དཀྱིལ་འཁོར་གྱི་ཐིག་གདབ་པ་མདོར་བསྡུས་པ།
ཤྲདྡྷ་ཀ་ར་བར་མ།
རྒྱ་གར་སྐད་དུ། སཾ་ཀྵིཔཏ་མཎྜལ་སའུ་ཏྲཾ་ནཱ་མ། བོད་སྐད་དུ། དཀྱིལ་འཁོར་གྱི་ཐིག་གདབ་པ་མདོར་བསྡུས་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དག་ཅིང་རང་བཞིན་དྲི་མེད་པ། །བདེ་བ་ཆེ་ལ་ཕྱག་འཚལ་ནས། །རྒྱུད་རྣམས་ཀུན་གྱི་སྤྱི་ཡི་ནི། །དཀྱིལ་འཁོར་ཐིག་གདབ་བཤད་པར་བྱ། །ས་གཞི་ཆ་སྙོམས་ཡིད་འོང་བ། །རྒྱར་ནི་དཀྱིལ་འཁོར་ཉིས་འགྱུར་ལ། །
དྲི་ཞིམ་ཆུ་ཡིས་ལེགས་བཏབ་ཅིང༌། །སྔགས་ཀྱིས་དག་བྱས་རབ་མཛེས་པར། །ཕྱོགས་མཚམས་མཉམ་པར་ཤེས་བྱས་ནས། །ཐིག་སྐུད་དཀྱིལ་འཁོར་ཉིས་འགྱུར་ལ། །ཤིན་ཏུ་སར་ཞིང་གཤེར་བ་ཡིས། །མཁས་པས་དཀྱིལ་འཁོར་ཐིག་གདབ་པོ། །སློང་དཔོན་ཤར་བལྟ་སློབ་མ་ནི། །ནུབ་ཏུ་བལྟས་ཏེ་རབ་བརྐྱང་ལ། །རྡོ་རྗེ་ཁུ་ཚུར་སར་བཞག་པས། །ཚངས་པའི་ཐིག་ནི་རབ་ཏུ་གདབ། །ཐིག་དེ་དཀྱིལ་འཁོར་རྒྱང་དག་གི །ཆ་བཞིར་རྣམ་པར་བགོ་བར་བྱ། །མཐའ་གཉིས་དག་ནི་དོར་ནས་སུ། །དབུས་མ་གཉིས་ཀྱི་ཚད་དུ་བྱ། །དབུས་སུ་མཉམ་པའི་ཤང་བཞག་སྟེ། །བྱང་དང་ལྷོ་ནི་ས་རིས་བྱ། །དེའི་འོག་ནུབ་ཏུ་བལྟས་ནས་ནི། །དེ་བཞིན་ལྷོ་དང་ནུབ་ཏུ་བྱ། །བྱ་རོག་རྗེས་གཉིས་མཚམས་སུ་ནི། །ཚངས་ཐིག་གཉིས་པ་གདབ་བྱ་ཞིང༌། །ཚངས་ཐིག་ཕྱེད་ཀྱི་ཚད་ཀྱིས་ནི། །ཟུར་བཞི་དག་ནི་རབ་ཏུ་གཞལ། །བྱ་རོག་རྗེས་བཞིན་བྱས་ནས་ནི། །དེ་འོག་ཟུར་བཞིའི་ཐིག་གདབ་པོ། །བྱང་དང་ལྷོ་དང་ཧར་ནུབ་ཏུ། །བལྟས་ནས་དབང་པོ་ཆུ་བདག་དང༌། །ནོར་བདག་གཤིན་རྗེའི་ཕྱོགས་སུ་ནི། །ཐིག་བཞི་བཏབ་པས་ངོས་བཞི་ཡིན། །ཤིན་ཏུ་མཉམ་པར་གཞལ་བྱས་ནས། །བྱིན་ཟ་སྲིན་པོའི་ཕྱོགས་གནས་ལ། །མཚམས་ཀྱི་ཐིག་གཉིས་གདབ་པ་ཡིས། །དཀྱིལ་འཁོར་གྱི་ནི་ཐིག་བཞིར་འགྱུར། །དེ་འོག་སྔགས་པ་བློ་ལྡན་པས། །ངོས་བཞིའི་ཆ་ནི་བྱེད་བྱ་སྟེ། །རེ་རེ་འང་ཆེ་ཆེན་བཅུ་དྲུག་ཏུ། །སོ་སོར་རྣམ་པར་དབྱེ་བར་བྱ། །དེ་ནས་རབ་མཉམ་ཡིད་འོང་ལ། །སོ་སོའི་ཆ་ནི་དབྱེ་བར་བྱ། །དང་པོ་དང་ནི་གཉིས་པ་དང༌། །དེ་བཞིན་དུ་ནི་གསུམ་པ་སྟེ། །དེ་གསུམ་ཆ་ནི་བཞི་བཞིར་བྱ། །ལྔ་པ་དྲུག་བདུན་བརྒྱད་པ་ཡང༌། །དེ་བཞིན་ལེགས་པར་འོག་བྱ་ཞིང༌། །བརྒྱད་པ་གཞན་ཡང་ནི་བཞིན་པའོ། །ཕྱོགས་བཞིར་མཉམ་པར་བགོས་ནས་ནི། །ཕྱི་ནས་ཐིག་ནི་གདབ་པར་བྱ། འདི་ལ་ཕྲེང་རེའམ་རེའུ་མིག་ནི། །ལྔ་བཅུ་རྩ་བརྒྱད་དག་ཏུ་འགྱུར། །ཚངས་བའི་ཐིག་གིས་ངོས་གཉིས་ལས། །གསུམ་པ་དེ་བཞིན་ལྔ་པ་དང༌། །བཅུ་བཞི་པ་དང་བཅུ་བདུན་པ། །དེ་བཞིན་ཉི་ཤུ་པ་དག་ཀྱང༌། །ཆ་
ལྔར་ཕྱོགས་བཞིར་བགོས་ནས་ནི། །སྒོ་ཁྱུད་ལོགས་དང་ངོས་དང་ནི། །འགྲམ་དང་ཡ་ཕུབས་བཟང་འགྱུར་བ། །འདི་ནི་ཐིག་གདབ་རིམ་པ་སྟེ། །རྒྱུད་ཀྱི་རྒྱལ་པོ་མ་ལུས་ལས། །མདོར་བསྡུས་ནས་ནི་བསྟན་པ་ཡིན། །བློ་ལྡན་སྒོ་ནས་བརྩམས་ནས་ནི། མཉམ་ཞིང་གསལ་བར་དབྱེ་བྱ་སྟེ། །སྒོ་ནི་འཁོར་ལོའི་བརྒྱད་ཆ་རུ། །ཡ་ཕྱོགས་བཅས་པ་དབུས་སུ་དབྱེ། །སྒོ་ཁྱུད་ཕྱི་རོལ་ཁྱམས་བྱ་སྟེ། །ཞེང་དུ་ཆ་ཆུང་གཉིས་ཀྱི་ཚད། །ཇི་སྲིད་སྒོ་ཁྱུད་གཉིས་ཀྱི་བར། །ཁྱམས་ཀྱི་ཆར་ནི་རྣམ་པར་བརྐྱང༌། །འབྲམ་རྒྱབ་རིན་ཆེན་ཕ་གུ་སྟེ། །ཆ་ཆུང་གཅིག་གི་ཚད་དུ་བྱ། །ལོགས་ཀྱི་ཕྱི་རོལ་རྒྱར་ཆ་གཉིས། །དྲ་བ་དྲ་ཕྱེད་ཚད་དུ་བྱ། །ལོགས་ལས་རྒྱབ་ཀྱི་ཆ་གཞན་ནི། །ཆ་ཡིས་བསྟོད་པ་ཀ་བ་སྟེ། །ཆ་ལྔར་ཁྱམས་རྒྱབ་ཐིག་གནས་ཤིང༌། །རྟ་བབས་ཀྱི་ནི་ནང་དུ་བྱ། །རྟ་བབས་ཡན་ཕྱོགས་དག་ལས་ནི། །ཆ་གཅིག་དོར་བའི་ཆ་ཆེན་ཚད། །ཆུར་ནི་ཆ་ཆེན་བཞི་པ་སྟེ། །སྐས་ལ་སོགས་པ་ཇི་བཞིན་འགྱུར། །རྟ་བབས་ཆ་གཅིག་པདྨའི་གནས། །ཆོས་ཀྱི་འཁོར་ལོ་ཆ་གཉིས་པ། །ཆུ་དང་ཞིང་མཉམ་གདུགས་ཀྱི་ཚད། །ཆ་གཅིག་པ་ལ་ཡུ་བ་ཕྱེད། །འཁོར་ལོའི་ངོས་གཉིས་ཐད་ཀར་ནི། །རི་འདབས་གཉིས་ནི་མཉམ་གནས་པ། །རྟ་བབས་ལ་བརྟེན་འཁོར་ལོར་ཕྱོགས། །ཤིན་ཏུ་འཛར་མིན་བརྒྱད་རིང་མིན། །རྡོ་རྐེ་རིན་ཆེན་ཡུ་བ་ཅན། །དེ་ཚད་རི་དགས་ཀྱི་རྒྱབ་ཏུ། །ཆ་ཆུང་གཅིག་དོར་ཐིག་ལ་བརྟེན། །རྡོ་རྗེ་རིན་ཆེན་ཡུ་བ་ཕྱེད། །བ་དན་དྲིལ་བུར་ལྡན་པ་ཡིས། །མཛེས་བརྟ་བབས་ཡིན་པར་འདོད། །དོས་ནང་སོ་སོའི་མཚམས་སུ་ཡང༌། །ལྷ་རྣམས་ཀྱི་ནི་སྣམ་བུར་འགྱུར། །ཆ་ཆེན་གྱི་ནི་ཚད་བྱ་བ། །གསུམ་དང་ལྔ་དང་གཅིག་ཏུ་འདོད། །འདི་ནི་རྒྱུད་རྣམས་ཐམས་ཅད་ཀྱི། །ཐིག་དབྱེ་བ་ནི་ལེགས་པ་ཡིན། །འདི་ནང་དབྱིབས་ནི་གང་གང་ཡིན། །རྒྱུད་ཀྱི་དབྱེ་བས་རྣམ་ཕྱེ་བ། །དེ་ཀུན་གསལ་བར་ཤེས་བྱ་ཞིང༌། །ལྷག་ཆད་མེད་པ་ཉིད་དུ་བྱ། །དེ་ཉིད་བསྡུས་པ་ཞེས་བྱ་བ། །རྩ་བའི་རྒྱུད་ཀྱི་བཤད་བྱ་སྟེ། །ལྷ་ཡི་སྣམ་བུའི་ཐིག་ལ་ནི། །འདབ་འབྱོར་འཁོར་ལ་རབ་ཏུ་མཛེས། །ཇི་ལྟར་རྒྱུད་ཀྱི་
རྗེས་མཐུན་པར། །དཀྱིལ་འཁོར་ལྔ་དང་ལྡན་ཞིང་གསལ། །སྔ་མའི་ཐིག་གི་བྱ་བ་ལ། །ཐིག་ནི་ལེགས་པར་གདབ་པར་བྱ། །དེ་ཉིད་དཀྱིལ་འཁོར་ལྔ་ཡི་ནི། །སྦྱོར་བས་ཡང་དག་བགོ་བྱ་ཞིང༌། །ལྷ་ཡི་སྣམ་མེ་བུའི་ཐིག་ལ་ནི། །སྦྱར་ཏེ་དང་པོར་བགོ་བར་བྱ།། དེ་ཡི་འོག་སྐོར་གཉིས་པ་ཡང༌། །ཆ་བྲན་ནང་ནས་བསྐོར་བར་བྱ། །བསྐོར་བ་གཉིས་ཀྱི་བར་དག་ནི། །ཆ་ཆུང་ཉིས་ཤུ་གཉིས་སུ་ངེས། །དེར་ནི་དཀྱིལ་འཁོར་ལྔ་པོ་ཡི། །གནས་ཀྱི་རྣམ་པར་ཤེས་བྱ་སྟེ། །ཚངས་པའི་ཐིག་ལས་ངོས་གཉིས་ཀྱི། །ཆ་བྲན་གསུམ་གསུམ་བསྐོར་བར་བྱ། །དེའི་ནང་ཆ་ཆུང་ཕྱེད་ཀྱི་ནི། །ཚད་ཀྱིས་སླར་ཡང་བསྐོར་བྱ་ཞིང༌། །དེ་གཉིས་བར་དུ་ཆ་ཆེན་པོ། །བཞི་ཆ་དང་བཅས་དབུས་དཀྱིལ་འཁོར། །ལྔ་པོ་པདྨ་ཟླ་བ་ཡིས། །ལྟེ་བའི་ཕྱོགས་བཞིར་བརྒྱན་པ་སྟེ། །སངས་རྒྱས་དཀྱིལ་འཁོར་ཉིད་ཡིན་ཕྱིར། །འཁོར་ལོའི་ཕྲེང་བ་ཡང་དག་ལྡན། །དེ་མཚུངས་ཤར་གྱི་ཕྱོགས་ལ་ནི། །ཆ་ཆུང་ཕྱེད་དང་བཅས་དོར་བས། །ཚངས་པའི་ཐིག་ལས་དེ་བཞིན་བསྐོར། །ནང་དུ་ཆ་ཆུང་ཕྱེད་ལས་བསྐོར། །དེ་བཞིན་ཕྱོགས་བཞིའི་གནས་རྣམས་སུ། །མི་བསྐྱོད་ལ་སོགས་དཀྱིལ་འཁོར་ནི། །རྡོ་རྗེ་རིན་ཆེན་ཆུ་སྐྱེས་དང༌། །སྣ་ཚོགས་རྡོ་རྗེའི་ཕྲེང་བས་བརྒྱན། །རྡོ་རྗེ་བས་རབ་མཛེས་པའི། །དཀྱིལ་འཁོར་ལྔ་རྣམས་བྱའོ་ཞེས། །སློབ་དཔོན་ལ་འཆད་པས་ན། །དེ་ཕྱིར་དེ་ཡི་གཞུང་མཆོག་ཡིན། །ཇི་ལྟར་བདག་པོ་དེ་བཞིན་དུ། །པདྨ་ཟླ་བས་བརྒྱན་པར་བྱ། །རེའུ་མིག་ལྔ་ཡི་བར་གང་ཡིན། །དེ་ནི་ཆ་ཆུང་གཅིག་ཕྱེད་བཅས། །རེའུ་མིག་མཐའ་རུ་ཀ་བ་ཡི། །རྩེ་མོར་རྡོ་རྗེའི་འདུས་པ་སྟེ། །དཀྱིལ་འཁོར་བརྒྱད་དུ་ཆ་ཆུང་ཕྱེད། །དོར་བར་རྡོ་རྗེའི་ཕྲེང་བ་བྱ། །མཚམས་སུ་རང་རང་གནས་ཚད་ཀྱི། །པདྨ་ཟླ་བས་བརྒྱན་པར་བྱ། །དེར་ནི་སྒེག་མོ་སོགས་བཞི་དགོས། །དེ་ཉིད་བསྡུས་པའི་དབུས་དཀྱིལ་འཁོར། །བདུག་སོགས་ཕྱི་ཡི་ལྷ་མོ་བཞི། །ཕྱི་ཡི་མཚམས་སུ་བྲི་བྱ་ཞིང༌། །བསྐལ་བཟང་སེམས་དཔའ་རྣམས་ཀྱང་དགོད། །སྒོ་རྣམས་སུ་ནི་སྒོ་སྲུང་བྲི། །ཕྱི་རོལ་རྡོ་རྗེ་ཕྲེང་གསལ་བ། །ཆ་ཆེན་གྱི་ནི་ཕྱེད་ཀྱི་ཚད། །འབར་བའི་ཕྲེང་བ་ཡང་དེའི་
ཚད། །ཕྱི་རོལ་ཤིང་ལ་སོགས་པས་བརྒྱན། །ནང་དུ་དེ་ཡི་ཕྱེད་ཕྱེད་དུ། །ཆ་རྣམས་བགོས་ཏེ་ཐིག་གདབ་ཅིང༌། །ཕོ་བྲང་རིམ་པ་སྣ་ཚོགས་པར། །རང་གི་བློས་ནི་རྣམ་པར་བརྟག །རིན་ཆེན་བཟང་པོ་དཔའ་བོ་རྡོ་རྗེ་ལ། །དད་ཅིང་གུས་པས་མང་དུ་གསོལ་བས་ན། །བརྩེ་ཕྱིར་ཐིག་གི་ཆོག་གསལ་དབྱེ་བྱས། །ཉེས་གྱུར་དམ་པས་བདག་ལ་བཟོད་པར་མཛོད། །འདི་བྱས་བསོད་ནམས་དམ་པ་ནི། །བྱང་ཆུབ་ཚོགས་གྱུར་གང་ཐོབ་དེས། །འཇིག་རྟེན་མ་ལུས་འདི་དག་ནི། །རང་ཉིད་དཀྱིལ་འཁོར་བདག་གྱུར་ཅིག །དཀྱིལ་འཁོར་གྱི་ཐིག་གི་ཆོ་ག་མདོར་བསྡུས་པ་སློབ་དཔོན་ཤྲདྡྷ་ཀ་ར་བར་མས་མཛད་པ་རྫོགས་སོ།། །།རྒྱ་གར་གྱི་མཁན་པོ་པྲ་ཏ་ཀ་ར་བར་མ་དང་ཞུ་ཆེན་གྱི་ལོ་ཙཱ་བ་རིན་ཆེན་བཟང་པོས་སྐད་གསར་ཆད་ཀྱིས་ཞུས་ཏེ་གཏན་ལ་ཕབ་པའོ། །