བའི་སེམས་ཉིད་དག །དེ་ཡིས་རྣམ་རྟོག་གང་ཡང་རིམ་གྱིས་འགགས། །དཔེར་ན་ཆུ་དང་ནམ་མཁའི་སྐྱེས་བུ་བཞིན། །མེ་རླུང་ནག་པོས་སྣང་བ་འདེད་གྱུར་པས། །དཀར་པོའི་ཤེལ་ལྟར་ལ་སོགས་ཡེ་ཤེས་འགྲུབ། །དང་པོའི་ཡན་ལག་མགོ་ནི་གཏི་མུག་གནས། །སྔར་ལྟར་བསྒོམས་པས་དེ་ཉིད་ཡེ་ཤེས་ཡིན། །དབང་པོ་ལྔ་ལ་ཉི་ཟླའི་མིག་གཉིས་ཆགས། །ལུས་ཀྱི་ཡན་ལག་ལྟེ་བའི་ཡེ་ཤེས་ནི། །ཆགས་པའི་འཁོར་ལོར་སྲོག་གི་རྩ་གནས་སོ། །དེ་ལ་ཟླ་གྲངས་རྩ་ནི་བཅུ་གཉིས་ལ། །ལུས་ཀྱི་ཚད་ནི་འདོམ་གང་གྲུ་བཞི་ཡིན། །འཛམ་བུའི་གླིང་བཞི་གླིང་ཕྲན་བརྒྱད་དག་བྱུང༌། །ཉི་ཟླའི་སྒོ་ནས་རླུང་ནི་ཡང་དག་འབྱུང༌། །ལྷོ་བྱང་གཉིས་དག་ཉི་ཟླའི་ལམ་ཡིན་ཏེ། །དབྱར་ཟླ་འབྲིང་པོ་བྱང་གི་བར་དུ་དགུ། །དགུན་ཟླ་འབྲང་བོ་ལྷ་རུ་ཤེས་པར་བྱ། །སྟོན་དཔྱིད་གཉིས་ཀྱི་འབྲིང་པོ་ཉིན་མཚན་མཉམ། །ད་ནི་རྣལ་འབྱོར་རླུང་གི་གྲངས་ལ་ནི། །སྐད་ཅིག་ཐང་ཅིག་ཡུད་ཙམ་གཅིག་ཡིན་ཏེ། །ཐུན་བརྒྱད་ཐུན་ཕྱེད་སུམ་བརྒྱ་དྲུག་ཅུ་གཞག །ལོ་གཅིག་ཧཱུཾ་ཉིད་ཐིག་ལེར་
― DTG053_Page_0061 ―
[མ་དཔེ་གཟིགས་ན་འདིར་གནོན།]
ཤེས་བར་བྱ། །ཉི་ཟླ་གཉིས་ཀྱི་སྒོ་ནས་རླུང་ལྔ་ནི། །རང་ནས་མི་རྒྱུ་གཞན་ནས་རྒྱུ་བ་དེས། །དཔལ་ལྡན་རྣལ་འབྱོར་རླུང་ལོག་ན་བར་འགྱུར། །ད་ལ་རླུང་གི་མིང་དང་གནས་རྣམས་ནི། །བརྟན་གཡོ་བར་གནས་མཁྲིས་རྒྱས་བདེ་གཤེགས་རླུང༌། །རིམ་པར་གཏི་མུག་ཆུ་རླུང་མགོ་ལ་རྒྱུ། །བད་ཀན་སྐྱེ་བས་རྣལ་འབྱོར་ལྷ་གནས་ཉམས། །གཡོ་བའི་རླུང་ནི་གཞན་གྱི་རྩ་ལ་རྒྱུ། །མདུད་པར་ཆགས་ན་དྲོད་ཉམས་གྲང་བ་སྟེ། །ཆུ་རླུང་བར་ན་མེ་རླུང་གནས་པ་དེ། །རྩུབ་པའི་རླུང་འཛིན་ངལ་དུ་བ་བྱས་པའི་ཚེ། །དྲག་པོའི་ཞེ་སྡང་མཐར་ཡང་སྙིང་རླུང་ལྡང༌། །འདུས་པའི་གནས་སུ་དུག་གསུམ་རླུང་འདུས་པ། །འདུས་པའི་ནད་ཀྱིས་སེམས་ཀྱི་དབང་པོ་འཁྲུལ། །བདེ་གཤེགས་གནས་སུ་མི་རྒྱུ་གཞན་རྒྱུ་ན། །རྣལ་འབྱོར་ལས་ཀྱི་ནད་དུ་ཤེས་པར་གྱིས། །སྨན་དང་སྨན་པ་རང་ལུས་གནས་པ་ལ། །ལུས་ཀྱི་དཀྱིལ་འཁོར་བརྒྱད་ཀྱི་ཐིག་ལེ་ལས། །སོར་ནི་བཅུ་གཉིས་བཅུ་གཉིས་སྟེང་དུ་ནི། །བཞི་བཞི་གནད་འཛིན་བརྒྱད་ལ་སེམས་གཏད་བྱ། །བུང་བའི་རླུང་འཛིན་འཁྲུལ་འཁོར་ནད་འདོན་བྱ། །དབུ་མར་མ་ཆུང་རླུང་ནི་རྩ་བཞི་རུ། །བཟུང་བས་རྣལ་འབྱོར་མངོན་རྟོགས་འདི་ལྟར་འཆར། །ས་ཡི་རླུང་གིས་ལུས་ལྕི་སེམས་མི་གསལ། །མི་རྟག་ཆུ་རྒལ་ཟླ་བ་མཐོང་བ་དང༌། །ཆུ་མིག་ལ་སོགས་རྟགས་ནི་སྣ་ཚོགས་འབྱུང༌། །རྣལ་འབྱོར་ཤ་རྒྱས་ལྡན་པ་ཤིན་ཏུ་དཀའ། །ཐང་ལ་འགྲོ་བར་འགྱུར་ན་གློ་སྙིང་བརྡུང༌། །རླུང་གི་རླུང་ནི་ཟིན་པའི་མངོན་རྟགས་ནི། །གྲང་བ་སྐྱེ་ཞིང་ལུས་ཁོལ་ཐིག་ལེ་འཛག །ཕོ་བ་ན་ཞིང་གཡང་ཟ་ཡན་ལག་འཁུམས། །མེ་རླུང་ཟིན་པའི་རྟགས་ནི་མཁྲིས་པ་རྒྱས། །སེམས་ཉམས་དྲོད་སྐྱེས་རོ་སྟོད་ལྕི་ཞིང་ན། །རྨི་ལྟས་མི་མཐོང་སྣང་བ་དམར་པོ་མཐོང༌། །འཆི་རླུང་གཡང་ཟ་འགྲོ་འདོད་སེམས་མི་དགའ། །རྨི་རྟགས་འཕུར་དང་ལྷུང་དང་ཕྲད་མི་ཐར། །བདེ་གཤེགས་རླུང་འཛིན་སེམས་བདེ་གཉིས་མེད་གནས། །བསུས་པའི་གེགས་སེལ་རིམ་བཞིན་འདི་ལྟར་བྱ། །དམིགས་པས་མེ་སྦར་ས་ཁམས་བསྲེག་པར་བྱ། །ཆུ་མིག་བརྒྱད་ལ་རྣལ་འབྱོར་རླངས་པ་འཐུལ། །ཆུ་བྲུབ་ས་སྤྱང་རླུང་གི་ཕྱག་དར་བྱ། །ཐོ་རངས་མི་བསྐྱོད་གྲང་ནས་བཏུང་བར་བྱ། །རླུང་ལ་མེ་བསྒོམ་ཧི་རྒྱུ་མར་
― DTG053_Page_0062 ―
[མ་དཔེ་གཟིགས་ན་འདིར་གནོན།]
ཆེན་དྲིལ། །བེམ་རྟོལ་བརྒྱབ་པས་བ་སྤུའི་བུ་ག་ཕྱེ། །འཁོར་ལོ་བསྒོམ་ཞིང་གྲང་བ་སེལ་བར་བྱེད། །དབུ་མར་མ་ཆུད་ཆུ་རླུང་གཞན་ཞུགས་ན། །བད་ཀན་ན་བས་བུ་གཉིས་དག་བྱེད། །ལུས་བཅའ་ཆུ་འབྲུབ་རླངས་པ་འཐུལ་བར་བསམ། །མེ་རླུང་གཉིས་ཀྱིས་འབྱུང་བར་སེམས་གཏད་དོ། །མཁྲིས་པ་ལྡང་ན་གངས་ཀྱི་ཆུ་འབྲུ་བ་བྱ། །བདུད་རྩིས་ལུས་གང་གངས་ནས་དུ་བ་འཐུལ། །སྤྱི་བོར་བླ་མའི་བདུད་རྩི་ལུས་ལ་བྱུག །རླུང་གི་རླུང་ནི་འཛིན་པའི་རྣལ་འབྱོར་པ། །བྱང་ཆུབ་སེམས་ཀྱི་ཏིང་ངེ་འཛིན་ལ་བསླབ། །གཞན་ཡང་ནད་རྟགས་ནད་འདོན་ཞལ་ལས་ཤེས། །རླུང་གནས་ནད་ཀྱི་བརྟག་པ་ཞེས་བྱ་བ་སློབ་དཔོན་ཨ་ཛོ་ཀིས་མཛད་པ་རྫོགས་སོ།།
| 
