དབང་གི་རིམ་པ་མདོར་བསྡུས་པ།
ཤེས་རབ་གསང་བ།
རྒྱ་གར་སྐད་དུ། སཾ་ཀྵིཔྟ་ཨ་བྷི་ཥེ་ཀ་ཀྲ་མ། བོད་སྐད་དུ། དབང་གི་རིམ་བ་མདོར་བསྡུས་པ། །དཔལ་གསང་བའི་འཇམ་དཔལ་ལ་ཕྱག་འཚལ་ལོ། །དབང་བསྐུར་བ་ལ་རྣམ་ལྔ་སྟེ། །དབང་བསྐུར་མི་རུང་སྐྱོན་བསྟན་དང༌། །སློབ་དཔོན་སློབ་མའི་མཚན་ཉིད་དང༌། །གནས་དང་དཀྱིལ་འཁོར་དབང་བསྐུར་བའོ། །དབང་བསྐུར་མི་རུང་རྣམ་གཉིས་ཏེ། །རྒྱུད་ཀྱི་ལུང་དང་སློབ་དཔོན་དགོངས། །ལུང་ལ་གསུམ་སྟེ་སྒྲ་མཁན་དང༌། །དགེ་སློང་དང་ནི་རྒན་པོའོ། །དགོངས་པ་ལ་ཡང་རྣམ་བཅུ་སྟེ། །མུ་སྟེགས་གླེན་པ་སྒྲ་ཤེས་དང༌། །ཉན་ཐོས་མ་ནི་རྒན་བོ་དང༌། །རང་གི་བུ་དང་བྱིས་པ་དང༌། །དད་པ་མེད་དང་རྒྱལ་པོ་ལ། །དབང་ནི་བསྐུར་བར་མ་གསུངས་སོ། །སློབ་དཔོན་མཚན་ཉིད་བཅུ་བཞི་སྟེ། །རིགས་བཟང་རབ་ཏུ་དཔའ་བོ་དང༌། །ཡེ་ཤེས་མཁྱེན་ལ་ཐུགས་རྗེ་ཆེ། །ཕྲག་དོག་འདོད་ཆགས་གཉིས་མི་མདའ། །ངོ་མ་
གཉིས་དང་སྙུན་མི་མངའ། །ཐམས་ཅད་མཚན་གྱིས་གང་བ་དང༌། །འཛམ་གླིང་གང་བའི་སྤྱན་མངའ་དང༌། །རྒྱུད་རྣམས་ཐམས་ཅད་རབ་ཏུ་མཁྱེན། །ཁྲོ་མེད་རབ་ཏུ་བཟང་བ་དང༌། །གཏོང་ཕོད་པ་དེ་སློབ་དཔོན་ནོ། །དཔལ་ཆེན་ཡེ་ཤེས་ཐིག་ལེ་ཡི། །རྒྱུད་ལས་རྡོ་རྗེ་སེམས་དཔས་གསུངས། །སློབ་མའི་མཚན་ཉིད་བཅུ་གཉིས་ཏེ། །ཁ་སྤུབ་འདུག་དང་རྡོལ་བ་མེད། །དབང་གི་སྣོད་རབ་ཡོད་པ་དང༌། །ཐོས་པ་མང་དང་དད་ཆེ་བ། །འདོད་ཆགས་ཆེ་དང་ཞི་འདྲ་དང༌། །ཐམས་ཅད་ཡོད་དང་གསང་ཐུབ་དང༌། །གཏོང་ཕོད་ཕྲག་དོག་ཆུང་བའོ། །གནས་བརྟག་པ་ལ་རྣམ་གཉིས་ཏེ། །རུང་དང་མི་རུང་བརྟག་པའོ། །མི་རུང་བ་ལ་རྣམ་པ་གསུམ། །རྒྱལ་པོ་མུ་སྟེགས་ཆོམ་རྐུན་གྱིས། །འཇིགས་པའི་ས་ནི་ངན་པ་ཡིན། །རུང་བའི་གནས་ནི་སྐྱོན་མེད་པའོ། །དཀྱིལ་འཁོར་ལ་ཡང་རྣམ་གསུམ་སྟེ། །རྡུལ་ཚོན་མེ་ཏོག་ཏིང་ངེ་འཛིན། །དབང་པོ་རབ་འབྲིང་དོན་དུ་བྱ། །གསུམ་ནི་རིགས་ཆེན་རྒྱ་མཚོ་ཡི། །རྒྱུད་ལས་དེ་སྐད་འབྱུང་བའོ། །དབང་བསྐུར་བ་ལ་རྣམ་བཞི་སྟེ། །བུམ་པའི་དབང་ནི་དང་པོ་སྟེ། །གསང་བ་ཤེས་རབ་ཡེ་ཤེས་དང༌། །དེ་ལྟར་དེ་བཞིན་པ་ཞི་པའི་དབང༌། །བུམ་པའི་དབང་ལ་བཅུ་གཅིག་སྟེ། །ཆུ་དང་དབུ་རྒྱན་རྡོ་རྗེ་དྲིལ། །མིང་དང་དམ་ཚིག་བརྟུལ་ཞུགས་དང༌། །བཀའ་སྩལ་ལུང་བསྟན་སློང་དཔོན་དབང༌། །གསང་གསུམ་གཞན་དུ་ཤེས་པར་བྱ། །ཐབས་དང་ཤེས་རབ་བདག་རིག་བྱ། །ཐབས་ནི་དེ་ལ་རྣམ་བཞི་སྟེ། །ཀྲྀ་ཡ་ཙ་ར་ཡོ་ག་དང༌། །ཡོ་གོཏྟ་ར་དང་རྣམས་སོ། །ཤེས་རབ་ཡོ་གཱ་ནུཏྟ་ར། །དབང་དེ་རྣམ་པ་གཉིས་ཡིན་ཏེ། །དགོངས་པ་བཤད་དང་གཉིས་སུ་གསུངས། །ཡོ་ག་མན་ཆད་གཅིག་ལས་མེད། །དེ་ནི་དངོས་གྲུབ་གྲུབ་པའི་དབང༌། །ཡོ་གོཏྟ་ར་རྣམ་གཉིས་ཏེ། །དགོངས་བཤད་བུམ་པ་དངོས་ཀྱི་དབང༌། །དགོངས་མ་ཡིན་ལ་རྣམ་དྲུག་སྟེ། །ལྷ་མིན་བརྡ་ཕྲད་བུམ་པའི་དབང༌། །དེ་ཡི་འབྲས་བུ་དགའ་བ་སྐྱེད། །བྷག་ཙུམ་སྐྲ་གཟུང་དབུ་རྒྱན་དབང༌། །པདྨར་རྡོར་བཅུག་རྡོ་རྗེའི་དབང༌། །དགའ་བ་མིན་པ་དགའ་བྱེད་མིན། །རྡོ་རྗེ་པད་བསྐྱོད་དྲིལ་བུའི་དབང༌། །དེ་ཡི་འབྲས་བུ་
རང་བཞིན་དགའ། །བདེ་བ་ཆེན་པོ་པདྨར་བཅས། །དེ་ནི་ཧ་སྐད་མིང་གི་དབང༌། །བདེ་བ་ཆེན་པོའི་རང་བཞིན་ནོ། །ངོ་བོ་འབྲས་བུ་གཉིས་པ་ཡིན། །པད་གནས་བྱང་ཆུབ་ལྕེ་ཡི་ས་བླང༌། །དེ་ནི་དམ་ཚིག་གསུམ་ཡིན་ནོ། །དེ་སྐད་རྡོ་རྗེ་སེམས་དཔའ་ཡིས། གསང་བའི་རྒྱ་མཚོའི་རྒྱུད་ནས་གསུངས། །དགོངས་པ་མ་ཡིན་བདེ་བའི་དོན། །གསང་བའི་རྒྱ་མཚོ་དེ་ལས་བྱུང༌། །གསང་བ་ཤེས་རབ་ཡེ་ཤེས་དབང༌། །ཨ་ནུཏྟ་རའི་དབང་དུ་འབྱུང༌། །དེ་ལྟར་བཞི་པ་ཅི་ལས་གསུངས། །ཤེས་རབ་ཡེ་ཤེས་དབང་གི་དོན། །ཤས་རབ་གང་ལགས་ཡེ་ཤེས་གང༌། །དེ་གཉིས་མེད་པའི་རང་བཞིན་མཁྱེན། །དེ་ཡི་དབང་ནི་བཞི་པའི་དོན། །འཁོར་ལོ་བཞི་ལ་དགའ་བཞི་གནས། །དེ་ཡི་ཡན་ལག་སྐད་ཅིག་བཞིའོ། །དང་པོ་སྤྲུལ་དང་ཆོས་འཁོར་ལོ། །ལོངས་སྤྱོད་བདེ་བའི་འཁོར་ལོ་བཞིའོ། །ལྟེ་བ་སྙིང་ག་མགྲིན་པ་དང༌། །སྤྱི་བོ་དག་ལ་རིམ་བཞིན་གནས། །དྲུག་ཅུ་རྩ་བཞི་བརྒྱད་དང་ནི། །བཅུ་དྲུག་སུམ་ཅུ་རྩ་གཉིས་སོ། །དེ་ཀུན་པདྨའི་འདབ་མ་ཡིན། །པདྨ་རེ་རེ་རྩ་རེ་ཡིན། །ཀ་ནས་བཟུང་སྟེ་ས་ཡི་བར། །གཡས་སྐོར་གཡོན་སྐོར་དྲུག་ཅུ་བཞི། །ཏྲཱཾ་ཧྲཱིཿ་ཁཾ་ཨཾ་ས་བོན་བཞི། །ལཾ་མཾ་བཾ་ཏཾ་མནན་པས་བརྒྱད། །ཐོག་མར་ཨ་དང་ཐ་མར་ཨ། །དེ་ལྟར་བཅུ་དྲུག་བསྐོར་བ་ཡིན། །ཨ་ལ་སོགས་པ་བཅུ་དྲུག་གིས། །གཡས་སྐོར་གཡོན་སྐོར་སུམ་ཅུ་གཉིས། །དེ་ལྟར་འཁོར་ལོའི་ས་བོན་ཡིན། །ཡཾ་ལས་རླུང་དཀྱིལ་གཞུ་འདྲ་དང༌། །རཾ་ལས་གྲུ་གསུམ་མེ་འདྲ་བསྐྱེད། །ཤེས་རབ་ཐབས་ལས་མེ་བྱུང་བས། །ལས་ཀྱི་རླུང་གིས་ཡང་དགའ་བར། །ལྟེ་བའི་རྩ་ཡི་དབུས་ནས་ལངས། །དམ་ཚིག་འཁོར་ལོའི་མཁའ་འགྲོ་ཚིག །ཆོས་དང་ལོངས་སྤྱོད་རྫོགས་ལམ་གནས། །ལོངས་སྤྱོད་འཁོར་ལོ་ལན་གསུམ་བསྐོར། །ན་ས་གཡང་བྱུང་སྨིན་ཕྲག་གནས། །ཨུ་རྒྱན་ལམ་བྷུ་ཛ་ལནྡྷར། །ཕྱིན་ནས་བདེ་ཆེན་འཁོར་ལོར་ཞུགས། །ཆོས་དབྱིངས་ཡེ་ཤེས་བདུད་རྩི་གསོལ། །བདུད་རྩི་ཁྱེར་ནས་སླར་ལམ་ཞུགས། །སྨིན་ཕྲག་སྦུ་གུར་ལམ་ཞུགས་ཏེ། །ལོངས་སྤྱོད་འཁོར་ལོར་ངལ་བསོས་ཏེ། །སྔར་ཚིག་མཁའ་འགྲོ་
སོས་ཀར་འགྱུར། །ལྟེ་བའི་འཁོར་ལོ་ལ་གནས་ནས། །ཡང་འགྲོ་ཡང་འོང་མཐོང་མི་འགྱུར། །སྐྲ་ཡི་རྩེ་མོ་ཁྲི་ཡི་ཆ། །དེ་ལྟར་རྟོགས་པ་སློབ་དཔོན་དྲིན། །གཏུམ་མོ་དེ་ལ་བདག་ཕྱག་འཚལ། །དབང་གི་དོན་མདོར་བསྡུས་པ་སློབ་དཔོན་དཔལ་ཤེས་རབ་གསང་བའི་ཞལ་སྔ་ནས་ཀྱིས་མཛད་པ་རྫོགས་སོ།།