ངན་སོང་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཆོ་ག་མདོར་བསྡུས་པ།
ཨ་ནནྟ་པ་ར་ཧེ་ཏ།
རྒྱ་གར་སྐད་དུ། སརྦ་དུརྒ་ཏི་པ་རི་ཤོ་དྷ་ནེ་སཾ་ཀྵིབྟ་ནཱ་མ། བོད་སྐད་དུ། ངན་སོང་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཆོ་ག་མདོར་བསྡུས་པ། ཐམས་ཅད་མཁྱེན་པ་ལ་ཕྱག་འཚལ་ལོ། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཆོས་ཀྱི་འཁོར་ལོ་སྐོར་མཛད་པའི། །ཤཱཀྱ་སེང་གེར་ཕྱག་འཚལ་ནས། །དན་སོང་ཐམས་ཅད་སྦྱོང་དོན་དུ། །ལུང་གཞན་ཅུང་ཟད་བཤད་པར་བྱ། །དེ་ལ་དང་པོར་རྣལ་འབྱོར་པའི་དབང་ཕྱུག་གིས་མི་ཕྱེད་བཞི་རིགས་རྣམས་གསོན་པའི་བར་ཆད་དུ་གྱུར་པའི་དུས་སུ་རྡོ་རྗེའི་རིགས་ཅན་རྣམས་འཆི་བའི་དུས་བྱས་པའི་ཚེ། ངན་སོང་ཐམས་ཅད་ཡོངས་སུ་སྦྱོང་བའི་ཆོ་ག་བྱེད་པར་འདོད་པས་རོ་དང་ཉེ་བའི་གནས་སུ་སྟན་ལ་སྐྱིལ་མོ་ཀྲུང་བཅས་པས་འདུག་སྟེ། ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་པར་བྱའོ། །དེའི་རྗེས་ལ་མགྲིན་པར་ཡི་གེ་ཧྲཱིཿ་ཡོངས་སུ་གྱུར་པ་ལས་པདྨ། དེའི་སྟེང་དུ་ཨ་ལས་བྱུང་བའི་ཟླ་བའི་དཀྱིལ་འཁོར་ལ་ཧཱུཾ་ལས་བྱུང་བའི་རྡོ་རྗེ་རྣམ་པར་བསྒོམ་སྟེ། རྡོ་རྗེ་ལྕེ་རྣམ་པར་བསམས་པས་སྡགས་བཟླས་པ་མཐུ་དང་ལྡན་པར་འགྱུར་རོ། །ལག་པ་གཉིས་གན་རྐྱལ་དུ་བྱས་པའི་ལག་པའི་མཐིལ་དུ་ཨ་ལས་བྱུང་བའི་
ཟླ་བ་ལ། ཧཱུཾ་ལས་རྡོ་རྗེ་རྩེ་ལྔ་པ་ཁ་དོག་དཀར་པོར་སྤྲུལ་ཏེ་ལག་པའི་མཐིལ་དུ་ཐིམ་པར་བསྒོམས་ལ། ལག་པ་གཉིས་ཐལ་མོ་སྦྱར་བ་བཅིངས་ལ། རྡོ་རྗེ་ལག་པར་རྡོ་རྗེའི་བར་དུ་སྦྱོར་བས་ཕྱག་རྒྱ་བཅིང་བ་མཐུ་དང་ལྡན་པར་འགྱུར་རོ། །དེ་ནས་ལྕི་བ་མ་ལྷུང་བས་དཀྱིལ་འཁོར་གྲུ་བཞི་པའི་ཚད་དུ་བྱུགས་ལ། ཙནྡན་དཀར་པོས་ཀྱང་བྱུགས་ཏེ་ཀུ་ཤས་ཆུ་དང་བའི་རྣམ་པ་ལྔ་གཏོར་བར་བྱའོ། །འབྲུ་ལྔ་དང་སྨན་ལྔ་དང་རིན་པོ་ཆེ་ལྔ་ནང་དུ་བླུགས་པ་མགྲིན་པ་གོས་སྔོན་པོས་བཅིངས་པའི་བུམ་པ་ཀུ་ཤ་ལ་ཉེ་བར་གཞག་པར་བྱའོ། །རྡོ་རྗེ་འཇིགས་བྱེད་ནས་བཟུང་སྟེ་རྡོ་རྗེ་རྩེ་མོ་མཐར་ཐུག་པའི་ཕྱག་རྒྱས་སྲུང་བའི་འཁོར་ལོ་རྣམ་པར་བསྒོམ་པར་བྱ་སྟེ། ར་བ་དང་གུར་བཅིང་བ་བསྒོམས་ལ་བྱིན་གྱིས་བརླབ་པར་བྱའོ། །དཀྱིལ་འཁོར་ལ་མེ་ཏོག་གི་ཚོམ་བུ་སིལ་མ་གཏོར་ལ། འཁོར་ལོ་ཚོགས་དང་བཅས་པ་ཡི། །དཀྱིལ་འཁོར་ནམ་མཁར་བསྒོམ་པར་བྱ། །མེ་ཏོག་སོགས་ཀྱིས་ཡང་དག་མཆོད། །སྡིག་པ་བཤགས་པ་ལ་སོགས་བྱ། །ལྷ་དང་མིན་དྲི་ཟ་དང༌། །ཀླུ་དང་འབྱུང་པོ་ལྟོ་འཕྱེ་ཆེ། །གནོད་སྦྱིན་སྲིན་པོ་ཡི་དགས་ཀྱིས། །ནམ་མཁར་བཞུགས་པའི་དཀྱིལ་འཁོར་ལ། །མཆོད་ནས་སངས་རྒྱས་རྣམས་ཀྱིས་ནི། །ཡོན་ཏན་བརྗོད་པ་བསྒོམ་བྱ་སྟེ། །ཨེ་མ་ཧོ་སངས་རྒྱས་ཨེ་སངས་རྒྱས། །སངས་རྒྱས་མཛད་པ་མཆོག་མཛད་ལེགས། །ངན་སོང་ཐམས་ཅད་ལེགས་སྦྱངས་ནས། །འགྲོ་རྣམས་བྱང་ཆུབ་ཐོབ་པར་མཛད། །ལྷ་དང་ཀླུ་སོགས་ཐམས་ཅད་ཀྱིས། །ཐལ་མོ་རབ་ཏུ་སྦྱར་བྱས་ཏེ། །ཤཱཀྱ་སེང་གེ་ཕྱག་འཚལ་ནས། །དེ་ཉིད་དུ་ནི་མི་སྣང་འགྱུར། །དེ་རྗེས་ཡི་གེ་ཨ་ལས་ནི། །བསྐྱེད་པའི་ཟླ་བ་སྙིང་གར་ཏེ། །དེ་ཡི་དབུས་སུ་དཀྱིལ་འཁོར་བསམ། །ནམ་མཁའི་དཀྱིལ་འཁོར་བཀུག་ནས་ནི། །སྙིང་ག་རུ་ནི་གཞུག་པར་བྱ། །རྡོ་རྗེ་ལྕགས་ཀྱུ་ལ་སོགས་ཀྱིས། །དགུག་གཞུག་བཅིངས་ལ་དབང་དུ་བྱ། །དཀྱིལ་འཁོར་རྣམ་གཉིས་ལེགས་བསྲེས་ཏེ། །རོ་གཅིག་ཏུ་ནི་རྣམ་པར་བསྒོམ། །དཀྱིལ་འཁོར་བ་ནི་ཐམས་ཅད་དུ། །རྫོགས་པའི་སྦྱོར་བ་ལས་བྱུང་བ། །དེ་ཡི་དབུས་སུ་བདག་གི་དངོས། །ཤཱཀྱ་སེང་གེར་བསྒོམ་པར་བྱ། །དེ་ནས་ཤཱཀྱ་
ཐུབ་པའི་ཐུགས་ཀར་ཟླ་བའི་དཀྱིལ་འཁོར་ལ་ངན་སོང་སྦྱོང་བའི་སྔགས་ཁ་དོག་དཀར་པོར་བསམས་ཏེ། སྔགས་ཀྱི་འོད་ཟེར་རྣམས་ཀྱིས་ཁམས་གསུམ་པོ་སྣང་བར་བྱས་ནས་དམྱལ་བ་དང་ཡི་དགས་དང་བྱོལ་སོང་གི་སེམས་ཅན་ངན་སོང་བ་རྣམས་འོད་ཟེར་གྱིས་བཀུག་པར་བལྟས་ལ་དཀྱིལ་འཁོར་དུ་བཅུག་པ་དང༌། དཀྱིལ་འཁོར་པ་ཐམས་ཅད་ཀྱིས་དེ་ནས་སེམས་ཅན་ཐམས་ཅད་ལ་དབང་བསྐུར་བ་དང་ལྡན་པར་བལྟ་བར་བྱའོ། །དེ་ལྟར་དབང་བསྐུར་ཙམ་གྱིས་ནི། །ཁམས་གསུམ་པ་ཡི་སེམས་ཅན་ཀུན། །སངས་རྒྱས་སྲས་དང་མཉམ་བཀོད་ནས། །དྲི་མ་མེད་པའི་ཁྱད་པར་གྱིས། །དེ་ནས་སེམས་ཅན་དགའ་བ་ཡིས། །བསྟོད་པའི་ཚིག་རྣམས་རྗོད་པར་བྱེད། །ཆོས་ཀྱི་འཁོར་ལོ་སྐོར་མཛད་པ། །ཁམས་གསུམ་པ་ཡི་འགྲོ་ཀུན་གྱི། །ངན་སོང་ཐམས་ཅད་སྦྱོང་མཛད་པ། །ཤཱཀྱ་སེང་གེ་ཕྱག་འཚལ་ལོ། །ཆོས་ཀྱི་དབྱིངས་ཀྱི་རང་བཞིན་ལས། །སེམས་ཅན་ཀུན་ལ་ཕན་པའི་ཕྱིར། །རང་གི་དེ་ཉིད་སྟོན་མཛད་པ། །རྡོ་རྗེ་གཙུག་ཏོར་ཕྱག་འཚལ་ལོ། །མཉམ་པའི་ཡེ་ཤེས་སྒོམ་པ་ཡིས། །ཁམས་གསུམ་ལ་གནས་ཐམས་ཅད་ལ། །དབང་བསྐུར་རབ་ཏུ་སྩོལ་མཛད་པ། །རིན་ཆེན་གཙུག་ཏོར་ཕྱག་འཚལ་ལོ། །སོ་སོར་ཀུན་རྟོག་རང་བཞིན་ལས། །ཆོས་ཀྱི་བདུད་རྩི་ཆར་འབེབས་པ། །སེམས་ཅན་དབུགས་འབྱིན་མཛད་པ་པོ། །པདྨའི་གཙུག་ཏོར་ཕྱག་འཚལ་ལོ། །སེམས་ཅན་སྡུག་བསྔལ་བསལ་བའི་ཕྱིར། །བྱ་བ་རྗེས་གྲུབ་རང་བཞིན་ཅན། །ཕྲིན་ལས་སྣ་ཚོགས་མཛད་པ་པོ། །སྣ་ཚོགས་གཙུག་ཏོར་ཕྱག་འཚལ་ལོ། །ཁམས་གསུམ་འོད་ཀྱིས་གསལ་མཛད་ནས། །སེམས་ཅན་རྣམས་ལ་ཐུགས་བརྩེ་བས། །བདེན་པ་མཐོང་བར་མཛད་པ་པོ། །གཙུག་ཏོར་གཟི་བརྗིད་ཕྱག་འཚལ་ལོ། །ཡིད་བཞིན་ནོར་བུ་རྒྱལ་མཚན་རྣམས། །སྦྱིན་པས་སེམས་ཅན་ཐམས་ཅད་ཀྱི། །བསམ་པ་ཐམས་ཅད་རྫོགས་མཛད་པ། །གཙུག་ཏོར་རྒྱལ་མཚན་ཕྱག་འཚལ་ལོ། །ཉོན་མོངས་ཉེ་བའི་ཉོན་མོངས་དག །གཅོད་ཅིང་བདུད་བཞིའི་སྟོབས་བཅོམ་ནས། །སེམས་ཅན་བྱང་ཆུབ་ཐོབ་མཛད་པ། །གཙུག་ཏོར་གནོན་པོ་ཕྱག་འཚལ་ལོ། །ཁམས་གསུམ་འགྲོ་བ་ཐམས་ཅད་
ཀྱིས། །གདུགས་དཀར་གྱིས་ནི་བརྒྱན་པ་ཡི། །ཆོས་ཀྱི་རྒྱལ་པོ་ཐོབ་མཛད་པ། །གཙུག་ཏོར་གདུགས་དཀར་ཕྱག་འཚལ་ལོ། །སྒེག་མོ་ཕྲེང་བ་དེ་བཞིན་དུ། །གང་མ་ལྷ་མོ་བཞི་པོ་དང༌། །སྤོས་དང་མེ་ཏོག་མར་མེ་མ། །དྲི་ཡི་ལྷ་མོ་ཕྱག་འཚལ་བསྟོད། །དད་སོགས་ངོ་བོ་ལས་བྱུང་བའི། །སྒེ་ཡི་དབུས་ན་གང་བཞུགས་པ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །སྒོ་སྲུང་རྣམས་ལ་ཕྱག་འཚལ་འདུད། །སྒོ་བཞི་ཡི་ནི་ལོགས་དག་ན། །ཁྱམས་ལ་སོགས་པར་བཞུགས་མཛད་ཅིང༌། །རབ་དགའ་ལ་སོགས་གནས་མཛད་གང༌། །བྱང་ཆུབ་སེམས་དཔའ་ཕྱག་འཚལ་འདུད། །ཚངས་པ་དྲག་པོ་ཟླ་བ་སོགས། །ཕྱོགས་བཞིའི་འཇིག་རྟེན་སྐྱོང་བ་དང༌། །མེ་དང་སྲིན་པོ་རླུང་ལྷ་དང༌། །འབྱུང་པོའི་བདག་པོ་ཕྱག་འཚལ་བསྟོད། །ཅེས་བྱ་བའི་ཚིག་འདིས་བསྟོད་ཅིད་དྲིལ་བུ་དཀྲོལ་བར་བྱའོ། །སྤྲོས་ནས་དཀྱིལ་འཁོར་ལ་སོགས་པ་སྟེ་ཁམས་གསུམ་པོ་སྟོང་པ་ཉིད་དུ་བསྒོམ་པར་བྱའོ། །དེ་ནས་སྟོང་པ་ཉིད་ལས་ཡཾ་རཾ་བཾ་ལཾ་ལས་བྱུང་བའི་དཀྱིལ་འཁོར་གྱི་སྟེང་དུ། སུཾ་ལས་བྱུང་བའི་རིན་པོ་ཆེ་སྣ་བཞིའི་རང་བཞིན་ཅན་གྱི་རི་རབ་བསྒོམ་པར་བྱའོ། །དེའི་དབུས་སུ་བྷྲཱུཾ་ལས་བྱུང་བའི་གཞལ་ཡས་ཁང་གྲུ་བཞི་ལ་སོགས་པའི་ཡོན་ཏན་དང་ལྡན་པའོ། །དེའི་དབུས་སུ་འཁོར་ལོ་རྩིབས་བརྒྱད་པ། དེའི་ལྟེ་བ་ལ་གནས་པའི་སེང་གེའི་གདན་ནོ། །དེའི་སྟེང་དུ་ཨ་ལས་བྱུང་བའི་ཟླ་བ་ལ་ཐབས་དང་ཤེས་རབ་ཀྱི་བདག་ཉིད་ཅན་གྱི་སྔགས་བཟླས་ཏེ། ཨོཾ་མུ་ནེ་མུ་ནེ་མ་ཧཱ་མུ་ནི་སྭཱ་ཧཱ། སྔགས་འདིའི་ཡོངས་སུ་གྱུར་པ་ལས། །ཤཱཀྱའི་རྒྱལ་པོ་རྗེས་དྲན་བྱ། །སེམས་ཅན་ཀུན་ལ་རྗེས་བརྩེ་བས། །ཆོས་ཀྱི་འཁོར་ལོའི་ཕྱག་རྒྱ་འཛིན། །རྡོ་རྗེ་ཁུ་ཚུར་གཉིས་བཅིངས་ཏེ། །རིམ་གྱིས་རྣམ་པར་འབྱེད་པ་ནི། །རྒྱ་འདི་ཆོས་ཀྱི་འཁོར་ལོ་སྟེ། །འཁོར་བ་ཐམས་ཅད་གཅོད་བྱེད་ཡིན། །འདི་ཡི་དཔེ་ནི་འདི་འདྲ་སྟེ། །ཇི་ལྟར་པདྨ་ལ་ཆགས་པའི། །བུང་བ་ལ་སོགས་བསྡམས་པ་བཞིན། །དེ་བཞིན་པདྨའི་འདབ་ཕྱེ་ན། །བཅིང་པའི་སྡུག་བསྔལ་ཐར་པར་བྱེད། །དེ་བཞིན་འཁོར་བར་སེམས་ཅན་རྣམས། །སྲིད་གསུམ་འཁོར་བར་བཅིངས་པ་ལས། །ཐུགས་
རྗེའི་བདག་ཅན་ཤཱཀྱ་ཡི། །སེང་གེས་བཅིངས་པ་ལས་གྲོལ་མཛད། །དེ་ནས་བཅོམ་ལྡན་འདས་ཀྱི་ཐུགས་ཀར་ཟླ་བ་ལ་སྔགས་ཀྱི་ཡི་གེ་བསྒོམ་པར་བྱ་སྟེ། ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏི་པ་རི་ཤོ་དྷ་ནི་རཱ་ཇཱ་ཡ། ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ་སརྦ་པཱ་པཾ་བི་ཤོ་དྷ་ན་ཤུདྡྷེ་བི་ཤུདྡྷེ། སརྦ་ཀརྨ་ཨཱ་བར་ཎ་བི་ཤོ་དྷ་ནེ་སྭཱ་ཧཱ། སྔགས་འདིས་རྡོ་རྗེ་གཙུག་ཏོར་ནས་བཟུང་ནས་རྡོ་རྗེ་ལྕགས་ཀྱུའི་བར་དུ་རྫོགས་པར་བྱའོ། །ཨོཾ་བཛྲ་ཧཱུཾ་ཕཊ། ཅེས་བརྗོད་ནས། བཅོམ་ལྡན་འདས་ཀྱི་ཞལ་གྱི་སྒོ་ནས་ཕྱུང་སྟེ་སེམས་ཅན་ཐམས་ཅད་སྣང་བར་བྱས་ནས་ངན་སོང་ཐམས་ཅད་ཞི་བར་བྱས་ཏེ་ཤར་གྱི་རྩིབས་ཀྱི་པདྨ་དང་ཟླ་བ་ལ་གནས་པའི་ཧཱུཾ་ལས་སྐྱེས་པའི་རྡོ་རྗེ་གཙུག་ཏོར་སྐུ་མདོག་དཀར་པོ་ས་གནོན་གྱི་ཕྱག་རྒྱས་ཡང་དག་པར་བཞུགས་པའོ། །ཨོཾ་རཏྣོཏ་ཏ་མ་ཏྲཱཾ་གིས་ལྷོའི་རྩིབས་ཀྱི་པདྨ་དང་ཟླ་བ་ལ་གནས་པའི་རིན་ཆེན་གཙུག་ཏོར་སྐུ་མདོག་སྔོན་པོ་མཆོག་སྤྱིན་གྱི་ཕྱག་རྒྱ་འཛིན་པ་ཁམས་གསུམ་པ་ལ་དབང་སྐུར་བར་མཛད་པའོ། །ཨོཾ་པདྨོ་ཏ་ཏ་མ་ཧྲཱིཿ་ས་ནུབ་ཀྱི་རྩིབས་ཀྱི་པདྨ་དང་ཟླ་བ་ལ་གནས་པའི་པདྨའི་གཙུག་ཏོར་སྐུ་མདོག་དམར་པོ་བསམ་གཏན་གྱི་ཕྱག་རྒྱ་འཛིན་པ། སེམས་ཅན་ཐམས་ཅད་དབུགས་འབྱིན་པར་མཛད་པའོ། །ཨོཾ་བི་ཤོ་དྷ་མ་ཨ་ཞེས་པས་བྱང་གི་རྩིབས་ཀྱི་པདྨ་དང་ཟླ་བ་ལ་གནས་པའི་སྣ་ཚོགས་གཙུག་ཏོར་སྐུ་མདོག་ལྗང་གུ་མི་འཇིགས་པ་སྩོལ་བས་སེམས་ཅན་འཁོར་བ་ལས་སྒྲོལ་བར་མཛད་པའོ། །ཨོཾ་གྱི་ས་བོན་ལས་བྱུང་བའི་གཙུག་ཏོར་གཟི་བརྗིད་མེའི་མཚམས་ཀྱི་པང་དང་ཟླ་བ་ལ་གནས་པ། སྐུ་མདོག་དཀར་དམར་ཕྱག་གཡས་ན་ཉི་མ་བསྣམས་པ་གཡོན་དཀུར་བརྟེན་ཏེ་བཞུགས་པ་ཁམས་གསུམ་པ་སྣང་བར་མཛད་པའོ། །ཧཱུཾ་གི་ས་བོན་ལས་བྱུང་བའི་གཙུག་ཏོར་རྒྱལ་མཚན་བདེན་བྲལ་ཀྱི་རྩིབས་ཀྱི་པདྨ་དང་ཟླ་བ་ལ་གནས་པ་སྐུ་མདོག་དམར་ནག་ཡིད་བཞིན་གྱི་ནོར་བུའི་རྒྱལ་མཚན་བསྣམས་པ་སེར་སྣ་སྦྱོང་བར་མཛད་པའོ། །དྷིའི་ས་བོན་ལས་བྱུང་བའི་གཙུག་ཏོར་རྣོན་པོ་རླུང་གི་རྩིབས་ཀྱི་པདྨ་དང་ཟླ་བ་ལ་གནས་པ་སྐུ་མདོག་ནམ་མཁའ་ལྟར་སྔོ་བ། ཕྱག་གཡས་ན་རལ་གྲི་གཡོན་ན་གླེགས་བམ་བསྣམས་པ་ཉོན་མོངས་
པ་དང་ཉེ་བའི་ཉོན་མོངས་པ་ཡང་དག་པར་གཅོད་པར་མཛད་པའོ། །ཀྵཾ་གི་ས་བོན་ལས་བྱུང་བ་གཙུག་ཏོར་གདུགས་དཀར་པོ་དབང་ལྡན་གྱི་རྩིབས་ཀྱི་པདྨ་དང་ཟླ་བ་ལ་གནས་པ་སྐུ་ན་དོག་དཀར་པོ་གདུགས་བསྣམས་པ་ཆོས་ཀྱི་བདག་པོ་ཐོབ་པར་མཛད་པའོ། །ཧཱུཾ་ཏྲཱཾ་ཧྲཱིཿཨཿའི་སྔགས་ཀྱིས་སྒེག་མོ་ལ་སོགས་པ་བཞི་མཚམས་ཀྱི་ཆའི་པདྨ་དང་ཟླ་བ་ལ་གནས་པ་སྐུ་མདོག་རིགས་ཀྱི་རིམ་པ་བཞིན་ནོ། །མེ་ཏོག་ལ་སོགས་པ་གྲྭའི་ཆའི་པདྨ་དང་ཟླ་བ་ལ་གནས་པ་སྐུ་མདོག་དང་སྔགས་དེ་བཞིན་དུ་སྤྲོ་བར་བྱའོ། །དེ་ནས་ཨོཾ་སརྦ་སཾ་སྐཱ་ར་པ་རི་ཤུདྡྷེ་དྷརྨ་ཏེ་ག་ག་ན་ས་མུདྒ་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡཱ་པ་རི་བཱ་རེ་སྭཱ་ཧཱ། ཞེས་བྱ་བའི་སྔགས་འདིས་བྱམས་པ་ལ་སོགས་པ་བཅུ་དྲུག་སྤྲོ་བར་བྱ་སྟེ་ཤར་གྱི་སྒོའི་ལོགས་གཉིས་སུ་བྱམས་པ་ལ་སོགས་པ་བཞི་དགོད་དེ། བྱམས་པ་མདོག་སེར་པོ་པདྨ་ལ་གནས་པའི་ཟླ་བ་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་ཕྱག་གཡས་ན་ཀླུ་ཤིང་མེ་ཏོག །གཡོན་ན་རིལ་པ་སྤྱི་བླུགས་འཛིན་པ་བྱམས་པའི་ཐུགས་ཀྱི་བདག་ཉིད་ཅན་ནོ། །གཉིས་པ་མཐོད་བ་དོན་ཡོད་ནི་མདོག་སེར་པོ་པདྨ་ལ་གནས་པའི་ཟླ་བ་ལ་བཞུགས་པ་གཡས་པ་ན་པདྨ་སྤྱན་དང་ལྡན་པ། གཡོན་པ་ཁུ་ཚུར་དཀུར་བརྟེན་པའོ། །གསུམ་པ་ངན་སོང་སྦྱོང་བ་ནི་སྐུ་མདོག་དམར་པོ་ལྕགས་ཀྱུ་འཛིན་པའོ། །བཞི་པ་མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་ནི་མདོག་དམར་སེར་གཡས་ན་དབྱུག་པ་འཛིན་པ། གཡོན་པ་ཁུ་ཚུར་དཀུར་བརྟེན་པའོ། །ལྷོའི་སྒོའི་ལོགས་སུ་དང་པོ་སྤོས་ཀྱི་གླང་པོ་མདོག་དཀར་ལྗང་ཕྱག་གཡས་ན་དྲིའི་གླང་པོའོ། །གཉིས་པ་དཔའ་བར་འགྲོ་བ་ནི་ཤེལ་དང་ཟླ་བའི་མདོག་ཅན་གཡས་ན་རལ་གྲི་འཛིན་པའོ། །གསུམ་པ་ནམ་མཁའི་མཛོད་ནི་མདོག་དཀར་སེར་གཡས་པ་ན་པདྨ་ལ་གནས་པའི་ཆོས་ཀྱི་མཛོད་དོ། །བཞི་པ་ཡེ་ཤེས་ཏོག་ནི་མདོག་སྔོན་པོ་གཡས་ན་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །ནུབ་ཀྱི་སྒོའི་ལོགས་སུ་དང་པོ་ནི་འོད་དཔག་ཏུ་མེད་པ་ཟླ་བའི་མདོག་ཅན་ཕྱག་གཡས་པ་ན་བདུད་རྩིའི་བུམ་པ་བསྣམས་པའོ། །གཉིས་པ་ཟླ་འོད་ནི་མདོག་དཀར་པོ་ཕྱག་གཡས་པ་ན་པདྨ་ལ་གནས་པའི་ཟླ་བ་འཛིན་པའོ། །གསུམ་པ་བཟང་སྐྱོང་ནི་མདོག་དཀར་དམར་ཕྱག་
གཡས་ན་རིན་པོ་ཆེ་འབར་བ་འཛིན་པའོ། །བཞི་པ་དྲ་བ་ཅན་གྱི་འོད་ནི་མདོག་དམར་པོ་ཕྱག་གཉིས་ཀྱིས་རྡོ་རྗེའི་དྲ་བ་འཛིན་པའོ། །དེ་ནས་བྱང་གི་སྒོའི་ལོགས་སུ་རྡོ་རྗེ་སྙིང་པོ་མདོག་སྔོ་ཞིང་དཀར་བ་ལ་ཕྱག་གཡས་པ་ན་ཨུཏྤ་ལ་རྡོ་རྗེ་དང་ལྡན་པའོ། །གཉིས་པ་བློ་གྲོས་མི་ཟད་པ་ནི་ཀུནད་དང་ཟླ་བ་ལྟར་དཀར་བ་ཕྱག་གཉིས་ན་ཡེ་ཤེས་ཀྱི་བུམ་པ་འཛིན་པ། གསུམ་པ་སྤོབས་པ་བརྩེགས་པ་ནི་ཟངས་ཀྱི་མདོག་ཅན་ཕྱག་གཉིས་ན་པདྨ་ལ་གནས་པའི་རིན་པོ་ཆེ་བརྩེགས་པ་འཛིན་པའོ། །བཞི་པ་ཀུན་དུ་བཟང་པོ་ནི་མདོག་སེར་པོ་ཕྱག་གཡས་ན་རིན་པོ་ཆེའི་སྙེ་མ་འཛིན་པའོ། །བྱང་ཆུབ་སེམས་དཔའ་ཐམས་ཅད་ནི་པདྨ་དང་ཟླ་བའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་གཡོན་པ་ཁུ་ཚུར་དཀུར་བརྟེན་པའོ། །ཛཿ་ཡི་ས་བོན་ལས་བྱུང་བ། །ཤར་དུ་རྡོ་རྗེ་ལྕགས་ཀྱུ་ནི། །ཟླ་བ་དཀར་ལྟར་མདོག་འཆང་ཞིང༌། །ཕྱག་གཡས་ལྕགས་ཀྱུ་འཛིན་པའོ། །ཧཱུཾ་གི་ས་བོན་ལས་བྱུང་བའི། །རྡོ་རྗེ་ཞགས་པ་ལྷོ་རུ་སྟེ། །སྐུ་མདོག་སེར་པོ་འཛིན་པས་གནས། །ཕྱག་ན་ཞགས་པ་ཡང་དག་བསྣམས། །བཾ་གྱི་ས་བོན་ལས་བྱུང་བའི། །རྡོ་རྗེ་ལྕགས་སྒྲོག་ནུབ་ཏུ་སྟེ། །སྐུ་མདོག་དམར་པོ་ལེགས་པར་མཛེས། །ཕྱག་ན་ལྕགས་སྒྲོག་འཛིན་པའོ། །ཧོཿ་ཡི་ས་བོན་ལས་བྱུང་བའི། །རྡོ་རྗེ་འབེབས་པ་བྱང་དུ་སྟེ། །སྣ་ཚོགས་མདོག་ནི་འཛིན་པས་གནས། །ཕྱག་ན་དྲིལ་བུ་ཡང་དག་བསྣམས། །དེ་ལྟར་དཀྱིལ་འཁོར་བསྐྱེད་ནས་སོ་སོའི་སྔགས་བརྗོད་པར་བྱ་སྟེ། ཆོས་ཀྱི་འཁོར་ལོའི་ཕྱག་རྒྱ་བཅིངས་ལ། ཨོཾ་ན་མཿ་སརྦ་དུ་རྒ་ཏེ་པ་རི་ཤོ་དྷ་ནི་རཱ་ཛཱ་ཡ། ཞེས་བྱ་བ་ལ་སོགས་པ་ནས་ཏེ་སྔགས་བརྗོད་པར་བྱའོ། །སེམས་ནི་རྣམ་པར་གཡེང་བའི་རྒྱུར་འགྱུར་བས་ཕྱི་རོལ་གྱི་ཕྱག་རྒྱ་བཅིང་བར་མི་བྱའོ་ཞེས་གསུངས་པས་དཀྱིལ་འཁོར་པ་སོ་སོའི་ཕྱག་རྒྱ་སོ་སོར་མ་བསྟན་ཏོ། །སརྦ་བིཏ་སརྦ་ཨཱ་བ་ར་ཎ་བི་ཤོ་དྷ་ནེ་མུ་ནེ་ཧཱུཾ་ཕཊ། ཤཱཀྱ་ཐུབ་པའི་སྔགས་སོ། །ཨོཾ་སརྦ་བིད་ཧཱུཾ་ཧཱུཾ། རྡོ་རྗེ་གཙུག་ཏོར་གྱིའོ། །ཨོཾ་སརྦ་བིཏ་ཏྲཊ། རིན་ཆེན་གཙུག་ཏོར་གྱིའོ། །ཨོཾ་སརྦ་བིད་ཧྲི་ཧྲི། པདྨ་གཙུག་ཏོར་གྱིའོ། །ཨོཾ་སརྦ་བིད་ཨཿཨཿ། སྣ་ཚོགས་གཙུག་ཏོར་གྱིའོ། །ཨོཾ་སརྦ་བིད་ཨོཾ་ཨོཾ། །གཙུག་ཏོར་གཟི་བརྗིད་ཀྱིའོ། །ཨོཾ་སརྦ་བིད་ཧཱུཾ་ཧཱུཾ།
གཙུག་ཏོར་རྒྱལ་མཚན་གྱིའོ། །ཨོཾ་སརྦ་བིཏ་ཕཊ། གཙུག་ཏོར་རྣོན་པོའིའོ། །ཨོཾ་སརྦ་བིཏ་ཀྲིཾ་ཏྲཊ། གཙུག་ཏོར་གདུགས་དཀར་གྱིའོ། །ཨོཾ་སརྦ་བིད་མ་ཧཱ་བཛྲོདྦྷ་བ་དཱ་ན་པཱ་ར་མི་ཏཱ་པཱུ་ཛེ་ཧཱུཾ། སྒེག་མོ་འི་འོ། །ཨོཾ་སརྦ་བིད་མ་ཧཱ་བཛྲོདྦྷ་བ་ཤཱི་ལ་པཱ་ར་མི་ཏཱ་པཱུ་ཛེ་ཏྲཾ། ཕྲེང་བ་མའིའོ། །ཨོཾ་སརྦ་བིད་མ་ཧཱ་བཛྲོདྦྷ་བ་ཀྵནྟི་པཱ་ར་མི་ཏཱ་པཱུ་ཛེ་ཧྲཱིཿ། གླུ་མའིའོ། །ཨོཾ་སརྦ་བིད་མ་ཧཱ་བཛྲོདྦྷ་བ་བཱིཪྻ་པཱ་ར་མི་ཏཱ་པཱུ་ཛེ་ཨཿ། གར་མའིའོ། །ཨོཾ་སརྦ་བིཏ་སརྦ་ཨ་པཱ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་དྷྱཱ་ན་པཱ་ར་མི་ཏཱ་པཱུ་ཛེ་ཧཱུཾ་ཕཊ། བདུག་པ་མའིའོ། །ཨོཾ་སརྦ་བིཏ་སརྦ་དུརྒ་ཏི་པ་རི་ཤོ་དྷ་ནི་ཀླེ་ཤ་ཚེ་ང་ན་པུཥྤ་བི་ལོ་ཀ་ནི་པྲཛྙཱཾ་པཱ་ར་མི་ཏཱ་པཱུ་ཛེ་ཏྲཾ་ཧཱུཾ་ཕཊ། མེ་ཏོག་མའིའོ། །ཨོཾ་སརྦ་བིད་ཨ་པཱ་ཡ་བི་ཤོ་དྷ་ནི་ཛྙཱ་ན་ཨཱ་ལོ་ཀ་ཀ་རི་པྲ་ཎི་དྷི་ན་པཱ་ར་མི་ཏཱ་པཱུ་ཛེ་ཧཱུཾ་ཕཊ། མར་མེ་མའིའོ། །ཨོཾ་སརྦ་བིཏ་སརྦ་ཨ་པཱ་ཡ་གནྡྷ་བ་ནཱི་ཤ་ནི་བཛྲ་གནྡྷ་ཨུ་པ་ཡ་པཱ་ར་མི་ཏཱ་པཱུ་ཛེ་ཨཱ་ཧཱུཾ་ཕཊ། དྲི་མའིའོ། །ཨོཾ་སརྦ་བིད་ན་ར་ཀ་ག་ཏི་ཨཱ་ཀཪྵ་ཎི་ཧཱུཾ་ཛཿ་ཕཊ། རྡོ་རྗེ་ལྕགས་ཀྱུའིའོ། །ཨོཾ་སརྦ་བིཏ་སརྦ་ད་ར་ཀ་ཨུཏྟ་ར་ནི་ཧཱུཾ་ཧཱུཾ་ཕཊ། རྡོ་རྗེ་ཞགས་པའིའོ། །ཨོཾ་སརྦ་བིཏ་སརྦ་ཨ་པཱ་ཡ་བནྡྷ་ན་བི་མོ་ཙ་ནི་ཧཱུཾ་བཾ་ཕཊ། རྡོ་རྗེ་ལྕགས་སྒྲོག་གིའོ། །ཨོཾ་སརྦ་བིཏ་སརྦ་ཨ་པཱ་ཡ་ག་ཏི་ག་ཧ་ན་བི་ཤོ་དྷ་ནི་ཧཱུཾ་ཧོཿཕཊ། རྡོ་རྗེ་འབེབས་པའིའོ། །ཨོཾ་མཻ་ཏྲི་ཡ་ཧ་ར་ཎཱ་སྭཱ་ཧཱ། ཨོཾ་ཨ་མོ་གྷཱ་དཪྴ་ནི་ཧཱུཾ། ཨོཾ་སརྦ་ཤོ་ཀ་ཏ་མོ་ནིརྒ་ཏེ་ན་མ་ཏི་ཧཱུཾ་ཕཊ། ཨོཾ་སརྦ་ཨ་པཱ་ཡ་ཛ་ཧ་སརྦ་ཨ་པཱ་ཡ་བི་ཤོ་དྷ་ནི་ཧཱུཾ། ཨོཾ་གནྡྷ་ཧ་སྟི་ནི་ཧཱུཾ། ཨོཾ་ཤཱུ་རཾ་ག་མེ་ཧཱུཾ། ཨོཾ་གྷ་ནེ་ག་ག་ན་ལོ་ཙ་ནེ་ཧཱུཾ། ཨོཾ་ཛྙཱ་ན་ཀེ་ཏུ་ཛྙཱན་བ་ཏི་ཧཱུཾ། ཨོཾ་ཨ་མི་ཏ་བྷཱ་ཨ་མི་ཏ་ཝ་ཏི་ཧཱུཾ། ཨོཾ་ཙནྡྲེ་ཙནྡྲ་བྱ་བ་ལོ་ཀི་ཏེ་སྭཱ་ཧཱ། ཨོཾ་བྷ་དྲ་པཱ་ལེ་ཧཱུཾ། ཨོཾ་ཛཱ་ལ་ནི་མ་ཧཱ་ཛཱ་ལ་ནི་ཧཱུཾ། ཨོཾ་བཛྲ་གརྦྷེ་ཧཱུཾ་ཨོཾ་ཨཀྵ་ཡ་ཀརྨ་ཨཱ་བ་ར་ཎ་བི་ཤོ་དྷ་ནི་སྭཱ་ཧཱ། ཨོཾ་སརྦ་པྲ་ཏི་བྷཱ་ནེ་པྲ་ཏི་བྷཱ་ན་ཀཱུ་ཊ་སྭཱ་ཧཱ། ཨོཾ་ས་མནྟ་བྷ་དྲེ་ཧཱུཾ། ཞེས་བྱ་བའི་སྔགས་ལན་རེ་རེ་དེ་དག་སོ་སོར་བརྗོད་ལ། དེ་ནས་ཕྱིས་འཁོར་ལོས་སྒྱུར་བའི་སྙིང་པོའི་འོད་ཟེར་ལྕགས་ཀྱུའི་རྣམ་པར་ཡང་དག་པར་སྤྲོས་ལ། ཤི་བའི་རྣམ་པར་ཤེས་པ་བཀུག་ལ་འགྲོ་བ་རིགས་དྲུག་ཀྱང་ངོ༌། །ཡི་གེ་གསུམ་གྱི་བདག་ཉིད་དུ་ནམ་མཁའ་ལ་
གནས་པར་བྱ་སྟེ། གོས་སྔོན་པོས་མགུལ་ཆིངས་བྱས་པའི་རྡོ་རྗེ་གནོད་སྦྱིན་གྱིས་བྱིན་རླབས་བྱས་ལ་དེ་ཉིད་ཀྱིས་སྔགས་བཟླས་ལ། མཁས་པས་རྟག་ཏུ་མཆོད་པར་བྱའོ། །ཤི་བའི་རུས་པའམ་མིང་ཡང་རུང་སྟེ། སྐྱེས་པའམ་བུད་མེད་གསོན་པོ་གང་ཡང་རུང་སེ་ཤིང་རོ་ཁ་བ་ལ་མེ་སྦར་ཏེ་ཕྱིར་བཟློག་པ་བྱ་བ་ནི། ནིམ་པ་དང་ཡུངས་ཀར་བསྲེགས་ལ་སྔགས་དང་ཕྱག་རྒྱས་བསྣུན་པར་བྱའོ། །ཨོཾ་སརྦ་པཱ་པཾ་ད་ཧ་ན་བཛྲ་ཆེ་གེ་མོའི་སརྦ་པཱ་པཾ་ད་ཧ་སྭཱ་ཧཱ། སྡིག་པ་ཐམས་ཅད་བསྲེག་པའི་སྔགས་དེས་མེའི་དཀྱིལ་འཁོར་དུ་བསྣུན་པར་བྱའོ། །ཚད་དང་ཆུར་ལྡན་པའི་བུམ་པས་དེའི་སྡིག་པ་བཀྲུ་བར་བྱ་སྟེ། ཨོཾ་སརྦ་ཨཱ་བ་ར་ཎ་ད་ཧ་ན་བཛྲ་ཧཱུཾ་ཕཊ། ཁྲུས་ཀྱི་སྔགས་ཀྱིས་ངན་སོང་གི་དྲི་མ་དག་པར་བྱའོ། །དེའི་རྗེས་ལ་ཟན་དང་ཆུར་བསྲེས་པས་སྡིག་པ་ཞི་བར་རབ་ཏུ་བརྟགས་ལ། དེ་ནས་སྣོད་དུ་གྱུར་པའི་དྲི་མ་ལྷག་མ་གཞོམ་པར་བྱ་སྟེ་དེ་ནས་ཕྱིར་བཟློག་པ་བྱ་སྟེ། ཡུངས་ཀར་དང༌། མེ་ཏོག་ཀུནྡས་སྒྲིབ་པ་ཐམས་ཅད་དག་པར་བྱའོ། །སྔགས་དང་ལྡན་པའི་བླ་མས་ཕྱག་རྒྱས་བྲབ་པར་བྱའོ། །དེའི་རྗེས་ལ་ཕྱིར་བཟློག་པ་བྱ་བ་ནི་ཡུངས་ཀར་གྱིས་བྱ་སྟེ་ཡུངས་ཀར་མེ་ཏོག་དང་ལྡན་པས་ཡང་དག་པར་བརྗོད་ཅིང་བྲབ་པར་བྱའོ། །བྲབ་པའི་སྔགས་ནི། ཨོཾ་སརྦ་པཱ་པཾ་བི་ཤོ་དྷ་ན་བཛྲ་ཧཱུཾ་ཕཊ། ཨོཾ་སརྦ་ཀརྨ་ཨཱ་བ་ར་ཎཱ་ནི་བྷསྨི་ཀུ་རུ་ཧཱུཾ་ཕཊ། ཨོཾ་བྲུཾ་བི་ནཱ་ཤ་ཡ་ཨཱ་བ་ར་ཎཱ་ནི་ཛཿཧཱུཾ་ཕཊ། ཨོཾ་དྲུཾ་བི་ཤོ་དྷ་ཡ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་སྲུཾ་ཤ་ར་ཤ་ར་པྲ་ཤ་ར་པྲ་ཤ་ར་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཧཱུཾ་ཧ་ར་ཧར་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་བྷྲི་ཏ་བྷྲི་ཏ་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཏྲ་ཊ་ཏྲ་ཊ་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཚིནད་ཚིནད་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ད་ཧ་ད་ཧ་སརྦ་ན་ར་ག་ཏེ་ཧེ་ཏུཾ་ཧཱུཾ་ཕཊ། ཨོཾ་པ་ཙ་པ་ཙ་སརྦ་པྲེ་ཏ་ག་ཏེ་ཧེ་ཏུ་ན་ཧཱུཾ་ཕཊ། །ཨོཾ་མཐ་མ་ཐ་སརྦ་ཏིཪྻ་ཀ་ག་ཏེ་ཧེ་རུན་ཧཱུཾ་ཕཊ། ཞེས་བྱ་བའི་སྔགས་འདིས་བསྣུན་བྲབ་ལ་ནམ་མཁའ་ལ་གཞག་པར་བྱའོ། །དེའི་རྗེས་ལ་རྡོ་རྗེ་སེམས་དཔའ་ལས་བྱུང་བའི་ཐབ་ཁུང་གི་དབུས་སུ། ཧཱུཾ་ལས་བྱུང་བའི་མེ་ལྷ་མདོག་དཀར་པོ་ཤེས་རབ་ལ་འཁྱུད་པ་ཕྱག་ན་རིལ་བ་སྤྱི་བླུགས་དང་མི་འཇིགས་པ་དང་དབྱུག་པ་དང༌། བགྲང་ཕྲེང་ཅན་
བལྟ་སྟེ། རྡོ་རྗེ་སེམས་དཔའ་ལ་སོགས་བཀུག་ནས་བསང་གཏོར་དང་མཆོད་ཡོན་དང་ཞབས་བསིལ་ཕུལ་ཏེ། ཡོངས་སུ་དག་པའི་མེ་ལ་ཐིམ་པར་བལྟའོ། །སྲེག་རྫས་རྣམས་སོ་སོར་ལན་བདུན་ཕུལ་ཏེ་དགང་བླུགས་དབུལ་བར་བྱའོ། །དེ་ལ་ཉེ་རེག་ཕུལ་ཏེ་དེ་བཞིན་ཉིད་ཀྱི་ཡེ་ཤེས་ཀྱི་མེ་དུ་ཡང་དག་པར་བལྟ་སྟེ། དེའི་ཐུགས་ཀར་ངན་སོང་སྦྱོང་བའི་དཀྱིལ་འཁོར་གྱི་འཁོར་ལོ་འཁོར་དང་བཅས་བ་བཞུགས་པར་བསམ་མོ། །དེ་ནས་འཁོར་ལོས་སྒྱུར་བ་ནས་བརྩམས་ཏེ་དཀྱིལ་འཁོར་པ་རྣམས་ཀྱི་སྔགས་ཀྱིས་སྦྱིན་སྲེག་དབུལ་ལོ། །དེའི་རྗེས་སུ་ནམ་མཁའ་ལ་གནས་པའི་ཡི་གེ་གསུམ་གྱིས་བདག་ཉིད་ལ་ཨོཾ་སརྦ་བིཏ་སརྦ་ཨ་པཱ་ཡ་བི་ཤོ་དྷ་ན་ཧཱུཾ་ཕཊ་སྭཱ་ཧཱ། ཞེས་བྱ་བའི་སྔགས་ཀྱིས་ངན་སོང་རྣམ་པར་སྦྱངས་ལ་འཁོར་ལོས་སྒྱུར་བའི་བཀས་རྡོ་རྗེ་ལྕགས་ཀྱུ་ལ་སོགས་པ་སྤྲོ་བའི་སྦྱོར་བས་ངན་སོང་ནས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་ལ་འགྲོ་བ་ལ་ལམ་ཡང་དག་པར་བསྟན་པའི་སྔགས་འདི་བརྗོད་པ་ཉིད་ཀྱིས་བཅོམ་ལྡན་འདས་ཀྱི་ཟླ་བ་ལ་ཡི་གེ་གསུམ་གྱི་བདག་ཉིད་བཞུགས་པར་བལྟས་ཏེ། ཨོཾ་རཏྣེ་རཏྣེ་མ་ཧཱ་རཏྣེ་རཏྣ་སམྦྷ་བེ་རཏྣ་ཀི་ར་ཎེ་རཏྣ་མཱ་ལ་བི་ཤུདྡྷེ་ཤོ་དྷ་ཡ་སརྦ་པཱ་པཾ་ཧཱུཾ་ཕཊ། ལམ་ཡང་དག་པར་བསྟན་པའི་སྔགས་སོ། །དེ་ནས་བཅོམ་ལྡན་འདས་ལ་ཡི་གེ་གསུམ་གྱི་བདག་ཉིད་རོ་གཅིག་པར་གྱུར་ཏེ་སྤྲོས་པའི་སྦྱོར་བས་རྡོ་རྗེ་གཙུག་ཏོར་ལ་སོགས་པ་རྣམས་ཀྱིས་བཅོམ་ལྡན་འདས་ལ་དཔང་བསྐུར་བ་དང་ལྡན་པར་བལྟས་ལ་དྲིལ་བུ་དཀྲོལ་ཏེ་དགང་གཟར་མར་གྱིས་གང་བ་དབུལ་བར་བྱ་སྟེ། ཨོཾ་པདྨེ་པདྨེ་པདྨ་ཨུདྦྷ་བེ་སུ་ཁ་པ་ཏྱཾ་གཙྪནྟུ་སྭཱ་ཧཱ། ཨོཾ་སརྦ་བུདྡྷ་ཀྵེ་ཊ་གཙྪནྟུ་སྭཱ་ཧཱ། ཞེས་བྱ་བའི་སྔགས་ཀྱིས་དགང་བླུགས་དབུལ་ལོ། །ཉེ་རེག་དང་སོ་རྩི་ལ་སོགས་པ་ཕུལ་ལ་དཀྱིལ་འཁོར་པ་རིམ་པས་བཅོམ་ལྡན་འདས་ལ་ཐིམ་པ་དང༌། བཅོམ་ལྡན་འདས་ཀྱང་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་མཚན་ཉིད་དུ་བཞུགས་པར་བྱའོ། །འཇིག་རྟེན་ལས་འདས་པའི་བྱ་བ་བྱས་ནས་དཀྱིལ་འཁོར་གཤེགས་སུ་གསོལ་བར་བྱ་སྟ་། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཅེས་བྱ་བ་ལ་སོགས་པས་གཤེགས་སུ་གསོལ་ལོ། །དེ་ནས་ཉི་མ་གསུམ་པའམ་བདུན་པ་ལ་སྔ་
མ་བཞིན་དུ་ཏིང་ངེ་འཛིན་གསུམ་བསྒོམས་ལ་འོ་མས་ཡོངས་སུ་གང་བའི་སྣོད་དུ་རུས་པ་ཐམས་ཅད་བཞག་སྟེ་ངན་སོང་སྦྱོང་བའི་སྔགས་ཐམས་ཅད་རིམ་གྱིས་བརྗོད་ཅིང༌། ཡུངས་ཀར་མེ་ཏོག་དཀར་པོ་དང་ལྡན་པས་དབང་བསྐུར་བ་སྦྱིན་པར་བྱའོ། །ཁྲུས་བྱས་ནས་ཀྱང་ངན་སོང་སྦྱོང་བའི་སྔགས་མང་པོ་བཟླས་ཏེ་དེ་ནས་ཚོགས་ཀྱི་འཁོར་ལོའི་བཟའ་བ་དང་སྟོན་མོ་ཇི་ལྟར་འདོད་པ་ཡོངས་སུ་སྤྱད་ལ་ཤིས་པ་བརྗོད་པ་ཇི་ལྟ་བ་བཞིན་དུ་སྦྱིན་བར་བྱའོ། །གང་ཞིག་སེམས་ཅན་བསམ་པའི་ངོ་རུ་ནི། །མདོ་རུ་ཡང་དག་བསྡུས་ཙམ་བྱས་པ་ལ། །བསྟན་བཅོས་མཐར་སོན་མཁས་པ་ཡིས། །བདག་ལ་བཟོད་པ་མཛད་པར་རིགས། །བསོད་ནམས་འདི་ཡི་སྦྱོར་བ་ཡིས། །ཁམས་གསུམ་གནས་པའི་སེམས་ཅན་ཀུན། །ཉོན་མོངས་རྒྱ་མཚོ་ལས་བརྒལ་ནས། །བདེ་བ་ཅན་དུ་འགྲོ་བར་ཤོག །ངན་སོང་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཆོ་གའི་བྱ་བ་མདོར་པ་སྡུས་པ་རྫོགས་སོ།། །།རྒྱ་གར་གྱི་མཁན་པོ་ཨ་ནནྟ་པ་ར་ཧེ་ཏའི་ཞལ་སྔ་ནས་མཛད་པའོ།།