རྡོ་རྗེ་སེམས་དཔའི་སྒྲུབ་ཐབས།
རྡོ་རྗེ་གདན་པ།
རྒྱ་གར་སྐད་དུ། བཛྲ་སཏྭ་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་སེམས་དཔའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐོག་མར་བདག་ཉིད་སྟན་བདེ་བ་ལ་འདུག་སྟེ། སྐྱིལ་མོ་ཀྲུང་གིས་གནས་ལ། སེམས་ཅན་ཐམས་ཅད་འཁོར་བའི་སྡུག་བསྔལ་ལས་བསྒྲལ་ཏེ། སངས་རྒྱས་དང་བྱང་ཆུབ་སེམས་དཔའི་ས་ལ་དགོད་པར་བྱའོ་ཞེས་པའི་སེམས་བསྐྱེད་པ་སྔོན་དུ་སོང་བའི་རྗེས་ལ། དེ་ནས་རང་ཐ་མལ་པར་གནས་པའི་སྤྱི་བོའི་སྟེང་དུ་པོཾ་ལས་པདྨ་དཀར་པོ། །དེའི་སྟེང་དུ་ཨ་ལས་ཟླ་བའི་དཀྱིལ་འཁོར་གང་བ། དེའི་སྟེང་དུ་ཧཱུཾ་དཀར་པོ་ཡོངས་སུ་གྱུར་པ་ལས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་འོད་ཟེར་ཁ་དོག་ལྔ་འཕྲོ་བ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་མཛེས་པ། ཕྱག་གཡས་པ་རྡོ་རྗེ་ཐུགས་ཀར་འཛིན་པ། གཡོན་པས་དྲིལ་བུ་རྐེད་པར་འཛིན་པ། སྐུ་རོལ་པས་བཞུགས་པ། ཞབས་གཡས་པ་ཅུང་ཟད་བརྐྱང་བའི་མཐེབ་ཆེན་གྱིས་བདག་གིས་ཚངས་བུག་ལ་རེག་པར་བསམས་ལ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ལ་ཡི་གེ་བརྒྱ་བས་བསྐོར་ནས་ཡོད་པར་བསམས་ལ། དེ་ལས་འོད་འཕྲོས་པས་འོག་མིན་ན་བཞུགས་པའི་དེ་བཞིན་གཤེགས་པའི་ཐུགས་ཀ་ནས་བདུད་རྩིའི་ཆུ་རྒྱུན་འོ་མ་ལྟ་བུ་དྲངས་ནས། རྡོ་རྗེ་སེམས་དཔའི་ཐུགས་ཀར་ཞུགས་ནས་ཞབས་ཀྱི་མཐེབ་ཆེན་གྱི་སྣ་བརྟོལ་ནས་བདག་གི་ཚངས་པའི་བུ་གནས་ཞུགས་པས་ལུས་ཐམས་ཅད་འཆི་མེད་ཀྱི་བདུད་རྩིས་གང་བར་བསམས་ཏེ། དེས་བདག་གིས་ཚེ་རབས་ཐོག་མ་མེད་པ་ནས་བསགས་པའི་མཚམས་མེད་པ་ལྔ་ལ་སོགས་པ་བྱས་པའི་སྡིག་པ་ཐམས་ཅད་དུད་ཁུ་ལྟ་བུ་རྐང་མཐིལ་ནས་འཐོན་པར་བསམས་ཏེ་ལུས་ཤེལ་དག་པ་ལྟར་ཕྱི་ནང་ས་ལེ་བར་བསམ་མོ། །དེ་ནས་དངོས་སམ་ཡིད་ཀྱིས་མཆོད་པ་དབུ་བར་བྱའོ། །དེ་ནས་རིག་སྔགས་བརྒྱ་པོ་ཇི་ལྟ་བ་བཞིན་དག་པར་བརྗོད་དོ། །དེ་ནས་དཔལ་རྡོ་རྗེ་སེམས་དཔའི་ཞལ་ནས་རིགས་ཀྱི་བུ་ཁྱོད་ཀྱི་སྡིག་པ་ཐམས་ཅད་དག་གོ་ཞེས་གསུང་བར་བསམས་ལ་དེ་ཉིད་དུ་ཐི་མ་པར་བསམ་མོ། །བདག་ཉིད་ནུས་
ལྡན་ཀུན་གྱི་མཆོག་ཏུ་གྱུར་པར་ཤེས་པར་བྱའོ། །ལམ་ཐམས་ཅད་ཀྱི་དག་བྱེད་ཀྱི་ཐབས་དཔལ་རྡོ་རྗེ་སེམས་དཔའི་ཡི་གེ་བརྒྱ་བའི་སྒྲུབ་ཐབས་བླ་མ་མངོན་ཤེས་ཅན་རྡོ་རྗེ་གདན་པས་མཛད་པ་རྫོགས་སོ།། །།ཡུལ་དབུས་ཀྱི་དཔེ་ཇི་ལྟ་བ་བཞིན་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་གུས་པས་བསྒྱུར་བའོ།།