ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་སྒྲུབ་ཐབས།
ཀླུ་སྒྲུབ་སྙིང་པོ།
རྒྱ་གར་སྐད་དུ། པྲཛྙཱ་པཱ་ར་མི་ཏ་ཧྲྀ་ད་ཡ་སྭཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་སྒྲུབ་ཐབས། ཤེས་རབ་ཀྱི་ཕ་རོལ་ཏུ་ཕྱིན་པ་དུས་གསུམ་རྒྱལ་བ་སྲས་དང་བཅས་པ་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱི་གཞི་ཡིན་ལམ་ཡིན་འབྲས་བུའང་དེ། །ཤེས་རབ་མི་དམིགས་ཤེས་རབ་སྙིང་པོ་གཙོ་བོ་དབྱེར་མེད་པ། །སྐུ་གསུམ་དཀོན་མཆོག་གསུམ་ལ་དབྱེར་མེད་ལུས་ངག་ཡིད་བཏུད་ནས། །རྒྱལ་ཡུམ་རིམ་བརྒྱུད་དད་དང་ཤེས་རབ་ཐོབ་ཕྱིར་བྲི། །དད་དང་ཤེས་རབ་སྔོན་འགྲོ་སྐྱབས་དང་སེམས་བསྐྱེད་ཅིང༌། །བརྩོན་པས་གྲོལ་འདོད་བཟོད་ལྡན་སྡུག་བསྔལ་མེད་སྤངས་ནས། །འཇིག་རྟེན་ཆོས་བརྒྱད་བསམ་བཏང་ནས་ནི་མ་ཉམས་ཏེ། །འདོད་ཡོན་མ་ཆགས་ཁྲིམས་ལྡན་ཅི་འབྱོར་མཆོད་དང་སྦྱིན། །ཤེས་རབ་སྦྱངས་པས་ཤེས་རབ་དོན་ཤེས་ཤེས་རབ་སྤྱོད་འདོད་པས། །རྒྱལ་བའི་གནས་དང་ཆོས་འདི་གནས་སུ་ཤེས་རབ་སྙིང་པོ་སྒྲུབ། །གང་ལ་ཆགས་ཕྱིན་དྲུག་ལྡན་པས་ཁྲུས་བྱས་ལ། །རྟེན་ལ་མཎྜལ་མཆོད་བཤམས་སྟན་ལ་མཉམ་འདུག་སྟེ། །བདུན་བརྒྱ་པ་ཡི་སྔགས་བརྗོད་
སྔགས་ཀྱི་བདེན་པ་ཡིས། །རྟེན་དེར་ཕུན་སུམ་ཚོགས་པ་སྔར་བསགས་སྤྱན་དེར་དྲང༌། །ཤེས་རབ་ཕ་རོལ་ཕྱིན་ཐོབ་ཤེས་རབ་ཕ་རོལ་ཕྱིན། །ཐབས་མང་གདུལ་བྱ་འདུལ་བའི་ཆོས་རྣམ་ཕ་རོལ་ཕྱིན། །རྒྱལ་བའི་ཡུམ་གྱུར་རྒྱལ་བ་སྲས་དང་བཅས་པ་ལ། །བདག་གི་ལུས་ངག་ཡིད་གསུམ་དང་གུས་དེང་ནས་ཕྱག་འཚལ་ལོ། །འཇིག་རྟེན་འདི་དང་གཞན་གྱི་འཇིག་རྟེན་ན། །མཆོད་པར་འོས་པའི་གཟུགས་སྒྲ་དྲི་དག་དང༌། །རོ་དང་རེག་བྱ་ཐུགས་དང་མི་འགལ་བའི། །གཙང་དང་མ་ཉམས་དམན་པར་མ་གྱུར་པའི། །ཆུ་གཙང་བསིལ་དང་མེ་ཏོག་ཁྱད་པར་ཅན། །དབྱིབས་ལེགས་དྲི་ཞིམ་ཁ་དོག་སྣ་ཚོགས་མཛེས། །ཙནྡན་གུར་ཀུམ་ག་པུར་ལ་སོགས་སྦྱར། །སོ་སོར་བསྲེག་པའི་བདུག་པ་ཇི་སྙེད་དང༌། །ཉི་ཟླ་ལྟར་གསལ་རིན་ཆེན་འོད་འབར་བའི། །རིན་ཆེན་སྒྲོལ་མ་མར་མེ་མཛེས་པའི་འོད། །གླ་རྩི་ཙནྡན་ཏུ་རུསྐ་སོགས་ལེགས་སྦྱར་དྲི། །སྐུ་མཛེས་དོན་དུ་བྱི་དོར་བྱུག་པ་རྫས་རྣམས་དང༌། །སྨན་དང་འབྲས་ཆན་ཤིང་ཐོག་ཏམ་པོ་ལེ། །ཡུན་རིང་འཚོ་བ་རྣམས་ཀྱང་རིམ་པར་དབུལ། །སྒྲ་སྙན་དབྱངས་དང་སིལ་སྙན་རོལ་མོར་བཅས། །རིན་ཆེན་བདུན་དང་རིན་ཆེན་གཞན་རྣམས་དང༌། །བཀྲ་ཤིས་རྫས་བརྒྱད་གཞན་ཡང་བཀྲ་ཤིས་རྫས། །བདག་གི་ལུས་ངག་ཡིད་བཅས་ཁྱོད་ལ་དབུལ། །རྒྱལ་སྲས་ཐུགས་རྗེ་ཅན་གྱིས་བདག་གཟིགས་ལ། །འགྲོ་གཟུགས་བདེ་བར་བྱ་ཕྱིར་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ། ཞེས་དེ་ཉིད་བསྡུས་པའི་སྔགས་ཀྱིས་དབུལ། རྒྱལ་བ་སྲས་དང་བཅས་ལ་བདག་རེ་གནོང༌། །འཁོར་བར་མ་རིག་ལུས་ངག་ཡིད་གསུམ་གྱིས། །མཚམས་མེད་ལ་སོགས་སྡིག་པའི་ལས་བགྱིས་དང༌། །བགྱིད་དུ་སྩལ་དང་རྗེས་སུ་ཡི་རང་བཤགས། །ད་ནི་འཇིགས་སོ་རྒྱལ་སྲས་ཁྱེད་དཔང་ལས། །ལུས་ངག་ཡིད་སྡིག་སླན་ཆད་མི་བགྱིད་དོ། །རྒྱལ་སྲས་ཁྱེད་དང་འཇིག་རྟེན་འདི་དང་གཞན་དག་ན། །འགྲོ་རིགས་དགེ་བ་ཐེག་པ་རིམ་གྱིས་སྤྱོད་བྱེད་པའི། །རྒྱུ་འབྲས་མ་འདྲེས་སོ་སོའི་དགེ་བ་བདག་ཡི་རང༌། །ཡི་རང་དགེ་དེ་ཟག་མེད་འགྲོ་ལ་སོ་སོར་བསྔོ། །ཀུན་གྱི་སྐྱབས་ཆེན་རྒྱལ་སྲས་སྐྱབས་དགལ། །དེང་ནས་བཟུང་
སྟེ་བདག་བསྐྱབ་སྐྱོབ་པར་མཛོད། །སྐྱབས་གནས་ཁྱེད་ལྟར་བདག་ཀྱང་སེམས་བསྐྱེད་པས། །ཁྱོད་ཀྱིས་སྤྱོད་ལྟར་བདག་སྤྱོད་འགྲོ་བའི་དོན་བྱེད་ཤོག །རྒྱལ་སྲས་ཁྱོད་ཀྱིས་སྣ་ཚོགས་སྐུ་སྤྲུལ་ལ། །འགྲོ་བ་གྲོལ་བའི་རིམ་པར་ཆོས་ཀྱི་འཁོར་ལོ་བསྐོར། །འགྲོ་བ་སོ་སོར་བདེ་ལམ་བྱང་ཆུབ་མ་ཐོབ་པར། །རྒྱལ་བ་སྲས་བཅས་མྱ་ངན་མི་འདའ་བཞུགས་པར་གསོལ། །ཕྱག་འཚལ་མཆོད་སོགས་བྱས་པའི་དགེ་བ་རྒྱ་ཆེན་དེ། །འགྲོ་ལ་བསྔོས་པས་འགྲོ་བ་སོ་སོར་བདེ་བ་དང༌། །མ་གྲོལ་གྲོལ་དང་མ་བསྒལ་བསྒྲལ་དང་དབུགས་ཕྱིན་དང༌། །མྱ་ངན་མ་འདས་པ་དག་མྱ་ངན་འདའ་བར་ཤོག །རྒྱལ་སྲས་དབང་པོར་རྒྱལ་སྲས་ལྟ་བུར་བདག་གིས་ནི། །ཚད་མེད་བཞི་བསྒོམ་རྒྱལ་བ་སྲས་བཅས་གནས་སུ་གཤེགས་སུ་གསོལ། །ཤེས་རབ་ཕ་རོལ་ཕྱིན་ཤེས་དངོས་པོ་རྣམས་སྟོང་པས། །སྭ་བྷཱའི་སྔགས་ཀྱིས་སྟོང་པར་བཟླས་པས་དངོས་སྟོང་དང༌། །ཤཱུ་ནྱ་ཏཱ་བརྗོད་གཟུང་བ་ཉིད་དང་བྲལ། །འཛིན་མེད་གནས་པ་མེད་པར་བློ་མཉམ་གཞག །མཉམ་པའི་ངང་ལས་རི་རྒྱལ་དམིགས་བྱས་ལ། །དེ་ལས་རིམ་གྱིས་བྱུང་བས་གླིང་རྣམས་ཆགས། །རི་སྟེང་པཾ་པད་ཨ་ལས་ཟླ་བ་དང༌། །སེང་གེའི་ཁྲི་ལ་རིན་པོ་ཆེ་ཡི་ཁྲི། །རིན་ཆེན་ཡོན་ཏན་རྒྱན་རྣམས་ལེགས་གསལ་ནས། །ཁྲི་སྟེང་པདྨ་སྣ་ཚོགས་ལྟེ་བ་ལ། །ཡི་གེ་མཾ་སེར་འཕྲོ་འདུ་ལས། །འོག་ཏུ་ཟླ་བ་ཨཱ་ལི་ལས། །སྟེང་དུ་ཀཱ་ལི་ཉི་མ་གྲུབ། །དེ་ཡི་འཁོར་ལོ་འཕྲོ་འདུ་ལས། །ལྟེ་བར་ཟླ་བ་མཾ་གནས་པ། །ཐམས་ཅད་གཅིག་གྱུར་བཅོམ་ལྡན་འདས། །ཤར་དུ་པཾ་ལས་ཡུམ་ཉིད་བཞེངས། །ལྷོ་རུ་ཧཱུཾ་ལས་ཕྱག་རྡོ་རྗེ། །ནུབ་ཏུ་མཾ་ལས་ཤཱ་རིའི་བུ། །བྱང་དུ་ཧྲཱིཿ་ལས་སྤྱན་རས་གཟིགས། །བཅོམ་ལྡན་གསེར་མདོག་ཆོས་འཆད་ཕྱག །རྡོ་རྗེ་སྐྱིལ་ཀྲུང་གཙུག་ཏོར་བཅས། །སྤྱན་ཡངས་མཐིང་ག་མཇོད་སྤུར་ལྡན། །སྐུ་ཡི་སྒོ་ནས་འོད་ཟེར་འགྱེད། །ཡུམ་ནི་ལོངས་སྤྱོད་རྒྱན་ཅན་ཏེ། །གསེར་མདོག་སྐུ་ནི་ཤིན་ཏུ་རྒྱས། །པད་ཟླ་རྒྱས་པའི་གདན་ལ་བཞུགས། །ཕྱག་གཉིས་མཉམ་པའི་ཏིང་འཛིན་གཞག །གཡས་པ་ཆོས་འཆད་པ་དང་ལྡན། །གཡོན་པ་པུསྟི་འཛིན་པའོ། །ཕྱག་ན་རྡོ་རྗེ་ཞལ་གཅིག་པ། །སྔོན་པོ་གཡས་ན་རྡོ་རྗེ་བསམ། །
གཡོན་ན་པདྨ་འཛིན་པར་བྱེད། །རིན་ཆེན་རྒྱན་ལྡན་སྐྱིལ་ཀྲུང་བཅས། །ཤཱ་རི་སེར་པོ་དཀའ་ཐུབ་གཟུགས། །ཆོས་གོས་གསུམ་དང་གསིལ་བྱེད་གཡས། །པུས་བཙུགས་གཡོན་ན་ལྷུང་བཟེད་ཐོགས། །ལུས་ངག་བསྡམས་ནས་གནས་པའོ། །མགོན་པོ་བྱང་སེམས་སྤྱན་རས་གཟིགས། །རྒྱན་མཛེས་སེམས་དཔའི་སྐྱིལ་མོ་ཀྲུང༌། །གཡས་ན་པདྨ་མཆོག་སྦྱིན་དང༌། །གཡོན་ན་པདྨ་པུསྟི་འཛིན། །དེ་རྣམས་ཟླ་བའི་གདན་ལ་བཞུགས། །གསལ་བར་གྱུར་ནས་ཕྱོགས་ཀུན་དུ། །བྱང་ཆུབ་སེམས་དང་ཉན་ཐོས་གཟུགས། །འགྲོ་བ་སོ་སོའི་གཟུགས་འཛིན་པ། །སྟེང་འོག་ཕྱོགས་རྣམས་ཐམས་ཅད་དུ། །རང་རང་མདོག་དང་མཚན་མས་བསྐྱེད། །དེ་ནས་བདག་པོའི་མིག་སོགས་ལ། །ཀྵཾ་ཛཾ་ཁཾ་གཾ་སྐཾ་སཾ་རྣམས། །ཟླ་བ་པདྨ་གདན་སྤྲོ་བསྡུ། །དེ་ཉིད་གསུམ་ཡང་གནས་གསུམ་དུ། །སྦྲོ་བསྡུ་མཚན་མ་གསུམ་དུ་བསྒོམ། །ཡེ་ཤེས་གཞུག་དང་དབང་བསྐུར་དང༌། །མི་བསྐྱོད་ལ་སོགས་སོ་སོར་གཞག །ཤཱ་རིའི་སྤྱི་བོར་རྒྱལ་བ་ཉིད། །གསང་དབང་སྤྱི་བོར་རྡོ་རྗེ་འཛིན། །མགོན་ལ་འོད་དཔག་ཡུམ་ཉིད་ལ། །མི་བསྐྱོད་གནས་ལ་མཆོད་པ་དབུལ། །འོ་ཐུག་སྤྲོ་བསྡུ་མདུན་གྱི་ཡུམ། །བདག་ལ་བསྡུས་ལ་སྙིང་པོའི་དོན། །འཁོར་བ་མྱ་ངན་འདས་པའི་ཆོས། །ཐམས་ཅད་བདག་གིས་གསལ་བསྒོམས་ལ། །སྤྱན་རས་གཟིགས་དང་དེར་སེམས་ལ། །ཤཱ་རིས་ཞུས་དང་ལྡན་བཏབ་པའི། །མདོ་དོན་སྐབས་ཤེས་དོན་དམ་བསྒོམ། །སྐྱོ་ན་བདེན་པའི་ངག་འདོན་ཏ། །ཏདྱ་ཐཱ་དང་ཨོཾ་སྤེལ་ནས། །ག་ཏེ་ག་ཏེ་པཱ་ར་དང༌། །ག་ཏེ་པཱ་ར་སཾ་ག་ཏེ། །བོ་དྷི་སྭཱ་ཧཱ་ཞེས་བརྗོད་ལ། །སྙིང་གར་པདྨའི་ལྟེ་བ་ལ། །མཾ་སེར་བདག་ལ་གཡས་སྐོར་བགྲང༌། །བསམ་གཏན་འདོད་ན་འཁོར་རྣམས་དང༌། །བདག་ཉིད་ཡི་གེ་མཾ་ལ་བསྡུ། །དེ་ལ་རིམ་བསྐྱེད་འཁོར་རྣམས་ལ། །མདོ་གདོན་སྔགས་ཀྱིས་འཁོར་རྣམས་ཀུན། །སྒྲིབ་སྦྱངས་བདག་འདྲར་གྱུར་པ་ལ། །རྒྱལ་བའི་ཡུམ་ཉིད་བསྟན་པ་ཡི། །དགེ་བ་བདག་གིས་ཅི་བྱས་ཐམས་ཅད་ནི། །སེམས་ཅན་ཀུན་ལ་བྱང་ཆུབ་ཕྱིར་བསྔོ་བས། །བདག་གཞན་ཤེས་རབ་སྙིང་པོ་ཐོབ་པར་ཤོག །རྗེས་ལ་སྒྱུ་མའི་བློ་ཡིས་ལངས། །ལྷ་ཡི་སྣང་བ་ལ་གནས་ལ། །བྱ་བ་ཐམས་ཅད་
རྒྱལ་བས་སྤྱད། །ཅི་སྤྱད་མཐར་ཕྱིན་ལམ་ཡིན་པས། །སེམས་གཉིས་ཕྱིན་དྲུག་སེམས་ཀྱིས་བྱ། །འདི་དོན་ཤེས་རབ་སྙིང་པོ་སྟེ། །རྨི་ལམ་སྒྱུ་མས་བཟླས་བརྗོད་བྱ། །དཀའ་བས་ཀླུ་ཡི་ལག་ནས་བླངས། །ཡུན་རིང་མདོ་རྣམས་ལེགས་སྤྱད་ལ། །རྒྱལ་ཡུམ་འདི་བྱས་དགེ་བ་ཡིས། །འགྲོ་བས་ཤེས་རབ་ཡུམ་ཐོབ་ཤོག །ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་སྒྲུབ་ཐབས་སློབ་དཔོན་ཆེན་པོ་ཀླུ་སྒྲུབ་སྙིང་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་བཻ་རོ་ཙ་ན་རཀྵི་ཏ་དང༌། བོད་ཀྱི་ལོ་ཙཱ་བ་ཀླན་ཆུང་གིས་བསྒྱུར་བའོ། །སླད་ཀྱིས་སྟག་ལོ་ཙཱ་བས་བཅོས་པའོ།། །།