ངན་སོང་སྦྱོང་བའི་དོན་གྱི་འབྲུ་འགྲེལ།
སངས་རྒྱས་གསང་བ།
རྒྱ་གར་སྐད་དུ། དུ་རྒ་ཏི་པ་རི་ཤོ་དྷ་ནཱརྠ་བཱ་རྟི་ཀཱ་ནཱ་མ། བོད་སྐད་དུ། ངན་སོང་སྦྱོང་བའི་དོན་གྱི་འབྲུ་འགྲེལ་ཞེས་བྱ་བ། ཆོས་ཉིད་ཐུགས་ཆུད་བདག་ཉིད་གཞན་གྱི་དཔལ། །ཡེ་ཤེས་རྡོ་རྗེས་འཁོར་བའི་སྡུག་བསྔལ་འཇོམས། །ཐུགས་རྗེ་ཆེན་པོས་འགྲོ་བའི་དོན་ལ་སེམས། །མཁྱེན་པའི་དགོངས་རླབས་ཆོས་ཉིད་རྟོགས་པས་དཔའ། །རྒྱུད་ཀྱི་དོན་གྱི་སྟོན་པའི་ངོ་བོ་ལ། །ལུས་ངག་ཡིད་གསུམ་དད་པས་ཕྱག་འཚལ་ཏེ། །རྒྱུད་ཀྱི་དོན་འགྲེལ་བདག་གིས་བྱ་བར་འདོད། །གུས་པའི་སེམས་ཀྱིས་འདི་གཞུང་འབད་པར་བྱ། །དེ་ལ་རྒྱུད་འདི་བསྡུས་པའི་དོན་རྣམ་པ་གཉིས་ཀྱིས་བ་སྟན་ཏེ། གླེང་གཞི་དང་མདོ་བཤད་པའོ། །གླེང་གཞི་ལ་ཡང་དོན་རྣམ་པ་གཉིས་ཀྱིས་བ་སྟན་ཏེ། ཕུན་སུམ་ཚོགས་པའི་གླེང་གཞི་དང༌། གླེང་བསླང་བ་གཉིས་སོ། །ཕུན་སུམ་ཚོགས་པའི་གླེང་གཞི་ལ་དོན་རྣམ་པ་ལྔ་སྟེ། གང་དུ་བཤད་པའི་གནས་དང༌། མ་ནོར་བས་སྟོན་པའི་སྟོན་པ་དང༌། ཡོངས་སུ་དག་པའི་འཁོར་དང༌། མ་ནོར་བར་སྡུད་བའི་སྡུད་པ་པོ་དང༌། གང་དུ་བཤད་པའི་རྒྱུད་དང་ལྔའོ། །གླེང་བསླང་བ་ལ་ཡང་དོན་རྣམ་པ་གཉིས་ཏེ། སྟོན་པས་གླེང་བསླང་བ་དང༌། འཁོར་གྱིས་གླེང་བསླང་བའོ། །མདོ་བཤད་པ་ལ་ཡང་དོན་གཉིས་ཏེ། དཀྱིལ་འཁོར་དང་སྤྱིན་སྲེག་གོ །དཀྱིལ་འཁོར་ལ་ཡང་དོན་རྣམ་པ་གཉིས་ཏེ། འཇིག་རྟེན་དང༌། འཇིག་རྟེན་ལས་འདས་པའོ། །སྤྱིན་སྲེག་ལ་གཉིས་ཏེ། རོའི་སྤྱིན་སྲེག་དང༌། ཕྲིན་ལས་རྣམ་བཞིའི་སྤྱིན་སྲེག་གོ །དེ་ཡང་དབང་པོ་རབ་མགོ་སྨོས་པས་དོན་གོ་བ་ལ་ནི། ཏནྟྲའི་མཚན་སྨོས་ཏེ། དེ་ཡང་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་སྨོས་ཏེ། དེ་ནི་མ་ནོར་ཅིང་ཕྱིན་ཅི་མ་ལོག་པའི་རང་བཞིན་ཆོས་ཉིད་ཇི་བཞིན་པ། ཡེ་ནས་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། དེའི་དོན་ནི་གཤེགས་པ་མེ་ལོང་ལྟ་བུའི་ཡེ་ཤེས། དཔེར་ན་མེ་ལོང་ལ་གཟུགས་བརྙན་འབྱུང་ཞིང་རྟོག་པ་མེད་པ་ལྟར། མེ་ལོང་
ལྟ་བུའི་ཡེ་ཤེས་ཀྱིས་ཆོས་ཉིད་ཀྱི་དོན་རྟོགས་པས་རིག་པ་དབྱིངས་སུ་གཤེགས་ནས་ཐུགས་རྗེའི་དཀྱིལ་འཁོར་འབྱུང་བའི་རྒྱུར་གྱུར་པས་ཆོས་ཀྱི་སྐུའོ། །དགྲ་བཅོམ་པ་ནི་སེམས་ཅན་གྱི་གནས་སྐབས་ན་ཉོན་མོངས་པ་ཅན་གྱི་ཡིད། ང་དང་བདག་ཏུ་འཛིན་པ་དང་བདག་མེད་པར་བསྒོམས་པས་མཉམ་པ་ཉིད་ཀྱི་ཡེ་ཤེས་སུ་གྱུར་པའོ། །ཡང་དག་པར་རྫོགས་པ་ནི། སོ་སོར་ཀུན་དུ་རྟོག་པའི་ཡེ་ཤེས་ཏེ། དེ་བཞིན་གཤེགས་པའི་ཆེ་བའི་ཡོན་ཏན་ཡང་དག་པར་རྫོགས་པར་བྱེད་པས་ན་སྨོས་ཏེ། ཅིའི་ཕྱིར་ཞེ་ན། ཡིད་ཀྱི་རྣམ་པར་ཤེས་པ་ཡུལ་ལ་ཡང་དག་པར་སྤྱོད་ཅིང༌། བག་ཆགས་ཀུན་གཞི་ལ་རྫོགས་པར་སོགས་པས་ན་སྨོས་ཏེ། དེ་གནས་གྱུར་བ་ནི་སོ་སོར་ཀུན་ཏུ་རྟོག་པའི་ཡེ་ཤེས་སོ། །དེ་གཉིས་ནི་ལོངས་སྤྱོད་རྫོགས་པའི་སྐུའོ། །སངས་རྒྱས་ཀྱི་ནི་སྤྲུལ་པའི་སྐུ་སྟེ། བྱ་བ་གྲུབ་པའི་ཡེ་ཤེས་ཀྱི་རྒྱུ་ནི། སྒོ་ལྔའི་རྣམ་པར་ཤེས་བ། ཡུལ་ལོག་པར་རྟོག་པ། སྐྱེས་བུ་ར་རོ་བའམ། གཉིད་ལོག་པ་ལས་སངས་ཤིང༌། ཤེས་བྱ་ལ་ཡེ་ཤེས་ཀྱིས་ཁྱབ་ཅིང་རྒྱས་པར་བྱེད་པས་ན་སངས་རྒྱས་སོ། །དེ་ནི་སྐུ་གསུམ་གྱི་ཕྲིན་ལས་སྟོན་ཏེ། ཅིའི་ཕྱིར་ཞེ་ན། ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཞེས་བྱ་བ་སྨོས་ཏེ། དེ་ལ་ངན་པ་ནི་རྒྱུ་སྟེ། ཡང་དག་པའི་དོན་ལ་མགོ་རྨོངས་ཤིང༌། རྒྱུ་ངན་པ་སྤྱོད་པའི་ཕྱིར་ན་ངན་པའོ། །སོང་བ་ནི་འབྲས་བུ་སྟེ། ཅིའི་ཕྱིར་ཞེ་ན། རྒྱུ་ལས་དང་ཉོན་མོ་ངེས་པས་འབྲས་བུ་ཁམས་གསུམ་དུ་ཡང་ནས་ཡང་དུ་སོང་བའི་ཕྱིར་རོ། །ཡོངས་སུ་སྦྱོང་བ་ནི་ངན་སོང་གི་རྒྱུ་སྦྱོང་བ་དང། འབྲས་བུ་སྦྱོང་བའོ། །རྒྱུ་ནི་རྡོ་རྗེ་ལྟ་བུའི་ཏིང་ངེ་འཛིན་གྱིས་སྦྱོང༌། འབྲས་བུ་ནི་འོད་ཟེར་སྡུད་པའི་ཕྲེང་བས་སྦྱོང༌། གཟི་བརྗིད་ནི་རྒྱུ་ཉོན་མོངས་པ་ཐམས་ཅད་སྦྱོང་བ་རྡོ་རྗེ་ལྟ་བུའི་ཏིང་ངེ་འཛིན་གྱིས་གཟི་བརྗིད་ཡེ་ཤེས་ལྔ་དང་ལྡན་པས་ཉོན་མོང་བ་རྣམ་པ་ལྔ་འཇོམས་པའི་གཟི་བརྗིད་དང་ལྡན་པའོ། །འབྲས་བུ་སྡུག་བསྔལ་གྱི་ཕུང་པོ་འཇོམས་པའོ། །འོད་ཐུགས་རྗེ་ལ་ཟེར་ཕྲིན་ལས་རྒྱུན་མི་འཆད་པའི་གཟི་བརྗིད་དང་ལྡན་པའོ། །རྣམ་པ་གཅིག་ཏུ་ཡོན་ཏན་གྱི་གཟི་བརྗིད་དང་ལྡན་པའོ། །རྒྱལ་པོ་ནི་ཉེས་པའི་སྐྱོན་བཅོམ་ཞིང་ལེགས་པའི་ཡོན་ཏན་སྣ་ཚོགས་པ་དང་ལྡན་པས་རྒྱལ་
པོའོ། །བརྟག་པ་ནི་ཆོ་ག་ཞིབ་མོ་དང༌། རྒྱུ་བྱང་ཆུབ་ཀྱི་སེམས་དང་ལྡན་པའི་སྒོ་ནས་བརྟག་པའོ། །དེ་ནས་དབང་པོ་རབ་མགོ་སྨོས་པས་གོ་བ་ལ་གསུངས་སོ། །ད་ནི་དབང་པོ་འབྲི་ནག་ཚིག་གི་དོན་རྣམ་པར་ཕྱེ་བས་གོ་བ་ལ་དོན་གྱིས་དབྱེ་བ་སྟོན་ཏེ། དེ་ཡང་དོན་རྣམ་པ་གཉིས་སུ་ཤེས་པར་བྱ་སྟེ། ཐུགས་ཆོས་ཉིད་ལས་མ་གཡོས་པའི་རྟགས་སུ་ནི་དཀྱིལ་འཁོར་དུ་སྟོན་ལ་ཐུགས་རྗེ་འགྲོ་བའི་དོན་མཛད་པའི་རྟགས་སུ་ནི་ཧོམ་དུ་བ་སྟན་ཏོ། །དེ་ཡང་བདེན་པ་གཉིས་དང་མི་འགལ་བར་བྱ་བའི་དོན་ཆེད་ནི། དཀྱིལ་འཁོར་ལ་ཡང་འཇིག་རྟེན་པ་དང་འཇིག་རྟེན་ལས་འདས་པ་གཉིས་སུ་གསུངས་སོ། །ཧོམ་ལ་ཡང་གཉིས་ཏེ། དངོས་པོ་ལ་ཞེན་པ་བཟློག་པའི་ཕྱིར་ནི་རོ་སྲེག་གི་ཧོམ་དང༌། ཐུགས་རྗེ་ཕུན་སུམ་ཚོགས་པས་འགྲོ་བའི་དོན་མཛད་པའི་ཕྱིར་ཕྲིན་ལས་རྣམ་བཞིའི་ཧོམ་དང་གཉིས་སོ། །དེ་ལྟར་གསུངས་པ་དེ་ཡང་དགོས་འབྲེལ་གྱི་འབྲེལ་བ་སྟན་ཏེ། དེ་ཡང་ཅིའི་ཕྱིར་ཞེ་ན། ཐུགས་ཆོས་ཉིད་ལས་མ་གཡས་ཀྱང༌། རྩ་བ་བྱང་ཆུབ་སེམས་སུ་འདུས་པའི་རྟགས་སུ་ནི། རྩ་བའི་དཀྱིལ་འཁོར་ཆེན་པོ་གསུངས་སོ། །དེ་ལྟར་རྩ་བ་བྱང་ཆུབ་ཀྱི་སེམས་སུ་འདུས་ཀྱང༌། ཐུགས་རྗེས་ངན་སོང་གི་རྒྱུ་འབྲས་གཞོམ་པའི་ཕྱིར། གཙུག་གཏོར་བརྒྱང་ཀྱི་དཀྱིལ་འཁོར་གསུངས་སོ། །དེ་ལྟར་གྱུ་འབྲས་བཅོམ་ཡང༌། སེམས་ཅན་འཆི་བ་ནི། ངན་སོང་གི་ལས་ཡིན་པས། དེ་ཞི་བར་བྱ་བའི་ཕྱིར། ཚེ་དཔག་མེད་ཀྱི་ལས་ཀྱི་སྒྲིབ་པ་རྒྱུན་གཅོད་པའི་དཀྱིལ་འཁོར་གསུངས་སོ། །ལས་ཀྱི་སྒྲིབ་པ་རྒྱུན་བཅད་ཀྱང༌། སེམས་ཅན་གློ་བུར་གྱི་རྐྱེན་གྱིས་འཆི་བས་ཚེ་དཔག་མེད་འཆི་བདག་འཇོམས་པ་ཕྱག་ན་རྡོ་རྗེའི་དཀྱིལ་འཁོར་གསུངས་སོ། །དེ་ལྟར་འཆི་བདག་བཅོམ་ཡང་ཕྲིན་ལས་རྣམ་བཞིའི་སྒོ་ནས་འགྲོ་བའི་དོན་མཛད་དགོས་པས། བྱང་ཆུབ་སེམས་དཔའ་རིགས་བཞི་འཁོར་ལོས་སྒྱུར་བའི་མཎྜལ་གསུངས་སོ། །དེ་ལྟར་འགྲོ་བའི་དོན་མཛད་ཀྱང་མ་རུངས་པ་གདུལ་དགོས་པས། ཁྲོ་བོ་རྡོ་རྗེ་ཉི་མའི་མཎྜལ་གསུངས་སོ། །དེ་ལྟར་མ་རུངས་པ་ཐུལ་ཡང༌། དངོས་པོར་ལྟ་བ་སུན་དབྱུང་དགོས་པས། རོ་སྲེག་གི་ཧོམ་གསུངས་སོ། །དེ་ལྟར་དངོས་པོ་ལྟ་བ་སུན་
དབྱུང་ཡང༌། ཐུགས་ཆོས་ཉིད་ལས་མ་གཡོས་པའི་རྟགས་སུ་ཞི་བའི་ཧོམ་གསུངས་སོ། །དེ་ལྟར་མ་གཡོས་ཀྱང་འགྲོ་བའི་དོན་བྱ་དགོས་པས་རྒྱས་པའི་ཧོམ་གསུངས་སོ། །དེ་ལྟར་དོན་མཛད་ཀྱང་འཁོར་བ་དབང་དུ་བསྡུ་དགོས་པས་དབང་གི་ཧོམ་གསུངས་སོ། །དེ་ལྟར་དབང་དུ་བསྡུས་ཀྱང་མ་རུངས་པ་ལ་མངོན་སྤྱོད་ཀྱི་ལས་བྱ་དགོས་པས་དྲག་པོའི་ཧོམ་གསུངས་སོ། །འཇིག་རྟེན་པ་མཚན་མ་ལ་དགའ་བས་དེ་ཞི་བར་བྱ་བའི་ཕྱིར། འཇིག་རྟེན་པའི་མཎྜལ་དྲུག་གསུངས་ཏེ། འཇིག་རྟེན་པའི་དྲི་ཟ་དང་གྲུལ་བུམ་དང་གནོད་སྤྱིན་དང༌། ཀླུའི་གནོད་པ་ཞི་བར་བྱ་བའི་ཕྱིར་རྒྱལ་པོ་བཞིའི་མཎྜལ་གསུངས་སོ། །གདོན་སྟོང་ཕྲག་བརྒྱང་ཅུ་ཞི་བར་བྱ་བའི་ཕྱིར་སྐྱོང་བཅུའི་དཀྱིལ་འཁོར་གསུངས་སོ། །བཟའ་དང་དུས་ཚིགས་སྐར་མ་གདུག་པ་སླུ་བ་ཞི་བར་བྱ་བའི་ཕྱིར་གཟའ་བརྒྱང་ཀྱི་མཎྜལ་གསུངས་སོ། །ཀླུའི་དུག་ཞི་བར་བྱ་བའི་ཕྱིར་ཀླུ་བརྒྱང་ཀྱི་མཎྜལ་གསུངས་སོ། །འཇིག་རྟེན་གྱི་ལྷ་མི་དགའ་བ་ཞི་བར་བྱ་བའི་ཕྱིར་ལྷ་ཆེན་པོ་བརྒྱང་ཀྱི་མཎྜལ་གསུངས་སོ། །ལྷ་གདོན་ཞི་བར་བྱ་བའི་ཕྱིར་འཇིགས་བྱེད་བརྒྱང་ཀྱི་མཎྜལ་གསུངས་སོ། །དེ་ལ་འཇིག་རྟེན་ལས་འདས་པའི་མཎྜལ་རྣམ་པ་དྲུག་ཏུ་གསུངས་པ་ནི། རྒྱུ་བྱང་ཆུབ་ཀྱི་སེམས་རྟོགས་པའི་སྒོ་ནས། འབྲས་བུ་ཡེ་ཤེས་རྣམ་པ་དྲུག་སྤྱོད་པ་ཕ་རོལ་ཏུ་ཕྱིན་པ་དྲུག་གི་རྟགས། དཀྱིལ་འཁོར་རྣམ་པ་དྲུག་དང་ལྡན་པའི་སྒོ་ནས། རྒྱུ་དྲུག་གིས་སྒྲིབ་པ་སྦྱོང་བའི་ཕྱིར་གསུངས་སོ། ཧོམ་ལྔ་གསུངས་པ་ནི། ཉོན་མོངས་པ་རྣམ་པ་ལྔ་སྦྱོང་བའི་རྟགས་སུ་གསུངས་སོ། །འཇིག་རྟེན་པའི་མཎྜལ་ནི། འཇིག་རྟེན་པའི་འདོད་པ་བསྐང་ཞིང་དགའ་བར་གཞུག་པ་དང༌། འཇིག་རྟེན་པ་དང་མཐུན་པར་བྱ་བའི་ཕྱིར་གསུངས་སོ། །དེ་ནི་དོན་གྱིས་དབྱེ་བ་སྟེ། དབང་པོ་འབྲི་ནག་དོན་རྣམ་པར་ཕྱེ་བས་གོ་བ་ལ། དོན་གྱི་དབྱེ་བ་སྨོས་པ་ཡིན་ནོ། །དབང་པོ་རབ་འབྲི་ནག་གཉིས་ཀྱི་དོན་ཆེད་དུ། ཏནྟྲའི་མཚན་དོན་གྱི་དབྱེ་བ་མདོར་བསྡུས་ཏེ་བ་སྟན་པའི་དོན་ཡིན་ནོ། །ད་ནི་དབང་པོ་ཐ་མ་ཚིག་ལྷུར་བླངས་པས་གོ་བ་རྣམས་ལ། རྒྱུད་ཀྱི་དོན་གསལ་བར་བྱ་བའི་ཕྱིར། སྟོན་པས་སངས་རྒྱས་བཅོམ་ལྡན་འདས་ཀྱིས་གསུངས་པའི་དོན་ཏེ། སེམས་ཅན་རྣམས་ནི་མཚན་མ་
ལ་ཞེན་ཅིང༌། དངོས་པོར་ལྟ་བས་ན། དེ་དག་གདུལ་བའི་ཕྱིར་ནི་ཧོམ་དང་དཀྱིལ་འཁོར་གསུངས་ཏེ། མཚན་མའི་སྒོ་ནས་མཚན་མ་མེད་པའི་དོན་ཤེས་པར་བྱ་བའི་ཕྱིར་སྨོས་ཏེ། དེ་ཡང་འདུལ་བའི་དབང་དུ་ཤེས་པར་བྱ་སྟེ། ཅིའི་ཕྱིར་ཞེ་ན། རྣམ་པ་ཐམས་ཅད་མཁྱེན་པའི་སྟོན་པས་སངས་རྒྱས་བཅོམ་ལྡན་འདས་སྐུ་དང་ཡེ་ཤེས་ཀྱི་ངོ་བོས་སྔོན་གྱི་བསོད་ནམས་ཀྱི་ཚོགས་མཐའ་ཡས་པ་བསགས་པས། བདག་དང་གཞན་གྱི་དོན་མ་ལུས་པར་ཡོངས་སུ་རྫོགས་པར་བྱ་བའི་ཕྱིར། ཐུགས་ཆོས་ཉིད་རྣམ་པར་མི་རྟོག་བའི་ངང་ལས་བཞེངས་ནས་འཁོར་བའི་སེམས་ཅན་རྣམས། ཉོན་མོངས་པའི་རྒྱ་མཚོ་ལས་ཐར་ཅིང་གྲོལ་བར་བྱ་བའི་དོན་དུ། རི་རབ་རིའི་རྩེ་མོར་ནོར་བུ་རིན་པོ་ཆེའི་ཁང་བཟངས་ནས། བྱང་ཕྱོགས་དགའ་བའི་ཚལ་དུ་ལྷ་རྣམས་གདུལ་བའི་དོན་དུ་ཞུས་ཏེ། རྒྱུད་ཀྱི་དོན་འདི་བཀའ་སྩལ་བའི་ཚེ། ཐུགས་ཡང་དག་པའི་ཡེ་ཤེས་ལས་སྐྱེས་པ། སྐུ་གསུང་ཐུགས་གསང་བའི་མཛོད་འཛིན་པ། ལག་ན་རྡོ་རྗེ་འཁོར་གྱི་ནང་དུ་ཐོས་ནས། དོན་གྱི་སྙིང་པོ་ཚིག་གི་ཕྲེང་བ་འདི་བསྡུས་ནས་གཞན་ལ་བཤད་པའི་ཕྱིར། འདི་སྐད་བདག་གིས་ཐོས་པའི་དུས་གཅིག་ཅེས་སྨོས་ཏེ། འདི་ནི་སྟོན་པ་སངས་རྒྱས་བཅོམ་ལྡན་འདས་ཀྱིས་འཁོར་བའི་སེམས་ཅན་རྣམས་བསྒྲལ་བའི་ཕྱིར། རྒྱུད་ཀྱི་དོན་འདི་གསུངས་པའི་ཚེ་འདི་ཞེས་བྱའོ། །བདག་གིས་ཞེས་བྱ་བ་ནི། ལག་ན་རྡོ་རྗེ་བདག་ནི་དེའི་ཚེ་འཁོར་གྱི་ནང་དུ་བདག་འདུས་པའི་དོན་ཏོ། །ཐོས་པ་ཞེས་བྱ་བ་ནི་ཐུགས་མཁྱེན་པའི་ཡེ་ཤེས་ཀྱིས་འགྲོ་བའི་དོན་ལ་དགོངས་ནས། ཞལ་གྱི་མཎྜལ་ནས་ཚངས་པའི་གསུང་ཕྱུང་ནས་བཀའ་སྩལ་པའི་ཚེ། རྣ་བའི་དབང་པོ་སྐྱོན་མེད་པས་ཐོས་པའི་ཕྱིར་རོ། །དུས་གཅིག་ན་ཞེས་བྱ་བ་ནི་སྟོན་པ་བརྒྱ་ལམ་གཅིག་ན། བརྒྱ་བྱིན་གྱི་གནས་ནས་འདུག་པའི་དུས་སོ། །དབྱར་དགུན་སྟོན་དཔྱིད་ལ་སོགས་པ་ནི་སྟོན་པ་ཐུགས་རྗེ་ཆེ་བས་འཁོར་རྣམས་ཀུན་གྱི་ནང་ན་བཞུགས་པར་སྣང་ཞིང༌། དེའི་ཚེ་དེའི་དུས་ན་བཤད་ཀྱི། གང་ན་བཞུགས་ཤིང་ཆོས་སྟོན་ཏོ་ཞེས་སོ་སོར་ཐེ་ཚོམ་སྐྱེས་དགོས་ཏེ་དེའི་ཕྱིར་མ་སྨོས་སོ། །བྷ་ག་བཱན་ནི་སྟོན་པ་ཕུན་སུམ་ཚོགས་པ་སྟེ། བཅོམ་ཞེས་བྱ་བ་ནི་བདུད་བཞི་བཅོམ་སྟེ་རྡོ་རྗེ་ལྷ་
བུའི་ཏིང་ངེ་འཛིན་གྱིས་ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་རྣམས་རྡོ་རྗེའི་གདན་སྟེང་སུ་མཐར་མཛད་ནས་ཉོན་མོངས་པའི་བདུད་བཅོམ་མོ། །དེའི་ཚེ་ཕྱོགས་བཅུའི་སངས་རྒྱས་རྣམས་ཀྱིས་མངོན་པར་བྱང་ཆུབ་ལ་ལྔས་བསྐུལ་ཏེ། རྣམ་པར་ཤེས་པའི་ཚོགས་བརྒྱང་ཡེ་ཤེ་རྣམ་པ་ལྔར་གནས་གྱུར་ཏེ། འཆི་བ་མེད་པ་གཡུང་དྲུང་གི་ཚེ་ཐོབ་པས་འཆི་བདག་གི་བདུད་བཅོམ་མོ། །ཐོ་རངས་མངོན་པར་རྫོགས་པར་སངས་རྒྱས་ནས། སྐུ་གསུམ་ཡེ་ཤེས་ཀྱི་ངོ་བོས། ཐུགས་རྗེའི་སྤྲུལ་པས་ཆ་གཅིག །རི་རབ་རིའི་རྩེ་མོར་རྣམ་པར་རྒྱལ་བའི་ཁང་བཟངས་སུ། །སྤྲུལ་པའི་སྐུའི་དང་ལོངས་སྤྱོད་རྫོགས་པའི་སྐུའི་ཆ་འཛིན་པ། རྣམ་པར་སྣང་མཛད་སེམས་དཔའ་སུམ་ཅུ་རྩ་བདུན་གྱི་ངོ་བོར་སངས་རྒྱས་པ། མཚན་ཡང་རྣམ་པར་སྣང་མཛད་རྡོ་རྗེ་དབྱིངས་སུ་གསོལ་བས། སྐུ་དང་ཡེ་ཤེས་རྣམ་པར་དག་པའི་ངོ་བོར་སྣང་བས། ཕུང་པོའི་མིང་མེད་པས་ཕུང་པོའི་བདུད་བཅོམ་མོ། །དེ་ལྟར་སངས་རྒྱས་ཀྱང་དམག་དཔོན་བཙོན་དུ་བཟུང་ནས་དྲ་མ་ལེགས་པ་དང་འདྲ་བར། ཐུགས་རྗེའི་སྤྲུལ་པ་ཆ་གཉིས་སུ་གྱེས་ནས། ཆ་གཅིག་རྡོ་རྗེའི་གདན་སྟེང་སུ་བ་སྟན་ཏེ། གཞན་འཕྲུལ་དབང་བྱེད་ཀྱི་ལྷའི་བུ་བྱེ་བ་དུང་ཕྱུར་ཐུལ། ཆ་གཅིག་རི་རབ་ཀྱི་རྩེ་མོར་རྣམ་པར་སྣང་མཛད་ཀྱིས་ལག་ན་རྡོ་རྗེར་སྤྲུལ་ནས། ལྷ་ཆེན་པོ་རྣམས་ཐུལ་ནས་ལྷའི་བུའི་བདུད་བཅོམ། ལྡན་པ་ནི་དེ་ལྟར་བདུད་བཞི་བཅོམ་པའི་དོན་གྱིས་ལེགས་པའི་ཡོན་ཏན་དྲུག་དང་ལྡན་ཏེ། དབང་ཕྱུག་གཟུགས་བཟང་གྲགས་པ་དང༌། །དཔལ་དང་ཡེ་ཤེས་བརྩོན་འགྲུས་སོ། །ཞེས་འབྱུང་སྟེ། དེ་ལ་དབང་ཕྱུག་ཕུན་སུམ་ཚོགས་པ་ནི། ཐུགས་ནམ་པར་མི་རྟོག་པའི་རྣམ་བཞག་པས་ན། མྱ་ངན་ལས་འདས་པའི་མཐའ་ཡས་དབང་ཞེས་བྱའོ། ཡའོ། ཁས་པའི་ཐུགས་རྗེས་འགྲོ་བའི་དོན་སྣ་ཚོགས་སུ་མཛད་པས་འཁོར་བའི་མཐའ་ལས་དབང་ཞེས་བྱའོ། །སྔོན་བསྐལ་པ་གྲངས་མེད་པ་མཐའ་ཡས་པ་ནས། བསོད་ནམས་ཡེ་ཤེས་ཀྱི་ཚོགས་རྣམས་པ་གཉིས་བསགས་པས་ཕྱུག་གོ །གཟུགས་བཟང་ཞེས་བྱ་བ་ནི་སྐུ་ཕུན་སུམ་ཚོགས་པའི་དོན་ཏོ། །དེ་ཅིའི་ཕྱིར་ཞེ་ན། ཆོས་ཀྱི་སྐུ་ལྷུན་གྱིས་
གྲུབ་པ་རྣམ་པར་མི་རྟོག་པའི་ངོ་བོར་གནས་ཏེ། དེའི་ཁྱད་པར་ལས་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པ། དབང་ཕྱུག་ཆེན་པོའི་གནས་ཆོས་ཀྱི་དབྱིངས་ཀྱི་ཕོ་བྲང་ན་རྣམ་པར་སྣང་མཛད་དུ་བ་སྟན་ཏེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ན་སྐུའི་སྒོ་ནས་ཆོས་སྟོན་ཏོ། །སྤྲུལ་པའི་སྐུ་ནི་རྣམ་པར་སྣང་མཛད་རི་རབ་རིའི་རྩེ་མོར་ལྷ་རྣམས་ལ་ཆོས་སྟོན་པ་དང༌། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། ཤཱཀྱ་ཐུབ་པ་དབུ་རེག་དང་ཞབས་རྗེན་དུ་བ་སྟན་ཏེ། འགྲོ་བའི་དོན་མཐའ་ཡས་པར་མཛད་པའི་ཚིག་གོ །དེ་ལྟ་བུའི་སྐུ་དང་ལྡན་པའི་ཕྱིར་ན་གཟུགས་དང་བཟང་བའོ། །དཔལ་ཞེས་བྱ་བ་ནི་ཆོས་ཐམས་ཅད་ཀྱི་རང་བཞིན་ཆོས་ཉིད་བསམ་དུ་མེད་པའི་དོན་ཐུགས་སུ་ཆུད་ནས། དངོས་པོ་ཐམས་ཅད་བསལ་ནས་མི་རྟོག་པའི་ངང་ལ་བཞུགས་པ་ནི་བདག་གི་དཔལ་ལོ། །སྔོན་གྱི་བསོད་ནམ་ནམ་ཀྱི་ཚོགས་ཀྱིས་ཐབས་མཁས་པའི་སྒོ་ནས་འགྲོ་བའི་དོན་སྣ་ཚོགས་སུ་མཛད་པས་ནི་གཞན་གྱི་དཔལ་ལོ། །ཡེ་ཤེས་ཞེས་བྱ་བ་ནི། ཆོས་ཐམས་ཅད་སྤྱི་དང་རང་གི་མཚན་ཉིད་ཀྱང་མཉམ་པ་ཉིད་ལས་མ་གཡོས་པ་ནི་མཉམ་པ་ཉིད་ཀྱི་ཡེ་ཤེས་སོ། །དེ་ལྟར་སྟོང་པ་ཉིད་ཀྱང་དོན་དམ་པར་ན་ཡང་དག་པའི་ཤེས་རབ་ཀྱིས་གསལ་བར་རིག་པ་ནི་སོ་སོར་རྟོག་པའི་ཡེ་ཤེས་སོ། །དེ་ལྟར་རྟོགས་པས་བྱས་པ་ཆུད་མ་ཟོས་པས་བྱས་པ་མཐར་ཕྱིན་པས་ན་བྱ་བ་གྲུབ་པའི་ཡེ་ཤེས་སོ། །བརྩོན་འགྲུས་ནི་ཉིན་མཚན་དུས་དྲུག་ཏུ་འགྲོ་བའི་དོན་སྣ་ཚོགས་སུ་མཛད་པ་ནི་བརྩོན་འགྲུས་སོ། །དེ་ལྟ་བུའི་སྟོན་པ་སངས་རྒྱས་བཅོམ་ལྡན་འདས་ཉེས་པའི་མཐར་ཕྱིན་པ། ལེགས་པའི་ཡོན་ཏན་བསྔགས་པའི་ཕུལ་དུ་ཕྱིན་པའོ། །བཅོམ་ལྡན་འདས་ནི་རྒྱུད་ཀྱི་སྟོན་པ་སྣ་ལ་སྨོས་སོ། །སྟོན་པའི་མདོར་བསྡུས་པ་བཤད་ཟིན་ཏོ།། །།ད་ནི་གནས་ཕུན་སུམ་ཚོགས་པའི་རང་བཞིན་ཀུན་རྫོབ་ཏུ་འདོད་པའི་ཡོན་ཏན་ལྔའི་རང་བཞིན་དུ་སྣང་བ་སྟེ། དེ་བཞིན་གཤེགས་པའི་བཞུགས་གནས་སུ་གསུངས་པས་ན། དོན་དམ་པ་བཤད་པའི་ཐབས་སུ་སྟོན་ཏེ། དེ་ཡང་ཅིའི་ཕྱིར་ཞེ་ན། ལྷའི་མཆོག་ཐམས་ཅད་ཀྱི་གནས་དགའ་བའི་ཚལ་ཡིད་དུ་
འོང་བ། ཁྱད་པར་དུ་འཕགས་པའི་གནས་ཕུན་སུམ་ཚོགས་པ་སྟོན་ཏེ། བརྒྱ་བྱིན་ལྷའི་དབང་པོ་བསོད་ནམས་ཀྱི་མཐུ་ལས་བྱུང་བ། ལྷའི་ལོངས་སྤྱོད་ཀྱི་རྒྱན་རིན་པོ་ཆེ་སྣ་ཚོགས་པ་དང༌། མཆོད་པའི་ཡོན་ཏན་སྣ་ཚོགས་པ་རྣམས་སུ་སྣང་བས་ནི་ལྷའི་གནས་ཞེས་བྱའོ། །ཀུན་རྫོབ་ཏུ་དེ་ལྟར་སྣང་ན་ཡང༌། དོན་དམ་པར་དེ་བཞིན་གཤེགས་པ་ཐམས་ཅད་ཀྱི་གཞལ་ཡས་ཁང་དུ་བྱིན་གྱིས་བརླབས་ནས་ཡེ་ཤེས་ལྷུན་གྱིས་གྲུབ་པའི་ཕྱིར་ན་མཆོག་ཅེས་བྱའོ། །དེ་ལྟ་བུའི་གཞལ་ཡས་ཁང་དེ་ལས་འདོད་པའི་ཡོན་ཏན་ཏིང་ངེ་འཛིན་གྱི་མཐུ་སྣ་ཚོགས་སུ་འབྱུང་བས་ན་ཐམས་ཅད་ཀྱི་ཞེས་བྱའོ། །དེ་ལྟ་བུའི་གཞལ་ཡས་ཁང་གི་ངོ་བོ་ཉིད་ནི་ཏིང་ངེ་འཛིན་གྱི་ཡེ་ཤེས་ཀྱིས་རྟོགས་པའི་ཡུལ་ཡིན་པས་ན་གནས་ཞེས་བྱའོ། །དེའི་དོན་ཟབ་ལ་རྒྱ་ཆེན་ར་བཏུ་རྟོགས་ན་དགའ་བའི་རོ་སྣ་ཚོགས་སུ་འབྱུང་བས་རབ་ཏུ་དགའ་བའི་ངོ་བོས་ན་དགའ་བ་ཞེས་བྱའོ། །ཆོས་ཀྱི་དབྱིངས་ཀྱི་གཞལ་མེད་ཁང་སྟེ། ཡོན་ཏན་དང་ཆོ་འཕྲུལ་སྣ་ཚོགས་པ་འབྱུང་བའི་གཞི་ཡིན་པས་ན་མང་བའི་ཕྱིར་ཞེས་བྱའོ། །མཚན་དང་དཔེ་བྱད་རྒྱན་དང་ཆ་ལུགས་སྣ་ཚོགས་པ་འབྱུང་བའི་གཞི་ཡིན་པས་ན། སེམས་རབ་ཏུ་དགའ་མགུ་རངས་པའི་ཕྱིར་ན་ཡིད་དུ་འོངས་བ་ཞེས་བྱའོ། །དེ་ལྟར་གནས་ཀྱི་ཡོན་ཏན་མདོར་བསྡུས་ནས། དེའི་འོག་ཏུ་ཡོན་ཏན་ཀུན་རྫོབ་ཏུ་སྣ་ཚོགས་སུ་སྣང་བ་དེ་བརྒྱ་བྱིན་བསོད་ནམས་ཀྱི་རྐྱེན་ཏེ། དོན་དམ་པའི་ཚུལ་དུ་བཤད་པར་བྱ་སྟེ། དངོས་པོ་རྣམས་ཆོས་ཉིད་དུ་ཟླ་བ་དང༌། མཚན་མ་ལ་ཞེན་པ་རྣམས་མཚན་མ་མེད་པར་བྱ་བ་དང༌། དེ་བཞིན་གཤེགས་པར་གཞན་མས་རྟོགས་པའི་ཡུལ་མ་ཡིན་ཞེས་སྟོན་ཏེ། དེ་ཡང་ཅིའི་ཕྱིར་ཞེ་ན། བུདྡྷ་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ཞེས་འབྱུང་བའི་ཕྱིར་ན་འོག་གི་གཏན་ཚིགས་གང་དུ་དྲངས་པའི་སྒོ་ནས་ཆེད་དོ། །ནོར་བུ་དང་རྔ་བོ་ཆེའི་སྒྲ་གྲགས་བ་ལ་སོགས་པ་བ་སྟན་པར་བྱ་སྟེ། ཆེ་བའི་ཡོན་ཏན་སྣ་ཚོགས་སུ་འབྱུང་བའི་རྟགས་སུ་ནོར་བུ་དང༌། །བྱང་ཆུབ་ཀྱི་སེམས་ཡེ་ཤེས་ཀྱི་འོད་འབར་བའི་རྟགས་སུ་གསེར་གྱི་ཤིང་ཡལ་ག་དང་ལྡན་པ་དང༌། ཏིང་ངེ་འཛིན་བདེ་
བའི་དོན་གྱི་ཁྱད་པར་ལ་དཔང་ཐོབ་པའི་རྟགས་སུ་ལྕུག་མར་བཅས་པ་དང༌། ཏིང་ངེ་འཛིན་འབུམ་ཕྲག་འབྱུང་བའི་རྟགས་སུ་ཤིང་གེལ་པ་དང༌། ཡང་དག་པའི་ཤེས་རབ་ཀྱིས་ཉོན་མོངས་པའི་ནད་སྣ་ཚོགས་པའི་སྡུག་བསྔལ་གྱི་གནོད་པ་སེལ་བའི་རྟགས་སྨན་དང༌། སོ་སོར་ཀུན་དུ་རྟོགས་པའི་ཤེས་རབ་ལ། གཟུང་འཛིན་རྣམ་པ་གཉི་སི་ཀྱི་སྐྱོན་གྱི་ཟུག་རྡུལ་དང་བྲལ་ཏེ་འཁོར་བའི་ཉེ་གནས་ལ་ཕན་འདོགས་པའི་རྟགས་སུ་མེ་ཏོག་སྣ་ཚོགས་བ་དང༌། འཁོར་བ་མི་ཟད་པའི་བར་དུ་ཐབས་མཁས་པའི་ཐུགས་རྗེ་ཆེན་པོ་མི་ཟད་པས་ན་དཔག་བསམ་གྱི་ཤིང་གིས་མཛེས་པར་བྱས་པ་དང༌། ཐབས་མཁས་པའི་ཆོ་འཕྲུལ་སྣ་ཚོགས་པ་འགྲོ་བ་ལ་འབྱུང་བའི་རྟགས་སུ་ནི་རྒྱན་གྱིས་རྣམ་པ་སྣ་ཚོགས་པས་བརྒྱན་པ་དང༌། ཐོགས་པ་མེད་པའི་ཡེ་ཤེས་ཀྱི་རྫུ་འཕྲུལ་གྱིས་འཁོར་བའི་ཉེ་གནས་ལ་ཕན་འདོགས་པའི་རྟགས་བྱ་སྣ་ཚོགས་པ་སྐད་འབྱིན་བ་དང༌། ཞལ་གྱི་དཀྱིལ་འཁོར་ནས་ཚངས་པའི་གསུང་རྣམ་པར་དག་པ་ཕྱུང་ནས་འགྲོ་བ་ལ་ཆོས་སྟོན་པའི་རྟགས་སུ་རྔ་བོ་ཆེ་དང༌། ཅད་ཏེའུ་ལ་སོགས་པའི་སྒྲ་སྣ་ཚོགས་པ་གྲག་པ་ལ་སོགས་པ་བ་སྟན་པའི་ཕྱིར་རོ། །དེ་ནི་གཞལ་ཡས་ཁང་གི་ཕུན་སུམ་ཚོགས་པའི་དོན་བ་སྟན་ཟིན་ཏོ། །ད་ནི་འཇིག་རྟེན་ལས་འདས་པའི་བསོད་ནམས་ཀྱི་རྐྱེན་དང༌། དེ་བཞིན་གཤེགས་པ་ལས་གྲུབ་པའི་དོན་སྟོན་ཏེ། དེ་ཅིའི་ཕྱིར་ཞེ་ན། ཁམས་གསུམ་ཐམས་ཅད་ཐུགས་རྡོ་རྗེའི་ཞིང་ཡིན་པས་ན། བརྒྱ་བྱིན་དང་ཚངས་པ་ལ་སོགས་པ་རྩེན་བ་ཞེས་བྱའོ། །ས་དང་པོ་བདེན་པ་མཐོང་བས། ཏིང་ངེ་འཛིན་དང་ཞིང་ཁམས་བརྒྱ་ལ་རྩལ་སྤྱོད་བས་བརྒྱ་བྱིན་ཞེས་བྱའོ། །ས་དང་པོར་འཁོར་བ་བ་སྟན་པ་ལས་ཚངས་པ་ལ་སོགས་པ་ཞེས་བྱའོ། །ས་དང་རོ་རང་ཏི་ཏིང་ངེ་འཛིན་ལ་ཤེས་པའི་རྩལ་སྦྱོང་བས་ན། ལྷའི་བུ་སྣ་ཚོགས་པས་རྣམ་པར་རྩེན་པ་ཞེས་བྱའོ། །ས་དང་པོར་དེ་བཞིན་གཤེགས་པ་ཐམས་ཅད་ལ་དགེ་བའི་རྩ་བ་བསྐྲུན་པས་ན། དེའི་ཕྱིན་ན་སངས་རྒྱས་དང་ཞེས་བྱའོ། །དེ་ལྟ་བུའི་བྱང་ཆུབ་སེམས་དཔའ་དེ་ནི་བྱང་ཆུབ་སེམས་དཔའ་ཐམས་ཅད་ཤེས་པའི་རྩལ་སྦྱོང་བ་རྣམ་པར་མི་རྟོག་པའི་ཡེ་ཤེས་ཐོབ་པའི་གཞི་ཡིན་པས་ན་
བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ཞེས་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་གཞལ་ཡས་ཁང་དེ་ནི་ས་དང་པོ་མཐོང་བའི་ལམ་ཡན་ཆད་མ་ཡིན་བ་གཞན་གྱིས་མ་རྟོགས་པས་ན། ཤེས་པའི་རྩལ་སྦྱངས་ཏེ། ཐུན་མོང་མ་ཡིན་པའི་གནས་དེ་ན་རྣམ་པ་ཐམས་ཅད་མཁྱེན་པའི་སངས་རྒྱས་ཤཱཀྱ་ཐུབ་པ་འཁོར་འཇིག་རྟེན་ལས་འདས་པ་སྣ་ཚོགས་པས་ཡོངས་སུ་བསྐོར་ནས་སྤྲིན་བཞིན་དུ་གཏིབས་ཏེ་བཞུགས་པའི་དོན་རབ་ཏུ་བསྡུས་པ་སྟོན་ཏེ། གནས་ཕུན་སུམ་ཚོགས་པའི་དོན་བསྡུས་པའི་དོན་བཤད་ཟིན་ཏོ།། །།ད་ནི་འཇིག་རྟེན་པའི་འཁོར་ཕུན་སུམ་ཚོགས་པ་སྟོན་ཏེ། འཇིག་རྟེན་ལས་འདས་པའི་འཁོར་མི་སྨོས་པར། འཇིག་རྟེན་པའི་འཁོར་སྣ་ལ་སྨོས་པ་མི་འགལ་ལམ་ཞེས་རྒོལ་བ་ལས། གཏན་ཚིགས་ཀྱིས་མི་འགལ་བར་སྟོན་ཏེ། དེ་ཅིའི་ཕྱིར་ཞེ་ན། འཇིག་རྟེན་པའི་ཆོས་ཅན་འཇིག་རྟེན་པ་ལས་འདས་པར་ཆོས་ཉིད་དུ་བཟླ་བ་དང༌། ཐེག་པ་ཆུང་བའི་འཇིག་རྟེན་པ་རྣམས་མོས་པ་སྐྱེད་དུ་གཞུག་པའི་ཕྱིར་ན་སྨོས་སོ། །བརྒྱ་བྱིན་དང་ཚངས་པ་ཞེས་བྱ་བ་ནི་མགོ་བརྒྱ་བྱིན་ཞིང་མཆོད་སྤྱིན་བརྒྱ་གཏང་བ་དང༌། ནོར་བུ་ཏིར་ཡ་ཀ་བརྒྱ་བྱིན་པས་བརྒྱ་བྱིན་ཏེ། ཡོན་བདག་ཡིན་བ་དང༌། གནས་ཀྱི་བདག་པོ་ཡིན་པས་སྣ་ལ་སྨོས་སོ། །ཚངས་པ་ནི་ཉོན་མོངས་བ་འཁོར་འགྱོད་ཁྲིན་དང་འདྲ་བ་ལས་ཚངས་པའམ། འཇིག་རྟེན་པའི་མེས་པོའམ། ཆོས་ཀྱི་འཁོར་ལོ་ཆེན་བོ་རྣམས་ལ་བསྐུལ་བར་དམ་བཅས་བས་ན་སྨོས་སོ། །སོགས་པ་ཞེས་བྱ་བ་ནི། དེ་གཉིས་ཀྱི་འཁོར་དུ་ནི་འདོད་ཁམས་བརྒྱ་བྱིན་གྱི་འཁོར་དུ་སྡུད་པ་དང༌། གཟུགས་ཁམས་ཚངས་པའི་འཁོར་དུ་སྡུད་པས་ན་འཁོར་དང་བཅས་པ་ནི་སོགས་པ་ཞེས་བྱའོ། །སོ་སོའི་སྐྱེ་བོ་ལས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ། ཚོགས་རྣམས་ཚུལ་བཞིན་བསགས་ནས་སྦྱོར་བའི་ལམ་ནོན། དེ་ཐེག་པ་ཆེན་པོའི་འཁོར་བར་མི་ལྡོག་ཅིང༌། སྔོན་ཆད་མ་མཐོང་བའི་རྣམ་པར་མི་རྟོག་པའི་ཡེ་ཤེས་མཐོང་བའི་རིགས་གཟུང་བ་དང༌། རྣམ་པ་གཅིག་ཏུ་ཆོ་འཕྲུལ་རྣམ་པ་བཞི་དང་མངོན་པར་བྱང་ཆུབ་པ་རྣམ་པ་ལྔའི་སྒོ་
ནས་སྤྱོད་ཅིང་སྦྱངས་ནས། ཐེག་པ་ཆེན་པོའི་རིགས་འཛིན་པས་ན་རིགས་འཛིན་ནོ། །དེའི་འོག་ཏུ་དེ་རྣམས་ཀྱི་བསོད་ནམས་ཀྱི་རྐྱེན་ཆགས་པའི་ཡུལ་དེ་ཆོས་ཉིད་ཡེ་ཤེས་ཀྱིས་བརྒྱན་པས་ན་ལྷའི་བུ་སྨོས་སོ། །དེའི་འོག་ཏུ་སེམས་ཅན་ལ་གནོད་པ་བྱེ་བྲག་ཞི་བར་གསུངས་པའི་ཕྱིར་ན་གནོད་སྤྱིན་ཏེ། རྣམ་ཐོས་སྲས་དང་སྲུངས་ཡང་དག་ཤེས་ལ་སོགས་པའོ། །དེའི་འོག་ཏུ་ཞེ་སྡང་གི་དྲེགས་པ་ཡོངས་སུ་གཞུག་པའི་ཕྱིར་ན། སྲིན་པོའི་སྡེ་ལང་ཀ་མགྲིན་བཅུ་དང༌། བདེན་བྲལ་དུ་བུམ་རྣ་འོ། །དེའི་འོག་ཏུ་ཕྲག་དོག་གདུག་རྩུབ་ཏུ་གཞུག་པའི་ཕྱིར་ན། ལྷ་མ་ཡིན་གྱི་རྒྱལ་པོ་རབ་སིམ་དང༌། རྣམ་པར་སྣང་བྱེད་དང༌། སྒྲ་གཅན་འཛིན་དང༌། སུམ་བརྩེགས་འཁོར་དང་བཅས་པ་དང༌། དེའི་འོག་ཏུ་ཉམ་ཆུང་བ་རྣམས་གཟེངས་བསྟོད་པའི་ཕྱིར་ན་དྲི་ཟ་སྟེ། རྒྱལ་པོ་ཡུལ་འཁོར་སྲུང་དང༌། ཟུར་ཕུད་ལྔ་པ་འཁོར་དང་བཅས་པའོ། །དེའི་འོག་ཏུ་སྤྱོད་པ་མི་ཚད་པ་ཚད་དུ་བཅུག་པའི་ཕྱིར་ན། མིའམ་ཅིའི་སྡེ་གྱལ་པོ་ཤིང་ལྗོན་པ་དང༌། བཙུན་མོའི་འཁོར་དང་བཅས་པའོ། །དེའི་འོག་ཏུ་སྐལ་བ་མེད་པ་རྣམས་གཟེངས་བསྟོད་དུ་གཞུག་པའི་ཕྱིར་ན་ལྟོ་འཕྱེ་ཆེན་པོ་རབ་བརྟན་འཁོར་སྤྲུལ་གྱིས་བསྐོར་བའོ། །དེའི་འོག་ཏུ་གནོད་པའི་བྱེ་བྲག་སྣ་ཚོགས་པ་ཞིར་གཞུག་པའི་ཕྱིར་ན། ཀླུའི་སྡེ་བ་རུ་ཎ་དང་འཇོག་པོ་ལ་སོགས་པའོ། །དེ་ནི་འཇིག་རྟེན་པའི་འཁོར་ཕུན་སུམ་ཚོགས་པ་སྟེ། དེ་ཅིའི་ཕྱིར་ཞེ་ན། སྟོན་པའི་ཞབས་འབྲི་ནག་དྲེགས་པ་ཅན་ཡིན་པས་ཐུལ་ནས་ཀྱང་གདམས་ངག་ཕོག་བས་ན་སྣ་ལ་སྨོས་སོ། །འཇིག་རྟེན་བའི་འཁོར་ཕུན་སུམ་ཚོགས་པའི་དོན་བ་སྟན་ཟིན་ཏོ། །ད་ནི་ཐུགས་ཡང་དག་པའི་ཡེ་ཤེས་ལས་བསྐྱེད་པ་རྒྱལ་སྲས་འཇིག་རྟེན་ལས་འདས་པའི་དོན་ཏོ། །ཅིའི་ཕྱིར་ཞེ་ན། འཇིག་རྟེན་ལས་འདས་པ་ཞེས་བྱ་ཞེ་ན། འཇིག་རྟེན་པའི་ཚུལ་འཛིན་པའི་མཚན་མའི་བྱེ་བྲག་དང་དོན་རྟོག་པའི་མཚན་མ་སྤངས་ནས། དེ་བཞིན་གཤེགས་པའི་ཐུགས་ཡང་དག་པའི་ཡེ་ཤེས་ཀྱི་དགོངས་པ་ལ་འཇུག་པའི་ཕྱིར་རོ། །དེ་ཡང་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྨོས་ཏེ་ཡང་དག་པའི་ཤེས་རབ་ཀྱིས་གཟུང་འཛིན་གྱི་སྒྲིབ་པ་གཉིས་གཏན་
ནས་བཅོམ་པས་ན་བྱང་ངོ༌། །དངོས་པོ་མེད་པའི་མཐའ་སྤངས་ཏེ། ཤེས་བྱ་ལ་ཡེ་ཤེས་ཁྱབ་པས་ན་ཆུབ་པོ། །ཆོས་ཉིད་དོན་གཉིས་སུ་མེད་པར་སེམས་པས་ན་སེམས་སོ། །དེའི་དོན་གཉིས་སུ་མེད་པས་ན། སྐད་ཅིག་ཀྱང་མི་ཡེངས་པར་ཀློང་དུ་གྱུར་པས་ན་བདུད་དང་མུ་སྟེགས་ཀྱིས་བསླུར་མི་ཐུབ་པས་ན་དཔའ་བའོ། །དེ་ལྟ་བུ་མི་རྟོག་པའི་ངང་ལས་སྔོན་གྱི་བསོད་ནམས་ཀྱི་ཚོགས་ཀྱིས་དག་པ་འཇིག་རྟེན་པའི་ཡེ་ཤེས་ཀྱིས་གཟུང་འཛིན་གྱི་སྒྲིབ་པ་སྤངས་པ་འབྱུང་སྟེ་གནས་པ་ནི་སེམས་སོ། །ཐབས་མཁས་པའི་ཐུགས་རྗེ་དེ་འཁོར་བ་མི་ཟད་ཀྱི་བར་དུ་སྲན་འཛུགས་པས་ན་དཔའ་བའོ། །དེ་ལྟ་བུ་དང་སྤྱོད་པ་གཞན་པས་ན་ཆེན་པོའོ། །དེ་ལྟ་བུའི་འཁོར་གྱི་གྲངས་ནི། བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱང་ལ་འདི་ལྟ་སྟེ་ཞེས་སྨོས་ཏེ། ཏིང་ངེ་འཛིན་དེ་ཙམ་ལ་མངའ་བརྙེས་པའི་ཕྱིར་དང༌། ཆེ་བའི་བྱིན་རླབས་དང་ཆོ་འཕྲུལ་དེ་ཙམ་མངའ་བའི་ཕྱིར་དེ་སྐད་ཅེས་བྱའོ། །གཞན་དུ་ན་སངས་རྒྱས་ཀྱི་ཞིང་མཐའ་ཡས་པ་ནས་འདུས་ཏེ། །དམ་པའི་ཆོས་བཙུན་པར་བྱ་བའི་སྟོན་པའི་ཞབས་འབྲི་ནག་འཁོར་དུ་བསྡུས་པའི་ཕྱིར་ན་གྲངས་ཀྱི་བྱེ་བྲགས་སྨོས་སོ། །དེ་ལྟར་བྱང་ཆུབ་སེམས་དཔའ་ཚད་མེད་གྲངས་མེད་པ་ལ་མདོར་སྨོས་པ་ནི་འདི་དག་གོ །བྱང་ཆུབ་སེམས་དཔའ་བློ་གྲོས་ཚད་མེད་པ་ནི། བདོག་པ་ཐམས་ཅད་གཏོང་བས་ས་དང་འདྲ་སྟེ། ཡང་དག་པའི་ཤེས་རབ་ཀྱི་བློ་གྲོས་ལ་ཐབས་མཁས་པའི་སྤྱིན་པ་ཚད་མེད་དཔག་ཏུ་མེད་པའི་ངོ་བོ་ཡིན་པས་ན། ནམ་མཁའི་སྙིང་པོའོ། །ནམ་མཁའི་བློ་གྲོས་ཀྱི་དོན་ལ་སྙིང་པོ་ནི་ཚད་མེད་པ་སྨོས་སོ། །བློ་གྲོས་མི་གཡོ་བ་ཞེས་པ་ནི། ཚུལ་ཁྲིམས་མི་གཡོ་བ་རྒྱ་མཚོའི་གཏིང་དང་འདྲ་སྟེ། ཚུལ་ཡང་དག་པའི་ངོ་བོ་ཡངས་ལ་རྒྱ་ཆེ་བས་མི་གཡོ་བའི་ཕྱིར་རོ། །ཁྲིམས་དེ་ལས་མི་འདའ་བས་བློ་གྲོས་སོ། །དེ་ནི་སའི་སྙིང་པོ་སྟེ། ས་ནི་འགྲོ་བའི་རྟེན་བྱེད་ཀྱང་མི་གཡོ་བ་དན་སྤྱར་རོ། །སྙིང་པོ་ནི་སྐྱོན་སྤངས་པའི་དོན་ཏེ་བློ་གྲོས་དང་སྤྱར་རོ། །དེ་ལྟ་བུའི་སའི་སྙིང་པོའི་རང་བཞིན་པས་ན་སྨོས་སོ། །བློ་གྲོས་ཡངས་པ་ནི། བཟོད་ཆེན་བརྟན་པས་རི་རབ་ལྷུན་པོ་འདྲ། ཡང་དག་པའི་བཟོད་པ་ཡངས་ལ་རྒྱ་ཆེ་
སྟེ། རི་རབ་ལྟར་བསྐྱོད་པར་དཀའ་སྟེ་སྒྲིབ་པ་རྣམ་པར་སེལ་བའི་རང་བཞིན་དུ་ཤེས་པར་བྱའོ། །སྒྲིབ་པ་རྣམ་པ་གཉིས་བ་སྟན་པ་ཡང༌། ཆོས་རྣམས་ཀྱི་ངོ་བོ་རྣམ་པར་སེལ་བས་ནི་བློ་གྲོས་སོ། །ཀུན་དུ་བློས་གྲོས་ནི་རབ་ཏུ་འབར་བའི་བརྩོན་འགྲུས་སྤྲིན་དང་འདྲ། ཡང་དག་པའི་ཤེས་རབ་ཀྱིས་ཀུན་དུ་མྱུར་བའི་རྫུ་འཕྲུལ་དང་ལྡན་པས་ཀུན་དུ་འགྲོ་འོང་བརྩོན་འགྲུས་ཐོགས་པ་མེད་པས་བློ་གྲོས་སོ། །དེ་ནི་ཕྱག་ན་རྡོ་རྗེ་སྟེ། དེ་ནི་ཐུགས་གསང་བའི་མཛོད་འཛིན་པས་ན་ཀུན་དུ་བཟང་ངོ༌། །དེ་ལྟ་བུའི་ཏིང་ངེ་འཛིན་དང་ལྡན་པས་བློ་གྲོས་སོ། །བློ་གྲོས་མཐའ་ཡས་ནི་བསམ་པ་མི་འགྱུར་ནམ་མཁའི་དཀྱིལ་དང་འདྲ། ཆོས་ཀྱི་དོན་ལ་ཡང་དག་པའི་ཡེ་ཤེས་ཀྱིས་གཏན་པ་བཅུག་པས་ན་བློ་གྲོས་སོ། །སྐུ་གསུང་ཐུགས་ནམ་མཁའ་ལྟར་ཡངས་པས་ན་མཐའ་ཡས་སོ། །དེ་ནི་དྲི་མ་མེད་པར་གྲགས་པ་སྟེ། ཡང་དག་པའི་ཤེས་རབ་ལ་སྐྱོན་གྱི་དྲི་མ་མེད་པས་ན་བློ་གྲོས་སོ། །ཐབས་མཁས་པའི་ཐུགས་རྗེ་སྣ་ཚོགས་ཀུན་དུ་གྲགས་པ་མཐའ་ཡས་ཞེས་སྨོས་སོ། །བློ་གྲོས་ཀ་མ་ལ་ནི། ཤེས་རབ་མཐའ་གཉིས་སྤངས་པས་པདྨ་འདྲ་སྟེ། ཤེས་རབ་ཀྱི་གཟུང་འཛིན་ཡངས་པ་སྟེ་བློ་གྲོས་སོ། །མཐའ་གཉིས་ལ་སེམས་པས་པདྨ་ལྟར་མ་ཆགས་པས་ན་ཀ་མ་ལ་འོ། །དེ་ནི་འཇམ་དཔལ་ཏེ་སྐུ་གསུང་ཐུགས་འཇམ་པས་ན་བློ་གྲོས་འཇམ་པའོ། །ཤེས་རབ་ཚད་མེད་པས་ནམ་མཁའི་དཀྱིལ་དང་འདྲ་བས་ན་དཔལ་ཏེ་ཀ་མ་ལ་ཞེས་པའོ། །བློ་གྲོས་ཆེན་པོ་ནི་ཐབས་ཀྱིས་འགྲོ་དོན་མཛད་པས་གར་མཁན་འདྲ། ཐབས་ཀྱིས་འགྲོ་དོན་སྣ་ཚོགས་སུམ་མཛད་པས་ན་བློ་གྲོས་སོ། །མཛད་པ་གར་ཐབས་དང་འདྲ་བ་འཇོམས་པས་ན་ཆེན་པོའོ། །དེ་ནི་སྤྱན་རས་གཟིགས་དབང་ཕྱུག་གོ །ཡང་དག་པའི་ཤེས་རབ་ཀྱི་སྤྱན་གྱིས་ཆོས་ཉིད་ཀྱི་དོན་ལ་གཟིགས་པས་ན་བློ་གྲོས་སོ། །ཐུགས་རྗེས་འཁོར་བ་ལ་དབང་ཞིང་ཚོགས་རྫོགས་ནས་ཕྱུག་པས་ན་ཆེན་པོའོ། །བློ་གྲོས་ལྷ་རྫས་ནི། སྟོབས་ཆེན་གནོན་བས་ལྷ་རྫས་མཐུ་ཆེན་འདྲ། ཡེ་ཤེས་ཀྱི་སྟོབས་དང་ལྡན་པའི་བློ་གྲོས་སོ། །ཕ་རོལ་གྱིས་ཟིལ་གྱིས་མི་ནོན་པས་ན་ལྷ་རྫས་སོ། །དེ་ནི་བྱམས་
པ་སྟེ། ཕྱོགས་མེད་པའི་བྱམས་པ་དང་ལྡན་པས་ན་བློ་གྲོས་སོ། །སྐྱེ་བ་གཅིག་གིས་ཐོགས་པས་ན་ལྷ་རྫས་སོ། །བློ་གྲོས་སྣ་ཚོགས་པས་ནི་སྨོན་པ་མེད་པའི་ཡེ་ཤེས་ལྔ་དང་ལྡན། ཆོས་ཉིད་ཀྱི་དོན་མཐོང་བ་ནི་སྨོན་པ་མེད་པས་ན་བློ་གྲོས་སོ། །ཡང་དག་པའི་ཡེ་ཤེས་སྣ་ཚོགས་སུ་སྣང་བས་ན་སྣ་ཚོགས་སོ། །དེ་ནི་ཀུན་དུ་བཟང་པོ་སྟེ། ལྟ་བ་དང་སྤྱོད་པ་ཀུན་དུ་ངན་པའི་མིང་ཡང་མེད་པས་ན་བློ་གྲོས་སོ། །སྨོན་ལམ་སྣ་ཚོགས་ལ་མངའ་བརྙེས་པས་སྣ་ཚོགས་སོ། །སོགས་ཞེས་བྱ་བ་ནི་གོང་དུ་གསུངས་པའི་དོན་ཏེ། གཙོ་བོར་རྣམས་ཀྱིས་འཁོར་དུ་གཏོགས་པའི་ཕྱིར་རོ། །ཕྱིར་མི་ལྡོག་པ་ནི་མོས་པ་སྤྱོད་པས་ངན་སོང་དུ་མི་ལྡོག་པ་བརྒྱང་པ་མཚན་མར་མི་ལྡོག་པས་ན་ཕྱིར་མི་ལྡོག་པའོ། །དགེ་འདུན་ཐུག་པ་མེད་པ་ནི་འཁོར་གྱི་རྣམ་གྲངས་ཀྱིས་ཆོས་ཉན་ཅིང་འཇུག་པས་ན་སྨོས་སོ། །དེ་ལ་དགེ་བའི་འབྲས་བུ་བླ་ན་མེད་པའོ། །འདུན་པ་ཡིད་འཕགས་པའི་ལམ་ལ་དམིགས་པའོ། །འཁོར་མང་པོའི་དབུས་ན་ཞེས་བྱའོ། །རྒྱལ་སྲས་བྱང་ཆུབ་སེམས་དཔའ་ཐུགས་ལས་སྐྱེས་བའི་འཁོར་དང༌། ཉན་ཐོས་དགྲ་བཅོམ་པ་གསུངས་ལས་སྐྱེས་པའི་འཁོར་དང༌། ལྷ་ཀླུ་གནོད་སྤྱིན་ལ་སོགས་པ་འཇིག་རྟེན་ལས་ཀྱི་འཁོར་དང༌། སྣང་སྲིད་ཐམས་ཅད་ཐུགས་རྗེ་ཞིང་གི་འཁོར་གྱི་དབུས་ན་དེ་བཞིན་གཤེགས་པ་བཞུགས་ཏེ། ཅིའི་ཕྱིར་ཞེ་ན། ཚངས་པ་ཆེན་པོ་པདྨའི་གདན་ནི། ཡེ་ཤེས་ཀྱི་འཁོར་བ་ལས་ཚངས་པ་དང་འཕྲིན་ལས་ཀྱིས་ཁམས་གསུམ་ཐམས་ཅད་འཁོར་བ་ལས་ཚངས་པར་བྱེད་པའོ། །པདྨ་ནི་ཐུགས་རྣམ་པར་དག་པ་མཚན་མས་མི་གོས་པ་དང༌། ཐབས་མཁས་པའི་ཕྲིན་ལས་འགྲོ་བའི་དོན་མཛད་ན་སྤྱོད་པས་མི་གོས་པས་ན་སྤྱད་པའོ། །ཆེན་པོའི་རྒྱུ་བྱང་ཆུབ་དང་ལྡན་པ་དང༌། འབྲས་བུ་ཁམས་གསུམ་ཐམས་ཅད་བླ་ན་མེད་པའི་དོན་ལ་དགོངས་པས་ན་ཆེན་པོའོ་ཞེའོ། །གདན་ནི་འབྲེལ་པའི་དོན་ཏེ་ཐུགས་རྗེ་ཐབས་ཀྱིས་འགྲོ་བའི་དོན་ལ་ཞུགས་པས་གདན། ཏིང་ངེ་འཛིན་རྣམ་པར་མི་རྟོག་པའི་ངང་ལ་བཞག་པས་གདན་ནོ། །བཞུགས་པ་ནི་ཏིང་ངེ་འཛིན་ཡེ་ཤེས་ངན་སོང་སྦྱོང་བའི་ཏིང་ངེ་འཛིན་ལ་ཞུགས་པ་དང༌། ཕྲིན་ལས་
ཐུགས་རྗེས་འོད་ཟེར་སྡུད་པའི་ཏིང་ངེ་འཛིན་གྱི་སྒོ་ནས་བཞུགས་པའོ། །ད་ནི་སྟོན་པས་གླེང་བསླང་བ་སྟོན་ཏེ། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ནི་རྒྱུ་ལས་དང་ཉོན་མོངས་པ་ངན་པ་ལས་འབྲས་བུ་སྡུག་བསྔལ་གྱི་ཕུང་པོ་ཁམས་གསུམ་དུ་སོང་བས་ན་སོང་བའོ། །རྒྱུད་ནི་ཀུན་གཞི་ལ་ཐོག་མ་མེད་པའི་དུས་ན་བག་ཆགས་རང་རྒྱུད་དུ་ཡོད་པས་ན་རྒྱུད་དོ། །ཐམས་ཅད་ནི་ལས་དང་ཉོན་མོངས་པའི་བག་ཆགས་དང་འབྲེལ་པའི་སེམས་ཅན་ནོ། །ཡོངས་སུ་སྦྱོང་བ་ནི་ཐུགས་རྡོ་རྗེ་ལྟ་བུའི་ཏིང་ངེ་འཛིན་གྱིས་སྦྱོང་བ་དང༌། ཕྲིན་ལས་འོད་ཟེར་སྡུད་པའི་ཏིང་ངེ་འཛིན་གྱིས་སྦྱོང་བའོ། །ཏིང་ངེ་འཛིན་ནི་རྡོ་རྗེ་ལྟ་བུའི་ཏིང་ངེ་འཛིན་གྱིས་ཐོག་མ་མེད་པའི་དུས་ནས་བདག་ཏུ་རྟོག་པའི་རང་བཞིན་རྒྱུའི་བག་ཆགས་ཡོད་པ་ལ་དམིགས་པའོ། །འོད་ཟེར་གྱི་ཕྲེང་བ་སྡུད་པའི་ཏིང་ངེ་འཛིན་གྱིས་ནི་འབྲས་བུ་སྡུག་བསྔལ་གྱི་ཕུང་པོ་འཇོམས་ཤིང་མི་གཏང་བས་ན་ཏིང་ངེ་འཛིན་ནོ། །སྙོམས་པར་ཞུགས་པ་ནི་མི་འདའ་བའི་སྙོམས་པར་ཞུགས་པ་དང་གཉིས་སུ་མེད་པའི་ཕྱིར་དང་འབྲེལ་པའི་ཕྱིར་སྙོམས་པར་ཞུགས་སོ། །རྣམ་པར་གྲོལ་བ་ནི་བག་ཆགས་ཀྱི་རྣམ་པ་སྣ་ཚོགས་ཏེ་གྲོལ་བ་ནི་དེ་ལས་ཐར་པའོ། །བྱང་ཆུབ་སེམས་དཔའི་ཏིང་ངེ་འཛིན་ནི་ཆོས་ཀྱི་དབྱིངས་གཟུང་འཛིན་གྱི་སྐྱོན་སྤངས་པས་ན་བྱང་ཆུབ་པའོ། །དེ་ནི་དོན་ཡེ་ཤེས་ལས་ཚུར་སྣང་བས་ན་ཆུབ་ལ། སེམས་ནི་དེ་ལས་ཐགས་རྗེའི་ཆོ་འཕྲུལ་འགྲོ་བ་རྣམས་ལས་འབྱུང་བས་ན་སེམས་སོ། །དཔའ་བའི་ཁམས་གསུམ་གྱི་འཁོར་བ་གྱེན་དུ་བཟློག་བས་དཔའ་བའོ། ཏིང་ངེ་འཛིན་དེ་ལྟ་བུའི་དོན་ལས་མི་འདའ་བར་གནས་པའི་ཕྱིར་རོ། །འོད་ཟེར་ཀུན་དུ་སྡུད་པའི་འཕྲེང་བ་ནི། ཐུགས་རྗེ་ཕུན་སུམ་ཚོགས་པ་སྟེ། ཕྱིའི་པགས་པ་ནས་བྱུང་བས་ནི་ངན་སོང་གི་ཡུལ་རྣམས་སྦྱོང་བ་ལ། ཟེར་ནི་ཡེ་ཤེས་ཀྱི་ཕྲིན་ལས་དྲང་བཞིན་ཕུན་སུམ་ཚོགས་པ་སྟེ། བ་སྤུའི་བུ་ག་ཀུན་ནས་འབྱུང་བས་ནི་བག་ཆགས་ཀྱི་རྒྱུད་སྦྱོང་ལ། སྡུད་པ་ནི་ཡོན་ཏན་གྱི་རང་བཞིན་ཏེ། སེམས་ཅན་རྣམས་བླ་ན་མེད་པའི་བྱང་ཆུབ་ལ་སྡུད་ལ་མང་པོ་ནི་དེ་རྣམས་ཀུན་ཁྱབ་པའི་དོན་ལ། ཕྲེང་བ་ནི་བསྡུས་པ་
དང་འབྲེལ་པ་ལྟར་ན་ཐུགས་རྗེ་དང་འཁོར་བར་འབྲེལ་པའི་དོན་ཡིན་ལ། ཉིད་ཀྱི་དཔྲལ་བའི་མཛོད་སྤུ་ནས་ཕྱུང་བ་ནི་ཉིད་ཀྱི་སྟོན་པ་ཤཱཀྱ་ཐུབ་པའོ། །དཔྲལ་བ་ནི་ཐུགས་རྣམ་པར་དག་པ་ནས་དཔྲལ་བའི་དཀྱིལ་འཁོར་དུ་བ་སྟན་ལ། མཛོད་སྤུ་ནི་ཏིང་ངེ་འཛིན་གྱི་ཆོ་འཕྲུལ་གཞན་ལས་འབྱུང་བའི་མཛོད་སྤུ་བ་སྟན་ལ་ཕྱུང་བ་ནི། གང་གི་འོད་ཟེར་སྡུད་པའི་ཕྲེང་བ་ཕྱུང་བའི་དོན་ཏོ། །བདེ་བ་སོ་སོར་ཐོབ་ནས་ཞེས་པ་ནི། ཐུགས་རྗེ་ཆོ་འཕྲུལ་གྱི་བྱིན་རླབས་ཀྱི་འོད་ཟེར་དེས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འོད་ཟེར་གྱི་སྣང་བ་ཆེན་པོས་ཁྱབ་པར་བྱས་ནས། སེམས་ཅན་དེ་དག་མི་དང་ལྷའི་བདེ་བ་སོ་སོར་ཐོབ་ནས། དགའ་བའི་ཚལ་དུ་བཀོད་པའི་ཕྱིར་རོ། །དེས་གསོལ་བ་འདེ་བས་པར་གྱུར་ཏེ། ཨེ་མ་ཧོ། །སངས་རྒྱས་ནི་ཐུགས་རྣམ་པར་དག་པའི་ངོ་བོ། །རྡོ་རྗེ་ལྟ་བུའི་ཏིང་ངེ་འཛིན་གྱི་སྒོ་ནས་ངན་སོང་གི་རྒྱུད་སྦྱོང་བ་རེ་བཟང་བའོ། །ཀྱེ་མ་སངས་རྒྱས་ནི་ངན་སོང་གི་རྒྱུད་སྦྱངས་བ་དེས་འབྲས་བུ་འཁོར་བར་མི་སྐྱེ་བ་སྤྱང་བ་རེ་བཟང་སྟེ། ཅིའི་ཕྱིར་ཞེ་ན། གསུང་རྣམ་པར་དག་པ་སྟེ། འགྲོ་བའི་རྒྱུད་རྣམ་པར་འབྲེལ་བའི་ཕྱིར་རོ། །ཀྱེ་མ་སངས་རྒྱས་ནི། འགྲོ་བའི་དོན་སྣ་ཆོགས་མཛད་པ་ནི་རེ་བཟང་ཞེས་བྱའོ། །ཀྱེ་མ་སངས་རྒྱས་ནི། འགྲོ་བའི་དོན་ལྟར་མཛད་ཀྱང་ཐུགས་ཆོས་ཉིད་ལས་མ་གཡོས་པས་རེ་བཟང་ཞེས་བྱའོ། །མཛད་པ་ལེགས་པ་ནི་སྐུ་གསུང་ཐུགས་ཀྱི་ཡོན་ཏན་ཕྲིན་ལས་གཞན་ལས་ཁྱད་པར་དུ་འཕགས་པའི་མཛད་པ་ལེགས་པའི་ཕྱིར་རོ། །གང་གི་ཕྱིར་བདག་ངན་སོང་ནི་སྦྱོང༌། ཐབས་དང་ཤེས་རབ་ཟུང་དུ་འབྲེལ་པའི་ཐུགས་རྗེས་འཁོར་བའི་རྒྱུ་དང་འབྲས་བུ་སྦྱངས་ནས་བཅོམ་པའི་ཕྱིར་རོ། །བྱང་ཆུབ་སྤྱོད་པ་ཉིད་ལ་གཞག་པ་ནི། སེམས་ཅན་དེ་རྣམས་ཉོན་མོངས་པའི་འཁོར་བ་ལས་བཏོན་ནས་བྱང་ཆུབ་རྣམ་པ་གསུམ་ལ་གཞག་ཅེས་གསུངས་སོ། །དེའི་འོག་ཏུ་ངོ་མཚར་མི་ཆེ་བའི་རྒྱུ་སྟོན་ཏེ། ཚད་མེད་པའི་བསོད་ནམས་ཀྱི་བསགས་པ་ཞེས་པ་ནི། དེ་ལ་སེམས་ཅན་གྱི་བསོད་ནམས་ཀྱི་ཕུང་པོ་བཅུ་འགྱུར་གྱིས་ནི་དེ་བཞིན་གཤེགས་པའི་བ་སྤུ་གཅིག་མངོན་པར་འགྲུབ་བོ། །
བ་སྤུ་མངོན་པར་གྲུབ་པའི་བསོད་ནམས་ཀྱི་ཕུང་པོ་བརྒྱ་འགྱུར་གྱིས་ནི། དཔེ་བྱད་བཟང་པོ་འགྲུབ་པོ། །དཔེ་བྱད་བཟང་པོ་གཅིག་མངོན་པར་གྲུབ་པའི་ཀཱི་བསོད་ནམས་ཀྱི་ཕུང་པོ་སྟོང་འགྱུར་གྱིས་ནི། མཛོད་སྤུ་དང་དབུའི་གཙུག་ཏོར་གདང་ཆོས་ཀྱི་དུང་མ་གཏོགས་པའི་མཚན་རེ་རེ་གྲུབ་བོ། །མཚན་ཉི་ཤུ་རྩ་དགུ་གྲུབ་པ་མ་གཏོགས་པའི་བསོད་ནམས་ཀྱི་ཕུང་པོ་ཁྲི་འགྱུར་གྱིས་མཛོད་སྤུ་གྲུབ་བོ། །མཛོད་སྤུར་གྲུབ་པ་མ་གཏོགས་པའི་བསོད་ནམས་ཀྱི་ཕུང་པོ་འབུམ་འགྱུར་གྱིས་ནི་གཙུག་ཏོར་གྲུབ་པོ། །གཙུག་ཏོར་དུ་གཏོགས་པའི་བསོད་ནམས་ཀྱི་ཕུང་པོ་བྱེ་བ་འབུམ་གྱིས་ནི། དེ་བཞིན་གཤེགས་པའི་ཆོས་ཀྱི་དུང་གྲུབ་བོ། །དེ་ནི་འབྲས་བུའོ། །རྒྱུ་ནི་རྐྱེན་དགེ་བའི་བཤེས་གཉེན་གྱི་མན་ངག་ལ་བརྟེན་ནས་བྱང་ཆུབ་ཀྱི་ཕྱོགས་དང་ཕ་རོལ་ཏུ་ཕྱིན་པའི་དགེ་བའི་རྩ་བའི་ཚོགས་བསགས་པའོ། །ཚད་མེད་པའི་ཡོན་ཏན་རིན་པོ་ཆེའི་འབྱུང་ཁུངས་ནི། ཚད་མེད་པའི་ནི་རྒྱུ་ཚད་མེད་པ་དང༌། འབྲས་བུ་ཚད་མེད་པ་དང༌། ཕྲིན་ལས་ཚད་མེད་པའོ། །ཡོན་ཏན་སྣ་ཚོགས་པ་སྟེ། འགྲོ་བའི་ལྟར་འདུལ་བ་བཞིན་དུ་འབྱུང་བའོ། །རིན་པོ་ཆེ་ནི་མི་ཟད་པའི་ཕྱིར་དང༌། དཀོན་པའི་ཕྱིར་དང༌། ཁྱབ་པའི་ཕྱིར་བཏགས་པའོ། །ཚད་མེད་པའི་ཐབས་རྫོགས་པ་ནི་ཐབས་གཉིས་ཏེ། རྒྱུའི་ཐབས་རྒྱུ་ཆུང་དུ་ལས་འབྲས་བུ་མང་པོར་བྱེད་པའོ། །འབྲས་བུའི་ཐབས་ནི་སེམས་ཅན་ཇི་ལྟར་མོས་པ་བཞིན་འབྱུང་བར་བྱ་ཞིང་སྣང་བའོ། །ཤེས་རབ་ཚད་མེད་པར་བསགས་པ་ནི་དང་པོར་འཇིག་རྟེན་པའི་ཤེས་རབ་ལ་བརྟེན་ཅིང་བསྒོམས་པས་འཇིག་རྟེན་ལས་འདས་པའི་ཤེས་རབ་ཐོབ་སྟེ། དེ་ནི་ཆོས་ཐམས་ཅད་སྐྱེ་བ་མེད་པར་རྟོགས་པས་ཚད་མེད་དེ། དེ་ཅིའི་ཕྱིར་ཞེ་ན། དངོས་པོ་དང་མཚན་མ་དང་བྲལ་བས་ཚད་ཀྱི་བྱེ་བྲག་ཏུ་མི་དམིགས་པའི་ཕྱིར་རོ། །ཚད་མེད་བ་ནི་ཐུན་མོང་དང་ཐུན་མོང་མ་ཡིན་པ་གཉིས་སུ་མེད་པ་དང་ལྡན་པ་སྟེ། ཐུན་མོང་ནི་འཇིག་རྟེན་པའི་སྤྱོད་པ་ལ། ཐུན་མོང་མ་ཡིན་པ་ནི་འཇིག་རྟེན་ལས་འདས་པའི་སྤྱོད་པའོ། །འདུལ་བའི་སྐྱེ་བོ་ཚད་མེད་པ་རྣམས་སྣོད་དུ་རུང་བར་མཛད་པ་ནི་འདུལ་བའོ། །འདུལ་བ་ནི་སྔོན་གྱི་སྨོན་
ལམ་གྱིས་འདུལ་བ་དང༌། འཕྲལ་གྱི་ཕྲིན་ལས་ཀྱིས་འདུལ་ལོ། །སྐྱེ་བ་ནི་ལས་ལས་སྐྱེ་ཞིང་འཁོར་བ་གཞོལ་ཕྱོགས་སུ་བོར་བའོ། །ཚད་མེད་པ་ནི་རྒྱུ་ཚད་མེད་པ་ནི་གནས་ཁམས་གསུམ་དང་འཁོར་བར་ལུས་བླངས་ནས། སྡུག་བསྔལ་གསུམ་དང༌། བརྒྱང་ཀྱིས་གཟིར་བའི་དེའི་རྒྱུ་ནི་ལས་དང་ཉོན་མོངས་པའོ། །དེ་ནི་མཐའ་ཡས་པའི་སེམས་ཅན་ཏེ། སྡུག་བསྔལ་གྱི་འབྲས་བུ་ཚད་མེད་པ་རབ་ལ་དམིགས་པའི་དོན་ཏོ། །སྣོད་དུ་རུང་བ་ནི་དེ་རྣམས་ཀྱི་རྒྱུ་དང་འབྲས་བུ་བཅོམ་ནས། བྱང་ཆུབ་རྣམ་པ་གསུམ་པོ་གང་ལ་ཡང་མོས་པ་ལ་དགོད་པ་ལ་སྣོད་དུ་རུང་བའོ། །མི་མཉམ་པ་དང་མཉམ་པའི་ཡེ་ཤེས་ནི། རྒྱུ་མི་མཉམ་པ་དང་ལས་དང་བའི་མཚན་ཉིད་དང༌། ཉོན་མོངས་པ་སྤོང་བའི་གྲོགས་མི་མཉམ་པ་དང༌། འབྲས་བུ་མི་མཉམ་པའོ། །མཉམ་པ་ནི་རྟོག་པ་དང་བྲལ་ཞིང་དངོས་པོ་མེད་པས་ན་མཉམ་པའོ། །མི་མཉམ་པ་དང་མཉམ་པའི་རྫུ་འཕྲུལ་དང་ལྡན་པ་ནི། མི་མཉམ་པ་དང་འགྲོ་བ་གཞན་ཉན་ཐོས་དང་རང་སངས་རྒྱས་ལ་སོགས་པའི་རྫུ་འཕྲུལ་ལ་སོགས་པ་དང་མི་མཉམ་པའོ། །མཉམ་པ་ནི། དེ་བཞིན་གཤེགས་པའི་རྫུ་འཕྲུལ་གྱི་ནང་དེ་དེ་དག་ཐམས་ཅད་འདུས་པའི་ཕྱིར་རོ། །མི་མཉམ་པ་དང་མཉམ་པའི་སྨོན་ལམ་གྱི་སྟོབས་དང་ལྡན་པ་སྟེ་ཞེས་པ་ནི། མི་མཉམ་པ་ནི་བདག་དང་གཞན་གཉིས་ཀྱི་དོན་དུ་བསྡོ་བས་མི་མཉམ་པའོ། །མཉམ་པ་ནི་དམིགས་པ་དང་བྲལ་བའོ། །སྨོན་པ་ནི་འབྲས་བུའོ། །ལམ་ནི་རྒྱུ་སྟེ་འབྲས་བུ་ལ་དམིགས་པའོ། །སྟོབས་ནི་གཞན་གྱི་ཟིལ་གྱིས་མི་ནོན་པའོ། །དེ་ལ་ཐེ་ཚོམ་དང་སོམ་ཉི་དང་ཡིད་གཉིས་མ་བྱེད་ཅིག་གོ་ཞེས་པ་ནི་ཐེ་ཚོམ་ཡིད་མི་ཆེས་པས་རྟོག་པ་ཞུགས་པའོ། །སོ་མ་ཉི་ནི་བྱ་མི་བྱ་སྙམ་པའི་སོམ་ཉིས་སོ། །རེས་འགའ་ནི་མི་བློ་རྟོག །རེས་འགའ་ནི་བློ་མི་རྒོད་པས་ནི་ཡིད་གཉིས་སོ། །འཁོར་གྱིས་གླེང་བས་ངོ་མཚར་གྱི་རྒྱུ་བ་སྟན་པའོ། །ད་ནི་དཀྱིལ་འཁོར་ཞུས་པ་སྟོན་ཏེ། དེ་ནས་ལྷའི་དབང་པོ་བརྒྱ་བྱིན་རང་གི་སྟན་ལ་ལངས་ནས་ནི་ཞེས་པ་ནི། འདོད་ཁམས་ཀྱི་ལྷ་ལ་དབང་བྱེད་པས་ན་དབང་པོའོ། །སྤྲུལ་པ་དང་ཞིང་ཁམས་དང་ཏིང་ངེ་འཛིན་བརྒྱ་ལ་རྩ་ལ་
སྦྱངས་པས་ན་བརྒྱ་བྱིན་ནོ། །རྡོ་ཨ་མོ་ལི་གའི་སྟེང་ན་རིན་པོ་ཆེའི་ཁྲིའུ་ལ་བཞུགས་པའི་ཕྱིར་ན་རང་གིའོ། །ལངས་པ་ནི་ཆོས་ཞུ་བའི་ཕྱིར་ལངས་པ་དང༌། རག་ལུས་པ་དང༌། རིན་ཐང་བསྐྱད་པ་དང༌། གུས་པ་དང་བསྐྱེད་པའི་ཕྱིར་ལངས་པའོ། །མཆོད་པ་ནི་རྒྱ་ཆེ་ཞིང་མཆོད་པ་ནི་མ་ཉེས་པར་བྱ་བའི་ཕྱིར། རྟ་དང་གླང་པོ་ཆེ་ལ་སོགས་པའོ། །རྒྱ་ཆེ་བ་ནི་སེམས་ཀྱིས་ཡིད་བཞིན་གྱི་སྒྲིན་ཚོགས་འདོད་པའི་ཡོན་ཏན་གྱི་ལྷ་མོར་སྤྲུལ་པའོ། །ཕྱག་བཙལ་ནས་འདི་སྐད་ཅེས་གསོལ་ཏོ། །ཕྱག་ནི་ལུས་ཀྱིས་ལངས་པ་དང༌། ངག་གིས་བསྟོད་བ་དང༌། སེམས་ཀྱིས་མོས་པའོ། །འདི་ནི་འོག་གི་དོན་ལ་སྐད་ནི་ཚིག་ཏུ་བརྗོད་པའོ། །གསོལ་ཏོ་ནི་འོག་གི་དོན་ཞུས་པའི་ཚུལ་ལོ། །སྤོབས་པ་བསྐྱེད་པར་གསོལ་ཏེ། སྔོན་གྱི་དགེ་བའི་ཚོགས་ཀྱིས་སྤོབས་པ་བསྐྱེད་པ་དང༌། རང་གི་མོས་པའི་མཐུས་ཞུ་བར་སྤོབས་བ་བསྐྱེད་པའོ། །བདེ་བར་གཤེགས་པ་བདག་སྤོབས་པ་བསྐྱེད་པར་གསོལ། ཆོས་ཉིད་ཀྱི་དོན་ཐུགས་སུ་ཆུད་པས་ནི་མི་བདེ་བའི་གནོད་པ་སྤངས་པས་བདེ་བར་རོ། །གཤེགས་པ་ནི་ཐབས་མཁས་པའི་ཐུགས་རྗེས་འགྲོ་བའི་དོན་ལ་གཤེགས་པས་གཤེགས་པའོ། །བདག་ནི་ལྷའི་དབང་པོ་སྤོབས་པ་ནི་རྒྱུ་དང་འབྲས་བུའི་དོན་ཞུ་བར་སྦོས་པའོ། །བསྐྱེད་པ་ནི་བདག་བྱང་ཆུབ་ཏུ་སེམས་བསྐྱེད་པར་མཛོད་ཅེས་པའོ། །གསོལ་བ་ནི་བདག་ལྷའི་བུ་དྲི་མ་མེད་པའི་དོན་ཞུ་བར་གསོལ་བ་རབ་ཏུ་གདབ་པའི་ཕྱིར་རོ། །སྤྱིར་ཞུ་བའི་དོན་བསྡུས་ནས་བཤད་ཟིན་ཏོ།། །།ད་ནི་སྒོས་ཞུས་པའི་དོན་སྟོན་ཏེ། སུམ་ཅུ་རྩ་གསུམ་པའི་ནི་བརྒྱ་བྱིན་ལ་རང་གི་བུ་སུམ་ཅུ་རྩ་གཉིས་དང༌། བརྒྱ་བྱིན་དང་སུམ་ཅུ་རྩ་གསུམ་ཡོད་པས་དེའི་ཕྱིར་རོ། །དེ་དག་ཀྱང་བརྒྱ་བྱིན་གྱི་ཕྱོགས་བཞི་མཚམས་བརྒྱང་ནས་བཞི་བཞི་འདུག་སྟེ། བརྒྱ་བྱིན་ལ་བསྐོར་བས་ན་བློན་པོ་ཞེས་བྱའོ། །འདི་ནས་ཤི་འཕོས་ནས་སེམས་ཅན་དམྱལ་བའི་སྟོན་པས་རྣམ་པར་སྨིན་པའི་སྡུག་བསྔལ་སྟོན་པ་ཡིན་ཏེ། འདི་ནི་ལྷའི་གནས་ཉིད་ལ་བྱ། ཤི་འཕོས་ནས་ནི་ཕུང་པོའི་རང་བཞིན་དང་བྲལ་ཏེ། རྣམ་པར་ཤེས་པ་ཐལ་བའི་ཐ་ཚིག་གོ །
མཚམས་མེད་པ་ནི་ལས་དང་ཉོན་མོངས་པ་སྟེ། རྣམ་པར་དཀར་བའི་བར་མཚམས་མེད་པའོ། །འབྲས་བུ་ལ་བར་མཚམས་མེད་པ་ནི། སྡུག་བསྔལ་གྱི་རང་བཞིན་སྣ་ཚོགས་པ་ལ། བདེ་བའི་བར་མཚམས་ནི་སྐད་ཅིག་ཀྱང་མེད་པའོ། །སེམས་ནི་སྡུག་བསྔལ་ལ་གནས་པ་ཡིན་ལ། ཅན་ནི་སྡུག་བསྔལ་གྱི་ཕུང་པོ་ཉེ་བར་ལེན་པའོ། །དམྱལ་བ་ནི་འཇོམས་པས་ནི་རབ་ཏུ་མནར་བའོ། །གཞན་མདོ་སྡེའི་གཞུང་ལས་གསལ་བསམ་བྲིས་སོ། །མཐའ་འཁོབ་ནི་ཁྲིམས་མེད་པའི་མཐར་ཕྱིན་པ་དང༌། ཆོས་སྐད་མི་ཐོས་པས་མཐའ་འཁོབ་བོ། །རྣམ་པ་གཅིག་ཏུ་ཡུལ་མཐའ་འཁོབ་ནི་གང་རི་ལ་མི་མཐའ་འཁོབ་ནི་སྤྱོད་པ་ངན་པའོ། །རྣམ་པར་སྨིན་པའི་དོན་བསྡུས་པ་བཤད་ཟིན་ཏོ།། །།རྣལ་པར་སྨིན་པ་ལ་སྐྱོ་བའི་དོན་སྟོན་ཏེ། དེ་ནས་བརྒྱ་བྱིན་ལ་སོགས་པའི་ལྷའི་བུ་ཐམས་ཅད་ཀྱིས་ཐོས་ནས། ཤིན་ཏུ་དངངས་ཤིང་སྐྲག་སྟེ། སྐྱོ་ནས་ཁས་བུབ་ཏུ་འགྱེལ་ཏོ་ཞེས་པ་ནི། སྟོན་པས་རྣམ་པར་སྨིན་པའི་དོན་གསུངས་པ་ལ། བརྒྱ་བྱིན་འཁོར་དང་བཅས་པ་དང༌། གཞན་ཡང་འདོད་ཁམས་ལྷའི་བུ་ཐམས་ཅད་ཀྱིས་ཐོས་ནས། རྒྱུ་ཉོན་མོངས་པ་ལ་ནི་ཤིན་ཏུ་དངངས། འབྲས་བུ་སྡུག་བསྔལ་ལ་རབ་ཏུ་སྐྲག་སྟེ། འདོད་པའི་ཡོན་ཏན་ལ་རབ་ཏུ་སྐྱོ་ན་ཡིད་སྐྲག་པས་ཁས་བུབ་ཏུ་འགྱེལ་ཏོ་ཞེའོ། །ད་ནི་ཞུ་བ་བསྣན་པ་བ་སྟན་ཏོ། །དེ་ནས་ཡང་ཞེས་པ་ནི་སྐབས་ཀྱི་རྟིང་ཐོགས་བསྐྱར་ཞིང་བསྣན་ནས་ཞུས་པའི་དོན་ཏོ། །བསྐྱབ་པར་གསོལ་བྱ་བ་ནི་འཁོར་གྱི་སྡུག་བསྔལ་འདི་ལས་བསྐྱབ་པར་གསོལ་བ་དང༌། བདག་དང་གཞན་ངན་སོང་ལས་རབ་ཏུ་ཐར་པར་བྱ་བའི་ཕྱིར་ཞུས་པའོ། །ད་ནི་བཀས་ངང་བ་སྟོན་ཏེ། དེ་ཡང་ཅིའི་ཕྱིར་ངང་ཞེ་ན། མ་འོངས་པའི་སེམས་ཅན་རྣམས་ལ་ཕན་པའི་ཕྱིར་ཏེ། ལྷའི་དབང་པོ་སངས་རྒྱས་བྱེ་བ་ཕྲག་བརྒྱང་ཅུ་རྩ་བཞིས་ཀྱང་བ་སྟན་པ་ཞེས་པ་ནི། མདངས་གསོལ་དུ་གསུངས་པའི་ཕྱིར་བོས་ནས་བཀའ་སྩལ་ཏེ། སྔོན་གྱི་སངས་རྒྱས་མར་མེ་མཛད་དང༌། གསེར་ཐུབ་ལ་སོགས་པ་བྱེ་བ་ཕྲག་བརྒྱང་ཅུ་རྩ་བཞིས་ཀྱང་ངན་སོང་གི་རྒྱུད་འདི་གསུངས་ཏེ། ངས་ཀྱང་བཤད་ཀྱིས་ཁྱོད་ཉོན་ཅིག་བྱ་བའི་
ཐ་ཚིག་གོ །ད་ནི་ངང་བ་ལ་དགའ་བ་སྟོན་ཏེ། དེ་ནས་ལྷའི་དབང་པོས་མངོན་པར་མཆོད་པ་ནི་སྟོན་པས་ངང་བའི་རྟིང་ཐོགས་སོ། །བརྒྱ་བྱིན་རབ་ཏུ་དགའ་བའི་མཆོད་པ་སྣ་ཚོགས་ཀྱིས་མཆོད་ནས་ཞུས་པའི་དོན་དང༌། ཕྱི་རབ་ལ་དེ་ལྟར་གྱིས་ཤིག་པའི་དོན་ཏོ། །ལེགས་བྱ་བ་ནི་ཐུགས་རྗེས་འགྲོ་བའི་དོན་ལ་ལེགས་པ་དང༌། བདག་ལ་རྒྱུ་དང་འབྲས་བུའི་ཆོས་སྟོན་པ་ལེགས་བྱ་བའི་ཐ་ཚིག་གོ །དེ་ལ་ཞུ་བ་བསྣན་པ་ནི། དེ་ནས་ཚངས་པ་ཞེས་འབྱུང་བས་ན། རེ་ཞིག་འཇིགས་རྟེན་པའི་མེས་པོ་ཚངས་པ་ཡིན་པ་དང༌། དད་པས་ཞུ་བའི་ཚུལ་དང། དམ་པའི་ཆོས་ཀྱི་བསྐུལ་བ་ཡིན་པས་ཞུ་བའི་ཚུལ་དུ་བ་སྟན་པའོ། །དང་པོར་སློབ་མ་སྣོད་དུ་རུང་བར་བྱིན་གྱིས་རློབ་བ་སྟོན་ཏེ། དེ་ནས་ཅོམ་ལྡན་འདས་ཀྱིས་ཞེས་པ་ནི། ཉེས་པའི་སྐྱོན་ཐམས་ཅད་གཏན་བཅོམ་ཞིང༌། ལེགས་པའི་ཡོན་ཏན་དང་ལྡན་པས་ན་མཐའ་གཉིས་སྐྱོན་བཅོམ་ཞིང་སྐུ་དང་ཡེ་ཤེས་ཀྱི་རང་བཞིན་ཤཱཀྱ་ཐུབ་པས་བཀའ་སྩལ་ཏེ། དེ་ཅིའི་ཕྱིར་ཞེ་ན། ཁམས་གསུམ་ལས་མཐར་ཕྱིན་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདིས་བྱིན་གྱིས་བརླབས་པ་ནི། དེ་བཞིན་ཉིད་ཆོས་ཇི་བཞིན་པའི་ངག་དུ་རང་གི་ངང་དུ་གཤེགས་པས་ན་དབྱིངས་དང༌། ཡེ་ཤེས་གཉིས་སུ་མེད་པའོ། །ཐམས་ཅད་ནི་ཕྱོགས་བཅུ་དུས་བཞིའི་སངས་རྒྱས་པ་སྙིང་པོ་ནི་ཐུགས་ཡང་དག་པའི་ཡེ་ཤེས་སོ། །བྱིང་ཡིས་བརླབས་པ་ནི། རས་དཀར་པོ་ལ་དམར་པོ་བྱ་བའི་མཐུ་ཚོན་ལ་ཡོད་པ་དང་འདྲ་བར་བླ་ན་མེད་པའི་སངས་རྒྱས་འགྲུབ་པའི་རྒྱུ་ནི་སྔགས་ལ་ཡོད་པས་ནའོ། །གདོན་མི་ཟ་བར་རྡོ་རྗེར་བྱིན་གྱིས་བརླབ་པ་ཞེས་བྱ་བ་ནི་གདོན་མི་ཟ་བ་ནི། ཐུགས་ཡང་དག་པའི་ཡེ་ཤེས་ལ་མཚན་མའི་སྐྱོན་གྱིས་མི་ཟ་བའོ། །རྡོ་རྗེ་ནི་སྐུ་གསུང་ཐུགས་རྡོ་རྗེ་ལྟ་བུའོ། །བྱིན་གྱིས་བརླབས་པ་ནི། ཁ་དོག་ཚོན་གྱིས་བསྒྱུར་བ་ལྟར་ཏིང་ངེ་འཛིན་ལ་སྙོམས་པར་ཞུགས་པས་བསྒྱུར། དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་བདེ་བའི་ཏིང་ངེ་འཛིན་གྱིས་ནི། ཉོན་མོངས་པ་ཐམས་ཅད་བྱང་ཆུབ་སེམས་སུ་བསྒྱུར་ནུས་པས་ན་དེ་སྐད་བྱའོ། །ཨོཾ་བཛྲ་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུཾ། ཨོཾ་ནི་ཡེ་ཤེས་ལྔ་ལ། བཛྲ་ནི་རྡོ་རྗེ། ཏིཥྛ་ནི་
འཇོམས་པ། ཛྙཱན་ནི་ཡེ་ཤེས་སོ། །ས་མ་ཡ་ནི་དམ་ཚིག་དང་ལྡན་པའོ། །ཧཱུཾ་ནི་ཐུགས་ཆོས་ཉིད་དུ་ཡེ་ནས་གནས་པའོ། །སྙོམས་པར་ཞུགས་ནས་ཀྱང་ནི། ཏིང་ངེ་འཛིན་བྱང་ཆུབ་རྣམ་པར་དག་པ་ལ་སྙོམས་པར་ཞུགས་པ་ནི་གཉིས་སུ་མེད་པར་གྱུར་པའི་ཐ་ཚིག་གོ ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་མ་ནོར་བ་ལ། བཞིན་ནི་མི་འགྱུར་བ་སྟེ། གཤེགས་པ་ནི་རིག་པ་དང་དབྱིངས་གཉིས་སུ་མེད་པར་གྱུར་པའོ། །ཐམས་ཅད་ནི་མ་ལུས་པ་ལ་སྙིང་པོ་ནི་བྱང་ཆུབ་ཀྱི་སེམས་ལ། འདི་ནི་དབང་པོ་མངོན་སུམ་དུ་གསུངས་པའོ། །རང་གི་སྙིང་གནས་བྱུང་ནས་རང་ནི་ཤཱཀྱ་ཐུབ་པ་ལ། སྙིང་པོ་ནི་ཐུགས་ཡེ་ཤེས་ལ་བྱ། ཕྱུང་ནི་ཚིག་ཏུ་གསུངས་པའོ། །ཨོཾ་ཤོ་དྷ་ནི་ཤོ་དྷ་ནི་ཞེས་པ་ནི། ཨོཾ་ཡེ་ཤེས་རྣམ་པ་ལྔའི་ངོ་བོར་ཀུན་རིག་རྣམ་པར་སྣང་མཛད་ཀྱི་སྙིང་པོ་སྟེ། ཆོས་ཉིད་རང་བཞིན་གྱིས་རྣམ་པར་དག་པའི་རྟགས་སོ། །ཨོཾ་སརྦ་བཱ་པཾ་བི་ཤོདྷ་ནི་ཡེ་ཤེས་རྣམ་པ་ལྔར་ལས་ཀྱི་སྡིག་པ་ཐམས་ཅད་དག་པར་བྱིན་གྱིས་བརླབ་པའོ། །ཤུདྡྷེ་བི་ཤུདྡྷེ། ངོ་བོ་ཉིད་དག་བའི་ཆོས་ཉིད་རང་བཞིན་གྱིས་དག་པ་ཆེན་པོར་བྱིན་གྱིས་བརླབ་ཅེས་བྱའོ། །སརྦ་ཀརམ་ཨཱ་བ་ར་ཎ་ནི། ཐམས་ཅད་མ་ལུས་པའི་ཕྲིན་ལས་རྒྱ་མཚོ་དང་འདུལ་བས་བྱིན་གྱིས་བརླབ་པའི་དོན། བི་ཤུདྡྷེ་སརྦ་ཆོས་ཉིད་དག་པ་དེ་ནི་རང་བཞིན་གྱིས་བརྐ་ཤིས་པའི་དོན་ཏོ། །རིག་སངས་ཆེན་མོ་འདི་བཤད་མ་ཐག་ཏུ་ནིར་རིག་པའི་ཡེ་ཤེས་ལ། སྔགས་ནི་དེས་མཚན་མ་འཇོམས་པ་ལ། ཆེན་མོ་འདི། ལྟ་བ་དང་སྤྱོད་པ་ཆེ་བས་ན་དབྱིངས་ཏེ་ཆེན་མོའོ། །ཁྱབ་པའི་ཕྱིར་བཏགས་སོ། །དེ་ནས་གཞན་ཡང་གསང་བའི་སྙིང་པོ་འདི་གསུངས་སོ། །དེ་ནས་ནི་སྐབས་ཀྱིར་ཏིང་ཐོགས་སོ། །གཞན་ཡང་རྣམ་པ་ནི། གསང་བ་ནི་ཆོས་ཉིད་ལ། སྙིང་པོ་ནི་ཡེ་ཤེས་ལ། འདི་ནི་འོག་གི་དོན་ལ་གསུངས་པ་ནི། གསལ་ལ་མ་འདྲེས་པར་བརྗོད་པའི་ཐ་ཚིག་གོ །ཨོཾ་ཤོ་དྷ་ནི་ཤོ་དྷ་ནི་སརྦ་ཨ་པ་ཡ་ནི་སརྦ་སྭ་རྒྱེ་བྷྱ་ཧཱུཾ་ནི། ཨོཾ་ནི་རིན་ཆེན་མེ་ཏོག་གི་ཡེ་ཤེས་ལ་སྙིང་པོའོ། །ཤོ་དྷ་ནི་དག་པ་ལ། སརྦ་ནི་ཐམས་ཅད། ཨ་པ་ཡ་ནི་ལྡན་པ། སརྦ་སྭ་རྒྱེ་བྷྱ་ནི། ཐམས་ཅད་བདེ་བར་བྱེད་པའི་རིག་པའོ། །དེ་བཞིན་གཤེགས་པ་ཐམས་ཅད་
ཀྱི་སྙིང་པོ་སྟེ། དེ་ནི་མ་ནོར་པ་སྟེ་ཆོས་ཀྱི་དབྱིངས་ཉིད་དོ། །བཞིན་ནི་ཡེ་ཤེས་ཀྱི་རྟོགས་པའོ། །གཤེགས་པ་ནི་ཐུགས་རྗེས་འགྲོ་བའི་དོན་མཛད་པའི་རྟགས་སོ། །ཐམས་ཅད་ནི་རིགས་ལྔའི་སངས་རྒྱས་ལ་སོགས་པ་ཐམས་ཅད་ཀྱི་སྙིང་པོའོ། །ཨོཾ་སརྦ་ཨ་བ་ཡ་བི་ཤོ་དྷ་ནི་ཧཱུཾ་ཕཊ་ནི། ཤཱཀྱ་ཐུབ་པའི་སྙིང་པོ་སྟེ། ཡང་དག་པའི་ཡེ་ཤེས་ཀྱི་རང་བཞིན་གྱིས་ཐམས་ཅད་ཀུན་གྱི་རང་བཞིན་ཡེ་ནས་དག་པར་བྱིན་གྱིས་བརླབས་ནས་བཞུགས་ཏེ། ཆོས་ཉིད་དག་པར་བྱེད་པའི་ཐ་ཚིག་གོ །སྙིང་པོ་དང་ཉེ་བའི་སྙིང་པོ་ཞེས་པ་ནི། སྙིང་པོ་ནི་རྩ་བ་རང་གི་བྱང་ཆུབ་ཀྱི་སེམས་ལ། ཉེ་བའི་སྙིང་པོ་ནི། དེ་བསྒྲུབ་པར་བྱ་བའི་ཕྱིར་འབད་ཅིང་བཙལ་བའོ། །ཨོཾ་ཏྲ་ཊ་ནི་ཡེ་ཤེས་ཀྱི་ངོ་བོ། །མཚན་མའི་ཆོས་ཐམས་ཅད་སྟོང་པ་ཉིད་ལ་བཟླ་བའི་ཐབས་ཏེ། མེ་ཏོག་ཆེར་རྒྱས་ཀྱིས་ཀུ་བསྐྱེད་པའི་སྙིང་པོའོ། །ངན་འགྲོ་ཐམས་ཅད་རྣམ་པར་སྦྱོང་བའི་སྙིང་པོ་ནི། ངན་པ་ནི་ལས་དང་ཉོན་མོངས་པ་ལ། འགྲོ་བ་ནི་ཁམས་གསུམ་ཤིང་རྟའི་འཕང་ལོ་ལྟ་བུར་གྱུར་པ་ལ། རྣམ་པར་ནི་སྡུག་བསྔལ་ལས་ཐར་པའི་ཐབས་མངའ་བ་དང༌། སྡུག་བསྔལ་བའོ། །སྦྱོང་བ་ནི་ཡེ་ཤེས་རྒྱུ་དང་འབྲས་བུར་བཅས་པ་སྦྱོང་བའོ། །སྙིང་པོ་ནི་བྱང་ཆུབ་ཀྱི་སེམས་སོ། །ཧཱུཾ་ནི་ངན་སོང་ཐམས་ཅད་ཡོངས་སུ་སྦྱོང་བའི་སྙིང་པོའོ། །ཐིག་ལེ་ཆོས་ཉིད་རྣམ་པར་མི་རྟོག་པའི་ངོ་བོ་ལ། ཧ་ཕྱེ་ག་ན་དགྱེས་ནས་འདུ་འབྲལ་མེད་པའི་དོན་ཏོ། །བསོད་ནམས་ཆུང་བའི་སེམས་ཅན་རྣམས་ནི། བསོད་ནམས་ནི་ལོངས་སྤྱོད་དང་བྲལ་བའོ། །ཆུང་བ་ནི་བདེ་བ་མེད་པའོ། །སེམས་ནི་ཚོགས་བརྒྱང་ལ། ཅན་ནི་ཉེ་བར་ལེན་པའི་ཕུང་པོ་ལྔའོ། །དེས་ཐོབ་ནས་བདེ་བླག་ཏུ་གྱུར་པའི་ཕྱིར་རོ། །ན་མོ་བྷ་ག་ཝ་ཏེ་ཞེས་པ་ནི། བཅོམ་ལྡན་འདས་ཀུན་རིག་རྩ་བའི་སྙིང་པོ་སྟེ། རྣམ་པར་སྣང་མཛད་ཀྱིས་བྱང་ཆུབ་ཀྱི་སེམས་བསྐྱེད་པའི་དོན་ཏོ། །སརྦ་དུརྒ་ཏི་ནི། ཐམས་ཅད་ཀུན་གྱི་རང་བཞིན་ཆོས་ཉིད་བྱང་ཆུབ་ཀྱི་སེམས་སུ་དབང་བསྐུར་བའི་དོན་ཏོ། །པཱ་རི་ཤོ་དྷ་ནི། རྩ་བ་བྱང་ཆུབ་ཀྱི་སེམས་དེ་ནི་རང་བཞིན་གྱིས་དག་པའོ། །རཱ་ཛའ་ཡ་ནི་།སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ནི་ཁམས་གསུམ་ལ་དབང་
གི་རྒྱལ་མཚན་འཛུགས་པའི་ཕྱིར་རོ། །ཏ་ཐཱ་ག་ཏ་ཡ་ནི། དེ་བཞིན་གཤེགས་པའོ། །ཏདྱ་ཐཱ་ནི། འདི་ལྟ་སྟེ་ཡང་དག་པའི་ཡེ་ཤེས་ཀྱི་ངོ་བོའོ། །ཨོཾ་ཤོ་དྷ་ནི་ཡེ་ཤེས་རྣམ་པ་ལྔས་ཉོན་མོངས་པ་རྣམ་པ་ལྔ་ཐམས་ཅད་དག་པར་བྱེད་པའི་ཐབས་སོ། །སརྦ་པཱ་པཾ་བི་ཤོ་དྷ་ནི། སྡིག་པ་ཐམས་ཅད་རང་བཞིན་གྱིས་དག་པར་བྱིན་གྱིས་བརླབས་པའོ། །སརྦ་ཀརྨཱ་ནི་ཕྲིན་ལས་རྒྱ་མཚོ་དང་འདྲ་བས་ཐམས་ཅད་མ་ལུས་པར་བྱིན་གྱིས་རློབ་པའི་ཕྱིར་རོ། །ཨཱ་བ་ར་ཎ་བི་ཤོ་དྷ་ནི། ཆེ་བའི་ཡོན་ཏན་དང་ལྡན་པས། ཐམས་ཅད་དག་པ་ཆེན་པོར་བྱིན་གྱིས་རློབ་པའི་ཐབས་སོ། །རྩ་བའི་རིག་པ་ནི། རྩ་བའི་བྱང་ཆུབ་ཀྱི་སེམས་གཟུང་འཛིན་དང་བྲལ་བ་ལ། རིག་པ་ནི་ཡེ་ཤེས་ཀྱིས་རྟོགས་པའི་ཡུལ་ལོ། །ཨོཾ་སརྦ་ཡིད་ནི་ཡེ་ཤེས་ཀྱི་དངོས་པོ་ཐམས་ཅད་དག་པར་བྱིན་གྱིས་རློབ་པའི་དོན་ཏོ། །སརྦ་ཨཱ་བ་ར་ཎ་ནི་ཐམས་ཅད་དག་པ་དང་ལྡན་པར་རིགས་ལྔས་བྱིན་གྱིས་བརླབས་པའི་ཕྱིར་རོ། །བི་ཤོ་དྷ་ཡ་ཧ་ན་ཧཱུཾ་ཕཊ་ནི་དགའ་བ་ཆེན་པོས་མཚན་མ་རྣམས་དབང་དུ་བསྡུས་ནས། ཐུགས་ཆོས་ཉིད་དུ་བྱིན་གྱིས་རློབ་པའི་ཕྱིར་རོ། །ཨོཾ་སརྦ་བིད་ཧཱུཾ་ཕཊ་སྟེ་ཨོཾ་ནི་ཡེ་ཤེས་ལྔའི་ངོ་བོ་ཡིན་པས། རིན་ཆེན་མེ་ཏོག་གི་ཉེ་བའི་སྙིང་པོའོ། །ཨཱཿནི་མ་སྐྱེས་པས་གསུང་གི་ངོ་བོས་སྣང་བ་མཐའ་ཡས་སོ། །ཧཱུཾ་ནི་རྣམ་པར་མི་རྟོག་པའི་ཡེ་ཤེས་ཏེ་རྡོ་རྗེ་སེམས་དཔའོ། །སརྦ་ནི་ཆེ་བའི་ཡོན་ཏན་འབྱུང་བའི་ངོ་བོ་སྟེ། རིན་ཆེན་འབྱུང་ལྡན། ཕཊ་ནི་ལས་ཏེ་ཐམས་ཅད་སྤྱིན་པའི་དོན། བྱ་བ་ནན་ཏན་གྱི་ཡེ་ཤེས་ཏེ་དོན་ཡོད་གྲུབ་པའོ། །ཨོཾ་སརྦ་བིད་ཧཱུཾ་ནི་ཤཱཀྱ་ཐུབ་པའི་སྐུ་བསྐྱེད་པ་སྟེ། སེམས་ཅན་ཐམས་ཅད་ཀྱི་སེམས་མ་སྐྱེས་པ་སྟེ། ཐམས་ཅད་ཐུགས་རྣམ་པར་མི་རྟོག་པའི་ཆོས་ཉིང་དུ་རིག་པའོ། །ཨོཾ་སརྦ་བིད་ཕཊ་ནི། ཆོས་ཀྱི་དབྱིངས་ཀྱི་ཡེ་ཤེས་ཀྱིས་རྣམ་པར་སྣང་མཛད་ཀྱི་སྐུ་བསྐྱེད་པའི་སྔགས་སོ། །ཨོཾ་སརྦ་བིད་ས་ནི་མེ་ལོང་ལྟ་བུའི་ཡེ་ཤེས་ཀྱིས་ས་ལྟར་ཆེ་བའི་ཡོན་ཏན་འབྱུང་བའི་ཐབས་སོ། །ངན་སོང་སྦྱོང་བའི་སྐུ་བསྐྱེད་པའི་སྙིང་པོའོ། །ཨོཾ་སརྦ་བིད་ཨཿནི་མཉམ་པ་ཉིད་ཀྱི་ཡེ་ཤེས་ཀྱིས་ཆོས་ཉིད་མ་སྐྱེས་པར་སྤྱོད་པའོ། །རིན་ཆེན་
མེ་ཏོག་གི་སྐུ་བསྐྱེད་པའི་སྙིང་པོའོ། །ཨོཾ་སརྦ་བིད་ཧཱུཾ་ནི། སོ་སོར་རྟོག་པའི་ཡེ་ཤེས་ཀྱི་ངོ་བོ་ཐུགས་རྣམ་པར་དག་པའི་དོན་ལ་འཇུག་པའི་ཐབས་སོ། །ཤཱཀྱ་ཐུབ་པའི་སྐུ་བསྐྱེད་པའི་སྙིང་པོའོ། །ཨོཾ་སརྦ་བིད་ཏྲ་ཐ་ནི། ཨོཾ་ནི་ཡེ་ཤེས་བྱ་བ་གྲུབ་པས་གདུལ་བྱ་ཆུད་མི་ཟ་བར་བྱ་བའི་ཕྱིར་རོ། །མེ་ཏོག་ཆེར་རྒྱས་ཀྱི་སྙིང་པོའོ། །ཨོཾ་ཤ་ནི་ཆོས་ཉིད་མངོན་པར་བྱང་ཆུབ་པ་ཤཱུ་ནྱ་ཏ་ཛྙཱ་ན་སྟེ། སྟོང་པ་ཉིད་ཀྱི་རང་བཞིན་དུ་བྱང་ཆུབ་ཀྱི་སེམས་ཟླ་བ་ལྟ་བུར་གྱུར་པའོ། །ཨོཾ་བྷ་ནི་ཨོཾ་ཡེ་ཤེས་ཀྱི་རང་བཞིན་དུ་གནས་པའི་ཕྱིར་རོ། །བཛྲ་རའི་སྒྲས་དྲངས་ནས། ཐམས་ཅད་རྡོ་རྗེའི་རང་བཞིན། ངོ་བོའི་སྔགས་ཀྱི་དོན་བསྡུས་པ་བཤད་ཟིན་ཏོ།། །།དེའི་ཡོན་ཏན་ནི་ལྷའི་བདག་པོ་བརྒྱ་བྱིན། ངན་འགྲོ་ཐམས་ཅད་ཡོངས་སུ་སྦྱོང་བ་ནི། ཡོན་ཏན་བརྗོད་པའི་ཕྱིར་ན། ལྷའི་དབང་པོ་ཞེས་བོས་པའོ། །ལྷ་ནི་འདོད་ཁམས་ཀྱི་ལྷ་ཡིན་པས་ན་ལྷ་ཞེས་གསུངས་སོ། །དེ་ལ་དབང་བསྐུར་ན་དབང་པོ་ངན་པ་ནི་རྒྱུ་སྟེ་ཉོན་མོངས་པའོ། །འགྲོ་བ་ནི་འབྲས་བུ་སྟེ་ཁམས་གསུམ་དང་འཁོར་བའི་རྒྱུའོ། །ཐམས་ཅད་ནི་འཁོར་བའི་སྡུག་བསྔལ་ཀུན་ལ་བྱ་བའི་ཕྱིར་རོ། །ཡོངས་སུ་སྦྱོངས་བའི་གཟི་བརྗིད་ནི་ཡོངས་སུ་མ་ལུས་བ་ཐམས་ཅད་དོ། །གཟི་བརྗིད་ནི་སྐུ་དང་གསུང་ཐུས་རྣམ་པར་དག་པའི་གཟི་བརྗིད་དང་ལྡན་པའོ། །དུས་མ་ཡིན་པར་འཆི་བ་བརྒྱང་ནི། ས་གཉན་པ་ལ་ཉལ་པ་དང༌། བུད་མེད་རྒན་མོ་དང་ཉལ་བ་དང༌། མི་ན་བཞིན་དུ་སྨན་ཟ་བ་དང༌། ཁང་རིང་ན་ཉལ་བ་དང༌། གདོན་འབྱུང་པོ་ཡོད་པའི་ཕྱོགས་སུ་མི་མེད་པར་གཅིག་པུར་འགྲོ་བ་དང། ནད་པ་སྨན་པའི་ངང་མི་ཉན་པ་དང༌། འཐབ་མོའི་ཡུལ་དུ་འཇུག་པ་དང༌། མི་ཐུབ་པ་ལ་དོ་བསྡོ་བ་ལ་སོགས་པ་ལས་ཐར་པར་འགྱུར་རོ། །དུས་མ་ཡིན་པར་འཆི་བ་དང་འབྲེལ་པ་ནི། ཆུ་ཆེན་པོ་ལ་རྐྱལ་བ་མེད་པར་རྐྱལ་བ་དང༌། སྤས་སར་གཅིག་པོར་འདུག་པ་དང༌། དུག་འཐུང་བ་རྣམས་ནི་འཆི་བ་དང་འབྲེལ་པའི་མཚན་མའོ། །རྨི་ལམ་གྱི་རྣམ་པ་ནི། སུམ་ཅུ་རྩ་གཉིས་ཏེ་ལྟས་ངན་གྱི་རྟགས་སོ། །གང་ཞེ་ན། དགྲས་དེད་པ་དང༌། སྐྱབས་དང་བྲལ་བ་དང༌། སྡུག་བསྔལ་གྱིས་གཟིར་བ་དང༌། ཡི་དྭགས་ཀྱི་གདོན་གྱིས་མཐུ་ཕྲོགས་པ་དང༌། མིག་ཕྱུང་
བ་དང༌། ཁ་ནས་ལྕེ་གཞན་གྱིས་ཕྲོགས་པ་དང༌། ཉི་ཟླ་ལྷུང་བ་དང༌། ས་གཞི་མི་གཙང་བས་གང་བ་དང༌། སྐྲ་བྱི་བ་དང༌། སྒྲེན་མོར་འདམ་བུ་དབབ་པ་དང༌། གཞན་གྱི་མགོ་ཕྲོགས་པ་དང༌། ལྕགས་སུ་འཇུག་པ་དང༌། དགུ་འཐུངས་པ་དང༌། མི་གཙང་བས་ལུས་བྱུགས་པ་དང། ཁྱིམ་ལ་མེ་ཤོར་བ་དང༌། མི་གཙང་བའི་རླུབས་སུ་ལྷུང་བ་དང༌། མི་བསྔགས་པའི་ཞལ་ཆེས་འདེ་བས་པ་དང༌། སྒྲ་མི་སྙན་པ་གྲག་པ་དང༌། གྲོགས་དང་བྲལ་བ་དང༌། ཆུས་ཁྱེར་བ་དང༌། མགོ་ལ་མེ་ཤོར་ང་དང༌། རྒྱལ་པོའི་ཆད་པས་གོ་རར་ཆུད་པ་དང༌། བདོག་པ་གཞན་གྱིས་ཕྲོགས་པ་དང༌། གཅན་གཞན་མཆུ་ཅན་གྱིས་ཟ་བ་དང༌། དམྱལ་བར་ལྷུང་མ་རྨི་བ་དང༌། མུན་པ་མུན་ནག་ན་འདུག་པ་དང༌། ངོ་ཚ་བ་དང༌། མྱ་ངང་གྱི་ནང་ན་འདུག་པ་དང༌། བདུད་ཀྱི་ཞབས་པས་གཟུགས་བ་དང༌། སྲིན་པོས་ཁྱེར་བ་དང༌། ཕངས་པའི་མི་ཤི་བ་དང༌། གཞན་གྱིས་འཚེ་བས་འདེ་བས་པའོ། །དེ་དག་ལ་སྡིག་པ་དང་ཉེས་པ་འབྱུང་བར་མི་འགྱུར་རོ། །གོང་གི་གསང་སྔགས་འཆང་བ་དེ་དག་ལ། བདུད་ལ་སོགས་པའི་བག་ཆགས་འབྱུང་བར་མི་འགྱུར་རོ། །དུས་མ་ཡིན་པའི་སྡིག་པ་དང༌། རྨི་ལམ་གྱི་སྡིག་པ་དང༌། ཉེས་པ་ཡང་འབྱུང་བར་མི་འགྱུར་རོ། །སྔགས་ཀྱི་ཡོན་ཏན་མདོར་བསྡུས་པ་བ་སྟན་ཟིན་ཏོ། །ད་ནི་སེམས་ཅན་ངན་སོང་དུ་སྐྱེས་པ་དཀྱིལ་འཁོར་དུ་བཅུག་ནས་དབང་བསྐུར་ནས་ཐར་པའི་ཐབས་སྟོན་ཏེ། དེ་ཅིའི་ཕྱིར་ཞེ་ན། སྐྱེས་པ་དང་བུད་མེད་དང༌། ལྷའམ་ཀླུའམ། ཤི་བའི་ལུས་དཀྱིལ་འཁོར་དུ་བཅུག་ན་ཞེས་པའི་བར་ནི་འཁོར་བའི་སེམས་ཅན་ཐུགས་རྗེའི་ཞིང་ཡིན་པས་དེ་ལས་ཐར་པར་བྱ་བའི་ཕྱིར་ན་སྔོན་གྱི་བག་ཆགས་སྣ་ཚོགས་ཀུན་ལ་བསགས་པའི་འབྲས་བུ་སྡུག་བསྔལ་གྱིས་འགྲོ་བ་རིགས་དྲུག་ཏུ་སྐྱེ་བ་བླངས་པ་ལ་སྔོན་གྱི་བག་ཆགས་ཀྱིས་བསགས་པའི་ལུས་གདོས་པ་ཅན་ཏེ། ཡང་དག་པའི་ཡེ་ཤེས་ཀྱིས་བག་ཆགས་རྩད་བཅད་པའི་ཕྱིར་ན། ཐིག་བཞི་བཏབ་པའི་རེའུ་མིག་དགུ་བ་འཁོར་ལོ་རྩིབས་བཅུ་དྲུག་པ་ལ་སྣམ་བུ་དང་སྒོ་དགོད་བ་དང༌། རིགས་ཀྱི་སེམས་དཔའ་བསྐལ་པ་བཟང་པོ་དང༌། མཆོད་པའི་ལྷ་མོ་དང༌། སྒོ་བ་དགོད་དེ་ལུས་ལ་གནས་རྣམ་པ་ལྔ། ཡིག་འབྲུ་
རྣམ་པ་ལྔ། རིགས་དྲུག་སོ་སོའི་ཡིག་འབྲུར་སྦྱངས་ནས་དངོས་པོའི་བག་ཆགས་རྣམས་དག་ཅིང་སྟོང་པ་ཆེན་པོར་བྱིང་ཡིས་བརླབས་ནས། དཀྱིལ་འཁོར་དུ་བཅུག་དབང་བསྐུར་ནས། རྒྱལ་བའི་སྲས་སུ་སྐྱེ་སྟེན་ངན་སོང་ལས་ཐར་བར་འགྱུར་རོ། །ཆོ་གའི་ཐབས་བ་སྟན་ཟིན་ཏོ། །དེ་ནས་ལྷ་རྣམས་ཀྱི་དབང་པོ་དང༌། བཤད་དུ་གསོལ་བའི་བར་གྱིས་བཤད་པར་གསོལ་བ་བཏབ་པར་བ་སྟན་ཏོ། །ད་ནི་ཏིང་ངེ་འཛིན་ལ་སྙོམས་པར་ཞུས་ནས་བཤད་པར་སྟོན་ཏེ། དེ་ནས་བཅོམ་ལྡན་འདས་ཤཱཀྱ་ཐུབ་བས་ཞེས་པ་ནི། སྐབས་ཀྱི་རྟིང་ཐོགས་སུ་འབྱུང་བས་ནི་དེ་ནས་སོ། །བཅོམ་པ་ནི་རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་པ་དང་ཤེས་བྱའི་སྒྲིབ་པ་རྣམས་བཅོམ་པའོ། །ལྡན་པ་ནི་སྐུ་དང་ཡེ་ཤེས་དང་ལྡན་པའོ། །འདས་པ་ནི་མཐའ་གང་ལ་ཡང་མི་གནས་པའོ། །ཤཱཀྱ་ནི་རིགས་ཤཱཀྱ་ཡིན་པ་དང༌། བདུད་ཤཱཀྱ་བཏུལ་བས་ན་ཤཱཀྱའོ། ཐུབ་པ་ནི་སྐུ་དང་གསུང་དང་ཐུགས་ཐུབ་པས་ནའོ། །ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ནི་ཡང་དག་པའི་ཡེ་ཤེ་རྡོ་རྗེ་ལྟར་འདུས་མ་བྱས་པས་ན། གཉིས་སུ་མེད་པའི་དོན་ལ་ཞུགས་པའི་དོན་ཏོ། །དཀྱིལ་འཁོར་ཆེན་པོ་འདི་གསུངས་སོ། །ཐུགས་རྣམ་པར་མི་རྟོག་པའི་ཡེ་ཤེས་ནི་དཀྱིལ་ལ། ཐབས་མཁས་པའི་ཐུགས་རྗེ་གཞན་ལ་སྣ་ཚོགས་སུ་འབྱུང་བས་ནི་འཁོར་ལ་ལྟ་བ་དང་སྤྱོད་པ་གཞན་ལས་འཕགས་པས་ནི་ཆེན་པོ་ཞེའོ། །གསུངས་ནི། དོན་གསུངས་པ་དན་རྟགས་གསུངས་པ་དང༌། མཚོན་བར་བྱེད་པ་ནི་གསུངས་པའི་ཕྱིར་ནའོ། །སངས་རྒྱས་ཀུན་གྱི་བྱང་ཆུབ་སེམས་ནི་སངས་རྒྱས་ནི། ཕྱོགས་བཅུ་དང་དུས་གསུམ་གྱི་གྱལ་བ་རྣམས་སོ། །བྱང་ཆུབ་སེམས་ནི་རྣམ་པ་གཉིས་ཏེ། དོན་དམ་བྱང་ཆུབ་ཀྱི་སེམས་ནི་ཆོས་ཉིད་སྐྱེ་བ་མེད་པའོ། །ཀུན་རྡོབ་བྱང་ཆུབ་ཀྱི་སེམས་ནི་ཁམས་གསུམ་གྱི་སེམས་ཅན་ལ་སྙིང་རྗེ་ཆེན་པོ་བསྐྱེད་པའོ། །བླ་ན་མེད་པར་རྟོགས་འགྱུར་བ་ནི་བྱང་ཆུབ་ཀྱི་སེམས་དེ། གཟུང་འཛིན་རྣམ་པར་རྟོག་པའི་མཐའ་སྤངས་པས་བླ་ན་མེད་པ་སྟེ། དེ་གང་གིས་རྟོགས་ན་སོ་སོར་རྟོག་པའི་ཡེ་ཤེས་ཀྱིས་ཚིག་ཙམ་མ་ཡིན་པར་བློའི་གཏིང་དུ་གནས་པའི་དོན་ཏེ། རྒྱལ་བས་གསུངས་པའི་ཡེ་ཤེས་དེ་ནི་ཉོན་མོངས་པའི་
འཁོར་བ་ལས་རྒྱལ་བའི་དེ་བཞིན་གཤེགས་པ་སྟེ། གསུང་ཚངས་པའི་དབྱངས་ཀྱིས་འགྲོ་བའི་དོན་དུ་བཀའ་སྩལ་བའི་དོན་དུ་ནི་ཡང་དག་པའི་ཡེ་ཤེས་ཏེ། སྤྲོས་པའི་མཐའ་སྤངས་ནས་རྣམ་པར་མི་རྟོག་པའི་དབྱིངས་ན་འདུ་འབྲལ་མེད་པའི་དོན་ཏོ། །དེ་ཅིའི་ཕྱིར་ཞེ་ན། དེ་ནི་དཀྱིལ་འཁོར་སྙིང་པོར་གསུངས་པ་ནི་རྣམ་པར་མི་རྟོག་པའི་ཡེ་ཤེས་ནི་དཀྱིལ། ཐབས་མཁས་པའི་ཕྲིན་ལས་སྣ་ཚོགས་སུ་འབྱུང་བ་ནི་འཁོར་ལོ་སྟེ་རྟོག་པའི་སྐྱོན་སྤངས་པས་ན་འཁོར་བྱང་ཆུབ་སེམས་དཔའ་རང་གི་དཀྱིལ་འཁོར་བཤད་ཟིན་ཏོ།། །།ད་ནི་རྩ་བའི་དཀྱིལ་འཁོར་རྟོག་པའི་ཕྱིར་གཟུགས་བརྙན་སྟོན་ཏོ། །དེ་ཅིའི་ཕྱིར་ཞེ་ན། ཕྱིའི་དཀྱིལ་འཁོར་འདི་གསུངས་སོ། །ད་ལ་ཕྱི་ནི་ས་ཚོན་གཟུགས་བརྙན་གྱི་དཀྱིལ་འཁོར་བྲི་བའི་ཐབས་ཏེ་དབང་པོ་རྣམ་པ་ལྔའི་སྤྱོད་ཡུལ་དུ་སྣང་བའོ། །དཀྱིལ་ནི་དབུས་ཀྱི་ཕོ་བྲང་ལ་འཁོར་ནི་འཁོར་ལོའི་རྩིབས་དང་ལྡན་པ་དང་སྣམ་བུ་སྒོ་དང་གྲུ་ཆད་དུ་ལྡན་པའོ། །འདི་ནི་འོག་མའི་དོན་ལ་གསུངས་པ་ནི་ཞལ་ནས་ཚངས་པའི་དབྱངས་སུ་ལྡན་པའོ། །གཙུག་ལག་ཁང་དང་སྐྱེད་མོས་ཚལ་ནི། གཙུག་ལག་ཁང་ནི། །ཆོས་ཀྱི་ཁང་པ་ཡོད་པའི་ས་ཕྱོགས་སུའོ། །སྐྱེད་མོས་ཚལ་ནི། ས་གཞི་མཉམ་ལས་ཕྱོགས་ཤིང་སྣ་ཚོགས་སྐྱེས་པའོ། །མཆོད་རྟེན་ལྷ་ཁང་ཀུན་དགའ་སོགས། །མཆོད་རྟེན་ནི་སྐུ་གདུང་རིང་བསྲེལ་ཡོད་པའི་ས་ཕྱོགས་སུ་ལྷ་ཀང་ནི་འཇིག་རྟེན་པའི་ལྷ་རྟེན་ཡོད་པའོ། །ཀུན་དགའ་བ་ནི། མི་མང་པོ་འདུ་བའི་ས་ཕྱོགས་སུ་བྲི་བར་གསུངས་སོ། །ཅི་བཞིན་པ་ཡི་ཆོ་ག་ཡིས། །ཞེས་པ་ནི། ཅི་བཞིན་ནི་གནས་ཅི་བཞིན་པ་དང༌། ཡོ་བྱད་ཅི་བཞིན་པ་དང༌། སྣགས་མཁན་དང༌། སངས་གཡོག་དང༌། ཡོན་བདག་ཅིག་བཞིན་ནོ། །ཅོ་ག་ནི་ས་གཞི་དང༌། བརྟག་པའི་ཆོ་ག །སྣང་བའི་རྒྱལ་བོ་དང༌། མི་སྣང་བའི་སའི་ལྷ་མོ་ལ་སོགས་པ་ལ། དང་པོ་ནི་ས་གང་དུ་བྱ་བའི་གནས་དང༌། ས་བཟང་པོ་བཙལ་བ་དང༌། གཉིས་པ་ཚུལ་བཞིན་དུ་ཚོགས་པར་བྱས་ལ་བསླང་བ་དང༌། གསུམ་པ་ནི། སྔགས་དང༌། ཕྱག་རྒྱ་དང༌། ཏིང་ངེ་འཛིན་དང་ལྡན་པར་བྱས་ལ། ཡེ་ཤེས་ལྔའི་ངོ་བོ་བྱང་ཆུབ་སེམས་སུ་བྱིན་གྱིས་
བརླབས་པ་དང༌། བཞི་པ་སའི་རང་བཞིན་དང་མཚན་ཉིད་བརྟག་པ་དང༌། ལྔ་པ་ཆོ་ག་བཞིན་དུ་བསྒོམ་པ་དང༌། དྲུག་པ་ཆོ་ག་བཞིན་དུ་མཁྱེན་པར་གསོལ་ཞིང་ལས་ཚུལ་བཞིན་དུ་བྱ་བ་དང༌། ཏིང་ངེ་འཛིན་མི་ཡེངས་པར་བྱ་བའོ། །དེ་ཅིའི་ཕྱིར་ཞེ་ན། གནས་ནི་བྱིན་གྱིས་བརླབ་བར་བྱ། །ཞེས་འབྱུང་བས། ཡེ་ཤེས་ཀྱི་ཆོས་ཉིད་ལ་གནས་པར་བྱིན་གྱིས་བརླབ་པ་དང༌། ཏིང་ངེ་འཛིན་གྱིས་སེམས་ལས་བྱུང་བའི་ཆོས་ཀྱི་དཀྱིལ་འཁོར་གྱི་གནས་སུ་བྱིན་གྱིས་བརླབ་པ་དང༌། བརྟག་པ་མིང་གི་གནས་ཆོས་ཉིད་དབྱིངས་སུ་བྱིན་གྱིས་བརླབ་པ་དང༌། མཚན་མ་རྫས་ཀྱི་གནས་ཚོན་གྱི་དཀྱིལ་འཁོར་གྱི་རྒྱལ་བའི་བཞུགས་གནས་སུ་བྱིན་གྱིས་བརླབ་པ་དང་བཞིའོ། །བྱིན་གྱིས་བརླབ་པའི་གནས་དེར་ནི། །ཞེས་བྱ་བ་ནི། དཔེར་ན་རྩི་གསེར་འགྱུར་གྱིས། །དངུལ་སྲང་སྟོང་གསེར་དུ་བསྒྱུར་བ་ལྟར། ཏིང་ངེ་འཛིན་གྱི་ཡེ་ཤེས་ཀྱི་རྩིས་ཉོན་མོངས་པ་རྣམ་པར་དག་པར་བྱིན་གྱིས་རློབ་པར་བྱེད་པ་ལ་དེ་སྐད་ཅེས་བྱའོ། །ཕྱི་ཡི་དཀྱིལ་འཁོར་བྲི་བར་བྱ། །ཞེས་པ་ནི་ཤེས་པ་སྣང་སྟེ། ཏིང་ངེ་འཛིན་གྱི་དཀྱིལ་འཁོར་དེ་མཐོང་བར་བྱེད་པས། དེ་ཕྱིའི་དཀྱིལ་འཁོར་གཟུགས་བརྙན་ལ་བརྟེན་དགོས་པས་ན་ཕྱིའི་མཎྜལ་ཞེས་གསུངས་སོ། །དེ་ནི་མཚོན་པར་བྱེད་པའི་ཕྱིར་ན། ཕྱིའི་མཎྜལ་ཞེས་བྱའོ། །གྲུ་བཞི་པ་ལ་སྒོ་བཞི་པ་ནི། ཡེ་ཤེས་བཞི་དང་ལྡན་པའི་རྟགས་སུ་གྲུ་བཞིར་བ་སྟན་པ་ལ། ཕྲིན་ལས་རྣམ་བཞི་དང་ལྡན་པའི་རྟགས་སུ་ནི་སྒོ་བཞི་དང་ལྡན་པར་བ་སྟན་ཏེ། རྟ་བབས་བཞི་དང་ལྡན་པ་དང༌། ཐེམ་སྐས་བཞི་དང་ཕྲེང་བ་ནི། མཎྜལ་སྟེགས་ཀྱི་བང་རིམ་ལ། རྟ་བབས་ནི་སྒོ་ཕྱོགས་ནས་བང་རིམ་བྱས་པའོ། །ཐེམ་སྐས་ནི་རྟ་བབས་ལས་སྐས་ཆུང་བར་བྱས་པའོ། །ཕྲེང་བ་ནི་ཐེམ་སྐས་དང་རྟ་བབས་ལ་ཕྲེང་བ་སྣང་བའི་བར་མཚམས་བརྒྱན་ནས་མཛེས་པར་བྱ་བ་ལ་སོགས་པའོ། །དེ་ཡང་ཚད་མེད་པ་བཞིའི་རྟ་བབས་དང་ལྡན་པས་བསྡུ་པའི་དངོས་པོ་བཞིའི་ཐེམ་སྐས་དང༌། ཐུགས་རྗེ་ཚད་མེད་པའི་ཕྲེང་བས་བརྒྱན་ཏེ། རྒྱལ་པར་ཐར་པ་བརྒྱང་ཡང་བ་སྟན། སེང་གེ་དང་བ་ལང་རྣམས་ཀྱིས་བརྒྱན་པ་ནི། ཐབས་ཐུགས་རྗེ་ཆེན་པོ་འཁོར་བས་མི་འཇིགས་པས་སེང་གེ་དང༌།
ཡང་དག་པའི་སྟོབས་ཚད་མེད་པའི་རྟགས་སུ་གླང་པོ་ཆེ་སྟེ། སྒོ་གཡས་གཡོན་ནི། དར་དང་ལྡ་ལྡི་དོ་ཤལ་ཕྲེང་བ་དྲིལ་བུ་དང་ནི་རྔ་མས་བརྒྱན་པ་ནི། དར་ནི་པཉྩ་རེག་ཡེ་ཤེས་རྣམ་པ་ལྔའི་དོན་ཏོ། །ལྡ་ལྡི་ནི་ཏྲི་རེ་ག་སྟེ་སྐུ་གསུང་ཐུགས་རྣམ་པར་དག་པའི་ངོ་བོའོ། །དོ་ཤལ་ནི་མུ་ཏིག་ཧ་རའི་ཤལ་ཏེ། བྱང་ཆུབ་སེམས་དཔའ་བདེ་བའི་དོ་ཤལ། ཕྲེང་བ་ནི་མུ་ཏིག་གི་ཕྲེང་བ་དོ་ཤལ་ཟླུམ་པོར་བསྐོར་བ་སྟེ། ཏིང་ངེ་འཛིན་ཚོགས་པའི་དོན་ཏོ། །དྲིལ་བུ་དེའི་བར་བར་ནས་དོ་ཤལ་དང་སྤེལ་མར་འདུག་སྟེ། གསུང་རྣམ་པར་དག་བས་འགྲོ་བ་ལ་ཆོས་སྟོན་པའི་རྒྱུའོ། །དེ་ནི་མུ་ཏིག་ཧ་ར་སྟེ། མཎྜལ་གྱི་མཐའ་བསྐོར་བའོ། །རྔ་མ་ནི་འཕྲོ་བས་གངས་རི་སྟེ། སྐྱོན་དང་བྲལ་བ་བྱང་ཆུབ་སེམས་ལ་གཡོ་བ་མེད་པའི་དོན་ཏོ། །རྡོ་རྗེ་རིན་ཆེན་པདྨ་དང༌། རྒྱ་གྲམ་གྱི་ནི་ཕྱག་རྒྱས་བརྒྱན་པ་ནི། རྡོ་རྗེ་ནི་རྡོ་རྗེར་བ་ཟླུམ་པོ་སྟེ། རིག་པའི་ཡེ་ཤེས་རྡོ་རྗེ་ལྟར་འདུས་མ་བྱས་པའི་རབ་དང་ལྡན་པ་དང༌། རིན་པོ་ཆེའི་ཕྲེང་བས་ཕོ་བྲང་ནང་དུ་བསྐོར་བའོ། །ཡོན་ཏན་སྣ་ཚོགས་གཞན་པས་བྱུང་བའོ། །པདྨ་ནི་ལྷ་མོ་སོ་སོའི་གདན་གྱི་ཁྱད་པར་རོ། །ཐབས་མཁས་ཐུགས་རྗེ་ཆེ་བས་ནི་འགྲོ་བའི་དོན་ལ་མ་ཆགས་པའི་དོན་ཏོ། །གྱ་གྲམ་ནི། གྲྭ་ན་རྡོ་རྗེ་རྒྱ་གྲམ་ཟླ་ཕུར་ཡོད་པ་སྟེ། ཐབས་དང་ཤེས་རབ་ཟུང་དུ་འབྲེལ་པའི་རྟགས་སོ། །རྒྱན་ནི་གཟུགས་བརྙན་ལ་མཛེས་པར་བརྒྱན་པ་དང༌། ནང་གི་རྟགས་འཛིན་ལ་གསལ་བར་བརྒྱན་པའོ། །སྲད་བུ་བརྒྱང་དང་ལྡན་པ་ལ། ཕྱིའི་སྒོ་ཁྱུད་རྣམས་ཀྱིས་བརྒྱན་པ་ནི། སྲད་བུ་ནི་ཐིག་སྐུད་དེ་བྱང་ཆུབ་སེམས་སུ་བསྒོམ་པའོ། །བརྒྱང་ནི་ཕྱོགས་ཐིག་བཞི་དང༌། ནང་ཐིག་བཞི་དང་བརྒྱང་དོ། །རྣམ་པ་བརྒྱང་དང་ལྡན་པ་དང༌། སྐུ་ལ་བཀྲ་ཤིས་ཀྱི་རྟགས་བརྒྱང་རྫོགས་པའི་རྟགས་སོ། །ཕྱིའི་སྒོ་ཁྱུད་ནི། སྒོ་ཁུག་པར་བྱས་ཏེ། ཏིང་ངེ་འཛིན་རྟོགས་པས་འཇུག་པའི་ཐབས་སོ། །རྣམས་ཀྱིས་བརྒྱན་པ་ནི། སྒོ་ལ་སུམ་རིམ་སྟེ་སྒོ་བཅུ་གཉིས་ཀྱིས་བ་སྟན་པའོ། །ཁམས་གསུམ་གྱི་སེམས་ཅན་རྟེན་ཅིང་འབྲེལ་པར་འབྱུང་བ་བཅུ་གཉིས་ལས་བཟློག་པའི་ཕྱིར་ན། མཛད་པ་བཅུ་གཉིས་ཚུལ་དུ་སངས་རྒྱས་སོ། །སྣམ་བུ་ལ་བཞི་རིམ་གྱིས་བརྒྱན་པ་ནི།
ཡེ་ཤེས་བཞིས་སྐྱེ་གནས་བཞི་སྦྱོང་བའི་རྟགས་སོ། །དེ་ནི་བརྒྱན་པའི་དོན་ཏོ། །དགུའི་ཆར་ནི་དགོས་པ་ལ། སྒོ་དང་སྒོ་ཁྱུད་ཐམས་ཅད་སུམ་ཆར་བྱ་བ་ནི། ཁམས་གསུམ་ས་དགུ་ཐུགས་རྗེས་སྦྱོང་བའི་ཕྱིར་ནི། དཀྱིལ་འཁོར་གྱི་ངོས་གཅིག་དགུར་འཆད་པ་ལ་སྒོ་དང་སྒོ་ཁྱུད་དུ་བྱང་སྟེ། ཞི་གནས་དང་ལྷག་མཐོང་ཟུང་དུ་འབྲེལ་པས་ན། སྒོ་དང་སྒོ་ཁྱུད་དུ་བྱའོ། །སྐུ་གསུང་ཐུགས་སྒྲུབ་པའི་ཕྱིར་ན་སུམ་ཆར་འཆད་དོ། །བརྒྱ་བྱིན་གྱི་བྱེ་བྲག་བ་སྟན་ཟིན་ཏོ། །ད་ནི་ནང་གི་དོན་སྟོན་ཏེ། དེ་ཅིའི་ཕྲི་ཞེ་ན། རྡོ་རྗེ་སྲད་བུས་ཐིག་བཏབ་པ། དབུས་ཀྱི་མཎྜལ་གྱི་ཐིག་གདབ་པ་ནི། རྡོ་རྗེ་ནི་རིགས་ལ་བྱ་སྟེ། བྱང་ཆུབ་སེམས་སུ་བྱིན་ཡིས་བརླབས་པའི་ཕྱིར་རོ། །སྲས་བུ་ནི་དེས་མཚོན་པའི་ཐབས་ཐིག་སྐུད་ལ་བྱའོ། །དབུས་ནི་ཆོས་ཀྱི་དབྱིངས་མཚོན་པའི་རྟགས་ཕོ་བྲང་ཟླུམ་པོ་ལ་བྱའོ། །ཐིག་ནི་རིག་པ་རྡོ་རྗེའི་ཐིག་བྱང་ཆུབ་སེམས་བདེ་བ་ཆེན་པོ་ལ་བྱའོ། །བྱིན་བརླབས་ཆོ་འཕྲུལ་གྱི་ཐིག་ནི། དེ་ལས་ཡེ་ཤེས་ཀྱི་འོད་ཟེར་འཕྲོས་པས། འཕགས་པའི་ཐུགས་དམ་བསྐུལ་བ་དང༌། སེམས་ཅན་གྱིས་དོན་བྱས་ནས་བྱིན་གྱིས་བརླབས་པའོ། །གདབ་པའི་སྲད་བུའི་ཐིག་ནི། ཐིག་སྐུད་ཡེ་ཤེས་ཀྱི་འོད་འཕྲོ་བར་བྱིན་གྱིས་བརླབས་ནས་གནམ་ཐིག་དང་ས་ཐིག་གདབ་པའོ། །དག་ཅིང་ཚངས་པར་བྱིན་གྱིས་བརླབ་པའོ། །ཆོས་ཀྱི་དཀྱིལ་འཁོར་འདྲ་བ་ལ་ཞེས་པ་ནི། འཁོར་ལོ་ནི་ལྟེ་བ་དང༌། རྩིབས་དང་ལྡན་ན་འཁོར་དུ་བཏུབ་བོ། །དཔེ་དེ་དང་འདྲ་བར་སྟོན་པ་དང༌། འཁོར་གནས་ལ་སོགས་པ་དང་ལྡན་ན། ཆོས་སྟོན་པས་ན་འཁོར་ལོའོ། །འཁོར་ལོས་ནི་མཆོད་པ་དང་འདྲ་བར། ཡང་དག་པའི་ཡེ་ཤེས་ནི་ཉོན་མོངས་པའི་སྡུག་བསྔལ་གཅོད་པའི་ཕྱིར། ཆོས་ཀྱི་འཁོར་ལོ་ཞེས་གསུངས་པ་སྟེ། བློའི་དྲ་བ་རྣམས་ཆད་ནས་དོན་མཐོང་བའི་རྟགས་སོ། །དྲ་བ་ནི་རྩིབས་དང་བཅས་པ་བཅུ་དྲུག་པ་གཅིག་ཏུ་བྱས་པའི་ཚིག་སྟེ། དེ་ཡང་མཚོན་པའི་རྟགས་ཏེ། ཆོས་ཀྱི་དབྱིངས་ནི་ཡེ་ནས་རྣམ་པར་དག་པ། མཚོན་པའི་རྟགས་ལྟེ་བ་ལ། ཐབས་མཁས་པའི་ཐུགས་རྗེ་ཕུན་སུམ་ཚོགས་པའི་རྟགས་རྩིབས་ཏེ། ཆོས་ནི་དབྱིངས་ལ་ལྟེ་བར་ཡང་བ་སྟན་ལ། འཁོར་ལོ་ནི་ཕྲིན་ལས་
ལ་རྩིབས་ནི་ཐུགས་རྗེའི་རང་བཞིན་དུ་བ་སྟན་ཏོ། །དྲ་བ་ནི་མཚོན་པའི་རྟགས་འཇིག་རྟེན་མཚོན་བྱེད་གཟུགས་བརྙན་དུ་བྱ་བ་ཡང༌། དེ་བཞིན་དུ་བྱ་བའི་ཕྱིར་ཏེ་ཡེ་ཤེས་མཚོན་པ་ནི་རིན་པོ་ཆེའི་ཕྲེང་བས་ཟླུམ་པོར་བསྐོར་བས་ཏེ། འདོད་པ་འབྱུང་བས་ལོངས་སྤྱོད་རྫོགས་པའི་སྐུའོ། །བརྡའི་དཀྱིལ་འཁོར་ལ་དཔེ་གཞག་གོ །དེ་ཅིའི་ཕྱིར་ཞེ་ན། ལྟེ་བར་བཅས་ཤིང་རྩིབས་བཅུ་དྲུག །ཞེས་པ་ནི། ལྟེ་བ་ནི་དབུས་ཀྱི་ཕོ་བྲང་ཟླུམ་པོ་སྟེ་ཆོས་ཀྱི་སྐུའོ། །བཅས་པ་ནི་རིན་པོ་ཆེའི་ཕྲེང་བས་ཟླུམ་པོར་བསྐོར་བས་ཏེ། འདོད་པ་འབྱུང་བས་ལོངས་སྤྱོད་རྫོགས་པའི་སྐུའོ། །རྩིབས་ནི་འཁོར་ལོ་སྟེ། ཐུགས་རྗེ་ཕུན་སུམ་ཚོགས་པས། སེམས་དཔའ་བཅུ་དྲུག་གི་རང་བཞིན་དུ་བ་སྟན་ཏེ། སྤྲུལ་པའི་སྐུའོ། །དེ་ཅིའི་ཕྱིར་ཞེ་ན། རིམ་པ་གསུམ་དང་ལྡན་པ་ཞེས་པ་ནི། རིམ་ནི་ཕྱི་ནས་ནང་དུ་འཇུག་པ་གསུམ་དང༌། ནང་ནས་ཕྱི་རུ་འབྱུང་བ་གསུམ་དུ་བ་སྟན་ཏོ། །ནང་ནས་ཕྱིར་འབྱུང་བ་ནི་ལྟེ་བ་དང༌། རིན་པོ་ཆེའི་ཕྲེང་བ་དང༌། རྩིབས་སུ་བ་སྟན་ཏོ། །དེ་ལ་ལྟེ་བ་ནི། ཀུན་རིག་རྣམ་པར་སྣང་མཛད་ཆོས་ཀྱི་སྐུའི་རྟགས་སུ་བ་སྟན་ཏོ། །རིམ་པ་ནི་མ་འདྲེས་པའི་འབྱུང་བའི་ཐ་ཚིག །རིན་པོ་ཆེའི་ཕྲེང་བ་ནི་རིགས་བཞིའི་སངས་རྒྱས་དང། རིགས་ཀྱི་ཡུམ་སྟེ། ལོངས་སྤྱོད་རྫོགས་པའི་སྐུ་བདེ་བ་ཆེན་པོར་བ་སྟན་ཏོ། །རིམ་པ་གསུམ་པའི་རྩིབས་ནི་སྤྲུལ་པའི་སྐུ་སྟེ། སེམས་དཔའ་བཅུ་དྲུག་ལ་སོགས་པའི་འཇིག་རྟེན་ལས་འདས་པའི་འཁོར་གྱི་རང་བཞིན་ཏེ། སྤྲུལ་པའི་སྐུར་བ་སྟན་པའོ། །རྡོ་རྗེར་བ་ཕྱིན་ཆད་ནི། སྤྲུལ་པའི་འཁོར་འཇིག་རྟེན་ལས་འདས་པ་དང༌། འཇིག་རྟེན་པར་ཤེས་པར་བྱའོ། །ཕྱི་ནས་ནང་དུ་འཇུག་པའི་རིམ་བ་གསུམ་ནི་སྒོ་ལ་སུམ་རིམ་དུ་བ་སྟན་ཏོ། །དེ་བཞིན་གཤེགས་པའི་གསུང་གི་སྒོ་ནས། འགྲོ་བའི་དོན་མཛད་པའི་རིམ་པ་ལ། དེ་ལྟར་འགྲོ་བ་བྱང་ཆུབ་རྣམས་ལ་བཀོད་ནས་ཐེག་པ་ཆེན་པོར་སེམས་བསྐྱེད་པར་བྱེད་པས་ན་ཕྱི་ནས་ནང་དུ་འཇུག་པའི་ཐ་ཚིག་གོ །ད་ནི་འཁོར་ལོའི་དོན་སྟོན་ཏེ། རྩིབས་ནི་ཉིས་འགྱུར་ཉིད་དུ་བྱ། །ཞེས་པ་ནི་རྩིབས་ནི་འཁོར་ལོའི་ལྟེ་བ་སྟེ། དེ་ལ་ཉིས་འགྱུར་དུ་བྱ་བའི་དབུས་ཀྱི་རིན་པོ་ཆེའི་ཕྲེང་བ་ཚུན་ཆད་ཀྱི་རིམ་པ་མ་གཏོགས་པ་གཉིས་
ཡོད་པ་སྟེ། དེ་ཡང་རིན་པོ་ཆེའི་ཕྲེང་བ་དང༌། གོང་རས་ཉིས་འགྱུར་དུ་ལྕེ་ལ་གཏང་བའི་ཕྱིར་ན། རྩིབས་ནི་ཉིས་འགྱུར་རོ། །དེ་ནི་ཐབས་དང་ཤེས་རབ་ཀྱི་སྒོ་ནས་འགྲོ་བའི་དོན་མཛད་པའི་ཕྱིར་ན་ཉིས་འགྱུར་དུ་སྨོས་ཏེ། དཀྱིལ་འཁོར་དོན་བསྡུས་པ་བཤད་ཟིན་ཏོ།། །།ད་ནི་དཀྱིལ་འཁོར་གྱི་ལྷ་གཙོ་བོའི་དོན་ཏེ། དེ་ཅིའི་ཕྱིར་ཞེ་ན། དབུས་ཕྱོགས་སུ་ཀུན་རིག་ནི་ཞེས་པ་གསུངས་ཏེ། ཐམས་ཅད་ཀུན་གྱི་རང་བཞིན་ཡིན་པས་ན་དབུས་ཞེས་སྨོས་སོ། །དུས་གསུམ་གྱི་དོན་ཕྱིན་ཅི་མ་ལོག་པར་ཤེས་པས་ན། ཀུན་རིག་གི་ཕྱོགས་མི་འཇིག་རྟེན་དང་མཐུན་པ་དང༌། དོན་གསལ་བར་བ་སྟན་པའི་ཕྱིར་སྨོས་སོ། །དུང་དང་ཀུ་ནྡ་ཟླ་འདྲ་ཞེས་པ་ནི། མཚན་མའི་སྐྱོན་དང་བྲལ་བས་ན་དུང་ལྟར་དཀར་བར་བ་སྟན་ལ། བྱང་ཆུབ་ཀྱི་སེམས་བདེ་བའི་རང་བཞིན་ཡིས་སྣུམ་པའི་རྟགས་སུ་ནི་མེ་ཏོག་ཀུན་ད་ལྟར་སྣུམ་པར་བ་སྟན་ཏོ། །ཞལ་བཞི་པ་ལ་རྡོ་རྗེ་ནི། །ཞེས་པ་ནི་ཕྱོགས་རིས་ང་བདག་མེད་པས་ཐམས་ཅད་མཉམ་པའི་རང་བཞིན་བས་ཞལ་བཞི་སྨོས་ཏེ། ཅིའི་ཕྱིར་ཞེ་ན། དེ་ནི་ཡེ་ཤེས་བཞི་རྟོགས་པའི་རང་བཞིན་ཡིན་པས་སྨོས་པའོ། །རྡོ་རྗེ་ནི་ཐུགས་རྣམ་པར་དག་པ་རྡོ་རྗེ་ལྟར་འདུས་མ་བྱས་པས་མཚན་མ་ཐམས་ཅད་བྲལ་བའི་རྟགས་སུ་བ་སྟན་ཏོ། །གདན་ནི་དེ་ལྟ་བུའི་ངང་ལ་བཞུགས་པ་དང༌། མི་འདའ་བའི་ཕྱིར་སྨོས་པའོ། །ཡང་དག་བཞུགས་ནི། ཟིལ་གྱིས་མི་ནོན་པར་བཞུགས་པ་དང༌། མི་རྟོག་པར་བཞུགས་པའི་ཐ་ཚིག་གོ །མདུན་དུ་ངན་སོང་ཀུན་འདྲེན་ནི། །ཞེས་པ་ནི། མདུན་ནི་ཤར་ཕྱོགས་ཏེ་མེ་ལོང་ལྟ་བུའི་ཡེ་ཤེས་ཀྱི་ངོ་བོ་སྟེ། ཉོན་མོངས་པ་འཇོམས་ལ་ངན་སོང་ནི་སྡུག་བསྔལ་རྡོ་རྗེ་ལྟ་བུའི་ཡེ་ཤེས་ཀྱིས་འཇོམས་ཤིང་འདྲེན་པས་ཀུན་འདྲེན་ནོ། །ཟླ་བ་རྒྱས་དང་བ་མོའི་མདོག །ཅེས་པ་ནི། སྐུ་ཟླ་བའི་མཎྜལ་དུ་གྱུར་པ་ནི་ཟླ་བའོ། །བ་མོའི་ནི་དཀར་ལ་འཚེར་བ་སྟེ། སྐུ་ལ་སྐྱོན་གྱི་བག་ཆགས་དང་བྲལ་བས་ནི་དཀར་ལ། ཡོན་ཏན་སྣ་ཚོགས་འབྱུང་བས་ནི་འཚེར་རོ། །རྒྱན་རྣམས་ཀུན་གྱིས་ལེགས་པར་བརྒྱན། །ཞེས་པ་ནི། དབུ་རྒྱན་དང་སེ་མོ་དོ་ལ་སོགས་པའི་རྒྱན་སྣ་ཚོགས་པས་སྤྲས་པའོ། །ལེགས་པར་བརྒྱན་ནི་མཛེས་པ་དང་བལྟ་ན་སྡུག་པས་ནི་ཏིང་ངེ་འཛིན་གྱི་
རྟགས་སོ། །རྒྱལ་མཆོག་སྐྱེས་བུ་གང་བས་ན་གང་བའོ། །བྲི་ནི་མཚོན་ཆ་བཀོད་པའི་ཐ་ཚིག་གོ །རྒྱབ་ཏུ་ཤཱཀྱ་རིགས་དབང་པོ། །ཞེས་པ་ནི། ཞལ་ཤར་དུ་གཟིགས་པའི་རྒྱབ་ནུབ་ཏུ་ཉེ་བ་སོ་སོར་རྟོག་པའི་ཡེ་ཤེས་ནི། རྒྱབ་ལས་སྐྱེས་པ་ནི། ཅིའི་ཕྱིར་ཞེ་ན། འཁོར་རྒྱབ་ལྟ་བུ་ལས་ཡེ་ཤེས་ཀྱི་འཁོར་བའི་གཟུང་འཛིན་བཅོམ་པས་ན་རྒྱབ་ནས་སྐྱེས་པ་ཞེས་བྱའོ། །ཤཱཀྱ་ནི་རིགས་ཕུན་སུམ་ཚོགས་པ་སྟེ། རྒྱལ་པོ་ཤཱཀྱ་ཉི་མ་དམར་པོའི་རིགས་ཏེ། རུས་ནི་གོ་ཏ་མའོ། །ཐུབ་པ་ནི། སྐུ་གསུང་ཐུགས་ཐུབ་པས་མི་དགེ་བ་སྤངས་ཏེ། ཡེ་ཤེས་ཀྱི་རང་བཞིན་ཡིན་པས་ཐུབ་པ་ཞེས་སྨོས་སོ། །གཙོ་བོ་ནི་ཁམས་གསུམ་གྱི་བདག་པོ་རྐང་གཉིས་ཀྱི་མཆོག །ལྷ་དང་མིའི་གཙོ་བོ་སྟེ། བྲི་བའི་ཐ་ཚིག་གོ །གཡས་དང་གཡོན་གྱི་ཕྱོགས་རོལ་དུ། །ཞེས་པ་ནི། ཞལ་ཤར་དུ་གཟིགས་པའི་གཡས་ནི་ལྷོ་སྟེ། དེ་ནི་མཉམ་པ་ཉིད་ཀྱི་ཡེ་ཤེས་ཀྱིས་འཁོར་བ་གཡོན་ཕྱོགས་དང་འདྲ་བའི་ལམ་ལས་བསྒྲལ་ཏེ། གཡས་ཕྱོགས་བདེ་བ་ཆེན་པོ་བླ་ན་མེད་པའི་ལམ་ལ་བཀོད་པས་གཡས་སོ། །གཡོན་ནི་བྱ་བ་ནན་ཏན་གྱི་ཡེ་ཤེས་ཀྱིས་ཕྲིན་ལས་ཀྱི་བདག་ཉིད་གཡོན་ཕྱོགས་དང་འདྲ་བའི་སེམས་ཅན་འཁོར་བ་ལས་འདྲེན་པར་མཛད་པས་ན་གཡོན་ཏེ་བྱང་ཕྱོགས་སོ། །རྒྱལ་མཆོག་རིན་ཆེན་མེ་ཏོག་གཉིས་པ་སྟེ། མཉམ་པ་ཉིད་ཀྱི་ཡེ་ཤེས་ཀྱི་ཉོན་མོངས་པ་ཅན་གྱི་ཡིད་དང་བདག་ཏུ་འཛིན་པ་ནི་ང་བདག་དང་བདག་མེད་པར་བཅོམ་པས་ན་རྒྱལ་མཆོག་གོ །རིན་ཆེན་ནི་བྱ་བ་གྲུབ་པའི་ཡེ་ཤེས་ཀྱིས་ཕྲིན་ལས་སྣ་ཚོགས་པར་མཛད་པ་ནི་རིན་ཆེན་ནོ། །མེ་ཏོག་ནི་འདམ་གྱི་ནང་ན་འདུག་ཀྱང་འདམ་གྱི་སྐྱོན་དང་བྲལ་བ་ལྟར། འཁོར་བ་ལ་ཐུགས་རྗེས་ཕྲིན་ལས་མཛད་ཀྱང་མ་གོས་པའི་རྟགས་སྨོས་སོ། །དབུས་ཀྱི་གཙོ་བོ་རིགས་ལྔའི་དོན་བསྡུས་པ་བཤད་ཟིན་ཏོ།། །།ད་ནི་མཉེས་པར་བྱེད་པའི་ཡེ་ཤེས་ཀྱི་ལྷ་མོ་རིགས་ཀྱི་ཡུམ་ཆེན་མོ་རྣམ་པ་བཞི་དབུས་ཀྱི་པོ་བྲང་ཟླུམ་པོའི་མཚམས་ཀྱི་རེའུ་མིག་མེད་པའི་དོན་སྟོན་ཏེ། དེ་ཡང་ཅིའི་ཕྱིར་ཞེ་ན། ལོ་ཙཱ་ན་དང་མཱ་མ་ཀཱི། །དེ་བཞིན་དཀར་མོ་སྒྲོལ་མ་རྣམས། །ཞེས་གསུངས་ཏེ། སྐུའི་ལྷ་མོ་ལོ་ཙཱ་ན་སྟེ། དེ་བཞིན་གཤེགས་བའི་ཡེ་ཤེས་ཀྱིས་གཟིགས་པའི་ཡུམ་སྟེ།
སངས་རྒྱས་སྤྱན་དུ་གསུངས། ཡེ་ཤེས་ཀྱི་སྐུ་ལ་ཆོས་ཉིད་རྒྱན་ཡུམ་དུ་བ་སྟན་པས་སངས་རྒྱས་སྤྱན་ནོ། །མཱ་མ་ཀཱི་བྱང་ཆུབ་ཀྱི་སེམས་བདེ་བ་ཆེན་པོ་གཞན་ལས་བྱུང་ཞིང༌། ཆེ་བ་རིན་པོ་ཆེ་ལྟ་བུ་མི་ཆད་པ་ལོངས་སྤྱོད་པར་རཏྣ་མཱ་མ་ཀཱིའོ། །ན་བཟའ་དཀར་མོའི་ཏིང་ངེ་འཛིན་ཚུལ་ཁྲིམས་ཀྱི་ན་བཟའ་དམ་པ་དང་ལྡན་པས་ཉོན་མོངས་པའི་ཉེས་སྐྱོན་གྱི་རྣམ་པས་མི་ཚུགས་པས་ན་བཟའ་དཀར་མོའོ། །དམ་ཚིག་སྒྲོལ་མ་ནི་སྔོན་གྱི་ཕྲིན་ལས་མངའ་བའི་འབྲས་བུས་ད་ལྟར་ཕྲིན་ལས་རྒྱ་མཚོ་ལྟ་བུ་ལ་མངའ་བརྙེས་པས་ཁམས་གསུམ་གྱི་སེམས་ཅན་རྣམས་ལ་ཐབས་མཁས་པའི་ཐུགས་རྗེས་མི་འདའ་བར་དམ་ཚིག་གིས་བསྒྲལ་བས་དམ་ཚིག་སྒྲོལ་མ་ཞེས་བྱའོ། །ལོ་ཙཱ་ན་ནི་ཟླ་བ་ཚེས་པ་ལ་སྤྱན་ཡོད་པ་དང༌། མཱ་མ་ཀཱི་ལ་རིན་པོ་ཆེའི་མཆོད་སྡོང་དང༌། ན་བཟའ་དཀར་མོ་ལ་པདྨ་སྒྲོལ་མའི་ཨུཏྤལ་བྲིའོ། །མཚན་གྱིས་ལྷ་མོའི་དོན་བ་སྟན་ཟིན་ཏོ། །སེམས་དཔའ་བཅུ་དྲུག་འཁོར་ལོའི་རྩིབས་ལ་འདུག་པའི་དོན་ཏེ། དེ་ཅིའི་ཕྱིར་ཞེ་ན། རྩིབས་ཀྱི་ནང་ནི་ཐམས་ཅད་དུ། །རྡོ་རྗེ་སེམས་སོགས་སེམས་དཔའ་མཆོག །ཅེས་གསུངས་པ་ནི་རྩིབས་ནི་འཁོར་ལོའི་རྩིབས་བཅུ་དྲུག་བ་སྟན་པའོ། །ནང་ནི་འཁོར་ལོའི་ལྕེ་ལ་བྲིས་པའི་ཐ་ཚིག་གོ ། དེ་ལ་ཤར་ཕྱོགས་ཀྱི་རྩིབས་ལ་བྲི་བའི་སེམས་དཔའ་བཞི་ནི་མེ་ལོང་ལྟ་བུའི་ཡེ་ཤེས་ཀྱིས། ཀུན་གཞི་གནས་གྱུར་པའི་ཐབས་ཏེ། འདུལ་བའི་དབང་དུ་སྐུ་སྤྲུལ་ཏེ་ཡང་དག་པའི་ཡེ་ཤེས་ཀྱིས་ཆོས་ཉིད་དོན་ལ་སེམས་པས་ན་རྡོ་རྗེ་སེམས་དཔའོ། །ཉོན་མོངས་པའི་བདུད་ལས་རྒྱལ་བས་རྡོ་རྗེ་རྒྱལ་པོའོ། །ཐབས་མཁས་པའི་ཐུགས་རྗེས་འགྲོ་བའི་དོན་ལ་ཆགས་པས་རྡོ་རྗེ་ཆགས་པའོ། །ཡང་དག་པའི་ཡེ་ཤེས་གཟུང་འཛིན་གྱི་སྐྱོན་གྱིས་མ་གོས་པས་རྡོ་རྗེ་ལེགས་པའོ། །ཐབས་མཁས་པའི་ཐུགས་རྗེས་འགྲོ་བའི་དོན་ལ་སེམས་པ་དང༌། ཡང་དག་པའི་ཡེ་ཤེས་ཀྱིས་ཆོས་ཉིད་ཀྱི་དོན་ལ་སྨེས་པས་ཤར་ཕྱོགས་སུ་བྲིའོ། །མཉམ་པ་ཉིད་ཀྱི་ཡེ་ཤེས་ཀྱིས་ཉོན་མོངས་པའི་ཡིད་ང་དང་བདག་ཏུ་ལྟ་བ་གདུལ་བའི་ཕྱིར་ལྷོ་ཕྱོགས་ཀྱི་སེམས་དཔའ་བ་སྟན་ཏེ། ཡང་དག་པའི་ཡེ་ཤེས་ལ་གཟུང་འཛིན་གྱི་སྐྱོན་གྱིས་མ་གོས་པས་ཆེ་བའི་ཡོན་ཏན་སྣ་ཚོགས་བ་འབྱུང་བས་
རྡོ་རྗེ་རིན་ཆེན་ནོ། །སྐུ་གསུང་ཐུགས་ཡེ་ཤེས་ཀྱི་གཟི་བརྗིད་དང་ལྡན་པས་རྡོ་རྗེ་གཟི་བརྗིད་དོ། །ཡང་དག་པའི་ཡེ་ཤེས་ཀྱིས་ཉོན་མོངས་པའི་བདུད་ལས་རྒྱལ་བས་ན་རྡོ་རྗེ་རྒྱལ་མཚན་ནོ། །སྐུ་གསུང་ཐུགས་མི་ཟད་རྒྱན་གྱི་འཁོར་ལོ་ལས་ཐབས་མཁས་པའི་ཐུགས་རྗེས་འགྲོ་བའི་དོན་ལ་བཞད་པས་ན་རྡོ་རྗེ་བཞད་པའོ། །སོ་སོར་ཀུན་དུ་རོག་པའི་ཡེ་ཤེས་ཡིད་ཀྱི་རྣམ་པར་ཤེས་པས་ཡུལ་ལ་རང་ཐད་དུ་མཆོད་པས་འཁོར་ལོའི་རྒྱུ་ཡིན་པས་གདུལ་བའི་ཕྱིར་རོ། །ཐུགས་རྗེས་ནུབ་ཀྱི་སེམས་དཔར་སྤྲུལ་ཏེ། བཞུགས་པ་ནི་སོ་སོར་ཀུན་དུ་རྟོག་པའི་ཡེ་ཤེས་ཀྱི་ཆོས་སྤྱི་དང༌། རང་གི་མཚན་ཉིད་ལ་མ་རྨོངས་པས་རྡོ་རྗེ་ཆོས་རབ་བོ། །ཡང་དག་པའི་ཡེ་ཤེ་སྐྱིས་ཉོན་མོངས་པ་ཐམས་ཅད་རྩད་ནས་གཅོང་པས་རྡོ་རྗེ་རྣོན་པོའོ། །ཐབས་མཁས་པའི་ཐུགས་རྗེས་འཁོར་བ་ཁ་ལོ་བསྒྱུར་བས་རྡོ་རྗེ་འཁོར་ལོའོ། །གསུང་རྣམ་པར་དག་པས་འགྲོ་བ་ལ་ཆོས་སྟོན་པས་རྡོ་རྗེ་སྨྲ་བའོ། །སྒོ་ལྔའི་རྣམ་པར་ཤེས་པས་ཡུལ་ལ་རང་ཐད་དུ་གཅོད་པས་འཁོར་བའི་གྱུ་སྟེ། གདུལ་བྱའི་ཐབས་སུ་བྱང་ཕྱོགས་ཀྱི་སེམས་དཔར་སྐུ་སྤྲུལ་ཏེ། བྱ་བ་གྲུབ་པའི་ཡེ་ཤེས་ཀྱིས་དེ་བཞིན་གཤེགས་པའི་ཕྲིན་ལས་སྣ་ཚོགས་སུ་མཛད་པས་རྡོ་རྗེ་ལས་རབ་པོ། །ཕྱིན་ཅི་ལོག་གི་གཟུང་འཛིན་གྱིས་མི་ཚུགས་པའི་གོ་སྐབས་པས་རྡོ་རྗེ་བསྲུང་བའོ། །རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་པའི་བདུད་འདུལ་བས་རྡོ་རྗེ་གནོད་སྤྱིན་ནོ། །ཡང་དག་པའི་ཤེས་རབ་ཀྱི་ས་རྟོག་པ་ཐམས་ཅད་ཀྱི་མཐའ་སྤངས་པས་རྡོ་རྗེའི་ཁུ་ཚུར་རོ། །ད་ནི་ཕྱི་ནང་གི་གྲུ་ཆང་ཀྱི་ལྷ་མོའི་དོན་ཏོ། །དེ་ཅིའི་ཕྱིར་ཞེ་ན། མཁས་པས་ལཱ་སྱེ་ལ་སོགས་པའི། །མཆོད་པ་གྲྭ་ཡི་ཕྱོགས་སུ་བྲི། །ཞེས་པ་ནི། ཁམས་གསུམ་གྱི་ལྷ་ཆེན་པོ་འདོད་ཆགས་ཅན་གདུལ་བའི་ཐབས་སུ། ནང་གི་ལྷ་མོ་བཞིར་བ་སྟན་ཏེ། ཡེ་ཤེས་མཚོན་པའི་ཡུལ་དུ་བྱུང་སྟེ། ཁམས་གསུམ་གྱི་སེམས་ཅན་དང་ཆ་བསྟུན་པའི་ཕྱིར་ཡང་དག་པའི་ཤེས་རབ་ཀྱིས་ཆོས་ཉིད་དོན་གསལ་བར་རྟོགས་པའི་རྟགས་སུ་ལཱ་སྱེར་བ་སྟན་ནོ། །བྱང་ཆུབ་སེམས་ལས་འདོད་པ་སྣ་ཚོགས་འབྱུང་བས་མཱ་ལེར་བ་སྟན་ནོ། །ཡང་དག་པའི་ཆོས་སྟོན་པའི་རྟགས་སུ་གཱི་ཏིར་བ་སྟན་ནོ། །ཐབས་མཁས་པའི་མཛད་པ་གར་
ཐབས་དང་འདྲ་བའི་རྟགས་སུ་ནྲྀ་ཏི་བ་སྟན་ནོ། །དེ་ནི་ཡེ་ཤེས་ཀྱིས་རྟོགས་པའི་ཡུལ་དབྱིངས་མཚོན་པའི་རྟགས་འདུལ་བའི་དབང་དུ་བ་སྟན་ནོ། །དེ་ནི་ནང་གི་གྲུ་ཆད་ལ་སྨོས་སོ། །དེའི་འོག་ཏུ་ཕྱི་རོལ་དང་ཆོས་མཐུན་པའི་དུས་རྣམ་པ་བཞི་ཆོས་ཀྱི་དབྱིངས་ལ་འདའ་བའི་ཕྱིར་མཚོན་པའི་རྟགས་སུ་ཕྱིའི་གྲུ་ཆད་ཀྱི་ལྷ་མོའི་དོན་བ་སྟན་ཏེ། དུས་སྔ་མ་དང་ཕྱིས་ཡེ་ནས་མ་སྐྱེས་པའི་ཆོས་ཉིད་དུ་ལ་འདའ་བའི་ཕྱིར་བཛྲ་དྷཱུ་པེ་སྟེ། ཚུལ་ཁྲིམས་ཀྱི་དྲིས་ཉོན་མོངས་པ་འཇོམས་པའི་ཕྱིར་རོ། །དུས་ད་ལྟ་དང་དབྱར་གྱི་ངོ་བོ་གནས་སུ་དག་པ་ནི་བཛྲ་པུཥྤེ་སྟེ། ཏིང་ངེ་འཛིན་བྱང་ཆུབ་ཀྱི་སེམས་མེ་ཏོག་ཏུ་གཏོར་བའི་ཕྱིར་རོ། །དུས་མ་འོངས་པ་དང༌། སྟོན་མ་སྐྱེས་པ་ནི་བཛྲ་ཨཱ་ལོ་ཀེ་སྟེ། ཡང་དག་པའི་ཤེས་རབ་སྒྲོན་མ་ལྟ་བུ་རྟོགས་པའི་ཡུལ་ལོ། །དུས་འབྱུང་བ་དང་དགུན་གྱི་ངོ་བོ་ཡེ་ནས་སྟོང་ཞིང་མི་དམིགས་པའི་མཚོན་པའི་རྟགས་བཛྲ་གནྡྷེ་སྟེ། ཤེས་རབ་ཡེ་ནས་དག་པས་རྟོགས་པའི་ཡུལ་ལོ། །དེ་རྣམས་ནི་ཡེ་ཤེས་རྣམ་པ་བཞི་དང༌། ཕྲིན་ལས་རྣམ་པ་བཞིས་འགྲོ་བའི་དོན་མཛད་པ་ཡང་ཆོས་ཉིད་ལས་མ་གཡོས་པའི་རྟགས་སུ་བ་སྟན་ནོ། །ཕྱི་ནང་གི་ལྷ་མོའི་དོན་བ་སྟན་ཟིན་ཏོ། །ད་ནི་ཡེ་ཤེས་ཀྱི་ཕྲིན་ལས་ཚང་མེད་པ་བཞི་སྟེ། བསྡུ་བ་དང་དངོས་པོ་རྣམ་པ་བཞིས་འགྲོ་བའི་དོན་མཛད་པའི་རྟགས་སྒོ་བ་བཞིའི་དོན་ཏེ། སྒོ་ཡི་ཕྱོགས་ནི་ཐམས་ཅད་དུ། །སྒོ་བ་བཞི་ནི་བྲི་བར་བྱ། །ཞེས་པ་ནི། ཡང་དག་པའི་ཤེས་རབ་ཀྱི་ལྕགས་ཀྱུས་འཁོར་བའི་སེམས་ཅན་ཉོན་མོངས་པ་ལས་འབྱིན་པའི་རགས་སུ་ལྕགས་ཀྱུར་བ་སྟན། ཐབས་མཁས་པའི་ཐུགས་རྗེས་ཞགས་པ་དང་འཁོར་བ་དག་འཛིན་པའི་རྟགས་སུ་ཞགས་པར་བ་སྟན། ཏིང་ངེ་འཛིན་ཡེ་ཤེས་ཀྱི་ངོ་བོར་གཉིས་སུ་མེད་པར་སྟོན་པའི་རྟགས་སུ་ལྕགས་སྒྲོག་ཏུ་བ་སྟན། གསུང་རབ་རྒྱ་མཚོའི་ངོ་བོས་ཆོས་སྟོན་པའི་རྟགས་སུ་དྲིལ་བུར་བ་སྟན། དེ་ནི་ཡེ་ཤེས་ཀྱི་སྤྲུལ་པས་སྒོ་སྨོས་སོ། །ད་ནི་ཐུགས་ཡང་དག་པའི་ཡེ་ཤེས་སྐྱེས་པའི་རྒྱལ་སྲས། སྔོན་གྱི་བསོད་ནམས་ཀྱི་ཚོགས་ཀྱིས་སངས་རྒྱས་ཀྱི་ཞིང་ཁམས་མཐའ་ཡས་པར་ཤེས་པའི་རྩ་ལ་སྦྱོང་བ་སྔོན་གྱི་བསོད་ནམས་ཀྱིས་འདུལ་བའི་དུས་ལ་སྐད་ཅིག་ཙམ་གཞེས་པས། བསྐལ་པ་བཟང་པོའི་བྱང་
ཆུབ་སེམས་དཔའ་བཅུ་དྲུག་སྨོས་ཏེ། རིམ་པ་དང་པོའི་སྣམ་བུ་ལ་བཀོད་པའི་དོན་ཏེ། ཅིའི་ཕྱིར་ཞེ་ན། རྟ་བབས་ཁྱམས་ནི་ཐམས་ཅད་དུ། །བྱམས་པ་ལ་སོགས་བྲི་བར་བྱ། །ཞེས་པ་ནི། ཐུགས་ཆོས་ཉིད་ལས་མ་གཡོས་པའི་རྟགས་སུ་ནི། ཤར་ཕྱོགས་ཀྱི་སེམས་དཔའ་བཞི་བ་སྟན་ཏེ། བདག་དོན་མཐར་ཕྱིན་པས་གཞན་དོན་རྩེ་གཅིག་ཏུ་མཛད་པས་ན་བྱམས་པའོ། །སྙིང་རྗེའི་བློ་མཁྱེན་པས་འཇམ་པའི་དཔལ་དང༌། ཚུལ་ཁྲིམས་ཀྱི་སྟོབས་དང་ལྡན་པ་སྤོས་ཀྱི་གླང་པོ་དང༌། ཐབས་མཁས་པ་ཕྲིན་ལས་ཀྱིས་འགྲོ་བའི་རེ་འདོད་སྐོང་བ་ཡེ་ཤེས་ཏོག་དང་བཞི་ཤར་ཕྱོགས་ཁྱམས་སུ་བྲིའོ། །ལྷོ་ཕྱོགས་ཀྱི་སེམས་དཔའ་བཞི་སྨོས་ཏེ། ལྟ་བ་དང་སྤྱོད་པ་ཡོངས་སུ་དག་པས་ཐམས་ཅད་ཆོས་ཉིད་ལ་འདའ་བས་བཟང་སྐྱོད་དང༌། ལྟ་སྤྱོད་རྣམ་པར་དག་པ་དང་ལྡན་པ་དོན་ཡོད་མཐོང་དང༌། ཆོས་ཉིད་ཀྱི་དོན་ལ་ཐུགས་རྗེས་ཆར་འབེབས་པ་ནམ་མཁའི་མཛོད་དང༌། ཐབས་དང་ཤེས་རབ་ཀྱི་སྤྱོད་པ་མི་ཟད་པ་དང་བློ་གྲོས་མི་ཟད་པ་དང་བཞི་བྲིའོ། །ནུབ་ཀྱི་སེམས་དཔའ་ཡོན་ཏན་གྱི་ཚོགས་རྫོགས་པས་ན་ནུབ་ཕྱོགས་ཀྱི་བཞི་སྨོས་ཏེ། བརྩོན་འགྲུས་ཀྱི་དོན་དང་ལྡན་པས་སྤོབས་པ་བརྩེགས་དང༌། མི་ཤེས་པའི་རི་བོ་འཇོམས་པས་མཐུ་ཆེན་པོ་ཐོབ་དང༌། ཡང་དག་པའི་ཤེས་རབ་འཁོར་བ་གཏིང་ནས་འཇོམས་པས་ངན་སོང་ཀུན་འདྲེན་དང༌། ཡང་དག་པའི་ཤེས་རབ་གཟུང་འཛིན་གྱི་སྐྱོན་སྤངས་པ་ངན་སོང་ཀུན་འཇོམས་དང་བཞིར་གཟུང་འཛིན་རྣམ་པ་གཉིས་ནུབ་ཏུ་བྲིའོ། །བྱང་ཕྱོགས་སེམས་དཔའ་བཞི་སྨོས་ཏེ། ཐབས་དང་ཤེས་རབ་ཟུང་དུ་འབྲེལ་པ་དྲ་བ་ཅན་དང༌། འཁོར་བའི་སྐྱོན་གྱི་ཟུག་རྡུ་དང་བྲལ་བ་ཟླ་འོད་དང༌། བསམ་པ་མངོན་པར་རྟོགས་པ་དང་ལྡན་པ་བདུད་རྩི་འོད་དང༌། ལྟ་སྤྱོད་ཡེ་ནས་དག་པ་ཀུན་དུ་བཟང་པོ་བཞི། སྒྲིབ་གཉིས་བྱང་བས་ན་བྱང་ཕྱོགས་སུ་བྲིའོ། །བསྐལ་བ་བཟང་པོའི་དོན་བ་སྟན་ཟིན་ཏོ། །བསྐལ་བཟང་གི་སྣམ་བུ་ལ་དཔེ་མེད་པའི་བྱང་ཆུབ་སེམས་དཔའ་བཅུ་དྲུག་སྤེལ་མར་འབྱུང་སྟེ། དཔེ་བཅུ་དྲུག་ནི་དེ་བཞིན་གཤེགས་པ་ཡེ་ཤེས་ལ་སྐྱེས་ནས། དབང་དུ་ཐུགས་རྗེའི་སྐུ་འབྱུང་ཞིང་ཉོན་མོངས་པ་ལས་རྒྱལ་བར་བྱེད་པས་རྒྱལ་ཞེས་བྱའོ། །
ད་ནི་ཐེག་པ་ཆུང་དུ་རྣམས་གཟེངས་སྟོང་པར་བྱེད་པའི་ཐབས་སུ་ཕྱུང་བས་ཅིའི་ཕྱིར་ཞེ་ན། ཉན་ཐོས་རྒྱལ་བ་ཐམས་ཅད་དང༌། །ཞེས་པ་ནི། དེ་ལ་ཉན་ཐོས་སྣ་ལ་སྨོས་པ་ནི། དེ་བཞིན་གཤེགས་པའི་ཐུགས་འདུལ་བའི་ཞིང་ཡིན་པའི་ཕྱིར་སྨོས་ལ། དཔེ་མེད་པ་ཕྱིན་སྨོས་པ་ནི། ཐུགས་རྗེས་འདུལ་བའི་ཞིང་ལ་འབྱུང་བའི་ཕྱིར་དང༌། ཚིག་བསྒྱུར་པའི་ཐབས་ལོགས་སུ་ཤེས་པར་བྱའོ། །དེ་ལ་དཔེ་མེད་པ་བཅུ་དྲུག་ནི། ཤར་དུ་ཐུགས་མཆོག་དཔེ་མེད་པ་བཞི་སྟེ་མེ་ལོང་ལྟ་བུའི་ཡེ་ཤེས་ཀྱིས་ཐབས་མཁས་པའི་ཐུགས་རྗེས་འཁོར་བའི་རྒྱུན་གཅོད་པས་ན་ངན་འཇོམས། ཉོན་མོངས་པའི་མུན་པ་སེལ་བས་ན་ཉོན་མོངས་མུན་སེལ། སྡུག་བསྔལ་འཇོམས་པར་བྱེད་པས་ངན་སོང་འདྲེན་མཛད། ཉོན་མོངས་པ་འཇོམས་པས་སྲིད་པའི་མཚོ་སྒྲོལ། སྐུ་མདོག་དཀར་པོ་རྡོ་རྗེ་ལྕགས་ཀྱུ་བསྣམས་པའོ། །ལྷོ་ཕྱོགས་སུ་སེམས་ཅན་གྱི་འདོད་པ་བསྐང་བའི་ཕྱིར། ཡོན་ཏན་དཔེ་མེད་པའི་བྱང་ཆུབ་སེམས་དཔའ་བཞི་སྨོས་ཏེ། མཉམ་པ་ཉིད་ཀྱི་ཡེ་ཤེས་དང་ལྡན་པའི་དགོས་འདོད་སྐོང་བ་རིན་ཆེན་མཛོད། ཏིང་ངེ་འཛིན་གྱི་ཡེ་ཤེས་ཀྱི་དགའ་བ་དང་ལྡན་པ་དགེ་བ་བློ་གྲོས། ཡང་དག་པའི་དོན་མཐུན་པར་སྨྲ་བས་ན་དོན་མཐུན་ཡིད་འོང་ཡང་དག་པའི་ཡེ་ཤེས་ཀྱི་དྲན་པ་དང་ལྡན་པས་དྲན་པའི་སྟོབས་མཆོག་སྐུ་མདོག་སྔོན་པོ་རིན་ཆེན་འབར་བ་བསྣམས་པའོ། །ནུབ་ཏུ་གསུང་མཆོག་དཔེ་མེད་པ་བཞི་སྨོས་ཏེ། སོ་སོར་རྟོག་པའི་ཡེ་ཤེས་ཀྱི་ང་རོ་དང་ལྡན་པས་ན་དགེ་བའི་འབྱུང་གནས་དང༌། ལེགས་པའི་ཡོན་ཏན་ལྡན་པས་ལེགས་པའི་ཏོག །ཉོན་མོངས་པའི་སེམས་ཅན་རྣམས་སྲིད་པའི་མཚོ་ལས་སྒྲོལ་བས་ན་སྲིད་མཚོ་སྒྲོལ། བདེན་པའི་གསུང་རྣམ་པར་དག་པས་ན་བདེ་བའི་འབྱུང་གནས་སོ། །སྐུ་མདོག་དམར་པོ་པདྨ་བསྣམས་པའོ། །བྱང་ཕྱོགས་སུ་ཕྲིན་ལས་དཔེ་མེད་པ་བཞི་སྨོས་ཏེ། བྱ་བ་གྲུབ་པའི་ཡེ་ཤེས་རབ་ཏུ་འབར་བས། བརྩོན་འགྲུས་ཀྱིས་འགྲོ་བའི་དོན་མཛད་པས་ན་བརྩོན་འགྲུས་མི་ལྡོག་པ། ཆེ་བའི་ཡོན་ཏན་ཆེན་པོ་དང་ལྡན་པས་ན་སྟོན་མཛད་དོ། །སེམས་ཅན་གྱི་ཐེ་ཚོམ་གྱི་ཐག་པ་གཅོད་པས་ན་ཐེ་ཚོམ་ཉིད་འགྱུར། སོ་སོར་རྟོག་པའི་ཡེ་ཤེས་ཀྱི་ང་རོ་དང་ལྡན་
པས་ང་རོ་སྙན། སྐུ་མདོག་ལྗང་གུ་མེ་ཏོག་ཨུཏྤལ་བསྣམས་པའོ། །དེ་རྣམས་མཚན་མའི་དངོས་པོ་དང་བྲལ་བས་ན་དཔེ་མེད། དང་པོའི་སྐྱོན་གྱིས་མི་ཚུགས་པས་ན་རྒྱལ་བ་ཞེས་བྱའོ། །ད་ནི་སྟོན་པའི་སྐུའི་ཞབས་འབྲི་ནག་སྤྲུལ་པའི་སྐུའི་འཁོར་ཡིན་པས་ན་འཇིག་རྟེན་ལས་འདས་པའི་སྣམ་བུ་གཉིས་ཡོད་པའི་ཐ་མ་ལ་བྲི་སྟེ། ཅིའི་ཕྱིར་ཞེ་ན། གཞན་ལ་རག་ལུས་པའི་ཕྱིར་ན་སྟོན་པ་ལ་གུས་པར་ཉན་ཅིང་རྣ་བའི་དབང་པོས་ཐོས་ནས་གཞན་ལ་སྟོན་པའི་ཕྱིར་ན་ཉན་ཐོས་སོ། །སྤྱིར་ནི་དགེ་སློང་སྟོང་ཉིད་བརྒྱ་ལྔ་བཅུ་འདུས་པའི་ཚེ་ཡོད་ཀྱང༌། འདིར་གཙོ་བོ་མཆོག་བཅུ་དྲུག་བྲི་བར་འབྱུང་བར་སྨོས་ཏེ། ཉིད་ཀྱི་གཅུང་པོ་དགའ་བོ། །སྐུའི་སྲས་སྒྲ་གཅན་འཛིན། ཤེས་རབ་ཅན་གྱི་མཆོག་ཤཱ་རིའི་བུ། འདྲི་ཞིང་ལན་ལྡོན་པ་ལ་མཁས་པའི་མཆོག་རབ་འབྱོར་ཤར་ཕྱོགས་སུའོ། །རྫུ་འཕྲུལ་ཅན་གྱི་མཆོག་མཽད་གལ། ཡབ་རྒྱལ་པོ་ཟས་གཙང་ལ་སོགས་པ་ཁྱིམ་པ་དད་པ་སྐྱེད་པ་འཆར་ཀའོ། །རྫུ་འཕྲུལ་གྱི་སྤྱན་དང་ལྡན་པ་མ་འགགས་པ་དང༌། སྟོན་པ་ལས་དམ་པའི་ཆོས་ཐོས་པ་སྔ་བ་ཀཽ་ཎྚིནྱ་དང༌། འདུལ་བ་འཛིན་པ་ཉེ་བ་འཁོར་དང༌། བདུད་ཀྱི་གཙོ་བོ་དད་པར་བྱེད་པ་རྟ་ཐུལ། འགོག་པའི་ཏིང་ངེ་འཛིན་ལ་དབང་ཐོབ་པའི་བ་གླང་བདག །ཞབས་འབྲི་ནག་གཉུག་མར་གནས་པ་ཀུན་དགའ་བོ། །ཤཱཀྱ་རྣམས་ཀྱི་སྐྲ་འབྲེག་མཁན་ཡིན་པས་ན་ཤཱཀྱ་མིང་ཆེན། བསླབ་པ་ཀུན་སྤྱིན་ནོར་སྤྱིན་འཛིན། སྦྱངས་པའི་ཡོན་ཏན་གྱི་རང་བཞིན་ཡིན་པས་གང་པོ། །ཞལ་ཏ་བ་སྐུ་བགྲེས་པས་འོད་སྲུངས་དེ་རྣམས་བྲིའོ། །དེ་རྣམས་ནི་དྲང་སྲོང་དང༌། པར་བུ་དང༌། བསིལ་ཡབ་དང་རིན་པོ་ཆེ་བསྣམས་པའོ། །ཉན་ཐོས་རྣམས་ཀྱི་དོན་བ་སྟན་ཟིན་ཏོ། །ད་ནི་ཉན་ཐོས་ཀྱི་སྣམ་བུ་ལ་རང་སངས་རྒྱས་རྣམས་ཀྱང་སྤེལ་མར་བྲི་བར་འབྱུང་སྟེ། ཅིའི་ཕྱིར་ཞེ་ན། དེ་བཞིན་རང་རྒྱལ་གཙོ་བོ་རྣམས། །ཞེས་གསུངས་ཏེ། དེ་ནི་སྔོན་ཉན་ཐོས་བློ་རྣོན་པོ་རྣམས་ཤུགས་ཀྱིས། སྨོན་ལམ་དབང་བཙན་པས་སངས་རྒྱས་མི་བཞུགས་པའི་ཞིང་ཁམས་རང་གི་བྱང་ཆུབ་རང་གིས་ཚོལ་ཞིང་རྙེད་པས་ན་རང་རྒྱལ་བའོ། །དེ་ལ་བཅུ་གཉིས་བྲི་སྟེ། ཉོན་མོངས་འཇོམས་
པས་གདུང་སེལ་དང༌། ཏིང་ངེ་འཛིན་ལ་དབང་ཐོབ་པས་ན་སྣང་བ་བརྩེགས་པ་དང༌། འཁོར་བ་སྐྲག་པར་བྱེད་པའི་དོན་མངའ་བས་ན་རང་སངས་རྒྱས་འཇིགས་པར་བྱེད་པ་དང༌། དེ་གསུམ་ཤར་ཕྱོགས་སུའོ། །འཁོར་བའི་རླུང་གིས་མི་བསྐྱོད་པས་ན་རི་བོ་རྒྱལ། ཤེས་པའི་རྩལ་དང་ལྡན་པས་ན་ཤེས་རབ་མགྱོགས་ཆེན། འཁོར་བས་མི་བསྙེལ་བས་དཔའ་བོ་འདུལ་བ་ལྷོ་ཕྱོགས་སུའོ། །གསུང་གི་སྒྲ་དང་ལྡན་པས་ན་སྒྲ་ཆེན། ཏིང་ངེ་འཛིན་རྩེ་གཅིག་པར་གྱུར་པས་ན་བསེ་རུ་ལྟ་བུ། ཉོན་མོངས་པའི་གདུང་བ་སེལ་བས་ན་གདུང་སེལ་ནུབ་ཕྱོགས་སུའོ། །སྤྲུལ་པའི་ཆོ་འཕྲུལ་དང་ལྡན་པ་ན་རྫུ་འཕྲུལ་ཆེར་སྟོན། འཇིགས་པ་ཐམས་ཅད་དང་བྲལ་བས་ན་སེང་གེ་ལྟ་བུ་དང༌། ཏིང་ངེ་འཛིན་འགྱུར་བས་ན་རང་སངས་རྒྱས་པ་ཡིད་གྱུར་ཏེ། དེ་རྣམས་ནི་བསིལ་ཡབ་དང་ཟླ་བ་ཚེས་པ་དང༌། མེ་འབར་བ་བསྣམས་པའོ། །རང་སངས་རྒྱས་བཤད་ཟིན་ཏོ།། །།ད་ནི་རྣམ་པར་ཐར་པ་བརྒྱང་ཀྱི་རྟགས་སྒོ་གསུམ་པའི་བར་མ་འཇིག་རྟེན་ལས་འདས་པའི་སྒོའི་ཁྲོ་བོ་སྟོན་ཏོ། །ཅིའི་ཕྱིར་ཞེ་ན། ཁྲོ་བོ་མངག་གཞུག་ཕོ་ཉའི་ཚོགས། །བྲི་བའམ་ཡང་ན་མིང་ཡང་རུང༌། །ཞེས་གསུངས་ཏེ། ཡང་དག་པའི་ཡེ་ཤེས་ཀྱི་ཉོན་མོངས་པ་ལ་ཁྲོ་བས་ཁྲོ་བའོ། །དེ་བཞིན་གཤེགས་པའི་སྐུ་གསུང་ཐུགས་ཀྱི་ཕྲིན་ལས་མཛད་པས་ན། མངག་པའོ། །སྤྲུལ་པ་སྣ་ཚོགས་སུ་འགྱེད་པས་ན་ཕོ་ཉའོ། །དེའི་རྟགས་ཀྱི་ཆ་འཛིན་པས་ན་ཁྲོ་བོ་བརྒྱང་མེ་ལོང་ལྟ་བུའི་ཡེ་ཤེས་ཀྱིས་འཇིག་རྟེན་གསུམ་ལ་རབ་ཏུ་གསལ་བས་ན་འཇིག་རྟེན་གསུམ་སྣང་ངོ༌། །ཐབས་མཁས་པའི་ཐུགས་རྗེས་འཇིག་རྟེན་འདུལ་བས་ན་འཇིག་རྟེན་གསུམ་འདུལ་ལོ། །ཤར་ཕྱོགས་ཀྱི་སྒོ་གཡས་གཡོན་གཉིས་སོ། །མཉམ་ཉིད་ཀྱི་ཡེ་ཤེས་ཀྱིས་ཉོན་མོངས་པ་འཇིག་པས་ན་འཇིག་རྟེན་གསུམ་འཇིག་གོ །ཉོན་མོངས་པའི་འཁོར་བ་ལས་ཐར་པར་བྱེད་པས་ན་འཇིག་རྟེན་ཐར་བྱེད་དེ་ལྷོའི་སྒོ་གཡས་གཡོན་ནོ། །སོ་སོར་རྟོག་པའི་ཡེ་ཤེས་ཀྱི་བདུད་རྩི་དང་ལྡན་པས་ན། བདུད་རྩི་ཐབ་སྦྱོར་རོ། །ཡང་དག་པའི་བེ་ཅོན་བསྣམས་པས་ཉོན་མོངས་པའི་མཚན་མ་འཇོམས་ཏེ་བེ་ཅོན་ཅན་ནི་ནུབ་ཀྱི་སྒོ་གཡས་གཡོན་ནོ། །བྱ་བ་ནན་ཏན་
གྱི་ཡེ་ཤེས་ཀྱི་ཕྲིན་ལས་དང་ལྡན་པས་ན། མཚན་མས་མི་གཡོ་བས་ན་མི་གཡོ་མགོན་པོའོ། །གསུང་རྣམ་པར་དག་པའི་སྐལ་བ་དང་ལྡན་པས་ན་རྟ་མགྲིན་ནོ། །བྱང་གི་སྒོ་གཡས་གཡོན་ནོ། །དེ་རྣམས་ནི་དེ་བཞིན་གཤེགས་པའི་ཡེ་ཤེས་ཀྱི་འགྲོ་བ་འདུལ་བའི་དོན་དུ་བྱུང་སྟེ། །མིང་ངམ་ཐིག་ལེའམ་མཚན་མ་གང་རུང་བྲི་ཞེས་པའི་ཐ་ཚིག་གོ །དེ་རྣམས་ནི་འཇིག་རྟེན་ལས་འདས་པའི་འཁོར་ལྷ་བརྒྱ་རྩ་ལྔ་བཤད་ཟིན་ཏོ།། །།ད་ནི་འཇིག་རྟེན་པའི་སྣམ་བུ་གཉིས་ཡོད་པའི་མཎྜལ་གྱི་དོན་ཏོ། །དེ་ཅིའི་ཕྱིར་ཞེ་ན། ཕྱི་ཡིད་ཀྱིལ་འཁོར་ཕྱི་རིམ་དུ། །གླིང་བཞི་བོ་ནི་བྲི་བར་བྱ། །ཞེས་པ་ནི། འཛམ་བུ་གླིང་དུ་ཚངས་པ་བྲི། ཕྱི་ནི་འཇིག་རྟེན་པ་ཡིན་པའི་ཕྱིར་སྨོས་ལ། དཀྱིལ་འཁོར་ནི་གཙོ་བོ་དང་འཁོར་དུ་བཅས་པ་བྲི་ཞེས་པའི་ཐ་ཚིག་གོ །གླིང་བཞི་པ་ནི། ཕྱོགས་བཞིན་མ་འདྲེས་པའི་ཕྱིར་སྨོས་ལ་འཛམ་བུའི་གླིང་དུ་ཚངས་པ་བྲི་བ་ནི། འཛམ་བུའི་ལྷོ་ཕྱོགས་ལ་ཚངས་པ་ཞེས་བྱ་བ་ནི། ཡབ་ཀྱི་ན་པཉྩི་ཀ་དང༌། ཡུམ་ལྷ་མོ་དཔལ་ལྡན་མོ་གཉིས་ཡིད་ཀྱིས་བཤོས་པའི་སྲས་ཞེས་པའི་ཐ་ཚིག་གོ །གླིང་བཞི་པ་ནི། སུམ་བརྒྱ་དྲུག་ཅུ་ཡོད་པའི་ནང་ནས། མི་མཇེད་ཀྱི་བདག་པོ་ཚངས་པ་ནི། སྲས་ཐུ་བོའི་འདོད་པའི་ཁམས་ཀྱི་ཉོན་མོངས་པས་ཚ་བའི་གདུང་བ་དང་བྲལ་བས་ཚངས་པ། འཁོར་བའི་གྱོད་ཁྲིན་དང༌། ལྟ་བའི་སྐྱོན་གྱིས་མགོས་པས་ན་ཚངས་པའོ། །སྲིད་པ་སྐོས་འདེ་བས་པས་ན་འཇིག་རྟེན་མེས་པོ་ཚངས་པའོ། །ཕྱག་ན་གུནྡྷེ་བསྣམས་པའོ། །བཙུན་མོ་ཚངས་པའི་བང་ཐོགས་པ་དང༌། ཕོ་ཉ་ནི་མངགས་པ་སྟེ་པདྨ། མངག་གཞུག་ཡིད་དུ་འོང་བ་རལ་གྲི་བསྣམས་པའོ། །བྱང་ཕྱོགས་སུ་དབང་ཕྱུག་ཆེ་ཞེས་པ་ནི། དཀྱིལ་འཁོར་གྱི་བྱང་ཕྱོགས་སུ་བྲི་བ་སྟེ། ལྷའི་རྒྱལ་པོ་ཡིན་པའི་ཕྱིར་ན་དབང་ཕྱུག་གོ །ཕྱག་ན་ཏྲི་ཤཱུལ་ཡུམ་དཀའ་ཐུབ་ཟློག་མ་ཕྱག་ན་པདྨ་ཁ་ཕྱེ་བ་བསྣམས་པ། ཕོ་ཉ་རྣམ་པར་སྣང་བ་དང༌། མངག་གཞུག་དེད་དཔོན་ནག་པོ་མདའ་དང་གཞུ་བསྣམས་ཏེ་དེ་བཞི་བྲིའོ། །ཤར་དང་ནུབ་ཀྱི་གླིང་དུ་བརྒྱ་བྱིན་ཁྱབ་འཇུག་ཐམས་ཅད་ཀྱང་ཞེས་པ་ནི་ཤར་ཕྱོགས་སུ་ལྷའི་དབང་པོ་བརྒྱ་བྱིན་ཏེ། ནོར་བུ་ཏིཪྻ་ཀ་བརྒྱ་བྱིན་ཅིང༌། མཆོད་སྤྱིན་རྒྱལ་
བཏང་བ་དང༌། སྤྲུལ་པ་བརྒྱ་འགྱེད། ཏིང་ངེ་འཛིན་བརྒྱ་ལ་སྙོམས་པར་འཇུག །སངས་རྒྱས་བརྒྱ་མཐོང་ཞིང་ཁམས་བརྒྱ་སྦྱོང་བས་བརྒྱ་བྱིན་ཕྱག་ན་རྡོ་རྗེ་གདེངས་པ་བསྣམས་པའོ། །བཙུན་མོ་བདེ་སོགས་དགུ་བོ་རྒྱུད་མངས་འདྲེན། མངག་གཟུག་ཡིད་དུ་འོང་བ་ལྷའི་བུ་ཀུན་དུ་སྣང་བ་རལ་གྲི་འཛིན། ཕོ་ཉ་རབ་ཏུ་མྱུར་བའི་ཤུགས་ཅན་རྩེ་གསུམ་པ་བསྣམས་ཞེས་པའོ། །ཁྱབ་འཇུག་གི་ཐུགས་ཀུན་དུ་ཁྱབ་པ་ལ་ཕྲིན་ལས་ནི་ཀུན་དུ་འཇུག་ཅེས་བྱའོ། །ཡབ་ནི་མཐའ་བྲལ་ལྷའི་དབང་པོ་བ་སུ་ཏ་དེ་བ། ཡུམ་ནི་ག་ཎ་པ་ཏི་ཕྱག་ན་འཁོར་ལོ་བསྣམས། བཙུན་མོ་དཔལ་མོ་ཕྱག་ན་གསལ་ཞིང་བསྣམས། མངག་གཞུག་རྡོ་རྗེ་བདེ་བ་ཕྱག་ན་མཆེ་བ་བསྣམས། ཕོ་ཉ་རྡོ་རྗེ་དེད་དཔོན་ཕྱག་ན་འཁོར་ལོ་བསྣམས་པ་བྲི་སྟེ། བཅུ་དྲུག་སྡེ་ཉི་ཤུ་རྩ་གཅིག་གོ །ལྷ་མིན་མཁའ་ལྡིང་དྲི་ཟ་དང༌། །ཞེས་པ་ནི། ལྷ་ཡང་མ་ཡིན་པ། མི་ཡང་མི་ཡིན་པས་ན་ལྷ་མ་ཡིན་ཏེ། ཕྲག་དོག་ཞི་བར་བྱ་བའི་ཕྱིར་བྲི་སྟེ། ལྷ་མ་ཡིན་གྱི་རྒྱལ་པོ་རྣམ་པར་སྣང་བྱེད། མདའ་དང་གཞུ་བཞུ་བསྣམས་པ་དང༌། སྒྲ་གཅན་འཛིན་ཟླ་བ་བསྣམས་པ་དང༌། སུམ་བརྩེགས་རི་བསྣམས་པ་དང༌། ཧེ་རན་ཀེ་ཤུ་རྡོ་རྗེ་བསྣམས་པ། ཀུན་དུ་སྣང་བ་མེ་ལོང་བསྣམས་པ། བཙུན་མོ་དང་བཅུ་གཉིས་བྲིའོ། །མཁའ་ལྡིང་ནི་ནམ་མཁའ་ལྡིང་སྟེ། གསེར་མིག་ལྕགས་ཀྱུ་བསྣམས་པ་དང༌། གཡོག་དུ་མ་ཅན་རྡོ་རྗེ་བསྣམས་པ་དང༌། བྱ་ཁྱུང་ག་རུ་ཎ་གནམ་ལྕགས་ཀྱི་སྦར་ཞགས་བསྣམས་པ་དང་གསུམ། བཙུན་མོ་གསུམ་སྟེ་དྲུག་དང་རྩ་བརྒྱང་དོ། །དྲི་ཟ་ནི་དྲི་ཟ་བའི་ཕྱིར་དང༌། གོས་སུ་སྤྲིན་གོན་ནས་སྣང་ལ་མི་སྣང་བའི་ཕྱིར་སྨོས་ཏེ། ཟུར་ཕུད་ལྔ་པ་མེ་ཏོག་གི་ཕྲེང་བ་བསྣམས་པ་དང༌། ཡུལ་འཁོར་སྲུང་བ་པི་ཝང་བསྣམས་པ་དང༌། བཙུན་མོ་གཉིས་དང་བཞི་སྟེ། ཉི་ཤུ་རྩ་གཉིས་ཏེ། དེ་ལྟར་ལྷ་བཞི་བཅུ་རྩ་གསུམ་བྱང་དྲང་པོ་ནས་ཤར་ཕྱོགས་སུ་དངར་ཏེ་བྲིའོ། །གནོད་སྤྱིན་སྲིན་པོ་ལྟོ་འཕྱེ་ཞེས་པ་ནི། སེམས་གནོད་པ་དང་བཅས་ཤིང༌། སེམས་པས་ནོར་སྒྲུབས་ཤིང་སྤྱིན་པའི་ཕྱིར་ན་གནོད་སྤྱིན་ནོ། །དེ་ལ་བརྒྱང་བྲི་སྟེ། ཤར་ཕྱོགས་སུ་ཡང་དག་ཤེས་ཟླ་ཚེས་བསྣམས་པ། ལྷོར་འབྲོག་གནས་རིན་
པོ་ཆེའི་སྒྲོམ་བུ་བསྣམས་པ། ནུབ་ཏུ་ནོར་བུ་བཟང་པོ་ནོར་བུ་བསྣམས་པ། བྱང་ན་ཛམྡྷ་ལ་ནེའུ་ལེའི་རྒྱལ་པ་བསྣམས་པ། ཤར་ལྷོར་གང་བ་བཟང་པོ་བུམ་པ། ལྷོ་ནུབ་ཏུ་ཀུ་བེ་ར་བེ་ཅོན། ནུབ་བྱང་དུ་པཉྩི་ཀ་རིན་ཆེན་མཛོད། བྱང་ཤར་དུ་ནོར་ལྷའི་རྒྱལ་པོ་ཤིང་ཏོག །བཙུན་མོ་བརྒྱང་དང་བཅུ་དྲུག་གོ ། སྲིན་པོ་ནི་འཇིགས་ཤིང་བསོད་པའི་ཕྱིར་རོ། །ལང་ཀ་མགྲིན་བཅུ་མདའ་གཞུ། ཨུ་པ་ཀརྞ་རལ་གྲི། བུམ་རྣ་དབྱུག་ཐོ། །བཙུན་མོ་དང་དྲུག་སྟེ་ཉི་ཤུ་རྩ་གཉིས་སོ། །ལྟོ་འཕྱེ་ཆེན་པོ་ནི། །ལྟོས་འགྲོ་བའི་ཕྱིར་ན་རྐང་ལ་མེད་དེ་ལྟོ་འཕྱེའོ། །རབ་བརྟན་རྡོ་རྗེ་བསྣམས་པ། ཁྱུས་འགྲོ་ནི་རིན་པོ་ཆེ་བསྣམས་པ། བཙུན་མོ་གཉིས་དང་བཞིས་ཏེ་ཉི་ཤུ་རྩ་དྲུག་གོ །དེ་ལྟར་ན་ལྷ་བརྒྱང་ཅུ་རྩ་བདུན་ནོ། །འབྱུང་པོ་ཡི་དྭགས་འདྲེ་རྣམས་དང༌། །ཞེས་པ་ནི། ལྟ་བ་ལོག་པ་ལས་བྱུང་བའི་ཕྱིར་འབྱུང་པོའོ། །དབང་ལྡན་ནི་ཕྱག་ན་ཏྲི་ཤཱུ་ལ་སྟེ། བཙུན་མོ་དང་གཉིས་ཏེ་བྱང་ཤར་མཚམས་སུ་གོང་མ་དང་བསྲེས་ལ་བྲི། ཡི་དྭགས་ཀྱིས་ཟས་འདོད་ཀྱང་ཟ་བར་བགེགས་ཡོད་པས་ཡི་དྭགས་སོ། །ཕྱི་ཡི་སྒྲིབ་པ་ཅན་དང༌། ནང་གི་སྒྲིབ་པ་ཅན་དང༌། རང་བཞིན་གྱི་སྒྲིབ་པ་ཅན། མེ་ལྕེའི་འཁོར་ལོ་ཅན་དང་སྒོ་ཁྱུད་ཅན་དང་བཞིའོ། །འདྲེ་ནི་བར་དུ་གཅོད་པའི་བགེགས་བྱེད་པས་ན་ལོག་འདྲེན་ནག་པོ་ཆུ་ལྟར་གཡོ་བ་སྤྲུལ། གཉེའུ་ཐུང་བ་སྟོན་ཏེ། སྤྱིའུ་ཚུགས་ཐུར་ལྟས་ཀྱི། སེའུ་ཉ་ན་སྙིང་དུ་འཇུག་པའི་འདྲེ་དང༌། དར་དབྱངས་ཏེ་ལྕེ་ལ་འཇུག་པ། མྱུར་རྒན་ཏེ་མྱུར་བར་འཇུག་པ་རལ་གྲི་བསྣམས་པ་དང་དྲུག་གོ ། འབྱུང་པོའི་རྒྱལ་པོ་དབང་ལྡན་ནི་འཁོར་བཅོ་ལྔ་ཡོད་དོ། །རི་དྭགས་ཀྱི་རྒྱལ་པོ་རི་དྭགས་ཀྱི་གདོན་དང༌། སྐེམ་བྱེད་ནི་གཞོན་ནུའི་གཟུགས་སུ་སྟོན་པའི་གདོན་དང༌། བརྗེད་བྱེད་པ་ནི་ཝ་འདྲ་དང༌། ཁུ་ཚུར་ཅན་ནི་བྱ་རོག་འདྲ་བ་དང༌། ནམ་གྲུ་ཁྱིའི་གཟུགས་དང༌། སྲུལ་པོ་ཕག་གི་གཟུགས་དང༌། ཛ་མ་ཀིརྟིའི་གཟུགས་དང༌། འདོད་པ་ཅན་རྡོ་རྗེའི་གཟུགས་དང༌། མྲྒ་བྱེད་པ་བྱི་ལའི་གཟུགས་དང༌། བཞིན་རྒྱན་འུག་པའི་གཟུགས་དང༌། གཉའ་ལག་ཅན་བྱ་གག་གི་གཟུགས་དང༌། བྱ་ནི་འདབ་ཆགས་ཀྱི་གཟུགས་དང༌། མིག་འཕྱང་པོ་ནི་ཕ་ཝང་གི་གཟུགས་
དང། འཇམ་པ་ནི་བ་གླང་གི་གཟུགས་དང༌། མ་མོ་ནི་མིའི་གཟུགས་དང་བཅོ་ལྔ་སྟེ། དེ་ལྟར་བརྒྱ་དགུ་བཅུ་རྩ་བཞིའོ། །ཀླུ་དང་སྤྲུལ་དང་རི་དྭགས་རྣམས། །ཞེས་པ་ནི། ཀླུ་ནི་བྱོལ་སོང་གི་རིགས་ཏེ། རྒྱ་མཚོན་གནས་པ་ཕྲག་དོག་དང་ལྡན་པ་བྲི་སྟེ། མཐའ་ཡས་ཨུཏྤལ་བསྣམས་པ་དང༌། འཇོག་པོ་དགྲ་སྟ། ཆུ་ལྷ་པདྨའི་སྡོང་པོ་དང༌། དུང་སྐྱོང་དུང་བསྣམས་པ། ནོར་རྒྱས་བུམ་པ་བསྣམས་པ། སྟོབས་ཀྱི་རྒྱུ་སྤྲུལ་གྱི་གཤོལ་མདའ་བསྣམས་པ། བཙུན་མོ་བདེ་སོགས། པདྨ་ཆེན་པོ་པདྨ་ཁ་ཕྱེ་བ་བསྣམས་པ། རིགས་ལྡན་རིན་ཆེན་རྐྱལ་བུ་བསྣམས་པ། དགའ་བོ་སྤྲིན་ཕུང་དང་རལ་གྲི་བསྣམས་པ། ཉེ་དགའ་པོ་རིན་ཆེན་འབར་བ་བསྣམས་པ། སྤྲུལ་ནི་བཙུན་མོ་བདེས་མགུལ་ནས་འཁྱུད་ཅིང་མཛེས་པའི་རྒྱན་དུ་བྱས་པ་སྟེ་ཉི་ཤུ་ཐམ་པའོ། །རིགས་རྣམས་ཞེས་པའོ། །ཕྱོགས་སྐྱོང་བ་བཅུ་ནི་བགེགས་ཀྱི་རིགས་སུ་གཏོགས་བས་རིགས་རྣམས་སོ། །བརྒྱ་བྱིན་རྡོ་རྗེ། གཤིན་རྗེ་ཐོད་དབྱུག །ཆུ་ལྷ་སྤྲུལ་ཞགས། གནོད་སྤྱིན་བེ་ཅོན། མེ་ལྷ་བགྲང་ཕྲེང༌། བདེན་བྲལ་རལ་གྲི། དབང་ལྡན་རྩེ་གསུམ། ས་བདག་མཆེ་བ། སའི་ལྷ་མོ་བུམ་པ། ཉི་མ་པདྨ། ཟླ་བ་ཨུཏྤལ་སོ་སོའི་བཙུན་མོ་ཡང་གཙོ་བོ་དང་མཐུན་པ་ཅན་དུ་བྲི་སྟེ་ཉི་ཤུ་རྩ་གསུམ། དེ་ལྟར་ཉིས་བརྒྱ་སུམ་ཅུ་རྩ་བདུན་སོ་སོའི་ཕྱོགས་སུ་བྲིའོ། །རྒྱལ་པོ་བཞི་རྣམས་བྲི་བར་བྱ། །ཞེས་པ་ནི། འདིའི་སྒོར་འོང་སྟེ། ཤར་དུ་ཡུལ་འཁོར་སྲུང་པི་ཝང༌། ལྷོར་འཕགས་སྐྱེས་པོ་རལ་གྲི། ནུབ་ཏུ་སྤྱན་མི་བཟང་སྦྲུལ་ཞགས། བྱང་དུ་རྣམ་ཐོས་སྲས་བ་དན། བཙུན་མོ་དང་བརྒྱང་དེ། དེ་ལྟར་ལྷ་ཉིས་བརྒྱ་བཞི་བཅུ་རྩ་ལྡའོ། །གཟའ་དང་སྐར་མ་རྒྱུ་སྐར་དང༌། །ཞེས་པ་ནི། གཟའ་ནི་འཕེལ་བ་དང་འགྲིབ་པར་སྟོན་ཏེ། རྣམ་པ་བརྒྱང་དེ། པ་བ་སངས་མེ་ཏོག །ཕུར་བུ་པུ་སྟེ། ལག་པ་མཆོག་སྤྱིན། ཟླ་བ་ཀུ་མུ་ད། མིག་དམར་བདུད་རྩིའི་བུམ་པ། སྒྲ་ཅན་འཛིན་པདྨའི་སྡོང་བུ། །ཉི་མ་པདྨ། སྤེན་པ་དབྱུག་ཐོ་བཙུན་མོ་དང་བཅུ་དྲུག་གོ །རྒྱུ་སྐར་ནི་ནམ་མཁའ་ལ་རྒྱུ་བ་སྟེ། དབང་ལྡན་གྱི་ཕྱོགས་ནས་མེ་ལྷའི་ཕྱོགས་སུ། སྨིན་
དྲུག་མདོག་དམར་བུམ་པའི་སྟེང་ན་བཞུགས། སྣར་མ་མདོག་དམར་གླང་ཁྱུ་པ་དཀར་མོ་ལ་ཞོན། མགོ་སེར་པོ་ཤ་བ་ཞོན། ལག་དམར་པོ་སྤྲུལ་ལ་ཞོན། ནབ་སོ་སེར་པོ་པདྨ་ལ་འདུག །རྒྱལ་ལྗང་གུ་བུམ་པ་ལ་འདུག །སྐག་ལྗང་གུ་བྱ་རོག་ལ་འདུག །ཕྱག་ན་རིན་པོ་ཆེའི་ཤིང་ཐོག་བསྣམས་པའོ། །མེའི་ཕྱོགས་ནས། བདེན་བྲལ་གྱི་ཕྱོགས་སུ་དངར་བ་ལ། མཆུ་སེར་མ་ཧེ་ལ་ཞོན། གྲེ་ལྗང་ཁྲི་ལ་འདུག །སྦོ་སེར་གསེར་ཁྲི་ལ་འདུག །མེ་བཞི་སེར་གླང་པོ་ཆེ་ལ་ཞོན། ནག་པ་ལྗང་རྨ་བྱ་ལ་ཞོན། ས་རི་དམར་ལྕང་མོ་ལ་འདུག །ས་ག་རྟ་དཀར་པོ་ལ་ཞོན། ཕྱག་མཚན་རིན་པོ་ཆེའི་ཤིང་ཐོག་བསྣམས་པའོ། །བདེན་བྲལ་གྱི་ཕྱོགས་ནས་རླུང་ལྷའི་ཕྱོགས་སུ་དངར་བ་ལ། ལྷ་མཚམས་མདོག་སེར་བྱའི་ཤ་ཚུགས་འདྲ་བྱ་ལ་ཞོན། སྣྲོན་དམར་གདན་པར་ཚངས་ཅན་ལ་འདུག །སྣུབས་མདོག་ལྗང་གུ་སྦལ་པ་ལ་ཞོན། ཆུ་སྟོད་མདོག་སེར་ཕུབ་ལ་འདུག །ཆུ་སྨད་ལྗང་གུ་བྱི་བ་ལ་ཞོན། བྱི་ཞུན་མདོག་སྔོ་སྲེ་མོང་ཞོན། གྲོ་ཞུན་མདོག་དམར་སྐུར་མ་ལ་འདུག །ཕྱག་མཚན་པདྨའི་སྡོང་བུ་ཤ་སྟག་བསྣམས་པའོ། །རླུང་གི་ཕྱོགས་ནས་དབང་ལྡན་བར་དངར་བ་ལ། མོན་དྲེ་ལྗང་གླང་ཁྱུ་བ་དཀར་པོ་ཞོན། མོན་གྲུ་མདོག་དམར་སྟན་ནང་ཚངས་ཅན་ལ་འདུག །ཁྲུམས་སྟོད་ལྗང་སེར་ཁྲི་ལ་འདུག །ཁྲུམས་སྨད་སེར་པོ་རིན་ཆེན་ཁྲི་ལ་འདུག །ནམ་གྲུ་དམར་པོ་རྟ་ལ་ཞོན། ཐ་སྐར་ལྗང་གུ་མི་ལ་ཞོན། བྲ་ཉེ་སྔོན་པོ་འཁོར་ལོའི་སྟེང་ན་འདུག །ཕྱག་ན་ཨུཏྤལ་ཤ་སྟགས་བསྣམས་པའོ། །དེ་ལྟར་རྒྱུ་སྐར་ཉི་ཤུ་རྩ་བརྒྱང་དེ། དེ་ལྟར་ལྷ་ཉིས་བརྒྱ་བརྒྱང་ཅུ་རྩ་དགུའོ། །ཁྲོ་བོ་མ་རུངས་འཚེ་བ་ནི། །ཞེས་པ་ནི། ཁྲོ་བོ་མ་རུངས་པ་དམྱལ་བ་སྟེ། ལས་ཀྱི་བག་ཆགས་ཁྲོས་པའི་མཐུ་ལས་སྣང་སྟེ། ཅིའི་ཕྱིར་ཞེ་ན། ཕྱིན་ཅི་ལོག་པའི་རྟོག་པ་ངན་པས་བལྟས་པས། གཤིན་རྗེ་རབ་ཏུ་ཁྲོས་པ་ནི་ཤིན་ཏུ་མི་བཟད་པར་སྣང་སྟེ། དེའི་འཁོར་ནི་བསམ་གྱིས་མི་ཁྱབ་པ་ལས། མདོར་བསྡུ་ན་ཚ་གྲང་གཉིས་ཏེ། ཚ་བ་ལ་བརྒྱང་དེ། མནར་མེད་པ་དང༌། རབ་ཏུ་ཚ་བ་དང༌། ཚ་བ་དང༌། དུ་འབོད་ཆེན་པོ་དང༌། དུ་འབོད་དང༌། བསྡུས་འཇོམས་དང༌། ཐིག་ནག་དང༌། ཡང་སོས་
དང་བརྒྱང་དོ། །གྲང་བ་བརྒྱང་ནི། ཆུ་བུར་ཅན་དང༌། ཆུ་བུར་རྡོལ་བ་དང༌། སོ་ཐམས་ཐམས་པ་དང༌། ཀྱི་ཧུད་ཟེད་བ་དང༌། ཨ་ཆུ་ཟེར་བ་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ལྟར་གས་པ་ཆེན་པོ་སྟེ་བརྒྱང་དོ། །ཉི་ཚེ་བ་དང༌། མཐའ་འཁོར་བ་གཉིས་ཏེ་བཅོ་བརྒྱང་ཀྱང༌། མིང་ངམ་བརྡའམ་ཐིག་ལེ་བྲི། མེའི་ཕྱོགས་ནས་དབང་ལྡན་གྱི་ཕྱོགས་སུ་བསྐོར་ཏེ་བྲིའོ། །འཚེ་བ་ནི་ཉོན་མོངས་པ་ལྔའི་ཆ་ཤས་སྡུག་བསྔལ་གྱི་བདག་གིས་གཞན་ལ་འཚེ་བར་བྱེད་པ་དང༌། གཞན་བདག་ལ་འཚེ་བའི་ཕྱིར་ན་འཚེ་བའོ། །དེ་ནི་འདོད་ཆགས་བྱ་དང༌། གཏི་མུག་ཕག་དང༌། ཞེ་སྡང་སྤྲུལ་དང༌། ང་རྒྱལ་རྩངས་པ་དང་བཞི་སྟེ་ཉི་ཤུ་རྩ་གཉིས་དེ་ལྟར་ལྷ་སུམ་བརྒྱ་བཅུ་གཅིག་གོ །བགེགས་དང་བི་ན་ཡ་ཀ་ནི། །ཞེས་བ་ནི། བགེགས་ནི། དགེ་བའི་བར་དུ་གཅོད་ཅིང་མཐོ་རིས་དང་ཐར་པ་ལ་སྒྲིབ་པའི་ཕྱིར་ན་བགེགས་ཏེ། སྤྱིར་ནི་སྟོང་ཕྲག་བརྒྱང་ཅུ་རྩ་བཞི་ཡོད་པ་ལ། འདིར་ནི་རྣམ་པ་བརྒྱང་སྨོས་ཏེ། ཚངས་པ་སྲིན་པོའི་གདོན་དང༌། བརྗེད་བྱེད་ཀྱི་གདོན་དང༌། རྣོན་པོ་དང༌། གྲིབ་གནོན་གྱི་གདོན་དང༌། སྐེམ་བྱེད་དང༌། མ་མོའི་གདོན་དང་དྲུག་གི་སྟེང་དུ། གཙོ་བོ་བི་ན་ཡག་འཁོར་ལོ་བསྣམས་པ། བཙུན་མོ་བརྒྱང་དེ། ལྷ་སུམ་བརྒྱ་བཅུ་དགུ་དང༌། སེམས་ཅན་ཀུན་ལ་ཕན་བྱེད་པའི། །དྲང་སྲོང་སྐལ་བ་ཆེན་པོ་རྣམས། །ཞེས་པ་ནི། སེམས་ནི་རྣམ་པར་ཤེས་པའི་ཚོགས་བརྒྱང་ལ། ཉེ་བར་ལེན་པའི་ཕུང་པོ་ལྔ་དང་འབྲེལ་པ། ཀུན་ནི་ཁམས་གསུམ་པ་ཀུན་ཡིན་ཏེ། ཕན་པ་ནི་ཐབས་མཁས་པའི་སྒོ་ནས་བྱེད་པའི་ཐ་ཚིག་གོ ། དེ་ནི་དྲང་སྲོང་སྟེ། དྲང་བ་ནི་སྐྱོན་སྤངས་པ་ཡིན་ལ། སྲོང་བ་ལམ་དྲང་པོ་ལ་སྲོང་བ་ཡིན་པས་སོ། །སྐལ་བ་ཆེན་པོར་བརྟུལ་ཞུགས་དང་མཐུ་ཆེ་བའི་ཕྱིར་ན་སྐལ་བ་ཆེན་པོ་སྟེ། རྣམས་ནི་མཆོག་བརྒྱང་བྲི་བའི་ཐ་ཚིག་སྟེ། དྲང་སྲོང་མེས་བཞི་རིན་པོ་ཆེ་འབར་བ། ནག་པ་འཁོར་ལོ། ཡང་དག་ཤེས་རྡོ་རྗེ། མདུན་བདར་རྩེ་གསུམ། གྱ་གྱུར་རིན་པོ་ཆེའི་སྒྲོམ། གྱུར་མིང་དགྲ་སྟ། ཨཾ་གུ་མེ་ཕུང༌། གཡོག་དོར་འཁོར་ལོ་བསྣམས་པ་སྟེ། མེ་ལྷའི་འཁོར་བ་ནས་ཤར་ལྷོའི་མཚམས་ནས་དངར་ཏེ་བྲི། དེ་ལྟར་ལྷ་སུམ་བརྒྱ་ཉི་ཤུ་རྩ་བདུན་ནོ། །མཁའ་འགྲོ་མ་དང་བུད་
མེད་བྲི། །ཞེས་པ་ནི། མཁའ་འགྲོ་ནི་ལས་དང་རྫུ་འཕྲུལ་དང་སྟོབས་ཀྱིས་མཁའ་ལ་འགྲོ་བ་སྟེ། བདུད་ཀྱི་རྒྱལ་པོ་མདག་པ་ཡིན་ཏེ། རྣམ་པ་བརྒྱང་དུ་བ་སྟན་ཏོ། །ལཱ་མ་ཀཽ་རཱི་མ་བྱིས་དབྱུག་དང༌། ལཱ་མ་ཙཽ་རཱི་མ་མདའ་གཞུ་དང༌། ལཱ་མ་ཕྲ་མོ་ཧ་རྒྱལ་མཚན་དང༌། ལཱ་མ་བེ་ཏཱ་ལཱི་རྡོ་རྗེ། ལཱ་མ་པུཀྐ་སཱི་རྒྱུ་ཞགས། ལཱ་མ་གྟསྨ་རཱི་ཐོད་པ། ལཱ་མ་ཙནྜ་ལཱི་རྩེ་གསུམ། ལཱ་མ་སྨ་ཤ་ལཱི་རིན་པོ་ཆེ་འབར་བ། ལྷོ་ནས་ནུབ་ཏུ་བྲི། བུད་མེད་ནི་མ་མོ་ཆེན་མོ་སྟེ། བུད་མེད་ཀྱི་ཚུལ་དུ་གནས་པ་བུད་མེད་བཅོ་ལྔ་སྟེ། དེ་ལྟར་ལྷ་སུམ་བརྒྱ་བཞི་བཅུ་རྩ་གཉིས་སོ། །དེ་བཞིན་སྲིང་མོ་རྣལ་འབྱོར་མ། །ཞེས་པ་ནི། དེ་བཞིན་གོང་མ་དང་འདྲ་བར་བུད་མེད་ཀྱི་ཚུལ་དུ་གནས་པས་དེ་བཞིན་སྲིད་མོ་ནི་བཞི་སྟེ། རྒྱལ་མ་པདྨ་བསྣམས་པ་དང༌། རྣམ་པར་རྒྱལ་མ་རྡོ་རྗེ་བསྣམས། མི་ཕམ་མ་འཁོར་ལོ། །རིག་སྔགས་འཆང་རྩེ་གསུམ་བསྣམས། སྲིང་མོ་ལྟར་གདུང་བའི་ཕྱིར་ན་སྲིད་མོའོ། །ནུབ་ནས་བྱང་དུ་བྲིའོ། །རྣལ་འབྱོར་མ་ནི། །རྣལ་འབྱོར་ནི་ཆོས་ཉིད་ལ། རྣལ་འབྱོར་རིག་པ་སྟེ། སྐུ་ཆོས་ཉིད་ལ་རྣལ་འབྱོར་རྟགས་བརྒྱང་དུ་བ་སྟན་པས་ན། བཀྲ་ཤིས་བརྒྱང་དེ། པདྨ་ཅན་དཔལ་བེའུ། འཇིགས་བྱེད་འཁོར་ལོ། །རྣམ་པར་རྒྱལ་བ་རྒྱལ་མཚན། །གདངས་ཅན་གདུགས། འོད་ལྡན་པདྨ། ཡིད་གཞུངས་བ་བུམ་པ། དྲི་མེད་དུང་འཛིན་པ་དང༌། ཡིད་བཟངས་གསེར་ཉ་སྟེ། དེ་ནི་འཇིག་རྟེན་པའི་འཁོར་དགར་གཞུག་པའི་ཕྱིར་ན། སྤྲུལ་པའི་སྐུའི་རྟགས། འཇིག་རྟེན་པའི་སྣམ་བུ་ལ་བྲི་སྟེ། དེ་ལྟར་ལྷ་སུམ་བརྒྱ་ལྔ་བཅུ་རྩ་བཞིའོ། །འབྱུང་བ་བཞིའི་ལྷ་ཆེན་ཞེས་པ་ནི་དངོས་པོའི་འབྱུང་བའི་གཞི་མེད་པར་འབྱུང་པས་ན་འབྱུང་པོའོ། །སྨིན་པར་བྱེད་པས་མེ་ལྷ་གསལ་བའི་འོད་ཟེར་མེ་དཔུང་བསྣམས། སྡུད་པར་བྱེད་པས་བ་རུ་ཎ་སྤྲུལ་ཞགས་བསྣམས། གཡོ་བར་བྱེད་པས་བ་ཡ་བེ་སྦུད་པ། སྣང་བར་བྱེད་པས་ས་བདག་ལག་ཆེན་འཁོར་ལོ། །དེ་དག་ནི་ཕྱོགས་སྐྱོང་བཅུའི་འཁོར་དུ་བསྡུས་པ་ཡང་ཡོད། གྲངས་ཀྱི་ཁྱད་པར་སྤྱིར་གཏོང་པ་ཡང་ཡོད། ཁྱིམ་དང་རི་ལ་གནས་པ་ཡང༌། །ཞེས་པ་ནི་ཁྱིམ་གྱི་ལྷ་སྟེ། ཀུན་དུ་སྣང་བ་རིན་ཆེན་སྒྲོམ། །རི་ལ་བརྟེན་ཅིང་གནས་པ་ནི། །རིའི་ལྷ་
རབ་ཏུ་བརྟན་པའི་བློ་གྲོས་རིན་པོ་ཆེ་འབར་བ། ཀུན་དགའ་གནས་ལ་སོགས། ལྗོན་ཤིང་སྐྱེ་བའི་བདག་པོ་བྱེད་པས་ཤིང་གི་ལྷ། ཀུན་ནས་འོད་ཟེར་ཤིང་ཐོག་བསྣམས། མི་མང་པོ་འདུ་བའམ། ཆོས་བཤད་པའམ། དགེ་འདུན་གྱི་རབ་རྣམས་བསྲུང་བས་ཀུན་དགའ་ར་བའི་ལྷ། ཀུན་དུ་སྣང་བའི་བློ་གྲོས་ལྗོན་ཤིང་བསྣམས། གནས་ལ་བརྟེན་ཅིང་བསྲུང་བས་ན། གནས་ཀྱི་ལྷ་ཚོགས་སྒོ་སྟེ། ཕྱག་ན་འཁོར་ལོ་བསྣམས། དུར་ཁྲོད་གྲོང་ཁྱེར་གནས་པ་རྣམས། །ཞེས་པ་ནི། དུར་ནི་སྡུད་པ་ལ་ཁྲོད་ནི་འབྱུང་བས་ཏེ། མི་རོ་རྣམས་ཀྱི་ཁོག་སྲུང་བྱེད་པའི་འདྲེ་འབྱུང་བའོ། །དགེ་བ་ཁ་ཊྭཱཾ་ག་བསྣམས། གྲོང་ནི་ཉུང་དུ་ལ། ཁྱེར་ནི་མང་པོ་སྟེ། ཡུལ་ཁམས་ཙམ་རེ་རེ་ལ་བྱ་བའི་ཐ་ཚིག་སྟེ། གྲོང་ཁྱེར་གྱི་ལྷ་བསོད་ནམས་དགེ་བའི་བློ་གྲོས་ཕྱག་ན་རིན་པོ་ཆེ་འབར་བ་བསྣམས། སྤྱིར་འབྱུང་བ་བཞི། ཕྱོགས་སྐྱོང་ཁོངས་སུ་བཏང་བ་ནི། ལྷ་སུམ་བརྒྱ་དྲུག་ཅུ་རྩ་གཅིག་བཏང་བ་ནི་སུམ་བརྒྱ་དྲུག་ཅུ་རྩ་ལྔར་འདོད་མིང་ངམ་བརྡའམ་ཡང་ན་ཐིག་ལེ་རྣམས་ཀྱང་བྲི་བར་བྱ་ཞེས་པ་ནི། མིང་ནི་བཏགས་པའི་རང་བཞིན་དུ་སྨོས་པའོ། །བརྡ་ནི་ཕྱག་མཚན། ཐིག་ལེ་གད་ན། ཚོམ་བུ་བྱས་ནས་གཞག་པའོ། །དེ་ནས་མཁས་པས་དཀྱིལ་འཁོར་ཞེས་པ་ནི། དེ་ནས་སྐབས་ཀྱི་རྟིང་ཐོགས་སུ་བྱུང་བ་ལ་བྱ། མཁས་པ་ནི་སྒྲུབ་པ་པོ་གདམས་ངག་དང་བཅས་པ་གཏན་ཚིགས་དང་སྒྲ་སྦྱོར་བྱེ་བྲག་ཀུན་ལ་མཁས་པའོ། །དཀྱིལ་འཁོར་ནི་ཀུན་རིག་རྩ་བའི་མཎྜལ་ཆེན་པོ་སྟེ་སྨོས་པ་འདི་ཉིད་ལ་བྱའོ། །ཀུན་རིག་ནི་དུས་གསུམ་མ་འདྲེས་པར་མཁྱེན་པ། རྩ་བ་ནི་བྱང་ཆུབ་སེམས། དཀྱིལ་ནི་བྱང་ཆུབ་སེམས་གཟུང་འཛིན་དང་བྲལ་བས། འཁོར་ནི་དེ་ལས་ཆེ་བའི་ཡོན་ཏན་སྣ་ཚོགས་འབྱུང་བའོ། །ཆེན་པོ་ནི་ཕྲིན་ལས་དང་ཐུགས་རྗེ་ཆེན་པོར་སྟོན་པའི་ལྷ་སུམ་བརྒྱ་དྲུག་ཅུ་པོ་དེ་དག་ཀྱང་སྐུ་གསུམ་དང་འཁོར་དུ་སྤྱར་རོ། །དེ་ཡར་ཀུན་རིག་རྣམ་པར་སྣང་མཛད་ཆོས་ཀྱི་སྐུ། རིགས་བཞིའི་སངས་རྒྱས་དང༌། རིགས་ཀྱི་ཡུམ་ལོངས་སྤྱོད་རྫོགས་པའི་སྐུ། སེམས་དཔའ་བཅུ་དྲུག་དང༌། དཔེ་མེད་པ་མན་ཆད་ཐུགས་རྗེ་སྤྲུལ་བའི་སྐུ། ཉན་ཐོས་ནས་གྲོང་ཁྱེར་གྱི་ལྷ་ལ་ཐུག་
བའི་བར་ཐམས་ཅད་སྤྲུལ་བའི་སྐུའི་འཁོར་ཏེ། ཐུགས་རྗེ་སྤྲུལ་པ་ཐ་དད་པར་སྟོན་པས་ན། འཁོར་ཡང་ཐ་དད་པར་བྲིས་པས། མཆོད་བ་དབུལ་ཞིང་མཎྜལ་གཞུང་བཞིན་དུ་བྱས་ན་བསོད་ནམས་ཀྱི་ཚོགས་སྐྱེའོ་ཞེས་པའི་ཐ་ཚིག་གོ །ད་ནི་མཎྜལ་གྱི་རྒྱན་ཆོས་སྟོན་ཏེ། ཅིའི་ཕྱིར་ཞེ་ན། བླ་རེ་རྒྱལ་མཚན་ལྷབ་ལྷུབ་དང༌། །ཞེས་པ་ནས། བཟའ་དང་བཏུང་བ་སྤྱར་བ་ལེགས། །ཞེས་པའི་བར་ཏེ། ཁམས་གསུམ་གྱི་བླ་མར་གྱུར་པས་བླ་རེ་དང༌། བདུད་ལས་རྒྱལ་བའི་རྒྱལ་མཚན་དང༌། ཐུགས་རྗེའི་ཕྲིན་ལས་ཀྱི་ལྷབ་ལྷུབ་དང༌། བྱང་ཆུབ་སེམས་ཀྱི་གདུགས་དང༌། ཕྲིན་ལས་ཀྱི་རྔ་ཡབ་དང༌། ཐུགས་རྗེའི་ལྡ་ལྡི་དང༌། སྐུའི་འཕན་དང༌། ཚུལ་ཁྲིམས་ཀྱིན་བཟའ་དང༌། གསེར་གྱི་བུམ་པ་བཅུ་དྲུག་དང༌། ཆོས་ཀྱི་དབྱིངས་ཀྱི་ཕྱག་རྒྱ་བ་སྟན་པ་དང༌། རིགས་ལྔ། ཡེ་ཤེས་ཀྱི་བུམ་པ་ལྔ། རིགས་ལྔའི་ཆུས་བཀང་ལ་གཞག་པ་དང༌། ཤེས་རབ་ཀྱི་མར་མེ་དང༌། ཐུགས་རྗེའི་གཏོར་མ་དང༌། མཛེས་པའི་ལྷ་བཤོས་དང༌། རོ་བརྒྱ་དང་ལྡན་པའི་ཟས་སྣ་ཚོགས་པ་དང༌། ཡན་ལག་བརྒྱང་དང་ལྡན་པའི་ཡོན་ཆབ་ལ་སོགས་པའི་བཏུང་བ་རྣམས་ཀྱི་མཎྜལ་གྱི་རྒྱན་ཆས་མཆོད་པའི་ཕྱིར་བརྒྱན་ཏོ། །འཁོར་གྱི་འབྱུང་པོའི་ཁ་ཟས་ལ་སོགས་པ་རྣམས་ནི་བདེ་སྟེ་བཤད་མི་དགོས། ད་ནི་སློབ་དཔོན་མཎྜལ་ལ་འཇུག་པ་སྟོན་ཏེ། དེ་ནས་ཁྲུས་ལ་སོགས་པ་བྱས་ནས་ཞེས་པ་ནི། དེ་ནས་མཎྜལ་གྱི་རྒྱན་ཆས་ལ་སོགས་པ་ཚང་བའི་རྟིང་ཐོགས་ལ་བྱ་སྟེ། ཁྲུས་ནི་རྣམ་པར་རྒྱལ་པའི་བུམ་པ་བྱིན་གྱིས་བརླབས་ནས་ཕྱིའི་ལུས་བཀྲུ་བ་དང༌། རྟོགས་པའི་ཁྱད་པར་གྱིས་ནང་གི་སེམས་བཀྲུ་བ་དང༌། བསོགས་བྱ་བ་ནི། ཆོས་གོས་དང༌། ཁ་ཟས་མངར་བ་དང༌། དཀར་གསུམ་ལ་སོགས་པ་བཟའ་ཞིང༌། རྡོ་རྗེ་འཛིན་མའི་ཕྱག་རྒྱ་བཅིངས་ནས། རིག་པའི་མེ་ཏོག་ཐོགས་ལ། འཕགས་པ་སྤྱན་དྲངས་ནས། ཕྱག་རྒྱ་རྣམ་བཞིས་གཟུགས་བརྙན་ལ་ཕབ་སྟེ། བདག་ཉིད་རྟོགས་པ་དང༌། གོམས་བ་འཇུག་གོ །སློབ་དཔོན་མཎྜལ་དུ་འཇུག་བ་བ་སྟན་ཟིན་ཏོ། །ད་ནི་སློབ་དཔོན་ཞུགས་པའི་ཡོན་ཏན་མཚན་མ་ཐོབ་པའི་རྟགས་སྟོན་ཏེ། ཅིའི་ཕྱིར་ཞེ་ན།
དེ་ནས་མཚན་མ་སྐྱེས་ཏེ་མགུ་ནས་ནི་ཞེས་པ་ནི། དེ་ནས་ནི་ཞུགས་པའི་རྟིང་ཐོགས་སོ། །མཚན་མ་ནི་དངོས་གྲུབ་ཀྱི་རྟགས་ཏེ། དྲི་ཞིམ་པོ་དང༌། འོད་དམ་རླངས་པ་ལ་སོགས་པའོ། །སྐྱེས་ཏེ་ཏིང་ངེ་འཛིན་གྱི་མཐུ་ལས་སྐྱེ་བ་དང༌། སྔོན་བསགས་ཀྱི་དགེ་བས་སྐྱེ་བའོ། །མགུ་ནས་ནི་རང་གི་ཏིང་ངེ་འཛིན་རྩེ་གཅིག་པས་མགུ་ནས་རྩེ་གཅིག་པ་དང་མཎྜལ་གྱིས་འཕགས་པ་དགྱེས་ནས་དངོས་གྲུབ་སྟེར་བའོ། །ཐོག་མ་དང་ཐ་མ་མེད་པར་མངོན་སུམ་མཐོང་གི །སྔོན་བསགས་པ་ཡོད་ན་ནི། དངོས་གྲུབ་ཀྱི་རྟགས་ཉེ་སྟེ། ཐོག་མ་ནས་མཐོང་ལ། སྔོན་བསགས་ཆུང་ནས་རྩོལ་བ་ཞན་ན་ནི་མཐའ་མར་མཐོང་སྟེ། མངོན་སུམ་ནི་དབང་པོའི་དངོས་སུ་ནི། འོད་དམ་རླངས་པ་མཐོང་ལ། ཡིད་ཀྱི་མངོན་སུམ་ནི། ཡིད་ཀྱིས་ཇི་ལྟར་བསྒོམས་པ་དེ་ལྟར་མཐོང་བའོ། །རྣལ་འབྱོར་མངོན་སུམ་ནི། གནས་ནི་གནས་ཀྱི་ཏིང་ངེ་འཛིན་དང༌། འབྱོར་ལྷག་མཐོང་གི་ཏིང་ངེ་འཛིན་ཤེས་རབ་ཀྱིས་ཆ་སྙོམས་པ་ནི་མཐོང་བའོ། །མཆོད་ཡོན་གསང་ལ་སོགས་པ་ཞེས་པ་ནི། མཆོད་པ་རྣམ་པ་ལྔ། ཡོན་ནི་བླ་རེ་ལ་སོགས་པ་རྣམས། མཆོད་པའི་དཀྱིལ་འཁོར་གྱིས་འཕགས་པ་མཆོད། རྟགས་ནི་རྒྱུ་དང་རྐྱེན་སྔགས་དང་ཏིང་ངེ་འཛིན་གྱི་རྟགས་སོ། །གསང་ནི་འདོད་པའི་ཡོན་ཏན་ལྔ་ལྷ་མོར་བྱིན་གྱིས་བརླབས་པས་ཐུན་མོང་མ་ཡིན་པའི་ཕྱིར་གསང༌། སོགས་ནི་ཐམས་ཅད་འཚོགས་པ་ལ་བྱ། དབྱངས་སྙན་པའི་བསྟོད་པ་དང༌། ལྷ་རྫས་ཀྱི་ཞེས་པ་ནི། དབྱངས་ནི་རྒྱུ་དང་ངག་གི་གླུ་ལེན་པ་ལ་བྱའོ། །སྙན་པ་ནི་རྣར་སྙན་ལ། བ་སྟོང་པ་ནི་ཡོན་ཏན་གྱི་སྒོ་བསྟོད་དེ། ལྷ་རྫས་མཆོད་པའི་ཁྱད་པར་ལ་བྱ་བས། དངོས་གྲུབ་མི་ཉམས་པར་བྱ་བའི་ཕྱིར་འཕགས་པ་མཆོད། སློབ་དཔོན་ཞུགས་པའི་ཡོན་ཏན་མཚན་མ་མཐོང་བའི་རྟགས་དང༌། མཆོད་པ་དང་བཅས་པ་བ་སྟན་ཟིན་ཏོ། །ད་ནི་འཇིག་རྟེན་པའི་འཁོར་ལ། མཆོད་པའི་སྤྱིན་པ་ལ་བབ་སྟེ། དེ་ཅིའི་ཕྱིར་ཞེ་ན། དེ་ནས་འབྱུང་པོ་ཀུན་གྱི་གཏོར་མ་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །འབྱུང་པོ་ནི་དགེ་བའི་ཚོགས་ལ་འབྱུང་བའི་ཕྱིར་ན་འབྱུང་པོ་སྟེ། འཇིག་རྟེན་པའི་
བསོད་ནམས་ཅན་རྣམས་སོ། །ལས་ཀྱི་བག་ཆགས་མི་དགེ་བའི་མཐུ་ལས་འབྱུང་བས་འབྱུང་པོ་སྟེ། སེམས་ཅན་དམྱལ་བ་ལ་སོགས་པ་ངན་སོང་བའོ། །ཀུན་གྱི་ནི་མ་ལུས་པའི་ཕྱིར་ཏེ་མཎྜལ་དུ་བཀོད་པ་རྣམས་སོ། །གཏོར་མ་ནི་ཕྲིན་ལས་ཏེ་ཁྱབ་པར་བྱེད་པ་སྟེ། མ་ནི་ལེན་པར་བྱེད་པ་སྟེ་མི་དམིགས་པར་གཏོང་བའོ། །ད་ནི་སློབ་མ་འཇུག་པ་སྟོན་ཏེ། ཅིའི་ཕྱིར་ཞེ་ན། དེ་ནས་སྔགས་པ་བླ་མེད་བྱང་ཆུབ་ཀྱི། །ཞེས་པ་ནི། སྔགས་པ་ནི་སློབ་དཔོན་ཏེ། ཏིང་ངེ་འཛིན་སྔགས་ཀྱི་མཐུ་དཔལ་སྐྱེ་བས་སྔགས་པའོ། །བླ་མེད་ནི་རྒྱུ་བླ་ན་མེད་པའི་སྒོ་ནས་ནི་ཞུགས། འབྲས་བུ་བླ་ན་མེད་པ་ཐོབ་པའོ། །བྱང་ཆུབ་ནི་ཟད་པ་དང༌། མི་སྐྱེ་བ་སྟེ། སློབ་མ་དེ་ལ་ཞུགས་པའི་ཕྱིར་རོ། །ཅིའི་ཕྱིར་ཞེ་ན། གནས་སུ་སློབ་མ་ཡོངས་སུ་སྨིན་པར་བྱ་ཞེས་གསུངས་སོ། །མཚོན་པའི་གནས་ནི་དཀྱིལ་འཁོར་རོ། །རྒྱུའི་གནས་ནི་སློབ་མའི་སེམས་སོ། །ཡོངས་སུ་སྨིན་པར་བྱ་བ་ནི་འབྲས་བུ་ཐོབ་པར་བྱ་བའི་ཕྱིར། སེམས་མ་གྲོལ་བ་གྲོལ་བར་བྱ་བའི་ཕྱིར། སློབ་མ་སེམས་བསྐྱེད། རྡོ་རྗེ་འཛིན་མའི་ཕྱག་རྒྱ་བཅིངས་ལ། མཎྜལ་སློབ་དཔོན་ལ་ཡོན་འབུལ་ལོ། །རིག་པའི་མེ་ཏོག་ལྷ་ལ་འཕངས་པའོ། །གང་ལ་བབ་པའི་ལྷ་དེ་ལ་བ་སྟན་པ་དང༌། ཡི་དམ་དུ་འཆར་གཞུག་པའོ། །ད་ནི་སློབ་མ་ལ་དམ་ཚིག་དབོག་པ་སྟོན་ཏེ། ཅིའི་ཕྱིར་ཞེ་ན། དེ་ནས་སྔགས་པ་མཁས་པ་ཡིས། །ཞེས་པ་ནི། དེ་ནས་སྐབས་ཀྱི་རྟིང་ཐོགས་སོ། །སྔགས་པ་ནི་སློབ་དཔོན་ནོ། །མཁས་པ་ནི་དམ་ཚིག་སྒྲོགས་པ་ལ་མཁས་པའོ། །སློབ་དཔོན་གྱིས་ཨརྒྷ་བྱིན་གྱིས་བརླབས་ནས། སློབ་མ་ལ་དམ་ཚིག་བསྒྲགས་པའི་ཚིགས་བཅད་དང༌། སྔགས་དང་སྐྱོན་ཡོན་ནི་བདེ་སྟེ་མ་བྲིས་སོ། །ད་ནི་དམ་ཚིག་དབོག་སྟེ། ཅིའི་ཕྱིར་ཞེ་ན། ཁྱོད་ཀྱིས་སྲོག་ཆགས་གསད་མི་བྱ། །ཞེས་པ་ནས། མདོར་ན་ཡིད་གཉིས་སོམ་ཉི་མི་བྱ་སྟེ། །ཞེས་པའི་བར་ནི་སྙིང་རྗེ་རྒྱུན་མི་འཆད་པའི་ཕྱིར་རོ། །སྲོག་མི་གཅོད་པ་དང༌། ཆགས་པས་ཁམས་གསུམ་དུ་འཁོར་བར་མ་བྱིན་པར་མི་བླང་བ་དང༌། དམ་པའི་ཆོས་དང་མི་མཐུན་པའི་བརྫུན་མི་སྨྲ་བ་དང༌། ཆགས་པས་ཏིང་ངེ་འཛིན་
ཉམས་པའི་གཞི་ཡིན་པས་བུད་མེད་ལ་ཆགས་པ་མི་སྐྱེད་པ་དང༌། ཉེས་པའི་གཞི་ཡིན་པས་ཆང་མི་འཐུང་བ་དང༌། འབྱུང་པོའི་ཁ་ཟས་ཤ་མི་ཟ་བ་དང༌། བསམ་པ་ངན་པའི་སྦྱོར་བ་སེམས་ལ་མི་བྱ་བ་དང༌། དམིགས་པའི་རྟེན་དཀོན་མཆོག་གསུམ་མི་སྤང་བ་དང༌། བྱང་ཆུབ་ཀྱི་སེམས་རྗེས་སུ་གཟུང་བ་དང༌། ལྷའི་སྙིང་པོ་རྫོགས་པ་དང༌། ཕྱག་རྒྱ་རྣམས་རྟག་ཏུ་བྱ་བ་དང༌། ལྷ་དང་སློབ་དཔོན་དབྱེར་མེད་པར་བལྟ་བ་དང༌། སློབ་དཔོན་གྱི་བཀའ་ལས་མི་འདའ་ཞིང༌། ལྷ་ལ་ཕུལ་བ་ལ་མི་འགོང་བ་དང༌། སྔགས་དང་ཕྱག་རྒྱལ་མི་སྨད་ཅིང་དང་དུ་བླང་བ་དང། གྲོང་སྔགས་ཀྱི་ལས་མི་བྱ་བ་དང༌། ཡིད་གཉིས་དང་སོམ་ཉི་མི་བྱའོ། །ད་ནི་མི་འདའ་བའི་ཐབས་བ་སྟན་ཅིང་དབང་བསྐུར་བ་སྟོན་ཏོ། དེ་ཅིའི་ཕྱིར་ཞེ་ན། བདག་གི་དེ་བཞིན་དང་ནི་སྔགས་སོགས་དེ་བཞིན་པ་ནི། བདག་སྒྲུབ་པ་པོ་སློབ་དཔོན་ནོ། །དེ་ཉིད་ནི་སློབ་མ་ཉིད་ལ་བྱ་ལ། སྔགས་རིག་པ་ལ་སོགས་པ་ནི་མངོན་པར་བྱང་ཆུབ་པ་ལྔ་དང༌། ལྡན་པ་དམ་བཅས་ནས། ཞེས་པ་ནི། མོས་པ་ནི་སློབ་མ་ཡིད་ཆེས་ལྟར་བསྒོམས་པས་དེ་བཞིན་དུ་སློབ་མ་ཡང་སྒོམ་དུ་གཞུག་པའོ། །རྣམ་གཅིག་ཏུ་ནི་བདག་ནི་སློབ་མ་ཉིད། ལྷ་སྔགས་ནི་ལྷའི་སྙིང་པོའོ། །སོགས་ནི་ཕྱག་རྒྱ་ལ་སོགས་པ། དེ་བཞིན་སློབ་མ་དེ་སྒོམ་དུ་གཞུག་པའི་ཐ་ཚིག་གོ །དེ་ཡང་ཅིའི་ཕྱིར་ཞེ་ན། མོས་པ་བརྟན་དང་ལྡན་པ་དམ་བཅས་ནས། །ཞེས་པ་ནི། མོས་པ་ནི་སློབ་མ་ཡིད་ཆེས་པའི་སྒོ་ནས་སོ། །བརྟན་པ་ནི་སེམས་མི་འགྱུར་ཞིང་འཁུ་ལྡོག་མེད་པའོ། །ལྡན་པ་ནི་ཡོན་ཏན་ཚང་བའི་ཕྱིར་སྨོས་ལ། དམ་བཅའ་བ་ནི་མི་འདའ་ཞིང༌། །མི་འགྱུར་བར་དམ་བསྒྲགས་ནས་དབང་བསྐུར་བའི་དོན་ཏོ། །ཅིའི་ཕྱིར་ཞེ་ན། བདག་གི་དེ་བཞིན་དང་ནི་སྔགས་སོགས་དེ་བཞིན་ཉིད། །ཅེས་པ་ནི། སརྦ་ནི་ཐམས་ཅད་དཀྱིལ་འཁོར་གྱི་ལྷ་རྣམས་སོ། །བིད་ནི་རིག་པ་སྟེ་ཐུགས་སོ། །ཇི་བཞིན་ནི་སློབ་མ་སྟེ། ལྷ་ཇི་བཞིན་དུ་དམ་བཅའ་བའོ། །དབང་ནི་ཐུགས་ཏེ་ཡོ་གའི་དབང་བཅུ་དང༌། ཐབས་དང་ཤེས་རབ་ཀྱི་དབང་དང༌། རིན་པོ་ཆེ་སྣ་བདུན་གྱི་དབང་དང་གསུམ་མོ། །བསྐུར་ནི་སློབ་མ་ལ་སྤྱིན་བའི་ཐ་ཚིག་གོ །ཅིའི་ཕྱིར་ཞེ་ན། བུམ་པ་ལ་
སོགས་ཇི་སྙེད་མང་ཐོགས་ལ། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །ཞེས་པ་ནི། སློབ་དཔོན་གྱིས་བུམ་བ་ཐུགས་ཀྱི་ངོ་བོ་སརྦ་བིད་ཀྱི་བྱིན་གྱིས་བརླབས་ནས། བདུད་རྩི་བུམ་པ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའོ། །བྱང་ཆུབ་ཀྱི་སེམས་ཡེ་ཤེས་ཀྱི་སྤྲུལ་བ་འབྱུང་བས་སློབ་མ་ལ་དབང་བསྐུར་བས། ཉོན་མོངས་པ་ལྔ་འཇོམས་པས་རིགས་རྣམ་པ་ལྔའི་དབང་དང༌། ཐབས་མཁས་པ་ཐུགས་རྗེའི་ཕྲེང་བའི་དབང་དང༌། བྱང་ཆུབ་སེམས་དཔའ་ཅོད་པན་གྱི་དབང་དང༌། མི་འདའ་བ་ཕྱག་རྒྱའི་དབང་དང༌། རྒྱལ་བའི་སྲས་ཡིན་པས་མིང་གི་དབང་དང༌། དེ་བཞིན་གཤེགས་པའི་ཕྲིན་ལས་མཛད་པས་ལས་ཀྱི་དབང་དང༌། འཁོར་བ་གཏིང་ནས་འཇོམས་པས་འཁོར་ལོའི་དབང་དང༌། གཉིས་སུ་མེད་པ་གཟུངས་ཀྱི་དབང་དང༌། ཆོས་ཉིད་ཀྱི་དོན་མཐོང་བས་གསང་བའི་དབང་དང༌། རྒྱལ་བའི་སྲས་ཡིན་པས་མིང་གི་དབང་དང༌། དེ་བཞིན་གཤེགས་པའི་དེ་བཅུ་ནི་སློབ་མ་ཇི་ལྟར་དགའ་བར་དབང་རིམ་པས་བསྐུར་རོ། །ད་ནི་ཐབས་ཤེས་རབ་ཀྱི་དབང་བསྐུར་ཏེ། དེ་ནས་ལག་ཏུ་རྡོ་རྗེ་དང་དྲིལ་བུ་སྤྱིན། ཐུགས་ཡང་དག་པའི་ཡེ་ཤེས་ཀྱི་རྡོ་རྗེ་ཐབས་ཀྱི་དབང་དང༌། ཆོས་ཀྱི་དབྱིངས་སྐྱེ་བ་མེད་པའི་དྲིལ་བུ་ཤེས་རབ་ཀྱི་དབང་དང༌། གཉིས་ནི་མཐའ་གཉིས་དབང་བསྐུར་བས་ཐབས་དང་ཤེས་རབ་བོ། །ད་ནི་ས་དང་པོ་ཐོབ་པའི་ལས་རིན་པོ་ཆེ་སྣ་བདུན་གྱི་དབང་བསྐུར་ཏེ། ཅིའི་ཕྱིར་ཞེ་ན། འཁོར་ལོ་ལ་སོགས་རིན་ཆེན་བདུན་ཐོགས་ལ། མི་དབང་དབང་ཕྱུག་འཁོར་ལོ་ཐོབ་པ་དང། སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་པ་ནི། འཁོར་ལོ་ནི་གཙོ་བོ་ཡིན་པས་སྣ་ལ་སྨོས་སོ། །སོགས་ཀྱི་ཁུངས་སུ་རིན་པོ་ཆེ་སྣ་བདུན་འབྱུང་སྟེ། བྱང་ཆུབ་ཀྱི་ཡན་ལག་བདུན་དང་སྤྱར་ཏེ། ཆོས་རྣམ་པར་འབྱེད་པ་ནི་ཤེས་རབ་ཀྱི་རང་བཞིན་ཏེ། རང་བཞིན་ནི་ཡན་ལག་གོ །དེའི་རྟགས་ནི་ཡང་དག་པའི་ཤེས་རབ་ཀྱིས་འཁོར་བ་འཇོམས་པས་ན་འཁོར་ལོའོ། །རིན་པོ་ཆེ་ནི། བཏང་སྙོམས་ནི་མཐོང་བས་ན་སྤང་བར་བྱ་བའི་ཏིང་ངེ་འཛིན་སྤངས་ནས་ཉོན་མོངས་པ་རྒྱུན་དུ་མི་འབྱུང་བས། ཉོན་མོངས་པ་མེད་པའི་ཡན་ལག་སྟེ། དེའི་རྟགས་ནི་
ཐབས་ཐུགས་རྗེས་ནོར་བུ་རིན་པོ་ཆེའོ། །ཤིན་ཏུ་སྦྱངས་པ་ནི་ལུས་སེམས་ལས་སུ་རུང་བ་སྟེ། འདོད་ཆགས་ལ་སོགས་པ་མི་འབྱུང་བས་དེའི་རྟགས་ནི་ཡང་དག་པའི་ཤེས་རབ་ཀྱི་བཙུན་མོའོ། །བརྩོན་འགྲུས་ནི་ངེས་པར་འབྱུང་བའི་ཡན་ལག་སྟེ། སོ་སོའི་གནས་ལས་ངེས་པར་འབྱུང་བའི་ཡན་ལག་སྟེ། དེའི་རྟགས་ནི་རྫུ་འཕྲུལ་གྱི་རྟ་རིན་པོ་ཆེའོ། །ཏིང་ངེ་འཛིན་ནི་མཐོང་པས་སྤང་བར་བྱ་བའི་ཉོན་མོངས་པ་སྤོང་བས་གནས་ཀྱི་ཡན་ལག་གོ །དེའི་རྟགས་ནི་ཐབས་མཁས་པའི་གླང་པོ་རིན་པོ་ཆེའོ། །དགའ་བའི་ཕན་ཡོན་གྱི་ཡན་ལག་སྟེ། ས་དང་བོར་བདེན་པ་མཐོང་བས་དེས་ལུས་སེམས་ལས་སུ་རུང་བས་ཕན་འདོགས་པས་ན་དེའི་རྟགས་ནི་འཁོར་བའི་དགྲ་འཇོམས་པ་དམག་མི་རིན་པོ་ཆེའོ། །དྲན་པ་ནི་ཤེས་རབ་ཀྱི་རྒྱུ་སྟེ། གནས་ཀྱི་ཡན་ལག་ཡིན་པས་དེའི་རྟགས་ནི་དྲན་པ་དང་ལྡན་པའི་ཁྱིམ་བདག་རིན་པོ་ཆེའོ། །མི་དབང་ནི་འཇིགས་པས་མཐོང་བའི་ཕྱིར་རོ། །དབང་ནི་ས་དང་པོ་ཐོབ་ཅིང་དེ་ལ་ལོངས་སྤྱོད་པས་ཕྱུག་གོ །སྡིག་པ་ནི་བག་ཆགས་ལ། གཞོམ་པ་ནི་སྤྲུལ་པའི་སྐུ་འཕྲོ་འདུ་བསྟིམས་ལ། དབང་ནི་བྱིན་གྱིས་བརླབས་ལ་བྱིན་པའོ། །ད་ནི་སློབ་མ་དགའ་བའི་གཏང་རག་ཡོན་འབུལ་བ་བ་སྟན་ཏེ། ཅིའི་ཕྱིར་ཞེ་ན། སྔགས་འགྲུབ་ཕྱིར་ནི་མོས་ལྡན་སློབ་མ་ལ། །ཞེས་གསུངས་ཏེ། སྔགས་ནི་ཉོན་མོངས་པ་བཅོམ་ནས་དབང་ཐོབ་པའོ། །གྲུབ་པ་ནི་ཆུད་མ་ཟོས་པར་རོ། །ཕྱིར་ནི་ཡོན་འབུལ་བའི་ཕྱིར་ན། མོས་པ་ནི་སེམས་ལ། ལྡན་པ་ནི་དད་པའོ། །སློབ་མ་ནི་དབང་བསྐུར་བ་སྟེ། དེས་སློབ་དཔོན་གྱི་དག་མཉན་ནས་གཞུང་ལས་བྱུང་བ་བཞིན་ཡོན་འབུལ་པའོ། །དབང་བསྐུར་བའི་ཡོན་ཏན་ཡང་བདེ་སྟེ་མ་སྨོས་སོ། །ད་ནི་སློབ་དཔོན་གྱི་བལྟ་ཐབས་སྟོན་ཏེ། ཅིའི་ཕྱིར་ཞེ་ནི། སངས་རྒྱས་ཀུན་དང་བླ་མར་མཉམ། །ཞེས་པ་ནི། སངས་རྒྱས་ཀུན་ནི་དཀྱིལ་འཁོར་གྱི་ལྷ་ལ་བྱ་ལ། བླ་མ་ནི་སློབ་དཔོན་ཏེ། མཉམ་པ་ནི་ལྷ་དང་འདྲ་བར་བལྟ་བའི་ཕྱིར། ལྷ་ངོ་ཤེས་སུ་འཇུག་ཅིང་དམ་མི་འདའ་བར་སྟོན་པས་མཉམ། སློབ་དཔོན་ལ་ནི་བརྙས་མི་བྱ། །ཞེས་པ་ནི། བདག་འཁོར་བ་ལས་འདྲེན་ཅིང་ཡང་དག་པའི་དོན་སྟོན་པས་ན།
སློབ་དཔོན་ལ་བརྙས་ན་འཕགས་པ་ཐམས་ཅད་ལ་བརྙས་པའི་ཐ་ཚིག་གོ །དེའི་འོག་ཏུ་གྲོགས་མཆེད་ལ་བརྙས་པ་སྟོན་ཏེ། ཅིའི་ཕྱིར་ཞེ་ན། རྡོ་རྗེ་སྤུན་དང་སྲིང་མོ་དང༌། །ཞེས་གསུངས་ཏེ། རྡོ་རྗེའི་དམ་ཚིག་རྡོ་རྗེ་བསྲུང་བ་དང༌། དངོས་གྲུབ་རྡོ་རྗེ་བ་སྟན་པའི་སྒོ་ནས་བསྒྲུབ་པའོ། །སྤུན་ནི་ཕ་མ་གཅིག་པའི་དོན་ཏོ། །ལྷ་དང་སློབ་དཔོན་ཕ་དང་འདྲ་བ་དང༌། དམ་པའི་ཆོས་མ་དང་འདྲ་བ་དང༌། གཉིས་པ་རྟེན་ཅིང་གནས་པ་དང༌། མི་འབྲལ་ཞིང་འགྲོགས་པའི་ཕྱིར་ན་སྤུན་ནོ། །སྲིང་མོ་ནི་མིང་སྲིན་ལྟར་ཚུལ་བསྲུང་བ་དང༌། ཕ་མའི་རྒྱུ་རྐྱེན་གཅིག་ལས་བྱུང་བ་འདྲ་བས། རྒྱུ་རང་གི་སེམས་ལ། རྐྱེན་རང་སློབ་དཔོན་གྱི་བཀའ་དྲིན་གྱིས་འབྲས་བུ་བླ་ན་མེད་པ་འབྱུང་བའི་ཕྱིར་ན། སྒྲུབ་པའི་གྲོགས་ནི་མི་བརྙས་པར་བརྩེ་གདུང་བྱ་བའི་ཐ་ཚིག་སྟེ། ཞིབ་ཏུ་གཞུང་ལས་སྨོས་སོ། །ད་ནི་དཀོན་མཆོག་གསུམ་པོ་ལ་གནོད་པ་བྱེད་པ་ལ། བཟོད་པ་མི་བསྒོམ་པ་སྟོན་ཏེ། ཅིའི་ཕྱིར་ཞེ་ན། དཀོན་མཆོག་གསུམ་ལ་གནོད་བྱེད་ལ། །ཞེས་གསུངས་ཏེ། དཀོན་གསུམ་བདུད་རྩིར་བསྒྲུབ་པའི་ཕྱིར། ཀུན་རིག་གི་འོག་དཀའ་བའི་ཕྱིར་དཀོན་ནོ། །མཆོག་ནི་རྐང་གཉིས་མཆོག་སངས་རྒྱས། འདོད་ཆགས་དང་བྲལ་བའི་མཆོག་དམ་པའི་ཆོས། མང་པོ་འདུས་པའི་མཆོག་དགེ་འདུན་ཏེ། དེ་གསུམ་ལ་གནོད་པ་བྱེད་པ་ལ་བཟོད་པ་མི་སྐྱེད་དེ། ཅིའི་ཕྱིར་ཞེ་ན། ཉེས་པ་བྱེད་པ་ལ་ཆད་པས་མཆོད་ན། གླང་པོ་ཆེ་རྫིང་རྙོག་པ་ལྟར། ཡུལ་ལ་ཉེས་པ་འཕེལ་བའི་གཞིའོ། །བསྒྲུབས་ན་མྱུར་དུ་འགྲུབ་པར་འགྱུར། །ཞེས་པ་ནི། བསྒྲུབས་པ་ནི་གོང་མའི་དོན་ལ་བྱ། །མྱུར་བ་ནི་གུས་པར་གྲུབ་པས་མི་ཐོགས་པའི་ཕྱིར་རོ། །འགྱུར་ནི་རས་དཀར་པོ་དམར་པོར་བྱ་བའི་མཐུ་བཙོད་ལ་ཡོད་པ་དང་འདྲ་བར། འབྲས་བུ་བླ་ན་མེད་པའི་རྒྱུ་ནི་རང་གི་སེམས་ལ་ཡོད་པའི་ཐ་ཚིག་གོ །ཀུན་རིག་རྩ་བའི་དཀྱིལ་འཁོར་ཡན་ལག་དང་བཅས་པ་བཤད་ཟིན་ཏོ།། །།ད་ནི་བསྒྲུབ་པར་བྱ་བའི་ཐབས་སྐུ་གཟུགས་ཀྱི་དོན་ཏེ། ཅིའི་ཕྱིར་ཞེ་ན། དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་དང་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །བཅོམ་
ནི་སྒྲིབ་པ་རྣམ་པ་གཉིས་བཅོམ་ལ། ལྡན་ནི་ཐུན་མོང་དང་ཐུན་མོང་མ་ཡིན་པའི་ཡོན་ཏན་དང་ལྡན་པས་ཏེ། ལྷའི་དབང་པོ་བརྒྱ་བྱིན་དང༌། གསོལ་པ་འཇིག་རྟེན་ལ་ཕན་པའི་ཐ་ཚིག་ཏུ་གསུངས་པའི་ཚིག་ཏུ་སྨོས་སོ། །སྒྲུབ་པའི་ཆོ་གའི་འདི་གསུངས་སོ། །ཞེས་པ་ནི། སྒྲུབ་པ་རྣམས་ནི་གསུམ་སྟེ། སྐུ་གཟུགས་གཟུགས་བརྙན་སྒྲུབ་པ་དང༌། དངོས་གྲུབ་ཀྱི་རྫས་སྒྲུབ་པ་དང༌། འབྲས་བུ་བླ་ན་མེད་པ་སྒྲུབ་པའི་ཕྱིར་ན་སྒྲུབ་པའོ། །ཆོ་ག་ནི་ཞིབ་མོའི་སྒོ་ནས་བྱ་བའི་ཐ་ཚིག་ལ། འདི་ནི་འོག་གི་དོན་ལ་གསུངས་པ་ནི་དེ་བཞིན་གཤེགས་པས་གསུངས་པའི་ཐ་ཚིག་གོ །བཅོམ་ལྡན་འདས་ཐམས་ཅད་རིག་པ་ཞེས་པ་ནས། སྒྲོལ་མ་ཞེས་བྱ་བའི་བར་དུ་ནི་སྐུ་གཟུགས་བྲི་བའི་ལྷའི་ཁྱད་པར་སྟོན་ཏེ། ཅིའི་ཁྱད་པར་ཞེ་ན། དེ་བཞིན་གཤེགས་པ་ཡང་དག་པ། །ཞེས་པ་ནི། དབུས་སུ་རྣམ་པར་སྣང་མཛད་བྲིའོ། །ཡང་དག་པའི་ཡེ་ཤེས་ཀྱིས་འཁོར་བའི་ངན་སོང་འཇོམས་པས་ངན་སོང་འཇོམས་པ་གཡས་སུ་བྲིའོ། །འཁོར་བ་གཡོན་ཕྱོགས་དང་འདྲ་བ་ལ། ཐུགས་རྗེ་དང་ལས་བསྐྱེད་པའི་ཕྱིར། ཤཱཀྱ་ཐུབ་པ་གཡོན་དུ་བྲིའོ། །ཐབས་ཐུགས་རྗེ་དང་ལྡན་པའི་རྟགས་སུ། ངན་སོང་སྦྱོང་བའི་འོག་ཏུ་སྤྱན་རས་གཟིགས་བྲིའོ། །སྐུ་གསུང་ཐུགས་གསང་བའི་མཛོད་འཛིན་པས། ཤཱཀྱ་ཐུབ་པའི་འོག་ཏུ་ཕྱག་ན་རྡོ་རྗེ་བྲིའོ། །ཉོན་མོངས་པའི་ནད་བཞི་བརྒྱ་རྩ་བཞི་གསོ་བའི་རྟགས་སུ་སྨན་གྱི་བླ་བྲིའོ། །དུག་གསུམ་བདུད་རྩིར་བསྒྲུབ་པའི་ཕྱིར། ཀུན་རིག་གི་འོག་ཏུ་རྟ་མགྲིན་བྲིའོ། །བདུད་དང་དྲེགས་བྱེད་གདུལ་བའི་ཕྱིར། འཇིག་རྟེན་གསུམ་ལས་རྣམ་པར་རྒྱལ་བ་རྟ་མགྲིན་གྱི་གཡོན་དུ་བྲིའོ། །ཡང་དག་པའི་ཤེས་རབ་ཀྱིས་རྟོགས་པའི་ཡུལ་ཡིན་པས། ཀུན་རིག་གི་མདུན་དུ་སངས་རྒྱས་སྤྱན་གྱི་ཟླ་བ་ཚེས་པ་ལ་སྤྱན་ཡོད་པ་བྲིའོ། །གཡས་སུ་མཱ་མ་ཀཱི་བྲིའོ། །གཡོན་དུ་སྒྲོལ་མ་བྲི། རྒྱབ་ཏུ་གོས་དཀར་མོ་བྲི། །འོག་ཏུ་མ་ཆག་པ་པདྨོའི་རྫིང་བུ་བྲིས་ལ། དེའི་ནང་དུ་ནི། ཉོན་མོངས་པ་འཁོར་བར་མི་གཏོང་བའི་ཆུ་སྲིན་གྱི་གཟུགས་དང༌། གཟུང་འཛིན་རྣམ་པ་གཉིས་དང་བྲལ་པའི་རྟགས་སུ་སྦལ་བ་བྲིའོ། །ཐུགས་རྗེའི་རྫུ་འཕྲུལ་གྱིས་འཁོར་བའི་ཉེ་
གནས་ལ་འཛིན་ཅིང་འབྲེལ་པའི་རྟགས་སུ་སྦལ་པ་དཀར་པོའང་ཕྱིར་བྲིའོ། །སྐྱོན་གྱི་བག་ཆགས་དང་བྲལ་ཞིང༌། ཐུགས་རྗེའི་ཐུགས་མངའ་བའི་རྟགས་སུ་རུས་སྦལ་དཀར་པོ་བྲི། ཉོན་མོངས་པ་ཟད་པར་མཛད་པའི་རྟགས་སུ་ཉ་དཀར་པོ་བྲིའོ། །དེ་རྣམས་ནི་ཡེ་ཤེས་ཀྱི་རྟགས་དང༌། མཛེས་པའི་རྒྱན་དང་ཐུགས་རྗེའི་ཡུལ་གསུམ་ཀ་སྤྱར་ཞིང་ཤེས་པར་བྱ། རྒྱན་ཆས་ཕྱི་མ་ནི་གཞུང་ལས་བྱུང་བར་བས། ལྷ་མི་བརྗེད་ཅིང་དྲན་པར་བྱ་བའི་ཕྱིར། བདག་ཉིད་ཀྱང་ཐལ་མོ་སྤྱར་ཞིང་མཆོད་པ་བྱེད་པའི་ཚུལ་དུ་བྲིའོ། །ད་ནི་མཆོད་པའི་ཐབས་སྟོན་ཏེ། དེ་ནས་རི་མོའི་གཟུགས་དེ་མངོན་པར་མཆོད་དེ་ཞེས་པ་ནི། རི་མོའི་གཟུགས་བརྙན་རི་མོར་བྲིའོ། །མངོན་པར་ནི་དབང་པོའི་མངོན་སུམ་དུ་རི་མོ་གཞག་ལ་ཡིད་ཀྱི་མངོན་སུམ་ནི་ཏིང་ངེ་འཛིན་གྱི་མཎྜལ་དུ་བསྒོམ་པའི་དོན་ཏོ། །མཆོད་པའི་རྒྱུད་དང་རྐྱེན་དང་ཐབས་སོ། །རྒྱུ་ནི་ལུས་ངག་ཡིད་གསུམ་གྱི་སྡིག་པ་བཤགས་པའོ། །རྐྱེན་ནི་དངོས་གྲུབ་ཀྱི་རྫས་ཀྱི་མར་དང༌། བུ་རམ་དང༌། བུ་རམ་དང༌། ཛཱ་ཏི་ཕ་ལ་ལ་སོགས་ཏེ། དངོས་གྲུབ་ཀྱི་སྣོད་དུ་བླུགས་ནས་མཆོད་པར་བགྱི་བ་ནི་རྣམ་པ་གཉིས་ཏེ། གཟུགས་བརྙན་མཆོད་པའི་འབྲས་བུ་ནི། སྐུ་བཞད་པ་ལ་སོགས་པའི་རྟགས་འབྱུང་བའོ། །བདག་ཉིད་ཀྱིས་སྤྱན་དབྱེ་ཞེས་པ་ནི། བདག་ཉིད་ནི་སྒྲུབ་པའོ། །སྤྱན་ནི་སྐུ་གཟུགས་ཀྱི་སྤྱན་ནོ། །དབྱེ་བ་ནི་རྣམ་པ་གཉིས་ཏེ། གཟུགས་བརྙན་དང༌། མཚན་མའི་སྤྱན་དབྱེ་བའི་ཐབས་ངང་གཉིས་སོ། །དེ་ལ་གཟུགས་བརྙན་གྱི་སྤྱན་ལ་ཡང་ཉི་ཟླའི་མཎྜལ་བསྒོམས་ནས། བདག་གི་མིག་ལས་ཡེ་ཤེས་ཀྱི་ཛཿ་སྤྲོས་ཏེ། རང་གི་མཎྜལ་ནས་ཐུགས་དམ་གྱི་རྒྱུད་བསྐུལ་ནས། བདག་ཏིང་ངེ་འཛིན་དང༌། ཆུ་དང་འོ་མ་འདྲེས་པར་གྱུར་ཏེ། གྲངས་ཀྱི་བསྙེན་པ་དང༌། མཚན་མའི་བསྙེན་པ་ཚུལ་བཞིན་དུ་བྱས་ནས་གཟུགས་བརྙན་གྱི་སྐུ་གཟུགས་ལ་ཕབ་སྟེ། གཉིས་སུ་མེད་པར་བྱིན་གྱིས་བརླབ་ཅིང་བརྟན་པར་བྱས་ནས། ཡེ་ཤེས་ཀྱི་སྤྱན་གྱིས་འགྲོ་བ་ལ་གཟིགས་པ་དང༌། བྱིན་གྱིས་རླབས་པར་བྱེད་པ་ནི་ཏིང་ངེ་འཛིན་གྱིས་སྤྱན་དབྱེ་བའོ། །དངོས་གྲུབ་སྒྲུབ་པའི་རྟགས་བདེ་སྟེ་བ་བྲིས་སོ། །ད་ནི་བྱིན་གྱིས་བརླབ་པ་སྟོན་ཏེ། ཅིའི་ཕྱིར་ཞེ་ན། དེ་ནས་གཟུགས་བརྙན་
དེ་བྱིན་གྱིས་བརླབས་ཏེ་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །གཟུགས་ནི་བརྟན་ཏེ་བྱུང་བ་དང༌། མཚོན་པར་བྱེད་པའི་ཕྱིར་ན་གཟུགས་ཏེ། དེ་ནི་གོང་དུ་སྨོས་པ་ཡིན་ལ། བྱིན་གྱིས་བརླབས་ཏེ་ཞེས་པ་ནི། ཡེ་ཤེས་ཀྱི་སྐུའི་སྤྲུལ་བ་སྤྲོས་པ་སྐུ་ལ་ཕོག་སྟེ་སྐུ་སྟོང་པ་ཉིད་དུ་བྱིན་གྱིས་བརླབས། གསུང་ཡིག་འབྲུའི་འཕྲོ་འདུ་སྤྲོས་ཏེ། གསུང་ལ་ཐིམ་པས་ན་གསུང་སྨོན་པ་མེད་པར་བྱིན་གྱིས་བརླབས་པའི་སྐུ་གཟུགས་དེ་ལ་དངོས་གྲུབ་གསོལ་བའི་ཕྱིར། སྤྱན་སྔར་མཆོད་པ་དབུལ་ཞིང་བསྙེན་པར་བྱ་བའི་དོན་ཏོ། །དེ་ཅིའི་ཕྱིར་ཞེ་ན། རྟག་ཏུ་མངོན་སུམ་འདུག་ཀྱང་ཞེས་གསུངས་ཏེ། རྟག་ཏུ་ཞེས་བྱ་བ་ནི། མི་འབྲལ་བར་བྱ་བའི་དོན་ཏོ། །མངོན་སུམ་དུ་ནི་དབང་པོས་མཐོང་བས་ལྟ། ཡིད་ཀྱིས་ནི་དམིགས་པའི་ཏིང་ངེ་འཛིན་གྱིས་ནི་བསྒོམ་པའི་དོན་ཏོ། །ད་ནི་བསྒྲུབ་པའི་གནས་བ་སྟན་ཏེ། དེ་ནས་དབེན་པའི་གནས་སུ་ཞེས་པ་ནི། སེམས་དབེན་པ་ནི་ཕྱི་ཡུལ་ལ་མི་སྤྲོ་བ་དང༌། ཡུལ་དབེན་པ་ནི་མིའི་སྐད་མི་ཐོས་པ་དང༌། ཏིང་ངེ་འཛིན་དབེན་པ་ནི། སེམས་རྩེ་གཅིག་ཏུ་མི་འགྱུར་པའི་ཀློང་དུ་གྱུར་པ། གནས་ནི་ལུས་ཀྱི་གནས་ནི་དབེན་པ་ཡིན་ལ། དབང་པོ་དབེན་པའི་གནས་ནི། གཟུགས་བརྙན་གྱི་སྐུ་ཡིན་ལ། ཏིང་ངེ་འཛིན་དབེན་པའི་གནས་ནི་ཆོས་ཉིད་ཡིན་ཏེ། བསྙེན་པའི་དོན་གྱི་དཀྱུས་ལས་འབྱུང་བསམ་སྨོས་སོ། །ད་ནི་དངོས་གྲུབ་ཀྱི་རྫས་སྟོན་ཏེ། བསོད་ནམས་སྣོད་ལས་ཅི་དགའ་བར། །དངོས་གྲུབ་མཆོག་ནི་སྩོལ་བར་བྱ། །ཞེས་གསུངས་ཏེ། སྒྲུབ་པ་པོས་དངུལ་གྱི་ཕོར་པའམ། རིན་པོ་ཆེའི་སྣོད་གཙང་མའི་ནང་དུ། དངོས་གྲུབ་ཀྱི་བུ་རམ་དང་ཙནྡན་ལ་སོགས་ཏེ་མཆོད་པའི་ཆ་རྐྱེན་ལ་བསྙེན་པ་ཚུལ་བཞིན་དུ་བྱས་ནས། ལྷའི་དབང་པོར་བྱིན་གྱིས་བརླབས་པ་སྟེ། འཕགས་པ་ལ་ཡང་དངོས་གྲུབ་ཐོབ་ཅན། མཆོད་རྫས་ཀྱི་སྐལ་བ་དབུལ། སེམས་ཅན་ལ་ཡང་སྙིང་རྗེའི་མགྲོན་དུ་སྤྱིན། བདག་གིས་ཀྱང་དངོས་གྲུབ་ཀྱི་རྫས་ལ་ལོངས་སྤྱོད་པའི་ཕྱིར་གཟུང༌། ཕྱི་མ་ནི་བདེ་སྟེ་མ་སྨོས་སོ། །སྐུ་གཟུགས་ཀྱི་ཆོ་ག་བསྡུས་པ་བཤད་ཟིན་ཏོ།། །།ད་ནི་མ་གྲུབ་ན་སྤོགས་པའི་དོན་
ཏེ། དན་སོང་ལས་ཐར་བར་སྟོན་ཏེ། ཅིའི་ཕྱིར་ཞེ་ན། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཞེས་པ་ནི། ཕྱི་རབས་ཀྱི་སེམས་ཅན་རྣམས་ལ་ཕན་འདོགས་པའི་དོན་དུ་མ་གྲུབ་ན་སྦོགས་པའི་ཆོ་ག་སྟོན་ཏེ། ཞུ་བའི་ཡོན་བདག་ཡིན་པས་མ་སྨོས་སོ། །དེ་ལྟར་ཞུ་བ་གསོལ་ནས། སྟོན་པས་ངང་ནས་བཀའ་སྩལ་བའི་དོན་ཏོ། །ཅིའི་ཕྱིར་ཞེ་ན། དེ་བཞིན་དཀྱིལ་འཁོར་བྲིས་ནས་ནི། །ཞེས་གསུངས་ཏེ། དེ་བཞིན་ཞེས་བྱ་བ་ནི་གོང་མའི་རྩ་བའི་དཀྱིལ་འཁོར་ཆེན་པོ་ནས་བྱུང་བ་དེ་ལྟར་བྱ་བའི་ཐ་ཚིག་གོ །དེ་ཡང་འཇིག་རྟེན་ལས་འདས་པའི་མཎྜལ་སྒོ་གཉིས་པ་ཡན་ཆང་བྲི་བར་འབྱུང་སྟེ། དེ་ལྟར་གཉིས་སུ་སྨོས་པ་ཡང༌། གོང་གི་སྒྲུབ་ཐབས་ཡིན་པས་འོག་མ་མ་གྲུབ་ན་སྤོགས་པའི་ཆོ་ག་ཡིན་ཏེ། གོང་མ་ནི་ནོར་བུ་དྲི་མ་མེད་པའི་དོན་དུ་གསུངས་ལ། འདི་ནི་ཕྱི་རབས་ཀྱི་སེམས་ཅན་ལ་མ་གྲུབ་ན་སྤོགས་པའི་ཐབས་སུ་ཤེས་པར་བྱ། དེ་ལྟར་ཡང་ནི་བུམ་བ་ཞེས་པ་ནི། ལྷའི་གྲངས་སོ་སོའི་བསྙེན་པ་དབུལ་བ་རྟགས་མ་བྱུང་གི་བར་དུ་བསྙེན་པ་བྱས་ནས། བུམ་པ་ལ་བྲུཾ་ལས་རིན་པོ་ཆེའི་གཞལ་ཡས་ཁང་དུ་ཆོས་ཀྱི་རང་བཞིན་དུ་བསྒོམ། ནང་གི་བཅུད་ཡེ་ཤེས་ཀྱི་ཕྲིན་ལས་ཐབས་ཐུགས་རྗེ་འོད་ཟེར་སྣ་ཚོགས་པ་འབྱུང་བར་བསམས་ལ། ལྷ་སོ་སོའི་རྩ་བའི་སྔགས་དང༌། ཤི་བའི་མིང་སྤེལ་མར་བཟླ་ཞིང༌། ཡང་དང་ཡང་དུ་ཏིང་ངེ་འཛིན་གྱིས་དར་བསྐྱེད་ལ་གཞུང་ལས་བྱུང་བའི་ཡོན་ཏན་ཐོབ་པར་འགྱུར་རོ། །ད་ནི་དེའི་ཡན་ལག་མཚན་མ་ལ་དམིགས་ནས། ངན་འགྲོ་ལས་ཐར་པའི་ཐབས་སྟོན་ཏེ། ཅིའི་ཕྱིར་ཞེ་ན། དེ་ཡི་གཟུགས་བརྙན་བྲི་བའམ། གུར་གུམ་གྱིས་ནི་མིང་ཡང་རུང༌། །ཞེས་གསུངས་ཏེ། དེ་ནི་དམིགས་པའི་རྟེན་གང་ལ་བྱ་བའོ། །གཟུགས་ནི་རྟེན་པར་བྱེད་པའི་གཞི་རྣམ་པར་བམ་པའི་རོའི་གཟུགས་བརྙན་རས་སམ་ཤོག་ཤོག་ལ་བྲིས་པའོ། །མིང་ནི་གདགས་པའི་གཞི། བོད་པའི་བརྡ། གུར་གུམ་གྱིས་ཤིང་བུ་ལ་བྲི་བའི་ཐ་ཚིག་གོ །དེ་ལ་སྔགས་དང་ཕྱག་རྒྱས་རྟགས་མ་བྱུང་གི་བར་དུ་དབང་བསྐུར་ཞིང་བྱིན་གྱིས་བརླབས་ན་འགྲུབ་ཅེས་སོ། །དེ་ནི་ཇི་ལྟར་བྱ་བའི་ཐབས་སྟོན་ཏེ།
ཅིའི་ཕྱིར་ཞེ་ན། ལྷ་ཡི་གཟུགས་སུ་བརྟགས་ནས་ཀྱང༌། །མཆོད་རྟེན་དབུས་སུ་གཞག་པར་བྱ། །ཞེས་པ་ནི། ལྷ་སོ་སོའི་སྐུའི་ཕྱག་རྒྱར་གཟུགས་ཀྱི་ངོ་བོ་བསྒོམས་ཏེ། དེ་ཡང་སྤྱི་བོར་ཀུན་རིག་གི་ཡིག་འབྲུས་བྱིན་གྱིས་བརླབ། སྙིང་གར་ངན་སོང་ཀུན་འདྲེན་གྱི་ཡིག་འབྲུས་བྱིན་གྱིས་བརླབ། ལྷག་པར་རྒྱལ་བ་ཡེ་ཤེས་ཏོག །རྐང་མཐིལ་བུ་མེ་ཏོག་ཆེར་རྒྱས། ཁར་ཤཱཀྱ་ཐུབ་པ། ཆོ་འཕྲུལ་རྣམ་པ་བཞིའི་རང་བཞིན་དུ་བྱིན་གྱིས་བརླབ་ཅིང༌། གསུང་ཡིག་འབྲུས་ཉོན་མོངས་བ་སྐྱེ་བའི་ཡུལ་གཞོམ་པའི་ཕྱིར་བརྟགས་ནས་སྤྲོ། སྐུ་ཙ་ཀ་ལིས་ཉོན་མོངས་པའི་རྟེན་གཞོམ་པའི་ཕྱིར་བརྟགས་ནས་སྤྲོ། ཐུགས་ཕྱག་མཚན་ཉོན་མོངས་པའི་རྒྱུ་སེམས་སྤྱང་པའི་ཕྱིར་བརྟགས་ནས་སྤྲོ། དེ་བས་ན་མཆོད་རྟེན་ནི་མཎྜལ་བྱས་པའི་ཐ་ཚིག་ལ། དབུས་ནི་མཎྜལ་གྱི་ཕོ་བྲང་གི་དབུས་ལ་གཞག་པ་ནི་བྱིན་གྱིས་བརླབ་པ་དང༌། དབང་བསྐུར་བའི་ཕྱིར་གཞག་ཞེས་བྱ་བའི་ཐ་ཚིག་གོ །འདི་ནི་མ་གྲུབ་ན་སྦོགས་པའི་ཆོ་ག་སྟོན་ཏེ། ཅིའི་ཕྱིར་ཞེ་ན། ཇི་སྲིད་མཚན་མ་ཤིན་ཏུ་ནི། །སྐྱེ་འགྱུར་འབར་བའི་གནས་ཀྱང་རུང༌། ཞེས་པ་གསུངས་ཏེ། ཇི་སྲིད་ནི་མཚན་མ་སྤངས་པ་དང༌། མ་གྲོལ་བ་དེ་སྲིད་ཀྱི་ཐ་ཚིག་གོ །མཚན་མ་ནི་དངོས་པོ་སྟེ་བག་ཆགས་ལ། ཤིན་ཏུ་ནི་མང་པོའི་ཐ་ཚིག་སྟེ། སྐྱེ་འགྱུར་ནི། འཁོར་བར་སྐྱེ་བར་འགྱུར་བ་དང༌། ཉོན་མོངས་བ་སྐྱེ་བར་འགྱུར་པའི་ཐ་ཚིག་གོ །འབར་བ་སྟེ་ཡེ་ཤེས་དེ་མ་གྲུབ་ན་གཉེན་པོ་བསྒོམ་པའི་དོན་ཏོ། །གནས་ནི་ཐུགས་རྗེའི་གནས། སྙིང་རྗེའི་ཡུལ་ཡིན་པས་དེ་ལ་དམིགས་པའི་ཡུལ། གནས་ཞེས་སྨོས་སོ། །དེ་ཡང་ཅིའི་ཕྱིར་ཞེ་ན། ཏིལ་དང་ཡུངས་ཀར་འབྲས་རྣམས་དང༌། །ཞེས་གསུངས་ཏེ། ཉོན་མོངས་པའི་མཚན་མ་བསྲེག་པའི་ཕྱིར་དང༌། ཐམས་ཅད་ཞིར་གཞུག་པའི་ཕྱིར་དང༌། བདག་ཉིད་ཀྱི་ཁམས་གསུམ་རྣམ་པར་རྒྱལ་པའི་ཏིང་ངེ་འཛིན་ལ་བཞུགས་ནས། ཏིལ་དང་ཡུངས་ཀར་དང༌། འབྲས་དང༌། བུ་རམ་སྦྲང་རྩི་ལ་སོགས་པ་དང༌། ར་རྒྱ་མོའི་འོ་མ་དང༌། གུར་གུམ་གཉིས་བསྲེས་ཏེ། ཡམ་ཤིང་སོར་བཅུ་གཉིས་པ་ལ་བྱུགས་ནས། ཡ་ཐོག་མ་ཐོག་གཉིས་
སྦྲང་རྩིར་བྱུག་སྟེ། ཤི་བའི་མིང་དང་བསྲེས་ཏེ་སྤྱིན་སྲེག་བྱས་ན། ཤི་བདེ་ངན་སོང་ལས་ཐར་བའི་རྟགས་ནི་མེ་ལ་བལྟ་སྟེ། མེ་ལྕེ་མདོག་དཀར་བ་དང༌། གཡས་སུ་འབར་བ་དང༌། གྱེན་དུ་འབར་བ་དང༌། དྲི་མ་མེད་པ་དང༌། ཟླུམ་ལ་མི་འཕྲོ་བ་ནི་ངན་སོང་ལས་ཐར་པའི་རྟགས་སུ་སྟོན་པས་གསུངས་སོ། །ཡོན་ཏན་དང་སྐྱོན་རྣམས་ཀྱི་ནི་བདེ་སྟེ་བརྡ་སྤྲད་པར་སླའོ། །མ་གྲུབ་ན་སྤོགས་པའི་ཐབས་ཀྱི་ཆོ་ག་ངན་སོང་ལས་ཐར་བའི་དོན་བསྡུས་པ་བ་སྟན་ཟིན་ཏོ། །ད་ནི་རོ་བསྲེག་ལ་ཧོམ་སྨོས་ཏེ། རོ་ནི་རྒྱུ་དང་འབྲས་བུའི་ཚུལ་ཏེ། རྒྱུ་མ་རིག་པ་སྟེ། ཡང་དག་པའི་དོན་ལ་མགོ་རྨོངས་པའི་རྟོག་པ་གློ་བུར་བས། ཀུན་གཞིའི་སྒྲིབ་པ་ནི་རྒྱུའོ། །དེ་ཅིའི་ཕྱིར་ཞེ་ན། ནང་གི་ཉེ་བར་ལེན་པའི་ཕུང་པོ་འདི་ལེན་པའི་ཕྱིར་ན། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་པ་སྨོས་སོ། །ཅིའི་ཕྱིར་ཞེ་ན། རོ་ནི་ཤེས་པ་དང་བྲལ་བ་ལྟར་རྒྱུ་དང་འབྲས་བུ་ལ་མགོ་རྨོངས་པའི་ཕྱིར་རོ། །ཕྱིའི་རོ་ནི་འབྲས་བུའི་དོ་བོ་སྟེ། དབང་པོའི་ལྔའི་སྤྱོད་ཡུལ་དུ་ལས་དང་ཉོན་མོངས་པས་བསྐྱེད་པས་ཕུང་པོ་གདོས་པ་ཅན་དུ་སྣང་བའི་ཕྱིར་རོ། །ཧོམ་ནི་རྒྱ་གར་གྱི་ངེ་ལས་དྲངས་ནས་སྤྱིན་སྲེག་ཅེས་སྨོས་ཏེ། སྤྱིན་པ་ནི་ཐུགས་རྗེས་ཏེ་བདེ་བ་སྤྱིན་ལ། སྲེག་པ་ནི་ཕྲིན་ལས་རྣམ་པ་བཞིས་སྲེག་པའི་ཕྱིར་རོ། །དེ་ལ་རོའི་རྒྱུ་ནི་ནང་གི་སེམས་ཏེ། གཉེན་པོ་འཕགས་པའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་གྱིས་སྲེག་ལ། འབྲས་བུའི་རོ་ནི་འཇིག་རྟེན་གྱི་མེས་སྲེག་པའི་ཐ་ཚིག་གོ །དེ་བས་ན་ཁམས་གསུམ་གྱི་མཚན་མའི་རང་བཞིན་ཏེ། དངོས་པོ་གཞོམ་པའི་ཕྱིར་ནི། ཡང་དག་པའི་ཡེ་ཤེས་མཚོན་པར་བྱེད་པའི་འཇིག་རྟེན་གྱི་མེད་དང༌། ཆོས་ཀྱི་དབྱིངས་མཚོན་པར་བྱེད་པས་ཧོམ་ཁུང་དང༌། ཐབས་ཐུགས་རྗེ་མཚོན་པའི་ཤིང༌། ཏིང་ངེ་འཛིན་ལས་སྤྲུལ་པ་གཞན་ལ་འབྱུང་བ་མཚོན་པའི་ཐབས་མཆོད་པའི་རྫས་དང༌། བསྲེག་རྫས་དང༌། མི་ཤིས་པ་དད་པ་བསྐྱེད་པའི་ཕྱིར་ན། ཚོན་རྩི་རྣམ་པ་ལྔ་དང༌། དེ་མེད་ནའང་ལྕགས་རྣམ་པ་ལྔའམ། ཐ་མ་ནི་འབྲས་བུ་ཚོན་གྱིས་ཁ་དོག་བསྒྱུར་རོ། །ཉོན་མོངས་པ་རྣམ་པ་ལྔ་གཞོམ་པའི་ཐུགས་སརྦ་པིང་
ཀྱིས་བྱིན་གྱིས་བརླབ་པ་སྟོན་ཏོ། །དེ་ཅིའི་ཕྱིར་ཞེ་ན། ཁྲུ་བཞི་བ་ཡི་ཚད་དུ་ནི། །ཞེས་སྨོས་ཏེ། ཁྲུ་བཞི་བ་ནི། ཡེ་ཤེས་རྣམ་པ་བཞིས་སྐྱེ་རྒས་ན་འཆིའི་སྡུག་བསྔལ་སྦྱངས་པའི་ཕྱིར་ན་གྲུ་བཞི་པའོ་ཚད་དུ་ནི་ཞེས་པ་ནི། ཐབ་ཁུང་སོགས་གཅིག་གི་ཚད་ནི་ཁྲུ་བཞི་སྟེ། ཕྱིའི་ཚད་ནི་ཁྲུ་བཅུ་གཉིས་ཏེ། རྟེན་འབྲེལ་བཅུ་གཉིས་འཁོར་བ་ལུགས་ལས་བཟློག་པའི་དོན་ཏེ། ཁྲུ་བཅུ་གཉིས་པ། ཁ་གསུམ་བཅད་པའི་དབུས་མ་ཐབ་ཁུང་སྟེ། གྲུ་བཞི་ཞེས་སྨོས་པའི་དོན་ཏོ། །དེའི་ཚད་ཕྱི་མའི་འོག་མས་སྟོན་ཏེ། ཅིའི་ཕྱིར་ཞེ་ན། ཆོ་ག་བཞིན་དུ་ཁུང་བརྐོས། །ལ། །ཞེས་གསུངས་ཏེ། ཆོ་ག་ནི་རྣམ་པ་གཉིས་ཏེ། ནང་གི་ཟབས་དང༌། ཕྱི་རོལ་གྱི་རྣམ་པ་གཉིས་སོ། །དེ་ལ་ནང་གི་ཟབས་ནི། ཁུང་བརྐོ་བ་སྟེ། ཅིའི་ཕྱིར་ཞེན། ཁྲུ་གང་གི་ཡར་གྱེད་དེའི་ཕྱི་རོལ་སྨོས་སོ། །ཐབ་ཁུང་ལ་སོར་བརྒྱང་ནི་འཆད་པ་ལ་མུ་རན་དུ་བྱ། མེ་རི་ནི་དམར་པོར་བཏང་སྟེ། རྣམ་པར་ཐར་བ་བརྒྱང་ཀྱི་ཡེ་ཤེས་ཞལ་གདངས་པའི་ཐ་ཚིག་གོ །ཕྱི་རོལ་གྱི་སྣམ་བུའི་ནང་དུ་ཡང་ཁ་བཞིར་བཅད་དེ། ཕྲིན་ལས་རྣམ་བཞིའི་སྒོ་ནས་འགྲོ་བའི་དོན་མཛད་པའི་རྟགས་ཏེ། བཞིའི་ནང་མ་གསུམ་དུ་ཁ་བཅད་དེ། གཅིག་ལ་རྡོ་རྗེ་བ་བཏང་སྟེ། ཁ་ཁྱེར་གཅིག་ལ་སེམས་དཔའ་བཅུ་དྲུག །གཅིག་ལ་བསྐལ་བཟང་རྒྱལ་སྲས་བཅུ་དྲུག །གྲུ་ཆད་ཀྱི་ནང་གཉིས་ལ་མཆོད་པའི་ལྷ་མོ་བརྒྱང༌། བཞི་ཆ་གཅིག་ལ་མཆོད་པ་རྣམས་དང༌། དྲི་རེག་དང༌། པཱ་ཉྩ་རེ་ག་དང༌། སྒོ་བཞི་མུ་ཁྱུད་དང་བཅས་པའི་ས་བཅད་དོ། །དེའི་སུམ་ཆ་གཅིག་ཕྱིར་བཅད་དོ། །ཤིང་རྣམས་གཞག །བཞིའི་ཆ་ཐབ་ལྷག་ཁ་གཉིས་སུ་འཆད་དེ། གོང་མའི་སུམ་ཆ་ལ་ཕྱེད་པོ་དེ་ཡར་བསྣན་ལ། ཤིང་གི་སྣམ་བུ་ལ་གཞག །ཕྱེད་པོ་དེ་སུམ་ཆ་སུམ་གཉིས་སུ་བཏང་ལ། ཤིང་སྣམ་དང༌། ཉེ་བའི་སུམ་ཆ་གཅིག །མཆོད་སྣམ་སུམ་གཉིས། འཇིག་རྟེན་བའི་སྣམ་བུ་བཞི་ཆ་ཕྱེད་ནི་ཁ་གཉིས་སུ་བཏང་སྟེ། གཟའ་དང་རྒྱུ་སྐར་གྱི་སྣམ་བུའོ། །ཕྱི་མ་སྒོ་སྣ་མ་མོ། །དབུས་ཀྱི་ཐབ་ཁུང་ཐིག་བཞི་བཏབ་པའི་རེའུ་མིག་དགུར་བྱས་ལ། དབུས་སུ་རྣམ་པར་སྣང་མཛད་ཀྱི་ཕྱག་རྒྱ་འཁོར་ལོ་འཇོམས་བ་ལ་འབུར་དུ་
བཏོད་ནས་བྲི། འཇིག་རྟེན་ལས་འདས་པའི་སྣམ་བུ་གཉིས་ནི་སེམས་དཔའ་བསྐལ་བཟང་ཤིང་སྣམ་བར་དུ་བཅུག་པ་ནི། འཇིག་རྟེན་པ་ཕྲག་དོག་ཆེ་བའི་ཕྱིར་རམ། འཇིག་རྟེན་དང་འཇིག་རྟེན་ལས་འདས་པ་ངོ་ཤེས་པའི་ཕྱིར་གཞག །འཇིག་རྟེན་པའི་སྣམ་བུ་གཉིས་ནི། བར་མ་ཕྱོགས་སྐྱོང་བཅུ་དང་བཀྲ་ཤིས་བརྒྱང༌། ཐ་མ་གཙུག་ལག་ཁང་གི་སྲུང་མ་དང༌། གཟའ་དང་རྒྱུ་སྐར་དང༌། རྒྱལ་པོ་བཞི། དེ་རྣམས་བྲི་བའི་དགོས་ཆེད་ནི། བཅོམ་ལྡན་འདས་ཀྱི་བཀའ་སྲུང་དང༌། རང་གི་འཁོར་གྱི་གདུག་པ་ཞི་བར་བྱ་བའི་ཕྱིར་དང༌། འཇིག་རྟེན་པའི་མངོན་རྟོགས་སྟོན་པའི་ཕྱིར་བྲི། ད་ནི་མཆོད་པའི་རྒྱན་ཆས་སྟོན་ཏེ། ཅིའི་ཕྱིར་ཞེ་ན། བྱ་དང་བུམ་པ་གང་བ་གཞག །ཅེས་པ་དང༌། ཁུང་བུའི་དབུས་སུ་གཞག་བར་བྱ། །ཞེས་པའི་བར་ནི། འཁོར་བའི་ཉེ་གནས་ལ་ཕན་འདོགས་པའི་རྟགས་དངུལ་གྱི་བྱ་པོ་བཅུ་དྲུག་དང། ཆོས་ཀྱི་དབྱིངས་ཀྱི་ཡེ་ཤེས་ཀྱི་རྟགས་གསེར་གྱི་བུམ་པ་ལྔ་དང༌། ཐབས་དང་ཤེས་རབ་ཟུང་དུ་འབྲེལ་པའི་རྟགས་གཏོར་མ་དང༌། ཁམས་གསུམ་ཚིམ་པར་བྱ་བའི་ཕྱིར། བཟའ་བ་དང་བཅའ་སྣ་ཚོགས་པ་དང༌། བྱང་ཆུབ་ཀྱི་ཡན་ལག་ལམ་ཏོག་སྣ་ཚོགས་པ་དང༌། ཐུགས་རྗེ་རྒྱུན་མི་འཆད་པའི་ཕྲེང་བ་དང༌། ཁམས་གསུམ་གྱི་བླ་མར་གྱུར་པས་བླ་རེ་དང༌། ཉོན་མོངས་པའི་བདུད་ལས་རྒྱལ་བའི་རྟགས་རྒྱལ་མཚན་དང༌། ཏིང་ངེ་འཛིན་སྣ་ཚོགས་དང་ལྡན་པའི་རྟགས་དར་སྣ་ཚོགས་པ་དང༌། ཉོན་མོངས་པའི་ཚ་བས་གདུང་བ་ལས་བསིལ་བའི་གདུགས་དང༌། ཏིང་ངེ་འཛིན་ལ་ཤེས་པ་རྩལ་སྦྱོང་བ་དང༌། དམ་རྫས་དང་ལྡན་པར་བྱ་བ་སྟེ། སྔགས་དང་ཕྱག་རྒྱས་བྱིན་གྱིས་བརླབ་ཅིང༌། ཡེ་ཤེས་ཀྱི་འོད་ཟེར་དམིགས་ནས་བསྲེག་རྫས་དང༌། མཆོད་རྫས་ལ་སོགས་པ་ཀུན་ནི། འཕགས་པ་མཉེས་པར་བྱ་བ་དང༌། དངོས་གྲུབ་ཐོབ་པའི་རྟགས་སུ་ཁུང་བུའི་དབུས་སུ་གཞག །ད་ནི་རོ་བྱིན་གྱིས་བརླབ་ཅིང་རྒྱས་གདབ་པ་སྟོན་ཏེ། ཅིའི་ཕྱིར་ཞེ་ན། རོ་ལ་སྔགས་ཀྱིས་བཏབ་ནས་ཀྱང༌། །ཆུ་མཆོག་གིས་ནི་བཀྲུ་བར་བྱ། །ཞེས་པ་ནི། རོ་ནི་རྒྱུ་འབྲས་ཀྱི་ཚུལ་གོང་དུ་སྨོས་པའོ། །སྔགས་ནི་རིགས་རྣམ་པ་ལྔའི་སྐུ་བསྐྱེད་པ་དང༌།
སྙིང་པོ་དང༌། ཉེ་བའི་སྙིང་པོ་དང་ལྔ་སྟེ་བཅོ་ལྔའོ། །སྟོང་པར་བསྒོམ་པ་དང༌། རྡོ་རྗེ་བསྒོམ་པ་གཉིས་ཏེ་བཅུ་བཅུན་ནོ། །བཏབ་ནས་ཀྱང་ནི། ཕྱིའི་བཏབ་པ་ནི་ལུས་ལ་བཏབ་པ་དང༌། ནང་གི་བཏབ་པ་ནི་ཡིག་འབྲུ་སྟེ། དེ་རྣམས་སྤྲུལ་པ་རོལ་བ་སྟིམས་ནས་དངོས་པོ་མེད་པར་བསྒོམ་པའོ། །ཆུ་ནི་བུམ་པའི་ནང་གི་ཆུ་སྟེ། དྲི་ཞིམ་པོ་ལ་སོགས་པ་གཞུང་ནས་འབྱུང་བ་རྣམས་སྤྱར་རོ། །མཆོག་ནི་སྙིང་པོ་བཅུ་བདུན་གྱིས་བྱང་ཆུབ་སེམས་ཟླ་བའི་མཎྜལ་དུ་གྱུར་པར་བསྒོམ་པའོ། །བཀྲུ་བར་བྱ་བ་ནི་རྣམ་པ་གཉིས་ཏེ། ཕྱིའི་བཀྲུ་བ་བུམ་པའི་ཆུས་འཁྲུ་བ་དང༌། ནང་གི་བཀྲུས་ཏིང་ངེ་འཛིན་གྱི་འཕྲོ་འདུས་དག་པར་བྱེད་པའི་ཐ་ཚིག་གོ །བཟླས་པ་དྲི་ཡིས་བྱུག་པར་བྱ། །ཞེས་པ་ནི། ཏིང་ངེ་འཛིན་གྱི་བཟླས་པ་དང༌། ཡིག་འབྲུ་དང་འཕྲོ་འདུའི་བཟླས་པའོ། །དྲི་གུར་གུམ་ལ་སོགས་པས་ལུས་ལ་བྱུག་པ་དང༌། ཚུལ་ཁྲིམས་ཀྱི་དྲིས་བྱིན་གྱིས་བརླབས་པའི་ཐ་ཚིག་གོ །གོས་དང་རྒྱན་གྱིས་ཀླུབས་ནས་ཀྱང༌། །ཞེས་པ་ནི། གོས་ནི་སྔགས་མཁན་གྱི་ཆས་གོས་དང༌། རོའི་གོས་ནི་ཕྲིན་ལས་རྣམ་པ་བཞིའི་ལས་གང་བྱེད་པའི་ཚུལ་དུ་བྱས་ལ། རྒྱན་ནི་སྐུ་བྲེའུ་ལྡིར་གྱི་ཅོད་བན་གྱི་རྒྱན་ལ་སོགས་པ་བཏགས་པ་དང། ཀླུ་བས་ནི་མང་བ་དང་མཛེས་པའི་ཐ་ཚིག་གོ །ད་ནི་རོལ་སྔགས་ཀྱིས་བྱིན་གྱིས་བརླབ་ཅིང་གདགས་པའི་དོན་ཏེ། ཅིའི་ཕྱིར་ཞེ་ན། སྔགས་བྲིས་པ་ནི་གདགས་པར་བྱ། །ཞེས་འབྱུང་སྟེ། སྔགས་ནི་ལྷ་སོ་སོའི་ཡིག་འབྲུའོ། །བྲིས་པའི་ནི་གྲོགས་འམ་ཤོག་ཤོག་ལ་བྲིའོ། །གདགས་པ་ནི་ལུས་ལ་གདགས་པའོ། །དེའི་གནས་གནག་ཡིན་ཞེ་ན། སྙིང་ག་ལྐོག་མ་ཁ་ཕྱོགས་དང༌། །དཔྲལ་བ་མཛོད་སྦུ་རྣ་བ་གཉིས། །མགོ་བོ་གཙུག་ཕུད་དཔུང་པ་གཉིས། །སྣ་དང་རྐེད་པ་པུས་མོ་ཕོལ། །ལོང་བུ་སྣ་ཡི་རྩེ་མོ་དང༌། །མི་གཉིས་དང་ནི་གསང་བའི་གནས། །དབང་པོ་རྣམས་ཀྱི་གནས་དག་ཏུ། །ཞེས་གསུངས་ཏེ། དེ་བཞིན་གཤེགས་པའི་ཡང་དག་པའི་ཡེ་ཤེས་ཀྱིས། མཚན་མ་རྣམས་གཞོམ་པར་བྱ་བའི་ཕྱིར། དེའི་གནས་ནི་བཅུ་བདུན་ཡོད་དེ། རྟེན་འབྲེལ་བཅུ་གཉིས་དང༌། དེ་ལས་བྱུང་བ་ལྔ་སྟེ། དེ་རྣམས་ནི་ཐུགས་ཀྱི་ངོ་བོར་སྤྱར་
བའི་ཕྱིར་རོ། །དེ་མཚོན་བའི་གནས་ནི་ལུས་ཏེ། ཟིའི་ཕྱིར་ཞེ་ན། སྔོན་གྱི་བག་ཆགས་ཀྱིས་བསྐྱེད་པའི་རང་བཞིན་ཡིན་པས་སེམས་རྟེན་པའི་གཞི་བྱེད་བས། ལུས་ཐམས་ཅད་ཀྱི་རང་བཞིན་ནི་མགོ་པོ་སྟེ། དེ་བཞིན་དུ་མ་རིག་པ་ནི་ཉོན་མོངས་པ་ཐམས་ཅད་ཀྱི་རང་བཞིན་ཏེ། ཅིའི་ཕྱིར་ཞེ་ན། མ་རིག་པ་མི་ཤེས་པའི་དབང་གིས་དེ་བཞིན་ཉིད་དང༌། ཡང་དག་པའི་མཐའ་དང༌། རྒྱུ་དང་འབྲས་བུ་ལ་མགོ་རྨོངས་པའི་ཕྱིར་རོ། །དེ་འཇོམས་པའི་སྔགས་ནི། རིན་ཆེ་མེ་ཏོག་གི་ཉེ་བའི་སྙིང་པོ་སྟེ། ཨོཾ་སརྦ་བིད་ཧཱུཾ་ཕཊ། དེ་མགོ་ལ་གདགས་ཤིང་བྱིན་གྱིས་བརླབས་པ་ཚུལ་བཞིན་བྱའོ། །དཔུང་པ་ནི་ལས་ཀྱི་འདུ་བྱེད་ལ་རྩོལ་བར་བྱེད་པའི་རྒྱུ་ཡིན་པས་ན། དཔེ་དེ་དང་འདྲ་བར་མ་རིག་པ་མགོ་རྨོངས་པས་ན། ཕྱིའི་ཡུལ་རྣམས་ལ་འདོད་ཆགས་ལ་སོགས་པའི་ཉོན་མོངས་བ་སྐྱེ་བ་ནི་མངོན་པར་འདུ་བྱེད་པའི་ཕྱིར་ན་འདུ་བྱེད་པའོ། །དེ་སྦྱོང་བའི་ཕྱིར་ཤཱཀྱ་ཐུབ་པའི་ཉེ་བའི་སྙིང་པོ་སྟེ། ཨོཾ་སརྦ་བིད་ཨཿ་དཔུང་པ་ལ་གདགས་ཏེ་གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །སྙིང་ནི་ཁྱད་པར་དུ་ཡང་ཤེས་པའི་རང་བཞིན་གནས་པའི་ཡིན་ཏེ། དེ་བཞིན་དུ་རྣམ་པར་ཤེས་པ་ནི། འདུ་བྱེད་ཀྱི་རྐྱེན་གྱིས་སོ་སོའི་སྤྲུལ་པ་རྣམ་པར་རིག་ཅིང་མ་འདྲེས་པར་མཆོད་པ་དང༌། བདག་གིར་འཛིན་པའི་ཕྱིར་ཏེ། དེ་འཇོམས་པའི་ཕྲག་རྒྱན་ནི་རྣམ་པར་སྣང་མཛད་ཀྱིས་ཉིང་པོ་སྟེ། ཨོཾ་ཤོ་དྷ་ནི་ཤོ་དྷ་ནི་སརྦ་པཱ་པཾ་བི་ཤོ་དྷ་ནི། ཤུདྡྷེ་བི་ཤྡྡྷེ་སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱཧཱ། སྙིང་གར་བཏགས་ནས་བྱིན་གྱིས་བརླབ་པའི་དོན་ཏོ། །རྐྱེན་པ་ནི་དང་པོ་ཕུང་པོ་སྐྱེ་བའི་རྒྱུ་བྱེད་པའི་རྟེན་ལྟེ་བའི་ཐད་ཀ་ནས་མ་ཟོས་པའི་དྲོད་ཀྱིས་རེག་པས་འཚོ་བར་བྱེ་དཔས་ན་ལུས་བྱིན་གྱིས་བརླབ་བོ། །དེ་བཞིན་དུ་རྣམ་པར་ཤེས་པའི་རང་བཞིན་ལ་ལས་ཀྱི་བཅག་ཞགས་བསྒོས་ཤིང་སྨོན་པས་ལྷན་ཅིག་སྐྱེས་པའི་ཉེ་བར་ལེན་པའི་ཕུང་པོ་ནི་མིང་དང་གཟུགས་འདི་འགྲུབ་སྟེ། དེ་འཇོམས་པའི་ཕྱག་རྒྱ་ནི་རྣམ་པར་སྣང་མཛད་ཀྱི་སྐུ་བསྐྱེད་པའི་ས་བོན་ཏེ། ཨོཾ་སརྦ་བིད་ཨོཾ། རྐེད་པར་བྱིན་གྱིས་བརླབ་ཅིང་གདགས་པའི་དོན་ཏོ། །རྣ་བའི་དབང་པོ་གྲོ་ག་གཅུས་ཏེ་བཅད་པ་འདྲ་བ་ནི་རྣམ་
པར་ཤེས་པ་སྐྱེ་ཞིང་འབྱུང་བའི་གཞི་བྱེད་ལ། དཔེར་ན་རྒྱུ་མིང་དང་གཟུགས་ལ་བརྟེན་པའི་དབང་པོ་རྣམས་ནི་སྐྱེ་མཆེད་དྲུག་སྟེ། དེ་འཇོམས་པ་ནི། ཀུན་རིག་གི་ཉེ་བའི་སྙིང་པོ་སྟེ། ཨོཾ་སརྦ་བིད་སརྦ་ཨཱ་བར་ཎ་བི་ཤོ་དྷ་ཡ་ཧ་ན་ཧཱུཾ་ཕཊ། རྣ་བ་གཉིས་ལ་གདགས་ཤིང་གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །སྣའི་དབང་པོ་ཟངས་མའི་མོ་ཁབ་གཤིབས་པ་དང་འདྲ་བ་སྟེ། ཡུལ་ལ་བརྟེན་ནས་རྣམ་པར་ཤེས་པ་བྱུང་ནས་ཡུལ་ཉམས་སུ་མྱོང་བའི་དོན་ཏེ། དེ་བཞིན་དུ་ཡུལ་དང་དབང་པོ་དང༌། རྣམ་པར་ཤེས་པ་གསུམ་འདུས་ནས། ཉམས་སུ་མྱངས་ནས་ཕྲད་པ་ནི་རེག་པའོ། །དེ་འཇོམས་པ་ནི་མེ་ཏོག་ཆེར་རྒྱས་ཀྱི་ཉེ་བའི་སྙིང་པོ་སྟེ། ཨོཾ་སརྦ་བིད་ཏྲ་ཐ། སྣ་ལ་བཏགས་ལ་བྱིན་གྱིས་བརླབས་ནས་གཉིས་སུ་མེད་པར་བྱ་བའི་དོན་ཏོ། །དཔྲལ་བའི་ངོ་བོ་ནི་བཀྲག་མདངས་འབྱུང་པའི་རང་བཞིན་གྱི་གཞི་སྟེ། དེ་བཞིན་དུ་རེག་པས་ཡུལ་དང་ཕྲད་པར་གྱུར་པའི་ཚེ། ཚེར་བས་ཡུལ་གྱི་བདེ་སྡུག་ཉམས་སུ་མྱོང་བ་ནི་ཚོར་བ་སྟེ། དེ་འཇོམས་པའི་ཕྱག་རྒྱ་ནི། མེ་ཏོག་ཆེར་རྒྱས་ཀྱི་སྙིང་པོས་ཏེ། ཨོཾ་སརྦ་བིད་ཏྲ་ཐ། དཔྲལ་བར་བཏགས་ནས་བྱིན་གྱིས་བརླབ་པའི་དོན་ཏོ། །ཁ་ནི་ཟས་ལ་སོགས་པ་ལ་སྲེད་པའི་རང་བཞིན་གྱི་རྒྱུ་བྱེད་པས་ན། དེ་བཞིན་དུ་ཚོར་བས་ཡུལ་གྱི་བདེ་སྡུག་ཉམས་སུ་མྱོང་ནས་ཕུང་པོ་ལྔ་ལ་མངོན་པར་ཞེན་པས་ནི་སྲེག་པའོ། །དེ་འཇོམས་པའི་ཕྱག་རྒྱ་ནི་ཤཱཀྱ་ཐུབ་པའི་སྙིང་པོ་སྟེ། ཨོཾ་སརྦ་ཨ་པ་ཡ་བི་ཤོ་དྷ་ཡ་ཧཱུཾ་ཕཊ། ཤཱཀྱ་ཐུབ་པའི་སྙིང་པོ་སྙིང་གར་བཏགས་ལ་བྱིན་གྱིས་བརླབ་པའི་དོན་ཏོ། །པུས་མོ་ནི་བརྐྱང་བ་དང༌། བསྐུམ་པའི་རྒྱུ་བྱེད་དེ། པུས་ཚིགས་ཏེ། དེ་བཞིན་དུ་སྲེད་པས་ཡུམ་གྱི་རྣམ་པར་ཤེས་པ་ལ་ཤེས་པ་ལ་འཕེལ་ཞིང་འབྱུང་བའི་རྐྱེན་གྱིས་ལེན་པ་སྟེ། མེ་ཏོག་ཐུ་བ་ལྟ་བུ་སྟེ། ཡུལ་ལ་བདག་ཏུ་ཞེན་པའི་དོན་ཏོ། །དེ་འཇོམས་པ་ནི་ངན་སོང་སྦྱོང་བའི་སྐུ་བསྐྱེད་པའི་སྙིང་པོ་སྟེ། ཨོཾ་སརྦ་བིད་སྭའ་བུས་མོ་གཉིས་ལ་གཏགས་ལ་གཉིས་སུ་མེད་པ་བྱིན་གྱིས་བརླབ་པའི་དོན་ཏོ། །རྐང་བའི་བོལ་ནི་ཕུང་པོ་འདྲེན་ཅིང་མགྱོགས་པར་བྱེད་པའི་གཞི་བྱེད་པ་སྟེ། དེ་བཞིན་དུ་ཡུལ་ལ་ལེན་པས་བདག་ཏུ་གཟུང་བས་ལས་ཀྱིས་མའི་
མངལ་དུ་འཕངས་ནས། སྲིད་པའི་གཞི་བསྒྲུབ་པའི་ས་བོན་འབྱིན་པས་སྲིད་པའོ། །དེ་འཇོམས་པ་ནི་རིན་ཆེན་མེ་ཏོག་གི་སྐུ་བསྐྱེད་པའི་སྙིང་པོ་སྟེ། ཨོཾ་སརྦ་བིད་ཨ། རྐང་པའི་བོལ་གཉིས་ལ་བཏགས་ནས་གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །གསང་བའི་གནས་ནི་སེམས་ཅན་སྐྱེ་བའི་རྒྱུ་ས་བོན་འབྱུང་བའི་གནས་ཏེ། དེ་བཞིན་དུ་སྲིད་པས་སྲིད་ཅིང་རྟས་པར་བྱེད་པས་ཕུང་པོ་སྨིན་ཅིང་མའི་མངལ་ནས་བྱུང་ནས་ཕྱིར་འབྱུང་བ་ནི་སྐྱེ་བའོ། །དེ་འཇོམས་པ་ནི་རྡོ་རྗེའི་བསྒོམ་པ་སྟེ། ཨོཾ་བྷ་གསང་བའི་གནས་སུ་གདགས་ཏེ། གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །གཙུག་ཕུད་ནི་རྒས་པའི་རྟགས་ཏེ། ཅིའི་ཕྱིར་ཞེ་ན། སྐྲ་དཀར་པོར་གྱུར་པའི་རྟགས་སོ། །དེ་བཞིན་དུ་སེམས་ཅན་རྣམས་ལས་ཀྱིས་རབ་ཏུ་བསྐྱེད་ནས། ཕུང་པོ་སྨིན་ཅིང་མཐར་ཐུག་པའི་རྒས་པ་སྟེ་དེ་བདག་པོའོ། །དེ་འཇོམས་པ་ནི་མེ་ཏོག་ཆེར་རྒྱས་ཀྱི་སྐུ་བསྐྱེད་པའི་སྙིང་པོ་སྟེ། ཨོཾ་སརྦ་བིད་ཏྲ་ཐ། གཙུག་ཕུད་དུ་བཏགས་ཏེ་གཉིས་སུ་མེད་པར་བྱིན་གྱིས་བརླབ་བོ། །ལྐོག་མ་ནི་དབུགས་ཕྱི་ནང་གཉིས་སུ་རྒྱུ་བའི་རྟེན་སྲོག་གི་གཟུངས་ཡིན་པས་དེ་བཞིན་དུ་དང་པོ་སྐྱེ་བའི་སྐྱེ་བའི་རྐྱེན་གྱིས་རྒས་ནས་ཁམས་རབ་ཏུ་འགྱུར་ནས། ནད་ཀྱི་རྣམ་པ་སྣ་ཚོགས་ཕུང་པོ་རྣམ་པར་མི་བཟོད་པའི་སྡུག་བསྔལ་སྣ་ཚོགས་པས་གཟིར་ཏེ། འཇིག་པ་ནི་འཆི་བའོ། །དེ་འཇོམས་པའི་ཕྱག་རྒྱ་ནི། རིན་ཆེན་མེ་ཏོག་གི་སྙིང་པོ་སྟེ། ཨོཾ་ཤོ་དྷ་ནི་ཤོ་དྷ་ནི་སརྦ་ཨ་པ་ཡན་སརྦ་སྭ་རྒྱེ་བྷྱ་ཧཱུཾ། རིན་ཆེན་མེ་ཏོག་གི་སྙིང་པོ་སྟེ། ཀློག་མར་བཏགས་ལ་བྱིན་གྱིས་བརླབ་བོ། །ལོང་བུ་ནི། རྐང་པའི་ཚིགས་གནས་པའི་གཞི་སྟེ། དེ་བཞིན་དུ་རབ་ཏུ་འཆིང་བར་མྱོས་ཏེ། སེམས་ཅན་མངོན་པར་ཆགས་པ་དང་བཅས་ཏེ། གང་གིས་སེམས་རབ་ཏུ་གདུང་བའི་མྱ་ངན་ནོ། །དེ་འཇོམས་པའི་ཕྱག་རྒྱ་ནི་ཤཱཀྱ་ཐུབ་པའི་སྐུ་བསྐྱེད་པ་སྟེ། ཨོཾ་སརྦ་བིད་ཧཱུཾ། ལོང་བུ་ལ་བཏགས་ལ་གཉིས་སུ་མེད་པར་བྱིན་གྱིས་བརླབ། མིག་ནི་ཡུལ་སྣ་ཚོགས་པ་མཐོང་བའི་རྒྱུ་མིག་གི་དབང་པོ་ཆུ་དང་བ་ལྟ་བུ་སྟེ། དེ་བཞིན་དུ་མྱ་ངན་གྱི་སེམས་རབ་ཏུ་གདུངས་ཏེ་ཤིན་ཏུ་མྱོས་ཏེ། ཚིག་
རྣམ་པ་སྣ་ཚོགས་སུ་སྨྲེ་སྔགས་འདོན་པ་ནི་སྨྲེ་སྔགས་འཇོམས་པའི་ཕྱག་རྒྱ་ནི་སྟོང་པར་བྱིན་གྱིས་བརླབ་པའི་སྔགས་ཏེ། ཨོཾ་ཤ་མིག་ལ་བཏགས་ལ་བྱིན་གྱིས་བརླབ་བོ། །མཛོད་སྤུ་ནི་ངོའི་བཀྲག་སྐྱེ་བའི་གནས་ཏེ། དཔེ་དེ་དང་འདྲ་བར་ནི། ནང་གི་རྣམ་པར་ཤེས་པའི་ཚོགས་ལྔ་དང༌། ལྷན་ཅིག་ཏུ་སྡུག་བསྔལ་སྣ་ཚོགས་མྱོང་སྟེ་རབ་ཏུ་ཉོན་མོངས་པས་གཟིར་བ་ནི། སྡུག་བསྔལ་གསུམ་དང་རྒྱུད་ཀྱི་རྒྱུ་སྟེ། དེ་འཇོམས་པའི་ཐབས་ཀྱི་ཕྱག་རྒྱ་ནི། ངན་སོང་སྦྱོང་བའི་ཉེ་བའི་སྙིང་པོ་སྟེ། ཨོཾ་སརྦ་བིད་ཧཱུཾ། མཛོད་སྤུ་ལ་བཏགས་ལ་གཉིས་སུ་མེད་པར་བྱིན་གྱིས་བརླབ་བོ། །སྣའི་རྩེ་མོ་ནི། སྣ་ནི་རྣམ་པར་ཤེས་པ་སྐྱེ་བའི་རྒྱུ་བྱེད་དེ། དཔེ་དེ་དང་འདྲ་བར་སྡུག་བསྔལ་གྱིས་སེམས་གཟིར་ཅིང་ཉོན་མོངས་པའི་ཚེ། ཡིད་མི་བདེ་བའི་འཁྲུལ་པ་སྣ་ཚོགས་ཉམས་སུ་མྱོང་བར་གྱུར་ནས། ཉོན་མོངས་པའི་སྡུག་བསྔལ་སྣ་ཚོགས་པས། རང་གི་སེམས་གཟིར་ཅིང་ཡིད་འཁྲུལ་པ་ནི་ཡིད་མི་བདེ་བའོ། །དེ་འཇོམས་པའི་ཕྱག་རྒྱ་ནི་ངན་སོང་སྦྱོང་བའི་སྙིང་པོ་སྟེ། སྣའི་རྩེ་མོ་ལ་བཏགས་ལ་གཉིས་སུ་མེད་པར་བྱིན་གྱིས་བརླབ་བོ། །སྙིང་པོ་བཅུ་བདུན་དུ་སྨོས་པ་ནི། སྟོང་པར་བསྒོམ་པ་རིག་པའི་ཡེ་ཤེས་སོ། །དབྱིངས་དང་ཡེ་ཤེས་ཀྱི་ཁྱད་པར་ལས། རིགས་ལྔའི་སངས་རྒྱས་འབྱུང་བའི་རྒྱུ་ཡིན་པའི་ཕྱིར་ཡང་སྨོས་སོ། །སེམས་ཅན་ཕྱི་གཟུང་བའི་ཡུལ་མེད་པ་ལ། ཡུལ་དུ་ལྟ་བའི་གཉེན་པོ་ནི། སྟོང་པར་བསྒོམ་པ་སྨོས་ལ། ནང་འཛིན་པའི་སེམས་མེད་པ་ལ་བདག་ཏུ་ལྟ་བའི་གཉེན་པོར་ནི་རྡོ་རྗེ་བསྒོམ་པ་སྨོས་སོ། །ཕྱི་ལ་བཅོ་ལྔ་ཡོད་བ་ནི་རྣམ་པ་གསུམ་དུ་བསྡུས་ཏེ། ཅིའི་ཕྱིར་ཞེ་ན། དེ་ལྟར་གཞན་དུ་ཡི་གེ་སྔགས། །ཞེས་གསུངས་ཏེ། དེ་ལྟར་གོང་གི་ཡིག་འབྲུ་དགོད་པའི་བྱེ་བྲག་ལ་བྱ་བ་ཡིན་ལ། གཞན་དུ་ནི་འགྲོ་བ་གཞན་གྱི་དོན་ཆེད་དུ་འདི་ལྟར་དུ་ཡང་སྤྱར་བ་ཞེས་པའི་ཐ་ཚིག་སྟེ། ཅིའི་ཕྱིར་ཞེན། ཡི་གེ་ནི་མཚོན་པར་བྱེད་པའི་རྒྱུ་བྱང་ཆུབ་ལ་བྲི་བར་བྱེད་པ་ཡིན་ལ། སྔགས་ནི་རིག་པའི་ཁྱད་པར་དུ་བ་སྟན་པ་ཡིན་ཏེ། དེ་ཡང་རྣམ་པ་གསུམ་སྟེ། བྱང་ཆུབ་ཀྱི་སེམས་རྟོགས་པའི་ཁྱད་པར་ལས་ནི་སྙིང་པོ་རྣམ་པ་ལྔར་བ་སྟན་ལ། བྱང་ཆུབ་
སེམས་ཀྱི་འབྲས་བུ་བླ་ན་མེད་པ་ཐོབ་ཅིང༌། སྤྱིན་པའི་རྒྱུ་བྱེད་པས་ཉེ་བའི་སྙིང་པོ་སྔར་བ་སྟན་ལ། འབྲས་བུ་ངོ་བོར་གཞག་པའི་ཕྱིར་ནི། སྐུ་བསྐྱེད་པ་ལྔ་བ་སྟན་ལ། དེ་ལ་སྙིང་པོ་ནི། རྒྱུའི་དོན་ཏོ། །ཉེ་བའི་སྙིང་པོ་ནི་རྐྱེན་སྙིང་པོ་འཕགས་པའི་ཡེ་ཤེས་ཀྱི་དོན་ཏོ། །སྐུ་བསྐྱེད་པའི་འབྲས་བུ་བླ་ན་མེད་པ་འགྲོ་བ་ལ་བ་སྟན་པའི་ཐ་ཚིག་གོ །དེ་ལ་སྙིང་པོ་བྱང་ཆུབ་ཀྱི་སེམས་རྒྱུ་རྣམ་པ་ལྔས་ནི་ངན་སོང་རྒྱུས་ཉོན་མོངས་པ་རྣམ་པ་ལྔ་ནི་ངན་སོང་གི་ཉོན་མོངས་པ་རྣམ་པ་ལྔ་འཇོམས་པའི་ཕྱག་རྒྱའོ། །རྐྱེན་གཉེན་པོ་ཡེ་ཤེས་ཀྱི་བརྩོན་འགྲུས་ཉེ་བའི་སྙིང་པོ་རྣམ་པ་ལྔ་ནི། ངན་སོང་དུ་སྐྱེ་བའི་ལམ་རྒྱུད་ལྔ་འཇོམས་པའི་དོན་ཏོ། །སྐུ་བསྐྱེད་པ་རྣམ་པ་ལྔས་ནི། ངན་སོང་གི་རྟེན་ཕུང་པོ་རྣམ་པ་ལྔ་བཤིག་ཅིང་འཇོམས་པའི་ཐ་ཚིག་གོ །དེ་ཡང་ཅིའི་ཕྱིར་ཞེ་ན། མཆོག་ཏུ་དགེ་བ་རྣམ་གཞག་གོ །ཞེས་གསུངས་ཏེ། མཆོག་ནི་ཐུགས་ཀྱི་ཡིག་འབྲུ་རྣམས་ལ་བྱ་སྟེ། ཅིའི་ཕྱིར་ཞེ་ན། ཡོན་ཏན་གྱི་མཆོག་ཏུ་གྱུར་པའི་ཕྱིར་རོ། །དགེ་བའི་ཐབས་ཏེ་གོང་དུ་གསུངས་པ་ལྟར། ངན་སོང་གི་རྒྱུ་ལམ་དང་རྟོག་པ་བཅོམ་ནས་དེ་དགེ་བ་ལ་དགོད་པའི་ཐ་ཚིག་གོ །དེ་བས་ན་གཞག་ཅེས་སྨོས་པའི་ཕྱིར་རོ། །སྔགས་ཀྱི་ཡིག་འབྲུ་བཏགས་པའི་དོན་བ་སྟན་ཟིན་ཏོ། །ད་ནི་རོ་ཤིང་སྟེང་དུ་གཞག་པའི་དོན་ཏེ། ཅིའི་ཕྱིར་ཞེ་ན། དེ་ནས་ངན་སོང་སྦྱོང་བའི་ཕྱིར་ཞེས་སྨོས་སོ། །དེ་ནས་ནི་སྐབས་ཀྱི་རྟིང་ཐོགས་སོ། །ངན་པ་ནི་ཉོན་མོངས་པ་སྟེ་རྒྱུའོ། །སོང་བ་ནི་འབྲས་བུ་སྟེ་ཁམས་གསུམ་དུ་འཁོར་བའོ། །སྦྱོང་བ་ནི་རྒྱུ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྤྱང་བ་དང༌། རྐྱེན་གཉེན་པོས་འཕགས་པའི་ཡེ་ཤེས་ཀྱི་འཕྲོ་འདུས་སྤྱང་བ་དང༌། ངན་སོང་གི་འབྲས་བུ་འོད་ཟེར་གྱི་ཕྲེང་བས། སྐུའི་ས་བོན་གྱིས་སྤྱང་བ་དང་གསུམ་མོ། །ཅིའི་ཕྱིར་ཞེ་ན། སྟན་དང་བཅས་པས་དེ་དབུས་སུ། །གཞག་པ་ཉིད་དུ་བྱ་བ་ཡིན། །ཞེས་གསུངས་ཏེ། སྟན་ནི་རྣམ་བ་གཉིས་ཏེ། ཕྱི་རོལ་དང་ཆོས་མཐུན་པར་བྱ་བའི་ཕྱིར་ན། ཤིང་གི་སྟེང་དུ་པདྨ་འདབ་མ་བརྒྱང་པ་བྱ་བ་དང༌། ཏིང་ངེ་འཛིན་དང་འབྲེལ་བའི་ཕྱིར་ནི། པཾ་ལས་པདྨ་འདབ་མ་བརྒྱང་པ་མཾ་ལས་ཉི་མའི་དཀྱིལ་འཁོར་ལ་སོགས་པའི་ཏིང་ངེ་འཛིན་གྱིས་བསྒོམ་པའི་ཐ་ཚིག་གོ །བཅས་ཞེས་བྱ་བ་ནི། སྟན་སྟེང་དུ་གཞག་པའི་ཐ་
ཚིག་གོ །དབུས་ནི་ཕོ་བྲང་དཀྱིལ་འཁོར་དུ་ཁྱེར་བའི་དོན་ཏོ། །གཞག་པ་ནི་དེ་ཉིད་དུ་སྟན་ལ་གཞག་པར་བྱ་བའི་དོན་ཏོ། །རོ་ཉིད་ཀྱང་སྙིང་པོ་ལྔ་བཀོད་པས་ནི་ཉོན་མོངས་པ་རྣམ་པ་ལྔ་དང་བྲལ་ཏེ། ཡེ་ཤེས་རྣམ་པ་ལྔར་བསྒོམས་ལ། ཉེ་བའི་སྙིང་པོ་རྣམ་པ་ལྔར་བཀོད་པས་ནི། ལམ་རྣམ་པ་ལྔ་སྦྱངས་ཏེ། རིགས་རྣམ་པ་ལྔར་བསྐྱེད་པ་དང༌། སྐུ་བསྐྱེད་པ་རྣམ་པ་ལྔ་བསྐྱེད་པས་ནི་ངན་སོང་གི་རྟེན་ཕུང་པོ་ལྔ་བཅོམ་ནས། རིན་པོ་ཆེ་ལྔའི་མཆོད་རྫས་སུ་གྱུར་བའམ། རྣམ་པར་གྲོལ་བའི་ཕུང་པོ་ལྔར་གྱུར་པར་བསྒོམས་ནས་བྱ་བ་ཡིན་ཞེས་སྨོས་སོ། །ད་ནི་གོས་ལ་སྔགས་ཀྱིས་གདབ་ཅིང་མེ་སྦར་བ་སྟོན་ཏེ། དེ་ནས་སྔགས་འཆང་སྔགས་ཀྱིས་ནི། །བཏབ་པའི་གོས་ཀྱིས་གཡོགས་པར་བྱ། །ཞེས་གསུངས་ཏེ། དེ་ནས་ནི་སྐབས་ཀྱི་རྟིང་ཐོགས་སོ། །སྔགས་འཆང་ནི་སྒྲུབ་པ་པོ་ལས་རྡོ་རྗེའོ། །སྔགས་ནི་གཉེན་པོ་ཡེ་ཤེས་ཀྱི་འོད་ཟེར་གོས་ལ་འཕྲོ་བའོ། །བཏབ་པ་ནི་གོས་ལ་བཏབ་པའོ། །རིགས་ལྔའི་ཡིག་འབྲུས་རིགས་དྲུག་ཁ་དོག་རྣམ་པ་ལྔར་བྱིན་གྱིས་བརླབས་པའི་ཐ་ཚིག་གོ །གཡོགས་པ་ནི་རོ་ལ་གཡོགས་པའོ། །ད་ནི་མེ་སྦར་བ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་བྱིན་ཟ་དགེ་བར་བ་སྦར་ལ། །ཞེས་གསུངས་ཏེ། དེ་ནས་ནི་སྐབས་ཀྱི་རྟིང་ཐོགས་སོ། །བྱིན་ཟ་ནི་ཡེ་ཤེས་ཀྱི་ཞལ་ཏེ། སྲེག་ཁང་གཞལ་ཡས་ཁང་ངོ༌། །ཅིའི་ཕྱིར་ཞེ་ན། ཡེ་ཤེས་ཀྱིས་ཉོན་མོངས་པ་ཟད་ཅིང་སྟོངས་པར་བྱེད་པའི་ཐ་ཚིག་གོ །དགེ་བ་ནི་མི་དགེ་བ་འཇོམས་པར་བྱེད་པའི་གཞི་ཡིན་ལ། སྦར་བ་ནི་ཤིང་ལ་མེ་སྦར་བའི་ཕྱིར་ཏེ། ཅིའི་ཕྱིར་ཞེ་ན། མེ་ལྕེ་སྟོང་གིས་དཀྲིས་ཤིང་འབར་བའི་ལུས། །ཞེས་གསུངས་ཏེ། དེ་ལ་མེ་ནི་ཡེ་ཤེས། ལྕེ་ནི་ཕྲིན་ལས། སྟོང་པ་ནི་སྤྲུལ་པ། དཀྲིས་པ་ནི་ཐུགས་རྗེས་འགྲོ་བའི་དོན་ལ་དཀྲིས་ཤིང་འབྲེལ། འབར་བ་ནི་རང་བཞིན། ལུས་ནི་ལྷ་ཡེ་ཤེས་སེམས་དཔའི་ལུས་སུ། བདག་དམ་ཚིག་སེམས་དཔའ་བསྒོམ་ཞིང༌། གཉིས་སུ་མེད་པར་བྱིན་གྱིས་བརླབ་པའི་ལུས་སོ། །དེ་ནས་སྔགས་པས་མཆོད་རྫས་ནི་གཡོན་དུ་གཞག་བསྲེག་རྫས་ནི་གཡས་སུ་གཞག་སྟེ། མེ་ལྷ་ཡེ་ཤེས་སེམས་དཔའ་སྤྱན་དྲངས་ཏེ། མཆོད་པ་སྤྱིན་སྲེག་ནས་འབྱུང་བ་བཞིན་བྱའོ། །ད་ནི་མཎྜལ་གྱི་ལྷ་སྤྱན་དྲངས་པ་སྟོན་ཏེ། ཅིའི་ཕྱིར་ཞེ་ན། དེ་བཞིན་
གཤེགས་སོགས་དེ་ལྟར་སྤྱན་དྲངས་ལ། །ཞེས་གསུངས་ཏེ། དེ་ནི་མ་ནོར་བའི་ཆོས་ཉིད་དོ། །བཞིན་ནི་ཡེ་ཤེས་ཀྱིས་ཕྱིན་ཅི་མ་ལོག་པར་རྟོགས་པའོ། །གཤེགས་པ་ནི་དབྱིངས་ཏེ། ཡེ་ཤེས་ཀྱི་ཁྱད་པར་ལས་རིགས་ལྔའི་སངས་རྒྱས་སུ་འགྲོ་བའི་དོན་ལ་གཤེགས་པའོ། །སོགས་ནི་འཁོར་དང་བཅས་པའོ། །དེ་ལྟར་མེ་ལ་བྱ་བའི་ཐ་ཚིག་གོ །སྤྱན་དྲང་བ་ནི། རང་བཞིན་གྱི་མཎྜལ་གྱི་འཕགས་པ་རྣམས་སྤྱན་དྲངས་ལ་བདག་གི་ཏིང་ངེ་འཛིན་བསྐྱེད་པ་ནི། ཆུ་དང་འོ་མ་འདྲེས་པ་ལྟར་གྱུར་ནས། ཡེ་ཤེས་ཀྱི་ཐབ་ཁུང་དུ་རིམ་པར་མཆོད་པ་གོང་ནས་བ་སྟན་པ་བཞིན་དུ་བྱ་བའི་ཐ་ཚིག་གོ ། ད་ནི་མེ་བརྟག་པ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་བྱིན་ཟ་ལ་ནི་བརྟག་བྱ་བ། །ཞེས་གསུངས་ཏེ། མེ་ལྕེ་ཟླུམ་ལ་འཁྱིལ་པ་ནི། ཆོས་ཀྱི་དབྱིངས་ཀྱི་ཡེ་ཤེས་ཀྱི་རྟགས་སོ། །དཀར་ལ་འཚེར་བ་ནི་མེ་ལོང་ལྟ་བུའི་ཡེ་ཤེས་ཀྱི་རྟགས་སོ། །མེ་ལྕེ་དྲང་པོར་འབར་བ་ནི་སོ་སོར་རྟོག་པའི་ཡེ་ཤེས་ཀྱི་རྟགས་སོ། །མེ་སྟག་མི་འཕྲོ་བ་ནི་མཉམ་པ་ཉིད་ཀྱི་ཡེ་ཤེས་ཀྱི་རྟགས་སོ། །མེ་ལྕེ་གྱེན་དུ་མི་འཐོར་བར་འབར་བ་ནི་བྱ་བ་ནན་ཏན་གྱི་ཡེ་ཤེས་ཀྱི་རྟགས་སོ། །དེ་འཕགས་པའི་གནས་སྐབས་སོ། །སེམས་ཅན་གྱི་གནས་སྐབས་སུ་སྐྱོན་ཡོན་གཉིས་སུ་བ་སྟན་ཏེ། ཡོན་ཏན་ལ་ཁ་དོག་དཀར་བར་འབར་བ་ནི་བག་ཆགས་ཟད་པའི་རྟགས་སོ། །གཡས་སུ་འཁྱིལ་ཞིང་འབར་བ་ནི་འཁོར་བ་ལས་ལྡོག་པའི་རྟགས་སོ། །གྱེན་དུ་འབར་བ་ནི་མཐོ་རིས་སུ་ཕྱིན་པའི་རྟགས་སོ། །དྲི་མ་མེད་པར་འབར་བ་ནི་ཉེ་བཞི་ལ་ཁ་ན་མ་ཐོ་བའི་སྐྱོན་གྱིས་མི་གོས་པའི་རྟགས་སོ། །མེ་ལྕེ་ཟླུམ་ལ་མེ་སྟག་མི་འཕྲོ་བར་འབར་བ་ནི། ཉ་བཞི་བཀྲ་ཤིས་པའོ། །མེ་ལྕེ་བརྟེན་ལ་གློག་བཞིན་དུ་དྲི་མ་མེད་པ་ལ་གསལ་བར་འབར་བ་ནི་ནོར་ཕྱུགས་འཕེལ་བའི་རྟགས་སོ། །དེ་ནི་མེའི་ཡོན་ཏན་བརྟག་ཐབས་དྲུག་གོ །མེའི་སྐྱོན་རྣམ་པ་ལྔ་སྟེ། ཁ་དོག་ཁམ་ལ་མི་གསལ་བར་འབར་བ་ནི། བག་ཆགས་ཀྱི་སྒྲིབ་པ་མ་འབྱོངས་པའི་རྟགས་སོ། །སྔོ་ལ་སྔོན་ལ་མེ་ལྕེ་གཡོན་དུ་འཁྱིལ་བ་ནི། མཐོ་རིས་སུ་མི་ཐར་བའི་རྟགས་སོ། །མེ་ལྕེ་ཐུར་དུ་འཚུབ་ཅིང་དུ་བ་དང་འདེས་ནས་འབར་བ་ནི། ཉེ་བཞི་ལ་མི་ཁས་བཙོགས་པའི་རྟགས་སོ། །མེ་ལྕེ་འཕྲོ་ཞིང་སྔོ་ནག་ཏུ་འབར་བ་ནི། ནོར་ཕྱུགས་མི་ཆགས་པའི་རྟགས་སོ། །མེ་འཚུབ་ཅིང་རླུང་གིས་
ལྷོ་ཕྱོགས་སུ་བས་དན་རིམས་ནད་དང་ཡམས་འོང་བའི་རྟགས་སོ། །མེའི་རྟགས་སྐྱོན་རྣམ་པ་ལྔའོ། །ད་ནི་ལས་ཀྱི་ལྷག་ཆད་ཀྱི་ཁ་བསྐང་བ་སྟོན་ཏེ། ཅིའི་ཕྱིར་ཞེ་ན། དེ་ནས་སྤྱན་དྲང་ཡོ་བྱད་གསུམ་མཆོད་ཅེས་གསུངས་ཏེ། དེ་ནས་ནི། གོང་དུ་མཆོད་པ་ཕུལ་བའི་ཕྱི་ནས་བྱ་བར་སྨོས་ལ། སྤྱན་དྲང་བ་ནི། ལས་ཀྱི་ལྷག་ཆད་ཁ་བསྐང་བའི་ཕྱིར། ཐབ་ཁུང་དུ་རིམ་པར་ལྷ་སྤྱན་དྲང་བའོ། །ཡོ་བྱད་ནི་མཆོད་རྫས་དང་བསྲེག་རྫས་ཐམས་ཅད་དོ། །ལན་གསུམ་ནི། སྐུ་གསུང་ཐུགས་ལ་མཉེས་པར་བྱ་བའི་ཕྱིར། ལྷ་རེ་རེ་ལ་ལན་གསུམ་གསུམ་དབུལ་ལོ། །ད་ནི་མ་གྲུབ་ན་སྤོགས་པའི་ཆོ་ག་སྟོན་ཏེ། ཅིའི་ཕྱིར་ཞེ་ན། ཕྱག་ན་རྡོ་རྗེ་པདྨའི་ཞགས་པ་བསྣམས། འཇིག་རྟེན་གསུམ་ལས་རྣམ་རྒྱལ་གཟུགས། །ཞེས་གསུངས་ཏེ། ཕྱག་ན་རྡོ་རྗེ་ནི་ཐུགས་ཡང་དག་པའི་ཡེ་ཤེས་ཏེ། ཉོན་མོངས་པའི་སྐྱོན་གྱིས་མ་གོས་པ་ནི། ཕྱག་གཡས་པ་ན་པདྨ་བསྣམས། ཐབས་ཐུགས་རྗེ་ཆེན་པོས་འཁོར་བ་མི་གཏོང་བའི་ཕྱིར་ནི་ཞགས་པ་བསྣམས། སྤྱིན་སྲེག་གི་གནས་སྐབས་སུ་བསྒོམས་པ་ལ། ད་ནི་རུས་པ་རྡོ་རྗེ་བསྡུ་བ་དང༌། མ་གྲུབ་ན་སྤོགས་པའི་ཆོ་ག་བྱ་བའི་ཕྱིར། བདག་ཉིད་དེ་ལས་ལས་ཀྱི་ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ། སྐུ་མདོག་སྔོན་པོར་འདུག་པ། དབུ་རྒྱན་རིགས་ལྔའི་སངས་རྒྱས་ཀྱིས་བརྒྱན་པ་དབུ་གསུམ་ཕྱག་དྲུག །དབུ་གཡས་དཀར་གཡོན་དམར། ཕྱག་གཡོན་དང་པོ་གཉིས་ཧཱུཾ་གིས་མཛུབ་མོ་གཉིས་བསྒྲེང་བ། གཡས་བར་མ་ནི་རྡོ་རྗེ་རྩེ་ལྔ་པ་བསྣམས་པ། གཡས་ཐ་མ་ན་པདྨ་འདབ་བརྒྱང་བསྣམས་པ། གཡོན་ཐ་མ་ན་ཞག་ས་བ་བསྣམས་པ། ན་བཟའ་སྟོད་གཡོགས་དང༌། སྨད་གཡོགས་ཀྱིས་བརྒྱན་པ། ཐུགས་ཆོས་ཉིད་ལས་མ་གཡོས་པའི་རྟགས་སུ་ནི་ཞབས་གཡས་བསྐུམ་པ། ཕྲིན་ལས་སྣ་ཚོགས་མཛད་པའི་རྟགས་སུ་ནི། གཡོན་བརྐྱང་པ་ལས་པདྨ་འདབ་མ་བརྒྱང་པ་དཀར་པོའི་གདན་ལ་བཞུགས་པར་བསྒོམ། སྡིག་ཅན་གྱི་རོའམ་བསྲེགས་པའི་ཐལ་བའི་སྟེང་ན་གནོན་ཅིང་བཞུགས་པར་ཏིང་ངེ་འཛིན་གྱིས་བསྒོམ་མོ། །དེ་ནས་ཁམས་གསུམ་རྣམ་པར་རྒྱལ་པའི་སྙིང་པོ་སྟོང་ངམ་བྱེ་བ་ཙམ་བྱ་ཞིང༌། སྡིག་ཅན་གྱི་མིང་ངམ་རུས་པ་དང་བསྲེས་ནས་སྤྱིན་སྲེག་བྱས་ན་
འགྲུབ་པར་གསུངས་སོ། །དེ་ནས་རུས་པ་རྡོ་རྗེ་བསྡུ་བའི་སྔགས་ཀྱིས་བསྡུ་བ་སྟོན་ཏེ། ཅིའི་ཕྱིར་ཞེ་ན། དེ་ནས་ཐར་པར་གྱུར་པ་དང༌། རྡོ་རྗེ་བསྡུ་བའི་སྔགས་ཀྱིས་ནི། །ཞེས་པ་ནི། དེ་ནས་བདག་ཉིད་ཁམས་གསུམ་རྣམ་པར་རྒྱལ་བའི་ཏིང་ངེ་འཛིན་བསྒོམས་པ་དེས། རུས་པ་ཉིད་རྡོ་རྗེ་བསྡུ་བའི་སྔགས་ཨོཾ་བཛྲ་ཏི་རིནྟི་ཞེས་བཟླས་ཤིང་རུས་པ་བསྡུ་སྟེ། ཅིའི་ཕྱིར་ཞེ་ན། དེ་ལྟར་མཚན་མ་སྲེག་པ་དེ་ཉིད་ལྷར་དབང་བསྐུར་བའི་ཕྱིར་རོ། །ཆོ་ག་བཞིན་དུ་བསྡུ་བར་བྱ། །ཞེས་གསུངས་ཏེ། ཆོ་ག་ནི་ཐབས་ཞིབ་མོ་སྟེ། བདག་ལྷར་བསྒོམས་པའི་ཆོ་གའོ། །བསྡུ་བ་ནི་རུས་པ་རིན་པོ་ཆེའི་འབར་བར་བྱས། །རུས་པ་ཉིད་ནོར་བུ་རིན་པོ་ཆེར་བསྒོམ་པའི་ཆོག་ག་དང་སྔགས་ཡིག་འབྲུ་བྱང་ཆུབ་སེམས་ཟླ་བའི་མཎྜལ་དུ་བསྒོམ་པའི་ཆོ་ག་དང༌། སྣོད་བྲུཾ་ལས་རིན་པོ་ཆེའི་གཞལ་ཡས་ཁང་དུ་བསྒོམ་པའི་ཆོ་གའོ། །བསྡུ་བ་ནི་རུས་པ་རིན་པོ་ཆེའི་འབར་པར་བྱས་ནས་སྣོད་དུ་བསྡུ་བ་དང༌། རྒྱུ་ཉོན་མོངས་པ་གཉེན་པོ་ཡེ་ཤེས་ཀྱི་སྟོབས་སུ་བསྡུ་བ་དང༌། འབྲས་བུ་རིགས་ལྔའི་ངོ་བོར་བསྡུ་བའོ། །དེ་ལྟར་བསྡུས་ནས་སྔགས་མཁན་གྱིས། རྣམ་པར་རྒྱལ་པའི་བུམ་པ་དྲི་ཆུ་དང༌། བའི་འོ་མ་དང་ཞོ་དང་མར་དང༌། བའི་ལྕི་བ་དང༌། གཅིན་དང་ལྔ། དྲི་སྣ་ཚོགས་དང་བསྲེས་ལ་བཏགས་ཏེ། མཆོད་རྟེན་དུ་བྱས་ནས་སྔགས་དང་ཕྱག་རྒྱ་བརྒྱ་རྩ་བརྒྱང་དང་འབུམ་ཕྲག་གི་བར་དུ་ཏིང་ངེ་འཛིན་དང་བཟླས་པ་བྱ་ཞིང༌། དངོས་གྲུབ་ཀྱི་རྟགས་མཆོད་རྟེན་འབར་བ་དང༌། ཞལ་འཛུམ་པ་དང༌། དྲི་དང་འོད་དང༌། རྣམ་པ་སྣ་ཚོགས་ཀྱི་གཟུགས་སྟོན་པ་ནི་བཟང་པོའི་རྟགས་སོ། །ཅི་སྲིད་མེ་ཏོག་ལ་སོགས་པ་འདོར་བ་དང༌། དྲི་མི་ཞིམ་པ་ལ་སོགས་པ་བྱུང་ན་ནི་སྡིག་པའི་མཚན་མ་སྟེ། བདག་ཉིད་མི་ཉལ་བར་ཏིང་ངེ་འཛིན་རྩེ་གཅིག་པར་སྔགས་ཀྱི་ཡིག་འབྲུ་བཟླས་ནས། ལྷའི་གཟུགས་སུ་འགྱུར་ཞིང་བྱང་ཆུབ་ཀྱི་རྒྱུར་ངེས་པ་ཐེ་ཚོམ་མེད་པར་ཀུན་རིག་གིས་གསུངས་སོ། །རུས་པ་རྡོ་རྗེ་བསྡུ་བའི་སྔགས་ཀྱིས་བསྡུ་བའི་ཆོ་ག་བྱེ་བྲག་དང་བཅས་པ་བཤད་ཟིན་ཏོ།། །།ད་ནི་ལས་ཀྱི་མཚན་ཉིད་བྱེ་བྲག་གཏན་ལ་དབབ་པ་སྟོན་ཏེ། མཚན་མ་འདི་དག་ཤེས་ནས་ནི། །ཞེས་པ་ནི། མཚན་མ་ནི་དངོས་གྲུབ་བཟང་ངན་གྱི་མཚན་མ་ལ། འདི་དག་ནི་གོང་དུ་གསུངས་
པ་ལ། ཤེས་ནས་ནི་ལས་ཀྱི་མཚན་ཉིད་གཏན་ལ་དབབ་པའི་དོན་སྟོན་ཏོ། །ཅིའི་ཕྱིར་ཞེ་ན། རྣམ་པར་མི་རྟོག་སེམས་ཀྱིས་ཀྱང༌། །ཞེས་གསུངས་ཏེ། རྣམ་པ་ནི་མཚན་མའི་བྱེ་བྲག་ལ། མི་རྟོག་པའི་ཡེ་ཤེས་ཀྱི་མཚན་མ་རྣམས་མ་བྱུང་མ་སྐྱེས་པར་བསྒོམ་པའོ། །སེམས་ནི་དེའི་དོན་བསྒྲུབ་པའི་སེམས་ཀྱི་ཏིང་ངེ་འཛིན་གྱིས་བསྒོམ་ཞེས་པའི་ཐ་ཚིག་གོ །དང་པོར་རྣམ་པར་མི་རྟོག་པའི་ཏིང་ངེ་འཛིན་བསྒོམས་པ་ལས། དག་པ་འཇིག་རྟེན་པའི་ཡེ་ཤེས་ཀྱིས་འགྲོ་བའི་དོན་བྱ་དགོས་པས་ན། བྱམས་དང་སྙིང་རྗེར་ལྡན་པ་ཡི། །ཞེས་གསུངས་ཏེ། བྱམས་པ་ནི་ཕྱོགས་མེད་པ་སྟེ། ཀུན་ལ་ཁྱབ་པར་བསྒོམ་པ་ཡིན་པས། སྙིང་རྗེས་ཕན་འདོགས་པ་སྟེ། ཁྱད་པར་དུ་ཡང་ངན་སོང་གསུམ་ལ་སོགས་པའི་སྡུག་བསྔལ་ཅན་རྣམས་སོ། །ལྡན་པ་ནི་ཕྲིན་ལས་དང་ལྡན་པ་སྟེ། འགྲོ་བའི་དོན་བྱེད་པའི་ཐ་ཆིག་པས། ལས་དང་ཐམས་ཅད་གཏན་ལ་འབེབས་པར་མཛད་པས་ན་ལས་གྲུབ་པའི་ཐ་ཚིག་གོ །ད་ནི་ལྟོས་པའི་རོ་མེད་ན་ཡང་ཆོ་ག་བྱེད་པའི་ཁྱད་པར་སྟོན་ཏེ། ཅིའི་ཕྱིར་ཞེ་ན། ཡང་ན་མེད་པར་གྱུར་ན་ཡང༌། །ཞེས་གསུངས་ཏེ། ཡང་ན་ནི་རོ་མེད་ན་ཡང་བྱ་བའི་ཐ་ཚིག་གོ །འགྱུར་ན་ནི་འགྲོན་ལ་ཐ་ཚིག་ཏུ་སོང་བའམ་ཤི་བའམ། ཆུས་ཁྱེར་བའམ། དངོས་པོ་མེད་པའོ། །ཅིའི་ཕྱིར་ཞེན། བཟླས་ཤིང་བསྒོམས་པའི་ཚུལ་གྱིས་ནི། །མིང་རུས་ལེགས་པར་བྲི་བར་བྱ། །ཞེས་གསུངས་ཏེ། བཟླས་པ་ནི་སྔགས་ཀྱི་ཡིག་འབྲུ་བཟླས་པ་དང༌། མཚོན་པའི་སྒོ་ནས་མིང་རུས་བཟླས་པ་དང༌། བཏགས་པའི་སྒོ་ནས་མིང་ཟློས་ཤིང༌། མིང་རུས་སྔགས་ཀྱི་ཡིག་འབྲུ་དང་བསྲེས་ཤིང༌། མ་ནོར་བར་བསྒོམ་པའི་ཚུལ་ཡིན་ཏེ། གྲོ་གའམ་ཤོག་ཤོག་ལ་མིང་རུས་གུར་གུམ་གྱིས་བྲིས་ཏེ། དེ་ལ་དམིགས་པའི་རྟེན་བྱས་ནས། གཉེན་པོ་ཡེ་ཤེས་ཀྱི་སྤྲུལ་པ་བསྟིམས་ནས། དེ་ཉིད་འཇིམ་པ་དད་བསྲེས་ལ་བཏགས་ཏེ་མཆོད་རྟེན་གྱི་ཕྲེང་བའམ། ལྷའི་གཟུགས་སུ་བྱས་ན་འང་རུང༌། སྤྱིན་སྲེག་བྱས་ནས་དབང་བསྐུར་ན་ཡང་རུང་སྟེ། གདོན་མི་ཟ་བར་མཐོ་རིས་སུ་སྐྱེ་བར་འགྱུར་རོ། །ཡང་ན་ཐལ་བ་ཉིད་ཡུངས་ཀར་དང་བསྲེས་ལ་ཤི་བའི་མིང་རུས་སྨོས་ལ་སརྦ་བིཏ་ཀྱི་སྔགས་ཀྱིས་བཏབ་ནས། རྒྱ་མཚོའམ་ཆུ་ཀླུང་དུ་
བླུགས་ནའང་ངན་འགྲོ་ལས་ཐར་བར་འགྱུར་རོ། །ད་ནི་དགེ་བའི་ཚོགས་ཆེ་བ་རྣམས་ངན་འགྲོ་ལས་ཐར་བར་ཐབས་སླ་བ་སྟོན་ཏེ། ཅིའི་ཕྱིར་ཞེ་ན། དགེ་བའི་མཆོག་ནི་བསྐྱེད་པ་དང༌། །བྱང་ཆུབ་ས་བོན་ཐོབ་པའི་ཐབས། །ཞེས་གསུངས་ཏེ། དགེ་བ་ནི་སྔོན་གོམས་པའི་མཐུས་དེ་ལྟར་མི་དགེ་བ་བཅུའི་དངོས་པོ་མེད་པའོ། །མཆོག་ནི་ཡིད་འཕགས་པའི་ལམ་ལ་འདུན་ཅིང༌། བྱང་ཆུབ་ཏུ་སེམས་བསྐྱེད་པའོ། །ཤེས་བྱ་ལ་ཡེ་ཤེས་ཆུབ་པའོ། །ས་བོན་ནི་དཔེར་ན་ས་བོན་སྐྱེ་བའི་འབྲས་བུ་འབྱིན་པ་དང་འདྲ་བར་རྒྱུ་རང་གི་བྱང་ཆུབ་ཀྱི་སེམས་འབྲས་བུ་བྱང་ཆུབ་ཏུ་སེམས་བསྐྱེད་པ་སྨོས་སོ། །སངས་རྒྱས་འབྲས་བུ་རྒྱུར་ལྡན་པ། །ཞེས་གསུངས་ཏེ། སངས་རྒྱས་ནི་རིགས་ལྔ་ལ་བྱ། འབྲས་བུ་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་སྟེ། རྒྱུ་ནི་རང་གིས་རྟོགས་པའི་ཁྱད་པར་རོ། །ཅིའི་ཕྱིར་ཞེ་ན། སྤྱིན་པའི་ཕ་རོལ་ཕྱིན་པར་ལྡན། །ཞེས་གསུངས་པ་དང༌། ཤེས་རབ་རྣམས་ཀྱི་རྒྱུ་བསྒོམས་པ། །ཞེས་པའི་བར་གྱིས་སྟོན་ཏེ། དེ་ལ་སྤྱིན་པ་ནི་ཡོངས་སུ་གཏོང་བའི་མཚན་ཉིད་དེ། དེ་ལ་རྣམ་པ་གཉིས་ཏེ། ཆོས་དང་ཟང་ཟིང་གཉིས་སོ། །ཚུལ་ཁྲིམས་ནི་ཚུལ་ཡང་ཡང་དག་པའི་དོན་ལ། ཁྲིམས་ནི་དེ་ལས་མི་འདའ་བའི་མཚན་ཉིད་དོ། །དེ་ལ་ཡང་གཉིས་ཏེ། དགེ་བའི་ཆོས་སྡུད་པ་དང༌། སེམས་ཅན་གྱི་དོན་བྱེད་པའི་ཚུལ་ཁྲིམས་སོ། །བཟོད་པ་ནི་མི་འཁྲུགས་པའི་མཚན་ཉིད་དོ། །དེ་ཡང་གཉིས་ཏེ། ཆོས་ཟབ་མོ་ལ་ཡིད་ཆེས་པའི་བཟོད་པ་དང༌། གནོད་པར་བྱེད་པ་ལ་ཇི་མི་སྙམ་པའི་བཟོད་པའོ། །བརྩོན་འགྲུས་ནི། སྐྱོ་དུབ་མེད་པའི་མཚན་ཉིད་དེ། དེ་ལ་ཡང་གཉིས་ཏེ། གོ་ཆའི་བརྩོན་འགྲུས་དང༌། སྦྱོར་བའི་བརྩོན་འགྲུས་སོ། །བསམ་གཏན་ནི། ཆོས་ཉིད་ཀྱི་དོན་ལ་མཉམ་པར་འཇོག་པའི་མཚན་ཉིད་དེ། དེ་ལ་ཡང་གཉིས་ཏེ། ཆོས་ཉིད་ཀྱི་བསམ་གཏན་དང༌། ཏིང་ངེ་འཛིན་གྱི་བསམ་གཏན་ནོ། །ཤེས་རབ་ནི། སྤྱི་དང་རང་གི་མཚན་ཉིད་དོ། །དེ་ལ་ཡང་གཉིས་ཏེ། ཟག་པ་དང་བཅས་པའི་ཤེས་རབ་དང༌། ཟག་པ་མེད་པའི་ཤེས་རབ་བོ། །དེ་ནི་རྒྱུད་དེ་ཕ་རོལ་ཏུ་ཕྱིན་པ་དྲུག་གིས་འབྲས་བུ་བསོད་ནམས་དང་ཡེ་ཤེས་ཀྱི་ཚོགས་སྐྱེ་བའི་ཕྱིར་རོ། །དེ་ལྟ་བུའི་སེམས་ཅན་ནི་ཐེ་
ཚོམ་མེད་བར་འགྲུབ་པའི་དོན་ཏོ། །ད་ནི་དགེ་བའི་རྩ་བ་མ་བསྐྱེད་པས་མི་འགྲུབ་པའི་དོན་ཏེ། དེ་ཅིའི་ཕྱིར་ཞེན། དགེ་བའི་རྩ་བ་མ་བསྐྱེད་ལ། །མེད་པར་ལྟ་བ་གང་ཡིན་དང༌། །ཞེས་གསུངས་ཏེ། དགེ་བ་ནི་རྣམ་པར་དཀར་བ་ལ་བྱ། རྩ་བ་ནི་བྱང་ཆུབ་ཀྱི་སེམས་སོ། །མ་བསྐྱེད་པ་ནི་དེ་ལ་མི་གནས་ཤིང་མ་མོས་པའོ། །མེད་པར་ལྟ་བ་ནི་རྒྱུ་དགེ་སྡིག་གཉིས་མི་དགེ་བར་ལྡན་པ་དང༌། འབྲས་བུ་དགེ་སྡིག་གཉིས་མེད་པར་ལྟ་བའོ། །དེ་ནི་རྒྱུ་འབྲས་ལ་སྐུར་པ་འདེ་བས་པ་སྟེ། ཡང་དག་པའི་བྱང་ཆུབ་ཀྱི་སེམས་མ་རྟོགས་ནས། ལོག་པ་དང༌། སངས་རྒྱས་ཀྱི་བ་སྟན་པ་ལ་ཞེ་སྡང་བྱེད་ཅིང། སྡིག་པའི་རང་བཞིན་དུ་མཐོང་པ་དང༌། ཕ་མ་ལ་སྙིང་རིང་ཞིང་བྱང་ཆུབ་ཀྱི་སེམས་དང་མ་བྲལ་བ་རྣམས་འགྲུབ་པར་མི་འགྱུར་ཞེས་རྣམ་པར་སྣང་མཛད་ཀྱིས་གསུངས་སོ། །དེ་ཡན་ཆད་དུ་སྤྱིན་སྲེག་གི་དོན་བ་སྟན་ཟིན་ཏོ། །ད་ནི་ཆོ་གའི་ཕན་ཡོན་བ་སྟན་ཏེ། དེ་ནས་བརྒྱ་བྱིན་ལ་སོགས་ལྷ། །ཞེས་གསུངས་ཏེ། དེ་ནི་གོང་གི་སྤྱིན་སྲེག་གི་མཇུག་སྡུད་ལ། ནས་ནི་འོག་གི་ཕན་ཡོན་གྱི་མགོ་འདྲེན་ནོ། །བརྒྱ་བྱིན་ནི་ཡོན་བདག་ཡིན་པས་ན་སྣ་ལ་སྨོས་ལ། ལྷ་ཐམས་ཅད་ནོར་བུ་དྲི་མ་མེད་པའི་འོད་ཐར་པ་ལས་ཕལ་ངམ་པའི་ཕྱིར་སྨོས་སོ། །དེ་ནས་དབང་པོར་བཅས་པ་ཡི། །ཞེས་པ་ནས། སྣ་ཚོགས་འབྱུང་བ་འདི་ཅི་ལགས། །ཞེས་པ་འབྱུང་བའི་བར་གྱིས་ནི། །ཡོན་ཏན་ལ་མང་སྟེ། མཆོད་པ་དུ་མས་མཆོད་པ་སྟོན་ཏེ། བཅོམ་ལྡན་འདས་ཀྱི་བཀའ་ཞེས་པ་ནས། བདེ་བར་གཤེགས་པ་ངོ་མཚར་ལགས་སོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་འོད་རྣམ་བར་ཐར་བ་བ་སྟན་ལ། འཁོར་ངོ་མཚར་ཆེ་བར་བ་སྟན་ཏོ། །དེ་ནས་བརྒྱ་བྱིན་ལ་སོགས་པ། །ཞེས་པ་ནས། སྔགས་དང་འདྲ་བའི་འདྲེན་པ་མེད། །ཅེས་པའི་བར་གྱིས་ནི། དཀོན་མཆོག་གསུམ་ལ་ཡོན་ཏན་གྱི་སྒོ་ནས་བསྟོད་པ་བ་སྟན་ཏོ། །དེ་ནས་ལྷའི་བུ་དེ་དག་གིས་ཞེས་པ་དང༌། བལྟ་བར་འཚལ་ལོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་རྫུ་འཕྲུལ་དང༌། རྣམ་པར་འཕྲུལ་པ་བལྟ་བར་ཞུ་བ་གསོལ་བ་སྟོན་ཏོ། །དེ་ནས་བཅོམ་ལྡན་འདས་ཞེས་པ་ནས་དེ་ཉིད་དུ་མི་སྣང་བར་གྱུར་ཏོ་ཞེས་པའི་བར་གྱིས་ནི། དེ་བཞིན་གཤེགས་པའི་ནོར་བུ་དྲི་མ་མེད་པའི་འོད་ཟེར་གྱི་ཕྲེང་བས་
བསྐུལ་ནས་རང་གི་གནས་ནས་འོད་བ་སྟོན་ཏོ། །དེ་ནས་ལྷའི་བུ་དེ་ཉིད་ཅེས་པ་ནས། ཟིལ་གྱིས་མནན་ཏོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་འོད་ཀྱི་རྣམ་པར་འཕྲུལ་པས་ཐམས་ཅད་ཟིལ་གྱིས་མནན་པ་སྟོན་ཏོ། །དེ་ནས་ལྷའི་བུ་དེ་ཞེས་པ་ནས། མྱུར་དུ་དགྲོལ་ཞེས་པའི་བར་གྱིས་ནི། ཡ་མཚན་ཆེ་ནས་ཐུགས་རྗེ་ལ་ངམ་ནས་བསྟོད་པ་སྟོན་ཏོ། །དེ་ནས་སྐད་ཅིག་མ་ཉིད་ཀྱི་ཚེ་ཞེས་པ་ནས། ཡ་མཚན་སྐྱེས་ཏེ་ཞེས་པའི་བར་གྱིས་ནི། རྣམ་པར་འཕྲུལ་པ་སྣ་ཚོགས་འཐོན་བ་སྟོན་ཏོ། །དེ་སྐད་ཅེས་སྨྲས་སོ་ཞེས་པ་ནས། ཚངས་སྤྱོད་ཚུལ་ཁྲིམས་དྲི་མེད་སྐྱེ་བས་མ་ཡས། །ཞེས་པའི་བར་གྱིས་ནི་དེ་བཞིན་གཤེགས་པའི་ཡོན་ཏན་གྱི་ཁྱད་པར་བསམ་གྱིས་མི་ཁྱབ་པ་ལ་དམ་པ་སྟོན་ཏོ། །དེ་ནས་ལྷའི་བུ་དེ་དག་གིས་ཞེས་པ་ནས། བལྟ་བར་འཚལ་ལོ་ཞེས་པའི་བར་གྱིས་ནི་བལྟ་བར་ཞུབ་གསོལ་པ་སྟོན་ཏོ། །དེ་ནས་བཅོམ་ལྡན་འདས་ཞེས་པ་ནས་མི་སྣང་བར་གྱུར་ཏོ་ཞེས་པའི་བར་གྱིས་ནི་སྣང་བར་བྱ་བའི་ཏིང་ངེ་འཛིན་ཏོ། །དེ་ནས་ནོར་བུ་དྲི་མ་མེད་པའི་ཞེས་པ་ནས། འདི་སྐད་གསོལ་ཏོ་ཞེས་པའི་བར་གྱིས་ནི་དེ་བཞིན་གཤེགས་པའི་སྤྱན་སྔར་འོད་ས་ནས་ཐམས་ཅད་ཟིལ་གྱིས་གནོན་པ་སྟོན་ཏོ། །ཀྱེ་མ་སངས་རྒྱས་ཀྱི་སངས་རྒྱས། །ཞེས་པ་ནས། །བདག་མྱུར་སྐྱེས་ཞེས་པའི་བར་གྱིས་སྔགས་ཀྱིས་ཡོན་ཏན་ཀུན་ལ་བསྟོད་པ་བ་སྟན་ཏོ། །དེ་ནས་ནོར་བུ་དྲུ་མ་མེད་པའི་ཞེས་པ་ནས་དེ་བཞིན་དུ་སོང་བ་ཞེས་བྱ་བི་བར་གྱིས་ནི། །དྲིན་ལ་ལན་གྱིས་གླན་པའི་ཕྱིར་མཆོད་པའི་ཁྱད་པར་གྱིས་མཆོད་ནས་རང་གི་གནས་སུ་འགྲོ་བ་སྟོན་ཏོ། །དེ་ནས་བརྒྱ་བྱིན་དད་ཞེས་པ་ནས། །བཤད་དུ་གསོལ་ཞེས་པའི་བར་གྱིས་ནི། །ཕྱི་རབས་ཀྱི་སེམས་ཅན་རྣམས་ལ་ཕན་པའི་ཕྱིར་ཞུབ་བ་གསོལ་པ་སྟོན་ཏོ། །བརྒྱ་བྱིན་དང་ཞེས་པ་ནས་འགྲོ་བར་འགྱུར་ཞེས་པའི་བར་གྱིས་ནི། སྔགས་ཀྱི་དོན་ཐོས་པར་དཀའ་བའི་ཆེ་པའི་ཡོན་ཏན་འདི་བ་སྟན་ཏོ། །དེ་ནས་བརྒྱ་བྱིན་དང་ཞེས་པ་ནས། རྣམ་པར་སྨིན་པ་ཇི་ལྟར་འགྱུར། །ཞེས་པའི་བར་གྱིས་ནི། རང་སྣོད་དུ་རུང་བས་ན་ཐེག་པ་ཆེན་པོ་ལ་དད་པའི་རྣམ་པར་སྨིན་པ་ཅིར་འགྱུར་ཞུ་བ་གསོལ་བ་བ་སྟན་ཏོ། །བཅོམ་ལྡན་འདས་ཀྱི་ཞེས་པ་ནས་སྨོས་ཅི་དགོས་ཞེས་པའི་བར་གྱིས་ནི། ཐེག་པ་ཆེན་པོའི་རིགས་ཅན་གྱི་ཡོན་
ཏན་གྱི་ཁྱད་པར་ཆེན་པོ་སྟོན་ཏོ། །དེ་ནས་བརྒྱ་བྱིན་དང་ཞེས་པ་ནས། བསྐྱབ་པར་བགྱི་ཞེས་པའི་བར་གྱིས་ནི། འཇིག་རྟེན་པའི་འཁོར་རྣམས་ཀྱིས་ཐེག་པ་ཆེན་པོའི་ཆོས་ཉིད་གང་ན་སྤྱོད་པ་དེ་བསྲུང་ཞིང་བསྐྱབ་པའི་ཐབས་སྟོན་ཏོ། །ལྷའི་དབང་པོ་ཞེས་པ་ནས། བསྒྲུབས་ཞེས་པའི་བར་གྱིས་ནི། ཕྱི་རབས་ཀྱི་སེམས་ཅན་ལ་ཕན་པའི་ཕྱིར་གདམས་ངག་སྤྱིན་པ་སྟོན་ཏོ། །རོ་སྲེག་གི་ཧོམ་ཆོ་གའི་ཡན་ལག་ཕན་ཡོན་དད་བཅས་པའི་དོན་དཀའ་དཀའ་བསྡུས་པ་བཤད་ཟིན་ཏོ།། །།ད་ནི་གཙུག་ཏོར་ཆེན་པོ་བརྒྱང་ཀྱི་དཀྱིལ་འཁོར་སྟོན་ཏེ། གཙུག་ཏོར་ཞེས་བྱ་བ་ནི་དཔེར་ན། ལུས་ཀྱི་རང་བཞིན་མགོའི་གཙུག་ཡིན་ལ་དེ་བཞིན་དུ་ཆོས་རྣམས་ཀྱི་རང་བཞིན་རྣམ་པར་དག་པ་ནི། ཆོས་ཀྱི་དབྱིངས་ཏེ་དབུས་ཀྱི་ཕོ་བྲང་ཟླུམ་པོར་སྟོན་ཏེ། ཤཱཀྱ་ཐུབ་པ་དཀྱིལ་འཁོར་ན་བཞུགས་པའི་དོན་ཏོ། །འཐོར་ནི་འཁོར་ཏེ་ཤཱཀྱ་ཐུབ་པ་ཆོས་ཀྱི་སྐུ་ལས། ཡེ་ཤེས་རྣམ་པ་བཞི་དང་ཕྲིན་ལས་རྣམ་པ་བཞིའི་རྟགས། གཙུག་ཏོར་བརྒྱང་འཁོར་དུ་ཕྱུང་པ་ནི་འཐོར་བའི་ཐ་ཚིག་སྟེ། ཐུགས་རྗེས་འགྲོ་བའི་ལས་འབྱུང་པའི་ཕྱིར་རོ། །དེའི་དོན་བ་སྟན་པའི་ཕྱིར། དེ་ནས་བཅོམ་ལྡན་འདས་ཞེས་སྨོས་ཏེ། དེ་ནི་གོང་གི་ཆོ་གའི་དོན་བསྡུས་ལ། ནས་ནི་འོག་མའི་དཀྱིལ་འཁོར་མགོ་འདྲེན་པའི་ཕྱིར་རོ། །བཅོམ་པ་ནི་ཡང་དག་པའི་ཤེས་རབ་ཀྱིས་ཉོན་མོངས་པ་ཕྱིན་ཅི་ལོག་པའི་སྐྱོན་བཅོམ་པ་ཡིན་ལ། ལྡན་པ་ནི་ཕ་རོལ་ཏུ་ཕྱིན་པའི་སྟོབས་དང་ལྡན་པ་ལ། འདས་ནི་མཐའ་གཉིས་དང་བྲལ་བའི་ཐ་ཚིག་སྟེ། ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་གསུངས་ཏེ། བྱང་བ་ནི་གཟུང་འཛིན་རྣམ་པ་གཉིས་སྤངས་པ་ཡིན་ལ། ཆུབ་པ་ནི་ཤེས་བྱ་ལ་ཡེ་ཤེས་ཀྱིས་ཆུབ་ཅིང་གནས་ལ། སེམས་ནི་གཉིས་སུ་མེད་པའི་དོན་ལ་སེམས་ལ། དཔའ་ནི་དེའི་དོན་ལ་སྲན་འཛུགས་ཏེ། སེམས་ནི་ཐུགས་རྗེས་འགྲོ་པའི་སེམས་ལ། དཔའ་ནི་འགྲོ་པའི་དོན་ལ་མི་ལྡོག་པ་སྟེ། །དེ་ནི་གཞན་དཔའ་བའི་ཕྱིར་ན་ཆེན་པོའོ། ཕྱག་ན་རྡོ་རྗེ་ནི་དུས་གསུམ་གྱི་རྒྱལ་པ་ཐམས་ཅད་ཀྱི་ཐུགས་ལས་སྐྱེས་པའི་ཕྱིར་ཕྱག་ན་རྡོ་རྗེ་སྐུ་གསུང་ཐུགས་ཀྱི་གསང་པའི་མཛོད་འཛིན་པའི་བདུད་དང་དྲེགས་བྱེད་འདུལ་པའི་རྟགས་སུ་རྡོ་རྗེ་བསྣམས་
པས་ཀྱང་རྡོ་རྗེ། དེ་བཞིན་གཤེགས་པ་རྣམས་ཀྱིས་མིད་གི་དབང་བསྐུར་ཞིང༌། རྡོ་རྗེ་ལག་ཏུ་བྱིན་པས་ཀྱང་རྡོ་རྗེའོ། །བཅོམ་ལྡན་འདས་ཀྱི་མཐུས་ཆོ་ག་ཞིབ་མོ་ཞེས་པ་ནི། དཔེར་ན་བོན་པོ་ལྷ་བཀའ་འབེབས་པ་ནི། ལྷའི་བཀའ་ཟེར་བ་དང་འདྲ་བར། ཕྱག་ན་རྡོ་རྗེ་བཤད་པ་འདི་ཡང་བཅོམ་ལྡན་འདས་ཀྱི་མཐུས་ཞེས་སྨོས་པའི་ཕྱིར་རོ། །ཆོ་ག་སྒྲུབ་པར་བྱེད་པའི་ཐབས་ལ་བྱ་སྟེ། ཞིབ་མོ་ནི་མ་གྲུབ་ན་སྦོགས་པའི་ཆོ་ག་བྱེད་པའོ། །ཅིའི་ཕྱིར་ཞེན། ཕྱི་མ་འདི་བཤད་དོ་ཞེས་གསུངས་སོ། །གོང་གི་རྩ་བའི་མཎྜལ་གྱི་དོན་འདིར་འདུས་པའི་ཕྱིར་རམ། འདི་བསྡུ་པའི་ཕྱིར་རམ། འདི་དང་འབྲེལ་པའི་ཕྱིར་ནི་སྨོས་སོ། །དཔའ་བོ་གདན་ལ་བཞེངས་ནས་ནི། །ཞེས་པ་ནི། ལྟ་བས་མཚན་མ་འཇོམས་པ་དང༌། ཐུགས་རྗེས་འཁོར་པ་འཇོམས་པས་དཔའ་བའོ། །གདན་ནི་ཡེ་ཤེས་ཏེ་ཆོས་ཉིད་དང་འབྲེལ་པའི་ཕྱིར་ན་གདན། ཐུགས་རྗེས་འཁོར་པ་ལས་འབྲེལ་པའི་རྟགས་སུ་པདྨར་བ་སྟན་པས་ན་གདན། བཞེངས་པ་ནི་དེ་བཞིན་གཤེགས་པའི་ཐུགས་ཀ་ནས། ཕྱག་ན་རྡོ་རྗེའི་སྐུ་ཕྱུང་བ་བཞེངས་ནས། ཕྱག་ན་རྡོ་རྗེའི་ཐུགས་ཀ་ནས་ནི། གཙུག་ཏོར་བརྒྱང་འབྱིན་པའི་ཕྱིར་ནི་བཞེངས་པའོ། །དགྱེས་ཤིང་རྡོ་རྗེ་གསོར་ནས་ནི། །ཞེས་པ་ནི། དགྱེས་པ་ནི་དེ་བཞིན་གཤེགས་པས་བྱིན་གྱིས་བརླབས་པ་སྟེ། རྒྱུད་ཀྱི་དོན་སྟོན་པར་དགྱེས་པའོ། །རྡོ་རྗེ་ནི་རིགས་པས་ཏེ། མི་འགྱུར་པའི་དོན་ལའོ། །གསོར་པ་ནི་ཕྲིན་ལས་ཏེ་རྒྱུད་ཀྱི་དོན་སྟོན་པར་བྱེད་པའི་ཐ་ཚིག་གོ །ཤཱཀྱ་ནི་རྒྱལ་པོ་ཤཱཀྱ་ཉི་མ་དམར་པོའི་རིགས་ཡིན་ལ། གཙོ་བོ་ནི་ཁམས་གསུམ་གྱི་གཙོ་བོའི་ཐ་ཚིག་གོ །དགྱེས་མཛད་ནི་རྒྱུད་ཀྱི་དོན་སྟོན་པའི་ཕྱིར་ན་དགྱེས་མཛད་དོ། །ཐུབ་པའི་གཙོ་ལ་ཕྱག་འཚལ་ནས། །ཞེས་གསུངས་ཏེ། ཐུབ་པ་ནི་སྐུ་གསུང་ཐུགས་ཐུབ་པའི་ཕྱིར་རོ། །གཙོ་བོ་ནི་རྐང་གཉིས་ཀྱི་གཙོ་བོ་ཡིན་ལ། ཕྱག་འཚལ་ནི་ཡ་རབས་བླ་མའི་ཚུལ་གཟུང་པའི་ཕྱིར་དང༌། སྐུ་གསུང་ཐུགས་ནན་ཏན་བསྐྱེད་པའི་ཕྱིར་སྨོས་སོ། །དེ་ཡན་ཆད་དུ་དེ་བཞིན་གཤེགས་པའི་བྱིན་གྱི་རླབས་ཀྱིས། །ཕྱག་ན་རྡོ་རྗེས་བཤད་པ་བ་སྟན་ཟིན་ཏོ། །ད་ནི་རྩ་བའི་སྙིང་པོ་འབྱུང་པའི་ཕྱེད་དུ་བཤད་པའི་དོན་སྟོན་ཏེ། ཅིའི་ཕྱིར་ཞེ་ན། སྒྲིབ་པ་ཐམས་ཅད་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་
དེ་འཛིན་ལ་ཞེས་པ་ནི། སྒྲིབ་པ་ནི་ཉོན་མོངས་པ་རྣམ་པར་བྱང་པའི་བག་ཆགས་རྣམ་པར་རྟོག་པ་སྟེ། རྣམ་པ་ལྔར་བ་སྟན་ཏེ། ལས་ཀྱི་སྒྲིབ་པ་དང༌། ཆོས་ཀྱི་སྒྲིབ་པ་དང༌། རྣམ་པར་སྨིན་པའི་སྒྲིབ་པ་དང༌། །སྐྱེ་བའི་སྒྲིབ་པ་དང༌། ཤེས་བྱའི་སྒྲིབ་པ་ལྔ་ནི་ཐམས་ཅད་དོ། །རྣམ་པར་དག་པ་ནི། གཉེན་པོའི་ཡེ་ཤེས་ཀྱིས་མི་མཐུན་པ་དག་ཟིལ་གྱིས་གནོན་པ་སྟེ། ཅིའི་ཕྱིར་རྡོ་རྗེ་ཞེས་སྨོས་ཏེ། རྡོ་རྗེས་ཐམས་ཅད་འཇོམས་པ་དང་འདྲ་སྟེ། ཉོན་མོངས་པའི་མཚན་མ་འཇོམས་པའི་ཕྱིར་རོ། །ཏིང་ངེས་འཛིན་ནི་དེའི་ངང་ལས་མི་འདའ་ཞིང་འཛིན་པའི་ཕྱིར་རོ། །སྙོམས་པར་ཞུགས་པ་ནི་གཉིས་སུ་མེད་པར་སྙོམས་པར་ཞུགས་པ་དང༌། མི་འདའ་བར་སྙོམས་པར་ཞུགས་པའོ། །ངན་འགྲོ་ཐམས་ཅད་ནི། ངན་ནི་ངན་སོང་གསུམ་མོ། །འགྲོ་བ་ནི་ལས་ཀྱི་བག་ཆགས་ཀྱིས་དེར་འགྲོ་བའོ། །ཐམས་ཅད་ནི་དེ་རྣམས་ལ་བྱའོ། །རྣམ་པར་སྦྱོང་པ་ནི། ཐུགས་རྗེས་རྡོ་རྗེ་ལྟ་བུས་རྒྱུ་སྤྱོད་པ་དང༌། གཙུག་ཏོར་བརྒྱང་ཀྱི་སྙིང་པོ་ཕྱུང་བས་འབྲས་བུ་སྦྱོང་པའོ། །རང་གི་སྙིང་པོ་ནི། རང་ནི་ཕྱག་ན་རྡོ་རྗེའི་སྙིང་པོ་ནི་རིག་པའི་ཡེ་ཤེས་སོ། །འདི་ཉིད་ཐུགས་ཀ་ནས་ནི། འདི་ཉིད་ནི་སྙིང་པོ་འོག་ནས་འབྱུང་པ་ཉིད་དོ། །ཐུགས་ཀ་ནས་ནི་ཡེ་ཤེས་པའི་རྒྱུད་ལ་གནས་པ་ཞལ་དུ་འབྱིན་པའི་དོན་ཏོ། །དེ་ཅིའི་ཕྱིར་ཞེ་ན། ཕྱུང་ཞེས་སྨོས་པའི་ཐ་ཚིག་གོ །སྔགས་ནི་སྙིང་པོ་ཡིན་པའི་ཕྱིར་ནམ་བཤད་དོ། །དེ་ཡན་ཆད་དུ་སྔགས་ཀྱི་དོན་འབྱུང་པའི་དགོས་ཆེད་དང་བཅས་པའི་དོན་བསྡུས་པ་བཤད་ཟིན་ཏོ།། །།ད་ནི་དཀྱིལ་འཁོར་གྱི་ལྷར་གོང་པའི་ཐབས་སྟོན་ཏེ། །ཅིའི་ཕྱིར་ཞེ་ན། འཁོར་ལོ་འདྲ་པའི་དཀྱིལ་འཁོར་ལ། ཞེས་བྱ་བ་ནི། །དཔེར་ན་འཁོར་ལོས་སྒྱུར་པའི་གསེར་གྱི་འཁོར་ལོ་ནི་ལྟེ་བ་དང་མུ་ཁྱུད་དང་རྩིབས་དང་ལྡན་པ་ནི། དེ་དང་འདྲ་བའི་ཕྱིར་ན། །དཀྱིལ་འཁོར་ལ་ཞེས་སྨོས་སོ། །ཅིའི་ཕྱིར་ཞེ་ན། ཤིན་ཏུ་མཛེས་པའི་རྩིབས་བརྒྱང་ཅན། །ཞེས་གསུངས་ཏེ་ཤིན་ཏུ་མཛེས་པ་ནི། ཚོན་སྣ་ལྔ་སྟེ། །དཀར་དང་དམར་དང་སེར་དང་ལྗང༌། །ཀུན་གྱི་མཐའ་མ་ལྕགས་ཀ་བ། །ཞེས་གསུངས་ཏེ། དབུས་ཀྱི་ཕོ་བྲང་ནི་གཟུང་འཛིན་དང་བྲལ་བས་དཀར་པོར་བྱ་བ་ཡིན་ལ། རིན་པོ་ཆེའི་ཕྲེང་བའི་གཞི་མ་ནི་མ་ཆགས་པས་དམར་པར་བྱ་བ་ཡིན་ལ། རྩིབས་ནི་
རྒྱལ་པོའི་གསེར་གྱི་འཁོར་ལོ་དང་མཐུན་པར་སེར་པོ་བྱ་བ་ཡིན་ནོ། །གྲུ་ཆད་བཞི་ནི་ཕྲིན་ལས་ཀྱི་རང་བཞིན་ཡིན་པས། ལྗང་གུར་བྱ་བ་ཡིན་ལ། མཐའ་མ་ནི་ལྕགས་ཀ་བཏང་སྟེ། །པ་ཉྩ་རེ་ག་ཡང་དེ་བཞིན་དུ་བྱས་པས་མཛེས་ཞེ་འོ། །རྩིབས་བརྒྱང་ནི་འཁོར་ལོའི་རྩིབས་བརྒྱང་དོ། །ཅིའི་ཕྱིར་ཞེ་ན། ལྟེ་བར་བཅས་ཤིང་མུ་ཁྱུང་བཅས། །ཞེས་འབྱུང་སྟེ། དེ་ལ་སྦུས་ཀྱི་ལྟེ་བ་ཟླུམ་པོ་ནི་ཆོས་ཀྱི་སྐུའོ། །རིན་པོ་ཆེའི་ཕྲེང་བ་ནི་ལོངས་སྤྱོད་རྫོགས་པའི་རྟགས་སོ། །འཁོར་ལོའི་རྩིབས་ནི་སྤྲུལ་པའི་སྐུའོ། །ཡང་དག་པའི་ཤེས་རབ་ཀྱིས་འཁོར་པ་འཇོམས་པས་འཁོར་ལོའོ། །ཆེ་བའི་ཡོན་ཏན་སྣ་ཚོགས་ལ་མངའ་བརྙེས་པས་ན་རིན་པོ་ཆེའི་ཕྲེང་བའོ། །ཐུགས་རྗེའི་ཕྲེང་ལས་ཀྱིས་སྐྱེ་ཤི་རྩད་ནས་བཅས་པས་ན་རྩིབས་སོ། །ཏིང་ངེ་འཛིན་མི་འགྱུར་པའི་རྟགས་སུ་ནི་རྡོ་རྗེར་རབ་བ་སྟན་ཏོ། །དུས་རྣམ་པ་བཞིའི་སྒོ་ནས་འགྲོ་པའི་དོན་མཛད་པའི་རྟགས་སུ་ནི་གྲུ་ཆད་བཞིར་བ་སྟན་ཏོ། །སྐུ་གསུང་ཐུགས་མི་འགྱུར་པའི་རྟགས་སུ་ནི་ཏྲི་རཱ་ག་དང་ཡེ་ཤེས་རྣམ་པ་ལྔ་དང་ལྡན་པའི་རྟགས་སུ་ནི་པཉྩ་རེ་གར་བ་སྟན། ཏིང་ངེ་འཛིན་རྟོགས་པའི་རྟགས་སུ་སྒོ་ཁྱུད་ལྡན་པས་ཐབས་ཐུགས་རྗེ། འཁོར་བ་ལས་མི་ཉམས་པའི་རྟགས་སེང་གེ་མགོ་གཡས་སུ་བ་སྟན་ལ། སྐུ་ཡང་དག་པའི་སྟོབས་དང་ལྡན་པའི་རྟགས་སུ་ནི་གླང་པོ་ཆེ་གཡོན་དུ་བ་སྟན་ལ། སྒོ་སྟེང་ཐུགས་རྗེ་ཐབས་ཀྱི་རྟ་བབས་དང་ལྡན་པ་ལ་བྱང་ཆུབ་སེམས་ཀྱི་མུ་ཏིག་ཧ་ར་ལ་གསུང་རྣམ་པར་དག་པ་དྲིལ་བུ་དང༌། ཕྲིན་ལས་སྣ་ཚོགས་སུ་འབྱུང་པའི་རིན་པོ་ཆེའི་དོ་ཤལ་དང༌། ཐབས་ཐུགས་རྗེའི་རྡོ་རྗེ་དང༌། ཤེས་རབ་མ་སྐྱེས་པའི་ཟླ་བར་འབྲེལ་པ་ལྟ་བུ་ནི་དཀྱིལ་འཁོར་གྱི་རྒྱན་ཏེ་ཡེ་ཤེས་ཀྱི་རྟགས་སུ་བ་སྟན་ཏོ། །ད་ནི་ནང་དུ་ལྷ་བྲི་བའི་ཁྱད་པར་སྟོན་ཏེ། ཅིའི་ཕྱིར་ཞེ་ན། ལྟེ་བའི་ནང་དུ་ཤཱཀྱ་ཐུབ། །ཅེས་གསུངས་ཏེ། ལྟེ་བ་ནི་དབུས་ཀྱི་ཕོ་བྲང་ངོ༌། །ཤཱཀྱ་ནི་རྒྱལ་པོ་ཤཱཀྱའི་རིགས་ཀྱི་སྲས་ཡིན་པའི་ཕྱིར་ན་ཤཱཀྱའོ། །ཐུབ་ནི་སྐུ་གསུངས་ཐུགས་ཐུབ་ལ། སྐུ་མདོག་སེར་པོ་ཐུགས་རྗེ་ཐབས་ཀྱི་དྲང་སྲོང་དང༌། ཆོས་ཀྱི་དབྱིངས་རྣམ་པར་དག་པའི་བར་དུ་བསྣམས་པར་བྲིའོ། །ད་ནི་མཎྜལ་གྱི་དོན་སྟོན་ཏེ། ཅིའི་ཕྱིར་ཞེ་ན། །ཕྱག་རྒྱ་རྡོ་རྗེ་སྟོབས་པོ་ཆེ། །
དཔའ་བོ་དེ་ཡི་སྤྱན་སྔར་བྲི། །ཞེས་གསུངས་ཏེ། །བཅོམ་ལྡན་འདས་ཀྱིས་མེ་ལོང་ལྟ་བུའི་ཡེ་ཤེས་ལས་སྤྲུལ་ཏེ་རྡོར་ཇེ་ལྟ་བུའི་ཏིང་ངེས་འཛིན་གྱིས་སྟོབས་དང་ལྡན་ལ། །ཡེ་ཤེས་ཀྱིས་ཆོས་ཉིད་སེམས་ཤིང་ཐུགས་རྗེས་འགྲོ་པའི་དོན་ལ་སེམས་པའི་ཕྱིར་ན་སྟོབས་ཆེན་ནོ། །དཔའ་བོ་ནི་ཤཱཀྱ་ཐུབ་པ་སྟེ་ཏིང་ངེ་འཛིན་མི་འགྱུར་པའི་དོ་བོར་གྲུབ་པའོ། །དེའི་སྤྱན་སྔར་བྲི་བ་ནི་མདུན་ཏེ་ཤར་ཕྱོགས་ཀྱི་རྩིབས་ལ་ཐུགས་ཀྱི་རྡོ་རྗེ་དང༌། ཤེས་རབ་ཀྱི་དྲིལ་བུ་དད་ལྡན་པར་བྲི་བའི་ཐ་ཚིག་གོ །རྒྱབ་ཏུ་འཁོར་ལོས་སྒྱུར་པ་བྲིས། །ཞེས་པ་ནི། རྒྱབ་ནི་ནུབ་ཕྱོགས་ཏེ། བཅོམ་ལྡན་འདས་ཀྱི་སོ་སོར་རྟོག་པའི་ཡེ་ཤེས་ལས་སྤྲུལ་ཏེ། དམ་པའི་ཆོས་བདུད་རྩིའི་འཁོར་ལོ་ནི་འགྲོ་བའི་རྒྱུད་ལས་བསྐོར་བ། ཐུགས་རྗེའི་ཐབས་ཀྱི་འཁོར་ལོ་ནི་ཁམས་གསུམ་གྱི་ནང་དུ་སྒྱུར་པའི་ཕྱིར་རོ། །སྐུ་མདོག་དམར་པོ་ཕྱག་ན་འཁོར་ལོ་བསྣམས་པ་སྟེ་ནུབ་ཀྱི་ཕྱོགས་ཀྱི་རྩིབས་ལ་བྲིའོ། །གཡས་ཕྱོགས་རྒྱལ་བའི་གཙུག་ཏོར་བྲི། ཞེས་པ་ནི་བཅོམ་ལྡན་འདས་ཀྱི་གཡས་ནི་ལྷོ་སྟེ། མཉམ་པ་ཉིད་ཀྱི་ཡེ་ཤེས་ཀྱི་ཁྱད་པར་ལས་ཉོན་མོངས་པའི་བདུད་ལས་རྒྱལ་པས་ན་རྒྱལ་པའི་གཙུག་ཏོར་རོ། །ཐུགས་རྗེ་ཐབས་ཀྱིས་འཁོར་བ་དབང་དུ་སྡུད་ཅིང༌། ཕྲིན་ལས་ཐབས་ཀྱི་ཆོ་འཕྲུལ་རྒྱལ་བའི་རྟགས་མངའ་བས་ན་སྐུ་མདོག་སྔོན་པོ་ཕྱག་ན་མཉམ་པ་ཉིད་ཀྱི་ཡེ་ཤེས་མི་འགྱུར་བའི་རྟགས་རྡོ་རྗེ་བསྣམས་པ་ལྷོ་ཕྱོགས་ཀྱི་རྩིབས་ལ་བྲིའོ། །གཡོན་རྣམ་པར་རྒྱལ་པ་ཞེས་པ་ནི་གཡོན་ནི་བྱང་ཕྱོགས་ཏེ། བཅོམ་ལྡན་འདས་ཀྱི་བྱ་བ་ནན་ཏན་གྱི་ཡེ་ཤེས་ལས་ཐུགས་རྗེའི་སྐུ་སྤྲུལ་ཏེ་ཉོན་མོངས་པའི་མཚན་མའི་ཕྲག་དོག་ལས་རྒྱལ་བས་ན། །ཐུགས་རྗེ་ཐབས་ཀྱི་སྤྲུལ་པས་རྒྱལ་པའི་རྟགས་སུ་སྐུ་མདོག་ལྡང་གུ་ཕྱག་ན་ཏིང་ངེས་འཛིན་གྱི་དབུ་རྒྱན་བསྣམས་པ་བྱང་གི་རྩིབས་ལ་བྲིའོ། །གཟི་བརྗིད་ཕུང་པོ་མེ་ཡི་ཕྱོགས། །ཞེས་པ་ཐུགས་ཆོས་ཉིད་ཞི་བའི་ངོ་བོ་ལས་ཐུགས་རྗེར་སྤྲུལ་ཏེ་བྱུང་པས་བྱང་ཆུབ་ཀྱི་སེམས་ཡེ་ཤེས་ཀྱི་གཟི་བརྗིད་སྤངས་པ། རྣམ་པར་དག་པའི་སྐུ་གསུང་ཐུགས་ཀྱི་གཟི་བརྗིད་ཀྱི་ཕུང་པོ་བརྙེས་པས་སྐྱེ་བའི་སྡུག་བསྔལ་འཇོམས་པས་སྐུ་མདོག་དམར་སེར་ཕྱག་ན་ཡེ་ཤེས་ཀྱི་སྤྲིན་ཕུང་བསྣམས་པའོ། །
མེ་ལྷ་དྲང་སྲོང་སྟེ། ཤར་ལྷོའི་རྩིབས་ལ་བྲིའོ། །དབང་པོའི་ཕྱོགས་སུ་གདུགས་དཀར་པོ། །ཞེས་པ་ནི་དབང་ལྡན་བྱང་ཤར་མཚམས་ན་འདུག་པས་བྱང་ཤར་ཕྱོགས་སུའོ། །བཅོམ་ལྡན་འདས་ཀྱི་ཕྲིན་ལས་དྲག་པོའི་རང་བཞིན་ལས་སྐུ་སྤྲུལ་ཏེ་གཏུམ་པོ་ཆེན་པོ་ཡེ་ཤེས་ཀྱི་གཙུག་ཏོར་དང་ལྡན་པ། འབར་བའི་ཕྲེང་བས་ཐུགས་རྗེའི་འོད་ཟེར་འཕྲོ་བ། བྱང་ཆུབ་ཀྱི་སེམས་ཐུགས་རྗེའི་དབུ་གདུགས་ཅན། གདུགས་དཀར་པོ་སྐུ་མདོག་དཀར་སྐྱར་གནས་པ་ཕྱག་ན་གཙུག་ཏོར་བསྣམས་པ་བྱང་ཤར་གྱི་རྩིབས་ལ་བྲིའོ། །རྣམ་པར་འཐོར་བ་རླུང་གི་ཕྱོགས། །ཞེས་པ་ནི། བཅོམ་ལྡན་འདས་ཀྱི་ཐུགས་རྗེ་དབང་གི་ངོ་བོ་ལས་སྐུ་སྤྲུལ་ཏེ། ཕྱིན་ཅི་ལོག་གི་མཚན་མ་སྟོང་པར་བྱེད་པ་ཐུགས་རྗེ་སྤྲུལ་པ་སྡུད་ཅིང་འཐོར་བར་བྱེད་པ། འགྲོ་བའི་དོན་དུ་དབང་གི་རྒྱ་མཚན་འཛུགས་པས་རྒས་པའི་སྡུག་བསྔལ་སྤྱོད་སྟེ། རྣམ་པར་འཐོར་བ་ནི་སྐུ་མདོག་དམར་སྐྱ་ཕྱག་ན་རལ་གྲི་བ་སྣ་མས་པ་རླུང་གི་ཕྱོགས་ཏེ་ནུབ་བྱང་གི་རྩིབས་ལ་བྲིའོ། རྣམ་པར་འཇོམས་པ་བདེན་བྲལ་ཕྱོགས། །ཞེས་པ་ནི། ཐུགས་མཆོག་ཡེ་ཤེས་རྒྱལ་པའི་ངོ་བོ་ལས་སྐུ་སྤྲུལ་ཏེ། །ཐུགས་རྗེ་ཆེན་པོས་སྡུག་བསྔལ་གྱི་མཚན་མ་འཇོམས་པས་ཡེ་ཤེས་ཀྱིས་རྟོག་པའི་དྲ་བ་བཤིགས་ཏེ། རྣམ་པར་འཇོམས་པ་ཐུགས་ཀྱི་སྤྲུལ་པས་ན་བའི་སྡུག་བསྔལ་འཇོམས་ཏེ། རྣམ་པར་འཇོམས་པ་ནི་སྐུ་མདོག་སྔོ་སྐྱ་ཕྱག་ན་བེ་ཅོན་བསྣམས་པ། རྣམ་པར་འཇོམས་པ་བདེན་བྲལ་གྱི་ཕྱོགས་ཏེ་ལྷོ་ནུབ་ཀྱི་ཕྱོགས་རྩིབས་ལ་བྲིའོ། །གྲྭ་ཡི་ཕྱོགས་ནི་ཐམས་ཅད་དུ། །ཞེས་པ་ནི། སྤྱིན་པའི་ངོ་བོ་སྒེག་མོ་སྐུ་མདོག་དཀར་བ་རྡོ་རྗེ་བསྣམས་པ། ཚུལ་ཁྲིམས་ཀྱི་ངོ་བོ་ཕྲེང་བ་མ་སེར་མོ་ཕྲེང་བ་འཛིན་པ། བཟོད་པའི་ངོ་བོ་གླུ་མཁན་མ་དམར་མོ་པི་ཝང་བསྣམས་པ། །བརྩོན་འགྲུས་ཀྱི་ངོ་བོ་གར་མ་ཕྱག་གཉིས་གར་བྱེད་པ་གྲུ་ཆད་ལ་བྲིའོ། །བྲིས་ནས་ཕྱི་རོལ་བྲི་བྱ་སྟེ། །བདུག་སྤོས་ལ་སོགས་བྲི་བར་བྱ། །ཞེས་པ་ནི། ཚུལ་ཁྲིམས་ཀྱི་བདུག་སྤོས་མ་དཀར་མོ་སྤོས་ཁང་བསྣམས་པ། ཏིང་ངེས་འཛིན་གྱི་མེ་ཏོག་མ་སེར་མོ་མེ་ཏོག་བསྣམས་པ། ཤེས་རབ་ཀྱི་མར་མེ་མ་དམར་མོ་མར་མེ་བསྣམས་པ། བྱང་ཆུབ་ཀྱི་སེམས་བདེ་བའི་དྲི་ཆབ་
མ་ལྗང་གུ་དྲི་ཆབ་བསྣམས་པ་ནི་གྲུ་ཆད་ཕྱི་མ་ལ་བྲིའོ། །དཔའ་བོ་ལྕགས་ཀྱུ་ཞགས་པ་དང༌། །ལྕགས་སྒྲོག་དྲིལ་བུ་སྙན་རྣམས་གཞག །ཅེས་པ་ནི་ཐུགས་རྗེའི་ལྕགས་ཀྱུ་མ་དམར་པོ་དང༌། ཕྲིན་ལས་ཀྱི་ཞགས་པ་མ་སེར་མོ་དང༌། །ཐབས་ཀྱི་ལྕགས་སྒྲོག་ན་དམར་མོ་དང༌། །གསུང་རབ་སྒྲའི་དྲིལ་བུ་མ་སྒོ་བཞིར་བྲིའོ། །ཤར་དུ་བྱམས་པ་སྐུ་མདོག་སེར་པོ་ཕྱག་གཡས་ན་ཀླུ་ཤིང་གི་མེ་ཏོག་པ་སྣམ་པ། །གཡོན་པ་སྤྱི་བླུགས་བསྣམས་པ། །མཐོང་བ་དོན་ཡོད་སྐུ་མདོག་སེར་པོ་གཡས་པ་པདྨ་བ་སྣམ་པ། །པདྨའི་སྟེང་ན་མིག་གཡོན་པ་ཁུ་ཚུར་དཀུར་བཞག་པ། ངན་སོང་སྤྱོད་བ་སྐུ་མདོག་དཀར་ལ་འོད་འབར་བ་ལྕགས་ཀྱུ་འཛིན་པའོ། །མྱ་ངན་མུན་འཇོམས་སྐུ་མདོག་དཀར་སེར་གཡས་པ་བེ་ཅོན་འཛིན་པ་གཡོན་པ་དཀུར་བཞག་པའོ། །ལྷོར་སྦོས་ཀྱི་གླང་པོ་སྐུ་མདོག་དཀར་ལྗང་གཡས་ན་སྤོས་ཀྱི་གླང་པོ་བསྣམས་པ་གཡོན་དཀུ་ལ་བརྟེན་པའོ། །དཔའ་བར་འགྲོ་བ་སྐུ་མདོག་དུང་ལྟར་དཀར་བ་གཡས་པ་རལ་གྲི་འཛིན་པ། གཡོན་པ་ཁུ་ཚུར་དཀུ་ལ་བརྟེན་པའོ། །ནམ་མཁའི་མཛོད་སྐུ་མདོག་དཀར་སེར་གཡས་པདྨ་འཛིན་པ། གཡོན་པ་དཀུ་ལ་བརྟེན་པའོ། །ཡེ་ཤེས་ཏོག་སྐུ་མདོག་སྔོན་པོ་གཡས་པ་རྒྱལ་མཚན་འཛིན་པ་གཡོན་པ་ཁུ་ཚུར་དཀུ་ལ་བརྟེན་པའོ། །ནུབ་ཏུ་ཟླ་འོད་སྐུ་མདོག་དཀར་པོ་ཕྱག་གཡས་ན་པདྨའི་སྟེང་ན་ཟླ་ཚེས། གཡོན་པ་ཁུ་ཚུར་དཀུ་ལ་བརྟེན་པའོ། །བདུད་རྩི་འོད་སྐུ་མདོག་དཀར་པོ་ཕྱག་གཡས་པ་བུམ་པ་འཛིན་པ་གཡོན་པ་ཁུ་ཚུར་དཀུ་ལ་བརྟེན་པའོ། །བཟང་སྐྱོང་དཀར་དམར་གཡས་རིན་པ་ཆེ་འབར་བ་འཛིན་པ་གཡོན་པ་ཁུ་ཚུར་དཀུར་བརྟེན་པའོ། །དྲ་བ་ཅན་གྱི་འོད་སྐུ་མདོག་དམར་བ་རྡོ་རྗེའི་དྲ་བ་འཛིན་པའོ། །བྱང་དུ་རྡོ་རྗེ་སྙིང་པོ་སྐུ་མདོག་སྔོ་སྐྱ་གཡས་ན་ཨུཏྤལ་གྱི་སྟེང་ན་རྡོ་རྗེ་དང་གཡོན་པ་དཀུ་ལ་བརྟེན་པའོ། །བློ་གྲོས་མི་ཟད་པ་རྡོ་རྗེ་དང་ཕྱག་གཉིས་ཀྱིས་བུམ་པ་འཛིན་པའོ། །སྤོབས་པ་བརྩེགས་པ་སྐུ་མདོག་དམར་བ། གཡས་པས་པདྨའི་སྟེང་ན་རིན་ཆེན་བརྩེགས་པ་བསྣམས་པ་ཕྱག་གཡོན་པ་ཁུ་ཚུར་དཀུ་ལ་བརྟེན་པའོ། །ཀུན་དུ་བཟང་པོ་སྐུ་མདོག་སེར་པོ་གཡས་ན་རིན་པོ་ཆེའི་སྙེ་མ་བསྣམས་པ་གཡོན་པ་ཁུ་ཚུར་དཀུ་ལ་བརྟེན་པའོ། །དཀྱིལ་འཁོར་བྲི་བའི་
ཐབས་བཤད་ཟིན་ཏོ།། །།ད་ནི་དཀྱིལ་འཁོར་དུ་འཇུག་པ་སྟོན་ཏེ། དེ་ནས་དྲི་ཞིམ་ལ་སོགས་པས། །རང་གི་ལུས་ནི་བསྐུས་ནས་ཀྱང༌། །རྡོ་རྗེ་འཛིན་པར་ཞུགས་ནས་ནི། །ཞེས་གསུངས་ཏེ། དེ་ནས་ནི་སྐབས་ཀྱི་རྟིང་ཐོགས་སོ། །དྲི་ཞིམ་ནི་གུར་གུམ་དང༌། ཙནྡན་དང། སྤོས་དང་གླ་རྩི་ལ་སོགས་པ་རྣམས་སོ། །རང་གི་ནི་སྒྲུབ་པོའམ་སློབ་མ་གང་རུང་བ་ལ་བྱའོ། །ལུས་བ་སྐུས་པ་ནི་ལུས་ལ་ལྡེ་གུ་ཡང་བྱ། །ཆུ་དང་སྤྱར་ཏེ་བཀྲུ་བ་ཡང་ཡིན་ནོ། །རྡོ་རྗེ་ནི་རིག་པ་མོ་ཡང་ཡིན་ལ། འཛིན་པ་ནི་ཕྱག་རྒྱ་སྟེ་བཅའ་བའོ། །ཞུགས་པ་ནི་ལྷའི་དཀྱིལ་འཁོར་དུ་སྤྱན་དྲང་པའི་ཕྱིར་ཕྱག་རྒྱ་བཞིའི་སྔགས་ཀྱིས་སྤྱན་དྲངས་ནས་གཟུགས་བརྙན་ལ་བཞུགས་པར་བསྒོམ་པའོ། །སློབ་དཔོན་རྟོག་པས་ཞུགས་པ་དང༌། སློབ་མ་དད་པས་ཞུགས་པའི་ཕྱིར་སྨོས་སོ། །ཅིའི་ཕྱིར་ཞེ་ན། །དེ་ནས་དེ་བཞིན་གཤེགས་པར་མོས་པ་བསྐྱེད་པ་ནི་ཞེས་གསུངས་ཏེ། དེ་ནས་ནི་གོང་འོག་གི་མཚམས་སྦྱོར་བ། །གཤེགས་པ་ནི་དེ་བཞིན་གཤེགས་པར་སེམས་ཀྱིས་མོས་པ་བསྐྱེད་པའོ། །མཆོད་པ་བྱས་ནས་དེ་བཞིན་གཤེགས་པའི་གཙུག་ཏོར་ནས་དབང་བསྐུར་ཏེ་ཞེས་པ་ནི། མཆོད་པ་ནི་དཀྱིལ་འཁོར་གྱི་ལྷ་མཆོད་པ་གཞུང་བཞིན་དུ་བྱེད་པའོ། །དེ་བཞིན་ནི་གོང་མ་བཞིན་དུའོ། །བཅུག་ནི་སློབ་མ་དཀྱིལ་འཁོར་དུ་བཅུག་སྟེ་དེ་ནས་དབང་བསྐུར་ཏེ། །ཐབས་དང་ཤེས་རབ་ཀྱི་རྡོ་རྗེ་དང་དྲིལ་བུ་དང་རིན་པོ་ཆེ་སྣ་བདུན་དང་ཡོ་གའི་དབང་རྫས་བཅུས་དབང་བསྐུར་ཏེ། ཡོན་ཏན་གཞུང་ལས་སྨོས་པ་བཞིན་ཐོབ་པར་འགྱུར་རོ། །ད་ནི་ཤི་བ་ལ་སྒོས་སུ་ཕན་པའི་དོན་སྟོན་ཏེ། ཅིའི་ཕྱིར་ཞེ་ན། ལྷ་དང་གནོད་སྤྱིན་སྲིན་པོ་ལ་སོགས་པ། །ཞེས་པ་ནི་ལྷའི་རྒྱལ་པོ་རྣམ་སྡང་ཀླུ་དང་གནོད་སྤྱིན་ལ་སོགས་པ་ཡང་ཐུགས་རྗེའི་ཞིང་ཡིན་ཏེ་དེའི་མིང་དང་རུས་ཀྱི་སྒོ་ནས་དམིགས་ཏེ། དཀྱིལ་འཁོར་གྱི་ལྷ་ལ་སྤྱིན་སྲེག་གི་ལས་བྱས་ཤིང༌། མཁྱེན་པར་གསོལ་ན་ཡང་འགྲུབ་ལ། གལ་ཏེ་སེམས་ཅན་པར་མ་དོའི་སྲིད་པ་དེ་ལེན་པས་དེའི་དབང་དུ་ཡང་གསུངས་ཏེ། ཅིའི་ཕྱིར་ཞེ་ན། ངན་འགྲོའི་རྒྱུད་དབང་དུ་གྱུར་པ་རྣམས་ཀྱི་ཞེས་གསུངས་ཏེ་ངན་པ་ནི་བག་ཆགས་སོ། །འགྲོ་བ་ནི་དེར་འགྲོ་བའོ། །
རྒྱུད་ནི་སེམས་ཅན་གྱི་རྒྱུད་དོ། །དབང་དུ་གྱུར་པ་ནི་ལས་ཀྱི་ངོ་བོས་དེར་སྐྱེས་ནས་དབང་དུ་གྱུར་པ་སྟེ། དེ་ལ་ཕན་པའི་ཐབས་བ་སྟན་པའི་ཕྱིར་ཤི་བའི་རོའམ་གཟུགས་བརྙན་ནམ་མིང་ཞེས་སྨོས་ཏེ། །ཤི་བ་ནི་སྲོག་དང་བྲལ་བའོ། །རོ་ནི་དངོས་པོ་ཡོད་པའི་དངོས་པོའོ། །གཟུགས་བརྙན་ནི་མེད་ན་ཡང་རི་མོ་མཁན་གྱི་རས་སམ་དར་ལ་ཚོན་གྱིས་བྲིས་པའོ། །མིང་ནི་གྲོ་གའྨ་ཤོག་ཤོག་ལ་གུར་གུམ་གྱིས་བྲིས་པའོ་།དེ་ཡང་དངོས་པོ་ལ་ཞེན་པས་ནི་རོ་སྨོས་ལ། །གདགས་པའི་གཞི་དགོས་པའི་སྒོ་ནས་མིང་སྨོས་ལ། ཚོན་པར་བྱེད་པའི་སྒོ་ནས་ནི་གཟུགས་བརྙན་སྨོས་ཏེ། དེ་ལ་ཏིང་ངེ་འཛིན་གྱི་བཟླས་པ་དང༌། སྔགས་ཀྱིས་བརྗོད་པ་དང༌། སྤྱིན་སྲེག་ཚུལ་བཞིན་དུ་ནི་བྱས་ཏེ་སྔ་མ་བཞིན་དུ་དབང་བསྐུར་ནས་ངན་སོང་ལས་ཐར་པར་འགྱུར་རོ། །གཙུག་ཏོར་བརྒྱང་ཀྱི་དཀྱིལ་འཁོར་གྱི་དོན་བསྡུས་པ་བཤད་ཟིན་ཏོ།། །།ད་ནི་ཕྱག་རྒྱའི་ལེའུ་སྟོན་ཏེ། ཅིའི་ཕྱིར་ཞེ་ན། དེ་ནས་བཅོམ་ལྡན་འདས་ཕྱག་ན་རྡོ་རྗེ་ཞེས་གསུངས་ཏེ། །རྒྱུད་ཀྱི་སྟོན་པ་གོང་དུ་བཤད་ཟིན་པ་ཡིན་པས་ཕྱག་རྒྱ་ལ་འཇུག་པའི་གོ་རིམས་སྨོས་མོ། །སེང་གེའི་ལྟ་བས་ཞེས་པ་ནི་བག་ཚ་ཞིང་འཇིགས་པ་དང་བྲལ་པའི་ཕྱིར་དང་འཁོར་ཐམས་ཅད་ཟིལ་གྱིས་མནན་པའི་ཕྱིར་དང༌། ཐེག་པ་ཆེན་པོའི་རིགས་ཅན་ཐམས་ཅད་གཟེངས་བསྟོད་པའི་ཕྱིར་བ་སྟན་ཏོ། །བཅོམ་ལྡན་འདས་ཕྱག་རྒྱ་དམ་པའི་ཞེས་པ་ནི། འཁོར་གར་བཞུགས་པའི་ཕྱིར་བཅོམ་ལྡན་འདས་ཞེས་གསུངས་སོ། །ཕྱག་རྒྱ་ནི་རྣམ་པ་གསུམ་སྟེ་མི་འདའ་བའི་ཕྱིར་ཕྱག་རྒྱ་ནི་ཆོས་ཉིད་རྟོགས་པས་མི་འདའོ། །མཚོན་པའི་ཕྱག་རྒྱ་ནི་ཁ་དོག་རྣམ་པ་ལྔའམ་ཕྱག་རྒྱས་མཚོན་པའོ། །འཆའ་བའི་ཕྱག་རྒྱ་ནི་ལག་པའི་སོར་མོ་བྱིན་གྱིས་བརླབས་ཏེ་འཆའ་བའོ། །དམ་པ་མཉེས་པའི་ཕྱིར་དང་གཉིས་སུ་མེད་པའི་ཕྱིར་དམ་པའོ། །ཕྱག་རྒྱའི་མཚན་ཉིད་མདོར་བ་སྟན་པའོ། །ད་ནི་སྐུ་གཟུངས་བྲི་བའི་ཆོ་ག་སྟོན་ཏེ། །ཅིའི་ཕྱིར་ཞེ་ན། །སྐུ་གཟུགས་ཀྱི་ཆོ་ག་འདིར་ཡང་དེ་བཞིན་དུ་བྱ་སྟེ་ཞེས་གསུངས་ཏེ། །སྐུ་གཟུགས་ནི་གཙུག་ཏོར་བརྒྱང་ཀྱི་དཀྱིལ་འཁོར་རྣམས་ལ་སྐུ་གཟུགས་ལ་བྲིས་ཏེ། །བདག་ཉིད་ཀྱང་དེའི་ཞབས་དྲུང་དུ་བྲིས་ལ། །བསྙེན་པ་གོང་དུ་གསུངས་པ་ལྟར་བྱས་ནས་ཡི་
དམ་དུ་བཅས་ན་ངན་སོང་ལས་ཐར་པར་འགྱུར་རོ། །སྐུ་གཟུགས་ཀྱི་དོན་བསྡུས་པ་བཤད་ཟིན་ཏོ།། །།ད་ནི་ཚངས་པ་ལ་སོགས་པ་ཞེས་པ་ནས། དབང་དུ་འགྱུར་ཞེས་པའི་བར་གྱིས་ནི་ནོར་བུ་དྲི་མ་མེད་པའི་འོད་སྔོན་ལས་ཅི་བྱས་བ་ཞུས་པའོ། །དེ་ནས་བཅོམ་ལྡན་འདས་ཞེས་པ་ནས། མ་འོངས་པའི་དུས་ལས་འདས་སོ་ཞེས་པའི་བར་གྱིས་ནི་ལས་ཀྱི་རྣམ་པར་སྨིན་པ་ངན་པར་སྨིན་པའི་རྒྱུ་རྐྱེན་སྟོན། ལན་ཅིག་ཅི་ཞིག་གི་རྐྱེན་གྱིས་ཞེས་པ་ནས། བདེ་མང་ཀུན་གྱི་གནས་སུ་སྐྱེ། །ཞེས་བྱ་བའི་བར་གྱིས་ནི་ལས་ཀྱི་རྣམ་པར་སྨིན་པ་མ་ངེས་པའི་དོན་སྟོན་ཏོ། །འབྲས་བུ་ངན་སོང་དུ་སྐྱེ་རྒྱུ་ལས་རྐྱེན་དྲང་སྲོང་དང་ཕྲད་ནས་ལྷར་སྐྱེས་པའི་དོན་སྟོན་ཏེ། ལྷའི་དབང་པོ་ཉོན་ཅིག་ཅེས་པ་ནས་ལྷའི་འཁོར་འདི་དག་ཡིན་ནོ་ཞེས་བྱ་བའི་བར་གྱིས་ནི་སྔོན་ལས་མཐུན་པའི་འབྲེལ་བ་སྟོན་ཏེ། སྔོན་གྱི་གླེང་གཞིའི་རྒྱུ་ནི་མདོ་སྡེ་ལ་སྨོས་ཏེ་ཡན་ཆད་དུ་ཐལ་ལོ། །ད་ནི་ཚེ་དཔག་མེད་ཀྱིས་ལས་ཀྱི་སྒྲིབ་པ་རྒྱུན་གཅོད་པའི་མཎྜལ་གྱི་དོན་སྟོན་ཏེ། དེ་ལ་ཚེ་ནི་ཡེ་ཤེས་སོ། །དཔག་མེད་ནི་དངོས་པོ་ཐམས་ཅད་དང་བྲལ་པའི་ཐ་ཚིག་གོ །ལས་ནི་དགེ་སྡིག་རྣམ་པ་གཉིས་སོ། །སྒྲིབ་པ་ནི་ནམ་མཁའ་དངས་པ་ལ་སྤྲིན་གྱིས་གཡོགས་པ་དང་འདྲ་བར་ཀུན་གཞི་ལ་རྟོག་པ་གློ་བུར་བས་བསྒྲིབས་པའོ། །རྒྱུན་གཅོད་ནི་གཉེན་པོ་འཕགས་པའི་ལམ་གྱི་ཡེ་ཤེས་ཀྱི་སྟོབས་ཀྱིས་མི་མཐུན་པ་རྒྱུན་གཅོད་པའི་ཐ་ཚིག་གོ །དཀྱིལ་འཁོར་ནི་དཔག་མེད་དེ་ཆོས་ཉིད་དོ། །འཁོར་ནི་ཆེ་སྟེ་ཞེས་པ་ནི། སེམས་ནི་རངས་ཏེ་གསོལ་པ་འདེ་བས་པའི་ཐ་ཚིག་གོ །ཡེ་ཤེས་བཞིའི་འཁོར་རོ། །དེ་བཤད་པའི་ཕྱིར་ཞུ་བ་གསོལ་བ་སྟོན་ཏེ། ཅིའི་ཕྱིར་ཞེ་ན། དེ་ནས་བརྒྱ་བྱིན་དང་ཞེས་སྨོས་སོ། །བརྒྱ་བྱིན་ནི་ཡོན་བདག་ཡིན་པའི་ཕྱིར་དང་གནས་ཀྱི་བདག་པོ་ཡིན་པའི་ཕྱིར་དང་པོར་སྨོས་སོ། །རབ་ཏུ་མགུ་ཞིང་ཡི་རངས་ཏེ། །ཞེས་པ་ནི་སེམས་ནི་རངས་ཏེ་གསོལ་པ་འདེ་བས་པའི་ཐ་ཚིག་གོ །བ་སྤུའི་བུ་ག་ནས་སྤུ་རྣམས་ལངས་པ་ནི་འཁོར་བ་ལ་སྐྲག་ཅིང་འབྲས་བུ་བླ་ན་མེད་པའི་སངས་རྒྱས་ལ་དགའ་བས་ན་སྣ་ལ་སྨོས་སོ། །རྒྱལ་བ་རྒྱལ་པ་ནི་ཡེ་ཤེས་ཀྱི་ཆོས་ཉིད་རྟོགས་པས་མཚན་མ་ལས་རྒྱལ་བ། ཐུགས་རྗེས་འགྲོ་
བའི་དོན་མཛད་པས་འཁོར་བ་ལ་སྤྱོད་པ་རྒྱལ་ལོ། །ཕྱག་ན་རྡོ་རྗེ་ལ་མིང་བཅུས་མངོན་པར་བསྟོད་དེ་ཞེས་པ་ནི། ཕྱག་ན་རྡོ་རྗེ་གནོད་སྤྱིན་ཀུན་དུ་བཟང་པོ་ཡིན་པའི་ཕྱིར་ནི། གནོད་སྤྱིན་སྐད་ཀྱིས་ཕ་རོལ་ཏུ་ཕྱིན་པ་བཅུ་ལ་སོགས་པ་ཡོན་ཏན་གྱི་སྒོ་ནས་བསྟོད་དོ། །དེ་ནི་ཚེ་དཔག་མེད་ཀྱི་མཎྜལ་བཤད་པའི་གསོལ་བ་གདབ་པའི་ཐ་ཚིག་གོ །ཀོ་ཊ་ཀྵ་ནི་ཁྱེད་ཀྱི་ཐབས་ཀྱི་ཕ་རོལ་ཏུ་ཕྱིན་པ་ལ་མངའ་བརྙེས་པའི་རང་བཞིན་ནོ་ཞེས་པའི་ཐ་ཚིག་གོ །ཀོ་ཊ་པ་ནི་ཁྱོད་ཀྱི་ཤེས་རབ་ཀྱིས་སྤྱི་དང་རང་གི་མཚན་ཉིད་འབྱེད་པའི་དོན་ཏོ། །ཀོ་ཊ་ཀོ་ཊ་ནི་ཁྱོད་ཀྱི་བརྩོན་འགྲུས་ཀྱི་སྟོབས་དང་ལྡན་པས་འཁོར་བར་མི་གཏོང་བའི་རྟགས་སོ། །ཀོ་ལ་པ་ལ་ནི་ཁྱོད་ཀྱི་བཟོད་པས་ནི་མི་འཁྲུགས་ཤིང་སྲན་ཚུགས་པའི་དོན་ཏོ། །ཀ་ཏི་ར་ཀ་ནི་ཁྱོད་ཀྱི་ཚུལ་ཁྲིམས་ཡང་དག་པ་མི་ཉམས་པའི་དོན་ཏོ། །ཀོ་ལ་ཀྵ་ནི་ཁྱོད་ཀྱི་སྟོབས་ཀྱི་ཕ་རོལ་ཏུ་ཕྱིན་པ་ནི་གཞན་གྱིས་མི་གནོན་པའི་རྟགས་སོ། །ཀོ་ལ་པ་ནི་ཁྱོད་ཀྱི་སྤྱིན་པའི་ཕ་རོལ་ཏུ་ཕྱིན་པ་ནི་ཡོངས་སུ་གཏོང་བའི་མཚན་ཉིད་དང་ལྡན་པའི་རྟགས་སོ། །ཀོ་ལ་ཀོ་ལ་ནི་ཁྱོད་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་ནི་ཡེ་ནས་ཤེས་པའི་རང་བཞིན་ཅན་ཡིན་པའི་རྟགས་སོ། །བྷཉྫ་ནི་ཁྱོད་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་སྐྱོ་དུབ་མེད་པའི་མཚན་ཉིད་དོ། །ཀོ་ལ་པ་ཏི་ནི་ཁྱོད་ཀྱི་སྨོན་ལམ་གྱི་ཕ་རོལ་ཏུ་ཕྱིན་པ་ནི་མཐུན་པའི་ཡེ་ཤེས་ལ་དམིགས་པའི་དོན་ཏོ། །ཀོ་ལ་ཏ་ཐ་ཨིནྟི་ནི་ཁྱོད་ནི་བསམ་གཏན་གྱི་ཕ་རོལ་ཏུ་ཕྱིན་པའི་དོན་མཐོང་བའི་ཆོས་ཉིད་བསམ་དུ་མེད་པ་ལ་གཏན་འཆའ་བའི་ཕྱིར་རོ། །ཐབས་ཀྱི་ཕ་རོལ་ཏུ་ཕྱིན་པས་ནི་རྡོ་རྗེ་འཛིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་པས་ནི་མགོན་པོ་རྒྱལ་མཚན་གྱི་དཔུང་རྒྱན་ཅན་ནོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པས་ནི་གླང་པོའི་རྣ་བ་དང་ལྡན་པའོ། །བཟོད་པའི་ཕ་རོལ་ཏུ་ཕྱིན་པས་ནི་རྣམ་པར་གནོན་པའི་ངོ་བོ་བརྙེས་སེ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་ནི་ཡོན་ཏན་རིན་ཆེན་འབྱུང་ལྡན་དུ་འགྱུར་རོ། །སྟོབས་ཀྱི་ཕ་རོལ་ཏུ་ཕྱིན་པས་ནི་བདེན་པའི་དོན་སྟོན་པ་ཐོབ་པའོ། །སྤྱིན་པའི་ཕ་རོལ་ཏུ་ཕྱིན་པས་ནི་གཟུགས་མཛེས་པ་ཐོབ་བོ། །ཡེ་ཤེས་ཀྱི་ཕ་རོལ་ཏུ་ཕྱིན་པས་ནི་ཡིད་ཀྱིས་བརྒྱན་པ་
འགྲུབ་པོ། །སྨོན་ལམ་གྱི་ཕ་རོལ་ཏུ་ཕྱིན་པས་ནི་མེ་འབར་བ་ཅན་འགྲུབ་པོ། །བསམ་གཏན་གྱིས་ནི་གཟུགས་མཛེས་པ་ཡིན་ཞེས་པའོ། །གསང་བའི་བདག་པོས་བཤད་དུ་གསོལ། །ཞེས་པའི་བར་གྱིས་གསོལ་བ་བཏབ་པའོ། །དེ་ནས་བཅོམ་ལྡན་འདས་ཞེས་པ་ནས་བཤད་དུ་གསོལ་ཞེས་པའི་བར་གྱིས་ནི་བཀའ་ངང་བ་བ་སྟན་ཏོ། །ད་ནི་དཀྱིལ་འཁོར་གྱི་ཡིག་འབྲུའི་དོན་ཏེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་ཞེས་པ་ནི། ངང་ནས་ཚེ་དཔག་མེད་ཀྱི་ཏིང་ངེ་འཛིན་ལ་ཞུགས་པའི་ཕྱིར་ན་སྨོས་སོ། །ཐམས་ཅད་ཀྱི་ཚེ་དཔག་ཏུ་མེད་པ་ཞེས་པ་ནི་ཐམས་ཅད་ནི་དངོས་པོར་སྣང་བའོ། །ཚེ་ནི་ཡེ་ཤེས་ཀྱི་དངོས་པོ་མེད་པར་རྟོགས་པས་ན་དཔག་མེད་དོ། །ཁྱད་པར་དུ་འབྱུང་བའི་རྡོ་རྗེ་ཞེས་པ་ནི། དབྱིངས་ཁྱབ་པའི་རང་བཞིན་ལས་ཡེ་ཤེས་འབྱུང་བའི་ཕྱིར་ན་རྡོ་རྗེ་ཞེས་སྨོས་སོ། །ཕྱི་མ་ནི་བདེ་སྟེ་མ་སྨོས་སོ། །ཐུགས་ཆོས་ཀྱི་ཡི་གེ་ཉིད་དུ་ཞུགས་པར་གྱུར་པ་ནི་ཐུགས་ནི་ཡེ་ཤེས་ལྔའི་རང་བཞིན་ལ། ཆོས་ནི་མཛད་པ་བཅུ་གཉིས་ཀྱི་ཚུལ་དུ་ཕྲིན་ལས་མཛད་པའི་དོན་ཏོ། །དེ་ཅིའི་ཕྱིར་ཞེ་ན། ཚེ་དཔག་ཏུ་མེད་པ་རྡོ་རྗེའི་འོད་བྱེད་པ་ནི། ཡང་དག་པའི་ཡེ་ཤེས་དངོས་པོ་དང་བྲལ་བས་ནི་དཔག་ཏུ་མེད་ལ། རྡོ་རྗེ་ལྟར་འདུས་མ་བྱས་པས་ནི་ཐུགས་རྗེའི་འོད་བྱེད། གདོན་མི་ཟ་བའི་སྒྲིབ་པ་རྣམ་པར་འཇོམས་པ་ནི་ཞེས་པ་ལ་གདོན་མི་ཟ་ནི་ཕྲིན་ལས་གདོན་མི་ཟ་ལ། སྒྲིབ་པ་ནི་ཉོན་མོངས་པའོ། །འཇོམས་པ་ནི་མཚན་མ་ཐམས་ཅད་འཇོམས་པའོ། །དྲི་མ་མེད་ཅིང་རྣམ་པར་དག་པའི་རྡོ་རྗེ་ནི། དྲི་མ་ནི་གཟུང་འཛིན་གྱི་བག་ཆགས་སོ། །མེད་པ་ནི་དག་པའོ། །རྡོ་རྗེ་ནི་ཆོས་ཉིད་དུ་བསྒོམ་པའོ། །གདོན་མི་ཟ་བར་མི་ཆོམས་པ། །ཞེས་པ་ནི། ཐུགས་རྗེ་དང་ཕྲིན་ལས་གཞན་གྱིས་མི་ཆོམས་པའོ། །དེ་རྣམས་ནི་རིགས་ལྔའི་སྙིང་པོ་སྟེ་ཅི་རིགས་པར་སྤྱར། སྔགས་ཀྱི་ཡིག་འབྲུའི་དོན་བསྡུས་པ་བཤད་ཟིན་ཏོ།། །།ད་ནི་དཀྱིལ་འཁོར་བྲི་བའི་ཐབས་སྟོན་ཏེ། དེ་ཅིའི་ཕྱིར་ཞེ་ན། གྲུབ་ཞི་པ་ལ་སྒོ་བཞི་པ། །སྒོ་བ་རྣམས་དང་ལྡན་པ་སྟེ། །རྟ་བབས་བཞི་དང་ལྡན་པར་བྱ། །ལྟེ་བ་དང་ནི་མུ་ཁྱུད་ལྡན། །ཞེས་གསུངས་ཏེ། གྲུབ་བཞི་ནི་ཕྲིན་ལས་
རྣམ་པ་བཞིས་འགྲོ་བའི་དོན་བྱེད་པའི་རྟགས་ཡིན་པས་གྲུབ་ཞིར་ལྡན་ནོ། །སྒོ་བཞི་ནི་ཚད་མེད་པའི་ཕྲིན་ལས་རྣམ་པ་བཞིས་འགྲོ་བ་ལ་དབྱུང་བའི་སྒོ་དང༌། བསྡུ་བའི་དངོས་པོ་བཞིས་ཐེག་པ་ཆེན་པོ་ལ་འཛུད་ཅིང་འགོད་པའི་རྟགས་སོ། །སྒོ་བ་ནི་དེའི་ཕྱག་རྒྱ་སྟེ་ཡེ་ཤེས་ཀྱི་འོད་དང་ལྡན་པར་བྲིའོ། །རྟ་བབས་བཞི་ནི་སྒོ་བཞི་བང་རིམ་གྱི་ཐེམ་པ་བཞི་སྟེ། སྙིང་རྗེ་ལ་སོགས་པ་ཚད་མེད་པ་བཞིའི་རྟགས་སོ། །ལྟེ་བ་ནི་དབུས་ཀྱི་ཕོ་བྲང་ཟླུམ་པོ་སྟེ་ཆོས་ཉིད་ཀྱི་རྟགས་སོ། །དེའི་དབུས་སུ་འཁོར་ལོ་ནི། །ཞེས་པ་ནི། དེ་ནི་དཀྱིལ་འཁོར་ལ་བྱའོ། །དབུས་ནི་དཀྱིལ་འཁོར་གྱི་སུམ་གཉིས་ལ་བྱའོ། །འཁོར་ལོ་ནི་རྩིབས་བཞི་བའོ། །དཀྱིལ་འཁོར་དམ་པ་བྲི་བར་བྱ། །ཞེས་པ་ནི། དཀྱིལ་ནི་དབུས་ཀྱི་ཕོ་བྲང་སྟེ་གཙོ་བོའི་ས་བཅད་དོ། །རྩིབས་བཞི་པ་དང་ལྡན་པ་ལ། །ཞེས་པ་ནི་རྩིབས་བཞི་པ་ནི་འཁོར་ལོའི་ལྕེ་བཞིའོ། །དེ་ནི་ཡེ་ཤེས་རྣམ་པ་བཞིའི་ཕྲིན་ལས་སོ། །ལྟེ་བ་དཀྱིལ་འཁོར་ལྡན་པར་བྱ། །ཞེས་པ་ནི་ལྟེ་བ་ནི་དབུས་ཀྱི་ཕོ་བྲང་ཟླུམ་པོ་ལ། དཀྱིལ་ནི་དེའི་ས་བཅད་དོ། །འཁོར་ལོ་ནི་རྩིབས་སུ་བ་སྟན་ཏོ། །ལྡན་པར་བྱ་བ་ནི་ལྷ་བྲི་བའི་ཐ་ཚིག་གོ །དེ་ཅིའི་ཕྱིར་ཞེ་ན། །དེ་ཡིད་བུས་སུ་གཙོ་བོ་ནི། །ཞེས་གསུངས་ཏེ་དེ་ནི་འཁོར་ལོའོ། །དབུས་ནི་ལྟེ་བའོ། །གཙོ་བོ་ནི་ཕྱག་ན་རྡོ་རྗེ་སྐུ་མདོག་ལྗང་སྐྱ་ཞལ་ཟླ་བ་རྒྱས་པ་ལྟར་འཛུམ་པ་ཕྱག་གཡས་ན་རྡོ་རྗེ། གཡོན་པ་ན་དྲིལ་བུ་བསྣམས་པ། རྒྱན་སྣ་ཚོགས་ཀྱིས་བརྒྱན་པ་བྲིའོ། །ཤར་གྱི་རྩིབས་ཀྱི་སྟེང་དུ་ནི་མགོན་པོ་མི་བསྐྱོད་པ་བྲི་བར་བྱ་ཞེས་པ་ནི། ཤར་ནི་ཤར་ཀྱི་ཕྱོགས་སོ། །རྩིབས་ནི་འཁོར་ལོའི་ལྕེའོ། །མགོན་པོ་ནི་ཁམས་གསུམ་གྱི་མགོན་མཛད་ཅིང་མཚན་མས་མི་བསྐྱོད་པས་སྐུ་མདོག་དཀར་པོ་ས་གནོན་གྱི་ཕྱག་རྒྱ་ཅན་བྲིའོ། །ལྷོའི་རྩིབས་ལ་རིན་ཆེན་འབྱུང་ལྡན་མཆོག་སྤྱིན་གྱི་ཕྱག་རྒྱ་ཅན་བྲིའོ། །ནུབ་ཀྱི་རྩིབས་ལ་སྣང་བ་མཐའ་ཡས་སྐུ་མདོག་དམར་པོ་ཏིང་ངེ་འཛིན་གྱི་ཕྱག་རྒྱ་ཅན་བྲིའོ། །བྱང་གི་རྩིབས་ལ་གདོན་མི་ཟ་བར་གྲུབ་པ་སྐུ་མདོག་ལྗང་གུ་སྐྱབས་སྤྱིན་གྱི་ཕྱག་རྒྱ་ཅན་བྲིའོ། །ཕྱི་མ་ནི་གཙུག་ཏོར་བརྒྱང་དང་ཆ་མཐུན་ནོ། །འཁོར་ལོས་སྒྱུར་བའི་ཆ་ལུགས་སུ་བྲི། མཎྜལ་དུ་བདག་ཉིད་ཞུགས་ཤིང་ལྷ་སྤྱན་དྲང་བ་ནི། དེ་ནས་རྣམ་གྲོལ་ཅན་ཉིད་དང༌། །ཞེས་པ་ནས།
ས་མ་ཡ་ཧཱུཾ་ཞེས་པའི་བར་གྱིས་བ་སྟན། །རྡོ་རྗེ་ཏི་རི་ཞེས་པ་ནས་བཛྲ་ཧཱུཾ་ཞེས་པའི་བར་གྱིས་ནི་རིག་པའི་མེ་ཏོག་དེ་མཎྜལ་དུ་འཇུག་པ་བ་སྟན། དེ་ནས་ཞེས་བ་ནས་ཧཱུཾ་ཞེས་བའི་བར་གྱིས་ནི་དམ་ཚིག་བསྒྲག་པ་བ་སྟན། བར་གྱི་ཚིགས་གཉིས་ཀྱིས་ནི་དཀྱིལ་འཁོར་བ་སྟན་པའོ། །དེ་ནས་འདི་ཞེས་བ་ནས་ཨ་བྷི་ཥིཉྩ་ཧཱུཾ་ཞེས་པའི་བར་གྱིས་ནི་དབང་བསྐུར་བ་བ་སྟན། དེ་ནས་ཞེས་པ་ནས་ཨཿ་ཞེས་པའི་བར་གྱིས་ནི་ཚེ་བསྲིང་བའི་ཐབས་བ་སྟན། དེའི་སྒྲུབ་པ་ཞེས་པ་ནས་བཟླས་བརྗོད་ཅེས་པའི་བར་གྱིས་ནི། བསྒྲུབ་པའི་ལྷ་བྲི་བ་བ་སྟན། ད་ནི་སྒྲུབ་པ་པོ་སྟོན་ཏེ་དེ་ནས་ཟླ་བ་ཉའི་ཚེ་མཆོད་པ་ཆེན་པོ་བྱས་ལ་བ་དམར་སེར་གྱི་མར་སྣོད་སར་པར་བཅུག་ལ་ཞེས་པ་ནི་སྒྲུབ་པ་བྱེད་པའི་དུས་ནི་ཟླ་བ་ཉ་བ་སྟེ། ཚོགས་གཉིས་རྫོགས་པའི་ཕྱིར་དང༌། །ཏིང་ངེ་འཛིན་རྒྱས་པའི་ཕྱིར་དང༌། འཇིག་རྟེན་པ་དང་མཐུན་པའི་ཕྱིར་སྨོས་སོ། །ཕྱི་ནང་གི་མཆོད་པས་མཉེས་པར་བྱ་བའི་ཕྱིར་འཕགས་པ་ལ་མཆོད་པ་ཕུལ་ལ། བདག་གིས་སྣོད་གཙང་མའི་ནང་དུ་བ་དམར་སེར་གྱི་མར་དང༌། ཏིལ་མར་དང༌། གུར་གུམ་ལ་སོགས་པ་བསྲེས་ཤིང་བཅུག་ལ། བདག་ཉིད་ལས་ཀྱི་ལྷ་ཕྱག་ན་རྡོ་རྗེའི་ཏིང་ངེ་འཛིན་དུ་ཞུགས་ལ། ལག་པ་གཡོན་པ་རྡོ་རྗེ་རྩེ་གསུམ་གྱི་ཕྱག་རྒྱ་བཅས་ལ་སྣོད་ལ་གཏད་ལ་གཡས་པ་ཐལ་མོ་ཁོང་སྟོང་དུ་སྤྱར་ཏེ། བཅོམ་ལྡན་འདས་ཚེ་དཔག་མེད་རབ་ཏུ་བསམ་ཞིང༌། སྐུའི་གཟུགས་བརྙན་ལ་དམིགས་པའི་རྟེན་བཅས་ནས་བསྙེན་པ་དང་བཟླས་བརྗོད་ཚུལ་བཞིན་བྱས་ནས། དངོས་གྲུབ་མཚན་མ་མ་བྱུང་ན་ཡང༌། དེ་ལ་མར་སར་པའམ། ཏིལ་མར་རམ་འོ་མ་ཆང་ངམ་ཁྲག་གམ་ཞག་གམ་གླང་བའམ་ཤའམ་གང་ཡང་རུང་བ་ལ་བཟླས་ཤིང་བདག་ཉིད་ཀྱིས་བཤགས་པ་བྱ་ཞིང༌། བདག་ཉིད་ཀྱི་ལུས་གུར་གུམ་གྱི་ཆུ་ལ་བཀྲུས་ལ་བསྙེན་པ་ཡུན་རིང་དུ་བྱས་ན་འགྲུབ་པར་ཐེ་ཚོམ་མེད་དོ། །ཚེ་དཔག་མེད་ལས་ཀྱི་སྒྲིབ་པ་རྒྱུན་གཅོད་པའི་ཕྱག་ན་རྡོ་རྗེའི་འདི་དཀྱིལ་འཁོར་བཤད་ཟིན་ཏོ།། །།ད་ནི་རྒྱལ་པོ་ཆེན་པོ་བཞིའི་དཀྱིལ་འཁོར་སྟོན་ཏེ། ཅིའི་ཕྱིར་ཞེ་ན། དེ་ནས་རྒྱལ་པོ་ཆེན་པོ་བཞིས། །ཞེས་གསུངས་ཏེ། དེ་ནས་ནི་ཚེ་དཔག་མེད་ཀྱི་དཀྱིལ་འཁོར་རྟིང་ཐོགས་སུ་འབྱུང་བའི་ཕྱིར་ན་དེ་ནས་ཞེས་
བྱའོ། །རྒྱལ་པོ་ནི་རྒྱ་ལ་པོ་ཆེན་པོ་བཞི་ལྷའི་རྒྱལ་པ་ཡིན་པའི་ཕྱིར་རོ། །ཆེན་པོ་ནི་སྐུ་བཞི་དང་དཔལ་བརྒྱང་བཀའ་སྲུང་རིགས་ཀྱིས་འདུལ་བའི་ཕྱིར་ཕྲིན་ལས་མཛད་པའི་ཕྱིར་ན་ཆེན་པོའོ། །བཞི་ནི་ཡུལ་འཁོར་སྲུང་དང༌། འཕགས་སྐྱེས་པོ་དང༌། མིག་མི་བཟང་དང༌། རྣམ་ཐོས་སྲས་ལ་སོགས་པ་བཞིས་བཀའ་སྩལ་དུ་གསོལ་བྱ་བའི་བར་གྱིས་རང་གི་སྙིང་པོ་འགྲོ་བ་ལ་ཕན་པའི་དོན་དུ་མདོངས་གསོལ་དུ་དབུལ་བར་གསོལ་བའོ། །དེ་བཞིན་གཤེགས་པས་བཀའ་ངང་བ་དང་རྒྱལ་པོས་སྙིང་པོ་ཕུལ་བ་ནི་བདེ་སྟེ་མ་སྨོས་སོ། །ད་ནི་དཀྱིལ་འཁོར་བྲི་བའི་དོན་བ་སྟན་ཏེ། དེ་ནས་དེ་དག་གི་དཀྱིལ་འཁོར་བཤད་དེ་ཞེས་གསུངས་ཏེ། དེ་ནས་ནི་སྙིང་པོ་ཕུལ་བའི་རྟིང་ཐོགས་སོ། །དཀྱིལ་ནི་ཕྱག་ན་རྡོ་རྗེ་དབུས་ན་བཞུགས་པའོ། །འཁོར་ནི་རྒྱལ་པོ་ཆེན་པོ་བཞིའོ། །བཤད་པ་ནི་དོན་བཤད་པའོ། །ཅིའི་ཕྱིར་ཞེ་ན། གྲུབ་ཞི་པ་ལ་སྒོ་བཞི་པ། །དཀྱིལ་འཁོར་ལྡས་ནི་བརྒྱན་པ་སྟེ། །ཞེས་གསུངས་ཏེ། གྲུ་བཞི་ནི་རྒྱལ་པོ་ཆེན་པོ་བཞི་ཡོད་པས་གྲུ་བཞིར་བྱའོ། །སྒོ་བཞི་ནི་རྒྱལ་པོ་བཞིས་ཕྱོགས་བཞི་ནས་རིགས་ཀྱིས་འདུལ་བ་དང་དམ་བཅའ་བའི་ཕྲིན་ལས་མཛད་པས་ན་སྒོ་བཞིའོ། །དཀྱིལ་འཁོར་ནི་ཕྱག་ན་རྡོ་རྗེ་དབུས་ན་བཞུགས་པའོ། །ལྡས་བརྒྱན་ཞེས་བ་ནི་རྒྱལ་པོ་ཆེན་པོ་བཞི་དང་ལྔ་ཡོད་པའི་ཕྱིར་ན་ལྡས་བརྒྱན་ཏེ་ཞེས་སྨོས་སོ། །དེ་ཡང་མཎྜལ་གྱི་སུམ་གཉིས་ལ་ཐཾ་ག་བཞི་བཏབ་པའི་རེའུ་མིག་དགུ་ལ། དབུས་སུ་ཕྱག་ན་རྡོ་རྗེ་འགྱིང་བག་ཏུ་བྲི། རེའུ་མིག་གི་མཚམས་སུ་རྒྱལ་པོ་ཆེན་པོ་བཞིའི་བཙུན་མོ་བྲིའོ། །ཡུལ་འཁོར་སྲུང་གི་བཙུན་མོ་རྡོ་རྗེ་མདའ་བྱེད་མ་དང༌། འཕགས་སྐྱེས་པོའི་བཙུན་མོ་དཔེ་མེད་མ་དང༌། །མིག་མི་བཟང་གི་བཙུན་མོ་འདུལ་མཁས་མ་དང༌། རྣམ་ཐོས་སྲས་ཀྱི་བཙུན་མོ་ཕྲེང་འཛིན་དང༌། རེའུ་མིག་གི་བར་ཡང་རིན་པོ་ཆེའི་ཕྲེང་བས་བཅད་དོ། །ཕྱི་རོལ་ཡང་ཟླུམ་པོས་བསྐོར། གྲུ་ཆད་བཞི་ལ་དུས་བཞི་བྲིའོ། །དེའི་ཕྱི་རོལ་དུ་མཆོད་སྣམ་བཅད། སྒོ་བཞི་ཡང་ཕྱོགས་སུ་བྲིའོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅས་ལ་སློབ་མ་གཞུག །རིག་པའི་མེ་ཏོག་དོར། གང་ལ་བབ་པའི་རྒྱལ་པོས་དབང་བསྐུར། ད་ནི་དབང་བསྐུར་བ་སྟོན་ཏེ། དེ་ནས་གྲྭ་ན་གཞག་བ་
ཡི། །བུམ་པ་བཞིས་ནི་དབང་བསྐུར་ཏེ། །ཞེས་གསུངས་ཏེ། དེ་ནས་ནི་ཞེས་པ་ནི་མཎྜལ་བྲི་བའི་རྟིང་ཐོགས་སོ། །མཚམས་ཞེས་བྱ་བ་ནི་རེའུ་མིག་གི་མཚམས་སུ་གཞག་པའོ། །བུམ་པ་བཞི་རྒྱལ་པོ་བཞིའི་སྔགས་དང་ཕྱག་རྒྱ་དང་ལྡན་པར་བྱ་སྟེ། དེ་ནས་བདག་ཉིད་ཕྱག་ན་རྡོ་རྗེའི་ཏིང་ངེ་འཛིན་དུ་ཞུགས་ལ། དང་པོ་ཕྱག་ན་རྡོ་རྗེའི་དབང་བསྐུར། དེ་ནས་རྒྱལ་པོ་ཆེན་པོ་བཞིའི་བུམ་པ་ཕྱོགས་ཕྱོགས་ན་ཡོད་བས་རིམ་པས་དབང་བསྐུར་ལ་བྱིན་གྱིས་བརླབས་ན་ཡོན་ཏན་གཞུང་ལས་འབྱུང་བ་བཞིན་ཐོབ་པར་འགྱུར་རོ། །རྒྱལ་པོ་ཆེན་པོ་བཞིའི་དཀྱིལ་འཁོར་གྱི་དོན་བསྡུས་པ་བཤད་ཟིན་ཏོ།། །།ད་ནི་ཕྱོགས་སྐྱོད་བཅུའི་དཀྱིལ་འཁོར་བཤད་དེ། དེ་ནས་ཕྱོགས་སྐྱོང་བ་རྣམས་ཀྱིས་ཞེས་པ་ནི། དེ་ནས་ནི་རྒྱལ་པོ་ཆེན་པོ་བཞིའི་རྟིང་ཐོགས་སོ། །ཕྱོགས་ནི་ཕྱོགས་བཞི་མཚམས་བཞི་དང་བརྒྱང་སྟེང་འོག་དང་བཅུའོ། །སྐྱོང་བ་ནི་དེ་རྣམས་ཀྱིས་འཇིག་རྟེན་སྐྱོང་བའོ། །དེ་རྣམས་ཀྱིས་ནི་འཁོར་རྣམས་ཀྱིས་རང་གི་སྙིང་པོ་འབུལ་བར་ཞུས་པ་དང༌། ངང་བ་དང་སྙིང་པོ་ཕུལ་བའོ། །ད་ནི་དཀྱིལ་འཁོར་བྲི་བ་སྟོན་ཏེ། དེ་ནས་དེ་དག་གི་དཀྱིལ་འཁོར་བཤད་དེ་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །དེ་དག་ནི་ཕྱོགས་སྐྱོང་པའོ། །དཀྱིལ་ནི་དབུས་སུ་མགོན་པོ་ཕྱག་ན་རྡོ་རྗེ་བྲིའོ། །འཁོར་ནི་ཕྱོགས་སྐྱོང་བཅུའོ། །བཤད་པ་ནི་དོན་བཤད་པའོ། །དཀྱིལ་འཁོར་སྔ་མ་བཞིན་བྲིས་ལ་ཞེས་པ་ནི། སྔ་མ་ནི་རྒྱལ་པོ་ཆེན་པོ་བཞི་དང་འདྲ་བར་བྲི་བའི་ཐ་ཚིག་གོ །ཕྱོགས་བཞི་མཚམས་བརྒྱང་ཀྱི་རེའུ་མིག་ལས་དབུས་ཀྱི་རེའུ་མིག་ལ་བཅོམ་ལྡན་འདས་ཕྱག་ན་རྡོ་རྗེ་ཞིབ་སྐུ་མདོག་ལྗང་གུ་ཕྱག་གཡས་པ་རྡོ་རྗེ་ཐུགས་ཀར་འཛིན་པ། གཡོན་དྲིལ་བུ་དཀུ་ལ་བརྟེན་པ་བྲིའོ། །དེའི་མདུན་དུ་ཉི་མ་དམར་པོ་ཤིང་རྟ་ལ་ཞོན་པ་ཉི་མ་འཛིན་པ། ཟླ་བ་དཀར་པོ་ངང་པ་ལ་ཞོན་པ་ཟླ་བ་འཛིན་པ། རྒྱབ་ཏུ་ས་བདག་ཕག་མགོ་ཅན་པི་ཝང་འཛིན་པ། ཤར་དུ་བརྒྱ་བྱིན་སེར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ། ལྷོར་གཤིན་རྗེ་སྔོན་པོ་མ་ཧེ་ལ་ཞོན་པ་དབྱུག་ཏོ་འཛིན་པ། ནུབ་ཏུ་ཆུ་ལྷ་དཀར་པོ་ཆུ་སྲིན་ལ་ཞོན་བ་སྤྲུལ་ཞགས་འཛིན་པ། བྱང་དུ་གནོད་སྤྱིན་སེར་པོ་རྟ་ལ་ཞོན་པ་རིན་པོ་ཆེ་འཛིན་པ། བྱང་ཤར་དུ་དབང་ལྡན་དཀར་པོ་གླང་ལ་ཞོན་པ་རྩེ་
གསུམ་འཛིན་པ། ཤར་ལྷོར་མེ་ལྷ་དམར་པོ་ར་ལ་ཞོན་པ་དབྱུག་ཏོ་འཛིན་པ། ལྷོ་ནུབ་ཏུ་སྲིན་པོ་ནག་པོ་མི་ལ་ཞོན་པར་རལ་གྲི་འཛིན་པ། ནུབ་བྱང་དུ་རླུང་ལྷ་ལྗང་གུ་ཤ་བ་ལ་ཞོན་པ་བདག་འཛིན་པ། སྒོ་བ་རྣམས་ཀྱང་དེ་བཞིན་དུ་ཕྱི་མ་ནི་རྒྱལ་པོ་ཆེན་པོ་བཞི་དང་མཐུན་ནོ། །དེ་ནས་སྤྱན་དྲང་པ་དང། བདག་ཉིད་ཞུགས་པ་དང༌། སློབ་མ་གཞུག་པ་དང༌། ཕྱོགས་སྐྱོང་བ་བཅུའི་སྔགས་ཀྱིས་བཏབ་པའི་བུམ་པ་རྣམས་ཀྱིས་དབང་བསྐུར་བ་དང༌། དེའི་ཡོན་ཏན་དང༌། ཡོན་ཏན་གྱི་ཆེ་བ་བསྲུང་ཞིང་འཕེལ་བར་བྱ་བ་དང༌། སོ་སོ་རང་རང་གི་ཕྱོགས་སྲུང་བའི་ཕྱིར་དམ་བཅས་བ་ནི་བདེ་སྟེ་བཤད་མི་དགོས་སོ། །ཕྱོགས་སྐྱོང་བ་བཅུའི་མཎྜལ་འདིས་ནི་གདོན་སྟོང་ཕྲག་བརྒྱང་ཅུ་རྩ་བཞི་ཟློག་པར་བགྱིད་པས་ཕྱོགས་སྐྱོང་བཅུའི་དཀྱིལ་འཁོར་གསུངས་ཏེ་དེ་ནི་འཇིག་རྟེན་པའི་གཙོ་བོ་ཡིན་པས་ན་འཇིག་རྟེན་པ་ལ་ཕན་པའི་དོན་དུ་བཤད་དོ། །ཕྱོགས་སྐྱོང་བཅུའི་དཀྱིལ་འཁོར་གྱི་དོན་མདོར་བསྡུས་པ་བཤད་ཟིན་ཏོ། །ད་ནི་གཟའ་ཆེན་པོ་བརྒྱང་ཀྱི་མཎྜལ་བཤད་དེ། དེ་ནི་སེམས་ཅན་ལ་གཟའ་ཆེན་པོ་བརྒྱང་གཤེད་དང་སྐར་མའི་རླུང་རྣམས་ཞི་བར་བྱ་བའི་ཕྱིར་གསུངས་ཏེ། དེ་ཡང་ཅིའི་ཕྱིར་ཞེ་ན། དེ་ནས་གཟའ་ཆེན་པོ་བརྒྱང་དང༌། འཁོར་རྒྱུ་སྐར་དང་བཅས་པ་རྣམས་ཀྱིས་ཞེས་གསུངས་ཏེ། དེ་ནི་སྐབས་ཀྱི་རྟིང་ཐོགས་སུ་འབྱུང་བའོ། །ནས་ནི་འོག་གི་མགོ་འདྲེན་པའོ། །གཟའ་ནི་དཔེར་ན་འཇིག་རྟེན་པ་དག་སྒྲ་ལ་གཟའ་ཞུགས་ན་མི་རུང་པར་འགྱུར་རོ་ཞེས་གསུངས་ཏེ། དེ་བཞིན་དུ་འཇིག་རྟེན་པའི་གཟའ་ཆེན་པོ་བརྒྱང་ནི་འཇིག་རྟེན་ན་རྒྱུ་བའི་མ་རུངས་པ་སྟེ་བར་སྣང་ལ་གནས་ཤིང་གནོད་པའི་གདུག་རྩུབ་བྱེད་པའི་ཕྱིར་སྨོས་སོ། །དེའི་འཁོར་ནི་རྒྱུ་སྐར་ཏེ་ནམ་མཁའ་ལ་རྒྱུ་ཞིང་ཟླ་བའི་མངག་གཞུག་དང༌། ལས་ཀུན་བྱེད་པས་ན་རྒྱུ་སྐར་རོ། །དེ་རྣམས་ནི་བཅོམ་ལྡན་འདས་ཀྱི་འཁོར་ཡིན་པས་འཇིག་རྟེན་པའི་གནོད་པ་ཞི་པར་བྱ་བའི་ཕྱིར་སྨོས་སོ། །འདི་སྐད་ཅེས་གསོལ་ཏོ་ཞེས་བྱ་བ་ནི། འོག་གི་དོན་འདི་ཁོ་ན་བཅོམ་ལྡན་འདས་ལ་ཞུ་བ་གསོལ་བའི་ཕྱིར་སྨོས་སོ། །བཅོམ་ལྡན་འདས་ཞེས་པ་ནི་ཉོན་མོངས་པའི་བདུད་བཅོམ་ཞིང་ཕ་རོལ་ཏུ་ཕྱིན་པའི་ལེགས་པའི་ཡོན་ཏན་དང་ལྡན་པས་མཐའ་གཉིས་ཀྱི་སྐྱོན་དང་བྲལ་པས་ཕྱག་ན་
རྡོ་རྗེའོ། །བདག་ཅག་འཁོར་དང་བཅས་པ་ཞེས་པ་ནི་བདག་གི་གཟའ་ཆེན་པོ་བརྒྱང་ལ་པ་སངས་གཙོར་སྨོས་པའོ། །གཅིག་ནི་ཕུར་བུ་ལ་སོགས་པ་ཕྱི་མ་བདུན་གྱི་ཐ་ཚིག་གོ །འཁོར་ནི་གཟའ་རེ་རེ་དང་རྒྱུ་སྐར་རྣམས་དུས་སུ་རྒྱུ་བས་ན་རྒྱུ་སྐར་གྱི་འཁོར་དུ་གསུངས་སོ། །རང་རང་གི་གསང་སྔགས་ཀྱི་ཞེས་པ་ནི་རང་རང་གཟའ་དང་རྒྱུ་སྐར་ཉིད་ལ་བྱ་བའི་ཐ་ཚིག་གོ །གསང་སྔགས་ནི་རང་རྟགས་ཀྱི་སྙིང་པོ་སེམས་ལ་གནས་པའི་དོན་ཏོ། །བྱིན་གྱིས་བརླབ་ཏུ་གསོལ་ཞེས་པ་ནི། དཔེར་ན་རས་དཀར་པོ་དམར་པོར་བྱིན་གྱིས་བརླབ་པ་ནི་བཙོད་ལ་ཡོད་པ་དང་འདྲ་བར་དེ་བཞིན་དུ་གཟའ་དང་རྒྱུ་སྐར་གྱི་སྙིང་པོ་བྱིན་གྱིས་བརླབ་པ་ནི་བཅོམ་ལྡན་འདས་ཕྱག་ན་རྡོ་རྗེ་ལ་མངའ་བས་སོ། །བྱིན་གྱིས་བརླབ་པ་བཤད་ཟིན་ཏོ། །ད་ནི་སྙིང་པོ་བཤད་བ་སྟོན་ཏེ་ལེགས་སོ་དཔའ་ཞེས་པ་ནི་ལེགས་སོ་ནི་གཟའ་ཚིག་ལ་བཅོམ་ལྡན་འདས་མགུ་བའི་ཐ་ཚིག་གོ །དཔའ་ནི་ཕྱག་ན་རྡོ་རྗེ་ཉིད་ཀྱིས་ངང་བའི་ཐ་ཚིག་གོ །ཕྱི་མ་ནི་བདེ་སྟེ་བཤད་མི་དགོས་སོ། །ད་ནི་དཀྱིལ་འཁོར་གྱི་དོན་སྟོན་ཏེ། དེ་ཅིའི་ཕྱིར་ཞེ་ན། དེ་ནས་དེ་དག་གི་དཀྱིལ་འཁོར་བཤད་དེ་ཞེས་པ་ནི། དེ་ནི་གོང་མའི་མཇུག་སྡུད་པ་ལ། ནས་ནི་འོག་གི་དཀྱིལ་འཁོར་གྱི་མགོ་འདྲེན་པ་ལའོ། །དེ་དག་ནི་གཟའ་དང་རྒྱུ་སྐར་དེ་དག་གོ །དཀྱིལ་ནི་ཕྱག་ན་རྡོ་རྗེ་དཀྱིལ་ན་བཞུགས་པའོ། །འཁོར་ནི་གཟའ་དང་རྒྱུ་སྐར་དུ་བཅས་པའོ། །བཤད་པ་ནི་ཚིག་དང་དོན་གསལ་བར་བྱ་བའི་ཐ་ཚིག་གོ །འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་སུ་བྲི་ཞེས་པ་ནི། ཆོས་ཐམས་ཅད་རང་བཞིན་གྱིས་རྣམ་བར་དག་པ་ཡིན་པའི་ཕྱིར་ནི་འཇིག །ཆད་པ་མ་ཡིན་པས་ནི་རྟེན་ལ། གསུམ་ནི་འདོད་ཁམས་དང་གཟུགས་ཁམས་དང༌། གཟུགས་མེད་པའི་ཁམས་གསུམ་ལ་བྱའོ། །རྣམ་པར་རྒྱལ་བ་ནི་མཚན་མའི་རྣམ་པ་སྟེ་དེ་རྣམས་ལས་ཐུགས་རྗེའི་ཕྲིན་ལས་ཀྱི་རྒྱལ་བའི་རྟགས་ཏེ། དེ་ནི་ཕྱག་ན་རྡོ་རྗེ་སྟེ་གཟའི་དཀྱིལ་འཁོར་གྱི་སྐབས་སུ་ཁྲོ་བོར་སྟོན་ཏེ། ཧཱུཾ་ཀ་རའི་གཟུགས་སུ་བྲི་བའི་ཐ་ཚིག་གོ །ངོས་རྣམས་སུ་ཕྱག་རྒྱ་ཆེན་པོ་བཞི་བྲི་ཞེས་པ་ནི། །ངོས་ནི་དཀྱིལ་འཁོར་ཁ་གསུམ་དུ་བཅད་བ་དེའི་དབུས་ཐིག་བཞི་བཏབ་པའི་རེའུ་མིག་དགུ་པ་རིན་པོ་ཆེའི་ཕྲེང་བས་ཟླུམ་པོར་བསྐོར་
བའི་ཕྱི་རོལ་གྱི་གྲུ་ཆད་བཞི་ལ་བྱ་བའི་ཐ་ཚིག་གོ །ཕྱག་རྒྱ་བཞི་ནི་དུས་བཞིའི་ལྷ་མོ་བཞི་ཕྱག་རྒྱ་བདུག་སྤོས་མེ་ཏོག་མར་མེ་དྲི་ཆབ་དང་བཞི་བྲིའོ། །རྣམ་པ་གཅིག་ཏུ་རྡོ་རྗེ་རིན་པོ་ཆེ། པདྨ་རྒྱ་གྲམ་ཞེས་སྨོས་སོ། །དེ་ཡི་མདུན་དུ་པ་བ་སངས། །ཞེས་པ་ནི་དེ་ནི་ཧཱུཾ་ཀ་རའོ། །མདུན་དུ་ནི་ཤར་ཕྱོགས་ཀྱི་རེའུ་མིག་གོ །པ་བ་སངས་མདོག་དཀར་པོ་ལག་ན་མེ་ཏོག་ཀུ་མུ་ཏ་དང་ཤིང་ཏོག་བསྣམས་པ། རྒྱབ་ཏུ་ཟླ་བ་བྲི་བར་བྱ། །ཞེས་པ་ནི་རྒྱབ་ནི་ནུབ་ཕྱོགས་ཏེ་གཟའ་ཟླ་བ་ཕྱག་ན་ཀུ་མུ་ཏ་ཐོགས་པ་དང་ངང་པ་ལ་ཞོན་པ་བྲི། གཡས་ནི་ལྷོ་ཕྱོགས་ཏེ་ཕུར་བུ་སྐུ་མདོག་སྔོན་པོ་ཕྱག་ན་བུ་སྟི་བསྣམས་པའོ། །གཡོན་དུ་གཟའ་ལྷག་བྲི་བར་བྱ། །ཞེས་པ་ནི་གཡོན་ནི་བྱང་ཕྱོགས་ཏེ་གཟའ་ལྷག་པདྨ་ལ་འདུག་པ། ཕྱག་གཡས་མཆོད་སྤྱིན་བྱེད་པ། གཡོན་ཨུཏྤལ་བསྣམས་པ་བྲི། མེ་ཡི་ཕྱོགས་སུ་མིག་དམར་དང༌། །ཞེས་པ་ནི་ཤར་ལྷོའི་མཚམས་ཏེ། མིག་དམར་མདོག་དམར་པོ་ཕྱག་གཡས་པ་ན་བདུད་རྩིའི་བུམ་པ་བསྣམས་པ། གཡོན་པ་ན་མེ་སྒྲོན་བསྣམས་པའོ། །རླུང་གི་ཕྱོགས་སུ་ཉི་མ་སྟེ། །ཞེས་པ་ནི་རླུང་ནི་ནུབ་བྱང་གི་མཚམས་ཏེ་གཟའ་ཉི་མ་རྟ་ལ་ཞོན་བ་ཕྱག་གཡས་པ་ན་པདྨ་ཁ་བྱེ་བ་བསྣམས་པ། གཡོན་བ་ན་མཐའ་བེར་བསྣམས་པ་བྲི། དབང་ལྡན་ཕྱོགས་སུ་སྦེན་པའོ། །ཞེས་པ་ནི་དབང་ལྡན་ནི་བྱང་ཤར་གྱི་ཕྱོགས་ཏེ། སྤེན་པ་ལག་པ་གཡས་ན་དབྱུག་པ་ཐོགས་པ། གཡོན་པ་དགྲ་སྟ་ཐོགས་པ། སྟན་ནང་ཚངས་ཅན་ལ་འདུག་པ་བྲི། སྲིན་པོའི་ཕྱོགས་སུ་སྒྲ་གཅན་བྲི། །ཞེས་པ་ནི། སྲིན་པོ་ནི་ལྷོ་ནུབ་ཀྱི་ཕྱོགས་སུ་སྒྲ་གཅན་མདོག་དུད་ཁ་མིའི་མགོ་ཅན་རོ་སྨད་སྤྲུལ་དུ་འདུག་བ། ཕྱག་གཡས་པ་ན་པདྨ་སྡོང་བུ་དང་བཅས་པ། གཡོན་པ་ན་རལ་གྲི་བསྣམས་པ་བྲི། ད་ནི་འཁོར་རྒྱུ་སྐར་སྨོས་ཏེ། དཀྱིལ་འཁོར་ཕྱི་རོལ་ཁོར་ཡུག་ཏུ། །ཞེས་པ་ནི་ཕྱི་རོལ་གྲུ་ཆད་ཕྱི་སྣམ་ལ་རྒྱུ་སྐར་ཉི་ཤུ་རྩ་བརྒྱང་རྩ་བའི་དཀྱིལ་འཁོར་ནས་འབྱུང་བ་བཞིན་དུ་བྲི་བ་ནི་ཕྱོགས་རེར་བདུན་བདུན་ནོ། །སྨིན་དྲུག་དམར་པོ་བུམ་པ་ལ་གནས་པ། སྣར་མ་ལྗང་གུ་ཁྱུ་བ་དཀར་པོ་ལ་ཞོན་པ། མགོ་སེར་པོ་ཤ་བ་ལ་ཞོན་པ། ལག་དམར་པོ་སྤྲུལ་ལ་ཞོན་པ། ནབ་སོ་སེར་པོ་པདྨ་ལ་འདུག་པ། རྒྱལ་ལྗང་གུ་བུམ་པ་ལ་འདུག་པ། སྐག་ལྗང་གུ་བྱ་རོག་ལ་འདུག་པ། མཆུ་སེར་པོ་མེ་ཏོག་ལ་
འདུག་པ། གྲེ་དཀར་པོ་པདྨ་ལ་འདུག་པ། དབོ་ལྗང་གུ་ཆུ་སྲིན་ལ་འདུག་པ། མེ་བཞི་སེར་པོ་གླང་པོ་ཆེ་ལ་ཞོན་པ། ནག་པ་ལྗང་སུ་རྨ་བྱ་ལ་ཞོན་པ། ས་རི་དམར་པོ་ལྕོང་མོ་ལ་ཞོན་པ། སག་ལྗང་གུ་རྟ་དཀར་བོ་ལ་ཞོན་པ། ལྷ་མཚམས་སེར་པོ་བྱ་རོག་ལ་ཞོན་པ། སྒྲོག་དམར་པོ་ནང་ཚངས་ཅན་ལ་འདུག་པ། སྣུབས་ལྗང་གུ་སྦལ་པ་ལ་ཞོན་པ། ཆུ་སྟོད་སེར་པོ་ནང་ཚངས་ཅན་ལ་འདུག་པ། ཆུ་སྨད་ལྗང་གུ་མིའི་སྙིང་ལ་འདུག་པ། བྱི་བཞིན་དཀར་པོ་ནང་ཚངས་ཅན་ལ་འདུག་པ། གྲོ་བཞིན་སེར་པོ་སྐུར་མ་ལ་འདུག་པ། མོན་གྲུབ་དམར་པོ་ནང་ཚངས་ཅན་ལ་འདུག་པ། མོན་གྲེ་ལྗང་གུ་གླུད་ཁྱུ་མཆོག་ཞོན་པ། ཆུ་སྟོད་ལྗང་གུ་གསེར་ཁྲི་ལ་འདུག་པ། ཐ་སྐར་ལྗང་གུ་མི་ལ་འདུག་པ། བྲ་ཉེ་སེར་པོ་འཁོར་ལོ་ལ་འདུག་པའོ། །སྒོ་སྒོར་དེ་བཞིན་སྒོ་བ་རྣམས། །ཁྲོས་པའི་ཡིད་དུ་བྲི་བར་བྱ། །ཞེས་པ་གསུངས་ཏེ། ཕྱི་རོལ་གྱི་སྒོ་བཞི་ལ་རྡོ་རྗེ་ལྕགས་ཀྱུ་མ་ལ་སོགས་པ་བཞི་རབ་ཏུ་ཁྲོས་པ་བསྐལ་པའི་མེ་དཔུང་འབར་བའི་དཀྱིལ་ན་རྡོ་རྗེའི་བྲག་རི་ལ་བརྐྱང་བསྐུམ་གྱི་ཚུལ་དུ་གནས་པ་བྲི། རྡོ་རྗེ་འཛིན་མར་ཞུགས་ནས་ནི། །ཞེས་པ་ནས་སམ་ཡ་ཧཱུཾ་གི་བར་གྱིས་ནི་དཀྱིལ་འཁོར་དུ་འཇུག་པ་བ་སྟན་ཏོ། །ད་ནི་དབང་བསྐུར་བ་སྟོན་ཏེ། དེ་ནས་གཟའ་བརྒྱང་སྔགས་བཏབ་སྟེ། །དེ་བུམ་བརྒྱང་ཀྱིས་དབང་བསྐུར་རོ། །ཞེས་པ་ནི་བདག་ཉིད་ཁམས་གསུམ་རྣམ་པར་རྒྱལ་བའི་ཏིང་ངེ་འཛིན་ལ་ཞུགས་ལ། བུམ་པ་བརྒྱང་གཟའ་བརྒྱང་ཀྱི་སྔགས་ཀྱིས་བཏབ་ནས་སློབ་མ་རྡོ་རྗེའི་ཕྱག་རྒྱ་བཅས་ནས་བསྒྲུབ་པར་བྱའོ། །དེ་ནས་ཙནྡན་དམར་པོའི་ཤིང་ལ་འབྲས་ཐུག་རིན་པོ་ཆེ་དང། ཏིལ་དང༌། སྦྲང་རྩི་དང༌། སཱ་ལུ་དཀར་པོ་དང༌། བུ་རམ། གུ་གུལ། སྤོས། ཀླ་རྩི་གུར་གུམ་རྣམས་བསྲེས་ལ་གཟའ་བརྒྱང་བསྒྲུབ་པར་བྱའོ། །ད་ནི་གཟའ་བརྒྱང་ཀྱིས་དམ་བཅས་བ་སྟོན་ཏེ། དེ་ནས་གཟའ་ཆེན་པོ་དེ་དག་ནི་ཞེས་པ་ནི་བཅོམ་ལྡན་འདས་ཀྱི་བཀའ་བསྲུང་ཞིང༌། རང་གིས་དམ་བཅས་པ་ཐམས་ཅད་མི་ཉམས་བར་བྱ་བའི་ཕྱིར་སྨོས་སོ། །དེ་ནས་རྒྱུ་སྐར་དང་ཡུད་ཙམ་གྱིས་ནི་ཞེས་པ་ནི་རྒྱུ་སྐར་རྣམས་ཡུད་ཙམ་གྱིས་ནི་མཁའ་ལ་འགྲོ་སྟེ། དེ་ཡང་ཡུད་ཙམ་གྱི་ཚད་ལས་ནི་ཞག་ཙམ་དུ་བརྩི་ཞིང་ཞག་ལ་རྒྱུ་སྐར་གྱི་རླུང་དེད་པའི་ཕྱིར་སྨོས་སོ། །སྐད་ཅིག་དང༌། ཐང་ཅིག་
དང། དུས་དང་ཟླ་ཚིགས་དང་ཞེས་པ་ནི་ཡུད་ཙམ་གྱི་ཚད་ལས་སྐད་ཅིག་བརྩི་སྟེ། ཡུད་ཙམ་ནི་བུད་མེད་བལ་འཁལ་བ་སྐྱེན་བུལ་རན་པས་མོ་རང་གི་ལག་པ་གང་ནར་གྱིས་དྲངས་ནས་བཀལ་ཏེ་འཕང་ལ་བགོས་པའི་ཚད་ནི་ཡུད་ཙམ་མོ། །ཡུད་ཙམ་ཉི་ཤུ་ནི་སྐད་ཅག་གོ །སྐད་ཅིག་ཉི་ཤུ་ནི་ཐང་གཅིག་གོ །ཐང་གཅིག་བཅུ་དྲུག་ནི་ཉིན་ཞག་གཅིག་གོ །ཉིན་ཞག་གཅིག་ལ་གཟའ་དང་རྒྱུ་སྐར་རིམ་པར་རྒྱུ་བ་དེའི་ཉིན་པར་དེ་བསྒྲུབས་ན་འགྲུབ་པར་གསུངས་སོ། །དུས་དང་ལོ་ཚིགས་དང་ཞེས་པ་ནི། དུས་ནམ་ཟླ་དབྱར་དགུན་སྟོན་དཔྱིད་བཞིའོ། །དེ་ཡང་ལོ་གཅིག་ལ་ཟླ་བ་བཅུ་གཉིས་ལ་དེ་ཡང་རབ་འབྲི་ནག་གསུམ་གསུམ་དུ་དབྱེའོ། །དེ་རེ་རེ་ལ་ཡང་གཟའ་དང་རྒྱུ་སྐར་གང་རྒྱུ་བདེ་ཤེས་པར་བྱ་བའི་ཕྱིར་སྨོས་སོ། །སྦྱོར་བ་དང་ཁྱིམ་དང་དུས་སྦྱོར་དང་ཞེས་པ་ནི། སྦྱོར་བ་ནི་སྐར་མ་དང་གཟའ་སྦྱོར་བའོ། །དུས་ཚོད་དང་ཚེས་གྲངས་སུ་སྦྱོར་བ་དང༌། ནམ་ཟླ་རེ་རེ་ལ་རྒྱུ་སྐར་རེ་རེ་ལ་རྒྱུག་རིམ་དུ་སྦྱོར་བའོ། །ཁྱིམ་ནི་གནས་ཏེ་རྒྱུ་སྐར་རིམ་པར་རྒྱུ་བའི་གནས་ཏེ། དེའི་དུས་ཡུ་ཡང་རང་གི་ཁྱིམ་དུ་ཡང་རྒྱུ་རྣམས་རིམ་པས་བསྒྲུབ་ཅིང་གནས་པར་བྱ་བའི་ཕྱིར་དུས་ནི་ནམ་ཟླ་དུས་བཞིའམ། ཞག་གི་གྲངས་ཀྱི་དུས་སུ་རྒྱུ་སྐར་བསྒྲུབ་པའོ། །འཇུག་ཕོད་ལ་སོགས་པ་ནི་དཀྱིལ་འཁོར་གྱི་ལྷ་གང་དུ་འཇུག་པ་དེ་སྨོས་སོ། །ཕྱི་མ་ནི་བདེ་སྟེ་མ་སྨོས་སོ། །གཟའ་བརྒྱང་ཀྱི་དཀྱིལ་འཁོར་གྱི་དོན་བསྡུས་པ་བཤད་ཟིན་ཏོ། །ད་ནི་ཀླུ་ཆེན་པོ་བརྒྱང་ཀྱི་དཀྱིལ་འཁོར་བཤད་དེ། དེ་ནི་འཇིག་རྟེན་པའི་སེམས་ཅན་ཀླུ་གདོན་གྱིས་ཟིན་པ་རྣམས་ཐར་པར་བྱ་བའི་ཕྱིར་སྨོས་སོ། །དེ་ཡང་ཅིའི་ཕྱིར་ཞེན། དེ་ནས་ཀླུ་ཆེན་པོ་བརྒྱང་ཀྱིས་ཕུད་ཅེས་བྱ་བའི་སྒྲས་ནི་ཞེས་པ་ནི། དེ་ནས་ནི་སྐབས་ཀྱི་དེ་མ་ཐག་པ་སྟེ་གཟའ་བརྒྱང་ཀྱི་རྟིང་ཐོགས་སུ་འབྱུང་བའོ། །ཀླུ་ཆེན་པོ་བརྒྱུད་ནི་མཐའ་ཡས་དང་རིགས་ལྡན་གཉིས་བྲམ་ཟེའི་རིགས་མེ་ལས་བྱུང་བ་སྟེ། དཀར་པོ་ནོར་རྒྱས་དང་དུང་སྐྱོང་གཉིས་རྒྱལ་རིགས་ལས་བྱུང་བ་སྟེ་མདོག་ཀྱང་སེར། འཇོག་པོ་དང་པདྨ་ཆེན་པོ་གཉིས་རླུང་ལས་བྱུང་བས་རྗེའུའི་རིགས་ཏེ་མདོག་ཀྱང་དམར། སྟོབས་ཀྱི་རྒྱུད་དང་པདྨ་གཉིས་ཆུ་ལས་བྱུང་བ་སྟེ། དམངས་རིགས་མདོག་ནག་པོ་ནི་རིགས་བཞིའི་གཙོ་བོ་བཞི་ཡིན་པས་ཆེན་པོའོ། །ཕུད་
ཅེས་བྱ་བ་ནི་རང་གི་དམ་ཚིག་སྒྱུ་མེད་པའི་སྙིང་པོ་སྟེ། དེ་ཅིའི་ཕྱིར་ཞེ་ན། དཔེར་ན་ནོར་གྱི་དམ་པ་ནི་ཕུད་དུ་བཅད་དེ་བཞག་པ་དང༌། ཟས་ཀྱི་དམ་པ་ནི་ཕུད་སྣལ་བཅད་དེ་གཞག་བ་ལྷ་མཆོད་པ་དང་འདྲ་བར། བདག་གི་དམ་ཚིག་སྒྱུ་མེད་པའི་རྟགས་ཡིན་པར་ཤེས་པར་བྱ་སྟེ་རྣམ་བ་གཅིག་ཏུ་ཕུད་ནི་མང་པོ་ལས་ཉུང་དུ་ན་གཅོད་པ་དང་འདྲ་བར་ཀླུའི་སྙིང་པོ་མང་པོ་ཞིག་བྱུང་ཡང༌། ཉུང་དུ་བ་སྟན་ན་ཕུད་ཅེས་བྱ་བ་ལས་མེད་པས་ན་ཕུད་ནི་བསྡུས་པ་དང༌། འདུས་པའི་ཕྱིར་ན་སྒྲས་མཉམ་པའི་ཐབས་སུ་བརྗོད་དོ། །བཅོམ་ལྡན་འདས་ལ་སྙིང་བོ་དབུལ་བར་ཞུབ་གསོལ་བ་དང༌། ཀླུའི་རྒྱལ་པོ་ལ་ངང་བ་དང༌། ཀླུའི་རྒྱལ་པོ་དགའ་ནས་སྙིང་པོ་བརྗོད་པ་ནི་རབ་ཏུ་བདེ་སྟེ་མ་སྨོས་སོ། །ད་ནི་ཀླུ་ཆེན་པོ་བརྒྱང་ཀྱི་དཀྱིལ་འཁོར་གྱི་དོན་སྟོན་ཏེ། དེ་ཡང་ཅིའི་ཕྱིར་ཞེ་ན། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སྨོས་སོ། །ད་ནས་ནི་སྐབས་ཀྱི་རྟིང་ཐོགས་སོ། །དེ་དག་ནི་གླུ་ཆེན་པོ་དེ་དག་གོ །དཀྱིལ་ནི་ཕྱག་ན་རྡོ་རྗེ་ཀླུའི་རྒྱལ་པོའི་ཚུལ་དུ་གནས་སོ། །འཁོར་ནི་ཀླུ་ཆེན་པོ་བརྒྱང་དོ། །བཤད་པ་ནི་དེའི་དོན་དང་ཚིག་བ་སྟན་པའོ། །དེ་ཡང་ཅིའི་ཕྱིར་ཞེ་ན། པདྨ་ཆེན་པོ་འདབ་བརྒྱད་ལ། །ཁ་དོག་དཀར་པོ་བྲི་བར་བྱ། །ཞེས་གསུངས་ཏེ། པདྨ་ནི་དཀྱིལ་འཁོར་གྲུ་བཞིར་བྱས་པའི་དབུས་སུ་པདྨ་འདབ་མ་བརྒྱང་པ་ཁ་དོག་དཀར་པོར་བྲིས་ཏེ། དཀྱིལ་འཁོར་སུམ་གཉིས་ལས་གཅད་པར་བྱའོ། །ཕྱིའི་གྲུ་ཆད་དང༌། ཤིང་རྟའི་སྣམ་བུ་ལ་བང་མིག་དང་སྒོ་དང་ལྡན་པར་བྱའོ། །དབུས་སུ་ཕྱག་ན་རྡོ་རྗེ་སྤྲུལ་མགོ་མཐའ་ཡས་པའི་གདེངས་ཀ་ཅན་ཀླུའི་རྒྱལ་པོ་བསྡིགས་པའི་ཚུལ་དུ་གནས་པར་བྱའོ། །པདྨའི་འདབ་མ་ལ་ཤར་ཕྱོགས་སུ་མཐའ་ཡས་ཕྱག་ན་ཨུཏྤལ་བསྣམས་པ། ལྷོར་འཇོག་པོ་དགྲ་སྟ། ནུབ་ཏུ་སྟོབས་ཀྱི་རྒྱུ་སྤྲུལ་གྱི་གཤོལ། བྱང་ཕྱོགས་སུ་དུང་སྐྱོང་དུང་ཕོར། ཤར་ལྷོར་ནོར་རྒྱས་བུམ་པ། ལྷོ་ནུབ་ཏུ་པདྨ་པདྨ་འདབ་མ་བརྒྱང༌། ནུབ་བྱད་དུ་ཆུ་ལྷ་སྤྲུལ་ཞགས། བྱང་ཤར་དུ་རིགས་ལྡན་རིན་ཆེན་རྒྱལ་བུ་རྣམས། བྲུ་ཆད་ལ་དུས་བཞིའི་ལྷ་མོ། ཤིང་རྟའི་བང་མིག་ལ་ཀླུ་གནོད་སྒོར་སྒོ་བ་རྣམས་བྲིའོ། །དཀྱིལ་འཁོར་བྲི་བའི་ཐབས་བསྡུས་པ་བཤད་ཟིན་ཏོ། །མཆོད་རྫས་བདེ་སྟེ་མ་སྨོས་སོ། །
ད་ནི་དཀྱིལ་འཁོར་དུ་འཇུག་པ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་རྡོ་རྗེ་བདག་ཉིད་ཞུགས་པ་ནི་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །རྡོ་རྗེ་ནི་སློབ་དཔོན་སྐུ་གསུང་ཐུགས་རྡོ་རྗེར་བསྒོམ་པའོ། །བདག་ཉིད་ནི་དཀྱིལ་འཁོར་བདག་ཉིད་དུ་གནས་ཤིང་བསྒོམ་པའོ། །ཞུགས་པ་ནི་གཉིས་སུ་མེད་པར་བྱ་བའི་དོན་ཏོ། །དེ་ཅིའི་ཕྱིར་ཞེ་ན། སྤྲུལ་མགོས་སྤྲུལ་མགོ་ཅན་རྣམས་དགུག །ཕུད་ཅེས་བྱ་བའི་ལྷན་ཅིག་ཏུ། ཛ།ཧཱུཾ་བཾ་ཧོཿཞེས་བརྗོད་ཅིང༌། །ཞེས་གསུངས། སྤྲུལ་མགོས་ནི་ཞེས་པ་ནི་བདག་སློབ་དཔོན་ལས་ཀྱི་བདག་ཉིད་ཕྱག་ན་རྡོ་རྗེར་བསྒོམ་པའོ། །སྤྲུལ་མགོ་ཅན་རྣམས་ནི་ཀླུ་རྣམ་པ་བརྒྱང་ལ་སོགས་པའོ། །དགུག་པ་ནི་དམ་ཚིག་གི་ཕྱག་རྒྱས་གཉིས་སུ་མེད་པར་བྱས་པའོ། །ཕུད་ནི་དམ་ཚིག་གི་མནའི་སྙིང་པོའོ། །ལྷན་ཅིག་ཏུ་ནི་དམ་ལས་མི་འདའ་བར་བྱ་བའི་ཐ་ཚིག་གོ །ཛཿནི་ལྕགས་ཀྱུ། ཧཱུཾ་ནི་ཞགས་པ། བཾ་ནི་ལྕགས་སྒྲོག །ཧོཿནི་དྲིལ་བུ་ཕྱག་རྒྱ་རྣམ་བ་བཞིས་བཀུག་ནས་དམ་ཚིག་དང་ལྡན་པར་བྱེད་པའོ། །ད་ནི་སློབ་མ་གཞུག་ཅིང་དབང་བསྐུར་བ་སྟོན་ཏེ། དེ་ཡང་ཅིའི་ཕྱིར་ཞེ་ན། དེ་ནས་བུ་ནི་རྒྱལ་པོ་དང༌། །རྒྱལ་རིགས་ཐམས་ཅད་བཅུག་ནས་ནི། །ཞེས་གསུངས་ཏེ། དེ་ནས་ནི་སྐབས་ཀྱི་རྟིང་ཐོགས་སོ། །བུ་ནི་སློབ་མ་སྟེ། རྒྱལ་པོ་ནི་རིགས་ཕུན་སུམ་ཚོགས་པའོཿ་།རྒྱལ་རིགས་ཐམས་ཅད་དཀྱིལ་འཁོར་དུ་གཞུག་གོ །དེ་ཅིའི་ཕྱིར་ཞེན། དུག་གི་ཉེས་སྐྱོན་བསལ་བའི་ཕྱིར། །ཕུད་ཅེས་བྱ་བའི་དབང་བསྐུར་རོ། །ཞེས་པ་ནི་དུག་ནི་ཀླུས་ཟིན་ནས་སྡུག་བསྔལ་གྱི་ནད་དོ། །ཉེས་པ་ནི་འདོད་ཆགས་ལ་སོགས་པའི་སྐྱོན་གྱིས་ཀླུ་དང་འགྲས་པ་ན་བཀྲ་མི་ཤིས་ཤིང་མི་ལ་སྐྱོན་ཡོད་པ་བསལ་བའི་ཕྱིར་སྨོས་སོ། །ཕུད་ནི་དམ་ཚིག་སྙིང་པོ་ལ་དབང་བསྐུར་བ་ནི་སློབ་མ་སྟེ། ཀླུ་དང་གཉིས་སུ་མེད་པར་བྱ་ཞིང་མི་གནོད་པར་བྱ་བའི་ཕྱིར་དབང་བསྐུར་རོ། །དེ་ལྟར་བྱས་ན་ཀླུ་ཐམས་ཅད་འགུགས་པར་འགྱུར་རོ། །ཀླུ་བསྒྲུབས་ན་དངོས་གྲུབ་འགྲུབ་བོ། །ཀླུ་མ་མགུ་ནས་སྨོན་ལམ་འདེ་བས་པ་དང༌། རང་གི་དམ་ཚིག་གི་མནའ་བོར་བ་དང༌། དུས་རྟག་ཏུ་སེམས་ཅན་ལ་ཕན་པ་དང༌། རྒྱལ་བའི་བཀའ་སྲུང་བ་ནི་བདེ་སྟེ་མ་སྨོས་སོ། །ད་ནི་ཀླུ་བསྒྲུབས་ནས་ནད་ཞི་བར་བྱེད་པའི་ཐབས་སྟོན་ཏེ། དེ་ཡང་ཅིའི་
ཕྱིར་ཞེ་ན། དེ་ནས་སྒྲུབ་པ་བཤད་དེ། ལྷ་རྫས་འོད་ཕྲེང་དཀར་པོ་ཡི། །དབུ་ལ་སྤྲུལ་མགོ་བཞིས་བསྐོར་བའི། །ཞེས་གསུངས་ཏེ། དེ་ནི་གོང་གི་མཇུག་སྡུད་ལ་ནས་ནི་འོག་གི་མགོ་འདྲེན་པའོ། །བསྒྲུབ་པ་ནི་དུག་གི་དེ་ཁོ་ན་ཉིད་ཀྱིས། ཀླུའི་སྐྱོན་བསལ་ཅིང་ནད་ཞི་བར་བྱེད་པས་བསྒྲུབ་པ། ལྷ་རྫས་ནི་བདག་ཉིད་ཕྱག་ན་རྡོ་རྗེར་བསྒོམས་པའི་དབུ་ལ་ལྷ་རྫས་ཀྱི་འོད་ཕྲེང་དཀར་བོའི་དབུ་རྒྱན་སྦྲུལ་མགོ་བཞིན་དུ་བསྒོམས་ཏེ། དེ་ཅིའི་ཕྱིར་ཞེ་ན། རྡོ་རྗེ་འཛིན་གཙོ་བསམས་ནས་ཀྱང༌། །ཕུད་ཅེས་བྱ་བ་འབུམ་བཟླས་ལ། །ཞེས་གསུངས་ཏེ། རྡོ་རྗེ་འཛིན་ནི་ལས་ཀྱི་ལྷའོ། །བསམ་པ་ནི་ཡིད་ཀྱིས་བསམ་ཞིང་བསྒོམ་པའོ། །དཀྱིལ་འཁོར་གྱི་གཙོ་བོ་ཡིན་པས་སྨོས་སོ། །ཕུད་ནི་སྙིང་པོ་ལ་འབུམ་ནི་གྲངས་ཏེ་བཟླས་པ་ནི་རྩ་བའི་སྙིང་པོ་དང་ཕུད་ཅེས་བྱ་བ་བསྲེས་ལ་བཟླས་སོ། །དེ་ཡང་ཅིའི་ཕྱིར་ཞེ་ན། དེ་ནས་དུག་བླང་ཕུད་ཅེས་ནི། བྱ་བའི་དཀྱིལ་འཁོར་བསམས་ནས་ཀྱང༌། །ལྷ་རྡས་འོད་ཟེར་ཕྲེང་བས་དགང༌། །ཞེས་གསུངས་ཏེ། དུག་ནི་ཉོན་མོངས་པ། བླང་བ་ནི་མེད་པར་བྱ་བ་ཕུད་ནི་རིག་པའི་མེ་ཏོག་གི་སྙིང་པོ་ལ། བྱ་བ་ནི་བསྒྲུབ་པར་བྱ་བའི་ཐ་ཚིག་ལ། འཁོར་ནི་ཀླུ་རྣམས་ཏེ། བསམ་པ་ནི་ཡིད་ཀྱིས་བསམ་པ། ལྷ་རྫས་ནི་མཆོད་པའི་རྫས་ཡིན་ཏེ། འོད་ནི་ཁ་དོག་རྣམ་པ་ལྔ་དང་དྲི་བསུང་དུ་ལྡན་པ་ལ། ཟེར་ནི་འཕྲོ་བ་སྟེ། ཕིང་བ་ནི་རྒྱུན་མི་འཆད་པའི་ཐ་ཚིག་ལ། དགོད་པ་ནི་མཆོད་པའི་རྫས་ཀྱིས་དགང་བའོ། །ད་ནི་དན་པ་ལ་སྲུང་བའི་ཆོ་ག་སྟོན་ཏེ། དེ་ཅིའི་ཕྱིར་ཞེ་ན། དེ་ལ་ཕུད་ཅེས་བྱ་བ་བསམ། ལག་པ་སྤྲུལ་མགོ་ཞགས་འདྲ་དང༌། །ཕུད་ཅེས་བྱ་བའི་རླུང་གིས་གཏོར། །ཞེས་གསུངས་ཏེ། དེ་ནི་གོང་གི་མཇུག་སྡུད་ལ། ཕུད་ནི་དུ་གཞི་བར་བྱེད་པའི་སྔགས་ཡིན་པས་ཡིད་ཀྱིས་བསམ། ལག་བ་ནི་སྒྲུབ་པ་པོ་དག་གི །སྤྲུལ་མགོ་ནི་ལག་པའི་སོར་མོ་རྣམས་སྤྲུལ་མགོ་འདྲ་བར་བྱས་པ་ལ། ཞགས་པ་འདྲ་ཞིང་ཞགས་པའི་ཕྱག་རྒྱ་བཅས་ལ་ཀླུ་དྲང་བའི་ཐ་ཚིག་གོ །ཕུད་ཅེས་བྱ་བ་ནི་གཏོང་བའི་གཉེན་པོ་སྟེ། དེ་ཅིའི་ཕྱིར་ཞེ་ན། རླུང་གིས་གཏོར་ཞེས་འབྱུང་བས། ཕུད་ལས་རླུང་དུ་གྱུར་པས་ནད་དང་དུག་དང་
རིམས་མེད་པར་འཐོར་བའི་ཐ་ཚིག་གོ །དེ་ཡང་ཅིའི་ཕྱིར་ཞེ་ན། བགས་པ་ཤ་དང་རུས་གནས་པའི། །དུག་རྣམས་ཐམས་ཅད་མ་ལུས་པ། །ཕུད་ཅེས་བྱ་བའི་ལག་པས་དྲང༌། །ཞེས་གསུངས་ཏེ། བགས་པ་ནི་ཕྱིའི་ཁ་དོག་སྟེ་སའི་ཁམས་ཤས་ཆེ་བའི་ནད་ཡིན་པས་བསྡུས། སྤྲུལ་ཁ་དོག་དམར་པོར་བསམ་ཞིང་འོད་དམར་པོས་གཏོར། ཁ་ཆུ་འཛག་པ་དང༌། ལྐོག་མ་འགག་པ་ནི་ཤའི་ནད་ཡིན་ཏེ། ཆུའི་ཁམས་ཀྱི་དུག་ཡིན་པས་སྤྲུལ་སྔོན་བོར་བསམ་ཞིང༌། འོད་སྔོན་པོའི་རང་བཞིན་དུ་གཏོར། རྐང་ལག་རུ་ཤིང་ལྷུ་ཚིགས་ན་བ་ནི་རུས་པ་ལ་གནས་པའི་ནད་ཡིན་ཏེ། རླུང་ལས་གྱུར་པའི་ཁམས་པས་ཕུད་ལས་རླུང་དཀར་པོར་གྱུར་པས་གཏོར། དེ་ལྟར་དུག་ཐམས་ཅད་མ་ལུས་པར་ལག་པ་སྤྲུལ་མགོ་ལ་ཕུད་ཅེས་བྱ་བའི་སྙིང་པོ་བསམས་ཏེ་དྲངས་ན་ནད་ཐམས་ཅད་འབྱིན་པར་འགྱུར་རོ། །དེ་ཡང་ཅིའི་ཕྱིར་ཞེ་ན། ལས་རྣམས་ཐམས་ཅད་ཀུན་བྱེད་ཅིང༌། །ཞེས་གསུངས་ཏེ། གོང་དུ་གསུངས་པ་དེ་ལྟར་བྱས་ན་ལས་ཐམས་ཅད་བྱེད་པར་འགྱུར་རོ། །དུག་རིམས་དུག་སྤྱར་ལ་སོགས་པ། །ཞེས་པ་ནི་དུག་ནི་རྣམ་པ་གཉིས་ཏེ། ཕྱིའི་ཧ་ལ་ཧ་ལའི་དུག་ལ་སོགས་པ་དང༌། ནང་འདོད་ཆགས་ལ་སོགས་པའི་དུག་གོ །རིམས་ནི་ཞག་གཅིག་པ་ལ་སོགས་པ་རྣམས་སོ། །དུག་སྤྱར་ནི་རང་བཞིན་དང༌། སྤྱར་བའི་དུག་གོ །ཁུ་ཚུར་ཕྱག་རྒྱས་ཀུན་འབྱིན་ན། །སྤྲུལ་མགོའི་ཕྱག་རྒྱས་སྨོས་ཅི་དགོས། །ཞེས་པ་ནི། དེ་ལྟ་བུའི་དུག་རྣམས་ཁུ་ཚུར་གྱི་ཕྱག་རྒྱ་བཅས་ནས་བྱབས་ན་ཡང་དུག་འབྱིན་པར་འགྱུར་ན། སྤྲུལ་མགོའི་ཕྱག་རྒྱ་བཅས་ནས་དྲངས་ན་ལྟ་སྨོས་ཀྱང་ཅི་དགོས་ཞེས་པའི་དོན་ཏོ། །ཀླུ་ཆེན་པོ་བརྒྱང་ཀྱི་དཀྱིལ་འཁོར་གྱི་དོན་བསྡུས་པ་བཤད་ཟིན་ཏོ། །ད་ནི་འཇིགས་བྱེད་ཆེན་པོ་བརྒྱང་ཀྱི་དཀྱིལ་འཁོར་གྱི་དོན་སྟོན་ཏེ། དེ་ནི་ལྷ་གདོན་ལ་སོགས་པ་ཞི་བའི་ཕྱིར་སྨོས་ཏེ། དེ་ཡང་ཅིའི་ཕྱིར་ཞེ་ན། དེ་ནས་ལྷ་ཆེན་པོ་རྣམས་ཀྱི་བདག་པོ་འཇིགས་བྱེད་ཆེན་པོ་བརྒྱང་ལ་བུད་མེད་རྣམས་ཀྱིས་བསྐོར་བས་ཞེས་གསུངས་པས། དེ་ནི་ཀླུ་བརྒྱང་ལ་སོགས་
བའི་མཇུག་བསྡུས་ལ། ནས་ནི་འོག་གི་འཇིགས་བྱེད་བརྒྱང་ཀྱི་མགོ་འདྲེན་པས་སོ། །ལྷ་ནི་འདོད་ཁམས་ཀྱི་ལྷ་ལ་ཆེན་པོ་ནི་དེའི་རྒྱལ་པོའོ། །རྣམས་ནི་མ་ལུས་པའོ། །བདག་པོ་ནི་དེ་རྣམས་ལ་དབང་བྱེད་པས་བདག་པོའོ། །འཇིགས་བྱེད་ནི་རབ་ཏུ་ཁྲོས་པའི་ཚུལ་དུ་གནས་པས་འཇིགས་བྱེད་དོ། །བརྒྱང་ནི་ལྷ་ཆེན་པོ་ཉི་ཤུ་རྩ་གཅིག་ལས་གཙོ་བོ་བརྒྱང་སྨོས་པའི་ཐ་ཚིག་གོ །བུད་མེད་ནི་རང་རང་གི་བཙུན་མོའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་རང་གི་འཇིགས་པའི་ཚུལ་གྱིས་སེམས་ཅན་སྐྲག་པ་ལ་ཕན་གདགས་པའི་ཕྱིར། བཅོམ་ལྡན་འདས་ལ་སྙིང་པོ་དབུས་བར་ཞུ་བ་གསོལ་བ་དང༌། བཅོམ་ལྡན་འདས་ཀྱིས་ངང་བ་དང་རང་གི་སྙིང་པོ་བརྗོད་པ་ནི་རབ་ཏུ་བདེ་སྟེ་མ་སྨོས་སོ། །ད་ནི་དཀྱིལ་འཁོར་གྱི་དོན་སྟོན་ཏེ། དེ་ཅིའི་ཕྱིར་ཞེ་ན། བཅོམ་ལྡན་འཇིགས་བྱེད་ཆེན་པོ་ནི། །རྒྱལ་པོ་དེ་དག་གི་དག་ཉན། །ཞེས་གསུངས་ཏེ། བཅོམ་ལྡན་འདས་ནི་ཕྱག་ན་རྡོ་རྗེའོ། །འཇིགས་བྱེད་ཆེན་པོ་ནི་འཇིགས་བྱེད་བརྒྱང་དོ། །རྒྱལ་པོ་ནི་འཇིགས་བྱེད་ཐམས་ཅད་ཀྱི་གཙོ་བོ་ཡིན་པས་སྨོས་སོ། །བདག་ནི་འཇིགས་བྱེད་ཁོ་ན། བདག་གི་ཐ་ཚིག་གོ །ངག་ཉན་བ་ནི་བཅོམ་ལྡན་འདས་ཀྱི་བཀའ་ཉན་པའོ། །དེའི་དཀྱིལ་འཁོར་ནི་འདི་ལྟར་བྲི་སྟེ། ཅིའི་ཕྱིར་ཞེ་ན། དེ་ནས་དེ་དག་གི་དཀྱིལ་འཁོར་བཤད་དེ་ཞེས་སྨོས་ཏེ་དེ་དག་ནི་གོང་གི་འཇིགས་བྱེད་བརྒྱང་དོ། །དཀྱིལ་ནི་དབུས་ན་རྣམ་པར་རྒྱལ་བ་བཞུགས་པའོ། །འཁོར་ནི་འཇིགས་བྱེད་བརྒྱང་དོ། །བཤད་པ་ནི་ཕྱག་ན་རྡོ་རྗེས་བཤད་པའོ། །དེ་ཅིའི་ཕྱིར་ཞེ་ན། འཁོར་ལོ་ཆེན་པོ་རྩིབས་བརྒྱང་པ། །བྲིས་ནས་དབུས་སུ་རྡོ་རྗེ་འཛིན། །ཞེས་གསུངས་ཏེ། འཁོར་ལོ་ནི་ལྟེ་བ་དང་མུ་ཁྱུད་དང་གོང་རས་དང་རྩིབས་སུ་ལྡན་པའོ། །བྲི་བ་ནི་འཁོར་ལོ་བྲི་བའོ། །དབུས་ནི་འཁོར་ལོའི་ལྟེ་བའོ། །རྡོ་རྗེ་འཛིན་པ་ནི་ཁམས་གསུམ་རྣམ་པར་རྒྱལ་བའོ། །དེ་ཡང་ཅིའི་ཕྱིར་ཞེ་ན། ཁྲོ་ཆེན་འཇིག་རྟེན་གསུམ་པས་ནི། །རྣམ་པར་རྒྱལ་བ་གཞག་པར་བྱ། །ཞེས་གསུངས་པ་སྟེ། ཁྲོ་བོ་ནི་ཡེ་ཤེས་ཏེ་ཉོན་མོངས་པ་ལ་ཁྲོ་བའོ། །འཇིག་རྟེན་ནི་རྒྱུ་ལ་བརྟེན། རྐྱེན་གྱིས་འཇིག་པའོ། །གསུམ་ནི་ཁམས་གསུམ་མོ། །རྣམ་པ་
ནི་དེ་རྣམས་སོ། །རྒྱལ་བ་ནི་དེ་རྣམས་འཇིགས་ཤིང་དེ་རྣམས་ལས་རྒྱལ་བའོ། །གཞག་པར་བྱ་བ་ནི་དབུས་སུ་བྲི་བ་སྟེ་གོང་དུ་གདུང་བསྲེག་གི་ནང་ནས་འབྱུང་བ་བཞིན་ནོ། །ད་ནི་དཀྱིལ་འཁོར་བྲི་བའི་དོན་སྟོན་ཏེ། ཅིའི་ཕྱིར་ཞེ་ན། དེ་ཡི་ཞབས་དྲུང་འཇིགས་བྱེད་པའི། །བདག་པོ་ཆེན་པོ་ཁྲོས་པ་ནི། །འཇིགས་བྱེད་མ་དང་བཅས་པར་བྲི། །ཞེས་གསུངས་ཏེ་དེ་ནི་ཕྱག་ན་རྡོ་རྗེའོ། །ཞབས་དྲུང་ནི་བདུན་དྲང་པོའོ། །ཤར་ཕྱོགས་ནི་ལྟེ་བའི་དྲུང་ངོ༌། །འཇིགས་འབྱེད་ཀྱི་བདག་པོ་ནི་དབང་ཕྱུག་མ་ཧཱ་དེ་བ་སྟེ། ཁྲོས་པ་ནི་འཇིགས་པའི་ཚུལ་དུ་གནས་པ་སྤྱན་གསུམ་མཆེ་བ་གཙིགས་པ། འཇིགས་པའི་ཆ་བྱད་སྣ་ཚོགས་པ་དང་ལྡན་པ། ཕྱག་ན་ཁ་ཏྭཱཾ་ག་བསྣམས་པ་བཙུན་མོ་འཇིགས་བྱེད་མ་ཨུ་མ་དེ་བ་དང་བཅས་པ་བྲི་བའི་ཐ་ཚིག་གོ །ད་ནི་འཁོར་འཇིགས་བྱེད་བརྒྱང་སྟོན་ཏེ། ཅིའི་ཕྱིར་ཞེ་ན། རྩིབས་ཀྱི་ནང་ནི་ཐམས་ཅད་དུ། །གཞན་ཡང་འཇིགས་བྱེད་བརྒྱང་པོ་ནི། །བུད་མེད་རྣམས་དང་ལྡན་པ་ལ། །ཞེས་གསུངས་ཏེ། རྩིབས་ནི་འཁོར་ལོའི་རྩིབས་སོ། །ནང་ནི་ཕྱི་རོལ་མ་ཡིན་ཏེ་རྩིབས་ཀྱི་ནང་ལྕེ་ལ་བྱ་བའི་ཐ་ཚིག་གོ །གཞན་ཡང་ནི་དབང་ཕྱུག་ཆེན་པོ་མ་གཏོགས་པའི་གཞན་ཡང་འཇིགས་བྱེད་བརྒྱང་ཡོད་པ་སྨོས་སོ། །ཤར་གྱི་རྩིབས་ལ་འཇིགས་བྱེད་ཕྲ་མི་ཏ་མདོག་དཀར་བ་ཕྱག་ན་རིན་པོ་ཆེ་འབར་བ་བསྣམས་པ། བཙུན་མོ་ཚངས་མ་དང་ལྡན་པར་བྲིའོ། །ལྷོའི་རྩིབས་ལ་འཇིགས་བྱེད་བྷེ་ར་བ་སྟེ། སྐུ་མདོག་སྔོ་ནག་ཕྱག་ན་རྩེ་གསུམ་བསྣམས་པ། བཙུན་མོ་བདེ་སོགས་མ་དང་བཅས་པ་བྲིའོ། །ནུབ་ཀྱི་རྩིབས་ལ་འཇིགས་བྱེད་ཀ་ལ་བྷཻ་ར་སྟེ་སྐུ་མདོག་དམར་ནག་ཏུ་འདུག་པ། ཕྱག་ན་ཐོད་དབྱུག་བསྣམས་པ། ཆུང་མ་རཽ་དྲི་མ་དང་བཅས་པ་བྲིའོ། །བྱང་གི་རྩིབས་ལ་འཇིགས་བྱེད་ཡཀྵེ་བྷཻ་ར་སྟེ་སྐུ་མདོག་ལྗང་ནག་ཕྱག་ན་འཁོར་ལོ་བསྣམས་པ་ཆུང་མ་ཀཽ་མཱ་རི་དང་ལྡན་པར་བྲིའོ། །ཤར་ལྷོའི་རྩིབས་ལ་འཇིགས་བྱེད་བྷཻ་ཤཱནྟ་སྐུ་མདོག་དམར་ནག་ཕྱག་ན་མདའ་གཞུ་བསྣམས་པ་བཙུན་མོ་བེ་སྣ་བི་དང་ལྡན་པར་བྲིའོ། །ལྷོ་ནུས་ཀྱི་རྩིབས་ལ་འཇིགས་བྱེད་བི་དི་བྷཻ་ར་སྟེ་སྐུ་མདོག་སྡོ་ནག་ཕྱག་ན་དགྲ་སྟ་བསྣམས་པ་བཙུན་མོ་ཕག་མོ་དང་ལྡན་པར་བྲིའོ། །ནུབ་བྱང་གི་རྩིབས་ལ་འཇིགས་
བྱེད་ཀཱ་ལ་བྷེ་ར་བ་སྐུ་མདོག་དུང་ཁ་ཕྱག་ན་རལ་གྲི་བསྣམས་པ་ཆུང་མམ་ནུ་ཧ་ར་དང་བཅས་པ་བྲིའོ། །བྱང་ཤར་གྱི་རྩིབས་ལ་འཇིགས་བྱེད་གན་པ་ཏི་སྐུ་མདོག་སྔོ་ནག་ཕྱག་ན་རྡོ་རྗེ་འབར་བསྣམས་པ། བཙུན་མོ་རྩ་མུ་ཎྚཱི་དུད་ཁ་དང་བཅས་པ་བྲིའོ། །ཕྱི་རོལ་གྲུ་ཆད་ལ་དུས་བཞི་དང་ལྡན་པར་བྲི། སྒོར་སྒོ་བ་བཞི་དྲིའོ། །དེ་དག་ཀྱང་རབ་ཏུ་ཁྲོས་པའི་ཚུལ་དུ་བྲིའོ། །དཀྱིལ་འཁོར་གྱི་མཆོད་རྫས་དང་སློབ་མ་གཞུག་ཅིང་དབང་བསྐུར་བ་ལ་སོགས་པ་བདེ་སྟེ་མ་སྨོས་སོ། །ད་ནི་འཇིགས་བྱེད་བརྒྱ་བསྒྲུབ་པའི་ཆོ་གའི་ཐབས་སྟོན་ཏེ། དེ་ཅིའི་ཕྱིར་ཞེ་ན། དེ་ནས་ལས་རྣམས་སྤྱིན་བྱ་སྟེ། །བུད་མེད་ཁྱིམ་མམ་མཚན་གཅིག་པ། །ཞེས་གསུངས་ཏེ། ལས་ནི་སྒྲུབ་པར་བྱེད་པའི་ཐབས་ཏེ་སྤྱིན་པ་ནི་དེ་བསྒྲུབས་ན་དངོས་གྲུབ་སྤྱིན་པའོ། །བུད་མེད་ཁྱིམ་ནི་མ་མོའི་གནས་དང༌། སྨད་འཚོད་མའི་གནས་དང༌། མོ་རེང་མོ་འདུག་པའི་ཁྱིམ་མོ། །མཚན་གཅིག་པ་ནི་ས་མཚན་མ་ཅན་དང༌། རི་མཚན་མ་ཅན་གཉེན་པོ་འཇིག་རྟེན་པའི་ལྷ་ཆེན་པོའི་རྟེན་ཡོད་བར་ཤ་ཁྲག་ཆང་ལ་སོགས་པས་དམ་རྫས་བྱས་ནས་བསྒྲུབས་ན་དངོས་གྲུབ་ཀྱི་རྟགས་ཉེ་བར་འོང་གསུངས་སོ། །ཕྱི་མ་བདེ་སྟེ་མ་སྨོས་སོ། །འཇིགས་བྱེད་མ་གུན་དངོས་གྲུབ་སྩོལ་བ་ཡང་བདེ་སྟེ་མ་སྨོས་སོ། །ད་ནི་དངོས་གྲུབ་ཀྱི་རྟགས་གསོལ་ཏེ་མ་སྨོས་སོ། །ཁུ་བ་བྲོ་བ་བཏང་བ་དང༌། །རྫས་དང་རལ་གྲི་འཁོར་ལོ་དང༌། །རྩེ་གསུམ་དང་ནི་མཐོ་རིས་ལྷ་ཞེས་གསུངས་ཏེ། ཁུ་བ་ནི་དངུལ་ཆུའི་རིགས་གསེར་དུ་སྣང་བས་ལྕགས་སྲང་སྟོང་གསེར་དུ་འགྱུར་བ་ལྟར་དངོས་གྲུབ་ཀྱི་རྫས་བྱང་ཆུབ་སེམས་ཀྱི་ཁུ་བ་དང་ལྡན་ཞིང༌། རོ་བྲོ་བའི་བཏུང་བ་དམ་པའི་རྟགས་འབྱུང་བ་དང༌། གཞན་ཡང་དངོས་གྲུབ་ཀྱི་རྟགས་རལ་གྲི་དང༌། རྩེ་གསུམ་དང༌། འཁོར་ལོ་ལ་སོགས་པ་འབྱུང་བ་དང༌། འོད་ཟེར་དང་གཟུགས་མཐོང་བར་གྱུར་ན་མཐོ་རིས་ཀྱི་ལྷ་དད་མི་ལ་སོགས་པས་དངོས་གྲུབ་ཐོབ་བོ། །དངོས་གྲུབ་སྤྱིན་དུ་འོད་ན། སྐྲག་ན་ནི་འཆི་སྟེ་མི་སྐྲག་པར་དངོས་གྲུབ་བླང་ངོ༌། །འཇིགས་བྱེད་བརྒྱས་ཀྱི་དཀྱིལ་འཁོར་གྱི་དོན་བསྡུས་པ་བཤད་ཟིན་ཏོ། །ད་ནི་ལྷ་ཆེན་པོ་བརྒྱང་ཀྱི་དཀྱིལ་འཁོར་གྱི་དོན་
བསྡུས་པ་སྟོན་ཏེ། དེ་ནི་འཇིགས་རྟེན་པའི་ལྷ་ཆེན་པོ་མི་དགེ་བ་དེ་ཞི་བར་བྱ་བའི་ཕྱིར་གསུངས་ཏེ། དེ་ཅིའི་ཕྱིར་ཞེ་ན། དེ་ནས་ཚངས་པ་ལ་སོགས་པའི་ལྷ་ཆེན་པོ་རྣམས་ཀྱི་ཞེས་གསུངས་ཏེ། དེ་ནི་གོང་གི་མཇུག་སྡུད་པ་ལ། ནས་ནི་འོག་གི་ལྷ་ཆེན་པོ་རྣམས་ཀྱི་མགོ་འདྲེན་པའོ། །ཚངས་པ་ནི་ཉོན་མོངས་པའི་འཁོར་བ་གྱད་ཁྲིན་དང་འདྲ་བ་ལས་ཚངས་ཤིང་འཇིག་རྟེན་པའི་མེས་པོ་ཡིན་པས་ཚངས་པ་སྣ་ལ་སྨོས་སོ། །ཕྱི་མ་ལྷ་ཆེན་པོ་རྣམས་ནི་དེའི་ཞར་ལ་སྨོས་པས་སོགས་ཞེས་བྱ་བའི་ཐ་ཚིག་གོ །ལྷ་ཆེན་པོ་རྣམས་ཀྱིས་རང་གི་སྙིང་པོ་བཤད་པར་འཚལ་ཞིང་བྱིན་གྱིས་བརླབ་པར་གསོལ་ནས་སྙིང་པོ་བཤད་པ་ནི་བདེ་སྟེ་མ་སྨོས་སོ། །ད་ནི་དཀྱིལ་འཁོར་གྱི་དོན་སྟོན་ཏེ། དེ་ནས་དེ་དག་གི་དཀྱིལ་འཁོར་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །ཞས་གསུངས་ཏེ་དེ་དག་ནི་ལྷ་ཆེན་པོ། །དཀྱིལ་འཁོར་ནི་གཙོ་བོ་དང་འཁོར་དུ་བཅས་པའི་དོན་སྟོན་ཏོ་ཞེའོ། །སྔ་མ་བཞིན་ནི་འཇིགས་བྱེད་ཆེན་པོ་ལྟར་བྱ་བའི་ཐ་ཚིག་གོ །དབུས་སུ་ཕྱག་ན་རྡོ་རྗེ་འཇིག་རྟེན་གསུམ་འདུལ་བྲིའོ། །ཤར་དུ་དབང་ཕྱུག་མདུད་རྩེ་གསུམ་བྲིའོ། །ལྷོར་བརྒྱ་བྱིན་རྡོ་རྗེ་གདེངས་པ་བྲི། ནུབ་ཏུ་ཚངས་པ་རིན་པོ་ཆེ། བྱང་དུ་ཁྱབ་འཇུག་འཁོར་ལོ། ཤར་ལྷོར་འདོད་པའི་དབང་ཕྱུག་གི་མདའ་གཞུ། ལྷོ་ནུབ་ཏུ་ཚོགས་བདག་གི་དགྲ་སྟེ། ནུབ་བྱང་དུ་བྷྲྀང་གི་རི་ཏིའི་རིན་པོ་ཆེའི་སྒྲོམ། བྱང་ཤར་དུ་གཞོན་ནུ་ཀཱ་རྟི་ཀ་མདུང་བསྣམས་པ་བྲིའོ། །གྲུ་ཆད་ལ་སྟོབས་བཟང་སྐུ་མདོག་ལྗང་གུ་གཤོལ་ཐོགས་པ་བྱང་དུ་བྲི། དགའ་བའི་དབང་ཕྱུག་སྐུ་མདོག་དམར་པོ་ཕྱག་ན་གཤོང་ཐུང་བ་ནུབ་ཕྱོགས་སུ་བྲིའོ། །ནག་པོ་ཆེན་པོ་སྐུ་མདོག་ནག་པོ་མི་སྡུག་པ་ཕྱག་ན་མདུང་རྩེ་གསུམ་བསྣམས་པ། རྒྱན་དང་ཆ་ལུགས་ཀྱིས་བརྒྱན་པ་ལྷོར་བྲིའོ། །སེང་གེའི་ཏོག་ཕྱག་ན་ཐོད་པ་ཁྲག་གིས་བཀང་བ་ཐོགས་པ་ཤར་ལྷོའི་གྲུ་ཆད་ལ་བྲི་བར་བྱའོ། །སྒོར་སྒོ་བ་བཞི་བྲི་བར་བྱའོ། །དཀྱིལ་འཁོར་དུ་འཇུག་པ་དང་དངོས་གྲུབ་ཀྱི་རྟགས་མཐོང་ནས་མཆོད་པ་དང༌། རྡོ་རྗེ་འཛིན་མའི་ཕྱག་རྒྱས་སློབ་མ་གཞུག་ཅིང་མེ་ཏོག་དོར་བ་དང༌། མིག་དབྱེ་བ་
དག་སྔགས་ཀྱིས་བཏབ་པའི་བུམ་པས་དབང་བསྐུར་ཞིང༌། སྔགས་ཀྱིས་བསྙེན་པའི་ཚད་བསྒྲུབ་པའི་གནས་དང༌། ལྷ་འོངས་ནས་དངོས་གྲུབ་སྟེར་ཞིང་གསོལ་བ་གདབ་པ་ནི་བདེ་སྟེ་མ་སྨོས་སོ། །ཕྱི་མ་ལྷ་ཆེན་པོ་རྣམས་ཀྱིས་འཇིག་རྟེན་ལ་ཕན་པར་བྱེད་པའི་ཐབས་སྣ་ཚོགས་འབྱུང་བ་ནི་བདེ་སྟེ་མ་སྨོས་སོ། །ལྷ་ཆེན་པོ་བརྒྱང་ཀྱི་དཀྱིལ་འཁོར་གྱི་དོན་བསྡུས་པ་བཤད་ཟིན་ཏོ། །ད་ནི་ཚེ་དཔག་མེད་གཤིན་རྗེ་འཇོམས་པའི་དཀྱིལ་འཁོར་སྟོན་ཏེ། དེ་ནི་སེམས་ཅན་དུས་མ་ཡིན་པར་འཆི་བས་འཇིགས་པའི་གཉེན་པོར་གསུངས་ཏེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་དཀྱིལ་འཁོར་ལ་ཀུན་དུ་གཟིགས་ནས་འཛུམ་པ་མཛད་པ་དང་ཞེས་པ་ནི་ཐུགས་ཡང་དག་པའི་ཡེ་ཤེས་ལས་སྐྱེས་པའི་ཕྱག་ན་རྡོ་རྗེ་ཉིད་ཀྱི་དཀྱིལ་འཁོར་འཇིག་རྟེན་པའི་འཁོར་སྣ་ཚོགས་པ་ལ་ཚེ་དཔག་མེད་ཀྱི་དཀྱིལ་འཁོར་བཤད་པར་བཞེད་ནས། གླང་པོ་ཆེའི་ལྟ་སྟངས་ཀྱིས་ཀུན་དུ་གཟིགས་ནས། ཞལ་འཛུམ་པ་གསེར་གྱི་ཁ་དོག་ལྟ་བུ་མཛད་ནས་འོད་ཀྱིས་འཇིག་རྟེན་གྱི་ཁམས་སྣང་བར་མཛད་དོ། །དེ་ཡང་ཅིའི་ཕྱིར་ཞེ་ན། འཁོར་གྱི་དཀྱིལ་འཁོར་དེ་དག་གཡོས་ཞེས་གསུངས་ཏེ། འཁོར་གྱི་དཀྱིལ་འཁོར་ནི་ཚངས་པ་ལ་སོགས་པའི་འཇིག་རྟེན་པའི་འཁོར་རོ། །གཡོས་པ་ནི་དྲོད་དེ་སྔོན་གྱི་དགེ་པའི་རྩ་བའི་ཚོགས་གཡོས་པའོ། །ཡང་དག་པར་གཡོས་པ་ནི་རྩེ་མོ་སྟེ། དགེ་བའི་རྩ་བ་རྣམ་པར་འཕེལ་བའི་རྩེ་མོ་བྱུང་བས་ཕྱི་གཟུང་བའི་ཡུལ་སྤངས་པས་ཡང་དག་པར་གཡོས་སོ། །ཡང་དག་པར་འགུལ་ནི་བཟོད་པ་སྟེ་ཕྱི་གཟུང་བའི་ཡུལ་སྤངས་པས་ན་འགུལ། ནང་འཛིན་པའི་སེམས་སྤོང་བ་ལ་ཞུགས་པས་ནི་ཡང་དག་པར་འགུལ་ཏོ། །འབར་རབ་ཏུ་འབར་ནི་འཇིག་རྟེན་ཆོས་ཀྱི་མཆོག་སྟེ་ནང་འཛིན་པའི་སེམས་སྤོང་བས་ནི་འབར་རོ། །ས་དང་པོར་བདེན་པ་མཐོང་བས་ནི་རབ་ཏུ་འབར་རོ། །ཡང་དག་པར་རབ་ཏུ་འབར་ཞིང་ས་དང་པོ་བདེན་པ་མཐོང་བའི་ལམ་སྟེ་འཇིག་རྟེན་པའི་མཚན་མ་རབ་ཏུ་འཇོམས་པས་ཡང་དག་པར་རབ་ཏུ་འབར་རོ། །དགོད་རབ་ཏུ་ཡང་དག་པར་རབ་ཏུ་དགོད་ནི་ཡེ་ཤེས་ནི་
དགོད་པར་བྱེད་པའོ། །གྲོགས་བྱང་ཆུབ་ཀྱི་ཡན་ལག་གིས་ནི་རབ་ཏུ་དགོད་པར་བྱེད་དོ། །སྤྱོད་པ་ཕ་རོལ་ཏུ་ཕྱིན་པས་ཡང་དག་པར་རབ་ཏུ་དགོད་དོ། །བརྩེ་རབ་ཏུ་བརྩེ་ཡང་དག་པར་རབ་ཏུ་བརྩེ་ཞེས་པ་ནི་ས་བཅུ་པ་ཆོས་ཀྱི་སྤྲིན་ཐོབ་པས་ནི་བརྩེའོ། །འབྲས་བུ་སངས་རྒྱས་པར་བྱེད་པས་ནི་ཡང་དག་པར་རབ་ཏུ་བརྩེ་ཞིང་ཞེས་སྨོས་སོ། །རྨད་ཀྱི་ཡ་མཚན་དུ་མ་འཇིག་རྟེན་དུ་སྣང་བར་གྱུར་ཏོ། །དགའ་ལྡན་གནས་ནས་འཇིག་རྟེན་མི་ཡུལ་དུ་བབས་ཏེ་མཛད་པ་བཅུ་གཉིས་ཀྱི་ཚུལ་དུ་མངོན་པར་རྫོགས་པར་སངས་རྒྱས་པའི་ཐ་ཚིག་གོ །འཇིག་རྟེན་པའི་འཁོར་དམ་པར་འགྱུར་རམ་འཛུམ་པའི་དོན་བ་སྟན་པར་ཞུ་བ་གསོལ་བ་དང༌། བཅོམ་ལྡན་འདས་ཀྱིས་ཚེ་དཔག་ཏུ་མེད་པའི་འཆི་བདག་བཅོམ་པའི་དོན་ཐོས་སམ་ཞེས་པ་དང༌། འཁོར་རྣམས་དགའ་ནས་ཞུ་བ་གསོལ་བ་དང༌། རྩ་བའི་སྔགས་ཀྱི་ཡིག་འབྲུ་བཤད་པ་ནི་རབ་ཏུ་བདེ་སྟེ་བརྡ་ཕྲད་སླའོ། །དཀྱིལ་འཁོར་བྲི་བའི་ཐབས་དང༌། སྔགས་མཁན་བདག་ཉིད་ཞུགས་ནས་ལྷ་སྤྱན་དྲང་བ་དང༌། བདག་ཉིད་དབང་བསྐུར་ཞིང་སྤྱན་རས་གཟིགས་བསྒྲུབས་ན་དངོས་གྲུབ་ཀྱི་རྟགས་སེམས་ཉམས་དགའ་བར་འགྱུར་བ་དང༌། རྡོ་རྗེ་འཛིན་མའི་ཕྱག་རྒྱ་བཅིངས་ལ། སློབ་མ་གཞུག་ཅིང་མེ་ཏོག་དོར་བ་དང༌། ཕྲེང་བ་ལ་སོགས་པས་དབང་བསྐུར་བ་དང༌། དམ་ཚིག་འབོགས་པའི་ཁྱད་པར་དང༌། དམ་ཉམས་གསད་བའི་ལས་བྱ་བ་ནི་བདེ་སྟེ་མ་སྨོས་སོ། །སྡིག་པ་ཆེ་བ་མེད་པར་བསྒྲུབ་པ་དང༌། དམ་ཚིག་ཁྱད་པར་བ་སྟན་པ་དང་དབང་བསྐུར་བ་ནི་བདེ་སྟེ་མ་བཤད་དོ། །སློབ་དཔོན་མཉེས་པའི་ཡོན་དབུལ་བ་དང་དངོས་གྲུབ་གསོལ་བ་དང་སློབ་དཔོན་གྱིས་སློབ་མ་ལ་དངོས་གྲུབ་སྤྱིན་པ་ནི་བདེ་སྟེ་མ་སྨོས་སོ། །ད་ནི་སྒྲུབ་པའི་ཐབས་སྟོན་ཏེ། ཅིའི་ཕྱིར་ཞེ་ན། ཆོས་རྣམས་ཐམས་ཅད་དངོས་མེད་པར། །སེམས་ཀྱིས་བསྒོམ་པར་བྱས་ནས་ཀྱང༌། །ཞེས་གསུངས་ཏེ་དཀྱིལ་འཁོར་དྲུག་པོ་གང་སྒོམ་ཡང་གཙོ་བོ་མངོན་བྱང་ལྔ་པོ་འདིས་བསྐྱེད་དོ། །དེ་ལ་དང་པོ་སྟོང་པ་ལ་མངོན་པར་བྱང་ཆུབ་པ་ནི་ལག་པ་མཉམ་གཞག་བྱ་སྟེ། ངག་ཏུ་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤྡྡྗོ྅ཧཾ་ཞེས་བརྗོད་པས་ཆོས་ཐམས་ཅད་
སྟོང་པ་ཉིད་དུ་བསྒོམ་པར་བྱའོ། །ངེའི་ངང་ལས་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་མངོན་པར་བྱང་ཆུབ་པ་ནི་ཨ་ལས་ཟླ་བའི་དཀྱིལ་འཁོར་བསམ། ཨཱ་ལི་བཅུ་དྲུག་ལས་ཟླ་བའི་དཀྱིལ་འཁོར་དུ་བསམ་མོ། །དེ་ནས་བརྟན་པའི་སྙིང་པོ་ནི། ཨོཾ་ཙིཏྟ་པྲ་ཏི་བེདྷཾ་ཀ་རོ་མི་ཞེས་བརྗོད་པས་རང་གི་སེམས་རང་གིས་རིག་པའོ། །རང་གི་ས་བོན་དེ་དབུས་སུ་ཞེས་སོ། །ཡང་དེའི་སྟེང་དུ་སྙིང་པོ་བསམ་དེའི་མཐའ་ན་ཕར་ཀཱ་ལི་ལས་ཟླ་བའི་དཀྱིལ་འཁོར་ཉིས་བརྩེགས་སུ་གྱུར་པར་བསམ། དེ་བརྟན་པར་བྱ་བ་ནི། ཨོཾ་བོ་དྷི་ཙིཏྟ་ཨུཏྤཱ་ད་ཡ་མི་ཞེས་བརྗོད་པས་ཡེ་ཤེས་ཀྱི་ཚོགས་རྫོགས་སོ། །ཡིག་འབྲུ་ལས་མངོན་པར་བྱང་ཆུབ་པ་ནི་དེའི་སྟེང་དུ་ལྷ་གང་བསྒོམ་གྱི་སྙིང་པོ་བསམ། དེ་བརྟན་པའི་སྙིང་པོ་ནི་ཏིཤྛ་བཛྲ་ཞེས་བརྗོད་པས་བརྟན་པར་བྱའོ། །དེ་ལས་འོད་འཕྲོས་འདུས་པ་ལས་དམ་ཚིག་གི་ཕྱག་རྒྱ་ལ་བསམས་ནས་དམ་ཚིག་ཕྱག་རྒྱ་ཡང་ཞེས་སོ། །མངོན་པར་བྱང་ཆུབ་པ་ནི་ལྷ་གང་བསྒོ་མ་གྱི་ཕྱག་མཚན་དུ་གྱུར་པའོ། །དེ་བརྟན་པར་བྱ་བ་ནི། ཨོཾ་བཛྲ་ཨཱཏྨ་ཀོ྅ཧཾ་ཞེས་པས་བརྟན་པར་གྱུར་ཏོ། །མཚན་མ་དེ་ལ་དེ་བཞིན་གཤེགས་པའི་སྐུ་གསུང་ཐུགས་ད་བག་ཏུ་མེད་པར་ཞུགས་པ་ལས། ཕྱག་རྒྱ་ཆེན་པོ་མངོན་པར་བྱང་ཆུབ་པ་ནི་དཀྱིལ་འཁོར་གང་བསྒོམ་གྱི་གཙོ་བོར་གྱུར་བའོ། །ཨོཾ་སརྦ་ཏ་ཐཱ་ག་ཏ་ཏཱ་སྟ་ཧཾ་ཞེས་བརྗོད་པས་བཅུ་གཅིག་པར་སངས་རྒྱས་པར་གྱུར་ཏོ། །དེ་ནས་རང་གིས་བོན་དང་ལྷ་གང་བསྒོམ་གྱི་སྔགས་དང༌། དམ་ཚིག་གི་ཕྱག་རྒྱས་སྐུ་ཕྱག་རྒྱ་ཆེན་པོ་ལ་གནས་བཞིར་བྱིན་གྱིས་བརླབ་བོ། །སངས་རྒྱས་རྣམས་ཀྱིས་དབང་བསྐུར་ཞེས་སོ། །དེ་ནས་རིགས་ལྔའི་ཕྱག་རྒྱས་དབང་བསྐུར་རོ། །ཨོཾ་བུདྡྷ་མུ་དྲ་ཨ་བྷི་ཥཉྩ་ཨོཾ་སྤྱི་བོར། ཨོཾ་བཛྲ་མུ་དྲ་ཨ་བྷེ་ཥིཉྩ་ཧཱུཾ། མཚོག་ཁར། ཨོཾ་རཏྣ་མུ་དྲ་ཨ་བྷི་ཥིཉྩ་ཏཱཾ། ལྟག་པ་གཡས། ཨོཾ་པདྨ་མུ་དྲ་ཨ་བྷི་ཥིཉྩ་ཧྲཱིཿ། ལྷག་པ་རུ། ཨོཾ་ཀརྨ་མུ་དྲ་ཨ་བྷི་ཥྀཙྙ་ཨཱཿ། ལྟག་པ་གཡོན་དུའོ། །དེ་ནས་དར་དཔྱད་གི་དབང་ནི། ཨོཾ་བཛྲ་པ་ཊཾ་བཱ་ལཾ་བི་ནི་ཨ་བྷི་ཥིཉྩ་ཧྲཱིཿ་ཞེས་པའོ། །དེ་ལས་ལྷའི་སྐུར་བསྐྱེད་དེ། བསྒྲུབས་ན་དངོས་གྲུབ་ཐོབ་ཅེས་གསུངས་སོ། །མཎྜལ་དུ་
ཞུགས་པའི་ཕན་ཡོན་ཞུ་བ་དང༌། བྷ་ག་བཱན་གྱི་བཀའ་སྩལ་པ་དང༌། དབང་བསྐུར་བའི་ཐབས་ནི་བདེ་སྟེ་མ་སྨོས་སོ། །ཚེ་དཔག་མེད་གཤིན་རྗེ་འཇོམས་པའི་དཀྱིལ་འཁོར་བཤད་ཟིན་ཏོ། །ད་ནི་ཞི་བའི་སྦྱིན་སྲེག་གི་ལས་སྟོན་ཏེ། སྤྱིན་པ་ནི་བདེ་བ་ལ། སྲེག་པ་ནི་ཉོན་མོངས་པའོ། །དེ་ཡང་ཅིའི་ཕྱིར་ཞེ་ན། ལྷའི་བུ་རྣམས་ཞི་ཞེས་གསུངས་ཏེ། ལྷའི་བུ་ཞེས་སྨོས་པ་ནི་ཁྱབ་པ་སྤྱིར་ལ་གཏང་བའི་ཕྱིར་རམ་ལྷའི་བུ་གཞོན་ནུ་རྣམས་གཡེང་བ་ཆེ་བས། ཉན་ཅིང་མདུན་དུ་འདུག་པའི་ཕྱིར་མིང་ནི་མ་སྨོས་ཏེ་ལྷའི་བུ་རྣམས་ཞེས་བྱ་བའི་ཐ་ཚིག་གོ །ཞི་བ་ནི་ཐུགས་རང་བཞིན་གྱིས་ཞི་བས་ཉོན་མོངས་པའི་མཚན་མ་ཞི་བར་བྱེད་པའི་ཐ་ཚིག་སྟེ་དེའི་ཐབས་ནི་འདི་ལྟར་ཡིན་ཏེ། ཅིའི་ཕྱིར་ཞེ་ན། ཧོམ་ཁུང་བར་མ་ཐ་མ་མཆོག །ཁྲུ་གང་ཁྲུ་དོ་ཁྲུ་བཞི་པ། །ཟླུམ་པོ་ཉིད་དུ་བྱས་ནས་ནི། །ཞེས་གསུངས་ཏེ། ཐབ་ཁུང་བར་མ་ནི་ཁྲུ་དོ། ཐ་མ་ཁྲུ་གང༌། མཆོག་ནི་ཁྲུ་བཞི་ཡིན་ཏེ་གཟུང་འཛིན་རྣམ་པ་གཉིས་སྤངས་པས་ནི་ཁྲུ་གང་དུ་བ་སྟན་ལ། ཐབས་དང་ཤེས་རབ་རྣམ་པ་གཉིས་དང་ལྡན་པའི་རྟགས་སུ་ཁྲུ་དོའོ། །ཚད་མེད་པ་བཞི་དང་ལྡན་པའི་རྟགས་ཁྲུ་བཞིར་བ་སྟན་ལ། དངོས་པོའི་མཐའ་སྤངས་པའི་རྟགས་སུ་ནི་ཕྱི་རོལ་ཟླུམ་པོར་བྱ་སྟེ། ཐབ་ཁུང་རབ་འབྲི་ནག་གི་ཚད་ལས་ལྷ་དགོད་པའི་རིམ་པ་ཡང་ཆེ་ཆུང་དུ་བྲིའོ། །ཐབ་ཁུང་གི་དབུས་སུ་འཁོར་ལོ་རྩིབས་བརྒྱང་དཀར་པོ་ཅིག་བྲི། ཐབ་ཀྱི་ཁ་ཁྱེར་ལ་མུ་རན་བཏང༌། མུ་རན་ལ་མེ་རི་བཏང༌། ཁ་ཁྱེར་ལ་རྡོ་རྗེའི་ར་བཏང༌། དེའི་ཕྱི་རོལ་གྱི་བང་རིམ་གཅིག་ལ་རིགས་རྣམ་པ་བཞིའི་ཕྱག་རྒྱ་རྡོ་རྗེ་དང༌། རིན་པོ་ཆེ་དང༌། པདྨ་དང་རྒྱ་གྲམ་རྣམས་བྲི། དེའི་ཕྱི་རོལ་ལ་སེམས་དཔའ་བཅུ་དྲུག་བྲི། དེའི་ཕྱི་རོལ་སྣམ་བུ་ལ་ཕྱོགས་སྐྱོང་བཅུ་དང་ལྷ་ཆེན་པོ་བརྒྱང་བྲི། དེའི་ཕྱི་རོལ་དུ་གཟའ་ཆེན་པོ་བརྒྱང་དང་རྒྱུ་སྐར་གྱི་མཚན་མའམ་ཐིག་ལེ་བྲི། དེ་ནས་གདོད་སྒོ་བ་བཞི་བྲི། །ད་ནི་ལས་བྱ་བའི་ཐབས་སྟོན་ཏེ། དེ་ཡི་མིང་ཡང་ཡུངས་ཀར་གྱིས། བརྒྱ་ཕྲག་སྟོང་དུ་བསྲེས་བྱས་ན། །ངན་སོང་ཀུན་ལས་རྣམ་པར་ཐར། །ཞེས་གསུངས་ཏེ་དེ་ནི་སེམས་ཅན་ཤི་བའོ། །མིང་ནི་གདགས་པའི་
གཞི་སྟེ་ཡུངས་ཀར་དང་བསྲེས་ལ་སོ་སོའི་སྔགས་དང་མིང་སྤེལ་མར་སྤྱིན་སྲེག་བྱ། རྣམ་པ་གཅིག་ཏུ་ནི་ཤ་དང་རུས་པ་དང་རྐང་དང་སྐྲ་དང་གོས་ལ་སོགས་པའི་མཚན་མ་དང༌། རོ་བསྲེགས་པའི་ཐལ་བ་ལ་སོགས་པ་དང༌། གུར་གུམ་དང༌། ཙནྡན་དང༌། འབྲས་ཆན་དང། ལ་དུ་ལ་སོགས་པ་དང་བསྲེས་ནས་ལས་བྱས་ན་ངན་སོང་ལས་ཐར་བར་གསུངས་སོ། །བྲི་བའི་ཐབས་བདེ་སྟེ་མ་སྨོས་སོ། །ད་ནི་མཆོད་པའི་ཁྱད་པར་སྟོན་ཏེ། བྱ་དང་བུམ་པ་དགང་བ་དང༌། །ཞེས་པ་ནི་དངུལ་གྱི་བྱ་ཕོ་དང༌། གསེར་གྱི་བུམ་པ་སྤོས་ཆུས་བཀང་བ་དང༌། གཏོར་མ་དང་ལྷ་བཤོས་ལ་སོགས་པ་དཀར་པོར་བྱས་ལ་གཞག་པ་དང༌། མར་དང༌། འོ་མ་དང༌། སྦྲང་རྩི་དང༌། སྤོས་དང༌། ཡུངས་ཀར་རྣམས་ཀྱང་མཆོད་རྫས་སུ་གཞག་སྟེ་དེ་ནི་མཆོད་པའི་ཁྱད་པར་རོ། །ད་ནི་གོས་བ་སྟན་ཏེ། དཀར་པོའི་གོས་ནི་གོན་ནས་ཀྱང༌། །ཞེས་པ་ནི་སྔགས་མཁན་གྱིས་དཔལ་གྱི་གོས་དཀར་པོ་གོན་པ་དང༌། སྲད་བུ་དཀར་པོ་སེ་རལ་དུ་ཐོགས་ཤིང་ལས་གོང་ནས་འབྱུང་བ་བཞིན་བྱས་ན་འགྲུབ་པར་གསུངས་སོ། །ད་ནི་རྒྱས་པའི་ལས་སྟོན་ཏེ། དེ་ཅིའི་ཕྱིར་ཞེ་ན། མཁས་པས་རྒྱས་པ་བྱ་དགོས་ཏེ། །ཞེས་པ་ནི་མཁས་པ་ནི་སྒྲུབ་པ་པོ་ཆོ་ག་དང་ལས་ཀྱི་བྱེ་བྲག་ལ་མཁས་པའོ། །རྒྱས་པ་ནི་དཔལ་དང་གཟི་བརྗིད་འཕེལ་ཞིང་རྒྱས་པའོ། །དེ་ནི་སེམས་ཅན་ཕོངས་པ་རྣམས་བདེ་བར་བྱ་བའི་ཕྱིར་སྨོས་ཏེ། ཁྲུ་དོ་པའམ་ཁྲུ་བཞི་པ། །དེ་ལྟར་མཆོག་ནི་ཁྲུ་བརྒྱང་པ། །བྱས་ནས་ཐབ་ཁུང་གྲུབ་ཞི་པའི། །ཞེས་གསུངས་ཏེ། ཁྲུ་དོ་ནི་ཐབ་ཁུང་གི་ཐ་ཚིག་གོ །ཁྲུ་བཞི་ནི་བང་རིམ་བཞི་ཡོད་པའི་ཐ་ཚིག་གོ །ཁྲུ་བརྒྱང་ནི་ཕྱིའི་ཚད་དོ། །ཐབ་ཁུང་ཡང་ཁྲུ་བཞི་པར་བརྐོས་ལ། མུ་རན་ཡང་བཏང༌། མུ་རན་ལ་ཆུ་སྐྱེས་ཀྱང་བཏང༌། ཁ་ཁྱེར་ལ་རིན་པོ་ཆེའི་ཕྲེང་བས་བསྐོར་དབུས་སུ་པདྨ་འདབ་མ་བརྒྱང་བྲིས་ལ་པདྨའི་ལྟེ་བར་རིན་པོ་ཆེ་འབར་བའི་འོད་ཟེར་སེར་པོ་ཅན་བྲི། བང་རིམ་དང་པོ་ལ་རིགས་རྣམ་པ་ལྔ་བྲི། གཉིས་པ་ལ་རིགས་ཀྱི་སེམས་དཔའ་བྲིའོ། །གསུམ་པ་ལ་ཕྱོགས་སྐྱོང་དང་བཀྲ་ཤིས་བྲིའོ། །བཞི་བ་ལ་སྒོ་གདོད། སྔགས་
མཁན་གོས་སེར་པོ་གོན་ནས་ལས་ཚུལ་བ་ཞིན་དུ་བྱས་ནས། ལུས་ཅན་གྱི་ཚེ་དང་དཔལ་དང་ག་ཟི་བརྗིད་དང་བདེ་བའི་ལོངས་སྤྱོད་འཕེལ་ལོ། །རྒྱས་པའི་དོན་བཤད་ཟིན་ཏོ། །ད་ནི་དབང་གི་ལས་སྟོན་ཏེ། དེ་ནི་མ་རུངས་པ་དབང་དུ་བསྡུ་པའི་ཕྱིར་སྨོས་ཏེ། དེ་ཅིའི་ཕྱིར་ཞེ་ན། དེ་ནས་ཕན་ཕྱིར་ངེས་པ་ཡང༌། །དབང་དུ་བྱ་བའི་ལས་བྱ་སྟེ། །ཞེས་གསུངས་པས། དེ་ནས་ནི་རྒྱས་པའི་རྟིང་ཐོགས་སུ་འབྱུང་པས་སོ། །ཕན་ཕྱིར་ནི་སེམས་ཅན་འདོད་ཆགས་ཅན་དང་ཉོན་མོངས་པས་ཉེན་པ་ལ་ཕན་པའི་ཕྱིར་རོ། །དབང་དུ་བྱ་བ་ནི་དེ་རྣམས་ཆགས་པའི་ཚུལ་གྱིས་དབང་དུ་བསྡུ་ཞིང་ཐེག་པ་ཆེན་པོར་སེམས་བསྐྱེད་པའི་ཐ་ཚིག་གོ །དེའི་ཐབས་ནི་ཇི་ལྟར་ཡིན་ཞེ་ན། ཐབ་ཁུང་གསུང་ཡི་དབྱིབས་འདྲ་བ། །ཁྲུ་གང་དམ་ནི་ཁྲུ་དོབ། །གྲུ་བཞིར་བྱས་པ་དེ་དབུས་སུ། །ཞེས་པ་ནི། ཧོམ་གྱི་ཐབ་ཁུང་ཡང་གཞུའི་དབྱིབས་ལྟར་བརྐོ་བར་བྱ་སྟེ། ཐབ་ཁུང་ཐམ་ཁྲུ་གང་འབྲི་ནག་ཁྲུ་དོ་རབ་ཁྲུ་བཞི་པ་བྱས་ལ། ཐབ་ཁུང་གི་དབུས་སུ་པདྨ་དམར་པོ་བྲིས་ལ། པདྨའི་ལྟེ་བ་ལ་མདའ་དང་གཞུ་བཅས་པ་ཡང་བྲི། ཁ་ཁྱེར་ལ་ཡང་མདའ་དང་གཞུ་དམར་པོ་ཡང་བྲི། ཕྱི་རོལ་དུ་ཡང་བར་རིམ་བཏོད་ལ་བང་རིམ་དང་པོ་ལ་རིགས་ལྔ། གཉིས་པ་ལ་རིགས་ཀྱི་སེམས་དཔའ། དེའི་ཕྱི་རོལ་དུ་སྒོ་གདོད། སྔགས་མཁན་ཡང་ཆས་གོས་དམར་བོ་གོན། མཆོད་རྫས་ཀྱང་མེ་ཏོག་དམར་པོ་དང༌། སྲན་མ་དང༌། བུ་རམ་དང༌། ཤིང་ཐོག་དམར་པོ་དང༌། མར་དང་གུར་གུམ་བསྲེས་པ་དང༌། ཙནྡན་དམར་པོའི་ཕྱེ་མ་ལ་སོགས་བསྲེག་རྫས་མཆོད་རྫས་དང་བསྲེས་ཏེ་སྤྱིན་སྲེག་བྱས་ན་ཐམས་ཅད་དེའི་མོད་ལ་དབང་དུ་འགྱུར་རོ། །ཐབ་ཁུང་གཞུའི་དབྱིབས་འདྲ་བར་བྱས་པ་ནི་ཞི་གནས་གཞུ་འདྲ་བ་དང་ལྷག་མཐོང་མདའ་འདྲ་བས་ཐམས་ཅད་དབང་དུ་སྡུད་པའི་རྟགས་སོ། །དབང་གི་ལས་བ་སྟན་ཟིན་ཏོ། །དྲག་པོའི་ལས་ནི་འདིར་མ་གསུངས་སོ། །དེ་ནས་ཚངས་པ་ལ་སོགས་པ་ཞེས་པ་ནས་སྨོས་ཅི་འཚལ་ཞེས་པའི་བར་གྱིས་ནི། འཁོར་སྲུང་བར་དམ་བཅས་པ་སྟོན། གང་ཞིག་ཆོ་ག་ཞིབ་མོ་ཞེས་པ་ནས་དེ་བཞིན་གཤེགས་པ་ལེགས་
པར་འཚལ་བར་བགྱིའོ་ཞེས་པའི་བར་གྱིས་ནི་ཆོ་ག་ཞིབ་མོ་འདི་གང་ན་སྤྱོད་པ་བཀུར་བར་བ་སྟན། དེ་ནས་བཅོམ་ལྡན་འདས་ཞེས་པ་ནས་ལེགས་པར་སྒྲུབས་ཤིག་ཅེས་བྱ་བའི་བར་གྱིས་ནི་ལེགས་པར་སྒྲུབས་ཤིག་པ་བ་སྟན་ཏོ། །དེ་ཡན་ཆད་ནི་ཆོ་གའི་ཕན་ཡོན་ནོ། །ད་ནི་རིགས་བཞི་འཁོར་ལོས་སྒྱུར་བའི་དཀྱིལ་འཁོར་སྟོན་ཏེ། དེ་ལ་རིགས་བཞི་ནི་རྡོ་རྗེའི་རིགས་དང་རིན་པོ་ཆེའི་རིགས་དང་པདྨ་དང་ལས་ཀྱི་རིགས་སོ། །འཁོར་ལོ་ནི་བསྐོར་དུ་བཏུབ་པའོ། །སྒྱུར་བ་ནི་དེས་ཁམས་གསུམ་སྒྱུར་བའོ། །དཀྱིལ་ནི་ཆོས་ཉིད་ལ་འཁོར་ནི་ཕྲིན་ལས་སོ། །དེ་ཡང་ཅིའི་ཕྱིར་ཞེ་ན། དེ་ནས་བཅོམ་ལྡན་འདས་ཕྱག་ན་རྡོ་རྗེས་གསང་སྔགས་དང་རིག་སྔགས་དང་སྙིང་པོ་ཐམས་ཅད་བརྟན་པར་བྱ་བའི་ཕྱིར་ཉིད་ཀྱི་སྙིང་པོ་འདི་བཤད་དེ་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སུ་འབྱུང་བ་ཡིན་ལ། བཅོམ་པ་ནི་ཉེས་པའི་སྐྱོན་བཅོམ་པ་ཡིན་ལ། ལྡན་པ་ནི་འཇིག་རྟེན་པའི་དྲེགས་པ་ཅན་འདུལ་བའི་ལེགས་པའི་ཡོན་ཏན་དང་ལྡན་ལ། འདས་པ་ནི་ཤེས་པས་སྲིད་བ་ལ་མི་གནས། ཐུགས་རྗེས་ཞི་བ་ལ་མི་གནས་པས་འདས་པའོ། །ཕྱག་ན་རྡོ་རྗེ་ནི་ཐུགས་ཡང་དག་པའི་ཡེ་ཤེས་ཀྱི་རྟགས་རྡོ་རྗེ་བསྣམས་བས་སོ། །གསང་བ་ནི་ཆོས་ཀྱི་དབྱིངས་ཏེ། ཕྱི་རོལ་གྱི་རྟོག་པ་ཅན་གྱིས་མི་རྟོགས་པའི་ཕྱིར་རོ། །སྔགས་ནི་མཚན་མ་དང་བྲལ་བའི་དོན་ཏོ། །རིག་པ་ནི་ཡེ་ཤེས་ལ་སྔགས་ནི་དེས་ཉོན་མོངས་པ་འཇོམས་པའོ། །སྙིང་པོ་ནི་བྱང་ཆུབ་ཀྱི་སེམས་ལ་ཐམས་ཅད་ནི་དེར་ཐམས་ཅད་འདུས་པའི་ཕྱིར་རོ། །བརྟན་པར་བྱ་བ་ནི་རྒྱུ་དང་འབྲས་བུ་བརྟན་པར་བྱ་བའི་ཐ་ཚིག་གོ །ཉིད་ཀྱི་སྙིང་བོ་འདི་ཞེས་པ་ནི་ཕྱག་ན་རྡོ་རྗེ་ཉིད་ཀྱི་བྱང་ཆུབ་ཀྱི་སེམས་ཀྱིས་སྙིང་པོའོ། །བཤད་པ་ནི་ཚིག་དང་དོན་བཤད་པའོ། །ཨོཾ་བྷཱུཾ་བཛྲ་པཱ་ཎི་ཞེས་པ་ནི། ཨོཾ་ནི་ཡེ་ཤེས་ལྔའོ། །བྷཱུཾ་ནི་གཞལ་ཡས་ཁང་གི་ས་བོན་ནོ། །ཏྲཾ་ནི་འཛིན་པའོ། །བཛྲ་ནི་ཕྱག་ན་རྡོ་རྗེའོ། །ཏིཤྛ་ནི་འཇོམས་པའོ། །ཧཱུཾ་ནི་ཐུགས། ཨོཾ་ཨཱཿཧཱུཾ་ནི་དེ་བཞིན་གཤེགས་པའི་སྐུ་གསུང་ཐུགས། ཨོཾ་བྷཱུཾ་ཕཊ་ནི་རྡོ་རྗེ་འཛིན་པའི་སྙིང་པོ་སྤྲོ་བའོ། །ཨོཾ་དི་བཛྲ་ཧཱུཾ་ནི་རིན་པོ་ཆེའི་རིགས་ཀྱི་སྙིང་པོའོ། །ཨོཾ་
བཛྲ་ཧ་ས་ནི་པདྨའི་རིགས་ཀྱི་སྙིང་པོའོ། །ཨོཾ་བཛྲ་ཧཱུཾ་ཨ་ནི་ལས་ཀྱི་རིགས་ཀྱི་སྙིང་པོའོ། །རྩ་བའི་སྙིང་པོའི་དོན་བཤད་ཟིན་ཏོ། །ད་ནི་དཀྱིལ་འཁོར་གྱི་དོན་སྟོན་ཏེ། དེ་ནས་དེ་དག་གི་དཀྱིལ་འཁོར་གྱི་དོན་བཤད་དེ། དཀྱིལ་འཁོར་སྔ་མ་བཞིན་བྲིས་ལ། །ཞེས་པ་ནི་དེ་དག་ནི་སྔགས་ཀྱི་ཡིག་འབྲུ་གོང་དུ་ཕྱུང་བའི་ལྷ་དེ་དག་གོ །དཀྱིལ་ནི་དབུས་ཀྱི་གཙོ་བོ་ལ་འཁོར་ནི་འཇིག་རྟེན་པ་དང་འཇིག་རྟེན་ལས་འདས་པའོ། །དཀྱིལ་ནི་དབུས་ཀྱི་ཕོ་བྲང་ལ་འཁོར་ནི་སྒོ་དང་སྣམ་བུ་ལ་སོགས་པའོ། །སྔ་མ་བཞིན་ནི་ཚེ་དཔག་མེད་ཀྱི་དཀྱིལ་འཁོར་ལྟར་འཁོར་ལོ་རྩིབས་བཞི་པར་བྲི་བའི་ཐ་ཚིག་གོ །དབུས་སུ་རྡོ་རྗེ་བྲི་བར་བྱ། །ཡང་ན་རྡོ་རྗེ་སེམས་དཔའམ། །ཀུན་དུ་བཟང་དམ་བདེ་བ་ཆེ། །ཞེས་པ་ནི་དབུས་ནི་ཕོ་བྲང་ཟླུམ་པོའོ། །རྡོ་རྗེ་ནི་ཐུགས་ཡང་དག་པའི་ཡེ་ཤེས་ཀྱི་རྡོ་རྗེ་རྩེ་ལྔ་པ་བྲི་བར་སྨོས་སོ། །ཡང་ན་ནི་བསྣན་པའི་དོན་ཏེ་རྣམ་གཅིག་ཏུ་ན་འདི་ལྟར་ཡང་བྲི་ཞེས་པའི་ཐ་ཚིག་གོ །རྡོ་རྗེ་སེམས་དཔའ་ནི་ཐུགས་ཡང་དག་པའི་ཡེ་ཤེས་ཀྱི་ཕྱག་རྒྱའོ། །ཀུན་དུ་བཟང་པོ་སྐུ་རྣམ་པར་དག་པའི་ཕྱག་རྒྱ་སྟེ་ཀུན་དུ་བཟང་པོའོ། །བདེ་བ་ཆེན་པོ་ནི་གསུང་བདེ་བ་ཆེན་པོ་ལ་མངའ་སྒྱུར་བས་བདེ་བ་ཆེན་པོའོ། །དེ་གསུམ་ནི་སྐུ་གསུང་ཐུགས་ཀྱི་ཕྱག་རྒྱ་ལས་གང་བྲིས་ཀྱང་མི་འགལ་བར་གསུངས་སོ། །སྤྱན་སྔར་ཕྱག་ན་རྡོ་རྗེ་ལ། །གཡས་སུ་ཕྱག་ན་རིན་ཆེན་བསྣམས། །ཞེས་པ་ནི་སྤྱན་སྔར་ནི་ཤར་ཕྱོགས་ཀྱི་ལྕེ་སྟེ་ཕྱག་ན་རྡོ་རྗེ་སྐུ་མདོག་དཀར་པོ་ཕྱག་ན་རྡོ་རྗེ་བསྣམས་པ་བྲི། གཡས་ནི་ལྷོ་ཕྱོགས་ཏེ་ནམ་མཁའི་སྙིང་པོ་སྐུ་མདོག་སྔོན་པོ་ཕྱག་གཡས་ན་རིན་པོ་ཆེ་བསྣམས་པ་བྲི། རྣམ་པར་གསལ་བ་ནུབ་ཕྱོགས་བྲི། །ཞེས་པ་ནི། རྣམ་པར་ནི་སྤྱི་དང་རང་གི་མཚན་ཉིད་དོ། །གསལ་བ་ནི་ཐུགས་ལ་དེ་གསལ་བ་སྟེ་ནུབ་ཕྱོགས་སུ་བྲི་བ་ནི་སྤྱན་རས་གཟིགས་དབང་ཕྱུག་སྐུ་མདོག་དཀར་པོ་ཕྱག་ན་པདྨ་བསྣམས་པ་བྲི། བྱང་གི་ཕྱོགས་ན་རྒྱ་གྲམ་བསྣམས། །ཞེས་པ་ནི་བྱང་ཕྱོགས་རྡོ་རྗེ་ལས་རབ་སྐུ་མདོག་ལྗང་གུ་ཕྱག་ན་རྒྱ་གྲམ་བསྣམས་པ་བྲི། ཕྱི་རོལ་དུ་ནི་ཀུན་བསྐོར་ཞིང༌། །ཞེས་པ་ནི། ཕྱི་
རོལ་ནི་འཁོར་ལོ་རྡོ་རྗེ་ར་བས་ཟླུམ་པོར་བསྐོར་བའི་ཕྱི་རོལ་གྲུ་ཆད་ལ་ནི་རྡོ་རྗེ་ལཱ་སྐྱེ་སྐུ་མདོག་དཀར་མོ་ཕྱག་ཁུ་ཚུར་གྱིས་དཀུར་རྟེན་པའོ། །ལྷོར་མཱ་ལེ་སྐུ་མདོག་སྔོན་མོ་ཕྱག་ན་རིན་པོ་ཆེའི་ཕྲེང་བ་འཛིན་པའོ། །ནུབ་ཏུ་དབྱངས་མཁན་སྐུ་མདོག་དམར་མོ་ཕྱག་ན་པི་ཝང་བསྣམས་པ། བྱང་དུ་གར་མཁན་མ་ལྗང་གུ་གར་མཛད་པ། ཤར་དུ་བདུག་པ་མ་སྐུ་མདོག་དཀར་མོ་ཕྱག་ན་བདུག་སྤོས་བསྣམས་པ། ལྷོར་མེ་ཏོག་མ་སྐུ་མདོག་སྔོན་མོ་ཕྱག་ན་མེ་ཏོག་གི་གཞོང་བུ་བསྣམས་པ། ནུབ་ཏུ་མར་མེ་མ་སྐུ་མདོག་དམར་མོ་ཕྱག་ན་མར་མེ་བསྣམས་པ། བྱང་དུ་དྲི་ཆབ་མ་སྐུ་མདོག་ལྗང་གུ་ཕྱག་ན་དུང་པོར་བསྣམས་པ་སྟེ་དེ་རྣམས་ནི་གྲྭཱ་ནས་རིམ་པར་བསྐོར་ཞིང་བྲི་བའི་ཐ་ཚིག་གོ །སངས་རྒྱས་ཐམས་ཅད་གཞག་པར་བྱ། །ཞེས་པ་ནི་སངས་རྒྱས་ནི་འདས་པ་དང་ད་ལྟར་གཉིས་པས་ཐམས་ཅད་གཞག་པར་བྱ་བ་ནི་གྲུ་ཆད་ཀྱི་ཕྱི་རོལ་དུ་སྣམ་བུ་གཅིག་བྱས་པ་ལ་བྲི་བར་བྱ་བ་སྟེ། འདས་པའི་སངས་རྒྱས་བདུན་བྲི་བར་བྱ་སྟེ་མར་མེ་མཛད་དང༌། འཁོར་བ་འཇིག་དང༌། གསེར་ཐུབ་དང༌། འོད་སྲུངས་དང༌། ཐམས་ཅད་སྐྱོབ་དང༌། ལོག་པར་དད་སེལ་དང༌། ཤཱཀྱ་ཐུབ་པ་དེའི་འཁོར་དུ་བཏང་བ་དང་བདུན་ནོ། །དེ་ནི་སྤྲུལ་བའི་སྐུ་ཆ་ལུགས་དབུ་རེ་ག་དང་ཞབས་རྗེན་དུ་བྲི། ཕྱག་མཚན་མི་དགོས་པས་ཤར་ནས་རིམ་པར་བསྐོར་བ་བྲི། དེའི་བར་དུ་ད་ལྟར་བཞུགས་པའི་སངས་རྒྱས་ལྔ་སྟེ། དེ་ནི་འཁོར་ལོས་སྒྱུར་བའི་ཆ་ལུགས་སུ་བཞུགས་པས་ཕྱག་མཚན་ཡང་བྲི་སྟེ་རྣམ་པར་སྣང་མཛད་སྐུ་མདོག་སེར་པོ་ཕྱག་ན་འཁོར་ལོ་བསྣམས་པའོ། །མི་བསྐྱོད་པ་སྐུ་མདོག་དཀར་པོ་ཕྱག་ན་རྡོ་རྗེ་བསྣམས་པའོ། །རིན་ཆེན་འབྱུང་ལྡན་སྐུ་མདོག་སྔོན་པོ་ཕྱག་ན་རིན་པོ་ཆེ་བསྣམས་པའོ། །སྣང་བ་མཐའ་ཡས་སྐུ་མདོག་དམར་པོ་ཕྱག་ན་པདྨ་བསྣམས་པའོ། །དོན་ཡོད་གྲུབ་པ་སྐུ་མདོག་ལྗང་གུ་ཕྱག་ན་རྒྱ་གྲམ་བསྣམས་པ་བྲིའོ། །དེའི་ཕྱི་རོལ་དུ་སྒོ་གདོད་ལ་ཤར་ན་ལྕགས་ཀྱུ་དཀར་པོ་ལྕགས་ཀྱུ་བསྣམས་པ་བྲི། ཞགས་བ་སྔོན་པོ་ཞགས་པ་བསྣམས་པ་
ལྷོར་བྲི། ལྕགས་སྒྲོག་དམར་པོ་ལྕགས་སྒྲོག་བསྣམས་པ་ནུབ་ཏུ་བྲི། དྲིལ་བུ་ལྗང་གུ་དྲིལ་བུ་བསྣམས་པ་བྱང་དུ་བྲི། ད་ནི་སེམས་དཔའ་བཅུ་དྲུག་བྲི་ཐབས་སྟོན་ཏེ་དེ་ཅིའི་ཕྱིར་ཞེ་ན། དེ་ཡི་ཕྱི་རོལ་སེམས་དཔའ་རྣམས། །གོ་རིམས་བཞིན་དུ་བྲི་བར་བྱ། །ཞེས་པ་ནི། སེམས་དཔའ་ནི་རིགས་སོ་སོ་ལ་སྤྲུལ་པ་སྟེ་བཅུ་དྲུག་གོ །བཤད་པ་ནི་ཀུན་རིག་ནས་འབྱུང་བ་དང་མཐུན། ཤར་ཕྱོགས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་བསྣམས་པའོ། །རྡོ་རྗེ་རྒྱལ་པོ་སེར་པོ་ལྕགས་ཀྱུ་བསྣམས་པའོ། །རྡོ་རྗེ་ཆགས་པ་དམར་པོ་མདའ་གཞུ་བསྣམས་པའོ། །རྡོ་རྗེ་ལེགས་པ་ལྗང་གུ་སེ་གོལ་བསྣམས་པ་ཤར་ཕྱོགས་སུ་རིམ་པས་བྲིའོ། ལྷོ་ཕྱོགས་སུ་རྡོ་རྗེ་རིན་ཆེན་སྐུ་མདོག་སྔོན་པོ་རིན་པོ་ཆེ་བསྣམས་པའོ། །རྡོ་རྗེ་གཟི་བརྗིད་དམར་སེར་ཉི་མ་བསྣམས་བའོ། །རྡོ་རྗེ་རྒྱལ་མཚན་ནམ་མཁའི་མདོག་རྒྱལ་མཚན་བསྣམས་པ། རྡོ་རྗེ་བཞད་པ་དཀར་པོ་སོའི་ཕྲེང་བ་བསྣམས་པ། ནུབ་ཏུ་རྡོ་རྗེ་ཆོས་རབ་སྐུ་མདོག་དམར་པོ་ཕྱག་ན་པདྨ་བསྣམས་པ་བྲི། རྡོ་རྗེ་རྣོན་པོ་སྔོན་པོ་རལ་གྲི་བསྣམས་པའོ། །རྡོ་རྗེ་འཁོར་ལོ་སེར་པོ་འཁོར་ལོ་བསྣམས་པའོ། །རྡོ་རྗེ་སྨྲ་བ་དམར་པོ་ལྗགས་བསྣམས་པའོ། །བྱང་ཕྱོགས་སུ་རྡོ་རྗེ་ལས་རབ་སྐུ་མདོག་ལྗང་གུ་རྒྱ་གྲམ་བསྣམས་པ་བྲིའོ། །རྡོ་རྗེ་སྲུང་བ་སེར་པོ་གོ་ཆ་བསྣམས་པའོ། །རྡོ་རྗེ་གནོད་སྤྱིན་ནག་པོ་མཆེ་བ་བསྣམས་པའོ། །རྡོ་རྗེ་ཁུ་ཚུར་སེར་པོ་ཁུ་ཚུར་བསྣམས་པ་བྲིའོ། །ད་ནི་དཔེ་མེད་པའི་བྱང་ཆུབ་སེམས་དཔའ་བཅུ་དྲུག་བྲི་བ་སྨོས་ཏེ། དེ་ཡི་ཕྱི་རོལ་སེམས་དཔའ་རྣམས། །ཞེས་བྱ་སྟེ་དེ་ནི་སེམས་དཔའ་བཅུ་དྲུག་གི་ཕྱི་རོལ་གྱི་སྣམ་བུ་ལའོ། །སེམས་ནི་རྡོ་རྗེའོ། །དཔའ་བ་ནི་ཡེ་ཤེས་ཏེ་མཚན་མ་ལ་དཔའ་བས་ན་དཔེ་མེད་པ་རྣམས་སྨྲོས་སོ། །ཤར་ཕྱོགས་སུ་ཐུགས་མཆོག་དཔེ་མེད་པ་བཞི་སྟེ་ཉོན་མོངས་མུན་སེལ་དང༌། སྡུག་བསྔལ་འཇོམས་བྱེད་དང༌། འཁོར་བ་རྒྱུན་གཅོད་རྣམས་རྡོ་རྗེ་ལྕགས་ཀྱུ་ཤ་དག་པ་བསྣམས་པའོ། །སྲིད་པའི་མཚོ་སྒྲོལ་ཕྱག་ན་འཁོར་ལོ་བསྣམས་སོ། །ལྷོར་ཡོན་ཏན་དཔེ་མེད་
པ་བཞི་བྲི་སྟེ། རིན་ཆེན་མཛོད་སྐུ་མདོག་སྔོན་པོ་རིན་ཆེན་འབར་བ་བསྣམས་པའོ། །དགེ་བའི་བློ་གྲོས་པུ་སྟི་བསྣམས་པའོ། །བདེ་བའི་འབྱུང་གནས་རིན་པོ་ཆེའི་སྒྲོམ་བསྣམས་པའོ། །ལེགས་པའི་ཏོག་རིན་པོ་ཆེའི་མཆོད་སྡོང་འབར་བ་བསྣམས་པའོ། །ནུབ་ཏུ་གསུང་མཆོག་དཔེ་མེད་པ་བཞི་བྲི་སྟེ་དོན་མཐུན་ཡིད་འོང་སྐུ་མདོག་སྔོན་པོ་ཕྱག་ན་དགུ་པོ་རྒྱུད་མངས་བསྣམས་པའོ། །བདེ་བའི་འབྱུང་གནས་རིན་པོ་ཆེའི་ཕྲེང་བསྣམས་པའོ། །ཐེ་ཚོམ་ཡིད་མྱུར་པདྨའི་སྡོང་བུ་བསྣམས་པའོ། །ང་རོ་སྙན་བ་དུང་བསྣམས་པའོ། །བྱང་ཕྱོགས་སུ་ཕྲིན་ལས་དཔེ་མེད་པ་བཞི་སྟེ་ཚད་མེད་ཡོན་ཏན་སྐུ་མདོག་ལྗང་གུ་དཔག་བསམ་ལྗོན་ཤིང་བསྣམས་པ། དྲན་པའི་སྟོབས་མཆོག་ཟླ་ཚེས་བསྣམས་པའོ། །ཐམས་ཅད་ཀུན་སྒྲོལ་ལྕགས་ཀྱུ། བརྩོན་འགྲུས་མི་ལྡོག་ཨུཏྤལ་བསྣམས་པ་བྲིའོ། །ད་ནི་སྐལ་བཟང་བཅུ་དྲུག་དཔེ་མེད་པ་དང་སྤེལ་མར་བྲི་བ་འབྱུང་སྟེ། བྱམས་པ་ལ་སོགས་མཆོག་ཆེན་བྲི། །ཞེས་གསུངས་པས། བྱམས་པ་ས་བཅུའི་རྒྱལ་ཚབ་ཡིན་པས་སྣ་ལ་སྨོས་སོ། །སོགས་ཀྱི་ཁོངས་སུ་ནི་སེམས་དཔའ་བཅུ་དྲུག་བསྡུའོ། །ཤར་ཕྱོགས་སུ་དཔའ་བར་འགྲོ་བ་རལ་གྲི་བསྣམས་པའོ། །ཀུན་དུ་བཟང་པོ་རིན་པོ་ཆེའི་སྙེ་མ་བསྣམས་པའོ། །ཟླ་འོད་གཞོན་ནུ་ཟླ་བ་ཚེས་པ་བསྣམས་པའོ། །བཟང་སྐྱོང་རིན་པོ་ཆེའི་བུམ་པ་བསྣམས་པའོ། །ལྷོ་ཕྱོགས་སུ་དྲ་བ་ཅན་གྱི་འོད་རིན་པོ་ཆེའི་དྲ་བ་བསྣམས་པ་བྲིའོ། །ནམ་མཁའི་མཛོད་རིན་པོ་ཆེའི་མཛོད་བསྣམས་པའོ། །རྡོ་རྗེ་སྙིང་པོ་རྡོ་རྗེ་བསྣམས་པའོ། །འོང་དཔག་མེད་པ་རིན་པོ་ཆེ་འབར་བ་བསྣམས་པའོ། །ནུབ་ཕྱོགས་སུ་ཡེ་ཤེས་ཏོག་རྒྱལ་མཚན་བསྣམས་པའོ། །མྱ་ངན་ཀུན་འཇོམས་རལ་གྲི་བསྣམས་པའོ། །བློ་གྲོས་མི་ཟད་པ་པུ་སྟི་བསྣམས་པའོ། །སྤོབས་པ་བརྩེགས་པ་རྡོ་རྗེ་བསྣམས་པའོ། །བྱང་ཕྱོགས་སུ་བྱམས་པ་ཀླུ་ཤིང་གུནྡྷེ་བསྣམས་པའོ། །སྤོས་ཀྱི་གླང་པོ་དུང་ཕོར་བསྣམས་པའོ། །ངན་སོང་ཀུན་འདྲེན་ལྕགས་ཀྱུ་བསྣམས་པའོ། །དོན་
ཡོད་གྲུབ་བ་རྡོ་རྗེ་རྒྱ་གྲམ་བསྣམས་པ་བྲིའོ། །དེར་སྒོ་བྱས་ལ་ཁྲོ་བོ་བརྒྱང་བྲི་སྟེ། མཆོག་ཆེན་བཞི་ནི་བྲི་བར་བྱ། །ཞེས་སྨོས་པས་སྐོ་སྲུང་ཡང་དེ་བརྒྱང་བྲི་སྟེ། སྒོ་སྲུང་དེ་རྣམས་ནི་ཕྱི་ནང་གི་བགེགས་འདུལ་བས་མཆོག་གོ །གཞན་ཡང་ཁྱད་པར་དུ་འཕགས་བས་སྤྱན་ཆེ་ཞེས་པའོ། །བྲི་བ་ནི་ཤར་དུ་འཇིག་རྟེན་གསུམ་སྣང་སྐུ་མདོག་དཀར་པོ་ཕྱག་ན་ཉི་མ་བསྣམས་པའོ། །འཇིག་རྟེན་གསུམ་འདུལ་ཕྱག་ན་རྩེ་གསུམ་འབར་བ་བསྣམས་པའོ། །འཇིག་རྟེན་གསུམ་འཇིགས་སྐུ་མདོག་སྔོན་པོ་ཕྱག་ན་ཐོད་དབྱུག་བསྣམས་པའོ། །འཇིག་རྟེན་གསུམ་མཐར་བྱེད་ཕྱག་ན་བེ་ཅོན་བསྣམས་པའོ། །ནུབ་ཏུ་བདུད་རྩི་ཐབ་སྦྱོར་སྐུ་མདོག་དམར་སྐྱ་ཕྱག་ན་རྒྱ་གྲམ་བསྣམས་པའོ། །བེ་ཅོན་ནག་པོ་དགྲ་སྟ་བསྣམས་པའོ། །བྱང་དུ་མི་གཡོ་མགོན་པོ་སྐུ་མདོག་ལྗང་གུ་དབྱུག་པ་བསྣམས་པའོ། །རྟ་མགྲིན་པདྨ་བསྣམས་པ་སྒོ་གཡས་གཡོན་དུ་ཟུང་རེ་བྲིའོ། །དེའི་ཕྱི་རིམ་གྱི་སྣམ་བུ་ལ་ཉན་ཐོས་དང་རང་སངས་རྒྱས་སྤེལ་མར་བྲི་སྟེ། དེ་ལྟར་དགེ་སློང་ཀུན་དགའ་སོགས། །ཐུབ་རྣམས་དེ་ཡི་ཕྱི་རོལ་བྲི། །ཞེས་པས། ཀུན་དགའ་བོ་ནི་ཞབས་འབྲི་ནག་ཡིན་པས་སྣ་ལ་སྨོས་ཏེ་བསིལ་ཡབ་བསྣམས་སོ། །ཤཱ་རིའི་བུ་རིན་པོ་ཆེ། མཽད་གལ་གྱི་བུ་པདྨ། རབ་འབྱོར་ཟླ་ཚེས། མ་འགགས་པ་མེ་ལོང༌། འཆར་ཀ་འཁོར་ལོ། །ཀཏྱཱ་ཡན་རིན་པོ་ཆེའི་སྒྲོམ། རྟ་ཐུལ་ཕྲེང་བ། ཉེ་བ་འཁོར་བར་བུ། བ་གླང་བདག་དྲང་སྲོང༌། སྒྲ་གཅན་འཛིན་པདྨའི་སྡོང་བུ། དགའ་བོ་གདུ་བུ། མིང་ཆེན། ནོར་སྤྱིན་འཛིན་རིན་པོ་ཆེའི་རྐྱལ་བུ། གང་པོ། འོད་སྲུངས་རིན་ཆེན་འབར་བ་བསྣམས་པའོ། །ཐུབ་པ་རྣམས་ནི་རང་སངས་རྒྱས་ཏེ། རང་གི་བརྟུལ་ཞུགས་དང༌། དམ་ཚིག་དང་སྡོམ་པ་སློབ་དཔོན་མེད་ཀྱང་རང་གིས་ཐུབ་པས་ན་ཐུབ་པ་རྣམས་སོ། །རང་སངས་རྒྱས་འཇིགས་བྱེད་རྡོ་རྗེ། སྣང་བརྩེགས་རིན་པོ་ཆེའི་མཛོད། དཔའ་བོས་འདུལ་རྡོ་རྗེ། ཉོན་མོངས་གདུང་སེལ་བསིལ་ཡབ། ཤེས་རབ་མགྱོགས་ཆེན་ཟླ་ཚེས། རྫུ་འཕྲུལ་ཆེར་སྟོན་མེ་འབར་བ། ཉོན་མོངས་གདུང་
སེལ་སྒྲ་ཆེན་དུང༌། བསེ་རུ་ལྟ་བུ་བསམ་གཏན་ཕྱག་རྒྱ་འཆའ། རི་བོའི་རྒྱལ་པོ་རིན་པོ་ཆེའི་སྙེམ། སེང་གེ་ལྟ་བུའི་རྡོ་རྗེ། ཡིད་མྱུར་བསིལ་ཡབ་བསྣམས་པ་བྲིའོ། །དེ་ལྟར་ལྷ་བརྒྱ་རྩ་བདུན་འཇིག་རྟེན་ལས་འདས་པ་ལ་ཡོད་དོ། །སྒོ་བ་ནི་རྒྱལ་པོ་ཆེན་པོ་བཞི་སྟེ། འོག་ནས་འབྱུང་བ་བཞིན་བྲི། དེའི་ཕྱི་རོལ་གྱི་སྣམ་བུ་ལ། འཇིག་རྟེན་པ་རྣམས་བྲི་སྟེ། ཚངས་པ་ལ་སོགས་ཕྱི་རོལ་བྲི། །ཞེས་པ་ནི། ཕྱི་རོལ་གྱི་སྣམ་བུ་ལ་བྲི་སྟེ། ཚངས་པ་གུནྡྷེ་བསྣམས་པ། བཙུན་མོ་ཚངས་མ་པི་ཝང་ཐོགས་པའོ། །མདག་གཞུག་ཡིད་དུ་འོང་བའི་རལ་གྲི། ཕོ་ཉ་མདག་པ་སྟེ་པདྨ་བསྣམས་པའོ། །དབང་ཕྱུག་ཏྲི་ཤཱུ་ལ། དཀའ་ཐུབ་བཟློག་མ་པདྨ། ཕོ་ཉ་རྣམ་པར་སྣང་བ་མདའ་གཞུ། མདག་གཞུག་དེད་དཔོན་ནག་པོ་མདུང་ཐུང་བསྣམས་པའོ། །བརྒྱ་བྱིན་རྡོ་རྗེ་གདེངས་པ་བསྣམས་པ། བདེ་སོགས་མ་རྒྱུད་མངས། མདག་གཞུག་ཡིད་དུ་འོང་བ་རལ་གྲི། ཕོ་ཉ་མྱུར་བའི་ཤུགས་ཅན་རྩེ་གསུམ་བསྣམས་པའོ། །ཁྱབ་འཇུག་འཁོར་ལོ་བསྣམས། བཙུན་མོ་དཔལ་ལྡན་མོ་གསལ་ཤིང༌། མངག་གཞུག་རྡོ་རྗེ་བདེ་བ་མཆེ་བ་བསྣམས། ཕོ་ཉ་རྡོ་རྗེ་སྡེ་དཔོན་འཁོར་ལོ་བསྣམས་པ་བྲི་སྟེ། དེ་ལྟར་བཅུ་དྲུག་སྟེ་བརྒྱ་ཉི་ཤུ་རྩ་གསུམ་མོ། །དེའི་ཕྱི་རིམ་གྱི་སྣམ་བུ་ལ་བྲི་བའི་ལྷ་སྟོན་ཏེ། གཟའ་དང་སྐར་མའི་ལྷ་རྣམས་དང༌། །ཞེས་པ་ནི། གཟའ་ནི་བརྒྱང་དེ། པ་བ་སངས་མེ་ཏོག །ཕུར་བུ་པུ་སྟི། ལྷག་པ་མཆོག་སྤྱིན། ཟླ་བ་ཀུ་མུ་ཏ། སྒྲ་གཅན་འཛིན་པདྨའི་སྡོང་བུ། མིག་དམར་བདུད་རྩིའི་བུམ་པ། ཉི་མ་པདྨ། སྤེན་པ་དབྱུག་ཏོ། །རྒྱུ་སྐར་ནི། སྨིན་དྲུག་དང༌། སྣར་མ་དང༌། མགོ་དང༌། ལག་དང༌། ནབ་སོ་དང༌། རྒྱལ་དང༌། སྐག་དང༌། དེ་རྣམས་ཤར་ཕྱོགས་སུ་བྲིའོ། །ཕྱག་མཚན་ནི་རིན་པོ་ཆེའི་སྙན་ཆ་དང༌། གདུ་བུ་ཤེ་དག་བསྣམས་པའོ། །ལྷོ་ཕྱོགས་སུ་མཆུ་དང༌། གྲེ་དང༌། དབོ་དང༌། མེ་བཞི་དང༌། ནག་པ་དང༌། ས་རི་དང༌། ས་ག་རྣམས་ནི་རིན་པོ་ཆེའི་མེ་ཏོག་བསྣམས་པའོ། །ནུབ་ཕྱོགས་སུ་ལྷ་མཚམས་དང༌། སྣྲོན་དང༌། སྣུབས་དང༌། ཆུ་སྟོད་དང༌། ཆུ་སྨད་དང༌། བྱི་བཞིན་
དང། གྲོ་བཞིན་རྣམས་ནི་པདྨའི་སྡོང་བུ་ཤེ་ངག་བསྣམས་པའོ། །བྱང་ཕྱོགས་སུ་མོན་དྲེ་དང༌། མོན་གྲུ་དང༌། ཁྲུམས་སྟོད་དང༌། ཁྲུམས་སྨད་དང༌། ནམ་གྲུ་དང༌། ཐ་སྐར་དང༌། བྲ་ཉེ་རྣམས་ནི་ཨུཏྤལ་ཤེ་དག་བསྣམས་པའོ། །ད་ནི་རྒྱལ་པོ་ཆེན་པོ་བཞི་རྣམས་སྟོན་ཏེ། རྒྱལ་པོ་ཆེན་པོ་བཞི་རྣམས་ནི། །ཞེས་པ་ནི། ཤར་དུ་ཡུལ་འཁོར་སྲུང་པི་ཝང༌། ལྷོར་འཕགས་སྐྱེས་པོ་རལ་གྲི། ནུབ་ཏུ་མིག་མི་བཟང་སྤྲུལ་ཞགས། བྱང་དུ་རྣམ་ཐོས་སྲས་བ་དན་བསྣམས་པ་སྟེ། དེ་ལྟར་ན་འཇིག་རྟེན་པའི་ལྷ་བཞི་བཅུ་སྟེ། བརྒྱ་དྲུག་ཅུ་རྩ་གསུམ་མོ། །ད་ནི་དེའི་ཕྱི་རོལ་གྱི་སྣམ་བུ་སྟོན་ཏེ། ཕྱོགས་སྐྱོང་འཇིག་རྟེན་སྐྱོང་བ་རྣམས། །ཞེས་པ་ནི་ཕྱོགས་བཞི་མཚམས་བརྒྱང་ན། འཇིག་རྟེན་སྐྱོང་བས་ཕྱོགས་སྐྱོང་ངོ༌། །བརྒྱ་བྱིན་རྡོ་རྗེ། གཤིན་རྗེ་ཐོད་དབྱུག །ཆུ་ལྷ་སྤྲུལ་ཞགས། གནོད་སྤྱིན་པེ་ཅོན། མེ་ལྷ་བགྲང་ཕྲེང༌། བདེན་བྲལ་རལ་གྲི། རླུང་ལྷ་བ་དན། དབང་ལྡན་རྩེ་གསུམ། ས་བདག་མཆེ་ཞགས། སའི་ལྷ་མོ་བུམ་པ། ཉི་མ་པདྨ། ཟླ་བ་ཀུ་མུ་ཏ་སྟེ། དེ་ལྟར་ན་བརྒྱ་བདུན་ཅུ་རྩ་ལྔའོ། །དེ་ནི་གཟའ་དང་རྒྱུ་སྐར་གྱི་སྣམ་བུ་དང་བསྲེའོ། །ད་ནི་ཕྱི་རོལ་གྱི་སྣམ་བུའི་ངན་སོང་གསུམ་གྱི་དོན་སྟོན་ཏེ། དེ་ཡི་ཕྱི་རོལ་དམྱལ་བ་ཀུན། །ཞེས་པ་ནི། དམྱལ་བ་ཡང་མདོར་བསྡུ་ན་ཚ་གྲང་གཉིས། ཉི་ཚེ་བ་དང་ཁ་འཁོར་བ་དང་གསུམ་མོ། །ཚ་བའི་བརྒྱང་ནི་ཡང་སོས་དང༌། ཐིག་ནག་དང༌། བསྡུས་འཇོམས་དང༌། དུ་འབོད་དང༌། དུ་འབོད་ཆེན་པོ་དང༌། ཚ་བ་དང༌། རབ་ཏུ་ཚ་བ་དང༌། མནར་མེད་པ་དང་བརྒྱང་དོ། །གྲང་བའི་བརྒྱང་ནི། ཆུ་བུར་དང༌། ཆུ་བུར་རྡོལ་བ་དང༌། སོ་ཐམས་ཐམས་པ་དང༌། ཀྱི་ཧུད་ཟེར་བ་དང༌། ཨ་ཆུ་ཟེར་བ་དང༌། ཨུཏྤལ་ལྟར་གས་པ་དང༌། པདྨ་ལྟར་གས་པ་དང༌། པདྨ་ལྟར་གས་པ་ཆེན་པོ་སྟེ་བརྒྱང་དོ། །ཉི་ཚེ་བ་དང༌། ཁ་འཁོར་གཉིས་ཏེ་བཅོ་བརྒྱང་དོ། །མིང་ངམ་བརྡའམ་ཐིག་ལེར་བྲིས་ཏེ་གཞག །འདོད་ཆགས་ལ་སོགས་བྱོལ་སོང་འདྲ། །ཞེས་པ་ནི་འདོད་ཆགས་ཕུག་རོན་དང༌། གཏི་མུག་ཕག་དང༌། ཞེ་སྡང་སྤྲུལ་དང༌། ང་རྒྱལ་རྩངས་
པ་ལ་སོགས་པ་བྲི་སྟེ། དེ་ལྟར་ཉི་ཤུ་རྩ་གཉིས་ཏེ། སྤྱིར་བརྒྱ་དགུ་བཅུ་རྩ་བདུན་ཡོད་དོ། །སྒོ་སྒོར་གསུངས་པ་དེ་བཞིན་དུ། །ཞེས་པ་ནི་གོང་དུ་སྒོ་བཞི་རིམ་དུ་གསུངས་བ་དེ་རྣམས་ལ་བྱ་བའི་ཐ་ཚིག་གོ །མཆོད་པའི་བྱེ་བྲག་ནི་བདེ་སྟེ་མ་སྨོས་སོ། །ད་ནི་སྔགས་མཁན་དཀྱིལ་འཁོར་དུ་འཇུག་པའི་དོན་སྟོན་ཏེ། དེ་ནས་སྔགས་མཁན་ཉིད་ཀྱིས་ནི། །སྤྱན་དྲངས་བདག་ཉིད་འཇུག་པར་བྱ། །ཞེས་པ་ནི། དེ་ནས་ནི་གོང་གི་རྟིང་ཐོགས་སོ། །སྔགས་མཁན་ནི་སློབ་དཔོན་ཏེ། སྔགས་དང༌། ཕྱག་རྒྱ་དང༌། ཆོ་ག་དང༌། ཐབས་ཀྱི་བྱེ་བྲག་ལ་མཁས་པའོ། །སྤྱན་དྲངས་པ་རྣམས་རང་བཞིན་གྱིས་འཕགས་པ་རྣམས་སྤྱན་དྲངས་ནས་གཟུགས་བརྙན་ལ་ཕབ་སྟེ། བདག་ཉིད་ཀྱང་དཀྱིལ་འཁོར་དུ་འཇུག་པར་བྱའོ། །བདག་ཉིད་ཀྱིས་ནི་དབང་བསྐུར་ལ། །ཞེས་པ་ནི། བདག་ཉིད་ནི་སློབ་དཔོན་ནོ། །དབང་བསྐུར་ནི་སློབ་མ་དེའི་འོག་ཏུ་དབང་བསྐུར་བའི་ཐ་ཚིག་གོ །ད་ནི་སློབ་དཔོན་དེའི་ཡོན་ཏན་སྟོན་ཏེ། སྡོམ་གནས་དམ་ཚིག་ལྡན་པ་དང༌། །ཞེས་པ་ནི། སྡོམ་པ་ནི་བྱང་ཆུབ་སེམས་དཔའི་སྡོམ་པའོ། །དམ་ཚིག་ནི་ཡོ་གའི་དམ་ཚིག་ལྔའོ། །བླ་མ་མོས་ཤིང་མི་འཇིགས་པ། །ཞེས་པ་ནི། བླ་མ་ནི་རྡོ་རྗེ་སློབ་དཔོན་ཏེ། མོས་པ་ནི་སློབ་མའི་སེམས་སོ། །མི་འཇིགས་པ་ནི་སློབ་མ་མི་ཤེས་པས་མི་འཇིགས་པའོ། །རིགས་བསྐྱེད་སྐྱོན་དང་བྲལ་བ་དང༌། །ཞེས་པ་ནི། ཡོ་གའི་རིགས་བཞི་དང་ལྷ་ལྔའོ། །བསྐྱེད་པ་ནི་སེམས་བསྐྱེད་པའོ། །སྐྱོན་ནི་སྡིག་པའི་སེམས་སོ། །བྲལ་བ་ནི་སྤངས་པའོ། །སེར་སྣ་མ་ལུས་སྤངས་འགྱུར་ཞིང༌། །ཞེས་པ་ནི། སེར་སྣ་ནི་སྣ་ལ་ཡེང་ཡེང༌། ཟིལ་ཕྲོམ་ཕྲོམ་མོ། །སྤངས་འགྱུར་ནི་ནོར་ལམ་ཆགས་པའོ། །ཡོན་ཏན་མང་པོ་ལྡན་འགྱུར་ཞིང༌། །ཞེས་པ་ནི། ཡོན་ཏན་དད་པ་དང༌། དྲང་བ་དང༌། གཡོ་སྒྱུ་ཆུང་བ་དང༌། ཡི་རང་ཞིང་གཏོང་ཕོད་པ་ལ་སོགས་པའོ། །གཏོང་དང་ཚུལ་ཁྲིམས་མང་དུ་ཐོས་པ་དང༌། །ཞེས་པ་ནི། གཏོང་བ་ནི་རྣམ་པ་གསུམ་སྟེ། ནོར་ཟས་གཏོང་བ་དང༌། ཡོངས་སུ་གཏོང་བ་ནི་རྒྱལ་སྲིད་གཏོང་
བ་དང༌། གཏོང་བ་ཆེན་པོ་ནི་ལུས་ལ་སོགས་པ་གཏོད་བའོ། །ཚུལ་ནི་ཐེག་པ་ཆེན་པོའི་ཆོས་ཀྱི་ཚུལ་ལོ། །ཁྲིམས་ནི་དེའི་དོན་ཉམས་སུ་ལེན་པའོ། །མང་དུ་ཐོས་པ་ནི་སྡེ་སྣོད་གསུམ་གྱི་དོན་ལ་ཡིད་ཆེས་པའི་དད་པས་གཞན་ལ་ཉན་ཅིང་ཐོས་པའོ། །བྱམས་པ་དང་ནི་སྙིང་རྗེའི་སེམས། །ཞེས་པ་ནི། བྱམས་པ་ནི་ཕྱོགས་མེད་པའོ། །སྙིང་རྗེ་ནི་མི་བཟོད་ཅིང་གཞན་ལ་ཕན་འདོགས་པའོ། །དགའ་དང་བཏང་སྙོམས་གནས་པ་དང༌། །ཞེས་པ་ནི། དགའ་བ་ནི་ཆོས་བཞིན་ཅན་ནོ། །བཏང་སྙོམས་ནི་གང་ལ་ཡང་མི་གནས་ཤིང་མ་ཆགས་པར་གནས་པའོ། །སྟོང་པ་མཚན་མ་མེད་པའི་སེམས། །ཞེས་པ་ནི། སྟོང་པ་ནི་རྣམ་པར་ཐར་པའི་མཚན་མ་དང་བྲལ་བའི་ངང༌། ཐུགས་མཚན་མ་མེད་པའི་སེམས་སུ་གནས་པའོ། །སྨོན་པ་མེད་པའི་ཡིད་ལྡན་པ། །ཞེས་པ་ནི། སྨོན་པ་མེད་པ་ནི་གསུམ། སྨོན་པ་མེད་པའི་རྣམ་པར་ཐར་པ་ལས། ཡིད་དང་ལྡན་པ་ནི་ཡིད་ཀྱི་རྣམ་པར་ཤེས་པས། རྣམ་པར་ཐར་པ་གསུམ་དང་ལྡན་པའི་དོན་བསྒོམ་པའོ། །ད་ནི་སློབ་མ་གཟུད་ཅིང་མེ་ཏོག་དོར་ནས། དམ་ཚིག་དབོག་པའི་ཚིག་སྟོན་ཏེ། དེ་ནས་སློབ་མ་སྔགས་འདི་ཡིས། །ཞེས་པ་ནི་སློབ་མ་འོག་ནས་འབྱུང་བའི་སྔགས་འདིས་སློབ་མ་གཞུག་པར་བྱའོ། །ཕྱི་མ་བདེ་སྟེ་བརྡ་ཕྲད་སླའོ། །དེ་ནས་ཕྱག་ན་རྡོ་རྗེས་སོ། །ཞེས་པ་ནས། ཐམས་ཅད་སྤྱིན་ནོ་ཞེས་པའི་བར་གྱིས་ནི། ལྷ་བ་སྟན་ཅིང་དབང་བསྐུར་བའི་བྱེ་བྲག་སྟེ་བརྡ་ཕྲད་སླའོ། །ད་ནི་སྒྲུབ་པའི་ཁྱད་པར་སྟོན་ཏེ། དེ་ཅིའི་ཕྱིར་ཞེ་ན། བདེ་བས་བདེ་བ་བསྐྱེད་ནས་ནི། །ཞེས་གསུངས་ཏེ། བདེ་བས་ནི་སྒྲུབ་པ་བོ་ཕུན་སུམ་ཚོགས་པ་ལྔ་དང་ལྡན་པའོ། །བདེ་བ་ནི་བརྩོན་འགྲུས་ཀྱི་རྟགས་བདེ་བ་འདོད་པའོ། །བསྐྱེད་ནས་ནི་ཆོ་འཕྲུལ་རྣམ་པ་བཞི་དང༌། མངོན་པར་བྱང་ཆུབ་པ་ལྔའི་སྒོ་ནས་སེམས་བསྐྱེད་པའོ། །དཀྱིལ་འཁོར་བཞི་ཡི་དབུས་སུ་ནི། །ཞེས་པ་ནི། དཀྱིལ་ནི་ཆོས་ཀྱི་དབྱིངས་ལ། འཁོར་ནི་ཡེ་ཤེས་བཞིའོ། །དབུས་ནི་དབུས་ཀྱི་ཕོ་བྲང་སྟེ། ཀུན་དུ་བཟང་པོ་བདེ་བ་ཆེ། །ཞེས་པ་ནི། ཀུན་དུ་བཟང་པོའམ་བདེ་བ་ཆེན་པོ་གང་
ཡང་རུང་བའི་རིགས་བཞིའི་དཀྱིལ་འཁོར་གྱི་དབུས་སུ་སྔགས་མཁན་བདག་ཉིད་ཀྱིས་བསྒོམ་པར་བྱའོ། །དེ་ཅིའི་ཕྱིར་ཞེན། སྙིང་གར་ཧཱུཾ་ཞེས་པ་བསམས་ནས། །རྡོ་རྗེ་སེམས་དཔའ་མཉམ་པར་འགྱུར། །ཞེས་པ་ནི། བདག་གི་སྙིང་གར་མ་ལས་ཉི་མའི་དཀྱིལ་འཁོར་ཅིག་བསམས་ལ། དེའི་དབུས་སུ་ཡེ་ཤེས་ཀྱི་ཧཱུཾ་བསམས་ནས། ཆོ་ག་རྣམ་པ་གསུམ་གྱི་ཚུལ་དུ་སྤྲོ་བསྡུ་བྱས་ལ། རྡོ་རྗེ་འཛིན་པ་དང་མཉམ་པའི་དངོས་གྲུབ་ཐོབ་བོ། །དཔལ་ལྡན་ལས་རྣམས་ཀུན་བྱེད་ཅིང༌། ཀུན་དུ་བཟང་པོ་བདག་ཉིད་འགྱུར། །ཞེས་པ་ནི། དཔལ་ལྡན་ནི་ལྟ་བ་དང་སྤྱོད་པའི་དཔལ་དང་ལྡན་པ་དེས་བསྒྲུབ་པའི་ལས་ཀུན་བྱས་ནས་ཀུན་དུ་བཟང་པོར་འགྱུར་ཞེའོ། །ཧཱུཾ་ལས་སངས་རྒྱས་སྐུར་བསྒྱུར་ན། ཕྱག་ན་རྡོ་རྗེ་བདག་ཉིད་འགྱུར། །ཞེས་པ་ནི། བདག་ཉིད་ལས་ཀྱི་ལྷ་ཕྱག་ན་རྡོ་རྗེ་བསྒྲུབ་པར་བྱ་བའི་ཕྱིར། ཡེ་ཤེས་ཀྱི་རང་བཞིན་ཡི་གེ་ཧཱུཾ་ལས་ཡི་གེ་ཧཱུཾ་སྣ་ཚོགས་སྤྲོས་ཏེ། དེ་ལ་སངས་རྒྱས་ཀྱི་གཟུགས་ཀྱིས་གང་བར་བསྒོམས་ན་ཕྱག་ན་རྡོ་རྗེ་དང་འདྲ་བར་འགྱུར་རོ། །སྙིང་གར་འཁོར་ལོ་རབ་བསྐོར་ནས། །ཕྱག་ན་རྡོ་རྗེ་འདྲ་བར་འགྱུར། །ཞེས་པ་ནི། བདག་གི་སྙིང་གར་ཙ་སེར་པོ་ལས་གསེར་གྱི་འཁོར་ལོ་རྩིབས་བརྒྱང་པ་ཅིག་བསྐྱེད་དོ། །རྡོ་རྗེ་ར་བས་མཐའ་མ་རབ་ཏུ་བསྐོར་ནས། འཁོར་ལོའི་ལྟེ་བར་ཡེ་ཤེས་སེམས་དཔའ་མཚོན་གང་བ་ཅིག་བསྒོམས་ཏེ། ལས་ཀྱི་ལྷའི་བསྙེན་པ་གྲངས་མང་དུ་བྱས་ན། ཕྱག་ན་རྡོ་རྗེ་དང་འདྲ་བའི་དངོས་གྲུབ་འཐོབ་བོ། །རྡོ་རྗེ་ཁྲོ་བོ་རབ་བསྒོམས་ཏེ། །སྙིང་གའི་དབུས་སུ་ཕཊ་ཅེས་བྱ། །ཧཱུཾ་ཞེས་བྱ་བ་བསྐོར་བསམས་ནས། །ཞེས་པ་ནི། བདག་ཁྲོ་བོ་རྡོ་རྗེ་སྟོབས་པོ་ཆེའི་ཏིང་ངེ་འཛིན་དུ་རབ་ཏུ་བསྒོམས་ཏེ། བདག་གི་སྙིང་གའི་དབུས་སུ་མ་ལས་ཉི་མའི་དཀྱིལ་འཁོར་ཅིག་བསྐྱེད་དེ། དེའི་དབུས་སུ་ཕཊ་ཅིག་བསྒོམས་ནས། ཕཊ་ཀྱི་མཐའ་མ་ཧཱུཾ་གིས་བསྐོར་བར་བསམས་ཏ། སྟོབས་པོ་ཆེའི་བསྙེན་པ་ཅི་མང་དུ་བྱས་ན་འགྲུབ་པར་འགྱུར་རོ། །རྡོ་རྗེ་བརྟན་པར་བདག་བསྒྱུར་ལ། །སྙིང་གར་ཨོཾ་ཞེས་བྱ་བ་ཡིས། །
བསྐོར་བའི་ཧཱུཾ་དང་ཏྲཾ་ལྡན་པས། །ཞེས་པ་ནི་ནམ་མཁའི་སྙིང་པོ་བསྒྲུབ་པའི་དོན་ཆེད་དུ། རྡོ་རྗེ་ནི་རིག་པ། བརྟན་པ་ནི་ཏིང་ངེ་འཛིན་དུ་བདག་ཉིད་བསྒྱུར་ནས། སྙིང་གར་ཟླ་བའི་དཀྱིལ་འཁོར་དབུས་སུ་ཨོཾ་བསྒོམས་ཏེ། ཧཱུཾ་དང་ཏྲཾ་གིས་ཨོཾ་གྱི་མཐའ་མ་བསྐོར་ཏེ། བསྒོམས་ནས་བསྙེན་པ་བྱས་ན་ནམ་མཁའི་སྙིང་པོ་དང་འདྲ་བར་འགྱུར་རོ། །ད་ནི་རྡོ་རྗེ་ཆོས་རབ་སྒོམ་པ་སྟེ། རྡོ་རྗེ་བསྒོམས་ལ་སྙིང་ག་ཡི། །དབུས་སུ་ཏྲཾ་བསམ་ཞེས་བྱ་བ། །ཨོཾ་ཞེས་བྱ་བས་བསྐོར་བསམས་ནས། །ཞེས་པ་ནི། བདག་ཉིད་རྡོ་རྗེ་ཆོས་སུ་བསྒོམས་ལ། སྙིང་གར་ཟླ་བའི་དཀྱིལ་འཁོར་དུ་ཡི་གེ་ཏྲཾ་བསམས་ཏེ། ཨོཾ་གྱིས་མཐའ་བསྐོར་ནས། བསྒྲུབས་ན་འགྲུབ་པར་འགྱུར་རོ། །ད་ནི་རྡོ་རྗེ་ལས་བསྒྲུབ་སྟེ། འཁོར་ལོ་རྒྱ་གྲམ་ཧཱུཾ་ལྡན་པ། །ཨཿ་ཞེས་བྱ་བ་བསྐྱེད་ནས་ཀྱང༌། །ཨོཾ་ཞེས་བྱ་བས་བསྐོར་བསམས་ན། །ཞེས་པ་ནི་བདག་ཉིད་རྡོ་རྗེ་ལས་སུ་བསྒོམས་ཏེ། བདག་གི་སྙིང་གར་འཁོར་ལོ་ཅིག་བསམས་ལ། འཁོར་ལོའི་ལྟེ་བར་རྡོ་རྗེ་རྒྱ་གྲམ་ཅིག་བསམས་ཏེ། རྒྱ་གྲམ་གྱི་བསྣོལ་མཚམས་སུ་ཧཱུཾ་བསྒོམས་ནས། ཨཿ་ཞེས་བྱ་བས་ལྷའི་སྐུར་བསྐྱེད་དེ། ཨོཾ་གྱིས་རྒྱ་གྲམ་གྱི་མཐའ་བསྐོར་ནས་བསྒྲུབས་ན་འགྲུབ་པར་གསུངས་སོ། །ད་ནི་ལས་རྣམ་པ་བཞིའི་བྱེ་བྲག་བཤད་དེ། དེ་ནས་ལས་རྣམས་བཤད་བྱ་སྟེ། །ཞི་བ་དང་ནི་རྒྱས་པའི་ལས། །དེ་ལྟར་དབང་དང་དྲག་སྤྱོད་རྣམས། །ཞེས་པ་ནི། དེ་ནས་ནི་གོང་གི་རྟིང་ཐོགས་སོ། །ལས་ནི་བྱེད་ཅིང་རྩོལ་བའོ། །རྣམ་པ་ནི་བྱེ་བྲག་གི་ཕྲིན་ལས་བཞིའོ། །ཐུགས་ཆོས་ཉིད་ལས་མ་གཡོས་པ་ནི་ཞི་བའོ། །བདེ་བ་ཆེན་པོས་འདོད་པ་སྐོང་བས་ན་རྒྱས་པའོ། །དེས་ཐམས་ཅད་དབང་དུ་སྡུད་པས་ན་དབང་ངོ༌། །དེས་མཚན་མའི་དངོས་པོ་འཇོམས་པས་ནི་དྲག་སྤྱོད་དོ། །བཟླས་དང་སྤྱིན་སྲེག་ཆོ་ག་ཡིས། །ལས་རྣམས་ཐམས་ཅད་བྱ་བ་ཡིན། །ཞེས་པ་ནི། བཟླས་པ་ནི་ཕྲིན་ལས་རྣམ་པ་བཞི་གང་བྱེད་པའི་སྔགས་དང་ཕྱག་རྒྱ་དང༌། ཏིང་ངེ་འཛིན་དང་ཡོ་བྱད་རྣམས་གྲུབ་ན་སྤོགས་པའི་ཆོ་ག་བྱེད་པའོ། །སྤྱིན་པ་ནི་མ་
ཆགས་པར་གཏོང་བའོ། །སྲེག་པ་ནི་དངོས་པོ་དང་མཚན་མ་རྣམས་སྲེག་པའོ། །ཆོ་ག་ནི་ལས་ཀྱི་བྱེ་བྲག་ལ་མཁས་པར་བྱ་བ་ཡིན་ཞེས་སོ། །རྡོ་རྗེ་སེམས་དཔར་བདག་བསྒྱུར་ལ། ཞི་བའི་ལས་ནི་བརྩམ་བྱ་ཞིང༌། །ཞེས་པ་ནི། བདག་རྡོ་རྗེ་སེམས་དཔའི་སྐུར་བསྒོམས་ལ། གོས་དང་ཁ་དོག་དཀར་པོར་བྱས་ཏེ། ཁ་ཤར་ཕྱོགས་སུ་བལྟས་ནས་ལས་བྱས་ན། ཉེས་པ་ཐམས་ཅད་སེལ་བར་འགྱུར་བར་ཡང་གསུངས་སོ། །ཡང་ན་དེ་བཞིན་གཤེགས་པའི་རིགས་ཀུན་དུ་བཟང་པོའམ། བདེ་བ་ཆེན་པོར་བསྒོམས་ནས་གོང་མ་བཞིན་དུ་ལས་བྱས་ན། སྡིག་ཅན་གྱི་སེམས་ཞི་བར་འགྱུར་རོ། །ད་ནི་རྒྱས་ལས་སྟོན་ཏེ། གསེར་འོད་མཛེས་ཤིང་འབར་བ་ཡིས། །རིན་ཆེན་འཛིན་དུ་བསམས་ནས་ནི། །ཞེས་པ་ནི། བདག་རིན་ཆེན་འབྱུང་ལྡན་མདོག་གསེར་འོད་ལྟར་མཛེས་ཤིང་འོད་འབར་བར་བསྒོམས་ནས། ཉི་མའི་གུང་ལ་རྒྱས་པའི་ལས་བྱས་ན། འོད་ཟེར་པོས་གང་ལ་བྱ་བའི་ལུས་ལ་བཀང་ནས་བྱིན་གྱིས་བརླབས་ན་འབྱོར་པ་དང་ལྡན་པར་འགྱུར་རོ། །ད་ནི་དབང་གི་ལས་སྟོན་ཏེ། འབྱོར་དང་ལྡན་པས་ཁུང་བུར་ནི། །པདྨ་འདྲ་བར་བྱས་ནས་ཀྱང༌། །ཞེས་པ་ནི་དབང་ནི་འབྱོར་པ་ཕུན་སུམ་ཚོགས་པ་དབང་དུ་བྱེད་པའི་ཐབས་སྟོན་ཏེ། ཁུང་བུའི་དབུས་སུ་པདྨ་མཁལ་ཡོན་འདྲ་བ་བརྐོས་ལ། རྡོ་རྗེ་ཆོས་རབ་ཏུ་བདག་བསྒྱུར་ནས་བསྒོམས་ན་འགྲུབ་པར་འགྱུར་ཞེས་གསུངས་སོ། །སྐབས་འདིར་དྲག་བོའི་ལས་འབྱུང་ཞེས་ཀྱང་གསུངས་ན། དཀྱུས་ན་མི་གསལ། ད་ནི་ཕྲིན་ལས་ཀྱི་ཐབས་སྟོན་ཏེ། འདྲེན་པ་ཀུན་དུ་བཟང་པོ་ཡིས། །ཞི་བའི་ལས་ནི་རབ་ཏུ་བྱ། །ཞེས་གསུངས་པས། ཉོན་མོངས་པའི་འཁོར་བ་ལས་སེམས་ཅན་འདྲེན་པས་ཀུན་དུ་བཟང་པོ་སྟེ། དེའི་ཏིང་ངེ་འཛིན་དུ་བདག་བསྒོམས་ལ། ཞི་བའི་ལས་མ་གྲུབ་ན་སྤོགས་པའི་ཆོ་ག་བྱའོ། །རྡོ་རྗེ་རིན་ཆེན་རྒྱས་པ་སྟེ། །དབང་བསྐུར་བ་ཡང་དེ་བཞིན་ནོ། །ཞེས་པ་ནི་རྡོ་རྗེ་ནི་ཞི་བའི་རང་བཞིན་ཏེ། དེ་ལས་རིན་ཆེན་རྒྱས་པར་བསྒྱུར་ལ། དེ་ལ། ཐམས་ཅད་དབང་དུ་སྒྱུར་བའི་ཕྱིར། །དབང་བསྐུར་བ་ཡང་དེ་བཞིན་
ནོ། །ཞེས་གསུངས་ཏེ། ཏོག་གིས་རྣམ་རྒྱལ་དེ་བཞིན་ཏེ། །ལོངས་སྤྱོད་དབང་ཕྱུག་དཔལ་མཉམ་མེད། །ཅེས་པ་ནི་ཕྲིན་ལས་རྣམ་པ་བཞི་ནི་ཉོན་མོངས་པའི་སྡིག་པ་རྩད་ནས་འབྱིན་པས་ན། ཏོག་ནི་གཟུང་འཛིན་རྣམ་པ་གཉིས་ལས་རྒྱལ་བ་དེ་བཞིན་དུ། བདག་གིས་ཕྲིན་ལས་རྣམ་པ་བཞིའི་ལས་ལས་བྱས་ལ། འཇིག་རྟེན་པའི་ལོངས་སྤྱོད་དང༌། ཁམས་གསུམ་གྱི་དབང་ཕྱུག་དང༌། དཔལ་མཉམ་པ་མེད་པ་འཐོབ་པར་འགྱུར་རོ། །རྡོ་རྗེ་ཉི་མའི་གཟི་བརྗིད་དང༌། མདོག་སྡུག་ཤིན་ཏུ་འབར་བར་བྱ། །ཞེས་པ་ནི། སྒྲུབ་པ་པོས་རྡོ་རྗེ་ཉི་མའམ། རྡོ་རྗེ་བཞད་པ་མདོག་སྡུག་གཉིས་གསལ་བར་བསྒོམ་པ་ནི་འབར་བར་བྱ་ཞེས་པའི་ཐ་ཚིག་གོ །བཞད་ཅིང་རྨད་དུ་མཛད་པ་ཡིས། །དགའ་མགུ་རངས་པའི་བསམ་པར་འགྱུར། །ཞེས་པ་ནི། རྡོ་རྗེ་བཞད་པར་བསྒོམས་ནས་དེའི་ཕྲིན་ལས་བྱས་ན། ཡོན་ཏན་རྨད་དུ་མཛད་པ་ཡིན་ན། ཐམས་ཅད་ཡིད་དགའ་བ་དང༌། སེམས་མགུ་བ་དང༌། བློ་རངས་པའི་བསམ་པར་འགྱུར་རོ། །པདྨ་བཞད་པས་ཚོགས་ཀུན་གྱི། །རྟོགས་མཛད་སངས་རྒྱས་ཐམས་ཅད་ཀྱང༌། །ཞེས་པ་ནི། བདག་ཉིད་རྡོ་རྗེ་ཆོས་སུ་བསྒྲུབས་ཏེ། པདྨ་ནི་མ་ཆགས་པ་ལ། བཞད་པ་ནི་ཕྲིན་ལས་ཏེ། ཚོགས་ནི་མང་པོ་འབྱུང་བའི་དོན་ཏོ། །རྟོགས་མཛད་ནི་དེའི་དོན་ཉམས་སུ་བླངས་ཤིང་རྟོགས་པར་བྱས་ནས། སངས་རྒྱས་ཐམས་ཅད་ཀྱང་མཉེས་ན། གཞན་ལྟ་ཅི་སྨོས་ཞེས་བྱ་བའི་དོན་ཏོ། །ད་ནི་རྡོ་རྗེ་རྣོན་པོའི་ལས་སྟོན་ཏེ། གཞན་གྱི་རིགས་སོགས་ཚོགས་མཆོག་རྣམས། །རྣོན་པོས་གཅོད་པ་ཉིད་དུ་མཛད། །ཅེས་པ་ནི། བདག་ཉིད་རྡོ་རྗེ་རྣོན་པོར་བསྒོམས་ནས། གཞན་གྱི་རིགས་སྔགས་ལ་སོགས་པའི་ཚོགས་ཀྱི་མཆོག་རྣམས་རྡོ་རྗེ་རྣོན་པོར་བསྒོམས་པའི་མཐུས། དེ་རྣམས་ཚར་གཅོད་ཅིང་གདོན་ཡི་དྭགས་ལ་སོགས་པ། གཟའ་ཐན་རྣམས་འཁོར་རྩད་ནས་འབྱིན་པར་མཛད་པ་ནི་རྡོ་རྗེ་གསུང་གི་ལས་སྟོན་ཏེ། ལྐུགས་དང་ལྐུགས་པ་ཡིན་པ་དང༌། །གླེན་མི་སྨྲ་དང་སྨྲ་བར་མཛད། །ཅེས་པ་ནི། རྡོ་རྗེ་སྨྲ་བར་བསྒོམས་ཏེ། ལྕེའི་སྟེང་དུ་པཾ་ལས་པདྨ་འདབ་མ་བརྒྱང་པའི་སྟེང་དུ། ཉི་མའི་དཀྱིལ་འཁོར་
ཅིག་བསྒོམས་ཏེ་དེའི་སྟེང་དུ་རྡོ་རྗེ་ཅིག་བསྒོམས་ནས། བསྒྲུབ་པའི་ལས་བྱས་ན་ལྐུགས་པ་རྣམས་སྨྲ་བར་མཛད་དོ། །གལ་ཏེ་མ་རུངས་པའི་ལྕེ་ལ་ཛཾ་བསྒོམས་ཏེ། དེ་འོད་ནག་པོ་འཕྲོས་ཏེ་ལྐུགས་པར་འགྱུར་རོ། །ད་ནི་རྡོ་རྗེ་ལས་ཀྱི་བསྒྲུབ་པ་སྟོན་ཏེ། རྒྱ་གྲམ་གྱི་ནི་མཆོད་པ་དང༌། །སེམས་ཅན་དོན་མཛད་ཐམས་ཅད་སྟོན། །ཞེས་པ་ནི། བདག་རྡོ་རྗེ་ལས་སུ་བསྒོམས་ནས། ཕྱག་ན་རྒྱ་གྲམ་བསྣམས་པ། དེ་ལ་མཆོད་པ་བྱ་ཞིང་བསྒོམས་ལ། སེམས་ཅན་གྱི་དོན་མཛད་པ་དང༌། དངོས་གྲུབ་ཐམས་ཅད་ཐོབ་པར་འགྱུར་རོ། །ད་ནི་རྡོ་རྗེ་སྲུང་བའི་ལས་སྟོན་ཏེ། ཧྲཾ་ཞེས་བྱ་བ་འཕྲོ་མཛད་ཅིང༌། །རྡོ་རྗེ་སྲུང་བས་སྲུང་བར་མཛད། །ཅེས་པ་ནི། བདག་ཉིད་རྡོ་རྗེ་སྲུང་བར་བསྒོམས་ཏེ། བདག་གི་སྙིང་གར་ཧྲཾ་ཞེས་བྱ་བ་ལས་འོད་འཕྲོ་བར་བསྒོམ་ཞིང་གང་ནད་ཀྱིས་ཟིན་པ་དེ་ལ་སྤྲོས་ན་རྡོ་རྗེ་སྲུང་བར་འགྱུར་རོ། །ད་ནི་རྡོ་རྗེ་གནོད་སྤྱིན་གྱི་ལས་འཆད་དེ། ཧཱུཾ་ཞེས་བྱ་བའི་སོ་ཡིས་ནི། །རྡོ་རྗེ་གནོད་སྤྱིན་ཉིད་ཀྱིས་ཀྱང༌། །ཞེས་པ་ནི། བདག་ཉིད་གནོད་སྤྱིན་དུ་བསྒོམས་ཏེ། ཧཱུཾ་ལས་ཡེ་ཤེས་ཀྱི་མཆེ་བ་རྣོན་པོ་དང་ལྡན་པ་བསྒོམས་ཏེ། རྡོ་རྗེ་གནོད་སྤྱིན་གྱི་ཏིང་ངེ་འཛིན་གྱིས་ནི་མ་རུངས་པ་རྣམས་སེམས་མ་རུངས་པར་འགྱུར་རོ། །མ་རུངས་པའི་སྙིང་གར་བཾ་བསམས་ཏེ། བསྒོམས་ན་དུག་རིགས་ལ་སོགས་པ་མེད་པར་འགྱུར་རོ། །ད་ནི་ཞི་བའི་ལས་སྟོན་ཏེ། འོད་ཟེར་གསལ་བའི་དངོས་པོ་ལ། །རྒྱས་པར་འགྱུར་བསྒོམ་བྱེད་ཅིང༌། །ཞེས་པ་ནི། བདག་རྡོ་རྗེ་སེམས་དཔར་བསྒོམས་ཏེ། འོད་ཟེར་དཀར་ལ་གསལ་བས་ཐམས་ཅད་རྒྱས་པར་འགྱུར་ཞིང་ཞི་བར་འགྱུར་རོ། །རྒྱས་པའི་ལས་ནི། རང་གི་ལུས་ནི་གསེར་བཙོས་དང༌། །ཉི་མ་གསལ་ཤར་དགེ་འདྲ་བར། །ཞེས་པ་ནི། བདག་ཉིད་རིན་ཆེན་འབྱུང་ལྡན་དུ་བསྒོམས་ནས། ཁ་དོག་སེར་པོ་འོད་འཕྲོ་བར་བསྒོམས་ན་ཐམས་ཅད་རྒྱས་པར་འགྱུར་རོ། །ད་ནི་དབང་གི་ལས་སྟོན་ཏེ། པདྨའི་སེམས་དཔའི་ཏིང་ངེ་འཛིན་གྱིས། །ཞེས་པ་ནི། བདག་ཉིད་ཆགས་པའི་རང་བཞིན་སྣང་བ་མཐའ་ཡས་སུ་བསྒོམས་ནས། ཧོཾ་ལས་འོད་ཟེར་དམར་པོ་འཕྲོས་ཏེ། སྙིང་གར་སྤྲོས་ན་
འདོད་པ་ཀུན་དབང་དུ་འགྱུར་རོ། །རིགས་བཞི་འཁོར་ལོས་སྒྱུར་བའི་ཆོ་ག་ཡན་ལག་དང་བཅས་པ་བཤད་ཟིན་ཏོ། །ཆོ་ག་བཤད་པ་ལས་ལེགས་པར་བསྔགས་པ་དང༌། ཕྱག་རྒྱའི་ལེའུ་ནི་བདེ་སྟེ་བརྡ་ཕྲད་སླའོ། །ཕྲིན་ལས་རྣམ་བཞིའི་སྔགས་ཀྱི་ཡིག་འབྲུ་ནི་ས་བཅུ་དྲུག་གི་སྙིང་པོའོ། །བ་བཅུ་དྲུག་ནི་ཉེ་བའི་སྙིང་པོའོ། །ཛ་བཅུ་དྲུག་ནི་སྐུ་བསྐྱེད་པའི་སྙིང་པོའོ། །ཙ་བཅུ་དྲུག་ནི་རྩ་བའི་གསང་སྔགས་སོ། །ཕྲིན་ལས་རྣམ་བཞི་གཏང་བ་ནི་བདེ་སྟེ་བརྡ་ཕྲད་སླའོ། །ད་ནི་རྡོ་རྗེ་ཉི་མ་མེའི་དཀྱིལ་འཁོར་སྟོན་ཏེ། དེ་ནས་ཕྱག་ན་རྡོ་རྗེས་རང་གི་སྐུ་བོར་ཏེ། རྡོ་རྗེ་སེམས་དཔའི་ཆོས་ཀྱི་སྐུའི་ངང་དུ་བཞུགས་ཏེ་གཉིས་སུ་མེད་པར་གྱུར་ཏོ། །དེ་ནས་རྡོ་རྗེ་གཉིས་སུ་མེད་པ་མཉམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཞེས་པ་ནི་རྡོ་རྗེ་ནི་ཡེ་ཤེས་ཏེ། དེའི་དོན་ལ་གཉིས་སུ་མེད་པ་སྟེ། དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་སོ། །རྡོ་རྗེ་སེམས་དཔའ་ཁྲོ་བོ་རྡོ་རྗེ་ཉི་མ་མེ་ཞེས་བྱ་བའི་སྙིང་པོ་འདི་ཞེས་པ་ནི། རྡོ་རྗེ་ནི་ཡང་དག་པའི་ཡེ་ཤེས་སོ། །སེམས་ནི་ཐུགས་རྗེ་ཕུན་སུམ་ཚོགས་པའོ། །དཔའ་ནི་ཕྲིན་ལས་ཕུན་སུམ་ཚོགས་པའོ། །ཁྲོ་བོ་ནི་རང་བཞིན་ཕུན་སུམ་ཚོགས་པའོ། །རྡོ་རྗེ་ནི་ཡེ་ཤེས་སོ། །མེ་ནི་མཚན་ཉིད་དོ། །སྙིང་པོ་ནི་རིག་པའོ། །ཐུགས་ནི་རིག་པའི་རང་བཞིན་སྙིང་ག་ནས་ཕྱུང་ཞེས་པའི་ཚིག་གོ །སྔགས་ཀྱི་དོན་ནི་མ་སྨོས་སོ། །ད་ནི་དཀྱིལ་འཁོར་གྱི་མཚན་ཉིད་བཤད་དོ། །དེ་ནས་དཀྱིལ་འཁོར་མི་བཟད་པ། །ཞེས་གསུངས་ཏེ། དེ་ནི་གོང་གི་མཇུག་སྡུད་ལ། ནས་ནི་འོག་གི་མགོ་འདྲེན། དཀྱིལ་ནི་རྡོ་རྗེ་ཉི་མ་མེལ། འཁོར་ནི་ཁྲོ་བོ་མི་བཟད་པར་རབ་ཏུ་འཇིགས་པའི་དྲག་ཤུལ་དང་ལྡན་པའོ། །ཆེ་བའི་ཆེ་མཆོག་རྩིབས་བཅུ་གཉིས། །ཞེས་པ་ནི་ཆེ་བ་ནི་འཇིག་རྟེན་པའོ། །མཆོག་ནི་དེའི་མཆོག་རྡོ་རྗེ་ཉི་མ་མེའོ། །རྩིབས་བཅུ་གཉིས་ནི་འཁོར་ལོའི་རྩིབས་ཏེ། ཤར་དུ་འཇིག་རྟེན་གསུམ་སྣང་རྡོ་རྗེ་བསྣམས་པའོ། །ཤར་ལྷོར་འཇིག་རྟེན་གསུམ་འདུལ་ཐོད་དབྱུག་བསྣམས་པ། ལྷོར་འཇིག་རྟེན་གསུམ་འཇིག་རྡོ་རྗེ་རྩེ་གསུམ། ལྷོ་ནུབ་ཏུ་འཇིག་རྟེན་མཐར་བྱེད་གཤེད་ཀྱི་དགྲ་སྟ། ནུབ་ཏུ་འཇིག་རྟེན་གསུམ་
འཇིག་བདུད་རྩི་ཐབ་སྦྱོར་གྱི་རྒྱ་གྲམ། ནུབ་བྱང་བེ་ཅོན་ནག་པོ་འཁོར་ལོ། །བྱང་མི་གཡོ་བ་དགྲ་སྟ། བྱང་ཤར་རྟ་མགྲིན་པདྨ་བསྣམས་པའོ། །ཤར་གྱི་སྲིན་མོ་ནག་མོ་ཐོད་རློན་བསྣམས་པ། ལྷོའི་རྩིབས་ལ་བེ་ཅོན་ནག་མོ་དབྱུག་ཏོ་བསྣམས་པ། ནུབ་ཀྱི་རྩིབས་ལ་མཚན་མོ་ནག་མོ་ཟླ་བ་བསྣམས། བྱང་གི་རྩིབས་ལ་ཁྲོ་བོ་གནོད་སྤྱིན་ནག་མོ་རྡོ་རྗེ་བསྣམས། ལྷ་རྫས་འབར་བའི་ཕྲེང་བས་དཀྲིགས། །ཤིན་ཏུ་འབར་ཞིང་ཆེར་འབར་བ། །ཞེས་པ་ནི། ལྷ་རྫས་ནི་འཇིག་རྟེན་པའོ། །འབར་བ་ནི་རྡོ་རྗེ་ཉི་མ་མེའོ། །ཕྲེང་བ་ནི་ཐུགས་རྡོ་རྗེ་ལས་འཁོར་གྱིས་ཕྲེང་བ་ལྟར་བསྐོར་བའི་ཐ་ཚིག་གོ །དཀྲིགས་པ་ནི་རིམ་པར་བྲི་བའི་ཕྱིར་སྨོས་ཏེ། ཤིན་ཏུ་འབར་བ་ནི་སྐུའོ། །ཆེར་འབར་བ་ནི་ཐུགས་ཡང་དག་པའི་ཡེ་ཤེས་སོ། །དེ་ལྟར་དཀྱིལ་འཁོར་བྲིས་ནས་ནི། །ཞེས་པ་ནི། དེ་ལྟར་ནི་གོང་གི་གཏན་ཚིགས་དེ་ལྟར་སྒྲུབ་པ་པོ་བདག་ཉིད་ཀྱིས་དཀྱིལ་འཁོར་གྱི་ལྷ་རྣམས་སྒྲུབ་པའོ། །དཀྱིལ་ནི་རྡོ་རྗེ་ཉི་མ་མེ་བཞུགས་ཏེ། འཁོར་ནི་ཁྲོ་བོ་རྣམས་ཀྱིས་བསྐོར་བ་བྲི་བ་ནི། ས་ཚོན་ལ་བྲི་བ་སྟེ། འཁོར་ལོའི་རྩིབས་བཅུ་གཉིས་སུ་འཁོར་རྣམས་སྔོན་གྱི་སྨོན་ལམ་གྱི་སྟོབས་ཀྱིས་ཁམས་གསུམ་གྱི་སེམས་ཅན་ལ་ཕན་པའི་རྟགས་སུ་རྟེན་འབྲེལ་བཅུ་གཉིས་ལས་བཟློག་སྟེ། ཐུགས་རྗེ་ཕུན་སུམ་ཚོགས་པའི་ཁྱད་པར་གྱིས་མཛད་པ་བཅུ་གཉིས་སུ་བ་སྟན་ཏོ། །དེ་ལྟ་བུའི་གཞལ་མེད་ཁང་དེའི་མཚོན་པར་བྱ་བའི་རྟགས་སུ་ཡེ་ཤེས་ཀྱི་ཁྲོ་བོ་རྣམས་རིམ་པར་བྲི་བའི་ཐབས། ཅིའི་ཕྱིར་ཞེ་ན། རྡོ་རྗེ་སེམས་དཔའ་གཞག་པར་བྱ། །ཞེས་པ་ནི། རྡོ་རྗེ་ནི་ཐུགས་ཆོས་ཉིད་དོ། །སེམས་དཔའ་ནི་ཡེ་ཤེས་སོ། །གཞག་པར་བྱ་བ་ནི་ཉི་མ་སྟེ། ཐུགས་ཆོས་ཉིད་མི་འགྱུར་བ་སྟེ་སྐུ་མདོག་སྔོ་ནག་ཕྱག་ན་ཐབས་དང་ཤེས་རབ་ཀྱི་རྡོ་རྗེ་དང་དྲིལ་བུ་བསྣམས་སོ། །ད་ནི་འཁོར་སྟོན་ཏེ་ཅིའི་ཕྱིར་ཞེ་ན། འཇིག་རྟེན་གསུམ་སྣང་ལ་སོགས་ཁྲོ་བོ་ཀུན། །ཞེས་པ་ནི། འཇིག་རྟེན་ནི་ཁམས་གསུམ་མོ། །གསུམ་སྣང་ནི་ཡེ་ཤེས་ཀྱི་ངོ་བོ་ལ་སོགས་ནི་འཁོར་དང་བཅས་པའོ། །ཁྲོ་བོ་ནི་མ་རུངས་པ་གདུལ་བའི་གཉེན་པོ་སྟེ། དེ་ཅིའི་ཕྱིར་ཞེ་ན། མ་རུངས་སྙིང་གར་
བཞག་ནས་ཤིན་ཏུ་སྡིགས་བྱེད་ཅིང༌། །ཞེས་པ་ནི། མ་རུངས་པ་ནི་སྤྱོད་པ་མི་བགྲུངས་པའོ། །སྙིང་ག་ནི་དྲན་པའི་བཞི་སྟེ་མནན་པའི་ཕྱིར་རོ། །སྡིགས་བྱེད་ཅིང་ནི། སྐུའི་ཚམ་ངམ་གྱིས་སྡིགས་པར་བྱེད་པའི་ཚུལ་གྱིས་གནོན་ཏེ། དེ་ཡང་ཤར་གྱི་རྩིབས་ལ་འཇིག་རྟེན་གསུམ་སྣང་གིས་ལྷའི་དབང་པོ་བརྒྱ་བྱིན་གནོན་ཏོ། །ཤར་ལྷོའི་རྩིབས་ལ་འཇིག་རྟེན་གསུམ་འདུལ་རྣམ་པར་རྒྱལ་ཏེ། མེ་ལྷའི་རྒྱལ་པོ་མནན་ཏོ། །ལྷོའི་རྩིབས་ལ་འཇིག་རྟེན་གསུམ་འཇིག་སྟེ་གཞན་གྱིས་མི་ཐུབ་པ་གཤིན་རྗེ་གནོན་ཏོ། །ལྷོ་ནུབ་ཀྱི་རྩིབས་ལ་འཇིག་རྟེན་མཐར་བྱེད་གཤིན་རྗེ་གཤེད་ཀྱིས་སྲིན་པོ་གནོན་ཏོ། །ནུབ་ཀྱི་རྩིབས་ལ་འཇིག་རྟེན་གསུམ་འཇིག་བདུད་རྩི་ཐབ་སྦྱོར་གྱིས་ཆུ་ལྷ་གནོན་ཏོ། །ནུབ་བྱང་གི་རྩིབས་ལ་བེ་ཅོན་ནག་པོ་རླུང་ལྷ་གནོན་ཏོ། །བྱང་གི་རྩིབས་ལ་མི་གཡོ་བ་གནོད་སྤྱིན་གནོན་ཏོ། །བྱང་ཤར་གྱི་རྩིབས་ལ་རྟ་མགྲིན་དབང་ལྡན་གནོན་ཏོ། །སྲིན་མོ་ནག་མོས་ཤར་གྱི་རྩིབས་ལ་ཉི་མ་གནོན་ཏོ། །བེ་ཅོན་ནག་མོས་ལྷོའི་རྩིབས་ལ་ས་བདག་གནོན་ཏོ། །མཚན་མ་ནག་མོས་ནུབ་ཀྱི་རྩིབས་ལ་ཟླ་བ་གནོན་ཏོ། །ཁྲོ་མོ་གནོད་སྤྱིན་ནག་མོས་བྱང་གི་རྩིབས་ལ་སའི་ལྷ་མོ་བརྟན་མ་གནོན་ཏོ་ཞེའོ། །དེ་རྣམས་ཀྱི་ཡེ་ཤེས་ཀྱི་ཁྱད་པར་གྱིས་འཇིག་རྟེན་གྱི་མཐུ་ཅན་དབང་དུ་བསྡུས་ནས་ཞབས་འོག་ཏུ་བཅུག་པའི་ཐ་ཚིག་གོ །སྐུ་མདོག་གི་དོན་ནི་བརྡ་ཕྲད་སླའོ། །ཞལ་ནི་ཤིན་ཏུ་འཇིགས་འཇིགས་ལྟ། །ཞེས་པ་ནི། ཞལ་ནི་རྣམ་པར་ཐར་པ་གསུམ་མོ། །འཇིགས་པ་ནི་བདུད་དང་སྲིན་པོ་ཡང་འཇིགས་པའོ། །འཇིགས་པར་ལྟ་བ་ནི་ཐུགས་རྗེའོ། །ཕྱག་ནི་བརྒྱ་ཕྲག་དུ་མར་ལྡན། །སྤྲུལ་དང་མི་སྡུག་གོས་ཀྱིས་བརྒྱན། །ཞེས་པ་ནི། ཕྱག་ནི་ཐབས་ཐུགས་རྗེའོ། །བརྒྱ་ཕྲག་ནི་རྣམ་གྲངས་སོ། །དུ་མར་ལྡན་ནི་ཕྲིན་ལས་སོ། །སྤྲུལ་ནི་འཁོར་བ་ཞེ་ལ་གནོན་པའི་རྒྱན་ནོ། །མི་སྡུག་པ་ནི་ཐུགས་རྗེའོ། །གོས་ཀྱིས་བརྒྱན་ནི་ཤེས་རབ་བོ། །སྟག་ལྤགས་ཀྱིས་ནི་སྨད་གཡོགས་ཤིང༌། །རྒྱུ་མ་ཐོགས་ཤིང་དབུ་མཐའ་ཡས། །ཞེས་པ་ནི་སྟག་ལྤགས་ནི་ཕྲིན་ལས་སོ། །
སྨད་གཡོགས་གོས་ནི་བདུད་ལས་རྒྱལ་བའོ། །རྒྱུ་མ་ནི་འཁོར་བའི་རྒྱུ་མའོ། །ཐོགས་པ་ནི་ཐུགས་རྗེའོ། །དབུ་མཐའ་ཡས་ནི་ཡེ་ཤེས་སོ། །མགོ་ཐོད་ཤས་བཀང་ཕྱག་ན་བསྣམས། །ཞེས་པ་ནི། མགོ་ཐོད་ནི་ཕྱི་སྣོད་ཀྱི་འཇིག་རྟེན་ནོ། །ཤས་གང་བ་ནི་ནང་བཅུད་ཀྱི་སེམས་ཅན་ནོ། །ཕྱག་ན་བསྣམས་པ་ནི་སྣོད་བཅུད་ཐུགས་རྗེས་གང་བར་བྱེད་པའི་ཐ་ཚིག་གོ །སྲིན་མོའི་ཚོགས་རྣམས་གཞག་པར་བྱ། །ཞེས་པ་ནི། ཕྱི་རོལ་གྱི་སྣམ་བུ་གྲུ་ཆད་ལ་སྲིན་མོ་ཆེན་མོ་བཞི་བྲི་སྟེ། འཇིག་རྟེན་ཡིན་པའི་ཕྱིར་དང༌། མཐུ་བོ་ཆེ་དམ་ལ་བཏགས་པའི་ཕྱིར་བྲི་བའི་ཐ་ཚིག་གོ །སྒོ་བ་རྣམས་ཀྱང་ཇི་བཞིན་དུ། །རང་གི་ཕྱག་རྒྱའི་ལག་མཚན་ཅན། །ཞེས་པ་ནི། དེའི་ཕྱི་རོལ་དུ་སྒོ་མ་ལྕགས་ཀྱུ་མ་དང༌། ཞགས་པ་དང༌། ལྕགས་སྒྲོག་དང༌། དྲིལ་བུ་རྣམས་ཀྱང་བྲི་བའི་ཐ་ཚིག་གོ །རང་གི་ནི་སོ་སོ་ལ། ཕྱག་རྒྱ་ནི་མི་འདའ་བ་དང་མཚོན་པའི་བརྡའོ། །ལག་མཚན་ནི། གྲུ་ཆད་ཀྱི་ལྷ་མོ་བཞི་ནི་ཤར་དུ་རཀྵ་མའི་ཐོད་རློན་དང༌། ལྷོར་ཨིནྡྲ་མའི་རྡོ་རྗེ་གདེངས་པ་དང༌། ནུབ་ཏུ་ཕྲ་མ་ནའི་རིན་པོ་ཆེ་དང༌། བྱང་དུ་ཡ་བའི་གདན་ནོ། །ལྷའི་གྲལ་རིམ་བ་སྟན་ཏོ། །ད་ནི་བུམ་པའི་དཀྱིལ་འཁོར་དང་ཆ་རྐྱེན་སྟོན་ཏེ། དེ་ནས་བུམ་པ་གང་བ་ཡིས། །ཞེས་པ་ནི། དེ་ལྟར་ནི་རྒྱན་ཆས་བུམ་པ་བཅུ་དྲུག །སྨན་ལྔ། འབྲུ་ལྔ། རིན་པོ་ཆེ་ལྔ། སྙིང་པོ་ལྔ། ཁ་རྒྱན་དང་གཟུངས་ཐག་དང༌། མགུལ་ཆིངས་དང་ལྡན་པར་བྱ་སྟེ་གཞག་པར་བྱའོ། །རྒྱན་ཆས་ཕྱི་མ་ནི་བརྡ་ཕྲད་སླའོ། །དཀྱིལ་འཁོར་དུ་འཇུག་པ་ནི། དེ་ནས་སློབ་དཔོན་བདག་ཉིད་ཀྱང༌། །ཞེས་པ་ནི། དཀྱིལ་འཁོར་བྲི་བའི་རྟིང་ཐོགས་སུ། ལྷ་ལ་དབང་མི་བཟའ་བའི་ཕྱིར། ལྷའི་དམ་ཚིག་ཐོབ་པའི་ཕྱག་རྒྱས་བདག་ཉིད་དཀྱིལ་འཁོར་དུ་འཇུག་ཅིང་ཁ་ཟས་ཤ་ལ་སོགས་པའི་དམ་ཚིག་བྱིན་གྱིས་བརླབ་ཅིང་མཆོད་པ་དབུལ་བར་བྱའོ། །དཀྱིལ་འཁོར་དུ་འཇུག་པ་བཤད་ཟིན་ཏོ། །ད་ནི་སྒྲུབ་ཏུ་ངང་བ་སྟོན་ཏེ། དེ་ནས་འདོད་ལྡན་རྙེད་ནས་ནི། །ཧཱུཾ་ཞེས་བྱ་བ་བསྒྲུབ་པར་བྱ། །ཞེས་པ་ནི། དེ་ནས་ནི་སྐབས་ཀྱི་རིང་ཐོགས་སོ། །འདོད་པ་
ནི་དངོས་གྲུབ་འདོད་ལ། ལྡན་པ་ནི་བདག་སྒྲུབ་པ་པོ་སྐལ་བ་དང་ལྡན་པའོ། །རྙེད་ནི་བདག་དང་གཉིས་སུ་མེད་པར་དངོས་གྲུབ་རྙེད་པའོ། །ཧཱུཾ་ནི་ལྷ་སོ་སོའི་རྩ་བའི་སྙིང་པོ་རྒྱུ་མ་ནོར་བའོ། །བསྒྲུབ་པར་བྱ་བ་ནི་དེ་ལས་མ་གཡོས་ཤིང་མི་འདའ་བར་བྱ་བའི་ཐ་ཚིག་གོ །སྒྲུབ་ཏུ་ངང་བ་བ་སྟན་ཟིན་ཏོ། །ད་ནི་སློབ་མ་འཇུག་པ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་སྔགས་མཁན་སྒོ་སྒོར་ཡང༌། །དེ་ཉིད་དྲན་བྱེད་བསྙེན་པར་བྱ། །ཞེས་པ་ནི། སྔགས་མཁན་ནི་གོང་དུ་བསྒྲུབས་པའི་སློབ་དཔོན་ནོ། །སྒོ་སྒོར་ནི་དཀྱིལ་འཁོར་གྱི་སྒོ་བཞིའོ། །ཡང་ནི་བསྣན་པའི་ཚིག་གི་དོན་ཏེ། སློབ་དཔོན་ཞུགས་པའི་འོག་ཏུ་སློབ་མ་ཡང་གཞུག་ཅེས་པའི་ཐ་ཚིག་གོ །དེ་ཉིད་ནི་སློབ་མ་དེ་ཉིད་དོ། །དྲན་བྱེད་ནི་དཀྱིལ་འཁོར་དང༌། སྔགས་དང༌། ཕྱག་རྒྱ་དང༌། ལྷ་དང་སློབ་དཔོན་ནོ། །བསྙེན་པར་བྱ་བ་ནི་བྱང་ཆུབ་ཀྱི་སེམས་དང་ལྡན་པར་བྱ་བའི་ཐ་ཚིག་གོ །དེའི་ཡོན་ཏན་ནི་བརྡ་ཕྲད་སླའོ། །ད་ནི་དངོས་གྲུབ་བླང་བ་སྟོན་ཏེ། དཀྱིལ་འཁོར་གྱི་ནི་ཚོགས་རྣམས་དང༌། །རང་གི་ལྷ་ཡི་ཚོགས་རྣམས་ལ། །ཞེས་པ་ནི། དཀྱིལ་ནི་དབུས་ཀྱི་གཙོ་བོའོ། །འཁོར་ནི་ཕྱི་རོལ་ནས་བསྐོར་བ་རྣམས་སོ། །ཚོགས་རྣམས་ནི་ལྡན་པའི་དོན་ཏོ། །རང་གི་ལྷ་ནི་བདག་གང་ལ་བབ་པའོ། །ཚོགས་ནི་གཡོག་དང་བཅས་པའོ། །རྒྱུད་ལས་འབྱུང་བའི་དམ་ཚིག་བརྗོད། །ཅེས་པ་ནི། རྒྱུད་ནི་ཐུགས་རང་བཞིན་གྱིས་རྒྱུད་ལ་གནས་པས། དོན་ནི་འདི་ཉིད་བྲེང་མ་ཆད་པ་དང༌། འབྲེལ་པའི་ཕྱིར་རྒྱུན་མ་ཆད་པར་སྨོས་སོ། །འབྱུང་བ་ནི་རྒྱུད་འདི་ཉིད་ལས་འབྱུང་བའི་དངོས་གྲུབ་སྩོལ་བའི་དོན་ཏོ། །དམ་ཚིག་ནི་བདག་དང་མི་འདའ་བའི་ཕྱིར་དམ་ཚིག་གོ །བརྗོད་པ་ནི་གསོལ་བ་འདེ་བས་པའི་ཐ་ཚིག་གོ །ད་ནི་དཀྱིལ་འཁོར་ནས་འབྱུང་བ་སྟོན་ཏེ། དེ་ནས་མཆོད་དེ་ལངས་ནས་ཀྱང། །ཞེས་པ་ནི། དཀྱིལ་འཁོར་གྱི་ལྷ་ལ་མཆོད་ཅིང༌། དངོས་གྲུབ་གསོལ་ཞིང༌། དཀྱིལ་འཁོར་ལས་ལངས་ནས་འབྱུང་བའི་ཐ་ཚིག་སྟེ། དེ་ཅིའི་ཕྱིར་ཞེ་ན། ཚོགས་སྤྱན་རྡོ་རྗེ་སེམས་དཔའ་ཡི། །ཚུལ་དུ་གནས་ནས་འབྱུང་བར་བྱ། །ཞེས་པ་ནི། ཚོགས་ནི་དཀྱིལ་འཁོར་
གྱི་ལྷ་རྣམས་སོ། །སྤྱན་ནི་ཡེ་ཤེས་སོ། །རྡོ་རྗེ་ནི་ཐུགས་སོ། །སེམས་དཔའ་ནི་ཕྲིན་ལས་སོ། །ཚུལ་དུ་གནས་པ་ནི་གཉིས་སུ་མེད་པར་གནས་པའོ། །འབྱུང་བར་བྱ་བ་ནི་སློབ་མ་ཡོན་འབུལ་དུ་འཇུག་པའི་ཕྱིར་འབྱུང་བར་བྱ་ཞེས་སྨོས་སོ། །སློབ་མ་འདུས་ནས་ཡོན་འབུལ་བ་ནི། དེ་ནས་སློབ་མ་ཞེས་པ་ནི། སྣོད་དུ་རུང་བར་བྱིན་གྱིས་བརླབ་པ་དང༌། །ཐོད་པའི་ཕྱག་རྒྱ་བཅའ་བ་དང༌། གདོང་གཡོགས་དཀྲི་བ་དང༌། དམ་ཚིག་གི་ཆུ་བླུད་པའི་སྔགས་དང༌། དམ་ཚིག་ལས་མི་འདའ་བའི་མནའ་དང༌། དབང་བསྐུར་བའི་སྔགས་དང༌། དབང་བསྐུར་བར་བྱ་བ་ནི་བརྡ་ཕྲད་སླའོ། །ད་ནི་དེ་དག་གི་སྒྲུབ་པ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་དེ་དག་སྒྲུབ་པ་སྟོན་ཏེ་ཞེས་པ་ནི། དེ་ནས་ནི་རྟིང་ཐོགས་སོ། །དེ་དག་ནི་གོང་གི་ལྷའོ། །སྒྲུབ་པ་ནི་གཉིས་སུ་མེད་པར་བསྒོམ་པའོ། །བདག་ཉིད་ཁྲོ་བོར་སྙོམས་ཞུགས་ཏེ། །དེས་ནི་སྙིང་གར་ཉི་མ་བསྒོམ། །ཞེས་པ་ནི། བདག་ཉིད་ནི་སྒྲུབ་པ་པོའོ། །ཁྲོ་བོ་ནི་ཉི་མ་མེའོ། །སྙོམས་ཞུགས་ནི་གཉིས་སུ་མེད་པར་སྒོམ་པའོ། །དེས་ནི་དེ་ལྟར་སྒྲུབ་པ་དེས་ཞེས་བྱ་བའི་ཐ་ཚིག་གོ །སྙིང་གར་ནི་ཤེས་པའི་རང་བཞིན་ལ་བྱའོ། །ཉི་མ་སྒོམ་ནི་ལྷ་ཡེ་ཤེས་སེམས་དཔའ་བདག་དམ་ཚིག་སེམས་དཔའ་ལ་བསྒོམ་པའི་ཕྱིར་རོ། །ཉི་མའི་དཀྱིལ་འཁོར་གཅིག་བསམ་མོ། །རང་གི་ཆོས་ཀྱི་ཡི་གེ་ལས། །ཁྲོས་ནས་ཡང་དང་ཡང་ཁྲོ་ཞིང༌། །དེ་གཉིས་གཅིག་ཏུ་བསྒོམ་པར་བྱ། །ཞེས་པ་ནི། རང་གི་ནི་སྒྲུབ་པ་པོ་བདག་ཉིད་དོ། །ཆོས་ཀྱི་ནི་གོང་གི་ཉི་མའི་དཀྱིལ་འཁོར་རོ། །ཡི་གེ་ནི་སོ་སོའི་རྩ་བའི་སྔགས་སོ། །ཁྲོས་ནས་ཡང་ནི་སེམས་རབ་ཏུ་ཁྲོས་ནས་ཁྲོ་བོའི་ཚུལ་དུ་དམིགས་པ་ལ་ཡང་དང་ཡང་ཞེས་སྨོས་སོ། །ཡང་ཁྲོ་ཞིང་ནི་དེ་ལས་ཀྱང་ཁྲོ་བོའི་སྤྲུལ་པ་ཕྱོགས་བཅུར་འཕྲོ་བའོ། །དེ་གཉིས་ནི་ལྷ་ཡེ་ཤེས་སེམས་དཔའ་དང༌། བདག་དམ་ཚིག་སེམས་དཔའ་གཉིས་སོ། །གཅིག་ཏུ་བསྒོམ་པ་ནི་ཆུ་དང་འོ་མ་འདྲེས་པའི་ཚུལ་དུ་བསྒོམ་པའོ། །དེའི་ཡོན་ཏན་ཕྲིན་ལས་རྣམ་པ་བཞི་སྒྲུབ་པ་ནི་བརྡ་ཕྲད་སླའོ། །ད་ནི་མ་གྲུབ་ན་སྤོགས་པའི་ཆོ་ག་སྟོན་ཏེ། དེ་ཅིའི་ཕྱིར་ཞེ་ན། རྡོ་རྗེ་སེམས་
དཔའི་ཏིང་འཛིན་གནས། །ཁྲོ་བོ་དཀྱིལ་འཁོར་བསྒོམ་པར་བྱ། །ཞེས་པ་ནི། རྡོ་རྗེ་ནི་ཐུགས་སོ། །སེམས་དཔའ་ནི་སྙིང་པོ་བྱང་ཆུབ་བོ། །ཏིང་ངེ་འཛིན་ནི་དེ་ལ་གཉིས་སུ་མེད་པར་བསྒོམ་པའོ། །ཁྲོ་བོ་ནི་ཡེ་ཤེས་སོ། །དཀྱིལ་འཁོར་ནི་ཉི་མ་མེའི་དཀྱིལ་འཁོར་རོ། །བསྒོམ་པར་བྱ་བ་ནི་བདག་དང་གཉིས་སུ་མེད་པར་སྒོམ་ཞིང་སྒྲུབ་པའི་ཐ་ཚིག་གོ །གདུག་པའི་སེམས་ཀྱིས་འཛིན་བྱེད་ཅིང༌། །ཞེས་པ་ནི། གདུག་པ་ནི་སྤྱོད་པའོ། །སེམས་ནི་དེའི་རང་བཞིན་ནོ། །འཛིན་བྱེད་ཅིང་ནི་མི་གཏོང་བར་འཛིན་པའི་ཐ་ཚིག་གོ །མདོར་ན་དུག་རིམས་གདོན་ལ་སོགས། །ཞེས་པ་ནི། མདོར་ན་ནི་རྣམ་པ་གཅིག་ཏུའོ། །དུག་ནི་རང་བཞིན་དང་སྤྱར་བའོ། །རིམས་ནི་ནད་སྣ་ཚོགས་པའོ། །གདོན་ལ་སོགས་ནི་གདོན་སྟོང་ཕྲག་བརྒྱང་ཅུ་ལ་སོགས་པས་བྱིན་གྱིས་བརླབས་པའོ་ཞེའོ། །ཐབས་ལ་སོགས་པ་འཇོམས་བྱེད་པ། །ཞེས་པ་ནི། ཐབས་ནི་གོང་དུ་གསུངས་པའི་བྱེ་བྲག་གོ །འཇོམས་བྱེད་ནི་དེ་འདུལ་བའི་གཉེན་པོའོ། །ཁྲོས་ནས་སྙིང་ལས་འབྱུང་འགྱུར་བ་ནི། ཁྲོས་པ་ནི་ཐུགས་རྗེའོ། །སྙིང་ལས་འབྱུང་བ་ནི་སེམས་ལས་ཁྲོ་བོའི་སྤྲུལ་པ་འབྱུང་བའོ། །བསད་པའི་ལས་ནི་བསམ་པར་བྱ། །ཞེས་པ་ནི། བསད་པ་ནི་གོང་གིས་ལས་ཀྱི་བྱེ་བྲག་རྣམས་མེད་པར་བསམ་པའི་ཐ་ཚིག་གོ །ཁྲོས་པར་གྱུར་པའི་རྒོད་མ་ཁས། །ཤ་དང་ཁྲག་ནི་འཇིབ་བྱེད་ཅིང༌། །ཞེས་པ་ནི། ཁྲོས་པར་གྱུར་པ་ནི། སེམས་གོང་གི་རིམས་ནད་ལ་སོགས་པ་གདོན་འབྱུང་བའོ། །རྒོད་མ་ཁ་ནི་བདག་ཉིད་རྟ་མགྲིན་གྱི་ཏིང་ངེ་འཛིན་དུ་ཞུགས་ལ། དེ་རྣམས་ཀྱིས་ཤ་དང་ཁྲག་འཇིབ་ཅིང་སྟོབས་འཕྲོག་པར་བསམ་པ་དང༌། འོད་ཟེར་གྱི་སྤྲུལ་པ་སྣ་ཚོགས་པ་ཐུགས་ཀ་ནས་ཕྱུང་ནས། རིམས་ནད་ལ་སོགས་པ་རྣམས་ཞི་བར་འགྱུར་ཞེས་གསུངས་ཏེ། མ་གྲུབ་ན་སྤོགས་པའི་ཆོ་ག་བ་སྟན་ཟིན་ཏོ། །ད་ནི་སྲུང་བའི་ཆོ་ག་སྟོན་ཏེ། དེ་ནས་ཧཱུཾ་གི་ཚིག་བཞག་ལ། །རྡོ་རྗེ་ལྟ་བུའི་ལུས་བསམ་ཞིང༌། །ཞེས་པ་ནི། ནད་པའི་ལུས་བྱིན་གྱིས་བརླབ་པའི་དོན་ཆེད་དུ། བདག་གི་ཐུགས་ཀ་ནས་ཡེ་ཤེས་ཀྱི་ཧཱུཾ་གི་ཚིག་སྣ་ཚོགས་པ་ཕྱུང་ཞིང༌། ནད་པའི་
ལུས་གཞིག་ཅིང་བསྟིམས་པའི་ནད་པའི་ལུས་ལ་འོད་དུ་ཞུ་སྟེ་རྡོ་རྗེའི་ངོ་བོར་གྱུར་པར་བསྒོམ་མོ། །ཧཾ་གིས་འཁོར་ལོའི་ཆོ་ག་བྱ། །འོད་ཟེར་ཆུ་ཡིས་དབང་བསྐུར་རོ། །ཞེས་པ་ནི། དེ་ལྟར་ལུས་བྱིན་གྱིས་བརླབས་པའི་ནད་པ་དེ། ཧཾ་སྤྲོས་པས་ཡེ་ཤེས་ཀྱི་འཁོར་ལོའི་གོ་ཆ་བླ་ན་མེད་པར་གྱུར་ཏེ། དེའི་འོད་བདག་གི་ཐུགས་ཀའི་དཀྱིལ་འཁོར་ལས་ཡེ་ཤེས་ཀྱི་འོད་ཟེར་བྱང་ཆུབ་ཀྱི་སེམས་ཟླ་བའི་དཀྱིལ་འཁོར་ཆུ་ལྟར་གཤེར་བས་ནད་པའི་སྤྱི་བོ་ནས་དབང་བསྐུར་བས་ནད་ལྔ་སོས་པར་བྱིན་གྱིས་བརླབས་པའི་ཐ་ཚིག་གོ །དེ་ནས་དེ་ཡི་མིང་ཟློས་ཤིང༌། །བཟླས་པ་ཚུལ་བཞིན་བསམ་པར་བྱ། །ཞེས་པ་ནི། དེ་ནས་ཞེས་བྱ་བ་ནི་རྟིང་ཐོགས་སོ། །མིང་སྨོས་ནི་ནད་པའོ། །བཟླས་པ་ནི་ཕྲིན་ལས་རྣམ་པ་བཞི་གང་བྱེད་པའི་བཟླས་པའོ། །ཚུལ་བཞིན་ནི་མ་ནོར་བའོ། །བསམ་པར་བྱ་བ་ནི་སོ་སོའི་ནད་རྣམས་ཤཱནྟིཾ་ཀུ་རུ་སྭཱ་ཧཱ་ཞེས་སྨོས་སོ། །བསྲུང་བའི་ཆོ་ག་བཤད་ཟིན་ཏོ། །ད་ནི་ཞི་བའི་སྤྱིན་སྲེག་སྟོན་ཏེ། དེ་ནས། ཁུང་བུ་གསུམ་ལས་རྣམ་གཅིག་ཏུ། །ཞེས་པ་ནི་ཁུང་བུ་གསུམ་ནི་རབ་འབྲི་ནག་རྣམ་པ་གསུམ་ལ་བྱའོ། །རྣམ་གཅིག་ཏུ་ནི་དེ་གསུམ་གྱི་ཁ་དོག་དབྱིབས་སྟོན་ཏེ། དེ་ཅིའི་ཕྱིར་ཞེ་ན། ཟླ་བ་རྒྱས་པའི་འོད་ཟེར་འཕྲོ་འདྲ་ལ། །ཞེས་པ་ནི། ཟླ་བ་ལྟར་ནི་དཀར་བ། རྒྱས་པ་ལྟར་ནི་ཟླུམ་པ། ཡེ་ཤེས་ཀྱི་འོད་ཟེར་འཕྲོ་བ་འདྲ་བ་ལ། དབྱིབས་སུ་སྨོས་ཞེས་པའི་ཐ་ཚིག་གོ །དེ་ཡང་ཁུང་བུ་རབ་འབྲི་ནག་ཐ་མ་གསུམ་ནི་བློའི་ཁྱད་པར་དང༌། བསོད་ནམས་ཀྱི་ཁྱད་པར་དུ་སྨོས་ཏེ། དེ་ལ་རྣམ་གཅིག་ཏུ་འོད་ནི་མེ་འོད་དོ། །ཟེར་ནི་མུ་རན་དང་ཁ་ཁྱེར་རོ། །འཕྲོ་བ་ནི་པདྨའི་འདབ་མའོ། །དེ་ཡང་ཐུགས་ཆོས་ཉིད་ལས་མ་གཡོས་པ་ནི་ཐབ་ཁུང་ཁྲུ་གང་དུ་སྨོས་སོ། །ཐབས་དང་ཤེས་རབ་ཟུང་དུ་འབྲེལ་པས་ཁྲུ་དོའོ། །ཚད་མེད་པའི་ཕྲིན་ལས་རྣམ་པ་བཞིས་འགྲོ་བའི་དོན་མཛད་པས་ཁྲུ་བཞིའོ། །ཉོན་མོངས་པའི་འཁོར་བ་རྩད་ནས་གཅོད་པའི་རྟགས་སུ། དབུས་སུ་འཁོར་ལོ་རྩིབས་བརྒྱང་པ་བྲི། གཟུང་འཛིན་གྱི་སྐྱོན་སྤངས་པའི་རྟགས་སུ་ཟླ་བའི་དཀྱིལ་འཁོར་བྲིའོ། །ཉོན་མོངས་པའི་མཚན་མ་འཇོམས་པའི་རྟགས་སུ་ཡེ་ཤེས་ཀྱི་རྡོ་རྗེ་
རྩེ་ལྔ་པ་ལ་ཡེ་ཤེས་ཀྱི་འོད་དཀར་པོ་འཕྲོ་བ་བྲིའོ། །ཉོན་མོངས་པའི་འཁོར་བའི་མུན་པ་སེལ་བའི་རྟགས་སུ་མེ་འོད་བྲིའོ། །རྟོག་གེ་པའི་སྤྱོད་ཡུལ་མ་ཡིན་པས་ཕྱི་རོལ་རྡོ་རྗེ་ར་བ་ཟླུམ་པོས་བསྐོར་རོ། །སྐུ་གསུང་ཐུགས་ལྷུན་གྱིས་གྲུབ་པས་སྣམ་བུ་རིམ་པ་གསུམ་གསུམ་དུ་བ་སྟན་པར་བྱའོ། །ཉོན་མོངས་པའི་སྐྱོན་གྱིས་མ་གོས་པས་པདྨའི་འདབ་མ་བྲིའོ། །ཡེ་ཤེས་བཞི་རྟོགས་པའི་ཡུལ་ཡིན་པས་ཕྱི་རོལ་གྲུ་བཞིར་བྱའོ། །བསྡུ་བའི་དངོས་པོ་བཞིས་སེམས་ཅན་སྡུད་པས་ན་སྒོ་བཞིར་བྱའོ། །རིམ་པ་དང་པོ་ལ་རིགས་བཞིའོ། །གཉིས་པ་ལ་སེམས་དཔའོ། །གསུམ་པ་ལ་ཕྱོགས་སྐྱོང་དང་ལྷ་ཆེན་པོ་སྤེལ་མར་བྲིའོ། །སྒོར་རྒྱལ་པོ་ཆེན་པོ་བཞི་བྲིའོ་ཞེས་སྨོས་སོ། །རིགས་བརྒྱར་ལ་སོགས་ཟུར་ཕྱིན་ཅིང༌། །ཞེས་པ་ནི་རིགས་ནི་ལྔའོ། །བརྒྱར་དབྱེ་བ་ནི་སྐུ་གསུང་ཐུགས་གསུམ་སྟེ། རིགས་བཅོ་ལྔའོ། །དེ་ལ་ཡང་ཡེ་ཤེས་རྣམ་པ་ལྔ་ལྔ་སྟེ་རིགས་བདུན་ཅུ་རྩ་ལྔའོ། །དེ་ལ་ཕྲིན་ལས་རྣམ་པ་བཞི་སྟེ་རིགས་དགུ་བཅུ་རྩ་ལྔའོ། །དེ་ཡང་ཐབས་དང་ཤེས་རབ་ཟུང་འབྲེལ་ཏེ། གཉིས་སུ་མེད་པས་གཉིས་གཅིག་ཏུ་བརྩིས་པས་བརྒྱ་ཐམ་པའོ། །ཟུར་ཕྱིན་ཅིང་ནི་གསལ་བར་བྱ་བ་དང༌། ཕྱོགས་མ་ནོར་བར་བྱ་བའི་ཐ་ཚིག་གོ །གཞན་མ་ཆ་རྐྱེན་ནི་བརྡ་ཕྲད་སླའོ། །མེ་བརྟག་པ་དང༌། ཡི་དམ་གྱི་ལྷ་སྤྱན་དྲང་བ་དང༌། མཆོད་པའི་ཐབས་དང་བསམ་རྒྱུད་ནི་དེ་དང་འདྲ་བའོ། །ད་ནི་ཞི་བའི་མཆོད་པ་མདོར་བསྡུས་པ་སྟོན་ཏེ། དེ་ནས་དཀོན་མཆོག་གསུམ་ལ་གསུམ། །ཞེས་པ་ནི། ཐེག་པ་ཆེན་པོའི་ཆོས་ཁུངས་མི་གསུང་བའི་དོན་ཆེད་དུ། སངས་རྒྱས་ཡབ་དང༌། དམ་ཆོས་ཡུམ་དང༌། དགེ་འདུན་སྲས་རྣམས་ལ་སྐུ་གསུང་ཐུགས་མཉེས་པར་བྱ་བའི་ཕྱིར་གསུམ་ཞེས་སྨོས་པའི་ཕྱིར་རོ། །དེ་བཞིན་དུ་ཡེ་ཤེས་ཀྱི་ཞལ་མེ་ལྷ་ལ་ཡང་གསུམ་མོ། །བསྒྲུབ་པའི་རྟེན་ཡིན་པས་རྡོ་རྗེ་སེམས་དཔའ་ལ་ཡང་གསུམ་མོ། །དམ་ཚིག་ཉམས་པ་བསྐང་བའི་ཕྱིར་ཕྱི་མ་ལ་ཡང་གསུམ་མོ། །སྙིང་རྗེའི་ཞིང་ཡིན་པས་བགེགས་དང་འབྱུང་པོ་ལ་ཡང་གསུམ་མོ། །ཡམ་ཤིང་བསྲེག་པའི་ཐབས་དང༌། བསྙེན་པའི་ཚད་དང༌། ལས་ཀྱི་ལྷག་ཆད་ཁ་བསྐང་བ་
དང། སླར་གཤེགས་སུ་གསོལ་བ་དང༌། གྲུབ་པའི་རྟགས་དང༌། སྡིག་ཅན་མ་གྲུབ་ན་གྲུབ་པའི་ཐབས་བརྡ་ཕྲད་པར་སླའོ། །ཞི་བའི་སྤྱིན་སྲེག་གི་དོན་བསྡུས་པ་བཤད་ཟིན་ཏོ། །ད་ནི་རྒྱས་པའི་ལས་བཤད་པར་བྱ་སྟེ། གནས་ཕུན་སུམ་ཚོགས་པ་བདེ་སྟེ་མ་བཀྲལ་ལོ། །ཧོམ་ཁུང་གི་ཚད་ནི། ཧོམ་ཁུང་ཁྲུ་དོ་ཁྲུ་བཞི་པ། །དེ་ལྟར་མཆོག་ནི་ཁྲུ་བརྒྱང་པའོ། །ཞེས་པ་ནི། གཟུང་འཛིན་རྣམ་པ་གཉིས་སྤངས་པས་ཁྲུ་དོའོ། །སྐྱེ་གནས་བཞི་སྦྱོང་བས་ཁྲུ་བཞི། རྣམ་པར་ཐར་པ་བརྒྱང་དང་ལྡན་པས་ཁྲུ་བརྒྱང་དོ། །རབ་འབྲི་ནག་དེ་རྣམས་ཀྱང་འབངས་དང་བློན་པོ་དང༌། རྒྱལ་པོ་གསུམ་གྱི་ཚད་དུ་ཡང་གསུངས་སོ། །ཆུང་མཆོག་བར་མ་རྣམས་ལ་གཅིག །ཅེས་པ་ནི། ཆུང་བ་ནི་ཁྲུ་དོ། མཆོག་ནི་ཁྲུ་བརྒྱང་དོ། །བར་མ་ནི་ཁྲུ་བཞིའོ། །དེ་རྣམས་གང་ལྕོགས་པ་ཅིག་ལ་དཀྱིལ་འཁོར་བྲི་ཞིང་རྒྱས་པའི་ལས་བྱ་ཞེས་པའི་ཐ་ཚིག་གོ །སྟེགས་བུ་བརྩེགས་པའི་དཀྱིལ་འཁོར་ནི། །ཞེས་པ་ནི། སྟེགས་བུ་ནི་ས་སྟེགས་སོ། །དཀྱིལ་ནི་དབུས་ཀྱི་ཕོ་བྲང་ཐབ་ཁུང་དུ་སྨོས་པའོ། །འཁོར་ནི་དེའི་ཕྱི་ཚད་དོ། །ཐབ་ཁུང་ཁྲུ་དོ། ཕྱི་ཚད་ནི་ཁྲུ་བརྒྱང་དེ། ཕྲིན་ལས་རྣམ་པ་བཞི་དང༌། ཚད་མེད་པ་བཞི་སྟེ་བརྒྱང་དང་ལྡན་པའི་རྟགས་སོ། །ཐབ་ཁུང་བར་མ་ཁྲུ་བཞིའི་ཕྱི་ཚད་ནི་ཁྲུ་བཅུ་གཉིས་ཏེ། མཛད་པ་བཅུ་གཉིས་ཀྱི་ཚུལ་གྱིས་རྟེན་གྱིས་རྟེན་འབྲེལ་བཅུ་གཉིས་ལྡོག་པའི་དོན་ཏོ། །རབ་ཁྲུ་བརྒྱང་ཀྱི་ཕྱི་ཚད་ནི་ཁྲུ་བཅུ་དྲུག་སྟེ། དམྱལ་བའི་ཁམས་བཅུ་དྲུག་གི་གཉེན་པོ་ཡེ་ཤེས་བཅུ་དྲུག་གིས་སྦྱོང་བའི་དོན་ཏོ། །མུ་ཁྱུད་སོར་བརྒྱང་བཅུ་དྲུག་གམ། །སུམ་ཅུ་གཉིས་སུ་བྱས་པས་ཡིན། །ཞེས་པ་ནི། ཐབ་ཀྱི་ཁ་ཁྱེར་ཆུང་བའི་ཚད་ནི་སོར་བརྒྱང་དེ། རྣམ་པར་ཐར་པ་བརྒྱང་དང་ལྡན་པའོ། །འབྲི་ནག་གི་མུ་ཁྱུད་སོར་བཅུ་དྲུག་ནི་སེམས་དཔའ་བཅུ་དྲུག་གི་དོན་ཏོ། །མཆོག་གི་མུ་ཁྱུད་ནི་སོར་སུམ་ཅུ་རྩ་གཉིས་ཏེ། གནས་གཞན་སུམ་ཅུ་རྩ་གཉིས་ནི་ཤེས་པ་སུམ་ཅུ་རྩ་གཉིས་ཀྱིས་སྦྱོང་བའི་ཐ་ཚིག་གོ །ཕྱི་ཡི་དཀྱིལ་འཁོར་དེ་ཡི་ཕྱེད། །ཞེས་པ་ནི། ཕྱི་ནི་མུ་ཁྱུད་ཀྱི་ཕྱི་རོལ་ལོ། །འཁོར་ལོ་ནི་སྣམ་བུའི་ཕྱི་རོལ་དུ་བསྐོར་བའོ། །དེའི་ཕྱེད་ནི་ཐབ་ཁུང་
དེའི་ཕྱེད་ཙམ་ཅིག་ཕྱི་རོལ་སྣམ་བུ་ལ་ཕྱི་རོལ་གཅད་པའི་ཐ་ཚིག་གོ །དཀྱིལ་འཁོར་དབུས་སུ་རིན་ཆེན་དང༌། །ཞེས་པ་ནི། དབུས་ནི་སྤྱང་བའི་ཕོ་བྲང་སྟེ། རིན་པོ་ཆེ་འབར་བ་གསེར་གྱི་འོད་འདྲ་བ་བྲིའོ། །ཕྱི་རོལ་གྱི་མུ་རན་ལ་ཡང་པདྨ་དང་རིན་པོ་ཆེ་སྤེལ་མ་བྲིའོ། །དེ་ཡི་དབུས་སུ་བརྐོ་བ་ནི། །ལེགས་པར་བརྟགས་ཏེ་ཕྱེད་ཀྱི་ཚད། །ཅེས་པ་ནི། དེའི་འོག་ཏུ་ཞེས་གསུངས་པ་ནི་སྟེགས་བུའོ། །དབུས་ནི་ཐབ་ཁུང་ངོ༌། །ལེགས་པར་ནི་ཐིག་ཚད་ལ་དབབ་པའི་ཐ་ཚིག་གོ །བལྟས་པ་ནི་གཟུ་ལུམས་མི་བྱ་བའི་ཐ་ཚིག་གོ །ཕྱེད་ཀྱི་ཚད་ནི་ཐབ་ཁུང་གི་ཕྱེད་ཚད་གཅིག་ནང་དུ་བརྐོ་བའོ། །ཁྲུ་བཞི་པའམ་ཁྲུ་བརྒྱང་པ། །ཡང་ན་དཔལ་སྐྱེས་པདྨ་འདྲ། །ཞེས་པ་ནི། ཕྱིའི་དབྱིབས་ཏེ་ཡེ་ཤེས་བཞིའི་རྟོགས་པའི་ཡུལ་ཡིན་པས་ཕྱི་རོལ་ཁྲུ་བཞི་པར་བྱའོ། །དེ་ཐབ་ཁུང་ཆུང་ཚད་ཀྱི་ཕྱི་རོལ་གྱི་དབྱིབས་སོ། །ཐབ་ཁུང་འབྲི་ནག་གི་དབྱིབས་ནི་ཟུར་བརྒྱང་པར་བྱ་སྟེ། ཚད་མེད་པ་བཞི་དང་བསྡུ་བའི་དངོས་པོ་བཞིས་འགྲོ་བའི་དོན་མཛད་པའི་རྟགས་སོ། །ཡང་ན་ནི་ཆུང་འབྲི་ནག་གཉིས་ལ་བསྣན་པའི་རྟགས་སོ། །དཔལ་སྐྱེས་ནི་བསོད་ནམས་རབ་ཀྱིས་བྱ་བའི་ཐ་ཚིག་གོ །པདྨ་འདྲ་ནི་པདྨ་གྱེས་པ་ལྟར་ཆེ་བའི་དབྱིབས་ཟླུམ་པོར་བྱ་བའི་ཐ་ཚིག་གོ །ཚོན་གྱིས་བྲིས་པའི་ཐབ་ནི་བརྡ་ཕྲད་སླའོ། །རིམ་གཉིས་ཡང་ན་རིམ་བཞིའམ། །ཡང་ན་རིམ་པ་བརྒྱང་ལྡན་པར། །ཞེས་པ་ནི། རིམ་གཉིས་ནི་འཇིག་རྟེན་པ་དང༌། འཇིག་རྟེན་ལས་འདས་པའི་སྣམ་བུ་གཉིས་སུ་བྱའོ། །ཡང་ན་ནི་བསྣན་ཏེ། རིམ་པ་བཞིར་སྨོས་ཏེ། འཇིག་རྟེན་པའི་སྣམ་བུ་གཉིས་དང༌། འཇིག་རྟེན་ལས་འདས་པའི་གཉིས་ཏེ་བཞིའོ། །རིམ་པ་བརྒྱང་ནི་མེ་རི་དང་རྡོ་རྗེ་ར་བ་དང༌། མཆོད་སྣམ་དང༌། སྒོ་སྣམ་བཞི་སྟེ། བརྒྱང་དང་ལྡན་པར་བྱ་ཞེས་སྨོས་ཏེ། སོ་སོའི་ཕྱག་མཚན་དང་ལྡན་པར་བྲིའོ། །རྒྱན་ཆས་ནི་བརྡ་ཕྲད་སླའོ། །ལས་དང་བྱ་བའི་ཐབས་ནི། བྱང་ཕྱོགས་ཁ་བལྟས་འདུག་ནས་ནི། །འཇིག་རྟེན་གསུམ་འདུལ་ཁྲོ་བོ་ནི། །ཞེས་པ་ནི། གནོད་སྤྱིན་གྱི་གཏེར་སྒྲུབ་པའི་ཕྱིར་བྱང་ཕྱོགས་སུ་ཁ་ལྟའོ། །དངོས་གྲུབ་མི་ཉམས་པར་བྱ་བའི་ཕྱིར་ནི་འདུག་ནས་ཞེས་སྨོས་
སོ། །འཇིག་རྟེན་གསུམ་འདུལ་ཁྲོ་བོ་ནི། །ཞེས་པ་ནི། འཇིག་རྟེན་གསུམ་ནི་བདེ་བ་བསྒྲུབ་པའི་ཕྱིར་ན། ཏྲཻ་ལོ་ཀྱ་བི་ཛ་ཡའི་ཁྲོ་བོའི་ཏིང་ངེ་འཛིན་དུ་སྒོམ་པ་སྨོས་སོ། །ཉིད་ཀྱི་རྣལ་འབྱོར་རྗེས་དྲན་ཞིང༌། །ལྷ་ཡི་ཡིད་བཞིན་ནོར་རྒྱལ་མཚན། །ཞེས་པ་ནི། ཉིད་ཀྱི་ནི་ལྷའོ། །དོན་དམ་པར་ཆོས་ཉིད་དང་ཡེ་ཤེས་རྣལ་འབྱོར་རྗེས་སུ་དྲན་པ་དང༌། ཀུན་རྫོབ་ཏུ་ལྷ་ཡེ་ཤེས་སེམས་དཔའ་དང༌། བདག་དམ་ཚིག་སེམས་དཔའ་རྗེས་སུ་དྲན་ཞིང་སྒོམ་པས་ལྷའི་ཡིད་བཞིན་གྱི་བདེ་བའོ། །ནོར་དང་རྒྱལ་མཚན་ནི་བདུད་ལས་རྒྱལ་བའི་རྟགས་ཐོབ་པའོ། །གཏེར་སྒྲུབ་པའི་ཡོན་ཏན་ནི་བདེ་སྟེ་བརྡ་ཕྲད་སླའོ། །ད་ནི་གང་བྱ་བའི་དམིགས་སྟོན་ཏེ། རྒྱལ་བར་བྱ་ཕྱིར་དེ་མིང་ནས། །ཞེས་པ་ནི། གང་ནོར་ཟད་པ་དེ་ནོར་སྤེལ་བའི་ཕྱིར། འཇིག་རྟེན་གསུམ་འདུལ་ལ་སོགས་པ་ལྷ་སོ་སོའི་སྔགས་དང༌། དེའི་མིང་སྤེལ་ལ་པུཥྚིཾ་ཀུ་རུ་ཞེས་གྲངས་ཀྱི་བསྙེན་པ་གཞུང་བཞིན་དུ་བྱས་ན་འགྲུབ་ཅེའོ། །སྤྱིན་སྲེག་བྱ་བའི་བསམ་རྒྱུད་ཡན་ལག་དང་བཅས་པ་དང༌། ཡམ་ཤིང་ཆོ་ག་དང་བཅས་པ་དང༌། མེ་ལྷ་སྤྱན་དྲངས་ནས་སྤྱིན་སྲེག་བྱ་བ་དང༌། སྔགས་མཁན་ཁོར་བོའི་ཏིང་ངེ་འཛིན་དུ་བཞུགས་ནས་སྤྱིན་སྲེག་དང༌། གཉེན་པོའི་ཡོན་ཏན་ནི་བརྡ་ཕྲད་སླའོ། །རྒྱས་པའི་ལས་མདོར་བསྡུས་པ་བཤད་ཟིན་ཏོ། །ད་ནི་དབང་གི་ལས་སྟོན་ཏེ། དབང་ནི་ཆགས་པའི་སེམས་ཀྱིས་སམ། ཡེ་ཤེས་ཀྱིས་ཆོས་ཉིད་ལ་དབང་སྒྱུར་བ་དང༌། ཐུགས་རྗེས་འགྲོ་བ་ལ་དབང་སྒྱུར་བས་དབང་ངོ༌། །དེ་མི་གཏོང་ཞིང་འཛིན་པས་ན་ཆགས་པའོ། །དེ་གཉིས་སུ་མེད་པར་སྒོམ་དགོས་པས་ན། སེམས་ཀྱིས་སམ་ཞེས་གསུངས་ཏེ། དེ་ནི་ཆགས་པའི་ཡུལ་ཆགས་པའི་སེམས་ཀྱིས་བྱ་བའི་ཐ་ཚིག་གོ །གང་དུ་བྱ་བའི་གནས་ནི་བདེ་སྟེ་བརྡ་ཕྲད་སླའོ། །ད་ནི་ཇི་ལྟར་བྱ་བའི་ཐབས་སྟོན་ཏེ། དེར་ནི་སྟེགས་བུ་ཁྲུ་བརྒྱང་དམ། དེ་ལྟར་བཅུ་གཉིས་བཅུ་དྲུག་རྣམས། །ཞེས་པ་ནི་དེར་ནི་གཞུང་ནས་འབྱུང་བའི་གནས་སོ། །སྟེགས་བུ་ནི་ས་སྟེགས་སོ། །ཁྲུ་བརྒྱང་ནི་ཧོམ་ཁུང་ཆུང་བའི་ཕྱི་ཚད་དེ། ལྟ་བ་ལོག་པ་བརྒྱང་འདུལ་བའི་གཉེན་པོར་གསུངས་སོ། །བཅུ་གཉིས་ནི་ཧོམ་ཁུང་འབྲི་ནག་
གི་ཕྱི་ཚད་དེ། རྟེན་འབྲེལ་བཅུ་གཉིས་ལུགས་ལས་བཟློག་པའི་རྟགས་སོ། །བཅུ་དྲུག་ནི་ཧོམ་ཁུང་རབ་ཀྱི་ཕྱིའི་ཚད་དེ། སྡུག་བསྔལ་རབ་ཀྱི་མཐར་ཐུག་པ། དམྱལ་ཁམས་བཅུ་དྲུག་ཐུགས་རྗེས་དབང་དུ་སྡུད་ཅིང་འདུལ་བའི་གཉེན་པོར་གསུངས་སོ། །ཧོམ་ཁུད་དཀྱིལ་འཁོར་བྱ་བ་ནི། །ཁྲུ་གང་ཡང་ན་ཁྲུ་དོའམ། །དེ་ལྟར་ཁྲུ་ནི་བཞི་པར་བྱ། །ཞེས་པ་ནི། ཧོམ་ཁུང་གི་དབུས་ཀྱི་ཕོ་བྲང་སྟེ་ཐབ་ཁུང་ངོ༌། །དཀྱིལ་ནི་ཚད་མ་ནོར་བའི་རྟགས་སོ། །འཁོར་ནི་ཕྱིའི་ཚད་གོང་མ་ལ་བྱ་ཞེས་པའི་ཐ་ཚིག་གོ །ཁྲུ་གང་ནི་སྟེགས་བུ་ཁྲུ་བརྒྱང་ཀྱི་ཐབ་ཁུང་སྟེ། ཆོས་ཉིད་དུ་ལ་འདའ་བས་ཁྲུ་གང་ངོ༌། །ཁྲུ་དོ་ནི་བཅུ་ཁྲུ་བཅུ་གཉིས་ཀྱི་ཐབ་ཁུང་གི་ཚད་དེ། ཐབས་དང་ཤེས་རབ་གཉིས་སུ་མེད་པས་མཐའ་གཉིས་ལ་དབང་སྒྱུར་བའི་རྟགས་སུ་ཁྲུ་དོར་བ་སྟན་ཏོ། །ཁྲུ་བཞི་ནི་ཁྲུ་བཅུ་དྲུག་གི་ཐབ་ཁུང་གི་ཚད་དེ། བསྡུ་བའི་དངོས་པོ་བཞིས་དམྱལ་ཁམས་བཅུ་དྲུག་སྡུད་པས་ན་ཁྲུ་བཞི་སྨོས་སོ། །གཞུ་འདྲ་བ་དང་པདྨ་དང༌། །ཞེས་པ་ནི། ཞི་གནས་གཞུ་འདྲ་བས་དབང་དུ་སྡུད་པའི་དོན་ཆེད་དུ་ནི་གཞུའི་དབྱིབས་འདྲ་བར་སྨོས་སོ། །ཆགས་པའི་ཚུལ་གྱིས་ཆགས་པ་དབང་དུ་སྡུད་པའི་དོན་ཆེད་དུ་པདྨ་འདྲ་སྟེ། འདབ་མ་མཁལ་ཡོན་དུ་འདུག་པས་དེའི་ཚུལ་དུ་བརྐོའོ། །ཐུགས་རྩེ་གཅིག་པའི་སྒོ་ནས་དབང་དུ་སྡུད་པའི་དོན་ཆེད་དུ། ཡང་ན་རྡོ་རྗེ་འདྲ་བར་བྱ། །ཞེས་པ་ནི། རྡོ་རྗེ་རྩེ་གཅིག་པའི་ཚུལ་དུ་བརྐོ་སྟེ། སྣ་གཉིས་ཕྲ་ལ་དཀྱིལ་སྦོམ་ལ་འབུར་བའི་ཐ་ཚིག་གོ །མདའ་འདྲ་ཟླ་བ་ཁམ་པའམ། །ཞེས་པ་ནི། ལྷག་མཐོང་མདའ་དང་འདྲ་བས་དོན་དབང་དུ་སྡུད་ཅིང་འབིགས་པའི་ཕྱིར་ན་མདའ་ཞེས་སྨོས་སོ། །མདེའུ་སྟེའུ་ཁ་ལྟར་སོག་ཀར་ཐབ་ཁུང་བརྐོ་བའི་ཐ་ཚིག་གོ །ཟླ་བ་ཡར་གྱི་ངོ་བཞིན་དུ་ཐུགས་རྗེས་འགྲོ་བའི་དོན་ལ་འཕེལ་ཞིང་དབང་སྡུད་པའི་དོན་ཆེད་དུ་ཟླ་གམ་འདྲ་སྟེ་ཚེས་བརྒྱང་པའི་ཚུལ་ལོ། །ནང་གི་ཐབ་ཁུང་བཞིན་དུ་ཕྱི་རོལ་གྱི་ཚད་ཀྱང་དེ་བཞིན་དུ་བྱའོ། །རྣམ་པ་གཅིག་ཏུ་ན་དེ་རྣམས་ཀྱང་རྒྱན་ཆས་སུ་ཤེས་པར་བྱ་སྟེ། དེ་ཅིའི་ཕྱིར་ཞེ་ན། ཐབ་ཁུང་ནང་དུ་པདྨ་བྲི། །ཞེས་པ་ནི། ཐབ་ཁུང་ནང་དུ་པདྨ་འདབ་མ་བརྒྱང་པ་ཅིག་བྲི་སྟེ། པདྨ་དང་ཞེས་པར་
སྤྱར་རོ། །དེའི་སྟེང་དུ་མདའ་བཅས་གཞུ་སྟེ། པདྨ་དེའི་སྟེང་དུ་མདའ་སྒྲོ་ཤར་དུ་བཅུག་པ་མདེའུ་རྩེ་ནུབ་ཏུ་བལྟ་བ་བྲི་སྟེ། གཞུ་འདྲ་དང༌། མདའ་དང་ཞེས་པ་དང་སྤྱར་རོ། །གཞུ་ཡི་དབུས་སུ་རྡོ་རྗེ་ཉིད། །ཅེས་པ་ནི། མདའི་སྟོང་རྡོ་རྗེ་ལྟ་བུ་ཉིད་དུ་ལྡན་པས་ན། ཡང་ན་རྡོ་རྗེ་འདྲ་བ་དང་སྤྱར་རོ། །ཟླ་བ་ནི་ཕྱིའི་གཟུགས་སུ་ཤེས་པར་བྱ། ཕྱི་མ་ནི་རྒྱན་ཆས་ཏེ། འོག་གི་དོན་གོང་དུ་སྤྱར་ཞིང་ཤེས་པར་བྱའོ། །མདའ་དང་འདྲ་ཞེས་པ་ནི་རྒྱན་ཆས་དེ་ལྟ་བུའི་ཐ་ཚིག་ཏུ་བྲི་བའི་ཕྱིར་རོ། །ཞེང་དུ་ཆུ་ཡི་ཕྱེད་ཀྱི་ཚད། །ཅེས་པ་ནི། ཞེང་ནི་གློའི་དཀྱིལ་ཚད་དོ། །ཆུ་ནི་ཟླ་གམ་གྱི་སྣ་རེ་རེའི་ཚད་དོ། །ཕྱེད་ཚད་ནི་སྣའི་ཕྱེད་ཚད་གཅིག་ཞེང་དུ་བྱ་བའི་ཐ་ཚིག་གོ །ཞེང་གི་ཚད་ཀྱི་ཕྱེད་ཚད་དུ། །ཧོམ་ཁུང་ཟབས་སུ་བརྐོ་བར་བྱ། །ཞེས་པ་ནི་ཞེང་ཕྱེད་མར་བཏང་བའི་ཕྱེད་ཚད་གཅིག་ནང་དུ་ཟབས་སུ་བརྐོ་བའི་ཐ་ཚིག་གོ །མུ་ཁྱུད་སོར་ནི་བཞི་པར་བྱ། །ཉིས་འགྱུར་བ་ནི་ཉིས་འགྱུར་བྱ། །ཞེས་པ་ནི། མུ་ཁྱུད་ནི་ཁ་ཁྱེར་རོ། །སོར་བཞི་ནི་ཡེ་ཤེས་བཞིའི་རང་བཞིན་ཏེ། ཁྲུ་བརྒྱང་པའི་ཁ་ཁྱེར་རོ། །དེ་ནི་ཆུང་ཚད་དོ། །ཉིས་འགྱུར་ནི་འབྲི་ནག་ཁྲུ་བཅུ་གཉིས་པའི་ཁ་ཁྱེར་གྱི་ཚད་དོ། །སོར་བཞི་ཉིས་འགྱུར་དུ་བྱ་ནི་སོར་བརྒྱང་དེ། འཕགས་པའི་ལམ་ཡན་ལག་བརྒྱང་པ་ལ་དགོད་པའི་རྟགས་སོ། །ཉིས་འགྱུར་བྱ་ནི་ཁྲུ་བཅུ་དྲུག་པ་རབ་ཀྱི་ཁ་ཁྱེར་གྱི་ཚད་དེ། བརྒྱང་ལས་ཉིས་འགྱུར་རོ། །བཅུ་དྲུག་སྟེ་སེམས་དཔའ་བཅུ་དྲུག་གིས་འགྲོ་བའི་དོན་རྒྱས་པར་མཛད་པའི་རྟགས་སོ། །ཧོམ་བྱ་བའི་ཐབས་བ་སྟན་ཏོ། །ཡམ་ཤིང་དང༌། མཆོད་རྫས་དང༌། ཁ་དོག་དང༌། ལྷ་བྲི་བའི་ཐབས་དང༌། སྔགས་མཁན་ཁ་གང་ཕྱོགས་སུ་ལྟ་བ་ནི་བརྡ་ཕྲད་སླའོ། །ད་ནི་བསམ་རྒྱུད་བ་སྟན་ཏེ། པདྨ་དམར་པོའི་གདན་བསམ་པར། །རབ་ཆགས་ཕྱག་ན་པདྨ་བསྣམས། །ཞེས་པ་ནི། པདྨ་ནི་ཆགས་པའི་དོན་ཏེ། ཆགས་པའི་ཚུལ་གྱིས་དོན་མཛད་པའོ། །དམར་བ་ནི་ཁ་དོག་སྟེ་མ་གོས་པའི་ཐ་ཚིག་གོ །གདན་ནི་བཞུགས་པ་སྟེ། ཐུགས་རྗེའི་རྟགས་སོ། །བསམ་པ་ལ་ནི་སྤྱན་རས་གཟིགས་དབང་ཕྱུག་སྐུ་མདོག་དམར་བ་དབུ་ལ་ཚེ་དཔག་མེད་བཞུགས་པར་བསྒོམ་ཞེའོ། །རབ་ནི་ཡེ་ཤེས་ཏེ་གཟུང་འཛིན་སྤངས་
བའི་རབ་བོ། །ཆགས་ནི་ཐུགས་རྗེ་སྟེ། འཁོར་བའི་གནས་ན་བཞུགས་པའོ། །ཕྱག་ནི་གཡས་སོ། །བསམ་པ་ལ་པདྨ་ནི་རང་རྟགས་ཐུགས་ཀ་ན་འཛིན་པའི་ཐ་ཚིག་གོ །གཡོན་དུ་རྡོ་རྗེ་ཆགས་པ་ལ། །ཞེས་པ་ནི། བདག་ཉིད་ལས་ཀྱི་ལྷ་དེ་ལྟར་བསྒོམས་པའི་གཡོན་དུ་རྡོ་རྗེ་ཆགས་པ་ཞི་གནས་དང་ལྷག་མཐོང་གི་མདའ་གཞུ་འགེངས་པར་བསྒོམ་མོ། །བདག་གི་གཡས་ཕྱོགས་སུ་ཀུན་དུ་བཟང་པོ་བདེ་བ་ཆེན་པོ་རྡོ་རྗེ་སེམས་དཔའ་སྟེ་ཕྱག་ན་རྡོ་རྗེ་ཐུགས་ཀར་འཛིན་པར་བསྒོམ་མོ། །བདག་གི་དབུས་སུ་ནི། བཛྲ་ཏཱི་ཀྵྞa་དྷཱིཿ་རྨོངས་བྱེད་མ་སྟེ། སྐུ་མདོག་དམར་མོ་ཕྱག་ན་ཆུ་སྲིན་གྱི་རྒྱལ་མཚན་འཛིན་པ་སྒོམ་མོ། །བཛྲ་ཀཱི་ལི་ཀཱི་ལི་ནི། སྐུ་མདོག་དམར་མོ་ཕྱག་ན་མདའ་གཞུ་འགེངས་པ་དག་དང༌། རྡོ་རྗེ་ཆགས་པ་བསྒོམ་པའི་བར་དུ་བསྒོམ་མོ། །བདག་གི་རྒྱབ་བཛྲ་ལཱ་སྐྱེ་སྐུ་མདོག་དམར་མོ་ཕྱག་ནི་འཁྱུད་པའི་ཚུལ་དུ་སྒོམ་མོ། །ཐབ་ཁུང་དུ་མེ་ལྷ་དམ་ཚིག་སེམས་དཔའ་སྐུ་མདོག་དམར་སེར་དུ་འདུག་པ། ཕྱག་རྣམ་པ་བཞི་དང་ལྡན་ཏེ། གཡས་དང་པོ་མདའ་འཛིན་པ། གཡོན་དང་པོ་གཞུ་ཐོགས་ནས་ལྟོང་རྒྱུད་སྤྱར་ཏེ། གཡས་གཡོན་ཐ་མ་པདྨ་བསྣམས་པར་བསྒོམས་ཏེ། བདག་ཉིད་དེ་ལྟར་ལས་ཀྱི་ལྷའི་ཏིང་ངེ་འཛིན་དུ་ཞུགས་ནས། ཛཿ་ལྕགས་ཀྱུས་ནི་ཐུགས་དམ་བསྐུལ། ཧཱུཾ་ཞགས་པས་ནི་མདུན་གྱི་བར་སྣང་ལ་སྤྱན་དྲངས། བཾ་ལྕགས་སྒྲོག་གིས་གཉིས་སུ་མེད་པར་སྤྱན་དྲངས། ཧོཿདྲིལ་བུས་བརྟན་པར་བཞུགས། དེ་ནས་ལྷ་ཡེ་ཤེས་སེམས་དཔའ་ལ་ཆགས་བའི་ཚུལ་གྱིས་མཆོད་པ་འབུལ་བའི་ཕྱིར། བདག་གི་སྤྱི་བོས་ཞབས་ཀྱི་དྲུང་དུ་གཏུགས་ལ། ཏིང་ངེ་འཛིན་གཉིས་སུ་མེད་པའི་སྦྱོར་བ་ལ་སྙོམས་པར་ཞུགས་ཏེ། ལས་གང་བྱེད་པའི་ལྷ་དེའི་རྩ་བའི་སྔགས་དང༌། ལས་བྱ་བའི་དམིགས་པ་དེའི་མིང་སྤེལ་ཞིང་རྩ་བའི་སྔགས་དམ་བཅའ་བ་བཞིན་བ་ཤཾ་ཀུ་རུ་ཞེས་བརྗོད་ཅིང། སྤྱིན་སྲེག་བྱས་ན་ཐམས་ཅད་དབང་དུ་འགྱུར་རོ། །དེ་ལྟར་བྱས་པའི་འོག་ཏུ་འཕགས་པ་སླར་གཤེགས་སུ་གསོལ་བ་དང༌། ལུས་སྲུང་བ་ལ་སོགས་པ་ཚུལ་བཞིན་དུ་བྱའོ། །དབང་གི་སྤྱིན་སྲེག་གི་དོན་མདོར་བསྡུས་པ་བ་སྟན་ཟིན་ཏོ། །དཀྱིལ་འཁོར་གྱི་བདག་པོ་ཆེན་པོ་རྒྱུད་ཀྱི་
སྟོན་པ་ལ། འཁོར་འཇིག་རྟེན་པ་རྣམས་ཀྱི་དཀྱིལ་འཁོར་དང༌། སྤྱིན་སྲེག་དང༌། ལས་ཀྱི་བྱེ་བྲག་དང༌། སྔགས་དང་ཕྱག་རྒྱ་ལ་སོགས་པ་ལ་དགའ་ནས་བསྟོད་པ་སྟོན་ཏེ། དེ་ཡང་སྐུ་གསུང་ཐུགས་གསང་བའི་བདག་པོ་མཚན་བརྒྱ་རྩ་བརྒྱང་པས་བསྟོད་པ་བྱེད་དེ། དེ་ལ་ཚིག་བདུན་ཅུའི་ཚིགས་སུ་བཅད་པའི་ཤླཽ་ཀ་ཕྱེད་དང་བཅོ་བརྒྱང་ཡོད་དེ། དེ་ལ་མཚན་བརྒྱ་རྩ་བརྒྱང་དུ་དབྱེ་བ་ནི་མཚན་རེ་རེ་ནས་ཕྱེ་སྟེ་བ་སྟན་པས་ན། འབྲུ་རྣམས་དཀྲོལ་བའི་རིམ་པ་ནས་གྲངས་བརྒྱ་རྩ་བརྒྱང་དུ་ཕྱེ་སྟེ་བ་སྟན་པར་ཤེས་པར་བྱའོ། །ད་ནི་སྟོང་པའི་དོན་སྟོན་ཏེ། དེ་ནས་བརྒྱ་བྱིན་ཚངས་པ་ལ་སོགས་ཞེས་འབྱུང་བས་ནི། དེ་ནི་གོང་མའི་དབང་གིས་དཀྱིལ་འཁོར་གྱི་མཇུག་སྡུད་ལ། ནས་ནི་འོག་གི་བསྟོད་བའི་མགོ་འདྲེན་ནོ། །བརྒྱ་བྱིན་དང་ཚངས་པ་སྨོས་པ་ནི། འཁོར་གྱི་གཙོ་བོ་ཡིན་པའི་ཕྱིར་སྨོས་སོ། །བརྒྱ་བྱིན་ནི་ཡོན་བདག་ཡིན་པས་སྣལ་སྨོས་སོ། །ཚངས་པ་ནི་ཆོས་ཀྱི་འཁོར་ལོ་བསྐུལ་བ་ཡིན་པས་དེའི་འོག་ཏུ་སྨོས་སོ། །སོགས་ཀྱི་ཁོངས་སུ་ནི་བརྒྱ་བྱིན་གྱི་འཁོར་དུ་འདོད་ཁམས་ན་གནས་པ་རྣམས་བསྡུའོ། །ཚངས་པའི་འཁོར་དུ་ནི་གཟུགས་ཁམས་ན་གནས་པ་རྣམས་སྡུད་བས་ན་ལ་སོགས་ལྷ་ཞེས་བྱའོ། །ཕྱག་འཚལ་ཡང་དང་ཡང་དུ་ནི། །ཞེས་པ་ནི། དེ་རྣམས་ཀྱི་ལུས་ཀྱིས་ནི་ཕྱག་དང་སྐོར་བ་བྱེད། ངག་གིས་ཚིག་སྙན་པའི་སྒོ་ནས་མཚན་བརྒྱ་རྩ་བརྒྱང་པའི་སྒོ་ནས་བསྟོད་དོ། །སེམས་ཀྱིས་ནི་ཡོན་ཏན་གྱི་སྒོ་ནས་དམིགས་ཏེ་དགའ་བ་བསྐྱེད་ནས་གནས་པའི་དོན་ཏོ། །རིན་ཆེན་བདུག་པ་སོགས་མཆོག་གིས། །ཞེས་པ་ནི། རིན་པོ་ཆེ་རྣམ་པ་སྣ་ཚོགས་པ་རྣམས་ཀྱི་གདུགས་ཏེ། རང་བཞིན་གྱི་བཟོ་བོའི་བསོད་ནམས་ཀྱི་ཁྱད་པར་གྱིས་བྱས་པ་དང༌། ལྷའི་ཏིང་ངེ་འཛིན་གྱི་ངོ་བོ་ལས་སྤྲུལ་པ་ཤིན་ཏུ་མཛེས་ཁྱབ་ནམ་མཁའ་དང་མཉམ་པ་རྣམ་པར་སྤྲས་ཤིང་གྲུབ་པས་ན་གདུགས་མཆོག་གོ །མཆོད་པ་སྣ་ཚོགས་བྱས་ནས་ཀྱང༌། །ཞེས་པ་ནི། མཆོད་པ་ཡང་རྣམ་པ་གསུམ་སྟེ། ཀུན་རྫོབ་རྫས་ཀྱི་མཆོད་པ་སྣ་ཚོགས་པ་དང༌། འདོད་པའི་ཡོན་ཏན་ཡེ་ཤེས་ཀྱི་ལྷ་མོའི་མཆོད་པ་སྣ་ཚོགས་པ་དང༌། སྒྲུབ་པ་རྩེ་གཅིག་པ་དད་པའི་མཆོད་པ་སྣ་ཚོགས་པ་དང་ལྡན་པའི་སྒོ་ནས་བྱེད་པའོ། །
ཕྱག་ན་རྡོ་རྗེ་རྒྱལ་བའི་སྤྱན། །ཞེས་པ་ནི། ཡེ་ཤེས་ཀྱི་རྟགས་ཕྱག་ན་རྡོ་རྗེ་བསྣམས་པས་ཕྱག་ན་རྡོ་རྗེའོ། །ཉོན་མོངས་པ་ལས་རྒྱལ་པས་ན་རྒྱལ་ཞེས་སོ། །ཡེ་ཤེས་ཀྱི་ཆོས་ཉིད་ཀྱི་དོན་ལ་གཟིགས་པས་ན་སྤྱན་ནོ། །རྣམ་གཅིག་ཏུ་ནི་སྤྱི་དང་རང་གི་མཚན་ཉིད་མ་འདྲེས་བར་གཟིགས་ཞེས་བྱའོ། །དགའ་བའི་བསམ་པས་སྟོད་བྱེད་པ། །ཞེས་པ་ནི། དགའ་བ་ནི་ཡིད་དེ་ཆོས་བ་སྟན་པ་དང༌། ཡོན་ཏན་གྱི་ཁྱད་པར་ལ་དགའ་བའོ། །བསམ་པ་ནི་ཏིང་ངེ་འཛིན་ཏེ་རྩེ་གཅིག་པའི་ཏིང་ངེ་འཛིན་གྱི་སྒོ་ནས་བསམ་པའོ། །བསྟོད་པ་ནི་ཡོན་ཏན་ཏེ། ཆེ་བའི་ཡོན་ཏན་བརྒྱ་རྩ་བརྒྱང་ཀྱི་སྒོ་ནས་སྟོད་པ་བྱེད་པའོ། །ད་ནི་མཚན་བརྒྱ་རྩ་བརྒྱང་ཀྱི་དོན་འབྲུ་གཉེར་ཞིབ་པར་བ་སྟན་ཏེ། སངས་རྒྱས་ཀུན་པས་སྔར་སངས་རྒྱས། །ཞེས་པ་ནི། སངས་རྒྱས་ནི་དུས་གསུམ་གྱི་བདེ་བར་གཤེགས་པ་ལ་བྱ་སྟེ། དེ་ཀུན་བས་སྔར་སངས་རྒྱས་ཏེ། ཕྱག་ན་རྡོ་རྗེ་ནི་ཐུགས་ཡང་དག་པའི་ཡེ་ཤེས་ཏེ། དེ་བཞིན་གཤེགས་པ་རྣམས་མངོན་པར་རྫོགས་པར་སངས་རྒྱས་པ་ཡང༌། ཐུགས་རྡོ་རྗེ་ལྟ་ཕུ་ལ་བརྟེན་ནས་སངས་རྒྱས་པར་བྱེད་པས་ན། འབྲས་བུའི་མིང་ལ་བཏགས་པས་ན། །སངས་རྒྱས་ཀུན་བས་སྔར་སངས་རྒྱས། །ཞེས་བྱའོ། །མི་ཤེས་དྲི་མ་ཀུན་བཅོམ་པ། །ཞེས་པ་ནི། མི་ཤེས་པ་མ་རིག་པ་སྟེ། རྒྱུ་དང་འབྲས་བུའི་དོན་མི་ཤེས་པའོ། །དྲི་མ་ནི་སེམས་ལ་བག་ཆགས་སྒོམ་པར་བྱེད་པས་ན། སེམས་རྨོངས་བར་བྱེད་པའི་དྲི་མར་གྱུར་པས་ན་དྲི་མའོ། །ཀུན་བཅོམ་ནི་མོས་པ་སྤྱོད་པའི་སྐབས་སུ་དེས་གཟུང་འཛིན་དུ་གྱུར་པས་ཏེ། སོ་སོའི་ཀུན་དུ་རྟོག་པའི་ཤེས་རབ་ཀྱིས་བཅོམ། མཐོང་བའི་ལམ་དང་བསྒོམ་པའི་ལམ་དུ་ཉོན་མོངས་པ་སྟེ། ཆོས་དང་གང་ཟག་ལ་བདག་མེད་པའི་ཡེ་ཤེས་ཀྱིས་བཅོམ་པའི་དོན་ཏོ། །རྡོ་རྗེ་ཞེས་པ་ནི། དཔེར་ན་རྡོ་རྗེས་ཐམས་ཅད་འཇོམས་པ་དང་འདྲ་བས་ན་ཐུགས་མཁྱེན་པའི་ཡེ་ཤེས་ཀྱི་དངོས་པོ་དང་མཚན་མ་བཅོམ་པས་ན་རྡོ་རྗེའོ། །རྡོ་རྗེ་འཛིན་རྒྱལ་པོ་ཞེས་པ་ནི། མཁྱེན་པའི་ཐུགས་རྡོ་རྗེ་ལྟ་བུ་ལ་མངའ་བརྙེས་པས་ན། རྡོ་རྗེ་འཛིན་རྒྱལ་ནི་མཚན་མ་ཐམས་ཅད་འཇོམས་བས་ན་མཚན་མ་ལས་རྒྱལ་ལོ། །དེ་ནི་རྡོ་རྗེ་འཛིན་རྒྱལ་ལོ། །རྡོ་རྗེ་རྡོ་རྗེ་འཛིན། །ཞེས་པ་ནི། རྡོ་རྗེ་གསུམ་སྨོས་པ་ནི། སྐུ་རྡོ་རྗེ་
ལྟར་སྲ་བ། ཐུགས་རྡོ་རྗེ་ལྟར་མི་འགྱུར་བ། གསུང་རྡོ་རྗེ་ལྟར་བདེན་པའི་ཚིག་མི་སླུའོ། །འཛིན་ནི་སྐུ་གསུང་ཐུགས་རྡོ་རྗེ་ལྟ་བུ་ལས་མི་འདའ་བར་འཛིན་པའོ། །རྡོ་རྗེ་སྐུ་སྟེ་ཞེས་པ་ནི་ཆོས་ཀྱི་སྐུ་རྡོ་རྗེ་ལྟར་འདུས་མ་བྱས་པས་མཚན་མས་མི་འགྱུར་བའི་ཕྱིར་སྨོས་སོ། །སྐུ་ཆེ་བ་ཞེས་པ་ནི་ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་དུ་ལྡན་པའི་སྐུ་སྟེ། དངོས་པོ་ཐམས་ཅད་ཀྱི་གཙོ་བོར་གྱུར་པས་ན་སྐུ་ཆེ་བ་སྨོས་སོ། །རྡོ་རྗེ་ཡན་ལག་ཅེས་པ་ནི་སྤྲུལ་པའི་སྐུ་སྟེ། རྡོ་རྗེ་ལྟ་བུར་མི་འགྱུར་བས་རྡོ་རྗེ་མཆོག་ཡན་ལག་ནི་མང་བའི་དོན་ཏེ། སྤྲུལ་བ་ལས་ཐུགས་རྗེའི་མཐུ་བས་ལྷ་དང་ཀླུ་དང་གནོད་སྤྱིན་དང་མི་ལ་སོགས་པ་ལ་སོ་སོའི་ལག་ན་རྡོ་རྗེ་ཞེས་གྲགས་པའོ། །རྡོ་རྗེ་མཆོག་ནི་ཞེས་པ་ནི་སྐུ་གསུམ་ལ་སྤྱིར་སྤྱར་ཏེ། ཆོས་ཀྱི་སྐུ་ལས་མི་འགྱུར་བའི་རྡོ་རྗེ་མཆོག་གོ །ལོངས་སྤྱོད་རྫོགས་པའི་སྐུ་ནི་མི་ཉམས་པས་རྡོ་རྗེ་སྟེ། ཏིང་ངེ་འཛིན་རྒྱུན་མི་འཆད་པའི་མཆོག་སྟེ་ཐུགས་རྗེ་ཕུན་སུམ་ཚོགས་པས་མཆོག །རྡོ་རྗེ་འབར་བ་ཞེས་བྱ་བ་ནི། རྡོ་རྗེ་ཐུགས་ཏེ་མཚན་མས་མི་འགྱུར་བའོ། །འབར་བ་ནི་ཕྲིན་ལས་ཏེ་འགྲོ་བའི་དོན་དུ་སྤྲུལ་པས་ཉོན་མོངས་པ་ལ་འབར་བའོ། །ཆེར་འབར་བ་ནི་ཐུགས་རྗེ་ཕུན་སུམ་ཚོགས་པ་སྟེ། ཁམས་གསུམ་གྱི་སེམས་ཅན་རྣམས་ཀྱི་ལས་དང་ཉོན་མོངས་པ་ལ་ཡེ་ཤེས་ཀྱི་འོད་འབར་བས་མཚན་མ་རྣམས་སྲེག་པར་མཛད་བས་ན་ཆེར་འབར་བའོ། །རྡོ་རྗེ་ཤུགས་ཆེན་ཞེས་པ་ནི་རྣམ་པར་མི་རྟོག་པའི་ཡེ་ཤེས་རྡོ་རྗེ་ལྟ་བུའི་ཤུགས་དང་ལྡན་པས་ནི་ཐུགས་རྗེ་ཕུན་སུམ་ཚོགས་པ་འབྱུང་སྟེ། ཅིའི་ཕྱིར་ཞེ་ན། ཤུགས་ཆེ་བ་ཞེས་སྨོས་བ་ན། རྣམ་པར་མི་རྟོག་པ་ལ་བརྟེན་བའི་སྟོབས་ཀྱིས་དག་པ་འཇིག་རྟེན་པའི་ཡེ་ཤེས་འགྲོ་བའི་དོན་དུ་ཐུགས་རྗེ་སྤྲུལ་པ་སྒྱུ་མ་ལྟར་སྣ་ཚོགས་སུ་སྟོན་པས་ན་འགྲོ་བའི་དོན་བྱེད་པའི་བྱིན་གྱིས་བརླབས་པའི་ཤུགས་དང་ལྡན་པའོ། །དེ་ནི་ཤུགས་ཆེ་བ་སྟེ་རྡོ་རྗེ་ཤུགས་ཆེ་བའོ། །རྡོ་རྗེ་མཚོན་ཆ་ཞེས་པ་ནི་ཐུགས་རྡོ་རྗེ་ལྟར་མི་འགྱུར་བའི་རང་བཞིན་ལས་ཕྲིན་ལས་མཚོན་ཆ་ལྟ་བུས་རྒོལ་བ་རྣམས་འདུལ་བའི་དོན་ཏོ། །མཚོན་ཆ་ཆེ་ཞེས་པ་ནི། དཔེར་ན་མཚོན་གྱིས་གཅོད་པ་དང་འདྲ་བར་ཉོན་མོངས་པ་རྩད་ནས་གཅོད་པའི་དོན་ཆེད་ནི་བདུད་ཀྱི་དམག་འདུལ་བས་ཆེ་བའོ། །ཕྱག་ན་རྡོ་རྗེ་ཕྱག་ཆེན་པོ། །ཞེས་
པ་ནི། ཕྱག་ན་ཡེ་ཤེས་ཀྱི་རྡོ་རྗེ་བསྣམས་ཏེ། ཉོན་མོངས་པ་རྣམས་ཡེ་ཤེས་ཀྱི་ཕྱག་གིས་འབྱིན་པར་མཛད་པས་སམ་འདུལ་བར་མཛད་བས་ཕྱག་རྒྱ་ཆེན་བོའོ། །རྡོ་རྗེ་མདའ་སྟེ་རབ་འབིགས་པ། །ཞེས་པ་ནི། ཐུགས་ལས་རྡོ་རྗེ་ཆགས་པར་སྤྲུལ་ཏེ། ཡེ་ཤེས་རྡོ་རྗེ་ལྟ་བུའི་མདས་ཉོན་མོངས་པ་རྣམས་འབིགས་ཤིང་མེད་པར་མཛད་པའམ། དོན་མཐོང་བར་མཛད་པའི་ཕྱིར་སྨོས་སོ། །རྡོ་རྗེ་རྣོན་པོ་ཞེས་པ་ནི། འདུལ་བའི་དབང་དུ་རྡོ་རྗེ་རྣོན་པོ་ལྟ་བུར་སྐུ་སྤྲུལ་ཏེ། ཁམས་གསུམ་རྣམས་ཡེ་ཤེས་ཀྱི་རལ་གྲི་རྣོན་པོས་གཅོད་ཅིང་ཟད་པར་མཛད་པའི་ཕྱིར་རོ། །རྣོ་པ་ཆེ་ཞེས་པ་ནི་རྡོ་རྗེ་འཁོར་ལོ་ལྟ་བུར་བ་སྟན་ཏེ། ཕྲིན་ལས་ཀྱི་འཁོར་ལོ་གཅོད་བྱེད་རྣོ་བས་སྐྱེ་ཞིང་རྩད་ནས་གཅོད་པའི་ཐ་ཚིག་ཡིན་པས་ན་རྣོ་བ་ཆེའོ། །ཆེ་བའི་ཆེ་བ་ཞེས་པ་ནི། འཇིག་རྟེན་པ་རྣམས་ཀྱི་ཆེ་བ་འདོད་ཁམས་ཀྱི་དབང་ཕྱུག་ཆེན་པོའོ། །དེའི་ཆེ་བ་ནི་སངས་རྒྱས་བཅོམ་ལྡན་འདས་ལགས་པ་ཞེས་པའི་ཐ་ཚིག་གོ །རྒྱ་མཚོ་ཆེན་པོ་ཞེས་པ་ནི། དཔེར་ན་རྒྱ་མཚོ་ནི་སུས་ཀྱང་གཏིང་མི་རྟོགས་པ་དང་འདྲ་བར་ཐུགས་ཀྱི་དགོངས་རླབས་གཞན་གྱིས་མི་རྟོགས་པས་ན་རྒྱ་མཚོ་ཆེའོ། །རྡོ་རྗེ་པདྨོ་ཞེས་པ་ནི། ཐུགས་རྗེ་སྤྲུལ་ལ་རྡོ་རྗེ་ཆོས་རབ་ལྟ་བུར་སྐུ་སྤྲུལ་ཏེ་ཉོན་མོངས་བས་མགོས་པས་ན་པདྨ་བསྣམས་ཏེ་འཁོར་བས་མ་གོས་པའི་དོན་ཏོ། །བྱང་ཆུ་ཆེ་ཞེས་པ་ནི་ཐུགས་མཚན་མ་དང་བྲལ་བར་བྱས་ལ་ཡེ་ཤེས་ཀྱིས་ཤེས་བྱ་ལ་ཆུབ་སྟེ། ཕྲིན་ལས་དང་ཐུགས་རྗེ་གཞན་པས་ཆེ་བས་ན་བྱང་ཆུབ་ཆེའོ། །བྱང་ཆུབ་སངས་རྒྱས་རང་འབྱུང་བ། །ཞེས་པ་ནི། ཐུགས་རྣམ་པར་དག་པའི་བྱང་ཆུབ་སེམས་དཔས་འབྲས་བུ་བླ་ན་མེད་པའི་སངས་རྒྱས་འབྱུང་བའི་ཕྱིར་རོ། །རྡོ་རྗེ་རྒྱ་ཆེན་ཞེས་པ་ནི། ཐུགས་རྡོ་རྗེ་ལྟར་མི་འགྱུར་པས་རྒྱ་ཆེ་སྟེ། གཞན་གྱིས་མི་རྟོགས་ཤིང་རིག་པར་དཀའ་བའི་ཐ་ཚིག་གོ །རྒྱ་ཆེན་ཏེ་ཞེས་པ་ནི། དཔེར་ན་ནམ་མཁའ་རྒྱ་ཆེ་སྟེ་ཚད་དཔག་ཏུ་མེད་པའོ། །དེ་བཞིན་དུ་ཐུགས་མཚན་མ་མེད་པས་ནི་ཕྱི་རོལ་པ་རྣམས་ཀྱིས་དཔག་ཅིང་གཞལ་དུ་མི་བཏུབ་པའོ། །རྡོ་རྗེ་སྒྱུ་མ་ཞེས་པ་ནི། ཐུགས་རྡོ་རྗེ་ནི་སྒྱུ་མ་ལྟར་སྣ་ཚོགས་སུ་སྟོན་པའི་ཐ་ཚིག་གོ །རྣལ་འབྱོར་ཞེས་པ་ནི། ཆོས་ཉིད་རྟོགས་པས་རྣལ་འབྱོར་རིག་པས་ཕྱིན་ཅི་མ་ལོག་པར་
མཁྱེན་པས་སོ། །རྡོ་རྗེ་རྒྱུ་སྟེ་ཞེས་པ་ནི། ཐུགས་རྡོ་རྗེ་ལྟ་བུ་ནི་འབྲས་བུ་སངས་རྒྱས་ཀྱི་རྒྱུ་སྟེ་མྱུར་དུ་ཐོབ་པར་བྱེད་པས་སོ། །གནོད་སྤྱིན་ཆེ་ཞེས་པ་ནི། ཕྲིན་ལས་ནི་རྡོ་རྗེ་གནོད་སྤྱིན་དུ་བ་སྟན་ཏེ། ཉོན་མོངས་པའི་གནོད་པ་ལ་བདེ་བ་སྤྱིན་པའི་དོན་ཏོ། །རྡོ་རྗེ་པདྨ་ཞེས་པ་ནི་པདྨ་འདམ་གྱིས་མ་གོས་པར་འདམ་དང་འབྲེལ་པ་ལྟར་ཐུགས་རྗེས་འཁོར་བར་རོལ་ཀྱང་སྐྱོན་གྱིས་མ་གོས་པའི་དོན་ཏོ། །རྣམ་སྦྱོང་བ་ཞེས་པ་ནི་ཉོན་མོངས་པ་རྣམས་ཐུགས་རྗེ་ཕུན་སུམ་ཚོགས་པས་རྣམ་པར་སྦྱོང་བའི་ཕྱིར་རོ། །རྡོ་རྗེ་ཁྲོ་བོ་ཞེས་བ་ནི། ཐུགས་རྗེས་བདུད་དང་སྲིན་པོ་རྣམས་འདུལ་བའི་ཕྱིར་ན། འདུལ་བའི་དབང་དུ་ཁམས་གསུམ་རྣམ་པར་རྒྱལ་བའི་སྐུར་སྤྲུལ་བའི་དོན་ཏོ། །མ་རུངས་ཆེ་ཞེས་པ་ནི་ཕྲིན་ལས་ངེས་བདུད་དང་མ་རུངས་པ་འབུལ་བའི་ཕྱིར་ན་སྤྱོད་པ་དྲག་པོའི་སྒོ་ནས་མཛད་པའོ། །རྡོ་རྗེ་གྲ་སྟེ་འཇོམས་པའི་གཙོ། །ཞེས་པ་ནི། བདུད་ཀྱི་རྒྱལ་པོའི་དགྲ་སྟ་ཕྲོགས་ནས་ཉིད་ཀྱིས་བདུད་རྣམས་འཇོམས་པར་མཛད་དོ། །རྡོ་རྗེ་འཇིག་པ་ཞེས་པ་ནི་ཐུགས་རྡོ་རྗེ་ལྟ་བུས་ཉོན་མོངས་པ་ཐམས་ཅད་འཇིག་པར་མཛད་པའི་དོན་ཏོ། །བསྲུང་བ་ཞེས་པ་ནི། ཕྲིན་ལས་རྡོ་རྗེ་བསྲུང་བ་ལྟར་བ་སྟན་ནས་སེམས་ཅན་རྣམས་རྟག་ཏུ་སྲུང་བར་མཛད་དོ། །རྡོ་རྗེ་ལྕགས་ཀྱུ་ཞེས་པ་ནི་ཉོན་མོངས་པའི་རྫིངས་ནས་སེམས་ཅན་རྣམས་དྲང་བའི་ཕྱིར་དང༌། རྡོ་རྗེ་ལྕགས་ཀྱུ་ལྟར་ཡང་འདུལ་བའི་དབང་དུ་བ་སྟན་ཏོ། །དོན་ཡོད་བྱེད་ཅེས་པ་ནི་ཕྲིན་ལས་དོན་ཡོད་པར་བ་སྟན་པའི་ཕྱིར་ན་རྡོ་རྗེ་ལས་སུ་བ་སྟན་ཏེ་དོན་ཡོད་པར་བ་སྟན་བའི་ཐ་ཚིག་གོ ། རྡོ་རྗེ་རོ་ལངས་རོ་ལངས་ཆེ། །ཞེས་པ་ནི། ཐུགས་རྡོ་རྗེས་ཤི་པ་སོས་པར་མཛད་པའི་ཕྱིར་ན་རོ་ལངས་ཆེན་པོར་སྐུ་སྤྲུལ་ནས་རོ་ལངས་གྲུབ་པ་རྣམས་འདུལ་བར་མཛད་པས་ན་རོ་ལངས་ཆེའོ། །རྡོ་རྗེ་སྲིན་པོ་ཟ་བའོ། །ཞེས་པ་ནི། ཕྲིན་ལས་རྡོ་རྗེ་སྲིན་པོར་བ་སྟན་ཏེ། ཉོན་མོངས་པའི་མཚན་མ་ཟ་བར་མཛད་པའི་ཐ་ཚིག་གོ །རྡོ་རྗེ་གནོད་སྤྱིན་ཞེས་པ་ནི། ཐུགས་རྗེས་གནོད་སྤྱིན་དུ་སྐུ་སྤྲུལ་ནས་འགྲོ་བའི་དོན་མཛད་པའི་ཐ་ཚིག་གོ །གནོད་སྤྱིན་ཆེ་ཞེས་པ་ནི། རེས་འགའ་ནི་གནོད་སྤྱིན་ཆེན་པོ་ཀུན་དུ་བཟང་པོར་ཡང་སྐུ་སྟོན་པས་ན་གནོད་སྤྱིན་ཆེའོ། །རྡོ་རྗེ་གནོད་ཏེ་ཞེས་པ་ནི།
ཡེ་ཤེས་རྡོ་རྗེ་དང་འདྲ་བས་གདོན་སྟོང་ཕྲག་བརྒྱང་ཅུ་ཟད་པར་མཛད་པས་རློག་པར་མཛད་པའི་ཐ་ཚིག་གོ །གདོན་ཆེ་མཆོག་ཅེས་པ་ནི། རེས་འགའ་གདོན་གྱི་ནང་དུ་ཡང་ཕྱག་ན་རྡོ་རྗེར་བ་སྟན་ནས། གདོན་འདུལ་བས་ན་གདོན་ཆེ་མཆོག་སྟེ། གདོན་གྱི་མཆོག་རྒྱལ་བའོ། །རྡོ་རྗེ་འཇིགས་བྱེད་ཅེས་པ་ནི། ཐུགས་རྗེས་འཇིགས་བྱེད་གཤིན་རྗེ་གཤེད་དུ་བ་སྟན་ནས། གཤིན་རྗེ་རྣམས་འཇོམས་པར་མཛད་དོ། །དགའ་བྱེད་དྲག་པོ་སྟེ་ཞེས་པ་ནི། ཐུགས་རྗེས་ཐམས་ཅད་དགའ་བར་བྱེད་ཅིང་ཕྲིན་ལས་དྲགས་པོ་ནི་བདུད་རྣམས་སྦབ་ཀོང་བར་མཛད་དོ། །རྡོ་རྗེ་འཇིགས་བྱེད་སྔངས་བྱེད་པ་ནི་རྡོ་རྗེ་ལྟ་བུའི་ཕྲིན་ལས་ཀྱིས་ཐམས་ཅད་ལ་སྐུ་འཇིགས་པར་བ་སྟན་པས། ཐམས་ཅད་སེམས་རབ་ཏུ་སྔངས་བར་བཀའ་ཉན་པའི་ཚུལ་གྱི་ཐ་ཚིག་གོ །སྒྲུབ་དཀའ་བསྒྲུབས་པ་ལེགས་པ་སྟེ། །ཞེས་པ་ནི་སྐྱེས་བུ་ཆེན་པོས་ནི་སྔོན་སོ་སོ་སྐྱེ་བོ་སྒྲུབ་དཀའ་བ་ལས་རབ་ཏུ་བསྒྲུབས་པས་འབྲས་བུ་ལེགས་པ་ཐོབ་ཅེས་པའི་དོན་ཏོ། །རྡོ་རྗེ་ལེགས་པ་ཞེས་པ་ནི་ཕྲིན་ལས་རྡོ་རྗེ་ལེགས་བར་བ་སྟན་ནས། རྡོ་རྗེ་དགའ་བས་ཞེས་པ་ནི་འགྲོ་བ་འདུལ་བ་དང༌། ཆོས་ཉིད་ལས་མི་གཡོས་པའི་ཐབས་དང་ལྡན་པས་ན་དགའ་བ་སྟེ། ཐུགས་རྗེ་དང་ལྡན་པའི་ཐ་ཚིག་གོ །དགའ་བ་ཆེ་ཞེས་པ་ནི་དེ་བཞིན་གཤེགས་པའི་སྐུ་གསུང་ཐུགས་ཀྱིས་དབང་བསྒྱུར་ནས་དགའ་བ་ཆེན་པོ་མཉེས་པའི་དོན་ཏོ། །དགའ་བའི་རྡོ་རྗེ་ཞེས་པ་ནི་དེའི་ཚེ་ཐམས་ཅད་དང་ལྡན་པའི་འཁོར་རྣམས་དགའ་བར་བྱ་བའི་ཕྱིར་ན། རྡོ་རྗེ་གསོར་བར་ཐམས་ཅད་གཡོས་ནས་ཨ་ལ་ལ་ཞེས་བརྗོད་པའི་དོན་ཏོ། །དབང་བྱེད་པ་ཞེས་པ་ནི། འཇིག་རྟེན་ཐམས་ཅད་དུས་གཅིག་ཏུ་དབང་དུ་བསྡུ་བའི་དོན་ཏོ། །འོད་སྡུག་པས་ནི་སྡུག་པ་ཆེ། །ཞེས་པ་ནི། འོད་ནི་ཡེ་ཤེས་ཀྱི་ཁ་དོག་རྣམ་པ་ལྔ་ལས་སྡུག་པ་མཛེས་པར་སྣང་བ་སྟེ། སྡུག་པ་ཆེ་ནི་དེས་འཇིག་རྟེན་གྱི་ཁམས་ཐམས་ཅད་མ་ལུས་པར་སྣང་བར་མཛད་པའི་སྡུག་པ་ཆེན་པོ་དང་ལྡན་པའི་དོན་ཏོ། །ནམ་མཁའ་དང་ནི་མཉམ་པའོ། །ཞེས་པ་ནི། ཕྲིན་ལས་ནམ་མཁའ་དང་མཉམ་པ་དང༌། མཁྱེན་པ་ནམ་མཁའ་དང་མཉམ་པའོ། །རེ་བ་ཐམས་ཅད་རྫོགས་པར་མཛད། །ཅེས་པ་ནི།
སེམས་ཅན་རྣམས་ཀྱི་རེ་བ་ཐམས་ཅད་ཐུགས་རྗེས་རྫོགས་པར་མཛད་པའི་དོན་ཏོ། །རྡོ་རྗེ་དབང་བསྐུར་ཞེས་པ་ནི་དུས་གསུམ་གྱི་སངས་རྒྱས་རྣམས་ཀྱིས་ཐུགས་རྡོ་རྗེ་ལྟ་བུའི་དབང་བསྐུར་བའི་དོན་ཏོ། །རིན་ཆེན་མཆོག་ཅེས་པ་ནི་སེམས་ཅན་གྱི་འདོད་པ་སྐོང་བའི་ཕྱིར་ན། རྡོ་རྗེ་རིན་ཆེན་དུ་བ་སྟན་པས་ནི་རིག་ཆེན་མཆོག་གོ །རྡོ་རྗེ་རྒྱལ་མཚན་ཞེས་པ་ནི། ཕྲིན་ལས་རྡོ་རྗེ་རྒྱལ་མཚན་དུ་བ་སྟན་ནས་ཉོན་མོངས་པ་ལས་རྒྱལ་བར་མཛད་པའོ། །ཡོན་ཏན་གཙོ་ཞེས་པ་ནི་ཆེ་བའི་ཡོན་ཏན་སྣ་ཚོགས་པས་འགྲོ་བའི་གཙོ་བོར་གྱུར་བའི་དོན་ཏོ། །རྡོ་རྗེ་ཡེ་ཤེས་ཞེས་པ་ནི། ཡེ་ཤེས་རྡོ་རྗེ་ལྟ་བུས་ཉོན་མོངས་པ་ཐམས་ཅད་འཇོམས་པར་བྱེད་པའོ། །ཡེ་ཤེས་ཆེ་ཞེས་པ་ནི། ཡེ་ཤེས་རྣམ་པ་ལྔ་ལ་མངའ་བརྙེས་པས་ན། དེ་བཞིན་གཤེགས་པའི་ཐུགས་མངའ་བས་ན་ཡེ་ཤེས་ཆེའོ། །རིག་སྔགས་བྱེ་བའི་ཚོགས་ཀྱིས་མཆོད། །ཅེས་པ་ནི་།རིག་སྔགས་འཆང་གྲུབ་བ་མཐུ་དང་བྱིན་རླབས་ཅན་བྱེ་བ་སྙེད་ཀྱིས་ཀྱང་རབ་ཏུ་མཆོད་པར་གྱུར་བའི་དོན་ཏོ། །ཧ་ལ་ཧ་ལ་ནག་པོ་ཆེ། །ཞེས་པ་ནི། སེམས་ཅན་གྱི་ཕྱི་ནང་གི་དུག་ཧ་ལ་ཧ་ལ་ཡང་ཞལ་དུ་རྔུབ་ཅིང་གསོལ་བས་བདུད་རྩིར་འགྱུར་རོ། །སྒྲ་ཆེ་ཞིང་ཞེས་པ་ནི་ཐུགས་རྗེ་ཆེན་པོ་གསུང་གི་སྒྲ་སྐད་ཆེན་པོས་ཐམས་ཅད་ཟིལ་གྱིས་གནོན་པར་མཛད་པས་ན་སྒྲ་ཆེ་ཞིང༌། །འཇོམས་པ་ཅན་ཞེས་པ་ནི། ཐུགས་རྗེས་འཇོམས་པའི་དབང་ཕྱུག་མར་སྐུ་སྤྲུལ་ནས་སེམས་ཅན་རྣམས་ཀྱི་འདོད་ཆགས་རྣམས་ཞི་བར་མཛད་པའི་དོན་ཏོ། །རྡོ་རྗེ་འདོད་པ་ཞེས་པ་ནི། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་མཛད་པ་རྣམས་འདོད་བཞིན་དུ་གྲུབ་པར་མཛད་པའོ། །འདོད་པ་ཆེ་ཞེས་པ་ནི། འདོད་པ་ནི་ཆོས་ཉིད་ལས་ཆེ་བ་ཡེ་ཤེས་ཀྱིས་མངའ་བརྙེས་པའི་དོན་ཏོ། །རྟོག་པའི་དུས་ངན་རྣམ་འཇོམས་པ། །ཞེས་པ་ནི་།ཕྱི་གཟུང་བར་རྟོག་པ་དང་།ནང་འཛིན་པར་རྟོག་པ་དང༌། ཆོས་ཙམ་དུ་རྟོག་པ་དང༌། གང་ཟག་ཏུ་རྟོག་པ་ལ་སོགས་པ་རྟོག་པ་བརྒྱ་རྩ་བརྒྱང་ལ་སོགས་བ་མ་ལུས་པར་སྤངས་བའི་དོན་ཏོ། །དུས་ངན་ནི་ལྔའི་ཐ་མའོ། །རྣམ་པར་འཇོམས་པ་ནི་ཉོན་མོངས་པ་ཡེ་ཤེས་ཀྱིས་འཇོམས་པ་ལ། དུས་ངན་ནི་ཐུགས་རྗེས་འཇོམས་པའི་
དོན་ཏོ། །སྐད་ཅིག་གཡོ་བས་ཐེ་ཚོམ་གཅོད། །ཅེས་པ་ནི། སེམས་ཅན་རྣམས་ཀྱི་སེམས་ཀྱི་རྒྱུད་ལ་ཡོད་པའི་ཐེ་ཚོམ་གཡོ་བ་རྣམས་དུས་གཅིག་ཏུ་འཛོམས་པར་མཛད་དོ། །གློག་བཞིན་ཞལ་གྱི་ལྗགས་ལས་འཕྲོ་།ཞེས་པ་ནི། དཔེར་ན་གློག་རྒྱུ་བ་བཞིན་དུ་མ་མགྱོགས་པས་ཀུན་དུ་ཐོས་པར་འཕྲོ་ཞེས་པའི་དོན་ཏོ། །རྡོ་རྗེ་མེ་སྟེ་མ་རུངས་འདུལ། །ཞེས་པ་ནི་།ཡེ་ཤེས་རྡོ་རྗེ་ལྟ་བུ་ལས་ཐུགས་རྗེ་ཕུན་སུམ་ཚོགས་པའི་མེ་སྟག་འཕྲོ་བ་ནི་མ་རུངས་པ་དངངས་སུ་འཇུག་པས་ཞལ་ནས་འབྱུང་བའི་དོན་ཏོ། །དྲག་པོར་བ་སྣང་ཞེས་པ་ནི་ཕྲིན་ལས་ཞི་བས་མི་འདུལ་བ་ལ། དྲག་པོར་རབ་ཏུ་སྣང་བར་མཇལ་བའི་དོན་ཏོ། །སྣང་མཛད་པ་ཞེས་པ་ནི། སྐུ་གསུང་ཐུགས་ཀྱི་ཕྲིན་ལས་རྣམ་པར་སྣང་མཛད་ཀྱིས་སེམས་ཅན་རྣམས་སྒྲོལ་པར་མཛད་པའི་དོན་ཏོ། །ཉི་མ་སྟོང་གིས་གདུངས་པའི་ཞལ། །ཞེས་པ་ནི། དཔེར་ན་ཉི་མ་སྟོང་གིས་གདུངས་པའི་དངོས་པོ་ཐམས་ཅད་མེ་འབར་བ་དང་འདྲ་བར་རྣམ་པར་ཐར་པའི་ཡེ་ཤེས་ཀྱི་ཞལ་ནས་མཚན་མ་རྣམས་བསྲེག་པའི་ཡེ་ཤེས་ཀྱི་མེ་འབྱུང་བས་ཉོན་མོ་ངེས་པ་བུད་ཤིང་དང་འདྲ་བ་བསྲེག་ཅིང་སྟོངས་པར་མཛད་བའི་དོན་ཏོ། །སྤྱན་དམར་འཇིགས་པར་མཛད་པ་པོ། །ཞེས་པ་ནི། སྤྱན་ན་ཡེ་ཤེས་ཏེ་ཐམས་ཅད་གཟིགས་པའོ། །དམར་བ་ནི་ཐུགས་རྗེ་སྟེ། མཚན་མས་མ་གོས་པའི་དོན་ཏོ། །ཐུགས་རྗེའི་འཇིགས་ཚུལ་ཐབས་ཀྱི་བྱིན་རླབས་ཀྱིས་ནི། ཕྲིན་ལས་ཀྱིས་གཟིགས་པར་ཐམས་ཅད་འཇིགས་པར་མཛད་དོ། །ཁྲོ་བོ་དུ་མ་འོད་བཞིན་འཕྲོ། །ཞེས་པ་ནི། ཐུགས་རྣམ་པར་དག་པའི་རང་བཞིན་ལས། ཡེ་ཤེས་ཀྱི་ཁྲོ་བོ་སྣ་ཚོགས་རྣམས་འཇིག་རྟེན་གང་བར་འཕོར་བའི་དོན་ཏོ། །ཕྱག་རྣམས་དུ་མས་མཚོན་ཆ་བརྒྱ། །ཞེས་པ་ནི། ཁྲོ་བོ་དེ་རྣམས་འདུལ་བའི་དབང་དུ། ཀུན་དུ་སྐུ་སྣ་ཚོགས་པ་ལ་ཕྱག་སྣ་ཚོགས་པར་བ་སྟན་ཏེ། ཕྱག་དེ་རྣམས་ན་ཡེ་ཤེས་ཀྱི་མཚོན་ཆ་སྣ་ཚོགས་པ་འདུལ་བའི་དབང་དུ་བསྣམས་ཤེའོ། །དུ་མའི་ཞལ་ཏེ་ཞེས་པ་ནི། སྐུ་དེ་རྣམས་ལས་ཡང་ཀུན་དུ་སྐུ་བས་མ་གྱིས་མི་ཁྱབ་པར་བ་སྟན་ཏེ། དེ་རེ་རེ་ཡང་ཀུན་དུ་ཞལ་བསམ་གྱིས་མི་ཁྱབ་པར་སྣ་ཚོགས་པ་རབ་ཏུ་སྟོན་པའི་ཕྱིར་རོ། །སྐུ་ཡང་
སྟོན་ཞེས་པ་ནི། སྐུ་དེ་རྣམས་འགྲོ་བ་རིགས་དྲུག་ཏུ་གཏོགས་པའི་སེམས་ཅན་རྣམས་ལ་སོ་སོའི་གཙོ་བོ་ནི་ཚུལ་ཐ་དད་བའི་སྐུར་བ་སྟན་ཏོ། །འཁྱིལ་ཞིང་ཞེས་པ་ནི། ཐུགས་རྗེས་འགྲོ་བ་དེ་བླ་ན་མེད་པའི་བྱང་ཆུབ་ཏུ་དགོད་པས་ཀྱང་འཁྱིལ་ཞིང་ལ། རྣམ་གཅིག་ཏུ་དབུ་སྐྲ་འཁྱིལ་པར་བ་སྟན་ཏེ། ཐུགས་ཆོས་ཉིད་ལས་མ་གཡོས་པའི་རྟགས་སོ། །རྒྱན་ཡང་འཁྱིལ་པ་ལ་ཞེས་པ་ནི། སྐུའི་རྒྱན་རྣམས་སྐུ་ལ་འཁྱིལ་བར་བ་སྟན་ཏེ། ཁམས་གསུམ་དབང་དུ་སྡུད་བའི་དོན་ཏོ། །སེམས་དཔའ་ཆོས་ལ་སྐུ་མི་མངའ། །ཞེས་པ་ནི། ཡེ་ཤེས་རྣམ་པར་དག་པའི་ཆོས་ཉིད་ལ་སེམས་དཔས་ནི་ཆོས་བ་སྟེ། ཆོས་ནི་དངོས་པོ་ཅན་ཏེ་དེ་དང་བྲལ་བས་ན་དངོས་པའི་སྐུ་མེད་ཅེས་པའི་དོན་ཏོ། །རྣམ་པར་རྟོག་པ་མ་ལུས་སྤངས། །ཞེས་པ་ནི། ཕྱི་གཟུང་བར་རྟོག་པ་དང༌། ནང་འཛིན་བར་རྟོག་པ་དང༌། ཆོས་ཙམ་དུ་རྟོག་པ་དང༌། གང་ཟག་དུ་རྟོག་པ་ལ་སོགས་པར་རྟོག་པས་བརྒྱ་རྩ་བརྒྱང་ལ་སོགས་པར་མ་ལུས་པར་སྤངས་པའི་དོན་ཏོ། །མ་རིག་འཇོམས་པའི་ཚངས་པ་སྟེ། །ཞེས་པ་ནི་ལྟ་བ་ལ་ལོག་པ་ཐམས་ཅད་ཀྱི་གཞི་ནི་མ་རིག་པ་སྟེ། མ་རིག་པས་བདག་ཏུ་རྨོངས་པའི་ངོ་བོ་ཚངས་པ་ཆེན་པོ་འཇིག་རྟེན་མེས་པོ་ཡང་འཇོམས་བར་བྱེད་པའི་ཐ་ཚིག་གོ །འདོད་ཆགས་ཞེ་སྡང་དྲི་མཐར་མཛད། །ཅེས་པ་འདོད་ཆགས་དག་པར་བསྒོམས་པས་ན་གསུང་གྲུབ། །ཞེ་སྡང་དག་པར་བསྒོམས་པས་ན་ཐུགས་གྲུབ། གཏི་མུག་དག་པར་བསྒོམས་པས་ནི་སྐུ་གྲུབ་པོ། །རྣམ་གཅིག་ཏུ་དུག་གསུམ་དྲི་མའི་རང་བཞིན་ཏེ། འདོད་ཆགས་ལ་མི་སྡུག་པ་བསྒོམས། ཞེ་སྡང་གི་གཉེན་པོ་བྱམས་པ་བསྒོམས། གཏི་མུག་གི་གཉེན་པོར་རྟེན་ཅིང་འབྲེལ་པར་འབྱུང་བ་བསྒོམས་པས་ཉོན་མོངས་པའི་དྲི་མ་ལས་ཐར་པར་གསུངས་སོ། །སྒྱུ་མ་གཏོགས་འདོད་ཅེས་པ་ནི་ལྷ་ཆེན་པོ་ཁྱབ་འཇུག་ནི་སྒྱུ་མ་ལྟར་སྣ་ཚོགས་པར་ཀུན་དུ་ཁྱབ་པར་ཕྱིན་ཅིང་ཀུན་དུ་འཇུག་པས་གཏོགས་འདོད་ཆེ་བས་ན། གཏོགས་འདོད་ཅེས་གསུངས་པས་ན་དེ་ཡང་འདུལ་བར་མཛད་དོ་བར་བ་སྟན་ཏོ། །རྡོ་རྗེ་ཅན་ཞེས་པ་ནི། དཔེར་ན་རྒད་པོ་འཁར་བ་ཅན་ཟེར་བ་ལྟར་ཐུགས་རྡོ་རྗེ་ལྟ་བུ་ལ་མངའ་བརྙེས་པའི་ཕྱིར་རོ། །རྣམ་གཅིག་ཏུ་འཇིག་རྟེན་ན་རྡོ་རྗེ་
ཅན་གྱི་རིགས་མ་རུངས་པ་རྣམས་འདུལ་བས་ཀྱང་དེ་སྐད་བ་སྟན་ཏོ། །རྩེ་གསུམ་ཞེས་པ་ནི་སྐུ་གསུང་ཐུགས་ལྷུན་གྱིས་གྲུབ་པའི་རྟགས་སུ་ཡེ་ཤེས་ཀྱི་རྡོ་རྗེ་རྩེ་གསུམ་བསྣམས་པར་འདོད། རྩེ་གསུམ་འཆང་བ་འཕྲོག་པ་ནི། །ཞེས་པ་ལྷ་དབང་ཕྱུག་ཆེན་བོའི་རྩེ་གསུམ་འཆང་བ་འཕྲོགས་ནས་ཕྱག་ན་བསྣམས་ཤེའོ། །འདོད་ཆགས་ཞེ་སྡང་གཏི་མུག་ཆེ། །ཞེས་པ་ནི། འདོད་ཆགས་ཆེ་བ་ནི་ཆོས་ཉིད་ཀྱི་དོན་ལ་ཆགས་པ་དང་འགྲོ་བའི་དོན་ལ་ཆགས་པའི་དོན་ཏོ། །ཞེ་སྡང་ནི་ཐུགས་རྗེ་སྟེ་ཉོན་མོངས་པའི་རྒྱུ་ལ་ཞེ་སྡང་བ་དང༌། ཆོས་ཉིད་ཀྱང་ངང་དུ་གནས་པས་ན་མཚན་མ་ལ་ཞེ་སྡང་བའོ། །གཏི་མུག་ནི་བླང་དོར་མེད་པ་སྟེ་འགྲོ་བའི་དོན་ལ་བླང་དོར་མེད་པར་མཛད་པ་དང༌། ཆོས་ཉིད་དམིགས་པས་ན་གང་ལ་ཡང་མི་གནས་པས་ན་ཆེན་པོའོ་ཞེས་པའི་དོན་ཏོ། །སྲིད་དང་སྲིད་མིན་རྣམ་སྦྱོང་བ། །ཞེས་པ་ནི། སྲིད་པ་ནི་འཁོར་བ་སྟེ་ཐུགས་རྗེས་སྦྱོང་ལ། མི་སྲིད་པ་ནི་མྱ་ངན་ལས་འདས་པ་སྟེ་ཡེ་ཤེས་ཀྱིས་སྦྱོང་ཞེས་པའི་དོན་ཏོ། །ཞི་ཞིང་དུལ་བ་ཞེས་པ་ནི། །ཞི་བ་ནི་ཆོས་ཉིད་ལས། དུལ་བ་ནི་ཡེ་ཤེས་ཏེ། ཆོས་ཉིད་དང་ཡེ་ཤེས་འབྲེལ་བའི་དོན་ཏོ། །དགའ་བ་ཆེ་ཞེས་པའི་ཐུགས་རྗེས་ནི་སེམས་ཅད་དག་པར་བྱེད་ལ། ཤེས་རབ་ཀྱིས་ནི་ཆོས་ཉིད་དག་པར་གཟིགས་པའི་དོན་ཏོ། །སངས་རྒྱས་ཞེས་པ་ནི་ཉོན་མོངས་པ་སྤངས་པས་སངས་ལ། ཤེས་བྱ་ལ་ཡེ་ཤེས་ཀྱིས་ཁྱབ་པས་ནི་རྒྱས་བའོ། །སངས་རྒྱས་རབ་རྟོགས་པ་ཞེས་པ་ནི། དུས་གསུམ་གྱི་སངས་རྒྱས་རྣམས་ཀྱི་དགོངས་པ་མི་མཁྱེན་པ་མི་མངའ་བའི་ཕྱིར་རོ། །སངས་རྒྱས་བདག་ཉིད་ཅེས་པ་ནི། དུས་གསུམ་གྱི་སངས་རྒྱས་ཀུན་གྱི་སྐུ་གསུང་ཐུགས་ཀྱི་བདག་ཉིད་དུ་གྱུར་བས་ན་བདག་ཉིད་དོ། །སངས་རྒྱས་སྐུ་ཞེས་པ་ནི། དེ་བཞིན་གཤེགས་པ་ཐམས་ཅད་ཀྱི་སྐུའི་བདག་ཉིད་དུ་གྱུར་པ་སྐུ་ལ་རྒོལ་བའི་བགེགས་རྣམས་རབ་ཏུ་འདུལ་བར་མཛད་པ་དང་སྐུའི་ཕྲིན་ལས་ཀྱི་ངོ་བོར་གྱུར་པས་སོ། །རྡོ་རྗེ་རབ་སྐྱེས་ཞེས་པ་ནི། གསུང་རྡོ་རྗེ་ལྟ་བུར་རབ་ཏུ་སྐྱེས་པར་གྱུར་བས་འགྲོ་བའི་རྒྱུད་དགྲོལ་བ་དང༌། གསུང་ལ་མངའ་བརྙེས་པའི་ཕྱིར་རོ། །རྡོ་རྗེ་སེམས་དཔའ་ཞེས་པ་ནི་།རྡོ་རྗེ་སེམས་དཔའི་ཐུགས་རྣམ་པར་དག་པ་ལ་རབ་ཏུ་མངའ་
བརྙེས་པའི་ཕྱིར་ན་རྡོ་རྗེ་སེམས་དཔའོ། །ཀུན་དུ་བཟང་པོ་ཞེས་པ་ནི། གནོད་སྤྱིན་རྣམས་ཀུན་དུ་བཟང་པོས་འདུལ་བར་མཛད་པས་ན། འདུལ་བའི་དབང་དུ་ནི་བ་སྟན་ནས་གནོད་སྤྱིན་གྱི་བདག་པོ་ཆེན་པོར་བ་སྟན་ཏོ། །ཆེར་བཟང་པོ་ཞེས་པ་ནི། སེམས་ཅན་རྣམས་ཀྱི་ནོར་རྣམས་བསྒྲུབ་པར་བྱ་བའི་ཕྱིར་ན་གང་བ་བཟང་པོ་བཏུལ་ནས་ནོར་གྱིས་གང་བར་མཛད་པས་དེའི་བདག་པོར་གྱུར་པས་ནི་ཆེར་བཟང་ཞེས་བྱའོ། །མཚན་བཟང་དམ་པས་རྣམ་པར་བརྒྱན། །ཞེས་པ་ནི། མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱང་ཆུ་ལ་མངའ་བརྙེས་པས་ན་མཚན་བཟང་དམ་པ་སྟེ། གཞན་ལས་འཕགས་པའི་ཐུན་མོང་མ་ཡིན་པས་ན་དམ་པའོ། །རྣམ་བར་བརྒྱན་ནི་འདུལ་པའི་དབང་དུ་ཐུན་མོང་གི་མཚན་གྱིས་ནི་བརྒྱན་པའི་སྐུ་བརྒྱང་པ། ཐུང་མོང་མ་ཡིན་པས་ནི་ཐུགས་རབ་ཏུ་བརྒྱན་པར་མཛད་པའོ། །ཁམས་གསུམ་བདག་ཉིད་ཆེ་ཞེས་པ་ནི། ཁམས་གསུམ་གྱི་བདག་ཉིད་ཆེན་པོར་ཐུགས་རྗེས་བ་སྟན་ནས། བདག་ཅག་འཇིག་རྟེན་པ་རྣམས་ཀྱི་མངའ་བདག་མཛད་ཅིང་འཁོར་གྱི་གཙོ་བོར་གྱུར་བའི་དོན་ཏོ། །ཁྱབ་པ་པོ་ཞེས་པ་ནི་སྲིད་པ་གསུམ་དུ་ཡང་ཐུགས་རྗེ་དང་ཕྲིན་ལས་ཀྱིས་ཁྱབ་བར་གྱུར་པས་ན། ཀུན་དུ་ཡང་ལག་ན་རྡོ་རྗེ་ཞེས་གྲགས་པར་མཛད་པའི་ཕྱིར་རོ། །ཐམས་ཅད་རྡོ་རྗེ་ཞེས་པ་ནི་སངས་རྒྱས་ཀྱི་ཞིང་མ་ལུས་པ་ཐམས་ཅད་དུ་ཕྱག་ན་རྡོ་རྗེར་བ་སྟན་ནས་དེའི་བ་སྟན་པ་ལ་གནོད་པའི་བདུད་ལ་སོགས་པ་རྣམས་འདུལ་བར་མཛད་པ་ནའམ། བ་སྟན་པ་རྡོ་རྗེ་ལྟ་བུའི་སྒོ་ནས་འདུལ་བར་མཛད་པའི་ཕྱིར། བདག་ཉིད་གཙང་ཞེས་པ་ནི་སྲིད་པ་གསུམ་གྱི་བདག་ཉིད་དུ་གྱུར་ཀྱང་ནི་ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་རྣམས་སྤངས་པས་ཀྱང་གཙང་ངོ༌། །རྣམ་པ་གཅིག་ཏུ་དུས་གསུམ་གྱི་སངས་རྒྱས་རྣམས་ཀྱི་རང་བཞིན་ནམ་བདག་ཉིད་དུ་གྱུར་པས་ན་མི་མཐུན་པའི་སྐྱོན་རྣམ་པ་ཐམས་ཅད་དང་བྲལ་བས་ན་བདག་ཉིད་གཙང་ཞེས་པའི་དོན་ཏོ། །མཚན་བརྒྱ་རྩ་བརྒྱང་པ་ཕྱེ་ནས་བཤད་ཟིན་ཏོ། །ད་ནི་རྒྱུད་ཀྱི་དོན་འདི་གཟུང་བ་སྟོན་ཏེ། དེ་ཅིའི་ཕྱིར་ཞེ་ན། གང་གིས་འདི་བྲིས་བཀླགས་འགྱུར་རམ། །ཞེས་པ་ནི། ཁྱབ་པ་སྤྱིའི་ཚིག་གམ། ཆོས་ལ་ཕྱོགས་སུ་བསྡུས་
པ་སྟེ་སུ་ཡང་རུང་ཞེས་པའི་དོན་ཏོ། །དེས་རྒྱུད་ཀྱི་དོན་འདི་ཡི་གེ་ལ་བྲིས་ནས། བདག་གིས་ནི་འཆང་བའམ། གཞན་ལ་བྲིས་ནས་སྤྱིན་པའམ། བྲིས་པ་རྣམས་བདག་གིས་ཀློག་གམ། གཞན་ཀློག་ཏུ་འཇུག་པའམ། རྒྱུན་དུ་ཡི་དམ་དུ་ཀློག་ཏུ་འཇུག་བར་བགྱི་ཞེས་པའི་དོན་ཏོ། །རྟག་ཏུ་དེ་དོན་བ་ཅང་བྱེད་དམ། །ཞེས་པ་ནི་དུས་རྟག་ཏུ་དོན་བློ་ལ་འཆང་བའམ། ཚིག་གླེགས་བམ་ལ་འཆང་བར་བྱེད་བའི་དོན་ཏོ། །དྲན་ནས་ཉན་པར་བྱེད་ཀྱང་རུང༌། །ཞེས་པ་ནི། དེ་ལ་དྲན་པ་ནི་ལྷག་མཐོང་གི་ཤེས་རབ་ཀྱིས་རྒྱུད་ཀྱི་དོན་ཉན་པ་དང༌། ཉན་པའི་དོན་བསམ་ཞིང་སྒོམ་པར་བྱེད་ཀྱང་རུང་སྟེ། ད་ནི་དེ་བཞིན་གཤེགས་པའི་རིགས་སུ་འགྱུར་བའི་དོན་ཏོ། །དེ་ཡང་ཅིའི་ཕྱིར་ཞེ་ན། ཕྱག་ན་རྡོ་རྗེ་འདྲ་བར་འགྱུར། །ཞེས་འབྱུང་བས་ན། རྒྱུད་འདི་ཉིད་ནི་ཕྱག་ན་རྡོ་རྗེའི་ཐུགས་ཀྱི་རྒྱུད་ལ་རབ་ཏུ་གནས་པས་གང་གི་འདི་ཉིད་རྣམས་སུ་བླངས་ནས། དེ་ཡང་ཕྱག་ན་རྡོ་རྗེ་དང་འདྲ་བར་འགྱུར་ཏེ། དེ་ཅིའི་ཕྱིར་ཞེ་ན། རྒྱུད་འདི་རྟོགས་པའི་སྒོ་ནས་ཐོབ་བར་འགྱུར་བའི་རྒྱུ་ཡིན་པས་སྨོས་སོ། །ད་ནི་རྒྱུད་འདི་གསུངས་པ་ལ་འཁོར་རྣམས་དགའ་བ་སྟོན་ཏེ། དེ་ཡང་ཅིའི་ཕྱིར་ཞེན། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་ཞེས་འབྱུང་བས། བཅོམ་ལྡན་འདས་ནི་ཤཱཀྱ་ཐུབ་པ་སྟེ། དེ་ཅིའི་ཕྱིར་ཞེ་ན། དེའི་བ་སྟན་པ་ཡིན་བས་གཙོ་བོར་རབ་ཏུ་སྨོས་སོ། །དེ་སྐད་ཅེས་བཀའ་སྩལ་པ་དང་ཞེས་པ་ནི། རྒྱུད་འདིའི་དོན་ཏེ་དེ་སྐད་ཅེས་པར་སྤྱར་ཏེ། དེ་ཡང་ཇི་ལྟར་གསུངས་ན། གླེང་གཞི་དང་མདོ་བཤད་པ་གཉིས་སུ་གསུངས་སོ། །གླེང་གཞི་ལ་ཡང་གཉིས་ཏེ། ཕུན་སུམ་ཚོགས་པའི་གླེང་གཞི་དང༌། ཁྱད་པར་གྱི་གླེང་གཞི་གཉིས་སུ་གསུངས་སོ། །ཕུན་སུམ་ཚོགས་པའི་གླེང་གཞི་ཡང་ལྔར་གསུངས་སོ། །དེ་ཡང་སྟོན་པ་དང༌། འཁོར་དང༌། གནས་དང༌། སྡུད་པ་པོ་དང་དུས་དང་རྣམ་པ་ལྔར་གསུངས་སོ། །ཁྱད་པར་ནི་རྣམ་པ་གཉིས་ཏེ། སྟོན་པས་གླེང་བསླང་བ་དང༌། འཁོར་གྱིས་གླེང་བསླང་པའོ། །མདོའི་དོན་བཤད་པ་ལ་ཡང་དོན་རྣམ་པ་གཉིས་སུ་གསུངས་ཏེ། དེ་ཡང་དཀྱིལ་འཁོར་དང་སྤྱིན་སྲེག་གོ །དེ་ཡང་ཐུགས་རྣམ་པར་མི་རྟོག་པའི་ངང་དུ་གནས་ཀྱང་ཀུན་རྫོབ་ཏུ་ཕྲིན་ལས་སྣ་ཚོགས་སུ་མཛད་
བས་ན་དཀྱིལ་འཁོར་དུ་བ་སྟན་ཏོ། །ཕྱིན་ཅི་ལོག་གི་ཉོན་མོངས་པའི་མཚན་མ་སྲེག་པའི་ཕྱིར་ན་ཧོམ་དུ་བ་སྟན་ཏེ་བཀའ་སྩལ་ཏོ། །དེ་ཡང་དཀྱིལ་འཁོར་ལ་རྣམ་པ་གཉིས་སུ་བཀའ་སྩལ་ཏེ། འཇིག་རྟེན་ལས་འདས་པ་དོན་དམ་པར་མི་འགལ་པར་བཀའ་སྩལ་བ་དང། འཇིག་རྟེན་པ་ཀུན་རྫོབ་ཀྱི་བདེན་པར་བཀའ་སྩལ་ལོ། །དེ་ལ་འཇིག་རྟེན་ལས་འདས་པ་ལ་ཡང་རྣམ་པ་དྲུག་སྟེ། དེ་ཡང་ཐམས་ཅད་བྱང་ཆུབ་སེམས་ཀྱི་རང་བཞིན་དུ། ཉོན་མོངས་པའི་སེམས་ཅན་ཐུགས་རྗེའི་ཞིང་ཡིན་པས་ན། ཀུན་རིག་རྩ་བའི་དཀྱིལ་འཁོར་བཀའ་སྩལ་ཏོ། །ཐུགས་རྣམ་པར་དག་པས་སྤྲུལ་བ་ཕྱུང་ནས་ངན་སོང་སྦྱོང་བའི་ཕྱིར་ན་གཙུག་ཏོར་བརྒྱང་གསུངས་སོ། །སེམས་ཅན་འཆི་བ་ནི་སྔོན་གྱི་ལས་ཡིན་པས་ན་དེ་སྤྱང་བའི་ཕྱིར་ན་ཚེ་དཔག་མེད་ལས་ཀྱི་སྒྲིབ་པ་བརྒྱན་གཅོད་བའི་དཀྱིལ་འཁོར་བཀའ་སྩལ་ཏོ། །སེམས་ཅན་རྣམས་འཕྲལ་གྱི་རྐྱེན་གྱིས་འཆི་བས་ནི། དེ་བཟློག་བའི་ཕྱིར་ཚེ་དཔག་མེད་བཀའ་སྩལ་ཏེ། སེམས་ཅན་གྱི་དོན་མཛད་བའི་འཕྲིན་ལས་སུ་ནི་རིགས་བཞིའི་འཁོར་ལོས་སྒྱུར་བ་གསུངས་སོ། །མ་རུངས་པ་ཞི་བས་མི་འདུལ་བ་རྣམས་དྲག་པོའི་སྒོ་ནས་འདུལ་དགོས་པས་ན། ཁྲོ་བོ་རྡོ་རྗེ་ཉི་མ་མེའི་དཀྱིལ་འཁོར་བཀའ་སྩལ་ཏོ། །འཇིག་རྟེན་པ་ཡང་རྣམ་པ་དྲུག་ཏུ་བཀའ་སྩལ་ཏེ། འཇིག་རྟེན་པ་སོ་སོ་རང་རང་གི་མཎྜལ་མདོངས་གསོལ་དུ་ཕུལ་བས་ན། དེ་ལ་སྟོན་པར་དགྱིས་ནས། རྒྱལ་པོ་ཆེན་པོ་བཞིའི་སོ་སོའི་བགེགས་རྣམས་ཞི་བར་བྱ་བའི་ཕྱིར་ན། རྒྱལ་པོ་ཆེན་པོ་བཞིའི་དཀྱིལ་འཁོར་བཀའ་སྩལ་ཏོ། །གདོན་སྟོང་ཕྲག་བརྒྱང་ཅུ་རྩ་བཞི་ཞི་བར་བྱ་བའི་ཕྱིར་ན། ཕྱོགས་སྐྱོང་བ་བཅུའི་དཀྱིལ་འཁོར་བཀའ་སྩལ་ཏོ། །གཟའ་སྐར་མི་མཐུན་པ་ཞི་བར་བྱ་བའི་ཕྱིར་གཟའ་བརྒྱང་ཀྱི་དཀྱིལ་འཁོར་བཀའ་སྩལ་ཏོ། །སེམས་ཅན་རྣམས་ལས་བདག་གི་གདོན་ཞི་བར་བྱ་བའི་ཕྱིར་ན་ཀླུ་བརྒྱང་ཀྱི་དཀྱིལ་འཁོར་བཀའ་སྩལ་ཏོ། །ལྷ་གདོན་རྣམས་གདུལ་བར་བྱ་བའི་ཕྱིར་ནི་འཇིགས་བྱེད་བརྒྱང་ཀྱི་དཀྱིལ་འཁོར་བཀའ་སྩལ་ཏོ། །སེམས་ཅན་རྣམས་ཀྱི་ལྷ་མི་དགའ་བའི་གནོད་པ་ཞི་བར་བྱ་བའི་ཕྱིར་ན་ལྷ་ཆེན་པོ་བརྒྱང་ཀྱི་དཀྱིལ་འཁོར་བཀའ་སྩལ་ཏོ། །སྤྱིན་སྲེག་ལ་ཡང་རྣམ་
པ་གཉིས་ཏེ། རོའི་ཧོམ་དང་ཕྲིན་ལས་རྣམ་པ་བཞིའི་ཧོམ་མོ། །དེ་ལ་ཡང་ཉོན་མོངས་པའི་དངོས་པོ་གདོས་པ་དང་བྲལ་བའི་ཕྱིར་ན། རོའི་སྤྱིན་སྲེག་བཀའ་སྩལ་ཏོ། །དེ་ཡང་ཐུགས་ཆོས་ཉིད་ལས་མ་གཡོས་པས་ན། ཞི་བའི་སྤྱིན་སྲེག་བཀའ་སྩལ་ཏོ། །འདོད་པ་ཕུན་སུམ་ཚོགས་པ་བསྒྲུབ་པའི་ཕྱིར་ན་རྒྱས་པའི་སྤྱིན་སྲེག་བཀའ་སྩལ་ཏོ། །ཁམས་གསུམ་ཐམས་ཅད་དབང་དུ་སྡུད་པའི་ཕྱིར་ན་དབང་གི་སྤྱིན་སྲེག་བཀའ་སྩལ་ཏོ། །མ་རུངས་པ་དྲེགས་པ་ཅན་འདུལ་བའི་ཕྱིར་ན་དྲག་པོའི་ཧོམ་བཀའ་སྩལ་ཏོ། །ཕྱི་མའི་ཆོ་ག་ཡན་ལག་ནི་དཀྱིལ་འཁོར་དང་ཧོམ་རྣམས་མ་གྲུབ་ན། ཆོ་ག་སྤོབས་བར་བྱའོ་ཞེས་བཀའ་སྩལ་ཏོ། །རྒྱུད་ཀྱི་དོན་དེ་ལྟར་བཅོམ་ལྡན་འདས་ཀྱིས་བཀའ་སྩལ་ན། དེ་སྐད་ཅེས་བཀའ་སྩལ་པ་དང་ཞེས་སྨོས་སོ། །ད་ནི་འཁོར་རྣམས་རབ་ཏུ་དགའ་བ་སྟོན་ཏེ། དེ་ཅིའི་ཕྱིར་ཞེན། བཅོམ་ལྡན་འདས་ཀྱིས་ཀྱང་མྱ་ངན་ལས་འདས་བའི་བ་སྟན་པའི་ཞབས་སུ་ཡང༌། དེ་སྐད་ཅེས་གྱིས་ཤིག་ཅེས་ཀུན་དགའ་བོ་ལ་གདམས་སོ། །དེ་ནས་བརྒྱ་བྱིན་དང་ཞེས་པ་ནི་མགོ་བརྒྱ་བཏང་ཞིང༌། མཆོད་སྤྱིན་བརྒྱ་བཏང་བ་དང༌། དང་པོའི་ཡོན་བདག་དང༌། དང་པོའི་ཡོན་བདག་དང༌། གནས་ཀྱི་བདག་པོ་ཡིན་པས་སྣ་ལ་སྨོས་སོ། །ཚངས་པ་ལ་སོགས་པའི་འཁོར་ཞེས་པ་ནི། ཉོན་མོངས་པ་ལས་ཚངས་པར་མཛད་པ་དང༌། འཇིག་རྟེན་པའི་མེས་པོ་ཡིན་པས་དེའི་འོག་ཏུ་སྨོས་སོ། །སོགས་ཀྱི་ཁོངས་སུ་ནི་སོ་སོའི་བཙུན་མོ་དང་བཅས་པའི་ཐ་ཚིག་གོ །འཁོར་ལ་སོགས་པ་ནི་བརྒྱ་བྱིན་སུམ་ཅུ་རྩ་གསུམ་དང་བཅས་པ་དང༌། ཚངས་བ་ཚངས་རིས་ལྷ་དང་བཅས་པ་དང་ཞེས་པའི་ཐ་ཚིག་གོ །ལྷ་དང་ནི་དབང་ཕྱུག་ཆེན་པོ་མ་ཧཱ་དེ་བ་ལ་སོགས་ལྷ་འདུས་པ་རྣམས་སོ། །མི་དང་ནི་མོས་པ་སྤྱོད་པའི་ས་ལ་མིར་གནས་པ་རྣམས་སོ། །ལྷ་མ་ཡིན་དང་ནི། ལྷ་མ་ཡིན་གྱི་རྒྱལ་པོ་སྒྲ་གཅན་ལ་སོགས་པ་རྣམས་དང༌། དྲི་ཟ་དང་ནི་ཟུར་ཕུད་ལྔ་པ་ལ་སོགས་པའོ། །གནོད་སྤྱིན་དང་སྡེ་དཔོན་པཉིཙ་ཀ་ལ་སོགས་པའོ། །སྲིན་པོ་ལ་སོགས་པ་ནི། ལང་ཀ་མགྲིན་བཅུ་ལ་སོགས་པའི་འཁོར་རྣམས་སོ། །བཅོམ་ལྡན་འདས་ཀྱིས་གསུངས་པ་ལ། །ཞེས་པ་ནི། རྒྱུད་ཀྱི་དོན་ཐུགས་རྣམ་པར་དག་པའི་ངང་ལ་གནས་པ། ཞལ་གྱི་
དཀྱིལ་འཁོར་ནས་ཚངས་པའི་གསུང་གིས་དོན་དང་ཚིག་ཏུ་ལྡན་པར་གསུངས་ཤེའོ། །མངོན་པར་དགའ་སྟེ་ཞེས་པ་ནི། དོན་ལ་དགའ་བ་དང༌། ཕྲིན་ལས་ངན་སོང་རྣམ་པར་སྦྱངས་པ་ལ་མངོན་པར་དགའ་བའོ། །རྗེས་སུ་ཡི་རང་ངོ་ཞེས་པ་ནི། རྒྱུད་ཀྱི་དོན་ལ་རྗེས་སུ་ཡི་རང་བ་དང༌། ཆོ་འཕྲུལ་གྱི་བྱ་བ་དང༌། ཕྲིན་ལས་ཀྱི་སྤྱོད་པ་ལ་རྗེས་སུ་ཡི་རང་བའོ། །བློ་དམན་རྣམས་ལ་ཕན་གདགས་ཕྱིར། །རྒྱུད་ཀྱི་འབྲུ་འགྲེལ་གསལ་བར་བཀྲོལ། །མཁས་པ་རྣམས་ཀྱིས་བཟོད་པ་མཛོད། །ཀུན་གྱིས་དོན་རྟོགས་བདེ་ལེགས་སྨོན། །དོན་གྱི་འབྲུ་འགྲེལ་སློབ་དཔོན་སངས་རྒྱས་གསང་བས་མཛད་པ་རྫོགས་སོ།།