བཟླས་པའི་ཕྲེང་བའི་མཚན་ཉིད།
― DTG068_Page_0598 ―
[མ་དཔེ་གཟིགས་ན་འདིར་གནོན།]
རྒྱ་གར་སྐད་དུ། ཨཀྵ་སུ་ཏྲ་ལཀྵ་ཎ། བོད་སྐད་དུ། བཟླས་པའི་ཕྲེང་བའི་མཚན་ཉིད། ཐམས་ཅད་མཁྱེན་པ་ལ་ཕྱག་འཚལ་ལོ། །རྡོ་རྗེ་སེམས་དཔའ་ལ་ལྷ་མོ་སངས་རྒྱས་སྤྱན་མས་ཞུས་པ། བཟླས་པའི་ཕྲེང་བའི་དོན་ཅི་ལགས། །མཆོག་གི་དབང་ཕྱུག་གིས་གསུང་དུ་གསོལ། རྡོ་རྗེ་སེམས་དཔལ་གསུངས་པ། ལྷ་མོ་ཉོན་ཅིག་རབ་ཏུ་བཤད་དོ། །ཁྱོད་ཀྱིས་ཞུས་པ་དེ་བརྗོད་པར་བྱའོ། །དེ་ཐམས་ཅད་ཀྱི་གཏམ་བཤད་དོ། །སེམས་ཅན་ཐམས་ཅད་ལ་ཕན་པའི་དོན་དུའོ། །མི་སྤང་བའི་སེམས་ཀྱི་སྡོམ་པ་དེ་བཞིན་དུ་བསོད་ནམས་དང་ཡེ་ཤེས་མི་སྤང་བ་ཐོབ་པའི་རྣལ་འབྱོར་པའི་བཟླས་པའི་ཕྲེང་བ་འདིའོ། །གང་ལ་བཟླས་པའི་ཕྲེང་བ་ལ་དད་པ་མོས་པ་གུས་པས་གཟུང་ངོ༌། །སྡིག་པ་ཐམས་ཅད་སྤོང་ངོ༌། །སྡུག་བསྔལ་ཐམས་ཅད་དང་བྲལ་བར་འགྱུར་རོ། །གང་དུ་བཟུང་ན་མགྲིན་པ་དང་ལག་པའི་རྩ་བར་རོ། །དེས་ནི་བྱ་བ་ཐམས་ཅད་འགྲུབ་པར་ངེས་སོ། །བཟླས་པ་བྱས་པས་ལྷ་མོ་དང་དཔའ་བོ་ངེས་པར་གྲུབ་བ་རབ་ཏུ་སྟེར་རོ། །རྣལ་འབྱོར་མཆོག་གིས་ཐོབ་པའི་རྡོ་རྗེ་སེམས་དཔའ་དང་མཉམ་པར་འབྱུང་ངོ༌། །བྱིས་པ་གཞོན་ནུ་རྣམས་ཀྱིས་སྡིག་པ་
― DTG068_Page_0599 ―
[མ་དཔེ་གཟིགས་ན་འདིར་གནོན།]
མང་པོ་བྱས་པ་དང༌། ཐམས་ཅད་སྤངས་པ་འབྱུང་བར་འགྱུར་རོ། །རྐང་པ་གཅིག་པའི་བཟླས་པའི་སྐུད་པ་འཛིན་པས། བཟླས་ན་ལྷའི་སྐྱེ་བ་དྲན་པར་འགྱུར་རོ། །ཕྱེད་ཀྱི་ཚད་ཀྱིས་བཟླས་ན་དེས་ལྷ་དང་ལྷ་མོའི་བདེ་བ་མཐོང་ངོ༌། །མང་བ་ཡིས་བཟླས་ན་བརྫུན་པའི་ངག་སྤངས་པའོ། །དུང་གི་ལ་བཟླས་པའི་ཡོན་ཏན་གཅིག་འབྱུང་ངོ༌། །ལུང་ཏང་ལ་བཟླས་པས་ཡོན་ཏན་གཉིས་འབྱུང་ངོ༌། །ལྕགས་ལ་བཟླས་པས་ཡོན་ཏན་གསུམ་འབྱུང་ངོ༌། །དེ་ལ་ལ་བཟླས་པས་ཡོན་ཏན་བཞིའོ། །ནོར་བུ་མུ་ཏིག་བྱི་རུ་ལ་བཟླས་པས་ཡོན་ཏན་བཅུ་དྲན་ནོ། །དབང་པོའི་དམིགས་ལ་བཟླས་པས་ཡོན་ཏན་བཅུ་འབྱུང་ངོ༌། །པདྨ་ལ་བཟླས་པས་ཡོན་ཏན་བྱེ་བའོ། །ཡོན་ཏན་བྱེ་བ་རུ་དྲཱཀྵ་ལའོ། །བོ་དེ་ཙི་ལ་བཟླས་པས་བཅུ་དྲུག་དང་འདྲ་བར་དུས་འདས་པ་ཡོན་ཏན་དཔག་ཏུ་མེད་པ་འབྱུང་ངོ༌། །བཟླས་པ་ཕྲེང་བའི་ཡོན་ཏན་འདི་དག་རྡོ་རྗེ་སེམས་དཔས་གསུངས་པའོ། །མཁས་པས་ལྷག་པ་དང་ཆད་པར་མི་བྱའོ། །ལྷག་པ་ཆད་པ་ལ་བགེགས་ཆེན་པོ་འཇུག་གོ །དེས་ན་མཉམ་པར་བྱའོ། །བཟླས་པའི་དུས་སོང་ནས་སྦྱིན་སྲེག་བརྒྱ་རྩ་བརྒྱད་བྱའོ། །སྡིགས་མཛུབ་སྙིང་གར་བྱས་ཏེ་མཛུབ་མོས་བཟླས་ན་བགེགས་བཀུག་ནས་ཚར་གཅོད་པར་འགྱུར་རོ། །གུང་མོས་བགྲངས་པས་ཐེ་ཚོམ་མེད་པར་དངོས་གྲུབ་འབྱུང་ངོ༌། །སྲིན་ལག་གིས་བགྲངས་པས་གནོད་སྦྱིན་གྱི་དངོས་གྲུབ་འགྲུབ་བོ། །མཐེ་ཆུང་གིས་བགྲངས་པས་ཤ་ཟ་དགུག་པ་དང་བསྐྲད་པ་འགྲུབ་བོ། །མདོ་འཛིན་ལ་བསྐོར་ཞིང་བྱའོ། །བཟླས་པའི་ཕྲེང་བའི་མཚན་ཉིད་རྫོགས་སོ།། །།པཎྜི་ཏ་ས་ར་ཧེ་ཏ་དང༌། ལོ་ཙཱ་བ་དགེ་སློང་ཤེས་རབ་རྒྱལ་མཚན་གྱིས་བསྒྱུར་བའོ།།
| 
