མི་འཁྲུགས་པའི་སྒྲུབ་ཐབས།
ཛཻ་ཏཱ་རི།
༈ མི་འཁྲུགས་པའི་སྒྲུབ་ཐབས་བཞུགས།། མི་འཁྲུགས་པ་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བྲི་བར་བྱ། །རྒྱུད་ལས་རིགས་ཀྱི་བུ་ཞེས་པ། །སྒྲུབ་པ་པོ་ཡི་མཚན་ཉིད་དེ། །དལ་འབྱོར་ཐེག་ཆེན་རིགས་ཅན་ནོ། །སྙིང་རྗེ་ཤེས་རབ་ལོན་ཏན་ལྡན། །བྱམས་དང་སྙིང་རྗེ་ལྡན་པ་དང༌། །དད་ཅིང་བླ་མ་ལ་གུས་དང༌། །སྐྱབས་སུ་སོང་ཞིང་སེམས་བསྐྱེད་པ། །དམ་ཚིག་སྡོམ་ལྡན་དབང་ཐོབ་པས། །ལས་ཀྱི་ཆོ་ག་ཤེས་ནས་ནི། །དགོན་པའི་གནས་སམ་གྲོང་གི་མཐར། །ལས་བྱས་བདེ་བའི་སྟན་ལ་འདུག །ཁྲུས་བྱས་གཙང་མའི་གོས་ཅན་གྱིས། །བདུན་པོ་རྣམ་པར་དག་པ་དང༌། །ཚད་མེད་བཞི་སོགས་ལྡན་པར་བསྒོམ། །ཆོས་རྣམས་ཐམས་ཅད་བདག་མེད་པར། །སེམས་ཀྱིས་བསྒོམ་པར་བྱས་ནས་ནི། །ཨ་ལས་ཟླ་བའི་དཀྱིལ་འཁོར་བསམ། །རང་གི་ས་བོན་དབུས་བསམས་ནས། །དམ་ཚིག་དག་དང་ཕྱག་རྒྱ་དང༌། །བསམ་ཞིང་དེ་བཞིན་ཉིད་དུ་བྱ། །རྣལ་འབྱོར་པས་ནི་བསྒྱུར་བར་བྱ། །ལྷ་ཡི་རྣལ་འབྱོར་ཚུལ་དུ་བསྒྱུར། །དེ་ནས་རང་གི་ས་བོན་དང༌། །ཕྱག་རྒྱ་ཕྱག་རྒྱས་དེ་བྱིན་བརླབ། །ལྷ་ཡི་གོ་རིམས་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །རང་ཉིད་རང་གི་ལྷར་བསྒོམས་ནས། །མི་འཁྲུགས་མདུན་ནམ་སྤྱི་བོར་བསམ། །བདག་ཉིད་མི་འཁྲུགས་པར་བསྒོམས་ནས། །དེ་ཉིད་གསུམ་སོགས་རང་དང་གཞན། །བུམ་པ་མཆོད་རྟེན་ལ་སོགས་ནང༌། །རྒྱ་མཚོ་པདྨ་ཟླ་བ་ལ། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས་འདིས། །བདག་གི་མཆོད་པ་བཞེས་ནས་ཀྱང༌། །མཆོད་པས་བདག་ལ་དགྱེས་པར་མཛོད། །ཨོཾ་བིགྷྣཱནྟ་
ཀྲྀཏ་ཧཱུཾ་ཕཊ། །ཐལ་སྦྱར་སོར་མོ་གཉིས་ཕྱིར་བསྐྱེད། །ཏ་ཐཱ་ག་ཏོདྦྷ་བཱ་ཡ་སྭཱ་ཧཱ། །ཛཿ་ཧཱུཾ་བཾ་ཧོཿ་ས་དེ་ཉིད་གདན་ལ་བཞུགས་པ་ལ། །མཆོད་དང་བསྟོད་དང་བཟླས་པ་བྱ། །སྒྲ་དང་སེམས་དང་གཞི་ལ་གཞོལ། །ལན་ལག་བཞི་དང་དམིགས་པ་གསུམ། །གཞན་དོན་བསྙེན་པ་བྱེད་པ་ནི། །གྲངས་དང་དུས་དང་མཚན་མའོ། །དངོས་གྲུབ་བསྒྲུབ་བྱའི་བཟླས་པ་ནི། །དག་དང་ཤིབ་བུ་རྡོ་རྗེ་བཟླས། །ཡིད་ཀྱི་བཟླས་བརྗོད་བཅས་པ་བཞི། །མེ་དང་སྒྲ་དང་སྒྲ་མཐའ་གསུམ། །བརྗོད་པ་མེད་པའི་བསམ་གཏན་ཏེ། །ཐུན་གསུམ་དག་ཏུ་བཟླས་པ་དང༌། །བསྟོད་ནས་མཆོད་པར་གཏོར་མ་གཏང༌། །ཡེ་ཤེས་གཤེགས་དང་དམ་ཚིག་བསྡུ། །མི་གནས་བསོད་ནམས་སྟེར་བར་བྱེད། །སྒྲ་མཐར་ཐར་བ་སྟེར་བར་བྱེད། །བཅོམ་ལྡན་འདས་མི་འཁྲུགས་པ་བྱོན་ནས་ཞེས་པས་རང་ལྷར་བསྒོམས་པའི་རྣལ་འབྱོར་པས་སྤྱན་དྲང་བ་དང༌། །མཆོད་པ་དང་བསྟོད་པ་དང༌། བཟླས་པ་དང༌། བསྒོམ་པ་བྱས་པས་དངོས་གྲུབ་སྩོལ་བར་གྱུར་པའོ། །ཆོས་ཉིད་མཉམ་པ་ཉིད་ལས་མ་གཡོས་ཀྱང༌། །ཐུགས་རྗེས་གཏན་དུ་མྱ་ངན་མི་འདའ་ཞིང༌། །ཕྲིན་ལས་རྣམ་བཞིས་འགྲོ་བའི་དོན་མཛད་པ། །བཅོམ་ལྡན་མི་འཁྲུགས་པ་ལ་ཕྱག་འཚལ་བསྟོད། །བཟླས་བརྗོད་མེ་ལ་ཚུལ་ཁྲིམས་རླུང་གིས་སྦར། །བརྩོམ་འགྲས་ཆེན་པོའི་མེ་ལྕེས་སྡིག་པ་སྲེག །ཉི་མ་མེ་ཤེལ་ཞུགས་ལ་མེ་འབྱུང་ལྟར། །མི་ཡི་ལུས་ལ་དངོས་གྲུབ་སྩོལ་བར་མཛད། །འདི་ཉིད་བཞིན་ནོར་བུ་རིན་ཆེན་ལྟར། །སྤྱི་བོའི་གཙུག་ཏུ་ཀུན་གྱིས་བཀུར་བར་འོས། །ངན་སོང་རྣམ་སེལ་ཐར་ལམ་འདིས་འགྲུབ་བོ། །རང་གཞན་མདུན་དུ་བསྒོམས་ཀྱང་དངོས་གྲུབ་སྟེར། །མགོན་པོ་མི་འཁྲུགས་བ་སྒྲུབ་པའི་ཐབས་སློབ་དཔོན་ཛཻ་ཏཱ་རིས་མཛད་པ་རྫོགས་སོ།། །།བླ་མ་མཉན་གྱིས་རང་འགྱུར་དུ་མཛད་པའོ།།