ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་བརྟག་པ་སྣང་བའི་རྒྱན་ཞེས་བྱ་བ།
རྒྱ་གར་སྐད་དུ། སརྦ་དུ་རྒ་ཏི་པ་རི་ཤོ་དྷ་ནེ་ཏེ་ཛོ་རཱ་ཛ་ཀལྤ་ཨཱ་ལོ་ཀཱ་ལཾ་ཀ་ར་ནཱ་མ། བོད་སྐད་དུ། ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་བརྟག་པ་སྣང་བའི་རྒྱན་ཞེས་བྱ་བ། གཙོ་ཆེན་ཀུན་རིག་ཤཱཀྱ་ཐུབ། །རྡོ་རྗེ་འཛིན་པ་ཞི་དང་ཁྲོ། །ཚེ་དཔག་མེད་དང་བདེ་བ་ཆེ། །འཁོར་དང་བཅས་ལ་ཕྱག་འཚལ་ནས། །ངན་སོང་རྣམ་པར་སྦྱོང་བྱེད་པའི། །གཟི་བརྗིད་
རྒྱལ་པོའི་བརྟག་པ་ནི། བདག་ཉིད་དྲན་པ་སྐྱེད་པའི་ཕྱིར། །ཅི་ནུས་པས་ནི་རྣམ་པར་དབྱེ། །འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པས་འདིའི་བརྗོད་པར་བྱ་བ་དང་འབྲེལ་པ་ནི་གང་ཞིག་ཡིན། དགོས་པ་དང་དགོས་པའི་དགོས་པ་ནི་ཅི་ཞིག་ཡོད་ཅེ་ན། དེ་བརྗོད་པར་བྱ་སྟེ། ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཞེས་བྱ་བ་ནི་རྒྱུད་ཡིན་ལ། འདི་སྐད་བདག་གིས་ཐོས་པ་ཞེས་བྱ་བ་ནས་ཚངས་པ་ཆེན་པོ་པདྨའི་གདན་ལ་བཞུགས་ཏེ་ཞེས་བྱ་བའི་བར་གྱིས་ཤཱཀྱ་ཐུབ་པ་ཉིད་དང་གཞན་གྱི་དོན་ཕུན་སུམ་ཚོགས་པའི་རང་བཞིན་སྟོན་པའི་གླེང་གཞིའི་མདོ་ནི། གདུལ་བྱ་མངོན་པར་འདོད་པ་བསྐྱེད་པའི་ཕྱིར་གསུངས་པ་ཡིན་ནོ། །གདུལ་བྱ་མངོན་པར་འདོད་པ་སྐྱེས་པ་རྣམས་ལ་ཤཱཀྱ་ཐུབ་པ་དེ་མངོན་སུམ་དུ་བྱེད་པའི་ཐབས་ནི་ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཞེས་བྱ་བ་ནས་བརྩམས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་བྱ་བའི་བར་གྱི་གཞུང་གིས་ཐབས་བསྟན་ཏོ། །ཡང་འདི་ཀུན་རིག་དང་གཙུག་ཏོར་དགུ་དང༌། ཚེ་དཔག་ཏུ་མེད་པའི་དཀྱིལ་འཁོར་ནི་བར་མ་ལ་སྲིད་པ་རྗེས་སུ་འཛིན་པར་བྱེད་པ་ཡིན་ནོ། །བདེ་བ་ཆེན་པོ་དང༌། འཆི་བདག་འཇོམས་པ་དང༌། ཁྲོ་བོ་རྡོ་རྗེ་མེ་ནི། མཆོག་ལ་སྲིད་པ་རྗེས་སུ་འཛིན་པར་བྱེད་པ་ཡིན་ནོ། །འཇིག་རྟེན་པའི་དཀྱིལ་འཁོར་རྣམས་ནི་མཆོག་དང་བར་མ་མ་ཡིན་པ་ལ་སྲིད་པ་རྗེས་སུ་འཛིན་པར་བྱེད་པ་ཡིན་ནོ། །ཇི་སྐད་དུ་འདི་ཉིད་ལས། སྲིད་དང་སྲིད་མིན་རྣམ་སྦྱོང་བ། །ཞི་ཞིང་དུལ་ལ་དགའ་བ་ཆེ། །ཞེས་གསུངས་པའི་ཕྱིར་རོ། །ཡང་འདིར་ནི་ཀུན་རིག་དང་བདེ་བ་ཆེན་པོའི་དཀྱིལ་འཁོར་ནི། སྐུ་སྟོན་ཞིང་ཕྱག་རྒྱ་ཆེན་པོ་ཡིན་ལ། དེ་བཞིན་གཤེགས་པའི་རིགས་སུ་བསྟན་ཏེ། འདོད་ཆགས་ཀྱིས་འདོད་ཆགས་སྤང་བའི་ཕྱིར་གསུངས་པ་ཡིན་ནོ། །གཙུག་ཏོར་དང་འཆི་བདག་འཇོམས་པའི་དཀྱིལ་འཁོར་ནི་གསུང་སྟོན་ཞིང་ཆོས་ཀྱི་ཕྱག་རྒྱ་གཙོ་བོར་གྱུར་ལ། པདྨའི་རིགས་སུ་བསྟན་ཏེ་གཏི་མུག་གིས་གཏི་མུག་སྤང་བའི་ཕྱིར་གསུངས་པ་ཡིན་ནོ། །ཚེ་
དཔག་མེད་དང་ཁྲོ་བོ་ཉི་མ་དང་མེ་དང་འཇིག་རྟེན་པའི་དཀྱིལ་འཁོར་རྣམས་ནི་ཐུགས་སྟོན་ཞིང་དམ་ཚིག་གི་ཕྱག་རྒྱ་གཙོ་བོར་གྱུར་ལ་རྡོ་རྗེའི་རིགས་ཡིན་ཏེ། ཁྲོ་བས་ཁྲོ་བ་སྤང་བའི་ཕྱིར་གསུངས་པ་ཡིན་ནོ། །ཇི་སྐད་དུ་འདི་ཉིད་ལས། ལག་པ་གཡོན་པའི་ཐལ་མོ་བཀན་ཏེ་པང་དུ་བཞག་ལ་དེའི་སྟེང་དུ་གཡས་པ་བཞག་སྟེ་མཐེ་བོང་གཉིས་སྤྲད་ལ་ཞི་བའི་ལྟ་བས་བལྟ་བ་འདི་ནི་དེ་བཞིན་གཤེགས་པའི་རིགས་ཀྱི་ཏིང་ངེ་འཛིན་གྱི་ཕྱག་རྒྱ་སྟེ་དམ་ཚིག་ཡིན་པར་བཤད་དོ། །དེ་ཉིད་ལས་བཟློག་སྟེ་སྟག་འོག་བསྣོལ་ལ་མཐེ་བོང་དང་མཐེའུ་ཆུང་གཉིས་གཅིག་ལ་གཅིག་ལུ་གུ་རྒྱུད་ཀྱི་ཚུལ་དུ་བསྣོལ་ལ་སྙིང་གར་གཞག་པ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། །ཐལ་མོ་རྫོགས་པར་སྦྱར་བ་ལས་མཐེ་བོང་མཐེའུ་ཆུང་གཉིས་བསྙམས་པ་ལ་ལྷག་མ་བརྐྱང་བ་འདི་ནི་པདྨོའི་རིགས་ཀྱི་པདྨོའི་ཕྱག་རྒྱའོ་ཞེས་བྱ་བ་དང༌། རྩེ་གསུམ་རྩེ་གསུམ་འཆང་འཕྲོ་དང༌། །འདོད་ཆགས་ཞེ་སྡང་གཏི་མུག་གཙོ། །ཞེས་པ་དང༌། མ་རིག་འཇོམས་པའི་ཚངས་པ་སྟེ། །འདོད་ཆགས་ཞེ་སྡང་དྲི་མཐར་མཛད། །ཅེས་གསུངས་པའི་ཕྱིར་རོ། །ཡང་ཀུན་རིག་དང་བདེ་བ་ཆེན་པོ་ནི་ལོངས་སྤྱོད་རྫོགས་པའི་སྐུའི་ཚུལ། ཤཱཀྱ་ཐུབ་པ་གཙུག་ཏོར་གྱི་དཀྱིལ་འཁོར་དང༌། འཆི་བདག་འཇོམས་པ་སྤྲུལ་པའི་སྐུའི་ཚུལ། དཀྱིལ་འཁོར་ལྷག་མ་རྣམས་ནི་ཆོས་ཀྱི་སྐུའི་ཚུལ་སྟོན་པ་ཡིན་ནོ། །འདི་ཉིད་ལས་ཇི་སྐད་དུ་བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ལོངས་སྤྱོད་རྫོགས་པའི་སྐུས་རྡོ་རྗེ་སེམས་དཔའི་སྐུར་ཞུགས་པར་འཚལ་བར་བགྱི་སྟེ་ཞེས་གསུངས་པའི་ཕྱིར་རོ། །ཡང་འདིའི་དབང་དང་དམ་ཚིག་དངོས་གྲུབ་ཀྱི་དཀྱིལ་འཁོར་ཀུན་རིག་དང༌། གཙུག་ཏོར་དགུ་དང༌། ཚེ་དཔག་མེད་དང༌། རྒྱལ་ཆེན་བཞི་དང༌། ཕྱོགས་སྐྱོང་བཅུ་དང༌། གཟའ་ཆེན་བརྒྱད་དང༌། ཀླུ་ཆེན་བརྒྱད་དང༌། འཇིགས་བྱེད་ཆེན་པོ་དང༌། ལྷ་ཆེན་རྣམས་ཀྱི་དཀྱིལ་འཁོར་དང༌། འཆི་བདག་འཇོམས་པ་དང༌། བདེ་བ་ཆེན་པོ་དང༌། ཁྲོ་བོ་རྡོ་རྗེ་ཉི་མ་མེའི་དཀྱིལ་འཁོར་ཏེ་བཅུ་གཉིས་སོ། །བསྒྲུབ་པའི་དཀྱིལ་འཁོར་ཀུན་རིག་གི་རས་ལ་བྲི་བ་དང༌། གཙུག་ཏོར་དགུའི་
རས་ལ་བྲི་བ་དང༌། ཚེ་དཔག་མེད་ཀྱི་རས་ལ་བྲི་བ་དང༌། ཀླུ་ཆེན་བརྒྱད་ཀྱི་བསམ་པ་དང༌། འཇིགས་བྱེད་ཆེན་པོའི་བསམ་པ་དང༌། ལྷ་ཆེན་པོའི་བསམ་པ་དང༌། འཆི་བདག་འཇོམས་པའི་བསམ་པ་དང༌། བདེ་བ་ཆེན་པོའི་བསམ་པ་དང༌། རྡོ་རྗེ་ཉི་མ་མེའི་བསམ་པ་སྟེ་དགུའོ། དེ་ཁོ་ན་སྟེ་དཀྱིལ་འཁོར་གྱི་དེ་ཁོ་ན་ཉིད་དོ། །དཀྱིལ་འཁོར་བསྐྱེད་པའི་གསང་སྔགས་དང༌། བྱིན་གྱིས་བརླབ་པའི་གསང་སྔགས་དང༌། མཆོད་པའི་སྔགས་དང༌། དབང་དང་དམ་ཚིག་སྦྱིན་པའི་སྔགས་དང༌། བསྒྲུབ་པའི་སྔགས་དང༌། བརྡུང་བའི་སྔགས་དང། དགུག་པའི་སྔགས་དང༌། སྔགས་ཀྱི་དེ་ཁོ་ན་ཉིད་དེ་ཅི་རིགས་སུ་སྦྱར་རོ། །འདིའི་ཀུན་རིག་གི་སྐབས་ན་ལྕགས་ཀྱུ་ལ་སོགས་པའི་ཕྱག་རྒྱ་དང༌། གཙུག་ཏོར་དང་བདེ་བ་ཆེན་པོའི་སྐབས་ནས་བཤད་པ་སྟེ་ཕྱག་རྒྱའི་དེ་ཁོ་ན་ཉིད་དོ། །ཀླུ་ཆེན་བརྒྱད་དང༌། འཇིགས་བྱེད་ཆེན་པོ་དང༌། ལྷ་ཆེན་པོ་བརྒྱད་ཀྱི་དཀྱིལ་འཁོར་དང༌། འཆི་བདག་འཇོམས་པ་དང༌། བདེ་བ་ཆེན་པོ་དང༌། ཁྲོ་བོ་རྡོ་རྗེ་ཉི་མ་དང༌། མེའི་དཀྱིལ་འཁོར་གྱི་སྐབས་ནས་བསྒོམ་པའི་སྒོ་ནས་བསྒྲུབ་པ་དྲུག་སྟེ་ཏིང་ངེ་འཛིན་གྱི་དེ་ཁོ་ན་ཉིད་དོ། །ཡང་ཀུན་རིག་གི་རས་རིས་ཀྱི་བཟླས་པ་དང། རོ་འམ་གཟུགས་བརྙན་ལ་བཟླས་པ་དང༌། གཙུག་ཏོར་དགུའི་རས་རིས་དང༌། རོའམ་གཟུགས་བརྙན་ལ་བཟླས་པ་དང༌། ཚེ་དཔག་མེད་ཀྱི་རས་རིས་ཀྱི་བཟླས་པ་དང༌། ཀླུ་ཆེན་བརྒྱད་ཀྱི་བཟླས་པ་དང༌། ལྷ་ཆེན་དང་འཇིགས་བྱེད་ཆེན་པོའི་བཟླས་པ་དང༌། འཆི་བདག་འཇོམས་པའི་སྐབས་དང༌། ཁྲོ་བོའི་སྦྱིན་སྲེག་གི་སྐབས་ཀྱི་བཟླས་པ་དང་བཅུ་ནི་བཟླས་བརྗོད་ཀྱི་དེ་ཁོ་ན་ཉིད་དོ། །ཡང་ཀུན་རིག་གི་སྐབས་ནས་ཞི་བའི་དོན་དུ་སྦྱིན་སྲེག་དང༌། རོ་བསྲེག་པའི་དོན་དུ་ཞི་བའི་སྦྱིན་སྲེག་དང༌། གཙུག་ཏོར་དགུའི་དོན་དུ་ཞི་བའི་སྦྱིན་སྲེག་དང༌། འཆི་བདག་འཇོམས་པའི་ཞི་བ་དང༌། རྒྱས་པ་དང༌། དབང་དང༌། མངོན་སྤྱོད་ཀྱི་སྦྱིན་སྲེག་དང༌། བདེ་བ་ཆེན་པོའི་སྐབས་ནས་ཞི་བ་དང༌། རྒྱས་པ་དང༌། དབང་དང༌། མངོན་སྤྱོད་དང༌། རྡོ་རྗེ་ཉི་མ་མེའི་ཞི་བ་དང༌། རྒྱས་པ་དང༌། དབང་དང༌། མངོན་སྤྱོད་དང་བཅུ་བཞི་སྟེ། སྦྱིན་
སྲེག་གི་དེ་ཁོ་ན་ཉིད་དོ། །རྡོ་རྗེ་ཉི་མ་མེ་མ་གཏོགས་པའི་དཀྱིལ་འཁོར་བཅུ་གཅིག་པ་ལ་སོགས་པ་ནས་སྤྱན་དྲང་བ་བསྟན་པ་ནི་སྤྱན་དྲང་བའི་དེ་ཁོ་ན་ཉིད་དོ། །དཀྱིལ་འཁོར་དེ་དག་དང་སྦྱིན་སྲེག་དང་རས་རིས་ལ་སོགས་པ་རྣམས་ལས་མཆོད་པ་བཤད་པ་རྣམས་དང༌། རྡོ་རྗེ་ཉི་མ་མེའི་སྦྱིན་སྲེག་གི་སྐབས་ནས་ལྷ་རྣམས་མཆོད་ཅིང་གཤེགས་སུ་གསོལ་བའི་དེ་ཁོ་ན་ཉིད་བསྟན་ཏོ། །ཀུན་རིག་གི་རས་བྲིས་ཀྱི་སྐབས་ནས་འཇིག་རྟེན་གསུམ་རྒྱལ་དུ་བསྐྱེད་དེ་བདག་གི་བདག་གི་དེ་ཉིད་དྲན་པས་ནི་བདག་བསྲུང་བ་ནི་སྲུང་བའི་དེ་ཁོ་ན་ཉིད་བསྟན་ཏོ། །ཡང་དངོས་སུ་ཏིང་ངེ་འཛིན་ཐབས་ཡིན་པས་དེ་བརྗོད་པར་བྱ་སྟེ། དེ་ཡང་རྩ་བའི་རྒྱུད་ཀྱིས་བཤད་པར་བྱའོ། །ངན་སོང་ཐམས་ཅད་ཀྱི་རྒྱུད་ཡོངས་སུ་སྦྱོང་བ་ཞེས་བྱ་བ་ནས་བརྩམས་ཏེ་སངས་རྒྱས་བྱེ་བ་ཕྲག་དགུ་བཅུ་རྩ་བཞིས་བཤད་པ་ངས་བཤད་ཀྱིས་ཉོན་ཅིག་ཅེས་བྱ་བའི་བར་གྱིས་ངན་འགྲོ་སྦྱོང་ཞིང་ནོར་བུ་དྲི་མ་མེད་པ་ལུང་བསྟན་པ་སྟེ་དང་པོ་སྦྱོར་བའི་ཏིང་ངེ་འཛིན་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཞེས་བྱ་བ་ནས་བརྩམས་ཏེ། འཇིག་རྟེན་དང་འཇིག་རྟེན་ལས་འདས་པའི་ཕན་པ་དང་བདེ་བ་ཐམས་ཅད་མྱོང་བར་འགྱུར་རོ་ཞེས་བྱ་བའི་བར་གྱི་གཞུང་གིས་ཚངས་པ་ལ་སོགས་པའི་འཇིག་རྟེན་པའི་ལྷའི་དཀྱིལ་འཁོར་དུ་དགོད་པའི་ཕྱིར་དང་ལྷ་རྣམས་བསྐྱེད་པའི་ཕྱིར་གསང་སྔགས་བཤད་པ་སྟེ་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །དེ་ནས་བསྡུ་ཞིང་བྱིན་གྱིས་བརླབ་པ་ནས་བརྩམས་ཏེ་ལས་ཀྱི་རྒྱལ་པོ་མཆོག་འཕགས་པ་གསང་ཞིང་སྲ་བའི་མཆོག་མཐོན་པོ་ལས་བཤད་པ་བཞིན་དུ་ཤེས་པར་བྱའོ། །དབང་དང་དམ་ཚིག་ཐོབ་པས་ཐབས་འདི་ཉིད་ལ་འཇུག་པར་བྱ་བའི་ཕྱིར་དེ་ནས་ལྷ་རྣམས་ཀྱི་དབང་པོ་ཞེས་བྱ་བ་ནས་བརྩམས་ཏེ། བརྩེར་ལྡན་དངོས་གྲུབ་མྱུར་དུ་འགྲུབ། །ཅེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་གཞུག་པ་ལ་སོགས་པའི་ཆོ་ག་སྟོན་ཏོ། །དེ་ཉིད་དུ་དབང་དང་དམ་ཚིག་ཐོབ་པ་རྣམས་ལ། ཇི་ལྟར་འདོད་པའི་དངོས་གྲུབ་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར།
དེ་ནས་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ཞེས་བྱ་བ་ནས། གནོད་སྦྱིན་རྒྱུ་སྐར་གདོང་ལ་སོགས། །ཚིག་ཙམ་གྱིས་ནི་དྲན་བཞིན་དུ། །ཞི་བ་ལ་སོགས་ལས་ཀུན་བྱེད། །ཅེས་བྱ་བའི་བར་གྱི་གཞུང་གིས་དངོས་གྲུབ་སྟོན་ཏོ། །ཡང་འདི་ཉིད་དུ། དབང་དང་དམ་ཚིག་ཐོབ་པ་རྣམས་ལ། སྡིག་པ་ཆེན་པོ་བྱས་པས་སེམས་ཅན་དམྱལ་བ་ལ་སོགས་པའི་ནང་དུ་གྱུར་པ་རྣམས་ཐབས་སླ་བས་གྲོལ་བར་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཞེས་བྱ་བ་ནས། བདེ་གཤེགས་རྒྱལ་བ་ཉིད་ཀྱིས་གསུངས། །ཞེས་བྱ་བའི་བར་གྱི་གཞུང་གིས་ཤི་བའི་དབང་དུ་གྱུར་པའི་ཆོ་ག་བསྟན་ཏོ། །དེ་ནས་བརྒྱ་བྱིན་ལ་སོགས་ལྷས། །པདྨ་ལྟ་བུའི་མིག་ཕྱེ་ནས། །ཞེས་པ་ནས་བརྩམས་ཏེ་བག་ཡོད་པར་གྱིས་ལ་སྒྲུབས་ཤིག་ཅེས་བྱ་བའི་བར་གྱི་གཞུང་གིས་ནོར་བུ་དྲི་མ་མེད་པ་དགའ་ལྡན་དུ་སྐྱེས་པ་དང༌། རྒྱུད་གཏད་པ་བསྟན་ཏེ། རྩ་བའི་རྒྱུད་ཀྱི་བསྡུས་པའི་དོན་བསྟན་ཏོ། །རྒྱུད་ཕྱི་མའི་བསྡུས་པའི་དོན་བསྟན་པར་བྱ་སྟེ་དེ་ལས་ཀྱང་དང་པོར་གཙུག་ཏོར་དགུའི་བསྡུས་པའི་དོན་བསྟན་པ་སྟེ། འདིར་དང་པོར་སྦྱོར་བའི་ཏིང་ངེ་འཛིན་ནི་རྩ་བའི་རྒྱུད་ལས་བཤད་པ་ལས་ཕྱག་ན་རྡོ་རྗེ་དང་བཅས་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ་ཧཱུཾ་ཕཊ་ཅེས་པའི་བར་གྱི་གཞུང་གིས་དཀྱིལ་འཁོར་རྒྱལ་མཆོག་བསྟན་ཏོ། །ལས་རྒྱལ་མཆོག་ནི་སྔ་མ་བཞིན་དུ་ཤེས་པར་བྱའོ། །ཐབས་དེ་ལ་འདི་ཉིད་དུ་དབང་དང་དམ་ཚིག་ཐོབ་པས་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་བཤད་དེ་ཞེས་བྱ་བ་ནས་བརྩམས་ཏེ། ཕྱག་ན་རྡོ་རྗེ་ཧཱུཾ་ཞེས་བྱ་བ་ལས་ཐམས་ཅད་བྱེད་པའི་བར་གྱི་གཞུང་གིས་སློབ་དཔོན་གྱི་ལས་དང༌། སློབ་མ་གཞུག་པ་ལ་སོགས་པའི་ཆོ་ག་བསྟན་ཏོ། །འདི་ལས་གསུངས་པའི་དངོས་གྲུབ་རྣམས་བྱ་བ་དང་སྤྱོད་པ་དང་རྣལ་འབྱོར་གྱི་རྒྱུད་གཞན་ལས་གསུངས་པའི་ཐབས་ཀྱིས་འགྲུབ་པོ་ཞེས་བྱ་བར་བརྟག་པ་གཞན་གྱི་ཆོ་
གས་ཀྱང་ཐམས་ཅད་འགྲུབ་པར་འགྱུར་རོ་ཞེས་བྱ་བས་སྟོན་ཏོ། །འདི་ཉིད་དུ་དབང་དང་དམ་ཚིག་ཐོབ་པའི་སློབ་དཔོན་གྱིས་ཤི་བའི་རོ་ལ་སོགས་པ་ལ་བཟླས་པ་དང་སྦྱིན་སྲེག་དང་དབང་རྣམས་ཀྱིས་གྲོལ་བར་བྱེད་དོ་ཞེས་པའི་དོན་བསྟན་པར་བྱ་བའི་ཕྱིར་ལྷ་དང་ཀླུ་དང་ཞེས་བྱ་བ་ནས་བརྩམས་ཏེ་ཡོངས་སུ་གྲོལ་བར་བྱེད་དོ་ཞེས་བྱ་བའི་བར་གྱི་གཞུང་གིས་བསྟན་ཏོ། །རྩ་བའི་རྒྱུད་དང་རྒྱུད་ཕྱི་མ་དང་ཕྱི་མའི་ཡང་ཕྱི་མ་ལས་གསུངས་པའི་ལྷ་རྣམས་བསྒྲུབ་པའི་ཕྱིར། རྒྱས་གདབ་པོ་ཞེས་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཕྱག་ན་རྡོ་རྗེས་སེང་གེའི་ལྟ་སྟངས་ཀྱིས་ཞེས་བྱ་བ་ནས། དེ་ལས་བསྐྱེད་ནས་བསྙེངས་པའོ། །ཞེས་པའི་བར་གྱི་གཞུང་གིས་བསྟན་ཏོ། །ཡང་འདི་ཉིད་དུ་དབང་དང་དམ་ཚིག་ཐོབ་པས་རས་རིས་མཆོད་དེ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་བསྙེན་པ་བྱས་ནས་ལས་ཐམས་ཅད་བྱའོ་ཞེས་བྱ་བའི་བར་གྱི་གཞུང་གིས་སྒྲུབ་པར་བསྟན་ཏོ། །དེ་ནས་ཚངས་པ་ལ་སོགས་པའི་ལྷ་རྣམས་ཀྱིས་ཞེས་བྱ་བ་ནས། གཞན་ཡིན་པར་མི་ལྟའི་འཁོར་འདི་ཉིད་ཡིན་ནོ་ཞེས་བྱ་བའི་བར་གྱི་གཞུང་གིས་ལྷའི་བུ་ནོར་བུ་དྲི་མ་མེད་པ་ལས་ཀྱི་རྣམ་པར་སྨིན་པ་ཅི་ལས་གྱུར་པ་བསྟན་ཏོ། །གཙུག་ཏོར་དགུའི་བསྡུས་པའི་དོན་ཏོ། །ད་ནི་ཚེ་ཚད་མེད་པའི་བསྡུས་པའི་དོན་བཤད་པར་བྱ་སྟེ། སྦྱོར་བ་དང་པོའི་ཏིང་ངེ་འཛིན་ནི་གཙུག་ཏོར་དུ་བཤད་པ་ཉིད་དོ། །དེ་ནས་བརྒྱ་བྱིན་དང་ཚངས་པ་རྣམས་ཡིད་རབ་ཏུ་མགུ་ཞིང་རངས་ནས་ཞེས་བྱ་བ་ནས། གསང་བའི་བདག་པོས་བཤད་དུ་གསོལ། །ཞེས་བྱ་བའི་གཞུང་གིས་བསྟོད་ཅིང་གསོལ་བ་གདབ་པར་སྟོན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་བྱ་བ་ནས་རྨད་ཀྱི་ཡ་མཚན་དུ་མ་འཇིགས་རྟེན་དུ་སྣང་བར་གྱུར་ཏོ་ཞེས་བྱ་བའི་བར་གྱི་གཟུང་གིས་དཀྱིལ་འཁོར་སྤྲུལ་པའི་གསང་སྔགས་བསྟན་ཏེ་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །དེ་ནས་བསྲུང་བ་དང་བྱིན་གྱིས་བརླབ་པ་ནི་སྔ་མ་བཞིན་དུ་ཤེས་པར་བྱའོ། །ཚེ་ཚད་མེད་པའི་དཀྱིལ་འཁོར་འདི་ཉིད་དུ་དབང་དང་དམ་ཚིག་ལ་སོགས་པ་ཐོབ་པས་
ཐབས་དེ་ལ་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། །དེ་ནས་དཀྱིལ་འཁོར་འདི་ཡིན་ཏེ། །གྲུ་བཞི་པ་ལ་སྒོ་བཞི་པ། །ཞེས་བྱ་བ་ནས་བརྩམས་ཏེ་ཨ་བྷི་ཥིཉྩ་ཧཱུཾ་ཞེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པ་སྟོན་ཏོ། །དེ་ཉིད་དུ་དབང་དང་དམ་ཚིག་ལ་སོགས་པ་ཐོབ་པ་ལ་དངོས་གྲུབ་སྦྱིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ལྟར་དབང་བསྐུར་ནས་ཚེ་བསྲིང་བའི་རིག་པ་སྦྱིན་ནོ་ཞེས་བྱ་བ་ནས་བརྩམས་ཏེ། བརྟག་མི་དགོས་པར་ཐེ་ཚོམ་མེད། །ཅེས་བྱ་བའི་གཞུང་གིས་ཚེ་ཚད་མེད་པའི་དངོས་གྲུབ་བསྟན་ཏོ། །ཚེ་ཚད་མེད་པའི་བསྡུས་པའི་དོན་ཏོ། །ད་ནི་འཇིག་རྟེན་པའི་ལྷ་ལ་སྲིད་པ་རྗེས་སུ་འཛིན་པར་བྱེད་པའི་དོན་དུ་འཇིག་རྟེན་པའི་དཀྱིལ་འཁོར་དྲུག་བསྟན་ཏོ། །དེ་ལ་དང་པོ་རྒྱལ་པོ་ཆེན་པོ་བཞིའི་དཀྱིལ་འཁོར་བསྡུས་པའི་དོན་བརྗོད་པར་བྱ་སྟེ། འདིའི་སྦྱོར་བ་དང་པོའི་ཏིང་ངེ་འཛིན་ནི་གཙུག་ཏོར་དུ་བཤད་པ་ལས་རྒྱལ་པོ་ཆེན་པོ་བཞི་དང་བཅས་པའོ། །རྒྱལ་པོ་ཆེན་པོ་བཞིས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་ཞེས་བྱ་བ་ནས་བརྩམས་ཏེ། ཨོཾ་ཀྵ་ཞེས་བྱ་བའི་བར་གྱི་བཤད་པས་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ཏོ། །ལས་ཀྱི་རྒྱལ་པོ་མཆོག་ནི་སྔ་མ་བཞིན་དུ་ཤེས་པར་བྱའོ། །འདི་ཉིད་དུ་དབང་དང་དམ་ཚིག་ཐོབ་པས་ཐབས་དེ་ལ་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དེ་དག་དཀྱིལ་འཁོར་འདི་ཡིན་ཏེ། །ཞེས་བྱ་བ་ནས། ཕྱག་ན་རྡོ་རྗེ་ལ་ཡང་འཁུས་པར་འགྱུར། །ཞེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པ་སྟོན་ཏེ་རྒྱལ་པོ་ཆེན་པོ་བཞིའི་བསྡུས་པའི་དོན་ཏོ། །དེ་ནས་ཕྱོགས་སྐྱོང་བཅུ་རྣམས་ཀྱི་དཀྱིལ་འཁོར་གྱི་དོན་བསྡུས་པའི་དོན་བཤད་པར་བྱ་སྟེ། དེ་ནས་ཞེས་བྱ་བ་དང་པོའི་སྦྱོར་པའི་ཏིང་ངེ་འཛིན་གྱི་རྗེས་ཐོགས་ལ་ཞེས་བྱ་བའི་དོན་ཏེ། འདིར་དང་པོའི་སྦྱོར་བའི་ཏིང་ངེ་འཛིན་ནི། གཙུག་ཏོར་དུ་གསུངས་པ་ལས་ཕྱོགས་སྐྱོང་བ་བཅུ་དང་བཅས་པ་ཡིན་ནོ། །ཕྱོགས་སྐྱོང་བ་བཅུ་
རྣམས་ཀྱིས་ཞེས་བྱ་བ་ནས་བརྩམས་ཏེ། ཨོཾ་པྲ་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །ལས་ཀྱི་རྒྱལ་པོ་མཆོག་ནི་སྔ་མ་བཞིན་དུ་ཤེས་པར་བྱའོ། །འདི་ཉིད་དུ་དབང་དང་དམ་ཚིག་ཐོབ་པས་ཐབས་དེ་ལ་འཇུག་པར་བྱའོ་ཞེས་པའི་དོན་འདི་བསྟན་པར་བྱ་བའི་ཕྱིར། དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས་བདག་ཉིད་ཀྱིས་ཀྱང་ཡོངས་སུ་བསྐྱབ་པར་བྱའོ་ཞེས་བྱ་བའི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པ་བསྟན་ཏོ། །ཕྱོགས་སྐྱོང་བ་བཅུའི་བསྡུས་པའི་དོན་ཏོ། །གཟའ་ཆེན་པོ་བརྒྱད་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། དེ་ནས་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བ་ནི་དང་པོའི་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལ་སྟེ། འདིར་དང་པོའི་སྦྱོར་བའི་ཏིང་ངེ་འཛིན་ནི་གཙུབ་ཏོར་དུ་བཤད་པ་ལས་གཟའ་ཆེན་པོ་བརྒྱད་རྒྱུ་སྐར་དང་བཅས་པ་ཡིན་ནོ། །གཟའ་ཆེན་པོ་བརྒྱད་ཅེས་པ་ནས། ཨོཾ་ཧ་ཞེས་བྱ་བའི་གཞུང་གིས་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །ལས་ཀྱི་རྒྱལ་པོ་མཆོག་ནི་སྔ་མ་བཞིན་དུ་ཤེས་པར་བྱའོ། །ཐབས་དེ་ལ་དམ་ཚིག་དང་དབང་ཐོབ་པས་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས་གདོན་མི་ཟ་བར་འཇིགས་པ་མི་འབྱུང་ངོ་ཞེས་བྱ་བའི་བར་གྱིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་དཀྱིལ་འཁོར་དུ་འཇུག་པའི་ཆོ་ག་གསུངས་པ་ཡིན་ནོ། །གཟའ་ཆེན་པོ་བརྒྱད་ཀྱི་བསྡུས་པའི་དོན་ནོ། །དེ་ནས་ཞེས་བྱ་བ་ལ་སོགས་པས་ཀླུ་ཆེན་པོ་བརྒྱད་ཀྱི་དཀྱིལ་འཁོར་བསྟན་ཏེ་དེ་ནས་ཞེས་བྱ་བ་དང་པོའི་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་གཙུག་ཏོར་དུ་བཤད་པ་ལས་ཀླུ་ཆེན་པོ་བརྒྱད་དང་བཅས་པ་ཡིན་ནོ། །དེ་ནས་ཀླུ་ཆེན་པོ་ནས་ཞེས་བྱ་བ་ནས། ཨོཾ་ཕུཿ་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །བསྡུ་ཞིང་བྱིན་གྱིས་བརླབ་པ་ནི་སྔ་མ་བཞིན་དུ་ཤེས་པར་བྱའོ། །
འདི་ཉིད་དུ་དམ་ཚིག་དང་དབང་ཐོབ་པས་ཐབས་དེ་ལ་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་དག་གི་དཀྱིལ་འཁོར་བཤད་དེ། པདྨ་ཆེན་པོ་འདབ་མ་བརྒྱད་པ་ཞེས་བྱ་བ་ནས་རྡོ་རྗེ་འཛིན་པའི་བཀའ་རབ་ཏུ་བསྒྲུབ་པར་བགྱིའོ་ཞེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པ་སྟོན་ཏོ། །ཀླུའི་དཀྱིལ་འཁོར་འདི་ཉིད་དུ་དབང་དང་དམ་ཚིག་ཐོབ་པས་བསམ་པའི་དཀྱིལ་འཁོར་ལ་བརྟེན་ཏེ་དགུ་བསལ་བའི་དངོས་གྲུབ་བསྟན་པའི་ཕྱིར། དེ་ནས་བསྒྲུབ་པ་བཤད་དེ་ཞེས་བྱ་བ་ནས། སྤྲུལ་མགོའི་ཕྱག་རྒྱས་སྨོས་ཅི་དགོས། །ཞེས་བྱ་བའི་བར་གྱིས་དངོས་གྲུབ་སྟོན་ཏོ། །ཀླུ་ཆེན་བརྒྱད་ཀྱི་བསྡུས་པའི་དོན་ཏོ། །དེ་ནས་ཞེས་བྱ་བ་ལ་སོགས་པས་འཇིགས་བྱེད་ཆེན་པོའི་དཀྱིལ་འཁོར་སྟོན་ཏོ། །དེ་ནས་ཞེས་བྱ་བ་ནི་དང་པོའི་སྦྱོར་བའི་རྗེས་ཐོགས་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་གཙུག་ཏོར་དུ་བཤད་པ་ལས་འཇིགས་བྱེད་ཆེན་པོ་མ་མོ་བརྒྱད་དང་བཅས་པ་ཡིན་ནོ། །དེ་ནས་ལྷ་ཆེན་པོ་རྣམས་ཀྱི་བདག་པོ་འཇིགས་བྱེད་ཆེན་པོ་བྱེད་པ་ཞེས་བྱ་བ་ནས། ཨོཾ་བྷ་སྭཱ་ཧཱ་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །ལས་ཀྱི་རྒྱལ་པོ་མཆོག་ནི་སྔ་མ་བཞིན་དུ་ཤེས་པར་བྱའོ། །འདི་ཉིད་དུ་དབང་དང་དམ་ཚིག་ཐོབ་པས་ཐབས་དེ་ལ་འཇུག་པར་བྱའོ་ཞེས་བྱའོ་ཞེས་བསྟན་པའི་ཕྱིར། དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས། དེ་ལྟར་བརྒྱད་ཀྱིས་དབང་བསྐུར་རོ། །ཞེས་བྱ་བའི་བར་གྱིས་སློབ་དཔོན་གྱིས་ལས་ཀྱི་ཆོ་ག་དང་སློབ་མ་དཀྱིལ་འཁོར་དུ་འཇུག་པ་ལ་སོགས་པ་སྟོན་ཏོ། །དེ་ཉིད་དུ་དབང་དང་དམ་ཚིག་ཐོབ་པ་ལ་སོགས་པ་ལ་ལས་སྦྱིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ལས་རྣམས་སྦྱིན་པར་བྱ་སྟེ་ཞེས་བྱ་བ་ནས་བརྩམས་ཏེ། བྱིན་ནས་དགོད་ཅིང་གྲོལ་བར་བྱེད། །སྐྲག་ནས་དེ་མ་ཐག་ཏུ་གསོད། །ཅེས་བྱ་བའི་བར་གྱིས་དངོས་གྲུབ་བསྟན་ཏེ་འཇིགས་བྱེད་ཆེན་པོའི་དཀྱིལ་འཁོར་གྱི་བསྡུས་པའི་དོན་ཏོ། །དེ་ནས་
ཞེས་བྱ་བ་ལ་སོགས་པས་ལྷ་ཆེན་པོའི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་དང་པོའི་སྦྱོར་བའི་ཏིང་ངེ་འཛིན་གྱི་རྗེས་ཐོགས་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་གཙུག་ཏོར་དུ་བཤད་པ་ལས་ཚངས་པ་ལ་སོགས་ཏེ་ལྷ་ཆེན་པོ་དང་བཅས་པ་ཡིན་ནོ། །དེ་ནས་ཚངས་པ་ཞེས་བྱ་བ་ནས་ཨོཾ་ག་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་བསྟན་ཏོ། །ལས་ཀྱི་རྒྱལ་པོ་མཆོག་གི་ཏིང་ངེ་འཛིན་སྔ་མ་བཞིན་དུ་ཤེས་པར་བྱའོ། །དེ་ནས་དཀྱིལ་འཁོར་བཤད་དེ་ཞེས་བྱ་བ་ནས། བུམ་པའི་ཆུས་ནི་དབང་བསྐུར་རོ། །ཞེས་བྱ་བའི་བར་གྱི་གཞུང་གིས་ཐབས་དེ་ལ་འཇུག་པའི་ཕྱིར་སློབ་དཔོན་གྱི་ལས་ཀྱི་ཆོ་ག་དང་སློབ་མ་དཀྱིལ་འཁོར་དུ་གཞུག་པ་ལ་སོགས་པ་སྟོན་ཏོ། །དེ་ཉིད་དུ་དམ་ཚིག་ཐོབ་པ་རྣམས་ལ། དེ་ནས་ལྷ་རྣམས་གང་དགའ་བའི། །དངོས་གྲུབ་རབ་ཏུ་སྦྱིན་པ་རྣམས། །ཞེས་བྱ་བ་ནས་བརྩམས་ཏེ། བདེ་འདོད་ཚད་མེད་གསོལ་བ་གདབ། །ཅེས་བྱ་བའི་བར་གྱིས་དངོས་གྲུབ་ཀྱི་ཆོ་ག་སྟོན་ཏོ། །དེ་ནས་དབང་ཕྱུག་ཆེན་པོ་ལ་སོགས་ཞེས་བྱ་བ་ནས། དབང་ཕྱུག་ཆེན་པོ་ཉིད་ཀྱང་གསལ་བར་བགྱིའོ་ཞེས་བྱ་བའི་བར་གྱིས་འཇིག་རྟེན་པ་དང་འཇིག་རྟེན་པ་ལས་འདས་པའི་དཀྱིལ་འཁོར་ཐམས་ཅད་དུ་ཞུགས་པའི་ཕན་ཡོན་སྟོན་ཏེ། ལྷ་ཆེན་པོའི་དཀྱིལ་འཁོར་གྱི་བསྡུ་པའི་དོན་ཏོ། །དེ་ནས་ཞེས་བྱ་བ་ལ་སོགས་པས་འཆི་བདག་འཇོམས་པའི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་དང་པོའི་སྦྱོར་བའི་རྗེས་ཐོགས་ལ་སྟེ། འདིར་དང་པོའི་སྦྱོར་བའི་ཏིང་ངེ་འཛིན་ལ་གཙུག་ཏོར་དུ་བཤད་པ་ཉིད་ཡིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་དཀྱིལ་འཁོར་ལ་གཟིགས་ནས་ཞེས་བྱ་བ་ནས་བརྩམས་ནས། ཨོཾ་སརྦ་སྭཱ་ཧཱ་གསང་བའི་སྙིང་པོའི་ཞེས་པའི་བར་གྱི་གཞུང་གིས་བཤད་པར་གསོལ་བ་གདབ་པ་དང་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །ལས་རྒྱལ་མཆོག་སྔ་མ་དང་འདྲའོ། །ཐབས་དེ་ཉིད་ལ་དབང་དང་དམ་ཚིག་ལ་སོགས་པ་ཐོབ་པས་འཇུག་པར་བྱའོ་ཞེས་བསྟན་པའི་ཕྱིར། དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས། གཞན་ཡང་ཅི་བཞེད་ཐམས་
ཅད་ནི། །ཕན་པར་བྱ་ཕྱིར་བླ་མར་དབུལ། །ཞེས་བྱ་བའི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་དཀྱིལ་འཁོར་དུ་གཞུག་པ་ལ་སོགས་པ་སྟོན་ཏོ། །དེ་ནས་བྱང་ཆུབ་བར་དུ་ནི། ཞེས་བྱ་བ་ནས། དངོས་གྲུབ་གཞན་ལྟ་སྨོས་ཅི་དགོས། །ཞེས་བྱ་བའི་གཞུང་གིས་རྟོག་པ་ཐམས་ཅད་ཀྱི་དམ་ཚིག་སེམས་དཔར་བསྐྱེད་པར་བྱ་བ་དང་བྱིན་གྱིས་བརླབ་པ་དང་དབང་བསྐུར་བ་དང༌། ཕྱག་རྒྱས་གདབ་བ་དང༌། མཆོད་པ་བསྒྲུབ་པའི་ཚོགས་བསྟན་ཏོ། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་ཞེས་བྱ་བ་ནས་བརྩམས་ཏེ་གྲོལ་བར་འགྱུར་རོ་ཞེས་བྱ་བའི་གཞུང་གིས་དཀྱིལ་འཁོར་དུ་ཞུགས་པའི་ཕན་ཡོན་སྟོན་ཏོ། །དེ་ནས་ལྷ་ཆེན་དེ་དག་གིས། །ཞེས་བྱ་བ་ནས་བརྩམས་ཏེ་སྡིག་པ་ཆུང་དུ་བྱས་པ་ལྟ་སྨོས་ཀྱང་ཅི་དགོས་ཞེས་བྱ་བའི་གཞུང་གིས་ཚེ་འདི་དང་ངན་འགྲོར་སྐྱེས་ཟིན་པ་རྣམས་ཀྱི་མིང་ལ་སོགས་པ་བཀུག་ལ་ཞག་བདུན་དུ་དབང་བསྐུར་བ་དང་མིང་ནས་སྨོས་ཏེ་བཟླས་པའི་ཆོ་ག་བྱ་བ་བསྟན་ཏོ། །ལྷ་ཡི་བུ་རྣམ་ཤི་བ་ཡིན། །ཞེས་བྱ་བ་ནས། མྱུར་དུ་བདེ་སྐྱེད་འགྲུབ་པར་འགྱུར། །ཞེས་བྱ་བའི་བར་གྱིས་ངན་འགྲོར་སྐྱེས་ཞིན་པ་རྣམས་སྦྱིན་སྲེག་བཞིས་སྦྱོར་བ་སྟོན་ཏེ། དེ་ནས་ཚངས་པ་ལ་སོགས་པའི་ལྷ་རྣམས་ཡིད་མགུ་ནས་ལེགས་པར་སྒྲུབས་ཤིག་ཅེས་བྱ་བའི་གཞུང་གིས་རྟོག་པའི་རྒྱལ་པོའི་ཕན་ཡོན་དང་རྒྱུད་གཏད་པ་བསྟན་ཏོ། །འཆི་བདག་འཇོམས་པའི་དཀྱིལ་འཁོར་གྱི་བསྡུས་པའི་དོན་ཏོ། །དེ་ནས་ཞེས་བྱ་བ་ལ་སོགས་པས་བདེ་བ་ཆེན་པོའི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་སྦྱོར་བ་དང་པོའི་རྗེས་ཐོགས་ལ་སྟེ་འདིར་ཕྱག་ན་རྡོ་རྗེ་ཉིད་སྤྲུལ་པ་ཡིན་པར་ཤེས་པར་བྱའོ། །དེ་ནས་ཞེས་བྱ་བ་ནས་བརྩམས་ཏེ་བཛྲ་ཧཱུཾ་ཨ་ཞེས་བྱ་བའི་བར་གྱི་གཞུང་གིས་བདེ་བ་ཆེན་པོའི་དཀྱིལ་འཁོར་རྒྱལ་པོ་མཆོག་སྟོན་ཏོ། །ལས་རྒྱལ་པོ་མཆོག་ནི་སྔ་མ་བཞིན་དུ་ཤེས་པར་བྱའོ། །བདེ་བ་ཆེན་པོ་དཀྱིལ་འཁོར་འདི་ཉིད་དུ་དབང་ཐོབ་པས་འཇུག་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནས། སིདྡྷ་
ཡེ་ཧཱུཾ་ཞེས་བྱ་བའི་བར་གྱིས་སློབ་དཔོན་ལས་ཀྱི་ཆོ་ག་དང་སློབ་མ་གཞུག་པ་ལ་སོགས་པ་བསྟན་ཏེ། དེ་ནས་ལས་རྣམས་ཐམས་ཅད་བྱེད་དུ་གཞུག་ཅིང་ཞེས་བྱ་བ་ནས། རྡོ་རྗེ་ལས་དང་མཉམ་པར་འགྱུར། །ཞེས་བྱ་བའི་གཞུང་གིས་དེ་ཉིད་དུ་དབང་དང་དམ་ཚིག་ཐོབ་པ་ལ་དངོས་གྲུབ་སྦྱིན་པ་སྟོན་ཏོ། །དེ་ནས་ལས་རྣམས་བཤད་པར་བྱ་སྟེ། ཞི་བ་དང་ནི་རྒྱས་པའི་ལས། །དེ་ལྟར་དབང་དང་མངོན་སྤྱོད་རྣམས། །ཞེས་བྱ་བ་ནས་བརྩམས་ཏེ། འདོད་པ་ཀུན་ཀྱང་དབང་དུ་བྱེད། །ཅེས་བྱ་བའི་བར་གྱིས་ལས་སྟོན་ཏོ། །དེ་ནས་བཅོམ་ལྡན་འདས་ཕྱ་ན་རྡོ་རྗེ་ཞེས་བྱ་བ་ནས། ཨུཏྤལ་ནི་སྒྲོལ་མར་དགོངས། །ཞེས་བྱ་བའི་བར་གྱི་གཟུང་གིས་རྟོག་པ་ཐམས་ཅད་ཀྱི་དཀྱིལ་འཁོར་སྦྱིན་སྲེག་ལ་སོགས་པའི་དུས་སུ་རྒྱས་གདབ་པའི་ཕྱག་རྒྱ་བསྟན་ཏོ། །གཞན་ཡང་རྟོག་པ་ཐམས་ཅད་ཀྱི་ལྷ་བསྐྱེད་པ་དང་ཞི་པ་ལ་སོགས་པའི་སྦྱིན་སྲེག་གི་དུས་སུ་མི་མཐུན་པའི་ཕྱོགས་གཞོམ་པ་ནི་བརྡུང་བའི་སྔགས་ནི་ས་ཞེས་བྱ་བ་ནས་ཁ་ཐམ་ཞེས་བྱ་བའི་གཞུང་གིས་སྟོན་ཏེ་བདེ་བ་ཆེན་པོའི་དཀྱིལ་འཁོར་བསྡུས་པའི་དོན་ཏོ། །གཙུག་ཏོར་ནས་བརྩམས་ཏེ་བདེ་བ་ཆེན་པོའི་དཀྱིལ་འཁོར་གྱིས་རྒྱུད་ཕྱི་མའི་དོན་བསྟན་ནས། ཁྲོ་བོའི་འཁོར་ལོ་བཤད་པ་རྒྱུད་ཕྱི་མའི་ཕྱི་མ་བསྟན་ཏེ་ཇི་སྐད་དུ། ལྟ་ངན་ཆགས་དང་བྲལ་བ་ལ། །གསང་བ་འདི་ནི་མི་རིགས་སོ། །སེམས་ཅན་ཀུན་ལ་ཕན་པའི་ཕྱིར། །དེ་ནས་ཡང་དག་བཤད་པར་བྱ། །ཞེས་བྱ་བ་གསུངས་པས་འདིར་ལྟ་བ་ངན་པ་ཆགས་པ་དང་བྲལ་བ་ནི་ཁྲོ་བོའི་བདག་ཉིད་ཅན་ཡིན་པས་དེ་གདུལ་པའི་དོན་དུ་གཙོ་བོར་ཁྲོ་བོའི་བདག་ཉིད་ཅན་འདི་བསྟན་ཏོ། །དེ་ནས་ལྷ་རྣམས་ཀུན་མགུ་ནས། །ཞེས་པ་ནས། རྡོ་རྗེ་སེམས་དཔའི་སྐུར་ཞུགས་ནས། །ཞེས་བྱ་བའི་བར་གྱི་གཞུང་གིས་དང་པོའི་སྦྱོར་བའི་ཏིང་ངེ་འཛིན་སྟོན་ཏོ། །འདིར་དེ་ནི་གཙུག་ཏོར་དུ་བཤད་པ་ལས་ཁྲོ་བོའི་སྐུར་བསྒྱུར་བ་དང་བཅས་པ་ཡིན་ནོ། །རྡོ་རྗེ་གཉིས་སུ་མེད་པར་ཞེས་བྱ་བ་ནས། ཨོཾ་བཛྲ་ཀཱ་ལ་ཡ་ཙཀྲ་ཧཱུཾ་ཕཊ་ཅེས་བྱ་བའི་གཞུང་གིས་ཁྲོ་བོའི་དཀྱིལ་འཁོར་གྱི་རྒྱལ་པོ་མཆོག་སྟོན་ཏོ། །སྒོ་དབྱེ་བ་སྔོན་དུ་འགྲོ་བས་བསྡུ་ཞིང་བྱིན་གྱིས་
བརླབ་པ་ནས་བརྩམས་ཏེ། ལས་ཀྱི་རྒྱལ་པོ་མཆོག་ནི་གསང་ཞིང་སྲ་བ་མཐོན་པོ་ལས་བཤད་པ་བཞིན་ཤེས་པར་བྱའོ། །འདི་ཉིད་དུ་དབང་དང་དམ་ཚིག་ཐོབ་པས་ཐབས་དེ་ལ་འཇུག་པར་བྱའོ་ཞེས་བསྟན་པའི་ཕྱིར། དེ་ནས་དེ་དག་གི་དཀྱིལ་འཁོར་མི་བཟད་པ་ཞེས་བྱ་བ་ནས་དེ་བཞིན་དབང་བསྐུར་བར་བྱའོ་ཞེས་བྱ་བའི་བར་གྱི་གཞུང་གིས་སློབ་དཔོན་ལས་ཀྱི་ཆོ་ག་དང་སློབ་མ་དཀྱིལ་འཁོར་དུ་གཞུག་པའི་ཆོ་ག་སྟོན་ཏོ། །འདི་ཉིད་དུ་དབང་དང་དམ་ཚིག་ཐོབ་པ་རྣམས་ལ་དངོས་གྲུབ་བསྟན་པའི་ཕྱིར། དེ་ནས་དཀྱིལ་འཁོར་གྱི་བསྒྲུབ་པ་བཤད་དེ་ཞེས་བྱ་བ་ནས། བཟླས་པའི་ཚུལ་བཞིན་བསམ་པར་བྱ། །ཞེས་བྱ་བའི་བར་གྱི་གཞུང་གིས་དངོས་གྲུབ་སྟོན་ཏོ། །དེ་ནས་འབྲུབ་ཁུང་རྣམས་གཅིག་ནི། །ཞེས་བྱ་བ་ནས། རྡོ་རྗེ་འདོད་པ་རྟག་ཏུ་བཟླས། །དབང་གི་ལས་སོ་ཞེས་བྱ་བའི་གཞུང་གིས་སྦྱིན་སྲེག་གི་ཆོ་ག་སྟོན་ཏོ། །རྟོག་པ་ཐམས་ཅད་ཀྱི་དཀྱིལ་འཁོར་རྣམས་ལ་ཡང་མཆོད་པ་རྣམས་ཀྱིས་ཡང་དག་པར་མཆོད་དེ་བསྟོད་ནས་ཕྱག་རྒྱ་དགྲོལ་ཏེ་གཤེགས་སུ་གསོལ་བར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བརྒྱ་བྱིན་ལ་སོགས་ལྷ། །ཞེས་བྱ་བ་ནས་རྗེས་སུ་ཡི་རང་ངོ་ཞེས་བྱ་བའི་གཞུང་གིས་བསྟན་ཏོ། །རྡོ་རྗེ་ཉི་མ་མེའི་བསྡུས་པའི་དོན་ཏོ། །དེ་ལྟར་བསྡུས་པའི་དོན་བཤད་ནས། །ཤཱཀྱ་ཐུབ་པ་ཉིད་དང་གཞན་གྱི་དོན་ཕུན་སུམ་ཚོགས་པའི་དཀྱིལ་འཁོར་དང༌། སྦྱིན་སྲེག་དང་རས་རིས་ལ་སོགས་པ་སྣང་བ་རྣམས་ནི་བརྗོད་པར་བྱ་བ་ཡིན་ལ། དེ་སྟོན་པའི་གཞུང་གི་ཆོ་ག་ནི་རྒྱུད་ཡིན་ཏེ་རྒྱུད་དང་བརྗོད་པར་བྱ་བ་གཉིས་ཐབས་དང་ཐབས་ལས་བྱུང་བའི་མཚན་ཉིད་དུ་འབྲེལ་པའོ། །རྒྱུད་ལ་བརྟེན་ནས་ཤཱཀྱ་ཐུབ་པ་ལ་མངོན་པར་འདོད་པ་བསྐྱེད་པ་ནི་དགོས་པའོ། །མངོན་པར་འདོད་པ་བསྐྱེད་པའི་མངོན་སུམ་དུ་བྱས་པ་ནི་དགོས་པའི་ཡང་དགོས་པའོ། །ཡང་འདིའི་མཚན་ཉིད་དང་གཞན་གྱི་དོན་ཕུན་སུམ་ཚོགས་པའི་གླེང་གཞི་དང་རྩ་བའི་རྒྱུད་དུ་གཏོགས་པའི་ཀུན་རིག་གི་དཀྱིལ་འཁོར་དང༌། རྒྱུད་ཕྱི་མར་གཏོགས་པ་གཙུག་ཏོར་དགུ་ནས་བརྩམས་ཏེ་བདེ་
བ་ཆེན་པོའི་དཀྱིལ་འཁོར་གྱི་བར་དང༌། རྒྱུད་ཕྱི་མའི་ཕྱི་མ་ཁྲོ་བོའི་དཀྱིལ་འཁོར་ཏེ་བསྡུས་པའི་དོན་རྫོགས་སོ།། །།དེ་ལ་འདི་ནི་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པ་ཞེས་བྱ་བའོ། །དེ་ལ་ངན་སོང་ཐམས་ཅད་ཅེས་བྱ་བ་ནི་སེམས་ཅན་རྣམས་དམྱལ་བ་དང་ཡི་དགས་དང་བྱོལ་སོང་ངོ༌། །དེ་ཡོངས་སུ་སྦྱོང་བ་ནི་སེམས་ཀྱི་ཉོན་མོངས་པའི་འདོད་ཆགས་དང་ཞེ་སྡང་དང་གཏི་མུག་ཡོངས་སུ་སྦྱོང་བའོ། །དེ་ཡང་འདི་སྐད་དུ་འདི་ཉིད་ལས། མ་རིག་འཇོམས་པའི་ཚངས་པ་སྟེ། །འདོད་ཆགས་ཞེ་སྡང་དྲི་མཐར་མཛད་ཅེས་གསུངས་པའི་ཕྱིར་རོ། །ཡང་ངན་སོང་ཐམས་ཅད་ནི་སེམས་ཅན་ཐམས་ཅད་དོ། །དེ་ཡོངས་སུ་སྦྱོང་བ་ནི་སེམས་ཀྱི་ཉོན་མོངས་པའི་ལས་ལས་གྲོལ་བའོ། །ཇི་སྐད་དུ་འདི་ཉིད་ལས་ཀུན་དུ་སྣང་བར་བྱས་པས་སེམས་ཅན་ཐམས་ཅད་ཀྱི་སེམས་ཀྱི་ཉོན་མོངས་པའི་འཆིང་བ་ལས་རྣམ་པར་གྲོལ་ཏེ། བདེ་བ་སོ་སོར་ཐོབ་ནས་ཞེས་གསུངས་པའི་ཕྱིར་རོ། །དེའི་གཟི་བརྗིད་ནི་སེམས་ཅན་གྱི་ཁམས་ཀུན་དུ་དཀྱིལ་འཁོར་དང་སྦྱིན་སྲེག་དང་རས་རིས་ལ་སོགས་པ་སྣང་བར་བྱེད་པའོ། །དེ་ཡང་རྩ་བའི་རྒྱུད་ལས། ཨེ་མའོ་སེམས་ཅན་ཁམས་ཀུན་དུ། །སྣང་བྱེད་གཟི་བརྗིད་དཔེ་མེད་བདག །ཅེས་གསུངས་པའི་ཕྱིར་རོ། །རྒྱལ་པོ་ནི་ཀུན་ལས་ཁྱད་པར་དུ་གྱུར་པས་མཛེས་ཤིང་འབར་བར་གྱུར་པས་རྒྱལ་པོ་སྟེ་རྡོ་རྗེ་འཛིན་པ་ཆེན་པོའོ། །དེ་ཡང་ཇི་སྐད་དུ་རྡོ་རྗེ་རྩེ་མོ་ལས། དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་སྲིད་པའི་དབང་ཕྱུག་གིས། །ཞེས་གསུངས་པའི་ཕྱིར་རོ། །དེ་ཉིད་ཀྱི་སྐུ་དང་གསུང་དང་ཐུགས་ཀྱི་གསང་བ་ནི་བརྟག་པ་སྟེ་རྡོ་རྗེ་རྩེ་མོ་ལས། གཞན་ཡང་གསང་བར་བརྟགས་པས་ན། །དེ་ཕྱིར་བརྟག་པ་ཞེས་བཤད་དོ། །ཞེས་གསུངས་པའི་ཕྱིར་རོ། །གཞན་ཡང་སེམས་ཅན་རྣམས་དང་བྱང་ཆུབ་ཏུ་སེམས་བསྐྱེད་པ་ལ་སོགས་པ་རྣམས་ནི་ངན་སོང་ཐམས་ཅད་དོ། །ཡོངས་སུ་སྦྱོང་བ་ནི་བྱང་ཆུབ་ཀྱི་སྤྱོད་པ་ལ་བཀོད་པ་དང་རྣམ་པར་རྟོག་པ་མ་ལུས་པར་སྤངས་པའོ། །ཇི་སྐད་དུ་འདི་ཉིད་ལས། གང་ཕྱིར་ངན་སོང་ཐམས་ཅད་སྦྱངས། །བྱང་ཆུབ་སྤྱོད་པ་ཉིད་ལ་
བཀོད། ཅེས་པ་དང༌། སེམས་ཉིད་ཆོས་པས་སྐུ་མི་མངའ། །རྣམ་པར་རྟོག་པ་མ་ལུས་སྤངས། །ཞེས་གསུངས་པའི་ཕྱིར་རོ། །དེ་རྣམས་ཀྱིས་སེམས་ཅན་ཀུན་ལ་མི་འཇིགས་པ་སྦྱིན་པ་ནི་གཟི་བརྗིད་དོ། །ཇི་སྐད་དུ། སེམས་ཅན་ཀུན་ལ་མི་འཇིགས་པ། །རྡོ་རྗེ་གཟི་བརྗིད་དུ་ཞེས་བཤད། །ཅེས་གསུངས་པའི་ཕྱིར་རོ། །དེའི་རྒྱལ་པོ་ནི་སྔ་མ་བཞིན་ནོ། །བརྟག་པ་ནི་མི་རྟོག་པའི་དོན་ལ་བརྟག་པ་སྟེ་ཇི་སྐད་དུ་རྩ་བའི་རྒྱུད་ལས། དེ་ལ་མི་རྟོག་རྟོག་པའི་བདག །རྟོག་པ་བརྟགས་པ་ལས་བྱུང་བ། །ཅེས་གསུངས་པའི་ཕྱིར་རོ། །མཚན་བཤད་ཟིན་ཏོ། །དེ་ལྟ་བུའི་རྒྱུད་སྡུད་པར་བྱེད་པ་ས་བཅུ་པའི་དབང་ཕྱུག་ལྕང་ལོ་ཅན་གྱི་ཕོ་བྲང་ན་བཞུགས་པ་རྡོ་རྗེ་འཆང་བས་བློ་ལ་བཞག་ནས་འདི་སྐད་ཅེས་བྱ་བ་ལ་སོགས་པ་སྨོས་སོ། །དེ་ལ་འདི་སྐད་ཅེས་བྱ་བ་ནི་ཡང་དག་པར་བསྡུས་པའི་བཤད་མ་ཐག་པའི་གཞུང་དང་དོན་གྱི་ངོ་བོ་ཉིད་དོ། །བདག་གིས་ཞེས་པས་ནི་བདག་ཉིད་ཡིན་པར་སྟོན་ཏེ་བདག་ཉིད་ཀྱིས་ཐོས་ཀྱི་བརྒྱུད་དེ་འོངས་པ་མ་ཡིན་ནོ། །འདིས་ནི་བདག་ཉིད་ཀྱིས་ཐོས་པ་སྟོན་ཏོ། །ཐོས་པ་ཞེས་བྱ་བ་ནི་ཐོས་པའི་རང་བཞིན་གྱི་ཤེས་རབ་ཀྱིས་ཐོས་ཀྱི་རྟོགས་པས་ནི་མ་ཡིན་ནོ། །འདིས་ནི་མ་འོངས་པ་དང་མ་རྟོགས་པ་ཉིད་དུ་སྟོན་ཏོ། །གང་གི་ཚེ་ཐོས་ཤེ་ན་དུས་གཅིག་ན་ཞེས་བྱ་བ་སྨོས་ཏེ། དུས་གཅིག་གི་དུས་ན་ཐོས་ཀྱི་གཞན་དུ་གཞན་ཐོས་སོ་ཞེས་བྱ་བ་ཡིན་ཏེ་འདིས་ནི་ཐོས་པ་མང་བར་སྟོན་ཏོ། །ཡང་ན་དུས་གཅིག་ན་ཞེས་བྱ་བ་ནི་སྐད་ཅིག་མ་ཉིད་ལ་ཀུན་ཐོས་ཏེ་དུས་གསུམ་གྱི་བསྐལ་པ་རྣམས་སོ་སོར་སྣང་བས་ཐམས་ཅད་ཐོས་པ་སྟེ་འདིས་ནི་ཚད་མེད་པའི་སྐྱེས་བུ་ཡིན་པར་སྟོན་ཏོ། །ཡང་ན་དུས་གཅིག་ན་བྱ་བས་ནི་རྒྱུད་འདི་དུས་གཅིག་ན་འབྱུང་བས་འབྱུང་དཀའ་བར་བསྟན་ཏོ།། ཁྱོད་ཀྱིས་གང་ལས་ཐོས་ཞེས་རྟོག་པ་དག་གི་ཕྱིར་བཅོམ་ལྡན་འདས་ཞེས་བྱ་བ་སྨོས་ཏེ་ཉོན་མོངས་པ་དང༌། ལྷའི་བུ་དང༌། ཕུང་པོ་དང༌། འཆི་བདག་གི་བདུད་ཀྱི་མཚན་ཉིད་ཅན་དུ་གནས་པའི་བདུད་རྣམས་བཅོམ་པས་ན་བཅོམ་ལྡན་འདས་སོ། །ཡང་ན་དབང་ཕྱུག་ལ་སོགས་
པའི་ཡོན་ཏན་དྲུག་དང་ལྡན་པས་བཅོམ་ལྡན་འདས་སོ། །དེ་ལྟར་སྟོན་པ་ཕུན་སུམ་ཚོགས་པ་བསྟན་ནས་གནས་ཕུན་སུམ་ཚོགས་པ་བསྟན་པའི་ཕྱིར། ལྷའི་ཚོགས་ཐམས་ཅད་ཀྱིས་ཞེས་བྱ་བ་ལ་སོགས་པ་སྨོས་ཏེ། ལྷའི་ཚོགས་ཐམས་ཅད་ཅེས་བྱ་བ་ནི་འདིར་སུམ་ཅུ་རྩ་གསུམ་པའི་ལྷ་རྣམས་སོ། །དེ་རྣམས་ཀྱི་དགའ་བའི་ཚལ་ནི་རི་རབ་ཀྱི་རྩེ་ནོར་བུ་དྲི་མ་མེད་པའི་སྟེང་ཚལ་བཞི་ལས་དགའ་བའི་ཚལ་ལོ། །མཆོག་ཏུ་ཡིད་དུ་འོང་བ་ཞེས་བྱ་བ་ནི་བསྟན་པའོ། །དེ་ཉིད་བཤད་པ་ནོར་བུ་དང་ཞེས་བྱ་བ་ལ་སོགས་པ་སྟེ་ནོར་བུ་ནི་རྡོ་རྗེ་ལ་སོགས་པའོ། །གསེར་གྱི་ཤིང་ཡལ་ག་དང་ལྕུག་མར་བཅས་པ་ཞེས་པ་ནི་ཤིང་ཉིད་གསེར་དུ་སྣང་བ་དང་ལྡན་པའོ། །ཤིང་གེལ་པ་དང་སྨན་དང་མེ་ཏོག་ཀ་མ་ལ་དང༌། ཀ་ནི་ཀ་ར་དང༌། བ་ཀུ་ལ་དང༌། ཏི་ལ་ཀ་དང༌། ཨ་ཤོ་ཀ་དང༌། མནྡཱ་ར་བ་དང༌། མནྡཱ་ར་བ་ཆེན་པོ་ལ་སོགས་པ་སྣ་ཚོགས་པ་དང༌། དཔག་བསམ་གྱི་ཤིང་རྣམས་ཀྱིས་མཛེས་པར་བྱས་པ་ཞེས་པ་ནི་དེ་རྣམས་ཀྱིས་བརྒྱན་པ་སྟེ་སོགས་པའི་སྒྲས་ནི་མཉྫུ་ཤ་ཀ་ལ་སོགས་པ་བསྡུས་པའོ། །རྒྱན་སྣ་ཚོགས་ཞེས་བྱ་བ་ནི་གདུགས་དང་རྒྱལ་མཚན་དང་ལྷབ་ལྷུབ་དང་ལྔ་ལྡི་ལ་སོགས་པ་སྟེ། དེ་རྣམས་ཀྱིས་སོ། །བརྒྱན་པ་ནི་སྤུད་པའོ། །འདིས་ནི་ཤིང་དང༌། སྨན་དང༌། མེ་ཏོག་དང་ལྔ་ལྡི་ཡིད་དུ་འོང་བ་བསྟན་ཏོ། །བྱ་མང་པོ་སྐད་འབྱིན་པ་ཞེས་བྱ་བ་ནི་ཁུ་བྱུག་དང༌། ཤང་ཤང་ཏེའུ་དང༌། མཐིང་རིལ་ལ་སོགས་པ་སྐད་ཡིད་དུ་འོང་བ་སྟོན་ཏེ་འདིས་ནི་བྱོལ་སོང་ཡིད་དུ་འོང་བ་སྟོན་ཏོ། །རྔ་དང༌། ཅང་ཏེའུ་དང༌། ཀེར་ཀོ་དང༌། གླིང་བུ་དང༌། རྔ་བོ་ཆེ་ལ་སོགས་པ་ཞེས་བྱ་བ་ནི་དེ་རྣམས་ཀྱི་སྒྲར་གྲགས་པ་སྟེ་སོགས་པའི་སྒྲས་ནི་དུང་དང་ཆ་ལང་ལ་སོགས་པ་བསྡུའོ། །འདིས་ནི་རོལ་མོའི་ཆ་བྱད་ཡིད་དུ་འོང་བ་སྟོན་ཏོ། །བརྒྱ་བྱིན་དང༌། ཚངས་པ་ལ་སོགས་པའི་ལྷ་དང་ལྷའི་བུ་མོ་རྣམ་པར་རྩེ་བ་ཞེས་བྱ་བ་ནི་དེ་རྣམས་གནས་དེར་ཡིད་མཐུན་པའི་སྒོ་ནས་རྩེ་བའོ། །སོགས་པའི་སྒྲས་ནི་ཚོགས་ཀྱི་བདག་པོ་ལ་སོགས་པ་བསྡུའོ། །འདིས་ནི་ལྷ་རྣམས་ཀྱི་ཡུལ་ཡིད་དུ་འོང་བ་སྟོན་ཏོ། །སངས་རྒྱས་དང་བྱང་ཆུབ་སེམས་
དཔའ་ཐམས་ཅད་ཀྱིས་བྱིན་གྱིས་བརླབས་པ་ནི་ཞེས་བྱ་བ་ནི་རྗེས་ལས་སྐྱེས་པའི་ཡེ་ཤེས་ཀྱི་སྣང་བ་ཞེས་བྱ་བའི་དོན་ཏོ། །ལྷའི་བཞུགས་གནས་ཕུན་སུམ་ཚོགས་པ་བསྟན་ནས་བརྒྱ་བྱིན་དང་ཞེས་བྱ་བ་ལ་སོགས་པས་འཁོར་ཕུན་སུམ་ཚོགས་པ་སྟོན་ཏོ། །བརྒྱ་བྱིན་ནི་མགོ་བོ་བརྒྱ་སྟོང་སྦྱིན་པ་ཉེ་བར་བསགས་ཞེས་པ་ལྟ་བུའོ། །ཚངས་པ་ཞེས་བྱ་བ་ནི་འཇིག་རྟེན་གྱི་མེས་པོར་གྲགས་པ་སྟེ། འཇིག་རྟེན་མེས་པོ་ཚངས་པ་ཡིས། །འཇིག་རྟེན་སྒྲོན་མ་བསྟོད་བྱས་ཏེ། །ཞེས་བྱ་བ་ལྟ་བུའོ། །སོགས་པ་ནི་འཇིགས་བྱེད་ཆེན་པོ་ལ་སོགས་པའོ། །ལྷ་དང་རིག་པ་འཛིན་དང༌། ལྷའི་བུ་མོའི་འཁོར་ཞེས་བྱ་བ་ནི་ལྷ་སྟེ་འདོད་ཁམས་དང་གཟུགས་ཁམས་ཀྱིའོ། །རིག་འཛིན་ནི་རྡོ་རྗེ་རིག་པ་འཛིན་པ་ལ་སོགས་པའོ། །ལྷའི་བུ་མོ་ནི་ཤ་རྩི་ལ་སོགས་པ་སྟེ་དེ་རྣམས་ཀྱི་འཁོར་གྲངས་བྱེ་བ་ཁྲག་ཁྲིག་སྟོང་ཕྲག་དུ་མ་དང་གནོད་སྦྱིན་དང་ཞེས་བྱ་བ་ནི། དགེ་སྡིག་བསྲེས་མ་ལས་གྱུར་པའོ། །ལྷ་མ་ཡིན་ཞེས་བྱ་བ་ནི་ལྷ་དང་ཡིད་མི་མཐུན་པའོ། །དྲི་ཟ་ཞེས་བྱ་བ་ནི་ཟུར་ཕུད་ལྔ་པ་ལ་སོགས་པའོ། །མིའམ་ཅི་ཞེས་བྱ་བ་ནི་སྡོང་པོ་ལ་སོགས་པའོ། །ལྟོ་འཕྱེ་ཆེན་པོ་ནི་ཁྱུས་འགྲོ་བ་ལ་སོགས་པའོ། །ཀླུ་ནི་དགའ་བོ་དང་འཇོག་པོ་ལ་སོགས་པའོ། །སོགས་པ་ནི་འབྱུང་པོ་དང་ཡི་དགས་དང་མ་མོ་ལ་སོགས་པ་སྟེ། དེ་ལྟ་བུའི་འཇིག་རྟེན་པའི་འཁོར་དུ་མ་དང་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་བ་ནི་བྱང་ཆུབ་སེམས་དཔའ་དང་སེམས་ཅན་གྱི་ཚོགས་ཆེན་པོ་ལ་སེམས་དཔའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོའོ། །བྱེ་བ་ཁྲག་ཁྲིག་སྟོང་ཕྲག་བརྒྱད་ལ་ཞེས་བྱ་བ་ནི་གྲངས་སོ། །འདི་ལྟ་སྟེ་ཞེས་བྱ་བ་ནི་ཉེ་བར་དགོད་པའོ། །བློ་གྲོས་ཚད་མེད་པ་ཞེས་བྱ་བ་ནི་རྡོ་རྗེ་རིན་ཆེན་ནོ། །བློ་གྲོས་མི་གཡོ་བ་ནི་རྡོ་རྗེ་སེམས་དཔའོ། །བློ་གྲོས་ཡངས་པ་ནི་རྡོ་རྗེ་ཆོས་སོ། །ཀུན་དུ་བློ་གྲོས་ནི་རྡོ་རྗེ་ལས་སོ། །བློ་གྲོས་མཐའ་ཡས་ནི་རྡོ་རྗེ་འཁོར་ལོའོ། །བློ་གྲོས་ཀ་མ་ལ་ནི་རྡོ་རྗེ་རྣོན་པོའོ། །བློ་གྲོས་ཆེན་པོ་ནི་རྡོ་རྗེ་ཁུ་ཚུར་རོ། །བློ་གྲོས་ལྷ་རྫས་ནི་ནམ་མཁའི་
མཛད་དོ། །བློ་གྲོས་སྣ་ཚོགས་ནི་གནོད་སྦྱིན་ནོ། །སོགས་པ་སྨོས་པས་ནི་སེམས་དཔའ་གཞན་རྡོ་རྗེ་སྲུང་བ་ལ་སོགས་པ་བསྡུས་པའོ། །དང་ཞེས་བྱ་བ་ནི་སྡུད་པའོ། །འདིས་ནི་འབྲས་བུའི་བྱང་ཆུབ་སེམས་དཔའི་འཁོར་སྟོན་ཏོ། །ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་ཞེས་བྱ་བ་ནི་འཁོར་དང་མཚན་མར་མི་ལྡོག་པའི་བྱང་ཆུབ་སེམས་དཔའི་ས་ལ་གནས་པ་སྟེ། དེའི་དགེ་འདུན་ཕན་ཚུན་མི་ཕྱེད་པ་དང༌། སྟོན་པ་མི་ཕྱེད་པ་གྲངས་མཐར་ཐུག་པ་མེད་པ་རྣམས་ཀྱིས་བླ་མར་བྱེད། མཆོད་ཅིང་བརྗོད་རབ་ཏུ་མཆོད་ཅིང་སྤེལ་ཞེས་བྱ་བ་ནི་གཅིག་གིས་གཅིག་བཤད་པའོ། །ཡང་ན་བསྟི་སྟང་བྱེད་པ་ནི། གདན་བཤམ་པ་ལ་སོགས་པའོ། །བླ་མར་བྱེད་པ་ནི་གོང་མར་བྱེད་པའོ། །མཆོད་ཅིང་བརྗོད་པ་ནི་རྣམ་ལྔས་མཆོད་ཅིང་རྒྱན་འདོགས་པའོ། །རབ་ཏུ་མཆོད་ཅིང་སྤེལ་བ་ནི་དེ་རྣམས་ཡང་དང་ཡང་དུ་ནི་དོན་དུ་བྱས་པའོ། །དེས་ནི་རྒྱུའི་བྱང་ཆུབ་སེམས་དཔའི་འཁོར་བསྟན་པའོ། །དེ་འཇིག་རྟེན་པ་དང་འབྲས་བུའི་བྱང་ཆུབ་སེམས་དཔའི་འཁོར་མང་པོའི་དབུས་ན་ཞེས་བྱ་བ་ནི་ཀུན་ནས་བསྐོར་ཏེ་བཞུགས་པའོ། །ཚངས་པ་ཆེན་པོ་པདྨའི་གདན་ལ་ཞེས་བྱ་བ་ནི་ཚངས་པ་ཡང་ཡིན་ལ་པདྨའི་གདན་ཡང་ཡིན་པས་ན་ཚངས་པ་ཆེན་པོ་པདྨའི་གདན་ཏེ་དག་ཅིང་ཚངས་ལ་ཉེས་པའི་སྐྱོན་གྱིས་མ་གོས་པའོ་ཞེས་བྱ་བའི་ཐ་ཚིག་ཚིག་གོ །བཞུགས་ཏེ་ཞེས་བྱ་བ་ནི་ཏིང་ངེ་འཛིན་དང་ཆོས་འཆད་པ་དང༌། སྤྱོད་ལམ་དང་གསུམ་སྣང་བ་ཐ་དད་པའི་ཚུལ་གྱིས་བཞུགས་པ་སྟེ་འདིས་ནི་བཞུགས་པ་དང་གདན་ཕུན་སུམ་ཚོགས་པ་བསྟན་ཏོ། །གཞན་དུ་ཡང་བཤད་པར་བྱ་སྟེ། འདི་སྐད་ཅེས་བྱ་བ་ནི་དོན་དམ་པར་རང་བཞིན་མེད་པར་ཀུན་རྫོབ་ཏུ་ཡོད་བཞིན་པ་སྟེ་སྒྲོ་སྐུར་གཉིས་དང་བྲལ་བའོ། །ཇི་སྐད་དུ་རྡོ་རྗེ་རྩེ་མོ་ལས། འཇིག་རྟེན་ཀུན་རྫོབ་ཅེས་བྱ་སྟེ། །དམ་པའི་དོན་དུ་རང་བཞིན་མེད། །ཅེས་གསུངས་པའི་ཕྱིར་རོ། །བདག་གིས་ཐོས་པ་ཞེས་བྱ་བ་ནི་ཐོས་ནས་རྟོགས་པ་སྟེ་ཇི་སྐད་དུ་རྩ་བའི་རྒྱུད་ལས། དམ་པའི་དོན་ནི་བདག་ཡིན་ཏེ། །གང་ཕྱིར་གཟིངས་འདྲའི་ཆོས་རྣམས་ལ། །རྣམ་པར་དག་པ་རྟོགས་པར་འགྱུར། །ཞེས་གསུངས་པའི་ཕྱིར་རོ། །དུས་གཅིག་
ན་ཞེས་པ་ནི་ཡེ་ཤེས་བཞིའི་སྐད་ཅིག་མ་ཉིད་ལ་སྟེ་ཇི་སྐད་དུ་རྩ་བའི་རྒྱུད་ཉིད་ལས། སྐད་ཅིག་མ་དེ་ཉིད་ཀྱི་ཚེ་ན་དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཡེ་ཤེས་ལས་མངོན་པར་རྫོགས་པར་སངས་རྒྱས་སོ་ཞེས་གསུངས་པའི་ཕྱིར་རོ། །བཅོམ་ལྡན་འདས་ཞེས་བྱ་བ་ནི་ཡེ་ཤེས་དེ་དག་ཉིད་ཀྱིས་མི་མཐུན་པའི་ཕྱོགས་ཀུན་བཅོམ་པ་སྟེ་རྡོ་རྗེ་རྩེ་མོ་ལས། མི་མཐུན་པ་ཡི་ཕྱོགས་རྣམས་ཀུན། །བཅོམ་པས་བཅོམ་ལྡན་འདས་ཞེས་བྱ། །ཞེས་གསུངས་པའི་ཕྱིར་རོ། །ལྷའི་ཚོགས་ཐམས་ཅད་ཀྱི་ཞེས་བྱ་བ་ནི་དེ་དག་གི་བྱང་ཆུབ་སེམས་ཀྱི་འདོད་ཆགས་ཆེན་པོ་སྟེ། གང་ཕྱིར་སེམས་ནི་བཅོམ་ལྡན་འདས། །འདོད་ཆགས་ཆེན་པོ་འདི་ཡི་ལྷ། །ཞེས་གསུངས་པའི་ཕྱིར་རོ། །དགའ་བའི་ཚལ་མཆོག་ཏུ་ཡིད་དུ་འོང་བ་ན་ཞེས་བྱ་བ་ནི་ཆོས་ཉིད་ཀྱིས་དེ་བཞིན་དུ་རོ་གཅིག་པའོ། །ཇི་སྐད་དུ། བློ་མཆོག་རྣམས་ཀྱི་ཀུན་དགའ་རབ་སྟེ། །དམན་པས་འཇིགས་པ་ཉིད་ཀྱི་རྒྱལ་བྱེད་ཚལ། །ཞེས་གསུངས་པ་དང༌། ཆོས་ཀྱི་འདོད་པ་ཡིད་དུ་འོང༌། །འདོད་ཆགས་དམ་ཚིག་ཡིན་པར་བཤད། །ཅེས་གསུངས་པའི་ཕྱིར་རོ། །ནོར་བུ་དང་གསེར་ཤིང་ཡལ་ག་དང་ལྕུག་མར་བཅས་པ་དང་ཤིང་གེལ་པ་དང༌། སྨན་དང༌། མེ་ཏོག་ཀ་མ་ལ་དང༌། ཀརྣི་ཀ་དང༌། ཙ་ཀུ་ལ་དང༌། ཏི་ལ་ཀ་དང༌། ཨ་ཤྭ་ཀ་དང༌། མནྡཱ་ར་བ་དང༌། མནྟཱ་ར་བ་ཆེན་པོ་ལ་སོགས་པ་སྣ་ཚོགས་པ་དང༌། དཔག་བསམ་གྱི་ཤིང་རྣམས་ཀྱིས་མཛེས་བར་བྱས་པ་རྒྱན་སྣ་ཚོགས་ཀྱིས་བརྒྱན་པ་ཞེས་བྱ་བ་ནི། བཅོམ་ལྡན་འདས་དེ་ཉིད་སྨན་དང་ཤིང་དང་མེ་ཏོག་དང་མཛེས་པའི་རྒྱན་ཡིན་ཏེ། འདི་སྐད་དུ། སྨན་རྣམས་མ་ལུས་ལྗོན་པའི་ཤིང༌། །ནང་དོ་ཅོག་གི་དགྲ་ཆེ་བ། སྡུ་གུ་འཇིག་རྟེན་གསུམ་ན་མཛེས། །ཞེས་པ་དང༌། བྱང་ཆུབ་ཡན་ལག་མེ་ཏོག་ཕྲེང༌། །ཞེས་གསུངས་པའི་ཕྱིར་རོ། །བྱ་མང་པོ་སྐད་འབྱིན་པ་ཞེས་པ་ནི་དེ་ཉིད་སྐད་སྣ་ཚོགས་སུ་སྣང་བ་སྟེ། ཇི་སྐད་དུ། ཕྱོགས་བཅུ་ཆོས་ཀྱི་རྔ་བོ་ཆེ། །ཞེས་བྱ་བ་དང༌། ལྷ་ཡི་སྐད་དང་ཀླུ་ཡི་སྐད་རྣམས་དང༌། །འགྲོ་བ་ཀུན་གྱི་སྐད་རྣམས་ཇི་ཙམ་པར། །ཞེས་གསུངས་པའི་ཕྱིར་རོ། །རྔ་དང༌། ཅང་ཏེའུ་དང༌། ཀེ་ཀོ་དང༌། གླིང་བུ་དང༌། རྔ་བོ་ཆེ་ལ་
སོགས་པ་ཞེས་བྱ་བ་ནི་ཕྱོགས་བཅུར་ཆོས་ཀྱི་སྒྲ་སྒྲོགས་པའོ། །ཇི་སྐད་དུ། ཕྱོགས་བཅུའི་ཆོས་ཀྱི་རྔ་བོ་ཆེ། །ཞེས་པ་དང༌། ཆོས་ཀྱི་དུང་དེ་སྒྲ་ཆེན་ལྡན། །ཞེས་གསུངས་པའི་ཕྱིར་རོ། །བརྒྱ་བྱིན་དང་ཞེས་བྱ་བ་ནི་བཅོམ་ལྡན་འདས་འདི་ཉིད་གཞན་ལ་ཕན་པར་བརྩོན་པ་སྟེ། འདི་ཉིད་ལས། བརྒྱ་བྱིན་གཞན་ལ་ཕན་བརྩོན་པ། །འདི་ཡིས་ཇི་ལྟར་གསོལ་བ་བཏབ། །ཅེས་གསུངས་པའི་ཕྱིར་རོ། །ཚངས་པ་ལ་སོགས་པ་ཞེས་བྱ་བ་ནི་མྱ་ངན་ལས་འདས་པ་རྣམ་པར་གྲོལ་བའོ། །ཇི་སྐད་དུ། མྱ་ངན་འདས་པ་ཚངས་པ་ཐོབ། །གྲོལ་བ་ཐར་པ་རྣམ་གྲོལ་ལུས། །ཞེས་གསུངས་བའི་ཕྱིར་རོ། །ལྷ་དང་མིའི་བུ་མོ་སྣ་ཚོགས་ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པ་དང༌། སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་སྟེ། ཇི་སྐད་དུ། སྔོན་ཆད་བྱང་ཆུབ་སེམས་བཟང་གང༌། །རྡོ་རྗེ་སེམས་དཔར་ཡང་དག་བཤད། །ཅེས་པ་དང༌། གང་ཕྱིར་མཆོག་ཏུ་རོལ་པ་ན། །སྒེག་མོ་སྦྱིན་པའི་ཕ་རོལ་ཕྱིན། །ཞེས་གསུངས་པའི་ཕྱིར་རོ། །དེ་རྣམས་རྣམ་པར་རྩེ་བ་ཞེས་བྱ་བ་ནི་རྨད་དུ་བྱུང་བའི་ཆོས་ཀྱི་ཐར་པ་དེ་ཉིད་དེ་རྡོ་རྗེ་རྩེ་མོ་ལས། ཐར་པ་མཆོག་ཏུ་བསྟན་པ་སྟེ། །ཞེས་གསུངས་པའི་ཕྱིར་རོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་པ་ན་ཞེས་བྱ་བ་ནི་བཅོམ་ལྡན་འདས་དེ་ཉིད་ཀྱིས་ཆོས་ཐམས་ཅད་སྐྱེ་བ་མེད་པར་ཤེས་པ་སྟེ་རྩ་རྒྱུད་ལས། བཅོམ་ལྡན་འདས་ཤཱཀྱ་ཐུབ་པས་ཕྱོགས་ཐམས་ཅད་མཉམ་པ་ཉིད་དུ་གཟིགས་ནས་བྱིན་གྱིས་བརླབས་ཏེ་ཞེས་གསུངས་པའི་ཕྱིར་རོ། །བརྒྱ་བྱིན་དང་ཚངས་པ་ལ་སོགས་པའི་ལྷ་དང་རིག་འཛིན་དང་ལྷའི་བུ་མོའི་འཁོར་བྱེ་བ་ཁྲག་ཁྲིག་སྟོང་ཕྲག་དུ་མ་དང༌། གནོད་སྦྱིན་དང་ལྷ་མ་ཡིན་དང་དྲི་ཟ་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། ཀླུ་ལ་སོགས་པའི་འཁོར་དུ་མ་དང་ཞེས་བྱ་བ་ནི་བཅོམ་ལྡན་འདས་དེ་ཉིད་ཀྱི་ཡོན་ཏན་ཆ་དུ་མར་དེ་སྣང་བ་སྟེ་ཇི་སྐད་དུ། ལྷ་དང་ལྷ་དབང་ལྷ་ཡི་ལྷ། །ལྷ་མིན་དབང་པོ་ལྷ་མིན་བླ། །ཞེས་པ་དང༌། གནོད་སྦྱིན་སྲིན་པོ་དམ་པ་བསྟན། །ཞེས་བྱ་བ་ལ་སོགས་པ་རྩ་བའི་རྒྱུད་ལས་གསུངས་པའི་ཕྱིར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་བ་ནི་བཅོམ་ལྡན་འདས་དེ་ཉིད་ཀུན་དུ་རྟོག་
པ་ཐམས་ཅད་སྤངས་པར་འདོད་པའོ། །ཇི་སྐད་དུ་བྱང་ཆུབ་པའི་རྒྱུད་ལས། བྱང་ཆུབ་ནམ་མཁའི་མཚན་ཉིད་དེ། །ཀུན་དུ་རྟོག་པ་ཐམས་ཅད་སྤངས། །གང་ཞིག་དེ་རྟོགས་འདོད་པ་སྟེ། །བྱང་ཆུབ་སེམས་དཔའ་ཞེས་བྱའོ། །ཞེས་གསུངས་པའི་ཕྱིར་རོ། །བྱེ་བ་ཁྲག་ཁྲིག་སྟོང་ཕྲག་བརྒྱད་ལ་འདི་ལྟ་སྟེ་ཞེས་བྱ་བ་ནི་བཅོམ་ལྡན་འདས་དེ་ཉིད་ཀུན་དུ་རྟོག་པ་ཐམས་ཅད་སྤངས་པས། བཅོམ་ལྡན་འདས་ཀྱི་ཡོན་ཏན་གྱི་བྱེ་བྲག་མཐར་ཐུག་པ་མེད་པ་ཉེ་བར་དགོད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཚད་མེད་པ་དང༌། བློ་གྲོས་མི་གཡོ་བ་དང༌། བློ་གྲོས་ཡངས་པ་དང༌། ཀུན་དུ་བློ་གྲོས་དང༌། བློ་གྲོས་མཐའ་ཡས་དང༌། བློ་གྲོས་ཀ་མ་ལ་དང༌། བློ་གྲོས་ཆེན་པོ་དང༌། བློ་གྲོས་ལྷ་རྫས་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་སྣ་ཚོགས་པ་ཞེས་བྱ་བ་ལ་བློ་གྲོས་ཚད་མེད་པ་ནི་ཁམས་གསུམ་པ་ཐམས་ཅད་ཀྱི་ཚོགས་གཉིས་དང་ས་དང་ཕ་རོལ་ཏུ་ཕྱིན་པ་རྫོགས་པ་ནི་རྡོ་རྗེ་རིན་ཆེན་ནོ། །དེ་ཡང་ཇི་སྐད་དུ། དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས། ཁམས་གསུམ་པ་ནི་རྒྱལ་པོ་ཆེ། །ཚོགས་གཉིས་ཡོངས་སུ་རྫོགས་པ་དང༌། །ས་དང་ཕ་རོལ་ཕྱིན་པ་མཆོག །རྡོ་རྗེ་དབང་བསྐུར་ལེགས་འབྱུང་བའོ། །ཞེས་གསུངས་པའི་ཕྱིར་རོ། །བློ་གྲོས་མི་གཡོ་བ་ནི་བྱང་ཆུབ་སེམས་དཔའ་བརྟན་པ་ལ་སྟོང་པ་ཉིད་ལས་བྱུང་བའི་མི་གཡོ་བ་ཕྱག་ན་རྡོ་རྗེ་སྟེ་ཇི་སྐད་དུ། འགྲོ་ལ་ཡང་དག་སྤྲོས་པའི་སེམས། །བསྟན་པའི་སྙིང་པོ་ལེགས་བསྒོམས་ཤིང༌། །སྟོང་ཉིད་དེ་ཉིད་ལ་བྱུང་བ། །རྡོ་རྗེ་སེམས་དཔའ་དེ་བཤད་དོ། །ཞེས་གསུངས་པའི་ཕྱིར་རོ། །བློ་གྲོས་ཡངས་པ་ནི་བདག་མེད་ཅིང་གཉིས་སུ་མེད་པའི་ཡེ་ཤེས་ཆོས་ཉིད་བསམ་གྱིས་མི་ཁྱབ་པའི་རྡོ་རྗེ་ཆོས་ཡངས་པ་སྟེ་ཇི་སྐད་དུ། བདག་མེད་ཆོས་ལས་ལེགས་པར་འབྱུང༌། །གཉིས་མེད་ཡེ་ཤེས་དམ་པ་སྟེ། །ཆོས་ཉིད་མཆོག་ཏུ་བསམ་མི་ཁྱབ། །རྡོ་རྗེ་ཆོས་སུ་དེ་བཤད་དོ། །ཞེས་གསུངས་པའི་ཕྱིར་རོ། །ཀུན་དུ་བློ་གྲོས་ནི་སེམས་ཅན་ཀུན་གྱི་དོན་དང་སངས་རྒྱས་ཀུན་གྱི་མཆོད་པ་ཆེན་པོ་སྟེ་རྡོ་རྗེ་ལས་སོ། །ཇི་སྐད་དུ། སེམས་ཅན་ཀུན་དོན་ཡང་དག་སྦྱོར། །སངས་རྒྱས་ཀུན་གྱི་མཆོད་ཆེན་པོ། །དང་པོ་སྦྱོར་བ་དག་པ་ཆེ། །རྡོ་རྗེ་ལས་ཞེས་བྱ་བར་བཤད། །ཅེས་གསུངས་
པའི་ཕྱིར་རོ། །བློ་གྲོས་མཐའ་ཡས་པ་ཞེས་བྱ་བ་ནི་སངས་རྒྱས་རྣམས་ཀྱི་ཆོས་ཀྱི་འཁོར་ལོ་མཐའ་ཡས་པ་དང༌། །རྟེན་འབྲེལ་བཅུ་གཉིས་གནས་འགྱུར་པ་མཐའ་ཡས་པ་ཐོབ་པ་རྡོ་རྗེ་རྒྱུའོ། །ཇི་སྐད་དུ། སངས་རྒྱས་རྣམས་ཀྱི་ཆོས་འཁོར་ལོ། །གཉིས་མེད་ཐོབ་པའི་མཚན་ཉིད་ཅན། །རྟེན་འབྲེལ་ཡང་དག་བཅུ་གཉིས་གྲགས། །རྡོ་རྗེ་རྒྱུ་ཞེས་བྱ་བར་བཤད། །ཅེས་གསུངས་པའི་ཕྱིར་རོ། །བློ་གྲོས་ཀ་མ་ལ་ཞེས་བྱ་བ་ནི། ཟག་པ་མེད་པའི་ཤེས་རབ་དང༌། །ཡེ་ཤེས་རྡོ་རྗེ་རྣོན་པོའོ། །ཇི་སྐད་དུ། རྡོ་རྗེ་བློ་ནི་སྣང་བ་ཆེ། །ཤེས་རབ་ཡེ་ཤེས་དྲི་མ་མེད། །ཟག་པ་མེད་པའི་ཤེས་རབ་སྟེ། །རྡོ་རྗེ་རྣོན་བོར་དེ་བཤད་དོ། །ཞེས་གསུངས་པའི་ཕྱིར་རོ། །བློ་གྲོས་ཆེན་པོ་ཞེས་བྱ་བ་ནི་སྐུ་གསུང་ཐུགས་ཀྱི་སྦྱོར་བ་གསང་བ་ཆེན་པོ་རྡོ་རྗེ་ཁུ་ཚུར་རོ། །ཇི་སྐད་དུ། སྐུ་གསུང་ཐུགས་ཀྱི་སྦྱོར་བ་ནི། །སྒྲིབ་པ་མེད་ཅིང་བླ་མེད་པ། །དེ་བཞིན་གཤེགས་པ་ཀུན་གྱི་གསང༌། །རྡོ་རྗེ་ཁུ་ཚུར་དེ་བཤད་དོ། །ཞེས་གསུངས་པའི་ཕྱིར་རོ། །བློ་གྲོས་ལྷ་རྫས་ཞེས་བྱ་བ་ནི། ནམ་མཁའ་མཛོད་ཀྱི་ཆོས་ལ་དབང་བསྒྱུར་བ་ཡིད་བཞིན་ནོར་བུ་ནམ་མཁའི་མཛོད་དོ། །ཇི་སྐད་དུ། ནམ་མཁའི་མཛོད་ནི་མཛོད་ཆེན་པོ། །ཆོས་རྣམས་ཀུན་ལ་དབང་སྒྱུར་བ། །ཡིད་བཞིན་ནོར་བུ་རྡོ་རྗེ་ཆེ། །རྡོ་རྗེ་ཐོག་ནི་བླ་མེད་པའོ། །ཞེས་གསུངས་པའི་ཕྱིར་རོ། །བློ་གྲོས་སྣ་ཚོགས་པ་ཞེས་བྱ་བ་ནི། སངས་རྒྱས་ཀྱིས་ཐབས་སྣ་ཚོགས་པའི་སྒོ་ནས་ཉོན་མོངས་པ་སྣ་ཚོགས་པ་ཟ་བའི་རྡོ་རྗེ་གནོད་སྦྱིན་ནོ། །ཇི་སྐད་དུ། སངས་རྒྱས་སྐྱོབ་པ་ཐམས་ཅད་ཀྱིས། །ཤེས་རབ་ཐབས་ཀྱི་ཁྲོ་བོ་ཆེ། །ཉོན་མོངས་ཐམས་ཅད་ཟ་བ་ཆེ། །རྡོ་རྗེ་གནོད་སྦྱིན་དེ་བཤད་དོ། །ཞེས་གསུངས་པའི་ཕྱིར་རོ། །འདི་དག་གིས་སྒྲུབ་པའི་ཡན་ལག་ཏུ་གྱུར་པའི་བྱང་ཆུབ་སེམས་དཔའ་བཤད་དེ། ལུང་ལས་དམ་པའི་ཆོས་ཀྱི་གྲོང་ཁྱེར་སྐྱོང་བར་བྱེད་པའི་བྱང་ཆུབ་སེམས་དཔའ་ཞེས་གསུངས་པའི་ཕྱིར་རོ། །སོགས་པ་སྨོས་པས་ནི་རྡོ་རྗེ་རྒྱལ་པོ་ལ་སོགས་པའི་ཡོན་ཏན་བསྡུའོ། །ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་རྣམས་མཐར་ཐུག་པ་མེད་པ་རྣམས་ཀྱིས་ཞེས་བྱ་བ་ནི། བཅོམ་ལྡན་འདས་དེ་ཉིད་ཀྱིས་ཕྱིར་མི་ལྡོག་པའི་བྱང་ཆུབ་ཀྱི་སྙིང་པོ་ལ་ཡོད་པའི་ས་བཅུ་དང་ཕ་རོལ་ཏུ་ཕྱིན་པ་བཅུ་ལ་སོགས་པ་བྱང་ཆུབ་སེམས་དཔའི་
ཡོན་ཏན་དང་ལྡན་པ་བསྟན་ཏོ། །ཇི་སྐད་དུ། ཕ་རོལ་ཕྱིན་བཅུ་ཐོབ་པ་སྟེ། །ཕ་རོལ་ཕྱིན་པ་བཅུ་ཡི་ཚུལ། །མགོན་པོ་ས་བཅུའི་དབང་ཕྱུག་སྟེ། །ས་བཅུ་ལ་ནི་གནས་པ་པོ། །ཞེས་པ་དང༌། རྩ་བའི་རྒྱུད་ལས། ཕྱིར་མི་ལྡོག་པའི་འཁོར་ལོ་ཡང༌། །བྱང་ཆུབ་སྙིང་པོ་ཡིན་པར་དགོངས། །ཞེས་གསུངས་པའི་ཕྱིར་རོ། །བསྟི་སྟང་དུ་བྱེད་བླ་མར་བྱེད་མཆོད་ཅིང་རྗེད། རབ་ཏུ་མཆོད་ཅིང་སྤེལ་ཞེས་བྱ་བ་ནི་རྒྱུའི་གནས་སྐབས་ཀྱི་ས་དང་ཕ་རོལ་ཏུ་ཕྱིན་པ་རྣམས་ཀྱིས་ཐོབ་པར་བྱ་བའི་བདག་ཉིད་དུ་སྟོན་ཏེ་ཇི་སྐད་དུ། མཆོད་འོས་བསྟོད་འོས་ཕྱག་གི་གནས། །རི་མོར་འོས་པ་བཀུར་བར་འོས། །བཀུར་འོས་བརྗེད་པར་བྱ་བ་མཆོག །ཕྱག་བྱར་འོས་པ་བླ་མའི་རབ། །ཅེས་གསུངས་པའི་ཕྱིར་རོ། །འཁོར་མང་པོའི་དབུས་ན་ཞེས་བྱ་བ་ནི་དེ་ཉིད་དཀྱིལ་འཁོར་གྱི་དེ་ཉིད་ཀྱིས་འཁོར་དང་གཙོ་བོའི་ཚུལ་གྱིས་ཞུགས་པ་སྟེ། ཇི་སྐད་དུ་འདི་ཉིད་ལས། སངས་རྒྱས་ཀུན་གྱི་བྱང་ཆུབ་སེམས། །བླ་ན་མེད་པ་རྟོགས་གྱུར་པའི། །རྒྱལ་བས་གསུངས་པའི་ཡེ་ཤེས་གང༌། །དེ་ནི་དཀྱིལ་འཁོར་སྙིང་པོར་གསུངས། །ཞེས་གསུངས་པའི་ཕྱིར་རོ། །དེའི་དོན་ཕྱིས་བཤད་པར་བྱའོ། །ཚངས་པ་ཆེན་པོ་ཞེས་བྱ་བ་ནི་བཅོམ་ལྡན་འདས་མྱ་ངན་ལས་འདས་པ་ཉིད་དེ་ཇི་སྐད་དུ་སྔར་བཤད་པ་དེ་བཞིན་དུ་ཤེས་པར་བྱའོ། །པདྨའི་གདན་ལ་བཞུགས་ཏེ་ཞེས་བྱ་བ་ནི་འཁོར་བའི་ཉེས་པས་མ་ཕོག་པ་དང་རྣལ་འབྱོར་ཅན་བཞུགས་པའོ། །དཔལ་མཆོག་དང་པོ་ལས། ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མ་གོས་པས། །འཁོར་བའི་ཉེས་པས་མ་གོས་སོ། །ཞེས་པ་དང་རྡོ་རྗེ་རྩེ་མོ་ལས། འཁོར་ལོ་དེ་ལ་བརྟག་བྱས་ནས། །རྣལ་འབྱོར་ཅན་ནི་མི་གསུང་བཞུགས། །ཞེས་གསུངས་པའི་ཕྱིར་རོ་ཞེས་གླེང་གཞིའི་དེ་ཁོ་ན་ཉིད་དོ། །གླེང་གཞིའི་འགྲེལ་པ་རྫོགས་སོ།། །།དེ་ལྟར་གླེང་གཞི་བསྟན་ནས། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བའི་ཞེས་བྱ་བ་ལ་སོགས་པ་རྒྱུད་ཉིད་བསྟན་ཏེ། ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བ་ནི། ངན་སོང་རྣམས་བག་ཆགས་དང་བཅས་པ་འཛོམས་ཞེས་བྱ་བའི་དོན་ཏོ། །དེ་ལ་དམིགས་པའི་ཏིང་ངེ་འཛིན་ལ་ཡང་མིང་འདི་སྐད་ཅེས་བྱ་སྟེ། དེའི་སྙོམས་པར་ཞུགས་པ་ནི་མངོན་དུ་མཛད་ནས་སོ། །ངན་སོང་གི་རྒྱུད་
ལས་རྣམ་པར་གྲོལ་བ་ཞེས་བྱ་བས་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་གྱི་འོད་ཟེར་ཞེས་བྱ་བ་ནི་སྤྲུལ་པའི་སྐུའི་རང་བཞིན་གྱི་ཏིང་ངེ་འཛིན་སྐྱེད་པར་བྱེད་པ་འོད་ཟེར་ལས་བྱུང་བའོ། །སྤྲོ་བ་དང་བསྡུ་བ་མང་པོའི་ཕྲེང་བ་ཞེས་པ་ནི་ཕར་སྤྲོ་ཚུར་སྡུད་པ་རྒྱུན་མི་འཆད་པའི་རང་བཞིན་ནོ། །ཉིད་ཀྱི་དཔྲལ་བའི་མཛོད་སྤུ་ནས་བྱུང་ནས་ཞེས་བྱ་བ་ནི། སྟོན་པ་བཅོམ་ལྡན་འདས་ཉིད་ཀྱི་སྨིན་མཚམས་ཀྱི་མཛོད་སྤུ་ནས་སོ། །དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་བ་ནི། འོད་ཟེར་གྱི་སྣང་བ་དེས་སོ། །སྟོང་གསུམ་གྱི་སྟོང་ཆེན་པོ་ཞེས་བྱ་བ་ནི་སྟོང་སྤྱི་ཕུད་དང༌། སྟོང་གཉིས་པ་བར་མ་དང་སྟོང་གསུམ་གྱི་སྟོང་ཆེན་པོའོ། །འཇིག་རྟེན་གྱི་ཁམས་ཞེས་བྱ་བ་ནི་འཇིག་པ་ལ་རྟེན་པའི་ཕྱིར་དང་མཚན་ཉིད་འཛིན་པའི་ཕྱིར་རོ། །འདི་དག་ཐམས་ཅད་ཀུན་དུ་སྣང་བར་བྱས་སོ་ཞེས་བྱ་བ་ནི། མ་ལུས་པར་སྣང་བར་བྱས་པའོ། །དེས་ཀྱང་ཅི་ཞིག་མཛད་ཅེ་ན། ནོར་བུ་དྲི་མ་མེད་པའི་སྟེང་དུ་འཁོད་དེ་བཞག་ནས་ཞེས་བྱ་བར་སྦྱར་རོ། །ཀུན་ནས་སྣང་བར་བྱས་ནས་སེམས་ཅན་གྱི་སེམས་ཉོན་མོངས་པའི་འཆིང་བ་ལས་རྣམ་པར་གྲོལ་ཏེ་ཞེས་བྱ་བ་ནི་ཉོན་མོངས་པའི་བག་ཆགས་དང་བཅས་པ་ལས་བཀྲོལ་བའོ། །བདེ་བ་སོ་སོར་ཐོབ་ནས་དགའ་བའི་ཚལ་ཐམས་ཅད་ཀུན་དུ་སྣང་བར་བྱས་ཏེ་ཞེས་བྱ་བ་ནི་རྒྱུ་དག་པའི་སེམས་ཅན་སྣང་ངོ་ཞེས་བྱ་བའི་དོན་ནོ། །མཆོད་པའི་སྤྲིན་སྣ་ཚོགས་པས་མཆོད་དེ་ལན་བརྒྱ་སྟོང་དུ་བསྐོར་བ་བྱས་ནས་མགོ་བོས་ལན་བརྒྱ་ཕྲག་སྟོང་དུ་ཕྱག་འཚལ་ནས། བཅོམ་ལྡན་འདས་ཀྱི་སྤྱན་སྔར་ས་གཞི་ནོར་བུ་དྲི་མ་མེད་པའི་སྟེང་དུ་འཁོད་དོ་ཞེས་བྱ་བ་ནི་མཆོད་པ་དང་བསྐོར་བ་དང༌། ཕྱག་འཚལ་བ་དང༌། སྤྱན་སྔར་འཁོད་པས་དྲིན་ལན་གྱི་ཚུལ་དུ་སྟོན་ཏོ། །འདི་སྐད་ཅེས་གསོལ་ཏོ་ཞེས་བྱ་བ་ནི་འོག་ནས་འབྱུང་བའི་དོན་འདི་སྐད་དུ་ཞུས་པའོ། །ཨེ་མའོ་ཞེས་བྱ་བ་ནི་ངོ་མཚར་གྱི་དོན་ཏོ། །སངས་རྒྱས་ཞེས་བྱ་བ་ནི་དེ་ཁོ་ན་རྟོགས་ནས་ཆོས་ཀུན་རྟོགས་པའི་ཕྱིར་སངས་རྒྱས་ཞེས་བྱའོ། །དེ་ཡང་རྡོ་རྗེ་རྩེ་མོ་ལས། དེ་བཞིན་ཉིད་བདེན་ཤིན་ཏུ་བརྟན། །དེ་ཁོ་ན་ཉིད་གང་རྟོགས་པ། །ཆོས་ཀུན་རྟོགས་ཞེས་བྱ་བ་གང༌། །དེ་ནི་རྟོགས་པས་སངས་རྒྱས་བརྗོད། །ཅེས་གསུངས་པའི་ཕྱིར་རོ། །ཨེ་མའོ་སངས་རྒྱས་ཨེ་སངས་རྒྱས། །ཞེས་བྱ་བ་ནི་ཡང་དང་ཡང་དུ་
ངོ་མཚར་བའོ། །ཅི་ཞིག་ལ་ཞེ་ན། མཛད་པ་ལེགས་ཞེས་གསུངས་ཏེ། གང་ཕྱིར་ངན་སོང་བདག་ཉིད་སྦྱངས། །བྱང་ཆུབ་སྤྱོད་པ་ཉིད་ལ་བཀོད། །ཅེས་གསུངས་པའི་དོན་ཏོ། །འདིས་ནི་སྦྱོར་བ་དང་པོ་སྒོམ་པ་རྣམས་ཀྱིས་མཆོད་པ་དང་སྡོམ་པ་གཟུང་བ་སྔོན་དུ་འགྲོ་བས་ལྷ་ལ་སོགས་པས་སངས་རྒྱས་ཀྱི་ཡོན་ཏན་བརྗོད་དེ་མི་སྣང་བར་གྱུར་པར་བསྒོམ་ཞེས་བྱ་བའི་དོན་ཏོ། །དེ་ནས་ཕྱག་འཚལ་ནས་འདི་སྐད་ཅེས་གསོལ་ཏོ་ཞེས་བྱ་བར་སྦྱར་རོ། །སུ་ཞིག་གིས་སྙམ་པ་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཞེས་གསུངས་སོ། །གང་ཞིག་ལ་ཞེ་ན། བཅོམ་ལྡན་འདས་ལ་ལན་བརྒྱ་ཕྲག་སྟོང་དུ་བསྐོར་བ་བྱས་ནས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་བྱ་བའི་དོན་ཏོ། །བཅོམ་ལྡན་འདས་གང་གི་སླད་དུ་སངས་རྒྱས་ཀྱི་འོད་ཟེར་ཀུན་དུ་སྣང་བས་ངན་སོང་གི་རྒྱུད་ལས་རྣམ་པར་གྲོལ་ཞིང༌། རྣམ་པར་གྲོལ་པའི་ལམ་ལ་གཞག་པ་ནི་ཞེས་བྱ་བ་ནི་བར་ཆད་མེད་པ་དང་རྣམ་པར་གྲོལ་བས་བྱང་ཆུབ་ཀྱི་སྤྱོད་པ་ཉིད་ལ་བཞག་སྟེ། དེ་ལ་བཅོམ་ལྡན་འདས་ངོ་མཚར་ཆེའོ། །བདེ་བར་གཤེགས་པ་ངོ་མཚར་ཆེའོ་ཞེས་གསུངས་པ་ནི་དོན་གཉིས་ཀྱི་དབང་གིས་ལན་གཉིས་ཞུས་པའོ། །ལན་དུ་བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་འདི་ནི་ངོ་མཚར་མི་ཆེའོ། །ལྷའི་དབང་པོ་འདི་ནི་ངོ་མཚར་མི་ཆེ་སྟེ་ཞེས་བྱ་བ་ནི་བསྟན་པའོ། །སངས་རྒྱས་ཞེས་བྱ་བ་ལ་སོགས་པས་བཤད་དེ། སངས་རྒྱས་བཅོམ་ལྡན་འདས་རྣམས་ནི་ཚད་མེད་པའི་བསོད་ནམས་ཀྱི་ཚོགས་ཡང་དག་པར་བསགས་པའོ་ཞེས་བྱ་བ་ནི་མངོན་པར་བྱང་ཆུབ་པ་དང་པོའི་རྒྱུ་དང་བཅས་པའི་ཟླ་བའི་དཀྱིལ་འཁོར་ཡོངས་སུ་རྫོགས་པའོ། །དེ་ཡང་ཇི་སྐད་དུ། དེ་བཞིན་ཚོགས་ནི་རྫོགས་པའི་ཕྱིར། །སེམས་ནི་ཟླ་བ་གང་དང་མཚུངས། །དངོས་པོ་ཡོད་དང་མེད་ཉིད་མིན། །ཇི་ལྟར་ཟླ་བ་མཚུངས་ཉིད་ཡིན། །ཞེས་གསུངས་པའི་ཕྱིར་རོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་ནི་ཚད་མེད་པའི་ཡོན་ཏན་རིན་པོ་ཆེའི་འབྱུང་གནས་སུ་གྱུར་པའོ། །ལྷའི་དབང་པོ་ཡང་དག་པར་རྫོགས་པའི་སངས་རྒྱས་ནི་ཚད་མེད་པའི་ཐབས་ཡང་དག་པར་རྫོགས་པའི་ཞེས་བྱ་བ་ནི་ཟླ་བའི་དཀྱིལ་འཁོར་གཉིས་པ་
རྫོགས་པའོ། །ཇི་སྐད་དུ། སྙིང་པོ་དག་པ་བཟླས་ནས་ནི། །སེམས་ནི་དབུས་སུ་རྟོགས་པ་ན། །ཟླ་བའི་དབུས་སུ་ཡང་ཟླ་བའི། །དཀྱིལ་འཁོར་གཉིས་པ་མཐོང་བ་ཡིན། །ཞེས་གསུངས་པའི་ཕྱིར་རོ། །ལྷའི་དབང་པོ་སངས་རྒྱས་རྣམས་ནི་ཤེས་རབ་ཚད་མེད་པ་བསགས་པའོ་ཞེས་བྱ་བ་ནི། ཤེས་རབ་སྟོང་པ་ཉིད་ཀྱིས་རྡོ་རྗེའི་དཀྱིལ་འཁོར་གཉིས་པའི་དབུས་ན་གནས་པའོ། །ཇི་སྐད་དུ། དཀྱིལ་འཁོར་གཉིས་པའི་དབུས་གནས་པའི། །རྡོ་རྗེ་ཆེན་པོ་སེམས་བྱེད་ཅིང༌། །ཐང་ཅིག་སོ་སོར་བརྟགས་པ་ནི། །ཤིན་ཏུ་བརྟན་པ་མཐོང་འགྱུར་ནས། །ཞེས་གསུངས་པའི་ཕྱིར་རོ། །སངས་རྒྱས་བཅོམ་ལྡན་འདས་རྣམས་ནི་སྤྱོད་པ་ཚད་མེད་པའོ། །སངས་རྒྱས་བཅོམ་ལྡན་འདས་རྣམས་ནི་གདུལ་བའི་སྐྱེ་བོ་ཚད་མེད་པའི་སྣོད་དུ་གྱུར་པར་མཛད་པའོ་ཞེས་བྱ་བ་ནི། རྡོ་རྗེ་ལས་སྐུ་གསུང་ཐུགས་བྱུང་ནས་སྤྱོད་པ་ཚད་མེད་པ་མཛད་ཅིང་སྐྱེ་བོའི་སྣོད་དུ་གྱུར་པར་མཛད་ཅིང་འདུས་པ་ལས་རྡོ་རྗེར་གྱུར་བའོ།། ཇི་སྐད་དུ། སྙིང་པོ་དག་པ་བཟླས་ནས་ནི། རྡོ་རྗེའི་ལུས་སུ་རྣམ་བསྒོམ་པ། །དེས་ནི་སྲ་བརྟན་ཁོང་སྟོང་མེད། །རྡོ་རྗེའི་སྐུ་ནི་ཐོབ་གྱུར་ནས། །ཞེས་གསུངས་པའི་ཕྱིར་རོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་ཡེ་ཤེས་དང་ལྡན་པའོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་རྫུ་འཕྲུལ་དང་ལྡན་པའོ་ཞེས་བྱ་བ་ནི། གཟུགས་སྐུ་ཆོས་སྐུ་དང་ལྡན་པའོ། །ཇི་སྐད་དུ། སྙིང་པོ་དག་ལ་བླངས་ནས་ནི། །སངས་རྒྱས་གཟུགས་སུ་རྣམ་བསྒོམས་པས། །རྣམ་པ་ཀུན་གྱི་མཆོག་ལྡན་པའི། །ཀུན་མཁྱེན་ཡེ་ཤེས་ཐོབ་པར་འགྱུར། །ཞེས་གསུངས་པའི་ཕྱིར་རོ། །སངས་རྒྱས་བཅོམ་ལྡན་འདས་རྣམས་ནི་མི་མཉམ་པ་དང་མཉམ་པའི་སྨོན་ལམ་གྱི་སྟོབས་དང་ལྡན་པ་སྟེ་ཞེས་བྱ་བ་ནི། རྡོ་རྗེ་དབྱིངས་ཤིན་ཏུ་བརྟན་པའི་ཡེ་ཤེས་དབང་བསྐུར་བ་དང་བཅས་པའོ། །ཇི་སྐད་དུ། རྡོ་རྗེ་དབྱིངས་ནི་ཤིན་ཏུ་བརྟན། །དེ་ནས་སངས་རྒྱས་ཐམས་ཅད་ནི། །རྡོ་རྗེའི་ཐུགས་ཀ་ནས་ཕྱུང་སྟེ། །ཆོས་ཀྱི་དབང་བསྐུར་བཞི་པོ་ཡིས། །དེ་ཚེ་ཐུབ་པ་དབང་བསྐུར་འགྱུར། །ཞེས་གསུངས་པའི་ཕྱིར་རོ། །ལྷའི་དབང་པོ་དེ་ལྟ་བས་ན་ཞེས་བྱ་བ་ནི་དབང་བསྐུར་བ་ལ་སོགས་པ་ཀུན་དུ་རྫོགས་པས་དེ་ལྟ་བས་ན་ཞེས་བྱའོ། །སངས་རྒྱས་རྣམས་
ཀྱི་སྣོད་ཇི་ལྟ་བ་བཞིན་དུ་སེམས་ཅན་གྱི་དོན་མཛད་པ་དང་ཞེས་བྱ་བ་ནི། དཀྱིལ་འཁོར་གྱི་དོན་དུ་གནས་པའི་ཡེ་ཤེས་ཀྱི་བདག་ཉིད་ཅེས་བྱ་བའི་དོན་ཏོ། །ཇི་ལྟར་འདུལ་བ་བཞིན་དུ་སེམས་ཅན་གྱི་དོན་མཛད་པ་དང་ཞེས་བྱ་བ་ནི། ངན་འགྲོ་སྦྱང་ཞིང་དཀྱིལ་འཁོར་དུ་བཅུག་པའི་སྒོ་ནས་སོ། །མོས་པ་ཇི་ལྟ་བ་བཞིན་དུ་སེམས་ཅན་གྱི་དོན་མཛད་པ་ཡིན་པར་ཤེས་པར་བྱ་སྟེ་ཞེས་བྱ་བ་ནི་ཇི་ལྟར་འདོད་པའི་དབང་ཐོབ་པའི་སྒོ་ནས་ཏེ། དེ་ལྟར་ན་འདི་ལ་ཐེ་ཚོམ་དང་སོམ་ཉི་དང་ཡིད་གཉིས་མ་བྱེད་ཅིག་གང་དེ་བཞིན་གཤེགས་པ་རྣམས་ཀྱིས་འདུལ་བར་མི་འགྱུར་བའི་གནས་མེད་དོ་ཞེས་བྱའོ། །ཡང་ན་བསོད་ནམས་ཀྱི་ཚོགས་བརྒྱད་དང༌། མཚན་དང་དཔེ་བྱད་ཀྱི་ཡོན་ཏན་དང༌། སྙིང་རྗེ་ཆེན་པོ་དང༌། ཤེས་རབ་དང༌། འཕགས་པ་མཆོད་པ་དང༌། སེམས་ཅན་གྱི་དོན་དང༌། ཡེ་ཤེས་དང་རྫུ་འཕྲུལ་གྱི་མངོན་པར་ཤེས་པ་དང༌། སྨོན་ལམ་གྱི་སྟོབས་དང་ལྡན་པའི་སྒོ་ནས་གང་ཟག་ལ་བདག་མེད་པ་ལ་སོགས་པ་དང༌། ཉན་ཐོས་ཀྱི་གཟུགས་ལ་སོགས་པ་དང༌། ཉན་ཐོས་ཀྱི་ཐེག་པ་ལ་སོགས་པ་འདུལ་བར་གྱུར་པའི་རྒྱུ་ལ་སོམ་ཉི་ལ་སོགས་པ་མ་བྱེད་ཅིག་ཅེས་བྱ་བའི་དོན་ཏོ། །འདིས་ནི་སྦྱོར་བ་དང་པོ་བསྒོམ་པ་རྣམས་ཀྱིས་བདག་མངོན་པར་བྱང་ཆུབ་པ་བསྐྱེད་དེ་བྱིན་གྱིས་བརླབ་པ་དང༌། དབང་བསྐུར་བ་དང་ལྡན་པས་ངན་འགྲོ་ནས་དགུག་ཅིང་དཀྱིལ་འཁོར་དུ་བཅུག་དབང་བསྐུར་བར་བྱ་སྟེ་ཞེས་བྱ་བའི་དོན་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་རང་གི་སྟན་ལས་ལངས་ནས་ཡང་བཅོམ་ལྡན་འདས་ལ་མཆོད་པ་རྒྱ་ཆེ་ཞིང་ཆེ་བ་བྱས་ཏེ། ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་བྱ་བ་ནི། ང་རྒྱལ་དང་བྲལ་བ་དང༌། མཆོད་པ་དང་ཕྱག་འཚལ་ཞིང་བསྟོད་པ་བྱས་པར་སྟོན་ཏོ། །འདིས་ནི་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་མཆོད་ཅིང་བསྟོད་པ་དྲིན་ལན་གྱི་ཚུལ་དུ་སྦྱར་བར་བྱའོ་ཞེས་བྱ་བའི་དོན་ཏོ། །སེམས་ཅན་ཞེས་བྱ་བ་ལ་སོགས་པ་ལ། བརྒྱ་བྱིན་ཉིད་སེམས་ཅན་གྱི་ཚེ་ཕྱི་མའི་དོན་དང༌། སྙིང་རྗེ་ཆུང་དུ་དང་འབྲིང་དང་ཆེན་པོ་དང༌། བསམ་པ་རྫོགས་པའི་རྒྱུར་ཤེས་རབ་བསྐྱེད་ཅིག་ཅེས་ཡང་དང་ཡང་དུ་གསོལ་བ་བཏབ་པའོ། །
བྱིན་གྱིས་བརླབ་པ་དང་ཞུགས་པའི་རང་བཞིན་གང་ཞེ་ན། བཅོམ་ལྡན་འདས་སུམ་ཅུ་རྩ་གསུམ་པའི་ཞེས་བྱ་བ་ལ་སོགས་པ་སྨྲོས་ཏེ། སུམ་ཅུ་རྩ་གསུམ་པའི་ལྷའི་རིས་ཞེས་བྱ་བ་ནི་ག་ཎ་པ་ཏི་ལ་སོག་པ་སུམ་ཅུ་རྩ་གཉིས་དང༌། བརྒྱ་བྱིན་གྱི་རིས་ཏེ་སུམ་ཅུ་རྩ་གསུམ་པའི་ལྷའི་རིས་སོ།། འདི་ཉིད་ནས་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་ཅིག་ཤི་འཕོས་ཏེ་དུས་ལས་འདས་ནས་ཞེས་བྱ་བ་ནི་ལས་ཅི་ཞིག་གི་སྟོབས་ཀྱིས་ཚེ་འཕོས་པའོ། །དགུང་བདུན་ལགས་ན་ཞེས་བྱ་བ་ནི་ལྷའི་ཞག་བདུན་ལ་མིའི་ལོ་བདུན་བརྒྱ་ལོན་པའོ། །བཅོམ་ལྡན་འདས་དེ་གང་དུ་སྐྱེས་ཞེས་བྱ་བ་ནི་གནས་གང་དུ་སྐྱེས་པ་དྲིས་པའོ། །བདེ་བའམ་སྡུག་བསྔལ་ཅི་ཞིག་མྱོང་བར་འགྱུར་ཞེས་བྱ་བ་ནི་འབྲས་བུ་དྲིས་པའོ། །བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ་ཞེས་བྱ་བ་ནི་ཡིད་ལ་གཅགས་ནས་ཡང་དང་ཡང་དུ་གསོལ་བ་བཏབ་པའོ། །བཅོམ་ལྡན་འདས་ཀྱིས་བཀའ་སྩལ་པ་ལྷའི་དབང་པོ་ཇི་སྟེ་དུས་ལ་བབ་པར་ཤེས་ན་ཞེས་བྱ་བ་ནི། ལྷའི་དབང་པོ་སྤྲུལ་པ་ཡིན་པའི་ཕྱིར་དུས་མཁྱེན་པས་སོ། །ཉོན་ཅིག་ཅེས་བྱ་བ་ནི་ཐོས་པའི་རང་བཞིན་གྱི་ཤེས་རབ་ཀྱིས་ཟུང་ཤིག་པའི་དོན་ཏོ། །ལྷའི་དབང་པོས་གསོལ་བ་བཅོམ་ལྡན་འདས་འདི་ནི་དུས་ལ་བབ་པ་ལགས་སོ། །བདེ་བར་གཤེགས་པ་འདི་ནི་དུས་ལ་བབ་པ་ལགས་སོ་ཞེས་གསུངས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཅེས་བྱ་བ་དེ་འདི་ནས་ཤི་འཕོས་ནས་མྱོང་ཞིང་མྱོང་བར་འགྱུར་རོ་ཞེས་བྱ་བར་སྦྱར་རོ། །ཇི་ལྟ་བུ་ཞིག་ཅེ་ན་དམྱལ་བ་ཆེན་པོར་ལོ་སྟོང་ཕྲག་བཅུ་གཉིས་ཀྱི་བར་དང༌། དམྱལ་བ་ཆུང་དུ་རྣམས་སུ་ལོ་སྟོང་ཕྲག་བརྒྱད་དང༌། བྱོལ་སོང་དང་ཡི་དགས་ཀྱི་གནས་སུ་ལོ་བརྒྱ་ཕྲག་བརྒྱད་དང༌། མིའི་སྐྱེ་གནས་སུ་རྣ་བ་དང་སྨྲ་བའི་སྐྱོན་ཅན་དུ་ལོ་སྟོང་ཕྲག་དྲུག་ཅུ་དང་སྡུག་བསྔལ་བརྒྱུད་པ་དང་གཞན་ལ་གནོད་པ་བྱེད་པ་དང་ལས་ཀྱི་སྒྲིབ་པ་བརྒྱུད་པས་སྟོང་ཕྲག་བརྒྱད་ཅུ་རྩ་བཞིའི་བར་དུ་སྡུག་བསྔལ་མྱོང་ཞིང་མྱོང་བར་འགྱུར་རོ་ཞེས་ལུང་བསྟན་པ་དང༌། དེ་ནས་བརྒྱ་བྱིན་ལ་སོགས་པ་ལྷའི་བུ་ཐམས་ཅད་ཀྱིས་ཐོས་ནས་ཤིན་ཏུ་སྔངས་ཤིང་ཞེས་བྱ་བ་ནི་ངག་གི་སྒོ་
ནས་སྐྲག་སྟེ་སྐྱོ་ནས་ཞེས་བྱ་བ་སེམས་ཀྱི་སྒོ་ནས་ཁ་བུབ་ཏུ་འགྱེལ་བར་གྱུར་ཏོ་ཞེས་བྱ་བ་ལུས་ཀྱི་ཚུལ་གྱིས་འགྱེལ་བར་གྱུར་པའོ། །འདིས་ནི་མོས་པ་སྤྱོད་པའི་ས་ལ་གནས་པའི་བརྒྱ་བྱིན་ལ་སོགས་པ་སྟོན་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ།། སྡུག་བསྔལ་ཆེན་པོ་བརྒྱུད་པ་འདི་ལས་བཅོམ་ལྡན་འདས་ཇི་ལྟར་ཐར་བར་འགྱུར། བདེ་བར་གཤེགས་པ་ཇི་ལྟར་ཐར་བར་འགྱུར། བཅོམ་ལྡན་འདས་ཅི་ནས་ཀྱང་སྡུག་བསྔལ་གྱི་ཕུང་པོ་འདི་ལས་རྣམ་པར་གྲོལ་བར་འགྱུར། བདེ་བར་གཤེགས་པ་འདི་བསྐྱབ་ཏུ་གསོལ་ཞེས་ཞུས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་བཤད་པ་འདི་ཉོན་ཅིག་ཅེས་བྱ་བ་ནི་ཕྲག་བརྒྱད་ཅུ་རྩ་བཞི་ནི་ཉེ་བར་མཚོན་པ་སྟེ། སངས་རྒྱས་གྲངས་མེད་པས་བཅོམ་ལྡན་འདས་ལ་བསྐུལ་ཞིང་དུ་མར་སྣང་བའི་ཚུལ་གྱིས་འདི་བཤད་ཅེས་བྱ་བའི་དོན་ཏོ། །འདིས་ནི་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱི་ལུས་ལ་དཀྱིལ་འཁོར་བརྟག་ཅེས་བྱ་བའི་ཐ་ཚིག་གོ །སྦྱོར་བ་དང་པོའི་ཏིང་ངེ་འཛིན་རྫོགས་སོ།། །།དེ་ནས་ཞེས་བྱ་བ་ལ་སོགས་པས་དཀྱིལ་འཁོར་རྒྱལ་པོ་མཆོག་སྟོན་པ་སྟེ། དེ་ནས་ཞེས་བྱ་བ་ནི་སྦྱོར་བ་དང་པོའི་ཏིང་ངེ་འཛིན་གྱི་རྗེས་ཐོགས་ལའོ། །ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ཞེས་བྱ་བ་ནི། དཀྱིལ་འཁོར་སྤྲུལ་ཞིང་གསང་སྔགས་གསུང་པའི་དོན་དུ་སླར་ཡང་ཞེས་པའི་དོན་ཏོ། །མེ་ཏོག་མནྡཱ་ར་བ་དང་ཞེས་བྱ་བ་ལ་སོགས་པ་མེ་ཏོག་དང་རྒྱན་གྱི་ཁྱད་པར་གྱིས་མཆོད་དེ་བསྐོར་བ་དང་ཕྱག་འཚལ་བ་དང་ལེགས་སོ་ཞེས་བྱ་བས་མཉེས་པར་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཕན་པ་དང་ཞེས་བྱ་བ་ཚེ་ཕྱི་མའི་དོན་དང༌། བདེ་བར་བགྱི་བ་དང་ཞེས་བྱ་བ་ཚེ་འདིའི་དོན་དང་མ་འོངས་པའི་སེམས་ཅན་རྣམས་ངན་སོང་གི་རྒྱུད་གསུམ་ལས་ཐར་བར་བགྱི་བའི་སླད་དུ་ཞེས་བྱ་བ་ནི། དཀྱིལ་འཁོར་ཡོད་ན་དབང་དང་དམ་ཚིག་ཡོད་པའི་ཕྱིར་རོ། །ལེགས་པར་བཤད་དུ་གསོལ་ཞེས་བྱ་བ་ནི་གཟུགས་བརྙན་གྱི་དཀྱིལ་འཁོར་དང༌། རང་བཞིན་གྱི་དཀྱིལ་འཁོར་སྤྲུལ་ཞིང་བཤད་དུ་གསོལ་ཞེས་བྱ་བའི་དོན་ཏོ། །དེ་ནས་གཞན་ཡང་སྤྲུལ་པའི་འཁོར་
ཚངས་པ་ལ་སོགས་པ་ལྷ་མང་པོ་རྣམས་ཀྱིས་ཀྱང་འདི་སྐད་ཅེས་གསོལ་ཏོ། །ལེགས་སོ་བཅོམ་ལྡན་འདས་ལེགས་སོ། །བདེ་བར་གཤེགས་པ་ཅི་ནས་ཀྱང་མ་འོངས་པའི་སེམས་ཅན་རྣམས་ཀྱིས་མཆན་ཙམ་ཐོས་པས་ངན་སོང་གསུམ་གྱི་ལམ་ལས་རྣམ་པར་གྲོལ་ཏེ། བདེ་འགྲོ་ལྷའི་འཇིག་རྟེན་ནས་མིའི་འཇིག་རྟེན་དུ་སྐྱེས་ནས་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་བཤད་པར་གསོལ་ཞེས་བྱ་བ་ནི། དཀྱིལ་འཁོར་དང་སྔགས་དང་འབྲས་བུ་འདི་རྣམས་དང་ལྡན་པས་བཤད་པར་གསོལ་ཞེས་གསོལ་བ་བཏབ་པའོ། །དེ་ནས་བཅོམ་ལྡན་འདས་ཀྱིས་ཏིང་ངེ་འཛིན་ལ་སྙོམས་པར་བཞུགས་སོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། བརྒྱ་བྱིན་དང་ཚངས་པ་ལ་སོགས་པ་ལྷའི་བུ་དེ་དག་བཞིན་གཤེགས་པ་ཐམས་ཅད་ཀྱི་སྙིང་པོ་འོག་ནས་འབྱུང་བ་བྱིན་གྱིས་བརླབ་པར་བྱ་བའི་ཕྱིར་ཞེས་བྱ་བ་ནི། ཁ་བུབ་ཏུ་འགྱེལ་བ་བསླངས་ཏེ་རྒྱུད་སྦྱངས་ལ་དམ་ཚིག་དང་དབང་ཐོབ་པར་བྱས་ནས་དཀྱིལ་འཁོར་དུ་ལྷ་དགོད་པའི་དོན་དུའོ། །ཇི་ལྟ་བུ་ཞིག་ལ་ཞེ་ན། གདོན་མི་ཟ་བའི་ཞེས་བྱ་བ་ལ་སོགས་པ་སྨོས་ཏེ་འབྲས་བུ་ཡོད་ཅིང་དོན་ཡོད་ལ་མི་ཆོད་པའི་རྡོ་རྗེ་ངེས་པ་བསྐྱེད་པའི་དོན་དུ་མིང་དེ་སྐད་ཅེས་བྱའོ། །ཏིང་ངེ་འཛིན་ལ་སྙོམས་པར་ཞུགས་པ་ནི་མངོན་དུ་མཛད་པའོ། །ཏིང་ངེ་འཛིན་འབའ་ཞིག་ཏུ་ཟད་དམ་ཞེ་ན་མ་ཡིན་ཏེ། ཨོཾ་བཛྲ་ཨ་དྷི་དྷིཥྛ་ཛྙཱ་ན་ས་མ་ཡེ་ཧཱུཾ། ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ་སྙོམས་པར་ཞུགས་ནས་གསངས་སྔགས་གསུང་པས་ལྷའི་བུ་རྣམས་ཀྱི་རྒྱུད་སྦྱང་བ་དང་དཀྱིལ་འཁོར་དུ་ཞུགས་པ་བསྟན་ཏོ། །གཞན་ཡང་སྙོམས་པར་ཞུགས་ནས་ཀྱང་གདོན་མི་ཟ་བར་མི་ཆོད་པའི་རྡོ་རྗེའི་བྱིན་གྱི་རླབས་ཀྱིས་བྱིན་གྱིས་བརླབས་ནས་ཀྱང་ཞེས་བྱ་བས་ནི་དབང་བསྐུར་བ་བསྡུའོ། །གདོན་མི་ཟ་བར་ཞེས་བྱ་བ་ནི་དབང་བསྐུར་བ་ལ་ཐེ་ཚོམ་མེད་པའོ། །མི་ཆོད་པའི་ཞེས་བྱ་བ་ནི་དེའི་འབྲས་བུ་ཆོས་ཀྱི་སྐུའོ། །རྡོ་རྗེའི་བྱིན་གྱི་རླབས་ཀྱིས་ཞེས་བྱ་བ་ནི་བུམ་པ་རྡོ་རྗེར་བྱིན་གྱིས་བརླབས་པས་སོ། །བྱིན་གྱིས་བརླབས་ནས་ཞེས་བྱ་བ་ནི་ཆུའི་དབང་བསྐུར་ནས་ཏེ། གཞན་ཡང་དབང་ཉི་ཤུ་རྩ་གཅིག་ཀུན་གྱིས་བསྐུར་རོ་ཞེས་བྱ་བའི་ཐ་ཚིག་གོ །ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་བྱ་བ་ལ་སོགས་པ་ལ་ཡོངས་སུ་སྦྱོང་
བའི་རྒྱལ་པོ་ནི་རྒྱུ་དང་འབྲས་བུ་དང་ངོ་བོ་ཉིད་དང་རྟེན་དང་གནས་སྦྱོང་བ་སྟེ་ཐུགས་ཡང་དག་པའི་ཡེ་ཤེས་སོ། །དེ་སྟོན་པའི་སྒྲ་ལ་ཡང་ཉེ་བར་གདགས་པས་དེ་སྐད་ཅེས་བྱའོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་འོག་ནས་འབྱུང་བ་འདིའོ། །རང་ཉིད་ཀྱང་ངེས་པའི་ཡེ་ཤེས་ལས་སྒྲའི་གཟུགས་སུ་ཕྱུང་ངོ་ཞེས་བྱ་བའི་དོན་ཏོ། །ཨོཾ་ཤོ་དྷ་ནི་ཞེས་བྱ་བ་ནས། ཤུདྡྷེ་སྭཱ་ཧཱ་ཞེས་བྱ་བའི་བར་རོ། །རིག་པ་ཆེན་པོ་འདི་བཤད་མ་ཐག་ཏུ་ཅེས་བྱ་བ་ནི་གསུངས་པ་དང་སྤྲུལ་པའོ། །དེའི་པན་ཡོན་སེམས་ཅན་ཞེས་བྱ་བ་ལ་སོགས་པས་སྟོན་ཏོ། །དེ་ནས་གཞན་ཡང་གསང་བའི་སྙིང་པོ་འདི་གསུངས་སོ་ཞེས་བྱ་བ་ལ། དེ་ནས་ཞེས་བྱ་བ་ནི་ཀུན་རིག་གི་གསང་སྔགས་གསུངས་པའི་རྗེས་ཐོགས་ལའོ། །གཞན་ཡང་ཞེས་བྱ་བ་ནི་སླར་ཡང་ཞེས་བྱ་བའི་དོན་ཏོ། །གསང་བའི་སྙིང་པོ་ཞེས་བྱ་བ་ནི། ཐུགས་དང་ཡོན་ཏན་དང་གསུང་དང་ཕྲིན་ལས་སོ། །དེ་སྟོན་པའི་སྒྲ་ལ་ཡང་ཉེ་བར་གདགས་པས་དེ་སྐད་ཅེས་བྱའོ། །འདི་གསུངས་སོ་ཞེས་བྱ་བ་ནི་འོག་ནས་འབྱུང་བའོ། །ཨོཾ་ཤོདྷི་ནི་ཤོ་དྷ་ཡ་སརྦ་ཨ་པ་ཡཱ་ན་ཞེས་བྱ་བ་ནི་ངན་སོང་སྦྱོང་བ་དང༌། རིན་ཆེན་ཏོག་དང༌། ཤཱཀྱའི་དབང་པོ་དང༌། མེ་ཏོག་ཆེར་རྒྱས་རྣམས་ཀྱི་ཐུན་མོང་གི་སྙིང་པོ་ཡིན་ནོ། །སརྦ་སདྱ་བྷྱ་ཧཱུཾ་ཞེས་བྱ་བ་དང༌། ཧཾ་ཞེས་བྱ་བ་དང༌། ཏྲ་ཐ་ཨ་ཞེས་བྱ་བ་ནི། རིན་ཆེན་ཏོག་ལ་སོགས་པའི་ཁྱད་པར་གྱི་སྙིང་པོ་སྟེ་ཕྱིས་འབྱུང་བ་ལས་ཤེས་པར་བྱའོ། །ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་རྣམས་ཀྱི་སྙིང་པོའི་ཞེས་བྱ་བ་ནི་བྱང་ཆུབ་ཀྱི་སེམས་དང་སྦྱིན་བ་དང་ཤེས་རབ་དང༌། བརྩོན་འགྲུས་དང་སྙིང་རྗེ་ལ་སོགས་པ་དང་བཅས་པའོ། །དེ་སྟོན་པའི་སྒྲ་ལ་ཡང་དེ་སྐད་ཅེས་བྱའོ། །ཨོཾ་སརྦ་ཨ་པཱ་ཡ་བི་ཤོ་དྷ་ནེ་ཞེས་བྱ་བ་ནི། སངས་རྒྱས་སྤྱན་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་རྣམས་ཀྱི་ཐུན་མོང་གི་སྙིང་པོ་ཡིན་ནོ། །ཧཱུཾ་ཕཊ་ཅེས་བྱ་བ་དང༌། ཏྲཾ་ཧཾ་ཨཿ་ཞེས་བྱ་བ་ནི་ཁྱད་པར་གྱི་སྙིང་པོའོ། །ལྷའི་དབང་པོ་གཞན་ཡང་འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་ཞེས་བྱ་བ་ནི་ཐུགས་སོ། །ཉེ་བའི་སྙིང་པོའོ་ཞེས་བྱ་བ་ནི་རྡོ་རྗེ་ལྟ་བུའི་ཏིང་ངེ་འཛིན་ཏོ། །དེ་སྟོན་པའི་སྒྲ་ལ་ཡང་དེ་སྐད་ཅེས་པའོ། །
ཨོཾ་ཏྲ་ཊ་ཅེས་བྱ་བ་ནི་སྡིག་པ་གཞོམ་པའི་སྙིང་པོའོ། །ལྷའི་དབང་པོ་འདི་ནི་གཞན་ཡང་ངན་སོང་ཐམས་ཅད་སྦྱོང་བའི་སྙིང་པོའི་ཞེས་བྱ་བ་ནི་ཤར་གྱི་གཙོ་བོའི་ཁྱད་པར་གྱི་སྙིང་པོའོ། །རྡོ་རྗེ་སེམས་དཔའ་ནས་བརྩམས་ཏེ་ལྷག་མ་རྣམས་ཀྱི་བདེ་བ་ཆེན་པོའི་དཀྱིལ་འཁོར་དང་གཙུག་ཏོར་ལ་སོགས་པ་རྣམས་སུ་ཤེས་པར་བྱའོ། །ལྷའི་དབང་པོ་གཞན་ཡང་མདོར་ན་དྲན་པ་ཙམ་གྱིས་ཀྱང་བསོད་ནམས་ཆུང་བའི་སེམས་ཅན་ཐམས་ཅད་ངན་སོང་གི་རྒྱུད་ཐམས་ཅད་ལས་བདེ་བླག་ཏུ་རྣམ་པར་གྲོལ་བར་གྱུར་པ་ནི་འདི་ཡིན་ནོ་ཞེས་བྱ་བ་ནི་མདོར་བསྡུ་ན་དྲན་པ་ཙམ་གྱིས་གྲོལ་བར་འགྱུར་བའི་རྒྱུ་ཡིན་ཏེ། ལྷ་ཐམས་ཅད་བསྐྱེད་པ་དང༌། རྒྱས་གདབ་པ་དང༌། སྙིང་གར་དགོད་པ་དང༌། ཁྲུས་བྱ་བ་དང༌། ཀུན་ལ་མཆོག་ཏུ་གྱུར་པའི་རྩ་བའི་རིག་པ་སྟེ། ན་མོ་བྷ་ག་ཝ་ཏེ་ཞེས་བྱ་བ་ནས་བརྩམས་ཏེ། སྭཱ་ཧཱའི་མཐར་ཐུག་པའོ། །སརྦ་བིད་ཅེས་བྱ་བ་ནས་བརྩམས་ཏེ། ཨོཾ་བྷ་ཞེས་བྱའི་མཐར་ཐུག་པ་རྣམས་ཚེ་འདིའི་ཕན་ཡོན་ལ་གནས་པའམ་ཤི་བའི་ལུས་ལ་གདགས་པ་དང་བཟླས་བརྗོད་བྱ་བ་དང༌། བྷ་དང་ཤའི་དོན་བསྒོམ་པ་ཡིན་ཏེ། དེ་གསུངས་པ་ལྷའི་དབང་པོ་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་གསང་བའི་སྙིང་པོ་འདི་ཞེས་བྱ་བ་ལ་སོགས་པ་གསུངས་ཏེ་དེ་སྟོན་པའི་སྒྲ་ལ་ཡང་དེ་སྐད་ཅེས་བྱ་སྟེ། རིགས་ཀྱི་བུའམ་རིགས་ཀྱི་བུ་མོ་གང་ཡང་རུང་བས་ཞེས་བྱ་བ་ནི་རྒྱལ་རིགས་ལ་སོགས་པ་དུ་མ་སྟེ། བུའམ་བུ་མོ་གང་ཡང་རུང་བས་ཞེས་བྱ་བ་ནི་ཁྱད་པར་གྱི་དགག་པ་མེད་པའོ། །མིང་ཙམ་ཉན་ཏམ་ཞེས་བྱ་བ་ནི་མིང་ཉིད་ཉན་པའོ།། བཅངས་སམ་ཞེས་བྱ་བ་ནི་དོན་དང་ཚིག་གོ །བཀླགས་སམ་ཞེས་བྱ་བ་ནི་ཁ་ཐོན་ནམ་གླེགས་བམ་གྱིས་སོ། །དེ་འབའ་ཞིག་ཏུ་མ་ཟད་ཀྱི་གྲོ་ག་ལ་སོགས་པ་ལ་བྲིས་ནས་ཀྱང་མགོ་བོའི་གཙུག་ཕུད་དམ་དཔུང་པ་འམ་མགུལ་དུ་བཏགས་ཏེ་འཆང་ན་ཞེས་བྱ་བ་ནི་ཚེ་འདི་ཉིད་ལ་གནས་པའི་གདགས་པ་གསུམ་བསྟན་ཏོ། །དེ་ཉིད་དུ་གསུངས་པ་ཚེ་འདི་ཉིད་ལ་བྱ་བའི་དོན་ཏོ། །དེ་ཉིད་ཀྱི་ཕན་ཡོན་དུས་མ་ཡིན་པར་འཆི་བ་བརྒྱད་དམ་ཞེས་བྱ་བ་ལ་སོགས་པ་སྨོས་ཏེ། དུས་མ་ཡིན་པར་འཆི་བ་བརྒྱད་ནི་མིད་པ་བསྒགས་པ་ལ་སོགས་པའོ། །དུས་མ་ཡིན་པའི་འཆི་བ་དང༌།
འབྲེལ་པའི་རྨི་ལམ་གྱི་རྣམ་པའམ་ཞེས་བྱ་བ་ནི། རྨི་ལམ་ནི་གསུམ་སྟེ། བག་ཆགས་ཀྱི་རྨི་ལམ་དང་ལྟས་བསྟན་པ་དང་བྱིན་གྱིས་བརླབས་པའོ། །དེས་ཀྱང་མི་འབྱུང་ལ་གཞན་ཡང་ངན་སོང་དང་འབྲེལ་པའི་མཚན་མ་དེ་དག་ཐམས་ཅད་རྨི་ལམ་དུ་ཡང་མི་འབྱུང་ན་ཞེས་བྱ་བ་ནི་གཉིད་མ་ལོག་པ་ན་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །མཉན་པ་ལ་སོགས་པའི་ཕན་ཡོན་བཤད་ནས། དཀྱིལ་འཁོར་དུ་ཇི་ལྟ་བར་ཞུགས་ལ་ཞེས་བྱ་བས་ཞུགས་པའི་ཕན་ཡོན་སྟོན་ཏོ། །ཞུགས་ལ་ཞེས་བྱ་བ་ལ་དང་པོར་ཞུགས་ལ་ཞུགས་ནས་དབང་བསྐུར་ནས་གོང་དུ་བཤད་པའི་སྙིང་པོ་བཟླས་བརྗོད་བྱེད་ཅིང་སྔགས་ཀྱི་དོན་བསྒོམ་པ་གང་ཡིན་པ་ཞེས་བྱ་བ་དང༌། བྷ་དང་ཤའི་དོན་བསྒོམ་པའོ། །ལྟ་སྨོས་ཀྱང་ཅི་དགོས་ཏེ་ཞེས་བྱ་བ་དང་ཕུལ་དུ་བྱུང་བ་གསུངས་པ་སྟེ་བསྟན་པའོ། །དེ་ཉིད་བཤད་པ་དེ་དག་ལས་སྡིག་པ་གང་ཡང་ཉེ་བར་མི་འགྱུར་ངན་སོང་དུ་འགྲོ་བར་ཡང་མི་འགྱུར་རོ་ཞེས་གསུངས་སོ། །དེ་ལྟར་ཚེ་འདི་ལ་གནས་པའི་ཕན་ཡོན་བཤད་ནས། ཚེ་འདས་པ་རྣམས་ཀྱི་ཕན་ཡོན་གྱི་དབང་དུ་བྱས་ནས། སྐྱེས་པའམ་བུད་མེད་དམ་ལྷའམ་ཀླུའམ་གནོད་སྦྱིན་ནམ་སྲིན་པོའམ། བྱོལ་སོང་ངམ་ཡི་དགས་སམ་སེམས་ཅན་དམྱལ་བ་ལ་སོགས་ཏེ་གང་ཡང་རུང་བ་ཤི་བའི་ལུས་དཀྱིལ་འཁོར་དུ་བཙུག་སྟེ་དབང་བསྐུར་ན་ཞེས་བྱ་བ་ནི་འོག་ནས་འབྱུང་བའི་ཚུལ་གྱིས་དཀྱིལ་འཁོར་དུ་བཅུག་ཅིང་དབང་བསྐུར་ན་ཞེས་བྱ་བའི་དོན་ཏོ། །དེ་ནས་ཅིར་འགྱུར་ཞེ་ན་འབྲས་བུ་གསུངས་པ། སེམས་ཅན་དམྱལ་བར་སྐྱེས་ན་ཡང་དེ་མ་ཐག་པར་ཡང་ཐར་ནས་ལྷའི་རིས་སུ་སྐྱེ་བར་འགྱུར་རོ། །ལྷའི་རིས་དེར་སྐྱེས་ནས་ཀྱང༌། དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་མངོན་དུ་བྱེད་ཅེས་བྱ་བ་ནི་སྒྲོ་འདོགས་པ་དང༌། སྐུར་པ་འདེབས་པ་དང་བྲལ་བའི་ཆོས་ཉིད་ཐོབ་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ལ་བསྙེན་བཀུར་ལ་སོགས་པ་ཡང་བྱེད། ཕྱིར་མི་ལྡོག་པར་ཡང་འགྱུར། རྒྱུ་ངེས་པ་ཅན་དུ་ཡང་འགྱུར། དེ་བཞིན་གཤེགས་པ་ཐམས་ཅད་ཀྱི་རིགས་སུ་ཡང་སྐྱེ། སྡིག་པ་ཐམས་ཅད་རབ་ཏུ་སྤངས་ནས་དེ་བཞིན་གཤེགས་པ་ཐམས་ཅད་ཀྱི་རིགས་སམ་ལྷའི་རིགས་སམ། གང་ཡང་རུང་བར་བདེ་བ་མྱོང་བར་འགྱུར་རོ་ཞེས་བྱ་བ་ནི་དེ་བཞིན་
གཤེགས་པ་ཐམས་ཅད་ལ་བསྙེན་བཀུར་བྱེད་པ་དང༌། ངེས་པར་འབྱེད་པའི་ཆ་དང་མཐུན་པ་ལ་སོགས་པ་ཕྱིར་མི་ལྡོག་པ་དང༌། ཐེག་པ་ཆེན་པོའི་རིགས་ཅན་དང༌། དེ་བཞིན་གཤེགས་པའི་དངོས་གྲུབ་དང༌། མཆོད་པའི་སྒྲིབ་པ་ལ་སོགས་པ་སྤངས་པ་དང༌། རིགས་ཀྱི་དངོས་གྲུབ་དང༌། འཇིག་རྟེན་པའི་ལྷ་དང༌། རི་ལུ་ལ་སོགས་པའི་དངོས་གྲུབ་གང་ཡང་རུང་བ་དང་ལྡན་པའི་བདེ་བ་ཐོབ་པར་འགྱུར་རོ་ཞེས་བྱ་བའི་དོན་ཏོ། །ལྷའི་དབང་པོ་མདོར་ན། འཇིག་རྟེན་དང་འཇིག་རྟེན་ལས་འདས་པའི་ཕན་པ་དང་བདེ་བ་ཐམས་ཅད་མྱོང་བར་འགྱུར་རོ་ཞེས་བྱ་བ་ནི་མདོར་བསྡུ་ན་འཇིག་རྟེན་དང་འཇིག་རྟེན་ལས་འདས་པ་གཉིས་སུ་བསྡུས་པས་དེའི་ཕན་པ་དང་བདེ་བ་མྱོང་བར་འགྱུར་རོ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་རྒྱལ་པོ་མཆོག་སྒོམ་པ་རྣམས་ཀྱི་ཁང་པ་བརྩེགས་མ་དང་གདན་བསྐྱེད་པ་དང༌། ཀུན་རིག་སྤྲུལ་ནས་ཐུགས་ཀར་ཟླ་བ་ལ་སྔགས་བཀོད་ནས་ལྷ་རྣམས་སྤྲུལ་པ་དང༌། སྤྲུལ་ཅིང་སྒྲུབ་པའི་སྔགས་འབྲས་བུ་དང་བཅས་པ་བསྟན་ཏོ། །རི་རབ་ཏུ་སྤྲུལ་བའི་དུས་ནི། གཙོ་བོ་གྲུབ་པའི་དུས་སུ་འཁོར་རྣམས་གྲུབ་པས། གཙོ་བོ་དང་འཁོར་སྤྲུལ་པ་མ་བསྟན་ཏོ། །དེ་ནས་ཞེས་བྱ་བ་ནས་བརྩམས་ཏེ་མྱོང་བར་འགྱུར་རོ་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །དེ་ནས་གཙོ་བོ་དང་ཐ་མི་དད་པར་བསམས་ཏེ། བསྡུ་བ་དང་ཕྱག་འཚལ་བ་དང༌། ཆེད་དུ་བརྗོད་པ་དང༌། བྱིན་གྱིས་བརླབ་བ་དང༌། ཡང་ཆེད་དུ་བརྗོད་པ་དང༌། དབང་བླང་བ་དང༌། དགུག་གཞུག་བྱ་བ་དང༌། རྒྱས་གདབ་པ་དང༌། ཀུན་གྱི་ཕྲིན་ལས་གཅིག་ལ་སྦྱར་བ་དང༌། ཀུན་གྱི་དེ་ཁོ་ན་ཉིད་བསྡུས་པ་དང༌། གསང་ཞིང་སྲ་བའི་མཆོག་མཐོན་པོ་ལས་བསྟན་པ་བཞིན་ཤེས་པར་བྱའོ། །ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ཏོ། །།དམ་ཚིག་དང་དབང་ཐོབ་པས་ཐབས་འདི་ཉིད་ལ་འཇུག་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་དང། སློབ་མ་གཞུག་པ་ལ་སོགས་པའི་ཆོ་ག་སྟོན་ཏོ། །དེ་ནས་སྔོན་དུ་བསྙེན་པ་བྱས་པའི་རྗེས་ཐོགས་ལའོ། །དེ་ཡང་འདིར་ལོའམ། ལོ་ཕྱེད་དམ། ཟླ་བ་གཅིག་གམ། ལྷ་རྣམས་གྲུབ་ནས་ཞེས་བྱ་བའི་དོན་ཏོ། །ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ་ཞེས་བྱ་
བར་སྦྱར་རོ། །ཅི་ཞིག་བྱས་ནས་ཤེ་ན། བཅོམ་ལྡན་འདས་ལ་དེ་བཞིན་དུ་བསྐོར་བ་བྱས་ནས་ཞེས་བྱ་བའི་དོན་ཏོ། །བཅོམ་ལྡན་འདས་བཤད་དུ་གསོལ་ཞེས་བྱ་བར་སྦྱར་རོ། །ཅིའི་སླད་དུ་ཞེ་ན། ངན་སོང་གི་དབང་དུ་གྱུར་པ་རྣམས་ལ་ཕན་པ་དང་བདེ་བར་བགྱི་བ་དང་ཅི་ནས་ཀྱང་སེམས་ཅན་དེ་དག་ངན་སོང་ཐམས་ཅད་ཀྱི་སྒོ་ལས་རྒྱབ་ཀྱིས་ཕྱོགས་པར་བགྱིད་པ་དང༌། བླ་ན་མ་མཆིས་པར་ཡང་དག་པར་རྫོགས་པའི་བྱང་ཆུབ་བདེ་བླག་ཏུ་རྟོགས་པར་བགྱི་བའི་སླད་དུ་ཞེས་བྱ་བ་ནི་དཀྱིལ་འཁོར་བྲིས་པས་མི་རྣམས་ལ་ཕན་པའི་དོན་དུ་སྟེ་དེའི་ཕྱིར་བཤད་དུ་གསོལ་ཞེས་བྱ་བའི་དོན་ཏོ། །རྗེ་བཙུན་བཤད་དུ་གསོལ་ཞེས་བྱ་བ་ནི་ཁྱད་པར་དུ་བོད་པས་གསོལ་བ་བཏབ་པའོ། །དེ་ནས་ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ལའོ། །བཅོམ་ལྡན་འདས་ཤཱཀྱ་ཐུབ་པས་ཞེས་བྱ་བ་ནི། ཀུན་རིག་ཉིད་མི་ཡུལ་དུ་ཤཱཀྱ་ཐུབ་པར་གྱུར་པ་ལ་དགོངས་ནས་དེ་སྐད་ཅེས་བཤད་དེ་ངེས་སོ། །དེ་བཞིན་གཤེགས་པ་ཐམས་ཅད་ཀྱི་ངན་སོང་ཐམས་ཅད་ཡོངས་སུ་སྦྱོང་བའི་ཡེ་ཤེས་ཞེས་བྱ་བ་ནི་དེར་ངེས་པའི་ཡེ་ཤེས་ཏེ། དབྱེར་མི་ཕྱེད་པས་རྡོ་རྗེ་ཞེས་བྱ་ལ་དཀྱིལ་འཁོར་གྱི་དེ་ཁོ་ན་ཉིད་དེ། དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །དེའི་སྙོམས་པར་ཞུགས་པ་ནི་མངོན་དུ་མཛད་པ་སྟེ་དེ་མཛད་ནས་སོ། །དེ་བཞིན་གཤེགས་པ་ཐམས་ཅད་ཀྱིས་ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ་ཞེས་བྱ་བ་དཀྱིལ་འཁོར་ནི་གཟུགས་ཅན་དང་གཟུགས་མེད་པ་ལ་གཟུགས་མེད་དེ་རང་གི་དཀྱིལ་འཁོར་གཉིས་སུ་མེད་པའི་ཡེ་ཤེས་སོ། །དེ་ཡང་ཆོས་ཀྱི་བཅུད་ཀྱི་སྙིང་པོ་འབྱུང་བའི་ཕྱིར་དང་སྙིང་པོ་ལན་པའི་ཕྱིར་དེ་སྐད་ཅེས་བྱའོ། །ཆེན་པོ་ཞེས་བྱ་བ་ནི་ཆོས་ཀྱི་དབྱིངས་སྔོན་དུ་འགྲོ་བས་ཡེ་ཤེས་གཟུགས་སྐུ་དང་བཅས་པའོ། །འདི་ཞེས་བྱ་བ་འོག་ནས་བྱུང་བ་འདིའོ་གསུངས་སོ་ཞེས་བྱ་བ་ནི་བཀའ་སྩལ་པའོ། །གསུངས་པའི་རང་གི་ངོ་བོ་བསྟན་པའི་ཕྱིར། །སངས་རྒྱས་ཀུན་གྱི་བྱང་ཆུབ་སེམས། །བླ་ན་མེད་པ་རྟོགས་འགྱུར་བའི། །རྒྱལ་བས་གསུངས་པའི་ཡེ་ཤེས་གང༌། །དེ་ནི་དཀྱིལ་འཁོར་སྙིང་པོར་གསུངས། །ཞེས་བྱ་བ་ཡིན་ཏེ། སངས་རྒྱས་ཀུན་གྱི་བྱང་ཆུབ་སེམས།
ཞེས་བྱ་བ་ནི་གཉིས་སུ་མེད་པའི་ཡེ་ཤེས་སོ། །བླ་ན་མེད་པ་ཞེས་བྱ་བ་ནི་སྤྲོས་པ་དང་བྲལ་བའོ། །རྟོགས་འགྱུར་བའི་ཞེས་བྱ་བ་ནི་ཁོང་དུ་ཆུད་པའོ། །དེ་ཉིད་ཡེ་ཤེས་ཞེས་བྱ་བས་སྟོན་ཏེ་སུས་གསུངས་ཤེ་ན། རྒྱལ་བས་གསུངས་པའི་ཞེས་བྱ་བ་སྨོས་སོ། །དེ་ནི་དཀྱིལ་འཁོར་སྙིང་པོར་གསུངས། །ཞེས་བྱ་བ་ནི་ངེས་པར་གཟུང་བ་སྟེ་དེ་ཉིད་ཅེས་བྱ་བའི་དོན་ཏོ། །དཀྱིལ་འཁོར་སྙིང་པོར་གསུངས་ཞེས་བྱ་བ་ནི་དཀྱིལ་འཁོར་གྱི་རང་བཞིན་དུ་བཤད་པའོ། །རང་བཞིན་དུ་བཤད་པ་དེ་ཡང་འདི་ཡིན་ཏེ། མི་མཉམ་པ་མེད་པས་ཟུར་བཞི་ཡིན་ནོ། །དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་བ་བཞི་དང༌། དབང་པོ་ལྔ་ཞེས་བྱ་བ་ནི་སྒོ་བཞི་ཡིན་ནོ། །བསམ་གཏན་རྣམས་ལ་རྟ་བབས་བཞི། །ཞེས་བྱའོ། །གཟུགས་རྣམས་ལ་ཁ་ཁྱེར་ལ་བརྟེན་པའི་ལྷ་མོ་རྣམས་ཞེས་བྱའོ། །བསམ་པ་ཐམས་ཅད་ཡོངས་སུ་རྫོགས་པ་འདུལ་བ་བསྐྱོད་པའི་རང་བཞིན་ནི། རླུང་གིས་དར་འཕན་བསྐྱོད་ནས་སྒྲ་སྒྲོགས་པ་ཞེས་བྱའོ། །ཡེ་ཤེས་མེ་ལོང་ཞེས་བྱའོ། །བྱང་ཆུབ་ཀྱི་ཡན་ལག་མེ་ཏོག་གི་ཕྲེང་བ་ཞེས་བྱའོ། །མི་ཟད་པའི་བདེ་བ་དྲ་བ་དང་དྲ་བ་ཕྱེད་པ་དང༌། རིན་ཆེན་མཆོག་ཉི་མ་དང་ཟླ་བ་ཞེས་བྱའོ། །རྣམ་པར་ཐར་པ་བརྒྱད་དཀྱིལ་འཁོར་བརྒྱད་ཅེས་བྱའོ། །ཐེག་པ་ཆེན་པོ་མདོ་སྡེས་བསྐོར་བ་ནི་རྡོ་རྗེ་ཐེག་པ་ཞེས་བྱའོ། །འཁོར་ལོ་ནི་ཆོས་ཀྱི་འཁོར་ལོ་ཞེས་བྱའོ། །དེ་ཡང་ཇི་སྐད་དུ། མི་མཉམ་མེད་པས་ཟུར་བཞི་སྟེ། །དྲན་དང་དབང་པོ་སྒོ་བཞི་ཡིན། །བསམ་གཏན་རྣམས་ཀྱང་རྟ་བབས་ཡིན། །ཁ་ཁྱེར་ལ་བརྟེན་རྡོ་རྗེ་མཆོག །ལྷ་མོས་མཆོད་པས་གཟུངས་རྣམས་ཡིན། །སྣ་ཚོགས་པ་ཡི་རྒྱན་རྣམས་ཀུན། །བསམ་པ་ཐམས་ཅད་རྫོགས་པ་ཡིན། །གདུལ་བྱ་བསྐྱོད་པས་སྣ་ཚོགས་མཆོག །དམ་ཆོས་མཆོག་ནི་ཀུན་དུ་འགྲོ། །རླུང་གིས་བསྐྱོད་ནས་སྣ་ཚོགས་མཆོག །དར་འཕན་དྲིལ་བུ་སྒྲ་སྒྲོགས་ནི། །མེ་ལོང་ཡེ་ཤེས་རྟགས་མེ་ཏོག །དྲ་བ་དྲ་ཕྱེད་རིན་ཆེན་མཆོག །ཉི་མ་ཟླ་བ་ཡང་དག་ལྡན། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞས་བཤད་དོ། །དེ་ཡི་ནང་རིམ་དག་གི་ཐིག །དཀྱིལ་འཁོར་བརྒྱད་པ་འདྲ་ཕ་ནི། །འདི་ན་རྣམ་པར་ཐར་པ་བརྒྱད། །དངོས་གྲུབ་ཀུན་གྱི་བདེ་བ་སྟེར། །ཐེག་པ་ཆེན་པོ་བྱང་ཆུབ་སེམས། །མདོ་སྡེའི་
འཁོར་ལོ་བསྐོར་བས་ན། །རྡོ་རྗེ་ཐིག་གིས་ཡོངས་བསྐོར་བ། །རྡོ་རྗེ་འཁོར་ལོ་ཡང་དག་བྲི། །ཞེས་པ་དང༌། ཆོས་ཀྱི་འཁོར་ལོ་འདྲ་བ་ལ། །ལྟེ་བར་བཅས་ཤིང་རྩིབས་བཅུ་དྲུག །ཅེས་གསུངས་པའི་ཕྱིར་རོ། །ཡང་དེ་ཉིད་ཀྱི་བྱང་ཆུབ་སེམས་ཀྱི་འབྲས་བུ་དང་བསྡུ་བའི་དངོས་པོ་བཞི་དང༌། སེམས་ཅན་གྱི་དོན་ལ་ཆགས་པ་དང༌། བྱང་ཆུབ་སེམས་དཔའ་ཀུན་མགུ་བར་བྱེད་པའི་ཚུལ་ནི་རྡོ་རྗེ་སེམས་དཔའ་དང༌། རྒྱལ་པོ་དང༌། ཆགས་པ་དང༌། ལེགས་པའོ། །ཇི་སྐད་དུ། བྱང་ཆུབ་སེམས་ཀྱི་འབྲས་བུ་ནི། །སངས་རྒྱས་ཡེ་ཤེས་བླ་མེད་གང༌། །དེ་ནི་རྡོ་རྗེ་སེམས་རང་བཞིན། །ཆོས་དང་ལོངས་སྤྱོད་སྤྲུལ་པའོ། །ཞེས་པ་དང༌། བསྡུ་བ་ཡི་ནི་དངོས་པོ་བཞི། །བཅོམ་ལྡན་འདས་ཀྱིས་གང་སྤྱད་པ། །སེམས་ཅན་འགུགས་པའི་ཐབས་ཞེས་པ། །རྡོ་རྗེ་རྒྱལ་པོ་ཡང་དག་འབྱུང༌། །ཞེས་བྱ་བ་དང༌། སེམས་ཅན་སྨིན་ཕྱིར་བཅོམ་ལྡན་གྱིས། །གང་ཚེ་བྱང་ཆུབ་སྤྱོད་པ་སྤྱད། །བྱང་ཆུབ་སྤྱོད་ལ་རྗེས་ཆགས་པ། །རྡོ་རྗེ་ཆགས་པར་ཡང་དག་འབྱུང༌། །ཞེས་པ་དང༌། སངས་རྒྱས་ཐམས་ཅད་མཉེས་བྱེད་ཅིང༌། །ལེགས་སོ་ཞེས་བྱ་རབ་སྟེར་བྱེད། །བྱང་ཆུབ་སེམས་དཔའ་ཀུན་མགུ་བྱེད། །དེ་ནི་རྡོ་རྗེ་ལེགས་པར་བརྗོད། །ཅེས་གསུངས་པའི་ཕྱིར་རོ།། གཉིས་སུ་མེད་པའི་ཡེ་ཤེས་དེ་ཉིད་སྦྱིན་པའི་ཕ་རོལ་ཏུ་ཕྱིན་པ་དང་མི་ཤེས་པའི་མུན་ནག་འཇོམས་པ་དང༌། ཆོས་ཀྱི་རྒྱལ་མཚན་ཆེན་པོ་དང༌། བྱང་ཆུབ་སེམས་དཔའ་ཀུན་དབུགས་འབྱིན་པ་གོ་རིམས་བཞིན་དུ་རྡོ་རྗེ་རིན་ཆེན་དང༌། གཟི་བརྗིད་དང༌། རྒྱལ་མཚན་དང་བཞད་པ་བཞི་ཡིན་ཏེ། ཇི་སྐད་དུ། བྱང་ཆུབ་སེམས་དཔའི་སྦྱིན་པ་གང༌། །མཁའ་མཉམ་རིན་ཆེན་ལྟ་བུ་སྟེ། །རྡོ་རྗེ་རིན་ཆེན་སྐལ་བ་ཆེ། །དེས་ན་རྡོ་རྗེ་རིན་ཆེན་བརྗོད། །ཅེས་པ་དང༌། མ་རིག་ལིང་ཏོག་འཁོར་བ་ཡི། །མི་ཤེས་མུན་པ་འཇོམས་བྱེད་ཅིང༌། །ཐར་པའི་སྣང་བ་གཟི་བརྗིད་ཆེ། །དེ་ནི་རྡོ་རྗེ་གཟི་བརྗིད་དོ། །ཞེས་པ་དང༌། རྒྱལ་མཚན་སངས་རྒྱས་ཀུན་རང་བཞིན། །ཐར་པའི་ལམ་འགྲོ་རྒྱལ་མཚན་དེ། །ཆོས་ཀྱི་རྒྱལ་མཚན་རྒྱལ་མཚན་ཆེ། །དེ་ནི་རྡོ་རྗེ་རྒྱལ་མཚན་བརྗོད། །ཅེས་པ་དང༌། རྣལ་འབྱོར་ཆེན་པོ་རྡོ་རྗེ་བཞད། །སངས་རྒྱས་ཐམས་ཅད་བཞད་བྱེད་ཅིང༌། །བྱང་ཆུབ་སེམས་
དཔའ་ཀུན་དབུགས་འབྱིན། །དེ་ནི་རྡོ་རྗེ་བཞད་པར་བརྗོད། །ཅེས་གསུངས་པའི་ཕྱིར་གཉིས་སུ་མེད་པའི་ཡེ་ཤེས་དེ་ཉིད་སེམས་ཅན་གྱིས་རྟོགས་པར་བྱེད་པའི་རྒྱུ་དང༌། ཤེས་རབ་ཆེན་པོ་དང༌། ཆོས་ཀྱི་འཁོར་ལོ་དང༌། ཚིག་དང་བྲལ་བས་སྨྲ་བ་སྟེ། བཞི་པོ་གོ་རིམས་བཞིན་དུ་རྡོ་རྗེ་ཆོས་དང་རྣོན་པོ་དང༌། འཁོར་ལོ་དང་སྨྲ་བ་སྟེ། ཇི་སྐད་དུ། རྣལ་འབྱོར་ཆེན་པོ་སངས་རྒྱས་ཆོས། །སངས་རྒྱས་སེམས་ཅན་རྟོགས་བྱེད་པ། །དག་པ་དེ་བཞིན་གཤེགས་སྙིང་པོ། །དེ་ནི་རྡོ་རྗེ་ཆོས་སུ་བརྗོད། །ཅེས་པ་དང༌། ཤེས་རབ་རྣོན་པོ་ཡེ་ཤེས་ཆེ། །ཤིན་ཏུ་སྡུག་པའི་ཉོན་མོངས་གཅོད། །ཤེས་བྱའི་སྒྲིབ་པ་གཅོད་པས་ན། །དེ་ནི་རྡོ་རྗེ་རྣོན་པོར་བརྗོད། །ཅེས་པ་དང༌། འཁོར་ལོ་སངས་རྒྱས་གར་ཤེས་པ། །ཆོས་ཀྱི་འཁོར་ལོ་ཤིན་ཏུ་བརྟན། །དམ་ཆོས་སྒྲོལ་བའི་བཅུད་ལས་བྱུང༌། །དེ་ནི་རྡོ་རྗེ་རྒྱུ་ཞེས་བྱ། །ཞེས་པ་དང༌། སངས་རྒྱས་ཀུན་གྱི་ཆོས་ཆེན་པོ། །མཁའ་མཚུངས་ཚིག་དང་བྲལ་བ་སྟེ། ཚིག་མེད་ཚིག་ལས་ཡང་དག་བྱུང༌། །ཞེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཉིད་སེམས་ཅན་སྨིན་པ་དང་གྲོལ་བ་དང་ཐེག་པ་དམན་པ་སྤོང་བ་དང༌། ཉོན་མོངས་པ་ཐམས་ཅད་ཟད་པ་དང་དེ་བཞིན་ཉིད་ཕྱིན་ཅི་མ་ལོག་པ་སྟེ་གོ་རིམས་བཞིན་དུ། རྡོ་རྗེ་ལས་དང་སྲུང་བ་དང༌། གནོད་སྦྱིན་དང༌། ཁུ་ཚུར་ཞེས་བྱའོ། །ཇི་སྐད་དུ། སེམས་ཅན་སྨིན་དང་གྲོལ་བ་ཡི། །སངས་རྒྱས་ཀུན་གྱི་ལས་གང་དང༌། །སངས་རྒྱས་ལས་ནི་བདག་མེད་པ། །དེ་ནི་རྡོ་རྗེ་ལས་ཞེས་བྱ། །བྱང་ཆུབ་སེམས་དཔའ་སྲུང་བ་སྟེ། །ཐེག་པ་དམན་པ་སྤང་བྱེད་ཅིང༌། །རྩེ་མོ་ནས་ལྟུང་སྲུང་བྱེད་པ། །དེ་ནི་རྡོ་རྗེ་སྲུང་བར་བཤད། །སྡིག་པ་ཐམས་ཅད་ཟད་བྱེད་ཅིང༌། །ཉོན་མོངས་ཐམས་ཅད་ངེས་པར་གཅོད། །སྲིད་པ་ཟད་བྱེད་གནོད་སྦྱིན་ཆེ། །དེ་ནི་རྡོ་རྗེ་གནོད་སྦྱིན་བརྗོད། །ཅེས་པ་དང༌། བདེན་ཞིང་གཞན་མིན་དེ་བཞིན་ཉིད། །འགྱུར་མེད་དེ་ཁོ་ན་ཉིད་གང༌། །སངས་རྒྱས་དེ་བཞིན་ཉིད་ཡེ་ཤེས། །དེ་ནི་རྡོ་རྗེ་ཁུ་ཚུར་བརྗོད། །ཅེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་དེ་ཉིད་སྦྱིན་པ་དང་ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་བར་དང༌། ཐབས་དང༌། སྨོན་ལམ་རྣམས་ནི། ལཱ་སྱེ་དང༌། མཱ་ལེ་དང༌། གཱི་རྟི་དང༌། ནི་རྟཱི་དང༌། དྷཱུ་པེ་དང༌།
པུཥྤེ་དང༌། ཨཱ་ལོ་ཀེ་དང༌། གནྡྷེ་ཞེས་བྱ་བ་རྣམས་སོ། །ཇི་སྐད་དུ། གང་ཕྱིར་མཆོག་ཏུ་རོལ་པས་ན། །སྒེག་མོ་སྦྱིན་པའི་ཕ་རོལ་ཕྱིན། །བྱང་ཆུབ་ཡན་ལག་འབྲས་སྟེར་བས། །ཕྲེང་བ་ཚུལ་ཁྲིམས་ཕ་རོལ་ཕྱིན། །ཞེས་པ་དང༌། ཞི་བའི་ཆོས་ལ་རྗེས་མོས་པས། །གླུ་མ་བཟོད་པའི་ཕ་རོལ་ཕྱིན། །ཞེས་པ་དང༌། སངས་རྒྱས་མཆོད་ལ་མི་སྐྱོ་བས། །གར་མ་བརྩོན་འགྲུས་ཕ་རོལ་ཕྱིན། །ཞེས་པ་དང༌། ཐར་པ་མཆོག་ནི་དགའ་སྒྲུབ་པས། །བདུག་པ་ཤེས་རབ་ཕ་རོལ་ཕྱིན། །སངས་རྒྱས་ཉིད་འབྲས་རྒྱུ་ཡིན་པས། །མེ་ཏོག་བསམ་གཏན་ཕ་རོལ་ཕྱིན། །ཞེས་པ་དང༌། རྡོ་རྗེ་མར་མེ་ཐབས་ཆེན་པོ། །སྨོན་ལམ་རྡོ་རྗེ་བྱུག་པ་དང༌། །ཞེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་དེ་ཉིད་བྱང་ཆུབ་ཀྱི་སེམས་ཀྱི་མཚན་ཉིད་འགུགས་པར་བྱེད་པ་དང༌། བྱང་ཆུབ་ཀྱི་སྤྱོད་པའི་ཞགས་པ་དང་ཐེག་པ་ཆེན་པོར་འཆིང་བ་དང༌། ཆོས་ཐམས་ཅད་སྐྱེ་བ་མེད་པར་འབབ་པ་སྟེ་གོ་རིམས་བཞིན་དུ། ལྕགས་ཀྱུ་དང༌། ཞགས་པ་དང༌། ལྕགས་སྒྲོག་དང༌། དྲིལ་བུའོ། །དེ་ཡང་ཇི་སྐད་དུ། བྱང་ཆུབ་སེམས་ཀྱིས་འགུགས་པ་ནི། །རྡོ་རྗེ་ལྕགས་ཀྱུར་ཡང་དག་བརྗོད། །བྱང་ཆུབ་སྤྱོད་པ་ལ་སྤྱོད་པ། །རྡོ་རྗེ་ཞགས་པར་དེ་བཤད་དོ། །ཐེག་པ་དམན་པ་སྲུང་བྱེད་པ། །རྡོ་རྗེ་ལྕགས་སྒྲོག་དེ་བཤད་དོ། །རབ་ནི་ཡང་དག་འབྱུང༌། །ཞེས་གསུངས་པའི་ཕྱིར་རོ། །ཡེ་ཤེས་དེ་གསུངས་པའི་ཕྱིར་རོ། །ཡང་གཉིས་སུ་མེད་པའི་ཐུགས་དེ་ཉིད་སྙིང་རྗེ་དང༌། བྱམས་པ་དང༌། དགའ་བ་དང༌། བཏང་སྙོམས་དང་བཞི་ནི་གོ་རིམས་བཞིན་དུ། སངས་རྒྱས་སྤྱན་མ་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་རྣམས་ཞེས་པ་ཡིན་ནོ། །ཇི་སྐད་དུ། སངས་རྒྱས་སྤྱན་ནི་བྱམས་པ་ཆེ། །མཱ་མ་ཀཱི་ནི་སྙིང་རྗེ་ཆེ། །དཀར་མོ་དགའ་བར་རབ་ཏུ་བརྗོད། །བཏང་སྙོམས་ཆེ་དང་ཐབས་ཆེ་བར། །སྒྲོལ་མ་ཞེས་ནི་བརྗོད་པ་ཡིན། །ཞེས་གསུངས་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཉིད་བྱང་ཆུབ་ཀྱི་སེམས་དང༌། ཚོགས་དང༌། ཤེས་རབ་དང༌། བྱང་ཆུབ་ཀྱི་སྤྱོད་པ་ཞེས་བྱ་བ་བཞི་གོ་རིམས་བཞིན་དུ་ངན་སོང་སྦྱོང་བ་དང༌། རིན་ཆེན་ཏོག་དང༌། ཤཱཀྱའི་དབང་པོ་དང༌། མེ་ཏོག་ཆེར་རྒྱས་སོ། །ཇི་སྐད་དུ། བྱང་
ཆུབ་ཏུ་ནི་སེམས་བསྐྱེད་དང༌། །དེ་བཞིན་ཚོགས་དང་ཤེས་རབ་དང༌། །བྱང་ཆུབ་སྤྱོད་པ་རབ་སྤྱོད་པ། །རྒྱལ་པོ་བཞིར་ནི་ཡང་དག་འབྱུང༌། །ཞེས་གསུངས་པའི་ཕྱིར་རོ། །ཡེ་ཤེས་དེ་ཉིད་ཆོས་ཐམས་ཅད་གཅིག་ཏུ་བསྡུས་པ་ནི། བཅོམ་ལྡན་འདས་རྣམ་པར་སྣང་མཛད་དོ། །ཇི་སྐད་དུ། དབུས་སུ་རྣམ་པར་སྣང་མཛད་ཅེས། །ཆོས་རྣམས་གཅིག་ཏུ་བསྡུས་པ་ཡིན། །ཞེས་གསུངས་པའི་ཕྱིར་རོ། །འདིས་ནི་འབྲས་བུ་དེ་ཉིད་ལས་ལྡོག་པའི་ཚུལ་གྱིས་ཐ་དད་པ་ཡིན་གྱི་ངོ་བོ་ཉིད་ཀྱིས་ཐ་དད་པ་ཡོད་པ་མ་ཡིན་ནོ། །འདིས་ནི་གཞན་ཡང་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་དཀྱིལ་འཁོར་གྱི་དེ་ཁོ་ན་ཉིད་ཐོག་མར་ཤེས་པར་གྱིས་ཤིག་ཅེས་སྟོན་ཏོ། །དེ་ལྟར་ནང་གི་དཀྱིལ་འཁོར་གཟུགས་མེད་པ་གསུངས་ནས། ད་ནི་དེ་ནས་ཞེས་བྱ་བ་ལ་སོགས་པས་ཕྱིའི་དཀྱིལ་འཁོར་གཟུགས་དང་བཅས་པ་བསྟན་ཏོ། །དེ་ནས་ཞེས་བྱ་བ་ནི་བར་མ་ཆད་པའོ། །ཡང་ཞེས་བྱ་བ་ནི་སྡུད་པའོ། །བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་ཞེས་བྱ་བ་ནི་མི་རྣམས་ལ་ཕན་པའི་དོན་དུའོ། །ཕྱིའི་དཀྱིལ་འཁོར་ཞེས་བྱ་བ་ནི། །གཟུགས་དང་བཅས་ཤིང་ཐམས་ཅད་འཇུག་ཏུ་རུང་བའོ། །འདི་གསུངས་སོ་ཞེས་པ་ནི། མི་རྣམས་ལ་ཕན་པའི་དོན་དུ་བཤད་དོ། །གཙུག་ལག་ཁང་དང་སྐྱེད་མོས་ཚལ། །མཆོད་རྟེན་ལྷ་ཁང་ཀུན་ར་སོགས། །ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །ཞེས་བྱ་བ་ནི་གཙུག་ལག་ཁང་དང༌། མཆོད་རྟེན་དང་ལྷ་ཁང་དང་ཀུན་དགའ་ར་བ་དང་འབབ་ཆུའི་འགྲམ་དང༌། གྲོང་ཁྱེར་གྱི་ཤར་དང༌། བྱང་གི་ཕྱོགས་ཀྱི་ཆར་རམ་གང་དུ་ཡིད་དང་མཐུན་པའི་གནས་སུའོ། །དེ་ནས། དཀྱིལ་འཁོར་བྲི་བའི་དོན་དུ་ནི། །ཚིགས་བཅད་འདི་ནི་བསྒྲག་པར་བྱ། །ས་ལ་རྒྱུ་བའི་ལྷ་ཀུན་དང༌། །གང་ཞིག་ས་ལ་བརྟན་པ་ཀུན། །བྱམས་པའི་སེམས་ཀྱིས་གནས་ནས་སུ། །སེམས་ཅན་ཀུན་ལ་དགེ་དོན་དུ། །ཀུན་དགའི་དོན་དུ་ཞུ་ཞིང་མཆིས། །དེ་ནས་ཇི་ལྟར་འཚམ་བཞིན་དུ་པུས་མོ་ནུབ་ཙམ་འོག་ཏུ་བརྐོས་ལ། གྱོ་མོ་ལ་སོགས་པ་བསལ་ལ། སྤྱན་དང་རྡོ་རེ་གནོད་སྦྱིན་དང༌། །བདུད་རྩི་འཁྱིལ་པའི་སྔགས་ཀྱི་ཆུས་བསང་གཏོར་བྱ། །བྲུ་ཚད་ཀྱིས་ཆེ་
ཆུང་བརྟག་པར་བྱ། བའི་ཆུ་དང་ལྕི་བས་བྱུག །ས་གཟུང་བ་དང་སྦྱང་བའི་ཆོ་གའོ། །དེ་ནས་གོས་དང་རྒྱན་སྣ་ཚོགས་ཀྱིས་བརྒྱན། ཁྲུས་བྱས་ལུས་དྲི་ཆུས། རྡོ་རྗེ་གནོད་སྦྱིན་དུ་བསྐྱེད། མིག་གཉིས་སུ་མ་དང་ཊ་ལས་ཟླ་བ་དང་ཉི་མ་དགོད། རྐང་པ་ལ་ཨ་ལས་སྣ་ཚོགས་རྡོ་རྗེ་བསྐྱེད། ལག་པ་གཉིས་ཀྱིས་རྡོ་རྗེ་དྲིལ་བུ་བཟང་སྟེ་ཡི་གེ་ཧཱུཾ་གི་སྒྲ་སྒྲོགས་ཤིང༌། གཡས་ནས་བསྐོར་ལ་དེངས་ཞེས་བརྗོད། མཚམས་དང་ར་བ་དང་དྲ་བ་དག་ཀྱང་བྱ། བདུད་དང་སྡང་བ་བཟློག །དེ་ནས་ཕུར་བུ་བྱིན་གྱིས་བརླབས་ལ་ཕུར་བུ་གདབ་པར་བྱའོ། །འདིས་ནི། ཇི་བཞིན་པ་ཡི་ཆོ་ག་ཡིས། །ཞེས་བྱ་བའི་དོན་ཏོ། །དེ་ནས་སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་བསྒོམས་ལ་དཀྱིལ་འཁོར་ནམ་མཁའ་ལ་བཏེག །ལྷའི་གནས་སུ་ཙནྡན་ལ་སོགས་པའི་ཟླུམ་པོ་དང༌། གྲུ་བཞིའི་ཐིག་ལེ་བྱ། དཀྱིལ་འཁོར་བརྟགས་པ་བསྡུས། ལྕགས་ཀྱུ་ལ་སོགས་པས་དགུག་གཞུག་བྱ། བགེགས་བསྐྲད་པ་དང༌། ར་བ་དང༌། དྲ་བ་བྱ། སྒོ་བཅད་སྲུང་བ་བརྟན་པར་བྱ། མཆོད་ཡོན་དབུལ་བ་སྔོན་དུ་འགྲོ་བས་ཕྱག་རྒྱ་བཞིས་རྒྱས་གདབ། མཆོད་པ་རྣམས་ཀྱིས་མཆོད་རང་རང་གི་སྔགས་ཅི་མང་དུ་བཟླས་ཏེ། བུམ་པ་ལྷག་པར་གནས་པ་དང་སློབ་མ་ལྷག་པར་གནས་པ་དང༌། ཕྱི་རོལ་དུ་གཏོར་མ་སྦྱིན་པ་དང༌། ཉེ་རེག་དང༌། སྦྱིན་སྲེག་དང༌། མཆོད་ཅིང་གསོལ་བ་གདབ་པ་ལ་སོགས་བྱའོ། །འདི་ཙམ་གྱིས་ནི། གནས་ནི་བྱིན་གྱིས་བརླབ་པ་བརྩམ། །ཞེས་བྱ་བའི་དོན་ཡིན་ནོ། །བྱིན་གྱིས་བརླབས་པའི་གནས་དེར་ནི། །ཞེས་བྱ་བ་ནི་དེ་ཉིད་དུའོ། །ཕྱི་ཡི་དཀྱིལ་འཁོར་བྲི་བར་བྱ། །ཞེས་པ་ནི་དཀྱིལ་འཁོར་གྱི་སྒོ་གཉིས་པའོ། །ཕྱོགས་ཀུན་མཉམ་པ་གྲྭ་དང་བཅས་པས་གྲུ་བཞི་པ་ལ་ཕྱོགས་ཀྱི་ཆ་རེ་རེ་ཞིང་སྒོ་བཞི་ཡོད་པས་སྒོ་བཞི་པ་ཞེས་བྱའོ། །རྟ་བབས་བཞི་དག་ལྡན་པ་དང༌། །ཐེམ་སྐས་བཞི་ཡི་ཕྲེང་བ་དང༌། །སེང་གེ་བ་གླང་རྣམས་ཀྱིས་བརྒྱན། །ཞེས་བྱ་བ་ནི། ཕྱོགས་རེ་རེ་ན་རྟ་བབས་རེ་དང༌། ཐེམ་སྐས་ཕྲེང་བ་དང༌། སེང་གེ་བ་གླང་རྣམས་ཀྱིས་མཛེས་པར་བྱས་པས་དེ་སྐད་ཅེས་བྱའོ། །དར་དང་ལྔ་ལྡི་དོ་ཤལ་ཕྲེང༌། །དྲིལ་བུ་དང་ནི་རྫ་མས་བརྒྱན། །ཞེས་བྱ་བ་
ནི་དར་གྱི་ལྔ་ལྡི་དང༌། མུ་ཏིག་གི་དོ་ཤལ་དང༌། མེ་ཏོག་གི་ཕྲེང་བ་དང༌། དྲིལ་བུ་གཡེར་ཁ་ལ་སོགས་པ་དག །རྔ་མས་མཛེས་པར་བྱས་པ་ལ་དེ་སྐད་ཅེས་བྱའོ། །རྡོ་རྗེ་རིན་ཆེན་པདྨ་དང༌། །རྒྱ་གྲམ་པ་ཡི་ཕྱག་རྒྱས་བརྒྱན། །ཞེས་བྱ་བ་ནི་ཤར་ཕྱོགས་སུ་རྡོ་རྗེ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རྒྱ་གྲམ་གྱི་ཕྱག་རྒྱས་བརྒྱན་ཅིང་སྤྲུལ་པའོ། །སྲང་བུ་རྒྱན་དང་ལྡན་པ་དང༌། །ཕྱི་ཡི་སྒོ་ཁྱུད་རྣམས་ཀྱིས་བརྒྱན། །ཞེས་བྱ་བ་ནི་ཚངས་ཐིག་གཉིས་དང༌། ཟུར་ཐིག་གཉིས་དང༌། ཤར་ཕྱོགས་དང༌། ནུབ་དང༌། བྱང་དང༌། ལྷོ་ཕྱོགས་ཀྱི་ཐིག་སྟེ་བརྒྱད་དང་ལྡན་པ་དང༌། སྒོ་ཁྱུད་ནི་མཛེས་པ་དང༌། རྗེས་སུ་མཛེས་པ་ཞེས་བྱ་བ་ནི་རྩིག་པར་སྟོན་པའི་ཆ་གཉིས་ཏེ་དེ་རྣམས་ཀྱིས་བརྒྱན་པའོ། །དགུ་ཡི་ཆར་ནི་བགོས་པ་ལས། །ཞེས་བྱ་བ་ནི་ནང་གི་དཀྱིལ་འཁོར་གནས་གྲུ་བཞི་པ་ཆ་དགུ་དང་ལྡན་པར་བགོས་པ་ལ་སོ། །སྒོ་དང་སྒོ་ཁྱུད་སུམ་ཆར་བྱ། །ཞེས་བྱ་བ་ནི་སྒོ་དང་སྒོ་ཁྱུད་ལ་ཆ་ཆེན་གཅིག་གནས་པར་བྱས་པས་སུམ་ཆའི་ཡང་སུ་མ་ཆར་འགྱུར་རོ། །རྡོ་རྗེ་སྲད་བུས་ཐིག་གདབ་པོ། །ཞེས་བྱ་བ་ནི་རྡོ་རྗེ་སྲང་བུར་བྱིན་གྱིས་བརླབས་པས་གདབ་བོ། །དབུས་ཀྱི་དཀྱིལ་འཁོར་ཐིག་གདབ་པ། །ཞེས་བྱ་བ་ནི་དབུས་ཀྱི་ཡང་དབུས་ཀྱི་ཐིག་གདབ་པའོ། །ཆོས་ཀྱི་འཁོར་ལོ་དྲ་བ་ལ། །ཞེས་བྱ་བ་ནི་རྡོ་རྗེ་དང་མཚོན་ཆའི་འཁོར་ལོ་ལྟ་བུ་མ་ཡིན་པ་ཆོས་ཀྱི་འཁོར་ལོ་འདྲ་བའོ། །ཡང་ན་ལྟེ་བ་དང་རྩིབས་རྟེན་དང་རྩིབས་དང་གསུམ་ཆོས་ཀྱི་འཁོར་ལོ་གསུམ་དང་འདྲ་བའོ། །ཡང་ན་སྟོང་པ་ཉིད་བཅུ་དྲུག་ཆོས་ཡིན་ལ་དེ་ཡང་འཁོར་ལོ་ནི་འདྲ་བའོ། །ལྟེ་བར་བཅས་ཤིང་རྩིབས་བཅུ་དྲུག །ཅེས་བྱ་བ་ནི་ལྟེ་བ་དང༌། རྩིབས་རྟེན་དང་བཅས་ཤིང༌། རྩིབས་བཅུ་དྲུག་ཏུ་གྲངས་ངེས་པའོ། །རིམ་པ་གསུམ་དང་ལྡན་པ་ལ། །ཞེས་བྱ་བའི་ལྟེ་བའི་རིམ་པ་དང༌། རྩིབས་རྟེན་གྱི་རིམ་པ་དང༌། རྩིབས་ཀྱི་རིམ་པ་དང་ལྡན་པའོ། །རྩིབས་ནི་ཉིས་འགྱུར་ཉིད་དུ་བྱ། །ཞེས་པ་ནི། རྩིབས་བྱང་ཆུབ་སེམས་དཔའི་གནས་ཡིན་པས་གཙོ་བོའི་གནས་པས་ཉིས་འགྱུར་གྱིས་ཆུང་བར་བྱའོ་ཞེས་བྱ་བའི་དོན་ཏོ། །ཡང་ལྟེ་བ་ལ་བསྐོར་བའི་རིམ་པ་དང་པོ་ནི་རྩིབས་རྟེན་ནོ། །གཉིས་པ་ནི་རྩིབས་ཡིན་པའི་ཕྱིར། རྩིབས་ནི་ཉིས་འགྱུར་ཉིད་དུ་བྱ། །ཞེས་གསུངས་
སོ། །འདི་ནི་དོན་སླར་ཡང་གསལ་བར་བྱ་སྟེ། ས་ཡི་ཆ་ཡིད་དུ་འོང་བར་དཀྱིལ་འཁོར་གྱི་ཉིས་འགྱུར་གྱི་ཚད་ལ། མིག་བྱིན་གྱིས་བརླབ་ཅིང་བསྒྲིལ་བ་དང་རང་རྡོ་རྗེ་སེམས་དཔར་བསྐྱེད་དེ། གྲོགས་པོ་རྡོ་རྗེ་ལས་སུ་བསྐྱེད་ནས། དང་པོ་རང་ཤར་དུ་བལྟས་ཏེ་ཚངས་ཐིག་གདབ། དེའི་འོག་ཏུ་བྱང་དུ་བལྟས་ཏེ་ཚངས་ཐིག་གཉིས་པ་གདབ། མེའི་གནས་སུ་གནས་ལ་ཤར་གྱི་ཐིག་གདབ། རླུང་གི་ཕྱོགས་སུ་བལྟས་ཏེ་ནུབ་ཀྱི་ཐིག་ཀྱང་གདབ། ཉིད་ཉིད་དུ་འདུག་སྟེ་ཤར་དུ་བལྟས་ཏེ་བྱང་དུ་ཐིག་ཀྱང་གདབ། མེའི་མཚམས་སུ་གནས་ནས་ལྷོ་ཕྱོགས་ཀྱི་ཐིག་གདབ། དེ་ཉིད་དུ་འདུག་སྟེ་རླུང་ཕྱོགས་སུ་བལྟས་ཏེ་ཚངས་ཐིག་གདབ་པར་བྱ། བདེ་བྲལ་གྱི་ཕྱོགས་སུ་འདུག་སྟེ་དབང་ལྡན་དུ་ཁ་བལྟས་ལ་ཟུར་ཐིག་གཉིས་པ་གདབ། དེ་ལྟར་གུ་བཞིར་གནས་པ་ལ་ཆ་ཆེན་བཅུ་དྲུག་གདབ་པར་བྱའོ། །ཐ་མར་ཆ་ཆེན་གཉིས་པར་བྱའོ། །དབུས་ཀྱི་བཅུ་པོ་གཉིས་གཉིས་གདབ། ཉི་ཤུ་རྩ་བཞི་དག་ཏུ་འགྱུར། །དེ་ནས་ཆ་ཕྲ་མོ་གདབ་པར་བྱ་བ་ནི། ཆ་ཆེན་དགུ་རུ་གནས་པ་ལ། །ཐ་མར་ལྔ་བའི་ཕྱེད་བོར་བ་ལ་ལྷག་མ་བརྒྱད་ལ་བཞི་བཞིར་བགོ་གསུམ་པ་དང་དེ་བཞིན་དུ་ལྔ་པ་ལ་ཡང་ངོ༌། །ཕྱི་རོལ་གྱི་སྒོ་དང་ནང་གི་སྒོ་ཁྱུད་དང་ལོགས་སུ་འགྱུར་རོ།། ལྔ་པའི་ཕྱེད་ནང་དུ་བོར་ནས་ཕྱི་རོལ་གཉིས་སུ་གདབ། དྲུག་པ་ལ་ཆ་བྲན་བཞི་བཏབ་ལ་བདུན་པའི་ནང་རོལ་ཆ་ཆུང་གཅིག་གདབ་བོ། །ཆ་གསུམ་མི་གདབ། དགུ་པ་དང་བཅུ་པ་བཅུ་གཉིས་པ་བཅུ་གཉིས་པ་བཞི་བཞིར་གདབ་བོ། །དེ་ནས་ཚོན་གྱི་ཐིག་གདབ་པར་བྱ་སྟེ། ལྔ་པ་ཕྱེད་ཀྱི་དང་པོ་གདབ། །དེ་ནས་གཉིས་དོར་གསུམ་པ་གདབ། །དྲུག་པ་ལ་ཡང་གདབ་པར་བྱ། །དགུ་པའི་ནང་གི་ཆ་གཅིག་གདབ། །ཡང་གཉིས་དོར་ལ་ཆ་གཅིག་གདབ། །ཡང་གཉིས་བཞག་ལ་ཆ་གཅིག་གདབ། །ངོས་དང་འགྲམ་མ་དང་ཡ་ཕུགས་འགྱུར། །ལྷག་མ་ནི་ཅི་རིགས་པར་སྦྱར་བར་བྱའོ། །དབུས་ཀྱི་དཀྱིལ་འཁོར་ཐིག་གདབ་པ་ལ། ཚངས་ཐིག་གི་ཕྱོགས་གཅིག་ཏུ་བཅུ་གཉིས་པ་ཡོངས་སུ་བསྐོར་བས་རྩིབས་རྟེན་དུ་འགྱུར་རོ། །དེའི་ནང་དུ་ཕྱོགས་གཅིག་གི་བཞི་པ་བཏབ་བས་ཀ་བར་འགྱུར་རོ། །རྩིབས་རྟེན་གྱི་ཕྱིར་རོལ་གསུམ་དོར་བ་ལ་རྩིབས་དྲུག་ཏུ་བྱ་སྟེ། གཙོ་བོའི་གནས་པས་ཕྱེད་ཀྱིས་
ཆུང་བ་ཉིས་འགྱུར་དུ་བྱའོ། བཞི་པ་ཡོངས་སུ་བསྐོར་བས་རྡོ་རྗེའི་ཕྲེང་བའོ། །ཐིག་གདབ་པའི་ཆོ་གའོ། །དབུས་ཀྱི་ཕྱོགས་སུ་ཀུན་རིག་གི །དྲུང་དང་ཀུནད་ཟླ་འདྲ་བ། །ཞེས་པ་ནི་དཀྱིལ་འཁོར་གྱི་དབུས་ཀྱི་ཕྱོགས་སུ་བཅོམ་ལྡན་འདས་རྣམ་པར་སྣང་མཛད་ཁ་དོག་དུང་དང་ཀུནད་དང༌། ཟླ་བ་དང་འདྲ་བ་ལ་མཆོག་ཏུ་ཕུལ་དུ་བྱུང་བའོ། །དབྱིབས་དང་གདན་དང་རྒྱན་ཅི་ཞིག་ཅེ་ན། ཞལ་བཞི་པ་ལ་དྲོ་རྗེ་ཡི། །སེང་གེའི་གདན་ལ་བཞུགས་པ་དང༌། ཏིང་ངེ་འཛིན་ཕྱག་རྒྱར་ལྡན་པ་དང༌། །རྒྱན་རྣམས་ཀུན་གྱིས་བརྒྱན་པ་བྲི། །ཞེས་གསུངས་སོ། །ཞལ་གསུངས་སོ། །ཞལ་བཞི་པ་ལ་ཞེས་བྱ་བ་སྐུ་གཅིག་ལ་ཞལ་བཞིའོ། དེ་ཡང་འོག་ནས་དེའི་སྤྱན་སྔར་ངན་སོང་ཀུན་འདྲེན་ཤར་ཕྱོགས་ལ་གསུངས་པའི་ཕྱིར་རོ། །སེང་གེའི་གདན་ལ་ཞེས་པ་སེང་གེ་དང་པདྨ་དང་ཟླ་བ་ལའོ། །རྡོ་རྗེའི་བཞུགས་པ་དང་ཞེས་སྦྱར་རོ། །འདིས་ནི་རྡོ་རྗེ་སྐྱིལ་ཀྲུང་གིས་བཞུགས་པར་བསྟན་ཏེ། །ཏིང་འཛིན་ཕྱག་རྒྱ་ལྡན་པ་དང༌། །རྒྱན་རྣམས་ཀུན་གྱིས་བརྒྱན་པར་བྲི། །ཞེས་བྱ་བ་ནི་ཏིང་ངེ་འཛིན་གྱི་ཕྱག་རྒྱ་དང་དབུ་རྒྱན་ལ་སོགས་པས་བརྒྱན་པར་བྲི་བ་དང༌། གཞན་པ་དང་དགོད་ཅེས་བྱ་བའི་དོན་ཏོ། །བཅོམ་ལྡན་འདས་རྣམ་པར་སྣང་མཛད་དེའི་སྤྱན་སྔར་ཏེ། ཤར་དུ་ངན་སོང་ཀུན་སྦྱོང་བའི་རྒྱལ་པོ་བྲི་སྟེ་ཕྱག་གཉིས་ཏིང་ངེ་འཛིན་དུ་བསྣོལ་བ་ཁ་དོག་ཇི་ལྟ་བུ་ཞེ་ན། ཟླ་བརྒྱས་དང་བ་མོའི་མདོག །རྒྱན་ཇི་ལྟ་བུ་ཞེ་ན། རྒྱན་རྣམས་ཀུན་གྱིས་ལགས་རྫོགས་ལ། །རྒྱལ་མཚོན་སྐྱེས་བུ་གང་བ་བྲི། །ཞེས་བྱ་བ་ནི། རྒྱལ་མཆོག་གང་བས་མཚན་དང་དཔེ་བྱད་རང་བཞིན་གྱིས་བརྒྱན་པར་བསྟན་ལ། སྔ་མས་ནི་གསལ་བའི་རྒྱན་སྟོན་ཏོ། །རྒྱབ་ཏུ་ཤཱཀྱའི་རིགས་དབང་པོ། །གཙོ་བོ་ཐུབ་པ་བྲི་བར་བྱ། །ཞེས་བྱ་བ་ནི་ནུབ་ཀྱི་ཕྱོགས་སུ་ཤཱཀྱ་ཐུབ་པ་ཁ་དོག་དམར་པོ་ཆོས་ཀྱི་འཁོར་ལོའི་ཕྱག་རྒྱ་ཅན་བྲི་བར་བྱའོ། །གཡོན་དང་གཡས་ཀྱི་ཕྱོགས་ཆར་ནི། །རྒྱལ་མཆོག་རིན་ཆེན་མེ་ཏོག་གཉིས། །ཞེས་བྱ་བ་ནི་ལྷོ་དང་བྱང་དུའོ། །རིན་ཆེན་པོ་མེ་ཏོག་ཁ་དོག་སྔོན་པོ་མཆོག་སྦྱིན་གྱི་ཕྱག་རྒྱ་ཅན་དང༌། བྱང་ཕྱོགས་སུ་མེ་ཏོག་ཆེར་རྒྱས་ཁ་དོག་ལྗང་གུ་མི་འཇིགས་པའི་ཕྱག་རྒྱ་ཅན་བྲི་ཞིང་དགོད་པར་བྱའོ། །འདི་དག་གི་གདམ་ཡང་གླང་པོ་ཆེ་ལ་སོགས་པ་ཇི་སྐད་དུ་བཤད་པ་བཞིན་ཤེས་པར་
བྱའོ། །ལོ་ཙ་ན་དང་མཱ་མ་ཀཱི། །དེ་བཞིན་གོས་དཀར་སྒྲོལ་མ་རྣམས། །རང་གི་རིགས་ཀྱི་མཚན་མ་བཞིན། །གྲྭ་ཡི་ཕྱོགས་ནི་ཀུན་དུ་བྲི། །ཞེས་བྱ་བ་ནི། སངས་རྒྱས་སྤྱན་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་རྣམས་རང་གི་རིགས་གཙོ་བོའི་ཁ་དོག་དང་མཚན་མ་ཅན་དང༌། རྡོ་རྗེ་དང༌། པདྨ་དང༌། ཨུཏྤལ་རྣམས་གོ་རིམས་བཞིན་དུ་ཕྱག་གཡས་ན་འཛིན་ཅིང༌། གྲྭའི་ཕྱོགས་ཀུན་དུ་བྲི་བར་བྱའོ་ཞེས་བྱ་བའི་དོན་ཏོ། །རྩིབས་ཀྱི་ནང་ནི་ཐམས་ཅད་དུ། །རྡོ་རྗེ་སེམས་དཔའ་མཆོག །རྫུ་འཕྲུལ་ཆེ་བའི་སེམས་དཔའ་རྣམས། །གོ་རིམས་བཞིན་དུ་བྲི་བར་བྱ། །ཞེས་བྱ་བ་ནི་རྩིབས་བཅུ་དྲུག་པའི་ནང་ཐམས་ཅད་དུ་རྡོ་རྗེ་སེམས་དཔའ་ལ་སོགས་པ་འབྲས་བུའི་བྱང་ཆུབ་སེམས་དཔའ་རྫུ་འཕྲུལ་ཆེ་བ་རྣམས་དབང་ལྡན་གྱི་མཚམས་ནས་བརྩམས་ཏེ་གོ་རིམས་བཞིན་དུ་བྲི་བར་བྱ་ཞེས་བྱ་བའི་དོན་ཏོ། །མཁས་པས་ལཱ་སྱེ་ལ་སོགས་པ། །མཆོད་པ་གྲྭ་ཡི་ཕྱོགས་སུ་བྲི། །ཞེས་བྱ་བ་དཀྱིལ་འཁོར་གྱི་མདོག་དང༌། །དབྱིབས་ལ་བྱ་བས་ལཱ་སྐྱེ་ལ་སོགས་པ་མཆོད་པ་བརྒྱད་ནང་གི་གྲྭ་དང༌། ཕྱི་རོལ་གྱི་གྲྭར་བྲི་ཞེས་བྱ་བའི་དོན་ཏོ། །སྒོ་ཡི་ཕྱོགས་ནི་ཐམས་ཅད་དུ། །ཞེས་བྱ་བ་ནི་ཤར་ལ་སོགས་པ་བཞིར། སྒོ་བ་བཞི་ནི་བྲི་བར་བྱ། །ཞེས་བྱའོ། །རྟ་བབས་ཁྱམས་ནི་ཐམས་ཅད་དུ། །ཞེས་བྱ་བ་ནི་ཀྱང་ཞེས་བྱ་བའི་དོན་ཏོ། །དེས་ནི་འདི་ལྟར་འགྱུར་ཏེ། ནང་གི་དཀྱིལ་འཁོར་གྱི་རྟ་བབས་ཀྱི་གནས་དང༌། ནང་གི་ཁྱམས་ཉིད་ཀྱི་ནང་དུ་བྲི་ཞེས་བྱ་བ་སྟེ་བསྟན་པའོ། །དེ་ཉིད་བཤད་པ། བྱམས་པ་ལ་སོགས་བྲི་བར་བྱ། །ཞེས་བྱ་བ་ལ་སོགས་པ་གསུངས་ཏེ་ནང་གི་ཁྱམས་ཉིད་དུ་བྱམས་པ་ལ་སོགས་པ་བཅུ་དྲུག་བྲི་བར་བྱའོ། །རྟ་བབས་ཀྱི་གནས་ཀྱི་ཁྱམས་ལ། རིམ་པ་གསུམ་གྱི་རང་བཞིན་བྲི། །ཞེས་ཏེ་དང་པོ་ལ་འཁོར་བ་གཅོད་མཛད་ལ་སོགས་པ་བཅུ་དྲུག་བྲི་བར་བྱའོ། །གཉིས་པ་ལ། ཉན་ཐོས་རྒྱལ་བ་ཐམས་ཅད་དང༌། །ཞེས་བྱ་སྟེ། ཉིད་ཀྱི་གཅུང་ཚེ་དང་ལྡན་པ་དགའ་བོ་ལ་སོགས་པ་བཅུ་དྲུག་བྲི་བར་བྱའོ། །གསུམ་པ་ལ་ཉོན་མོངས་འཇོམས་པ་འཇིགས་མེད་གདུང་བ་སེལ་བ་ལ་སོགས་པ་བཅུ་གཉིས་བྲི་བར་བྱའོ། །ཁྲོ་བོ་མངག་པ་ཕོ་ཉ་རྣམས། །བྲི་བྱ་ཡང་ན་མིང་ཡང་རུང༌། །ཞེས་བྱ་བ་ནི་ཁྲོ་བོ་ཉིད་མངག་པ་ཡང་ཡིན་ལ་ཕོ་ཉ་ཡང་ཡིན་པས་
དེ་སྐད་ཅེས་བྱའོ། །བྲིའམ་ཡང་ན་མིང་ཡང་རུང༌། །ཞེས་བྱ་བ་ནི་འདྲ་བའམ་མིང་དེ་ཡི་གེར་དགོད་པའང་རུང་སྟེ་ཕྱག་མཚན་དུ་དགོད་པར་བྱ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་རྒྱལ་བོ་མཆོག་བསྒོམ་པ་སྟོན་ཏོ། །ཤར་ཕྱོགས་ཀྱི་སྒོར་འཇིག་རྟེན་གསུམ་སྣང་དང་འཇིག་རྟེན་གསུམ་འཇིག་གོ །ལྷོ་ཕྱོགས་ཀྱི་སྒོར་འཇིག་རྟེན་གསུམ་མཐར་བྱེད་དང་འཇིག་རྟེན་གསུམ་འདུལ་ལོ། །ནུབ་ཕྱོགས་ཀྱི་སྒོར་བདུད་རྩི་འཁྱིལ་པ་དང༌། བེ་ཅོན་སྔོན་པོའོ། །བྱང་ཕྱོགས་ཀྱི་སྒོར་མི་གཡོ་མགོན་པོ་དང་རྟ་མགྲིན་བྲི་བར་བྱའོ། །ཕྱི་ཡི་དཀྱིལ་འཁོར་ཕྱི་རོལ་དུ། །ཞེས་བྱ་བ་ནི་སྔར་བསྟན་པ་དེ་ཉིད་ཀྱི་ཕྱི་རོལ་དུ་མུ་རན་དཀར་པོ་བྲི་ཞིང༌། དེ་ཉིད་ཀྱི་བར་དུ། གླིང་བཞི་པོ་ནི་བྲི་བར་བྱ། །འཛམ་བུའི་གླིང་དུ་ཚངས་པ་བྲི། །བྱང་ཕྱོགས་སུ་ནི་དབང་ཕྱུག་ཆེ། །ཤར་དང་ནུབ་ཀྱི་གླིང་དུ་ནི། །བརྒྱ་བྱིན་གཏོགས་འདོད་ཐམས་ཅད་ཀྱང༌། །འཁོར་དང་བཅས་པ་བྲི་བར་བྱ། །ཞེས་བྱ་བ་ནི། ཤར་ཕྱོགས་སུ་བརྒྱ་བྱིན་འཁོར་དང་བཅས། ལྷོ་ཕྱོགས་སུ་ཚངས་པ་འཁོར་དང་བཅས། ནུབ་ཕྱོགས་སུ་གཏོག་འདོད་འཁོར་དང་བཅས། བྱང་ཕྱོགས་སུ་མ་ཧཱ་དེ་བ་འཁོར་དང་བཅས་པ་བྲི་བར་བྱའོ་ཞེས་བྱ་བའི་དོན་ཏོ། །གཞན་རྣམས་དག་ཀྱང་དེ་བཞིན་ཏེ། །ཞེས་བྱ་བ་ནི། བརྒྱ་བྱིན་ནས་བརྩམས་ཏེ་དབང་ལྡན་གྱི་མཐར་ཐུག་པར་འཁོར་དང་བཅས་པ་བྲི་བར་བྱའོ། །དེ་ཉིད་ཀྱི་འཁོར་བཤད་པ་ལྷ་མིན་ཞེས་བྱ་བ་ལ་སོགས་པའོ། །ལྷ་མིན་ཞེས་བྱ་བ་སུམ་བརྩེགས་དང༌། རབ་སིམ་དང༌། ཧེ་རན་ཀེ་ཤུ་དང༌། ཀུན་དུ་སྣང་བ་ལ་སོགས་པའོ། །དྲི་ཟའི་རྒྱལ་པོ་ཡུལ་འཁོར་སྲུང་ལ་སོགས་པའོ། །ནམ་མཁའ་ལྡིང་གསེར་མིག་ལ་སོགས་པའོ། །གནོད་སྦྱིན་ནོར་འཛིན་ལ་སོགས་པའོ། །སྲིན་པོ་ཨུ་བ་ཀརྣི་པུ་རྣལ་སོགས་པའོ། །གཞན་ཡང་དེ་བཞིན་དུ་ལྟོ་འཕྱེ་ཆེན་པོ་དང༌། ཡི་དགས་དང༌། འདྲེ་རྣམས་དང༌། ཀླུ་དང༌། སྦྲུལ་དང༌། རི་རྣམས་དང༌། རྒྱལ་པོ་ཆེན་པོ་བཞི་རྣམས་དང༌། གཟའ་དང། རྒྱུ་སྐར་དང༌། ཁྲོ་བོ་མ་རུངས་པ་འཚེ་བའི་བགེགས་དང༌། བི་ན་ཡ་ཀ་རྣམས་དང༌། སེམས་ཅན་ཀུན་ལ་ཕན་པར་བྱེད་བའི་དང་སྲོང་སྐལ་བ་ཆེན་པོ་རྣམས་དང༌། མཁའ་འགྲོ་མའི་བུད་མེད་རྣམས་དང༌། སྲིན་པོ་རྣལ་འབྱོར་མ་རྣམས་དང༌། འབྱུང་པོ་བཞིའི་ལྷ་ཆེན་པོ་རྣམས་དང༌། ཁྱིམ་
དང་རི་དང༌། ཀུན་དགའ་ར་བ་དང༌། ནགས་ཚལ་དང༌། དུར་ཁྲོད་ན་གནས་པ་དང༌། གྲོང་ཁྱེར་ན་གནས་པ་རྣམས་ཀྱང་བྲི་སྟེ་མིང་དུ་གཞག་པ་དང༌། ཕྱག་རྒྱར་གཞག་པ་དང༌། ཐིག་ལེ་ཙམ་དུ་བྲི་བར་བྱ་སྟེ། འཁོར་འདི་རྣམས་ཀྱི་ཁ་དོག་ལ་སོགས་མ་བཤད་དོ།། འདིས་ནི་འདི་སྐད་སྟོན་པ་ཡིན་ཏེ། ཐིག་བཏབ་པའི་རྗེས་ཐོགས་ལའོ། །ཚོན་གྱི་ལས་རྣམས་བྱས་ནས། ཚོན་དགྱེ་བ་སྔོན་དུ་འགྲོ་བས་ལྷ་རྣམས་གཞག་ཅིང་འཁོར་རྣམས་ནི་མིང་དང༌། ཕྱག་རྒྱ་དང༌། ཐིག་ལེ་ཙམ་དུ་བྲིས་ཀྱང་འགྲུབ་པར་འགྱུར་རོ་ཞེས་སྟོན་ཏོ། །དེ་ནས་ཞེས་བྱ་བ་ལ་སོགས་པ་ལ་མཁས་པས་གཞག་ཅེས་ཐམས་ཅད་ལ་སྦྱར་བར་བྱའོ། །དེ་ཡང་དཀྱིལ་འཁོར་ལ་མཆོད་པའི་ཕྱིར། བླ་རེ་དང༌། རྒྱལ་མཚན་དང༌། ལྷབ་ལྷུབ་དང༌། གདུགས་དང༌། རྔ་མ་དང༌། ལྡ་ལྡི་དང༌། འཕན་དང་སྣ་ཚོགས་པའི་ན་བཟའ་དང༌། གསེར་ལས་བྱས་པའི་བྱ་བརྒྱད་དང་བཅུ་དྲུག་གམ། སུམ་ཅུ་རྩ་གཉིས་ཀྱང་རུང་བ་དང༌། དབང་བསྐུར་བའི་བུམ་པ་ཆུས་བཀང་བ་ལྔ་དང༌། མེ་ཏོག་དང༌། མར་མེ་དང༌། གཏོར་མའི་བུམ་པ་དང༌། མཛེས་པའི་བཤོས་ལ་སོགས་པ་དང༌། བཟའ་བ་དང༌། བཏུང་བ་ལེགས་པར་སྦྱར་བ་དང༌། བཅའ་བ་སྣ་ཚོགས་པ་དང༌། གནོད་སྦྱིན་སྲིན་པོའི་ཁ་ཟས་སུ་གཏོར་མ་རྣམ་པ་སྣ་ཚོགས་པ་དང༌། འབྱུང་པོ་ཀུན་དང༌། ཀླུ་རྣམས་དང༌། ལྷ་དང༌། མི་དང༌། མི་མ་ཡིན་གྱི་ཁ་ཟས་སུ་མེ་ཏོག་དང༌། དྲི་སྣ་ཚོགས་དང༌། འོ་མ་དང༌། མར་དང༌། ལི་ཁ་ར་དང་བཅས་པ་གཞག་པར་བྱའོ། །སློབ་མ་དང་བདག་དབང་བསྐུར་བའི་དོན་དུ་རྣམ་པར་རྒྱལ་བའི་བུམ་པ་དྲིའི་ཆུས་རབ་ཏུ་བཀང་བ་རྡོ་རྗེ་སེམས་དཔའི་སྤྱན་སྔར་གཞག་པར་བྱའོ། །ལས་ཐམས་ཅད་པའི་བུམ་པ་ནི་ཤར་ཕྱོགས་ཀྱི་སྒོར་གཞག་པར་བྱའོ། །བུམ་པ་ལྷག་མ་རྣམས་ནི་ཕྱི་རོལ་གྱི་འཁོར་ཡུག་རྣམས་ལ་གཞག་པར་བྱའོ། །གཞན་ཡང་ཆོས་ཀློག་པ་བཞི་ཕྱོགས་བཞིར་གཞག་པར་བྱའོ། །དེ་ལྟར་དཀྱིལ་འཁོར་ཀུན་དུ་ལེགས་པར་བཀོད་ནས་དགོངས་ཀའི་དུས་ནས་བརྩམས་ཏེ། དེ་ནས་ཞེས་བྱ་བ་ལ་སོགས་པས་ལྷ་རྣམས་མཆོད་པ་སྟོན་ཏེ། ཁྲུས་ལ་སོགས་པ་བྱས་ནས་ཞེས་བྱ་བ་ནི་དང་པོར་ཁྲུས་བྱ། གནས་བསྲུང་རྐང་པ་བཀྲུས་ཏེ་ཉེ་རེག་བྱ། སྔོན་དུ་བདག་
བསྲུང་བ་ལ་སོགས་པ་འགྲོ་བས་རྒྱན་གདགས་དྲིས་བྱུང༌། །རྡོ་རྗེ་འཛིན་མས་ཞུགས་ནས་བསྐོར་བ་བྱ། ཆད་པ་དང་ལྷག་པ་ཞི་བར་བྱ། སྒོ་ཕྱེ་ལ་ཞེས་བྱ་བའི་དོན་ཏོ། །དེ་ཉིད་དྲི་དང་ཕྲེང་མཆོད་ཕྲེང་བ་ཅན། །དྲི་ཞིང་ཁ་བཀང་མཆོག་མཛེས་པ། །རྡོ་རྗེ་འཛིན་མས་ཞུགས་ནས་ཀྱང༌། །ཞེས་བྱ་བའི་དོན་ཡིན་ནོ། །ཀྱང་ཞེས་བྱ་བའི་དོན་ནི་བསྡུ་པ་སྟེ། དང་པོའི་སྦྱོར་བ་དང༌། དཀྱིལ་འཁོར་རྒྱལ་མཆོག་དང་ལས་རྒྱལ་མཆོག་བསྒོམས་ལ། མཆོད་པ་གསང་བ་བཟླས་བརྗོད་བྱ། །ཧཱུཾ་མཛད་ང་རྒྱལ་གྱིས་སྒོ་ཕྱེ། །ཞེས་བྱ་བའི་དོན་ཏོ། །ཡང༌། མེ་ཏོག་ཐོགས་ཏེ་སྒོ་ཕྱོགས་འདུག །གཙོ་བོ་རྒྱལ་བ་སྲས་ཀྱི་འཁོར། །མང་པོ་རྣམས་ནི་སྤྱན་དྲངས་ཏེ། །ཞེས་བྱ་བ་ནི་གཙོ་བོའི་རྣལ་འབྱོར་དང་ལྡན་པས་དཔུང་བར་སེ་གོལ་བརྡབ་པ་བྱས་ལ། ཛཿཧཱུཾ་བཾ་ཧོཿ་ཞེས་བརྗོད་དེ་སྤྱན་དྲང་ངོ་ཞེས་བྱ་བའི་དོན་ཏོ། །ཕྱག་རྒྱ་སྔགས་དང་བདག་ལྡན་པས། །ལྕགས་ཀྱུ་ལ་སོགས་བདག་སྦྱོར་ཞིང༌། །ཞེས་བྱ་བ་ནི། བདག་ཕྱག་རྒྱ་དང་སྔགས་དང་ལྡན་པའི་སྒོ་ནས་ལྕགས་ཀྱུ་ལ་སོགས་པའི་ལས་བྱ་ཞིང་ངོ༌། །ཅི་ཞིག་སྤྱན་དྲང་ཞེ་ན། ཛཿ་ཧཱུཾ་བཾ་ཧོཿཐུགྶ་རྗེའི་བདག །ཚུར་གཤེགས་ཞེས་ནི་བརྗོད་ནས་ཀྱང༌། །ཞེས་བྱ་བ་གསུངས་སོ། །གསང་བའི་བཅིང་བ་བཅིངས་ནས་ནི། །ཞེས་བྱ་བ་ནི་དམ་ཚིག་དང༌། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་པས། དམ་ཚིག་གི་བཅིང་བས་བཅིངས་ཞེས་བྱ་བའི་དོན་ཏོ། །ཕྱག་རྒྱ་གང་ཞིག་གིས་དགུག་པ་ལ་སོགས་པའི་ལས་བྱ་བ་མཛུབ་མོ་གཉིས་ཞེས་བྱ་བ་ལ་སོགས་པ་སྨོས་ཏེ། མཛུབ་གཉིས་ལྕགས་ཀྱུའི་ཚུལ་དུ་བྱ། །ཞེས་བྱ་བ་ནི་མཁྲིག་མ་གཉིས་བསྣོལ་ཏེ། མཐེའུ་ཆུང་ལུ་གུ་རྒྱུད་དུ་སྦྲེལ། མཛུབ་མོ་གཉིས་ལྕགས་ཀྱུའི་ཚུལ་དུ་བྱ་བ་ནི་ལྕགས་ཀྱུའོ། །མཁྲིག་མ་གཉིས་མདུད་པ་བྱས་པ། །ཞགས་པ་བཞིན་དུ་སྦྱར་ནས་ཀྱང༌། །ཞེས་བྱ་བའོ། །དེ་ལ་ལྕགས་སྒྲོག་ཚུལ་དུ་བྱ། །ཞེས་བྱ་བ་ནི་མཛུབ་མོ་གཉིས་གདུ་བུར་བཅིངས་པའོ།། མཛུབ་མོ་གཉིས་སླར་ནང་དུ་བཀུག་ནས་བསྐྱོད་པར་གྱུར་ན་དབང་དུ་འགྱུར་ཞེས་བྱ་བ་ནི་དྲིལ་བུའོ། །དེ་ནས་མཚན་མ་སྐྱེས་ཏེ་མགུ་ནས་ནི། །ཐོག་མ་ཐ་མ་མེད་པར་མངོན་སུམ་མཐོང༌། །ཞེས་བྱ་བ་ནི། དེ་ནས་ཞེས་བྱ་བ་ནི་བར་མ་ཆད་པ་སྟེ། སྤྱན་དྲངས་ལྕགས་ཀྱུ་ལ་སོགས་པས་ལས་བྱས།
བགེགས་བས་ལ་མཆོད་པ་དབུལ་བ་སྔོན་དུ་འགྲོ་བས་ཕྱག་རྒྱ་བཞིས་རྒྱས་གདབ། དབང་བསྐུར་བའི་རྗེས་ཐོགས་ཉིད་ལ་ཞེས་བྱ་བའི་དོན་ཏོ། །མཚན་མ་སྐྱེས་ཏེ་ཞེས་བྱ་བ་ནི། བསྒོམ་པ་དང་བཟླས་པ་བྱ་བར་བསྟན་ཏོ། །དེའི་འབྲས་བུ་ཁྱད་པར་མཐོང་ནས་མགུ་ནས་ནི། ཐོག་མཐའ་མེད་པར་དངོས་པོ་ཐམས་ཅད་མངོན་པར་ཤེས་པ་སྐྱེས་པས་མཐོང་བར་འགྱུར་རོ་ཞེས་བྱ་བའི་དོན་ཏོ། །དེ་ནས་མཐོང་བ་ལས་སོགས་པའི་ལྷ་རྣམས་ལ། ཨརྒྷས་མཆོག་བསྟན་པས་གསང་ལ་སོགས་པ་ཡི། །དབྱངས་སྙན་པ་ཡི་བསྟོད་པའི་ལྷ་རྫས་ཀྱི། །མཆོག་གི་དམ་པ་རྣམས་ཀྱིས་ལེགས་པར་མཆོད། །ཅེས་བྱ་བ་ནི། ཨརྒྷ་བྱིན་གྱིས་བརླབས་པ་དང༌། གསང་བ་ལཱ་སྱེ་ལ་སོགས་པ་བརྒྱད་དང༌། བསྟོད་པ་རྣམས་དབྱངས་སྙན་པས་འབུལ་ཞིང༌། ལྷ་རྫས་ཀྱི་མཆོག་དམ་པ་གོང་དུ་བཤད་པ་བུམ་པ་ལ་སོགས་པ་རྣམས་ཀྱིས་ལེགས་པར་མཆོད་དོ་ཞེས་བྱ་བའི་ཐ་ཚིག་གོ །འདི་སྐད་དུ་སྟོན་པ་ཡིན་ཏེ། དང་པོ་རྡོ་རྗེ་འཛིན་མ་དང་དཔལ་གྱི་ལག་གཉིས་ལྟ་བུར་བཅིངས་ནས་མེ་ཏོག་གི་ཕྲེང་བ་ཐོགས་ཏེ། ཡིད་ཀྱིས་དཀྱིལ་འཁོར་དུ་ཞུགས་ལ་ཆད་པ་དང་ལྷག་བཞི་པར་བྱ། །མེ་ཏོག་གི་ཕྲེང་བ་དོར། མགོ་ལ་བཅིངས་ངོ༌། །ཨོཾ་བཛྲ་ས་ཏྭ་ཧཱུཾ་ཞེས་ཀྱང་རྒྱུན་མི་ཆད་པར་བཟླས་པ་བྱ། ཧཱུཾ་མཛད་ཀྱི་ང་རྒྱལ་དང་ལྡན་པས་སྒོ་བཞི་ཕྱེ། ཁྲུས་བྱས་དྲི་དང་ཕྲེང་བ་ལ་སོགས་པའི་རྒྱན་རྣམས་པ་སྣ་ཚོགས་ཀྱིས་བརྒྱན། ས་མ་ཡ་སྟྭཾ། ཞེས་བརྗོད་དེ་སྟན་ཐོག་ཏུ་འདུག །ལྕེ་ལག་པ་བྱིན་གྱིས་བརླབ་པ་ནས་བརྩམས་ཏེ། སྲུང་པའི་འཁོར་ལོ་ཐམས་ཅད་རྫོགས་པར་བྱ་ལ། སེམས་ཅན་ཐམས་ཅད་ལ་ཕན་པའི་ཕྱིར་ནམ་མཁར་དཀྱིལ་འཁོར་བསྒོམ་པར་བྱའོ། །དེ་ནས་དྲིལ་བུ་སྟོང་པའི་བདག་ཏུ་བརྟག་པ་དང༌། མཆོད་པ་རྣམ་པ་ལྔ་དང༌། སྡིག་པ་ཐམས་ཅད་བཤགས་པ་ལ་སོགས་པ་ལྷ་དང་ལྷ་མ་ཡིན་གྱིས་མཆོད་ནས་མི་སྣང་བར་གྱུར་པ་དང༌། བསམ་གཏན་དང་གཟུགས་མེད་པའི་སྙོམས་པར་འཇུག་པ་མངོན་དུ་བྱས་ནས། འོག་མིན་དུ་བྱིན་ནས་མངོན་པར་བྱང་ཆུབ་པ་ལྔས་རྡོ་རྗེ་དབྱིངས་སུ་བསྐྱེད་དེ་བྱིན་གྱིས་བརླབ་པ་དང༌། དབང་བསྐུར་བ་སྔོན་དུ་འགྲོ་བ་དང་བཅས་ཏེ་སྙིང་གའི་དཀྱིལ་འཁོར་དུ། ངན་སོང་སྦྱོང་བ་ལ་སོགས་པ་བྱས་ནས་དཀྱིལ་འཁོར་ལུས་ལ་བརྟགས་ཏེ། ནམ་མཁའི་
ཕྱོགས་སུ་གནས་ནས། རི་རབ་དང་ཁང་པ་བརྩེགས་པ་ལ་སོགས་པ་བསྐྱེད་དེ་ཐབས་དང་ཤེས་རབ་ཀྱིས་བདག་ཉིད་ཞུ་བ་ལས། ཀུན་རིག་གི་སྐུར་གྱུར་ནས། ཐུགས་ཀའི་ཟླ་བ་ལ་ལྷ་ཐམས་ཅད་བསྐྱེད་པ་ལས་ཐ་མི་དང་པར་བསམས་ཏེ་བསྡུ་བ་སྔོན་དུ་འགྲོ་བས། ཕྱག་དང་ཆེད་དུ་བརྗོད་པ་དང༌། དཀྱིལ་འཁོར་དུ་ཞུགས་ནས་བྱིང་ཡིས་བརླབ་ནས་ཡང་ཆེད་དུ་བརྗོད་པ་དང༌། རྣལ་འབྱོར་པས་དབང་བླངས་ཤིང༌། ལྕགས་ཀྱུ་ལ་སོགས་པས་ལས་བྱ་ཞིང་ཕྱག་རྒྱ་ཞིས་རྒྱས་བཏབ་ནས། ངན་སོང་ཐམས་ཅད་སྦྱོང་བའི་ལས་ལ་སྦྱར་ཏེ། མཆོད་པ་བསངས་ལ་བཟླས་པར་བྱ་བ་བརྗོད་ཅིང༌། ཧཱུཾ་མཛད་ཀྱི་ང་རྒྱལ་དང་ལྡན་པས་སྒོ་ཕྱེ་སྟེ། གཙོ་བོའི་སྦྱོར་བས་སངས་རྒྱས་རྣམས་བསྡུས་ལ། ལྕགས་ཀྱུ་ལ་སོགས་པས་ལས་བྱས་ལ། རྡོ་རྗེ་གནོད་སྦྱིན་གྱིས་བགེགས་བསལ་ལ། ར་བ་དང་དྲ་བ་བྱས་ལ། རྡོ་རྗེ་ཁུ་ཚུར་གྱིས་སྒོ་བཅས་དེ། བསྲུངས་པས་བརྟན་པར་བྱས་ལ། མཆོད་ཡོན་དབུལ་པ་སྔོན་དུ་འགྲོ་བས་ལྷ་ཐམས་ཅད་ཀྱི་དམ་ཚིག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོས་རྒྱས་བཏབ་ལ། །ལྷ་ཐམས་ཅད་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ཏེ། སྒོམ་པ་དང་བཟླས་བརྗོད་མཐོང་བ་གསལ་བ་དང༌། ཨརྒྷ་ལ་སོགས་པ་མཆོད་པ་རྣམས་ལྔ་དང་བརྒྱད་དང་བསྟོད་པ་དང༌། བྱང་ཆུབ་སེམས་དཔའ་བཅུ་དྲུག་ལ་སོགས་པ་རྣམས་ཀྱིས་པ་ར་ཎ་ཁཾ་ཞེས་བྱ་བས་དབུལ་བར་བྱའོ་ཞེས་བྱ་བའི་དོན་ཏོ། །དེ་ནས་འབྱུང་པོ་ཀུན་གྱི་གཏོར་མ་བྱ། །སེམས་ཅན་བཀྲེས་ཤིང་སྐོམ་ལ་བཏུང་བ་དང༌། ཕྱོགས་ན་གནས་པ་རྣམས་ལ་རྣམ་པར་བརྟག །དེ་ཡི་གཏོར་མ་ཇི་ལྟར་མཐུན་པར་བྱ། །ཞེས་བྱ་བ་ནི་དངོས་གྲུབ་གསོལ་པའི་ལྷ་རྣམས་མཆོད་པ་དེ་ནས་འབྱུང་པོ་ཀུན་ཞེས་བྱ་བ་སེམས་ཅན་ཐམས་ཅད་ཀྱི་དཀར་གསུམ་གྱིས་གཏོར་མ་བྱས་ཏེ་སེམས་ཅན་བཀྲེས་པ་ལ་བཟའ་བ་དང་ཞེས་སྦྱར། སྐོམ་པ་ལ་བཏུང་བ་དང༌། ཕྱོགས་སྐྱོང་ཕྱོགས་ན་གནས་པ་རྣམས་སྤྱན་དྲངས་ཏེ་གཏོར་མ་སྦྱིན། འཁོར་རྣམས་ལ་དེའི་གཏོར་མ་ཇི་ལྟར་མཐུན་ཞིང་འཚམ་པར་སྦྱིན་པར་བྱ་སྟེ། དེ་ཡང་ཕྱི་རིལ་དུ་གཏོར་མ་སྦྱིན་པར་བྱ་སྟེ། འབྲས་ཆན་མེ་ཏོག་ཆུ་དང་བཅས། །ཞེས་བྱ་བ་ལ་སོགས་པ་ལ། ཨ་ཀཱ་རོ་ཞེས་བྱ་བ་ལ་སོགས་པས་བྱིན་གྱིས་བརླབས་
ནས་འཕགས་པ་དཔུང་བཟངས་ཀྱིས་ཞུས་པ་ལས་འབྱུང་བ་ལྟར་གཏོར་མ་སྦྱིན་པར་བྱའོ་ཞེས་བྱ་བའི་དོན་ཏོ། །དེ་ནས་ཉེ་རེག་དང་འཐོར་འཐུང་བྱས་ལ། ཐབ་ཁུང་དུ་མེ་ཏོག་གིས་ལྷ་རྣམས་སྤྱན་དྲངས་ལ་མར་གྱི་དགང་བླུགས་ལ་སོགས་པ་ཕུལ་ལ་སླར་སྤྱན་དྲངས་ཏེ། བདག་མིང་འདི་ཞེས་བགྱི་པ་ཡི། །རྡོ་རྗེ་སློབ་དཔོན་དཀའ་ཐུབ་ཆེ། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །ཞེས་བརྗོད་པར་བགྱིའོ། །འདི་ཙམ་གྱིས་ནི་སློབ་དཔོན་གྱི་ལས་ཀྱི་ཆོ་ག་སྟོན་ཏོ། །དེ་ནས་སྔགས་པ་ཞེས་བྱ་བ་ལ་སོགས་པས་སློབ་མ་གཞུག་པ་ལ་སོགས་པ་སྟོན་ཏོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །སྔགས་པས་བླ་ན་མེད་པའི་བྱང་ཆུབ་ཀྱི། །གནས་སུ་སློབ་མ་ཡོངས་སུ་སྨིན་པར་བྱ། །འགྲོ་ལ་ཕན་ཕྱིར་མྱུར་དུ་བྱང་ཆུབ་སེམས། །དེ་དག་བྱང་ཆུབ་མཆོག་སེམས་བསྐྱེད་དུ་གཞུག །དེ་རྣམས་བྱིན་བརླབ་བྱང་ཆུབ་སྨོན་ལམ་གདབ། །ཟབ་ཅིང་རྒྱ་ཆེ་བ་ཡི་ཆོས་བསྒྲགས་ལ། །སྲུང་བ་བྱས་ནས་བརྟུལ་ཞུགས་སྔོ་མ་གནས་པ། །ཞེས་བྱ་བ་ནི་འགྲོ་བ་ལ་ཕན་པའི་ཕྱིར་མྱུར་དུ་བྱང་ཆུབ་ཏུ་འགྱུར་བ་དང༌། བྱང་ཆུབ་མཆོག་ཏུ་སེམས་བསྐྱེད་པ་དང༌། རྡོ་རྗེ་སེམས་དཔར་གྱིས་བྱིན་བརླབ་ཅིང་སྐྱེད་པ་དང༌། སྡིག་པ་བཤགས། རྗེས་སུ་ཡི་རང་བསྐུལ། གསོལ་བ་གདབ། ལམ་བསྒོམ། ཕྱག་འཚལ་བ་ལ་སོགས་པས་སྨོན་ལམ་གདབ་པ་དང༌། ལྷག་པར་གནས་པའི་དུས་སུ་ཟབ་ཅིང་རྒྱ་ཆེ་བའི་ཆོས་བསྒྲགས་ལ། སྲུང་སྐུད་བཏགས་པས་སྲུང་བ་བྱས་ནས་ལྷག་པར་གནས་པ་དང༌། དཀྱིལ་འཁོར་དུ་གཞུག་པའི་དུས་སུ་བརྟུལ་ཞུགས་དང་སྔོམ་པ་ལ་གནས་པ་ཞེས་བྱ་བའི་དོན་ཏོ། །རང་གི་ཁ་ནས་སྔགས་ཟློས་གཞུག་པར་བྱ། །དར་ལ་སོགས་པས་མིག་གཉིས་གཡོགས་ནས་ནི། །རྡོ་རྗེ་འཛིན་མར་དཔལ་གྱི་ལག་གཉིས་སྦྱར། །མེ་ཏོག་རིན་ཆེན་ལ་སོགས་དེ་བརྒྱན་ལ། །གཡོན་གྱིས་ལག་པ་བཀང་སྟེ་གཞུག་པར་བྱ། །ཞེས་བྱ་བ་ནི་སློབ་དཔོན་རང་གི་ཁ་ནས་སྔགས་བརྗོད་ཅིང་སློབ་མ་གཞུག་པར་བྱ་བ་དང༌། དར་དང་རས་དམར་པོས་སྟོད་གཡོགས་དང་སྨད་གཡོགས་བྱས་ཤིང་མིག་གཉིས་གཡོགས་ནས་རྡོ་རྗེ་འཛིན་མར་དཔལ་གྱི་པདྨོར་ལག་པ་གཉིས་བྱས་ལ། མེ་ཏོག་ལ་སོགས་པའི་ཕྲེང་བས་བརྒྱན་ལ་ཡོན་
འབུལ་དུ་གཞུག་པར་བྱའོ་ཞེས་བྱ་བའི་དོན་ཏོ། །གཞུག་པའི་སྔགས་བསྟན་པ་ནི་སྔགས་ནི་འདི་རྣམས་ཡིན་ནོ་ཞེས་བྱ་བ་ནས། ས་མ་ཡེ་ཧཱུཾ་ཞེས་བྱ་བའི་བར་རོ། །དེ་ནས་སྔགས་འདིས་མེ་ཏོག་ལ་སོགས་པ་དོར་བར་བྱའོ་ཞེས་བྱའོ་ཞེས་བྱ་བ་ནས་ས་མ་ཡ་སྟྭཾ་ཞེས་བྱ་བའི་བར་གྱིས་མེ་ཏོག་དང་རིན་པོ་ཆེ་ལ་སོགས་པ་དོར་བ་བསྟན་ཏོ། །དོར་ནས་ཅི་ཞིག་བྱེད་ཅེ་ན། དངོས་གྲུབ་ཏུ་འགྱུར་པ་ནི་ལྷ་བཟུང་ཞིང་བསྒྲུབས་པས་འགྲུབ་པོ་ཞེས། མེ་ཏོག་རིན་ཆེན་ལ་སོགས་པ། །གང་ལ་པ་རིགས་ཀྱི་ལྷ། །གཙོ་བོའི་རིགས་དེ་བསྒྲུབས་ནས་ནི། །དངོས་གྲུབ་འགྱུར་ཏེ་ཐེ་ཚོམ་མེད། །ཅེས་གསུངས་སོ། དེ་ནས་སྔགས་ལ་མཁས་པ་ཡིས། །ཞེས་བྱ་བ་སློབ་དཔོན་གྱིས། སྔགས་འདིས་དམ་ཚིག་སྦྱིན་བར་བྱ། །ཞེས་བྱ་བ་ནི། སྔགས་འདི་བརྗོད་པ་སྔོན་དུ་འགྲོ་བས་སྦྱིན་པར་བྱ་སྟེ། ཨོཾ་ཞེས་བྱ་བ་ནས། ཧཱུཾ་ཞེས་བྱ་བའི་བར་རོ། །དེ་ནས་འདིས་དམ་ཚིག་བསྒྲག་པར་བྱའོ་ཞེས་བྱ་བ་ནས། བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་བྱ་བའི་བར་འདིའི་དོན་ནི། སློབ་དཔོན་གྱི་དམ་ཚིག་བསྒྲག་པར་བྱ་བ་དང༌། འདི་ནི་དམྱལ་པའི་ཆུ་ཡིན་ཏེ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །ཅེས་གསུངས་པ་ནི། ཡང་ཅིས་ཏེ་དམ་ཚིག་འདས་ན་སྔར་ཞུགས་པའི་ཡེ་ཤེས་ཀྱི་སེམས་དཔའ་གཤེགས་ཤིང་ཁྲོས་པས་ཀྱང་རང་གིས་བརྩམས་པ་བུ་དང་ཚ་བོ་ལ་སོགས་པ་བརླག་པར་མཛད་དེ། སྐྱོན་དེ་ལྟར་གནས་པ་དེ་བས་ན། རྟག་ཏུ་ཁྱོད་ཀྱིས་དམ་ཚིག་དང་བླ་མའི་བཀའ་མོས་པས་བསྲུངས་པ་བྱའོ། །བསྲུང་བར་བྱ་བ་དེ་ཉིད་གང་ཡིན་ན་སྲོག་གཅོད་པ་དང༌། མ་བྱིན་པར་ལེན་པ་དང༌། བརྫུན་དང༌། འདོད་པ་ལོག་པར་སྤྱོད་པ་དང༌། ཆང་བཏུང་བ་དང༌། ཤ་ལ་སོགས་པ་བཟའ་བ་སྤང༌། །སེམས་ཅན་གནོད་པར་སྦྱོར་བ་རྣམས་ཀྱང་མི་བྱ། དཀོན་མཆོག་གསུམ་མི་སྤང༌། དུས་ཀུན་དུ་བྱང་ཆུབ་ཀྱི་སེམས་དང༌། སྙིང་པོ་དང༌། སྔགས་དང༌། ཕྱག་རྒྱ་དང༌། ལྷ་དང་བླ་མ་མི་སྤང༌། སྡིག་པའི་ལས་མི་བྱ། བླ་མའི་བཀའ་ལས་མི་འདའ། ལྷ་ལ་ཕུལ་པའི་རྙིང་པ་དང༌། བླ་མའི་གྲིབ་མ་དང༌། ཕྱག་རྒྱའི་གཟུགས་ལ་མི་འགོམ། སྔགས་དང་ལྷ་ལ་མི་སྨད། གཞན་ལ་གནོད་པ་དྲག་པོ་མི་བསྐུལ། མུ་སྟེགས་ཅན་ལ་མི་སྨད། དམ་པའི་
ཆོས་ལ་སོམ་ཉི་དང་ཡིད་གཉིས་མི་བྱ། བདག་གི་དེ་ཉིད་དང་སྔགས་དང་ཕྱག་རྒྱ་ལ་སོགས་པ་ལ་ཡིད་གཉིས་མི་བྱ་བའོ་ཞེས་བྱ་བའི་དོན་ཏོ། །འདིའི་སླར་ཡང་བསྒྲུབ་པའི་རིམ་པ་ནི་འདི་ཡིན་ཏེ། བསླབ་པ་ལྔ་ཡོངས་སུ་གཟུང་བའམ། དགེ་སྦྱོང་ངམ་དགེ་སློང་གི་སྡོམ་པ་ཡོངས་སུ་གཟུང་བ་ལྷག་པར་གནས་པའི་ཆོ་ག་ཇི་ལྟ་བ་བཞིན་དུ་བྱས་པས། སློབ་དཔོན་གྱི་ཞབས་གཉིས་ལ་ཕྱག་བྱས་ཏེ་འདི་སྐད་ཅེས་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་དེ་རིང་བདག་འཚལ་ལོ། །དམ་ཚིག་ཆེན་པོ་དེ་ཉིད་གསོལ། །སྡོམ་པ་རྣམས་ཀྱང་བདག་ལ་གསོལ། །དེ་ནས་ཡོལ་བའི་མཐར་རྡོ་རྗེ་སྲུང་བ་ཡོངས་སུ་བཟླས་པའི་རས་ཤིན་ཏུ་དམར་བས་སྟོད་གཡོགས་སྨད་གཡོགས་བསྐོན་ཞིང༌། སྒོ་སྲུང་བཟླས་པའི་དར་དཀར་གྱི་གདོང་གཡོགས་བཅིངས་ལ་ཕྱག་བྱེད་དུ་གཞུག་གོ །མེ་ཏོག་ཐོགས་པས་ཡང་སློབ་དཔོན་ལ་ཕྱག་བྱས་ལ། སྡིག་པ་བཤགས་པ་དང༌། རྗེས་སུ་ཡི་རང་བ་དང་བསྐུལ་བ་དང༌། གསོལ་བ་གདབ་པ་ཡང་བྱས་ལ་འདི་སྐད་ཅེས་བརྗོད་པར་བྱའོ། །གཙོ་བོ་བདག་ལ་སྡོམ་པ་གསོལ། །ཐུབ་པའི་ཉི་མ་ལུས་པ། །སངས་རྒྱས་བདག་ལ་དགོངས་སུ་གསོལ། །བདག་མིང་འདི་ཞེས་བྱ་བ་ནི། །སློབ་དཔོན་དབང་དུ་གནས་པ་ལ། །སངས་རྒྱས་རོལ་མོ་ལས་བྱུང་བ། །མི་ལྡོག་འཁོར་ལོའི་འབྱོར་པར་ལྡན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་འཇུག་པར་བགྱི། །གསང་བའི་རིགས་མཐོ་ཐམས་ཅད་དུ། །སློབ་དཔོན་བདག་ནི་འཇུག་པར་མཛོད། །མི་ལྡོག་པ་ཡི་དབང་བསྐུར་བ། །སྐལ་བ་ཆེན་པོ་བདག་ལ་གསོལ། །མཚན་རྣམས་ཀུན་གྱིས་རབ་བརྒྱན་ཅིང༌། །དཔེ་བྱད་རྣམས་དང་ཡང་དག་ལྡན། །སངས་རྒྱས་སྐུ་ནི་ཡིད་འོང་བ། །སློབ་དཔོན་ཆེན་པོ་བདག་ལ་སྩོལ། །དབང་བསྐུར་ཆེན་པོ་རྨད་བྱུང་བ། །སེམས་ཅན་ཀུན་གྱི་དོན་བགྱིད་ཕྱིར། །བདག་ནི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་སློབ་དཔོན་གྱིས་རིགས་ལ་གསོལ་བ་གདབ་སྟེ། ཆེ་གེ་ཞེས་བྱ་འདི་ཉིད་ནི། །བྱང་ཆུབ་སེམས་ནི་ཡོངས་འཛིན་པ། །དམ་ཚིག་མཆོག་དང་གསང་བ་
ཡི། །འཁོར་ལོ་འདིར་ཡང་འཇུག་པར་འཚལ། །དེ་ནས་སློབ་དཔོན་གྱིས་འདི་སྐད་བརྗོད་པར་བྱའོ། །གསང་བ་ཆེན་པོའི་རིགས་དག་པ། །གསང་བ་ཆེན་པོ་འཛིན་པར་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱ། །དེ་ནས། ཇི་ལྟར་དུས་གསུམ་མགོན་པོ་རྣམས། །ཞེས་བྱ་བ་ནས། སེམས་ཅན་མྱ་ངན་འདས་ལ་དགོད། །ཅེས་བྱ་བའི་བར་དུ་བརྗོད་པར་བྱའོ། །ཡང་ཨོཾ་སརྦ་ཡོ་ག་ཙིཏྟ་ཨུ་ཏྤཱ་ད་ཡཱ་མི་ཞེས་བྱ་བས་བྱང་ཆུབ་ཏུ་སེམས་བསྐྱེད་ནས། སྙིང་གར་རྡོ་རྗེ་བཞག་ནས། སུ་ར་རེ་ས་མ་ཡ་སྟཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་བཛྲ་སཏྭ། ཞེས་ཟློས་ཤིང་རྡོ་རྗེ་སེམས་དཔའི་དམ་ཚིག་གི་ཕྱག་རྒྱས། རྡོ་རྗེ་སེམས་དཔར་བྱིན་གྱིས་བརླབས་ལ། རིགས་ཀྱི་དམ་ཚིག་གི་ཕྱག་རྒྱ་བཞིས་སྙིང་ག་ལ་སོགས་པ་བཞིར་བྱིན་གྱིས་བརླབས་ལ། དྲི་དང་མེ་ཏོག་ལ་སོགས་པས་མཆོད་ལ་ཡོན་གྱི་མཆོག་ཕུལ་ཏེ། ཕྱི་རོལ་ན་གནས་པའི་བུམ་པས་དབང་བསྐུར་ལ། ས་མ་ཡ་སྟཾ་ཞེས་བྱ་བས་རྡོ་རྗེ་འཛིན་མ་དཔལ་གྱི་ལག་པ་གཉིས་སུ་ཤེས་པར་བྱ་སྟེ། མེ་ཏོག་གི་ཕྲེང་བ་ཐོགས་ལ། ཨོཾ་བཛྲ་ཨ་དྷི་ཏིཥྛ་ཧཱུཾ། ཨོཾ་བཛྲ་ས་མ་ཡ་ཧཱུཾ། ཨོཾ་བཛྲ་པྲ་བེ་ཤ་བཛྲ་ཧཱུཾ། ཨ་ས་མེ་ཏྲི་ས་མེ་མ་ཧཱ་ས་མ་ཡེ་ཧཱུཾ་ཞེས་བྱ་བ་འདིས་གཞུག་པར་བྱའོ། །དེ་ནས་སྒོ་དབྱེ་བའི་ཕྱག་རྒྱས་སྙིང་གར་ཕྱེ་ལ། རང་གི་སྙིང་ག་ན་གནས་པའི་རྡོ་རྗེའི་དབུས་ན་ཡི་གེ་ཨ་རྡོ་རྗེ་དམར་པོའི་འོད་ཟེར་གྱི་ཕྲེང་བ་དང་ལྡན་པར་བསམས་ནས། སློབ་མའི་སྙིང་ག་ན་གནས་པའི་རྡོ་རྗེའི་དབུས་སུ་བློས་བཅུག་ལ་ལུས་ཐམས་ཅད་གང་བར་བསམས་ཤིང༌། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག་ཅེས་སྨྲས་གཞུག་གོ །དེ་ནས་སེམས་མ་རྡོ་རྗེ་འཛིན་མའི་ཕྱག་རྒྱ་བཅིངས་ལ། འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་འདི། །ད་ལྟ་ཉིད་དུ་འབབ་པར་ཤོག །ཅེས་བརྗོད་དུ་བཅུག་ལ། བཛྲ་ཨ་བེ་ཤ་ཨ་ཨ་ཨ་ཨ་ཨཱ། ལན་བརྒྱའི་བར་དུ་བཟླས་ཤིང་དབབ་པར་བྱའོ། །དེ་ནས་སྣང་བ་དྲི་བར་བྱའོ། །མེ་ཏོག་གི་ཕྲེང་བ་ཧཱུཾ་པྲ་ཏཱི་ཙྪ་བཛྲ་ཧཱུཾ་ཞེས་བྱ་བས་དོར། ཡང་ན། སངས་རྒྱས་དངོས་གྲུབ་ཐོབ་བྱའི་ཕྱིར། །ཞེས་བྱ་བ་ལ་སོགས་པ་སྨོས་པས་དོར་རོ། །དེ་ནས་མགོ་ལ་བཅིང་བ་ནི། །ཨོཾ་པྲ་ཏི་གྲྀཧྞ་སྭ་མི་མཾ། སཏྭ་
མ་ཧཱ་བ་ལ་ཞེས་བྱའོ། །དམ་ཚིག་བསྒྲག་པར་བྱ་སྟེ། འདི་ནི་ཁྱོད་ཀྱི་དམྱལ་བའི་ཆུ། །ཞེས་བྱ་བ་ནས། བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་བྱ་བ་བརྗོད་དོ། །དེ་ནས་ཨོཾ་བཛྲ་ཧཱ་སྤྱོད་གྷ་ཊ་ཡ་ཧཱུཾ་ཞེས་བྱ་བས་གདོང་གཡོགས་དགྲོལ། ཨོཾ་བཛྲ་པཱ་ཤྱ་ཧཱུཾ་ཞེས་བྱ་བས་དཀྱིལ་འཁོར་བསྟན། ཏིཥྛ་བཛྲ་ཞེས་བྱ་བ་ལ་སོགས་པས་འཇུག་པའི་ཕྱག་རྒྱ་སྙིང་གར་དགྲོལ་ལོ། །དེ་ལྟར་སློབ་མ་དཀྱིལ་འཁོར་དུ་གཞུག་པ་བཤད་ནས། དབང་བསྐུར་བར་བྱ་བའི་ཕྱིར་མོས་པ་བརྟན་པ་དང་ལྡན་པས་དམ་བཅའ་ཞིང༌། སརྦ་བིད་ཀྱིས་ཇི་ལྟར་དབང་བསྐུར་ཏེ། །བུམ་པ་ལ་སོགས་ཇི་སྙེད་མང་ཐོགས་པས། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །དེ་ནས་ལག་ཏུ་དྲིལ་བུ་རྡོ་རྗེ་སྦྱིན། །འཁོར་ལོ་ལ་སོགས་རིན་ཆེན་བདུན་ཐོགས་ལ། །མི་དབང་དབང་ཕྱུག་འཁོར་ལོ་ཐོགས་པ་དང༌། །སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་བྱ་བ་ནི་སྡོམ་པ་འཛིན་པས་མོས་པ་བརྟན་པ་དང་ལྡན་པར་དམ་བཅས་ནས། ཨོཾ་སརྦ་བིད་ཨ་བྷི་ཥིཉྩ་ཞེས་བརྗོད་ཅིང༌། ཇི་ལྟར་གསུངས་པའི་བུམ་པས་དབང་བསྐུར་ཞིང༌། གཞན་ཡང་དབུ་རྒྱན་དང་དར་དཔྱངས་ལ་སོགས་པའི་ཕྲེང་བ་དང༌། ཕྱག་རྒྱ་དང༌། རྡོ་རྗེ་དང༌། ལས་ཀྱི་རྡོ་རྗེ་དང༌། འཁོར་ལོ་དང། ཐབས་ཤེས་རབ་གཉིས་སུ་མེད་པ་གསང་བ་དང་ཤེས་རབ་ཡེ་ཤེས་རྣམས་ཀྱིས་དབང་བསྐུར་བ་ཇི་སྙེད་ཐོགས་པས། བཅུ་པོ་རྣམས་ཀྱིས་དབང་བཅུ་ཅི་དགར་བསྐུར་རོ། །དེ་ནས་ལག་པ་གཡོན་དུ་དྲིལ་བུ་གཡས་སུ་རྡོ་རྗེ་བྱང་ཆུབ་སེམས་དཔའ་དང་སྟོང་པ་ཉིད་དུ་བརྟགས་ལ་སྦྱིན། འཁོར་ལོ་རིན་པོ་ཆེ་ལ་སོགས་པ་རིན་པོ་ཆེ་སྣ་བདུན་ཐོགས་ལ། ཨོཾ་བཛྲ་རཏྣ་ཨ་བྷི་ཥིཉྩ་ཞེས་བརྗོད་ཅིང་དབང་བསྐུར་བར་བྱའོ། །དེའི་ཕན་ཡོན་ནི། མི་དབང་དབང་ཕྱུག་འཁོར་ལོ་སྟེ། །འཁོར་ལོས་སྒྱུར་བའི་རྒྱལ་པོ་འཐོབ་པར་བྱ་བའི་ཕྱིར་དང༌། འདིས་ནི་རིན་པོ་ཆེ་སྣ་བདུན་གྱི་འབྲས་བུ་བསྟན་ཏོ། །ཐམས་ཅད་ཀྱི་ཐུན་མོང་གི་འབྲས་བུ་ནི། སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་བྱའོ། །དེ་ནས་བཀའི་དབང་བསྐུར་བ་དང༌། ལས་ཀྱི་དབང་བསྐུར་བ་ཡང་སྦྱིན་ཏེ་ཕྱིས་བཤད་པར་བྱའོ། །དེ་ལྟར་ན་དབང་ཉི་ཤུ་རྩ་གཅིག་ཏུ་འགྱུར་རོ། །ཅིའི་ཕྱིར་ཇི་ལྟ་བུ་ཞིག་ཅེ་ན། འཁྲུད་པར་བྱེད་པས་བརྟན་
པར་བྱེད་པའི་བདག་ཉིད་ཀྱི་ངོ་བོ་དང་ཕྱིར་མི་ལྡོག་པའི་ས་བོན་ལ་བྱའོ། །སྔགས་བསྒྲུབ་ཕྱིར་དུ་མོས་ལྡན་སློབ་མ་ལ། །སྔགས་པས་བཀའ་ནི་རབ་ཏུ་བགྲོ་བར་བྱ། །ཞེས་བྱ་བ་ནས་བརྩམས་ཏེ། བརྩེར་ལྡན་དངོས་གྲུབ་མྱུར་དུ་འགྲུབ། །ཅེས་བྱ་བའི་བར་གྱིས་སྔགས་བསྒྲུབ་པའི་ཕྱིར་སློབ་དཔོན་གྱིས་བཀའ་རབ་ཏུ་བསྒོ་ཞིང༌། སློབ་མས་བླ་མ་ལ་ཡོན་ཕུལ་ཏེ་དམ་ཚིག་སྦྱིན་པ་བསྟན་ཏེ་གོ་སླ་བའི་ཕྱིར་མ་བཤད་དོ། །སླར་ཡང་འདི་དག་གི་དོན་བཤད་པར་བྱ་སྟེ། ཤར་ཕྱོགས་ཀྱི་སྒོ་དང་ཉེ་བར་པདྨ་དཀར་པོ་ལ་གནས་པའི་འཁོར་ལོ་རྩིབས་བརྒྱད་པ་ལེགས་པར་བྲིས་ལ། དེ་ལ་སློབ་མ་རང་གིས་ལྷར་བསྐྱེད་ནས། དྲི་དང༌། བདུག་པ་དང༌། མེ་ཏོག་དང༌། ལྷ་བཤོས་དང༌། མར་མེས་ཡང་དག་པར་མཆོད་དེ། བཀྲ་ཤིས་ཀྱི་ཚིགས་སུ་བཅད་པ་འདོན་ཅིང༌། རྣམ་པར་རྒྱལ་བའི་བུམ་པ་ལས་རྡོ་རྗེ་ཁུ་ཚུར་གྱིས་ཆུ་བླངས་ལ། ཨོཾ་སརྦ་བིད་ཨ་བྷི་ཥིཉྩ་མཾ། ཞེས་བྱ་བའི་སྔགས་འདིས། སྤྱི་བོ་ནས་དབང་བསྐུར་བར་བྱའོ། །དེ་ནས་རྡོ་རྗེ་འཛིན་པའི་བུམ་པ་དང༌། ཤར་ཕྱོགས་ཀྱི་ངན་སོང་སྦྱོང་བའི་བུམ་པས་དབང་བསྐུར་ཞིང༌། ཨོཾ་བཛྲ་ཀ་ལ་ཤ་ཨ་བྷི་ཥིཉྩ་ཧཱུཾ་ཞེས་བྱ་བ་དང༌། གཙོ་བོའི་བུམ་པས་དབང་བསྐུར་ཞིང༌། བུདྡྷ་ཀ་ལ་ཤ་ཨ་བྷི་ཥིཉྩ་ཨོཾ་ཞེས་བྱ་བ་དང༌། རིན་ཆེན་ཏོག་གི་བུམ་པ་དང༌། ཨོཾ་རཏྣ་ཀ་ལ་ཤ་ཨ་བྷི་ཥིཉྩ་ཏྲཱཾ་ཞེས་བྱ་བ་དང༌། ཤཱཀྱའི་དབང་པོའི་བུམ་པ་དང༌། ཨོཾ་པདྨ་ཀ་ལ་ཤ་ཨ་བྷི་ཥིཉྩ་ཧྲཱིཿཞེས་བྱ་བ་དང༌། མེ་ཏོག་ཆེར་རྒྱས་ཀྱི་བུམ་པ་དང༌། ཨོཾ་ཀརྨ་ཀ་ལ་ཤ་ཨ་བྷི་ཥིཉྩ་ཨཿཞེས་བྱ་བས་དབང་བསྐུར་བར་བྱའོ། །དེ་ནས་རིན་པོ་ཆེ་ལ་སོགས་པའི་རྒྱུ་ལས་བྱས་པའི་དབུ་རྒྱན་དང་དེ་བཞིན་གཤེགས་པའི་རིགས་སམ་བདེ་བར་གཤེགས་པའི་སྐུ་གཙོ་བོ་ཡིན་ན་རིན་པོ་ཆེའི་མྱུ་གུ། ཨོཾ་བཛྲ་ཨ་བྷི་ཥིཉྩ་ཧཱུཾ། བུདྡྷ་ཨོཾ། རཏྣ་ཏྲཱཾ། པདྨ་ཧྲིཿ། ཀརྨ་ཨཿཞེས་བྱས་པས། ཨོཾ་དང་ཨ་བྷི་ཥིཉྩ་བརྗོད་པས་དབང་བསྐུར་བར་བྱའོ། །དེ་ནས་རིན་པོ་ཆེ་ལ་སོགས་པའི་ཕྲེང་བས་དབང་བསྐུར་བ། ཨོཾ་རཏྣ་མཱ་ལེ་ཨ་བྷི་ཥིཉྩ་ཏྲཾ་ཏྲཾ་ཏྲཾ་ཏྲཾ། ཨོཾ་ཕཊ་བཱ་ལཾ་པ་ན་ཨ་བྷི་ཥིཉྩ་ཏྲཾ་ཞེས་བརྗོད་པར་བྱའོ། །དེ་ནས་རང་གི་དམ་ཚིག་གི་ཕྱག་རྒྱ་བཅིངས་ལ། ཨོཾ་བུདྡྷ་མུ་དྲ་ཨ་བྷི་ཥིཉྩ་ཨོཾ། དབུས་སུའོ། །ཨོཾ་བཛྲ་མུ་དྲ་ཨ་བྷི་ཥིཉྩ་ཧཱུཾ་ཤར་དུའོ། །ལྷོ་ནུབ་བྱང་རྣམས་སུ་ཏྲཱཾ་ཧྲཱིཿ་ཨཿགྮན་འགྲེ། ཕྱག་རྒྱའི་དབང་
བསྐུར་བའོ། །དེ་ནས་དང་པོའི་རྡོ་རྗེ་བཅིངས་ལ། ཨོཾ་བཛྲ་ནཱ་མ་ཨ་བྷི་ཥིཉྩ་ཧཱུཾ། ཨོཾ་ཏྲཾ་ཧྲི་ཨཿཞེས་བྱ་བ་བརྗོད་དེ། ཡེ་ཤེས་ཀྱི་རྡོ་རྗེའི་དབང་བསྐུར་བའོ། །ལས་ཀྱི་རྡོ་རྗེ་སྣ་ཚོགས་ལག་ཏུ་བྱིན་ལ། ཨོཾ་ཀརྨ་བཛྲ་ཨ་བྷི་ཥིཉྩ་ཨཿཞེས་བྱ་བས་ལས་ཀྱི་རྡོ་རྗེའི་དབང་བསྐུར་རོ། །ཆོས་ཀྱི་འཁོར་ལོ་རྐང་བའི་བར་དུ་བཅུག་ལ། ཨོཾ་བཛྲ་ཙཀྲ་ཨ་བྷི་ཥིཉྩ་ཧཱུཾ་བྷྲཱུཾ། ཨོཾ་ཙཀྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་ཨོཾ་ཧཱུཾ་ཏྲཾ་ཧྲི་ཨཿཞེས་གསུམ་དུ་རིགས་ཀྱི་དབྱེ་བས་བརྗོད་པར་བྱའོ། །འཁོར་ལོས་དབང་བསྐུར་བའོ། །དེ་ནས་རྡོ་རྗེ་དྲིལ་བུ་གཉིས་འཁྱུད་པའི་ཚུལ་དུ་བཟུང་ལ། ཨོཾ་བཛྲ་དྷ་ར་ན་ཨ་བྷི་ཥིཉྩ་ཧཱུཾ། རིན་པོ་ཆེའི་དྲིལ་བུ་རིན་ཆེན་རྡོ་རྗེ་དང་འཁྱུད་པ། ཨོཾ་རཏྣ་དྷ་ར་ན་ཨ་བྷི་ཥིཉྩ་ཏྲཾ། པདྨོའི་རྡོ་རྗེ་དྲིལ་བུ་དང༌། པདྨ་དྷ་ར་ན་ཨ་བྷི་ཥིཉྩ་ཧྲི། སྣ་ཚོགས་རྡོ་རྗེ་དྲིལ་བུ་དང༌། ཀརྨ་དྷ་ར་ན་ཨ་བྷི་ཥིཉྩ་ཨཿ། དེ་བཞིན་གཤེགས་པའི་རྡོ་རྗེའི་དྲིལ་བུ་དང༌། ཨོཾ་སརྦ་ཏ་ཐཱ་ག་ཏ་རཏྣ་ཨ་བྷི་ཥིཉྩ་ཨོཾ་ཞེས་བྱ་བ་རིགས་ཐ་དད་པའི་སྒོ་ནས་ཐབས་དང་ཤེས་རབ་གཉིས་སུ་མེད་པར་དབང་བསྐུར་བར་བྱའོ། །དེ་ནས་ཨོཾ་སརྦ་ཏ་ཐཱ་ག་ཏ་གུ་དྱ་ཨ་བྷི་ཥིཉྩ་ཨོཾ་ཞེས་བརྗོད་དེ་སྐུའི་གསང་བ། ཨོཾ་བཛྲ་གུ་ཧྱ་ཨ་བྷི་ཥིཉྩ་ཧཱུཾ་ཞེས་བརྗོད་དེ་ཐུགས་ཀྱི་གསང་བ། ཨོཾ་རཏྣ་གུ་ཧྱ་ཨ་བྷི་ཥིཉྩ་ཏྲཾ་ཞེས་བརྗོད་དེ། ཡོན་ཏན་གྱི་གསང་བ། ཨོཾ་པདྨ་གུ་ཧྱ་ཨ་བྷི་ཥིཉྩ་ཧྲི་ཞེས་བརྗོད་དེ། གསུང་གི་གསང་བ། ཨོཾ་ཀརྨ་གུ་ཧྱ་ཨ་བྷི་ཥིཉྩ་ཨ་ཨ་ཨ་ཞེས་བརྗོད་དེ། ཕྲིན་ལས་ཀྱི་གསང་བའོ། །གསང་བའི་དབང་བསྐུར་བ་སྦྱིན་པའོ། །དེ་ནས་ཆོས་ཐམས་ཅད་ནི་སྐྱེ་བ་མེད་པ་ཉིད་བསྟན་ཅིང༌། ཨོཾ་བཛྙཱ་ས་མ་ཡ་ཨ་བྷི་ཥིཉྩ་ཧཱུཾ་ཨ། ཞེས་བྱ་བས་ཤེས་རབ་ཡེ་ཤེས་ཀྱི་དབང་བསྐུར་བར་བྱའོ། །དེ་ནས་རས་སམ་གྲོ་ག་ལ་སོགས་པ་ལ། འཁོར་ལོ་རིན་པོ་ཆེ་ལ་སོགས་པ་བདུན་བྲིས་ལ། ཨོཾ་རཏྣ་ཨ་བྷི་ཥིཉྩ་ཞེས་དབང་བསྐུར་རོ། །དེ་ནས་ལག་པ་གཡས་པར་རྡོ་རྗེ་བྱིན་ལ། སངས་རྒྱས་རྣམས་ཀྱི་རྡོ་རྗེའི་དབང༌། །དི་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང༌། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་ཏི་ཥྛ་བཛྲ་ས་མ་ཡ་སྟྭཾ་ཞེས་བྱ་བས་སྦྱིན་པར་བྱའོ། །ཨཿཞེས་བྱ་བས་དྲིལ་བུ་བསྐྱེད་ལ་སྦྱིན་པར་བྱའོ། །དེ་ན་གདེངས་ཀའི་དབང་བསྐུར་བར་བྱའོ། །ཨོཾ་སརྦ་ཏ་ཐཱ་ག་ཏ་ཨཱ་ཛྙཱ་
ཏེ་དཱ་སི་མི་གྲྀ་ཧྞ་བཛྲ་སུ་སིདྡྷ་ཡེ། ཨོཾ་བཛྲ་ཏི་ཥྛ་ཧཱུཾ། རྗེས་སུ་གནང་བའོ། །ཡང་ལག་ཏུ་རྡོ་རྗེ་བྱིན་ལ། ལས་ཀྱི་དབང་བསྐུར་བར་བྱ་སྟེ། ཨོཾ་སརྦ་ཀརྨ་ཎི་ཀུ་རུ་བུདྡྷ་ནཱ་མ་ཧཱུཾ་ཞེས་བརྗོད་དེ་བརྟུལ་ཞུགས་སྦྱིན་ནོ། །དེ་ལྟར་དབང་ཉི་ཤུ་རྩ་གཅིག་བྱིན་ནས་སློབ་དཔོན་དུ་འགྱུར་རོ། །དེ་ནས་སློབ་དཔོན་དང་སློབ་མས་དཀྱིལ་འཁོར་གྱི་ལྷ་རྣམས་མཆོད་དེ་སློབ་མ་རྣམས་ཡོ་བྱད་ཀྱིས་ཚིམ་པར་བྱས་ནས་བསྟོད་ཅིང་མཆོད་ལ་དགེ་བའི་རྩ་བ་བསྔོ་སྟེ། དམ་ཚིག་གི་ཕྱག་རྒྱ་བཀྲོལ་ནས་གཤེགས་སུ་གསོལ་ཏེ། མཎྜལ་ཕྱགས་ནས། ཆུ་བོ་ཆེན་པོར་དོར་ནས་བསྐོར་བ་བྱ། སྤྲུལ་པའི་ཚོགས་ལུས་ལ་བསྡུ་ཞིང་ཅི་བདེར་གནས་པར་བྱའོ། །དཀྱིལ་འཁོར་ཐམས་ཅད་དུ་འཇུག་པའི་ཆོ་གའོ། །དེ་ལྟར་དབང་དང་དམ་ཚིག་ཐོབ་པ་རྣམས་ལ་དངོས་གྲུབ་ལ་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་སྟོན་ཏོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །བཅོམ་ལྡན་འདས་ཀྱིས་གསུངས་སོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། ལྷ་རྣམས་ཀྱི་དབང་པོ་བརྒྱ་བྱིན་གྱིས། ལྷའི་འཇིག་རྟེན་དང་བཅས་པ་རྣམས་ཀྱི་དོན་དང༌། ཕན་པ་དང༌། བདེ་བའི་ཕྱིར་ཞེས་བྱའོ། །གང་ཞིག་གསུངས་ཤེ་ན། སྒྲུབ་པའི་ཆོ་ག་འདི་ཞེས་བྱ་བ་སྨོས་ཏེ་འདི་སྒྲུབ་པས་ན་བསྒྲུབ་པ་སྟེ། བྱེད་པའམ་རྒྱུའི་ཆོ་ག་ཞེས་བྱ་བའོ། །རས་ལ་ཞེས་བྱ་བ་ལ་སོགས་པ་ལ། རས་ཁ་ཚར་བཟང་པོ་རིན་ལ་རྩེགས་པ་མེད་པར་ཉོས་ལ། སྦྱིན་མེད་པའི་ཚོན་རྩི་རྣམས་ཀྱིས་བཅོམ་ལྡན་འདས་ཀུན་རིག་སྔར་བཤད་པ་བཞིན་དུ་སེང་གེའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ། ཟླ་བ་ལྟར་དཀར་བ་ཞལ་བཞི་པ་ཏིང་ངེ་འཛིན་གྱི་ཕྱག་རྒྱ་དང་ལྡན་པ། རྒྱན་རྣམ་པ་སྣ་ཚོགས་ཀྱིས་བརྒྱན་པ་བྲི་བར་བྱའོ། །གཡས་ཕྱོགས་སུ་ངན་སོང་སྦྱོང་བ་རྒྱན་ཀུན་གྱིས་བརྒྱན་པ་བ་མོའི་མདོག་ལྟ་བུ་ཏིང་ངེ་འཛིན་གྱི་ཕྱག་རྒྱ་ཅན་བྲི་བར་བྱའོ། །གཡོན་ཕྱོགས་སུ་ཤཱཀྱ་ཐུབ་པ་མདོག་དམར་པོ་ཆོས་ཀྱི་འཁོར་ལོའི་ཕྱག་རྒྱ་ཅན་བྲི་བར་བྱའོ། །ངན་སོང་སྦྱོང་བའི་འོག་ཏུ་སྤྱན་རས་གཟིགས་དབང་ཕྱུག་མདོག་ཟླ་བ་ལྟ་བུ་ཕྱག་གཡོན་ན་པདྨ་བསྣམ་པ་ཕྱག་གཡས་པ་པདྨ་ཁ་འབྱེད་པ་བྲི་བར་བྱའོ། །ཤཱཀྱ་ཐུབ་པའི་འོག་ཏུ་ཕྱག་ན་རྡོ་རྗེ་མདོག་ནམ་མཁའ་ལྟ་བུ་གཡས་ན་རྡོ་རྗེ་བསྣམས་ཤིང་ཐུགས་ཀར་
འཇོག་ལ་གཡོན་བསྙེམས་པའོ། །དེ་གཉིས་ཀྱི་བར་དུ་སྨན་གྱི་ལྷ་མདོག་སྔོན་པོ་ཕྱག་གཡོན་ན་འབྲས་བུ་ཨ་རུ་ར་བསྣམས་པ་གཡས་མཆོག་སྦྱིན་ཅན་ནོ། །རྟ་མགྲིན་དང་ཁམས་གསུམ་རྣམ་རྒྱལ་གཉིས་མདོག་དམར་པོ་དང་སྔོན་པོ་རང་གི་ལྷ་ལ་བརྟེན་པར་བྲི། དེ་གཉིས་ཀྱི་བར་དུ། ལོ་ཙ་ན་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་རྣམས་རང་གི་སྤྱན་ལ་སོགས་པ་ལག་ཏུ་ཐོགས་པ་བྲི། དེ་བཞིན་གཤེགས་པ་ནི་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །ལྷ་མོ་ནི་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེ་དག་གི་འོག་པདྨའི་རྫིང་བུ་དང། དེའི་ནང་ན་ཆུ་སྲིན་དང༌། ཉ་དང༌། རུས་སྦལ་དང༌། སྦལ་པ་དཀར་པོ་དང༌། ཉ་འཁར་བ་དང༌། དུང་དང༌། པིར་དང༌། སྲོག་ཆགས་དུ་མ་ཡོད་པ་དང༌། དེ་ནས་ཆུ་ལས་སྐྱེས་པའི་མེ་ཏོག་དུ་མ་ཡོད་པ་དང་བཅས་པ་བྲི་བར་བྱའོ། །བདུག་པ་དང༌། མར་མེ་དང༌། དྲི་དང༌། ཕྲེང་བ་དང༌། གོས་དང༌། མེ་ཏོག་དང༌། འབྲས་བུ་སྣ་ཚོགས་པ་བྲི། དེའི་འོག་ཏུ་སྒྲུབ་པ་པོ་ཉིད་ཐལ་མོ་སྦྱར་ཏེ་ཕྱག་འཚལ་བའི་ཚུལ་གྱིས་འདུག་པ་བྲི། དེ་ནས་རི་མོའི་གཟུགས་དེ་བསྙེན་པ་དང་བཅས་པས་མངོན་པར་མཆོད་དེ། སྒྲུབ་པ་པོ་བདག་ཉིད་ཀྱིས་རབ་ཏུ་གནས་པར་བྱ་ཞིང་མངའ་ཕུལ། སྤྱན་དབྱེ་བར་བྱ་སྟེ་འདི་ནི་འདི་ཉིད་ཀྱི་ཆོ་ག་ལས་ཤེས་པར་བྱའོ། །བདེན་པས་བྱིན་གྱིས་བརླབ་པ་དམིགས་པར་བྱའོ་ཞེས་བྱ་བ་ནི་བདེན་པ་སྟེ་སྤྱན་དབྱེ་བའོ། །བྱིན་གྱིས་བརླབ་པར་དམིགས་པ་སྟེ་མཚན་མ་ལའོ། །དེ་ནས་ཅི་སྟེ་མཚན་མ་ཞིག་མཐོང་ན་ནི་མྱུར་དུ་དངོས་གྲུབ་ཐོང་འགྱུར་རོ། །འོན་ཏེ་མ་མཐོང་ན་ནི་རིང་མོ་ཞིག་ནས་དངོས་གྲུབ་ཏུ་འགྱུར་ཞེས་བྱ་བ་ནི་མཚན་མ་ལས་སྐལ་བ་དང་ལྡན་པ་དང་མི་ལྡན་པའི་ལས་སོ། །མཚན་མ་གང་ཞིག་ཡིན་ཞེ་ན། བཞད་པ་དང་ནི་རྔ་སྒྲ་དང༌། །དྲིལ་བུའི་སྒྲ་དང་འབྲུག་སྒྲ་དང༌། །ཞེས་བྱ་བ་མཆོག་གི་མཚན་མ་དང༌། དེ་བཞིན་དགེ་སློང་བྲམ་ཞེ་དང༌། །ཞེས་བྱ་བའི་འབྲིང་གི་མཚན་མ་དང༌། འབྲས་བུ་མཐོང་ན་ཞེས་བྱ་བ་མཚན་མ་ཐ་མ་ལས་གོ་རིམས་བཞིན་དུ་མྱུར་དུ་མཆོག་དང་བར་དང་ཐ་མར་འགྲུབ་ཅེས་བྱའོ། །དེ་ནས་གཟུགས་དེ་ཞེས་བྱ་བ་ལ་སོགས་པས་བསྙེན་པ་དང་སྒྲུབ་པ་དང་དངོས་གྲུབ་སྟོན་ཏེ། གཟུགས་བྱིན་གྱིས་བརླབས་ཏེ་ཞེས་བྱ་བ་ནི། ཡེ་ཤེས་སེམས་དཔའ་བཅུག་པས་སོ། །
སྔགས་དང་ཕྱག་རྒྱས་བྱིན་གྱིས་བརླབས་ཏེ་དབང་བསྐུར་ནས་ཞེས་པའི་དོན་ཏོ། །ཅི་བདོག་པ་ཡིས་མཆོད་པར་བྱ། །རྟག་ཏུ་མངོན་སུམ་འདུག་ནས་ཀྱང༌། །ཞེས་བྱ་བ་ནི་མཆོད་བ་སྣ་ཚོགས་ཀྱིས་མཆོད་ཅིང༌། རྣལ་འབྱོར་གྱིས་དུས་སུ་རྒྱུན་མི་འཆད་པར་སྤྱན་སྔར་འདུག་ཅེས་སྟོན་ཏོ། །འཇིག་རྟེན་གསུམ་ལས་རྣམ་རྒྱལ་གྱིས། །བདག་སྲུང་ལ་སོགས་བྱས་ནས་ཀྱང༌། །བདག་གི་དེ་ཉིད་དྲན་བྱེད་ཅིང༌། །ཞེས་བྱ་བ་ནི་ཧཱུཾ་བཞིའི་སྔགས་ཀྱིས་བདག་སྲུང་བ་དང༌། ཁྲུས་ཀྱི་ཆོ་ག་སྔོན་དུ་འགྲོ་བས། དཀྱིལ་འཁོར་ལུས་ལ་བརྟགས་པའི་མཐར་ཐུག་པ་བྱས་ལ་འབུམ་ཕྲག་གསུམ་མམ་ཡང་ན་དྲུག ། དངོས་གྲུབ་མཚན་མ་མ་བྱུང་བར་དུ་བཟླས་པར་བྱའོ། །དེ་ནས་དབེན་པའི་གནས་སུ་ནི། །བརྒྱད་བརྒྱ་ཉིད་དུ་ཚང་བར་བྱ། །སྔགས་ནི་འཁྲལ་འཁྲུལ་མེད་པར་བཟླས། །ཞེས་བྱ་བ་ནི། གནས་དབེན་པར་སྔ་མ་ཉིད་ཀྱི་ཆོགས་བརྒྱད་བརྒྱར་སྔགས་གུག་སྐྱེད་དང༌། ཚེག་བར་ལ་སོགས་པ་ཆད་ལྷག་མེད་བར་བཟླས་ཞེས་བྱ་བའི་དོན་ཏོ། །དེ་ལྟར་བསྙེན་པ་བསྟན་ནས། དེ་ནས་བཟླས་པའི་མཇུག་ཏུ་ནི། །དཀྱིལ་འཁོར་སྔ་མ་བཞིན་བསམས་ལ། །མཆོད་པ་རྒྱ་ཆེར་བྱས་ནས་ཀྱང༌། །མཚན་གཅིག་ཐོག་ཐབ་བཟླས་པ་བྱ། །ཞེས་བྱ་བས་སྒྲུབ་པ་བསྟན་ཏེ། བཟླས་པ་རྫོགས་པའི་མཇུག་ཏུ་དཀྱིལ་འཁོར་སྔ་མ་བཞིན་དུ་བསམས་ལ། ཏིང་ངེ་འཛིན་གསུམ་དང་ལྡན་པས་མཚན་ཐོག་ཐག་བཟླས་བརྗོད་བྱས་ནས་འབྲས་བུ་བསྟན་པ་སྟེ། ཅི་སྟེ་གཙོ་བོའམ་དེ་ཡི་སྲས། །ཞེས་བྱ་བ་ལ་སོགས་པས་སྟོན་ཏོ། །ཅི་སྟེ་གཙོ་བོ་དང་བྱང་ཆུབ་སེམས་དཔའ་དང་འཇིག་རྟེན་པ་མཐོང་བ་ལས་དངོས་གྲུབ་རབ་འབྲིང་གསོལ་བ་གདབ་པར་བྱ་སྟེ། ཕྱག་འཚལ་ནས་དངོས་གྲུབ་བླང་བར་བྱའོ། །གལ་ཏེ་འབྲིང་ངམ་ཐ་མའི་དངོས་གྲུབ་མིག་སྨན་ལ་སོགས་པ་ཡིན་ན་བླ་མ་དང་དཀོན་མཆོག་ལ་སྐལ་བ་རེ་རེ་ཕུལ་ནས་ལྷག་མ་བདག་སྤྱད། དབུལ་བའི་ཞིང་མེད་ན་བདག་ཉིད་ཀྱིས་སྤྱད། མཆོག་གི་དངོས་གྲུབ་ཡིན་ན། སེམས་ཅན་ལ་ཕན་པར་བརྩོན་པར་བསྐལ་པ་དུ་མར་གནས་པར་འགྱུར་རོ། །ཅི་སྟེ་དངོས་གྲུབ་འཐོབ་ན་ལས་ཐམས་ཅད་འགྲུབ་པར་གྱུར་ཏེ། གནོད་སྦྱིན་རྒྱུ་སྐར་གདོན་ལ་སོགས་པ་ཚིག་ཙམ་གྱིས་བྲན་བཞིན་དུ་ཞི་བ་ལ་སོགས་པའི་ལས་བྱེད་པར་འགྱུར་རོ་ཞེས་བྱ་བའི་དོན་ཏོ། །སྡིག་པ་ཆེན་པོ་
བྱས་པས་སེམས་ཅན་དམྱལ་བ་ལ་སོགས་པའི་དབང་དུ་གྱུར་པ་ཐབས་སླ་བས་གྲོལ་བ་བསྟན་པའི་ཕྱིར། དེ་ནས་ཞེས་པ་ལ་སོགས་པས་བསྟན་ཏོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྡིག་པ་བགྱིས་པས་སེམས་ཅན་དམྱལ་བ་ལ་སོགས་པའི་དབང་དུ་གྱུར་པ་རྣམས་ཇི་ལྟར་ན་དམྱལ་བ་ལ་སོགས་པའི་སྡུག་བསྔལ་བའི་སྤང་བའི་སླད་དུ་བསྒྲུབ་པར་བགྱིས་ཞེས་བྱ་བ་ནི་ཤི་བ་རྣམས་ཇི་ལྟར་སྦྱང་ཞེས་པའི་དོན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་ཉོན་ཅིག་།སེམས་ཅན་དམྱལ་བ་ལ་སོགས་པའི་དབང་དུ་གྱུར་པའི་སེམས་ཅན་སྡིག་པ་ཆེན་པོ་བྱེད་པ་དེ་དག་ཅི་ནས་ཀྱང་སེམས་ཅན་དམྱལ་བའི་སྡུག་བསྔལ་ལས་ཐབས་སླ་བས་གྲོལ་བར་འགྱུར་བ་ཉོན་ཅིག་ཅེས་བྱ་བ་ནི་ཉོན་ལ་ཟུང་ཤིག་པའི་དོན་ཏོ། །ཐབས་དེ་ཉིད། དེ་བཞིན་དཀྱིལ་འཁོར་བྲིས་ནས་ནི། །དེ་ལྟར་ཡང་ན་བུམ་པ་ལ། །བརྒྱ་རྩ་བརྒྱད་དུ་བཟླས་ནས་ནི། །དབང་བསྐུར་བ་ནི་རབ་ཏུ་བརྟག །ཅེས་བྱ་བ་སྔར་བཤད་པ་བཞིན་དུ། བསྙེན་པ་དང་སའི་ཆོ་ག་དང༌། ལྷ་རྣམས་མཆོད་པ་ལ་སོགས་པ་བྱས་ནས། བུམ་པ་ལ་སྔགས་བཟླས་ཏེ། ལྷོ་སྒོའི་ཆོ་ག་སྔོན་དུ་འགྲོ་བས་དཀྱིལ་འཁོར་དུ་བཅུག་ཅིང་སྔར་བཤད་པ་བཞིན་དུ་དབང་བསྐུར་བ་ཞེས་བྱ་བའི་དོན་ཏོ། །དེའི་འབྲས་བུ། དེ་ནས་སྡིག་པ་ཀུན་སྦྱངས་ཏེ། །དམྱལ་བ་ལ་སོགས་སྡུག་བསྔལ་ལས། །དེ་ནི་མྱུར་དུ་ཐར་པར་འགྱུར། །སྡིག་ལས་རྣམ་པར་གྲོལ་བདག་ཉིད། །དག་པར་གྱུར་པའི་ལྷ་རྣམས་ཀྱི། །རིགས་སུ་སྐྱེ་བར་གྱུར་ནས་ཀྱང༌། །དེ་ནི་རྟག་ཏུ་སངས་རྒྱས་དང༌། །ཆོས་འགྲོ་བ་ནི་འཐོབ་པར་འགྱུར། །ཕྱིར་མི་ལྡོག་པའི་ས་ལ་གནས། །རིམ་གྱིས་བྱང་ཆུབ་འཐོར་པར་འགྱུར། །ཞེས་བྱ་བ་གསུངས་སོ། །དེ་ཡང་ཅི་ཞིག་ལས་དབང་བསྐུར་ཞེ་ན། དེ་ཡི་གཟུགས་བརྙན་བྲི་བ་ནི། །གུར་གུམ་གྱིས་ནི་མིང་བྱང་རུས། །ཞེས་བྱ་བ་གསུངས་སོ། །དེ་ཅིའི་ཕྱིར་ཞེ་ན། ངན་སོང་ཀུན་གྱི་འཇིགས་ཆེན་ལས། །སེམས་ཅན་རྣམས་ནི་དགྲོལ་བའི་ཕྱིར། །ཞེས་གསུངས་ཏེ། སུ་ཞིག་གིས་ཤེ་ན། སྔགས་མཁན་གཞན་ལ་ཕན་བརྩོན་ཞིང༌། །སྙིང་རྗེ་ཅན་གྱིས་དང་བསྐུར་རོ། །
ཞེས་བྱ་བ་གསུངས་སོ། །དེས་ནི་ཐབས་དང་པོ་བསྟན་ཏོ། །གཞན་ཡང༌། དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བརྟགས་ནས་ཀྱང༌། །མཆོད་རྟེན་དབུས་སུ་གཞག་པར་བྱ། །ཞེས་བྱ་བ་ནི་གཟུགས་བརྙན་ལ་སོགས་པ་མདུན་དུ་གཞག་ལ། ལྕེ་དང་ལག་པ་བྱིན་གྱིས་བརླབ་པ་ནས་བཟུང་སྟེ་སྲུང་བའི་འཁོར་ལོ་དང༌། ནམ་མཁར་དཀྱིལ་འཁོར་བསྒོམ་པ་དང་མཆོད་པ་རྣམས་ཀྱིས་མཆོད་དེ། ཇི་ལྟ་བའི་གོ་རིམས་ཀྱིས་མངོན་པར་བྱང་ཆུབ་པ་མངོན་དུ་བྱས་ནས། ཕབ་སྟེ་དཀྱིལ་འཁོར་བསྲེ་བ་བྱས་ལ་གཟུགས་བརྙན་ལ་སོགས་པ་ལ་འོད་ཟེར་གྱིས་ཤེས་པ་བཅུག་སྟེ། སྡིག་པ་འཇོམས་པ་ལ་སོགས་སྔོན་དུ་འགྲོ་བས་རང་གི་སྙིང་གར་ཇི་ལྟ་བ་བཞིན་དུ་བཅུག་སྟེ། རྡོ་རྗེ་དབྱིངས་ཀྱི་དབང་ཕྱུག་མས་བྱིན་གྱིས་བརླབས་ལ། སྔགས་དང་ཕྱག་རྒྱས་དབང་བསྐུར་ཏེ་མཆོད་རྟེན་གྱི་དབུས་སུ་གཞག་པར་བྱའོ་ཞེས་བྱ་བའི་དོན་ཏོ། །ཐབས་སླ་བ་གཉིས་པའོ། །གཞན་ཡང། རང་གི་ལྷའམ་ལྷ་གཞན་གྱི། །སྙིང་པོ་སྙིང་གར་བྲིས་ནས་ཀྱང༌། །ལྷ་འདྲ་བར་ནི་སེམས་བསྐྱེད་དེ། །ཁྱིམ་གྱི་ནང་དུ་གཞག་པར་བྱ། །ཞེས་བྱ་བ་ནི་དབང་དང་དམ་ཚིག་ཐོབ་པའི་རྣལ་འབྱོར་བ་ཤི་བར་གྱུར་ན། ཤེས་ན་རང་གི་ལྷའི་སྙིང་པོ་སྙིང་གར་བྲི། ལྷ་དང་འདྲ་བས་སེམས་ཀྱིས་བརྟག །མ་ཤེས་ན་ལྷག་གང་ཡང་རུང་བའི་སྙིང་པོ་སྙིང་གར་བྲི། ལྷ་དང་འདྲ་བས་སེམས་ཀྱིས་བརྟག །ཁྱིམ་མམ་དུར་ཁྲོད་དམ་མཆོད་པའི་ནང་དུ་མཆོད་པའི་ནང་དུ་གཞུག་པར་བྱ་སྟེ། འདི་ནི་ཐབས་སླ་བ་གསུམ་པའོ། །གཞན་ཡང༌། དེ་ནས་སྨོས་ནས་ནི། གུར་གུམ་བཟང་པོས་སྔགས་བྲིས་ལ། །རིམ་གྱིས་འབུམ་ནི་ཚང་ཙམ་དུ། །མཆོད་རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེ་ནས་ནི་ངེས་པར་དམྱལ་གནས་ནས། །དེ་བྱས་པ་ནི་གྲོལ་བར་འགྱུར།། །ཡི་དགས་བྱོལ་སོང་སྡུག་བསྔལ་ལས། །གྲོལ་ནས་ལྷ་ཡི་ནང་དུ་སྐྱེ། །ཞེས་བྱ་བ་ནི། དེའི་མིང་ནས་བརྩམས་ཏེ། སྔར་བཤད་པའི་སྔགས། ཨོཾ་སརྦ་བིད་ཅེས་བྱ་བ་ནས། བྷ་ཞེས་བྱ་བའི་མཐར་ཐུག་པ་གུར་གུམ་བཟང་པོས་རས་སམ་གྲོ་གནག་པོར་བྱས་པ་ལ་འབུམ་ཚང་བར་ཙཻ་ཏྱ་བྱས་ཏེ། མཆོད་རྟེན་གྱི་ལས་བྱའོ། །སྡིག་པ་ཟད་པར་བྱ་བའི་ཕྱིར། །བྱེ་བ་སྙེད་དུ་གདབ་པར་བྱའོ། །དེ་ནི་དམྱལ་བ་དང་བྱོལ་སོང་
དང་ཡི་དགས་ལས་གྲོལ་ཏེ་ལྷའི་གནས་སུ་སྐྱེའོ་ཞེས་བྱ་བའི་དོན་ཏོ། །འདིའི་དོན་ནི་ཆོ་ག་ཉིད་ལས་ཤེས་པར་བྱའོ། །ཐབས་བཞི་པའོ། །གཞན་ཡང༌། དེ་ཡི་མིང་ནས་བརྗོད་ནས་ནི། །འབུམ་ཕྲག་སྟོང་ངམ་ཡང་ན་ནི། །བརྒྱ་ཕྲག་སྟོང་དུ་ཚང་བ་དང༌། །བྱེ་བ་སྙེད་དུ་རབ་བཟླས་ན། །ལྷ་ཡི་གནས་སུ་སྐྱེ་བར་ངེས། །ཞེས་བྱ་བ་ནི་སྦྱོར་བ་དང་པོ་དང་དཀྱིལ་འཁོར་རྒྱལ་མཆོག་དང༌། ལས་ཀྱི་རྒྱལ་པོ་མཆོག་དང༌། སྒོ་དབྱེ་བ་སྔོན་དུ་འགྲོ་བས་དེའི་མིང་ཐོག་མར་སྨོས་ཏེ། གོང་དུ་བཤད་པའི་སྔགས་འབུམ་ཕྲག་སྟོང་དང་བརྒྱ་ཕྲག་སྟོང་ཚང་བ་དང༌། བྱེ་བ་སྙེད་དུ་བཟླས་ཏེ་དཀྱིལ་འཁོར་ཆེན་པོ་ལ་མཆོད་པ་སྔོན་དུ་འགྲོ་བས་མཚན་ཐོག་ཐག་བཟླས་ན་ལྷའི་གནས་སུ་ངེས་པར་སྐྱེ་ཞེས་བྱ་བའི་དོན་ཏོ། །ཐབས་སླ་བ་ལྔ་པའོ། །དེ་ནས་གཞན་ཡང༌། དེ་ཡི་མིང་ནས་བརྗོད་ནས་ནི། །མཁས་པས་འབུམ་ཕྲག་བརྒྱ་འམ་ནི། །ཡང་ན་སྟོང་ཕྲག་བརྒྱ་སྙེད་དུ། །སྦྱིན་སྲེག་བྱས་པར་གྱུར་ན་ནི། །ཞེས་བྱ་བ་ནི། ཐབ་ཁུང་ཇི་ལྟ་བ་བཞིན་དུ་བརྐོས་ཏེ། རྫས་གཞག་ཅིང་བསང་བ་བྱས་ནས་རང་ལྷར་བསྐྱེད་དེ། ཆོས་ཀྱི་ཡི་གེ་ལས་ཐབ་ཁུང་བྱིན་གྱིས་བརླབས་ལ། བྷ་དང་ཤ་བཀོད་བའི་བུད་ཤིང་བརྩིགས་ཏེ་རྒྱུན་བཞག་གི་མེ་སྦར་ནས་མེ་ལྷ་སྤྱན་དྲང་བ་སྔོན་དུ་འགྲོ་བས་དགང་བླུགས་ལ་སོགས་པ་ཕུལ་ཏེ་འབར་བ་དང་ཐ་མི་དད་པར་འགྱུར་པའི་མེ་ལྷའམ། ཡང་ན་མེ་ལྷའི་སྙིང་གར་རྡོ་རྗེ་སེམས་དཔའ་ལ་དགང་བླུགས་ལ་སོགས་པ་ཕུལ་བ་སྔགས་དང་མིང་སྤེལ་ཏེ། ཏིལ་གྱི་སྦྱིན་སྲེག་མཁས་པས་འབུམ་ཕྲག་བརྒྱ་འམ། བརྒྱ་ཕྲག་སྟོང་སྙེད་དུ་སྦྱིན་སྲེག་བྱས་ལ། ལྷ་རྣམས་གཤེགས་སུ་གསོལ་བའི་ཆོ་ག་བྱས་ནས་ནི་ཞེས་བྱ་བའི་དོན་ཏོ། །དེའི་འབྲས་བུ་ནི། དམྱལ་བ་ཆེན་པོར་གྱུར་པ་ཡི། །སྡིག་པ་དེ་ལས་ཐར་བར་འགྱུར། །ཞེས་བྱའོ། །ཡང་དུས་ཇི་སྲིད་དུ་ཞེ་ན། །ཇི་སྲིད་མཚན་མ་ཤིན་ཏུ་ནི། །འབར་བའི་གནས་སུ་སྐྱེ་བར་འགྱུར། །མཚན་མ་ཡང་དག་འབྱུང་བར་དུ། །ཞེས་བྱ་བ་དེ་སྲིད་དུའོ། །རྫས་ཅི་ཞིག་ཅེ་ན། ཏིལ་དང་ཡུངས་ཀར་འབྲས་རྣམས་དང༌། །བ་ཡི་འོ་མར་ལྡན་པ་དང༌། དྲི་ཡིས་བསྐུས་པའི་ཡམ་ཤིང་གིས། །ཆོ་ག་བཞིན་དུ་སྦྱིན་སྲེག་བྱ། །ཞེས་གསུངས་སོ། །སྡིག་པ་ལས་ཐར་བའི་མཚན་མ་ནི། དེ་ནས་དེ་ནི་
ངེས་པར་ཡང༌། །ལྷ་ཡི་གནས་སུ་སྐྱེས་གྱུར་ནས། །དེ་ཡི་མཚན་མ་སྟོན་པར་བྱེད། །ཡང་ན་ལྷ་ཡི་མཆོག་ཏུ་འགྱུར། །ཡང་ན་ཧོམ་ཁུང་ནང་དུ་ནི། །མེ་ཡི་ལྟས་ནི་སྟོན་བྱེད་ཅིང༌། །ལྷ་ཡི་གནས་སུ་སྐྱེ་བ་དང༌། །སྡིག་པ་བཅོམ་པའི་མཚན་མ་ནི། །དཀར་པོ་ཉིད་དང་གཡས་སུ་འབར། །གྱེན་དུ་འབར་ཞིང་དྲི་མ་མེད། །ཟླུམ་ཞིང་རྣམ་པར་མི་འཕྲོ་ལ། །བརྟན་ལ་གློག་བཞིན་དྲི་མ་མེད། །ཡང་ན་མེ་ལྷ་ཉིད་ཀྱིས་ནི། །བདག་ཉིད་དེ་ཉིད་སྟོན་བྱེད་ཅིང༌། །ཟླ་བ་དྲི་མེད་དཀར་འདྲལ། །གཞན་མདོག་དཀར་ཞིང་ལྷམ་མེར་འབར། །དེས་ན་མཚན་མ་འདི་དག་གིས། །དམྱལ་བ་ལ་སོགས་རྣམ་གྲོལ་ཞིང༌། །སྡིག་པ་བཅོམ་ནས་བདེ་འགྲོར་ནི། །སྐྱེས་པ་ཡིན་པར་ཤེས་པར་བྱ། །ཞེས་བྱ་བ་ནི་ཐར་པའི་མཚན་མ་ཡིན་ནོ་ཞེས་བྱ་བའི་དོན་ཏོ། །ཐབས་སླ་བ་དྲུག་པའོ། །གཞན་ཡང༌། ཁྲུ་བཞི་པ་ཡི་ཚད་དུ་ནི། །ཆོ་ག་བཞིན་དུ་བརྐོས་པ་ལ། །རྡོ་རྗེས་མཐའ་མར་བསྐོར་བ་ཡི། །འཁོར་ལོ་དབུས་སུ་བྲི་བར་བྱ། །རིགས་ལྔ་ཡི་ནི་ཕྱག་རྒྱ་རྣམས། །ཇི་བཞིན་པ་ཡི་ཕྱོགས་སུ་བྲི། །ཇི་བཞིན་སེམས་དཔའ་རྣམས་ཀྱང་ནི། །འཇིག་རྟེན་རྩེ་ལ་སོགས་པ་བྲི། །ཞེས་བྱ་བ་ནི་དང་པོར་སྟེགས་བུའི་ཚད་ཁྲུ་སུམ་ཅུ་རྩ་གཉིས་ལ་སོགས་པ་བརྩིགས་ལ། ཁྲུ་བཞི་བའི་སྨད་དུ་ཟབས་སུ་ཁྲུ་དོ་བའི་ཚད་ཀྱི་ཁུང་བུ་བརྐོས་ལ། སོར་བཅུ་དྲུག་པའི་ཕྱི་རོལ་དུ་སོར་བཅུ་དྲུག་ཡོད་པའི་མཐོ་དམན་དང་ལྡན་པ་དེ་ལ་རྡོ་རྗེ་རྩེ་གསུམ་པའི་ཕྲེང་བས་བསྐོར། དེའི་དབུས་སུ་འཁོར་ལོ་རྩིབས་བརྒྱད་པ་རྡོ་རྗེ་རྩེ་གསུམ་བས་བསྐོར་བ་བྲི། ལྟེ་བ་ལ་སོགས་པ་རྣམས་སུ་རིགས་ལྔའི་ཕྱག་རྒྱ་རྣམས་ཤར་ལ་སོགས་པ་ཇི་བཞིན་པའི་ཕྱོགས་སུ་རིམ་པ་བཞིན་དུ་བྲི། དེའི་ཕྱི་རོལ་དུ་འཁོར་ལོ་རྩིབས་བཅུ་དྲུག་པ། སེམས་དཔའ་བཅུ་དྲུག་གི་རྡོ་རྗེ་ལ་སོགས་པ་བྲི། དེའི་ཕྱི་རོལ་གྲྭ་དང་སྒོ་རྣམས་ལ། ལཱ་སྱ་དང་ལྕགས་ཀྱུ་ལ་སོགས་པའི་ཕྱག་རྒྱ་བྲི། ཁྱམས་ཀྱི་ནང་དུ་བྱམས་པ་ལ་སོགས་པའི་ཕྱག་རྒྱ་བྲི། ཕྱི་རོལ་གྱི་ཁྱམས་ལ་རིམ་པ་དང་པོ་དང་གཉིས་པ་དང་གསུམ་པ་ལ་རྡོ་རྗེ་ལ་སོགས་པ་དང༌། པར་བུ་དང་གསེག་ཤང་དང༌། འཁོར་ལོ་རྣམས་བྲི་བར་བྱའོ། །སྒོ་རྣམས་ལ་ཁྲོ་བོའི་ཕྱག་མཚན་རྣམས་བྲི་བར་བྱའོ། །འཇིག་རྟེན་གཙོ་དང་མ་མོ་དང་མཁའ་འགྲོ་མ་རྣམས་ཀྱི་ཐིག་ལེ་དང་མིང་དུ་བྲི་བར་བྱའོ་ཞེས་བྱ་བའི་དོན་ཏོ། །
ཡང་བྱ་དང་བུམ་པ་གང་བ་དང༌། གཏོར་མའི་སྣོད་རྣམས་བཀང་བ་བརྒྱད་དམ་བཅུ་དྲུག་སྙེད་དག་གཞག་བཟའ་བ་དང་བཅའ་བའི་བཤོས་དང༌། མེ་ཏོག་གི་ཕྲེང་བ་དང༌། བླ་རེ་རྒྱལ་མཚན་དང༌། དར་དང་ལྔ་ལྡི་རྣམས་གཞག་བར་བྱའོ། །དཀྱིལ་འཁོར་དམ་པར་སྦྱིན་སྲེག་གི་ཕྱིར་གཞག་པ་ཡིན་ནོ། །ཆོ་ག་ཤེས་པས་བྲིས་ནས་ཀྱང༌། ལྷ་རྣམས་མང་པོ་སྤྱན་དྲངས་པ། །ཞེས་བྱ་བ་ནི་ཆོ་ག་ཤེས་པས་ཕྱག་རྒྱའི་དཀྱིལ་འཁོར་བྲིས་ནས་ཏེ། ཐུགས་ཀྱི་རང་བཞིན་སྟོན་ཅིང་དངོས་པོ་མཚན་མ་བསྲེག་པ་ནི་ཐུགས་གཙོར་གྱུར་པའི་ཕྱིར་རོ། །ཀྱང་ཞེས་བྱ་བ་ནི་ལྷག་ཆད་ཞི་བ་སྔོན་དུ་འགྲོ་བས་ཏིང་ངེ་འཛིན་གསུམ་དང༌། བཟླས་བརྗོད་བྱེད་ཅིང་སྒོ་དབྱེ་བ་བསྡུའོ། །ལྷ་རྣམས་མང་པོ་སྤྱན་དྲངས་བ་ནི། བསྡུ་ཞིང་ལྕགས་ཀྱུ་ལ་སོགས་པས་ལས་བྱའོ། །སྔགས་ཤེས་པས་ནི་སྔགས་ཕྱག་རྒྱ། །ཨརྒྷཾ་ཕུལ་བ་ཤེས་བས་ཀྱང༌། །ཞེས་བྱ་བ་ནི་མཆོད་ཡོན་དབུལ་བ་སྔོན་དུ་འགྲོ་བས་ཕྱག་རྒྱ་བཞིས་རྒྱས་གདབ་དབང་བསྐུར་བས་ཀྱང་ཞེས་པས་སྟོན་ཏོ། །མདོར་ན་མཆོད་པ་བྱས་ནས་ནི། །ཞེས་བྱ་བ་ནི་སྣ་ཚོགས་པའི་མཆོད་པ་བསྡུ་ན་མཆོད་པར་འདུས་པས་དེ་སྐད་ཅེས་བྱའོ། །ལྷ་ཡི་སྦྱོར་བས་རབ་གནས་ལ། །ཞེས་བྱ་བ་ནི། ལྷའི་ང་རྒྱལ་གྱིས་གནས་པའོ། །དེ་ལྟར་སྦྱིན་སྲེག་གི་ཚེ་ན་ལྷ་རྣམས་མཆོད་ནས་རྫས་བསྟན་པའི་ཕྱིར། ག་བུར་གུར་གུམ་ལ་སོགས་པ། །མར་དང་འོ་མ་ཏིལ་བསྒོས་ལ། །ནས་དང་ཡུངས་ཀར་འབྲས་རྣམས་ལ། །དྲི་ཡི་ཆུས་ནི་ལེགས་བཀང་སྟེ། །འབྲས་ཆན་སྤོད་དང་ལ་དུ་དང༌། །སྦྲང་རྩི་ཁ་རར་ལྡན་དེ་བཞིན། །བརྒྱ་ཕྲག་དུ་མར་ཡོངས་བཟླས་ལ། །ཡམ་ཤིང་ལ་ཡང་དེ་བཞིན་ཏེ། །རང་གི་སྔགས་ཀྱིས་བཏབ་པའི་ཤིང༌། །ཁུང་བུའི་ནང་དུ་གཞུག་བར་བྱ། །ཞེས་བྱ་བ་ལ་རྫས་དེ་རྣམས་ཀུན་ལ་ཨོཾ་སརྦྦ་བིད་ཅེས་བྱ་བ་ནས། བྷ་ཞེས་བྱ་བའི་བར་གྱི་སྔགས་བརྒྱ་ཕྲག་དུ་མར་བཟླས་ཤིང༌། སྔགས་དེ་ཉིད་བཏབ་པའི་ཤིང་ལ་བྷ་དང་ཤ་བཀོད་པ་མཆོད་རྟེན་གྱི་དབུས་སུ་བརྩིག་བར་བྱ་བའི་དོན་ཏོ། །རོའི་བྱ་བ་བསྟན་པའི་ཕྱིར། དང་བོ་རེ་ཞིག་ངན་འགྲོ་ལས་དགུག་ཅིང་སྡིག་པ་སྦྱངས་ལ། བྱེ་མ་དང་ཉུངས་ཀར་གྱིས་སྦྱངས་ཏེ་ཁྲུས་བྱས་ལ། ཡངས་སྟེགས་སྔོན་པོའི་སྟེང་དུ་གཞག་པ་ལས་བུམ་བ་སྔོན་པོས་བཀྲུ་ཞིང་མགྲིན་རིས་དང་ལམ་བསྟན་ཏེ་མེ་ཏོག་གི་ཆར་
ཕབ་ལ། སློབ་མ་གཞུག་པའི་ཆོ་ག་ཇི་ལྟ་བ་བཞིན་དུ་དཀྱིལ་འཁོར་དུ་བཅུག་ལ་བུམ་པ་ལ་སོགས་པ་བསྡུས་ཏེ། འཁོར་ལོ་རྩིབས་བརྒྱད་དང་པདྨ་ལ་བཞག་ནས་རང་གི་ལྷག་པའི་ལྷར་བསྐྱེད་དེ། ཆུ་མཆོག་གིས་བཀྲུས་ལ་དྲིས་བྱུག་ཅིང་རྒྱན་སྣ་ཚོགས་པ་བཏགས་ལ་སྔགས་ཀྱིས་བཏབ་པའི་བདུག་པ་ལ་སོགས་པས་བདུག་ཅིང་མཆོད་པའི་ཁྱད་པར་གྱིས་མཆོད་བ་ནི། རོ་ལ་སྔགས་ཀྱིས་བཏབ་ནས་ནི། །ཆུ་མཆོག་གིས་ནི་བཀྲུ་བར་བྱ། །བཟླས་པའི་དྲི་ཡིས་བྱུག་བར་བྱ། །གོས་དང་རྒྱན་གྱིས་བཀླུབས་ནས་ཀྱང༌། །སྔགས་ཀྱིས་བཏབ་པའི་བདུག་པས་བདུག །མེ་ཏོག་ཕྲེང་བ་སོགས་པས་མཆོད། །ཅེས་བྱ་བ་འདིས་བསྟན་ཏོ། །དེ་འབའ་ཞིག་ཏུ་མ་ཟད་ཀྱི། གཙུག་ཕུད་དཔུང་བར་དེ་བཞིན་དུ། །སྔགས་བྲི་བས་ནི་གདགས་པར་བྱ། །ཞེས་བྱ་བ་ནི་སྔགས་བྲི་པས་གདགས་པ་མདོར་བསྟན་ཏོ། །སྙིང་ག་ལྐོག་མ་ཁ་ཕྱོགས་སུ། །སརྦྦ་བིད་ཀྱིས་བྱིན་གྱིས་བརླབ། །ཅེས་བྱ་བ་ནི་རྡོ་རྗེའི་ཕྱག་རྒྱ་བཅིངས་ཏེ། ཨོཾ་སརྦྦ་བིད་བཛྲ་ཨ་དྷི་ཏིཥྛ་ཛྙཱ་ན་ས་མ་ཡི་ཧཱུཾ། ཞེས་བྱ་བས་སྙིང་ག་ལྐོག་མའི་ཕྱོགས་ལ་སོགས་བ་རྣམས་སུ་བྱིན་གྱིས་བརླབ་པ་སྟེ་མདོར་བསྟན་པའོ། །སྔགས་ཁྲི་བ་དང་བྱིན་གྱིས་བརླབ་པ་གཉིས་བཤད་པ་ནི། དཔྲལ་བ་མཛོད་སྤུ་རྣ་བ་གཉིས། །མགོ་བོ་གཙུག་ཕུད་དཔུང་བ་གཉིས། །སྣ་དང་རྐེད་པ་པུས་མོ་བོ་ལ། །ལོང་བུ་སྣ་ཡི་རྩེ་མོ་དང༌། །མིག་གཉིས་དང་ནི་གསང་བ་ཡི། །དབང་པོ་རྣམས་ཀྱི་གནས་དང་ནི། །དེ་ལྟར་གཞན་དུ་ཡི་གེ་སྔགས། །མཆོག་ཏུ་དགེ་བ་རྣམས་བཤད་དོ། །ཞེས་བྱ་བ་ནི། གནས་བཅོ་བརྒྱད་དུ་འགོད་པ་སྟེ། །ཡི་གེ་ཞེས་བྱ་བ་བྷ་དང་ཤའོ། །སྔགས་ཞེས་བྱ་བ་སརྦ་བིད་ལ་སོགས་པའོ། །མཆོག་ཏུ་དགེ་བར་བྱེད་པས་ན་དེ་སྐད་ཅེས་བྱའོ་ཞེས་བྱ་བའི་དོན་ཏོ། །དེ་ནས་རོ་བསྲེག་བའི་རང་ལྷར་གྱུར་པ་ཙམ་ཞིག་ལུས་པའི་ཕྱིར་ངན་སོང་སྦྱོང་བའི་ཕྱིར་ལྷར་བསྐྱེད་པ་སྟེ། འདིས་ནི་ཀུན་རྫོབ་མི་འགག་བ་དང་དོན་དམ་པར་མཚན་མ་ལས་འདས་པ་ཤེས་པར་བྱ་བའི་ཕྱིར་རོ། །ཡང་ན་དོན་དམ་པར་ཤེས་བར་བྱ་བའི་ཕྱིར། སྐྲ་དང་ཐལ་བ་ལ་སོགས་པ་བསྲེག་བའི་རྫས་སུ་དབུལ་བ་ནི། རྒྱུད་ཕྱི་མ་ལས་སྟོན་ཏོ། །དེ་ནས་ལྷར་བསྐྱེད་དེ། དེ་ནས་ངན་སོང་སྦྱོང་བའི་ཕྱིར། །སྟན་དང་བཅས་ཏེ་ཐབ་དབུས་སུ། །བཞག་པ་ཉིད་དུ་བྱ་བ་ཡིན། །དེ་ནས་སྔགས་འཆང་
སྔགས་ཀྱིས་ནི། །བཏབ་པའི་གོས་ཀྱིས་གཡོགས་པར་བྱ། །ཞེས་བྱ་བ་ཡིན་ནོ། །མེ་དང་མཆོད་བའི་བྱ་བ་བསྟན་བའི་ཕྱིར་དེ་ནས་བྱིན་རླབས་ཞེས་བྱ་བ་ལ་སོགས་པ་སྨོས་ཏེ་རོ་དབུས་སུ་བཞག་ལ་དེ་ནས་བྱིན་ཟ་དགེ་བ་རྒྱུན་བཞག་གི་མེ་བླངས་ལ། རླུང་ཡབ་ཀྱིས་སྦར་ལ་རང་གི་ཆོས་ཀྱི་ཡི་གེས་ཐབ་ཁུང་བྱིན་གྱིས་བརླབས་ཏེ་མར་གྱིས་སྦར་ལ། བྱིན་ཟ་དེ་ཡང་ཇི་ལྟ་བུ་ཡིན་ཞེ་ན། མེ་ལྕེ་སྟོང་གིས་དཀྲིགས་ཤིང་འབར་བའི་ལུས་སུ་གནས་པ་ལ་ཟླ་བ་ལྟར་དཀར་ཞི་བའི་ལུས་སོ། །བསམས་བའམ་ཞེ་ན་མཐའ་ཡས་བའི་མེ་བཀུག་ལ་ཞེས་བྱ་བའོ། །དེ་ནས་ཨརྒྷས་མཆོད། བློ་མཆོག་ལྡན་བའི་མདུན་དུ་གཟུགས་མཆོག་གཞག །འབྲས་བུ་འཐོབ་པར་འདོད་པས་མེ་ཏོག་གིས་ནི་དེ་བཞིན་གཤེགས་པ་སྤྱན་དྲངས་ལ། མཆོད་ཡོན་སྔོན་དུ་འགྲོ་བས་མཆོད་པ་ལྔས་མཆོད་དེ། དེ་ནས་མེ་ལྷ་ལ་བསྲེག་བྱ་རྣམས་ཀྱིས་མཆོད་པར་བྱ་བའི་ཕྱིར་རོ། །དེ་ནས་བསྲེག་བྱ་རྣམས་ཀྱིས་ལྷ་ཐམས་ཅད་ལ་བརྒྱ་རྩ་བརྒྱད་དང༌། གཙོ་བོ་ལ་ཉི་ཤུ་རྩ་གཅིག་བརྟག །དེ་ནས་མེ་ལྷ་གཙོ་བོ་ལ་སོགས་པ་གཤེགས་སུ་གསོལ་ཏེ་ཡོ་བྱད་ལན་གསུམ་གསུམ་དབུལ། དེ་ནས་ཕྱག་ན་རྡོ་རྗེ་པད་དཀར་ཞལ། ཨརྒྷ་ལ་སོགས་པས་མཆོད་དེ། དེ་ཡང་ཕྱག་ན་རྡོ་རྗེ་དང་པདྨ་འཛིན་ཅིང་གཉིས་ཀྱིས་ཞགས་པ་བསྣམས་པ། ཁམས་གསུམ་རྣམ་རྒྱལ་གྱི་གཟུགས་ཞབས་ཀྱི་པདྨོ་དང་མ་ཧཱ་དེ་བ་ཨུ་མ་དེ་བ་དང་བཅས་པ་མནན་པ་རྒྱན་རྫོགས་པ། སངས་རྒྱས་ཀྱི་དབུ་རྒྱན་ཅན་བསམས་སམ་ཡིད་ཀྱིས་བྲིས་བའང་རུང༌། དེའི་སྙིང་པོ་ཧཱུཾ་ཞེས་བྱ་བ་དང༌། ཚེ་འདས་པ་ཤཱནྟིཾ་ཀུ་རུ་ཞེས་བྱ་བ་དང་ཏིལ་གྱིས་སྦྱིན་སྲེག་བྱས་ནས། སྟོང་ངམ་བྱེ་བའི་ཚད་དུའམ། མཚན་མ་བྱུང་བ་དེ་སྲིད་ཀྱི་བར་དུ་སྦྱིན་སྲེག་བྱས་ལ། སྡིག་ཅན་གྱི་རྒྱུད་དག་པར་ཤེས་ནས་མེ་ལྷའི་ཕྱག་རྒྱ་དགྲོལ་དེ་གཤེགས་ནས་མེ་ལྷ་མཆོད་དེ་བཟོད་པར་གསོལ་དེ་ནས་གཤེགས་སུ་གསོལ་བར་བྱའོ། །དེ་ལྟར་མཆོད་པ་བྱ་བ་བསྟན་ནས་ཐལ་བའི་བྱ་བ་བསྟན་པའི་ཕྱིར། དེ་ནས་ཐལ་བར་གྱུར་པ་དང༌། །རྡོ་རྗེ་བསྡུ་བའི་སྔགས་ཀྱིས་ནི། །ཞེས་བྱ་བ་སཾ་ཧ་ར་ན་བཛྲ་ཞེས་བྱ་བས་སོ། །ཆོ་ག་བཞིན་དུ་བསྡུ་བར་བྱ། །ཐལ་བ་དེ་དང་རུས་པ་རྡུལ། །སྔགས་ཀྱིས་བཏབ་བའི་དྲི་ཆུ་དང༌། །བ་སྐྱེས་འོ་མ་ལ་སོགས་ལྔས། །སྦྱོང་བའི་
སྔགས་ཀྱི་བློ་ལྡན་གྱིས། །འབུམ་དུ་བཟླས་པ་བརྗོད་ནས་ནི། །ག་བུར་དྲི་དང་བསྒོས་བ་ཡིས། །འདག་བ་དང་ནི་བསྲེས་ནས་ཀྱང༌། །གཟུགས་སུ་བྱ་བའམ་ཡང་ན་ནི། །མཆོད་རྟེན་གྱི་ནི་ལྷར་བྱས་ནས། །གཅིག་གམ་གཉིས་སམ་གསུམ་མམ་ལྔ། །ཡང་ན་བརྒྱ་རྩ་བརྒྱད་དུའམ། །སྔགས་དང་ཕྱག་རྒྱས་བཏབ་ནས་ཀྱང༌། །འབུམ་ཕྲག་ཉིས་བརྒྱའི་བར་དུ་བཟླས། །ཞེས་བྱ་བ་ལ་གཟུགས་སུ་ཞེས་བྱ་བ་སྐུ་གཟུགས་སུའོ། །སྔགས་དང་ཕྱག་རྒྱས་བཏབ་ཅེས་བྱ་བ་སྤྱན་དབྱེ་བ་བྱས་ནས་ཞེས་བྱ་བའི་དོན་ཏོ། །དེའི་མཚན་མ་ནི། དེ་ནས་མཆོད་རྟེན་འབར་འགྱུར་ཏམ། །ཞེས་བྱ་བ་ལ་སོགས་ཏེ་དེ་ལྟ་བུ་མཐོང་བར་འགྱུར་རོ་ཞེས་བྱ་བའི་དོན་ཏོ། །ཅི་སྟེ་མཚན་མ་དེ་དག་ནི། །སྡིག་ཅན་བློ་ཡིས་མ་མཐོང་ན། །ཞེས་པ་ནི། རྣལ་འབྱོར་པ་རྒྱུད་མ་དག་བསམ་མཐོང་ནའོ། །འབུམ་གྱི་ཕྲག་ནི་བརྒྱ་སྟོང་ངམ། །ཇི་སྲིད་མཚན་མ་བྱུང་བར་དུ། །དེ་བཞིན་གཤེགས་བ་མཆོད་ནས་ནི། །མཉམ་པར་གཞག་པས་བཟླ་བར་བྱ། །དེ་ཡི་མཐར་ནི་མཁས་པས་ཀྱང༌། །མཚན་གཅིག་ཐོག་ཐག་མི་ཉལ་བཟླས། །ཞེས་བྱ་བས་ནི་སྡིག་པ་ཤིན་ཏུ་ཆེ་བས་དང་པོ་དང་གཉིས་པ་ལ་མཚན་མ་མ་མཐོང་ན་འབུམ་ཕྲག་བརྒྱ་བཟླས་བརྗོད་བྱས་ཏེ་མཚན་ཐོག་ཐག་མི་ཉལ་བར་བཟླས་ཞེས་བྱ་བའི་དོན་ཏོ། །སྒྲིབ་པ་ཤིན་ཏུ་ཆུང་བ་རྣམས་ནི་རོ་བསྲེག་པའི་དུས་སུའོ། །སྡིག་པ་ཅན་རྣམས་ནི་འབུམ་ཕྲག་ཉིས་བརྒྱའི་དུས་ནའོ། །ཤིན་ཏུ་སྡིག་ཆེ་བ་རྣམས་ནི་འབུམ་ཕྲག་སྟོང་གི་དུས་ན་མཚན་མ་བྱུང་ན། དེའི་སྡིག་པ་ཉིད་དག་པར་མཐོང་སྟེ་ལྷའི་ལུས་སུ་གྱུར་ལ་རང་གི་རྒྱུད་དོ་ཤེས་ན་དེ་བྱམས་པ་དང༌། སྙིང་རྗེར་ལྡན་པས་ལས་ཐམས་ཅད་བྱེད་པར་འགྱུར་རོ་ཞེས་བྱ་བའི་དོན་ཏོ། །ཐབས་བདུན་པའོ། །དེ་ལྟར་ཡང་རོ་ཡོད་པའི་དབང་དུ་བྱས་པ་བཤད་ནས། ད་ནི་རོ་མེད་པའི་དབང་དུ་བྱས་པའི་ཐབས་བསྟན་པ། ཡང་ན་མེད་བར་གྱུར་ན་ཡང༌། །བཟླས་ཤིང་བསྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ཀྱང༌། །མཆོད་རྟེན་ཕྲེང་བ་བྱ་བ་དང༌། །ཡང་ན་གཟུགས་སུ་བྲིས་ཀྱང་རུང༌། །སྦྱིན་སྲེག་མངོན་པར་དབང་བསྐུར་ནས། །ཞེས་བྱ་བ་ནི་བཟླས་ཤིང་ཞེས་པ་བཟླས་བརྗོད་དང༌། མཆོད་རྟེན་ཕྲེང་བའི་གཟུགས་སུ་བྱ། །ས་ཚ་དང༌། སྦྱིན་སྲེག་བྱ་བ་མིང་བསྲེག་པ་དང༌། སྦྱིན་སྲེག་མངོན་
པར་དབང་བསྐུར་ན། །ཞེས་བྱ་བ་མཆོད་རྟེན་གྱི་དབུས་སུ་གཞུག་པ་དང༌། ཁྱིམ་དུ་བཞག་པ་དང༌། དབང་བསྐུར་བ་ཉིད་དང་བདུན་རོ་མེད་ཀྱང་འགྲུབ་པའོ་ཞེས་བྱ་བར་སྟོན་ཏོ། །སྔ་མ་བཞིན་དུ་འབྲས་བུ་ནི། །གདོན་མི་ཟ་བར་བདེ་འགྲོར་སྐྱེ། །ཞེས་བྱའོ། །གཞན་ཡང་ཐལ་བ་ཉུངས་ཀར་བྱེ་མ་སོགས། །ཞེས་བྱ་བ་ཐལ་བ་དང་ཉུངས་ཀར་དང༌། བྱེ་མ་དང་མེ་ཏོག་ལ། རང་གི་མིང་སྨོས་སྔགས་བཏབ་ནས། །ཞེས་བྱ་བ་ལ་མིང་ནས་ཐོག་མར་སྨོས་ཏེ་རོ་ལ་སོགས་བ་ལ་བྱ་བ་བྱས་ནས། སོང་ནས་ཀྱང་ཕྱིའི་རྒྱ་མཚོར་འབབ་པའི་ཆུ་ཀླུང་དུ་དོར་ཞེས་བྱ་བའི་དོན་ཏོ། །དེའི་འབྲས་བུ། དེ་ལྟར་ན་འང་སྡིག་ཅན་ཡང༌། །ངན་འགྲོ་ལས་ནི་ཐར་འགྱུར་ན། །ཞེས་བྱ་བ་དམན་པ་ཡང་ཐར་བར་གསུངས་ན་ཞེས་བྱ་བའི་དོན་ཏོ། །མཆོག་རྣམས་སྨོས་ཀྱང་ཅི་ཞིག་དགོས། །དགེ་བའི་མཆོག་ནི་བསྐྱེད་པ་དང༌། །ཞེས་བྱ་བ་ལ་སོགས་པ་གསུངས་སོ། །སྡིག་པ་ངེས་པ་ཅན་རྣམས་ནི་ཐབས་ཅིས་ཀྱང་མི་གྲོལ་བར་དགེ་བའི་རྩ་བ་མ་བསྐྱེད་པར་ཞེས་བྱ་བ་ནས། བདེ་གཤེགས་རྒྱལ་བ་ཉིད་ཀྱིས་གསུངས། །ཞེས་བྱ་བའི་བར་དུ་སྟོན་ཏོ། །དེ་ལྟར་ཐབས་བརྒྱད་སྟོན་ཏོ། །ཐམས་ཅད་ཀྱང་ཐབས་སླ་བས་གྲོལ་བར་འགྱུར་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་བརྒྱ་བྱིན་ལ་སོགས་པས་བཀའ་སྩལ་པ་བདེན་པ་ཉིད་དུ་བྱས་ནས་ནོར་བུ་དྲི་མ་མེད་པ་ཐར་ཏེ་དགའ་ལྡན་དུ་སྐྱེས་ནས་གྲགས་པ་ཆེན་པོའི་ལྷ་དང་བཅས་བས་དེ་བཞིན་གཤེགས་པ་ལ་ཚེ་འདི་ཉིད་ལ་མཆོད་པའི་ཕྱིར་སེམས་བསྐྱེད་དེ། ལྷ་རྫས་སྣ་ཚོགས་ཀྱིས་དགའ་བའི་ཚལ་ཀུན་དུ་གང་བར་བྱས་སོ། །ལྷའི་བུ་ནི་མ་མཐོང་ལ་ལྷ་རྫས་མཐོང་བ་རྣམས་ཀྱིས་ཡ་མཚན་ཆེ་བར་གྱུར་ནས། འདི་ཅི་ལགས་ཞེས་ངོ་མཚར་ཆེ་བར་ཞུས་པ་དང༌། བཀའ་སྩལ་པ་དྲི་མ་མེད་པའི་འོད་ཡིན་ནོ། །ཞུས་པ་ངོ་མཚར་ཆེའོ། །ལྷ་རྣམས་ཀྱིས་ཀྱང་ཞུས་པ། དཀོན་མཆོག་ལ་ཁྱད་པར་ཅན་དུ་བསྔགས་ནས་ལྟ་བར་འཚལ་ལོ། །ཞེས་གསོལ་བ་བཏབ་ནས་འོད་ཀྱིས་སྙིང་བསྐུལ་ཏེ་འོད་མི་སྣང་བར་གྱུར་ནས། རྫུ་འཕྲུལ་ཆེན་པོས་དགའ་བའི་ཚལ་སྣང་བར་བྱས་ནས། བླ་མ་གཉིས་མ་གཏོགས་པ་ཟིལ་གྱིས་མནན་ནས་ཆེད་དུ་བརྗོད་དོ། །པདྨ་སྒྲ་སྙན་པ་འབྱིན་པ་བྱུང་བ་དང་ཡ་མཚན་སྐྱེས་ཏེ། བསམ་ཡས་བརྗོད་ནས་ལྟ་
བར་འཚལ་ཞུས་པ་དང་བླ་མའི་འོད་ཀྱིས་སྙིང་བསྐུལ་ཏེ་འོད་མི་སྣང་བར་གྱུར་ནས། བླ་མ་གཉིས་མ་གཏོགས་པ་ཐམས་ཅད་གཡོས་ཏེ་ངོ་མཚར་ཆེ་བའི་དོན་ཞུས་པ། ཁྱད་པར་ལྔའི་མཆོད་པས་མཆོད་དེ་མི་སྣང་བར་གྱུར་ཏེ་ཞེས་བྱ་བ་སྟེ། ནོར་བུ་དྲི་མ་མེད་པ་དགའ་ལྡན་དུ་སྐྱེས་པ་བསྟན་ཏོ། །དེ་ནས་བརྒྱ་བྱིན་དང་ཞེས་བྱ་བ་ལ་སོགས་ནས་བག་ཡོད་བར་སྒྲུབས་ཤིག་ཅེས་བྱ་བའི་བར་གྱིས་ཐམས་ཅད་ལ་ཕན་པའི་ཕྱིར་རྒྱུད་གཏད་པ་བསྟན། དེ་ལྟར་རྩ་བའི་རྒྱུད་ཕྱག་རྒྱ་ཆེན་པོ་དང་དེ་བཞིན་གཤེགས་པའི་རིགས་ལོངས་སྤྱོད་རྫོགས་པའི་སྐུ་ལ་སོགས་པའི་གཙོ་བོར་གྱུར་པ་བསྟན་པའོ། །ཅིའི་ཕྱིར་རྩ་བའི་རྒྱུད་དུ་མཛད་ཅེ་ན། ལྷ་ཐམས་ཅད་ཀྱི་སྐུ་དང༌། གསུང་དང༌། ཐུགས་དང༌། ཕྲིན་ལས་དང༌། ཡོན་ཏན་དང་ལྔ། རྩ་བར་དང་པོར་སྟོན་པ་དང་ལྡན་པས་ན་རྩ་བའི་རྒྱུད་ཅེས་བྱའོ། །དེ་ཡང་ཇི་སྐད་དུ། གསང་བ་ལྔ་ལྡན་གང་ཡིན་པ། །དང་པོ་ཉིད་དུ་བསྟན་པས་ན། །དེ་ནི་རྩ་བའི་རྒྱུད་ཅེས་བྱ། །ཞེས་གསུངས་པའི་ཕྱིར་རོ། །ཅིའི་ཕྱིར་རྒྱུད་ཅེས་བརྗོད་ཅེ་ན། །རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །ཞེས་གསུངས་པས་རྒྱུན་ཆགས་པའམ། འཁོར་བའི་ཕྱིར་རྒྱུད་ཅེས་བྱའོ། །དེ་ལྟར་རྩ་བའི་རྒྱུད་བསྟན་ནས། དེ་ནི་དེ་ནས་ཞེས་བྱ་བ་ལ་སོགས་པས་རྒྱུད་ཕྱི་མ་སྟོན་ཏེ། ཅིའི་ཕྱིར་ཕྱི་མ་ཞེས་བྱ་ཞེ་ན། སྔ་མ་ལས་བྱུང་ཞིང་དེ་ཉིད་གསུང་བ་སྤས་པ་ཤེས་པའི་ཕྱིར་རྒྱུད་ཕྱི་མ་ཞེས་བརྗོད་པར་བྱའོ། །དེ་ཡང་ཇི་སྐད་དུ། ཕྱི་མ་སྔ་མ་ལས་བྱུང་སྟེ། །དེ་ཉིད་གསུངས་པ་སྦས་ཤེས་པ། །རྒྱུད་ནི་ཕྱི་མར་བརྗོད་པ་ཡིན། །ཞེས་གསུངས་པའི་ཕྱིར་རོ། །འདིས་རྒྱུད་ཕྱི་མའི་ཕྱི་མ་ནི་དགའ་བའི་ཚལ་འདི་ཉིད་དུ་གསུངས་པར་ཤེས་པར་བྱ་སྟེ། མིའི་ཡུལ་དུ་བབ་པ་ལ་སོགས་པ་ལ་ཁྱད་པར་མ་བཤད་པ་དང༌། ཕྱིས་འཛམ་བུ་གླིང་གི་རིས་འདི་ཉིད་ན་ཞེས་གསུངས་པ་ནི། རི་རབ་ཀྱི་ལྷོ་ཕྱོགས་ལ་དགོངས་པ་དང༌། ཡང་ཕྱིས་མིང་དང་རྗེས་ཡི་རང་ངོ་ཞེས་བྱ་བ་གསུངས་པ་ནི། རྫུ་འཕྲུལ་གྱི་མངོན་པར་ཤེས་པ་དང་ལྡན་པ་ཡིན་པས་སྤྲུལ་པའི་སྐུ་མཐོང་བའི་ཕྱིར་འགལ་བ་མེད་པ་ཁོ་ནའོ། །ལ་ལ་དག་གནས་གང་དུ་འཆད་པ་དེ་དག་གིས་བཤད་པའི་ལུང་བརྗོད་དགོས་ཏེ། ལུང་མེད་པ་ཁོ་ན་ཉིད་ཡིན་ཏེ། དེ་ཉིད་ཀྱིས་གང་ནས་ཀྱང་མ་བཤད་པའི་ཕྱིར་རོ། །རིགས་པ་ནི་
ཤིན་ཏུ་ལྐོག་ཏུ་གྱུར་བའི་ཕྱིར་མི་འཐད་པ་ཉིད་དོ། །དེ་ནས་ཞེས་བྱ་བ་ནི་དང་པོའི་སྦྱོར་བའི་རྗེས་ཐོགས་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་རྩ་བའི་རྒྱུད་དུ་བཤད་པ་ལས་ཕྱག་ན་རྡོ་རྗེས་སྔར་བཤད་པའི་ཡོན་ཏན་གྱི་ཁྱད་པར་དང་བཅས་པའོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནི། ཡེ་ཤེས་ཀྱི་རྡོ་རྗེ་རྩེ་ལྔ་པ་ཕྱག་གི་མཐིལ་ན་གནས་པ་བཞིན་དུ་འཛིན་པའམ་ཕྱག་ན་རྡོ་རྗེ་ཉིད་འཛིན་པས་དེ་སྐད་ཅེས་བྱ་སྟེ་ངེས་སོ། །འདི་གསུངས་སོ་ཞེས་བྱ་བར་སྦྱར་རོ། །ཇི་ལྟར་གསུངས་ཤེ་ན། བཅོམ་ལྡན་འདས་ཀྱི་མཐུས་ཞེས་བྱ་བ་གསུངས་ཏེ་སངས་རྒྱས་ཀྱི་བྱིན་གྱི་རླབས་ཀྱིས་སོ། །ཅི་ཞིག་གསུངས་ཤེ་ན། བརྟག་པའི་རྒྱལ་པོ་ཕྱི་མ་འདི། །ཞེས་བྱ་བ་སྨོས་ཏེ། བརྟག་པའི་རྒྱལ་པོ་ཕ་རོལ་ཏུ་ཕྱིན་པ་དྲུག་བྱང་ཆུབ་ཀྱི་སེམས་དང་བཅས་བ་ཡིན་ལ་དེ་སྟོན་བ་ལ་ཡང་དེ་སྐད་ཅེས་བྱ་སྟེ། ཇི་སྐད་དུ། སེམས་ཅན་ཀུན་གྱི་དོན་བྱའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །ཕ་རོལ་ཕྱིན་དྲུག་སྤྱོད་བདག །བརྟན་པ་རྟོགས་པ་ཉིད་ཡིན་ནོ། །ཞེས་གསུངས་པའི་ཕྱིར་རོ། །བརྟག་པ་ཕྱི་མ་འདི་ཞེས་བྱ་བ་ནི་སྔར་བཤད་པ་འདི་ལྟ་བུ་འདིའོ། །གསུངས་སོ་ཞེས་བྱ་བ་ནི་སངས་རྒྱས་ཀྱི་མཐུས་བཀའ་སྩལ་ཏོ། །འདིས་ནི་ཕྱག་ན་རྡོ་རྗེ་བཤད་བས། དེ་བཞིན་གཤེགས་པ་ཉིད་ཀྱིས་གསུངས་པའི་ཕྱིར་བཀའ་ཉིད་དུ་རྣམ་པར་གཞག་པ་གསུངས་སོ། །གདུལ་བྱ་རྣམས་ཀྱི་བསམ་བ་ལ་དགོངས་ནས་དེ་སྐད་ཅེས་བཤད་ཀྱིས་དོན་ལ་ཐ་དད་པ་ཡོད་པ་མ་ཡིན་ནོ། །དཔའ་བོ་གདན་ལ་བཞེངས་ནས་ཀྱང༌། །དགྱེས་ཤིང་རྡོ་རྗེ་གསོར་ནས་ནི། །ཤཱཀྱའི་བདག་པོ་དགྱེས་མཛད་པ། །ཐུབ་པའི་གཙོ་ལ་ཕྱག་བཙལ་ནས། །ཞེས་བྱ་བ་ནི་གཉིས་སུ་མེད་པའི་དཔའ་བོ་གཙོ་བོ་ལ་གུས་པས་ཟླ་བ་དང་པདྨའི་གདན་རང་དང་འཚམ་པ་ལས་བཞེངས་ནས་བྱིན་གྱིས་བརླབས་པས་དགྱེས་ཤིང་བགེགས་ཞི་བ་དང༌། བར་ཆོད་ཀྱིས་མི་ཚུགས་པར་བྱ་བའི་ཕྱིར་རྡོ་རྗེ་བསོར་ནས་ཀྱང༌། ཤཱཀྱའི་བདག་པོ་སེམས་ཅན་གྱི་དོན་ལ་དགྱེས་པར་མཛད་པ་ཐུབ་པའི་གཙོལ་ཕྱག་འཚལ་ནས་ཞེས་བྱ་བའི་དོན་ཏོ། །འདིས་ནི་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་ཀྱང་བགེགས་ཞི་བར་བྱས་ནས་གནང་བ་ཐོབ་ནས་འཇུག་པ་བྱའོ་ཞེས་བྱ་བའི་དོན་ཏོ། །སྒྲིབ་པ་ཐམས་
ཅད་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ནི་སྒྲིབ་པ་ཐམས་ཅད་དེ་མཆོད་པའི་སྒྲིབ་བ་ལ་སོགས་པའོ། །རྣམ་པར་དག་པ་རྡོ་རྗེ་ཞེས་བྱ་བ་ཐབས་དང་ཤེས་རབ་ཀྱི་རང་བཞིན་ནོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱ་ལ། དེ་ལ་སྙོམས་པར་ཞུགས་པ་ནི་མངོན་དུ་མཛད་པ་སྟེ། དེ་ལྟ་བུར་གྱུར་ནས་ཞེས་བྱ་བའི་ཐ་ཚིག་གོ །འདིས་ནི་དཀྱིལ་འཁོར་རྒྱལ་མཆོག་བསྒོམ་པས་ཟླ་བའི་དབུས་སུ་ཐབས་དང་ཤེས་རབ་ཀྱི་བདག་ཉིད་དུ་ཞུགས་ནས་གཙོ་བོ་བསྐྱེད་དེ། ཕྱག་རྒྱ་བརྗོད་པ་དང་སྔགས་བརྗོད་པ་དང་བཅས་པ་བསྟན་པའོ། །ངན་སོང་ཐམས་ཅད་རྣམ་པར་སྦྱོང་བའི་རང་གི་སྙིང་བོའི་འདི་ཐུགས་ཀ་ནས་ཕྱུང་ངོ་ཞེས་བྱ་བ་ལ། ངན་སོང་ཐམས་ཅད་རྣམ་པར་སྦྱོང་བ་ནི་འདིར་གཙུག་ཏོར་རོ། །རང་གི་སྙིང་བོ་ཞེས་བྱ་བ་ནི་དེ་ཁོ་ན་བསྐྱེད་པ་ལ་བྱའོ། །འདི་ཉིད་ཀྱི་ཐུགས་ཀ་ནས་ཕྱུང་ངོ་ཞེས་བྱ་བ་ནི་སྒྲའི་རང་བཞིན་འོག་ནས་འབྱུང་བ་འདི་ཉིད་ཀྱི་ཐུགས་ངེས་པ་ཅན་ཡེ་ཤེས་ལས་བཏོན་ཞེས་བྱ་བའི་དོན་ཏོ། །འདིས་ནི་སྒོམ་པ་བོ་རྣམས་ཀྱིས་གཙོ་བོའི་ཐུགས་ཀར་ཟླ་བ་ལ་སྔགས་བཀོད་དེ་འཁོར་ཐམས་ཅད་བསྐྱེད་དོ། །སྟོན་པའི་སྔགས་ཉིད་བཛྲ་ཧཱུཾ་ཕཊ་ཅེས་བྱ་བ་ནི་རྡོ་རྗེ་གཙུག་གིའོ། །ཨོཾ་སརྦྦ་པཱ་པཾ་ད་ཧ་ན་བཛྲ་ཧཱུཾ་ཕཊ་ཅེས་བྱ་བ་ནས་བརྩམས་ནས། ཨོཾ་མ་ཏེ་སརྦྦ་ཏིཪྻ་ཀ་ག་ཏི་ཧེ་ཧཱུཾ་ཕཊ་ཅེས་བྱ་བ་བཅོ་ལྔས་བཏེག་པའི་སྔགས་སྟོན་ཏོ། །དེ་ནས་དེ་དག་གི་ཡོ་བྱད་རྣམས་བཤད་དོ་ཞེས་བྱ་བ་ནི། དེ་དག་གི་ཞེས་པ་དཀྱིལ་འཁོར་གྱི་ལྷ་རྣམས་ཀྱིའོ། །ཡོ་བྱད་རྣམས་ཞེས་པ་གསོལ་ཀ་བ་དང་བྲན་ལ་སོགས་པ་རྣམས་ཀྱིའོ། །བཤད་དོ་ཞེས་བྱ་བ་བཟླས་པའི་སྔགས་རྣམས་གསུངས་སོ། །དེ་ཉིད་ཨོཾ་སརྦྦ་ཨ་བ་ཡ་ཞེས་བྱ་བ་ནས་ཧཱུཾ་ཕཊ་ཅེས་བྱ་བས་སྟོན་ཏོ། །དཀྱིལ་འཁོར་གྱི་ལྷ་རྣམས་བསྐྱེད་པ་ནི། རྒྱུད་གཞན་དང་འདི་ཉིད་ཀྱི་རྩ་བའི་རྒྱུད་དང༌། ཕྱི་མའི་བདེ་བ་ཆེན་བོའི་བཤད་པ་ལས་ཤེས་པར་བྱ་སྟེ། ར་ཏོནྟྟ་མ་ཏྲཾ་པདྨོཏྟ་མ་ཧྲཱིཿ། བི་ཤོཏྟ་ཨ་ཞེས་བྱ་བ་ལ་སོགས་པ་རྣམས་ཀྱང༌། ན་མོ་བྷ་ག་ཝ་ཏེ་སརྦྦ་དུ་རྒ་ཏི་ཞེས་བྱ་བ་ལ་སོགས་བ་རྩ་བའི་རིག་པ་དང་བཅས་པའོ། །དེས་ནི་འདི་སྐད་དུ་སྟོན་ཏེ། དཀྱིལ་འཁོར་རྒྱལ་མཆོག་སྒོམ་པོ་རྣམས་ཀྱིས་ནི་ཤཱཀྱ་ཐུབ་པའི་ཐུགས་ཀར་ཐུན་མོང་དང་ཁྱད་པར་གྱི་སྔགས་བཀོད་དེ། རྡོ་རྗེ་གཙུག་
ཏོར་ནས་བརྩམས་ནས་རྡོ་རྗེ་དྲིལ་བུའི་བར་དུ་བསྐྱེད་ཅེས་བྱ་བའི་དོན་ཏོ། །སྦྲུལ་པའི་དུས་སུ་མཐོང་བའི་སྐལ་བ་དང་ལྡན་པ་རྣམས་ལ་དཀྱིལ་འཁོར་གྱི་ལྷ་རྣམས་ཀྱི་སྨོན་ལམ་དང་ཐུགས་རྗེའི་མཐུས་ཇི་ལྟར་འདོད་པ་ལྟར་སྣང་བ་ཡིན་ནོ། །དེ་ནས་བསྡུ་ཞིང་བྱིན་གྱིས་བརླབ་པ་སྔོན་དུ་འགྲོ་བ་ནས་བརྩམས་ཏེ། ལས་ཀྱི་རྒྱལ་པོ་མཆོག་ནི་སྔ་མ་བཞིན་དུ་ཤེས་པར་བྱའོ། །ཏིང་ངེ་འཛིན་རྣམ་པ་གསུམ་བསྟན་ཟིན་ཏོ། །ཐབས་དེ་ལ་འདི་ཉིད་དུ་དབང་དང་དམ་ཚིག་ཐོབ་པས་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་དང་སློབ་མ་གཞུག་པ་ལ་སོགས་པའི་ཆོ་ག་སྟོན་ཏོ། །དེ་ནས་ཞེས་བྱ་བ་ནི་སྔོན་དུ་བསྙེན་པའི་རྗེས་ཐོགས་ལའོ། །གཞན་ཡང་ས་བཟུང་བ་དང་ལྷག་པར་གནས་པ་དང་བཅས་པ་ཡང་དེ་ནས་ཞེས་བྱ་བས་སྟོན་ཏོ། །དཀྱིལ་འཁོར་བཤད་དེ་ཞེས་བྱ་བ་ནི་ཐིག་གདབ་པ་དང་རྡུལ་ཚོན་བྲི་བའི་གཟུགས་ཅན་གྱི་དཀྱིལ་འཁོར་བཤད་ཅེས་བྱ་བའི་དོན་ཏོ། །འཁོར་ལོ་འདྲ་བའི་དཀྱིལ་འཁོར་ལ། །ཞེས་བྱ་བ་ནི་དཀྱིལ་འཁོར་གྱི་གནས་གྲུ་བཞི་པ། སྒོ་བཞི་པ་རྟ་བབས་དང་བཅས་པ་ཁ་ཁྱེར་དང་ལྡན་པ་ལ་སོགས་པ་ཕྱིའི་དཀྱིལ་འཁོར་བྱས་ལ་ཞེས་བྱ་བའི་དོན་ཏོ། །འདིས་ནི། དཀྱིལ་འཁོར་ལ་ནི་འཁོར་ལོ་བཤད། །ཅེས་བྱ་བ་ལེགས་པར་འགྱུར་རོ། །དེའི་ནང་དུ་ཇི་ལྟར་བྲི་ཞེ་ན། ཤིན་ཏུ་མཛེས་པའི་རྩིབས་བརྒྱད་ཅན། །ལྟེ་བར་བཅས་ཤིང་རྩིབས་རྟེན་ཅན། །ནང་གི་རིམ་བ་བྲིས་ནས་ནི། །ཞེས་བྱ་བ་གསུངས་ཏེ། རྩིབས་བརྒྱད་དང་ལྡན་པ་དང་ལྟེ་བ་དང་རྩིབས་རྟེན་དང་སུམ་རིམ་དུ་བྲིས་ནས་རྡོ་རྗེ་ཕྲེང་བས་ཡོངས་སུ་བསྐོར་བ་བྲི་ཞེས་བྱ་བའི་དོན་ཏོ། །དེའི་ནང་དུ་ཅི་ཞིག་དགོད་ཅེ་ན། ལྟེ་བའི་ནང་དུ་ཤཱཀྱ་ཡི། །དཔང་པོ་ཐུབ་པ་བྲི་བར་བྱ། །ཕྱག་ན་རྡོ་རྗེ་སྟོབས་ཆེན་ནི། །དཔའ་བོ་དེ་ཡི་སྤྱན་སྔར་བྲི། །རྒྱབ་ཏུ་འཁོར་ལོས་སྒྱུར་བ་བྲི། །གཡས་སུ་རྒྱལ་པོ་གཙུག་ཏོར་ལ། །གཡོན་པར་རྣམ་པར་རྒྱལ་བ་བྲི། །གཟི་བརྗིད་ཕུང་པོ་མེ་ཡི་ཕྱོགས། །དབང་པོའི་ཕྱོགས་སུ་གདུགས་དཀར་པོ། །རྣམ་པར་འཐོར་བ་རླུང་གི་ཕྱོགས། །རྣམ་པར་འཇོམས་བ་ནྲི་ཏིར་བྲི། །ཞེས་བྱ་བ་གསུངས་ཏེ་ལྟེ་བའི་དབུས་པདྨའི་ལྟེ་བ་ལ་ཤཱཀྱ་ཐུབ་པ། པདྨ་རེ་རེ་བོར་བའི་གཞི་ལ་རྡོ་རྗེ་ལ་སོགས་པའི་ཤར་ཕྱོགས་སུ་རྡོ་རྗེ་
གཙུག་ཏོར། ལྷོ་ཕྱོགས་སུ་རྒྱལ་བའི་གཙུག་ཏོར། ནུབ་ཕྱོགས་སུ་པདྨའི་གཙུག་ཏོར། བྱང་ཕྱོགས་སུ་སྣ་ཚོགས་གཙུག་ཏོར། ཤར་ལྷོ་མཚམས་སུ་གཙུག་ཏོར་གཟི་བརྗིད། ལྷོ་ནུབ་མཚམས་སུ་གཙུག་ཏོར་རྒྱལ་མཚན། ནུབ་བྱང་དུ་གཙུག་ཏོར་རྣོན་པོ། བྱང་ཤར་མཚམས་སུ་གཙུག་ཏོར་གདུགས་དཀར་བྲི་བར་བྱའོ། །འཁོར་ལོ་འདྲ་བའི་དཀྱིལ་འཁོར་ལ། །ཞེས་སྔར་བཤད་དེ། བཤད་པ་ཕྱི་རོལ་བྲི་བྱ་སྟེ། །གྲུ་བཞི་པ་ལ་སྒོ་བཞི་པ། །སེང་གེ་རྟ་བབས་བརྒྱན་པར་བྱ། །ཞེས་བྱ་བ་གསུངས་པ་སྟེ། ཕྱི་རོལ་གྱི་གནས་གྲུ་བཞི་དང་སྒོ་བཞི་དང་སེང་གེ་དང་གླང་པོ་ཆེ་དང་རྟ་བབས་དང་ཁ་ཁྱེར་ལ་སོགས་པས་བརྒྱན་པར་བྱའོ་ཞེས་བྱ་བའི་དོན་ཏོ། །ཕྱི་རོལ་གྱི་གནས་རྣམས་སུ་དགོད་པ་ནི། དཔའ་བོ་ལྕགས་ཀྱུ་ཞགས་པ་དང༌། །ལྕགས་སྒྲོག་དྲིལ་བུ་སྙན་རྣམས་གཞག །གྲྭ་ཡི་ཕྱོགས་ནི་ཐམས་ཅད་དུ། །བདུག་པ་ལ་སོགས་བྲི་བར་བྱ། །ཞེས་བྱ་བ་གསུངས་ཏེ་དཔའ་བོས་ཤར་ཕྱོགས་ཀྱི་སྒོར་ལྕགས་ཀྱུ། ལྷོར་ཞགས་པ། ནུབ་ཏུ་ལྕགས་སྒྲོག །བྱང་དུ་དྲིལ་བུ་རྣམས་གཞག །ནང་གི་གྲྭའི་ཕྱོགས་མཚམས་སུ་ནི་ལཱ་སྱེ་དང་ཕྲེང་བ་དང་གླུ་མཁན་མ་དང་གར་མཁན་མ་དང་བཞི་གཞག་པར་བྱའོ། །ཕྱིའི་གྲྭ་བཞིར་བདུག་པ་མ་དང་མེ་ཏོག་མ་དང་མར་མེ་མ་དང་དྲི་ཆབ་མ་རྣམས་ཤར་ལྷོ་མཚམས་ནས་བརྩམས་ཏེ་བྲི་བར་བྱའོ། །ཁྱམས་ལ། བྱམས་པ་ལ་སོགས་བྲི་བར་བྱ། །ཞེས་བྱ་བའི་དོན་ཏོ། །དེ་ལྟར་དཀྱིལ་འཁོར་ལེགས་བར་བཀོད་ནས་ཆད་པ་དང་ལྷག་པ་ཞི་བར་བྱ་སྟེ་དཀྱིལ་འཁོར་དུ་ཞུགས་ལ་མེ་ཏོག་གི་ཕྲེང་བ་དོར་ཏེ་སྒོ་བཞི་ཕྱེ་ལ། ཁྲུས་བྱས་ཤིང་ལུས་དྲི་ཞིམ་པོ་ལ་སོགས་པས་བྱུགས་ནས་རྒྱན་སྣ་ཚོགས་བས་བརྒྱན་ཏེ། ལྕེ་དང་ལག་པ་བྱིན་གྱིས་བརླབས་ནས་སྦྱོར་བ་དང་པོ་དང་དཀྱིལ་འཁོར་རྒྱལ་པོ་མཆོག་དང་ལས་ཀྱི་རྒྱལ་པོ་མཆོག་དང་སྒོ་དབྱེ་བ་རྣམས་སོ། །དེ་ནས་དྲི་ཞིམ་ལ་སོགས་པ། །རང་གི་ལུས་ལ་བསྐུས་ནས་ཀྱང༌། །རྡོ་རྗེ་འཛིན་མས་ཞུགས་ནས་ནི། །ཞེས་བྱ་བ་ཀྱང་དུ་བསྐུར་བས་ཕལ་ཆེར་སྟོན་ཏོ། །དེ་ནས་གཙོ་བོ་བདག་སྦྱོར་བས། །ཨོཾ་ཛཿ་ཧཱུཾ་བཾ་ཧོཿ་བྷ་ག་ཝཱན་ཨེ་ཧྱེ་ཧི་མ་ཧཱ་ཀ་རུ་ཎི་ཀ་དྲྀ་ཤྱ་ཧོ་ས་མ་ཡ་སཏྭཾ་ཞེས་བྱ་བ་ལས་ལྷ་ཐམས་ཅད་སྤྱན་དྲང་ངོ་ཞེས་བྱ་བ་ནི་བསྡུའོ་ཞེས་བྱ་བའི་དོན་ཏོ། །དེ་ནས་གཤེགས་པར་མོས་པ་བསྐྱེད་དེ་ཞེས་བྱ་བ་ནི་ལྕགས་ཀྱུ་ལ་སོགས་པས་ལས་བྱ་ཞིང་བགེགས་བསལ་བ་དང༌།
སྒོ་བཅད་པ་དང༌། ར་བ་དང༌། དྲ་བ་དང༌། སྲུང་བ་དང༌། དེ་བརྟན་པར་བྱ་བ་དང༌། ཕྱག་རྒྱ་བཞིས་རྒྱས་གདབ་པ་དང༌། དབང་བསྐུར་བར་མོས་པ་བསྐྱེད་དེ་མཆོད་པ་བྱས་ནས་ཞེས་བྱ་བ་ནི། བཟླས་བརྗོད་ཀྱི་རྗེས་ཐོགས་ལ་མཆོད་པ་སྣ་ཚོགས་ཀྱིས་མཆོད་པ་དང༌། གཏོར་མ་དང༌། སྦྱིན་སྲེག་དང་གནང་བ་ནོད་པར་བྱས་ལ། དེ་ནས་སློབ་མ་གཞུག་པའི་བྱ་བ་བྱའོ་ཞེས་བྱ་བའི་དོན་ཏོ། །དེ་བཞིན་དུ་བཅུག་སྟེ་དབང་བསྐུར་ན་ཞེས་བྱ་བ་ནི་སྔ་མ་བཞིན་དུ་དཀྱིལ་འཁོར་དུ་བཅུག་ཅིང་དབང་ཉི་ཤུ་རྩ་གཅིག་གིས་བསྐུར་ན་ཞེས་བྱ་བའི་དོན་ཏོ། །དེའི་ཕན་ཡོན་ངན་སོང་ཐམས་ཅད་ལས་རྣམ་པར་གྲོལ་ཏེ་བདེ་འགྲོ་མཐོ་རིས་ཀྱི་འཇིག་རྟེན་དང་གོང་ནས་གོང་དུས་རྣམས་སུ་སྐྱེ་བར་འགྱུར་རོ། །དངོས་གྲུབ་ཐམས་ཅད་ཀྱང་འགྲུབ་པར་འགྱུར་རོ། །སངས་རྒྱས་སུ་ཡང་གདོན་མི་ཟ་བར་འགྲུབ་པར་འགྱུར་རོ། །སྔ་མ་བཞིན་དུ་ལས་ཐམས་ཅད་བྱེད་ཅིང་ཐམས་ཅད་ལ་ཐོགས་པ་མེད་པར་འགྱུར་རོ། །བྱ་བ་བྱས་པས་རིམས་ནད་ཐམས་ཅད་དང་གདོན་གདུག་པ་ཅན་ལ་སོགས་པ་ཐམས་ཅད་ལས་ཐར་བར་འགྱུར་རོ། །ཕྱག་ན་རྡོ་རྗེའི་ཧཱུཾ་ཞེས་བྱ་བས་ལས་ཐམས་ཅད་བྱེད་པར་འགྱུར་རོ་ཞེས་བྱ་བ་ནི། དབང་བསྐུར་བ་ཙམ་གྱིས་ངན་སོང་ཐམས་ཅད་ལས་ཐར་ཞིང་བདེ་འགྲོར་སྐྱེ་བ་དང༌། དབང་བསྐུར་ནས་བསྒྲུབས་པས་མོས་པ་སྤྱོད་པ་ལ་སོགས་པས་བཅུ་གཉིས་སུ་གོང་ནས་གོང་དུ་འགྲོ་བ་དང༌། འཇིག་རྟེན་པའི་དངོས་གྲུབ་དང་སངས་རྒྱས་སུ་འགྱུར་བ་དང་སྔར་བཤད་པ་བཞིན་དུ་ཞི་བ་ལ་སོགས་བའི་ལས་བྱེད་པ་དང༌། ལས་ཕྲ་མོ་ཐམས་ཅད་ལ་སྦྱར་བ་ཙམ་གྱིས་འགྲུབ་པ་དང༌། བྱེ་མ་དང་ཡུངས་ཀར་ལ་སོགས་པས་བྱབས་བས་པས་རིམས་དང་གདོན་དང་གདུག་པ་ཐམས་ཅད་ལས་ཐར་པར་འགྱུར་བ་དང༌། དབང་བསྐུར་བ་དེ་ལ་ཕྱག་ན་རྡོ་རྗེ་དེའི་དྲུང་དུ་གནས་པས་ཐམས་ཅད་བྱེད་པར་འགྱུར་རོ་ཞེས་བྱ་བའི་དོན་ཏོ། །བརྟག་པ་གཞན་གྱི་ཚོགས་ཀྱང་ལས་ཐམས་ཅད་འགྲུབ་པར་འགྱུར་རོ་ཞེས་བྱ་བ་ནི་བྱ་བ་དང་སྤྱོད་པ་དང་རྣལ་འབྱོར་གྱི་རྒྱུད་བརྟག་པ་གཞན་གྱི་ཆོ་ག་ལས་ཀྱང་ཞེས་བྱ་བ་ནི་སྔར་ཀྲྀ་ཡར་བཤད་པའི་ལྷ་ལྔས་བསྐྱེད་པ་དང༌། སྙིང་པོ་ཚིག་ཙམ་གྱིས་བསྐྱེད་པ་དང་རྣལ་འབྱོར་གྱི་རྒྱུད་དུ་བཤད་པའི་མངོན་པར་བྱང་ཆུབ་པ་དང༌། སྙིང་པོ་ཚིག་ཙམ་གྱིས་བསྐྱེད་པ་ལ་སོགས་པའི་ཚོགས་ཀྱང་
ལས་ཐམས་ཅད་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་འདིའི་དབང་བསྐུར་བ་དང་དམ་ཚིག་ལ་མཆོག་ཏུ་གསུངས་སོ་ཞེས་བྱ་བའི་དོན་ཏོ། །ཐབས་སླ་བས་སྔ་མ་བཞིན་དུ་གྲོལ་བས་ལྷ་དང་ཀླུ་དང་གནོད་སྦྱིན་དང་སྲིན་པོ་ལ་སོགས་པ་ངན་སོང་གི་རྒྱུད་ཀྱི་དབང་དུ་གྱུར་པ་རྣམས་ཤི་བའི་རོའམ་གཟུགས་བརྙན་ནམ། མིང་ལ་སོགས་ཏེ་བཟླས་པ་དང་སྦྱིན་སྲེག་དང་དབང་རྣམས་ཀྱིས་སྔ་མ་བཞིན་དུ་ཞེས་བྱ་བ་ནི་ཐབས་སླ་བ་བརྒྱད་ཚན་གཉིས་པོ་རྣམས་ཀྱིས་ཡིན་ཏེ། བཟླས་པ་དང་པོ་ཞེས་བྱ་བ་ནི་བཟླས་བརྗོད་བྱ་བ་ཉིད་དང༌། ཆུ་ཀླུང་དུ་དོར་བ་དང་ཚ་ཚ་དང་གསུམ་བསྟན་ཏོ། །སྦྱིན་སྲེག་ཅེས་བྱ་བ་སྦྱིན་སྲེག་ཉིད་དང་སྦྱིན་སྲེག་ཆེན་པོ་དང་གཉིས་སོ། །དབང་ཞེས་བྱ་བ་དབང་བསྐུར་བ་ཉིད་དང༌། མཆོད་རྟེན་གྱི་དབུས་སུ་གཞག་པ་དང་དུར་དུ་བསྐྱལ་བ་དང་གསུམ་བསྟན་ཏོ། །ངན་སོང་ཐམས་ཅད་ཡོངས་སུ་གྲོལ་བར་བྱེད་དོ་ཞེས་བྱ་བ་ནི་དེ་རྣམས་ཀྱི་ཕན་ཡོན་ནོ། །དེ་ནས་དེ་རྣམས་སུ་ཞེས་བྱ་བ་ལ་སོགས་པས་རྒྱུད་གསུམ་ལས་གསུངས་པའི་ལྷ་རྣམས་རྒྱས་གདབ་བོ། །དེ་ནས་ཞེས་བྱ་བ་ནི་སྔ་མ་བཞིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སེང་གེའི་ལྟ་སྟངས་ཀྱིས་བཅོམ་ལྡན་འདས་ཀྱི་ཞལ་དུ་བལྟས་ཏེ་ཕྱག་བཙལ་ནས་འདི་སྐད་ཅེས་གསོལ་ཏེ་ཞེས་བྱ་བ་ནི་འཇིགས་པ་མེད་པའི་ཚུལ་གྱིས་བལྟས་ཏེ་བྱིན་གྱིས་བརླབ་པའི་ཕྱིར་ཕྱག་འཚལ་ནས་འོག་ནས་འབྱུང་བའི་དོན་ཞུས་པའོ། །བྱིན་གྱིས་བརླབ་ཕྱིར་གསོལ་བ་བཏབ་སྟེ་ཞུས་པའི་དོན་ཏོ། །བཅོམ་ལྡན་ཕྱག་རྒྱ་དམ་པ་ཡི། །མཚན་ཉིད་བདག་གིས་བཤད་པར་བྱ། །ཐུགས་རྗེས་བསྒྲལ་བའི་ཐུགས་མངའ་བའི། །རྒྱལ་བ་ཀུན་གྱིས་བྱིན་བརླབས་པ། །ཞེས་བྱ་བ་ཡིན་ཏེ་བཅོམ་ལྡན་འདས་སྐུ་གསུང་ཐུགས་དམ་པའི་ཕྱག་རྒྱས་བཅིངས་པའི་མཚན་ཉིད་བཤད་པར་བགྱི་བ་ལ། དམིགས་སུ་མེད་པ་ཐུགས་རྗེ་ཆེན་པོས་བསྐུལ་བའི་ཐུགས་དང་ལྡན་པ་ལ་རྒྱལ་བ་ཀུན་གྱི་ངོ་བོ་གནས་པ་ཁྱོད་ཀྱིས་བྱིན་གྱིས་རློབས་ཤིག་ཅེས་བྱ་བའི་དོན་ཏོ། །གསོལ་བ་བཏབ་ནས་བཤད་པ་དངོས། །མཉམ་པར་གཞག་པས་དཔྲལ་བར་ནི། །ཕྱག་འཚལ་བ་ཡི་ཐལ་མོ་སྦྱར། །སངས་རྒྱས་བདེ་གཤེགས་སྐྱེས་རྣམས་ཀྱིས། །ཕྱག་འཚལ་བ་ཡི་ཕྱག་རྒྱར་བཤད། །ཅེས་བྱ་བ་ནི་ལྷའི་རྣལ་འབྱོར་དང་
ལྡན་པས་དཔྲལ་བར་ཐལ་མོ་སྦྱར་ཞིང་ཕྱག་འཚལ་བའི་ཚུལ་དུ་བྱས་ན། དེ་བཞིན་གཤེགས་པའི་རིགས་རྣམས་ཀྱི་ཕྱག་འཚལ་བའི་ཕྱག་རྒྱར་བཤད་ཅེས་བྱ་བར་བསྟན་ཏོ། །རྣལ་འབྱོར་རིགས་པས་མགྲིན་ཕྱོགས་སུ། །ཐལ་མོ་སྙིང་གར་སྦྱར་བ་ནི། །རྟག་ཏུ་པདྨའི་རིགས་ཉིད་དུ། །པདྨའི་ཕྱག་རྒྱ་ཡིན་པར་བཤད། །ཅེས་བྱ་བ་ནི་ལྷའི་རྣལ་འབྱོར་དང་ལྡན་པས་མགྲིན་པའི་ཕྱོགས་སྙིང་གར་ཐལ་མོ་སྦྱར་ཏེ་ཕྱག་འཚལ་ན་པདྨའི་རིགས་ཀྱི་ཕྱག་རྒྱར་འགྱུར་རོ། །རྡོ་རྗེ་ཐལ་མོ་སྦྱར་ནས་ཀྱང༌། །སྙིང་གར་གུང་མོ་ཐལ་སྦྱར་བ། །རྡོ་རྗེ་རིགས་ཀྱི་ཕྱག་རྒྱ་འདི། །དམ་ཚིག་ཐམས་ཅད་འཛིན་བྱེད་པའོ། །ཞེས་བྱ་བ་ནི་ཐལ་མོ་སྦྱར་ནས་སྙིང་གར་གུང་མོའི་རྩེ་མོ་སྦྱར་བ་དང་ཕྱག་འཚལ་བ་ན་རྡོ་རྗེ་རིགས་ཀྱི་དམ་ཚིག་ཐམས་ཅད་འཛིན་པར་འགྱུར་རོ། །འདི་རྣམས་ཀྱི་རིགས་སུ་ངེས་པར་ཨོཾ་སརྦ་ཏ་ཐཱ་ག་ཏ་བཱ་ད་བནྡྷ་ནཾ་ཀ་རོ་མི་ཞེས་བྱ་བས་ཕྱག་འཚལ་བར་བྱའོ། །གཞན་ཡང་དེ་བཞིན་གཤེགས་པའི་ཁུ་ཚུར་གཡོན་པས་ཐལ་མོར་བྱས་ལ་གན་རྐྱལ་དུ་གཞག་པ་དེའི་སྟེང་དུ་གཡས་པ་བཞག་སྟེ་མཐེ་བོང་གཉིས་སྤྲད་ལ་ཞི་བའི་ལྟ་བས་བལྟ་བ་འདི་ནི་དེ་བཞིན་གཤེགས་པའི་རིགས་ཀྱི་སྟེ། ཀུན་རིག་དང་ངན་སོང་སྦྱོང་བའི་ཏིང་ངེ་འཛིན་གྱི་ཕྱག་རྒྱ་སྟེ་དམ་ཚིག་ཡིན་པར་བཤད་དོ་ཞེས་བྱ་བའི་ཕྱག་རྒྱ་ཉིད་དམ་ཚིག་སྟེ་མི་འདའ་བར་བྱེད་པས་སོ། །ཇི་སྐད་དུ། དེ་བཞིན་གཤེགས་པ་ཀུན་གྱིས་ཀྱང༌། །འདའ་བར་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་སུ་བསྒྲགས། །ཞེས་གསུངས་པའི་ཕྱིར་རོ། །དེ་ཉིད་ལས་བཟློག་སྟེ། ལྟ་འོག་བསྣོལ་ལ་མཐེ་བོང་དང་མཐེའུ་ཆུང་གཉིས་གཅིག་ལ་གཅིག་ལུ་གུ་རྒྱུད་ཀྱི་ཚུལ་དུ་བསྣོལ་ལ་སྙིང་གར་གཞག་པ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱ་ཞེས་བྱ་ལ་རྡོ་རྗེ་འཛིན་མ་དཔལ་གྱི་པདྨ་ལྟ་བུར་བྱ་བ་སྟེ་དམ་ཚིག་ཐོབ་པར་བྱེད་པའི་ཕྱག་རྒྱའོ། །དེ་བཞིན་གཤེགས་པའི་རིགས་ཀྱི་ཡང་འཇུག་པའི་ཕྱག་རྒྱ་ཡིན་ནོ། །ཐལ་མོ་རྫོགས་པར་སྦྱར་བ་ལས་མཐེ་བོང་དང་མཐེའུ་ཆུང་གཉིས་བསྙམས་ལ་ལྷག་མ་བརྐྱང་པའི་འདི་ནི་པདྨའི་རིགས་ཀྱི་པདྨའི་ཕྱག་རྒྱའོ་ཞེས་བྱ་བ་ནི་ཤཱཀྱ་ཐུབ་པའོ། །རྡོ་རེ་བསྡམས་པ་ལས་གུང་མོ་གཉིས་རྡོ་རྗེ་འདྲ་བར་བསྙམས་ལ་མཐེ་བོང་མཐེ་ཆུང་གཉིས་
བརྐྱང་བ་འདི་ནི། ཕྱག་ན་རྡོ་རྗེའི་ཕྱག་རྒྱའོ་ཞེས་བྱ་བ་རྡོ་རྗེ་གཙུག་ཏོར་དང་རྡོ་རྗེ་སེམས་དཔའི་དམ་ཚིག་གི་ཕྱག་རྒྱའོ། །དེ་ཉིད་ལས་མཐེ་བོང་དང་མཐེའུ་ཆུང་གཉིས་དེ་བཞིན་དུ་བྱས་ལ། མཛུབ་མོ་གཉིས་དང་སྲིན་ལག་པདྨོ་འདྲ་བར་བཀུག་པ་ནི་ངན་སོང་ཐམས་ཅད་ཡོངས་སུ་སྦྱོང་བའི་ཕྱག་རྒྱའོ་ཞེས་བྱ་བ་ནི་དམ་ཚིག་གི་ཕྱག་རྒྱའོ། །དེ་ཉིད་ལས་མཛུབ་མོ་དང་སྲིན་ལག་གཉིས་རིན་པོ་ཆེར་བྱས་པ་ནི་དབང་བསྐུར་བའི་ཕྱག་རྒྱའོ་ཞེས་བྱ་བ་ནི་རིན་ཆེན་ཏོག་དང༌། དབང་བསྐུར་བ་སྟེ་རྡོ་རྗེ་གདམས་པ་ལས་བྱུང་བའོ། །མཐེའུ་ཆུང་དང་མཐེ་བོང་སོ་སོར་བསྙམས་ལ་ལྷག་མ་རྣམས་བརྐྱང་བ་འདི་ནི་སྡིག་པ་ཐམས་ཅད་སྲེག་པའི་ཕྱག་རྒྱའོ་ཞེས་བྱ་བ་ནི་ངན་འགྲོ་ལ་སོགས་པའི་དཀྱིལ་འཁོར་དུ་ཞུགས་པའི་སྔོན་དུའོ། །ལག་པ་གཡོན་བ་དེ་བཞིན་དུ་བསྐོར་ཞིང་ཞེས་བྱ་བ་འདི་ནི་ལས་ཐམས་ཅད་པའི་ཕྱག་རྒྱའོ་ཞེས་བྱ་བ་ནི་ངན་འགྲོ་སྦྱང་བ་ལ་སོགས་པ་ཀུན་གྱི་སྟེ་སྔ་མ་བཞིན་དུ་ཤེས་པར་བྱའོ། །སྙིམ་པ་བཟེད་པ་གྱེན་དུ་འཐོར་བར་བྱེད་པ་འདི་ནི་བདུག་པའི་ཕྱག་རྒྱའོ་ཞེས་བྱ་བ་ལ་སོགས་པ་ལ་སྙིམ་པ་འོག་ནས་གྱེན་དུ་འཐོར་བ་དང༌། བསྙམས་ཏེ་འཛིན་པ་དང༌། དུང་དང་འདྲ་བར་བྱ་བ་དང་བཞི་ནི་བདུག་པ་མ་ལ་སོགས་པའིའོ། །དེ་ཉིད་ལས་བརྐྱང་སྟེ་འཛིན་པ་ནི་གཏོར་མའི་ཕྱག་རྒྱའོ་ཞེས་བྱ་བ་ནི་ཕྱི་རོལ་དུ་གཏོར་མ་སྦྱིན་པའི་ཚེ་རྡོ་རྗེ་ཐལ་མོ་བརྐྱང་བ་སྦྱིན་ནོ། །དེ་ཉིད་ལས་གུང་མོ་ནང་དུ་བཀུག་པ་ནི་ཨརྒྷའིའོ་ཞེས་བྱ་བ་ནི་མཆོད་ཡོན་གྱིའོ། །ད་ནི་དམ་ཚིག་གི་ཕྱག་རྒྱ་སྟོན་ཏེ་རྡོ་རྗེ་བཅིངས་པ་ལས་གུང་མོ་གཉིས་བསྙམས་ཏེ་ཚིགས་དང་པོ་བཅག་ལ་སོར་མོ་ཐམས་ཅད་བརྐྱང་བ་འདི་ནི་རྣམ་པར་འཐོར་བའི་ཕྱག་རྒྱའོ་ཞེས་བྱ་བ་གཙུག་ཏོར་རྣོན་པའིའོ། །དེ་ཉིད་ལས་མཐེ་བོང་དང་མཐེ་ཆུང་གཉིས་བཀུག་པ་ནི་རྣམ་པར་འཇོམས་པའི་ཕྱག་རྒྱའོ་ཞེས་བྱ་བ་ནི་གཙུག་ཏོར་རྒྱལ་མཚན་གྱིའོ། །དེ་ཉིད་ལས་འོད་ཟེར་འབར་བ་འདྲ་བ་ནི་གཟི་བརྗིད་ཕུང་པོའི་ཕྱག་རྒྱའོ་ཞེས་བྱ་བ་གཙུག་ཏོར་གཟི་བརྗིད་ཀྱིའོ། །དེ་ཉིད་ལས་སྤྱི་བོར་བསྐོར་བ་གདུགས་དཀར་རྒྱ་ཞེས་བྱ་བ་ནི་གཙུག་ཏོར་གདུགས་དཀར་པོའིའོ། །རྡོ་རྗེ་ཁུ་ཚུར་གཉིས་ལས་མཛུབ་མོ་གཉིས་དང་མཐེའུ་ཆུང་གཉིས་གཉིས་བསྣོལ་ལ་མདུད་པ་གྱེན་དུ་བསྣོལ་བ་འདི་ནི་འཁོར་ལོའི་ཕྱག་རྒྱའི་ཞེས་བྱ་བ་དཀྱིལ་འཁོར་སྦྲུལ་བའི་
ཕྱག་རྒྱའོ། །རྡོ་རྗེ་བསྡམས་པ་ལས་གུང་མོ་གཉིས་རྡོ་རྗེར་བྱས་པ་ནི་མཛུབ་མོ་གཉིས་རིན་པོ་ཆེ་ལྟར་བྱས་ལ་ལྷག་མ་རྣམས་འོད་ཟེར་འབར་བར་བྱས་བ་ནི་རྒྱལ་བའི་གཙུག་ཏོར་གྱི་ཕྱག་རྒྱའོ། །རིན་ཆེན་ཞེས་བྱ་བ་རིན་ཆེན་གཙུག་ཏོར་གྱི་ཕྱག་རྒྱའོ། །དེ་བཞིན་དུ་མཛུབ་མོ་གཉིས་རྡོ་རྗེར་བྱས་ལ་སོར་མོ་ལྷག་མ་རྣམས་བསྡམས་ནས་རྡོ་རྗེ་འདྲ་བར་བྱས་པ་ནི་རྣམ་པར་རྒྱལ་བའི་ཕྱག་རྒྱའོ་ཞེས་བྱ་བ་ནི་སྣ་ཚོགས་གཙུག་ཏོར་གྱི་ཕྱག་རྒྱའོ། །གཡས་བ་མཆོག་སྦྱིན་དུ་བྱས་ལ་གཡོན་པ་མི་འཇིགས་པས་སྦྱིན་པ་འདི་ནི་དེ་བཞིན་གཤེགས་པའི་ཡིན་ནོ་ཞེས་བྱ་བ་བཅོམ་ལྡན་འདས་ཚེ་དཔག་མེད་ཀྱིའོ། །རྡོ་རྗེ་བསྡམས་པ་ལས་མཛུབ་མོ་གཉིས་བརྐྱང་སྟེ་རྡོ་རྗེ་འདྲ་བར་བྱས་པ་འདི་ནི་རྡོ་རྗེའི་ཕྱག་རྒྱའོ། །དེ་ཉིད་ལས་མཛུབ་མོ་གཡས་པ་བཀུག་པ་འདི་ནི་ལྕགས་ཀྱུའི་ཕྱག་རྒྱའོ། །དེ་ཉིད་ལས་མེ་ཏོག་འདྲ་བར་བྱས་ལ་འདི་ནི་མདའི་ཕྱག་རྒྱའོ། །དེ་ཉིད་ལས་སླར་བཀུག་སྟེ་མཐེ་བོང་གཉིས་རྩེ་སྤྲད་པ་ནི་བློ་གྲོས་ལེགས་པའོ། །དེ་ཉིད་ལས་ཚིགས་བར་མ་བཅག་པ་ནི་རིན་པོ་ཆེའིའོ། །དེ་ཉིད་ལས་སོར་མོ་རྣམས་འོད་ཟེར་འདྲ་བར་སྐྱེད་པ་ནི་གཟི་བརྗིད་ཀྱིའོ། །དེ་ཉིད་ལས་སྤྱི་བོར་གཞག་པ་ནི་ཏོག་གིའོ། །དེ་ལས་མདུན་དུ་གཞག་པ་ནི་བཞད་པའིའོ། །དེ་ཉིད་ལས་པདྨོ་འདྲ་བར་བྱས་པ་ནི་པདྨའིའོ། །དེ་ཉིད་ལས་རྩེ་མོ་གཉིས་བཀུག་པ་ནི་རལ་གྲིའིའོ། །དེ་ཉིད་ལས་གདུ་བུ་འདྲ་བར་བྱས་པ་ནི་འཁོར་ལོའིའོ། །དེ་ཉིད་ལས་ཡིད་ཙམ་པདྨ་འདྲ་བར་བྱས་པ་ནི་ལྕེའིའོ། །དེ་ཉིད་ལས་རྩེ་མོ་ཡིད་ཙམ་སྐྱེད་པ་ནི་རྒྱ་གྲམ་གྱིའོ། །དེ་ཉིད་ལས་ཤིན་ཏུ་བསྐྱེད་པ་ནི་སྲུང་བའིའོ། །དེ་ཉིད་ལས་རྩེ་མོ་གཉིས་སླར་བཀུག་པ་ནི་གནོད་སྦྱིན་གྱིའོ། །དམ་དུ་བཀུག་པ་ནི་བསྡམས་པའོ་ཞེས་བྱ་བ་རྣམས་ནི་རྡོ་རྗེ་སེམས་དཔའ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་བར་གྱི་དམ་ཚིག་གི་ཕྱག་རྒྱའོ། །བསྡམས་པ་ཉིད་མདུན་དུ་གཞག་པ་ནི་བདུག་པའིའོ། །དེ་ཉིད་ལ་གྱེན་དུ་སྟོད་པ་ནི་ཕྲེང་བའིའོ། །མདུན་དུ་མཐེ་བོང་བསྙམས་ཏེ་བསྐོར་བ་ནི་མར་མེའིའོ། །དེ་ཉིད་བྱུག་པ་ལྟར་བྱས་པ་ནི་དྲིའོ་ཞེས་བྱ་བ་བདུག་པ་ལ་སོགས་པ་བཞིའི་དམ་ཚིག་གི་ཕྱག་རྒྱའོ། །སྔར་བཤད་པ་ནི་ལས་ཀྱི་ཕྱག་རྒྱའོ། །དེ་ཉིད་ལས་མཛུབ་མོ་གཉིས་བཀུག་པ་ནི་ལྕགས་ཀྱུའིའོ། །དེ་ཉིད་
ལས་རྩེ་མོ་གཉིས་སྤྲད་པ་ནི་ཞགས་པའིའོ། །དེ་ཉིད་ལས་གཅིག་ལ་གཅིག་འཁྱུད་པ་ནི་ལྕགས་སྒྲོག་གིའོ། །དེ་ཉིད་ལས་བསྐྱོད་པ་ནི་མཉེས་པའིའོ་ཞེས་བྱ་བ་ནི་སྒོ་བཞིའི་དམ་ཚིག་གི་ཕྱག་རྒྱ་སྟེ་ལས་ཀྱི་ཕྱག་རྒྱ་ནི་སྔར་རྩ་བའི་རྒྱུད་དུ་ཤེས་བར་བྱའོ། །སྐུ་གཟུགས་ཀྱི་ཆོ་ག་ཡང་འདི་ནི་དེ་བཞིན་བྱས་ཏེ་ཞེས་བྱ་བས་རས་རིས་ཀྱི་སྒྲུབ་པ་སྟོན་ཏོ། །སྐུ་གཟུགས་ཀྱི་ཆོ་ག་ཡང་ཞེས་བྱ་བ་ནི་སླར་ཡང་ཞེས་བྱ་བའི་དོན་ཏོ། །འདིར་ནི་ཞེས་བྱ་བ་ནི་རྒྱུད་ཕྱི་མའི་དཀྱིལ་འཁོར་དང་པདྨའི་རིགས་འདིར་ནི་ཞེས་བྱ་བའོ། །དེ་བཞིན་བྱས་ཏེ་ཞེས་བྱ་བ་ནི་པདྨའི་རྫིང་བུ་ལ་སོགས་པ་རྣམས་སོ། །ཅུང་ཟད་དུ་ན་བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བའི་གཟུགས་བྲིའོ་ཞེས་བྱ་བ་ནི། འཇིག་རྟེན་གསུམ་རྒྱལ་ཉིད་ཅུང་ཟད་ན་ནི་དོན་ཡིན་ནོ། །ཡང་ན་སྐུ་གཟུགས་ཉིད་དཀྱིལ་འཁོར་གྱི་ཚུལ་དུ་བྲིས་ལ་ཞེས་བྱ་བ་ནི་གཙུག་ཏོར་དགུའི་དཀྱིལ་འཁོར་གྱི་ཚུལ་དུ་བྲི་བའོ། །མེ་ཏོག་ལ་སོགས་པས་མཆོད་དེ། དེའི་སྤྱན་སྔར་འབུམ་ཙམ་ཅིག་སྔར་བསྙེན་པ་བྱས་ནས་ལས་ཐམས་ཅད་བྱའོ་ཞེས་བྱ་བ་ནི་སྤྱན་དབྱེ་བ་སྔོན་དུ་འགྲོ་བས་དབེན་པའི་གནས་སུ་སྤྱན་དྲང་ཞིང་ཕྱག་རྒྱ་བཞིས་རྒྱས་གདབ་པ་པ་དང༌། དབང་བསྐུར་བ་དང༌། མཆོད་པ་བྱས་ལ་བསྙེན་པ་འབུམ་བྱས་ཏེ་མཚན་ཐོག་ཐག་བཟླས་ནས་སྔར་བཤད་པའི་དངོས་གྲུབ་ཀྱི་ལས་ཐམས་ཅད་བྱའོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ལ་སོགས་པས་ནོར་བུ་དྲི་མ་མེད་པའི་ལས་ཀྱི་རྣམ་པར་སྨིན་པ་ཅི་ལས་གྱུར་པ་སྟོན་ཏོ། །དེ་ནས་ཕྱག་ན་རྡོ་རྗེ་ལ་ལས་ཀྱི་རྣམ་པར་སྨིན་པ་ཅི་ཡིས་ནོར་བུ་དྲི་མ་མེད་པའི་འོད་དེ་དམྱལ་བ་ལ་སོགས་པ་དེར་ལྷུང་ཞེས་དྲིས་པ་དང༌། སངས་རྒྱས་ཀྱི་མཐུས་ཕྱག་ན་རྡོ་རྗེས་བཀའ་སྩལ་པ་དང་བཤད་པ་ནི་འདི་ཡིན་ཏེ། འདི་ནི་སྔོན་གྱི་ལས་ཀྱི་སྒྲིབ་པ་འདི་ཡིན་ཏེ་འཛམ་བུའི་གླིང་གི་རིགས་འདི་ཉིད་ན་མཐའ་ཁོབ་པ་རིགས་ངན་དུ་གཏོགས་པའི་རྒྱལ་པོ་ལུས་མི་བདེ་བ་ཞེས་བྱ་བ་ཞིག་ཏུ་གྱུར་ཏེ་ཞེས་བྱ་བའི་ལ་སོགས་པ་སྨོས་ཏེ་སྔོན་གྱི་ཞེས་བྱ་བ་རྫོགས་ལྡན་གྱི་དུས་ནའོ། །འཛམ་བུའི་གླིང་གི་རིགས་འདི་ཉིད་ན་ཞེས་བྱ་བ་ནི་རི་རབ་ཀྱི་ལྷོ་ཕྱོགས་གླིང་བཞི་པའི་རིགས་འདི་ཉིད་ནའོ། །རྒྱལ་པོ་ལུས་མི་བདེ་བ་ཞེས་བྱ་བ་ནི་བཙུན་མོ་དམ་པ་མཛེས་ལྡན་མའི་ཁོང་དུ་གནས་ཙམ་ཉིད་ན་
ལུས་མི་བདེ་བ་ཡིན་པའི་ཕྱིར་རོ། །ལྷག་མ་རྣམས་ནི་གོ་སླ་བས་མ་བཤད་དེ་འདིས་ཀྱང་ནོར་བུ་དྲི་མ་མེད་པ་དེ་ཉིད་ཀྱི་ལས་ཀྱི་རྣམ་པར་སྨིན་པ་དང་ཞུས་པ་བསྟན་པའི་ཕྱིར། འཛམ་བུའི་གླིང་དུ་ལྷའི་བུ་ནོར་བུ་དྲི་མ་མེད་པའི་དོན་དུ་ཞུ་བ་མ་འབྲེལ་བའི་ཕྱིར་རོ། །ད་ནི་ཚེ་ཚད་མེད་པའི་དཀྱིལ་འཁོར་གསུངས་པའི་པདྨའི་རིགས་བཤད་པའི་རྗེས་ཐོགས་ལ། བཤད་པ་དེ་ནས་ཞེས་བྱ་བ་ལ་སོགས་པས་ཚེ་ཚད་མེད་པའི་དཀྱིལ་འཁོར་སྟོན་ཏོ། །གཞན་ཡང་དེ་ནས་ཞེས་བྱ་བ་ནི་སྦྱོར་བ་དང་པོའི་རྗེས་ཐོགས་ལའོ། །འདིར་དང་པོའི་ཏིང་ངེ་འཛིན་ནི་གཙུག་ཏོར་དུ་བཤད་པ་ཉིད་དང་འདྲ་བར་ཤེས་པར་བྱའོ། །བརྒྱ་བྱིན་དང་ཚངས་པ་ལ་སོགས་པའི་ལྷའི་བུ་རྣམས་ཀྱིས་བོས་ནས་བསྟོད་དེ་གསོལ་བ་བཏབ་བོ་ཞེས་བྱ་བར་སྦྱར་རོ། །ཚུལ་ཇི་ལྟ་བུ་དང་ལྡན་པས་ཤེ་ན། བརྒྱ་བྱིན་དང་ཚངས་པ་ལ་སོགས་པ་ལྷའི་བུ་རྣམས་ཡིད་རབ་ཏུ་མགུ་ཞིང་རངས་ཏེ་བ་སྤུའི་བུ་གནས་སྦུ་རྣམས་ལངས་ཤིང་རྒྱལ་བ་རྒྱལ་བ་ཞེས་སྐད་ཆེན་པོས་བོས་ནས་སོ། །ལྷའི་བུ་རྣམས་ཞེས་བྱ་བ་ནི་ངེས་པར་འབྱེད་པའི་ཆ་དང་མཐུན་པ་ཐོབ་པ་སྤྲུལ་པའི་སྐུ་མཐོང་བའི་སྐལ་བ་དང་ལྡན་པའི་བརྒྱ་བྱིན་ལ་སོགས་པ་ཉིད་སྟོན་ཏོ། །སྔར་ནི་རྩ་བའི་རྒྱུད་དུ་ལས་ཀྱི་རྣམ་པར་སྨིན་པ་བཤད་པས་རྒྱལ་བར་འགྱུར་ནས། དེ་སངས་པར་བྱ་བའི་ཕྱིར་དཀྱིལ་འཁོར་དུ་བཅུག་ཅིང༌། དབང་བསྐུར་བ་རྣམས་ཡིན་ཏེ། གཞན་ཡང་དེ་རྣམས་ཚེ་བསྲིང་བའི་ཕྱིར་དཀྱིལ་འཁོར་དང་སྒྲུབ་པ་བསྟན་པའི་ཕྱིར་རོ། །སྤྲུལ་པ་ནི་ལྷའི་དབང་པོ་ཞེས་བྱ་བ་གང་ཡིན་པ་སྟེ་དེ་ལྟ་ན་ནི་ཁྱོད་དེའི་ཕར་གྱུར་ཏོ་ཞེས་བྱ་བ་འགལ་ལོ་ཞེ་ན་མ་ཡིན་ཏེ་ནོར་བུ་དྲི་མ་མེད་པ་ཉིད་ཀྱང་དེ་བཞིན་གཤེགས་པའི་སྤྲུལ་པ་ཡང་དེ་ལྟ་བུར་སྣང་བའི་ཕྱིར་རོ། །དེ་ལྟར་ན་ཐམས་ཅད་སྤྲུལ་པ་དང་དངོས་སུ་འགྱུར་རོ་ཞེ་ན། འདི་ནི་འཐད་པ་ཉིད་དོ། །དེ་ཡང་བཅོམ་ལྡན་འདས་ཀྱིས་ཇི་སྐད་དུ། ལྷ་དང་ལྷ་དབང་ལྷ་ཡི་བླ། །ལྷ་མིན་དབང་པོ་ལྷ་ཡི་བདག །ཅེས་པ་དང༌། ཨུ་མའི་ཁྱིབ་ཐབ་སྐྱེ་དགུའི་བདག །གཏོགས་འདོད་རྒྱལ་འདོད་ཐུབ་པ་ཆེ། །འཇིག་རྟེན་གསུམ་དང་མཁའ་དང༌། །ཞེས་བྱ་བ་ལ་སོགས་པ་དང༌། ང་ནི་དམྱལ་བའི་དམྱལ་བ་པ། །ཞེས་གསུངས་པའི་ཕྱིར་རོ། །ལྷའི་བུ་རྣམས་ཁུ་བུབ་ཏུ་འགྱེལ་བ་དང་བ་སྤུ་ལངས་པ་དང་
ཚེ་སྒྲུབ་པ་དེ་བཞིན་གཤེགས་པའི་སྤྲུལ་པ་ལས་གཞན་པ་ཉིད་དོ། །རབ་ཏུ་མགུ་ཞིང་རངས་ཏེ་ཞེས་བྱ་བ་ནི་རྒྱུ་དང་འབྲས་བུའི་ཁྱད་པར་མཐོང་བའི་ཕྱིར་རོ། །བ་སྤུ་ལངས་ཤིང་ཞེས་བྱ་བ་ནི་དང་པོའི་དད་པ་བསྐྱེད་པས་སོ། །རྒྱལ་བ་རྒྱལ་བ་ཞེས་སྐད་ཆེན་པོར་བོས་ནས་ཞེས་བྱ་བ་ནི་ལས་ཀྱི་རྣམ་པར་སྨིན་པ་གསུངས་པས་སྐྲག་ནས་ཡང་དང་ཡང་དུ་སྐད་ཆེན་པོར་བོས་པའོ། །བཅོམ་ལྡན་འདས་ཕྱག་ན་རྡོ་རྗེ་ལ་མིང་བཅུ་པ་འདིས་ཞེས་བྱ་བ་ནི་མཚན་དོན་དང་ལྡན་པས་སོ། །མངོན་པར་བསྟོད་དེ་ཞེས་བྱ་བ་ནི་མིང་དོན་དང་ལྡན་པས་བརྗོད་པས་བསྟོད་པས་སོ། །གསོལ་བ་བཏབ་བོ་ཞེས་བྱ་བ་ནི་ཚེ་རིང་བ་དང་ནད་མེད་པའི་དོན་དུ་གསོལ་བ་བཏབ་བོ་ཞེས་བྱའོ། །བསྟོད་པ་དང་གསོལ་བ་བཏབ་པའི་རང་གི་ངོ་བོ་ཀྵོ་ཏཀྵ། ཁྱོད་ནི་གླང་པོའི་རྣ་བ་ཅན། །ཞེས་བྱའོ། །ཀྵད་ཏྲག་ཀྵ། བཅོམ་ལྡན་འདས་མགོན་རྡོ་རྗེ་འཛིན། །ཞེས་བྱའོ། །ཀོ་ཏ་བ་གོ་ཏ་བ། ཁྱོད་ནི་བཟང་པོའི་རྒྱན་ཞེས་བྱའོ། །ཀོ་ཏ་བ་ཤ་ཁྱོད་ནི་རྣམ་པར་གནོན་པའི་ཞེས་བྱའོ། །ཀ་ཧི་རཀྵ། ཡོན་ཏན་རིན་ཆེན་འབྱུང་གནས་ཁྱོད། །ཅེས་བྱའོ། །ཀོ་ལ་ཀྵ། ཁྱོད་ནི་བདེན་པའི་སྤྲིན་ཆེན་ཏེ། །ཞེས་བྱའོ། །ཀོ་ལ་བ་ཀོ་ལ་པ། ཁྱོད་ནི་གཟུགས་སྡུག་ཡིད་ཀྱི་རྒྱན། །ཀོ་ལ་པ་ཤ་།ཁྱོད་ནི་མེ་ལྕེ་འབར་བ་ཅན། །ཞེས་བྱའོ། །ཀ་ལི་སྟ། ཁྱོད་ནི་ཡིད་བཞིན་ནོར་བུ་སྟེ། །ཞེས་བྱའོ། །ཐ་ཨི་ཏི། ཁྱོད་ནི་གཟུགས་ནི་མཛེས་པ་ཡིན། །ཞེས་བྱའོ་ཞེས་བྱ་བ་ནི་བཅོམ་ལྡན་འདས་ལ་བསྟོད་པ་ཞེས་བྱ་བའི་དོན་ཏོ། །གཞན་ཡང་ངོ་བོ་ཉིད་ཀྱི་སངས་རྒྱས་ལ་སོགས་པ་བཅུ་དང་སྟོབས་བཅུ་དང་དབང་བཅུ་དང༌། གཟུགས་བཅུ་སྟེ་དེ་བཞིན་གཤེགས་པ་ལ་མངའ་བའི་ཡོན་ཏན་སྟོན་ཏེ་བརྗོད་པའི་ཕྱིར་རོ། །དེ་ལྟར་བསྟོད་པ་བསྟན་ནས། བརྒྱ་བྱིན་ལ་སོགས་ལྷ་མཆོག་རྣམས། །སེམས་ཅན་ཀུན་ལ་ཕན་པ་དང༌། །ཚེ་དང་ནད་མེད་འཕེལ་བའི་ཕྱིར། །མགོན་པོ་ཁྱོད་ལ་གསོལ་བ་འདེབས། །བཅོམ་ལྡན་འདས་ཚེ་ཐུང་བ་དང་སྐལ་བ་ཆུང་བ་རྣམས་ཀྱི་དོན་དང་ཕན་པ་དང་ཚེ་བསྲིང་བའི་སླད་དུ་བཤད་པར་གསོལ། གསང་བའི་བདག་པོ་བཤད་དུ་གསོལ་ཞེས་བྱ་བ་ཡིན་ཏེ་བརྒྱ་བྱིན་ལ་སོགས་པ་མོས་པ་སྤྱོད་པའི་ས་ལ་གནས་པའི་ལྷའི་མཆོག་རྣམས་སེམས་ཅན་ཀུན་ཚེ་ཕྱི་མའི་དོན་དང༌། ཚེ་འཕེལ་བ་དང་ནད་མེད་པའི་ཕྱིར་
མགོན་པོ་ཁྱོད་ལ་གསོལ་བ་འདེབས་ཀྱིས་ཚེ་ཐུང་ཞིང་སྐལ་བ་ཆུང་བ་རྣམས་ཀྱི་དོན་དང་ཕྱི་མ་ལ་དང་འདིའི་ཕན་པ་དང་བདེ་བ་དང་ཚེ་བསྲིང་བའི་སླད་དུ་ཡང་དང་ཡང་དུ་བཤད་དུ་གསོལ་ཞེས་གསོལ་བ་བཏབ་པའི་དོན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་བྱ་བ་ལ་སོགས་པས་སྙིང་པོ་གསུངས་པ་སྟོན་ཏོ་ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ལའོ། །བཅོམ་ལྡན་འདས་ཕྱག་ན་རྡོ་རྗེས་བརྒྱ་བྱིན་དང་ཚངས་པ་ལ་སོགས་པ་འཁོར་དེ་དག་གཟིགས་ནས་ལེགས་སོ་ཞེས་བྱ་བས་མགུ་བར་བྱས་ཏེ་སྣོད་དང་ལྡན་པ་ཚངས་བ་ལ་སོགས་པའི་ལྷའི་བུ་རྣམས་གང་ཁྱེད་ཀྱིས་འདི་ལྟ་བུའི་སྤོབས་པ་ཡང་དག་པར་བསྐྱེད་པ་ནི་ལེགས་སོ་ལེགས་པར་སྒྲུབས་ཤིག་དང་བཤད་པར་བྱའོ་ཞེས་བྱ་བ་ནི་འཁོར་ལ་གཟིགས་ཤིང་མགུ་བར་བྱས་པས་སྣོད་དང་ལྡན་པར་བྱས་ནས་སྤོབས་པ་བསྐྱེད་པ་ལ་དགྱེས་ནས་ལེགས་སོ་ཞེས་བྱ་བ་ལན་གཉིས་གསུངས་ཏེ། མ་ཡེངས་པར་འཛིན་དུ་བཅུག་པའི་ཐ་ཚིག་གོ །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་བྱ་བ་ནི་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་སོ། །སེམས་ཅན་ཐམས་ཅད་ཀྱི་ཚེ་དཔག་ཏུ་མེད་པ་སྤེལ་བ་ཞེས་བྱ་བ་ནི་ཉི་མ་དང་ཟླ་བ་ཡོད་པ་དེ་སྲིད་ཀྱི་བར་དུ་ཐུབ་པའོ། །དེ་བཞིན་གཤེགས་པ་ཐམས་ཅད་ཀྱི་སྙིང་བོ་འདི་ཞེས་བྱ་བ་ནི། ཡོན་ཏན་དེ་ལྟ་བུ་དང་ལྡན་པ་འོག་ནས་འབྱུང་བའི་སྙིང་པོ་འདིའོ། །རང་གི་སྙིང་གནས་ཕྱུང་ངོ་ཞེས་བྱ་བ་ནི་ངེས་པའི་ཡེ་ཤེས་སྟོན་པའོ། །དེ་ཉིད་ཨོཾ་པུ་ཎྱེ་ཞེས་བྱ་བ་ལ་སོགས་པ་སྟེ་དེའི་ཕན་ཡོན་ནི། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུངས་འདི་བཤད་མ་ཐག་ཏུ་ངན་སོང་ཐམས་ཅད་རབ་ཏུ་ཞི་སྟེ་སེམས་ཅན་དམྱལ་བ་དང་བྱོལ་སོང་དང་ཡི་དགས་སུ་སྐྱེས་པའི་སེམས་ཅན་རྣམས་གྲོལ་བར་བྱེད་པ་ཉིད་ཀྱིས་རབ་ཏུ་ཤེས་སོ། །འཇིག་རྟེན་གྱི་ཁམས་ཐམས་ཅད་དུ་སྣང་བར་བྱས་ཏེ་སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་དུ་བྱས་ནས་ཞེས་བྱ་བ་ནི་བཅོམ་ལྡན་འདས་ཀྱིས་གཟུངས་འདི་གསུངས་མ་ཐག་ཏུ་ངན་སོང་གསུམ་ལས་ཞི་ཞིང་གྲོལ་ཏེ། བཅོམ་ལྡན་འདས་ཀྱི་མཐུས་གྲོལ་ཞིང་ཞི་བར་རང་རང་ཤེས་སོ། །འཇིག་རྟེན་གྱི་ཁམས་ཐམས་ཅད་དུ་སྤྲུལ་པའི་སྐུའི་རྣམ་པར་བྱས་ནས་སངས་
རྒྱས་ཀྱི་མཛད་པ་བཅུ་གཉིས་ཡུམ་གྱི་ལྷུམས་སུ་གཤེགས་བ་དང་སྐུ་མྱ་ངན་ལས་འདས་པའི་ཚུལ་སྟོན་བའི་བར་མཛད་ནས་ཞེས་བྱ་བའི་དོན་ཏོ། །ཀྱང་ཞེས་བྱ་བ་ནི་མཛད་པ་གཉིས་དང༌། མཛད་བ་བདུན་དང༌། མཛད་པ་བཅུ་དྲུག་དང༌། མཛད་པ་ཉི་ཤུ་རྩ་བདུན་དང༌། མཛད་པ་བརྒྱ་རྩ་བཅུ་དང༌། མཛད་པ་མཐའ་ཡས་པ་ཡང་མཛད་ནས་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་འདི་ཉིད་དུ་ཞུགས་པར་གྱུར་ཏོ་ཞེས་བྱ་བ་ནི་དེ་བཞིན་གཤེགས་བ་ཐམས་ཅད་དེ་ནི་འདིར་ཕྱག་ན་རྡོ་རྗེའོ། །ཐུགས་ཀྱི་ཆོས་ཀྱི་ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པའི་ཡེ་ཤེས་སོ་ཡི་གེ་ཞེས་བྱ་བ་ནི་དེའི་རྟགས་ཟླ་བའོ། །དེ་ལ་བཀོད་པའི་ཡིག་འབྲུ་ལ་ཡང་ཡི་གེ་ཞེས་བྱ་བ་བཤད་དེ་ཇི་སྐད་དུ། ཡི་གེ་བྱང་ཆུབ་སེམས་ཡིན་ཏེ། །གཉིས་པ་སྒྲ་ཞེས་བྱ་བར་བཤད། །ཅེས་བྱ་བ་བཤད་པའི་ཕྱིར་རོ། །འདི་ཉིད་དུ་ཞུགས་པར་གྱུར་ཏོ་ཞེས་བྱ་བ་ནི་སྤྲུལ་བའི་སྐུ་དེ་དག་ཀྱང་ཟླ་བའི་དཀྱིལ་འཁོར་དེ་ཉིད་དུ་ཞུགས་པར་གྱུར་ཏོ་ཞེས་བྱ་བའི་དོན་ཏོ། །འདིས་ནི་དཀྱིལ་འཁོར་རྒྱལ་པོ་མཆོག་སྒོམ་པ་རྣམས་ཀྱིས་ཕྱག་ན་རྡོ་རྗེ་ལྟེ་བའི་དབུས་སུ་བཞུགས་པ་ལ་སྙིང་གནས་འོད་ཟེར་བྱུང་སྟེ་སྔགས་ཀྱི་འོད་དེས་བརྒྱ་བྱིན་དང་ཚངས་པ་ལ་སོགས་པ་བཀུག་ནས་བསྟོད་ཅིང་གསོལ་བ་བཏབ་ནས། ཡང་རང་གི་སྙིང་གར་ཟླ་བ་ལ་སྔགས་བཀོད་དེ། སངས་རྒྱས་ཀྱི་མཛད་པ་རྣམས་མཛད་ནས་སྔགས་དང་འདྲེས་པ་ལས་ཞུ་བར་གྱུར་པ་ཏེ་ཐབས་དང་ཤེས་རབ་ཀྱི་བདག་ཉིད་ལས་གཙོ་བོ་བསྐྱེད་པར་བྱ་བའི་དོན་ཏོ། །དེ་ནས་བཅོམ་ལྡན་འདས་ཀྱིས་ཚེ་དཔག་ཏུ་མེད་པའི་རྡོ་རྗེའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ནི། ཚེ་དཔག་ཏུ་མེད་པའི་རྡོ་རྗེ་འོད་བྱེད་པ་ནི་མེ་ལོང་ལྟ་བུའི་ཡེ་ཤེས་ཏེ་བྲི་བ་དང་ཟད་བ་མེད་པས་ཚེ་དཔག་ཏུ་མེད་པའི་གཟུང་བ་དང་འཛིན་པ་རྟོག་པས་མི་ཕྱེད་པས། རྡོ་རྗེའི་རང་བཞིན་གྱིས་དག་པས་འོད་བྱེད་པ་ཞེས་བྱ་བ་ཡིན་ལ། དེ་ལ་དམིགས་པའི་ཏིང་ངེ་འཛིན་ལ་ཡང་མིང་དེ་སྐད་ཅེས་བྱ་སྟེ་སྙོམས་པར་བྱས་པ་ནི་དེ་གཞན་ལ་སྦྱིན་པའི་རྣམ་པ་ཐུགས་རྩེ་གཅིག་ཏུ་མཛད་ནས་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཚེ་དང་ཡེ་ཤེས་དཔག་ཏུ་མེད་པ་ཞེས་བྱ་བ་ནི་བཅོམ་ལྡན་འདས་ཚེ་ཚད་མེད་པའི་ཕྱག་རྒྱ་
ཆེན་པོའོ། །སྙིང་པོའི་གཟུངས་འདི་བཤད་དོ་ཞེས་བྱ་བ་འོག་ནས་འབྱུང་བ་འདི་བཤད་དོ། །དེ་ཉིད་ཨོཾ་ཨཱ་མི་ཏ་ཞེས་བྱ་བ་ནས་སྭཱ་ཧཱ་ཞེས་བྱ་བའི་བར་རོ། །དེ་ནས་འདི་བཤད་མ་ཐག་ཏུ་ནི་སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞིའོ་ཞེས་བྱ་བ་སྔ་མ་བཞིན་ནོ། །དེ་ནས་ཡང་བཅོམ་ལྡན་འདས་ཀྱིས་གདོན་མི་ཟ་བར་སྒྲིབ་པ་ཐམས་ཅད་རྣམ་པར་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཞེས་བྱ་བ་ནི་ཐེ་ཚོམ་མེད་པར་གཟུང་འཛིན་གྱི་སྒྲིབ་པ་ཐམས་ཅད་རྣམ་པར་འཇོམས་ཤིང་འཁྲུད་པ་ནི་མཉམ་པ་ཉིད་ཀྱི་ཡེ་ཤེས་ཏེ། དེ་ལ་དམིགས་པའི་ཏིང་ངེ་འཛིན་ལ་མིང་དེ་སྐད་ཅེས་བྱ་བ་ཞིང་གཞན་ལ་སྦྱིན་པའི་རྣམ་པ་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱིས་སྒྲིབ་པ་གཅོད་པ་ཞེས་བྱ་བ་ནི་རིན་ཆེན་འབྱུང་ལྡན་ནོ། །སྙིང་པོ་འདི་ཐུགས་ཀ་ནས་ཕྱུང་ངོ་ཞེས་བྱ་བ་ནི་འོག་ནས་འབྱུང་བའི་སྔགས་ཏེ། དེ་ཉིད་ཨོཾ་ཀ་ཀ་ནི་ཞེས་བྱ་བ་ལ་སོགས་པའོ། །འདི་བཤད་མ་ཐག་ཏུ་ཡང་ཐམས་ཅད་དེ་བཞིན་གྱུར་ཏོ་ཞེས་བྱ་བ་ནི་སྔ་མ་བཞིན་ནོ། །དེ་ནས་ཡང་བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་ལ། སྒྲིབ་པ་ཐམས་ཅད་དྲི་མེད་ཅིང༌། །ཞེས་བྱ་བ་ནི་གཟུང་འཛིན་གྱི་དྲི་མ་དང་བྲལ་བ་སོ་སོར་རྟོག་པའི་ཡེ་ཤེས་སོ། །དེ་ཉིད་རྣམ་པར་རྟོག་པའི་རྡོ་རྗེ་ཞེས་པའོ། །དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་ནི་སྦྱིན་པའི་རྣམ་པ་ཐུགས་རྩེ་གཅིག་ཏུ་མཛད་ནས་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱིས་སྒྲིབ་པ་རྣམས་མ་ལུས་པར་འཇོམས་པ་ཞེས་བྱ་བ་ནི་འོད་དཔག་ཏུ་མེད་པའོ།། སྙིང་པོའི་གཟུངས་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བ་ནི་དེ་སྐྱེད་པར་བྱེད་པ་དང་ལམ་སྦྱང་བའི་སྔགས་ཏེ། ཨོཾ་རཏྣེ་ཞེས་བྱ་བ་ལ་སོགས་པའོ། །དེ་ནས་ཞེས་བྱ་བ་ལ་སོགས་པ་སྔ་མ་བཞིན་ཏེ་ཕན་ཡོན་ནོ། །དེ་ནས་ཡང་ཞེས་བྱ་བ་ལ་སོགས་པ་ལ་གདོན་མི་ཟ་བར་མི་འཇོམས་པ་ཐམས་ཅད་རྣམ་པར་འཇོམས་ནས་ཞེས་བྱ་བ་ནི་བྱ་བ་ནན་ཏན་གྱི་ཡེ་ཤེས་ཏེ། སྒོ་ལྔའི་རྣམ་པར་ཤེས་པ་ལ་སོགས་པ་འཇོམས་པའི་ཕྱིར་རོ། །ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ནི་སྦྱིན་པའི་རྣམ་པ་ཐུགས་རྩེ་གཅིག་ཏུ་མཛད་ནས་སོ། །དེ་ནས་དེ་བཞིན་གཤེགས་པ་ཐམས་ཅད་ནི་དོན་ཡོད་གྲུབ་
པའོ། །སྙིང་པོའི་གཟུངས་འདི་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། གསང་སྔགས་འདི་ཞེས་བྱ་བ་ལ་སོགས་པས་ལན་གསུམ་དུ་གཡོས་ཤིང་ཡ་མཚན་འཇིག་རྟེན་དུ་སྣང་བས་སྔགས་ཀྱི་ཆེ་བ་བསྟན་ཏོ། །དེ་ནས་བསྡུ་ཞིང་བྱིན་གྱིས་བརླབ་པ་ལ་སོགས་པ་སྔར་བཤད་པ་བཞིན་དུ་ཤེས་པར་བྱའོ། །དེ་ནས་དཀྱིལ་འཁོར་ནི་འདི་ཡིན་ཏེ་ཞེས་བྱ་བ་ལ་སོགས་པས་སློབ་དཔོན་གྱི་ལས་དང༌། སློབ་མ་གཞུག་པ་ལ་སོགས་པའི་ཆོ་ག་སྟོན་ཏོ། །དེ་ནས་ཞེས་བྱ་བ་ནི་རྗེས་ཐོགས་ལའོ། །དེ་ཡང་འདིར་དང་པོར་རེ་ཞིག་ཉམས་དགའ་བའི་ས་ཕྱོགས་སུ་སྟན་ལ་འདུག་ལ། ལྕེ་དང་ལག་པ་བྱིན་གྱིས་བརླབ་པ་དང་རྡོ་རྗེ་འཇིགས་བྱེད་ནས་བརྩམས་ཏེ་འོག་བཅིང་པའི་མཐར་ཐུག་པ་དང༌། ནམ་མཁར་དཀྱིལ་འཁོར་བསམས་ལ། མཆོད་པ་རྣམ་པ་ལྔས་མཆོད་པ་ལ་སོགས་པ་དང་ལྷ་དང་ལྷ་མ་ཡིན་གྱིས་བསྟོད་དེ་མི་སྣང་བར་གྱུར་པའི་བར་དང༌། སྟོང་པ་ཉིད་དང་ཨ་ལས་ཟླ་བ་དང་ས་བོན་དང་དམ་ཚིག་གི་ཕྱག་རྒྱ་དང་ལྷའི་རྣལ་འབྱོར་དང་བྱིན་གྱིས་བརླབ་པ་དང་དབང་བསྐུར་བ་དང་ཕྱག་ན་རྡོ་རྗེ་ཐུགས་ཡོངས་སུ་རྫོགས་པའི་སྦྱོར་བས་དཀྱིལ་འཁོར་བསྐྱེད་དེ། ནམ་མཁའི་དཀྱིལ་འཁོར་དགུག་པ་དང༌། ངན་འགྲོ་སྦྱོང་ཞིང་དཀྱིལ་འཁོར་དུ་གཞུག་པ་དང་དབང་བསྐུར་ནས། སངས་རྒྱས་ཀུན་པས་སྔར་སངས་རྒྱས། །ཞེས་བྱ་བ་ལ་སོགས་པས་བསྟོད་པ་དང༌། དཀྱིལ་འཁོར་ལུས་ལ་བརྟགས་བ་དང་བཅས་པ་ནི་དང་པོའི་སྦྱོར་བའི་ཏིང་ངེ་འཛིན་ཏོ། །དེ་ནས་སྟོང་པ་ཉིད་དུ་བསྒོམ་པ་དང་ཁང་པ་བརྩེགས་མ་དང་འཁོར་ལོ་རྩིབས་བཞི་པའི་ལྟེ་བ་ལ་བབས་ཏེ་ཕྱག་ན་རྡོ་རྗེ་ཉིད་ཀྱི་ཐུགས་ཀར། ཨོཾ་པུ་ཎྱེ་པུ་ཎྱེ། མ་ཧཱ་པུ་ཎྱེ་ཨ་པ་རི་མི་ཏ་པུ་ཎྱེ་ཛྙཱ་ན་སམྦ་རོ་པ་ཙིཏྟེ་ཀ་རི་ནི་སྭཱ་ཧཱ། ཞེས་བྱ་བ་བཀོད་ནས་འོད་ཟེར་གྱིས་སངས་རྒྱས་ཀྱི་མཛད་པ་བྱས་ཏེ་གསོལ་བ་འདེབས་པའི་ལྷ་རྣམས་དང་བཅས་པ་ཐུགས་ཀའི་ཟླ་བར་ཞུགས་པས་ཟླ་བ་དང་བཅས་པ་ཞུ་ནས་ཤེས་རབ་དང་ཐབས་སུ་གྱུར་ནས་སྔགས་དེ་ཉིད་གྱུར་པ་ལས་ཕྱག་ན་རྡོ་རྗེར་གྱུར་ནས་དེའི་ཐུགས་ཀྱི་ཟླ་བའི་ཨོཾ་ཨཱཿ་ནི་ཏི་ཞེས་བྱ་བ་ལ་སོགས་པས་མི་བསྐྱོད་པ་བསྐྱེད་དེ། ཤར་གྱི་རྩིབས་པ་ལ་གདོན། ཨོཾ་ཀ་ཀ་ནི་ཞེས་བྱ་བ་ལ་སོགས་པས་ལྷོ་ཕྱོགས་ཀྱི་རིན་ཆེན་འབྱུང་ལྡན་གདོན། ཨོཾ་རཏྣེ་ཞེས་བྱ་བ་ལ་
སོགས་པས་ནུབ་ཕྱོགས་ཀྱི་འོད་དཔག་ཏུ་མེད་པ་གདོན། ཨོཾ་ཨ་ཀ་ཀ་ཞེས་བྱ་བ་ལ་སོགས་པས་བྱང་ཕྱོགས་སུ་དོན་ཡོད་གྲུབ་པ་གདོན། ཧཱུཾ་ཏྲཾ་ཧྲཱི་ཨ་ཞེས་པས་ལཱ་སྱ་ལ་སོགས་པ་བརྒྱད་དེ་མཚམས་ཀྱི་ཆ་ལ་གཞག །དེ་ནས་གཙོ་བོ་དང་ཐ་མི་དད་པས་བསྡུ། ཕྱག་དང་ཆེད་དུ་བརྗོད་དེ་དབང་བླང་ལྕགས་ཀྱུ་ལ་སོགས་པས་ལས་བྱ་ཞིང་དབང་བསྐུར་ཏེ་ཚེ་བསྲིང་བའི་ལས་ལ་སྦྱར་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ནོ། །དེ་ནས་བཟླ་བར་བྱ་བ་བརྗོད་ཅིང་སྒོ་དབྱེ་བ་སྔོན་དུ་འགྲོ་བས་བསྡུ། ལྕགས་ཀྱུ་ལ་སོགས་པས་ལས་བྱ་ཞིང་མཆོད་ཡོན་སྔོན་དུ་འགོ་བས་ཕྱག་རྒྱ་བཞིས་རྒྱས་བཏབ། དབང་བསྐུར་མཆོད་པ་སྣ་ཚོགས་ཀྱིས་མཆོད་དེ། ལྷ་ཐམས་ཅད་ཀྱི་ཐུགས་ཀའི་ཟླ་བ་ལ་སྔགས་བཀོད་ནས་བཟླས་བརྗོད་བྱ། ཐུན་བཞིའི་ཐ་མར་བསྟོད་པ་སྔོན་དུ་འགྲོ་བས་མཆོད་པ་དང་ཕྱག་དང་དབང་བསྐུར་བ་དང་གོ་བགོ་བ་དང་དགེ་བའི་རྩ་པ་བསྔོ་བ་དང་བརྗོད་པར་གསོལ་བ་དང་རྡོ་རྗེ་སེམས་མའི་ཕྱག་རྒྱ་བཀྲོལ་ཏེ་གཤེགས་སུ་གསོལ་བ་དང་སྤྲུལ་པ་དང་ལུས་ལ་བསྡུ་བ་བརྟན་པར་བྱའོ། །དེ་ནས་ལངས་ཏེ་གླེགས་བམ་བཀླག་པ་ལ་སོགས་པ་ཅི་ནུས་བྱའོ། །དེ་ལྟར་བྱས་པས་ཟླ་བ་དྲུག་གམ་ལོ་གཅིག་གམ་ལྷ་རྣམས་ལས་གནང་བ་ཐོབ་པ་དང་འབུམ་ཕྲག་གཅིག་གི་བར་དུ་བྱས་ཏེ་སྔོན་དུ་བསྙེན་པའི་ཆོ་གའོ། །དེ་ནས་སྔར་བཤད་པ་བཞིན་དུས་གཟུང་བ་དང་ལྷག་པར་གནས་པའི་ཆོ་ག་དང༌། ཐིག་བྱིན་གྱིས་བརླབ་པ་ལ་སོགས་པ་སྔོན་དུ་འགྲོ་བ་ཞེས་བྱ་བའི་དོན་ཏོ། །དཀྱིལ་འཁོར་ནི་འདི་ཡིན་ཏེ། གྲུ་བཞི་པ་ལ་སྒོ་བཞི་པ། །སྒོ་བ་བཞི་དང་ཡང་དག་ལྡན། །རྟ་བབས་བཞི་དང་ལྡན་པར་བྱ། །ཞེས་བྱ་བ་སྔ་མ་བཞིན་དུ་ཤེས་པར་བྱའོ། །ཕྱི་དང་ནང་གི་དཀྱིལ་འཁོར་སྤྱིར་ལྟེ་བར་བཅས་ཤིང་སྒོ་ཁྱུད་དང་ལྡན་པ། ལྟེ་བ་དང་ནི་སྒོ་ཁྱུད་ལྡན། །ཞེས་བྱའོ། །ནང་གི་དཀྱིལ་འཁོར་རྩིབས་བཞིའི་ལྟེ་བ་དང་བཅས་པའོ། །དེ་ཡི་དབུས་སུ་འཁོར་ལོའོ། །དཀྱིལ་འཁོར་དམ་པ་བྲི་བྱ་སྟེ། །རྩིབས་བཞི་པ་དང་ལྡན་པ་ལ། །ལྟེ་བའི་དཀྱིལ་འཁོར་ལྡན་པར་བྱ། །ཞེས་བྱ་བ་སྟོན་ཏོ། །དེ་རུ་ལྷ་གང་བྲི་ཞེ་ན། །དེ་ཡི་དབུས་སུ་གཙོ་བོ་ནི། །ཕྱག་ན་རྡོ་རྗེ་དྲིལ་བསྣམས་ཤིང༌། །ཟླ་བ་འདྲ་བའི་ཞལ་
འཛུམ་བྲི། །ཞེས་བྱ་བ་ལ་སོགས་པ་བྲི་བ་གསུངས་སོ། །དཀྱིལ་འཁོར་གྱི་འཁོར་ལོའི་ལྟེ་བར་གཙོ་བོ་རྡོ་རྗེ་འཛིན་པ་ཞི་བ་ཕྱག་ན་རྡོ་རྗེ་དང་དྲིལ་བུ་བསྣམས་ཤིང་ཁ་དོག་དཀར་པོ་ཞལ་འཛུམ་པར་བྲི་བར་བྱའོ། །འཁོར་ལོའི་རྩིབས་བཞི་ལ་ཤར་དུ་མི་བསྐྱོད་པ། ལྷོར་རིན་ཆེན་འབྱུང་ལྡན། ནུབ་ཏུ་འོད་དཔག་མེད། བྱང་དུ་དོན་ཡོད་གྲུབ་པ་བྲི་སྟེ་ཐམས་ཅད་ཀྱང་འཁོར་ལོས་སྒྱུར་བའི་ཆ་ལུགས་ཅན་ཁ་དོག་དཀར་པོ་དབུ་རྒྱན་ལ་སོགས་པའི་རྒྱན་སྣ་ཚོགས་ཀྱིས་བརྒྱན་པ་གཡས་པ་མཆོག་སྦྱིན་དུ་བྱེད་པ། གཡོན་མི་འཇིགས་པ་རྡོ་རྗེའི་སྐྱིལ་ཀྲུང་གིས་སོ། །ནང་གི་གྲྭ་ལ་ལཱ་སྱེ་ལ་སོགས་པ་བྲིའོ། །ཕྱིའི་གྲྭ་ལ་དྷུཔྤེ་ལ་སོགས་པའོ། །སྒོ་བཞི་ལ་སྒོམ་བཞི་བྲི་སྟེ་གཡོན་བརྐྱང་བ་དང༌། ཟླུམ་པོ་དང༌། མཐུན་པའི་རྐང་ཐམས་ཅད་ཀྱིས་གནས་པར་བྲི་སྟེ། དེ་ནས་གཞན་ཡང་བྲིས་པ་ལྟར་བར་སྣང་ལས་འོངས་ཏེ་གཅིག་ཏུ་བསྲེ་བ་དང༌། གདུགས་དང་རྒྱལ་མཚན་བུམ་པའི་མཆོག་དང་གཏོར་མ་དང་རྟ་བབས་དང་ཆོས་ཀློག་པ་དང༌། མེ་ཏོག་སིལ་མ་བཀྲམ་པ་དང་བཅས་པ་ནི་དེ་ནས་ཞེས་བྱ་བས་སྟོན་ཏེ། རྣལ་འབྱོར་བདག་ཉིད་ཞུགས་ཞེས་བྱ་སྟེ། ཞུགས་ནས་ལྷག་ཆད་བསྐང་བ་དང་སྒོ་དབྱེ་བ་སྔོན་དུ་འགྲོ་བས་ཏིང་ངེ་འཛིན་གསུམ་དང་ལྡན་པར་གནས་པས་སྒོ་དབྱེ་བ་སྟོན་ཏོ། །དེ་ནས་བསྡུ་ཞིང་སྤྱན་དྲང་བ་ནི་སྔགས་ཀྱིས་ལྷ་རྣམས་སྤྱན་དྲངས་ཏེ། ཛཿ་ཧཱུཾ་བཾ་ཧོཿབྷ་ག་བཱ་ན་བཛྲ་ཨེ་ཧྱ་ཧི་ས་མ་ཡ་སྟྭཾ། དེ་ནས་གཙོ་བོ་བྱོན་པ་དང༌། །ཞེས་བྱ་བ་ནི། མདོར་ན་མཆོད་པ་བྱས་ནས་ཀྱང༌། །ཞེས་བྱ་བ་ནི། མདོར་བསྡུན་ལྕགས་ཀྱུ་ལ་སོགས་པས་ལས་བྱ་ཞིང་བགེགས་བསལ་སྒོ་བཅད་པ་ལ་སོགས་པ་སྔ་མ་བཞིན་དུ་བྱས་ནས། ཕྱག་རྒྱ་བཞིས་རྒྱས་གདབ་དབང་བསྐུར་བཟླས་བརྗོད་བྱ་བ་རྣམས་ནི་མདོར་ན་ཞེས་བྱའོ། །མཆོད་པ་བྱས་ནས་ཞེས་བྱ་བ་ནི། ཨརྒ་མཆོག་བསྟབས་པ་ལ་སོགས་པའི་མཆོད་པ་བྱའོ། །ཀྱང་ཞེས་བྱ་བ་ནི་གཏོར་མ་དང་སྦྱིན་སྲེག་དང་གནང་བ་ནོད་པ་བསྡུའོ། །འཆི་བདག་སྦྲུལ་གྱི་འཇིགས་ལྡན་རྣམས། །ཞེས་བྱ་བ་ལ་སོགས་པས་དཀྱིལ་འཁོར་དུ་གཞུག་པ་བསྟན་ཏོ། །འཆི་བདག་སྦྲུལ་དང་འདྲ་བས་འཇིགས་ལྡན་རྣམས་གཞོམ་པའི་ཕྱིར་གཞུག་པར་བྱ་སྟེ། མདོར་ན། ཨོཾ་བཛྲ་ས་མ་ཡ་ཧཱུཾ་ཞེས་བྱ་
བས་ཏི་རཱིནྟི་རིའི་ཕྱག་རྒྱ་བཅིངས་ལ་རིན་ཆེན་ཐོགས་ཏེ་ཡང་ན་ཕྲེང་བ་ཐོགས་ཏེ་གཞུག །ཧཱུཾ་པྲ་ཏཱིཙྪ་བཛྲ་ཧཱུཾ་ཞེས་བྱ་བས་མེ་ཏོག་དོར། བཛྲ་ས་མ་ཡ་ཧཱུཾ་ཞེས་བྱ་བས་དམ་ཚིག་སྦྱིན། ཨོཾ་བཛྲ་ཧཱ་སྱོད་གྷ་ཏྲ་ཡ་ཞེས་བྱ་བས་གདོང་གཡོགས་དགྲོལ། ཨོཾ་བཛྲ་པཱ་ཤྱ་ཧཱུཾ་ཞེས་བྱ་བས་དཀྱིལ་འཁོར་བསྟན་ནས་སྙིང་གར་ཕྱག་རྒྱ་དགྲོལ། འདིའི་སྒྲུབ་པའི་གོ་རིམས་ནི་རྩ་བའི་རྒྱུད་དུ་བཤད་ཟིན་ཏོ། །དེ་ནས་ཞེས་བྱ་བ་ལ་སོགས་པས་དབང་བསྐུར་བ་བསྟན་ཏོ། །དེ་ཡང་དང་བོར་དབུ་རྒྱན་དང༌། བུམ་པ་དང༌། ཕྲེང་བ་དང༌། ཕྱག་རྒྱ་དང༌། རྡོ་རྗེ་དང༌། ལས་ཀྱི་རྡོ་རྗེ་དང༌། འཁོར་ལོ་དང༌། ཐབས་དང༌། ཤེས་རབ་དང༌། གསང་བ་དང༌། ཤེས་རབ་ཀྱིས་དབང་བསྐུར་བ་རྣམས་ཡིན་ཏེ། འདི་ཡང་རྩ་བའི་རྒྱུད་དུ་བཤད་པ་དེ་བཞིན་དུ་ཤེས་པར་བྱའོ། །དེ་ལྟར་དབང་བསྐུར་ན་ཚེ་རིང་བའི་རིག་པ་འདི་སྦྱིན་ནོ་ཞེས་བྱ་བ་ལ་སོགས་པས་འདི་ཉིད་དུ་དབང་བསྐུར་བ་དང་དམ་ཚིག་ཐོབ་པ་ལ་དངོས་གྲུབ་སྦྱིན་ནོ་ཞེས་བྱ་བ་སྟེ། དེ་ལྟར་སྔར་བཤད་པ་ལྟར་བསྐུར་ནས་ཚེ་རིང་བ་ཐོབ་པར་བྱེད་པའི་རིག་པ་འདི་སློབ་དཔོན་གྱིས་སློབ་མ་ལ་སྦྱིན་ནོ། །དེ་ཉིད་ཨོཾ་བྷཱུཾ་བཛྲ་ཨཱ་ཡུ་ཥེ་ཧཱུཾ་ཨ་ཞེས་བྱ་བའོ། །དེ་ནས་སྒྲུབ་པ་འདི་ཡིན་ཏེ་ཞེས་བྱ་བ་ནི་འདིས་སྒྲུབ་པས་ན་བསྒྲུབ་སྟེ་འོག་གནས་འབྱུང་བའི་ཆོགས་སོ། །འདི་ཡིན་ཏེ་ཞེས་བྱ་བ་ནི་སྟོན་པས་རྩོམ་པའོ། །བཅོམ་ལྡན་འདས་རྡོ་རྗེ་ཚེ་དཔག་མེད་ཟླ་བའི་འོད་ཅན་ཞེས་བྱ་བ་ལ་སོགས་པས་དང་པོ་བྲི་བ་དང་བསྙེན་པ་སྟོན་ཏེ་བཅོམ་ལྡན་འདས་ཚེ་དཔག་མེད་ཁ་དོག་དཀར་པོ་རྒྱན་ཀུན་གྱིས་བརྒྱན་པ་གཡས་པ་མཆོག་སྦྱིན་དང་གཡོན་པ་མི་འཇིགས་པ་སྦྱིན་པ་དེ་ལས་བདུད་རྩི་འཛག་པ་བྲིའོ། །དེའི་འོག་ཏུ་རྣལ་འབྱོར་པ་ཐལ་མོ་སྦྱར་བ་གདོང་གྱེན་དུ་བལྟས་པ། མཆོད་པ་རྣམ་པ་ལྔ་དང་བཅས་པ་རས་ལ་བྲིས་ཏེ་སྤྱན་དབྱེ་བའི་ཆོ་ག་སྔར་བཤད་པ་བཞིན་དུ་བྱས་ལ། དེའི་སྤྱན་སྔར་དང་པོའི་སྦྱོར་བའི་ཏིང་ངེ་འཛིན་བསྒོམ་སྟེ་བཅོམ་ལྡན་འདས་ལ་སེམས་བཞིན་དུ་འབུམ་བཟླས་སོ། །དེ་ནས་ཟླ་བ་ཉ་བ་ལ་ཞེས་བྱ་བ་ལ་སོགས་པས་སྒྲུབ་པ་སྟོན་ཏེ། ཉའི་ནུབ་མོ་དཀྱིལ་འཁོར་ཆེན་པོ་བརྩམས་ཏེ་མཆོད་པ་བྱས་ལ་བ་དམར་སེར་གྱི་མར་སྣོད་གསར་བར་བཅུག་ལ་རྡོ་རྗེ་ཁུ་ཚུར་གཡོན་པས་མནན་ལ། བཅོམ་ལྡན་འདས་སྲོག་
དང་བཅས་པ་ལྟ་བུར་སེམས་ཤིང་མཚན་ཐོག་ཐག་བཟླས་བརྗོད་བྱ་བ་ཡིན་ནོ། །དེ་ནས་དྲི་སྣ་ཚོགས་བསྣམས་ཤིང་ཞེས་བྱ་བ་ལ་སོགས་པས་མཚན་མ་དང་དངོས་གྲུབ་སྟོན་ཏོ། །དེ་ནས་དྲི་དང་ལྡན་པ་འམ་རླངས་པ་འམ། དུ་བའམ་མེ་འམ་འོད་ཟེར་རམ་མེ་སྒྲོན་ནམ་འོད་ལ་སོགས་པའི་མཚན་མ་བྱུང་ན་མར་མེ་དེ་ཡང་མར་སར་པ་ལ་སོགས་པ་རྫ་ས་བཅུ་གཅིག་པོ་གང་ཡང་རུང་བ་ལ་བསྲེས་ཏེ། ནང་པར་སྔར་སྲུང་བ་དང༌། ཁྲུས་ལ་སོགས་པས་བདག་ཉིད་དཀྱིལ་འཁོར་བརྟགས་པའི་ཚུལ་དུ་སྦྱངས་ནས། ལྷའི་རྣལ་འབྱོར་དུ་བྱས་ཏེ་འཐུངས་སམ་ཟོས་ན་ཉི་མ་དང་ཟླ་བ་ཡོད་ཀྱི་བར་དུ་ཚེ་རིང་བ་རྡོ་རྗེ་དང་འདྲ་བར་འགྱུར་རོ། །མཚན་མ་ཐ་མ་བྱུང་ན། ནད་མེད་ཟོ་མདོག་བདེ་སྐྲ་དཀར་དང་གཉེར་བ་མེད་པའི་ཚེ་ལོ་བརྒྱ་པར་འགྱུར་རོ། །གཞན་ཡང་དེས་ཉུངས་ཀར་ལ་སོགས་པས་ཞི་བ་ལ་སོགས་པའི་ལས་འགྲུབ་པར་འགྱུར་ཏེ་ཐེ་ཚོམ་མེད་དོ། །དེ་ལྟར་ཚེ་ཚད་མེད་པའི་དཀྱིལ་འཁོར་བཤད་ནས། ད་ནི་འཇིག་རྟེན་པའི་ལྷ་ལ་མོས་པའི་དོན་དུ་འཇིག་རྟེན་པའི་དཀྱིལ་འཁོར་དྲུག་བསྟན་ཏེ། དེ་ཡང་དང་པོར་དེ་ནས་རྒྱལ་པོ་བཞི་ཞེས་བྱ་བ་ལ་སོགས་པས་རྒྱལ་པོ་བཞིའི་དཀྱིལ་འཁོར་སྟོན་ཏོ། །དེ་ནས་ཞེས་བྱ་བ་ནི་དང་པོའི་སྦྱོར་བའི་རྗེས་ཐོགས་སོ། །དེ་ཡང་འདིར་གཙུག་ཏོར་དུ་བཤད་པ་ལས། རྒྱལ་པོ་བཞི་དང་བཅས་པའོ། །དེ་ཉིད་ཀྱི་སྙིང་གར་དཀྱིལ་འཁོར་སྤྲུལ་པའི་དུས་སུ་གཙོ་བོའི་ཐུགས་ཀར་ཟླ་བ་ལ་སྔགས་བཀོད་དེ། །ངན་འགྲོ་སྦྱོང་བའི་དུས་སུ་རྒྱལ་པོ་བཞི་ཡང་དགུག་པ་དང་བཅས་པ་བསྒོམ་ཞེས་བྱ་བའི་དོན་ཏོ། །རྒྱལ་པོ་བཞི་ཞེས་བྱ་བ་ལ་སོགས་པ་ལ་བཤད་དུ་གསོལ་ཞེས་བྱ་བར་སྦྱར་རོ། །དེ་ཡང་རྒྱལ་ཆེན་བཞིས་མོས་པ་བྱེད་པའི་ས་ཐོབ་པའི་ཕྱག་ན་རྡོ་རྗེ་ལ་ཕྱག་འཚལ་ནས་སེམས་ཅན་ངན་འགྲོ་ལས་བསྐྱབ་བ་དང༌། ཚེ་ཕྱི་མ་དང་འདིའི་དོན་དུ་རང་རང་དགོད་བའི་སྙིང་པོ་དང༌། སྤྲུལ་པ་ལ་སོགས་པ་བཤད་ཀྱིས། དེ་ལ་བརྟེན་བའི་དཀྱིལ་འཁོར་རྡོ་རྗེ་འཛིན་པས་བཀའ་སྩལ་དུ་གསོལ་ཞེས་གསོལ་བ་གདབ་བོ། །རྒྱལ་པོ་ཆེན་པོ་དག་ལེགས་ཀྱིས་ཤོད་ཅིག་དང་ངས་རྗེས་སུ་ཡི་རང་ཞིང་བྱིན་གྱིས་བརླབ་པར་བྱའོ་ཞེས་བྱ་བ་ནི་ཁྱོད་ཀྱིས་ཞུས་པ་བཞིན་དུ་ངས་བྱིན་གྱིས་བརླབ་ཅིང་བཤད་པའོ་ཞེས་བྱའོ། །དེ་ནས་
གནོད་སྦྱིན་གྱི་རྒྱལ་པོ་ལ་བོས་ཏེ་ཞེས་བྱ་བ་ནས་རང་རང་གི་སྙིང་པོ་ཕུལ་ཏེ། ཨོཾ་བཻ་གནོད་སྦྱིན་གྱི་རྒྱལ་པོའིའོ། །ཨོཾ་དྷི་དྲི་ཟའི་རྒྱལ་པོའིའོ། །ཨོཾ་བི་གྲུལ་བུམ་གྱི་རྒྱལ་པོའིའོ། །ཨོཾ་ཁྱ་ཀླུའི་རྒྱལ་པོ་སྟེ་འདི་དག་གིས་དེ་རྣམས་དགོད་པ་ལ་སོགས་པ་སྟོན་ཏོ། །སྒོ་བ་རྣམས་ཀྱི་ནི་ཛཿ་ཧཱུཾ་བཾ་ཧོཿཞེས་བྱ་བ་ཡིན་ནོ། །འདིས་ཀྱང་འདི་སྐད་དུ་སྟོན་ཏེ། སྦྱོར་བ་དང་པོ་བསྒོམ་པ་ལ་ཁང་པ་ལ་བརྩིགས་མ་དང་གདན་བསྐྱེད་ལ་རྒྱལ་པོ་བཞི་དང་བཅས་པ་བསམས་ནས་སྙིང་པོ་དེ་རྣམས་ཀྱིས་རྒྱལ་པོ་གནས་རྣམས་སུ་བཀོད་དེ། ཕྱག་ན་རྡོ་རྗེའི་ཐུགས་ཀ་ལས་སྒོ་བ་བཞི་བཏོན་ནས་བསྒོམ་པ་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་བསྡུ་ཞིང་བྱིན་གྱིས་བརླབ་པ་ནི་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ཡིན་པར་ཤེས་པར་བྱའོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ནི། སློབ་དཔོན་གྱི་ལས་དང་སློབ་མ་གཞུག་པ་ལ་སོགས་པ་སྟོན་ཏེ། དེ་ཡང་རྒྱལ་པོ་ཆེན་པོ་དེ་དག་གི་དཀྱིལ་འཁོར་བཤད་པ་ནི། ཕྱིའི་དཀྱིལ་འཁོར་གྲུ་བཞི་སྒོ་བཞི་པ་ནང་གི་དཀྱིལ་འཁོར་འཁོར་ལོ་རྩིབས་བཞི་པས་བརྒྱན་པའོ། །དེའི་ལྟེ་བ་ལ་སྔ་མ་བཞིན་དུ་རྡོ་རྗེ་འཛིན་པ་ཞི་བ་བྲི་པའོ། །བྱང་ཕྱོགས་ཀྱི་རྩིབས་ལ་ལུས་ངན་པོ་ནེའུ་ལེའི་རྒྱལ་བ་ཐོགས་པ་རིན་པོ་ཆེའི་རྒྱན་གྱིས་བརྒྱན་པ་སྦོམས་པ་སེང་གེའི་གདན་ལ་གསེར་གྱི་མདོག་ཅན་བུམ་པ་བཟང་པོའི་ཁ་ནས་ཆུ་འབབ་པ་དང༌། དཔག་བསམ་གྱི་ཤིང་དང་བཅས་པར་བྲིའོ། །ཤར་ཕྱོགས་ཀྱི་རྩིབས་ལ་ཡུལ་འཁོར་སྲུང་པི་ཝང་བསྒྲེང་བ་ལྗང་གུ་རྒྱན་རྣམས་ཀྱིས་བརྒྱན་པའོ། །ལྷོ་ཕྱོགས་ཀྱི་རྩིབས་ལ་ལུས་འཕགས་རལ་གྲི་ལག་ན་ཐོགས་པ་བྲིའོ། །ནུབ་ཕྱོགས་ཀྱི་རྩིབས་ལ་མིག་མི་བཟང་རྡོ་རྗེ་དང་ཞགས་པ་འཛིན་པ་མགོ་བོ་ལ་སྦྲུལ་མགོ་བདུན་གྱིས་བསྐོར་པ་མིག་དམར་ཞིང་ཤིན་ཏུ་འབུར་བ་བྲིའོ། །སྒོ་བཞིའི་ཕྱོགས་སུ་ལྕགས་ཀྱུ་མ་ལ་སོགས་པ་བྲིའོ། །དེ་ནས་དགོངས་ཀའི་དུས་ལ་བབ་པ་དང་རྡོ་རྗེའི་ཕྱག་རྒྱས་རྣལ་འབྱོར་པ་ཉིད་དུ་ཞུགས་ལ་ལྷག་ཆད་ཞི་བར་བྱ་བ་དང༌། མེ་ཏོག་དོར་བ་ལ་སོགས་པ་སྔོན་དུ་འགྲོ་བས་ཏིང་ངེ་འཛིན་གསུམ་དང་ཡང་སྒོ་ཕྱེ་སྟེ་དང་པོ་རྡོ་རྗེ་འཛིན་པ་སྤྱན་དྲང༌། དེ་ནས་ཨོཾ་བཻ་ཞེས་བྱ་བ་ལ་སོགས་པ་ལ་ཛཿ་ཧཱུཾ་བཾ་ཧོཿ། བཏགས་པས་རྒྱལ་པོ་སྤྱན་དྲང༌།
ལྕགས་ཀྱུ་ལ་སོགས་པས་ལས་བྱ། ཕྱག་རྒྱ་བཞིས་རྒྱས་གདབ། དབང་བསྐུར་བ་དང་མཆོད་པ་བྱ་བ་དང་ཆོ་ག་བཞིན་དུ་ཕྱི་རོལ་ཏུ་གཏོར་མ་དབུལ་སྦྱིན་སྲེག་བྱ་ཞིང་གནང་བ་ནོད་ཅེས་བྱ་བ་སྟོན་ཏོ། །དེ་ནས་སྔགས་མཁན་སྔགས་འདི་དང་ཞེས་བྱ་བ་ལ་སོགས་པས་གཞུག་པ་དང་དབང་བསྐུར་བ་ཕན་ཡོན་དང་བཅས་པ་སྟོན་ཏོ། །དེ་ནས་རྣལ་འབྱོར་པས། ཨོཾ་བཛྲ་ས་མ་ཡ་ཧཱུཾ་ཞེས་བྱ་བའི་སྔགས་འདི་དང༌། རྡོ་རྗེ་འཛིན་པའི་ཕྱག་རྒྱས་རིགས་བཞི་པོ་གང་ཡང་རུང་བ་མེ་ཏོག་གམ། རིན་ཆེན་ཐོགས་སུ་གཞུག་གོ །དེ་ནས་པྲ་ཏཱིཙྪ་བ་མ་ཧོ་དྷ་མ་ཞེས་བྱ་བས་དོར་རོ། །གང་ལ་བབས་པ་དེ་འདིས་འགྲུབ་པར་འགྱུར་རོ། །དེ་ནས་སྔར་བཤད་པ་བཞིན་དུ་པདྨ་ལ་བཞག་སྟེ། ཕྱི་རོལ་དུ་གནས་པའི་བུམ་པ་བཞིས་དབང་བསྐུར་ཞིང་ཕྱག་ན་རྡོ་རྗེའི་ཕྱག་རྒྱར་བསྐྱེད་ལ་དབང་བསྐུར་བར་བྱ་སྟེ། དེ་ནས་དབང་ཉི་ཤུ་རྩ་གཅིག་པོ་ཀུན་སྔ་མ་བཞིན་དུ་བསྐུར་ནས་རྒྱལ་པོར་གྱུར་པ་དང༌། རྒྱལ་པོ་ཡང་གླིང་གཅིག་དང༌། གླིང་བཞི་ལ་དབང་བསྐུར་བའི་རྒྱལ་པོར་འགྱུར་རོ། །ཕྱག་ན་རྡོ་རྗེའི་ཕྱག་རྒྱར་བསྐྱེད་པ་བཞིན་དུ་གཞན་ཡང་རྒྱལ་པོ་བཞིའི་ཕྱག་རྒྱ་བསྐྱེད་དེ་ལན་བཞིར་དབང་བསྐུར་ཞིང་ཞུགས་ན་རྡོ་རྗེ་འཛིན་པ་དང་རྒྱལ་པོ་བཞི་འཁོར་དང་བཅས་པས་རྟག་ཏུ་སྐྱོང་བ་དང་གཞན་གྱི་གནོད་པ་དང་ནད་དང་འཆི་བདག་གི་འཇིགས་པ་དང་མུ་གེ་ལ་སོགས་པའི་གནོད་པ་འཇོམས་སོ། །རྒྱལ་པོ་བཞིས་ཁྱད་པར་དུ་ཞི་བ་དང་མངོན་སྤྱོད་དང་དབང་དང་རྒྱས་པ་བྱེད་དེ། དེ་ལྟར་མ་བྱས་ན་ཕྱག་ན་རྡོ་རྗེ་ལ་འཁྲུས་པར་འགྱུར་རོ་ཞེས་བྱ་བ་ཡིན་ནོ། །དེ་ནས་ཞེས་བྱ་བ་ལ་སོགས་པས་ཕྱོགས་སྐྱོང་བ་བཅུ་རྣམས་ཀྱི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་ནི་ཕྱོགས་སྐྱོང་བཅུ་དང་བཅས་པའི་ཕྱག་ན་རྡོ་རྗེ་སྟེ་མདོར་ན་དང་པོའི་སྦྱོར་བའི་ཏིང་ངེ་འཛིན་ཏེ་དེའི་རྗེས་ཐོགས་ལའོ། །ཕྱོགས་སྐྱོང་བ་བཅུ་རྣམས་ཀྱིས་ཞེས་བྱ་བ་ལ་སོགས་པ་ལ། ཕྱོགས་སྐྱོང་བ་བཅུ་རྣམས་ཀྱིས་བཅོམ་ལྡན་འདས་ལ་ཕྱག་བྱས་ཏེ་སེམས་ཅན་གྱི་དོན་དུ་རང་གི་སྙིང་པོ་དང་དབུལ་བར་གསོལ་བ་བཏབ་པ་དང༌། བཅོམ་ལྡན་འདས་ཀྱིས་གནང་བས་རང་གི་སྙིང་པོ་ཕུལ་བ། ཨོཾ་ཨི་ཞེས་བྱ་བ་ནས་ཨོཾ་བྲ་ཞེས་བྱ་བའི་བར་བརྒྱ་བྱིན་དང༌། གཤིན་རྗེ་དང༌། ཆུ་ལྷ་དང༌། གནོད་སྦྱིན་དང༌། མེ་ལྷ་དང༌། སྲིན་པོ་དང༌། རླུང་ལྷ་དང༌། དབང་
ལྡན་དང༌། ཉི་མ་དང༌། ཕག་རྣམས་ཀྱི་སྙིང་པོ་ཡིན་ཏ་འདིས་ནི་འདི་རྣམས་དགོད་པ་སྟོན་ཏོ། །དེ་ནས་བསྡུ་ཞིང་བྱིན་གྱིས་བརླབ་པ་ནི་སྔ་མ་བཞིན་ནོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ལ་སོགས་པས་སློབ་དཔོན་གྱི་ལས་དང་སློབ་མ་གཞུག་པ་ལ་སོགས་པ་སྟོན་ཏེ། དེ་ཡང་ཏིང་ངེ་འཛིན་གསུམ་དང་ས་དང་ལྷག་པར་གནས་པ་བྱས་པ་དེའི་རྗེས་ལ་དཀྱིལ་འཁོར་ཟུར་བཞི་པ་སྒོ་བཞི་པ་ལ་སོགས་པའི་དབུས་སུ་འཁོར་ལོ་རྩིབས་བརྒྱད་པ་བྲིས་ལ། དེའི་ལྟེ་བ་ལ་རྡོ་རྗེ་འཛིན་པ་སྔ་མ་བཞིན་གཞག །ཕྱོགས་སྐྱོང་རྣམས་ཤར་ལ་སོགས་བའི་ཆར་བརྒྱ་བྱིན་ལ་སོགས་པ་གཞག །ལྟེ་བ་ལ་སྤྱན་སྔར་ཉི་མ་དང་ཕག་ཀྱང་གཞག །སྒོ་རྣམས་སུ་ལྕགས་ཀྱུ་ལ་སོགས་པ་ཡང་གཞག །དེ་ནས་ཏིང་ངེ་འཛིན་གསུམ་ལ་སོགས་པ་དང་སྦྱན་དྲང་བ་དང་མཆོད་པ་བྱ། དེ་ནས་སློབ་མ་གཞུག་པའི་དོན་དུ་ཡང་བདག་ཉིད་གཅིག་པུ་ཞུགས་ནས། གནང་བ་ནོད་པའི་མཐར་ཐུག་པར་བྱ་ཞེས་པའི་དོན་ཏོ། །སློབ་མ་རྣམས་ནི་གཞུག་བྱས་ཤིང༌། །ཞེས་བྱ་བ་ལ་སོགས་པས་དཀྱིལ་འཁོར་དུ་གཞུག་པ་དང་དབང་བསྐུར་བ་དང་ཕན་ཡོན་སྟོན་ཏོ། དང་པོ་སློབ་མ་རྣམས་སྔར་རྩ་བའི་རྒྱུད་དུ་བཤད་པ་བཞིན་དུ་གཞུག་ཅིང༌། ཕྱོགས་སྐྱོང་བའི་བུམ་པ་རྣམས་ཀྱིས་དབང་བསྐུར་ཏེ། དབང་བསྐུར་བ་གཞན་རྣམས་ཀྱིས་ཀྱང་དབང་བསྐུར་ཏེ་སྙིང་པོ་སྦྱིན་པར་བྱའོ། །དེ་ནས་བསྒྲུབས་ན་འགྲུབ་པར་ཐེ་ཚོམ་མེད་དོ་ཞེས་བྱ་བའི་དོན་ཏོ། །དེ་ནས་དེ་དག་མགུ་ནས་ནི། །འདི་སྐད་དུ་ནི་ཚིག་གསོལ་ཏོ། །ཞེས་བྱ་བ་ལ་སོགས་པ་བརྒྱ་བྱིན་ལ་སོགས་པས་ཞུས་པ་སྟེ་དབང་བསྐུར་བའི་ཕན་ཡོན་ཡིན་ཏེ་གོ་སླ་བསམ་བཤད་དོ། །དེ་ནས་གཟའ་ཆེན་པོ་བརྒྱད་ཅེས་བྱ་བ་ལ་སོགས་པས་གཟའ་ཆེན་པོ་བརྒྱད་ཀྱི་དཀྱིལ་འཁོར་སྟོན་ཏོ། །དེ་ནས་ཞེས་བྱ་བ་ལ་དེ་ནས་ཞེས་བྱ་བ་ནི་དང་པོའི་སྦྱོར་བ་སྟེ། འདིར་དང་པོའི་སྦྱོར་བ་ནི་ཕྱག་ན་རྡོ་རྗེ་གཟའ་ཆེན་པོ་རྒྱུ་སྐར་དང་བཅས་པ་ཡིན་ནོ། །གཟའ་ཆེན་པོ་བརྒྱད་ཅེས་བྱ་བ་ལ་སོགས་པ་ལ་གཟའ་འཁོར་དང་བཅས་པ་རྣམས་རང་རང་གི་སྙིང་པོ་ཕུལ་བ་ལ་བྱིན་གྱིས་བརླབས་ནས་རང་རང་གི་སྙིང་པོ་བཟླས་པ་ནི། ཨོཾ་ཨ་ཞེས་བྱ་བ་ནས་ཨོཾ་ར་ཞེས་བྱ་བའི་བར་པ་བསངས་དང༌། ཕུར་བུ་དང༌། ཟླ་བ་དང༌། གཟའ་
ལག་དང༌། མི་ག་དམར་དང༌། སྒྲ་གཅན་དང༌། ཉི་མ་དང༌། སྤེན་པ་ལ་སོགས་པ་དང༌། སྨིན་དྲུག་ལ་སོགས་རྒྱུ་སྐར་ཉི་ཤུ་རྩ་བརྒྱད་དང་བཅས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ནི་སྔ་མ་བཞིན་ཏེ་ཏིང་ངེ་འཛིན་རྣམ་པ་གསུམ་མོ། །དེ་ནས་དེ་དག་གི་དཀྱིལ་འཁོར་བཤད་དོ་ཞེས་བྱ་བ་ལ་སོགས་པས་སློབ་དཔོན་གྱི་ལས་སྟོན་ཏེ་དེ་ཡང་ཏིང་ངེ་འཛིན་གསུམ་གྱིས་བསྙེན་པ་བྱས་ནས་ས་དང་ལྷག་པར་གནས་པའི་རྗེས་ལ་ཐིག་གདབ་པ་སྔོན་དུ་འགྲོ་བས་ཇི་སྐད་དུ་བཤད་པའི་དཀྱིལ་འཁོར་དང༌། ནང་གི་ཆོས་ཀྱི་འཁོར་ལོ་རྩིབས་བརྒྱད་པ་ལྟེ་བ་དང་བཅས་པ་བྲིས་ལ། དབུས་ཀྱི་པདྨོའི་ལྟེ་བ་ལ་རྡོ་རྗེ་འཛིན་པའི་ཁྲོ་བོ་གཞག་པར་བྱའོ། །པདྨ་འདབ་མ་བརྒྱད་ཀྱི་མཚམས་བཞི་བོར་བའི་ཕྱོགས་བཞི་ལ་རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེ་བྲིའོ། །རྩིབས་ལ་ཤར་དུ་པ་བསངས། ལྷོར་ཕུར་བུ། ནུབ་ཏུ་ཟླ་བ། བྱང་དུ་གཟའ་ལག །ཤར་ལྷོར་མིག་དམར། ལྷོ་ནུབ་ཏུ་སྒྲ་གཅན་འཛིན། ནུབ་བྱང་དུ་ཉི་མ། བྱང་ཤར་དུ་སྤེན་པ། སྒོ་བཞིར་ལྕགས་ཀྱུ་ལ་སོགས་པ་ཁྲོས་པ་བྲི། ཁོར་ཡུག་གི་ཕྱི་རོལ་དུ་སྨིན་དྲུག་ནས་བྲ་ཉེའི་མཐར་ཐུག་པར་རྒྱུ་སྐར་བདུན་བདུན་ཕྱོགས་རེ་རེར་བྲིའོ། །འདིར་ལཱ་སྱེ་ལ་སོགས་པ་རྣམས་མི་བྲི་བ་ནི་འཇིག་རྟེན་པའི་ལྷར་དངོས་གྲུབ་སྩོལ་བའི་རྒྱུར་གྱུར་པས་མཆོད་པ་བྱ་བ་མ་ཡིན་པའི་ཕྱིར་རོ། །དེ་ནས་ཁྲུས་ལ་སོགས་པ་སྔོན་དུ་འགྲོ་བས་ཏིང་ངེ་འཛིན་གསུམ་དང་ལྡན་པས་ལྕགས་ཀྱུ་ལ་སོགས་པས་ལས་བྱ་ཞིང༌། མཆོད་པ་དང་གནང་བ་ནོད་པ་སྔ་མ་བཞིན་ནོ། །དེ་ནས་སློབ་མ་རྣམས་གཞུག་སྟེ་ཞེས་བྱ་བ་ལ་སོགས་པས་གཞུག་པ་དང་དབང་བསྐུར་བའི་ཕན་ཡོན་དང་བཅས་པ་སྟོན་ཏོ། །ཨོཾ་བཛྲ་ཞེས་བྱ་བ་ལ་སོགས་པ་གསུམ་གྱིས་གཞུག་པའི་ཁྱད་པར་བསྟན་ཏོ། །ལྷག་མ་ནི་སྔར་བཤད་པ་བཞིན་ནོ། །དེ་ནས་གཟའ་བརྒྱད་ཀྱིས་བྱིན་གྱིས་བརླབས་པའི་བུམ་པས་དབང་བསྐུར་རྡོ་རྗེའི་ཕྱག་རྒྱས་དབང་བསྐུར། དབང་བསྐུར་བ་ལྷག་མ་རྣམས་ཀྱིས་ཀྱང་དབང་བསྐུར། གཟའ་ཡི་དམ་འདི་ལྟར་བཟུང་སྟེ་སྙིང་པོ་དོན་ཙམ་གྱི་སྒོ་ནས་བསྒྲུབ་པར་བྱའོ། །འདིར་སྒྲུབ་པའི་ཁྱད་པར་མ་བཤད་པ་ནི་རྒྱུ་ནི་གསུམ་ཡིན་ཏེ། དབང་དང་དམ་ཚིག་ཁོ་ན་གཙོར་ཟུང་ཤིག །དབང་གི་འབྲས་བུ་གཟའི་དཀྱིལ་འཁོར་ལ་སོགས་པ་གསུམ་
ཡིན་ནོ། །ཀླུའི་དཀྱིལ་འཁོར་ལ་སོགས་པ་གསུམ་ནི་དབང་དང་དམ་ཚིག་དང་དངོས་གྲུབ་ཐམས་ཅད་སྒྲུབ་པ་ཁོ་ནའོ། །འདི་ལྟར་བསྟན་པ་དེ་ཡང་དེས་འདུལ་བའི་གང་ཟག་ལ་སོགས་པ་ཡིན་ནོ་ཞེས་བྱ་བའོ། །དེ་ནས་ཕན་ཡོན་གཟའ་རྣམས་ཀྱིས་འདོད་པ་ཐམས་ཅད་སྒྲུབ་པོ། །རྒྱུ་སྐར་དང་སྐད་ཅིག་དང་ཡུད་ཙམ་དང་ཐང་གཅིག་དང༌། དུས་གཅིག་དང་ཟླ་ཚིགས་དང་སྦྱོར་བ་དང་ཁྱིམ་དང་དུས་སྦྱོར་དང་འཇུག་ཕོད་ལ་སོགས་པ་ཞེས་བྱ་བ་ནི་རྒྱུ་སྐར་དེ་དག་ཉིད་སྐད་ཅིག་ལ་སོགས་པ་ལ་དབང་བ་དང༌། དུས་དྲུག་པ་ལ་སོགས་པ་ནས་ཟླ་ཚིགས་ལ་དབང་བ་དང༌། དཔལ་ལ་སོགས་པའི་འབྱོར་པ་དང༌། ཁྱིམ་དང་དུས་སྦྱོར་བ་ལ་སོགས་པ་འགྲུབ་པ་དང་འཇུག་ཕོད་བཟང་ངན་བྱེད་པ་དང་ཞེས་བྱ་བ་ཡིན་ནོ། །ལྷག་མ་རྣམས་ནི་གོ་སླ་བས་མ་བཤད་དོ། །དེ་ནས་ཀླུ་ཆེན་བརྒྱད་ཀྱི་ཞེས་བྱ་བ་ལ་སོགས་པས་ཀླུའི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་ལ་སོགས་པ་ནི་སྦྱོར་བའི་ཏིང་ངེ་འཛིན་ཏོ། །དེ་ཡང་སྔ་མ་ལས་ཀླུ་ཆེན་བརྒྱད་དང་བཅས་པའོ། །ཀླུ་ཆེན་བརྒྱད་ཀྱི་ཞེས་བྱ་བ་ལ་སོགས་པ་ལ། རང་གི་སྐད་ཅིག་ཙམ་གྱིས་མཚོན་པའི་སྒྲས་བཅོམ་ལྡན་འདས་མཉེས་པར་བྱས་ཏེ་སྙིང་པོ་དབུལ་བར་ཞུས་པ་དང༌། བཅོམ་ལྡན་འདས་ཀྱིས་གནང་ནས་རང་རང་གི་སྙིང་པོ་ཕུལ་བ། ཨོཾ་ཕུཿ་ཞེས་བྱ་བ་ནས། ཨོཾ་ཕུཿ་ཞེས་བྱ་བའི་བར་མཐའ་ཡས་དང༌། འཇོག་པོ་དང༌། ཀརྐོ་ཊ་དང་རིགས་ལྡན་དང༌། ནོར་རྒྱས་དང་དུང་སྐྱོང་དང་པདྨ་དང་ཆུ་ལྷ་རྣམས་ཀྱི་ཡིན་ནོ། །དེ་སྔ་མ་བཞིན་དུ་བཤད་པས་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །དེ་ནས་བསྡུ་བ་དང་བྱིན་གྱིས་བརླབ་པ་ནི་སྔ་མ་བཞིན་དུ་ལས་རྒྱལ་མཆོག་གི་ཏིང་ངེ་འཛིན་ནོ། །དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་བསྟན་ཏོ། །དེ་ཡང་སྔོན་དུ་བསྙེན་པ་དང་ས་ལྷག་པར་གནས་པའི་ཆོ་ག་དང༌། ཐིག་གདབ་པ་དང་བཅས་པར་བྱ་བ་ལ་དེ་ནས་ཞེས་བྱའོ། །པདྨ་འདབ་མ་བརྒྱད་པའི་དཀྱིལ་འཁོར་བཤད་དེ། པདྨ་འདབ་མ་བརྒྱད་པ་ཁ་དོག་དཀར་པོ་དེའི་ལྟེ་བར་རྡོ་རྗེ་འཛིན་པ་ཁྲོ་བོ་དབུ་ལ་སྦྲུལ་མགོ་བདུན་མཐའ་ཡས་པ་ཡོད་པར་བྲིའོ། །དབང་ལྡན་གྱི་ཕྱོགས་ནས་བརྩམས་ནས་མཐའ་ཡས་ནས་ཆུ་ལྷའི་བར་མཐར་ཐུག་པར་པདྨ་རེ་རེ་ལ་སྦྲུལ་
མགོ་བདུན་བདུན་མགོ་ལ་ཡོད་པ། ཆུང་མས་ལག་པ་གཡས་པས་མགུལ་ནས་འཁྱུད་པར་བྲི་བར་བྱའོ། །འདི་དག་དང་ཕྱིའི་དཀྱིལ་འཁོར་དང་སྒོ་ལ་སོགས་པ་མེད་ན་ནི་རྒྱ་མཚོ་ཆེན་པོ་ལ་བརྟེན་པའི་དབང་དུ་བྱས་ནས་དུས་དེ་ལ་དགོངས་ནས་བཤད་པ་ཡིན་ནོ། །དེའི་ཕྱིར་པདྨ་ཡང་ཆུ་དང་འདམ་ལས་སྐྱེ་སྟེ་འདི་དག་ཀྱང་པདྨ་ལ་གནས་པ་ཉིད་དོ། །གཞན་དག་ཏུ་ནི་གཞལ་ཡས་ཁང་དང་བཅས་པར་ཡང་བཤད་དོ། །གཞན་ཡང་བུམ་པ་བརྒྱད་དང༌། གཏོར་མ་དང་ཤིན་ཏུ་མཛེས་པའི་བཤོས་དང༌། འབྱུང་པོའི་གཏོར་མ་མར་དང་འོ་མ་དང་སྦྲང་རྩིར་བཅས་པར་བྲིའོ། །དེ་ནས་ཁྲུས་བྱ་བ་སྔོན་དུ་འགྲོ་བས་ཞུགས་ལ་ཏིང་ངེ་འཛིན་གསུམ་དང་ལྡན་པར་བྱའོ། །སྦྲུལ་མགོའི་ཕྱག་རྒྱས་རང་གི་སྐད་མཚོན་པ་ཕུཿ་ཛཿ་ཧཱུཾ་བཾ་ཧོཿ་ཞེས་བརྗོད་དེ། ལྕགས་ཀྱུ་ལ་སོགས་པས་ལས་བྱ་བ་སྔ་མ་བཞིན་དུ་ཤེས་པར་བྱའོ། །དེ་ནས་བུ་ནི་རྒྱལ་པོ་དང་ཞེས་བྱ་བ་ལ་སོགས་པས་སློབ་མ་གཞུག་པ་སྟོན་ཏོ། དེ་ནས་རྒྱལ་པོ་དང་རྒྱལ་རིགས་རྩ་བའི་རྒྱུད་དུ་བསྟན་པ་བཞིན་དུ་དཀྱིལ་འཁོར་དུ་བཅུག་ནས་དུག་གི་ཉེས་པ་བསལ་བའི་ཕྱིར། ཕུཿ་ཞེས་བྱ་བས་དྲངས་པའི་སྔར་བཤད་པའི་སྔགས་རྣམས་ཀྱིས་སྔ་མ་བཞིན་དུ་དབང་བསྐུར་རོ། །དེ་ནས་ཨོཾ་བེའུ་ཞེས་བྱ་བ་ལ་སོགས་པའི་སྙིང་པོ་ཙམ་བརྗོད་ནས་ཀླུ་རྣམས་བསྒྲུབ་པར་བྱའོ། །དེ་ནས་དེ་དག་མགུ་ནས་ཞེས་བྱ་བ་ལ་སོགས་པ་ནི་གོ་སླ་བའི་ཕྱིར་མ་བཤད་དོ། །ཀླུའི་དཀྱིལ་འཁོར་འདི་ཉིད་དུ་དབང་ཐོབ་པ་རྣམས་ལ་དངོས་གྲུབ་བསྟན་པའི་ཕྱིར། དེ་ནས་སྒྲུབ་པ་བཤད་ཅེས་བྱ་བ་ལ་སོགས་པས་དངོས་གྲུབ་བཤད་དེ། དེ་ཡང་དང་པོར་གནས་དཔེན་པར་ཁྲུས་བྱས་པ་སྔོན་དུ་འགྲོ་བས་བདག་རྡོ་རྗེ་འཛིན་པར་བསམས་ཏེ། དེའི་དབུལ་སྦྲུལ་མགོ་དེ་ལས་ལྷ་རྫས་ཀྱི་འོད་ཟེར་གྱི་ཕྲེང་བ་དཀར་པོ་བདུད་རྩི་འབབ་པ་ལྟ་བུར་བསམས་ཏ། ཕུཿ་ཞེས་བྱ་བ་ཐུན་མོང་གི་སྙིང་པོ་འབུམ་བཟླས་ལ་བསྙེན་པ་བྱས་ཏེ། དེ་ནས་ཀླུའི་དཀྱིལ་འཁོར་བསམས་ཏེ་མཆོད་ལ་དུག་གིས་ཟིན་པའམ། གཡན་པའམ་འཚེ་བ་ལ་སོགས་པས་ཟིན་པ་ལ་དབུའི་ལྷ་རྫས་འོད་ཟེར་གྱི་ཕྲེང་བས་བཀང་སྟེ། དེའི་དོན་དུ་ཕུཿ་ཞེས་བྱ་བས་ཀླུའི་དཀྱིལ་འཁོར་བསམས་ཏེ་ལག་པ་སྦྲུལ་མགོའི་ཞགས་པ་འདྲ་བས་དྲང་ཞིང་
ཕུཿ་ཞེས་བརྗོད་ལ་འོད་ཟེར་གྱི་རླུང་གིས་གཏོར་ལ། དང་པོར་པགས་པ། དེ་ནས་ཤ་དང༌། ཐ་མར་དུས་པ་ལ་གནས་པའི་དུག་རྣམས་ཕུཿ་ཞེས་བྱ་བ་དང་སྦྲུལ་མགོས་དྲངས་ན་འདྲོངས་པར་འགྱུར་རོ་ཞེས་བྱ་བའི་དོན་ནི་སྒྲུབ་པ་ཡིན་ནོ། །དེ་ནས་ལས་ཐམས་ཅད་བྱེད་ཅིང་དུག་རིམས་དང་དུག་སྦྱར་མ་ལ་སོགས་ཀྱི་དུས་སུ་སྔ་མ་བཞིན་དུ་སྤྱར་ན་ཁུ་ཚུར་གྱིས་ཀྱང་འབྱིན་ཏེ། སྦྲུལ་མགོའི་ཕྱག་རྒྱ་སྨོས་ཅི་དགོས། །ཞེས་བྱ་བ་ཁྱད་པར་དུ་གསུངས་པ་ཡིན་ནོ། །དེ་ནས་ཞེས་བྱ་བ་ལ་སོགས་པས་འཇིགས་བྱེད་ཆེན་པོའི་དཀྱིལ་འཁོར་སྟོན་ཏོ། །དེ་ནས་ཞེས་བྱ་བ་ནི་འཇིགས་བྱེད་ཆེན་པོའི་དཀྱིལ་འཁོར་དང་བཅས་པ་སྔ་མ་བཞིན་ནོ། །ལྷ་ཆེན་པོ་རྣམས་ཀྱི་བདག་པོ་འཇིགས་བྱེད་ཆེན་པོ་ཞེས་བྱ་བ་ལ་སོགས་པ་ལ་འཇིགས་བྱེད་རང་གི་འཁོར་བུད་མེད་བརྒྱད་དང་བཅས་པས་བསྐོར་བས་ཕྱག་བྱས་ཏེ་ཞུས་པའི་དོན་ཏོ། །སྐྲག་ཅིང་སྨྱོ་བ་ལ་སོགས་པ་ལ་ཕན་གདགས་པའི་སླད་དུ་སྙིང་པོ་ཕུལ་ལ་གསོལ་པ་བཏབ་པ་དང༌། བཤད་པར་གནང་ནས་འཇིགས་བྱེད་ཆེན་པོ་ཁོ་ནས་འཇིགས་པའི་སྒྲ་ཕྱུང་སྟེ་སྨྲས་པ་ནི་ཨོཾ་བྷེ་ར་ཞེས་བྱ་བ་ནས། ཨོཾ་བ་སྭཱ་ཧཱ་ཞེས་བྱ་བའི་བར་ཡིན་ཏེ། འཇིགས་བྱེད་ཆེན་པོ་དང༌། ཚངས་པ་དང༌། ཁྱབ་འཇུག་དང༌། བརྒྱ་བྱིན་དང༌། གཞོན་ནུ་ཀ་རྟི་ཀ་དང༌། བྷྲྀདྒི་རི་ཏི་དང༌། སྟོབས་བཟངས་དང༌། ཚོགས་ཀྱི་བདག་པོ་ཁྲོས་པ་དང་བཅས་པ། ཆུང་མ་དང་བཅས་པ་རྣམས་ཀྱི་སྙིང་པོ་ཡིན་ཏེ། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་སྟོན་ཏེ་གང་གི་ཕྱིར་འཇིགས་བྱེད་ཆེན་པོ་ཁོ་ནས་སྨྲས་ཤེ་ན། བཅོམ་ལྡན་འདས་འཇིགས་བྱེད་ཆེན་པོ་ནི། བརྒྱད་པོ་དེ་དག་བདག་ངག་ཉན། །ཞེས་བྱ་བ་གསུངས་ཏེ་གཙོ་བོ་ཡིན་པའི་ཕྱིར་ངག་ཉན་པའོ། །ཏིང་ངེ་འཛིན་གསུམ་པ་ནི་དེ་བཞིན་དུ་ཤེས་པར་བྱའོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ལ་སོགས་པས་སློབ་དཔོན་གྱི་ལས་སྟོན་ཏེ་དེ་བཞིན་དུ་བསྙེན་པ་ལ་སོགས་པ་ཐམས་ཅད་བྱས་པ་ཕྱིའི་དཀྱིལ་འཁོར་བྲི་བའི་ནང་དུ་འཁོར་ལོ་རྩིབས་བརྒྱད་པ་ལྟེ་བ་དང་བཅས་པ་བྲིས་ནས། རྡོ་རྗེ་འཛིན་པ་ཁྲོ་བོ་འཇིགས་བྱེད་ཆེན་པོ་ཆུང་མ་དང་བཅས་པ་ཞབས་འོག་ཏུ་ནོན་པར་བྲི། ཤར་ཕྱོགས་ཀྱི་རྩིབས་སུ་བརྒྱ་བྱིན་ལ་སོགས་པ། ལྷོའི་ཕྱོགས་ཀྱི་རྩིབས་
ལ་ཚངས་པ་ཁྲོས་པ། ནུབ་ཕྱོགས་ཀྱི་རྩིབས་ལ་གཏོགས་འདོད་ཁྲོས་པ། བྱང་ཕྱོགས་ཀྱི་རྩིབས་ལ་གཞོན་ནུ་ཀརྟི་ཀ་ཁྲོས་པ། ཤར་ལྷོའི་རྩིབས་ལ་ཚོགས་ཀྱི་བདག་པོ་ཁྲོས་པ། ལྷོ་ནུབ་ཀྱི་མཚམས་སུ་བྷྲྀདྒི་རི་ཏི་ཁྲོས་པ། ནུབ་བྱང་གི་མཚམས་སུ་དགའ་བྱེད་དབང་ཕྱུག་ཁྲོས་པ། བྱང་ཤར་གྱི་རྩིབས་ལ་སྟོབས་བཟངས་ཁྲོས་པ་ཆུང་མ་དང་བཅས་བ་བྲི་བར་བྱའོ། །རྒྱུད་འདིར་ནི་ལྷ་རྣམས་ཀྱི་ཁ་དོག་དང་ཕྱག་མཚན་དང་གདན་དང་དབྱིབས་ལ་སོགས་བ་མ་བསྟན་པ་ནི་འགྲོ་བ་འདུལ་བ་རྣམས་ཀྱི་ཕྱག་མཚན་ལ་སོགས་པ་ངེས་པ་མེད་པའི་ཕྱིར་མ་བསྟན་ཏོ། །ཡང་དཀྱིལ་འཁོར་དུ་དགོད་པའི་དུས་སུ་ནི་བྱ་བ་དང་སྤྱོད་པ་དང༌། རྣལ་འབྱོར་གྱི་རྒྱུད་གཞན་རྣམས་ལས་ཤེས་པར་བྱའོ། །འདིར་ཡང་སྒོ་བ་རྣམས་ནི་ཁྲོ་བ་དང་ལྡན་པར་བྲི་ལ། སྔར་བཤད་པ་བཞིན་དུ་བུམ་པ་ལ་སོགས་པ་རྣམས་གཞག་པར་བྱའོ། །དེ་ནས་ཏིང་ངེ་འཛིན་གསུམ་དང་ལྡན་པས་སྒོ་དབྱེ་བ་ལ་སོགས་པ་ལྕགས་ཀྱུ་ལ་སོགས་པས་ལས་བྱ་སྟེ་ཁྲག་གིས་བཀང་པའི་ཐོད་པས་མཆོད་པ་དང༌། ཤ་ཆང་གི་གཏོར་མ་དང༌། སྣོད་མགོའི་ཐོད་རྣམས་ཁྲག་ཆང་གིས་བཀང་བ་གཞག །བུམ་པ་བརྒྱད་འཇིགས་བྱེད་ཀྱིས་བྱིན་གྱིས་བརླབས་པ་རྣམས་ཀྱིས་མཆོད་ཅིང་ཕྱི་རོལ་དུ་གཏོར་མ་བྱིན་ལ་གནང་བ་ནོད་པའི་བར་དུ་བྱའོ། །དེ་ནས་འཇིག་རྟེན་གསུམ་རྒྱལ་པོའི། །ཞེས་བྱ་བ་ལ་སོགས་པས་སློབ་མ་གཞུག་པ་ཏོན་ཏོ། །སློབ་དཔོན་གྱི་ལས་རྣམས་ཀྱི་རྗེས་ཐོགས་ལ་འདིར་འཇུག་པའི་ཕྱག་རྒྱ་ནི་དྲག་པོ་ཡིན་པའི་ཕྱིར་འཇིག་རྟེན་གསུམ་རྒྱལ་གྱི་ཕྱག་རྒྱས་སྔར་བཤད་པ་བཞིན་དུ་བཅུག་ལ། བུམ་པའམ་མགོའི་ཐོད་པ་བརྒྱད་ཀྱི་ཁྲག་ལྕེ་ལ་མྱང་དུ་གཞུག་ཅིང་དབང་བསྐུར་བ་ཐམས་ཅད་ཀྱིས་དབང་བསྐུར་བའོ། །དེ་ནས་ཞེས་བྱ་བ་ལ་སོགས་པས་འདི་ཉིད་དུ་དབང་ཐོབ་པ་ལ་སྦྱིན་པར་སྟོན་ཏོ། །དེ་ནས་དང་པོར་རེ་ཞིག་བུད་མེད་ཀྱི་ཁྱིམ་མམ། ཤིང་གཅིག་པར་ལྕེ་དང་ལག་པ་བྱིན་རླབས་ནས་བརྩམས་ཏེ་འཇིག་རྟེན་གསུམ་རྒྱལ་དུ་བསྐྱེད་ནས་མཆོད་དེ། ཨོཾ་བྷཻ་ར་ཞེས་བྱ་བ་འབུམ་ཕྲག་བཞིར་བཟླས་པ་ནས་ཐ་མར་མཚན་ཡལ་ནས་སུ་གནས་ཏེ་དེ་ནས་སྒྲ་ཐོས་ནས་ཁྲག་གི་ཐོད་པ་ཕུལ་ཏེ་འཇིགས་བྱེད་དེ་མཐོང་བར་འགྱུར་རོ། །ཁམས་གསུམ་རྣམ་
རྒྱལ་ཧཱུཾ་ཞེས་བྱ་བ་དྲན་པར་བྱེད་ཅིང་ཐོད་པ་བཀང་སྟེ་ཡང་ཕུལ་ན་གྲུབ་ནས་ཅི་འདོད་ཅེས་བྱ་བར་སྨྲ་བར་བྱེད་དེ་ས་སྦྱིན་པ་མ་གཏོགས་པར་ཁམས་གསུམ་རྣམ་རྒྱལ་གྱི་ང་རྒྱལ་དུ་བསྒོམས་པས་གསོལ་བ་བཏབ་ན་ཁུ་བ་ལ་སོགས་པ་ཐམས་ཅད་སྦྱིན་པར་བྱེད་དོ། །མི་སྐྲག་པར་བྱ་སྟེ་སྐྲང་ན་དེ་མ་ཐག་ཏུ་གསོད་དོ། །དེ་ནས་ཞེས་བྱ་བ་ལ་སོགས་པས་ལྷ་ཆེན་པོ་རྣམས་ཀྱི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་སྔ་མ་བཞིན་ཏེ་ཚངས་པ་ལ་སོགས་པ་དང་བཅས་པའོ། །ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་ཞེས་བྱ་བ་ལ་སོགས་པ་ལ། ལྷ་ཆེན་པོ་རྣམས་ཀྱིས་རྡོ་རྗེ་འཛིན་པ་ལ་ཕྱག་བྱས་ཏེ་ཞུས་པའི་དོན་རང་གི་སྙིང་པོ་བཤད་པར་འདོད་པ་ལ་བྱིན་གྱིས་བརླབ་པར་གསོལ་བ་བཏབ་ནས། རང་གི་སྙིང་པོ་སྨྲས་པ་ཞེས་བྱ་བ་ནས་ཀྲ་ཞེས་བྱ་བའི་མཐར་ཐུག་པར་ཏེ་དབང་ཕྱུག་ཆེན་པོ་དང༌། ཚངས་པ་དང༌། བརྒྱ་བྱིན་དང༌། གཏོགས་འདོད་དང༌། གཞོན་ནུ་ཀཏི་ཀ་དང་ཚོགས་ཀྱི་བདག་པོ་དང་བྷྲྀདྒི་ཏི་ཏི་དང་སྟོབས་བཟངས་རྣམས་ཀྱི་ཡིན་ནོ། །འདིའི་བཤད་པ་སྔ་མ་བཞིན་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །ཏིང་ངེ་འཛིན་གསུམ་པ་ཡང་དེ་བཞིན་དུ་ཤེས་པར་བྱའོ། །དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་བསྟན་ཏོ། །བསྙེན་པ་ལ་སོགས་པ་ཐམས་ཅད་བྱས་ལ་དེ་ནས་ཚེ་དཔག་ཏུ་མེད་པ་བཞིན་དུ་དཀྱིལ་འཁོར་འཁོར་ལོ་རྩིབས་བཞི་པ་བྲིས་ལ། ལྟེ་བ་ལ་རྡོ་རྗེ་འཛིན་པ་ཁྲོ་བོ། ཤར་གྱི་རྩིབས་ལ་དབང་ཕྱུག་ཆེན་པོ། །ལྷོའི་རྩིབས་ལ་བརྒྱ་བྱིན། ནུབ་ཀྱི་རྩིབས་ལ་ཚངས་པ། བྱང་གི་རྩིབས་ལ་གཏོགས་འདོད། རང་རང་གི་ཆུང་མ་དང་བཅས་པ་བྲི་སྟེ་ལྕགས་ཀྱུ་ལ་སོགས་པ་བཞི་ཡང་ཁྲོས་པ་དང་བཅས་པ་བྲིས་ལ། དཀྱིལ་འཁོར་གྱི་ཕྱི་རོལ་དུ་དབང་ལྡན་གྱི་མཚམས་ནས་བརྩམས་ནས་སྟོབས་བཟངས་དང༌། ཚོགས་ཀྱི་བདག་པོ་དང༌། བྷྲྀདྒི་རི་ཏི་དང༌། གཞོན་ནུ་ཀརྟི་ཀ་གཞག །བྱ་དང་བུམ་པ་ལ་སོགས་པ་ཐམས་ཅད་ཀྱང་སྔ་མ་བཞིན་དུ་གཞག །དེ་ནས་ཞུགས་པ་སྔོན་དུ་འགྲོ་བས་ཏིང་ངེ་འཛིན་གསུམ་དང་ཕྱག་རྒྱ་བཞིས་རྒྱས་བདབ་པ་ལ་སོགས་པ་མཆོད་པའི་མཐར་ཐུག་པ་ཐམས་ཅད་དགའ་བ་ཆེན་པོས་མཆོད་པར་བྱའོ། །དེ་ནས་རྡོ་རྗེ་འཛིན་པ་ནི། །ཞེས་བྱ་བ་ལ་
སོགས་པས་སློབ་མ་གཞུག་པའི་ལས་ལ་སོགས་པ་སྟོན་ཏོ། །འདིར་རྡོ་རྗེ་འཛིན་པའི་ཕྱག་རྒྱ་བཅིངས་ལ་སྔ་མ་བཞིན་དུ་བཅུག་ནས། ཨོཾ་པྲ་ཏཱི་ཙྪ་ཞེས་བྱ་བ་ལ་སོགས་པས་མེ་ཏོག་དོར་བ། མིག་དབྱེ་བ། བསྟན་པར་བྱ་བ་ལ་སོགས་པ་ཐམས་ཅད་སྔ་མ་བཞིན་དུའོ། །དེ་ནས་སྔགས་ཀྱིས་བཏབ་པའི་བུམ་པ་བརྒྱད་ཀྱིས་དབང་བསྐུར། དབང་བསྐུར་བ་ལྷག་མ་ཡང་རྩ་བའི་རྒྱུད་དུ་བཤད་བ་བཞིན་ཤེས་པར་བྱའོ། །དེ་ནས་ལྷ་རྣམས་གང་དགའ་བའི། །ཞེས་བྱ་བ་ལ་སོགས་པས་འདི་ཉིད་དུ་དབང་དང་དམ་ཚིག་ཐོབ་པ་ལ་དངོས་གྲུབ་སྦྱིན་པ་སྟོན་ཏོ། །གང་ལ་དགའ་བའི་སྔགས་བྱིན་ལ་སྔ་མ་བཞིན་དུ་རྡོ་རྗེ་འཛིན་པ་བསམས་ཏེ་འབུམ་ཕྲག་གཉིས་བསྙེན་པ་བྱས་ནས་ཤེས་པའི་གནས་སུ་དཀྱིལ་འཁོར་ཆེན་པོ་བསམས་ཏེ་བསྒྲུབས་ན་ནས་ཕྱེད་ན་ལྷ་འོངས་ནས་ཅི་འདོད་པ་སྦྱིན་གྱིས་སོམས་ཏེ་སྨྲོས་ཤིག །དེ་ནས་ལྷ་ལ་གསོལ་བ་ཅི་འདོད་པ་གདབ་བོ། དེ་ནས་བླ་མ་དང་སློབ་དཔོན་ལ་ཆ་རེ་དབུལ་བ་ནི་རྩ་བའི་རྒྱུད་དུ་བཤད་པ་བཞིན་དུ་ཤེས་པར་བྱའོ། །དེ་ནས་ཞེས་བྱ་བ་ལ་སོགས་པས་འཇིག་རྟེན་ལས་འདས་པའི་དཀྱིལ་འཁོར་བཅུ་གཉིས་པོ་མཐའ་དག་ཏུ་ཞུགས་པའི་འབྲས་བུ་ལམ་བཅོ་ལྔ་དང༌། འཇིག་རྟེན་པའི་ཡོན་ཏན་མཐའ་དག་ཀྱང་བསྟན་ཏེ་གོ་སླ་བས་མ་བཤད་དོ། །འཇིག་རྟེན་པའི་དྲུག་བར་དུ་ཅིའི་ཕྱིར་བསྟན་ཞེ་ན། སངས་རྒྱས་ཀྱི་ཆོས་ཐམས་ཅད་ཀྱང་སྐུ་གསུམ་དང་རིགས་གསུམ་གྱི་བསྡུས་པའོ། །དེ་ཡང་ཀུན་རིག་དང༌། གཙུག་ཏོར་དག །ཚེ་དཔག་ཏུ་མེད་པའི་དཀྱིལ་འཁོར་གསུམ་གྱི་བསྟན་པ་དེ་དག་རྟོགས་པར་བྱ་བའི་ཕྱིར་དང་པོར་སྟོན་ཏོ། །དེ་ནས་དེ་དག་ལ་འཇུག་པ་ཡང་བྱང་ཆུབ་སེམས་དཔའ་མོས་པའི་ས་ཡན་ཆད་ཐོབ་པ་ཡིན་པས་སྦྱོར་བའི་ལམ་ལ་གནས་པ་ཐོབ་པའི་རང་བཞིན་ཅན་རྒྱལ་པོ་བཞི་དང་ཕྱོགས་སྐྱོང་བཅུ་དང༌། གཟའ་ཆེན་པོ་བརྒྱད་ཀྱི་དཀྱིལ་འཁོར་དང་དབང་དང་དམ་ཚིག་དང་གཙོ་བོར་གྱུར་པ་སྟོན་ཏོ། །སྦྱོར་བའི་ལམ་མངོན་པར་རྟོགས་པ་དང་འབྲེལ་བའི་རང་བཞིན་ལ་གཞན་གྱི་དོན་བྱེད་པ་གཙོ་བོར་འགྱུར་བས། ཀླུ་ཆེན་པོ་བརྒྱད་དང་འཇིགས་བྱེད་ཆེན་པོ་དང༌། ལྷ་ཆེན་པོའི་དཀྱིལ་འཁོར་གཙོ་བོར་གྱུར་པ་བསྟན་ཏོ། །དེ་དག་བྱང་ཆུབ་སེམས་དཔའ་མོས་པས་སྤྱོད་པའི་ས་ལ་གནས་
པ་ཞེས་བྱའོ། །དེ་ཡང་རྩ་བའི་རྒྱུད་ལས། དེ་ནས་བརྒྱ་བྱིན་དང་ཚངས་པ་ལ་སོགས་པའི་ལྷའི་བུ་རྣམས་དང་རྒྱལ་པོ་བཞི་དང་འཇིག་རྟེན་སྐྱོང་བ་བརྒྱད་དང༌། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང༌། གནོད་སྦྱིན་གྱི་སྡེ་དཔོན་ཆེན་པོ་ནོར་བུ་བཟང་པོ་དང་ནོར་བཟངས་པོ་ཆེན་པོ་ལ་སོགས་པ་བྱང་ཆུབ་སེམས་དཔའི་ས་ལ་རབ་ཏུ་གནས་པ་རྣམས་དང་ཞེས་གསུངས་པའི་ཕྱིར་རོ། །དེ་ནས་ཡང་ས་བཅུ་དང་སངས་རྒྱས་ཀྱི་ས་ལ་སྐུ་གསུང་ཐུགས་ཉིད་དུ་འབྱུང་བས་འཆི་བདག་འཇོམས་པ་གསུང་དང༌། བདེ་བ་ཆེན་པོ་སྐུ་དང༌། ཁྲོ་བོ་ཐུགས་ཀྱི་དཀྱིལ་འཁོར་ཏེ་གསུམ་གྱིས་བཤད་དོ། །དེ་ལྟར་ན་རྒྱུ་འབྲས་ཀྱི་གོ་རིམས་སུ་བཤད་ནས་ཞེས་བྱ་བ་ཡིན་ལ། གྲངས་ཀྱང་ངེས་པ་འདི་ཙམ་གྱིས་བསྟན་ཏོ། །དེ་ལྟར་འཇིག་རྟེན་པའི་དཀྱིལ་འཁོར་དྲུག་བཤད་ནས། ད་ནི་དེ་ནས་ཞེས་བྱ་བ་ལ་སོགས་པས་འཆིབ་བདག་འཇོམས་པའི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་ནི་སྔ་མ་བཞིན་སྦྱོར་བ་དང་པོའི་རྗེས་ཐོགས་ལའོ། །བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་འཁོར་གྱི་དཀྱིལ་འཁོར་གཟིགས་ནས་ཞེས་བྱ་བ་ལ་སོགས་པ་ལ་མཐུ་ཆེན་པོའི་རིག་བཤད་དུ་གསོལ་ཞེས་བྱ་བ་སྦྱར་རོ། །དེ་ཡང་ཕྱག་ན་རྡོ་རྗེ་ཉིད་ཀྱིས་འཁོར་ལ་གཟིགས་ཏེ་འཛུམ་པ་དང༌། འཁོར་གཡོས་པ་དང༌། འགུལ་བ་དང༌། འབར་བ་དང༌། དགོད་པ་དང༌། རྩེ་བ་དང་རྨད་ཀྱི་ཡ་མཚན་སྣང་བར་གྱུར་ཏོ། །དེ་ལ་ལྷ་རྣམས་དམ་པར་གྱུར་ནས་ཕྱག་འཚལ་ཏེ་འཛུམ་པ་མཛད་པའི་རྒྱུ་དྲིས་པ་དང༌། ཕྱག་ན་རྡོ་རྗེས་གསན་ནས་ལྷ་རྣམས་ལ་འཆི་བདག་འཇོམས་བར་བྱེད་པའི་རིག་པ་ཐོས་སམ་ཞེས་བཀའ་སྩལ་པ་དང༌། ཕྱག་འཚལ་ཞིང་མགུ་ཞིང་དང་བའི་དད་པ་སྐྱེས་ཏེ་ལེགས་སོ་ཞེས་བྱ་བ་སྔོན་དུ་འགྲོ་བས་ཚེ་བསྲིང་ཞིང་འཆི་བདག་ཞི་བར་བྱ་བ་དང་ངན་སོང་གྲོལ་བར་བྱ་བ་དང༌། འཁོར་བ་སྤངས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བགྱི་བའི་སླད་དུ་རིག་པ་བཤད་དུ་གསོལ་ཞེས་བྱ་བའི་དོན་ཏོ། །སྔ་མ་ནི་ཚེ་འདི་ལ་གནས་པའི་དོན་དུ་བཤད་པ་ཁོ་ན་ཡིན་ལ། འདི་ནི་འདི་དང་ཕྱི་མ་གཉིས་ཀ་ནས་ཐམས་ཅད་ཡིན་པའི་ཕྱིར་ཁྱད་པར་དེ་ཡོད་དོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ལྷ་རྣམས་ཀྱིས་གསོལ་བའི་ཚིག་གསན་ནས་ཞེས་བྱ་བ་ནི་སྔར་གསོལ་བ་
བཏབ་པའི་ཚིག་གསན་ནས་སོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་རིག་སྔགས་འདི་ཉིད་སྐུ་གསུང་ཐུགས་རྡོ་རྗེ་ལས་ཕྱུང་ངོ་ཞེས་བྱ་བ་ནི་འོག་ནས་འབྱུང་བའི་རིག་སྔགས་འདི་ཉིས་སྐུ་ལས་འོད་ཟེར། གསུང་ལས་སྒྲ། ཐུགས་ལས་ངེས་པའི་ཡེ་ཤེས་ཕྱུང་ངོ་ཞེས་བྱ་བའི་དོན་ཏོ། །དེ་ཉིད་ཨོཾ་པུ་ཎྱེ་ཞེས་བྱ་བ་ལ་སོགས་པའོ། །སྙིང་པོ་རིག་པའོ་ཞེས་བྱ་བ་ནི་སྙིང་པོ་ནི་ཡེ་ཤེས་ལྔའོ། །དེ་ཉིད་ནི་རིག་པའོ། །དེ་སྟོན་པའི་སྒྲ་ལ་ཡང་དེ་སྐད་ཅེས་གདགས་སོ། །འདིས་ནི་ཐམས་ཅད་ཀྱི་འོད་ཀྱི་དཀྱིལ་འཁོར་ལ་བྲི་བའི་རིག་པ་དང་བཟླས་བརྗོད་དུ་བྱ་བ་བསྟན་ཏོ། །ཨོཾ་དྷི་སྭཱ་ཧཱ། ཉེ་བའི་སྙིང་པོའི་རིག་པའོ་ཞེས་བྱ་བ་ནི་མངོན་སུམ་པའི་རྒྱུའི་རྡོ་རྗེ་ལྟ་བུའི་ཏིང་ངེ་འཛིན་ཏོ། །དེའི་སྒྲ་ཡང་སྔ་མ་བཞིན་ནོ། །ཕྱག་ན་རྡོ་རྗེའི་སྙིང་པོའོ། །ཨོཾ་བྷྲུཾ་སྭཱ་ཧཱ་སྙིང་པོའོ། །ཉེ་བའི་སྙིང་པོ་རིག་པ་ཞེས་བྱས་པ་ལ་སྙིང་པོ་ནི་གཟུགས་ཀྱི་སྐུའོ། །ཉེ་བའི་སྙིང་པོ་ནི་རིག་པའོ།། མངོན་སུམ་པའི་རྒྱུ་ཡེ་ཤེས་ཏེ་དེའི་སྒྲ་ཡང་སྔ་མ་བཞིན་ནོ། །གཙོ་བོ་ནི་རིག་པའོ། །ཨོཾ་གྲུཾ་སྭཱ་ཧཱ་སྙིང་པོ་ཡང་དག་པར་བསྐུལ་བའོ་ཞེས་བྱ་བ་ནི་ཐུགས་རྗེས་ཐུགས་ཡང་དག་པར་བསྐུལ་བའི་རིག་པའོ། །དེའི་སྒྲ་ཡང་སྔ་མ་བཞིན་ཏེ། ཁྲོ་བོའི་རིག་པའོ། །ཨོཾ་ཏྲཾ་སྭཱ་ཧཱ་སྙིང་པོ་དམ་བའོ་ཞེས་བྱ་བ་ནི་མཉམ་པ་ཉིད་ཀྱི་ཡེ་ཤེས་ཏེ་སྒྲལ་ཡང་དེ་བཞིན་ནོ། །ནམ་མཁའི་སྙིང་པོའི་རིག་པའོ། །ཨོཾ་ཧྲི་སྭཱཾ་ཧཱ། གསང་བའི་སྙིང་པོའོ་ཞེས་བྱ་བ་ནི་སོ་སོར་ཀུན་དུ་རྟོག་པའི་ཡེ་ཤེས་ཏེ་སྤྱན་རས་གཟིགས་ཀྱི་རིག་པའོ། །འདི་དག་གིས་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་བསྟན་ཏོ། །སྔ་མ་བཞིན་དུ་བསྒོམ་པར་བྱའོ་ཞེས་བྱ་བའི་དོན་ཏོ། །ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ནི་སྔ་མ་བཞིན་དུ་ཤེས་པར་བྱའོ། །དེ་ནས་དེ་དག་གི་དཀྱིལ་འཁོར་བསྟན་ཏེ་ཞེས་བྱ་བ་ལ་སོགས་པས་སློབ་དཔོན་གྱི་ལས་བསྟན་ཏེ་སྔ་མ་བཞིན་དུ་བསྙེན་པ་ལ་སོགས་པ་སྔོན་དུ་འགྲོ་བས་ཕྱིའི་དཀྱིལ་འཁོར་བྲིས་ཏེ། ནང་གི་དཀྱིལ་འཁོར་དུ་འཁོར་ལོ་རྩིབས་བཞི་བ་བྲིས་ལ་དབུལ་སུ་དེ་བཞིན་གཤེགས་པ་ཚེ་དང་ཚོགས་དང་གཟི་བརྗིད་ཚད་མེད་པ་གཞག་པ་བྷྲཱུཾ་ཞེས་བྱ་བས་སོ། །སྤྱན་སྔར་ཕྱག་ན་རྡོ་རྗེ་སྟེ་ཧྲི་ཞེས་བྱ་བའི་སྙིང་པོས་གཞག་གོ །བྱང་ཕྱོགས་སུ་ཁྲོ་བོ་སྟེ་ཀྲུཾ་
ཞེས་བྱ་བའི་སྙིང་པོས་སོ། །ལྷོ་ཕྱོགས་སུ་ནམ་མཁའ་སྙིང་པོའི་སྙིང་པོ་སྟེ། ཏྲཾ་ཞེས་བྱ་བའི་སྙིང་པོས་སོ། །ནུབ་ཕྱོགས་སུ་སྤྱན་རས་གཟིགས་ཏེ་ཧྲི་ཞེས་བྱ་བའི་སྙིང་པོས་སོ། །ཀུན་གྱི་འོད་ལ་ཨོཾ་པུ་ཎྱེ་ཞེས་བྱ་བ་ལ་སོགས་པའི་རིག་པ་བྲིའོ། །དབང་བསྐུར་བའི་བུམ་པ་ལྔ་དང༌། མཆོད་པའི་བུམ་པ་བརྒྱད་དང༌། ཏྲཾ་ཞེས་བྱ་བའི་སྔགས་ཀྱི་བཟླས་བརྗོད་བྱས་ཏེ་གཞག་གོ །བདུག་པ་ལ་སོགས་པའི་མཆོད་རྫས་ཀུན་ལ། ཀྲུཾ་ཞེས་བྱ་བའི་བཟླས་པས་གཞག །གཞན་ཡང་མཆོད་པའི་ལྷ་མོ་བརྒྱད་དང་སྒོ་བ་བཞི་སྔ་མ་བཞིན་དུ་བྲིའོ། །དེ་ནས། དགོངས་ཀའི་དུས་ལ་བབ་པ་དང༌། །ཞེས་བྱ་བ་ནི་དེ་ནས་སྔགས་མཁན་བདག་ཉིད་ཞུགས་ལ་བདེ་བར་གཤེགས་པ་སྲས་དང་འབངས་སུ་བཅས་པའི་འཁོར་གྱིས་བསྐོར་ཏེ་རིག་པ་དང་ལྷན་ཅིག་སྤྱན་དྲང་ངོ༌། །དེ་ནས་བདག་ཉིད་དབང་བསྐུར་ཏེ། །སྐྱིལ་ཀྲུང་བཅས་ཏེ་འདུག་ལ་སྟོང་ཕྲག་བརྒྱར་བཟླས་ན་དེ་བཞིན་གཤེགས་པའམ་རྡོ་རྗེ་འཛིན་པའམ། འཕགས་པ་སྤྱན་རས་གཟིགས་ཀྱི་དབང་ཕྱུག་ཀྱང་རུང་སྟེ་མངོན་སུམ་དུ་མཐོང་ནས་འདོད་པའི་མཚན་མ་སོ་སོར་ཐོབ་པར་འགྱུར་རོ། །ཅི་སྟེ་མཉམ་པར་མ་བཞག་ན་ཡིད་ཀྱིས་ཐམས་ཅད་ནུས་པར་འགྱུར་རོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ནས། ཨོཾ་བཛྲ་དྷཱ་ར། རཏྣ་དྷཱ་ར། པདྨ་དྷཱ་ར། བི་ཤྭ་དྷཱ་ར། ཏ་ཐཱ་ག་ཏ་ས་མ་ཡ་མ་ཏི་ཀྲ་མ་ཐ་ཏ་ཐཱ་ག་ཏ་ས་མ་ཡ་དྷཱ་ར་ཨཱཏྨ་ཀོ྅ཧཾ་ཞེས་བྱ་བའི་ང་རྒྱལ་བསྐྱེད་ལ་ཞེས་བྱ་བ་ནི་སྔགས་པ་ཉིད་ཞུགས་ལ་ལྷག་ཆད་ཞི་བར་བྱས་ནས་ཏིང་ངེ་འཛིན་གསུམ་སྔོན་དུ་འགྲོ་བས་སྒོ་ཕྱེ་སྟེ། རྒྱལ་བ་སྲས་དང་བཅས་པ་རིག་པ་དང་ལྷན་ཅིག་སྤྱན་དྲང་ངོ༌། །དེ་ནས་ལྕགས་ཀྱུ་ལ་སོགས་པས་ལས་བྱ། ཕྱག་རྒྱ་བཞིས་རྒྱས་གདབ། དབང་བསྐུར། བཟླས་པ་དང༌། མཆོད་པ་དང༌། གཏོར་མ་དང༌། སྦྱིན་སྲེག་དང་གནང་བ་ནོང་པའི་བར་དུ་བྱའོ། །དེ་ནས་སློབ་མ་འཇུག་པའི་ཆོ་གས་ཞུགས་ཏེ། བདག་ཉིད་དབང་ཉི་ཤུ་རྩ་གཅིག་བསྐུར་ནས། སྐྱིལ་ཀྲུང་བཅས་ནས་འབུམ་བཟླས་ན་དེ་བཞིན་གཤེགས་པ་ལ་སོགས་པ་དཀྱིལ་འཁོར་གྱི་གཙོ་བོ་མངོན་སུམ་དུ་མཐོང་ནས་འབྲས་བུ་མཆོག་ཐོབ་པོ། །བཟླས་བརྗོད་མ་བྱས་ཀྱང་ཡིད་ཀྱིས་ལས་ཐམས་ཅད་བྱེད་ནུས་བར་
འགྱུར་རོ། །དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ནས། རྡོ་རྗེ་འཛིན་གྱི་ཕྱག་རྒྱས་འཇུག་པ་ཡིན་ནོ་ཞེས་བྱ་བའམ། རིན་ཆེན་འཛིན་དང༌། པདྨ་འཛིན་དང༌། ཁྲོ་བོ་དང་དེ་བཞིན་གཤེགས་པའི་འཇུག་པ་ནི་ང་ཡིན་ཞེས་ང་རྒྱལ་བསྐྱེད་ལ་ཞེས་བྱ་བའི་དོན་ཏོ། །དེ་ནས་སློབ་མ་རྣམས་གཞུག་པར་བྱའོ་ཞེས་བྱ་བ་ལ་སོགས་པས་སློབ་མ་གཞུག་པ་ལ་སོགས་པ་སྟོན་ཏེ་དེ་ཡང་རྩ་བའི་རྒྱུད་དུ་བཤད་པ་བཞིན་དུ་ཡེ་ཤེས་དབབ་པའི་མཐར་ཐུག་པ་བྱས་ལ་འདིར་མེ་ཏོག་དོར་བར་བྱའོ། །ཨོཾ་སརྦ་ཏ་ཐཱ་ག་ཏ་པྲ་ཏཱི་ཙྪ་ཧོ་ས་མ་ཡ་སྟྭཱཾ། དེ་ཉིད་བརྗོད་ལ་མགོ་ལ་བཅིངས་གདོང་གཡོགས་དགྲོལ། །ལྷ་ངོ་བསྟན་འཇུག་པའི་ཕྱག་རྒྱ་སྙིང་གར་བསྟན། དབང་བསྐུར་བར་བྱ་སྟེ་སྔ་མ་བཞིན་དུ་ཤར་ཕྱོགས་ཀྱི་སྒོར་བ་ཞག་ལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་བཛྲ་དྷཱ་ཏུ་ཨ་ཛྙཱ་ཧཱུཾ་བྷྲཱུཾ། ཞེས་བྱ་བ་དང་གཙོ་བོའི་བུམ་པས་དབང་བསྐུར་རོ། །ཨོཾ་བཛྲ་བཛྲ་ཨབྷི་ཥིཉྩ་ཧཱུཾ་ཧཱུཾ། ཞེས་བྱས་པས་རྡོ་རྗེ་འཛིན་པའི་བུམ་པས་དབང་བསྐུར་རོ། །ཨོཾ་རཏྣ་ཨ་བྷི་ཥིཉྩ་ཧཱུཾ་ཏྲཾ། ཞེས་བྱ་བས་ནམ་མཁའི་སྙིང་པོའི་བུམ་པས་དབང་བསྐུར་རོ། །ཨོཾ་པདྨ་ཨ་བྷེ་ཥིཉྩ་ཧཱུཾ་ཧྲཱིཿ། ཞེས་པས་སྤྱན་རས་གཟིགས་ཀྱི་བུམ་པས་དབང་བསྐུར་རོ། །དེ་ནས་ཀརྨ་ཨ་བྷི་ཥིཉྩ་ཧཱུཾ་ཀྲུཾ་ཞེས་བྱ་བ་དང་ཁྲོ་བོའི་བུམ་པས་དབང་བསྐུར་རོ། །དབང་ལྷག་མ་ཉི་ཤུས་ཀྱང་དབང་བསྐུར་བར་བྱ་སྟེ། དེ་ལ་དམ་ཚིག་ནི་འདི་ཡིན་ནོ། །དཀོན་མཆོག་གསུམ་དང་བྱང་ཆུབ་ཀྱི་སེམས་དང་བླ་མ་མི་སྤང་ངོ༌། །སྲོག་ཆགས་མི་གསད་མ་བྱིན་པར་མི་བླང༌། བརྫུན་དུ་སྨྲ་བར་མི་བྱ། གཞན་གྱི་བུད་མེད་ལ་མི་སྤྱད། །བླ་མའི་གྲིབ་མ་ལ་མི་འགོམ། །སློབ་དཔོན་དུ་ཡོན་ཏན་ཅན་མ་ཡིན་པ་མི་གཟུང༌། སློབ་དཔོན་གྱི་མཚན་ནས་མི་བརྗོད། སྔགས་དང་ཕྱག་རྒྱ་དང་ལྷ་ལ་མི་སྨད་གལ་ཏེ་གླེན་པས་སྨད་ན་ནད་ཀྱིས་ཐེབས་ནས་འཆི་བར་འགྱུར་རོ། །སྙིང་པོ་དང་ལྷའི་གྲིབ་མ་དང་ཕྱག་རྒྱ་དང་གོམ་བས་མི་འགོམ། དཀོན་མཆོག་གསུམ་དང་བསྟན་པ་ལ་གནོད་པ་དང་བླ་མ་ལ་སྨོད་པ་རྣམས་ངན་སྔགས་ཀྱིས་གསད་པར་བྱའོ། །ལོག་པར་ལྟ་བ་དང་སྡིག་པ་སྤྱོད་པ་དང་སེམས་ཅན་ལ་གནོད་པ་དང་དམ་ཚིག་ལ་སྡང་བ་རྣམས་སྙིང་རྗེ་ཆེན་པོས་ངན་སྔགས་ཀྱིས་གསད་པར་བྱའོ། །འཇུངས་
པ་ཅན་གྱི་ནོར་བླངས་ལ། །ཕོངས་པ་རྣམས་ལ་སྦྱིན་པར་བྱ། །བླ་མ་ལ་མཆོད་པ་བྱ་བའི་ཕྱིར་དང༌། དམ་ཚིག་བསྒྲུབ་པའི་ཕྱིར་དང༌། དཀྱིལ་འཁོར་མཆོད་པའི་ཕྱིར་དང༌། དམ་ཚིག་ཅན་ལ་ཕན་པའི་ཕྱིར་དང༌། རྒྱལ་བ་སྲས་དང་བཅས་པ་ལ་མཆོད་པའི་ཕྱིར་དུ་འཇུངས་པ་རྣམས་ཀྱི་ནོར་ད་བྲོག་གོ །སེམས་ཅན་ལ་ཕན་པར་འདོད་པས་བླ་མའི་ནོར་དང༌། སྲོག་ཆགས་ཀྱི་སྲོག་བསྲུང་བའི་ཕྱིར་བརྫུན་དུ་སྨྲ་བར་བྱའོ། །སངས་རྒྱས་མཉེས་པར་བྱ་བའི་ཕྱིར་དམ་ཚིག་སྲུང་བ་དང་བསྒྲུབ་པའི་ཕྱིར་གཞན་གྱི་བུད་མེད་བསྟེན་པར་བྱའོ། །དེ་དག་ཀྱང་ཇི་ལྟ་བུ་ཞེ་ན། རྡོ་རྗེ་སེམས་དཔའི་རྣལ་འབྱོར་དང་ལྡན་པས་ཐམས་ཅད་སྤྱད་ཅིང་བསྒྲུབས་ན་འགྲུབ་པར་འགྱུར་ཏེ་མཉེས་པར་མི་འགྱུར་ན། སྙིང་རྗེ་ཆེན་པོ་དང་ལྡན་པའི་ཐབས་ཀྱིས་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །དེ་ནས་བཀའི་དབང་བསྐུར་བར་བྱའོ། །དེ་ནས་ལས་ཀྱི་རྡོ་རྗེ་ལག་ཏུ་བྱིན་ལ་ལས་ཀྱི་དབང་བསྐུར་བར་བྱའོ། །དབང་བསྐུར་བ་ནི་རྩ་བའི་རྒྱུད་དུ་བསྟན་པ་བཞིན་དུ་ཤེས་པར་བྱའོ། །དེ་ནས་བླ་མ་ལ་ལུས་དང་ནོར་དང་དབྱིག་དང་འབྲུ་དང་སྟན་དང་བྲན་དང་ཁང་པ་དང་རྒྱལ་པོ་ཡིན་ན་རྒྱལ་སྲིད་དང་བུ་དང་བུ་མོ་དང་ཆུང་མ་དང་མ་དང་སྲིང་མོ་དང་ཚ་བོ་དང༌། གཞན་ཡང་ཅི་བཞེད་པ་ཐམས་ཅད་རང་ལ་ཕན་པའི་ཕྱིར་བླ་མ་ལ་དབུལ་ལོ་ཞེས་བྱ་བའི་དོན་ཏོ། །དེ་ནས་བྱང་ཆུབ་བར་དུ་ནི། །ཞེས་བྱ་བ་ལ་སོགས་པས་དངོས་གྲུབ་སྟོན་ཏེ། འདི་ཉིད་དུ་དབང་དང་དམ་ཚིག་ཐོབ་པ་དེ་ནས་བྱང་ཆུབ་ཐོབ་པའི་བར་དུ་སངས་རྒྱས་ཉིད་དང༌། བྱང་ཆུབ་སེམས་དཔའ་དང་འཇིག་རྟེན་པའི་མཐུ་ཆེན་རྣམས་སྒྲུབ་པར་འདོད་པས་སློབ་དཔོན་ལ་དངོས་གྲུབ་རྣམས་གསོལ་བ་གདབ་བོ། །དེ་ནས་སློབ་མ་ལ་ཕན་པའི་ཕྱིར་སློབ་དཔོན་སེར་སྣ་མེད་ཅིང་སེམས་དད་པ་དང་ལྡན་པའི་སློབ་མ་ལ་དངོས་གྲུབ་རྣམས་སྦྱིན་པར་བྱའོ་ཞེས་བྱ་བ་སྦྱིན་ནོ། །ཇི་ལྟ་བུ་སྦྱིན་ཞེན། ཆོས་རྣམས་ཐམས་ཅད་དངོས་མེད་པར། །སེམས་ཀྱིས་བསྒོམ་པ་བྱས་ནས་ཀྱང༌། །ཨ་ལས་ཟླ་བའི་དཀྱིལ་འཁོར་བསམ། །རང་གི་ས་བོན་དེ་དབུས་སུ། །བསམས་ནས་དམ་ཚིག་ཕྱག་རྒྱ་དག །བསམས་ཤིང་དེ་བཞིན་དེ་ཉིད་དུ། །སྒྲུབ་པ་ཡིས་ནི་བསྒྱུར་བར་བྱ། །ལྷ་ཡི་རྣལ་འབྱོར་ཚུལ་དུ་བསྒྱུར།
དེ་ནས་རང་གི་ས་བོན་དང༌། །ཕྱག་རྒྱས་ཕྱག་རྒྱ་དེ་བྱིན་བརླབ། །ལག་འོག་གོ་རིམས་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །དེ་ནས་ང་རྒྱལ་བསྐྱེད་ནས་ཀྱང༌། །ཞེས་བྱ་བ་གསུངས་ཏེ། ཆོས་རྣམས་ཐམས་ཅད་ཅེས་བྱ་བ་ནི་མཚན་ཉིད་འཛིན་པས་ན་ཆོས་ཏེ་དངོས་པོ་ཐམས་ཅད་དོ། །དངོས་པོ་མེད་པར་ཞེས་བྱ་བ་ནི་རྒྱུ་དང་བྲལ་བས་ཞེས་བྱ་བའི་ཐ་ཚིག་གོ །རྒྱུ་དང་བྲལ་བ་དེ་ཡང་རྒྱུ་ཡོད་པ་ལས་སྐྱེའམ་མེད་པ་ལས་སྐྱེའམ་གཉི་ག་ལས་སྐྱེ་ཞེ་ན། ཅི་དང་པོར་ཡོད་པ་ལས་མ་ཡིན་ཏེ་ངོ་བོ་ཉིད་ཡོངས་སུ་གྲུབ་ཟིན་པ་ནི་མ་འོངས་པའི་དུས་གཞན་དུ་སྐྱེ་བ་དོན་དུ་མི་རིགས་སོ། །གཞན་དུ་གལ་ཏེ་ཡོད་པ་སྐྱེ་བར་འགྱུར་བ་ནི་སྐྱེས་ཟིན་པའང་སྐྱེ་བར་འགྱུར་རོ། །མེད་པ་ལས་ཀྱང་མི་སྐྱེ་སྟེ་ཤིན་ཏུ་གཟུགས་མེད་པའི་རི་བོང་གི་རྭ་ལ་སོགས་པ་དང་འདྲ་ཞིང་སྐྱེ་བར་འཇུག་པ་དང་མི་ལྡན་པའི་ཕྱིར་རོ། །གཞན་དུ་འདི་དག་ཐམས་ཅད་མེད་པར་འགྱུར་ཞིང་གང་གི་ཕྱིར་དངོས་པོའི་ཕྱོགས་གང་ཡང་རུང་བ་འགའ་ཞིག་ལས་ཀྱང་དངོས་པོ་ཐམས་ཅད་རྟག་ཏུ་སྐྱེ་བར་ཐལ་བར་འགྱུར་བས་རྒྱུ་དང་འབྲས་བུ་ངེས་པ་མེད་པར་འགྱུར་རོ། །གལ་ཏེ་སོ་སོའི་ནུས་པ་ངེས་པར་མི་འགྱུར་བར་དངོས་པོ་འདི་རྣམས་ཀྱི་ནུས་པ་སོ་སོར་ངེས་པར་གྱུར་ན་ནི་དངོས་པོ་དེ་རྣམས་ལས་ཅུང་ཟད་ཅིག་སྐྱེ་བར་འགྱུར་བས་ཁྱད་པར་མེད་པས་ཀྱང་ཐམས་ཅད་མེད་པ་ཡིན་ནོ་ཞེ་ན། དེ་ནི་མི་རིགས་ཏེ་འབྲས་བུ་རྣམས་དང་འདྲེས་པའི་གཟུགས་རྣམས་རྐྱེན་དུ་གྱུར་ན་ནི་དེའི་ཚེ་དེ་རྣམས་ཀྱིས་སོ་སོར་ངེས་པའི་འབྲས་བུ་དང་འབྲེལ་པར་འགྱུར་བས་འབྲས་བུ་གང་ཞིག་ལ་ངེས་པར་ནུས་པ་ཡིན། དེ་ལྟ་ན་ནུས་པ་ངེས་པ་མེད་པ་ཉིད་དུ་གནས་པར་འགྱུར་རོ། །དེ་བས་ན་ཐམས་ཅད་ལས་ཐམས་ཅད་སྐྱེ་བར་ཐལ་བར་འགྱུར་བས་བཟློག་དཀའ་བར་འགྱུར་བ་དང་ཡོད་པ་དང་མེད་པའི་ཕྱོགས་སུ་སྨྲས་པའི་ཉེས་པ་དང་འདྲེས་པར་འགྱུར་རོ། །གཉི་ག་ལས་ཀྱང་མི་སྐྱེ་སྟེ་གཅིག་ལ་ངོ་བོ་ཉིད་གཉིས་སུ་འགྱུར་བ་མེད་དེ། གཅིག་པ་ཉིད་དང་གཉིས་པ་ཉིད་ནི་ཕན་ཚུན་འགལ་བའི་ཕྱིར་དེ་ཡང༌། ཡོད་དང་མེད་པའི་དོན་ལ་ཡང༌། །རྐྱེན་ནི་རུང་བ་མ་ཡིན་ཏེ། །ཡོད་ན་རྐྱེན་གྱིས་ཅི་ཞིག་བྱ། །མེད་ན་གང་གི་རྐྱེན་དུ་འགྱུར། །གང་ཚེ་ཆོས་
ནི་ཡོད་པ་ན། །མེད་དང་ཡོད་མིན་མི་སྒྲུབ་པ། །ཇི་ལྟར་སྒྲུབ་བྱེད་རྒྱུ་ཞེས་བྱ། །དེ་ལྟར་ཡིན་ན་མི་རིགས་སོ། །རྐྱེན་རྣམས་སོ་སོ་འདུས་པ་ལས། །འབྲས་བུ་དེ་ནི་མེད་པ་ཉིད། །རྐྱེན་རྣམས་ལས་ནི་གང་མེད་པ། །དེ་ནི་རྐྱེན་གྱིས་ཇི་ལྟར་སྐྱེད། །ཅི་སྟེ་དེ་ནི་མེད་པར་ཡང༌། །རྐྱེན་དེ་དག་ལས་སྐྱེ་འགྱུར་ན། །རྐྱེན་དག་ལས་ཀྱང་འབྲས་བུ་ནི། །ཅི་ཡི་ཕྱིར་ན་སྐྱེ་མི་འགྱུར། །ཞེས་བཤད་པ་ཡིན་ནོ། །སེམས་ཀྱི་བསྒོམ་པ་བྱས་ནས་ཀྱང༌། །ཞེས་བྱ་བ་ནི་སྔ་མ་བཞིན་དུ་དོན་བསྒོམ་ཞེས་བྱ་བའི་ཐ་ཚིག་གོ །སྔ་མ་ལས་ཟླ་བའི་དཀྱིལ་འཁོར་བསྒོམ་ཞེས་བྱ་བ་ནི་རང་གི་སེམས་ཉིད་ཟླ་བ་དང་པོ་དང་གཉིས་པར་བསྒོམ་པའོ། །རང་གི་ས་བོན་དེ་དབུས་སུ། །བསམས་ཤིང་དམ་ཚིག་ཕྱག་རྒྱ་དག །ཅེས་བྱ་བ་ནི་དབུས་སུ་རང་གི་ས་བོན་ལས་དམ་ཚིག་གི་ཕྱག་རྒྱ་བསྐྱེད་པར་བྱ་བའི་དོན་ཏོ། །བསམ་ཞིང་དེ་བཞིན་དེ་ཉིད་དུ།། སྒྲུབ་པ་པོས་ནི་བསྒྱུར་བར་བྱ། །ཞེས་བྱ་བ་ནི་སྐུ་གསུང་ཐུགས་དཔག་ཏུ་མེད་པ་འདུས་པའོ། །ལྷ་ཡི་རྣལ་འབྱོར་ཚུལ་དུ་བསྒྱུར། །ཞེས་བྱ་བ་ནི་དེ་ཉིད་ལས་ལྷའི་སྐུ་རྫོགས་པའོ། །དེ་ནས་རང་གི་ས་བོན་དང༌། །ཕྱག་རྒྱ་ཕྱག་རྒྱས་དེ་བྱིན་བརླབ། །ཅེས་བྱ་བ་ནི་བྱིན་གྱིས་བརླབ་པ་རང་གི་ས་བོན། ཨོཾ་སརྦ་བིད་བཛྲ་ཨདྷི་ཏིཥྛ་ཛྙཱ་ན་ས་མ་ཡེ་ཧཱུཾ་ཞེས་བྱ་བ་དང་ཕྱག་རྒྱ་གཉིས་བཅིངས་ཏེ། སྙིང་ག་ལ་སོགས་པའི་གནས་བཅོ་བརྒྱད་དུ་བྱིན་གྱིས་བརླབ་པའོ། །ལྷག་འོག་གོ་རིམས་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །ཞེས་བྱ་བ་ནི་སྙིང་གར་དཀྱིལ་འཁོར་གཞན་དུ་སྤྲུལ་ཏེ་ཞུགས་ནས་དེའི་འོག་ཏུ་སངས་རྒྱས་ལྔའི་དབུ་རྒྱན་ངང༌། ངར་དཔྱངས་དང༌། རྡོ་རྗེ་དང༌། བདག་པོ་དང༌། མིང་དང༌། བརྟུལ་ཞུགས་སྦྱིན་ནོ་ཞེས་བྱ་བའི་དོན་ཏོ། །དེ་ནས་ང་རྒྱལ་བསྐྱེད་ནས་ཀྱང༌། །ཞེས་བྱ་བ་ནི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་ལ་སོགས་པས་རྒྱས་བཏབ་ནས་ཞེས་བྱ་བའི་དོན་ཏོ། །ཀྱང་ཞེས་བྱ་བ་ནི་མཆོད་པ་བསྡུའོ། །འདི་སྐད་དུ་སྟོན་པ་ཡིན་ཏེ། རིགས་རྣམས་ཀྱི་ཟློས་པ་པོས་ཁྲུས་ཀྱི་ཆོ་ག་སྔོན་དུ་འགྲོ་བ་ལས་ལྷ་ལ་སོགས་པ་མཆོད་དེ་མི་སྣང་བར་གྱུར་བར་བྱས་ལ་དང་པོ་ཆོས་ཐམས་ཅད་རྒྱུ་དང་འབྲས་བུའི་སྒོ་ནས་སྟོང་པ་
ཉིད་དུ་བསྒོམ། ཨ་ལས་ཟླ་བའི་དཀྱིལ་འཁོར་དང༌། ཡང་ཟླ་བའི་དཀྱིལ་འཁོར་དང༌། ས་བོན་ལས་དམ་ཚིག་གི་ཕྱག་རྒྱ་དང་དེ་བཞིན་གཤེགས་པའི་སྐུ་དང་གསུང་དང་ཐུགས་རྡོ་རྗེར་ཞུགས་པ་དང་གཟུགས་ཉིད་རྫོགས་པར་བྱེད་པ་དང༌། རྡོ་རྗེའི་ཕྱག་རྒྱ་གཉིས་བཅིངས་ཏེ་སྔགས་བརྗོད་ལ་བྱིན་གྱིས་བརླབ་པ་དང༌། སྙིང་གར་སྤྲུལ་ཏེ་འཇུག་པ་དང༌། དབང་རྣམས་ཀྱིས་དབང་བསྐུར་བ་དང་རྒྱས་གདབ་པ་དང་མཆོད་པ་ཡང་བྱའོ་ཞེས་བྱ་བའི་དོན་ཏོ། །མཁས་པ་ཡིས་ནི་བསྒྲུབ་བྱས་ན། །ཞེས་བྱ་བ་ནི་བསྙེན་པ་དང་མཚན་ཐོག་ཐག་ཏུ་བསྒོམས་ནས་ཞེས་བྱ་བའི་དོན་ཏོ།། འབྲས་བུ་ཅིར་འགྱུར་ཞེ་ན། དེ་བཞིན་གཤེགས་ཀྱང་འགྲུབ་འགྱུར་ན། དངོས་གྲུབ་གཞན་ལྟ་ཅི་ཞིག་སྨོས། །ཞེས་བྱ་བ་ཡིན་ནོ། །འདིས་ནི་རྟོག་པ་ཐམས་ཅད་ཀྱི་དམ་ཚིག་སེམས་དཔའ་བསྐྱེད་པ་དང་དངོས་གྲུབ་ཀྱི་ཆོ་ག་སྟོན་ཏོ། །དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས་ཞེས་བྱ་བ་ལ་སོགས་པས་དཀྱིལ་འཁོར་འདིར་གཞུག་པའི་ཕན་ཡོན་བསྟན་ཏེ་གོ་སླ་བས་མ་བཤད་དོ། །དེ་ནས་ལྷ་དེ་དག་དེ་བཞིན་གཤེགས་པ་ལ་སོགས་པས་དབང་བསྐུར་བ་དང་བཟླས་བརྗོད་སྟོན་ཏེ། བཅོམ་ལྡན་འདས་ལ་ཕྱག་འཚལ་ནས་ཞུས་པའི་དོན་ཚེ་ཐུང་བ་དང༌། ངན་སོང་དུ་སྐྱེས་པར་འགྱུར་བ་མ་མཆིས་ན་ཇི་ལྟར་བསྒྲུབ་ཅེས་ཞུས་པ་དང༌། ལྷན་དུ་དཀྱིལ་འཁོར་དུ་ཆུག་ཅིག །ཆོས་ཀྱི་ཡི་གེ་ཟློས་སུ་ཆུ་གཅིག །དེ་ཚེ་རིང་བར་འགྱུར། བསོད་ནམས་དང་ལྡན་པར་འགྱུར། ངན་སོང་ལས་གྲོལ་བར་འགྱུར་ཞེས་བྱ་བ་ཡིན་ནོ། །ཚེ་འདི་ལ་གནས་པའི་དོན་བཤད་ནས། ཕ་རོལ་ཏུ་འཕོས་པ་རྣམས་ཀྱི་དོན་དུ་ངན་སོང་དུ་སྐྱེས་ཟིན་པ་རྣམས་མིང་ལ་སོགས་པ་ལ་བཀུག་ལ་ལན་བདུན་དུ་དཀྱིལ་འཁོར་དུ་བཅུག་ལ་དབང་བསྐུར་ན་ངན་སོང་ལས་རྣམ་པར་གྲོལ་བར་འགྱུར་རོ་ཞེས་བྱ་བ་དང༌། ཤི་བའི་མིང་ནས་སྨོས་ཏེ་སྔར་བཤད་པའི་རིག་པའི་རྒྱུད་ཉིད་འབུམ་ཕྲག་སྟོང་གི་བར་དུ་བཟླས་བརྗོད་བྱས་པ་ལ་ཡང་ཁ་དོག་དུ་ཀློག་པའི་ཚུལ་གྱིས་བྱས་ན། མཚམས་མེད་པ་ལྔ་དང་ལྡན་པ་ཡང་འབྱང་བར་འགྱུར་ན་སྡིག་པ་ཆུང་དུ་ལྟ་སྨོས་ཀྱང་ཅི་དགོས་ཞེས་ཕན་ཡོན་གསུངས་པ་ཡིན་ནོ། །ལྷའི་བུ་རྣམས་ཞི་བའི་ཞེས་བྱ་བ་ལ་སོགས་པའི་ངན་
སོང་དུ་སྐྱེས་ཟིན་པ་རྣམས་སྦྱང་བ་སྟོན་ཏེ་ཞི་བའི་ཧོམ་ཁུང་ཐ་མ་ཁྲུ་གང་བར་མ་ཁྲུ་དོ་མཆོག་ཁྲུ་བཞི་པ་ཟླུམ་པོ་ཉིད་དུ་བྱས་ནས་མིང་དང་སྔགས་སྤེལ་ཏེ་ཉུངས་ཀར་གྱིས་བརྒྱ་ཕྲག་སྟོང་དུ་སྦྱིན་སྲེག་བྱས་ན་ངན་སོང་ལས་ཐར་བར་འགྱུར་རོ། །དེའི་ཤ་དང་རུས་པ་དང་སྐྲ་དང་ཐལ་བ་དང་གཟུགས་བརྙན་ལ་སོགས་པས་བརྒྱ་ཕྲག་སྟོང་དུ་སྦྱིན་སྲེག་བྱས་ན་ཡང་ངན་སོང་ལས་ཐར་བར་འགྱུར་རོ། །ཐབ་ཁུང་ལ་སོགས་པ་ལ་ཅི་ཞིག་བྲི་ཞེ་ན། དེའི་དབུས་སུ་འཁོར་ལོ་རྩིབས་བརྒྱད་དང་འོད་ཟེར་དཀར་པོ་བྲི། །འཁོར་ཡུག་ལ་རྡོ་རྗེ་རྩེ་ལྔ་པ་འོད་ཟེར་དཀར་པོ་བྲི། དེའི་ཕྱི་རོལ་དུ་འཁོར་ལོ་རྩིབས་བཞི་པ་ལ་ཤར་ཕྱོགས་སུ་རྡོ་རྗེ་གཞག །བྱང་དུ་རྒྱ་གྲམ། ལྷོ་ཕྱོགས་སུ་རྡོ་རྗེ་རིན་ཆེན། ནུབ་ཏུ་པདྨ། སྡིག་པ་གཞོམ་པའི་ཕྱིར་ཕྱག་རྒྱ་སྣ་ཚོགས་པ་གཞག་པར་བྱ་སྟེ་མུ་རང་དཀར་པོའི་ནང་དུ་ཕྱི་རྡོ་རྗེ་རིགས་ཀྱི་ཕྱག་རྒྱ་བྲི་བ་ནི་གཟའ་དང་སྐར་མ་དང་འཇིག་རྟེན་སྐྱོང་བ་དང་བཅས་པ་བྲི། གཙོ་བོ་གང་ཞིག་ཏུ་གཞག་ཅེ་ན། རི་མོ་འམ་ལུགས་མ་ཡང་རུང༌། ཤར་ཕྱོགས་ཀྱི་རྩིབས་ལ་རྡོ་རྗེ་ཅན་དང་ལྷན་ཅིག་གཞག །གཞན་ཡང་བྱང་དུ་བུམ་པ་དང་གཏོར་མ་དང་ལྷ་བཤོས་རབ་ཏུ་བཀང་བ་གཞག །མདོར་ན་ཐིག་གཏབ་ནས་ཆོ་ག་བཞིན་དུ་བྲི་བར་བྱ། དེ་ནས་དཀར་པོའི་གོས་གོན་རྣལ་འབྱོར་དང་ལྡན་པས་ངན་སོང་གི་རྒྱུད་ན་གནས་པའི་སེམས་ཅན་དྲང་ཞིང་སྡིག་བཞི་བར་བྱ་བའི་ཕྱིར་དང་དག་པའི་སེམས་ཀྱིས་སྦྱིན་སྲེག་བྱའོ། །རྫས་ཅི་ཞིག་གིས་བྱ་ཞེ་ན། མར་དང་འོ་མ་སྦྲང་རྩི་དང༌། ཆན་དང་འབྲས་ཡོས་དང་ཡུངས་ཀར་དང་དེའི་རུས་པ་ལ་སོགས་པ་བསྲེས་ཏེ་སྦྱིན་སྲེག་བྱའོ། །རུས་པ་ལ་སོགས་པ་མེད་ན་མིང་ནས་སྨོས་ཏེ་བྱའོ། །དེ་ལྟར་ཞི་བའི་སྦྱིན་སྲེག་གིས་བདེ་འགྲོར་སྐྱེས་ནས། རྒྱས་པའི་སྦྱིན་སྲེག་མཁས་པས་རྒྱས་པར་བྱ་དགོས་ཏེ་ཞེས་བྱ་བ་ལ་སོགས་པ་ལ་རྣལ་འབྱོར་པས་ཁྲུ་དོ་པ་དང་ཁྲུ་བཞི་པ་དང༌། མཆོག་ལ་ཁྲུ་བརྒྱད་པ་བྱས་ནས་ཧོ་མ་ཁུང་ཁྲུ་བཞི་པ་མུ་རན་དང་ལྡན་པ་དེའི་དབུས་སུ་པདྨ་དང་རིན་པོ་ཆེའི་འོད་ཟེར་སེར་པོ་དང་ལྡན་པར་བྲིའོ། །དེའི་ཁོར་ཡུག་ཏུ་རིན་པོ་ཆེ། མུར་ན་ལ་པདྨ། ཕྱི་རོལ་དུ་རྩིབས་ཆེན་པོ་བཞི་ལ། ཤར་དུ་རྡོ་རྗེ།
ལྷོར་རིན་པོ་ཆེ། ནུབ་ཏུ་པདྨ། བྱང་དུ་སྣ་ཚོགས་རྡོ་རྗེ། ཤར་དུ་འཁོར་ལོའི་རྩིབས་ལ་གཙོ་བོའི་རི་མོ་ལ་སོགས་པ་བྲིའོ། །གྲྭ་རྣམས་སུ་ལྷ་མོ་བརྒྱད་ཀྱི་ཕྱག་མཚན། སྒོར་ལྕགས་ཀྱུ་ལ་སོགས་པའི་ཕྱག་མཚན་བྲི་བར་བྱའོ། །དེ་ནས་གོས་སེར་པོ་བགོས་ནས་མཐོ་རིས་ན་གནས་པ་དྲན་པར་བྱེད་ཅིང་དེ་ལ་ཕན་ཞིང་རྒྱས་པར་བྱ་བའི་ཕྱིར་རྒྱས་པའི་ལས་སྔ་མ་བཞིན་དུ་བྱས་ནས། དེའི་ཚེ་དང་དཔལ་དང་གཟི་བརྗིད་དང་ལོངས་སྤྱོད་འཕེལ་བར་བྱ་བའི་ཕྱིར་དེ་ལྟར་རྒྱས་བའི་ལས་བྱའོ། །དེ་ནས་དབང་དུ་བྱ་བའི་ལས་བཤད་པ་ནི། དེ་ནས་ཕན་ཕྱིར་ངེས་པར་ཡང། །དབང་དུ་བྱ་བའི་ལས་བཤད་དོ། །ཞེས་བྱ་བ་ལ་སོགས་པ་ལ་རྒྱས་པར་བྱ་བ་ནས་དབང་དུ་བྱ་བའི་ལས་ནི་ཐབ་ཁུང་གཞུའི་དབྱིབས་འདྲ་བ་དང༌། ཐ་མ་ཁྲུ་གང༌། བར་མ་ཁྲུ་དོ་མཆོག་ཁྲུ་བཞི་པར་བྱས་ལ་དེའི་དབུས་སུ་པདྨ་དམར་པོ་བྲིས་ལ། ལྟེ་བ་ལ་མདའ་དང་གཞུ་བྲི། འཁོར་ཡུག་ཏུ་མདའ་དང་གཞུ་བྲི། སྔགས་ཤེས་པས་མུ་རན་ལ་ཡང་མདའ་དང་གཞུ་བྲི། ཕྱི་རོལ་ལྷག་མ་རྣམས་ཞི་བ་དང་རྒྱས་པ་དང་འདྲ་བར་བྱའོ། །དེ་ནས་སེམས་ཅན་དེ་དྲན་པར་བྱས་ཏེ་གོས་དམར་པོ་གོན་ལ་པདྨའམ་འབྲས་བུ་དམར་པོ་ཚོན་གྱིས་སྦྲུས་ནས་མར་དང་གུར་གུམ་དང་བསྲེས་ནས། ཙནྡན་དམར་པོའི་ཕྱེ་མའི་སྦྱིན་སྲེག་བྱས་ན་ཐམས་ཅད་དེའི་དབང་དུ་འགྱུར་རོ་ཞེས་བྱ་བ་ཡིན་ནོ། །དེ་ནས་མངོན་སྤྱོད་བསྟན་པ་ནི། །དེ་ལ་གདོན་རྣམས་གཞོམ་པའི་ཕྱིར། །མངོན་སྤྱོད་ཀྱི་ལས་ནི་བརྩམ་པར་བྱ། དབང་དུ་གྱུར་པ་དེ་ལ་གཞོམ་པའི་ཕྱིར་མངོན་སྤྱོད་བརྩམ་པར་བྱ་སྟེ། ཐ་མ་ཕྱེད་དང་གསུམ། བར་མ་ཁྲུ་གསུམ། མཆོག་ཁྲུ་དགུ་པ། ཐབ་ཁུང་ཁྲུ་གསུམ་པ། དབུས་སུ་རྡོ་རྗེ་རྩེ་དགུ་པ་མུ་ཁྱུད་ལ་རྩེ་གསུམ་པ་དང༌། རྒྱ་གྲམ་དང་རྡོ་རྗེ་དང་དབྱུག་པ་དང༌། ཕྱོགས་གཅིག་རྩེ་གསུམ་པའི་རྡོ་རྗེ་དང༌། དགྲ་སྟ་དང་རྡོ་རྗེ་རྩེ་གཅིག་པས་བསྐོར། ཕྱི་རོལ་དུ་ལྷའི་གནས་འཁོར་ལོ་རྩིབས་བཞི་པ་དང་ལཱ་སྐྱེ་ལ་སོགས་པའི་གནས་དང༌། རྡོ་རྗེ་རིགས་ཀྱི་གནས་སུམ་རིམ་དུ་བྱ། བྱ་དང་གཏོར་མ་དང་བུམ་པ་དང་བཤོས་ཆ་རྣམ་པ་མང་པོ་དང༌། ཆང་དང་ཁྲག་གིས་བཀང་བའི་ཐོད་པ་གཞག །དེ་ནས་ལུས་
ཅན་གྱི་སྡིག་པ་དང་བགེགས་གཞོམ་པའི་ཕྱིར། གོས་ནག་པོ་བགོས་ཤིང་ཁྲོ་བོ་ཚད་མར་བྱས་ལ་འཇིག་རྟེན་གསུམ་རྒྱལ་དུ་བསྐྱེད་དེ་སྔ་མ་བཞིན་དུ་སྦྱིན་སྲེག་བྱས་ནས། དེ་ནས་དེའི་ལུས་ལ་སྡིག་པ་བཅོམ་ནས་བགེགས་དང་བྲལ་ཏེ་མཐོ་རིས་ལྷ་དང་མིའི་ནང་ན་ཅི་དགའ་བར་སྤྱོད་དོ། །དེ་ནས་ཐབ་ཀྱི་གོ་རིམས་དང་པོ་ཞི་བ་དང་དེ་ལས་རྒྱས་པ་འབྱུང་བས་རྒྱས་པ་དང༌། དེ་ནས་དབང་དུ་བྱ་བ་དེ་ནས་མངོན་སྤྱོད་ཀྱི་ལས་ཡིན་ཏེ། གོ་རིམས་འདི་དག་ཉིད་ཀྱིས་ནི། །དེ་ནས་གང་གི་ཕྱིར་བྱས་པ། །དེ་ཡི་ཕྱིར་ཡང་དེ་བཞིན་འགྱུར། །ཞེས་གསུངས་པའི་ཕྱིར་རོ། །ཚེ་འདི་ཉིད་ལ་གནས་པ་རྣམས་ཀྱི་གོ་རིམས་ཕན་ཡོན་དང་བཅས་པ། གཞན་དག་གི་ལས་རྣམས་ཀྱང༌། སྔ་མ་བཞིན་དུ་དེ་ལྟར་བྱ། །དེས་ནི་སེམས་ཅན་རྣམས་ལ་ཡང༌། །མྱུར་དུ་བདེ་སྐྱིད་འགྲུབ་པར་འགྱུར། །ཞེས་གསུངས་པ་ཡིན་ནོ། །དེ་ནས་ཚངས་པ་ལ་སོགས་པའི་ལྷ་རྣམས་དང་ཞེས་བྱ་བ་ལ་སོགས་པས་བརྟག་པའི་རྒྱལ་པོའི་ཕན་ཡོན་དང༌། རྒྱུད་གཏད་པ་བསྟན་ཏེ་གོ་སླ་བས་མ་བཤད་དོ། །དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་བདེ་བ་ཆེན་པོའི་དཀྱིལ་འཁོར་སྟོན་ཏེ། དེ་ནས་ཞེས་བྱ་བ་སྦྱོར་བ་དང་པོའི་རྗེས་ཐོགས་ལ་སྟེ། འདིར་དང་པོའི་སྦྱོར་བ་ནི་ཕྱག་ན་རྡོ་རྗེ་ཉིད་ཡིན་པར་གཟུང་ངོ༌། །བཅོམ་ལྡན་འདས་ཕྱག་ན་རྡོ་རྗེ་རྗེ་སྔགས་དང་ཕྱག་རྒྱ་དང་སྙིང་པོ་ཐམས་ཅད་ཅེས་བྱ་བ་ནི་གསུང་དང་ཐུགས་དང་ལས་དང་སྐུ་ཐམས་ཅད་དོ། །སྟན་པར་བ་བའི་ཕྱིར་ཞེས་བྱ་བ་ནི་འོག་ནས་འབྱུང་བའི་དཀྱིལ་འཁོར་ཡོད་པ་ལས་བསྟན་པར་འགྱུར་རོ། །ཉིད་ཀྱི་སྙིང་པོ་འདི་བཤད་དོ། །ཞེས་བྱ་བ་ནི་ཉིད་ཀྱི་ཡེ་ཤེས་ངེས་པར་བསྟན་པའི་སྒྲས་གསུངས་པའོ། །དེའི་གནས་ལའང་བྱ་བ་སྟེ་དེ་ཉིད་ཨོཾ་བཛྲ་བྷི་ཧཱུཾ། རྡོ་རྗེ་སེམས་དཔའིའོ། །ཨོཾ་ཨཱཿ་ཧཱུཾ་ཀུན་དུ་བཟང་པོའིའོ། །བཛྲ་ཧཱུཾ་ཕཊ་ཕྱག་ན་རྡོ་རྗེའིའོ། །ཨོཾ་བཛྲ་ཀྲོ་དྷ་བཛྲ་ཧཱུཾ་ཕཊ། རྡོ་རྗེ་བསྣམས་པའོ། །ཨོཾ་བཛྲ་དྷི་སྒྲིབ་པ་རྣམ་པར་བསལ་བའིའོ། །ཨོཾ་བཛྲ་ཧཱུཾ་ཨ་རྒྱ་གྲམ་བསྣམས་པའོ། །འདི་དག་གིས་ཀྱང་དཀྱིལ་འཁོར་རྒྱལ་མཆོག་སྒོམ་པ་པོས་སྔ་མ་བཞིན་དུ་དཀྱིལ་འཁོར་ལུས་ལ་བརྟགས་
པའི་བར་བྱས་ནས་ཁང་པ་བརྩེགས་པ་དང་གདན་བསྐྱེད་ལ་ཀུན་རིག་གི་དཀྱིལ་འཁོར་ཇི་ལྟ་བ་བཞིན་བསམས་ལ། དབུས་སུ་བདེ་བ་ཆེན་པོའམ། རྡོ་རྗེ་སེམས་དཔའ་བསམས་ལ་ཐབས་དང་ཡེ་ཤེས་རབ་ཀྱི་མཚན་ཉིད་ལས་སྔར་བཤད་པའི་ཡེ་ཤེས་ལས་སྐུ། དེའི་ཐུགས་ཀར་ཟླ་བ་ལ་ཡིག་འབྲུ་རྣམས་བཀོད་དེ་བསྐྱེད་ཅེས་བྱ་བའི་དོན་ཏོ། །དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་བསྡུ་ཞིང་བྱིན་གྱིས་བརླབ་པ་ལ་སོགས་པ་ལས་རྒྱལ་པོ་མཆོག་ཅེས་པའི་ཏིང་ངེ་འཛིན་སྔ་མ་བཞིན་ཤེས་པར་བྱའོ། །དེ་ནས་དེ་དག་གི་དཀྱིལ་འཁོར་བཤད་དེ་ཞེས་བྱ་བ་ལ་སོགས་པས་སློབ་དཔོན་གྱི་ལས་སྟོན་ཏོ། །སྔོན་ལ་བསྙེན་པ་བྱས་པ་དང༌། ས་ལྷག་པར་གནས་པ་དག །ཆོག་ཐམས་ཅད་སྤྱད་དེ་དེ་ནས་དཀྱིལ་འཁོར་བཤད་པ་ནི། རྩ་བའི་རྒྱུད་ལྟར་དཀྱིལ་འཁོར་བྲིས་ལ་ཀུན་རིག་གི་གནས་སུ་རྡོ་རྗེ་འམ། རྡོ་རྗེ་སེམས་དཔའ་འམ། བདེ་བ་ཆེན་པོ་གང་རུང་ཅིག་བྲི། དེའི་སྤྱན་སྔར་ཕྱག་ན་རྡོ་རྗེ་གཡས་ཕྱོགས་སུ་རྡོ་རྗེ་བསྡམས་པ། ནུབ་ཕྱོགས་སུ་རྣམ་པར་གསལ་བ། བྱང་ཕྱོགས་སུ་རྒྱ་གྲམ་བསྣམས་པ། དེའི་ཕྱི་རོལ་གྱི་དཀྱིལ་འཁོར་དུ། ཤར་ཕྱོགས་སུ་ངན་སོང་སྦྱོང་བ། ལྷོར་རིན་ཆེན་ཏོག །ནུབ་ཕྱོགས་སུ་ཤཱཀྱའི་དབང་པོ། བྱང་ཕྱོགས་སུ་མེ་ཏོག་ཆེར་རྒྱས། དེའི་ཕྱི་རོལ་འཁོར་ལོའི་རྩིབས་རྣམས་ལ་སེམས་དཔའ་བཅུ་དྲུག་པོ་གོ་རིམས་བཞིན་དུ་བྲི། ཁྱམས་དང་གྲྭའི་ཆར་བྱམས་པ་དང༌། ལཱ་སྱེ་ལ་སོགས་པ་དང༌། སྒོ་གཉིས་པའི་ནང་དུ་དཔེ་མེད་པའི་བྱང་ཆུབ་སེམས་དཔའ་བྲི། རིམ་པ་གཉིས་པ་ལ་ཀུན་དགའ་བོ་ལ་སོགས་པའི་ཉན་ཐོས་གསུམ་པ་ལ་རང་སངས་རྒྱས་བྲིའོ། །མུ་རན་དཀར་པོའི་ནང་དུ་འཁོར་ཡུག་ལ་རང་རང་གི་བུ་དང་ཆུང་མས་བསྐོར་བའི་ཚངས་པ་ལ་སོགས་པ་དང༌། གཟའ་དང་སྐར་མའི་ལྷ་རྣམས་དང༌། རྒྱལ་པོ་བཞི་དང༌། འཇིག་རྟེན་སྐྱོང་བ་རྣམས་བྲི། དེའི་ཕྱི་རོལ་གྱི་མཚམས་ཀྱི་ཆར་ཤར་ལྷོར་དམྱལ་བ། ལྷོ་ནུབ་ཏུ་ཡི་དགས། ནུབ་བྱང་དུ་བྱོལ་སོང༌། བྱང་ཤར་དུ་མིའི་འགྲོ་བ་བྲི་བར་བྱའོ། །ཤར་ལ་སོགས་པའི་ཕྱོགས་བཞིར་ཤར་ཕྱོགས་སུ་འདོད་ཆགས་བྱ། ལྷོ་ཕྱོགས་སུ་ཞེ་སྡང་སྦྲུལ། ནུབ་ཕྱོགས་སུ་གཏི་མུག་ཕག །བྱང་ཕྱོགས་སུ་བུད་མེད་ཀྱི་གཟུགས་བྲི་བར་བྱའོ། །ནང་སྒོར་ལྕགས་ཀྱུ་
ལ་སོགས་པ། ཕྱི་རོལ་གྱི་སྒོར་འཇིག་རྟེན་གསུམ་མཐར་བྱེད་པ་ལ་སོགས་པ་སྟོབས་ཀྱི་དམ་པ་རྣམས་བྲི་བར་བྱའོ། །དྲི་རྣམ་པ་ལྔའི་ཆུས་བཀང་བའི་གསེར་གྱི་བུམ་པ་དང་གཏོར་མ་དང་ལྷ་བཤོས་དང༌། མེ་ཏོག་དབང་བདུག་པ་དང་གདུགས་དང་རྒྱལ་མཚན་དང་འཕན་དང་བླ་རེ་དང་རྔ་མ་དང་དྲིལ་བུ་དང༌། རྡོ་རྗེ་ནོར་བུ་དང་དོ་ཤལ་དང་ཉི་མ་ལ་སོགས་པས་བརྒྱན་ཞིང་གཞག་པར་བྱའོ། །འདོད་པའི་ཡོན་ཏན་རྣམས་ཀྱི་རང་བཞིན་གཟུགས་སྡུག་པ་ལ་སོགས་པ་ལྔས་དཀྱིལ་གྱི་འཁོར་ཉེ་འཁོར་ཀུན་དུ་དགང་ངོ༌། །དེ་ནས་སྦྱོར་བ་དང་པོ་ལ་སོགས་པ་སྔོན་དུ་འགྲོ་བས་སྒོ་ཕྱེ་སྟེ། སྤྱན་དྲངས་ལ་ལྷ་རྣམས་མཆོད་པའི་མཐར་ཐུག་པ་བྱས་པའི་རྗེས་ཐོགས་ལ་གནང་བ་ནོད་མནོས་ནས་བདག་ཉིད་ཞུགས་ལ་བདག་ཉིད་དབང་བསྐུར་ལ་ཞེས་བྱ་བ་ཡིན་ནོ། །སྔོམ་གནས་དམ་ཚིག་ལྡན་པ་ཞེས་བྱ་བ་ལ་སོགས་པས་སློབ་མ་གཞུག་པ་ལ་སོགས་པ་སྟོན་ཏོ། །སློབ་མ་སྡོམ་པ་ལ་གནས་ཤིང་དམ་ཚིག་ལ་གནས་པ་བླ་མ་ལ་མོས་པ་སྟོང་པ་ཉིད་ལ་མི་འཇིགས་པ། རིགས་ཀྱི་སྐྱོན་དང་བྲལ་བ། སེར་སྣ་དང་བྲལ་བ། ཡོན་ཏན་དང་ལྡན་པ། གཏོང་བ་དང༌། ཚུལ་ཁྲིམས་དང༌། མང་དུ་ཐོས་པ་དང༌། ཚད་མེད་པ་བཞི་དང༌། རྣམ་པར་ཐར་པའི་སྒོ་དང་ཡིད་དང་མཐུན་པའི་སློབ་མས་སྔ་མ་བཞིན་དུ་གསོལ་བ་བཏབ་བ་ལ་སོགས་པ་སྔོན་དུ་འགྲོ་བས་སྔགས་འདིས་བྱང་ཆུབ་ཏུ་སེམས་བསྐྱེད་དུ་བཅུག་སྟེ། ཨོཾ་བཛྲ་ཧཱུཾ་ཛ། སྔགས་འདིས་གཟུང་བར་བྱ་སྟེ། ཨོཾ་བཛྲས་མ་ཡ་པྲ་བེ་ཤ་ཡ་ཧཱུཾ། སྔགས་འདིས་མེ་ཏོག་དོར་བར་བྱའོ། །ཨོཾ་བཛྲ་པཱ་ཎི་པྲ་ཏའི་ཙྪ་བཛྲ་ས་ཏྭ་མ་ཧཱ་སུ་ཁ་ཧཱུཾ་ཧ་ཧོ་ས་མ་ཡ་སྟྭཾ། རང་གི་ལྷའི་སྔགས་དང་ཕྱག་རྒྱས་མགོ་ལ་བཅིང་བར་བྱའོ། །དེ་ནས་དམ་ཚིག་སྦྱིན་པར་བྱའོ། །ཨོཾ་ཇི་སྟེ་ཁྱོད་ཀྱིས་སུ་ཡང་རུང་བ་ལ་སྨྲས་ན། ཕྱག་ན་རྡོ་རྗེའི་རྡོ་རྗེ་འབར་བས་ཁྱོད་ཀྱི་མགོ་བོ་འགས་པར་འགྱུར་རོ། །འདིས་དམ་ཚིག་གི་ཆུ་བླུད་དོ། །ཨོཾ་བཛྲས་མ་ཡ་ཧྲི་ཏྲཾ་ཧཱུཾ་ཨ། འདིས་གདོང་གཡོགས་དགྲོལ་ལོ། །ཨོཾ་བཛྲ་ཙཀྵུ་པཱ་ཤེས་ཧཾ། ཨོཾ་ཏ་ཛྙཱ་ན་བེ་ཏ་ལ་ན་ཏེ། མ་ཧཱ་མ་མི་ཧཱུཾ། དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྟན་ལ་རྩ་བའི་རྒྱུད་དུ་བཤད་པ་བཞིན་དུ་ཐམས་ཅད་བྱས་ལ། བཅོམ་ལྡན་འདས་ཀྱི་སྤྱན་སྔར་
དབང་བསྐུར་བར་བྱའོ། །ཨོཾ་བཛྲ་པཱ་ཎི་སྭ་ཡ་ཏི། ཨ་ནུ་ར་ག་ཏེ་ཨ་བྷི་ཥིཉྩ་ཧཱུཾ། ཞེས་ཕྱག་ན་རྡོ་རྗེའི་བུམ་པས་དབང་བསྐུར། ཨོཾ་བཛྲ་ཨ་བྷི་ཥིཉྩ་སརྦ་ཨ་བྷི་ཥེ་ཀ་ཏེ་ཧཱུཾ། རྡོ་རྗེ་སེམས་དཔའི་བུམ་པས་དབང་བསྐུར། ཨོཾ་བུདྡྷ་དྷརྨཱ་བྷི་ཥྀཉྩ་སརྦ་བུདྡྷ་བི་ཥི་ཀ་ཏ་ཨོཾ་ཧཱུཾ། ཀུན་དུ་བཟང་པོའི་བུམ་པས་དབང་བསྐུར། ཨོཾ་རཏྣཱ་བྷི་ཥིཉྩ་སརྦ་རཏྣཱ་བྷི་ཥི་ཀ་ཏ་ཨོཾ་ཧྲི། རྡོ་རྗེ་བསྡམས་པའི་བུམ་བས་དབང་བསྐུར། ཨོཾ་པདྨཱ་བྷི་ཥིཉྩ་སརྦ་པདྨཱ་བྷི་ཥེ་ཀ་ཏ་ཧྲི། རྣ་པ་གསལ་བའི་བུམ་པས་དབང་བསྐུར། ཨོཾ་ཀརྨཱ་བྷི་ཥིཉྩ་སརྦ་ཀརྨཱ་བྷི་ཥེ་ཀ་ཏ་ཨ། སྣ་ཚོགས་རྡོ་རྗེ་བསྡམས་པའི་བུམ་པས་དབང་བསྐུར། དབང་བསྐུར་བ་ལྷག་མ་ནི་རྩ་བའི་རྒྱུད་དུ་བསྟན་པ་བཞིན་ཤེས་པར་བྱའོ། །དེ་ནས་ལུས་ལ་སོགས་པ་ཡོན་དུ་ཕུལ་ནས་བཀའ་ནོད་པར་བྱའོ། །དེའི་སྔགས་ཨོཾ་སརྦ་ཞེས་བྱ་བ་ལ་སོགས་པའོ། །དེ་ནས་ལས་ཐམས་ཅད་བྱེད་དུ་བཅུག་ཅིང་དངོས་གྲུབ་ཐམས་ཅད་ཀྱང་སྦྱིན་ནོ་ཞེས་བྱ་བ་ལ་སོགས་པས་དངོས་གྲུབ་བསྟན་ཏོ། །བདེ་བས་བདེ་བ་བསྐྱེད་ནས་ནི། །ཞེས་བྱ་བ་ནི་བདེ་བ་ཆེན་པོ་ལྷག་པའི་ལྷ་ཐོབ་པས་བདེ་བ་ཆེན་པོའི་སྐུར་བསྐྱེད་ནས་ནི་ཞེས་བྱ་བ་ཡིན་ནོ། །དཀྱིལ་འཁོར་བཞི་ཡི་དབུས་སུ་ནི། །ཀུན་དུ་བཟང་ངམ་བདེ་ཆེན་པོ།། བདག་ཉིད་ཀྱིས་ནི་བསྒོམས་ནས་ཀྱང༌། སྙིང་གར་ཧཱུཾ་ཞེས་བྱ་བ་ནས། །ཞེས་བྱ་བ་ནི་ཕྱག་ན་རྡོ་རྗེ་ལ་སོགས་པ་བཞིའི་དབུས་སུ་བདེ་བ་ཆེན་པོ་སྔ་མ་བཞིན་དུ་བསྒོམས་ནས་སྙིང་གར་ཟླ་བའི་ཐོག་ཏུ་ཧཱུཾ་ཞེས་བྱ་བ་དང་པོའི་བསྙེན་པ་ལ་མཚན་མ་ཐོབ་ཀྱི་བར་དུ་བསམས་ཏེ་མཚན་ཐོག་ཐག་བསམས་ནས་ཞེས་བྱ་བ་ཡིན་ནོ། །དེའི་ཕན་ཡོན་ནི། རྡོ་རྗེ་སེམས་དཔའ་དང་མཉམ་འགྱུར། །དཔལ་ལྡན་ལས་རྣམས་ཀུན་བྱེད་ཅིང༌། །ཀུན་དུ་བཟང་པོར་བདག་ཉིད་འགྱུར། །དེ་ལྟར་འགྱུར་བར་ཐེ་ཚོམ་མེད། །ཅེས་གསུངས་པ་ཡིན་ནོ། །གཞན་ཡང་འཆི་བདག་འཇོམས་བའི་སྐབས་སུ་བཤད་པ་བཞིན་དུ་ལྷའི་རྣལ་འབྱོར་རྫོགས་པར་བསྐྱེད་ལ། ཧཱུཾ་ལས་ཕྱག་ན་རྡོ་རྗེར་བསྒྱུར་ལ་སྙིང་གར་འདི་ཉིད་ཀྱི་དཀྱིལ་འཁོར་བསྒོམས་ཏེ་བསྙེན་པ་དང་སྒྲུབ་པ་བསྒོམས་ན་ཕྱག་ན་རྡོ་རྗེ་དང་འདྲ་བར་འགྱུར་རོ་ཞེས་བྱ་བ་ནི། ཧཱུཾ་ལས་སངས་རྒྱས་གཟུགས་གྱུར་ན། །ཕྱག་ན་
རྡོ་རྗེ་བདག་ཉིད་འགྱུར། །སྙིང་གར་འཁོར་ལོ་རབ་བསྒོམས་ན། །ཕྱག་ན་རྡོ་རྗེ་འདྲ་བར་འགྱུར། །ཞེས་གསུངས་པའི་དོན་ཡིན་ནོ། །གཞན་ཡང༌། རྡོ་རྗེ་ཁྲོ་བོར་མཉམ་གཞག་སྟེ། །སྙིང་གའི་དབུས་སུ་ཕཊ་ཅེས་བྱ། །ཧཱུཾ་ཞེས་བྱ་བས་བསྐོར་བསམས་ཏེ། །ཁྲོ་བོ་སྟོབས་ཆེན་ཉིད་དུ་འགྱུར། །ཞེས་བྱ་བ་ནི་སྔ་མ་བཞིན་དུ་བསམས་ཏེ་ཁྲོ་བོར་བསྒྱུར་ལ་རང་གི་ཟླ་བའི་སྟེང་དུ་ཕཊ་ཅེས་བྱ་བ་ཧཱུཾ་ཞེས་བྱ་བས་བསྐོར་བར་བསམས་ཏེ་བསྙེན་པ་དང་སྒྲུབ་པ་བསྒོམས་ན་ཁྲོ་བོ་སྟོབས་པོ་ཆེ་ཉིད་དུ་འགྱུར་རོ་ཞེས་བྱ་བའི་དོན་ཏོ། །རྡོ་རྗེ་བསྡམས་པར་བདག་བསྒྱུར་ལ། །སྙིང་གར་ཨོཾ་ཞེས་བྱ་བ་ཡིས། །བསྐོར་བའི་ཧཱུཾ་དང་ཧྲི་ཟླ་བ། །བསམས་ན་རིན་ཆེན་འདྲ་བར་འགྱུར། །ཞེས་བྱ་བ་ནི་སྔ་མ་བཞིན་རྡོ་རྗེ་རིན་ཆེན་དུ་བསྒྱུར་ལ། ཧཱུཾ་ཧྲི་གཉིས་ཟླ་བའི་དབུས་སུ་བསམས་ལ། ཨོཾ་ཞེས་བྱ་བས་བསྐོར་བ་སྙིང་གར་བསམས་ལ་བསྙེན་པ་དང་སྒྲུབ་པས་རྡོ་རྗེ་རིན་ཆེན་དུ་འགྱུར་རོ་ཞེས་བྱ་བ་ཡིན་ནོ། །སྔ་མ་བཞིན་དུ་རྡོ་རྗེ་ཆོས་སུ་བསྒོམས་ལ་སྙིང་གའི་དབུས་སུ་ཏྲཾ་ཞེས་བྱ་བ་ཨོཾ་ཨོཾ་ཞེས་བྱ་བས་བསྙེན་པ་དང་སྒྲུབ་པའི་དུས་སུ་ཟླ་བ་ལ་བསྒོམས་པས་ཕྱག་ན་པདྨོ་དང་འདྲ་བར་འགྱུར་རོ་ཞེས་བྱ་བའི་དོན་ཏོ། །རྡོ་རྗེ་བསྒོམས་ནས་སྙིང་གི་ནི།། དབུས་སུ་ཧྲའི་ཞེས་བྱ་བ་ལ། །ཨོཾ་ཞེས་བྱ་བས་བསྐོར་བསམས་ན། །ཕྱག་ན་པདྨོ་མཉམ་པར་འགྱུར། །ཞེས་བྱ་བ་ཡིན་ནོ། །གཞན་ཡང་སྔ་མ་བཞིན་དུ་རྡོ་རྗེ་ལས་སུ་བསྐྱེད་ལ། ཨ་ལས་འཁོར་ལོའི་དབུས་སུ་སྣ་ཚོགས་རྡོ་རྗེ་དབུས་སུ་ཧཱུཾ་དང་ལྡན་པ་ཨོཾ་ཞེས་བྱ་བས་བསྐོར་བ་བསྙེན་པ་མཚན་ཐོག་ཐག་བཟླས་ན་རྡོ་རྗེ་ལས་དང་མཉམ་པར་འགྱུར་རོ་ཞེས་བྱ་བ་ནི། འཁོར་ལོ་རྒྱ་གྲམ་ཧཱུཾ་ལྡན་པས། །ཨཿ་ཞེས་བྱ་བ་བསྐྱེད་ནས་ཀྱང༌། །ཨོཾ་ཞེས་བྱ་བས་བསྐོར་བསམས་ན། །རྡོ་རྗེ་ལས་དང་མཉམ་པར་འགྱུར། །ཞེས་གསུངས་པ་ཡིན་ནོ། །རྡོ་རྗེ་ལས་རྣམས་བཤད་བྱ་སྟེ། །ཞེས་བྱ་བ་ལ་སོགས་པས་ལས་བཤད་དེ། དེ་ནས་བཤད་པར་བྱའི་ལས་རྣམས་ནི། ཞི་བ་དང་རྒྱས་བ་དང་དབང་དང་མངོན་སྤྱོད་ཀྱི་ལས་རྣམས་བཟླས་པ་དང་སྦྱིན་སྲེག་གི་སྒོ་ནས་ཞི་བ་ལ་སོགས་པའི་ལས་རྣམས་བྱ་བ་ཡིན་ནོ། །ཞི་བའི་རྣལ་འབྱོར་པ་རྡོ་རྗེ་སེམས་དཔའ་བསྒྱུར་ལ་ཞི་བའི་ལས་
བརྩམ་ཞིང༌། དུས་ངན་པར་བཟླས་པ་དང་སྦྱིན་སྲེག་བྱེད་ཅིང་འོད་ཟེར་སྤྲིན་གྱིས་དེའི་ལུས་ལ་འོག་ནས་འབྱུང་བའི་བརྡུང་བའི་སྔགས་བརྗོད་ཅིང་འཕྲོ་བར་གྱུར་པར་བསྒོམས་ལ་ཤར་དུ་ཁ་བལྟས་ནས་གཞན་གྱི་ཉེས་པ་སེལ་བར་བྱེད་ལ་སེམས་ཅན་ལ་ཕན་པར་དགའ་བས་དེ་བཞིན་གཤེགས་པའི་རིགས་ལ་མཆོད་ཅིང་ཀུན་དུ་བཟང་པོའམ་བདེ་བ་ཆེན་པོ་བསམས་ནས་ནང་པར་རེ་རེ་སྔ་མ་བཞིན་ཐམས་ཅད་བྱས་པས་སྡིག་པ་ཞི་བར་འགྱུར་ཞེས་བྱ་བར་གནས་སོ། །རྒྱས་པ་ནི་འོད་ཟེར་སེར་པོ་དང་ལྡན་པའི་རིན་ཆེན་འཛིན་དུ་བསམས་ལ། ཟས་དཀར་གསུམ་བཟའ་ཞིང་ཉི་མའི་གུང་ལ་རྒྱས་པའི་ལས་ཤིས་ཏེ། ཐབ་ཁུང་རིན་ཆེན་ལྟ་བུར་བརྐོས་ལ་བཟླས་པ་དང་སྦྱིན་སྲེག་བྱ་བ་ནི། སྔགས་པས་སྔ་མ་བཞིན་དུ་འོད་ཟེར་སེར་པོས་ལུས་དགོང་ངོ་ཞེས་པའི་དོན་ཏོ། །དབང་དུ་བྱ་བ་ནི་ལྷའི་རྣལ་འབྱོར་དང་ལྡན་པས་ཐབ་ཁུང་པདྨོ་འདྲ་བར་བྱས་པ་སྤྱན་རས་གཟིགས་སུ་བདག་བསྒྱུར་ལ་ཉི་མ་རྒས་པའི་མཐར་དབང་དུ་བྱའོ་ཞེས་བྱ་བའི་དོན་ཏོ། །དེ་ཡང་ལྷ་གང་དག་གི་རྣལ་འབྱོར་གྱིས་འགྲུབ་པར་བསྟན་པ་ནི། འདྲེན་པ་ཀུན་ཏུ་བཟང་པོས་ནི་ཞི་བའི་ལས་བྱའོ། །རྡོ་རྗེ་རིན་ཆེན་གྱི་རྣལ་འབྱོར་ནི་རྒྱས་གདབ་པ་དབང་བསྐུར་བ་འགྲུབ་བོ། །རྡོ་རྗེ་དཔལ་གྱི་རྣལ་འབྱོར་ནི་རྣམ་པར་རྒྱལ་བ་དང་ལོངས་སྤྱོད་དང༌། དབང་ཕྱུག་དང་དཔལ་མཉམ་པ་མེད་པ་འགྲུབ་བོ། །རྡོ་རྗེ་ཉི་མ་ནི་གཟི་བརྗིད་དང་མདོག་ཤིན་ཏུ་འབར་བ་གཙོ་བོར་འགྲུབ་བོ། །བཞད་པ་ནི་དགའ་མགུ་རངས་པ་གཙོ་བོར་འགྲུབ་བོ། །རྡོ་རྗེ་ཆོས་ནི་ཆོས་ཐམས་ཅད་བརྟགས་ནས་སངས་རྒྱས་ལ་སོགས་པ་ཐམས་ཅད་མཉེས་པར་བྱེད་པ་གཙོ་བོར་འགྲུབ་བོ། །དབང་ཕྱུག་ཆེན་པོ་ལ་སོགས་པའི་རིགས་རྣོན་པོས་གཅོད་པ་ཉིད་དུ་འགྲུབ་བོ། །མ་རུངས་པ་རྣམས་རྩད་ནས་གཅོད་པ་འཁོར་ལོས་གཙོ་བོར་འགྲུབ་བོ། །མི་སྨྲ་བ་སྨྲ་བར་མཛད་ཅིང་མ་རུངས་པ་ལྐུགས་པས་རྡོ་རྗེ་སྨྲ་བ་གཙོ་བོར་འགྲུབ་བོ། །རྡོ་རྗེ་ལས་ཀྱི་རྣལ་འབྱོར་གྱིས་མཆོད་པ་དང་སེམས་ཅན་གྱི་དོན་བྱ་བར་གཙོ་བོར་འགྲུབ་བོ། །རྡོ་རྗེ་སྲུང་བས་བསྲུང་པ་གཙོ་བོར་འགྲུབ་བོ། །མ་རུངས་པ་ཐམས་ཅད་ཟ་བ་རྡོ་རྗེ་གནོད་སྦྱིན་གྱི་གཙོ་བོར་འགྲུབ་བོ། །རྡོ་རྗེ་ཁུ་ཚུར་གྱིས་བཅིངས་ནས་གཙོ་བོར་འགྲུབ་བོ། །དེ་དག་གི་ལྷའི་རྣལ་
འབྱོར་གྱིས་ཞི་བ་དང་རྒྱས་པ་དང་དབང་དང༌། མངོན་སྤྱོད་རྣམས་ལ་གཅིག་དང་བཞི་དང་བཞིས་གཙོ་བོར་འགྲུབ་བོ་ཞེས་བྱ་བ་ཡིན་ནོ། །གཞན་ཡང་དེ་དག་གི་ཐུན་མོང་གི་འབྲས་བུ་ནི། བཟླས་པ་དང་སྦྱིན་སྲེག་གི་ལས་ཀྱི་དགོས་པ་ཐམས་ཅད་བསྒྲུབ་པར་བྱའོ་ཞེས་བྱ་བ་ཡིན་ནོ། །ཞི་བ་ལ་འོད་ཟེར་གསལ་བས་བསྒྲུབ་པའི་དངོས་པོ་གང་བར་བསྒོམ་ཞིང༌། ཞི་བ་ལྷའི་རྣལ་འབྱོར་དང་ལྡན་པ་ཞི་བའི་སེམས་ཀྱིས་ཞི་ཞེས་བྱའོ། །རང་གི་ལུས་གསེར་བཙོམ་ལྟ་བུ་དང༌། ཉི་མ་ཤར་བ་ལྟ་བུར་བསམས་ལ་རྒྱས་པའི་ལས་བྱའོ། །འོད་ཟེར་སེར་པོས་དགང་བར་བྱའོ། །སྤྱན་རས་གཟིགས་ཀྱི་རྣལ་འབྱོར་གྱིས་ཧྲི་དང་འདྲ་བའི་འོད་ཟེར་བཏང་བས་བསྒྲུབ་པར་བྱ་བའི་སྙིང་ལ་ཀུན་དུ་བསྐོར་ནས་བྱེད་ཅིང་བསམས་ན་འདོད་པ་ཐམས་ཅད་དབང་དུ་བྱེད་དོ་ཞེས་བྱ་བའི་དོན་ཏོ། །དེ་ལྟར་ལས་རྣམས་བཤད་ནས་དེ་ནས་བཅོམ་ལྡན་འདས་ཕྱག་ན་རྡོ་རྗེ་ཞེས་བྱ་བ་ལ་སོགས་པས་རྟོག་པ་ཐམས་ཅད་ཀྱི་དཀྱིལ་འཁོར་དང་སྦྱིན་སྲེག་ལ་སོགས་པའི་དུས་སུ་རྒྱས་གདབ་པ་སྟོན་ཏེ། དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་ན་རྡོ་རྗེས་སེམས་ཅན་ཐམས་ཅད་ལ་ཕན་པའི་ཕྱིར་ཐེ་ཚོམ་ཐམས་ཅད་གཅོད་པ་ངན་སོང་ཐམས་ཅད་བཟློག་པའི་རྟོག་པ་དམ་པ་འདི་བཤད་པ་ལེགས་སོ་ལེགས་སོ་ཞེས་བྱ་བ་ནི་དགའ་ནས་ལན་གཉིས་སུ་ཞུས་པའོ། །དེ་ནས་ཕྱག་ན་རྡོ་རྗེས་ཕྱག་རྒྱའི་ལེའུ་འདི་བཤད་དོ་ཞེས་བྱ་བ་ནི་བདེ་བར་བྱེད་པས་ན་ཕྱག་རྒྱ་སྟེ་འོག་ནས་འབྱུང་བའོ། །ལེའུ་ཞེས་བྱ་བ་ནི་གོས་དང་འདྲ་བ་སྟེ་ཆོ་ག་དང་རིམ་པ་དང་རྣམ་པར་འབྱེད་པ་དང་དུམ་བུ་ཞེས་བྱ་བའི་དོན་ཏོ། །འདི་བཤད་དོ་ཞེས་པ་ནི་གསུངས་པའོ། །ལག་པ་གཉིས་མདུན་དུ་བཞག་ལ་ཨ་ལས་ཟླ་བའི་དཀྱིལ་འཁོར་དུ་བྱིན་གྱིས་བརླབས་ཏེ་ཞེས་བྱ་བ་ནི་ལག་པ་གཉིས་མདུན་དུ་བཞག་ནས་ཨ་ལས་ཟླ་བ་ཧཱུཾ་ལས་རྡོ་རྗེ་བསྐྱེད་དེ་ཐིམ་པའོ། །ཧཱུཾ་ཞེས་བྱ་བ་དང་ཨ་ཞེས་ཟླ་བའི་དཀྱིལ་འཁོར་གཉིས་ཀྱི་བྱིན་གྱིས་བརླབས་ལ་ཞེས་བྱ་བ་ནི་ཧཱུཾ་ཨཱཿཞེས་བརྗོད་པས་སོ། །ལག་པ་གཉིས་ཀྱི་ཐལ་མོ་གཉིས་ཀ་ལ་ཨ་ལ་སོགས་པའི་ཡི་གེ་བཅུ་དྲུག་
ཀུན་དུ་གང་ཞིང་འཕྲོ་བར་བྱ་སྟེ་ཞེས་བྱ་བ་ནི་ཟླ་བ་ལ་གཡས་སྐོར་གྱིས་ཨ་ཨཱ་ལ་སོགས་པ་བཅུ་དྲུག་འོད་ཟེར་དང་བཅས་ཏེ་ཞེས་བྱ་བའི་དོན་ཏོ། །མཐེ་བོང་གཉིས་ལ་ཨོཾ་ཞེས་བྱ་བ་བཞག་ནས་གུང་མོ་གཉིས་ལ་ཧཱུཾ་ཞེས་བྱ་བ་གཞག །མཛུབ་མོ་གཉིས་ལ་ཧཱུཾ་ཞེས་བྱ་བ་གཞག །སྲིན་ལག་གཉིས་ལ་ཧྲི་ཞེས་བྱ་བ་གཞག །མཐེ་བོང་ལ་ཨ་ཞེས་བྱ་བ་བཞག་སྟེ་དེ་ལྟར་ཡི་གེ་རྣམས་གཞག་པར་བྱས་ནས་དེ་བཞིན་གཤེགས་པ་རྣམས་ཡིན་པར་མོས་པ་བསྐྱེད་དེ་ཞེས་བྱ་བ་ནི་གཡས་པ་ལ་ཨོཾ་ལས་རྣམ་པར་སྣང་མཛད། ཧཱུཾ་ལ་སོགས་པ་ལ་ནི་མི་བསྐྱོད་པ་ལ་སོགས་པ་བསྐྱེད། གཡོན་ཕྱོགས་ལ་ཨོཾ་ལས་རྡོ་རྗེ་དབྱིངས་ཀྱི་དབང་ཕྱུག་མ། ཧཱུཾ་ལ་སོགས་པ་ལ་རྡོ་རྗེ་སེམས་དཔའ་ལ་སོགས་པ་བསྐྱེད་དེ་ཞེས་བྱ་བའི་དོན་ཏོ། །ཆོས་ཐམས་ཅད་གཅིག་ལ་གཅིག་འདྲེས་པ་དང་གདན་རྗེས་སུ་མཐུན་པར་བྱས་ཏེ་ཞེས་བྱ་བ་ནི་བདེ་བར་གཤེགས་པ་ཡབ་ཡུམ་རྣམས་བཛྲ་ཨཉྫ་ལི་ཞེས་བྱ་བས་རྡོ་རྗེ་ཐལ་མོ་སྦྱར་བ་དང་བདག་གིས་ཀྱང་དེའི་དོན་བསྒོམ་ཞེས་བྱ་བའི་དོན་ཏོ། །ལག་པ་གཉིས་པདྨ་ལྟ་བུར་སྦྱར་བ་བྱས་ནས། ཨོཾ་ཞེས་བྱ་བ་གཉིས་བརྐྱང་བ་དང་ཨ་ཞེས་བྱ་བ་གཉིས་བ་ཀུག་སྟེ། དེ་བཞིན་དུ་ཧཱུཾ་ཞེས་པ་དང༌། ཧྲི་ཞེས་བྱ་བ་གཉིས་གཤིབས་ཏེ་བརྐྱང་བ་འདི་ནི་བཅོམ་ལྡན་འདས་ཀྱི་རྩ་བའི་ཕྱག་རྒྱ་ལས་ཐམས་ཅད་དང་ལྡན་པའི་དམ་ཚིག་གིའོ་ཞེས་བྱ་བ་ནི་མཐེ་བོང་གཉིས་བརྐྱང་མཛུབ་མོ་གཉིས་དང་སྲིན་ལག་གཉིས་པདྨའི་འདབ་མ་འདྲ་བར་བྱ། གུང་མོ་གཉིས་གཤིབས་ཏེ་བརྐྱང་བ་ནི་སྡིག་པ་སྦྱང་བ་ལ་སོགས་པ་ལས་ཐམས་ཅད་ལས་མི་འདའ་བའི་ཕྱག་རྒྱའོ་ཞེས་བྱ་བའི་དོན་ཏོ། །དེ་ཉིད་རྣོན་པོ་དང་ལྡན་པ་དང༌། དེ་ལས་རབ་ཏུ་འཁོར་ལོ་དང་འདྲ་བ་དང་འཁོར་ལོའི་ཞེས་བྱ་བ་ནི་རྡོ་རྗེ་ཐལ་མོ་དེ་ཉིད་རྣོན་པོ་ལྟར་བྱས་ཏེ་བསྐོར་ན་འཁོར་ལོའི་ཕྱག་རྒྱར་འགྱུར་རོ། །དེ་ཉིད་ལས་ཁར་གཞག་པ་ནི་སྒྲ་སྟེ་འདི་ནི་ཕྱག་རྒྱའི་ཚོགས་སོ་ཞེས་བྱ་བ་ནི་རྡོ་རྗེ་ཐལ་མོ་དེ་ཉིད་ཁར་གཞག་པ་སྒྲའི་སྟེ་ཕྱག་རྒྱའི་ཚིག་ཏུ་འགྱུར་རོ། །དེ་ཉིད་གཉིས་སུ་བྱས་ནས་ལས་ཀྱི་ཕྱག་རྒྱར་བྱས་ནས་ལས་ཀྱིའོ་ཞེས་བྱ་བ་ནི། རྡོ་རྗེ་ཐལ་མོ་དེ་ཉིད་གཉིས་སུ་བྱས་ནས་རྡོ་རྗེ་ཁུ་ཚུར་དུ་བྱས་ཏེ་རང་རང་གི་སྙིང་
གར་སྦྱར་ན་ལས་སུ་འགྱུར་རོ། །གཡོན་པ་མགོ་ཐོད་ཐོགས་འདྲ་དང༌། །གཡས་པ་མདུང་རྩེ་གསུམ་པ་ཞེས་བྱ་བ་ནི་གཡོན་པ་མགོ་ཐོད་ཐོགས་པ་འདྲ་བར་བྱས་ལ་གཡས་པ་མཐེ་བོས་མཐེའུ་ཆུང་མནན་ཏེ། ལྷག་མ་གསུམ་མདུང་རྩེ་གསུམ་པ་ལྟར་བྱས་པ་ནི་མ་མོ་དང་གཤིན་རྗེའི་ཕྱག་རྒྱའོ། །གཡོན་པ་པདྨ་ཁ་འཛུམ་དང༌། །གཡས་པ་ཨོཾ་ཞེས་བྱ་བ་གཞག །ཅེས་བྱ་བ་ནི་གཡོན་པ་པདྨ་ཁ་འཛུམ་པ་ལྟ་བུ་བྱས་ལ། གཡས་པའི་མཐོ་བོང་ཁའི་ཕྱོགས་སུ་གཞག་པ་ནི་ཚངས་པའིའོ། །གཡོན་པ་འཁོར་ལོ་དབྱུག་རྩེ་གསུམ། །ཞེས་བྱ་བ་ནི་གཡོན་པ་འཁོར་ལོ་ཐོགས་པ་ལྟར་བྱས་ལ། གཡས་དབྱུག་ཏོ་རྩེ་གསུམ་ལྟར་བྱས་པ་ནི་དབང་ཕྱུག་ཆེན་པོའིའོ། །ཨ་དང་ཨོཾ་ནི་རྩེ་སྤྲད་པ། །ལྷག་མ་གསུམ་ནི་རྡོ་རྗེ་ཅན། །ཞེས་བྱ་བ་ནི་གཡས་པའི་མཐེའུ་ཆུང་དང་མཐེ་བོང་རྩེ་སྤྲད་ནས་ལྷག་མ་གསུམ་རྡོ་རྗེར་བྱས་པ་ནི་བརྒྱ་བྱིན་གྱིའོ། །ཧཱུཾ་དང་ཨོཾ་གཉིས་གཞུར་བྱས་ལ། །ལྷག་མ་མདར་བྱས་མདའ་ཅན་གྱིའོ། །ཞེས་བྱ་བ་ནི་མཛུབ་མོ་དང་མཐེ་བོང་གཉིས་གཞུར་བྱས་ལ་སོར་མོ་ལྷག་མ་མདར་བྱས་པ་ནི་མདའ་གཞུ་ཅན་གྱི་ཕྱག་རྒྱའོ། །ལག་པ་གཡས་གཡོན་ལ་འཁོར་ལོར་བྱ། །འདི་ནི་ཉི་མ་ཟླ་བའི་ཞལ། །ཞེས་བྱ་བ་ནི། གཡོན་པ་བགྲད་པ་ཟླ་བ་ཡི། །གཡས་པ་བགྲད་པ་ཉི་མའིའོ། །ཐལ་མོ་དམ་སྦྱར་སོར་མོ་སྤྲོ། །གཟའ་ལག་རྟག་ཏུ་སེ་གོལ་གཏོགས། །ཞེས་བྱ་བ་ནི་ཐལ་མོ་སྦྱར་བ་སོར་མོ་འཁྲོལ་བ་ལྟར་བྱེད་ཅིང་སེ་གོལ་གཏོགས་པ་ལྟར་བྱེད་པ་ནི་གཟའ་ལག་གོ །དེ་ཉིད་ཚིག་དབང་གསུངས་པ་སྟེ། །མཆུ་ལ་ཚིག་འབྲུ་འདྲ་བར་གཞག །ཅེས་བྱ་བ་ནི་རྡོ་རྗེ་ཐལ་མོ་ཉིད་མཆུ་ལས་ཚིག་དབྱུང་བ་འདྲ་བར་གཞག་པ་ནི་ཕུར་བུའོ། །པ་བསངས་ནི་མཉམ་ཉིད་སྦྱར། །ཞེས་བྱ་བ་ནི་ཐལ་མོ་མཉམ་ཉིད་སྦྱར་བ་པ་སངས་དང་མིག་དམར་གྱིའོ། །སྤེན་པ་དབྱིག་པ་འཛིན་པར་བྱ། །ཞེས་བྱ་བ་ནི་དབྱུག་པ་འཛིན་པ་ལྟར་བྱེད་པ་ནི་སྤེན་པའིའོ། །བ་ལང་སྣ་ནི་ཆུ་སྲིན་འདྲ། །ཞེས་བྱ་བ་ནི་མཛུབ་མོ་དང་མཐེ་བོང་གཉིས་གླང་པོ་ཆེ་དང་ཆུ་སྲིན་གྱི་སྣ་འདྲ་བ་སྒྲ་གཅན་གྱི་ཡིན་པར་ཤེས་པར་བྱའོ་ཞེས་བྱ་བའི་དོན་ཏོ།།
རྒྱུ་སྐར་མེ་སྟག་འཕྲོ་བ་འདྲ། །དེ་ཉིད་བསྐོར་ན་གློག་ཕྲེང་གི །བླ་འོག་གཞག་པ་སྤྲིན་ཕྱག་རྒྱ། །ཞེས་བྱ་བ་ནི་མེ་སྟག་འཕྲོ་བ་ལྟར་བྱས་བ་རྒྱུ་སྐར་གྱིའོ། །དེ་ཉིད་བསྐོར་བ་གློག་གིའོ། །ཐལ་མོ་གཉིས་བླ་འོག་ཏུ་གཞག་པ་སྤྲིན་གྱིའོ། །འདི་དག་སྙིང་པོ་ཕྱག་རྒྱ་སྟེ། །ལས་ཀྱི་ཕྱག་རྒྱ་ཡང་འདི་དག་ཡིན་ནོ་ཞེས་བྱ་བ་ནི་ཐུགས་དམ་ཚིག་སྙིང་པོའི་ཕྱག་རྒྱའོ། །འཇིག་རྟེན་པའི་ལས་ཀྱི་ཕྱག་རྒྱ་ཡང་འདི་དག་ཉིད་དོ། །དེ་ཉིད་ལས་སྲིན་ལག་སྦས་པ་ནི་ཕྱག་ན་རྡོ་རྗེའི་ཞེས་པ་ནི་རྡོ་རྗེ་ཐལ་མོ་དེ་ཉིད་ལས་མཛུབ་མོའི་ཚིགས་བར་མ་བཅག་པ་སྟེ་དབང་བསྐུར་བ་རྡོ་རྗེ་རིན་ཆེན་གྱི་ཕྱག་རྒྱ་སྟེ། དེ་ཉིད་ལས་ཧཱུཾ་ཞེས་བྱ་བས་ཚིགས་བར་མ་བཅག་པ་ནི་དབང་བསྐུར་བ་སྦྱིན་པར་བྱེད་པ་སྟེ། ནམ་མཁའི་སྙིང་པོའི་ཕྱག་རྒྱའོ། །དེ་ཉིད་ལས་ཧཱུཾ་ཞེས་བྱ་བ་ནི་གཤིབས་ལ་སྲིན་ལག་པདྨ་འདྲ་བར་བྱས་པ་འདི་པདྨ་འབྱུང་བའི་ཆགས་པའི་ཕྱག་རྒྱའོ་ཞེས་བྱ་བ་ནི་མཛུབ་མོ་གཉིས་གཤིབས་སྲིན་ལག་པདྨ་འདྲ་བར་བྱ་བ་ནི་རྣམ་པར་གསལ་བའི་ཕྱག་རྒྱའོ། །མཛུབ་མོ་གཉིས་དང་སྲིན་ལག་གཉིས་བསྒྲེང་བ་ནི་རྡོ་རྗེ་སེམས་དཔའ་སྟེ་དེ་ཉིད་ལས་ཧཱུཾ་ཞེས་བྱ་བ་དང༌། །ཧྲི་ཞེས་བྱ་བས་གཤིབས་ཏེ་བསྒྲེང་བ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱའོ། །དེ་ཉིད་ལས་པདྨ་འདྲ་བར་བྱས་པ་ནི་བདེ་བ་ཆེན་པོའི་ཕྱག་རྒྱའོ། །དེ་ཉིད་ལས་འོད་ཟེར་འཕྲོ་བའི་ཚུལ་དུ་བྱས་པ་ནི་ཀུན་དུ་བཟང་པོའི་ཕྱག་རྒྱའོ་ཞེས་བྱ་བ་ནི་རྡོ་རྗེ་ཐལ་མོ་པདྨ་འདྲ་བར་བྱས་པ་དང༌། །འོད་ཟེར་འཕྲོ་བ་ནི་བདེ་བ་ཆེན་པོ་དང་ཀུན་དུ་བཟང་པོའི་ཕྱག་རྒྱའོ། །དེ་ཉིད་ནང་དུ་བཀུག་ན་ནི། །ཁྲོ་བོ་སྣ་ཚོགས་གཟི་ཅན་ནོ། །ཞེས་བྱ་བ་ནི་ཐལ་མོ་ནང་དུ་བཀུག་པ་ཁྲོ་བོའིའོ། །དེ་ཉིད་ལས་ཤིན་ཏུ་བསྡམས་པ་ནི་རྡོ་རྗེ་བསྡམས་པའོ། །བརྐྱང་པ་ནི་སྲུང་བའོ། །ཧྲི་ཞེས་བྱ་བའི་ས་བོན་ནི་གནོད་སྦྱིན་གྱིའོ་ཞེས་བྱ་བ་སོར་མོ་རྣམས་བསྡམས་པ་རྡོ་རྗེ་དམ་ཚིག་གི་ཕྱག་རྒྱའི་རྒྱུ་དང༌། བརྐྱང་ནས་མགུལ་དུ་འཁྱུད་པ་སྲུང་བའི་དང༌། །མཛུབ་མོ་མཆེ་བ་གནོད་སྦྱིན་གྱི་ཕྱག་རྒྱའོ། །ཧཱུཾ་ཞེས་བྱ་བ་ལྕགས་ཀྱུར་བྱས་པ་ནི་བཀུག་པའོ། །དེ་ཉིད་མདར་བྱས་པ་ནི་འདོད་པའོ། །ཨོཾ་དང་ཧཱུཾ་གཉིས་སྦྱར་བ་དགྱེས་པའོ་ཞེས་བྱ་བ་ནི་མཛུབ་མོ་གཉིས་ལྕགས་ཀྱུར་བྱས་པ་རྒྱལ་པོའིའོ། །མཛུབ་མོ་གཉིས་མདར་བྱས་པ་ཆགས་པའིའོ། །མཐེ་བོང་དང་
མཛུབ་མོ་གཉིས་སེ་གོལ་གཏོགས་པ་ནི་ལེགས་པའིའོ། །དེ་ཉིད་དཀྱིལ་འཁོར་ལྟ་བུར་བྱས་པ་ནི་གཟི་བརྗིད་ཀྱིའོ། །དེ་ཉིད་ནོར་བུ་འདྲ་བར་བྱས་པ་ནི་རྒྱལ་མཚན་གྱིའོ། །བསྐོར་ན་གཞག་པ་སྟེ་དེ་ཉིད་ཁར་གཞག་ན་དགྱེས་ཤིང་འཛུམ་པར་མཛད་པ་ཡ་མཚན་ནོ་ཞེས་བྱ་བ་རྡོ་རྗེ་བསྡམས་པ་ལས་འོད་ཟེར་འབར་བ་ལྟར་བྱས་པ་གཟི་བརྗིད་ཀྱིའོ། །རྡོ་རྗེ་བསྡམས་པ་ཉིད་ཐལ་མོར་བྱས་པ་ནོར་བུ་འདྲ་བར་བྱས་པ་ནི་རྒྱལ་མཚན་གྱིའོ། །དེ་ཉིད་བསྐོར་ནས་ཁའི་ཕྱོགས་སུ་གཞག་པ་ནི་བཞད་པའིའོ། །ཐལ་མོ་པདྨོ་བཀུག་པ་ནི་པདྨོའིའོ། །ཨ་ཞེས་བྱ་བ་དང་ཨོཾ་ཞེས་བྱ་བ་གཉིས་ནང་དུ་བཀུག་པ་ནི་རལ་གྲིའོ། །གཅིག་ལ་གཅིག་སྦྱར་བ་ནི་འཁོར་ལོའིའོ། །སྔ་མ་ལས་ཨོཾ་ཞེས་བྱ་བ་གཉིས་ཁར་གཞག་པ་ནི་འབྱུང་བ་སྟེ་ཞེས་བྱ་བ་ཐལ་མོ་པདྨོ་དང་མཐེའུ་ཆུང་དང་མཐེ་བོང་བཀུག་ནས་ལྷག་མ་རལ་གྲི་དང་ཐལ་མོ་སྦྱར་བ་དང༌། མཐེ་བོང་གཉིས་ཁར་གཞག་པ་ནི་གོ་རིམས་བཞིན་དུ་ཆོས་དང་རྣོན་པོ་དང༌། འཁོར་ལོ་དང་སྨྲ་བའི་ཕྱག་རྒྱའོ། །མདོར་ན་ཕྱག་རྒྱ་ནི་ལས་ཀྱི་ཕྱག་རྒྱ་སྦྱིན་པར་བྱེད་པའོ་ཞེས་བྱ་བ་ནི་ཡོན་ཏན་མདོར་བསྡུ་ན་ལས་ཐམས་ཅད་སྦྱིན་པར་བྱེད་པའོ་ཞེས་བྱ་བའོ། །དེ་ཉིད་བསྡུས་མདུད་སྤྲུལ་མགོར་འགྱུར། །ཞེས་བྱ་བ་ནི་རྡོ་རྗེ་ཐལ་མོ་དེ་ཉིད་ལས་མཚམས་གཉིས་བསྡུས་ལ་སོར་མོའི་རྩེ་མོ་བསྡུས་ནས་བཏུད་དེ་སྤྲུལ་མགོ་ལྟར་བྱས་པ་ནི་ཀླུ་དང་ཆུ་ལྷའི་ཕྱག་རྒྱའོ། །ཀུན་དུ་གནོད་སྦྱིན་མཆེ་བ་འདྲ། །ཞེས་བྱ་བ་ནི་མཛུབ་མོ་གཉིས་མཆེ་བ་འདྲ་བར་བྱས་པ་ནི་གནོད་སྦྱིན་ནོ། །སྲིན་པོ་ཡི་ནི་ཁྲག་འཕྲོག་པ། །ཞེས་བྱ་བ་ཁྲག་འཐུང་པ་ལྟར་བྱེད་པ་སྲིན་པོའིའོ། །ལག་པ་བསྐོར་བ་རླུང་གི་སྟེ། །དབྱུག་ཏོ་ལྡན་པ་གནོད་སྦྱིན་ནོ། །བུམ་པ་གཞག་པ་ནོར་གྱིའོ། །ཞེས་བྱ་བ་ནི་ལག་པ་བསྐོར་བ་རླུང་ལྷའིའོ། །དབྱུག་ཏོ་ལྟར་བྱེད་པ་ནི་གནོད་སྦྱིན་གྱིའོ། །ལག་པ་གཉིས་བུམ་པ་ལྟར་བྱེད་པ་ནི་ནོར་ལྷའིའོ། །མཐེ་བོང་ནེ་ལེའི་རྣ་འདྲར་བྱ། །མགོ་བོ་ཐོད་པ་ནག་པོ་སྟེ། །བྷྲྀདྒི་རི་ཏི་ལག་བརྐྱང་པ། །པི་ཝང་གཡོན་ཐོགས་དྲི་ཟའོ། །ལག་གཉིས་འབར་བ་མེ་འབར་བ། །གུང་མོ་དབྱུག་འདྲ་གཤིན་རྗེ་ཡི། །ཞེས་བྱ་བ་ནི་རྡོ་རྗེ་ཐལ་མོ་ཉིད་མཐེ་བོང་གཉིས་རྣ་བ་དང་འདྲ་བར་བྱ་བ་ནི་རྣམ་ཐོས་བུའོ། །གཡོན་པ་མགོ་ཐོད་མཁལ་མའི་ཕྱོགས་སུ་
འཇོག་པ་ནི་ནག་པོ་ཆེན་པོའིའོ། །ཐ་མ་བརྐྱང་བ་ནི་བྷྲྀདྒི་རི་ཏིའིའོ། །གཡོན་པ་པི་ཝང་ཐོགས་པ་ནི་དྲི་ཟའིའོ། །ལྷག་མ་གཉིས་ཀྱི་སོར་མོ་མེ་འདྲ་བར་བྱས་པ་ནི་མེ་ལྷའིའོ། །ལག་པ་གཉིས་ཀྱི་གུང་མོ་དབྱུག་པ་འདྲ་བར་བྱས་པ་ནི་གཤིན་རྗེའོ། །རྣལ་འབྱོར་ཁྲོ་དང་དབང་སྦྱིན་པ། །མཐེའུ་ཆུང་རལ་གྲི་མཛུབ་གཞག་ཅན། །ཞེས་བྱ་བ་ནི་རྡོ་རྗེ་ཐལ་མོ་ལས་མཐེའུ་ཆུང་གཉིས་རལ་གྲི་ལྟར་བྱས་པ་ནི་རྣ་བ་ལ་གཞག་ལ་ཁྲོ་བོའི་ཚུལ་དུ་བྱ་བ་དང་མཛུབ་མོ་གཉིས་ཞགས་པ་ལྟར་བྱས་པ་སྟེ་གཞན་ལ་དབང་དུ་བྱེད་པ་སྦྱིན་པ་དང་བཅས་པ་ཆུ་ལྷ་འཁོར་དང་བཅས་པའི་ཕྱག་རྒྱའོ། །རླུང་གི་རྒྱལ་མཚན་རང་གི་གདོང༌། །ཞེས་བྱ་བ་ནི་ལག་པ་གཡས་པའི་མཐེ་བོས་མཛུབ་མོ་མནན། སོར་མོ་ལྷག་མ་གསུམ་པ་བ་དན་ལྟར་བྱས་པ་རང་གི་གདོང་དུ་འཕྱར་བ་ནི་རླུང་ལྷའིའོ། །དེ་ལ་སོགས་པའི་ཕྱག་རྒྱ་རྣམས། །ལག་ལས་སྐྱེས་པས་སྐྱེ་བར་འགྱུར། །ཞེས་བྱ་བ་ནི་གོང་དུ་བཤད་པའི་ཕྱག་རྒྱ་དེ་ལ་སོགས་པ་ཕྱག་རྒྱ་སྣ་ཚོགས་པ་རྣམས་རྒྱུ་ལག་པ་ལས་སྐྱེ་ཞིང་བཅིང་བར་འགྱུར་རོ་ཞེས་བྱ་བ་ཡིན་ནོ། །ལྷ་རྣམས་ཀྱི་ཐུན་མོང་དུ། པདྨའི་ཕྱག་རྒྱ་བཀྲ་ཤིས་ཏེ། །ཀླུ་རྣམས་ཞེས་བྱ་ཨུཏྤལ། །དེ་ལྟར་སོ་ནི་གནོད་སྦྱིན་རྣམས། །སྲིན་པོ་རྣམས་ཀྱི་མགོ་ཚལ་པ། །བུད་མེད་རྣམས་ཀྱི་སོར་བཅུ་བསྣོལ། །གཟའ་རྣམས་ཀྱི་ནི་དབྱུག་པ་སྟེ། །ཨ་རྒ་དབུལ་བ་རྒྱུ་སྐར་རྣམས། །དེ་དག་ཀུན་གྱིས་སེམས་འགྲུབ་པོ། །ཞེས་བྱ་བ་ནི་འཇིག་རྟེན་པའི་ལྷ་ཐམས་ཅད་ཀྱི་ཐུན་མོང་དུ་ཐལ་མོ་པདྨོའི་ཕྱག་རྒྱའོ། །ཀླུ་རྣམས་ཀྱི་སོར་མོ་ཨུཏྤལ་ལྟར་བྱས་པའོ། །གནོད་སྦྱིན་ཐམས་ཅད་ཀྱི་སོར་མོ་རྣམས་སོ་ལྟར་བྱས་པའོ། །སྲིན་པོ་རྣམས་ཀྱི་ལག་པ་གཡས་གཡོན་མགོ་པོའི་ཚལ་བ་ལྟར་བྱས་པའོ། །བུད་མེད་ཐམས་ཅད་ཀྱི་སོར་མོ་བཅུ་བསྣོལ་བའོ། །གཟའ་ཐམས་ཅད་ཀྱི་ལག་པ་གཡས་གཡོན་དབྱུག་པ་ལྟར་བྱས་པའོ། །ཨརྒ་དབུལ་བལྟར་བྱས་པ་རྒྱུ་སྐར་ཐམས་ཅད་ཀྱི་སྟེ་དེ་དག་ནི་སེམས་བསྐུལ་བ་འགྲུབ་བོ་ཞེས་བྱ་བའི་དོན་ཏོ། །མགོ་བོ་ཐོད་པ་ཁར་གཞག་པ། །ཕྱག་རྒྱ་འདི་ནི་ཕྲ་མེན་མ། །མགོ་ཐོད་ལྕེ་ཡི་ཕྱག་རྒྱ་ནི། །རྡོ་རྗེ་རྣལ་འབྱོར་མ་ཡིར་བཤད། །དེ་དག་ཀུན་གྱི་ཐུན་མོང་དུ། །ཕྱག་རྒྱ་ཆེན་པོ་བཤད་པར་བྱ། །ཐལ་མོ་བརྐྱང་བ་བཤད་པ་ནི། །ཡང་ན་ཐལ་མོ་པདྨར་བྱ།།
ཞེས་བྱ་བ་ནི་མགོ་བོའི་ཐོད་པ་ཁར་གཞག་པ་ལྟར་བྱས་པ་ནི་ཕྲ་མེན་མའི་ཕྱག་རྒྱའོ། །མཛུབ་མོ་དང་མཐེ་བོང་གཉིས་རྩེ་སྤྲད་དེ་སྲིན་ལག་དང་མཐེའུ་ཆུང་མིག་འབྲས་སུ་བྱས་པ་གུང་མོ་ལྕེར་བརྐྱང་བ་ནི་རྡོ་རྗེ་རྣལ་འབྱོར་མའི་ཕྱག་རྒྱའོ། །འཇིག་རྟེན་པའི་ལྷ་ཐམས་ཅད་ཀྱི་ཐུན་མོང་དུ་ཐལ་མོ་བརྐྱང་བ་དང་ཡང་ན་པདྨོར་བྱས་པའོ། །རྡོ་རྗེ་ཁུ་ཚུར་བཅིངས་ནས་ནི། །ཨ་ཞེས་བྱ་བ་ལུ་གུ་རྒྱུད། །ཧཱུཾ་ཞེས་བྱ་བ་གཉིས་བསྒྲེང་ལ། །ཕྱག་ན་རྡོ་རྗེའི་ཕྱག་རྒྱ་ཡིན། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ནས་མཁྲིག་མ་བསྣོལ་ཏེ་མཐེའུ་ཆུང་ལུ་གུ་རྒྱུད་དུ་སྦྲེལ་མཛུབ་མོ་བསྒྲེང་བ་ནི། རྡོ་རྗེ་འཛིན་པ་ཁྲོ་བོའོ། །རྡོ་རྗེ་བསྡམས་པ་བསྡམས་ནས་ཀྱང༌། །ཧཱུཾ་དང་ཨ་གཉིས་གཤིབས་ཏེ་བསྒྲེང༌། །ཨོཾ་ཞེས་བྱ་བ་ངོས་བཅར་བ། །ཕྱག་རྒྱ་སྣང་བར་བྱེད་པར་དགོངས། །ཞེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་དང་མཐེ་ཆུང་གཉིས་གཤིབས་ཏེ་བསྒྲེང༌། མཐེ་བོང་ངོས་ལ་བཅར་བ་ནི་འཇིག་རྟེན་གསུམ་སྣང་གིའོ། །དེ་ལ་ཨ་ཞེས་བྱ་བ་བཅིངས། །ཞེས་བྱ་བ་ནི་མཐེ་ཆུང་ནང་དུ་བཀུག་པ་ནི་འཇིག་རྟེན་གསུམ་མཐར་བྱེད་ཀྱིའོ། །ཨོཾ་ཞེས་བྱ་བ་ནང་དུ་བཀུག །ཨ་ཞེས་བྱ་བ་སྔོན་བཞིན་སྦྱར།། ཨོཾ་དང་ཨ་ཡང་འདྲ་བར་བྱ། །ཞེས་བྱ་བ་མཐེ་བོང་གཉིས་ནང་དུ་གཞུག་མཐེ་ཆུང་གཉིས་ནི་ནང་དུ་སྦྱར་མཐེ་བོང་དང་མཐེའུ་ཆུང་གཉིས་འདྲ་བར་སྦྱར་བ་ནི་མི་གཡོ་མགོན་པོའི་ཕྱག་རྒྱའོ། །ཏྲཾ་ཞེས་བྱ་བ་གཤིབས་ནས་ནི། །ཨེ་དང་ཨོཾ་གཉིས་ལུ་གུ་རྒྱུད། །ལྷག་མ་གཤིབས་པའི་ཕྱག་རྒྱ་འདི། །བདུད་རྩི་འཁྱིལ་པར་ཤེས་པར་བྱ། །ཞེས་བྱ་བ་ནི་གུང་མོ་གཉིས་གཤིབས་ཏེ་བསྒྲེང༌། མཐེའུ་ཆུང་དང་མཐེ་བོང་ལུ་གུ་རྒྱུད་དུ་སྤྲེལ། ལྷག་མ་གཤིབས་པ་བདུད་རྩི་འཁྱིལ་པའིའོ། །ཏྲཾ་ཞེས་བྱ་བ་གཤིབས་ནས་ནི། །ཧཱུཾ་ཞེས་བྱ་བ་དེ་བཞིན་ནོ། །ཞེས་བྱ་བ་གུང་མོ་དང་མཛུབ་མོ་གཤིབས་པ་ནི་བེ་ཅོན་སྔོན་པོའིའོ། །དེ་ལྟར་ཧཱུཾ་ཞེས་བྱ་བ་གཤིབས། །ལྷག་མ་འོད་ཟེར་འབར་བར་བྱ། །རྟ་མགྲིན་ཕྱག་རྒྱ་གང་ཡིན་པ། །དེ་ཡང་ལས་རྣམས་ཀུན་ལ་གསུངས། །ཞེས་བྱ་བ་ནི་མཛུབ་མོ་གཉིས་གཤིབས་ཏེ་ལྷག་མ་འོད་ཟེར་ལྟར་བྱས་པ་
རྟ་མགྲིན་གྱི་ཕྱག་རྒྱ་སྟེ་ལས་དང་དངོས་གྲུབ་ཐོབ་པར་འགྱུར་རོ་ཞེས་བཤད་པ་ཡིན་ནོ། །ཁྲོ་བོ་རྣམས་ཀྱི་དམ་ཚིག་གི་ཕྱག་རྒྱའོ། །སྤྱན་ནི་མིག་དང་འདྲ་བར་བཤད། །མཱ་མ་ཀཱི་ནི་རྡོ་རྗེར་བཤད། །དཀར་མོ་པདྨ་ཉིད་དུ་བཤད། །ཨུཏྤལ་ནི་སྒྲོལ་མར་དགོད། །ཅེས་བྱ་བ་ནི་རྡོ་རྗེ་བསྡམས་པ་ལ་མཛུབ་མོ་དང་མཐེའུ་ཆུང་མིག་ལྟར་བྱས་པ་ནི་སངས་རྒྱས་སྤྱན་གྱིའོ། །མཛུབ་མོ་རྩེ་གུག་པ་གུང་མོར་སྦྱར་བ་ནི་མཱ་མ་ཀཱིའོ། །གུང་མོ་དང་སྲིན་ལག་པདྨོ་འདྲ་བར་བྱས་པ་ནི་གོས་དཀར་མོའོ། །མཛུབ་མོའི་རྩེ་མོ་བཀུག་པས་གུང་མོ་ལས་དཀྲིས་ཏེ། མཐེ་བོང་ངོས་ལ་བཅར་བ་ནི་སྒྲོལ་མའི་ཨུཏྤལའོ། །གང་ཕྱག་རྒྱ་མ་བཤད་པ་ཐམས་ཅད་ནི་དེ་ཁོ་ན་ཉིད་བསྡུས་པ་ལ་སོགས་པར་ཤེས་པར་བྱའོ། །གཞན་ཡང་རྟག་པ་ཐམས་ཅད་ཀྱི་ལྷ་བསྐྱེད་པ་དང་མི་མཐུན་པའི་ཕྱོགས་གཞོམ་པ་དང་བརྡུང་བའི་སྔགས་ནི་བཛྲ་སཏྭ་ཧཱུཾ། ཛྲ་རཱ་ཛ་ཛ་ཞེས་བྱ་བ་ལ་སོགས་པ་བཅུ་དྲུག་རྡོ་རྗེ་སེམས་དཔའ་ལ་སོགས་པའོ། །ཨོཾ་བུདྡྷ་ལོ་ཙཱ་ན་ཧཱུཾ། སངས་རྒྱས་སྤྱན་གྱིའོ། །བཛྲ་མཱ་མ་ཀཱི་ཏྲཱཾ། མཱ་མ་ཀཱིའོ། །བཛྲ་པཎྚ་རེ་དེ་ཧི་དེ་ཧི་སིདྡྷ་བོ་དྷི་ལོ་ཀོཏྟ་རི་བྷ་སྭཱ་ཧཱ། གོས་དཀར་མོའིའོ། །ཨོཾ་བཛྲ་ཏཱ་རེ་ཏུ་ཏྟཱ་རེ་ཏུ་རེ་ཧཱུཾ་ཧཱུཾ་ཧཱུཾ་སྭ་སྭ་སྭ་སྒྲོལ་མའིའོ།། སེམས་དཔའ་བཅུ་དྲུག་གི་སྙིང་པོ་དང་སྦྱར་བའི་ཤཾ་པ་ཏ་བཅུ་དྲུག་ཞི་བར་བརྡུང་བའོ། །དེ་བཞིན་སྦྱར་བ་གྷུཾ་བཅུ་དྲུག་རྒྱས་པའི་བརྡུང་བའོ། །དེ་བཞིན་དུ་ཧོ་སྦྱར་བ་བཅུ་དྲུག་དབང་གི་བརྡུང་བའོ། །དེ་བཞིན་ཁ་སྟཾ་སྦྱར་བ་བཅུ་དྲུག་མངོན་སྤྱོད་ཀྱི་བརྡུང་བའོ། །འདིར་མ་གསུངས་པའི་སྔགས་པ་ཐམས་ཅད་ཡང་གཞན་དག་ལས་ཤེས་པར་བྱའོ། །ཅིའི་ཕྱིར་རྒྱུད་ཕྱི་མའི་བདེ་བ་ཆེན་པོ་དང༌། དེ་ཡང་གཙུག་ཏོར་དུ་གསང་སྔགས་དང་ཕྱག་རྒྱའི་ཁྱད་པར་གསུངས་ཤེ་ན། དཀྱིལ་འཁོར་གྱི་ལྷ་ཐམས་ཅད་དེ་གཉིས་ཀྱི་ནང་དུ་འདུས་པའི་ཕྱིར་གསུངས་སོ་ཞེས་བྱ་བའི་དོན་ཏོ། །དེ་ལྟར་རྒྱུད་ཕྱི་མ་བཤད་ནས་ད་ནི་རྒྱུད་ཕྱི་མའི་ཡང་ཕྱི་མ་བཤད་པའི་ཕྱིར་འཇུག་པར་བྱ་སྟེ། དེ་ཡང༌། དེ་ནས་ལྷ་རྣམས་ཀུན་མགུ་ནས། །ཞེས་བྱ་བ་ལ་སོགས་པས་སྟོན་ཏོ། །འདིར་ནི་ཁྲོ་བོར་གསུངས་པ་སྟོན་ཏེ། དེ་ཡང་འོག་ནས་ཁྲོ་བོའི་སྐུར་འགྱུར་བའི་
ཕྱིར་རོ། །དེ་ནས་ལྷ་རྣམས་ཀུན་མགུ་ནས། །ཕྱག་ན་རྡོ་རྗེ་ཕྱག་འཚལ་ཏེ། །ཁྲོ་བོའི་དཀྱིལ་འཁོར་བཤད་པའི་ཕྱིར། །གསོལ་བ་འདེབས་པ་ཉིད་དུ་འགྱུར། །ཞེས་བྱ་བ་ནི་རྩ་བའི་རྒྱུད་དང་ཕྱི་མའི་རྒྱུད་བཤད་པས་ལྷ་རྣམས་མགུ་ནས་ཕྱག་འཚལ་ནས་ཁྲོས་པས་ཁྲོ་བོ་སྤངས་པའི་ཕྱིར་གསོལ་བ་འདེ་བས་པ་ཉིད་དུ་གྱུར་ཏོ་ཞེས་བྱ་བའི་དོན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་རང་གི་སྐུ་བོར་ཏེ་ཞེས་བྱ་བ་ནི་ཞི་བའི་སྐུར་བོར་ཏེའོ། །རྡོ་རྗེ་སེམས་དཔའི་སྐུར་ཞུགས་ནས། །ཞེས་བྱ་བ་ནི་ཁྲོ་བོ་སེམས་དཔའི་སྐུར་གྱུར་པའོ། འདིས་ནི་སྦྱོར་བ་དང་པོའི་ཏིང་ངེ་འཛིན་སྟོན་ཏོ། །གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་ཕྱག་ན་རྡོ་རྗེའི་སྐུར་བསྐྱེད་ལ། འོག་ནས་འབྱུང་བའི་གསང་སྔགས་ཀྱིས་ཁྲོ་བོའི་སྐུར་བསྒྱུར་རོ་ཞེས་བྱ་བའི་དོན་ཏོ། །རྡོ་རྗེ་གཉིས་སུ་མེད་པའི་མཉམ་པ་ཞེས་བྱ་བས་ནི་སེམས་དང་སེམས་ལས་བྱུང་བ་གཉིས་སུ་མེད་པ་ཐུགས་རྗེ་ཆེན་པོ་མཚུངས་པའི་ཁྲོ་བོའོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱ་སྟེ། དེའི་སྙོམས་པར་ཞུགས་པ་ནི་མངོན་དུ་མཛད་པའོ། །རྡོ་རྗེ་སེམས་དཔའ་ཁྲོ་བོ་ཞེས་བྱ་བ་ནི་ཁྲོ་བོ་སེམས་དཔའ་ཉིད་དོ། །མེའི་རྡོ་རྗེ་ཉི་མ་ཞེས་བྱ་བ་ནི་ཁྲོ་བོ་ལྷག་མ་རྣམས་ཏེ་དབྱེར་མི་ཕྱེད་པའི་འོད་དན་ལྡན་པའོ། །སྙིང་པོ་འདི་ཉིད་ཀྱི་ཐུགས་ཀ་ནས་བྱུང་ངོ་ཞེས་བྱ་བ་ནི་འོག་ནས་འབྱུང་བའི་སྙིང་པོའོ། །དེ་ཉིད་ཀྱི་ངེས་པའི་ཡེ་ཤེས་ལས་ཕྱུང་བའོ། །དེ་ཉིད་ཨོཾ་བཛྲ་ཀྲོ་དྷ་ཨ་ན་ལཱརྐ་མ་ཧཱ་བཛྲ། བཛྲ་ཀྲོ་དྷ་དྲ་བ་དྲ་བ། བི་དྲ་བ་བི་དྲ་བ། སརྦ་ཨ་བ་ཡ། ནཱ་ཤ་ཡ་ནཱ་ཤ་ཡ། ཧ་ར་ཧ་ར་ཕྲ་ཎཾ་ཧཱུཾ་ཕཊ། ཁྲོ་བོ་རྡོ་རྗེ་སེམས་དཔའོ། །ཨོཾ་ཏྲཻ་ལོ་ཀྱ་ཀ་རི་ཧཱུཾ་ཕཊ། འཇིག་རྟེན་གསུམ་སྣང་གིའོ། །ཨོཾ་ཏྲཻ་ལོ་ཀྱ་ད་མ་ཀ་ཧཱུཾ་ཕཊ། འཇིག་རྟེན་གསུམ་འདུལ་གྱིའོ། །ཨོཾ་ཏྲཻ་ལོ་ཀྱ་ནཱ་ཤ་ཧཱུཾ་ཕཊ། འཇིག་རྟེན་གསུམ་འཇིག་གིའོ། །ཨོཾ་ཏྲི་ལོ་ཀྱ་ཧ་ན་ཏ་ཀ་ཧཱུཾ་ཕཊ། འཇིག་རྟེན་གསུམ་མཐར་བྱེད་ཀྱིའོ། །ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་བདུད་རྩི་འཁྱིལ་པའིའོ། །ཨོཾ་ཀཱ་ལ་དཎྜ་ཧཱུཾ་ཕཊ། བེ་ཅོན་སྔོན་པོའིའོ། ཨོཾ་ཀ་ལ་ཧ་ནི་ཧཱུཾ་ཕཊ། མི་གཡོ་མགོན་པོའིའོ། །ཨོཾ་ཧ་ཡ་གྲཱྀ་བ་ཧཱུཾ་ཕཊ། རྟ་མགྲིན་
ཀྱིའོ། །ཨོཾ་ཀ་ལ་ཨངྐུ་ཤ་ཧཱུཾ་ཕཊ། ལྕགས་ཀྱུའིའོ། །ཨོཾ་ཀ་ལ་པཱ་ཤ་ཧཱུཾ་ཕཊ། ཞགས་པའིའོ། །ཨོཾ་ཀ་ལ་བཧྡྷ་ཧཱུཾ་ཕཊ། ལྕགས་སྒྲོག་གིའོ། །ཨོཾ་ཀ་ལ་གྟཎྚ་ཧཱུཾ་ཕཊ། དྲིལ་བུའིའོ། །ཨོཾ་ཀ་ལ་རཀྵ་སི་ཧཱུཾ་ཕཊ། སྲུང་མའིའོ། །ཨོཾ་ཀ་ལ་དཎྜ་ཧཱུཾ་ཕཊ། བེ་ཅོན་མིའིའོ། །ཨོཾ་ཀ་ལ་ར་ཊི་ཧཱུཾ་ཕཊ། དགའ་མའིའོ། །ཨོཾ་ཀ་ལ་ཡ་ཀྵ་སི་ཧཱུཾ་ཕཊ། གནོད་སྦྱིན་གྱིའོ། །འདི་དག་གིས་ནི་དཀྱིལ་འཁོར་རྒྱལ་པོ་མཆོག་བསྟན་ཏོ། །གསང་སྔགས་ཀྱི་སྒོའི་སྤྱད་པ་སྤྱོད་པ་དཀྱིལ་འཁོར་རྒྱལ་མཆོག་སྒོམ་པ་རྣམས་ཀྱིས་རྡོ་རྗེ་སེམས་དཔའི་ཐུག་སུ་སྔགས་བཀོད་ལ་བསྐྱེད་དོ་ཞེས་བྱ་བའི་དོན་ཏོ། །ཏིང་ངེ་འཛིན་གསུམ་པ་ནི་དེ་བཞིན་དུ་སྔར་བསྟན་པ་ལས་ཤེས་པར་བྱའོ། །དེ་ནས་དཀྱིལ་འཁོར་མི་ཟད་པ། །ཞེས་བྱ་བ་ལ་སོགས་པས་སློབ་དཔོན་གྱི་ལས་སྟོན་ཏེ། བསྙེན་པ་དང་ལྷག་པར་གནས་པའི་ཆོ་ག་ཐམས་ཅད་སྤྱད་པ། དེ་ནས་ཁྲོ་བོའི་དཀྱིལ་འཁོར་ཡངས་པ་རྩིབས་བཅུ་གཉིས་པ་འོད་ཟེར་འབར་བས་དཀྲིགས་ཤིང་ཆེར་འབར་བར་སྔ་མ་ལྟར་ཕྱིའི་དཀྱིལ་འཁོར་བྲིས་ནས་ལྟེ་བ་ལ་རྡོ་རྗེ་སེམས་དཔའ་གཞག་པར་བྱའོ། །དབང་ལྡན་གྱི་ཕྱོགས་ནས་བརྩམས་ཏེ། ཤར་གྱི་རྩིབས་གཉིས་ལ་གསུམ་སྣང་དང་གསུམ་འདུལ། ལྷོའི་རྩིབས་གཉིས་ལ་གསུམ་འཇིག་དང་གསུམ་མཐར་བྱེད། ནུབ་ཀྱི་རྩིབས་གཉིས་ལ་བདུད་རྩི་འཁྱིལ་པ་དང་བེ་ཅོན་སྔོན་པོ། བྱང་གི་རྩིབས་གཉིས་ལ་མི་གཡོ་མགོན་པོ་དང་རྟ་མགྲིན། མེའི་ཕྱོགས་ཀྱི་རྩིབས་སུ་སྲུང་བའོ། །སྲིན་པོའི་ཕྱོགས་ཀྱི་རྩིབས་ལ་བེ་ཅོན་མ། རླུང་གི་ཕྱོགས་ཀྱི་རྩིབས་ལ་དགའ་བ་མོ། དབང་ལྡན་ཕྱོགས་ཀྱི་རྩིབས་ལ་གནོད་སྦྱིན་མོ། །ཁྲོ་བོ་བརྒྱད་འཇིག་རྟེན་སྐྱོང་བ་བརྒྱད་མནན་པ་ཞལ་འཇིགས་པ་ཕྱག་བརྒྱ་ཕྲག་དུ་མ་མངའ་བ། སྤྲུལ་དང་ཐོད་ཀྱིས་བརྒྱན་པ། སྟག་ལྤགས་སྨད་དཀྲིས་བྱས་པ། རྒྱུ་མ་ཐོགས་བ་སྤྲུལ་པ་ཕྱག་དང་དབུ་མཐའ་ཡས་པ་འབྱུང་བ། དེ་དག་ཀྱང་མགོ་ཐོད་ཤས་བཀང་བ་ཕྱག་ན་ཐོགས་པར་བྲི། ཕྱི་རོལ་ན་སྲིན་མོ་བདུན་ཅུ་ལ་སོགས་པ་གཞག །སྒོ་བ་རྣམས་ལྕགས་ཀྱུ་ལ་སོགས་པའི་ཕྱག་མཚན་ཐོགས་པར་བྲི། དེ་ནས་བདུད་རྩིས་གང་བའི་བུམ་པ་བཅུ་དྲུག་གཞག་བདུག་པ་དང་མེ་ཏོག་དྲི་མར་མེ་ཁ་ཟས་
ཀྱིས་བཀང་བའི་གཏོར་མ་བཤམ། བཟའ་བ་དང་བཅའ་བའི་བདུད་རྩིས་མགོ་ཐོད་གང་བར་གྱུར་པ་རྣམས་གཞག་ཅེས་བྱ་བ་ཡིན་ནོ། །དེ་ནས་སློབ་དཔོན་བདག་ཉིད་ཀྱང༌། །མགུ་ནས་མགོ་ཐོད་ཕྱག་རྒྱས་གཞུག །ཕྱག་རྒྱ་དེ་དང་དེ་ཡིས་ནི། ཤ་རྣམས་ཀུན་གྱི་དམ་ཚིག་གསོལ། །དེ་ནས་འདོད་ལྡན་རྙེད་ནས་ནི། །ཞེས་བྱ་བ་ལ་དེ་ལྟར་དགོངས་ཀའི་དུས་མཚམས་ལ་བབ་པ་དང༌། སློབ་དཔོན་གྱིས་མགོ་ཐོད་ཀྱི་ཕྱག་རྒྱས་དཀྱིལ་འཁོར་དུ་ཞུགས་ཏེ་ཆད་པ་དང་ལྷག་པ་ཞི་བར་བྱ། དེ་ནས་ཏིང་ངེ་འཛིན་གསུམ་སྔོན་དུ་འགྲོ་བས་སྒོ་དབྱེ། བསྡུ་ན་ནམ་མཁའ་ལ་མགོ་ཐོད་ཀྱི་ཕྱག་རྒྱ་དེ་དང༌། རྣལ་འབྱོར་དེའི་ཤ་རྣམས་ཀྱི་དམ་ཚིག་གསོལ་ལོ། །དེ་ནས་འདོད་པའི་དངོས་གྲུབ་རྙེད་ནས་ཧཱུཾ་ཞེས་བྱ་བའི་སྔགས་བཅས་པས་བསྒྲུབ་པར་བྱའོ། །དེ་ནས་སྔགས་མཁན་སྒོར་སྒོ་མ། །དེ་ཉིད་དྲན་བྱེད་བསྙེན་པར་བྱ། །ཞེས་བྱ་བ་ནི་ལྕགས་ཀྱུ་ལ་སོགས་པས་ལས་བྱ་ཞིང་བགེགས་བསྐྲད་བསྲུང༌། སྒོ་བཅད་ཕྱག་རྒྱ་བཞིས་རྒྱས་གདབ་དབང་བསྐུར་ཞེས་བྱ་བའི་དོན་ཏོ། །དེས་ནི་ངེས་པར་དངོས་གྲུབ་སྟེར། །ཡུད་ཙམ་འཇིག་རྟེན་དབང་དུ་འགྱུར། །དཀྱིལ་འཁོར་དུ་ནི་ཚོགས་རྣམས་དང༌། །རང་གི་ལྷ་ཡི་ཚོགས་རྣམས་ལ། །རྒྱུད་ལས་བྱུང་བའི་དམ་ཚིག་བརྗོད། །ཅེས་བྱ་བ་ནི་དངོས་གྲུབ་འཇིག་རྟེན་དབང་དུ་འགྱུར་བར་བྱ་བའི་ཕྱི་དཀྱིལ་འཁོར་གྱི་ལྷ་རང་གི་ཚོགས་རྩ་བའི་རྒྱུད་ལ་འབྱུང་བའོ། །བཟླས་བརྗོད་ཀྱི་དམ་ཚིག་ཐོག་མ་དང་ཐ་མ་མེད་པ་དེ་སྲིད་ཀྱི་བར་བར་བརྗོད་དོ་ཞེས་བྱ་བའི་དོན་ཏོ། །དེ་ནས་མཆོད་དེ་ལངས་ནས་ཀྱང༌། །ཚོགས་ཅན་རྡོ་རྗེ་སེམས་དཔའ་ཡི། །ཚུལ་དུ་གནས་ནས་འབྱུང་བར་བྱ། །ཞེས་པ་ནི་མཆོད་པ་དང༌། གཏོར་མ་དང༌། སྦྱིན་སྲེག་དང༌། གནང་བ་ནོད་པའི་མཐར་ཐུག་པ་བྱས་ལ། ཚོགས་ཀྱི་བདག་ཉིད་རྡོ་རྗེ་སེམས་དཔའ་ཁྲོ་བོའི་ཚུལ་དུ་གནས་ནས་འབྱུང་བར་བྱའོ་ཞེས་བྱ་བའི་དོན་ཏོ། །དེ་ནས་སློབ་མ་བསྡུས་ནས་ནི། །ཞེས་བྱ་བ་ལ་སོགས་པས་སློབ་མ་གཞུག་པ་ལ་སོགས་སྟོན་ཏེ། སློབ་མ་རྣམས་སྔ་མ་བཞིན་དུ་ཆོ་ག་ཐམས་ཅད་བྱས་ཏེ་ལག་ཏུ་རིན་པོ་ཆེ་ཐོགས་སུ་བཅུག་ལ། ཨོཾ་བཛྲ་ཀྲོ་དྷ་ཞེས་བྱ་བ་ལ་སོགས་པ་ནས། ཨོཾ་བཛྲ་
ཀྲོ་དྷ་ས་མ་ཡ་མ་ཏི་ཀྲ་མ་ཧཱུཾ་ཕཊ་ཅེས་བྱ་བས་དཀྱིལ་འཁོར་དུ་བཅུག་ལ། རྩ་བའི་རྒྱུད་དུ་གསུངས་པ་བཞིན་དུ་ཆོ་ག་ལྷག་མ་རྗེས་སུ་སྤྱད་ནས། ཨོཾ་བཛྲ་ཀྲོ་དྷ་ས་མ་ཡ་ཨ་བྷི་ཥིཉྩ་ཧཱུཾ་ཕཊ་ཨ་ཞེས་བྱ་བ་འདིས་ཁྲོ་བོའི་བུམ་པས་དབང་བསྐུར་ལ། དབང་བསྐུར་བ་ཉི་ཤུ་པོ་ཀུན་རྩ་བའི་རྒྱུད་དུ་བཤད་པ་བཞིན་དུ་དབང་བསྐུར་བར་བྱའོ་ཞེས་བྱ་བའི་དོན་ཏོ། །དེ་ཉིད་དུ་དབང་བསྐུར་བ་ཐོབ་པ་རྣམས་ལ་དངོས་གྲུབ་བསྟན་པའི་ཕྱིར་དེ་ནས་དེ་དག་གི་སྒྲུབ་པ་བཤད་དེ་ཞེས་བྱ་བ་ལ་སོགས་པ་ཡིན་ནོ། །དེ་དག་གི་སྒྲུབ་པ་བཤད་པ་ནི་སྔར་བཤད་པའི་ཆོ་གས་ཁྲོ་བོ་གང་ཡང་རུང་བར་བསྐྱེད་དེ། སྙིང་གར་ཉི་མའི་དཀྱིལ་འཁོར་ལ་རང་གི་ཡི་གེ་ལ་ཁྲོ་བོ་དཔག་ཏུ་མེད་པ་བསྒོམས་ནས་ཡི་གེ་དང་ཁྲོ་བོ་གཅིག་ཏུ་བསྲེས་ཏེ་བསྒོམ་པ་དང༌། དང་པོ་བསྙེན་པ་དང་སྒྲུབ་པ་བསྒོམས་ན་ངེས་པར་གསོད་པར་འགྱུར་རོ་ཞེས་བྱ་བ་ནི། བདག་ཉིད་ཁྲོ་བོར་སྙོམས་ཞུགས་ཏེ། །དེ་ནས་སྙིང་གར་ཉི་མ་བསྒོམ། །རང་གི་ཆོས་ཀྱི་ཡི་གེ་ལས། །ཁྲོས་ནས་ཡང་དང་ཡང་འཕྲོས་ཤིང༌། །དེ་གཉིས་གཅིག་ཏུ་བསྒོམ་པར་བྱ། །དེ་ནས་འགྲུབ་འགྱུར་གཞན་དུ་མིན། །ཞེས་གསུངས་སོ། །ཁྲོ་བོའི་ལས་གསོད་པ་ཁོ་ནའམ་ཞེ་ན། གཞན་ཡང་ཡིན་པར། ཁྲོ་བོའི་རྒྱལ་པོ་ལས་དངོས་སུ། །གསོད་པར་ཡིན་པར་བཤད་མོད་ཀྱི། །ཞི་དང་དབང་དང་རྒྱས་པ་རྣམས། །འདི་དག་བྱེད་འགྱུར་གདོན་མི་ཟ། །ཞེས་བྱ་བ་ཡིན་ཏེ་ཁྲོ་བོ་ཐམས་ཅད་ཐུན་མོང་གི་སྒྲུབ་པ་བསྟན་ཏོ། །རྡོ་རྗེ་སེམས་དཔའི་ཏིང་འཛིན་གནས། །ཁྲོ་བོ་དཀྱིལ་འཁོར་བསྒོམ་བྱས་ནས། །སྡུག་པའི་སེམས་ཅན་འཛིན་བྱེད་ཅིང༌། །མདོར་ན་དུག་རིམས་གདོན་ལ་སོགས། །དེ་བཞིན་དེ་དག་ཐམས་ཅད་ནི། །ཐབས་ལ་སོགས་པས་འཇིགས་བྱེད་པའི། །ཁྲོས་ནས་སྙིང་ལས་འབྱུང་འགྱུར་བར། །བསད་པའི་ལས་ལ་བརྩམ་པར་བྱ། །ཁྲོས་པར་གྱུར་ནས་རྒོད་པའི་ལས། །ཤ་དང་ཁྲག་རྣམས་འཇིབ་བྱེད་ཅིང༌། །དེ་དག་འཚོ་བ་སྲེག་པར་བྱེད། །བསམས་ནས་ངེས་པར་བརླག་པར་འགྱུར། །ཞེས་བྱ་བ་ནི་འཆི་བདག་འཇོམས་པའི་དཀྱིལ་འཁོར་ལས་བཤད་པ་ལྟར་རང་གི་ལྷའི་རྣལ་འབྱོར་བྱས་ལ། ཁྲོ་བོ་རྡོ་རྗེ་སེམས་དཔར་བསྐྱེད་ནས་རང་
གི་སྙིང་གར་ཁྲོ་བོའི་དཀྱིལ་འཁོར་བསྒོམས་ཏེ་གདུག་པ་དང་རིམས་ལ་སོགས་པ་ཐུགས་རྗེ་ཆེན་པོའི་ཐབས་ཁྲོ་བོས་འཇོམས་པར་བསམས་ནས། སྙིང་གའི་ཁྲོ་བོའི་དཀྱིལ་འཁོར་ལས་ཁྲོ་བོ་སྤྲོས་ཏེ་བཞད་པའི་ཞལ་གྱི་ཤ་དང་ཁྲག་འཇིབ་ཅིང༌། སྲོག་དང་བྲལ་བར་བསྙེན་པ་དང་སྒྲུབ་པར་བསམས་ནས་ངེས་པར་བརླག་པར་འགྱུར་རོ། །གཞན་ཡང་ཁྲོ་བོ་འཇིག་རྟེན་གསུམ་སྣང་ཁ་དོག་དཀར་པོ་བསྒོམ་ཞིང༌། དེ་ནས་བྱུང་བའི་དཀྱིལ་འཁོར་གྱིས་ཁྱབ་པར་བསམས་ལ་འོད་དེ་ཕྱུང་ནས་རིམས་ལ་སོགས་པ་རིང་དུ་དོར་ལ་འོད་ལས་ཧཱུཾ་བྱུང་རྡོ་རྗེར་བསམ་ཞིང་འོད་ལས་ཧཱུཾ་ལྟ་བུའི་འཁོར་ལོར་གྱུར་པ་གོ་ཆར་བྱ། འོད་ཟེར་གྱི་ཆུས་སྤྱི་བོ་ནས་དབང་བསྐུར། དེ་ནས་མིང་ནས་སྨོས་ཤིང་བཟླས་བརྗོད་དང་བསྙེན་པ་དང་བསྒྲུབ་པ་ཚུལ་བཞིན་དུ་བསམས་ན་འགྲུབ་པར་འགྱུར་བ་ནི། ཁྲོ་བོ་འཇིག་རྟེན་གསུམ་སྣང་མཛད། །ཟླ་བ་འདྲ་བའི་དགེ་བསམས་ཤིང། །འོད་ཟེར་ཕྱུང་བ་མང་པོ་ཡིས། །ཁྱད་པར་གྱུར་པར་རྣམ་བསམ་ལ། །རིམས་དང་གདོན་དང་དུག་ལ་སོགས། །འོད་ཟེར་དེས་ནི་ཕྱུང་ནས་ཀྱང༌། །དེ་ཡི་ནད་བགེགས་གནོད་པ་སེམས། །ཞི་བྱའི་ཕྱིར་ནི་རིང་དུ་དོར། །དེ་ནས་ཧཱུཾ་གི་ཚོགས་བཞག་ལ། །རྡོ་རྗེ་ལྟ་བུར་ལུས་བསམ་ཞིང༌། །ཧཱུཾ་གི་འཁོར་ལོས་གོ་ཆར་བྱ། །འོད་ཟེར་ཆུ་ཡིས་དབང་བསྐུར་རོ། །དེ་ནས་དེ་ཡི་མིང་སྨོས་ཤིང༌། །བཟླས་པའི་ཚུལ་གྱིས་བསམ་པར་བྱ། །ཞེས་གསུངས་པ་ཡིན་ནོ། །སྦྱིན་སྲེག་རྣམ་པ་གསུམ་བསྟན་པ་ནི་དེ་ནས། ཁུང་བུ་གསུམ་ལས་རྣམ་གཅིག་ནི། །ཞེས་བྱ་བ་ལ་སོགས་པས་དང་པོ་ཞི་བ་བསྟན་ཏེ། དེ་ཡང་ཞི་བ་དང་རྒྱས་པ་དང་དབང་གསུམ་ལས། ཞི་བ་ནི་ཁ་དོག་དཀར་པོ། ཐ་མ་ནི་ཁྲུ་གང༌། བར་པ་ཁྲུ་དོ། མཆོག་ཁྲུ་བཞིའོ། །རྣལ་འབྱོར་པ་ངེས་དང་པོར་ས་རྣམས་རབ་སྦྱངས་ཏེ། འཁོར་ལོའི་སྟེང་ན་ཟླ་བའི་དཀྱིལ་འཁོར་དབུས་སུ་རྡོ་རྗེ་རྩེ་ལྔ་པ་ཅིག་ཐབ་ཁུང་གི་དབུས་སུ་བྲི། དེའི་ཕྱི་རོལ་གྱི་འཁོར་ལོ་རྩིབས་བཅུ་གཉིས་པ་འཇིག་རྟེན་གསུམ་སྣང་ལ་སོགས་པའི་ཕྱག་རྒྱ་འོད་ཟེར་དཀར་པོར་འཕྲོག་འདོད་ཆགས་ལ་སོགས་པའི་རིགས་བརྒྱ་འཇོམས་པ་བྱེ་བྲག་ཏུ་ཕྱེ་བ་བྲི། རྒྱལ་པོ་བཞིའི་ཕྱག་མཚན་
ཕྱོགས་སྐྱོང་རྣམས་ཀྱི་ཕྱག་མཚན་ཕྱོགས་ཕྱོགས་སུ་བྲི། ལྷ་ཆེན་པོ་ཁྱབ་འཇུག་ལ་སོགས་པ་རྣམས་ཀྱི་ཕྱག་མཚན་དཀྱིལ་འཁོར་ལྟ་བུར་བྲི། དྲི་ཞིམ་པའི་ཆུས་བཀང་བའི་མདོག་དཀར་པོའི་རས་ཀྱིས་དཀྲིས་པའི་བུམ་པ་བརྒྱད་གཞག །འབྲས་ཆན་དང་ཞོ་དང་མར་དང་དཀར་གསུམ་གྱི་གཏོར་མ་དང༌། ལྷ་བཤོས་དང༌། བདུག་པ་དང༌། མར་མེ་དང་མེ་ཏོག་རྣམས་ཀྱང་གཞག །མཆོད་པ་བྱ་བའི་ཕྱིར་བླ་རེ་དང༌། གདུགས་དང་རྒྱལ་མཚན་དང་རྔ་མ་ལ་སོགས་པ་གཞག །ན་མ་རེ་རེ་ག་པུར་དང་བཅས་པའི་དྲི་ཞིམ་པོ་ཙནྡན་ལ་སོགས་པའི་བྱུག་པས་བྱུགས་ཁ་ཤར་དུ་བལྟས་ཏེ་སྦྱིན་སྲེག་བྱ། དེ་བཞིན་གཤེགས་པའི་སྐྱིལ་ཀྲུང་ངམ་སེམས་དཔའི་སྐྱིལ་ཀྲུང་གིས་གདན་ལ་འདུག །གཞན་ཡང་གོས་ལ་སོགས་པ་དཀར་པོ་དང༌། ཕྲེང་བ་དཀར་པོས་བརྒྱན། སྲེག་པའི་རྫས་བསྟན་པ་ནི་མར་མེ་དན་སྤྲད་རྩི་དང༌། འོ་མ་དང༌། ནས་ཀྱི་ཐུག་པ་དང༌། ཏིལ་མར་དང༌། ཏིལ་ཉིད་དང༌། ཡུངས་ཀར་དང༌། འབྲས་ཡོས་དང༌། འབྲས་ཆན་དང༌། ནས་དན་གྲོ་དང༌། མེ་ཏོག་དྲི་ཞིམ་པ་རྣམས་ག་བུར་དང་བསྲེས་པ་ཙནྡན་དཀར་པོས་བསྒོས་པ་གཞག་གོ །ཡམ་ཤིང་དང་བུད་ཤིང་ནི་འདབ་མ་བརྒྱད་པ་མེ་ཏོག་དང་འབྲས་བུ་ཡོད་ཅིང་ཞོ་དང་ལྡན་པའི་ཡམ་ཤིང་ལ་ཁུང་བུའི་ཁྱད་པར་གྱི་སོར་གྱིས་གཞལ་ཞིང༌། མཆོག་སོར་ཉི་ཤུ་རྩ་བཞི་ཡན་ཆད། སོར་བཅུ་དྲུག་ཐབ་ཁུང་བར་མ་ལ། བཅུ་གཉིས་དང་བརྒྱད་ཐ་མ་ལ། གཞན་ཡང་བུད་ཤིང་ཞོ་དང་ལྡན་པ་ལ་དྲིའི་ཆུས་བསྐུས་ཏེ། བུད་ཤིང་དེ་ལ་རྒྱུན་གཞག་ལ་སོགས་པའི་མེ་བཅུག་སྟེ། ཛྭ་ལ་ཛྭ་ལ་ཧཱུཾ་ཞེས་པས་རླུང་ཡབ་ཀྱིས་སྦར་ནས། དྲིའི་ཆུས་བསང་གཏོར་བྱས་ཏེ། དེ་ནས་མེ་ལྷ་བསྐྱེད་པ་ནི་ཁ་དོག་དཀར་པོ་ཕྱག་གཡས་གཉིས་ན་པདྨ་དང་ནོར་བུ། ཕྱག་གཡོན་གཉིས་ན་རིལ་བ་དང་དབྱུག་པ་ཐོགས་པ། པདྨ་དཀར་པོའི་གདན་གྱི་སྟེང་དུ་དེ་ལྟ་བུའི་མེ་ལྷ་བཀུག་ནས་མཆོད་ཡོན་དབུལ་བར་བྱའོ། །སྦྱིན་སྲེག་གི་ཚེ་ན་ཁྱད་པར་མཆོད་པའི་ལྷ་ཁ་དོག་དཀར་པོ་འགྲོ་བ་ལ་ཕན་པའི་ཁྲོ་བོ་རྡོ་རྗེ་སེམས་དཔའ་པདྨ་དཀར་པོ་ལ་ཤར་ཕྱོགས་སུ་བསམས་ཏེ། དེའི་ཐོག་ཏུ་སྤྱན་དྲངས་ནས་གཞག་པར་བྱའོ། །དེའི་མདུན་དུ་བསྒྲུབ་
པར་བྱ་བའི་ལུས་བཞག་སྟེ་ཁྲོ་བོའི་འོད་ཟེར་གྱིས་ཉེས་པ་དྲངས་ནས་ཕྱི་རོལ་དུ་དོར་བར་བསམ་མོ། །མཆོད་པའི་དུས་སུ་ནང་པར་སྔ་བར་ཁྲུས་བྱས་ལུས་དྲིས་བྱུག །འོད་ཟེར་བདུད་རྩི་ལྟ་བུར་བསམ་ཞིང་སྦྱིན་སྲེག་བྱ་སྟེ་དམ་ཚིག་དེ་ནི་འདའ་བར་མི་བྱ་བ་ཁ་ནའོ། །དེ་ནས་མཆོད་པའི་རིམ་པ་ནི། ཤ་ཆེན་ལ་སོགས་པའི་བདུད་རྩི་ལྔ་དང་པོར་མེ་ལྷ་ལ་ཕུལ། དེ་ནས་ཤར་ཕྱོགས་ན་བཞུགས་པའི་ཁྲོ་བོ་དེའི་ཐུགས་ཀར་སྤྱན་དྲངས་ལ་དབུལ། དེ་ཡང་བསྲེག་བྱ་གསུམ་དུ་དབུལ་བར་བྱའོ། །དེ་ནས་དེའི་ལུས་སུ་སངས་རྒྱས་དཀོན་མཆོག་གསུམ་སྤྱན་དྲངས་ལ། དཀོན་མཆོག་གསུམ་དུ་དམིགས་ལ་ཡང་ལན་གསུམ་དུ་དབུལ། གཤེགས་སུ་གསོལ་ཏེ་ཡང་མེ་ལྷ་ལ་དབུལ། དེ་ནས་དཀྱིལ་འཁོར་གྱི་ལྷ་རྣམས་སྤྱན་དྲངས་ཏེ་རྡོ་རྗེ་སེམས་དཔའ་ལ་དབུལ། དེ་ནས་དཀྱིལ་འཁོར་གྱི་ལྷ་རེ་རེ་ལ་དབུལ། དེ་ནས་བགེགས་ལ་སོགས་པ་ཐམས་ཅད་ལ་དབུལ། ཡང་གཤེགས་སུ་གསོལ་ཏེ་རང་གི་ལྷག་པའི་ལྷ་ལ་དབུལ། དེ་ནས་དང་པོར་ཁྲོ་བོའི་སྔགས་ཀྱིས་བཏབ་ནས་སྦྱིན་སྲེག་བྱས་ཏེ་རྫས་ཐམས་ཅད་གཅིག་ཏུ་བསྲེས་ནས་བདུད་རྩི་འཁྱིལ་པའི་སྔགས་ཀྱིས་བཏབ་སྟེ། སྦྱིན་སྲེག་ཀུན་བྱས་པའི་འོག་ཏུ་བརྒྱ་སྟོང་ངམ་བརྒྱ་རྩ་བརྒྱད་དམ་ཁྲོ་བོ་སྤྱན་དྲངས་པ་ལ་ཕུལ་ལ་འོད་ཟེར་འབྱུང་བས་བསྒྲུབ་པར་བྱ་བ་དབང་བསྐུར་ཞིང༌། ཧཾ་གི་གོ་ཆས་བསྲུང༌། མཇུག་ཏུ་ལྷ་ཐམས་ཅད་ལ་མཆོད་པ་བརྒྱད་ལ་སོགས་པས་མཆོད་ནས། རྡོ་རྗེ་སེམས་དཔའི་ཕྱག་རྒྱ་གྱེན་དུ་བཀྲོལ་ཏེ། ཨོཾ་བཛྲ་མུཿ་ཞེས་བྱ་བས་གཤེགས་སུ་གསོལ་ལོ། །འདིས་ནི་ཞི་བའི་ལས་འགྲུབ་པ་ལ་ཐེ་ཚོམ་མེད་དོ། །ཅི་སྟེ་སྡིག་པ་ཅན་ནམ་ཏིང་ངེ་འཛིན་དང་མི་ལྡན་ནས་དངོས་གྲུབ་མི་ཐོབ་ན། དང་པོ་སྟོང་པ་ཉིད་དུ་བསྒོམས་ལ། དེ་ནས་སྔ་མ་བཞིན་དུ་ཐམས་ཅད་བྱས་ནས་གདོན་མི་ཟ་བར་དངོས་གྲུབ་ཏུ་འགྱུར་ཏེ། ཞི་བའི་ལས་འདི་ཙམ་གྱིས་མཐར་ཐུག་གོ་ཞེས་བྱ་བའི་དོན་ཏོ། །དེ་ནས་རྒྱས་པ་བསྟན་པ་ནི། འབྲས་བུར་ལྡན་ན་མ་ནགས་ཚལ་ལམ། །ཞེས་བྱ་བ་ལ་སོགས་པ་ཡིན་ཏེ། འབྲས་བུར་ལྡན་པའམ་ནགས་ཚལ་ལམ་གནས་སམ་རྒྱལ་པོ་དང་རྗེའུ་རིགས་ཀྱི་ཁྱིམ་དུ་རྒྱས་པ་ལ་དགའ་བའི་སེམས་
ཀྱིས་བྱ་སྟེ། ཐབ་ཁུང་ཆུང་དུ་ཁྲུ་དོ། །བར་མ་ཁྲུ་བཞི་པ། མཆོག་ཁྲུ་བརྒྱད་པ་གང་ཡང་རུང་བ་ཅིག་ཏུ་བྱས་པའི་ལས་བྱ་བ་ཡིན་ནོ། །གཞན་ཡང་སྟེགས་བུ་དན་ཕྱག་རྒྱ་བསྟན་པ་ནི་ཐབ་ཁུང་ལས་སྟེགས་བུ་དཔག་པས་ཤེས་པར་བྱ་སྟེ། ཐབ་ཁུང་ཁྲུ་དོ་ལ་སྟེགས་བུ་ཁྲུ་བརྒྱད། ཐབ་ཁུང་ཁྲུ་བཞི་ལ་སྟེགས་བུ་ཁྲུ་བཅུ་གཉིས། ཐབ་ཁུང་ཁྲུ་བརྒྱད་ལ་སྟེགས་བུ་ཁྲུ་བཅུ་དྲུག་ག་མ་ཉི་ཤུ་རྩ་བཞིར་བྱའོ། །ཐབ་ཁུང་ཁྲུ་དོ་ལ་མུ་ཁྱུད་སོར་བརྒྱད། ཐབ་ཁུང་ཁྲུ་བཞི་ལ་མུ་ཁྱུད་སོར་བཅུ་དྲུག །ཐབ་ཁང་ཁྲུ་བརྒྱད་ལ་མུ་ཁྱད་སོར་སུམ་ཅུ་རྩ་གཉིས་སུ་བྱ་བ་ཡིན་ནོ། །དེའི་ཕྱི་རོལ་དུ་པདྨ་སྣ་ཚོགས་པས་བརྒྱན་པར་བྱ་བ་ཡིན་ནོ། །དེའི་དབུས་སུ་རིན་པོ་ཆེ་དང་པདྨ་སྣ་ཚོགས་གཞག་པར་བྱའོ། །དེའི་དབུས་སུ་ཐབ་བརྐོ་བ་ནི་ཟབས་སུ་རྒྱའི་ཕྱེད་ཀྱི་ཚད་གྲུ་བཞི་པའམ། ཁྲུ་བརྒྱད་གང་ཡང་རུང་བར་བྱའོ། །འཇིམ་པ་སེར་པོས་བསྐུས་ཤིང་གུར་ཀུམ་ལ་སོགས་པས་བྱུགས་ནས་ཚོན་སེར་པོས་བསྐུས་ཏེ་གསེར་འོད་དང་འདྲ་བར་བསམ་ཞིང་བྱའོ། །དེ་ནས་ཚོན་དམར་སེར་གྱིས་རིན་པོ་ཆེ་དང༌། པདྨ་ལ་སོགས་པ་ཕྱག་རྒྱའི་དཀྱིལ་འཁོར་འཁོར་ཡུག་ཉིད་དུ་གནས་པ་བྲི་བར་བྱ་སྟེ། ནང་གི་དཀྱིལ་འཁོར་དང་ཕྱིའི་དཀྱིལ་འཁོར་རིམ་པ་གཉིས་སམ། ཐབ་ཁུང་དང་མུ་ཁྱུད་དང་ནང་གི་དཀྱིལ་འཁོར་དང་ཕྱིའི་དཀྱིལ་འཁོར་ཏེ་བཞིའམ་ནང་གི་འཁོར་ཡུག་དང་མུ་ཁྱུད་དང་འཁོར་ལོ་དང་ལྷའི་གནས་དན་མུ་རན་དཀར་པོའི་ནང་དན་ཕྱི་རོལ་དང་འགྲོ་རིས་ཀྱི་གནས་དན། ཡང་ན་རིམ་པ་བརྒྱད་དང་ལྡན་པར་བྲིའོ། །སྒོ་བ་ཉིད་ཀྱང་ཕྱག་རྒྱའི་གཟུགས་སུ་བྲིའོ། །བུམ་པ་ཁ་དོག་སེར་པོ་དྲི་ཆུས་བཀང་བ་བརྒྱད་དམ། བཅུ་གཉིས་སམ། བཅུ་དྲུག་གམ། སུམ་ཅུ་རྩ་གཉིས་ཏེ་བཀྲ་ཤིས་པའི་དར་སེར་པོས་དཀྲི། ཁ་རྒྱན་ཡལ་ག་དང་མེ་ཏོག་ཅན་དྲི་ཞིམ་པོའི་མེ་ཏོག་དང་བདུག་པ་དང་ཕྲེང་བ་དང་མར་མེ་དང་རྒྱན་རྣམས་དན་རྒྱལ་མཚན་དན་འཕན་དག་བླ་རེ་དང་གདུགས་རྣམས་སེར་སོ་བརྒྱན་པ་གཞག་པར་བྱའོ། །ལྷའི་རྣལ་འབྱོར་བསྟན་པ་ནི་བདག་ཉིད་གོས་དང་རྒྱན་དང་མེ་ཏོག་ལ་སོགས་པ་སེར་པོས་བརྒྱན། བྱང་ཕྱོགས་སུ་ཁ་བལྟས་ཏེ་འདུག་ནས་ཁྲོ་བོ་རྡོ་རྗེ་སེམས་དཔའི་རྣལ་འབྱོར་བྱེད་ཅིང་ཞེས་བྱ་བ་ཡིན་ནོ། །གཞན་ཡང་དེ་ཉིད་ཀྱི་ཚེ་ན་མཆོད་པའི་ལྷ་བྱང་ཕྱོགས་སུ་ནམ་མཁའ་
ལ་ལྷའི་བུ་ཡིད་བཞིན་གྱི་ནོར་བུའི་རྒྱལ་མཚན་མདོག་སེར་པོ་འདྲ་བ་དང༌། ལྷའི་བུ་དང་ཉི་མ་དང་ཟླ་བ་དང་ཀུ་བེ་ར་དང་ནོར་སྦྱིན་དང༌། ཛམྦྷ་ལ་ཀུན་ཀྱང་འོད་ཟེར་གསེར་ལྟ་བུ་འབེབས་ཤིང་ཡིད་ཀྱི་དགོས་པ་སྐོང་བར་མཛད་པ་འོད་ཟེར་ཆུ་ཡིས་དབང་བསྐུར་བར་བསམ་མོ། དེ་ནས་དབང་ཐོབ་ནས་ལུས་རྒྱས་པར་འགྱུར་རོ། །ཡང་རྒྱས་པར་བྱ་བའི་ཕྱིར་དེའི་མིང་དང་གུང་གུང་ཞེས་བྱ་བ་རྩ་བརྒྱད་དང་སྟོང་ཕྲག་བརྒྱ་རྩ་བརྒྱད་དུ་བཟླས་པ་བྱའོ། །དེ་ནས་སྦྱིན་སྲེག་བྱ་བ་ནི་བྱང་ཕྱོགས་སུ་སེང་གེའི་སྟན་གྱི་ཐོག་ན་རིན་པོ་ཆེའི་ཁྲི། ཡང་ན་པདྨ་དང་ཉི་མ་དང་ཟླ་བའི་གདན་ཁྲིའི་སྟེང་ན་རྡོ་རྗེ་རིན་ཆེན་དང༌། རྡོ་རྗེ་གཟི་བརྗིད་དང༌། རྡོ་རྗེ་དཔལ་དང༌། རྡོ་རྗེ་བཞད་པ་དང་བཞི་རྒྱན་ཀུན་གྱིས་བརྒྱན་པ། ཕྱག་རྒྱ་མཆོག་སྦྱིན་མཛད་པ་རིན་པོ་ཆེའི་ཆར་དང་འོད་ཟེར་གྱི་ཕྲེང་བས་བསྒྲུབ་པར་བྱ་བ་ལ་ཁྱབ་པར་བསམ་མོ། །དུང་དང་ཅང་ཏེའུ་དང་པི་ཝང་དང༌། སིལ་སྙན་དང་གླུ་དང་གར་གྱིས་དེ་རྣམས་མཆོད་པར་བྱ་སྟེ། དེའི་འོག་ཏུ་སྦྱིན་སྲེག་གི་ལས་བརྩམ་མོ། ཡམ་ཤིང་དང་བུང་ཤིང་བསྟན་པ་ནི། ཁུང་བུའི་ཁྱད་པར་ལས་ཡམ་ཤིང་དང་བུད་ཤིང་དབྱེ་སྟེ་མཛུབ་གང་བ་དང་ཁྲུ་གང་བ་ནི་ཆུང་དུ་ཡིན་ནོ། །བར་མ་ནི་ཁྲུ་དོ། ཁྲུ་བཞི་པ་ནི་མཆོག་གོ །མེ་ཏོག་དང་འབྲས་བུར་བཅས་པ་རྩེ་མོ་སྦྲང་རྩིས་བྱུག་པ་ཡིན་ནོ། །བསྲེག་པར་བྱ་བའི་རྫས་འབྲུ་དང་མེ་ཏོག་དང་འབྲས་བུ་སེར་པོ་དང༌། མར་དང་སྦྲང་རྩིར་བསྲེས་ནས་དཔལ་གྱི་འབྲས་བུ་ལྟ་བུར་བྱས་པ་ཡིན་ནོ། །མཆོད་པའི་རིམ་པ་བསྟན་པའི་ཕྱིར། མེ་ལྷ་ཁ་དོག་སེར་པོ་ཕྱག་བཞི་པ། ཕྱག་མཚན་སྔར་ཞིབ་པར་བཤད་པ་བཞིན་པདྨོའི་གདན་ལ་ཞུགས་པ་རྒྱན་སྣ་ཚོགས་ཀྱིས་བརྒྱན་པ་སྤྱན་དྲངས་ཏེ་བསྲེག་བྱ་དབུལ། དེ་ནས་དེ་ཉིད་འབར་བར་བཞུགས་པའི་ལུས་སུ་ཁྲོ་བོའི་རྒྱལ་པོ་བཅུག་ནས། སྔོན་བཞིན་དུ་བསྒྲུབ་པར་བྱ་བ་དྲན་པར་བྱེད་ཅིང་སྦྱིན་སྲེག་དབུལ་པ་ནི་འབུམ་མ་མ་ཉིས་འབུམ་གྱིས་ངེས་པར་དངོས་གྲུབ་འགྲུབ་བོ། །འབུམ་ཕྲག་བརྒྱས་ནི་རྒྱལ་སྲིད་ལ་དབང་བའི་ལོངས་སྤྱོད་ཕུན་སུམ་ཚོགས་པ་འགྲུབ་བོ། །དེ་ནས་མཇུག་ཏུ་འོད་ཟེར་གྱིས་དབང་བསྐུར་ཞིང་བསྲུངས་ན་རྒྱས་པར་འགྱུར་ཏེ། རྡོ་རྗེ་འཛིན་པའི་བཀའ་བཞིན་ནོ་ཞེས་
བྱ་བ་ཡིན་ལ། འདི་ཙམ་གྱིས་ནི་རྒྱས་པའི་ལས་མཐར་ཐུག་གོ་ཞེས་བྱ་བའི་དོན་ཏོ། །དབང་ནི་ཆགས་བའི་སེམས་ཀྱིས་ཀྱང༌། །ཞེས་བྱ་བ་ལ་སོགས་པས་དབང་གི་ལས་སྟོན་ཏེ། དབང་ནི་ཆགས་པའི་སེམས་དང་ཏིང་ངེ་འཛིན་གྱིས་བྱ་བ་སྟེ། ཆགས་པ་རྡོ་རྗེ་ཅན་དང༌། རྡོ་རྗེ་ཆགས་པ་དེ་ལས་བྱུང་ཞིང་ཁམས་གསུམ་ཆགས་པར་བྱེད་པའི་ཕྱིར་རོ། །པདྨའི་སེམས་དཔའ་རྟག་ཏུ་ཆགས་པ་དེ་བས་ན་དབང་དུ་བྱ་བའི་ལས་གྲུབ་པར་བཤད་པ་ཡིན་ནོ་ཞེས་བྱ་བའི་དོན་ཏོ། །གནས་ཇི་ལྟ་བུ་ཞིག་ཏུ་བྱ་ཞེ་ན། ཆགས་དང་མཐུན་པའི་ས་ཕྱོགས་སམ། །ཆགས་པར་བྱེད་པའི་ཁྱིམ་དུ་ཤེས། །བཅོ་བླག་མཁན་ནམ་ཟླ་མཚན་ཅན་དག་གི །ཁྱིམ་དུ་ཆགས་པའི་ལས་རྣམས་བྱ་བ་ཡིན། །རྡོ་རྗེ་ཆགས་པའི་གནས་ཀྱང་རུང༌། །ཕྱག་ན་པདྨོའི་གནས་ཉིད་དུ། །རྟག་ཏུ་རྡོ་རྗེ་སེམས་དཔའི་གནས། །བདེ་ཆེན་གྱི་ནི་གནས་ཆེན་དང༌། །པདྨ་ཨུཏྤལ་རྫིང་བུ་དང༌། །བནྡུ་ཀ་ཡི་མེ་ཏོག་གནས། །མེ་ཏོག་འབྲས་བུ་དམར་ཚལ་ནི། །ཡིད་འོང་སེམས་ནི་ཆགས་བྱེད་པ། །དེར་ནི་ཞེས་བྱ་བ་ཡིན་ནོ། །སྟེགས་བུ་དང་ཐབ་ཁུང་བསྟན་པ་ནི་སྟེགས་བུ་ཁྲུ་བརྒྱད་ཅེས་བྱ་བ་ལ་སོགས་པ་སྟེ། སྟེགས་བུ་ཁྲུ་བརྒྱད་དམ་བཅུ་དྲུག་པ་རྣམས་བྱས། དེའི་དབུས་སུ་ཧོམ་ཁུང་བྱ་བ་ནི་གོ་རིམས་བཞིན་དུ་ཁྲུ་དོ་དང༌། ཁྲུ་བཞི་པར་བྱའོ། །དབྱིབས་ནི་གཞུ་དང་འདྲ་བ་དང༌། པདྨ་འདྲ་བ་དང༌། རྡོ་རྗེ་འདྲ་བ་དང༌། མདའ་འདྲ་བ་དང༌། ཟླ་བ་ཁམ་པ་འདྲ་བ་དང༌། པདྨའི་འདབ་མ་འདྲ་བར་བྱས་ལ་ཞེང་དུ་མཆུའི་ཕྱེད་ཀྱི་ཚང་ཞིང་གི་ཕྱེད་ཀྱི་ཚད་ཟབས་སུ་བརྐོ། མུ་ཁྱུད་སོར་བཞི་པ་དང་སོར་བརྒྱད་པ་དང༌། བཅུ་གཉིས་པ་དང༌། ཐ་མ་དང༌། བར་མ་དང༌། མཆོག་གི་ཁྱད་པར་ལགས་སོ། །ཡམ་ཤིང་དང་བུད་ཤིང་ནི་སོ་སོར་ངེས་པར་བྱ་བཞི་བའི་སྐབས་སུ་གསུངས་པ་ལྟར་བྱས་ལ། ཤིན་ཏུ་དམར་བའི་ཙནྡན་དང༌། བཙག་དང༌། རྒྱ་སྐྱེགས་དང༌། ལེ་བརྒན་རྩི་དང༌། གུར་ཀུམ་དང་བཅས་པས་བུད་ཤིང་དང་ཡམ་ཤིང་ལ་བསྐུའོ། །གཞན་ཡང་རྫས་བསྟན་པ་ནི། ཡུངས་འབྲུ་དམར་པོ་དང༌། བཙག་དང༌། མཚལ་དང༌། ཟངས་ཀྱི་ཕྱེ་མ་དང༌། ཡུངས་ཀར་
དང་སྐེ་ཙེ་དང༌། ལན་ཚྭ་དང་ཏིལ་དང་ཞིམ་ཐིག་ལེའི་འབྲུ་དང༌། ལ་ཕུག་དང་ཉུངས་རྡོག་དང༌། ཁྲག་དང་རྡུལ་ཆེན་པོ་དང་བཅས་པ་ཀུན་བསྲེས་པར་བྱ་བའི་ཕྱིར་བསྡུས་ནས་བཙག་ལ་སོགས་པས་བསྐུས་ནས། ཁྲོ་བོའི་སྔགས་ཀྱི་བྱིན་གྱིས་བརླབས་ལ། བ་དང་ར་ལས་བཞོས་པའི་བསྲུབས་མ་ཐག་པའི་མར་སར་དང༌། མར་དང་ཏིལ་མར་རྣམས་ག་བུར་ལ་སོགས་པས་བསྐུས་ནས་བདུད་རྩི་འཁྱིལ་བའི་སྔགས་ཀྱིས་བཏབ་སྟེ་གཞག་གོ །དེ་ནས་ཧོམ་ཁུང་དམར་པོར་བསམས་ནས་སྤོས་དམར་པོ་ལ་སོགས་པས་བྱུག་ཅིང་བསྐུ་བར་བྱའོ། །གཞན་ཡང་ཐབ་ཁུང་དང་ཕྱག་རྒྱ་བསྟན་པ་ནི། གུར་ཀུམ་གྱིས་བསྲེས་པའི་ཚོན་གྱིས་ཧོམ་ཁུང་གི་ནང་དུ་པདྨ་བྲི། དེའི་ལྟེ་བ་ལ་མདའ་དང་གཞུ་བྲི། དེའི་དབུས་སུ་རྡོ་རྗེ་བྲི། ནང་གི་འཁོར་ཡུག་ཏུ་པདྨ་བྲི། མུ་ཁྱུད་ལ་མདའ་དང་གཞུ་བྲི། དེའི་ཕྱི་རོལ་གྱི་འཁོར་ཡུག་ལ་པདྨ་ཉིད་མདའ་དང་བཅས་པ་བྲི། དེའི་ཕྱི་རོལ་འཁོར་ལོའི་རྩིབས་ལ་དབང་ལྡན་གྱི་ཕྱོགས་ནས་བརྩམས་ཏེ་རྡོ་རྗེ་དང་ལྕགས་ཀྱུ་དང་མངའ་གཞུ་དང་གསུམ་ཤར་གྱི་རྩིབས་ལ། ལྷོ་ཕྱོགས་ཀྱི་རྩིབས་ལ་རིན་ཆེན་དང་རྒྱལ་མཚན་དང༌། ཉི་མའི་དཀྱིལ་འཁོར་བྲི། ནུབ་ཕྱོགས་ཀྱི་རྩིབས་ལ་པདྨ་དང༌། རལ་གྲི་དང༌། འཁོར་ལོ་བྲི། །བྱང་ཕྱོགས་ཀྱི་རྩིབས་ལ་སྣ་ཚོགས་རྡོ་རྗེ་དང་མཆེ་བ་དང༌། གོ་ཆའི་མཆོག་རྣམས་བྲིའོ། །གྲྭ་རྣམས་སུ་སྤོས་ལ་སོགས་པ་ཕྱག་རྒྱའི་གཟུགས་བྲི། དེ་ནས་མེ་ཏོག་ལ་སོགས་ཐམས་ཅད་ཀྱིས་སྔ་མ་བཞིན་དུ་མཆོད་དོ། །གོས་དང་ཕྲེང་བ་དམར་པོ་དང་དམར་པོའི་དྲིས་བསྐུས་ནས་དམར་ཐག་མ་ཆད་བར་དུ་ལས་བརྩམས་ཏེ་བྱ་བ་ཡིན་ནོ། །ཁྱད་པར་དབང་ལ་བྱིན་གྱིས་བརླབས། པདྨ་དམར་པོའི་གདན་ལ་བཞུགས་པ། རབ་ཆགས་ཕྱག་ན་པདྨ་བསྣམས། །གཡོན་དུ་རྡོ་རྗེ་ཆགས་པ་ལ། །གཡས་སུ་བདེ་བ་ཆེན་པོ་སྟེ། །བསམས་ནས་དེ་ཡི་དབུས་སུ་ནི། །ཆུ་སྲིན་རྒྱལ་མཚན་འཛིན་པ་གཞག་རྡོ་རྗེ་གཞུ་དང་གཡོན་འགྱིང་མ། །མེ་ཏོག་དམར་བརྒྱན་རབ་དགྱེས་མ། །ཞེས་བྱ་བ་ལ་ནུབ་ཀྱི་པདྨའི་ཆ་ལ་རབ་ཆགས་ཕྱག་ན་པདྨ་བསྣམས་པའི་སྤྱན་རས་གཟིགས་བྲི། གཡོན་དུ་རྡོ་རྗེ་ཆགས་པ། གཡས་པར་བདེ་བ་ཆེན་པོ་ཡིད་ཀྱིས་བྲི་ཞིང་བསམས་ནས། ལྟེ་བ་ལ་
ཆུ་སྲིན་གྱི་རྒྱལ་མཚན་མ་དང༌། ལྷ་མོ་རྡོ་རྗེ་གླུ་དང༌། ལྷ་མོ་རྡོ་རྗེ་གཡོན་འགྱིང་མ་དང་རབ་དགྱེས་མ་དང་བཅས་པ་བསམ་མོ་ཞེས་བྱ་བའི་དོན་ཏོ། །དྲི་ལ་སོགས་པས་རབ་མཆོད་དེ། །ཞེས་བྱ་བ་ལ་སྔ་མ་བཞིན་དུ་གླུ་དང་རོལ་མོས་མཆོད་ནས། བཛྲ་སཏྭ་ཧཱུཾ་ཧོ་ཧཱུཾ་ཞེས་བྱ་བ་ཟློས་ཤིང་དབང་དུ་བྱས་པའི་ཕྱིར་བརྗོད་པར་བྱའོ། །མཆོད་པའི་རིམ་པ་བསྟན་པའི་ཕྱིར། །མདའ་དང་གཞུ་ཐོགས་དེ་བཞིན་དུ། །ཞེས་བྱ་བ་ལ་སོགས་པ་ཡིན་ཏེ། འདིར་མེ་ལྷ་ཕྱག་གཉིས་ན་མདའ་གཞུ་ཐོགས་པ་ཕྱག་གཉིས་ན་པདྨ་དམར་པོ་དང་དབྱུག་པ་ཐོགས་པ། དེ་ལྟ་བུའི་མེ་ལྷ་བཅུག་ནས་དང་པོར་མཆོད་དེ། དེའི་ལུས་སུ་ཁྲོ་བོའི་རྒྱལ་པོ་བཅུག་སྟེ་མཆོད། འོད་ཟེར་དམར་པོ་བྱུང་ནས་དེ་ལས་ལྕགས་ཀྱུ་དང་ཞགས་པས་བསྒྲུབ་པར་བྱ་བ་བཀུག་ཅིང་བཅིངས་ལ་སྤྱི་བོ་ཞབས་དྲུང་དུ་བཞག་པར་བསམ། དེ་ལྟར་བསམས་ན་ལྷ་ཡང་དབང་དུ་འགྱུར་ན་མི་དང་མི་མིན་ལྟ་སྨོས་ཀྱང་ཅི་དགོས། ལས་ཟིན་པར་གྱུར་པ་དང་ཆགས་པའི་སེམས་སུ་བཅས་ནས་སྤྱི་བོ་ནས་འོད་ཟེར་གྱིས་དབང་བསྐུར་ཞིང་ཧཾ་གི་གོ་ཆས་བསྲུང་བར་བྱ་བ་སྟེ། རྡོ་རྗེ་ཆོས་ཀྱི་རྣལ་འབྱོར་གྱིས་ལྷ་རྣམས་མཆོད་དེ། དམ་ཚིག་ཕྱག་རྒྱ་གྱེན་དུ་བཀྲོལ་ལ་གཤེགས་སུ་གསོལ་ལ་རྡོ་རྗེ་སྲུང་བས་བསྲུངས་ཏེ། རྡོ་རྗེ་འདོད་པ་ཧཾ་ཞེས་བྱ་བ་བཟླས་ནས་ལངས་ལ་ཅི་བདེར་གནས་པར་བྱའོ། །འདི་ཙམ་གྱིས་ནི་དབང་གི་ལས་མཐར་ཐུག་གོ་ཞེས་བྱ་བའི་དོན་ཏོ། །རྟོག་པ་ཐམས་ཅད་ཀྱི་དཀྱིལ་འཁོར་རྣམས་ལ་ཡང་ཐོག་མར་མཆོད་པ་རྣམས་ཀྱིས་མཆོད་དེ་བསྟོད་ནས། ཕྱག་རྒྱ་བཀྲོལ་ཏེ་གཤེགས་སུ་གསོལ་བ་ནི། དེ་ནས་ཞེས་བྱ་བ་ལ་སོགས་པས་སྟོན་པས། དེ་ནས་བརྒྱ་བྱིན་ལ་སོགས་ལྷས། །ཡང་དང་ཡང་དུ་ཕྱག་འཚལ་ཏེ། །རིན་ཆེན་གདུགས་ལ་སོགས་མཆོག་གི །མཆོད་པ་སྣ་ཚོགས་བྱས་ནས་ཀྱང༌། །ཕྱག་ན་རྡོ་རྗེ་རྒྱལ་དབང་ལ། །དགའ་བའི་སེམས་ཀྱིས་སྟོད་པར་བྱེད། །ཅེས་བྱ་བ་ལ། དེ་ནས་ཞེས་བྱ་བ་ནི་བར་མ་ཆད་པ་སྟེ། ཁྲོ་བོ་རྡོ་རྗེ་འཛིན་པས་རྒྱུད་ཕྱི་མའི་ཕྱི་མ་དབང་གི་ལས་ལ་ཐུག་གི་བར་བཤད་པའི་རྗེས་ཐོགས་ལའོ། །བརྒྱ་བྱིན་ལ་སོགས་ལྷ་ཞེས་བྱ་བ་ནི། བརྒྱ་བྱིན་དང་ཚངས་པ་ལ་སོགས་
པ་དཀྱིལ་འཁོར་དུ་བཀོད་པའི་ལྷ་རྣམས་ཀྱིས་ཞེས་བྱ་བ་ཡིན་ནོ། །ཡང་དང་ཡང་དུ་ཕྱག་བྱས་ཤིང་རིན་པོ་ཆེའི་གདུགས་ལ་སོགས་པས་མཆོད་པ་ནི་མཆོད་པར་བྱས་པའོ། །དེ་ཡང་གསང་སྔགས་ཀྱི་སྤྱད་པ་སྤྱོད་པར་འདོད་པ་རྣམས་ཀྱིས་དཀྱིལ་འཁོར་གྱི་བྱ་བ་ལ་སོགས་པ་རྫོགས་ནས་མཆོད་པ་སྔོན་དུ་འགྲོ་བས་བསྟོད་དོ་ཞེས་བྱ་བའི་དོན་ཏོ། །ཕྱག་ན་རྡོ་རྗེ་རྒྱལ་དབང་ལ། །ཞེས་བྱ་བ་ནི་དཀྱིལ་འཁོར་དགུའི་བདག་པོའི་རྡོ་རྗེ་འཛིན་པ་ཞི་བ་དང་ཁྲོ་བོ་ལ་ཞེས་སྟོན་ཏོ། །དགའ་བའི་སེམས་ཀྱིས་སྟོད་པར་བྱེད། །ཅེས་བྱ་བ་ནི་ཡིད་བདེ་བའི་སེམས་ཀྱིས་འོག་ནས་འབྱུང་བ་རྣམས་བརྗོད་དོ་ཞེས་བྱ་བའི་དོན་ཏོ། །དེ་ཡང་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་དཀྱིལ་འཁོར་དགུའི་སྐབས་སུ་འདིས་བསྟོད་དོ་ཞེས་སྟོན་ཏོ། །བསྟོད་པའི་རང་གི་ངོ་བོ་སྟོན་པ་ནི། སངས་རྒྱས་ཞེས་བྱ་བ་ལ་སོགས་པའོ། །སངས་རྒྱས་ཀུན་པས་སྔར་སངས་རྒྱས། །ཞེས་བྱ་བ་ནི་བྱང་ཆུབ་ཏུ་སེམས་བསྐྱེད་པའི་སྒོ་ནས་སོ། །མི་ཤེས་དྲི་མ་ཀུན་བཅོམ་པ། །ཞེས་བྱ་བ་ནི་འདྲེས་པའི་མ་རིག་པ་སྤངས་པའི་སྒོ་ནས་སོ། །རྡོ་རྗེ་རྡོ་རྗེ་འཛིན་རྒྱལ་པོ། །ཞེས་བྱ་བ་ནི་བྱང་ཆུབ་ཀྱི་སེམས་དང་རྡོ་རྗེ་རྩེ་ལྔ་འཛིན་པའི་སྒོ་ནས་སོ། །རྡོ་རྗེ་རྡོ་རྗེ་རྡོ་རྗེ་འཛིན། །ཞེས་བྱ་བ་ནི་སྐུ་གསུམ་གྱི་རྡོ་རྗེ་འཛིན་པའི་སྒོ་ནས་སོ། །རྡོ་རྗེ་སྐུ་སྟེ་སྐུ་ཆེ་བ། །ཞེས་བྱ་བ་ནི་སྐུ་ཕྱག་རྒྱ་ཆེན་པོའི་སྒོ་ནས་སོ། །ཕྱག་ན་རྡོ་རྗེ་ཕྱག་འཚལ་བསྟོད། །ཅེས་བྱ་བ་ནི་དཀྱིལ་འཁོར་གྱི་བདག་པོའི་སྒོ་ནས་སོ། །རྡོ་རྗེ་ཡན་ལག་རྡོ་རྗེ་མཆོག །ཅེས་བྱ་བ་ནི་དཀྱིལ་འཁོར་གྱི་ལྷ་ཐམས་ཅད་དུ་སྣང་བའི་སྒོ་ནས་སོ། །རྡོ་རྗེ་འབར་བ་ཆེར་འབར་བ། །ཞེས་བྱ་བ་ནི་མཚན་མའི་རྣམ་པར་རྟོག་པ་སྲེག་པའི་ཚུལ་གྱིས་སོ། །རྡོ་རྗེ་ཤུགས་ཏེ་ཤུགས་ཆེ་བ། །ཞེས་བྱ་བ་ནི་ཐུགས་རྗེ་ཆེན་པོའི་ཤུགས་ཀྱི་སྒོ་ནས་སོ། །རྡོ་རྗེ་མཚོན་ཆ་མཚོན་རྣོན་པོ། །ཞེས་བྱ་བ་ནི་ཐོས་པ་དང་བསམས་པ་དང་བསྒོམས་པའི་ཤེས་རབ་ཀྱི་སྒོ་ནས་སོ། །ཕྱག་ན་རྡོ་རྗེ་ཕྱག་ཆེན་པོ། །ཞེས་བྱ་བ་ནི་ཏིང་ངེ་འཛིན་གྱི་ཕྱག་རྒྱའི་སྒོ་ནས་སོ། །རྡོ་རྗེ་མདའ་སྟེ་རབ་འབིགས་པ། །ཞེས་བྱ་བ་
ནི་ཆོས་ཀྱི་སྒོ་འདོད་པའི་སྒོ་ནས་སོ། །རྡོ་རྗེ་རྣོན་པོ་རྣོ་བ་ཆེ། །ཞེས་བྱ་བ་ནི་ཟག་པ་མེད་པའི་ཤེས་རབ་ཀྱི་སྒོ་ནས་སོ། །ཆེ་བ་ཆེན་པོ་རྒྱ་མཚོ་ཆེ། །ཞེས་བྱ་བ་ནི་ཆོས་ཀྱི་དབྱིངས་ཀྱི་ཚུལ་གྱིས་སོ། །རྡོ་རྗེ་པདྨ་བྱང་ཆུབ་ཆེ། །ཞེས་བྱ་བ་ནི་འཁོར་བའི་ཉེས་སྐྱོན་དང་བྲལ་བའི་ཚུལ་གྱིས་སོ། །སངས་རྒྱས་བྱང་ཆུབ་རང་བྱུང་བ། །ཞེས་བྱ་བ་ནི་ཐེག་པ་ཆེན་པོ་ཁོ་ནར་ངེས་པའི་ཚུལ་གྱིས་སོ། །རྡོ་རྗེ་རྒྱ་ཆེན་རྒྱ་ཆེན་ཏེ། །ཞེས་བྱ་བ་ནི་དོན་དམ་པའི་ཚུལ་གྱིས་སོ། །རྡོ་རྗེ་སྒྱུ་མ་རྣམ་སྦྱོང་བ། །ཞེས་བྱ་བ་ནི་ཀུན་རྫོབ་ཀྱི་ཚུལ་གྱིས་སོ། །རྡོ་རྗེ་རྒྱུ་སྟེ་གནོད་སྦྱིན་ཆེ། །ཞེས་བྱ་བ་ནི་ཉོན་མོངས་པ་ཟད་པར་བྱེད་པའི་རྒྱུའི་ཚུལ་གྱིས་སོ། །རྡོ་རྗེ་པདྨ་རྣམ་སྦྱོང་བ། །ཞེས་བྱ་བ་ནི་གཞན་གྱི་ཉེས་པ་དག་པར་བྱེད་པའི་ཚུལ་གྱིས་སོ། །རྡོ་རྗེ་ཁྲོ་བོ་དྲག་པོ་ཆེ། །ཞེས་པ་ནི་ཁྲོ་བོའི་དཀྱིལ་འཁོར་དུ་སྣང་བའི་ཚུལ་གྱིས་སོ། །རྡོ་རྗེ་དགྲ་སྡང་འཇོམས་པའི་གཙོ། །ཞེས་བྱ་བ་ནི་ཧཱུཾ་མཛད་དུ་སྣང་བའི་ཚུལ་གྱིས་སོ། །རྡོ་རྗེ་འཇིགས་པ་སྲུང་བ་ཆེ། །ཞེས་བྱ་བ་ནི་རྡོ་རྗེ་སྲུང་བའི་རང་བཞིན་གྱིས་སོ། །རྡོ་རྗེ་ལྕགས་ཀྱུ་དོན་ཡོད་བྱེད། །ཅེས་བྱ་བ་ནི་རྒྱལ་པོའི་རང་བཞིན་གྱིས་སོ། །རྡོ་རྗེ་རོ་ལངས་རོ་ལངས་ཆེ། །ཞེས་བྱ་བ་ནི་མ་ཧཱ་དེ་བར་སྤྲུལ་པའི་ཚུལ་གྱིས་སོ། །རྡོ་རྗེ་སྲིན་པོ་ཟ་བ་པོ། །ཞེས་པ་སྲིན་པོར་སྣང་བའི་ཚུལ་གྱི་སྒོ་ནས་སོ། །རྡོ་རྗེ་གནོད་སྦྱིན་གནོད་སྦྱིན་ཆེ། །ཞེས་བྱ་བ་གནོད་སྦྱིན་དུ་སྤྲུལ་པའི་སྒོ་ནས་སོ། །རྡོ་རྗེ་གདོན་ཏེ་གདོན་གྱི་མཆོག །ཅེས་པ་ནི་གདོན་དུ་སྤྲུལ་པའི་སྒོ་ནས་སོ། །འཇིགས་བྱེད་དག་བྱེད་དྲག་པོ་ཆེ། །ཞེས་བྱ་བ་ནི་དྲི་མ་འཁྲུ་བ་ཟག་པ་མེད་པའི་སྒོ་ནས་སོ། །རྡོ་རྗེ་འཇིགས་བྱེད་རྔམ་བྱེད་པ། །ཞེས་པ་ནི་ཕྱི་རོལ་མུ་སྟེགས་འཇོམས་པའི་སྒོ་ནས་སོ། །བསྒྲུབ་དཀའ་བསྒྲུབ་པ་ལེགས་པ་སྟེ། །ཞེས་པ་ནི་དགའ་བ་སྤྱོད་པའི་སྒོ་ནས་སོ། །རྡོ་རྗེ་ལེགས་པ་དགྱེས་མཛད་པ། །ཞེས་པ་ནི་རྡོ་རྗེ་ལེགས་པའི་རང་བཞིན་གྱིས་སོ། །རྡོ་རྗེ་དགའ་བ་དགའ་བ་ཆེ། །ཞེས་པ་ནི་ཟག་པ་མེད་པའི་དགའ་བའི་རང་བཞིན་གྱིས་སོ། །རྡོ་རྗེ་དགའ་བའི་ཆེ། །ཞེས་པ་ནི་ཟག་པ་མེད་པའི་དགའ་བའི་རང་བཞིན་གྱིས་སོ། །དགའ་བའི་རྡོ་རྗེ་དབང་བྱེད་པ། །ཞེས་
བྱ་བ་ནི་བྱས་པའི་དངོས་པོ་བཞིའི་རང་བཞིན་གྱིས་སོ། །འོད་སྡུག་པས་ནི་སྡུག་པ་ཆེ། །ཞེས་པ་ནི་གཟི་བརྗིད་རང་བཞིན་གྱིས་སོ། །ནམ་མཁའ་དང་ནི་མཉམ་པའོ། །ཞེས་པ་སྤྲུལ་པའི་རང་བཞིན་གྱིས་སོ། །རེ་བ་ཐམས་ཅད་རྫོགས་མཛད་པ། །ཞེས་པ་ནི་བྱམས་པའི་རང་བཞིན་གྱིས་སོ། །རྡོ་རྗེ་དབང་བསྐུར་རིན་ཆེན་མཆོག །རྡོ་རྗེ་རྒྱལ་མཚན་ཡོན་ཏན་གཙོ། །ཞེས་པ་རིན་ཆེན་དང༌། རྒྱལ་མཚན་གྱི་རང་བཞིན་གྱིས་སོ། །རྡོ་རྗེ་ཡེ་ཤེས་ཡེ་ཤེས་ཆེ། །ཞེས་པ་ནི་ཡེ་ཤེས་ལྔའི་སྒོ་ནས་སོ། །རིག་པ་བྱེ་བ་ཚོགས་ཀྱི་མཆོག །ཅེས་བྱ་བ་ལྷ་མོ་རྣམས་ཀྱི་བདག་པོར་སྣང་བའི་སྒོ་ནས་སོ། །ཧ་ལ་ཧ་ལ་ནག་པོ་ཆེ། །ཞེས་པ་ནི་ཀླུ་ཆེན་པོའི་དཀྱིལ་འཁོར་དུ་སྣང་བའི་སྒོ་ནས་སོ། །དགྲ་ཆེ་ཞིང་ནི་འཇོམས་པ་ཅན། །ཞེས་པ་ནི་འཇིགས་བྱེད་ཆེན་པོའི་དཀྱིལ་འཁོར་དུ་སྣང་བའི་སྒོ་ནས་སོ། །རྡོ་རྗེ་འདོད་པ་འདོད་པ་ཆེ། །ཞེས་པ་ནི་རྡོ་རྗེ་ཆོས་སུ་སྣང་བའི་སྒོ་ནས་སོ། །རྙོག་མ་དུས་ངན་རྣམ་འཇོམས་པ། །ཞེས་པ་ནི་འཆི་བདག་འཇོམས་པའི་དཀྱིལ་འཁོར་དུ་སྣང་བའི་སྒོ་ནས་སོ། །སྐད་ཅིག་གཡོ་བའི་ཐེ་ཚོམ་གཅོད། །ཅེས་པ་ནི་འཇིག་རྟེན་པའི་ཆོས་ཐམས་ཅད་ཀྱི་ཐེ་ཚོམ་གཅོད་པའི་སྒོ་ནས་སོ། །གློག་བཞིན་ཞལ་གྱི་ལྗགས་ལས་འཕྲོ། །ཞེས་པ་ནི་ཆོས་མྱུར་དུ་གསུངས་པའི་སྒོ་ནས་སོ། །རྡོ་རྗེ་མེ་སྟེ་མ་རུངས་འདུལ། །ཞེས་པ་ནི་མེ་ལྟར་འབར་བའི་སྒོ་ནས་སོ། །དྲག་པོ་རབ་སྣང་སྣང་མཛད་པ། །ཞེས་པ་ནི་འདོད་པའི་རྒྱལ་པོའི་སྒོ་གནས་སོ། །ཉི་མ་སྟོང་གིས་གདུངས་པའི་ཞལ། །ཞེས་པ་ནི་གཟི་བརྗིད་ཆེན་པོའི་སྒོ་ནས་སོ། །སྤྱན་དམར་འཇིགས་པར་མཛད་པ་པོ། །ཁྲོ་བོ་དུ་མའི་འོད་འཕྲོ་ཞིང༌། །ཕྱག་རྣམས་དུ་མ་མཚོན་ཆ་བརྒྱ། །དུ་མའི་ཞལ་ཏེ་སྐུ་ཡང་སྟོང༌། །འཁྱིལ་ཅིང་བརྒྱན་ཡང་འཁྱིལ་པ་ལ། །ཞེས་པ་ནི་ཁྲོ་བོའི་དཀྱིལ་འཁོར་དུ་སྣང་བའི་སྒོ་ནས་སོ། །སེམས་ཀྱི་ཆོས་པས་སྐུ་མི་མངའ། །རྣམ་པར་རྟོག་པ་མ་ལུས་སྤངས། །ཞེས་པ་ནི་ཆོས་ཀྱི་སྐུའོ། །མ་རིག་འཇོམས་པའི་ཚངས་པ་སྟེ། །འདོད་ཆགས་ཞེ་སྡང་སྲིད་མཐར་
མཛད། །ཅེས་པ་ཉོན་མོངས་པ་གསུམ་སྤོང་བའི་སྒོ་ནས་སོ། །སྒྱུ་མ་ཁྱབ་འཇུག་རྡོ་རྗེ་ཅན། །རྩེ་གསུམ་རྩེ་གསུམ་འཆང་འཕྲོག་མ། །ཞེས་པ་མ་ཧཱ་དེ་བ་དང་ཁྱབ་འཇུག་དང་བརྒྱ་བྱིན་ཆུང་མ་དང་བཅས་པར་སྣང་བའི་སྒོ་ནས་སོ། །འདོད་ཆགས་ཞེ་སྡང་གཏི་མུག་ཆེ། །ཞེས་པ་ཀུན་རིག་ལ་སོགས་པ་འདོད་ཆགས་ཀྱིས་འདུལ་བ་ལ་སོགས་པའི་སྒོ་ནས་སོ། །སྲིད་དང་སྲིད་མིན་རྣམ་སྦྱོང་བ། །ཞེས་མོས་པ་རབ་འབྲིང་རྣམ་པ་གསུམ་ལ་སྣང་བའི་སྒོ་ནས་སོ། །ཞི་ཞིང་དུལ་ལ་དགའ་བ་ཆེ། །སངས་རྒྱས་སངས་རྒྱས་རབ་རྟོགས་པ། །སངས་རྒྱས་བདག་ཉིད་སངས་རྒྱས་སྐུ། །ཞེས་པ་ནི་སངས་རྒྱས་ཀྱི་ཆོས་ཐམས་ཅད་བསྡུས་པའི་སྒོ་ནས་སོ། །རྡོ་རྗེ་རབ་སྐྱེས་རྡོ་རྗེ་སེམས། །ཀུན་དུ་བཟང་པོ་ཆེར་བཟང་བ། །ཞེས་པ་རྡོ་རྗེ་སེམས་དཔའ་དང་ཀུན་དུ་བཟང་པོའི་སྒོ་ནས་སོ། །མཚན་རྣམས་དམ་པས་རྣམ་བརྒྱན་པ། །ཞེས་པ་ནི་མཚན་བཟང་པོ་སུམ་ཅུ་རྩ་གཉིས་ཀྱིས་བརྒྱན་པའི་སྒྲོ་ནས་སོ། །ཁམས་གསུམ་བདག་ཉིད་ཁྱབ་པ་པོ། །ཞེས་པ་ཁམས་གསུམ་དུ་སྣང་བའི་ཚུལ་གྱིས་སོ། །ཐམས་ཅད་རྡོ་རྗེ་བདག་ཉིད་གཙང༌། །ཞེས་པ་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་དང༌། རྡོ་རྗེ་འཆང་ཆེན་པོ་ཉིད་སྣང་བའི་སྒོ་ནས་སོ། །དེ་ལྟར་བསྟོད་པ་བསྟན་ནས་ཕན་ཡོན་ནི་གང་གིས་ཞེས་བྱ་བ་ལ་སོགས་པས་སྟོན་ཏེ་སྐྱེས་པ་དང་བུད་མེད་གང་གིས་སོ། །འདི་བྲིས་ཞེས་བྱ་བ་ནི་རས་ལ་སོགས་པ་ལ་བྲིས་པའོ། །ཀློག་འགྱུར་ཏམ་ཞེས་པ་ཀློག་པ་དང་ཁ་དོན་བྱེད་པའོ། །རྟག་ཏུ་དེ་དག་འཆང་བྱེད་དམ། །ཞེས་པ་ནི་བསམ་པ་དང་སྒོམ་པའི་ཚུལ་གྱིས་སོ། །དྲན་ནས་ཉན་པར་བྱེད་ཀྱང་རུང༌། །ཞེས་པ་ནི་དྲན་པ་སྔོན་དུ་འགྲོ་བས་ཉན་པའོ། །ཀྱང་ཞེས་བྱ་བ་ནི་རྒྱལ་མཚན་གྱི་རྩེ་མོ་ལ་འདོགས་པ་དང༌། མཆོད་པ་ལ་སོགས་པ་ཡང་བསྡུ་སྟེ་དེ་ལྟ་བུ་དག་ཀྱང་ངོ༌། །དགོས་པ་ནི་ཅི་ཞིག་ཡོད་ཅེ་ན། ཕྱག་ན་རྡོ་རྗེ་འདྲ་བར་འགྱུར། །ཞེས་གསུངས་ཏེ་རྡོ་རྗེ་འཛིན་པ་ཆེན་པོར་འགྱུར་ཞེས་བྱ་བའི་ཐ་ཚིག་གོ །བཅོམ་ལྡན་འདས་ཀྱིས་ཞེས་བྱ་བ་ལ་སོགས་པས་དགའ་བ་དང་རྗེས་སུ་ཡི་རང་བ་
སྟོན་ཏོ། །དེ་ཡང་གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་དགེ་བའི་རྩ་བ་བསྔོ་ཞིང་རྗེས་སུ་ཡི་རང་སྟེ། སྤྲུལ་པའི་ཚོགས་ལུས་ལ་བསྡུས་ལ་སྤྲུལ་པ་བྱ་བ་ནས་ཅི་བདེར་གནས་སོ་ཞེས་བྱ་བའི་དོན་ཏོ། །བཅོམ་ལྡན་འདས་ཀྱིས་ཞེས་བྱ་བ་ནི་ཤཱཀྱ་ཐུབ་པ་དང༌། དེས་བྱིན་གྱིས་བརླབས་པའི་ཕྱག་ན་རྡོ་རྗེ་དང༌། རྡོ་རྗེ་འཛིན་པ་ཁྲོ་བོ་རྣམས་ཀྱིས་ཞེས་བྱ་བའི་དོན་ཏོ། །དེ་སྐད་ཅེས་བཀའ་སྩལ་པ་དང་ཞེས་པ་ནི་རྩ་བའི་རྒྱུད་དང༌། རྒྱུད་བྱི་མ་དང༌། ཕྱི་མའི་ཕྱི་མའོ། །བརྒྱ་བྱིན་དང་ཚངས་པ་ལ་སོགས་པ་ལྷའི་འཁོར་རྣམས་དང༌། ལྷ་དང་མི་དང་ལྷ་མ་ཡིན་དང་དྲི་ཟ་དང་གནོད་སྦྱིན་དང་སྲིན་པོ་ལ་སོགས་པ་ཞེས་བྱ་བ་ནི་མིང་ཞེས་བྱ་བ་ཡང་ཤས་ཆེ་བ་སྟེ། རྫུ་འཕྲུལ་ལ་བརྟེན་པའོ། །བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ་རྗེས་སུ་ཡི་རང་ངོ་ཞེས་བྱ་བ་འབྲས་བུ་ཐོབ་པས་མངོན་པར་དགའ་སྟེ། རྒྱུད་སྤྲུལ་པས་བཤད་པ་ལ་རྗེས་སུ་ཡི་རང་བའོ། །ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོའི་བརྟག་པ་ཞེས་བྱ་བ་སྔར་བཤད་པ་བཞིན་ནོ། །ཕྱོགས་གཅིག་པ་ཞེས་བྱ་བ་དེ་ཁོ་ན་ཉིད་བསྡུས་པ་དང༌། དཔལ་མཆོག་དང་པོ་དང། རྡོ་རྗེ་རྩེ་མོ་ལ་སོགས་པ་ལས་ལེའུ་འདི་ཕྱོགས་གཅིག་ཏུ་བྱས་ཤེང་དུམ་བུར་བཀོལ་བ་ལས་འདིར་འདུས་པར་བསྟན་ཞེས་བྱ་བའི་ཐ་ཚིག་གོ །ངན་སོང་རྣམ་པར་སྦྱོང་བྱེད་པའི། །གཟི་བརྗིད་རྒྱལ་པོ་སྣང་བརྩམས་པས། །དགེ་བ་བདག་གིས་ཅི་བསགས་པ། །འགྲོ་ཀུན་ངན་སོང་རྣམས་སྦྱངས་ཏེ། །རྡོ་རྗེ་འཛིན་པ་ཉིད་གྱུར་ཅིག །ངན་སོང་ཐམས་ཅད་ཡོངས་སུ་སྦྱོང་བའི་གཟི་བརྗིད་ཀྱི་རྒྱལ་པོ་བརྟག་པ་སྣང་བའི་རྐྱན་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་སུ་བིདྱ་ཀ་ར་བརྨ་དང༌། ཞུ་ཆེན་གྱི་ལོ་ཙཱ་བ་དགེ་སློང་དབང་ཕྱུག་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།