ལྟུང་བ་སྦོམ་པོ།
རྟ་དབྱངས།
རྒྱ་གར་སྐད་དུ། སྠཱུ་ལ་པཏྟི། བོད་སྐད་དུ། ལྟུང་བ་སྦོམ་པོ། ཐུགས་རྗེ་ཆེན་པོ་ལ་ཕྱག་འཚལ་ལོ། །རྡོ་རྗེ་སེམས་དང་བླ་མ་ཡི། །ཞབས་ཀྱི་པདྨར་རབ་བཏུད་དེ། །རྣལ་འབྱོར་སྔོམ་པར་གང་གསུངས་པའི། །ལྟུང་བ་སྦོམ་པོ་བཤད་པར་བྱ། །རྣལ་འབྱོར་གང་ཞིག་རིག་མ་ནི། །དམ་ཚིག་མེད་པའང་སྟོབས་ཀྱིས་སྤྱོད། །དེ་ལ་འཕྱ་བར་བྱེད་པ་ཡང༌། །དེ་ཡི་ལྟུང་བ་དང་པོར་གསུངས། །རྒྱུད་ལས་མ་གསུངས་རིམ་ཉིད་ཀྱིས། །གང་ཞིག་བདུད་རྩི་བསྟེན་པ་ཡང༌། །དེ་ལ་ངན་འགྲོར་ལྟུང་བ་ཡི། །ལྟུང་བ་གཉིས་པར་འགྱུར་བ་ཡིན། །རྨོངས་པ་གང་ཞིག་ཚོགས་འཁོར་ལོ། །རྩོད་པར་སངས་རྒྱས་ཀྱིས་གསུངས་པའི། །དམ་ཚིག་ལ་ནི་བཞད་གད་བྱེད། །དེ་ལ་གསུམ་པར་འགྱུར་བ་ཡིན། །གསང་བའི་ཆོས་ནི་གང་གསུངས་པ། །བློ་ངན་གསང་བར་མི་བྱེད་ན། །རྨོངས་པའི་རྣལ་འབྱོར་བ་དེ་ལ། །སྦོམ་པོའི་ལྟུང་བ་བཞི་པར་འགྱུར། །དད་ལྡན་ཆོས་ལ་འདྲི་བ་ན། །ཆོས་ཉིད་གཞན་དུ་སྟོན་པ་ནི། །དེ་ལ་སྦོམ་པོར་བཤད་པ་ཡི།།
ལྟུང་བ་ལྔ་པར་རྒྱལ་བས་གསུངས། །ཉན་ཐོས་ཐེག་པ་ཅན་དག་དང༌། །ཞག་བདུན་དུ་ནི་ལྷན་ཅིག་གནས། །སྦོམ་པོར་གྲགས་པ་དེ་ལ་ནི། །དྲུག་བར་རབ་ཏུ་འགྱུར་བ་ཡིན། །ཡང་དག་དེ་ཉིད་མི་ཤེས་པར། །གང་ཞིག་དེ་ཉིད་ང་རྒྱལ་བྱེད། །རྨོངས་པའི་སེམས་ལྡན་དེ་ལ་ནི། །སྔོམ་པོ་ཞེས་བྱ་བདུན་པ་ཡིན། །གང་ཞིག་སྣོད་མིན་སེམས་ཅན་ལ། །ཕྱི་ཡི་ཆོས་མོས་དེ་ལ་ཡང༌། །གསང་བའི་ཆོས་ནི་ཡང་དག་སྟོན། །དེ་ལ་སྦོམ་པོ་བརྒྱད་པར་འགྱུར། །བློ་ལྡན་བྱང་ཆུབ་སེམས་དཔའ་ཡིས། །འདི་དག་སྤང་བར་བྱ་བ་སྟེ། །གལ་ཏེ་བྱུང་ན་ཆོག་བཞིན། །བཤགས་ན་དམྱལ་བར་མི་འགྲོའོ། །ཐབས་ནི་འདི་དག་ཉིད་ཀྱིས་ནི། །བསྙེན་པར་བཤགས་པར་མི་བྱེད་ན། །བླ་མས་སློབ་མིན་དེ་བཞིན་དུ། །རྡོ་རྗེའི་སྦུན་གྱི་ཚོགས་ཀྱིས་ཀྱང༌། །ལྟུང་བ་བསྡུས་པ་བྱས་པ་ལས། །བདག་གིས་བསོད་ནམས་གང་ཐོབ་པ། །འགྲོ་ཀུན་ལྟུང་བས་མི་གོས་ཤིང༌། །དམ་ཚིག་སྣོད་དུ་འགྱུར་བར་ཤོག །ལྟུང་བ་སྦོམ་པོ་བསྡུས་པ་སློབ་དཔོན་རྟ་དབྱངས་ཀྱིས་མཛད་པ་རྫོགས་སོ།།