ཨ་ཕྲེང་ཀ་ཕྲེང་གི་སྔགས་ཀྱི་རིམ་པ།
གནྡྷ།
རྒྱ་གར་སྐད་དུ། ཨཱ་ལི་ཀཱ་ལི་མནྟྲ་ཛྙཱ་ན་ནཱ་མ། བོད་སྐད་དུ། ཨ་ཕྲེང་ཀ་ཕྲེང་གི་སྔགས་ཀྱི་རིམ་པ་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། དབྱངས་དང་གསལ་བྱེད་བཞི་བཅུ་རྩ་དགུ་ཡི། །བདག་གཞན་སྒྲ་ཡི་རིག་པའི་སྒྲ་དོན་ནི། །བ་རྫི་ལ་སོགས་གྲངས་ཀྱང་དེ་དོན་རྟོགས་པ་མེད། །དེ་བྱིར་གསལ་དོན་བདག་གིས་བཤད་པར་བྱ། །སྒྲ་ཡི་གནས་ནི་བརྒྱད་ཡིན་ཏེ། །རྐན་དང་ལྕེ་དང་སོ་རྣམས་ཏེ། །སྤྱི་བོ་མགྲིན་པ་མཆུ་དང་ནི། །ཁོད་པ་སྣ་ལ་རྣམ་པར་གནས། །དེ་ཡི་དང་པོ་ཨ་ཕྲེང་ནི། །ཐུན་ཕྱེད་བཅུ་དྲུག་ལ་སོགས་ལྡན། །ཤེས་རབ་མེ་ལོང་ཡེ་ཤེས་ཏེ། །བློ་དང་ལྡན་པས་ཤར་པར་བྱ། །དེ་ཡི་ཐོབ་མ་བཅུ་བཞི་པ། །དབྱངས་ཅན་སྒྲ་གསལ་ཡི་གེའོ། །དེ་དག་རྣམས་ཀྱི་དང་པོ་ནི། །བཅུ་ནི་མཉམ་པའི་ཡེ་ཤེས་སོ། །སྐབས་འབྱུང་ལྔ་ནི་ཐུང་བ་སྟེ། །གཞན་རྣམས་རིང་བར་ཤེས་བར་བྱ། །དབྱངས་རྣམས་ཀྱི་ནི་ཐོག་མ་གཉིས། །སྤངས་ཏེ་བཅུ་བཞིའི་མིང་ཅན་ནོ། །ཨེ་ཨཻ་ཨོ་ཨཽ་བཞི་དག་ནི། །དོན་དམ་ཀུན་རྫོབ་འབྲལ་ཡིག་གོ །ཨ་ནི་སྟོང་པའི་ཐིག་ལེའོ། །ཟླ་བ་ཉི་མ་གཏུམ་མོའོ།། ཐིག་ལེ་གཉིས་ལྡན་ཨ་ཡིག་ནི། །དྲག་པོའི་སྒྲ་ནི་དབྱེ་བར་བྱེད། །རྀ་རཱྀ་ལྀ་ལཱི་འབྱུང་བ་བཞི། །དབྱེ་བས་སྲེག་བྱེད་ཡི་གེའོ། །ཐུང་བའི་མིག་འཛུམས་སྐད་ཅིག་གཅིག །མིག་འཛུམས་རིང་བ་སྐད་ཅིག་གཉིས། །སྐད་ཅིག་གསུམ་པ་འབོད་ཡིག་ཡིན། །སྐད་ཅིག་ཕྱེད་པ་གསལ་བྱེད་དེ། རྣལ་འབྱོར་གཡོན་གྱི་ཕྱོགས་སུ་ནི། །དབྱངས་ཅན་བཅུ་དྲུག་ཤེས་རབ་བོ། །དེ་རྣམས་སྒྲ་གནས་འདི་ཡིན་ཏེ། ཨ་ཀུ་ཧ་ཡིག་ཐིག་ལེ་གཉིས་ལ་ལྷུང༌། །ཨ་ནི་ཁོང་གི་ཡི་གེའོ། །ཨི་ཙུ་ཡ་ཤ་རྐན་ལ་གནས། །ལྀ་ཏུ་ལས་སོ་འབྱུང་ངོ༌། །རྀ་ཊུ་ར་ཥ་སྤྱི་བོར་གྲགས། །ཨཾ་ནི་འོད་གསལ་
སྣ་ལྡན་ཏེ། །ལྟེ་བར་གནས་ཏེ་གྱེན་ལ་རྒྱུ། །ཨེ་ཨེ་མགྲིན་པ་ཨོ་ཨཽ་མཆུ། །དེ་ཡི་ཐོག་མར་ཆོས་དབྱིངས་སོ། །དེ་ལྟར་ཨ་ཕྲེང་བཤད་བྱས་ནས། །ཨ་ཀ་ཙར་ཏ་པ་ཡེ་ཤ་སྟེ། །རྩ་བའི་སྒྲས་ནི་དེ་རྣམས་སོ། །ཀ་ལས་བརྩམས་ཏེ་ཧ་ཡི་མཐར། །གཡས་ཕྱོགས་གསལ་བྱེད་ཤེས་པར་བྱ། །ཀ་ཕྲེང་ལྔ་ཚན་ལྔ་པོ་སྟེ། །བཞི་ཡི་སྒྲ་ཡི་རེག་པའོ། །ཤ་ཥ་ས་ཧ་བཅས་པ་ནི། །ཐོག་མར་གཉིས་གཉིས་གྲངས་མིན་ནོ། །ལྷག་མ་གསུམ་གསུམ་སྒྲ་ཡིན་ཏེ། །ལྔ་ཚན་ལྔ་ནི་སྣ་ལས་འབྱུང༌། །མཐའ་ལ་གནས་པའི་འབྱུང་བ་བཞི། །རྣལ་འབྱོར་ཀུན་རྫོབ་འདོད་པས་བཅད། །མཚན་ལྔ་ཡི་ནམ་མཁའ་ལ། །ཤ་ཥ་ས་ཧ་དྲོད་ཅན་གནས། །ཀྵ་ནི་ཀཱ་ལི་མ་མོ་འདུས། །དེ་ནི་འཁོར་ལོའི་རྣལ་འབྱོར་རོ། །བསྐྱེད་པའི་རིམ་པའི་དབྱེ་བ་ཡིས། །རྒྱུ་ཡི་ཡི་གེ་བཤད་པར་བྱ། །ཀ་ནས་བརྩམས་ནས་ཧ་ཡི་བར། །སྟིར་རོ་ཡི་གདན་ཡིན་ནོ། །ཡ་ར་ལ་བ་མ་ཡིས་བརྒྱན། །མཁའ་འགྲོ་རྣམས་ཀྱི་བསྐྱེད་ཐབས་སོ། །ཀཾ་ནི་ཐོད་པ་ཁ་ཊྭཱཾ་ག །ཚ་ནི་ཀེང་རུས་གདུགས་ཡིན་ཏེ། །ང་ཚན་ལྔ་ནི་ཉི་མ་ཡིན། །ཤ་ཥ་དུར་ཁྲོད་ཤེས་པར་བྱ། །ས་བོན་ཡི་གེ་བཤད་བྱས་ནས། །ཀཱ་ལི་རྣལ་འབྱོར་ངོ་སྤྲོད་བསྟན། །ཀ་ཚན་ཡ་དང་བཅས་པ་ནི། །ཟླ་གམ་སྔོན་པོ་ནང་ནུབ་ལ། །ཕུ་ཕུ་ས་དང་གཞན་ལ་ཆགས། །ཇི་ལྟར་རི་མོ་བྲི་དང་མཐོང༌། །ཤར་གྱི་ཡི་གེ་རླུང་ཡིན་ནོ། །ཙ་ཚད་ར་དང་ཤ་དང་བཅས། །གྲུ་གསུམ་དམར་དང་ཉི་མ་ཕྱེད། །ཞེ་སྡང་དུས་སུ་སྤྲུལ་ཡང་བྲི། །ལྷོ་ཕྱོགས་དྲག་པོའི་གནས་ཡིན་ནོ། །ཊ་ཚན་བྷ་དང་བཅས་པ་ནི། །ཟླུམ་ལ་དཀར་ཏེ། སྔ་དྲོའི་དུས། །ཀ་ལི་ཛན་དང་འབུག་ཀ་ནི། །གཏི་མུག་བྱ་ཡི་རི་མོ་ཅན། །ནུབ་ཀྱི་ཕྱོགས་སུ་མོ་གདོན་ནོ། །ཏ་ཚན་ཀྵ་དང་ཎ་བཅས་པ། །གྲུ་བཞི་ལྗང་སེར་ནམ་ཕྱེད་ནི། །ས་དང་རླུང་གི་ཁམས་ཡིན་ནོ། །ཕྲག་དོག་དམར་པོ་རྒྱས་པའི་དུས། །རྨི་ལམ་རྟ་དང་སྟག་མཐོང་བ། །རྒྱལ་པོས་བདག་གདོན་གྱི་ངོ༌། །བྱང་གི་ཕྱོགས་སུ་འཛིན་པར་བྱ། །བ་ཚན་སྔོན་པོ་ཆུ་རླུང་སྟེ། །གྲུ་གསུམ་ཟླ་གམ་དབྱིབས་དང་ལྡན། །ནང་ནུབ་དུས་སུ་ཁམས་ལྕི་བ། །རིག་པས་རྣལ་འབྱོར་བརྟག་པར་བྱ། །དེ་བཞིན་འབྱུང་ཆུང་ཉི་ཤུ་ལྔའི། །གདམས་པ་ཞལ་ནས་བླང་བར་བྱ། །དྲི་མེད་ཤེས་
རབ་བརྒྱན་པ་ཡི། །ཐབས་དང་ལྡན་པའི་སྦྱོར་བ་ནི། །ཐ་སྙད་མུན་པ་རབ་བསལ་བའི། །དེ་དག་སེམས་ཉིད་སྟོང་པ་བདག །ཐ་སྙད་ལ་བཀོད་དགེ་བ་དེས། །འགྲོ་དྲུག་སྡུག་བསྔལ་ཟད་ཕྱིར་བསྔོ། །ཨཱ་ལི་ཀཱ་ལིའི་རྣལ་འབྱོར་ཞེས་བྱ་བ་སློབ་དཔོན་གནྡྷས་མཛད་པ་རྫོགས་སོ།། །།