ལྷན་ཅིག་སྐྱེས་པའི་རང་བཞིན།
ཚེམ་བུ་པ།
རྒྱ་གར་སྐད་དུ། ས་ཧ་ཛ་ཨ་ནནྟ་སྭ་བྷཱ་བ་ན་ནཱ་མ། བོད་སྐད་དུ། ལྷན་ཅིག་སྐྱེས་པའི་རང་བཞིན་ཞེས་བྱ་བ། རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །འཁོར་ལོ་རྣ་རྒྱན་མགུལ་རྒྱན་གདུ་བུ་དང༌། །སྐ་རགས་ཁྱོད་ལ་བཟང་ཞིང་རབ་ཏུ་མཛེས། །བོ་ལ་ཀཀྐོ་ལ་མྱོས་ངོ་མཚར་ཚེ། །སྐད་ཅིག་གཅིག་ལ་ཧེ་རུ་ཀ་དཔལ་དགྱེས། །ཀྱེ་ཧོ་རྩ་ལག་འདི་ལ་བདག་ཡིད་དགའ། །ལུས་ངག་སེམས་ཀྱི་རོ་ནི་གཅིག་བྱས་ནས། །ནམ་མཁར་བསྡུས་ནས་རྣལ་འབྱོར་སྤས་པར་འགྱུར། །རྣལ་འབྱོར་མ་ཀྱེ་འདི་ལ་བདག་ཡིད་དགའ། །འཇིགས་བྱེད་དུས་མཚན་ཞབས་ཀྱི་འོག་ཏུ་མནན། །ནམ་མཁའི་མཐར་ཐུག་ཧེ་དང་ཧཱུཾ་སྒྲ་སྤྲོ། །ཕྱོགས་བཅུར་ཆང་གིས་མྱས་པ་ཡི། །ཀྱེ་ཧོ་དཔལ་ལྡན་རྣལ་འབྱོར། །ཀྱེ་མ་དཔའ་བོ་རྣལ་འབྱོར་མེད། །སྟོང་པ་དང་ནི་སྙིང་རྗེའི་རང་བཞིན་ལ། །དངོས་དང་དངོས་མེད་གཉིས་ཀ་མེད། །པྲ་ཕབ་གཟུགས་བཞིན་མཁའ་ལ་སྣོད། །ཀྱེ་ཧོ་རྣལ་འབྱོར་མ་དང་ཡུམ་ལྔའི་གྲོང༌། །ཨཱ་ལི་དང་ནི་ཀཱ་ལི་ཉི་མ་རྣམས། །མད་པ་རྨོངས་པ་རྣམས་ཀྱང་གཏི་མུག་ཆེ། །ཨཱ་ལི་རྣམས་དང་ཀཱ་ལི་ཉི་ཟླ་དག །མེད་ལ་ཤེས་མིན་ཕྱུགས་འདྲ་ཐེ་ཚོམ་མེད། །དཔའ་བོ་རྣལ་འབྱོར་མ་རྣམ་སྦྱོར་བ་ཡིས། །སྲིད་པའི་འཆིང་བ་གཅོད་པ་ངོ་མཚར་
ཆེ། །ཀྱེ་ཧོ་རྩ་ལག་འདི་ལ་བདག་ཡིད་དགའ། །ལུས་ངག་སེམས་ཀྱི་རོ་ནི་གཅིག་བྱས་ནས། །ནམ་མཁའི་ཁམས་སུ་བསྡུས་ནས་སྦས་པར་འགྱུར། །རྣལ་འབྱོར་མ་ཀྱེ་འདི་ལ་བདག་སེམས་དགའ། །ཚད་མེད་གནས་བཞིའི་དབུས་སུ་ནི། །བདག་གིས་སྤྱིར་ཡང་དངོས་པོ་བརྗོད་དུ་མེད། །དཔའ་བོ་རྣལ་འབྱོར་དབང་ཕྱུག་ངོ་མཚར་ཆེ། །ཇི་ལྟར་ཆུ་གཏིང་ཆུ་ཟླ་དང་འདྲེས་ལྟར། །རྣལ་འབྱོར་མ་ཀྱེ་འདི་ལ་བདག་སེམས་དགའ། །ཤ་རློན་དམ་ཚིག་རྫས་འདི་ངོ་མཚར་ཆེ། །གོ་ཀུ་ལ་སོགས་དམ་ཚིག་ལ་ཆགས་པས། །དེ་ཡིས་བདག་མེད་མ་ནི་གར་མཛད་དོ། །ཀྱེ་ཧོ་བདེ་གཤེགས་རྣམ་སྣང་ཕྱག་རྒྱ་ཅན། །རྣལ་འབྱོར་མ་ཀྱེ་འདི་ལ་བདག་སེམས་དགའ། །ལྷན་ཅིག་སྐྱེས་པའི་རག་བཞིན་ཞེས་བྱ་བ་སློབ་དཔོན་ཀནྠ་རིས་མཛད་པ་རྫོགས་སོ།།