ཐིག་ལེ་བཅུ་དྲུག་གི་ཉམས་ལེན།
ཀཾ་ཀ་ལེ་པ།
རྒྱ་གར་སྐད་དུ། ཥོ་ཌ་ཤ་བིནྡུ་བྷཱ་བ་ན་ནཱ་མ། བོད་སྐད་དུ། ཐིག་ལེ་བཅུ་དྲུག་གི་ཉམས་ལེན་ཞེས་བྱ་བ། ཡུམ་བདག་མེད་མ་ལ་ཕྱག་འཚལ་ལོ། །རང་ལུས་ཁོང་སྟོང་བསམ་བྱས་ནས། །མཚན་མེད་ཨ་པ་དྷཱ་ཏཱི་ལ། །འཁོར་ལོ་བཞི་ནི་བསམ་བར་བྱ། །ཡི་གེ་དྲུག་ཅུ་རྩ་བཞི་ནི། །སྤྲུལ་པའི་འཁོར་ལོར་བྱིན་གྱིས་བརླབས། །བདེ་གཤེགས་ལྔ་དང་ལྷ་མོ་རྣམས། །འདབ་བརྒྱད་པདྨར་དགོད་པར་བྱ། །ཁམས་དང་ཕུང་པོ་དག་པའི་ཕྱིར། །དབྱངས་ཅན་བཅུ་དྲུག་ལོངས་སྤྱོད་བསྒོམ། །དེ་རྣམས་ཉིས་འགྱུར་སྤྱི་བོ་རུ། །བདག་ཉིད་བསྲུང་བའི་མན་ངག་གོ །བཅུ་དྲུག་ཐིག་ལེ་རབ་ཏུ་འབར། །རྩ་བརྒྱད་ཐིག་ལེ་རྒྱུ་བ་ཡིན། །བཞི་པོ་ཞུ་སྟེ་རོལ་པ་གཉིས། །གཉིས་ཀྱི་ཕྱེད་ནི་བདག་མེད་མ། །བཅུ་དྲུག་ཕྱེད་ཕྱེད་གྲངས་ཡིན་ནོ། །ཀ་ནས་བརྩམས་ནས་མ་ཡི་བར། །རེག་བྱེད་ཉི་ཤུ་རྩ་ལྔ་ཡིན། །ཡ་ནས་བརྩམས་ནས་ཧ་ཡི་བར། །མི་རེག་མིང་ཅན་བརྒྱད་ཡིན་ནོ། །བསྡུས་པ་ཨཱ་ཕྱེད་ཀཱ་ཕྲེང་གཉིས། །སྤྲུལ་པའི་འཁོར་ལོར་བསམ་པར་བྱ། །ཉི་མའི་འོད་ཀྱིས་དྲོས་ཙམ་ཅན། །ཁམས་གསུམ་སྲེག་ཅིང་ཞུ་བར་བསམ། །ཚེས་ཀྱི་རིམ་པའི་རྗེས་འབྲངས་ནས། །རི་བོང་ཅན་གྱིས་རྒྱས་བར་འགྱུར། །མཁའ་འགྲོ་ལོངས་སྤྱོད་བདག་ཐིམ་ནས། །དགའ་བའི་བདག་ཉིད་སྐད་ཅིག་ལ། །དཔའ་རྒྱལ་སྙིང་རྗེ་ཆེན་པོ་སྐྱེ། །ཡང་དག་ཟུང་འཇུག་གྲུབ་པ་ཡིས། །སྒྲབ་པ་ཐམས་ཅད་དག་པར་འགྱུར། །སྐྱེ་འགག་མེད་པའི་རྣལ་འབྱོར་ནི། །ཀཾ་ཀ་ལི་བདག་གྲུབ་པ་ཐོབ། །ཀྱེ་ཧོ་མ་ཡེངས་རྣལ་འབྱོར་པ། །རང་གི་སེམས་ལ་ཉམས་ལེན་གྱིས། །སློབ་དཔོན་ཀཾ་ཀ་ལེ་པས་མཛད་པ་འཁོར་ལོ་བཞིའི་ཉམས་ལེན་གྱི་ཞལ་གདམས་རྫོགས་སོ།།