དཀྱིལ་འཁོར་སྤྱིའི་རིམ་པ།
རུ་ར་བྷ་དྲ།
རྒྱ་གར་སྐད་དུ། ས་དྷཱ་ར་མཎྜ་ལ་པ་རི་པ་ཏི། བོད་སྐད་དུ། དཀྱིལ་འཁོར་སྤྱིའི་རིམ་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་དཀྱིལ་འཁོར་ལས་རྣམ་པར་སྣང་མཛད་མཉེས་པར་བྱ་བའི་ཕྱིར་དེའི་རིམ་པ་ནི་འདིའོ། །ཇི་ལྟར་སྔར་རང་གི་སྒྲུབ་ཐབས་ཀྱི་རིམ་པས་བསྙེན་པ་བྱས་པ་དང༌། བཟླས་བརྗོད་བྱས་པས་མཚན་མ་མཐོང་བས། བདག་དང་གཞན་འཁོར་བའི་རྒྱ་མཚོ་ལས་བསྒྲལ་བའི་ཕྱིར་སྔགས་པས་དཀྱིལ་འཁོར་གྱི་ལས་བྱའོ། །དཀྱིལ་འཁོར་གྱི་ཡོ་བྱད་ཐམས་ཅད་བསྡུས་ལ་ཚེས་གྲངས་དང༌། གཟའ་དང༌། རྒྱུ་སྐར་ལ་སོགས་པ་བཟང་པོ་ལ། དཀྱིལ་འཁོར་གྱིས་གཞིའི་མཚན་མ་བལྟ་བའི་ཕྱིར། གྲོགས་དང་བཅས་པས་གནས་དེ་ཉིད་བརྟག་པར་བྱ་སྟེ། ལྷ་ཁང་དང༌། ཚོང་འདུས་ཆེན་པོ་དང༌། ཡུལ་དང༌། གྲོང་ཁྱེར་དང༌། ཁྱམས་ཀྱི་ཤར་དང༌། བྱང་དུ་བརྩམ་པར་བྱའོ། །གཞན་དུ་ན་འདི་ལྟར་ཡང་བྱ་སྟེ། ས་བཟང་པོ་སྣུམ་པ་དང༌། ཟུག་རྔུ་ལ་སོགས་པའི་ཉེས་པ་མེད་པ་ཤར་དང་བྱང་དུ་གཞོལ་བ། མེ་ཏོག་དང་ཤིང་དང་ཆུ་དང་ལྡན་པར་བྱའོ། །ཡང་ན་ཡིད་གང་དུ་དགའ་བར་རོ། །དེ་ནས་སློབ་དཔོན་རྣམ་པར་སྣང་མཛད་ཀྱི་རྣལ་འབྱོར་དུ་བཞུགས་པས། སའི་བདག་པོ་ལ་གཏོར་མ་ལ་སོགས་པ་སྦྱིན་ཞིང་ས་བསླང་པར་བྱ་སྟེ། རྨི་ལམ་དུ་ཁུགས་པར་གྱུར་ནའོ། །དེ་ཡང་སྔགས་པས་ལྕི་བ་ས་ལ་མ་ལྷུང་བས་མཎྜལ་བྱས་ལ། དཀོན་མཆོག་གསུམ་ལ་ཕྱི་ནང་གི་མཆོད་པ་བྱ་ཞིང༌། ཇི་ལྟ་བ་བཞིན་དུ་འཇིག་རྟེན་སྐྱོང་བ་རྣམས་ལ་གཏོར་མ་བྱིན་ལ། གཞུང་བཞིན་དུ་པུས་མོ་ས་ལ་བཙུགས་ནས། ཐལ་མོ་སྦྱར་ཏེ་བླང་བར་བྱའོ། །གང་ས་འདི་ལ་གནས་བཅས་པའི། །ལྷ་དང་ཀླུ་དང་གནོད་སྦྱིན་དང༌། ཤ་ཟ་ལ་སོགས་པ་རྣམས་ལ་བསླང་བར་བྱ་ཡིས། སའི་གནས་འདི་ལ་ལྷ་ཁང་དང༌། མཆོད་རྟེན་ལ་སོགས་པ་བྱེད་པར་འདོད་ཀྱིས། ཁྱེད་རྣམས་མི་གནོད་པ་དང༌། བཟོད་པ་ཡོད་ན། ས་འདིར་བྱེད་ཀྱི་ང་གནས་འདིར་ཉལ་ན་རྨི་ལམ་གྱི་མཚན་མར་སྟོན་ཅིག་ཅེས་ལན་གསུམ་བརྗོད་ལ་ཉལ་བར་བྱའོ། །རྨི་ལམ་དུ་ངེད་རྣམས་ལ་མི་གནོད་
ཀྱི་གྱིས་ཤིག་ཅེས་བསྟན་ན་དེ་ཉིད་དུ་བྱའོ། །ས་ཁུགས་ནས་ཕྱི་དེ་ཞག་གི་སྔ་དྲོ་དང་པོ་ལ་འདི་སྐད་བརྗོད་དོ། །དཀོན་མཆོག་གསུམ་ལ་མཆོད་པར་བྱ་བའི་ཕྱིར། ས་འདི་ཙམ་ཞིག་ཁུགས་ནས་ལྷ་ཁང་ལ་སོགས་པ་བྱེད་ཀྱིས། ཁྱེད་རྣམས་སེམས་མི་ནུར་ཞིང་བགེགས་མེད་པ་དང་གྲོགས་པོར་བྱོས་ཤིག་ཅེས་བསྒོ་བར་བྱའོ། །ཡོན་བདག་གིས་ཞག་དང༌། གཟའ་སྐར་བཟང་པོའི་དུས་སུ། མཆོད་སྦྱིན་གྱི་ཤིང་ལས་སྲིད་དུ་ཁྲུ་གང་སྦོམས་སུ་ནི་མཐེ་བོ་དང་མཐེ་ཆུང་རྩེ་སྦྲང་པའི་ནང་ཁེངས་པ་ལས་ཕུར་པ་བྱས་ལ། ཇི་ཙམ་དགོས་པའི་ཕྱོགས་དང་མཚམས་སུ་ཕུར་པ་བཏབ་ལ། སྲང་བུ་ཉིས་བསྒྲིལ་གྱིས་ཕུར་པ་ལ་བྲེ་བར་བྱའོ། །དེའི་དབུས་རྫིང་བུ་འདྲ་བའི་དབྱིབས་སུ་བྱས་ལ། དེའི་དཀྱིལ་དུ་མཎྜལ་བྱས་ཏེ། དཀོན་མཆོག་གསུམ་ལ་མཆོད་པ་རྣམས་དབུལ་ལོ། །ཕྱོགས་སྐྱོང་རྣམས་ལ་ཡང་གཏོར་མ་བཏང་ལ། ཐལ་མོ་སྦྱར་ལ་འདི་སྐད་ཅེས་བརྗོད་པར་བྱའོ། །ཇི་ལྟར་ཕྱོགས་རྣམས་ཐམས་ཅད་དུ། །རྫོགས་པའི་སངས་རྒྱས་འཇིག་རྟེན་བཞུགས། །བྱང་ཆུབ་སེམས་དཔའ་དགྲ་བཅོམ་དག །བདག་ནི་རྡོ་རྗེ་ཆེ་གེ་ལ། །འདི་ཉིད་དུ་ནི་བརྟན་བཞུགས་ན། །མངོན་ཤེས་ཅན་གྱིས་མཆོད་ཡོན་བཞེས། །ཞེས་ལན་གསུམ་བརྗོད་དེ། བུམ་པ་བཀྲ་ཤིས་དང་ལྡན་པ་ལ་དེ་བཞིན་གཤེགས་པའི་སྙིང་པོ་བརྒྱ་རྩ་བརྒྱད་བཟླས་པའི་མཆོད་ཡོན་དབུལ། བུམ་པ་མ་འབྱོར་ན་དུང་ཕོར་དབུལ། ལྷ་ཁང་ལ་སོགས་པ་བྱེད་ན་གཙོ་བོ་དབུས་སུ་དམིགས་ལ། དེ་ཉིད་ཀྱི་སྙིང་པོ་བརྒྱ་རྩ་བརྒྱད་བཟླས་པའི་མཆོད་ཡོན་དབུལ་ཞིང་གསོལ་བ་གདབ་པར་བྱའོ། །ཀྱེ་བཅོམ་ལྡན་འདས་བདག་གི་མཆོད་ཡོན་བཞེས་ནས། བྱིན་གྱིས་བརླབ་ཅིང་བརྟན་པར་བཞུགས་སུ་གསོལ་ཞེས་བརྗོད་དོ། །གལ་ཏེ་དགའ་བའི་ས་གཞི་དེ་རྨི་ལམ་དུ་ཁུགས་ན། དེ་ནས་ཁྲོ་བོའི་ང་རྒྱལ་དུ་བྱས་ལ། མངོན་སྐྱོད་ཀྱི་སྦྱིན་སྲེག་བྱས་ཏེ། བགེགས་ཐམས་ཅད་བསྐྲད་ལ་སྔ་མ་བཞིན་དུ་སའི་ཚད་བླངས་ཏེ། མཆོད་ཡོན་དབུལ་བར་བྱ། དེ་ནས་འོག་ནས་འབྱུང་བའི་རིམ་པ་ལྟར། ཀླུའི་གཙོ་བོ་ལ་དམིགས་ལ། ས་བརྐོ་བར་བྱ་ཞིང༌། མཆོད་ཡོན་སྦྱིན་པའི་ཆོ་ག་བྱའོ། །དེ་ནས་ཕྱི་དེ་ཉིན་ཉི་མ་ཕྱེད་ཙམ་ན།
དཀྱིལ་འཁོར་གྱི་སའི་དབུས་སུ་ཁྲོ་བོའི་ང་རྒྱལ་བྱས་ལ། སྔགས་ཀྱི་འོག་ཏུ་ཐ་མར་ཕཊ་བརྗོད་ཅིང༌། ཁྲག་དང་ལན་ཚྭ་དང༌། མི་རུས་ཀྱི་ཕྱེ་མས་མངོན་སྤྱོད་ཀྱི་སྦྱིན་སྲེག་གི་ཆོ་གས་དཀྱིལ་འཁོར་གྱི་བགེགས་ཞི་བར་བྱ་བའི་ཕྱིར། གཡོན་པའི་མཐེ་བོང་དང་མཛུབ་མོས་སྦྱིན་སྲེག་བྱའོ། །ཡང་ཕྱི་དེ་ཞག་ལ་ལུས་བཀྲུ་ཞིང་དྲི་ཞིམ་པོས་བྱུགས་ལ་ཞི་བའི་སྦྱིན་སྲེག་གི་ཆོ་ག་བྱ་སྟེ། བཅོམ་ལྡན་འདས་ཀྱི་ཁྲོ་བོའི་སྔགས་ཀྱིས་བགེགས་བསལ་ཞིང་གནས་བསྲུང་བར་བྱའོ། །ཡང་དེ་བཞིན་དུ་ཡུངས་ཀར་དང༌། ཆུ་དང་ཞི་བའི་སྦྱིན་སྲེག་བྱས་པའི་ཐལ་བ་ལ་སྔགས་ལན་བདུན་བཟླ་ཞིང༌། སའི་ཚད་ནི་ཇི་ཙམ་པར་གཏོར་བ་བྱས་ནས། སའི་ལྷ་མོ་ནམ་མཁའ་ལ་གཤེགས་སུ་གསོལ་བར་བྱས་ལ། ས་སྦྱང་བའི་ཆོ་ག་ནི། ཇི་ཙམ་འདོད་པའི་གནས་སུ་གྲུ་བཞིར་དམིགས་ལ་ཀླུའི་བདག་པོ་བསམས་ཏེ་བརྐོ་བར་བྱའོ། །དེ་ལ་ཀླུའི་གཙོ་བོ་དོན་ཞེས་བྱ་བ་ནི་འདི་ཡིན་ཏེ། སྟོན་ཟླ་གསུམ་ལ་གློ་གཡས་པ་ས་ལ་ཕབ་སྟེ། ཁ་ལྷོ་ཕྱོགས་སུ་བལྟས་ཏེ་ཉལ་ལོ། །དགུན་ཟླ་གསུམ་ལ་ལྷོར་མགོ་བསྟན་ལ་ནུབ་ཏུ་ཁ་བལྟས་ལ་ཉལ། དཔྱིད་ཟླ་བ་གསུམ་ལ་མགོན་ཏུ་བལྟ་ཁ་བྱང་དུ་བལྟའོ། །དབྱར་ཟླ་བ་གསུམ་ལ་བྱང་དུ་མགོ་བལྟ་ཤར་དུ་ཁ་བལྟས་ཏེ་ཉལ། དེ་ནས་ཀླུའི་མགོ་བོ་དང་རྒྱབ་དང་འཕོང་བོར་ནས་ས་བརྐོ་བར་བྱ། མངོན་པར་དག་པའི་དངོས་གྲུབ་ཀྱི་དོན་དུ་བྲང་གི་ཕྱོགས་སུ། ལྐོག་མ་དང༌། ལྟེ་བ་དང༌། པུས་མོ་ཙམ་གྱི་བར་དུ། དངོས་གྲུབ་རབ་འབྲིང་ཐ་མ་གསུམ་འདོད་པའི་ཕྱིར། གཡས་གཡོན་དུ་བཞུགས་པར་བསམ་ཞིང་བརྐོ་བར་བྱ་སྟེ། ས་ཕྱུང་ལ་གཞན་བཟང་པོ་ནུབ་པ་དང༌། རྡོ་བ་དང་མགལ་དུམ་དང༌། སོལ་བ་དང༌། རུས་པ་དང༌། གྱོ་མོ་དང་བོང་བ་ལ་སོགས་པ་མེད་པར་བྱས་ནས་ཡང་དྲི་ཞིམ་པོ་དང་ས་བསྲེས། ཡང་ན་ནི་དྲི་ཞིམ་པོ་དང་ཆུ་བསྲེས་པའམ། ཡི་གེ་ཧཱུཾ་བཟླས་པའི་ཆུ་དང་བསྲེས་ཤིང་འཐད་པར་བཅགས་ཤིང་བཀབ་ལ། ལག་མཐིལ་ལྟར་མཉམ་པའི་སྟེང་དུ་གཞལ་ཡས་ཁང་གོ་བཞི་དང་རྟ་བབས་བཞིས་མཛེས་པར་བྱས་ལ། སྐར་ཁུང་དང་སྐར་ཁུང་དྲ་བ་ཅན་ལ་སོགས་པས་ཡོངས་སུ་བསྐོར་བའི་ནང་དུ་ཆུད་པར་བསམ། ངོས་ཐམས་ཅད་དུ་སྣ་ཚོགས་པའི་མེ་ཏོག་གི་ཕྲེང་བ་དང་དྲིལ་བུ་དང༌།
མེ་ལོང་གདགས་རྒྱལ་མཚན་བཟང་པོ་གཟུགས་པ་བླ་རེ་དམ་པ་བྲེ་བ་དང༌། སངས་རྒྱས་རྣམ་པར་སྣང་མཛད་ལ་སོགས་པའི་རས་རིས་ཀྱིས་ཉེ་བར་མཛེས་པར་བྱས་ལ། གཙོ་བོའི་བཟླས་པ་བྱས་པའི་སྨན་དང༌། འབྲུ་དང༌། རིན་པོ་ཆེ་དབུས་སུ་གཞུག་པར་བྱའོ། །ཟུག་རྔུའི་ཉེས་པ་ཐམས་ཅད་ནི། །གལ་ཏེ་དབྱུང་བར་མི་ནུས་ན། །ལག་པས་བརྡབས་ཏེ་སྔགས་འདི་བཟླ། །དངོས་གྲུབ་ཆེན་པོ་ཐོབ་པར་འགྱུར། །ཁང་པ་ཆེན་པོ་དང༌། བྲག་ཕུག་དང༌། བ་ལང་གི་ལྷས་དང༌། ལྷ་ཁང་ལ་སོགས་པ་དང༌། འབབ་ཆུའི་འགྲམ་དང༌། སྔར་བྱས་པའི་ས་ལ་ཡང་སྦྱང་མི་དགོས་ཀྱི་འདི་ལྟར་ཡང་བྱ་སྟེ། རང་གཙོ་བོར་བསྒོམ་ཞིང་ཁྲོ་བོའི་སྔགས་ཀྱིས་བགེགས་བསྐྲད་པ་དང༌། ཆུ་དང་ཡུངས་ཀར་དང་ཐལ་བ་ལ་བཟླས་ཏེ། སྔ་མ་བཞིན་དུ་གཏོར་ཞིང༌། ཤར་ཕྱོགས་ནས་བརྩམས་ཏེ། བའི་རྣམ་པ་ལྔས་བྱུག་པར་བྱ་ཞིང༌། དྲི་ཆབ་ཀྱིས་ཀྱང་གཏོར། ཁྲོ་བོའི་སྔགས་ལན་བདུན་བཟླས་པའི་སྨན་དང༌། འབྲུ་དང༌། རིན་པོ་ཆེ་དབུས་སུ་གཞུག་པར་བྱའོ། །དཀྱིལ་འཁོར་གྱི་གནས་སྦྱང་བའི་རིམ་པ་གཉིས་སུ་བྱས་པས་དག་པའི་ཆོ་གའོ། །དེ་བཞིན་དུ་ལྷ་ཁང་དང༌། མཆོད་རྟེན་དང༌། རྒྱལ་པོའི་ཁང་པ་དང༌། འདུ་ཁང་ལ་སོགས་པ་བྱེད་ན་ཡང་ས་སྦྱང་བར་བྱའོ། །དེ་ནས་དེ་ལྟ་བུའི་གནས་ལ་ཉིན་རེའམ། ཟླ་རེའམ། ལོ་རེའི་བར་གྱིས་དཀྱིལ་འཁོར་བྱ་བར་འདོད་ན། ཡོན་བདག་གི་འབྱོར་པ་དང་ཅི་དགའ་བས་བྱའོ། །ཇི་ལྟར་མོས་པ་བཞིན་དུ་ཞག་དང༌། གཟའ་སྐར་ལ་སོགས་པའི་དབུས་སུ་གཟུང་བར་བྱ་སྟེ། དེ་ལ་སློབ་དཔོན་རང་གི་ལྷའི་རྣལ་འབྱོར་ལ། དཀྱིལ་འཁོར་གྱི་དབུས་སུ་འདུག་ལ། སྔ་མ་བཞིན་དུ་བསྒྲུབ་པའི་རིམ་པས་བགེགས་བསྐྲད་དེ། སྙིང་ག་ནས་བྱུང་བའི་དཀྱིལ་འཁོར་གྱི་འཁོར་ལོ་ལས་སྤྲུལ་ལ་བྱུང་བས། ནམ་མཁའ་ཁྱབ་པར་བསམས་ཏེ། ཕྱོགས་བཅུའི་རྒྱལ་བ་སྲས་དང་བཅས་པ་ཁྱེད་རྣམས་བདག་དང་སློབ་མར་བཅས་པ་ལ། བྱིན་གྱིས་བརླབ་ཅིང་བསྲུང་བའི་ཕྱིར་བཞུགས་སུ་གསོལ་ཞེས་བསྐུལ་ཞིང༌། སྙིང་གའི་ཟླ་བའི་དཀྱིལ་འཁོར་གྱི་རྡོ་རྗེའི་དབུས་སུ་བསྡུས་ཏེ་བཅུག་ལ་གཅིག་ཏུ་གྱུར་པར་བསམས་ཏེ། དེ་ནས་རང་གི་ལུས་
རྣམ་པར་སྣང་མཛད་ཀྱི་ང་རྒྱལ་དུ་བྱས་ལ། སྙིང་པོ་བརྗོད་ཅིང་སེམས་དཔའི་སྐྱིལ་མོ་ཀྲུང་ཕྱེ་ལ་ལངས་ནས། མིག་གཡོན་པ་ལ་ཡི་གེ་ཊ་ལས་ཟླ་བའི་དཀྱིལ་འཁོར། གཡས་པ་ལ་ཡི་གེ་མ་ལས་ཉི་མའི་དཀྱིལ་འཁོར་འབྲས་བུ་གཉིས་ལ་ཡི་གེ་ཧཱུཾ་ཤིན་ཏུ་གཡོ་བ་བསྐལ་པའི་མེ་ལྟར་འབར་བའི་རྡོ་རྗེའི་མིག་བྱས་ཏེ། ལག་པ་གཡས་པ་རྡོ་རྗེ་གསོར་ཞིང༌། གཡོན་པ་དྲིལ་བུ་དཀྲོལ་ཞིང་བཟུང་ལ། མགོ་དང་མིག་གཡོན་དུ་ཅུང་ཟད་བཏུད་ལ། ཨ་ལས་སྣ་ཚོགས་རྡོ་རྗེ་རྐང་པའི་འོག་ཏུ་བསམས་ཏེ། རྒྱན་ཐམས་ཅད་དང་ལྡན་པའི་ཁྲོ་བོའི་ང་རྒྱལ་བསྐྱེད་དེ། ཐམས་ཅད་དུ་བལྟ་ཞིང་རྡོ་རྗེའི་འགྲོས་ཀྱིས་བསྐོར་བར་བྱ་ཞིང༌། བགེགས་ཐམས་ཅད་བསྐྲད་པའི་ཕྱིར་འདི་སྐད་ཅེས་བརྗོད་དོ། །སློབ་དཔོན་མིང་འདི་ཞེས་བྱ་བས་སློབ་མ་ཆེ་གེ་མོ་ཞིག་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་དང༌། སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར། ས་ཕྱོགས་འདིར་དཀྱིལ་འཁོར་གྱི་རྒྱལ་པོ་མིང་འདི་ཞེས་བྱ་བ་བྲིའི། ལྷ་དང་ལྷ་མ་ཡིན་དང་གནོད་སྦྱིན་དང༌། སྲིན་པོ་དང་ཡི་དགས་དང༌། ཤ་ཟ་དང་བརྗེད་བྱེད་དང༌། འབྱུང་པོ་དང་མཁའ་འགྲོ་མ་དང༌། གནོན་པོ་དང་ནམ་མཁའ་ལྡིང་དང༌། མིའམ་ཅི་དང༌། རིག་སྔགས་སྒྲུབ་པ་རྒན་པོ་དང༌། རྒན་མོ་དང་འཁོར་དང་གཡོག་ཏུ་བཅས་པ། གང་དག་འཁོད་པ་རྣམས་དེངས་ཤིག །འདི་ལྟར་རྡོ་རྗེ་འཆང་གི་བཀའ་ཐོས་ནས། མྱུར་བ་ཉིད་དུ་དེངས་ཤིག་གང་དག་མི་འགྲོ་བ་དེ་དག་ནི། ཕྱག་ན་རྡོ་རྗེ་ཧཱུཾ་ཞེས་བྱ་བ་རབ་ཏུ་ཁྲོས་པའི་བཞིན་འབར་བ་ཅན་གྱིས་ཡེ་ཤེས་ཀྱི་རྡོ་རྗེ་ཆེན་པོ་རབ་ཏུ་འབར་བས། མགོ་བོ་ཚལ་པ་བརྒྱར་འགས་པར་འགྱུར་རོ། །ཧཱུཾ་ཞེས་ལན་གསུམ་བརྗོད་དོ། །དེ་ནས་རང་གི་གཙོ་བོ་ལས་སྤྲུལ་པའི་ཁྲོ་བོ་གྲངས་མེད་པ་ཤིན་ཏུ་འཇིགས་པ་བྱུང་སྟེ། བགེགས་རྣམས་ཤིན་ཏུ་སྐྲག་ཅིང་བསྐྲད་པར་བྱས་ནས། ནམ་མཁའ་ཁྱབ་པར་འཁྱིལ་ཞིང་བཞུགས་སོ། །དེ་ནས་གར་གྱི་གཡས་བརྐྱང་བ་དང༌། གཡོན་བརྐྱང་བ་ལ་སོགས་པའི་སྟང་སྟབས་འདིར་བྱའོ། །དེ་ནས་མཐའ་ཡས་དང༌། རྣམ་པར་རྒྱལ་བ་དང༌། སྤྲིན་སྒྲ་དང༌། སྟོབས་བོ་ཆེ་དང༌། རྒྱལ་བ་ལ་སོགས་པ་ཕུར་བུ་ལྔའི་ངོ་བོ་ཉིད་ཀྱེ། ཁྲོ་བོ་
གཟུགས་འོག་ཏུ་རྡོ་རྗེ་རྩེ་གཅིག་པ་དབུས་སུ་བཙུགས་ལ། དེ་ནས་དབང་ལྡན་ནས་བརྩམས་ཏེ་བསྐོ་ཕྱོགས་སུ། ཨོཾ་བཻ་རོ་ཙ་ན་ཧཱུཾ་སརྦ་བིགྷྣཱཾ་ཨུ་ཙ་ཏ་ཡ་ཧཱུཾ་ཕཊ། ཅེས་བྱ་བའི་སྔགས་ཀྱིས་ཕུར་བུ་རྣམས་ལ་བཟླ་ཞིང་འོག་ནས། གསེར་གྱིས་གཞི་ལ་ཐུག་པའི་བར་དུ་གདབ་པར་བསམ་མོ། །དེ་ནས་རྣམ་པར་སྣང་མཛད་ཀྱི་ཕྱག་རྒྱ་བཅིངས་ཏེ་ཧཱུཾ་བརྗོད་ཅིང་ང་རྒྱལ་བསྐྱེད་དེ། དཀྱིལ་འཁོར་གྱི་ས་ལ་སྔ་མ་བཞིན་སྒྲུལ་ལ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་བཅིངས་ཤིང་སྔགས་བརྗོད་ལ། དེའི་རྣལ་འབྱོར་དུ་བྱས་ཏེ། ནམ་མཁའ་ལ་མི་བསྐྱོད་པ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ང་རྒྱལ་བསྐྱེད་ཅིང༌། གྲོགས་པོ་རྣམས་ཀྱི་དཀྱིལ་འཁོར་བྲི་བའི་ཕྱིར་བདག་ཉིད་ལ་གསོལ་བ་གདབ་པར་བསམ་པར་བྱའོ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་པོ་མེད་པའི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་ནི་མཆོག་ལས་བྱུང༌། །ཡེ་ཤེས་སྤྱོད་པ་རྣམ་སྤྱོད་པ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་དུ་བཟང་པོ་ཐུགས་ཀྱི་མཆོག །དཀྱིལ་འཁོར་སྙིང་པོ་བཤད་དུ་གསོལ། །དེ་ནས་ལངས་ཏེ་དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་ཁྱབ་པར་མཐོང་སྟེ། འདི་སྐད་ཅེས་བརྗོད་པར་བྱའོ། །ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། ཞེས་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་འཚལ་ནས་ལངས་ལ་ང་རྒྱལ་བསྐྱེད་པར་བྱ། བདག་ནི་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བདག་ཡིན། །རྣལ་འབྱོར་དབང་ཕྱུག་རྒྱལ་པོ་བདག །ཕྱག་ན་རྡོ་རྗེ་བསྟན་བདག་སྟེ། །བདག་པོ་རྡོ་རྗེ་ཆེན་པོ་བདག །བྱིན་གྱིས་བརླབ་ཅིང་བཞུགས་སོ་གསོལ། །དེ་ནས་རྡོ་རྗེ་དྲིལ་བུ་བླངས་ལ། ཨོཾ་བཛྲ་ཨུ་ཏིཥྛ་ཞེས་
ཇི་ལྟར་སྤྲུལ་པའི་ལྷའི་དཀྱིལ་འཁོར་རྣམས་སྔ་མ་བཞིན་དུ་ནམ་མཁའ་ལ་བཞུགས་སུ་གསོལ་ལོ། །གཡས་བརྐྱང་བ་ལ་སོགས་པས་བགེགས་བསྐྲད་པར་བྱ་སྟེ། ས་གཞི་ཐམས་ཅད་རྡོ་རྗེའི་རང་བཞིན་དུ་གྱུར་པར་བསམས་ལ། གཞལ་ཡས་ཁང་ནམ་མཁའ་ལ་དམིགས་ལ། རྡོ་རྗེའི་མིག་གིས་ཕྱོགས་མཚམས་སུ་བགེགས་མེད་པར་མཐོང་ནས། སྒོ་དབྱེ་བའི་ཕྱག་རྒྱས་སྒོ་ཕྱེ་སྟེ། སྔགས་པས་གསང་བའི་དཀྱིལ་འཁོར་དུ་རྡོ་རྗེ་རྒྱུའི་གཟུགས་སུ། ལྟོ་བ་ཆེ་བ་དབུ་བཞི་པ། རྡོ་རྗེ་དང་འཁོར་ལོ། པདྨ་དང་དྲིལ་བུ་བསྣམས་པ། སྐུ་མདོག་སེར་པོར་བསྒོམས་ཏེ། སྔགས་འདི་དང་རྡོ་རྗེ་ལྕགས་ཀྱུའི་ཕྱག་རྒྱས་བཀུག་ལ། ཨོཾ་བཛྲ་མཎྜལ་ཧཱུཾ་ཛ། ཞེས་རྡོ་རྗེ་རྒྱུ་ཉིད་བསྒྱུར་བས་ཕྱག་རྒྱ་དང་སྔགས་འདིས་དཀྱིལ་འཁོར་གྱིས་གཞི་གྲུབ་པར་གྱུར་ཏེ། བྱིན་གྱིས་བརླབས་པ་བྱ། ཨོཾ་མ་ཧཱ་བཛྲ་ཙཀྲཱ་དྷི་ཏིཥྛ་སིདྡྷ་ཧཱུཾ། ཞེས་པ་རྡོ་རྗེ་ཁུ་ཚུར་གཉིས་བཅིངས་ཏེ། འཁོར་ལོ་བཞིན་དུ་བསྐོར་བར་བྱ། །མགལ་མེའི་འཁོར་ལོའི་ཚུལ་གྱིས་ནི། འཁོར་ལོ་བྱིན་གྱིས་བརླབ་པའི་ཕྱག་རྒྱ་འདིའོ། །དེ་ནས་མཐའ་ཡས་དང་རྣམ་པར་རྒྱལ་པ་ལ་སོགས་པ་སྔར་དམིགས་པའི་ཏིང་ངེ་འཛིན་གྱིས་ཕུར་བུ་གདབ། ཙནྡན་དམར་པོ་དང༌། དར་དང་སྐུའི་རྒྱན་དང་བཅས་པ། གཡོན་པའི་ཁུ་ཚུར་གྱིས་བཟུང་སྟེ། གཡས་པས་འབར་བའི་ཐོ་བ་ཙནྡན་དམར་པོ་དང༌། མེ་ཏོག་དམར་པོ་དང༌། དར་དང་སྲད་བུ་དང་བཅས་པའི་ཐོ་བ་བླངས་ཏེ། དཀྱིལ་འཁོར་གྱི་ཕྱི་རོལ་དབང་ལྡན་ནས་བརྩམས་ཏེ་བརྡུང་བར་བྱ། སྔར་བཤད་པའི་སྔགས་སམ། ཡང་ན་ཨོཾ་བཛྲ་ཀྲོ་དྷ་ཀཱི་ལི་ཀཱི་ལ་ཡ་སརྦ་བི་གྷྣྰཾ་ཧཱུཾ་ཧཱུཾ་ཕཊ། ཅེས་བྱ་བ་ནི་ཕུར་བ་གདབ་པའི་སྔགས་སོ། །ཨོཾ་བཛྲ་མུདྒ་ར་ཨཱ་ཀོ་ཊ་ཡ་ཧུཾ། ཐོ་བའི་སྔགས་སོ། །དེ་ནས་རྩེ་གསུམ་པའི་ཕྱག་རྒྱ་ཕྱོགས་བཅུར་བསྟན་ཅིང་བགེགས་བསྐྲད་པར་བྱ། ཨོཾ་ཨཱཿ་ཧཱུཾ། ཡི་གེ་གསུམ་གྱིས་དཀྱིལ་འཁོར་གྱི་ཕྱི་རོལ་དུ་འཁོར་ལོའི་རིམ་པ་དང༌། པདྨའི་རིམ་པ་དང༌། རྡོ་རྗེའི་རིམ་པར་བསམས་ལ། དེའི་ཕྱི་རོལ་དུ་རྡོ་རྗེ་དྲ་བ་དང༌། ས་གཞི་ཡང་རྡོ་རྗེའི་རང་བཞིན་དུ་བྱས་ལ། འབར་བའི་ཕྲེང་བའི་འོད་དང་བཅས་པ་བསྒོམས་ལ། བགེགས་བསྐྲད་ཅིང༌། རྣམ་པར་སྣང་མཛད་ཀྱི་སྔགས་དང༌། རྡོ་རྗེ་ཁུ་ཚུར་གྱིས་སྒོ་རྣམས་བཅིང་བར་བྱ། དེ་ན་
ཡི་གེ་ལཾ་ལས་བྱུང་བའི་སའི་ལྷ་མོ་སྐུ་མདོག་སེར་མོ་བུམ་པ་ལག་ན་ཐོགས་པ་རྒྱན་ཐམས་ཅད་དང་ལྡན་པ། རྡོ་རྗེ་ལྕགས་ཀྱུའི་ཕྱག་རྒྱས་སྤྱན་དྲངས་ཏེ། དགུག་བ་ལ་སོགས་པ་བྱ་ཞིང་ཚིགས་བཅད་འདིས་སྟ་གོན་དུ་བྱ། སྐྱོབ་པ་སངས་རྒྱས་ཐམས་ཅད་ཀྱི། སྤྱོད་པའི་ཚུལ་དང་ཁྱད་པར་ནི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ལས་ནི། །རྒྱལ་བར་བྱ་སྟེ་དཀྱིལ་འཁོར་བྲི། །ཞེས་ལན་གསུམ་བརྗོད་དོ། །མཆོད་པ་བྱས་ལ་སའི་ལྷ་མོ་དགའ་བའི་མདངས་ཀྱིས་དེ་བཞིན་དུ་གྱིས་ཤིག་ཅེས་བྱ་ཞིང་འོག་ཏུ་ཐིམ་པར་བྱའོ། །དེ་ནས་རྡོ་རྗེ་བཅིངས་པའི་ཕྱག་རྒྱ་དང༌། །སྔགས་འདིས་ས་གཞི་གཟུང་བར་བྱའོ། །ཨོཾ་བཛྲ་བྷ་ཧཱུཾ། ཞེས་བརྗོད་དེ། ཨོཾ་བཛྲ་དྷ་དྷ་ཨ་དྷི་ཏིཥྛ། ཞེས་པས་བྱིན་གྱིས་བརླབས། འདི་ནི་ས་གཞི་བྱིན་གྱིས་བརླབས་པའི་ཆོ་གའོ། །དེ་ནས་དྲི་བཟང་པོས་བྱུགས་ནས། མེ་ཏོག་སྣ་ཚོགས་ཀྱིས་ཆལ་མར་བཀྲམ་སྟེ། ཟླ་བ་ལ་སོགས་པས་ལྷ་རྣམས་ཇི་ལྟར་གནས་པའི་མིང་བརྗོད་དེ། མཎྜལ་རེ་རེ་བྱའོ། དེའི་འོག་ཏུ་རྣམ་པར་སྣང་མཛད་འཁོར་དང་བཅས་པ་སྤྱན་དྲངས་ཏེ། དྲྭ་བ་དང་ར་བ་ལ་སོགས་པས། མཚམས་བཅད་ནས་མཆོད་པ་དང༌། བསྟོད་པ་བྱས་ཏེ། དཀྱིལ་འཁོར་གྱི་དབུས་སུ་འདུག་ལ། ཇི་ལྟར་རང་གི་སྒྲུབ་ཐབས་ལས་འབྱུང་བ་བཞིན་དུ་བགེགས་བསལ་ནས་རྣལ་འབྱོར་ཆེན་པོ་བྱས་ཏེ། སེམས་དཔའི་སྐྱིལ་མོ་ཀྲུང་གིས་འདུག་ལ། རྣམ་པར་སྣང་མཛད་ཀྱི་སྐུར་བསྒྱུར་ནས། ང་རྒྱལ་བསྐྱེད་ཅིང་སེམས་དག་པར་བྱ་ཞིང༌། །དེང་དུས་བདག་ཚེ་འབྲས་བུ་ཡོད། །བདག་གི་བསོད་ནམས་འབྲས་བུར་བཅས། །ལྷ་དང་དམ་ཚིག་གི་མཉམ་པར། །གྱུར་པ་བདག་ནི་ཐེ་ཚོམ་མེད། །བྱང་ཆུབ་སེམས་དང་སེམས་གཅིག་ལས། །མི་བདོག་པར་ནི་ང་དག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གིས་ཆོས་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་ལུས་ཐམས་ཅད་ཀྱིས་ཕྱག་བྱས་ལ། སངས་རྒྱས་ཐམས་ཅད་ལ་གསོལ་
བ་གདབ་པར་བྱའོ། །མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །དེང་འདིར་སངས་རྒྱས་ཀུན་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཞེས་ལན་གསུམ་བརྗོད་དོ། །སྔ་མ་བཞིན་དུ་བསམས་ཏེ། དཀྱིལ་འཁོར་གྱི་སྟེང་དུ་ཨ་ལས་ཟླ་བའི་དཀྱིལ་འཁོར། ཨོཾ་ལ་སོགས་པ་རང་གི་ཡི་གེ་བཀོད་ལ། ལྷ་འཁོར་དང་བཅས་པ་སོ་སོའི་གནས་ལ་བཞུགས་པར་བསམ་མོ། །དེའི་འོག་ཏུ་ཡེ་ཤེས་སེམས་དཔའ་འཁོར་དང་བཅས་པ་དགུག་པ་དང༌། གཞུག་པ་དང་བཅིང་བ་དང་དབང་དུ་བྱས་ཏེ། དམ་ཚིག་སེམས་དཔའ་དང་གཅིག་ཏུ་གྱུར་པར་བྱའོ། །དེ་ནས་མཆོད་ཡོན་དང༌། ཞབས་བསིལ་དང༌། སོ་སོར་གནས་ལ་བཞུགས་སུ་གསོལ་ཏེ། ཨོཾ་བཻ་རོ་ཙ་ན། ཨརྒྷཾ་པྲཏཱིཙྪ་སྭཱ་ཧཱ། ཞེས་བྱ་བ་ལ་སོགས་པ་དཀྱིལ་འཁོར་ལ་མཆོད་པ་རྣམ་པ་ལྔ་ཕུལ་ལ། བསྟོད་པ་དང་ཕྱག་བྱའོ། །གསེར་རམ་དངུལ་ལམ་ཟངས་ལས་རྣམ་པར་རྒྱལ་བའི་བུམ་པ་བྱ། མ་འབྱོར་ན་ཁམ་པ་ལས་བྱ། དེ་ཉིད་དངོས་པོ་མེད་པར་བསམས་ལ། ཡི་གེ་བཾ་ལས་བྱུང་བ་ནག་པོ་ར་རི་མེད་པ། མགྲིན་པ་རིང་བ་ལྟ་བ་ཆེ་བ་མཆུ་འཕྱངས་པ་བསྒོམས་ཏེ། དེའི་ནང་དུ་དྷི་ལས་པདྨ་དེའི་སྟེང་དུ་ཨ་ལས་ཟླ་བའི་དཀྱིལ་འཁོར་མ་ལས་ཉི་མའི་དཀྱིལ་འཁོར། སྔ་མ་བཞིན་དུ་ལྷའི་འཁོར་ལོ་བསམས་ལ། དེ་རྣམ་པར་གྱུར་པ་ལས་བདུད་རྩིའི་ཆུས་གང་བར་བསྒོམས་ཏེ། དེ་ནས་དྲི་བླུགས་ལ། སྨན་ལ་སོགས་པ་དང་ལྡན་པར་བྱས་ཏེ། ཤྭེ་ཏ་བྲྀ་ཧ་ཏི་ཨ་པ་ར་ཛི་ཏ་དཎྜཱ་ཨུཏྤལ་ཀཎྜ་ཀ་རི་ཧ་ས་དེ་བ་ལ་སོགས་པའི་རྩ་བ་ལས་བྱས་ཏེ། འདི་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་ཀྱི་རྟགས་སུ་བྱས་པའོ། །ནས་སོ་བ་དང༌། སྲན་མ་ཤ་དང༌། ནས་དང༌། ཏིལ་དང༌། གྲོ་འདི་རྣམས་ནི་དེ་བཞིན་གཤེགས་པའི་ཐུགས་ཀྱི་རང་བཞིན་ནོ། །ཤེལ་དང༌། དངུལ་དང༌། མུ་ཏིག་དང༌། དུང་དང༌། བྱེ་རུ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་མདོག་གི་རྟགས་སོ། །ནང་གི་བུམ་པ་ལ་ནི་འདི་རྣམས་གཞུག་པར་བྱ་སྟེ། ཟླ་བ་དང་ཉི་མ་དང༌། ཆུ་དང་དྲི་དང་བཟའ་བ་རྣམས་སུ་གཞུག་གོ །བུམ་པ་ལ་
འཁོར་ལོའི་བདག་པོའི་མཚན་མ་ལ་སོགས་པ་ལྔ་དང་ལྡན་བར་བྱ་ཞིང་དཀར་བོ་དང༌། དམར་པོ་དང༌། སེར་པོ་དང༌། ལྗང་གུ་དང༌། སྔོན་པོའི་རིགས་རྣམས་ཀྱིས་མགུལ་པ་བཅིང་བར་བྱའོ། །མ་འབྱོར་ན་རས་ཅུང་ཟད་ཅིག་གིས་སྦྱིར་བྱའོ། །ཤིང་འོ་མ་ཅན་འབྲས་བུ་དང་བཅས་བ་ཁ་བརྒྱན་པར་བྱའོ། །གཙོ་བོའི་ཕྱག་རྒྱའམ་རྡོ་རྗེ་སེམས་མའི་ཕྱག་རྒྱ་བསྟན་ཅིང༌། གཙོ་བོའི་སྔགས་སྟོང་རྩ་བརྒྱད་དམ་བརྒྱ་རྩ་བརྒྱད་བཟླས་ལ་གཞག་པར་བྱའོ། །ཡང་ན་སྤྱིའི་སྔགས་འདི་བརྒྱ་རྩ་བརྒྱད་བཟླས་ལ་གཞག །ཨོཾ་བཛྲ་ཨུ་ཏ་ག་ཧཱུཾ། ཞེས་བྱ་བས་སོ། །དེ་ནས་བུམ་པའི་གཞི་མེ་ཏོག་དཀར་པོ་ཆལ་བར་བཀྲམ་པའམ། རས་བཏིང་པའི་སྟེང་དུ་གཞག་གོ །དེ་བཞིན་དུ་མཆོད་ཡོན་གྱི་སྣོད་གཉིས་ཆུ་དང་བཅས་པ་བཞག་ལ། དཀྱིལ་འཁོར་མཆོད་པའི་ཞག་གི་བར་དུ་ཉིན་རེ་ལན་གསུམ་དུ་ཕྱི་ནང་གི་མཆོད་པ་དང༌། ཏིང་ངེ་འཛིན་དང་བཟླས་པ་བྱའོ། །དེ་ནས་དཀྱིལ་འཁོར་མཆོད་པའི་དུས་སུ་དཀྱིལ་འཁོར་བསྐོར་ལ་དང་པོ་དབུས་སུ་གཞག །དེ་ནས་ལྷ་སོ་སོའི་གནས་སུ་གཞག་གོ །བུམ་པའི་གྲངས་ནི་དཀྱིལ་འཁོར་གྱི་ལྷ་དུ་ཡོད་པ་དེ་ཙམ་དུ་བྱའོ། །དེ་མ་འབྱོར་ན་བཅུ་ལས་ཉུང་བར་མི་བྱའོ་ཞེས་རྒྱུད་ལས་འབྱུང༌། སྨན་དང༌། འབྲུ་དང༌། རིན་པོ་ཆེ་དང་ལྡན་པ་རས་ཟུང་དང༌། མེ་ཏོག་གི་ཕྲེང་བ་དང༌། ཙནྡན་དང་གུར་ཀུམ་ལ་སོགས་པའི་དྲི་བཟང་པོས་བསྐུས་པའི་བུམ་པ། རང་གི་ལྷའི་མཚན་མ་དང་ལྡན་པའི་རིམ་བཞིན་དུ་གཞག་པར་བྱ། དེ་ནས་ལས་ཐམས་ཅད་པའི་བུམ་པ་ལ་བགེགས་བསྐྲད་པའི་སྔགས་བཟླ་ཞིང༌། སྣ་ཚོགས་རྡོ་རྗེས་མཚན་པ་ལ་མཆོད་པ་བྱ་སྟེ། ཕྱི་རོལ་དུ་བྱང་ཤར་མཚམས་སུ་གཞག་པར་བྱ་སྟེ། འདི་སྐད་གསོལ་བ་གདབ་པར་བྱ། ཁྱེད་ཀྱིས་དཀྱིལ་འཁོར་མ་རྫོགས་ཀྱི་བར་དུ། བགེགས་མ་རུངས་པ་རྣམས་བསྲུང་དུ་གསོལ་ཞེས་བྱ་བ་ནི་བུམ་པའི་སྟ་གོན་གྱི་ཆོ་གའོ། །ཕྱི་རོལ་དུ་སོང་སྟེ་རྣམ་པར་སྣང་མཛད་ཀྱི་རྣལ་འབྱོར་དུ་གནས་ལ། ཕྱོགས་སྐྱོང་ལ་གཏོར་མ་བཏང་སྟེ་ཞི་བའི་སྦྱིན་སྲེག་བྱའོ། །དཀྱིལ་འཁོར་གྱི་སར་ཞུགས་ཏེ་སྔ་མ་བཞིན་དུ་ཏིང་ངེ་འཛིན་ལ་གནས་ནས་འདི་སྐད་ཅེས་བརྗོད་པར་བྱའོ། །ཨོཾ་པདྨ་ས་ར་སྭ་དྭ་ཨ་བ་ར་ཏ་ཡ་ཤོ་དྷ་ཡ་ཧཱུཾ་ཧྲཱི་དྷི། ལྕེ་བྱིན་གྱིས་
བརླབས་པ་བྱས་ནས། ལག་པར་བདུག་སྤོས་ཐོགས་ཏེ། པུས་མོ་ས་ལ་བཙུགས་ནས་འདི་སྐད་གསོལ་བ་གདབ་པར་བྱའོ། །རྣམ་པར་སྣང་མཛད་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །བདག་ལ་བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང༌། །ཁྱེད་རྣམས་ལ་ཡང་བརྩེ་བའི་ཕྱིར། །ས་འདིར་དཀྱིལ་འཁོར་བྲི་བར་འཚལ། །བཅོམ་ལྡན་བདག་ནི་གུས་པ་ལ། །དེ་བས་སྣང་བ་མཛད་པའི་རིགས། །སངས་རྒྱས་འཇིག་རྟེན་མགོན་བརྩེ་དང༌། །བྱང་ཆུབ་སེམས་དཔའ་དགྲ་བཅོམ་དང༌། །གསང་སྔགས་ལྷ་གཞན་གང་ལགས་དང༌། །འཇིག་རྟེན་སྐྱོང་བའི་ལྷ་རྣམས་དང༌། །གང་ཡང་འབྱུང་པོ་མཐུ་ཆེན་དང༌། །གང་སུ་ལྷ་ཡི་སྤྱན་མངའ་པའི། །སེམས་ཅན་བསྟན་ལ་དགའ་བ་རྣམས། །བདག་མིང་འདི་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །སང་ནི་དཀྱིལ་འཁོར་བཟང་པོའི་མིང༌། །འདི་ཞེས་བགྱི་བ་ཅི་ནུས་ཀྱིས། །ཆོ་ག་བཞིན་དུ་བྲི་ལགས་ན། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་བརྗོད་དོ། །དེ་ནས་བསམ་པ་ཐག་པ་ནས། བསྟོད་པ་དང་ཕྱག་བྱས་ཏེ། ཕྱི་རོལ་དུ་བྱུང་ནས་སློབ་མ་སྟ་གོན་དུ་གནས་པར་བྱ་སྟེ། དེ་ནས་ལུས་བཀྲུ་བ་དང༌། དག་པ་དང་གོས་གཙང་མ་བགོས་ལ། སྙིམ་པ་མེ་ཏོག་གིས་བཀང་ལ། སློབ་དཔོན་ལ་ཕྱག་བྱས་ཏེ་གསོལ་བ་གདབ་པར་བྱའོ། །དགའ་ཆེན་ཁྱོད་བདག་སྟོན་པ་པས། སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱི། །འདི་སྐད་ཅེས་ལན་གསུམ་བརྗོད་དོ། །དེ་ནས་སློབ་དཔོན་གྱིས་མཚན་ཉིད་དང་ལྡན་པའི་སློབ་མ་བོས་ཏེ། འདི་སྐད་བརྗོད་པར་བྱའོ། །ཁྱོད་ནི་ཚུལ་ཆེན་སྣོད་ཡིན་གྱིས། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་གོ་ཆ་ནི། །ཁྱོད་ལ་ཡང་
དག་བསྟན་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་པ། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཞིང་བཞུགས་བ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པར་མཆན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །རྟོག་པ་མང་པོ་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དེ་ནས་ཆོ་ག་འདིས་སྡིག་བ་བཤགས་པ་ལ་སོགས་པ་བྱེད་དུ་གཞུག །བདག་གིས་སྡིག་པ་ཅི་བགྱིས་དང༌།། བགྱིད་དུ་སྩལ་ལ་ཡི་རང་བ། །སངས་རྒྱས་སྤྱན་སྔར་མཆིས་ནས་སུ། །དེ་དག་བདག་གིས་བཤགས་བར་བགྱི། །སངས་རྒྱས་བྱང་ཆུབ་སེམས་དཔའ་དང༌། །རང་རྒྱལ་དགྲ་བཅོམ་འགྲོ་རྣམས་ཀྱི། །བསྒོམ་དང་བཟླས་བརྗོད་བསོད་ནམས་ཀྱི། །དེ་དག་བདག་ནི་ཡི་རང་ངོ༌། །སེམས་བསྐྱེད་མངོན་པར་སངས་རྒྱས་དང༌། །ཆོས་ཀྱི་འཁོར་ལོ་བསྐོར་བ་དང༌། །བྱང་ཆུབ་སེམས་དཔའ་ཚོགས་སྤྱོད་དང༌། །དེ་ནས་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཇི་ལྟ་བར། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་སེམས་ནི་བསྐྱེད་པ་ལྟར། །དེ་རིང་ཉིད་དུ་སེམས་བསྐྱེད་དོ། །མགོན་པོ་བདག་ལ་དགོངས་སུ་གསོལ། །མ་ལུས་བཞུགས་པའི་སངས་རྒྱས་རྣམས། །དུས་འདི་ཉིད་ནས་འཚང་རྒྱའི་བར། །བླ་མེད་བདག་ལ་གཟིགས་སུ་གསོལ། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་སྡོམ་པ་ནི། །ཡང་དག་ཉིད་དུ་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །དམ་ཚིག་ཡིད་དུ་འོང་བ་ལ། །ཉིན་རེ་
ཞིང་ནི་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨ་རིགས་མཆོག་དག་བ་ལ། །ཕྱི་ནང་གསང་བའི་ཐིག་པ་གསུམ། །དམ་བའི་ཆོས་ཀྱང་མ་ལུས་གཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་བར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་བསྡུ་བ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །དེ་བཞིན་བརྟན་པོར་གཟུང་བར་བགྱི། །བདག་གི་དགེ་བའི་ཆོས་རྣམས་འདི་དག་གིས། །འཇིག་རྟེན་མི་རིང་སངས་རྒྱས་མྱུར་བསྒྲུབ་ནས། །སེམས་ཅན་འཁོར་བའི་རྒྱ་མཚོར་བྱིང་བ་རྣམས། །བླ་མེད་བྱང་ཆུབ་ཉིད་དུ་བསྒྲལ་བར་བགྱི། །ཞེས་ཞུས་པ། སློབ་དཔོན་གྱིས་སློབ་མ་ལ་བསྲུང་བ་བྱ་སྟེ། ཁྲོ་བོའི་སྔགས་ཀྱིས་ཚེམས་ཤིང་ལ་བཟླས་པ་བྱའོ། །སོ་ཤིང་ཆོ་ག་ནི་འདིའོ། །ཨུ་དུམྺཱ་ར་ཨ་ཤྭདྠ། མེ་ཏོག་བཅིངས་ཤིང་དྲི་ཡིས་བྱུག །སོར་ནི་བཅུ་གཉིས་ཚད་དུ་བྱ། །མ་ཡོ་མ་གས་འབུས་མ་ཟོས། །ལྕི་བས་པ་ཡི་ཀོ་བ་ཙམ། །ས་གཞི་མཎྜ་ལ་བྱས་ནས་ནི། །སློབ་མ་དེ་ཡི་སྟེང་བཞག་ནས། །མེ་ཏོག་ལ་སོགས་མཆོད་པ་བྱ། །སློབ་མའི་ཚོགས་ལ་སྦྱིན་བར་བྱ། །དེ་ནས་ཤར་ཕྱོགས་ཁ་བལྟས་ཏེ། །མི་སྨྲ་བར་ནི་སོ་ཤིང་བཅའ། །བཅའ་བ་ཟིན་ནས་མི་དགབ་ཤིང༌། །ཕན་ཚུན་དུ་ཡང་མི་དོར་རོ། །དེ་ཚེ་བདག་ལ་བལྟ་བ་དང༌། །རྩེ་མོ་གྱེན་དུ་འགྲེང་གྱུར་ན། །དེ་ནི་དངོས་གྲུབ་མཆོག་ཅེས་བྱ། །དེ་བཞིན་ཤར་དུ་ཁ་བལྟས་ན། །དེ་ཡིས་དངོས་གྲུབ་འབྲིང་དུ་བཤད། །མཚམས་དང་བྱང་དུ་ཁ་བལྟས་ན། །འཇིག་རྟེན་པ་ཡི་དངོས་གྲུབ་འགྲུབ། །སོ་ཤིང་བོར་པ་བརྒྱ་ཞིག་ལ། །གལ་ཏེ་ཐུར་དུ་ཁ་བལྟས་ན། །དེ་ནི་ངེས་པར་ས་འོག་གི །དངོས་གྲུབ་དེ་ལ་ཐེ་ཚོམ་མེད། །དེ་ནས་དྲིའི་ཆུས་ལག་པ་བཀྲུས་ཏེ། འཐོར་འཐུང་བྱའོ། །ཡང་ཨོཾ་ཧྲི་བི་ཤུདྡྷ་སྶརྦ་དྷརྨཱ་སྶརྦ་པཱ་པ་ནི་ཙསྱ་སཾ་ཤོ་དྷ་ཡ་སརྦ་བི་ཀལྤཱ་པ་ནཱ་ཡ་ཧཱུཾ། ཞེས་བྱ་བ་མངོན་པར་བཟླས་པའི་ཆུ་ཁྱོར་བ་གསུམ་འཐུང་དུ་གཞུག་པར་བྱ་བའི་ཕྱིར་སྦྱིན་པར་བྱའོ། །དེའི་འོག་ཏུ་སློབ་མ་རྣམས་ལ་སེམས་དགའ་བར་བྱ་བའི་ཕྱིར། ཆོས་བསྟན་པར་བྱའོ། །བར་འདིར་ཆོས་བསྟན་
པའི་ཆོ་ག་གཞན་དུ་ལྟོས། དེ་ནས་རྩ་བའི་སྔགས་ཀྱིས་ཀུ་ཤ་ལ་བཟླས་ལ། འོག་གི་ཕྱོགས་སུ་ཞོག་ཅེས་བསྒོ། །བགེགས་ཀྱི་དགྲའི་སྔགས་བཟླས་པ། །སྟན་དུ་ཡང་ནི་གདིང་བར་བྱ། །གྲངས་དྲུག་མདུད་དྲུག་བྱས་པ་ཡི། །སྲུང་སྐུད་དཔུང་པ་གཡོན་པར་གདགས།། ཡི་གེ་བརྒྱ་པས་བརྟན་བྱས་པ། །བསྲུང་བའི་ཕྱིར་ནི་གདགས་པར་བྱའོ། །དེ་ནས་བཞིན་བཟང་རྣམས་ལོངས་ཤིག །སང་གི་ཉིན་མོ་ཁྱེད་རྣམས་ཀྱིས། །ཐར་པ་ཆེན་པོའི་རང་བཞིན་གྱི། །གྲོང་ཁྱེར་ཆེན་པོ་མཐོང་འགྱུར་གྱིས། །དེ་ནས་སྔ་མ་བཞིན་དུ་མཆོད་པ་རྣམ་པ་ལྔ་བྱས་ནས། གཏོར་མ་བཏང་སྟེ་ནང་དུ་ཞུགས་ནས་དཀྱིལ་འཁོར་ལ་ཕྱི་ནང་གི་མཆོད་པས་ཡང་དག་པར་མཆོད་དེ། གནས་དེ་ཉིད་དུ་ཀུ་ཤའི་སྟན་ལ་སློབ་མ་དཀྱིལ་འཁོར་གྱི་འགྲམ་དུ་སེང་གེའི་ཉལ་སྟབས་སུ་འདུག་ལ། རྨི་ལམ་གྱི་མཚན་མ་བལྟ་བའི་ཕྱིར། མི་སྨྲ་བར་བསམ་པའི་སེམས་ཀྱིས་ཉལ་བར་བྱའོ།། དེ་ནང་པར་མཚན་མོའི་མཐར་རྨི་ལམ་གང་དང་གང་མཐོང་བ་དྲི་བར་བྱ། དྲི་བ་ཐོས་ནས་རྨི་ལམ་བཟང་ངན་འཛེམ་པ་མེད་པར་བསྟན་པར་བྱའོ། །རྨི་ལམ་སངས་རྒྱས་མཐོང་བ་ནི། །ཡོན་ཏན་རྒྱ་མཚོ་མངོན་སུམ་བཞིན། །ཞེས་བྱ་བ་ལ་སོགས་པ་སྨོས། རྨི་ལམ་བཟང་པོ་མཐོང་ན་སློབ་མ་ལ་རྗེས་སུ་ཡི་རང་བ་དང༌། དངོས་གྲུབ་རབ་འབྲིང་ཐ་མ་བསྟན་པར་བྱའོ། །ངན་བ་མཐོང་ན་བའི་རྣམ་པ་ལྔ་ལ་ཁྲོ་བོའི་སྔགས་བཟླས་ཏེ། འཐུང་དུ་གཞུག་ཅིང་བསྲུང་བ་བྱ། འགྲུབ་ན་དྲག་པོའི་སྦྱིན་སྲེག་ཀྱང་བྱ་ཞིང་རྟོག་པ་བསལ་བར་བྱའོ། །དེ་ནས་སློབ་དཔོན་ཕྱག་རྒྱ་ཆེན་པོ་དང་ལྡན་པར་བྱས་ཏེ། སྔ་མ་བཞིན་དུ་ཕུར་བུ་དང་དྲ་བ་དང་རབ་དང་ཕྱོགས་བཅིང་བར་བྱའོ། །ཡི་གེ་གསུམ་ལས་རི་རབ་བསྐྱེད། དེའི་སྟེང་དུ་བདག་ཉིད་རྣམ་པར་སྣང་མཛད་དུ་བསྒོམས་ཏེ། དེ་ལས་སྤྲུལ་པ་བྱུང་བས་སྲད་བུ་འཛིན་པར་བསམས་ལ། ངེས་པར་དཀྱིལ་འཁོར་བྱ་བ་ནི། །སུ་ཞིག་གིས་ནི་བྱ་བར་ནུས། །ལྷ་ཡི་རྣལ་འབྱོར་རང་གནས་ན། །དཀྱིལ་འཁོར་འགྲུབ་པར་འགྱུར་བ་ཡིན། །ཞེས་རྒྱུད་ལས་འབྱུང་བ་ཡིན་ནོ། །དེ་ནས་ལས་ཐམས་ཅད་པའི་བུམ་པ་བསང་གཏོར་བྱ་བའི་ཕྱིར་བཞག་སྟེ། དཀྱིལ་འཁོར་ཐིག་གདབ་པར་བྱའོ། །གླུ་དང་རོལ་མོ་མེ་ཏོག་
ལ་སོགས་པ། །མཆོད་པ་རང་བཞིན་གྱི་དཀྱིལ་འཁོར་ལ་བྱའོ། །དེའི་འོག་ཏུ་སྲད་བུ་སོ་སོར་བྱས་ཏེ། དཀར་པོ་དང་སེར་པོ་དང༌། སྔོན་པོ་དང་དམར་པོ་དང༌། ལྗང་གུ་རྣམས་ལ། ཨོཾ་ཧཱུཾ་ཏྲཱཾ་ཧྲཱིཿ་ཁཾ། ཞེས་བྱ་བའི་ཡི་གེ་འབྲུ་ལྔ་བཟླས་ལ། རྣམ་པར་སྣང་མཛད་ལ་སོགས་པ་བསྒོམས་ཏེ། མིག་གཡས་གཡོན་ལ་ཉི་མ་དང་ཟླ་བ་བསམས་ཏེ། ཨོཾ་དི་བ་དྷྲ་རིཥྛ་ཨོཾ་ཀུ་ཛཿ། ཞེས་བཟླས་ལ། ལྕགས་ཀྱུ་འདྲ་བའི་འོད་ཟེར་གྱི་སྤྲིན་འབྱུང་བས། རྣམ་པར་སྣང་མཛད་ལ་སོགས་པ་བསྐུལ་ཏེ། ཡེ་ཤེས་ཀྱི་སྤྱན་གྱིས་གཟིགས་ནས། འདི་སྐད་ཅེས་གསོལ་བ་གདབ་པར་བྱའོ་ཞེས་བཅོམ་ལྡན་འདས་ཀྱིས་དཀྱིལ་འཁོར་ཐིག་གདབ་པའི་རྡོ་རྗེ་སྲད་བུ་སྩལ་དུ་གསོལ། དེ་ནས་ཡེ་ཤེས་ཀྱི་སྤྱན་གྱིས་གཟིགས་ནས། རྣམ་པར་སྣང་མཛད་ལ་སོགས་པའི་ཐུགས་ནས་ཕྱུང་སྟེ། ལྕགས་ཀྱུས་བསྐུལ་བའི་ཚུལ་དུ། རང་གི་ལག་ཏུ་འོང་བར་བསམས་ཏེ། རྣམ་བར་སྣང་མཛད་མདུན་དུ་དམིགས་ལ། ཨོཾ་ཛི་ན་ཛི་ཀ་སྭཱ་ཧཱ། ཞེས་བརྗོད་ལ་བསྒྲིལ་བར་བྱའོ། །དེ་ནས་ཙནྡན་བཟང་པོ་ལ་སོགས་པས། ལེགས་པར་བསྐུས་པའི་གསེར་གྱི་སྣོད་ལ་སོགས་པའི་ནང་དུ་ལེགས་པར་བཞག་ལ། མེ་ཏོག་ལ་སོགས་པས་མཆོད་དེ། རྡོ་རྗེའི་མིག་བྱས་ལ། རྡོ་རྗེ་ཁུ་ཚུར་གྱིས་སྲད་བུ་བཟུང་ལ། ཨོཾ་བཛྲ་བེ་ཡ་མ་སཱུ་ཏྲཾ་མཱ་ཏི་ཀྲ་མ་ཧཱུཾ། ཞེས་བརྒྱ་རྩ་བརྒྱད་བཟླ་བར་བྱའོ། །ཨོཾ་ཨོཾ་ཧཱུཾ། ཞེས་བརྒྱ་རྩ་བརྒྱད་བཟླ་པར་བྱའོ། །ཡང་དཀྱིལ་འཁོར་དྲི་བཟང་པོས་བྱུགས་ཏེ། ཕྱི་རོལ་འཁོར་བར་མེ་ཏོག་བཀྲམ་ནས་ནམ་མཁའ་ན་བཞུགས་པའི་དཀྱིལ་འཁོར་གྱི་ལྷ་ཐམས་ཅད་ལ་མཆོད་ཡོན་ཕུལ་ཏེ། མེ་ཏོག་ལ་སོགས་པ་མཆོད་པ་རྣམ་པ་ལྔ་དབུལ། སྒེག་མོ་ལ་སོགས་པ་ཕྱི་ནང་གི་མཆོད་པས་ཀྱང་མཆོད། གླུ་དང་རོལ་མོ་སོགས་པ་ཅི་ནུས་ཀྱིས་མཆོད་ནས། སྔགས་པ་རང་ཉིད་ཀྱིས་དཀྱིལ་འཁོར་གྱི་ཐིག་གདབ་པར་བྱའོ།། དེ་ལ་རིམ་པ་ནི་འདི་ཡིན་ཏེ། བདག་ཉིད་རྣམ་པར་སྣང་མཛད་རྣལ་འབྱོར་དུ་བྱས་ཏེ། ཨོཾ་ཛི་ན་ཛིཀ །ཅེས་བྱ་བའི་སྙིང་པོ་ཅི་ནུས་སུ་བརྗོད་ནས། རྣམ་པར་སྣང་མཛད་དུ་གྱུར་པའི་སྙིང་ག་ལས། གྲོགས་པོ་སྤྲུལ་ནས་བྱིན་གྱིས་བརླབས་པ་དང་དབང་བསྐུར་བ་བྱ་སྟེ། མདུན་དུ་
བལྟ་བར་བྱས་ནས་ཕན་ཚུན་རྡོ་རྗེ་ཁུ་ཚུར་གཉིས་བཅིངས་ལ། དཀྱིལ་འཁོར་གྱི་ཉིས་འགྱུར་གྱི་ཚད་སྦོམས་སུ་སྒོའི་ཉི་ཤུའི་ཆའི་སྲད་བུ་རྡོ་རྗེ་ཁུ་ཚུར་གཡོན་པས་བཟུང་ལ། ཕྱོགས་ཐམས་ཅད་མཉམ་པར་དམིགས་ཤིང༌། ཨོཾ་ཛ་ཛ་ཛ། ཞེས་བྱ་བ་གསུམ་བརྗོད་ལ་ལག་པ་གཡས་པས་བླངས་ཏེ། གྲོགས་པོའི་ལག་ཏུ་གཏད་པར་བྱའོ། །གྲོགས་པོས་རྐང་པ་མདུན་དུ་བསྣུར་ནས། གཡོན་པའི་རྡོ་རྗེ་ཁུ་ཚུར་གྱིས་ཛ་ཛ་ཛ་གསུམ་བརྗོད་ནས་བླངས་ཏེ། སློབ་དཔོན་ནུབ་ཏུ་འདུག་ལ་ཁ་ཤར་དུ་བལྟ་བ་དང༌། དེ་བཞིན་དུ་ལྷོར་འདུག་ལ་བྱང་དུ་བལྟས་ལ་གནམ་ཐིག་གདབ་བར་བྱའོ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། ཞེས་གཉིས་ཀས་བརྗོད་པར་བྱའོ། །སྔ་མ་ཇི་ལྟ་བ་བཞིན་དུ་མཚུངས་པའི་ཐིག་ཀྱང་དེ་བཞིན་དུ་གདབ་བར་བྱའོ། །སློབ་དཔོན་དང་སློབ་མ་གཉིས་གཡས་སུ་བསྐོར་བར་བྱའོ། །དེ་ནས་མེའི་ཕྱོགས་སུ་འདུག་ལ་བྱང་དུ་མངོན་པར་ཕྱོགས་པར་བྱས་ནས། ཕྱིའི་དཀྱིལ་འཁོར་གྱི་ཤར་ངོས་ཀྱི་ཐིག་གདབ་པར་བྱའོ། །རླུང་གི་ཕྱོགས་སུ་གནས་ནས་ལྷོར་མངོན་པར་ཕྱོགས་ཏེ་ནུབ་ཏུ་ཐིག་གདབ་བོ། །དེ་བཞིན་དུ་འདུག་ལ་ཤར་དུ་ཕྱོགས་ཏེ་བྱང་གི་ཐིག་གདབ་བོ། །ཡང་མེའི་ཕྱོགས་ཆར་འདུག་ལ། ནུབ་ཏུ་མངོན་པར་ཕྱོགས་ལ་ལྷོའི་ངོས་སུ་ཐིག་གདབ་གོ །དེ་བཞིན་དུ་འདུག་ལ་རླུང་ཕྱོགས་སུ་བྲི་བར་བྱའོ། །ཡང་བདེན་བྲལ་གྱི་ཕྱོགས་སུ་འདུག་ལ། དབང་ལྡན་གྱི་མཚམས་སུ་སྲད་བུ་བྲེ་བར་བྱ་སྟེ། ཆ་བཞིར་བགོས་ཏེ་ཕྱེད་ནི་ནང་གི །ཕྱེད་ནི་ཕྱིའི་ས། རིམ་པ་འདི་བཞིན་དུ་དཀྱིལ་འཁོར་ཐམས་ཅད་ལ་ཐིག་གདབ་པར་བྱའོ། །ཐིག་སྐུད་ཆད་ན་བླ་མ་འཆི། །རིང་ཐུང་ཁྱེར་ན་ན་བར་འགྱུར། །ཕྱོགས་འཁྲུལ་སློབ་མ་མྱོས་པར་འགྱུར། །དེས་ན་ནན་ཏན་ཐམས་ཅད་དུ། །ཐིག་སྐུད་ལས་ནི་འབད་པར་བྱ། །དེ་བཞིན་དུ་ཐིག་གདབ་པར་བྱ་སྟེ། ཡེ་ཤེས་ཀྱི་ཐིག་སྐུད་ཀྱང་སྔ་མ་བཞིན་དུ་མཆོད་དེ། གཤེགས་སུ་གསོལ་བར་བྱའོ། །དེ་ནས་སྔ་མ་ཡེ་ཤེས་ཀྱི་སྐུད་པ་ལ་ཡིག་འབྲུ་ཇི་ལྟར་བཀོད་པ་བཞིན་དུ། འདིར་ཚོན་ལ་ཡང་དགོད་པར་བྱ་སྟེ། དེ་ནས་དཀྱིལ་འཁོར་བྲི་བ་ནི། །ལྕགས་ནི་སྣ་ལྔའི་ཕྱེ་མ་སྟེ། །མཁས་པས་དཀར་པོ་ལ་སོགས་པའོ། །དད་ཅིང་
ཡོན་ཏན་ལྡན་པ་ཡི། །སློབ་མས་རིན་ཆེན་ཕྱེ་མས་བྲི། །རིན་ཆེན་ལྕགས་རྣམས་མ་འབྱོར་ན། །སཱ་ལུ་བཏགས་པའི་ཕྱེ་མས་བྲི། །ཚོན་རྩི་ཞིབ་མོས་སྔར་བཤད་པ། །འབྱུང་ཁུངས་ལས་བྱུང་ཕྱེ་མས་བྱ། །རྡོ་རྗེའི་མཁས་ནི་སྣ་ཚོགས་ཀྱང༌། །ཕྱེ་མའི་གོར་ནི་སྦྱར་བར་བྱ། །དེ་ལྟར་རྣམ་པ་བཞི་པོ་ནི། །ཕྱེ་མའི་རྒྱུར་ནི་གྲགས་པ་ཡིན། །ལྕགས་རྣམས་ཀུན་དང་རིན་ཆེན་དང༌། །འབྱུང་ཁུངས་རྣམས་དང་འབྲས་བཏགས་པ། །དཀྱིལ་འཁོར་ཀུན་གྱི་ལས་རྣམས་ལ། །ཕྱེ་མ་དོན་དུ་སྦྱར་བར་བྱ། དམ་ཚིག་ལ་ནི་ལྕགས་ཀྱི་ཤིང༌། །རིན་ཆེན་ལས་བྱུང་དབང་བསྐུར་ལ། །སཱ་ལུ་ཕྱེ་མ་ཞི་བ་ལ། །ཁམས་ལས་བྱུང་བ་རྒྱས་པ་ལ། །དྲག་ཤུལ་སྤྱོད་པ་ཁྱད་པར་དུ། །ཐལ་བ་ལ་སོགས་བྱ་བར་ཤིས། །ཕྱེ་མ་རྣམས་ཀྱི་བྱེ་བྲག་གི །ཆོ་གའི་རིམ་པ་བསྟན་པ་འདིའོ། །ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་བྱ་བའི་སྔགས་འདིས་ལན་བདུན་བདུན་བཟླས་ཏེ། དེ་ནས་ཚོན་རྩི་ཐམས་ཅད་ལ། འབར་བའི་མིག་གིས་བལྟ་བར་བྱའོ། །དེ་ལ་འབར་བའི་མིག་གིས་བལྟ་བ་ནི་འདི་ཡིན་ཏེ། རབ་ཏུ་མྱུར་བར་གཡོ་བའི་མིག །མིག་གི་རྗེ་མ་འདྲེན་པ་ནི། །འབར་བའི་ལྟ་བ་ཞེས་སུ་གསུངས། །འགྲོ་བ་ཐམས་ཅད་འགུགས་པའོ། །མཐར་ཡི་གེ་ཧྲི་དང་རྡོ་རྗེ་པདྨའི་ཕྱག་རྒྱས་སྤང་བར་བྱའོ། །དེ་ནས་ཚོན་བཟང་པོ་བྱ་བའི་ཕྱིར་བདེན་པའི་བྱིན་གྱི་རླབས་བྱའོ། །བདེན་པ་གང་གིས་སེམས་ཅན་རྣམས་ལ་སངས་རྒྱས་རྣམས་སེམས་ཅན་དུ་དཔག་པས། ཆགས་པ་མཛད་པའི་བདེན་པ་དེ་ཚོན་རྩི་རྣམས་འབར་བར་གྱུར་ཅིག་ཅེས་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་སྔགས་བརྒྱ་རྩ་བརྒྱད་བཟླས་ཏེ། དེའི་འོག་ཏུ་རྡོ་རྗེ་དྲིལ་བུ་བླངས་ཏེ། དཀྲོལ་ཞིང་བཀྲ་ཤིས་ཀྱི་དབྱངས་རྣམས་བརྗོད། དེ་ནས་བཀྲ་ཤིས་ཀྱི་འདས་པའི་བསམ་པ་བཏང་ལ། འགྲོ་བའི་དོན་ལ་དམིགས་ཏེ། ཨོཾ་བཛྲ་ཙི་ཏྲ་ཞེས་བྱ་བའི་སྔགས་ཟློས་ཤིང༌། རྡོ་རྗེ་ཁུ་ཚུར་གཡོན་པས། ཚོན་བླངས་ལ་དབང་ལྡན་གྱི་མཚམས་ནས་གཡས་སུ་བསྐོར་ཏེ། ཚོན་དགྱེ་བར་བྱའོ། །དེ་ནས་ཕྱིས་ཅི་བདེ་བར་བྱའོ། །ཚོན་དགྱེ་བ་ཡང༌། མཉམ་དང་མ་འདྲེས་མ་ཡོ་བ། །བར་མ་ཆད་དང་གཡོན་མི་བསྐོར། སྦོམས་སུ་སྒོ་ཡི་ཉི་ཤུའི་ཚད། །རེ་ཁཱའི་རྣམས་
ཀྱང་དེ་ཙམ་བྱ། སྦོམས་ན་ནད་རྣམས་འབྱུང་བར་འགྱུར། །ཕྲས་ན་ཡང་ནི་ནོར་ཟད་འགྱུར། །སྤྲོ་བར་གྱུར་ན་མཛའ་བཤེས་འབྲལ། །བར་དུ་ཆད་ན་མཁན་སློབ་འཆི། །གཡོན་དུ་བསྐོར་ན་སྡུག་བསྔལ་འབབ། །དེ་བས་ཚོན་རྩི་ནན་ཏན་བྱ། །སྔོན་པོ་རྡོ་རྗེའི་རང་བཞིན་ཏེ། །གཉིས་པ་གསེར་ལ་དམིགས་པ་དང༌། །པདྨ་རཱ་གའི་རང་བཞིན་གཞན། །གཞན་ངག་མར་གད་ལྟ་བུར་བཤད། །དཀར་པོ་ནང་དུ་ཤེས་བྱ་སྟེ། །འདི་ནི་ཚོན་གྱི་རིམ་པར་འདོད། །ཤར་ཕྱོགས་སུ་ནི་སྔོན་པོ་ཆེ། །ལྷོར་ནི་སེར་པོ་ལེགས་སྦྱར་བ། །ནུབ་ཀྱི་ཆ་ནི་དམར་པོ་སྟེ། །བྱང་གི་ལྗང་གུ་ཡང་དག་ལྡན། །དབུས་ཀྱི་ས་ཡི་ཆ་ཉིད་ནི། །ཤེལ་ལྟར་སྣང་བ་བླ་ན་མེད། །རྡོ་རྗེ་དྲིལ་བུ་རྟག་འཆང་བ། །ཤིན་ཏུ་མཉམ་གཞག་ལེགས་པར་བྲི། །གསང་སྔགས་དེ་ཉིད་ཡོངས་ཟློས་ཤིང༌། །ཚོན་གྱིས་ཐིག་ནི་ཡོངས་སུ་དགང༌། །འདི་ལྟར་བྱ་བ་ནི་དཀྱིལ་འཁོར་གྱི་ཚོན་སྤྱིའི་རིམ་པའོ།། །།ཡང་གཞན་དུ་ན་དཀྱིལ་འཁོར་སྒོ་གཉིས་པའམ། གསུམ་པ་ཕྱན་རྡོ་རྗེ་ཤུགས་ཀྱི་སྔགས་ཟློས་ཤིང༌། དཀྱིལ་འཁོར་རྣམས་ནམ་མཁའ་ལ་འདེགས་ཤིང་བཞག་པར་བསམས་ལ། འཇུག་ཅིང་འབྱུང་བ་ལ་སྔགས་ནི་འདི། ཨོཾ་བཛྲ་བེ་ག་ཨ་ཀྲ་མ་ཧཱུཾ། ཞེས་བརྗོད་པར་བྱའོ། །དེ་ནས་དཀྱིལ་འཁོར་བྲིས་ཟིན་ནས་བགེགས་ཞི་བར་བྱ་བའི་ཕྱིར། ཁྲོ་བོའི་སྦྱོར་བ་བྱས་ལ། བགེགས་རྣམས་བསྐྲད་པ་དང་བསྲུང་བ་བྱའོ། །རྡོ་རྗེ་ལྕགས་ཀྱུ་ལ་སོགས་པའི་སྔགས་དང་ཕྱག་རྒྱས་བཀུག་ལ་བགེགས་བསྐྲད་རང་གི་སྙིང་གའི་རྡོ་རྗེའི་དབུས་སུ་ལྷའི་འཁོར་ལོ་བཞུགས་པར་བསམ་ཞིང༌། ཨོཾ་ཨེ་ཧྱེ་ཧི་བྷ་ག་བཱ་ན་མ་ཧཱ་ཀ་རུ་ཎི་ཀ་དྲྀ་ཤྱ་ཧོ་ས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ། ཞེས་བརྗོད་དོ། །འཁོར་ལོ་རིམ་བཞིན་བསྒོམས་པ་བཞིན་དུ། ཕྱག་མཚན་དང༌། སྐུ་མདོག་དང་གོས་དང་རྒྱན་དང་ལྡན་པ་བཅུག་ཅིང༌། མེ་ཏོག་ལ་སོགས་པས་མཆོད། ལྷའི་སྔགས་རེ་རེ་བཟླས། གཙོ་བོའི་སྔགས་ལན་བདུན་བཟླས་ཏེ། དེ་ནས་བྱིན་གྱིས་བརླབ་པ་དང་དབང་བསྐུར་བ་བྱ་སྟེ། སྙིང་ག་ལས་ཕྱུང་ལ་ནམ་མཁའ་ལ་བཞུགས་སུ་གསོལ་ལོ། །ཡང་རྣམ་པ་གཞན་དུ་ན་སྙིང་གར་བཞག་སྟེ། རྣམ་པར་སྣང་མཛད་ཀྱི་རྣལ་འབྱོར་དུ་བྱས་ལ། མེ་
ཏོག་གི་ཕྲེང་བ་བླངས་ཏེ། ཨོཾ་ཨཱཿ་ཧཱུཾ་ཞེས་བཟླས་ཞིང༌། དཀྱིལ་འཁོར་གྱི་གནས་ཉིད་དུ། གཡས་གཡོན་ཉེས་པ་ཞི་བར་བྱ་བའི་ཕྱིར། ཁྲོ་བོའི་ལྟ་བས་བལྟ་ཞིང༌། དྲིལ་བུ་དཀྲོལ་ལ་ལན་བདུན་བསྐོར་ཏེ། བཅོམ་ལྡན་འདས་ལ་ཕྲེང་བ་དབུལ་བར་བྱའོ། །རྡོ་རྗེ་གར་བྱ་ཞིང་བསྐོར་ནས་སླར་ཕྲེང་བ་བླངས་ཏེ། རང་གི་མགོ་ལ་བཅིང་བར་བྱའོ། །དེའི་འོག་ཏུ་རྡོ་རྗེ་སློབ་དཔོན་མཉམ་པར་བཞག་པས། ཤར་དང་ལྷོ་དང་ནུབ་དང་བྱང་དུ་ཁ་བལྟས་ལ་ཡིད་ཀྱིས་འཁོར་ལོའི་སྒོ་དབྱེ་བར་བྱ་སྟེ། དེའི་སྔགས་དང་ཕྱག་རྒྱ་ནི་འདི་ཡིན་ནོ། །རྡོ་རྗེ་མཛུབ་མོ་ལེགས་པར་ནི། །སྦྱར་ལ་བསྡམས་ཏེ་བཀན་ནས་སུ། །རབ་ཏུ་ཁྲོས་ནས་དབྱེ་བ་ནི། །སྒོ་དབྱེ་བའི་ཕྱོགས་ཡིན་ནོ། །ཨོཾ་བཛྲ་ཨུ་ཏ་གྷ་ཊ་ཡ་ས་མ་ཡ་པྲ་ཝེ་ཤ་ཡ་ཧཱུཾ། འདི་ནི་སྒོ་དབྱེ་བའི་ཆོ་གའོ། །དེ་ནས་རང་གི་ལུས་གཟུགས་བརྙན་གྱི་རྣལ་འབྱོར་བྱས་ལ། དེ་བཞིན་གཤེགས་པ་ཐམས་ཅད་དགུག་པ་དང༌། གཞུག་པ་དང་བཅིང་བ་དང༌། དབང་དུ་བྱས་ལ་བསྒྲུབ་པར་བྱ་སྟེ། དེའི་རིམ་པ་ནི་འདིའོ། །དབང་པོར་རྣམ་པར་སྣང་མཛད་ཀྱི་རྣལ་འབྱོར་དུ་བྱས་ལ། ཨོཾ་ཛི་ན་ཛི་ཀ་ཨཱ་ཀཪྵ་ཡ་ཛཿ། ཞེས་བྱ་བས་དགུག་ཅིང༌། སངས་རྒྱས་ཀྱི་འཇིག་རྟེན་གྱི་ཁམས་ཐམས་ཅད་ན། དཔལ་རྣམ་པར་སྣང་མཛད་ལ་སོགས་པ་འཁོར་དང་བཅས་པ་དགྱེས་ཤིང་ནམ་མཁའ་ཁྱབ་པར་བསམས་ཏེ། རང་རང་གི་རྫུ་འཕྲུལ་གྱིས་རྡོ་རྗེ་འཆང་ཆེན་པོ་ལ་སོགས་པའི་དངོས་གྲུབ་ཐོབ་པར་བྱ་ཞིང༌། རང་རང་གི་གནས་སུ་གཞུག་པར་བྱའོ། །དེ་བཞིན་གཤེགས་པ་ཐམས་ཅད་དགྱེས་པ་དང་བརྟན་པར་འགྱུར་རོ། །རང་དང་རྣམ་པར་སྣང་མཛད་དང་གཉིས་སུ་མེད་དེ་གྲོགས་ལྟར་གྱུར། དེ་ལྟར་སྒོ་ལ་སོགས་པ་ལ་ཛཿ་ཧཱུཾ་བཾ་ཧོཿ། ཞེས་བྱ་བས་དགུག་ཅིང༌། སྒོ་བ་རྣམས་བཞུགས་སུ་གསོལ་ལོ། །དེ་ལྟར་རྣམ་པར་སྣང་མཛད་དང་གཉིས་སུ་མེད་པར་རྣལ་འབྱོར་དུ་བྱས་ཏེ། རང་གི་སྙིང་ག་ནས་འོད་ཟེར་བྱུང་བས་དཀྱིལ་འཁོར་གྱི་འཁོར་ལོ་གསལ་བར་བྱ་སྟེ། སྔར་གྱི་སྙིང་གའི་ལྷ་དང་དཀྱིལ་འཁོར་གྱི་ལྷ་སོ་སོར་ཐིམ་པར་བྱའོ། །དེའི་འོག་ཏུ་གཙོ་བོའི་སྙིང་བོ་བརྒྱ་རྩ་བཟླ་བར་བྱའོ། །འཁོར་རྣམས་ཀྱི་བདུན་བདུན་ནོ། །སྔ་མ་བཞིན་དམ་པས་
ཕྱག་རྒྱ་བཞིས་གདབ་པར་བྱ་སྟེ། དེ་ཙམ་གྱིས་དཀྱིལ་འཁོར་འགྲུབ་བོ། །དེ་ནས་གཙོ་བོའི་སྙིང་པོ་བཟླ་ཞིང༌། དཀྱིལ་འཁོར་ལས་འོད་ཟེར་འཕྲོས་པས་སེམས་ཅན་གྱི་དོན་བྱས་ཏེ། སླར་ལོག་པར་རང་གི་གནས་ལ་བཞུགས་པར་བསྒོམས་ཏེ། ཨོཾ་བཾ་དྷ་བཛྲ་བ་ཏི་ཏིཥྛ། ཞེས་རྡོ་རྗེ་བཅིངས་བ་བསྡམས་ཏེ། ཨོཾ་བཛྲ་མུཥྚི་བཾ། ཞེས་བྱ་བས་བརྟན་པར་བྱའོ། །དེ་ནས་མཆོད་ཡོན་ལ་སོགས་པ་རྣམས་ཀྱིས་མཆོད་པར་བྱའོ། །དེ་ནས་སྔ་མ་བཞིན་དུ་རྣམ་པར་རྒྱལ་བའི་བུམ་པ་ལ་སྔགས་བཟླས། རྡོ་རྗེ་སེམས་མའི་ཕྱག་རྒྱའམ། གཙོ་བོའི་ཕྱག་རྒྱ་བྱ་སྟེ། མེ་ཏོག་གི་ཕྲེང་བ་བླངས་ཏེ། སྔགས་འདིས་ལན་ཉི་ཤུ་རྩ་གཅིག་བཟླས་ནས། རྣམ་པར་རྒྱལ་བའི་བུམ་པ་མདུན་དུ་བཞག་སྟེ། ཕྲེང་བ་བཅིང་བར་བྱའོ། །སྔགས་ནི་ཨོཾ་མ་ཧཱ་སུ་ཁ་བཛྲ་ཨོཾ་ཨ་མོ་གྷ་ས་མ་ཡོ་ད་ཀ་སིདྡྷི་ཨ་བྷི་ཥིཉྩ་སརྦ་མུ་ཁ་སཽ་མ་ན་སྱཾ་ད་ད་ཀུ་རུ་ཀུ་རུ་ཛཿ་ཧཱུཾ་བཾ་ཧོཿ། ཞེས་བྱ་བས་བུམ་པ་གནས་སུ་གཞག་པར་བྱ། བུམ་པ་ཕྱི་མ་རྣམས་ལ་ཡང་རང་གི་མཚན་མ་བཏབ་ལ། སྤྱིའི་སྔགས་འདི་ལན་བདུན་བདུན་བཟླས་ཏེ། སྔགས་ནི་འདི་ཡིན་ནོ། །ཨོཾ་བཛྲོད་ཀ་ཧཱུཾ། ཞེས་བྱའོ། །སོ་སོའི་སྔགས་ཀྱིས་བཏབ་སྟེ། རང་རང་གི་གནས་སུ་གཞག་བར་བྱའོ། །དེ་ནས་མཆོད་ཡོན་ལ་སོགས་པ་མཆོད་པ་རྣམ་པ་ལྔ་བྱ། ཨོཾ་བཻ་རོ་ཙ་ན་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་བྱ་བ་དང༌། སོ་སོའི་སྔགས་ལྔ་དང་མཆོད་པ་དབུལ། དེ་ནས་སྙིང་ག་ནས་འོད་ཟེར་ཕྱུང་སྟེ། ལཱ་སྱེ་ལ་སོགས་པ་བཅུ་དྲུག་བསྐུལ་ནས་དཀྱིལ་འཁོར་ལ་མཆོད་པར་བསམ་མོ། །སྤྱིའི་ལྷ་མོའི་སྔགས་ནི་འདི་ཡིན་ཏེ། ཨོཾ་སརྦ་ཏ་ཐཱ་ག་ཏ་མ་ཧཱ་ཧཱ་ས་ལ་སྱ་ར་ཏི་ཀྲི་ཌི་སཽ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་བྱ་བ་བརྗོད་དེ། དེ་ནས་ལས་ཐམས་ཅད་པའི་བུམ་པའི་ཆུས་གནས་ཐམས་ཅད་བསང་གཏོར་བྱ། དེ་ནས་ལྷ་བཤོས་དང། ཁུར་བ་སྣ་ཚོགས་དང༌། འབྲས་ཆན་དང༌། བཏུང་བའི་བྱེ་བྲག་ལ་སོགས་པ་མཆོད་པའི་དངོས་པོ་ཅི་འབྱོར་པ་ཡི་གེ་ཨོཾ་ཨཱཿ་ཧཱུཾ། གཙོ་བོའི་སྔགས་ཀྱིས་བཏབ་སྟེ། དབུལ་བར་བྱའོ། །དེ་ནས་ཨོཾ་བཻ་རོ་ཙ་ན་པཱུ་ར་པཱུ་ར་ཨ་ཝརྟ་ཡ་ཧོཿ། །ཞེས་བྱ་བའི་སྔགས་ཀྱིས་ལྷ་
ཐམས་ཅད་ལ་རས་དབུལ་ལོ། །དེ་ནས་ཡང་འབྱོར་ཚད་ཀྱི་བླ་རེ་དང༌། གདུགས་དང༌། རྒྱལ་མཚན་དང༌། འཕན་ལ་སོགས་པ་ཡང་མཆོད་པའི་ཕྱིར་ལྷ་རྣམས་ལ་དབུལ་ལོ། །གླུ་དང༌། གར་དང༌། རོལ་མོ་དང༌། རྩེད་མོ་དང༌། དགའ་བ་ལ་སོགས་པའི་དངོས་པོ་དང༌། ཏིང་ངེ་འཛིན་གྱིས་མཆོད་པ་དཔག་ཏུ་མེད་པ་རྣམས་ཀྱིས་ཀྱང་མཆོད་པར་བྱའོ། །དེ་ནས་ཨོཾ་ཨ་ནུཏྟ་ར་སརྦ་པཱུ་ཛ་མེ་གྷ་ས་མུ་དྲ་ག་ཏཾ་སྥ་ར་ཎ་ཨི་མཾ་ག་ག་ན་ཁཾ་ཧཱུཾ་ཕཊ་སྭཱ་ཧཱ། ཞེས་བྱ་བའི་སྔགས་ལན་བདུན་བརྗོད་པས་མཆོད་པའི་རྣམ་པར་གྱུར་ཏེ། ལྷ་རྣམས་མཉེས་ཤིང་བྱིན་གྱིས་བརླབ་པར་འགྱུར་རོ། །དེ་ནས་ཉེས་པ་ཆེ་ཆུང་རྣམས་མེད་པར་བྱ་བའི་ཕྱིར། དྲིལ་བུ་དཀྲོལ་ཞིང་ཡི་གེ་བརྒྱ་བ་ལན་བདུན་བརྗོད་ཅིང༌། དཀྱིལ་འཁོར་ལན་བདུན་བསྐོར་བ་བྱས་ནས། རྩ་བའི་སྒོར་སྟན་བདེ་བ་ལ་འདུག་སྟེ། ཏིང་ངེ་འཛིན་ལ་གནས་ཤིང་བཟླས་པ་བརྒྱའམ་སྟོང་ཅི་ནུས་བརྗོད་ལ་བརྟན་པར་བྱ་སྟེ། གསོལ་བ་གདབ་པར་བྱ་སྟེ། སེམས་ཅན་ཐམས་ཅད་ཀྱི་དོན་གྱི་ཕྱིར། ཐུགས་རྗེས་དངོས་གྲུབ་སྩལ་དུ་གསོལ། །དེ་ནས་སྒྲུབ་པའི་གྲོགས་པོ་དཀྱིལ་འཁོར་དུ་བཞག་ལ། རང་ཉིད་སྒོར་འདུག་ནས་ཁྲོ་བོའི་ང་རྒྱལ་བསྐྱེད་དེ། སྔ་མ་བཞིན་དུ་གཏོར་མ་བཏང་ངོ༌། །དེ་ནས་ཉེས་པ་རྣམས་སྦྱང་བའི་ཕྱིར། རང་གི་ལྷའི་རྣལ་འབྱོར་དུ་བྱ་བ་སྟེ། ལས་ཐམས་ཅད་པའི་ཐབ་ཁུང་བྱས་ནས། མར་ལ་སོགས་པའི་སྲེག་རྫས་ཀྱིས་ཞི་བའི་སྦྱིན་སྲེག་བྱའོ། །དེ་ནས་སློབ་དཔོན་ལུས་བཀྲུས་ལ་དྲིས་བྱུགས་ལ་གོས་སྣ་ཚོགས་བགོ་བ་དང༌། མེ་ཏོག་གི་ཕྲེང་བ་བཅིང་བ་དང་སུག་སྨེ་ལ་ལ་སོགས་པ་དྲི་བཟང་པོ་ཡང་བཅའོ། །སློབ་དཔོན་རང་ཉིད་དང་སྒྲུབ་པའི་གྲོགས་དང༌། སྐྱེས་པ་དང་བུད་མེད་ལ་སོགས་པས་གར་གླུ་དང་བཀྲ་ཤིས་དང་རོལ་མོའི་ཆ་བྱད་རྣམས་ཀྱིས་མཆོད་པར་བྱའོ། །དེ་ལྟར་བྱས་པས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་རློབ་པར་འགྱུར་རོ། །ཤིན་ཏུ་ཐུགས་དགྱེས་པས་སྤྱན་མཛེས་པས་གཟིགས་ཤིང་བྱམས་པ་དང༌། སྙིང་རྗེའི་ཤུགས་ཀྱིས་བདག་དང་སློབ་མའི་ཚོགས་རྣམས་ལ་དགོངས་ཤིང་གཟིགས་པར་གྱུར་ནས། བཀའ་དྲིན་སྐྱོབ་བོ། །དེ་ནས་སློབ་དཔོན་རང་ཉིད་ཀྱིས་ལྷའི་རྣལ་འབྱོར་དུ་བྱས་ལ། ཅི་བདེ་
པར་གནས་པར་བྱའོ། །དཀྱིལ་འཁོར་སྤྱིའི་ཆོ་ག་རྫོགས་སོ།། །།དེ་ནས་སློབ་མ་གཞུག་པའི་ཆོ་ག་བྱ་སྟེ། སློབ་དཔོན་བདག་ཉིད་དང་པོ་དཀྱིལ་འཁོར་དུ་འཇུག་པ་ནས། དབང་བསྐུར་བ་རྫོགས་ཀྱི་བར་དུ་བཀའ་ཉན་པར་བྱའོ། །དེ་ནས་སློབ་དཔོན་གྱིས་འདི་སྐད་བརྗོད་པར་བྱའོ། །འདོད་ཆགས་ཆེན་པོ་ཀུན་འབྱུང་བ། །འཁོར་ལོ་དེ་ནི་གཟུགས་བརྙན་འདྲ། །སློབ་མའི་དོན་དུ་གྲོང་ཁྱེར་བྱས། །དེ་ཁོ་ན་ཉིད་བདེན་པར་བརྗོད། །དེ་ནས་སློབ་མ་ཡོལ་བའི་ཕྱི་རོལ་དུ་བཞག་སྟེ། སྔ་མ་བཞིན་དུ་སྡོམ་པ་བླངས་ལ། གོས་དམར་པོ་བགོས་པ་དང༌། མིག་དང་གདོང་གཡོགས་ལ་ལས་ཐམས་ཅད་པའི་ཆུས་བསང་གཏོར་བྱས་ལ། འདི་སྐད་བརྗོད་པར་བྱའོ། །ཀ་སྟྭཾ་སུ་ར་པྲ་ཏི་ཡཾ། སློབ་མས་འདི་སྐད་ལན་གདབ་པར་བྱའོ། །སུ་བྷ་གོ་ཧཾ་མ་ཧཱ་སུ་ཁ། དེ་ནས་ཤར་གྱི་སྒོར་བཞག་སྟེ། སྔགས་འདི་བརྗོད་ཅིང་ཕྱག་བྱེད་དུ་གཞུག་གོ །ཨོཾ་སརྦ་ཏ་ཐཱ་ག་ཏ་བཻ་རོ་ཙ་ན་པཱུ་ཛོ་པ་སྠ་ན་ཡ་ཨཱ་ཏྨ་ནཱཾ་ནཪྻི་ཏ་ཡཱ་མི། བཻ་རོ་ཙ་ན་ཨ་དྷི་ཏིཥྛ་སྭ་མཱཾ། ཞེས་བྱང་ཆུབ་ཀྱི་སེམས་བསྐྱེད་པར་བྱ་ཞིང་སྙིང་གར་རྡོ་རྗེ་འདི་བཞག་སྟེ། སྔགས་འདི་སྨྲ་བར་བྱའོ། །ཨོཾ་སརྦ་ཡོ་གཙིཏྟ་ཨུཏྤཱ་ད་ཡཱ་མི་སུ་ར་ཏ་ས་མ་ཡ་སྟྭཾ། ཨ་ཧཾ་སིདྡྷྱི་བཛྲ་ཡ་ཐ་སུ་ཁཾ། ཞེས་བརྗོད་དོ། །དེ་ནས་རྣམ་པར་སྣང་མཛད་ཀྱི་ཕྱག་རྒྱས་མེ་ཏོག་གི་ཕྲེང་བ་བླངས་ལ་ལག་ཏུ་གཞག །དེ་ནས་སྔགས་འདིས་བསྲུང་བ་བྱ། ན་མོ་རཏྣ་ཏྲ་ཡཱ་ཡ། ཨོཾ་བཻ་ཏོ་ཙ་ན་ས་པ་རི་བཱ་ར་རཀྵ་སརྦ་ཡེ་བྷྱཿ་སྭཱ་ཧཱ། དེ་ནས་འདི་སྐད་བརྗོད་དེ། དེང་ཁྱོད་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པར་འགྱུར་གྱིས། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་མ་མཐོང་བ་རྣམས་ལ་སྨྲ་བར་མི་བྱ་ཞིང༌། དད་པ་མེད་པ་རྣམས་ལ་ཡང་མ་ཡིན་ནོ། །དེ་ནས་ཁྲོ་བོ་གཤིན་རྗེ་གཤེད་ལ་སོགས་པའི་སྔགས་ཀྱིས་བཀུག་སྟེ་བཞག་ནས་སྡོམ་པ་འཛིན་དུ་གཞུག་གོ །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་རྡོ་རྗེའི་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་གྲུབ་པ་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་
བ་སུ་ལ་ཡང་མ་སྨྲ་ཤིག །ཁྱོད་དམ་ཚིག་ཉམས་པར་འགྱུར་ཏ་རེ། སྙིང་གར་རྡོ་རྗེ་བཞག་སྟེ། ཨོཾ་འདི་ནི་དམ་ཚིག་རྡོ་རྗེ་སྟེ། །ཁྱོད་ཀྱི་སྙིང་ལ་རབ་ཏུ་གནས། །གལ་ཏེ་གཞན་ཞིག་ལ་སྨྲས་ན། །ཁྱོད་ཀྱི་སྙིང་ལས་འབྱུང་བར་འགྱུར། །ཞེས་བརྗོད་དོ། །དེ་ནས་དུང་ཆོས་བཟང་པོའམ། ཉ་ཕྱིས་ལ་སོགས་པའི་ནང་དུ་ཆུ་བླུགས་ལ་ཡི་གེ་གསུམ་གྱིས་སྦར་བར་བྱ་སྟེ་ཆུ་བླུད་བར་བྱའོ། །འདི་སྐད་བརྗོད་དེ། འདི་ནི་སེམས་ཅན་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། ཨོཾ་བཛྲོད་ཀ་ཋ་ཋ་ཋ། ཞེས་བརྗོད་དོ། །དེ་ནས་དམ་ཚིག་བརྟན་པར་གྱུར་ནས། སློབ་མ་ལ་འདི་སྐད་བསྒོ་སྟེ། དེང་ཕན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་ཡང་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །ཡང་བ་མ་སྤངས་པར་དུས་བྱས་ནས། དམྱལ་བར་ལྟུང་བར་གྱུར་ཏ་རེ་ཞེས་སྨྲས་ལ། དེ་ནས་སློབ་མས་འདི་སྐད་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་བརྗོད་པར་བྱའོ། །དེ་ནས་རྡོ་རྗེ་སློབ་དཔོན་གྱིས་རྣམ་པར་སྣང་མཛད་ཀྱི་རྣལ་འབྱོར་དུ་བྱས་ལ། དེ་ནས་འོད་ཟེར་བྱུང་བས་སློབ་མའི་སྙིང་གར་ཡི་གེ་རཾ་ལས་མེའི་དཀྱིལ་འཁོར་གྲུ་གསུམ་པ། དེའི་ཕྱི་རོལ་དུ་ཡཾ་ལས་རླུང་གི་དཀྱིལ་འཁོར་གྱི་དབུས་སུ་ཆུད་པ། གྲུ་གསུམ་གྱི་ནང་དུ་ཡི་གེ་ཧཱུཾ་ལས་རྡོ་རྗེ་དམར་པོ། སྤྱི་བོར་ཡི་གེ་ཨོཾ་ལས་འཁོར་ལོ་རྩིབས་བརྒྱད་པ་འཁོར་བར་བསྒོམ་མོ། །དེ་ནས་དམ་ཚིག་གི་ཕྱག་རྒྱ་བྱ་སྟེ། འདི་སྐད་སྨྲའོ། །ཨོཾ་ཨཱ་ཡེ་ཤ་སྟུ་ཏེ་སྟྭ་དྷེ་བཛྲ་གྷ་མཱ་ནུཏྟ་རཾ། ཞེས་བརྗོད་དོ། །དེ་ནས་སྦོམས་པ་ལན་བརྒྱ་རྩ་བརྒྱད་བཟླས་ལ་མེ་ལ་བོར་ཏེ། བསྐོར་ཞིང་སློབ་མའི་ལག་ཏུ་བཞག་ནས་མེ་ཏོག་གི་ཕྲེང་བ་ཡང་བྱིན་ལ་ང་རྒྱལ་ཡང་བསྐྱེད་དེ་སྔགས་འདི་སྨྲས་སོ། །ཨོཾ་བཻ་རོ་ཙ་ན་ཨཱ་ཝེ་ཤ་དྷུ་ན་དྷུ་ན། ཀཾ་པཱ་ཀཾ་པཱ་ཀཾ་པཱ་ཡ་པ་ཏཾ་གྷྲྀ་ཎ་གྷྲྀ་ཎ་བྷ་ཡ་བཻ་རོ་ཙ་ན་སྭཱ་ཧཱ། ཞེས་བྱ་བས་བབས་ནས་ལྕེ་ལ་ཨ་དམར་པོ་བསམས་ཏེ། ཀྱེ་རྡོ་རྗེ་རུང་དམ་མི་རུང་སྨྲོས་ཤིག་ཅེས་བྱ་བ་དང༌། ལེགས་ཉེས་ཀུན་སྨྲ་བར་འགྱུར་རོ། །ཨོཾ་བྷ་ག་
བཱ་ན་བཻ་རོ་ཙ་ན་ཨཱ་ཝེ་ཤ་ཏིཥྛ་བཛྲ་དྲྀ་ཌྷོ་མེ་བྷ་བ་ཤ་ཤྭ་ཏོ་མེ་བྷ་བ་ཧྲྀ་ད་ཡ་མེ་ཨ་དྷི་ཏིཥྛ་སརྦ་སིདྡྷི་མྨེ་བྲ་ཡཙྪ་སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿ་ཀུ་རུ་ཧཱུཾ་ཧ་ཧ་ཧ་ཧ་ཧོཿ། ཞེས་བརྗོད་དོ། །མེ་ཏོག་དཀྱིལ་འཁོར་དུ་དབུལ་ཞིང་སྔགས་པྲ་ཏཱིཙྪ་ཧོ། །སློབ་དཔོན་གྱིས་ཕྲེང་བ་བླངས་སློབ་མའི་མགོ་ལ་སྟོབས་པོ་ཆེ་འདི་ལོང་ཤིག་བྱས་ལ་བཅིང་བར་བྱ། དེ་ནས་སྔགས་འདིས་གདོང་གཡོགས་དགྲོལ་བར་བྱའོ། །ཨོཾ་བཻ་རོ་ཙ་ན་ས་མནྟ་ཏིཥྛ། ཙཀྵུ་ནེ་ཏྲ་པ་ཧ་ར་མུངྒྷ་ཊ་ཡ་ཏེ། སརྦ་ཨ་ཀྵོ་བཛྲ་ཙཀྵུ་ཨ་ནུཏྟ་རཾ། ཞེས་བརྗོད་ལ་གདོང་གཡོགས་དགྲོལ་ཏེ་མིག་ལ་ཨོཾ་རེ་རེ་དང༌། སྙིང་གར་གཙོ་བོར་བསམ་པར་བྱ། དེ་ལྟར་འབབ་པར་མ་གྱུར་ན། དེ་ནས་སྙིང་གར་ཧཱུཾ་འབར་བ་དམིགས་ལ། རང་ཉིད་རྡོ་རྗེ་ཧཱུཾ་མཛད་ཀྱི་ང་རྒྱལ་བསྐྱེད་ལ། དེ་ཉིད་ཀྱི་སྔགས་ཀྱི་ཕྲེང་བས་དབབ་པར་བྱ་སྟེ། ན་མཿ་སརྦ་ཏ་ཐཱ་ག་ཏེ་བྷྱཿ་ཨོཾ་ཏ་ཊ་ཏ་ཊ། རྡོ་རྗེ་ཧཱུཾ་མཛད་ཀྱི་སྔགས་འདིས་དབབ་པར་བྱ། །དེ་ནས་སློབ་དཔོན་གྱིས་སློབ་མ་ལ་ཀྱེ་རྡོ་རྗེ་ཞེས་བོས་ལ། ལྟོས་ཤིག་ཅེས་བསྒོའོ། །དཀྱིལ་འཁོར་དབུས་ནས་སྒོའི་མཐར་ཐུག་པའི་བར་དུ་བསྟན་པར་བྱའོ། །དེ་ནས་སློབ་མས་མེ་ཏོག་ལ་སོགས་པའི་མཆོད་པ་བྱེད་དུ་བཅུག་ལ། དེ་ནས་སློབ་དཔོན་ཕྱག་ལན་གསུམ་དུ་བྱེད་དུ་གཞུག་གོ། དཀྱིལ་འཁོར་ལན་གསུམ་བསྐོར་ལ་སྨོན་ལམ་བཏབ་ནས། རྡོ་རྗེ་སློབ་དཔོན་ལ་ཕྱག་ལན་གསུམ་བྱས་ལ་ཡོན་གྱི་མཆོག་དབུལ་བར་བྱ་སྟེ། བ་དང༌། བ་ལང་དང༌། རྟ་དང༌། ཆུང་མ་དང༌། བྲན་དང༌། གསེར་དང༌། དངུལ་དང༌། རིན་པོ་ཆེ་དང༌། ས་གཞི་དང༌། གྲོང་དང༌། ནོར་དང༌། མ་ཧེ་རྣམས་དབུལ་བར་བྱ། བདག་དང་བུ་དང་ཆུང་མ་དང༌། །ཡོ་བྱད་རྣམ་པ་སྣ་ཚོགས་པས། །སློབ་དཔོན་མཉེས་པར་གྱུར་པ་ནི། །ལས་ཀྱི་དངོས་གྲུབ་ཐོབ་པར་འགྱུར། །སློབ་མ་དཀྱིལ་འཁོར་དུ་གཞུག་པའི་ཆོ་གའོ། །ཤིན་ཏུ་གསང་བའི་གཞུང་འདི་ཉིད། །རྡོ་རྗེ་སློབ་མ་གསོལ་བྱ་སྟེ། །དེ་ཉིད་ལ་ནི་ཡོན་གྱི་མཆོག །དམ་པ་ཕུལ་ནས་གསོལ་བ་གདབ། །ཇི་ལྟར་སྔོན་གྱི་རྒྱལ་པོ་ལ། །རྡོ་རྗེ་སེམས་དཔས་དབང་བསྐུར་ལྟར། །ཡོན་ཏན་ལྡན་པས་བརྩེར་དགོངས་ནས། །དབང་རྣམས་བདག་ལ་སྩལ་དུ་གསོལ། །དེ་ནས་སློབ་དཔོན་གྱིས་སྣོད་དུ་
རུང་བར་དགོངས་ནས། དད་པ་དང་སྔགས་མཁས་པར་མཐོང་ནས་དབང་བསྐུར་བར་བྱའོ། །དང་པོར་རྣམ་པར་རྒྱལ་བ་ལ་སོགས་པ་རྣམས་ལས། དུང་ཕོར་བཟང་པོའི་ནང་དུ་ཆ་བསྡུས་ཏེ། དེ་ནས་རྣམ་པར་སྣང་མཛད་ཀྱི་སྔགས་ཀྱིས་སྙིང་གའི་དཀྱིལ་འཁོར་གྱི་འོད་ཟེར་གྱིས་ནམ་མཁའ་ལས་ལྷ་མོ་བསམ་གྱིས་མི་ཁྱབ་པ་གསེར་གྱི་བུམ་པ་ཐོགས་པ་འབྱུང་བས་དབང་བསྐུར་བར་བསམ་ཞིང༌། རང་གིས་ཀྱང་དུང་ཕོར་གྱི་ཆུ་འདིས་སྤྱི་བོར་བླུགས་ཤིང་སྔགས་འདི་བརྗོད་བར་བྱའོ། །ཨོཾ་བཛྲ་ཨ་བྷི་ཥིཉྩ། ཞེས་ཆུའི་དབང་བསྐུར་བའོ། །དེ་ནས་དབུ་རྒྱན་ལ་སངས་རྒྱས་ལྔ་བསྒོམས་ལ། དར་དབྱངས་དང་བཅས་པ་ལག་ཏུ་ཐོགས་ཏེ། སྔ་མ་བཞིན་དུ་ལྷ་མོ་རྣམས་ཀྱིས་དབང་བསྐུར་ཞིང༌། སྔགས་བརྗོད་ལ་དབུ་རྒྱན་བཅིང་བར་བྱའོ། །ཨོཾ་བཛྲ་བ་ར་ད་ཀ་བཛྲཱ་རལླི་ཧོ། །དེའི་སྟེང་དུ་རྣམ་པར་སྣང་མཛད་ཀྱི་སྔགས་བཟླས་པའི། མེ་ཏོག་གི་ཕྲེང་བ་བཅིང་བར་བྱ་སྟེ། འདི་ནི་དབུ་རྒྱན་དང་ཕྲེང་བའི་དབང་ངོ༌། །དེ་ནས་རྡོ་རྗེ་བཟུང་ལ་སློབ་མའི་ལག་པ་གཉིས་ཀས་བཟུང་ལ། སངས་རྒྱས་རྡོ་རྗེ་དབང་གིས་ནི། །ཁྱོད་ནི་དེང་འདིར་དབང་བསྐུར་འགྱུར། །འདི་ནི་སངས་རྒྱས་དེ་ཀུན་ཉིད། །རབ་ཏུ་འགྲུབ་ཕྱིར་རྡོ་རྗེ་ལོང༌། །འདི་ནི་རྡོ་རྗེའི་དབང་ངོ༌། །དེ་ནས་ལག་ཏུ་རྡོ་རྗེ་དྲིལ་བུ་བླངས་ཏེ། སྔགས་འདིས། ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷིཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཞེས་བྱ་བས་དྲིལ་བུ་ལག་ཏུ་བྱིན་ལ་འདི་སྐད་བརྗོད་དོ། །དྲིལ་བུ་སངས་རྒྱས་ཀུན་གྱི་དངོས། །དཀྲོལ་བའི་སྒྲ་ནི་ཤེས་རབ་ཉིད། །ཁྱོད་ཀྱིས་བརྟན་པར་གཟུང་བར་གྱིས། །བྱང་ཆུབ་མཆོག་ཅེས་སངས་རྒྱས་གསུངས། །དངོས་རྣམས་རང་བཞིན་དག་པའི་ཕྱིར། ངོ་བོ་ཉིད་ཀྱིས་དངོས་མེད་བྱས། །རང་བཞིན་དག་པའི་སེམས་དཔའ་ཡིས། །དམ་པའི་དངོས་པོ་མེད་པར་འགྱུར། །འདི་ནི་བདག་པོའི་དབང་ངོ༌། །དེ་ནས་སྤྱི་བོར་ལག་པ་བཞག་ལ་དབང་བསྐུར་ཏེ། ཨོཾ་བཛྲ་ས་ཏྭ་ཏྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཤེ་ཀ་ཏ། ཀྱེ་རྡོ་རྗེ་ཆེ་གེ་མོ་ཞེས་རྡོ་རྗེ་མིང་གི་དབང་བསྐུར་རོ། །དེ་ནས་རྡོ་རྗེ་བརྟུལ་ཞུགས་བྱ་སྟེ། ལག་པར་རྡོ་རྗེ་བླངས་ཏེ། འདི་ནི་རྡོ་རྗེ་སེམས་དཔའི་ལག་ན་འདུག །ཁྱོད་ཀྱིས་རྟག་ཏུ་བཅང་བར་གྱིས། །
ཕྱག་ན་རྡོ་རྗེ་བརྟུལ་ཞུགས་བརྟན། །སློབ་མས་རྡོ་རྗེའི་རྩེ་མོ་ནས་བཟུང་ནས་སྔགས་འདི་བརྗོད་པར་བྱའོ། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཡེ་ཥ་ཏྭཾ་དྷ་ར་ཡཱ་མི་བཛྲ་སཏྭ་ཧི་ཧི་ཧི་ཧི་ཧཱུཾ། ཞེས་བྱ་བ་འདི་ནི་རྡོ་རྗེ་ཐུགས་དཀའ་ཐུབ་པའོ། །དེའི་དབང་པོ་ཐོབ་པའི་སྔགས་པས་ལས་ཅི་བྱས་པ་འགྲུབ་པར་འགྱུར་རོ། །འདི་དག་ཀུན་ནི་རིག་པའི་དབང་བསྐུར་བ་ཡིན་ནོ། །སེམས་ཅན་གྱི་དོན་བྱ་བའི་ཕྱིར། ཕྱིར་མི་ལྡོག་པའི་དབང་སྦྱིན་པར་བྱ་སྟེ། མི་ལྡོག་འཁོར་ལོའི་དབང་བསྩལ་ཅིག །བདག་ནི་རྟག་ཏུ་སློབ་དཔོན་བགྱིད། །ཅེས་བྱ་བའི་བར་གྱིས་གསོལ་བ་གདབ་པར་བྱའོ། །དེ་ནས་སྣ་ཚོགས་པདྨའི་སྟེང་སེང་གེའི་ཁྲི་བྱས་པའི་སྟེང་དུ་རས་ལ་སོགས་པའི་སྟན་བཏིང་ལ། དེའི་སྟེང་དུ་སློབ་མ་བཞག་ལ། བགེགས་གཞོམ་པའི་ཕྱིར་སྔགས་བཟླ་ཞིང༌། སློབ་མ་ཤར་གྱི་སྒོར་གཞག་པར་བྱ་སྟེ། སྔགས་དང་ཕྱག་རྒྱས་བྱིན་གྱིས་བརླབས་ལ་དབང་བསྐུར་བའི་ཡོ་བྱད་རྣམས་བསགས་ཏེ། དབང་བསྐུར་བར་བྱའོ། །དེ་ནས་ལག་པ་གཉིས་སུ་རང་གི་མཚན་མ་འཁོར་ལོ་དང༌། པདྨ་དང༌། རལ་གྲི་སྦྱིན་པར་བྱ་ཞིང་འདི་སྐད་བརྗོད་པར་བྱའོ། །ཞི་བ་དང༌། རྒྱས་པ་དང༌། དབང་ལ་སོགས་པ་དང༌། དབྲལ་བ་དང༌། གཞིག་པ་དང། གསད་པ་དང༌། དབྱུང་བ་དང༌། དགུག་པ་ལ་སོགས་པ་ལས་ཐམས་ཅད་དེ་རིང་ཕན་ཆད་གྱིས་ཤིག །མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པས། །ཆོས་ཀྱི་འཁོར་ལོ་བསྐོར་བར་གྱིས། །འདི་ནི་འཁོར་ལོའི་དབང་ངོ༌། །དེ་ནས་མེ་ལོང་བསྟན་ལ། ཆོས་ཀུན་གཟུགས་བརྙན་ལྟ་བུ་སྟེ། །དག་ཅིང་དངས་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང༌། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །དེ་ནས་ཧོ་ཞེས་བྱ་བས་མདའ་གཞུ་བྱིན་ལ། དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག་ཅེས་བརྗོད་པར་བྱའོ། །ཕྱོགས་བཞིར་མདའ་འཕེན་དུ་གཞུག་ཅིང༌། སྟེང་འོག་ཏུ་ཡང་རེ་རེ་འཕེན་དུ་གཞུག་གོ །དེ་ནས་རིན་པོ་ཆེའམ་
གསེར་གྱི་ཐུར་མ་ཐོགས་ལ། སློབ་མའི་མིག་གཉིས་སུ་པྲ་བཀོད་ལ། །ཐུར་མ་དེས་མིག་བྱུགས་ལ་འདི་སྐད་ཅེས་བརྗོད་པར་བྱ་སྟེ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །ལིང་ཐོག་རྒྱལ་བ་ངས་བསལ་མཛད། ཨོཾ་བཛྲ་ནེ་ཏྲ་ཨ་བར་ཧ་ར་པ་ཊ་ལཾ་ཧྲི། དེ་ནས་དུང་བྱིན་ལ་འདི་སྐད་ཅེས་བརྗོད་པར་བྱ་སྟེ། དེ་རིང་ཕན་ཆད་འཇིག་རྟེན་ལ། །སྐྱོབ་པ་རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པ། །ཀུན་དུ་མ་ལུས་གང་བར་གྱིས། །དེ་ནས་སེམས་དཔའི་རྡོ་རྗེ་ལག་ཏུ་བྱིན་ལ། ལྷ་རྣམས་དང་ནི་སེམས་ཅན་ལ། །ཅི་དགའ་བར་ནི་འགྲུབ་པར་འགྱུར། །སངས་རྒྱས་ཀུན་གྱི་གསང་བ་ཡི། ལོང་ཤིག་རྡོ་རྗེ་གྲུབ་པའི་ཕྱིར། །གྲུབ་པ་ཆེན་པོ་ཁྱོད་ཀྱི་ལས། །བདུད་རྣམས་ཆེན་པོ་འདུལ་བར་གྱིས། །རལ་གྲི་མིག་སྨན་ས་འོག་དང༌། །ཤིང་ལྷམ་དང་ནི་མགུ་ལིང་ཀི །ལྷ་དང་གནོད་སྦྱིན་མོ་གྲུབ་དང༌། །ཇི་ལྟར་འདོད་པ་གྲུབ་པར་གྱིས། །ཞེས་བསྒོ། །དེ་ནས་སློབ་དཔོན་རྣམ་པར་སྣང་མཛད་ཀྱི་རྣལ་འབྱོར་དུ་བྱས་ལ། མདུན་ན་སློབ་མ་གནས། སྣ་བུག་གཡས་པ་ནས་ནང་དུ་བཅུག་ལ། འོད་ཟེར་གྱིས་དག་པར་སྦྱངས་ནས་སྣ་བུག་གཡོན་པ་ནས་ཕྱིར་བྱུང་ལ་མདུན་དུ་བཞག་སྟེ་ལུང་བསྟན་པར་བྱ། དེ་བཞིན་གཤེགས་པའི་ཁུ་ཚུར་གཡོན་པས་སྙིང་གར་ཆོས་གོས་ཀྱི་མཐའ་མ་འཛིན་པའི་ཚུལ་དུ་བྱས་ལ། གཡས་པ་མི་འཇིགས་པའི་ཚུལ་དུ་བྱའོ། །ཨོཾ་འདི་ནི་ངས་ཁྱོད་ལུང་བསྟན་པ། །རྡོ་རྗེ་དེ་བཞིན་གཤེགས་པ་དང༌། །སྲིད་པའི་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་དང་ལས་བཏོན། །ཀྱེ་རྡོ་རྗེ་ཆེ་གེ་མོ་ཞེས་བྱ་བ་དེ་བཞིན་གཤེགས་པ། སཏྭ་ས་མ་ཡ་སྟྭཾ་བྷུར་བྷུ་བ་སྭཿ་།ཞེས་གང་ལུང་བསྟན་པར་བྱས་ནས། དེ་ལ་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའ་དང༌། དེ་བཞིན་གཤེགས་པ་ཐམས་ཅད་དང༌། རྡོ་རྗེ་འཛིན་འཁོར་དང་བཅས་པ་རང་རང་གི་དམ་ཚིག་མགྲིན་གཅིག་ཏུ། བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་ལུང་སྟོན་པར་འགྱུར་རོ་ཞེས་སློབ་མ་ལ་བསྒོ་བར་བྱའོ། །དེ་ནས་སྔགས་ཀྱིས་བྱིན་གྱིས་བརླབས་ལ། རྒྱལ་པོའི་དབང་གི་ཚུལ་གྱིས་དུང་དང༌། རྔ་པ་ཊ་ཧ་དང༌། རྔ་པོ་ཆེ་དང༌། རྔ་ཐམས་ཅད་དང༌། གླུ་དང་
སྒེག་མོ་ལ་སོགས་པ་ཐམས་ཅད་སློབ་མའི་བ་སྤུའི་བུ་གར་སྤྲུལ་པའི་ཚུལ་དུ་ཞུགས་ནས། ཡིད་དུ་འོང་བའི་གླུ་དང༌། སྔགས་བརྗོད་ཅིང་ཚིག་འདིས་དབང་བསྐུར་བར་བྱའོ། །རྡོ་རྗེ་དབང་བསྐུར་ཆེན་པོ་ཡིས། །ཁམས་གསུམ་གྱིས་ནི་ཕྱག་བྱས་པ། །དམ་ཚིག་གསུམ་གྱི་གནས་ལས་བྱུང༌། །སངས་རྒྱས་ཀུན་གྱིས་སྩོལ་བར་མཛད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ་སུ་པྲ་ཏིཥྛ་བཛྲ་སྭཱ་ཧཱ། དེ་ནས་བཀྲ་ཤིས་རྣམས་མཆོད་པར་བྱའོ། །དེ་ནས་ཆོས་གོས་རྣམས་བཏོན་ཏེ། མེ་ཏོག་ལ་སོགས་པས་མཆོད། མཆོད་ཕྱིར་གདུ་བུ་བཅས་པར་བྱ། །དེ་ནས་བླ་མ་བདག་ཉིད་ཀྱིས། །དེའི་སྤྱི་བོར་གདུགས་ཀྱང་གཟུང༌། །ཐལ་མོ་སྦྱར་བ་བྱས་ནས་ནི། །དཀྱིལ་འཁོར་ལེགས་པར་བསྐོར་དུ་གཞུག །སྤྱི་བོས་བཏུད་དེ་ཕྱག་འཚལ་གཞུག །སློབ་མ་འདི་ནི་ཕུལ་བ་ལགས། །གསང་སྔགས་རྒྱུད་ནི་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀུན་གྱིས་བཀུར་བར་འགྱུར། །སེམས་ཅན་རྣམས་ལ་སྙིང་བརྩེའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་གྱིས། །བསྒྲུབ་བྱ་ཀུན་ཀྱང་རྒྱུད་ལ་སྦྱོར། །ཁྱོད་ཀྱི་ཆོས་ལ་སེར་སྣ་དང༌། །སེམས་ཅན་ཀུན་ལ་མི་ཕན་པ། །ཉམ་ང་ཆེན་པོར་གྱུར་ཀྱང་ནི། །བུ་ཁྱོད་ཀྱིས་ནི་མི་བྱའོ། །དེ་ནས་གཙོ་བོའི་སྔགས་བརྒྱ་རྩ་བརྒྱད་བཟླས་ལ། ཕྱག་རྒྱ་སློབ་མ་ལ་སྦྱིན་པར་བྱའོ། །ཕྱག་རྒྱ་ཁྱོད་ལ་བྱིན་གྱིས་བརྟན་པར་གྱུར་ཅིག །བདག་གིས་ཕྱག་རྒྱ་བླངས་པ་བརྟན་པར་གྱུར། དེ་བཞིན་དུ་སློབ་དཔོན་གྱིས་སློབ་མ་ལ་ལྷའི་སྔགས་དང༌། མན་ངག་དང། ཕྱག་རྒྱ་བཞི་ཡན་བསྟན་ཅིང་གཉི་གས་སྔགས་བཟླས་ཤིང༌། སློབ་དཔོན་གྱིས་འདི་སྐད་བསྒོ་བར་བྱ། ཁྱོད་ཀྱིས་ཕྱག་རྒྱ་ལ་སོགས་པ་མི་ཤེས་པ་སུ་ལ་ཡང་མ་སྨྲ་ཞིག །དེ་ཅིའི་ཕྱིར་ཞེ་ན། དཀྱིལ་འཁོར་མ་མཐོང་བ་རྣམས་ལ། ཕྱག་རྒྱ་ལ་སོགས་པ་བསྟན་ན། སྐྱེ་བོ་དད་པ་མེད་པས་འཕྱས་ནས་ནད་ཀྱིས་བཏབ་སྟེ། དུས་མ་ཡིན་པར་ཤི་ནས་དམྱལ་བར་སྐྱེ་བར་འགྱུར་ལ། བསྟན་པའི་རྒྱུས་རང་ཉིད་ཀྱང་དམྱལ་བར་སྐྱེ་བར་འགྱུར་རོ། །དེ་ནས་དབུགས་དབྱུང་བ་སྦྱིན་པར་བྱ་སྟེ། ཇི་ལྟར་ཞུགས་པའི་སློབ་མ་རྣམས། །དཀྱིལ་འཁོར་མཐོང་བས་སྒྲིབ་པ་འབྱུང༌། །
དི་རིང་སངས་རྒྱས་རིགས་སུ་ནི། །ཁྱེད་རྣམས་སྐྱེ་བར་ཐེ་ཚོམ་མེད། །དེའི་འོག་ཏུ་དམ་ཚིག་སྦྱིན་པར་བྱ་སྟེ། །དངོས་གྲུབ་དམ་ཚིག་སྡོམ་པ་འདི། །ཁྱོད་ཀྱིས་རྟག་ཏུ་བསྲུང་བར་བྱ། །རྡོ་རྗེ་དྲིལ་བུ་ཕྱག་རྒྱ་དང༌། །བྱང་ཆུབ་སེམས་ནི་སྤང་མི་བྱ། །གནོད་པ་བྱེད་ལ་བྱམས་སེམས་བསྐྱེད། །རྡོ་རྗེ་སྤུན་ལ་བསྙེན་བཀུར་བྱ། །དད་པ་ཅན་ལ་སྨད་མི་བྱ། །སློབ་དཔོན་ལ་ནི་སྨད་མི་བྱ། །ཞབས་ལ་སྤྱི་བོས་ཕྱག་བྱས་ཏེ། །བླ་མ་ལ་ནི་ཡོན་ཡང་དབུལ། །དངོས་པོ་ཁྱད་པར་གང་དང་གང༌། །བླ་མ་མཉེས་ཕྱིར་དེ་ལ་དབུལ། །དེ་བཞིན་བླ་མ་དེ་ལ་ནི། །ཟད་དང་ཕོངས་པ་མེད་པར་དབུལ། །བླ་མ་དེ་ལ་བརྙས་མི་བྱ། །གལ་ཏེ་བརྙས་པར་གྱུར་ན་ནི། །སངས་རྒྱས་རྣམས་ལ་བརྙས་དང་མཚུངས། །དེ་ཡི་རྣམ་སྨིན་མྱོང་བར་ནི། །དུས་མ་ཡིན་པར་འཆི་བའི་རྐྱེན། །གླེན་དང་དགྲ་དང་རྐུན་པོ་དང༌། །དེ་བཞིན་གདོན་དང་རིམས་ཀྱིས་ཐེབས། །རྒྱལ་པོའི་ཆད་དང་ཕྲ་མེན་དང༌། །མེ་དང་ཆུ་དང་རྟག་ཏུ་དུག །བགེགས་དང་བར་ཆད་ཤ་འཁོན་གཉེར། །ཤི་ནས་དམྱལ་བར་ལྟུང་བར་འགྱུར། །སེམས་ནི་ཁྲོ་བར་མི་བྱ་ཞིང༌། །ནམ་ཡང་ཤེས་རབ་ཉམས་མི་བྱ། །བསྟིར་མེད་དམྱལ་བ་སྐྲག་པའི་གནས། །དེ་ཉིད་འདིར་ནི་བཟློག་པར་བཤད། །དེས་ན་བླ་མ་སྨོད་པ་བསྡམ། །ཐམས་ཅད་སྡོམ་པས་ཡོངས་སུ་བཟུང༌། །རྡོ་རྗེ་སློབ་དཔོན་ཆེན་པོ་ནི། །གཙང་ཞིང་གུས་དང་དག་པ་དགེ །ནམ་ཡང་མི་མཉེས་མི་བྱའོ། །རང་གི་དངོས་པོ་དེ་ལ་ཕུལ། །བླ་མར་ཕུ་དུད་རྟག་ཏུ་བྱ། །གལ་ཏེ་ཉེས་པ་བྱས་ན་ནི། །ཚ་བའི་རིམས་ནི་མི་ཟློགས་ལྟར། །དེ་བཞིན་འགྱོད་བཤགས་སྦྱངས་ཏེ་བསྡམས། །ཁྱེད་ཀྱིས་རྟག་ཏུ་དམ་ཚིག་བསྲུངས། །འདི་ནི་དམ་ཚིག་སྦྱིན་པའོ། །དེའི་འོག་ཏུ་ཇི་ལྟར་ཞུགས་པའི་སློབ་མ་རྣམས། བཟའ་བཏུང་ལ་སོགས་པས་སེམས་དགའ་བར་བྱས་ཏེ་བཏང༌། དེའི་འོག་ཏུ་ཐབ་ཁུང་ལ་རྣམ་པར་སྣང་མཛད་བསམས་ཏེ། རྒྱལ་བའི་ཆོ་གས་མར་གྱི་སྲེག་བླུགས་བརྒྱ་རྩ་བརྒྱད་དབུལ་བར་བྱའོ། །དེའི་འོག་ཏུ་ཞི་བའི་ཐབ་ཁུང་ལ་རང་དང་སློབ་མ་དང༌། རྒྱལ་པོ་དང༌། སེམས་ཅན་ཐམས་ཅད་ཀྱི་དོན་དུ་ཞི་བའི་ཆོ་གས་མར་གྱི་དགང་བླུགས་བརྒྱ་ཕུལ་ཏེ། མཆོད་པ་ཐམས་ཅད་ཀྱིས་མཆོད་དེ། གཤེགས་སུ་གསོལ་
བར་བྱའོ། །དེ་ནས་དཀྱིལ་འཁོར་གྱི་གནས་སུ་འདུག་ལ། བསྟོད་པ་དང༌། མཆོད་པ་དང༌། ཕྱོགས་སྐྱོང་ལ་གཏོར་མ་སྦྱིན་པ་དང༌། ཕྱག་བྱས་ཏེ་མཆོད་པ་ཕུལ་ནས། དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བྱས་ཏེ། སྨོན་ལམ་བཏབ་ཅིང་སྔ་མའི་ཕྱག་རྒྱ་བཅིངས་ཤིང་དགྲོལ་བར་བྱའོ། །རྡོ་རྗེ་དྲིལ་བུ་བླངས་ལ་ལན་གསུམ་བསྐོར་བ་བྱས་ཏེ། ཡེ་ཤེས་ཀྱི་དཀྱིལ་འཁོར་དང༌། གསང་བའི་དཀྱིལ་འཁོར་གཤེགས་སུ་གསོལ་བར་བསམ་ཞིང༌། ཇི་ལྟར་སྤྲུལ་པའི་འཁོར་ལོ་རྣམས་སྙིང་གར་བསྡུས་ལ། ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ། ཅེས་བརྗོད་ཅིང༌། ཨོཾ་ཀྲྀ་ཏོ་བྷ་སརྦ་སཏྭཱརྠ། སིདྡྷ་ར་དད་ཐ་ཡ་ཐཱ་ནུ་ག །གཙྪ་ཏྭཾ་བུདྡྷ་བི་ཥ་ཡཾ། པུ་ན་ར་ག་པུ་ན་ར་ག་ཞེས་བརྗོད་ཅིང༌། བསྲུང་བ་བྱ་ཞིང་གཏང་བར་བྱ། ས་ཚོན་རྣམས་བསྡུས་ལ་ཆུ་ཆེན་པོར་དོར་བར་བྱ། དེ་ནས་ཨོཾ་བཛྲ་ཀཱི་ལ་ཡ་སརྦ་ཀལྤཱན་བུདྡྷ་བུདྡྷ་ས་ཏྭེན་བཛྲ་དྷ་ར་ཨ་ཡེ་ཨཱཿ་ཧཱུཾ་ཧཱུཾ། ཞེས་བརྗོད་ཅིང་རྡོ་རྗེ་ཕུར་པ་དབྱུང་བར་བསམ། ཕྱིས་སེང་ལྡིང་གི་ཕུར་བུ་འདིས་དབྱུང་བར་བྱ་སྟེ། ཕྱག་རྒྱ་ནི་འདིའོ། །ལག་པ་གཉིས་རྡོ་རྗེ་ཁུ་ཚུར་བྱས་ལ་མཛུབ་མོ་གཉིས་རྩེར་དགུག་པ་བར་དུ་བཅུག་ལ་དབྱུང་བར་བྱའོ། །དེ་ནས་གཙོ་བོའི་སྔགས་བརྒྱ་རྩ་བརྒྱད་ཀྱིས། དྲི་ཆབ་བམ་འོ་མས་ཕུར་བུ་བཀྲུ་ཞིང༌། ཆུ་དེས་བུ་ག་དགང༌། དེ་ནས་དཀྱིལ་འཁོར་གྱི་ས་གཞི་བའི་ལྕི་བས་བྱུག །ཡོ་བྱད་རྫས་རྣམས་ཐམས་ཅད་ནི། །སློབ་དཔོན་དག་གིས་བསྡུས་ནས་སུ། །བདག་རང་ཉིད་ཀྱིས་སྤྱད་པར་བྱ། །སློབ་མ་རྣམས་ལ་བགོར་མི་རུང༌། དཀྱིལ་འཁོར་གྱི་ནི་ཡོ་བྱད་དག །སློབ་དཔོན་བདག་ཉིད་དབང་བར་བཤད། །གལ་ཏེ་སློབ་མས་སྤྱད་ན་ནི། །དམ་ཚིག་ལས་ནི་ཉམས་པར་འགྱུར། །དེ་ནས་དཀྱིལ་འཁོར་གྱི་གནས་ལ་འདུག་སྟེ། རང་ཉིད་དུས་ཐམས་ཅད་དུ་ལྷའི་ངོ་བོ་ཉིད་དུ་དམིགས་ཏེ། བཟའ་བ་དང༌། བཏུང་བ་ལ་སོགས་པ་ཐམས་ཅད་སློབ་དཔོན་དང༌། སློབ་མས་ཇི་ལྟར་དམ་ཚིག་ལས་འབྱུང་བ་བཞིན་དུ་མཆོད་པར་བྱ་ཞིང་བཟའ་བར་བྱའོ། །སློབ་དཔོན་རུ་ར་བྷ་དྲས། དཀྱིལ་འཁོར་ཐམས་ཅད་ཀྱི་སྤྱིའི་རིམ་པ་ཞལ་དང་འདྲ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང༌།
ལོ་ཙཱ་བ་དགེ་སློང་རིག་པ་གཞོན་ནུས་བསྒྱུར་བ།།