སེམས་ཉིད་ཀྱི་རྟོགས་པ་འཇོམས་པའི་ལྟ་བ།
ལ་ཀྵ་མཱི་ཡི།
རྒྱ་གར་སྐད་དུ། ཙིཏྟ་ཀལྤ་པ་རི་ཧ་ར་དྲྀཥྚི་ནཱ་མ། བོད་སྐད་དུ། སེམས་ཉིད་ཀྱི་རྟོག་པ་འཇོམས་པའི་ལྟ་བ་ཞེས་བྱ་བ། གཤིན་རྗེ་གཤེད་ལ་ཕྱག་འཚལ་ལོ། །མར་སར་མགོ་བོ་བཅད་བ་ཡིས། །སྟ་རེའི་སོ་ནི་འཆག་པར་བྱེད། །སྦལ་པས་གླང་པོ་མིད་པར་འགྱུར། །ཀྱེ་མ་ཤིང་ཐུན་དགོད་པར་བྱེད། །ཀྱེ་མ་ངོ་མཚར་མེ་གོ་ཀྱེ། །སེམས་ལ་ཐེ་ཚོམ་མ་བྱེད་ཅིག །མཚར་ན་ཨ་བ་དྷཱུ་ཏཱི་པ། །སེམས་ལ་རྟོག་པ་མ་བྱེད་ཅིག ། ཁོ་ཡིས་མ་བཤད་འདི་མ་གོ །ནམ་མཁའ་ལས་ནི་མེ་ཏོག་འབྱུང༌། །ཀྱེ་མ་ངོ་མཚར་མེ་གོ་ཀྱེ། །སེམས་ལ་ཐེ་ཚོམ་མ་བྱེད་ཅིག །མཚར་ན་ཨ་བ་དྷཱུ་ཏཱི་པ། །སེམས་ཀྱི་ཐེ་ཚོམ་ཅི་ཞིག་བྱ། །ཀྱེ་མ་མོ་གཤམ་བུ་སྐྱེས་ན། །ཁྲི་ཡང་གར་ནི་བྱེད་པར་འགྱུར། །རས་བལ་དཀོན་པར་ཐོབ་འགྱུར་བས། །ནམ་མཁའི་གོས་ཅན་དུ་བར་བྱེད། །ཀྱེ་མ་ངོ་མཚར་མེ་གོ་ཀྱེ། །སེམས་ཀྱི་ཐེ་ཚོམ་ཅི་ཞིག་བྱ། །མཚར་ན་ཨ་བ་དྷཱུ་ཏཱི་པ། །སེམས་ལ་ཐེ་ཚོམ་མ་བྱེད་ཅིག །ཀྱེ་མ་གླང་ཆེན་ཁྲི་ལ་འདུག །སྦྲང་བུ་གཉིས་ཀྱིས་འདེགས་པར་བྱེད། །དམུས་ལོང་ལམ་སྟོན་ངོ་མཚར་
ཆེ། །ལྐུགས་པས་གཏམ་ནི་སྨྲ་བར་བྱེད། །ཀྱེ་མ་ངོ་མཚར་མེ་གོ་ཀྱེ། །སེམས་ལ་ཐེ་ཚོམ་མ་བྱེད་ཅིག །མཚར་ན་ཨ་བ་དྷཱུ་ཏཱི་པ། །སེམས་ཀྱི་ཐེ་ཚོམ་ཅི་ཞིག་བྱ། །བྱི་བས་བྱི་ལ་འདེད་པ་མཚར། །དེ་མཐོང་ངོ་མཚར་སྐྱེ་བར་འགྱུར། །བོང་བུ་མྱོས་པ་མཐོང་འགྱུར་བས། །གླང་པོ་རྣམས་ཀྱང་བྲོས་པར་བྱེད། །ཀྱེ་མ་ངོ་མཚར་མེ་གོ་ཀྱེ། །སེམས་ལ་ཐེ་ཚོམ་མ་བྱེད་ཅིག །མཚར་ན་ཨ་ཝ་དྷཱུ་ཏཱི་པ། །སེམས་ཀྱི་ཐེ་ཚོམ་ཅི་ཞིག་བྱ། །ཀྱེ་མ་སྤྲེའུ་ལྟོགས་པ་ནི། །རྡོ་བ་ཁམ་གྱིས་ཟ་བར་བྱེད། །ཀྱེ་མ་སེམས་ཀྱི་ཉམས་མྱོང་ནི། །སུས་ཀྱང་བརྗོད་པར་ནུས་མ་ཡིན། །ཀྱེ་མ་ངོ་མཚར་མེ་གོ་ཀྱེ། །སེམས་ལ་ཐེ་ཚོམ་མ་བྱེད་ཅིག །མཚར་ན་ཨ་ཝ་དྷཱུ་ཏཱི་པ། །སེམས་ཀྱི་ཐེ་ཚོམ་ཅི་ཞིག་བྱ། །སེམས་ཉིད་ཀྱི་རྟོག་པ་འཇོམས་པར་བྱེད་པ་ཞེས་བྱ་བ་ཀཾ་ཀ་ལ་དང་མེ་ཁ་ལ་ནས་བརྒྱུད་པ་སློབ་དཔོན་ལ་ཀྵ་མཱི་ཡིས་གསུངས་པ་རྫོགས་སོ།།