གཏོར་མའི་ཆོ་ག།
རྒྱ་གར་སྐད་དུ། བ་ལིཾ་བི་དྷི། བོད་སྐད་དུ།
གཏོར་མའི་ཆོ་ག །འཕགས་པ་འཇམ་དཔལ་ལ་ཕྱག་འཚལ་ལོ། །ཡིད་བཞིན་ནོར་བུ་ཆེན་པོ་འཆང༌། །དཔག་བསམ་ཤིང་ཆེན་རྒྱས་འདྲ་སྟེ། །བུམ་པ་བཟང་པོ་ཆེ་བའི་མཆོག །སེམས་ཅན་ཀུན་དོན་བྱེད་ལ་འདུད། །གཏོར་མའི་རིམ་པ་བཤད་པར་བྱ། །དང་པོ་ལྷའི་རྣལ་འབྱོར་དང་ལྡན་པའི་སྔགས་པས་རིན་པོ་ཆེའི་སྣོད་མཛེས་པའི་ནང་དུ་ཁ་ཟས་ཀྱི་འབྱོར་པ་དྲི་དང་ཁ་དོག་དང་ལྡན་པ་སྣ་ཚོགས་བཅུག་ལ། གཏོར་མའི་ནང་དུ་ཡི་གེ་ཨ་ལས་ཡིད་བཞིན་གྱི་ནོར་བུ་འབར་བ་ཟླ་བའི་སྟེང་དུ་རྣམ་པར་བསམས་ལ། དེ་ལས་བདུད་རྩིའི་ཆུ་རྒྱུན་དང༌། འདོད་པའི་ཡོན་ཏན་གྱིས་རྣམ་པར་སྤྲས་པས་སྣོད་དང་བཅུད་ཆོས་ཀྱི་དབྱིངས་ཁྱབ་པར་བསམ་ཞིང་བསྒོམ་པ་ནི། ཡིད་བཞིན་ནོར་བུ་ཆེན་པོ་འཆང༌། །ཁྱབ་བདག་རིན་ཆེན་ཀུན་གྱི་གདུགས། །ཞེས་བྱའོ། །བདག་ཉིད་ཀྱི་སྙིང་གའི་དྷཱིཿལས། དཔག་བསམ་ཤིང་ཆེན་རྒྱས་པ་སྟེ། །བུམ་པ་བཟང་པོ་ཆེ་བའི་མཆོག །ཅེས་བྱ་བ་ནི་དཔག་བསམ་གྱི་ཤིང་ནམ་མཁའི་མཐའ་དང་མཉམ་པ་བུམ་པ་བདུད་རྩིས་བཀང་བའི་འབྲས་བུ་སྨིན་པ་བདུད་རྩི་རྣམ་པར་འཛག་པའོ། །གཏོར་མའི་རྒྱུད་རྒྱས་པར་བསམ་མོ། །ཐུགས་ཀའི་འོད་ཟེར་གྱིས་ཡེ་ཤེས་བདུད་རྩི་དབབ་སྟེ་གཉིས་སུ་མེད་པར་བསམ་མོ། །ཨ་ཨཱ་སརྦ་ཏ་ཐཱ་ག་ཧྲྀད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མུརྟི་བཱ་གཱི་ཤྭ་ར་མ་ཧཱ་ཝ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨཱ་དྷཱ་ཏུ་ཨོཾ་ཨཱཿཧཱུཾ། ཞེས་པས་བྱིན་གྱིས་བརླབ་པའོ། །སྣ་ཚོགས་གཟུགས་ཅན་ཡིད་ལ་སྐྱེས། །འཇིག་རྟེན་གསུམ་ཡང་གཞོན་ལུས་གཅིག །ཅེས་བྱ་བ་ནི་དེ་ནས་སྙིང་གའི་འོད་ཟེར་གྱིས་ཡང་དག་པའི་སངས་རྒྱས་སྲས་དང་བཅས་པ་དང་ཁམས་གསུམ་གྱི་སེམས་ཅན་ཐམས་ཅད་བཀུག་སྟེ། དེ་དག་ཐམས་ཅད་སྙིང་གར་ཡི་གེ་ཨ་བཀོད་པའི་འོད་ཟེར་གྱིས་རྣམ་པར་སྦྱངས་ཏེ། འཕགས་པ་འཇམ་དཔལ་དུ་བསམ་མོ། །གསུམ་སེལ་མཐའ་ཡས་གྲོལ་གསུམ་ཐོབ། །སངས་རྒྱས་སྤྲུལ་པའི་རྒྱན་དང་ལྡན། །ཞེས་བྱ་བ་ནི་ཡི་གེ་གསུམ་གྱིས་བྱིན་གྱིས་བརླབས་ལ། དངོས་སམ་ཡིད་
ཀྱིས་ལུས་དཔག་མེད་སྤྲུལ་ལ་མཆོད་དོ། །ནམ་མཁའི་མཐའ་ལ་ལོངས་སྤྱོད་དང༌། །སེམས་ཅན་ཀུན་ཡིད་ཚིམ་པར་བྱེད། །དེ་ལྟར་ལྗགས་ཀྱི་འོད་ཟེར་གྱིས་བདུད་རྩིའི་རྒྱུན་ལ་ཞུགས་ཏེ། ཀུན་ཀྱང་ཚིམ་པར་དམིགས་ཤིང་འདོད་པའི་ལོངས་སྤྱོད་ཀྱིས་ཚིམ་པར་བྱའོ། །དེ་ནས། ཆོས་ཀྱི་སྤྱིན་བདག་ཆེན་པོ་སྟེ། །མཆོད་འོས་བ་སྟོང་འོས་ཕྱག་གི་གནས། །ཞེས་པས་ཕྲེང་བའི་སྔགས་དང༌། ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ། ཨཱདྱ་ན་ནུཏྤནྣ་ཏྭཱ་ཏ། ཨོཾ་ཨཱཿཧཱུཾ་ཞེས་པ་དང༌། ཚིགས་སུ་བཅད་པའི་བསྟོད་པས་ཆོས་ཀྱི་སྤྱིན་པ་བྱའོ། །བྱང་ཆུབ་སེམས་དཔའ་སེམས་དཔའ་ཆེ། །ཤེས་རབ་ཀྱིས་ནི་དེ་ཐོབ་ཤོག །བྱང་ཆུབ་ཆེན་པོར་བསྔོ་ཞིང་སྨོན་ལམ་རྒྱ་ཆེན་པོར་གདབ། ཨོཾ་ཨཱཿཧཱུཾ་ཞེས་པས་གཤེགས་སུ་གསོལ། ཕ་རོལ་ཕྱིན་དང་རྒྱུད་རྣམས་མ་ལུས་དང༌། །བདེར་གཤེགས་རྒྱལ་བའི་དཀྱིལ་འཁོར་མ་ལུས་ཀྱི། །ཀུན་གྱི་གཙོ་བོར་ཁྱབ་པས་ཐུགས་ལ་གནས། །ཡེ་ཤེས་ལུས་ཅན་མཚན་དོན་རྒྱ་ཆེ་བས། །སྣ་ཚོགས་ཚུལ་ཅན་བསྟོད་ཀྱིས་དེང་འདིར་བདག་གིས་འདིར། །དམ་པའི་གདམས་ངག་ཉེར་བ་སྟན་རྣལ་འབྱོར་ལམ་དང་སྤྱར། སྤྱར་བ་འདི་ལ་དགེ་བ་གང་ཡོད་འདིས། །བདག་སོགས་འཇམ་དཔལ་ཡེ་ཤེས་སེམས་དཔའ་འདྲར་འགྱུར་ཤོག །གཏོར་མའི་ཆོག་རྫོགས་སོ།།