རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཆེན་པོའི་འགྲེལ་བཤད།
སངས་རྒྱས་གསང་བ།
རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ཆེན་པོའི་འགྲེལ་བཤད་བཞུགས། ནཱ་མ་སིདྡྷི་རཱ་ཛ། སིདྡྷི་སིདྡྷ། བཅོམ་ལྡན་འདས་ཀྱིས་ཐོག་མ་ཐམས་ཅད་མཁྱེན་པའི་ཡེ་ཤེས་བརྙེས་ནས། ཐམས་ཅད་མཁྱེན་པའི་ཡེ་ཤེས་དེས་འདུལ་བའི་འགྲོ་བ་རྣམ་པ་གཉིས་སུ་གཟིགས་པ་ནི། དམིགས་པ་དང་བཅས་པ་ལ་མོས་པ་གཙོར་གྱུར་བ་རྣམས་དང༌། ཟབ་ཅིང་རྒྱ་ཆེ་བ་ལ་མོས་པ་གཙོར་གྱུར་པ་རྣམས་སོ། །འདུལ་བའི་འགྲོ་བ་དེ་རྣམས་ལ་ཡང་སྤྱོད་པ་རྣམ་པ་གཉིས་ཏེ། ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པ་དང༌། སྔགས་ཀྱི་སྒོ་ནས་འཇུག་ཅིང་སྤྱོད་པའི། །དེ་ལ་ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པ་ལ་ཡང་རྣམ་པ་གཉིས་ཏེ། དམིགས་པ་དང་བཅས་པ་ལ་མོས་པ་གཙོར་གྱུར་པ་དང༌། ཟབ་ཅིང་རྒྱ་ཆེ་བ་ལ་མོས་པ་གཙོར་གྱུར་པ་སྟེ། དེ་ལ་ཕ་རོལ་ཏུ་ཕྱིན་པའི་སྒོ་ནས་འཇུག་ཅིང༌། སྤྱོད་པའི་འདུལ་བའི་འགྲོ་བ་དམིགས་པ་དང་བཅས་པ་ལ་མོས་པ་གཙོར་གྱུར་པ་རྣམས་ཀྱི་དོན་དུ་འདུལ་བ་དང༌། མདོ་སྡེ་དང༌། མངོན་པའི་ཆོས་རྣམས་དང༌། དེ་བཞིན་དུ་གཞན་ཡང་ཐེག་པ་ཆེན་པོའི་མདོ་སྡེ་ཁྱིམ་བདག་དཔའ་བོ་ལ་སོགས་པ་རྣམས་བསྟན་ཏོ། །དེ་བཞིན་དུ་ཟབ་ཅིང་རྒྱ་ཆེ་བ་ལ་མོས་པའི་འདུལ་བའི་འགྲོ་བ་རྣམས་ཀྱི་དོན་དུ་ཟབ་ཅིང་རྒྱ་ཆེ་བའི་མདོ་སྡེ་སྡོང་པོས་བརྒྱན་པ་དང༌། ས་བཅུ་པ་དང༌། ཏིང་ངེ་འཛིན་གྱི་རྒྱལ་པོ་ལ་སོགས་པ་རྣམས་བསྟན་ཏོ། །དེ་བཞིན་དུ་ཟབ་ཅིང་རྒྱ་ཆེ་བ་སྔགས་ཀྱི་སྒོ་ནས་འཇུག་ཅིང་སྤྱོད་པའི་གདུལ་བྱའི་འགྲོ་བ་རྣམས་ལ་ཡང་རྣམ་པ་གཉིས་ཏེ། དམིགས་
པ་དང་བཅས་པ་ལ་མོས་པ་གཙོར་གྱུར་པ་དང༌། ཟབ་ཅིང་རྒྱ་ཆེ་བ་ལ་མོས་པ་གཙོར་གྱུར་པ་སྟེ། དེ་ལ་དམིགས་པ་དང་བཅས་པ་ལ་མོས་པ་གཙོར་གྱུར་པ་རྣམས་ཀྱི་དོན་དུ་འཕགས་པ་རབ་ཏུ་གྲུབ་པའི་རྒྱུད་དང༌། རིག་འཛིན་གྱི་སྡེ་སྣོད་ལ་སོགས་པ་བྱ་བའི་རྒྱུད་རྣམས་བསྟན་ཏོ། །དེ་བཞིན་དུ་ཟབ་ཅིང་རྒྱ་ཆེ་བས་འདུལ་བའི་འགྲོ་བ་རྣམས་ཀྱི་དོན་དུ་འཕགས་པ་དེ་ཁོ་ན་ཉིད་བསྡུས་པའི་རྒྱུད་ལ་སོགས་པ་བསྟན་ཏེ། དམིགས་པ་དང་བཅས་པ་ལ་གཙོར་གྱུར་ཆེས་པ་ཡང་ཟབ་ཅིང་རྒྱ་ཆེ་བ་ལ་མོས་ཤིང་མི་སྤྱད་པ་མ་ཡིན་མོད་ཀྱི། དམིགས་པ་དང་བཅས་པ་ལ་སྤྱོད་པར་མོས་པའི་ཤས་ཆེ་བ་ལ་བྱའོ། །ཟབ་ཅིང་རྒྱ་ཆེ་བ་ལ་མོས་པ་ལ་གཙོར་གྱུར་པ་རྣམས་ལ་དམིགས་པ་དང་བཅས་པའི་སྤྱོད་པ་ལ་མ་མོས་ཤིང་མི་སྤྱོད་པ་མ་ཡིན་མོད་ཀྱི། ཟབ་ཅིང་རྒྱ་ཆེ་བ་ལ་སྤྱོད་པའི་ཤས་ཆེ་བ་སྟེ། དེ་ལྟར་མངོན་པ་ནི་འཕགས་པ་དེ་ཉིད་བསྡུས་པ་ལ་སོགས་པ་ནང་གི་སྦྱོར་བ་གཙོར་གྱུར་པ་ཡིན་མོད་ཀྱི། ཕྱིའི་སྤྱོད་པ་རྣམས་ཀྱང་མེད་པ་མ་ཡིན་ནོ། །དེ་བཞིན་དུ་བྱ་བའི་རྒྱུད་རྣམས་ཀྱང་ཕྱིའི་སྤྱོད་པ་གཙོར་གྱུར་པ་ཡིན་མོད་ཀྱི། ནང་གི་སྤྱོད་པ་ཡང་མེད་པ་མ་ཡིན་ཏེ། རིག་འཛིན་གྱི་སྡེ་སྣོད་ལ་སོགས་པར་གསུངས་པ་རྣམ་པར་ཐར་པའི་སྒོ་གསུམ་ལ་གཞོལ་བ་ལ་སོགས་པ་སྟེ། དེ་བཞིན་དུ་ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པ་རྣམས་ལ་ཡང་ཇི་ལྟར་རིགས་པར་སྤྱད་པར་ཤེས་པར་བྱའོ། །དེ་བཞིན་དུ་རྣམ་པར་སྣང་མཛད་མངོན་པར་བྱང་ཆུབ་པ་རྣམས་པར་སྤྲུལ་པའི་བྱིན་གྱི་རླབས་ཀྱི་རྒྱུད་འདི་ཡང་ཐབས་དང་ཤེས་རབ་གཙོར་གྱུར་པ་སྦྱོར་བའི་རྒྱུད་ཡིན་མོད་ཀྱི། བྱ་བ་ལ་མོས་པའི་གདུལ་བྱའི་འགྲོ་བ་རྣམས་ལ་གཟུང་བའི་ཕྱིར་བྱ་བའི་རྒྱུད་ཀྱི་རྗེས་སུ་མཐུན་པའི་སྤྱོད་པ་དག་ཀྱང་བསྟན་པས། བྱ་བའི་རྒྱུད་དམ་གཉིས་ཀའི་རྒྱུད་ལྟ་བུར་སོ་སོར་བརྟགས་ཤིང་གྲགས་སོ། །དེ་ལ་བཅོམ་ལྡན་འདས་ཀྱིས་རྒྱུད་འདི་ཡང་གདུལ་བྱའི་འགྲོ་བ་རབ་འབྲིང་ཐེ་མ་གསུམ་གྱི་དོན་དུ་བསྟན་པ་ནི། མགོ་གླེངས་པས་ཤེས་པ་དང༌། དོན་རྣམ་པར་ཕྱེ་བས་ཤེས་པ་དང༌། ཚིག་གི་མཐར་གྱུར་པའི་གདུལ་བའི་འགྲོ་བ་རྣམས་ལའོ། །དེ་ལ་མགོ་གླེངས་པས་ཤེས་པ་ནི་ཤེས་རབ་མཆོག་ཏུ་རྣོ་ཞིང་ཐོས་པ་མང་བ་དང་ལྡན་པས་རྒྱུད་འདིའི་མིང་དོན་གྱི་རྗེས་
སུ་མཐུན་པ་རྣམ་པར་སྣང་མཛད་མངོན་པར་བྱང་ཆུབ་པ་རྣམ་པར་སྤྲུལ་པའི་བྱིན་གྱི་རླབས་ཞེས་པའི་མིང་ཙམ་ཐོས་པས། རྒྱུད་འདིའི་དོན་ཐམས་ཅད་གོ་བར་གྱུར་པ་ནི་རྣམ་པར་སྣང་མཛད་ཅེས་བྱ་བའི་ཚིག་གིས་བཅོམ་ལྡན་འདས་རྣམ་པར་སྣང་མཛད་ལོངས་སྤྱོད་རྫོགས་པའི་སྐུ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ། ཐམས་ཅད་མཁྱེན་པའི་རང་བཞིན་དུ་ཤེས་སོ། །མངོན་པར་བྱང་ཆུབ་པའི་ཚེ་ཞེས་པའི་ཚིག་ཀྱང་མངོན་པར་བྱང་ཆུབ་པ་ནི་རང་གི་སེམས་ཡང་དག་པ་ཇི་ལྟ་བ་ཉིད་དུ་ཤེས་པ་སྟེ། དེ་ཡང་ཆོས་ཐམས་ཅད་སྟོང་པ་ཉིད་ནམ་མཁའ་ལྟ་བུའི་མཚན་ཉིད་དུ་ཆུད་པའོ། །རྣམ་པར་སྤྲུལ་པའི་ཞེས་པའི་ཚིག་གིས་ཀྱང་དེ་ལྟར་མངོན་པར་བྱང་ཆུབ་པ་ཉིད་ཀྱི་ཚེ་ན། སྔོན་གྱི་སྨོན་ལམ་གྱི་ཤུགས་ཀྱིས་ཆོས་ཉིད་རབ་ཏུ་ཐོབ་པས་ལྷུན་གྱིས་གྲུབ་པ་ཉིད་དུ་སྐུ་མི་ཟད་པའི་རྒྱན་གྱིས་སུས་ཀྱང་ཟིལ་གྱིས་མི་ནོན་པ་ཉིད་དུ་ཁམས་གསུམ་ཐམས་ཅད་ཁྱབ་པ། རྫོགས་ལོངས་སྤྱོད་པ་དང་སྤྲུལ་པའི་སྐུ་ལ་སོགས་པས་ཇི་ལྟར་སྣོད་དུ་གྱུར་པའི་སེམས་ཅན་ལ་གང་གིས་འདུལ་བའི་སྐུས་དོན་མཛད་པ་ནི། སངས་རྒྱས་ཀྱི་སྐུས་འདུལ་བའི་སེམས་ཅན་རྣམས་ལ་སངས་རྒྱས་ཀྱི་སྐུར་སྟོན་པ་ཅན། ཉན་ཐོས་དང༌། རང་སངས་རྒྱས་དང༌། བརྒྱ་བྱིན་དང་ཚངས་པ་ལ་སོགས་པའི་གཟུགས་ཀྱིས་འདུལ་བའི་སེམས་ཅན་རྣམས་ལ་དེ་རྣམས་ཀྱི་ཚུལ་བསྟན་ཅིང་དོན་མཛད་པ་དང༌། དེ་བཞིན་དུ་གསུང་མི་ཟད་པའི་རྒྱན་གྱིས་ཀྱང་ཁམས་གསུམ་ཐམས་ཅད་དུ་སངས་རྒྱས་ཀྱི་གསུང་དམ་པས་ཁྱབ་པར་ཆོས་སྟོན་པ་དེ་བཞིན་དུ་ཐུགས་མི་ཟད་པའི་རྒྱན་གྱིས་ཀྱང༌། ཇི་བཞིན་པ་དང་བཅས་པའི་ཡིད་ལས་བྱུང་བའི་དབང་ཆེན་དང་ཆུའི་དཀྱིལ་འཁོར་ལ་སོགས་པ་ཇི་བཞིན་པར་བསྟན་པར་གོའམ། དེ་བཞིན་དུ་བྱིན་གྱི་རླབས་ཞེས་བྱ་བའི་ཚིག་གིས་ཀྱང་དེ་ལྟར་རྣམ་པར་སྤྲུལ་པ་སྐུ་གསུང་ཐུགས་མི་ཟད་པའི་རྒྱན་གྱིས་ཁམས་ཐམས་ཅད་དུ་ཁྱབ་པར་བསྟན་པ་འདི་ནི་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་ཡོངས་སུ་དག་པ་རྣམས་ཀྱི་སྤྱོད་ཡུལ་དུ་གྱུར་གྱི། གདུལ་བའི་འགྲོ་བ་འོག་མ་རྣམས་ཀྱི་སྤྱོད་ཡུལ་དུ་མ་གྱུར་པས་སྐུ་ལ་སོགས་པ་མི་ཟད་པའི་རྒྱན་དེ་ཉིད་གདུལ་བའི་འགྲོ་བ་དེ་རྣམས་ཀྱི་དོན་དུ་རྒྱུད་འདིར་དཀྱིལ་འཁོར་
དང། སྔགས་དང་ཕྱག་རྒྱའི་སྒོ་ནས་ལུས་ངག་ཡིད་ཀྱི་མཚན་མར་གྱུར་པ་བསྟན་པ་སྟེ། བྱིན་གྱི་རླབས་ཞེས་པ་ནི་དཀྱིལ་འཁོར་དང༌། སྔགས་དང་ཕྱག་རྒྱའི་སྒོ་ནས་ལུས་ངག་གསུམ་གྱི་ཆ་ལུགས་དང༌། རང་བཞིན་དུ་ལྷག་པར་གནས་ཞེས་བྱ་བའི་དོན་ཏོ། །དེ་ལྟར་རྣམ་པར་སྣང་མཛད་མངོན་པར་བྱང་ཆུབ་པ་རྣམ་པར་སྤྲུལ་པའི་བྱིན་གྱི་རླབས་ཞེས་པ་དོན་གྱི་རྗེས་སུ་མཐུན་པའི་མིང་ཙམ་གྱིས་དོན་འདི་ལྟ་བུར་གོ་བ་ནི་གླེངས་པས་ཤེས་པའི་གདུལ་བའི་འགྲོ་བ་རྣམས་ཏེ། དེ་དག་གི་དོན་དུ་རྒྱུད་འདི་མིང་ཙམ་སྨོས་པས་ཤེས་པར་བྱའོ། །དེ་ལྟར་ཤེས་པ་འགའ་ཞིག་མ་ཡིན་གྱི། གཞན་ཡང་རྒྱུད་འདིའི་འགྲེལ་པ་དང༌། དམིགས་པ་བསྟན་པར་བྱ་བ་དང༌། དགོས་པ་ཡང་བསྟན་པར་ཤེས་པར་བྱ་བ་ནི། རྒྱུད་འདི་ནི་བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་གྱི་དཀྱིལ་འཁོར་སྐུ་མི་ཟད་པ་ལ་སོགས་པའི་རྒྱུད་དང་འབྲེལ་བར་བལྟ་སྟེ། རང་བཞིན་གྱི་དཀྱིལ་འཁོར་འདི་ནི་རྒྱུད་འདིའི་རྒྱུ་ཡིན་ནོ། །རྒྱུད་འདི་ནི་དེའི་འབྲས་བུར་ཤེས་པར་བྱ་སྟེ་དེ་ནི་འབྲེལ་པའོ། །དེ་བཞིན་དུ་རྒྱུད་འདིར་དཀྱིལ་འཁོར་དང་སྔགས་དང་ཕྱག་རྒྱའི་སྒོ་ནས་ལུས་དང་ངག་དང་ཡིད་ཇི་བཞིན་པས་བསྟན་པས། རང་བཞིན་གྱི་དཀྱིལ་འཁོར་གྱི་ཚུལ་ཅི་འདྲ་བ་རྒྱུད་འདིས་མཚོན་ནས་ཤེས་པར་བྱ་སྟེ། དེ་བས་རྒྱུད་འདི་ནི་དམིགས་པ་སྟོན་པའོ། །བཅོམ་ལྡན་འདས་ཀྱི་རང་བཞིན་གྱི་དཀྱིལ་འཁོར་ནི་དམིགས་པ་སྟོན་པར་བྱའོ། །དེ་ལ་དགོས་པ་ནི་རྒྱུད་འདིར་བསྒྲུབ་པའི་སྤྱོད་པ་ཇི་སྐད་དུ་བཤད་པའི་རིམ་གྱིས་རང་གི་ལྷག་པའི་ལྷ་མཉེས་པར་བྱས་ནས་ལྷ་དང་མིའི་ལོངས་སྤྱོད་དང་རལ་གྲི་དང༌། རིག་འཛིན་ལ་སོགས་པ་མངོན་པར་འབྱུང་བའི་མཚན་ཉིད་མངོན་སུམ་དུ་ཐོབ་པ་ཉིད་ནས་བཅོམ་ལྡན་འདས་རྣམ་པར་སྣང་མཛད་ཀྱི་མཁྱེན་རབ་དམ་པས་བླ་ན་མེད་པ་ཐམས་ཅད་མཁྱེན་པ་དང་ལྡན་པ་ཐོབ་པར་དགོངས་པ་ནི་དེའི་དགོས་པར་ཤེས་པར་བྱའོ། །དོན་རྣམ་པར་ཕྱེ་བས་ཤེས་པའི་གདུལ་བའི་འགྲོ་བ་ནི། དེའི་དོན་གྱི་རྗེས་སུ་མཐུན་པའི་མིང་ཙམ་སྨོས་པས་རྒྱུད་ཀྱི་དོན་ཀུན་ཤེས་པར་མི་ནུས་ཏེ་དེ་བས་ན་དེ་དག་གི་དོན་དུ་རྒྱུད་ཀྱི་དོན་རྣམ་པར་ཕྱེ་སྟེ་བཤད་པ་ནི་རྣམ་པར་སྣང་མཛད་ཀྱི་རྒྱུ་དང་རང་བཞིན་དང་འབྲས་བུ་དང༌། དེའི་
མངོན་པར་བྱང་ཆུབ་པའི་རྒྱུ་དང་རང་བཞིན་དང་འབྲས་བུ་ལ་སོགས་པའི་བཤད་པ་སྟེ། དེ་ལ་རྣམ་པར་སྣང་མཛད་ཀྱི་རྒྱུ་བཤད་པ་ནི། འཇིག་རྟེན་གྱི་སེམས་ཀྱིས་རིམ་པ་བརྒྱ་ལ་སོགས་པ་དང༌། དད་པ་སྤྱོད་པ་ལ་སོགས་པའི་འཇིག་རྟེན་ལས་འདས་པའི་ས་རིམ་པ་ནས་ཀུན་དུ་སངས་རྒྱས་པའི་སོ་སོའི་བར་དུ་ནི་རྣམ་པར་སྣང་མཛད་ཀྱི་རྒྱུ་བཤད་པའོ། །རང་བཞིན་བཤད་པ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་རྣམ་པ་བཞིའི་མཚན་ཉིད་གང་གི་ཕྱིར་རྒྱུད་འདིར་སྤྲུལ་པའི་སྐུ་རྣམ་པ་གཉིས་སུ་བཏགས་ནས་སྐུ་བཞིར་བཤད་དེ། བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་བཤད་པའོ། །ལུས་དང་ངག་ཡིད་མི་ཟད་པའི་རྒྱན་རྣམ་པར་སྤྲུལ་པས་ཁམས་གསུམ་ཐམས་ཅད་ཁྱབ་པ་ནི། སེམས་ཅན་དང་སེམས་ཅན་མ་ཡིན་པའི་ལུས་ལ་སོགས་པ་ཇི་ལྟར་སྣོད་དུ་གྱུར་པ་ལ་སྣང་བ་དེ་ནི་དེའི་འབྲས་བུ་བཤད་པའོ། །མངོན་པར་བྱང་ཆུབ་བའི་རྒྱུ་ཡང་བྱང་ཆུབ་ཀྱི་སེམས་ནི་རྒྱུ། སྙིང་རྗེ་ནི་རྩ་བ། ཐབས་ནི་མཐར་གྱུར་ཞེས་པ་ལ་སོགས་པའོ། །རང་བཞིན་ཇི་སྲིད་ཇི་སྐད་དུ་གསུངས་པ་དེ་ལ། བྱང་ཆུབ་གང་ཞེ་ན། རང་གི་སེམས་ཡང་དག་པ་ཉིད་ཇི་ལྟ་བར་ཤེས་པའོ་ཞེས་པ་ལ་སོགས་པའོ། །དེ་བཞིན་དུ་དེའི་རྣམ་པར་སྤྲུལ་པ་དང༌། བྱིན་གྱི་རླབས་དག་ཀྱང་བཤད་པ་སྟེ། ཞིབ་ཏུ་ནི་བསྡུས་པའི་དོན་ཉིད་དུ་བཤད་པས་འདིར་མ་སྨོས་སོ། །ཚིག་གི་མཐར་གྱུར་པས་འདུལ་བའི་འགྲོ་བ་རྣམས་ལ་ནི་དེ་ལྟར་རྒྱུ་དང་རང་བཞིན་དང་འབྲས་བུ་ལ་སོགས་པ་རྣམ་པར་ཕྱེ་སྟེ་བཤད་ཀྱང་ཚིག་དང་དོན་རྣམས་ཞིབ་ཏུ་མི་གོ་སྟེ། དེ་བས་ན་དེ་དག་གི་དོན་དུ་ཚིག་རེ་རེ་ནས་སྤྲོས་ཤིང་རྒྱས་པར་བཤད་པ་ནི་བཅོམ་ལྡན་འདས་དེ་བཞིན་གཤེགས་པའི་བྱིན་གྱིས་རློབ་པ་ཞེས་པ་ལ་སོགས་པ་རྒྱུད་འདི་མགོ་མཇུག་ཏུ་སྤྲོས་ཏེ་བཤད་པའོ། །དེ་ལ་བཅོམ་ལྡན་འདས་དེ་བཞིན་གཤེགས་པའི་བྱིན་གྱིས་རློབ་པ་རྡོ་རྗེ་ཆེན་བོ་ཞེས་པ་ལ་སོགས་པ་རྒྱུད་འདི་ཐམས་ཅད་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་ཕུན་སུམ་ཚོགས་པ་རྣམ་པ་བཅུ་གཅིག་བསྟན་པ་ནི་འདི་ལྟ་སྟེ། སྤོང་བ་ཕུན་སུམ་ཚོགས་པ་དང༌། གནས་ཕུན་སུམ་ཚོགས་པ་དང༌། འཁོར་ཕུན་སུམ་ཚོགས་པ་དང༌། སྟོན་པ་ཕུན་སུམ་ཚོགས་པ་དང༌། མཐུ་ཕུན་སུམ་ཚོགས་པ་
དང། ཕ་རོལ་གྱི་དོན་ཕུན་སུམ་ཚོགས་པ་དང༌། བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། བྱང་ཆུབ་ཀྱི་རྒྱུ་ཕུན་སུམ་ཚོགས་པ་དང༌། བྱང་ཆུབ་ཀྱི་རྣམ་པར་སྤྲུལ་པའི་བྱིན་གྱིས་བརླབས་པ་ཕུན་སུམ་ཚོགས་པ་སྟེ། དེ་ལ་སྤོང་བ་ཕུན་སུམ་ཚོགས་པ་ནི། བཅོམ་ལྡན་འདས་ཞེས་པའི་ཚིག་སྟེ། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་སྤོང་བའི་མཚན་ཉིད་དོ། །གནས་ཕུན་སུམ་ཚོགས་པ་ནི་ཡོན་ཏན་རྣམ་པ་བརྒྱད་དང་ལྡན་པ་སྟེ། དེ་ལ་འདིར་གནས་ཕུན་སུམ་ཚོགས་པ་བརྒྱད་ནི་འདི་ལྟ་སྟེ། དེ་བཞིན་གཤེགས་པ་ཐམས་ཅད་ལྷག་པར་གནས་པ་ཕུན་སུམ་ཚོགས་པ་དང༌། སྲ་ཞིང་རྒྱ་ཆེ་བ་ཕུན་སུམ་ཚོགས་པ་དང༌། བྱང་ཆུབ་ཆེན་པོར་ཆུད་པའི་གནས་ཕུན་སུམ་ཚོགས་པ་དང༌། རྡོ་རྗེ་འཛིན་པའི་བྱང་ཆུབ་སེམས་དཔའ་ཆེན་པོ་རྣམས་མངོན་པར་འདུ་བ་ཕུན་སུམ་ཚོགས་པ་དང༌། སྔ་ཁང་གི་རྩེ་མོ་རྒྱ་ཆེ་བ་ཕུན་སུམ་ཚོགས་པ་དང༌། ཁ་དོག་ཕུན་སུམ་ཚོགས་པ་དང༌། དབྱིངས་ཕུན་སུམ་ཚོགས་པ་དང༌། གདན་ཕུན་སུམ་ཚོགས་པ་རྣམས་ཏོ། དེ་ལ་དེ་བཞིན་གཤེགས་པ་ཐམས་ཅད་ལ་ལྷག་པར་གནས་པ་ཕུན་སུམ་ཚོགས་པ་ནི། དེ་བཞིན་གཤེགས་པའི་བྱིན་གྱིས་རློབ་པ་ཞེས་བྱ་བའི་ཚིག་གིས་བསྟན་ཏོ། །སྲ་ཞིང་རྒྱ་ཆེ་བ་ཕུན་སུམ་ཚོགས་པ་ནི་རྡོ་རྗེ་རྒྱ་ཆེ་བ་ཞེས་པའི་ཚིག་གིས་སོ། །བྱང་ཆུབ་ཆེན་པོར་ཆུད་པའི་གནས་ཕུན་སུམ་ཚོགས་པ་ནི་ཆོས་ཀྱི་དབྱིངས་འབྱུང་བ་ཞེས་བྱའོ། །རྡོ་རྗེ་འཛིན་པའི་བྱང་ཆུབ་སེམས་དཔའ་ཆེན་པོ་རྣམས་མངོན་པར་འདུ་བ་ཕུན་སུམ་ཚོགས་པ་ནི་རྡོ་རྗེ་འཆང་ཀུན་འདུ་བ་ཞེས་པའོ། །སྔ་ཁང་གི་རྩེ་མོ་རྒྱ་ཆེ་བ་ཕུན་སུམ་ཚོགས་པ་ནི་དེ་བཞིན་གཤེགས་པའི་མོས་པས་རྣམ་པར་རོལ་པ་མཐའ་དང་དབུང་མེད་ཅིང་རྩེ་མོ་མཐོ་བ་ཞེས་པའོ། །ཁ་དོག་ཕུན་སུམ་ཚོགས་པ་ནི་རིན་པོ་ཆེ་ཆེན་པོའི་རྒྱལ་པོས་རྣམ་པར་བརྒྱན་པ་འབྱུང་བ་ཞེས་པས་སོ། །དབྱིབས་ཕུན་སུམ་ཚོགས་པ་ནི་རིན་པོ་ཆེའི་རྒྱལ་པོའི་སྔ་ཁང་ཆེན་པོ་ཞེས་པས་སོ། །གདན་ཕུན་སུམ་ཚོགས་པ་ནི་བྱང་ཆུབ་སེམས་དཔའི་ལུས་ཀྱི་སེང་གེའི་གདན་ལ་བཞུགས་པ་ཞེས་པ་སྟེ། དེ་རྣམས་ནི་ཕུན་སུམ་ཚོགས་པ་རྣམ་པ་བརྒྱད་དང་
ལྡན་ཏེ་གཉིས་པའོ། །འཁོར་ཕུན་སུམ་ཚོགས་པ་ནི་ནམ་མཁའ་དྲི་མ་མེད་པའི་རྡོ་རྗེ་འཛིན་ཞེས་པ་ནས་ཀུན་དུ་བཟང་པོ་དང༌། བྱམས་པ་དང༌། སྒྲིབ་པ་རྣམ་པར་སེལ་བ་དང༌། འཇམ་དཔལ་ཞེས་པ་ལ་སོགས་པ་རིག་པར་བྱའོ། །སྟོན་པ་ཕུན་སུམ་ཚོགས་པ་ནི་ལུང་དང་ཐོབ་པའི་ཆོས་སྟོན་པ་སྟེ། དེ་ཡང་ཀུན་དུ་བསྐོར་ནས་མདུན་དུ་བྱས་ཏེ། དུས་གསུམ་གྱི་དུས་ལས་འདས་པ་དེ་བཞིན་གཤེགས་པ་ཉི་མས་བྱིན་གྱིས་བརླབས་ཏེ། ལུས་དང་ངག་དང་ཡིད་མཉམ་པ་ཉིད་ཀྱི་ཡེ་ཤེས་གནས་ཞེས་བྱ་བའི་ཆོས་ཀྱི་སྒོ་བཤད་དོ་ཞེས་པའི་ཚིག་གིས་སོ། །མཐུ་ཕུན་སུམ་ཚོགས་པ་ནི་འཇིག་རྟེན་དང་འཇིག་རྟེན་ལས་འདས་པའི་སྦྱོར་བའི་གཙོ་བོས་མ་ཐོབ་བའི་སྤྲུལ་པ་ཐོབ་པ་སྟེ། དེའི་སྐབས་སུ་གསུངས་པ་དེ་ནས་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་ཆེན་པོ་རྣམས་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱི་རླབས་ཀྱིས་ལུས་དང་ངག་དང་ཡིད་མཉམ་པ་ཉིད་མི་ཟད་པའི་རྒྱན་གྱི་མཛོད་རབ་ཏུ་སྤྱོད་པ་ལ་འཇུག་ཅེས་པས་སོ། །ཕ་རོལ་གྱི་དོན་གྱི་ཐབས་ཕུན་སུམ་ཚོགས་པ་ནི་དེའི་སྐབས་སུ་གསུངས་པ་ཐམས་ཅད་དུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱི་རླབས་ཀྱིས་ལུས་ཀྱི་ལས་ཐམས་ཅད་དང༌། ངག་གི་ལས་ཐམས་ཅད་དང༌། ཡིད་ཀྱི་ལས་ཐམས་ཅད་ཀྱི་སྔགས་ཀྱི་ཚུལ་གྱིས་ཚིག་ཆོས་འཆད་པར་མཐོང་ངོ་ཞེས་པ་ནས་འདི་ལྟ་སྟེ། བཅོམ་ལྡན་འདས་སེམས་ཅན་ཐམས་ཅད་ཀྱི་བསམ་པ་རབ་ཏུ་རངས་པ་སྟེ། དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱིས་འཇིག་རྟེན་དང་ལྷར་བཅས་པ་ལ་རབ་ཏུ་རངས་པར་བྱེད་དོ་ཞེས་པས་སོ། །གཞན་ཡང་རྒྱུད་འདི་བཤད་པ་ཐམས་ཅད་ཀྱིས་ཇི་ལྟར་རིགས་པར་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་ཕུན་སུམ་ཚོགས་པ་དང༌། རང་བཞིན་དུ་ཕུན་སུམ་ཚོགས་པ་དང༌། དེའི་བྱང་ཆུབ་ཀྱི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། བྱང་ཆུབ་ཀྱི་རྣམ་པར་སྤྲུལ་པའི་བྱིན་གྱི་རླབས་ཀྱི་རང་བཞིན་ཕུན་སུམ་ཚོགས་པ་སྟེ། སྔར་བཤད་ཟིན་པས་འདིར་མ་བཤད་དོ། །དེ་ལྟ་བས་ན་བཅོམ་ལྡན་འདས་རྣམ་པར་སྣང་མཛད་ཀྱི་ཕུན་སུམ་ཚོགས་པ་རྣམ་པ་བཅུ་གཅིག་གིས་རྒྱུད་འདི་ཐམས་ཅད་བསྡུས་པར་བལྟའོ། །མདོ་སྡེ་དང་རྒྱུད་
གཞན་དག་ཏུ་འདི་སྐད་བདག་གིས་ཐོས་པ་འབྱུང་ལ། རྒྱུད་འདིར་མ་སྨོས་པ་ནི་སྟོན་པ་དང༌། དུས་དང༌། གནས་ངེས་པ་དང༌། ཉན་པ་དང་སྡུད་པར་མཛད་པའི་བྱང་ཆུབ་སེམས་དཔའ་ཀུན་དུ་བཟང་པོ་དང༌། ཕྱག་ན་རྡོ་རྗེ་ལ་སོགས་པ་ཆུད་པ་གཙོ་བོར་གྱུར་པའི་ཕྱིར་འདི་སྐད་བདག་གིས་ཐོས་བ་མ་སྨོས་ཏེ། རྒྱུད་འདི་བཤད་པ་ཡང༌། བཅོམ་ལྡན་འདས་རྣམ་པར་སྣང་མཛད་ལོངས་སྤྱོད་རྫོགས་པའི་སྐུ་མངོན་པར་བྱང་ཆུབ་པའི་སྐུའི་བྱིན་གྱི་རླབས་ཀྱིས་བྱང་ཆུབ་ཀྱི་སྙིང་པོ་ན་རྟག་ཏུ་བཞུགས་པས་བཤད་དེ། དུས་དང་གནས་དེ་ཉིད་ན་ངེས་པར་བཞུགས་པས་དུས་གཅིག་གི་ཚེ་ཞེས་པ་མ་སྨོས་སོ། །ཉན་པ་ཡང་ཀུན་དུ་བཟང་པོ་ལ་སོགས་པ་དེ་རྣམས་ཐོས་པ་སྙིང་པོར་གྱུར་པ་མ་ཡིན་གྱི་ཆུད་པ་གཙོར་གྱུར་པས་འདི་སྐད་བདག་གིས་ཐོས་ཞེས་མ་སྨོས་སོ། །མདོ་སྡེ་དང་གཞུང་གཞན་དག་ཏུ་སྨོས་པ་ནི། བཅོམ་ལྡན་འདས་རྫོགས་ལོངས་སྤྱོད་པའི་སྐུ། དུས་དང་གནས་མ་ངེས་པར་ཡང་བཞུགས་ཏེ། བར་བར་ནི་འོག་མིན་གྱི་གནས་ན་བཞུགས་ཤིང་ཆོས་འཆད། བར་བར་ནི་རི་རབ་ཀྱི་རྩེ་མོ་ན་བཞུགས་ཤིང་ཆོས་འཆད་པ་དང༌། དེ་བཞིན་དུ་སྤྲུལ་པའི་སྐུ་ཡང་བར་བར་ནི་རྒྱལ་པོའི་ཁབ་ན་བཞུགས། བར་བར་ནི་མཉན་དུ་ཡོད་པ་ལ་སོགས་པའི་གནས་ན་བཞུགས་ཤིང་ཆོས་འཆད་དེ་དེ་ལྟར་དུས་དང་གནས་མ་ངེས་པས་དུས་གཅིག་གི་ཚེ་ན་ཞེས་པ་ལ་སོགས་པའོ། །ཉན་པ་ཡང་འཕགས་པ་ཉན་ཐོས་ལ་སོགས་པ་ཐོས་པ་སྙིང་པོར་གྱུར་པ་སྟེ། ཆུད་པ་གཙོ་བོར་གྱུར་པ་མ་ཡིན་པས་འདི་སྐད་བདག་གིས་ཐོས་པ་ཞེས་སྨོས་སོ། །བཅོམ་ལྡན་འདས་རྣམ་པར་སྣང་མཛད་ཀྱི་ཕུན་སུམ་ཚོགས་པ་རྣམ་པ་བཅུ་གཅིག་གིས་ཀྱང་རྣམ་པ་བཞིར་བསྡུས་ཏེ། བཞི་གང་ཞེ་ན། སྐྱེས་བུ་དང་གནས་དང་འཁོར་དང་དགོས་པའོ། །དེ་ལ་བཅོམ་ལྡན་འདས་ཞེས་པ་ནི་ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་ཡན་ཆད་དཔྱིས་ཕྱིན་པར་ཤེས་རབ་ཀྱིས་དབྲལ་དེ་མེད་པར་བྱས་པ་ནི་བཅོམ་པའོ། །གཉིས་སུ་བདུད་རྣམས་བཅོམ་པ་ལ་ཡང་བྱ་སྟེ། མདོར་ན་ཉོན་མོངས་པ་དང་ཤེས་བྱའི་སྒྲིབ་པ་སྤངས་པ་ཡང་མངོན་པར་བྱང་ཆུབ་པའི་སྐུ་ལ་བྱ་སྟེ། དེས་ནི་སྐྱེས་བུའི་ཆེ་བའི་བདག་ཉིད་བསྟན་པ་སྟེ། སྐྱེས་བུ་ཆེ་བ་དེ་བསྟན་པ་ཡང་ཆོས་ཉན་པའི་སེམས་ཅན་རྣམ་པ་གཉིས་ཏེ། ཆོས་ཀྱི་
རྗེས་སུ་འཇུག་པ་དང་དད་པའི་རྗེས་སུ་འཇུག་པའོ། །དེ་ལ་ཆོས་ཀྱི་རྗེས་སུ་འཇུག་པ་ནི་འཆད་པའི་སྐྱེས་བུ་ལ་མི་རྟོག་གི་ཆོས་བཟང་ངན་ལ་རྟོག་པ་དེར་ཟད། དད་པའི་རྗེས་སུ་འཇུག་པ་ནི་འཆད་པའི་སྐྱེས་བུ་བཙན་པ་དེ་འདི་ལ་ཡིད་ཆེས་ཤིང་དགོས་པའི་སྐྱེས་བུ་བཙན་པ་དེ་བསྟན་ཏོ། །གནས་ཕུན་སུམ་ཚོགས་པ་ཡང་བཅོམ་ལྡན་འདས་གནས་དེ་ལྟ་བུ་ན་བཞུགས་པས་ཆེ་བའམ། བཙུན་པ་བསྟན་པས་དད་པའི་རྗེས་སུ་འཇུག་པའི་འགྲོ་བ་བཟུང་བའི་ཕྱིར་རོ། །འཁོར་ཕུན་སུམ་ཚོགས་པ་ཡང་བཅོམ་ལྡན་འདས་གཅིག་པུ་མི་བཞུགས་ཀྱི། འཁོར་དེ་ལྟ་བུས་བསྐོར་ཅིང་བཞུགས་པས་ཆེ་བའམ་བཙུན་པར་བསྟན་ཏེ། དེའི་སྐྱེས་བུ་བཙན་པར་བསྟན་པས་དད་པས་རྗེས་སུ་འཇུག་པའི་འགྲོ་བ་ལ་དགོས་པ་མེད་པར་སྐྱེས་བུ་དེ་ལྟ་བུ་ལ་ཉན་པར་སྤྲོ་བས་དང་པའི་རྗེས་སུ་འཇུག་པའི་སེམས་ཅན་གཟུང་བའི་ཕྱིར་བསྟན་ཏོ། །གནས་བཤད་པ་ཡང་རྣམ་པ་གསུམ་གྱི་ཕྱིར་དེ་སྐྱེས་བུ་བཙན་པ་དང༌། གནས་དེ་ལྟ་བུའི་ཡོན་ཏན་བསྒྲུབ་པས་རྗེས་སུ་དྲན་པར་བྱས་ན་འགྲུབ་པའི་ཕྱིར་དང༌། སངས་རྒྱས་དང་བྱང་ཆུབ་སེམས་དཔས་བཅགས་པའི་གནས་ཏེ། མཆོད་རྟེན་དུ་འགྱུར་བའི་ཕྱིར་རོ། །སྐྱེས་བུ་བཙན་པ་ནི་གོང་དུ་བཤད་པའོ། །འཁོར་ཕུན་སུམ་ཚོགས་པ་ཡང་རྣམ་པ་གསུམ་སྟེ། སྐྱེས་བུ་བཙན་པ་དེ་ལྟ་བུའི་བྱང་ཆུབ་སེམས་དཔའ་རྡོ་རྗེ་འཛིན་ནམ་མཁའ་དྲི་མ་མེད་པ་ལ་སོགས་པ་ཆོས་ཉན་པས་འཛིན་པའི་མཆོག་བསྟན་པ་དང༌། ཉན་པ་མཆོག་དེ་དག་བཞུགས་པས་སྡུད་པར་མཛད་པའི་བྱང་ཆུབ་སེམས་དཔའི་དབང་དུ་གྱུར་པ་བསྟན་པའོ། །སྐྱེས་བུ་ནི་སྔར་སྨོས་པའོ། །དགོས་པ་ནི་རྒྱུད་འདི་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་དང༌། རང་བཞིན་དང༌། དབང་ཆེན་དང༌། ཆུ་ལ་སོགས་པའི་དཀྱིལ་འཁོར་དུ་བསྒྲུབ་པ་དང༌། ལས་བཤད་པའི་རིམ་བཞིན་དུ་བསྒྲུབས་ན་མངོན་པར་འཆད་པ་དང་མ་ལུས་པའི་བདེ་བ་ཐོབ་པ་དགོས་པའི་ཕྱིར་རོ། །དེ་ལྟར་ཕུན་སུམ་ཚོགས་པ་རྣམ་པ་བཅུ་གཅིག་འདི་བཞིན་བསྡུས་སོ། །དེ་ལ་བཅོམ་ལྡན་འདས་དེ་བཞིན་གཤེགས་པའི་བྱིན་གྱིས་རློབ་པ་ཞེས་པ་ནི། འདས་པ་དང་མ་འོངས་པ་དང་ད་ལྟའི་དེ་བཞིན་གཤེགས་པ་ཐམས་ཅད་བྱང་ཆུབ་ཀྱི་སྙིང་པོ་ལ་གནས་པ་ལ་བྱ་སྟེ། བྱིན་གྱིས་རློབ་པ་ཞེས་པའི་
ཚིག་ནི་གནས་པའི་དོན་ཏོ། །སྐབས་འདིར་བྱང་ཆུབ་ཀྱི་སྙིང་པོ་ནི་འདས་པ་དང་མ་འོངས་པ་དང་ད་ལྟར་སངས་རྒྱས་ཐམས་ཅད་པས་སངས་རྒྱས་མང་པོ་གནས་པར་འགྱུར་བའི་དོགས་པ་བསལ་བ་ལ་སོགས་པ་ནི་བསྡུས་པའི་དོན་ཉིད་དུ་ཞིབ་ཏུ་བཤད་པས་འདར་མ་སྨོས་སོ། །རྡོ་རྗེ་ཆེན་པོ་ནི་རྡོ་རྗེ་དེ་ཉིད་ཕལ་བ་མ་ཡིན་གྱི་མཆོག་གམ་དམ་པའམ་ཆེན་པོ་ཞེས་བྱའོ། །རྒྱ་ཆེ་བ་ནི་རྡོ་རྗེ་དང་ལྡན་པའི་ཁང་པ་དེ་ནི་ཡངས་ཤིང་རྒྱ་ཆེ་བའམ། རྡོ་རྗེ་དེ་དག་ཉིད་གྲངས་མང་བ་ལ་བྱའོ། །ཆོས་ཀྱི་དབྱིངས་འབྱུང་བ་ཞེས་བྱ་བ་ནི་དེ་ལ་ཆོས་ཀྱི་ཕུང་པོ་དང་ཁམས་དང་སྐྱེ་མཆེད་དོ། །དབྱིངས་ནི་རང་བཞིན་ཕུང་པོ་ལ་སོགས་པའི་ཆོས་དེ་རྣམས་ཀྱི་ཀུན་རྫོབ་ཀྱི་མཚན་ཉིད་རིས་པས་བརྟག་མི་བཟད་པ་སྟེ། དེ་དག་གི་རང་བཞིན་ནི་སྟོང་པ་ཉིད་དོ། །སྟོན་པའི་རང་བཞིན་དུ་ཆུད་པ་ནི་འབྱུང་བ་ཞེས་བྱའོ། །རྡོ་རྗེ་འཛིན་པ་ཀུན་འདུ་བ། །ཞེས་པ་ནི་དེ་ལ་རྡོ་རྗེ་ནི་ཡང་དག་པ་མ་ཡིན་པའི་ལྟ་བ་འཇོམས་པའི་ཤེས་རབ་སྟེ། ཤེས་རབ་དེ་ལྟ་བུ་དང་ལྡན་པའི་བྱང་ཆུབ་སེམས་དཔའི་ནི་རྡོ་རྗེ་འཛིན་པའོ། །འདུ་བའི་ཚིག་ནི་གནས་ཕུན་སུམ་ཚོགས་པའི་སྐབས་སུ་བཤད་པའོ། །རྡོ་རྗེ་འཛིན་པ་མ་ཡིན་པའི་བྱང་ཆུབ་སེམས་དཔའ་ཡང་དེར་མི་འདུ་བ་མ་ཡིན་མོད་ཀྱི། འདིར་སྔགས་བཤད་པའི་སྐབས་ལས་རྡོ་རྗེ་འཛིན་གཙོ་བོར་སྨོས་སོ། །རྡོ་རྗེ་འཛིན་པ་ཡང་རྣམ་པ་གསུམ་གྱི་ཕྱིར་འཛིན་ཏེ། སོ་སོའི་རྣམ་པར་གྲོལ་བའི་སྒོ་སྟོན་པ་དང༌། རིག་པའི་བརྟུལ་ཞུགས་དང༌། མཆོད་པའི་ཡན་ལག་ཏུ་འགྱུར་པའི་ཕྱིར་འཛིན་པའོ། །ཕ་རོལ་ཏུ་ཕྱིན་པ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ཨུཏྤལ་དང༌། པདྨོ་ལ་སོགས་པ་འཛིན་པ་ཡང་སོ་སོར་རྣམ་པར་གྲོལ་བའི་སྟོན་པར་རིག་པར་བྱའོ། །དེ་བཞིན་གཤེགས་པ་ཤིན་ཏུ་མོས་ཤིང་རྣམ་པར་རོལ་པ་ཞེས་པ་ནི་བྱང་ཆུབ་སེམས་དཔའི་སྤྱད་པ་སྤྱོད་པ་ན། དེ་ལྟ་བུའི་གནས་ལ་སོགས་པར་མོས་ཤིང་སྨོན་པ་ལས་ཇི་ལྟར་སྨོན་པ་བཞིན་དུ་ཐོབ་ནས་སྤྱོད་པ་ནི་རོལ་པའོ། །མཐའ་དང་དབུས་མེད་ཅིང་རྩེ་མོ་མཐོ་བ་ནི་མཐའ་དམིགས་སུ་མེད་པས་ན་དབུས་ཀྱང་དམིགས་སུ་མེད་པའོ། །རྩེ་མོ་མཐོ་བ་ནི་དེ་བཞིན་གཤེགས་པའི་དབུའི་གཙུག་ཏོར་དང་འདྲ་སྟེ་རྩེ་མོ་བ་ལྟང་མི་སྣང་བ་ལ་བྱའོ། །
རིན་པོ་ཆེ་ཆེན་པོའི་རྒྱལ་པོས་བརྒྱན་ཅིང་འབྱུང་བས་ཞེས་པ་ནི་ཁ་དོག་ཕུན་སུམ་ཚོགས་པའི་སྐབས་བཤད་དེ། སྔ་ཁང་དེ་ཉིད་ནི་རིན་པོ་ཆེས་སྤྲས་པ་ལ་བྱའོ། །བྱང་ཆུབ་སེམས་དཔའི་ལུས་ཀྱི་སེང་གེའི་གདན་ལ་བཞུགས་ཞེས་པ་ནི་སྔོན་གྱི་སྨོན་ལམ་གྱིས་སེང་གེའི་ལུས་སུ་གྱུར་ཅིང་སེང་གེའི་གདན་བྱེད་པའམ། བྱང་ཆུབ་སེམས་དཔའི་ལུས་ཉིད་ཀྱིས་བཅོམ་ལྡན་འདས་ཀྱི་གདན་དུ་བྱེད་དེ་སེང་གེའི་བྱ་བ་བྱེད་པ་ལ་བྱའོ། །བཅོམ་ལྡན་འདས་གནས་དེ་ལྟ་བུ་ན་བཞུགས་པ་ཡང་འཁོར་བྱང་ཆུབ་སེམས་དཔའ་འདི་རྣམས་དང་བཞུགས་ཏེ་བྱང་ཆུབ་སེམས་དཔའ་དེ་རྣམས་ཀྱང་དོན་གྱི་རྗེས་སུ་མཐུན་པའི་མཚན་ཅན་ཤ་སྟག་སྟེ། རྡོ་རྗེ་འཛིན་ནམ་མཁའ་དྲི་མ་མེད་ཅེས་པ་ལ་སོགས་པའོ། །གཞུང་ལས་འབྱུང་བས་བསྐོར་ཏེ་མདུན་དུ་བྱས་ནས་ཆོས་འཆད་དོ། །འདི་ལྟ་སྟེ། དུས་གསུམ་གྱི་དུས་ལས་འདས་པ། དེ་བཞིན་གཤེགས་པ་ཉི་མའི་བྱིན་གྱི་རླབས་ཀྱིས་ལུས་དང་ངག་དང་ཡིད་མཉམ་པའི་གནས་ཤེས་བྱའི་ཆོས་ཀྱི་སྒོ་མོའི་ཆོས་འཆད་དོ་ཞེས་པ་ཆོས་ལ་ཡང་རྣམ་པ་གཉིས་ཏེ། ཐོབ་པའི་ཆོས་དང་ལུགས་ཀྱི་ཆོས་སོ། །དེ་ལ་ཐོབ་པའི་ཆོས་ལ་ཡང་རྣམ་པ་གཉིས་ཏེ། དོན་དམ་པ་དང་ཀུན་རྫོབ་བོ། །དོན་དམ་པ་ནི་དེ་བཞིན་ཉིད་ཀྱི་མཚན་ཉིད་སྟོང་པའི་རང་བཞིན་ནོ། །ཀུན་རྫོབ་ཀྱི་ཆོས་ནི་དེ་བཞིན་གཤེགས་པའི་ལུས་ངག་ཡིད་མི་ཟད་པའི་རྒྱན་གྱིས་ཁམས་གསུམ་བྱ་བ་བར་སྟོན་པའོ། །ལུགས་ཀྱི་ཆོས་ནི་མདོ་སྡེ་དང་ཚིགས་སུ་བཅད་པ་ལ་སོགས་པ་གསུང་རབ་ཡན་ལག་བཅུ་གཉིས་ཏེ། དེ་རྣམས་ལས་གང་བཤད་ཅེ་ན། སྐབས་འདིར་ལུགས་ཀྱི་ཆོས་རྒྱུད་འདི་ཉིད་བཤད་བ་སྟེ། དེ་ཡང་གང་ཞེ་ན། གསུངས་པ་ལུས་དང་ངག་ཡིད་མཉམ་པ་ཉིད་ཀྱི་ཤེས་གནས་ཞེས་བྱ་བའི་ཆོས་ཀྱི་སྒོ་མོ་བཤད་དོ་ཞེས་པ་སྟེ། དེ་ལ་ལུས་དང་ངག་ཡིད་མཉམ་པ་ཉིད་ཅེས་པ་ནི། མཉམ་པ་གསུམ་གྱིས་རིག་བར་བྱ་སྟེ། བཅོམ་ལྡན་འདས་ཀྱི་སྐུ་དང་གསུང་དང་ཐུགས་ཀྱི་འཁོར་ལོས་སེམས་ཅན་གྱི་ལུས་དང་ངག་དང་ཡིད་ཇི་སྙེད་པ་དེ་སྙེད་དུ་ཁྱབ་པར་མཉམ་པ་ཉིད་དོ། །གཉིས་སུ་ན་བཅོམ་ལྡན་འདས་ཀྱི་སྐུ་གསུང་ཐུགས་ཀྱི་འཁོར་ལོས་སེམས་ཅན་གྱི་དོན་དུ་སྦྱོར་བ་ལས། དེ་བཞིན་གཤེགས་པའི་
སྐུའི་འཁོར་ལོས་གསུང་དང་ཐུགས་ཀྱི་བྱ་བ་ཡང་བྱེད། གསུང་གི་འཁོར་ལོས་ཀྱང་སྐུ་དང་ཐུགས་ཀྱི་བྱ་བ་ཡང་བྱེད། ཐུགས་ཀྱི་འཁོར་ལོས་ཀྱང་སྐུ་དང་གསུང་གི་བྱ་བ་ཡང་བྱེད་དོ། །དེ་ལྟར་མཚུངས་པར་བྱེད་པ་ན་མཉམ་པ་ཉིད་དོ། །གསུམ་དུ་ན་དེ་བཞིན་གཤེགས་པའི་སྐུ་ལ་སོགས་པ་དང༌། སེམས་ཅན་གྱི་ལུས་དང་ངག་དང་ཡིད་སྟོང་པ་ཉིད་ཀྱི་རང་བཞིན་དུ་དབྱེར་མེད་ཅིང་རོ་གཅིག་པས་ན་མཉམ་པ་ཉིད་དོ། །ཆོས་ཀྱི་སྒོ་མོ་ཞེས་པ་ནི། དེ་ལྟ་བུའི་ལུས་དང་ངག་དང་ཡིད་ཀྱི་མཉམ་པ་ཉིད་ཀྱི་ཤེས་གནས་དེ་བཤད་པས། ཐོབ་པའི་ཆོས་ལ་འཇུག་པར་འགྱུར་བའི་སྒོ་ནས་སྒོ་མོ་ཞེས་གསུངས་སོ། །དེ་བཞིན་དུ་གཞན་ཡང་ལུགས་ཀྱི་ཆོས་རྣམས་ནི་ཐོབ་པའི་ཆོས་ལ་འཇུག་པའི་སྒོ་ལྟ་བུར་རིག་པར་བྱའོ། །དེ་ལ་ཆོས་འཆད་པ་ཡང་སྐུ་བཞི་གང་གིས་འཆད་ཅེ་ན། ཆོས་ཀྱི་སྐུ་དང་བྱང་ཆུབ་ཀྱི་སྙིང་པོ་ན་བཞུགས་པའི་སྐུ་ནི་མི་གཡོ་བ་ཉིད་ཚིག་ཏུ་བརྗོད་པ་ལས་འདས་པས་ན་ཚིག་གིས་ཆོས་མི་འཆད། དེའི་བྱིན་གྱི་རླབས་ཀྱིས་རྫོགས་ལོངས་སྤྱོད་པ་དང་སྤྲུལ་པའི་སྐུས་འཆད་དོ། །དེ་ལ་སྐབས་འདིར་ཡང་བཅོམ་ལྡན་འདས་རྣམ་པར་སྣང་མཛད་རྫོགས་ལོངས་སྤྱོད་པའི་སྐུས་ལུས་དང་ངག་དང་ཡིད་དང་མཉམ་པ་ཉིད་ཀྱི་ཤེས་གནས་ཀྱི་ཆོས་ཀྱི་སྒོ་འཆད་དེ་དེ་ཡང་འདི་ལྟ་སྟེ། དུས་གསུམ་གྱི་དུས་ལས་འདས་པ་དེ་བཞིན་གཤེགས་པ་ཉི་མའི་བྱིན་གྱི་རླབས་ཀྱིས་འཆད་དེ། ཆོས་ཀྱི་སྐུ་དེ་ཉི་མ་ལྟ་བུར་སྣང་བའི་རང་བཞིན་བས་ན། དེ་བཞིན་གཤེགས་པའི་ཉི་མ་ཞེས་བྱ་བ་སྟེ། ཆོས་ཀྱི་སྐུ་ཉི་མ་དང་ཟླ་བ་ལ་སོགས་པའི་དུས་ལས་འདས་པ་སྟེ། དེ་བས་ན་དུས་གསུམ་གྱི་དུས་ལས་འདས་པ་ཞེས་གསུངས་པ་ཡིན་ནོ། །དེ་ལ་དུས་གསུམ་གྱི་དུས་ལས་འདས་པ་ཞེས་པ་ནི། འདས་པའི་དུས་དང་ད་ལྟར་གྱི་དུས་དང་མ་འོངས་པའི་དུས་ལས་འདས་པའོ། །དེ་དག་ནི་སྟོན་པ་ཕུན་སུམ་ཚོགས་པ་བཤད་པ་ལ་བྱའོ། །མཐུ་ཕུན་སུམ་ཚོགས་པ་བཤད་པ་ནི་གཞུང་ལས་འབྱུང་བ་དེ་ནས་ཀུན་དུ་བཟང་པོ་ལ་སོགས་པ་དང༌། གསང་བའི་བདག་པོ་རྡོ་རྗེ་འཛིན་ལ་སོགས་པའི་རྣམས་ཞེས་པ་ནས། སྔགས་ཀྱི་ཚུལ་གྱི་ཚིག་གིས་ཆོས་འཆད་པར་མཐོང་ངོ་ཞེས་པའི་བར་དུ་སྟེ། དེ་ལ་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱི་
རླབས་ཀྱིས་ལུས་མཉམ་པ་ཉིད་མི་ཟད་པའི་རྒྱན་གྱི་མཛོད་རྣམ་པར་སྤྲུལ་པ་ལ་འཇུག་གོ་ཞེས་པ་ནི། དེ་ལ་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་རྣམས་ས་བཅུ་ལ་སོགས་པ་རབ་ཏུ་ཐོབ་པ་ན། རང་གི་ཏིང་ངེ་འཛིན་དང་རྣམ་པར་གྲོལ་བའི་སྒོ་ནས་མཐུ་དང་རྫུ་འཕྲུལ་འབྱིན་པ་དང༌། སངས་རྒྱས་ཀྱི་ཞིང་རྣམ་པར་བརྒྱན་པ་ལ་སོགས་པ་བྱས་པས་མགུ་ཞིང་དེ་ལས་གཞན་བྱ་བ་མེད་སྙམ་པའི་བློ་སྐྱེ་བ་ལ། བཅོམ་ལྡན་འདས་རྣམ་པར་སྣང་མཛད་ཀྱི་དཔལ་གྱི་བེའུའི་འོད་མཆོག་སྦྱིན་པ་བཏང་བས། བྱང་ཆུབ་སེམས་དཔའ་དེ་རྣམས་ཀྱི་གཙུག་ཏུ་ཕོག་སྟེ། དེའི་བྱིན་གྱི་རླབས་ཀྱིས་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་དེ་རྣམས་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་མཉམ་པ་ཉིད་མི་ཟད་པའི་རྒྱན་གྱི་མཛོད་རྣམ་པར་སྤྲུལ་པ་ལ་འཇུག་པར་གྱུར་ཏོ། །དེ་བཞིན་དུ་གསུང་དང་ཐུགས་མི་ཟད་པའི་རྒྱན་གྱི་མཛོད་རྣམ་པར་སྤྲུལ་པ་ལ་ཡང་དག་པར་འཇུག་པར་གྱུར་ཏོ། །དེ་ལ་མཉམ་པ་ཉིད་རྣམ་པ་གསུམ་གོང་དུ་བཤད་པའོ། །མི་ཟད་པ་ནི་ཆོས་ཀྱི་སྐུའི་བྱིན་གྱི་རླབས་ཀྱིས་སྐུ་ལ་སོགས་པ་དེ་དག་ནམ་འཁོར་བ་ཡོད་ཀྱི་བར་དུ་གནས་པའོ། །རྒྱན་ཞེས་པ་ནི་སྐབས་འདིར་རྣམ་པ་སྣ་ཚོགས་སུ་བལྟའོ། །མཛོད་ཅེས་པ་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཉིད་ལ་བྱ་སྟེ། སྐུ་དེ་ལས་ཇི་ལྟར་འདུལ་བ་དང་རྗེས་སུ་མཐུན་པའི་སྐུ་ལ་སོགས་པ་མི་ཟད་པའི་འཁོར་ལོ་འབྱུང་བའི་ཕྱིར་རོ། །རྣམ་པར་སྤྲུལ་པ་ནི་སྐུ་ལ་སོགས་པའི་འཁོར་ལོ་དེ་དག་ཉིད་གང་གིས་ཀྱང་ཟིལ་གྱིས་མི་ནོན་པར་རང་གི་བྱ་བ་ལ་འཇུག་པའོ། །འོན་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་འམ་གསུང་ངམ་ཐུགས་ལས་ཕྱིར་བྱུང་བའམ་ལྡོག་པར་མི་མངོན་ཞེས་པ་ལས་འགའ་ཞིག་རྟོག་པ་སྐྱེ་བ་གདུལ་བར་བྱ་བའི་འགྲོ་བ་རྣམ་པ་བཞི་སྟེ། ཤེས་བྱ་དང་ཉོན་མོངས་པའི་སྒྲིབ་པ་སྤངས་པའི་རྣམ་པར་རྟོག་པ་དར་ལྭ་ཙམ་གྱིས་བསྒྲིབས་པའི་ལྷག་མ་མ་ལུས་པའི་བྱང་ཆུབ་སེམས་དཔའ་རྣམས་དང༌། མོས་པ་རྣམ་པར་དག་པ་སྤྱོད་པའི་ས་མངོན་དུ་བྱས་པ་རྣམས་དང༌། ཉན་ཐོས་དང་རང་སངས་རྒྱས་ཀྱི་ཉོན་མོངས་པའི་སྒྲིབ་པ་ནི་བྱང༌། ཤེས་བྱའི་སྒྲིབ་བ་མ་བྱང་བ་ཕྱོགས་གཅིག་བ་རྣམས་དང༌། འགྲོ་བ་ཐ་དད་པ་ཉོན་
མོངས་པ་རྣམས་དང༌། ཤེས་བྱའི་སྒྲིབ་པ་མ་སྤངས་པ་རྣམས་ཏེ་དེ་བས་ན་བཅོམ་ལྡན་འདས་ཀྱི་སྐུ་ལས་ཕྱིར་འབྱུང་བའམ་ལྡོག་པར་མི་མངོན་ཏེ་རྣམ་པར་མི་རྟོག་ན། བྱང་ཆུབ་སེམས་དཔའ་ཡོངས་སུ་དག་པ་རྣམས་ཀྱི་སྤྱོད་ཡུལ་དུ་འགྱུར་གྱི། འོག་མ་རྣམས་ཀྱི་སྤྱོད་ཡུལ་དུ་མི་འགྱུར་སྙམ་དུ་དོགས་པ་སྐྱེ་བ་ལ་དེའི་ལན་དུ་བཅོམ་ལྡན་འདས་མངོན་པར་བྱང་ཆུབ་པ་ཉིད་ཀྱི་ཚེ་ན། རྣམ་པར་མི་རྟོག་པར་སྔོན་གྱི་སྨོན་ལམ་གྱི་ཤུགས་དང་ཆོས་ཉིད་ཀྱིས་ལྷུན་གྱིས་གྲུབ་པ་ཉིད་དུ་རྫོགས་ལོངས་སྤྱོད་པའི་སྐུ་དང༌། སྤྲུལ་པའི་སྐུས་ཇི་ལྟར་སྣོད་དུ་གྱུར་པའི་སེམས་ཅན་གྱི་དོན་ཐམས་ཅད་དུ་མཛད་དེ། དེ་བས་ན་གཞུང་ལས་གསུངས་པ་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ལས་ཀུན་དང༌། གསུང་གི་ལས་ཀུན་དང༌། ཐུགས་ཀྱི་ལས་ཀུན་ཐམས་ཅད་དུ་སེམས་ཅན་གྱི་ཁམས་ཐམས་ཅད། སྔགས་ཀྱི་ཚུལ་གྱི་ཚིག་གིས་ཆོས་འཆད་པར་མཐོང་ངོ་ཞེས་པའོ། །དེ་ལ་མཐོང་བ་ནི་ཀུན་དུ་བཟང་པོ་བྱང་ཆུབ་སེམས་དཔའ་ལ་སོགས་པའི་སྤྱོད་ཡུལ་དུ་གྱུར་པ་སྟེ། དེ་ཡང་རྣམ་པ་ཐམས་ཅད་དུ་མཐོང་བ་ནི་མ་ཡིན་མོད་ཀྱི། རང་གི་མཐུ་དང་སྤྱོད་ཡུལ་ཤས་ཆེ་ཆུང་བཅོམ་ལྡན་འདས་སྐུ་ལ་སོགས་པའི་འཁོར་ལོ་མཐོང་བའམ་ཆུད་པ་ལ་བྱ་སྟེ། རྣམ་པ་ཐམས་ཅད་ཆུད་ཅིང་མཐོང་ན་དེ་བཞིན་གཤེགས་པ་དང་བྱེ་བྲག་མེད་བའི་ཕྱིར་རོ། །རྡོ་རྗེ་འཛིན་པ་དང༌། ཀུན་དུ་བཟང་པོ་དང་ཕྱག་ན་པདྨའི་ལུས་དང་འདྲ་བ་ཞེས་པ་ནས་ལས་ཀྱི་ཚེ་འགགས་པ་ཡང་འབྱུང་བའི་མྱུ་གུ་མཐོང་བར་སྐྱེ་ཞེས་པའི་བར་དུ་བཤད་པར་བྱ་བ་དེ་ལ་རྡོ་རྗེ་འཛིན་པ་དང་ཀུན་དུ་བཟང་པོ་དང༌། ཕྱག་ན་པདྨོའི་ལུས་དང་འདྲ། །ཞེས་པ་ནི་བཅོམ་ལྡན་འདས་རྣམ་པར་སྣང་མཛད་མངོན་པར་བྱང་ཆུབ་པའི་བྱིན་གྱི་རླབས་ཀྱིས་དེ་ལྟ་བུའི་ལུས་དང་འདྲ་བས་ཆོས་འཆད་པ་ནི་ལས་ཀྱི་ཚེ་ལས་སྐྱེས་པའི་སེམས་དཔའ་རྣམས་དང༌། ལས་ཀྱི་ཚེ་འགགས་པའི་སེམས་ཅན་རྣམས་སླར་འབྱུང་བའི་མྱུ་གུ་མངོན་པར་སྐྱེ་བྲི་བྱ་བའི་ཕྱིར་ཏེ། དེ་ལ་ལས་ཀྱི་ཚེ་ལས་སྐྱེས་པ་ནི་མོས་པ་སྤྱོད་པའི་ས་ན་གནས་པ་ན་སེམས་གསུམ་སྤྱོང་བ་དང༌། ས་བཅུ་ལ་སོགས་པའི་ཡོན་ཏན་ཅི་འདྲ་བ་དེ་ངེས་པར་ཤེས་ཤིང༌། དེ་ལ་མོས་པས་ཉོན་མོངས་པ་ཀུན་ནས་མི་ལྡང་བར་རྣམ་པ་ཀུན་མནན་ཏེ། སེམས་སྦྱོང་བ་ལ་སོགས་
པའི་དགེ་བའི་ལས་ཀྱི་དབང་གིས་བརྒྱ་བྱིན་དང་ཚངས་པ་ལ་སོགས་པར་ཇི་ལྟར་སྨོན་པ་བཞིན་དུ་གར་འདོད་པར་སྐྱེ་བ་ནི་ལས་ཀྱི་ཚེ་ལས་སྐྱེས་པ་རྣམས་ཏེ། དེ་ཡང་སེམས་དང་པོ་བསྐྱེད་པ་ནས་ས་བཅུ་པའི་བར་དུའོ། །དེ་ལ་སེམས་དང་པོ་བསྐྱེད་པ་ཞེས་པ་ནི་ས་དང་པོ་རབ་ཏུ་དགའ་བ་ལ་བྱའོ། །ལས་ཀྱི་ཚེ་བགགས་པ་ཞེས་པ་ནི་འཕགས་པ་ཉན་ཐོས་ཉོན་མོངས་པའི་སྒྲིབ་པ་སྤངས་པ་རྣམས་ཕུང་པོ་ལྷག་མ་དང་བཅས་པའི་མྱ་ངན་ལས་འདས་བའི་ཚོ། པདྨོ་དམ་པའི་སྙིང་པོ་ལ་བསྐལ་པ་བརྒྱད་ཅུར་གནས་ནས། ཚེ་དེ་འགོག་པར་བྱེད་པ་དེ་ལ་བྱང་ཆུབ་སེམས་དཔའ་དེ་རྣམས་ཀྱིས་ཚེ་འགོག་པ་དེ་ལས་བཟློག་སྟེ་སླར་འབྱུང་བའི་མྱུ་གུ་བསྐྱེད་ནས་ས་བཅུ་ལ་འཇུག་པ་དང༌། རྫོགས་པར་བྱ་བའི་ཕྱིར་ཆོས་འཆད་དོ། །འདི་ཉིད་ཀྱིས་ཡོངས་སུ་རྫོགས་པར་བྱ་བའི་ཕྱིར་ཞེས་པའི་སྔགས་ཀྱི་ཚིག་རྣམ་པར་དག་པ་འདི་ཉིད་ཀྱིས་ཞེས་པར་དགོངས་པའོ། །སྔགས་ཀྱི་ཚིག་རྣམ་པར་དག་པ་ཞེས་པ་ནི་ཕྱག་ན་པདྨོ་དང༌། ཕྱག་ན་རྡོ་རྗེ་ལ་སོགས་པའི་བདག་གི་ངོ་བོ་ལས་ཀྱི་ཚེ་ལས་སྐྱེས་པའི་སེམས་དཔའ་རྣམས་དང༌། ལས་ཀྱི་ཚེ་བགགས་པའི་སེམས་ཅན་རྣམས་སེམས་ཅན་ཕལ་དང་འདྲ་བར་ཉོན་མོངས་པའི་དབང་དུ་མི་འགྲོ་བ་སྟེ། དེ་རྣམས་ལ་ཆོས་བཤད་པ་ཡངས་དང་པོ་ནས་བརྩམས་ནས་ས་བཅུ་རྫོགས་པར་བྱ་བའི་ཕྱིར། རྣམ་པར་དཀར་བའི་ཆོས་ཤ་སྟག་པས་སྔགས་ཀྱི་ཚིག་རྣམ་པར་དག་པའོ་ཞེས་པའོ། །ད་ནི་འཕགས་པ་ཀུན་དུ་བཟང་པོ་ལ་སོགས་པ་དེ་རྣམས་ཉིད་བཤད་པའི་ཆོས་ལ་འཇུག་པའི་ཞར་ལ་སྔགས་རྒྱུད་དང་རྟོག་པ་ལ་སོགས་པའི་ཆོས་ཀྱི་བདག་ཉིད་རྣམས་ལ་འཇུག་སྟེ། བཤད་པའི་ཆོས་ཀྱི་རིམ་པ་བསྡུས་པར་མཛད་པས་ཇི་ལྟར་རྗེས་སུ་ཆུད་པ་སྟེ་བསྟན་པར་གསུངས་པ་སྟེ་ཐམས་ཅད་དུ་ཡང༌། བཅོམ་ལྡན་འདས་རྣམ་པར་སྣང་མཛད་ཀྱི་ལུས་ཀྱི་ལས་ཐམས་ཅད་དང༌། དག་གི་ལས་ཐམས་ཅད་དང༌། ཡིད་ཀྱི་ལས་ཐམས་ཅད་དུ་སེམས་ཅན་གྱི་ཁམས་ཐམས་ཅད་ལ་སྔགས་སྨྲ་བར་བྱ་སྟེ། ཐམས་ཅད་དུ་ཞེས་པ་ནི་དུས་ཐམས་ཅད་དུ་ཞེས་པ་ཁོ་ནས་དབྱུང་ངོ༌། །ངེས་ཚིག་གི་དོན་ལ་འདི་ལྟ་སྟེ། ས་དང་བོ་ཕ་རོལ་ཏུ་ཕྱིན་པ་རྫོགས་པའི་དུས་དང༌། བྱང་ཆུབ་ཐོབ་པའི་དུས་སུ་ཞེས་པ་སྟེ། དེ་ཇི་ལྟ་ཞེ་ན། གསུངས་པ་བཅོམ་
ལྡན་འདས་རྣམ་པར་སྣང་མཛད་ལུས་ཀྱི་ལས་ཐམས་ཅད་དང༌། ངག་གི་ལས་ཐམས་ཅད་དང་ཡིད་ཀྱི་ལས་ཐམས་ཅད་དོ་ཞེས་སོ། །དེ་ལ་འདིར་ལུས་ཀྱི་ལས་ལ་སོགས་བའི་ཚིག་གིས་བཅོམ་ལྡན་འདས་དང་ཕ་རོལ་ཏུ་ཕྱིན་པ་རྫོགས་པར་བྱེད་པ་དང༌། དེ་བཞིན་དུ་བྱང་ཆུབ་ཐོབ་པའི་རྒྱུར་གྱུར་པའི་ལུས་དང་ངག་དང་ཡིད་ཀྱི་བྱ་བ་ནན་ཏན་དེས་གང་མཐུའི་ཁྱད་པར་བཅོམ་ལྡན་འདས་ཀྱི་ཡེ་ཤེས་ལ་བསགས་པ་དེ་ལས་ཀྱི་ཚིག་ཏུ་གསུངས་སོ། །དེ་ལྟ་བུའི་མཐུའི་མཚན་ཉིད་ཀྱི་ལས་ཀྱང་དཀྱིལ་འཁོར་གྱི་ལྷའི་གཟུགས་སུ་གྱུར་པའི་སྤྱོད་པ་གསུངས་པ་ཐམས་ཅད་དུ་ཡང་སེམས་ཅན་གྱི་ཁམས་ཐམས་ཅད་ལ་སྔགས་ཀྱི་ཚིག་གིས་ཆོས་འཆད་པར་མཐོང་ངོ་ཞེས་པའོ། །དེ་ལས་ཐམས་ཅད་དུ་ཞེས་པ་ནི་འཇིག་རྟེན་གྱི་ཁམས་རྒྱས་པ་ཐམས་ཅད་པར་ཤེས་པར་བྱའོ། །སེམས་ཅན་གྱི་ཁམས་ཐམས་ཅད་ལ་ཞེས་པ་ནི་དེ་འཇིག་རྟེན་གྱི་ཁམས་རྒྱས་པར་འགྲོ་བ་རྒྱུད་དྲུག་ཏུ་གཏོགས་པའི་སེམས་ཅན་རྣམས་ལས་དང་ཉོན་མོངས་པའི་དབང་གིས་ཚེ་ཐོབ་པ་རྣམས་ཤེས་པར་དགོངས་ཏེ། སྔགས་ཀྱི་ཚུལ་གྱི་ཚིག་གི་ཆོས་འཆད་པ་ཞེས་པ་ནི། དེ་ལ་ཤེས་པ་དང་དཔུང་གཉེན་དུ་སྦྱོར་བས་ན། སྔགས་དེས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་རང་བཞིན་རྣམས་སུ་གསུངས་ཏེ། དེའི་རྣམ་པར་ཐར་པའི་སྒོ་ལ་སོགས་པའི་ཚིག་རྣམས་དང༌། དེར་བྱིན་གྱིས་བརླབས་པ་ཉིད་ཡི་གེ་དང་ཚིག་བྱེད་པ་རྣམས་ཀྱང་སྔགས་ཀྱི་ཚིག་ཏུ་གསུངས་སོ། །སྔགས་དེ་རྣམས་ཀྱི་རྒྱུ་དང་རང་བཞིན་དང༌། འབྲས་བུ་ཐོབ་པའི་ཐབས་ཀྱི་ལམ་ནི་ཚུལ་ཏེ་དེ་ཤེས་ཤིང་ཐོབ་པ་ནི་ཆོས་ཀྱི་ཚིག་དེ་རྣམས་ཀྱི་སྟེ་དེ་རྣམས་ནི་སྔགས་ཀྱི་ཚིག་ཅེས་གསུངས་སོ། །ཚིག་དེ་རྣམས་ཀྱིས་བཅོམ་ལྡན་འདས་ཀྱི་ལས་ཏེ་སྔགས་ལ་སོགས་པའི་ལྷར་སྣང་བར་འགྱུར་ཏེ། སྔགས་ཀྱི་ཚུལ་གྱིས་མཚན་ཉིད་བཤད་པའི་ཆོས་སྟོན་པར་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་དེ་རྣམས་ཀྱིས་མཐོང་ངོ་ཞེས་པ་འདིས་རྣམ་པ་གསུམ་གསུངས་ཏེ། དེ་བཞིན་གཤེགས་པའི་ལུས་ལ་སོགས་པའི་ལམ་རྣམས་ཀྱིས་དཀྱིལ་འཁོར་གྱི་ལྷའི་གཟུགས་སུ་གྱུར་པ་དང༌། དེ་ཡང་ཇི་ལྟར་སྣོད་དུ་གྱུར་པའི་གདུལ་བའི་འགྲོ་བ་འདུལ་ནུས་པའི་རྗེས་སུ་མཐུན་པ་དང༌། དེ་བཤད་པའི་ཆོས་སྔགས་ཀྱི་ཚིག་ཏུའོ། །
དོན་འདི་ཡང་བཅོམ་ལྡན་འདས་ཀྱིས་ཡང་རྒྱུད་འདིར་གཞུང་འདི་གསལ་བར་བསྟན་ཏེ། དེ་གསུངས་པ་བཅོམ་ལྡན་འདས་ཀྱིས་རང་གི་ལུས་ལ་སོགས་པའི་ལས་ཀྱི་ལྷའི་གཟུགས་སུ་གྱུར་པའི་ཕྱིར་རོ། །དེ་བཞིན་གཤེགས་པའི་ཐོགས་པ་མེད་པའི་སྟོབས་བཅུ་ལ་མོས་པ་ལས་དུ་མའི་ཁ་དོག་དང་དབྱིབས་སུ་བཀོད་པའི་བདག་གི་ངོ་བོ་བསྐལ་པ་དུ་མ་བྱེ་བ་ཁྲག་ཁྲིག་བརྒྱ་སྟོང་དུ་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པའི་བསོད་ནམས་བསྐྱེད་པའི་ལུས་འབྱུང་ངོ་ཞེས་པ་ལ་སོགས་པ་སྟེ། དེ་ཡང་བཅོམ་ལྡན་འདས་ཀྱི་ལུས་ལ་སོགས་པའི་ལས་རྣམས་ལྷ་ལ་སོགས་པའི་གཟུགས་སུ་གྱུར་པ་དེ་ནི་ཅི་ཡང་རུང་བ་མ་ཡིན་གྱི། སེམས་ཅན་འདུལ་བར་སྣང་བའི་རང་བཞིན་དུ་བས་ཏེ། གང་གསུངས་པ། བཅོམ་ལྡན་འདས་ཏིང་ངེ་འཛིན་ལ་མཉམ་པར་ཞུགས་མ་ཐག་ཏུ་ཡང་བཅོམ་ལྡན་འདས་ཇི་ལྟ་བ་བཞིན་དུ་ལས་དང་ཚེའི་རྣམ་པར་སྨིན་པ་དང༌། འབྲས་བུ་ཟ་བ་དང༌། བར་འཇུག་པའི་གཟུགས་དང༌། ཁ་དོག་དང༌། དབྱིབས་དང༌། སྤྱོད་པ་དང༌། ཚིག་དང་བརྗོད་པ་རྣམས་སེམས་ཅན་སོ་སོར་མགུ་བར་བྱེད་པ། བ་སྤུའི་བུ་ག་ཐམས་ཅད་ནས་ཆོས་ཀྱི་དབྱིངས་ལས་སྐྱེས་པ་རྟག་ཏུ་འབྱུང་སྟེ། བྱུང་ནས་ཀྱང་ནམ་མཁའི་ཁམས་ཀུན་དུ་རྒྱས་པ། འཇིག་རྟེན་གྱི་ཁམས་སུ་རྒྱས་པར་སྒྲའི་དབྱངས་གཅིག་གིས་ཆོས་ཀྱི་དབྱིངས་ཆུད་པར་བྱེད་པ། དེ་བཞིན་གཤེགས་པ་འབྱུང་བར་སྲིད་པའི་ཚིགས་སུ་བཅད་པ་འདི་འབྱུང་ངོ་ཞེས་པ་ལ་སོགས་པ་དང། དེ་བཞིན་དུ་དེ་དག་གིས་བཤད་པའི་སྔགས་ལ་སོགས་པའི་ཚིག་ཏུ་བྱ་བའི་དོན་དང༌། དེའི་བྱིན་གྱིས་བརླབས་ཀྱི་ཕྱིར་གསུངས་པ་དང༌། ཇི་ལྟར་ཡང་དེ་བཞིན་གཤེགས་པའི་སྔགས་ཀྱི་ཚུལ་ཡི་གེའི་འབྲུར་གནས་པ་དེ་དག་ལ། གསང་བའི་བདག་པོ་དེ་དག་ནི་དེ་བཞིན་གཤེགས་པས་བསྐལ་པ་བརྒྱ་སྟོང་ཁྲག་ཁྲིག་དུ་མར་བསགས་པའི་བདེན་པའི་ཚིག་དང༌། དྲན་པ་ཉེ་བར་གཞག་པ་བཞི་དང༌། གང་འཕགས་པའི་བདེན་པ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དེ་བཞིན་གཤེགས་པའི་སྟོབས་བཅུ་དང༌། ཕ་རོལ་ཏུ་ཕྱིན་པ་དྲུག་དང༌། བྱང་ཆུབ་ཀྱི་
ཡན་ལག་བདུན་རྣམས་དང༌། ཚངས་པའི་སྤྱོད་པ་རྣམ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་ནི་མདོར་ན་གསང་བ་པའི་བདག་པོ་གང་དེ་བཞིན་གཤེགས་པ་རྣམས་ཀྱི་ཐམས་ཅད་མཁྱེན་པའི་ཡེ་ཤེས་ལ། དེ་ཐམས་ཅད་དེ་བཞིན་གཤེགས་པའི་རང་གི་སྨོན་ལམ་དང་ཡེ་ཤེས་ཀྱི་སྟོབས་དང༌། ཆོས་ཀྱི་དབྱིངས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་ཏེ། ཇི་ལྟར་སྟོང་དུ་གྱུར་པའི་སེམས་ཅན་རྣམས་ལ་སྔགས་ཀྱི་ཆོས་སྟོན་ཞེས་པ་ལ་སོགས་པ་སྟེ། དེ་ལ་ཇི་ལྟར་རྟོག་པ་ཐམས་ཅད་རབ་ཏུ་མེད་པ་ཆོས་ཀྱི་སྐུ་གནས་པ་དེ་བཞིན་གཤེགས་པ་དེ་ལྟ་བུའི་སྔགས་ཀྱི་ལྷ་ལ་སོགས་པ་འབྱུང་ཞེས་གང་གིས་གླེངས་ན། དེའི་ཕྱིར་བཅོམ་ལྡན་འདས་ཀྱིས་འདི་གསུངས་ཏེ། ཇི་ལྟར་ལུས་ཀྱི་བྱེ་བྲག་གི་དམིགས་སྟོན་པ་རྣམ་པ་མང་དུ་གནས་པ་དེ་བཞིན་དུ་སྔགས་ཀྱི་མགོན་པོ་གསུངས་པ་གྲངས་མེད་པའོ། །ཇི་ལྟར། ཡིད་བཞིན་ནོར་བུ་དཔལ་ལྡན་པ། །འདོད་པའི་དོན་ནི་རབ་བསྒྲུབ་པ། །དེ་ལྟར་འཇིག་རྟེན་སྒྲོན་མ་ཡི། །ལུས་ནི་ཐམས་ཅད་དོན་སྒྲུབ་པའོ། །ཇི་ལྟར་ན་ཡང་གསང་བའི་བདག་པོ་ཆོས་ཀྱི་དབྱིངས་རྣམ་པར་མི་རྟོག་པའི་དགོས་པ་ཐམས་ཅད་མངོན་པར་བྱེད་ཅེས་པ་ནི་འདི་ལྟ་སྟེ། གསང་བའི་བདག་པོ་ནམ་མཁའི་ཁམས་ནི་སེམས་ཅན་མ་ཡིན། སྲོག་མ་ཡིན། ཤེད་ལས་སྐྱེས་པ་མ་ཡིན། བྱེད་པ་པོ་མ་ཡིན། ཚོར་བ་པོ་མ་ཡིན། གཟུང་བ་མ་ཡིན། འཛིན་པ་མ་ཡིན། རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་ཏེ། འོན་ཀྱང་སེམས་ཅན་གྱི་ཁམས་མ་ལུས་པའི་འགྲོ་བ་དང་འོང་པ་ལ་སོགས་པར་བྱེད་དོ། །དེ་ལ་དགོས་པ་མེད་དོ། །དེ་བཞིན་དུ་ཐམས་ཅད་མཁྱེན་པ་གནས་མེད་པ་འདི་རྣམ་པར་མི་རྟོག་ཀྱང་འགྲོ་བ་ཐམས་ཅད་ཀྱི་ཕྱི་ནང་གི་བྱ་བ་བྱེད་དོ་ཞེས་སོ། །བཤད་པ་འདི་ཡང་བཅོམ་ལྡན་འདས་ཀྱི་དགོངས་པ་ཤེས་པ་ནི་འདི་ལྟ་སྟེ། ཆོས་ཀྱི་སྐུ་ལ་རྣམ་པར་གནས་པ་དེ་བཞིན་གཤེགས་པ་ལ་རྣམ་པར་རྟོག་པ་མེད་ཀྱང༌། སྔོན་གྱི་སྨོན་ལམ་གྱི་ཤུགས་ཀྱིས་ལྷའི་ལུས་ལ་སོགས་པ་ཐམས་ཅད་དུ་རབ་ཏུ་སྣང་བ་དེ་ལ་རྣམ་པར་རྟོག་པའི་སྐབས་ཀྱིས་ཅི་ཞིག་བྱ་ཞེས་པའོ། །གཞུང་ལས་འབྱུང་བ་དེ་ནས་ཕྱག་ན་རྡོ་རྗེ་གསང་བའི་བདག་པོ་འཁོར་འདུས་པ་ན་བཞུགས་པ་ལས་ལངས་
ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པ་ནས་བཅོམ་ལྡན་འདས་དེ་ལྟ་བས་ན་ཡེ་ཤེས་དེའི་རྒྱུ་ནི་གང་ལགས། རྩ་བ་ནི་གང་མཐར་ཐུག་པ་ནི་གང་ལགས་ཞེས་པའི་བར་དུ། བཅོམ་ལྡན་འདས་ཀྱི་སྐུ་དང་གསུང་དང་ཐུགས་ཀྱི་ལས་ལས་ཐམས་ཅད་མཁྱེན་པའི་ཡེ་ཤེས་ལས་འབྱུང་བ་ཐམས་ཅད་མཁྱེན་པའི་ཡེ་ཤེས་དེ་སེམས་ཅན་རྣམས་ལ་སོ་སོར་ཕྱེ་སྟེ། ཚུལ་སྣ་ཚོགས་དང༌། བསམ་པ་སྣ་ཚོགས་དང༌། ཐབས་སྣ་ཚོགས་སུ་འཆད་པ་དེ་དག་ཇི་ལྟར་མཐོང་བ་བཅོམ་ལྡན་འདས་ལ་སླར་བཟླས་ནས་ཐམས་ཅད་མཁྱེན་པའི་ཡེ་ཤེས་དེའི་རྒྱུ་དང་རྩ་པ་དང་མཐར་ཐུག་པ་དྲིས་པ་ལ་བྱ་སྟེ། ཇི་ལྟར་བྱ་ཞེས་པ་ནི་འོག་ནས་འབྱུང་བའི་ཚིག་རྣམས་འདྲི་བ་ལ་མི་བྱའི། དེ་རྣམས་བདག་གི་ཇི་ལྟར་ཆུད་པ་རྣམས་གསོལ་ནས། ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་དང་རྩ་བ་དང་མཐར་ཐུག་པ་དྲིས་པའི་ཚིག་སྦྱོར་སྨོས་པའོ། །དེ་ལ་བཅོམ་ལྡན་འདས་དང་དེ་བཞིན་གཤེགས་པ་ནི་གོང་དུ་བཤད་པའོ། །དགྲ་བཅོམ་པ་ནི་ཉོན་མོངས་པའི་དགྲ་བཅོམ་པའམ་བཀུར་སྟིའི་གནས་སུ་རིགས་པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པའི་ཡེ་ཤེས་ཐོབ་ནས་ཞེས་པ་ནི་སྙིང་པོ་བྱང་ཆུབ་ན་ཡང་དག་པར་བཞུགས་པའོ། །ཐམས་ཅད་མཁྱེན་པའི་ཡེ་ཤེས་ནི་ཀུན་རྫོབ་དང་དོན་དམ་པ་རྣམ་པ་གཉིས་ཏེ། ཀུན་རྫོབ་ནི་སྟོབས་བཅུ་དང་མི་འཇིགས་པ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པ་རྣམས་པ་ཐམས་ཅད་མཁྱེན་པའོ། །དོན་དམ་པར་ནི་སྟོང་པ་ཉིད་དུ་མཁྱེན་པའོ། །སོ་སོར་ཕྱེ་སྟེ་ཞེས་པ་ནི་སོ་སོར་བཤད་པའི་དོན་ཏེ། ཐམས་ཅད་མཁྱེན་པར་རོ་གཅིག་ཏུ་གྱུར་ཅིང་རྫོགས་པ་མཚན་ནི་འོག་ནས་འཆད། མི་དང་ལྷར་སྐྱེ་བ་ལ་སོགས་ཏེ། འཇིག་རྟེན་གྱི་དགེ་བ་བཅུ་གྲུབ་པ་དང་ཉན་ཐོས་ལ་སོགས་པ་ཐམས་ཅད་ཀྱང་མཁྱེན་པའི་ཆ་སྟེ། ཇི་ལྟར་ཞེ་ན། འཇིག་རྟེན་གྱི་བསོད་ནམས་ཐམས་ཅད་མཁྱེན་པ་ཉིད་ནས་འབྱུང་བའི་རྒྱུ་སྟེ། ཐམས་ཅད་མཁྱེན་པའི་ཆ་ཤས་ཡོད་པས་ན་རྒྱུར་འགྱུར། གཞན་ཡང་མངོན་དུ་དང་ཉིང་ནས་ཉིང་གི་རྒྱུ་དང་རང་བཞིན་པར་རིག་པར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་ཚོགས་རྣམས་ཐམས་ཅད་མཁྱེན་པའི་ཡེ་
ཤེས་ལ་བསགས་པ་དེ་ལྷུན་གྱིས་གྲུབ་པ་ཉིད་དུ་སེམས་ཅན་རྣམས་ལ་སོ་སོར་ཕྱེ་བའི་ཚུལ་ལ་སོགས་པ་སྣ་ཚོགས་སུ་བསྟན་པ་སྟེ། དེ་ལ་ཚུལ་སྣ་ཚོགས་ཞེས་པ་ནི། ཁ་ཅིག་ལ་ཉན་ཐོས་ཀྱི་ཐེག་པའི་ཚུལ་ཞེས་པ་ནས་ལྔ་མངོན་པར་ཤེས་པའི་ཚུལ་དུ་ཞེས་པའི་བར་དུ་སྟེ། དེ་རྣམས་སོ་སོར་རྣམ་པར་གྲོལ་བའི་ལས་ལ་བྱའོ། །བསམ་པ་སྣ་ཚོགས་ཞེས་པ་ནི་ཁ་ཅིག་ལ་ལྷར་སྐྱེ་བའི་ཕྱིར་ཉན་པ་དང༌། མིའམ་ཅིར་སྐྱེ་བའི་བར་དུ་ཆོས་འཆད་པ་ཞེས་པའི་བར་དུ་སྟེ། དེ་རྣམས་སུ་སྐྱེ་བར་འདོད་པའི་བསམ་པ་དང་རྗེས་སུ་མཐུན་པར་ཆོས་འཆད་པ་ལ་བྱའོ། །ཐབས་སྣ་ཚོགས་སུ་འཆད་ཅེས་པ་ནི། དེ་ལ་སེམས་ཅན་ལ་ལ་ཡང་སངས་རྒྱས་ཀྱིས་འདུལ་བ་རྣམས་ཀྱི་ནི་སངས་རྒྱས་ཀྱི་གཟུགས་སུ་མཐོང་ངོ་ཞེས་པ་ནས། སོ་སོའི་སྤྱོད་ལམ་དུ་རྣམ་པར་འདུག་པར་མཐོང་ངོ་ཞེས་པ་སྟེ། ཚུལ་སྣ་ཚོགས་དང་བསམ་པ་སྣ་ཚོགས་འཆད་པ་ཡང་ཐབས་ཡིན་མོད་ཀྱི། དང་གཉིད་སངས་རྒྱས་ལ་སོགས་པའི་སྐུས་སེམས་ཅན་དེ་དག་གི་རང་རང་གི་སྐད་ཀྱི་ཚུལ་དུ་སྨྲ་ཞིང༌། སོ་སོའི་སྤྱོད་ལམ་དུ་རྣམ་པར་འཇུག་པར་སྟོན་པ་ནས་ཐབས་ཀྱི་ཡང་ཐབས་སུ་བལྟའོ། །སོ་སོའི་སྤྱོད་ལམ་དུ་ཞེས་པ་ནི་སངས་རྒྱས་དང་ཉན་ཐོས་ལ་སོགས་པས་འདུལ་བ་སེམས་ཅན་དེ་དག་གི་སྤྱོད་ལམ་དང་རྗེས་སུ་མཐུན་པའི་གཟུགས་སུ་འགྱུར་ཞིང་སྟོན་པ་ལ་བྱའོ། །ཐམས་ཅད་མཁྱེན་པའི་ཡེ་ཤེས་དེ་ནི་རོ་གཅིག་སྟེ། དེ་བཞིན་གཤེགས་པའི་རྣམ་པར་གྲོལ་བའི་རོ་ལགས་སོ་ཞེས་པ་ནི་དེ་ལྟར་ཚུལ་སྣ་ཚོགས་དང༌། བསམ་པ་དང་ཐབས་སྣ་ཚོགས་ཀྱི་སྒོ་ནས་རྣམ་པ་ཐ་དད་པ་དུ་མར་སྤྲོས་པ་ཡང༌། སྤྱིའི་དེ་བཞིན་གཤེགས་པའི་རྣམ་པར་གྲོལ་བ། ཉོན་མོངས་པ་དང་ཤེས་བྱའི་སྒྲིབ་པ་སྤངས་པ་རྟོག་པའི་བག་ཆགས་ཀྱི་གནས་ལས་ཤིན་ཏུ་འདས་པའི་མཚན་ཉིད་དུ་རོ་གཅིག་ཏུ་འགྱུར་བ་ནི། དཔེར་ན་བུ་རམ་ཤིང་རྣམ་པ་མང་པོའི་ཁུ་བ་ལས་བུ་རམ་དུ་བྱས་ན། བུ་རམ་ཤིང་དེ་རྣམས་ཀྱི་སོ་སོའི་རོ་དབྱེར་མེད་དེ་རོ་གཅིག་པ་དང་འདྲའོ། །དེ་ནི་འདི་ལྟ་སྟེ་དཔེར་ན་བཅོམ་ལྡན་འདས་ནམ་མཁའི་ཁམས་ནི་རྟོག་པ་ཐམས་ཅད་དང་བྲལ་བ་སྟེ་ཞེས་པ་ནས་དེ་ནས་ལྷ་དང་འཇིག་རྟེན་དུ་བཅས་པ་ལ་ཚིམ་པར་བྱེད་དོ་ཞེས་པའི་བར་དུ་ནི་ཐམས་ཅད་མཁྱེན་པའི་ཡེ་ཤེས་དེའི་རང་
བཞིན་ཕུན་སུམ་ཚོགས་པ་དང༌། མངོན་པར་འཚང་རྒྱ་བའི་ཕ་རོལ་གྱི་དོན་ཕུན་སུམ་ཚོགས་པ་དང༌། སྤོང་བ་ཕུན་སུམ་ཚོགས་པ་དང༌། མ་ལུས་པའི་བདེ་བ་ཐོབ་པའི་ཕ་རོལ་གྱི་དོན་ཕུན་སུམ་ཚོགས་པ་ཐོབ་པར་བསྟན་པའི་དཔེ་སྟེ། དཔེ་དེ་དག་གིས་ཐམས་ཅད་མཁྱེན་པའི་ཡེ་ཤེས་དེ་སྔོན་གྱི་སྨོན་ལམ་གྱི་ཤུགས་ཀྱིས་ལྷུན་གྱིས་གྲུབ་པ་ཉིད་དུ་རྣམ་པར་མི་རྟོག་མི་དཔྱོད་པར་ཚུལ་སྣ་ཚོགས་ལ་སོགས་པའི་སྒོ་ནས་སེམས་ཅན་གྱི་དོན་བྱ་བ་བྱེད་པར་ཡང་བསྟན་པ་སྟེ། དེ་ལ་ནམ་མཁའི་དཔེས་ནི་རང་བཞིན་ཕུན་སུམ་ཚོགས་པ་བསྟན་ཏེ། ནམ་མཁའ་ཇི་ལྟར་རྟོག་པ་དང་དཔྱོད་པའི་བག་ཆགས་ཀྱི་གནས་མེད་པ་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ལ་རྟོག་པ་མེད་དོ། །རྣམ་པར་རྟོག་པ་དང་རྣམ་པར་དཔྱོད་པ་མེད་ཅེས་པའི་དོན་ཏོ། །དེ་ལ་ཐེ་ཚོམ་དོགས་པ་དེ་ལྟར་ཐམས་ཅད་མཁྱེན་པའི་ཡེ་ཤེས་རྣམ་པར་མི་རྟོག་སྟེ། སེམས་པ་མེད་ན་ལུས་ལ་སོགས་པའི་རྒྱུན་འབྱུང་ཞིང་སེམས་ཅན་གྱི་དོན་བྱེད་པ་སེམས་པ་མེད་པར་ཇི་ལྟར་འབྱུང་ཞིང་བྱེད་སྙམ་པ་ལ། སའི་དཔེས་རྣམ་པར་མི་རྟོག་བཞིན་དུ་མངོན་པར་འཆར་བའི་ཕ་རོལ་གྱི་དོན་ཕུན་སུམ་ཚོགས་པ་བྱེད་པར་བསྟན་ཏེ། དེ་ལས་ནི་རྟོག་པ་དང་རྣམ་པར་རྟོག་པ་མེད་བཞིན་རྩ་བ་དང་འབྲས་བུ་དང་མེ་ཏོག་ལ་སོགས་པས་སེམས་ཅན་ཐམས་ཅད་ཀྱི་གསོས་སུ་འགྱུར་བར་བྱེད་དོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ཡང་རྟོག་པ་དང་རྣམ་པར་རྟོག་པ་མེད་བཞིན་སྔགས་ཀྱི་ལྷ་ལ་སོགས་པའི་སྒོར་སྟོན་ཏེ། སེམས་ཅན་རྣམས་ཀྱིས་ཀྱང་སྔགས་ཀྱི་ལྷ་ལ་སོགས་པ་བསྙེན་ཅིང་བཟླས་པ་ལ་སོགས་པའི་སྒོ་ནས་མཉེས་པར་བྱས་ཏེ། མངོན་པར་འཆར་བའི་མཚན་ཉིད་མི་དང་ལྷའི་ལོངས་སྤྱོད་ལ་སོགས་པ་ཐོབ་པར་འགྱུར་རོ། །མེའི་དཔེས་ནི་སྤོང་བ་ཕུན་སུམ་ཚོགས་པ་བསྟན་ཏེ། ཇི་ལྟར་མེས་རྩི་ཤིང་ལ་སོགས་པ་ཐམས་ཅད་བསྲེགས་ཀྱང་སྲེག་པར་འགྱུར་བའི་མཐུ་མི་ཟད་དོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ཡང་མི་ཤེས་པའི་བུད་ཤིང་ཐམས་ཅད་སྲེག་པ་ནི། །རྒྱུའི་ཚེ་བྱང་ཆུབ་སེམས་དཔའི་སྤྱོད་པ་ས་དང་ཕ་རོལ་ཏུ་ཕྱིན་པ་ལ་སོགས་པ་རིམ་གྱིས་མི་ཤེས་པ་ལ་སོགས་པ་ཉོན་མོངས་པ་མི་མཐུན་པ་ལ་སོགས་པའི་ཕྱོགས་རྣམས་
སེལ་ཅིང་མེད་པར་བྱེད་པ་ནི་བུད་ཤིང་སྲེག་པའོ། །གཉིས་སུ་ན་འབྲས་བུའི་ཚེ་ཐམས་ཅད་མཁྱེན་པ་ཉིད་མི་ཤེས་པ་མེད་པའི་མཚན་ཉིད་པས་ན་མི་ཤེས་པའི་བུད་ཤིང་སྲེག་པའི་རང་བཞིན་ནོ། །རླུང་གི་དཔེས་ཀྱང་སྤོང་བ་ཕུན་སུམ་ཚོགས་པ་དེ་ཉིད་སྤོང་བ་གོང་མ་དེས་ཀྱང་བག་ཆགས་ཐམས་ཅད་མ་ལུས་པར་སྤོང་བའི་དཔེ་འོག་མས་བསྟན་ཏེ། དེ་བས་ན་གསུངས་པ་རླུང་གི་ཁམས་ནི་རྡུལ་ཐམས་ཅད་འཕྱག་གོ་ཞེས་པ་སྟེ། དེ་ལ་རྡུལ་ནི་ཕྲ་བའི་མཚན་ཉིད་དེ། དེ་བཞིན་དུ་ཐམས་ཅད་མཁྱེན་པའི་ཡེ་ཤེས་མི་ཤེས་པའི་བག་ཆགས་ཕྲ་མོ་ཡན་ཆད་སྤངས་པ་ལ་བྱའོ། །ཆུའི་དཔེས་ནི་མ་ལུས་པའི་བདེ་བའི་ཕ་རོལ་གྱི་དོན་ཕུན་སུམ་ཚོགས་པ་བསྟན་ཏེ། ཇི་ལྟར་ཆུ་དེས་ཚ་བ་ལ་སོགས་པས་གདུངས་པའི་སེམས་ཅན་གྱི་ལུས་སིམ་པར་བྱེད་པ་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ཡང༌། སེམས་ཅན་ཐམས་ཅད་ཀྱི་སྡུག་བསྔལ་དང་འདོད་ཆགས་ལ་སོགས་པའི་ཉོན་མོངས་པ་རྣམས་ཀྱིས་གདུངས་པ་ཞི་བར་བྱེད་པ་མ་ལུས་པའི་བདེ་བའི་མཚན་ཉིད་མྱ་ངན་ལས་འདས་པ་ལ་སྦྱོར་ཞིང་རྫོགས་པས་ན། ལྷ་དང་འཇིག་རྟེན་དུ་བཅས་པ་ལ་ཚིམ་པར་བྱེད་དོ་ཞེས་པ་དེ་དག་ནི། ཕྱག་ན་རྡོ་རྗེ་ཉིད་ཀྱིས་ཐམས་ཅད་མཁྱེན་པའི་ཚུལ་སྔོན་ཆད་བཅོམ་ལྡན་འདས་ཀྱིས་བཀའ་སྩལ་པ་ལས། བདག་རང་གི་འདི་ལྟར་རྟོགས་ཞེས་གསོལ་བ་སྟེ། བདག་རང་ཆུང་བར་བསྟན་པ་དང་ཆོས་འཆད་པ་སྤྲོ་བ་བསྐྱེད་པའི་ཕྱིར་རོ། །དེ་དག་གི་རང་བཞིན་དེ་ལྟར་ཆུང་མོད་ཀྱི་དེ་དག་གི་རྒྱུ་གཙོ་བོའི་རྒྱུ་དང༌། རྒྱུའི་རྒྱུ་དང༌། མཐར་རྫོགས་པར་བྱེད་པའི་རྒྱུ་གང་ལགས་ཞེས་དྲིས་པ། དེ་དག་གི་རྒྱུ་ནི་གང༌། རྩ་བ་ནི་གང༌། མཐར་གྱུར་པ་ནི་གང་ཞེས་སོ། །དེ་ལ་འཕགས་པ་ཕྱག་ན་རྡོ་རྗེ་ཚུལ་སྣ་ཚོགས་ལ་སོགས་པ་དང༌། དེ་བཞིན་གཤེགས་པའི་རྣམ་པར་གྲོལ་བའི་རོ་གཅིག་པར་ཆུད་པའི་ཤེས་རབ་ཀྱིས་སམ། ཐོས་པའི་ཤེས་རབ་ཀྱིས་ཤེས། དེ་སྟེ་ཆུད་པའི་ཤེས་རབ་ཀྱིས་ཤེས་ན་དེ་བཞིན་གཤེགས་པ་དང་ཁྱད་པར་མེད། ཐོས་པའི་ཤེས་རབ་ཀྱིས་ཆུད་ན་སེམས་ཅན་ཕལ་དང་འདྲ་བར་དོགས་པ་ལ་ལན་དུ་བྱ་བ། ཤེས་རབ་དེ་གཉིས་ཀས་ཤེས་པ་ལ་ཉེས་པ་མེད་དེ། བཅོམ་ལྡན་འདས་ཀྱིས་སྐུ་མི་ཟད་པའི་རྒྱན་ལ་སོགས་པར་
འཇུག་པ་རང་གི་མཐུ་ཇི་ཙམ་པའི་སྤྱོད་ཡུལ་ཆུད་ཀྱི། བཅོམ་ལྡན་འདས་ལྟར་རྣམ་པ་ཐམས་ཅད་དུ་ཆུད་པ་ནི་མ་ཡིན་ཏེ་ཁྱད་པར་མེད་པར་མི་འགྱུར། ཐོས་པ་ཡང་ཆུད་པ་གཙོ་བོ་ཡིན་པར་གྱུར་གྱི། སེམས་ཅན་ཕལ་ལྟར་ཐོས་པ་ཙམ་གཙོར་གྱུར་བ་མ་ཡིན་པས་སེམས་ཅན་ཕལ་དང་ཁྱད་པར་མེད་པར་མི་འགྱུར་རོ། །གཉིས་སུ་ནི་ཆུད་པའི་ཤེས་རབ་ཀྱིས་རྣམ་པ་ཐམས་ཅད་ཆུད་པ་ལ་ཉེས་པ་མེད་དེ། བཅོམ་ལྡན་འདས་ཀྱིས་བྱིན་གྱི་རླབས་ཀྱིས་ཕ་རོལ་གྱི་སེམས་ཤེས་པ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་ཡུལ་རྣམ་པ་ཐམས་ཅད་དུ་ཆུད་པར་འགྱུར་རོ། །དེ་ལ་བཅོམ་ལྡན་འདས་ལ་ཕྱག་ན་རྡོ་རྗེས་ཐམས་ཅད་མཁྱེན་པའི་ཡེ་ཤེས་དེའི་རྒྱུ་དང་རྩ་བ་དང་མཐར་གྱུར་པ་དྲིས་པ་ལ། དགེའོ་དགེའོ་ཚིག་ལན་གསུམ་གསུངས་པ། གོང་མ་གཉིས་ནི་དྲིས་པའི་དངོས་པོ་བཟང་བས་མཉེས་ཏེ། བསྟོད་པའི་ཚིག་ཏུ་ལན་གཉིས་བཟླས་པ་ནི་དྲིས་པའི་ཚིག་དེ་ཉིད་དགེ་བ་ལ་བྱ། འོག་མ་གཅིག་ནི་ཕྱག་ན་རྡོ་རྗེ་ལ་བྱ་སྟེ། དེ་ལྟ་བུའི་དོན་བཟང་པོ་འདྲི་ཞིང་སེམས་ཅན་ལ་ཕན་གདགས་པའི་ཕྱིར་དྲིས་པ་དགེའོ་ཞེས་གསུངས་པའོ། །དགེ་བར་ཉོན་ལ་ཤིན་ཏུ་ཡིད་ལ་ཟུང་ཤིག་ཅེས་པས་སྣོད་བཞི་ལས་བཟློག་པར་གསུངས་ཏེ། ཉོན་ཅིག་ཅེས་པ་ནི་སྣོད་ཁས་ཕུབ་པ་ལས་བཟློག་པའོ། །དགེ་བར་ཞེས་པ་ནི་སྣོད་གྱོ་མོ་ལས་བཟློག་པའོ། །ཤིན་ཏུ་ཞེས་པ་ནི་སྣོད་མི་གཙང་བས་གང་བ་ལས་བཟློག་པའོ། །ཡིད་ལ་ཟུང་ཤིག་ཅེས་པས་ནི་སྣོད་ཞབས་རྡོལ་ལས་བཟློག་པའོ། །བྱང་ཆུབ་ཀྱི་སེམས་ནི་རྒྱུའོ། །སྙིང་རྗེ་ནི་རྩ་བའོ། །ཐབས་ནི་མཐར་གྱུར་པ་ཞེས་པ་ལ་དེ་ལ་བྱང་ཆུབ་ཀྱི་སེམས་ལ་ཡང་རྣམ་པ་གཉིས་ཏེ། བྱང་ཆུབ་ཀྱི་ཕྱིར་སེམས་དཔའ་དང་བྱང་ཆུབ་ཀྱི་རང་བཞིན་གྱི་སེམས་སོ། །བྱང་ཆུབ་ཀྱི་ཕྱིར་སེམས་དཔའ་ནི་སྨོན་པ་དང་འཇུག་པའི་སེམས་དག་ཀྱང་ཡིན་མོད་ཀྱི། སྐབས་འདིར་ས་དང་པོའི་བྱང་ཆུབ་ཀྱི་སེམས་ལ་བྱ་སྟེ། ས་དང་པོའི་སེམས་དེ་མངོན་པར་བྱང་ཆུབ་པའི་སྙིང་པོར་སྦྱོར་བའི་ཕྱིར་རོ། །བྱང་ཆུབ་ཀྱི་རང་བཞིན་གྱི་སེམས་ཀྱང་འདི་ལྟ་སྟེ། ས་དང་པོ་བྱང་ཆུབ་ཀྱི་སེམས་དེ་ནི་ཆོས་ཐམས་ཅད་མཉམ་པ་ཉིད་དུ་ཆུད་པའི་རང་བཞིན་ཏེ། མངོན་པར་བྱང་ཆུབ་པ་དང་རང་བཞིན་གཅིག་པའི་ཕྱིར་རོ། །དེ་ལྟ་བུའི་
བྱང་ཆུབ་ཀྱི་སེམས་ནི་ཐམས་ཅད་མཁྱེན་པའི་ཡེ་ཤེས་ཀྱི་རྒྱུའི་གཙོ་བོར་རིག་པར་བྱའོ། །སྙིང་རྗེ་ནི་རྩ་བ་སྟེ་སེམས་ཅན་སྡུག་བསྔལ་བས་གདུངས་པ་ལས་བྲལ་བའི་ཕྱིར། སྙིང་རྗེའི་སྒོ་ནས་སྨོན་ལམ་ལ་སོགས་པའི་བྱང་ཆུབ་ཀྱི་སེམས་སྐྱེ་སྟེ། དེ་བས་ན་སྙིང་རྗེ་ཆན་པོ་བྱང་ཆུབ་ཀྱི་སེམས་ཀྱི་རྩ་བར་གྱུར་པས་ན་རྒྱུའི་ཡང་རྒྱུར་བལྟའོ། །གཉིས་སུ་ན་ཐམས་ཅད་མཁྱེན་པའི་ཡེ་ཤེས་བརྟན་པར་གནས་པའི་ཕྱིར་རྩ་བ་ཞེས་བྱ་སྟེ། ཐུགས་རྗེའི་གཟུངས་ཀྱིས་ལྷག་མ་མ་ལུས་པའི་མྱ་ངན་ལས་མི་འདའ་བར་དུས་ཐམས་ཅད་དུ་མི་གནས་པའི་མྱ་ངན་ལས་འདས་པར་གནས་ཤིང༌། ཀུན་རྫོབ་དང་དོན་དམ་པའི་ཡེ་ཤེས་བརྟན་པ་སྟེ། སྡོང་པོའི་རྩ་བ་ལྟར་བརྟན་པར་བྱེད་པ་བས་ན་ཐམས་ཅད་མཁྱེན་པའི་ཡེ་ཤེས་ཀྱི་རྩ་བའོ། །ཐབས་ནི་མཐར་གྱུར་ཞེས་པ་ལས། ཐབས་ནི་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་དེ་དག་ཐམས་ཅད་མཁྱེན་པའི་ཡེ་ཤེས་རྫོགས་པར་སྦྱོར་བའི་མཐའ་དེ་དག་གིས་བརྟན་པས་ན་མཐར་གྱུར་པར་བལྟའོ། །དེ་ལ་ཐམས་ཅད་མཁྱེན་པའི་རྒྱུ་བྱང་ཆུབ་ཀྱི་སེམས་སོ་ཞེས་བྱ་བ་བྱང་ཆུབ་ཉིད་གང་ཡིན་མི་ཤེས་པ་བསྟན་པ་གསང་བ་པའི་བདག་པོ་དེ་ལ་བྱང་ཆུབ་གང་ཞེ་ན་འདི་ལྟ་སྟེ། འདི་ནི་ནམ་མཁའི་མཚན་ཉིད་དོ་ཞེས་གསུངས་པའི་བར་དུའོ། །གོང་དུ་བྱང་ཆུབ་ཀྱི་སེམས་ཐམས་ཅད་མཁྱེན་པའི་ཡེ་ཤེས་ཀྱི་རྒྱུར་བཤད་པ་དེའི་བྱང་ཆུབ་ཀྱི་རང་བཞིན་བཤད་པ་ལ་བྱ་སྟེ། གསང་བའི་བདག་པོ་དེ་ལ་བྱང་ཆུབ་གང་ཞེ་ན། རང་གི་སེམས་ཉིད་ཇི་ལྟ་བ་ཉིད་དུ་ཤེས་པ་ཞེས་པ་ལ་གང་ཞེ་ན་ཞེས་པ་ནི་ཉན་ཐོས་དང་རང་སངས་རྒྱས་དང་ཐེག་པ་ཆེན་པོའི་བྱང་ཆུབ་རྣམས་ལས་གང་ཡིན་ཞེས་པ་ལ་མི་བྱའི་བྱང་ཆུབ་དེ་ཅི་འདྲ་བ་ཞེས་པ་ལ་བྱའོ། །རང་གི་སེམས་ཇི་ལྟ་བ་ཉིད་དུ་ཤེས་པ་ནི་སྦྱོར་བའི་སེམས་ཀྱིས་བུམ་པ་ལ་སོགས་པ་ཇི་བཞིན་པར་མཐོང་བ་དེ་སྐད་ཅིག་མ་ཕྱི་མའི་སེམས་ཀྱི་བུམ་པ་ལ་སོགས་པའི་ཇི་བཞིན་པ་དེ་ཡང་དག་པ་མ་ཡིན་པར་སུན་ཕྱུང་ནས་དེ་ལྟར་གཟུང་བའི་ཆ་སུན་ཕྱུང་སྟེ། མེད་ན་འཛིན་པའི་ཆ་ཡང་ཡོད་པ་མ་ཡིན་ཏེ། དེ་ལྟར་གཟུང་བ་དང་འཛིན་པའི་རང་བཞིན་དང་བྲལ་བ་ཡོངས་སུ་དག་པར་ཇི་བཞིན་མེད་པར་རང་བཞིན་གྱིས་དག་པར་ཤེས་པ་ནི་རང་གི་སེམས་ཡང་དག་པར་ཇི་ལྟ་བ་ཉིད་དུ་ཤེས་པའོ། །དེ་བཞིན་དུ་གཞུང་
གཞན་ལས་ཀྱང༌། ཡེ་ཤེས་བཞི་ལས་མཉམ་པ་ཉིད་ཀྱི་ཡེ་ཤེས་ནི་བྱང་ཆུབ་ཀྱི་སེམས་སུ་བཤད། མེ་ལོང་ལྟ་བུའི་ཡེ་ཤེས་དང༌། སོ་སོར་རྟོག་པ་དང༌། བྱ་བ་ནན་ཏན་གྱི་ཡེ་ཤེས་ནི་ཐམས་ཅད་མཁྱེན་པའི་ཡེ་ཤེས་སུ་བཤད་པར་རིག་པར་བྱའོ། །དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པོ་ཞེས་པ་ལ། བླ་ན་མེད་པ་ནི་བྱང་ཆུབ་དེའི་གོང་ན་དེ་ལས་ལྷག་པའི་བྱང་ཆུབ་གཞན་མེད་པའོ། །ཡང་དག་པར་བྱང་ཆུབ་པ་ནི་ཕྱིན་ཅི་མ་ལོག་པར་བྱང་ཆུབ་པ་ལ་བྱ་སྟེ། ཉན་ཐོས་དང་རང་སངས་རྒྱས་ནི་ཉོན་མོངས་པའི་སྒྲིབ་པ་སྤངས་ཀྱང༌། ཤེས་བྱའི་སྒྲིབ་པ་མ་སྤངས་པས་ཕྱོགས་གཅིག་ཕྱིན་ཅི་ལོག་པ་ནི་མ་ཡིན་གྱི་ཉོན་མོངས་པ་དང་ཤེས་བྱའི་སྒྲིབ་པ་གཉིས་སྤངས་པས་ཡང་དག་པར་བྱང་ཆུབ་པའོ། །རྫོགས་པར་བྱང་ཆུབ་པ་ནི་ཀུན་དུ་བྱང་ཆུབ་པ་ཞེས་བྱ་སྟེ། ཤེས་བྱ་དང་ཉོན་མོངས་པའི་སྒྲིབ་པའི་བག་ཆགས་ཡན་ཆད་མ་ལུས་པར་སྤངས་པས་ན་ཀུན་དུ་བྱང་ཆུབ་པ་ཞེས་བྱའོ། །གཉིས་སུ་ན་རང་གི་སེམས་ཇི་ལྟ་བ་ཉིད་ཀུན་རྫོབ་དང་དོན་དམ་པའི་ཆོས་རྣམས་རྣམ་པ་ཐམས་ཅད་དུ་སྟོང་པར་ཤེས་པར་བྱའོ། །གསང་བའི་བདག་པོ་དེ་ལ་ནི་ཆོས་ཅུང་ཟད་ཀྱང་ཡོད་པ་མ་ཡིན་ཞིང་དམིགས་པ་མེད་དོ་ཞེས་པ་ནི། བྱང་ཆུབ་ད་ལ་ཕུང་པོ་དང་ཁམས་དང་སྐྱེ་མཆེད་དང༌། གཟུང་བ་དང་འཛིན་པ་ནི་ཆོས་ཀྱི་རང་བཞིན་བག་ཆགས་ཙམ་ཡང་མེད་པས་བྱང་ཆུབ་དེ་ཉིད་འཛིན་པའི་རང་བཞིན་དུ་ཡོད་པ་མ་ཡིན་ནོ། །དམིགས་སུ་མེད་དོ་ཞེས་པ་ནི་དམིགས་པའི་ཡུལ་མ་ཡིན་པས་གཟུང་བའི་རང་བཞིན་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་དེ་ནི་ནམ་མཁའི་མཚན་ཉིད་དོ་ཞེས་པ་ནི་དེ་ལ་ནམ་མཁའི་མཚན་ཉིད་རྟག་པ་དང་མི་འགྱུར་བ་དང་སྟོང་པ་ལ་སོགས་པའི་མཚན་ཉིད་ཀྱང་ཡིན་མོད་ཀྱི། སྐབས་འདིར་གཟུང་བ་དང་འཛིན་པ་རང་བཞིན་མེད་པ་ལ་བྱ་སྟེ། དེ་བས་ན་དེ་ལྟར་བསྟན་པས་གསུངས་པ་དེ་ལ་ཤེས་བྱ་དང་ཤེས་པར་བྱ་བ་གང་ཡང་མེད་དོ་ཞེས་སོ། །ཤེས་པ་ནི་འཛིན་པའོ། །ཤེས་པར་བྱ་བ་ནི་གཟུང་བར་བྱ་བ་སྟེ། བྱང་ཆུབ་དེ་ལ་གཟུང་བ་དང་འཛིན་པ་གང་ཡང་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། གསང་བའི་བདག་པོ་བྱང་ཆུབ་ལ་མཚན་མ་མེད་པས་སོ་ཞེས་པས་ནི་བྱང་ཆུབ་དེ་ལ་ཁ་དོག་སྔོན་པོ་དང་སེར་པོ་ཇི་
བཞིན་པ་དང་ཁ་དོག་དབྱིབས་ལ་སོགས་པ་ཇི་བཞིན་པའི་མཚན་མ་མེད་པའི་ཕྱིར་རོ། །ཆོས་ཐམས་ཅད་ཀྱང་མཚན་ཉིད་མེད་ཅེས་པ་ལ་སོགས་པའི་སེམས་ཇི་བཞིན་པར་ཤེས་པ་དེ་བྱང་ཆུབ་ཅས་བཤད་ན། སེམས་ལས་གཞན་པའི་ཆོས་དེ་དག་ཇི་བཞིན་པར་ཤེས་པ་ནི་མ་ཡིན་ནམ་ཞེ་ན། ཇི་ལྟར་སེམས་ཇི་བཞིན་པར་ཤེས་ཤིད་མཚན་མ་མེད་པ་ལ་སོགས་པ་བཤད་པ་བཞིན་ནོ། །ཆོས་ཐམས་ཅད་ཀྱང་མཚན་མ་མེད་དེ་ནམ་མཁའ་བཞིན་ཞེས་པའོ། །ཡང་ན་བྱང་ཆུབ་མཚན་མ་མེད་པ་ནི་ཆོས་ཐམས་ཅད་མཚན་མ་མེད་དེ་ནམ་མཁའི་མཚན་ཉིད་དོ་ཞེས་པར་ཡང་བཤད་དོ། །དེ་ལ་ཆོས་ནི་སེམས་ལས་གཞན་པའི་ཕུང་པོ་ལ་སོགས་པའོ། །འདི་ལྟ་སྟེ་ནམ་མཁའི་མཚན་ཉིད་དོ་ཞེས་པ་ནི་ནམ་མཁའ་ལ་མཚན་ཉིད་མེད་པའི་ཕྱིར་རོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་གང་ནས་བཙལ་བར་བགྱི། བྱང་ཆུབ་མངོན་པར་རྫོགས་པ་ཡང་གང་ནས་བཙལ་བར་བགྱི་ཞེས་པ་ནས། གསང་བའི་བདག་པོ་དེ་ནི་བྱང་ཆུབ་སེམས་དཔའི་བྱང་ཆུབ་ཀྱི་རྣམ་པར་དག་པའི་སྒོ་ཞེས་བྱ་བ་ཆོས་སྣང་བའི་སྒོ་མོ་སྟེ་ཆོས་སྣང་བའི་ཚུལ་དང་པོའོ་ཞེས་པའི་བར་དུ། ཐམས་ཅད་མཁྱེན་པའི་ཡེ་ཤེས་དང། བྱང་ཆུབ་མངོན་པར་རྫོགས་པར་བྱ་བའི་ཕྱིར། འཇུག་པའི་ཐབས་དྲིས་པ་དང༌། དེ་གཉིས་རང་གི་སེམས་ལས་བཙལ་བའི་ཐབས་བསྟན་པ་ལ་བྱའོ། །དེ་ལ་ཐམས་ཅད་མཁྱེན་པའི་བྱང་ཆུབ་མངོན་པར་རྫོགས་པ་གང་ནས་བཙལ་ཞེས་པ་ནི་དེ་ལ་ཇི་ལྟར་འཇུག་ཅེས་དྲིས་པའོ། །བྱང་ཆུབ་དེ་དང་ཐམས་ཅད་མཁྱེན་པ་ཉིད་རང་གི་སེམས་ལས་བཙལ་བར་བྱའོ་ཞེས་པ་ནས་རང་གི་སེམས་ཉིད་གཟུང་བ་དང་འཛིན་པའི་ཕྱིར་རང་བཞིན་རྣམ་པར་རྟོག་པའི་བག་ཆགས་སྤངས་ཏེ། རྣམ་པར་དག་པ་ན་རང་བཞིན་གྱིས་འོད་གསལ་བ། སོ་སོ་རང་གི་རིག་པ་མི་གཡོ་བ་ཡེ་ཤེས་ཀྱི་སྣང་བའི་མཚན་ཉིད་བྱང་ཆུབ་དང༌། ཐམས་ཅད་མཁྱེན་པའི་རང་བཞིན་དུ་འགྱུར་ཞེས་པའི་དོན་ཏོ། །སེམས་ལ་ཇི་ལྟར་བརྟགས་པས་དོན་དེ་ཤེས་པར་འགྱུར་ཞེ་ན། དེ་རྟོག་པའི་གང་ཟག་ཀྱང་རྣམ་པ་གཉིས་ཏེ། དབང་པོ་ལས་འདས་པའི་ཡེ་ཤེས་དང་ལྡན་པས་སངས་རྒྱས་དང་བྱང་ཆུབ་སེམས་དཔའ་
དང། འོག་མའི་ལྟ་བ་ཅན་འགྲོ་བ་ཐ་དད་པ་རྣམས་ཀྱིས་སོ། །དེ་ལ་འགྲོ་བ་ཐ་དད་པས་བརྟག་པར་གསུངས་པ། སེམས་ཕྱི་ནང་དང་བར་ནས་མི་དམིགས་སོ་ཞེས་སོ། །ཕྱི་ནི་གཟུང་བ་ནང་ནི་འཛིན་པ། བར་ནི་དེ་གཉིས་གའི་བར་ནས་ཀྱང་སེམས་མི་དམིགས་སོ་ཞེས་པའོ། །དབང་པོ་ལས་འདས་པའི་ཡེ་ཤེས་དང་ལྡན་པ་རྣམས་ཀྱིས་ཀྱང་རྣམ་པ་ལྔའི་དངོས་པོར་སེམས་མ་དམིགས་པ་ནི། ཁ་དོག་དང་དབྱིབས་དང་ཁམས་དང་རྒྱུད་དང་གནས་པར་ཏེ། དེ་བས་ན་ཁ་དོག་སྔོན་པོར་ཡང་མ་ཡིན་ཞེས་པ་ནས་ལུས་ལ་མི་གནས་ཡིད་ལ་མིག་ནས། མཐོང་པ་ཡང་མེད། མཐོང་བར་འགྱུར་བ་ཡང་མ་ཡིན་ཞེས་པའི་བར་དུ་གསུངས་པ་སྟེ། མཐོང་པ་མེད་ཅེས་པ་ནི་འདས་པ་དང་ད་ལྟར་གྱི་དུས་ན་ཡང་མ་མཐོང་བའོ། །མཐོང་བར་འགྱུར་བ་ཡང་མ་ཡིན་ནོ་ཞེས་པ་ནི་མ་འོངས་པའི་དུས་ན་ཡང་མཐོང་བར་མི་འགྱུར་བའོ། །ཁ་དོག་སྔོན་པོ་ཡང་མ་ཡིན་ཞེས་པ་ནས་ཁ་དོག་ཤེལ་ལྟ་བུའི་བར་ཡང་མ་ཡིན་ཞེས་པའི་བར་དུ་ནི་སེམས་དེ་ཁ་དོག་ཇི་བཞིན་པར་མཐོང་བའི་ཡུལ་མ་ཡིན་པ་ལ་བྱའོ། །ཐུང་དུ་མ་ཡིན་ཞེས་པ་ནས་མ་ནིང་དུ་ཡང་མ་ཡིན་ཞེས་པའི་བར་དུ་དབྱིབས་ཇི་བཞིན་པར་མ་ཡིན་པ་ལ་བྱའོ། །འདོད་པའི་ཁམས་ཀྱི་རང་བཞིན་མ་ཡིན་གཟུགས་དང་གཟུགས་མེད་པའི་ཁམས་ཀྱི་རང་བཞིན་ཡང་མ་ཡིན་ཞེས་པ་ནི་ཁམས་ཀྱི་ཇི་བཞིན་པར་མཐོང་བ་མེད་པ་ལ་བྱའོ། །ལྷ་དང་ཀླུ་དང་གནོད་སྦྱིན་དང་ཞེས་པ་ནས་སེམས་ཅན་གྱི་རིས་མཐུན་པའི་རང་བཞིན་མ་ཡིན་ཞེས་པའི་བར་དུ་རྒྱུད་ཇི་བཞིན་མཐོང་བ་མེད་པ་ལ་བྱའོ། །སེམས་ནི་མིག་ལའང་མི་གནས་ཞེས་པ་ནས་ཡིད་ལ་མི་གནས་ཞེས་པའི་བར་དུ་དབང་པོ་དྲུག་ལ་སེམས་གནས་པར་མཐོང་བ་མེད་པ་ལ་བྱའོ། །ཁ་དོག་དང་དབྱིབས་ལ་སོགས་པ་དེ་རྣམས་ཀྱི་ཇི་བཞིན་པར་སྣང་བ་ནི། སེམས་དེ་གཟུང་བ་དང་འཛིན་པའི་རང་བཞིན་དང་མ་བྲལ་བས་དྲི་མ་དང་བཅས་པར་འགྱུར། དེ་ལྟར་དྲི་མ་དང་བཅས་པས་ན་ཐམས་ཅད་མཁྱེན་པའི་ཡེ་ཤེས་མ་ཡིན་ཏེ། དེ་བས་ན་དྲི་མ་དེ་དག་ཐམས་ཅད་ཡོངས་སུ་དག་པའི་སེམས་དེ་ནི་ཐམས་ཅད་མཁྱེན་པ་སྟེ། དེའི་ཕྱིར་གསུངས་པ། ཅིའི་ཕྱིར་ཞེན། སེམས་ནི་ནམ་མཁའི་མཚན་ཉིད་དེ། །ཞེས་པ་སྟེ་ནམ་མཁའི་མཚན་ཉིད་ནི་རྟོག་པ་དང་རྣམ་པར་རྟོག་པ་
སྤངས་པ་སྟེ། ནམ་མཁའི་མཚན་ཉིད་དེ་དང་འདྲ་བའི་ཕྱིར་གསུངས་པ་དེ་བས་ན་རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བའོ་ཞེས་པ་སྟེ། རྣམ་པར་རྟོག་པ་དང་རྣམ་པར་དཔྱོད་པ་སྤངས་པ་ཞེས་པའི་དོན་ཏོ། །དེ་ལྟར་སེམས་ནི་ནམ་མཁའི་མཚན་ཉིད་དང་འདྲ་བས་བྱང་ཆུབ་ཀྱང་དེ་ཡིན། གསུངས་པ་གང་ནམ་མཁའི་རང་བཞིན་པ་དེ་སེམས་ཀྱི་རང་བཞིན་པས་དེ་བྱང་ཆུབ་ཀྱི་རང་བཞིན་ཞེས་པའོ། །དེ་ལྟར་སེམས་དང་ནམ་མཁའ་དང་བྱང་ཆུབ་རྣམས་གཟུང་བ་དང་འཛིན་པའི་རང་བཞིན་གཉིས་སུ་མེད་པར་གསུངས་པ། དེ་ལྟར་ན་གསང་བའི་བདག་པོ་སེམས་དང་ནམ་མཁའི་དབྱིངས་དང༌། བྱང་ཆུབ་མི་གཉིས་ཏེ་དེ་དག་ལ་གཉིས་སུ་མེད་ཅེས་པའོ། །དེ་ནི་སྙིང་རྗེའི་ཐབས་ཀྱི་ཕ་རོལ་ཏུ་ཕྱིན་པས་ཟིན་པའོ་ཞེས་པ་ནི་དེ་ལྟ་བུའི་སེམས་རང་བཞིན་གྱིས་གཟུང་བ་དང་འཛིན་པའི་བག་ཆགས་ཀྱང་མེད་པ་བྱང་ཆུབ་དང་ཐམས་ཅད་མཁྱེན་པའི་མཚན་ཉིད་དེའི་རྩ་བ་ནི་སྙིང་རྗེ་སྟེ་བརྟན་པར་བྱེད་པའོ། །དེ་ལ་སྦྱོར་བར་བྱེད་པའི་ཐབས་ནི་ཕ་རོལ་ཏུ་ཕྱིན་པ་སྟེ། ཡོངས་སུ་ཟིན་པ་ནི་ཐམས་ཅད་མཁྱེན་པའི་ཡེ་ཤེས་ཏེ་སྐྱོང་བའི་རྒྱུར་ཤེས་པར་བྱའོ། །གསང་བའི་བདག་པོ་དེ་གཞུང་འདིས་འདི་ལྟར་རིག་པར་བྱའོ་ཞེས་བ་ནི་གོང་དུ་བྱང་ཆུབ་གང་ཞེ་ན་རང་གི་སེམས་ཇི་ལྟ་བ་ཉིད་དོ་ཞེས་པ་དང༌། ཐམས་ཅད་མཁྱེན་པ་དང་བྱང་ཆུབ་མངོན་པར་རྫོགས་པར་རང་གི་སེམས་ལས་བཙལ་བར་བྱའོ་ཞེས་གསུངས་པ་དང༌། བྱང་ཆུབ་དང་ཐམས་ཅད་མཁྱེན་པ་རང་གི་སེམས་ལས་བཅོལ་ཏེ། རང་བཞིན་གྱིས་འོད་གསལ་བའི་ཕྱིར་ཞེས་པ་ལ་སོགས་པ་གསུངས་པ་དེ་གཞུང་གཅིག་སྟེ། གཉི་ག་ཡང་བྱང་ཆུབ་དང་ཐམས་ཅད་མཁྱེན་པའི་རྒྱུར་འགྱུར་བའི་ཚིག་གི་གཞུང་དུ་རིག་པར་བྱའོ། །སངས་རྒྱས་བཅོམ་ལྡན་འདས་ཀྱིས་ཆུད་པའི་ཆོས་དང༌། ལུགས་ཀྱི་ཆོས་བྱང་ཆུབ་སེམས་དཔའི་འཁོར་ལ་གང་དང་གང་བཤད་པ། ཚིག་ལ་སོགས་པའི་སྒོ་ཐ་དད་ཀྱང་གཞན་གྱི་ཕྱིར་མ་ཡིན་གྱི། དོན་རྣམ་པ་གཉིས་ཀྱི་ཕྱིར་ཏེ། བྱང་ཆུབ་ཀྱི་སེམས་རྣམ་པར་དག་པ་དང༌། རང་གི་སེམས་ཀུན་དུ་ཤེས་པར་བྱ་བའི་ཕྱིར། དེ་བས་ན་གསུངས་པ། ངས་བྱང་ཆུབ་སེམས་དཔའི་འཁོར་ལ་ཆོས་གང་དང་གང་བཤད་པ་དེ་དག་ཐམས་ཅད་ནི་བྱང་ཆུབ་ཀྱི་སེམས་རྣམ་
པར་དག་པ་དང་སེམས་ཡོངས་སུ་ཤེས་པའི་ཕྱིར་ཞེས་པ་དེ་ལ་བྱང་ཆུབ་ཀྱི་སེམས་རྣམ་པར་དག་པ་ནི་བྱང་ཆུབ་སེམས་དཔའི་ས་དང་པོ་ལ་བྱང་ཆུབ་ཀྱི་སེམས་ཆུད་པ་དེ་གཟུང་པ་དང་འཛིན་པ་ལས་རྣམ་པར་གྲོལ་བའི་ཕྱིར་དག་པའོ། །སེམས་ཞེས་པ་ནི་གང་སེམས་ཀྱི་ངོ་བོ་ཤེས་པ་དེའི་རྒྱུས་ས་དང་པོ་ཐོབ་པར་བྱེད་པ་དེ་ལ་བྱ་སྟེ། མོས་པ་སྤྱོད་པའི་ཚེ་སེམས་བསྐྱེད་དེ། དེ་དག་གི་ཕྱིར་ཆོས་བཤད་ཅེས་པའི་དོན་ཏེ་བྱང་ཆུབ་ཀྱི་སེམས་ཉིད་ལ་སྦྱོར་བར་བྱེད་པའོ། །དེ་ལྟར་སེམས་ཡོངས་སུ་གཟུང་བར་བྱ་བ་ཡང་ཁ་དོག་ཇི་བཞིན་པ་ལ་སོགས་པར་ཤེས་པར་བྱ་བ་མ་ཡིན་གྱི་ཇི་བཞིན་པའི་རང་བཞིན་ཐམས་ཅད་ལས་འདས་པའི་རང་བཞིན་དུ་སྟེ། བྱང་ཆུབ་ནི་གཟུང་བ་དང་འཛིན་པའི་ཆ་དང་བྲལ་བ་རྣམ་པར་དག་པ་ཙམ་གྱི་རང་བཞིན་དུ་ཡང་མ་ཡིན་ཏེ། ཇི་ཙམ་དུ་མཚན་མར་གྱུར་པ་དེ་དག་ཐམས་ཅད་དུ་རང་གི་སེམས་དེ་ཤེས་པར་མི་བྱ་ཞིང་བཙལ་དུ་མི་རྙེད་པ་གསུངས་པ་འདི་ལྟ་སྟེ། ཇི་བཞིན་དུ་དབྱིབས་སམ་ཁ་དོག་ཏུའམ་ཞེས་པ་ནས་རྣམ་པ་ཐམས་ཅད་དུ་ཡོངས་སུ་བཙལ་ཀྱང་མི་རྙེད་དོ་ཞེས་པའི་བར་དུ་སྟེ་ཁ་དོག་དང་དབྱི་བས་ལ་སོགས་པའི་རྣམ་པ་དེ་དག་རེ་རེ་ནས་སྨོས་པ་ཡང་གང་གང་དུ་ཆགས་པའི་གནས་རྣམས་སུ་རིག་པའི་གཞུང་གིས་བརྟགས་ན་དངོས་པོ་ཡོད་པ་མ་ཡིན་ཏེ། ཁ་དོག་དང་གཟུགས་ལ་སོགས་པའི་དེ་དག་བརྟགས་པ་ཡང་ཁ་དོག་དང་གཟུགས་ལ་སོགས་པ་དེ་དག་སེམས་ལས་ཐ་མི་དད་དེ། སེམས་ཀྱི་སྣང་བ་ཡིན་ན་ནི་སེམས་ཉིད་ཀྱང་གཟུགས་ཅན་དུ་འགྱུར་བ་ཇི་ཙམ་དུ་གཟུགས་དང་ལྡན་པ་དེ་ཐམས་ཅད་རྡུལ་ཕྲན་གྱི་ཆས་གཞིགས་ན་ཡོད་པར་མི་འགྱུར་ཏེ། ཁ་དོག་ལ་སོགས་པ་དེ་དག་སེམས་ལ་ཐ་དད་ཀྱང་དེ་དག་རྡུལ་ཕྲན་གྱི་ཆས་གཞིགས་ན་ཡོད་པར་མ་གྲུབ་པས་གཟུགས་མེད་ན་གཟུགས་ཀྱི་ཇི་བཞིན་པར་སྐྱེ་བའི་རྣམ་པར་ཤེས་པ་མི་སྐྱེ་སྟེ་ཡོད་པ་མ་ཡིན་ནོ། །དེ་བཞིན་དུ་ཚོར་བ་ལ་སོགས་གཞན་ཡང་ཕྱི་རོལ་གྱི་ཡུལ་སུན་ཕྱུང་སྟེ། དམིགས་སུ་མེད་པས་ན་ཡུལ་ཅན་མེད་པར་སེམས་དང་སེམས་ལས་བྱུང་བ་མི་སྲིད་པས་མི་དམིགས་སོ། །གསང་བའི་བདག་པོ་དེ་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་བྱ་བ་ཆོས་སྣང་བའི་ཚུལ་ལོ་
ཞེས་པ་ནི་དེ་ལྟ་བུའི་ཚུལ་དུ་མོས་པ་སྤྱོད་པའི་ས་ན་སེམས་ཡོངས་སུ་ཤེས་པ་དེ་ནི་རྣམ་པ་གསུམ་གྱི་རྒྱུ་ཡིན་པར་བཤད་པ་ནི་ས་དང་པོའི་བྱང་ཆུབ་ཀྱི་སེམས་དང༌། མངོན་པར་བྱང་ཆུབ་པ་དང་ཐམས་ཅད་མཁྱེན་པའོ། །དེ་ལ་ས་དང་པོའི་བྱང་ཆུབ་ཀྱི་སེམས་རྣམ་པར་དག་པའི་མཚན་ཉིད་ལ་འཇུག་པའི་སྒོ་ནས་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་གསུངས་སོ། །ཆོས་སྣང་བའི་སྒོ་ཞེས་པ་ནི་མྱ་ངན་ལས་འདས་པའི་ཆོས་གཟུང་བ་དང་འཛིན་པ་དང་བྲལ་བ་སྟེ། སྣང་བ་ནི་མཁྱེན་ཞེས་པའི་དོན་ཏོ། །སྙིང་པོ་བྱང་ཆུབ་ཉིད་དོ། །དེ་ཐོབ་པའི་རྒྱུའམ་སྒོ་ནི་སེམས་ཞེས་པའོ། །ཆོས་སྣང་བའི་ཚུལ་ཞེས་པ་ནི། སྐད་ཅིག་མ་དང་པོ་ལ་མཉམ་པ་ཉིད་ཀྱི་ཡེ་ཤེས་ཀྱི་མཚན་ཉིད་མངོན་པར་བྱང་ཆུབ་ནས། ཐམས་ཅད་མཁྱེན་པའི་མཚན་ཉིད་མེ་ལོང་ལྟ་བུ་དང་སོ་སོར་རྟོག་པ་དང༌། བྱ་བ་ནན་ཏན་གྱི་ཡེ་ཤེས་སྐད་ཅིག་མ་གཉིས་པ་ལ་ཐོབ་སྟེ། མྱ་ངན་ལས་འདས་པའི་ཆོས་ཀུན་རྫོབ་དང་དོན་དམ་པའི་ཚུལ་དུ་ཐམས་ཅད་མཁྱེན་པའོ། །དང་པོ་ཞེས་པ་ནི་སྐད་ཅིག་མ་དང་པོ་ལ་བྱང་ཆུབ་ཐོབ་པ་ལ་བྱའོ། །དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་ཉོན་མོངས་པའི་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་རབ་ཏུ་ཐོབ་བོ་ཞེས་པའི་བར་དུ་དེ་ལྟ་བུར་རང་གི་སེམས་ཇི་ལྟ་བ་ཉིད་ཤེས་བར་བྱེད་བ་ལ་གནས་པའི་རྗེས་སུ་བསྔགས་པ་བཤད་པ་ལ་བྱ་སྟེ། དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་ཞེས་པ་ནི་རང་གི་སེམས་གཟུང་བ་དང་འཛིན་པ་ལ་སོགས་པའི་ཇི་བཞིན་པར་མི་ལྟ་བར་གནས་པ་ལ་བྱ་སྟེ། དེ་ལྟར་གཟུང་བ་དང་འཛིན་པའི་རང་བཞིན་མ་མཐོང་བའི་སེམས་ནི་རྣམ་བར་དག་པ་སྟེ། དེ་ལྟར་སེམས་རྣམ་པར་དག་པ་ན། ལྷུན་གྱིས་གྲུབ་པ་ཉིད་དུ་ཉོན་མོངས་པའི་སྒྲིབ་པ་དང༌། ལས་ཀྱི་སྒྲིབ་པ་དང༌། ཚེའི་སྒྲིབ་པ་ལ་སོགས་པ་ཐམས་ཅད་སྤང་པའི་གཉེན་པོར་གྱུར་པའོ། །ཏིང་ངེ་འཛིན་རབ་ཏུ་འཐོབ་པར་གྱུར་ཏེ། དེ་བས་ན་གསུངས་པ། ཉོན་མོངས་པའི་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་རབ་ཏུ་འཐོབ་ཅེས་སོ། །དེ་ལྟ་བུའི་སེམས་རྣམ་པར་དག་པ་ལ་རབ་ཏུ་གནས་པར་གྱུར་པ་ནི་སྒྲིབ་པ་ཐམས་ཅད་བསལ་བས་སངས་རྒྱས་ཐམས་ཅད་ལ་མངོན་སུམ་དུ་ཆོས་ཉན་ཅིང་བསྙེན་བཀུར་བྱེད་པ་དང་ལྔ་མངོན་པར་ཤེས་པ་འཐོབ་སྟེ། འཕྲུལ་གྱི་
མིག་གིས་ལམ་རིང་པོ་ན་འདུག་པའི་གཟུགས་ཀྱང་རི་དང་རྩིག་པ་ལ་སོགས་པ་ལ་ཐོགས་པ་མེད་པར་མཐོང༌། རྫུ་འཕྲུལ་གྱི་རྣ་བས་ལམ་རིང་པོ་ན་འདུག་པའི་སྒྲ་ཡང་རི་དང་རྩིག་པ་ལ་སོགས་པས་བར་མི་ཆོད་པར་ཐོས། ཕ་རོལ་གྱི་སེམས་འདོད་ཆགས་དང་ཆས་པའམ། འདོད་ཆགས་དང་བྲལ་བ་ལ་སོགས་པ་ཤེས། ཚེ་རབས་སྔ་མ་ལ་ཡང་ཅི་བྱེད་པ་དང༌། གནས་གང་ན་གནས་པ་རྗེས་སུ་དྲན། རྫུ་འཕྲུལ་གྱི་རྐང་པ་ལ་སོགས་པ་འཐོབ་སྟེ། མཐའ་ཡས་པའི་མི་དང་ལྷ་ལ་སོགས་པའི་ཚིག་ཤེས་པ་གཟུངས་མཐའ་ཡས་པའི་བྱ་བ་ལ་སོགས་པའི་དབྱངས་ཀྱི་ང་རོ་ལས་དོན་ཅུང་བའི་གཟུགས་དང་འབྲུག་གི་སྒྲ་དང༌། སེམས་ཅན་མ་ཡིན་པའི་སྒྲས་ས་གཡོ་བ་དང་ཆུ་ལ་སོགས་པའི་སྒྲ་མཐའ་ཡས་པ་ལ་སོགས་པ་ལས། སྒྲ་དེ་དག་གི་དོན་ཅི་ཟེར་རྟོགས་པའི་གཟུངས་ཐོབ་སྟེ། སེམས་ཅན་རྣམས་ཀྱི་བསམ་པ་དང་རྗེས་སུ་མཐུན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ནས་ཁམས་གསུམ་ན་འཁོར་བ་ན་ཡང་འཐོབ་པའི་ཆོས་ཉམས་པར་མི་འགྱུར་བ་དང༌། མ་ཐོབ་པ་ཡང་མི་ཐོབ་པར་མི་འགྱུར་ཞིང་སེམས་ཅན་གྱི་དོན་བྱ་བ་ལ་ནམ་འཁོར་བ་ཡོད་ཀྱི་བར་དུ་སྐྱོ་བར་མི་འགྱུར་ཏེ། དེ་བས་ན་གསུངས་པ། སངས་རྒྱས་ཐམས་ཅད་གནས་པར་རབ་ཏུ་འཐོབ། ལྔ་མངོན་པར་ཤེས་པ་ཡང་རབ་ཏུ་འཐོབ། མཐའ་ཡས་པའི་ཚིག་དང་དབྱངས་དང་སྒྲའི་གཟུངས་རབ་ཏུ་འཐོབ། སེམས་ཅན་རྣམས་ཀྱི་བསམ་པ་བཞིན་དུ་འཇུག་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ནས་འཁོར་བ་ན་ཡང་ཆོས་མི་ཉམས་པས་སེམས་ཅན་གྱི་དོན་བྱ་བ་ལ་མི་སྐྱོ་བ་ཡིན་ཞེས་པའོ། །འདུས་མ་བྱས་ཀྱི་ཚུལ་ཁྲིམས་ལ་རབ་ཏུ་གནས་ཞེས་པ་ནི། སྟོང་པ་ཉིད་རབ་ཏུ་རྟོགས་པ་ལ་གནས་པས་སྟོང་བ་ཉིད་ཀྱི་ངང་ཚུལ་དུ་གྱུར་པ་ཡིན་གྱི། སེམས་ཅན་གྱི་དོན་གྱི་ཚུལ་ཁྲིམས་དང༌། དགེ་བ་ལ་སོགས་པའི་ཚུལ་ཁྲིམས་དང་སྒོམ་པ་ལ་སོགས་པ་ཀུན་རྫོབ་ཀྱི་ཚུལ་ཁྲིམས་ལ་ནི་མི་བྱའོ། །ལོག་པར་ལྟ་བ་སྤངས་པ་ཞེས་པ་ནི། མུ་སྟེགས་ལ་སོགས་པའི་ལྟ་བ་རྣམས་དང་བྲལ་བ་ལ་བྱའོ། །ཡང་དག་པར་རྒྱུན་དུ་ཞུགས་ཞེས་པ་ནི་འདི་ལྟར་ལོག་
པའི་ལྟ་བ་སྤངས་བས་ཡང་དག་པའི་ལྟ་བ་རྟོགས་པ་ཞེའོ། །གཞན་ཡང་གསང་བའི་བདག་པོ་སྒྲིབ་པ་ཐམས་ཅད་སྤོང་པའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཞེས་པ་ནི་དེ་ལྟ་བུའི་ཏིང་ངེ་འཛིན་སྔར་ཐོབ་ནས་ཐོབ་པ་ཙམ་དུ་མ་ཟད་ཀྱི་ཏིང་ངེ་འཛིན་ཉིད་དང་ལྡན་པར་གནས་པ་ལ་བྱའོ། །ཤིན་ཏུ་དད་པའི་མཐུས་སངས་རྒྱས་ཀྱི་ཆོས་ཉོན་མི་མོངས་པར་ཡོངས་སུ་རྫོགས་པར་འགྱུར་ཏེ་ཞེས་པ་ནི་གཟུང་བ་དང་འཛིན་པ་རབ་ཏུ་སྤངས་པ། རང་བཞིན་གྱིས་འོད་གསལ་བའི་སེམས་བྱང་ཆུབ་ཀྱི་མཚན་ཉིད་དེ་ལྟ་བུ་ལ་ལྷག་པར་མོས་པའི་མཐུས་བསགས་པས་སངས་རྒྱས་ཀྱི་ཆོས་ཆུད་པ་དང༌། ལུགས་ཀྱི་མཚན་ཉིད་དང༌། ཕ་རོལ་ཏུ་ཕྱིན་པ་ལ་སོགས་པ་དང༌། སྐུའི་འཁོར་ལོ་ལ་སོགས་པའི་ཆོས་རྣམས་མ་བསྒྲུབས་ཀྱང་ཐོབ་པར་འགྱུར་བའོ། །མདོར་ན་གསང་བའི་བདག་པོ་རིགས་ཀྱི་བུའམ་རིགས་ཀྱི་བུ་མོ་གང་ཡང་རུང་སྟེ། དེ་ནི་ཡོན་ཏན་ཚང་མེད་པ་དང་ལྡན་པར་འགྱུར་ཏེ་ཞེས་པ་ནི། དེ་ལྟ་བུའི་ཏིང་ངེ་འཛིན་དང་ལྡན་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་གི་སོ་སོའི་ཡོན་ཏན་བརྗོད་ན་བསྐལ་པར་ཡང་མི་རྫོགས་ཏེ། བརྗོད་ཀྱིས་མི་ལང་བས་ཚད་འདི་ཙམ་མོ་ཞེས་གཟུང་དུ་མེད་དེ། མདོར་སྨྲས་པ་ཚད་མེད་པའི་ཡོན་ཏན་དང་ལྡན་ནོ་ཞེས་པའོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། ཐུབ་པ་ཆེན་པོས་བཤད་དུ་གསོལ། །ཞེས་པའི་བར་དུ་ནི་གོང་དུ་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་དང་བྱང་ཆུབ་སེམས་ཀྱི་མཚན་ཉིད་ཞིབ་ཏུ་བཤད་དེ། བྱང་ཆུབ་ཀྱི་སེམས་དེ་ལྟ་བུ་ལ་གནས་པའི་ཏིང་ངེ་འཛིན་ཐོབ་པའི་ཡོན་ཏན་གྱི་ཚད་ཀྱང་ཚད་མེད་པའི་ཡོན་ཏན་དང་ལྡན་པ་ཞེས་གསུངས་ཏེ། དེ་ལྟ་བུའི་བྱང་ཆུབ་ཀྱི་སེམས་ཇི་ལྟར་སྐྱེ་བར་འགྱུར་བ་དང༌། བྱང་ཆུབ་ཀྱི་སེམས་དེའི་མཚན་ཉིད་ཅི་འདྲ་བར་ཤེས་བར་བྱ་བ་ལ་སོགས་པ་དྲིས་པ་སྟེ། དེ་ཇི་ལྟར་སེམས་ན་བཅོམ་ལྡན་འདས་བྱང་ཆུབ་ཏུ་ནི་སྐྱེ་ཞེས་བགྱི་ཞེས་པ་ནི་སྤྱིར་ན་སྐྱེས་ཞེས་པ་དང༌། སྐྱེ་ཞེས་བགྱི་ཞེས་པ་གཉིས་ཏེ། དེ་ལ་སྐྱེ་ཞེས་པ་ནི་མིང་ཙམ་སྟེ། དཔེར་ན་བུ་མངལ་དུ་ཞུགས་པ་ལྟ་བུའོ། །སྐྱེ་ཞེས་བགྱི་ཞེས་པ་ནི་སྐྱེས་པར་གདགས་པའི་དོན་ཏོ། །དཔེར་ན་བུ་བཙས་པ་དངོས་ལྟ་བུའོ། །དེ་བས་ན་
བྱང་ཆུབ་ཀྱི་སེམས་སྐྱེ་བ་ཙམ་དྲིས་པ་མ་ཡིན་གྱིས་དང་པོའི་སེམས་བྱང་ཆུབ་ཀྱི་མཚན་ཉིད་ཡོངས་སུ་རྫོགས་པར་སྐྱེས་པ་དྲིས་པ་ལ་བྱའོ། །བྱང་ཆུབ་ཏུ་ཞེས་པ་ནི་བླ་ན་མེད་པའི་བྱང་ཆུབ་ཀྱི་ཕྱིར་སྐྱེ་བ་ལ་བྱ་སྟེ། དེ་ཡང་ས་དང་པོའི་སེམས་ཀྱི་མཚན་ཉིད་བླ་ན་མེད་པའི་བྱང་ཆུབ་དང་རང་བཞིན་གཅིག་པའོ། །བླ་ན་མེད་པའི་བྱང་ཆུབ་ལ་སོགས་པ་རིམ་གྱིས་རྫོགས་པར་བྱེད་པ་ཡང་རང་བཞིན་དེ་ལ་ཐ་དད་པ་མ་ཡིན་གྱི་རང་བཞིན་དེ་ཉིད་ལས། མི་མཐུན་པའི་གཉེན་པོ་ལ་སོགས་པ་སེལ་པའི་སྒོ་ནས་མིང་གཞན་དུ་བཏགས་པ་ཙམ་དུ་ཟད་དོ། །དཔེར་ན་གསེར་ཉིད་ལས་རྒྱན་ལ་སོགས་པར་བྱས་ན་རང་བཞིན་གཅིག་ཀྱང་མིང་གི་རྣམ་གྲངས་མང་པོར་ཐོགས་པ་དང་འདྲ་སྟེ། དེ་བས་ན་ས་དང་པོའི་བྱང་ཆུབ་ཀྱི་སེམས་དེ་བྱང་ཆུབ་ཀྱི་རང་བཞིན་ལ་ཡང་བྱ་སྟེ། སྨོན་པ་དང་འཇུག་པའི་སེམས་ཀྱང་བྱང་ཆུབ་ཀྱི་ཕྱིར་སེམས་པ་ཡིན་མོད་ཀྱི། ས་དང་པོའི་བྱང་ཆུབ་ཀྱི་སེམས་ལྟར་བླ་ན་མེད་པའི་བྱང་ཆུབ་དང་རང་བཞིན་མི་གཅིག་པས་དེ་ལ་མི་བྱའོ། །ཡང་རྣམ་པ་གཅིག་ཏུ་ན་ལན་བཀའ་སྩལ་པ། བྱང་ཆུབ་ཀྱི་ས་དང་པོའི་མཚན་ཉིད་གསུངས་པས་ན་གཞན་མ་ཡིན་པར་མངོན་ནོ། །ཇི་ལྟར་ན་མཚན་ཉིད་ཤེས་པར་བགྱི། བྱང་ཆུབ་འབྱུང་བ་སྐྱེས་པའི་སེམས། །ཞེས་པ་ནི་ས་དང་པོའི་བྱང་ཆུབ་ཀྱི་སེམས་དེ་ལས་བླ་ན་མེད་པའི་བྱང་ཆུབ་འབྱུང་བས་དེ་ནི་བྱང་ཆུབ་འབྱུང་བ་ཞེས་བྱ་སྟེ། བྱང་ཆུབ་འབྱུང་པའི་སེམས་དེ་སྐྱེས་པའི་མཚན་ཉིད་བསོད་ནམས་ཆེན་པོའི་སྙིང་པོ་ནམ་མཁའ་བཞིན་དུ་ཚད་མེད་པ་ལ་སོགས་པ་དྲིས་པ་ལ་བྱའོ།། སེམས་རིག་པའི་མཆོག་ཡེ་ཤེས་འབྱུང་བས་གསུངས་ཞེས་པ་ནི་བཅོམ་ལྡན་འདས་ལ་ཡོན་ཏན་གྱི་སྒོ་ནས་བསྟོད་པ་ལ་བྱ་སྟེ། བཅོམ་ལྡན་འདས་ནི་འཇིག་རྟེན་དང་ཉན་ཐོས་དང་རང་སངས་རྒྱས་སུ་སེམས་རིག་པ་མཆོག་གི་ཕྱིར་བྱ་བ་དང༌། ལོངས་སྤྱོད་རྫོགས་པའི་སྐུ་དེ་ཐམས་ཅད་མཁྱེན་པའི་ཡེ་ཤེས་ལས་བྱུང་བས་ཡེ་ཤེས་འབྱུང་ཞེས་གསུངས་སོ། །དཔའ་བོ་ཆེན་པོ་ཇི་སྙེད་ཅིག །ཤིན་ཏུ་འདས་ནས་གདོད་སྐྱེ་བ། །ཞེས་པ་ནི་འཇིག་རྟེན་པའི་སེམས་གྲངས་དུ་ཞིག་འདས་ནས་བྱང་ཆུབ་ཀྱི་སེམས་དེ་སྐྱེ་བ་དྲིས་པ་སྟེ། སེམས་བརྒྱ་དྲུག་ཅུ་པོ་འདས་ནས་སྐྱེ་བ་ལ་བྱ་སྟེ།
སེམས་སྐྱེས་ཞེས་པ་མ་ཡིན་གྱི་སྐྱེ་བཙམ་ལ་བྱའོ། །མགོན་པོ་སེམས་རྣམས་མཚན་ཉིད་དང༌། །དུས་ཀྱང་རྒྱས་པར་བཤད་དུ་གསོལ། །ཞེས་པ་ནི་སེམས་བརྒྱ་དྲུག་ཅུ་པོ་དེ་དག་གི་མཚན་ཉིད་འདོད་ཆགས་ཀྱི་སེམས་ཞེ་སྡང་གི་སེམས་ཞེས་པ་ལ་སོགས་པ་དང༌། སེམས་བརྒྱ་དྲུག་ཅུ་པོ་དེ་དག་འདས་ནས་ཀྱང་བསྐལ་པ་ལ་སོགས་པ་ཇི་སྲིད་ཅིག་ན་བྱང་ཆུབ་ཀྱི་སེམས་དེ་སྐྱེ་བར་འགྱུར་ཞེས་པའི་དུས་དྲིས་པའོ། །དེའི་བསོད་ནམས་ཅི་འདྲ་བ་དང་སྤྱོད་པ་ཅི་འདྲ་བ་ཞིག་ཅེས་པ་ནི་དེ་ལྟ་བུའི་བྱང་ཆུབ་ཀྱི་སེམས་སྐྱེས་པ་དེའི་བསོད་ནམས་ཇི་ལྟ་བུ་དང༌། སྤྱོད་པ་ཅི་འདྲ་བ་ཞིག་སྤྱད་པས་ན་བྱང་ཆུབ་ཀྱི་སེམས་དེ་ཐོབ་ཅེས་པའོ། །སེམས་ལ་སེམས་ཀྱི་ཁྱད་པར་ཡང༌། །ཐེག་པ་ཆེན་པོ་བཤད་དུ་གསོལ། །ཞེས་པ་ནི་སེམས་ཅན་དབང་པོ་རྣོན་པོ་ཆོས་ལ་བདག་མེད་པར་རྟོགས་ནས་འཇུག་པ་དང༌། འཕགས་པ་ཉན་ཐོས་ལ་སོགས་པ་དབང་པོ་རྟུལ་པོ་རྒྱུན་དུ་ཞུགས་པ་ལ་སོགས་པའི་ས་བརྒྱད་བསྒོམས་ནས་འཇུག་པའི་ཁྱད་པར་དྲིས་པ་ལ་བྱའོ། །དེ་ལ་སེམས་ཞེས་བྱ་བ་ནི་བྱང་ཆུབ་ཀྱི་སེམས་སྤྱིར་བྱའོ། །དེ་ནས་རྣམ་པར་སྣང་མཛད་ཀྱིས་ཞེས་པ་ནས། བྱང་ཆུབ་དང་པོ་ཞེས་ཀྱང་བྱ། །ཞེས་པའི་བར་དུ་གོང་དུ་ཕྱག་ན་རྡོ་རྗེས་དྲིས་པའི་ལན་བཀའ་སྩལ་པ་ལ་བྱ་སྟེ། བུ་ཁྱོད་ཅེས་པ་ནི་ཕྱག་ན་རྡོ་རྗེ་ཆོས་ཀྱི་དབྱིངས་ལས་སྐྱེས་པས་ན་བཅོམ་ལྡན་འདས་ཀྱི་སྲས་སོ། །ཆེན་པོ་འབྱུང་བ་ཞེས་པ་ནི་སེམས་ཀྱི་རྒྱུད་ཀྱི་མཚན་ཉིད་ལ་བྱ་སྟེ། སེམས་ཀྱི་རྒྱུད་དེ་ལས་བྱང་ཆུབ་དང་ཐམས་ཅད་མཁྱེན་པའི་ཡེ་ཤེས་ཆེན་པོ་འབྱུང་བའི་ཕྱིར་རོ། །དགེའོ་ཞེས་པ་ནི་དེ་ལྟ་བུའི་དོན་བཟང་པོ་དྲིས་པ་ཉིད་དགེ་བ་དང་ཕྱག་ན་རྡོ་རྗེ་དགའ་བ་བསྐྱེད་པའི་ཕྱིར་གསུངས་སོ། །ཐེག་ཆེན་གནས་ནི་མཆོག་ཡིན་ཞེས་པ་ནི་སེམས་ཀྱི་རྒྱུད་དེ། ཐེག་པ་གསུམ་གྱི་ནང་ན་མཆོག་དམ་པ་ལ་བྱའོ། །སེམས་ཀྱི་རྒྱུད་ཀྱི་མཚན་ཉིད་དོ་ཞེས་པ་ནི་ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པའི་སེམས་ཀྱི་མཚན་ཉིད་བཤད་ཀྱིས་ཉོན་ཅིག་པ་དང་སྦྱར་རོ། །སངས་རྒྱས་རྣམས་ཀྱི་གསང་མཆོག་ཅེས་པ་ནི་དེ་ལྟ་བུའི་སེམས་རྣམ་པར་དག་པ་ཐམས་ཅད་མཁྱེན་པ་དང་མངོན་པར་བྱང་ཆུབ་པའི་རང་བཞིན་ཏེ། སེམས་ཅན་ཕལ་གྱི་སྤྱོད་ཡུལ་མ་ཡིན་པ་དང༌། སྣོད་མ་ཡིན་པ་ལ་མི་བསྟན་པའི་ཕྱིར་གསང་བ་ཞེས་བྱའོ། །རྟོག་པ་
ཀུན་གྱིས་རིག་མི་ནུས། །ཞེས་པ་ནི་སྟོང་པའི་མཚན་ཉིད་ཀྱི་སེམས་ཏེ། མངོན་སུམ་དང་རྗེས་སུ་དཔག་པའི་སྒོ་ནས་དེ་ཇི་བཞིན་པ་མི་རྟོགས་པའོ། །ཡིད་ལ་བསྡུས་ལ་ཉོན་ཅིག་པ་ནི་མ་ཡེངས་པར་ཉོན་ཅིག་པའོ། །སེམས་བརྒྱ་དྲུག་ཅུ་ལས་འདས་པའི་སྐྱེ་བོའི་འོག་ཏུ་ཞེས་པ་ནི་འཇིག་རྟེན་པའི་སེམས་བརྒྱ་དྲུག་ཅུ་ལས་འདས་ནས་ཆོས་ལ་བདག་མེད་པར་རྟོགས་ཏེ་མོས་པས་སྤྱོད་པའི་ས་ལ་སེམས་གསུམ་རྣམ་པར་བསྒོམ་པ་དང༌། ཕ་རོལ་ཏུ་ཕྱིན་པ་རྣམས་རྣམ་པར་སྤྱད་པ་དང༌། བསྡུ་པའི་དངོས་པོ་རྣམ་བཞི་བྱས་ནས་མོས་པ་སྤྱོད་པའི་ས་ལས་འཕར་ཏེ། ས་རབ་ཏུ་དགའ་བའི་སེམས་ཡེ་ཤེས་ཀྱི་ས་ལ་ཞུགས་པ་ལ་བྱ་སྟེ། ཇི་སྙེད་ཅིག་ཏུ་འདས་ནས་སྐྱེ་ཞིང་དྲིས་པའི་ལན་ཏོ། །བསོད་ནམས་ཆེན་པོ་ཞེས་པ་ནི་ཕ་རོལ་ཏུ་ཕྱིན་པ་ལ་སོགས་པའི་བསོད་ནམས་ཆེན་པོའི་རྒྱུ་ལས་སྐྱེས་པའོ། །སྙིང་པོ་ཞེས་པ་ནི་ཕྱིན་ཅི་མ་ལོག་པ་ཡོངས་སུ་རྫོགས་པ་སྟེ། དཔེར་ན་ཙནྡན་དང་སེང་ལྡེང་གི་སྙིང་པོ་ལྟར་མཆོག་དམ་པ་ལ་བྱའོ། །བྱང་ཆུབ་ཕྱིར་དུ་བྱང་ཆུབ་འབྱུང༌། །ཞེས་པ་ནི་བླ་ན་མེད་པའི་བྱང་ཆུབ་ཐོབ་པའི་ཕྱིར་བྱང་ཆུབ་ཀྱི་སེམས་དེ་ལས་སེམས་འབྱུང་བ་ལ་བྱའོ། །ཚད་མེད་པ་ནི་ནམ་མཁའ་བཞིན། །ཞེས་པ་ནི་བྱང་ཆུབ་ཀྱི་སེམས་དེའི་ཡོན་ཏན་ལ་སོགས་པ་ཚད་གཟུང་ཞིང་དཔག་ཏུ་མེད་པའམ། དེ་བཞིན་དཔག་ཏུ་མེད་པས་འདི་ཙམ་མོ་ཞེས་ཚད་གཟུང་དུ་མེད་དེ་ནམ་མཁའ་དང་འདྲ་བ་ལ་བྱའོ། །གོས་པ་མེད་པ་ཇི་བཞིན་གནས། །ཞེས་པ་ནི་དེ་ལྟ་བུའི་སེམས་ནམ་མཁའི་མཚན་ཉིད་ལ་གློ་བུར་གྱི་ཉོན་མོངས་པའི་བག་ཆགས་ཀྱིས་མ་གོས་པ་སྟེ། དེ་ལྟར་གློ་བུར་གྱི་ཉོན་མོངས་པ་ཇི་བཞིན་པའི་དབང་དུ་མ་གྱུར་པས་ཤིན་ཏུ་རྣམ་པར་དག་པའི་རང་བཞིན་དུ་གནས་པ་ལ་བྱའོ། །ཆོས་ཀུན་གྱིས་ནི་ཡོངས་མི་གཡོས། །ཚད་མེད་ཡེ་ཤེས་ཀྱིས་བསྒྲུབས་པ། །ཞེས་པ་ནི་བྱང་ཆུབ་ཀྱི་སེམས་དེ་ཚད་མེད་པའི་ཡེ་ཤེས་ལས་འབྱུང་བ་ལ་བྱའོ། །ཡང་དག་པར་རྫོགས་པའི་སངས་རྒྱས་མཐོང་ངོ་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་ལ་མཆོད་པ་བྱས་པ་དང་ས་དང་ཕ་རོལ་ཏུ་ཕྱིན་པ་ལ་སོགས་པ་སྤྱད་པ་ལས་བྱུང་སྟེ། དེ་ནི། དེ་ཡི་སྤྱད་པ་ཅི་འདྲ་བ། ཞེས་དྲིས་པའི་ལན་ཏོ། །བྱང་ཆུབ་དང་པོ་ཞེས་ཀྱང་བྱ། །ཞེས་པ་ནི་ས་དང་པོའི་བྱང་
ཆུབ་ཀྱི་སེམས་ལ་བྱ་སྟེ། དེ་རྣམས་ནི་བྱང་ཆུབ་ཀྱི་སེམས་ཀྱི་རྒྱུ་དང་རང་བཞིན་བཤད་པའོ། །དེ་ལྟ་བས་ན་གསང་བའི་བདག་པོ་འཁོར་བ་ཐོག་མ་མེད་པ་ནས་བུས་པ་སོ་སོར་འགྲོ་བ་རྣམས་ཞེས་པ་ནས་ཞེས་རྟོག་གོ་ཞེས་པའི་བར་དུ་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་བཤད་པ་ལ་བྱ་སྟེ། རྒྱུ་དེ་ཡང་རྣམ་པ་གཉིས་སོ། །དེ་ལ་ཡང་འཇིག་རྟེན་པའི་སེམས་བརྒྱ་དྲུག་ཅུ་ལ་སོགས་པ་ནི་རྣམ་པར་སྣང་མཛད་ཀྱི་རྒྱུ་ལེན་པའི་རྒྱུའོ། །ས་དང་ཕ་རོལ་ཏུ་ཕྱིན་པ་གཞན་ནི་ལྷན་ཅིག་པའི་རྒྱུའོ། །དེ་བས་ན་སོ་སོར་འགྲོ་བ་ལ་ཡང་རྣམ་པ་གཉིས་ཏེ། འཇིག་རྟེན་པའི་གཞུང་ལུགས་ཤེས་པ་དང་མི་ཤེས་པའོ། །དེ་ལ་བྱིས་པས་ནི་ངན་པར་སྨྲ་བ་དང༌། ངན་པར་བྱེད་པ་དང༌། ངན་པར་སེམས་པ་སྟེ། དེ་དག་ནི་རང་གི་གཞུང་ལུགས་ཀྱང་མི་ཤེས་པའོ། །དེ་ལས་གཞན་པ་ནི་རང་རང་གི་གཞུང་ལུགས་ཤེས་པ་འཕགས་པའི་ལམ་ཐོབ་པ་ལ་བྱ་སྟེ། དེ་དག་འཁོར་བ་ན་སྡུག་བསྔལ་གསུམ་གྱིས་གདུངས་ནས་གདུངས་པ་དེ་ལས་ཐར་པའི་ཕྱིར། བདག་དང་བདག་གིར་བརྟགས་པ་དེ་དག་ལ་བརྟན་ནས་སྦྱིན་པ་ལ་སོགས་པ་བྱས་ནས་ཐར་པར་རེ་བའོ། །བདག་དང་བདག་གི་བ་ལ་མངོན་པར་ཆགས་ནས་བདག་ཏུ་འཛིན་པ་གྲངས་མེད་པ་ལ་རྟོག་པ་དེ་དག་ཀྱང་བདག་ཅེས་པའི་རང་བཞིན་ཅི་འདྲ་བར་མ་སྤྱད་པར་ཆགས་པ་སྐྱེ་བ་ནི་རང་གི་གཞུང་ལུགས་མི་ཤེས་པའི་བྱིས་པ་རྣམས་སོ། །རང་རང་གི་ལུགས་ཤེས་པ་དེ་རྣམས་ཀྱང་སོ་སོའི་བདག་ཏུ་བརྟགས་པ་དེ་ལ་བརྟེན་པ་ནི་ཁ་ཅིག་ནི་དུས་ལས་བྱུང་ངོ་ཞེས་པ་ནས་སྨྲ་བའོ་མི་སྨྲ་བའོ་ཞེས་པའི་བར་དུ་སྟེ། དེ་དག་ནི་འཇིག་རྟེན་པ་རྣམས་ཀྱིས་སོ་སོའི་བདག་ཏུ་བརྟགས་པ་སྟེ། ཇི་སྐད་དུ་སྨོས་པའི་བདག་དང་བདག་གི་ངོ་བོ་དེ་དག་གིས་བདག་ཅག་འགྲོ་བ་རྣམས་བསྐྱེད་དེ། འཇིག་པར་བྱེད་པ་ཡང་དེ་དག་ཉིད་པར་རྟོག་པས། གསང་བའི་བདག་པོ་དེ་ལྟ་བུ་ལ་སོགས་པ་ཞེས་པ་ནི་གོང་དུ་སྨོས་པའི་བདག་གི་དངོས་པོ་རྣམས་ལ་བྱའོ། །ཐར་པར་རེ་བའི་ཕྱིར་ཞེས་པ་ནི་དེ་ལྟ་བུ་བ་བདག་ཏུ་བརྟགས་པ་ཉིད་ལ་བརྟེན་ནས་ཐར་པར་རེ་བའོ། །སྦྱོར་བས་སྦྱོར་བར་འདོད་པ་རྣམས་ཀྱི་ཞེས་པ་ནི་འཇིག་རྟེན་པའི་ཚུལ་དུ་ལུས་ངག་ཡིད་གསུམ་ཡུལ་ལ་འཇུག་པ་ལ་འགོག་པ་དང་དངོས་པོ་གང་ལ་དམགས་པ་དེ་ལ་སེམས་རྩེ་
གཅིག་ཏུ་དམིགས་པའམ་འཇོག་པ་ནི་སྦྱོར་བ་སྟེ་ལུས་ངག་ཡིད་གསུམ་ཡུལ་ལ་མི་འཇུག་པར་འགོག་པའི་སྦྱོར་བར་འདོད་པ་རྣམས་ཀྱིས་དེ་ལྟ་བུའི་བདག་རྣམས་རབ་ཏུ་རྟོག་པ་ལ་བྱའོ། །བྱིས་པ་སོ་སོའི་སྐྱེ་བོ་རྣམས་ཕྱུགས་དང་འདྲ་ཞེས་པ་ནི་རང་གི་ལུགས་མི་ཤེས་པ་ལ་བྱ་སྟེ། ཕྱུགས་དང་འདྲ་ཞེས་པ་ནི་ངན་དུ་སྨྲ་བ་དང་ངན་དུ་སེམས་པ་དང༌། ངན་དུ་བྱེད་པའི་དཔེ་སྟེ། ཕྱུགས་ནི་ཟ་བ་དང༌། གཡེམ་པ་དང་འཇིགས་པ་ལས་བསམ་བ་གཞན་མེད་དེ། བྱིས་པ་རྣམས་ཀྱང་དེ་ལྟ་བུའི་མཚན་ཉིད་དང་ལྡན་པས་ཕྱུགས་དང་འདྲ་ཞེས་པའོ། །བརྒྱལ་གལ་ཏེ་ཁ་ཅིག་ཅེས་པ་དེ་ལྟ་བུའི་བྱིས་པ་ཕྱུགས་དང་འདྲ་བ་འཁོར་བ་ན་འཁྱམ་པ་ན་ཆོས་ཀྱི་འདུ་ཤེས་སྐྱེས་པ་ནི་ཤིན་ཏུ་དཀོན་པའི་མཆོག་སྟེ། ཆོས་ཀྱི་འདུ་ཤེས་སྐྱེ་བ་ཡང་སྨྱུང་བར་འདུག་ནས་བསོད་ནམས་སུ་འགྱུར་བ་ལ་བྱ་སྟེ། སྨྱུང་བར་འདུག་པ་དེ་ཙམ་གྱིས་སེམས་མགུ་སྟེ། སྨྱུང་བར་འདུག་པ་དེ་ཉིད་ལ་ཡང་དང་ཡང་དུ་དུས་སུ་གོམས་པར་བྱེད་དེ། དེ་བས་ན་གསུངས་པ་འདི་ལྟ་སྟེ། སྨྱུང་བར་འདུག་གོ་ཞེས་པ་ནས། དེ་ཙམ་གྱིས་སེམས་མགུ་བ་སྐྱེས་ཏེ། དེའི་ཕྱིར་དེ་དག་ལ་གོམས་པར་བྱེད་དོ་ཞེས་སོ། །གསང་བའི་བདག་པོ་དེ་ནི་དགེ་བ་ལས་བྱུང་བའི་ཕྱིར་སེམས་དང་པོ་སྟེ། ས་བོན་དུ་གྱུར་པའོ་ཞེས་པ་ནི་སེམས། བདུན་པོའི་ཚེ་ཚུལ་ཁྲིམས་བསྲུངས་པའི་དགེ་བ་ལས་བྱུང་བའི་ས་བོན་དུ་གྱུར་པ་ལ་བྱའོ། །དེ་ལ་འགའ་ཞིག་དོགས་པ་སྐྱེ་བ་སྟེ། སྨྱུང་བར་འདུག་པ་ནི་བརྟུལ་ཞུགས་ཀྱི་མཚན་ཉིད་དེ་ཉོན་མོངས་པའི་ཕྱོགས་གཅིག་ཡིན་ན། ཇི་ལྟར་དགེ་བའི་ས་བོན་དུ་འགྱུར་སྙམ་པ་ལ་དོགས་པ་བསལ་བ་སྨྱུང་བར་བྱས་པའི་འོག་ཏུ་མཆོད་པ་དང་སྦྱིན་པའི་སེམས་འབྱུང་སྟེ། སྨྱུང་བ་དེ་ནི་སྦྱིན་པ་ལ་སོགས་པའི་དགེ་བའི་དེ་མ་ཐག་པའི་རྐྱེན་པས་ཉེས་པ་མེད་དོ། །སྦྱིན་པ་ལ་སོགས་པ་དེ་དག་ཀྱང་ཟག་པ་དང་བཅས་པའི་དགེ་བ་ལ་བྱའོ། །དེའི་རྒྱུས་ནི་སྦྱིན་པ་བྱིན་པ་སྟེ། ལྟས་དང་སྦྱོར་པ་ཉིད་པས་ཞེས་པ་ནི། སྨྱུང་བར་བྱེད་པ་དེ་ཉིད་ལས་གོམས་པར་བྱེད་པའི་རྒྱུས་ཟླ་བ་དང་སྐར་མ་དང༌། ཉི་མ་ལ་སོགས་པ་བཟང་པོའི་ཉིན་པར་ཕ་མ་ལ་སོགས་པའི་གཉེན་རྣམས་ལ་སྦྱིན་པར་བྱེད་པ་ནི་ཚུལ་ཁྲིམས་བསྲུངས་པའི་དགེ་བའི་ལས་ལས་བྱུང་བའི་མྱུ་གུར་བལྟའོ།།
དེ་ནས་ཡང་སྦྱིན་པ་དེ་ནི་མ་འདྲིས་པ་ལ་སྦྱིན་པ་ཞེས་པ་ནི། སྦྱིན་པ་སྔ་མ་ལ་གོམས་པའི་མཐུས་གཉེན་མ་ཡིན་པ་གཞན་ལ་ཡང་སྦྱིན་པ་སྟེ། དེ་ཡང་དགེ་བ་བཅུའི་ལས་འབྱུང་པའི་རྒྱུ་སྟེ་སྡོང་བུ་ལྟ་བུའོ། །དེ་ནས་ཡང་སྦྱིན་པའི་སྣོད་ཚོལ་ཞིང་སྦྱིན་ནོ་ཞེས་པ་ནི་པ་དང་མ་དང་མཁན་པོ་དང་སློབ་དཔོན་དང༌། བྲམ་ཟེ་སྨྲང་བཞི་རྫོགས་པར་ཤེས་པ་ལ་སྦྱིན་ན། དེ་དག་ནི་སྦྱིན་གནས་ཏེ་བསོད་ནམས་མཐའ་མེད་པར་འགྱུར་ཏེ། དེ་དག་ནི་སྦྱིན་པའི་སྣོད་དོ་སྙམ་ནས་སྦྱིན་པར་བྱེད་པ་དེ་ཡང་དགེ་བ་འབྱུང་བའི་རྒྱུ་སྟེ་འདབ་མ་ལྟ་བུར་བལྟའོ། །དེ་ནས་ཡང་སྦྱིན་པ་དེ་སྤྱོད་པའི་གནས་དང་བླ་མ་ལ་དགའ་བཞིན་དུ་སྦྱིན་པ་ཞེས་པ་ནི་སྦྱིན་པ་དེ་ནི་སྔ་མ་ལས་རྒྱ་ཆེ་སྟེ། སྣོད་ལ་ཡང་མི་རྟོག་པར་བླ་མ་དང་རོལ་མོ་མཁན་ལ་སོགས་པ་སེམས་དགའ་བར་སྦྱིན་པའི་དངོས་པོ་ལ་མ་ཆགས་པར་སྦྱིན་པ་སྟེ། དེ་ཡང་དགེ་བའི་ལས་འབྱུང་བའི་རྒྱུ་སྟེ་མེ་ཏོག་ལྟ་བུར་བལྟའོ། །དེ་ནས་སྦྱིན་པ་དེ་འདོད་པ་རྣམས་ལ་སྦྱིན་པ་ནི་ཟས་འདོད་པ་ལ་ཟས། གོས་འདོད་པ་ལ་གོས་ལ་སོགས་པ་ཅི་འདོད་པ་རྣམས་སྦྱིན་པ་ལ་བྱ་སྟེ། དེ་ཡང་དགེ་བའི་ལས་བྱུང་བའི་རྒྱུ་སྟེ་འབྲས་བུ་ལྟ་བུར་བལྟའོ། །དེ་ནས་ཡང་གསང་པའི་བདག་པོ་མཐོ་རིས་སུ་སྐྱེ་བའི་ཕྱིར་ཚུལ་ཁྲིམས་བསྲུང་ཞེས་པ་ནི། དེ་ལྟ་བུའི་སྦྱིན་པ་རྣམས་བྱས་ནས་ལུས་ཀྱི་ལས་གསུམ་དང༌། ངག་གི་ལས་བཞི་དང༌། ཡིད་ཀྱི་ལས་གསུམ་གྱི་སྒོ་ནས་མི་དགེ་བ་འབྱུང་བ་སྤོང་བའི་མཚན་ཉིད་ཚུལ་ཁྲིམས་བསྲུངས་ནས། དེའི་འབྲས་བུ་མངོན་པར་འཆད་པའི་མཚན་ཉིད་ལྷ་ལ་སོགས་པའི་ལོངས་སྤྱོད་མཐོ་རིས་སུ་སྐྱེ་བའི་ཕྱིར་ཏེ། ལོངས་སྤྱོད་དེ་ཉིད་ག་སོགས་སུ་འགྱུར་བ་ལ་བྱའོ། །དེ་ནས་ཡང་གསང་བའི་བདག་པོ་དེ་འདྲ་བའི་སེམས་སུ་འཁོར་བ་ན་རྒྱུ་བས། དགེ་བའི་གྲོགས་པོ་ལ་ལས་ཚིག་འདི་སྐད་ཅེས་ཐོས་སོ། །དེ་ལྟ་བུར་སྦྱིན་པ་བྱེད་ཅིང་ཚུལ་ཁྲིམས་བསྲུངས་ལ། མཁན་པོ་འཇིག་རྟེན་པའི་གཞུང་ལུགས་ཤེས་པ་འགའ་ཞིག་གིས་དགེ་བའི་བཤེས་གཉེན་བྱ་སྟེ་རང་གི་སྟོན་པའི་ལྷ་ལ་བསྟེན་དུ་བཅུག་པ་སྟེ། དགེ་བའི་བཤེས་གཉེན་དེས་ཀྱང་ལྷ་རྣམས་ཀྱི་དངོས་པོ་བསྟན་པ། ལྷ་ཆེན་འདི་ནི་ལྷ་འདི་ཡིན། །དགེ་བ་ཀུན་ཀྱང་སྦྱིན་པར་བྱེད། །ཁྱོད་ཀྱིས་འདི་མཆོད་དང་བྱས་ན། །ཐམས་ཅད་ཀྱང་ནི་འབྱོར་པར་འགྱུར། །ལྷ་རྣམས་ཀུན་གྱི་དྲང་སྲོང་མཆོག །
དེ་བཞིན། སྨྲང་དང་སྨྲང་གི་མིང་རྣམས་ལ། །ཞེས་པའི་བར་དུའོ། །མཁས་པ་ཁྱོད་ཀྱིས་མཆོད་པ་བྱོས། །ཞེས་པ་ནི་དེ་ལྟར་གོང་དུ་མིང་གིས་སྨོས་པའི་ལྷ་དེ་རྣམས་ལ་གང་ལ་དད་པ་སྟོན་པ་མཆོད་ཅིག་དང༌། ལྷ་དེ་རྣམས་ནི་བདེ་བ་སྟེར་བ་དང༌། བསམ་པ་ཐམས་ཅད་འབྱོར་པར་བྱེད་པའོ་ཞེས་བསྟན་པའོ། །དེ་སྐད་དུ་ནི་སྒྲ་བཞིན་རྣམས། །ཐོས་ནས་སུ་ནི་ཡིད་མགུ་སྟེ། །དེ་ནས་དེ་ལ་ནན་ཏན་བྱེད། །རབ་ལྡན་གྱུར་ཏོ་ཞེས་པ་ནི་དེ་ལྟར་དགེ་བའི་བཤེས་གཉེན་གྱིས་ལྷ་རྣམས་བསྟན་པ་ཐོས་ནས་བྱིས་པ་དེ་ལ་ཡིད་མགུ་བ་སྐྱེས་ཏེ། དེ་ནས་ལྷ་དེ་དག་ལ་བརྟེན་པ་དང་མཆོད་པ་ནན་ཏན་བྱེད་ཅིང་ལྷ་དེ་རྣམས་ལ་རབ་ཏུ་དད་པ་དང་ལྡན་པར་གྱུར་པའོ། །གསང་བའི་བདག་པོ་དེ་ནི་ཕྱིས་པ་སོ་སོར་འགྲོ་བ་རྣམས་འཁོར་བ་ན་འཁྱམ་པ་ན། མཆོག་ཏུ་དབུགས་དབྱུང་བ་དེ་ནི་བརྒྱད་དེ། སེམས་ཀྱི་སྟོབས་སུ་གྱུར་པའོ་ཞེས་སྔོན་གྱི་རྒྱལ་བ་རྣམས་ཀྱིས་གསུངས་སོ་ཞེས་པ་ནི་དེ་ལྟ་བུའི་བྱིས་པ་སོ་སོར་འགྲོ་བའི་ཐ་དད་པ་རྣམས་འཁོར་བ་ན་རྟེན་དང་མགོན་མེད་བར་འཁྱམས་པ་དགེ་བའི་བཤེས་གཉེན་གྱིས་རྟེན་དང་མགོན་དེ་དག་བསྟན་པས་བྱིས་པ་དེ་རྣམས་རྟེན་དང་མགོན་རྙེད་དེ་དབུགས་བྱུང་བར་གྱུར་པ་ནི་བསྟན་པར་གྱུར་པས་དགེ་བའི་སྟོབས་སུ་གྱུར་པའོ། །དེ་ནས་ཡང་གསང་བའི་བདག་པོ་དེ་དག་གི་རིམ་པ་ཇི་ལྟ་བུར་ཁྱད་པར་སྨྲས་པ་ལ། རྟོགས་ཤིང་བཞུགས་པ་དང་ཁྱད་པར་དེ་རྣམས་ལ་རིམ་པར་གནས་ནས་མྱ་ངན་ལས་འདས་པའི་ཕྱིར་བློ་སྐྱེས་པ་ནི་སྟོང་པ་ཉིད་དེ་ལ་ཡོད་སྙམ་སེམས་སོ་ཞེས་པ་ནི་སྔར་བདག་གི་ངོ་བོ་སྨོས་པ་རྣམས་དང༌། སྟོན་པའི་ལྷ་རྣམས་ཇི་སྐད་དུ་སྨོས་པའི་རང་བཞིན་ཤེས་ནས་བདག་ཏུ་བརྟགས་པ་དང༌། ལྷ་དེ་རྣམས་ལ་བརྟེན་ཏེ། ལྷ་དེ་རྣམས་བསྟན་པའི་གཞུང་གིས་ལས་དང་ཉོན་མོངས་པ་སྤངས་ནས་བདག་ཏུ་བརྟགས་པ་དེ་དག་པར་འགྱུར་ཏེ། དག་པ་དེ་ནི་སྟོང་པ་ཉིད་མྱ་ངན་ལས་འདས་པ་ཡིན་སྙམ་དུ་བློ་སྐྱེ་སྟེ། སྟོང་པ་ཉིད་ལ་བདག་ཅེས་པའི་དངོས་པོ་རྣམས་ཀྱི་འབྲུ་ཙམ་མམ། སྤུའི་ཉག་མ་ལ་སོགས་པ་བདེ་བ་དང་སྡུག་བསྔལ་མྱོང་བར་བྱེད་པའི་རང་བཞིན་དེ་ཡོད་པར་རྟོག་སྟེ། དེ་དག་ནི་བྱིས་པ་སོ་སོར་འགྲོ་བ་རྣམས་ཀྱིས་བདག་དང་ལྷ་རྣམས་ལ་བརྟེན་ནས་བདག་ཅག་གི་རྣམ་པར་གྲོལ་བ་བཙལ་
བ་སྟེ། རྣམ་པར་གྲོལ་བའི་བདེ་བདེ་ཡང་བཅོམ་ལྡན་འདས་རྣམ་པར་སྣང་མཛད་ཉིད་གནས་པའི་རྒྱུར་བལྟའོ། །དབང་པོ་ཆེན་པོ་དང་ཚངས་པ་ལ་སོགས་པའི་ལྷ་དེ་རྣམས་ཀྱང་སྤྱིར་སེམས་ཅན་རྣམ་པ་གཉིས་ཏེ། ལས་ལ་སྐྱེས་པ་དང༌། ཡེ་ཤེས་ཀྱི་སེམས་ཅན་དེ་ལ་སྐབས་འདིར་ལྷ་རྣམས་ཀྱང་བྱིས་པ་སོ་སོར་འགྲོ་བ་འཁྱམས་པ་རྣམས་སོ་སོའི་མྱ་ངན་ལས་འདས་པའི་ལམ་སྟོན་པ་སྟེ། ལམ་དེ་སྟོན་པ་ཡང་བཅོམ་ལྡན་འདས་རྣམ་པ་རྣང་མཛད་ཀྱིས་ཤེས་ནས་ཐོབ་པའི་རྒྱུར་སྦྱོར་བ་ཡིན་པས། དབང་པོ་དང་བརྒྱ་བྱིན་ལ་སོགས་ཏེ་ལྷ་དེ་རྣམས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལས་སྤྲུལ་པའི་ཡེ་ཤེས་ཀྱི་སེམས་ཅན་དུ་བལྟའོ། །གསང་བའི་བདག་པོ་དེ་དག་གིས་ནི་སྟོང་པ་ཉིད་དུ་མ་ཤེས་ཏེ་ཞེས་པ་ནི་སྟོང་པ་ཉིད་ལས་འབའ་ཞིག་ཅེས་པ་བདག་གིས་ངོ་བོར་བརྟགས་པས་སྟོང་པར་མི་འགྱུར་ཏེ། ཇི་ཙམ་དུ་དངོས་པོར་བརྟགས་པ་དེ་ཙམ་དུ་ཡོད་པའི་མཐའ་འཛིན་པས་སྟོང་པ་ཉིད་ཤེས་པར་མི་འགྱུར་ཞེས་པའོ། །དེ་ལྟ་བས་ན་སྟོང་པའི་མཚན་ཉིད་ཕྱིན་ཅི་མ་ལོག་པར་གསུངས་པ་སྟོང་པ་ཉིད་ནི་དངོས་པོ་ཡང་མ་ཡིན། དངོས་པོ་མ་ཡིན་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། དེ་ལྟར་བརྟག་པ་ཡང་མ་ཡིན། མི་བརྟག་པ་ཡང་མ་ཡིན། དེ་ལ་སྟོང་པ་ཉིད་དུ་ཇི་ལྟར་བརྟག་ཅེས་པ་སྟེ། དེ་ལ་དངོས་པོ་ཡང་མ་ཡིན་ཞེས་པ་ནི་ཇི་ལྟར་བྱིས་པ་རྣམས་ཀྱིས་བདག་ཏུ་བརྟགས་པའི་དངོས་པོ་མ་ཡིན། དངོས་པོ་མ་ཡིན་པ་ཡང་མ་ཡིན་ཞེས་པ་ནི་དེ་ལྟ་བུ་ཡོད་པའི་དངོས་པོ་ལས་གཞན་པ་ཡང་སྤོང་བ་དེ་མ་ཡིན་པའོ།། ཡོད་པ་ཡང་མ་ཡིན་ཞེས་པ་ནི་སྟོང་པ་ཉིད་ལ་དེ་ལྟ་བུའི་དངོས་པོ་མེད་པའོ། །མེད་པ་ཡང་མ་ཡིན་ཞེས་པ་ནི་སྟོང་པ་ཉིད་ཀྱི་རང་བཞིན་མེད་པ་མ་ཡིན་པའོ། །གཉིས་ཀ་མ་ཡིན་ཞེས་པ་ནི་ཡོད་མེད་གཉིས་ལས་གཞན་མེད་པའོ། །དེ་ནི་བརྟག་པ་ཡང་མ་ཡིན་མི་བརྟག་པ་ཡང་མ་ཡིན། དེ་ལ་སྟོང་པ་ཉིད་དུ་ཇི་ལྟར་བརྟག་ཅེས་པ་ནི། དེ་ལྟར་ཡོད་པ་དང་མེད་པ་མ་ཡིན་པས་སྟོང་པ་ཉིད་ལ་དངོས་པོར་བརྟག་ཏུ་མེད་ཅེས་པ་སྟེ། དེ་གཉིས་ཀྱི་དོན་ཚིགས་སུ་བཅད་དེ་གསུངས་པ། གང་གིས་སྟོང་ཉིད་མི་ཤེས་པ། །དེ་ཡིས་མྱ་ངན་འདའ་མི་ཤེས། །དེ་བས་སྟོང་ཉིད་ཤེས་བྱ་བ། །
དངོས་དང་དངོས་མིན་རྣམ་པར་བསྒོམ། །ཞེས་པ་སྟེ། གང་གིས་སྟོང་ཉིད་མི་ཤེས་པ། །ཞེས་པ་ནི་སྟོང་ཉིད་ལ་དངོས་པོར་བརྟགས་པ། སྟོང་པ་ཉིད་ཀྱི་རང་བཞིན་ཕྱིན་ཅི་མ་ལོག་པར་མི་ཤེས་པ་སྟེ། དེས་ནི་ཆོས་ཀྱི་དབྱིངས་ཞི་བ་མྱ་ངན་ལས་འདས་པ་རྣམས་ཀྱང་ཤེས་པར་མི་ནུས་པ་ལ་བྱའོ། །སྟོང་པ་ཉིད་ཇི་ལྟར་ཤེས་པར་བྱ་ཞེ་ན། དངོས་པོ་དང་དངོས་པོ་མེད་པར་ཟིན་པའི་དངོས་པོ་དང་བྲལ་བས་ཤེས་པར་ནུས་ཏེ། དེ་བས་ན་གསུངས་པ། དངོས་དང་དངོས་མིན་རྣམ་པར་བསྒོམ། །ཞེས་པའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཀྱི་རྒྱུད་དེ་དག་བཤད་དུ་གསོལ་ཞེས་པ་ནི། སྔར་སེམས་ཀྱི་རྒྱུད་བརྒྱ་དྲུག་ཅུ་འདས་ནས་བྱང་ཆུབ་ཀྱི་སེམས་སྐྱེའོ་ཞེས་གསུངས་པ། སེམས་ཀྱི་རྒྱུད་དེ་རྣམས་ཀྱི་མཚན་ཉིད་ཅི་འདྲ་བ་ལགས་བཤད་དུ་གསོལ་ཞེས་པ་ལ་བྱའོ། །དེ་སྐད་ཅེས་གསོལ་པ་ནས་བཤད་ཀྱིས་ཉོན་ཅིག་པའི་བར་དུ་གསོལ་བ་བཤད་དུ་གནང་བ་ལ་བྱ་སྟེ། དེ་དག་བཤད་པ་ཡང་གསང་བའི་བདག་པོ་འདི་ནི་འདོད་ཆགས་ཀྱི་སེམས་འདོད་ཆགས་མེད་པའི་སེམས་ཞེས་པ་ནས། ཕུལ་དུ་གྱུར་པའི་སེམས་ཆེར་གྱུར་པའི་སེམས་ཞེས་པའི་བར། སེམས་དེ་རྣམས་བཤད་པ་ཡང་མིང་དང་མཚན་ཉིད་སྤོང་བ་དང་ལམ་གྱི་སྒོ་བཤད་པར་ཤེས་པར་བྱ་སྟེ། སེམས་དེ་རྣམས་ཀྱི་རང་བཞིན་ཡང་རྣམ་པ་བཞི་སྟེ། ཉོན་མོངས་པ་དང་དགེ་བ་དང་མི་དགེ་བ་དང་ལུང་དུ་མ་བསྟན་པའོ། །དེ་ལ་སེམས་དེ་རྣམས་ལས་འདས་པར་བྱ་བ་ཡང༌། སྤྱིར་སྔགས་ཀྱི་སྒོ་ནས་སྤྱོད་པ་རྣམ་པ་གཉིས་ཏེ་གྲུབ་པ་དང་དམ་ཚིག་ཅན་ནོ། །དེ་ལ་གྲུབ་པ་ནི་མོས་པ་སྤྱོད་པའི་ས་ནས་ཡིད་ཀྱི་རང་བཞིན་གྱི་ལུས་ཀྱི་གང་དུ་འདོད་པ་འཕར་བས་རིམ་པ་དང་བསྐལ་བའི་ཚིག་ཀྱང་མེད་དོ། །དམ་ཚིག་ལ་ཡང་རྣམ་པ་གཉིས་ཏེ། དབང་པོ་རྟུལ་པོ་དང་རྣོན་པོའོ། །དེ་ལ་དབང་པོ་རྟུལ་པོ་ནི་ཐོག་མ་འཇིག་རྟེན་པའི་ལམ་སྟོང་པ་ཉིད་ལ་ལམ་འབའ་ཞིག་པར་བློ་སྐྱེས་པ་ལས་འཕར་ནས་གང་ཟག་ལ་བདག་མེད་པར་ཆུད་དེ། སེམས་འདི་རྣམས་ཀྱང་སྒུག་བསྔལ་བ་ཉིད་དང༌། མི་རྟག་པ་ཉིད་དང༌། སྟོང་པ་ཉིད་དང་བདག་མེད་པར་རྟོགས་ཏེ། སྤོང་བ་གོམས་པར་བྱེད་
པ་ནི་འཇིག་རྟེན་པའི་ལམ་ནས་བརྩམས་ཏེ་བསྐལ་པ་གསུམ་གྱི་བར་དུ་གང་ཟག་ལ་བདག་མེད་པར་བསྒོམས་ཏེ། དེ་ནས་ཕུང་པོ་ལ་ཡང་སྙམ་པའི་བློ་སྐྱེ་བ་དེ་ཡང་སུན་ཕྱིན་ནས་ཕུང་པོ་ལ་སོགས་པ་དང༌། སྒྱུ་མ་དང་སྨིག་རྒྱུ་ལྟ་བུར་ཆོས་ལ་བདག་མེད་པར་ཆུད་དེ་སེམས་གསུམ་བསྒོམ་བ་དང༌། ཕ་རོལ་ཏུ་ཕྱིན་པ་ལ་སོགས་པ་རྣམ་པར་དཔྱོད་པའི་མཚན་ཉིད་མོས་པ་སྤྱོད་པའི་ས་ལ་འཇུག་གོ །དབང་པོ་རྣོན་པོ་ནི་ཐོག་མ་ཉིད་ནས་གང་ཟག་དང་ཆོས་གཉིས་ཀ་ལ་བདག་མེད་པར་ཆུད་པས། སེམས་དེ་རྣམས་ཀྱང་སྒྱུ་མ་དང་སྨིག་རྒྱུའི་ཚུལ་གྱིས་སྤོང་ཞིང་སེམས་གསུམ་པོ་སྒོམ་པ་ཕ་རོལ་ཏུ་ཕྱིན་པ་རྣམས་རྣམ་པར་དཔྱོད་པའི་རིམ་གྱིས་མོས་པ་སྤྱོད་པའི་ས་ལ་བསྐལ་པ་གཅིག་གིས་རྫོགས་ནས་བསྐལ་པ་དེའི་བཞི་ཆ་གཅིག་གིས་ཡེ་ཤེས་ཀྱི་ས་ལ་འཇུག་གོ །མོས་པ་སྤྱོད་པའི་ས་ལ་ཞུགས་ནས་ནི་དབང་པོ་རྣོ་རྟུལ་གཉིས་ཀ་ཡང་མོས་པ་སྤྱོད་པའི་ས་ལ་དེ་བསྐལ་པ་གཅིག་གིས་རྫོགས་པར་བྱེད་པ་དང༌། ཡེ་ཤེས་ཀྱི་ས་ལ་བསྐལ་པ་བཞི་ཆ་གཅིག་གིས་འཇུག་པར་འདྲའོ། །སེམས་ཀྱི་དངོས་བོ་དྲུག་ཅུ་རྣམས་ལས་བརྒྱུ་དྲུག་ཅུར་འབྲེལ་པ་ཡང༌། སྒྲིབ་པའི་ཆ་སྤོམ་ཕྲ་གསུམ་དུ་ཕྱེ་སྟེ། གསུམ་པོ་དེ་རྣམས་ལས་གཅིག་ཅིང་ཡང་གསུམ་གསུམ་དུ་བསྒོ་སྟེ་རྣམ་དགུར་བལྟའོ། །དེ་ལ་སྒྲིབ་པ་ཆེན་པོའི་ཆེན་པོ་ལ་སེམས་གཅིག་སྤོང༌། ཆེན་པོའི་འབྲིང་པོ་ལ་གཉིས་སྤོང༌། ཆེན་པོའི་ཆུང་ངུ་ལ་གསུམ་སྤོང༌། འབྲིང་པོའི་ཆེན་པོ་ལ་བཞི་སྤོང༌། འབྲིང་པོའི་འབྲིང་པོ་ལ་ལྔ་སྤོང༌། འབྲིང་པོའི་ཆུང་ངུ་དྲུག་སྤོང༌། ཆུང་ངུའི་ཆེན་པོ་ལ་བདུན་སྤོང༌། ཆུང་ངུའི་འབྲིང་པོ་ལ་བརྒྱད་སྤོང༌། འོག་ནས་འབྱུང་བའི་ཚུལ་གྱིས་དེ་ལྟར་སེམས་བརྒྱ་དྲུག་ཅུ་མོས་པ་སྤྱོད་པའི་ས་ནས་སྤོང་ཞིང་མོས་པ་སྤྱོད་པའི་ས་དེ་རྫོགས་པར་བྱེད་དོ། །དེ་ལ་དགུ་རྣམས་ཀྱི་མཐར་ཆུང་ངུའི་ཡང་ཆུང་ངུ་ནི་མོས་པ་སྤྱོད་པའི་ས་ནས་སྤོང་སྟེ། ཡེ་ཤེས་ཀྱི་ས་ལ་འཇུག་པར་ཤེས་པར་བྱའོ། །དེ་ལ་འདོད་ཆགས་ཀྱི་སེམས་གང་ཞེ་ན། འདོད་ཆགས་ཀྱི་ཆོས་བ་སྟོན་པའོ་ཞེས་པ་ལ་འདོད་ཆགས་ཀྱི་སེམས་ཞེས་པ་ནི་འདོད་ཆགས་དང་ལྡན་པའི་སེམས་ལ་བྱ་སྟེ། དེ་ཡང་དགེ་བ་དང་མི་དགེ་བ་དང༌། ཉོན་མོངས་པ་དང༌། ལུང་དུ་མི་སྟོན་པའི་ཆོས་རྣམ་པ་བཞི་ལས་ཇི་ལྟར་རིགས་པ་ཆགས་
པས་བསྙེན་པར་ཤེས་པར་བྱ་སྟེ། ལྷ་ལ་སོགས་པ་ལ་དད་ཅིང་མཆོད་པར་བྱ་བ་ལ་ཞེན་ནས་མཆོད་པ་ལ་སོགས་པའི་ལས་དེ་དག་བྱེད་པ་ནི་འདོད་ཆགས་ཀྱི་ཆོས་བསྙེན་པར་བྱེད་པ་ལ་བྱ་སྟེ་དགེ་བའོ། །དེ་བཞིན་དུ་བུད་མེད་ལ་སོགས་པ་ལ་ཞེན་ནས་དེའི་བྱ་བ་བྱེད་པ་ནི་འདོད་ཆགས་ཀྱི་ཆོས་བསྙེན་པ་སྟེ། ཉོན་མོངས་པའི་སེམས་སོ། །མ་བྱིན་པར་ལེན་པ་དང༌། བརྫུན་དུ་སྨྲ་བ་ལ་སོགས་པའི་ཆོས་ལ་ཞེན་ནས་དེ་དག་གི་བྱ་བ་བྱེད་པ་ནི་འདོད་ཆགས་ཀྱི་ཆོས་བསྙེན་པ་སྟེ་མི་དགེ་བའི་སེམས་སོ། །བཟོ་ལ་སོགས་པའི་ཆོས་ལ་ཞེན་ནས་དེ་དག་གི་བྱ་བ་བྱེད་པ་ནི་འདོད་ཆགས་ཀྱི་ཆོས་བསྙེན་པ་སྟེ་ལུང་དུ་མི་སྟོན་པའོ། །དེ་ལྟར་སེམས་གཞན་རྣམས་ལ་ཡང་ཇི་ལྟར་རིགས་པར་དགེ་བ་དང་མི་དགེ་བ་དང་ཉོན་མོངས་པ་དང་ལུང་དུ་མ་བསྟན་པ་འདིའི་ཚུལ་གྱིས་སྦྱར་བར་བྱའོ། །འདོད་ཆགས་མེད་པའི་སེམས་གང་ཞེ་ན། མ་ཆགས་པར་ཆོས་བསྙེན་པ་སྟེ་གོང་དུ་སྨོས་པའི་ཆོས་རྣམ་བཞི་ལ་མ་ཆགས་པའམ། མ་མོས་ཀྱང་ཆོས་ཉིད་ཀྱིས་སྤྱོད་པའམ། གཞན་གྱི་དབང་དུ་མི་སྤྱོད་བཞིན་དུ་དེ་དག་གི་བྱ་བ་བྱེད་པ་འདོད་མི་ཆགས་པའི་ཆོས་བསྙེན་པའོ། །ཞེ་སྡང་གི་སེམས་གང་ཞེ་ན། ཞེ་སྡང་གི་ཆོས་བསྙེན་པ་ཞེས་པ་ནི་ཞེ་སྡང་དང་ལྡན་པའི་སེམས་དེ་གོང་དུ་སྨོས་པའི་ཚུལ་གྱིས་དགེ་བ་དང་མི་དགེ་བ་ལ་སོགས་པར་རིག་པར་བྱའོ། །བྱམས་པའི་སེམས་གང་ཞེན། བྱམས་པའི་རྗེས་སུ་འགྲོ་བའི་ཆོས་བསྙེན་པ་སྟེ་ཞེས་པ་ནི་བྱམས་པ་དང་ལྡན་པའི་སེམས་དེ་དགེ་བ་དང་མི་དགེ་བ་ལ་སོགས་པ་ནི་སྔ་མ་བཞིན་ནོ། །གཏི་མུག་གི་སེམས་གང་ཞེ་ན། མི་དཔྱོད་པར་ཆོས་བསྙེན་པའོ་ཞེས་པ་ནི་གཏི་མུག་དང་ལྡན་པའི་སེམས་སོ། །ཤེས་རབ་ཀྱི་སེམས་གང་ཞེ་ན། ཁྱད་པར་ལས་ཁྱས་པར་དུ་ཆུད་པའི་ཆོས་བསྙེན་པའོ་ཞེས་པ་ནི་ཤེས་པ་དང་ལྡན་པའི་སེམས་དེ་ཁྱད་པར་ཞེས་པ་ནི་ཤེས་རབ་མ་ཐོབ་པ་ལས་ཤེས་རབ་ཐོབ་པར་འགྱུར་རོ། །ཁྱད་པར་གཞན་དུ་ཞེས་པ་ནི་ཤེས་རབ་དེ་ཐོབ་པ་ལས་ཤེས་རབ་དམ་པའི་ཁྱད་པར་དུ་ཆུད་པ་ལ་བྱའོ། །གདོན་མི་ཟ་བའི་སེམས་གང་ཞེ་ན། བཀའ་དང་བླ་མའི་ཚིག་བཞིན་བྱེད་པ་ཞེས་པ་ནི་རྒྱལ་པོ་ལ་སོགས་པའི་བཀའ་དང་སློབ་དཔོན་ལ་སོགས་པའི་ལུང་མི་
བྱར་མི་རུང་སྟེ་ངེས་པར་བྱ་བའི་ཆོས་དེ་བྱེད་པའོ། །ཐེ་ཚོམ་གྱི་སེམས་གང་ཞེ་ན། ཇི་ལྟར་གདོན་མི་ཟབ་ཉིད་ལ་དོགས་པས་བསྙེན་པའི་ཞེས་པ་ནི་ཐེ་ཚོམ་དང་ལྡན་པའི་སེམས་དེ་སྔར་ཕྱིན་ཅི་མ་ལོག་པར་ཟིན་པ་ལ་ཕྱིས་བདག་ཉིད་ཀྱིས་ཐེ་ཚོམ་བསླང་སྟེ། དགོས་པ་སྐྱེ་བར་བྱེད་པ་ནི་དེའི་ཆོས་ལ་བསྙེན་པའོ་ཞེས་བྱའོ། །མུན་པར་གྱུར་པའི་སེམས་གང་ཞེ་ན། མི་དོགས་པ་ལ་དོགས་པར་ཤེས་པའོ་ཞེས་པ་ནི་མུན་པ་ལྟ་བུའི་སེམས་ཏེ། ཇི་ལྟར་མུན་པའི་ནང་ན་བུམ་པ་ལ་སོགས་པ་ཡོད་ཀྱང་གསལ་བར་མི་སྣང་བས་ཡོད་དམ་མེད་དགོས་པ་སྟེ། དེ་བཞིན་དུ་སེམས་མུན་བ་དང་འདྲ་བ་ཡང་དངོས་པོ་ཕྱིན་ཅི་མ་ལོག་པ་ལ་མ་རིག་པའི་མུན་པས་བསྒྲིབས་པས་དོགས་པ་སྐྱེ་བའོ། །སྣང་བར་གྱུར་པའི་སེམས་གང་ཞེ་ན། ཐེ་ཚོམ་མེད་པ་ལ་ཐེ་ཚོམ་མེད་པར་བསྙེན་པའོ་ཞེས་པ་ནི་སྣང་བའི་རང་བཞིན་དུ་གྱུར་པའི་སེམས་ཏེ། ཇི་ལྟར་ནམ་མཁའ་སྣང་བ་ལ་རྫས་ཀྱི་དངོས་པོ་སྣང་བར་གསལ་བ་བཞིན་དུ་སྣང་བའི་རང་བཞིན་གྱི་གཟུགས་དེ་ཡང་སེམས་དེས་ཀྱང་ཤེས་པར་བྱའི་དངོས་པོ་ཐེ་ཚོམ་མེད་པར་ཤེས་ནས། དེ་ཉིད་ལ་ཐེ་ཚོམ་མེད་བཞིན་དུ་སྤྱོད་པ་ནི་ཐེ་ཚོམ་མེད་པའི་ཆོས་ལ་བསྙེན་པའོ། །སྡུད་པའི་སེམས་གང་ཞེ་ན། གང་དུ་མ་ལས་གཅིག་ཏུ་སྡུད་པ་ཞེས་པ་ནི་སྡུད་པའི་རང་བཞིན་གྱི་སེམས་ཏེ། ཕུང་པོ་དང་ཁམས་དང་སྐྱེ་མཆེད་ལ་སོགས་པ་རང་གི་མཚན་ཉིད་སོ་སོ་པ་ལས་སྟོང་པ་དང་བདག་མེད་པ་ལ་སོགས་པའི་སྤྱིའི་མཚན་ཉིད་དུ་གཅིག་ཏུ་སྡུད་པའོ། །འཐབ་མོའི་སེམས་གང་ཞེ་ན། ཕན་ཚུན་རྩོད་པའོ་ཞེས་པ་ནི་འཐབ་མོ་ཅན་གྱི་སེམས་ཏེ་མི་མཐུན་པའི་མུ་རེ་རེ་བཟུང་ཞིང་རྩོད་པའི་ཆོས་བསྙེན་པའོ། །རྩོད་པ་དང་བྲལ་བའི་སེམས་གང་ཞེ་ན། གང་བདག་ཉིད་ལ་བདག་གིས་རྩོད་པའོ་ཞེས་པ་ནི་རྩོད་པ་མེད་པའི་རང་བཞིན་གྱི་སེམས་ཏེ། གཞན་ཡང་ཕན་ཚུན་དུ་མི་མཐུན་པའི་ཕྱོགས་བཟུང་ཞིང་མི་རྩོད་པར་བདག་རང་གི་སེམས་ལ་སུན་འབྱིན་པའམ། དཔྱོད་པ་ལྟ་བུའོ། །མི་རྩོད་པའི་སེམས་གང་ཞེ་ན། མཉམ་པར་སྙོམས་པར་རྟོག་པའོ་ཞེས་པ་ནི་རྩོད་པ་མེད་པའི་རང་བཞིན་གྱི་སེམས་ཏེ། དངོས་པོ་གང་ཡང་རུང་བ་ལ་གཞན་དང་ལྟ་བ་མཐུན་པས་མཚུངས་པར་སྤྱོད་དེ། རྩོད་པ་མེད་པའི་ཆོས་བསྙེན་
པར་བྱེད་པའོ། །ལྷའི་སེམས་གང་ཞེ་ན། ཡིད་ལ་ཡིད་ཀྱིས་རྟོག་པའོ་ཞེས་པ་ནི་ལྷ་ལྟ་བུའི་སེམས་སམ་ལྷའི་ཕྱིར་སེམས་པ་སྟེ། ལྷ་ལྟ་བུར་སེམས་པ་ནི་ཇི་ལྟར་ལྷ་རྣམས་བདག་ནི་ལྷ་ཡིན་ནོ་སྙམ་དུ་སེམས་པ་བཞིན་དུ་སེམས་དེ་ཡང་བདག་ཉིད་གང་ཡིན་པ་དེ་ཡིན་ནོ་སྙམ་དུ་སེམས་པའོ། །ལྷའི་ཕྱིར་སེམས་པ་ནི་བདག་གི་ལྷར་གྱུར་པར་བྱའོ་སྙམ་དུ་སེམས་པའོ། །ལྷ་མ་ཡིན་གྱི་སེམས་གང་ཞེ་ན། གང་འཁོར་བ་ལ་སྨོན་པའོ་ཞེས་པ་ནི་ལྷ་མ་ཡིན་ལྟ་བུའི་སེམས་ཏེ། དེ་ལྟར་ལྷ་མ་ཡིན་དེ་ལ་སོགས་པའི་དངོས་པོ་ཐམས་ཅད་ལ་སྨོན་པར་བྱེད་པ་དེ་བཞིན་དུ་སེམས་དེ་ཡང་འཁོར་བ་ལ་སྨོན་པར་བྱེད་པའི་ཆོས་བསྟེན་པའོ། །ཀླུའི་སེམས་གང་ཞེ་ན། སྤྱོད་པ་ཆེན་པོར་སེམས་པའོ་ཞེས་པ་ནི་ཀླུ་ལྟ་བུའི་སེམས་ཏེ། ཇི་ལྟར་ཀླུ་ཕྱུག་པོ་ལ་མགོ་མང་པོ་ཡོད་དེ། མགོ་མང་སོ་དེས་ལོངས་སྤྱོད་ཆེ་བར་ཤེས་པ་བཞིན་དུ་སེམས་དེ་ཡང་ལོངས་སྤྱོད་ཆེན་པོ་སྤྱོད་པའི་ཆོས་བསྙེན་པའོ། །དེ་ལ་ཀླུ་མགོ་མང་པོ་ལ་ཇི་ལྟར་ལོངས་སྤྱོད་ཀྱི་དཔེར་གྱུར་ཞེ་ན། རྒྱ་གར་གྱི་སྐད་དུ། ལོངས་སྤྱོད་ལ་བྷོ་ག །ཀླུའི་མགོ་ལ་ཡང་བྷོ་ག་ཞེས་བྱ་སྟེ་སྐད་ཀྱི་གཞུང་དུ་མཐུན། དོན་དུ་ཡང་ཀླུ་མགོ་མང་པོ་དེ་ཕྱུག་པས་ལོངས་སྤྱོད་ཆེན་པོ་སྤྱོད་དོ། །དེ་བཞིན་དུ་སེམས་དེ་ཡང་ལོངས་སྤྱོད་ཆེན་པོའི་ཆོས་ལ་བསྙེན་པར་བྱེད་པས་ཀླུ་ལྟ་བུའི་སེམས་ཞེས་བྱའོ། །མིའི་སེམས་གང་ཞེ་ན། དེ་ཉིད་ཀྱི་དོན་ལ་སེམས་པ་ཞེས་པ་ནི། མིའི་ལོངས་སྤྱོད་འདོད་པའི་ཡོན་ཏན་གྱི་ཆོས་ལ་བསྙེན་པར་བྱེད་པའོ། །བུད་མེད་ཀྱི་སེམས་གང་ཞེ་ན། འདོད་པའི་ཕྱིར་དེའི་ཆོས་ལ་བསྙེན་པའོ་ཞེས་པ་ནི་བུད་མེད་ལྟ་བུའི་སེམས་ཏེ་བུད་མེད་ནི་འདོད་ཆགས་ཀྱི་ཡུལ་དུ་གྱུར་པའི་ཆོས་རྣམས་ཐོབ་པར་བྱ་བའི་ཕྱིར་ཆོས་དེ་དག་གི་བྱ་བ་བྱེད་དེ། དེ་བཞིན་དུ་སེམས་དེ་ཡང་འདོད་པའི་ཡུལ་རྣམས་ཐོབ་པར་བྱ་བའི་ཕྱིར་ཆོས་དེ་དག་ལ་བསྙེན་པར་བྱེད་དོ། །དབང་པོའི་སེམས་གང་ཞེ་ན། གང་ངས་བསམ་མོ་སྙམ་མོ་ཞེས་པ་ནི་དབང་པོ་ལྟ་བུའི་སེམས་ཏེ། དབང་པོའི་འཇིག་རྟེན་ཐམས་ཅད་སྐྱེ་བ་དང་འཇིག་པར་ངས་བྱ་བར་སེམས་སོ། །དེ་བཞིན་དུ་སེམས་དེ་ཡང་བདག་གིས་མ་བྱས་པ་རྣམས་ཀྱང་བདག་གིས་བྱས་སོ་སྙམ་པའི་ཆོས་བསྙེན་པར་བྱེད་པའོ། །དབང་
པ་ནི་ལྷ་ཆེན་པོ་ལ་བྱའོ། །ཚོང་པའི་སེམས་གང་ཞེ་ན། གང་བསྡུས་ནས་སོ་སོར་སྤེལ་བའི་ཆོས་བསྙེན་པའོ་ཞེས་པ་ནི་ཚོང་པ་ལྟ་བུའི་སེམས་ཏེ། ཚོང་པ་ནི་འཚོང་ཞིང་ཉོ་བའི་ཆོས་རྣམས་རིན་ཆུང་བའི་དུས་ན་ཀུན་བསྡུས་ནས་ནམ་རིན་ཆེ་བ་ནི་རིན་ཆེ་བ་དེ་དག་ཐམས་ཅད་སླར་སྤེལ་ཞིང་འཚོང་བར་བྱེད་དོ། །དེ་བཞིན་དུ་སེམས་དེ་ཡང་སྔར་ཕུང་པོ་དང་ཁམས་དང་སྐྱེ་མཆེད་རྣམས་མི་རྟག་པ་དང་སྡུག་བསྔལ་བ་ལ་སོགས་པའི་ཆོས་དེ་རྣམས་ཉིད་ཇི་ལྟར་རིགས་པར་སྤང་པར་བྱ་བའི་ཆོས་བསྙེན་པར་བྱེད་པའོ། །ཆུན་པའི་སེམས་གང་ཞེ་ན། མང་དུ་ཐོས་པ་བཙལ་ནས་ཕྱིས་བསྙེན་པའོ་ཞེས་པ་ནི་ཆུན་པ་ལྟ་བུའི་སེམས་ཏེ་སྔར་ཞིང་ཐོག་རྣམས་བསྡུས་ནས། ཕྱིས་ཞིང་ཐོག་དེ་རྣམས་ཉིད་ལ་བཟའ་བ་དང་བཏུང་བ་ལ་སོགས་པ་བྱ་བ་བྱེད་དོ། །དེ་བཞིན་དུ་སེམས་དེ་ཡང་སྔར་ཆོས་རྣམས་མང་དུ་ཐོས་པར་བྱས་ཏེ། བསགས་ནས་ཇི་ལྟར་ཐོས་པའི་ཆོས་དེ་རྣམས་ཕྱིས་སེམས་པ་དང་བསྒོམ་པ་ལ་སོགས་པའི་ཆོས་བསྙེན་པར་བྱེད་པའོ། །ཆུ་བོའི་སེམས་གང་ཞེ་ན། གང་དག་མཐའ་གཉིས་མི་རྟོག་པར་བསྙེན་པའོ་ཞེས་པ་ནི་ཆུ་བོ་ལྟ་བུའི་སེམས་ཏེ། ཆུ་བོ་ནི་མཐའ་གཉིས་སུ་མི་མཐོ་བར་དབུས་ཀྱི་གཞུང་བཞིན་ལས་འབབ་བོ། །དེ་བཞིན་དུ་སེམས་དེ་ཡང་རྟག་པ་དང་ཆད་པའི་མཐའ་གཉིས་སྤོང་བར་བྱེད་པའི་ཆོས་བསྙེན་པའོ། །ཡང་ན་ཆུ་བོ་མཐའ་གཉིས་ལ་རྟོག་ཅིང་འབབ་བ་དེ་བཞིན་དུ་སེམས་དེ་ཡང་རྟག་པ་དང་ཆད་པའི་མཐའ་གཟུང་ཞིང་དེའི་ཆོས་བསྙེན་པར་བྱེད་པ་ལ་ཡང་བྱའོ། །མཚེའུའི་སེམས་གང་ཞེ་ན། བདག་བསྙེན་པའོ་ཞེས་པ་ནི་མཚེའུ་ལྟ་བུའི་སེམས་ཏེ་མཚེའུ་དེ་ནི་གཞན་ལས་འབབ་པའི་ཆུ་རྣམས་བསོགས་ལ། བདག་ལས་གར་ཡང་མི་འཛག་སྟེ། དེ་བཞིན་དུ་སེམས་དེ་ཡང་གཞན་གྱི་ཐམས་ཅད་ནི་བསྡུས་ལ་བདག་ལས་གང་སུ་ཡང་མི་གཏོང་བའི་ཆོས་བསྙེན་པའོ། །རྫིང་བུ་ལྟ་བུའི་སེམས་གང་ཞེ་ན། གང་གིས་མི་ཟབ་བ་ལས་ཟབ་པར་ཤེས་པའོ་ཞེས་པ་ནི་རྫིང་བུ་ལྟ་བུའི་སེམས་ཏེ། རྫིང་བུ་ཆུས་གང་བ་མི་ཟབ་ཀྱང་གཏིང་དཔག་ཏུ་མི་མངོན་པས་ཟབ་པ་འདྲ། དེ་བཞིན་དུ་སེམས་དེ་ཡང་ཟབ་མོའི་བློ་མ་ཡིན་པ་ལ་ཟབ་སྙམ་དུ་སེམས་པའི་ཆོས་
བསྙེན་པའོ། །བསྲུང་བའི་སེམས་གང་ཞེ་ན། འདི་ནི་བདེན་གྱི་གཞན་ནི་གཏི་མུག་གོ་ཞེས་པ་ནི་བསྲུང་བར་གྱུར་པའི་སེམས་ཏེ། བདག་གིས་ཇི་ལྟར་ཐོས་ཤིང་ཟིན་པ་དེ་ཉིད་མ་ནོར་བའོ་སྙམ་ནས་བརྟན་པར་བཟུང་སྟེ། གཞན་གྱིས་ཟིན་ཅིང་རྟོག་པ་དེ་མ་ཡིན་པ་སྙམ་དུ་ཆོས་བསྙེན་པའོ། །སེར་སྣའི་སེམས་གང་ཞེ་ན། བདག་ལ་བསྙེན་ཅིང་གཞན་ལ་མི་གཏོང་བའོ་ཞེས་པ་ནི་སེར་སྣ་ཅན་གྱི་སེམས་ལ་བྱ་སྟེ། ཇི་ལྟར་གྲགས་པའོ། །བྱི་ལའི་སེམས་གང་ཞེ་ན། གང་འཕར་བའི་གླགས་ཚོལ་བའོ་ཞེས་པ་ནི་བྱི་ལ་ལྟ་བུའི་སེམས་ཏེ། བྱི་བ་ལ་སོགས་པ་འཛིན་པ་འཕར་བས་འཕར་ཞིང་འཛིན་ཏེ། དེ་བཞིན་དུ་སེམས་དེ་ཡང་འཕགས་པའི་ལམ་ལ་སོགས་པ་ཐོབ་པར་བྱེད་ན་འཇུག་པའི་དུས་ཀྱི་རིམ་གྱིས་འཕར་བ་ཡང༌། དེའི་རིམ་གྱིས་འཕར་བའོ། །ཁྱིའི་སེམས་གང་ཞེ་ན། གང་ཆུང་དུས་ཀྱང་མགུ་བར་གྱུར་པའོ་ཞེས་པ་ནི་ཁྱི་ལྟ་བུའི་སེམས་ཏེ་ཁྱི་ནི་ཆུང་དུས་ཀྱང་མགུའོ། །དེ་བཞིན་དུ་སེམས་དེ་ཡང་གང་ཡང་རུང་བའི་དངོས་པོ་ཆུང་ངུ་ལ་མགུ་བར་བྱེད་པའི་ཆོས་བསྙེན་པར་བྱེད་པའོ། །ནམ་མཁའ་ལྡིང་གི་སེམས་གང་ཞེ་ན། གང་སྐྱབས་སུ་གྱུར་པའི་ཆོས་བསྙེན་པའོ་ཞེས་པ་ནི་ནམ་མཁའ་ལྡིང་ལྟ་བུའི་སེམས་ཏེ། ནམ་མཁའ་ལྡེང་ནི་ཀླུ་ལ་སོགས་པ་ལ་འཛིན་ལ་འདབ་མས་རྡོབ་ཅིང་འཛིན་ཏེ། དེ་བཞིན་དུ་སེམས་དེ་ཡང་གང་བདག་གི་ཡིན་པ་དེ་ནི་ཕྱོགས་འཛིན་པའི་བསྙེན་པར་བྱེད་དོ། །ནམ་མཁའ་ལྡིང་དེ་འདབ་མས་རྡོབ་ཅིང་སྤྲུལ་འཛིན་པ་དེ་ཇི་ལྟར་ཕྱོགས་འཛིན་པའི་དཔེར་འགྱུར་ཞེ་ན། རྒྱ་གར་གྱི་སྐད་དུ། འདབ་མ་ལ་པཀྵ་ཤ་ཞེས་བྱ་ཕྱོགས་ལ་ཡང་པཀྵ་ཞེས་བྱ་སྟེ། དེ་ལྟར་སྐད་ཀྱི་གཞུང་ལས་གཅིག་ལ་དོན་དུ་ཡང་ནམ་མཁའ་ལྡིང་ནི་ཀླུ་དེ་བདག་གིར་བྱེད་པའི་ཕྱིར་འཛིན། ཕྱོགས་སུ་གྱུར་པ་ཡང་བདག་གིར་བྱ་བའི་དངོས་པོའི་དོན་ལ་ཕྱོགས་འཛིན་པས་མཐུན་ནོ། །བྱི་བའི་སེམས་གང་ཞེ་ན། གང་བཅིངས་པ་ཐམས་ཅད་གཅོད་པར་བྱེད་པར་སེམས་པའོ་ཞེས་པ་ནི་བྱི་བ་ལྟ་བུའི་སེམས་ཏེ། བྱི་བ་ནི་བཅིངས་པ་ཐམས་ཅད་གཅོད་ཅིང་གྲོལ་བར་བྱེད་པའོ། །དེ་བཞིན་དུ་སེམས་དེ་ཡང་འདོད་ཆགས་ཞེ་སྡང་གཏི་མུག་གིས་བཅིངས་
པ་ལས་བཀྲོལ་བའི་ཆོས་བསྙེན་པར་བྱེད་པའོ། །གླུའི་སེམས་གང་ཞེ་ན། བདག་གིས་དབྱངས་སྣ་མང་པོའི་གླུའི་ཚིག་གིས་སེམས་ཅན་རྣམས་གཟུང་ངོ་སྙམ་བ་ནི་གླུ་ལྟ་བུའི་སེམས་ཏེ། ཇི་ལྟར་གླུ་དེས་སེམས་ཅན་རྣམས་དགའ་ཞིང་འདུ་བ་དེ་བཞིན་དུ་སེམས་དེ་ཡང་བདག་གིས་གང་གི་རྗེས་སུ་མཐུན་པའི་སྒྲ་སྐད་ཀྱིས་དབྱངས་མང་པོས་སེམས་ཅན་རྣམས་གང་དུ་དད་པར་གཟུང་ངོ་སྙམ་པའི་ཆོས་བསྙེན་པར་བྱེད་པའོ། །གར་གྱི་སེམས་གང་ཞེ་ན། བདག་གིས་འཕྲུལ་སྣང་མང་པོས་ཕ་རོལ་པོ་རྣམས་ལ་བྱེད་དུ་གཞུག་གོ་སྙམ་དུ་སེམས་ཞེས་པ་ནི་གར་བྱ་བའི་ཕྱིར་སེམས་ཏེ། གར་ཞེས་བྱ་བའི་ཚིག་ནི་ལུས་གཡོ་བའི་དོན་ཏོ། །ལུས་གཡོ་བ་ནི་གར་གཅིག་པུར་མ་ཟད་ཀྱི་ནམ་མཁའ་ལ་འགྲོ་བ་ལ་སོགས་པའི་ལུས་ཀྱི་རྫུ་འཕྲུལ་ཐམས་ཅད་ལ་བྱ་སྟེ། དེ་ལྟ་བས་ན་ལུས་ཀྱི་རྫུ་འཕྲུལ་དེ་དག་གིས་སེམས་ཅན་རྣམས་རྫུ་འཕྲུལ་སྣ་ཚོགས་ལ་སྦྱོར་བར་བྱེད་པའི་ཆོས་བསྙེན་པའོ། །རྔའི་སེམས་གང་ཞེ་ན། བདག་གིས་ཆོས་ཀྱི་རྔ་བརྡུང་ངོ་སྙམ་པའོ་ཞེས་པ་ནི་རྔའི་སེམས་ཏེ། ཆོས་ཀྱི་རྡ་བསྒྲགས་ཤིང་འཆད་པར་བྱ་བའི་ཆོས་བསྙེན་པར་བྱེད་པའི་སེམས་སོ། །ཁྱིམ་གྱི་སེམས་གང་ཞེ་ན། གང་བདག་གིས་ལུས་བསྲུང་པའི་ཆོས་བསྙེན་པའོ་ཞེས་པ་ནི་ཁྱིམ་ལྟ་བུའི་སེམས་ཏེ་ཁྱིམ་ནི་རྫས་ལ་སོགས་པ་ཆུད་མི་ཟ་བར་སྲུང་སྐྱོང་བར་བྱེད་དེ། དེ་བཞིན་དུ་སེམས་དེ་ཡང་བདག་གིས་ལུས་སྲུང་བའི་ཆོས་བསྙེན་པར་བྱེད་པའོ། །སེང་གེའི་སེམས་གང་ཞེ་ན། གང་ཐམས་ཅད་ཟིལ་གྱིས་མནན་པར་སེམས་པའོ་ཞེས་པ་ནི་སེང་གེ་ལྟ་བུའི་སེམས་ཏེ། སེང་གེ་ནི་བདག་གི་སྒྱུ་རྩལ་གྱིས་བྱོལ་སོང་ཐམས་ཅད་ཟིལ་གྱིས་གནོན་པ་དེ་བཞིན་དུ། སེམས་དེ་ཡང་བདག་གིས་ཀྱང་ཤེས་ཤིང་གྲགས་པའི་ཕྱོགས་ཀྱིས་གཞན་རྣམས་ཟིལ་གྱིས་མནན་པའི་ཆོས་བསྙེན་པར་བྱེད་པའོ། །འུག་པའི་སེམས་གང་ཞེ་ན། གང་མཚན་མོ་ལ་སེམས་པའོ་ཞེས་པ་ནི་འུག་པ་ལྟ་བུའི་སེམས་ཏེ། འུག་པ་ནི་བདག་གིས་ཟས་ཚོལ་བ་ལ་སོགས་པ་བྱ་བ་ཐམས་ཅད་མཚན་མོ་བྱེད་དོ། །དེ་བཞིན་དུ་སེམས་དེ་ཡང་བདག་གི་བྱ་བ་རྣམས་མཚན་མོ་བྱེད་པའི་ཆོས་བསྟེན་པའོ། །བྱ་རོག་
གི་སེམས་གང་ཞེ་ན། གང་བས་ཐམས་ཅད་སེམས་པའོ་ཞེས་པ་ནི་བྱ་རོག་ལྟ་བུའི་སེམས་ཏེ། བྱ་རོག་ནི་ཀུན་གྱིས་འཇིགས་ཤིང་བརྡབས་བཞིན་དུ་རང་གི་བྱ་བ་བྱེད་དེ། དེ་བཞིན་དུ་སེམས་དེ་ཡང་གང་གིས་དངོས་པོ་སྤྱད་པ་ཐམས་ཅད་བག་ཚ་ཞིང་བརྡབས་པས་བརྡབས་པའི་ཆོས་བསྙེན་པར་བྱེད་པའོ། །འབར་བའི་སེམས་གང་ཞེ་ན། གང་དགེ་བ་རྣམས་མི་དགེ་བར་བཟློག་པའོ་ཞེས་པ་ནི་འབར་བ་ལྟ་བུའི་སེམས་ཏེ་འབར་བ་སྔོན་དགེ་བ་ལ་སོགས་པ་སྤྱད་པའི་རྒྱུས་བདག་མཐུ་དང་ལྡན་པར་གྱུར་པས་མཐུ་དེས་གསོད་པ་ལ་སོགས་པ་མི་དགེ་བའི་ཆོས་རྣམས་སྤྱོད་དེ་སེམས་དེ་ཡང་དེ་ལྟ་བུའི་ཆོས་བསྙེན་པར་བྱེད་པའོ། །ཚེར་མའི་སེམས་གང་ཞེ་ན། གང་ཐམས་ཅད་འགྱོད་པ་སྒོམ་པའོ་ཞེས་པ་ནི་ཚེར་མ་ལྟ་བུའི་སེམས་ཏེ། ཚེར་མ་ནི་འཛུགས་ཤིང་གནོད་པར་བྱེད་པའོ། །དེ་བཞིན་དུ་སེམས་དེ་ཡང་གང་བྱས་པའི་དངོས་པོ་ལ་འགྱོད་པ་སྐྱེའོ། །འགྱོད་པ་དེ་ཉིད་ཡང་དང་ཡང་དུ་ཡིད་ལ་བྱེད་ཅིང་ཟུག་རྡུར་གྱུར་པའི་ཆོས་བསྙེན་པའོ། །ས་འོག་གི་སེམས་གང་ཞེ་ན། གང་ས་འོག་གི་དོན་ལ་སེམས་པའོ་ཞེས་པ་ནི་ས་འོག་གི་ཕྱིར་སེམས་པ་སྟེ། ས་འོག་ཏུ་སོང་ནས་དེའི་བྱ་བ་བྱེད་པའི་ཆོས་བསྙེན་པར་བྱེད་པའོ། །རླུང་གི་སེམས་གང་ཞེ་ན། གང་ཐམས་ཅད་དུ་ཐམས་ཅད་ལ་རྒྱུ་བའོ་ཞེས་པ་ནི་རླུང་ལྟ་བུའི་སེམས་ཏེ། རླུང་ནི་བར་བར་མེའི་ནང་དུ་ཞུགས། བར་བར་ཆུ་ལ་སོགས་པའི་ནང་དུ་ཞུགས་པ་དེ་བཞིན་དུ་སེམས་དེ་ཡང་བར་བར་དགེ་བའི་ནང་དུ་ཞུགས་ཏེ་མི་དགེ་བར་བྱེད། བར་བར་མི་དགེ་བའི་ནང་དུ་ཞུགས་ཏེ་དགེ་བར་བྱེད་དེ། མདོར་ན་ཀུན་གྱི་ནང་དུ་འཇུག་ལ་ཡང་མི་གནས་པར་བྱེད་པའི་ཆོས་བསྙེན་པར་བྱེད་པའོ། །མེའི་སེམས་གང་ཞེ་ན། གང་ཚ་བའི་མཚན་ཉིད་ཀྱིས་གདུངས་པ་ཞེས་པའོ། །མེ་ལྟ་བུའི་སེམས་ཏེ། མེ་ནི་རང་གི་ཚ་བས་གདུང་བར་བྱེད་དེ། དེ་བཞིན་དུ་སེམས་དེ་ཡང་རང་གི་དཀའ་ཐུབ་ཀྱིས་ལུས་དང་སེམས་གདུངས་ཤིང་སྨ་འབབ་པར་བྱེད་པའི་ཆོས་བསྙེན་པའོ། །མེ་དཀའ་ཐུབ་ཀྱི་དཔེར་ཇི་ལྟར་འགྱུར་ཞེ་ན། རྒྱ་གར་སྐད་དུ། ཚ་བ་ལ་ཏ་པ་ཞེས་བྱ། དཀའ་ཐུབ་ལ་ཡང་ཏ་པ་ཞེས་བྱ་སྟེ། དེ་ལྟར་སྐད་དང་གཞུང་མཐུན་པས་དཔེར་བྱའོ། །
འདམ་གྱི་སེམས་གང་ཞེ་ན། བདག་ཉིད་ཀྱི་ཉེས་པ་ཕ་རོལ་ལ་གོས་པར་བྱེད་པའོ་ཞེས་པ་ནི་འདམ་གྱི་སེམས་ཏེ། འདམ་ནི་བདག་གི་ངོ་བོར་ངན་པ་དེ་གཞན་ལ་གོས་ཤིང་ཆགས་པར་བྱེད་དོ། །དེ་བཞིན་དུ་སེམས་དེ་ཡང་རང་གི་ཉེས་པ་གཞན་ལ་གོས་པར་བྱེད་པའི་ཆོས་བསྙེན་པར་བྱེད་དོ། །རྙོག་པའི་སེམས་གང་ཞེ་ན། གང་ཕ་རོལ་གྱི་ཉེས་པ་བྱུང་བས་བ་དག་གི་སེམས་འཁྲུགས་པར་བསྙེན་པའོ་ཞེས་པ་ནི་རྙོག་པ་ལྟ་བུའི་སེམས་ཏེ། གཞན་གྱི་ཉེས་པས་བདག་གི་སེམས་འཁྲུགས་པར་བྱེད་པའོ། །ཁ་དོག་གི་སེམས་གང་ཞེ་ན། གང་དེ་ཉིད་ཀྱིས་ཆོས་བསྙེན་པའོ་ཞེས་པ་ནི་ཁ་དོག་ལྟ་བུའི་སེམས་ཏེ། ཚོན་དཀར་པོའམ་དམར་པོ་ལ་སོགས་པའི་ཁ་དོག་ནི་གང་ལ་བསྐུས་པ་དེ་ཚོན་དེ་ཉིད་ཀྱི་རང་བཞིན་དུ་འགྱུར་ཏེ། དེ་བཞིན་དུ་སེམས་དེ་ཡང་གང་གི་དངོས་པོ་བསམས་པ་དེ་ལ་ཞེན་ནི་ཇི་ལྟར་བསམས་པ་དེའི་རང་བཞིན་དུ་འགྱུར་པའི་ཆོས་བསྙེན་པའོ། །ཕུབ་ཀྱི་སེམས་གང་ཞེ་ན། གང་དགེ་བ་གཞན་སྤོང་བའི་ཆོས་བསྙེན་པའོ་ཞེས་པ་ནི་ཕུབ་ལྟ་བུའི་སེམས་ཏེ། ཕུབ་ནི་མཚོན་ལ་སོགས་པ་གཞན་རྣམས་ཀྱིས་མི་ཕིགས་པར་སྐྱོབ་པའི་བྱ་བ་བྱེད་པའོ། །དེ་བཞིན་དུ་སེམས་དེ་ཡང་དགེ་བ་གཅིག་སྤྱད་པས་དགེ་བ་གཞན་སྒྲིབ་པར་བྱེད་པའི་ཆོས་བསྙེན་པར་བྱེད་པའོ། །འཁྲུལ་པའི་སེམས་གང་ཞེ་ན། གང་གཞན་གཟུང་ཞིང་གཞན་སེམས་པའོ་ཞེས་པ་ནི་འཁྲུལ་པའི་རང་བཞིན་གྱི་སེམས་ཏེ། གང་གིས་དངོས་པོ་ཟིན་ཏེ་འཁྲུལ་ནས་གཞན་ཡིན་སྙམ་དུ་སེམས་པའོ། །དུག་གི་སེམས་གང་ཞེ་ན། གང་ཤིན་ཏུ་དངོས་པོ་མེད་པར་སེམས་པའོ་ཞེས་པ་ནི་དུག་གི་སེམས་ཏེ། དུག་ནི་གང་གིས་ཟིན་ན་ཤི་སྟེ་མེད་པར་འགྱུར་བའོ། །དེ་བཞིན་དུ་སེམས་དེ་གང་ཡང་ལྟ་བ་ལ་སོགས་པའི་ཉོན་མོངས་པ་རྣམས་སྤངས་ནས་ཕྱིར་མི་སྐྱེ་བར་མེད་པར་བྱེད་པའོ། །ཞགས་པའི་སེམས་གང་ཞེ་ན། གང་ཐམས་ཅད་རང་འཆིང་ཞིང་འདུག་པའོ་ཞེས་པ་ནི་ཞགས་པ་ལྟ་བུའི་སེམས་ཏེ། ཞགས་པ་ནི་འཆིང་བའི་བྱ་བ་བྱེད་དོ། །དེ་བཞིན་དུ་སེམས་དེ་ཡང་བདག་ཉིད་བཅིང་བར་བྱེད་པའི་ཆོས་བསྙེན་པར་བྱེད་པའོ། །ལྕགས་སྒྲོག་གི་སེམས་གང་ཞེ་ན། གང་རྐང་པ་གཉིས་ལ་འདུག་པར་སེམས་པའོ་ཞེས་པ་ནི་ལྕགས་
སྒྲོག་ལྟ་བུའི་སེམས་ཏེ། ལྕགས་སྒྲོག་ནི་རྐང་པ་གཉིས་འཛིན་པར་བྱེད་དེ་དེ་བཞིན་དུ་སེམས་དེ་ཡང་ཡོད་པ་དང་མེད་པའི་ཚིག་གི་མཐའ་གཉིས་འཛིན་པའི་ཆོས་བསྙེན་པའོ། །དེ་ལ་ལྕགས་སྒྲོག་རྐང་གཉིས་འཛིན་པ་དང་སེམས་ཀྱི་མཐའ་གཉིས་སུ་འཛིན་པ་ཇི་ལྟར་དཔེར་འགྱུར་ཞེ་ན། རྒྱ་གར་སྐད་དུ། རྐང་པ་ལ་ཡང་པ་ད་ཞེས་བྱ། ཚིག་ལ་ཡང་པ་ད་ཞེས་བྱ་སྟེ་མཐུན་ནོ། །སྤྲིན་གྱི་སེམས་གང་ཞེ་ན། གང་དབྱར་དུ་སེམས་པའོ་ཞེས་པ་ནི་སྤྲིན་ལྟ་བུའི་སེམས་ཏེ། སྤྲིན་ནི་དབྱར་འདུ་ཞིང་དབྱར་གྱི་བྱ་བ་བྱེད་དེ། དེ་བཞིན་དུ་སེམས་དེ་ཡང་དབྱར་གྱི་བྱ་བ་བྱེད་པའི་ཆོས་བསྙེན་པའོ། །ཞིང་གི་སེམས་གང་ཞེ་ན། བདག་གི་ལུས་ལ་ཡོངས་སུ་ལས་བྱེད་པའོ་ཞེས་པ་ནི་ཞིང་ལྟ་བུའི་སེམས་ཏེ། ཞིང་ནི་འབྲུལ་ལ་སོགས་པ་སྐྱེ་བར་བྱེད་པའི་ཕྱིར་རྨོས་པ་ལ་སོགས་པའི་ལས་བྱི་དོར་བྱེད་དོ། །དེ་བཞིན་དུ་སེམས་དེ་ཡང་བདག་གི་ལུས་བཟང་པོར་བྱ་བའི་ཕྱིར་ཁྲུས་དང་བྱུག་པ་དང་རྒྱན་ལ་སོགས་པས་བདག་གི་ལུས་ལ་བརྒྱན་པར་བྱེད་པའི་ཆོས་བསྙེན་པའོ། །ལན་ཚྭའི་སེམས་གང་ཞེ་ན། གང་ལ་གང་གིས་བསམ་པ་དེ་ཉིད་སེམས་པའོ་ཞེས་པ་ནི་ལན་ཚྭའི་སེམས་ཏེ། ལན་ཚྭ་ནི་བུམ་པ་ལ་སོགས་པ་སྣོད་ཀྱི་ནང་དུ་གཞག་ན་སྣོད་དེ་ཡང་ལན་ཚྭས་ཟོས་ནས་བྱང་སྟེ་རྡོལ་པ་དང་ལན་ཚྭའི་རོར་འགྱུར་རོ། །དེ་བཞིན་དུ་སེམས་དེས་ཀྱང་གང་གི་དངོས་པོ་ལ་དམིགས་ཤིང་རྟོག་པ་ལ་རྟོག་པའི་སེམས་དེ་ཉིད་ཀྱིས་སྐད་ཅིག་མ་ཕྱི་མའི་ཆ་ལ་རྟོག་པའི་དེ་སུན་ཕྱུང་ནས་མེད་པར་བྱེད་པའི་ཆོས་བསྙེན་པར་བྱེད་པའོ། །སྤུ་གྲིའི་སེམས་གང་ཞེ་ན། གང་རབ་ཏུ་བྱུང་བ་ཙམ་ལ་གནས་པའོ་ཞེས་པ་ནི་སྤུ་གྲི་ལྟ་བུའི་སེམས་ཏེ། སྤུ་གྲི་ནི་རབ་ཏུ་བྱུང་བའི་སྐྲ་འདྲེག་པ་ཙམ་གྱི་བྱ་བ་བྱེད་པ་དེ་རབ་ཏུ་བྱུང་བ་ནི་ནན་ཏན་གྱིས་གཞན་མི་བྱེད་དོ། །དེ་བཞིན་དུ་སེམས་དེ་ཡང་རབ་ཏུ་བྱུང་སྟེ་སྐྲ་འདྲེག་ནས་རབ་ཏུ་བྱུང་བ་ཙམ་ལ་གནས་ཀྱི། རབ་ཏུ་བྱུང་བའི་བསླབ་པའི་ནན་ཏན་ཚུལ་ཁྲིམས་སྲུང་བ་ལ་སོགས་པ་མི་བྱེད་པའོ། །རི་རབ་ཏུ་གྱུར་པའི་སེམས་གང་ཞེ་ན། གང་ཆེ་བར་གྱུར་པའི་སེམས་པ་ནི་རི་རབ་ལྟ་བུའི་སེམས་ཏེ། རི་རབ་ནི་དཔག་ཚད་སྟོང་ཕྲག་བརྒྱད་ཅུར་གྱེན་དུ་མཐོ་ཞིང་འཕགས་པར་གྱུར་ཏོ།
དེ་བཞིན་དུ་སེམས་དེ་ཡང་བདག་གི་ཡོན་ཏན་གྱིས་ཀུན་ནས་འཕགས་སོ་སྙམ་ནས་འགྱིང་ཞིང་ཆེ་བར་བྱེད་པའི་ཆོས་བསྙེན་པར་བྱེད་པའོ། །རྒྱ་མཚོར་གྱུར་པའི་སེམས་གང་ཞེ་ན། རང་གི་ལུས་ལ་རྟོག་ཅིང་འདུག་པའོ་ཞེས་པ་ནི། རྒྱ་མཚོ་ལྟ་བུའི་སེམས་ཏེ། རྒྱ་མཚོ་ནི་རང་གི་རླབས་ཀྱིས་བདག་ཉིད་ལ་རློབ་ཅིང་རེག་པར་བྱེད་པའོ། །དེ་བཞིན་དུ་སེམས་དེ་ཡང་བདག་ཉིད་ཀྱི་ལུས་ལ་མི་རྟག་པ་དང་སྟོང་པ་ལ་སོགས་པར་རྟོག་གོ །ཕུག་ཏུ་གྱུར་པའི་སེམས་གང་ཞེ་ན། སྔོན་ངེས་པར་གྱུར་པ་ལས་ཕྱིས་དེ་ཉིད་དུ་འགྱུར་བ་སྟོན་པའོ་ཞེས་བྱ་བ་ནི་ཕུག་ལྟ་བུའི་སེམས་ཏེ། སེམས་དེ་ཕུག་ནི་སྒོར་ཆུང་དུར་ངེས་པ་ལས་གྱུར་པ། ཕུག་དེ་སྒོ་ལས་རྣམ་བ་དུ་མར་ཆེ་བར་འགྱུར་རོ། །དེ་བཞིན་དུ་སེམས་དེ་ཡང་སྔར་བདག་དང་ཚུལ་ཁྲིམས་དང་ཡོན་ཏན་དང་ལྡན་པས་ངེས་པར་འཇུག་པ་ལས་ཚུལ་ཁྲིམས་དང་ཡོན་ཏན་དང་དེ་ཉིད་ཀྱིས་དྲེགས་ནས་དེའི་གཞིས་ང་རྒྱལ་བྱེད་ཅིང་འགྱུར་བའོ། །ཚེར་འགྱུར་བའི་སེམས་གང་ཞེ་ན། གང་གི་སེམས་བསྐྱེད་པ་དེ་བཞིན་དུ་འགྲོ་བའོ་ཞེས་པ་ནི། །ཚེར་གྱུར་པའི་རང་བཞིན་གྱི་སེམས་ཏེ། སྔོན་དགེ་བ་དང་མི་དགེ་བ་གང་ཡང་རུང་བ་ལ་སྤྱད་པའི་བག་ཆགས་ཡོད་པས་གང་དུ་སྐྱེས་ན་ཡང་བག་ཆགས་དེ་ཉིད་ལྷན་ཅིག་ཏུ་སྐྱེ་བའོ། །ཡང་ན་སྔོན་གྱི་དགེ་བ་དང་མི་དགེ་བའི་ལས་གང་ཡང་རུང་བའི་རྣམ་པར་སྨིན་པའི་འབྲས་བུ་མི་འདྲ་བའི་ཚེ་ཐོབ་ནས་དེ་ལྟ་བུ་དང་ལྷན་ཅིག་ཏུ་སྐྱེ་བ་སྟེ། དཔེར་ན་ཚེ་རབས་སྔ་མ་ལ་སྲོག་གཅོད་པ་གོམས་ཤིང་མང་དུ་བྱས་པས་ཚེ་ཕྱི་མ་ལ་ནད་མང་ཞིང་ཚེ་ཐུང་བར་འགྱུར་བ་སྟེ། དེ་བཞིན་དུ་དགེ་པ་ཡང་ཇི་ལྟར་རིགས་པར་སྦྱར་བར་བྱའོ། །འཇིག་རྟེན་ལས་འདས་པའི་སེམས་བརྒྱ་དྲུག་ཅུ་བསྐལ་བ་གསུམ་འདས་པ་དང་འཇིག་རྟེན་ལས་འདས་པའི་སེམས་སྐྱེའོ་ཞེས་པ་འཇིག་རྟེན་ལས་འདས་པའི་སེམས་ཀྱང་རྣམ་པ་གཉིས་ཏེ། གང་ཟག་ལ་བདག་མེད་པར་ཆུད་པའི་སེམས་ཟག་པ་མེད་པ་ཇི་བཞིན་པ་དང་བཅས་པའི་སེམས་དང༌། ཆོས་ལ་བདག་མེད་པར་ཆུད་པའི་སེམས་ཟག་པ་མེད་པར་ཇི་བཞིན་པ་མེད་པ་རང་བཞིན་གྱིས་འོད་གསལ་བ་སྟེ། དེ་ལ་སྐབས་འདིར་འཇིག་རྟེན་ལས་མ་
འདས་པའི་སེམས་ཤེས་པ་ནི་གང་ཟག་རྣམས་ཀྱིས་ཤེས་པར་ནུས་སམ་ཞེ་ན། དེ་ནས་རྟོག་པ་ཅན་དེ་དག་གིས་མི་ནུས་ཏེ། དེ་བས་ན་གསུངས་པ། རྟོག་པ་ཀུན་གྱི་རིག་དཀའ་སྟེ། །ཞེས་པའོ། །སྔོན་གྱི་སངས་རྒྱས་རྣམས་ཀྱིས་གསུངས། །ཞེས་པ་ནི་དེ་ལྟར་རྟོག་པ་རྣམས་ཀྱིས་ཀྱང་ཤེས་པར་མི་ནུས་ན་སུས་ཤེས་པར་ནུས་ཤེ་ན། རྟོག་པ་རྣམས་ཀྱི་སྤྱོད་ཡུལ་མ་ཡིན་གྱི་སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་ཏེ་གསུངས་པའོ་ཞེས་པའོ། །སྔོན་གྱི་སངས་རྒྱས་རྣམས་ཞེས་པ་ནི་དེ་ལྟ་བུ་འབའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་ཀྱང་ཚུལ་འདི་ལྟར་མཁྱེན་ནས་བཤད་པའོ་ཞེས་པ་སྟེ། སངས་རྒྱས་བཅོམ་ལྡན་འདས་རྣམས་མཁྱེན་པ་གཅིག་པར་བསྟན་པའོ། །ཅིའི་ཕྱིར་ཞེ་ན། བསོད་ནམས་དང་ཡེ་ཤེས་ཀྱི་ཚོགས་དང༌། ཆོས་ཀྱི་སྐུ་དང་འགྲོ་བའི་དོན་མཛད་པར་གཅིག་པས་མཉམ་པ་ཉིད་ཀྱི་ཕྱིར་རོ།། ཉེས་པ་ཀུན་དང་བྲལ་བའོ་ཞེས་པ་ནི་དེ་ལྟ་བུའི་ཟབ་ཅིང་ཞི་བ་གང་ཟག་ལ་བདག་མེད་པར་ཆུད་པ་དེ་ཉོན་མོངས་པ་དང་ཉེ་བའི་ཉོན་མོངས་པ་དང་བྲལ་བའོ་ཞེས་པའོ། །གསང་བའི་བདག་པོ་འཇིག་རྟེན་ལས་འདས་པའི་སེམས་དེ་ལ་གནས་ནས་ཕུང་པོ་ལ་སོགས་པ་ཡོད་སྙམ་པའི་བློ་སྐྱེ་བའོ་ཞེས་པ་ནི་དེ་ལྟར་གང་ཟག་ལ་བདག་མེད་པ་ཇི་བཞིན་པ་དང་བཅས་པ། ཟབ་ཅིང་ཞི་བ་འཇིག་རྟེན་ལས་འདས་པའི་སེམས་དེ་ལ་གནས་ན། གོང་དུ་སྨོས་པའི་ཚུལ་དུ་ཕུང་པོ་ཙམ་སྟེ། ཡོད་པར་རྟོག་གི་གང་ཟག་ལ་ནི་བདག་མེད་པར་ཆུད་དེ་དེ་ནི་བསྐལ་པ་གསུམ་གྱི་ས་རྫོགས་པར་འགྱུར་རོ།། ནམ་ཕུང་པོ་ལ་སྐྱོ་བ་སྐྱེ་བ་ནས་ཞེས་པ་ནས་སྦྱོར་བའི་ལམ་རྣམས་བསྐལ་པ་གཅིག་གིས་འདས་པར་འགྱུར་རོ་ཞེས་པའི་བར་དུ་ནི། དེ་ལྟར་ཕུང་པོ་ལ་སྤྱིར་བརྟགས་ཏེ། བརྟགས་པ་དེ་ལ་དངོས་པོ་ཡོང་སྙམ་དུ་བློ་སྐྱེས་པའོ། །ཕུང་པོ་སོ་སོར་བཤིག་སྟེ་སུན་ཕུང་ན་གཟུགས་ཀྱི་ཕུང་པོ་ནི་དབུ་བ་རྡོས་པ་འདྲ། ཇི་ལྟར་དབུ་བ་ལ་སོ་སོར་གཞིག་ན། དབུ་བ་ལ་སྙིང་པོ་མེད་པ་བཞིན་དུ་ཕུང་པོ་དེ་ཡང་བཤིག་སྟེ་སོ་སོར་བརྟགས་ན། ཁ་དོག་དང་དབྱིབས་ལ་སོགས་པ་སོ་སོར་ཆོས་རྣམས་ཀྱི་རང་གི་མཚན་ཉིད་ཙམ་དུ་ཟད་ཀྱི་ཕུང་པོ་ཞེས་པའི་དངོས་པོ་གང་ཡང་མེད་པར་ཤེས་
སོ། །དེ་བཞིན་དུ་ཚོར་བ་ནི་ཆུའི་ཆུ་བུར་དང་འདྲ་སྟེ་བྱུང་མ་ཐག་ཏུ་ཞིག་ཅིང་མེད་པར་བྱེད་པར་འགྱུར་ཏ། མི་རྟག་པས་འདུག་པའི་གནས་མེད་པ་ལ་ཕུང་པོར་བརྟགས་པའི་དངོས་པོ་གང་ཡང་མེད་པར་ཤེས་སོ། །དེ་བཞིན་དུ་རྣམ་པར་ཤེས་པའི་ཕུང་པོ་ཡང་སོ་སོར་བཤིག་ན་རྣམ་པར་ཤེས་པ་ནི་སྒྱུ་མ་དང་འདྲ་སྟེ། ཇི་ལྟར་སྒྱུ་མའི་བ་ལང་ལ་སོགས་ཏེ། དེ་དག་ལ་བ་ལང་ཡོད་པ་མ་ཡིན་གྱི། རྩི་ཤིང་ལ་སོགས་པ་དེ་རྣམས་ཀྱི་རང་བཞིན་དུ་ཟད་དོ། །རྣམ་པར་ཤེས་པའི་ཕུང་པོ་ཡང་དེ་འདྲ་སྟེ། ཕུང་པོ་བརྟགས་པའི་དངོས་པོ་ཡོད་པ་མ་ཡིན་གྱི་རྣམ་པར་ཤེས་པའི་རང་བཞིན་དེ་ཙམ་དུ་ཟད་དོ། །འདུ་ཤེས་ཀྱི་ཕུང་པོ་ལྔ་ཡང་སོ་སོར་གཞིག་ན་སྨིག་རྒྱུ་བ་འདྲ་སྟེ། ཇི་ལྟར་སྨིག་རྒྱུ་བ་ལ་སྐོམ་པས་གདུངས་པའི་སྐྱེས་བུས་ཆུར་མཐོང་མོད་ཀྱི་དེ་ལ་ཆུའི་དངོས་པོ་ཡོད་པ་མ་ཡིན་ཏེ། སྨིག་རྒྱུ་བའི་རང་བཞིན་ཙམ་དུ་ཟད་དོ། །འདུ་ཤེས་ཀྱི་ཕུང་པོ་ཡང་དེ་དང་འདྲ་སྟེ། འདུ་ཤེས་ཀྱི་ཕུང་པོ་བརྟགས་པའི་དངོས་པོ་ནི་ཡོད་པ་མ་ཡིན་གྱི་དེ་ལ་མཚན་མར་འཛིན་པའི་རང་བཞིན་ཙམ་དུ་ཟད་དོ། །དེ་བཞིན་དུ་འདུ་བྱེད་ཀྱི་ཕུང་པོ་ཡང་ཆུ་ཤིང་གི་ཕུང་པོ་དང་འདྲ་སྟེ། ཀུན་དུ་གྲགས་པས་འདིར་མ་སྨོས་སོ། །དེ་ལྟར་ཕུང་པོ་དེ་ཡང་དབུ་བ་ལ་སོགས་པའི་དཔེས་སུན་ཕྱུང་ནས་ཕུང་པོར་བརྟགས་པའི་དངོས་པོ་ཡོད་པར་མི་འགྱུར་ཏེ་སོ་སོའི་མཚན་ཉིད་དུ་ཟད་དོ། །དེ་ལྟར་ཕུང་པོ་ཡོད་པར་མ་གྲུབ་ན་ཁམས་དང་སྐྱེ་མཆེད་རྣམས་ཀྱང་ཕུང་པོ་ལས་མི་གཞན་པས་ན་ཁམས་དང་སྐྱེ་མཆེད་དུ་བརྟགས་པའི་དངོས་པོ་ཡོད་པ་མ་ཡིན་གྱི། དེ་རྣམས་ཀྱི་སོ་སོའི་རང་བཞིན་ཙམ་དུ་ཟད་དོ། །གཟུང་བ་དང་འཛིན་པ་ཡང་གཟུགས་ཀྱི་ཕུང་པོ་ནི་གཟུང་བའི་དངོས་པོར་བརྟགས། ཚོར་བ་ལ་སོགས་པ་ཕུང་པོ་བཞི་ནི་འཛིན་པར་བརྟགས་པའི་དངོས་པོ་ཡང་བརྟགས་པའི་དངོས་པོ་ཡོད་པ་མ་ཡིན་ཏེ་ཆོས་རྣམས་སོ་སོའི་རང་བཞིན་ཙམ་དུ་ཟད་དོ། །དེ་ལྟར་ཕུང་པོ་ལ་སྐྱོ་བའི་སེམས་སྐྱེས་པས་དབུ་བ་ལ་སོགས་པའི་རང་བཞིན་དུ་བཤིག་ཅིང་བསྒོམས་ནས་ཕུང་པོ་ལ་ཡོད་དོ་སྙམ་དུ་བློ་སྐྱེས་ནས་ཕུང་པོར་འཛིན་པ་དེ་ལས་ཀྱང་གྲོལ་བར་འགྱུར་ཏེ། ནམ་ཕུང་པོ་ལ་སྐྱོ་བའི་སེམས་སྐྱེས་ནས་དེ་ནི་དབུ་བ་དང་ཆུ་བུར་དང་སྒྱུ་མ་དང༌། སྨིག་རྒྱུ་དང་
འདྲ་བར་རྣམ་པར་བསྒོམས་པས་རྣམ་པར་གྲོལ་ལོ་ཞེས་པའོ། །དེ་ལྟར་ཕུང་པོ་ལས་རྣམ་པར་གྲོལ་ནས་ཆོས་རྣམས་ཀྱི་ངོ་བོ་རང་བཞིན་ཕུང་པོ་ལ་སོགས་པར་བརྟགས་པ་དང་བྲལ་བའི་མཚན་ཉིད་ཙམ་འབའ་ཞིག་ཡོད་པར་ཆུད་པར་གཞུང་ལས་གསུངས་པ་དེ་འདི་ལྟ་སྟེ། ཕུང་པོ་དང༌། ཁམས་དང༌། སྐྱེ་མཆེད་དང༌། གཟུང་བ་དང༌། འཛིན་པ་དང་རྣམ་པར་བྲལ་བ་ཆོས་ཉིད་ཀྱི་རང་བཞིན་ནི་ཞི་བའི་ཁམས་ཏེ་རྟོགས་པར་འགྱུར་ཞེས་པ་སྟེ། དེ་ལ་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་དང་བྲལ་བ་ཞེས་པ་ནི་གོང་དུ་ཕུང་པོ་ལ་སོགས་པར་བརྟགས་པའི་དངོས་པོ་སུན་ཕྱུང་བའི་ཚུལ་གྱིས་ཆོས་ཉིད་ཀྱི་རང་བཞིན་སྔོན་པོ་ལ་སོགས་པའི་ཇི་བཞིན་པ་ལ་བརྟགས་པའི་དངོས་པོར་ཡོད་པ་མ་ཡིན་པས་ན་བྲལ་བའོ། །དེ་བས་ན་གཟུང་འཛིན་དང་བྲལ་བ་ཞེས་པས་ཡང་གཟུགས་ཀྱི་ཕུང་པོ་ལ་གཟུང་བར་བརྟགས་པ་དང་ཚོར་བ་ལ་སོགས་པའི་ཕུང་པོ་བཞི་ལ་འཛིན་པའི་དངོས་པོར་བརྟགས་པ་དེ་དང་བྲལ་བ་ལ་བྱའི། །ཆོས་ལ་བདག་མེད་པར་ཆུང་བའི་མཚན་ཉིད་གཟུང་བ་དང་འཛིན་པ་དང་བྲལ་བ་ལ་ནི་མི་བྱའོ། །ཆོས་ཉིད་ཀྱི་རང་བཞིན་ཞེས་པ་ནི། དེ་ལ་ཆོས་ནི་ཕུང་པོ་ལ་སོགས་པའོ། །དེ་རྣམས་ཀྱི་ངོ་བོ་ནི་ཆོས་ཉིད་ཀྱི་རང་བཞིན་ཏེ། དེ་ཡང་སྔོན་པོ་དང་དམར་པོ་ལ་སོགས་པ་རང་བཞིན་རྣམས་སོ། །དེ་ལྟར་སྔོན་པོ་དང་དམར་པོ་ལ་སོགས་པའི་རང་བཞིན་ཙམ་འབའ་ཞིག་ཡོད་ཀྱི་ཕུང་པོ་ལ་སོགས་པའི་དངོས་པོར་བརྟགས་པའི་དངོས་པོ་མེད་པར་ཆུད་བ་ནི་ཞི་བའི་ཁམས་རྟོགས་ཞེས་བྱ་སྟེ། ཞི་བ་ཞེས་པ་ནི་སེམས་ཀྱི་རྒྱུ་དེ་ལ་ཕུང་པོ་ལ་སོགས་པར་བརྟགས་པའི་འཁྲུལ་པ་མེད་པས་ཞི་བའོ། །ཁམས་ནི་རང་བཞིན་ནོ། །རྟོགས་པ་ནི་དེ་ལྟ་བུའི་ཚུལ་དུ་ཆུད་པའོ། །གསང་བའི་བདག་པོ་འཇིག་རྟེན་ལས་འདས་པའི་སེམས་དེ་ནི་ལོག་པ་དང་མ་ལོག་པ་བརྒྱད་ཀྱིས་སེམས་ཀྱི་རིམ་པ་དང་འབྲེལ་པས་ལས་དང་ཉོན་མོངས་པའི་རྒྱ་མཚོ་དང་བྲལ་བ་སྦྱོར་བ་རྣམས་བསྐལ་པ་གཅིག་གིས་འདའ་བར་འགྱུར་རོ་ཞེས་པ་ནི་ཕུང་པོར་བརྟགས་པའི་དངོས་པོ་ཡོད་པར་འཛིན་པ་ལས་གྲོལ་ནས་ཆོས་རྣམས་ཀྱི་སོ་སོའི་རང་བཞིན་ཙམ་འབའ་ཞིག་ཡོད་པར་ཆུད་པའི་སེམས་ཞི་བ་དེ་ཕུང་པོ་ལ་དངོས་པོ་
མེད་པ་ནས་བརྩམས་ཏེ། ཆོས་རྣམས་ཀྱི་སོ་སོའི་རང་བཞིན་སྔོན་པོ་ལ་སོགས་པ་འབའ་ཞིག་ཏུ་ཟད་པར་ཆུད་པ་ལ་ཞུགས་ནས་བསྐལ་པ་གཅིག་གིས་སེམས་དེ་ཉིད་ལས་འདས་ཏེ་ཆོས་ལ་བདག་མེད་པར་ཆུད་པ་མོས་པ་སྤྱོད་པའི་ས་ལ་འཇུག་པར་འགྱུར་རོ། །དེ་ལ་འཇིག་རྟེན་ལས་འདས་པའི་སེམས་དེ་ནི་ལོག་པ་དང་མ་ལོག་པ་བརྒྱད་ཀྱིས་སེམས་ཀྱི་རིམ་པ་ཤེས་པ་ནི་རྒྱུན་དུ་ཞུགས་པ་ནས་དགྲ་བཅོམ་པའི་བར་གྱིས་སེམས་བརྒྱད་པ་ལ་བྱ་སྟེ། སེམས་དེ་དག་ལོག་པ་དང་མ་ལོག་པའི་ཕུང་པོ་ལ་སོགས་པར་བརྟགས་པའི་དངོས་པོ་ཡོད་པར་འཛིན་པས་ལོག་པའོ།། ཉོན་མོངས་པ་སྤངས་པས་ན་མ་ལོག་པའོ། །ཉོན་མོངས་པའི་བག་ཆགས་དང་བཅས་པས་ན་ལོག་པའོ། །རྣམ་པར་འབྲེལ་བ་ཞེས་པ་ནི་ཕུང་པོ་ལ་བདག་མེད་པར་ཆུད་པའི་སེམས་ཞི་བ་དེ། ཕུང་པོ་ལ་ཡོད་པར་འཛིན་པའི་སེམས་ཀྱིས་རིམ་པ་བརྒྱད་པོ་དེས་བསྐྱེད་པ་ལ་བྱ་སྟེ། དེ་ལྟ་བས་ན་འཇིག་རྟེན་ལས་འདས་པའི་སེམས་དེ་ལོག་པ་དང་མ་ལོག་པ་བརྒྱད་ཀྱིས་སེམས་ཀྱི་རིམ་པ་དང་རྣམ་པར་འབྲེལ་པ་ཞེས་གསུངས་སོ། །དེ་དག་གི་སྔགས་ཀྱི་སྒོར་སྤྱད་པ་སྤྱོད་པའི་བྱང་ཆུབ་སེམས་དཔའ་དབང་པོ་རྟུལ་པོ་རྣམས་གང་ཟག་ལ་བདག་མེད་པར་ཆུད་པའི་རིམ་གྱིས་སེམས་བརྒྱ་དྲུག་ཅུ་ལ་སོགས་པའི་ཉོན་མོངས་པ་རྣམས་སྤྱོད་པའི་རིམ་པའོ། །ད་ནི་སྔགས་ཀྱི་སྒོར་སྤྱད་པ་སྤྱོད་པའི་བྱང་ཆུབ་སེམས་དཔའ་ཐེག་པ་ཆེན་པོས་འགྲོ་བ་གཞན་གྱི་རྐྱེན་གྱིས་མ་ཡིན་པ་ཤེས་རབ་རྣོན་པོ་རྣམས་ཆོས་དང་གང་ཟག་གཉིས་ཀ་ལ་བདག་མེད་པར་བསྒོམ་ཞིང་མོས་པ་སྤྱོད་པའི་ས་ལ་འཇུག་པའི་རིམ་པ་བཤད་དེ། དེ་ཡང་གསང་བའི་བདག་པོ་ཐེག་པ་ཆེན་པོར་ཞུགས་པ་གཞན་གྱི་རྐྱེན་གྱིས་མ་ཡིན་ཆོས་ལ་བདག་མེད་པའི་རང་བཞིན་དུ་སེམས་སྐྱེའོ། །བྱང་ཆུབ་སེམས་དཔའ་ཐེག་པ་ཆེན་པོ་ལ་ཞུགས་པ་ཐོས་པ་རབ་ཏུ་མང་ཞིང་ཤེས་རབ་མཆོག་ཏུ་རྣོ་བ་གཞན་གྱི་རྐྱེན་གྱིས་མི་གོས་པར་རང་གི་བློས་ཆོས་རྣམས་སྒྱུ་མ་དང༌། སྨིག་རྒྱུ་བ་ལ་སོགས་པའི་མཚན་ཉིད་དུ་ཤེས་ནས་ཆོས་ལ་བདག་མེད་པར་ཆུད་པར་འགྱུར་བ་ལ་བྱའོ། །དེ་ལ་གང་ཟག་ལ་བདག་མེད་པར་ཆུད་པའི་རིམ་པ་བསྐལ་པ་གསུམ་གྱིས་འདའ་བར་བྱ་བ་དང༌།
གང་ཟག་ལ་བདག་མེད་པས་ཀྱང་ཕུང་པོ་ཙམ་ཡོད་པར་འདུ་ཤེས་པ་ཡང་བསྐལ་པ་གཅིག་གིས་སྤང་བར་བྱའོ། །དགོས་ན་དེ་དག་གི་བྱ་བ་མ་བྱས་པར་ཇི་ལྟར་ཆོས་ལ་བདག་མེད་པར་འགྱུར་ཞེ་ན། གསུངས་པ་ཅིའི་ཕྱིར་ཞེ་ན། དེ་ནི་དེ་དག་གི་སྔོན་སྤྱད་པ་ན་ཕུང་པོ་དང་ཀུན་གཞི་བསྒོམས་པས་ངོ་བོ་ཉིད་ཡོངས་སུ་རིག་པ་ནི། སྒྱུ་མ་དང་སྨིག་རྒྱུ་དང་གཟུགས་བརྙན་དང༌། བྲག་ཅ་དང༌། མེ་མགལ་བསྐོར་བ་དང༌། དྲི་ཟིའི་གྲོང་ཁྱེར་ལྟ་བུའི་འདུ་ཤེས་སྐྱེའོ་ཞེས་པ་ནི། སྔོན་དུ་སྤྱད་པ་སྤྱོད་པ་ན་ཕུང་པོའི་གནས་བསྒོམས་ནས་སྒྱུ་མ་དང་སྨིག་རྒྱུ་བ་ལ་སོགས་པ་ཞེས་པ་ནི་དང་པོའི་དད་པ་རྩོལ་བའི་འཇུག་པ་སྤྱོད་པ་སྤྱད་པ་ན། ཕུང་པོའི་རང་བཞིན་སྒྱུ་མ་ལ་སོགས་པ་ལྟ་བུར་ཤེས་ཤིང་གོམས་པར་བྱས་པས་གང་ཟག་ལ་བདག་མེད་པར་ཆུད་པའི་རིམ་པ་མ་སྤྱད་ཀྱང་ཆོས་ལ་བདག་མེད་པར་ཆུད་པར་འགྱུར་བའོ་ཞེས་པའོ། །དེ་ལ་སྒྱུ་མ་ཞེས་པ་ནི་ཆོས་རྣམས་ལ་སྒྱུ་མ་ལྟ་བུར་འདུ་ཤེས་སྐྱེས་ཏེ། སྒྱུ་མའི་བ་ལང་དང༌། རྟ་ལ་སོགས་པ་རྡོ་དང༌། ཤིང་ལ་སོགས་པ་ལ་བྱས་ཀྱང་རྡོ་ཤིང་རྣམས་སུ་མི་མངོན་པར་བ་ལང་དང༌། རྟ་ལ་སོགས་པའི་གཟུགས་སུ་སྣང་མོད་ཀྱི། །ཡང་དག་པར་ན་བ་ལང་དང། རྟ་ལ་སོགས་པའི་དངོས་པོ་ཡོད་པ་མ་ཡིན་ཏེ། རྡོ་ཤིང་ལ་སོགས་པ་ཙམ་དུ་ཟད་དོ། །དེ་བཞིན་དུ་ཕུང་པོ་ལ་སོགས་པའི་ཆོས་རྣམས་སྣད་ཡང་རྣམ་པར་ཤེས་པ་འཁྲུལ་པའི་དབང་གིས་སྣང་སྟེ། ཡང་དག་པར་ནི་ཆོས་ཀྱི་ངོ་བོ་སྒྱུ་མའི་བ་ལང་དང་འདྲ་སྟེ། སྣང་དུ་ཟིན་ཀྱང་ཡོད་པ་མ་ཡིན་ནོ། །རྣམ་པར་ཤེས་པ་དེ་ནི་རྡོ་དང་ཤིང་ལ་སོགས་པ་མི་འདྲ་སྟེ། མི་མངོན་ཡང་གཟུགས་ལ་སོགས་པ་སྣང་བའི་ཆོས་རྣམས་ནི་ཡོད་པ་མ་ཡིན་གྱི་རྣམ་པར་ཤེས་པའི་འཁྲུལ་པ་ཇི་བཞིན་ཙམ་དུ་ཟད་དོ། །དེ་བཞིན་དུ་སྨིག་རྒྱུ་བ་དང་འབྲོག་དགོན་པ་ན་སྐྱེས་བུ་སྐོམ་གྱིས་གདུངས་པས་སྨིག་རྒྱུ་བ་ལ་ཆུར་མཐོང་སྟེ་ཆུའི་དངོས་པོ་ཡོད་པ་མ་ཡིན་གྱི་སྨིག་རྒྱུ་ཙམ་དུ་ཟད་དོ། །དེ་བཞིན་དུ་ཕུང་པོ་ལ་སོགས་པའི་ཆོས་རྣམས་སྣང་བ་ནི་མ་ཡིན་གྱི། རྣམ་པར་ཤེས་པ་འཁྲུལ་པ་ཇི་བཞིན་ཙམ་དུ་ཟད་དོ། །དེ་བཞིན་དུ་གཟུགས་བརྙན་དང༌། བྲག་ཅ་དང༌།
མེ་མགལ་བསྐོར་བ་དང༌། དྲི་ཟའི་གྲོང་ཁྱེར་རྣམས་ཀྱང་གོང་དུ་སྒྱུ་མ་ལ་སོགས་པ་བཤད་པའི་ཚུལ་དུ་རིག་པར་བྱ་སྟེ། མདོར་ན་ཕུང་པོ་ལ་སོགས་པའི་ཆོས་རྣམས་སྣང་བ་རྣམ་པར་ཤེས་པ་འཁྲུལ་པ་སྣང་པ་ཙམ་དུ་ཟད་དོ། །རྨི་ལམ་ན་གཟུགས་ལ་སོགས་པའི་ཡུལ་མེད་པར་ཡང་གཟུགས་ལ་སོགས་པར་མཐོང་ཞིང༌། དེ་དག་གི་བྱ་བ་བྱེད་མོད་ཀྱི་རྨི་ལམ་གྱི་ཚེ་ན་གཟུགས་ལ་སོགས་པ་མེད་པར་གསལ་བར་མངོན་ཏེ། དེ་དག་ཀུན་རྣམ་པར་ཤེས་པའི་དབང་གིས་གྱུར་པ་ཙམ་དུ་ཟད་དོ་སྙམ་ནས་དེ་ལྟར་མོས་པ་སྤྱོད་པའི་ས་ལ་ཞུགས་ནས་ཕུང་པོ་ལ་སོགས་པའི་ཆོས་རྣམས་ལ་ནི་བདག་མེད་པར་ཆུད་པ་ནི་སྒྱུ་མ་ལ་སོགས་པ་ནས་དྲི་ཟའི་གྲོང་ཁྱེར་ལ་སོགས་པ་ལྟ་བུའི་འདུ་ཤེས་སྐྱེས་ཏེ། ཆོས་རྣམས་ནི་ཡང་དག་པར་ཡོད་པ་མ་ཡིན་མོད་ཀྱི། རྣམ་པར་ཤེས་པ་ཙམ་ཡོད་པར་འཛིན་ཏོ། །དེ་ལྟ་བུར་ཆོས་ལ་བདག་མེད་པར་ཆུད་པ་མོས་པ་སྤྱོད་པའི་ས་དེ་ལ་ཡང་དེ་ལྟ་བུར་ཆོས་རྣམས་སྒྱུ་མ་དང་སྨིག་རྒྱུ་བ་ལ་སོགས་པའི་ཚུལ་དུ་འཇུག་ཅིང་འཇུག་པའི་སེམས་དང༌། ཆོས་རྣམས་དེ་ལྟར་བཤིག་ནས་དེའི་ཏིང་ངེ་འཛིན་རྣམ་པར་མི་རྟོག་པ་ལ་གནས་པའི་སེམས་དང༌། དེ་ནས་སྙིང་རྗེའི་དབང་གིས་ཕ་རོལ་ཏུ་ཕྱིན་པ་ལ་སོགས་པ་རྣམ་པར་སྤྱོད་ཅིང་ས་བཅུ་པ་ལ་སོགས་པ་ཡོན་ཏན་ཐོས་པ་དང་བསམས་པ་དང་བསྒོམས་པའི་ཤེས་རབ་ཀྱིས་ཤེས་ནས་དེ་དག་ལ་རབ་ཏུ་མོས་པ་བྱེད་ཅིང་འཇུག་པ་དང་གནས་པ་དང་ལྡང་བའི་སེམས་དེ་གསུམ་རྣམ་པར་བསྒོམས་པས་ས་དང་ཕ་རོལ་ཏུ་ཕྱིན་པའི་ཡོན་ཏན་ལ་སོགས་པ་རྣམས་ཡོངས་སུ་མི་ཤེས་པ་ནི་ཡོངས་སུ་ཤེས། མངོན་དུ་མ་བྱས་པ་མཉན་པ་དང་བསམས་པ་དང་བསྒོམས་པའི་ཤེས་རབ་ཀྱིས་ཆོས་ལ་བདག་མེད་པར་ཆུད་ཅིང་རྣམ་པར་ཤེས་པ་ཙམ་ཡོད་པར་འཛིན་པ་དེ་ནི་མོས་པ་སྤྱོད་པའི་སའི་མཚན་ཉིད་དེ་མོས་པ་སྤྱོད་པའི་ས་དེ་བསྐལ་པ་གཅིག་གིས་རྫོགས་པར་འགྱུར་རོ། །དེ་ནས་བསྐལ་པ་བཞི་ཆ་གཅིག་གིས་མོས་པ་སྤྱོད་པའི་ས་དེ་ནས་འཕར་ཏེ། ཡེ་ཤེས་ཀྱིས་དེ་ལ་འཇུག་པའི་རིམ་པ་གསུངས་པ་སྟེ། དེ་ལྟ་བས་ན་གསང་བའི་བདག་པོ་དེ་དག་གིས་བདག་གི་སེམས་དབང་དུ་གྱུར་པས་རང་གི་སེམས་ཐོག་མ་ནས་མ་སྐྱེས་པའི་ཕྱིར་ཆོས་
ལ་བདག་མེད་པ་ཉིད་སྤངས་སོ། །དེ་ཅིའི་ཕྱིར་ཞེ་ན། གསང་བའི་བདག་པོ་སེམས་ཀྱི་ངོ་བོ་ཉིད་རིག་པས་ཐོག་མའི་མཐའ་དང༌། ཐ་མའི་མཐའ་ཡང་མི་རྙེད་དོ། །དེའི་སྦྱོར་བ་རྣམས་ཀྱིས་བསྐལ་པ་གཉིས་ཀྱིས་འདའོ་ཞེས་པའོ། །དེ་ལ་བདག་གི་སེམས་དབང་དུ་གྱུར་པས་རང་གི་སེམས་ཐོག་མ་ནས་སྐྱེས་པའི་ཕྱིར་ཆོས་ལ་བདག་མེད་པ་ཉིད་ཀྱང་སྤངས་སོ་ཞེས་པ་ནི། སྔར་ཆོས་ལ་བདག་མེད་པར་ཆུད་དེ། རྣམ་པར་ཤེས་པ་འབའ་ཞིག་གཟུང་བ་དང་འཛིན་པ་ཇི་བཞིན་པ་ཡོད་པར་སེམས་པ་དེ་ཡང་རང་གི་དབང་དུ་གྱུར་པས་རྣམ་པར་ཤེས་པ་དེ་ཐོག་མ་ནས་མ་སྐྱེས་པར་ཆུད་པས་རྣམ་པར་ཤེས་པ་ཙམ་དུ་བྱེད་པར་འདུ་ཤེས་པ་དེ་ཡང་སྤངས་པས་ཆོས་ལ་བདག་མེད་པ་ཉིད་ཀྱང་སྤངས་སོ། །ཅིའི་ཕྱིར་རྣམ་པར་ཤེས་པ་ཙམ་དུ་འདུ་ཤེས་པ་དེ་སྤངས་པས་ཆོས་ལ་བདག་མེད་པ་སྤངས་ཞེས་བྱ་ཞེ་ན། །ཕུང་པོ་ལ་སོགས་པ་རྣམས་བདག་མེད་པར་ཆུད་པའི་རྒྱུས་རྣམ་པར་ཤེས་པ་ཙམ་དུ་ཡོད་པར་འདུ་ཤེས་སྐྱེས་ཏེ་དེ་བས་ན་རྣམ་པར་ཤེས་བ་ཙམ་ཡོད་པར་འདུ་ཤེས་པ་དེ་སྤངས་ན་ཆོས་ལ་བདག་མེད་པ་ཉིད་སྤངས་པ་ཡིན་ཏེ། འབྲས་བུ་ལ་རྒྱུས་བསླན་པའོ། །རྣམ་པར་ཤེས་པ་ཙམ་ཡོད་པར་འདུ་ཤེས་པ་དེ་ཡང་ཇི་ལྟར་སྤོང་ཞེན། གསུངས་པ། ཅིའི་ཕྱིར་ཞེ་ན། གསང་བའི་བདག་པོ་སེམས་ཀྱི་ངོ་བོ་ཉིད་ཡོངས་སུ་རིག་པས་ཐོག་མའི་མཐའ་དང༌། ཐ་མའི་མཐའ་ཡང་མི་རྙེད་དོ་ཞེས་པ་སྟེ། དེ་ལྟར་རང་གི་སེམས་དེ་ཐོག་མར་གང་ནས་སྐྱེས་པའི་མཐའ་བཙལ་ན་མཐའ་དེ་མི་རྙེད་དེ། དེ་ལྟར་ཐོག་མའི་མཐའ་མེད་པས་ཐ་མ་འགག་པའི་མཐའ་ཡང་རྙེད་པར་མི་འགྱུར་ཏེ། ཐོག་མ་དང་ཐ་མའི་མཐའ་མི་རྙེད་དོ། །དེ་ལྟར་ཐོག་མའི་མཐའ་མེད་པས་སེམས་དེ་མ་སྐྱེས་པར་མངོན་ཏེ། དེ་ལྟར་ཐོག་མ་ནས་མ་སྐྱེས་ན་གཟུང་བ་དང་འཛིན་པ་ཇི་བཞིན་པར་སྣང་བར་ཤེས་པ་དེ་དག་ཅི་ཞིག་ཡོད་སྙམ་ནས་དམ་པར་ཤེས་པ་ཙམ་ཡོད་པར་འདུ་ཤེས་པ་དེ་སྤངས་པས་ཆོས་ལ་བདག་མེད་པར་ཡང་སྤངས་ཞེས་བྱའོ། །དེ་ལྟ་བུའི་ཚུལ་དུ་བསྒོམ་ཞིང་ཆོས་ལ་བདག་མེད་པར་སྤོང་བ་ཡང་བསྐལ་པ་གཉིས་ཀྱིས་ཡོངས་སུ་རྫོགས་པར་འགྱུར་རོ། །ད་ནི་རབ་ཏུ་དགའ་བའི་བྱང་ཆུབ་ཀྱི་སེམས་སྐྱེ་བའི་རིམ་པ་བཤད་པར་བྱ་
སྟེ། དེ་ཡང་གཞན་ཡང་གསང་བའི་བདག་པོ་བྱང་ཆུབ་སེམས་དཔའ་སྔགས་ཀྱི་སྒོ་ནས་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ནི་ཚད་མེད་གྲངས་མེད་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཚད་མེད་པའི་བསོད་ནམས་དང་ཡེ་ཤེས་ཀྱི་ཚོགས་བསགས་པ་ཞེས་པ་ནས། ཤིན་ཏུ་རང་བཞིན་མེད་པའི་སེམས་སྐྱེས་ཏེ། གསང་བའི་བདག་པོ་དེ་ནི་བྱང་ཆུབ་ཀྱི་སེམས་དང་པོ་ཞེས་རྒྱལ་བ་རྣམས་ཀྱིས་གསུངས་སོ་ཞེས་པའི་བར་དུ་ས་དང་པོའི་བྱང་ཆུབ་ཀྱི་སེམས་དེའི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། མཚན་ཉིད་ཕུན་སུམ་ཚོགས་པ་དང༌། མཚན་ཉིད་དེའི་སྒྲུབ་པ་ཕུན་སུམ་ཚོགས་པ་ནི་བཤད་པར་རིག་པར་བྱ་སྟེ། དེ་ལ་རྒྱུ་ཕུན་སུམ་ཚོགས་པ་ནི་ཚད་མེད་གྲངས་མེད་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཚད་མེད་པའི་བསོད་ནམས་དང་ཡེ་ཤེས་ཀྱི་ཚོགས་བསྒགས་པ་ཞེས་བྱའོ། །རང་བཞིན་ཕུན་སུམ་ཚོགས་པ་ནི་ཚད་མེད་པའི་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནས། དབང་པོ་དང་ཉེ་བའི་དབང་པོ་ལ་སོགས་པས་ཕྱག་བྱས་པས་ཞེས་པའི་བར་དུ་སྟེ། རང་བཞིན་ཕུན་སུམ་ཚོགས་པ་དེས་ཀྱང་སྤོང་བ་ཕུན་སུམ་ཚོགས་པ་དང་ཡང་བསྡུ་བར་བྱ་སྟེ། སྤོང་བ་ཕུན་སུམ་ཚོགས་པ་ནི་ཚད་མེད་པའི་ཤེས་རབ་དང་ཐབས་ཀྱིས་ཟིན་པ་ཞེས་པ་དང༌། ཉན་ཐོས་དང་རང་སངས་རྒྱས་ཀྱི་ས་ལས་འདས་ཞེས་པའོ། །མཐུ་ཕུན་སུམ་ཚོགས་པ་ནི་ལྷ་དང་ལྷ་མ་ཡིན་དང་འཇིག་རྟེན་དུ་བཅས་པས་ཕྱག་བྱས་པ་ཞེས་པ་དང་བརྒྱ་བྱིན་དང་ཚངས་པ་དང་དབང་པོ་དང་ཉེ་བའི་དབང་པོ་ལ་སོགས་པས་ཕྱག་བྱས་པ་ཞེས་པའོ། །མཚན་ཉིད་ཕུན་སུམ་ཚོགས་པ་ནི་ཤིན་ཏུ་རང་བཞིན་མེད་པའི་སེམས་སྐྱེས་ཞེས་པའོ། །མཚན་ཉིད་དེ་སྒྲུབ་པ་ཕུན་སུམ་ཚོགས་པ་ནི་དེ་ལ་འདི་ལྟ་སྟེ། སྟོད་པ་ཉིད་ཀྱི་རང་བཞིན་རྫས་མ་ཡིན་པ་ཞེས་པ་ནས་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དང་བྲལ་བ་ཞེས་པའི་བར་དུའོ། །དེ་ལ་ཚད་མེད་པ་གྲངས་མེད་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཚད་མེད་པའི་བསོད་ནམས་དང་ཡེ་ཤེས་ཀྱི་ཚོགས་བསགས་པ་ཞེས་པ། བསྐལ་པ་བྱེ་བ་ཞེས་པ་ནི་འབུམ་ཕྲག་བརྒྱ་ལ་བྱའོ། །བརྒྱ་སྟོང་ཞེས་པ་ནི་བྱེ་བ་ཁྲི་ཕྲག་འབུམ་ལ་བྱའོ། །ཚད་
མེད་གྲངས་མེད་ཅེས་པ་ནི་བསྐལ་པ་བྱེ་བ་ཕྲག་འབུམ་པོ་དེ་ཡང་ཚད་ཀྱིས་གཞལ་དུ་མེད། གྲངས་མེད་བགྲང་དུ་མེད་པར་སེམས་དང་པོ་བསྐྱེད་པའམ། གང་ཟག་ལ་བདག་མེད་པར་བསྒོམས་པ་ནས་བརྩམས་ཏེ། བསོད་ནམས་དང་ཡེ་ཤེས་ཀྱི་ཚོགས་བསགས་པའི་རྒྱུས་ས་དང་པོ་རབ་ཏུ་དགའ་བའི་སེམས་ཤིན་ཏུ་རང་བཞིན་མེད་པའི་མཚན་ཉིད་ཡོངས་སུ་རྫོགས་པར་འགྱུར་རོ། །ཚད་མེད་པའི་ཤེས་རབ་དང་ཐབས་ཀྱིས་ཡོངས་སུ་ཟིན་པ་ཞེས་པ་ཤེས་རབ་ཀྱི་ཆོས་ཐམས་ཅད་རང་བཞིན་ཀུན་ཆུབ་པར་བྱེད་པའོ། །ཐབས་ནི་སྙིང་རྗེ་ཆེན་པོའི་དབང་གིས་སེམས་ཅན་རྣམས་ཡོངས་སུ་སྨིན་པ་དང་གྲོལ་བར་བྱེད་པ་སྟེ། ཚད་མེད་པ་ཞེས་པ་ནི་ཤེས་རབ་དང་ཐབས་དེ་དག་ཉིད་འདི་ཙམ་ཞིག་ཅེས་དཔག་ཏུ་མེད་དོ། །དེ་ལྟར་ཤེས་རབ་ཀྱིས་ཆོས་ཐམས་ཅད་རང་བཞིན་མེད་པར་ཆུད་པས་ཉོན་མོངས་པ་ལ་སོགས་པ་སྤངས་པ་དང༌། ཐབས་ཀྱིས་སེམས་ཅན་སྨིན་ཅིང་གྲོལ་བར་བྱེད་པས། ངན་སོང་ལ་སོགས་པ་སྤངས་པའི་ཡོན་ཏན་དང་ལྡན་པས། དེའི་སྤོང་བ་ཕུན་སུམ་ཚོགས་པའོ། །ཡོངས་སུ་ཟིན་ཞེས་པ་ནི། བྱང་ཆུབ་ཀྱི་སེམས་དེ་དེ་ལྟ་བུ་ཤེས་རབ་དང་ཐབས་ཚད་མེད་པ་སྤོང་བ་ཕུན་སུམ་ཚོགས་པ་དེ་ཡོངས་སུ་ཟིན་པ་ལ་བྱའོ། །ཉན་ཐོས་དང་རང་སངས་རྒྱས་ཀྱི་ས་ལས་ཤིན་ཏུ་འདས་པ་དང་ཞེས་པ་ཡང་དེ་ལྟ་བུའི་ཤེས་རབ་དང་ཐབས་ཚད་མེད་པ་དང་ལྡན་པས་ཉན་ཐོས་དང་རང་སངས་རྒྱས་ཀྱི་ལྟ་བ་ལས་འདས་ཏེ། འཕགས་པ་འམ་དེ་དག་གི་སྤྱོད་ཡུལ་མ་ཡིན་པ་ལ་བྱ་སྟེ་དེ་ཡང་སྤོང་བ་ཕུན་སུམ་ཚོགས་པའོ། །ལྷ་དང་ལྷ་མ་ཡིན་དང་འཇིག་རྟེན་དུ་བཅས་པས་ཕྱག་བྱས་པ། བརྒྱ་བྱིན་དང་ཚངས་པ་དང་དབང་པོ་དང་ཉེ་བའི་དབང་པོ་ལ་སོགས་པས་ཕྱག་བྱས་ཞེས་པ་ནི། དེ་ལྟ་བུའི་འཇིག་རྟེན་གྱི་དབང་པོ་ལ་སོགས་པ་སེམས་ཅན་མཐུ་ཅན་རྣམས་ཀྱིས་མཆོད་ཅིང་ཕྱག་བྱས་པའི་མཐུ་དང་ལྡན་པས་མཐུ་ཕུན་སུམ་ཚོགས་པའོ། །བྱང་ཆུབ་ཀྱི་སེམས་དེ་གཟུགས་མེད་པ་ལ་ཇི་ལྟར་དེ་དག་གིས་ཕྱག་བྱ་ཞེ་ན། གཟུགས་མེད་ཀྱང་དེ་ཡོན་ཏན་དང་རྫུ་འཕྲུལ་ཆེན་པོ་དེ་དག་ཐོབ་ནས་འདུད་ཅིང་ཕྱག་འཚལ་བར་འགྱུར་རོ། །ཡང་དེ་ལྟ་བུའི་སེམས་དང་ལྡན་པའི་བྱང་ཆུབ་སེམས་དཔའ་ལ་ཕྱག་འཚལ་བ་ལ་
ཡང་བྱའོ། །འདི་ལྟ་སྟེ་སྟོང་པའི་ངོ་བོ་ཉིད་ཅེས་བྱ་བ་ནི་བྱང་ཆུབ་ཀྱི་སེམས་དེ་གཟུང་བ་དང་འཛིན་པའི་རང་བཞིན་མེད་དེ། ནམ་མཁའ་དང་འདྲ་བས་སྟོང་པའི་རང་བཞིན་ནོ། །རྫས་མ་ཡིན་ཞེས་པ་ནི་དེ་ལྟར་སྟོང་པའི་རང་བཞིན་ཡིན་པས་རྡུལ་ཕྲ་མོ་ལ་སོགས་པའི་རྫས་ཀྱི་རང་བཞིན་མ་ཡིན་པའོ། །མཚན་མ་མེད་ཅེས་པ་ནི་མུ་སྟེགས་ཅན་ལ་སོགས་པས་བརྟགས་ཏེ་བདག་ལ་སོགས་པ་ཁམས་གསུམ་ཐམས་ཅད་སྐྱེ་བ་དང་འཇིག་པའི་ཆུབ་ཀྱི་སེམས་དེ་ལ་ཉིད་མ་ཡིན་པའོ། །མཚན་ཉིད་མ་ཡིན་ཞེས་པ་ནི་བྱང་ཆུབ་ཀྱི་སེམས་ཏེ། སྔོན་པོ་དང་སེར་པོ་ལ་སོགས་པ་ཇི་བཞིན་པའི་མཚན་ཉིད་མ་ཡིན་པའོ། །འཕྲོ་བ་ལས་ཤིན་ཏུ་འདས་པ་ཞེས་པ་ནི་འཕྲོ་བ་ནི་རྣམ་པར་རྟོག་པ་ལ་བྱ་སྟེ། རྣམ་པར་རྟོག་པ་མེད་པའོ། །ནམ་མཁའ་ཇི་བཞིན་ཚད་མེད་པ་ཞེས་པ་ནི་དེ་ལྟར་རྣམ་པར་རྟོག་པ་མེད་པས་ནམ་མཁའ་དང་འདྲ་སྟེ། ནམ་མཁའ་ནི་ཚད་འདི་ཙམ་ཞེས་དཔག་ཏུ་མེད་དེ། དེ་བཞིན་དུ་བྱང་ཆུབ་ཀྱི་སེམས་དེའི་ཡོན་ཏན་ཡང་ཚད་གཟུང་དུ་མེད་པའོ། །ཆོས་ཐམས་ཅད་ཀྱི་གནས་སུ་གྱུར་པ་ཞེས་པ་ལ། ཆོས་ཐམས་ཅད་ནི་འདུས་བྱས་ཀྱི་ཆོས་ལ་བྱ་སྟེ། འདུས་བྱས་ཀྱི་ཆོས་དེ་རྣམས་རྡུལ་ཕྲན་གྱི་ཕྱོགས་ཆ་ལ་སོགས་པར་བཤིག་གམ་སྒྱུ་མ་དང༌། སྨིག་རྒྱུ་ལ་སོགས་པའི་ཚུལ་དུ་བཤིག་ན་སྟོང་པ་ཉིད་ཀྱི་རང་བཞིན་དུ་གྱུར་ཏེ། བྱང་ཆུབ་ཀྱི་སེམས་དེ་དང་རོ་གཅིག་པས་ཆོས་དེ་དག་ཐམས་ཅད་ཀྱི་གནས་སུ་གྱུར་པ་ཞེས་པའོ། །གཉིས་སུ་ནི་ཆོས་ཐམས་ཅད་ཅེས་བྱ་བ་ནི་སྟོབས་བཅུ་དང་མི་འཇིགས་པ་བཞི་དང་མ་འདྲེས་པ་བཅོ་བརྒྱད་ལ་སོགས་པ་སངས་རྒྱས་བཅོམ་ལྡན་འདས་ཀྱི་ཡོན་ཏན་གྱི་ཆོས་རྣམས་བྱང་ཆུབ་ཀྱི་སེམས་དེ་ལ་གནས་པ་ན་ཆོས་ཐམས་ཅད་ཀྱི་གནས་སུ་གྱུར་པ་ཞེས་བྱའོ། །འདུས་བྱས་དང་འདུས་མ་བྱས་དང་བྲལ་བ་ཞེས་བྱ་བ་ནི། འདུས་མ་བྱས་དང་བྲལ་བ་ནི་ས་དང་པོའི་སེམས་ཐོབ་པའི་མི་མཐུན་པའི་གཉེན་པོར་གྱུར་པ་རྣམས་དང་བྲལ་བའོ། །འདུས་མ་བྱས་དང་བྲལ་བ་ནི་ཉོན་མོངས་པ་དང་ཤེས་བྱའི་སྒྲིབ་པའི་བག་ཆགས་མ་སྤངས་པས་མྱ་ངན་ལས་འདའ་བའི་དབྱིངས་ལ་མིག་ནས་བའོ། །མིག་དང་རྣ་བ་དང་སྣ་དང་ལྕེ་དང་
ལུས་དང་ཡིད་དང་བྲལ་བ་ཞེས་པ་ནི་མིག་ལ་སོགས་པའི་རྣམ་པར་ཤེས་པ་ལྟར་མིག་ལ་སོགས་པས་རྒྱུ་བྱས་པས་སྐྱེས་པ་མ་ཡིན་པས་དེ་རྣམས་དང་བྲལ་བའོ། །ཤིན་ཏུ་རང་བཞིན་མེད་པའི་སེམས་ཞེས་པ་ནི་དེ་ལྟར་གོང་དུ་སྨོས་པའི་ཆོས་རྣམས་གང་དང་ཡང་མི་ལྡན་པས་དེ་རྣམས་ཀྱི་ཇི་བཞིན་པའི་རང་བཞིན་མ་ཡིན་པ་སྟེ། དེ་བས་ན་ཤིན་ཏུ་རང་བཞིན་མེད་པའི་སེམས་སོ། །སྐྱེས་ཏེ་ཞེས་པ་ནི་དེ་དང་འདྲ་བའི་རང་བཞིན་མེད་པའི་སེམས་ཀྱི་མཚན་ཉིད་དེ་གོང་དུ་སྨོས་པ་དེའི་བསྐལ་པ་དེ་སྙེད་དུ་བསོད་ནམས་དང་ཡེ་ཤེས་ཀྱི་ཚོགས་བསགས་པའི་རྒྱུས་ས་དང་པོའི་ཡོན་ཏན་རྣམས་རྫོགས་ནས། བླ་ན་མེད་པའི་བྱང་ཆུབ་ཀྱི་ཕྱིར། སེམས་དེ་སྐྱེས་པར་རིག་པར་བྱའོ། །དེ་ནི་ལས་དང་ཉོན་མོངས་བྲལ། །ལས་དང་ཉོན་མོངས་སུ་ཡང་ལྡན། །འཇིག་རྟེན་རྣམས་ཀྱི་སྦྱིན་གནས་ཏེ། །མཆོད་ཅིང་བཀུར་སྟི་དེ་ལ་རྟག་ཏུའོ། །ཞེས་པ་ལ་ལས་དང་ཉོན་མོངས་བྲལ་ཞེས་པ་ནི། ངན་སོང་ལ་སོགས་པའི་ལས་དང་ས་དང་པོའི་མི་མཐུན་པའི་ཕྱོགས་དང་བྲལ་བའོ། །ལས་དང་ཉོན་མོངས་སུ་ཡང་ལྡན། །ཞེས་པ་ནི་ས་བླ་མ་རྣམས་ཐོབ་པར་བྱ་བའི་ལས་དང་དེ་དག་ལ་སྒྲིབ་པའི་ཉོན་མོངས་པ་དང་ལྡན་པའོ། །འཇིག་རྟེན་རྣམས་ཀྱི་སྦྱིན་གནས་ཞེས་པ་ནི་དེ་ལྟ་བུའི་སེམས་དང་ལྡན་པའི་བྱང་ཆུབ་སེམས་དཔའ་དེ་ནོར་དང་འབྲུ་དང་རིན་པོ་ཆེ་ལ་སོགས་པས་ཡོན་དབུལ་བའི་སྣོད་དུ་གྱུར་པའོ། །མཆོད་པ་ཞེས་པ་ནི་དྲི་དང་མེ་ཏོག་ལ་སོགས་པས་མཆོད་པའི་གནས་སོ། །བཀུར་སྟི་ཞེས་པ་ནི་ཕྱག་བྱ་ཞིང་ཐལ་མོ་སྦྱར་བ་དང༌། བསུ་ཞིང་བསྐྱལ་བ་ལ་སོགས་པའི་བཀུར་སྟིའི་གནས་སོ། །དེ་ལ་རྟག་ཏུ་ནི་དེ་ལྟ་བུའི་བྱང་ཆུབ་སེམས་དཔའ་རྣམས་ལ་འཇིག་རྟེན་པ་རྣམས་ཀྱིས་རྟག་ཏུ་མཆོད་པ་དང་བཀུར་སྟི་ལ་སོགས་པའོ།། །།ད་ནི་མོས་པ་དང་བའི་མཚན་ཉིད་དང་ཡོན་ཏན་ཡང་བཤད་དེ། གནས་ཀྱང་གསང་བའི་བདག་པོ་སེམས་གསུམ་རྣམ་པར་བསྒོམས་ན་ཞེས་པ་ནས། མཁས་པས་བསྐལ་པ་གཅིག་གིས་ནི། །ས་ལས་ཤིན་ཏུ་འདས་པར་འགྱུར། །ཞེས་པའི་བར་དུའོ། །དེ་ལ་སེམས་གསུམ་རྣམ་པར་བསྒོམས་ན་ཞེས་པ་ནི་འཇུག་པ་དང་ལྡང་བའི་སེམས་ཏེ་རྣམ་པར་བསྒོམ་པའི་ཐབས་ནི་སྡར་ཆོས་ལ་བདག་མེད་པའི་སྐབས་
སྲུང་ཤད་དེ། ཤིན་ཏུ་དད་པ་ཞེས་པ་ནི་མཉན་པ་དང་བསམས་པ་དང་བསྒོམས་པའི་ཤེས་རབ་ཀྱིས་ས་དང་ཕ་རོལ་ཏུ་ཕྱིན་པ་ལ་སོགས་པ་སངས་རྒྱས་ཀྱི་ཡོན་ཏན་རྣམས་ཤེས་ནས་དེ་ཉིད་ཡིན་གྱིས་གཞན་མ་ཡིན་ཞེས་པ་དེ་ལ་ཤིན་ཏུ་མོས་པ་སྐྱེ་བའོ། །མོས་པ་ཞེས་པ་ནི་ཆོས་དེ་ལ་མོས་པ་ཙམ་མ་ཡིན་ཏེ། དེ་རྣམས་ཀྱིས་ཡོན་ཏན་གོམས་པར་བྱ་བ་ལ་ནན་ཏན་བྱེད་པ་དེ། དེ་བས་ན་གསུངས་པ། ཕ་རོལ་ཏུ་ཕྱིན་པ་རྣམས་བརྟག་པ་དང་བསྡུ་བ་རྣམ་བཞི་ནི་ཞེས་པ་སྟེ། དེ་ལ་ཕ་རོལ་ཏུ་ཕྱིན་པ་རྣམས་བརྟག་པ་ཞེས་པ་ནི་ས་དང་པོ་ནས་བརྩམས་ཏེ་བཅུའི་བར་དུ་ས་རེ་རེ་ལ་ཡང་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རེ་རེ་སྤྱོད་དེ་ཕ་རོལ་ཏུ་ཕྱིན་པ་ཇི་ལྟར་བདག་སྤྱོད་པ་དེ་བཞིན་དུ་སེམས་ཅན་གཞན་རྣམས་ཀྱང་བསྡུ་བ་རྣམ་བཞིའི་སྒོ་ནས་བསྡུས་ཏེ་སྤྱོད་དུ་གཟུང་དོ། །དེ་ལ་རབ་ཏུ་དགའ་བའི་ཡོན་ཏན་སེམས་དགའ་བཞིན་དུ་ཆོས་དང་ཟང་ཟིང་གིས་ཕ་རོལ་ཏུ་ཕྱིན་པ་སྤྱོད་པའི་ས་ལ་གནས་པ་ལ་བདག་ཀྱང་སྤྱོད་ལ། སེམས་ཅན་གཞན་རྣམས་ཀྱང་བསྡུ་བ་རྣམ་བཞིའི་སྒོ་ནས་བསྡུས་ཤིང་སྤྱོད་པར་གཟུད་དོ། །ས་གཉིས་པ་དྲི་མ་མེད་པ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དྲི་མ་མེད་པ་སྤྱོད་པ་ཡང་མོས་པ་སྤྱོད་པའི་ཚེ་བདག་ཀྱང་སྤྱོད་ལ་གཞན་རྣམས་ཀྱང་སྤྱོད་དུ་གཟུང་དོ། །ས་གསུམ་པ་འོད་བྱེད་པ་ལ་མ་སྐྱེས་པའི་ཆོས་ལ་བཟོད་དེ་བཟོད་པའི་པ་རོལ་ཏུ་ཕྱིན་པ་སྤྱོད་པ་ཡང༌། མོས་པ་སྤྱོད་པའི་ཚེ་བདག་ཀྱང་སྤྱོད་ལ་གཞན་ཡང་སྤྱོད་དུ་གཟུད་དོ། །ས་བཞི་པ་འོད་འཕྲོ་བ་ཅན་ལ་ཡེ་ཤེས་ཀྱི་འོད་འཕྲོ་བས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནས་སྤྱོད་པ་དང༌། ས་ལྔ་པ་ཤིན་ཏུ་རྒྱལ་བ་ནས་བདུད་ལ་སོགས་པ་ལས་ཤིན་ཏུ་རྒྱལ་བར་དཀའ་བའི་བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱོད་པ་དང༌། ས་དྲུག་པ་མངོན་དུ་བྱ་བ་ལ་ཤེས་རབ་མངོན་དུ་གྱུར་བས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དང༌། ས་བདུན་པ་རིང་དུ་སོང་བ་ལ་སེམས་ཅན་རྣམས་སྨིན་པ་དང་བོལ་བར་བྱེད་པའི་ཐབས་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དང༌། ས་བརྒྱད་པ་མི་གཡོ་བ་ལ་སྨོན་ལམ་གྱི་དབང་གིས་ཐོབ་ནས་བླ་མ་རྣམས་ཐོབ་པའི་ཕྱིར་སྨོན་ལམ་གྱི་ཕ་རོལ་ཏུ་ཕྱིན་པ་སྤྱོད་པ་དང༌། ས་དགུ་པ་དག་པའི་བློ་གྲོས་ལ་སྟོབས་ཀྱི་ཕ་རོལ་ཏུ་ཕྱིན་པ་སྤྱོད་
པ་དང༌། ས་བཅུ་པ་ཆོས་ཀྱི་སྤྲིན་ལ་ཕྱོགས་བཅུའི་དེ་བཞིན་གཤེགས་པ་རྣམས་ལ་མངོན་སུམ་དུ་ཡེ་ཤེས་ཀྱིས་ཆོས་འདྲི་ཞིང་སྤྱོད་ཡུལ་དུ་གྱུར་པ་ཡེ་ཤེས་ཀྱི་ཕ་རོལ་ཏུ་ཕྱིན་པ་སྤྱོད་པ་རྣམས་མོས་པ་སྤྱོད་པའི་ཚེ་ཉིད་ན་བདག་ཀྱང་སྤྱོད་པ་ལ་གོམས་པར་བྱེད་ལ། སེམས་ཅན་རྣམས་ཀྱང་བསྡུ་བ་རྣམ་བཞིའི་སྒོ་ནས་བསྡུས་ཏེ་སྤྱོད་དུ་འཇུག་པའོ། །བསྡུ་བ་རྣམ་བཞི་པོ་ཞེས་པ་ནི་སྦྱིན་པ་དང༌། སྙན་པར་སྨྲ་བ་དང༌། དོན་བྱེད་པ་དང༌། དོན་མཐུན་པར་བྱེད་པའི་སྒོ་ནས་ཕ་རོལ་ཏུ་ཕྱིན་པ་རྣམས་ལ་སྤྱོད་དུ་འཛུད་པའོ། །ས་དེ་རྣམས་ཀྱི་མཚན་ཉིད་དང༌། ཡོན་ཏན་རྒྱ་ཆེར་ནི་ས་བཅུའི་མདོ་སྡེ་ལ་སོགས་པར་བལྟའོ། །མཉམ་མེད་ཤིན་ཏུ་མོས་པའི་ས། །ཞེས་པ་ནི་མོས་པ་སྤྱོད་པའི་ས་དེ་འཇིག་རྟེན་པ་ཕལ་རྣམས་དང་མི་མཉམ་པའོ། །ཚད་མེད་པ་ཞེས་པ་དེའི་ཡོན་ཏན་སྤྱི་གྲངས་བཅལ་བ་ལས་འདས་པའོ། །བསམ་ཡས་ཞེས་པ་ནི་སེམས་ཀྱིས་བསམས་ཤིང་དཔག་པ་ལས་འདས་པའོ། །ས་བཅུ་རིམ་པར་ཐོབ་ཅེས་པ་ནི་ཕ་རོལ་ཏུ་ཕྱིན་པ་བཅུ་པོ་སྤྱོད་པའི་སེམས་ཀྱི་རིམ་པ་ལ་བྱའོ། །ཚད་མེད་ཡེ་ཤེས་ལས་བྱུང་བ། །ཞེས་པ་ནི་ཐམས་ཅད་མཁྱེན་པའི་ཡེ་ཤེས་ཚད་མེད་པའོ། །མོས་པ་སྤྱོད་པའི་ས་དེ་ལ་བྱའོ། །དེའི་ས་ཐམས་ཅད་ཐོབ་པ་ནི་དེའི་ས་ཅུང་ཟད་གང་གསུངས་པའོ་ཞེས་པ་ནི་མོས་པ་སྤྱོད་པ་དེས་སྟོབས་བཅུ་དང༌། མི་འཇིགས་པ་བཞི་དང༌། མ་འདྲེས་པ་བཅོ་བརྒྱད་ལ་སོགས་པའི་ཆོས་རྣམས་གང་ཅུང་ཟད་བཅོམ་ལྡན་འདས་ཀྱིས་གསུངས་པ་དེ་ཐམས་ཅད་ཐོབ་པར་འགྱུར་བའོ། །དེ་བས་ཐམས་ཅད་མཁྱེན་པའི་ས་ནི་ཤིན་ཏུ་མོས་པའི་ས་ཞེས་བྱ་ཞེས་པ་ནི། དེ་ལྟར་དེ་བཞིན་གཤེགས་པའི་ཆོས་ཐམས་ཅད་མོས་པས་ཐོས་པས་ན། མོས་པ་སྤྱོད་པའི་ས་དེ་ཐམས་ཅད་མཁྱེན་པའི་སའི་རྒྱུ་སྟེ་དེ་བས་ན་རྒྱུ་ལ་འབྲས་བུས་བསླན་ཏེ། གསུངས་པ་དེས་ཤིན་ཏུ་མོས་པའི་ས་ཞེས་ཀྱང་བྱ་ཞེས་པའོ། །ཡིད་གཞུངས་བསྐལ་པ་གཅིག་གིས་ནི། །ས་ལས་ཤིན་ཏུ་འདས་པར་འགྱུར། །ཞེས་པ་ནི་ཤེས་རབ་ཅན་གྱིས་མོས་པ་སྤྱོད་པའི་ས་དེ་བསྐལ་པ་གཅིག་གིས་ཡོངས་སུ་རྫོགས་པར་འགྱུར་ཞེས་པའོ། །དེའི་བཞི་ཆ་གཅིག་གི་ས་ནི། །ཤིན་ཏུ་མོས་
པས་ཀྱང་འདས་ཞེས་པ་ནི། བསྐལ་པ་དེའི་བཞི་ཆ་གཅིག་གིས་ནི། མོས་པ་སྤྱོད་པའི་ས་ཆོས་བདག་མེད་པར་ཆུད་པའི་ས་དེ་ལས་འཕར་ཏེ། ཡེ་ཤེས་ཀྱི་ས་ལ་འཇུག་པའི་སྟེགས་སུ་གྱུར་པའི་ཆོས་ལ་བདག་མེད་པར་ཡང་སྤངས་ནས་རང་གི་སེམས་ཐོག་མ་ནས་མ་སྐྱེས་མ་བྱུང་བར་བསྒོམ་པ་ལ་ཞུགས་པ་ལ་བྱའོ། །མོས་པ་སྤྱོད་པའི་སའི་རིམ་པ་དང་ཡོན་ཏན་དེ་དག་སྔར་མོས་པ་སྤྱོད་པའི་ས་ལ་བདག་མེད་པ་ལ་འཇུག་པའི་སྐབས་སུ་མི་བཤད་པར་རབ་ཏུ་དགའ་བའི་ས་བཤད་པའི་འོག་ཏུ་ཅིའི་ཕྱིར་བཤད་ཅེ་ན། རབ་ཏུ་དགའ་བའི་ས་ནི་མོས་པ་སྤྱོད་པའི་སའི་འབྲས་བུ་སྟེ་དེ་ལྟར་འབྲས་བུ་དེ་ཅི་འདྲ་བར་ཤེས་ནས་དེའི་རྒྱུ་གང་ཡིན་པ་དེ་གདོད་བརྟག་པར་བྱ་སྟེ། དེ་བས་ན་མོས་པ་སྤྱོད་པའི་ས་དེའི་ཕྱིས་བཤད་དོ། །ད་ནི་རྣམ་པར་སྣང་མཛད་ཀྱི་རྒྱུ་འཇིག་རྟེན་གྱི་སེམས་སྦྱིན་པ་ལ་སོགས་པ་བརྒྱད་པོ་བཤད་པ་དང༌། སོ་སོའི་བདག་ཏུ་བརྟགས་པ་ལ་བརྟེན་ནས་འབའ་ཞིག་པའི་བློ་སྐྱེ་བ་བཤད་པ་དང༌། དེ་ནས་འཇིག་རྟེན་ལས་འདས་པའི་སེམས་སྐྱེས་ཏེ། བདག་ཏུ་བརྟགས་པ་རྣམས་མེད་པར་ཆུད་ནས་ཕུང་པོ་ཙམ་དུ་ཟིན་པ། གང་ཟག་ལ་བདག་མེད་པར་ཆུད་པ་བཤད་པ་དང༌། ཕུང་པོ་ཙམ་པོ་དེ་ལ་ཡང་དབུ་བ་དང་ཆུའི་ཆུ་བུར་ལ་སོགས་པའི་ཚུལ་དུ་བཤིག་ནས། ཆོས་རྣམས་སོ་སོའི་རང་བཞིན་སྔོན་པོ་ལ་སོགས་པ་ཙམ་དུ་ཟད་པར་ཆུད་པ་བཤད་པ་དང༌། ཆོས་ལ་བདག་མེད་པར་ཆུད་ནས། རང་བཞིན་གྱི་སེམས་ཐོག་མ་ནས་མ་སྐྱེས་པ་སྟོང་པ་ཉིད་དུ་ཆུད་པར་བཤད་པ་དང༌། ས་དང་པོའི་སེམས་ཀྱི་རང་བཞིན་སྟོང་པ་ཉིད་ཀྱི་རང་བཞིན་དེ་ཡང་ངོ་བོ་མེད་པར་མཉམ་པ་ཉིད་དུ་ཆུད་པས་རྒྱ་ཆེར་བཤད་པ་དེ་རྣམས་ཉིད་དེ་འདིར་དབུགས་དབྱུང་བའི་སྒོ་ནས་མདོར་བསྡུས་ཏེ་ཕྱག་ན་རྡོ་རྗེ་གསོལ་པ་དང༌། བཅོམ་ལྡན་འདས་རྣམ་པར་སྣང་མཛད་ཀྱིས་ཀྱང་མདོར་བསྡུས་ཏེ་གསུངས་པ་དེ་བཤད་པར་བྱ་སྟེ། དེ་རྣམས་བཤད་པ་ཡང་ལན་གཉིས་སུ་བཟླས་པ་ཅི་དགོས་ཤེ་ན། སྔར་བཤད་པས་གསལ་བར་མ་གོ་ན་ཕྱིས་བཟླས་ཏེ་བཤད་པས་གསལ་ཞིང་བསྟན་པར་འགྱུར་བའི་ཕྱིར་ཏེ། དེ་བས་ན་ཕལ་ཆེར་ལང་སྔར་རྒྱ་
ཆེར་བཤད་དེ་མ་གོ་ན་ཕྱིས་མདོར་བསྡུས་ཏེ་བཤད་པས་གོ་བ་ཡང་ཡོད་དེ་སྡར་ཚིག་རྐྱང་པས་བཤད་དེ་མ་གོ་བ་ལས་ཕྱིས་ཚིགས་སུ་བཅད་དེ་གོ་བ་ཡང་སྲིད་པའི་ཕྱིར་རོ། །མདོ་སྡེ་ལ་སོགས་པ་གཞན་དག་རྣམས་ཀྱང་སྔར་སྤྲོས་ཏེ་བཤད་པའི་དོན་དེ་ཉིད་ཚིགས་སུ་བཅད་བས་བསྡུས་ཏེ་བཤད་པ་དེ་དག་སྲིད་དེ། དེ་བས་འདིར་ཡང་སྔར་རྒྱས་པར་བཤད་པའི་དོན་དེ་ཉིད་ཕྱིས་བསྡུས་ཏེ་བཤད་དོ། །དེ་ཡང་དེ་ནས་བཅོམ་ལྡན་འདས་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས་སྲས་རྣམས་དབུགས་དབྱུང་བར་གྱུར་པའོ་ཞེས་པའི་བར་དུ་ནི་ཕྱག་ན་རྡོ་རྗེས་གསོལ་བའི་ཚིག་སྟེ། མཚན་ཉིད་མགོན་པོས་གསུངས་པ་ནི། །སེམས་ཅན་རྣམས་ཀྱི་མགོན་ཁྱོད་ཀྱིས། །ཞེས་པ་ནི་སྔར་སེམས་ཅན་རྣམས་ཀྱི་མཚན་ཉིད་བཤད་པ་དེ་དབུགས་དབྱུང་བ་རྣམ་པ་དུས་ཐོབ་པར་འགྱུར་ཞེས་ཞུས་པའོ། །དབུགས་དབྱུང་བ་རྣམས་པ་དུས་ཐོབ་ཅེས་པ་ནི་ཕྱིས་དབུགས་དབྱུང་བ་ཞེས་པ་ནི་ཇི་ལྟར་འཇིག་རྟེན་ན་གྲགས་པ་ལམ་འཕྲང་གི་འཇིགས་པ་ནས་རྐུན་པོ་ལ་སོགས་པའི་འཚེ་བ་ལས་ཐར་ན་དབུགས་དབྱུང་བ་ཞེས་བྱ་བ་དེ་བཞིན་དུ་འདིར་ཡང་འཁོར་བའི་དགོན་པ་ན་རྣམ་པར་འཁྱམས་པའི་སེམས་ཅན་ལས་དང་ཉོན་མོངས་པའི་རྐུན་པོས་འཚེ་བའི་འཇིགས་པ་ལས་ཐར་པའི་དབུགས་དབྱུང་བ་ཞེས་བྱ་བ་སྟེ། དེ་ལས་ཐར་ན་གཞན་དབུགས་དབྱུང་བར་བྱ་བའི་ས་མེད་དེ། དབུགས་དབྱུང་བ་གཅིག་ཏུ་ཟད་ནས་ཅིའི་ཕྱིར་ན་དབུགས་དབྱུང་བའི་དུས་ཐོབ་ཅེས་མང་པོའི་ཚིག་སྨོས་ཤེ་ན། ཇི་ལྟར་འཇིག་རྟེན་པ་རྣམས་འཇིགས་པ་གཅིག་ལས་ཐར་ནས་འཇིགས་པ་དེ་ལས་ཀུན་དབུགས་དབྱུང་མོད་ཀྱི་དེ་ལས་གཞན་པའི་འཇིགས་པ་རྣམས་ལས་མ་ཐར་ན་དབུགས་མ་ཕྱུང་བའོ། །དེ་བཞིན་དུ་འདིར་ཡང་དགེ་བ་དང་གང་མི་མཐུན་པའི་གཉེན་པོར་གྱུར་པ་དེ་ལས་ཐར་ཏེ། དབུགས་དབྱུང་མོད་ཀྱི་དེ་ལས་གཞན་པའི་བགེགས་སུ་གྱུར་པ་རྣམས་ལས་མཐར་ན། དེ་ལས་དབུགས་མ་དབྱུང་བ་ཞེས་བྱ་སྟེ། དེ་བས་ན་དབུགས་དབྱུང་བ་རྣམ་པ་དུའི་ས་བོན་ཞེས་སྨོས་སོ། །སྲས་རྣམས་ཞེས་པ་ནི་མཆོག་ལས་སྐྱེས་པ་སྟེ། མཆོག་ནི་ཆོས་ཀྱི་དབྱིངས་དེ་བཞིན་ཉིད་དེ་ལས་སྐྱེས་པ་ནི་བྱང་ཆུབ་སེམས་དཔའ་སྟེ། དེ་རྣམས་དབུགས་དབྱུང་བར་གྱུར་
པའོ། །བཅོམ་ལྡན་འདས་རྣམ་པར་སྣང་མཛད་ཆེན་པོས་ཕྱག་ན་རྡོ་རྗེ་ལ་བཀའ་སྩལ་ཏོ་ཞེས་པ་ནས་ཐམས་ཅད་སྟོང་པ་ཉིད་ཀྱི་རང་བཞིན་མེད་དོ། །སྟོང་པའི་ཡེ་ཤེས་སྐྱེས་པ་དེ་ན་ཆོས་ཐམས་ཅད་ཀྱི་ངོ་བོ་ཉིད་སྙོམས་པར་དབུགས་དབྱུང་བའོ་ཞེས་པའི་བར་དུ་ཕྱག་ན་རྡོ་རྗེས་གསོལ་བ་རྣམས། བཅོམ་ལྡན་འདས་རྣམ་པར་སྣང་མཛད་ཀྱིས་བཀའ་སྩལ་པ་ལ་བྱའོ། །དེ་ལ་ཡིད་བསྡུས་ལ་ཉོན་ཅིག་པ་ནི་སྣོད་རྣམ་བཞིའི་གཉེན་པོར་གསུངས་པ་སྟེ་སྔར་བཤད་པའོ། །བྱིས་པ་སོ་སོར་འགྲོ་བ་རྣམས་མི་དགེ་བའི་ལས་རྣམས་སྤངས། དགེ་བའི་ལས་བྱེད་པ་ན་དགེ་བར་དབུགས་དབྱུང་བའོ་ཞེས་པ་ནི་བྱིས་པ་ཕྱུགས་དང་འདྲ་བ་རྣམས་འཁོར་བ་ན་འཁྱམས་པ་ལས་སྐྱོ་སྟེ། བསོད་ནམས་ཀྱི་འདུ་ཤེས་སྐྱེས་ན་སྨྱུང་བར་འདུག་ཅིང་སྦྱིན་པ་ལ་སོགས་པ་བྱེད་པ་ནི་དགེ་བར་དབུགས་དབྱུང་བ་ཞེས་བྱའོ། །དེ་ལ་དགེ་བ་ཞེས་པ་ནི་དབུགས་དབྱུང་བ་གཞན་ཡང་དགེ་བ་ཡིན་ན། ཅིའི་ཕྱིར་འདིར་འབའ་ཞིག་ལ་དགེ་བ་བྱ་ཞེ་ན། གཞན་ཡང་དགེ་བ་ཡིན་མོད་ཀྱི། འོན་ཀྱང་གཞན་རྣམས་ལ་སོ་སོའི་མིང་ཡོད་པས་འདི་ལ་དགེ་བ་ཞེས་བྱའོ། །ནམ་བདག་གིས་དེ་ཁོ་ན་ཉིད་ཇི་ལྟ་བ་ཉིད་རབ་ཏུ་ཤེས་ན་བདག་གི་གནས་སུ་རབ་ཏུ་དབུགས་དབྱུང་བའོ་ཞེས་བ་ནི་སྦྱིན་པ་ལ་སོགས་པའི་སེམས་བརྒྱད་སྤྱོད་པ་ན། དགེ་བའི་བཤེས་གཉེན་དང་ཕྲད་དེ་འཇིག་རྟེན་པ་རྣམས་ཀྱིས་བདག་ཏུ་བརྟགས་པའི་དངོས་པོ་ཇི་ལྟ་བ་ཉིད་དུ་ཤེས་ནས། བདག་ལ་བརྟེན་ཅིང་འཇིག་རྟེན་པའི་ལས་རྣམས་གོམས་པར་བྱེད་པ་ནི་བདག་གི་གནས་སུ་དབུགས་དབྱུང་བ་ཞེས་བྱའོ། །བདག་གིས་དེ་ཁོ་ན་ཉིད་ཇི་ལྟ་བ་ཉིད་དུ་རབ་ཏུ་ཤེས་ཞེས་པ་ནི་སྟོང་པ་ཉིད་ཀྱི་རང་བཞིན་དུ་ཤེས་རབ་ཀྱིས་ཇི་ལྟ་བ་ཉིད་དུ་ཤེས་པ་ལ་ནི་མི་བྱའི། འཇིག་རྟེན་པའི་གཞུང་བཞིན་དུ་བདག་གི་ངོ་བོར་བརྟགས་པ་དེ་ཕྱིན་ཅི་མ་ལོག་པར་ཤེས་པ་ལ་བྱའོ། །ནམ་ཕུང་པོ་ཡོངས་སུ་གཟུང་བ་བྱས་ནས་བདག་གིས་གནས་ཀུན་སྤངས་ཏེ། ཉིད་ཀྱིས་གཟུགས་དཔྱད་པ་དེ་ན་བདག་མེད་པར་དབུགས་དབྱུང་བའོ་ཞེས་པ་ནི་ཕུང་པོར་བརྟགས་པ་ཡོད་པར་འཛིན་པ་དེ་ནི་དབུ་བ་དང་ཆུ་བུར་ལ་སོགས་པའི་ཚུལ་དུ་བཤིག་ན་ཕུང་པོར་བརྟགས་པའི་དངོས་པོ་ཡོད་པ་མ་
ཡིན་གྱི། ཆོས་རྣམས་སོ་སོའི་མཚན་ཉིད་ཙམ་འབའ་ཞིག་ཡོད་པར་ཆུད་པ་ནི་ཆོས་ལ་དབུགས་དབྱུང་བ་ཞེས་བྱའོ། །ནམ་ཆོས་སྤངས་ནས་མ་སྐྱེས་པ་ལ་འདུག་པ་དེ་ན་ཆོས་ལ་བདག་མེད་པར་དབུགས་ཕྱུང་བའོ་ཞེས་པའོ་ཞེས་པ་ནི་ཕུང་པོ་ལ་སོགས་པའི་ཆོས་རྣམས་སྒྱུ་མ་དང་སྨིག་རྒྱུའི་ཚུལ་དུ་བཤིག་ནས་ཡོད་པ་མ་ཡིན་ཏེ། རྣམ་པར་ཤེས་པ་ཙམ་དུ་ཟད་པར་ཆུད་དེ། རྣམ་པར་ཤེས་པ་དེ་ཉིད་ཀྱང་ཐོག་མ་དང་ཐ་མའི་མཐའ་མི་རྙེད་དེ། རང་བཞིན་མེད་དེ་ཐོག་མ་ནས་མ་སྐྱེས་པར་ཆུད་པ་དེ་ནི་ཆོས་ལ་བདག་མེད་པར་དབུགས་དབྱུང་བ་ཞེས་བྱའོ། །ནམ་ཕུང་པོ་དང༌། ཁམས་དང། སྐྱེ་མཆེད་དང༌། གཟུང་བ་དང༌། འཛིན་པ་དང༌། བདག་དང༌། སྲོག་ལ་སོགས་པ་དང༌། མ་སྐྱེས་པ་རྣམ་པ་ཐམས་ཅད་སྟོང་པ་ཉིད་ཀྱི་རང་བཞིན་ཡང་ངོ་བོ་མེད་དོ་ཞེས་སྟོང་པའི་ཡེ་ཤེས་སྐྱེས་པ་དན་ཆོས་ཐམས་ཅད་ཀྱི་ངོ་བོ་ཉིད་མཉམ་པ་ཉིད་དུ་དབུགས་དབྱུང་པའོ་ཞེས་པ་ནི་ཕུང་པོ་ལ་སོགས་པའི་ཆོས་རྣམས་བདག་མེད་པར་ཆུད་དེ་རྣམ་པར་ཤེས་པ་ཙམ་དུ་ཟད་པར་ཤེས་པ་དང༌། རྣམ་པར་ཤེས་པ་དེ་ཡང་ཐོག་མ་ནས་མ་སྐྱེས་པར་ཆུད་དེ། སྟོང་པ་ཉིད་ཀྱི་རང་བཞིན་དུ་ཤེས་པའི་སྟོང་པའི་རང་བཞིན་དེ་ཡང་ངོ་བོ་མེད་པར་ཆུད་པ་ནི་སྟོང་པ་ས་དང་པོའི་སེམས་ཀྱི་མཚན་ཉིད་སྟོང་པའི་ཡང་སྟོང་པ་སྟེ་མཉམ་པ་ཉིད་དུ་དབུགས་ཕྱུང་བ་ཞེས་བྱ་སྟེ། དེ་རྣམས་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་ཕུན་སུམ་ཚོགས་པ་བཤད་པ་ལ་བྱ་སྟེ། རྒྱུ་ཕུན་སུམ་ཚོགས་པ་བཤད་པ་ཡང་དེ་འབའ་ཞིག་ཏུ་མ་ཟད་ཀྱི་གཞན་ཡང་རྒྱུའི་སྐབས་ནས་འབྱུང་བ། བྱང་ཆུབ་ནམ་མཁའི་མཚན་ཉིད་དེ། །ཀུན་དུ་རྟོག་པ་ཐམས་ཅད་སྤངས་ཏེ་ཆུད་པ་རུ་གང་འདོད་པ་དེ་ནི་བྱང་ཆུབ་སེམས་དཔའ་ཞེས་བྱ་སྟེ། བླ་ན་མེད་པའི་བྱང་ཆུབ་ཆུད་པར་འདོད་པ་དེ་ནི་ས་དང་པོ་མན་ཆད་རྣམས་འབའ་ཞིག་ལ་མི་བྱའི། ས་བཅུ་དང་ཀུན་དུ་བཟང་པོའོ། །ས་ལ་གནས་པའི་བྱང་ཆུབ་སེམས་དཔའ་ཡང་བླ་ན་མེད་པའི་བྱང་ཆུབ་ཆུད་པར་འདོད་པ་སྟེ། །དེ་བས་ན་བྱང་ཆུབ་སེམས་དཔའ་དེ་རྣམས་སྤྱོད་པ་ཡང་བཅོམ་ལྡན་འདས་རྣམ་པར་སྣང་བར་མཛད་ཀྱི་རྒྱུར་རིག་པར་བྱའོ། །ད་ནི་འདིས་དཔྱད་པར་བྱ་སྟེ། སྔགས་རྣམས་ཀྱི་སྤྱིའི་མཚན་ཉིད་ནི་བྱང་ཆུབ་ཀྱི་སེམས་སོ་ཞེས་གཞུང་
པས་གསུངས་ན། བྱང་ཆུབ་ཀྱི་སེམས་ནི་ཕུང་པོ་དང༌། ཁམས་དང༌། སྐྱེ་མཆེད་དང༌། གཟུང་བ་དང༌། འཛིན་པ་དང༌། ལས་དང༌། བྱ་བའི་རྣམ་པ་དང་བྲལ་བ་སྟོང་པ་ཉིད་ཀྱི་རང་བཞིན་དུ་ཡང་ངོ་བོ་མེད་པར་ཡིན་ལ། སྔགས་ནི་སངས་རྒྱས་དང་བྱང་ཆུབ་སེམས་དཔའ་རྣམས་དང༌། དེ་སྟོན་པར་བྱེད་པའི་སྒྲ་དང་ཡི་གེའི་འབྲུ་རྣམས་ཏེ། དེ་རྣམས་ཀྱང་མཆོག་དང༌། འབྲིང་དང༌། ཐ་མའི་གྲུབ་པ་དང༌། ཞི་བ་དང༌། རྒྱས་པ་དང༌། མངོན་སྤྱོད་པའི་ལས་རྣམས་ཀྱི་བྱ་བ་བྱེད་དེ། དེ་ལྟར་མི་མཐུན་ན་དེ་རྣམས་ཇི་ལྟར་རིག་པར་བྱ་ཞེ་ན། དེའི་ཕྱིར་གསུངས་པ། དེ་ནི་གསང་བའི་བདག་པོ་བྱང་ཆུབ་སེམས་དཔའི་སྤྱད་པ་སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་རྣམས་གནས་བཅུས་རྐྱེན་དང་འདུ་བ་ཚོགས་ཏེ་བྱུང་བ་བསྒོམས་ནས་སྔགས་ཚུལ་གྱི་རྒྱུད་དུ་སོང་བ་ཞེས་པ་སྟེ། ཡང་ཀུན་རྫོབ་ཀྱི་ཆོས་རྣམས་ནི་རིག་པས་བརྟག་མི་བཟོད་དེ། དོན་དམ་པར་སྟོང་བའི་རང་བཞིན་ཡིན་མོད་ཀྱི། འོན་ཀྱང་ཀུན་རྫོབ་དང་སོ་སོའི་རྒྱུ་དང་འབྲས་བུ་ངེས་པའི་བྱ་བ་རྣམས་ཀྱང་བྱེད་པར་འགྱུར་ཏེ། མེད་ཅེས་བྱར་མི་རུང་ངོ༌། །དེ་ལྟར་སྟོང་པའི་རང་བཞིན་ལས་ཀུན་རྫོབ་ཡོད་པར་སྣང་བ་ནི་སྒྱུ་མ་ལ་སོགས་པ་དང་འདྲའོ། །དེ་བཞིན་དུ་སྔགས་ཀྱི་རང་བཞིན་ཡང་བྱང་ཆུབ་ཀྱི་སེམས་དེ་དོན་དམ་པར་སྟོང་པ་ཡིན་མོད་ཀྱི། ཆོས་ཀྱི་དབྱིངས་ཀྱི་བྱིན་གྱི་རླབས་དང༌། སྒྲུབ་པ་པོའི་སྦྱོར་བའི་མཐུས་གྲུབ་པའི་འབྲས་བུ་རྣམ་པ་སྣ་ཚོགས་ཀུན་དུ་སྣང་ཞིང་མྱོང་བར་འགྱུར་ཏེ། དེ་རྣམས་ཀྱང་སྒྱུ་མ་ལ་སོགས་པའི་དཔེར་བཤད་པ་ནི་འདི་ལྟ་སྟེ། སྒྱུ་མ་དང་སྨིག་རྒྱུ་དང་རྨི་ལམ་དང་ཞེས་བྱ་བ་ལ་སོགས་པ་ནས་གཞན་ཡང་གསང་བའི་བདག་པོ་ལ་ལས་མེའི་མགལ་པ་ལག་ཏུ་བླངས་ཏེ་བསྐོར་ནས་འཁོར་ལོར་མཐོང་མོད་ཀྱི། །དེ་བཞིན་དུ་སྟོང་པར་འགྱུར་བའོ་ཞེས་པའི་བར་དུ་སྟེ། དེ་ལ་སྒྱུ་མ་གང་ཞེ་ན་འདི་ལྟ་སྟེ། སྨན་དང་སྔགས་སུ་སྦྱོར་ནས། རྣམ་པ་སྣ་ཚོགས་ཡིད་དང་མིག་སླུ་བའི་དངོས་པོ་རྣམས་སྔོན་མ་མཐོང་བ་རྣམས་སྟོན་ཏེ་དེ་ཡང་ཕན་ཚུན་ཕྱོགས་བཅུར་འདོད་པ་ཡང་ཡིན་ནོ། །དེ་ཅིའི་ཕྱིར་ཞེ་ན། སྒྱུ་མ་ནི་རང་བཞིན་གྱིས་སྟོང་པ་ཉིད་ཀྱི་ཕྱིར་དེ་བཞིན་དུ་སྔགས་ཀྱི་སྦྱོར་བས་སྦྱོར་བ་ལས་ཐམས་ཅད་འབྱུང་ངོ་ཞེས་པ་ནི་ཇི་ལྟར་སྒྱུ་མ་མཁན་གྱིས་སྔགས་དང་སྨན་
གྱི་སྦྱོར་བ་ལས། བ་ལང་དང་རྟ་ལ་སོགས་པའི་དངོས་པོ་རྣམ་པ་མང་པོས་ཡིད་དང་མིག་ཆགས་པར་བྱེད་པར་སྣང་སྟེ། དེ་རྣམས་ཀྱང་བ་ལང་དང་རྟ་ལ་སོགས་པའི་རང་བཞིན་དུ་ཡོད་པ་མ་ཡིན་པས་ན། ཕྱོགས་བཅུ་ནས་འོངས་པའམ་འདོད་པ་ཡང་མེད་དེ། འོན་ཀྱང་དེ་དག་ལ་བ་ལང་ལ་སོགས་པའི་བྱ་བ་ཡང་བྱེད་དོ། །དེ་བཞིན་དུ་སྔགས་ཀྱི་རང་བཞིན་བྱང་ཆུབ་ཀྱི་སེམས་དེ་སྟོང་པ་ཉིད་ཡིན་ཀྱང༌། སྦྱོར་བ་ལས་སྔགས་ཀྱི་དངོས་གྲུབ་སྦྱོར་བ་སྦྱར་ནས་རབ་དང་འབྲིང་ལ་སོགས་པ་གྲུབ་པའི་འབྲས་བུ་རིག་འཛིན་ནམ་མཁའ་ལ་འགྲོ་བ་དང་མི་སྣང་པར་འགྲོ་བ་ལ་སོགས་པ་རྣམ་པ་སྣ་ཚོགས་སུ་སྣང་ཞིང་མྱོང་བར་བྱེད་དོ། །གཞན་ཡང་གསང་བའི་བདག་པོ་སྨིག་རྒྱུ་བ་ནི་ཡོངས་ཀྱིས་སྟོང་པ་ཉིད་དེ་ཡང་མིང་ཙམ་དུ་སྨོས་ནས་བརྗོད་དོ། །དེ་བཞིན་དུ་སྔགས་འདི་ཡང་མིང་ཙམ་དུ་སྨོས་ཏེ་དཔྱད་པར་བརྗོད་པའོ་ཞེས་པ་ནི་དེ་ལྟར་སྔགས་ཀྱི་འབྲས་བུ་སྒྱུ་མ་དང་འདྲ་ན་སྔགས་ཀྱི་དངོས་བོ་ཅི་ཞིག་ཅེ་ན། སྨིག་རྒྱུ་ལྟ་བུ་སྟེ། ཇི་ལྟར་འབྲོག་དགོན་པ་ན་སྨིག་རྒྱུ་བ་ན་མའི་མ་རི་དགས་རྣམས་ཀྱིས་ཆུར་འདུ་ཤེས་སྐྱེས་ཏེ། དེ་ན་ཆུ་ཡོད་པ་མ་ཡི་ན་ཡང་སྨིག་རྒྱུ་བ་དེ་ཇི་བཞིན་པའི་རྣམ་པར་ཤེས་པ་བསྐྱེད་ཅིང་སྐོམ་པ་ཡང་ཆུས་དེ་མོས་པའི་བྱ་བ་བྱེད་དེ། དེ་བཞིན་དུ་སྔགས་དེ་ཡང་དངོས་པོ་ཡོད་པ་ཡང་མ་ཡིན། འདུ་ཤེས་ཙམ་དུ་ཟད་མོད་ཀྱི། འོན་ཀྱང་སྔགས་ཀྱི་དངོས་གྲུབ་ཀྱི་འབྲས་བུ་བསྐྲུན་པའི་བྱ་བ་བྱེད་དོ། །དེ་བཞིན་དུ་ཡང་གསང་བའི་བདག་པོ་རྨི་ལམ་ན་ཡང་ཉིན་པར་དང་སྐད་ཅིག་དང་ཡུད་ཙམ་དང་ཆ་ཤས་ཙམ་དང་ལོ་ལ་སོགས་པར་བདག་ཉིད་འདུག་ཅིང་བདེ་བ་དང་སྡུག་བསྔལ་རྣམ་པ་མང་པོ་མྱོང་བ་མཐོང་ནས་སླར་སད་པ་དང་ཅི་ཡང་མ་མཐོང་དོ། །དེ་ལྟ་བུར་སྔགས་འདིའི་ཚུལ་ཡང་རྨི་ལམ་བཞིན་དུ་རིག་པར་བྱའོ་ཞེས་པ་འདི་སྔར་སྔགས་བསྒྲུབས་པའི་འབྲས་བུའི་དཔེ་སྒྱུ་མ་ལས་དཔེ་བླངས་བ་དེ་སྒྱུ་མ་ནི་ཡུན་རིང་དུ་འདུག་པ་མ་ཡིན་གྱི་སྐད་ཅིག་ཡུད་ཙམ་དག་ཏུ་ཟད་པས་སྔགས་ཀྱི་འབྲས་བུ་ནི་བསྐལ་པ་ལ་སོགས་པར་ཡུན་རིང་དུ་འདུག་ན་ཇི་ལྟར་དཔེར་རུང་ཞེ་ན། རྨི་ལམ་གྱི་དཔེས་ཡུན་རིང་དུ་གནས་པ་བསྟན་པ་སྟེ། ཇི་ལྟར་རྨི་ལམ་ན་ཡུན་གྱི་དངོས་པོ་མེད་པར་སྐད་ཅིག་དང་ཉི་མ་དང་ཞག་དང་ལོ་ལ་སོགས་
པ་ཡུལ་རྣམས་སྤྱོད་ཅིང་བདེ་བ་དང་སྡུག་བསྔལ་བ་རྣམ་པ་མང་པོ་མྱོང་ཞིང་རིག་པར་མཐོང་སྟེ། དེ་ལས་སད་ན་དངོས་པོ་གང་ཡང་མེད་དོ། །དེ་ལྟར་ཡང་ཅིས་མངོན་ཞེ་ན། ཏིང་ངེ་འཛིན་གྱི་རྒྱལ་པོའི་མདོ་ལས་ཀྱང་གསུངས་པ། ཇི་ལྟར་བུ་མོ་གཞོན་ནུའི་རྨི་ལམ་ན། བདག་ལས་བུ་བྱུང་སྟེ་བུ་དེ་སྐྱེས་ནས་དགའ་བ་ཡང་སྐྱེས་དེ་ནས་བུ་དེ་ཤི་བ་ཡང་མཐོང་སྟེ། ཤི་ནས་མི་དགའ་བ་ཡང་སྐྱེས་པར་མཐོང་བས་དེ་ལྟར་རྨི་ལམ་ན་ཡུན་རིང་པོར་སྲིད་དོ། །དེ་བཞིན་དུ་སྔགས་བསྒྲུབས་པའི་འབྲས་བུ་ཡང་རང་བཞིན་མེད་པ་ལས་སྦྱོར་བས་སྒྲུབ་ན་གྲུབ་པའི་འབྲས་བུ་རྣམ་པ་སྣ་ཚོགས་ཚེ་རབས་དང་བསྐལ་པ་ལ་སོགས་པར་གནས་པར་འགྱུར་རོ། །གཞན་ཡང་གསང་བའི་བདག་པོ་གཟུགས་བརྙན་འབྱུང་བ་བཞིན་དུ་སྔགས་ཀྱི་སྒྲུབ་པ་ཡང་རྟོགས་པར་བྱའོ་ཞེས་པ་ནི་དེ་ལྟར་སྔགས་གྲུབ་པ་དེ་རྣམས་དངོས་པོ་མེད་པར་ཡང་རྟེན་ཅིང་འབྲེལ་པར་འབྱུང་བ་ལས་བྱུང་ན། སྒྲུབ་པ་ཐམས་ཅད་ཀྱིས་ཅིའི་ཕྱིར་གྲུབ་པ་མི་འཐོབ་ཅེ་ན། ཇི་ལྟར་གཟུགས་བརྙན་དེ་རྡོ་དང་ཤིང་གཞན་ལ་མི་འབྱུང་གི་མེ་ལོང་གི་དཀྱིལ་འཁོར་དག་པ་ལས་འབྱུང་བར་འགྱུར་རོ། །དེ་བཞིན་དུ་སྔགས་ཀྱི་སྒྲུབ་པ་དེ་ཡང་སྒྲུབ་བ་པོ་ཐམས་ཅད་ལ་མི་འབྱུང་གི་གང་བྱང་ཆུབ་ཀྱི་སེམས་བསྒོམས་ཤིང་རྒྱུད་དག་པར་གྱུར་པ་དེ་ལ་འབྱུང་བར་བསྟན་པའོ། །གཞན་ཡང་གསང་པའི་བདག་བོ་གྲུབ་པའི་སྒྲུབ་གནས་ནི་དྲི་ཟའི་གྲོང་ཁྱེར་ལྟ་བུར་ལྟོས་ཤིག་ཅེས་པ་ནི། ཇི་ལྟར་དྲི་ཟ་རྣམས་ཀྱི་གྲོང་ཁྱེར་དྲི་ཟ་དེ་རྣམས་ཀྱིས་གང་དུ་བསམས་པ་དེར་གྲོང་རྡལ་བྱུང་དུ་གྱུར་ཏེ། དེ་བཞིན་དུ་སྔགས་ཀྱི་སྒྲུབ་པ་དེ་ཡང་བདག་ཉིད་ཀྱི་ལུས་རིག་འཛིན་ལ་སོགས་པར་གྲུབ་པའི་ཕྱིར་སྒྲུབ་ཀྱི། གཞན་གྱི་ཕྱིར་མ་གྲུབ་ཀྱང་ནམ་རིག་འཛིན་ལ་སོགས་པ་གྲུབ་ན་ལྷའི་གཞལ་མེད་ཁང་དང་དཔག་བསམ་གྱི་ཤིང་གི་གྲིབ་མ་དང་ཤེལ་གྱི་བྲག་ལ་བདུད་རྩིའི་ཆུ་འབབ་པ་དང༌། རིན་པོ་ཆེའི་གསིང་མ་ལ་སོགས་པའི་གནས་རྣམས་བསམས་པ་ཙམ་གྱིས་འགྲུབ་པར་འགྱུར་བ་བསྟན་པའོ། །གཞན་ཡང་གསང་བའི་བདག་པོ་བྲག་ཅ་བཞིན་དུ་སྔགས་ཀྱི་སྒྲ་ཡང་རིག་པར་བྱའོ། །དེ་འདི་ལྟ་སྟེ། སྒྲའི་ཕྱིར་བྲག་ཅ་འབྱུང་བ་ཡིན་ཏེ་དེ་བཞིན་དུ་སྔགས་ཀྱི་ཚུལ་རིག་པར་བྱའོ་
ཞེས་པ་ནི་ཇི་ལྟར་སྒྲའི་རྐྱེན་གྱིས་བྲག་ཅ་འབྱུང་བས་དངོས་པོ་ཡོད་པ་མ་ཡིན་ཀྱང་སྒྲར་འབྱུང་བ་དེ་བཞིན་དུ་ཡང་སྔགས་ཀྱི་སྒྲར་ཡང་སྔགས་ཀྱི་རང་བཞིན་སྟོང་པ་ཉིད་མོད་ཀྱི་བསྒྲུབས་པའི་རྐྱེན་གྱིས་དེ་འབྱུང་བ་དེ་དཔེར་ན་བྲག་ཅ་དང་འདྲ་བར་བསྟན་པའོ། །གཞན་ཡང་གསང་བའི་བདག་པོ་ཟླ་བ་ཤར་བའི་གཟུགས་བརྙན་ཆུའི་ནང་དུ་འབྱུང་བ་དེ་ནི་ཟླ་བའི་རང་བཞིན་དེ་ནས་མི་གཞན་ནོ། །དེ་བཞིན་དུ་སྔགས་སྒྲུབ་པའི་རིག་འཛིན་དེ་ཡང་རིག་འཛིན་གྱི་ལུས་བཟང་པོ་ལ་སོགས་པ་བསྒྲུབ་པའི་གཟུགས་དེ་ལས་གཞན་མ་ཡིན་ཏེ་གཟུགས་དེ་ཉིད་ལས་འགྱུར་མོད་ཀྱི། འོན་ཀྱང་རིག་འཛིན་ཅེས་སྨོས་པར་བསྟན་པའོ། །གཞན་ཡང་གསང་བའི་བདག་པོ་ཆར་འབབ་པ་ཆུ་བུར་འབྱུང་བ་དེ་བཞིན་དུ་སྔགས་ཀྱི་གྲུབ་གནས། རྣམ་པ་དུ་མར་སྤྲུལ་ཞེས་གྲགས། །ཞེས་པ་ནི་སྔགས་གཅིག་པུ་ལས་གྲུབ་པའི་འབྲས་བུ་རྣམ་པ་མང་པོ་ཇི་ལྟར་འགྱུར་ཞེ་ན། སྔགས་དེ་གཅིག་པུ་ཡིན་ཡང་གྲུབ་པའི་འབྲས་བུ་རྣམ་པ་མང་པོ་འབྱུང་བ་ཆུའི་ཆུ་བུར་གྱི་དཔེས་བསྟན་པ་སྟེ། ཇི་ལྟར་ཆར་འབབ་པ་ན་ཆུ་དེ་གཅིག་པུ་ལས་ཆུའི་ཆུ་བུར་ཆེ་ཕྲ་ལ་སོགས་པ་རྣམ་པ་མང་པོ་འབྱུང་བ་དེ་བཞིན་དུ་སྔགས་གཅིག་པུ་ལས་ཀྱང་འགྲུབ་པའི་འབྲས་བུ་རྣམ་པ་དུ་མ་འབྱུང་ངོ༌། །གཞན་ཡང་གསང་བའི་བདག་པོ་ཡང་སེམས་ཅན་མེད་ཅིང་སྲོག་ཀྱང་མེད་པའི་མཁན་པོ་ཡང་ཡོད་པ་མ་ཡིན། དངོས་པོ་ཀུན་ཀྱང་སྟོང་པ་སྟེ། །མཐོང་བ་རྣམས་ཀྱང་འཁྲུལ་པའོ། །ཞེས་པ་ནི་དེ་ལྟར་སྔགས་ཀྱི་རང་བཞིན་སྟོང་པ་ཉིད་དེ་སེམས་ཅན་ནམ་སྲོག་གམ། བྱེད་པའི་མཁན་པོ་མེད་དེ་སྟོང་པ་ཉིད་ཀྱང་གྲུབ་པའི་འབྲས་བུ་ལ་སོགས་པ་ཀུན་སྣང་བ་ནི་འཁྲུལ་པར་སྣང་བར་བསྟེན་པའོ། །གསང་བའི་བདག་པོ་དེ་ནི་ཐེག་པ་ཆེན་པོའི་གནས་སོ་ཞེས་པ་ནས་མ་ལུས་པའི་ཡེ་ཤེས་ཆེན་པོ་འབྱུང་བ་འདི་ཐམས་ཅད་ཤེས་ན་སེམས་ཀྱིས་རིམ་པ་དེ་དག་ཐམས་ཅད་ཇི་བཞིན་པའི་དེ་ཉིད་རབ་ཏུ་ཤེས་སོ་ཞེས་པའི་བར་དུ་ནི་ས་དང་པོའི་བྱང་ཆུབ་ཀྱི་སེམས་མཉམ་པ་ཉིད་ཆུད་པ་དེའི་རྗེས་སུ་བསྔགས་པ་བཤད་པ་ཆུད་པ་ལ་བྱ་སྟེ། ཐེག་པ་ཆེན་པོའི་གནས་ཞེས་པ་ནི་བྱང་ཆུབ་ཀྱི་སེམས་དེ་ཇི་ལྟ་བ་ཉིད་དུ་ཤེས་པ་སྟེ་ཐེག་པ་ཆེན་པོ་ནི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའོ། །བྱང་ཆུབ་ཀྱི་སེམས་
ཀྱི་གནས་སོ་ཞེས་པ་ནི་འཇིག་རྟེན་པའི་སེམས་བརྒྱད་ནས། ས་རབ་ཏུ་དགའ་བའི་སེམས་ཀྱི་བར་གྱི་རིམ་པ་དེ་རྣམས་རབ་ཏུ་ཤེས་སོ། །མི་མཉམ་པ་དང་མཉམ་པའི་གནས་སོ་ཞེས་པ་ལ། མི་མཉམ་པ་ནི་ནམ་མཁའ་སྟེ། ནམ་མཁའ་དེ་མཐའ་མེད་པས་ཅི་དང་ཡང་མི་མཉམ་པའོ། །ནམ་མཁའ་གང་དང་ཡང་མི་མཉམ་པ་དང༌། དེ་དང་མཉམ་པ་ནི་ཆོས་ཀྱི་དབྱིངས་སྟོང་པ་ཉིད་དེ། སྟོང་བ་ཉིད་ཀྱི་རང་བཞིན་དེ་ཤེས་པ་ནི་མི་མཉམ་པ་དང་མཉམ་པའི་གནས་སོ། །གདོན་མི་ཟ་བའི་གནས་ཞེས་པ་ནི་ཆོས་རྣམས་སྟོང་པ་ཉིད་ཀྱི་རང་བཞིན་དུ་ཕྱིན་ཅི་མ་ལོག་པར་ངེས་པར་ཤེས་པར་བྱའོ། །ཡང་དག་པར་རྫོགས་པའི་སངས་རྒྱས་ཀྱིས་གནས་སོ་ཞེས་པ་ནི་ས་དང་པོའི་བྱང་ཆུབ་ཀྱི་སེམས་ཆོས་ཐམས་ཅད་མཉམ་པ་ཉིད་དུ་ཆུད་པ་དེ་བླ་ན་མེད་པའི་བྱང་ཆུབ་དང་ཐ་མི་དད་དོ། །རོ་གཅིག་པས་ན་ཡང་དག་པར་རྫོགས་པའི་སངས་རྒྱས་སོ་ཞེས་པའོ། །མཐར་གྱིས་ཐེག་པ་ཆེན་པོ་མངོན་པར་སྒྲུབ་པའི་གནས་སོ་ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་འཇིག་རྟེན་པ་ངང་འཇིག་རྟེན་ལས་འདས་པའི་སེམས་འོག་མ་རྣམས་ཀྱང༌། ས་དང་པོའི་བྱང་ཆུབ་ཀྱི་སེམས་འདིའི་ནང་དུ་འདུས་ལས་དང་པོ་ནས་ཀུན་དུ་བཟང་པོའི་ས་མན་ཆད་ཀྱི་སེམས་ཀྱང་འདི་ལས་ཐ་མི་དད་པས་ན་དེ་རྣམས་ཀྱི་གནས་སུ་གྱུར་པས་ན་མཐར་གྱིས་ཐེག་པ་ཆེན་པོ་མངོན་པར་སྒྲུབ་པའི་གནས་ཞེས་པའོ། །མ་ལུས་པའི་ཡེ་ཤེས་འབྱུང་བ་ཆེན་པོ་འདི་ཐམས་ཅད་དུ་ཤེས་ན་སེམས་ཀྱིས་རིམ་པ་དེ་ཐམས་ཅད་ཇི་ལྟ་བ་ཉིད་དུ་རབ་ཏུ་ཤེས་པ་ནི་ས་དང་པོའི་བྱང་ཆུབ་ཀྱི་སེམས་དེ་ཐམས་ཅད་མཁྱེན་པའི་ཡེ་ཤེས་འབྱུང་བའི་གཙོ་བོ་བསམ་ལུས་པའི་ཡེ་ཤེས་འབྱུང་བ་ཆེན་པོ་ཞེས་པ་སྟེ། དེ་ལེགས་པར་ཤེས་པ་རྣམ་པར་སྣང་མཛད་ཀྱི་རྒྱུ་འཇིག་རྟེན་ལས་འདས་པའི་སེམས་ཀྱིས་རྒྱུད་ཐམས་ཅད་རབ་ཏུ་ཤེས་པར་གྱུར་བར་བསྟན་པའོ། །རྣམ་པར་སྣང་མཛད་ཆེན་པོ་མངོན་པར་བྱང་ཆུབ་པ་རྣམ་པར་སྤྲུལ་པའི་བྱིན་གྱིས་བརླབས་པའི་སེམས་ཀྱི་རྒྱུད་རིམ་པ་དང་པོའོ།། །།ད་ནི་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཐམས་ཅད་མཁྱེན་པའི་ཡེ་ཤེས་དེས་མཐའ་ཡས་པའི་སེམས་ཅན་གྱི་
ཁམས་རྣམས་ཚུལ་སྣ་ཚོགས་དང་བསམ་པ་སྣ་ཚོགས་དང་ཐབས་སྣ་ཚོགས་ཀྱིས་བླ་ན་མེད་པར་བསྒྲལ་བའི་ཕྱིར་སྔོན་གྱི་སྨོན་ལམ་གྱི་ཤུགས་ཀྱིས་ལྷུན་གྱིས་གྲུབ་པ་ཉིད་དུ་སྐུ་མཉམ་པ་ཉིད་མི་ཟད་པའི་རྒྱན་གྱི་འཁོར་ལོས་ཁམས་གསུམ་ཐམས་ཅད་དུ་ཁྱབ་པར་མཛད་པ། བཅོམ་ལྡན་འདས་རང་བཞིན་གྱི་དཀྱིལ་འཁོར་དེ། བྱང་ཆུབ་སེམས་དཔའ་ཆེན་པོ་འཕགས་པ་ཀུན་དུ་བཟང་པོ་དང༌། ཕྱག་ན་རྡོ་རྗེ་ལ་སོགས་པ་ཡོངས་སུ་དག་པ་རྣམས་ཀྱིས་མངོན་སུམ་དུ་མཐོང་ཞིང་སྤྱོད་ཡུལ་དུ་གྱུར་ན། འགྲོ་བ་འོག་མ་རྣམས་ཀྱིས་བཅོམ་ལྡན་འདས་ཀྱི་སྐུ་ལ་སོགས་པའི་འཁོར་ལོ་དེ་སྤྱོད་ཡུལ་དུ་མ་གྱུར་ཏེ། སེམས་ཅན་དེ་རྣམས་ཀྱི་དོན་དུ་སྐུ་ལ་སོགས་པའི་འཁོར་ལོ་དེ་རྣམས་དཀྱིལ་འཁོར་དང་སྔགས་དང་ཕྱག་རྒྱ་ལ་སོགས་པར་བྱིན་གྱིས་བརླབས་པར་བཅོམ་ལྡན་འདས་ལ་ཕྱག་ན་རྡོ་རྗེ་ས་གསོལ་པས་འཆད་དེ། གསོལ་པ་དེ་ཡང་དེ་ནས་ཕྱག་ན་རྡོ་རྗེ་གསང་བའི་བདག་པོས་བཅོམ་ལྡན་འདས་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ་ཞེས་པ་ནས་དེང་ཡང་བཅོམ་ལྡན་འདས་ཀྱིས་སྙིང་རྗེ་ཆེན་པོའི་སྙིང་པོ་འབྱུང་བ། དཀྱིལ་འཁོར་གྱི་རྒྱལ་པོ་ཡོངས་སུ་རྫོགས་པའི་ཕྱིར་མ་འོངས་པ་ན། སེམས་ཅན་མང་པོའི་དོན་དང༌། ཕན་པ་དང་བདེ་བར་འགྱུར་བའི་ཕྱིར་སྔགས་སྤྱོད་པའི་ཚུལ་དེ་བཤད་དུ་གསོལ་ཞེས་པའི་བར་དུ་སྟེ། བཅོམ་ལྡན་འདས་ཀྱིས་བཅོམ་ལྡན་འདས་ཉིད་མངོན་པར་རྫོགས་པར་སངས་རྒྱས་ནས་ཆོས་ཀྱི་དབྱིངས་བསམ་གྱིས་མི་ཁྱབ་པ། སེམས་ཅན་གྱི་ས་ལས་འདས་པ་དེ་ཐུགས་སུ་ཆུད་པ་སྐུ་ལ་སོགས་པའི་འཁོར་ལོས་སེམས་ཅན་གྱི་ཁམས་ཐམས་ཅད་དུ་ཁྱབ་པར་སེམས་ཅན་རྣམས་སོ་སོའི་དང་པ་དང་རྗེས་སུ་མཐུན་པ་སོ་སོའི་བསམ་པ་ཡོངས་སུ་རྫོགས་པར་བྱེད། རྣམ་པར་སྤྲུལ་པ་ཕྱག་ན་རྡོ་རྗེ་ཇི་ལྟར་མཐོང་ཞིང་ཆུད་པ་དེ་བཅོམ་ལྡན་འདས་ལ་སླར་བཟླས་ཏེ། གསོལ་བ་ལ་བྱ་སྟེ། དེ་ལྟར་སླར་བཟླས་པ་ཡང་ཚུལ་གྱིས་སྟོན་པས། ཅི་བཤད་པ་རྣམས་ཉན་པ་པོས་མཇལ་ཏོ་བར་སླར་མཉན་ན། སྟོན་པ་པོ་ཡང་སྤྲོ་ལ་སྐབས་འོག་མ་མཚམས་སྦྱར་བ་ལ་བདེ་བའི་ཕྱིར་རོ། །ངོ་མཚར་ཆེའོ་ཞེས་པ་ནི། དེ་ལྟར་སྟོང་པ་ཉིད་བརྗོད་ཅིང་སྤྱད་པ་ལས་འདས་པ་ཆུད་
ཀྱང། སྐུ་ལ་སོགས་པའི་རྒྱན་གྱི་ཚུལ་སྣ་ཚོགས་དང༌། བསམ་པ་སྣ་ཚོགས་དང༌། ཐབས་སྣ་ཚོགས་སུ་སྤྲུལ་པ་དེ་ངོ་མཚར་ཆེ་བ་ལ་བྱའོ། །བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་ནས་ཞེས་པ་ནི། ཆོས་ཀྱི་དབྱིངས་བས་མ་གྱིས་མི་ཁྱབ་པ་དེ་གཞན་ལས་མཉན་ཏེ། ཐུགས་སུ་ཆུད་པ་མ་ཡིན་གྱི། བཅོམ་ལྡན་འདས་ཉིད་ཀྱིས་ཐུགས་སུ་ཆུད་པ་ལ་བྱའོ། །དེ་ཡང་བཅོམ་ལྡན་འདས་ཀྱིས་སྙིང་རྗེ་ཆེན་པོའི་སྙིང་རྗེ་འབྱུང་བ། དཀྱིལ་འཁོར་གྱི་རྒྱལ་པོ་ཡོངས་སུ་རྫོགས་པའི་ཕྱིར་མ་འོངས་པ་ན། སེམས་ཅན་མང་བོའི་དོན་དང་ཕན་པ་དང་བདེ་བར་འགྱུར་བའི་ཕྱིར་སྔགས་སྤྱོད་པའི་ཚུལ་བཤད་དུ་གསོལ་ཞེས་པ་ནི་རང་བཞིན་གྱི་དཀྱིལ་འཁོར་སྐུ་ལ་སོགས་པའི་འཁོར་ལོ་དེ་བདག་ཅག་གིས་ཆུད་ཅིང་སྤྱོད་ཡུལ་དུ་འགྱུར་ན་མ་འོངས་པའི་འགྲོ་བ་རྣམས་ཀྱི་དོན་དུ་སྐུ་ལ་སོགས་པའི་འཁོར་ལོ་དེ་རྣམས་དཀྱིལ་འཁོར་དེའི་སྔགས་དང་ཕྱག་རྒྱའི་སྒོ་ནས་འགྲོ་བ་དེ་རྣམས་ཀྱི་སྤྱོད་ཡུལ་དུ་འགྱུར་བར་བྱིན་གྱིས་བརླབ་པའི་གསོལ་བ་ལ་བྱ་སྟེ། སྙིང་རྗེ་ཆེན་པོ་འབྱུང་ཞེས་པ་ནི་དཀྱིལ་འཁོར་ཆེན་པོ་ལས་འབྱུང་བ་ལ་བྱའོ། །དཀྱིལ་འཁོར་ཞེས་ནི་འོག་ནས་གཞུང་ཉིད་ལས་བཤད་དོ། །རྒྱལ་པོ་ཞེས་པ་ནི་དེ་ལས་གཞན་པའི་བྱང་ཆུབ་སེམས་དཔའ་ལ་སོགས་པའི་དཀྱིལ་འཁོར་ཀུན་ཀྱང་དཀྱིལ་འཁོར་ཆེན་པོ་འདིའི་ནང་དུ་འདུས་པས་ན་རྒྱལ་པོ་ཞེས་བྱའོ། །ཡོངས་སུ་རྫོགས་པའི་ཕྱིར་ཞེས་པ་ནི་དཀྱིལ་འཁོར་གྱི་སྒོ་ནས་སྒྲུབ་པ་ལྷ་མཉེས་པར་བྱ་བའི་སྤྱོད་ཡུལ་བ་རྣམ་པ་བཅུ་དྲུག་གིས་བདག་གི་ལྷ་མཉེས་པར་བྱ་བ་དང་སྒྲུབ་པའི་སྒོ་ནས་བསླབ་པའི་ཡན་ལག་བཞི་དང་རང་གི་སེམས་ཡོངས་སུ་སྦྱང་བ་ལ་སོགས་པའི་སྤྱོད་པའི་ལྷ་མཉེས་པར་བྱ་སྟེ། རིག་འཛིན་ལ་སོགས་པའི་གྲུབ་པ་ཐོབ་ནས་རིམ་གྱིས་སངས་རྒྱས་པར་འགྲུབ་པ་དང་རང་གི་སེམས་ཡོངས་སུ་སྦྱངས་པས་མངོན་དུ་བ་དང༌། ཕ་རོལ་ཏུ་ཕྱིན་པ་ལ་སོགས་པ་སྤྱད་པ་རྫོགས་ནས། ཐམས་ཅད་མཁྱེན་པའི་ཡེ་ཤེས་རྙེད་པར་འགྱུར་བ་ནི་དཀྱིལ་འཁོར་ཏེ་ཡོངས་སུ་རྫོགས་པ་ལ་བྱའོ། །མ་འོངས་པའི་སེམས་ཅན་མང་པོའི་དོན་དང་ཕན་པ་དང་བདེ་བར་འགྱུར་བའི་ཕྱིར་སྔགས་སྦྱར་བའི་ཚུལ་དེ་བཤད་དུ་གསོལ། ཞེས་པ་ནི་མ་
འོངས་པའི་སེམས་ཅན་དེ་རྣམས་ཀྱི་དཀྱིལ་འཁོར་ཡོངས་སུ་རྫོགས་པའི་མཚན་ཉིད་ཐམས་ཅད་མཁྱེན་པ་ཉིད་ཀྱི་ཡེ་ཤེས་དེ་ཐོབ་པའི་ཕྱིར་དཀྱིལ་འཁོར་དེ་བཤད་དུ་གསོལ་ལོ་ཞེས་པ་སྟེ་དོན་གྱི་ཕྱིར་ཞེས་པ་ནི། ཐམས་ཅད་མཁྱེན་པའི་ཡེ་ཤེས་ཐོབ་པའི་དོན་གྱི་ཕྱིར་བྱའོ།། ཕན་པའི་ཕྱིར་ཞེས་པ་ནི་ཚེ་ཕྱི་མ་ལ་ཕན་པའི་ཕྱིར་བྱའོ། །བདེ་བའི་ཕྱིར་ཞེས་པ་ནི་ཚེ་འདི་ལ་བདེ་བའི་ཕྱིར་རོ། །ཡང་ན་དོན་གྱི་ཕྱིར་ཞེས་པ་ནི་ཕན་པ་དང་བདེ་བའི་དོན་གྱི་ཕྱིར་ཡང་བྱའོ། །སྔགས་སྤྱད་པའི་ཚུལ་ཞེས་པ། སྔགས་ཀྱི་སྤྱད་པ་ནི་དཀྱིལ་འཁོར་དང་སྒྲུབ་པ་ལ་སོགས་པ་སྟེ་དེ་དག་ཉིད་ཚུལ་ལོ། །ཚུལ་ཞེས་པ་ནི་རྒྱ་གར་སྐད་ཀྱི་གཞུང་དང་སྦྱར་ན་འགྲོ་བའམ་ཐོབ་པ་ལ་བྱ་སྟེ། སྔགས་སྤྱད་པ་དེས་བླ་ན་མེད་པའི་སངས་རྒྱས་པར་འགྲོ་བའམ་ཐོབ་པ་དེ་བཤད་དུ་གསོལ་ཞེས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་འཁོར་དེ་དག་ཐམས་ཅད་ལ་གཟིགས་ནས་ཞེས་པ་ནི་འཁོར་བྱང་ཆུབ་སེམས་དཔའ་དེའི་ནང་ནས་གཡེང་བ་ཡོད་དམ་མེད་པ་དང༌། སྣོད་དུ་མི་འགྱུར་བའི་ཉན་པ་ཡོད་དམ་མེད་བརྟག་པའི་ཕྱིར་གཟིགས་པ་ལ་བྱ་སྟེ། བཅོམ་ལྡན་འདས་རྣམ་པར་སྣང་མཛད་ཀྱི་འཁོར་བྱང་ཆུབ་སེམས་དཔའ་ཡོངས་སུ་དག་པ་ཤ་སྟག་ན་ཅིའི་ཕྱིར་གཡེང་བ་དང༌། །སྣོད་དུ་མི་འགྱུར་བ་འབྱུང་ཞེ་ན། དེའི་དགོངས་པ་འདི་ལྟ་སྟེ། བཅོམ་ལྡན་འདས་འཁོར་བྱང་ཆུབ་སེམས་དཔའ་དེ་རྣམས་ལ་གཡེང་བ་དང་སྣོད་དུ་མི་འགྱུར་བ་མེད་མོད་ཀྱི། མ་འོངས་པའི་དུས་ན་ཆོས་ཉན་པ་རྣམས་ལ་དེ་ལྟ་བུ་སྲིད་པས་དེ་དག་ལ་བརྟག་པའི་ཚུལ་བསྟན་པའི་ཕྱིར་རོ། །ཕྱག་ན་རྡོ་རྗེ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་བའི་དཀྱིལ་འཁོར་སྤྱད་པ་བཤད་པའི་ཆོས་ཀྱི་གཞུང་ཉོན་ཅིག་པ་ནི། དཀྱིལ་འཁོར་གྱི་སྒོ་ནས་ལྷ་མཉེས་པར་བྱ་བའི་སྤྱོད་པའི་རྣམ་པ་བཅུ་དྲུག་བཤད་པ་དང༌། དེ་བཞིན་དུ་རིམ་གྱིས་སྒྲུབ་པའི་སྒོ་ནས་ལྷ་མཉེས་པར་བྱ་བའི་སྤྱོད་པ་བཟླས་པ་ཡན་ལག་བཞི་དང༌། རང་གི་སེམས་ཡོངས་སུ་སྦྱང་བར་བྱས་པས་ལྷ་མཉེས་པར་འགྱུར་ཏེ། རིག་འཛིན་ལ་སོགས་པའི་གྲུབ་པ་མངོན་དུ་ཐོབ་ནས་རིམ་གྱིས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་བས་ན་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་
པའི་དཀྱིལ་འཁོར་ཞེས་བྱའོ། །དཀྱིལ་འཁོར་སྤྱད་བ་ཞེས་པ་ནི་དཀྱིལ་འཁོར་བྲི་བ་ལ་སོགས་པའི་སྤྱད་པ་རྣམ་པ་བཅུ་དྲུག་ལ་སོགས་པའོ། །ཚུལ་ནི་སྔར་བཤད་པའོ། །གཞུང་ཞེས་པ་ནི་ངོན་གྱི་དངོས་པོ་གཅིག་ལ་ཚིག་མང་པོའི་སྒོ་ནས་དམིགས་བསྟན་པ་ལ་བྱ་སྟེ། དེ་ཡང་སྐབས་འདིར་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བ་ནི། ཕ་རོལ་ཕྱིན་པ་ལ་སོགས་པའི་སྒོ་ནས་ཀྱང་འགྱུར། སྔགས་སྤྱད་པའི་སྒོ་ནས་ཀྱང་འགྱུར་ཏེ། དེ་བས་ན་དཀྱིལ་འཁོར་བཤད་པའི་ཚུལ་བཤད་པའི་ཆོས་ཀྱི་གཞུང་ཞེས་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆོས་ཀྱི་དབྱིངས་ཀྱི་དོན་མ་རྫོགས་པས་སེམས་ཅན་གྱི་ཁམས་མ་ལུས་པར་གདོན་པར་ཡི་དམ་བཅས་ནས་ཞེས་པ་ནས། དེ་དག་བྱུང་ནས་ཕྱོགས་བཅུ་ཀུན་དུ་བསྐོར་ཏེ། སླར་ལོག་ནས་བཅོམ་ལྡན་འདས་ཀྱི་སྐུ་ལ་སོ་སོའི་གནས་སུ་སླར་ཞུགས་སོ་ཞེས་པའི་བར་དུ་མ་འོངས་པའི་འགྲོ་བ་རྣམས་ཀྱི་དོན་དུ་སྙིང་རྗེ་ཆེན་པོ་འབྱུང་བའི་དཀྱིལ་འཁོར་བྲི་བའི་ཕྱིར་རང་བཞིན་གྱི་དཀྱིལ་འཁོར་འབྱུང་བའི་ཏིང་ངེ་འཛིན་བསྟན་པ་ལ་བྱ་སྟེ། ཏིང་ངེ་འཛིན་བསྟན་པ་ཡང་སྙིང་རྗེ་ཆེན་པོ་འབྱུང་བའི་དཀྱིལ་འཁོར་བྲི་བའི་སློབ་དཔོན་གྱི་ཏིང་ངེ་འཛིན་འདི་ལྟ་བུ་མངོན་དུ་བྱ་སྟེ། དེ་ནས་ས་ཚོན་གྱི་གཟུགས་ཀྱི་ཆ་ལུགས་ལ་སོགས་པའི་དཀྱིལ་འཁོར་བྲི་བའི་ཚུལ་བསྟན་པའོ། །དེ་ལ་བཅོམ་ལྡན་འདས་རྣམ་པར་སྣང་མཛད་ཆོས་ཀྱི་དབྱིངས་ཀྱི་དོན་མ་རྫོགས་པ་ཞེས་པ། ཆོས་ཀྱི་དབྱིངས་ནི་སྟོང་པ་ཉིད་དེ། དེ་བཞིན་ཉིད་ཡང་དག་པའི་མཐའ་སྟེ། དེའི་དོན་ནི་སྐུ་ལ་སོགས་པ་མི་ཟད་པའི་རྒྱན་གྱིས་སེམས་ཅན་གྱི་ཁམས་ཐམས་ཅད་ཀུན་དུ་ཁྱབ་པར་བསྟན་ནས། སེམས་ཅན་དེ་རྣམས་བླ་ན་མེད་པའི་བྱང་ཆུབ་ཏུ་བསྒྲལ་བར་བྱ་སྟེ། སེམས་ཅན་དེ་རྣམས་ཀྱང་མ་ལུས་པར་མ་བསྒྲལ་བ་ནི་དོན་མ་རྫོགས་པ་ལ་བྱའོ། །སེམས་ཅན་གྱི་ཁམས་མ་ལུས་པར་གདོན་པར་ཡི་དམ་བཅས་ཞེས་པ་ནི། དེ་ལྟར་ཆོས་ཀྱི་དབྱིངས་ཀྱི་དོན་དེ་མ་རྫོགས་པར་ཟད་པ་མ་ཡིན་གྱི། བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐུགས་ཡིད་མ་མཛད་པ་ནི། བདག་གིས་བྱང་ཆུབ་ཐོབ་ནས་སེམས་ཅན་ཡང་བསྒྲལ་བར་བྱའོ། །དེ་བས་ན་སེམས་ཅན་གྱི་ཁམས་
མ་ལུས་པར་གདོན་པར་ཡི་དམ་བཅས་ཞེས་སོ། །དེ་བཞིན་གཤེགས་པ་ཐམས་ཅད་དང་མོལ་ཏེ་ཞེས་པ་ནི་འདས་པ་དང་མ་འོངས་པ་དང་ད་ལྟར་བཞུགས་པའི་སངས་རྒྱས་རྣམས་ཚོགས་དང༌། ཆོས་ཀྱི་སྐུ་འགྲོ་བའི་དོན་བྱེད་པར་སངས་རྒྱས་ཐམས་ཅད་མཉམ་པ་ཉིད་དེ། དེ་བས་ན་སངས་རྒྱས་ཐམས་ཅད་གསུང་གཅིག་ཏུ་འབད་པར་བསྟན་པའོ། །གཉིས་སུ་ན་དེ་བཞིན་གཤེགས་པ་ཐམས་ཅད་མོལ་ཏེ་ཞེས་པ་ནི། ཆོས་ཀྱི་དབྱིངས་དེ་བཞིན་ཉིད་མངོན་དུ་བྱས་ནས་ཞེས་པའོ། །ཡང་ན་དེ་བཞིན་གཤེགས་པ་ཐམས་ཅད་དང་མོལ་ཏེ་ཞེས་པ་ནི་མ་འོངས་པའི་འགྲོ་བ་ང་རྒྱལ་ཅན་རྣམས་ང་རྒྱལ་བཅག་པ་དང༌། ཞུ་བླག་མི་བྱེད་པ་རྣམས་བླ་མ་དང་གྲོགས་པོ་ལ་དྲི་ཞིང་ཞུ་བླག་བྱེད་པར་བརྩོན་པ་སྐྱེད་པའི་ཕྱིར་ཏེ། དེ་བཞིན་གཤེགས་པ་ཐམས་ཅད་མཁྱེན་པ་ཡང་གཞན་དང་བཀའ་བགྲོས་མཛད་ཅིང་ཆོས་སྟོན་ན་བདག་ཅག་ཚོད་ལྟ་ཅི་ཞིག་སྙམ་ནས་ང་རྒྱལ་བཅག་ནས་གཞན་ལ་འདྲི་བ་ལ་བརྩོན་པར་འགྱུར་རོ། །སྙིང་རྗེ་ཆེན་པོའི་སྙིང་པོ་འབྱུང༌། །ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་ཏིང་ངེ་འཛིན་དེ་ལས་སྙིང་རྗེ་ཆེན་པོའི་སྙིང་པོ་འབྱུང་བའམ་སྙིང་རྗེ་ཆེན་པོ་ཏིང་ངེ་འཛིན་འབྱུང་བ་ལ་བྱའོ། །ཏིང་ངེ་འཛིན་ལ་ཞུགས་མ་ཐག་ཏུ། བཅོམ་ལྡན་འདས་ཡན་ལག་ཐམས་ཅད་ནས། དེ་བཞིན་གཤེགས་པའི་སྐུ་དང་པོ་སེམས་བསྐྱེད་ནས་ས་བཅུའི་བར་དུ་སེམས་ཅན་གྱི་དོན་བྱེད་པ་འབྱུང་ངོ༌། །དེ་དག་བྱུང་ནས་ཕྱོགས་བཅུ་ཀུན་དུ་བསྐོར་ཏེ་སླར་ལོག་ནས་བཅོམ་ལྡན་འདས་ཀྱི་སྐུ་སོ་སོའི་གནས་སུ་སླར་ཞུགས་སོ་ཞེས་པ་ནི་བཅོམ་ལྡན་འདས་ཏིང་ངེ་འཛིན་དུ་བཞུགས་པ་དེ་ལ། བ་སྤུའི་བུ་ག་རེ་རེ་ནས་ཀྱང་དེ་བཞིན་གཤེགས་པའི་སྐུ་འདྲ་བ་རྣམ་པར་སྤྲུལ་པ་འབྱུང་སྟེ། སེམས་ཅན་གྱི་དོན་བྱེད་པ་ནི་ས་དང་པོ་ནས་བརྩམས་ནས་ས་བཅུ་ཡོངས་སུ་རྫོགས་པར་འགྱུར་བའི་ཕྱིར་རོ། །དེ་དག་སླར་བཅོམ་ལྡན་འདས་ཀྱི་སྐུ་ལ་སོ་སོའི་གནས་སུ་ཞུགས་པ་ཡང༌། ཏིང་ངེ་འཛིན་བརྟན་པའི་མཐུས་བ་སྤུའི་བུ་ག་གང་ནས་བྱུང་བ་དེ་ཉིད་དུ་སླར་མ་འཁྲུལ་པར་ཞུགས་པའོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཕྱག་ན་རྡོ་རྗེ་དཀྱིལ་འཁོར་བྲི་བ་ཉོན་ཅིག་ཅེས་པ་ནི་ཏིང་ངེ་འཛིན་དེ་ལས་
བཞེངས་ནས། ཕྱག་ན་རྡོ་རྗེ་ལ་དཀྱིལ་འཁོར་བཤད་པ་ལ་བྱ་སྟེ། དཀྱིལ་འཁོར་བྲི་བ་བཤད་པ་དེ་ཡང་རྒྱུ་དང་རང་བཞིན་དང་འབྲས་བུ་རྣམ་པ་གསུམ་དུ་བལྟ་སྟེ། དེ་ལ་རྒྱུ་ནི་སློབ་དཔོན་ནོ། །རང་བཞིན་ནི་དཀྱིལ་འཁོར་ས་དཔྱད་ཅིང་བྲི་བ་ལ་སོགས་པའོ། །འབྲས་བུ་ནི་སློབ་མ་གཟུང་ཞིང་དབང་བསྐུར་བ་ལ་སོགས་པའོ། །དེ་ལ་དཀྱིལ་འཁོར་བྲི་བའི་རྒྱུ་ནི་གཙོ་བོ་ནི་སློབ་དཔོན་གྱི་ཡིན་ཏེ། དེ་བས་ན་སློབ་དཔོན་གྱི་མཚན་ཉིད་ཐོག་མར་བཤད་དོ། །སློབ་དཔོན་གྱི་མཚན་ཉིད་བཤད་དེ། སློབ་དཔོན་དུ་འཇུག་པའི་ཡོན་ཏན་གྱི་མཚན་ཉིད་དང༌། སློབ་དཔོན་དུ་རྫོགས་པའི་ཡོན་ཏན་གྱི་མཚན་ཉིད་དང༌། དེ་རབ་ཏུ་དབྱེ་བའི་མཚན་ཉིད་དེ། སློབ་དཔོན་དུ་འཇུག་པའི་མཚན་ཉིད་ནི་བྱང་ཆུབ་ཀྱི་སེམས་སུ་སོང་བའི་ཡིད་དང་ལྡན་པ་ལ་སོགས་པའོ། །སློབ་དཔོན་དུ་རྫོགས་པའི་མཚན་ཉིད་ནི་ལུང་ཐོབ་ཅིང་དབང་བསྐུར་བ་ཞེས་བྱའོ། །རབ་ཏུ་དབྱེ་བའི་མཚན་ཉིད་ནི་བྱང་ཆུབ་ཀྱི་སེམས་ལ་གནས་པ་ཞེས་པའོ། །དེ་ཡང་ལུས་ཀྱི་ཡོན་ཏན་དང༌། ངག་གི་ཡོན་ཏན་དང་ཡིད་ཀྱི་ཡོན་ཏན་དང་གསུམ་སྟེ། གར་རིགས་པར་སྦྱོར་བར་བྱའོ། །དེ་ལ་བྱང་ཆུབ་ཀྱི་སེམས་སུ་སོང་བའི་ཡིད་དང་ལྡན་ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་སྟོང་པར་འཇིག་པར་འཇུག་པ་དང་ལྡན་པའོ། །ཤེས་རབ་དང་ལྡན་ཞེས་པ་ནི་ཤེས་རབ་རྣམ་པ་གཉིས་ཏེ། རང་བཞིན་གྱིས་ཤེས་རབ་རྣོ་བ་དང༌། མཉན་པ་དང༌། བསམ་པ་ལ་སོགས་པའི་ཤེས་རབ་སྟེ། དེ་དག་གང་ཡང་རུང་བ་དང་ལྡན་པའོ། །སྙིང་རྗེ་ཅན་ཞེས་པ་ནི་སྙིང་རྗེ་ནི་སེམས་ཅན་སྡུག་བསྔལ་བ་ལས་འདོན་པ་སྟེ། དེ་ཡང་རང་བཞིན་གྱིས་སྙིང་རྗེ་ཅན་དང་མངོན་པར་འདུས་བྱས་པའི་སྙིང་རྗེ་སྟེ། དེ་དང་ལྡན་པའོ། །ཐབས་ལ་མཁས་པ་ཞེས་པ་ནི་སྦྱོར་བ་འཇིག་རྟེན་གྱི་སྒྲ་ཐབས་ལ་སོགས་པ་རྣམ་པ་མང་སྟེ། སྐབས་འདིར་ནི་དཀྱིལ་འཁོར་བྲི་བ་དང༌། མཆོད་པའི་ཡན་ལག་རྣམས་ལ་མཁས་པ་ལ་བྱའོ། །རྟག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་མཁས་པ་ཞེས་པ་ནི། དོན་དམ་པ་དང་ཀུན་རྫོབ་རྣམ་པ་གཉིས་ཀྱི་ཚུལ་གྱིས་མཁས་ཏེ། དོན་དམ་པར་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཐམས་ཅད་ཐོག་མ་ནས་མ་བྱུང་མ་སྐྱེས་པ་སྟོང་པ་ཉིད་ཀྱི་རང་བཞིན་དུ་བསྒོམ་པ་ལ་མཁས་པའོ། །ཀུན་
རྫོབ་ཏུ་ནི་དེ་ལྟར་ཤེས་རབ་སྟོང་པ་ཉིད་ཀྱི་བསྒོམ་པ་ལས་ལང་ས་ནས། སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་སྤྱད་ནས། དེ་ལ་ཡང་མི་ཆགས་པར་འཁོར་གསུམ་ཡོངས་སུ་དག་པའི་ཚུལ་དུ་སྦྱོར་བ་ལ་མཁས་པའོ། །ཐེག་པ་གསུམ་འབྱེད་ཤེས་པ་ཞེས་བྱ་བ་ནི་ཉན་ཐོས་ཀྱི་ཐེག་པ་གང་ཟག་བདག་མེད་པར་ཆུད་ནས་ཕུང་པོ་དང་ཁམས་ལ་སོགས་པ་མི་རྟག་པ་དང༌། སྡུག་བསྔལ་བ་དང་བདག་མེད་པར་ཆུད་པ་དང༌། རང་སངས་རྒྱས་ཀྱི་ཐེག་པ་ཕུང་པོ་ལ་སོགས་པ་དེ་རྣམས་ཀྱང་རྟེན་ཅིང་འབྲེལ་བར་འབྱུང་བའི་རང་བཞིན་དུ་ཆུད་པ་དང༌། །ཐེག་པ་ཆེན་པོའི་ཆོས་ཐམས་ཅད་ཐོག་མ་ནས་མ་བྱུང་མ་སྐྱེས་པར་ཆུད་པ་རྣམས་ཀྱིས་མཚན་ཉིད་བྱེ་བྲག་ཏུ་འབྱེད་མཁས་པ་ལ་བྱའོ། །དེ་ལ་སྤྱིར་ཐེག་པ་གཅིག་ལ་གསུམ་དུ་དབྱེར་ཅི་ཡོད་ཅེ་ན། ཐེག་པ་ཉིད་གསུམ་དུ་དབྱེ་བ་ལ་ནི་མི་བྱའི། ཉན་ཐོས་དང་རང་སངས་རྒྱས་རྣམས་སོ་སོར་ཇི་ལྟར་ཆུད་པའི་མཚན་ཉིད་འབྱེད་མཁས་པ་ལ་བྱའོ། །སྔགས་ཀྱི་དེ་ཁོ་ན་ཉིད་ལ་མཁས་པ་ཞེས་པ་ནི་སྔགས་རྣམས་སྤྱིའི་དེ་ཁོ་ནའི་མཚན་ཉིད་ནི་བྱང་ཆུབ་ཀྱི་སེམས་ཏེ། དེ་ལ་མཁས་པ་དང་སྔགས་དང་ཡི་གེ་ས་བོན་དང་ཏིང་ངེ་འཛིན་རྣམས་ལ་མཁས་པ་སྟེ། སྔགས་ལ་མཁས་པའི་སྔགས་ཀྱི་ཚིག་རྣམས་བསྐུལ་བ་དང་ཕྱག་རྒྱའི་རང་བཞིན་ལ་འབྱེད་མཁས་པའོ། །ཡི་གེ་ས་བོན་ལ་མཁས་པ་ནི། ལྷ་རྣམས་སོ་སོའི་ས་བོན་སྙིང་པོ་གང་ཡིན་པ་དང༌། དེ་རྣམས་ཀྱི་ཏིང་ངེ་འཛིན་གྱི་སྒོ་དང་ལས་གང་ཡིན་པ་ལ་མཁས་པའོ། །ཏིང་ངེ་འཛིན་ལ་མཁས་པ་ནི་ཏིང་ངེ་འཛིན་དུ་ཞུགས་པ་ལས་དབང་ཆེན་དང༌། ཆུ་ལ་སོགས་པའི་དཀྱིལ་འཁོར་བཀོད་ཅིང་དེ་རྣམས་ཀྱིས་ལས་བསྒྲུབ་པ་ལ་མཁས་པའོ། །བསམ་པ་ཤེས་པ་ནི་སློབ་མ་རྣམས་ཀྱི་བསམ་པ་ཤེས་པ་སྟེ། དེ་ཡང་ཕ་རོལ་གྱི་སེམས་ཤེས་པའི་ཚུལ་གྱིས་ཤེས་པ་ལ་ནི་མི་བྱའི། སྔགས་ཀྱིས་ཆ་བརྟགས་པའི་ཚུལ་གྱིས་སློབ་མ་རྣམས་ཀྱི་སྤྱོད་པ་དང༌། ཚུལ་ལ་བརྟགས་ན་ལྷ་ཞི་བ་དང་ཁྲོ་བོ་རྣམས་གང་ལ་བསྙེན་པར་འོས་པ་དང༌། གྲུབ་པ་རབ་འབྲིང་གསུམ་ལས་གང་བསྒྲུབ་པར་འོས་པ་ལ་སོགས་པའི་ཚུལ་ལ་མཁས་པའོ། །སངས་རྒྱས་དང་བྱང་ཆུབ་སེམས་དཔའ་རྣམས་ལ་དད་པ་
ཞེས་པ་ནི་དེ་རྣམས་ཀྱི་ཡོན་ཏན་ལ་མོས་ཤིང་ཡིད་ཆེས་པའོ། །དཀྱིལ་འཁོར་འདྲི་བའི་ལས་བྱེད་བར་ལུང་ཐོབ་ཅིང་དབང་བསྐུར་ཞེས་པ་ལ་དབང་བསྐུར་བ་ནི་དབང་བསྐུར་བའི་དཀྱིལ་འཁོར་དུ་དྲི་དང་མེ་ཏོག་དང་སྨན་དང་རིན་པོ་ཆེ་ལ་སོགས་པས་བརྒྱན་པའི་བུམ་པར་ཆུ་བླུགས་ཏེ་དབང་བསྐུར་བ་ལ་བྱ། ལུང་ཐོབ་པ་ནི་དེ་ལྟར་དབང་བསྐུར་ནས་དཀྱིལ་འཁོར་བྲི་བ་དང་སྒྲུབ་པ་ལ་སྤྱོད་པ་ཁྱོད་ཀྱིས་གྱིས་ཤིག་ཅེས་ཚིག་གིས་གནང་བའོ། །དེ་ལ་ལུང་ཐོབ་ཅིང་དབང་བསྐུར་ཞེས་པ་དབང་མ་བསྐུར་བར་ལུང་མི་ཐོབ་སྟེ། སྨོས་པས་དབང་བསྐུར་བ། མ་སྨོས་ཀྱང་ཞར་ལ་གོ་བར་འགྱུར་ནས། །གཉིས་ཀ་ཅིའི་ཕྱིར་སྨོས་ཤེ་ན། གདོན་ལ་སོགས་སེལ་བའི་ལས་ཕྲན་ཚོགས་ལ་དབང་མ་བསྐུར་ཀྱང་བྱོས་ཤིག་པའི་ལུང་ཐོབ་པ་སྲིད་ཀྱི། དེ་བས་ན་ལུང་ཐོབ་ཅིང་དབང་བསྐུར་ཞེས་སྨོས་པའོ། །བརྟན་པ་ཞེས་པ་ནི་ཤེས་པ་དང་ལོངས་སྤྱོད་ལ་སོགས་པ་དང་ལྡན་པ་ཡང་དེ་དག་གིས་དྲེགས་པར་མི་འགྱུར། དེ་དག་དང་མི་ལྡན་ན་ཡང་ཞུམ་པར་མི་འགྱུར་བའོ། །སྦྱོར་བ་ལ་མཁས་པ་ཞེས་བྱ་བ་ནི་སྒྲུབ་པ་དང་ཞི་བ་ལ་སོགས་པའི་ལས་ཀྱི་སྦྱོར་བ་ལ་མཁས་པའོ། །བྱང་ཆུབ་ཀྱི་སེམས་ལ་གནས་ཞེས་པ་ནི། སྟོང་པ་ཉིད་རྣམ་པར་མི་རྟོག་པའི་ཏིང་ངེ་འཛིན་ལ་གནས་ནུས་པའོ། །གསང་བའི་བདག་པོ་སློབ་དཔོན་དེ་ལྟ་བུ་དང་ལྡན་པ་དེ་ནི་རྒྱལ་བའི་བདག་ཉིད་ལས་སྐྱེས་པ་སྟེ། སངས་རྒྱས་བྱང་ཆུབ་སེམས་དཔས་ཀྱང་བསྔགས་སོ། །ཞེས་པ་ལ་སློབ་དཔོན་དེ་ལྟ་བུ་དང་ལྡན་པ་དང་ཞེས་པ་ནི། གོང་དུ་སྨོས་པའི་ཡོན་ཏན་རྣམས་དང་ལྡན་པའོ། །རྒྱལ་བའི་བདག་ཉིད་ལས་སྐྱེས་པ། །ཞེས་པ་ནི། རྒྱལ་བ་ནི་སངས་རྒྱས་བཅོམ་ལྡན་འདས་ཏེ་དེའི་བདག་ཉིད་ནི་ཆོས་ཀྱི་དབྱིངས་སོ། །ཆོས་ཀྱི་དབྱིངས་སྟོང་པ་ཉིད་ལ་མོས་པ་ལས་བྱུང་བ་ནི་རྒྱལ་བའི་བདག་ཉིད་ལས་སྐྱེས་པ་ཞེས་བྱའོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྔགས་སོ་ཞེས་པ་ནི་དེ་ལྟ་བུའི་ཡོན་ཏན་དང་ལྡན་པའི་སློབ་དཔོན་དེ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྔགས་སོ། །དེ་ལྟར་སློབ་དཔོན་དེ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྔགས་ན་མི་བསྔགས་པའི་སློབ་དཔོན་ཡོད་དམ་ཞེ་ན་ཡོད་དེ། སངས་རྒྱས་དང་བྱང་ཆུབ་སེམས་
དཔའ་རྣམས་ཀྱིས་བསྔགས་སོ་ཞེས་པའི་ཚིག་དེས་སློབ་དཔོན་རྣམ་པ་གཉིས་སུ་ཤེས་པར་བྱ་སྟེ། ཟབ་ཅིང་རྒྱ་ཆེ་བ་ལ་མོས་པ་དང་དམིགས་པ་ཅན་ནོ། །དེ་ལ་སྐབས་འདིར་སློབ་དཔོན་ཡོན་ཏན་དེ་ལྟ་བུ་དང་ལྡན་པ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྔགས་པ་ནི་ཟབ་ཅིང་རྒྱ་ཆེ་བའི་སློབ་དཔོན་ལ་བྱའོ། །དམིགས་པ་ཅན་གྱི་སློབ་དཔོན་གྱི་མཚན་ཉིད་ནི་འོག་ནས་སློབ་དཔོན་གཉི་གའི་མཚན་ཉིད་བཤད་པའི་སྐབས་སུ་ཤེས་པར་བྱའོ། །ད་ནི་སློབ་དཔོན་དེ་ལྟ་བུས་འཁོར་གཟུང་བའི་སློབ་མ་རྣམས་བརྟག་པར་བྱ་སྟེ། སློབ་མ་དེ་རྣམས་བརྟག་པ་ཡང་རང་བཞིན་གྱི་ཡོན་ཏན་དང་མངོན་པར་འདུས་བྱས་པའི་ཡོན་ཏན་གྱི་སྒོ་ནས་སོ། །དེ་བས་ན་གསང་བའི་བདག་པོ་སློབ་དཔོན་དེ་ལ་གཞན་ཞིག་གིས་བཅོལ་ཡང་རུང་ཞེས་པ་ནི་འོག་ནས་འབྱུང་བའི་མཚན་ཉིད་དང་ལྡན་པའི་སློབ་མ་རྣམས་ཀྱིས་གསོལ་བ་བཏབ་ཀྱང་རུང་ཞེས་པའོ། །ཡང་ན་སེམས་ཅན་གྱི་སྣོད་དུ་འགྱུར་བའི་དྲི་མ་མེད་པ་མཐོང་བ་ན། རང་གིས་བསྐུལ་མ་བཏབ་སྟེ། ཤེས་པ་ལ་སྣོད་དུ་འགྱུར་ཞེས་པ་ནི་སྔར་བཤད་པའི་སྣོད་དུ་འགྱུར་བའོ། །དྲི་མ་མེད་ཅེས་པ་ནི་སྡིག་པ་མེད་པ་སྟེ། དེ་ལ་སྡིག་པ་ནི་སེམས་ཀྱི་རྒྱུད་ལ་ཡོད་དེ། ཇི་ལྟར་སློབ་དཔོན་དེས་མཐོང་བར་འགྱུར་ཞེ་ན། སེམས་ཀྱི་རྒྱུད་དེ་ལ་གནས་པའི་སྡིག་པ་མེད་པར་མཐོང་བ་ལ་ནི་མི་བྱའི་སྡིག་པའི་རྒྱུ་མི་དགེ་བ་བཅུའི་ལས་ཀྱི་ལམ་མི་སྤྱོད་པར་མཐོང་བ་ནི་སྡིག་པ་མེད་པར་མཐོང་བའོ། །དེ་ལྟ་བུའི་སློབ་མ་མཐོང་ན་ཕས་མ་གསོལ་ཀྱང༌། སློབ་མ་དེའི་སྣོད་དུ་འགྱུར་བ་ཡིན་པས་འོག་ནས་འབྱུང་བའི་ཚིགས་སུ་བཅད་པས་ཆོས་བཤད་ཅིང་སྔགས་ཀྱི་ཚུལ་ལ་གཞག་པར་བྱའོ། །མང་དུ་མོས་པ་ཞེས་པ་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་སངས་རྒྱས་བཅོམ་ལྡན་འདས་ཀྱི་ཡོན་ཏན་གྱིས་ཆོས་རྣམས་མ་ཆུད་ཅིང་མངོན་དུ་མ་བྱས་ཀྱང་མཉན་པ་དང་བསྒོམ་པའི་སྒོ་ནས་འདི་ཉིད་ཡིན་གྱི་གཞན་མ་ཡིན་ནོ་ཞེས་པ་ནི་མོས་པ་མང་བའོ། །བསྟན་ཞེས་པ་ནི་གོང་དུ་སློབ་དཔོན་གྱིས་བསྟན་པ་ཉིད་བཤད་པ་དང་མཐུན་ནོ། །དད་པ་ཞེས་པ་ནི་དཀོན་མཆོག་གསུམ་ལ་ཡིད་ཆེས་པ་ཇི་བཞིན་པའོ། །སྔགས་བྱེད་པའི་ཚུལ་ལ་ཡིད་ཆེས་
པའི་དད་པའོ། །གཞན་ལ་ཕན་པར་དགའ་ཞེས་པ་ནི་སྙིང་རྗེ་ཆེན་པོ་དང་ལྡན་པ་སྟེ། གཞན་སྡུག་བསྔལ་བ་ལས་བྲལ་བར་དགའ་བ་དེ་ལྟ་བུ་དང་ལྡན་པའི་སློབ་མར་ཤེས་ཤིང་མཐོང་ན། རང་གིས་བསྐུལ་མར་བཏབ་སྟེ་ཞེས་པ་གོང་དུ་སྨོས་པའི་ཡོན་ཏན་གྱི་མཚན་ཉིད་དང་ལྡན་པར་མཐོང་ནས་ཞེས་པའོ། །བོས་པ་ལ་འདི་སྐད་ཅེས་སྨྲོས་ཤིག་ཅེས་པ་ནི་གལ་ཏེ་སློབ་མ་དེ་བདག་ཅག་སྔགས་གྲུབ་པའི་འབྲས་བུ་ཞིག་རིག་འཛིན་ལ་སོགས་པ་འདོད་པ་མ་ཡིན་གྱི། བླ་ན་མེད་པའི་བྱང་ཆུབ་ཐོབ་པར་འདོད་དོ་སྙམ་དུ་སེམས་པ་ལ། སྔགས་ཀྱི་སྒོ་ནས་བླ་ན་མེད་པའི་བྱང་ཆུབ་ཐོབ་པའི་མཚན་ཉིད་ཀྱི་ཆོས་ཤོད་ཅིག་ཅེས་པའོ། །བུ་འདི་ཐེག་པ་ཆེན་པོ་སྟེ། །སྔགས་སྤྱོད་ཚུལ་གྱི་ཆོ་ག་ཡིན། །ཁྱོད་ལ་ཡང་དག་བཤད་ཀྱིས་སུ། །ཁྱོད་ཀྱང་ཚུལ་ཆེན་སྣོད་དུ་འགྱུར། །ཞེས་པ་ནི་སྔགས་སྤྱད་པའི་ཚུལ་འདི་ཐེག་པ་ཆེན་པོའོ། །དེ་ཡང་ཁྱོད་ལ་ཡང་དག་པར་བཤད་པ་ནི། ཁེ་དང་བཀུར་སྟིའི་ཕྱིར་བཤད་པ་མ་ཡིན་གྱི་སློབ་མ་དེ་སྣོད་དུ་འགྱུར་བའི་ཕྱིར་བཤད་པའོ། །འདས་པ་རྫོགས་པའི་སངས་རྒྱས་དང༌། །གང་རྣམས་ཕྱིས་ཀྱང་བྱོན་པ་དང༌། །ད་ལྟར་མགོན་པོ་དེ་རྣམས་ཀྱང༌། །འགྲོ་རྣམས་དོན་ཕྱིར་བཞུགས་པ་ཡང༌། །ཞེས་པ་ནི་འདས་པ་དང༌། དེ་ལྟར་དང། མ་བྱོན་པའི་ཡང་དག་པར་རྫོགས་པའི་སངས་རྒྱས་རྣམས་ཀྱང་སྔགས་སྤྱད་པའོ། །ཚུལ་དམ་པ་འདི་ལས་བྱང་ཆུབ་ཀྱི་ཤིང་དྲུང་དུ་བདུད་རྣམ་བཞི་བཅོམ་ནས་ཐམས་ཅད་མཁྱེན་པའི་ཡེ་ཤེས་ཐོབ་སྟེ། དེ་བས་ན་སློབ་མ་ཁྱེད་རྣམས་ཀྱིས་ཀྱང་ཚུལ་དམ་པ་འདི་ལས་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ་ཞེས་བསྟན་པ་སྟེ། དེ་བས་ན་གསུངས་པ་སྟེ། དེ་དག་ཀུན་གྱིས་དམ་པ་ནི། །སྔགས་གཙོ་བོ་མཆོག་མཁྱེན་པས་ན། །བསྟན་པ་ཐམས་ཅད་མཁྱེན་ཐོབ་པ། །བྱང་ཆུབ་དྲུང་དུ་མཚན་ཉིད་མེད་པའོ། །སྔགས་ཀྱི་སྦྱོར་བ་མཉམ་མེད་པས། །སྟོབས་ཅན་རྣམས་ཀྱང་བཅོམ་པ་ནི། །བདུད་སྡེ་ཤིན་ཏུ་མ་རུངས་རྣམས། །ཤཱཀྱ་སེང་གེ་མགོན་པོ་ཡིས། །དེ་བས་བློ་ཅན་བུས་འདི་ལྟར། །ཐམས་ཅད་མཁྱེན་ནི་ཐོབ་པར་གྱིས། །ཞེས་པའོ། །དེ་དག་ཀུན་གྱིས་ཞེས་པ་ནི། འདས་པ་དང༌། ད་ལྟར་གྱི་དང༌། མ་བྱོན་པའི་སངས་རྒྱས་ཀུན་གྱིས་ཞེས་པའོ། །བྱང་
ཆུབ་དྲུང་དུ་མཚན་ཉིད་མེད་པའོ། །ཞེས་པ་ནི་བྱང་ཆུབ་ཀྱི་ཤིང་དྲུང་དུ་ཐམས་ཅད་མཁྱེན་པ་མཚན་མ་མེད་པ་ཐོབ་པའོ། །སྔགས་ཀྱི་སྦྱོར་བ་མཉམ་མེད་པའོ། །ཞེས་པ་ནི་གང་དང་ཡང་མི་མཉམ་པའི་སྔགས་ཀྱི་སྦྱོར་བ་དེས་ཐམས་ཅད་མཁྱེན་པ་ཐོབ་པར་ཤེས་པར་སྦྱར་རོ། །དེ་བས་བློ་ཅན་བུས་འདི་ལྟར་ཐམས་ཅད་མཁྱེན་པ་ནི་ཐོབ་པར་གྱིས་ཤིག་པ་ནི་དེ་ལྟར་ཤཱཀྱ་སེང་གེས་ཀྱང་སྔགས་སྤྱད་པའི་སྒོ་ནས་ཐམས་ཅད་མཁྱེན་པ་བརྟེན་ནས། ཁྱོད་ཀྱིས་ཀྱང་འདིའི་སྒོ་ནས་ཐམས་ཅད་མཁྱེན་པ་ཐོབ་པར་གྱིས་ཤིག་ཅེས་བཤད་པའོ། །དེ་ལྟར་ཐམས་ཅད་མཁྱེན་པ་ཐོབ་པར་ཡང༌། བཅོམ་ལྡན་འདས་ཀྱིས་འོག་མིན་གྱི་གནས་ལ་སོགས་པར་མངོན་པར་བྱང་ཆུབ་པའི་རིམ་པ་གཞན་ཡང་ཡོད་མོད་ཀྱི། སྐབས་འདིར་མི་རྣམས་ལ་བཤད་པའི་ཕྱིར་སྤྲུལ་པའི་སྐུས་ཀྱང་བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་པའི་རིམ་པ་བསྟན་ཏོ། །དེ་བཞིན་སྔགས་མཁན་མང་སྤྱོད་ཅེས་པ་ནི་གོང་དུ་སྨོས་པའི་ཚུལ་གྱིས་སློབ་མ་དེ་མང་དུ་སྤྲོ་བ་སྐྱེད་ཅིག་ཅེས་པའོ། །སྙིང་རྗེས་བསམ་པའི་ཡིད་ཀྱིས་ཁེ་དང་བཀུར་སྟིའི་ཕྱིར་མ་ཡིན་གྱི་སློབ་མ་དེ་དག་ལ་སྙིང་རྗེའི་ཕྱིར་རོ། །སློབ་མ་དེ་བརྟན་གྱུར་རིག་ནས། །ཞེས་པ་ནི་སློབ་མ་དེ་རྣམས་དེ་ལྟར་གོང་དུ་སྨོས་པའི་ཚུལ་གྱིས་ཡིད་ཆེས་ཏེ། གཞན་དུ་མི་འགྱུར་བར་གྱུར་ནས་སློབ་མ་དེ་དག་གིས་དཀྱིལ་འཁོར་བྲི་བའི་ས་རྣམས་བརྟག་པར་བྱ་སྟེ། དེ་ཡང་ས་ཉིད་ཀྱི་ཡོན་ཏན་གྱིས་དགའ་བ་དང་འཕགས་པ་རྣམས་ཀྱིས་བཅག་པས་དགའ་བ་དང༌། ལྷ་དང་མི་རྣམས་ཀྱིས་བསྙེན་པས་དགའ་བ་དང༌། སྔགས་མཁན་ཉིད་གང་དུ་དད་པས་དགའ་བའོ། །དེ་ལ་ས་ཉིད་ཀྱི་ཡོན་ཏན་གྱིས་དགའ་བའི་གནས་དྲི་དང་མེ་ཏོག་འབྲས་བུར་ལྡན་པའི་རི་གཙང་ཞིང་དགའ་བའི་ཆུ་འགྲམ་ཞེས་པ་ནི། གང་ན་ཆུ་བོ་མང་པོ་རྣམས། །ངང་པའི་ཆུ་བྱ་མང་བརྒྱན་པ། །དེ་རུ་སྔགས་ལ་མཁས་པ་ཡིས། །སྙིང་རྗེས་བྱུང་བའི་དཀྱིལ་འཁོར་བྲི། །ཞེས་པའི་བར་དུའོ། །སངས་རྒྱས་དང་རང་སངས་རྒྱས་ཞེས་པ་ནས། ས་ཕྱོགས་ཐུབ་པས་བདེ་བར་བསྔགས། །ཞེས་པའི་བར་དུ་ནི་འཕགས་པ་རྣམས་ཀྱིས་ཞབས་ཀྱིས་བཅགས་པས་དགའ་བ་ལ་བྱའོ། །གཞན་ཡང་རྣམ་པ་མང་པོ་ཡི། །ཕྱོགས་རབ་བཟང་དང་གཙུག་ལག་ཁང༌། །
ཞེས་པ་ནས། ལྷ་རྣམས་ཀུན་གྱི་གནས་རྣམས་དང༌། །ཁྱིམ་སྟོང་རྣམས་སུ་དེ་བཞིན་ཏེ། །དཀྱིལ་འཁོར་ནན་ཏན་དུ་བྲིས་ཤིག །སློབ་མ་རྣམས་ལ་ཕན་པ་འདོད། །ཅེས་པའི་བར་དུ་ནི་ལྷ་དང་མི་རྣམས་ཀྱིས་བསྙེན་པས་དགའ་བའོ། །ཡང་ན་ནི་ཡིད་དུ་གར་འོང་བར་ཡང་རུང་སྟེ། དེར་བྲིའོ་ཞེས་པ་ནི་གོང་དུ་སྨོས་པ་རྣམ་པ་གསུམ་ལས། གཞན་པའི་ས་སྔགས་པ་ཉིད་གང་དུ་དད་པ་དེར་དཀྱིལ་འཁོར་བྲི་བ་གསུངས་སོ། །དེ་བསལ་བའི་རྣམ་པ་བྱ་སྟེ་ཞེས་པ་ནི་བསལ་བ་རྣམ་པ་གཉིས་ཏེ། ཕྱི་དང་ནང་གིའོ། །དེ་བས་ན་སློབ་དཔོན་ལ་ཡང་རྣམ་པ་གཉིས་ཏེ། ཟབ་ཅིང་རྒྱ་ཆེ་བ་ལ་མོས་པ་དང་དམིགས་པ་ཅན་ནོ། །དེ་ལ་ཟབ་ཅིང་རྒྱ་ཆེ་བ་ལ་མོས་པའི་སློབ་དཔོན་གྱིས་ནི་བྱང་ཆུབ་ཀྱི་སེམས་བསྒོམས་པས་ཕྱིའི་ཉེས་པ་རྣམས་ཀྱི་དངོས་པོ་ཐོག་མ་ནས་མ་བྱུང་མ་སྐྱེས་པར་ཆུད་དེ། ནང་གི་སེམས་སྦྱངས་བས་དག་པར་འགྱུར་ཏེ་ཕྱིའི་ཟུག་རྡུ་ལ་སོགས་པ་བསལ་མི་དགོས་མོད་ཀྱི་སློབ་མ་རྣམས་ཀྱི་ཡིད་དང་སྦྱར་བའི་ཕྱིར། ཕྱི་ཡི་ས་རྣམས་བརྟག་པ་ཡང་དེ་རྣམས་ལ་མ་ཞེན་པར་བྱ་སྟེ། དེ་བས་ན་སློབ་དཔོན་ཟབ་ཅིང་རྒྱ་ཆེ་བ་ལ་མོས་པས་ནི་ཕྱི་ནང་གཉིས་ཀའི་ས་སྦྱང་བར་བྱའོ། །དམིགས་པ་ཅན་གྱི་སློབ་དཔོན་གྱིས་བྱང་ཆུབ་ཀྱི་སེམས་གོམས་པར་མ་བྱས་པས་ཕྱིའི་ས་རྣམས་སྦྱང་བར་བྱའོ། །དེ་ལ་ནང་གི་ས་སྦྱང་བ་ནི། བྱང་ཆུབ་ཀྱི་སེམས་གོམས་པར་བྱེད་པའོ། །ཕྱིའི་སྦྱང་བ་ནི་རྡོ་དང་གྱོ་མོ་དང་ས་དང་འབྲས་དང་ཞེས་པ་ནས་གནས་རྣམས་ཉེས་པ་ཐམས་ཅད་དང་བྲལ་ན་ལྷ་རྣམས་ཀྱིས་ཀྱང་བསྔགས་སོ་ཞེས་པའི་བར་དུའོ། །ཚེས་གྲངས་དང་ཉི་མ་ཞེས་པ་ནས་སྔ་དྲོའི་དུས་ན་ལྟས་བཟང་པོར་བརྟགས་ཏེ་ཞེས་པའི་བར་དུ་ནི་དཀྱིལ་འཁོར་འདྲི་བའི་ས་བརྟག་པའི་ཚད་དོ། །ཡོངས་སུ་བཟུང་བ་རྩོམ་པའི་ཚེས་གྲངས་དང་སྐར་མ་ཤིས་པ་ཞེས་པ་ནི་སྐར་མ་འབའ་ཞིག་ཤིས་བ་ལ་མི་བྱའི། ཉི་མ་དང་ཚེས་གྲངས་ཀུན་ཤིས་པར་ཞེས་པར་སོ་སོར་སྦྱར་རོ། །སྔ་དྲོའི་དུས་ལ་ལྟས་བཟང་པོར་བརྟགས་ན་ཞེས་པ་ནི་ལྟས་བཟང་པོར་བརྟགས་པ་རབ་འབྲིང་རྣམ་པ་གསུམ་སྟེ། ལྷའི་དང་བར་སྣང་གི་དང་ས་ལས་བྱུང་བའོ། །དེ་ལ་ལྷའི་ནམ་མཁའ་ལས་སྒྲ་སྙན་ལ་སོགས་པ་འབྱུང་སྟེ་མཆོག་གོ །བར་སྣང་གི་ནི་བཀྲ་ཤིས་ཀྱི་ཚིག་དང་བྲམ་
ཟེའི་སྨྲང་ལ་སོགས་པ་ཐོབ་སྟེ་འབྲིང་ངོ༌། །ས་ལས་འབྱུང་བ་ནི་དུང་ལ་སོགས་པ་ས་ལ་འདུག་པ་མཐོང་སྟེ་ཐ་མའོ། །དེ་ལྟར་ཐོག་མར་རྩོམ་པ་ལ་སྔ་དྲོའི་དུས་ན་ལྟས་དེ་རྣམས་ལས་གང་ཡང་རུང་བ་ཅིག་བྱུང་ན་བཟང་སྟེ་ས་ཡོངས་སུ་གཟུང་བ་ལ་སོགས་པའི་ལས་རྣམས་བརྩམ་པར་བྱའོ། །སའི་ལྷ་རྣམས་སྦྲན་པའི་ཚིགས་སུ་བཅད་པ་འདི་གཉིས་སྒྲོགས་པར་བྱའོ་ཞེས་པ་དེ་ལྟར་སྔ་དྲོའི་དུས་ན་ལྟས་བཟང་པོ་དང་ལྡན་ན་དཀྱིལ་འཁོར་གང་དུ་བྲི་བར་བྱ་བའི་ས་གཞི་དེར་སའི་ལྷ་མོ་ལ་ཁྱོད་ཀྱི་སྟེང་དུ་སའི་དཀྱིལ་འཁོར་བྲིའོ་ཞེས་གསོལ་བ་བཏབ་སྟེ་ཡང་བསྟོད་པའི་ཚིགས་སུ་བཅད་པའི་སྒོ་ནས་སོ། །དེ་ལ། དཔང་དུ་ལྷ་མོ་ཁྱོད་གྱུར་བ། །སྐྱོབ་པ་སངས་རྒྱས་ཀུན་གྱི་སྟེ། །ཞེས་པ་ནི་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པ་ན་ས་དང་ཕ་རོལ་ཏུ་ཕྱིན་པ་རྣམས་ཀྱིས་ཚུལ་ཁྱད་པར་དུ་སྤྱད་པ་དང༌། དེ་ལྟར་སྤྱད་ནས་བྱང་ཆུབ་ཀྱི་ཤིང་དྲུང་དུ་བདུད་རྣམ་བཞི་བཅོམ་སྟེ་མངོན་པར་རྫོགས་པར་སངས་རྒྱས་པ་ཡང༌། ས་ཁྱོད་ཀྱི་སྟེང་དུ་བབས། ལྷ་མོ་ཁྱོད་ཀྱིས་ཇི་ལྟ་བ་ཉིད་ཤེས་ཏེ་དཔང་དུ་གྱུར་ཏོ་ཞེས་པ་སྟེ། དེ་བས་ན་གསུངས་པ། སྤྱད་པའི་ཚུལ་གྱིས་སྤྱད་པར་ནི། །ཕ་རོལ་ཕྱིན་པ་རྣམས་ཀྱིའོ། །ཇི་ལྟར་བདུད་དམག་མང་བཅོམ་པ། །སྐྱོབ་པ་ཤཱཀྱ་སེང་གེ་ཡིས། །ཞེས་པའོ། །དེ་བཞིན་བདག་གིས་བདུད་བཏུལ་ནས། །དཀྱིལ་འཁོར་བདག་གིས་འདིར་བྱའོ། །ཞེས་པ་ནི་ཇི་ལྟར་བཅོམ་ལྡན་འདས་ཤཱཀྱ་ཐུབ་པས་ས་དང་ཕ་རོལ་ཏུ་ཕྱིན་པ་རྣམས་སྤྱད་དེ། བྱང་ཆུབ་ཀྱི་ཤིང་དྲུང་དུ་བདུད་རྣམ་པ་བཞི་བཏུལ་ནས་མངོན་པར་བྱང་ཆུབ་པར་བྱས་པ་དེ་བཞིན་དུ་བདག་ཀྱང་མ་ལུས་པའི་སེམས་ཅན་གྱི་ཁམས་རྣམས་བསྒྲལ་བའི་ཕྱིར་ས་ཁྱོད་ཀྱི་སྟེང་དུ་དཀྱིལ་འཁོར་བྲིས་ཏེ། རིམ་གྱིས་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་པར་བྱའོ་ཞེས་པའོ། །ལག་པ་ས་ལ་བཞག་སྟེ། དེ་སྐད་དུ་སྦྲན་པ་མང་དུ་བསྒྲགས་པ་ནི་པུས་མོ་གཉིས་ས་ལ་བཙུགས་ནས་དེར་སྤོས་དང་མེ་ཏོག་གིས་མཆོད་ནས་བསྔགས་པའི་ས་དེ་བཞིན་གཤེགས་པ་རྣམས་ལ་ཕྱག་འཚལ་ཅིག་ཅེས་སའི་ལྷ་མོ་ཚིགས་སུ་བཅད་པས་བསྐུལ་ཏེ་གསོལ་བ་གདབ་པ་ཡང༌། དེ་ཚུལ་བཞིན་སྔར་དེ་བཞིན་གཤེགས་པ་རྣམས་དང་ལྷ་མོ་དེ་ལ་མཆོད་ཅིང་ཕྱག་
བྱས་ལ། ལག་པ་ས་ལ་བཞག་ནས་གདོད་གོང་དུ་སྨོས་པའི་ཚིགས་སུ་བཅད་པས་བསྐུལ་ཏེ་གསོལ་བ་གདབ་བོ། །དེ་འོག་ཏུ་ཚུལ་བཞིན་མཁས་པས་ས་རྣམས་ཚོལ་ཅིག་ཅེས་པ་ནི་འོག་ནས་འབྱུང་བའི་ཚུལ་གྱིས་བཙལ་བར་བྱའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པ་ནི་དུས་དང་ཡུལ་དང་ལས་བྱེད་པ་ཡང་དགེ་བ་དང་མི་དགེ་བའི་ལྟས་རྣམས་ལ་སྨྲས་པ་རྣམས་ཀྱིས་འབྲས་བུར་འཛིན་པ་ཆོས་འདི་མི་ཤེས་པའི་ཕྱིར་དུའོ། །དེ་དག་དོན་ཕྱིར་སེམས་དཔའི་བར་དུ་གོང་དུ་ཉི་མ་ཚེས་གྲངས་དང་སྐར་མ་ལ་སོགས་པའི་ལྟས་རྣམས་བཤད་པ་སྔགས་རྣམས་ཀྱི་རང་བཞིན་ནོ། །དོན་དམ་པར་བྱང་ཆུབ་ཀྱི་སེམས་ཡིན་ཏེ་མཚན་མ་དེ་དག་ལས་འདས་པའོ། །ཀུན་རྫོབ་ཏུ་ཡང་དཀྱིལ་འཁོར་དང་སྒྲུབ་པ་དང་སྔགས་སྤྱད་པའི་ཡན་ལག་རྣམས་མཚན་མ་ཅན་ཡིན་མོད་ཀྱི་དོན་གྱི་བྱ་བ་བྱེད་པ་སྟེ། སྐར་མ་དང་ཚེས་གྲངས་ལ་སོགས་པའི་མཚན་མ་འདི་རྣམས་ནི་དོན་དམ་པ་དང་འགལ། ཀུན་རྫོབ་ཏུ་དོན་གྱི་བྱ་བ་མ་ཡིན་ན། ཅིའི་ཕྱིར་བཅོམ་ལྡན་འདས་ཀྱིས་མཚན་མ་དེ་དག་བཤད་ཅེས་གསོལ་བ་དང༌། བཅོམ་ལྡན་འདས་ཀྱིས་ཀྱང་དོན་དམ་པའི་མཚན་ཉིད་དེ་ལྟ་བུ་ཡིན་མོད་ཀྱི། མ་འོངས་པའི་འགྲོ་བ་རྣམས་ཀྱིས་དོན་དམ་པའི་ཚུལ་དེ་མི་ཤེས་པ་དེ་འགྲོ་བ་དེ་རྣམས་བཀྲི་བའི་ཕྱིར། མཚན་མ་རྣམས་བཤད་པའི་རིགས་པ་བསྟན་པ་སྟེ། འགྲོ་བ་དེ་རྣམས་ལ་ཡང་རྣམ་པ་གཉིས་ཏེ། དངོས་པོ་ལ་ཆགས་པ་དང༌། དངོས་པོ་མེད་པ་ལ་ཆགས་པའོ། །དངོས་པོ་ལ་ཆགས་པ་རྣམས་ལ་ཡང་ཚེས་གྲངས་དང་དུས་དང་ཡུལ་ལ་སོགས་པའི་དངོས་པོས་རྗེས་སུ་མཐུན་པར་བཤད་ཅིང་བཀྲི་བ་དང༌། དངོས་པོ་མེད་པ་ལ་ཆགས་པ་རྣམས་ཀྱང་དེ་ལས་ཟློག་སྟེ། དངོས་པོའི་སྒོ་ནས་བཀྲི་བའི་ཕྱིར་རོ། །མཚན་མར་བྲལ་བ་སངས་རྒྱས་ཏེ། །ཞེས་པ་ནི་གཟུང་བ་དང་འཛིན་པའི་མཚན་མ་དང་བྲལ་བའོ་ཞེས་པའོ། །ཆོས་ཀྱི་སྐུ་ལ་རྣམ་པར་ཞུགས་པ་ཞེས་པ་ནི་དེ་ལྟར་གཟུང་བ་དང་འཛིན་པའི་མཚན་མ་དང་བྲལ་བ་ས་དམིགས་སུ་མེད་པའི་ཆོས་ཀྱི་སྐུའོ། །དེ་ལྟར་སངས་རྒྱས་བཅོམ་ལྡན་འདས་ཆོས་ཀྱི་སྐུའི་རང་བཞིན་དུ་གྱུར་པ་
ནི་ཆོས་ཀྱི་སྐུ་ལ་རྣམ་པར་ཞུགས་ཞེས་པའོ། །གསང་བའི་བདག་པོ་དེ་ནས་ཇི་ལྟ་བུར་བཤད་པའི་གནས་ལ་གཅིག་ཏུ་སྙོམས་ལ་རྡུངས་ཤིག་ཅེས་པ་ནས་བདག་ཀྱང་ཡིད་ལ་སྤྲོ་བ་དང༌། ཡང་ན་ཇི་ལྟར་མཐོང་བ་ཡང་རུང་བུ་དཔེ་གཉིས་ལ་བྱུང༌། དགེའོ། །སེམས་དཔའ་ཆེན་པོ་ཁྱོད་མྱུར་དུ་དཀྱིལ་འཁོར་བྲིས་ཤིག་ཅེས་པའི་བར་དུ་ཞག་བདུན་གྱི་སྔོན་རོལ་དུ་སྣང་བ་དང༌། མི་སྣང་བ་ལ་དཀྱིལ་འཁོར་བྲི་བའི་ས་བསླང་སྟེ། དེ་ལ་སྣང་བ་ནི་རྒྱལ་པོ་ལ་སོགས་པའི་མི་རྣམས་སོ། །མི་སྣང་བ་ནི་འཇིག་རྟེན་པའི་ལྷ་དང༌། གནོད་སྦྱིན་དང༌། ཤ་ཟ་ལ་སོགས་པ་སྟེ་ལྷ་ལ་སོགས་པ་ལ་མ་བསླངས་པར་དཀྱིལ་འཁོར་བྲིས་ན་དཀྱིལ་འཁོར་གྱི་ལྷ་ཁྲོ་བོ་ལ་སོགས་པའི་ཟེར་གྱིས་འཇིག་རྟེན་པའི་ལྷ་དེ་རྣམས་ལ་གནོད་པར་འགྱུར་ཏེ། དེ་ལྟར་གནོད་པར་གྱུར་ན། ལྷ་དེ་དག་སྒྲུབ་པ་ལ་བགེགས་ཀྱི་སྐབས་ཚོལ་བར་འགྱུར། གཉིས་སུ་ནི་དེ་དག་ལ་གནོད་བཞིན་དུ་དཀྱིལ་འཁོར་བྲིས་ན་སྒྲུབ་པ་སྙིང་རྗེ་མེད་པར་འགྱུར་ཏེ། དེ་བས་ན་དེ་དག་ལ་སྩལ་བའི་ཕྱིར་སྔར་ལྷ་ལ་སོགས་པ་རྣམས་སྤྲན་ཞིང་ས་བླངས་ཏེ། ལྷ་ལ་སོགས་པ་དེ་རྣམས་ཀྱང་བག་བྱེད་ཅིང་དེ་ནས་གཞན་དུ་འདོང་སྟེ་ཉེས་པ་མེད་པར་འགྱུར་རོ། །རྒྱལ་པོ་ལ་སོགས་པ་མི་རྣམས་ལ་ཡང༌། ས་སླར་བསླང་བ་ནི་ཕྱིས་བརྩད་པར་མི་འགྱུར་བའི་ཕྱིར་རོ། །དེར་སླར་བསླངས་ནས་ཕྱིས་དཀྱིལ་འཁོར་བྲི་བ་ལས་ཞག་གསུམ་གྱི་སྔོན་རོལ་དུ་ཇི་སྐད་དུ་སྨོས་པའི་ས་དེར། ཇི་ལྟར་རིགས་པར་བརྟགས་ནས་ཡོངས་སུ་གཟུང་བའི་རིམ་པ་འདི་ལྟར་བྱའོ། །ཐོག་མར་བའི་ལྕི་བ་ས་ལ་མ་ལྷུང་བ་དང༌། བའི་གཅིན་དུ་བསྲེས་པའི་དཀྱིལ་འཁོར་བྱ། དེ་ནས་ས་དེ་སྔགས་ཀྱིས་བསྲུང་བར་བྱ། དེ་ནས་ཕྱོགས་མཚམས་ཀུན་དུ་བགེགས་བསལ་བར་བྱ། དེའི་འོག་ཏུ་དྲིའི་དཀྱིལ་འཁོར་རྣམས་གྲུ་བཞི་ལ་སོར་བཅུ་གཉིས་པར་བྱེད་དེ། དེ་ནས་སྔགས་པ་འགྲེངས་ཏེ་དཀྱིལ་འཁོར་དེའི་དབུས་ཀྱི་ནམ་མཁའ་ལ་སངས་རྒྱས་བསམ་པར་བྱའོ། །དེ་ནས་རང་བཞིན་གྱི་དཀྱིལ་འཁོར་རྣམས་སྡུད་པར་འགྱུར་པ་སྟེ། དམ་ཚིག་གསུམ་གྱི་ཕྱག་རྒྱ་བཅིངས་ནས་བསམ་མོ། །སྔགས་པ་འགྲེངས་ཏེ་བསམ་པ་ནི་མི་གནས་པར་སྟོན་པ་སྟེ། སངས་རྒྱས་ལྔ་རྣམས་ནམ་མཁའ་ལ་བསམ་པའི་ཕྱིར་རོ། །
དེ་ནས་དེར་དྲི་དང་མེ་ཏོག་ལ་སོགས་པས་མཆོད་དེ་སངས་རྒྱས་ཀྱི་སྤྱན་སྔར་འཕགས་པ་མི་གཡོ་བའམ། ཁམས་གསུམ་རྣམ་པར་རྒྱལ་བའམ་གང་ཡང་རུང་བའི་སྔགས་ཀྱིས་ས་དེ་ཡོངས་སུ་གཟུང་བར་བྱའོ། །དེ་ནས་སངས་རྒྱས་སྲས་དང་བཅས་པར་སློབ་མ་རྣམས་དཀྱིལ་འཁོར་དུ་གཟུད་པའི་ནུབ་མོར་གཤེགས་སུ་གསོལ་བའོ། །དེ་ནས་སྔགས་པ་དེ་ནུབ་ཕྱོགས་ཀྱི་ངོས་སུ་ཉལ་ལ་བྱང་ཆུབ་ཀྱི་སེམས་དང་སྙིང་རྗེ་ལྡན་པར་བྱ་སྟེ། རྨི་ལམ་བལྟས་ཏེ། དེ་ཡང་རབ་འབྲིང་གསུམ་དུ་ཤེས་པར་བྱའོ། །དེ་ལ་བྱང་ཆུབ་སེམས་དཔའ་རྣམས་མཐོང་ན་རྨི་ལམ་ཐ་མའོ། །སངས་རྒྱས་རྣམས་མཐོང་ན་འབྲིང༌། སངས་རྒྱས་དེ་རྣམས་ཤིན་ཏུ་སྤྲོ་ཞིང་སྔགས་པ་ལ་བུ་ཁྱོད་དགེའོ། །དཀྱིལ་འཁོར་མྱུར་དུ་བྲིས་ཤིག་ཅེས་བསྐུལ་མ་འདེབས་པར་མཐོང་ན་རྨི་ལམ་རབ་ཏུ་ཤེས་པར་བྱའོ། །འདི་རྣམས་ཀྱང་རྒྱུད་ཉིད་ཀྱི་ནང་ནས་ཞིབ་ཏུ་འབྱུང་སྟེ། རྒྱུད་ཀྱི་ནང་ནས་ལྟག་འོག་ཏུ་འབྱུང་བས་འདིར་ལས་སུ་བྱ་བའི་རིམ་པ་བཞིན་དུ་བཀོད་དོ། །དད་པ་རིགས་བཙུན་ལས་བྱུང་བ། །ཞེས་པ་ནས་གཉིས་སམ་གཅིག་བཞི་ལས་མང་ཡང་སླའོ་ཞེས་པའི་བར་དུ་ནི་སློབ་མ་རྣམས་བརྟགས་པ་ལ་བྱ་སྟེ། དེ་ཡང་བྱེ་བྲག་གི་མཚན་ཉིད་རབ་ཏུ་བྱེད་པའི་མཚན་ཉིད་དེ། དེ་ལ་འདིར་དད་པ་རིགས་བཙུན་པ་ལས་བྱུང་བ་ཞེས་པ་ལ་སོགས་པའི་མཚན་ཉིད་ཇི་སྐད་དུ་སྨོས་པ་རྣམས་བྱེ་བྲག་གི་མཚན་ཉིད་དོ། །རབ་ཏུ་དབྱེ་བའི་མཚན་ཉིད་ནི་འོག་ནས་འཆད་དོ། །ཕལ་པའི་མཚན་ཉིད་ནི་གོང་དུ་ཇི་སྐད་དུ་སྨོས་པའི་གྲངས་ལས་གཞན་པ་སྟེ་འོག་ནས་འབྱུང་བ་མོད་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པར་ཡི་དམ་བཅའོ། །དེ་བྱང་ཆུབ་ཀྱི་ས་བོན་གྱི་རྒྱུའི་ཕྱིར་འདི་ལྟར་ཚད་མེད་པའི་སེམས་ཅན་ཡོངས་སུ་གཟུང་བར་བྱའོ་ཞེས་པའོ། །སློབ་མ་དེ་རྣམས་ལ་ཡང་རྒྱུད་ལ་སོགས་པ་ལ་མཁས་ཤིང་བྱང་ཆུབ་ཀྱི་སེམས་གོམས་པ་ནི་དཀྱིལ་འཁོར་དུ་བཅུག་པ་དེ་ཉིད་ཀྱི་ཚེ་ན་དེ་སློབ་དཔོན་ནམ་སྒྲུབ་པར་དབང་བསྐུར་བར་བྱའོ། །རྒྱུད་ལ་སོགས་པ་རྣམས་ལ་ནི་མཁས་ཀྱང༌། བྱང་ཆུབ་ཀྱི་སེམས་མ་བསྒོམས་པ་ན། བྱང་ཆུབ་ཀྱི་སེམས་སྒོམ་དུ་བཅུག་སྟེ་ཕྱིས་དབང་བསྐུར་བར་བྱའོ། །དེ་ལས་གཞན་ཕལ་རྣམས་ཀྱིས་ནི་རྒྱུད་ཀྱང་
མི་ཤེས། བྱང་ཆུབ་ཀྱི་སེམས་ཀྱང་མ་བསྒོམས་ཕྱིས་ཀྱང་ཤེས་པར་མི་འགྱུར། བྱང་ཆུབ་ཀྱི་སེམས་ཀྱང་མི་སྒོམ་པ་ནི་ཕལ་རྣམས་ཏེ། དུས་གཉིས་ཀར་ཡང་དབང་མི་བསྐུར་གྱི། བྱང་ཆུབ་ཀྱི་ས་བོན་དུ་འགྱུར་བའི་ཕྱིར་དཀྱིལ་འཁོར་དུ་གཟུང་ངོ༌། །དེ་ལ། དད་པ་རིགས་བཙུན་ལས་བྱུང་བ། །ཞེས་པ་ལ་སོགས་པའི་མཚན་ཉིད་ནི་གོང་དུ་སློབ་མའི་མཚན་ཉིད་སྨོས་པར་བཤད་ཟིན་པས་འདིར་མ་སྨོས་སོ། །བཅུའམ་བརྒྱད་དམ་བདུན་ཀྱང་རུང༌། །གཉིས་སམ་གཅིག་བཞི་ལས་མང་སླའོ། །ཞེས་པ་ནི་ཇི་སྐད་དུ་སྨོས་པའི་མཚན་ཉིད་ལྡན་པའི་སློབ་མ་ནི་ཤིན་ཏུ་དཀོན་པས་གྲངས་ཉུང་དུ་གསུངས་པའོ། །མང་ཡང་སླ་ཞེས་པ་ནི་མཚན་ཉིད་དེ་ལྟ་བུ་དང་ལྡན་པ་དཀོན་པ་སྟེ། བརྒྱ་ལ་དེ་ལྟ་བུའི་མཚན་ཉིད་དང་ལྡན་པ་ཡོད་ན་གྲངས་མ་མཆིས་པ་དེ་ལས་ལྷག་ན་ཡང་ཉེས་པ་མེད་པའོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་ཡང་དྲིས་པ་ནས་བྱང་ཆུབ་ཀྱི་ས་བོན་གྱི་རྒྱུའི་ཕྱིར་འདི་ལྟར་ཚད་མེད་པའི་སེམས་ཅན་ཡོངས་སུ་གཟུང་བར་བྱའོ་ཞེས་པའི་བར་དུ་གོང་དུ་སློབ་མའི་གྲངས་ངེས་པར་བཤད་པ་ཅིའི་ཕྱིར་འཆད་ཅེས་བཅོམ་ལྡན་འདས་ཕྱག་ན་རྡོ་རྗེས་གསོལ་བ་དང༌། དེའི་ལན་བཅོམ་ལྡན་འདས་ཀྱིས་བཤད་པ་ལ་བྱ་སྟེ། ཅིའི་ཕྱིར་སློབ་མ་རྣམ་གྲངས་ངེས་པར་བཤད་ཅེས་དྲི་བར་དགོངས་པ་ལ་དཀྱིལ་འཁོར་འདིའི་མིང་གི་ཇི་ལྟར་དཀྱིལ་འཁོར་ཞེས་བགྱི་ཞེས་ཇི་ལྟར་དྲིས་ཤེ་ན། དེའི་དགོངས་པ་འདི་ལྟ་སྟེ། དེ་སྐད་དྲིས་ན་དཀྱིལ་འཁོར་གྱི་ངེས་པའི་ཚིག་དང༌། དམིགས་པ་བརྟན་པར་བྱ་བ་དང༌། སློབ་མའི་གྲངས་ངེས་པ་གསུམ་ཆར་འདྲིས་པར་འགྱུར་ཏེ། དེ་ལ་དཀྱིལ་འཁོར་འདིའི་མིང་ཅི་ཞེས་པ་དཀྱིལ་འཁོར་གྱི་དམིགས་བསྟན་པར་བྱ་བ་དྲིས་པའོ། །ཇི་ལྟར་ན་དཀྱིལ་འཁོར་ཞེས་དྲིས་པ་ནི་ངེས་པའི་ཚིག་དྲིས་པའོ། །དཀྱིལ་འཁོར་འདི་ནི་སངས་རྒྱས་འབྱུང་བ་སྟེ། །ཞེས་པ་ནི་དཀྱིལ་འཁོར་འདི་སངས་རྒྱས་འབྱུང་བ་དང་འདྲ་བའི་ཕྱིར་ཏེ། སངས་རྒྱས་འབྱུང་བ་ན་སངས་རྒྱས་ཀྱི་ཡོན་ཏན་གྱི་ཆོས་རྣམས་ཀྱང་སྲིད། སེམས་ཅན་གྱི་བྱེད་པ་ཡང་ཡོད་དེ། དེ་བཞིན་དུ་དཀྱིལ་འཁོར་འདི་ལས་ཀྱང་སངས་རྒྱས་ཀྱི་ཆོས་རྣམས་ཀྱང་སྲིད་ཅིང་སེམས་ཅན་གྱི་དོན་བྱ་བ་ཡང་འཕྲལ་དུ་བྱང་ཆུབ་ཀྱི་སེམས་བསྐྱེད་པ་དང༌། རིམ་གྱིས་
མཆོག་ལ་སོགས་པའི་གྲུབ་པ་དང་ཞི་བ་ལ་སོགས་པའི་ལས་རྣམས་བྱེད་པ་ཡོད་ཅིང་མཐར་སངས་རྒྱས་པར་འགྱུར་བར་བྱེད་པའི་ཕྱིར་རོ། །དཀྱིལ་ཞེས་བྱ་བ་ནི་སྙིང་པོའོ། །འཁོར་ཞེས་བྱ་བ་ནི་ཁྱབ་པའོ་ཞེས་པ་ནི་མར་གྱི་སྙིང་པོའམ་ཙནྡན་གྱི་སྙིང་པོ་དང་འདྲ་སྟེ་མཆོག་དམ་པ་ལ་བྱའོ། །མར་དང་ཙནྡན་གྱི་སྙིང་པོ་དེ་དག་ལ་ནི་མཆོག་པའམ་རྫོགས་པ་མེད་ཀྱང་སྲིད། དེ་དག་དང་འདྲ་བ་མ་ཡིན་ནམ་ཞེ་ན། སྙིང་པོར་འདྲ་མོད་ཀྱང༌། དེ་ལས་ཀྱང་ཁྱད་པར་དུ་གསུངས་པ་ཁྱབ་པ་ཞེས་པ་སྟེ། ཁྱབ་པ་ནི་མཆོག་པའམ་ཡོངས་སུ་རྫོགས་པའི་དོན་ཏོ། །དཀྱིལ་འཁོར་འདི་སྙིང་པོ་མཆོག་པའམ་རྫོགས་པ་ཞེས་པ་ཅིའི་ཕྱིར་བྱ་ཞེ་ན། སངས་རྒྱས་བཅོམ་ལྡན་འདས་བསྐལ་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་ནས། སྟོབས་དང་མི་འཇིགས་པ་ལ་སོགས་པ་སངས་རྒྱས་ཀྱི་ཡོན་ཏན་གྱི་ཆོས་རྣམས་ཡོངས་སུ་རྫོགས་ནས་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་པ་ནི་སྙིང་པོར་གྱུར་པ་མཆོག་དམ་པ་སྟེ། མཆོག་དེ་ལས་གཞན་པ་བཙལ་མི་དགོས་པར་དེས་ཆོག་སྟེ་མི་འགྱུར་བ་ཡོངས་སུ་རྫོགས་པའོ། །གང་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་པ་མི་འགྱུར་བ་ཡོངས་སུ་རྫོགས་ཏེ། དེ་ཉིད་སྔོན་གྱི་སྨོན་ལམ་གྱི་ཤུགས་ཀྱིས་སྐུ་ལ་སོགས་པ་མི་ཟད་པའི་རྒྱན་གྱི་འཁོར་ལོར་གྱུར་པ་དཀྱིལ་འཁོར་འདི་བྱིན་གྱིས་བརླབས་པས་ན། དཀྱིལ་འཁོར་འདིའི་སྙིང་པོ་མཆོག་པ་ཞེས་བྱའོ། །གསང་བའི་བདག་པོ་འོན་ཀྱང་སེམས་ཅན་གྱི་ཁམས་མ་ངེས་པ་རྣམས་ཡོངས་སུ་བསྐྱང་བའི་ཕྱིར་སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་བའི་དཀྱིལ་འཁོར་འཕེལ་བའོ། །ཞེས་པ་སེམས་ཅན་གྱི་ཁམས་མ་ངེས་པ་ཡོངས་སུ་བསྐྱང་བའི་ཕྱིར་ཞེས་པ་ནི་སྙིང་རྗེ་ཆེན་པོའི་དབང་གིས་ཚད་མེད་པའི་སེམས་ཅན་གྱི་ཁམས་རྣམས་དཀྱིལ་འཁོར་འདིར་བཙུད་ན་བླ་མེད་བྱང་ཆུབ་ཀྱི་རྒྱུར་འགྱུར་བས་ཀྱང་བསྐྱང་བའི་ཕྱིར་ཞེས་གསུངས་སོ། །སྙིང་རྗེ་ཆེན་པོ་འབྱུང་ཞེས་པ་ནི། དཀྱིལ་འཁོར་འདི་སྙིང་རྗེ་ཆེན་པོ་ལ་འབྱུང་བ་སྟེ། བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་བརྙེས་ནས་སྙིང་རྗེ་ཆེན་པོ་འདིའི་དབང་གིས་སྐུ་ལ་སོགས་པ་མི་ཟད་པའི་རྒྱན་གྱི་འཁོར་ལོ་འདི་འབྱུང་བས་ན་སྙིང་རྗེ་ཆེན་པོ་འབྱུང་ཞེས་བྱའོ། །སྙིང་པོ་ཞེས་པ་ནི་
འབྱུང་བའི་གནས་ཏེ། སྙིང་རྗེ་ཆེན་པོ་དེ་དཀྱིལ་འཁོར་དེ་འབྱུང་བའི་གནས་སོ། །ཡང་ན་དཀྱིལ་འཁོར་འདི་ལས་སྙིང་རྗེ་ཆེན་པོ་འབྱུང་བ་ལ་ཡང་བྱ་སྟེ། དཀྱིལ་འཁོར་འདིའི་སྒོ་ནས་དེ་བཞིན་གཤེགས་པའི་ཡོན་ཏན་གྱི་ཆོས་སྙིང་རྗེ་ཆེན་པོ་ལ་སོགས་པ་འབྱུང་བ་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་བའི་ཕྱིར་རོ། །དཀྱིལ་འཁོར་འཕེལ་བའོ་ཞེས་པ་ནི་དཀྱིལ་འཁོར་འདིར་བཙུད་པའི་སེམས་ཅན་རྣམས་བསོད་ནམས་འཕེལ་བའི་ཕྱིར་རོ། །གཉིས་སུ་ན་དཀྱིལ་འཁོར་ཉིད་སྣམ་བུ་ལ་སོགས་པ་རིམ་པ་འཕེལ་བ་སྟེ། སངས་རྒྱས་ལ་ཡང་བྱའོ། །འོན་ཀྱང་ཞེས་པ་ནི་སངས་རྒྱས་འབྱུང་བའི་དཀྱིལ་འཁོར་ཞེས་བྱ་མོད་ཀྱི། འདི་རྣམས་དང་ལྡན་པའི་ཕྱིར་མིང་འདི་སྐད་ཅེས་བྱའོ། །གསང་བའི་བདག་པོ་གང་དུ་དེ་བཞིན་གཤེགས་པ་རྣམས་ཀྱིས་གྲངས་མེད་པའི་བསྐལ་པར་བསྐྱེད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་བྱིན་གྱིས་བརླབས་པ་སྟེ་ཞེས་པ་ནི་དཀྱིལ་འཁོར་འདི་གཞན་མ་ཡིན་གྱི། གང་དེ་བཞིན་གཤེགས་པས་བསྐལ་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་ནས་བླ་ན་མེད་པའི་བྱང་ཆུབ་ཐོབ་པ་དེ་ཉིད་སྔགས་ཀྱི་ལྷ་དང་ཕྱག་རྒྱ་དང་སྔགས་ཀྱི་འབྲུ་རྣམས་སུ་ལྷག་པར་གནས་པར་བྱིན་གྱིས་བརླབས་པ་ཞེས་བསྟན་པའོ། །དེས་ན་གསང་བའི་བདག་པོ་གཞུང་འདི་ལྟར་རིག་པར་བྱ་སྟེ་ཞེས་པ་ནི། དེ་བཞིན་གཤེགས་པ་རྣམས་བསྐལ་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་པས་ཐམས་ཅད་མཁྱེན་པ་བརྙེས་ནས། སྔོན་གྱི་སྨོན་ལམ་གྱི་ཤུགས་ཀྱིས་སྐུ་ལ་སོགས་པ་མི་ཟད་པའི་རྒྱན་སེམས་ཅན་གྱི་ཁམས་མ་ལུས་པ་ལ་བྱིན་གྱིས་རློབ་སྟེ། སེམས་ཅན་གྱི་ཁམས་གཅིག་གམ་གཉིས་ལ་མ་ཡིན་པ་དེའི་གཞུང་གིས་དེ་བཞིན་གཤེགས་པ་དེ་གང་དུ་འཚང་རྒྱ་བ་ནི་སེམས་ཅན་གཅིག་གམ་གཉིས་ཀྱི་ཕྱིར་མ་ཡིན་གྱི། མཐའ་ཡས་སེམས་ཅན་དོན་གྱི་ཕྱིར་མངོན་པར་འཚང་རྒྱ་བར་རིག་པར་བྱ་སྟེ། དེ་བས་ན་གསུངས་པ་དེ་བཞིན་གཤེགས་པ་བྱང་བྱང་ཏུ་མངོན་པར་སངས་རྒྱས་པ་ནི་སེམས་ཅན་གཅིག་གི་དོན་གྱི་ཕྱིར་མ་ཡིན་གཉིས་ལ་མ་ཡིན་གསུམ་ལ་མ་ཡིན་གྱི་སེམས་ཅན་གྱི་ཁམས་མ་ལུས་པ་རྣམས་ལ་སྙིང་རྗེའི་
དབང་དུ་གྱུར་པས་ཡོངས་སུ་བསྐྱང་བའི་ཕྱིར་བྱང་ཆུབ་ཏུ་མངོན་པར་འཚང་རྒྱ་སྟེ་ཞེས་པའོ། །དེས་སེམས་ཅན་གྱི་བསམ་པ་ཇི་ལྟ་བ་བཞིན་དུ་ཆོས་འཆད་དོ་ཞེས་པ་ནི་དེ་ལྟར་དེ་བཞིན་གཤེགས་པ་མ་ལུས་པའི་སེམས་ཅན་རྣམས་ཀྱི་དོན་དུ་མངོན་པར་སངས་རྒྱས་མོད་ཀྱི་སེམས་ཅན་ཐམས་ཅད་དེ་བཞིན་གཤེགས་པས་ཆོས་བཤད་པའི་སྣོད་དུ་མི་འགྱུར་ཏེ། སོ་སོའི་དད་པ་རྗེས་སུ་མཐུན་པར་དེ་བཞིན་གཤེགས་པས་ཆོས་འཆད་པ་ནི་བསམ་པ་ཇི་ལྟ་བ་བཞིན་ཆོས་འཆད་པའོ་ཞེས་པའོ། །དེ་བས་ན་གསུངས་པ་གསང་བའི་བདག་པོ་ཐེག་པ་ཆེན་པོ་ལ་གོམས་པར་མ་བྱས་པ་ནི་སྔགས་བྱེད་པའི་ཚུལ་འདི་མཐོང་ངམ་ཐོས་ན་སེམས་ཅན་འགའ་ཞིག་དད་པ་རྣམས་ཀྱང་མི་སྐྱེ་བ་གང་གིས་སྔོན་ཐེག་པ་ཆེན་པོའི་སྔགས་སྤྱད་པའི་ཚུལ་མཐའ་ཡས་པའི་སྒོ་དེ་ལ་གོམས་པར་མ་བྱས་པའོ་ཞེས་པའི་ཕྱིར་བྱང་ཆུབ་སེམས་དཔའ་ལ་རྣམ་པ་གཉིས་ཏེ། ཕ་རོལ་ཏུ་ཕྱིན་པའི་སྒོར་སྤྱད་པ་སྤྱོད་པ་དང༌། སྔགས་ཀྱི་སྒོར་སྤྱད་པ་སྤྱོད་པའོ། །དེ་ལ་ཕ་རོལ་ཏུ་ཕྱིན་པ་སྤྱད་པ་སྤྱོད་པའི་བྱང་ཆུབ་སེམས་དཔའ་ཡང་སྔགས་ཀྱི་སྤྱད་པ་སྤྱོད། སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་ཡང་ཕ་རོལ་ཏུ་ཕྱིན་པ་ལ་སྤྱོད་དེ། དེ་ལ་ཡང་བྱེ་བྲག་ཏུ་གཅིག་ནི་སྔགས་གཙོར་སྒྲུབ་ཅིང་ཕ་རོལ་ཏུ་ཕྱིན་བ་ཞར་ལ་སྤྱོད། གཅིག་ནི་ཕ་རོལ་ཏུ་ཕྱིན་པ་གཙོར་སྒྲུབ་ཅིང་སྔགས་ཞར་ལ་སྤྱོད་དེ། དེ་ལྟར་སྤྱོད་པ་གཉིས་ཀ་ཡང་ཐེག་པ་ཆེན་པོའི་མཚན་ཉིད་གཅིག་སྟེ། སེམས་ཅན་གང་དེ་ལྟ་བུའི་ཐེག་པ་ཆེན་པོ་ལ་ཚེ་རབས་སྔ་མ་ལ་མཉན་པ་དང༌། བསམ་པ་དང་བསྒོམ་པའི་སྒོ་ནས་མ་ཞུགས་ཤིང་ནན་ཏན་དུ་མ་བྱས་པས་ནི་སྔགས་སྤྱོད་པའི་ཚུལ་གྱིས་ཆོས་རྣམས་ཐོས་སམ་དཀྱིལ་འཁོར་ལ་སོགས་པ་མཐོང་ན་ཡང་དད་ཅིང་དགའ་བ་མི་སྐྱེའོ། །སྔགས་ཀྱི་སྤྱོད་པ་དང་ཕ་རོལ་ཏུ་ཕྱིན་པའི་སྤྱོད་པ་དག་སྔོན་གོམས་པར་བྱས་པ་ནི་གཉིས་ཀ་ལ་ཡང་དད་པ་སྐྱེས་ཏེ། སྔགས་སྤྱོད་ལ་གོམས་པར་བྱས་པས་ཀྱང༌། ཕ་རོལ་ཏུ་ཕྱིན་པ་མཐོང་ངམ་ཐོས་ན་དགའ་ཞིང་དད་པ་སྐྱེ། ཕ་རོལ་ཏུ་ཕྱིན་པ་སྤྱོད་པ་ལ་གོམས་པས་ཀྱང་སྔགས་ཀྱི་སྤྱོད་པ་མཐོང་ངམ་ཐོས་ན་དགའ་ཞིང་དད་པ་སྐྱེའོ། །དེ་བས་ན་གསུངས་པ་གང་གིས་སྔོན་ཐེག་པ་ཆེན་པོའི་སྔགས་སྤྱད་པའི་ཚུལ་མཐའ་ཡས་པའི་སྒོ་
འབྱུང་བ་ལ་གོམས་པར་བྱའོ་ཞེས་བྱ་སྟེ། དེ་བས་ན་ཐེག་པ་ཆེན་པོ་སྔགས་སྤྱད་པའི་ཚུལ་འདི་ལྟ་བུ་ལ་གོམས་པར་བྱས་པ་ནི། སྔགས་སྤྱད་པའི་ཚུལ་འདི་ལ་དད་ཅིང་སྣོད་དུ་འགྱུར་གྱི། གཞན་རྣམས་ཀྱིས་མ་ཡིན་ནོ་ཞེས་པའོ། །མཐའ་ཡས་བའི་སྒོ་འབྱུང་ཞེས་པ་ནི་ཐེག་པ་ཆེན་པོ་དེ་ཉིད་ཀྱི་ཡོན་ཏན་ཏེ། སྟོབས་དང་མི་འཇིགས་པ་ལ་སོགས་པ་སངས་རྒྱས་ཀྱི་ཡོན་ཏན་གྱི་ཆོས་རྣམས་འབྱུང་བ་དང༌། རིག་པའི་རྒྱལ་པོ་དང་ཁྲོ་བོ་དང་ཕོ་ཉ་ལ་སོགས་པ་རྣམ་པ་མང་པོའི་སྒོ་འབྱུང་བའི་ཕྱིར་རོ། །དེ་དག་རྡོ་རྗེ་སེམས་དཔའ་ཡིན་ཏེ་ཞེས་པ་ནི་དེ་ལྟ་བུའི་ཐེག་པ་ཆེན་པོ་ལ་གོམས་པར་བྱས་པའི་སེམས་ཅན་དེ་དག་སེམས་ཤིན་ཏུ་བརྟན་པ་ནི་མུར་འདུག་དང༌། བདུད་ལ་སོགས་པས་མི་བཟློག་སྟེ། དེ་དག་སེམས་རྡོ་རྗེ་དང་འདྲ་བས་ན་རྡོ་རྗེ་སེམས་དཔའ་ཞེས་པའོ། །དེ་དག་གི་ཕྱིར་འདི་དང་གྲངས་འཆད་མོད་ཀྱི་ཞེས་པ་ནི་དེ་ལྟ་བུའི་སེམས་ཅན་ཤིན་ཏུ་དཀོན་པས་མང་དུ་མི་འབྱུང་བའི་ཕྱིར་གྲངས་ངེས་པར་འཆང་ངོ༌། །འོན་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པར་བསྐལ་བར་ཡི་དམ་བཅའ་བར་བྱ་བ་ནི། དེ་བྱང་ཆུབ་ཀྱི་ས་བོན་གྱི་རྒྱུའི་ཕྱིར། འདི་ལྟར་ཚང་མེད་པའི་སེམས་ཅན་ཡོང་སུས་གཟུང་བར་བྱའོ་ཞེས་པ་ནི་གོང་དུ་གྲངས་སུ་བཅད་པ་ནི་སྒྲུབ་པའམ་སློབ་དཔོན་དུ་སྨིན་པར་བྱ་བའི་སློབ་མ་སྟེ། དེ་ལས་གཞན་པའི་སེམས་ཅན་རྣམས་ལ་ཡང་སྙིང་རྗེ་ཆེན་པོ་བསྐྱེད་དེ། དཀྱིལ་འཁོར་དེར་བཙུད་ན་སློབ་དཔོན་ནམ་སྒྲུབ་པ་པོར་མི་འགྱུར་ཡང༌། དཀྱིལ་འཁོར་དུ་བཙུད་ཅིང་བྱང་ཆུབ་ཏུ་སེམས་བསྐྱེད་ན། བྱང་ཆུབ་ཀྱི་རྒྱུའི་ས་བོན་དུ་འགྱུར་བའི་ཕྱིར་ཚད་དང་གྲངས་ཚད་མེད་པར་གཟུང་ངོ༌། །དེ་ནས་དེ་དག་བོས་ལ་གསུམ་ལ་སྐྱབས་སུ་འགྲོ་བ་བྱིན་ལ་སྡིག་མི་བྱ་བ་རྣམས་སྒྲོགས་ཤིག་ཅེས་པ་ནས། བདེན་པ་གཉིས་ལ་གནས་པ་སྟེ། །ཐེག་པ་མཆོག་ཏུ་བཟང་བ་འདི། །ཚུལ་བཞིན་འདུག་ན་ཐོབ་པར་འགྱུར། །ཞེས་པའི་བར་དུ་དཀྱིལ་འཁོར་བྲི་བའི་སྔ་དེའི་ནུབ་སློབ་མ་རྣམས་ཡོངས་སུ་གཟུང་བའི་རིམ་པ་བཤད་པ་སྟེ་དེ་ཡང་རྣམ་པ་དགུའོ། །དགུ་གང་ཞེ་ན་སྡིག་པ་བཤགས་པ་དང༌། སྐྱབས་སུ་བཏང་བ་དང༌། དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་བ་འཛིན་དུ་གཞུག་པ་དང༌། དྲི་དང་མེ་ཏོག་སྦྱིན་པ་དང༌། སོ་ཤིང་འཆའ་རུ་གཞུག་
པ་དང༌། སྐུད་པས་དཔུང་པ་བཅིངས་ཏེ་སྲུང་བ་ངང་སྤྲོ་བ་བསྐྱེད་པ་དང༌། རྨི་ལམ་བལྟར་གཞུག་པ་དང་ཆོས་བཤད་པ་རྣམས་ཏེ། དེ་རྣམས་ཀྱང་རྒྱུད་ལས་ནི་ཁ་ཅིག་ལྟག་འོག་ཏུ་འབྱུང་མོད་ཀྱི། ལས་སུ་བྱ་བའི་རི་པ་འདི་ལྟར་བལྟའོ། །དེ་ལ་གསུམ་ལ་སྐྱབས་སུ་འགྲོ་བ་བྱིན་པ་ཞེས་པ་སྟོན་ཏོ། །སངས་རྒྱས་དང་ཆོས་དང་འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཏེ། བརྒྱ་ལ་སྔོན་སོ་སོར་ཐར་པ་ལ་སོགས་པའི་སྒོམ་པའི་སྒོ་ནས་སྐྱབས་སུ་སོང་ཟིན་པ་ཡང་སྔོན་སོང་བ་ནི་འཕགས་པའི་གང་ཟག་བརྒྱད་ཀྱི་དགེ་འདུན་ལ་སྐྱབས་སུ་སོང་གི །འདིར་ནི་སངས་རྒྱས་དང་ཆོས་ལ་སྐྱབས་སུ་སོང་བ་སྔ་མ་དང་མཐུན་དུ་ཟིན་ཀྱང་དགེ་འདུན་ལ་མི་མཐུན་ཏེ། འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ལ་བྱེ་བྲག་ཏུ་སྐྱབས་སུ་སོང་བའི་ཕྱིར་སྔོན་གསུམ་ལ་སྐྱབས་སུ་སོང་ཟིན་ཀྱང༌། ཡང་འདིར་སྐྱབས་སུ་གཏང་བར་བྱའོ། །དེ་ལས་གཞན་ལ་སྔོན་སྐྱབས་སུ་མ་སོང་བ་རྣམས་གདོད་སྐྱབས་སུ་གཏང་བར་བྱ་བའི་ཕྱིར་རོ། །དེ་སྟེ་འདིར་སྔོན་སྐྱབས་སུ་སོང་ཟིན་པ་ཡང་བརྟན་པར་བྱ་བའི་ཕྱིར་ཡང་འདིར་སྐྱབས་སུ་གཏང་བར་བྱའོ། །སྡིག་མི་བྱ་བ་རྣམས་སྒྲོགས་ཤིག །ཅེས་པ་ནི་སྔོན་ཆད་བྱས་པའི་སྡིག་པ་སླར་བཤགས་པ་དང། ད་ལྟར་དང་ཕྱིས་བྱེད་པར་འགྱུར་བ་མི་བྱ་བར་ཡི་དམ་བཅའ་བའི་ཕྱིར་ཏེ། དེ་ལ་ད་ལར་དང་ཕྱིས་བྱེད་པར་འགྱུར་བ་མི་བྱ་བའི་ཡི་དམ་བཅའ་བའི་རིགས་ན། སྔོན་བྱས་ཟིན་པ་སླར་བཤགས་པ་ཅི་ཕན་ཞེ་ན། སྡིག་པ་སྔོན་བྱས་པ་ལ་ཡོན་ཏན་དུ་མི་ལྟ་ཞིང་འཆགས་པ་འཆི་འཕོ་བའི་ཚེ་སྡིག་པ་བྱེད་པའི་དངོས་པོ་དེ་མངོན་དུ་མི་འགྱུར་བའི་ཕྱིར་རོ། །དེ་ལ་སྡིག་པ་བཤགས་པ་ཡང་གསུམ་ལ་སྐྱབས་སུ་འགྲོ་བའི་སྔོན་རོལ་དུ་བྱ་སྟེ། ཅིའི་ཕྱིར་ཞེ་ན། སྡིག་བཤགས་ཏེ་གཙང་མར་བྱས་པའི་བདག་གི་ངོ་བོ་དེ་སྐྱབས་སུ་གཏང་བར་འོས་པའི་ཕྱིར་རོ། །དེ་ནས། དེ་ལ་མེ་ཏོག་སྤོས་བྲིམས་ཏེ། །ཞེས་པ་ནི་དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་བཟུང་ཟིན་པའི་འོག་ཏུ་བྱ་སྟེ་ཅིའི་ཕྱིར་ཞེན། དེ་ལ་སྡིག་པ་བཤགས་ཤིང་སྐྱབས་སུ་སོང་ལ་སྡོམ་པ་གཟུང་བས་སློབ་མ་དེ་ནོད་དུ་གྱུར་ཅིང་སྦྱིན་པའི་གནས་པས་དྲི་དང་མེ་ཏོག་སྦྱིན་ནོ། །དུས་གསུམ་དུ་མ་བསྒྲིབས་པའི་ཡེ་ཤེས་ཀྱི་སྡོམ་པ་
འཛིན་དུ་ཆུག་ཅིག་ཅེས་པ་དུས་གསུམ་དུ་སྒྲིབ་པ་མེད་པའི་ཡེ་ཤེས་ནི་ཐམས་ཅད་མཁྱེན་པའི་ཡེ་ཤེས་ཏེ། ཐམས་ཅད་མཁྱེན་པའི་ཡེ་ཤེས་དེ་ནི་ཤེས་བྱ་དང་ཉོན་མོངས་པའི་སྒྲིབ་པ་སྤངས་པའི་མཚན་ཉིད་ལས་འདས་པ་དང་ད་ལྟར་དང་མ་འོངས་པའི་དུས་ཐམས་ཅད་དུ་ཡང་དག་པ་ཉིད་ཀྱི་དངོས་པོ་ལ་མི་སྒྲིབ་ཅིང་ཐོགས་པ་མེ་དཔར་མཐོང་བས་ན་དུས་གསུམ་དུ་སྒྲིབ་པ་མེད་པའི་ཡེ་ཤེས་ཞེས་བྱ་སྟེ། ཡེ་ཤེས་དེ་ཐོབ་པར་བྱ་བའི་ཕྱིར་མི་དགེ་བའི་ལས་ཀྱི་ལམ་བཅུ་སྤོང་བའི་སྡོམ་པ་ནི་དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་ཞེས་བྱའོ། །སྡོམ་པ་དེ་ཡང་ཀུན་རྫོབ་དང་དོན་དམ་པའི་བྱེ་བྲག་གིས་ཞིབ་ཏུ་འོག་ནས་འཆད་དོ། །གཟུང་བ་དང་དེ་ནས་བསྔགས་པའི་སོ་ཤིང་ཨུ་དུམྦཱ་རའམ་ཨ་ཤྭཏྠ་ཡང་རུང་སྟེ། ཤིང་རབ་ཏུ་བཟང་བ་སྤོས་དང་མེ་ཏོག་ལ་སོགས་པས་བརྒྱན་ཏེ། རྩེ་མོ་དག་གཅིག་ཏུ་གཤིབས་ལ་བྱིན་ཅིག་ཅེས་པ་ནི་གཙང་ཞིང་དག་པར་བྱ་བའི་ཕྱིར་དང་འཇིག་རྟེན་པའི་ཚུལ་དུ་ཡང་སང་ལྟ་བུ་ནས་སྨྱུང་བར་འདུག་པར་བྱ་ན། དོ་ནུབ་ཤིང་བཅའ་བར་སྲིང་དེ། དེ་དག་དང་མཐུན་པར་བྱ་ཞིང་གཟུང་བའི་ཕྱིར་དང༌། སོ་ཤིང་དེ་བོར་ནས་ཁ་གང་དུ་བལྟ་བ་ལས་སློབ་མ་རྣམས་གྲུབ་པ་ལ་སོགས་པ་གང་གི་སྣོད་དུ་གྱུར་པའི་ལྟས་བལྟ་བའི་ཕྱིར་རོ། །དེ་ནས་ཤར་ཕྱོགས་སམ་བྱང་ཕྱོགས་གཅིག་ཏུ་བལྟ་སྟེ། ཤིན་ཏུ་སེམས་ཐུབ་པར་གྱིས་ལ་འཆར་ཆུག་ཅིག །སོ་ཤིང་བོར་བའི་ལྟས་ལས་སེམས་ཅན་སྣོད་ཡིན་ནམ་མ་ཡིན་རྟོགས་ཤིག་ཅེས་པ་ནི་ཁ་ཕྱོགས་སུ་བལྟས་པ་ལ་སོ་ཤིང་གི་ཁ་བདག་ལ་བལྟས་པར་གྱུར་ན་གྲུབ་པ་མཆོག་མྱུར་དུ་འཐོབ་པའི་སྣོད་དུ་ཡང་འགྱུར་ཞིང་སོ་ཤིང་གི་ཁ་ནུབ་ཕྱོགས་སུ་བལྟས་པའི་ཞར་གྱི་དབང་དུ་བྱས་པའི་ལས་ཀྱང་འགྲུབ་པར་འགྱུར་རོ། །སོ་ཤིང་རྩེ་ཤར་ཕྱོགས་སུ་བལྟས་ན། གྲུབ་པ་མཆོག་དང་རྒྱས་པའི་ལས་ཀྱི་སྣོད་དུ་འགྱུར་རོ། །སོ་ཤིང་ཁ་ལྷོ་ཕྱོགས་སུ་བལྟས་ན། མངོན་པར་སྤྱོད་པའི་ལས་འགྲུབ་པའི་སྣོད་དུ་འགྱུར། བདག་ཁ་བྱང་ཕྱོགས་སུ་བལྟས་ལ་སོ་ཤིང་གི་ཁ་བདག་ལ་བལྟས་ན། གྲུབ་པ་འབྲིང་པོ་མྱུར་དུ་འཐོབ་པའི་སྣོད་དུ་འགྱུར། སོ་ཤིང་གི་ཁ་བྱང་ཕྱོགས་སུ་བལྟས་ན་ཞི་བའི་ལས་འགྲུབ་པར་འགྱུར། བྱང་དང་ཤར་གྱི་
མཚམས་སུ་བལྟས་ན་ཞི་བ་དང་རྒྱས་པ་གཉི་ག་འགྲུབ་པར་འགྱུར། ཤར་དང་ལྷོའི་མཚམས་སུ་བལྟས་ན་མངོན་པར་སྤྱོད་པ་འགྲུབ། ལྷོ་ནུབ་ཀྱི་མཚམས་སུ་བལྟས་ན་བསྐྲད་པ་དང་སྐམས་པ་ལ་སོགས་པའི་ལས་འགྲུབ། ནུབ་བྱང་གི་མཚམས་སུ་བལྟས་ན་གནོད་སྦྱིན་མ་ལ་སོགས་པར་འགྲུབ། སོ་ཤིང་གཞི་བོར་ཟུགས་ཏེ་རྩེ་པར་སྣང་ལ་བལྟས་ན་བར་སྣང་ལ་འགྲོ་བ་འགྲུབ་པར་འགྱུར། གྱེན་དུ་བལྟས་ན་རིག་འཛིན་ལ་སོགས་པ་འགྲུབ། ཁ་ཐུར་དུ་བལྟས་ན་སའི་འོག་ཏུ་འགྲོ་བ་འགྲུབ་པའི་སྣོད་དུ་འགྱུར་ཏེ། ཞིབ་ཏུ་ནི་གསང་བའི་རྒྱུད་ལ་སོགས་པར་བལྟའོ། །སོ་ཤིང་བལྟས་ཏེ་བལྟ་བ་ཡང་མཚན་ཉིད་དུ་གསུངས་པ་དང་ལྡན་པའི་སློབ་མ་རྣམས་ལ་ལྟའི། སློབ་མ་ཕལ་རྣམས་ལ་ནི་སོ་ཤིང་གི་ལྟས་དེ་དག་དང་ལྡན་དུ་ཟིན་ཀྱང་གྲུབ་པ་ལ་སོགས་པ་དེ་ལྟ་བུའི་ནན་ཏན་མི་བྱེད་པས་སློབ་མ་ཕལ་རྣམས་ལ་ནི་ལྟས་དེ་རྣམས་མི་བལྟར་མི་རུང་བ་མེད་དོ། །དེ་ནས་མདུད་པ་གསུམ་དང་ལྡན་པའི་སྐུད་པས་དཔུང་པ་གཡོན་པར་རང་གི་སེམས་གཅིག་ཏུ་གྱིས་ལ་ཆིངས་ཤིག་ཅེས་པའི་འཕགས་པ་མི་གཡོ་བའམ། ཁམས་གསུམ་རྣམ་པར་རྒྱལ་བ་གང་ཡང་རུང་བའི་སྔགས་ཀྱིས་མདུད་པ་རེ་རེ་ལ་སྔགས་ལན་རེ་གདབ་སྟེ་སློབ་མ་དེ་རྣམས་བསྲུང་བའི་ཕྱིར། དཔུང་པ་གཡོན་བ་ལ་སློབ་དཔོན་ཉིད་ཀྱིས་བཅིང་ངོ༌། །དེ་ལྟར་སློབ་མ་རྣམས་སྡིག་པ་དང་བར་ལྡན་ན་ཀུན་དུ་སྡུས་ལ་འདི་ལྟར་སྤྲོ་བ་སྐྱེད་ཅིག་དང༌། སེམས་བརྟན་པར་འགྱུར་ཞེས་པ་ནི་འོག་ནས་འབྱུང་བའི་ཚིགས་སུ་བཅད་པས་གཟེངས་བསྟོད་ན། སློབ་མ་རྣམས་དགའ་ཞིང་སྤྲོ་བས་སེམས་བརྟན་པར་འགྱུར་རོ། །དེང་ནི་ཁྱེད་ཀྱིས་མཉམ་པ་མེད་པ་ཡི། །རྙེད་པ་ཐོབ་པ་མཐུ་ཆེན་རྣམས་ཀྱི་སྟེ། །གང་ཕྱིར་རྒྱལ་བ་ཀུན་གྱིས་ཁྱེད་རྣམས་ཀྱི། །སྲས་དང་བཅས་པས་བསྟན་པ་འདིར། །ཐམས་ཅད་ཡོངས་སུ་བཟུང་བས་ན། །སྐྱེ་བཞིན་པ་ནི་མཐུ་ཆེན་རྣམས། །དེ་བས་ཁྱེད་རྣམས་ཐེག་ཆེན་ལ། །གང་ཕྱིར་སང་ནི་སྐྱེ་བར་འགྱུར། །ཞེས་པ་ནི་ད་ལྟར་ཁྱེད་ཀྱིས་སྡིག་པ་བཤགས་ཤིང༌། སྐྱབས་སུ་སོང་བ་དང་སྡོམ་པ་གཟུང་བས་མཉམ་པ་མེད་པ་ཐོབ་པར་བྱ་བ་བླ་ན་མེད་པའི་བྱང་ཆུབ་དེ་ཡང་ཁྱེད་ཀྱིས་ཐོབ་བོ་ཞེས་པ་སྟེ། ཅིའི་ཕྱིར་ཞེ་ན། རྒྱལ་བ་སྲས་དང་བཅས་པས་བསྟན་པ་ལ་ཁྱེད་ཡོངས་སུ་གཟུང་བའི་ཕྱིར་རོ། །དེ་བས་ན་ཁྱེད་ད་ནི་ཐེག་པ་ཆེན་
པོ་ལ་སྐྱེ་བཞིན་པ་སྟེ། སད་ནི་ཐེག་པ་ཆེན་པོ་ལ་སྐྱེ་བར་འགྱུར་རོ་ཞེས་པ་སྟེ་དེ་ལ་མཉམ་པ་མེད་པའི་རྙེད་པ་ཞེས་པ་ནི་སྔགས་ཀྱི་ཚུལ་དུ་སྤྱོད་པའི་ཉན་ཐོས་དང་རང་སངས་རྒྱས་ཐམས་ཅད་ཀྱི་ཐེག་པ་དང༌། ཐེག་པ་ཆེན་པོ་ཕ་རོལ་ཏུ་ཕྱིན་པ་ལ་སོགས་པ་དང་ཡང་མི་མཉམ་པ་ཞེ་ན། ཕ་རོལ་ཏུ་ཕྱིན་པ་ལ་སོགས་པ་སྤྱོད་པ་འདྲ་མོད་ཀྱི། འདི་སྔགས་ཀྱི་བཟླས་པ་ལ་སོགས་པ་ཁྱད་དུ་ལྷག་པར་སྤྱོད་པ་ལ་མི་མཉམ་པ་སྟེ། ཐོབ་ཅེས་པ་ནི་དེ་ལྟ་བུ་ཐོབ་ཅེས་པའོ། །མཐུ་ཆེན་རྣམས་ཀྱིས་ཞེས་པ་ནི་སློབ་མ་རྣམས་ལ་བསྟོད་པའི་ཚིག་སྟེ། དེ་ལྟ་བུའི་མཐུ་ཆེན་པོ་ལ་ཞུགས་པས་བཙུན་པ་ཞེས་པའི་དོན་ཏོ། །རྒྱལ་བ་སྲས་དང་བཅས་པ་ཞེས་པ་ནི་སངས་རྒྱས་བཅོམ་ལྡན་འདས་སྲས་བྱང་ཆུབ་སེམས་དཔའ་དང་བཅས་པ་ཞེས་པ་སྟེ། གང་གི་ཕྱིར། རྒྱལ་བ་ཀུན་གྱིས་ཁྱེད་རྣམས་ནི། །ཞེས་བར་འབྲེལ་ཏོ། །བསྟན་པ་འདི་ཞེས་པ་ནི། ཐམས་ཅད་ཡོངས་སུ་བཟུང་བས་ན། །ཞེས་པར་འབྲེལ་ཏེ། རྒྱལ་བ་སྲས་དང་བཅས་པས་སྔགས་སྤྱད་པའི་བསྟན་པ་འདིར་ཡོངས་སུ་བཟུང་བས་ན། ཁྱེད་རྣམས་ཀྱིས་མཉམ་པ་མེད་པའི་རྙེད་པ་ཐོབ་བོ་ཞེས་པར་འབྲེལ་ཏོ། །སྐྱེ་བཞིན་པ་ནི་ཞེས་པ་ཐེག་པ་ཆེན་པོ་ལ་སྐྱེ་བཞིན་པ་སྟེ། དེ་བས་ཁྱེད་རྣམས་ཐེག་ཆེན་ལ། །གང་ཕྱིར་སང་ནི་སྐྱེ་བར་འགྱུར། །ཞེས་པ་ནི་སང་ལྟ་བུ་ན་དཀྱིལ་འཁོར་དུ་འཇུག་པའི་ཚེ་བྱང་ཆུབ་ཏུ་སེམས་བསྐྱེད་པ། ཐེག་པ་ཆེན་པོ་ལ་སྐྱེས་ཟིན་ཞེས་པའི་དོན་ཏོ། །དེ་ནས་རྨི་ལམ་དུ་གཙུག་ལག་ཁང་དང་ཀུན་དགའི་རབ་བཟང་པོ་རྣམས་དང་ཞེས་པ་ནས་ཤིན་ཏུ་བརྟན་པ་ཁྱེད་ཀྱིས་སང་ནང་པར་ང་ལ་ཟློས་ཤིག་ཅེས་དེ་སྐད་བསྒོ་ལ་དེ་ནས་སློབ་མ་དེ་དག་ལ་ཡང་ཆོས་ཤོད་ཅིག་ཅེས་པའི་བར་དུ་དེ་ལྟར་སྤྲོ་བ་བསྐྱེད་པ་ལ་སོགས་བ་བྱས་ནས་སློབ་མ་རྣམས་ལ་རྨི་ལམ་གྱི་ལྟས་འདི་རྣམས་བསྟན་ཏེ། འདི་རྣམས་ལས་གང་མཐོང་བ་སང་ནང་པར་སློབ་དཔོན་ལ་ཟློས་སུ་གཞག་པ་སྟེ། རྨི་ལམ་གྱི་ལྟས་དེ་རྣམས་ཀྱང་ས་ལས་བྱུང་བ་དང༌། བར་སྣང་གི་དང་འཕགས་པའི་དང་རྣམ་པ་གསུམ་སྟེ་རབ་འབྲིང་ཐ་མར་བལྟའོ། །དེ་གསུམ་རེ་རེ་ལས་ཀྱང་རབ་དང་འབྲིང་དང་ཐ་མ་གསུམ་བྱེད་པར་བྱའོ། །དེ་ལ་གཙུག་ལག་ཁང་ཞེས་པ་ནས་གཉེན་སྡུག་པའི་ཞེས་པའི་བར་དུ་ས་ལས་བྱུང་བའོ། །དེ་
བཞིན་གཤེགས་པ་འམ་རང་སངས་རྒྱས་སམ། དེ་བཞིན་རྒྱལ་བའི་ཉན་ཐོས་སམ་མཐུ་ཆེན་པོའི་བྱང་ཆུབ་སེམས་དཔའ་འམ་ཞེས་པ་ནི་འཕགས་པའིའོ། །འབྲས་བུ་ཐོབ་པའི་འམ་ཞེས་པ་ནས་བཀྲ་ཤིས་པའི་སྒྲ་འབྲས་བུ་ཐོབ་པར་འགྱུར་བ་ཐོས་ན་ཞེས་པའི་བར་དུ་བར་སྣང་ལས་བྱུང་བའི་ལྟས་སོ། །དེ་ལ་གཙུག་ལག་ཁང་ནས་ཁང་ཐོག་ཅེས་པའི་བར་དུ་ས་ལས་བྱུང་བའི་ཐ་མའོ། །རལ་གྲི་དང་ཡིད་བཞིན་ནོར་བུ་ནི་ས་ལས་བྱུང་བའི་རབ་པོ། །གདུགས་དང་མེ་ཏོག་དང་བུད་མེད་གོས་དཀར་མོ་ཅན་བརྒྱན་པ་དང་གཉེན་སྡུག་པ་རྣམས་དང་བྲམ་ཟེ་དང་བ་རྣམས་ཀྱིས་ལས་བྱུང་བའི་ལྟས་ཀྱི་འབྲིང་ངོ༌། །དེ་བཞིན་གཤེགས་པ་ནི་འཕགས་པའི་ལྟས་ཀྱི་རབ་བོ། །བྱང་ཆུབ་སེམས་དཔའ་མཐུ་ཆེན་པོ། རང་སངས་རྒྱས་ནི་འཕགས་པའི་འབྲིང་ངོ༌། །ཉན་ཐོས་ནི་འཕགས་པའི་ཐ་མའོ། །འབྲས་བུ་ཐོབ་བ་ནི་བར་སྣང་གི་ཐ་མའོ། །རྒྱ་མཚོ་རྣམས་དང་རྫིང་ལ་རྐྱལ་ཞིང་བརྒལ་བ་ནི་བར་སྣང་གི་འབྲིད་ངོ༌། །དེ་བཞིན་དུ་ཡིད་དུ་འོང་པའི་སྒྲ་བཀྲ་ཤིས་པ་འབྲས་བུ་ཐོབ་པར་འགྱུར་བ་ནི་ག་ལས་ཐོས་ནས་བར་སྣང་གི་རྨི་ལམ་གྱི་ལྟས་རབ་ཏུ་ཤེས་པར་བྱ་སྟེ། རྨི་ལམ་དེ་རྣམས་ལྟ་པ་ཡང་ཁྱད་པར་གྱི་སློབ་མ་རྣམས་ནི་གང་དུ་དཀྱིལ་འཁོར་དུ་ཉལ་བའི་རིགས་སོ། །ལམ་འདི་མཆོག་སྟེ་དཔལ་དང་ལྡན། །ཐེག་པ་ཆེན་པོ་རྒྱ་མཚོ་ཆེ། །ཞེས་པ་ནས། ཐེག་པ་མཆོག་ཏུ་བཟང་བ་འདི། །ཚུལ་བཞིན་འདུག་ན་ཐོབ་པར་འགྱུར། །ཞེས་པའི་བར་དུ་ཡང་སློབ་མ་དེ་རྣམས་སྤྲོ་བར་བྱ་བའི་ཕྱིར་ཐེག་པ་ཆེན་པོ་ལས་སྐྱེས་པར་འགྱུར་རོ་ཞེས་པ་ནི། ཐེག་པ་ཆེན་པོ་ཉིད་རྒྱུ་དང་འབྲས་བུའི་ཡོན་ཏན་འདིར་བཤད་དེ། དེ་ལྟ་བུའི་ཐེག་པ་ཁྱེད་ཀྱིས་ཐོབ་པར་འགྱུར་རོ་ཞེས་བསྟན་པ་སྟེ། ལམ་འདི་མཆོག་སྟེ་དཔལ་དང་ལྡན། །ཞེས་པ་ནི་བླ་ན་མེད་པའི་བྱང་ཆུབ་ཏུ་འགྲོ་བའི་ལམ་སྟེ། དེ་ཡང་སྔགས་ཀྱི་ཚུལ་སྤྱོད་པའི་ལམ་མོ། །མཆོག་ཅེས་པ་ནི་ཉན་ཐོས་དང་རང་སངས་རྒྱས་ཀྱི་ཐེག་པ་དང༌། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་སྤྱོད་པ་རྣམས་ཀྱི་ལམ་ལས་འཕགས་པའི་ཕྱིར། བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་སྤྱོད་པའི་ལམ་ལས་ཅིའི་ཕྱིར་འཕགས་ཤེ་ན། ཕ་རོལ་ཏུ་ཕྱིན་པ་ལ་སོགས་པ་སྤྱོད་པ་འདྲ་ཡང་ལྷ་རྣམས་མཉེས་པར་བྱ་བའི་ཕྱིར་ཡན་
ལག་བཞི་ལ་སོགས་པའི་སྔགས་བཟླས་པ་དང་མཆོད་པ་དང་སྦྱིན་སྲེག་ལ་སོག་པའི་སྒོ་ནས་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་རྒྱུན་མི་འཆད་པར་སྤྱོད་པས་འབྲས་བུ་མྱུར་དུ་ཐོབ་པར་འགྱུར་བའི་ཕྱིར་མཆོག་གོ །དཔལ་ལྡན་ཞེས་པ་ནི་མངོན་པར་འཆར་བའི་མཚན་ཉིད་ལྷ་དང་མིའི་ལོངས་སྤྱོད་ཀྱི་བདེ་བ་དང༌། རིག་འཛིན་ལ་སོགས་པའི་གྲུབ་པ་ཐོབ་པ་དང༌། མ་ལུས་པའི་བདེ་བའི་མཚན་ཉིད་མི་གནས་པའི་མྱ་ངན་ལས་འདས་པ་རིམ་གྱིས་ཐོབ་པར་འགྱུར་བས་ན་དཔལ་དང་ལྡན་པའོ། །ཐེག་པ་ཆེན་པོ་འབྱུང་ཆེན་ལ། །ཞེས་པ་ནི་སྔགས་སྤྱོད་པའི་ཚུལ་གྱིས་ཐེག་པ་ཆེན་པོ་ནི་བླ་ན་མེད་པའི་བྱང་ཆུབ་འབྱུང་བའི་རྒྱུའི་གཙོ་བོ་ཡིན་པས་ན་འབྱུང་བ་ཆེན་པོ་ཞེས་བྱའོ། །གང་གི་ཕྱིར་ཁྱེད་ཅག་དོང་བ་ནི་དེ་བཞིན་གཤེགས་པར་འགྱུར་བར་འོང་དོ་ཞེས་པ་ནི་དེ་ལྟར་ཐེག་པ་ཆེན་པོ་ལ་ཞུགས་ན། དེའི་འབྲས་བུ་ཐམས་ཅད་མཁྱེན་པའི་ཡེ་ཤེས་ཀྱི་རང་བཞིན་ཆོས་ཀྱི་སྐུ་ཐོབ་པར་འགྱུར་རོ་ཞེས་པའོ། །དེ་ནས་བཅོམ་ལྡན་འདས་ལ་འཕྲོ་བ་དང་བྲལ་བ་རྡོ་རྗེ་འཛིན་གྱིས་འདི་སྐད་གསོལ་ཏོ་ཞེས་པ་ནས་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ལུས་དང་ངག་དང་ཡིད་ཡོངས་སུ་བཏང་བ་མ་ཡིན་པའི་བསླབས་པ་གཟུང་བར་བྱ་བ་མེད་དོ་ཞེས་པའི་བར་དུ་ཡང་སྔར་དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་གསུངས་པ་དེ་ཉིད་ཞིབ་ཏུ་བཤད་པ་སྟེ། བཅོམ་ལྡན་འདས་གང་ལ་གནས་པའི་བྱང་ཆུབ་སེམས་དཔའ། རྣམས་ཀྱི་སངས་རྒྱས་དང་བྱང་ཆུབ་སེམས་དཔའ་དེ་རྣམས་མཉེས་པར་འགྱུར་བ་དུས་གསུམ་དུ་མ་བསྒྲིབས་པའི་སྡོམ་པ་དེ་བཤད་དུ་གསོལ་ཞེས་པ་ནི་དུས་གསུམ་དུ་སྒྲིབ་པ་མེད་པའི་ཡེ་ཤེས་སྡོམ་པ་དེ་ལ་གནས་ནས་སངས་རྒྱས་དང་བྱང་ཆུབ་སེམས་དཔའ་རྣམས་མཉེས་ཏེ། མངོན་པར་མཚར་བ་དང་མ་ལུས་པའི་བདེ་བ་ཐོབ་པར་འགྱུར་བ་དེ་བཞིན་དུ་བཤད་པར་གསོལ་བའོ། །དུས་གསུམ་དུ་སྒྲིབ་པ་མེད་པའི་ཡེ་ཤེས་སྡོམ་པ་ནི་བཤད་ཟིན་ཏོ།། །།ལུས་དང་ངག་ཡིད་ལྷན་ཅིག་གཏོད། །ཅེས་པའི་ལུས་དང་ངག་ཡིད་གསུམ་དུས་གཅིག་ཏུ་སྟོང་པ་ཉིད་ལ་འཇུག་པ་སྟེ། དེ་ལྟར་ལུས་དང་ངག་ཡིད་གསུམ་སྟོང་པ་ཉིད་ཀྱི་རང་བཞིན་དུ་འགྱུར་ཏེ་དམིགས་སུ་མེད་པས་ཆགས་པར་བྱ་བ་དང༌། ཆགས་
པའི་དངོས་པོ་དང༌། ཆགས་པར་བྱེད་པ་ལ་སོགས་པ་ཡང་དམིགས་སུ་མེད་དེ། དེ་ལྟར་དམིགས་སུ་མེད་པ་ནི་ལུས་དང་ངག་དང་ཡིད་རྣམས་སྡིག་པ་ལ་སོགས་པ་མི་བྱེད་པ་སྟེ་དེ་ནི་སྡོམ་པའོ། །ཆོས་ཐམས་ཅད་ལ་རྩོལ་བ་མེད་པ་ཞེས་པ་ནི། ཕུང་པོ་དང་ཁམ་དང་སྐྱེ་མཆེད་ལ་སོགས་པའི་ཆོས་ཐམས་ཅད་སྐྱེ་བར་བྱེད་པའི་རྒྱུ་ལུས་དང་དག་ཡིད་གསུམ་མི་བྱེད་ཅེས་པ་སྟེ། དེ་ལྟེ་དེ་དག་སྐྱེད་པའི་རྒྱུ་མ་བྱས་པའི་སྡོམ་པ་སྟེ། དེ་དག་གི་དོན་དམ་པའི་སྡོམ་པ་བསྟན་པའོ། །དེ་ཡང་གང་ཞེ་ན་སུས་སངས་རྒྱས་དང་བྱང་ཆུབ་སེམས་དཔའ་ལ་བདག་གི་ལུས་རབ་ཏུ་གཏོད་པའོ་ཞེས་པ་ནི་དུས་གསུམ་དུ་སྒྲིབ་པ་མེད་པའི་སྡོམ་པ་དེ་གཞན་མ་ཡིན་གྱི། བདག་གི་ལུས་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕུལ་བ་དེ་སངས་རྒྱས་དང་བྱང་ཆུབ་སེམས་དཔའ་མངའ་སྟེ་དབང་བདག་ལ་མེད་དོ། །དེ་ལྟར་དབང་བདག་ལ་མེད་དེ་སངས་རྒྱས་དང་བྱང་ཆུབ་སེམས་དཔའ་མངའ་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་ནི་མི་དགེ་བ་བཅུའི་ལས་ཀྱི་ལམ་མི་སྤྱོད་དོ། །དེ་བས་ན་གང་གིས་ལུས་ཕུལ་བ་དེས་ཀྱང་ཆོས་བཞིན་དུ་བྱ་དགོས་ཏེ། མི་དགེ་བའི་ལས་ཀྱི་ལམ་བཅུ་ལུས་དང་ངག་ཡིད་གསུམ་གྱི་སྒོ་ནས་མི་སྤྱོད་པས་སྡོམ་པ་ཞེས་བྱའོ། །དེ་བས་ན་གསུངས་པ་དེ་ཅིའི་ཕྱིར་ཞེ་ན། གང་གིས་བདག་གི་ལུས་ཡོངས་སུ་བཏང་བ་དེས་ནི་དངོས་པོ་གསུམ་ཡོངས་སུ་བཏང་པའོ། །གསུམ་པོ་དེ་གང་ཞེ་ན་ལུས་དང་ངག་ཡིད་དོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་ལུས་དང་ངག་དང་ཡིད་གསུམ་གྱི་སྡོམ་པས་བསྡམ་པར་བྱའོ་ཞེས་པའོ། །དེ་ཅིའི་ཕྱིར་ཞེ་ན་བྱང་ཆུབ་སེམས་དཔའ་ནི་ལུས་དང་ངག་ཡིད་གསུམ་བཏང་བ་མ་ཡིན་པའི་སྡོམ་པ་གཟུང་བར་བྱ་བ་མེད་དོ་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ལུས་ཕུལ་བས་ལུས་དང་ངག་དང་ཡིད་གསུམ་ཆར་ཕུལ་བར་འགྱུར་ཏེ། ལུས་དང་ངག་དང་ཡིད་གསུམ་ལ་བདག་མི་དབང་ན། ལུས་དང་ངག་ཡིད་གསུམ་གྱི་སྒོ་ནས་མི་དགེ་བའི་ལས་བཅུ་མི་སྤྱོད་པས་དེ་ཉིད་སྡོམ་པ་སྟེ། ལུས་དང་ངག་ཡིད་གསུམ་ལས་ལྷག་པའི་སྡོམ་པ་གཞན་ཡོད་པ་མ་ཡིན་ཞེས་པའི་དོན་ཏེ། མདོར་ན་གང་གིས་སངས་རྒྱས་དང་བྱང་ཆུབ་སེམས་དཔའ་རྣམས་ལ་བདག་གི་ལུས་ཕུལ་བ་དེས་ལུས་དང་ངག་ཡིད་གསུམ་
གྱི་སྒོ་ནས་མི་དགེ་བ་བཅུའི་ལས་མི་སྤྱོད་པ་སྟེ། དེ་དག་ཐམས་ཅད་མཁྱེན་པའི་ཡེ་ཤེས་སྒྲིབ་པ་མེད་པ་ཐོབ་པར་བྱེད་པའི་རྒྱུར་འགྱུར་བ་བསྟན་པའོ། །དེ་ནས་ཕྱི་དེ་ཉིན་པར་བདག་ལུས་རྡོ་རྗེ་སེམས་དཔར་བྱིན་གྱིས་རློབས་ལ་ཞེས་པ་ནས་སེམས་དག་པར་འགྱུར་བའི་ཕྱིར་སྤོས་ཀྱི་ཆུ་གཙང་མ་བྱིན་ཅིག་ཅེས་པའི་བར་དུ་དཀྱིལ་འཁོར་འདྲི་བའི་ནང་པར་སློབ་དཔོན་གྱིས་ལས་སུ་བྱ་བ་རྣམས་བཤད་པ་སྟེ། ནང་བར་ཉི་མའི་རྩེ་ལ་ལྷོ་བྱང་ཤར་ནུབ་ལ་སོགས་པ་བརྟགས་ན་གསལ་བར་མངོན་ཏེ། དེ་བས་ན་ནན་པར་ཁྲུས་ལ་སོགས་པ་བྱས་ནས་དཀྱིལ་འཁོར་བྲི་བའི་ས་དེའི་ནང་དུ་ཞུགས་ཏེ། བཅོམ་ལྡན་འདས་རྣམ་པར་སྣང་མཛད་ཡིད་ལ་བྱ་སྟེ། ཕྱག་འཚལ་བ་ལ་དམ་ཚིག་གསུམ་གྱིས་ཕྱག་རྒྱ་བཅིངས་ཏེ། ཆོས་ཀྱི་དབྱིངས་ཀྱི་ཕྱག་རྒྱས་བདག་ཉིད་སྟོང་པར་བྱིན་གྱིས་བརླབས་ཏེ། ཆོས་ཀྱི་འཁོར་ལོའི་ཕྱག་རྒྱ་བཅིངས་ནས་རྡོ་རྗེ་སེམས་དཔའ་བྱིན་གྱིས་བརླབ་བོ། །དེ་ནས་རྡོ་རྗེ་གོ་ཆའི་ཕྱག་རྒྱ་བཅིངས་ཏེ་གོ་ཆ་བགོའོ། །དེ་ནི་རྡོ་རྗེ་སེམས་དཔར་བྱིན་གྱིས་བརླབས་ཏེ། རྡོ་རྗེ་སེམས་དཔའ་ཞེས་བྱ་བ་ནི་སེམས་ཤིན་ཏུ་བརྟན་པ་རྡོ་རྗེ་དང་འདྲ་བ་ལ་བྱ་སྟེ། དེ་ཡང་གང་ཞེ་ན། ཕྱིན་ཅི་མ་ལོག་པ་ཡོངས་སུ་རྫོགས་པའི་མཚན་ཉིད་བྱང་ཆུབ་ཀྱི་སྙིང་པོའི་སེམས་ཏེ། དེ་ཉིད་དཔལ་རྡོ་རྗེ་སེམས་དཔའ་བྱང་ཆུབ་སེམས་དཔའི་སྐུར་བྱིན་གྱིས་བརླབས་པའོ། །དེ་ལྟར་སློབ་དཔོན་དེ་རྡོ་རྫེ་སེམས་དཔའི་སྐུར་བྱིན་གྱིས་བརླབས་པ་ལ་དཀྱིལ་འཁོར་གྱིས་ལྷོ་བྱང་ཤར་ནུབ་ལ་སོགས་པ་བརྟགས་ཏེ་གཏན་ལ་དབབ་པ་དང་ལྷ་རྣམས་གར་དགོད་པའི་གནས་རྣམས་ཀྱང་ཡིད་ཀྱིས་གཏན་ལ་དབབ་པར་བྱའོ། །ཡང་སྤོས་ཆུས་བུམ་པ་བཀང་སྟེ། ཁམས་གསུམ་རྣམ་པར་རྒྱལ་བའི་སྔགས་ཀྱིས་བཏབ་ལ་ཐོག་མར་སྒོར་བཞག་སྟེ། མཁས་པས་འགྲོ་བ་ཀུན་ལ་དེས་གཏོར་ཅིག །ཅེས་པ་ནི་གཞུང་ལས་འབྱུང་བའི་མཚན་ཉིད་དང་ལྡན་པའི་བུམ་པ་སྤོས་ཆུས་བཀང་ལ། རིན་པོ་ཆེ་དང་སྨན་དང་འབྲུ་སྣ་ལྔ་བླུགས་ཏེ་དཀྱིལ་འཁོར་གྱི་ཕྱི་རའི་སྒོར་བཞག་སྟེ། སློབ་མ་རྣམས་ནང་དུ་འོང་བའི་ཚེ་བགེགས་བསལ་བའི་ཕྱིར་གཏོར་རོ། །ཁམས་གསུམ་རྣམ་པར་རྒྱལ་བའི་སྔགས་ཀྱིས་བུམ་པ་དེ་ལ་གདབ་པ་དེ་ཡང་སྙིང་པོའི་སྔགས་ཀྱིས་གདབ་ན་བརྒྱ་རྩ་བརྒྱད་དུ་གདབ།
རྩ་བའི་སྔགས་ཀྱིས་གདབ་ན་བདུན་ན་ཉི་ཤུ་རྩ་གཅིག་ཏུ་གདབ་པོ། །དེ་ནས་སེམས་དག་པར་འགྱུར་བའི་ཕྱིར་སྤོས་ཀྱི་ཆུ་གཙང་མ་བྱིན་ཅིག་པ་ནི་སློབ་མ་རྣམས་སྔགས་སྤྱོད་པ་དང་འགལ་བའི་ཁ་ཟས་ཟོས་པའི་རྣམ་པར་རྟོག་པ་བསལ་བའི་ཕྱིར་སྤོས་ཆུ་གཙང་མ་དེ་བླུད་དོ། །གཙང་མ་ཞེས་པ་ནི་སེམས་ཅན་གྱི་ཡན་ལག་ལ་སོགས་པ་མེད་པའོ། །སྔགས་དང་འགལ་བའི་ཁ་ཟས་ཟོས་པའི་རྣམ་པར་རྟོག་པ་མེད་ནའང་སྤོས་ཀྱི་ཆུ་གཅང་མ་འཐུངས་པས་བདག་གི་རྒྱུད་གཏང་མར་གྱུར་ཏོ་སྙམ་པའི་འདུ་ཤེས་སྐྱེས་ཏེ། མི་གཙང་བ་ལ་སོགས་པའི་དོགས་པ་མེད་པར་འགྱུར་བའི་ཕྱིར་སྤོས་ཆུ་བླུད་དོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་གསོལ་ཏོ་ཞེས་པ་ནས་ནམ་སྲོད་ནས་འདི་འབྲི་བ་སྟེ། ནམ་མཁའ་ལ་ཡང་དཀྱིལ་འཁོར་བྲི། །ཞེས་པའི་བར་དུ་དཀྱིལ་འཁོར་ཇི་ཙམ་ན་བྲི་བའི་དུས་ཞུས་པ་དང་བཤད་པ་སྟེ། ཀུན་མཁྱེན་ཞེས་པ་ནི་བཅོམ་ལྡན་འདས་ཐམས་ཅད་མཁྱེན་པའོ། །དུས་དང་ཚོད་ཅེས་པ་ནི་དཀྱིལ་འཁོར་འདྲི་བའི་དུས་དེ་ཉིད་ཀྱི་ཚེ་ན་སྟེ་དེ་བཤད་དུ་གསོལ་ཞེས་པའོ། །སྨྲ་བའི་མཆོག་གིས་བཀའ་སྩལ་གཅིག །ཅེས་པ་ནི་སྨྲ་བ་ཐམས་ཅད་ཀྱི་མཆོག་ནི་སངས་རྒྱས་བཅོམ་ལྡན་འདས་ཏེ། སེམས་དཔའ་ཆེན་པོ་གང་དུས་སུ་བྱིན་གྱིས་བརླབ་པར་འགྱུར་བ་ནི་དཀྱིལ་འཁོར་མཁན། སྔགས་གྲུབ་ནན་ཏན་ཞུགས་ཚེའོ། །ཞེས་པ་ནི་དཀྱིལ་འཁོར་གྱི་མཁན་པོ་དམ་ཚིག་གི་དཀྱིལ་འཁོར་འདྲི་བ་དང་གྲུབ་པའི་དཀྱིལ་འཁོར་འདྲི་བ་ལ་བྱང་ཆུབ་སེམས་དཔའ་རྣམས་དུས་གང་དེར་གཤེགས་པར་འགྱུར་ཞེས་ཞུས་པ་སྟེ། སེམས་དཔའ་ཆེན་པོ་ཞེས་པ་ནི་སངས་རྒྱས་བཅོམ་ལྡན་འདས་ལ་མི་བྱའོ། ཕ་རོལ་ཏུ་ཕྱིན་པ་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ལ་བྱ་སྟེ། ཅི་ཞེ་ན་སངས་རྒྱས་བཅོམ་ལྡན་འདས་ནི་དུས་ཐམས་ཅད་དུ་བྱིན་གྱིས་རློབ་པས་ཞུ་མི་དགོས་སོ། །བྱང་ཆུབ་སེམས་དཔའ་རྣམས་ནི་ཏིང་ངེ་འཛིན་ལས་བཞེངས་ནས་སེམས་ཅན་ཐམས་ཅད་ཀྱི་དོན་ལ་རྟོག་པ་སྔོན་དུ་བཏང་བར་གཤེགས། །དུས་ཐམས་ཅད་དུ་བྱིན་གྱིས་མི་རློབ་བོ། །དེ་བས་དཀྱིལ་འཁོར་འདྲི་བ་ལ་བྱང་ཆུབ་སེམས་དཔའ་རྣམས་གང་གི་དུས་སུ་གཤེགས་པར་འགྱུར་ཞེས་ཞུས་པའོ། །གཉིས་སུ་ན་སེམས་དཔའ་ཆེན་པོ་ཞེས་ནམས་ཀྱང་མི་འབོད་དེ། བྱང་
ཆུབ་སེམས་དཔའ་རྣམས་ལ་སེམས་དཔའ་ཆེན་པོ་ཞེས་འབོད་པར་གྲགས་པས་དེ་བས་སེམས་དཔའ་ཆེན་པོ་ཞེས་པ་ནི་བྱང་ཆུབ་སེམས་དཔའ་ཆེན་པོ་རྣམས་ལ་བྱའོ། །ནམ་སྲོས་ནས་ནི་བྲི་བ་སྟེ། །ནམ་ཡང་དཀྱིལ་འཁོར་བྲིས་པས་སོ། །ཞེས་པ་ནི་དཀྱིལ་འཁོར་འདྲི་བར་འདོད་པ་རྣམས་ཀྱི་ཕྱིར། དུས་ཐམས་ཅད་ཀྱི་དཀྱིལ་འཁོར་ཐམས་ཅད་མཚན་མོ་བྲིའོ་ཞེས་བཀའ་སྩལ་ཏེ། བྱང་ཆུབ་སེམས་དཔའ་དེ་རྣམས་ཀྱང་མཚན་མོའི་དུས་དེར་གཤེགས་པར་འགྱུར་རོ་ཞེས་གསུངས་པའོ། །དེ་བས་ན་འདི་ནི་དམ་ཚིག་གི་དཀྱིལ་འཁོར་དང༌། བསྒྲུབ་པའི་དཀྱིལ་འཁོར་གཉིས་ཀ་ཡང་དུས་ཐམས་ཅད་དུ་མཚན་མོ་བྲི་བར་ཤེས་པར་བྱའོ། །དེ་ལ་གསང་བའི་རྒྱུད་ལ་སོགས་པས་བསྒྲུབ་པའི་དཀྱིལ་འཁོར་མ་གཏོགས་པ་གཞན་ཐམས་ཅད་མཚན་མོ་བྲིའོ་ཞེས་འབྱུང་སྟེ། དེ་བས་ན་བསྒྲུབ་པའི་དཀྱིལ་འཁོར་ཉིན་པར་བྲི་བར་གསུངས་སོ། །དེ་ཅིའི་ཕྱིར་ཞེ་ན་བསྒྲུབ་པ་ནི་ནམ་སྲོས་ནས་ནམ་ལངས་ཀྱི་བར་མཚན་རངས་པར་བསྒྲུབ་དགོས་ཏེ། དེ་བས་ན་བསྒྲུབ་པའི་དཀྱིལ་འཁོར་མཚན་མོ་བྲི་བའི་སྐབས་མེད་དེ་ཉིན་པར་འདྲི་བར་གསུངས་སོ། །འདིར་ནི་གཉིས་ཀ་ཡང་མཚན་མོ་བྲི་བར་གསུངས་པས་དམ་ཚིག་གི་དཀྱིལ་འཁོར་དེ་ཉིད་མཚན་མ་བྲི་བར་བྱའོ། །བསྒྲུབ་པའི་དཀྱིལ་འཁོར་ནི་གསང་བའི་རྒྱུད་ལས་འབྱུང་བ་ལྟར་ཉིན་པར་བྲི་བར་གསུངས་ཀྱི། རྒྱུད་འདི་ལས་མཚན་མོ་བྲི་བར་གསུངས། བསྒྲུབ་པ་ཉིད་ཀྱི་མཚན་མོ་བྲི་བ་ནི་སྐབས་མེད་དེ་དེའི་ནུབ་མོ་བྲིས་ན་མཚན་མོ་མལ་ཚེ་ཐུན་འགའ་དཀྱིལ་འཁོར་བྲི་བར་ཟད་པས་བསྒྲུབ་པ་མཚན་རངས་པར་མི་འགྱུར་ཏེ། དེ་བས་ན་སྔ་དེ་ནུབ་མོ་དཀྱིལ་འཁོར་བྲིས་ལ་ཕྱི་དེ་ནུབ་མོ་བསྒྲུབ་པར་ཤེས་པར་བྱའོ། །དཀྱིལ་འཁོར་ཆེན་པོ་དག་ནུབ་གཅིག་གིས་མི་ཟིན་པ་ཡང་གཞུང་དེ་ལྟར་ཤེས་པར་བྱའོ། །ད་ནི་དཀྱིལ་འཁོར་བྲི་བའི་སླད་དུ་བྲི་བ་ལ་སོགས་པ་བཤད་པར་བྱ་སྟེ། དཀྱིལ་འཁོར་བྲི་བ་དེ་ཡང་སྤྱིར་རྣམ་པ་དྲུག་གིས་ཡོངས་སུ་རྫོགས་པར་འགྱུར་རོ། །དྲུག་གང་ཞེ་ན། དཀྱིལ་འཁོར་སྲད་བུ་བྲེ་བའི་ཏིང་ངེ་འཛིན་བཤད་པ་དང༌། སྲད་བུ་བྲེ་བ་བཤད་པ་དང༌། དཀྱིལ་འཁོར་གྱི་ཚད་བཤད་པ་དང༌། སྣམ་བུའི་རིམ་པར་དབྱེ་བ་དང༌། སྒོ་ཁྱུད་དང་རྟ་བབས་རྣམ་པར་དབྱེ་བ་དང་ལྷ་
རྣམས་ཀྱི་གནས་ངེས་པར་བཤད་པའོ། །དེ་ནས་སློབ་དཔོན་གྱིས་སངས་རྒྱས་ཐམས་ཅད་ལ་ཕྱག་བགྱིས་ལ། ཚོན་སྣ་ལྔའི་སྲད་བུ་ཐོགས་ནས་བདག་གི་ལུས་བཅོམ་ལྡན་འདས་རྣམ་པར་སྣང་མཛད་དུ་བྱིན་གྱིས་བརླབས་ལ་ཞེས་པ་ནི་སྲད་བུ་བྲེ་བའི་ཏིང་ངེ་འཛིན་བཤད་པ་སྟེ། དེ་ལ་སངས་རྒྱས་ཐམས་ཅད་ལ་ཕྱག་བགྱིས་ཏེ་ཞེས་པ་ནི་ཏིང་ངེ་འཛིན་ལ་འཇུག་པར་བྱ་ན། ཐོག་མར་སངས་རྒྱས་རྗེས་སུ་དྲན་ཞིང་ཕྱག་བྱ་བར་རིགས་སོ། །ཚོན་སྣ་ལྔའི་སྐུད་པ་ཞེས་པ་ནི་ཡེ་ཤེས་ལྔའི་རང་བཞིན་དུ་བརྟགས་ཏེ། ཡེ་ཤེས་ལྔ་པོ་དེ་དག་དང་ལྡན་པར་བདག་རྣམ་པར་སྣང་མཛད་ཀྱི་སྐུར་བྱིན་གྱིས་བརླབ་བོ། །བདག་ཉིད་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བྱིན་གྱིས་བརླབས་ལ་ཞེས་པ་ནི་དཀྱིལ་འཁོར་རྣམ་པ་གསུམ་ལ་ཏིང་ངེ་འཛིན་དུ་གནས་པ་ཡང་བྱེ་བྲག་རྣམ་པ་གསུམ་སྟེ། སྙིང་རྗེ་ཆེན་པོའི་དཀྱིལ་འཁོར་ལ་སློབ་དཔོན་རྣམ་པར་སྣང་མཛད་ཀྱི་སྐུར་བྱིན་གྱིས་བརླབས་ཏེ་སྲད་བུ་བྲེ་བ་ལ་སོགས་པ་དཀྱིལ་འཁོར་གྱི་ལས་རྣམས་བྱའོ། །ཡི་གེ་འཁོར་ལོ་བསྐོར་བའི་དཀྱིལ་འཁོར་ལ་ཆོས་ཀྱི་སྐུར་བྱིན་གྱིས་བརླབས་ནས་དཀྱིལ་འཁོར་གྱི་ལས་རྣམས་བྱའོ། །གསང་བའི་དཀྱིལ་འཁོར་ལ་དབང་ཆེན་ལ་སོགས་པའི་དཀྱིལ་འཁོར་ལྔ་དང་ལྡན་པའི་སྐུར་བྱིན་གྱིས་བརླབས་ནས་དཀྱིལ་འཁོར་གྱི་ལས་རྣམས་བྱ་སྟེ། དེ་དག་ཀྱང་ཞིབ་ཏུ་ནི་བསྡུ་པའི་དོན་ལས་བཤད་དོ། །རྒྱུད་ཉིད་ཀྱང་སོ་སོའི་སྐབས་སུ་འབྱུང་ངོ༌། །ཚོན་སྣ་ལྔའི་སྐུད་པ་རྣམས་ཡེ་ཤེས་ལྔར་བརྟགས་པ་ནི་འོག་ནས་ཕྱེ་མའི་སྣ་ལྔ་ལ་སངས་རྒྱས་ལྔར་བརྟགས་པ་དང་སྦྱར་རོ། །ཐོག་མར་ཤར་ཕྱོགས་སུ་སྲང་བུ་བྲེ་བ་ནི། །ལྟེ་བ་ཁུང་དང་བསྙམས་ནས་ནི། །བར་སྣང་ལ་ནི་གཟུང་བར་བྱ། །དེ་ནས་ལྷོ་ཕྱོགས་སོང་ནས་སུ། །བྱང་ཕྱོགས་སུ་ཡང་དེ་བཞིན་བྲེའོ། །ཞེས་པ་ནི་ཐོག་མར་དེ་སློབ་དཔོན་དཀྱིལ་འཁོར་གྱི་ནུབ་ཕྱོགས་ཀྱི་ངོས་ནས་ཁ་ཤར་ཕྱོགས་སུ་བལྟས་ཏེ། འགྲེང་ལ་ནམ་མཁའ་ལ་རང་བཞིན་གྱི་དཀྱིལ་འཁོར་དམིགས་པའི་ཚུལ། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་སོགས་པ་མི་ཟད་པའི་རྒྱན་གྱི་འཁོར་ལོ་དང་བཅས་པ་མངོན་དུ་བསམས་ཏེ། སྲད་བུའི་ཐོག་མ་གྲོགས་ལ་འཛིན་དུ་བཅུག་ལ་ཤར་ཕྱོགས་སུ་གཏོང་ངོ༌། །དེ་ལ་ལྷོ་ཕྱོགས་ནས་བརྐྱང་སྟེ་ནམ་མཁའ་ལ་རང་བཞིན་གྱི་དཀྱིལ་འཁོར་བཏབ་སྟེ།
དེ་ལྟར་ནམ་མཁའ་ལ་སེམས་ཀྱིས་རང་བཞིན་གྱི་དཀྱིལ་འཁོར་བཏབ་ནས། ཕྱིས་ས་ལ་དཀྱིལ་འཁོར་བྲི་བ་ནི་རང་བཞིན་གྱི་དཀྱིལ་འཁོར་དེའི་གཟུགས་བརྙན་ལྟ་བུར་ཤེས་པར་བྱའོ། །དེ་ལྟར་ནམ་མཁའ་ལ་དཀྱིལ་འཁོར་སེམས་ཀྱིས་བསམ་པ་ལ་སྲད་བུ་བྲེ་ཅི་དགོས་ཤེ་ན། ནམ་མཁའ་ལ་རང་བཞིན་གྱི་དཀྱིལ་འཁོར་བསམ་པའི་མཚན་མར་བརྟགས་པའི་ཕྱིར་རོ། །དེ་ནས་སྲད་བུ་ཕྱི་མ་དེ་དང་གོས་བླངས་ཞེས་པ་ནི་སྲད་བུ་སྔ་མའི་དམན་མས་བྲིར་མི་རུང་བས་ན། ཚོན་སྣ་ལྔའི་སྐུད་པ་གཞན་ཞིག་བླངས་ནས་དཀྱིལ་འཁོར་ཕྱི་མ་བྲི་བའི་དོན་ཏོ། །ཤར་ཕྱོགས་བལྟས་ནས་བྲེ་བ་ཡང། །དེ་བཞིན་གཤེགས་པ་དྲན་བཞིན་ནོ། །ཞེས་པ་ནི་དཀྱིལ་འཁོར་མི་འཁྲུལ་པར་གཏན་ལ་དབབ་པའི་ཕྱིར་སྲད་བུ་དབུས་ནས་རྒྱ་གྲམ་དུ་བྲེས་ནས་ཏེ། དཀྱིལ་འཁོར་གྱི་དབུས་སུ་བབ་པར་ཕུར་བུ་བཙུགས་ལ་དེ་ནས་སྲད་བུ་དེ་བལྟས་ཏེ། དབུས་ཀྱི་ཕུར་བུ་བཟུང་ལ་གྲྭ་བཞི་གཏན་ལ་དབབ་པར་བྱའོ། །དེ་ལྟར་གཏན་ལ་དབབ་ནས་གྲྭ་བཞིར་མཚན་མར་ཡང་ཕུར་བུ་བཞི་གཟུགས། སྲད་བུ་ཡང་མདུད་པ་མི་བོར་བར་སྐུད་པ་ལ་སོགས་པའི་མཚན་མ་གདག་པར་བྱའོ། །དེ་བཞིན་གཤེགས་པ་དྲན་བཞིན་དུ། །ཞེས་པ་ནི་དེ་བཞིན་གཤེགས་པ་རྣམས་ཡིད་ལ་བྱས་ནས་ཞེས་པའོ། །དེ་ནས་ལྷོ་ཕྱོགས་སོང་ནས་སུ། །བྱང་ཕྱོགས་སུ་ནི་བྲེ་བར་བྱ། །ཞེས་པ་ཡང་རྒྱ་གྲམ་ཉིད་བྲེ་བ་ལ་བྱའོ། །བློ་ཅན་དེ་ནས་བསྐོར་ནས་སུ། །ནི་རྀ་ཏི་ཡི་ཕྱོགས་འདུག་སྟེ། །བྱང་ཕྱོགས་སུ་ནི་བྲེ་བར་བྱ། །ཞེས་པ་ནི་སློབ་དཔོན་དེ་ལྷོ་དང་ནུབ་ཀྱི་མཚམས་སུ་འདུག་ནས་ཁ་བྱང་ཕྱོགས་སུ་བལྟ་སྟེ་ནུབ་ཀྱི་ངོས་སུ་སྲད་བུ་བྲེ་བར་བྱའོ། །དེ་མས་གཡས་སུ་བསྒྱུར་བར་བྱ། །བསྒྱུར་ཏེ་དེ་རུ་འདུག་ནས་སུ། །ལྷོ་ཕྱོགས་ཀྱང་ནི་བྲེ་བར་བྱ། །ཞེས་པ་ནི་སློབ་དཔོན་ལྷོ་ནུབ་ཀྱི་མཚམས་དེ་ཉིད་དུ་འདུག་ཅིང་ཁ་བྱང་ཕྱོགས་སུ་བལྟས་པ་ལས་ཁ་ཤར་ཕྱོགས་སུ་བསྒྱུར་ཏེ། དེ་ཉིད་དུ་འདུག་པ་ལ་ཤར་ཕྱོགས་སུ་བལྟ་སྟེ། སྲད་བུ་འཛིན་པའི་གྲོགས་པོས་དཀྱིལ་འཁོར་བསྐོར་ནས་ཤར་དང་ལྷོའི་མཚམས་སུ་སོང་སྟེ། ལྷོ་ཕྱོགས་ཀྱི་ངོས་སུ་སྲད་བུ་བྲེ་བར་བྱའོ། །དེ་ནས་གནས་དེ་བཏང་ནས་སུ། །མེ་ཡི་ཕྱོགས་དེར་གནས་ནས་ནི། །ཤར་ངོས་བྲེ་བར་བྱ་བ་ཡང༌། །སྔགས་མཁན་སྔགས་ཀྱི་ཆོ་གར་
གནས། །ཞེས་པ་ནི་སློབ་དཔོན་དེ་ལྷོ་དང་ནུབ་མཚམས་དེ་བོར་ནས་ཤར་ལྷོའི་མཚམས་སུ་འདུག་སྟེ་ཤར་ཕྱོགས་ཀྱི་ངོས་སྲད་བུ་བྲེ་བར་བྱའོ། །སྔགས་མཁན་སྔགས་ཀྱི་ཆོ་གར་གནས། །ཞེས་པ་ནི་རྣམ་པར་སྣང་མཛད་ཀྱི་ཏིང་ངེ་འཛིན་ལ་གནས་ཞེས་པའི་དོན་ཏོ། །དེ་ནས་ཨི་ཤྭ་ནར་སོང་ནས། །ནུབ་ཕྱོགས་སུ་ནི་ཁ་བལྟ་སྟེ། །བྱང་ཕྱོགས་ངོས་དེ་བྲེ་བ་དང༌། །རླུང་གི་གྲྭར་ནི་ཐུག་པའི་བར། །ཞེས་པ་ནི་སློབ་དཔོན་བྱང་དང་ཤར་གྱི་མཚམས་སུ་འདུག་ནས་བྱང་ཕྱོགས་ཀྱི་ངོས་སུ་སྲད་བུ་བྲེ་བར་བྱའོ། །དེ་བཞིན་སྔགས་པས་བྱ་བ་ནི། །ཀུན་ཀྱང་གྲུ་བཞི་ལྷམ་པར་ཏེ། །ཞེས་པ་ནི་དེ་ལྟར་གོང་དུ་སྨོས་པའི་མཚན་ཉིད་ཀྱིས། དཀྱིལ་འཁོར་དེ་ཀུན་གྲུ་བཞི་བྱ། །ཞེས་པའོ། །དེ་ལྟར་དཀྱིལ་འཁོར་གྱི་སྲད་བུ་བྲེ་བར་ཐོག་མར་ནུབ་ཕྱོགས། དེ་ནས་ལྷོ་ཕྱོགས། དེའི་འོག་ཏུ་ཤར་ཕྱོགས། དེ་ནས་བྱང་ཕྱོགས་སུ་བྱ་བ་ཅིའི་ཞེ་ན། ནུབ་ཕྱོགས་ཀྱི་ངོས་ནི་སོ་སོར་རྟོག་པའི་ཡེ་ཤེས་སུ་བརྟག །ལྷོ་ཕྱོགས་ནི་མཉམ་པ་ཉིད་ཀྱི་ཡེ་ཤེས་སུ་བརྟག །ཤར་ཕྱོགས་ནི་མེ་ལོང་གི་ཡེ་ཤེས་སུ་བརྟག །བྱང་ཕྱོགས་ནི་བྱ་བ་ནན་ཏན་གྱི་ཡེ་ཤེས་སུ་བརྟག་སྟེ། དེ་བས་ན་ཐོག་མར་སོ་སོར་རྟོག་པའི་ཡེ་ཤེས་སུ་འགྱུར། དེ་རྫོགས་པ་ལས་མཉམ་པ་ཉིད་ཀྱི་ཡེ་ཤེས་རྫོགས་པར་འགྱུར། མཉམ་པ་ཉིད་ཀྱི་ཡེ་ཤེས་ལས་མེ་ལོང་གི་ཡེ་ཤེས་རྫོགས་པར་འགྱུར། མེ་ལོང་གི་ཡེ་ཤེས་ལས་ལུས་དང་ལོངས་སྤྱོད་དང་གནས་ཀྱི་མཚན་ཉིད་བྱ་བ་ནན་ཏན་གྱི་ཡེ་ཤེས་འབྱུང་སྟེ། དེ་བས་ན་རིམ་པ་དེ་ལྟར་སྨོས་སོ། །ཡེ་ཤེས་བཞིའི་དམིགས་ཡུལ་ཀྱང་ཆོས་ཀྱི་དབྱིངས་རྣམ་པར་དག་པ་སྟེ། དེ་བས་ན་སྲད་བུ་རྒྱ་གྲམ་དུ་བྲེས་པའི་རི་མོ་ངོས་བཞི་ནས་རེ་རེ་བྱུང་བ་ནི་ཆོས་ཀྱི་དབྱིངས་ལ་འདུ་བའོ། །རྒྱ་གྲམ་གྱི་གཅིག་ཏུ་འདུས་པ་ནི་ཆོས་ཀྱི་དབྱིངས་ཀྱི་མཚན་ཉིད་དོ། །དེ་ལྟར་སྲད་བུ་བྲེ་སྟེ་ས་བཅད་ནས་ཚོན་སྣ་གཅིག་པའི་སྐུད་པ་ཐིག་གཤེར་བ་ལ་བསྒྲེས་ཏེ། གོས་ཀྱི་རིམ་གྲོ་མི་བྱེད་པར་སྣང་བར་བྱ་བའི་ཕྱིར་གདབ་བོ། །དེ་ནས་དབུས་སུ་ཞུགས་ནས་ནི། །དེ་ནས་སྣམ་བུ་གསུམ་དུ་དབྱེ། །ཞེས་པ་ནི་སློབ་དཔོན་གྱི་དཀྱིལ་འཁོར་དེའི་ནང་དུ་ཞུགས་ནས་སྣམ་བུ་གསུམ་དུ་བཅད་ད། སྣམ་བུ་གསུམ་པོ་ལས་ཆ་བཞིར་བགོས་ཏེ། ཆ་རེ་རེ་ཡང་ངོས་རེ་རེ་སྦྱར་བའོ། །དེ་བཞིན་དུ་སྣམ་བུ་
གཉིས་ལ་ཡང་ཤེས་པར་བྱ་སྟེ། སྣམ་བུ་གསུམ་དུ་བྱ་བ་ནི། །ས་དེ་འཁོར་ཀྱང་ཐམས་ཅད་དུ། །ཞེས་པ་ནི་དེ་ལྟར་དཀྱིལ་འཁོར་དེ་ཁོར་ཡུག་ཏུ་རིམ་པ་གསུམ་དུ་བྱའོ་ཞེས་པའོ། །རེ་རེ་ལ་ཡང་ཆར་བྱ་བ། །དུམ་བུ་གསུམ་དུ་གཅད་པར་བྱ། །ཞེས་པ་ནི་སྣམ་བུ་གསུམ་པོ་རེ་རེ་ལ་ཡང་ཆ་གསུམ་དུ་བགོས་པ་ལ། ཆ་གཅིག་ནི་བསྐོར་བའི་སྣམ་བུར་གཞག །ཆ་གཉིས་ནི་ལྷ་རྣམས་ཀྱི་གནས་སུ་བྱ་བ་སྟེ། དེ་བས་ན་གསུངས་པ། ཕྱི་རིམ་ཆ་གཅིག་དོར་བ་ནི། །སྣམ་བུ་གཅིག་བསྐོར་ཕྱི་རུ་སྟེ། །ལྷག་མའི་རིམ་པ་གཉིས་པོ་ནི། །ངེས་པར་ལྷ་རྣམས་གནས་པར་རོ། །ཞེས་པ་སྟེ་དེ་དག་གིས་སྣམ་བུ་དབྱེ་བའོ། །སྒོ་ཁྱུང་དག་ནི་ཕྱོགས་བཞི་རུ། །བློ་ཅན་གྱིས་ནི་སོ་སོར་བྱ། །ལྷ་རྣམས་དེ་རུ་བྲི་བ་ཡང༌། །དཀའ་བར་སྤྱོད་པས་ནན་ཏན་བྱ། །ཞེས་པ་ནི་སྒོ་ཁྱུད་རྣམས་རྣམ་པར་དབྱེ་བ་སྟེ། སྒོ་ཁྱུད་དེ་རྣམས་ཀྱང་ཚད་ནི་དཀྱིལ་འཁོར་སྣམ་བུའི་དགུ་ཆ་གཅིག་ཏུ་བརྟགས་ཏེ། སྙིང་པོའི་དཀྱིལ་འཁོར་གྱི་ནང་གི་སྒོ་ཁྱུད་རྣམས་ཤར་ཕྱོགས་ཀྱི་སྒོ་ཁྱུད་ནང་དུ་ཆོས་ཀྱི་སྐུའི་ཕྱག་རྒྱ་གཞག་པར་བྱ། བྱང་ཕྱོགས་ཀྱི་ནང་དུ་སྤྱན་རས་གཟིགས་ཀྱི་དབང་པོ་གཞག །ལྷོ་ཕྱོགས་ཀྱི་ནང་དུ་ཕྱག་ན་རྡོ་རྗེ་གཞག །དེའི་ཕྱི་རིམ་གྱི་སྒོ་ཁྱུད་རྣམས་ལ་ཤར་ཕྱོགས་ཀྱི་སྒོ་ཁྱུད་ཀྱི་ནང་དུ་ཤཱཀྱ་ཐུབ་པ་སྤྲུལ་པའི་སྐུ་གཞག །ལྷོ་ཕྱོགས་ཀྱི་ནང་དུ་གཤིན་རྗེ་གཞག །བྱང་ཕྱོགས་ཀྱི་ནང་དུ་དབང་པོ་གཞག་པ་སྟེ། གཤིན་རྗེ་དབང་པོ་ལ་སོགས་དེ་རྣམས་ཀྱང་དཀྱིལ་འཁོར་བར་མའི་སྣམ་བུ་ལ་སྒོ་ཁྱུད་ཀྱི་ནང་དུ་འདུག་པ་ཡང༌། བཅོམ་ལྡན་འདས་ཀྱི་སྤྲུལ་པའི་སྐུ་ཉིད་དུ་རིག་པར་བྱ་སྟེ། གཤིན་རྗེ་ལ་སོགས་པས་འདུལ་བའི་སེམས་ཅན་རྣམས་གདུལ་བའི་ཕྱིར་ཡི་དགས་རྣམས་ཀྱི་རྒྱལ་པོ་གཤིན་རྗེའི་གཟུགས་སུ་གཙོ་བོར་བྱས་ནས་སྒོ་ཁྱུད་ན་གནས་སོ། །དབང་པོ་ཡང་ལྷ་རྣམས་ཀྱི་རྒྱལ་པོ་སྟེ། གཙོ་བོར་བྱ་ཞིང་སྒོ་ཁྱུད་ན་གནས་སོ། །བཅོམ་ལྡན་འདས་ཤཱཀྱ་ཐུབ་པ་ཡང་མི་རྣམས་ཀྱི་གཙོ་བོར་གྱུར་ཅིང་སྒོ་ཁྱུད་ན་བཞུགས་སོ། །སྙིང་པོའི་དཀྱིལ་འཁོར་ན་བཞུགས་པའི་གཙོ་བོར་ཡེ་ཤེས་བཞིའི་རང་བཞིན་དུ་ཤེས་པར་བྱ་སྟེ། བཅོམ་ལྡན་འདས་རྣམ་པར་སྣང་མཛད་མངོན་པར་བྱང་
ཆུབ་པའི་མཚན་ཉིད་དབུས་ན་བཞུགས་པ་ནི་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ནོ། །ཆོས་ཀྱི་སྐུའི་ཕྱག་རྒྱ་ཤར་ན་གནས་པ་ནི་མེ་ལོང་གི་ཡེ་ཤེས་ཀྱི་རང་བཞིན་ནོ། །སྤྱན་རས་གཟིགས་ཀྱི་དབང་པོ་བྱང་ཕྱོགས་ན་གནས་པ་ནི་སོ་སོར་ཀུན་དུ་རྟོག་པའི་ཡེ་ཤེས་ཀྱི་རང་བཞིན་ནོ། །ཕྱག་ན་རྡོ་རྗེ་ལྷོ་ཕྱོགས་ན་གནས་པ་ནི་བྱ་བ་ནན་ཏན་གྱི་ཡེ་ཤེས་ཀྱི་རང་བཞིན་དུ་རིག་པར་བྱའོ། །དཀྱིལ་འཁོར་གྱི་སྣམ་བུ་གསུམ་པ་ལ་ཤར་ཕྱོགས་ཀྱི་སྒོ་ཁྱུད་ཀྱི་ནང་ན་འཕགས་པ་འཇམ་དབྱངས་གཙོ་བོའི་གཟུགས་སུ་བཞུགས། ལྷོ་ཕྱོགས་ཀྱི་སྒོ་ཁྱུད་ཀྱི་ནང་ན་སྒྲིབ་པ་ཐམས་ཅད་རྣམ་པར་སེལ་བའི་བྱང་ཆུབ་སེམས་དཔའ་བཞུགས། དེ་བཞིན་དུ་ནུབ་དང་བྱང་ན་ཡང་ནམ་མཁའི་སྙིང་པོ་དང༌། སའི་སྙིང་པོ་གཙོ་བོའི་གཟུགས་སུ་སྒོ་ཁྱུད་ན་བཞུགས་པར་ཤེས་པར་བྱའོ། །དེ་བཞིན་འདི་ལྟར་ཀུན་བྱ་བ། །རིམ་པར་ཕྱེ་སྟེ་ཤིན་ཏུ་བརྟག །ཅེས་པ་ནི་གོང་དུ་སྨོས་པ་ལྟར་དཀྱིལ་འཁོར་གྱི་སྣམ་བུ་བགོ་བ་དང་སྒོ་ཁྱུད་རྣམས་རྣམ་པར་དབྱེ་བ་དང༌། སྒོ་ཁྱུད་རྣམས་སུ་གཙོ་བོའི་ལྷ་རྣམས་ཤིན་ཏུ་བྱེ་བྲག་ཕྱེ་བར་དགོད་ཅེས་པའོ། །འབྲས་བུ་པདྨོ་དཀར་པོ་མཆོག །དེ་ཡི་སྙིང་པོ་ཞེས་སུ་བསྒྲགས། །སྙིང་པོ་ངེས་བྱས་ཀུན་ཀྱང་དཀྱིལ་འཁོར་སྙིང་རྗེ་འབྱུང་བ་ཞེས་པ་ནི། དབུས་ཀྱི་པདྨོ་དཀར་པོ་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་བསོད་ནམས་ཀྱི་ཚོགས་ལ་བྱ་སྟེ། དཀར་བ་ནི་ཚོགས་དེ་ཉིད་རྣམ་པར་དག་པའོ། །སྙིང་པོ་ནི་འབྱུང་བའི་གནས་ཏེ། བསོད་ནམས་ཀྱི་ཚོགས་ཏེ་བཅོམ་ལྡན་འདས་ཀྱི་སྙིང་རྗེ་ཆེན་པོའི་བདག་ཉིད་འབྱུང་བའི་གནས་སོ། །སྙིང་རྗེ་ཆེན་པོ་དེ་ལས་དཀྱིལ་འཁོར་འདི་འབྱུང་སྟེ། དེ་བས་ན་སྙིང་པོ་འདི་ལས་འབྱུང་བ་ཞེས་པའོ། །དེ་ཡི་ཚད་ནི་སྨྲས་པ་ཡང༌། །ཆེན་པོར་ཡང་ནི་སོར་བཅུ་དྲུག །ཅེས་པ་ནི་དབུས་ཀྱི་པདྨའི་ཚད་སོར་བཅུ་དྲུག་སྟེ། ཆེན་པོར་ཡང་ནི་ཞེས་པ་ནི་དེ་ལས་ལྷག་པར་ཀྱང་རུང་ཞེས་པའོ། །དེའི་དགོངས་པ་ཡང་འདི་ལྟ་སྟེ། བཅུ་དྲུག་ནི་ས་བཅུ་དང་ཕ་རོལ་ཏུ་ཕྱིན་པ་དྲུག་དང་ལྡན་པའོ། །ཆེན་པོར་ཡང་ནི་ཞེས་པ་ནི་དེ་ལས་ལྷག་པ་ཀུན་དུ་བང་པོའི་ས་ལ་སོགས་པ་དང་ལྡན་པ་ཞེས་པ་སྟེ། མདོར་ན་པདྨོ་དེ་བཅོམ་ལྡན་འདས་ཀྱི་རྒྱུ་བསོད་ནམས་དང་ཡེ་ཤེས་ཀྱི་ཚོགས་ཀྱི་རང་བཞིན་གྱི་མཚན་ཉིད་ལྟ་བུར་བལྟའོ།།
འདབ་བརྒྱད་ཀྱི་རྫོགས་ལྡན་ཞེས་པ་ནི་བསོད་ནམས་ཚོགས་ཏེ། ཡེ་ཤེས་བརྒྱད་དང་ལྡན་པས་འདབ་མ་བརྒྱད་དུ་གསུངས་སོ། །དེ་ལས་ཡེ་ཤེས་བརྒྱད་ནི་མེ་ལོང་གི་ཡེ་ཤེས་དྣག །མཉམ་པ་ཉིད་ཀྱི་ཡེ་ཤེས་དང༌། སོ་སོར་ཀུན་དུ་རྟོག་པའི་ཡེ་ཤེས་དང༌། བྱ་བ་ནན་ཏན་གྱི་ཡེ་ཤེས་དེ་ཉིད་སྒོ་ལྔའི་རྣམ་པར་ཤེས་པ་ལྔ་ལས་གྱུར་པས་རྣམས་པ་ལྔར་ཕྱེ་སྟེ། ཡེ་ཤེས་དེ་རྣམས་དེ་བརྒྱད་དང་ལྡན་པས་འདབ་མ་བརྒྱད་དུ་གྱེས་སོ། །ཡེ་ཤེས་རྣམས་ཀྱང་ཆོས་ཐམས་ཅད་དམིགས་པ་མེད་པའི་རང་བཞིན་དུ་ཆུད་པ་སྟེ། དེ་ལྟར་ཐམས་ཅད་དམིགས་སུ་མེད་པར་ཆུད་པས་སྦྱིན་པར་བྱ་བ་དང༌། སྦྱིན་པའི་དངོས་པོ་དང༌། སྦྱིན་པར་བྱེད་པ་གསུམ་ཆར་ཡང་དམིགས་སུ་མེད་པར་ཆུད་དེ། དེ་བས་ན་སྦྱིན་པ་ལ་སོགས་པའི་བསོད་ནམས་ཀྱི་ཚོགས་ཏེ་ཡེ་ཤེས་ལྟ་བུ་དང་ལྡན་པས་འཁོར་གསུམ་ཡོངས་སུ་དག་པའི་རང་བཞིན་དུ་ཤེས་པར་བྱའོ། །གེ་སར་དང་ལྡན་ཤིན་ཏུ་བཟང༌། །ཞེས་པ་གེ་སར་རྣམས་ནི་སངས་རྒྱས་བཅོམ་ལྡན་འདས་ཀྱི་རྒྱུའི་ཡོན་ཏན་དང་ཏིང་ངེ་འཛིན་དང་གཟུངས་དང་རྣམ་པར་གྲོལ་བ་དང༌། སྟོབས་དང་མི་འཇིགས་པ་ལ་སོགས་པའི་མཚན་མར་བརྟག་སྟེ། བསོད་ནམས་ཀྱི་ཚོགས་དེ་ཡང་ཡོན་ཏན་དེ་རྣམས་དང་ལྡན་པ་ཞེས་པའོ།། འདབ་མའི་བར་ནི་ཀུན་དུ་ཡང༌། །ཆུབ་པར་རྡོ་རྗེ་བྲི་བར་བྱ། །ཞེས་པ་རྡོ་རྗེ་ནི་ཡེ་ཤེས་ཀྱི་མཚན་མ་སྟེ། གོང་དུ་སྨོས་པའི་ཡེ་ཤེས་བརྒྱད་རྣམས་དང་ལྡན་པ་ཞེས་བྱའོ། །དེ་ཡི་སྙིང་པོའི་དབུས་སུ་ནི། །རྒྱལ་བའི་གཙོ་མཆོག་བྲི་ཞེས་པ་ནི་བཅོམ་ལྡན་འདས་མངོན་པར་བྱང་ཆུབ་པའི་རང་བཞིན་པདྨའི་སྙིང་པོའི་སྟེང་དུ་བྲིས་ཏེ། རྒྱལ་བའི་གཙོ་མཆོག་ཅེས་པ་ནི་བདུད་རྣམས་ལས་རྒྱལ་བ་སྟེ། དེ་རྣམས་ཀྱི་ནང་ན་ཡང་མཆོག་ཅེས་བྱའོ། །འབར་བཅས་གསེར་གྱི་ཁ་དོག་འདྲ། །ཐོར་ཚུགས་ཅོད་པན་འཆང་བ་སྟེ། །མགོན་པོའི་འོད་ཀྱིས་རིམ་པར་བསྐོར། །ནད་དང་བྲལ་བའི་ཏིང་འཛིན་གནས། །ཤེས་པ་འབར་དང་བཅས་ཞེས་པ་ནི་འབར་བ་ནི་སྲེག་པའི་རང་བཞིན་ཏེ་ཉོན་མོངས་པ་དང་ཤེས་བྱའི་སྒྲིབ་པ་སྲེག་པའི་རང་བཞིན་གྱི་ཡེ་ཤེས་དང་ལྡན་པ་ཞེས་པའོ། །གསེར་གྱི་ཁ་དོག་འདྲ་ཞེས་པ་ནི་རྒྱལ་བའི་རང་བཞིན་ནོ། །ཐོར་ཚུགས་འཆང་བ་ནི་འོག་མིན་གྱི་གནས་ན་
བཞུགས་ན་འོག་མིན་གྱི་གནས་ཀྱི་ལྷ་རྣམས་ཐོར་ཚུགས་དང་བཅས་པ་སྟེ། དེ་དག་དང་མཐུན་པར་བྱ་བའི་ཕྱིར་ཐོར་ཚུགས་དང་ལྡན་པའོ། །ཅོད་པན་འཆང་ཞེས་པ་ནི་ཆོས་ཀྱི་རྒྱལ་པོའམ་དབང་པོར་དབང་བསྐུར་བ་ནི་རིན་པོ་ཆེའི་ཅོད་པན་གསོལ་བའོ། །མགོན་པོའི་འོད་ཀྱིས་རིམ་པར་བསྐོར།། ཞེས་པ་ནི་ཡོངས་སུ་དག་པའི་ཡེ་ཤེས་རང་བཞིན་གྱིས་འོད་དང་བ། འོད་ཀྱི་དཀྱིལ་འཁོར་ལས་འཕྲོ་བས་བསྐོར་བ་ཞེས་པའོ། །ནད་དང་བྲལ་བ་ཞེས་པ་ནི་ཉོན་མོངས་པ་དང་ཤེས་བྱའི་སྒྲིབ་པའི་གདོན་དང་བྲལ་བ་ཞེས་པའོ། །ཏིང་ངེ་འཛིན་གནས་ཞེས་པ་ནི་སོ་སོ་རང་གིས་རིག་པའི་ཡེ་ཤེས་མི་གཡོ་བ་རྩེ་གཅིག་ཏུ་གནས་པ་སྟེ། གཟུངས་ཀྱང་ཏིང་ངེ་འཛིན་གྱི་ཚུལ་དུ་གནས་པའོ། །དེའི། ཤར་དུ་སངས་རྒྱས་རྣམས་ཀྱི་ནི། །ཕྱག་རྒྱ་ནན་ཏན་བྲི་བ་ནི། །པདྨའི་སྟེང་དུ་གྲུ་གསུམ་པ། །མཁས་པས་ཀུན་ཀྱང་དཀར་པོ་རུ། །འོད་ཀྱིས་ཀུན་བསྐོར་དང་བ་ནི། །ཐམས་ཅད་དུ་ཡང་དཀར་པོ་རུ། །ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཤར་ཕྱོགས་སུ་མངོན་པར་སངས་རྒྱས་པ་འདས་པའི་དེ་བཞིན་གཤེགས་པ་རྣམས་ཕྱག་རྒྱ་གསུམ་པའི་མཚན་ཉིད་དུ་བྲིས་ཏེ། ཤར་ཕྱོགས་སུ་གཞག་པ་ནི་རྒྱ་གར་སྐད་དུ་ཤར་ཕྱོགས་ལ་པཱུརྦ་ཞེས་བྱ། འདས་པའང་པཱུརྦ་ཞེས་བྱ་སྟེ། དེ་བས་ན་སྔོན་འདས་པའོ་ཞེས་གླེང་བའི་ཕྱིར། ཤར་ཕྱོགས་སུ་གཞག་གོ །པདྨའི་སྟེང་དུ་གྲུ་གསུམ་བྲི་བ་ནི་སྟོང་པ་ཉིད་དང༌། མཚན་མ་མེད་པ་དང་སྨོན་པ་མེད་པ་སྟེ། རྣམ་པར་ཐར་པའི་སྒོ་གསུམ་ཡོངས་སུ་རྫོགས་པའི་མཚན་ཉིད། །ཕྱག་རྒྱ་དེའི་དབུས་སུ་རྡོ་རྗེ་རྩེ་ལྔ་པ་བཞག་པ་དང༌། གྲྭ་གཉིས་ནས་འོད་གཉིས་འབྱུང་བར་བྱའོ་ཞེས་གསང་བའི་དཀྱིལ་འཁོར་ནས་འབྱུང་བ་སྟེ། རྡོ་རྗེ་རྩེ་ལྔ་པ་གཞག་པ་ནི་ཡེ་ཤེས་ལྔའི་མཚན་མའོ། །འོད་གཉིས་འབྱུང་བར་བྱ་བ་ནི་ཕྱག་རྒྱ་སྟེ་ཆོས་ཀྱི་སྐུའི་མཚན་ཉིད་དེ་ཆོས་ཀྱི་སྐུ་ལས་རྫོགས་ལོངས་སྤྱོད་པའི་སྐུ་དང༌། པདྨོ་ནི་སྔར་བཤད་པའོ། །དཀར་པོ་ནི་ཉོན་མོངས་པ་དང་ཤེས་བྱའི་སྒྲིབ་པ་དག་པ་སྟེ་པདྨོ་ཉིད་ལ་བྱའོ། །འོད་ཀྱིས་བསྐོར་བ་ནི་ཡེ་ཤེས་ཀྱི་འོད་འཕྲོ་བས་བསྐོར་བའོ། །ཐམས་ཅད་དུ་ཡང་དཀར་པོ་ཞེས་པ་ནི་ཕྱག་རྒྱ་དེ་ཉིད་དཀར་པོ་བྱ་སྟེ་ཡོངས་སུ་དག་པའི་ཕྱིར་རོ། །དེ་ཡི་བྱང་དུ་བྲི་
བ་ནི། །མགོན་པོ་ཐམས་ཅད་ཀུན་གྱི་ཡུམ། །འོད་བཅས་གསེར་གྱི་ཁ་དོག་འདྲའོ། །ན་བཟའ་དཀར་པོ་མནབས་པ་སྟེ། །ཀུན་དུ་ཡང་ནི་འབར་བ་ལ། །ཏིང་འཛིན་གནས་བཞིན་མཁས་པའོ། །ཞེས་པ་ནི་ཕྱག་རྒྱ་གྲུ་གསུམ་པའི་བྱང་ཕྱོགས་སུ་བཅོམ་ལྡན་འདས་མ་ནམ་མཁའི་སྤྱན་བྲི་བ་ནི། ཤེས་རབ་ཀྱི་ཕ་རོལ་ཏུ་ཕྱིན་མའི་རང་བཞིན་མངོན་པར་བྱང་ཆུབ་པ་དང་ལྡན་པའི་ཤེས་རབ་སྟེ། མགོན་པོ་སངས་རྒྱས་བཅོམ་ལྡན་རྣམས་ཤེས་རབ་དེ་ལས་བྱུང་བས་ན་དེ་མགོན་པོ་རྣམས་ཀྱི་ཡུམ་མོ། །འབར་བཅས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་སྲེག་པའི་རང་བཞིན་འབར་བ་དང་བཅས་པའོ། །གསེར་གྱི་ཁ་དོག་ནི་རྒྱས་པའི་རང་བཞིན་ནོ། །ན་བཟའ་དཀར་པོ་མནབས་པ་ནི་ན་བཟའ་ནི་གཡོགས་པར་བྱེད་པ་སྟེ། གཡོགས་པ་དེ་ཉིད་དག་པ་ནི་དཀར་པོ། དེ་བས་ན་ཤེས་བྱ་དང་ཉོན་མོངས་པའི་སྒྲིབ་པས་གཡོགས་པ་དག་བའི་མཚན་མ་ནི་ན་བཟའ་དཀར་པོའོ། །རྣམ་པར་སྣང་ཞིང་ཞེས་པ་ནི་ཤིན་ཏུ་དག་ཅིང་རང་བཞིན་གྱིས་འོད་གསལ་བའི་ཡེ་ཤེས་ཀྱི་རང་བཞིན་དུ་ཁྱབ་པའོ། །ཏིང་ངེ་འཛིན་གནས་ཞེས་པ་ནི་མི་གཡོ་བའི་གཟུགས་སུ་གནས་པའོ། །མགོན་པོ་ཡི་ནི་བྱང་ཕྱོགས་སུ། །སྤྱན་རས་གཟིགས་ནི་ལེགས་པར་བྲི། །དཔའ་བོ་པདྨོ་དཀར་པོའི་སྟན། །དུང་དང་ཀུནད་ཟླ་བ་འདྲ། །སྣང་བ་མཐའ་ཡས་ཐོར་ཚུགས་གནས། །ཡིད་ཙམ་འཛུམ་པའི་ཞལ་རས་སུ། །ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཡས་རོལ་བྱང་ཕྱོགས་ཀྱི་ངོས་སུ་པདྨོའི་རིགས་ཀྱི་བདག་པོ་སྤྱན་རས་གཟིགས་ཀྱི་དབང་པོ་བྲི་སྟེ། སྤྱན་རས་གཟིགས་ཞེས་པ་ནི་སོ་སོར་ཀུན་དུ་རྟོག་པའི་ཡེ་ཤེས་ཀྱི་རང་བཞིན་གྱིས་སེམས་ཅན་རྣམས་ཡོངས་སུ་སྨིན་པ་དང༌། གྲོལ་བར་བྱ་བའི་ཕྱིར་གཟིགས་པ་དང༌། ཆོས་ཀྱི་དབྱིངས་རྣམ་པར་དག་པ་ལ་གཟིགས་སོ། །དཔའ་བོ་ཞེས་པ་ནི་ཤེས་བྱ་དང་ཉོན་མོངས་པའི་སྒྲིབ་པའི་རྐུན་པོ་འཇོམས་པ་ལ་དཔའ་བའོ། །པདྨོ་དཀར་པོ་ལ་བཞུགས་པ་ནི། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་དག་པའི་རང་བཞིན་ནོ། །སྦྱོར་བའི་ལས་པདྨོ་དང་དམར་པོར་གསུངས་ལ་འདིར་དཀར་པོར་གསུངས་པ་དེ་ཡང་སྦྱོར་བའི་རྒྱུད་ནི་ཐབས་གཙོ་བོར་གྱུར་པ་སྟེ། ཐབས་
ཀྱིས་སེམས་ཅན་རྣམས་ཡོངས་སུ་སྨིན་པར་གྲོལ་བར་བྱ་བའི་དོན་ལ་ཞེས་བསྟན་པའི་ཕྱིར་དམར་པོ་བསྟན་ཏོ། །རྒྱུད་འདིར་ནི་ཤེས་རབ་གཙོར་གྱུར་པའི་སྒོ་ནས་ཤེས་རབ་ཀྱི་ཆོས་ཐམས་ཅད་ཤིན་ཏུ་དག་པར་ཆུད་པའི་མཚན་ཉིད་དུ་དཀར་བོར་བསྟན་ཏོ། །དུང་དང་ཀུནད་ཟླ་བ་འདྲ། །ཞེས་པ་ནི་སྐུའི་ཁ་དོག་དང་མེ་ཏོག་ཀུནད་དང་ཟླ་བ་ལྟར་དཀར་བར་ཤེས་པའོ། །སྣང་བ་མཐའ་ཡས་ཐོར་ཚུགས་གནས། །ཞེས་པ་ནི་སྣང་བ་མཐའ་ཡས་ནི་སོ་སོར་རྟོག་པའི་ཡེ་ཤེས་ཀྱི་རང་བཞིན་ཏེ་དེའི་མཚན་མར་བསྟན་པའོ། །གཉིས་སུ་ན་སྦྱོར་བའི་རྒྱུད་ལས་རིགས་སོ་སོའི་དབང་བསྐུར་བ་སོ་སོ་པདྨོའི་རིགས་ལ་སྣང་བ་མཐའ་ཡས་ཀྱིས་དབང་བསྐུར་བའི་ཕྱིར་རོ། །ཡིད་ཙམ་འཛུམ་པའི་ཞལ་ཞེས་པ་ནི་ཏིང་ངེ་འཛིན་དུ་མི་གནས་པར་སེམས་ཅན་གྱི་དོན་དུ་ཆོས་ལ་སོགས་པ་བཤད་པའི་ཕྱིར། འཛུམ་ཞིང་ཞལ་མ་བཙུམས་པའི་དོན་དུ། དེ་ཡི་གཡས་སུ་བྲི་བ་ནི། །སྒྲོལ་མའི་ལྷ་མོ་གྲགས་ཆེན་ཏེ། །ལྗང་གུ་གདངས་བཞིན་ཁ་དོག་མང༌། །བུད་མེད་ན་ཆུད་ཚད་དང་འདྲ། །ཐལ་སྦྱར་མེ་ཏོག་ཨུཏྤལ་ཐོགས། །འོད་རྣམས་ཀུན་གྱིས་ཀྱང་ནི་བསྐོར། །འོད་གསལ་ཀུན་ཀྱང་འབྱུང་བཞིན་ཏེ། །ན་བཟའ་ཡང་དག་དཀར་མནབས་པའོ། །ཞེས་པ་ནི་སྤྱན་རས་གཟིགས་ཀྱི་དབང་པོ་སེམས་ཅན་གྱི་ཁམས་ལ་གཟིགས་ནས་བདག་གི་བསོད་ནམས་དང་ཡེ་ཤེས་ཀྱི་ཚོགས་ལ་སོགས་པ་ཐམས་ཅད་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་བསྔོས་ཏེ་བསྒྲལ་ཀྱང་སེམས་ཅན་དེ་དག་མ་ལུས་པར་འཁོར་བ་ལས་རྒལ་བར་མ་གྱུར་པ་གཟིགས་ནས་ཐུགས་རྗེ་ཆེན་པོའི་ཤུགས་ཀྱིས་བཤུམས་པ་ལས་སྒྲོལ་མའི་ལྷ་མོ་མང་པོ་བྱུང་ནས་སེམས་ཅན་ཐམས་ཅད་སྒྲོལ་བར་བྱེད་པའི་གཟུགས་སུ་གྱུར་པ་སྟེ་དེ་བས་ན་སྒྲོལ་མའི་ལྷ་མོའོ། །གཞན་ཡང་རྣམ་པ་དུ་མ་རྒྱུད་གཞན་ལས་ཤེས་པར་བྱའོ། །གྲགས་ཆེན་ཞེས་པ་ནི་ཡོན་ཏན་གྱི་ཚིག་གོ །ལྗང་གུ་གདངས་བཞིན་ཞེས་པ་ནི་ཁ་དོག་དཀར་པོ་དང་སྔོན་པོ་དང་སེར་པོ་ལ་སོགས་པ་བསྡུས་པ་ལས་ལྗང་གུར་འགྱུར་ཏེ། ཁ་དོག་དཀར་པོ་དང་སྔོན་པོ་ལ་སོགས་པ་ནི་ཞི་བ་དང་རྒྱས་པ་དང་མངོན་པར་སྤྱོད་པའི་ལས་ཀྱི་མཚན་མ་སྟེ། དེ་དག་གཅིག་ཏུ་བསྡུས་པ་ནི་ལས་ཐམས་ཅད་བྱེད་པའོ། །གཟུགས་མེད་
པོ་ཞེས་པ་ནི་སེམས་ཅན་རྣམ་པ་མང་པོའི་དོན་དུ་བར་བར་ཕོའི་གཟུགས། བར་བར་མོའི་གཟུགས་རྣམ་པ་དུ་མར་འགྱུར་བའི་ཕྱིར་རོ། །བུད་མེད་ན་ཆུད་ཚད་དང་འདྲ། །ཞེས་པ་ནི་ཡོན་ཏན་མ་རྫོགས་ཏེ་གཞོན་པ་ཡང་མ་ཡིན། ཡོན་ཏན་རྣམས་ལས་འདས་པའི་བྱང་ཆུབ་ཉིད་མྱ་ངན་ལས་འདས་པར་གྱུར་པའི་ཚུལ་དུ་རྒས་པ་ཡང་མ་ཡིན་ཏེ། བསོད་ནམས་དང་ཡེ་ཤེས་ཀྱི་ཚོགས་རྒྱས་པའི་མཚན་ཉིད་ནི་ཚད་ལ་བབ་པའོ། །ཐལ་སྦྱར་མེ་ཏོག་ཨུཏྤལ་ཐོགས། །ཞེས་པ་ནི་རྣམ་པར་གྲོལ་བའི་སྒོ་སྣ་ཚོགས་འཛིན་པ་སྟེ། དེ་བས་ན་ཨུཏྤལའི་འདབ་མ་རལ་གྲི་ལྟ་བུ་ནི་ཤེས་རབ་རྣམ་པར་གྲོལ་བའི་སྒོ་ལྟ་བུར་ཤེས་པར་བྱའོ། །འོད་རྣམས་ཀྱིས་ནི་ཀུན་དུ་བསྐོར། །ཞེས་པ་ནི་ཡེ་ཤེས་ཀྱི་འོད་འཕྲོ་བས་བསྐོར་བའོ། །འཇིགས་པ་སེལ་བ་ཞེས་པ་ནི་ཞི་ཞིང་རྒྱལ་པོ་དང་རྐུན་པོ་ལ་སོགས་པའི་འཇིགས་པ་བརྒྱད་སེལ་བར་བྱེད་པའོ། །ན་བཟའ་ཡང་ནི་དཀར་པོ་མནབས་པ་ནི་ངོ་ཚ་བ་དང་ལྡན་པའི་མཚན་མ་སྟེ། ཇི་ལྟར་གོས་ཀྱིས་གཡོགས་ཤིང་མི་སྣང་བར་བྱ་བ་བཞིན་དུ་ངོ་ཚ་བ་ཡང་འཆབ་ཅིང་སྦ་བའི་མཚན་མ་སྟེ་ངོ་ཚ་བ་དེ་དང་ལྡན་པའོ། །དཀར་བ་ནི་ངོ་ཚ་ཉིད་རྣམ་པར་དག་པའི་མཚན་མའོ། །ཅིའི་ཕྱིར་ངོ་ཚ་བ་དང་ལྡན་ཞེ་ན། ངོ་ཚ་བ་ནི་བྱང་ཆུབ་སེམས་དཔའི་ཡོན་ཏན་དེ་བཞིན་དུ་འོག་ནས་འཆད་དོ། །ཁྲོ་གཉེར་མ་ནི་གཡོན་ཕྱོགས་བྲི། །སྔགས་ཀྱི་ནོར་བུ་ཕྲེང་འཆང་བ། །ལྷ་མོ་སྤྱན་གསུམ་ཐོར་ཚུགས་ཅན། །ཁ་དོག་རྣམས་ཀྱང་དཀར་པོ་སྟེ། །འོད་ཀྱི་འཁོར་གྱིས་དེ་བསྐོར་བ། །དཀར་པོ་དམར་པོ་སེར་པོ་རྣམས། །ཞེས་པ་ནི་སྤྱན་རས་གཟིགས་ཀྱི་གཡོན་རོལ་དུ་ཁྲོ་གཉེར་མ་བྲི་སྟེ། ཁྲོ་གཉེར་མ་ཞེས་པ་ནི་འབྲས་བུ་ལ་རྒྱུས་བརླན་པའི་མཚན་མ་སྟེ་སྤྱན་རས་གཟིགས་ཀྱི་དབང་པོའི་སྨིན་མཚམས་ཀྱི་ནང་ནས་ལྷ་མོ་དེ་ཕྱུང་སྟེ། ཁྲོ་གཉེར་གྱི་རྒྱུད་ལས་བྱུང་བས་ན་ཁྲོ་གཉེར་མ་ཞེས་བྱའོ། །སྔགས་ཀྱི་ནོར་བུའི་ཕྲེང་བ་འཆང༌། །ཞེས་པ་ནི་ལྷ་མོ་དེ་ཁྲོ་བོའི་བདག་ཉིད་འབའ་ཞིག་མ་ཡིན་གྱི། ཕ་རོལ་ཏུ་ཕྱིན་པ་ལ་སོགས་པ་ལྡན་པར་བསྟན་པ་སྟེ། སྔགས་ཀྱི་ནོར་བུ་ཕ་རོལ་ཏུ་ཕྱིན་པའི་མཚན་མའོ། །སྤྱན་གསུམ་པ་ནི་ཁྲོ་བོའི་བདག་ཉིད་དོ། །ཐོར་ཚུགས་ཅན་ཞེས་པ་ནི་འོག་མིན་གནམ་གྱི་ལྷ་རྣམས་དང་རིགས་མཐུན་པའི་ཁ་དོག་རྣམས་ཀྱང་དཀར་པོ་ཞེས་པ་ནི་
ཡོངས་སུ་དག་པའི་མཚན་ཉིད་དོ། །འོད་རྣམས་འཁོར་གྱིས་བསྐོར་བ་ཞེས་པ་ནི་ཡེ་ཤེས་ཀྱི་འོད་འཕྲོ་བ་དང་ལྡན་པའོ། །དེ་ནི། དཀར་པོ་དམར་པོ་སེར་པོ་རྣམས། །ཞེས་པ་ནི་འོད་ཉིད་ཁ་དོག་དེ་རྣམས་དང་ལྡན་པ་སྟེ། ཞི་བ་དང་རྒྱས་པ་ལ་སོགས་པའི་ལས་ཐམས་ཅད་བྱེད་པའི་མཚན་མའོ། །ཁྲོ་གཉེར་མའི་དྲུང་དུ་བྲི་བ་ནི། མཐུ་ཆེན་ཡང་ནི་ལེགས་བྲི་བ། །དཔའ་བོ་ན་བཟའ་དཀར་མནབས་ཏེ། །ཕྱག་ན་པདྨོ་སྙིང་བརྩེར་ལྡན། །དེ་ཡི་པདྨོ་ཁ་མ་བྱེ། །འོད་ཀྱི་དཀྱིལ་འཁོར་བསྐོར་བའོ། །ཞེས་པ་ནི་ཁྲོ་གཉེར་མའི་དྲུང་དུ་འཕགས་པ་མཐུ་ཆེན་པོ་ཐོབ་པ་བྲི་སྟེ། ཁྲོ་གཉེར་མའི་དྲུང་དུ་བྲི་བ་ནི་མཐུ་ཆེན་ཏེ་དཔུང་དུ་བྱ་བའི་ཕྱིར་རོ། །དཔའ་ཞེས་པ་ནི་སུས་ཀྱང་ཟིལ་གྱིས་མི་གནོན་པའོ། །ན་བཟའ་དཀར་པོ་མནབས་པ་ནི་ཡོངས་སུ་དག་པའི་མཚན་ཉིད་དོ། །ཕྱག་ན་པདྨོ་སྙིང་བརྩེར་ལྡན། །དེ་ཡི་པདྨོ་ཁ་མ་བྱེ། །ཞེས་པ་ནི་དེའི་ཕྱག་རྒྱའོ། །སྙིང་བརྩེར་ལྡན་པ་ནི་སྙིང་རྗེ་ཆེན་པོ་དང་ལྡན་པའོ། །པདྨ་ཁམ་བྱེ་བ་ནི་སྤྱན་རས་གཟིགས་ཀྱི་དབང་པོ་དང་ཁྱད་པར་བསྟན་པའོ། །འོད་ཀྱི་དཀྱིལ་འཁོར་བསྐོར་བའོ། །ཞེས་པ་ནི་ཡེ་ཤེས་ཀྱི་འོད་འཕྲོ་བ་དང་ལྡན་པའོ། །མཁས་པས་དེའི་དྲུང་དུ་བྲི་བ་ནི། གྲགས་འཛིན་རིག་པའི་ལྷ་མོའོ། །དེ་ཡི་ཁ་དོག་གསེར་འདྲ་བ། །རྒྱན་ཀུན་གྱིས་ནི་ཤིན་ཏུ་བརྒྱན། །མེ་ཏོག་ཚོམས་ཅིག་བཟང་ཐོགས་པ། །པྲི་ཡང་ཀུ་སྟེ་ཕྱག་གཡོན་པར། །ཞེས་པ་ནི་མཐུ་ཆེན་པོ་ཐོབ་པའི་དྲུང་དུ་གྲགས་འཛིན་ཞེས་པའི་ལྷ་མོ་བྲི་སྟེ། དེ་ལ་གྲགས་འཛིན་ཞེས་པ་ནི་སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་གྲགས་པ་རྣམས་འཛིན་པའོ། །དེའི་ཁ་དོག་གསེར་འདྲ་བ་ནི་རྒྱས་བའི་མཚན་ཉིད་དོ། །མེ་ཏོག་ཚོམས་ཅིག་བཟང་ཐོགས་པ། །པྲི་ཡང་ཀུ་སྟེ་ཕྱག་གཡོན་པར། །ཞེས་པ་ནི་ལྷ་མོ་དེའི་ཕྱག་རྒྱའོ། །སྒྲོལ་བའི་ལྷ་མོའི་དྲུང་དུ་ནི། །དཀར་བར་གནས་པར་ཞེས་བྱ་བའི་ལྷ་མོ་དེར་བྲི་སྟེ། དཀར་བར་གནས་པ་ནི་ཆོས་ཀྱི་དབྱིངས་རྣམ་པར་དག་པ་ལ་གནས་པའོ། །སྒྲོལ་བའི་ལྷ་མོའི་དྲུང་དུ་བྲི་བ་ནི། སྒྲོལ་མའི་ལྷ་མོ་དེ་རྣམས་ཅན་རྣམས་སྒྲོལ་ཞིང་ལས་ཐམས་ཅད་བྱེད་པ་འབའ་ཞིག་མ་ཡིན་གྱི། ཆོས་དབྱིངས་རྣམ་པར་དག་པ་ལ་བསྙེན་པར་བྱེད་པ་བསྟན་པའི་ཕྱིར་རོ། །ན་བཟའ་དཀར་མནབས་ཛ་ཏ་ཅན། །ཕྱག་རྒྱ་པདྨོ་བློ་ཅན་གྱིས། །ཞེས་པ་ནི་ན་
བཟའ་དཀར་མོ་ནི་ཡོངས་སུ་དག་པའི་མཚན་མའོ། །ཕྱག་ན་པདྨོའི་ནི་ཕྱག་རྒྱས་པདྨོ་ཐོགས་པའོ། །ཐོར་ཚུགས་སྔ་མ་བཞིན་ནོ། །བློ་ཅན་གྱིས་ཞེས་པ་ནི་སྔགས་མཁན་བློ་ཅན་གྱིས་དེ་ལྟར་བྲི་བ་ཞེས་པའོ། །དེའི་འོག་ཏུ་བྲི་བ་ནི་སྔགས་པས། རིག་པའི་རྒྱལ་པོ་སྟོབས་ཅན་ཏེ། །ཉི་མ་འཆར་བའི་ཁ་དོག་འདྲ། །པདྨ་དཀར་པོས་ཤིན་ཏུ་བརྒྱན། །མ་རུངས་འོད་འབར་ཕྲེང་བ་ཅན། །སྤུ་ཡང་སེང་གེ་འདྲ་བར་འདུག །རྟ་མགྲིན་ཞེས་སུ་བསྒྲགས་པ་སྟེ། །བློ་ཅན་སྤྱན་རས་གཟིགས་ཀྱིའོ། །ཞེས་པ་ནི་དཀར་བར་གནས་པའི་ལྷ་མོའི་འོག་ལོགས་སུ་འཕགས་པ་རྟ་མགྲིན་བྲི་སྟེ། རིག་པའི་རྒྱལ་པོ་ཞེས་པ་ནི་པདྨོའི་རིགས་ཀྱི་རིག་པའི་རྒྱལ་པོ་སྟོབས་ཅན་ཞེས་པ་སྟེ་མཐུ་ཆེན་པོའི་ཡོན་ཏན་ནོ། །ཉི་མ་འཆར་བའི་ཁ་དོག་འདྲ། །ཞེས་པ་ནི་ཁ་དོག་དམར་བར་བསྟན་པའོ། །པདྨོ་དཀར་པོས་ཀུན་ནས་བརྒྱན། །ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་རྣམ་པར་དཀར་བས་བརྒྱན་པའོ། །མ་རུངས་པ་ཞེས་པ་ནི་ཁྲོ་བས་འཇིགས་པའི་གཟུགས་སོ། །འོད་འབར་བའི་ཕྲེང་བ་ཅན་ནི་ཤེས་བྱ་དང་ཉོན་མོངས་པའི་སྒྲིབ་པ་སྲེག་པར་བྱེད་པའི་ཡེ་ཤེས་ཅན་ཏེ། དེ་བསྲེགས་ནས་ཆོས་ཀྱི་དབྱིངས་རྣམ་པར་ཐར་པ་འཐོབ་པར་འགྱུར་བ་སྟེ། དེ་བས་ན་ཆོས་ཀྱི་དབྱིངས་རྣམ་པར་དག་པའི་རང་བཞིན་དཀར་བར་གནས་པའི་ལྷ་མོའི་འོག་ཟད་དུ་བྲི་སྟེ། བར་ཆད་མེད་པའི་ལམ་གྱི་རང་བཞིན་དུ་ཤེས་པར་བྱའོ། །སྤུ་ཡང་སེང་གེ་འདྲ་བར་འདུག །ཅེས་པ་ནི་སེང་གེ་ལྟར་སུས་ཀྱང་ཟིལ་གྱིས་མི་ནོན་པའི་མཚན་མའོ། །རྟ་མགྲིན་ཞེས་སུ་བསྒྲགས་ཞེས་པ་ནི་ཆོས་ལ་འབིགས་པའི་ཡེ་ཤེས་མྱུར་ཞིང་མགྱོགས་པ་རྟ་དང་འདྲ་བ་དང༌། སེམས་ཅན་གྱི་དོན་བྱ་བ་ལ་མགྱོགས་པ་རྟ་དང་འདྲ་བའི་ཕྱིར་རྟ་མགྲིན་ཞེས་བྱའོ། །བློ་ཅན་སྤྱན་རས་གཟིགས་ཀྱིའོ། །ཞེས་པ་ནི་དེ་དག་སྤྱན་རས་གཟིགས་ཀྱི་འཁོར་ལོ་ཅན་གྱིས་ཤེས་པར་བྱའོ་ཞེས་པ་སྟེ་དེ་དག་གི་པདྨོའི་རིགས་ཀྱི་དཀྱིལ་འཁོར་རང་བཞིན་གྱི་དཀྱིལ་འཁོར་གྱི་གཟུགས་བརྙན་དུ་བྲིས་པ་སྟེ། རང་བཞིན་གྱི་དཀྱིལ་འཁོར་ཐམས་ཅད་ནི་མཐའ་ཡས་པས་བྲིར་ཡང་མི་ལང་བས། དཀྱིལ་འཁོར་འདི་དག་ཐམས་ཅད་ནི་རང་བཞིན་གྱི་དཀྱིལ་འཁོར་སྡུད་པའི་སྒོར་གྱུར་པར་ཤེས་པར་བྱའོ། །སངས་རྒྱས་རྣམས་ནི་ལྷོ་ཕྱོགས་སུ། །བྱང་ཆུབ་
སེམས་དཔའ་མགོན་རྣམས་ཀྱི། །ཕྱག་རྒྱ་མཐུ་ཅན་བྲི་བ་ནི། །རེ་བ་ཐམས་ཅད་ཡོངས་འགྲུབ་པ། །ཡིད་བཞིན་ནོར་བུ་ཞེས་སུ་གྲགས། །པདྨོ་དཀར་ལ་གནས་པར་རོ། །ཞེས་པ་ནི་འདས་པའི་སངས་རྒྱས་རྣམས་ཀྱི་ཕྱག་རྒྱ་གྲུ་གསུམ་པའི་ལྷོ་ཕྱོགས་སུ། བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ནོར་བུ་ཡིད་བཞིན་འདྲ་བ་བྲི་སྟེ། བྱང་ཆུབ་སེམས་དཔའ་རྣམས་བྲི་ན། གྲངས་མེད་མཐའ་མེད་པས་དེ་རྣམས་སྡུད་པའི་སྒོར་གྱུར་པའི་ཕྱག་རྒྱ་བྲི་བར་ཤེས་པར་བྱའོ། །སྐལ་བ་ཆེན་པོ་ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པ་ལ་བྱའོ། །གཉིས་སུ་ན་བསྙེན་པ་ཆེན་པོ་ཞེས་ཀྱང་བྱ་སྟེ་སེམས་ཅན་མང་པོས་བསྙེན་པའི་ཕྱིར་རོ། །བྱ་བ་ཡོངས་སུ་རྫོགས་པ་ཞེས་བྱ་བ་ནི། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་དོན་བྱེད་པའོ། །ཡིད་བཞིན་ནོར་བུ་ཞེས་བསྒྲགས་པ། །ཞེས་པ་ནི་རེ་བ་ཡོངས་སུ་རྫོགས་པར་བྱེད་པ་ཡིད་བཞིན་གྱི་ནོར་བུ་བཞིན་པའོ། །ཡང་ན་ཕྱག་རྒྱ་ཡིད་བཞིན་གྱི་ནོར་བུ་ལྟར་བྲི་ཞེས་པའོ། །པདྨོ་དཀར་པོ་གནས་པ་ནི་བསོད་ནམས་དང་ཡེ་ཤེས་ཀྱི་ཚོགས་རྣམ་པར་དཀར་བ་ལས་བྱུང་བའོ། །མགོན་པོ་ཡི་ནི་ལྷོ་ཕྱོགས་སུ། །སྣང་མཛད་ཆེན་དེའི་ཞེས་པ་ནས། །འོད་ཀྱིས་བསྐོར་བ་རྡོ་རྗེ་འཆང༌། །ཞེས་པའི་བར་དུ་ཕྱག་ན་རྡོ་རྗེའི་བྱེ་བྲག་སྟེ། བཅོམ་ལྡན་འདས་རྣམ་པར་སྣང་མཛད་ཀྱི་ལྷོ་ཕྱོགས་སུ་བྲིའོ། །དེ་ཡང་ནན་ཏན་ཡེ་ཤེས་ཀྱི་མཚན་ཉིད་དེ། བཅོམ་ལྡན་འདས་ཀྱི་གཡོན་ཕྱོགས་སུ་བྲི་བ་ནི་རྒྱན་སྣ་ཚོགས་ཀྱིས་བརྒྱན་ལ་འགྱིང་བའི་ཚུལ་དུ་གནས་པས་བཅོམ་ལྡན་འདས་ཞི་བ་དང་རྗེས་སུ་མཐུན་པའི་ཕྱིར་གཡོན་དུ་བྲིའོ། །རེ་བ་ཀུན་ནི་རྫོགས་པར་བྱས་པ་བཞིན་དུ་སེམས་ཅན་གྱི་དོན་བྱེད་པའི་ནན་ཏན་བྱེད་པས་ན། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པའོ། །འཕྲོ་བ་མཐའ་ཡས་རྒྱ་ཆེན་པོ། །ཞེས་པ་ནི་སེམས་ཅན་གྱི་དོན་དུ་མཐའ་ཡས་པར་རྒྱུ་སྟེ། དེ་ཡང་རྒྱ་ཆེ་བའི་རྒྱུའོ། །འོད་ཀྱིས་བསྐོར་བ་ནི་ཡེ་ཤེས་ཀྱི་འོད་འབྲོ་བས་བསྐོར་བའོ། །རྡོ་རྗེ་འཆང་བ་ནི་ཡེ་ཤེས་ལྔའི་རང་བཞིན་གྱི་རྡོ་རྗེ་འཆང་བའོ། །དེ་ཡི་གཡས་སུ་བྲི་བ་ནི། །མཱ་མ་ཀཱི་ཞེས་བྱ་བ་ནི། །ལྷ་མོ་ཕྱག་ན་རྡོ་རྗེ་འཆང༌། །རྡོ་རྗེ་རྒྱན་གྱིས་བརྒྱན་པའོ། །ཞེས་པ་ནི་རྡོ་རྗེའི་ཡུམ་བྱ་བ་ནན་ཏན་གྱི་ཡེ་ཤེས་དང་ལྡན་པའི་ཤེས་རབ་
ཀྱི་ཕ་རོལ་ཏུ་ཕྱིན་པའི་རང་བཞིན་ཏེ། མཱ་མ་ཀཱི་ཞེས་པ་ནི། མཱ་མ་ཀཱི་ནི་ཕྱག་ན་རྡོ་རྗེའོ། །མཱ་མ་ཀཱི་བས་མཱ་མ་ཀཱི་ཞེས་བྱའོ། །ཕྱག་ན་རྡོ་རྗེ་ཇི་ལྟར་མཱ་མ་ཀཱི་ཞེ་ན། གདུག་པ་དང་མ་རུངས་པ་རྣམས་གདུག་པའི་བྱ་བ་བྱེད་པ་ལ་མ་བྱེད་ཅེས་འགོག་པ་སྟེ། མ་བྱེད་པ་ཞེས་བྱ་སྟེ། ཡུམ་དེའི་མ་བྱེད་ཅེས་བྱའོ། །རྡོ་རྗེ་འཆང་བ་ནི་ཡེ་ཤེས་ཀྱི་རང་བཞིན་གྱི་ཕྱག་ན་རྡོ་རྗེ་རྩེ་གསུམ་པ་འཆང་བའོ། །རྡོ་རྗེའི་རྒྱན་གྱིས་བརྒྱན་ཞེས་པ་ནི་རྒྱན་རྣམས་ཀྱི་མཚན་མ་རྡོ་རྗེས་བཏབ་པ་སྟེ། རྡོ་རྗེ་རིགས་ཀྱི་མཚན་མའོ། །དེ་ཡི་འོག་ཟད་བྲི་བ་ནི། །སྟོབས་ཆེན་རྡོ་རྗེ་ཁ་བ་ཅན་མ། །ལྷ་མོ་ཞ་འབྲིང་བས་བསྐོར་ཏེ། །བཞིན་ནི་ཡིད་ཙམ་འཛུམ་པ་སྟེ། །ཞེས་པ་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་དེའི་བར་ཆད་པ་མེད་པའི་ལམ་གྱི་རང་བཞིན་པས་དེའི་འོག་ཏུ་བྲི་སྟེ། རྡོ་རྗེ་རྩེ་ཅན་མ་ཞེས་པ་ནི་ཆོས་ཉིད་ལ་འབིགས་པར་བྱེད་པའི་ངང་ཚུལ་ཅན་ནོ། །སྟབས་ཅན་ཞེས་པ་ནི་དེའི་ཡོན་ཏན་ནོ། །ལྷ་མོ་ཞ་འབྲིང་མས་བསྐོར་བ་ཞེས་པ་ནི་དེ་མ་ཐག་པའི་ལམ་གྱི་ཡན་ལག་རྣམས་དང་ལྡན་པའོ། །ཡང་ན་རྒྱལ་པོའི་འཁོར་བས་མངག་གཞུག་མ་ལ་སོགས་པ་སྲིད་པའི་ཕྱིར་རོ། །དེ་བཞིན་ཡིད་ཀྱིས་འཛུམ་པ་སྟེ། །ཞེས་པ་ནི་ཏིང་ངེ་འཛིན་དུ་མ་ཞུགས་པས་སེམས་ཅན་གྱི་དོན་མཛད་པའི་ཕྱིར་རོ། །གཡོན་དུ་སྔགས་པས་བྲི་བ་ནི། །རྡོ་རྗེ་ལུ་གུ་རྒྱུད་ཅེས་བྱ། །རྡོ་རྗེ་ལུ་གུ་རྒྱུད་ཐོགས་པ། །རང་གི་འཁོར་གྱིས་བསྐོར་བ་སྟེ། །ཁ་དོག་པྲི་ཡང་ཀུ་བ་ཞིན་སྔོ། །རྡོ་རྗེ་མཚན་མས་མཚན་བྱས་པའོ། །ཞེས་པ་ནི་ཕྱག་ན་རྡོ་རྗེ་གཡོན་དུ་རྡོ་རྗེ་ལུ་གུ་རྒྱུད་ཅེས་བྱ་བ་བྲིས་ཏེ། ལུ་གུ་རྒྱུད་ནི་འཕགས་པའི་ལམ་གྱི་རང་བཞིན་ཏེ། སེམས་ཅན་རྣམས་ལམ་དེར་འདྲེན་ཞིང་འཛུད་པར་བྱེད་པའི་མཚན་མའོ། །ཡང་ན་རྒྱལ་པོའི་འཁོར་གྱིས་ཕུལ་བས་གདུག་པ་དང་མ་རུངས་པ་རྣམས་བཟུང་ཞིང་འདོགས་པའི་མཚན་ཉིད་དོ། །རང་གི་འཁོར་གྱིས་བསྐོར་བ་སྟེ། །ཞེས་པ་ནི་རྡོ་རྗེ་ལུ་གུ་རྒྱུད་མ་དེ་ཉིད་ཀྱི་འཁོར་མདག་གཞུག་མ་ལ་སོགས་པ་རྣམས་ཀྱིས་བསྐོར་བའོ། །རྡོ་རྗེ་མཚན་མས་མཚན་བྱས་པའོ། །ཞེས་པ་ནི་རྒྱན་རྣམས་ལ་རྡོ་རྗེ་མཚན་གྱིས་བཏབ་པའོ། །ཕྱག་ན་རྡོ་རྗེ་འོག་ལོགས་སུ། །ཞེས་པ་ནས། ཁྲོ་བོ་ཆེན་པོ་འདི་འདྲ་བས། །པདྨོའི་གདན་ལ་གནས་པར་བྲི། །
ཞེས་པའི་བར་དུ་ཕྱག་ན་རྡོ་རྗེའི་བྱ་བ་ནན་ཏན་གྱི་ཡེ་ཤེས་བར་ཆད་མེད་པའི་ལམ་གྱི་མཚན་ཉིད་དུ་གྱུར་པ་ཁྲོ་བོ་ཟླ་བ་ཐིག་ལེའི་བྱེ་བྲག་སྟེ། མ་ཟང་འོག་ཏུ་བྲི་བ་ནི་བྱ་བ་ནན་ཏན་གྱི་ཡེ་ཤེས་ལ་སྦྱོར་བ་བར་ཆད་མེད་པའི་ལམ་གྱི་རང་བཞིན་པས་བྱ་བ་ནན་ཏན་གྱི་ཡེ་ཤེས་ཀྱི་སར་མ་ཕྱིན་པའི་འོག་ཏུ་བྲིའོ། །ཁྲོ་བོ་ཁམས་གསུམ་གྲགས་པ་ཞེས་པ་ནི་ཡོན་ཏན་གྱིས་འཇིག་རྟེན་གསུམ་དུ་གྲགས་པའོ། །བགེགས་དང་དགྲ་ཆེན་ཞི་བར་བྱེད། །ཅེས་པ་ནི་ལྷ་དང་གནོད་སྦྱིན་ལས་འབྱུང་བའི་བགེགས་རྣམས་མི་ལ་སོགས་པའི་དགྲ་སེལ་བར་བྱེད་པའོ། །ཟླ་བ་ལྟར་ཡོངས་སུ་དག་ཅིང་སེམས་ཅན་ཐམས་ཅད་ཀྱི་རྒྱུད་ཚིམ་པར་བྱེད་པའི་རང་བཞིན་ནོ། །ཐིག་ལེ་ནི་ཐིག་ལེའི་མཚན་མ་དང་ལྡན་པའམ། ཡང་ན་ནི་ཏི་ལ་ཀ་ཞེས་པ་ནི་རྒྱ་གར་སྐད་དུ་གཙོ་བོའི་རྣམ་པ་ལ་བྱ་སྟེ། ཁྲོ་བོ་ཟླ་བའི་གཙོ་བོ་ལྟ་བུར་ཞེས་བྱའོ། །སྤྱན་གསུམ་པ་ནི་ཡེ་ཤེས་ཀྱི་སྤྱན་ལྷག་པར་མངའ་བའམ་ཁྲོ་བའི་མཚན་མའོ། །མཆེ་བ་བཞི་པ་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང་རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་དང་ལྡན་པའོ། །འོད་ནི་དབྱར་གྱི་སྤྲིན་འདྲ་བར། །ཞེས་པ་ནི་ཁ་དོག་དབྱར་གྱི་སྤྲིན་འདྲ་བ་སྟེ། དབྱར་གྱི་སྤྲིན་གྱི་རླུང་དང་ཆར་བར་བཅས་པའི་བག་གནས་པ་སྟེ། དེ་དང་འདྲ་བས་ལས་ཐམས་ཅད་བྱེད་པའི་མཚན་མའོ། །དྲག་པོ་རྒོད་པའི་སྒྲ་འབྱིན་པ། །ཞེས་པ་ནི་རྒོད་པའི་སྒྲས་ཐམས་ཅད་ཁེངས་ཤིང་གནོད་པར་འགྱུར་བའི་སྒྲ་འབྱིན་པའོ། །རྡོ་རྗེའི་རྒྱན་གྱིས་ཤིན་ཏུ་བརྒྱན། །ཞེས་པ་རྒྱན་རྣམས་ལ་རྡོ་རྗེ་མཚན་མས་བཏབ་པའོ། །མཐའ་ཡས་འཁོར་གྱིས་བསྐོར་བ་ནི། །ཁྲོ་བོའི་འཁོར་གྱིས་བསྐོར་བ་ཞེས་པ་ནི་འཁོར་ཕལ་དང་ཁྲོ་བོ་གྲངས་མེད་པས་བསྐོར་བའོ། །ལག་པ་བརྒྱ་སྟོང་དུ་མ་ཞེས་པ་ནི་ལམ་གྱི་ཡན་ལག་བརྒྱ་སྟོང་དུ་མས་སེམས་ཅན་རྣམས་འཕགས་པའི་ལམ་ལ་འཛུད་པའམ། ཡན་ལག་དེ་རྣམས་ཀྱིས་ལམ་གྱི་སྒྲིབ་པ་མང་པོ་རྣམས་སེལ་བའི་མཚན་མའོ། །མཚོན་ཆ་དུ་མ་སྣ་ཚོགས་ཞེས་པ་ནི་ལམ་གྱི་ཡན་ལག་ཡོན་ཏན་རྣམས་རྡོ་རྗེ་ལ་སོགས་པའི་མཚོན་ཆར་གྱུར་པའོ། །ཁྲོ་བོ་ཆེན་པོ་དེ་འདྲ་བར། །པདྨོའི་གདན་ལ་གནས་པར་བྲི། །ཞེས་པ་ནི་གོང་དུ་སྨོས་པའི་ཚུལ་དུ་བྲི་སྟེ་འཁོར་ཡན་ལག་
མང་པོ་རྣམས་ནི་ཡིད་ཀྱིས་བསམ་པར་བྱ་སྟེ། ཉུང་ཟད་ཅི་འོས་པར་བྲི་བར་བྱའོ། །དེ་ཡི་ནུབ་ཏུ་སོང་ནས་ནི། །རྡོ་རྗེ་འཛིན་པ་མང་དུ་བྲི། །ལག་ན་རྡོ་རྗེ་མཚོན་ཆ་ཐོགས། །མཐུ་ཆེན་ཁ་དོག་སྣ་ཚོགས་པ། །དཔའ་བོ་འོད་ཀྱི་འཁོར་གྱིས་བསྐོར། །སེམས་ཅན་ཀུན་གྱི་དོན་བྱེད་པའོ། །ཞེས་པ་ནི་ཕྱག་ནར་དོ་རྗེའི་འཁོར་རྡོ་རྗེ་འཛིན་པ་རྣམས་བྲི་སྟེ། མིང་དང་ཆ་ལུགས་གསང་བའི་དཀྱིལ་འཁོར་ལས་འབྱུང་བ་དང་སྦྱར་བར་བྱའོ། །སྔགས་མགོན་གྱི་ནི་འོག་ལོགས་སུ། །ནཻ་རྀ་ནི་ཕྱོགས་ལོགས་སུ། །ཞེས་པ་ནས། ཁྲོ་བོ་ལྟ་བུ་གཞོན་ནུའི་གཟུགས། །ཞེས་པའི་བར་དུ་བཅོམ་ལྡན་འདས་རྣམ་པར་སྣང་མཛད་ཉིད་ཀྱི་མཉམ་པ་ཉིད་ཀྱི་ཡེ་ཤེས་ཀྱི་བར་ཆད་མེད་པའི་ལམ་དུ་གྱུར་པ། བཅོམ་ལྡན་འདས་ཀྱི་འོག་མ་ཟད་དུ་འཕགས་པ་མི་གཡོ་མགོན་བྲི་བའི་བྱེ་བྲག་གསུངས་པ་སྟེ། ལག་ན་རལ་གྲི་ཐོགས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་གཅོད་པའི་ཤེས་རབ་ཀྱི་མཚན་ཉིད་དོ། །ཞགས་པ་ནི་ལམ་གྱི་མཚན་ཉིད་དོ། །ལམ་དེར་སེམས་ཅན་ཐམས་ཅད་འདྲེན་ཞིང་འཛུད་པའོ། །མིག་གཅིག་བཙུམས་པ་ནི། བར་ཆད་མེད་པའི་ལམ་གྱི་རང་བཞིན་པས་ཆོས་ཀྱི་དབྱིངས་རྣམ་པ་ཐམས་ཅད་དུ་མ་ཆུད་ཅིང་མཉམ་པ་ཉིད་ཀྱི་ཡེ་ཤེས་ཡོངས་སུ་རྫོགས་པའི་མཚན་མའོ། །འབར་བས་བསྐོར་བའི་ནང་དུ་འདུག །ཅེས་པ་ནི་སྒྲིབ་པ་སེལ་བའི་ཡེ་ཤེས་དང་ལྡན་པའོ། །མཁྲེགས་པ་ནི་ཕྱིན་ཅི་མ་ལོག་པ་ཡོངས་སུ་རྫོགས་པའི་ལམ་གྱི་རང་བཞིན་པས་བརྟན་ཞིང་མི་འགྱུར་བའོ། །གཞོན་ནུ་མའི་གཟུགས་ནི་བར་ཆད་མེད་པའི་ལམ་ལ་དང་པོ་ཞུགས་པས་ལམ་རྒྱས་པའི་མཚན་མ་སྟེ། དེ་བས་ན་བར་ཆད་མེད་པའི་ལམ་རྒྱས་པའི་མཚན་ཉིད་ཁམས་གསུམ་རྣམ་པར་རྒྱལ་བ་རླུང་གི་ཕྱོགས་སུ་གཞག་གོ །བྲིས་ནས་བློ་ཅན་འགྲོ་བ་ནི། །རླུང་ཕྱོགས་སུ་སྟེ་ནན་ཏན་བྱ། །ཞེས་པ་ནས། ཟད་པའི་དུས་བཞིན་འདུག་པའོ། །ཞེས་པའི་བར་དུ་བཅོམ་ལྡན་འདས་རྣམ་པར་སྣང་མཛད་མཉམ་པ་ཉིད་ཀྱི་ཡེ་ཤེས་ཀྱི་བར་ཆད་མེད་པའི་ལམ་རྫོགས་པའི་རང་བཞིན་ཁམས་གསུམ་རྣམ་པར་རྒྱལ་བ་བྲི་བའི་བྱེ་བྲག་གསུངས་པ་སྟེ། ཟད་པའི་དུས་བཞིན་འདུག་པའོ། །ཞེས་པ་ནི་ཟད་པའི་ཚེ་ཉི་མ་དང་ཟླ་བ་མེད་དེ་མུན་ནག་ཏུ་
འགྱུར་ཏེ། ཁྲོ་བོ་དེའི་ཁ་དོག་ཀྱང་མུན་པ་དང་འདྲ་བ་ནག་པོ་བྲི་ཞེས་པའི་དོན་ཏོ། །དེ་བཞིན་ནང་རོལ་བྲིས་པ་རྣམས། །རྒྱས་པ་རུ་ནི་བཤད་པ་ཡིན། །ཞེས་པ་ནི་སྙིང་པོའི་དཀྱིལ་འཁོར་དུ་སྐུ་མི་ཟད་པ་ལ་སོགས་པའི་རྒྱན་རང་བཞིན་གྱི་དཀྱིལ་འཁོར་རྣམས་སྡུད་པར་འགྱུར་བ་ཡེ་ཤེས་ལྔའི་མཚན་མ་འཁོར་དང་བཅས་པར་བཤད་ཅེས་པའོ། །ད་ནི་དཀྱིལ་འཁོར་གཉིས་པའི་སྣམ་བུའི་སྐུ་མི་ཟད་པའི་རྒྱན་སྡུད་པར་གྱུར་པ་སྤྲུལ་པའི་སྐུ་ཤཱཀྱ་ཐུབ་པ་དང༌། དབང་པོ་དང་གཤིན་རྗེ་ལ་སོགས་པའི་ཚུལ་དུ་བསྟན་པ་འཁོར་དང་བཅས་པ་བྲི་བར་བཤད་པར་བྱ་སྟེ། གཉིས་པོའི་ཆ་ནི་ངེས་པ་རུ་ཤར་ཕྱོགས་ཀྱི་དབུས་སུ་ཆ་གཉིས་རྣམ་པར་བརྟགས་པའི་སྒོ་ཁྱུད་ཀྱི་ནང་རོལ་དུ། སྔགས་པས་བྲི་བ་ཤཱཀྱ་ཐུབ། །རྒྱས་པ་གསེར་གྱི་ཁ་དོག་འབར། །མཚན་མཆོག་སུམ་ཅུ་རྩ་གཉིས་ལྡན། །མགོན་པོ་ཆོས་གོས་གསོལ་བཞིན་ཏེ། །གཙོ་བོ་ཆོས་ཀྱི་དོན་བྱེད་པ། །པདྨ་དཀར་པོའི་གདན་ལ་བཞུགས། །བཞུགས་པ་ཆོས་ཀྱང་འཆད་པ་བཞིན། །ཞེས་པའི་བར་དུ་བཅོམ་ལྡན་འདས་ཤཱཀྱ་ཐུབ་པ་དཀྱིལ་འཁོར་ཉིས་རིམ་གྱི་ཤར་གྱི་ངོས་ཆ་གཉིས་བགོས་པའི་དབུས་སུ་བབ་པའི་སྒོ་ཁྱུད་ཀྱི་ནང་དུ་བྲིས་ཏེ་ཤཱཀྱ་ཐུབ་པ་ཞེས་པ་ནི། ཤཱཀྱའི་རིགས་ལས་བྱུང་ཞིང་ལུས་དང་ངག་ཡིད་གསུམ་ཐུབ་པའི་ངང་ཚུལ་ཅན་ནོ། །ཤར་ཕྱོགས་སུ་བྲི་བ་ནི་བཅོམ་ལྡན་འདས་རྣམ་པར་སྣང་མཛད་པས་སྔར་བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་པ་བསྟན་པའོ། །གསེར་གྱི་ཁ་དོག་ནི་རྒྱས་པའི་མཚན་མ་སྟེ་བསོད་ནམས་དང་ཡེ་ཤེས་ཀྱི་ཚོགས་རྒྱས་པའི་རང་བཞིན་གྱི་ཕྱིར་རོ། །འབར་བ་དང་བཅས་པ་ནི་ཀུན་དུ་སངས་རྒྱས་པས་སྒྲིབ་པ་སྲེག་པའི་རང་བཞིན་གྱི་ཡེ་ཤེས་དང་ལྡན་པའོ། །མཚན་མཆོག་སུམ་ཅུ་གཉིས་དང་ལྡན། །ཞེས་པ་ནི་གཅུག་ཏོར་བལྟར་མི་སྣང་བ་ལ་སོགས་པ་སྐྱེས་བུ་ཆེན་པོའི་མཚན་གཞུང་ལས་གྲགས་པའོ། །ཆོས་གོས་དུར་སྨྲིག་གསོལ་བ་ནི་འཁོར་བ་ལ་ནི་མ་ཆགས་བ་དང༌། སྙིང་རྗེའི་དབང་གིས་སེམས་ཅན་ཐམས་ཅད་ལ་ཆགས་པ་བསྟན་པ་སྟེ། ཆོས་གོས་ཚོན་གྱིས་ཞེས་པ་ནི་སྙིང་རྗེས་སེམས་ཅན་ལ་ཆགས་པ་བསྟན་པའོ། །དམར་པོ་ཉིད་དུ་མི་གསལ་བར་དུར་སྨྲིག་ཏུ་གྱུར་པ་ནི་འཁོར་བ་ལ་མ་ཆགས་པར་
བསྟན་པའོ། །གཙོ་བོ་བསྟན་པའི་དོན་བྱེད་པ་ཞེས་པ་ནི། འཁོར་རྣམས་ལ་སློབ་ཅིང་སྟོན་པའི་དོན་བྱེད་པའོ། །པདྨ་དཀར་པོའི་གདན་ནི་བསོད་ནམས་ཀྱི་ཚོགས་ཡོངས་སུ་དག་པའི་མཚན་མ་སྟེ་སྔ་མ་བཞིན་ནོ། །ཆོས་འཆད་བཞིན་དུ་བཞུགས་པ་ནི་གཞུང་ལས་གྲགས་བའོ། །དེ་ཡི་གཡས་ཕྱོགས་ལོགས་སུ་ནི། །ལྷ་མོ་སངས་རྒྱས་སྤྱན་ཞེས་བྱ། །ཞལ་རས་ཞི་བའི་ཡིད་འཛུམ་པར། །འོད་ཀྱི་འཁོར་གྱིས་ཤིན་ཏུ་བསྐོར། །མཉམ་མེད་སྐུ་ཡང་ཤིན་ཏུ་དངས། །དེ་ནི་ཤཱཀྱ་ཐུབ་པའི་ཡུམ། །ཞེས་པ་ནི་སངས་རྒྱས་པའི་ཤེས་རབ་ཡུམ་གྱི་གཟུགས་གྱུར་པ་ཤཱཀྱ་ཐུབ་པའི་གཡས་རོལ་གྱི་བྱང་ཕྱོགས་ལོགས་སུ་བྲི་སྟེ། སངས་རྒྱས་ཤཱཀྱ་ཐུབ་པ་ཤེས་རབ་དེ་ལས་བྱུང་བའི་ཕྱིར། སངས་རྒྱས་ཀྱི་ཡུམ་ཞེས་བྱའོ། །སངས་རྒྱས་ཀྱི་སྤྱན་ཞེས་པ་ནི་གཟིགས་པའི་རང་བཞིན་པས་ཤེས་རབ་ལ་བྱའོ། །ཞལ་རས་ཞི་པ་ཡིད་འཛུམ་པ་ནི་ཞི་བཤེས་བྱ་དང་ཉོན་མོངས་པའི་སྒྲིབ་པ་དག་པའོ། །ཡིད་ཙམ་འཛུམ་པ་ནི་ཆོས་སྟོན་པའི་མཚན་མའོ། །འོད་ཀྱིས་ཤིན་ཏུ་བསྐོར་ཞེས་པ་ནི་ཀུན་དུ་སངས་རྒྱས་པ་ལ་ཤེས་བྱ་དང་ཉོན་མོངས་པ་སྲེག་པའི་ཡེ་ཤེས་དང་ལྡན་པའོ། །མཉམ་པ་མེད་པ་ནི་ཇི་བཞིན་པ་མེད་པའི་ཡེ་ཤེས་ཀྱི་རང་བཞིན་པས་ཚད་འདི་ཙམ་མོ་ཞེས་བཟུང་ཞིང་གཞལ་དུ་མེད་པའོ། །དེ་ཡི་གཡས་ཕྱོགས་བྲི་བ་ནི། །རིག་པ་སྨིན་མཚམས་ཞེས་གྲགས་པ། །ལྷ་མོ་པདྨའི་སྟེང་བཞུགས་པར། །དུང་དང་ཟླ་བའི་འོད་འདྲ་བ། །ཡིད་བཞིན་ནོར་བུ་ལག་ན་ཐོགས། །རེ་བ་ཀུན་ཀྱང་རྫོགས་པར་བྱེད། །ཅེས་པ་ནི་སངས་རྒྱས་སྤྱན་གྱི་གཡས་རོལ་བྱང་ཕྱོགས་སུ་སྨིན་མཚམས་ཞེས་བྱ་བའི་རིག་མ་བྲི་སྟེ། སངས་རྒྱས་ཀྱི་སྨིན་མཚམས་ནས་སྐྱེས་བུ་ཆེན་པོའི་མཚན་ཐིག་ལེ་འདྲ་བ་དེའི་ཏིང་ངེ་འཛིན་གྱི་གཟུགས་སུ་གྱུར་བའི་ལྷ་མོ་ནི་སྨིན་མཚམས་ཞེས་བྱའོ། །མགོན་པོའི་གཡོན་ལོགས་སྔགས་མཁན་གྱིས། །ལེགས་པར་གཙུག་ཏོར་ལྔ་བྲི་ཞེས་པ་ནས། ཀུན་ཀྱང་ནན་ཏན་ཆེར་བྲི་བ། །གནས་རྣམས་ཀྱང་ནི་ལྔ་ཉིད་དུ། །ཞེས་པའི་བར་དུ་བཅོམ་ལྡན་འདས་ཀྱི་གཡོན་རོལ་ལྷོ་ཕྱོགས་སུ་གཙུག་ཏོར་ལྔ་བྲི་སྟེ། གཙུག་ཏོར་ཞེས་པ་ནི་བཅོམ་ལྡན་འདས་ཀྱི་གཙུག་ནས་བྱུང་བ་སྟེ། འབྲས་བུ་རྒྱུ་ལས་བརླན་ཏེ་མཚན་གསོལ་བའོ། །འདི་རྣམས་ཀྱི་ཕྱག་རྒྱ་ལ་སོགས་
པ་ནི། ཞིབ་ཏུ་གསང་བའི་དཀྱིལ་འཁོར་ལས་སྨོས་པས་ན་འདིར་མ་བཤད་དོ། །དེ་རྣམས་ཀྱི་ནི་བྱང་ཕྱོགས་སུ། །གཙང་བར་གནས་དག་ལེགས་པར་བྲི། །ཞེས་པའི་བར་དུ་གཙུག་ཏོར་ལྔའི་གཡོན་རོལ་ལྷོ་ཕྱོགས་སུ་གཟུགས་མེད་པའི་ཁམས་ཀྱི་ལྷ་རྣམས་ལ་སྐུ་མི་ཟད་བའི་རྒྱན་གྱིས་ཁྱབ་པར་མཛད་པའི་སྒོར་གྱུར་པ་གནས་གཙང་མའི་རིས་ཀྱི་ལྷ་རྣམས་བྲི་སྟེ། གཞུང་ལས་བྱང་ཕྱོགས་སུ་སྨོས་ན། ཅིའི་ཕྱིར་ལྷོ་ཕྱོགས་སུ་བྲི་ཞེ་ན། གཙུག་ཏོར་ལྔའི་བྱང་ཕྱོགས་ན་ཤཱཀྱ་ཐུབ་པ་ལ་སོགས་པ་བཞུགས་པས་བྲི་བའི་སྐབས་མེད་དེ། ལྷོ་ཕྱོགས་སུ་བྲི་བར་མངོན་ནོ། །གཉིས་སུ་ན་སྐད་ཀྱི་གཞུང་གིས་ཀྱང་བྱང་ཕྱོགས་སུ་ཞེས་པའོ། །ལྷོ་ཕྱོགས་བྱ་བའི་ཕྱིར་རོ། །མཛོད་སྦུའི་གཡས་ལོགས་བྱང་ཕྱོགས་སུ། །གཙུག་ཏོར་གསུམ་པོ་ཉིད་ཀྱིས་ཏེ། །ཆེར་འབྱུང་བ་ཡི་གཙུག་ཏོར་དང༌། །དེ་བཞིན་གྱེན་དུ་འབྱུང་བ་དང༌། །མཐའ་ཡས་དབྱངས་ཀྱི་སྒྲ་དང་སྟེ། །དེ་རྣམས་ནན་ཏན་ལེགས་པར་བྲི། །ཞེས་པ་ནི། མཛོད་སྤུའི་གཡས་རོལ་བྱང་ཕྱོགས་སུ། །གཙུག་ཏོར་གསུམ་རྣམས་བྲི་བ་སྟེ། །དཀར་པོ་སེར་སྐྱ་སེར་གདངས་ཏེ། །ཞེས་པ་ནི་གཙུག་ཏོར་གསུམ་པོ་དེ་དག་ཉིད་ཀྱི་ཁ་དོག་སྟེ། སེར་སྐྱ་ནི་ཡུངས་ཀར་གྱི་ཁ་དོག་འདྲའོ། །སེར་གདངས་ནི་གསེར་གྱི་ཁ་དོག་འདྲའོ། །མཐུ་ཆེན་གཙུག་ཏོར་ལྔ་པོ་གསུམ་དུ་བྱ་བ་གཞན་གྱི་སྟེ་ཞེས་པའི་གཙུག་ཏོར་གསུམ་པོ་ལས་གཞན་པ་གཙུག་ཏོར་ལྔ་པོ་སྔར་སྨོས་པ་རྣམས་ཁ་དོག་གསུམ་དུ་བྱའོ་ཞེས་པ་སྟེ་ཁ་དོག་རྣམ་པ་གསུམ་པོ་ཞེས་པ་ཡང་དཀར་པོ་དམར་པོ་སེར་པོ་ཞེས་པའོ། །གཙུག་ཏོར་ལྔ་ལ་ཁ་དོག་གསུམ་ནི་གཙུག་ཏོར་གསུམ་དང་སྦྱར། གཙུག་ཏོར་གཉིས་ནི་ཁ་དོག་དེ་དག་ཉིད་ལས་དཀར་པོ་དང་དམར་པོ་གཉིས་དང་སྦྱར་རོ། །དེ་དག་སྨོན་ལམ་མཐུ་ཅན་ཞེས་པ་ནི་དེ་དག་ཀུན་ཀྱང་བཅོམ་ལྡན་འདས་ཤཱཀྱ་ཐུབ་པའི་སྨོན་ལམ་གྱི་མཐུ་ལས་བྱུང་བའོ་ཞེས་པའོ། །དེ་ནས་སྔགས་པ་མེའི་ཕྱོགས་སུ་མེ་ནི་དྲང་སྲོང་ཆེ་བ་དང་བཅས་པ་ཞེས་པ་ནས་རིལ་བ་སྤྱི་བླུགས་དང༌། སྔགས་ནོར་ཐོགས་ཞེས་པའི་བར་དུ་ཤར་དང་ལྷོའི་མཚམས་སུ་འཁོར་མེའི་དྲང་སྲོང་རྣམས་དང་བཅས་པར་བྲི་བའི་བྱེ་བྲག་དེ་རྣམས་ཀྱང་སྐུ་མི་ཟད་པའི་རྒྱན་ཉིད་མེའི་དྲང་སྲོང་ལ་སོགས་པ་གདུལ་བའི་ཕྱིར་མེའི་གཟུགས་སུ་གྱུར་པའོ། །དེ་ནས་ལྷོ་ཡི་ཕྱོགས་སུ་ནི། །སོང་ནས་གཤིན་རྗེར་
བྲི་བར་བྱ། །ལག་ན་དབྱིག་ཐོགས་མ་ཧེ་ཞོན། །འོད་ཀྱི་ཁ་དོག་དབྱར་སྤྲིན་འདྲ། །མ་མོ་རྣམས་དང་དུས་མཚན་དང༌། །འཆི་བྱེད་རྣམས་ཀྱིས་བསྐོར་བའོ། །ཞེས་པ་ནི་སྐུ་མི་ཟད་པའི་རྒྱན་དེ་ཉིད་གཤིན་རྗེ་ལ་སོགས་པ་གདུལ་བའི་ཕྱིར་ཡི་དགས་ཀྱི་རྒྱལ་པོ་གཤིན་རྗེའི་གཟུགས་སུ་གྱུར་པ་སྟེ། དེའང་ལྷོའི་ཕྱོགས་ཀྱི་སྒོ་ཁྱུད་ཀྱི་ནང་དུ་པྲི་སྟེ། མ་ཧེ་ཞོན་པ་ནི་དེའི་ཐེག་པ་སྟེ། འཇིག་རྟེན་གྱི་ཐེག་པ་པས་མ་ཧེ་ལྟར་དཀར་པོ་མ་ཡིན་པའོ། །དབྱིག་པ་ཐོགས་པ་ནི་ཤེས་རབ་ཀྱི་མཚན་མ་སྟེ་དབྱིག་པ་ཟླུམ་པོ་བཅད་པའི་རང་བཞིན་མ་ཡིན་པ་ནི་འཁོར་བ་རྒྱུད་ལས་ལེགས་ཉེས་ཀྱི་འབྲས་བུ་སྟོན་པ་ལ་སོགས་པ་འཆད་པས་འཁོར་བའི་རྒྱུད་གཅོད་པ་མ་ཡིན་པའོ། །ནཻ་རིའི་ཕྱོགས་སུ་ནི་རི་བྲིའོ། །འཇིགས་པ་ལག་ན་རལ་གྲི་ཅན། །ཞེས་པ་ནི་ལྷོ་ནུབ་ཀྱི་མཚམས་སུ་འབར་བ་རྣམས་གདུལ་བའི་ཕྱིར་སྐུ་མི་ཟད་པའི་རྒྱན་དེ་ཉིད་འབར་བའི་རྒྱལ་པོ་ནི་རིའི་གཟུགས་སུ་གྱུར་པའོ། །དེ་ནས་བློ་ཅན་བྲི་བ་ནི། ནུབ་བྱང་ཕྱོགས་སུ་བྲི་བ་ལྷའི་རྒྱལ་པོ་སྟེ། རི་རབ་རྩེ་གནས་ལྷས་བསྐོར་པ། །ལག་ན་རྡོ་རྗེ་ཅོད་པན་ཅན། །རྒྱན་ཀུན་གྱིས་ནི་བརྒྱན་པའོ། །ཞེས་པ་ནི་འདོད་པའི་ལྷ་རྣམས་གདུལ་བའི་ཕྱིར་སྐུ་མི་ཟད་པའི་རྒྱན་དེ་ཉིད་ལྷ་རྣམས་ཀྱི་རྒྱལ་པོ་དབང་པོའི་གཟུགས་སུ་གྱུར་པ་སྟེ། དེ་ཡང་བྱང་ཕྱོགས་ཀྱི་ངོས་སྒོ་ཁྱུད་ཀྱི་ནང་དུ་བྲིའོ། །དེ་ཡང་རི་རབ་ཀྱི་རྩེ་མོ་ལ་གནས་ཤིང་འཁོར་ལྷ་རྣམས་ཀྱིས་སྐོར་བར་བྲི་སྟེ་ཅོད་པན་གྱི་རྒྱལ་པོའི་ཚུལ་འཛིན་པས་སོ། །རྡོ་རྗེ་ནི་དེའི་ཡེ་ཤེས་ཀྱི་མཚན་མའོ། །གཉིས་སུ་ན་ལག་ཆའོ། །དེ་ཡི་ཤར་དུ་བ་རུ་ཎ། །ལག་ན་ཞགས་པ་ཐོགས་པ་བྲི། །ཞེས་པ་ནི་ཆུའི་དབང་པོ་ཤར་ཕྱོགས་སུ་བྲི་སྟེ། ཞགས་པ་ནི་དེ་ཉིད་ཀྱི་ལམ་གྱི་རང་བཞིན་ནོ། །ཤར་ཕྱོགས་སུ་བྲི་བ་ནི་པཱུརྦ་ཞེས་པ་སྔོན་གྱི་ཚིག་སྟེ། བསྐལ་པ་འབྱུང་བའི་འོག་ཏུ་ཆུའི་དཀྱིལ་འཁོར་གྱིས་ཐོག་མར་གཞི་བཙུགས་པའི་ཕྱིར་རོ། །ཉི་མའི་ཤིང་རྟ་སྟེང་འདུག་པ། །ཞེས་པ་ནི་ཆུའི་རྒྱལ་པོའི་ཤར་ཕྱོགས་སུ་ཉི་མ་བྲི་སྟེ་ཤིང་རྟ་ནི་ཉི་མའི་བཞོན་པའོ། །ཤར་ཕྱོགས་སུ་བྲི་བ་ནི་སྔོན་གྱི་ཚིག་སྟེ། བསྐལ་པ་འབྱུང་བའི་འོག་ཏུ་འཇིག་རྟེན་པ་རྣམས་ཀྱི་ནང་ན་ཉི་མ་དང་ཟླ་བ་དང་པོར་འབྱུང་བའི་ཕྱིར་རོ། །རྒྱལ་དང་རྣམ་པར་རྒྱལ་བ་ཡང༌། །དེ་ཡི་གཡས་ལོགས་
བྲི་བར་བྱ། །ཞེས་པ་ནི་ཉི་མའི་ཆུང་མ་གཉིས་སོ། །དེ་ཡི་གཡས་ཕྱོགས་ཚངས་པ་སྟེ། །གདོང་བཞི་པ་ལ་རལ་པ་ཅན། །ཨོཾ་ཞེས་འབྱིན་ཅིང་ནན་ཏན་བྱེད། །ངང་པ་པདྨའི་སྟེང་གནས་པ། །ཞེས་པ་ནི་དབང་པོའི་གཡས་ལོགས་ནུབ་ཕྱོགས་སུ་ཚངས་པ་བྲི་སྟེ། གདོང་བཞི་པ་ནི་སྨྲང་བཞི་སོ་སོ་ནས་འབྱུང་བའོ། །ངང་པ་པདྨའི་སྟེང་གནས་པ། །ཞེས་པ་ནི་ཚངས་པའི་བཞོན་པ་ངང་པ་སྟེ། ངང་པའི་སྟེང་ན་པདྨ་བཞག་པ་ལ་འདུག་པར་བྲིའོ། །ཨོཾ་གྱི་སྒྲ་འབྱིན་པའི་ཚུལ་དང་ཕྱག་རྒྱ་ནི་གསང་བའི་དཀྱིལ་འཁོར་དུ་བཤད་པ་དང་སྦྱར་རོ། །དེ་ཡི་ནུབ་ཏུ་བྲི་བ་ནི། །ས་ཡི་ལྷ་མོ་དབྱངས་ཅན་དང༌། །གཏོགས་འདོད་ཕུང་པོ་དེ་བཞིན་རླུང༌། །དབང་པོ་ཆེ་དང་ཟླ་བ་སྟེ། །ནུབ་ཀྱི་ཕྱོགས་སུ་གནས་པ་ནི། །ནན་ཏན་ཆེན་པོར་བྱས་ལ་བྲི། །ཞེས་པ་ནི་ནུབ་ཕྱོགས་ཀྱི་ངོས་སུ་གཏོགས་འདོད་ལ་སོགས་པའི་ལྷ་དེ་དག་ལྷོ་ཕྱོགས་ནས་བརྩམས་ཏེ་རིམ་པ་ཇི་ལྟ་བ་བཞིན་དུ་བྲིའོ། །ནུབ་ཕྱོགས་སུ་བྲི་བ་ནི། སྒོ་ནུབ་ཏུ་གཏོད་པས་སྒོ་ཁར་བྲི་བ་སྟེ། དབང་པོ་དང་གཏོགས་ལ་དོད་ལ་སོགས་པའི་ལྷ་དེ་རྣམས་འཇིག་རྟེན་ལས་འདས་པའི་ལམ་དུ་འཇུག་པའི་སྒོར་གྱུར་པའི་ཕྱིར་རོ། །དེ་རྣམས་ཀྱང་སྐུ་མི་ཟད་པའི་རྒྱན་དེ་ཉིད་དེ། ལྷ་དེ་དག་གདུལ་བའི་ཕྱིར་དེ་དག་ཉིད་ཀྱི་གཟུགས་སུ་གྱུར་པ་སྟེ། སྐུ་མི་ཟད་པའི་རྒྱན་དེ་ལ་སོགས་པ་དེ་དག་གི་གཟུགས་སུ་གྱུར་པ་ཡང་ཆ་ལུགས་དེ་དག་འདྲ་མོད་ཀྱི། དེ་དག་ངག་གཅིག་ཅིང་གདུལ་བའི་ཕྱིར་མཐུ་དང་རྫུ་འཕྲུལ་ལ་སོགས་པ་དེ་དག་ལས་ལྷག་པར་ཤེས་པར་བྱའོ། །དེ་བཞིན་དུ་གཤིན་རྗེ་ལ་སོགས་པ་གཞན་ཡང་སྦྱར་རོ། །དེ་དག་བྲི་བ་སྔགས་པ་ཡིས། །མི་འཁྲུགས་པ་ཡི་ཡིད་ཀྱིས་ཏེ། །ཐུབ་པ་རྒྱལ་པོའི་འོག་ཏུ་བྲི། །ཁྲོ་བོ་འདི་དག་བྲི་བར་བྱ། །གཞན་གྱི་མི་ཚུགས་ཁྲོ་ཆེན་དང༌། །གཞན་གྱིས་མི་ཚུགས་ལྷ་མོ་དང༌། །ས་བདག་ལག་ན་བུམ་པ་ཐོགས། །གུས་པར་དེ་དག་འཁོར་བཞིན་དུའོ། །ཁྲོ་བོ་གཞན་གྱིས་མི་ཐུབ་པ་ནི་བཅོམ་ལྡན་འདས་ཤཱཀྱ་ཐུབ་པའི་བར་ཆད་མེད་པའི་རང་བཞིན་ནོ། །ལྷ་མོ་གཞན་གྱིས་མི་ཐུབ་པ་ནི་བཅོམ་ལྡན་འདས་ཤཱཀྱ་ཐུབ་པའི་མཐུ་བརྟན་པར་གྱུར་པའོ། །སའི་ལྷ་མོ་ལག་ན་བུམ་པ་ཐོགས་པ་ནི་བཅོམ་ལྡན་འདས་ཀྱི་དཔང་དུ་གྱུར་པ་སྟེ་དེ་དག་
ཀྱང་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔ་མ་ཟད་འོག་ཏུ་བྲིའོ། །ཀླུ་ཆེན་དགའ་བོ་ཉེ་དགའ་བོ། །ནན་ཏན་ཏུ་ནི་བྲི་བར་བྱ། །སྒོ་བ་གཉིས་ཀྱི་མདུན་དུ་སྟེ། །ཤཱཀྱ་སེང་གེ་སྦྱོང་བ་ཡི། །ཞེས་པ་ནི་ཀླུའི་རྒྱལ་པོ་གཉིས་སྒོ་ཕ་རོལ་ཚུ་རོལ་ནས་གཅིག་ལ་གཅིག་ཕྱོགས་པར་བྲི་སྟེ་ཆབ་སྒོ་བར་ཤེས་པར་བྱའོ། །གཞན་ཡང་ཤཱཀ་ཐུག་ཕྱག་རྒྱ་དང༌། །སྔགས་རྣམས་དཀྱིལ་འཁོར་བར་བཤད་པ། །རྒྱུད་རྣམས་ཀུན་ལས་བྱུང་བ་ཡང༌། །དབང་པོ་ཡིས་ནི་བྲི་བར་བྱ། །ཞེས་པ་ནི་བཅོམ་ལྡན་འདས་ཤཱཀྱ་ཐུབ་པའི་ཕྱག་རྒྱ་ལྷུང་བཟེད་དང་གསེག་ཤང་ལ་སོགས་པ་རྒྱུད་ལས་འབྱུང་བ་རྣམས་ཇི་ལྟར་རིགས་པར་བྱའོ་ཞེས་པའོ། །ད་ནི་འཕགས་པ་འཇམ་དབྱངས་ལ་སོགས་པ་བྱང་ཆུབ་སེམས་དཔའ་ཆེན་པོ་རྣམས་ཆོས་ཉན་པའི་ཚུལ་དུ་བཞུགས་པས་བྲི་བར་བཤད་དེ། དེ་ལ་ཆོས་ཉན་པ་ནི་ལུགས་ཀྱི་ཆོས་དང་ཐོབ་པའི་ཆོས་ཏེ། ལུགས་ཀྱི་ཆོས་ནི་ཞལ་ནས་གསུངས་པ་རྣམས་སོ། །ཐོབ་པའི་ཆོས་ནི་སྐུ་མི་ཟད་པའི་རྒྱན་གྱི་དཀྱིལ་འཁོར་ནང་ལོགས་པ་གཉིས་པོ་ནང་དུ་སྐུ་བཞི་པོ་འཁོར་དང་བཅས་པ་སྟེ། དེ་བས་ན་དེ་དག་ཆུད་པར་བྱ་བའི་ཕྱིར་བྱང་ཆུབ་སེམས་དཔའ་དེ་རྣམས་ཀྱིས་ཡོངས་སུ་བསྐོར་ཞིང་མདུན་དུ་བྱས་པའི་ཚུལ་དུ་བྲི་བར་བསྟན་ཏེ། བྱང་ཆུབ་སེམས་དཔའ་དེ་རྣམས་ཀྱི་ཕ་རོལ་ཏུ་ཕྱིན་པ་ལས་སྐྱེས་པ་ཤེ་དག་པར་ཤེས་པར་བྱའོ། །སྔགས་པ་དེ་ནས་བྱུང་ནས་སུ། །ཆ་གསུམ་གཏན་ལ་བབ་པ་དེར། །མཆོག་སྦྱིན་རྡོ་རྗེ་བྲི་སྟེ་ཞེས་པ་ནས། ཀུན་ནས་འཁོར་བར་སྔགས་པ་ཡིས། །མཚན་མ་བཟང་པོའི་འོད་ཀྱིས་སོ། །ཞེས་པའི་བར་དུའོ།། ཤར་ཕྱོགས་ཀྱི་ངོས་ཀྱི་སྒོ་ཁྱུད་ཀྱི་ནང་དུ་འཕགས་པ་འཇམ་དབྱངས་བྲི་བར་བྱ་སྟེ། དེ་ཡང་སྒྲའི་རྗེས་སུ་འགྲོ་བའི་ཤེས་རབ་ཀྱི་རང་བཞིན་ཏེ། ཆོས་ཐམས་ཅད་ཀྱི་སྤྱི་དང་རང་གི་མཚན་ཉིད་བློས་བརྟགས་ཤིང་དཔྱད་ནས་ཆུད་པར་བྱེད་པ་སྟེ། དེ་བས་ན་དེ་ལྟར་ཆུད་ནས་སྒྲིབ་པ་ཐམས་ཅད་རྣམ་པར་སྤོང་བའི་བྱང་ཆུབ་སེམས་དཔའ་ཕྱི་ནས་ལྷོ་ཕྱོགས་སུ་བྲི་སྟེ། དེ་ལྟར་སྒྲིབ་པ་སྤངས་ནས་བཟོད་པ་དང་དགའ་བར་ལྡན་པའི་རང་བཞིན་སའི་སྙིང་པོ་བྱང་ཕྱོགས་སུ་བྲི་སྟེ། དེ་ལྟར་བཟོད་པ་དང་དགའ་བར་ལྡན་པ་ཐོབ་ནས་ཆོས་ཐམས་ཅད་སྟོང་པ་ཉིད་ནམ་མཁའ་ལྟར་ཆུད་པའི་རང་བཞིན་ནུབ་
ཕྱོགས་སུ་བྲི་སྟེ། རྣམ་པར་གྲོལ་བའི་རིམ་པ་དེ་ལྟ་བས་ན། དང་པོ་ཉིད་དུ་ཤར་ཕྱོགས་སུ་ཤེས་རབ་ཀྱི་རང་བཞིན་འཕགས་པ་འཇམ་དཔལ་བྲིའོ། །མཆོག་སྦྱིན་རྡོ་རྗེ་ཞེས་པ་ནི་འཕགས་པ་འཇམ་དཔལ་ཕྱག་ན་རྡོ་རྗེས་མཆོག་བྱིན་ཏེ། ཕྱག་ན་རྡོ་རྗེས་སྔགས་ཀྱི་རྒྱུད་འཆད་པའི་དབང་བསྐུར་ཏེ་དེ་ལྟར་རྡོ་རྗེ་མཆོག་བྱིན་ཞེས་བྱའོ། །ཟུར་ཕུད་ལྔ་དང་ལྡན་པ་ནི་ཡེ་ཤེས་ལྔའི་རང་བཞིན་ནོ། །གཞོན་ནུ་བྲིས་པའི་གཟུགས་འཛིན་པ་ནི་གཞོན་ནུའི་ས་འཛིན་པ་སྟེ་ཆོས་ཀྱི་རྒྱལ་པོའི་གཟུགས་སུ་བཞུགས་པའོ། །ལག་ན་ཨུཏྤལ་ཐོགས་པ་ནི་རྡོ་རྗེ་ཅན་ཏེ། ལག་པ་གཡོན་པ་ཞེས་པ་ནི་ཡེ་ཤེས་ལྔའི་མཚན་མའི་རྡོ་རྗེའི་ཨུཏྤལའི་སྟེང་དུ་གཞག་པ་ལག་པ་གཡོན་ན་ཐོགས་པ་སྟེ། རྡོ་རྗེ་ནི་མཆོག་བྱིན་པའོ། །ཨུཏྤལ་ནི་ཤེས་རབ་ཀྱི་རལ་གྲིའི་མཚན་མའོ། །རབ་ཏུ་དགོད་བཞིན་འདུག་པའོ། །ཞེས་པ་ནི་ཤེས་རབ་ཀྱི་ཆོས་སྟོན་པའི་མཚན་མའོ། །མཚན་བཟང་ལྡན་པའི་འོད་ཀྱིས་ཏེ། །ཞེས་པ་ནི་འོད་འཕྲོ་སེར་པོ་དང་དཀར་པོ་ལ་སོགས་པ་དང་ལྡན་པ་སྟེ། ནག་པོ་ལ་སོགས་པའི་འོད་མེད་པའོ། །དེ་བྲི་བ་ནི། གཞོན་ནུ་དྲ་བའི་འོད་ཅན་ཏེ། །ལག་ན་རིན་ཆེན་དྲ་བ་ཐོགས། །པདྨ་དཀར་པོའི་སྟན་ལ་སྟེ། །རྒྱལ་བའི་སྲས་ལ་ལྟ་བར་བྲི། །ཞེས་པ་ནི་འཕགས་པ་འཇམ་དཔལ་གྱི་འཁོར་དྲ་བའི་འོད་ཅེས་བྱ་བ་ནི་གཡས་རོལ་བྱང་ཕྱོགས་སུ་བྲི་སྟེ། དྲ་བའི་འོད་ཅེས་པ་ནི་འོད་རྣམས་རྒྱུན་མི་འཆད་པར་གཅིག་ལ་གཅིག་འབྲེལ་པ་དང་ལྡན་པ་ནི་དྲ་བའི་འོད་ཅེས་བྱ། ལག་ན་རིན་ཆེན་དྲ་བ་ཐོགས། །ཞེས་པ་ནི་ཕྱག་དྲ་བ་འདྲ་བ་ལ་རིན་པོ་ཆེས་སྤྲས་པ་ཐོགས་པའོ། །པདྨ་དཀར་པོའི་གདན་ལ་བཞུགས་པ་ནི་བླ་མ་བྱེ་བྲག་ཡོད་པར་བྱ་བའི་ཕྱིར་རོ། །རྒྱལ་བའི་སྲས་ལ་ལྟ་བར་བྲི། །ཞེས་པའི་འཕགས་པ་འཇམ་དཔལ་ཉིད་ལ་ལྟ་བར་བྲི་བའོ། །མཆོག་སྦྱིན་རྡོ་རྗེ་གཡོན་རོལ་དུ། །མངག་གཞུག་མ་ནི་ལྔ་བྲི་ཞེས་པ་ནས། འགུགས་པ་ཞེས་སུ་བསྒྲགས་པ་སྟེ། །ཞེས་པའི་བར་དུ་འཕགས་པ་འཇམ་དཔལ་གྱི་འཁོར་མངག་གཞུག་མ་རྣམས་མིང་གིས་སྨོས་པ་ལྔ་གཡོན་རོལ་དུ་བྲི་བར་བྱའོ། །བློ་ཅན་རྣམས་ཀྱིས་མངག་པ་རྣམས་ཀྱི་ནི། །འོག་ཏུ་ཅི་བགྱི་ཞེས་པ་ལྔ་པོ་བྲི། །ཞེས་པ་ནི་མངག་གཞུག་མ་དེ་ལྔའི་གཡོག་ཅི་བགྱི་ཞེས་པ་ལྔ་མངག་གཞུག་རྣམས་
ཀྱི་མ་ཟད་དུ་བྲི་བར་བྱའོ། །གཡོག་གཉིས་པོ་ཡང་བྲི་བ་ནི། །དྲ་བའི་འོད་ཅན་གྱི་སྟེ་ཞེས་པ་ནི་དྲ་བའི་འོད་ཀྱི་དྲུང་དེའི་གཡོག་གཉིས་བྲི་བར་བྱ། དེ་རྣམས་ནི་འཕགས་པ་འཇམ་དཔལ་གྱི་འཁོར་ཏེ། ཁ་དོག་དང་ཕྱག་རྒྱ་ལ་སོགས་པ་ནི་གསང་བའི་དཀྱིལ་འཁོར་དུ་བལྟ་བར་བྱའོ། །ལྷོ་ཕྱོགས་སུ་ནི་སྔགས་མཁན་གྱིས། །བྱང་ཆུབ་སེམས་དཔའ་ཆེར་གྲགས་པ། །སྒྲིབ་པ་ཀུན་སེལ་དེ་རུ་བྲི། །གཙོ་བོའི་རང་བཞིན་ནོར་བུ་ཐོགས། །ཞེས་པ་ནི་ལྟོ་ཕྱོགས་ཀྱི་སྒོ་ཁྱུད་ཀྱི་ནང་དུ་སྒྲིབ་པ་ཐམས་ཅད་རྣམ་པར་སེལ་བ་བྲི་སྟེ། སྒྲིབ་པ་ཐམས་ཅད་རྣམ་པར་སེལ་ཞེས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་ཐམས་ཅད་སྤངས་ཞེས་པའི་དོན་ཏོ། །གཉིས་སུ་ནི་རྒྱུའི་ཚེ་འདོད་པ་དང་སྲེད་པ་དང་ན་སེམས་ལ་སོགས་པའི་སྒྲིབ་པ་ལྔ་བསལ་ཏེ། དེ་རྣམས་མི་བསྐྱོད་པ་ལས་བྱུང་བས་ན་འབྲས་བུ་ལ་རྒྱུས་བརླན་པ་ལ་ཡང་བྱའོ། །དེ་ཡི་གོ་གཉིས་བོར་ནས་སུ། །དཔའ་བོ་བརྒྱད་པོ་རྣམས་བྲི་སྟེ། །ཞེས་པ་ནས། བློ་གྲོས་བསམ་པས་དེ་བཞིན་ནོ། །ཞེས་པའི་བར་དུ་མགོན་པོའི་འཁོར་བརྒྱད་པོ་རྣམས་གཡས་སུ་བཞི་གཡོན་དུ་བཞི་རིམ་བཞིན་དུ་བྲིས་ཏེ། ཆ་གཉིས་བོར་པ་ནི་དཔོན་གཡོག་གི་མཚམས་ཀྱི་གྲལ་དཔག་པའི་ཕྱིར་རོ། །བྱང་ཆུབ་སེམས་དཔའ་དེ་རྣམས་ཀྱི་མིང་ནི་དོན་གྱི་རྗེས་སུ་མཐུན་པར་ཤེས་པར་བྱའོ། །ལྷོ་ཕྱོགས་དེ་ནི་བོར་ནས་སུ། །བྱང་གི་ཕྱོགས་སུ་སོང་ལ་ནི། །ཞེས་པ་ནས། བྱང་ཆུབ་སེམས་དཔའ་གྲགས་ཆེན་པོ། །ཞེས་པའི་བར་དུ་སའི་སྙིང་པོ་བྱང་ཆུབ་སེམས་དཔའ་བྱང་ཕྱོགས་ཀྱི་ངོས་ཀྱི་སྒོ་ཁྱུད་ཀྱི་ནང་དུ་བྲི་བ་སྟེ། བཟོད་པ་རབ་ཏུ་དགའ་ལྡན་པ། །ཞེས་པ་ནི་བཟོད་པ་རྣམ་པ་གསུམ་དང་ལྡན་པ་སྟེ། ཟབ་མོའི་ཆོས་ལ་བཟོད་པ་དང་སྡུག་བསྔལ་བ་ལ་བཟང་པོ་དང་ཕ་རོལ་གྱི་གནོད་པ་བྱས་པ་བཟོད་པའོ། །དགའ་བར་ལྡན་པ་ནི་རང་གི་རྣམ་པར་ཐར་བའི་སོགས་རངས་ཤིང་དགའ་བའོ། །སའི་སྙིང་པོ་ཞེས་པ་ནི་དེ་ལྟ་བུར་བཟོད་པ་དང་ལྡན་པས་ས་དང་འདྲ་བའི་ཕྱིར་རོ། །འབར་བ་ནི་སྔར་བཤད་པ་བཞིན་ནོ། །དེའི་སྟན་ཡིད་དུ་འོང་བ་ནི། །མཁས་པས་ཀྱང་ནི་བསམ་པར་བྱ། །འབྱུང་གནས་ཀུན་དང་ལྡན་པ་ཡིས། །རིན་ཆེན་ཀུན་གྱིས་ཤིན་ཏུ་བརྒྱན། །ཞེས་པ་ནི་བྱང་ཆུབ་སེམས་དཔའ་དེའི་བྱེ་བྲག་ས་དེ་ཡང་དཀར་དམར་ལ་སོགས་པའི་ཁ་དོག་དང་ལྡན་པ་རིན་པོ་ཆེས་བརྒྱན་པར་
བྲིའོ། །དེ་ཡི་སྟེང་དུ་འདུག་པ་སྟེ། །དེར་འདུག་པར་བྲི་བ་ནི། བྱང་ཆུབ་སེམས་དཔའ་གྲགས་ཆེན་ནོ། །ཞེས་པ་ནི་སའི་སྟེང་དུ་པདྨོ་རིན་པོ་ཆེ་བཞིའི་རང་བཞིན་བྲི་སྟེ། རིན་པོ་ཆེ་བཞི་ནི་གོང་དུ་བྱང་ཆུབ་སེམས་དཔའི་ཡོན་ཏན་བཟོད་པ་རྣམ་པ་གསུམ་དང༌། རབ་ཏུ་དགའ་བ་དེ་ཉིད་རིན་པོ་ཆེའི་མཚན་མར་གྱུར་པས་པདྨོ་དེ་བརྒྱན་པ་སྟེ། དེའི་སྟེང་དུ་བྱང་ཆུབ་སེམས་དཔའ་དེ་བཞུགས་པར་བྲིའོ། །དེ་ཡི་ཡོན་ཏན་སྒོ་མཐའ་ཡས། །ཞེས་པ་ནས། བསམ་པ་བརྟན་པ་ཡང་དེ་བཞིན། །ཞེས་པའི་བར་དུ་བྱང་ཆུབ་སེམས་དཔའ་དེའི་འཁོར་ཡོན་ཏན་མཐའ་ཡས་པ་དང་ལྡན་པ་གྲངས་མེད་པ་རྣམས་ཡོད་དོ། །དེ་དག་ལས་དོན་གྱི་རྗེས་སུ་མཐུན་པའི་མིང་དང་ལྡན་པ་བྱང་ཆུབ་སེམས་དཔའ་འདི་རྣམས་རིམ་བཞིན་དུ་བྲི་བར་བྱའོ། །དེ་ནས་སྔགས་པ་ནུབ་ཕྱོགས་སུ། །ནམ་མཁའི་སྙིང་པོ་དེར་བསམ་སྟེ། །དཔའ་བོ་གོས་ཀྱང་དཀར་པོ་གྱོན། །ལག་ན་རལ་གྲི་ཤིན་ཏུ་འབར། །ལེགས་པར་འདུག་པ་བྲི་བ་ནི། །རྒྱལ་སྲས་པདྨོའི་སྟེང་དུ་སྟེ། །ཞེས་པ་ནི་ནུབ་ཕྱོགས་ཀྱི་ངོས་ཀྱི་སྒོ་ཁྱུད་ཀྱི་ནང་དུ་ནམ་མཁའི་སྙིང་པོ་བྱང་ཆུབ་སེམས་དཔའ་བྲི་བར་བྱ་སྟེ། ནམ་མཁའི་སྙིང་པོ་ཞེས་པ་ནི་ཆོས་ཐམས་ཅད་སྟོང་པ་ཉིད་ཀྱི་མཚན་ཉིད་ནམ་མཁའ་ལྟ་བུར་གྱུར་པ་བྱང་ཆུབ་སེམས་དཔའ་དེ་ལས་བྱུང་བས་ན་ནམ་མཁའི་སྙིང་པོ་ཞེས་བྱའོ། །ན་བཟའ་དཀར་མོ་མན་བས་པ་ནི་འཛེམ་པ་དང་དོ་ཚ་བ་དང་ལྡན་པའི་མཚན་མ་སྟེ་སྔར་བཤད་པ་དང་འདྲའོ། །རལ་གྲི་ནི་དེའི་རྣམ་པར་གྲོལ་བའི་ཤེས་རབ་ཀྱི་མཚན་མའོ། །དེ་ཡི་འཁོར་དུ་བསྒྲགས་པ་ནི། །ཞེས་པ་ནས་བརྟན་པའི་བློ་ཞེས་པའི་བར་དུ་ནམ་མཁའི་སྙིང་བོའི་འཁོར་བྱང་ཆུབ་སེམས་དཔའ་དོན་གྱི་རྗེས་སུ་མཐུན་པའི་མིང་དང་ལྡན་པ་འདི་རྣམས་གོ་རིམས་བཞིན་དུ་གཡས་གཡོན་དུ་བྲི་བར་བྱའོ། །སོམས་ཤིག་གོ་རིམས་བཞིན་དུའོ། །ཞེས་པ་ནི་བཅོམ་ལྡན་འདས་ཀྱི་སྐུ་མི་ཟད་པའི་རྒྱན་དེ་དག་ཆོས་ཉན་པའི་བྱང་ཆུབ་སེམས་དཔའ་ཆེན་པོ་འདི་རྣམས་ཀྱིས་ཡོངས་སུ་བསྐོར་ཞིང་མདུན་དུ་བྱས་ཏེ། རྟག་པར་ལྷན་ཅིག་ཏུ་སོམས་ཤིག་ཅེས་པའོ། །བྱང་ཆུབ་སེམས་དཔའ་དེ་རྣམས་ཀྱི་སྐུ་མདོག་དང་ཕྱག་རྒྱ་ལ་སོགས་པ་འདིར་གསལ་བར་མ་སྨོས་པ་རྣམས་གསང་བའི་དཀྱིལ་འཁོར་དུ་བལྟ་པར་བྱའོ། །དེ་ནས་ཕྱག་ན་རྡོ་རྗེ་གསང་བའི་བདག་པོས་
འཁོར་དེ་ཐམས་ཅད་ལ་བལྟས་ནས་ཞེས་པ་ནས། གང་གིས་སྤྱད་པའི་མཆོག་འདི་ལ། །ཤིན་ཏུ་བརྟན་ཡིད་ཐུབ་པའོ། །ཞེས་པའི་ཕྱག་ན་རྡོ་རྗེ་གོང་དུ་དཀྱིལ་འཁོར་བཤད་པ། ལྷ་རྣམས་སོ་སོར་དགོད་པ་ལ་སོགས་པ་ཆུད་ནས་དེ་དག་གི་ཚུལ་དང་ཡོན་ཏན་ལ་སོགས་པ་སེམས་ཤིན་ཏུ་དང་བར་གྱུར་ཏེ། དང་བ་དེའི་ཤུགས་ཀྱིས་སྔགས་ཀྱི་ཚུལ་དཀོན་ཞིང་མཐུ་ཆེ་བ་བསྟན་པ་དང༌། དཀྱིལ་འཁོར་མཐོང་བ་མཐུ་ཆེ་བ་བསྟན་པ་དང༌། སྔགས་སློབ་པ་ཡང་མཐུ་ཆེ་བ་བསྟན་པ་དང༌། སྔགས་ཉན་ཅིང་སེམས་པའི་སྒོ་ནས་དད་པ་མཐུ་ཆེ་བ་བསྟན་པའི་ཚིགས་སུ་བཅད་པ་སྨྲས་པ་སྟེ། དེ་ལ་སེམས་དང་བ་རྣམ་པ་གསུམ་སྟེ། པགས་པར་སོང་བ་དང༌། རུས་པར་སོང་བ་དང༌། རྐང་དུ་སོང་བའོ། །དེ་ལ་པགས་པར་སོང་བ་སྤུར་ལྡང་བ་ལ་སོགས་པའོ། །རུས་པར་སོང་བ་ནི་མཆི་མ་འབྱུང་བ་ལ་སོགས་པའོ། །རྐང་དུ་སོང་བ་ནི་ཚིག་ཏུ་སྨྲ་པ་ལ་སོགས་པ་སྟེ། དེ་བས་ན་ཕྱག་ན་རྡོ་རྗེ་སེམས་ཤིན་ཏུ་དད་རྐང་དུ་སོང་བ་དང་ལྡན་པས་ཚིག་ཏུ་སྨྲས་སོ། །དེ་ནས་ཕྱག་ན་རྡོ་རྗེ་གསང་བའི་བདག་པོས་འཁོར་དེ་ཐམས་ཅད་ལ་བལྟས་ནས་ཞེས་པ་ནི། འཁོར་དེ་རྣམས་ཀྱང་བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་ཡོངས་སུ་དག་པ་ཤ་སྟག་ཏུ་བཞུགས་པས་གཡེང་ངམ་མི་གཡེང་བ་སྣོད་དུ་གྱུར་ཏམ་མ་གྱུར་པ་བརྟག་པ་ལ་ནི་མི་བྱའི། དད་པའི་ཤུགས་ཉིད་ཀྱིས་འཁོར་དེ་རྣམས་ལ་བལྟས་པའོ། །བཅོམ་ལྡན་འདས་རྣམ་པར་སྣང་མཛད་ལ་རིང་ཞིག་ཏུ་མིང་མི་འཛུམས་པར་བལྟས་ནས་ཞེས་པ་ཡང་དད་པའི་ཤུགས་ཀྱིས་བཅོམ་ལྡན་འདས་ལ་སྙིང་ཚིམ་ཚིམ་དུ་རིང་དུ་བལྟས་པའོ། །གླེང་གཞིར་གླེང་བའི་ཚིག་འདི་སྐད་ཅེས་གསོལ་ཏོ་ཞེས་པ་ནི་གཞན་གྱིས་མ་དྲིས་པར་བདག་ཉིད་ཀྱིས་སེམས་དང་བ་དང༌། དང་བའི་ཤུགས་ཀྱིས་ཚིག་ཏུ་འདོར་ཏེ་སྨྲས་པའོ། །ཀུན་མཁྱེན་གལ་ཏེ་འཇིག་རྟེན་དུ། །འབྱུང་ཞིང་སྐྱེ་བར་འགྱུར་བ་ཡང༌། །ཨུ་དུ་མྦཱ་རའི་མེ་ཏོག་བཞིན། །བརྒྱ་ལམ་བརྒྱ་ལམ་གདོད་འབྱུང་བའོ། །དེ་བས་ཤིན་ཏུ་འབྱུང་དཀའ་བ། །སྔགས་སྤྱད་པ་ཡི་ཚུལ་འདི་སྟེ། །ཞེས་པ་ནི་སྔགས་སྤྱད་པ་ཤིན་ཏུ་དཀོན་པ་བསྟན་པ་སྟེ། དེ་བཞིན་གཤེགས་པ་འཇིག་རྟེན་དུ་འབྱུང་བ་
ཡང་ཨུ་དུ་མྦཱ་རའི་མེ་ཏོག་དང་འདྲ་བ་སྟེ། དཀོན་པ་བརྒྱ་ལ་དེ་བཞིན་གཤེགས་པ་འཇིག་རྟེན་དུ་འབྱུང་ན་ཡང༌། བརྒྱ་ལམ་བརྒྱ་ལམ་ན་སྔགས་ཀྱི་ཚུལ་འཆད་པ་ནི་སྔགས་སྤྱོད་པའི་སྣོད་དུ་གྱུར་པའི་གདུལ་བ་གཟིགས་ནས། གདོད་སྔགས་ཀྱི་ཚུལ་སྟོན་པ་ན། དེ་བཞིན་གཤེགས་པ་འཇིག་རྟེན་དུ་འབྱུང་ན། ཡང་སྔགས་སྤྱོད་པའི་ཚུལ་ནི་བརྒྱ་ལམ་བརྒྱ་ལམ་ན་འབྱུང་བ་ཡིན་པས་ན་དཀོན་ནོ་ཞེས་ཏེ། ཚིག་དེ་སྐད་དུ་སྨྲས་པ་ཡང་ཕྱག་ན་རྡོ་རྗེ་ཉིད་དེ་ལྟར་ཆུད་ནས་སེམས་དད་པའི་ཤུགས་ཀྱིས་སྨྲས་པ་དང༌། སྔགས་ཀྱི་ཚུལ་དེ་ལྟར་དཀོན་ཞིང་མཐུ་ཆེ་བར་མ་འོངས་པའི་འགྲོ་བ་རྣམས་ལ་བསྟན་པའི་ཕྱིར་རོ། །ཐམས་ཅད་མཁྱེན་པའི་འཇིག་རྟེན་དུ་སྐྱེ་ཞིང་འབྱུང་བའི་དུས་ངེས་པ་ནི་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་བྱང་ཆུབ་ཀྱི་ཤིང་དྲུང་དུ་མངོན་པར་སངས་རྒྱས་ཏེ། འཇིག་རྟེན་དུ་འབྱུང་ནས་ཀྱང༌། བསྐལ་པ་དང་ལོ་གྲངས་ལ་སོགས་པ་འདི་སྲིད་ཅིག་ལོན། འཕགས་པ་བྱམས་པ་འཇིག་རྟེན་དུ་གདོད་འབྱུང་བ་ཡང༌། དུས་འདི་སྲིད་ཅིག་ན་འབྱུང་ངོ་ཞེས་ངེས་པར་བཤད་ན། ཅིའི་ཕྱིར་བརྒྱ་ལམ་བརྒྱ་ལམ་ན་ཞེས་མ་ངེས་པས་སྨོས་ཤེ་ན། དེ་བཞིན་གཤེགས་པ་འཇིག་རྟེན་དུ་འབྱུང་བའི་དུས་ངེས་ཀྱང་དེ་བཞིན་གཤེགས་པ་འཇིག་རྟེན་དུ་འབྱུང་བའི་ཚེ། སེམས་ཅན་རྣམས་སྐལ་བ་དང་མི་ལྡན་པས་བརྒྱ་ལམ་བརྒྱ་ལམ་ན་དེ་བཞིན་གཤེགས་པ་མངོན་པར་འབྱུང་སྟེ་དུས་ངེས་པ་མེད་དོ། །དེ་བས་ན་དེ་བཞིན་གཤེགས་པ་འཇིག་རྟེན་དུ་མངོན་པར་འཚང་རྒྱ་བ་འབའ་ཞིག་ལ་འཇིག་རྟེན་དུ་འབྱུང་ཞེས་མི་བྱའི་སེམས་ཅན་རྣམས་ཀྱི་སྤྱོད་ཡུལ་དུ་གྱུར་ཅིང་མཐོང་བ་ལ་ཡང་བྱ་བས་ན། བརྒྱ་ལམ་བརྒྱ་ལམ་ཞེས་སྨོས་སོ། །བསྐལ་པ་བྱེ་བ་དུ་མ་རུ། །སྡིག་པ་ཇི་སྙེད་བྱས་ཡོད་པ། །དེ་ཀུན་འབྱུང་བར་འགྱུར་བ་ནི། །དཀྱིལ་འཁོར་འདི་ནི་མཐོང་བའོ། །ཞེས་པ་ནི་དཀྱིལ་འཁོར་མཐོང་བ་ཤིན་ཏུ་མཐུ་ཆེ་བར་བསྟན་པ་སྟེ། དེ་བཞིན་གཤེགས་པ་སྐུ་མི་ཟད་པའི་རྒྱན་ལ་སོགས་པའི་བྱིན་གྱི་རླབས་ཀྱིས་དཀྱིལ་འཁོར་འདི་མཐོང་བས། བསྐལ་པ་དུ་མར་མི་དགེ་བ། །བཅུ་ལ་སྤྱད་པའི་སྡིག་བསགས་པ། །དེ་དག་ཐམས་ཅད་འབྱང་པར་འགྱུར། །ཞེས་པ་སྟེ་དེ་འབྱང་བར་འགྱུར་བ་ཡང་དཀྱིལ་
འཁོར་མཐོང་བ་ཙམ་གྱིས་འབྱང་བར་འགྱུར་བ་འབའ་ཞིག་མ་ཡིན་གྱི། སྦྱོར་བ་དང་རྩ་བ་དང་ཕྱི་མ་དང་གསུམ་དུ་ལྡན་ན་འབྱང་བར་འགྱུར་ཏེ། དེ་ལ་སྦྱོར་བ་ནི་དཀྱིལ་འཁོར་དུ་འཇུག་པའི་ཕྱིར་སྡིག་པ་བཤགས་པ་དང༌། གསུམ་ལ་སྐྱབས་སུ་འགྲོ་བ་དང༌། དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་འཛིན་པའོ། །རྩ་བ་ནི་དཀྱིལ་འཁོར་དུ་འཇུག་པ་ཉིད་ཀྱི་ཚེ་བྱང་ཆུབ་ཀྱི་སེམས་བསྐྱེད་པ་དང༌། དཀྱིལ་འཁོར་དུ་གཞུག་པ་དང༌། སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་སྐུ་གཟུགས་དང༌། ཕྱག་རྒྱ་ལ་སོགས་པ་དང་དཀྱིལ་འཁོར་གྱི་རྒྱན་དང་ལྡ་ལྡི་ལ་སོགས་པ་མཐོང་ནས་སེམས་དང་བ་སྐྱེས་པའོ། །ཕྱི་མ་ནི་དཀྱིལ་འཁོར་དུ་ཞུགས་པའི་འོག་ཏུ་དམ་པའི་ཆོས་དང༌། བྱང་ཆུབ་ཀྱི་སེམས་ཡོངས་སུ་མི་གཏོང་བ་ལ་སོགས་པའི་དམ་ཚིག་མནོས་ཏེ། རྣམ་པ་དེ་དག་གསུམ་དང་ལྡན་པར་དཀྱིལ་འཁོར་མཐོང་ན་བསྐལ་བ་དུ་མར་བསགས་པའི་སྡིག་པ་ཡང་འབྱང་བར་འགྱུར་ན་ནི། དཔེར་ན་མུན་ནག་ལོ་དུ་མར་འདུག་པ་སྒྲོན་མ་ལན་ཅིག་འབྱུང་བས་མེད་པ་དང་འདྲའོ། །ཇི་སྨོས་གྲགས་པ་མཐའ་ཡས་པའི། །སྔགས་སྤྱད་ཆོ་ག་གནས་པ་སྟེ། །བླ་མེད་གནས་སུ་འགྲོ་བ་ནི། །མགོན་པོ་སྔགས་འདི་ཟློས་བ་སྟེ་ཞེས་པ་ནི་སྔགས་ཟློས་པ་མཐུ་ཆེ་བ་བསྟན་པ་སྟེ། དཀྱིལ་འཁོར་མཐོང་བ་ཙམ་གྱིས་ཀྱང་བསྐལ་བ་དུ་མར་བསགས་པའི་སྡིག་པ་འབྱང་བར་འགྱུར་ན། སངས་རྒྱས་དང་བྱང་ཆུབ་སེམས་དཔའི་སྔགས་ཡོན་ཏན་མཐའ་ཡས་པར་གྲགས་པ་ཇི་སྐད་དུ་གསུངས་པའི་ཆོ་ག་དང་ལྡན་བར་བསླབ་པ་གོམས་བར་བྱས་ན་བླ་ན་མེད་པའི་གནས་ཐོབ་པ་ལྟ་སྨོས་ཅི་དགོས་ཞེས་པའོ། །དེ་དག་ལོག་བར་འགྲོ་ཆད་པ། །སྡུག་བསྔལ་ཀུན་ཀྱང་འབྱང་བ་སྟེ། །གང་གིས་སྤྱད་པའི་མཆོག་འདི་ལ། །ཤིན་ཏུ་བརྟན་ཡིན་འདུག་པའོ། །ཞེས་པ་ནི་སྔགས་སྤྱད་པའི་ཚུལ་ལ་ཉན་ཅིང་སེམས་པའི་སྒོ་ནས་དང་པ་མཐུ་ཆེ་བར་བསྟན་པ་སྟེ། སྔགས་སྤྱད་པའི་ཚུལ་དམ་པ་འདི་ལ་ཉན་བ་དང་བསམ་པས་དེ་ཉིད་ཡིན་གྱི་གཞན་མ་ཡིན་ནོ་སྙམ་ནས་བློ་གཞན་དུ་མི་འགྱུར་བར་མོས་ན་སྡུག་བསྔལ་ཅན་གྱི་དན་སོང་དུ་མི་སྐྱེ་བར་འགྱུར་རོ་ཞེས་པའོ། །སྔགས་སྤྱད་པ་དང་སྤྱད་པའི་ཚུལ། །ཞེས་པ་ལ་སོགས་པའི་ཚིག་
རྣམས་ནི་སྔར་ལན་མི་ཉུང་བར་བཤད་ཟིན་པས་ན་འདིར་མ་སྨོས་སོ། །ཚིགས་སུ་བཅད་པ་འདི་རྣམས་ཀྱང་ཕྱག་ན་རྡོ་རྗེ་ཉིད་ཀྱིས་དོན་དེ་ལྟ་བུར་ཆུད་པས་སེམས་དང་བའི་ཤུགས་ཀྱིས་སྨྲས་པའི་ཞར་ལ་མ་འོངས་པའི་སེམས་ཅན་རྣམས་སྔགས་སྤྱོད་པ་ལ་སྤྲོ་བ་བསྐྱེད་པའི་ཕྱིར་སྨྲས་སོ། །དེའི་ཚེ་འཁོར་དེ་དག་ཐམས་ཅད་དང༌། རྡོ་རྗེ་འཛིན་པ་དེ་དག་མགྲིན་གཅིག་ཏུ་མཐུན་པར་ཚིག་འདི་སྐད་ཅེས་གསོལ་ཏོ་ཞེས་པ་ནས། བྱང་ཆུབ་སེམས་དབའ་གཞན་རྣམས་ཀྱང༌། །སྔགས་རྒྱུད་རྗེས་བཞིན་དང་བའོ། །ཞེས་པའི་བར་དུའོ། །ཕྱག་ན་རྡོ་རྗེས་བཅོམ་ལྡན་འདས་ལ་ཚིག་སུ་བཅད་པ་འདི་སྐད་གསོལ་བ་དང༌། ཀུན་དུ་བཟང་པོ་བྱང་ཆུབ་སེམས་དཔའ་ལ་སོགས་པ་འཁོར་དེ་རྣམས་དང་རྡོ་རྗེ་འཛིན་པ་དེ་རྣམས་ཀྱིས་ཕྱག་ན་རྡོ་རྗེའི་དགོངས་པ་འདི་ལྟར་རིག་སྟེ། དཀྱིལ་འཁོར་བཤད་པའི་སྐབས་སུ་བབ་པ་ལ། དཀྱིལ་འཁོར་གྱི་སྲད་བུ་བྲེ་བ་དང༌། ལྷ་རྣམས་སོ་སོར་དགོད་པ་ལ་སོགས་པ་ནི་བཤད་ཟིན་གྱི་ཚོན་བྱིན་གྱིས་བརླབ་པའི་ཏིང་ངེ་འཛིན་དང༌། ས་ཚོན་སོ་སོ་ལ་སངས་རྒྱས་ཀྱི་སྐུ་བསམ་ཞིང་བྱིན་གྱིས་བརླབ་པ་དང༌། ཚོན་གང་ཡིན་པ་དང༌། ཇི་ལྟར་ཚོན་ཞེས་བྱ་བ་དང༌། ཚོན་འགྱེད་པའི་ཐབས་དང༌། ཚོན་གང་སྔོན་དུ་གཏང་བ་དང༌། རྟ་བབས་དང་སྒོ་ཁྱུད་ཀྱི་ཚད་ལ་སོགས་བ་མ་བཤད་བས་དེ་དག་དྲི་བའི་ཕྱིར་ཕྱག་ན་རྡོ་རྗེས་ཚིགས་སུ་བཅད་པ་འདི་དག་སྨྲའོ་སྙམ་པར་རིག་ནས་ཚིག་འདི་སྐད་སྨྲས་པ་སྟེ། ཕྱག་ན་རྡོ་རྗེས་དེའི་ཚེ་འཁོར་དེ་དག་ཐམས་ཅད་དང༌། རྡོ་རྗེ་འཛིན་པ་དེ་དག་མགྲིན་གཅིག་ཏུ་མཐུན་པར་འདི་སྐད་ཅེས་གསོལ་ཏོ་ཞེས་པ་ནི། ཕ་རོལ་ཏུ་ཕྱིན་པ་སྤྱོད་པ་ལས་བྱུང་བའི་བྱང་ཆུབ་སེམས་དཔའ་ཀུན་དུ་བཟང་པོ་དང༌། འཇམ་དཔལ་ལ་སོགས་པ་དང༌། སྔགས་ཀྱི་སྤྱོད་པ་ལས་བྱུང་བའི་བྱང་ཆུབ་སེམས་དཔའ་རྡོ་རྗེ་འཛིན་པ་དེ་རྣམས་དགོངས་པ་མཐུན་པས་ཚིག་དང་དོན་མཐུན་པར་སྨྲས་པའོ། །དགེའོ་དགེའོ་ཞེས་པ་ནི་ཕྱག་ན་རྡོ་རྗེ་དོན་དེ་ལྟ་བུར་སེམས་ཤིང་བཅོམ་ལྡན་འདས་ལ་འདྲི་བ་ཕྱག་ན་རྡོ་རྗེ་དེ་ཉིད་དགེའོ་ཞེས་པའོ། །དགེའོ་ཞེས་པ་གཉིས་པ་ནི་དྲི་བར་བྱ་བའི་དོན་བཟང་བས་དགེའོ་ཞེས་བའོ། །དགེའོ་དགེའོ་དཔའ་ཆེན་པ། །སྔགས་སྤྱད་དབང་དུ་གྱུར་པ་སྟེ། །ཞེས་པ་ནི་ཕྱག་ན་རྡོ་རྗེའི་ཡོན་
ཏན་བརྗོད་པའོ། །ཁྱོད་ཀྱིས་ཀུན་དྲིས་མཉམ་མེད་ལ། །བདག་གི་ཡིད་ལ་བསམས་པའོ། །ཞེས་པ་ནི་དྲི་བར་བྱ་བའི་དངོས་པོ་སྟེ། དགེའོ་དགེའོ་ཞེས་པ་དང་སྤྱར་རོ། །ཕྱག་ན་རྡོ་རྗེའི་ཡིད་ལ་བསམས་པ་དེ་ཚིག་ཏུ་མ་སྨྲས་ན་བྱང་ཆུབ་སེམས་དཔའ་དེ་དག་གིས་ཇི་ལྟར་རིག་ཅེ་ན། ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་མཐུ་ཆེན་པོ་ཤ་སྟག་པས། ཕ་རོལ་གྱི་སེམས་རིག་པ་དང་འདྲ་བར་ཕྱག་ན་རྡོ་རྗེས་ཅི་བསམས་པ་རྣམས་ཤེས་སོ། །གཉིས་སུ་ན་དེ་ལྟ་བུར་དྲི་བའི་སྐབས་ཡིན་པས་ཕྱག་ན་རྡོ་རྗེས་ཚིགས་སུ་བཅད་པ་གཞན་གླེངས་ཀྱང་བྲི་བར་བྱ་བའི་དངོས་པོ་འདི་ཡིན་པར་ཤེས་སོ། །དེ་ལྟར་ཕྱག་ན་རྡོ་རྗེའི་དགོངས་པ་ཤེས་པས་ན། བདག་ཅན་ཀུན་གྱི་དབང་དུ་གྱུར། །ཞེས་པ་སྟེ་དབང་དུ་གྱུར་ཞེས་པའི་དོན་ནི་ཁྱོད་ཀྱིས་ཅི་བསམས་པ་དེ་ངེད་ཀྱིས་ཤེས་ཏེ། དེད་ཀྱང་དེ་བཞིན་དུ་སེམས་སོ་ཞེས་པའོ། །སྔགས་སྤྱད་འབྲས་བུ་གནས་ཞེས་པ་ནི་བྱང་ཆུབ་སེམས་དཔའ་དེ་ཉིད་བརྩམ་པར་བསྟན་ཏེ། ངེད་ཀྱང་ངན་དོན་མ་ཡིན་གྱི། སྔགས་སྤྱད་པའི་འབྲས་བུ་ཐོབ་བ་དག་གོ་ཞེས་པའོ། །བྱང་ཆུབ་སེམས་དཔའ་གཞན་རྣམས་ཀྱང༌། །སྔགས་རྒྱུད་རྗེས་བཞིན་དང་བའོ། །ཞེས་པ་ནི་བྱང་ཆུབ་སེམས་དཔའ་དེ་རྣམས་འབའ་ཞིག་མ་ཡིན་གྱི་ཕ་རོལ་ཏུ་ཕྱིན་པ་ལས་བྱུང་བའི་བྱང་ཆུབ་སེམས་དཔའ་གཞན་རྣམས་ཀྱིས་ཀྱང་དེ་བཞིན་དུ་མཁྱེན་ཏོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། སྔགས་རྣམས་མཚན་ཉིད་ཅི་འདྲ་བ་དང་ཏིང་ངེ་འཛིན་ཇི་ལྟར་རྟོགས་པ་ཡང་ཞེས་པའི་བར་དུ་གོང་དུ་ཞུ་བར་བསམས་པའི་དངོས་པོ་རྣམས་ཞུས་པ་སྟེ། ཚོན་བྱིན་གྱི་བརླབ་པ་ལ་སོགས་པ་འདིར་ཞུས་པ་དང༌། བཤད་པའི་ནང་དུ་མ་བྱུང་བ་རྣམས་གསང་བའི་དཀྱིལ་འཁོར་གྱི་སྐབས་སུ་བལྟ་བར་བྱའོ། །དེ་སྐད་ཅེས་གསོལ་བ་དང༌། བཅོམ་ལྡན་འདས་ཆོས་ཀུན་དབང་ཐུབ་པས་ཕྱག་ན་རྡོ་རྗེ་ལ་བཀའ་སྩལ་པ་ཞེས་པ་ནས། དེ་བས་རྣམ་པ་ཀུན་ལ་ཡང༌། །སྟོང་ཉིད་རྟག་ཏུ་དྲན་པར་བྱ། །ཞེས་པའི་བར་དུ་ཕྱག་ན་རྡོ་རྗེས་ཞུས་པ་རྣམས་ཀྱི་ལན་བཅོམ་ལྡན་འདས་ཀྱིས་བཀའ་སྩལ་པ་སྟེ། སེམས་ཅན་ཁམས་དག་མགུ་རྙེད་པ། །ཆོས་ཀྱི་
དབྱིངས་ནི་རོ་དེ་ཡིན། །དེ་ཕྱིར་སྔོན་གྱི་སངས་རྒྱས་གསུང༌། །དེ་བས་དེ་ཡི་ཚོན་ཞེས་བྱ། །ཞེས་པ་ནི་ཅིའི་ཕྱིར་ཚོན་ཞེས་བགྱི་ཞེས་ཞུས་པ་དང༌། འོག་གི་ལན་ཏེ། སེམས་ཅན་ཁམས་ནི་མགུ་རྙེད་པ། །ཞེས་པ་ནི་ཚོན་ཞེས་བྱ་བའི་ཚིག་གི་དོན་ཏེ། ཚོན་ཞེན་པར་བྱེད་པའི་རང་བཞིན་ཏེ་འདིར་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཁ་དོག་དང་ཆ་ལུགས་དང༌། དཀྱིལ་འཁོར་གྱི་རི་མོར་སྣང་བས་སེམས་ཅན་རྣམས་དད་པ་སྐྱེས་ཏེ་མགུ་ཞིང་ཞེན་པར་འགྱུར་བས་ན་ཚོན་ཞེས་བྱའོ། །ས་བཅུ་ཡོངས་སུ་རྫོགས་པའི་ཚེ་ཏིང་ངེ་འཛིན་འདི་རབ་ཏུ་ཐོབ་པར་འགྱུར་ཏེ། ཏིང་ངེ་འཛིན་འདི་རབ་ཏུ་ཐོབ་པ་གཞན་གྱིས་ཐོབ་པ་མ་ཡིན་གྱི། རང་གི་སེམས་ཡོངས་སུ་ཤེས་པ་ལས་ཐོབ་པ་དེ་བས་ན། གསུངས་པ་དེ་ནི་སེམས་ཀུན་ཞེས་པས་ནི། །རྙེད་ཀྱི་གཞན་ལས་མ་ཡིན་ནོ། །ཞེས་པའོ། །དེ་ལ་སེམས་ཡོངས་སུ་ཤེས་པ་ཡང་གསང་པའི་བདག་པོ་རང་གི་སེམས་ནི་སྔོན་པོ་ཡང་མ་ཡིན་ཞེས་པ་ནས་རྣམ་པ་ཐམས་ཅད་དུ་བཙལ་ཀྱང་རྙེད་པར་མི་འགྱུར་རོ་ཞེས་པའི་བར་དུ་བྱང་ཆུབ་ཀྱི་སེམས་བཤད་བའི་སྐབས་སུ་བཤད་ཟིན་ཏོ། །གཉིས་པོ་ཡོངས་སུ་སྤངས་པ་ནི། །སངས་རྒྱས་རྫོགས་རྣམས་དེ་ལ་དད། །སྟོང་པ་ཆེན་པོར་གསུངས་པ་ནི། །ཀུན་མཁྱེན་ཡེ་ཤེས་རྫོགས་བྱེད་པའོ་ནི་ཀུན་དུ་སངས་རྒྱས་པའི་ཏིང་ངེ་འཛིན་དེ་གཉིས་ཡོངས་སུ་སྤངས་ཞེས་པ་ནི། གཟུང་བ་དང་འཛིན་པ་སྤངས་པ་དང་སྟོང་པའི་རང་བཞིན་དུ་འདུ་ཤེས་གཉིས་སྤངས་པ་སྟེ། ས་བཅུ་གཅིག་པ་ཀུན་དུ་བཟང་པོའི་ས་ལ་གནས་པའི་ཚེ་ཆོས་ཐམས་ཅད་སྟོང་པའི་རང་བཞིན་ནོ་སྙམ་ནས་སྟོང་པར་འདུ་ཤེས་པ་དེ་སྤངས་ཏེ། སྟོང་པའི་རང་བཞིན་དུ་ཡང་ཡོད་པ་མ་ཡིན་ནོ་སྙམ་པའི་འདུ་ཤེས་ཙམ་ལ་གནས་པ་སྟེ། དེ་བས་ན་སྟོང་པར་འདུ་ཤེས་པ་ཡང་སྤངས་པས་སྟོང་པ་ཆེན་པོ་ཞེས་བྱའོ། །ཀུན་མཁྱེན་ཡེ་ཤེས་རྫོགས་བྱེད་པའི། །ཞེས་པ་ནི་ཀུན་དུ་སངས་རྒྱས་པའི་དེ་མ་ཐག་ཏུ་འདུ་ཤེས་ཙམ་བོ་ཡང་སྤངས་པའི་མཚན་ཉིད་ཐམས་ཅད་མཁྱེན་པའི་ཡེ་ཤེས་འཐོབ་བར་འགྱུར་ཏེ། ཀུན་དུ་སངས་རྒྱས་པ་དེ་ཐམས་ཅད་མཁྱེན་པའི་ཡེ་ཤེས་ལ་སྤྱོར་བ་བྱེད་པས་ན། ཀུན་མཁྱེན་ཡེ་ཤེས་རྫོགས་བྱེད་པ། །ཞེས་པའོ། །དེ་བས་ན་རྣམ་པ་
ཀུན་དུལ་ཡང་སྟོང་བ་ཉིད་ཀྱི་ཏིང་ངེ་འཛིན་རྟག་ཏུ་དྲན་པར་བྱའོ་ཞེས་པ་ནི་དེ་ལྟར་སྟོང་པ་ཉིད་ཀྱི་ཏིང་ངེ་འཛིན་དེས་ཐམས་ཅད་མཁྱེན་པ་རྫོགས་པར་བྱེད་པས་ན་ཡན་ལག་བཞིས་བྱིན་གྱིས་བརླབ་པ་དང༌། བདག་གི་ལྷར་སྦྱོར་བ་དང༌། དབང་ཆེན་དང་ཆུའི་དཀྱིལ་འཁོར་གྱི་ཏིང་ངེ་འཛིན་ལ་སོགས་པ་ཐམས་ཅད་ལ་འདི་ལྟ་བུའི་སྟོད་པ་ཉིད་རྟག་ཏུ་གོམས་པར་བྱའོ་ཞེས་པའོ། །ད་ནི་བྱང་ཆུབ་སེམས་དཔའ་དང༌། ཉན་ཐོས་དང་རང་སངས་རྒྱས་རྣམས་སོ་སོའི་ཏིང་ངེ་འཛིན་རྣམས་བསྟན་པའི་ཕྱིར། བཅོམ་ལྡན་འདས་ཏིང་ངེ་འཛིན་ལ་མཉམ་པར་ཞུགས་ཏེ། ཏིང་ངེ་འཛིན་དེ་ལས་བཞེངས་ནས་བྱང་ཆུབ་སེམས་དཔའ་ལ་སོགས་པའི་ཏིང་ངེ་འཛིན་དེ་རྣམས་བསྟན་པའི་སྐབས་བཤད་དེ། དེ་ལ་བཅོམ་ལྡན་འདས་རྣམ་པར་སྣང་མཛད་སངས་རྒྱས་ཐམས་ཅད་དང་མོལ་ནས་ཞེས་པ་ནས། སེམས་ཅན་རྣམས་ལ་སྙིང་བརྩེའི་ཕྱིར། །ངས་ནི་ཐམས་ཅད་བཤད་པ་ཡིན་ཞེས་པའི་བར་དུ་བྱང་ཆུབ་སེམས་དཔའི་ཏིང་ངེ་འཛིན་ཀུན་དུ་སངས་རྒྱས་པའི་མཚན་ཉིད་དབའ་བོ་ཆེན་བོའི་ཏིང་ངེ་འཛིན་ལ་གནས་ནས་བདུད་བཞི་བཅོམ་པའི་རང་བཞིན་འཆད་དེ། སངས་རྒྱས་ཐམས་ཅད་དང་མོལ་ནས་ཞེས་པ་ནི་སངས་རྒྱས་ཐམས་ཅད་དགོངས་པ་མཐུན་པས་བྱ་བ་གཅིག་ཏུ་བསྟན་པ་སྟེ། བསོད་ནམས་དང་ཡེ་ཤེས་ཀྱི་ཚོགས་དང་ཆོས་ཀྱི་སྐུ་དང༌། སེམས་ཅན་གྱི་དོན་བྱེད་པར་མཉམ་པ་ཉིད་ཀྱི་ཕྱིར་རོ། །སངས་རྒྱས་ཐམས་ཅད་དང་རྒྱུད་གཅིག་པ་སྟོབས་མགྱོགས་པའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་ཏིང་ངེ་འཛིན་དེའི་མིང་སྟེ། སངས་རྒྱས་ཐམས་ཅད་དང་རྒྱུད་གཅིག་ཏུ་ཞེས་པ་ནི་སེམས་ཅན་གྱི་དོན་དུ་སྤྱོད་པ་སྣ་ཚོགས་འབྱུང་ཡང༌། སངས་རྒྱས་ཐམས་ཅད་རྒྱུད་གཅིག་པ་ལས་བྱུང་བ་ནི་ཆོས་ཀྱི་རོ་གཅིག་པ་ལས་བྱུང་སྟེ། དཔེར་ན་མེ་མར་མང་པོ་ཡང་འོད་འདྲེས་པར་གྱུར་ན་གཅིག་སྟེ་དབྱེར་མེད་པ་དང་འདྲའོ། །སྟོབས་ཞེས་པ་ནི་ཐོགས་བ་མེད་པའི་མཐུའོ། །མགྱོགས་ཞེས་པ་ནི་མཐུ་དེ་སེམས་ཅན་གྱི་དོན་ལ་མྱུར་པའོ། །སྙིང་པོར་བྱང་ཆུབ་འདུག་ནས་སུ། །བདུད་བཞི་ཡང་ནི་ཤིན་ཏུ་བཅོམ། །ཞེས་པ་ནས། སེམས་ཅན་རྣམས་ལ་སྙིང་པ་རྩེའི་ཕྱིར། །དས་ནི་ཐམས་ཅད་བཤད་པ་ཡིན། །ཞེས་པའི་བར་ཀུན་དུ་
སངས་རྒྱས་པའི་ཏིང་ངེ་འཛིན་གོང་དུ་བཤད་པ་དེ་ཉིད་དཔའ་བོ་ཆེན་པོའི་ཏིང་ངེ་འཛིན་ལ་གནས་ནས་སྟོང་པ་ཉིད་ཀྱི་ཏིང་ངེ་འཛིན་དེས་བདུད་བཞི་བཅོམ་པ་བསྟན་པ་སྟེ། དེ་ལ། བདུད་བཞི་ཡང་ནི་ཤིན་ཏུ་བཅོམ། །ཞེས་པ་ནི་ཕུང་བོའི་བདུད་དང༌། ཉོན་མོངས་པའི་བདུད་དང༌། འཆི་བདག་གི་བདུད་དང༌། ལྷའི་བུའི་བདུད་རྣམས་བཅོམ་པ་སྟེ། དེ་ཡང་ཀུན་རྫོབ་དང་དོན་དམ་པ་གཉིས་སུ་རིག་པར་བྱའོ། །དེ་ལ་ཀུན་རྫོབ་ཏུ་བདུད་བཞི་བཅོམ་པ་ནི་བྱང་ཆུབ་ཆེན་པོར་ལྷའི་བུའི་བདུད་དང་ཉོན་མོངས་པའི་བདུད་གཉིས་བཅོམ། ཕུང་པོའི་བདུད་དང་འཆི་བའི་བདུད་གཉིས་དེའི་ཞར་ལ་བཅོམ་པ་སྟེ། ཐེག་པ་ཆུང་དུའི་ལུགས་ལ་གྲགས་པའོ། །སྐབས་འདིར་ཆོས་ཐམས་ཅད་མ་བྱུང་མ་སྐྱེས་པར་ཆུད་ནས། བདུད་རྣམ་པ་བཞི་ཆར་ཡང་དམིགས་སུ་མེད་པའི་ཚུལ་གྱིས་བཅོམ་སྟེ། མ་སྐྱེས་པ་ལས་སངས་རྒྱས་ཞེས་པ་ལ་སོགས་པའི་ཚིགས་སུ་བཅད་པ་དང་སྦྱར་རོ། །དེ་ནས་དཔའ་བོ་ཆེན་པོ་ཞེས་པ་ནས། དཔའ་བོ་ཆེན་པོ་ཞེས་ཀྱང་བྱ། །ཞེས་པའི་བར་དུ་དེ་ལྟར་བདུད་རྣམ་པ་བཞི་བཅོམ་ནས་ཚངས་པ་ལ་སོགས་པའི་འཇིག་རྟེན་པའི་ལྷ་རྣམས་བཅོམ་ལྡན་འདས་ལ་ཁྱོད་ནི་དཔའ་བོ་ཆེན་པོ་འཇིགས་པ་དང་བྲལ་བའོ་ཞེས་དགའ་བཞིན་དུ་ཚིག་ཏུ་འདོད་པས་ན། ང་ནི་དཔའ་བོ་ཆེན་པོ་ཡིན། །ཞེས་བཅོམ་ལྡན་འདས་ཀྱིས་གསུངས་པའོ། །མ་སྐྱེས་པ་ལས་ངས་སངས་རྒྱས། །ཞེས་པ་ནི་དེ་ལྟར་བདུད་རྣམ་བཞི་བཅོམ་པ་དེ་དམིགས་པ་དང་བཅས་པས་བཅོམ་པ་མ་ཡིན། ཆོས་ཐམས་ཅད་མ་སྐྱེས་མ་བྱུང་བར་ངས་ཆུད་ནས་དམིགས་སུ་མེད་པའི་ཚུལ་གྱིས་ཞེས་པ་དང་འབྲེལ་ཏོ། །ཆོས་ཀྱི་དབྱིངས་ཀྱི་རོལ་ཕྱིར་ཡིད། །ཅེས་པ་ནི་ཚོན་འདི་རྣམས་ལ་ཆོས་ཀྱི་དབྱིངས་དང་ལྡན་པའི་སངས་རྒྱས་ཀྱི་སྐུའི་རང་བཞིན་ཡི་གེ་རྣམས་ཀྱིས་བྱིན་གྱིས་བརླབས་པས། ཚོན་འདིས་ཆོས་ཀྱི་དབྱིངས་མཚོན་པར་འགྱུར་ཏེ། རོ་གཅིག་པ་ནི་ཆོས་ཀྱི་དབྱིངས་ཀྱི་རོ་ཞེས་བྱའོ། །དེ་ལྟར་ཡི་གེ་རྣམས་ཀྱིས་བྱིན་གྱིས་རློབ་པ་ཡང༌། ཡི་གེ་འཁོར་ལོའི་དཀྱིལ་འཁོར་སྐབས་སུ་བལྟ་བར་བྱའོ། །ཚོན་ནི་ནང་ལོགས་འདུག་ནས་བྲི། །ཕྱི་རོལ་འདུག་ནས་ཚོན་མི་བྲི། །ཞེས་བ་ནི་ཇི་ལྟ་བུར་ན་ཚོན་ཞེས་ཞུས་པའི་ལན་ཏེ།
སྔགས་པ་དཀྱིལ་འཁོར་གྱི་ནང་དུ་ཞུགས་ནས་ནང་དུ་བསྣུར་ཞིང་ཚོན་རྣམས་བྲི་ཞེ་པའོ། །དཀར་པོ་ནི་ཐོག་མར་གཏང༌། དེ་ཡི་འོག་ཏུ་དམར་པོ་སྟེ། །དེ་ནས་སུ་ནི་སེར་པོ་གཏང༌། །དེ་ཡི་འོག་ཏུ་སྔོན་པོ་གཏང༌། །ཀུན་གྱི་ནང་རོལ་ནག་པོ་སྟེ། །ཚོན་འགྱེད་ཚུལ་སྨྲས་དེ་བཞིན་ནོ། །ཞེས་པ་ནི། དེ་ལ་གང་གི་ཐོག་མར་གཏང༌། །ཞེས་ཞུས་པ་དང༌། ཅིའི་ཕྱིར་དེ་ལ་ཚོན་ཞེས་བྱ། །ཞེས་པ་དང༌། དང་པོར་དྲིས་པའི་ལན་གཉིས་ཀ་ཅིག་ཅར་བཀའ་སྩལ་པ་སྟེ། ཚོན་རྣམས་དེ་ལྟར་དགྱེ་པའི་དགོངས་པ་ཡང་འདི་ལྟ་སྟེ། དཀར་པོ་ནི་ཆོས་ཀྱི་དབྱིངས་ཀྱི་རང་བཞིན་ནོ། །དེ་ལྟར་ཆོས་ཀྱི་དབྱིངས་སུ་གྱུར་པའི་འོག་ཏུ་ཐབས་ཀྱི་སྒོ་ནས་སེམས་ཅན་གྱི་དོན་བྱེད་པའི་སྙིང་རྗེས་སེམས་ཅན་ལ་ཞེན་པའི་རང་བཞིན་དམར་པོ་གཏང་ངོ༌། །དེའི་འོག་ཏུ་སེམས་ཅན་གྱི་དོན་དེ་ཉིད་རྒྱས་པར་འགྱུར་ཏེ་རྒྱས་པའི་མཚན་ཉིད་ཚོན་སེར་པོ་གཏང་ངོ༌། །དེ་ལྟར་རྒྱས་པའི་འོག་ཏུ་ཐམས་ཅད་བྱེད་ནུས་པར་འགྱུར་ཏེ། དེ་བས་ན་དེའི་འོག་ཏུ་ཚོན་ལྗང་གུ་ཁ་དོག་ཐམས་ཅད་པ་གཏང་ངོ༌། །དེ་ལྟར་ལས་ཐམས་ཅད་ནུས་ན་གདུ་ག་པ་དང་མ་རུངས་པ་རྣམས་འདུལ་བ་མངོན་པར་སྤྱོད་པའི་མཚན་ཉིད་ཁ་དོག་ནག་པོ་གཏང་སྟེ། ཐམས་ཅད་ནི་ནང་རོལ་དུ་གཏང་བ་ནི་གསང་བའི་ཕྱིར་རོ། །གཞན་ཡང་དེ་བཞིན་གཤེགས་པའི་སྐུར་བྱིན་གྱིས་བརླབ་པ་ལ་སོགས་པའི་རིམ་པའི་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་བལྟ་བར་བྱའོ། །རྟ་བབས་ཚད་ནི་ཞེས་པ་ནས། །དཔའ་བས་རིམ་གྱིས་ཆེ་བར་རོ། །ཞེས་པའི་བར་དུ་ནི། རྟ་བབས་རྣམས་ཀྱི་ཚད་དང་ནི། །སྒོ་ཁྱུད་རྣམས་ཀྱང་དེ་བཞིན་ཏེ། །སྒོ་རྣམས་ཀྱང་ནི་རིག་པར་བྱ། །མགོན་པོས་དེ་དག་འདྲ་བ་ཡི། །ཚད་གསུངས་ཞེས་ཞུས་པའི་ལན་ཏེ། །རྟ་བབས་ཀྱི་ནི་ཚད་ཀྱང་ནི། །དཀྱིལ་འཁོར་དབུས་མའི་ཚད་དུ་བྱ། །ཞེས་པ་ནི་རྟ་བབས་ཀྱི་ཞེང་གི་ཚད་སྙིང་པོའི་དཀྱིལ་འཁོར་གྱི་ངོས་དང་མཉམ་པར་བྱ་ཞེས་པའོ། །སྒོ་ཁྱུད་པདྨོར་མཉམ་པ་སོར་བཅུ་དྲུག་ཏུ་བཅས་པ་ཞེས་པ་ནི་སྒོ་ཁྱུད་ཀྱང་རྟ་བབས་ཀྱི་ཚད་བྱེད་དེ་དེ་དང་མཉམ་པར་བྱའོ། །ཐོག་མར་སྒོ་རྣམས་རིག་པར་བྱ་བ་དཀྱིལ་འཁོར་མཉམ་པར་ཏེ། དེ་ལས་སྐྱེད་པར་རིག་པར་བྱའོ། །དཔའ་བས་ཆེ་བར་རོ་ཞེས་པ་ནི་
ནང་གི་དཀྱིལ་འཁོར་གྱི་སྒོ་སྙིང་པོ་པདྨོ་སོར་བཅུ་དྲུག་པ་དང་མཉམ་པར་བྱ། དེའི་ཕྱི་མ་དེ་ལ་སོར་བཞིས་སྐྱེད། དེའི་ཕྱི་རིམ་ཡང་སོར་བཞིས་སྐྱེད་དེ། དེ་ལྟར་རིམ་གྱིས་རིམ་གྱིས་ཆེ་བར་བྱ་ཞེས་པའོ། །སྒོ་རྣམས་ཀྱི་ནི་བར་བར་དུ། །སྒོ་སྲུང་རྣམས་ནི་གཞག་པར་བྱ། །ཞེས་པས་དཀྱིལ་འཁོར་གྱི་སྒོའི་ཕ་རོལ་ཚུ་རོལ་གྱི་ངོས་སུ་འོག་ནས་སྨོས་པའི་སྒོ་སྲུང་རྣམས་གཞག་སྟེ། ཤཱཀྱ་ཐུབ་པའི་སྒོ་སྲུང་ནི་སྔར་ཚང་བར་གསུངས་ཟིན་པས་འོག་ནས་འབྱུང་བ་མི་སྙག་གོ །བཅོམ་ལྡན་འདས་རྣམ་པར་སྣང་མཛད་ཀྱི་སྒོ་སྲུང་ཡང༌། ཐུབ་དཀའ་བ་དང་མངོན་དུ་བ། །ཞེས་པ་གཉིས་ཚང་བར་གསུངས་པས་འོག་ནས་འབྱུང་བའི་རྣམ་པ་ལས་མིང་གིས་སྨོས་མེད་པ་འདི་ཉིད་གཞག་པར་བྱའོ། །སེམས་མགུ་བ་ནི་ཏིང་ངེ་འཛིན་ཏེ། མདོར་བཤད་པ་ནི་དེ་ཡིན་ནོ་ཞེས་པ་ནི་ཏིང་ངེ་འཛིན་ཇི་ལྟར་རྟོགས་པ་ཡང་ཞེས་ཞུས་པའི་ལན་ཏེ། དེ་ལ་ཏིང་ངེ་འཛིན་ཞེས་བྱ་བ་ནི་སེམས་རྩེ་གཅིག་པའི་མཚན་ཉིད་དེ། དེ་ཡང་ཀུན་རྫོབ་དང་དོན་དམ་པ་ལ་རྩེ་གཅིག་པ་ནི། ཆུ་དང་དབང་ཆེན་གྱི་དཀྱིལ་འཁོར་ལ་སོགས་པ་ལ་སེམས་རྩེ་གཅིག་པར་དམིགས་པའོ། །དོན་དམ་པ་ནི་གཟུང་བ་དང་འཛིན་པ་སྤངས་པ་སྟོང་པའི་རང་བཞིན་ལ་སེམས་རྩེ་གཅིག་པ་སྟེ། གཉིས་གང་ཡང་རུང་བ་ལ་ཏིང་ངེ་འཛིན་རྩེ་གཅིག་ཏུ་གྱུར་པ་སེམས་གུད་དུ་མི་འགྱུར་བར་ཞེན་ཅིང་ཚིམ་པར་བྱེད་པ་ནི། སེམས་མགུ་བ་ཞེས་བྱ་སྟེ། དེ་ནི་ཏིང་ངེ་འཛིན་སྤྱིའི་མཚན་ཉིད་དོ། །ཁྱད་པར་དུ་ནི་སེམས་དཔའ་ཆེ། །ཉོན་ཅིག་པ་ཡི་ཡིད་ཀྱིས་ཏེ། །ཞེས་པ་ནི། དེ་བས་རྣམ་པ་ཀུན་ལ་ཡང༌། །སྟོང་ཉིད་རྟག་པར་དྲན་པར་བྱའོ། །ཞེས་པའི་བར་དུ་ནི་དོན་དམ་པ་ཏིང་ངེ་འཛིན་གྱི་ཁྱད་པར་དུ་བཤད་པ་སྟེ། དེ་ཡང་སངས་རྒྱས་ཀྱི་ཏིང་ངེ་འཛིན་དང༌། ཀུན་དུ་སངས་རྒྱས་པའི་ཏིང་ངེ་འཛིན་ཏོ། །དེ་ལས་སངས་རྒྱས་ཀྱི་ཏིང་ངེ་འཛིན་ནི་སངས་རྒྱས་ཀུན་གྱི་སྟོང་པ་ཉིད་ཀྱི་ཏིང་ངེ་འཛིན་ཞེས་རྒྱལ་བས་གསུངས་ཞེས་བ་སྟེ། དེ་ལ་སྟོང་པ་ཉིད་ཅེས་པ་ནི། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་ཐོག་མ་ནས་མ་སྐྱེས་མ་བྱུང་བའི་ཚུལ་བཤིག་གམ་རྡུལ་ཕྲ་མོལ་སོགས་པའི་ཚུལ་བཤིག་ན་ཡོད་པ་མ་ཡིན་ཏེ། དེ་རྣམས་
ཀྱི་ཇི་བཞིན་པར་སྣང་བ་ཡང་ཡོད་པ་མ་ཡིན་ཏེ། དེ་ལྟར་གཟུང་བ་དང་འཛིན་པའི་མཚན་ཉིད་མེད་པར་ཆུད་པ་ནི་སྟོང་པ་ཉིད་དེ། དེ་ལྟར་ཆོས་རྣམས་སོ་སོའི་མཚན་ཉིད་སྟོང་པ་ཉིད་ཀྱི་རང་བཞིན་དུ་ཆུད་དེ། སྟོང་བའི་རང་བཞིན་དེ་ལས་སེམས་གཞན་དུ་མི་འགྱུར་ཞིང་དེ་ཉིད་ལ་རྩེ་གཅིག་པར་གྱུར་པ་ནི་ས་བཅུ་རྫོགས་པའི་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་དེ་ཐོབ་སྟེ། དེའི་ཚེ་སངས་རྒྱས་ཞེས་བྱའོ། །དེ་ལྟར་གཟུང་བ་དང་འཛིན་པའི་ཆ་ཡོངས་སུ་སྦངས་པའི་སྟོང་པ་ཉིད་ས་རབ་ཏུ་དགའ་པ་དེ་དག་གི་ཚེ་ན་མ་ཐོབ་པ་མ་ཡིན་མོད་ཀྱི། ས་རབ་ཏུ་དགའ་བ་ནས་ས་བརྒྱད་པའི་བར་དུ་ལོག་པའི་གཉེན་པོ་ཡོངས་སུ་མ་སྤངས་པས་ལྷུན་གྱིས་གྲུབ་པ་ཉིད་དུ་མི་འཇུག་པའི་ཕྱིར་དེ་དག་ལ་མི་བྱ། ས་བརྒྱད་པ་ཡན་ཆད་ལོག་པའི་གཉེན་པོ་རྣམས་སྤངས་ཏེ་ལྷུན་གྱིས་གྲུབ་པར་འཇུག་པས་ན། ས་བརྒྱད་ས་དགུ་ས་བཅུ་ལ་སྤྱོར་རོ། །ཆོམ་ས་ཞེས་པ་སྟེ། མ་སྐྱེས་པ་ལ་སངས་སངས་རྒྱས། །ཞེས་པ་ནི་དངོས་སུ་ན་ཆོས་ཐམས་ཅད་ཐོག་མནས་མ་སྐྱེས་པར་ཆུད་པས་ཕུང་པོ་ཡང་དམིགས་སུ་མེད་པའི་ཕྱིར་ཕུང་པོའི་བདུད་བཅོམ་པའོ། །དག་གི་སྤྱོད་ཡུལ་དང་བྲལ་ཞེས་པ་ནི་རྣམ་པར་རྟོག་པ་དང་བྲལ་ཞེས་པ་སྟེ། རྟོག་པའི་སྤྱོད་ཡུལ་ལས་འདས་པས་དངོས་སུ་ལྷའི་བུའི་བདུད་བཅོམ་པའོ། །ཉེས་པ་ཀུན་ནས་རྣམ་པར་གྲོལ། །ཞེས་པ་ནི་ཉོན་མོངས་པ་ལས་རྣམ་པར་གྲོལ་བས་དངོས་ས་ན་ཉོན་མོངས་པའི་བདུད་བཅོམ་པའོ། །རྒྱུ་དང་རྐྱེན་དུ་བྲལ་བ་སྟེ། །ཞེས་པ་ནི་རྒྱུ་རྐྱེན་མེད་པས་ན་མ་སྐྱེས་པས་འཆི་བ་མེད་དེ། དངོས་སུ་མ་འཆི་བའི་བདུད་བཅོམ་པའོ། །ཡེ་ཤེས་ནམ་མཁའ་སྟོང་པ་འདྲ། །ཞེས་པ་ནི་དེ་ལྟར་རྣམ་པ་བཞི་ཆར་ལས་གྲོལ་བས་ན་ཇི་བཞིན་པ་མེད་པའི་ཡེ་ཤེས་རང་བཞིན་གྱིས་འོད་དངས་པ་སྟོང་པའི་མཚན་ཉིད་ནམ་མཁའ་དང་འདྲ་བར་མ་སྐྱེས་ཞེས་པའོ། །ཇི་ལྟར་འབྱུང་བ་ང་ཡིས་བྱུང༌། །ཞེས་པ་ནི་སྟོང་པ་ཉིད་ཀྱི་ཡེ་ཤེས་དེ་ལྟ་བུར་ཕྱིན་ཅི་མ་ལོག་པ་ཉིད་དུ་ངས་ཐོབ་ཅེས་པའོ། །ཤིན་ཏུ་དྲི་མ་མེད་པ་ཞེས་པ་ནི་ཡེ་ཤེས་དེ་ཤེས་བྱ་དང་ཉོན་མོངས་པའི་སྒྲིབ་པ་ཡོངས་སུ་སྤངས་པ་ཞེས་པའོ། །དེ་ཁོ་ན་ཞེས་པ་ནི་ཕྱིན་ཅི་མ་ལོག་པ་ཡོངས་སུ་རྫོགས་པའི་མཚན་ཉིད་པས་རིགས་པ་དང་གཞུང་གིས་སུན་དབྱུང་དུ་མི་ནུས་པས་ན་སྟོད་
པ་ཉིད་ཀྱི་ཡེ་ཤེས་དེ་ཁོ་ན་ཞེས་བྱའོ། །མིང་ནི་སངས་རྒྱས་མཚན་ཉིད་ཅེས་པ་ནི་ཀུན་དུ་སངས་རྒྱས་པ་ཞེས་བྱ་བ་དེ་སྟོང་པའི་རང་བཞིན་དུ་འདུ་ཤེས་པ་ཡང་སྤངས་ནས་སྟོང་པ་ཉིད་ཀྱི་རང་བཞིན་དུ་ཡང་ཡོད་པ་ཡིན་པར་ཤེས་པའི་འདུ་ཤེས་དེ་ཙམ་ལ་གནས་པ་ཞེས་པའོ། །དེ་བསད་ནི་ཡང་དག་ཉིད། །བྱིན་གྱི་རླབས་ཀྱི་མཐུ་ཡིས་ནི། །ཡི་གེ་འབྲུ་རུ་སྨྲས་པ་ནི། །འཇིག་རྟེན་དུ་ནི་སྣང་བྱེད་པ། །སེམས་ཅན་རྣམས་ལ་སྙིང་བརྩེའི་ཕྱིར། །ངས་ནི་ཐམས་ཅད་བཤད་པ་ཡིན། །ཞེས་པ་ནི་དེ་ལྟར་ངས་ཐམས་ཅད་ཐོག་མ་ནས་མ་སྐྱེས་མ་བྱུང་བར་ཆུད་ཀྱང༌། སེམས་ཅན་རྣམས་ལ་སྙིང་བརྩེ་བའི་ཕྱིར་ཡང་དག་པ་ཉིད་ཀྱིས་ཆོས་དེའི་ཚིག་ཏུ་བརྗོད་པའི་ཕྱིར་ཡི་གེའི་འབྲུ་རྣམས་སུ་བྱིན་གྱིས་བརླབས་ཏེ། ཡི་གེའི་འབྲུ་རྣམས་ཀྱང་དཔའ་བོ་ཆེན་པོའི་ཏིང་ངེ་འཛིན་གྱི་སྐབས་སུ་བལྟ་བར་བྱའོ། །འདི་རྣམས་ཀྱི་རིམ་པ་ཡང་བསྡུས་པའི་དོན་གྱི་ནང་དུ་བཤད་པས་ཤིན་ཏུ་མ་བཤད་པའོ། །དེ་ནས་རྡོ་རྗེ་འཛིན་པ་ཆེན་པོ་ངོ་མཚར་དུ་གྱུར་ནས་མིག་གདངས་ཏེ་སྤྱོ་བོས་ཕྱག་འཚལ་ནས་ཚིག་འདི་སྐད་གསོལ་ཏོ་ཞེས་པ་ནས། གོང་དུ་སངས་རྒྱས་དང་ཀུན་དུ་སངས་རྒྱས་པའི་ཏིང་ངེ་འཛིན་སྟོང་པ་ཉིད་འཕྲོ་བ་མེད་པའི་ཆོས་སངས་རྒྱས་རྣམས་ཀྱིས་ཆུད་ལ་འཕྲོ་བ་དང་བཅས་པའི་ཆོས་རྣམས་ཡིག་འབྲུ་ལ་སོགས་པའི་སྒོ་ནས་བསྟོད་ཅིང་བཤད་པ་དེ་ངོ་མཚར་ཆེ་བར་གྱུད་པ་སྟེ། དེ་བས་ན་གསུངས་པ། སངས་རྒྱས་ཀུན་ཀྱང་ངོ་མཚར་ཆེ། །ཞེས་པ་ནས། སྔགས་ཀྱི་མཚན་ཉིད་འདི་ཡང་ནི། །བདེན་པ་གཉིས་ལ་གནས་པ་སྟེ། །ཞེས་པའི་བར་དུ་སྟེ། དེ་ལ། སངས་རྒྱས་ཀུན་ཀྱང་ངོ་མཚར་ཆེ། །ཞེས་པ་ནི་སངས་རྒྱས་དང་ཀུན་སངས་རྒྱས་ཡང་དག་པར་རྫོགས་པའི་སངས་རྒྱས་ཀུན་ཀྱང་འཕྲོ་བ་མེད་པའི་ཆོས་ཆུད་ནས་འཕྲོ་བ་དང་བཅས་པ་ཆོས་འཆད་པས་ན་ངོ་མཚར་ཆེ་ཞེས་པའོ། །ཐབས་དང་ཤེས་རབ་བསམ་མི་ཁྱབ། །ཅེས་པ་ནི་ཤེས་རབ་ནི་ཆོས་ཐམས་ཅད་སྟོང་པ་ཉིད་དུ་ཆུད་པའོ། །ཐབས་ནི་སྟོང་པ་ཉིད་ཀྱི་ཆོས་ཏེ་ཡི་གེའི་འབྲུ་ལ་སོགས་པ་བསྟན་ནས། རབ་དང་འབྲིང་དང་ཐ་མ་ལ་སོགས་པ་འགྲུབ་པ་དང༌། ཞི་བ་ལ་སོགས་པའི་ལས་རྣམས་བྱེད་པའི་སྒོ་ནས་སེམས་ཅན་རྣམས་འཇུད་པར་བྱེད་པ་དེ་ནི་ཐབས་དང་ཤེས་རབ་བསམ་གྱིས་མི་ཁྱབ་པའོ། །འོད་འཕྲོ་ཀུན་དང་
བྲལ་བ་ནི། ཆོས་དང་སངས་རྒྱས་རང་བྱུང་བའོ། །དེ་ལྟར་སངས་རྒྱས་རྣམས་ཀྱིས་འཕྲོ་བ་མེད་པའི་ཆོས་ཆུད་ནས་ཞེས་པ་སྟེ་སངས་རྒྱས་ཞེས་པ་ནི་ཆུད་པའི་དོན་ཏེ། དེ་ལྟར་འཕྲོ་བ་མེད་བའི་དོན་ཆུད་ནས་འཇིག་རྟེན་པ་ཀུན་རེ་བ་ཡོངས་སུ་རྫོགས་པར་བྱ་བའི་ཕྱིར་ཆོས་དེ་འཆད་པ་ནི་ངོ་མཚར་ཆེའོ་ཞེས་པ་དང་སྦྱར་རོ། །རང་བྱུང་བ་ཞེས་པ་ནི་ས་བརྒྱད་པ་ཡན་ཆད་ཀྱི་བྱང་ཆུབ་སེམས་དཔའ་རྣམས་གཞན་གྱིས་མི་བཀྲི་བའི་ཕྱིར་རང་བྱུང་བ་ཞེས་བྱའོ། །སྔགས་ཀྱི་མཚན་ཉིད་འདི་ཡང་སྔགས་ཀྱི་ཚུལ་ལ་གནས་ཞེས་པ་ནི་དེ་ལྟར་འཕྲོ་བ་མེད་པའི་ཆོས་ཆུད་ནས་འཕྲོ་བ་དང་བཅས་པའི་ཆོས་འཆད་བས་ན། སྔགས་ཀྱི་མཚན་ཉིད་འདི་ཡང་ཀུན་རྫོབ་དང་དོན་དམ་པའི་བདེན་པ་གཉིས་ཀ་ལ་གནས་པ་སྟེ། དོན་དམ་པའི་བདེན་པ་ནི་སྟོང་པ་ཉིད་ཀྱི་རང་བཞིན་ནོ། །ཀུན་རྫོབ་ཀྱི་བདེན་པ་ནི་གྲུབ་པ་མཆོག་ལ་སོགས་པ་དང༌། ཞི་བ་ལ་སོགས་པའི་ལས་རྣམས་བྱེད་བའོ། །སེམས་ཅན་ཀུན་གྱིས་ཤེས་ན་ཡང༌། །འཇིག་རྟེན་གྱི་ཡང་མཆོད་རྟེན་འགྱུར། །ཞེས་པ་ནི་སྔགས་ཀྱི་ཚུལ་དེ་ལྟ་བུས་གྲུབ་པ་ལ་སོགས་པར་མ་གྱུར་ཀྱང༌། སེམས་ཅན་རྣམས་ཀྱིས་མཉན་པ་དང་བསམས་བ་ཙམ་གྱི་སྒོ་ནས་བ་ཙམ་གྱིས་ཀྱང་འཇིག་རྟེན་པ་རྣམས་ཀྱི་མཆོད་རྟེན་དུ་འགྱུར་རོ་ཞེས་པའོ། །གཞན་ཡང་གསང་བའི་བདག་པོ་སྐྱེ་བ་གཅིག་གིས་ཐོགས་པ་མེད་པའི་བྱང་ཆུབ་སེམས་དཔའ་ཞེས་པ་ནས། དགོས་པའི་ས་ལ་གནས་པ་ནི། །དེ་དག་སངས་རྒྱས་ས་ལ་གནས། །ཞེས་པའི་བར་དུ་ས་བཅུ་ཡོངས་སུ་རྫོགས་པའི་བྱང་ཆུབ་སེམས་དཔའ་སངས་རྒྱས་ཀྱི་སལ་གནས་པ་དེ་ཆོས་རྣམས་མ་བྱུང་མ་སྐྱེས་པ་སྟོང་པ་ཉིད་ཀྱི་རང་བཞིན་དུ་ཆུད་ནས། སེམས་ཅན་གྱི་དོན་དུ་ཐབས་ཀྱི་འཁོར་ལོས་བྱ་བ་ཡོད་པའི་ས་ལ་གནས་པའི་ཏིང་ངེ་འཛིན་བཤད་པ་སྟེ། སྐྱེ་བ་གཅིག་གིས་ཐོགས་པ་ཞེས་པ་ནི་ས་བཅུའི་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ས་ལ་ཆོས་ཀྱི་རྒྱལ་ཚབ་ཀྱི་སར་སྐྱེ་བ་གཅིག་པུས་ཐོགས་བ་ཞེས་པའོ། །གཉིས་སུ་མས་བཅུའི་བྱང་བྱང་ཆུབ་སེམས་དཔའ་རྣམས་ས་བཅུ་ཉིད་དུ་རིས་མཐུན་པར་གྱུར་པས་བཅུ་པ་རྣམས་རིགས་གཅིག་པ་ཞེས་པའོ། །དེ་དག་དོན་དང་བྲལ་བ་ནི། །འཇིག་རྟེན་གྱི་ནི་མཚན་ཤེས་ནས། །དོན་གྱི་ས་ལ་གནས་པ་ནི། །དེ་དག་སངས་རྒྱས་
ལ་གནས་སོ། །ཞེས་པ་ནི་འཇིག་རྟེན་རྣམས་གང་གི་འབྲས་བུ་ཡང་མ་ཡིན་ཏེ། རྒྱུ་གང་ལས་ཀྱང་མ་བྱུང་བས་ཐོག་མ་ནས་མ་སྐྱེས་པར་ཆུད་ཀྱང་བྱ་བའི་ས་ལ་གནས་ཏེ། སེམས་ཅན་རྣམས་ཀྱི་དོན་དུ་སྦྱར་བ་དང༌། སངས་རྒྱས་ཀྱི་ཞིང་རྣམ་པ་སྣ་ཚོགས་ཀྱིས་བརྒྱན་བ་ལ་སོགས་པ་མཛད་པས་ན། སངས་རྒྱས་ཀྱི་ས་ལ་གནས་པའི་བྱང་ཆུབ་སེམས་དཔའ་དེ་རྣམས་བྱ་བའི་ས་ལ་གནས་པ་སྟེ། དེ་ནི་བྱང་ཆུབ་སེམས་དཔའ་ས་བཅུ་པ་སངས་རྒྱས་ཀྱི་ས་ལ་གནས་པ་རྣམས་ཀྱི་ཏིང་ངེ་འཛིན་གྱི་ཚུལ་ལོ། །གཞན་ཡང་གསང་བའི་བདག་པོ་ས་བརྒྱད་པ་ལ་གནས་པའི་བྱང་ཆུབ་སེམས་དཔའ་ཞེས་པ་ནས། འཇིག་རྟེན་སྒྱུ་མ་ལྟར་ཤེས་ཏེ། །འཇིག་རྟེན་རྣམས་ཀྱི་དབང་པོའོ། །ཞེས་པའི་བར་དུས་བརྒྱད་པའི་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་བཤད་པ་སྟེ། དེ་ལ། ཆོས་རྣམས་ཀུན་ནི་མ་རྙེད་དེ། །ཞེས་པའི་ཆོས་ཐམས་ཅད་རང་བཞིན་གྱིས་ཤིན་ཏུ་དངོས་པོ་མེད་དོ། །དམིགས་སུ་མེད་པར་ཆུད་ཅེས་པ་ནི་ཚེས་རྣམས་དངོས་པོ་མེད་པར་དེ་སྔོན་ཡོད་པ་ལས་ཞིག་སྟེ་མེད་པར་འགྱུར་ཏེ། དངོས་པོ་མེད་པའམ་འོན་ཏེ་ཐོག་མ་ནས་མ་བྱུང་མ་སེམས་སྐྱེས་པས་དངོས་པོ་མེད་ཅེ་ན། དེ་བས་ན་གསུངས་པ། བྱུང་དང་སྐྱེ་བ་ཡོངས་སུ་བྲལ། །ཞེས་པ་སྟེ་ཐོག་མ་ནས་མ་སྐྱེས་པས་སླར་འབྱུང་བ་ཡང་མི་འགྱུར་ཏེ། ཐོག་མ་ནས་མ་བྱུང་མ་སྐྱེས་པས་དངོས་པོ་མེད་པར་ཤེས་སོ། །འཇིག་རྟེན་སྒྱུ་མ་ལྟར་ཤེས་ཏེ། །ཞེས་པ་ནི་དེ་ལྟ་བུའི་ཆོས་རྣམས་དངོས་པོ་མེད་པར་ཆུད་པས། འཇིག་རྟེན་གྱི་ཆོས་རྣམས་ཀུན་རྫོབ་ཏུ་སྣང་བར་འགྱུར་པ་ཡང་དངོས་པོ་མེད་པ་ལས་སྣང་བ་སྟེ་ཇི་ལྟར་སྒྱུ་མ་དངོས་པོ་མེད་པ་ལས་སྣང་བ་ལྟར་ཤེས་སོ་ཞེས་པའོ། །འཇིག་རྟེན་རྣམས་ཀྱི་དབང་པོ་ཞེས་པ་ནི། དེ་ལྟར་ཆོས་ཐམས་ཅད་སྒྱུ་མ་ལྟ་བུར་ཤེས་པས་བྱང་ཆུབ་སེམས་དཔའ་དེ་འཇིག་རྟེན་པའི་ནང་ན་གཙོ་བོ་དམ་པར་འགྱུར་བའོ་ཞེས་པའོ། །གཞན་ཡང་གསང་བའི་བདག་པོ་ཉན་ཐོས་པ་རྣམས་ཞེས་པས་དངོས་པོ་ཤིན་ཏུ་མེད་པའི་ཡེ་ཤེས་མི་སྤྱོད་དེ། ཉན་ཐོས་ཀྱི་ཏིང་ངེ་འཛིན་གྱི་ཚུལ་ལོ་ཞེས་པའི་བར་དུ་འཕགས་པ་ཉན་ཐོས་པ་རྣམས་ཀྱི་ཏིང་ངེ་འཛིན་བཤད་པ་སྟེ། འཕགས་པ་ཉན་ཐོས་པ་རྣམས་ནི་ཕུང་པོ་ལ་སོགས་པའི་ཆོས་རྣམས་རྒྱུ་དང་འབྲས་བུའི་ངོ་བོ་
ཉིད་སྐྱེ་བ་དང་འཇིག་པར་ལྟ་སྟེ་དམིགས་པ་དང་བཅས་པ་རྣམས་སོ། །དེ་ལྟར་སྐྱེ་བ་དང་འཇིག་པ་ཡོད་པས་རྟག་པ་དང་ཆད་པའི་མཐའ་གཉིས་བཤིག་པ་དང༌། སྐྱེ་བ་ཡོད་པར་མཐོང་བས་ཆད་པའི་མཐའ་བཤིག་སྟེ། འཇིག་པ་ཡོད་པར་མཐོང་བས་རྟག་པའི་མཐའ་བཤིག་གོ །དེ་ལྟར་སྐྱེ་བ་དང་འཇིག་པ་ཡོད་པར་མཐོང་བས་ཆོས་རྣམས་ཤིན་ཏུ་དངོས་པོ་མེད་པར་མཐོང་བའི་ཡེ་ཤེས་མི་སྐྱེ་སྟེ། ཤིན་ཏུ་དངོས་པོ་མེད་ཅིང་ཡེ་ཤེས་སྐྱེ་བའི་རྒྱུ་མ་རྙེད་པའི་ཕྱིར་རོ། །གསང་བའི་བདག་པོ་རང་སངས་རྒྱས་རྣམས་ནི་ཞེས་པ་ནས། དེ་ནི་རང་སངས་རྒྱས་རྣམས་ཀྱི་ཏིང་ངེ་འཛིན་གྱི་ཚུལ་ལོ་ཞེས་ཁྱད་པར་འཕགས་པ་རང་སངས་རྒྱས་རྣམས་ཀྱི་ཏིང་ངེ་འཛིན་གྱི་ཚུལ་བཤད་པ་སྟེ། རྒྱུ་དང་འབྲས་བུ་རྣམ་བསྒོམས་ནས། །ཞེས་པ་ནི་རྒྱུ་དང་འབྲས་བུ་སུན་འབྱིན་པའི་ཚུལ་དུ་རྣམ་པར་བཤིག་ཅེས་པ་སྟེ། ཆོས་རྣམས་ཀྱི་རྒྱུ་དང་རྐྱེན་རྣམས་ཀྱི་ངོ་བོ་སྐད་ཅིག་མའི་ཆ་མི་རྟག་པ་གནས་པ་ནི་ཁབ་ཀྱི་རྩེ་ལ་ཡུངས་ཀར་གྱི་འབྲས་བུ་མི་ཆགས་པ་དང་འདྲ་སྟེ། བརྟག་མི་བཟོད་པས་རྒྱུ་དང་འབྲས་བུ་དངོས་པོ་མེད་པར་ཆུད་དོ། །བརྗོད་དུ་མེད་པའི་ཆོས་ཀྱི་ཚུལ་ལ་གནས་པའི་ཡེ་ཤེས་འབྱུང་ངོ་ཞེས་པ་ནི་དེ་ལྟར་ཆོས་རྣམས་ཡོད་པ་མ་ཡིན་པའི་ཚིག་གིས་བརྗོད་དུ་མེད་པར་མཐོང་བའི་ཡེ་ཤེས་སྐྱེས་ནས། ཚིག་ཏུ་བརྗོད་པ་ཡང་འགོག་པར་བྱེད་དེ། དེ་བས་ན་གསུངས་པ་ཆོས་ཐམས་ཅད་བརྗོད་དུ་མེད་པའོ་ཞེས་ཤིན་ཏུ་ངག་དགག་པའི་ཏིང་ངེ་འཛིན་ལ་འདུག་ཅེས་པའོ། །མདོར་ན་འཕགས་པ་རང་སངས་རྒྱས་རྣམས་རྒྱུ་དང་འབྲས་བུའི་དངོས་པོ་བཤིག་ནས། རང་བཞིན་མེད་པར་མཐོང་བས་ཆོས་ལ་བདག་མེད་པར་ཆུད་ཀྱང་ངག་དགག་པ་ཙམ་ལ་གནས་པས་བྱང་ཆུབ་སེམས་དཔའ་ལྟར་ཇི་བཞིན་པ་མེད་པའི་ཡེ་ཤེས་ཀྱི་སྣང་བ་ལ་མི་དམིགས་སོ། །ཉན་ཐོས་ལྟར་ཆུད་པ་གང་ཟག་ལ་བདག་མེད་པ་ལྟར་ཆུད་པ་ཙམ་ཡང་མ་ཡིན་ནོ། །གཞན་ཡང་གསང་བའི་བདག་པོ་འཇིག་རྟེན་པ་རྣམས་ནི་རྒྱུ་ལས་འབྲས་བུ་དང་ལས་བྱུང་བ་ཡང་རུང༌། འཇིག་རྟེན་ཀྱང་རུང་དབང་གཞན་ལ་ལས་པའི་ཕྱིར། སྟོང་པའི་ཏིང་ངེ་འཛིན་སྐྱེས་ཏེ་དེ་ནི་འཇིག་རྟེན་གྱི་ཏིང་
ངེ་འཛིན་གྱི་ཚུལ་ལོ་ཞེས་པ་ནི་འཇིག་རྟེན་པ་རྣམས་ཀྱི་ཏིང་ངེ་འཛིན་གྱི་ཚུལ་ཏེ། འཇིག་རྟེན་པ་རྣམས་ནི་ལས་དང་འབྲས་བུ་ལ་སོགས་པ་རྒྱུ་ལས་སྐྱེས་ཀྱང༌། ངེད་ཀྱི་བདག་ཅེས་བྱ་བ་དབང་པོ་དང་ཚངས་པ་ལ་སོགས་པས་བསྐྱེད་པར་ཆུད། ཆོས་ཐམས་ཅད་དངོས་པོ་མེད་དེ་སྟོང་པ་ཉིད་དུ་མཐོང་པ་དེ་ཡང་རང་བཞིན་གྱིས་སྟོང་པ་མ་ཡིན་གྱི། དབང་པོ་ལ་སོགས་པས་སྟོང་པར་བྱས་སོ་སྙམ་ནས་སྟོང་པ་ཉིད་ཀྱི་ཏིང་ངེ་འཛིན་ལ་གནས་པར་བྱེད་དོ། །གསང་བའི་བདག་པོ་ཏིང་ངེ་འཛིན་གྱི་ཚུལ་ནི་དེ་ལྟ་བུའོ་ཞེས་པ་ནས། འཇིག་རྟེན་གྱི་ལྷ་ཡང་རུང་སྟེ་སུ་སྔགས་སྤྱོད་པ་དང༌། གང་ལ་གནས་ཏེ་ཚུལ་གྱི་ཆོ་ག་འཆང་ན་སེམས་ཅན་རྣམས་ལ་ཕན་པར་བྱེད་པ་ཞེས་པའི་བར་དུ་གོང་དུ་བཤད་པ་རྣམས་ཀྱི་སྡུད་པའི་ཚིག་སྟེ། དེ་དག་སོ་སོའི་ཏིང་ངེ་འཛིན་སྟོང་པ་ཉིད་ཀྱི་ཚུལ་དུ་ཆུད་ནས་སྟོང་པ་དེ་ལ་གནས་ཏེ། སྟོང་པའི་ཆོས་དེ་ཉིད་ཚིག་དང་ཡིག་འབྲུལ་ལ་སོགས་པས་སྟོན་ཅིང་འཆད་པ་ནི། སེམས་ཅན་རྣམས་ཀྱི་དོན་གྱི་ཕྱིར། །ཞེས་པའོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ། །སྔགས་རྣམས་ཀྱི་སྔགས་ཀྱི་མཚན་ཉིད་ཉོན་ཅིག་ཅེས་པ་ནས། རང་སངས་རྒྱས་ཀྱང་དེ་བཞིན་ཏེ། །དེ་ཡི་ཁྱད་པར་བཤད་པ་ནི། །ཏིང་འཛིན་བྱེ་བྲག་རིག་བྱ་བ། །རྣམ་པར་ལས་དང་ཚེ་སྦྱོང་བའོ། །ཞེས་པའི་བར་དུ་དེ་བཞིན་གཤེགས་པ་དང་ཀུན་དུ་སངས་རྒྱས་པ་དང་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་རྣམས་ཀྱི་སོ་སོའི་སྔགས་ཀྱི་མཚན་ཉིད་བཤད་པ་སྟེ། སྔགས་ཀྱི་མཚན་ཉིད་དེ་ཡང་རྣམ་པ་གསུམ་དུ་རིག་པར་བྱ་སྟེ། སྔགས་ཀྱི་ལྷ་དང༌། སྔགས་ཀྱི་དོན་དང༌། སྔགས་ཀྱི་རང་བཞིན་ནོ། །དེ་ལ་སྔགས་ཀྱི་ལྷ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་བཤད་ཟིན་ཏེ། དེ་ཡང་དེ་བཞིན་གཤེགས་པ་དང༌། ཀུན་དུ་སངས་རྒྱས་པ་དང་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ལ་སོགས་པ་རྣམས་ཉིད་སྙིང་རྗེ་ཆེན་པོའི་དཀྱིལ་འཁོར་དུ་རིགས་གསུམ་བཀོད་པ་རྣམས་ནི་དེ་བཞིན་གཤེགས་པའི་དཀྱིལ་འཁོར་བར་མ་ན་ཤཱཀྱ་ཐུབ་པ་འཁོར་དང་བཅས་ཏེ་བཞུགས་པ་ནི་ཀུན་དུ་སངས་རྒྱས་སོ། །དཀྱིལ་
འཁོར་ཐ་མ་ན་འཕགས་པ་འཇམ་དཔལ་ལ་སོགས་པ་ས་བཅུ་ཡོངས་སུ་རྫོགས་པའི་བྱང་ཆུབ་སེམས་དཔའ་གཙོ་བོ་བཞུགས་པ་རྣམས་ནི་སངས་རྒྱས་རྣམས་སོ། །དེ་ལས་གཞན་པའི་བྱང་ཆུབ་སེམས་དཔའ་ཕྱག་ན་རིན་ཆེན་ལ་སོགས་པ་ནི། བྱང་ཆུབ་སེམས་དཔའ་ཉན་ཐོས་དང་རང་སངས་རྒྱས་ནི་དངོས་སུ་མ་སྨོས་ཀྱང༌། སྤྲུལ་པའི་སྐུས་འདུལ་བའི་ནང་དུ་བདོག་པས་ན་དཀྱིལ་འཁོར་བར་མའི་ནང་དུ་འདུས་པར་རིག་པར་བྱའོ། །འཇིག་རྟེན་པ་རྣམས་ཀྱང་དཀྱིལ་འཁོར་བར་མ་དེ་ཉིད་ཀྱི་ནང་ན་དངོས་པོས་འཁོར་བའོ། །སྔགས་ཀྱི་དོན་ནི་ཀུན་དུ་སངས་རྒྱས་བ་ནས་འཇིག་རྟེན་པའི་ལྷ་རྣམས་ཀྱི་བར་གྱི་ཏིང་ངེ་འཛིན་གྱི་གོང་དུ་བཤད་པ་སྟེ། དེ་ཡང་ཀུན་རྫོབ་དང་དོན་དམ་གཉིས་སུ་ཤེས་པར་བྱ་སྟེ། དོན་དམ་ནི་རྣམ་པར་གྲོལ་བའི་སྟོང་པའི་རང་བཞིན་ནོ། །ཀུན་རྫོབ་ནི་དོན་གྱི་ས་ལ་གནས་ཞེས་པ་ལ་སོགས་པ་སེམས་ཅན་གྱི་དོན་དུ་ཆོས་འཆད་པ་དང༌། བཅོམ་ལྡན་འདས་ཀྱི་ཡོན་ཏན་སྟོབས་དང་མི་འཇིགས་པ་ལ་སོགས་པའི་ཡོན་ཏན་གྱི་ཆོས་རྣམས་སོ། །སྔགས་ཀྱི་རང་བཞིན་ཡང་རྣམ་པ་མེད་པ་བཞིན་ཤེས་པར་བྱ་སྟེ། ཚིག་དང་འབྲུ་དང་དབྱངས་དང་ཡུལ་གྱི་སྐད་རྣམས་སོ། །དེ་ལ་ཚིག་ནི་ཡི་གེའི་འབྲུ་མང་པོ་འབྱུང༌། འདུས་པ་ལས་ཚིག་ཏུ་ལངས་པར་སྨྲའོ། །འབྲུ་ནི་ཡི་གེ་ཀ་ལ་སོགས་པ་སྔགས་ཀྱི་ཡི་གེ་འབྲུ་རེ་བའོ། །དབྱངས་ནི་ཡི་གེ་ཨ་དང་ཨི་ལ་སོགས་པ་གུག་སྐྱེད་ཀྱི་རིས་སུ་གཏོགས་པའོ། །ཡུལ་སྐད་ནི་སོ་སོའི་ཡུལ་ན་སྐད་གང་གིས་སྤྱོད་སྤྱད་པ་དེ་ཉིད་དང་མཐུན་པར་གསུངས་པའོ། །སྔགས་རྣམས་ཀྱི་སྔགས་ཀྱི་མཚན་ཉིད་ཉོན་ཅིག་པ་ནི། སྔར་སྔགས་རྣམས་ཀྱི་མཚན་ཉིད་བཤད་དུ་གསོལ་ཞེས་བཅོམ་ལྡན་འདས་ལ་གསོལ་པ་དེ་དང༌། ངས་བཤད་ཀྱིས་ཉོན་ཅིག་པ་སྟེ། སྔགས་རྣམས་ཀྱི་མཚན་ཉིད་ཅེས་མི་སྨོས་པར་སྔགས་རྣམས་ཀྱི་སྔགས་ཀྱི་མཚན་ཉིད་ཅེས་སྨོས་པ་ནི་སྔགས་རྣམས་ཀྱི་མཚན་ཉིད་སྔགས་ཀྱི་ལྷ་དང་སྔགས་ཀྱི་དོན་གོང་དུ་བཤད་པས་ན། ད་འདིར་སྔགས་རྣམས་ཀྱི་སྔགས་ཀྱི་མཚན་ཉིད་གསང་བར་སྨྲ་བའི་རང་བཞིན་གྱི་ཚིག་རྣམས་ཉོན་ཅིག་ཅེས་པའོ། །ཀུན་དུ་སངས་རྒྱས་པའི་སྔགས་རྣམས་ནི་ཆིག་ལས་ཀྱང་མིང་དང་མཚན་མར་རྟོགས་ཤེས་པ་ནི་ཛིན་ཛིཀ་ཅེས་པ་ལ་སོགས་པའི་ཚིག་སྨོས་པས་
འདི་ནི་སངས་རྒྱས་ཀྱི་མིང་གི་མཚན་མ་སྟེ། སངས་རྒྱས་ཀྱི་སྔགས་ཤེས་པར་བྱེད་པའོ། །ཚིག་དེ་རྣམས་ནི་དབང་གི་ཡིན་པས། །སྔགས་ཀྱི་དོན་ཀུན་སྒྲུབ་པའོ། །ཞེས་པ་ནི་ཀུན་དུ་སངས་རྒྱས་པའི་སྔགས་ཀྱི་ཚིག་སྨོས་པ་ཡང་དབང་ཆེན་གྱི་ཏིང་ངེ་འཛིན་གྱི་མཚན་མ་སྟེ། རྒྱས་བའི་དོན་ཐམས་ཅད་འགྲུབ་པར་འགྱུར་བའོ་ཞེས་པའོ། །ཁ་ཅིག་སྐུལ་བའི་ཚིག་དང་ནི། །རང་མིང་ཐོག་མར་བཅས་པའོ། །ཞེས་པ་ནི་སྔགས་ཀྱི་ཚིག་ལས་སྔགས་ཀྱི་ལྷའི་མཐུ་དང་ཡོན་ཏན་རྣམས་སྨོས་པ་དང༌། ཞི་བར་གྱུར་ཅིག་ཅེས་པ་ལ་སོགས་པའི་ལས་རྣམས་སྐུལ་བ་སྨོས་པ་དང༌། ཛིན་ཛིཀ་ཅེས་པ་ལ་སོགས་པ་ལྷའི་མཚན་སྨོས་པས་ལྷ་གང་གི་སྔགས་ཡིན་པ་རིག་པར་འགྱུར་བའོ། །ཧཱུཾ་ཕཊ་ཅེས་པ་ལ་སོགས་པ་དང་ལྡན་པའི་ཚིག་རྣམས་ནི་གོང་དུ་གཙུག་ཏོར་བརྒྱད་སྨོས་པ་ལ་སོགས་པའི་སྔགས་སུ་ཤེས་པར་བྱ་སྟེ། གཙུག་ཏོར་གྱི་སྔགས་རྣམས་གཞུང་གཞན་ལས་ཧཱུཾ་དང་ཕཊ་མེད་པ་ཡང་འབྱུང༌། གཙུག་ཏོར་གྱི་མ་ཡིན་པའི་ལྷ་རྣམས་ཀྱི་སྔགས་ཧཱུཾ་དང་ཕཊ་དུ་བཅས་པ་ཡང་འབྱུང་བས་ན། ཧཱུཾ་དང་ཕཊ་དུ་བཅས་པའི་གཙུག་ཏོར་གྱི་སྔགས་འདི་རྣམས་ནི་རྒྱུད་འདི་ཉིད་དུ་སྨོས་པར་ཤེས་པར་བྱའོ། །ཟུང་ཆོམས་ཞེས་པ་རྣམས་དང༌། སྣུན་ཅིག་སོད་ཅིག་ཁོས་ཤིག་པ་དང་ཁྲོ་བོ་དང་ནི་ཅི་བགྱི་ཞེས་པ་ནི་ཚིག་དེ་ལྟ་བུ་དྲག་ཤུལ་ཅན་དང་ལྡན་པ་ནི། སྔགས་ནི་ཁྲོ་བོ་རྣམས་དང་ཅི་བགྱི་ཞེས་བ་རྣམས་ཀྱི་སྔགས་སུ་ཤེས་པར་བྱའོ། །ན་མཿསྭཱ་ཧཱ་ལ་སོགས་པ་དང་ལྡན་ཞེས་པ་ནས། མགོན་པོ་བྱང་ཆུབ་སེམས་དཔའོ། །ཞེས་པའི་བར་དུ་ནི་ས་བཅུ་ལ་གནས་པའི་བྱང་ཆུབ་སེམས་དཔའ་སངས་རྒྱས་ཞེས་བྱ་བ་དང༌། དེ་ལས་གཞན་པའི་བྱང་ཆུབ་སེམས་དཔའ་རྣམས་ཀྱི་སྔགས་ཏེ། མགོན་ཕྱག་འཚལ་བ་དང་ལྡན་ཞིང་ཚིག་མཇུག་སྭཱ་ཧཱ་དང་བཅས་པ་དང༌། བྱང་ཆུབ་སེམས་དཔའ་སོ་སོའི་ཏིང་ངེ་འཛིན་གྱི་རང་བཞིན་གྱི་ཚིག་རྣམས་སྨོས་པ་དང༌། ཟུང་ཞིག་ཆོམས་ཤིག་པ་ལ་སོགས་པའི་ཚིག་དྲག་ཤུལ་ཅན་རྣམས་མེད་པ་ཞི་བའི་ཚིག་རྣམ་པར་དག་པའི་མཚན་ཉིད་ཀྱི་ཚིག་དང་ལྡན་པའི་སྔགས་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཡིན་པར་ཤེས་པར་བྱའོ། །ཉན་ཐོས་རྣམས་ཀྱི་སྔགས་ནི་ཚིག་རེ་རེ་ལ་འཇུག་པ་སྟེ་ཞེས་པ་ནི། འཕགས་པ་ཉན་ཐོས་རྣམས་ཀྱི་
སྔགས་རྣམས་ནི་སྤྱི་བོ་དང་གཙུག་ཕུད་ལ་སོགས་པ་ཡན་ལག་གི་སྔགས་རྣམས་མེད་པས་ན་གཅིག་པུའོ། །བྱང་ཆུབ་སེམས་དཔའ་ལྟར་གཟུགས་སྣ་ཚོགས་སུ་མི་འགྱུར་གྱི། དགེ་སློང་གི་ཚུལ་གཅིག་པུ་འཛིན་པའམ། གང་ཟག་ལ་བདག་མེད་པ་གཅིག་པུ་ཆུད་པ་ནི་གཅིག་པུ་འདུག་པ་ཞེས་པའོ། །རང་སངས་རྒྱས་དང་དེ་བཞིན་ཏེ། དེའི་ཁྱད་པར་བཤད་པ་ནི་ཏིང་ངེ་འཛིན་བྱེ་བྲག་རིག་པར་བྱ་བ་རྣམ་པར་སྦྱོར་བར་བྱའོ་ཞེས་པ་ནི་རང་སངས་རྒྱས་ཀྱི་སྔགས་རྣམས་ཀྱང་མཚན་ཉིད་གཞན་ནི་ཉན་ཐོས་ཀྱི་དང་མཐུན་ཏེ། ཁྱད་པར་དུ་ནི་རྒྱུ་དང་འབྲས་བུ་བཤིག་ནས་ཆོས་རྣམས་སྟོང་པར་ཆུད་པའི་ཏིང་ངེ་འཛིན་དང་ལྡན་པར་ཤེས་པར་བྱའོ། །དེ་ལ་འདིར་ཀུན་དུ་སངས་རྒྱས་པ་ལ་སོགས་པའི་མཚན་ཉིད་བཤད་པ་ལ་དེ་བཞིན་གཤེགས་པའི་སྔགས་ཀྱི་མཚན་ཉིད་ཅིའི་ཕྱིར་དངོས་སུ་མ་སྨོས་ཤེ་ན། ཀུན་དུ་སངས་རྒྱས་པའི་སྔགས་དེ་ཉིད་དེ་བཞིན་གཤེགས་པའི་སྟེ། ཅིའི་ཕྱིར་ཞེན། ཀུན་དུ་སངས་རྒྱས་པ་ལ་སོགས་པ་དེ་རྣམས་ཕ་རོལ་ཏུ་ཕྱིན་པ་སྤྱོད་པ་ལས་བྱུང་བ་ཡིན་ན་ཡང༌། དེ་བཞིན་གཤེགས་པའི་རྒྱུ་ཡིན་པས་དེ་བཞིན་གཤེགས་པ་དང་ཐ་མི་དད། འོན་ཏེ་ཡེ་ཤེས་ཀྱི་སེམས་ཅན་ཡིན་ཡང༌། དེ་ཉིད་དེ་བཞིན་གཤེགས་པའི་འབྲས་བུ་ཡིན་པས་ཐ་མི་དད་པས་དེ་བཞིན་གཤེགས་པའི་སྔགས་སོ། །དོན་དམ་པར་བྱང་ཆུབ་སེམས་དཔའ་ཡང་དེ་བཞིན་གཤེགས་པའི་སྔགས་ཀྱི་ཡི་གེ་འབྲུ་རེ་རེ་པ་རྣམས་ཀྱི་ཏིང་ངེ་འཛིན་གྱི་སྒོ་སྟོང་པ་ཉིད་ཀྱི་རང་བཞིན་དུ་སྟོན་པར་གཅིག་པས་ན་ཐ་མི་དད་དོ། །ཡང་ན་དེ་བཞིན་གཤེགས་པའི་སྔགས་རྣམས་ནི་སྙིང་པོ་ཡི་གེ་ཨ་རྣམ་པ་བཞི་རྣམས་འོག་ནས་བཤད་པའོ། །འོན་ཀྱང་གསང་བའི་བདག་པོ་སྔགས་རྣམས་ཀྱི་མཚན་ཉིད་ནི་སངས་རྒྱས་ཐམས་ཅད་ཀྱིས་མ་བྱས། བྱེད་དུ་མ་བཅུག །རྗེས་སུ་སྨོས་པ་མ་ཡིན་ནོ་ཞེས་པ་ནས། སྔགས་ཀྱི་ཆོ་ག་ཀུན་རབ་ཏུ་འཆད་དོ་ཞེས་པའི་བར་དུ་སྔགས་རྣམས་ཀྱི་རང་བཞིན་བཤད་པ་སྟེ། ཚིག་ལས་མིང་དང་མཚན་མར་རྟོག་པའི་མཚན་ཉིད་ཀྱི་སྔགས་བསྐུལ་པ་ལ་སོགས་པ་དང་ལྡན་པའི་ཚིག་གིས་དོན་གང་བསྐུལ་བ་དེ་གྲུབ་པར་བྱེད་པའི་མཐུའི་རང་བཞིན་རྣམས་མཐུ་འདིས་དོན་འདི་འགྲུབ་པར་བྱའོ་ཞེས་དེ་བཞིན་གཤེགས་པས་སྔགས་ཀྱི་རང་བཞིན་ཏེ་བྱས་པ་ཡིན་ནམ།
དེ་བཞིན་དུ་གཞན་ལ་བྱེད་དུ་བཅུག་གམ། གཞན་བྱེད་པ་ལ་རྗེས་སུ་ཡི་རང་ན་ཡང་དེ་བཞིན་གཤེགས་པ་ཉིད་ཀྱི་མཚན་མ་དང་བྲལ་བས། བྱེད་དུ་བཅུག་པའམ་རྗེས་སུ་ཡི་རང་བ་མ་ཡིན་ཏེ། ཅིའི་ཕྱིར་ཞེ་ན། སྔགས་ཀྱི་རང་བཞིན་དེ་བཞིན་གཤེགས་པས་མཛད་པར་གྱུར་པ་ན་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་དོན་མཛད་པས་ན། བསྒྲུབ་པར་བརྩམ་པ་ཐམས་ཅད་ཀྱི་ངེས་པར་འགྱུར་ཏེ། དེ་ལྟར་སྒྲུབ་པ་ཐམས་ཅད་ཀྱིས་འགྲུབ་པ་མ་ཡིན་པས་དེ་བཞིན་གཤེགས་པས་མཛད་པ་མ་ཡིན་ནོ། །དེ་སྟེ། སྔགས་ཀྱི་མཐུའི་དོན་དང་མཐུ་གཉིས་རྟག་ཏུ་གཅིག་ལ་གཅིག་འབྲེལ་པ་ཡིན་ན། ཚིག་བརྗོད་པ་ཙམ་གྱིས་དོན་དེ་ཉིད་འགྱུར་ཏེ། དཔེར་ན་མེ་ཞེས་ཚིག་ཏུ་བརྗོད་ན་མེའི་རང་བཞིན་སྲེག་པར་བྱེད་པ་ཡིན་ཡང་ཚིག་ཏུ་བརྗོད་པས་ཁ་འཚིག་པར་མི་འགྱུར་བ་དང་འདྲའོ། །དེ་བས་ན་སྔགས་ཀྱི་མཐུ་དེ་ནི་དེ་བཞིན་གཤེགས་པས་མཛད་པ་ཡང་མ་ཡིན། གཞན་བྱེད་དུ་བཅུག་པའམ། གཞན་བྱེད་པ་ལ་རྗེས་སུ་ཡི་རང་བ་མ་ཡིན་ཞེས་པའོ། །དེ་ཅིའི་ཕྱིར་ཞེ་ན། ཆོས་རྣམས་ཀྱི་ཆོས་ཉིད་དེ་ལྟ་བུའོ། །དེ་འདི་ལྟ་སྟེ་ཡང་དག་པར་གཤེགས་པ་བྱུང་བ་ཡང་རུང༌། མ་བྱུང་བ་ཡང་རུང༌། མ་བྱུང་བ་ཡང་རུང༌། ཆོས་རྣམས་ཀྱི་ཆོས་ཉིད་དེ་ལྟ་བུ་ཡོངས་སུ་འཇུག་པ་ཡིན་ཏེ། འདི་ལྟ་སྟེ་སྔགས་རྣམས་ཀྱི་སྔགས་ཀྱི་མཚན་ཉིད་དུ་ཞེས་པ་ནི་ཚིག་ལས་དོན་མིང་དང་མཚན་མར་རྟོག་པའི་སྔགས་དེ་བསྐུལ་བ་ལ་སོགས་པའི་ཚིག་དང་དོན་དུ་ལྡན་ན་ཡང་བསྐུལ་པའི་དོན་དེ་ཉིད་སུས་ཀྱང་བྱས་པ་མ་ཡིན་ཏེ། རྒྱུ་གཞན་ལ་མི་ལྟོས་པར་ཆོས་དེ་ལྟར་ཡི་ནས་འདུག་པ་ནི། དཔེར་ན་བུ་རམ་གྱི་རོ་མངར་བ་དང་ལན་ཚྭའི་རོ་བྲོ་བའི་རང་བཞིན་ཏེ། རྒྱུ་གང་གིས་ཀྱང་འདུས་མ་བྱས་པར་མངར་བའི་རང་བཞིན་ཡེ་ནས་འདུག་པ་བཞིན་ནོ། །དེ་སྟེ་དེ་བཞིན་གཤེགས་པས་བྱས་པ་མ་ཡིན་ནམ། དེ་བཞིན་གཤེགས་པ་བྱུང་བ་ན་སྔགས་ཀྱི་རང་བཞིན་དེ་ཡང་ཡོད། མ་བྱུང་ན་ནི་མེད་པར་འགྱུར་ཏེ་དེ་ལྟ་མ་ཡིན་པས་ན་དེ་བཞིན་གཤེགས་པ་བྱུང་ཡང་རུང་མ་བྱུང་ཡང་རུང༌། ཆོས་རྣམས་ཀྱི་ཆོས་ཉིད་དེ་ལྟ་བུ་ནི་ཡོངས་ཀྱིས་འདུག་པ་མ་ཡིན་ཏེ། །དེ་འདི་ལྟ་སྟེ། སྔགས་རྣམས་ཀྱི་སྔགས་ཀྱི་ཆོས་ཉིད་ཀྱི་དོན་ཞེས་པའོ། །དེ་ལྟར་དེ་གསང་བའི་
བདག་པོ་ནམ་ང་ཡང་དག་པར་གཤེགས་པའི་སངས་རྒྱས་ཐམས་ཅད་མཁྱེན་པ་ཐམས་ཅད་གཟིགས་པ་འཇིག་དུ་འབྱུང་བ་ནི་ཞེས་པ་ནས། དབྱངས་རྣམས་དུ་མར་བྱིན་གྱིས་བརླབས་ནས་སྔགས་ཀྱི་ཚུལ་འཆད་དོ་ཞེས་པའི་བར་དུ་སྔགས་ཀྱི་ཆོས་ཉིད་ཡེ་ནས་དེ་ལྟར་འདུག་པ་ལ་ཚིག་དང་ཡིག་འབྲུ་དང་དབྱངས་རྣམས་སུ་ཇི་ལྟར་རིག་པར་རྣམ་པར་དགོད་པ་ཙམ། དེ་བཞིན་གཤེགས་པར་མཛད་པར་བསྟན་བ་སྟེ་ཡང་དག་པར་རྫོགས་པའི་སངས་རྒྱས་ཞེས་པ་ནི། མཉམ་པ་ཉིད་ཀྱི་ཡེ་ཤེས་ཀྱི་ཕྱིན་ཅི་ལོག་པ་ཉིད་དུ་མངོན་པར་བྱང་ཆུབ་པའོ། །ཐམས་ཅད་མཁྱེན་པ་ཞེས་པ་ནི་སོ་སོར་རྟོག་པའི་ཡེ་ཤེས་ཀྱིས་ཀུན་རྫོབ་དང་དོན་དམ་པའི་ཚུལ་དུ་ཐམས་ཅད་མཁྱེན་པའོ་ཐམས་ཅད་གཟིགས་པའོ་ཞེས་པ་ནི་མེ་ལོང་ལྟ་བུའི་ཡེ་ཤེས་དང༌། བྱ་བ་ནན་ཏན་གྱི་ཡེ་ཤེས་ཡུན་དུ་གཟིགས་པའོ། །དེ་ལྟ་བུའི་ཐམས་ཅད་མཁྱེན་པ་འཇིག་རྟེན་དུ་བྱུང་བ་ན་ཚུལ་རྣམ་པ་དུ་མ་དད་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་འཇིག་རྟེན་ལ་སོགས་པའི་ཚུལ་རྣམ་པ་མང་པོའོ། །རྗེས་སུ་མཐུན་པར་སྔགས་ཀྱི་ཆོས་ཉིད་ཡེ་ནས་འདུག་པ་དེ་ཡི་གེ་འབྲུ་རྣམས་སུ་སྟོན་པ་ནི་ཚིག་དང་འབྲུ་དང་དབྱངས་རྣམ་པ་སྣ་ཚོགས་སུ་བསྟན་པའོ། །གཉིས་སུ་དེ་བཞིན་གཤེགས་པའི་རིགས་དང༌། པདྨོའི་རིགས་དང༌། རྡོ་རྗེའི་རིགས་ལ་སོགས་པའི་ཚུལ་སྣ་ཚོགས་དང་ཞེས་པའི་སྔགས་ཀྱི་ཚིག་དེ་རྣམས་ཀྱང་ལ་ལ་ནི་སྒྲ་ཇི་བཞིན་པར་འཆད། ལ་ལ་ནི་ལྡེམ་པོ་ངག་ཏུ་སྟོན་ཞེས་པའོ། །བསམ་པ་རྣམ་པ་དུ་མའི་སེམས་ཅན་ལ་ལ་ཞེས་པ་ནི། སེམས་ཅན་ལ་ལ་ཞི་བ་འདོད། ལ་ལ་སངས་རྒྱས་པར་འདོད། ལ་ལ་གྲུབ་པར་འདོད། ལ་ལ་འབྲིང་འདོད་པ་ལ་སོགས་པའི་སེམས་ཅན་རྣམས་ཇི་ལྟར་འདོད་པ་དང་རྗེས་སུ་མཐུན་པར་སྔགས་ཀྱི་ཆོས་ཉིད་དེ། ཛིན་ཛིཀ་ཅེས་པ་ལ་སོགས་ཚིག་རྣམ་པ་དུ་མ་དང༌། ཀ་ལ་སོགས་པའི་འབྲུ་རྣམ་པ་དུ་མ་དང༌། དྲི་མ་མེད་པ་ལ་སོགས་པའི་སྐད་དུ་སྨྲ་བ་རྣམ་པ་དུ་མའི་མཚན་མར་བཀོད་དེ་སྟོན་ཞེས་པའོ། །དབྱངས་རྣམ་པ་དུ་མར་བྱིན་གྱིས་བརླབས་ནས་ཞེས་པ་ནི་ཨ་ཨི་ལ་སོགས་པའི་གུག་སྐྱེད་ཀྱི་ཚུལ་རྣམ་པ་དུ་མའམ། བནྡྷར་བ་ལ་སོགས་པའི་
དབྱངས་སྣ་ཚོགས་སུ་སྟོན་ཞེས་པའོ། །ཇི་ལྟར་ན་དེ་བཞིན་གཤེགས་པའི་སྔགས་རྣམས་ཀྱི་ཚིག་འབྲུ་དང་ཡི་གེར་བྱིན་གྱིས་རློབ་ཅེ་ན་ཞེས་པ་ནས། ཇི་ལྟར་རིགས་པར་སྔགས་ཀྱི་ཆོ་ག་ཀུན་རབ་ཏུ་འཆང་ངོ་ཞེས་པའི་བར་དུ་སྔགས་ཀྱི་ཆོས་ཉིད་ཡི་གེ་འབྲུ་ལ་སོགས་པར་བྱིན་གྱིས་བརླབས་ཏེ་སྟོན་པ་ཡང་དེ་བཞིན་གཤེགས་པའི་ཡོན་ཏན་སྟོབས་དང་མི་འཇིགས་པ་ལ་སོགས་པ་དེ་དག་སྔགས་ཀྱི་འབྲུར་བྱིན་གྱིས་བརླབས་པ་སྟེ་སྟོན་པར་ཡང་བཤད་དེ། ཚིག་དང་འབྲུ་རྣམས་སུ་བྱིན་གྱིས་རློབ་པ་ཡང་ཀུན་རྫོབ་དང་དོན་དམ་པ་གཉིས་སུ་རིག་པར་བྱ་སྟེ། དེ་ལ་ཀུན་རྫོབ་ཀྱི་སྟོན་པ་ནི་སྟོབས་དང་མི་འཇིགས་པ་ལ་སོགས་པ་རྣམས་ཚིག་དང་འབྲུ་ལ་སོགས་པར་བྱིན་གྱིས་བརླབས་ཏེ་སྟོན་པའོ། །དོན་དམ་པར་སྟོན་པ་ནི་ཆོས་ཐམས་ཅད་ཐོག་མ་ནས་མ་སྐྱེས་མ་བྱུང་བ་སྟོང་པ་ཉིད་ཀྱི་རང་བཞིན་ཡི་གེ་ལ་སོགས་པའི་འབྲུར་སྟོན་པ་སྟེ། དེ་བས་ན་གསུངས་པ། བསྐལ་པ་བྱེ་བ་བརྒྱ་ཕྲག་དུ་མར་སྔགས་པའི་བདེན་པའི་ཚིག་དང༌། འཕགས་པའི་བདེན་པ་བཞི་པོ་རྣམས་དང་ཞེས་པ་ལ་སོགས་པ་བསྐལ་པ་བྱེ་བ་བརྒྱ་ཕྲག་དུ་མ་ཞེས་པ་ནི་མང་པོའི་མཚན་མ་སྟེ། འཕགས་པའི་བདེན་པ་ལ་སོགས་པ་ཀུན་ལ་སྦྱར་བར་བྱའོ། །དེ་བཞིན་གཤེགས་པས་བསྐལ་པ་དུ་མར་བདེན་པའི་ཚིག་བསགས་པ་སྟེ། སྔགས་ཀྱི་ཡི་གེ་འབྲུར་བྱིན་གྱིས་བརླབས་པས་ན། སུ་བསྒྲུབ་པར་འདོད་པ་དེས་ཀྱང་བདེན་པའི་ཚིག་རྗེས་སུ་བསྲུང་བར་ཤེས་པར་བྱའོ། །བརྫུན་དུ་སྨྲ་བས་སྔགས་རྣམས་མི་འགྲུབ་བོ་ཞེས་རྒྱུད་གཞན་ལས་ཀྱང་འབྱུང་ངོ༌། །འཕགས་པའི་བདེན་པ་བཞི་དང༌། དྲན་པ་ཉེ་བར་གཞག་པ་དང༌། རྫུ་འཕྲུལ་གྱི་རྐང་པ་དང༌། སྟོབས་བཅུ་དང༌། བྱང་ཆུབ་ཀྱི་ཡན་ལག་དང༌། ཚད་མེད་པ་བཞི་དང༌། ཆོས་མ་འདྲེས་པ་ལ་སོགས་པ་དང་གཞུང་གཞན་ལས་གྲགས་པ་ཉིད་དོ། །གསང་བའི་བདག་པོ་མདོར་ན་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཐམས་ཅད་ཀྱང་དེ་བཞིན་གཤེགས་པའི་རང་བཞིན་གྱི་བསོད་ནམས་དང་ཡེ་ཤེས་ཀྱི་སྟོབས་དང༌། རང་གི་སྨོན་ལམ་གྱི་ཡེ་ཤེས་ཀྱི་སྟོབས་དང་ཆོས་ཀྱི་དབྱིངས་ལྷུན་གྱིས་གྲུབ་པའི་སྟོབས་ཀྱིས་ལྷུན་གྱིས་གྲུབ་ནས་སེམས་ཅན་ཇི་ལྟ་བུའི་རིགས་པར་སྔགས་ཀྱི་ཆོ་ག་ཀུན་རབ་ཏུ་འཆད་དོ་
ཞེས་པ་ནི་དེ་བཞིན་གཤེགས་པའི་ཡོན་ཏན་རྣམས་ཀྱི་མཐུ་རྣམས་བྱིན་གྱི་རླབས་ཀྱིས། ཡི་གེའི་འབྲུ་རྣམས་སུ་སྟོན་པ་སྟེ། རང་གི་བསོད་ནམས་དང་ཡེ་ཤེས་ཀྱི་སྟོབས་ཞེས་པ་ནི། བསོད་ནམས་ཀྱི་སྟོབས་ནི་སྦྱིན་པ་དང་ཚུལ་ཁྲིམས་དང་བཟོད་པའི་ཕ་རོལ་ཏུ་ཕྱིན་པ་ལ་སྤྱོད་པའོ། །ཡེ་ཤེས་ཀྱི་སྟོབས་ནི་ཤེས་རབ་དང་བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱོད་པ་སྟེ། སྟོབས་ཞེས་པ་ནི་དེ་དག་གི་མཐུ་ཐོགས་པ་མེད་པའོ། །རང་གི་སྨོན་ལམ་དང་ཡེ་ཤེས་ཀྱི་སྟོབས་དང་ཞེས་པ་ནི། སྔོན་གྱི་སྨོན་ལམ་གྱི་ཤུགས་ཀྱིས་སྔགས་རྣམས་ཀྱི་རང་བཞིན་ཇི་ལྟ་བ་ཉིད་དུ་རྟོགས་པའོ་ཞེས་པའོ། ཆོས་ཀྱི་དབྱིངས་ཀྱི་བྱིན་གྱིས་བརླབས་ཞེས་པ་ནི་ཆོས་ཀྱི་དབྱིངས་ལ་གནས་ནས་ཞེས་པ་སྟེ། ཆོས་ཀྱི་དབྱིངས་ལ་གནས་པའི་མཐུ་དེས་སེམས་ཅན་རྣམས་ཀྱི་བསམ་པ་ཇི་བཞིན་དུ་སྔགས་ཀྱི་ཆོས་ཉིད་ཡེ་གེའི་འབྲུ་ལ་སོགས་པར་སྟོན་ཏོ་ཞེས་པའོ། །ཇི་ལྟར་རིགས་པར་ཞེས་པ་ནི་ཇི་ལྟར་སྣོད་དུ་འགྱུར་བའི་སེམས་ཅན་རྣམས་ལའོ། །སྔགས་ཀྱི་ཡི་གེ་དག་གང་ཞེ་ན། ཐོག་མ་བར་ནས་མ་སྐྱེས་པའི་ཕྱིར། ཨ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི། གསང་བའི་བདག་པོ་ང་དང་ཉ་དང་ཎ་དང་ན་ནི་ཏིང་ངེ་འཛིན་ཐམས་ཅད་ཀྱི་དབང་པོ་སྟེ། ནུས་པ་ཐམས་ཅད་དང་ལྡན་པ་མྱུར་དུ་བྱ་བའི་དོན་རབ་ཏུ་བསྒྲུབ་པའོ་ཞེས་པའི་བར་དུ་སྔགས་རྣམས་ཀྱི་མཚན་ཉིད་ཚིག་དང༌། མིང་དང་མཚན་མར་རྟོགས་པའོ་ཞེས་བཤད་པ་དེ་དག་ཉིད་ཡི་གེའི་འབྲུ་དང་ཚིག་རྣམས་སུ་བཅོམ་ལྡན་འདས་ཀྱིས་བཤད་པ་དེ་རྣམས་ཏིང་ངེ་འཛིན་གྱི་སྒོར་གྱུར་པ་སྟེ། ཚིག་དང་ཡི་གེ་འབྲུ་རེ་ལས་ཏིང་ངེ་འཛིན་གྱི་སྒོར་གྱུར་པ་དེ་ཡང་དོན་གཉིས་སྟོན་ཏེ། ཀུན་རྫོབ་དང་དོན་དམ་པའོ། །དེ་ལ་ཀུན་རྫོབ་ཀྱི་སྟོན་པ་ལ་ནི། ཡི་གེ་འབྲུ་དང་ཚིག་རྣམས་ལས། སངས་རྒྱས་བཅོམ་ལྡན་འདས་ཀྱི་ཡོན་ཏན་སྟོབས་དང་མི་འཇིགས་པ་ལ་སོགས་པ་སྟོན་པའོ། །དོན་དམ་པར་སྟོན་པ་ནི་ཡི་གེ་དེ་ཉིད་ཀྱི་སྒོ་ནས་ཆོས་ཐམས་ཅད་ཀྱི་ཐོག་མ་ནས་མ་སྐྱེས་པ་སྟོང་པ་ཉིད་སྟོན་བ་སྟེ། དེ་བས་ན་ཡི་གེ་འབྲུ་དང་ཚིག་གི་སྒོ་ནས་ཀུན་རྫོབ་དང་དོན་དམ་པའི་དོན་བསྟན་པའི་ཕྱིར། བཅོམ་ལྡན་འདས་ཀྱིས་སྔགས་ཀྱི་མཚན་ཉིད་ཕྱག་རྒྱ་ལ་སོགས་པའི་སྒོ་ནས་མིང་དང་མཚན་ཉིད་མ་གཏོགས་པར་བསྟན། ཡི་གེ་འབྲུ་དང་ཚིག་དང་འབྲུ་རྣམས་
བྱིན་གྱིས་བརླབས་ཏེ་བསྟན་ཏོ། །དེ་བས་ན་ད་འདིར་ཡི་གེ་ཨ་ལ་སོགས་པའི་ཡི་གེའི་འབྲུ་རྣམས་ཀྱི་སྒོ་ནས་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་བསྟན་ཏེ། འཆང་དེ་དེ་ཡང་ཡི་གེ་ཀ་ལ་སོགས་པ་སུམ་ཅུ་རྩ་གཉིས་པོ་རྣམས་དང་ལྡན་པས་སྟོང་པ་ཉིད་ཀྱི་ཏིང་ངེ་འཛིན་གྱི་སྒོར་གྱུར་པ་སྟེ། དེ་རྣམས་ཀྱང་ཁ་ཅིག་ནི་ཆོས་ཐམས་ཅད་སྟོང་པ་ཉིད་དུ་སྟོན། ཁ་ཅིག་ནི་ཕྱོགས་གཅིག་སྟོང་པ་ཉིད་དུ་སྟོན། ཁ་ཅིག་ནི་སྟོང་པར་འཇུག་པའི་སྒོ་ནས་སྟོང་པ་ཉིད་དུ་སྟོན་པའི་ཏིང་ངེ་འཛིན་གྱི་སྒོར་གྱུར་པ་སྟེ་ཇི་ལྟར་རིགས་པར་བལྟའོ། །དེ་ལ་ཡི་གེ་ཨ་ལ་སོགས་པ་གང་ཡང་རུང་བ་ཅིག་གིས་ཐམས་ཅད་སྟོང་པ་ཉིད་དུ་སྟོན་པ་ལས་ལྷག་པར་ཡི་གེ་གཞན་རྣམས་སྟོང་པ་ཉིད་དུ་སྟོན་པ་མེད་དེ། གང་ཡི་གེ་ཨ་ལ་སོགས་པ་བསྟན་པ་དེ་ཉིད་ཀྱི་ཡི་གེ་གཞན་རྣམས་ཀྱིས་སྟོན་པས་སྟོང་པ་ཉིད་དུ་སྟོན་པར་དོ་ན་གཅིག་སྟེ། ཡི་གེ་ཨའི་སྒོ་ནས་ཆོས་ཐམས་ཅད་སྟོང་པ་ཉིད་དུ་ཆུད་ན། ཡི་གེ་གཞན་ཅི་དགོས་ཤེ་ན། སྟོང་པར་སྟོན་པ་ནི་ཡི་གེ་གཅིག་གིས་ཀྱང་ཆོག་མོད་ཀྱི། ཡི་གེ་འབྲུ་དང་ཚིག་རྣམས་ལས་སྔགས་སུ་བསྟན་ཏེ་སྔགས་དེའི་སྒོ་ནས་མ་སྐྱེས་པས་སྟོང་པ་ཉིད་དགོངས་པའི་ཕྱིར་ཡི་གེ་ཐམས་ཅད་སྨོས་སོ། །དེ་བས་ན་སྔགས་ཐམས་ཅད་ཀྱི་རང་བཞིན་ནི་བྱང་ཆུབ་ཀྱི་སེམས་སོ་ཞེས་རྒྱུད་གཞན་ལས་གསུངས་སོ། །ཐོག་མ་ནས་མ་སྐྱེས་པའི་ཕྱིར། ཨ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། ཆོས་ཐམས་ཅད་ཐོག་མ་ནས་མ་སྐྱེས་པས་སྟོང་པ་ཉིད་དུ་ཆུད་པ་ནི་དེ་བཞིན་གཤེགས་པ་སྟེ། དེ་བས་ན་སྟོང་པ་ཉིད་དུ་ཆུད་པའི་ཏིང་ངེ་འཛིན་གྱི་སྒོར་གྱུར་པར་ཡི་གེ་ཨ་དེ་བྱིན་གྱིས་བརླབས་ཏེ་གཞག་པ་སྟེ། དེ་བས་ན་ཆོས་ཐམས་ཅད་ཐོག་མ་ནས་མ་སྐྱེས་པ་མ་བྱུང་བར་ཡི་གེ་ཨའི་སྒོ་ནས་བསྟན་ཏེ། དགོས་པ་དང་བྲལ་བའི་ཕྱིར་ཀ་ནི་ཆོས་ཐམས་ཅད་ཀྱི་སྒོ་མོའོ་ཞེས་པ་ནི་རྒྱ་གར་སྐད་དུ། དགོས་པ་ལ་ཀཱཪྻ་ཞེས་བྱ་སྟེ། ཡི་གེ་ཀ་དེ་ཆོས་ཐམས་ཅད་སྟོང་པའི་ཏིང་ངེ་འཛིན་གྱི་སྒོར་གྱུར་པ་བས་ཡི་གེ་ཀའི་སྒོ་ནས་ཆོས་ཐམས་ཅད་དགོས་པ་མེད་པར་ཤེས་པར་བྱ་སྟེ། དགོས་པ་ཞེས་པ་ནི་འབྲས་བུ་སྟེ། འབྲས་བུ་དེ་ཡང་རྒྱུས་མ་བསྐྱེད་ན་འབྲས་བུ་མེད་པར་འགྱུར་ཏེ། རྒྱུ་མེད་པའི་འབྲས་བུ་ཡང་མེད་པའོ། །དེ་སྟེ་དགོས་པ་བྲལ་བ་ཞེས་བྱུང་
བས། འབྲས་བུ་རྒྱུས་མ་བསྐྱེད་པ་མེད་ཀྱི། རྒྱུ་དེ་འབྲས་བུ་སྐྱེད་པའི་རང་བཞིན་དུ་ཡོད་དམ་ཞེ་ན། རྒྱུ་ཉིད་འབྲས་བུ་ལས་གྱུར་པ་སྟེ། དེ་བས་ན་ཆོས་ཐམས་ཅད་མ་བྱུང་མ་སྐྱེས་པའི་དོན་དུ་རིག་པར་བྱའོ། །ནམ་མཁའ་དང་འདྲ་བ་དམིགས་སུ་མེད་པའི་ཕྱིར། ཁ་ནི་ཆོས་ཐམས་ཅད་ཀྱི་སྒོ་ཞེས་པ་ནི། ནམ་མཁའ་དང་འདྲ་བ་ལ། རྒྱ་གར་སྐད་དུ། ཁཾ་ཁ་ས་མ་ཞེས་བྱ་སྟེ། ཡི་གེ་ཁ་དེ་ནི་ཆོས་ཐམས་ཅད་སྟོང་པར་སྟོན་པའི་ཏིང་ངེ་འཛིན་གྱི་སྒོ་སྟེ་ཐམས་ཅད་ནམ་མཁའ་ལྟ་བུའི་རང་བཞིན་ཡོད་པ་མ་ཡིན་པའོ། །རྒྱུད་ཐམས་ཅད་དམིགས་སུ་མེད་པའི་ཕྱིར། ག་ནི་ཆོས་ཐམས་ཅད་ཀྱི་སྒོ་ཞེས་པ་ནི། ག་ཏི་ཞེས་པ་རྒྱུད་ལའང་བྱ། འགྲོ་བ་ལ་ཡང་བྱ། བྱང་ཆུབ་པ་ལ་ཡང་བྱ་སྟེ། ཡི་གེ་ག་ནི་ཆོས་ཐམས་ཅད་སྟོང་པ་ཉིད་དུ་སྟོན་པའི་ཏིང་ངེ་འཛིན་གྱི་སྒོར་གྱུར་པ་ཡིན་པས་རྒྱུད་དུ་དྲང་ན་ནི་མི་དང་ལྷ་ལ་སོགས་པའི་རྒྱུད་དྲུག་དམིགས་སུ་མེད་པའོ། །འགྲོ་པར་དྲང་ན་ནི་ཤར་དང་ནུབ་ལ་སོགས་པར་འགྲོ་བར་བྱ་བ་དང༌། འགྲོ་བའི་བྱ་བ་དམིགས་སུ་མེད་པའོ། །ཆུད་པར་དྲང་ན་ནི་ཆོས་ཐམས་ཅད་ཐོག་མ་ནས་མ་སྐྱེས་པར་ཆུད་པར་བྱ་བའི་དངོས་པོ་དང༌། ཆུད་པར་བྱེད་པ་དམིགས་སུ་མེད་པའོ། །གཅིག་ཏུ་འཕངས་པ་དམིགས་སུ་མེད་པའི་ཕྱིར། གྷ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་གཅིག་ཏུ་འཕུངས་པ་ལ། རྒྱ་གར་སྐད་དུ། གྷ་ནི་ཞེས་བྱ་སྟེ། ཡི་གེ་གྷ་ནི་ཆོས་ཐམས་ཅད་སྟོང་པ་ཉིད་སྟོན་པའི་ཏིང་ངེ་འཛིན་གྱི་སྒོ་དེ་རྡུལ་ཕྲ་མོ་རྣམས་གཅིག་ཏུ་འཕུངས་པའི་དངོས་པོའོ། །དམིགས་སུ་མེད་ཅེས་པའོ། །འཆི་འཕོ་ཐམས་ཅད་དང་བྲལ་བའི་ཕྱིར། ཙ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། རྒྱ་གར་སྐད་དུ། འཆི་འཕོ་ལ་ཙྱུ་ཏི་ཞེས་བྱ་སྟེ། ཡི་གེ་ཙ་ནི་ཆོས་ཐམས་ཅད་སྟོང་པར་སྟོན་པའི་ཏིང་ངེ་འཛིན་གྱི་སྒོ་བས། ཆོས་ཐམས་ཅད་མ་སྐྱེས་པའི་ཕྱིར་འཆི་འཕོ་ཡང་འཆི་འཕོ་དམིགས་སུ་མེད་པའོ་ཞེས་པའོ། །གྲིབ་མ་དང་མཚུངས་པའི་ཕྱིར། ཚ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་གྲིབ་མ་ལ་ཚ་ཡ་ཞེས་བྱ་སྟེ། ཚ་དེ་ཆོས་ཐམས་ཅད་སྟོང་པ་སྟོན་པའི་ཏིང་ངེ་འཛིན་གྱི་སྒོ་སྟེ། དེ་ལ་གྲིབ་མ་དེ་ལུས་ལས་གཞན་པ་མ་ཡིན་ན་ནི་ལུས་མེད་ཀྱང་གྲིབ་མ་འབྱུང་བའི་རིགས་ཏེ། ལུས་ལས་མི་གཞན་ན་གྲིབ་མ་ལོགས་
ཤིག་ཏུ་འབྱུང་བ་ཡང་མི་རིགས་པ་ལས་དེ་ལྟ་བུ་འབྱུང་བ་ནི་ཡང་དག་པ་མ་ཡིན་ཏེ་འཁྲུལ་པ་ལ་སྒྱུ་མ་ལྟ་བུའོ། །འཁྲུལ་པའམ་སྒྱུ་མ་ནི་དངོས་པོ་ཡོད་པ་མ་ཡིན་ཏེ། ཆོས་ཐམས་ཅད་ཀྱང་གྲིབ་མ་དེ་དང་འདྲ་བས་སྟོང་པ་ཉིད་དོ་ཞེས་པའོ། །སྐྱེ་བ་དམིགས་སུ་མེད་པའི་ཕྱིར། ཛ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་སྐྱེ་བ་ལ་ཛཱ་ཏི་ཞེས་བྱ་སྟེ། སྐྱེ་བར་བྱ་བའམ་སྐྱེ་བཞིན་པའི་དངོས་པོ་མེད་པས་སྐྱེ་བ་དམིགས་སུ་མེད་པའོ་ཞེས་བྱའོ། །དྲི་མ་ནི་དམིགས་སུ་མེད་པའི་ཕྱིར། ཛྷ་ནི་ཆོས་ཐམས་ཅད་ཀྱི་སྒོ་ཞེས་པ་ནི་དྲི་མ་ལ་ཛྷ་མ་ར་ཞེས་བྱ་བ་སྟེ། དྲི་མར་གྱུར་པའི་ཆོས་རྣམས་དམིགས་སུ་མེད་པའོ། །ང་རྒྱལ་དམིགས་སུ་མེད་པའི་ཕྱིར་ཊ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། ད་རྒྱལ་ལ་ཊ་ཀ་ར་ཞེས་བྱ་སྟེ། ཆོས་ཐམས་ཅད་སྟོང་པ་ཉིད་པས་ང་རྒྱལ་གྱི་དངོས་པོ་དམིགས་སུ་མེད་པའོ། །སྐྱེ་བ་མེད་པའི་ཕྱིར། ཋ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་སྐྱེ་བ་ལ་བི་ཋ་བ་ན་ཞེས་བྱ་བ་སྟེ། ཆོས་ཐམས་ཅད་སྟོང་པ་ཉིད་པས་སྐྱེ་བའི་དངོས་པོ་དམིགས་སུ་མེད་ཅེས་པའོ། །འཚེ་བ་དམིགས་སུ་མེད་པའི་ཕྱིར། ཊ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། འཚེ་བ་ལ་ཊ་མ་ར་ཞེས་བྱ་བ་སྟེ་འཚེ་བར་བྱ་བའི་དངོས་པོ་རྣམས་མེད་པས་འཚེ་བར་བྱ་བའི་དངོས་པོ་ཡང་དམིགས་སུ་མེད་པའོ་ཞེས་པའོ། །མུ་གེ་དང་ཡོངས་སུ་བྲལ་བར་བྱ་བའི་ཕྱིར། ཊྷ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། མུ་གེ་ལ་ཊྷངྒ་ཞེས་བྱ་སྟེ། ཆོས་རྣམས་སྟོང་པ་ཉིད་པས་མུ་གེའི་དངོས་པོ་དམིགས་སུ་མེད་ཅེས་པའོ། །དེ་བཞིན་ཉིད་དམིགས་སུ་མེད་པའི་ཕྱིར། ཏ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། དེ་བཞིན་ཉིད་ལ་ཏ་ཐཱ་ཏ་ཞེས་བྱ་སྟེ། དེ་བཞིན་ཉིད་དང་ཡང་དག་པའི་མཐའ་དང་སྟོང་པ་ཉིད་ཅེས་པ་ནི་གཞུང་གཅིག་སྟེ། དེ་བཞིན་ཉིད་དུ་དམིགས་སུ་མེད་ཅེས་བྱའོ། །གནས་དམིགས་སུ་མེད་པའི་ཕྱིར། ཐ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། གནས་ལ་སྠ་ན་ཞེས་བྱ་སྟེ། སྣོད་ཀྱི་འཇིག་རྟེན་གྱི་རང་བཞིན་གྱི་གནས་སམ། ཆོས་རྣམས་སྐད་ཅིག་པའི་མཚན་ཉིད་པས་མི་གནས་པའི་ཕྱིར་གནས་དམིགས་སུ་མེད་ཅེས་པའོ། །འདུལ་བ་དམིགས་སུ་མེད་པའི་ཕྱིར་ད་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། འདུལ་བ་ལ་ད་ན་མ་ཞེས་བྱ་སྟེ། འདུལ་
བའི་དངོས་པོའམ། དུལ་བར་བྱ་བ་དམིགས་སུ་མེད་ཅེས་པའོ། །ཁམས་དམིགས་སུ་མེད་པའི་ཕྱིར། དྷ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། ཁམས་ལ་དྷཱ་ཏུ་ཞེས་བྱ་སྟེ། འདོད་པའི་ཁམས་དང༌། གཟུགས་ཡོད་པ་དང༌། གཟུགས་མེད་པའི་ཁམས་ལ་སོགས་པ་དམིགས་སུ་མེད་ཅེས་པའོ། །དོན་དམ་པའི་བདེན་པ་དམིགས་སུ་མེད་པའི་ཕྱིར། པ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། དོན་དམ་པ་ལ་པ་ར་མཱ་རྠ་ཞེས་བྱ་སྟེ། ཡི་གེ་པ་ནི་དེ་ནི་དོན་དམ་པའི་རང་བཞིན་དུའང་དམིགས་སུ་མེད་པར་བསྟན་པའོ། །དབུ་བ་དང་འདྲ་སྟེ་སྙིང་པོ་དམིགས་སུ་མེད་པའི་ཕྱིར། ཕ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་དབུ་བ་ལ་ཕེ་ན་ཞེས་བྱ་སྟེ། ཕུང་པོ་ལ་སོགས་པའི་ཆོས་རྣམས་དབུ་བ་དང་འདྲ་བར་སྙིང་པོ་མེད་པར་བཤིག་པ་དེ་ཡང་སྙིང་པོ་མེད་པར་ཡི་གེ་ཕའི་སྒོ་ནས་བསྟན་ཏོ། །འབྱུང་བ་ཐམས་ཅད་དམིགས་སུ་མེད་པའི་ཕྱིར། བྷ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་འབྱུང་བ་ལ་བྷ་བ་ཞེས་བྱ་སྟེ། དེ་ཡང་འདོད་པའི་ཁམས་དང༌། གཟུགས་ཡོད་པའི་དང་གཟུགས་མེད་པའི་ཁམས་སུ་འབྱུང་བས་ན་འབྱུང་བ་ཞེས་བྱ་སྟེ་ཕུང་པོ་ལྔ་ཉིད་ལ་བྱའོ། །ཕུད་པོ་ལྔ་པོ་དེ་དག་དམིགས་སུ་མེད་པར་ཡི་གེ་བྷའི་སྒོ་ནས་སྟོན་ཏོ། །འཆི་བ་རྣམས་དམིགས་སུ་མེད་པའི་ཕྱིར། མ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་འཆི་བ་ལ་མ་ར་ཎ་ཞེས་བྱ་བ་ནི། ཆོས་ཐམས་ཅད་མ་སྐྱེས་པས་འཆི་བ་ཡང་དམིགས་སུ་མེད་པར་ཡི་གེ་མའི་སྒོ་ནས་བསྟན་ཏོ། །ཐེག་པ་ཐམས་ཅད་དམིགས་སུ་མེད་པའི་ཕྱིར། ཡ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་ཐེག་པ་ལ་ཡཱ་ན་ཞེས་བྱ་སྟེ། ཆོས་རྣམས་གང་ཞེ་ན། ཆོས་ཀྱང་གཟིངས་འདྲ་བར་བོར་བས་ན། ཆོས་རྣམས་སྟོང་པར་ཆུད་ནས་ཐེག་པ་གང་ལ་ཞུགས་ཏེ་ཆུད་པའི་ཐེག་པ་དེ་ཉིད་ཀྱང་དམིགས་སུ་མེད་པར་ཡི་གེ་ཡའི་སྒོ་ནས་བསྟན་པའོ། །རྡུལ་ཐམས་ཅད་དང་བྲལ་བར་བྱ་བའི་ཕྱིར། ར་ནི་ཆོས་ཐམས་ཅད་ཀྱི་སྒོ་མོ་སྟེ་ཞེས་པ་ནི་རྡུལ་ལ་ར་ཛ་ཞེས་བྱ་སྟེ། རྡུལ་ཞེས་རྡུལ་ཕྲ་མོ་རྣམས་ལ་ཡང་བྱ་བ་སྟེ་ཉོན་མོངས་པ་རྣམས་ལ་ཡང་བྱ་སྟེ། དེ་གཉིས་གང་ཡང་རུང་བ་དམིགས་སུ་མེད་པར་ཡི་གེ་རའི་སྒོ་ནས་བསྟན་པའོ། །མཚན་ཉིད་དམིགས་སུ་མེད་པའི་ཕྱིར་ལ་ནི་ཆོས་ཐམས་ཅད་ཀྱི་སྒོ་མོ་
ཞེས་པ་ནི། མཚན་ཉིད་ལ་ལཀྵ་ཎ་ཞེས་བྱ་སྟེ། འདུས་བྱས་དང་འདུས་མ་བྱས་པའི་མཚན་ཉིད་ལ་སོགས་པ་དམིགས་སུ་མེད་པར་ཡི་གེ་ལའི་སྒོ་ནས་བསྟན་པའོ། །ངག་གི་ལམ་དང་ཡོངས་སུ་བྲལ་བའི་ཕྱིར་ཝ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི། ངག་གི་ལམ་ལ་ལྦཱ་ཀ་ཞེས་བྱ་སྟེ། རྣམ་པར་མ་བརྟགས་མ་དཔྱད་པར་ཚིག་ཏུ་མི་སྨྲའི་རྣམ་པར་དཔྱད་ནས་ཚིག་ཏུ་སྨྲ་བ་སྟེ། བརྟག་པར་བྱ་བ་དང་རྟོགས་པར་བྱེད་པའི་ཚིག་ཏུ་སྨྲ་བ་ཡང་དམིགས་སུ་མེད་པར་ཡི་གེ་ཝའི་སྒོ་ནས་བསྟན་པའོ། །རང་བཞིན་གྱིས་ཞི་བའི་ཕྱིར་ཤ་ནི་ཆོས་ཐམས་ཅད་ཀྱི་སྒོ་མོའོ་ཞེས་པ་ནི་རང་བཞིན་གྱིས་ཞིབ་ལ་པྲ་ཀྲ་ཏ་ཤཱནྟི་ཞེས་བྱ་བ་སྟེ། ཆོས་ཐམས་ཅད་སྟོང་པ་ཉིད་དང་རང་བཞིན་གྱིས་ཞི་བར་ཡི་གེ་ཤའི་སྒོ་ནས་བསྟན་པའོ། །རང་བཞིན་གྱིས་བླུན་པའི་ཕྱིར། ཥ་ནི་ཆོས་ཐམས་ཅད་ཀྱི་སྒོ་མོའོ་ཞེས་པ་ནི། བླུ་ན་པོ་ལ་ཛྷ་ཥ་ཞེས་བྱ་སྟེ། མིག་དང་རྣ་བ་ལ་སོགས་པའི་བདག་པོ་རྣམས་ཀྱིས་ཆོས་རྣམས་ཟིན་པ་ནི་ཡང་དག་པ་མ་ཡིན་པར་ཟིན་པར་བྱ་སྟེ། མིག་ལ་སོགས་པའི་དབང་པོ་རྣམས་བླུན་པས་མི་བརྩན་པའི་ཕྱིར་དེ་དག་གིས་ཟིན་པའི་ཆོས་ཡོད་པ་མ་ཡིན་པ་ཥའི་སྒོ་ནས་སྟོན་པའོ། །ཡི་གེ་པའི་གོར་བཏང་བ་ནི། ཊ་དང་ཥ་གཉིས་གནས་གཅིག་ནས་བྱུང་བ་དང༌། པའི་ལས་ཊ་བྱེད་པའི་ཕྱིར་རོ། །བདེན་པ་ཀུན་དམིགས་སུ་མེད་པའི་ཕྱིར་ས་ནི་ཆོས་ཐམས་ཅད་ཀྱི་སྒོ་མོའོ་ཞེས་བ་ནི་བདེན་པ་ལ་སཏྱ་ཞེས་བྱ་སྟེ། ཀུན་རྫོབ་དང་དོན་དམ་པའི་བདེན་པ་དམིགས་སུ་མེད་པར་ཡི་གེ་སའི་སྒོ་ནས་བསྟན་པའོ། །རྒྱུ་དམིགས་སུ་མེད་པའི་ཕྱིར་ཧ་ནི་ཆོས་ཐམས་ཅད་ཀྱི་སྒོ་མོ་ཞེས་པ་ནི་རྒྱུ་ལ་ཧེ་ཏུ་ཞེས་བྱ་སྟེ། ཆོས་ཐམས་ཅད་ཀྱི་རྒྱུ་དམིགས་སུ་མེད་པར་ཡི་གེ་ཧའི་སྒོ་ནས་བསྟན་པ་སྟེ། མདོར་ན་ཡི་གེ་དེ་རྣམས་སྟོང་པ་ཉིད་ཀྱི་ཏིང་ངེ་འཛིན་རྣམས་ཀྱི་སྒོ་སྟོན་པར་རིག་པར་བྱའོ། །གསང་བའི་བདག་པོ་ང་དང་ཉ་དང་ན་དང་ཎ་ནི་ཏིང་ངེ་འཛིན་ཐམས་ཅད་ཀྱི་དབང་པོ་སྟེ་ཞེས་པ་ནི། ཡི་གེ་དེ་རྣམས་ཀླད་ཀོར་གྱི་འཁོར་བཏགས་པས་སྟོང་པ་ཉིད་ཀྱི་མཚན་མ་བས་ནི་ཀ་ལ་སོགས་བའི་འཁོར་ཀུན་དབང་ངོ༌། །ཉ་ནི་ཙ་ལ་སོགས་པའི་འཁོར་ཀུན་དུ་གཏོགས་སོ། །ན་ནི་ཏ་ལ་སོགས་པའི་འཁོར་ཀུན་དུ་གཏོགས་སོ། །དེ་བཞིན་དུ་ཡི་གེ་དེ་རྣམས་ཡ་ར་ལ་སོགས་པའི་སྟོང་པར་གཏོགས་ཏེ། སྟོང་པ་
ཐམས་ཅད་ཀྱི་མཚན་ཉིད་པས་མཐུ་དང་ལྡན་པ་སྟེ། ཀུན་རྫོབ་ཏུ་བསྒྲུབ་པའི་དགོས་པ་རྣམས་ཀྱང་མྱུར་དུ་འགྲུབ་པར་འགྱུར་ཏེ། དེ་བས་ན་གསུངས་པ། མཐུ་ཐམས་ཅད་དང་ལྡན་པ་མྱུར་དུ་བྱ་བའི་དོན་རབ་ཏུ་བསྒྲུབ་པ་ཞེས་བྱའོ། །གསང་བའི་བདག་པོ་སྔགས་ཀྱི་ཚུལ་གྱི་ཏིང་ངེ་འཛིན་གྱི་སྒོ་འདི་ནི་ཞེས་པ་ནས། ཡིད་ལ་སྔགས་མཁན་གྱིས་བསམས་ན། འཆི་འཕོ་མེད་པའི་གནས་ཐོབ་འགྱུར། །ཞེས་པའི་བར་དུ་སྔགས་ཀྱི་ཚུལ་ཡི་གེ་འབྲུ་ཀ་ལ་སོགས་པ། དེ་བཞིན་ཉིད་ལ་དམིགས་པའི་ཏིང་ངེ་འཛིན་གྱི་སྒོར་གྱུར་པ་རྣམས་བཤད་པ་རྣམས་ཀྱི་རྗེས་སུ་བསྔགས་པ་དང་རང་བཞིན་བསྟན་པ་སྟེ། དེ་ཡང་འཇུག་པའི་ཡོན་ཏན་དང་གནས་པའི་ཡོན་ཏན་དང་ལྡང་བའི་རང་བཞིན་དུ་ཤེས་པར་བྱ་སྟེ། དེ་ལ་རེ་བ་ཐམས་ཅད་ཡོངས་སུ་རྫོགས་པར་བྱེད་པ་དེ་བཞིན་གཤེགས་པ་ཐམས་ཅད་ཀྱི་བསམ་གྱིས་མི་ཁྱབ་པའི་རྣམ་པར་སྨིན་པའི་འབྲས་བུའོ་ཞེས་པ་ནི། དེ་བཞིན་གཤེགས་པའི་རྒྱུའི་ཡོན་ཏན་དང༌། སྟོབས་དང་མི་འཇིགས་པ་ལ་སོགས་པ་ལས་གྱུར་བ་ཞེས་པའོ། །རྣམ་པ་མཆོག་ཐམས་ཅད་དང་ལྡན་པ། སྔགས་ཀྱི་དེ་ཁོ་ནའི་དོན་གདོན་མི་ཟ་བའོ་ཞེས་པ་ནི་འཇུག་པའི་རང་བཞིན་ཏེ། རྣམ་པ་མཆོག་ཐམས་ཅད་དང་ལྡན་བས་ཞེས་པ་ནི། ཡི་གེ་ཨ་དང་ཀ་ལ་སོགས་པ་དེ་བཞིན་ཉིད་ལ་དམིགས་པར་འཇུག་པའི་ཏིང་ངེ་འཛིན་གྱི་སྒོར་གྱུར་པ་དམ་པ་རྣམས་དང་ལྡན་པ་ཞེས་པའོ། །སྔགས་ཀྱི་དེ་ཁོ་ནའི་དོན་གདོན་མི་ཟ་བ་ཞེས་པ་ནི་ཕྱིན་ཅི་མ་ལོག་པས་རིགས་པ་དང་གཞུང་གིས་སུན་མི་ཕྱིན་པའོ། །དུས་གསུམ་ལས་ཤིན་ཏུ་འདས་པ་ནམ་མཁའ་དང་འདྲ་སྟེ་དྲི་མ་མེད་པ། བསམ་ཡས་སེམས་ཀྱི་ས་ལ་གནས། །ཞེས་པ་ནི་གནས་པའི་རང་བཞིན་ཏེ། དུས་གསུམ་ལས་ཤིན་ཏུ་ཤེས་པ་ནི། འདས་པ་དང་ད་ལྟར་དང་མ་འོངས་པའི་དུས་ཏེ། དེ་ཡང་ཕུང་པོ་ལྔ་ལ་བྱ་སྟེ། ཕུང་པོ་ལྔ་ལས་ཤིན་ཏུ་འདས། །ཞེས་པའོ། །ནམ་མཁའ་དང་འདྲ་སྟེ་དྲི་མ་མེད་ཅེས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་དྲི་མ་རྣམས་དང་བྲལ་བ་ཞེས་པའོ། །བསམ་ཡས་སེམས་ཀྱི་ས་ལ་གནས། །ཞེས་བ་ནི་སེམས་པ་མེད་པ་ལས་སེམས་ཀྱི་ས་ལ་གནས་པ་སྟེ་སོ་སོ་རང་གི་རིག་པའི་རང་བཞིན་ཞེས་པའོ། །ལས་དང་བྱ་བ་ལས་བྱུང་བ། །སྤྱོད་པ་རྣམས་ཀྱང་རྗེས་སུ་ཐོབ།།
བསམ་ཡས་འབྲས་བུ་སྨིན་པའོ། །ཞེས་པ་ནི་ལངས་པའི་རང་བཞིན་ཏེ། ལས་དང་བྱ་བ་ལས་བྱུང་བ། །ཞེས་པ་ནི་སྟོང་པ་ཉིད་ལས་ལངས་ནས་སེམས་ཅན་རྣམས་ལ་ཕན་པའི་ཕྱིར། ཀུན་རྫོབ་ཏུ་བཟླས་པའི་ཡན་ལག་བཞི་ལ་སོགས་པ་ལུས་དང་ངག་གི་ལས་རྣམས་ཀྱང་སྟོན་ཞེས་པའོ། །སྤྱོད་པ་རྣམས་ཀྱང་རྗེས་སུ་ཐོབ། །བསམ་ཡས་འབྲས་བུ་སྨིན་པའོ། །ཞེས་པ་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་དང༌། སྔགས་ཀྱི་སྤྱོད་པ་རྣམས་སྤྱད་ན་མངོན་པར་འབྱུང་བ་དང༌། མ་ལུས་པའི་བདེ་བ་བསམ་གྱིས་མི་ཁྱབ་པ་འབྱིན་པའོ་ཞེས་པའོ། །འདི་ནི་དོན་དམ་དེ་ཁོ་ན། །སངས་རྒྱས་ཀུན་གྱིས་རབ་ཏུ་བསྒྲགས། །ཞེས་པ་ནི་གོང་དུ་བཤད་པ་རྣམས་སྡུད་པའི་ཚིག་སྟེ། སངས་རྒྱས་རྣམས་ཀྱིས་རབ་ཏུ་བསྒྲགས། །ཞེས་པ་ནི་སྔགས་ཀྱི་རང་བཞིན་སྟོང་པ་ཉིད་ཀྱི་བྱང་ཆུབ་ཀྱི་སེམས་བསྒོམ་པ་ཤེས་པ་དང༌། སྔགས་ཀྱི་ཡི་གེ་ལས་ལྷའི་གཟུགས་སུ་སྦྱར་ཞིང༌། ཡན་ལག་བཞི་བའི་བཟླས་པ་ལ་སོགས་པའི་ཆོ་གར་ཤེས་ན་གྲུབ་པ་ཐོབ་པར་འགྱུར་ཞེས་པའོ། །སྒྲར་སྨྲས་ཡང་དག་དེ་ཁོ་ན། །སྔགས་རྣམས་ཀྱི་ནི་སྔགས་མཚན་ཉིད། །ཡིད་ལ་བསམ་པའི་ས་བསམས་ན། །འཆི་འཕོ་མེད་པའི་གནས་ཐོབ་འགྱུར། །ཞེས་པ་ནི་སྔགས་ཀྱི་ཡི་གེའི་སྒྲའི་སྒོ་ནས་བསྟན་པའི་དོན་དེ་བཟླས་པ་ལ་སོགས་པ་ལ་མི་རྟོག་པར་བསྒོམས་པས་མྱ་ངན་ལས་འདས་པ་འཆི་འཕོ་མེད་པའི་གནས་ཐོབ་ཅེས་པའོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་འདི་སྐད་ཅེས་གསོལ་ཏེ་ཞེས་པ་ནས་ཐུན་མོང་མ་ཡིན་པའི་ཡོན་ཏན་དང་ལྡན་པར་འགྱུར་རོ་ཞེས་པའི་བར་དུ་བཤད་པའི་དོན་རྣམས་ཕྱག་ན་རྡོ་རྗེས་མཇལ་བར་བསྟན་པ་དང༌། མ་འོངས་པའི་འགྲོ་བ་རྣམས་སྤྲོ་བ་བསྐྱེད་པ་དང༌། དཀྱིལ་འཁོར་གྱི་ཡོ་བྱད་བཤད་པའི་ལྷག་མ་རྣམས་བཤད་པར་གསོལ་བའོ། །བཅོམ་ལྡན་འདས་ཀྱིས་བསམ་གྱིས་མི་ཁྱབ་པའི་སྔགས་ཀྱི་མཚན་ཉིད་ཀྱི་ཚུལ་གྱིས་ཆོས་ཀྱི་གཞུང་བཤད་པ། བཅོམ་ལྡན་འདས་ངོ་མཚར་ཆེའོ་ཞེས་པ་ནི། ཡི་གེ་ཀ་ལ་སོགས་པ་སྟོང་པ་ཉིད་ཀྱི་ཏིང་ངེ་འཛིན་དེ་དག་གི་དོན་བསམ་དུ་མེད་པ་དེ་དག་གིས་འཇལ་ཏེ་ངོ་མཚར་ཆེའོ་ཞེས་པའོ། །ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ལགས་ཏེ་ཞེས་པ་ནི། ཉན་ཐོས་ནི་
གང་ཟག་ལ་བདག་མེད་པར་ཆུད་པ་ཙམ་དང༌། རང་སངས་རྒྱས་ནི་རྒྱུ་དང་འབྲས་བུ་བཤིག་ནས་ངག་འགགས་པ་ཙམ་པས་དེ་བཞིན་ཉིད་ལ་དམིགས་པའི་ཏིང་ངེ་འཛིན་གྱི་སྤྱོད་ཡུལ་མ་ཡིན་ཞེས་པའོ། །སེམས་ཅན་དེ་དག་ཐུན་མོང་མ་ལགས་བའི་ཡོན་ཏན་དང་ལྡན་པར་འགྱུར་པ་ནི། གང་སྔགས་ཀྱི་ཚུལ་འདི་ལ་དད་པར་འགྱུར་པའོ་ཞེས་པ་རྣམས་ནི་མ་འོངས་པའི་འགྲོ་བ་རྣམས་ནི་སྤྲོ་བ་བསྐྱེད་པའོ། །བཅོམ་ལྡན་འདས་གཞན་ཡང་དཀྱིལ་འཁོར་གྱི་ཡོ་བྱད་ཀྱི་ཆོ་ག་རྣམས་བཤད་པར་གསོལ་ཞེས་པ་ནི། དཀྱིལ་འཁོར་བྲིས་ཟིན་ན་མཆོད་པ་ལ་སོགས་པ་བྱ་བར་རིགས་ཏེ། དེ་བས་ན་མཆོད་པའི་ཏིང་ངེ་འཛིན་དང༌། ཡིད་ཀྱིས་མཆོད་པ་དང༌། ཐལ་མོ་སྦྱར་བའི་མཆོད་པ་དང༌། བྱམས་པ་དང་སྙིང་རྗེས་མཆོད་པ་དང༌། འཇིག་རྟེན་གྱི་མཆོད་པ་དྲི་དང་མེ་ཏོག་ལ་སོགས་པ་སྟེ། མཆོད་པ་རྣམ་པ་དེ་བཞི་དང༌། དཀྱིལ་འཁོར་བསྲུང་བ་དང༌། དཀྱིལ་འཁོར་གྱི་ལྷ་རྣམས་བཞུགས་སུ་གསོལ་བ་རྣམས་བཤད་དུ་གསོལ་ཞེས་པའོ། །དེ་རྣམས་ལས་ཀྱང་ལ་ལ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་སྐབས་ནས་འབྱུང༌། ལ་ལ་ནི་ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་སྐབས་ནས་འབྱུང༌། ལ་ལ་ནི་གསང་བའི་དཀྱིལ་འཁོར་ལས་འབྱུང་སྟེ། དེ་འདི་ནས་མི་འབྱུང་བ་འོག་མ་གཉིས་ཀྱི་སྐབས་ནས་འབྱུང་བ་ཡང་སྐབས་འདིར་སྦྱར་བར་བྱ། འདི་ནས་འབྱུང་བ་ལ་འོག་མ་གཉིས་ཀྱི་ནད་ནས་མི་འབྱུང་བ་ཡང་དེ་བཞིན་དུ་སྦྱར་བར་བྱ་སྟེ། དེ་དག་གི་རིམ་པ་ཡང་ལྷ་རྣམས་ཀྱི་དཀྱིལ་འཁོར་དུ་བྱིན་གྱིས་བརླབ་པ་ལ་སྤྱན་དྲང་མི་དགོས་པའི་རིམ་པ་ལ་སོགས་པ་བསྡུས་པའི་དོན་གྱི་ནང་དུ་ཞིབ་ཏུ་བཤད་པས་འདིར་མ་སྨོས་སོ། །དེ་ནས་སྔགས་པས་བྱ་བ། ལྷ་རྣམས་ལ་ནི་མཆོད་པའི་ཕྱིར། །ཞེས་པ་ནས། སེམས་དཔའ་ཆེན་པོ་ཕལ་རྣམས་ལའང༌། །རེ་རེ་བར་ནི་བསྒྲགས་པ་ཡིན། །ཞེས་པའི་བར་དྲི་ལ་སོགས་པ་ཕྱིའི་མཆོད་པ་རྣམས་བཤད་པ་སྟེ། ཕྱིའི་མཆོད་པ་དེ་རྣམས་ཀྱང༌། སྔགས་པ་དམིགས་པ་བས་ཚུལ་བཞིན་མ་བྱས་ན། འཕགས་པའི་ལྷ་རྣམས་འཁྲུག་བར་མི་འགྱུར་ཡང་དེའི་འཁོར་ཕལ་རྣམས་འཁྲུག་པར་འགྱུར་ཏེ། འཕྲལ་དུ་ག་ནོད་པ་མི་བྱེད་ཀྱང་ཇི་ལྟར་བསམས་པའི་དོན་གྲུབ་པར་མི་བྱེད་དེ།
ཕན་འདོགས་པར་མི་འགྱུར་རོ་ཞེས་རྒྱུད་གཞན་ལས་འབྱུང་བས་མཆོད་པ་དེ་རྣམས་ནན་ཏན་དུ་བྱའོ། །སློབ་དཔོན་ཟབ་ཅིང་རྒྱ་ཆེ་བ་ལ་མོས་པས་ཀྱང་གཙོར་ནི་ཡིད་ཀྱིས་མཆོད་པ་བྱ་སྟེ། སློབ་མ་དམིགས་བ་ཅན་རྣམས་ཀྱི་ཡིད་དང་སྦྱར་བའི་ཕྱིར་ཕྱི་མའི་མཆོད་པ་འདི་རྣམས་ཀྱང་མ་ཆགས་བཞིན་དུ་བྱའོ། །མཆོད་པའི་ཏིང་ངེ་འཛིན་དང་ཡིད་ཀྱིས་མཆོད་པ་དེ་དག་ནི་ཡི་གེ་འཁོར་ལོ་བསྐོར་བར་དཀྱིལ་འཁོར་དང་གསང་བའི་དཀྱིལ་འཁོར་དག་ཏུ་བལྟའོ། །མེ་ཏོག་དཀར་དང་དམར་སེར་དག །ཅེས་པ་ནས། ཡིད་དུ་འོང་བ་བལྟར་སྡུག་པ། །བཀྲ་ཤིས་ཀུན་ཏེ་ནན་ཏན་དུ། །མཁས་པས་སུ་ནི་མཆོད་པར་བྱ། །ཞེས་པའི་བར་དུ་མེ་ཏོག་གི་མཆོད་པ་རྣམ་པ་བཤད་དེ། དཀར་དང་དམར་དང་སེར་ཞེས་པ་ནི་མེ་ཏོག་གི་རིགས་སྤྱིར་སྨོས་པའོ། །པདྨོ་དང་ཨུཏྤལ་ཞེས་པ་ལ་སོགས་པ་ནི་སྤྱིར་སྨོས་པ་དེ་དག་ཉིད་ལས་སོ་སོའི་མིང་སྨོས་པའོ། །ཡིད་དུ་འོང་བ་ཞེས་པ་ནི་དྲི་ཞིམ་པའོ། །བལྟར་སྡུག་པ་ཞེས་པ་ནི་ཁ་དོག་དང་དབྱིབས་མཛེས་པའོ། །བཀྲ་ཤིས་པ་ནི་ལྷ་རྣམས་མཆོད་པ་དང་མི་འགལ་བ་ཞེས་པ་སྟེ། འདིར་ནི་མདོ་ཙམ་དུ་སྨོས་ཀྱི། འདིར་མིང་གིས་མ་སྨོས་པ་ལས་གཞན་དུ་ཡང་ཡིད་དུ་འོང་བ་དང་བཀྲ་ཤིས་པ་ལས་མཆོད་པར་བྱའོ་ཞེས་པའོ། །ཙནྡན་དང་ཨ་ཀ་རུ་ཞེས་པ་ནས། སྤོས་བཟང་རྣམས་ཀྱང་དབུལ་བར་བྱ། །ཞེས་པའི་བར་དུ་དྲིའི་མཆོད་པ་རྣམས་ཏེ། ཤིན་ཏུ་དྲི་ཞིམ་ཞིང་ཡིད་དུ་འོང༌། །ཞེས་པ་ནི་འདིར་མིང་གིས་སྨོས་པ་ལས་གཞན་ཡང་དྲི་ཞིམ་ཞིང་ཡིད་དུ་འོང་བ་ལ་སོགས་པ་དྲིའི་རིགས་རྣམས་གང་ཡང་རུང་བ་དབུལ་ལོ་ཞེས་པ་སྟེ། དེ་ལས་ཀྱང་ལ་ལ་ནི་གཅིག་ཏུ་སྦྱར། ལ་ལ་བསྡུས་ཏེ་སྦྱར་བར་ཤེས་པར་བྱའོ། །དྲིའི་མཆོད་པ་དབུལ་བར་ཡང་མེ་ཏོག་གི་མཆོད་པ་རྣམས་སྔོན་རོལ་དུ་དབུལ་བར་བྱའོ། །ཨ་ཀ་རུ་དང་ཐང་ཤིང་ཞེས་པ་ནས་གཞན་ཡང་བདུག་པ་སྣ་ཚོགས་པ་འཇིག་རྟེན་གྱིས་བསྒྲགས་པ་བཀྲ་ཤིས་ལ་ཚུལ་བཞིན་དུ་སྔགས་པས་གསོལ་ཅིག །ལྷའི་ཡིད་དུ་འོང་ཞེས་པའི་བར་དུ་བདུག་པའི་མཆོད་པ་རྣམས་བཤད་དེ། དེ་རྣམས་ཀྱང་ལ་ལ་ནི་གཅིག་ཏུ་སྦྱར། ལ་ལ་ནི་བསྡུས་ཏེ་སྦྱར་ཏེ་ཤེས་པར་བྱའོ། །གཞན་ཡང་བདུག་པ་སྣ་ཚོགས་པ་འཇིག་རྟེན་
གྱི་ཁམས་སུ་བསྒྲགས་པ་བཀྲ་ཤིས་པ་ཞེས་པ་ནི། འདིར་མིང་གིས་མ་སྨོས་པ་གཞན་དུ་འཇིག་རྟེན་དུ་གྲགས་པའི་བདུག་པ་སྣ་ཚོགས་ལྷ་རྣམས་ལ་མཆོད་པ་དང་མི་འགལ་བར་ཡང་རུང་བ་དབུལ་བར་བྱ་ཞེས་པའོ། །སེམས་དཔའ་ཆེན་པོ་དེ་ནས་ཡང་གཏོར་མའི་ལས་ཀྱི་ཆོ་ག་ཉོན་ཅིག་ཅེས་པ་ནས། ཞོ་དང་འོ་མ་རྒྱས་པར་རོ། །ཞེས་པའི་བར་དུ་བཤོས་ཀྱི་མཆོད་པ་རྣམས་བཤད་པ་སྟེ། དེ་རྣམས་ཀྱང་ཟས་དང༌། བཟའ་བ་དང༌། བཅའ་བ་དང་བཏུང་བའི་དངོས་པོར་ཤེས་པར་བྱ་སྟེ། དེའི་ཟས་ནིའོ་ཐུག་དང་འབྲས་ལ་སོགས་བའོ། །བཟའ་བ་ནི་ཁུར་བ་ལ་སོགས་པའོ། །བཅའ་བ་ནི་ཤིང་ཐོག་ལ་སོགས་པའོ། །བཏུང་བ་ནི་ཞོ་དང་འོ་མ་ལ་སོགས་པའོ། །རྒྱས་པའོ་ཞེས་པ་ནི་དེ་རྣམས་བཟང་ཞིང་མང་དུ་འབུལ་བའོ། །མར་མེ་བཟང་པོ་རྣམས་ཁྱད་ནི། །ཞེས་པ་ནས། ཤིན་ཏུ་དྲི་ཞིམ་པས་ཀྱང་གསོལ། །ཞེས་པའི་བར་དུ་མར་མེའི་མཆོད་བ་བཤད་པ་སྟེ། གཙང་མ་ཞེས་པ་ནི་ཉ་ཚིལ་ལ་སོགས་པ་བཙོག་པ་མེད་པ་དང༌། རས་ཀྱི་སྙིང་པོ་དྲི་མ་མེད་པ་ཞེས་པའོ། །ཕྱོགས་སུ་གདུགས་དང་བ་དན་རྣམས། །ཁ་དོག་སྣ་ཚོགས་བཟང་ཡང་བྲེ། །ཞེས་པ་ནི་དཀྱིལ་འཁོར་གྱི་ཕྱིའི་སྒོ་ཁར་གདུགས་དཀར་པོ་གཅིག་བཞག །ངོས་བཞི་གྲྭ་བཞིར་ཕྱོགས་སོ་སོར་ཁ་དོག་དང་མཐུན་པའི་བ་དན་རྣམས་བསྒྲེང་བར་བྱའོ་ཞེས་པའོ། །རྟ་བབས་བཟང་པོ་རྣམས་ཀྱང་ནི། །དྲིལ་དང་བཅས་ཏེ་རབ་ཏུ་དབུལ། །ཞེས་པ་ནི་ཕྱིའི་སྒོ་ཁར་ཤིང་ལ་སོགས་པ་ལས་བྱས་པའི་རྟ་བབས་བཟང་པོ་དྲིལ་བུ་དག་གིས་བརྒྱན་པ་ཞེས་པའོ། །དེ་ནས་བུམ་བ་རྣམས་བླང་བ། །ཞེས་པ་ནས། གོས་རྣམས་ཀྱིས་ནི་མགྲིན་པ་བཅིངས། །མཁས་པ་ཡིས་ནི་རྣམ་པར་བཀོད། །ཅེས་པའི་བར་ཏེ་བུམ་པ་རྣམས་དབུལ་ཏེ་ནག་པོ་ལ་སོགས་པའི་སྐྱོན་མེད་པར་གཞུང་ལས་བྱུང་བའི་མཚན་ཉིད་དང་ལྡན་པ་དབུལ་ཏེ། དེ་རྣམས་གསང་བའི་རྒྱུད་ལས་འབྱུང་བ་བཞིན་དུ། ལྷ་རྣམས་སོ་སོ་ལ་བསྔོ་བར་མི་བྱ་བར་སྤྱིར་དགོད་པ་ནི་བྱང་ཆུབ་སེམས་དཔའི་སྔགས་ཀྱིས་བཏབ་སྟེ། སློབ་མ་རྣམས་དབང་བསྐུར་བ་ལ་བླུགས་པར་བྱ་བའི་ཕྱིར། གཙོ་བོ་ལྷ་རྣམས་ཀུན་ལ་ནི། །གོས་ཟུང་རེ་ནི་དབུལ་བར་བྱ། །ཞེས་པ་ནི་དཀྱིལ་འཁོར་རིམ་པ་
གསུམ་ཆར་གྱི་སྒོ་ཁྱུད་རྣམས་ཀྱི་ནང་ན་བཞུགས་པའི་གཙོ་བོ་རྣམས་དང༌། བཅོམ་ལྡན་འདས་རྣམ་པར་སྣང་མཛད་དབུས་ན་བཞུགས་པ་ལ་རས་ཟུང་རེ་རེ་དབུལ་ལོ་ཞེས་པའོ། །ཐམས་ཅད་ལ་ཟུང་རེ་མི་འབྱོར་ན་སྤྱིར་ཟུང་གཅིག་དབུལ་བར་བྱའོ། །སེམས་དཔའ་ཆེན་པོ་ཕལ་རྣམས་ལ།། ཡ་རེ་བར་ནི་བསྒྲགས་པ་ཡིན། །ཞེས་པ་ནི་དཀྱིལ་འཁོར་གྱི་ལྷ་ཕལ་རྣམས་ལ་ཡ་རེ་དབུལ་ཞེས་པ་སྟེ། ཐམས་ཅད་ལ་རེ་རེ་མ་འབྱོར་ན་ཡང་སྤྱིར་ཡ་གཅིག་དབུལ་བར་ཤེས་པར་བྱའོ། །ད་རྣམས་ཀྱང་བུམ་པའི་མགྲིན་པ་དཀྲི་བ་མ་གཏོགས་པར་གཞན་དུ་རིག་པར་བྱའོ། །སློབ་མ་དཀྱིལ་འཁོར་དྲུང་དགུག་སྟེ། །སྔགས་པ་ཡིས་ནི་ཆུས་ཐོབ་ཅིག །ཅེས་པ་ནས། དེ་བཞིན་སློབ་མ་ཀུན་ཚུད་ཅིག །ཅེས་པའི་བར་དུ་སློབ་མ་རྣམས་དཀྱིལ་འཁོར་དུ་གཟུད་པའི་ཆོ་ག་སྟེ། དེ་ཡང་སློབ་དཔོན་སྔར་མཆོད་པ་ན་ལས་ཀྱི་རྡོ་རྗེ་སེམས་དཔར་བསྒྱུར་བ་ལས་སློབ་མ་འཛུད་པའི་ཚེ་འོག་ནས་འབྱུང་བའི་སློབ་དཔོན་གྱི་ཏིང་ངེ་འཛིན་དུ་བསྒྱུར་ཏེ། ཐོག་མ་ཉིད་དུ་དཀྱིལ་འཁོར་གྱི་ཕྱི་རའི་སྒོར་ཁམས་གསུམ་རྣམ་པར་རྒྱལ་བས་བསྔགས་པའི་བུམ་པའི་ཆུས་སློབ་མ་རྣམས་བགེགས་བསལ་བའི་ཕྱིར་གཏོར་ཏེ། སློབ་མ་རྣམས་གདོང་གཡོགས་པའི་རས་ལ་དམ་ཚིག་གསུམ་གྱི་ཕྱག་རྒྱ་བཅིངས་ཏེ། དམ་ཚིག་གསུམ་གྱི་སྔགས་ལན་གསུམ་བཟླས་པས་སློབ་མའི་གདོང་གཡོགས། །དེ་ནས་སློབ་མའི་ལག་པར་དྲི་དང་མེ་ཏོག་བྱིན་ལ་བྱང་ཆུབ་ཀྱི་སེམས་བསྐྱེད་དེ། དེ་ནས་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་དབྱིངས་སུ་བྱིན་གྱིས་བརླབ། དེ་ནས་ཆོས་ཀྱི་དབྱིངས་ཀྱི་འཁོར་ལོའི་ཕྱག་རྒྱ་དང་སྔགས་དང༌། རྡོ་རྗེ་གོ་ཆའི་སྔགས་ཀྱིས་སློབ་མ་དེ་རྡོ་རྗེ་སེམས་དཔར་བྱིན་གྱིས་བརླབས་ལ། སྤྱི་བོར་ཆོས་ཀྱི་དབྱིངས་ཀྱི་ཡི་གེ་རཾ་ཁ་དོག་དཀར་པོ་ཀླད་ཀོར་དང་བཅས་པ་འབར་བ་ཅན་བསམ། དེ་ནས་དམ་ཚིག་གསུམ་གྱི་ཕྱག་རྒྱ་བཅིངས་ཏེ། དེའི་སྔགས་ཟློས་སུ་བཅུག་ལ་མེ་ཏོག་འདོར་དུ་བཅུག །དེ་ནས་མེ་ཏོག་གར་བབས་པའི་ལྷ་སློབ་མ་དེ་ལ་བྱི་ན་ཏེ། དེ་ནས་དཀྱིལ་འཁོར་ལན་གསུམ་བསྐོར་དུ་གཞུག་སྟེ། དེ་རྣམས་ནི་དཀྱིལ་འཁོར་དུ་གཟུད་པའི་ཆོ་ག་རིམ་པ་མདོར་སྨྲས་པའོ། །ཡན་ལག་སོ་སོར་བཤད་པ་ནི།།
བྱང་ཆུབ་སེམས་ཀྱང་འཛིན་དུ་གཞུག །ཅེས་པའི་སྨོན་ལམ་གྱིས་བྱང་ཆུབ་ཀྱི་སེམས་འཛིན་དུ་གཞུག་ཅེས་པའོ། །དེ་བཞིན་གཤེགས་པ་དྲན་པར་བྱ། །ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་བདག་ལ་དགོངས་ཞེས་སྨྲ་བར་བྱ་བ་སྟེ། སྨོན་ལམ་གྱིས་བྱང་ཆུབ་ཏུ་སེམས་བསྐྱེད་པ་ཡང་སངས་རྒྱས་དང་བྱང་ཆུབ་སེམས་དཔའ་རྣམས་བདག་ལ་དགོངས་ཤིག །བདག་མིང་འདི་ཞེས་བགྱི་བས་དུས་འདི་ནས་བཟུང་ནས། ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ་རང་གི་སེམས་ཐོག་མ་ནས་མ་སྐྱེས་པ་སྟོང་པ་ཉིད་ཀྱི་རང་བཞིན་ཇི་ལྟར་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་དེ་རྣམས་ཀྱིས་བྱང་ཆུབ་ཏུ་སེམས་བསྐྱེད་པ་དེ་ལྟར་བདག་གིས་ཀྱང་བྱང་ཆུབ་ཏུ་སེམས་བསྐྱེད་དོ་ཞེས་པའོ། །དེ་ནས། ཐམས་ཅད་སྐྱེ་བར་འགྱུར་བ་ནི། །སྐྱེ་བ་རྒྱལ་བའི་རིགས་དགེ་ལའོ། །ཞེས་པ་ནི་དེ་ལྟར་སྨོན་ལམ་གྱིས་བྱང་ཆུབ་ཀྱི་སེམས་བསྐྱེད་པས་ས་བོན་བཏབ་པའི་སྒོ་ནས་རྒྱལ་བའི་རིགས་དགེ་བ་ལ་སྐྱེ་བར་འགྱུར་ཏེ། རྒྱལ་བའི་རིགས་ཞེས་པ་ནི་ཐབས་དང་ཤེས་རབ་ཏུ་ལྡན་པ་སྟེ། དེ་ལ་ཤེས་རབ་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ཆོས་ཐམས་ཅད་སྟོང་པ་ཉིད་ཀྱི་རང་བཞིན་ནོ། །ཐབས་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་ཏེ། དེ་བཞིན་གཤེགས་པ་རྣམས་ཀྱང་དེ་ལས་བྱུང་བས་ན་དེ་ནི་རྒྱལ་བའི་རིགས་ཞེས་བྱའོ། །དེ་དག་ཕྱག་རྒྱ་བཅིངས་པ་ནི་ཆོས་ཀྱི་དབྱིངས་ལས་བྱུང་བའོ་ཞེས་པ་ནི། འཇུག་པའི་བྱང་ཆུབ་ཀྱི་སེམས་དང་གནས་པའི་བྱང་ཆུབ་ཀྱི་སེམས་བསྐྱེད་པ་དེ། ཆོས་ཀྱི་དབྱིངས་སྟོང་པ་ཉིད་ཀྱི་སྔགས་དང་ཕྱག་རྒྱ་དེས་སློབ་མ་དེ་སྟོང་པ་ཉིད་དུ་བྱིན་གྱིས་བརླབ་བོ། །ཆོས་ཀྱི་འཁོར་ལོ་ལས་དེ་བཞིན་དུ། རྡོ་རྗེ་སེམས་དཔར་བྱིན་གྱིས་བརླབ། །ཅེས་པ་ནི། དེ་ལྟར་སྟོང་པ་ཉིད་ཀྱི་རང་བཞིན་དུ་ཆུད་ནས་སླར་ཀུན་རྫོབ་ཀྱི་སྒོ་ནས་སེམས་ཅན་རྣམས་ལ་ཆོས་ཀྱི་འཁོར་ལོ་བསྐོར་བའི་ཕྱིར། ཆོས་ཀྱི་འཁོར་ལོའི་སྔགས་དང་ཕྱག་རྒྱས་སློབ་མ་རྡོ་རྗེ་སེམས་དཔའི་སྐུར་བསྒྱུར་རོ། །རྡོ་རྗེ་སེམས་དཔའ་ཞེས་པ་ནི་གང་གི་སེམས་རྡོ་རྗེ་དང་འདྲ་བར་བརྟན་པ། ཅིས་ཀྱང་ཟིལ་གྱིས་མི་ནོན་པ་
སྟེ། དེ་ཡང་ཟླ་བའི་དཀྱིལ་འཁོར་གྱི་ནང་དུ་བཞུགས་པ། ཟླ་བའི་དཀྱིལ་འཁོར་འོད་ཀྱི་དཀྱིལ་འཁོར་དང་ལྡན་པ། དབུ་རྒྱན་དང་ལྡན་པ་རྒྱན་སྣ་ཚོགས་ཀྱིས་བརྒྱན་པའི་སྐུའོ། །དེའི་སྙིང་གར་ཡང་རྡོ་རྗེ་རྩེ་ལྔ་པ་ཡེ་ཤེས་ལྔའི་རང་བཞིན་ཟླ་བའི་དཀྱིལ་འཁོར་ལ་གནས་པར་བསམ་པར་བྱའོ། །སངས་རྒྱས་ཀུན་གྱི་དམ་ཚིག་ནི། །བཅིང་བ་དེ་ནས་སྔགས་པ་རང་གིས་ནན་ཏན་གྱིས། གོས་ལ་ལན་གསུམ་གདབ་པ་ཡང༌། །སྔགས་ཀྱིས་དེ་ཚེ་ཆོ་ག་བཞིན། །ཞེས་པ་ནི་གདོང་དགབ་པའི་རས་ལ་སྔགས་པ་ཉིད་ཀྱིས་དམ་ཚིག་གསུམ་གྱི་ཕྱག་རྒྱ་དང་སྔགས་ཀྱིས་གདབ་སྟེ། དེ་ཡང་སྐབས་འདིར་སྨོས། མོད་ཀྱི་ལས་འདི་རྣམས་ཀྱི་དང་པོར་ཤེས་པར་བྱའོ། །དེ་དག་རྣམས་ཀྱི་གདོང་ཁོབ་ཅིག་ཅེས་པ་ནི། དམ་ཚིག་གིས་བཏབ་པའི་རས་དེས་སློབ་མ་དེ་རྣམས་ཀྱི་གདོང་དགབ་པར་བྱ་སྟེ། གདོང་དགབ་པ་དེ་ཡང་དེ་དག་སྔར་རང་བཞིན་གྱིས་མིག་ཏུ་འདུག་པ་ལས། དམ་ཚིག་གི་སྔགས་དང་ཕྱག་རྒྱས་བྱིན་གྱིས་བརླབས་པས་བཀབ་ནས་ཡེ་ཤེས་ཀྱི་མིག་ཏུ་བསྒྱུར་བར་འགྱུར་ཏེ། ཡེ་ཤེས་ཀྱི་མིག་དེ་ཕྱེ་ནས་བཅོམ་ལྡན་འདས་ཀྱི་སྐུ་མི་ཟད་པའི་རྡོ་རྗེའི་རྒྱན་གྱི་དཀྱིལ་འཁོར་དེ་བསྟན་པའི་ཕྱིར་རོ། །སྙིང་རྗེར་སོང་བའི་ཡིད་ཀྱིས་ཏེ། །ཞེས་པ་ནི་སྙིང་རྗེ་དང་ལྡན་པར་བྱ་བའི་ཕྱིར། དེ་ཁེ་དང་བཀུར་སྟིའི་ཕྱིར་མ་ཡིན་ནོ་ཞེས་པའོ། །ལན་གསུམ་དམ་ཚིག་ཟློས་སུ་གཞུག །ཅེས་པ་ནི་མེ་ཏོག་འདོར་དུ་གཞུག་ཅེས་པ་དང་སྦྱར་ཏེ། དམ་ཚིག་གསུམ་གྱི་ཕྱག་རྒྱ་བཅིངས་ལ་སྔགས་ཀྱང་ལན་གསུམ་བཟླས་ཏེ་མེ་ཏོག་འདོར་དུ་གཞུག་གོ །དམ་ཚིག་གསུམ་ཞེས་པ་ནི་བཅོམ་ལྡན་འདས་ཀྱི་སྐུ་མི་ཟད་པ་དང༌། གསུང་མི་ཟད་པ་དང༌། ཐུགས་མི་ཟད་པའི་རྡོ་རྗེའི་རྒྱན་གྱི་དཀྱིལ་འཁོར་ཏེ། དེའི་བྱིན་གྱི་རླབས་སུ་གྱུར་པ་ནི་དམ་ཚིག་གི་སྔགས་དང་ཕྱག་རྒྱ་སྟེ། ཕྱག་རྒྱ་བཅིངས་ཤིང་དེའི་སྔགས་ལན་གསུམ་བཟླས་ན། སྐུ་ལ་སོགས་པ་མི་ཟད་པའི་རྡོ་རྗེ་རྒྱན་དེ་མཐོང་བར་འགྱུར་རོ། །དེ་བས་ན་སྔགས་པ་རྟག་ཏུ་ཟློས་པ་ལ་སོགས་པ་བྱེད་པའི་ཚེ་ཡང་དམ་ཚིག་གསུམ་གྱི་ཕྱག་རྒྱ་བཅིངས་ཏེ། སྔགས་ལན་གསུམ་བཟླས་ན། དམ་ཚིག་ཉམས་པ་ལ་སོགས་པ་སླར་འཚོ་བར་འགྱུར་རོ། །སྤྱི་བོར་ཡི་གེ་གཞག་པ་ནི། །ཀླད་ཀྱི་འཁོར་དང་བཅས་པ་སྟེ། །འབར་
བའི་ཕྲེང་ཟེར་འབྱུང་བཞིན་དུའམ། །ཞེས་པ་སྟེ། ཁ་དོག་དཀར་བ་ཟླ་བ་ཤར་བ་བཞིན་དུའོ་ཞེས་པ་ནི། སློབ་མའི་སྤྱི་བོར་ཡི་གེ་ར་ཆོས་ཀྱི་དབྱིངས་ཀྱི་ཡེ་ཤེས་བསམ་སྟེ། ར་ནི་ཤེས་བྱ་དང་ཉོན་མོངས་པའི་སྒྲིབ་པ་དང་བྲལ་བའི་རང་བཞིན་ནོ། །ཀླད་ཀོར་བཞག་པ་ནི་སྟོང་པ་ཉིད་ཀྱི་རང་བཞིན་ནོ། །འབར་བའི་ཕྲེང་དང་བཅས་པ་ནི་རྒྱུའི་ཡེ་ཤེས་ཀྱི་རང་བཞིན་ནོ། །ཟླ་བ་ཤར་བ་དང་འདྲ་བ་ནི་ཟླ་བ་འཆར་བའི་ཚེ། རང་བཞིན་དཀར་བ་ལ་ཅུང་ཟད་དམར་པོ་བསྟན་པ་སྟེ་དཀར་བ་ནི་རང་བཞིན་གྱིས་དག་པའོ། །རྩ་དམར་བ་ནི་སེམས་ཅན་གྱི་དོན་ལ་ཆགས་པའོ། །དེ་ནས་མེ་ཏོག་འཐོར་ཆུག་ཅིག །མགོན་པོ་ཀུན་གྱི་སྤྱན་སྔར་ཏེ། །མེ་ཏོག་དེ་ནི་གང་ལྷུང་བ། །སྔགས་མཁན་གྱིས་ནི་དེ་བྱིན་ཅིག །ཅེས་པ་ནི་སྔོན་དཀྱིལ་འཁོར་དུ་མ་ཞུགས་ཤིང་ལྷ་མ་མནོས་པའམ། དཀྱིལ་འཁོར་དུ་ཞུགས་ཤིང་ལྷ་མ་མནོས་པའམ། ལྷ་མནོས་ཏེ་བཏང་བ་རྣམས་གདོད་ལྷ་མནོས་པར་བྱ་ན་མེ་ཏོག་གདོད་དེ་ལྟར་དོར་བར་བྱ། དེ་ལྟར་ལྷ་མནོས་ཟིན་ཏེ། གདོད་མནོས་མི་དགོས་ན། གདོང་གཡོགས་བཀྲོལ་ལ་མེ་ཏོག་དེ་བདག་གི་ལྷའམ་བཅོམ་ལྡན་འདས་རྣམ་པར་སྣང་མཛད་ལ་དབུལ་བར་བྱ་སྟེ། དེ་དག་ཀྱང་ཞིབ་ཏུ་ནི་བསྡུས་པའི་དོན་དུ་བཤད་ཟིན་ཏོ། །མེ་ཏོག་བོར་ནས་ལྷ་གང་ལ་བབ་པ་དེའི་ཆ་བརྟག་པ་ཡང་ཞིབ་ཏུ་གསང་བའི་རྒྱུད་ཀྱི་ནང་དུ་བལྟའོ། །དཀྱིལ་འཁོར་དང་པོའི་སྒོ་རུ་སྟེ། །སྒོ་ཁྱུད་ཀྱི་ནི་དབུས་ཀྱི་ཆ། །སྒོ་གཉིས་ཀྱི་ནི་བར་དེར་ཡང༌། །སློབ་མ་དེར་གཟུད་དཀྱིལ་འཁོར་གྱི། །དེར་འདུག་པ་ནི་ཆོ་ག་ཀུན། །རིམ་བཞིན་དེ་རྣམས་ཆུད་པར་བྱའོ། །ཞེས་པ་ནི་དཀྱིལ་འཁོར་གསུམ་པའི་སྒོ་ཁྱུད་ཀྱི་དབུས་སུ་སློབ་མ་དེར་གཟུང་སྟེ། དེར་གནས་ནས་གོང་དུ་སྨོས་པའི་ལས་ཐམས་ཅད་བྱ་སྟེ། སྒོ་ཁར་སློབ་མ་ལ་ཆུ་གདབ་པ་འབའ་ཞིག་མ་གཏོགས་སོ། །དཀྱིལ་འཁོར་གྱི་ནང་དུ་མ་ཞུགས་པར་སྒོ་ཁ་ནས་ལས་དེ་རྣམས་བྱ་བ་ཡང༌། ལྷ་རྣམས་ལ་མེ་ཏོག་འདོར་ན་ཡང་སྒོ་ཁ་ན་བོར་ན་ནང་དུ་འབབ་པར་འགྱུར་གྱི། །ནང་དུ་ཞུགས་ཏེ་བོར་ན་ལྷ་ཁ་ཅིག་རྒྱབ་ཏུ་ལུས་པར་འགྱུར་ལ། བདག་ནང་དུ་ཞུགས་ཏེ་བོར་ན་མེ་ཏོག་ཕྱི་རོལ་དུ་བབ་པར་འགྱུར་བའི་ཕྱིར་རོ། །གཉིས་སུ་
ན་གོང་དུ་སྐྱོབ་པ་རྣམས་ཀྱི་སྤྱན་སྔར་ཞེས་ཀྱང་འབྱུང་བས། བདག་ནང་དུ་ཞུགས་ན་ཁ་ཅིག་གི་སྤྱན་སྔར་ཀྱང་མི་འགྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཁ་ཅིག་ལ་རྒྱབ་ཀྱིས་བལྟ་བར་མི་རིགས་པའི་ཕྱིར་རོ། །གསུམ་དུ་ན་འདི་ནི་ཆོས་ཀྱི་རྒྱལ་པོའི་འཁོར་བས་ཐོག་མ་ནང་དུ་ཞུགས་ན་ཀོ་ལོང་དུ་འགྱུར་ཏེ། རྒྱལ་པོའི་ཆོས་དང་འགལ་བའི་ཕྱིར་རོ། །དེ་བཞིན་སློབ་མ་ཀུན་ཆུང་ནས་ཐམས་ཅད་རྟོག་པ་དང་བྲལ་བའོ། །དེ་དག་རྣམས་ལ་ཞིར་བྱས་ནས། །ཞེས་པ་ནས་སྔགས་པ་འོག་མའི་བར་དུ་དཀྱིལ་འཁོར་དུ་ཆུད་པའི་སློབ་མ་དེ་རྣམས་ཞི་བར་བྱ་བའི་ཕྱིར་ཞི་བའི་སྦྱིན་སྲེག་བྱ་སྟེ། སློབ་མ་རྣམས་དཀྱིལ་འཁོར་དུ་ཞུགས་པས་སྡིག་པ་རྣམས་བྱང་ཞིང་རྒྱུད་དག་པ་དེས། བཅོམ་ལྡན་འདས་ཀྱི་སྐུ་མི་ཟད་པའི་རྡོ་རྗེའི་རྒྱན་ལ་སོགས་པ་ལ་སྦྱིན་སྲེག་གི་སྒོ་ནས་ཡོན་ཕུལ་ན། བསོད་ནམས་འཕེལ་ཏེ་སྡིག་པ་བྱང་བས་ཞི་བར་འགྱུར་རོ། །དེའི་རིམ་པ་ཡང་ཐོག་མའི་སྙིང་པོའི་དཀྱིལ་འཁོར་གྱི་སྔོན་རོལ། དཀྱིལ་འཁོར་བར་མའི་སྒོའི་ཕྱི་རིམ་གསུམ་པོའི་ནང་རོལ་དུ་ཞུགས་ཏེ་ཐབ་ཁྲུ་གང་བ་བྱ། དེ་སྟེ་དཀྱིལ་འཁོར་ཆུད་དེ་ནང་དུ་མི་ཤོད་ན་དཀྱིལ་འཁོར་གྱི་ཕྱི་རིམ་གྱི་སྒོ་ཁར་བྱ། ཁང་ཐོག་ལ་སོགས་པར་བརྐོར་མི་རུང་ན། ཚོན་དམར་པོས་ཞུགས་ཐབ་དེ་བྲི་བར་བྱ་སྟེ། དེ་ནས་ཞུགས་ཐབ་དེའི་མཐའ་མར་ཀུ་ཤ་ལྷོ་ཕྱོགས་ནས་བརྩམས་ཏེ་བསྐོར་བའི་ཐབ་ཏུ་དགྲམ་པ་ནི། རྩྭ་གཅིག་གི་རྩ་བས་གཅིག་གི་མགོ་ནོན་པར་བྱས་ཏེ་བསྐོར་རོ། །དེ་བས་ན་ཁམས་གསུམ་རྣམ་པར་རྒྱལ་བས་བསྔགས་པའི་སྤོས་ཆུས་དེར་བཏབ་བོ། །དེ་ནས་ཞུགས་ཐབ་དེར་འཇིག་རྟེན་པའི་ཏྲི་ཏ་ཞེས་བྱ་བ་ལས་ཐམས་ཅད་བྱེད་པ་མགྲིན་པ་རིང་ལ་སྤུ་ཅན། ཁ་དོག་ཁམ་པར་འདུག་པ། མེ་ཏོག་གཅིག་ཞུགས་ཐབ་དེར་བོར་ལ་མེ་དེ་བྱིན་གྱིས་བརླབ་པར་བྱའོ། །དེ་ནས་མེ་དེ་ཁ་བཀྲུ་བ་དང༌། གང་བའི་སྦྱིན་སྲེག་གཞུང་ལས་འབྱུང་བ་བཞིན་དུ་བྱིན་ནས། དེ་ཉིད་དུ་འབར་བཞིན་དུ་བཞག་ལ། དེ་ནས་འཇིག་རྟེན་ལས་འདས་པའི་ཞི་བའི་མེ་ཞུགས་ཐབ་དེར་མེ་ཏོག་གཅིག་བོར་ནས་བྱིན་གྱིས་བརླབས་ཏེ་ཁ་བཀྲུ་བ་དང༌། གང་བའི་སྦྱིན་སྲེག་ལ་སོགས་པ་སྔ་མ་བཞིན་དུ་བྱས་ནས་སློབ་མ་རེ་རེའི་ཕྱིར་ཡང་སྦྱིན་སྲེག་ལན་ཉི་ཤུ་རྩ་རེ་
རེ་བྱ་བ་ནི། སློབ་མའི་ལག་བ་གཡས་བའི་མཐེ་བོང་ནས་སློབ་དཔོན་གྱིས་ལག་པ་གཡོན་པས་བཟུང་སྟེ་བྱའོ། །འདི་ནི་བསྡུས་པའི་དོན་ཏོ། །ཡན་ལག་གི་དོན་བཤད་པ་ནི། རྟོག་པ་ཀུན་དང་བྲལ་བའོ། །ཞེས་པ་ནི་སློབ་མ་དེ་རྣམས་དཀྱིལ་འཁོར་དུ་གཞུག་པར་སྦྱོར་ན། སྐྱབས་གསུམ་ལ་སོགས་པར་སོང་བ་དང༌། དཀྱིལ་འཁོར་དུ་ཞུགས་ནས་བྱང་ཆུབ་ཏུ་སེམས་བསྐྱེད་པ་དང༌། ཞུགས་ནས་ཀྱང་ཕྱིས་སྔགས་ཀྱི་སྤྱད་པ་སྤྱོད་པ་སྦྱོར་བ་དང༌། རྩ་བ་དང༌། ཕྱི་མ་གསུམ་དག་སྟེ་རྟོག་པ་དང་བྲལ་བའོ། །སྦྱིན་སྲེག་ཚུལ་ནས་སྦྱིན་སྲེག་བྱ། །ཞེས་པ་ནི་སྦྱིན་སྲེག་གི་ཆོ་ག་གཞུང་ལས་ཇི་སྐད་གསུངས་པ་བཞིན་དུ་བྱ་བ་སྟེ་འོག་ནས་འབྱུང་བར་བལྟའོ། །སྙིང་པོའི་དཀྱིལ་འཁོར་ནི་སྔོན་རོལ་དུ་གཉིས་པོ་ཡང་རྒྱབ་ཏུ་སྟེ། དཀྱིལ་འཁོར་བར་མའི་དབུས་སུ་ནི། །མ་ཡེངས་པ་ཡི་སེམས་ཀྱིས་སུ། །ཁྲུ་གང་ཙམ་དུ་བྱ་བ་ནི། །མེ་ཡི་ཞུགས་ཐབ་བསྒྲགས་པ་ཡིན། །ཞེས་པ་ནི་གོང་དུ་བཤད་ཟིན་ཏོ། །འདིར་ཚད་འགའ་ཞིག་ཁྲུ་གང་དུ་གསུངས་ཀྱི་ཟླུམ་པོའམ་གྲུ་བཞིར་བྱ་བ་མ་སྨོས་ཀྱང་ཞི་བ་དང་རྒྱས་པའི་ཞུགས་ཐབ་ཇི་ལྟར་གྲགས་པ་ལྟར་བྱ་སྟེ། འདིའི་སྐབས་སུ་ཞི་བའི་ལས་པས་ཟླུམ་པོར་འོས་སོ། །ཡང་ན་ཞི་བ་དང་རྒྱས་པ་གཉིས་སུ་མཐུན་ན་གྲུ་བཞི་ཡང་ཉེས་པ་མེད་དོ། །ཁ་རན་སོར་བཞིའི་ཚད་དུ་ཞེས་པ་ནི་ཞུགས་ཐབ་གྲུ་བཞི་ན་ཁ་རན་ཡང་གྲུ་བཞིར་བྱ། ཞུགས་ཐབ་ཟླུམ་པོ་ན་ཁ་རན་ཡང་ཟླུམ་པོར་བྱའོ། །དབུས་སུ་ཡང་ནི་རྡོ་རྗེ་བྲི། །ཞེས་པ་ནི་ཡེ་ཤེས་ལྔའི་ཕྱག་རྒྱར་གྱུར་བ་རྡོ་རྗེ་རྩེ་ལྔ་པ་བྲིའོ། །སྔགས་པ་ཡི་ནི་གཡས་ལོགས་སུ། །སྤྱིན་སྲེག་གི་ནི་ཡོ་བྱད་བཞག །གཡོན་ལོགས་སུ་ནི་སློབ་མ་དགོད། །ཅེས་པ་ནི་བསྲེག་པར་བྱ་བའི་རྫས་རྣམས་སྔགས་པའི་གཡས་སུ་གཞག་གོ །གཡོན་དུ་སློབ་མ་དགོད་པ་ནི་སློབ་མའི་གཡས་སུ་སློབ་དཔོན་འབབ་སྟེ། སློབ་དཔོན་དེ་སློབ་མ་ལ་ཕན་འདོགས་པས་རྗེས་སུ་མཐུན་པ་བསྟན་ཏོ། །ཀུན་ཀྱང་ཅོག་བུར་འདུག་པར་བྱ། །ཞེས་པ་ནི་ཚུལ་གྱི་ལས་རྣམས་མ་ཟིན་ན་བག་ཕབ་སྟེ་འདུག་པའམ་གུས་པ་བསྟན་པའོ། །བདག་ནི་འཇག་མའི་རྩྭ་བཏིང་བའི་སྟེང་དུ་སྟེ། དེར་འདུག་ཤིག་པ་ནི་སློབ་དཔོན་ཉིད་རྩྭ་ཀུ་ཤ་བཏིང་བའི་སྟང་དུ་འདུག་པ་ལ་
བྱའོ། །ཡང་ནི་ཚོན་རྩིས་བྲི་ཞེས་པ་ནས། སོ་སོའི་སྦྱིན་སྲེག་བྱ་བ་ནི། །ཉི་ཤུ་རྩ་གཅིག་བླུགས་ཤིང་སྲེག །ཅེས་པའི་བར་དུ་ནི་གོ་རིམ་བཞིན་དུ་གོང་དུ་བཤད་ཟིན་ཏོ། །ཡིད་ཐུབ་བྱམས་པར་བསམས་ལ་ནི། །ཞེས་པ་ནི་ཞི་བའི་ལས་ལ་ཚུལ་གྱིས་བྱམས་པར་བྱའོ། །སྦྱིན་སྲེག་བྱས་ནས་སྔགས་པ་ཡིས། །སློབ་མ་རྣམས་ལ་ཡོན་སློངས་ཤིག །ཅེས་པ་ནས་མཆོད་སྟོན་ཁྱེད་ཀྱིས་ཅི་ནུས་པར། དགེ་འདུན་གསོལ་བ་སངས་རྒྱས་ཀྱིས་བསྔགས་པ་ལའོ་ཞེས་པའི་བར་སློབ་མ་རྟོག་པ་སྦྱངས་པ་དེ་དག་བསོད་ནམས་ཀྱི་ཞིང་དམ་པ་ལ་སྦྱིན་པ་བྱེད་དུ་སློབ་དཔོན་གྱིས་གཞུག་སྟེ། ཕན་དམ་པ་འདོགས་པའི་སློབ་དཔོན་དེ་ལ་སློབ་མ་རྣམས་ཀྱིས་གུས་པར་ཡོན་ཕུལ་ན་བསོད་ནམས་མཆོག་ཏུ་འགྱུར་བའི་ཕྱིར། གསེར་དང་དངུལ་དང་རིན་པོ་ཆེ་ལ་སོགས་པ་དབུལ་བར་བྱའོ་ཞེས་བསྐུལ་མ་བཏབ་བོ། །དེ་ལྟར་སློབ་དཔོན་ལ་ཡོན་ཕུལ་ནས་ཀྱང་འཕགས་པའི་དགེ་འདུན་ནི་སྦྱིན་པའི་གནས་དམ་པ་སྟེ། འཕགས་པའི་དགེ་འདུན་ལ་ཡོན་ཕུལ་བ་དང༌། མཆོད་སྟོན་གསོལ་བར་བྱ་བ་བསྟན་པ་ནི། འདི་ནི་བསོད་ནམས་ཞིང་ཡིན་ཏེ། །མགོན་པོ་རྣམས་ཀྱིས་གསུངས་པ་སྟེ། །ཞེས་པ་ལ་སོགས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་དབང་བསྐུར་བ། །དེ་ནི་རྒྱས་པར་བཤད་པར་བྱ། །ཡང་དག་ཡིད་གཅིག་གིས་ལ་ཉོན། །སངས་རྒྱས་ཀུན་གྱིས་བཤད་པའོ། །ཞེས་པ་ནས། རྡོ་རྗེ་འཛིན་པ་དེ་ཀུན་གྱིས། །ཁྱོད་ལ་རྟག་ཏུ་སྲུང་བར་བྱེད། །ཅེས་པའི་བར་དུ་སློབ་མ་རྣམས་དབང་བསྐུར་བའི་སྐབས་འཆད་དེ། །དེ་ལ་མངོན་པར་དབང་བསྐུར་ཞེས་པ་ནི་བཅོམ་ལྡན་འདས་ཀྱི་སྐུ་དང་གསུང་དང་ཐུགས་མཉམ་པ་ཉིད་མི་ཟད་པའི་རྒྱན་རང་བཞིན་གྱི་དཀྱིལ་འཁོར་གྱི་བྱིན་གྱིས་བརླབས་སུ་འགྱུར་བའི་སྤྱན་སྔར་མངོན་སུམ་དུ་རིན་པོ་ཆེ་ལ་སོགས་པའི་བུམ་པར་ཆུ་བླུགས་བ་སྟེ། མངོན་པར་བླུགས་ཞེས་པ་ནི་ཚིག་གི་དོན་ཏོ། །དེ་ཡང་རྣམ་པ་གསུམ་དུ་བརྟག་པར་བྱ་བ་ནི་དབང་བསྐུར་བའི་མིང་ཇི་ལྟབ་དང༌། སུ་ལ་དབང་བསྐུར་བ་དང༌། ཅིའི་ཕྱིར་དབང་བསྐུར་བའོ། །ད་ལ་དབང་བསྐུར་བའི་མིང་ཇི་ལྟ་བ་ཞེས་པ་ནི་སྤྱིར་དབང་བསྐུར་བའི་རྣམ་པ་མང་སྟེ། སྤྱིར་
སྔགས་པར་བྱ་བའི་ཕྱིར་རིག་པ་སྦྱིན་པའོ། །ལས་ཀྱི་དབང་བསྐུར་བ་ནི་ཞི་བ་དང་རྒྱས་པ་དང་མངོན་པར་སྤྱོད་པའི་ལས་བྱ་བ་དང་གདོན་བསལ་བ་ལ་སོགས་པ་བྱ་བར་དབང་བསྐུར་བ་སྟེ། དེ་ལ་སྐབས་འདིར་ནི་སློབ་དཔོན་དུ་དབང་བསྐུར་བ་ཞེས་བྱ་བ་སྟེ་དེ་ནི་མིང་ངོ༌། །སུ་ལ་དབང་བསྐུར་བར་བྱ་ཞེས་པ་ནི། སློབ་མ་ཕལ་ཐམས་ཅད་ལ་དབང་བསྐུར་བར་བྱ་བ་མ་ཡིན་གྱི། ཁྱད་པར་ཅན་གྱི་སློབ་མ་དམ་ཚིག་ལྔའི་སྐབས་ནས་གསུངས་པ། སྔགས་དང་ཕྱག་རྒྱ་ཡང་བསྟན་ཞིང༌། ལས་དང་བྱ་བ་ལ་ཡང་རབ་ཏུ་སྦྱར་བར་བྱ་ཞེས་པ་སྟེ་སྔགས་ཀྱི་རྒྱུད་རྣམས་ཐོས་ཤིང༌། དཀྱིལ་འཁོར་ལ་སོགས་པ་བྲི་ནུས་པ་ཡོངས་སུ་རྫོགས་པའི་སློབ་མ་རྣམས་ལ་དབང་བསྐུར་ཏེ། སུ་ལ་དབང་བསྐུར་ཞེས་པ་ནི་དེ་རྣམས་ལ་དབང་བསྐུར་བའོ། །ཅིའི་ཕྱིར་དབང་བསྐུར་ཞེས་པ་ནི། ཆོས་ཀྱི་མིག་མི་འཚུབ་པར་བྱ་བའི་ཕྱིར་ཏེ། འཇིག་རྟེན་ན་ཡང་འཇིག་རྟེན་གྱི་གཙུག་ལག་ལུང་བསྟན་པ་དང་རྟོག་པ་དང་སྨན་ལ་སོགས་པ་རྣམས་ཀྱང་སློབ་མས་རྫོགས་པར་ལོབས་ནས། སློབ་དཔོན་གྱིས་དབང་བསྐུར་བའི་ཆོ་ག་འཇིག་རྟེན་པ་རྣམས་ལ་ཇི་ལྟར་སྲིད་པར་བྱས་ནས་བཤད་པ་ལ་སོགས་པ་བྱ་བར་སློབ་མ་ལ་ལུང་སྦྱིན་པ་སྲིད་དོ། །དེ་དག་ཀྱང་སོ་སོའི་གཙུག་ལག་རྫོགས་པར་མི་ཤེས་ཤིང་དབང་མ་བསྐུར་བར་བཤད་པ་ལ་སོགས་པ་བྱས་ན། གཙུག་ལག་དེ་དག་ཇི་ལྟ་བ་བཞིན་དུ་བཤད་མི་ནུས་པས་དེ་དག་གིས་མིག་མི་འཚུབ་པར་འགྱུར་བའི་ཕྱིར་རོ། །དེ་བཞིན་དུ་འདིར་ཡང་སློབ་མ་རྣམས་རྒྱུད་ལ་སོགས་པ་རྫོགས་པར་ཤེས་པར་བྱ་སྟེ། དེ་དག་ཉིད་སློབ་དཔོན་གྱིས་མངོན་སུམ་དུ་བསྐོར་ནས་རྒྱུད་བཤད་པ་དང༌། དཀྱིལ་འཁོར་བྲི་བ་ལ་སོགས་པ་ཇི་ལྟ་བ་བཞིན་དུ་ཤེས་པར་སློབ་དཔོན་ཉིད་ཀྱིས་ཡིད་ཆེས་ཏེ། སེམས་ཅན་གྱི་དོན་བྱེད་ནུས་པར་གྱུར་པ་རྣམས་ལ་དབང་བསྐུར་ན་ཆོས་ཀྱི་མིག་མི་འཚུབ་པར་འགྱུར་བའི་ཕྱིར་རོ། །གཉིས་སུ་ན་དེ་ལྟར་མངོན་པར་འདུས་པའི་སློབ་མ་དེས་སློབ་དཔོན་དུ་གྱུར་ན། འཇིག་རྟེན་པ་རྣམས་ཀྱང་ཁུངས་དེ་ལྟ་བུ་ལས་བྱུང་བའི་སློབ་དཔོན་དེ་ལ་ཡིད་ཆེས་ཤིང་བཙུན་པར་བྱེད་དོ། །རིམ་པ་འདི་ལྟ་བུར་དབང་མ་བསྐུར་བ་རྒྱུད་ལ་སོགས་པ་མི་ཤེས་པར་ཐུག་ཐུབ་ཏུ་སྔགས་ཀྱི་རྒྱུད་ལ་སོགས་པ་འཆད་ཅིང༌། དཀྱིལ་འཁོར་
འདྲི་ན་ཇི་ལྟ་བ་ཉིད་དུ་མི་ཤེས་པས་དོན་ལོག་པར་འགྱུར་ན། སྔགས་ཀྱི་ལྷ་ལ་སོགས་པས་ཀྱང་བྱིན་གྱིས་མི་རློབ་པས་ཅི་བསམས་པའི་དོན་མི་འགྲུབ་སྟེ། གདུལ་བའི་འགྲོ་བ་རྣམས་ཡིད་མི་ཆེས་ཤིང་མི་ཕྱོགས་པས་ཆོས་ཀྱི་མིག་འཚུབས་པར་འགྱུར་རོ། །ཅིའི་ཕྱིར་དབང་བསྐུར་ཞེས་པ་ནི་དེའི་ཕྱིར་རོ། །དེ་ལ་དབང་བསྐུར་བ་ཡང༌། ཇི་ལྟར་འཇིག་རྟེན་གྱི་རྒྱལ་པོ་དགེ་བ་བཅུའི་ལས་ཀྱི་ལམ་གྱི་བཀའ་ཁྲིམས་སྟོན་པ། མངོན་པར་འབྱུང་བའི་འབྲས་བུ་སྦྱིན་པར་བྱེད་པ་དེ་ཇི་ལྟར་རྒྱལ་ཐབས་སུ་བསྒྱུར་བར་བྱ་བ་དེ་བཞིན་དུ་བྱ་སྟེ། འདི་ཡང་མངོན་པར་འབྱུང་བ་དང༌། མ་ལུས་པའི་བདེ་བའི་འབྲས་བུ་སྦྱིན་པར་བྱེད་པའི་ཆོས་ཀྱི་རྒྱལ་པོར་དབང་བསྐུར་བའི་ཕྱིར་ཏེ། དེ་ཡང་རིམ་པ་འདི་ལྟར་བྱའོ། །ཐོག་མར་རྩ་བའི་དཀྱིལ་འཁོར་གྱི་མདུན་དུ་བར་ཁྲུ་དོས་བཅད་དེ། དེ་དབང་བསྐུར་བའི་དཀྱིལ་འཁོར་རིམ་པ་གཅིག་པ་སྒོ་གཅིག་པ་བྲིས་ལ། དེའི་ནང་པདྨ་འདབ་མ་བརྒྱད་པ་བྲིས་ཏེ། དཀྱིལ་འཁོར་གྱི་གྲྭ་བཞིར་རྡོ་རྗེ་འཛིན་པ་བཞི་བྲི། པདྨ་འདབ་མ་བརྒྱད་པ་ཡང་བྱང་ཆུབ་སེམས་དཔའ་བཞི་དང༌། ཅི་བགྱི་ཞེས་པ་བཞི་སྟེ་བརྒྱད་བྲི། པདྨོའི་དབུས་སུ་ཆོས་ཀྱི་དབྱིངས་ཀྱི་ཡི་གེ་རཾ་བྲིས་ལ་དེར་སློབ་མ་བཞག་སྟེ། དྲི་དང་མེ་ཏོག་ལ་སོགས་པའི་མཆོད་པ་དང་བཀྲ་ཤིས་པའི་ཚིགས་སུ་བཅད་པ་དང༌། གླེང་གཞི་རྒྱ་ཆེན་པོ་སྙན་པ་རྣམས་ཀྱིས་བསྒྲགས་ཤིང༌། ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའི་རྣམས་ཀྱིས་བྱིན་གྱིས་བརླབས་པའི་རིན་པོ་ཆེ་བཞིའི་བུམ་པ་དཀྱིལ་འཁོར་ཆེན་པོ་ལན་རེ་བསྐོར་ནས་སློབ་མ་དེའི་སྤྱི་བོ་ནས་བླུགས་སོ། །དེའི་འོག་ཏུ་འདིར་དངོས་ཀྱིས་མ་སྨོས་ཀྱང༌། །དེ་བཞིན་གཤེགས་པའི་གཙུག་ཏོར་དང༌། སྤྱན་དང༌། ལྕེ་དང༌། གོ་ཆ་རྣམས་ཀྱི་ཕྱག་རྒྱ་དང༌། སྔགས་ཀྱིས་ཀྱང་སློབ་མེད་མ་དེ་ལ་པདྨོའི་སྟེང་ན་འདུག་པ་ཉིད་ན་རིམ་པ་བཞིན་དུ་བྱིན་གྱིས་བརླབ་པར་བྱའོ།། དེ་ནས་གནས་དེ་ནས་བསླངས་ཏེ། དཀྱིལ་འཁོར་དེའི་ཉེ་འཁོར་དུ་ཁྲི་བཟང་པོ་གཅིག་གཞག་སྟེ། གོས་གཤེར་བ་བརྗེས་ནས་གསར་པ་ཕྲུགས་གཅིག་གོན་ནས་ཁྲི་སྟེང་དུ་གཞག་སྟེ་དྲི་དང་མེ་ཏོག་ལ་སོགས་པས་མཆོད་ནས། སློབ་དཔོན་ཉིད་མིག་ཕྱེ་བའི་ཐུར་མ་ཐོགས་ནས་མདུན་དུ་འདུག་སྟེ།
དེ་བཞིན་གཤེགས་པ་རྣམས་ཀྱིས་བུ་ཁྱོད་མི་ཤེས་པའི་རབ་རིབ་རྣམས་བསལ་ཏོ་ཞེས་པ་ལ་སོགས་པའི་ཚིག་བརྗོད་དོ། །དེ་ནས་མེ་ལོང་བླངས་ལ་ཆོས་རྣམས་གཟུགས་བརྙན་དང་འདྲ་སྟེ། རང་བཞིན་མེད་པའི་སྟོང་པ་ཉིད་ཀྱི་ཚུལ་དུ་སྒོམས་ཤིག་ཅེས་པའི་ཚིག་བརྗོད་དོ། །དེ་ནས་དེ་ལྟར་བདག་གི་དོན་ཡོངས་སུ་རྫོགས་ནས་ཕ་རོལ་གྱི་དོན་ཕུན་སུམ་ཚོགས་པར་བྱ་བའི་ཕྱིར་རྐང་པའི་འོག་ཏུ་གསེར་གྱི་འཁོར་ལོ་བཞག་སྟེ། ཆོས་ཀྱི་འཁོར་ལོ་བསྐོར་ཅིག་ཅེས་བསྒྲགས་སོ། །དེ་ནས་ཆོས་ཀྱི་འཁོར་ལོ་བསྐོར་བ་དེ་ཡང་སངས་རྒྱས་གསུང་མཆོག་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་གྲགས་པ་བསྐོར་བར་བྱ་སྟེ། གསུང་མཆོག་དེའི་ཕྱག་རྒྱར་གྱུར་པ་དུང་བཟང་པོ་ཅིག་ལག་པ་གཡོན་པར་བྱིན་ལ། ཆོས་ཀྱི་དུང་ཁྱོད་ཀྱིས་བྱིན་ཅིག་ཅེས་བརྗོད་དོ། །དེ་ལྟར་སེམས་ཅན་གྱི་དོན་བྱས་ནས་སངས་རྒྱས་རྣམས་ལ་བྱས་པ་ཤེས་པའོ་ཞེས་པ་ལ་སོགས་པའི་ཚིག་དེའི་འོག་ཏུ་བརྗོད་པར་བྱ་སྟེ། དེ་རྣམས་ནི་ལས་སུ་བྱ་བའི་རིམ་པ་བསྡུས་ཏེ་བཤད་པའོ། །ཡན་ལག་གི་དོན་སོ་སོར་བཤད་པ་ནི། སེམས་དཔའ་ཆེན་པོ་མངོན་པར་དབང༌། །བསྐུར་བ་རྒྱས་པ་རུ་ནི་བྱ། །ཡང་དག་ཡིད་གཅིག་གིས་ལ་ཉོན། །ཞེས་པ་ནི་མངོན་པར་དབང་བསྐུར་བ་ཞེས་པ་ནི་ཚིག་གི་དོན་གོང་དུ་བཤད་ཟིན་ཏོ། །རྒྱས་པ་རུ་ནི་བཤད་པར་བྱ། །ཞེས་བ་ནི་དབང་བསྐུར་བའི་ཆོ་ག་འོག་ནས་འབྱུང་བ་རྣམས་དང་ལྡན་པར་བཤད་དོ་ཞེས་པའོ། །སྔོན་གྱི་སངས་རྒྱས་རྣམས་ཀྱིས་བཤད་པའི་ཞེས་པ་ནི་སངས་རྒྱས་ཐམས་ཅད་མཉམ་པ་ཉིད་པས་བྱ་བ་གཅིག་ཏུ་བསྟན་པའོ། །དེ་ནས་གསང་བའི་བདག་པོ་ནང་གི་དཀྱིལ་འཁོར་གྱི་མདུན་དུ་ཕྱི་རོལ་གྱི་ཁྲུ་ངོ་བོར་ལ་དཀྱིལ་འཁོར་བྲི་བ་ནི། གྲུ་བཞི་པ་ལ་སྒོ་གཅིག་སྟེ། །ཞེས་པའི་དོན་གཞན་ནི་སྔར་བཤད་ཟིན་ཏེ། འདིར་དངོས་སུ་མ་སྨོས་ཀྱང་སྤྱིའི་མཚན་ཉིད་ལྟར་བྱས་ན། ནང་གི་དཀྱིལ་འཁོར་གྱི་ས་ཤར་ཕྱོགས་སུ་གཞོལ་ན་དབང་བསྐུར་བའི་དཀྱིལ་འཁོར་བྱང་ཕྱོགས་སུ་བྲི་བར་བྱ། ནང་གི་དཀྱིལ་འཁོར་བྱང་ཕྱོགས་སུ་གཞོལ་ན། དབང་བསྐུར་བའི་དཀྱིལ་འཁོར་ནུབ་ཕྱོགས་སུ་བྲི་བར་བྱ་སྟེ། འདིར་ནི་ནང་གི་དཀྱིལ་འཁོར་གྱི་མདུན་དུ་དབང་བསྐུར་བའི་དཀྱིལ་འཁོར་བྲི་བར་འཆད་པར་གསུངས་པས། དབང་བསྐུར་
བའི་ཆུས་ནང་གི་དཀྱིལ་འཁོར་ལ་ཆུ་མི་འབྱུང་བར་བྱ་བའི་ཕྱིར། ནང་གི་དཀྱིལ་འཁོར་གྱི་ས་བྱང་ཕྱོགས་སུ་གཞོལ་བར་བྱའོ། །འོན་ཏེ་ཤར་ཕྱོགས་སུ་གཞོལ་ན་ཡང་བར་ས་རྒལ་གྱིས་གཅད་པར་བྱའོ། །གྲྭ་བཞིར་རྡོ་རྗེ་འཛིན་པ་བཞི་གཞག་པར་བྱ་སྟེ་ཞེས་པ་ནི་རྡོ་རྗེ་འཛིན་པ་དེ་རྣམས་དང༌། འོག་ནས་བྱང་ཆུབ་སེམས་དཔའ་བཞི་དང༌། ཅི་བགྱི་ཞེས་པ་བཞི་འབྱུང་བ་རྣམས་ཀྱང་དེ་བཞིན་གཤེགས་པའི་ཡོན་ཏན་ལས་གྱུར་པ་སྟེ། འཕྲོ་བ་མེད་པར་སྤྱོད་པ་ཞེས་པའོ། །ནམ་མཁའ་དྲི་མེད་ཅེས་པ་ནི་སྟོང་པ་ཉིད་ཀྱི་སྤྱོད་ཡུལ་ནམ་མཁའ་དང་འདྲ་བ་སྟེ་ཤེས་བྱ་དང་ཉོན་མོངས་པའི་དྲི་མ་སྤངས་པའོ། །དྲི་མ་མེད་པའི་མིག་དང་ཞེས་པ་ནི་གཟུང་བ་དང་འཛིན་པའམ། ཤེས་བྱ་དང་ཉོན་མོངས་པའི་སྒྲིབ་པ་སྤངས་པའི་ཤེས་རབ་ཅན་ཞེས་པའོ། །སྣ་ཚོགས་གོས་འཆང་བ་ཞེས་པ་ནི་གོས་གཡོགས་པར་བྱེད་པ་བས་ངོ་ཚ་བ་སྟེ། གང་ངོ་ཚ་བ་ཡོད་པ་མི་བྱ་བ་རྣམས་མི་བྱེད་པ་དང༌། བྱ་བའི་རིགས་པ་རྣམས་བྱེད་པ་དང༌། དམ་པ་རྣམས་ཀྱིས་བསྔགས་པ་སྟེ་དེ་ལྟ་བུ་ནི་ངོ་ཚ་བ་དང་ལྡན་པ་ཞེས་པའོ། །དབུས་པདྨ་ཆེན་པོ་འདབ་མ་བརྒྱད་ལ། གེ་སར་བཅས་པར་གྱིས་ལ་ཞེས་པ་ནི་ཡེ་ཤེས་བརྒྱད་ཀྱི་ཕྱག་རྒྱར་གྱུར་པའོ། །གེ་སར་ནི་ཡོན་ཏན་རྣམས་སོ། །འདབ་མ་བཞི་ལ་བྱང་ཆུབ་སེམས་དཔའ་གྲོགས་སུ་གྱུར་པ་སྨོན་ལམ་གྱི་མཐུ་དང་ལྡན་པ་བཞི་བྲི་སྟེ་ཞེས་པ་ནི་བྱང་ཆུབ་སེམས་དཔའ་དེ་རྣམས་དེ་བཞིན་ཉིད་ཀྱི་ཡོན་ཏན་ལས་གྱུར་པ་སྟེ། གཉིས་སུ་ནི་རང་གི་དོན་ཕུན་སུམ་ཚོགས་པ་གཉིས་ནི་ཕ་རོལ་གྱི་དོན་ཕུན་སུམ་ཚོགས་པའི་རང་བཞིན་ཏེ། སྨོན་ལམ་གྱི་དབང་གིས་ཆོས་ཀྱི་རྒྱལ་པོར་དབང་བསྐུར་བ་དེའི་པདྨོའི་གདན་གྱི་གནས་སུ་གྱུར་པ་སྟེ། དེ་ལ་གཟུངས་དབང་རྒྱལ་པོ་ཞེས་པ་གཟུངས་ནི་ཤེས་རབ་ཀྱི་རྒྱལ་པོར་གྱུར་པ་ཞེས་པའོ། །དྲན་པ་ཡང་དག་ཅེས་པ་ནི་ཤེས་རབ་དེ་ཉིད་མི་གནས་པའི་མྱ་ངན་ལས་འདས་པའི་རང་བཞིན་སེམས་ཅན་རྣམས་ལ་རྒྱུན་མི་འཆད་དོ། །ཕན་པ་ལྷག་པར་སེམས་པ་ཞེས་པ་ནི་སེམས་ཅན་རྣམས་ལ་ཕན་པར་སེམས་པའོ། །སྙིང་རྗེ་ཅན་ཞེས་པ་ནི་སྙིང་རྗེའི་དབང་གིས་སེམས་ཅན་རྣམས་ལ་ཕན་པར་སེམས་པ་སྟེ། དེ་གཉིས་ནི་ཕ་རོལ་གྱི་དོན་ཕུན་སུམ་ཚོགས་པའི་རང་བཞིན་ནོ། །གོང་མ་གཉིས་ནི་རང་གི་དོན་ཕུན་
སུམ་ཚོགས་པའི་རང་བཞིན་ནོ། །ལོ་མ་བཞི་པོ་གཞན་ལ་ནི། །ཅི་བགྱི་ཞེས་པ་བཞི་བྲི་སྟེ། །ཞེས་པ་ཡང་དེ་བཞིན་ཉིད་ཀྱི་ཡོན་ཏན་དུ་ཤེས་པར་བྱ་སྟེ། སྨོན་ལམ་གྱི་དབང་གིས་གྱུར་པ་ནི་གོང་མ་བཞིན་ནོ། །སེམས་གཞན་ལ་སྤྱོད་པ་ཞེས་པ་ནི་གཞན་གྱི་སེམས་ཤེས་པའི་རང་བཞིན་ནོ། །འདོད་པ་ཡོངས་སུ་རྫོགས་པར་བྱ། །ཞེས་པ་ནི་སེམས་ཅན་རྣམས་ཀྱི་རེ་བ་ཡོངས་སུ་རྫོགས་པར་བྱེད་པ་ཞེས་པའོ། །མ་ཆགས་པ་དང་རྣམ་པར་གྲོལ་བ་ཞེས་པ་ནི་འབྲས་བུའི་ཡོན་ཏན་དེ་སྟོང་པ་ཉིད་ཀྱི་རང་བཞིན་ཆགས་པ་མེད་པས་ན་གྲོལ་བའོ། །གོང་མ་གཉིས་ནི་རྒྱུའི་རང་བཞིན་ནོ། །དབུས་སུ་ནི་བསམ་གྱིས་མི་ཁྱབ་པའི་ཆོས་ཀྱི་དབྱིངས་ཀྱི་གཟུགས་སོ་ཞེས་པ་ནི། ཆོས་ཀྱི་དབྱིངས་ཀྱི་ཡི་གེ་ཁ་དོག་དཀར་པོ་པདྨོའི་སྙིང་པོ་ལ་གཞག་གོ །རིན་པོ་ཆེའི་བུམ་པ་བཞི་ཞེས་པ་ནི། གསེར་དང་དངུལ་དང༌། པདྨ་རཱ་ག་དང༌། མརྒཏྟའི་བུམ་པ་གསེར་དང་དངུལ་དེ་དག་གིས་བརྒྱན་པའི་བུམ་པ་བྱའོ། །དེ་ལྟར་ཡང་མ་འབྱོར་ན་དེ་རྣམས་ཀྱི་ཁ་དོག་དང་མཐུན་པའི་སའི་བུམ་པ་བྱ་སྟེ། དེ་དག་ལ་སོགས་པའི་ཡོ་བྱད་རྣམས་འབྱོར་པ་ལས་ཇི་སྐད་དུ་འབྱུང་བ་བཞིན་དུ་མ་སྦྱར་ན་འཇུངས་པའི་སེམས་དང་ལྡན་ཏེ། སེམས་མ་དག་པས་ལྷ་རྣམས་ཀྱང་བྱིན་གྱིས་མི་རློབ་ཅེས་གཞུང་ལས་འབྱུང་ངོ། །སྙིང་ནས་མེད་པ་མི་འབྱོར་དུ་མི་རུང་ན་སྙམ་ནས་མི་སྤོབས་ཏེ། མི་བྱེད་དམ་འཚོ་བའི་ཡོ་བྱད་དང༌། ནད་གསོས་ཀྱི་སྨན་ཟོང་ཡང་མི་འཇོག་པར་བྱེད་ན། ཡང་དགོངས་པའམ་ཆོ་ག་མི་ཤེས་པ་སྟེ། འཚོ་བའི་ཡོ་བྱད་དང་ནད་རྐྱེན་གྱི་སྨན་ཟོང་དུ་སྙད་བཏགས་ནས་ལྷག་པར་ཡོད་ལ་གཏོང་མི་ཕོད་ན་གོང་དུ་སྨོས་པ་དང་འདྲ་སྟེ། མདོར་ན་སེམས་ལ་སྒྱུ་མེད་པ་གཙང་སྦྲར་ཤེས་པར་བྱའོ། །ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་པ་ཡང༌། སློབ་མ་དེ་ངན་སོང་སྤོང་བར་བསྟན་པའི་ཕྱིར་རོ། །ཐོག་མ་ཉིད་དུ་ངན་སོང་ཐམས་ཅད་སྦྱང་བའི་བྱང་ཆུབ་སེམས་དཔའི་སྔགས་ཀྱིས་བཏབ་པའི་བུམ་པས་བླུགས་སོ། །ངན་སོང་སྤངས་ནས་ཤེས་བྱ་དང་ཉོན་མོངས་པའི་སྒྲིབ་པ་དང་བྲལ་བར་གྱུར་ཅིག་པའི་དོན་དུ། དེ་ནས་སྒྲིབ་པ་ཐམས་ཅད་རྣམ་པར་སེལ་བའི་སྔགས་ཀྱིས་བཏབ་པས་བླུགས་སོ། །དེ་ནས་ཀུན་དུ་བཟང་པོའི་ས་ཐོབ་པར་གྱུར་ཅིག་
པའི་དོན་དུ་ཀུན་དུ་བཟང་པོའི་སྔགས་ཀྱིས་བཏབ་པའི་བུམ་པས་བླུགས་སོ། །དེ་ནས་ཆོས་ཀྱི་རྒྱལ་ཚབ་ཏུ་གྱུར་ཅིག་པའི་དོན་དུ་བྱམས་པའི་སྔགས་ཀྱིས་བཏབ་པའི་བུམ་པས་བླུགས་པར་བྱའོ། །སྔགས་པས་པདྨ་དམ་པ་དེ་ལ་ནི་རང་གིས་བཞག་ནས་སུ་ཞེས་པ་ནས། དེ་ནས་ཡང་དེ་མཆོད་པ་ནི། །མེ་ཏོག་སྤོས་ལ་སོགས་པས་སོ། །ཞེས་པའི་བར་དུ་དོན་གཞན་ནི་གོང་དུ་བཤད་ཟིན་ཏོ། །སློབ་མ་དེས་དབང་བསྐུར་བར་བྱ་བའི་ཚེ་འདིར་དངོས་སུ་མ་གསུངས་ཀྱང༌། དཀྱིལ་འཁོར་དུ་འཇུག་པའི་ཚེ་ན། རྡོ་རྗེ་སེམས་དཔའི་སྐུར་བསྒྱུར་ཏེ། དེ་ལས་གཞན་པའི་སྐུར་བསྒྱུར་བར་མ་གསུངས་པས་རྡོ་རྗེ་སེམས་དཔའི་སྐུར་བསྒྱུར་ཏེ་དབང་བསྐུར་བར་བྱའོ། །དབང་བསྐུར་བའི་ཚེ་པདྨའི་གདན་ལ་བཞུགས་པ་ཡང་འཁོར་ལོས་སྒྱུར་བའི་རྒྱལ་པོའི་འདུག་ཐབས་སུ་བཞག་སྟེ། རྐང་པ་གཡོན་པ་ཁྲིའི་སྟེང་དུ་གཞག་ལ་གཡས་པ་ས་ལ་བཞག་སྟེ། ལག་པ་གཡོན་པ་ཁྲི་ལ་བསྟེན་ལ། གཡས་པ་པུས་མོ་ལ་བཞག །གདོང་ཡང་མི་མཐོ་མི་དམའ་བར་དྲང་པོར་བལྟ་བར་བྱའོ། །ཐུར་མ་བླང་བ་གསེར་གྱི་སྟེ། །ཞེས་པ་ནས། ཐུར་མའི་སྨན་པ་རྒྱལ་པོ་ཡིས། །ཇི་ལྟར་འཇིག་རྟེན་རྣམས་ལ་སྔོན་གྱིའོ། །ཞེས་པའི་བར་དུ་རིམ་པ་བཞིན་དུ་གོང་དུ་བཤད་པའོ། །མ་རིག་པས་བསྒྲིབས་པས། བུ་ཁྱོད་ཀྱི་རྒྱལ་བས་ཁྱོད་ཀྱི་དེ་བསལ་བ་ནི་ཞེས་པ་སྔོན་མཉམ་པ་དང༌། བསམ་པའི་ཤེས་རབ་ཀྱི་རྒྱུ་ལ་སོགས་པ་མི་ཤེས་པ། རྒྱལ་བའི་ལུང་སློབ་དཔོན་གྱིས་བཤད་པ་མི་ཤེས་པ་བསལ་ཏོ་ཞེས་པའོ། །ཐུར་མའི་སྨན་པ་རྒྱལ་པོ་ཡིས། །ཇི་ལྟར་འཇིག་རྟེན་རྣམས་ལ་སྔོན་གྱིའོ། །ཞེས་པ་ནི་དཔེ་སྟེ། ཇི་ལྟར་མིག་གི་སྨན་པའི་རྒྱལ་པོས་འཇིག་རྟེན་པ་རྣམས་ཀྱི་མིག་གི་རབ་རིབ་བསལ་ཏེ། གཟུགས་ལ་སོགས་པའི་རང་གི་དངོས་པོ་ཇི་ལྟ་བ་བཞིན་དུ་འདུག་པ་མི་མཐོང་བ་ལས་མཐོང་བར་བྱས་པ་བཞིན་དུ། རྒྱལ་བ་རྣམས་ཀྱིས་ཀྱང་བུ་ཁྱོད་ཀྱི་མ་རིག་པས་ཆོས་རྣམས་ཀྱི་མཚན་ཉིད་ཇི་ལྟ་བ་བཞིན་འདུག་པ་མི་ཤེས་པ་ལས་ཤེས་པར་བྱའོ་ཞེས་པའོ། །མེ་ལོང་ལ་འདི་ལྟར་ཡང་ཆོས་ཀྱི་མཚན་ཉིད་དེ་སྨྲོས་ཤིག །ཆོས་རྣམས་གཟུགས་བརྙན་དང་འདྲ་སྟེ་ཞེས་པ་ནི། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་གཟུགས་
བརྙན་དང་འདྲ་སྟེ་བལྟར་ཡང་སྣང་ལ། ཡང་དག་པར་ནི་བརྟགས་ན་དངོས་པོ་ཡོད་པ་མ་ཡིན་པའོ། །ཕྲ་ཞེས་པ་ནི་འདི་ལྟར་ཕུང་པོ་ལ་སོགས་པའི་ཆོས་རྣམས་ཕུང་པོའི་རང་བཞིན་དུ་དམིགས་སུ་མེད་པས་ཕྲ་བ་ཞེས་པའོ། །དགེ་བ་ཞེས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་དང་བྲལ་བ་ཞེས་པའོ། །རྟོག་པ་མེད་པ་ཞེས་པ་ནི་སྒྲིབ་པ་དང་དེ་དག་གི་བག་ཆགས་ཀྱང་མེད་ཅེས་པའོ། །མི་གཟུང་བ་བརྗོད་དུ་མེད་པ་ཞེས་པ་དེ་ལྟ་བུའི་སྟོང་པའི་རང་བཞིན་ལ་རྣམ་པར་ཤེས་པ་དྲུག་གིས་གཟུང་དུ་མེད་ཅིང༌། ཚིག་གིས་བརྗོད་དུ་མེད་པ་དེ་ལས་འདས་པའོ། །རྒྱུ་དང་ལས་ལས་བྱུང་བའོ་ཞེས་པ་ནི་ཕུང་པོ་ལ་སོགས་པའི་ཆོས་རྣམས་ཡེ་ནས་ཡོད་པའི་རང་བཞིན་མ་ཡིན་གྱི། རྒྱུ་དང་ལས་ལས་བྱུང་བས་ན་གཟུགས་བརྙན་དང་འདྲ་སྟེ། ཡོད་པ་མ་ཡིན་པས་བརྗོད་དུ་མེད་པ་ལ་སོགས་པའི་ཚིག་གོང་མ་དེ་རྣམས་དང་སྦྱར་རོ། །དེ་བཞིན་ཆོས་འདི་ཤེས་པར་གྱིས། །རང་བཞིན་མེད་ཅིང་གནས་མེད་པ། །ཞེས་པ་ནི་གཟུགས་བརྙན་དང་འདྲ་བས་རང་བཞིན་མེད་པའོ། །རྒྱུ་དང་རྐྱེན་ལས་བྱུང་བས་སྐད་ཅིག་མའི་ཆ་མི་གནས་པར་ཤེས་པ་སྟེ། དེ་རྣམས་ཆོས་རྣམས་ཀྱི་མཚན་ཉིད་ཇི་ལྟར་ཤེས་ནས་དེ་ལྟ་བུའི་ཚུལ་དུ་བསྒོམ་པའི་ཤེས་རབ་ཀྱིས་སྒོམས་ཤིག་ཅེས་པའོ། །ཚད་མེད་སེམས་ཅན་དོན་བྱོས་ཤིག །ཅེས་པ་ནས་བླ་ན་མེད་པ་ཆོས་ཀྱི་དུང་སྒྲ་བསྒྲག་གོ་ཞེས་པའི་བར་དུ་སྟེ་དེ་ལྟར་བདག་གི་དོན་ཕུན་སུམ་ཚོགས་ནས། ཕ་རོལ་གྱི་དོན་ཕུན་སུམ་ཚོགས་པར་བྱོས་ཤིག་ཅེས་པ་སྟེ་གོང་དུ་བཤད་ཟིན་ཏོ། །སངས་རྒྱས་རྣམས་ཀྱི་བུར་སྐྱེས་སོ། །ཞེས་པ་ནི་ཁྱོད་དེ་བཞིན་གཤེགས་པའི་ཡེ་ཤེས་ལས་སྐྱེས་སོ་ཞེས་པའོ། །ཐེ་ཚོམ་བློ་ངན་དོགས་པ་མེད་པའི་སེམས་ཀྱིས་སོ། །ཞེས་པ་ནི་ཆོས་ཀྱི་འཁོར་ལོ་བསྐོར་ཞིང་སེམས་ཅན་གྱི་དོན་བྱ་བ་དེ་ལྟར་ཡིན་ནམ་མ་ཡིན་སྙམ་པའི་ཐེ་ཚོམ་མེད་པ་དང༌། མི་བྱའོ་སྙམ་པའི་བློ་ངན་པ་མི་སྐྱེ་བ་དང་འཁོར་རྣམས་ལ་བག་ཚ་བ་མེད་པར་འཇིག་རྟེན་པ་རྣམས་ལ་སྔགས་སྤྱད་པའི་ཚུལ་གྱིས་ཆོས་རབ་ཏུ་སྒྲོགས་ཤིག་ཅེས་པའོ། །དེ་ལྟར་བྱས་པ་ཤེས་པ། སངས་རྒྱས་དེ་ནས་ཕན་འདོགས་པ། །ཞེས་བརྗོད་པ་ནི་དེ་ལྟར་སེམས་ཅན་གྱི་དོན་བྱས་ན། སངས་རྒྱས་རྣམས་ཀྱི་བྱ་བ་བྱས་པས་དྲན་ཞིང་སངས་རྒྱས་ལ་ལན་ལྡོན་པར་བཤད་པ་ཞེས་
པའོ། །རྡོ་རྗེ་འཛིན་པ་དེ་ཀུན་ཀྱང༌། །ཁྱོད་ལ་རྟག་ཏུ་སྲུང་བར་བྱེད། །ཅེས་པ་ནི་དབང་བསྐུར་བའི་དཀྱིལ་འཁོར་གྱི་གྲྭ་བཞིར་རྡོ་རྗེ་འཛིན་པ་བཞི་གཞག་པ་དང༌། པདྨའི་འདབ་མ་ལ་བཞུགས་པའི་བྱང་ཆུབ་སེམས་དཔའ་དེ་རྣམས་ཀྱང་ལས་བྱས་པའི་དོན་ཡོད་དོ་སྙམ་ནས་སྲུང་བར་བྱེད་དོ་ཞེས་པའོ། །དེ་ནས་སློབ་མ་དེ་བསླངས་ལ། སྙིང་རྗེར་སོང་བའི་ཡིད་ཀྱིས་སུ། །ཞེས་པ་ནས། དེ་ནས་སུ་ནི་ཁས་བླང་བ། །ནང་གི་བདག་ཉིད་ངེས་པའོ། །ཞེས་པའི་བར་དུ་སློབ་མ་ལ་དམ་ཚིག་བསྟན་པ་སྟེ། དེ་ཡང་སྔོན་དམ་ཚིག་མནོས་པ་དང་མ་མནོས་པ་གཉིས་ཀ་ལ་བསྟན་ཏེ། དེ་ལ་སློབ་མ་དམ་ཚིག་བཞི་དང་ལྔ་དག་ཏུ་ལྡན་ལ། ལས་དང་བྱ་བ་དག་ལ་སྦྱར་བ་རྒྱུད་ལ་སོགས་པ་དང༌། དམ་ཚིག་ཤེས་ཤིང་མནོས་ཟིན་པ་ལ་བསྟན་ཅི་དགོས་ཤེ་ན། འཇིག་རྟེན་ན་རྒྱལ་པོ་རྣམས་ཀྱང་རྒྱལ་ཆོས་སུ་བྱ་བ་རྣམས་སྔ་ན་ཡང་ཤེས་ཤིང་སྲུང་མོད་ཀྱི། ནམ་རྒྱལ་པོར་དབང་བསྐུར་བའི་ཚེ་ཡང་སློབ་དཔོན་ལ་སོགས་པས་བསྟན་ཅིང་གོས་པར་བྱེད་དོ། །དེ་བཞིན་དུ་འདིར་ཡང་སྔ་ནས་ཡང་དམ་ཚིག་འདི་རྣམས་སྲུང་མོད་ཀྱི། ཆོས་ཀྱི་རྒྱལ་པོར་དབང་བསྐུར་ན་ཆོས་ཀྱིས་བསྟན་པར་བྱའོ། །གསུམ་དུ་ན་ཡང་དང་ཡང་དུ་བསྟན་ན་བརྟན་པར་འགྱུར་བའི་ཕྱིར་རོ། །དེ་ནས་སློབ་མ་དེ་བསླང་ལ། །སྙིང་རྗེར་སོང་བའི་ཡིད་ཀྱིས་ནི། །སྔགས་པས་ནང་དུ་བཅུག་ནས་སུ། །དེ་ལ་དམ་ཚིག་བསྟན་པར་བྱའོ། །ཞེས་པ་ནི་མེ་ལོང་དང་འཁོར་ལོ་ལ་སོགས་པ་བསྟན་པའི་གནས་དེ་ནས་སློབ་མ་དེ་བསླང་སྟེ། སློབ་དཔོན་གྱིས་སློབ་མའི་གདུགས་བཟུང་ནས། དཀྱིལ་འཁོར་དང་པོའི་སྒོ་ཁྱུད་ཀྱི་ནང་དུ་ཁྲིད་ལ། སྒོ་ཁྱུད་ཀྱི་ནང་དེར་གཞག་སྟེ་འོག་ནས་འབྱུང་བའི་དམ་ཚིག་རྣམས་བསྟན་པར་བྱ་ཞེས་པའོ། །བུ་ཁྱོད་དེང་ཕན་ཆད། སྲོག་གི་ཡང་ནི་ཕྱི་རུ་ཡང༌། །དམ་པའི་ཆོས་ནི་ཡོངས་བཏང་བ། །ཞེས་པ་ནི་དམ་པའི་ཆོས་དེ་བཏང་བ་ལ་ཡང་རྣམ་པ་གསུམ་སྟེ། ཐེག་པ་ཆེན་པོར་བལྟས་པ་ལས་ལོག་པར་བལྟས་པ་དང༌། ཆོས་སྨྲ་བ་ལ་བལྟས་པར་དབང་བཟའ་ཞིང་སྐུར་པ་འདེབས་པ་དེ་ཉིན་རེ་ཞིང་དམ་པའི་ཆོས་ཉན་པ་དང༌། སེམས་པ་དང༌། སྒོམ་པ་དང༌། འདྲི་བ་དང༌། ཀློག་པ་དང་མཆོད་པ་ལ་སོགས་པ་བྱས་པ་ལས་གང་ཡང་རུང་བ་ཅིག་མ་
བྱས་ན་དམ་པའི་ཆོས་བཏང་བ་ཞེས་བྱ་སྟེ། དེ་རྣམས་ཁྱོད་ཀྱིས་སྲོག་གི་ཕྱིར་ཡང་མི་གཏང་ངོ་ཞེས་པའོ། །དེ་ནས་གཞན་ཡང་བྱང་ཆུབ་སེམས་དཔའ་ཞེས་པ་ནི་མི་གཏང་ཞེས་པར་སྦྱར་ཏེ། བྱང་ཆུབ་ཀྱི་སེམས་རྣམ་པ་བཞི་ལས་སྨོན་ལམ་གྱི་སེམས་དང་འཇུག་པའི་སེམས་དག་མི་གཏང་བ་ལ་བྱ་སྟེ། སེམས་ཅན་རྣམས་ལ་ཕན་པའི་ཕྱིར་བདག་སངས་རྒྱས་སུ་གྱུར་ཅིག་ཅེས་པ་དང༌། ཆོས་ཐམས་ཅད་སྟོང་པ་ཉིད་དུ་བསྒོམ་པ་རྟག་ཏུ་བྱའོ་ཞེས་པའོ། །སེར་སྣ་ཁྱོད་ཀྱིས་ཡོངས་མི་བྱ། །ཞེས་པ་ནི་ཆོས་དང་ནོར་བདག་ལ་ཡོད་པ་ལས་གཞན་ལ་སྦྱིན་པར་རིགས་པ་ལས་མི་སྦྱིན་པར་མི་བྱའོ། །སེམས་ཅན་ལ་ཡང་གང་གནོད་པ། །ཞེས་པ་ནི་མི་བྱ་ཞེས་པ་དང་འབྲེལ་ཏེ་ལུས་དང་ངག་དང་ཡིད་གསུམ་གྱི་སྒོ་ནས་སེམས་ཅན་རྣམས་ལ་འཕྲལ་གྱི་གནོད་པ་དང་ཡུན་གྱི་གནོད་པ་མི་བྱ་ཞེས་བྱའོ། །བླ་མ་སློབ་མས་ཕྱག་བྱ་བ། །གུས་པར་ནན་ཏན་རྐང་པ་ལའོ། །དེ་ནས་ཐམས་ཅད་ཁས་བླང་བ། །ནང་གི་བདག་ཉིད་ངེས་པས་སོ། །ཞེས་པ་ནི་གོང་དུ་སློབ་དཔོན་གྱིས་དམ་ཚིག་སྒོམ་པ་དེ་རྣམས་ལུས་དང་ངག་དང་ཡིད་གསུམ་གྱི་སྒོ་ནས་འགྱུར་བ་མེད་པར་ཁས་བླང་ངོ་ཞེས་པ་སྟེ། ལུས་ཀྱིས་བླ་མ་ལ་སློབ་མས་ཕྱག་བྱ་བ་དད་ཅིང་གུས་པས་རྐང་པ་ལའོ་ཞེས་པའོ། །ངག་གིས་ཞེས་པ་ནས་ཐམས་ཅད་ཁས་བླང་པ་ཞེས་པ་སྟེ། བཀའ་སྩལ་པ་བཞིན་དུ་བགྱིའོ་ཞེས་སྨྲ་བར་བྱའོ། །སེམས་ཀྱིས་ནི་ནང་གི་བདག་ཉིད་ངེས་པས་སོ་ཞེས་པ་སྟེ། སློབ་དཔོན་གྱི་ངོ་ཙམ་དུ་ཁས་བླང་བ་མ་ཡིན་གྱི། སེམས་ཐག་མ་ནས་ཞེས་པའོ། །དེ་ཡན་ཆད་དུ་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་ཆོ་ག་རྣམས་རྫོགས་སོ།། །།ད་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དེར་ཞུགས་པ་རྣམས་ཀྱིས་རྗེས་སུ་བསྔགས་པ་བཤད་དེ། དེ་ཡང་དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་འདི་སྐད་ཅེས་གསོལ་ཏོ་ཞེས་པ་ནི་བཅོམ་ལྡན་འདས་རིགས་ཀྱི་བུ་ཕོ་དང༌། རིགས་ཀྱི་བུ་མོ་དེ་དག་རྣམས་ནི་སངས་རྒྱས་བཅོམ་ལྡན་འདས་བཞིན་དུ་བལྟའོ་ཞེས་པའི་བར་དུ་སྟེ། བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་སྙིང་རྗེ་ཆེན་པོ་འབྱུང་བའི་དཀྱིལ་འཁོར་ཆེན་པོའི་དམ་ཚིག་ལ་ཞུགས་ནས་དེའི་བསོད་ནམས་ཇི་སྙེད་
ཅིག་མངོན་པར་འདུས་པར་རིག་པར་བགྱི་ཞེས་པ་ནི་དཀྱིལ་འཁོར་དུ་ཞུགས་ཤིང་དམ་ཚིག་མནོས་པ་ཙམ་འབའ་ཞིག་ལ་མི་བྱའོ། །དེ་བཞིན་གཤེགས་པའི་སྐུ་ལ་སོགས་པ་མཉམ་པ་ཉིད་མི་ཟད་པའི་རྡོ་རྗེའི་རྒྱན་དེ་དག་གི་བྱིན་གྱིས་བརླབས་སུ་གྱུར་པ། སྙིང་རྗེ་ཆེན་པོའི་དཀྱིལ་འཁོར་དང། ཡི་གེ་འཁོར་ལོ་བསྐོར་བའི་དཀྱིལ་འཁོར་དང༌། གསང་བའི་དཀྱིལ་འཁོར་རྣམས་དེ་བཞིན་གཤེགས་པའི་སྐུ་གསུང་ཐུགས་ཀྱི་མཚན་མར་གྱུར་པ་སྟེ། དེ་དག་ཉིད་དམ་ཚིག་གསུམ་ཞེས་པའོ། །དམ་ཚིག་དེ་ཞུགས་པ་ཞེས་པ་ནི་དེའི་རྒྱུའི་རང་བཞིན་འབྲས་བུ་ལ་སྦྱོར་བར་ཤེས་པ་ཞེས་པ་སྟེ། དེ་དག་ཤེས་པ་ཡང་རྒྱུ་ཤེས་པ་ནི་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གྱི་རྒྱུ་བྱང་ཆུབ་ཀྱི་སྙིང་པོ་ཡིན་པར་ཤེས་པའོ། །རང་བཞིན་གྱི་སྐུ་མི་ཟད་པ་ལ་སོགས་པ་ཉིད་དུ་ཤེས་པའོ། །འབྲས་བུ་ལ་སྦྱོར་བ་ནི་བླ་ན་མེད་པའི་བྱང་ཆུབ་ཏུ་འགྱུར་རམ། ཇི་ལྟར་བསམས་པ་འགྲུབ་པ་ལ་སོགས་པ་འཐོབ་པའི་ཕྱིར། སྔགས་ཀྱི་སྤྱོད་པ་རྣམས་ཤེས་ནས། །དེ་ལ་སྦྱོར་བ་སྟེ་དེ་ལྟ་བུར་ཞུགས་ན་བསོད་ནམས་ཇི་ཙམ་མངོན་པར་འདུས་བྱས་པ་ཞེས་ཞུས་པའོ། །ཇི་སྙེད་སེམས་ཐོག་མ་བསྐྱེད་པ་ནས་དེ་བཞིན་གཤེགས་པ་འབྱུང་བའི་བསོད་ནམས་མངོན་པར་འདུས་བྱས་པ་དེ་སྙེད་དུ་རིགས་ཀྱི་བུའམ་རིགས་ཀྱི་བུ་མོ་དེའི་བསོད་ནམས་མངོན་པར་འདུས་བྱས་པར་རིག་པར་བྱའོ་ཞེས་པ་ནི་ས་དང་པོའི་སེམས་བསྐྱེད་པ་ནས་ས་བཅུ་གཅིག་ཏུ་འགྱུར་བའི་བསོད་ནམས་མངོན་པར་འདུས་བྱས་པ་དང་མཉམ་མོ་ཞེས་པ་སྟེ། ཅིའི་ཕྱིར་ཞེ་ན། དམ་ཚིག་དེ་ལྟ་བུ་ལ་ཞུགས་པ་ནི་མོས་པ་སྤྱོད་པ་ནས་ཞུགས་ན་མཐའ་དེ་བཞིན་གཤེགས་པའི་བར་འགྱུར་བའི་ཕྱིར་རོ། །རིགས་ཀྱི་བུ་དང་རིགས་ཀྱི་བུ་མོ་དེ་དག་ཇི་ལྟར་ཞལ་དང་ལྷུམས་ནས་སྐྱེས་པའི་སྲས་པོ་ཞེས་པ་ཞལ་ནས་སྐྱེས་པ་ནི། འཇུག་པའི་སྒོ་ནས་སྐྱེས་པ་ཞེས་པ་སྟེ། དེ་བཞིན་གཤེགས་པར་འཇུག་པའོ། །སྒོ་ནི་མོས་པ་སྤྱོད་པའི་ས་ལ་སོགས་པ་སྟེ་དེ་དག་མོས་པ་སྤྱོད་པའི་ས་ལ་ཞུགས་པའི་ཕྱིར་རོ། །ལྷུམས་སུ་སྐྱེས་པའི་སྲས་པོ་ཞེས་པ་ནི་དེ་བཞིན་གཤེགས་པའི་སྤྱོད་པ་དང་མཐུན་པར་སྤྱོད་པའི་ཕྱིར་རོ། །རིགས་ཀྱི་བུ་དང་རིགས་ཀྱི་བུ་མོ་དེ་དག་ཕྱོགས་གང་ན་འཁོད་པ་དེ་དག་དེ་བཞིན་གཤེགས་པས་ཆེན་པོ་བྱ་མི་དགོས་སོ་ཞེས་པ་ནི་དེ་
དག་གང་ན་འཁོད་པ་ན་སེམས་ཅན་གྱི་དོན་སྤྱད་པ་སྟེ་ས་ཕྱོགས་དེར་དེ་བཞིན་གཤེགས་པས་སེམས་ཅན་གྱི་དོན་སྤྱད་པ་ཆེན་པོ་མི་དགོས་ཞེས་པའོ། །མགྲིན་གཅིག་ཏུ་ཞེས་པ་ནི་དུས་གཅིག་ཏུ་སྨྲས་པ་དང༌། སྨྲ་བའི་ཚིག་གཅིག་པ་དང༌། སྨྲ་བར་བྱ་བའི་དོན་གཅིག་པ་དང༌། སྒྲ་གཅིག་ཏུ་འབྱིན་པའོ། །ད་ནི་དཀྱིལ་འཁོར་ལ་སོགས་པ་སྲུང་བ་ལ་སོགས་པ་རྣམས་འཆད་དེ། སྔགས་དེ་རྣམས་ཀྱང་དེ་བཞིན་གཤེགས་པའི་གསུང་གི་འཁོར་ལོས་ཁམས་གསུམ་དུ་ཁྱབ་པའི་བྱིན་གྱིས་བརླབས་སུ་གྱུར་པ་སྟེ། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་དེ་དག་ཐམས་ཅད་ལ་གཟིགས་ནས་ཞེས་པ་ནས། དུས་གསུམ་དུ་མ་ཆགས་པའི་སྟོབས་ཀྱི་སྔགས་ཀྱི་ཚིག་ཅེས་བྱ་བ་ཡོད་དོ་ཞེས་བྱ་བའི་བར་དུ་སྟེ། ཁྱད་པར་དེ་ལྟ་བུ་དང་ལྡན་པའི་སྔགས་ཡོད་ཀྱིས་བཤད་དོ་ཞེས་པའི་ཚིག་ཁོ་ནས་དབྱུང་བར་རིག་པར་བྱའོ། །མཐའ་ཡས་པར་འཕྲོ་ཞིང་ལུས་རྒྱ་ཆེན་པོ་ཞེས་པ་ནི་སེམས་ཅན་གྱི་ཁམས་ཐམས་ཅད་དུ་ཁྱབ་པར་འཇུག་པ་ཞེས་པའོ། །སྣ་ཚོགས་ཀྱི་གཟུགས་ཀྱི་ནོར་བུ་དང་འདྲ་ཞེས་པ་ནི་ཡིད་བཞིན་གྱི་ནོར་བུ་དེ་གཟུགས་རྣམ་པ་སྣ་ཚོགས་སུ་ཡང་སྣང་ལ་སེམས་ཅན་ཅི་འདོད་པ་ཐོབ་པར་བྱ་བ་སྣ་ཚོགས་བྱེད་དེ། དེ་བཞིན་དུ་རིག་པའི་རྒྱལ་མོ་འདི་ཡང་སེམས་ཅན་རྣམས་ཀྱི་དོན་དུ་གཟུགས་སྣ་ཚོགས་སྟོན་ཅིང་བྱ་བ་སྣ་ཚོགས་བྱེད་པ་ཞེས་པའོ། །ཚད་མེད་པའི་བསོད་ནམས་ཀྱི་ཚོགས་བསགས་པ་ཞེས་པ་ནི་དེ་བཞིན་གཤེགས་པའི་གསུང་དེ་ཚད་མེད་པའི་བསོད་ནམས་ཀྱི་ཚོགས་བསགས་པ་ལས་བྱུང་བའི་ཕྱིར་རོ། །ཐོགས་པ་མེད་པར་གནས་པ་ཞེས་པ་ནི་སེམས་ཅན་གྱི་ཁམས་ཐམས་ཅད་དུ་ཡེ་ཤེས་ཀྱིས་སྒྲིབ་པ་མེད་པར་མཁྱེན་པ་ཞེས་པ་སྟེ། དེ་བས་ན་དུས་གསུམ་དུ་མ་ཆགས་པའི་སྟོབས་ཀྱི་གནས་ཀྱི་ཚིག་ཅེས་གསུངས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་རེ་བ་ཐམས་ཅད་ཡོངས་སུ་རྫོགས་པར་བྱེད་པ་ཞེས་པ་ནས་ཏིང་ངེ་འཛིན་ལ་ཀུན་དུ་མཐུན་པར་ཞུགས་སོ་ཞེས་པའི་བར་དུ་རིག་པའི་རྒྱལ་མོ་དེ་ཡོངས་སུ་བསྒྲགས་པའི་ཕྱིར་ཏིང་ངེ་འཛིན་ལ་ཞུགས་པ་སྟེ། དེ་ལྟར་ཏིང་ངེ་འཛིན་དུ་ཞུགས་པ་ཡང་བཅོམ་ལྡན་འདས་ཏིང་ངེ་འཛིན་དེ་ལྟ་བུ་ཞིག་ལ་ཞུགས་ཀྱིས་ངོ་མཚར་ཞིག་འབྱུང་ངོ་སྙམ་ནས། སེམས་ཅན་རྣམས་དེ་ལྟར་བལྟ་པ་
དང་ཉན་པར་གཟུང་པར་བྱ་བའི་ཕྱིར་རོ། །རེ་བ་ཐམས་ཅད་ཡོངས་སུ་རྫོགས་པར་བྱེད་པ་ལྕེའི་དབང་པོས་སངས་རྒྱས་བཅོམ་ལྡན་འདས་ཀྱི་ཞིང་ཐམས་ཅད་དུ་ཁྱབ་པར་བྱས་ནས་ཞེས་པ་ནི་ཏིང་ངེ་འཛིན་དེར་འཇུག་པའི་ཕྱིར། དེ་བཞིན་གཤེགས་པས་བསྐལ་པ་དུ་མར་བདེན་པའི་ཚིག་བསམས་པ་ལས་གྱུར་པ་དེ་བཞིན་གཤེགས་པའི་སྐྱེས་བུ་ཆེན་པོའི་མཚན་ལྕེ་རྒྱ་ཆེ་བ་སྲབ་པ་ཁ་དོག་ཟངས་འདྲ་བ་དེས་ཁྱབ་པར་བྱས་ཞེས་པའོ། །རྒྱ་ཆེན་པོ་ཞེས་པ་ནི་ཏིང་ངེ་འཛིན་དེའི་ཁྱད་པར་ཏེ་ཁམས་གསུམ་ཐམས་ཅད་དུ་ཁྱབ་པར་བྱེད་པའི་ཕྱིར་རོ། །རྣམ་པར་དག་པ་ཞེས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་མེད་པའོ། །ཆོས་ཀྱི་རྒྱལ་མཚན་ཞེས་པ་ནི་ཆོས་སྟོན་པ་རྒྱལ་མཚན་ལྟར་གཞན་ལས་འཕགས་པར་སྟོན་པའོ། །མཚན་ཞེས་པ་ནི་ཏིང་ངེ་འཛིན་དེ་ཉིད་སྔགས་ཀྱི་ཚིག་སྟོན་པའི་མཚན་ཉིད་དོ། །རྩེ་མོ་ཀུན་དུ་བལྟ་བ་ཞེས་པ་ནི་ཁམས་གསུམ་ཐམས་ཅད་དུ་གཟིགས་པས་ན་རྩེ་མོ་ལྟར་མཐོ་བ་སྟེ་དེ་དག་ནི་ཏིང་ངེ་འཛིན་གྱི་ཁྱད་པར་རོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་ཁྱབ་པར་ཞེས་པ་ནི་ཁམས་གསུམ་ཐམས་ཅད་ཁྱབ་པ་ཞེས་པ་སྟེ། དེ་བས་ན་སེམས་ཅན་གྱི་ཁམས་ཡོངས་སུ་སྐྱོང་བ་ཞེས་བྱ་བ་སྟེ། བཅོམ་ལྡན་འདས་དེ་ལྟ་བུའི་སྒྲ་འབྱིན་ཅིང་རིག་པའི་རྒྱལ་མོ་གསུངས་སོ་ཞེས་པ་དང་སྦྱར་རོ། །དེ་སྐད་གསུངས་མ་ཐག་ཏུ་ཞེས་པ་ནས། སྟོབས་ཆེན་གསང་སྔགས་འདི་དྲན་པས་སོ་ཞེས་པའི་བར་དུ་རིག་པའི་རྒྱལ་མོ་དེའི་མཐུ་རྗེས་སུ་བསྔགས་པ་སྟེ། བསྲུང་ཞིང་བསྒྲིབ་པ་དང་བསྐྱབ་པའི་ཕྱིར་རོ་ཞེས་པ་ནི། བསྲུང་བ་ནི་གནོད་པ་ཆུང་དུ་ལས་བསྲུང་བའོ། བསྒྲིབ་པ་ནི་གནོད་པ་འབྲིང་པོ་ལས་བསྒྲིབ་པའོ། །སྐྱོབ་པ་ནི་གནོད་པ་ཆེན་པོ་ལས་སེམས་ཅན་རྣམས་སྦེད་པར་བྱེད་པའོ། །དེ་དག་ལ་ནི་འཇིགས་པ་ཆེན་པོ་གང་དག་བསྲུང་བ་སྙིང་ལ་གནས་པ་ཞེས་པ་ནི་སེམས་ཅན་གང་རིག་པའི་རྒྱལ་མོ་འདི་སྙིང་ལ་དྲན་ན་འཇིགས་པ་མེད་དོ་ཞེས་པའོ། །དེ་ནས་བཅོམ་ལྡན་འདས་ཀྱིས་ཆོས་ཀྱི་དབྱིངས་རྒྱ་ཆེན་པོ་བྱིན་གྱིས་བརླབ་པ་ཞེས་པ་ནས། དེ་བཞིན་གཤེགས་པའི་ལྕེའི་ཞེས་པའི་བར་དུ་དཀྱིལ་འཁོར་དགོད་པའི་སྔགས་རྣམས་བཤད་པ་སྟེ། དེ་ནས་བཅོམ་ལྡན་འདས་ཀྱིས་ཆོས་ཀྱི་དབྱིངས་རྒྱ་ཆེན་པོ་བྱིན་གྱིས་བརླབ་པ་ཞེས་པ་ནི་ཆོས་ཀྱི་དབྱིངས་ལ་
ཡང་རྣམ་པ་གཉིས་ཏེ་ཟབ་པ་དང་རྒྱ་ཆེ་བའོ། །དེ་ལ་ཟབ་པ་ནི་བྱང་ཆུབ་ཀྱི་སྙིང་པོའི་རང་བཞིན་ནོ། །རྒྱ་ཆེ་བ་ནི་སྐུ་ལ་སོགས་པ་མི་ཟད་པའི་རྡོ་རྗེ་རྒྱན་གྱི་འཁོར་ལོ་སྟེ་སྐུ་ལ་སོགས་པ་མི་ཟད་པའི་འཁོར་ལོ་དེ་ཉིད་བྱིན་གྱིས་བརླབས་ནས་ཞེས་པའོ། །དེའི་ཚེ་ཆོས་ཀྱི་དབྱིངས་མཛོད་ཀྱི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་ཏིང་ངེ་འཛིན་དེའི་བྱེ་བྲག་སྟེ། ཆོས་ཀྱི་དབྱིངས་མཛོད་ཅེས་པ་ནི་དམ་ཚིག་གི་སྔགས་ལ་སོགས་པ་དེ་ལས་འབྱུང་བའི་ཕྱིར་རོ། །སྙིང་པོ་ཞེས་པ་ནི་འབྱུང་བའི་གནས་ཏེ་སྔགས་དེ་རྣམས་འབྱུང་བའི་གནས་དེ་ཡིན་ནོ་ཞེས་པའོ། །དམ་ཚིག་ལས་བྱུང་བའི་རིག་པ་གསུངས་སོ་ཞེས་པ་ནི། །དམ་ཚིག་ཅེས་པ་ནི་ཀུན་འགྲོ་བའམ་ཆུད་པ་སྟེ། དེ་ཡང་སྐུ་ལ་སོགས་པ་མི་ཟད་པའི་རྡོ་རྗེའི་རྒྱན་ཏེ་དེ་ཆུད་པར་འཇུག་པ་ནི་རིག་པ་འདི་སྟེ་འཇུག་པ་ཡང་མ་ཐོབ་པར་འཇུག་པ་དང་ཐོབ་ནས་ཞིག་སྟེ་འཇུག་པའོ། །དེ་ལ་མ་ཐོབ་པར་འཇུག་པ་ནི་དཀྱིལ་འཁོར་མ་མཐོང་བ་དང་པོར་རིག་པ་འདི་བླངས་ཏེ་འཇུག་པའོ། །བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་རྣམས་ཀྱང་རིག་པ་དེ་བརྗོད་པ་ཙམ་གྱིས་རང་བཞིན་གྱི་དཀྱིལ་འཁོར་དེ་མཐོང་བར་འགྱུར་རོ། །ཐོབ་ནས་ཞིག་སྟེ་འཇུག་པ་ནི་དཀྱིལ་འཁོར་མ་མཐོང་བ་དང༌། བར་གཞན་གྱིས་ཆོད་ནས་དམ་ཚིག་གི་སྔགས་འདོན་པའོ། །སྔགས་དེ་འདོན་པ་ཡང་དེ་བཞིན་གཤེགས་པའི་སྐུ་དང་གསུང་དང་ཐུགས་གསུམ་གྱི་འཁོར་ལོའི་ཡོན་ཏན་བརྗོད་པ་དེ་ཐོས་པའོ། །དེ་ནས་དེ་མ་ཐག་ཏུ་སངས་རྒྱས་ཀྱི་ཞིང་ཐམས་ཅད་དང༌། བྱང་ཆུབ་སེམས་དཔའི་འཁོར་འདུས་པ་ཐམས་ཅད་དུ་དམ་ཚིག་ལ་འཇུག་པའི་རིག་པའི་སྒྲ་འབྱུང་ངོ་ཞེས་པ་སངས་རྒྱས་ཀྱི་ཞིང་ཐམས་ཅད་ཅེས་པ་ནི་འདུལ་བའི་འགྲོ་བ་ཕལ་རྣམས་ལའོ། །བྱང་ཆུབ་སེམས་དཔའ་འཁོར་འདུས་པ་ཐམས་ཅད་དུ་ཞེས་པ་ནི་ཀུན་དུ་བཟང་པོ་ལ་སོགས་པའི་འཁོར་རྣམས་ལའོ། །གང་ཐོས་ནས་ནི་ཆོས་ཀུན་ལ་མི་འདའ་བ་ནི་མཁས་པའོ་ཞེས་པ་ནི་དམ་ཚིག་ནི་མཁས་པ་རྣམས་ཀྱིས་ཐོས་ནས་ལུང་གི་ཆོས་དང་ཐོབ་པའི་ཆོས་གཉིས་ལས་མི་འདའ་སྟེ། ལུང་གི་ཆོས་ལས་མི་འདའ་བ་ནི་དམ་པའི་ཆོས་ཡོངས་སུ་མི་གཏོང་བ་ལ་སོགས་པའི་དམ་ཚིག་རྣམས་མི་འདྲལ་བའོ། །ཐོབ་པའི་ཆོས་ལས་མི་འདའ་
བ་ནི་རང་བཞིན་གྱི་དཀྱིལ་འཁོར་དེ་ཡིད་ལ་བྱེད་པ་དེ་མི་གཏོང་བའོ། །ཆོས་ཀྱི་དབྱིངས་སུ་འབྱུང་བའི་སྔགས་ནི་འཇུག་པ་སྟེ་སློབ་མའམ་བདག་ཀྱང་རུང་སྟེ་སྟོང་པ་ཉིད་དུ་བསྒྱུར་བའོ། །རྡོ་རྗེ་སེམས་དཔར་བྱིན་གྱིས་བརླབ་པའི་སྔགས་ནི་གནས་པ་སྟེ་ཡེ་ཤེས་ལྔའི་རང་བཞིན་ནམ། རྡོ་རྗེ་སེམས་དཔའ་ཉིད་ཀྱི་སྐུར་གནས་པའོ། །རྡོ་རྗེ་གོ་ཆའི་སྔགས་ནི་ལྡང་བ་སྟེ་སེམས་ཅན་ཐམས་ཅད་བདེ་བ་དང་ལྡན་པའི་བྱམས་པ་ཆེན་པོའི་གོ་ཆ་བགོས་པའོ། །དེ་བཞིན་གཤེགས་པའི་སྤྱན་གྱི་སྔགས་ནི་སློབ་མ་མིག་གཡོགས་བཀྲོལ་ཏེ་དཀྱིལ་འཁོར་བལྟར་གཞུག་པའོ། །དྲིའི་སྔགས་ནི་དེ་བཞིན་གཤེགས་པའི་ཚུལ་ཁྲིམས་རྣམ་པར་དག་པའི་ཡོན་ཏན་ལས་གྱུར་པའོ། །མེ་ཏོག་གི་སྔགས་ནི་བྱམས་པ་ཆེན་པོའི་ཡོན་ཏན་ལས་གྱུར་པའོ། །བདུག་པའི་སྔགས་ནི་ཆོས་ཀྱི་དབྱིངས་དང་རྗེས་སུ་མཐུན་པའི་ཡེ་ཤེས་ཀྱིས་ཉོན་མོངས་པ་ལ་སོགས་པ་སྲེག་པའི་ཡོན་ཏན་ལས་གྱུར་པའོ། །མེ་མར་གྱི་སྔགས་ནི་དེ་བཞིན་གཤེགས་པའི་ཡེ་ཤེས་ཀྱི་འོད་འབར་བ་ནམ་མཁའ་བཞིན་དུ་རྒྱ་ཆེ་བར་སྣང་བ་ལས་གྱུར་པའོ། །ཨརྒྷའི་སྔགས་ནི་ཆོས་ཀྱི་དབྱིངས་རྣམ་པར་དག་པ་ནམ་མཁའ་དང་མཉམ་པ་དང་མཉམ་པ་མེད་པ་ལས་བྱུང་བའོ། །གཙུག་ཏོར་གྱི་སྔགས་ནི་དེ་བཞིན་གཤེགས་པའི་སྤྱི་གཙུག་བལྟར་མི་སྣང་བ་ནམ་མཁའ་ལྟར་མཐའ་མེད་པ་ལས་བྱུང་བའོ། །དེ་བཞིན་གཤེགས་པའི་གོ་ཆའི་སྔགས་ནི། དེ་བཞིན་ཉིད་ཐོབ་པར་བྱེད་པའི་ལམ་གྱི་ཡེ་ཤེས་འབར་བ་དེས་ཤེས་བྱ་དང་ཉོན་མོངས་པའི་སྒྲིབ་པ་དག་སྲེག་པར་བྱེད་པ་ལས་བྱུང་བའོ། །ཀུན་དུ་འབར་བའི་སྔགས་ནི་འོད་ཀྱི་དཀྱིལ་འཁོར་ཏེ་དེ་ཡང་ལམ་གྱི་ཤེས་རབ་འབར་བ་སྟེ། ཤེས་བྱ་དང་ཉོན་མོངས་པའི་སྒྲིབ་པ་སྲེག་པར་བྱད་པ་ལས་བྱུང་བའོ། །ཡང་དག་པར་གཤགས་པའི་ལྕེའི་སྔགས་ནི། བདེན་པའི་ཚིག་གི་ཆོས་ལ་གནས་པ་ལས་བྱུང་བ་སྟེ་དེ་བཞིན་གཤེགས་པའི་སྤྱན་དང། གཙུག་ཏོར་ལ་སོགས་པའི་སྔགས་དེ་རྣམས་འོག་ནས་འབྱུང་བའི་ཕྱག་རྒྱ་དང་ལྡན་པར་བྱ་སྟེ། སློབ་དཔོན་ཉིད་དེ་བཞིན་གཤེགས་པའི་སྐུར་བསྒྱུར་ན་ཡང་སྔགས་དེ་རྣམས་ཀྱིས་བསྒྱུར་བའོ། །ནམ་སྙིང་པོ་འབྲུ་གཅིག་པ་ལས་བསྒྱུར་ན་ནི་འདི་རྣམས་ཀྱང་མི་དགོས་སོ། །སློབ་མ་
དབང་བསྐུར་བ་ན་ཡང་བུམ་པའི་ཆུས་བླུགས་པའི་འོག་ཏུ་སྔགས་དེ་རྣམས་ཕྱག་རྒྱ་དང་བཅས་པར་སྦྱར་རོ། །ཇི་ལྟར་བཅོམ་ལྡན་འདས་ཀྱི་དཀྱིལ་འཁོར་དེ་བྲི་བའི་ཚེ་ནི་བགེགས་ཞི་བར་འགྱུར་ཞེས་པ་ནི། དཀྱིལ་འཁོར་ཐོག་མར་འདྲི་བ་སྟེ། སྦྱོར་བའི་ཚེ་དང་བྲིས་ནས་སློབ་མ་ལ་སོགས་པ་གཟུང་བའི་ལས་བྱེད་པའི་ཚེ་ན། སློབ་མ་ལ་སོགས་པ་བཅུད་ཟིན་པའི་ཚེ་བགེགས་བྱུང་ན་ཇི་ལྟར་བགྱི་ཞེས་ཞུས་པའོ། །སྔགས་རྣམས་ཀྱང་ནི་སྒྲུབ་པ་ཡི། །བགེགས་རྣམས་ཀྱིས་ནི་གནོད་མི་བྱེད། །ཅེས་པ་ནི་དཀྱིལ་འཁོར་བྲིས་ཀྱང་རུང་སྟེ། སྤྱིར་སྔགས་སྒྲུབ་པ་ལ་བགེགས་བྱུང་ན་ཇི་ལྟར་ཞི་བར་བགྱི་ཞེས་པའོ། །སྔགས་རྣམས་ཀྱང་ནི་ཇི་ལྟར་སྒྲུབ། །ཅེས་པ་ནི་སྔགས་སྒྲུབ་པ་བཟླས་པའི་ཡན་ལག་བཞི་ལ་སོགས་པ་ཇི་ལྟར་བགྱི་ཞེས་པའོ། །འབྲས་བུའང་ཅི་རུ་འགྱུར་ཞེས་པ་ནི་སྔགས་བསྒྲུབས་ན་དེའི་འབྲས་བུ་ཅི་འདྲ་བར་འགྱུར་ཞེས་པའོ། །བགེགས་ནི་རང་གི་སེམས་ལས་བྱུང། །ཞེས་པ་ནས། ཚངས་པ་བརྒྱ་བྱིན་བཅས་པའོ། །ཞེས་པའི་བར་དུ་བགེགས་ཞི་བར་བྱ་བ་བཤད་པ་སྟེ། དེ་ཡང་མཚན་མ་མེད་པ་སྟེ། མཚན་མ་དང་བཅས་པའོ། །མཚན་མ་མེད་པ་ནི་བྱང་ཆུབ་བསྒོམ་པའོ། །མཚན་མ་ནི་འཕགས་པ་མི་གཡོ་བའི་གཟུགས་སུ་བསྒྱུར་ཞིང་སྔགས་དང་ཕྱག་རྒྱ་དང་དཀྱིལ་འཁོར་དང་ལྡན་པར་སྦྱར་བའོ། །བགེགས་ནི་རང་གི་སེམས་ལས་བྱུང༌། །སྔོན་ཆད་སེར་སྣ་བསྙེན་པས་ཏེ། །དེ་ཡི་རྒྱུ་ནི་གཞིག་པའི་ཕྱིར། །བྱང་ཆུབ་སེམས་ཞེས་དྲན་པ་སྟེ། །ཞེས་པ་ནི་བགེགས་ཆོས་དང་ཟང་ཟིང་གཞན་ལ་མི་གཏོང་བར་འཇུངས་པའི་བསྙེན་པའི་བག་ཆགས་རང་གི་སེམས་ལ་སོགས་པ་ལས་གྱུར་ཏེ། བགེགས་དེའི་རྒྱུ་ནི་སེར་སྣ་ཡིན་ཏེ། དེ་གཞིག་པའི་ཕྱིར་བྱང་ཆུབ་ཀྱི་སེམས་བསྒོམ་པ་ན་སྙིང་པོ་ཉིད་ཀྱི་རང་བཞིན་གོམས་པར་བྱ་བ་སྟེ། སྟོང་པ་ཉིད་གོམས་པར་བྱས་ན། སེར་སྣའི་དངོས་པོའམ་བགེགས་ཀྱི་དངོས་པོ་དག་དམིགས་སུ་མེད་པའི་སྒོ་ནས་ཞི་བར་འགྱུར་རོ།། གང་གི་རྟོག་པ་སྤངས་པ་ཞེས་པ་ནས་རྣམ་པར་རྟོག་པ་ལས་བྱུང་དེ་ཀུན་དེ་བཞིན་ཞེས་པའི་བར་དུ་བྱང་ཆུབ་ཀྱི་སེམས་དེ་ཉིད་ཀྱི་ཁྱད་པར་ཏེ། བྱང་ཆུབ་ཀྱི་སེམས་དེ་ནི་རྣམ་པར་རྟོག་པ་ལ་སོགས་པ་སྤོང་ཞིང་འགོག་པའི་རང་བཞིན་ནོ་ཞས་པའོ། །སྔགས་པ་བྱང་སེམས་དྲན་པར་བྱ། །ཡིད་ལ་མི་གཡོ་བ་
ཡི་བཟླས། །བགེགས་རྣམས་ཀྱང་ནི་རབ་ཏུ་འབྲོས། །དེ་ཡི་ཕྱག་རྒྱ་བྱས་ནའོ། །ཞེས་པ་ནི་བགེགས་བསལ་བའི་ཐབས་གཉིས་པ་སྟེ། སྔགས་པ་བྱང་ཆུབ་ཀྱི་སེམས་དྲན་པར་བྱས་ནས་འཕགས་པ་མི་གཡོ་བའི་སྔགས་ཡིད་ཀྱིས་ཟློས་པ་ནི། དེའི་སྙིང་གར་རླུང་གི་དཀྱིལ་འཁོར་གྱི་ནང་ན་ཡི་གེ་ཧཾ་འདུག་པར་བསམས་ཏེ། ཡི་གེ་ཧཾ་གི་སྒྲ་ཆོས་ཐམས་ཅད་རྒྱུ་དང་འབྲས་བུར་མི་དམིགས་པ་ནི་བྱང་ཆུབ་ཀྱི་སེམས་དྲན་པའོ། །སྔགས་ཟློས་ཡིད་ལ་མི་གཡོ་བ་ཟློས་པ་སྟེ། དེ་ལྟར་སྔགས་དེ་ཕྱག་རྒྱ་དང་ལྡན་པར་བཟླས་ཏེ། བསྡིགས་ན་བགེགས་དེ་འབྱེར་བར་འགྱུར་རོ། །རླུང་བཅིང་བ་ནི་འདི་ཉོན་ཅིག་པ་ནས་སྔོན་གྱི་རྒྱལ་བས་གསུངས་ཞེས་པའི་བར་དུ་རླུང་མནན་པའི་ཆོ་ག་སྟེ། བདག་ཡི་གེ་ཨ་ལས་རྣམ་པར་སྣང་མཛད་དུ་བསྒྱུར་ནས། ཡིད་ལ་འཕགས་པ་མི་གཡོ་བའི་སྙིང་པོ་ཧཾ་བསམས་ཤིང༌། རླུང་གི་ཕྱོགས་སུ་ཡི་གེ་དྲིའི་ཐིག་ལེ་བདུན་བྱ་བ་ནི། རླུང་གི་རྒྱལ་པོ་འཁོར་དང་བཅས་པ་སྟེ། འཁོར་དྲུག་གི་མཐའ་བསྐོར་ནས་རྒྱལ་པོ་ཉིད་དབུས་སུ་བཞག་ལ། ཀུན་ཀྱང་རི་དགས་ལ་ཞོན་པ། ཁ་དོག་སྔོན་པོར་བསམས་ཏེ། དེའི་སྟེང་དུ་ཁམ་ཕོར་གྱིས་བཀབ་ལ། ཁམ་ཕོར་དེའི་བར་དུ་བསམས་ཏེ། དེའི་སྟེང་དུ་ཡི་གེ་ཨཾ་བསམས་ཏེ། ཨཾ་ལས་དབང་ཆེན་གྱི་དཀྱིལ་འཁོར་གསེར་གྱི་ཁ་དོག་འདྲ་བ་ཤིན་ཏུ་ཁྲོ་བར་བསམ་མོ། །སེམས་དཔའ་ཆེན་པོ་ཆུ་ནི་ཞེས་པ་ནས། སྤྲིན་དེ་མ་ཐག་འགྱེས་པ་ཕྱོགས་ཀུན་ནས་ནི་ལངས་པའོ་ཞེས་པའི་བར་དུ་ཆུའི་བགེགས་བསལ་བ་སྟེ། བདག་ཉིད་ཡི་གེ་ར་ལས་འཕགས་པ་མི་གཡོ་བ་མདོག་དམར་པོ་འབར་བར་བསམས་ལ། སྤྲིན་གྱི་གཟུགས་ས་ལ་བྲིས་ཏེ། རལ་གྲིའི་ཕྱག་རྒྱས་དེ་གཏུབས་ན་འཇིག་པར་འགྱུར་རོ། །ཡང་དེ་ལ་བཏབ་སྟེ། མཁས་པས་རྡོ་རྗེར་གྱུར་པ་སྟེ། ཞེས་པར་འགྱུར་རོ། །ཡང་ན་བགེགས་སུ་འགྱུར་བ་ཀུན་ཞི་བར་འགྱུར་བར་བྱ་བ་ཡང་བཤད་དོ། །ཆུའི་བགེགས་དེ་ཉིད་བསལ་བའི་ཕྱིར་གཞན་གསུངས་ཏེ། བདག་ཉིད་ཕྱག་ན་རྡོ་རྗེར་བསྒྱུར་ལ། རྡོ་རྗེ་རྩེ་ལྔ་པའི་ཕྱག་རྒྱ་བཅིངས་ལ། ཕྱག་རྒྱའི་རྩེ་སྤྲིན་གྱི་གཟུགས་ལ་ཕུར་བུས་གདབ་པའི་ཐབས་སུ་བཙུགས་པ་ནི་ཞི་བར་འགྱུར་རོ། །ཡང་ན་བགེགས་སུ་འགྱུར་བ་ཀུན་ཞི་བར་འགྱུར་བ་བྱ་བ་ཡང་བཤད་དོ། །འཆི་བ་ཡང་ནི་
དོག་མེད་ཅེས་པའི་བར་དུ་བགེགས་ཞི་བར་བྱེད་པའི་ཐབས་གཞན་དུ་གསུངས་པ་སྟེ། སྔགས་པ་འཕགས་པ་མི་གཡོ་བའི་གཟུགས་སུ་བསྒྱུར་ནས་དེའི་སྔགས་བཟླས་པ་བྱ་སྟེ། འཕགས་པ་མི་གཡོ་བར་བསྒྱུར་བ་ཡང༌། རླུང་གི་དཀྱིལ་འཁོར་སྙིང་གར་བསམས་ཏེ། དེ་ལ་གནས་པར་བསམ་ཞིང་སྔགས་པ་དེ་ཉིད་དཀྱིལ་འཁོར་ཆེན་པོའི་སྒོ་ཁྱུད་ཀྱི་ནང་དུ་འདུག་ལ། དེར་བགེགས་ཀྱི་གཟུགས་བྲིས་ཏེ། དེའི་སྤྱི་བོར་རྐང་པ་གཡོན་པས་བཙིར་ན་བགེགས་ཞི་བར་འགྱུར་རོ། །སྐེ་ཚེ་དུག་དང་བསྲེས་པ་ཡིས། །ཞེས་པ་ནས། ཚངས་པ་བརྒྱ་བྱིན་བཅས་པ་ཡང༌། །ཞེས་པའི་བར་དུ་ཡང་བགེགས་གཞན་བསལ་བའི་ཐབས་གཞན་བཤད་པ་སྟེ། བགེགས་ཀྱི་གཟུགས་བྱས་ལ་དུག་དང་སྐེ་ཚེ་བསྲེས་པས་བསྐུས་ཏེ། མེ་ལ་བསྐམས་ན་བགེགས་ཞི་བར་འགྱུར་ཏེ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ཀྱིས་ཀྱང་རང་གི་གནས་ལ་འདུག་ནས་དོན་ཐམས་ཅད་ལ་ནན་ཏན་བགྱིའོ་ཞེས་པའི་བར་དུ་སྔར་བགེགས་བསལ་བ་བཤད་པའི་སྐབས་སུ། འཕགས་པ་མི་གཡོ་བ་རླུང་གི་ཁ་དོག་ཏུ་གནས་ཏེ། བསྐྲད་པ་དང་མེའི་ཁ་དོག་ཏུ་བསྒྱུར་ཏེ། བགེགས་བསྐྲད་པ་དང་ཁམ་ཕོར་ལ་དབང་ཆེན་གྱི་དཀྱིལ་འཁོར་བསམ་པ་ནས་ཕྱག་ན་རྡོ་རྗེ་མཇལ་བའི་དོན། ཞི་བ་དང་རྒྱས་པའི་ལས་བྱ་བ་རྣམས་ལ། ལྷ་རྣམས་རང་རང་གི་དཀྱིལ་འཁོར་ལ་གནས་ནས། ཞི་བ་ལ་སོགས་པའི་ལས་རྣམས་བྱེད་པར་མཇལ་ཏེ། དེ་ཅིའི་ཕྱིར་ཞེ་ན། དམ་ཚིག་གི་ཚུལ་གྱིས་དེ་ལྟ་སྟེ། ལྷ་རྣམས་རང་རང་གི་དཀྱིལ་འཁོར་ལ་གནས་པར་སྦྱར་ན། གང་དུ་བསམ་པ་དེ་བྱིན་གྱིས་བརླབས་ལ་ལས་གང་བྱ་བ་རྣམས་ཀྱང་དེ་བཞིན་གཤེགས་པས་ཇི་སྐད་གསུངས་པ་བཞིན་དུ་བྱེད་པར་འགྱུར་ཏེ། དེ་བས་ན་སྔགས་པ་རྣམས་ཀྱང༌། ལྷའི་ཁ་དོག་ཅི་འདྲ་བ་དེར་བསྒྱུར་ཏེ། ལས་བྱ་བ་རྣམས་མཇལ་ཏོ་ཞེས་པའོ། །བཅོམ་ལྡན་འདས་ཀྱིས་བཀའ་སྩལ་པ། གསང་བའི་བདག་པོ་དེ་དེ་བཞིན་ནོ། །ཇི་སྐད་སྨྲས་པ་དེ་དེ་བཞིན་ཏེ་ཞེས་པ་ནི། ཕྱག་ན་རྡོ་རྗེ་མཇལ་བ་དེ་ཕྱིན་ཅི་མ་ལོག་པར་མཇལ་ཏོ་ཞེས་པའོ། །གང་དང་གང་གི་ཁ་དོག་ཏུ་གསུངས་པ་དེའི་དཀྱིལ་
འཁོར་ཡང་དེ་ཉིད་དོ་ཞེས་པ་ནི། ལྷ་རྣམས་ཀྱི་ཁ་དོག་སྟེ། ཅི་འདྲ་བ་དེའི་དཀྱིལ་འཁོར་ཡང་དེ་འདྲ་བར་བྱའོ་ཞེས་པ་སྟེ། ཁ་དོག་སེར་པོ་ནི་དབང་ཆེན་གྱི་དཀྱིལ་འཁོར་ལ་སྦྱར་བར་བྱ། ལྷའི་ཁ་དོག་དཀར་པོ་ནི་ཆུའི་དཀྱིལ་འཁོར་དུ་སྦྱར་བར་བྱ། ལྷའི་ཁ་དོག་དམར་པོ་ནི་མེའི་དཀྱིལ་འཁོར་ལ་སྦྱར་བར་བྱ། ལྷའི་ཁ་དོག་སྔོན་པོ་དང་ནག་པོ་ནི་རླུང་གི་དཀྱིལ་འཁོར་ལ་སྦྱར་བར་བྱ་སྟེ། དེ་རྣམས་ནི་སོ་སོའི་དཀྱིལ་འཁོར་འཆད་པའོ། །དེ་ལས་མཆོད་པའི་ཡོ་བྱད་ལ་སོགས་པས་གཞན་དུ་བསྒྱུར་ན། རྒྱས་པའི་ལྷ་ཡང་ཞི་བར་འགྱུར། ཞི་བ་ཡང་ཁྲོ་བོ་ལ་སོགས་པར་དགོས་པའི་ཕྱིར་སྒྱུར་དུ་རུང་བར་ཤེས་པར་བྱའོ། །ལྷ་ལ་ལ་ནི་ཁ་དོག་ཐམས་ཅད་དང་ལྡན་པ་སྟེ། དཔེར་ན་ཨཱཪྻ་ཏཱ་ར་ལ་སོགས་པ་ཁ་དོག་ལྗང་གུ་བས་ཁ་དོག་ཐམས་ཅད་དང་ལྡན་པ་སྟེ། དཀྱིལ་འཁོར་ཀུན་དང་ལས་ཐམས་ཅད་བྱེད་པར་ཤེས་པར་བྱའོ། །དེ་བཞིན་དུ་དགོངས་པའི་དབང་གིས་མཆོད་པའི་ཡོ་བྱད་ལ་སོགས་པས་སྒྱུར་ན། རང་བཞིན་སོ་སོའི་ངེས་པ་ལས་ཀྱང་ལས་ཐམས་ཅད་བྱེད་པར་ཤེས་པར་བྱའོ། །དེ་ལ་གསང་བའི་བདག་པོ་མ་འོངས་པའི་དུས་ན་སེམས་ཅན་བློ་ཞན་པ་ཞེས་པ་ནས། དེ་དག་གིས་སྔོན་སེམས་ཅན་རྣམས་ལ་ཕན་པར་དགོངས་པའི་ཕྱིར། འདི་ཐམས་ཅད་བསྟན་པར་རབ་ཏུ་མི་ཤེས་སོ་ཞེས་པའི་བར་དུ་ལྷ་རྣམས་ཀྱི་ཁ་དོག་གང་ཡིན་པ་དཀྱིལ་འཁོར་ཡང་དེ་ཡིན་པར་གསུངས་པ། དབང་པོ་དང་མེའི་དཀྱིལ་འཁོར་ལ་སོགས་པ་ནི། འཇིག་རྟེན་པའི་རྒྱུད་ལ་ཡོད་ཀྱི། འཇིག་རྟེན་ལས་འདས་པའི་རྒྱུད། བྱ་བའི་རྒྱུད་དང་སྤྱོད་པའི་རྒྱུད་ཀུན་ལས་མི་འབྱུང་བས་ན། འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་ཟེར་ཏེ། གང་འཇིག་རྟེན་གྱི་རྒྱུད་རྣམས་ཀྱང༌། སངས་རྒྱས་བཅོམ་ལྡན་འདས་ཐམས་ཅད་མཁྱེན་པས་སེམས་ཅན་རྣམས་སོ་སོའི་དད་པ་དང་རྗེས་སུ་མཐུན་པར་མི་ཤེས་སོ་ཞེས་པའི་ཕྱིར་རོ་ཞེས་པ་སྟེ། དེ་ཅིའི་ཕྱིར་དེ་ལྟར་མི་ཤེས་ཤེ་ན། བློ་ཞེན་ཅིང་དད་པ་ཆུང་བ་ལ་སོགས་པའི་ཉེས་པས་བསྐལ་པའི་ཕྱིར་རོ། །ཆོས་རྣམས་ཀྱི་མཚན་ཉིད་ཀྱང་བླུན་པོ་རྣམས་ཀྱིས་མི་ཤེས་སོ་ཞེས་པ་ནི་ཆོས་རྣམས་ཀྱི་མཚན་ཉིད་སྟོང་པ་ཉིད་ཀྱི་རང་བཞིན་ཡང་དེ་དག་གིས་མི་ཤེས་སོ་ཞེས་པ་སྟེ། བདག་ཀྱང་མ་རུང་ལ། གཞན་ཡང་མ་རུང་བར་བྱེད་དོ་ཞེས་པ་དང་སྦྱར་རོ། །རྟག་
ཏུ་སྔགས་པ་དེར་གནས་ལ། །རབ་ཏུ་ངེས་པར་ལས་བྱེད་དོ། །ཞེས་པ་ནི་སྔགས་པས་སྟོང་པ་ཉིད་ལ་གནས་ནས་ཞི་བ་ལ་སོགས་པའི་ལས་བྱའོ་ཞེས་པ་སྟེ། སྟོང་པ་ཉིད་ལ་གནས་ནས་ལས་བྱ་བ་ཡང༌། གཅིག་ནི་མཚན་མ་མེད་པའི་ཏིང་ངེ་འཛིན་ལ་གནས་ནས། དེ་ཉིད་ཀྱིས་གྲུབ་པ་ཐོབ་པར་འགྱུར་བའོ། །གཅིག་ནི་སྟོང་པ་ཉིད་ཀྱི་ཏིང་ངེ་འཛིན་སྔོན་དུ་བྱས་ནས་དེ་ལས་ལངས་ཏེ། བཟླས་པ་ལ་སོགས་པ་བྱས་ནས་གྲུབ་པ་ཐོབ་པའོ། །དེ་དག་ནི་བགེགས་ཞི་བར་བྱ་བའི་སྐབས་སོ། །ད་ནི་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་དེ་རྣམས་ཐོག་མ་མོས་པ་སྤྱོད་པའི་ས་ལ་ཞུགས་པའི་ཚེ། རང་གི་རྣམ་པར་གྲོལ་པའི་སྒོ་སྔགས་ཀྱི་ཚིག་བསྟན་པ་དེ་ཉིད་ལ་གོམས་པར་བྱས་པས། ས་བཅུ་དང་ས་བཅུ་གཅིག་པ་ལ་སོགས་པ་ཡོངས་སུ་རྫོགས་པའི་རང་རང་གི་རྣམ་པར་ཐར་པའི་སྒོ་ཇི་ལྟར་ཆུད་པ། སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་སྔགས་རྣམས་དགོད་པའི་ཕྱིར་སྨྲ་བར་འདོད་ནས། བཅོམ་ལྡན་འདས་ལ་གསོལ་བ་སྟེ། དེ་ནས་རྡོ་རྗེ་འཛིན་པ་དེ་དག་ཕྱག་ན་རྡོ་རྗེ་ལ་སོགས་པ་དང་ཞེས་པ་ལ་སོགས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་དེ་དག་དང༌། རྡོ་རྗེ་འཛིན་པ་དེ་དག་ལ་མི་ཉམས་པའི་ཆོས་ཉིད་ཀྱིས་བྱིན་གྱིས་བརླབས་ཞེས་པ་ནི་བྱང་ཆུབ་སེམས་དཔའ་དེ་རྣམས་མི་འགོང་བའམ། སྤོབས་པ་སྐྱེ་བར་བྱིན་གྱིས་བརླབས་ཞེས་པའོ། །སངས་རྒྱས་ཀྱི་རྒྱན་ཞེས་པ་ནི། ཀུན་དུ་བཟང་པོ་བྱང་ཆུབ་སེམས་དཔའ་དེ་ཏིང་ངེ་འཛིན་དུ་ཞུགས་ན། སྤུའི་ཁུང་བུ་རེ་རེ་ནས་སངས་རྒྱས་རེ་རེ་འབྱུང་སྟེ། དེ་ལྟར་ལུས་ལས་སངས་རྒྱས་གྲངས་མེད་པར་འགྱུར་བ་དེ་ཉིད་རྒྱན་ཞེས་བྱའོ། །དེ་ལྟར་ཏིང་ངེ་འཛིན་རྣམས་ནི་བྱང་ཆུབ་སེམས་དཔའ་སོ་སོའི་ཡོན་ཏན་དང་རྗེས་སུ་མཐུན་པར་ཤེས་པར་བྱའོ། །དེ་བཞིན་དུ་སྔགས་རྣམས་དེ་བཞིན་གཤེགས་པའི་ཡོན་ཏན་ལས་བྱུང་བའོ། །བྱང་ཆུབ་སེམས་དཔའ་དེ་རྣམས་ཀྱི་སོ་སོའི་རྣམ་པར་གྲོལ་བའི་སྒོ་སྟེ་དེ་དག་ཉིད་ཀྱི་ཚིག་ཏུ་བྱིན་གྱིས་བརླབ་པར་ཤེས་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་འདུས་པ་ཐམས་ཅད་ལ་གཟིགས་ནས་ཞེས་པ་ནས་རྐྱེན་དབང་ལ་སྟེ། ཟབ་ལ་བལྟ་དཀའ་བ་ཞེས་པའི་
བར་དུ། སྔར་ཡི་གེ་ཨ་རྣམ་པ་བཞི་བྱང་ཆུབ་དང་སྤྱོད་པ་དང༌། ཀུན་དུ་སངས་རྒྱས་པ་དང་མྱ་ངན་ལས་འདས་པའི་ཏིང་ངེ་འཛིན་གྱི་སྒོ་བཤད་པ་སྟེ། དེ་ཉིད་ཀྱི་དོན་བྱང་ཆུབ་དང་སྤྱོད་པ་དང༌། ཀུན་དུ་སངས་རྒྱས་པ་དང༌། མྱ་ངན་ལས་འདས་པའི་རང་བཞིན་ཀུན་བསྟན་པ་སྟེ། དེ་བསྟན་པ་ཡང་གདུལ་བའི་འགྲོ་བ་རྣམས། ལ་ལ་ནི་ཡི་གེ་ཨ་ལ་སོགས་པའི་འབྲུའི་སྒོ་ནས་གོམས་པར་བྱེད་དེ། ལ་ལ་ནི་དེའི་དོན་གྱི་སྒོ་ནས་གོམས་པར་བྱེད་དེ། དེ་ནས་དོན་འདི་བསྟན་པས་བྱང་ཆུབ་ལ་སོགས་པའི་རང་བཞིན་ཆུང་པར་བྱ་བ་དོན་གྱི་སྒོ་ནས་བསྟན་ཏོ། །རེ་བ་ཐམས་ཅད་རྫོགས་པར་བྱེད་པ་དུས་གསུམ་མཐའ་ཡས་པའི་སྒོ་གདོན་མི་ཟ་བའི་ཡེ་ཤེས་ཡོངས་སུ་རྫོགས་པར་བྱེད་པའི་ཆོས་ཀྱི་ཚིག་གསུངས་སོ་ཞེས་པ་དེ་ལ་རེ་བ་ཐམས་ཅད་རྫོགས་པར་བྱེད་པ་དུས་གསུམ་མཐའ་ཡས་པའི་སྒོ་གདོན་མི་ཟ་བའི་ཡེ་ཤེས་ནི་དེ་བཞིན་ཉིད་ཀྱི་ཡེ་ཤེས་ལ་བྱ་སྟེ། རེ་བ་ཐམས་ཅད་རྫོགས་པར་བྱེད་པ་ཞེས་པ་ནི། ཡེ་ཤེས་རྣམ་པར་མི་རྟོག་ཀྱང་སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་ཟད་པའི་རྡོ་རྗེའི་རྒྱན་ལ་སོགས་པས་ཁམས་གསུམ་ཐམས་ཅད་དུ་ཁྱབ་པར་སེམས་ཅན་ཐམས་ཅད་དང་རྗེས་སུ་མཐུན་པར་བྱེད་དོ་ཞེས་པའོ། །དུས་གསུམ་མཐའ་ཡས་པའི་སྒོ་གདོན་མི་ཟ་བའི་ཡེ་ཤེས་ཡོངས་སུ་རྫོགས་པར་བྱེད་པ་ཞེས་པ་ནི། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་ཏིང་ངེ་འཛིན་རྣམ་པ་མང་པོའི་སྒོ་ནས་སྟོང་པ་ཉིད་དུ་འཇུག་ཅིང་ཡེ་ཤེས་ངེས་པར་བྱེད་པའོ་ཞེས་པའོ། །ཡོངས་སུ་རྫོགས་པར་བྱེད་པའི་ཆོས་ཀྱི་ཚིག་གསུངས་སོ་ཞེས་པ་ནི་ཡེ་ཤེས་དེ་ཉིད་ཡོངས་སུ་རྫོགས་པར་བྱེད་པའི་ཚིག་སྟེ། དེ་ཡང་ནམ་མཁའ་དྲི་མ་མེད་པ་ལ་སོགས་པའི་ཚིགས་སུ་བཅད་པ་ལ་སོགས་ཏེ། དེ་རྣམས་ཀྱི་དོན་ཆུད་ན་ཡེ་ཤེས་དེ་ཡོངས་སུ་རྫོགས་པར་འགྱུར་བའི་ཕྱིར་རོ། །དེ་ལ། ནམ་མཁའ་དྲི་མེད་ངོ་བོ་ཉིད་མེད་པ། །ཞས་པ་ནི་བྱང་ཆུབ་སེམས་ཀྱི་རང་བཞིན་དེ་ནི་ཇི་ལྟར་ནམ་མཁའ་ལ་ཉོན་མོངས་པ་ལ་སོགས་པའི་སྒྲིབ་པའི་དྲི་མ་མེད་ཅིང༌། སྔོན་པོ་ལ་སོགས་པའི་རང་བཞིན་གཟུང་དུ་མེད་པ་དེ་བཞིན་དུ་བྱང་ཆུབ་ཀྱི་རང་བཞིན་ལ་ཡང་ཉོན་མོངས་པ་ལ་སོགས་པའི་སྒྲིབ་པའི་དྲི་མ་མེད་ཅིང༌། དེ་ཇི་བཞིན་པ་ཡེ་ཤེས་ཀྱིས་
གཟུང་དུ་མེད་པའོ་ཞེས་པའོ། །རྣམ་མང་ཡ་ཤེས་སྣ་ཚོགས་སྦྱིན་པ་སྟེ། །ཞེས་པ་ནི་སྤྱོད་པའི་རང་བཞིན་ཏེ། མངོན་པར་བྱང་ཆུབ་པ་འདི་ཉིད་ཀྱི་ཚེ་ན། སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་རྣམས་སེམས་ཅན་རྣམ་པ་མང་པོ་ལ་ཇི་ལྟར་རྗེས་སུ་མཐུན་པར་ལུང་གི་ཆོས་དང་ཐོབ་པའི་ཆོས་དག་སྟོན་ཏེ། ཆོས་དེ་དག་སྟོན་ན་སེམས་ཅན་རྣམ་པ་སྣ་ཚོགས་པ་དེ་རྣམས་ཡེ་ཤེས་ཐོབ་པར་འགྱུར་བའི་ཕྱིར་རོ། །གཉིས་སུ་ནི་རྒྱུའི་ཚེའི་སྤྱོད་པ་ལ་ཡང་བྱ་སྟེ། རྣམ་པར་དག་པའི་ཆོས་དེ་ཉིད་ལ་འཇུག་པའི་ཚེ། ཀུན་རྫོབ་དང་དོན་དམ་པའི་ཡེ་ཤེས་ཐོབ་པར་བྱེད་པའི་ཕྱིར་རོ། །རྟག་པ་རུ་ནི་སྟོང་པའི་རང་བཞིན་ཏེ། །ཞེས་པ་ནི་ཀུན་དུ་སངས་རྒྱས་པའི་རང་བཞིན་ལ་བྱ་སྟེ། ཕྱིའི་གཟུང་བར་བྱ་བའི་ཆོས་རྣམས་ཀྱང་རང་བཞིན་མེད་ན། འཛིན་པར་བྱེད་པའི་ཡེ་ཤེས་ཀྱང་མེད་དེ། དེ་ལྟར་གཟུང་བ་དང་འཛིན་པའི་ཆ་གཉིས་ཀ་སྤངས་པའི་རང་བཞིན་ཕྱིན་ཅི་མ་ལོག་པ། ཡོངས་སུ་རྫོགས་པའི་མཚན་ཉིད་ལ་བྱའོ། །རྐྱན་དབང་ལ་སྟེ། ཟབ་ལ་བལྟ་དཀའ་བའོ་ཞེས་པ་ནི་མྱ་ངན་ལས་འདས་པའི་རང་བཞིན་ལ་བྱ་སྟེ། རྐྱེན་དབང་ལ་སྟེ་ཞེས་པ་ནི་གཞན་གྱི་དབང་ལས་ཀྱི་མཚན་ཉིད་ཀྱི་ཡེ་ཤེས་མར་མེའི་རྒྱུན་དང་འདྲ་བ་སྐད་ཅིག་མའི་རྒྱུན་མི་འཆད་པར་རྟེན་ཅིང་འབྲེལ་པར་འབྱུང་བའི་རང་བཞིན་ཞེས་པའོ། །ཟབ་ལ་བལྟ་དཀའ་བ་ཞེས་པ་ནི། ཟབ་པ་ནི་གཟུང་བ་དང་འཛིན་པའི་ཆ་གཉིས་སྤངས་པ་སྟོང་པ་ཉིད་ཀྱི་རང་བཞིན་ནོ། །དེ་བས་སྟོང་པ་ཉིད་ཀྱི་རང་བཞིན་དེ་ལ་སྔོན་པོ་ལ་སོག་པའི་ཇི་བཞིན་པ་མེད་པས་བལྟ་དཀའ་ཞེས་པའོ། །རྟག་ཏུ་ཁྱད་པར་འགྲོ་བ་ཞེས་པ་ནས། དེ་ལས་རྙེད་དཀའ་གནས་གཞན་མེད་པ་ནི། འཇིག་རྟེན་དུ་སྣང་བར་མཛད་པ་སྟེ། རྒྱལ་བས་གསུངས་པ་ཤིན་ཏུ་རྣམ་པར་དག་པའི་ཆོས་ཉིད་དོ་ཞེས་པའི་བར་དུ་བྱང་ཆུབ་ཀྱི་རང་བཞིན་ཤིན་ཏུ་རྣམ་པར་དག་པའི་ཆོས་ཉིད་དེ་ལ་འཇུག་ཅིང་གོམས་པར་བྱེད་པ་ན། དེའི་འབྲས་བུ་ཐོབ་པའི་རིམ་པ་བཤད་པ་སྟེ། རྟག་ཏུ་ཁྱད་པར་རིམ་པར་འགྲོ་བ་སྟེ། །རྣམ་པར་བསམས་བཞིན་རྣམ་པའི་མཆོག་ཀྱང་སྦྱིན། །ཞེས་པ་ནི་རྣམ་པར་དག་པའི་ཆོས་ཉིད་དེ། དེ་ལ་མཉན་པ་དང༌། བསམ་པ་དང༌། འཇིག་རྟེན་གྱི་
རྒྱལ་པོ་དང་ལོངས་སྤྱོད་ལ་སོགས་པ་བདེ་བའི་མཆོག་ཐོབ་པར་འགྱུར་ཞེས་པའོ། །ཇི་ལྟར་འགྲོ་བ་ཀུན་གྱི་གནས་པ་ནི། །ནམ་མཁའ་ཡིན་ཏེ་མི་ཆགས་སྤྱོད་ཡུལ་བ་དེ། །དེ་ལྟར་རྣམ་པར་དག་པ་ཡིས། །ཆོས་ཉིད་འདི་ལ་སོགས་པ་གསུམ། །མ་ལུས་སྐྱིད་འབྱུང་བའོ་ཞེས་པ་ནི། རྣམ་པར་ངག་པའི་ཆོས་ཉིད་དེ་ལས། མོས་པ་སྤྱོད་པའི་ས་ལ་གནས་ནས་གོམས་པར་བྱས་ན། ཁམས་གསུམ་གྱི་དབང་པོ་མངོན་པར་འབྱུང་བའི་མཚན་ཉིད་ཐོབ་པར་འགྱུར་རོ་ཞེས་པ་སྟེ། རྣམ་པར་དག་པའི་ཆོས་དེ་རྣམས་རྣམ་པར་མི་རྟོག་ཀྱང༌། དེ་ལྟ་བུའི་འབྲས་བུ་འབྱུང་སྟེ། དག་པ་ནི་དཔེར་ན་ནམ་མཁའ་རྣམ་པར་མི་རྟོག་ཀྱང༌། འགྲོ་བ་ཐམས་ཅད་ཀྱི་གནས་བྱེད་པ་བཞིན་དུ། ཆོས་དེ་ཉིད་རྣམ་པར་དག་པ་དེ་ཡང་རྣམ་པར་མི་རྟོག་བཞིན་དུ། ཁམས་གསུམ་གྱི་སྐྱིད་པ་འབྱུང་བར་བྱེད་དེ། དེ་བས་ན། ཇི་ལྟར་འགྲོ་བ་ཀུན་གྱི་གནས་ནི་ནམ་མཁའ་ཡིན་ཏེ་མི་ཆགས་སྤྱོད་ཡུལ་བ། །དེ་ལྟར་རྣམ་པར་དག་པའི་ཆོས་ཉིད་འདི་ལ་སོགས་གསུམ་མ་ལུས་སྐྱིད་འབྱུང་བའོ་གསུངས་པའོ། །ཁམས་གསུམ་མཆོག་དེ་སྤྱོད་ན་ནི། སངས་རྒྱས་ཀུན་དང་སྤྱོད་ཡུལ་གཅིག་པར་འགྱུར་ཞེས་པ་ནི་ས་རབ་ཏུ་དགའ་བ་ལ་གནས་པ་རྣམས་ཀྱིས་གོམས་པར་བྱ་སྣ་དེའི་འབྲས་བུ་སངས་རྒྱས་རྣམས་དང་སྤྱོད་ཡུལ་གཅིག་པར་འགྱུར་རོ་ཞེས་པའོ། །དེ་ལས་རྙེད་དཀའ་གཞན་མེད་པ་ནི་འཇིག་རྟེན་ཀུན་དུ་སྣང་བར་བྱེད་པ་སྟེ། རྒྱལ་བས་གསུངས་པ་རྣམ་པར་དག་པའི་ཆོས་ཉིད་དོ་ཞེས་པ་ནི་སངས་རྒྱས་པའི་ཚེ་འཐོབ་པའི་འབྲས་བུ་སྟེ། སངས་རྒྱས་པ་ལས་རྙེད་པར་དཀའ་བ་གཞན་མེད་ཅིང༌། འཇིག་རྟེན་གྱི་ཁམས་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ཀྱིས་ཁྱབ་པར་སྣང་བར་མཛད་པའི་ཕྱིར་རོ། །རྒྱལ་བས་གསུངས་པ་ཤིན་ཏུ་རྣམ་པར་དག་པའི་ཆོས་ཉིད་དོ། །ཞེས་པ་ནི་དེ་ལྟ་བུའི་ཆོས་ཉིད་རྣམ་པར་དག་པ་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་སོ་ཞེས་པ་ནི་སྡུད་པའི་ཚིག་གོ །དེར་སྤྱོད་པ་རྣམ་པར་རྟོག་པ་སྤངས་ཏེ་དེའོ་ཞེས་པ་ནི་དེ་ལྟ་བུའི་རང་བཞིན་གྱིས་ཆོས་དེ་ལ་རྣམ་པར་རྟོག་པ་སྤོང་བ་སྟེ་སྤྱོད་ཅིག་ཅེས་པའོ། །སྤངས་པའི་ཆོས་དེ་ཟབ་ལ་འགོང་བ་མེད་པའོ་ཞེས་པ་ནི་ཆོས་ཉིད་རྣམ་པར་དག་པའོ། །དེ་
རྒྱ་ཆེ་ཞིང་མི་འགྱུར་བ་ཡོངས་སུ་རྫོགས་པའི་མཚན་ཉིད་པས་འགོང་བའམ་འགོག་པ་མེད་ཅེས་པ་སྟེ། ཆོས་ཉིད་དེའི་རང་བཞིན་སྤྱིར་བསྟན་པའོ། །འདི་ལྟ་སྟེ་གསང་བའི་བདག་པོ་འདོད་པའི་ཁམས་ཀྱི་དབང་པོ་ལ་མྱོས་པར་བྱེད་པ་ཞེས་བྱ་བའི་རིག་པ་ཡོད་དོ་ཞེས་པ་ནས། འདི་ལྟ་སྟེ། སྔགས་ཀྱིས་ནི་མེའི་ཚ་བ་མེད་པར་བྱས་ནས་གྲང་བར་འགྱུར་རོ། །རིགས་ཀྱི་བུ་དཔེའི་ཚུལ་དེ་ལྟ་བུ་ལས་ཀྱང་སྔགས་ཀྱི་མཐུ་ལས་མངོན་པར་དད་པར་བྱ་བའི་རིགས་སོ་ཞེས་པའི་བར་དུ་སྔགས་ཀྱི་རྒྱུ་དང་རང་བཞིན་དང་མཐུ་དང་འབྲས་བུ་བཤད་དེ། རྒྱུ་དང་རང་བཞིན་ནི་རྟག་ཏུ་ཡི་གེ་ལ་སོགས་པའི་ནང་དུ་བཤད་དོ། །ཐབས་འདིར་ནི་སྔགས་ཀྱི་མཐུས་བསྟན་པ་བཤད་དེ། དེ་ཡང་སྒྲུབ་བ་ཡིད་གཉིས་དང་ཐེ་ཚོམ་ཅན་ལས་འོག་ནས་འབྱུང་བའི་སྔགས་ཀྱི་མཐུ་རྣམས་བསྟན་པས། གང་སྒྲུབ་པ་ལ་ཐེ་ཚོམ་དུ་གྱུར་པ་ལ། གྲུབ་པ་འཐོབ་མི་འཐོབ་སྙམ་པའི་ཐེ་ཚོམ་བསལ་བ་དང༌། དེ་ལ་རབ་ནི་འདོད་པའི་ཁམས་ཀྱི་དབང་པོ་ཆེན་པོ་རིག་པས་ལྷའི་བུ་རྣམས་རིག་པར་འགྱུར་ཞེས་པ་དང༌། གཟུགས་ཡོད་པའི་ཁམས་ཀྱི་དབང་པོ་ཆེན་པོའི་བུ་ལ་ཡིད་མགྱོགས་ཞེས་བྱ་བའི་རིགས་ལས་བྱུང་བའི་མཐུ་དང་གཉིས་ནི་རབ་ཏུ་བཤད་དོ། །དབང་པོའི་མིག་འཕྲུལ་གྱི་སྔགས་ནི་སྤྱོད་པ་དང༌། ལྷ་མ་ཡིན་གྱི་སྔགས་ཀྱི་སྒྱུ་མ་ལ་སོགས་པའི་སྔགས་ནི་མཐུ་འབྲིང་དུ་བཤད་དོ། །དུག་དང་རིམས་ལ་སོགས་པ་དང༌། མ་མོ་རྣམས་ཀྱི་སྔགས་ཀྱིས་འཆི་བར་བྱེད་པ་དང༌། མེ་དང་ཚ་བ་ལ་སོགས་པས་དྲང་བར་འགྱུར་རོ་ཞེས་པ་ནི་མཐུ་ཐ་མར་བཤད་དོ། །འདི་ལྟ་སྟེ་གསང་བའི་བདག་པོ་འདོད་པའི་ཁམས་ཀྱི་དབང་པོ་ལ་མྱོས་པར་བྱེད་པ་ཡོད་པ་ཞེས་པ་ནི། འདོད་པ་ཞེས་པ་ནི་གཟུགས་དང༌། སྒྲ་དང༌། དྲི་དང༌། རེ་དང༌། རེག་པ་རྣམས་སྤྱོད་པའོ། །ཁམས་ཀྱི་དབང་པོ་ལ་ཞེས་པ་ནི། འདོད་པའི་ཁམས་ཀྱི་གནས་རིམ་པ་དྲུག་གི་དབང་པོ་ལ་མྱོས་པར་བྱེད་པ་ཞེས་བྱ་བའི་རིམ་པ་ཡོད་དོ་ཞེས་པ་ནི་ཁམས་དེར་སྐྱེས་པ་རྣམས་རང་བཞིན་གྱི་རིག་པ་དང་ལྡན་པས་རིག་པས་རིག་པ་དེ་བསམས་པའམ་བརྗོད་པ་ཙམ་གྱིས་འདོད་པ་ལྔའི་ལོངས་སྤྱོད་དང་ལྡན་པར་འགྱུར་རོ། །དེས་འདོད་པ་ན་འཁོད་པའི་ལྷའི་བུ་རྣམས་མྱོས་པས་བརྒྱལ་བར་འགྱུར་ཞེས་བྱ་བ་ནི། མྱོས་པ་ཞེས་པ་ནི་མི་དྲན་ཞིང་དབང་
པོ་མི་གསལ་བར་གྱུར་པ་ནི་མ་ཡིན་གྱི། རིག་པ་དེའི་མཐུས་ལྷའི་བུ་རྣམས་འདོད་པ་ལྔའི་ལོངས་སྤྱོད་ལ་ཆགས་ཤིང་ཞེན་པར་གྱུར་ཏེ། འདོད་པའི་དབང་དུ་གྱུར་པས་ན་འདོད་པས་མྱོས་པ་ཞེས་བྱའོ། །མེ་ཏོག་མང་པོ་སྣ་ཚོགས་དང་ལྡན་པའི་གནས་དགའ་བ་རྣམས་ཀྱང་སྟོན་ཞེས་པ་ནི། དེ་ལ་མེ་ཏོག་སྣ་ཚོགས་ནི་ལྡུམ་ར་དང༌། མེ་ཏོག་གི་ཚལ་དང༌། ཡིད་དུ་འོང་བའི་སྐྱེད་མོས་ཚལ་དང༌། མེ་ཏོག་དང་ཚལ་དེ་དག་ཀྱང་དྲི་ཞིམ་པོ་དང༌། ཁ་དོག་ཤིན་ཏུ་མཛེས་པར་བརྒྱན་པའོ། །གནས་དགའ་བ་ནི་ཀུན་དགའ་ར་བ་དང༌། རིན་པོ་ཆེ་སྣ་ཚོགས་ཀྱིས་བརྒྱན་པའི་ལྡིང་ཁང་ལ་སོགས་པ་བསྟན་པའོ། །ལོངས་སྤྱོད་བཟང་པོ་རྣམ་པ་མང་པོ་ཡང་མངོན་པར་སྤྲུལ་ནས་ཞེས་པ་ནི། ལོངས་སྤྱོད་བཟང་པོ་ནི་འདོད་པ་རྣམ་པ་ལྔའི་ལོངས་སྤྱོད་བཟང་པོ་ལ་བྱ་སྟེ། ཁ་ཟས་ཀྱི་བཟའ་བ་དང་ལྷའི་གོས་རབ་ཏུ་བཟང་ཞིང་འཇམ་པ་ལ་སོགས་པ་རྣམས་སོ། །མངོན་པར་སྤྲུལ་པ་ནི་གནས་དེ་ན་ལྷའི་བུ་རྣམས་རང་རང་གི་རིག་པའི་མཐུས། འདོད་པ་རྣམ་པ་ལྔའི་ལོངས་སྤྱོད་འབྱུང་བར་བྱའོ། །གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་སྦྱིན་པ་དག་ཀྱང་ཡོངས་སུ་སྤྱོད་དོ་ཞེས་པ་ནི། དེ་ལ་གཞན་འཕྲུལ་དབང་བྱེད་ཅེས་པ་ནི། ཡང་རང་གི་མཐུ་ལས་འདོད་པ་རྣམ་པ་ལྔའི་ལོངས་སྤྱོད་འབྱུང་བ་རྣམས། ལྷའི་བུ་མོ་རྣམས་ལའང་སྦྱིན་པ་དེ་དག་ཡོངས་སུ་སྤྱོད་དོ། །དེ་བཞིན་དུ་བྱང་ཆུབ་སེམས་དཔའ་ཡང་སྦྱིན་པ་ལ་སོགས་པ་ཡིད་བཞིན་དུ་སྤྱོད་ཀྱང་བདག་ཉིད་དེ་ལ་ཆགས་པར་མི་སྤྱོད་དོ། །འདི་ལྟ་སྟེ་དབང་པོ་ཆེན་པོའི་ལྷའི་བུ་ལ་ཡིད་མགྱོགས་ཞེས་བྱ་བར་རིག་པ་ཞེས་བྱ་ནི་རིག་པ་སྟེ། བསམས་པ་ཙམ་གྱིས་སེམས་ཅན་གྱི་དོན་དུ་བྱ་བ་དང༌། ཇི་ལྟར་འདོད་པའི་གནས་དེ་དག་ཏུ་སྐད་ཅིག་ཡུད་ཙམ་གྱིས་ཕྱིན་པར་འགྱུར་བས་ན་ཡིད་མགྱོགས་ཞེས་བྱའོ། །དེས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སེམས་ཅན་རྣམས་ཀྱི་དོན་བྱེད་ཅིང་ཞེས་པ་ནི། དེ་ལ་སྟོང་གསུམ་གྱི་སྟོང་ཆེན་པོ་ནི་བླ་དང་འོག་དང་ཀུན་ལ་བྱ་བའང་མ་ཡིན་གྱི། གཟུགས་ཡོད་པའི་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་བྱའོ། །སྟོང་གསུམ་ནི་གཞུང་ལ་གྲགས་པའོ། །སེམས་ཅན་གྱི་དོན་ནི་གཟུགས་ཡོད་པའི་སེམས་ཅན་རྣམས་ལ། རིག་པ་དེའི་
མཐུས་འོག་ནས་འབྱུང་བའི་ལོངས་སྤྱོད་ལ་སོགས་པས་སེམས་ཅན་རྣམས་ཀྱི་དོན་བྱེད་པའོ། །ལོངས་སྤྱོད་དང་ཟས་ལ་སོགས་པ་རྣམས་མངོན་པར་སྤྲུལ་ནས་ཞེས་པ་ནི། དེ་ལ་ཁྱད་པར་དུ་ན། ཁ་ཟས་ཁམ་གྱི་བཟའ་བ་དང་དྲི་ལ་སོགས་པ་མི་སྤྱོད་དེ། ལོངས་སྤྱོད་གཞན་ནི་ལྷག་མ་དང་འདྲའོ། །གཙང་མའི་གནས་ཀྱི་ལྷའི་བུ་རྣམས་ལ་སྦྱིན་པ་དག་ཀྱང་སྤྱོད་དོ་ཞེས་པ་ནི། དེ་ལས་གཙང་མ་ཞེས་པ་ནི་གཟུགས་ཀྱི་ཁམས་དེ་ན། གཙང་མའི་རིས་ཀྱི་ལྷ་རྣམས་ལ་ཡང༌། སྦྱིན་བདག་རིག་པའི་མཐུ་ལས་བྱུང་བའི་ལོངས་སྤྱོད་ལ་སྤྱོད་པའོ། །འདི་ཡན་ཆད་ནི་སྔགས་ཀྱི་མཐུ་རབ་ཏུ་བསྟན་པའོ། །འདི་ལྟ་སྟེ། དཔེར་ན་མིག་འཕྲུལ་ཅན་གྱི་སྔགས་ཀྱིས་ནི། ཀུན་དགའི་ར་བ་བཟང་པོ་རྣམ་པ་མང་པོ་དང༌། ཆུ་དང་འབབ་ཆུ་དང་མི་ལ་སོགས་པ་མངོན་པར་སྟོན་ཏོ་ཞེས་པ་ནི་དབང་པོའི་སྔགས་ཀྱི་མཐུ་བཤད་དེ། དེ་ཡང་གང་ཞེ་ན། མིག་འཕྲུལ་ཅན་གྱི་སྔགས་ཀྱིས་ཞེས་པ་ནི། དབང་པོ་ལ་སོགས་པའི་ལྷ་རྣམས་དང་ལྷ་མ་ཡིན་དུ་འཐབ་པའི་ཚེ། སྔགས་ཀྱི་གྲངས་མེད་པའི་དབང་པོའི་ལྷ་རྣམས་སུ་སྤྲུལ་ནས། ལྷ་མ་ཡིན་གྱི་མིག་བསླུ་བ་དང༌། གང་ལ་རྒོལ་བའི་གཏོལ་མེད་པར། མིག་འཕྲུལ་གྱི་མཐུས་བྱེད་པའོ། །དབང་པོ་ནི་སྔགས་ཀྱི་མཐུ་ལ་ཀུན་དགའི་ར་བ་བཟང་པོ་དང༌། ཆུ་དང་འབབ་ཆུ་དང་མིག་ལ་སོགས་པ་སྔགས་ཀྱི་མཐུས་མངོན་པར་སྤྱོད་ཅིང་སྟོན་ཏོ། །འདི་ལྟ་སྟེ། དཔེར་ན་ལྷ་མ་ཡིན་གྱི་སྔགས་ཀྱིས་ནི་སྒྱུ་མ་མང་པོ་སྟོན་ཏོ་ཞེས་པ་ནི། ཨ་སུ་ར་སྔགས་ཀྱི་མཐུས་བཤད་དེ། དེ་ཡང་གང་ཞེ་ན། ལྷ་མ་ཡིན་དང་དབང་པོ་ལ་སོགས་པའི་ཚེ་ལྷ་མ་ཡིན་གྱི་སྔགས་ཀྱི་མཐུས། ལྷ་མ་ཡིན་གྲངས་མེད་པར་སྤྲུལ་པ་དང༌། རཱ་ཧུ་ལ་ལྟ་བུའི་གཟུགས་ལྷ་མ་ཡིན་གྱི་གནས་ནས། རི་རབ་རིའི་རྒྱལ་པོ་ལས་འཕགས་པའི་ལུས་བྱུང་བ་ནས། ལྷ་རྣམས་ལ་སྐྲག་པ་དང་མཐུས་བྱིན་གྱིས་བརླབས་པའི་སྒྱུ་མ་རྣམས་སྟོན་པའོ། །རྟག་ཏུ་དབང་པོ་ལ་སོགས་པའི་སྔགས་ཀྱི་མཐུ་བཤད་པ་དང༌། ལྷ་མ་ཡིན་གྱི་སྔགས་ཀྱི་མཐུ་བཤད་པ་དེས་འདི་གཉིས་ནི་མཐུ་འབྲིང་དུ་བཤད་པ་ལ་བྱའོ། །འདི་ལྟ་སྟེ། དཔེར་ན་སྔགས་ཀྱིས་ནི་དུག་དང་རིམས་ལ་སོགས་པ་མེད་པར་འགྱུར་རོ་ཞེས་པ་ནི་མི་རྣམས་ཀྱི་སྔགས་མཐུ་
བཤད་དེ། དེ་ཡང་གང་ཞེ་ན། དེ་སྔགས་དེ་གཉིས་ཀྱི་མཐུས་དུག་ཐམས་ཅད་དང་རིམས་ལ་སོགས་པའི་ནད་ཐམས་ཅད་ཞི་ཞིང་མེད་པར་བྱེད་པ་ལ་བྱའོ། །འདི་ལྟ་སྟེ། དཔེར་ན་མ་ཞེས་བྱ་བའི་ལྷ་རྣམས་ཀྱི་སྔགས་ཀྱིས་ནི། སེམས་ཅན་རྣམས་འཆི་བར་བྱེད་དོ་ཞེས་པ་ནི། མ་བདུན་པོ་རྣམས་ཀྱི་སྔགས་ཀྱི་མཐུ་བཤད་དེ། དེ་ཡང་གང་ཞེ་ན། དབང་པོ་ལ་སོགས་པའི་ལྷ་རྣམས་དང༌། ལྷ་མ་ཡིན་རྣམས་སུ་འཐོབ་པའི་ཚེ། ལྷ་རྣམས་ཀྱིས་ལྷ་མ་ཡིན་ཐུབ་པར་མ་གྱུར་ན། དབང་པོ་དང་ཚངས་པ་ལ་སོགས་པ་རང་རང་ལས་མ་ཞེས་བྱ་བའི་ལྷ་མོ་བདུན་སྤྲུལ་ཏེ། ལྷ་མོ་བདུན་པོ་དེ་རྣམས་ཀྱིས་མཚོན་གྱིས་བཏབ་པའི་ཁྲག་ས་ལ་མ་ལྷུང་བར་འཐུངས་པ་དང༌། གདོད་ལྷ་མ་ཡིན་རྣམས་ཞི་བར་འགྱུར་བར་ཡང་བྱའོ། །བདུན་གྱི་སྔགས་དེ་སྤྱོད་པའི་ལས་རྣམས་བྱེད་པའི་ཚེ། མ་རྣམས་ཀྱི་སྔགས་ཀྱི་ཚིག་བཞིན་བྱས་ནས། སེམས་ཅན་འཆི་བར་བྱེད་པ་དང༌། ལྷ་དང་ལྷ་མ་ཡིན་དུ་འཐབ་པའི་ཚེ། འཇིག་རྟེན་ན་སེམས་ཅན་རྣམས་དགེ་བར་སྤྱོད་པ་མང་ཞིང༌། བསོད་ནམས་ཆེ་ན་ལྷ་རྣམས་རྒྱལ་བར་འགྱུར། དགེ་བ་སྤྱད་པ་ཉུང་ཞིང་མཐུ་ཆུང་ན་ལྷ་མ་ཡིན་རྒྱལ་བར་འགྱུར་ཏེ། དེ་ལ་ལྷ་རྣམས་རྒྱལ་བར་འགྱུར་ན། གང་ཟླ་བ་དང་སྤྱང་ཀིས་ཟིན་པའི་དངོས་གྲུབ་ཀྱང་ཐོབ། ལྷ་མ་ཡིན་རྣམས་རྒྱལ་ན་སེམས་ཅན་གྱི་ཁམས་སུ་སེམས་ཅན་རྣམས་བཅིང་བར་བྱེད་པའི་རིམས་ནད་རྣམས་ཀྱི་སྔགས་ཀྱི་མཐུ་ལས་འབྱུང་བར་བྱེད་པའོ། །འདི་ལྟར་སྔགས་ཀྱིས་ནི་མེའི་ཚ་བ་མེད་པར་བྱས་ནས་གྲང་བར་འགྱུར་རོ་ཞེས་པ་ནི། སྔགས་ཀྱི་མཐུས་མེ་འབར་བའི་ནང་དུ་ཞུགས་ཀྱང༌། ཚིག་པ་དང་གདུང་བ་ལ་སོགས་པ་མེད་ཅིང་ཆུའི་ནང་དུ་འགྲོ་བ་དང་འདྲ་སྟེ་གྲང་བར་འགྱུར་རོ། །རིགས་ཀྱི་བུ་དཔེ་ཚུལ་དེ་ལྟ་བུ་ལས་ཀྱང་སྔགས་ཀྱི་མཐུ་ལས་མངོན་པར་དད་པར་འགྱུར་བ་དང༌། རིགས་སོ་ཞེས་པ་ནི་རྟག་ཏུ་མཐུ་རབ་འབྲིང་རྣམ་པ་གསུམ་བསྟན་པ་ལ། གང་མ་དད་པ་རྣམས་དད་པར་འགྱུར་བ་དང་ཐེ་ཚོམ་དང་ཡིད་གཉིས་པའི་འགྲོ་བ་རྣམས་ཐེ་ཚོམ་བསལ་ནས་སྔགས་ཀྱི་མཐུ་ལ་མངོན་པར་དད་པར་བྱ་བའི་རིགས་སོ་ཞེས་བསྐུལ་བའོ། །སྔགས་དེའི་མཐུ་ཡང་སྔགས་ལས་བྱུང་བ་ཡང་མ་ཡིན་ཞེས་པ་ནས། རྟག་ཏུ་རྒྱུན་མི་འཆད་པར་སྔགས་ཀྱི་ཚུལ་གྱི་རྗེས་
སུ་འཇུག་པར་རིག་པར་བྱའོ་ཞེས་པའི་བར་དུ་སྔགས་ཀྱི་རང་བཞིན་བཤད་པ་ལ་བྱ་སྟེ་དེ་ཡང་གང་ཞེ་ན། དེ་ལ་སྔགས་ཀྱི་མཐུ་ཡང་སྔགས་ལས་བྱུང་བ་མ་ཡིན་ཞེས་པ་ནི། སྔགས་ཀྱི་མཐུ་དེ་སྔགས་ཀྱི་ཡིག་འབྲུ་ལས་བྱུང་བ་ཡང་མ་ཡིན། དེ་སྟེ་སྔགས་ཀྱི་ཡིག་འབྲུ་ལས་སངས་རྒྱས་ཀྱི་མཐུ་དེ་ཡོད་ན་ནི། སྔགས་ཀྱི་གླེགས་བམ་ལ་སོགས་པ་རྐུན་པོས་ཀྱང་མི་ཐོབ། མེས་ཀྱང་ཚིག་པར་མི་འགྱུར་ཏེ། དེ་བས་ན་སྔགས་ཀྱི་མཐུ་ལས་མཐུ་འབྱུང་བ་ཡང་མ་ཡིན་ནོ་ཞེས་སོ། །དོན་ལ་ཡང་ཞུགས་པ་མ་ཡིན་ཞེས་པ་ནི། རལ་གྲི་དང་འཁོར་ལོ་དང་རི་ལུ་ལ་སོགས་པའི་རྫས་རྣམས་ལ་སྟེ། རྫས་དེ་རྣམས་ལ་སྔགས་ཀྱི་མཐུ་ཞུགས་ནས་གྲུབ་པར་འབྱུང་བ་ཡང་མ་ཡིན་ཞེས་སོ། །སྦྱོར་བ་ལས་རྙེད་པ་ཡང་མ་ཡིན་ཞེས་པ་ནི། སྒྲུབ་པ་ལ་འབྱུང་བའི་སྦྱོར་བདེ་གཉིས་ལས་སྔགས་ཀྱི་མཐུ་འབྱུང་བ་ཡང་མ་ཡིན་ཏེ། དེ་སྟེ་སྒྲུབ་བ་ལ་འཇུག་བ་ལས་བྱུང་བ་ཡིན་ན་གྲུབ་ཟིན་པ་ཡིན་པས་བསྒྲུབ་མི་དགོས་ཞེས་པའོ། །འོན་ཀྱང་རིགས་ཀྱི་བུ་དུས་གསུམ་ལས་འདས་པ་ཟབ་མོ་བསམ་གྱིས་མི་ཁྱབ་པ་རྟེན་ཅིང་འབྲེལ་པར་འབྱུང་བ་ལས་མངོན་པར་གྲུབ་པའི་ཕྱིར་རོ་ཞེས་པ་ནི། དེ་བཞིན་གཤེགས་པ་འཇིག་རྟེན་དུ་བྱུང་ཡང་རུང་མ་བྱུང་ཡང་རུང་སྟེ། སྔགས་ཀྱི་ཆོས་ཉིད་ནི་ཡོང་ནས་འདུག་པའོ་ཞེས་བཤད་དེ། འོན་ཀྱང་རིགས་ཀྱི་བུ་དུས་གསུམ་ལས་འདས་པ་ཞེས་པ་ནི། དུས་གསུམ་དུ་སྔ་མ་འདས་པའི་དུས་ན་གྲུབ་པའི་རང་བཞིན་མ་ཡིན་ན་ནི། མ་འོངས་པ་དང་ད་ལྟར་གྱི་དུས་ན་གྲུབ་པར་མི་འགྱུར་ཏེ། དེ་སྟེ་མ་འོངས་པའི་དུས་དང་ད་ལྟར་གྱི་དུས་ན་གྲུབ་པའི་རང་བཞིན་ཡོད་ན་ནི་སྔ་མ་འདས་པའི་དུས་ན་འགྲུབ་པར་ཡང་མི་འགྱུར་ཏེ། དེ་བས་སྔགས་གྲུབ་པའི་རང་བཞིན་ནི། དུས་གསུམ་གང་ལ་ཡང་གནས་པ་ཡིན་པས་ན་དུས་གསུམ་ལས་འདས་པའོ། །ཟབ་མོ་བསམ་གྱིས་མི་ཁྱབ་པ་རྟེན་ཅིང་འབྲེལ་བར་འབྱུང་བ་ལས་མངོན་པར་གྱུར་པའི་ཕྱིར་རོ་ཞེས་པ་ནི། དཔེར་ན་མེ་ཏོག་སྣ་ཚོགས་དང་འདྲ་སྟེ། ས་བོན་དང༌། མྱུ་གུ་དང་ལོ་མའི་ཆེ་ཁ་དོག་སྔོན་པོ་ལ་སོགས་པ་གཞན་ལ་མེ་ཏོག་ཏུ་གྱུར་པའི་ཚེ། ཁ་དོག་གཞན་དུ་གྱུར་པ་ལྟ་བུ་དང༌། བ་ལྟ་བུས་རྩྭ་རྩུབ་པོ་དང་སྔོན་པོ་ལ་སོགས་པ་ཟོས་ཀྱང༌། འོ་མ་འཇམ་ཞིང་དཀར་བའི་རང་བཞིན་ལྟ་བུར་
གྱུར་པ་སྟེ། དེ་ལྟ་བས་ན་སྔགས་ཀྱི་དངོས་གྲུབ་ནི་གང་ལ་ཡང་མི་གནས་མོད་ཀྱི་ཟབ་མོ་བསམ་གྱིས་མི་ཁྱབ་པའི་ཆོས་ཉིད་རྒྱུ་རྐྱེན་གཅིག་ཚོགས་པ་ལ་སྔགས་ཀྱི་ཆོས་ཉིད་ཀྱིས་བྱིན་གྱིས་བརླབས་པ་ལས། གྲུབ་པ་རབ་འབྲིང་རྣམ་པ་གསུམ་ལ་སོགས་པར་ཐོབ་པར་འགྱུར་རོ། །སྔགས་ཀྱིས་བྱིན་གྱིས་བརླབས་པའི་ཆོས་ཉིད་ལས་བྱུང་བས་ན་མི་འགྱུར་བའོ་ཞེས་པ་ནི་བྱིན་གྱིས་རློབ་པ་དང་མི་འགྱུར་བ་བཤད་དེ། དེ་ལས་བྱིན་གྱིས་བརླབས་ཞེས་པ་གང་གྲུབ་པ་ཉིད་ལ་ཆོས་ཉིད་ལ་བྱིན་གྱིས་རློབ་ཅིང༌། གྲུབ་པ་ཐོབ་པ་དེ་ཡང་བརྟན་ཞིང་མི་འགྱུར་བའོ། །དེ་བས་ན་རིགས་ཀྱི་བུ་བསམ་གྱིས་མི་ཁྱབ་པའི་ཆོས་ཀྱི་རང་བཞིན་གྱི་རྒྱུན་དུ་ཞུགས་པས་རྟག་ཏུ་རྒྱུན་མི་འཆད་པར་སྔགས་ཀྱི་ཚུལ་གྱི་རྗེས་སུ་འཇུག་པར་བྱའོ། །དེ་ནས་ཡང་བཅོམ་ལྡན་འདས་དུས་གསུམ་ལ་མ་ཆགས་པའི་སྟོབས་ཀྱིས་གནས་ཀྱི་བྱིན་གྱིས་བརླབས་པ་ཞེས་པ་ནས། ཡང་དག་པར་ཀུན་རྫོགས་པའི་སངས་རྒྱས་ཀྱིས་ཚིག་གིས་བཏབ་པ་གཅིག་ནས་གཅིག་ཏུ་མངོན་པར་གྲགས་པའོ་ཞེས་པའི་བར་དུ་བྱང་ཆུབ་ཀྱི་རང་བཞིན་ཡང་ལག་བཞི་དང་ལྡན་པའི་དམིགས་སྟོན་པའི་ཡི་གེ་ཨ་རྣམ་པ་བཞི་བཅོམ་ལྡན་འདས་ཀྱིས་གསུངས་པ་སྟེ། ཨ་རྣམ་པ་བཞི་སྔར་ཡང་བཤད་དེ། འདིར་ཡང་བཟླས་ཏེ་གསུངས་པ་ཅིའི་ཕྱིར་ཞེ་ན། སྔར་བཤད་པ་ནི་དོན་དམ་པའི་ཏིང་ངེ་འཛིན་གྱི་སྒོར་གྱུར་པའི་ཡི་གེ་འབྲུ་རེ་པོ་སྤྱིར་བཤད་པ་སྟེ། འདིར་ཡང་བཟླས་ཏེ་གསུངས་པ་ནི། སྔགས་བསྒྲུབ་པས་དེའི་དོན་སྒོམ་ཞིང་བརླབ་པར་བྱ་བའི་ཕྱིར། ཁྱད་པར་དུ་གསུངས་པའོ། །དེ་ལ་དུས་གསུམ་དང་མ་ཆགས་པའི་སྟོབས་ཀྱི་གནས་བྱིན་གྱིས་བརླབས་པ། དེ་བཞིན་གཤེགས་པ་བསམ་གྱིས་མི་ཁྱབ་པའི་རྒྱན་རྣམ་པར་དག་པའི་སྙིང་པོ་ཞེས་བྱ་བའི་ཏིང་ངེ་འཛིན་དུ་ཞུགས་སོ། །ཨ་ཞེས་པ་ནི་ཨ་རྣམ་པ་བཞི་པོ་དེ་གསུངས་པའི་ཕྱིར། བཅོམ་ལྡན་འདས་ཏིང་ངེ་འཛིན་དུ་ཞུགས་ཏེ། དེ་རྣམས་ཀྱིས་ཀྱང་དོན་དམ་པ་དང་ཀུན་རྫོབ་གཉིས་ཀྱིས་སྟོན་ཏེ། དེ་ལ་དོན་དམ་པར་སྟོན་པ་ནི་ཡི་གེ་ཨ་དེའི་སྒོ་ནས་དེ་བཞིན་ཉིད་སྟོན་པའོ། །ཀུན་རྫོབ་ཏུ་སྟོན་པ་ནི་ཡི་གེ་ཨ་དེ་ལས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འབྱུང་བར་བསྟན་པ་སྟེ། གང་གི་ཕྱིར་ཡི་གེ་བརྒྱ་པའི་ལེའུ་ལས་ཨ་འདི་རྣམས་ལས་ཡི་གེ་ཀ་ལ་སོགས་པ་སུམ་ཅུ་རྩ་གཉིས་འཕྲོ་བར་བཤད་པ་
དེ་ཡི་གེ་སུམ་ཅུ་རྩ་གཉིས་པོ་དེ་རྣམས་ཀྱང༌། སྐྱེས་བུ་ཆེན་བོའི་མཚན་སུམ་ཅུ་རྩ་གཉིས་སུ་བལྟའོ་ཞེས་འབྱུང་བའི་ཕྱིར་རོ། །ཏིང་ངེ་འཛིན་འདི་ལས་དོན་རྣམ་པ་གཉིས་སུ་སྟོན་པའོ། །ཡི་གེ་ཨ་དེ་རྣམས་འབྱུང་བ་སྟེ། དེ་ལ་དུས་གསུམ་དུ་མ་ཆགས་པའི་སྟོབས་ཀྱི་གནས་ཞེས་པ་ནི་དོན་དམ་པ་དེ་བཞིན་ཉིད་དེ། ཡི་གེ་ཨ་རྣམས་ཀྱི་དམིགས་བསྟན་པར་བྱ་སྟེ། དུས་གསུམ་དུ་མ་ཆགས་པའི་སྟོབས་ཞེས་པ་ནི། དེ་བཞིན་ཉིད་ཀྱི་རང་བཞིན་ཏེ། མི་འགྱུར་བ་ཡོངས་སུ་རྫོགས་པའི་མཚན་ཉིད་པས་ནམ་མཁའ་དང་འདྲ་བ་སྟེ། དུས་གསུམ་དུ་ཐོགས་པ་མེད་པའི་མཐུ་དང་ལྡན་པ་ཞེས་པའོ། །གནས་ཞེས་པ་ནི་དེ་བཞིན་ཉིད་ཀྱི་རང་བཞིན་ཏེ། ཡི་གེ་ཨའི་འབྲུ་བྱིན་གྱིས་བརླབས་པ་སྟེ། འཁོར་བ་དེའི་མཐའ་ཇི་ཙམ་པའི་བར་དུ་ཡི་གེ་ཨ་རྣམས་སུ་ལྷག་པར་གནས་ཞེས་པའི་དོན་ཏེ། དེ་ནི་དོན་དམ་པར་བསྟན་པའོ། །དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་སྟེ། གནས་རྒྱན་རྣམ་པར་དག་པ་ཞེས་པ་ནི་ཀུན་རྫོབ་ཏུ་ཡི་གེ་ཨ་ལས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྣམས་འབྱུང་བར་བསྟན་པ་སྟེ། དེ་བཞིན་གཤེགས་པའི་བསམ་གྱིས་མི་ཁྱབ་པའི་གནས་ཞེས་པ་ནི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་སྟེ། དེ་བཞིན་གཤེགས་པའི་བསམ་གྱིས་མི་ཁྱབ་པ་ནི་དེ་བཞིན་གཤེགས་པའི་སྐུ་ལས་རྫུ་འཕྲུལ་སྣ་ཚོགས་བསམ་གྱིས་མི་ཁྱབ་པ་འབྱུང་བའི་ཕྱིར་རོ། །རྒྱ་ཆེན་པོ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྣམས་ཏེ། མཚན་དེ་རྣམས་ཀྱང་ཡི་གེ་ཨ་འདི་བཞི་ལས་བྱུང་བས་ན། རྒྱན་ཞེས་པ་ནི་ཨ་འདི་རྣམས་ཡིད་ལ་བྱའོ། །རྣམ་པར་དག་པ་ཞེས་པ་ནི་མཚན་སུམ་ཅུ་རྩ་གཉིས་པོ་དེ་རྣམས་ཕྱོགས་ན་གནས་པ་དང༌། རྩ་ལའང་ཀུན་རྫོབ་པ་ན་རྣམ་པར་དག་པ་བཞེས་པའོ་།སྙིང་པོ་ཞེས་པ་ནི་འབྱུང་བའི་གནས་ཞེས་པའི་དོན་ཏེ། དེ་ལྟ་བུའི་དོན་དམ་པ་དང་ཀུན་རྫོབ་ཀྱི་སྟོན་ཅིང་འབྱུང་བའི་ཡི་གེ་ཨ་རྣམ་པ་བཞི་ཏིང་ངེ་འཛིན་ལས་བྱུང་བས་ན། ཏིང་ངེ་འཛིན་དེ་དུས་གསུམ་དུ་ན་མ་ཆགས་པའི་སྟོབས་ཀྱི་གནས་བྱིན་གྱིས་བརླབས་ཏེ། དེ་བཞིན་གཤེགས་པའི་བསམ་པའི་གནས་ཀྱིས་རྒྱན་རྣམ་པའི་སྙིང་པོ་ཞེས་བྱའོ། །ཆོས་ཀྱི་དབྱིངས་མ་ལུས་པ་སོ་སོར་བརྗོད་པའི་སྒྲ་ལས་ཆོས་ཀྱི་དབྱིངས་ལ་གནས་པའི་སྟོབས་ཡང་དག་པར་རྫོགས་པའི་སངས་རྒྱས་ཤིན་ཏུ་
མོས་པ་ལས་འབྱུང་བའི་ཚིག་འདི་བཞི་དབྱངས་གཅིག་ཏུ་འབྱུང་བར་གསུངས་ཏེ་ཞེས་པ་ནི། ཆོས་ཀྱི་དབྱིངས་མ་ལུས་པ་སོ་སོར་དམིགས་པའི་སྒྲ་ཞེས་པ་ནི། སྒྲ་འབྱུང་བ་ཨ་འདི་བཞི་གསུངས་སོ་ཞེས་པ་དང༌། འབྲེལ་ཏེ། ཨ་འདི་བཞི་སྒྲ་མ་སྐྱེས་པར་འབྱུང་བ་ལ་དམིགས་པས། བུམ་པ་ལ་སོགས་པའི་ཆོས་རྣམས་ཀྱི་ཚིག་ཐམས་ཅད་ཀྱང་མ་སྐྱེས་པའི་ཚིག་ཏུ་སྡུག་པར་འགྱུར་ཏེ། དེ་སྟོན་པའི་ཨ་བཞི་བྱེ་བྲག་གསུངས་པ། ཆོས་ཀྱི་དབྱིངས་ཀྱི་སྟོབས་ལ་གནས་པ་ཞེས་བྱ་བ་ལ་སྒོ་པ་སྟེ། ཨ་དེ་རྣམས་ཆོས་ཀྱི་དབྱིངས་ཀྱི་ཚིག་ཏུ་གྱུར་པས་ན། ཆོས་ཀྱི་དབྱིངས་ལ་གནས་པ་ཞེས་བྱའོ། །སྟོབས་ཞེས་པ་ནི་ཆོས་ཀྱི་དབྱིངས་ཀྱི་ཚིག་ལས་གཞན་དུ་མི་འགྱུར་བར་མཐུ་དང་ལྡན་པའི་ཕྱིར་རོ། །མི་མཉམ་པའི་སྟོབས་ཞེས་པ་ནི་དེ་དག་མཐུ་ཕུན་སུམ་སོགས་པ་སྟོན་བའོ། །ཡང་དག་པར་རྫོགས་པའི་སངས་རྒྱས་ཤིན་ཏུ་མོས་པ་ལས་བྱུང་བ་ཞེས་པ་ནི། དེ་བཞིན་གཤེགས་པའི་རྒྱུའི་ཚེ། ཡང་དག་པར་རྫོགས་པའི་སངས་རྒྱས་པའི་ཡོན་ཏན་རྣམས་ལ་ཇི་ལྟར་མོས་པ་མངོན་པར་བྱང་ཆུབ་པའི་ཚེ་ཡོངས་སུ་རྫོགས་པར་གྱུར་པ་དེ་ལས་ཡི་གེ་ཨ་འདི་བཞི་འབྱུང་བའི་ཕྱིར་རོ། །དབྱངས་གཅིག་ཏུ་འབྱུང་ཞེས་པ་ནི་བུམ་པ་ལ་སོགས་པའི་སོ་སོའི་ཚིག་རྣམས་མ་སྐྱེས་པའི་སྒྲ་གཅིག་པུར་འབྱུང་བའི་ཕྱིར་རོ། །ཆོས་ཀྱི་དབྱིངས་ཐམས་ཅད་ཁྱབ་པར་བྱས་ནས་ནམ་མཁའ་དང་མཉམ་པར་གྱུར་ནས་ཞེས་པ་ནི་མ་སྐྱེས་པའི་སྒྲས་ཆོས་ཀྱི་དབྱིངས་ཐམས་ཅད་ནམ་མཁས་ཁྱབ་པ་དང་འདྲ་བར་བྱས་ནས་ཞེས་པའམ། ཆོས་ཀྱི་དབྱིངས་ནམ་མཁའི་མཐའ་དང་མཉམ་པར་ཁྱབ་པར་བྱས་ནས་ཞེས་པ་སྟེ། འདི་ཡང་ཆོས་ཀྱི་དབྱིངས་ཞེས་པ་ནི་འཇིག་རྟེན་གྱི་ཁམས་རྣམས་སུ་རིག་པར་བྱའོ། །ཡི་གེ་ཨ་ནི་བྱང་ཆུབ་ཀྱི་རང་བཞིན་ཏེ། རྣམ་པ་བཞི་ལ་ནི་བྱང་ཆུབ་ཀྱི་ཡན་ལག་བཞི་དང་ལྡན་པ་སྟེ། བྱང་ཆུབ་དང་སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པ་རྣམས་རིམ་བཞིན་དུ་བལྟའོ། །དེ་བྱུང་མ་ཐག་ཏུ་ཆོས་ཀྱི་དབྱིངས་གྲགས་པའི་སྒོ་ལས། འདི་ལྟར་ཡང་དག་པར་རྫོགས་པའི་སངས་རྒྱས་ཀྱི་ཚིག་གིས་བཏབ་པ་བརྗོད་པའི་སྐད་གཅིག་ནས་གཅིག་ཏུ་གྲགས་པའོ་ཞེས་བྱ་བྱ་བ་ནི། སྙིང་པོ་དེ་རྣམས་གསུངས་པ་དང༌། འཇིག་རྟེན་གྱི་ཆོས་རྣམས་ཀྱི་སྒྲ་
ལས་དེ་བཞིན་གཤེགས་པའི་ཚིག་གི་མཚན་མ་མ་བྱུང་མ་སྐྱེས་པའི་སྒྲ་སྒྲོག་པར་བྱུང་ངོ་ཞེས་པའོ། །བྱང་ཆུབ་སེམས་དཔའ་གང་གིས་ཐོས་པ་རྣམས་ཤེས་པ་ནས་རྟག་ཏུ་ནན་ཏན་ཆེར་བྱ་བ་དང༌། སེམས་ཅན་ཡོངས་སུ་དག་པའོ་ཞེས་པའི་བར་དུ་དེ་ལྟ་བུ་མ་སྐྱེས་པའི་སྒྲ་འཇིག་རྟེན་གྱི་ཁམས་ཐམས་ཅད་དུ་ཁྱབ་པ། བྱང་ཆུབ་སེམས་དཔའ་རྣམས་ཀྱིས་ཐོས་ནས་ངོ་མཚར་དུ་གྱུར་ཏེ། དེའི་རྗེས་སུ་སྔགས་པ་དང་བཅོམ་ལྡན་འདས་ལ་སླར་གསོལ་བ། འདི་ལྟར་ཡང་དག་པར་རྫོགས་པའི་སངས་རྒྱས་ཀྱི་སྙིང་པོ་འདི་སྒྲུབ་པ་ཞིག་ཡོད་ན་ཞེས་པ་ནས། མངོན་རྟགས་བྱུང་བའི་བར་དུ་འདུག་གོ་ཞེས་པའི་བར་དུ་སྒྲུབ་པའི་སྔོན་རོལ་དུ་བྱང་ཆུབ་སེམས་བསྐྱེད་པར་བྱ་བ་སྟེ། དེ་ཡང་གཙུག་ལག་ཁང་ངམ་སྐྱེད་མོས་ཚལ་ལ་སོགས་པའི་གནས་མིང་གིས་སྨོས་པའམ། དེ་ལས་གཞན་པའི་གནས་བདག་ཉིད་སེམས་གང་དུ་དགའ་བར་འདུག་སྟེ་སྒོམ་མོ། །དེ་སྐྱེད་མོས་ཚལ་དང་ཕུག་ནི་ལུས་དབེན་པར་བྱ་བའི་གནས་སོ། །གཙུག་ལག་ཁང་ནི་སེམས་དབེན་ན་ལུས་མི་དབེན་ཀྱང་བླ་སྟེ། སེམས་དབེན་པའི་གནས་སོ། །གང་ན་ཡིད་དཔེན་པ་དེར་ཞེས་པ་ནི་གནས་དེ་དག་ལས་གཞན་གང་ཡང་རུང་སྟེ། སེམས་གང་དུ་དབེན་པ་དེ་གཙོ་བས་དེར་འདུག་སྟེ། མཚན་མ་བྱུང་བའི་བར་དུ་བསྒོམ་མོ་ཞེས་པ་དང་འབྲེལ་ཏེ། །མཚན་མ་ཡང་སྐབས་འདིར་ནི་ནང་མེད་པ་དང༌། བྲུ་བ་མི་ཚ་བ་ལ་སོགས་པ་སྔགས་བཟླས་པ་ལས་བྱུང་བ་ལ་ནི་མི་བྱའི། བསམ་གཏན་སེམས་བརྟན་ཞིང་མི་འགྱུར་བར་གྱུར་པ་ལ་བྱའོ། །དེ་ལས་གང་ཡང་རུང་སྟེ། སྙིང་པོ་ཚིག་གཅིག་ཟུང་ལ་ཞེས་པ་ནས། ནམ་མཁའ་བཞིན་ཐོག་མ་ནས་ཞི་བ་དེ་ལ་ཞུགས་པར་སོམས་ལ་ཞེས་པའི་བར་དུ། གོང་དུ་སྨོས་པའི་ཚུལ་གྱིས་བྱང་ཆུབ་ཀྱི་སེམས་གོམས་པར་བྱས་ཏེ། མཚན་མ་བྱུང་ནས་རང་གི་ལྷའི་གཟུགས་སུ་སྦྱར་བ་གོམས་པར་བྱ་བ་དང༌། དེའི་སྙིང་གར་མེ་ལོང་གི་དཀྱིལ་འཁོར་ལ་སངས་རྒྱས་ཀྱི་སྐུ་བསམ་པ་དང། སངས་རྒྱས་ཀྱི་སྐུའི་སྙིང་གར་ཡང་ཟླ་བའི་དཀྱིལ་འཁོར་དང་བཟླས་པའི་སྔགས་བསམ་སྟེ། དེའི་རིམ་པ་ཡང་འདིའོ། །ཨ་རྣམ་པ་བཞི་པོ་ལས་གང་ཡང་རུང་བ་ཅིག་སྙིང་གར་ཟླ་བའི་དཀྱིལ་འཁོར་བསམས་པ་ལ། ཨ་དེའི་སྒྲ་ཆོས་ཐམས་ཅད་ཐོག་མ་ནས་མ་སྐྱེས་པའོ་ཞེས་པ་ལ་
དམིགས་ཤིང༌། རང་གི་ཕུང་པོ་ལྔ་ཐོག་མ་ནས་མ་བྱུང་མ་སྐྱེས་པའི་སྦྱོར་བའམ། རྡུལ་ཕྲན་དུ་གཞིག་པ་ལ་སོགས་པའི་སྦྱོར་བས་སྟོང་པ་ཉིད་དུ་གཞིག་སྟེ། ཟླ་བའི་དཀྱིལ་འཁོར་ལ་ཨ་གནས་པ་ཙམ་འབའ་ཞིག་ཡོད་པར་བསམས་ཏེ། དེ་ནས་ཟླ་བའི་དཀྱིལ་འཁོར་དང་ཨ་ཉིད་ཀྱང་གོང་མའི་ཚུལ་གྱིས་དམིགས་སུ་མེད་པར་བཤིག་སྟེ། ཇི་ཙམ་འདོད་ཀྱི་བར་དུ་སྟོང་པ་ཉིད་ཀྱི་ཏིང་ངེ་འཛིན་མངོན་དུ་བྱའོ། །དེ་ནས་སྙིང་རྗེའི་དབང་གིས་ཏིང་ངེ་འཛིན་དེ་ལས་ལངས་ཏེ། སྒྱུ་མ་ལྟ་བུར་མོས་པའི་ཚུལ་གྱིས། ཨ་དེ་སྙིང་གའི་ཕྱོགས་སུ་བསམས་ནས། ཨ་དེ་ལས་འོད་འཕྲོ་བ་འབྱུང་བ་དང༌། འདུས་པའི་སྦྱོར་བས་རང་གི་ལྷའི་གཟུགས་སུ་བསྒྱུར་བར་བྱ་སྟེ། དེ་ཡང་ཐེ་ཚོམ་མེད་པར་རང་གི་ལྷའི་གཟུགས་སུ་སྣང་བར་གྱུར་གྱི་བར་དུའོ། །དེ་ལ་སྤྱིར་ལྷའི་གཟུགས་སུ་བསྒྱུར་བ་ཡང་རྣམ་པ་གསུམ་སྟེ། གཅིག་ནི་ཕྱག་རྒྱ་དང་སྔགས་སྦྱར་བས་ལྷའི་གཟུགས་དེ་དག་གོ་སྙམ་པར་མོས་པ་ཙམ་མོ། གཉིས་ནི་རྟག་ཏུ་གོམས་པའི་དབང་གིས་རང་གི་ལྷའི་གཟུགས་སུ་ཐེ་ཚོམ་མེད་པར་གསལ་བར་སྣང་བའོ། །གསུམ་ནི་སྦྱོར་བའི་མཐུས་རང་གི་ལུས་བརྗེས་ཏེ། ལྷའི་ལུས་སུ་གྱུར་པ་སྟེ། དེ་ལ་སྐབས་འདིར་རྟག་ཏུ་གོམས་པའི་དབང་གིས་རང་གི་ལུས་ལྷའི་གཟུགས་སུ་གསལ་བར་སྣང་བ་ལ་བྱའོ། །དེ་ལྟར་རང་གི་ལུས་ལྷའི་གཟུགས་སུ་བསྒྱུར་ནས། དེའི་སྙིང་པོ་ཨ་གཅིག་བསམས་ཏེ། ཨ་དེ་ལས་བྱང་ཆུབ་ཀྱི་སེམས་ཀྱི་ཕྱག་རྒྱ་བསྒྱུར་བ་ཟླ་བའི་དཀྱིལ་འཁོར་མེ་ལོང་འདྲ་བར་བསམས་ཏེ། དེ་ཡང་ཤིན་ཏུ་གསལ་བ་དྲི་མ་མེད་པར་བསམ། དེའི་དབུས་སུ་ཡི་གེ་ཨ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་གྱུར་པར་བསམས་ཏེ། དེ་བས་ན་དེ་གསུངས་པ་གཉིས་པོ་ཡང་དག་པར་རྫོགས་པའི་སངས་རྒྱས་ཏེ། མེ་ལོང་གི་དཀྱིལ་འཁོར་གྱི་དབུས་སུ་པདྨའི་རྒྱལ་པོ་ཆེན་པོའི་སྟེང་ན། ཕུག་གི་ནང་ན་ཏིང་ངེ་འཛིན་དུ་ཞུགས་ཤིང༌། བཞུགས་པ་བཞིན་ཞེས་པ་ལ་སོགས་པ་སྟེ། ཕུག་གི་ནང་ན་བཞུགས་བཞིན་ཞེས་པ་ནི། མེ་ལོང་གི་དཀྱིལ་འཁོར་ནང་ན་བཞིན་གྱི་གཟུགས་བརྙན་སྣང་བ་ལྟར། དེ་ཉིད་ཀྱི་ནང་ན་ཉེ་བར་འདུག་པར་བསམས་ཏེ་ཞེས་པའོ། །དེ་ནས་དེ་བཞིན་གཤེགས་པའི་སྙིང་གར་ཟླ་བའི་དཀྱིལ་འཁོར་བསམས་ཏེ། དེའི་དབུས་སུ་བཟླས་པར་བྱ་བའི་
སྔགས་བསམས་ནས། དེ་བཟླས་ཤིང་སྔོན་དུ་བསྙེན་པ་འབུམ་བྱས་ཏེ། དེ་བས་ན་གསུངས་པ་ཐོག་མར་བསྙེན་ཏོ། །དེ་ལ་ཆིག་འབུམ་ཚང་བར་བྱའོ་ཞེས་པའོ། །དེ་བས་ན་ཟླ་བ་གཉིས་པོ་ལ་མེ་ཏོག་སྤོས་ལ་སོགས་པ་གསོལ་ཞེས་པ་ནི། སྔར་འབུམ་གཅིག་གྲངས་སུ་བཟླས་ལ། དེ་ནས་ཟླ་བ་གཉིས་དང༌། སྔ་དྲོ་དང་ཕྱི་དྲོ་ལ་མེལ་ཚེ་ཐུན་རེ་རེ། ཉི་མ་གུང་ལ་མེལ་ཚེ་ཐུན་ཕྱེད་བཟླས་པའི་སྦྱོར་བས་དུས་ཆད་པ་སྟེ། སྔར་ཆིག་འབུམ་གྲངས་ཟློས་པ་དང་ཟླ་བ་གཉིས་དུས་སུ་ཟློས་པ་ལས། ཟླ་བ་ཕྱི་མ་གཅིག་ལ་ནི་དྲི་དང་མེ་ཏོག་ལ་སོགས་པའི་མཆོད་པ་མི་བྱ་བར་བཟླས་ཏེ། དང་པོ་སེམས་མ་གོམས་པ་ལ་ཕྱིའི་མཆོད་པ་ལ་སོགས་པས་སེམས་གཡེངས་སུ་དོགས་པའི་ཕྱིར་རོ། །ཟླ་བ་ཕྱི་མ་གཉིས་པོ་ལ་ནི་གོམས་ཤིང་བརྟན་པར་གྱུར་པས་ཕྱིའི་མཆོད་པ་ལ་སོགས་པས་མི་གཡེངས་པར་འགྱུར་བའི་ཕྱིར་རོ། །ཕན་པར་བསྒྲུབ་པར་བྱ་བ་ནི། སེམས་ཅན་ལ་ནི་རྣམ་པ་མང་དུ་ཞེས་པ་ནི། ད་ནི་དཔའ་བོ་ཆེན་པོའི་སྙིང་པོ་འབྲུ་རྣམ་པ་ལྔ་པ་རྣམས་ནི་བསྒྲུབ་པ་དང་ས་རྣམས་བཤད་དེ། དེ་ལ་སྤྱིར་དེ་བཞིན་གཤེགས་པའི་རྒྱུ་དང་འབྲས་བུའི་ཡོན་ཏན་མོས་པ་སྤྱོད་པའི་ས་ནས་བརྩམས་ཏེ་ཀུན་དུ་སངས་རྒྱས་པར་གྱུར་གྱི་བར་དུ་ཅི་བསགས་པ་རྣམས་སྡུད་པའི་སྒོར་གྱུར་པ་ནི། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་དང༌། ཕུང་པོ་ལྷག་མ་མེད་པའི་མྱ་ངན་ལས་འདས་པ་སྟེ། དེ་ལས་ཕུང་པོ་ལྷག་མ་མེད་པ་མ་ལུས་པའི་མྱ་ངན་ལས་འདས་པ་ན། དེ་བཞིན་གཤེགས་པའི་མཚན་ཉིད་དུ་འདུ་ཤེས་པ་ཡང་སྤངས་པ་འོག་མའི་ཕྲ་མོའི་གནས་སུ་མངོན་པར་བྱང་ཆུབ་པའོ། །ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་ནི། ཀུན་དུ་སངས་རྒྱས་པའི་མཚན་ཉིད་ཆོས་རྣམས་སྒྱུ་མའི་རང་བཞིན་དུ་ངའི་ཆོས་རྣམས་ནི་སྟོང་པའོ་སྙམ་པའི་འདུ་ཤེས་ཙམ་པའི་བག་ཆགས་ཕྲ་མོ་ལྷག་མར་ལུས་པ་འདོད་པའི་ཁམས་སུ་བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་ནས་བདུད་རྣམ་བཞི་བཏུལ་བའོ། །དེ་ལ་ཕུང་པོ་ལྷག་མ་མ་ལུས་པའི་མྱ་ངན་ལས་འདས་པའི་སྙིང་པོ་ནི། ཨ་རྣམ་པ་བཞི་སྟེ། དེ་རྣམས་ཀྱི་སྒྲུབ་པ་ལ་སོགས་པ་ནི་བཤད་ཟིན་ཏོ། །འདིར་ནི་ཕུང་པོའི་ལྷག་མ་དང་བཅས་པའི་མྱ་ངན་ལས་འདས་པའི་སྙིང་པོ་བདུད་བཞི་འཇོམས་པའི་ཏིང་ངེ་འཛིན་ངེ་འཛིན་གྱི་སྒོ་རྣམས་ཀྱི་
སྒྲུབ་པ་དང་ལས་རྣམས་འཆད་དེ། དེ་ཡང་དེ་ནས་བཅོམ་ལྡན་འདས་རྣམ་པར་སྣང་མཛད་འཁོར་འདུས་པ་ཐམས་ཅད་ལ་གཟིགས་ནས། ཕྱག་ན་རྡོ་རྗེ་གསང་བའི་བདག་པོ་ལ་བཀའ་སྩལ་པ། ཕྱག་ན་རྡོ་རྗེ་དེ་བཞིན་གཤེགས་པ་རྣམས་ཀྱི་ཡིད་ལས་བྱུང་བ་ཞེས་བྱ་བ་ལ་སོགས་པ་སྟེ། དེ་ལ་ཡི་གེ་ཨ་ལ་སོགས་པའི་ཏིང་ངེ་འཛིན་གྱི་སྒོ་ནས་བདུང་བཞི་བཅོམ་པ་དང༌། ཏིང་ངེ་འཛིན་དེ་རྣམས་ཉིད་དབང་ཆེན་ལ་སོགས་པའི་དཀྱིལ་འཁོར་བཞིན་བྱིན་གྱིས་བརླབ་པའི་རིམ་པ་ཡང་འདི་ལྟ་སྟེ། ཡི་གེ་ཨ་ནི་ཆོས་ཐམས་ཅད་ཐོག་མ་ནས་མ་སྐྱེས་པར་ཆུད་པའི་ཏིང་ངེ་འཛིན་གྱི་སྒོ་མོ་སྟོན་པ་སྟེ། དེའི་སྒོ་ནས་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་མ་སྐྱེས་པར་ཆུད་དེ། དམིགས་སུ་མེད་ན་ཕུང་པོའི་བདུད་བཅོམ་པའོ། །ཡི་གེ་བ་ནི་ཆོས་ཐམས་ཅད་ངག་གི་ལམ་དང་བྲལ་བ་སྟོན་པའི་ཏིང་ངེ་འཛིན་གྱི་སྒོ་སྟེ། ངག་གི་ལམ་ནི་རྣམ་པར་རྟོག་པ་སྟེ། རྣམ་པར་རྟོག་པ་མེད་པར་ཆུད་དེ། རྣམ་པར་མི་རྟོག་པས་ལྷའི་བུའི་བདུད་བཅོམ་མོ། །དེ་ལྟར་ཕུང་པོ་ལ་སོགས་པའི་ཆོས་རྣམས་དང༌། དེ་ལ་དམིགས་པའི་རྣམ་པར་རྟོག་པ་མེད་ན། དེ་དག་ལ་ཆགས་པར་འགྱུར་བ་འདོད་ཆགས་ལ་སོགས་པའི་ཉོན་མོངས་པ་རྣམས་མེད་པར་ཡི་གེ་རའི་སྒོ་ནས་མཚོན་ཏེ། ཆོས་ཐམས་ཅད་རྡུལ་དང་འདྲ་བར་ཆུད་དེ། རྡུལ་ཆེ་བ་ནི་ཉོན་མོངས་པ་ལ་བྱ་སྟེ། དེས་ཉོན་མོངས་པའི་བདུད་བཅོམ་མོ། །ཡི་གེ་ཧ་ནི་ཆོས་ཐམས་ཅད་རྒྱུ་དང་འབྲས་བུར་ཆུད་པའི་ཏིང་ངེ་འཛིན་གྱི་སྒོ་དེ་ཉོན་མོངས་པ་ལ་ལས་དང་ཚེ་འབྱུང་སྟེ། ཉོན་མོངས་པ་ལ་ལས་དང་ཚེ་ཡང་མི་འབྱུང༌། ཚེ་མ་བྱུང་ན་འཆི་བར་མི་འབྱུང་སྟེ། དེ་ལྟར་ཆུད་པས་འཆི་བའི་བདུད་བཅོམ་པའོ། །དེ་ལྟར་ཆོས་རྣམས་ཐོག་མ་ནས་མ་སྐྱེས་པ་ལ་སོགས་པའི་ཚུལ་གྱིས་སྟོང་པ་ཉིད་ཀྱི་རང་བཞིན་དུ་ཆུད་པའི་སྒོ་ནི་ཡི་གེ་ལ་སྟེ། ཆོས་ཐམས་ཅད་ནམ་མཁའ་དང་འདྲའོ་ཞེས་བསྟན་པའོ། །དེ་ལྟར་ཏིང་ངེ་འཛིན་དེ་རྣམས་ལ་ཀུན་རྫོབ་ཏུ་ཡང་ཡི་གེ་ཨ་ལ་སོགས་པ་རེ་རེ་ལས་དབང་ཆེན་ལ་སོགས་པའི་དཀྱིལ་འཁོར་དུ་ཡང་སྤྱར་ཏེ། ཡི་གེ་ཨའི་སྒོ་ནས་ཞུགས་པའི་ཏིང་ངེ་འཛིན་གྱི་ཕུང་པོའི་བདུད་བཅོམ་སྟེ། ཕུང་པོ་ནི་སྲ་ཞིང་ཁུར་ཁྱེར་ནུས་པའོ། །དེ་བཞིན་དུ་དེའི་རྗེས་མཐུན་པར་ཡི་གེ་ཨ་དེ་ལས། སའི་དཀྱིལ་འཁོར་དུ་གྱུར་ཏེ། ས་ཡང་སྲ་ཞིང་
ཁུར་ཁྱེར་བཟོད་པའོ། །ཡི་གེ་པ་ལས་རྣམ་པར་རྟོག་པ་དང་བྲལ་བའི་ཏིང་ངེ་འཛིན་གྱི་སྒོར་གྱུར་ཏེ། དེ་ནི་རྟོག་པ་ལ་སོགས་པའི་དྲི་མ་དག་པར་བྱེད་པའོ། །དེ་བཞིན་དུ་ཡི་གེ་བ་ལས་ཆུའི་དཀྱིལ་འཁོར་དུ་གྱུར་པའམ་དེའི་རྗེས་སུ་མཐུན་པ་སྟེ། མེ་ནི་ཐམས་ཅད་སྲེག་ཅིང་མེད་པར་བྱེད་པའོ། །ཡི་གེ་ར་ལས་ཆོས་ཐམས་ཅད་རྡུལ་དང་བྲལ་བའི་ཏིང་ངེ་འཛིན་དུ་གྱུར་ཏེ། དེ་བཞིན་དུ་ཡི་གེ་ཧ་ལས་རླུང་གི་དཀྱིལ་འཁོར་དུ་གྱུར་པ་ཡང༌། དེའི་རྗེས་སུ་མཐུན་པ་སྟེ། རླུང་ནི་ཐམས་ཅད་དུ་འཐོར་བའམ་འཇིག་པར་བྱེད་པའི་རང་བཞིན་ནོ། །ཡི་གེ་ཁ་ལས་ཆོས་ཐམས་ཅད་སྟོང་པ་ནམ་མཁའི་རང་བཞིན་དུ་ཆུད་པའི་ཏིང་ངེ་འཛིན་དུ་གྱུར་ཏེ། དེ་བཞིན་དུ་ཡི་གེ་ཁ་ལས་ནམ་མཁའི་དཀྱིལ་འཁོར་དུ་གྱུར་པ་དང་ནམ་མཁའི་རང་བཞིན་དུ་མཐུན་ཏེ། དེ་དག་ནི་སྤྱིའི་དོན་ཏོ། །དེ་བཞིན་གཤེགས་པའི་ཡིད་ལས་བྱུང༌། །ཞེས་བྱ་བ་ནི་དེ་བཞིན་ཉིད་ཀྱི་ཡེ་ཤེས་ལས་འབྱུང་ཞེས་པ་སྟེ། ཨ་ལ་སོགས་པའི་སྟོང་པ་ཉིད་དེ་དག་ཉིད་ལ་བྱའོ། །ལས་དང་བྱ་བ་རྣམ་པར་རོལ་པ་ཞེས་བྱ་བ་ནི་གྲུབ་པ་རབ་ལ་སོགས་པ་དང་ཞི་བ་ལ་སོགས་པའི་ལས་རྣམས་བྱེད་པའོ། །སྤྱོད་པ་ནི་རོལ་མོ་ཞེས་པ་ནི་རོལ་མོ་མཁན་དང་འདྲ་སྟེ། རོལ་མོ་མཁན་གྱི་གར་ལ་སོགས་པའི་རོལ་མོ་སྣ་ཚོགས་སྟོན་ཏེ། དེ་བཞིན་དུ་སྙིང་པོ་འདི་རྣམས་ཀྱང་གྲུབ་པ་དང་ལས་སྣ་ཚོགས་སྟོན་པའི་ཕྱིར་རོ། །ཁམས་བཞི་འདུས་པ་ཞེས་པ་ནི། ས་དང་ཆུ་དང་མེ་དང་རླུང་གི་ཁམས་ཀྱི་དཀྱིལ་འཁོར་རྣམས་སྙིང་པོ་འདི་རྣམས་ལས་བྱུང་བའི་ཕྱིར་རོ། །ནམ་མཁའ་དང་འདྲ་བར་ཁྱབ་པར་ཤེས་པ་ནི། འདི་ལྟར་ནམ་མཁའ་ཐམས་ཅད་དུ་ཁྱབ་པ་དེ་བཞིན་དུ་སྙིང་པོ་དེ་རྣམས་ཀྱིས་ཀྱང་ཐམས་ཅད་དུ་ཁྱབ་པ་སྟེ། དེ་དག་ནི་སྙིང་པོ་དེ་རྣམས་ཀྱི་རང་བཞིན་བསྟན་པའོ། །སྣང་བ་དང་ནི་མི་སྣང་བའི་འབྲས་བུའི་གཙོ་ཞེས་པ་ནི་མཐུ་བསྟན་པ་སྟེ། སྣང་བ་ནི་རིག་འཛིན་ལ་སོགས་པའི་མངོན་སུམ་དུ་འགྱུར་བའོ། །མི་སྣང་བ་ནི་སངས་རྒྱས་ལ་སོགས་པའི་འབྲས་བུ་རེ་ཞིག་ནས་ཐོབ་པ་སྟེ། དེ་ལྟ་བུ་མཆོག་གི་སྦྱིན་པ་བྱེད་པ་ཞེས་པའོ། །ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མངོན་སུམ་དུ་གྱུར་ཞེས་པ་ནི། དེ་དག་གི་སྤྱོད་ཡུལ་དུ་གྱུར་པ་ཞེས་པ་སྟེ། ཉན་ཐོས་རྣམས་ཀྱང་ས་མ་ལུས་པ་དང་ཆུ་མ་ལུས་པ་ལ་སོགས་པའི་ཏིང་
ངེ་འཛིན་མངོན་དུ་བྱེད་དེ། དེ་ཡང་དཀྱིལ་འཁོར་དེ་དག་གི་རང་བཞིན་པའི་ཕྱིར་རོ། །བྱང་ཆུབ་སེམས་དཔའ་ཡང་ས་གཞི་ཐམས་ཅད་རིན་པོ་ཆེ་ལ་སོགས་པས་བཀང་སྟེ། དེ་བཞིན་གཤེགས་པ་ལ་མཆོད་པ་བྱེད་པ་ལ་སོགས་པ་ཡང་དཀྱིལ་འཁོར་འདི་དག་གི་རང་བཞིན་པའི་ཕྱིར་རོ། །སྔགས་ཀྱི་སྒོར་བྱང་ཆུབ་སེམས་དཔའ་སྤྱད་པ་སྤྱོད་པ་རྣམས་རེ་བ་ཐམས་ཅད་ཡོངས་སུ་རྫོགས་པར་བྱེད་པ་ཞེས་པ་ནི་བསྟན་པ་འདི་ལ་ཞུགས་པ་རྣམས་གྲུབ་པ་ལ་སོགས་པ་འཐོབ་པའི་སྒོ་ནས་རེ་བ་ཡོངས་སུ་རྫོགས་པར་བྱེད་པའི་ཕྱིར་རོ། །སེམས་ཅན་ཐམས་ཅད་ལ་ཕན་འདོགས་ཞེས་པ་ནི་བསྟན་པ་འདིར་ཞུགས་པ་དང་མ་ཞུགས་པ་གཉིས་ཀ་སེམས་ཅན་ལ་ཕན་འདོགས་པ་སྟེ། ལས་དུ་མ་དང་ལྡན་པ་ནི་གདོན་དང་དུག་ལ་སོགས་པ་སེལ་བའི་ལས་སྣ་ཚོགས་དང་ལྡན་པའོ། །ཕྱག་ན་རྡོ་རྗེ་སྤྱོད་པའི་རོལ་མོ་ལས་བྱ་བ་མངོན་པར་འབྱུང་བ་འབྲས་བུའི་གཙོ་བོ་སེམས་ཅན་ཀུན་གྱི་མངོན་སུམ་པ་དེ་གང་ཞེ་ན། གོང་དུ་སྨོས་པ་དེ་དག་ཉིད་དང་དངོས་སུ་བསྟན་པའི་ཕྱིར་རོ། །གང་ཞེ་ན་ཞེས་གསུངས་པའོ། །ཆོག་ཤེས་པས་ཐོག་མར་བྱས་པ་ནི། བདག་གི་དེ་ཉིད་རིམ་བཞིན་དུའོ། །ཞེས་པ་ནས་ཅི་སྨོས། དེ་ནི་བདག་ཉིད་ཀྱིས། རྒྱལ་བ་མཆོག་ཏུ་བསྒྱུར་ནའོ། །ཞེས་པའི་བར་དུ་སྔགས་པས་བདག་གི་དེ་ཁོ་ན་ཉིད་སྦྱར་བ་དང༌། དེའི་རྗེས་སུ་སྔགས་པ་འཆད་དེ། སྔགས་པས་བདག་གི་དེ་ཁོ་ན་ཉིད་སྦྱོར་བ་སྔོན་དུ་བྱས་ཏེ། དེ་ནས་སྔགས་ཀྱི་ཡི་གེ་རྣམས་ལུས་ལ་སོ་སོའི་གནས་སུ་བཀོད་དེ། དབང་ཆེན་གྱི་དཀྱིལ་འཁོར་ལ་སོགས་པར་བསྒྱུར་ནས། དེ་དག་གི་བསྒྲུབ་པ་དང་ལས་ལ་སོགས་པ་ལ་འཇུག་གོ།། རིམ་པ་དེ་ལྟ་བུར་འཇུག་པ་ཡང་སྔོན་སངས་རྒྱས་བཅོམ་ལྡན་འདས་ཆོས་རྣམས་ཐོག་མ་ནས་མ་སྐྱེས་པ་སྟོང་པའི་རང་བཞིན་དུ་མངོན་པར་བྱང་ཆུབ་པ་ནས། དེའི་འོག་ཏུ་སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་ཟད་པ་ལ་སོགས་པའི་རྒྱན་རྣམས་ཀུན་རྫོབ་ཀྱི་ཚུལ་དུ་འཇིག་རྟེན་ཐམས་ཅད་དུ་ཁྱབ་པར་སྟོན་ཏེ། དེ་བས་ན་སྔགས་པས་ཀྱང་བདག་གི་དེ་ཁོ་ན་ཉིད་སྟོང་པར་དམིགས་པ་སྔོན་དུ་བྱས་ཏེ། ཡི་གེ་དགོད་པ་དང་བཟླས་པ་ལ་སོགས་པ་ཕྱིས་བྱའོ། །དེ་ལ་ཆོག་ཤེས་པར་ཐོག་མར་བྱས་པ་ནི་བདག་གི་དེ་ཉིད་རིམ་བཞིན་ནོ་ཞེས་པ་ནས་དེའི་སངས་རྒྱས་ཀུན་གྱི་བདག་གི་དེ་ཉིད་བར་གསུངས་ཞེས་པའི་བར་དུ་
བདག་གི་དེ་ཉིད་སྦྱོར་བ་སྟེ། བདག་གི་དེ་བཞིན་ཉིད་ཅེས་པ་ནི། སྔགས་མཁན་རང་གི་སྙིང་པོ་ཡང༌། ཡི་གེ་ཨའི་སྒོ་ནས་ཐོག་མ་ནས་མ་བྱུང་མ་སྐྱེས་པར་སྟོང་པར་བཤིགས་ཏེ། དེ་བས་ན་ཨ་ལས་དབང་ཆེན་གྱི་དཀྱིལ་འཁོར་ཁ་དོག་ཤིན་ཏུ་སེར་ཞིང་ལྕི་བ་བསམས་ཏེ། དེའི་སྟེང་ན་སངས་རྒྱས་བཅོམ་ལྡན་འདས་བཞུགས་ཏེ། དེ་ལྟ་བུར་བདག་ཉིད་ཀྱི་ལུས་ལ་བསམས་ཏེ། དེ་བས་ན་གསུངས་པ་ཆོག་ཤེས་པས་ཐོག་མར་བྱའོ་ཞེས་པ་ལ་སོགས་པ་སྟེ། བདག་གི་དེ་ཉིད་རིམ་བཞིན་དུའོ། །ཞེས་པ་ནི་བྱང་ཆུབ་ཀྱི་སེམས་བསྒོམ་པ་བཞིན་བྱས་ཤིང༌། ལྷའི་གཟུགས་སུ་བསྒྲུབ་པ་ལ་སོགས་པའི་ལས་རིམ་པ་བཞིན་དུ་བྱའོ་ཞེས་པའོ། །སྔགས་མཁན་འདུག་ནས་སྔ་མ་བཞིན་དུ་ཞེས་པ་ནི། གོང་དུ་དེ་བཞིན་གཤེགས་པའི་སྙིང་པོ་བཤད་པའི་རིམ་པ་བཞིན་དུ་འདུག་ནས་ཞེས་པའོ། །དེ་བཞིན་གཤེགས་པ་དྲན་པར་བྱ། །ཞེས་པ་ནི་སློབ་པ་ལ་སོགས་པའི་ལས་རྣམས་བྱ་ན། དེ་བཞིན་གཤེགས་པ་མདུན་དུ་བསམ་པར་བྱ་སྟེ། སྔགས་དག་རིག་པ་ལ་སོགས་པ་དམིགས་པའི་ཡུལ་ཡིན་པའི་ཕྱིར་རོ། །གཉིས་སུ་ན་དེ་བཞིན་གཤེགས་པ་མདུན་དུ་བསམས་ནས་བགེགས་མེད་པའི་ཕྱིར་རོ། །བདག་ཉིད་ཨ་རུ་བྱ་བ་ནི་འཁོར་བ་དང་བཅས་བརྒྱས་པར་ཏེ་ཞེས་པའི་བདག་ཉིད་ཡི་གེ་ཨ་ལས་སྟོང་པ་ཉིད་ཀྱི་རང་བཞིན་དུ་བསམས་ཏེ། ཀླད་ཀོར་གྱིས་ནི་འཛིན་པར་བྱེད་པའི་ཡེ་ཤེས་ཀྱང་སྟོང་པ་ཉིད་དུ་སྟོན་པ་སྟེ། གཟུང་བ་དང་འཛིན་པ་མེད་པར་སྟོང་པའི་རང་བཞིན་དུ་བསྒྱུར་བར་བྱའོ་ཞེས་པའོ། །ཐམས་ཅད་ཁ་དོག་སེར་ཞིང་བཟང༌། །གྲྭ་བཞི་ལ་ནི་རྡོ་རྗེས་མཚན། །ཞེས་པ་ནི་སྟོང་པའི་རང་བཞིན་དུ་གྱུར་པ་དེ་ལས། དབང་ཆེན་གྱི་དཀྱིལ་འཁོར་གྲུ་བཞི་ཁ་དོག་ཤིན་ཏུ་སེར་བ་རྡོ་རྗེའི་མཚན་མ་བཏབ་པ་བསམ་མོ་ཞེས་པའོ། །སྔགས་པ་དེར་འདུག་བསམ་པ་ནི། །རྫོགས་པའི་སངས་རྒྱས་ཀུན་གྱི་གཙོ། །ཞེས་པ་ནི་དཀྱིལ་འཁོར་དེའི་སྟེང་ན་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསམས་ཏེ། །དེ་ཡང་བདག་གི་ལུས་ཉིད་དེ་ལྟར་བསམ་པར་ཤེས་པར་བྱའོ། །ནམ་ཞིག་སྔགས་པ་དེ་ཐེ་ཚོམ། །མེད་བདག་ཉིད་ཡང་དག་འགྱུར་ན། །ཞེས་པ་ནི་བདག་གི་དེ་ཁོ་ན་ཉིད་སྟོང་པར་དམིགས་པ་དང༌། ལྷའི་གཟུགས་སུ་གསལ་བར་སྣང་
བ་ཐེ་ཚོམ་མེད་པར་གྱུར་ནས་ཞེས་པ་སྟེ། སྟོང་པ་ཉིད་དུ་ཐེ་ཚོམ་མེད་པར་གྱུར་པ་ཡང་ཏིང་ངེ་འཛིན་དག་པ་དང༌། ཇི་བཞིན་པ་དང་བྲལ་བ་དང༌། རྣམ་པར་རྟོག་པ་ཐམས་ཅད་སྤང་བ་ན། ཇི་ལྟ་བ་ཉིད་དུ་ཐེ་ཚོམ་མེད་པའོ། །ལྷའི་གཟུགས་སུ་གསལ་བ་ཐེ་ཚོམ་མེད་པ་ཡང༌། ཏིང་ངེ་འཛིན་ལྷའི་གཟུགས་སུ་ཀུན་དུ་གསལ་བ་དང༌། རྣམ་པར་སྤང་བ་ནི་ཇི་བཞིན་པ་ཉིད་དུ་ཐེ་ཚོམ་མེད་བ་ཞེས་པ་སྟེ། ནམ་ཞིག་སྔགས་པ་རབ་ཏུ་མོས་པའི་སེམས་ཀྱིས་བྱེད་པར་གྱུར་ན། འོག་ནས་འབྱུང་བའི་རྗེས་སུ་སངས་བ་རྣམས་ཐོབ་སྟེ། འོན་ཀྱང་འགྱུར་བའི་འཇིག་རྟེན་པ་ཀུན་ལ་ཕན་པར་བྱེད་པ་སྟེ། ཞེས་པ་ནི་གྲུབ་པ་ལ་སོགས་པ་ཐོབ་པའི་སྒོ་ནས། སེམས་ཅན་རྣམས་ལ་ཕན་གདགས་ནུས་ཏེ། དེ་ནི་ཕ་རོལ་གྱི་དོན་ཕུན་སུམ་ཚོགས་པའོ། །ངོ་མཚར་མང་པོ་དང་ཡང་ལྡན། །མིག་འཕྲུལ་རྣམས་ཀྱི་གནས་ན་འདུག །ཅེས་པ་ནི་རིག་འཛིན་ལ་སོགས་པའི་གྲུབ་པ་ཐོབ་ནས། མིག་འཕྲུལ་མཁན་དང་འདྲ་བར་རྫུ་འཕྲུལ་ངོ་མཚར་སྣ་ཚོགས་རྣམས་བྱེད་ནུས་པར་འགྱུར་ཞེས་པ་སྟེ་མཐུ་ཕུན་སུམ་ཚོགས་པའོ། །ཐོག་མ་མེད་ནས་བསགས་པ་ནི། །མ་རིག་སོགས་པས་དོག་པ་རྣམས། །དེ་དག་ཐམས་ཅད་འབྱུང་བ་ནི། །སྔགས་པ་ནམ་ཞིག་སྙོམས་ཐུབ་ནའོ། །ཞེས་པ་ནི་ཐོག་མ་མེད་པའི་དུས་ནས་མ་རིག་པའི་དབང་གིས་འཁོར་བ་དོག་པ་ན། མི་དགེ་བ་དང་ཉོན་མོངས་པའི་ལས་བསགས་པ་སྦྱོར་བ་དེ་ལྟ་བུ་ལ་སྙོམས་པར་ཐུབ་ན། དེ་དག་ཐམས་ཅད་བྱང་བར་འགྱུར་རོ་ཞེས་པ་སྟེ། དེ་ནི་སྤོང་བ་ཕུན་སུམ་ཚོགས་པའོ། །ནམ་ཞིག་སེམས་ནི་བསྒོམ་བྱ་བ། །བླ་ན་མེད་པའི་བྱང་ཆུབ་སེམས། །དེ་ནས་སྔགས་པ་ལས་རྣམས་ནི། །དགེ་དང་མི་དགེ་ལས་བྱུང་བའི། །སྦྱོར་བ་རྟག་ཏུ་མི་གོས་པ། །པདྨོ་ཆུས་མི་ཆགས་དང་འདྲའོ། །ཞེས་པ་སྟེ་བྱང་ཆུབ་ཀྱི་སེམས་ཏེ་སྟོང་པའི་མཚན་ཉིད་པས་དགེ་བ་དང་མི་དགེ་བའི་ལས་ལ་སོགས་པའི་འབྲས་བུ་དངོས་པོ་རྣམས་ཀྱི་གཉེན་པོ་ཡིན་པའི་ཕྱིར་རོ། །དེ་ལ་མི་དགེ་བའི་འབྲས་བུ་མི་གོས་པ་ནི་རིགས་ན་དགེ་བའི་འབྲས་བུ་མི་གོས་ན། ཚུལ་ཁྲིམས་བསྲུང་བ་ལ་སོགས་པའི་འབྲས་བུ་ཡང་མེད་དམ་ཞེ་ན། བྱང་ཆུབ་ཀྱི་སེམས་ནི་སྟོང་པའི་རང་བཞིན་པས། དེ་བ་དག་དམིགས་སུ་མེད་པར་འགྱུར་མོད་ཀྱི། དེ་ལས་
ལངས་ནས་ཕྱིས་སྦྱོར་བ་བདག་འཚང་རྒྱ་བའི་རྒྱུར་གྱུར་པའི་ལུས་དང༌། ལོངས་སྤྱོད་ལ་སོགས་པ་དང་ལྡན་པར་ཤོག་ཅིག་ཅེས་སྨོན་ལམ་འདེབས་པས་དགེ་བའི་ལས་ཀྱི་འབྲས་བུའི་བག་ཆགས་སླར་ལྟ་བར་འགྱུར་རོ། །ཅི་སྨོས་དེ་ནི་བདག་ཉིད་ཀྱིས། རྒྱལ་པ་མཆོག་ཏུ་བསྒྱུར་ནའོ། །ཞེས་པ་ནི་བྱང་ཆུབ་ཀྱི་སེམས་འབའ་ཞིག་བསྒོམས་པས་ཀྱང༌། དེ་ལྟར་གྱུར་ན་བྱང་ཆུབ་ཀྱི་སེམས་བསྒོམ་པ་ལ་སྦྱོར་བ་པ་དེ་བདག་ཉིད་སངས་རྒྱས་ཀྱི་སྐུར་བསྒྱུར་བ་ནི། མི་དགེ་བ་ལ་སོགས་པའི་ལས་ཀྱིས་མི་གོས་པར་གྱུར་པ་ལྟ་ཅི་སྨོས་ཞེས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་བདུད་བཞི་རབ་ཏུ་འདུལ་བ་རྡོ་རྗེ་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཞེས་པ་ནི། བཅོམ་ལྡན་འདས་ཏིང་ངེ་འཛིན་དེ་ལ་ཞུགས་ནས་བདུད་བཞི་ལས་རྒྱལ་བར་བྱེད་པ་དང༌། རྡོ་རྗེ་རྣམ་པར་རོལ་པའི་སྔགས་རྣམས་འབྱུང་བས་ན། ཏིང་ངེ་འཛིན་དེ་བདུད་བཞི་ལས་རྒྱལ་བ་རྡོ་རྗེ་རྣམ་པར་རོལ་པ་ཞེས་བྱའོ། །དེ་ལ་བདུད་བཞི་ལས་རྒྱལ་བ་ཞེས་བྱ་བ་ནི། སྤོང་བ་ཕུན་སུམ་ཚོགས་པའོ། །རྡོ་རྗེ་རྣམ་པར་རོལ་པ་ཞེས་པ་ནི་རྡོ་རྗེ་དང་འདྲ་བར་ཅིས་ཀྱང་མི་ཚུགས་པར་རྣ་པར་རོལ་པ་སྤྲུལ་པ་སྟེ། མཐུ་ཕུན་སུམ་ཚོགས་པའོ། །དེ་བས་ན་གསུངས་པ། བདུད་བཞི་ལས་རྒྱལ་བར་ཞེས་པ་ལ་སོགས་པ་སྟེ། རྡོ་རྗེ་ཡི་གེའི་ཚིག་འདི་རྣམས་གསུངས་སོ་ཞེས་པ་དང་འབྲེལ་ཏོ། །བདུད་བཞི་ལས་རྒྱལ་བ་ཞེས་པ་ནི་སྔ་མ་བཞིན་ནོ། །རྒྱུད་དྲུག་རྣམ་པར་རོལ་པ་ཞེས་པ་ནི་ཡི་གེ་རྣམས་ཀྱི་སྒོ་ནས་སྟོང་པ་ཉིད་ཀྱི་ཏིང་ངེ་འཛིན་ལ་ཞུགས་ན། རྒྱུད་དྲུག་ལ་སོགས་པ་ཐམས་ཅད་དམིགས་སུ་མེད་པར་ཆུད་པ་རྒྱུད་དྲུག་ལས་རྣམ་པར་གྲོལ་ལོ། །གཉིས་སུ་ཡི་གེ་དེ་རྣམས་ཀྱི་སྒོ་ནས་དབང་ཆེན་ལ་སོགས་པའི་དཀྱིལ་འཁོར་དུ་སྦྱར་ཞིང༌། རིག་འཛིན་ལ་སོགས་པའི་གྲུབ་པ་ཐོབ་ནས་རིམ་གྱིས་ས་ལ་བླ་མ་ལ་འཕར་བས་ན། རྒྱུད་དྲུག་ལས་རྣམ་པར་གྲོལ་ལོ་ཞེས་པ་སྟེ། སྔགས་དེ་རྣམས་ཕ་རོལ་གྱི་དོན་ཕུན་སུམ་ཚོགས་པ་བསྟན་པའོ། །ཐམས་ཅད་མཁྱེན་གྱི་ཡེ་ཤེས་ཡོངས་སུ་རྫོགས་པར་བྱེད་པ་ཞེས་པ་ནི། ཡེ་ཤེས་ཕུན་སུམ་ཚོགས་པ་སྟེ། གོང་མའི་རིམ་གྱིས་ཞུགས་ན་ཐམས་ཅད་མཁྱེན་པའི་ཡེ་ཤེས་རྫོགས་པར་
འགྱུར་བའི་ཕྱིར་རོ། །སྔགས་ཀྱི་ཡི་གེ་འབྲུ་རྣམས་ལས་བདུད་བཞི་འཇོམས་པའི་ཏིང་ངེ་འཛིན་དང༌། དབང་ཆེན་ལ་སོགས་པའི་དཀྱིལ་འཁོར་འགྱུར་བའི་རིམ་པ་ནི་གོང་དུ་བཤད་ཟིན་ཏོ། །དེ་ནས་ཕྱག་ན་རྡོ་རྗེ་གསང་བའི་བདག་པོ་དང༌། རྡོ་རྗེ་འཛིན་པ་དེ་དག་དང་ཞེས་པ་ནས། གང་གི་སེམས་ཅན་ཐེག་ཆེན་གྱི། །སྔགས་ཀྱི་སྤྱོད་པ་བླ་མེད་ལ། །མཐོང་བའི་ཆོས་ལ་བདེར་སྤྱོད་པ། །རྣམ་པར་སྤྱོད་པ་དགའ་བར་རོ། །ཞེས་པའི་བར་དུ་བཅོམ་ལྡན་འདས་ཀྱི་སྔགས་གསུངས་པ་སྟེ། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་དེ་རྣམས་ཀྱིས། སྔགས་དེ་རྣམས་ཀྱི་མཐུ་དང་ཡོན་ཏན་རྣམས་ཆུད་ན་ངོ་མཚར་དུ་འགྱུར་ཏེ། སྔགས་དེ་རྣམས་ཀྱི་རྗེས་སུ་བསྔགས་པ་རྙེད་ནས། སོ་སོའི་གནས་སུ་དགོངས་པ་ཆོ་ག་རྣམས་བཤད་དུ་གསོལ་བ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དོན་ཀུན་ཏེ་ཞེས་པ་ནི་སྙིང་པོ་འདི་རྣམས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱ་བ་ཐམས་ཅད་བྱེད་པ་དོན་གྱི་མཆོག་གོ་ཞེས་པའོ། །དེས་ནི་སངས་རྒྱས་དང་བྱང་ཆུབ་སེམས་དཔའ་སྐྱོང་བ་རྣམས་དང༌། རང་སངས་རྒྱས་དང་འཇིག་རྟེན་འདི་ཡིན་ན་ཉན་ཐོས་པ་གང་དཔའ་བོ་རྣམས་སའི་སྟེང་ན་མ་ལུས་པར་རྫུ་འཕྲུལ་རྣམ་པ་དུ་མར་སྤྱོད་དོ་ཞེས་པ་ནི་སྙིང་པོ་འདི་རྣམས་ཀྱི་མཐུས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་རྫུ་འཕྲུལ་སྣ་ཚོགས་སྤྱོད། ཉན་ཐོས་དང་རང་སངས་རྒྱས་རྣམས་ཀྱང་ཏིང་ངེ་འཛིན་གྱིས་ནམ་མཁའ་སྟོང་པ་ལ་སར་བསམས་ཏེ། དེ་ལ་སྤྱོད་ལམ་བཞིར་གནས་པ་དང༌། རོ་སྨད་ལ་ཆུ་འབྱུང༌། རོ་སྟོད་ལ་མེ་འབྱུང་བ་དང༌། རླུང་གི་དཀྱིལ་འཁོར་བསམས་ནས། རི་ལ་སོགས་པ་ཡང་འཇིག་པར་བྱེད་པ་ལ་སོགས་པ་རྫུ་འཕྲུལ་སྣ་ཚོགས་སྤྱོད་དོ་ཞེས་པའོ། །དེ་དག་ཐོབ་པ་དཔེ་མེད་ཡེ་ཤེས་ཏེ། །སངས་རྒྱས་ཡེ་ཤེས་བླ་ན་མེད་པའོ། །ཞེས་པ་ནི་དེ་ལྟར་རྫུ་འཕྲུལ་སྣ་ཚོགས་སྤྱད་ནས་ཀྱང༌། སྙིང་པོ་འདི་རྣམས་ཀྱི་མཐུས། རིམ་གྱིས་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ་ཞེས་པའོ། །དེ་བས་ན་སོ་སོའི་ཆོ་ག་རྒྱས་པར་བཞག་པའི་ལས་རྣམས་སོ་སོར་བསྟན་པ་འདི་ལ་བཤད་པར་གསོལ་ཞེས་པ་ནི། སྔགས་དེ་རྣམས་ལས་དབང་ཆེན་ལ་སོགས་པའི་དཀྱིལ་འཁོར་དུ་
བསྒྱུར་བའི་ཆོ་ག་དང༌། སོ་སོར་དགོད་པ་དང་ལས་རྣམས་སྤྱོད་པ་བསྟན་པ་འདི་བཤད་དུ་གསོལ་ཞེས་པའོ། །གང་གི་སེམས་ཅན་ཐེག་པ་ཆེན་པོའི་སྔགས་ཀྱི་སྤྱོད་པ་བླ་ན་མེད་པ་མཐོང་བའི་ཆོས་ལ་ཡང་སྤྱོད་པ་ནི། རྣམ་པར་སྤྱོད་པ་དགའ་བར་རོ། །ཞེས་པ་ནི་དེ་དག་བཤད་པ་ཡང་སེམས་ཅན་རྣམས་མཐོང་བའི་ཆོས་ལ་མངོན་པར་འབྱུང་བའི་བདེན་པ་ཐོབ་པའི་ཕྱིར། དེ་རྣམས་བཤད་དུ་གསོལ་པ་སྟེ་བཤད་པའི་དགོས་པ་བསྟན་པའོ། །ད་ནི་གོང་དུ་བཤད་པ་དེ་རྣམས་སོ་སོའི་ལས་རྣམས་བཤད་དེ། ལས་དེ་རྣམས་ཀྱང་སྔགས་པ་བདག་རང་ཡི་གེ་ཨ་ལས་སྔ་མ་བཞིན་དུ་སྟོང་པ་ཉིད་དུ་བསམས་ཏེ། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དབང་ཆེན་ལ་བཞུགས་པར་བདག་ཉིད་བསམས་ཏེ། ལུས་ཀྱི་ནང་དུ་དབང་ཆེན་གྱི་དཀྱིལ་འཁོར་བསམ་ལ། དེ་ཡི་གེ་རྣམས་རིམ་བཞིན་དུ་བསམས་ཏེ། དེ་བས་ན་གསུངས་པ་དེའི་ཡངས་གཞི་རྡོ་རྗེ་ཆེན་པོར་བྱིན་གྱིས་བརླབས་ནས། ཉིད་ཀྱི་སྐུ་ལས་བྱང་ཆུབ་ཀྱི་སྙིང་པོར་ཉེ་བར་བསྟན་པར་དགོངས་ཏེ་གསུངས་པ་ཞེས་པ་ལ་སོགས་པ་སྟེ། ས་གཞི་རྡོ་རྗེ་ཆེན་པར་བྱིན་གྱིས་བརླབས་ནས་ཞེས་པ་ནི། སྐུ་དབང་ཆེན་གྱི་དཀྱིལ་འཁོར་དུ་བྱིན་གྱིས་བརླབས་ནས་ཞེས་པའོ། །ཉིད་ཀྱི་སྐུ་ལས་བྱང་ཆུབ་ཀྱི་སྙིང་པོ་ཉེ་བར་བསྟན་པ་ནས་ཞེས་པ་ནི། དེ་ལྟར་དབང་ཆེན་གྱི་དཀྱིལ་འཁོར་དུ་བསྒྱུར་བ་ལས་ཨལ་སོགས་པའི་ཡི་གེ་རྣམས་དགོད་པར་བསྟན་པ་སྟེ། ཡི་གེ་རྣམས་ཉིད་མངོན་པར་བྱང་ཆུབ་པའི་ཏིང་ངེ་འཛིན་གྱི་སྒོ་བྱང་ཆུབ་ཀྱི་སྙིང་པོ་ཞེས་བྱ་སྟེ། དེ་ལྟར་བཅོམ་ལྡན་འདས་ཀྱིས་དབང་ཆེན་གྱི་དཀྱིལ་འཁོར་དུ་སྔར་བྱིང་ཡིས་བརླབས་ནས། ཕྱིས་ཡི་གེ་རྣམས་དགོད་པར་བསྟན་པ་ཡང་མ་འོངས་པའི་འགྲོ་བ་རྣམས་ཀྱིས་ཀྱང་ཚུལ་འདི་ལྟར་བྱའོ་ཞེས་བསྟན་པའོ། །ཨ་དེ་རབ་ཏུ་ཤེས་བྱ་བ། །དབང་ཆེན་གྱི་དཀྱིལ་འཁོར་བཅས་པ། །ཕྱི་རོལ་དང་ནི་ནང་དུ་ཡང༌། །རྡོ་རྗེ་དཀྱིལ་འཁོར་ཤེས་པར་བྱ། །ཞེས་པ་ནི་གོང་དུ་བཤད་པའི་རིམ་གྱིས་ཡི་གེ་ཨ་ལས་བདག་གི་ལུས་ལས་སངས་རྒྱས་ཀྱི་སྐུ་དབང་ཆེན་གྱི་དཀྱིལ་འཁོར་དང་བཅས་པར་བསམ་པའོ། །རྡོ་རྗེ་དཀྱིལ་འཁོར་ཞེས་པ་ནི་དབང་ཆེན་གྱི་དཀྱིལ་འཁོར་དེ་རྡོ་རྗེའི་མཚན་ཉིད་བཏབ་ཅེས་པའོ། །དེ་འདུག་
ནས་ཀུན་བསམས་ཞེས་པ་ནི། ཡི་གེ་ཨ་ལ་སོགས་པ་རྣམས་རིམ་བཞིན་དུ་དེ་ལས་བསམས་ཞེས་པའོ། །སྦྱོར་བ་བསྟན་ཞེས་གསུངས་བ་ནི། དབང་ཆེན་གྱི་དཀྱིལ་འཁོར་ལ་གནས་པའི་སྐུ་དེ་ལ། སྦྱོར་བ་གནས་པས་སྤྱོར་བ་བསྟན། །ཞེས་པའོ། །ཨ་ནི་སྲོག་གི་གཙོ་བོ་སྟེ། །འདྲེན་པའི་མཆོག་ཅེས་བྱ་བ་ཡིན། །ཞེས་པ་ནི་སྔགས་པ་དབང་ཆེན་གྱི་དཀྱིལ་འཁོར་ལ་གནས་ནས། ཡི་གེ་ཨ་དེ་ཁ་དོག་གསེར་བཙོ་མ་འདྲ་བ། ནང་གི་དཀྱིལ་འཁོར་གྱེན་དུ་དབུགས་ཀྱི་རླུང་གིས་ཕུལ་བ་དང་འདྲ་བར་བསམས་ལ། བདག་གི་སྣའི་བུ་གནས་བྱུང་སྟེ། ཕ་རོལ་པོ་ནད་པའི་སྣའི་བུ་གར་ཞུགས་ནས་ཁོང་ཐམས་ཅད་དུ་ཁྱབ་པ་ནི། ཆུའི་ནང་དུ་རས་བཏིང་བའམ། གཡག་རང་བཀྲམ་པ་དང་འདྲ་བར་བསམས་ཏེ། སླར་ཡིད་ཀྱི་ཨ་དེ་དབུགས་དང་བཅས་པར་དྲང་བར་བསམ་པ་ནི། རས་སམ་གཡག་རྡ་ཆུ་ནང་དུ་བཀྲམ་པའི་དཔུང་ནས་བཟུང་ནས་དྲངས་ནས་ཞུམ་པར་འགྱུར་བ་དེ་ལྟར་བསམས་ཏེ། དེས་ནད་ཐམས་ཅད་ཨའི་རང་བཞིན་དུ་འདུས་ཏེ། སླར་ནད་པའི་སྣ་ནས་བྱུང་སྟེ། བདག་གི་ཁོང་དུ་ཞུགས་པར་བསམ་མོ། །དེ་བཞིན་དུ་ལན་མང་དུ་གོམས་པར་བྱས་ནས་ཐམས་ཅད་འདྲེན་པར་འགྱུར་རོ། །དེ་བཞིན་དུ་སེམས་དྲང་ན་ཡང་ཨ་དེ་སྔ་མ་བཞིན་དུ་རླུང་དང་བཅས་པར་བདག་གི་ལུས་ལས་ཕ་རོལ་གྱི་ལུས་ལ་འཇུག་པར་བསམས་ཏེ། ཁྱད་པར་དུ་བདག་གི་དབུགས་དང༌། ཕ་རོལ་གྱི་དབུགས་གཉིས་འདྲེས་ཏེ་གཅིག་ཏུ་གྱུར་པར་བསམས་ཏེ། ཨ་སངས་མ་བཞིན་དུ་སླར་དྲངས་ན་དབང་དུ་འགྱུར་རོ། །དེ་བཞིན་དུ་ཨ་དེས་བསྒྲུབ་པར་བྱ་བའི་མིག་ལ་སོགས་པའི་དབང་པོའི་རྒྱུད་དུ་ཁྱབ་པར་བསམས་ཏེ། སླར་དྲངས་ན་རྐང་པས་འོང་བར་འགྱུར། ཡང་སྔ་མ་བཞིན་དུ་བསམས་ཏེ། ཨ་དེས་བསྒྲུབ་པར་བྱ་བའི་ལུས་ཀྱི་ནང་ཐམས་ཅད་དུ་ཁྱབ་པར་བསམས་ཏེ། སླར་དྲངས་ན་རིལ་བོར་དྲངས་པར་འགྱུར་རོ། །ཀླུང་ཀར་བཞག་ན་ནི་སེམས་ཅན་ཀུན་གྱི་སྡུད་པར་འགྱུར་ཞེས་པ་ནི། སྔགས་པ་འདིར་ཟླ་བ་གཅིག་ཏུ་ཞེས་པ་ནས། མི་གཡོ་བ་ཤིན་ཏུ་མི་ཕྱེད་པ་དང༌། ལྷ་དང་ལྷ་མ་ཡིན་གྱིས་སོ་ཞེས་པའི་བར་དུ་བསླབ་པ་ལས་བྱུང་བའི་གྲུབ་པ་བཤད་དེ། བདག་གི་སྔ་མ་བཞིན་དུ་བསྒྱུར་ནས། སྔ་དྲོ་མེལ་ཚེ་ཐུན་གཅིག་
གུང་ལ་མེལ་ཚེ་ཐུན་གཅིག་ཏུ་བཟླས་པ། ཟླ་བ་གཅིག་གི་བར་དུ་བྱས་ན་མ་རིག་པ་བསལ་བར་འགྱུར་ཞིང༌། ལྷ་དང་ལྷ་མ་ཡིན་ལ་སོགས་པས་མི་ཚུགས་པར་འགྱུར་ཞེས་པའོ། །ལས་གང་རྒྱས་པར་འགྱུར་བ་དང༌། །བདག་གི་རྙེད་པ་སྒྲུབ་པ་ཡང༌། །དེ་དག་རྟག་ཏུ་སྔགས་མཁན་གྱིས། །ཕྱེ་བའི་དཀྱིལ་འཁོར་དབུས་སུ་སྟེ། །ཞེས་པ་ནི་རྒྱས་པའི་ལས་དང༌། བདག་གི་ལོངས་སྤྱོད་དུ་འགྱུར་བ་ལ་སོགས་པ་ཡང༌། དཀྱིལ་འཁོར་ལ་གནས་ཏེ་སྒྲུབ་བོ་ཞེས་པའོ། །གསེར་གྱི་ཁ་དོག་འབར་བར་བཅས། །ཐོར་ཚུགས་ཅོད་པན་འཆང་བ་ནི། །རྫོགས་པའི་སངས་རྒྱས་ཏིང་འཛིན་བཞུགས། །དེ་ནི་དབང་ཆེན་གནས་ཞེས་བྱའོ། །ཞེས་པ་ནི་དབང་ཆེན་གྱི་དཀྱིལ་འཁོར་ལ་བཅོམ་ལྡན་འདས་ཀྱི་སྐུ་འདི་ལྟ་བུར་ཞུགས་པར་བསམ་ཞེས་པའོ། །རྡོ་རྗེ་པདྨོ་རལ་གྲིའམ། །ཞེས་པ་ནས། དབང་ཆེན་དུ་ནི་བསྒོམ་བྱས་ཏེ། །སྒྲུབ་བོ་ཞེས་བྱ་བ་ནི་རྡོ་རྗེ་ལ་སོགས་པའི་རྫས་དེ་རྣམས་སྔགས་པ་དབང་ཆེན་གྱི་དཀྱིལ་འཁོར་ལ་གནས་ནས། རྒྱུད་གཞན་དག་ལས་འབྱུང་བའི་རིམ་གྱིས་སྒྲུབ་བོ་ཞེས་པའོ། །ད་ནི་གནས་པ་རབ་བཤད་ཀྱིས། །དེ་ནི་རྩེ་གཅིག་ཏུ་ཡང་ཉོན། །ཞེས་པ་ནས་མི་གཡོ་འདུག་པར་འགྱུར་ཞེས་པའི་བར་དུ་ཕ་རོལ་གྱི་རྒོལ་བ་ལ་སོགས་པ་གནན་པར་བྱ་བ་སྟེ། སྔགས་པས་སྔ་མ་བཞིན་དུ་དབང་ཆེན་གྱི་དཀྱིལ་འཁོར་ལ་གནས་པར་བསམས་ནས་གནན་པར་བྱ་བའི་སྤྱི་བོར་རི་རབ་ཤིན་ཏུ་སེར་ལ་ལྕི་བ་རྩེ་མོ་བརྒྱད་པ་བསམས་ཏེ། དེའི་སྟེང་དུ་པདྨོ་བསམ། པདྨོའི་སྟེང་དུ་རྡོ་རྗེ་རྒྱ་གྲམ་བསམ། དེའི་སྟེང་དུ་ཨ་དེ་ལས་བཅོམ་ལྡན་འདས་ཀྱི་སྐུ་བསམས་ཏེ། མནན་པར་གནས་པ་རྣམས་ཀྱི་སྤྱི་བོར་ནོན་པར་བསམས་ན། ཐམས་ཅད་མི་གཡོ་བར་འགྱུར་རོ་ཞེས་པའོ། །སྨན་ལ་ཡང་ན་ལན་བརྒྱ་རུ། །ཞེས་པ་ནས་དེའི་ནད་མེད་པར་འགྱུར་བ་ནི། སྔོན་གྱི་ལས་ལས་བྱུང་བ་རྣམས་སོ་ཞེས་པའི་བར་དུ་ནི་བདག་སྔ་མ་བཞིན་དུ་བསམས་ཏེ། སྨན་ལ་ལན་བརྒྱ་སྔགས། ནད་པ་ལ་བླུད་ན་ནད་འཚོ་བར་འགྱུར་རོ་ཞེས་པའོ། །དེ་ལས་གཞན་ཡང་གཙོ་བོ་ཞེས་པ་ནས་རབ་ཏུ་སྡུད་པའི་མཆོག་ནི་ཀླད་ཀྱི་འཁོར་དང་བཅས་པའོ་ཞེས་པའི་བར་དུ་བའི་སྒྲུབ་པ་རྣམས་བཤད་པ་སྟེ། ཡི་གེ་བསམ་པ་ཡང་དབང་ཆེན་
གྱི་དཀྱིལ་འཁོར་དུ་བསམ་པ་ནི་སྔ་མ་བཞིན་ཏེ། དེ་ལ་ཁྱད་པར་དུ་ནང་གི་དབང་ཆེན་གྱི་དཀྱིལ་འཁོར་ལྟེ་བའི་ཐད་ཀར་བསམ་མོ། །ཁ་བ་འོ་མའམ་དུང་འདྲ་བར། །ལྟེ་བའི་དབུས་ནས་བྱུང་བར་དེ། །ཞེས་པ་ནས། ཁ་བའི་ཕུང་པོའི་དབུས་ན་ཞུགས། །གདུག་པ་ཀུན་ཀྱང་རབ་ཏུ་ཞི། །ཞེས་པའི་བར་དུ་བའི་ལས་གཅིག་བཤད་པ་སྟེ། བདག་ཉིད་དབང་ཆེན་གྱི་དཀྱིལ་འཁོར་དུ་བསྒྱུར་ན། ནང་གི་རྡོ་རྗེའི་དཀྱིལ་འཁོར་ལྟེ་བའི་ཐད་ཀར་བསམ་སྟེ། དེའི་སྟེང་དུ་པདྨོ་དཀར་པོ་ཁ་བ་འོ་མ་དུང་འདྲ་བ་ལྟེ་བའི་ནང་ནས་འབྱུང་བ་འདུག་པར་བསམས་ཏེ། པདྨོའི་སྟེང་དུ་ཡི་གེ་བ་སྟོན་གྱི་ཟླ་བའི་ཁ་དོག་འདྲ་བ་བསམས་ལ། བ་ལ་ཆུ་རྒྱུན་དགུ་འབྱུང་བས་བསྐོར་ཏེ། ཆུའི་དཀྱིལ་འཁོར་ཟླ་བའི་འོད་འདྲ་བ་དེའི་གཞིར་གྱུར་པ་བསམས་ལ། ཡི་གེ་བ་དེ་ཡང་བུམ་པ་འདྲ་བ་སྨུག་པའི་ཟིལ་པ་དཀར་པོ་འདུས་པ་འདྲ་བའི་ནང་ན་འདུག་པར་བསམས་ཏེ། བདག་གི་ལུས་ཀྱི་ནང་ཐམས་ཅད་ཁྱབ་པར་བསམས་ན། གདུག་པ་དང་ཚ་བའི་རིམས་ལ་སོགས་པ་ཐམས་ཅད་འབྱང་བར་འགྱུར་རོ། །དེ་བཞིན་དུ་བདག་གི་ལུས་དབང་ཆེན་གྱི་དཀྱིལ་འཁོར་ལ་འདུག་པར་བསམས་ལ་གཞན་གྱི་ལུས་ལ་དེ་བཞིན་དུ་བསམས་ན། གདུག་པ་དང་ཚ་བའི་རིམས་ལ་སོགས་པ་འབྱང་བར་འགྱུར་རོ། །འོ་མ་མུ་ཏིག་ཕྲེང་དཀར་དང༌། །ཞེས་པ་ནས། སྔགས་པ་ཡིད་ལ་བསམས་ན་ནི། །གདུག་པ་ཀུན་ལས་ཐར་བར་འགྱུར། །ཞེས་པའི་བར་དུ་བའི་ལས་གཞན་ཏེ། ཡི་གེ་བདེ་སྔ་མ་བཞིན་དུ་བསམས་ནས་སྨུག་ཟིལ་མེད་པར་དེ་ལ་ཆུ་རྒྱུན་དཀར་པོ་འབྱུང་སྟེ། ཆུ་རྒྱུན་དེས་བ་དེ་ལ་འཁོར་ནས་འཁྱིལ་བར་འདུག་པར་བསམས་ལ། དེ་བདག་གི་དབུགས་ཀྱིས་བསྐྱོད་ནས་རང་གི་ལུས་ཐམས་ཅད་དུ་ཁྱབ་པར་བསམས་ན། དེས་གདུག་པ་ལ་སོགས་པའི་ནད་རྣམས་ཞི་བར་འགྱུར་རོ། །དེ་བཞིན་དུ་ཕ་རོལ་བསམས་ན་ཡང༌། གདུག་པ་ལ་སོགས་པའི་ནད་རྣམས་དེ་བཞིན་དུ་ཞི་བར་འགྱུར་རོ། །དཀྱིལ་འཁོར་དེ་ལ་སྒྲུབ་པ་ནི། །དངོས་པོ་འདི་རྣམས་ཐུབ་སེམས་ཀྱིས། །ཞེས་པ་ནས་དེ་ནི་ཞི་བྱེད་དཔལ་ལྡན་པའི་དཀྱིལ་འཁོར་རོ་ཞེས་གསུངས་པ་ཡིན་ཞེས་པའི་བར་དུ་བའི་དཀྱིལ་འཁོར་གྱི་སྦྱོར་བ་ལ་གནས་ནས། རྡོ་རྗེ་ལ་སོགས་
པའི་རྫས་མིང་གིས་སྨོས་པ་དེ་རྣམས་བསྒྲུབས་ན། ཚེ་རིང་བ་ལ་སོགས་པའི་གྲུབ་པ་རྣམས་ཐོབ་པར་འགྱུར་ཏེ་རིམ་བཞིན་དུ་སྦྱོར་བར་བྱའོ། །རབ་ཏུ་སྡུད་པའི་ཆོག་པ་ནི། །ཀླད་ཀྱི་འཁོར་དང་བཅས་ནའོ། །ཞེས་པ་ནི་ནད་པའི་ལུས་ལ་བ་དེ་ཀླད་ཀོར་དང་བཅས་པར་བསམས་ན། བ་ནི་གཟུང་བའི་ཆོས་ཐམས་ཅད་སྟོང་པར་བྱད་པ། ཀླད་ཀོར་ནི་འཛིན་པ་ཐམས་ཅད་སྟོང་པར་སྟོན་ཏེ། དེ་ལྟར་ལུས་དེ་གཟུང་བ་དང་འཛིན་པ་གཉིས་ཀ་དང་བྲལ་ཏེ། སྟོང་པས་ནད་ཀྱང་སྟོང་པའི་རང་བཞིན་དུ་འདུས་ཏེ་མེད་པར་འགྱུར་བའོ། །ར་དེ་ནི་ཉིད་མཆོག་ཡིན་ཞེས་པ་ནས། མེ་དང་བཅས་པར་སྦྱར་ནའོ་ཞེས་པའི་བར་དུ་རའི་སྒྲུབ་པ་དང་ལས་རྣམས་བཤད་དེ། ར་ནི་ཡང་དག་མཆོག་ཡིན་ཏེ། །ཞེས་པ་ནི་ཆོས་ཐམས་ཅད་རྡུལ་དང་བྲལ་བའི་ཏིང་ངེ་འཛིན་སྟོང་པའི་རང་བཞིན་མཆོག་གི་དེ་བཞིན་ཉིད་དེ་ཡི་གེར་དེ་སྟོན་པས་ན། མཆོག་གི་དེ་བཞིན་ཉིད་ཅེས་བྱ་བ་སྟེ། དོན་དམ་པའི་མཚན་ཉིད་དོ། །འོད་ཅན་གྱིས་འོད་ཅེས་བྱ་བ་ནི། ཉི་མ་དང་ཟླ་བ་དང་སྐར་མ་ལ་སོགས་པའི་འོད་ཅན་རྣམས་ཏེ། འོད་ཅན་དེ་རྣམས་ཀྱི་ནང་ན་མེ་ནི་འོད་ཅན་གྱི་མཆོག་སྟེ། ཡི་གེར་ནི་མེའི་ས་བོན་ཡིན་པས་ན་འོད་ཅན་རྣམས་ཀྱི་མཆོག་ཅེས་བྱ་སྟེ། ཀུན་རྫོབ་ཀྱི་རང་བཞིན་བསྟན་པའོ། །དེས་ན་ལས་རྣམས་གང་ཡང་རུང༌། །མཚམས་མེད་པར་ནི་འགྱུར་བ་རྣམས། །དེ་ཀུན་འབྱུང་གྱུར་སྦྱོར་བས་ནི། །ཤིན་ཏུ་འཐོབ་པར་བསམས་ནའོ། །ཞེས་པའི་བར་དུ་དེ་ལ་བསྒོམས་པའི་འབྲས་བུ་བསྟན་པ་སྟེ། ཆོས་ཐམས་ཅད་རྡུལ་དང་བྲལ་བ་སྟོང་པ་ཉིད་ཀྱི་རང་བཞིན་དུ་བསྒོམས་ན། མི་དགེ་བཅུ་ལ་སོགས་པའི་ལས་རྣམས་དང༌། དེའི་འབྲས་བུ་མཚམས་མེད་པ་ལ་སོགས་པ་དམིགས་སུ་མེད་པས་འབྱུང་བར་མི་འགྱུར་རོ་ཞེས་པའོ། །རབ་ཏུ་ཀུན་དམར་ཡིད་འོང་གྲུ་གསུམ་ལྟ་བུ་རུ་ནི་འདུག །འབར་བའི་ཕྲེང་བས་འཁོར་ལོ་ནི།། གྲུ་གསུམ་རྭ་ཅན་སྙིང་གར་གཞག །ཅེས་པ་ནི་མེའི་དཀྱིལ་འཁོར་གྱི་མཚན་ཉིད་དེ་སྙིང་གར་ནང་གི་རྡོ་རྗེའི་དཀྱིལ་འཁོར་གྱི་སྟེང་དུ་གྲུ་གསུམ་ཤིན་ཏུ་དམར་བ། འགྲེང་བུར་འདུག་པ་གྲུ་གསུམ་གྱི་མཚན་ཉིད་བཏབ་པར་བསམ་མོ་ཞེས་པའོ། །དེ་རུ་འདུག་པས་སྦྱོར་བས་བསམ། །ར་
ཀླད་ཀོར་དང་བཅས་པར་ཏེ། །ཞེས་པ་ནི་དཀྱིལ་འཁོར་གྱི་མཚན་ཉིད་དབུས་ན་ཡི་གེར་ཁ་དོག་དམར་པོ་ཀླད་ཀོར་དང་བཅས་པ་འགྲེང་བུར་འདུག་པར་བསམ་ཞེས་པ་སྟེ། ཀླད་ཀོར་དང་བཅས་པ་ནི། ཀུན་དུ་སངས་རྒྱས་པའི་སྙིང་པོ་གཟུང་བ་དང་འཛིན་པ་གཉིས་དང་བྲལ་བ་སྟོན་པའོ། །དེ་བཞིན་དུ་ཡི་གེ་བ་ཡང་ཀླད་ཀོར་མེད་ཀྱང་ཀུན་དུ་སངས་རྒྱས་པའི་སྙིང་པོ་བས་པའི་བུ་ག་ཉིད་ཀླད་ཀོར་ལྟ་བུར་འཛིན་པ་མེད་པར་སྟོན་པར་བལྟའོ། །དངོས་པོ་དེ་རྣམས་དེར་སྒྲུབས་སུ། །ཞེས་པ་ནི་མེ་དང་བཅས་པར་སྦྱར་རོ། །ཞེས་པའི་བར་དུ་ཡི་གེ་ར་བསྒྲུབ་པ་བ་དང་ལས་རྣམས་བཤད་པ་སྟེ། སྔགས་པ་རའི་དཀྱིལ་འཁོར་ལ་གནས་ནས། བསྒྲུབ་པ་མིང་གིས་སྨོས་པ་རྣམས་རྒྱུད་དང་རྟོག་པ་གཞན་ལས་བྱུང་བའི་ཚོགས་རྫས་ཀྱི་མཚན་མ་དང་བཅས་པའམ་མཚན་མ་མེད་པར་བསྒྲུབས་ན། ཉི་མ་ལ་སོགས་པ་གྲུབ་སྟེ་ཅི་བསྒོ་བ་ཉན་ཏོ། །ཧ་དེ་ཡང་དག་མཆོག་ཡིན་ཏེ།། ཞེས་པ་ནས། བདུད་རྣམས་རྣམ་པར་འགྱུར་བྱེད་པ། །རྒྱུ་ཀུན་མི་དམིགས་པ་རུ་སྟེ། །ཞེས་པའི་བར་དུ་ཧ་ཞེས་པའི་བསྒྲུབ་པ་དང༌། ཡོན་ཏན་དང་དཀྱིལ་འཁོར་ལ་སོགས་པ་བཤད་པ་སྟེ། ཧ་དེ་དེ་ཉིད་མཆོག་ཡིན་ཏེ། །ཞེས་པ་ནི་ཆོས་ཐམས་ཅད་རྒྱུ་དང་འབྲས་བུར་སྟོན་པའི་རང་བཞིན་པས་དེ་ཁོ་ན་ཉིད་ཀྱི་མཆོག་ཅེས་པའོ། །དེ་ཡང་རླུང་ལས་མངོན་བྱུང་བ། །ཞེས་པ་ནི་རླུང་གི་དཀྱིལ་འཁོར་ལས་བྱུང་བའམ། དེ་ལས་རླུང་གི་དཀྱིལ་འཁོར་འབྱུང་བས་སོ། །རྒྱུ་དང་ལས་དང་འབྲས་བུ་ཡིན། །གང་གི་ས་བོན་སྐྱེས་པར་ཏེ། །དེ་ཡིས་ཀུན་ཀྱང་འཇོམས་པ་ནི། །གང་གི་འཁོར་དང་བཅས་པའོ། །ཞེས་པ་ནི་དེའི་རང་བཞིན་བསྒོམས་པའི་འབྲས་བུ་བསྟན་པ་སྟེ། ཧ་ཞེས་པ་ནི་ཀླད་ཀོར་དང་བཅས་པར་བསམ་པས། ཆོས་ཐམས་ཅད་རྒྱུ་དང་འབྲས་བུའི་ཚུལ་གྱིས་གཟུང་བ་དང་འཛིན་པ་གཉིས་ཀ་དམིགས་སུ་མེད་དེ། རྒྱུ་ཞེས་པ་ནི་མ་རིག་པ་ལ་སོགས་པ་ཉོན་མོངས་པ་རྣམས་སོ། །ལས་ནི་ལུས་དང་ངག་ཡིད་གསུམ་གྱི་སྒོ་ནས་དགེ་བ་དང་མི་དགེ་བ་ལ་སོགས་པ་རྣམས་སོ། །འབྲས་བུ་ནི་དེ་དག་གི་རྣམ་པར་སྨིན་པ་ངན་སོང་དང་ངན་འགྲོ་ལ་སོགས་པའོ། །གང་གི་ས་བོན་རྣམས་སྐྱེ་བ། །ཞེས་
པ་ནི་རྒྱུ་དང་ལས་དེ་དག་གིས་ཡང་ཕུང་པོ་སྐྱེད་པ་སྟེ། དེ་དག་ཐམས་ཅད་དམིགས་སུ་མེད་པར་སྟོང་པས་ན་འཇོམས་པར་འགྱུར་ཞེས་པའོ། །དེ་ཡི་གཟུགས་ཀྱང་བཤད་པ་ནི། །ཁ་དོག་ནག་ལ་འོད་ཆེ་བ། །འཇིགས་ཤིང་འབར་བའི་ཕྲེང་བར་འཁོར། །ཀུན་དུ་གཡོ་བ་འབར་བཞིན་དུའོ། །ཞེས་པ་ནི་ཡི་གེ་ཧ་ཉིད་ཀྱི་གཟུགས་བསྟན་བ་སྟེ། དེ་ཡང་རླུང་གི་དཀྱིལ་འཁོར་གྱི་སྟེང་ན་གནས་པར་བསམ་སྟེ། རླུང་གི་དཀྱིལ་འཁོར་གསུངས་པ་དང༌། །དཀྱིལ་འཁོར་དེའི་སྟེང་བསམ་པ་ནི། །ཞེས་པ་ནི། བ་དན་བཅས་པར་གཡོ་བཞིན་ཏེ། །ཞེས་པའི་པར་དུ་སྟེ་གཡོ་བཞིན་པ་ནི་རླུང་གི་རང་བཞིན་གཡོ་བས་དཀྱིལ་འཁོར་གཡོ་བར་བསམ་མོ། །སྔགས་པས་བསམས་དེར་འདུག་པར་ནི། །ཡི་གེ་མཆོག་གི་ཡི་གེའོ། །ཞེས་པ་ནི་ཡི་གེའི་རང་བཞིན་སྔར་ཡང་བཤད་ཟིན་མོད་ཀྱི། ཡི་གེ་ཤེས་རབ་ཀྱི་སྒྲ་ནི་མི་འགྱུར་ཞེས་པ་སྟེ། འདི་ཡང་བཟླས་ཏེ་གསུངས་པ་ནི། རབ་ཏུ་གོམས་པའི་མཐུས་ཡི་གེ་མི་འགྱུར་བསམ་ཞེས་པའོ། །དེར་ནི་དངོས་པོ་རྣམས་སྒྲུབ་པ། །དེ་ཀུན་སྔགས་པ་ཡིས་བྱས་པ། །སེམས་ཐུབ་དཀྱིལ་འཁོར་འདུག་ནས་སོ། །ཞེས་པའི་བར་དུ་མིང་གིས་སྨོས་པའི་དངོས་པོ་དེ་རྣམས་སྔགས་པ་རླུང་གི་དཀྱིལ་འཁོར་ལ་གནས་ནས་རྒྱུད་གཞན་ལས་བྱུང་བའི་ཆོ་ག་བཞིན་དུ་གྲུབ་པར་བྱའོ་ཞེས་པ་སྟེ། ཡི་གེ་དེ་བཞི་ཆར་ཡང་བརྩིས་ན་གོ་གཅིག་པ་ནི། དབང་ཆེན་གྱི་དཀྱིལ་འཁོར་གྱི་ནང་དུ་བསམ་ཞིང༌། བདག་ཉིད་ཀུན་དུ་སངས་རྒྱས་པའི་སྐུར་བསྒྱུར་དང༌། ནང་གི་རྡོ་རྗེའི་དཀྱིལ་འཁོར་ཡི་གེ་བ་ལ་སོགས་པ་གང་བསམས་པའི་གནས་དེ་ཉིད་དུ་སྤོང་ཞིང་བསམས་པ་དང་ལས་སུ་བྱ་བ་རྣམས་མ་རྟོགས་པར་བསྒྲུབ་བ་རྣམས་ལ། ཕྱག་ན་རྡོ་རྗེ་རྩེ་ལྔ་པ་བཅིངས་ཏེ། སྔོན་དུ་བསྙེན་པ་ཟླ་བ་གཅིག་ཏུ་དུས་གསུམ་དུ་བྱ་བ་དང༌། མཚན་མ་དང་བཅས་པ་དང་མཚན་མ་མེད་པ་གཉིས་བསྒྲུབ་ཏུ་རུང་བ་ནི་ཀུན་ལ་སོ་སོར་སྤྱད་པར་བྱའོ། །དེས་ནི་སྙིང་པོ་བྱང་ཆུབ་ཏུ། །བྱང་ཆུབ་སེམས་དཔའ་གྲགས་ཆེན་རྣམས། །བདུད་རྣམས་རྣམ་པར་འདུལ་བྱེད་པ། །རྒྱུ་ཀུན་མི་དམིགས་པ་རུ་སྟེ། །ཞེས་པ་ནི་ཡི་གེའི་མཐུ་བསྟན་པ་སྟེ། བྱང་
ཆུབ་སེམས་དཔའ་རྣམས་ཀྱང་ཡི་གེ་འདིའི་སྒོ་ནས་ཆོས་ཐམས་ཅད་རྒྱུ་དང་བྲལ་བར་ཆུད་ནས། བདུད་བཞི་རྣམ་པར་བཅོམ་སྟེ། མངོན་པར་བྱང་ཆུབ་པ་ཐོབ་བོ་ཞེས་པའོ། །རྒྱུ་མེད་པས་ན་འབྲས་བུ་ཡང་མེད་དོ། །ཞེས་པ་ནས། གནས་མཆོག་དམ་པ་བསྒྲུབ་པར་བྱའོ། །ཞེས་བྱ་བའི་བར་དུ་ཡི་གེ་ཁཾ་གི་རང་བཞིན་དང་སྒྲུབ་པ་བཤད་པ་སྟེ། ལས་དེ་ཡང་ནི་ཡོད་པ་མ་ཡིན་ཏེ། །དེ་ལྟར་དངོས་སུ་དེ་མེད་པས། །སྟོང་པའི་ཡེ་ཤེས་ཐོབ་པ་ཡིན། །ཞེས་པ་ནི་མ་རིག་པ་ལ་སོགས་པའི་ཉོན་མོངས་པ་རྒྱུ་དང་དགེ་བ་དང་མི་དགེ་བ་ལ་སོགས་པའི་ལས་དང༌། བཟང་འགྲོ་དང་ངན་འགྲོ་ལ་སོགས་པའི་འབྲས་བུ་ཡི་གེ་ཁཾ་གཟུང་བ་དང་འཛིན་པ་སྟོང་པར་སྟོན་པའི་སྒོ་ནས་དམིགས་སུ་མེད་ཅེས་པའོ། །དེ་ཡི་གཟུགས་ཀྱང་གསུངས་པ་ནི། །མཐུ་ཆེན་སངས་རྒྱས་རྫོགས་པ་སྟེ། །ཀླད་ཀྱི་འཁོར་དང་བཅས་པ་ནི། །ཁཾ་སྟེ་ནམ་མཁའི་མཆོག་ཅེས་བྱ་བ་ནི། ཡི་གེ་དེའི་རང་བཞིན་གསུངས་པ་སྟེ། ཡི་གེ་ཁཾ་དེ་གཟུང་བ་དང་འཛིན་པ་གཉིས་ཀ་དང་བྲལ་བར་སྟོན་པས་སྟོང་པའི་མཆོག་ཅེས་བྱའོ། །རལ་གྲི་ཕྱག་རྒྱ་བཅས་པ་རུ། སྒྲུབ་པ་འདི་རྣམས་གདོན་མི་ཟ་བར་སྒྲུབ། རལ་གྲི་ཞགས་པ་འཁོར་ལོའམ། །མདའ་འམ་ཐོ་བའམ་དེ་བཞིན་ཏེ། །དེའི་དྲའི་རྫས་དང་ལྡན་པ་རུ།། གནས་མཆོག་དམ་པར་བསྒྲུབ་པར་བྱའོ། །ཞེས་པ་ནི་སྔགས་སྦྱོར་བའི་སྟན་ལ་གནས་ནས་སྤྱི་བོར་ཡི་གེ་ཁཾ་བསམས་ཏེ། ཐམས་ཅད་ནམ་མཁའི་རང་བཞིན་དུ་བསམས་ཏེ། ཡི་གེ་ཁཾ་འབའ་ཞིག་ཁ་དོག་ནམ་མཁའ་དང་འདྲ་བར་བསམས་ནས། རལ་གྲི་ཕྱག་རྒྱ་བཅིངས་ཏེ་སྔ་མ་བཞིན་དུ་བཟླས་ན་མིང་གིས་སྨོས་པ་རྣམས་འགྲུབ་པར་འགྱུར་རོ། །ནང་པར་བདག་གི་གཟུགས་བསྒྱུར་ནས། ཕྱི་རོལ་དང་ནང་ལ་མི་རྟོག་པར་འགྱུར་ན་ཞེས་པ་ནས། དེ་ལྟ་བུ་ལ་སོགས་པ་སྒྲུབ་པའི་ཚིག་ནི་ཡིད་ལས་འབྱུང་བའོ་ཞེས་པའི་བར་དུ་སྔགས་པ་སྦྱོར་བའི་བསྟན་པ་སྔ་མ་བཞིན་དུ་བསྒོམ་པ་ལས་ཁྱད་པར་དུ་བདག་གི་དེ་ཁོ་ན་སྟོང་པར་བསྒོམ་པ་འདོད་ཆགས་ལ་སོགས་པའི་ཉོན་མོངས་པ་རྣམས་ཀུན་ནས་མི་ལྡང་བར་ནུས་ཀྱི། བར་དུ་གོམས་པར་བྱས་ན་ཨ་ལ་སོགས་པའི་སྙིང་པོ་རྣམས་སྒྲུབ་པ་དང༌། ལས་རྣམས་ཕྱི་རོལ་གྱི་རྫས་ལ་མི་ལྟོས་པར་སྒྲུབ་པ་བཤད་པ་དེ། ནམ་ཨར་བདག་གི་
གཟུགས་བསྒྱུར་ནས། ཕྱི་རོལ་དང་ནང་ལ་མི་རྟོག་པར་གྱུར་ན་ཞེས་པ་ནི། ཨ་ལ་སོགས་པའི་རང་བཞིན་དུ་བསྒྱུར་ཏེ། ཕྱི་རོལ་གྱི་གཟུགས་ལ་སོགས་པ་དངོས་པོ་རྣམས་དང༌། ནང་གི་གཟུགས་ཡོད་པའི་བློ་མི་སྐྱེ་བ་སྟེ། དངོས་པོ་རྣམས་ལ་མ་ཆགས་པར་གྱུར་པ་བྱས་ལ། ཨ་དེ་བསྒྲུབས་ན་དེའི་འབྲས་བུ་བོང་བ་དང་རྡོ་དག་དང་གསེར་དུ་ཡང་མི་འབྱེད་དེ། ཇི་ལྟར་རྡོ་དང་བོང་བ་ལ་ཆགས་པ་མི་སྐྱེ་བ་དེ་བཞིན་དུ། གསེར་ལ་ཡང་ཆགས་པ་མི་སྐྱེ་སྟེ། འདོད་ཆགས་དང་ཞེ་སྡང་མངོན་དུ་མི་ལྡང་བ་དང་མི་དགེ་བ་བཅུའི་ལས་བྱས་པའི་སྡིག་པའི་འབྲས་བུའི་དབང་དུ་མི་འགྱུར་ཞིང་སྟེ། དེ་བས་གསུངས་པ་དེ་རྣམ་པར་དག་སྟེ། རྫོགས་པའི་སངས་རྒྱས་དང་འདྲ་བར་གྲུབ་པར་འགྱུར་རོ། །དེ་ནི་ལས་ཐམས་ཅད་ཀྱང་ནུས་ཞེས་པ་ནི་གྲུབ་པ་རབ་འབྲིང་ལ་སོགས་པ་གྲུབ་པ་དང༌། ཞི་བ་ལ་སོགས་པའི་ལས་རྣམས་ནུས་ཞེས་པའོ། །ཉེས་པ་ཀུན་དང་བྲལ་བ་ཡིན། །ཞེས་པ་ནི་ལས་དེ་དག་བྱེད་ན་མ་རྒྱས་པའམ་འཁྲུལ་པ་ལ་སོགས་པའི་ཉེས་པ་མེད་པར་བྱེད་ནུས་པར་འགྱུར་ཞེས་པའོ། །དེ་ལས་གཞན་ཡང་བཤད་པ་ནི། །ཞེས་པ་ནས། གང་གིས་ཆུ་དེ་འཐུངས་བ་དང༌། །ལག་པས་ཀྱང་ནི་རེག་ཀྱང་རུང༌། །གདོན་མི་ཟ་བར་དེ་དག་ཀུན། །ཐེ་ཚོམ་མ་ཟ་བྱང་ཆུབ་འགྱུར། །ཞེས་པའི་བར་དུ་བའི་སྦྱོར་བ་སྟེ། སྔགས་པ་སྦྱོར་བའི་སྟན་ལ་གནས་ནས། ཡི་གེ་བ་ལས་ཆུའི་དཀྱིལ་འཁོར་ལ་སོགས་པ་བསམ་པ་ནི་སྔ་མ་བཞིན་ཏེ། ཁྱད་པར་དུ་བ་ལས་ཆུའི་རྒྱུན་འབྱུང་བ་དང༌། ཆུའི་དཀྱིལ་འཁོར་གྱིས་བདག་གི་ལུས་སྤྱི་བོ་ནས་རྟིང་པའི་བར་དུ་རྒྱས་པར་གང་བར་བསམས་ཏེ། དེ་ལྟར་བསྟན་པར་ཡིད་ཆེས་ཏེ། ཆུ་དེ་ཐམས་ཅད་བ་སྤུའི་བུ་ག་ཐམས་ཅད་ནས་ཕྱིར་བྱུང་སྟེ། བདག་གི་ལུས་ཀྱི་ཐེན་འཁོར་དང༌། ཁང་པ་ལ་སོགས་པ་ཀུན་གང་བར་བསམས་ནས། རིམ་གྱིས་གཙུག་ལག་ཁང་དང་ཡུལ་ལ་སོགས་པ་ཐམས་ཅད་དུ་གང་བར་བསམས་ན། ཆུ་དེ་ལ་གང་སེམས་ཅན་སྐལ་བ་དང་ལྡན་པ་རྣམས་ཀྱིས་འཐུངས་སམ་རེག་པ་ན། དེ་ལྟར་འཐུངས་པ་དང༌། རེག་པའི་སྤྱོད་ཡུལ་དུ་གྱུར་པ་དེ་ནི་སེམས་ཅན་ཕལ་དང་མི་འདྲ་བར་སྐལ་བ་དང་ལྡན་པར་མངོན་པས་བྱང་ཆུབ་ཏུ་ངེས་
པར་འགྱུར་རོ་ཞེས་པའོ། །ལུས་ཀུན་དུ་ནི་ར་དེའང༌། །ཤིན་ཏུ་ཐུབ་པར་སེམས་ཀྱིས་བསམ། །ཞེས་པ་ནས། ར་དེའི་རྣམ་པར་འཕྲུལ་པའོ། །ཞེས་པའི་བར་དུ་རའི་སྦྱོར་བ་སྟེ། ལུས་ཀུན་དུ་ནི་ར་དེའི་ཡང༌། །ཤིན་ཏུ་ཐུབ་པར་སེམས་ཀྱིས་བསམ། །ཞེས་པ་ནི་སྔགས་པ་སྦྱོར་བའི་སྟན་ལ་སྔ་མ་བཞིན་དུ་གནས་ནས། སྙིང་གར་ཡི་གེར་མེའི་དཀྱིལ་འཁོར་ལ་གནས་པར་བསམ་སྟེ། འབར་བའི་འོད་འཕྲོས་རང་གི་ལུས་ཀྱི་ནང་ཐམས་ཅད་ཁྱབ་པར་གང་བར་བསམས་ནས། དེ་ལྟར་བསྟན་པར་གྱུར་པ་དང༌། བ་སྤུའི་བུ་ག་ཐམས་ཅད་ནས་ཕྱིར་བྱུང་སྟེ་རིམ་གྱིས་གྲོང་ཁྱེར་དང་ཡུལ་ལ་སོགས་པ་ཐམས་ཅད་མེའི་འོད་འཕྲོས་སྣང་བས་གང་བར་བསམས་ཏེ། དེ་བས་ན་གསུངས་པ། དེ་ནས་ཕྱི་རོལ་གྱི་གཏོང་བ་ནི། སྦྱོར་བས་སྣང་བྱེད་འབར་བ་སྟེ། །ཞེས་པའོ། །སྔགས་པ་འདོད་བཞིན་བྱེད་པ་ནི། །ར་དེས་རྣམ་པར་སྤྲུལ་པ་ཡིས། །ཞེས་པ་ནི་སྦྱོར་བ་དེ་ལྟར་བྱས་ན་ར་ལས་མེ་བྱུང་བ་དེས་སྔགས་པའི་ཅི་འདོད་པ་བཞིན་དུ་བྱེད་བར་འགྱུར་རོ་ཞེས་པའོ། །རོ་སྟོད་དུ་ནི་ར་དེར་བྱ་བ་ནི། །ལྟེ་བའི་ཁུང་གི་ནང་དུ་གཞག །འབར་བ་དང་ནི་ཆུ་འབབ་པར། །དེ་ནི་གཉིས་ཀའང་སྟོན་པར་འགྱུར། །ཞེས་པ་ནི་ར་དང་བ་གཉིས་དུས་གཅིག་ཏུ་སྦྱར་བ་སྟེ། སྔགས་པ་སྔ་མ་བཞིན་དུ་སྦྱོར་བའི་སྟན་ལ་གནས་ནས། སྙིང་གར་ཡི་གེ་ར་མེའི་དཀྱིལ་འཁོར་ལ་གནས་པར་བསམས་ཏེ། ལྟེ་བའི་ཁུང་གི་སྔ་མ་བཞིན་དུ་ཆུའི་དཀྱིལ་འཁོར་ལ་གནས་པར་བསམས་ན། དུས་གཅིག་ཏུ་ར་ལས་མེ་འབྱུང་བ་དང་བ་ལས་ཆུ་འབབ་པའི་ཆོ་འཕྲུལ་ཅན་དུ་འགྱུར་རོ།། གྲང་བས་སྡུག་བསྔལ་སེམས་ཅན་དམྱལ། །རས་ནི་ཤིན་ཏུ་ཞི་བར་བྱེད། །ཅེས་པ་ནི་ར་འབའ་ཞིག་ཏུ་སྔ་མ་བཞིན་དུ་མེའི་དཀྱིལ་འཁོར་ལ་གནས་ནས་བསྒྲིམས་ཏེ། བསྒྲུབས་ན་འགྲུབ་པའི་མེ་དེ་སེམས་ཅན་དམྱལ་བའི་སྟེང་བར་སྣང་ལ་གནས་ནས་ལུས་ལ་མེ་བྱུང་སྟེ། སེམས་ཅན་དམྱལ་བ་ཐམས་ཅད་ཁྱབ་པར་བྱས་ནས། གྲང་བས་བསྒྲིབས་ཤིང་སྡུག་བསྔལ་བའི་སེམས་ཅན་དེ་རྣམས་མེ་དེས་ཞི་བར་ནུས་ཞེས་པའོ། །བས་ནི་གདུང་བའི་རྣམ་པ་སྟེ། །སྔགས་པ་སྔགས་ཀྱི་ཆོ་གར་གནས། །ཞེས་པ་ནི་རབ་ཏུ་ཞི་བར་འགྱུར་ཞེས་པ་དང་སྦྱར་ཏེ། སྔགས་པ་
སྔ་མ་བཞིན་དུ་སྦྱོར་བའི་སྟན་ལ་གནས་ནས། ཡི་གེ་སྔ་མ་བཞིན་དུ་ཆུའི་དཀྱིལ་འཁོར་ལ་གནས་པར་བསམས་ཏེ། བ་ལས་ཆུ་བྱུང་བ་ནི་ཡང་སྔ་མ་ལྟར་བསམས་ནས། བདུད་རྩིའི་ཆུ་དེ་ཚ་བས་གདུངས་པའི་སེམས་ཅན་དམྱལ་བ་དེ་དག་ཐམས་ཅད་བསིལ་བར་འགྱུར་ཏེ་ཞི་བར་བྱས་ནས། ཐབས་ནི་མེའི་སྦྱོར་བ་དང་མཐུན་ནོ། །དེའི་འོག་ཏུ་བཞག་པ་ནི་ཧ་ཞེས་པ་སྟེ། བ་དང་བཅས་པ་དེའི་ལས་རྣམས་བསྒྲུབས་ཏེ། སྡིག་པ་དང་ལྡན་པའི་མི་ཡང་རུང་ཞེས་པ་ནི། མི་དེའི་ལས་སྦྱར་བ་ལས་མེ་མི་འབར་ཞིང་ལས་སུ་མ་བཏུབ་པར་གྱུར་ན། མེ་དེའི་དཀྱིལ་འཁོར་གྱི་འོག་ཏུ་ཡི་གེ་ཧ་རླུང་གི་དཀྱིལ་འཁོར་ལ་གནས་པར་བསམས་ཏེ། རླུང་དེས་བསྐྱོད་པར་བསམས་ན། མེ་དེ་ལས་གང་ལས་ཀྱང་སྦྱར་བ་དེ་ངེས་པར་འབྱེད་དོ་ཞེས་པ་སྟེ། སྡིག་དང་ལྡན་པའི་མི་ཡང་རུང༌། །ཞེས་པ་ནི་སྡིག་པ་དང་ལྡན་པའི་མིས་སྦྱར་ན་ཡང་འགྲུབ་ན་གཞན་ལྟ་སྨོས་ཀྱང་ཅི་དགོས་ཞེས་པ་སྟེ། ངེས་པར་ལས་བྱེད་པའི་ཚིག་བསྟན་པ་ཡིན་ནོ། །སྦྱོར་བས་ཕྱི་དང་ནང་གི་དངོས་པོ་རྣམས་ལ་མི་ལྟོས་ཏེ། ཀུན་ནས་ལྡང་བ་དང་བྲལ་བས་བསྒོམ་པར་བྱ་བ་ཡིན་པས། སྡིག་པ་དང་ལྡན་པར་མི་སྤྱོད་དོ། །སྔགས་པ་དབང་ཆེན་ལ་འདུག་ནས། །ཆུ་ཡི་ལས་ལ་ཞུགས་ཤིག་དང༌། །བསྡུ་བ་ལ་སོགས་པ་ཐམས་ཅད། །གདོན་མི་ཟ་བར་བྱེད་པར་འགྱུར། །ཞེས་པ་ནི་དབང་ཆེན་གྱི་དཀྱིལ་འཁོར་ལ་གནས་ལ་ཆུའི་ལས་བྱར་རུང་བར་བཤད་པ་སྟེ། སྔགས་པ་སྔ་མ་བཞིན་དུ་སྦྱོར་བའི་སྟན་ལ་གནས་ནས། ཡི་གེ་ཨ་དབང་ཆེན་གྱི་དཀྱིལ་འཁོར་ལ་སྔ་མ་བཞིན་དུ་བསམས་ཏེ། ཡི་གེ་བས་སྒྲུབ་པར་བྱེད་པའི་ལས་རྣམས་བྱེད་དོ་ཞེས་པའོ། །དེ་བའི་ལས་ཆུ་ཐམས་ཅད་དུ་གང་བར་བྱ་བ་ནི་མ་གཏོགས་ཏེ། ཆུ་ཐམས་ཅད་དུ་གང་བར་བྱས་ནས། དབང་ཆེན་གྱི་དཀྱིལ་འཁོར་དེ་ཉིད་ཆུའི་དཀྱིལ་འཁོར་དུ་གྱུར་པས་དབང་ཆེན་གྱི་དཀྱིལ་འཁོར་དུ་མི་འགྱུར་བའི་ཕྱིར་རོ། །བསྡུ་བ་ལ་སོགས་པ་ཐམས་ཅད་ཀྱང་བྱེད་པར་འགྱུར་ཞེས་པ་ནི་ཡི་གེ་ཨ་དེ་ནད་པ་ལ་སོགས་པའི་སྤྱི་བོར་བསམས་ལ། དེའི་འོད་འཕྲོ་བ་སེར་པོ་ཞི་བའི་རང་བཞིན་གྱིས་སྤྱི་བོ་ནས་མཐར་ཕྱི་ནང་ཁྱབ་པའི་རྟིང་བའི་
བར་དུ་ཕྱིན་པར་བཀྲུས་པར་བསམས་ན། ནད་ཀྱང་དེ་བཞིན་དུ་འདག་པར་འགྱུར་ཞེས་པའོ། །དེ་བཞིན་ནམ་ཡི་གེ་སྦྱོར་བར་བྱེད་ན་ཡང་ནད་པའི་སྤྱི་བོར་བ་དེའི་ཆུའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསམས་ལ། བུམ་པ་ཁ་སྦུབ་པའི་ཁ་ནས་བདུད་རྩིའི་ཆུ་དཀར་པོ་བབ་པར་བསམས་ཏེ། ཆུ་དེས་སྤྱི་བོ་ནས་རྟིང་པའི་བར་དུ་མཐར་གྱིས་ཕྱི་ནང་བཅས་པར་བཀྲུས་པར་བསམས་ན་ནད་ཐམས་ཅད་འབྱང་བར་འགྱུར་ཏེ། སྦྱོར་བ་དེ་ནི་སྤྱིའི་ཆོ་ག་སྟེ། གཞན་དག་ཏུ་སྦྱར་བར་བྱའོ། །རླུང་ནི་ཀུན་དུ་འགྲོ་བ་སྟེ། །ཞེས་པ་ནས། འཕྲུལ་གྱི་རྣ་བ་ཐོབ་པར་འགྱུར། །ཞེས་པའི་བར་དུ་ཡི་གེ་ཧ་དབང་ཆེན་ལ་སོགས་པའི་དཀྱིལ་འཁོར་ཀུན་གྱི་ལས་བྱེད་པར་བཤད་པ་སྟེ། དེ་ལ་རླུང་ནི་ཀུན་དུ་འགྲོ། །ཞེས་གསུངས་པ་ཞེས་པ་ནི། ཡི་གེ་ཧ་ནི་རླུང་གི་རང་བཞིན་ཏེ། དེ་ནི་དབང་ཆེན་ལ་སོགས་པའི་དཀྱིལ་འཁོར་ཀུན་དུ་གཏོགས་ཞེས་པ་སྟེ། དབང་ཆེན་གྱི་དཀྱིལ་འཁོར་དབྱིབས་གྲུ་བཞི་ཆུའི་དཀྱིལ་འཁོར་ཟླུམ་པོ་ལ་སོགས་པ་དབྱིབས་སོ་སོར་བྱེད་པ་ནི་རླུང་ཡིན་པའི་ཕྱིར་ཏེ། དེ་བས་ན་གསུངས་པ་དེ་ནི་ཐམས་ཅད་བྱེད་པའོ། །རྣམ་པ་ཐ་དད་སྣ་ཚོགས་པའི་ལས་རྣམས་ནི། རབ་ཏུ་རྣམ་པར་དབྱེ་བ་རྣམས། དེའི་ཚོགས་བྱ་བ་ནི། གཟུགས་ཀྱི་དཀྱིལ་འཁོར་དབུས་སུ་ཞེས་པ་དང་འབྲེལ་ཏེ། རྣམ་པ་ཐ་དད་པར་ཞེས་པ་ནི། དབང་ཆེན་ལ་སོགས་པའི་དཀྱིལ་འཁོར་ཁ་དོག་སེར་པོ་དང་དམར་པོ་དང་དཀར་པོ་ལ་སོགས་པའི་རྣམ་པ་ཐ་དད་པའོ། །སྣ་ཚོགས་ལས་རྣམས་ཞེས་པ་ནི། དཀྱིལ་འཁོར་དེ་རྣམས་ཀྱི་སོ་སོའི་ལས་སྣ་ཚོགས་པ་ཞེས་པའོ། །རབ་ཏུ་རྣམ་པར་དབྱེ་བའི་ལས་ཞེས་པ་ནི། དབང་ཆེན་དང་ཆུའི་དཀྱིལ་འཁོར་ལ་སོགས་པའི་སོ་སོའི་བའི་རྣམས་ཞེས་པའོ། །དེའི་ཚོགས་བྱ་ཞེས་པ་ནི་ཡི་གེ་ཧའི་ཚོགས་བྱ་ཞེས་པའོ། །གཟུགས་ཀྱི་དཀྱིལ་འཁོར་དབུས་སུའོ། །ཞེས་པ་ནི་སྔགས་པ་ལྷའི་གཟུགས་སུ་བསྒྱུར་ཏེ། དབང་ཆེན་གྱི་དཀྱིལ་འཁོར་སྦྱོར་བ་སྟན་ལ་གནས་པ་ཞེས་པ་སྟེ། མདོར་ན་ཡི་གེ་ཨ་དང་པ་ལ་སོགས་པའི་སོ་སོའི་དཀྱིལ་འཁོར་དུ་ཡི་གེ་ཧ་བསམས་ཏེ། སྦྱོར་བ་བྱས་ན་ཨ་ལ་སོགས་པའི་ལས་རྣམས་བྱེད་པར་འགྱུར་རོ་ཞེས་པའོ། །ཡིད་ཀྱང་ཡོངས་སུ་སྤྱོད་བར་དུ། །བཟླས་ན་ཡིད་ནི་
དགའ་བར་འགྱུར། །ཞེས་པ་ཡིད་ནི་ཇི་བཞིན་པ་དང་བཅས་པའི་སེམས་ཏེ། སྙིང་གར་མེ་ལོང་གི་དཀྱིལ་འཁོར་བསམས་ལ། དེའི་དབུས་ན་ཡི་གེ་ཧ་མེ་ལོང་གི་དྲི་ཕྱི་བ་བཞིན་དུ་བསམས་ཏེ། བཟླས་ན་ཕ་རོལ་སེམས་ཤེས་པར་འགྱུར་རོ། །ལུས་ནི་ཡང་བར་བསྒོམས་ནས་སུ། །འགྲོ་ཞིང་འཆག་ཚེ་བཟླས་ན་ནི། །འཕྲུལ་གྱི་རྐང་པ་ཐོབ་པར་འགྱུར། །ཞེས་པ་ནི་སེམས་ལ་བདག་གི་ལུས་ཡང་བ་ཤིང་བལ་ལྟ་བུའམ། ནམ་མཁའ་ལ་འཕུར་དུ་ཆ་སྙམ་དུ་སེམས་ཤིང་འཆག་པའི་ཚེ། ཡི་གེ་ཧ་བཟླས་ན་རྫུ་འཕྲུལ་གྱི་རྐང་པ་ཐོབ་ཅིང་ནམ་མཁའ་ལ་འགྲོ་བར་འགྱུར་རོ་ཞེས་པའོ། །ཨ་ནི་ཙོག་པུར་རབ་ཏུ་ཡང༌། །རྣ་བར་བཞག་ནས་བཟླས་བྱ་བ། །ཟླ་བ་གཅིག་ཏུ་ཚང་བར་ཏེ། །འཕྲུལ་གྱི་རྣ་བར་འགྱུར་ཞེས་པ་ནི་སྔགས་པ་ཙོག་པུར་བྱས་ཏེ། ཡི་གེ་རྣ་བར་བཞག་ལ་ཟླ་བ་གཅིག་ཏུ་བཟླས་ན། འཕྲུལ་གྱི་རྣ་བ་ཐོབ་པར་འགྱུར། །ཞེས་པའོ། །གསང་བའི་དེ་ལྟ་བུ་ལ་སོགས་པ་སྒྲུབ་པའི་ཚིག་ལས་བྱུང་བའོ་ཞེས་པ་ནི་གོང་དུ་སྨོས་པའི་སྒྲུབ་པ་དེ་རྣམས་ཕྱི་རོལ་དང་ནང་ལ་མི་རྟོག་པར་གྱུར་པས་བསྒོམས་པ་ཡིད་ལ་བྱུང་ཞེས་པའོ། །གསང་བའི་བདག་པོ་གཟུགས་མེད་པས་སེམས་མེད་པའི་དངོས་པོ་རྣམས་ཞེས་པ་ནས། དེ་བས་ཀུན་མཁྱེན་འགྲུབ་པ་ཡང། །གནས་མཆོག་ཀྱང་ནི་བསྒྲུབ་པར་བྱའོ། །ཞེས་པའི་བར་དུ་སྤྱིར་སྔགས་ཀྱི་གྲུབ་པ་རྣམས་སེམས་ཀྱིས་བསམས་པ་དང༌། ཚིག་ཏུ་བརྗོད་པ་དང༌། དེ་བཞིན་གཤེགས་པའི་བྱིན་རླབས་ལས་བྱུང་བར་བསྟན་པ་སྟེ། གཟུགས་མེད་པའི་ངོ་བོ་རྣམས་ལས་ཞེས་པ་ནི། སེམས་དང་སེམས་ལས་བྱུང་བའི་ངོ་བོ་གཟུགས་མེད་པ་རྣམས་ལས། རྣམ་པ་ཐ་དད་པ་རྣམས་ལས་མངོན་པར་འདུ་བྱས་པ་རྣམས་སེམས་ཀྱི་བསམ་པ་ལས་འབྱུང་ངོ་ཞེས་པ་དང་འབྲེལ་ཏེ། མདོར་ན་ཕྱི་རོལ་གྱི་དངོས་པོ་རྣམས་ལས་ཞེས་པ་ནི། སེམས་ཀྱི་བསམ་པ་ཙམ་ལས་གྲུབ་པ་རྣམ་པ་མང་པོ་སྣ་ཚོགས་པ་གཟུགས་དང་ལྡན་པ་རྣམས། སེམས་ལས་བྱུང་བའི་གཟུགས་མེད་པ་འབྱུང་བར་འགྱུར་རོ་ཞེས་པའོ། །ངག་རྣམ་པར་བསྐྱོད་པ་ཙམ་གྱིས་ལས་ཐམས་ཅད་དང༌། ས་བོན་བྱ་བ་འབྱུང་ཞེས་པ་ནི་ཧ་ལ་སོགས་པའི་ཡི་གེ་རྣམས་ཀྱི་སྒྲ་བརྗོད་པ་ཙམ་ལས་ཧ་ལ་སོགས་པའི་ཡིག་འབྲུ་
དབང་ཆེན་ལ་སོགས་པའི་ས་བོན་གྱི་དཀྱིལ་འཁོར་གྱི་ས་བོན་དུ་འགྱུར་བ་ཡང༌། རབ་དང་འབྲིང་ལ་སོགས་པའི་གྲུབ་པ་དང་ཞི་བ་ལ་སོགས་པའི་ལས་རྣམས་བྱེད་པར་འགྱུར་བ་འབྱུང་ངོ་ཞེས་པའོ། །ལས་ཐམས་ཅད་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་མདུན་ན་ཞེས་པ་ནས། དེ་བཞིན་གཤེགས་པ་གཟུགས་བརྙན་ལྟ་བུར་བཞུགས་སོ་ཞེས་པའི་བར་དུ་དེ་བཞིན་གཤེགས་པ་ཐམས་ཅད་དུ་བྱིན་གྱིས་བརླབས་པར་བཤད་པ་སྟེ། དེ་བཞིན་གཤེགས་པ་དེ་བྱིན་གྱིས་བརླབ་པ་ཡང་སྨོན་ལམ་གྱི་ཤུགས་ཀྱིས་གདུལ་བའི་འགྲོ་བ་རྣམས་ཇི་ལྟར་དད་པའི་སོ་སོའི་རྗེས་སུ་མཐུན་པ་ཐམས་ཅད་ཀྱི་རེ་བ་ཡོངས་སུ་རྫོགས་པར་འགྱུར་བ་སེམས་ཅན་རེ་རེའི་མདུན་ན་གཟུགས་བརྙན་ལྟ་བུར་བཞུགས་པ་ནི། ཟླ་བ་གནམ་ལ་འདུག་ཀྱང་གཟུགས་བརྙན་མཚོ་དང་རྫིང་བུ་དང་སྣོད་ཀྱི་ཆུ་ལ་སོགས་པ་ཐམས་ཅད་དུ་སྣང་བར་གྱུར་པ་དང་འདྲ་སྟེ། དེ་ལྟ་བུར་སེམས་ཀྱིས་ཚིག་བརྗོད་པ་ཙམ་དང༌། དེ་བཞིན་གཤེགས་པའི་བྱིན་གྱི་རླབས་ལས་གྲུབ་པ་རྣམ་པ་མང་པོ་སྣ་ཚོགས་པ་རྣམས་འབྱུང་བ་ལ་ལྟོས་ཞེས་པའོ། །དེ་བཞིན་གཤེགས་པ་དེ་ནི་རྣམ་པར་རྟོག་པ་ཡང་མེད་ཅེས་པ་ནས། ཆོས་དང་ཆོས་མ་ཡིན་པ་ལས་རྣམ་པར་དུལ་ཞེས་པའི་བར་ནི། དེ་བཞིན་གཤེགས་པ་དེ་ལྟར་སེམས་ཅན་ཐམས་ཅད་ཀྱི་མདུན་ན་གནས་ཀྱང་རྣམ་པར་རྟོག་པ་ལ་སོགས་པའི་དངོས་པོ་འདི་རྣམས་དང་བྲལ་ཞེས་པ་སྟེ། དེ་ལ་རྣམ་པར་རྟོག་པ་ཡང་མེད་ཅེས་པ་དེ་ནི་དེ་བཞིན་གཤེགས་པ་དེ་ངས་སེམས་ཅན་འདི་རྣམས་ཀྱི་དོན་བྱའོ་སྙམ་པའི་རྣམ་པར་རྟོག་པ་དེ་ལ་མི་འཛིན་ཞེས་པའོ། །ཡིད་ཀྱི་ཡུལ་ལས་འདས་ཞེས་པ་ནི། ཡིད་ནི་ཇི་བཞིན་པ་དང་བཅས་པའི་སེམས་ཏེ་དེ་ལས་འདས་ཞེས་པའོ། །བྱ་བ་དང་ལས་དང་ཞེས་པ་ནི་ལུས་དང་ངག་དང་ཡིད་གསུམ་གྱི་སྒོ་ནས་སྤྱོད་པའི་བྱ་བ་དང་ལས་རྣམས་དང་བྲལ་ལོ་ཞེས་པའོ། །ཆོས་དང་ཆོས་མ་ཡིན་པ་ལས་རྣམ་པར་བྲལ་བ་ཞེས་པ་ནི། ཆོས་ནི་དགེ་བ་བཅུའི་ལས་ཀྱི་ལམ། ཆོས་མ་ཡིན་པ་ནི་མི་དགེ་བ་བཅུའི་ལས་ཀྱི་ལམ་སྟེ། དེ་དག་ནི་དངོས་པོ་རྣམས་དང་བྲལ་ལོ་ཞེས་པའོ། །ཀུན་མཁྱེན་གནས་སུ་ཐོབ་བྱེད་པ། །སྔགས་སྤྱད་ལས་ནི་འབྱུང་བ་སྟེ། །ཞེས་པ་ནི་དེ་ལྟར་དངོས་པོ་དེ་
རྣམས་དང་ཡང་ལྔ་མངོན་པར་ཤེས་པ་ལ་སོགས་པའི་དངོས་པོ་རྣམས་སྔགས་ཀྱི་སྤྱོད་པའི་སྒོ་ནས་ཐོབ་པར་བྱེད་དོ་ཞེས་པའོ། །དེ་བས་ཀུན་མཁྱེན་སྒྲུབ་པ་དང༌། །གནས་མཆོག་ཀྱང་ནི་བསྒྲུབ་པར་བྱའོ། །ཞེས་པ་ནི་དེ་ལྟ་བས་ན་ལྔ་མངོན་པར་ཤེས་པ་དང༌། སངས་རྒྱས་བཅོམ་ལྡན་འདས་ཀྱིས་ཤེས་ནས་མཆོག་ཀྱང་བསྒྲུབ་པར་བྱའོ་ཞེས་པའོ། །དེ་ནས་དཔལ་ལྡན་རྡོ་རྗེ་འཛིན། །ཞེས་པ་ནས། ཡིད་ནི་དེ་ལྟར་ཤེས་པར་བྱ། །སྔགས་པ་སྔགས་རྒྱུད་ལ་གནས་སོ། །ཞེས་པའི་བར་དུ་སྔ་ཕྱི་དང་ནང་གི་བསླབ་པའི་ཡན་ལག་བཞི་དང་དཔའ་བོ་ཆེན་པོ་སྙིང་པོ་ལྔའི་བཟླས་པ་ཡན་ལག་གསུམ་སྔར་བཤད་པ་རྣམས་དེ་བཞིན་གཤེགས་པའི་སྙིང་ག་ནས་ཟླ་བའི་དཀྱིལ་འཁོར་ལ་བཟླས་པར་བྱ་བའི་སྔགས་དགོད་པ་དང༌། དབང་ཆེན་ལ་སོགས་པའི་དཀྱིལ་འཁོར་རྣམས་ལ་བཟླས་པར་བྱ་བའི་སྔགས་རྣམས་དགོད་དེ། བཟླས་པར་བྱའོ་ཞེས་མདོ་ཙམ་དུ་གསུངས་ཏེ། ཟླ་བའི་དཀྱིལ་འཁོར་དང་བཟླས་པའི་སྔགས་རྣམས་ཟློས་པ་ཉིད་ཀྱི་ཚེ་ན། གསལ་བར་སྣང་བར་བསམ་པའི་ཐབས་ཞིབ་ཏུ་མ་གསུངས་ཏེ། དེ་དག་གསལ་བར་སྣང་བའི་ཡོངས་སུ་སྦྱང་བའི་སྒོ་ནས་བཤད་པ་དང༌། ནང་གི་བཟླས་པའི་ཡན་ལག་བཞིའི་སྦྱོར་བ་ལ། བདག་གི་སྙིང་གར་དེ་བཞིན་གཤེགས་པའི་སྐུ་མེ་ལོང་གི་དཀྱིལ་འཁོར་གྱི་ནང་ན་བཞུགས་པར་བསམ་པ་ཡང་མདོ་ཙམ་གསུངས་ཏེ། གསལ་བ་ཉིད་དུ་མ་བཤད་པས་དེ་ཡང་སྔགས་ཟློས་པའི་ཚེ་ན་སེམས་ཀྱི་གསལ་བར་སྣང་བར་བྱ་བར་བཤད་པ་སྟེ། དེ་ལ། དེ་ནས་དཔལ་ལྡན་རྡོ་རྗེ་འཛིན། །མིག་མི་འཛུམས་པར་ངོ་མཚར་ཏེ། །ཞེས་པ་ནི་གོང་དུ་དབང་ཆེན་པོའི་སྙིང་པོ་རྣམས་བཤད་པ་ཐོས་ཤིང་ཆུད་ན་ངོ་མཚར་དུ་འགྱུར་བའོ། །དེ་ནི་རྡོ་རྗེ་སྤོར་བ་ནི། །འོད་ཟེར་ཀུན་དུ་འབར་བ་བཞིན། །འདི་ཀུན་སྣང་བར་གྱུར་པ་ཡང༌། །སངས་རྒྱས་ཞིང་རྣམས་ཁྱབ་པར་རོ། །ཞེས་པ་ནི་དེ་ལྟར་ངོ་མཚར་དུ་གྱུར་ཏེ། དགའ་བའི་ཤུགས་ཀྱིས་རྡོ་རྗེ་སྤོར་བ་སྟེ། རྡོ་རྗེའི་འོད་འཕྲོ་འབར་བ་དང་འདྲ་བས་སངས་རྒྱས་ཀྱི་ཞིང་ཐམས་ཅད་ཁྱབ་སྟེ་སྣང་བར་གྱུར་པའོ། །གཉིས་སུ་དེ་ལྟར་རྡོ་རྗེ་སྦོར་བ་ཡང་མ་འོངས་པའི་འགྲོ་བ་རྣམས་
སྔགས་སྤྱོད་པ་ལ་དད་པ་བསྐྱེད་པ་སྟེ། སྔགས་ཀྱི་ཕྱག་རྒྱ་རྡོ་རྗེ་སྤོར་བས་སངས་རྒྱས་ཀྱི་ཞིང་ཐམས་ཅད་འོད་ཀྱིས་ཁྱབ་པ་མཐོང་ན་དད་པ་སྐྱེ་བའི་ཕྱིར་རོ། །སྔགས་པ་རྣམས་ཀྱི་གནས་གསུངས་པ། །གནས་དེ་ཡང་ནི་མ་རྙེད་ན། །སྔགས་དེ་རྣམས་ནི་གང་ནས་དོང༌། །གཙོ་བོ་དེ་རྣམས་གང་ནས་ལྷགས། །ཞེས་པ་ནི་སྔར་བཟླས་པའི་ཡན་ལག་བཞི་ལ་སོགས་པ་གསུངས་པ་ནི། ཟླ་བའི་དཀྱིལ་འཁོར་ལ་སྔགས་གནས་པར་བྱ་བ་བཤད་པ་རྣམས་ཟློས་པ་ཉིད་ཀྱི་ཚེ་ན། བདག་གི་སྙིང་ག་ནས་དེ་བཞིན་གཤེགས་པའི་སྙིང་གར་འདོད་པ་དང༌། དེ་བཞིན་གཤེགས་པའི་སྙིང་གནས་དབུགས་སླར་སྡུད་པར་བསམ་ཞིང༌། བདག་གི་སྙིང་གར་དམིགས་པ་ན་གང་ནས་ལྷགས་པའི་གནས་གསལ་བར་བདག་གིས་མ་དམིགས་ན། དེ་གནས་དེ་དག་དམིགས་པར་བགྱི་བ་བཤད་དུ་གསོལ་ཞེས་པའོ། །ཚིག་མཆོག་ཁྱོད་ཀྱིས་མི་མཁྱེན་མེད། །ཆོས་རྣམས་ཀུན་གྱི་གནས་ཁྱོད་དོ། །ཆུ་རྣམས་ཀྱི་ནི་རྒྱ་མཚོ་བཞིན། །ཞེས་པ་ནི་བཅོམ་ལྡན་འདས་ལ་བསྟོད་པའི་ཚིག་སྟེ། །ཆོས་རྣམས་ཀུན་གྱི་གནས་ཁྱོད་དོ། །ཞེས་པ་ནི་ལུགས་ཀྱི་ཆོས་དང་ཆུད་པའི་ཆོས་ཀྱི་གནས་ཞེས་པའོ། །ཆུ་རྣམས་ཀྱི་ནི་རྒྱ་མཚོ་བཞིན། །ཞེས་པ་ནི་དེའི་དཔེ་སྟེ་ཆུ་རྣམས་ཐམས་ཅད་ཀྱི་གནས་ཀྱང་རྒྱ་མཚོ་ཡིན་པ་དང་འདྲའོ་ཞེས་པའོ། །སེམས་དཔའ་ཆེན་པོ་ཡིད་གནས་པར། །དཀྱིལ་འཁོར་རྣམས་ནི་བཤད་པ་སྟེ། གོང་དུ་ཕྱག་ན་རྡོ་རྗེས་གསོལ་བའི་དོན་ཏེ། སྔགས་རྣམས་ཀྱི་གནས་དཀྱིལ་འཁོར་རྣམས་གསུངས་པ་ནི་ཡིད་ཡིན་པར་བཤད་དེ། ཡིད་ཅེས་པ་ནི་ཇི་བཞིན་པ་དང་བཅས་པའི་སེམས་ཏེ། ནམ་བདག་གི་སེམས་ཟླ་བའི་དཀྱིལ་འཁོར་ལ་སོགས་པའི་ཇི་བཞིན་པར་སྣང་བར་གྱུར་པ་དེ་ཉིད་གནས་ཞེས་བཤད་དོ་ཞེས་པ་སྟེ། མདོར་ན་སྔགས་ཟློས་པར་བྱེད་པའི་ཚེ། རབ་ཏུ་གོམས་པའི་མཐུས་བདག་གི་སེམས་ཉིད་ཟླ་བའི་དཀྱིལ་འཁོར་ལ་སོགས་པ་ཇི་བཞིན་པར་གསལ་བར་སྣང་བར་བྱའོ། །དེ་བས་ན་གསུངས་པ་སྔགས་རྣམས་ཀྱི་གནས་སྙིང་དུ་ཤེས་ན་འབྲས་བུ་ཐོབ་ཅེས་པ་སྟེ། བདག་ཉིད་སེམས་ཉིད་སྔགས་རྣམས་ཀྱི་གནས་སུ་ཤེས་ན། ཏིང་ངེ་འཛིན་ཁུགས་ཤིང་སེམས་སྦྱོང་བའི་མཚན་མ་བས་
ཏེ། དེས་ན་ཇི་ལྟར་བསམ་པའི་གྲུབ་པ་ལ་སོགས་པ་འཐོབ་པར་འགྱུར་ཞེས་པའོ། །ཡིད་ཀྱིས་བསམས་པ་དེ་ཡང་ནི། །དཀར་པོ་སེར་པོ་དམར་པོ་སྟེ། །དེ་ལ་བྱེ་བྲག་འབྱེད་པ་ཡང༌། །སེམས་ཀྱིས་ཀྱང་ནི་བྱ་བ་ཡིན། །ཞེས་པ་ནི། སེམས་དཔའ་ཆེན་པོ་ཡིད་གནས་པ་ནི། དཀྱིལ་འཁོར་རྣམས་ནི་བཤད་པ་སྟེ། །ཞེས་པའི་འབྲེལ་པའི་ཚིག་སྟེ། ཡིད་ཇི་ལྟར་གནས་ཡིན་པ་དང༌། དཀྱིལ་འཁོར་ཡང་གང་རྣམས་ཡིན་པ་བསྟན་པ་སྟེ། དབང་ཆེན་དང་ཆུའི་དཀྱིལ་འཁོར་དཀར་པོ་དང་སེར་པོ་དང་དམར་པོ་ལ་སོགས་པ་རྣམས་ཡིད་ཀྱིས་བསམས་པ་སྟེ། དེ་རྣམས་བྱེ་བྲག་ཏུ་འབྱེད་ཅིང་ཡོངས་སུ་ཆད་པར་བྱེད་པ་ནི་སེམས་ཉིད་དེ། སེམས་ཀྱི་དཀྱིལ་འཁོར་དེ་རྣམས་གང་ཡང་རུང་བ་ཅིག་བསམས་ནས། གོམས་པའི་མཐུས་དཀྱིལ་འཁོར་ཇི་བཞིན་པ་ཉིད་དུ་བདག་གི་སེམས་གྱུར་ན། དེ་སེམས་དེ་གནས་ཤེས་བྱ་ཞེས་པའོ།། སེམས་དེ་ངེས་པར་མགུ་བ་ན། །དེ་ཡི་སྙིང་དུ་བཤད་པ་ཡིན། །ཞེས་པ་ནི་སྔགས་རྣམས་ཀྱི་གནས་སྙིང་དུ་ཤེས་ན་འབྲས་བུ་ཐོབ་པར་འགྱུར་རོ་ཞེས་གོང་དུ་བཤད་པའི་འབྲེལ་པ་སྟེ། བདག་གི་སེམས་དཀྱིལ་འཁོར་ཇི་བཞིན་པར་ཞེན་པར་འགྱུར་ཏེ། དེ་ལས་མི་འགྱུར་ཞིང་རྩེ་གཅིག་པར་གྱུར་ན། དེ་ན་སེམས་ངེས་པར་མགུ་བ་ཡིན་ཏེ། དེ་ལྟ་བུའི་ཚུལ་དུ་སེམས་མགུ་བར་གྱུར་པ་དེ་ནི་སྔགས་རྣམས་ཀྱི་གནས་སྙིང་དུ་ཤེས་པ་ཞེས་བྱའོ། །གནས་དེར་གནས་པའི་སྔགས་རྣམས་ཀྱིས། །འབྲས་བུ་ཡང་ནི་རྒྱ་ཆེར་སྦྱིན། །ཞེས་པ་དེ་ལྟར་རང་གི་སེམས་ཉིད་ཟླ་བའི་དཀྱིལ་འཁོར་ལ་སོགས་པ་ཇི་བཞིན་པར་འགྱུར་ཏེ། སྔགས་རྣམས་ཀྱང་དེར་གནས་པར་སྣང་ཞིང༌། སེམས་ཙམ་ན་སྔགས་དེ་རྣམས་འབྲས་བུ་རྒྱ་ཆེར་སྟེར་ཏེ་ཞེས་པའོ། །དེ་རུ་བསམ་པ་པདྨོ་སྟེ། །འདབ་མ་བརྒྱད་པ་གེ་སར་བཅས། །ཞེས་པ་ནས། སྔགས་པ་སྔགས་རྒྱུད་གནས་པའོ།། ཞེས་པའི་བར་དུ་ནང་གི་ཡན་ལག་བཞིས་བཟླས་པ་སྔར་བཤད་པ་ནི། བདག་གི་ལུས་ལྷར་བསྒྱུར་བའི་སྙིང་ག་ན། དེ་བཞིན་གཤེགས་པའི་སྐུ་མེ་ལོང་གི་དཀྱིལ་འཁོར་གྱི་ནང་ན་གནས་པར་བསམ་པ་དེ་ཉིད་ཞིབ་ཏུ་བཤད་པ་སྟེ། དེ་རུ་བསམ་པ་པདྨོ་སྟེ། །འདབ་མ་བརྒྱད་པའི་གེ་
སར་བཅས། །དེ་ཡི་སྟེང་དུ་ཨ་དེ་གནས། །ཞེས་པ་ནི་རང་གི་སེམས་ཟླ་བའི་དཀྱིལ་འཁོར་ཇི་བཞིན་པར་གྱུར་པ་སྟེ། པདྨོ་དང་ཨ་བསམ་མོ་ཞེས་པའི་ཨ་དེ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསམ་པ་ནི། འབར་བའི་ཕྲེང་བ་བཟང་པོས་འཁོར། །ཀུན་དུ་ཡང་ནི་གཡོ་བཞིན་བ། །ཞེས་པ་ལ་སོགས་པ་སྟེ། ཀུན་དུ་གཡོ་བཞིན་པ་ཞེས་པ་ནི་སྲོག་དང་བཅས་པར་འདྲ་བར་བསམ་མོ་ཞེས་པའོ། །གཙོ་བོ་རྣམ་མང་གཟུགས་ཀྱང་འཆང༌། །ཞེས་པ་ནི་སྐུ་མི་ཟད་པའི་རྒྱན་ལ་སོགས་པ་རྣམ་པ་དུ་མར་འབྱུང་བའི་རང་བཞིན་ཅན་ཞེས་པའོ། །མེ་ལོང་ཕུག་ན་འདུག་བཞིན་དུ། །ཞེས་པ་ནི་སྔར་བཤད་ཟིན་ཏོ། །སྣང་བ་ཀུན་ཀྱང་སྟོན་པ་ཞེས་པ་ནི། སེམས་ཅན་ཐམས་ཅད་ཀྱི་མདུན་ན་གནས་པར་སྟོན་པ་ཞེས་པའོ། །ཆུ་དང་ཟླ་བར་འདྲ་བ་རུ། །ཞེས་པ་ནི། སྣང་བ་ཀུན་ཀྱང་སྟོན་པ་སྟེ། །ཞེས་པ་ནི་དཔེ་སྟེ། ཟླ་བ་དེ་ཆུའི་ནང་ན་གཟུགས་བརྙན་འབྱུང་བར་བྱེད་པ་དང་འདྲའོ། །ཡིད་ནི་དེ་ལྟར་ཤེས་པར་བྱ། །ཞེས་པ་ནི་སྔགས་པས་རང་གི་ཡིད་དེ་དེ་བཞིན་གཤེགས་པའི་སྐུ་དེ་ལྟ་བུ་ཇི་བཞིན་པ་ཉིད་དུ་གྱུར་པར་ཤེས་པར་བྱའོ་ཞེས་པའོ། །དེ་ལྟར་དེ་བཞིན་གཤེགས་པའི་སྐུའི་བྱེ་བྲག་བཤད་པ་དེ་རྣམས་ཀྱང་སྦྱོར་བ་བས་ཚུལ་དེ་ལྟར་བསྒོམ་པར་བྱ་བ་བསྟན་པ་དང༌། དེ་བཞིན་གཤེགས་པའི་སྐུ་གསུམ་ཆར་ལ་བསྟོད་པ་ཡང་ཞར་ལ་བསྟན་པ་སྟེ། དེ་ཡི་སྟེང་དུ་ཨ་དེ་གནས། །ཞེས་པ་ནི་ཆོས་ཀྱི་སྐུའི་རང་བཞིན་བསྟན་ཅིང་བསྟོད་པའོ། །འབར་བའི་ཕྲེང་བ་བཟང་པོས་འཁོར། །ཞེས་པ་ནས། གཙོ་བོ་རྣམས་མང་གཟུགས་ཀྱང་འཆང༌། །ཞེས་པའི་བར་དུ་རྫོགས་ལོངས་སྤྱོད་པའི་སྐུའི་རང་བཞིན་དུ་བསྟོད་པའོ། །སྣང་བ་ཀུན་ཀྱང་སྟོན་པ་སྟེ། །ཆུ་ནང་ཟླ་བ་འདུག་པ་བཞིན། །ཞེས་པ་ནི་སྤྲུལ་པའི་སྐུའི་རང་བཞིན་ལ་བསྟོད་པའོ། །དེ་ནས་སྔགས་པ་རོ་སྟོད་ཀྱི། །ཞེས་པ་ནས། བླ་མེད་སངས་རྒྱས་ཡེ་ཤེས་སོ། །ཞེས་པའི་བར་དུ་སྦྱར་བ་སྦྱོར་བའི་སྟན་སྦྱར་བ་ལས། ཀླད་པའི་ནང་དུ་ཡི་གེ་ཨ་ཤིན་ཏུ་དཀར་བ་བསམས་ལ། མིག་གི་ནང་དུ་ཡི་གེར་བསམས་ཏེ། །ཡི་གེ་དེའི་འོད་ཀྱིས་སྙིང་ག་ནས་དེ་བཞིན་གཤེགས་པའི་སྐུ་བསམ་པ་སྟེ། སྣང་བར་བསམ་པ་དང༌། དེ་རྣམས་བསམས་ནས་ཀྱང་ཡི་གེ་རའི་གནས་མིག་གཉིས་སུ་
ཡི་གེ་ལ་བསམས་ཏེ། རའི་སྒྲ་ནི་དེ་ཁོ་ན་ཉིད་ཆོས་ཐམས་ཅད་མཚན་ཉིད་མེད་པར་སྟོན་པ་ལ་དམིགས་ནས། ཐམས་ཅད་སྟོང་པའི་རང་བཞིན་དུ་བསམས་པ་དང༌། ཨ་ལ་སོགས་པའི་ཡི་གེ་དག་བསམས་པ་ལས་གྲུབ་པར་འགྱུར་བ་དང༌། དེའི་རྗེས་སུ་སྔགས་པ་རྣམས་འཆད་དེ། ཡི་གེ་དེ་རྣམས་དེ་ལྟར་བསམས་པ་དང༌། སེམས་ཡོངས་སུ་སྦྱང་བ་དང༌། དེ་རྣམས་སྦྱར་བ་ལས་གྲུབ་པ་ཐོབ་པའི་ཕྱིར་ཏེ། དེ་སེམས་ཡོངས་སུ་སྦྱང་བའི་རིམ་པ་ཡང་ཐོག་མ་ཉིད་བདག་གི་ལུས་ཡི་གེ་ཨ་ལ་སོགས་པའི་སྒོ་ནས་མ་བྱུང་མ་སྐྱེས་པར་སྟོང་པར་བཤིགས་ཏེ། དེ་རྣམས་སླར་ཡི་གེ་ཨ་བསམས་ཏེ། ཨ་དེ་ལས་གོང་མའི་རིམ་བཞིན་དུ་ཕྱི་ནང་གི་དབང་གི་རྡོ་རྗེ་དཀྱིལ་འཁོར་དང་བཅས་པའི་ལྷའི་གཟུགས་སུ་བདག་གི་ལུས་བསྒྱུར་ཏེ། ནང་གི་དཀྱིལ་འཁོར་གྱི་དབུས་ན་བཅོམ་ལྡན་འདས་རྣམ་པར་སྣང་མཛད་གོང་དུ་སྨོས་པའི་ཚུལ་བཞིན་དུ་བསམས་ཏེ། དེ་ནས་ཀླད་པའི་ནང་དུ་ཡི་གེའི་ཨ་ཤིན་ཏུ་དཀར་བ་བསམས་ལ་མིག་གཉིས་སུ་བསམས་ཏེ། ར་དེ་ཡང་ཆོས་ཀྱི་དབྱིངས་ཀྱི་ཡི་གེ་ཤིན་ཏུ་དཀར་བ་སྟེ། དེའི་འོད་ཀྱིས་སླར་སྙིང་ག་ན། བཅོམ་ལྡན་འདས་ཀྱི་སྐུ་མེ་ལོང་ནང་ན་བཞུགས་པ་བཞིན་གསལ་བར་སྣང་བར་བྱའོ།། དེ་ནས་དེའི་འོད་ཀྱིས་སླར་ཡང་བསམས་ན་ཡི་གེ་ཨ་དེ་ཤིན་ཏུ་གསལ་བར་སྣང་བར་བྱས་ཏེ། དེ་ལྟར་གསལ་བར་བརྟན་པར་གྱུར་པ་ཡང་ཡི་གེ་རའི་གནས་མིག་གཉིས་སུ་ཡི་གེ་ཀླད་ཀོར་དང་བཅས་པར་བསམས་ལ། དེའི་སྒྲ་ཁོ་ན་ཉིད་ཆོས་ཐམས་ཅད་མཚན་ཉིད་དང་བྲལ་བ་ལ་དམིགས་པས། ཡི་གེ་ཨ་ལ་སོགས་པ་ལྟར་བསམས་པ་ཐམས་ཅད་སྟོང་པར་བསམ་མོ། །དེ་ལྟར་སྟོང་པར་བསམ་པ་ཡང་བརྟན་པར་གྱུར་ནས། ཡང་བདག་གི་སེམས་དབང་དུ་གྱུར་པར་བྱ་བའི་ཕྱིར། སྔ་མའི་རིམ་བཞིན་དུ་སྦྱོར་བའི་གནས་དང༌། བཅོམ་ལྡན་འདས་ཀྱི་སྐུ་སྙིང་གར་བསམས་པ་དང༌། ཀླད་པར་ཨ་བསམས་པ་སྔ་མའི་རིམ་བཞིན་དུ་བྱའོ། །དེ་བཞིན་དུ་དེ་ཡང་དང་ཡང་དུ་ཡི་གེ་ལ་བསམས་ནས་སྟོང་པར་བྱ་བ་དང༌། སླར་བཅོམ་ལྡན་འདས་ཀྱི་གཟུགས་དང་ཨ་ལ་སོགས་པ་བསམས་པ་དང༌། སྟོང་པར་བྱ་བ་དག་སེམས་ལ་དབང་དུ་བྱ་བའི་ཕྱིར་ལན་མང་དུ་གོམས་པར་བྱ་བ་སྟེ། དེ་
བས་ན་གསུངས་པ། དེ་ནས་སྔགས་པ་རོ་སྟོད་ཀྱི། །ཐོད་པའི་རིམ་པའི་དབུས་སུ་ནི། །ཀླད་མཚན་འཁོར་གྱིས་བཏབ་བཅས་པ། །ཨ་ཞེས་བྱ་བ་དེ་ལྟར་བསམས། །ཞེས་པ་སྟེ་དེ་ཉིད་ཀྱི་བྱེ་བྲག་ཏུ་གསུངས་པ་མཐོང་བ་རྒྱ་ཆེ་བ་དག་སྟེ། ཤེལ་དང་ཟླ་བ་བཞིན་དུ་གསལ། །ཞི་བ་ཆོས་ཀྱི་སྐུ་ཡིན་ཏེ། །ཀུན་གྱི་རྟེན་ཞེས་བྱ་བ་ཡིན། །ཞེས་པ་སྟེ། བསམ་པའི་ཐབས་ནི་གོང་དུ་བཤད་པའི་ཡི་གེའི་དོན་ནི། མདོར་ན་ཡི་གེ་ཨ་ཤེལ་དང་ཟླ་བ་ལྟ་བུར་དཀར་བ་ཀླད་ཀོར་དང་བཅས་པར་བསམས་ཏེ། དེ་ནི་ཆོས་ཀྱི་སྐུའི་རང་བཞིན་དུ་ཤེས་པར་བྱའོ། །དེ་བས་ན། ཀུན་གྱི་རྟེན་ཞེས་བྱ་བ་ཡིན། །ཞེས་པ་སྟེ་ཆོས་ཀྱི་སྐུ་ནི་ཐམས་ཅད་ཀྱི་རྟེན་ཏེ། ཆོས་ཀྱི་སྐུའི་དབང་གིས་ཐམས་ཅད་འབྱུང་བའི་ཕྱིར་རོ། །ཡང་གཉིས་སུ་ཨ་དེ་ཐམས་ཅད་ཀྱི་སྙིང་པོ་ཡིན་པས་ཀུན་གྱི་རྟེན་བྱའོ། །དེ་ལ་སྔགས་ཀྱིས་བསྒྲུབ་པ་ནི། །རྣམ་པ་མང་པོའི་གཟུགས་ཀྱང་ཐོབ། །མཐོ་རིས་མྱ་ངན་འདའ་བའང་ཐོབ། །དེ་བཞིན་གཤེགས་ནས་མཐོང་བའོ། །ཞེས་པ་ནི་དེ་ལྟར་སེམས་ཡོངས་སུ་སྦྱངས་ནས། ཨ་དེ་ཀླད་པའི་ནང་དུ་བསམས་ཏེ། རིག་འཛིན་ལ་སོགས་པའི་གྲུབ་པ་ཐོབ་པར་འགྱུར་ཞེས་པའོ། །རྣམ་པར་སྣང་མཛད་མངོན་པར་བྱང་ཆུབ་པའི་ལུས་དང་ངག་དང་ཡིད་ཀྱི་དཀྱིལ་འཁོར་གསུམ་བྱིན་གྱིས་བརླབས་པ་ལས་ལུས་ཀྱི་འཁོར་ལོ་བྱིན་གྱིས་བརླབས་པ་ནི་སྙིང་རྗེ་ཆེན་པོའི་དཀྱིལ་འཁོར་དེ་བཤད་ལགས། ངག་གི་འཁོར་ལོས་བྱིན་གྱིས་བརླབས་པ་ཡི་གེ་འཁོར་ལོའི་སྐོར་འདིར་བཤད་པར་བྱ་སྟེ། ལུས་དང་ངག་དང་ཡིད་གསུམ་ཀའི་འཁོར་ལོ་འདིར་འདུས་མོད་ཀྱི། ངག་གི་འཁོར་ལོ་གཙོ་བོ་བས་ངག་གི་འཁོར་ལོར་བྱིན་གྱིས་བརླབས་པ་སྟེ། གཞན་ཡང་མེད་པ་མ་ཡིན་ནོ། །དེ་ལ་དཀྱིལ་འཁོར་དང་པོ་བྲི་བར་བརྩམས་པའི་ཚེ། དཀྱིལ་འཁོར་གྱི་སློབ་དཔོན་རང་གི་ཏིང་ངེ་འཛིན་རྣམ་པར་བཤད་པ་གང་ཡང་རུང་བ་ལ་དམིགས་ཏེ། བདག་དང་འཁོར་ཐམས་ཅད་བསྲུང་བའི་ཕྱིར། རིག་པ་འདི་ལན་གསུམ་མམ་བདུན་ནམ་ཉི་ཤུ་རྩ་གཅིག་བཟླས་པར་བྱས་ཏེ། རིག་པ་དེ་བཅོམ་ལྡན་འདས་ཀྱིས་རིག་པ་དེའི་དོན་རྣམ་པར་གྲོལ་བའི་ཏིང་ངེ་འཛིན་དམིགས་ནས་སྔགས་བཤད་པར་མཛད་པ་ནི། དེ་ནས་
བཅོམ་ལྡན་འདས་ཞེས་པ་ནས་རིག་པའི་རྒྱལ་མོ་འབྱུང་ངོ་ཞེས་པའི་བར་དུ་གསུངས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་སྲུང་བའི་འཁོར་ལ་གཟིགས་ནས་ཞེས་པ་དེ་ལ་ཐམས་ཅད་སྲུང་བ་ཞེས་པ་ནི། འཁོར་བྱང་ཆུབ་སེམས་དཔའ་ཕྱག་ན་རྡོ་རྗེ་དེ་སེམས་ཅན་ཐམས་ཅད་ལ་སྲུང་ཞིང་སྐྱོབ་པའི་ཕྱིར་རོ། །ཡང་ན་གཅིག་ཏུ་ན་ཐམས་ཅད་དང་ལྡན་པ་ནི་འཁོར་དེ་དག་ཉིད་ཐམས་ཅད་ཉིད་དང་ལྡན་པ་ཞེས་པའི་དོན་ཏོ། །གཟིགས་པ་རྣམ་པ་གཉིས་ཀྱི་ཕྱིར་འཁོར་ལ་གཟིགས་པ་ཆོས་ཉིད་ཀྱིས་དེ་བཞིན་ཏེ། འཁོར་སེམས་ཅན་འདུས་པར་བསྐུལ་བ་དང་སྣོད་དུ་གྱུར་ཏམ་མ་གྱུར་བརྟག་པ་སྟེ། འདིའི་སྐབས་སུ་འཁོར་དེ་དག་ལ་མི་དགོས་པ་ཕྱི་མ་ལ་བསྟན་པའོ། །བྱམས་པ་ཆེན་པོ་དང་སྙིང་རྗེ་ཆེན་པོའི་སྤྱན་གྱིས་སེམས་ཅན་ཐམས་ཅད་ཀྱི་ཁམས་ལ་གཟིགས་ཞེས་པ་ནི་བཅོམ་ལྡན་འདས་ཀྱིས་མི་གནས་པའི་མྱ་ངན་ལས་འདས་པ་ཉིད་ནི་རྟག་ཏུ་རྟོག་པ་ཐམས་ཅད་དང་བྲལ་བས་གཟིགས་ཤིང་རྟོག་པ་ཡང་མི་འབྱུང་མོད་ཀྱི། །སྔོན་གྱི་སྨོན་ལམ་གྱི་ཤུགས་ཐུགས་རྗེ་ཆེན་པོའི་ཡུམ་དང༌། བྱམས་པ་ཆེན་པོའི་དབང་གིས་ན། སེམས་ཅན་ཐམས་ཅད་ཀྱི་ཁམས་ལ་གཟིགས་པ་ནི། མ་གྲོལ་བ་དགྲོལ་བ་དང་མ་སྨིན་པ་སྨིན་པར་བྱ་བའི་ཕྱིར་རིག་པ་བཤད་པར་དགོངས་སོ། །མི་འཆི་བ་ཞེས་པའི་ཏིང་ངེ་འཛིན་ལ་མཉམ་པར་བཞུགས་ཞེས་པ་ནི། དེ་ལ་མི་འཆི་བ་ནི་འཆི་བར་འགྱུར་བ་མེད་པའི་ཕྱིར་ཏེ། དེ་ནི་ཆོས་ཀྱི་སྐུ་སྟོང་པ་ཉིད་དོ། །དེ་ལ་དམིགས་ཏེ་ཏིང་ངེ་འཛིན་འབྱུང་བས་ན། མི་འཆི་བ་ལས་འབྱུང་ཞེས་བྱའོ། །ཡང་ན་མི་འཆི་བ་དེ་ཉིད་ཏིང་ངེ་འཛིན་འདི་ལས་འབྱུང་བས་ན། མི་འཆི་བ་ལས་འབྱུང་བ་སྟེ། བྱང་ཆུབ་པ་ལས་ཆོས་ཀྱི་སྐུའི་ཡེ་ཤེས་འབྱུང་བ་ཞེས་པའི་དོན་ཏེ། ཏིང་ངེ་འཛིན་དེ་ལས་མཉམ་པར་བཞུགས་ནས་རིག་པ་གསུངས་སོ། །བཅོམ་ལྡན་འདས་ཀྱིས་ཡན་ལག་ཐམས་ཅད་ནས་དུས་གསུམ་དུ་མ་ཆགས་པའི་རྒྱལ་མོ་འབྱུང་ཞེས་པ་དེ་ལ་བཅོམ་ལྡན་འདས་ཀྱིས་ཡན་ལག་ཐམས་ཅད་ཅེས་པ་ནི་རྫོགས་ལོངས་སྤྱོད་པའི་སྐུ་དང་སྤྲུལ་པའི་སྐུ་དང༌། སྙིང་པོ་བྱང་ཆུབ་པའི་སྐུའི་ཡན་ལག་ཐམས་ཅད་ནས་བྱུང་བ་སྟེ། སྟོང་པ་ཉིད་རྣམ་པར་མི་རྟོག་པའི་
ཏིང་ངེ་འཛིན་ལ་གནས་པས་ཞལ་ནས་ཚིག་ཏུ་འབྱུང་བའི་མི་རིགས་ཤེས་ནས་ཡན་ལག་ནས་བྱུང་ཞེས་པའོ། །དེ་ལ་དུས་གསུམ་ལ་མ་ཆགས་པའི་སྟོབས་ཞེས་པ་ནི་སྔ་མ་འདས་པ་དང་མ་འོངས་པ་དང་ད་ལྟར་གྱི་དུས་ལ་སྟོང་པ་ཉིད་ཆོས་ཀྱིས་དབྱིངས་ཀྱིས་དེ་ལ་དམིགས་པའི་སྐྱེ་བ་མཐུ་དང་ལྡན་པ་ནི་དོན་དམ་པའོ། །རིག་པ་འདིའི་མཐུས་བདུད་རྒོལ་བ་ཐམས་ཅད་ཀྱིས་བགེགས་བྱེད་པར་མི་ཚུགས་པ་ནི་ཀུན་རྫོབ་ཏུའོ། །རིག་པ་ཞེས་པ་ནི་ཤེས་པའི་དོན་ཏེ། འདིའི་སྐབས་སུ་བྱང་ཆུབ་པའི་ཤེས་རབ་ཉིད་ལ་བྱའོ། །རྒྱལ་མོ་ཞེས་པ་ནི་ཤེས་རབ་ཐམས་ཅད་ཀྱི་ནང་ན་བྱང་ཆུབ་པའི་མཆོག་པས་ན་རྒྱལ་མོ་ཞེས་བྱ་སྟེ། དེ་བས་ན་རིག་པ་འདི་ཡང་བྱང་ཆུབ་ཉིད་ཀྱི་ཡེ་ཤེས་ཀྱི་རང་བཞིན་བྱིན་གྱིས་བརླབས་པའོ། །རིག་པ་དེའི་རང་བཞིན་གཟུགས་བསྟན་པར་གསུངས་པ། རིགས་ཀྱི་བུ་རིག་པ་འདི་ནི་དེ་བཞིན་གཤེགས་པའི་སྐུ་དང་མི་གཉིས་པའི་སྤྱོད་ཡུལ་ཞེས་སོ། །དེ་ལ་ནི་དེ་བཞིན་གཤེགས་པའི་སྐུ་ཞེས་པ་ནི་ཆོས་ཀྱི་སྐུ་དེ་དང༌། རིག་པ་འདི་དང་གཉིས་སྤྱོད་ཡུལ་གཉིས་སུ་མེད་པ་ནི་དེ་བཞིན་ཉིད་ལ་དམིགས་པ་འདྲ་བའི་ཕྱིར་རོ། རིག་པ་འདིའི་མཐུ་ཆེན་པོ་བསྟན་པའི་ཕྱིར། གསུངས་པ་འདིས་བྱིན་གྱིས་བརླབས་ཞེས་པ་ནས་སྡུག་བསྔལ་འགགས་ཞེས་པའི་བར་དུ་སྟེ། རིག་པ་འདིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བྱིན་གྱིས་བརླབས་པ་ན། སངས་རྒྱས་དང་བྱང་ཆུབ་སེམས་དཔའ་དེ་དག་གིས་མི་གནས་པའི་མྱ་ངན་ལས་འདས་པའི་ཆོས་ཐོགས་པ་མེད་པ་གང་སྡུག་བསྔལ་འགགས་པ་ཐོབ་པ་ཞེས་པའི་དོན་ཏེ། །དེ་ལ་སངས་རྒྱས་དང་ཞེས་པ་ནི་བླ་ན་མེད་པར་སངས་རྒྱས་པ་ལ་མི་བྱ་སྟེ། བྱང་ཆུབ་སེམས་དཔའ་ས་བཅུར་ཕྱིན་པ་དབང་བཅུ་ཐོབ་པའི་སངས་རྒྱས་དེ་ལ་བྱའོ། །བྱང་ཆུབ་སེམས་དཔའ་ནི་དེ་ལས་གཞན་པ་འཕགས་པའི་ས་ལ་གནས་པ་རྣམས་ལ་བྱའོ། །མ་ཆགས་པའི་ཆོས་ཞེས་པ་ནི་མི་གནས་པའི་མྱ་ངན་ལས་འདས་པའི་རང་བཞིན་ཏེ། ཉོན་མོངས་པ་དང་ཤེས་བྱའི་སྒྲིབ་པ་མེད་པས་ན་མ་ཆགས་པའོ་ཞེས་བྱའོ། །ཡང་ཅི་འདྲ་ཞེ་ན། གང་ན་སྡུག་བསྔལ་གྱི་རྣམ་པ་འགགས་ཞེས་པ་སྟེ། ཕུང་པོའི་སྡུག་བསྔལ་རྣམས་མྱ་ངན་ལས་འདས་ཞེས་པའི་ཆོས་དེ་ལ་མེད་
ཅེས་པའི་དོན་ཏོ། །དེ་ནས་བཅོམ་ལྡན་འདས་ཀྱིས་ཡི་གེ་དཀྱིལ་འཁོར་གྱི་སྤྱོད་པའི་འཁོར་རྣམས་ལ་བཤད་པར་བྱའོ་ཞེས་བཀའ་སྩལ་པ། དེ་ནས་བཅོམ་ལྡན་འདས་རྣམ་པར་སྣང་མཛད་ཅེས་པ་ནས། སངས་རྒྱས་ཀྱི་བྱེད་པ་ལ་འཇུག་པར་གནས་ཞེས་པའི་བར་དུའོ།། དེ་ལ་དེ་བཞིན་གཤེགས་པ་ཐམས་ཅད་ལ་རྗེས་སུ་དགོངས་ཞེས་པ་ནི་ཕྱི་མའི་སེམས་ཅན་དང་མ་འོངས་པའི་སེམས་ཅན་རྣམས་ཅི་རྩོམ་ན་ཡང༌། དང་པོར་དེ་བཞིན་གཤེགས་པ་རྗེས་སུ་དྲན་པར་གྱིས་ཤིག་ཅེས་ལུང་བསྟན་པའོ། །བདག་ཉིད་དང་ཕྱག་ན་རྡོ་རྗེ་ཐོག་མ་ནས་མ་སྐྱེས་པར་བྱིན་གྱིས་བརླབས་ཞེས་པ་ནི། དཀྱིལ་འཁོར་གྱི་རྣམ་པ་བསྟན་པ་ནི། འཆད་པ་དང་ཉན་པ་གཉིས་ཏིང་ངེ་འཛིན་ལ་མཉམ་པར་བཞུགས་ནས་བཤད་ཅིང་ཉན་པའི་ཚུལ་ཏེ། དེ་བས་ན་བཅོམ་ལྡན་འདས་འཆད་པ་ཉིད་དང༌། ཕྱག་ན་རྡོ་རྗེ་ཉན་པ་གཉིས་མ་སྐྱེས་པའི་ཆོས་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་བཞུགས་པ་བསྟན་ཏོ། །དེ་ཡང་ཏིང་ངེ་འཛིན་ལ་མ་ཞུགས་པ་ནི། སྤྱོད་ཡུལ་མ་ཡིན་པའི་ཕྱིར་རོ། །དེ་བས་དཀྱིལ་འཁོར་གྱི་སློབ་དཔོན་གྱིས་ཀྱང༌། དཀྱིལ་འཁོར་དང་པོར་རྩོམ་པའི་ཚེ། བདག་ཉིད་ཀྱང་བྱིན་གྱིས་བརླབས། གྲོགས་བྱེད་པའི་རྡོ་རྗེ་མཆོག་སྦྱིན་གྱིས་བྱིན་གྱིས་རླབས་ཤིག་ཅེས་པ་དེ་བས་རང་ངམ་སློབ་དཔོན་གྱིས་སྟོང་པ་ཉིད་དུ་བྱིན་གྱིས་བརླབ་པོ། །ཡི་གེའི་འཁོར་ལོ་བསྐོར་བ་ཞེས་བྱ་བའི་དཀྱིལ་འཁོར་ལ་སྤྱོད་པའི་ལེའུ་རྒྱས་པར་ཞེས་པ་དེ་ལ་ཡི་གེ་འཁོར་ལོ་བསྐོར་བ་ཞེས་པ་ནི། གཅིག་ཏུ་ནི་འཁོར་ལོ་བཞིན་དུ་ཡི་གེས་བསྐོར་བ་སྟེ། ཡི་གེ་ཨ་དབུས་སུ་བཞག་ལ་ཀ་ལ་སོགས་པས་མཐའ་བསྐོར་བའི་ཕྱིར་རོ། །གཉིས་སུ་ནི་འཁོར་ལོའི་དཀྱིལ་འཁོར་དུ་ཡི་གེར་བསྒྱུར་བས་ན་ཡི་གེའི་འཁོར་ལོ་བསྐོར་བ་སྟེ། དཀྱིལ་འཁོར་དེར་གཟུགས་ཡི་གེའི་འབྲུར་བསྒྱུར་ཏེ་བཀོད་པའི་ཕྱིར་རོ། །སྤྱོད་པ་ཞེས་པ་ནི་དཀྱིལ་འཁོར་གྱི་ལས་སུ་བྱ་བ་རྣམས་སོ། །ལེའུ་ཞེས་པ་ནི་དེ་ཉིད་ཀྱི་གཞུང་གི་ལེའུའོ། །རྒྱས་པ་ཞེས་པ་ནི་དཀྱིལ་འཁོར་དེར་སློབ་མའི་སེམས་རྒྱུད་ལ་བསོད་ནམས་ཀྱི་ཚོགས་ཤིན་ཏུ་འཕེལ་བའོ། །དཀྱིལ་འཁོར་དེ་ཡང་ཇི་ལྟ་བུ་ཞེ་ན། རང་བཞིན་བསྟན་པར་གསུངས་པ་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་
རྣམས་ཀྱིས་སངས་རྒྱས་ཀྱི་བྱ་བ་ལ་ཞུགས་ཞེས་པའི་དོན་ཏོ། །དེ་ལས་སངས་རྒྱས་ཀྱི་བྱ་བ་ནི་ཚེ་འདི་དང་ཕ་རོལ་དུ་མངོན་པར་འཆར་བ་དང༌། བདེ་བ་མ་ལུས་པའི་འབྲས་བུ་ཐོབ་པར་མཛད་པའོ། །དེ་བཞིན་དུ་སྔགས་སྤྱོད་པ་རྣམས་ལ་དཀྱིལ་འཁོར་འདིའི་ཚུལ་གྱིས་ཚེ་འདི་དང་ཕ་རོལ་དུ་འཇིག་རྟེན་དང་འཇིག་རྟེན་ལས་འདས་པའི་འབྲས་བུ་ཐོབ་པར་བྱེད་པས་ན། སངས་རྒྱས་ཀྱི་བྱ་བ་ལ་ཞུགས་པས་ནི་དཀྱིལ་འཁོར་འདི་ལྟ་སྟེ། དེ་བཤད་ཀྱིས་ཉོན་ཅིག་ཅེས་པའི་དོན་ཏོ། བཅོམ་ལྡན་འདས་ཀྱིས་ཡི་གེས་འཁོར་ལོ་བསྐོར་བའི་དཀྱིལ་འཁོར་གྱི་སྤྱོད་པ་བཤད་པར་གནང་ནས། ཕྱག་ན་རྡོ་རྗེ་དེས་ཤིན་ཏུ་མགུ་ནས་བཅོམ་ལྡན་འདས་ལ་ཡོན་ཏན་གྱི་སྒོ་ནས་བསྟོད་པ་ཡང་གཅིག་ཏུ་ན་དཀྱིལ་འཁོར་འདིའི་ནང་ནས་བཅོམ་ལྡན་འདས་རྒྱུ་དང་འབྲས་བུའི་ཡོན་ཏན་འབྱུང་བ་རྣམས་ཀྱི་སྒོ་ནས་བསྟོད་པའི་ཕྱིར་གསུངས་པའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་འདིས་མངོན་པར་བསྟོད་དོ་ཞེས་པའི་བར་དུའོ། །དེ་ལ་བཅོམ་ལྡན་འདས་ལ་གུས་པ་བསྐྱེད་པའི་ཕྱིར་ཕྱག་འཚལ་ཏེ། རྡོ་རྗེའི་ཚུལ་དུ་བབ་ཅེས་པ་སྟེ། རྡོ་རྗེའི་ཚུལ་དུ་བབས་པ་ནི་གཡེང་ཞིང་འགྲོགས་པ་མེད་པར་བརྟན་པོར་བབས་པའོ། །བཅོམ་ལྡན་འདས་ཞེས་པ་ནི་ཡོན་ཏན་རྣམ་ལྔའི་སྒོ་ནས་བསྟོད་དེ། བྱང་ཆུབ་སེམས་ཀྱི་སྒོ་ནས་བསྟོད་པ་དང༌། རྒྱུ་དང་འབྲས་བུའི་སྤྱོད་པའི་སྒོ་ནས་བསྟོད་པ་དང༌། དེ་བཞིན་གཤེགས་པའི་དེ་མ་ཐག་པའི་ལམ་གྱི་སྒོ་ནས་བསྟོད་པ་དང༌། ཀུན་དུ་སངས་རྒྱས་པའི་ཡོན་ཏན་དང་མྱ་ངན་ལས་འདས་པའི་ཡོན་ཏན་གྱི་སྒོ་ནས་བསྟོད་པ་སྟེ། ཡོན་ཏན་གྱི་གོ་རིམས་ཀྱང་འདི་ལྟར་རིགས་ན། ཚིགས་བཅད་ལ་མི་བདེ་བའི་ཕྱིར་ལྟག་འོག་འབྲེལ་པར་གསུངས་སོ། །དེ་ལ་ཕྱག་འཚལ་བྱང་ཆུབ་སེམས་ཁྱོད་ལ། །ཞེས་པ་ནི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའ་ས་དང་པོ་ཡན་ཆད་ལ་བྱ་མོད་ཀྱི། འདིའི་སྐབས་སུ་ས་དང་པོ་ལ་སོགས་པ་རྣམས་དང་ཕ་རོལ་ཏུ་ཕྱིན་པའི་སྒོ་ནས་བསྟོད་ཟིན་པས་ན་དེ་ལ་མི་བྱའི་འདིར་རྩོལ་བའི་བྱང་ཆུབ་མོས་པ་སྤྱོད་པའི་ས་ལ་བྱ་སྟེ། ཡང་དེ་བཞིན་གཤེགས་པའི་རྒྱུ་ཡིན་པས་ན་རྒྱུ་དེ་ལས་དེ་བཞིན་གཤེགས་པའི་འབྲས་བུའི་མིང་བཏགས་ཏེ། བྱང་ཆུབ་ཀྱི་སེམས་འབྱུང་བ་ཁྱོད་ལ་ཕྱག་འཚལ་ལོ་ཞེས་
སོ། །བྱང་ཆུབ་ཀྱི་སེམས་འབྱུང་བ་ཁྱོད་ལ་ཕྱག་ཀྱང་འཚལ་ཞེས་པ་ནི། དེ་བཞིན་གཤེགས་པའི་དེ་མ་ཐག་ལམ་གྱི་ཡོན་ཏན་གྱི་སྒོ་ནས་བསྟོད་པ་སྟེ། བྱང་ཆུབ་སེམས་དཔའི་ས་བཅུ་ལས་འདས་པས་ན། སྙིང་པོ་བྱང་ཆུབ་མ་ཐོབ་ཀྱི་བར་དུ་དེ་མ་ཐག་པའི་ལམ་སྟེ། དེ་ལ་བྱང་ཆུབ་འབྱུང་བས་ན། བྱང་ཆུབ་འབྱུང་བ་ཞེས་བྱའོ། །སྤྱོད་པའི་གཟུགས་ཞེས་པ་ནི་རྒྱུའི་སྤྱོད་པ་དང་འབྲས་བུའི་སྤྱོད་པ་རྣམ་པ་གཉིས་ཏེ། འབྲས་བུའི་སྤྱོད་པ་ནི་ལུས་དང་ངག་ཡིད་གསུམ་གྱི་འཁོར་ལོ་སྤྱོད་པས་འཇིག་རྟེན་གསུམ་དུ་ཁྱབ་པར་སྟོན་པའོ། །རྒྱུའི་སྤྱོད་པའི་གཟུགས་ནི་ས་དང་ཕ་རོལ་ཏུ་ཕྱིན་པ་རྣམས་སོ། །ཐོག་མར་མཛད་པ་ལ་སོགས་པ་ལ་ཕྱག་འཚལ་ཞེས་པ་ནི། ཀུན་དུ་སངས་རྒྱས་པའི་ཡོན་ཏན་གྱི་སྒོ་ནས་བསྟོད་པ་སྟེ། ཆོས་རྣམས་དང་པོ་ནས་ཇི་ལྟ་བ་བཞིན་དུ་གཟུང་བ་དང་འཛིན་པ་ལས་བྲལ་པ་སྟོང་པ་ཉིད་པས་ན་དེ་ལ་ཕྱག་འཚལ་ལོ་ཞེས་པའོ། །སྟོང་ཉིད་ལ་འདུག་ཕྱག་འཚལ་ཏེ། །ཞེས་པ་ནི་མྱ་ངན་ལས་འདས་པའི་རང་བཞིན་གྱི་སྒོ་ནས་བསྟོད་པ་སྟེ། ཆོས་ཐམས་ཅད་མ་བྱུང་མ་སྐྱེས་པའི་ངོ་བོ་ཉིད་མི་གནས་པའི་མྱ་ངན་ལས་འདས་པ་ལ་ཕྱག་འཚལ་ལོ་ཞེས་པའོ། །དེ་ནས་ཕྱག་ན་རྡོ་རྗེས་དཀྱིལ་འཁོར་དེ་བཤད་པར་གསོལ་ཞེས་པའི་ཕྱིར་སྨྲས་པ། བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པ་ནས་བཤད་དུ་གསོལ་ཞེས་པའི་བར་དུ་གསུངས་པ་སྟེ། དེ་ལ་བདག་གིས་རིག་ནས་ཞེས་པ་ནི་དཀྱིལ་འཁོར་གྱི་ཚུལ་བཅོམ་ལྡན་འདས་ཀྱིས་བཤད་དེ་ཞེས་པའི་དོན་ཏོ། །དེ་ལ་ཕྱག་ན་རྡོ་རྗེ་ཐོབ་པའི་ཆོས་དང་ལྡན་པ་ཡིན་པས་ན། བཅོམ་ལྡན་འདས་དེས་ལུགས་ཀྱི་ཆོས་བཤད་པ་དེ་ཐོས་ནས་སེམས་ཅན་གྱི་དོན་བྱ་བ་དང་སྔགས་ཚུལ་རྫོགས་པར་བྱའོ་ཞེས་པ་དེ་ནི་མི་རིགས་སོ་ཞེས་སོ། །དེ་ཅིའི་ཕྱིར་ཞེ་ན། ཐོབ་པའི་ཆོས་ཉིད་ལ་གནས་པས་ལུགས་ཀྱི་ཆོས་མཉན་ཏེ། སེམས་ཅན་གྱི་དོན་བྱ་བ་ལ་སོགས་པ་མི་རིགས་སོ། །དེ་ནི་དེ་ལྟར་མ་ཡིན་ཏེ། གཅིག་ཏུ་ན་བཅོམ་ལྡན་འདས་ཀྱིས་ཆོས་བཤད་པ་གཅེས་ཤིང་བཙུན་པར་བསྟོད་པའི་ཕྱིར་ཏེ། བཅོམ་ལྡན་འདས་ཀྱིས་ཆོས་དེ་བཤད་པས་ན། ཕྱག་ན་རྡོ་རྗེ་ལྟ་བུ་ཐོབ་པ་དང་ལྡན་པས་ཀྱང་ཐོས་ནས་ཡོན་ཏན་གྱི་བྱེ་བྲག་ཐོབ་པར་འགྱུར་ན་
གཞན་ལྟ་ཅི་སྨོས་ཞེས་འཇིག་རྟེན་གྱིས་ཤེས་པར་བྱ་བའི་ཕྱིར་རོ། །ཡང་གཅིག་ཏུ་ན་ཕྱག་ན་རྡོ་རྗེ་ཐོབ་པའི་ཆོས་དང་ལྡན་མོད་ཀྱི། ལུགས་ཀྱི་ཆོས་རྣམས་ཀྱང་བཅོམ་ལྡན་འདས་ལས་མཉན་ཏེ། སེམས་ཅན་གྱི་དོན་མཛད་པར་གྱུར་ན་ཡང་ཉེས་པ་མེད་དོ། །དེ་ནས་བཅོམ་ལྡན་འདས་མི་གནས་པའི་མྱ་ངན་ལས་འདས་པས་ན། རྣམ་པར་མི་རྟོག་པ་ལ་ཞུགས་པ་ལས་ཆོས་གསུངས་པའི་ཚིག་དེ་འབྱུང་བ་མི་རིགས་ཏེ། ཡང་ན་ནི་རྣམ་པར་མི་རྟོག་པའི་ཚིག་ཉམས་པར་འགྱུར་རོ་ཞེས་པ་དེ་འདྲ་བའི་ཀླན་ཀར་མི་འགྱུར་བའི་ཕྱིར། བཅོམ་ལྡན་འདས་ཀྱིས་རྫོགས་ལོངས་སྤྱོད་པ་དང་སྤྲུལ་པའི་སྐུས་ཆོས་ཀྱང་བཤད་ལ། རྣམ་པར་མི་རྟོག་པའི་ཏིང་ངེ་འཛིན་ལས་ཀྱང་ཉམས་པ་མེད་པར་བསྟན་པའི་ཕྱིར་གསུངས་པ་དེ་ནི་དང་པོའོ། །འཇིག་རྟེན་གྱིས་ཞེས་པ་ནས་ལས་ཀྱི་རྣམ་པར་སྨིན་པ་ཞེས་པའི་བར་དུའོ། །དེ་ལ་དང་པོའི་འཇིག་རྟེན་པ་ཆོས་བསྟན་པས་ནི་མི་རྟོག་པའི་ཚུལ་ལས་ཆོས་བཤད་པ་མི་འབྱུང་བ་མ་ཡིན་པར་བསྟན་ཏེ། དེ་ལ་ཐོག་མའི་འཇིག་རྟེན་པ་དང་ཞེས་པ་ནི་རྣམ་པ་གཉིས་ཏེ་དག་པ་དང་མ་དག་པའོ། །དེ་ལ་དག་པ་ནི་བྱང་ཆུབ་སེམས་དཔའི་ས་དང་པོ་ཅན་རྣམས་ཏེ། དེ་རྣམས་སྔར་བྱུང་ནས་ཕྱིས་མངོན་པར་ཆོས་བཤད་པ་མི་འབྱུང་བ་མ་ཡིན་པར་བསྟན་པ་སྟེ། དེ་ལ་ཐོག་མའི་འཇིག་རྟེན་སངས་རྒྱས་པའི་ཕྱིར་ན། དེ་རྣམས་སྔ་མའི་འཇིག་རྟེན་པ། །ཞེས་པའོ། །དེ་མ་ཐག་པའི་དངོས་པོ་འཇིག་རྟེན་པ་ནི་བསྐལ་པ་ཆེན་པོས་བཤིག་པའི་འོག་ཏུ་དང་པོ་འཇིག་རྟེན་བྱུང་བའི་ཚེ་ཚངས་པ་དང༌། བརྒྱ་བྱིན་ལ་སོགས་པ་དང༌། དང་པོ་ཉིད་དུ་འབྱུང་བས་ན་དང་པོ་འཇིག་རྟེན་པ་ཞེས་བྱ་སྟེ། དེ་དག་ལ་བཅོམ་ལྡན་འདས་ཀྱིས་ཆོས་རྣམ་པ་གསུམ་དུ་བཤད་པས་ན། དེ་དག་གིས་བཅོམ་ལྡན་འདས་ལ་འཇིག་རྟེན་གྱི་མགོན་པོ་ཞེས་བསྒྲགས་སོ། །དེ་ལ་ཆོས་རྣམ་པ་གསུམ་བཤད་པ་དེ་ཡང་གང་ཞེ་ན། མཚུངས་པ་མེད་པའི་ཆོས་དང་ཐོག་མ་ནས་ཞི་བ་དང་བླ་ན་མེད་པའི་ཆོས་སོ། །དེ་རྣམས་ཀྱང་འཇུག་པ་དང་སྦྱོར་བ་དང་འབྲས་བུའི་བྱེ་བྲག་ཏུ་བལྟ་སྟེ། དེ་ལ་མཚུངས་པ་མེད་ཅེས་པ་ནི་བླ་ན་མེད་པར་འཇུག་པའི་ཆོས་ཏེ།
གང་མཚན་མ་ལ་གནས་ཤེ་ན། བཀའ་སྩལ་པ་དགེ་བ་བཅུ་དང་སྦྱིན་པ་ལ་སོགས་པའི་དགེ་བའི་ཆོས་རྣམས་སོ། །དེ་ཡང་འཇིག་རྟེན་པ་ཕྱི་རོལ་མུ་སྟེགས་ཀྱི་ཆོས་དང་མི་མཚུངས་པས་ན་མཚུངས་པ་མེད་པའི་ཕྱར་རོ། །ཐོག་མ་ནས་ཞི་ཞེས་པ་ནི་སངས་རྒྱས་པར་སྤྱོད་པའི་རིམ་པ་སྟེ། ཆོས་ཐམས་ཅད་རྒྱུ་རྐྱེན་གྱིས་བསྐྱེད་པའི་ཕྱིར་ན་ཐོག་མ་ནས་ཞི་བའོ་ཞེས་པར་བསྟན་པའོ། །དེ་ལ་བླ་ན་མེད་པ་ཞེས་པ་ནི་འཇུག་པ་དང་སྦྱོར་བའི་འབྲས་བུ་སྟེ། མི་གནས་པའི་མྱ་ངན་ལས་འདས་པའི་ས་བསྟན་པའོ། །དེ་ལྟར་ཆོས་བསྟན་ཅིང་འཆད་མོད་ཀྱི་རྣམ་པར་མི་རྟོག་པ་ལས་ཉམས་པ་མེད་པར་བསྟན་པའི་ཕྱིར་གསུངས་པ་དེ་ལྟར་བྱིན་གྱིས་བརླབས་ཞེས་པ་ལ་སོགས་པའོ། །དེ་ལ་དེ་ལྟར་བྱིན་གྱིས་བརླབས་ཞེས་པ་ནི། བྱང་ཆུབ་སེམས་དཔའ་ཀུན་དུ་བཟང་པོ་བསམ་པ་ཡོངས་སུ་དག་པ་ལ་སོགས་པ་ཇི་ལྟར་བཅོམ་ལྡན་འདས་ཀྱིས་བྱིན་གྱི་རླབས་ཀྱིས་འོད་ལ་སོགས་པས་བསྐུལ་བ་དེ་ལྟ་བུས་བྱིན་གྱིས་བརླབས་ནས་སྙིང་པོ་བྱང་ཆུབ་ན་བཞུགས་པའི་སྐུ་མཐོང་བར་བསྟན་ཏོ། །དེ་དག་གི་སྙིང་པོ་བྱང་ཆུབ་ཀྱི་སྐུ་མཐོང་བ་དེ་ཅི་ལྟ་བུར་མཐོང་ཞེ་ན། ནམ་མཁའ་ལྟ་བུར་སྤྲོས་པ་མེད་པ་ལ་སོགས་པའོ། །ནམ་མཁའ་གཞན་ཞེས་པ་ནི་རང་བཞིན་གྱིས་འོད་དང་དྲི་མ་མེད་པ་སྟོད་པ་ཉིད་ཀྱི་རང་བཞིན་ནོ། །སྤྲོས་པ་མེད་པ་ཞེས་པ་ན་ནིང་གི་ཡིད་ཀྱི་རྣམ་པར་ཤེས་པའི་རྣམ་པར་རྟོག་པ་ཐམས་ཅད་སྤངས་ཞེས་པའི་དོན་ཏོ། །སྤྱོད་པ་དང་མི་གཉིས་པར་སྦྱོར་བ་ཞེས་པ་ནི་ལུས་དང་ངག་དང་ཡིད་གསུམ་གྱིས་འཁོར་ལོ་སྤྱོད་པ་དང༌། སྙིང་པོ་བྱང་ཆུབ་ཀྱི་སྐུ་མི་གཉིས་པར་སྦྱོར་བ་སྟེ། དེ་ཉིད་རང་བཞིན་དབྱེར་མེད་པའི་ཕྱིར་རོ། །ལས་ཀྱི་རྣམ་པར་སྨིན་པ་ལྟ་བུ་ཞེས་པ་ནི། ལས་ཀྱི་རྣམ་པར་སྨིན་པ་དང་འདྲ་ཞེས་པ་རྣམ་པར་སྨིན་པ་ཉིད་མ་ཡིན་གྱི། དེ་དང་འདྲ་བ་བསྟན་པའོ། །དེ་ཅིའི་ཕྱིར་ཞེ་ན། སེམས་དད་པའི་སེམས་ཅན་ནི་ལས་ཀྱི་རྣམ་པར་སྨིན་པ་ལ་བརྟེན་ཏེ། དེ་ཉིད་ཟད་པར་འགྱུར་གྱིས། བཅོམ་ལྡན་འདས་ནི་བསོད་ནམས་དང་ཡེ་ཤེས་ཀྱི་ཚོགས་ཆེན་པོ་རྒྱུ་མཐུན་པའི་འབྲས་བུ་སྟེ། དེ་ཟད་པར་མི་འགྱུར་བ་སྟེ། སྙིང་པོ་བྱང་ཆུབ་ཀྱི་སྐུ་སྟེ་བསོད་ནམས་དང་ཡེ་ཤེས་ཀྱི་ཚོགས་ཆེན་
པོའི་རྒྱུ་མཐུན་པའི་འབྲས་བུ་བས་ན་རྣམ་པར་སྨིན་པ་ལྟ་བུ་ཞེས་བྱའོ། །ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་བདག་པོར་ཡི་གེ་ཨ་བཞག་པ་སྟེ། ཨ་དེའི་ཡོན་ཏན་དང་བརྗོད་པ་དང་བཅས་པར་གསུངས་པ། དེ་བཞིན་གཤེགས་པའི་སྐུ་ཐམས་ཅད་ཅེས་པ་ནི། དེ་བཞིན་གཤེགས་པའི་སྙིང་པོ་འདི་ལ་ནན་ཏན་དུ་བྱའོ་ཞེས་པའི་བར་དུ་སྟེ། དེ་ལ་དེ་བཞིན་གཤེགས་པ་ཐམས་ཅད་ཀྱི་ཡན་ལག་ཐམས་ཅད་ནས་ཞེས་པ་ནི་ཡི་གེ་ཨ་སྟེ། དེ་བཞིན་གཤེགས་པའི་ལུས་ཀྱི་འཁོར་ལོ་སྐུ་ཐམས་ཅད་ནས་བྱུང་བ་ཞེས་པའི་དོན་ཏོ། །འཇིག་རྟེན་དང་འཇིག་རྟེན་ལས་འདས་པས་ཞེས་པ་དེ་དག་ནི། ཡི་གེ་ཨའི་མཐུ་ཆེན་པོ་བསྟན་པ་སྟེ། དེ་འཇིག་རྟེན་པ་ཞེས་པ་ནི་མུ་སྟེགས་ཀྱི་དྲང་སྲོང་ལ་སོགས་པ་དང༌། ཕྱོགས་གཅིག་སྟོང་པར་ལྟ་བ་རྣམས་སོ། །འཇིག་རྟེན་ལས་འདས་པའི་ཞེས་བྱང་ཆུབ་སེམས་དཔའ་རྣམས་ལ་བྱ་སྟེ། ཉན་ཐོས་དག་ནི་འོག་ནས་འབྱུང་བས་ན་འདིར་ནི་མ་གཏོགས་སོ། །ཉན་ཐོས་དང་རང་སངས་རྒྱས་དག་ཀྱང་རང་གི་རྣམ་པར་གྲོལ་བ་ཕྱོགས་གཅིག་གི་སྒོ་སྟོང་པ་ལ་གནས་པ་སྟེ། དེ་རྣམས་ཀྱང་སྔགས་བསྒྲུབ་པའི་འཇུག་པ་དང༌། བསམ་གཏན་གྱི་སྒོར་འཇུག་པ་རྣམ་པ་གཉིས་ཏེ། དེ་གཉིས་ཀའི་ཡང་སྲོག་དང་འདྲ་བ་སྟེ། དེ་ཅིའི་ཕྱིར་ཞེ་ན། དེ་དག་ཐམས་ཅད་ཀྱང་དོན་དམ་པ་ཡང་ལ་ལ་ནི་མ་ནོར་ལ། ཡོངས་སུ་རྫོགས་པའི་སྟོང་པ་ལ་ལ་ནི་ཕྱོགས་མཚམས་སྟོང་པར་ལྟ་བ་སྟེ། སྤྱིར་ཐམས་ཅད་སྟོང་པའི་དོན་ལ་བརྟེན་པས་ན། ཡི་གེ་ཨའི་དོན་མ་སྐྱེས་པའི་ཆོས་ཉིད་དེ་དག་ཐམས་ཅད་ཀྱི་སྲོག་ལྟ་བུའོ། །ཀུན་རྫོབ་ཏུ་གང་ཡང་ཡིག་འབྲུ་ལ་བརྟེན་པའོ། །ཆོས་ཐམས་ཅད་ཨ་ལས་གྱུར་པས་ན་སྲོག་ལྟ་བུའོ། །དེ་ལ་བསམ་གཏན་ཞེས་པ་ནི་སྦྱོར་བ་སྟེ་སེམས་པའོ། །བསམ་གཏན་བྱས་ཞེས་པ་ནི་གང་བསམ་པ་དེའི་འབྲས་བུ་སྟེ། དེ་ནི་བསམ་གཏན་གྱི་སྒོ་ནས་འཇུག་པའོ།། སྒོ་སྒྲུབ་པ་ནི་རབ་དང་འབྲིང་དང་ཐ་མ་ལ་སོགས་པ་སྟེ། དེ་ལ་བསྒྲུབ་པའི་ཕྱིར་འཇུག་པ་སྟེ། དེ་ནི་སྔགས་བསྒྲུབ་པའི་སྒོར་ཞུགས་པའོ། །ཡིག་འབྲུ་རྣམས་ཀྱང་ཀུན་རྫོབ་དང་དོན་དམ་པའི་སྒོ་ནས་སྲོག་ལ་སོགས་པར་འགྱུར་བ་སྟེ། དེ་ལ། ཡི་གེ་རྣམས་ཀྱི་ཚེར་འགྱུར་བ། །ཞེས་པ་ནི། བྱང་ཆུབ་
ཀྱི་སྒོ་ནས་ཡི་གེ་དེ་རྣམས་ལ་བརྟེན་པའི་ཕྱིར་ཚེར་གྱུར་ཏེ། ཨ་ཞེས་པའི་དོན་ནི་མ་སྐྱེས་པའོ། །དེ་བཞིན་དུ་ཡི་གེ་ཀ་ཞེས་བྱ་བའི་དོན་དངོས་པོ་ཐམས་ཅད་དང་བྲལ་བ་སྟེ་མ་སྐྱེས་པའི་དོན་ཏོ། །དེ་བས་ན་ཡི་གེ་ཀ་བྱང་ཆུབ་ཀྱི་ས་བོན་གྱི་ཚེ་ཡང་ཨ་ལ་རག་ལུས་པའི་ཕྱིར་སྲོག་ཅེས་བྱའོ། །དེ་བཞིན་དུ་ཡི་གེ་ལྷག་མ་རྣམས་ཀྱང་ཤེས་པར་བྱའོ། །དེ་ལ་ཡི་གེ་རྣམས་ཀྱི་སྲོག་ཅེས་པ་ནི་སྤྱོད་པའི་སྒོ་ནས་ཡིག་འབྲུ་རྣམས་དེ་ལ་རྟོགས་པས་ན། དེ་བས་ན་སྲོག་ཅེས་བྱའོ། །སྐྱབས་སུ་འགྱུར་ཞེས་པ་ནི་ཀུན་དུ་སངས་རྒྱས་པའི་སྒོ་ནས་ཡི་གེ་རྣམས་ཀྱིས་བརྟེན་པས་ན་སྐྱབས་སོ།། འབྱུང་ངོ་ཞེས་པ་ནི་མྱ་ངན་ལས་འདས་པའི་སྒོ་ནས་ཡི་གེ་རྣམས་འབྱུང་བའི་དོན་ཏོ། །རིགས་ཀྱི་བུ་འདི་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཞེས་པ་ནི་སངས་རྒྱས་ཀྱི་སྐུ་འཁོར་ལོ་ཐམས་ཅད་ཀྱིས་བྱིན་གྱིས་བརླབས་ཞེས་པའི་དོན་ཏོ། །སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་སངས་རྒྱས་ཀྱི་བྱ་བ་ཞུགས་པ་ཞེས་པ་ནི་ཡི་གེ་ཨ་དེའི་མཐུ་ཆེན་པོ་བསྟན་པ་སྟེ། སངས་རྒྱས་འཇིག་རྟེན་དུ་འབྱུང་བའི་ཚེ། ཆོས་རྣམ་པ་གཉིས་བསྟན་པ་ནི་སངས་རྒྱས་ཀྱི་བྱ་བ་སྟེ། གཉིས་པ་ནི་བསམ་པ་དག་པ་རྣམས་ལ་ཐོབ་པའི་ཆོས་བསྟན་པ་དང༌། བསམ་པ་མ་དག་པ་རྣམས་ལ་ལུགས་ཀྱི་ཆོས་བསྟན་ཏོ། །དེ་བཞིན་དུ་ཡི་གེ་ཨ་ཡང་ཆོས་དེ་གཉིས་ཀ་སྟོན་པའི་རྒྱུ་ཡིན་ཏེ། དེ་བས་ན་སངས་རྒྱས་ཀྱི་བྱ་བ་ལ་ཞུགས་པ་ཡིན་ནོ། །ཇི་ལྟར་ཞེ་ན། ཐོབ་པའི་ཆོས་རྣམས་ཀྱང་ཡི་གེ་ཨ་དེའི་དོན་མ་སྐྱེས་པ་ལས་བྱུང་བའོ། །ལུགས་ཀྱི་ཆོས་རྣམས་ཀྱང་ཡིག་འབྲུའི་སྒོ་ནས་བཤད་དོ། །ཆོས་ཐམས་ཅད་ཡི་གེ་ཨ་ལས་མ་གྱུར་པ་མེད་པའི་ཕྱིར་རོ། །སངས་རྒྱས་ཀྱི་བྱ་བ་བྱེད་པར་ཇི་ལྟར་ཤེས་ཤེ་ན། གསུངས་པ་ཨ་ཞེས་བྱ་བའི་སྒོ་ནས་ཆོས་ཐམས་ཅད་འབྱུང་ཞེས་སོ། ཇི་ལྟར་ཞེ་ན། ཡི་གེ་ཨ་ཞེས་བྱ་བས་རྒྱུ་བྱས་པ་ན། ཐོབ་པའི་ཆོས་དང་ལུགས་ཀྱི་ཆོས་ཐམས་ཅད་འབྱུང་བའི་ཕྱིར་རོ། །དེ་ལྟར་ཡི་གེ་ཨ་ཞེས་བྱ་བ་དེ་སངས་རྒྱས་ཀྱི་བྱ་བ་བྱེད་ཅིང་ཆོས་ཐམས་ཅད་འབྱུང་བའི་སྒོ་ཡིན་པས་ན། ཡི་གེ་ཨ་དེ་སྔགས་བརྗོད་པའི་བྱང་ཆུབ་སེམས་དཔའ་རྣམས་ཀྱིས་དེ་བཞིན་གཤེགས་པར་བལྟའོ་ཞེས་པ་ལ་སོགས་པ་སྟེ། །དེ་
ལ་དེ་བཞིན་གཤེགས་པ་མཐོང་བར་འདོད་པས། དེ་བཞིན་གཤེགས་པའི་སྙིང་པོ་ལ་མངོན་པར་བསྒྲུབ་པ་ཞེས་བྱ་བའི་ཡི་གེ་ཨ་ཞེས་པའི་དོན་ནི་སྙིང་པོ་བྱང་ཆུབ་ཉིད་ཀྱི་སྙིང་པོ་སྟེ། དེ་བཞིན་གཤེགས་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། དེ་ནི་དོན་དམ་པའོ། །ཀུན་རྫོབ་ཏུ་ན་ཨ་ཞེས་བྱ་བའི་ཡི་གེའི་འབྲུ་དེ་བསྒོམས་ན། དེའི་མཐུས་དེ་བཞིན་གཤེགས་པ་གྲངས་མེད་པ་འབྱུང་བའི་ཕྱིར་རོ། །དེ་བཞིན་གཤེགས་པ་མཆོད་པར་འདོད་པས་ཀྱང་ཡི་གེ་འདི་བསྒོམ་པར་བྱ་སྟེ། མཆོད་པ་ཡང་རྣམ་པ་གཉིས་སུ་རིག་པར་བྱ་བ་ནི་ནན་ཏན་གྱིས་མཆོད་པ་དང་ཟང་ཟིང་གི་མཆོད་པའོ། །དེ་ལ་ནན་ཏན་གྱིས་མཆོད་པ་ནི། ཡི་གེ་ཨ་དེ་ཉིད་ཀྱི་དོན་ལ་བསྒོམ་པར་འགྱུར་རོ། །ཟང་ཟིང་གིས་མཆོད་པ་ནི་ཡི་གེ་ཨ་དེ་བསྒོམ་པའི་མཐུས་ན། མཆོད་པའི་སྤྲིན་རྒྱ་ཆེན་པོ་ནམ་མཁའ་གང་བར་འགྱུར་བའི་ཕྱིར་རོ། །བྱང་ཆུབ་ཀྱི་སེམས་མངོན་དུ་བྱེད་འདོད་པས་ཞེས་པ་ནི་བྱང་ཆུབ་སེམས་དཔའི་ས་དང་པོ་ཡན་ཆད་ཀྱི་སེམས་ལ་བྱ་སྟེ། དེ་མངོན་པར་བྱེད་འདོད་པས་ཡི་གེ་ཨའི་དོན་མངོན་པར་བསྒྲུབ་པར་བྱོས་ཤིག་ཅེས་པའི་དོན་ཏོ། །དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་ཀྱང་མ་སྐྱེས་པའོ། །ཡི་གེ་ཨའི་དོན་ཀྱང་མ་སྐྱེས་པས་མཚུངས་པའི་ཕྱིར་རོ།། བྱང་ཆུབ་ཀྱི་སེམས་ཀྱང་ལྷན་ཅིག་ཏུ་གནས་པར་འདོད་པས་ཞེས་པ་ནི། དེ་ལྟར་འདོད་པ་ཡི་གེ་ཨའི་དོན་ལ་སྒོམས་ཤིག་ཅེས་པའི་དོན་ཏེ། བྱང་ཆུབ་སེམས་དཔའ་རྣམས་ཀྱང་མ་སྐྱེས་པའི་དོན་ལ་དམིགས། ཡི་གེ་ཨ་ཡང་མ་སྐྱེས་པའི་དོན་ལ་དམིགས་པས་ན། སྤྱོད་ཡུལ་མཐུན་པས་ལྷན་ཅིག་ཏུ་སྐྱེས་པར་འགྱུར་རོ། །དེ་ཡན་ཆད་ནི་བསམ་གཏན་གྱི་སྒོ་ནས་བསྒོམ་པ་དང༌། ཨ་ཉིད་སྔགས་ཀྱི་སྒོ་ནས་བསྒྲུབ་པ་ལ་ཞུགས་པ་གཉིས་ཀ་ཐུན་མོང་བའི་ཡོན་ཏན་ནོ། །གྲུབ་པ་མངོན་པར་འདོད་ཅེས་པ་ནི་སྔགས་ཀྱི་སྒོ་ནས་ཞུགས་ན། གྲུབ་པ་རབ་འབྲིང་རྣམ་པ་གསུམ་མོ། །དེ་རྣམས་ནི་ཡན་ལག་ཏུ་སྨོས་པའི་ཚིག་སྟེ། མདོར་ན་ཐམས་ཅད་མཁྱེན་པ་གྲུབ་པར་འདོད་པས་འདི་སྒོམས་ཤིག་ཅེས་གསུངས་སོ། །དེ་ནས་དཀྱིལ་འཁོར་བྲི་བའི་ཆོ་ག་རྣམ་པ་གསུམ་གསུངས་པ། དེ་ནས་བཅོམ་ལྡན་འདས་ཀྱིས་སྙིང་རྗེ་ཆེན་པོ་འབྱུང་བ་ལས་གྱུར་པའི་དཀྱིལ་འཁོར་
གྱི་རྒྱལ་པོ་དགོད་པ་དང༌། ལྷའི་གནས་གཏན་ལ་དབབ་པ་ཞེས་པ་ནི། དེ་ལ་སྙིང་རྗེ་ཆེན་པོ་འབྱུང་བ་ལས་གྱུར་པ་ཞེས་དངོས་སུ་ནི་ལུས་ཀྱི་འཁོར་ལོའི་བྱིན་གྱིས་བརླབས་པའི་དཀྱིལ་འཁོར་འདི་དང༌། བདག་རང་གི་དཀྱིལ་འཁོར་ལ་ཡང་མིང་དུ་གདགས་སོ། །དེ་ཅིའི་ཕྱིར་ཞེ་ན། འཁོར་ལོ་རྣམ་པ་གསུམ་པོ་ཡང་སྙིང་རྗེ་ཆེན་པོ་འབྱུང་བ་ལས་གྱུར་པའི་ཕྱིར་རོ། །དེ་ལ་བྱ་བ་ནི་དཀྱིལ་འཁོར་གྱི་མཐུར་གྱུར་ཅིང་རྒྱུར་བྱའོ། །ལྷའི་གནས་གཏན་ལ་དབབ་ཅེས་པ་ནི། དབུང་མཐའ་དང་མཆོག་རྒྱན་དུ་ལྷའི་བཞུགས་པའི་གནས་ངེས་པར་བྱ་བ་དང༌། ཏིང་ངེ་འཛིན་ལ་མཉམ་པར་སྤྲུལ་ཞེས་བྱ་བ་ནི་གང་ཏིང་ངེ་འཛིན་དུ་ཞུགས་ནས་བསྲུང་བའི་རིག་པ་དང་སྔགས་ལ་སོགས་པའོ། །སྔགས་ཀྱི་སྤྱོད་པ་ཞེས་པ་ནི་དཀྱིལ་འཁོར་དུ་འཇུག་པའི་ཚེ་ལས་སུ་སྤྱོད་པ་རྣམས་སོ། །བསམ་པའི་ཆོ་ག་བྱ་བ་ནི་དཀྱིལ་འཁོར་དུ་འཇུག་པ་ན། སློབ་མས་བྱང་ཆུབ་ཀྱི་སེམས་སུ་བསམ་པ་དང༌། སློབ་དཔོན་རང་གི་ཏིང་ངེ་འཛིན་དུ་གནས་པ་ལ་སོགས་པའི་བྱེ་བྲག་གསུངས་པའོ། །དེ་ལ་རེ་རེ་ཞིང་བཤད་པ་ནི་འདི་མན་ཆད་ནས་འབྱུང་ངོ༌། །དེ་ལ་དཀྱིལ་འཁོར་གྱི་རྒྱལ་པོར་རྣམ་པར་བཀོད་ཅེས་པ་ནི། དོན་བཤད་པའི་གསུངས་པ་དེ་ལ་སློབ་དཔོན་གྱིས་ཐམས་ཅད་མཁྱེན་པའི་སྒོ་ཨ་ཞེས་པ་ལ་གནས་ཏེ་ཞེས་པ་ནས་དེ་བཞིན་གཤེགས་པའི་རང་བཞིན་སྟོང་པ་ཉིད་ཀྱི་རང་གི་གཟུགས་ཞེས་པའི་བར་དུའོ། །དེ་དཀྱིལ་འཁོར་གྱི་ཐིག་བྲི་བའི་ཚེ། དཀྱིལ་འཁོར་གྱིས་ནམ་བུ་རེ་རེ་ཞིང་ཡང༌། སློབ་དཔོན་གྱིས་ཏིང་ངེ་འཛིན་རེ་རེས་གསུངས་ཏེ། ཕྱི་རོལ་གྱི་རིམ་པའི་དཀྱིལ་འཁོར་ལ་བྱང་ཆུབ་སེམས་དཔའ་འཇམ་དཔལ་ལ་སོགས་པའི་ཕ་རོལ་ཏུ་ཕྱིན་པ་ལས་སྐྱེས་པ་རྣམས་བཞུགས་པས་ན། ཐིག་བྲི་བའི་སློབ་དཔོན་གྱིས་ཏིང་ངེ་འཛིན་ཀྱང་ཐམས་ཅད་མཁྱེན་པའི་རྒྱུའི་གནས་ཀྱི་སྙིང་པོ་ཡི་གེ་ཨ་ལ་གནས་ཏེ་དཀྱིལ་འཁོར་གྱི་སྐུད་པ་དྲོངས་ཤིག་ཅེས་གསུངས་སོ། །དེ་ལ་དང་པོ་ཐིག་བྲི་བའི་ཚེ་དང་པོར་ནམ་མཁའི་ཐིག་བྲི་བར་གསུངས་པ་ལ། སངས་རྒྱས་ཐམས་ཅད་ལ་ཕྱག་འཚལ་ནས་ཞེས་པ་ནས་བྱང་ཕྱོགས་སུ་བལྟས་ཏེ་ཐིག་སྐུད་དྲོངས་ཤིག་ཅེས་པའི་བར་དུའོ། །དེ་ནས་སའི་དཀྱིལ་འཁོར་གྱི་ཐིག་བྲི་བའི་ཕྱིར་གསུངས་པ།
ནུབ་ཕྱོགས་སུ་ལྟོས་ལ་ཐིག་སྐུད་དྲོངས་ཤིག་ཅེས་སོ། །ལྷག་མ་རྣམས་འདིར་མ་གསུངས་པ་ནི། སྙིང་རྗེ་ཆེན་པོའི་དཀྱིལ་འཁོར་དུ་ཐིག་བྲི་བ་ཞིབ་ཏུ་བཤད་ཟིན་པས། འདིའི་ལྷག་མ་ནི་དེ་དང་འདྲ་བར་ཤེས་པར་བྱའོ། །དེ་ནས་སྙིད་པོའི་དཀྱིལ་འཁོར་ཐིག་བྲི་བའི་སློབ་དཔོན་ཏིང་ངེ་འཛིན་བཤད་པར་གསུངས་པ། རྡོ་རྗེ་སེམས་དཔའ་ཕྱག་ན་རྡོ་རྗེ་ཞེས་པ་ནས། སྙིང་པོའི་དཀྱིལ་འཁོར་བརྟག་པར་བྱའོ་ཞེས་པའི་བར་དུའོ། །དེའི་སློབ་དཔོན་གྱི་ཏིང་ངེ་འཛིན་ནི་བྱང་ཆུབ་པའི་ས་བོན་ཡི་གེ་ཨས་བསྐྱེད་པའི་རྡོ་རྗེ་སེམས་དཔར་སློབ་དཔོན་བདག་བྱིན་གྱིས་བརླབ་པའོ། །རྡོ་རྗེ་སེམས་དཔའ་ལ་ཡང་ལས་ཀྱི་རྡོ་རྗེ་སེམས་དཔའ་ལ་སོགས་པ་བཞིན་དུ་འདྲེན་པ་ཡང་ཡོད་དེ། དེའི་སྐབས་སུ་གཞན་ལ་མི་བྱའི་རྡོ་རྗེ་སེམས་དཔའ་ཕྱག་ན་རྡོ་རྗེ་ལ་བྱའོ། །དེ་ནས་དཀྱིལ་འཁོར་བར་མའི་སྣམ་བུའི་ཐིག་བྲི་བའི་ཏིང་ངེ་འཛིན་གསུངས་པ་དེ་བཞིན་དུ་གཉིས་པའི་དཀྱིལ་འཁོར་ཞེས་པ་ནས་སྙིང་པོ་ཉིད་ཀྱི་གཟུགས་ཞེས་པའི་བར་དུའོ། །དེ་ལ་དཀྱིལ་འཁོར་སྣམ་བུ་བར་མའི་ནང་ན་རྫོགས་ལོངས་སྤྱོད་པའི་སྐུ་དང་སྤྲུལ་པའི་སྐུ་གཉིས་བཞུགས་ཏེ། དཀྱིལ་འཁོར་དེའི་ཐིག་བྲི་བའི་ཚེ་ཡང་སྐུ་དེ་གཉིས་ཀྱི་རྒྱུའི་ཏིང་ངེ་འཛིན་རྣམ་པ་བཞིའི་སློབ་དཔོན་གྱི་བྱིན་གྱིས་རླབས་ཏེ་སློབ་དཔོན་གྱི་ཏིང་ངེ་འཛིན་དེ་རྣམས་དམིགས་ནས་བྱའོ་ཞེས་པའི་དོན་ཏེ། དེ་ལ་དང་པོ་ནི་ཞི་བའི་ཞེས་བྱ་བ་བྱང་ཆུབ་པའོ། །གཉིས་ཞེས་པ་ན་སྤྱོད་པའོ། །སྟོང་པའི་གཟུགས་ཞེས་པ་ནི་མྱ་ངན་ལས་འདས་པའོ། །ལྷག་མ་ནི་གནས་གཏན་ལ་ཕབ་པར་བྱའོ་ཞེས་པ་ནི་དེའི་རྒྱུད་ནས་བཤད་པ་འདི་མན་ཆད་དུ་འབྱུང་སྟེ། དེ་ནས་བཅོམ་ལྡན་འདས་ལྷའི་གཟུགས་སུ་རྟག་གོ་ཞེས་པའི་བར་དུའོ། །དེ་ལ་སྣམ་བུ་གཅིག་ལས་ཀྱང་གསུམ་དུ་བགོས་ཏེ་སུམ་ཆར་བསྐོར་བར་བྱ། སུམ་གཉིས་ལྷའི་གཟུགས་སུ་བྱའོ་ཞེས་པའི་དོན་ཏོ། །ཐིག་དྲངས་ནས་དེ་བཞིན་གཤེགས་པའི་སྤྱོད་པ་མངོན་དུ་བྱའོ་ཞེས་པ་ནི། དེ་ལྟར་ལྷའི་གནས་དང་བསྐོར་ས་དགོད་པ་ཉིད་ཀྱི་ཚོམ་བུ་མི་བྱ་བར་ཐིག་བཏབ་སྟེ་བྱའོ། །དེ་ཉིད་ཀྱི་ཚེ་ན་ཡང་དེ་བཞིན་གཤེགས་པའི་སྤྱོད་པ་སྟོང་པ་ཉིད་ལ་དམིགས་ཞེས་པའི་དོན་ཏོ། །དེ་ནས་དཀྱིལ་འཁོར་གྱི་ཚོན་རྩི་རྣམས་བྱིན་གྱིས་བརླབ་པའི་ཆོ་ག་གསུངས་པ་ཡང༌། བཅོམ་
ལྡན་འདས་རྣམ་པར་སྣང་མཛད་དུ་བདག་ཉིད་བྱིན་གྱིས་བརླབ་པོ་ཞེས་པ་ནས། བདུད་ཀྱི་སྡེ་གནོད་པ་ཐམས་ཅད་བསྡིགས་པ་ཞེས་པའི་བར་དུ། དེ་ལ་རྣམ་པར་སྣང་མཛད་དུབ་དག་ཉིད་ཕྱག་རྒྱས་བྱིན་གྱིས་བརླབ་ཅེས་པ་ནི་ཚོན་རྣམས་བྱིན་གྱིས་བརླབ་པའི་ཚེ། རྡོ་རྗེའི་ཕྱག་རྒྱས་སློབ་དཔོན་ཉིད་རྣམ་པར་སྣང་མཛད་ཀྱི་སྐུར་བྱིན་གྱིས་རློབས་ཤིག་ཅེས་པ་སྟེ། རྡོ་རྗེ་ནི་ཡེ་ཤེས་ཀྱི་མཚན་མས་ན་ཡེ་ཤེས་ལྔས་བྱིན་གྱིས་བརླབས་པའི་དོན་ཏོ། །ཚོན་རྣམས་བྱིན་གྱིས་བརླབས་པ་ཡང༌། ཀུན་རྫོབ་དང་དོན་དམ་པ་རྣམ་པ་གཉིས་ཏེ། དེ་ལ་དོན་དམ་པར་བྱིན་གྱིས་བརླབས་པའི་ཕྱིར་གསུངས་པ། ཆོས་ཐམས་ཅད་ཀྱི་དབྱིངས་རྒྱ་ཆེན་པོས་བྱིན་གྱིས་བརླབས་ཞེས་པའོ། །དེ་ནི་ཚོན་སྣ་ལྔའི་སྦྱོར། ཆོས་ཀྱི་དབྱིངས་ཆེན་པོ་སྟོང་པ་ཉིད་དུ་བྱིན་གྱིས་བརླབ་ཅེས་པའི་དོན་ཏོ། །ཀུན་རྫོབ་ཀྱི་སྒོ་ནས་ཚོན་རེ་རེ་ཞིང་ཡང༌། ལྷ་རེ་རེས་བྱིན་གྱིས་བརླབས་པར་གསུངས་པ། ཚོན་ནི་དང་པོ་བླངས་ནས་སུ། །ཞེས་པ་ལ་སོགས་པའོ། །དེ་ཚོན་དཀར་པོ་ནི་ཆོས་ཀྱི་དབྱིངས་ཀྱི་བྱིན་གྱིས་བརླབ་པར་གསུངས་ཏེ། ཆོས་ཀྱི་དབྱིངས་དེའི་རང་བཞིན་དང་མཐུ་བསྟན་པར་གསུངས་པ། ཆོས་ཀྱི་དབྱིངས་དག་པ་སེམས་ཅན་གྱི་ཁམས་སྦྱོང་བ་པོ་དེ་བཞིན་གཤེགས་པ་ཉིད་དེ་དག་སྟེ་ཞེས་པ་ཐམས་ཅད་ཡང་བ་ཞེས་སོ། །ཆོས་ཀྱི་དབྱིངས་དེ་ལྟ་བུའི་དོན་དུ་བསམ་ནས་དོན་དེ་ཡི་གེ་ར་འབར་བ་ལ་སོགས་པའི་ཡོན་ཏན་སྨོད་པ་དེ་ལྟ་བུས་བྱིན་གྱིས་བརླབ་བོ། །དེ་ནས་ཚོན་དམར་པོ་བྱིན་གྱིས་བརླབས་པ་གསུངས་པ། དེ་ནས་གཉིས་དང་དམར་པོའི་ཞེས་པ་ལ་སོགས་པའོ། །ཡི་གེ་མའི་ས་བོན་གྱིས་བསྐྱེད་པའི་སངས་རྒྱས་མི་ཐུལ་བས་བྱིན་གྱིས་བརླབས་པར་གསུངས་སོ། །དེ་ནས་ཚོན་སེར་པོ་ལ་ཡི་གེའི་ས་བོན་གྱིས་བསྐྱེད་པ། སངས་རྒྱས་གསེར་ཐུབ་ཀྱིས་བྱིན་གྱིས་བརླབས་པར་གསུངས་པ། དེ་ནས། གསུམ་པའི་ཚོན་དེ་བླངས་ནས་སུ། །ཞེས་པ་ལ་སོགས་པའོ། །ཚོན་ལྗང་གུ་ལ་སྙིང་པོ་བྱང་ཆུབ་ན་བཞུགས་པའི་སྐུས་བྱིན་གྱིས་བརླབས་པར་གསུངས་པ། དེ་ནས་མརྒད་ཅེས་པའི་ཁ་དོག་ལ་སོགས་པའི་ཚོན་ལྗང་གུའི་ཁ་དོག་ནི་ནོར་བུ་མརྒད་འདྲ་བའི་ཁ་དོག་ལྟ་བུའོ། །ཚོན་ནག་པོ་ཁམས་གསུམ་རྣམ་པར་རྒྱལ་བས་བྱིན་གྱིས་བརླབས་པར་གསུངས་པ།
དེ་ནས་ནག་པོ་བླངས་ནས་སུ། །ཞེས་པ་ལ་སོགས་པ་སྟེ། དེ་ལ་ཡི་གེ་ལྔས་བསྐྱེད་པའི་ཁྲོ་བོའི་གཟུགས་དེ་ཡང་ཇི་འདྲ་ཞེ་ན། རྣམ་པར་གཡོ་ཞིང་འབར་བའི་ཕྲེང་བ་དུས་མཐའི་མེའི་མཐའ་ལྟ་བུ་འཇིགས་པ་ལ་སོགས་པའོ། །དེ་ལ་ཚོན་སྣ་ལྔ་རྣམས་ཡེ་ཤེས་ལྔའི་རང་བཞིན་དུ་བལྟ་སྟེ། དཀར་པོ་ནི་ཆོས་ཀྱི་དབྱིངས་ཀྱི་རང་བཞིན་ནོ། །དམར་པོ་ནི་ཐུལ་བར་དཀའ་བ་སངས་རྒྱས་ཀྱི་རང་བཞིན་ཏེ་མེ་ལོང་ལྟ་བུའོ། །སེར་པོ་ནི་མཉམ་པ་ཉིད་ཀྱི་ཡེ་ཤེས། ལྗང་གུ་ནི་ཀུན་དུ་རྟོག་པའི་ཡེ་ཤེས། ནག་པོ་ནི་བྱ་བ་ནན་གྱི་ཡེ་ཤེས། དེ་ལ་རིམ་པར་བཤད་པ་ནི་ཆོས་ཐམས་ཅད་ཀྱི་དབྱིངས་ཉིད་དུ་དང་པོ་ནས་འཇུག་གོ །སྟོང་པ་འབའ་ཞིག་གིས་དམིགས་པར་ཡང་མི་རུང་སྟེ། སྙིང་རྗེ་ཆེན་པོའི་དབང་གིས་སེམས་ཅན་ལ་དམིགས་ཤིང་ཆགས་པ་བསྐྱེད་པའི་ཕྱིར་དེའི་དུས་སུ་ཚོན་དམར་དགྱེའོ། །སེམས་ཅན་གྱི་དོན་ལ་ཞུགས་པས་རྒྱས་པར་འགྱུར་ཏེ། དེ་བས་ན་དེའི་འོག་ཏུ་ཚོན་སེར་པོ་བྲིའོ། །རྒྱས་ཤིང་མཐུ་དང་ལྡན་པས་ན་ལས་ཐམས་ཅད་ནུས་པ་སྟེ། བདག་དང་གཞན་གྱི་དོན་ནུས་པས་ན། འཇམ་པོ་འདུལ་བ་ལ་ཡང་འཇམ་པོར་སྟོན། མ་རུངས་པ་རྣམས་ལ་ཡང་ཁྲོ་བོ། །ཐབས་གཞན་གྱིས་མ་ཁུགས་པ་མ་རུངས་པ་རྣམས་ལ་ཐབས་གཞན་མེད་ན། མཐར་དྲག་ཤུལ་གྱིས་གདུལ་བའི་ཕྱིར། ཐ་མར་ནག་པོ་བཞག་སྟེ། ཁྲོ་བོའི་ལས་བྱེད་དོ། །ཏིང་ངེ་འཛིན་ལས་རྣམ་པར་གྲོལ་བ་ཞེས་གོང་དུ་སྨོས་པ་དེ་འདི་མན་ཆད་འཆད་དེ། དེ་བཅོམ་ལྡན་འདས་རྣམ་པར་སྣང་མཛད་ཀྱིས་དེའི་ཏིང་ངེ་འཛིན་ལས་བཞེངས་ནས་ཞེས་པ་ལ་སོགས་པ་བཤད་པའོ། །ཏིང་ངེ་འཛིན་དེ་ལས་བཞེངས་ནས་ཞེས་པ་ནི། སྔར་ཏིང་ངེ་འཛིན་དུ་ཞུགས་པ་ལས་བཞེངས་ནས། རྒྱལ་བའི་ཏིང་ངེ་འཛིན་ལ་འཇུག་པའོ། །མཐའ་ཡས་པར་རྣམ་པར་རྒྱལ་བཞེས་བྱ་བ་ནི། གྲངས་མེད་པའི་རྒོལ་བ་རྣམས་ཀྱིས་མི་ཚུགས་པས་ན། གྲངས་མེད་པའི་རྒྱལ་བ་ཞེས་པའི་དོན་ཏོ། །ཐམས་ཅད་ཀྱིས་མི་ཚུགས་པའི་རིག་པའི་རྒྱལ་མོ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་ཡུལ་ལས་བྱུང་བ་གསུངས་སོ་ཞེས་པ་དེ་ལས་ཐམས་ཅད་ཀྱིས་མི་ཚུགས་པ་ཞེས་པ་ནི་ཀུན་རྫོབ་དང་དོན་དམ་པར་ཏེ། ཉོན་མོངས་པ་དང་ལྷའི་བུའི་བདུད་ལ་སོགས་པས་མི་ཚུགས་
ཞེས་པའི་དོན་ཏོ། །ད་ནི་ཕྱག་རྒྱའི་ལེའུ་བཤད་པ་སྟེ། ཕྱག་རྒྱ་རྣམས་བཤད་པ་ཡང་སྤྱིར་གདུལ་བའི་འགྲོ་བ་རྣམ་པ་གཉིས་ཟབ་ཅིང་རྒྱ་ཆེ་བ་ལ་མོས་པ་དང་དམིགས་པ་ཅན་ནོ། །དེ་ལ་ཟབ་ཅིང་རྒྱ་ཆེ་བ་ལ་མོས་པའི་གདུལ་བའི་འགྲོ་བ་ནི་སྔགས་ཚིག་རྣམས་བཤད་པས་སྔགས་ཚིག་དེ་དག་གི་སྒྲའི་དེ་ཁོ་ན་ཉིད་ལ་དམིགས་ཤིང༌། བྱང་ཆུབ་ཀྱི་སེམས་སྒོམ་པ་སྔོན་དུ་བར་ལྷའི་གཟུགས་སྦྱོར་ཏེ། ལྷའི་གཟུགས་སྦྱོར་བ་དེ་ཡང་ཏིང་ངེ་འཛིན་དག་པ་དང༌། རྣམ་པར་རྟོག་པ་གཞན་སྤངས་པ་དང༌། ལྷའི་གཟུགས་སུ་སྣང་བ་རྫོགས་པར་རོ། །དམིགས་པ་ཅན་གྱིས་གདུལ་བའི་འགྲོ་བ་ནི། སྔགས་ཀྱི་སྒྲའི་དེ་ཁོ་ན་ཉིད་ལ་དམིགས་པ་ལ་སོགས་པ་དེ་དག་མ་ནུས་ཏེ། ཕྱག་རྒྱ་ཙམ་བཅིངས་ནས་ལྷའི་གཟུགས་སུ་སྦྱོར་བར་བྱེད་པས་ན། དམིགས་པ་ཅན་གྱིས་གདུལ་བའི་འགྲོ་བ་དེ་དག་གི་ཕྱིར། བཅོམ་ལྡན་འདས་ཀྱི་རྒྱུ་དང་འབྲས་བུའི་ཡོན་ཏན་རྣམས་ཀྱི་ཕྱག་རྒྱའི་གཟུགས་བྱིན་གྱིས་བརླབ་པོ། །དེ་ལ་རལ་གྲི་དང་རྡོ་རྗེ་ལ་སོགས་པའི་ཕྱག་རྒྱ་ནི་ཡིད་ཀྱི་ཡོན་ཏན་ནོ། །དུང་གི་ཕྱག་རྒྱ་ལ་སོགས་པའི་ཕྱག་རྒྱ་ནི་གསུང་གི་ཡོན་ཏན་ནོ། །གཙུག་ཏོར་གྱི་ཕྱག་རྒྱ་ལ་སོགས་པའི་ཕྱག་རྒྱ་ནི་སྐུའི་ཡོན་ཏན་ཏེ་ཅི་ལྟར་རིག་པར་སོ་སོར་སྦྱར་བར་བྱའོ། །ཕྱག་རྒྱའི་ལེའུ་བཤད་པ་དེ་ཡང་དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་འདུས་པ་ཐམས་ཅད་ལ་གཟིགས་ནས། ཕྱག་ན་རྡོ་རྗེ་བྱང་ཆུབ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །གསང་བའི་བདག་པོ་དེ་བཞིན་གཤེགས་པ་རྣམས་ལ་དེ་བཞིན་གཤེགས་པ་རྣམས་ཀྱི་རྒྱན་དུ་གྱུར་པ། ཆོས་ཀྱི་དབྱིངས་རྟོགས་པའི་མཚན་མར་གྱུར་པ། ཕྱག་རྒྱའི་ལེའུ་རྒྱས་པ་ཞེས་བྱ་བ་མེད་དོ་ཞེས་བྱ་བ་ལ་སོགས་པའོ། །དེ་ལ་དེ་བཞིན་གཤེགས་པ་རྣམས་ཀྱི་རྒྱན་དུ་གྱུར་ཅེས་པ་ནི་གཙུག་ཏོར་དང་སྤྱན་གྱི་ཕྱག་རྒྱ་ལ་སོགས་པ་སྐུའི་རྒྱན་དུ་གྱུར་པའི་ཕྱིར་རོ། །ཆོས་ཀྱི་དབྱིངས་རྟོགས་པའི་མཚན་མར་གྱུར་པ་ཞེས་པ་ཆོས་ཀྱི་དབྱིངས་དེ་བཞིན་ཉིད་ཀྱི་ཡེ་ཤེས་ཏེ། དེ་རྟོགས་ཤིང་ཆུད་པར་མཛད་པའི་མཚན་མ་ནི་རལ་གྲི་དང་རྡོ་རྗེ་ལ་སོགས་པའི་ཕྱག་རྒྱའོ། །དེས་བརྒྱན་པའི་བྱང་ཆུབ་སེམས་དཔའ་རྣམས་ནི་ཞེས་པ་ནས་དེ་དག་
ཀྱང་དེའི་ངག་ཉན་པར་འགྱུར་ཏེ་ཞེས་པའི་བར་དུ་ཕྱག་རྒྱ་དེ་རྣམས་བསྟན་པའི་དགོངས་པ་བཤད་པ་སྟེ། གང་བྱང་ཆུབ་སེམས་དཔའ་རྣམས་ཕྱག་རྒྱ་དེ་དག་དང་ལྡན་པ་ནི། དེ་བཞིན་གཤེགས་པའི་བྱང་ཆུབ་ཆེན་པོའི་མཚན་མས་བཏབ་པ་ཡིན་ཏེ། དེ་དག་ལ་ལྷ་དང་མི་དང་ལྷ་མ་ཡིན་ལ་སོགས་པ་རྣམས་ཀྱིས་མི་བརྫི་བར་འགྱུར་ཞིང༌། ལྷ་དང་ལྷ་མ་ཡིན་ལ་སོགས་པ་དེ་རྣམས་ཀྱང༌། བྱང་ཆུབ་སེམས་དཔའ་དེ་དག་གི་ངག་མཉན་པར་འགྱུར་རོ། །ཇི་ལྟར་འཇིག་རྟེན་ན་རྒྱལ་པོའི་ཕྱག་རྒྱ་འཆང་བའི་སྐྱེས་བུ་དེ་ལ་འཇིག་རྟེན་པའི་མི་རྣམས་ཀྱང་མི་བརྫི་བར་འགྱུར་ཞིང༌། འཇིག་རྟེན་པ་རྣམས་ཀྱང་དེའི་ངག་ཉན་པར་འགྱུར་བ་དང་འདྲ་བ་སྟེ། མདོར་ན་ཕྱག་རྒྱ་འདི་རྣམས་བཤད་པས་གདུལ་བའི་འགྲོ་བ་རྣམས་ལ་མཐོང་བའི་ཆོས་དང་ཚེ་ཕྱི་མ་ལ་ཕན་པར་འགྱུར་བར་བསྟན་པའོ། །དེ་ནས་བཅོམ་ལྡན་འདས་མི་ཚུགས་པའི་གནས་ཀྱི་སྟོབས་བྱིན་གྱིས་བརླབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི། འོག་ནས་འབྱུང་བའི་ཕྱག་རྒྱས་དེ་དག་ཉིད་མི་ཚུགས་པའི་གནས་ཀྱི་སྟོབས་ཞེས་བྱ་སྟེ། བཅོམ་ལྡན་འདས་ཏིང་ངེ་འཛིན་ལ་མཉམ་པར་བཞུགས་ནས། ཕྱག་རྒྱ་དེ་དག་འཆད་པས་ན། ཏིང་ངེ་འཛིན་དེའི་མིང་མི་ཚུགས་པའི་གནས་ཀྱི་སྟོབས་བྱིན་གྱིས་བརླབ་པ་ཞེས་བྱའོ། །དེ་ལ་མི་ཚུགས་པ་ཞེས་བྱ་བ་ནི་བཅོམ་ལྡན་འདས་ཀྱི་སྐུ་མི་ཟད་པ་ལ་སོགས་པའི་རྡོ་རྗེ་རྒྱན་དེ་དག་ཅི་ལ་ཡང་ཐོགས་པ་མེད་པའོ། །གནས་ཞེས་པ་ནི་བཅོམ་ལྡན་འདས་ཀྱི་སྐུ་ལ་བྱ། སྟོབས་ཞེས་པ་ནི་དེ་ལྟར་ཐོགས་པ་མེད་པ་ཉིད་སྟོབས་སུ་གྱུར་པའོ། །བྱིན་གྱིས་བརླབས་ཞེས་པ་ནི་བཅོམ་ལྡན་འདས་ཀྱི་སྐུ་མི་ཟད་པ་ལ་སོགས་པའོ། །རྡོ་རྗེ་ཐོགས་པ་མེད་པའི་སྟོབས་སུ་གྱུར་པ་དེ་ཉིད་ཕྱག་རྒྱའི་ངོ་བོར་བྱིན་གྱིས་བརླབས་པའོ། །བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་འདི་ལྟར་ཀུན་གྱིས་མི་ཚུགས་པའི་སྟོབས། མི་མཉམ་པ་དང་མཉམ་པའི་སྟོབས་དམ་ཚིག་ལ་འཇུག་པ་ཞེས་བྱ་བའི་སྟོབས་ཀྱི་རིག་པ་འབྱུང་ངོ་ཞེས་པ་མི་ཚུགས་པའི་སྟོབས་ཞེས་པ་ནི་གོང་མ་བཞིན་ནོ། །མི་མཉམ་པའི་སྟོབས་ཞེས་པ་ནི། མི་ཚུགས་པའི་སྟོབས་དེ་ཉིད་གང་དང་ཡང་མི་མཉམ་པའོ། །དམ་ཚིག་
ལ་འཇུག་པའི་སྟོབས་ཞེས་པ་ནི་དམ་ཚིག་གི་དོན་ནི་སྔར་བཤད་ཟིན་ཏོ། །དམ་ཚིག་ལ་འཇུག་པ་ནི་སྐུ་མི་ཟད་པ་ལ་སོགས་པའི་རང་བཞིན་གྱིས་དཀྱིལ་འཁོར་ལྟ་བ་འོག་མའི་འགྲོ་བ་རྣམས་ཀྱི་སྤྱོད་ཡུལ་དུ་མི་འགྱུར་བས། དེའི་བྱིན་གྱིས་བརླབས་སུ་གྱུར་པ། དམ་ཚིག་གི་ཕྱག་རྒྱ་དང་སྔགས་འདི་བཅིངས་ཤིང་བརྗོད་པ་ན་རང་བཞིན་གྱིས་དཀྱིལ་འཁོར་དེ་མཐོང་བ་དང་འདྲ་བ་ན་འཇུག་པ་ཞེས་བྱའོ། །གཉིས་སུ་དམ་ཚིག་སྲུང་བ་རྣམས་ཉམས་པ་ན། དམ་ཚིག་གི་ཕྱག་རྒྱ་དང་སྔགས་འདི་བྱས་ན། དཀྱིལ་འཁོར་མཐོང་བ་དང་འདྲ་སྟེ། དེ་བྱས་པ་ཙམ་གྱིས་དམ་ཚིག་ལས་ཉམས་པ་དེ་འཚོ་བ་སྟེ། སླར་དམ་ཚིག་ཏུ་ཞུགས་པར་འགྱུར་བས་ན་དམ་ཚིག་ཏུ་འཇུག་པ་ཞེས་བྱའོ། །གསུམ་དུ་ན་དཀྱིལ་འཁོར་དུ་འཇུག་པའི་དམ་ཚིག་གི་ཕྱག་རྒྱ་དང༌། སྔགས་འདིར་བྱས་ན་འཇུག་པས་ན། དམ་ཚིག་ཏུ་འཇུག་པ་ཞེས་བྱའོ།། གསང་བའི་བདག་པོ་རིག་པའི་རྒྱལ་མོ་འདི་ནི་དེ་བཞིན་གཤེགས་པ་ཐམས་ཅད་ཀྱིས་སྟོན་པའོ་ཞེས་པ་འདི་བརྗོད་པས། སངས་རྒྱས་ཐམས་ཅད་ཀྱི་གནས་རང་བཞིན་གྱི་དཀྱིལ་འཁོར་མཐོང་བ་དང་འདྲ་བས་ན། སངས་རྒྱས་ཐམས་ཅད་ཀྱི་ས་སྟོན་པ་ཞེས་བྱའོ། །གཉིས་སུན་གཟུགས་བརྙན་གྱི་དཀྱིལ་འཁོར་བྲིས་པ་ཡང༌། རིག་པ་འདི་བརྗོད་ནས་བསྟན་པའམ། རིག་པ་འདི་བརྗོད་ན་སངས་རྒྱས་ཐམས་ཅད་ཀྱི་དཀྱིལ་འཁོར་དེ་མཐོང་བར་འགྱུར་བས། སངས་རྒྱས་ཐམས་ཅད་ཀྱིས་སྟོན་པ་ཞེས་བྱའོ། །ཆོས་ལམ་གསུམ་གྱི་མཚམས་ལས་མི་འདའོ་ཞེས་པ་ཆོས་ལམ་གསུམ་ནི་དེ་བཞིན་གཤེགས་པའི་སྐུ་དང་གསུང་དང་རྡོ་རྗེའི་ཡིད་མི་ཟད་པའི་རྒྱན་ནམ། སྐུ་གསུམ་སྟེ་དེའི་ལམ་ནི་དམ་ཚིག་བསྲུང་བ་བྱ་བ་རྣམས་ལ་སོགས་པ་སྟེ། ལམ་དེ་དེ་ལས་མི་འདའ་བའོ། །ཕ་རོལ་ཏུ་ཕྱིན་པ་དང་ས་ཡོངས་སུ་རྫོགས་པ་སྟེ་ཞེས་པ་ནི་དམ་ཚིག་དེར་ཞུགས་ནས། བཅོམ་ལྡན་འདས་ལ་མཆོད་པ་ལ་སོགས་པ་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་རིམ་གྱིས་རྫོགས་པར་བྱེད་པ་དང༌། དེའི་མཐུས་ས་ལས་རིམ་གྱིས་འཕར་བར་འགྱུར་བས་ན། ས་དང་ཕ་རོལ་ཏུ་ཕྱིན་པ་རྫོགས་པར་བྱེད་པའོ། །སངས་རྒྱས་ཀུན་གྱི་དམ་ཚིག་ནི། ཕྱག་རྒྱ་འདི་ལ་
གནས་ཞེས་པ་ནི་དམ་ཚིག་གི་དན། དམ་ཚིག་ཏུ་བསྲུང་བ་ལས་མི་འདའ་འམ། སྐུ་མི་ཟད་པ་ལ་སོགས་པ་ཆུད་པར་བྱེད་པའམ། སྐུ་དེ་དག་ཡོངས་སུ་ཐོབ་པར་བྱེད་པ་དེ་དག་ཕྱག་རྒྱ་འདིའི་སྒོ་ནས་མཆོད་ཅིང་ཆུད་པར་བྱེད་པས་ན་ཕྱག་རྒྱ་འདི་ལ་རབ་ཏུ་གནས་པར་བྱེད་པ་ཞེས་བྱའོ། །རྒྱ་འདི་ཕྱག་རྒྱ་ཆེན་པོ་སྟེ། །ཆོས་དབྱིངས་རྣམ་པར་སྤྱོད་པའོ། །ཞེས་པ་ནི་ཆོས་ཀྱི་དབྱིངས་སྟོང་པ་ཉིད་ཕྱག་རྒྱ་འདིས་མཚོན་གྱི་ཆུད་པར་འགྱུར་བས་ན། ཆོས་ཀྱི་དབྱིངས་སྦྱོང་བ་ཞེས་བྱའོ། །ཕྱག་རྒྱ་འདི་ནི་དཔལ་མཆོག་སྟེ། །ཆོས་ཀྱི་འཁོར་ལོ་ཞེས་ཀྱང་བསྒྲགས། །དེ་ཡི་འཁོར་ལོ་བསྐོར་པ་ནི། །འཇིག་རྟེན་མགོན་པོ་སྒྲོལ་རྣམས་སོ། །ཞེས་པ་ནི་ཆོས་ཀྱི་དབྱིངས་སུ་བྱིན་གྱིས་བརླབས་ནས། ཆོས་ཀྱི་འཁོར་ལོ་བསྐོར་བའི་ཕྱིར་རྡོ་རྗེ་སེམས་དཔའ་བྱིན་གྱིས་བརླབས་ཏེ། དཔལ་མཆོག་ཅེས་པ་ནི་རྡོ་རྗེ་སེམས་དཔའ་ཉིད་ལ་བྱ་སྟེ། དཔལ་རྡོ་རྗེ་སེམས་དཔའ་དེ་ལུགས་ཀྱི་ཆོས་དང༌། ཐོབ་པའི་ཆོས་རྣམས་འཁོར་ལོ་བསྐོར་བ་སྟེ། ཕྱག་རྒྱ་དེས་རྡོ་རྗེ་སེམས་དཔར་གྱུར་ནས། བྱང་ཆུབ་སེམས་དཔའ་འཇིག་རྟེན་གྱི་མགོན་པོ་རྣམས་ཀྱང་ཆོས་ཀྱི་འཁོར་ལོ་སྐོར་བར་བྱེད་དོ་ཞེས་པའོ། །རལ་གྲིའི་ཕྱག་རྒྱ་སྟེ་ཕྱག་རྒྱ་ཆེན་པོའོ། །མགོན་པོ་སངས་རྒྱས་ཀུན་གྱི་སྟེ། །དེས་ནི་ལྟ་བ་རྣམས་གཅོད་པ། །ལྷན་ཅིག་པ་དང་བདག་ཏུ་བལྟ། །ཞེས་པ་ནི་རལ་གྲིའི་ཕྱག་རྒྱ་ཆོས་དང་གང་ཟག་ལ་བདག་མེད་པར་ཆུད་པའི་ཡེ་ཤེས་ཀྱི་མཚན་མར་གྱུར་པ་སྟེ། ཡེ་ཤེས་དེ་ནི་ལྷན་ཅིག་ཏུ་སྐྱེས་པའི་བདག་ཏུ་ལྟ་བ་རྣམས་གཅོད་པ་ཞེས་བྱའོ། །ཕྱག་རྒྱ་འདི་ནི་དཔལ་མཆོག་སྟེ། །ཆོས་ཀྱི་དུང་ཞེས་བསྒྲགས་པ་ཡིན། །དེས་ནི་སངས་རྒྱས་འཇིག་རྟེན་ན། །བྱང་ཆུབ་སེམས་དཔའ་མཆོག་རྣམས་དང༌། །རྡུལ་མེད་པ་ཡི་ཆོས་འཆད་པ། །ཞི་བ་མྱ་ངན་འདས་འགྲོ་བའི། །ཞེས་པ་ནི་དུང་གི་ཕྱག་རྒྱ་དེ་སངས་རྒྱས་ཀྱི་གསུང་གི་མཚན་མར་གྱུར་པ་སྟེ། སངས་རྒྱས་ཀྱི་གསུང་དེ་རྡུལ་དང་བྲལ་བའི་ཆོས་མྱ་ངན་ལས་འདས་པ་ཞི་བ་ཐོབ་པར་བྱེད་པ། སངས་རྒྱས་དང་བྱང་ཆུབ་སེམས་དཔའ་རྣམས་འཆད་དོ་ཞེས་པའོ། །འདིས་ནི་དཔལ་མཆོག་པདྨོ་སྟེ། །མགོན་པོ་སངས་རྒྱས་ཀུན་གྱི་ནི། མི་ཚུགས་རྡོ་རྗེའི་གདན་
ཡིན་ཏེ། །མགོན་པོ་གང་དུ་འཚང་རྒྱ་བ། །དེ་ནི་སྐྱེས་དང་བྱང་ཆུབ་པ། །སངས་རྒྱས་རྣམས་ཀྱིའོ་ཞེས་པ་ནི། ཕྱག་རྒྱ་པདྨོ་དེ་སངས་རྒྱས་རྣམས་ཀྱི་གདན་ཏེ། མགོན་པོ་སངས་རྒྱས་རྣམས་གང་དུ་བྱང་ཆུབ་ན་ཡང་གདན་འདི་ལ་བཞུགས་ཏེ། བྱང་ཆུབ་སངས་རྒྱས་སྲས་བྱང་ཆུབ་སེམས་དཔའ་རྣམས་ཀྱང་པདྨོ་འདི་ལས་སྐྱེས་ཞེས་པའོ། །ཕྱག་རྒྱ་ཆེན་པོ་རྡོ་རྗེའི་རྒྱ་གྲམ་མ་རིག་པའི་གྲོང་ཁྱེར་རྣམས་འབྱེད་པ་སྟེ། སངས་རྒྱས་རྣམས་ཀྱི་ཡེ་ཤེས་ཏེ། །ལྷ་མིན་ལྷ་ཡིས་བཙུགས་པའོ། །ཞེས་པ་ནི་བཅོམ་ལྡན་འདས་ཀྱི་དེ་མ་ཐག་པའི་ལམ་གྱི་ཡེ་ཤེས་ཏེ། རྡོ་རྗེའི་ཕྱག་རྒྱར་བྱིན་གྱིས་བརླབས་པ་སྟེ། མ་རིག་པའི་གྲོང་ཁྱེར་རྣམས་འཇོམས་པ་ནི། ཡེ་ཤེས་དེས་མ་རིག་པ་དང་སེམས་ལས་བྱུང་བའི་འཁོར་རྣམས་དང་བཅས་པར་འཛོམས་ཞེས་པ་གཙུག་ཏོར་ཕྱག་རྒྱ་ཆེན་པོ་སྟེ། གཙུག་ཏོར་ཞེས་སུ་བསྒྲགས་པ་ཡིན། དེས་ནི་བཅིངས་མ་ཐག་ཏུ་ཡང༌། །ཕྱག་རྒྱ་གཙོ་བོར་གྱུར་པར་འང༌། །ཞེས་པ་ནི་བཅོམ་ལྡན་འདས་ཀྱི་སྐྱེས་བུ་ཆེན་པོའི་མཚན་གཙུག་ཏོར་ཏེ། ཕྱག་རྒྱར་བྱིན་གྱིས་བརླབས་པ་སྟེ། དེ་ནི་བཅིངས་མ་ཐག་ཏུ་སངས་རྒྱས་གཙོ་བོར་འགྱུར་ཞེས་པ་ནི་ཕྱག་རྒྱ་ལ་མང་དུ་བསྡུས་པས་ལྷའི་གཟུགས་སུ་འགྱུར་བ་ལ། གཅིག་པུས་ལྷའི་གཟུགས་སུ་གྱུར་ཏེ། གཙུག་ཏོར་གྱི་ཕྱག་རྒྱ་འདི་གཅིག་པུ་བཅིངས་པས་ཀྱང་སངས་རྒྱས་ཀྱི་སྐུར་བསྒྱུར་དུ་རུང་ཞེས་པའོ། །སྤུ་མཛོད་ཅེས་སུ་བསྒྲགས་པ་སྟེ། །རྒྱལ་མཆོག་ཕྱག་རྒྱ་རྟག་པ་རུ། །འདི་ལྟར་བཅིང་བ་བྱས་ན་ནི། །དེ་དག་རྒྱལ་བ་མཆོག་ཏུ་འགྱུར། །བཅོམ་ལྡན་འདས་ཀྱི་སྐྱེས་བུའི་མཚན་སྨིན་མཚམས་ནས་སྤུ་མཛོད་ཅེས་བྱ་བ་ནས། སྤུའི་ཉག་མ་གཅིག་འབྱུང་བ་བརྐྱང་ན་ནི། ཁམས་གསུམ་ཐམས་ཅད་དུ་ཡང་ཁྱབ་པར་འགྱུར་བ། དཀྱིལ་ནས་དེ་ཉིད་དུ་ཟད་པར་ཕྱག་རྒྱ་འདིར་བྱིན་གྱིས་བརླབས་པ་སྟེ། འདི་འབའ་ཞིག་བཅིངས་པས་ཀྱང༌། སངས་རྒྱས་ཀྱི་སྐུར་བསྒྱུར་དུ་རུང་ཞས་པའོ། །ལྷུང་བཟེད་ཀྱི་ཕྱག་རྒྱ་ནི་ཚིགས་སུ་བཅད་པ་རང་ལོག་ཏུ་གསུངས་པར་ཟད་དོ། །སེམས་ཅན་ཀུན་ལ་
མི་འཇིགས་པ། །དེ་ཡིས་དབུགས་ནི་འབྱིན་པ་ཡིན། །གང་གི་རྒྱ་ཆེན་དེ་བཅིངས་པ། །མི་འཇིགས་ཕྱག་རྒྱ་ཞེས་བསྒྲགས་པའོ། །ཞེས་པ་མི་འཇིགས་པ་སྦྱིན་པའི་ཕྱག་རྒྱ་སྟེ། བདག་གམ་སེམས་ཅན་རྣམས་བགེགས་ལ་སོགས་པ་སྐྲག་ཅིང་འཇིགས་པར་གྱུར་ན། ཕྱག་རྒྱ་བཅིངས་ཏེ་བསྟན་ལ་དེ་ལས་ཐར་བར་འགྱུར་ཞེས་པའོ། །འདི་ནི་མཆོག་སྦྱིན་ཕྱག་རྒྱ་སྟེ། །འཇིག་རྟེན་མགོན་པོ་རྣམས་ཀྱིས་བསྔགས། །འདི་ནི་བཅིངས་མ་ཐག་ཏུ་ཡང༌། །མཆོག་སྦྱིན་རྒྱལ་བ་དམ་པར་འགྱུར། །ཞེས་པ་ནི་བཅོམ་ལྡན་འདས་སེམས་ཅན་རྣམས་ལ་མཆོག་སྦྱིན་གྱི་ཕྱག་རྒྱ་སྟེ། ནམ་གྲུབ་པ་ལ་སོགས་པའི་མཆོག་ནོད་ན། མཆོག་སྦྱིན་པའི་ཕྱག་རྒྱ་འདིས་བཅིངས་ནས་མནོད་དོ། །རྒྱལ་ཆེན་ཕྱག་རྒྱ་ཆེན་པོ་འདི། །སངས་རྒྱས་མགོན་པོ་ཀུན་གྱི་སྟེ། །བདུད་རྣམས་ཀུན་ལ་བསྡིགས་པ་ཡིན། །རེ་བ་ཀུན་གྱི་སྦྱིན་པའོ། །དེ་ནི་བཅིངས་མ་ཐག་ཏུ་ཡང༌། །སོ་སོར་གྱེས་པར་གདོན་མི་ཟ། །བདུད་སྡེ་མང་པོ་འཇིགས་པ་དང༌། །བགེགས་དང་རྣམ་བགེགས་གཞན་དག་ཀྱང༌། །ཞེས་པ་ནི་བགེགས་རྣམ་པར་སྐྲག་པར་བྱེད་པའི་ཕྱག་རྒྱ་སྟེ། ཕྱག་རྒྱ་དེ་བཅིངས་པ་སྦྱིན། བགེགས་ལ་སོགས་པ་ཐམས་ཅད་རྣམ་པར་སྐྲག་ནས་སོ་སོར་འབྱེར་བར་འགྱུར་ཏེ། དེ་ལྟར་བགེགས་རྣམས་སོ་སོར་འབྱེར་ན་བགེགས་མེད་པས། ཇི་ལྟར་བསམས་པའི་དོན་གྲུབ་པར་འགྱུར་བས་ན། རེ་བ་ཐམས་ཅད་ཡོངས་སུ་རྫོགས་པར་བྱེད་པའོ། །འདི་ནི་སངས་རྒྱས་མགོན་རྣམས་ཀྱིས། །སྙིང་རྗེ་ལས་བྱུང་སྤྱན་ཡིན་ཏེ། །མིག་གི་སྟེང་དུ་དེ་ཞོག་ཅིག །དེ་ཕྱིར་སངས་རྒྱས་སྤྱན་དུ་འགྱུར། །ཞེས་པ་ནས་སངས་རྒྱས་བཅོམ་ལྡན་འདས་ཀྱིས་ཤེས་རབ་ཀྱི་སྤྱན་སྙིང་རྗེ་ཆེན་པོའི་དབང་གིས་སེམས་ཅན་ཐམས་ཅད་ལ་གཟིགས་པ་སྙིང་རྗེ་ལས་བྱུང་བའི་སྤྱན་ཞེས་བྱ་སྟེ། སྤྱན་དེ་ཕྱག་རྒྱ་འདིར་བྱིན་གྱིས་བརླབས་པ་ཡིན་པས་ན། ཕྱག་རྒྱ་འདི་བཅིངས་ཏེ། མིག་ཏུ་བཞག་ན་བདག་སངས་རྒྱས་ཀྱི་སྐུར་བསྒྱུར་བའི་ཚེ། སངས་རྒྱས་ཀྱི་སྤྱན་དུ་འགྱུར་རོ། །ཞགས་པ་འདི་ནི་མཆོག་ཅེས་གསུངས། །གནོད་པ་ཐམས་ཅད་མེད་པར་བྱེད། །སྔགས་པ་ཡིས་ནི་
འདི་བཅིངས་ན། །རྟག་ཏུ་གནོད་པ་རྣམ་བཅིངས་ཡིན། །ཞེས་པ་ནི་འཕགས་པའི་ལམ་ཡན་ལག་བརྒྱད་ཀྱི་རང་བཞིན་གྱིས་ཡེ་ཤེས་སེམས་ཅན་ཐམས་ཅད་འདོན་པར་བྱེད་ཅེས་ཞགས་པའི་ཕྱག་རྒྱར་བྱིན་གྱིས་བརླབས་ཏེ། ཞགས་པའི་ཕྱག་རྒྱ་འདི་བཅིངས་པས། བགེགས་ལ་སོགས་པའི་གནོད་པ་རྣམས་བཅིངས་པའི་ལས་བྱེད་དོ་ཞེས་པའོ། །འདི་ནི་ཀྱོ་བ་བཏང་ཞེས་གསུངས། །སངས་རྒྱས་མགོན་པོ་ཀུན་གྱིས་ཏེ། །ཐམས་ཅད་མ་ལུས་འགུགས་པ་ཡིན། །ས་བཅུར་གནས་པ་རྣམས་དང་ནི། །མཐུ་ཆེན་བྱང་ཆུབ་སེམས་དཔའ་དང༌། །གཞན་ཡང་གནོད་པར་སེམས་པའོ། །ཞེས་པ་ནི་དེ་བཞིན་གཤེགས་པའི་རྒྱུ་དང་འབྲས་བུའི་སྤྱོད་པ་རྣམས་རྒྱུའི་ཚེ་ན། བསྡུ་བ་རྣམ་བཞིས་སེམས་ཅན་རྣམས་འདུད་ཅིང་འདྲེན་པ་དང༌། འབྲས་བུའི་ཚེ་ན་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གྱིས་སེམས་ཅན་སྡུད་ཅིང་འདྲེན་པར་སྤྱོད་པ་དེ་ཉིད་ལྕགས་ཀྱུའི་ཕྱག་རྒྱར་བྱིན་གྱིས་བརླབ་པ་སྟེ། ལྕགས་ཀྱུས་ཀྱང་ཐམས་ཅད་འདྲེན་པར་བྱེད་པ་ནི། བགེགས་ལ་སོགས་པ་གནོད་པར་བྱེད་པ་རྣམས་དང༌། བྱང་ཆུབ་སེམས་དཔའ་ས་བཅུ་ལ་གནས་པ་ཡང་སྟེ། བྱང་ཆུབ་སེམས་དཔའ་ས་བཅུ་ལ་གནས་པ་ཡང་འགུགས་ན། གཞན་ལྟ་སྨོས་ཀྱང་ཅི་དགོས་ཞེས་པའོ། །དེ་བཞིན་གཤེགས་པའི་ལྟེ་བའི་ཕྱག་རྒྱ། ཕྱག་རྒྱ་སྔ་མ་ལས་ཞེས་པ་ནི་ལྕགས་ཀྱུའི་ཕྱག་རྒྱ་ལ་བསྙེལ་ཏེ། ལྕགས་ཀྱུའི་ཕྱག་རྒྱ་སྲིན་ལག་གཉིས་བསྒྲེང་བར་ཤེས་པར་བྱའོ། །དེ་བཞིན་གཤེགས་པའི་རྡོ་རྗེའི་ཕྱག་རྒྱ་ནི། མངོན་པར་བྱང་ཆུབ་པ་ལྔ་སྦྱར་རོ། །ལྕགས་ཀྱུའི་ཕྱག་རྒྱ་ནི་སྤྱོད་པ་དང་སྦྱར་རོ། །དེ་བཞིན་གཤེགས་པའི་སྙིང་པོའི་ཕྱག་རྒྱ་དང༌། སྟོབས་བཅུའི་ཕྱག་རྒྱ་ནི་ཀུན་དུ་སངས་རྒྱས་པ་དང་སྦྱར་རོ། །ཆོས་ཐམས་ཅད་སྙོམས་པར་ཆུད་པའི་ཕྱག་རྒྱས་ནི་མྱ་ངན་ལས་འདས་པ་དང་སྦྱར་རོ། །དེ་ལ་སྔགས་ཀྱང་ཀུན་དུ་སངས་རྒྱས་པ་ལ་ཕྱག་འཚལ་ལོ་ཞེས་པ་ནི། ཀུན་དུ་སངས་རྒྱས་པ་དང་སྦྱར། །ཀུན་དུ་རྡོ་རྗེ་ཕྱག་འཚལ་ལོ། །ཞེས་པ་ནི་བྱང་ཆུབ་དང་སྦྱར་རོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ་ཞེས་པ་ནི་དེ་བཞིན་གཤེགས་པ་དང་སྦྱར་རོ། །དེ་ལ་སྔགས་དང་ཕྱག་རྒྱ་རྣམས། བསྟན་པ་
ཡང་སྤྱིར་བསྟན་པ་དང་སོ་སོར་བསྟན་པ་སྟེ། དེ་ལ་སོ་སོར་བསྟན་པ་ཡང་རྣམ་པ་གཉིས་ཏེ། དངོས་སུ་བསྟན་པ་དང་གཞན་དུ་བསྙེལ་བའོ། །དེ་ལ་དངོས་སུ་བསྟན་པ་ནི་གོང་དུ་མིང་སྨོས་པ་རྣམས་སོ། །གཞན་དུ་བསྙེལ་བ་ནི་དེ་ལ་སོགས་པའོ་ཞེས་པ་སྟེ་རྒྱུན་དུ་བསྙེལ་བའོ། །སྤྱིར་བསྟན་པ་ནི་གསང་བའི་བདག་པོ་ལུས་ཇི་ཙམ་དུ་བསྐྱོད་པ་ཀུན་ཀྱང་ཕྱག་རྒྱར་རིག་པར་བྱའོ། །ལྕེ་ཇི་ཙམ་བསྐྱོད་པ་དེ་ཡང་སྔགས་རྣམས་སུ་ཤེས་པར་བྱའོ་ཞེས་པ་སྟེ། དེ་ཡང་ཇི་ལྟ་བུར་གནས་ན་གསུངས་པ། བྱང་ཆུབ་ཀྱི་སེམས་དང་ལྡན་པའི་ཡིད་དང༌། དེ་བཞིན་གཤེགས་པའི་ས་ལ་གནས་ནས་དཀྱིལ་འཁོར་བྲི་ཞེས་པ་སྟེ། ནམ་སྔགས་པ་བྱང་ཆུབ་ཀྱི་སེམས་དང་ལྡན་པའི་ཡིད་དང༌། དེ་བཞིན་གཤེགས་པའི་ས་ལ་གནས་པར་གྱུར་ན། ཇི་ཙམ་དུ་ལུས་ལ་སོགས་པ་དེ་ཙམ་དུ་ཕྱག་རྒྱར་འགྱུར། ཇི་ཙམ་དུ་ལྕེ་བསྐྱོད་པ་དེ་ཙམ་དུ་སྔགས་བརྗོད་པར་འགྱུར་རོ་ཞེས་པ་དང་སྦྱར་ཏེ། བྱང་ཆུབ་ཀྱི་སེམས་དང་ལྡན་པའི་ཡིད་ཅེས་པ་ནི། སྟོང་པ་ཉིད་ལ་དམིགས་པའི་སེམས་དང་ལྡན་ཞེས་པའོ། །དེ་བཞིན་གཤེགས་པའི་ས་ལ་གནས། །ཞེས་པ་ནི་ཀུན་རྫོབ་དང་དོན་དམ་པ་རྣམ་པ་གཉིས་ཏེ། ཀུན་རྫོབ་ཏུ་དེ་བཞིན་གཤེགས་པའི་ས་ལ་གནས་པ་ནི་ལྷའི་གཟུགས་སུ་སྦྱར་རོ། །དོན་དམ་པར་ནི་སྟོང་པ་ཉིད་ཀྱི་རང་བཞིན་དུ་ལྷར་སྦྱར་བ་སྟེ། དེ་ལྟར་ཡང་བྱང་ཆུབ་ཀྱི་སེམས་དང་ལྡན་ཞིང༌། ཀུན་རྫོབ་དང་དོན་དམ་པའི་མཚན་ཉིད་ལྷའི་གཟུགས་སུ་སྦྱར་བ་མ་ཡིན་པར་སྔགས་དང་ཕྱག་རྒྱ་བྱ་བའམ། དཀྱིལ་འཁོར་བྲིས་ན་སངས་རྒྱས་དང་བྱང་ཆུབ་སེམས་དཔའ་རྣམས་སྲུང་བར་འགྱུར་རོ་ཞེས་དངོས་ཀྱིས་གསུངས་སོ། །ད་ནི་སྔགས་ཀྱི་ལེའུ་ཞེས་བཤད་པ་ལ་སོགས་པ་སྔགས་ཀྱི་ཚིག་དང་ཡི་གེའི་འབྲུ་ལས་ཏིང་ངེ་འཛིན་གྱི་སྒོར་གྱུར་པ་ལ་སོགས་པ་ཡི་གེ་ཀ་ལ་སོགས་པ་སུམ་ཅུ་རྩ་གཉིས་དང༌། ཨཱ་ལི་ལ་སོགས་བཅུ་དྲུག་དང་ལྡན་པར་འགྱུར་བ་བསྟན་ཏེ། དེ་ལ་ཡི་གེ་ཀ་ལ་སོགས་པ་སུམ་ཅུ་རྩ་གཉིས་པོ་རྣམས་ནི། ཡི་གེ་ཨ་དང་མི་ལྡན་པར་མི་སྨྲ་སྟེ། དེ་ཐམས་ཅད་ཀྱང་ཨ་དང་ལྡན་པར་ཤེས་པར་བྱའོ། །དེ་ཡང་གསང་བའི་བདག་པོ་ཐམས་ཅད་དུ་རྒྱས་པའི་སྒོ་མོ་
ཆོས་ཀྱི་གཞུང་ཉོན་ཅིག་ཅེས་པ་ལ་སོགས་པ་སྟེ། ཨ་དང་ལྡན་པའི་ཡི་ག་རྣམས་སྔགས་སུ་སྦྱར་བ་དང༌། ཏིང་ངེ་འཛིན་ལ་སོགས་པ་ཐམས་ཅད་དུ་ཁྱབ་བར་འཇུག་པའི་སྒོ་མོ་ཞེས་པའོ། །དེ་བས་ན་གསུངས་པ། གསང་བའི་བདག་པོ་བྱང་ཆུབ་སེམས་དཔའ་ཨ་ལ་གནས་ཏེ། ཀུན་ལ་ནན་ཏན་བྱའོ་ཞེས་སོ། །དང་པོ་ཨ་དང་ས་བ་གསུམ་སྨོས་པ་ནི་རིགས་གསུམ་སྨོས་པའོ། །དེ་ལ་དང་པོར་ཡི་གེ་ཨ་ལ་ཐ་མ་ལ་པར་སྨོས་ནས་ཀ་ལ་སོགས་པ་སུམ་ཅུ་རྩ་གཉིས་པོ་རྣམས་སྨོས་པ་ནི་ཀ་ལ་སོགས་པ་སྟེ། རྣམ་པ་ཐམས་ཅད་ཀྱང་ཐ་མལ་པའི་རང་བཞིན་དུ་ཤེས་པར་བྱ་སྟེ། དེ་དག་ཐམས་ཅད་བྱང་ཆུབ་ཀྱི་རང་བཞིན་དུ་བསྟན་པའོ། །ཡི་གེ་ཨ་འདྲེན་པ་ཐོག་མར་སྨོས་ནས་ཀ་ལ་སོགས་པ་ཐམས་ཅད་ཀྱང་འདྲེན་པར་སྨོས་པ་རྣམས་ནི། དེ་དག་ཐམས་ཅད་སྤྱོད་པའི་རང་བཞིན་དུ་ཤེས་པར་བྱའོ། །ཡི་གེ་ཨ་ཐོག་མར་སྨོས་ན། ཀ་ལ་ཞེས་པ་ལ་སོགས་པ་སུམ་ཅུ་རྩ་གཉིས་རྣམས་སྨོས་པ་ཐམས་ཅད་ཀྱང་ཨ་དང་ལྡན་པས། ཀུན་སངས་རྒྱས་པའི་རང་བཞིན་དུ་ཤེས་པར་བྱའོ། །ཡི་གེ་ཨ་ཚིག་གཉིས་དང་ལྡན་པ་ཐོག་མར་སྨོས་ནས། ཡི་གེ་ཚིག་གཉིས་དང་ལྡན་པ་ལ་སོགས་པ་ཐམས་ཅད་ཡི་གེ་ཨ་ཚིག་གཉིས་དང་ལྡན་པས། །ཐམས་ཅད་ཀྱང་མྱ་ངན་ལས་འདས་པའི་རང་བཞིན་དུ་ཤེས་པར་བྱའོ། །ཀ་ལ་སོགས་པ་ཡི་གེ་སུམ་ཅུ་རྩ་གཉིས་པོ་དེ་རྣམས་ཨི་ལ་སོགས་པ་དང་ལྡན་པ་ན་ཡང་ཏིང་ངེ་འཛིན་དེ་དག་ཉིད་ཀྱི་སྒོ་ནས་སྟོན་པའི་རང་བཞིན་དུ་ཤེས་པར་བྱའོ། །དེ་ལ་རྀ་རཱྀ་དང་ལྀ་ལཱྀ་གཉིས་མ་སྨོས་པ་ནི། གོང་དུ་ཡི་གེ་ར་དང་ཨི་ལ་སོགས་པ་རྀ་རཱྀ་ཞེས་པ་དེའི་ཁོངས་སུ་འདུས། ལ་དང་ཨ་མི་སྨོས་པ་ལྀ་ཞེས་དེའི་ཁོངས་སུ་འདུས་པར་ཤེས་པར་བྱའོ། །གསང་བའི་བདག་པོ་ཡི་གེའི་ཚུལ་ལ་མཁས་པའི་ཆོས་ཀྱི་གཞུང་ངོ་ཞེས་པ་ནས། གསང་བའི་བདག་པོ་པས་སངས་རྒྱས་ཀྱི་ཞིང་པྲ་ས་ར་ན། དེ་བཞིན་གཤེགས་པ་ཐམས་ཅད་དུ་ཁྱབ་པའི་སྒོ་མོ་ཆོས་ཀྱི་གཞུང་འདི་མི་འཆད་པ་མ་མཐོང་ངོ་ཞེས་པའི་བར་དུ་སྨོས་པའི་ཡི་གེ་རྣམས་ཀྱི་རྗེས་སུ་བསྔགས་བ་བཤད་པ་སྟེ། རང་བཞིན་ཕུན་སུམ་ཚོགས་པ་དང༌། བྱིན་གྱིས་བརླབས་པ་ཕུན་སུམ་
ཚོགས་པ་དང༌། མཐུ་ཕུན་སུམ་ཚོགས་པ་དང༌། ལས་ཕུན་སུམ་ཚོགས་པ་བསྟན་པའོ། །དེ་ལ་རང་བཞིན་ཕུན་སུམ་ཚོགས་པ་ནི། ཡི་གེའི་རང་བཞིན་རྣམས་སོ་སོར་སྟོན་པ་སྟེ། ཡི་གེའི་ཚུལ་ལ་མཁས་པའི་ཆོས་ཀྱི་གཞུང་ངོ་ཞེས་པའི་ཚིག་གིས་སོ། །ལས་ཕུན་སུམ་ཚོགས་པ་ནི་སྔགས་ཀྱི་ཚུལ་ལ་རྣམ་པར་གནས་པའི་ཆོ་གའོ་ཞེས་གསུངས་པའི་ཚིག་གིས་སོ། །བྱིན་གྱིས་བརླབས་པ་ཕུན་སུམ་ཚོགས་པ་ནི། ནམ་ཡི་གེ་རྣམས་སྔགས་ཀྱི་སྒྲ་བརྗོད་དམ། ཏིང་ངེ་འཛིན་བསྒོམ་པའམ་ལྷའི་གཟུགས་སུ་སྦྱོར་ན། དེ་བཞིན་གཤེགས་པ་རྣམས་བྱིན་གྱིས་བརླབ་སྟེ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ་ཞེས་པའི་ཚིག་གིས་སོ། །མཐུ་ཕུན་སུམ་ཚོགས་པ་ནི། འདས་པ་དང་ད་ལྟར་དང་མ་འོངས་པའི་སངས་རྒྱས་བཅོམ་ལྡན་འདས་རྣམས་ཀྱིས་བཤད་དོ་ཞེས་པ་ནས་ཆོས་ཀྱི་གཞུང་འདི་མི་འཆད་པར་མ་མཐོང་ངོ་ཞེས་པའི་བར་དུ་སྟེ། སངས་རྒྱས་ཐམས་ཅད་ཀྱིས་བཤད་པས་མཐུ་ཆེའོ། །ལས་ཕུན་སུམ་ཚོགས་པ་ལ་རྣམ་པ་བཞི་སྟེ། སྔགས་རྣམས་སུ་སྦྱོར་བ་དང༌། ལྷའི་གཟུགས་སུ་བསྒྱུར་བ་དང༌། ཏིང་ངེ་འཛིན་དུ་སྦྱོར་བ་དང༌། བྱང་ཆུབ་སེམས་དཔའི་སྤྱོད་པའི་རོལ་མོའོ། །དེ་ལ་སྔགས་རྣམས་སུ་སྦྱོར་བ་ནི་ཡི་གེ་འབྲུ་དེ་རྣམས་ལས་སྔགས་ཀྱི་ཚིག་གི་ཚུལ་དུ་སྦྱར་བ་སྟེ། སྔགས་ཀྱི་ཚུལ་ལ་རྣམ་པར་གནས་པའི་ཆོ་གའོ་ཞེས་པའི་ཚིག་སྔ་མ་ཉིད་ཀྱིས་སོ། །ལྷའི་གཟུགས་སུ་བསྒྱུར་བ་ནི་ཡི་གེ་རྣམས་གང་ཡང་རུང་བ་ལས་ལྷའི་གཟུགས་སུ་སྦྱོར་བ་སྟེ། གཟུགས་ཡོངས་སུ་འཛིན་པའི་ཚིག་གིས་སོ། །ཏིང་ངེ་འཛིན་དུ་སྦྱོར་བ་ནི་ཡི་གེ་འབྲུ་དེ་རྣམས་ལས་སྟོང་པ་ཉིད་ཀྱི་རང་བཞིན་ཆོས་ཀྱི་སྐུར་སྦྱོར་བ་སྟེ། དེ་བཞིན་གཤེགས་པའི་ཚུལ་ལ་མཁས་པའི་ཚིག་གིས་སོ། །སྤྱོད་པ་ནི་ཞི་བ་དང་རྒྱས་པ་ལ་སོགས་པའི་ལས་དང༌། རབ་དང་འབྲིང་ལ་སོགས་པ་འགྲུབ་པར་སྤྱོད་པ་སྟེ། བྱང་ཆུབ་སེམས་དཔའི་སྤྱོད་པ་རོལ་པ་ཞེས་པའི་ཚིག་གིས་སོ། །ཐོག་མ་དང་ཐ་མ་དང་དབུས་རྣམས་ཀ་ཙ་ཊ་ཏ་པ་རྣམས་དང་ལྡན་པའི་ཏིང་ངེ་འཛིན་མང་པོར་འཇུག་པ་ལ་ནན་ཏན་གྱིས་ཤིག་དང༌། བྱང་ཆུབ་དང་སྤྱོད་པ་དང་ཀུན་དུ་སངས་རྒྱས་དང་མྱ་ངན་
ལས་འདས་པ་དང་བཅས་པར་ཐོབ་པར་བྱེད་དོ་ཞེས་པ་ནི། ཡི་གེ་ཀ་ལ་སོགས་པ་སུམ་ཅུ་རྩ་གཉིས་པོ་དེ་གཉིས་པོ་དེ་རྣམས་དང་པོའི་ཨ་ཨཱ་ཞེས་པ་གཉིས་དང༌། ཐ་མའི་ཨཾ་ཨ་ཞེས་པ་གཉིས་དང༌། དབུས་ཀྱི་ཨི་ལ་སོགས་པ་རྣམས་དང་ལྡན་པར་སྦྱར་ན། བྱང་ཆུབ་དང་སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པའི་སྒོ་སྟོན་པའི་རང་བཞིན་པས་དེ་རྣམས་དང་ཏིང་ངེ་འཛིན་དུ་སྦྱར་ན་བྱང་ཆུབ་ལ་སོགས་པ་ཐོབ་པར་འགྱུར་རོ་ཞེས་པའོ། །དེ་བཞིན་དུ་ཐོག་མ་ལ་སོགས་པ་དང་ལྡན་པར་བརྗོད་ན། སྔགས་ཀྱི་ཆོ་གར་འགྱུར་གྱིས། ཐོག་མ་དང་ཐ་མ་དང་དབུས་སུ་ལྡན་པར་དེ་ཡང་རིག་པར་བྱའོ་ཞེས་པ་ཐོག་མ་ལ་སོགས་པ་ཞེས་པ་ནི། ཐོག་མའི་ཨ་ཨཱ་དང༌། ཐ་མའི་ཨཾ་ཨ་དང༌། དབུས་ཀྱི་ཨི་ལ་སོགས་པ་དང་ལྡན་པར་ཀ་ལ་སོགས་པའི་ཡི་གེ་རྣམས་བརྗོད་ན། བྱང་ཆུབ་ལ་སོགས་པ་ཐོབ་པ་འབའ་ཞིག་མ་ཡིན་གྱིས་སྔགས་ཀྱི་ཚིག་རྣམས་སུ་ཡང་འགྱུར་རོ་ཞེས་པའོ། །མཁས་པས་ཇི་ལྟར་འདོད་པས་སྔགས་ཀྱི་གཙོ་བོར་དེའི་ཚིག་རེ་རེ་དང་སྦྱོར་ཅིག་དང༌། ངེས་པར་འཚང་རྒྱ་ཞིང་བླ་ན་མེད་པར་གནས་མཆོག་སྦྱིན་པར་བྱེད་དོ་ཞེས་པའོ། །གོང་དུ་སྨོས་པའི་ཚུལ་ལ་མཁས་པས་ཏིང་ངེ་འཛིན་གང་འདོད་ཆགས་པའམ། རང་གི་ལྷ་གང་ཡིན་པར་སྦྱར་བ་ལ་སོགས་པ་ལ། ཇི་ལྟར་འདོད་པར་ཡི་གེ་དེ་རྣམས་གང་ཡང་རུང་བ་འབྲུ་གཅིག་ལ་སྦྱར་ན་ཡང༌། ཇི་ལྟར་བསམས་པའི་དོན་འགྲུབ་པར་བྱེད་པའོ་ཞེས་པ་འདི་ནི་དེ་ལྟར་འཁོར་ལོ་གཅིག་སྟེ། འཁོར་ལོ་བཞིན་དུ་འཁོར་བ་ནི། ཡི་གེ་འཁོར་ལོ་ཞེས་པ་ནི་ཡི་གེ་ཨ་གཅིག་པོ་ལས་ཀ་ལ་སོགས་པ་དུ་མའི་ཏིང་ངེ་འཛིན་གྱི་རང་བཞིན་གྱི་འཁོར་ལོ་ལྟ་བུར་འཁོར་བའོ་ཞེས་པའོ། །སྔགས་པའི་ཡི་གེ་འཁོར་ལོ་དེ་ཤེས་ན། རྟག་ཏུ་ཇི་ལྟར་མཛེས་པ་ནི། བཅོམ་ལྡན་འདས་རྣམ་པར་སྣང་མཛད་འཁོར་ལོ་བསྐོར་བ་བཞིན་ནོ་ཞེས་པ་ནི་སྔགས་པས་གོང་དུ་སྨོས་པའི་ཡི་གེ་འཁོར་ལོ་ཞེ་ན། བཅོམ་ལྡན་འདས་རྣམ་པར་སྣང་མཛད་ལས་དང་སྤྱོད་པ་ཐམས་ཅད་དུ་སྤྱོད་ནུས་པ་བཞིན་དུ་འགྱུར་རོ་ཞེས་པའོ། །མཛེས་པ་ཞེས་པ་ནི་སྤྱོད་པའི་ཚིག་ཏུ་ཤེས་པར་བྱའོ། །ད་ནི་སངས་རྒྱས་བཅོམ་ལྡན་
འདས་ཀྱི་སྐུ་མི་ཟད་པ་དང༌། གསུང་མི་ཟད་པ་དང༌། ཡིད་མི་ཟད་པ་རྡོ་རྗེའི་རྒྱན་རྣམས་དེ་དཀྱིལ་འཁོར་དུ་བྱིན་གྱིས་བརླབས་པ་ལ་སྐུ་མི་ཟད་པ་དང༌། གསུང་མི་ཟད་པའི་བྱིན་གྱིས་བརླབས་ཀྱི་དཀྱིལ་འཁོར་ལ་སྙིང་རྗེ་ཆེན་པོའི་སྙིང་པོ་འབྱུང་བ་དང༌། ཡི་གེ་འཁོར་ལོ་བསྐོར་བའི་དཀྱིལ་འཁོར་ནི་གོང་དུ་བཤད་ཟིན། ཡིད་མི་ཟད་པའི་དཀྱིལ་འཁོར་ཆོས་ཀྱི་སྐུའི་བྱིན་གྱིས་བརླབས་སུ་འགྱུར་བ་དེ་བསྟན་ཏེ། དེའི་ཞར་ལ་གོང་དུ་དཀྱིལ་འཁོར་གཉིས་བཤད་པའི་ཆོ་གའོ། །ལྷག་མ་སློབ་དཔོན་གྱི་མཚན་ཉིད་དང༌། སློབ་མའི་མཚན་ཉིད་ལ་སོགས་པ་དང༌། དཀྱིལ་འཁོར་གྱི་ཡོ་བྱད་དུ་བྱིས་པ་རྣམས་ལ་གོང་དུ་རྒྱས་པ་མ་སྨོས་ཤིང༌། མ་རྫོགས་པ་རྣམས་དང་སྦྱིན་སྲེག་གི་ཆོ་ག་ལ་སོགས་པ་འདི་ཉིད་དུ་རྒྱས་པར་བཤད་དེ། དེ་ལ་ཆོས་ཀྱི་སྐུ་ནི་མཚན་མས་བསྟན་པ་ལས་འདས་ཏེ། དངོས་པོ་མེད་པས་བསྟན་དུ་མི་མངོན་པ་ལ་ཡོན་ཏན་གྱི་རྗེས་སུ་མཐུན་པ་ལས་བསྟན་པར་བྱ་སྟེ། ཆོས་ཀྱི་སྐུའི་ཡོན་ཏན་ནི་ཕྱིན་ཅི་མ་ལོག་པ་དང་མི་འགྱུར་བར་ཡོངས་སུ་རྫོགས་པའི་རང་བཞིན་དང༌། རྣམ་པར་རྟོག་པ་ཐམས་ཅད་སྤངས་པ་དང༌། ཉོན་མོངས་པ་ཐམས་ཅད་ལས་རྣམ་པར་གྲོལ་བ་དང༌། བྱ་བ་ཐམས་ཅད་བྱེད་ནུས་པའི་རང་བཞིན་ཏེ། དེའི་རྗེས་སུ་མཐུན་པའི་སྒོ་ནས་དེ་བསྟན་པ་ནི། ས་དང་ཆུ་དང་མེ་དང་རླུང་རྣམས་ཀྱི་དཀྱིལ་འཁོར་དུ་བྱིན་གྱིས་བརླབས་ཏེ། ས་ནི་བརྟན་ཞིང་མི་འགྱུར་བ་ཡོངས་སུ་རྫོགས་པའི་མཚན་ཉིད་རྡོ་རྗེ་དང་འདྲ་བས། དབང་ཆེན་གྱི་རྡོ་རྗེའི་དཀྱིལ་འཁོར་དུ་བྱིན་གྱིས་བརླབས་ཏེ་བསྟན་པའོ། །རྣམ་པར་རྟོག་པ་ཐམས་ཅད་སྤངས་པའི་རང་བཞིན་ནི། ཆུའི་དཀྱིལ་འཁོར་དུ་བྱིན་གྱིས་བརླབས་ནས་བསྟན་པ་སྟེ། ཆུ་ནི་ཐམས་ཅད་འཁྲུ་བར་བྱེད་པའི་རང་བཞིན་ནོ། །དེའི་སྙིང་པོ་བ་ནི་སྔ་མ་བཞིན་དུ་ཤེས་པར་བྱའོ། །ཉོན་མོངས་པ་ཐམས་ཅད་ལས་རྣམ་པར་གྲོལ་བའི་མཚན་ཉིད་ནི། མེའི་དཀྱིལ་འཁོར་དུ་བྱིན་གྱིས་བརླབས་པ་སྟེ། མེའི་རང་བཞིན་བསྲེག་པར་བྱ་བ་དང༌། ཡི་གེར་ཆོས་ཐམས་ཅད་རྡུལ་དང་བྲལ་བར་སྟོན་པའི་ཕྱིར་རོ། །བྱ་བ་ཐམས་ཅད་ནུས་པ་ནི་རླུང་གི་དཀྱིལ་འཁོར་དུ་བྱིན་གྱིས་
བརླབས་པ་སྟེ། རླུང་ནི་ཀུན་དུ་འགྲོ་ཞིང་ཐམས་ཅད་འབྱེད་པའོ་ཞེས་སྔར་བཤད་ཟིན་པའི་ཕྱིར་རོ། །དེ་ལྟར་ཆོས་ཀྱི་སྐུ་བྱིན་གྱིས་བརླབས་སུ་གྱུར་པ་གསང་བའི་དཀྱིལ་འཁོར་དེ་དང༌། དཀྱིལ་འཁོར་སུམ་ཆར་ཆོ་ག་རྫོགས་པར་བཤད་པའི་ཕྱིར། བཅོམ་ལྡན་འདས་ཏིང་ངེ་འཛིན་དེ་ལ་མཉམ་པར་ཞུགས་ཏེ། དེ་ཡང་ཅི་བྱས་ནས་ཞུགས་ཤེ་ན། གསུངས་པ་བཅོམ་ལྡན་འདས་ཀྱིས་སེམས་ཅན་གྱི་ཁམས་ཐམས་ཅད་དུ་དེ་བཞིན་གཤེགས་པའི་སྤྱན་གྱིས་གཟིགས་ནས་ཞེས་པ་སྟེ། དེ་བཞིན་གཤེགས་པའི་ཡེ་ཤེས་ཀྱིས་གཟིགས་ནས་ཞེས་པའི་དོན་ཏོ། །ཆོས་ཀྱི་དབྱིངས་ཀྱི་མཛོད་རྣམ་པར་འཕྲུལ་པ་དེ་བཞིན་གཤེགས་པ་མཉམ་པའི་རྒྱན་གྱི་སྙིང་པོ་ཞེས་བྱ་བའི་ཏིང་ངེ་འཛིན་ལ་མཉམ་པར་ཞུགས་སོ་ཞེས་པ་ཆོས་ཀྱི་དབྱིངས་ནི་དེ་བཞིན་ཉིད་དེ། དེ་ལས་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་རྣམས་ཀྱི་མཚན་ཉིད་འབྱུང་བ་ནི། དེ་བཞིན་གཤེགས་པ་མཉམ་པའི་རྒྱན་ཞེས་བྱ་སྟེ། དེ་དག་ཆོས་ཀྱི་དབྱིངས་དེ་ལས་འབྱུང་བ་ན། ཆོས་ཀྱི་དབྱིངས་དེ་ཉིད་མཛོད་ཅེས་བྱའོ། །རྣམ་པར་སྤྲུལ་པ་ཞེས་པ་ནི། དེ་ལས་བྱུང་བའི་དེ་བཞིན་གཤེགས་པ་རྣམས་རྣམ་པ་སྣ་ཚོགས་སུ་སྤྱོད་པ་ཞེས་པའོ། །མཉམ་པ་ཞེས་པ་ནི་དེ་བཞིན་གཤེགས་པའི་སྐུ་འབྱུང་བ་དེ་དག་ཉིད་ཚོགས་པ་དང༌། ཆོས་ཀྱི་སྐུ་དང་སེམས་ཅན་གྱི་དོན་བྱེད་པར་མཉམ་པའི་ཕྱིར་རོ། །རྒྱ་ཆེར་ཞེས་བྱ་བ་ནི་མང་པོའི་ཚིག་གོ །སྙིང་པོའོ་ཞེས་བྱ་བ་ནི་འབྱུང་བའི་གནས་ཏེ། ཏིང་ངེ་འཛིན་དེ་ཉིད་ལ་བྱ་སྟེ། ཏིང་ངེ་འཛིན་དེར་ཞུགས་ན་དེ་ལྟ་བུར་འབྱུང་བའི་ཕྱིར། ཏིང་ངེ་འཛིན་དུ་ཞུགས་ནས་ཀྱང༌། ཇི་ལྟར་བསྟན་ཞེ་ན། གསུངས་པ་ཆོས་ཀྱི་དབྱིངས་མི་ཟད་པ་མང་པོ་མངོན་པར་བསྟན་པ་དང༌། སྔགས་ཀྱི་སྤྱོད་པ་འདི་ལས་སེམས་ཅན་གྱི་ཁམས་མ་ལུས་པར་གདོན་པའི་ཡི་དམ་བཅས་པར་རྫོགས་པར་བྱ་བའི་ཕྱིར་ཞེས་པ་སྟེ། ཆོས་ཀྱི་དབྱིངས་ཞེས་པ་ནི་སྐབས་འདིར་སེམས་ཅན་གྱི་ཁམས་ལ་བྱ་སྟེ། དེ་མངོན་པར་འབྱུང་བ་བསྟན་པ་ཡང་ལས་དང་ཚེའི་རྣམ་པར་སྨིན་པ་དང༌། འབྲས་བུ་ཞེས་པ་ལ་སོགས་པའི་ཚིག་འོག་ནས་འབྱུང་བ་བཤད་དོ། །སྔགས་ཀྱི་སྤྱོད་པ་འདི་ཉིད་ལས་སེམས་ཅན་གྱི་ཁམས་མ་ལུས་པར་གདོན་པར་ཡི་དམ་
བཅའ་བ་རྫོགས་པར་བྱ་བའི་ཕྱིར་ཞེས་པ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དང༌། ཡི་གེ་འཁོར་ལོ་བསྐོར་བའི་དཀྱིལ་འཁོར་བསྟན་དུ་ཟིན་ཀྱང༌། །གསང་བའི་དཀྱིལ་འཁོར་མ་བསྟན་ན། དམ་ཚིག་ལྔ་ལ་སོགས་པ་དང་ཡང་ལྡན་པར་མི་འགྱུར་ལ། དེའི་ཞར་ལ་སྔ་མའི་ཆོ་ག་ལྷག་མ་རྣམས་ཀྱང་རྫོགས་པར་བཤད་པར་བྱ་བ་མ་བསྟན་ན། སྔགས་པ་རྫོགས་པར་མི་འགྱུར་བས། དམ་ཚིག་མ་རྫོགས་པར་འགྱུར་ཏེ། དེ་བས་ན་དེ་དག་ཀུན་རྫོགས་པར་བསྟན་ན། སེམས་ཅན་གྱི་ཁམས་མ་ལུས་པར་གདོན་པའི་ཡི་དམ་བཅས་པ་རྫོགས་པར་འགྱུར་རོ། །དེ་ནས་འདི་ལྟར་སེམས་ཅན་གྱི་ཁམས་སུ་རྣམ་པར་སྤྲུལ་པའི་སྒོ་ནས་ལས་དང་ཚེའི་རྣམ་པར་སྨིན་པ་དང༌། འབྲས་བུ་ཟ་བ་དང༌། །ཟར་འཇུག་པ་དང༌། ཁ་དོག་དང༌། དབྱིབས་དང༌། དབྱངས་དང༌། འགྲོ་བ་དང༌། སྤྱོད་པ་དང༌། ངེས་པའི་ཚིག་འབྱུང་བ་དང༌། ཇི་ལྟ་བུར་བསམས་པ་བཞིན་པས་སེམས་ཅན་ཐམས་ཅད་སོ་སོར་མགུ་བར་བྱེད་པ། བ་སྦུའི་བུ་ག་ཐམས་ཅད་ནས་ཆོས་ཀྱི་དབྱིངས་ནས་རྣམ་པར་འཕེལ་བའི་སྐུ་འབྱུང་ཞེས་པ་ནི། དེ་ལྟར་བཅོམ་ལྡན་འདས་ཏིང་ངེ་འཛིན་ལ་མཉམ་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྐུ་བ་སྤུའི་བུ་ག་ཐམས་ཅད་དུ་དེ་བཞིན་གཤེགས་པའི་སྐུ་སེམས་ཅན་ཐམས་ཅད་དང་རྗེས་སུ་མཐུན་པ། ལས་དང་ཚེའི་རྣམ་པར་སྨིན་པ་དང༌། འབྲས་བུ་དང༌། ཟ་བ་དང་ཟར་འཇུག་པ་ལ་སོགས་པ་སྟོན་པ་འབྱུང་པོ་ཞེས་པ་སྟེ། ལས་ཀྱི་རྣམ་པར་སྨིན་པ་དང་ཚེའི་འབྲས་བུ་ཟ་བར་སྟོན་པའི་ལས་ལེགས་ཉེས་ཅི་སྤྱད་པའི་འབྲས་བུ་བདེ་བ་དང་སྡུག་བསྔལ་རྣམ་པར་རང་རང་སྤྱོད་པ་སྣང་བའོ། །ཟར་འཇུག་པ་ནི་རྒྱལ་པོ་དང་སེམས་ཅན་དམྱལ་བའི་སྲུང་མ་ལ་སོགས་པ་ལྟ་བུ་སྟེ། དེ་དག་གིས་དབང་བྱས་ནས་གཞན་རྣམས་ལ་བདེ་བ་དང་སྡུག་བསྔལ་སྤྱོད་དུ་འཇུག་པའོ། །དེ་དག་ཉིད་ཀྱི་བྱེ་བྲག་ཏུ་གསུངས་པ། གཟུགས་དང་ཁ་དོག་དང་ཞེས་པ་ལ་སོགས་པ་སྟེ། སེམས་ཅན་རྣམས་ཀྱི་གཟུགས་དང་ཁ་དོག་དང་བསམ་པ་ལ་སོགས་པའི་རྗེས་སུ་མཐུན་པར་ཆོས་འཆད་པའི་སྐུ་རྣམས་འབྱུང་ངོ་ཞེས་པ་དང་སྦྱར་ཏེ། དེ་བས་ན་གསུངས་པ། སེམས་ཅན་ཐམས་ཅད་སོ་སོར་མགུ་བར་བྱེད་པ་ཞེས་པའོ། །སེམས་ཅན་གྱི་ཁམས་སུ་རྣམ་པར་སྤྲུལ་
པའི་སྒོའོ་ཞེས་པའི་ཚིག་གོང་མ་དེ་བ་སྤུའི་ཁུང་བུ་ཞེས་པ་དང་སྦྱར་རོ། །དེ་བཞིན་གཤེགས་པའི་སྐུ་བ་སྤུའི་ཁུང་བུ་དེ་སེམས་ཅན་གྱི་ཁམས་རྣམ་པར་སྤྲུལ་པ་ལས་དང་ཆེའི་རྣམ་པར་སྨིན་པ་དང༌། འབྲས་བུ་ཟ་བ་དང་ཟར་འཇུག་པ་རྣམས་སྣང་བའི་སྐུ་རྣམས་འབྱུང་བའི་སྒོ་ཡིན་པའི་ཕྱིར་རོ། །དེ་བྱུང་ནས་ནམ་མཁའ་དང་འདྲ་བ་འཇིག་རྟེན་གྱི་ཁམས་རྒྱས་པར་ཁྱབ་པ་དང༌། དབྱངས་སྒྲ་གཅིག་ཏུ་ཆོས་དབྱིངས་རིག་པར་བྱེད་ཅིང༌། དེ་བཞིན་གཤེགས་པ་འབྱུང་བར་འགྱུར་བའི་ཚིགས་སུ་བཅད་པ་འདི་སྐད་ཅེས་བསྒྲགས་སོ་ཞེས་པ་ནི་ཚིག་ཏུ་འོག་ནས་འབྱུང་བ་དེ་བསྒྲགས་ཏེ། དེ་ཡང་ཐམས་ཅད་ཚིག་གཅིག་ཏུ་སྒྲ་སྒྲོགས་པ་ན། སེམས་ཅན་གྱི་ཁམས་ཐམས་ཅད་དུ་ཐོས་ཤིང་ཆུད་པར་བྱེད་པ་སྟེ། ཆོས་ཀྱི་དབྱིངས་ཞེས་པའི་ཚིག་ནི་འདིར་སེམས་ཅན་གྱི་ཁམས་སུ་ཤེས་པར་བྱའོ། །དེ་སྐད་དུ། སྒྲ་སྒྲོགས་པའི་ཚིགས་སུ་བཅད་པ་དེ་ཆོས་ཀྱི་དབྱིངས་སུ་དམིགས་པ་སྟོན་པའི་ཚིག་སྟེ། ཚིགས་སུ་བཅད་པ་བསྟན་པ་དེ་ལ་ཆུད་ཅིང་གོམས་པར་བྱས་ནས། དེ་བཞིན་གཤེགས་པར་འགྱུར་བས་ན། དེ་བཞིན་གཤེགས་པ་འབྱུང་བར་འགྱུར་བའི་ཚིགས་སུ་བཅད་པ་ཞེས་བྱ་སྟེ། ཚིགས་སུ་བཅད་པ་གསུངས་པ་འདི་ལྟར་གང་ནས་འབྱུང་བ་དེ་ཀུན་ཞེས་པ་ནས། སངས་རྒྱས་རྫོགས་པས་བཤད་པའོ། །ཞེས་པའི་བར་དུ་སྟེ། གང་ནས་ཞེས་པ་ནི་ཆོས་རྣམས་ཀྱི་མཚན་ཉིད་ནས་ཞེས་པའོ། །འབྱུང་བ་དེ་ཀུན་ཞེས་པ་ནི་སངས་རྒྱས་དང་ཉན་ཐོས་ལ་སོགས་པ་མིང་གིས་སྨོས་པ་རྣམས་ཏེ། མདོ་རན་ཆོས་རྣམས་ཀྱི་ཆོས་ཉིད་མཚན་ཉིད་ནི་ཆོས་ཀྱི་དབྱིངས་དེ་བཞིན་ཉིད་ལས་སངས་རྒྱས་དང་ཉན་ཐོས་དང་བྱང་ཆུབ་སེམས་དཔའ་དང༌། ཀུན་དུ་སངས་རྒྱས་པ་དང༌། སེམས་ཅན་གྱི་འཇིག་རྟེན་དང༌། སྣོད་ཀྱི་འཇིག་རྟེན་དང་ཆོས་རྣམས་འབྱུང་ཞིང་གནས་པ་དག་འབྱུང་སྟེ། དེ་དག་རྟག་ཏུ་ཇི་ལྟར་འབྱུང་བ་ཤེས་རབ་དང་ཐབས་སུ་ལྡན་པས་ལམ་འདི་ཁྱེད་ཀྱིས་བསྒོམ་པར་གྱིས་ཤིག་ཅེས་པ་སྟེ། དེ་ཡང་རྫོགས་པའི་སངས་རྒྱས་ཀྱིས་བཤད་པ་ཞེས་པའོ། །རྣམ་པར་བརྟག་པའོ་ཞེས་པ་ན་ཀུན་རྫོབ་ཏུ་འང་ཞེས་པ་སྟེ། མདོར་ན་ཆོས་རྣམས་ཀྱི་དབྱིངས་མཚན་ཉིད་དང་འདྲ་བ་དང༌། དེའི་དབང་གིས་དེ་བཞིན་གཤེགས་པ་ལས་སྤྲུལ་པའི་
སྐུ་ལ་སོགས་པ་འབྱུང་བ་དང་དེ་ལ་དམིགས་ནས་ཉན་ཐོས་དང་རང་སངས་རྒྱས་ལ་སོགས་པ་མཐར་སངས་རྒྱས་པའི་བར་དུ། ཇི་ལྟར་འགྲུབ་པར་འགྱུར་བའི་ལམ་དེ་ཁྱེད་ཀྱིས་ཤེས་པར་བྱོས་ཤིག་ཅེས་པའོ། །དེ་ལྟར་བཅོམ་ལྡན་འདས་ཏིང་ངེ་འཛིན་དེར་ཞུགས་ནས། འཇིག་རྟེན་པའི་ཚིག་དང་འཇིག་རྟེན་ལས་འདས་པ་གཉིས་བསྟན་ཏེ། འཇིག་རྟེན་པའི་ལས་དང༌། ཚེའི་རྣམ་པར་སྨིན་པ་དང༌། འབྲས་བུ་ཟ་བ་དང་ཟར་འཇུག་པ་ལ་སོགས་པའོ། །འཇིག་རྟེན་ལས་འདས་པ་ནི་ཚིགས་སུ་བཅད་པའི་འདི་ཉིད་དོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་སེམས་ཀྱི་དབང་ཙམ་གྱིས་སྤུའི་བུ་ག་ཐམས་ཅད་ནས། སངས་རྒྱས་འབྱུང་བའི་རྒྱུ་བྱིན་གྱི་རླབས་ཆོས་ཀྱི་དབྱིངས་ལས་འཕྲུལ་པ་དེ་བཞིན་གཤེགས་པའི་སྐུ་ཆོས་ཀྱི་དབྱིངས་ཐམས་ཅད་དུ། རང་གི་སྐུ་རིག་པར་བྱེད་པ། སྤྲུལ་པའི་སྤྲིན་ཁྱབ་པར་བྱས་ནས། ཆོས་ཀྱི་དབྱིངས་རང་རང་གི་གནས་སུ་སླར་ཞུགས་སོ་ཞེས་པ་ནི། གོང་དུ་བཅོམ་ལྡན་འདས་ཀྱིས་བ་སྤུའི་བུ་ག་ཐམས་ཅད་ནས། ཆོས་ཀྱི་དབྱིངས་ནས་འཕྲུལ་པའི་སྐུ་འབྱུང་བ་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་སེམས་ཀྱི་དབང་ཙམ་གྱིས། སངས་རྒྱས་ཀྱི་སྐུ་མངོན་པར་བྱང་ཆུབ་པ་དང༌། ཆོས་ཀྱི་འཁོར་ལོ་བསྐོར་བ་ལ་སོགས་པ་སེམས་ཅན་གྱི་ཁམས་ཐམས་ཅད་དུ་རང་གི་སྐུ་རིག་པར་བྱེད་པ། སྤྲུལ་པའི་སྐུ་མང་པོས་ཁྱབ་པར་བྱས་ནས། སེམས་ཀྱི་དབང་ཙམ་གྱིས་རང་རང་གི་ཆོས་ཀྱི་དབྱིངས་སུ་སླར་ཞུགས་པ་བསྟན་ཏོ་ཞེས་པ་སྟེ། སེམས་ཀྱི་དབང་ཙམ་གྱིས་ཞེས་པ་ནི། བཅོམ་ལྡན་འདས་རྣམ་པར་སྣང་མཛད་དེ། སྒྲུབ་པ་པོ་ལྟ་བུར་བལྟ། སྦྲུལ་པའི་སྐུ་རྣམས་འབྱུང་བ་ནི་བསྒྲུབ་པའི་ལྷ་རྣམས་ལྟ་བུར་བལྟའོ། །ཆོས་ཀྱི་དབྱིངས་ཀྱི་ལས་འཕྲུལ་པའི་དེ་བཞིན་གཤེགས་པའི་སྐུ་ཞེས་པ་ནི། ཆོས་ཀྱི་དབྱིངས་ཀྱི་བྱིན་གྱི་རླབས་ཀྱི་བཅོམ་ལྡན་འདས་རྣམ་པར་སྣང་མཛད་ཀྱི་སྤྲུལ་པའི་སྐུ་རྣམས་འབྱུང་ཞེས་པ་སྟེ། དེས་ཀྱང་ཆོས་ཀྱི་དབྱིངས་ཀྱི་བྱིན་གྱི་རླབས་དང༌། སྒྲུབ་པ་པོའི་སེམས་ཀྱི་དབང་ཙམ་གྱིས་རང་གི་སྐུའི་གཟུགས་སུ་སྣང་བར་གྱུར་པ། མ་འོངས་པའི་གདུལ་པའི་འགྲོ་བ་རྣམས་ལ་བསྟན་པའོ། །ཆོས་ཀྱི་དབྱིངས་རང་རང་གི་གནས་སུ་སླར་ཞུགས་སོ་ཞེས་པ་ནི་སླར་བསྡུའི་བུ་ག་རྣམས་སུ་ཞུགས་པ་ལ་ནི་མི་བྱའི། གང་
དུ་བྱུང་བ་དེ་དག་གི་གནས་ཉིད་དུ་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་དུ་མི་སྣང་བར་གྱུར་པ་ལ་བྱའོ། །དེ་ལྟར་བཅོམ་ལྡན་འདས་ཀྱིས་རང་གིས་སྐུ་ལས་དེ་བཞིན་གཤེགས་པའི་སྐུ་རྣམས་འབྱུང་བས། སེམས་ཅན་གྱི་ཁམས་ཐམས་ཅད་དུ་ཁྱབ་པར་བྱས་ཏེ། སླར་མི་སྣང་བར་གྱུར་པ་བསྟན་ནས། ཡིད་མི་ཟད་པའི་རྡོ་རྗེའི་བྱིན་གྱི་རླབས་གསང་བའི་དཀྱིལ་འཁོར་དང་དཀྱིལ་འཁོར་གསུམ་གྱི་ཆོ་གའི་ལྷག་མ་རྣམས་བཤད་པར་གསུངས་པ། དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་ལ་བཀའ་སྩལ་པ་ཞེས་པ་ལ་སོགས་པ་སྟེ། གསང་བ་ཞེས་པ་ནི་དཀྱིལ་འཁོར་འདིའི་ཡིད་ཀྱི་རང་བཞིན་ཆོས་ཀྱི་སྐུའི་བྱིན་གྱིས་བརླབས་པས་ཡིད་ཀྱི་རང་བཞིན་ཆོས་ཀྱི་སྐུ་སྟེ། དངོས་པོར་བསྟན་པའི་རང་བཞིན་མ་ཡིན་ཏོ། ཕྲ་བས་ན་གསང་བ་ཞེས་བྱའོ། །གཉིས་སུ་ན་སྐུ་དང་གསུང་གི་རང་བཞིན་ཕྱག་བཞིན་ཕྱག་རྒྱའི་རང་བཞིན་དུ་བསྒྱུར་བས་སྐུ་དང་གསུང་དུ་མི་མངོན་པ་ལའང་བྱའོ། །ལྷ་རྣམས་གཤེགས་པའི་གནས་ཞེས་པ་ནི། དབང་ཆེན་ལ་སོགས་པའི་དཀྱིལ་འཁོར་དེ་དག་ལྷ་རྣམས་བྱིན་གྱིས་བརླབ་པའི་གནས་ཡིན་པའི་ཕྱིར་རོ། །རང་གི་ས་བོན་གྱི་མཚན་མས་བཏབ་པ་ཞེས་པ་ནི། དབང་ཆེན་ལ་སོགས་པའི་དཀྱིལ་འཁོར་སོ་སོའི་ས་བོན་ཨ་བ་ལ་སོགས་པའི་མཚན་མས་བཏབ་པ་ཞེས་པའོ། །ཐོག་མར་དཀྱིལ་འཁོར་སྔགས་པ་ཡིས། །བདག་གི་ལུས་ལ་དགོད་དོ་ཞེས་པ་ནི། ཚོན་དགྱེ་བ་ལ་སོགས་པའི་སྔོན་རོལ་དུ། སྔགས་པ་སྦྱོར་བའི་སྟན་སྔར་བཤད་པ་ལ་གནས་ནས། སྔ་མ་བཞིན་དུ་དབང་ཆེན་ལ་སོགས་པའི་དཀྱིལ་འཁོར་ལུས་ལ་རིམ་བཞིན་དུ་བཞག་གོ་ཞེས་པ་སྟེ། དེ་བས་ན་གསུངས་པ། རྐང་པ་ནས་རྐེད་པའི་བར་དུ་ནི་བསམ་པ་ཡང་ནི་དབང་ཆེན་དུ། དེ་ནས་སྙིང་གའི་བར་དུ་ནི་ཆུར་བསམ་མོ། །ཆུ་ཡན་ཆད་ནི་མེ་རུ་སྟེ། མེ་ཡན་ཆད་ནི་རླུང་དུ་ཡང་ཞེས་པ་སྟེ། ཆུ་ཡན་ཆད་མེ་རུ་སྟེ་ཞེས་པ་ནི། སྙིང་གཡན་ཆད་མེ་རུ་བསམ་པར་གསལ་ན་མེ་ཡན་ཆད་ནི་རླུང་དུ་ཡང་ཞེས་པ་ནི། རླུང་དུ་གང་ཡན་ཆད་བསམ་པའི་མཚམས་གསལ་བར་མ་སྨོས་ཀྱང་དབང་པོ་ཆེན་པོའོ། །སྙིང་པོ་ལས་སྨིན་མཚམས་སུ་ཡི་གེ་ཧཱུཾ་བསམ་པར་གསུངས་པས། སྨིན་མཚམས་ཡན་ཆད་རླུང་གི་དཀྱིལ་འཁོར་བསམ་པར་ཤེས་
པར་བྱའོ། །མཁས་པ་ཡིས་ནི་བསམས་ནས་སུ། །དེ་ནས་ས་ལ་གཟུགས་བཞག་གོ །ཞེས་པ་ནི་སྔགས་པས་དེ་ལྟ་བུའི་ཏིང་ངེ་འཛིན་བྱས་ནས། གཟུགས་བརྙན་གྱི་དཀྱིལ་འཁོར་ས་ལ་བྲི་བྲ་བྱའོ་ཞེས་པའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་རྣམ་པར་སྣང་མཛད་ཀྱི་ལུས་དང་ངག་དང་ཡིད་ཀྱི་ས་ལ་ཞུགས་ནས་ཞེས་པ་ནི་བཅོམ་ལྡན་འདས་ཀྱི་ལུས་དང་ངག་དང་ཡིད་མི་ཟད་པའི་རྡོ་རྗེ་རྒྱན་ལ་ཞུགས་ཞེས་པའོ། །ཆོས་མཉམ་པ་ལ་བལྟས་ཏེ་ཞེས་པ་ནི། དོན་དམ་པར་ཡང་ཆོས་ཐམས་ཅད་སྟོང་པ་ཉིད་ཀྱི་རང་བཞིན་མཉམ་པའོ། །ཀུན་རྫོབ་ཏུ་ཡང་དེ་བཞིན་གཤེགས་པའི་སྐུ་ལ་སོགས་པ་དང༌། སེམས་ཅན་གྱི་ཁམས་ཇི་སྙེད་པར་མཉམ་པ་ལ་བྱའོ། །མ་འོངས་པའི་འགྲོ་བ་རྣམས་ལ་བལྟས་ནས་ཞེས་པ་ནི། མ་འོངས་པའི་འགྲོ་བ་རྣམས་ཀྱི་དོན་དུ་སྔགས་ཀྱི་རྒྱལ་པོ་འདི་སྨྲས་སོ་ཞེས་པ་སྟེ། མ་འོངས་པའི་དུས་ན་སྔགས་པས་དཀྱིལ་འཁོར་འདྲི་བའི་སྔོན་རོལ་དུ། སྔགས་ཀྱི་རྒྱལ་པོ་འདི་བསྙེན་པར་བྱས་ནས། དཀྱིལ་འཁོར་འདྲི་བའི་ཕྱིར་དང༌། སྔགས་འདིའི་དོན་ལ་འཇུག་པ་དང་འདིས་བསྲུང་བར་བྱ་པའི་ཕྱིར་རོ། །ཕྱག་རྡོ་རྗེ་དེ་གསང་བའི་བདག་པོས་སྨྲས་མ་ཐག་ཏུ་ཞེས་པ་ནས། རྫོགས་པའི་སངས་རྒྱས་དཔང་དུ་འགྱུར། །འཇིག་རྟེན་ཁམས་ན་བཞུགས་པ་ཞེས་པའི་བར་དུ་ཕྱག་ན་རྡོ་རྗེ་རིག་པའི་རྒྱལ་པོ་འདི་སྨྲས་པའི་རྗེས་སུ་བསྔགས་པ་གསུངས་སོ། །དེ་ནས་དཔལ་ལྡན་རྡོ་རྗེ་འཆང༌། །ཞེས་པ་ནས། ཆོས་རྣམས་མཚན་ཉིད་དེ་འདྲའོ། །ཞེས་པའི་བར་དུ་གོང་དུ་བཅོམ་ལྡན་འདས་ཀྱིས་ཚིགས་སུ་བཅད་པ་གསུངས་ཏེ། ཐེ་ཚོམ་དང་ཡིད་གཉིས་མེད་པར་ལམ་འདི་ཁྱེད་ཀྱིས་སྒོམས་ཤིག་ཅེས་གདམས་པ་དེ་ཉིད་ཀྱི་དོན་ཏེ། ཕྱག་ན་རྡོ་རྗེ་ཇི་ལྟར་ཆུད་པ་ལྟར། །བཅོམ་ལྡན་འདས་ལ་བསྙད་པ་སྟེ། ཆུད་པ་དེ་ཡང་བཅོམ་ལྡན་འདས་ཀྱི་བྱིན་གྱིས་རླབས་སུ་ཆུད་དོ་ཞེས་གསུངས་སོ། །དེ་ནས་དཔལ་ལྡན་རྡོ་རྗེ་འཆང༌། །བསམ་པ་རབ་ཏུ་རངས་མགུ་བ། །ཞེས་པ་ལ་སོགས་པ་སྟེ། བདག་ནི་སངས་རྒྱས་བཅོམ་ལྡན་འདས་རྣམས་ཀྱིས་དགོངས་ཞེས་པ་ནི། ཕྱོགས་བཅུའི་སངས་རྒྱས་ཐམས་ཅད་ཀྱིས་ཕྱག་གཡས་པ་བརྐྱང་སྟེ། སྤྱི་བོར་བཞག་ནས་བྱིན་གྱིས་བརླབས་ཞེས་པའོ། །ཆོས་དེ་དག་ནི་མཚན་ཉིད་མེད་དེ་ཞེས་པའི་ཕུང་པོ་དང༌། ཁམས་དང་སྐྱེ་མཆེད་ལ་སོགས་པའི་ཚེས་
རྣམས་རང་བཞིན་གྱིས་འོད་གསལ་བ་ནི་མཚན་མ་དང་བྲལ་བའོ། །གནས་མེད་པ་ནི་ཕ་རོལ་པོ་རྣམས་ཀྱི་ཆ་ཤས་ཅན་ལ་སོགས་པ་ཀུན་གྱི་གནས་སུ་བརྟགས་པ་དེ་ཡོད་པ་མ་ཡིན་ཞེས་སོ། །ངོ་བོ་མ་ཡིན་ཞེས་བྱ་བ་ནི། བདག་དང་བདག་གི་རང་བཞིན་ཡོད་པ་མ་ཡིན་ཞེས་པའོ། །ལས་དར་ཚེ་ལས་རྣམ་པར་བྲལ། །ཞེས་པ་ནི་ཆོས་རྣམས་ཀྱི་རྒྱུ་དང་འབྲས་བུའི་རང་བཞིན་མེད་ཅེས་པ་སྟེ། དེ་ལྟར་རྒྱུ་དང་འབྲས་བུའི་རང་བཞིན་མེད་པས་ན། མཚན་ཉིད་མེད་པ་ཞེས་པ་ལ་སོགས་པའི་ཚིག་གོང་མ་དང་སྦྱར་རོ། །རྫོགས་པའི་སངས་རྒྱས་རང་བཞིན་ཞེས་པ་ནི། ཆོས་ཐམས་ཅད་དངོས་པོ་ཡོད་པ་གང་ཡང་མ་ཡིན་ཏེ། འདུ་ཤེས་ཙམ་དུ་ཟད་དོ་ཞེས་པའོ། །མགོན་པོ་རྣམས་ཀྱི་ཐབས་ཀྱིས་ནི། །སྙིང་རྗེ་དབང་དུ་གྱུར་བས་སུ། །ཆུད་པར་བྱས་ནས་ཆུད་པར་བྱའོ། །ཞེས་པ་ནི་ཆོས་ཀྱི་མཚན་ཉིད་དེ་འདྲ་བ་ནི། བཅོམ་ལྡན་འདས་ཀྱི་ཐུགས་རྗེ་ཆེན་པོའི་ཐབས་ཀྱི་སྒོ་ནས་བྱིན་གྱིས་བརླབས་པས་བདག་ཅག་གི་ཆུད་དོ་ཞེས་པའོ། །དེ་ལྟར་ཕྱག་ན་རྡོ་རྗེ་གསང་བའི་བདག་པོས་གླེར་པའི་ཚིགས་སུ་བཅད་པ་དེ་ཆེད་དུ་སྨྲས་ནས་ཞེས་པ་ནས། ལས་དང་སྐྱེ་བ་ལས་ཐར་པར་ནི། ཇི་ལྟར་སྔགས་པ་ནམ་ཞིག་འགྱུར། །ཞེས་པའི་བར་དུ་གསང་བའི་དཀྱིལ་འཁོར་བྲི་པ་དང༌། དཀྱིལ་འཁོར་གསུམ་ཆར་གྱི་ཆོ་གའི་ལྷག་མ་རྣམས་དྲིས་པ་སྟེ། སློབ་དཔོན་གྱི་ཏིང་ངེ་འཛིན་དང་དབང་བསྐུར་བའི་ཆོ་ག་རྣམས་མ་གཏོགས་པར་གཞན་ཐམས་ཅད་དཀྱིལ་འཁོར་གསུམ་ཆར་ཆོ་ག་མཐུན་པར་ཤེས་པར་བྱའོ། །སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་རྒྱལ་པོའི་དེའི་ཐེ་ཚོམ་བཅད་པ་དང་ཞེས་པ་ནི་དཀྱིལ་འཁོར་གསུམ་ཆར་ཡང་སྙིང་རྗེ་ཆེན་པོ་ལས་བྱུང་བས་ན། གསང་བའི་དཀྱིལ་འཁོར་ལ་སྙིང་རྗེ་ཆེན་པོ་འབྱུང་བ་ཞེས་པའོ། །ཐེ་ཚོམ་བཅད་པ་ནི་འོག་ནས་འབྱུང་བའི་དོན་རྣམས་མ་བཤད་ན། ཆོ་ག་རྣམས་མ་རྫོགས་པས་མ་འོངས་པའི་འགྲོ་བ་རྣམས་ཐེ་ཚོམ་ཅན་དུ་འགྱུར་ཏེ། དེ་བས་ན་དེ་དག་གི་ཐེ་ཚོམ་བཅད་པའི་ཕྱིར་ཞེས་པ་སྟེ། མ་འོངས་པའི་འགྲོ་བ་རྣམས་ལ་བརྟགས་ནས་ཞེས་པ་ལ་སོགས་པ་སྟེ་དངོས་ཀྱིས་གསུངས་པའོ། །དངོས་པོ་འདི་རྣམས་དྲིས་པའི་ལན་ནི། འོག་ནས་ཞིབ་ཏུ་འབྱུང་བས་ན། དེ་དང་སྦྱར་བར་བྱའོ། །ད་ནི་འོག་ཏུ་ཕྱག་ན་རྡོ་རྗེས་བཅོམ་ལྡན་འདས་ཀྱིས་བཤད་པའི་
སྐབས་ལ་བབ་སྟེ། དེ་ནས་སངས་རྒྱས་ཀུན་མཁྱེན་ལ་སོགས་པའོ། །ཕྱག་ན་རྡོ་རྗེས་དྲིས་པ་རྣམས་ཀྱང་བཅོམ་ལྡན་འདས་ཀྱིས་སྤྱིར་བསྡུས་ཏེ། རྣམ་པ་གསུམ་དུ་བྱས་ནས་གསུངས་པ། གསང་བའི་དཀྱིལ་འཁོར་བྲི་བ་དང༌། །ལྷ་རྣམས་དགོང་པའི་གནས་ཀྱང་ནི། །སྙིང་རྗེ་ཆེན་པོའི་རྩ་ལས་བྱུང། །ཐེག་པ་ཆེན་པོའི་གནས་མཆོག་སྟ། །སངས་རྒྱས་ཀུན་གྱི་གསང་ཆེན་པོ། །ཁྱོད་ཀྱིས་ཀུན་ཀྱང་དྲིས་པ་ནི། །མདོ་རུ་ཡང་ནི་བསྟན་པར་བྱའོ། །ཞེས་པ་སྟེ། དེ་ལ། ལྷ་རྣམས་དགོད་པའི་གནས་ཀྱང་ནི། །ཞེས་པས་འཇིག་རྟེན་དང་འཇིག་རྟེན་ལས་འདས་པའི་ལྷའི་བྱེ་བྲག་དང༌། ལྷ་དེ་རྣམས་ཀྱི་ཁ་དོག་ལ་སོགས་དྲིས་པ་དང༌། ལྷ་རྣམས་ཀྱི་གནས་དབང་ཆེན་ལ་སོགས་པའི་དཀྱིལ་འཁོར་དུ་བརྟགས་པ་ལ་སོགས་བརྟག་པ་དང༌། དེ་དག་མདོར་བསྡུས་ཏེ་གསུངས་པའོ། །ཐེག་པ་ཆེན་པོའི་གནས་མཆོག་དེ། །ཞེས་པ་ནི་སྔགས་པ་བྱང་ཆུབ་སེམས་དཔའ་དང་ཐམས་ཅད་མཁྱེན་པར་ཇི་ལྟར་འགྱུར། བདེན་པ་ཐོབ་པ་ཇི་ལྟར་ཞེས་པ་དྲིས་པ་དེ་དག་བསྡུས་ཏེ་གསུངས་པ་སྟེ། ཚིག་དེ་དག་ནི་བྱང་ཆུབ་ཏུ་གཞོལ་བའི་ཚིག་པས་ཐེག་པ་ཆེན་པོའི་ལམ་མཆོག་ཅེས་བྱའོ། །གཞན་རྣམས་ཀྱང་ཐེག་པ་ཆེན་པོའི་ཚིག་ཡིན་མོད་ཀྱི། གཞན་པས་འདི་ཉེ་ཞིང་གཙོ་བོའི་ཕྱིར་རོ། །དེ་གཉིས་ལས་གཞན་པ་སློབ་དཔོན་གྱི་མཚན་ཉིད་དང༌། ཚོན་འགྱེད་པ་ལ་སོགས་པ་ཇི་སྲིད་དྲིས་པ་དེ་དག་ཐམས་ཅད་གསང་བའི་དཀྱིལ་འཁོར་བྲི་བ་ཞེས་པའི་ནང་དུ་འདུས་པར་རིག་པར་བྱའོ། །དེ་ལ་སྐབས་འདིར་གསང་བའི་དཀྱིལ་འཁོར་ཞེས་པ་ནི་དཀྱིལ་འཁོར་གསུམ་ཆར་གྱི་ཆོ་ག་སྤྱིར་དྲིས་པའི་དངོས་བོ་དེ་དག་ཉིད་ཆེན་པོ་འབྱུང་བའི་རྒྱུ་ཞེས་པའོ། །དམ་ཚིག་ཅན་མ་ཡིན་པ་ལས་མི་བསྟན་པས་གསང་ཞེས་བྱའོ། །གཞན་ནི་གོང་དུ་སྨོས་པ་བཞིན་ནོ། །འབྱུང་བ་ཆེན་པོ་ཞེས་གོང་དུ་དྲིས་པ་དེ་དག་ཐམས་ཅད་བླ་ན་མེད་པའི་བྱང་ཆུབ་ཀྱི་རྒྱུ་ཤེ་དག་དྲིས་པའི་དངོས་པོ་དེ་དག་ཉིད་ཆེན་པོ་འབྱུང་བའི་རྒྱུ་ཞེས་བྱའོ། །སྙིང་རྗེ་ཆེན་པོ་རྩ་ལས་འབྱུང༌། །ཞེས་པ་ནི་དཀྱིལ་འཁོར་དེ་དག་སྙིང་རྗེ་ཆེན་པོ་ལས་བྱུང་བས། དེའི་ཡོ་བྱད་དྲིས་པའི་དངོས་པོ་དེ་དག་སྙིང་རྗེ་ཆེན་པོའི་རྩི་ལས་འབྱུང་ཞེས་བྱའོ། །སངས་རྒྱས་རྫོགས་པའི་གསང་ཆེན་པོ། །ཞེས་པ་ནི་ཐེག་པ་ཆེན་པོའི་གནས་མཆོག་དེ་དག་ལ་སོགས་པ་སྣོད་མ་ཡིན་
པའི་སེམས་ཅན་རྣམས་ལ་མི་བཤད་པས་གསང་བ་ཆེན་པོ་ཞེས་བྱའོ། །དཀྱིལ་འཁོར་གྱི་ནི་ཐོག་མ་རུ། །ཞེས་པ་ནས། སོ་སོའི་ལས་ལ་འདོད་བཞིན་དུའོ། །ཞེས་པའི་བར་དུའོ་ཞེས་པ་དཀྱིལ་འཁོར་བྲི་བའི་སྔོན་རོལ་དུ། སློབ་དཔོན་གྱིས་བདག་དང་སློབ་མ་བསྲུང་བ་ལ་སོགས་པའི་ལས་བྱས་པའི་སྔགས་རྣམས་ལ་ཡུན་དུ་བསྙེན་པ་བྱས་ནས། སོ་སོའི་ལས་ལ་སྦྱར་རོ་ཞེས་གསང་བའི་རྒྱུད་ལ་སོགས་པ་ནས་འབྱུང་སྟེ། དེའི་ཕྱིར་རིག་པའི་རྒྱལ་པོའི་དཀྱིལ་འཁོར་བྲི་བའི་སྔོན་རོལ་དུ་བཟླས་པ་བྱ་སྟེ། མཚན་མ་བྱུང་བའི་བར་དུ་བཟླས་ན། དེ་དག་ཐམས་ཅད་མཚན་མ་བྱས་པར་འགྱུར་རོ། །འདིའི་མཚན་མ་ཡང་དཀྱིལ་འཁོར་གྱི་ལྷག་མར་གནས་པ་ན། སྔགས་པའི་རྨི་ལམ་དུ་སངས་རྒྱས་དང་བྱང་ཆུབ་སེམས་དཔའ་རྣམས་དཀྱིལ་འཁོར་བྲི་བའི་ལས་རྩོམ་པ་མཐོང་ན་ཞེས་པ་དང་སྦྱར་རོ། །ཡན་ལག་བཅུ་གཉིས་ཚིག་ལས་བྱུང༌། །ཞེས་པ་ནི་ཡིག་འབྲུ་ཡན་ལག་བཅུ་གཉིས་སྔགས་ཚིག་ཏུ་གྱུར་པ་ལ་ཡང་བྱ། གཉིས་སུ་ན་ཡི་གེ་འབྲུ་བཅུ་གཉིས་ལས། དོན་དམ་པའི་མཚན་ཉིད་དུ་ཆུད་པར་འགྱུར་བ་ལ་ཡང་བྱ་སྟེ། ཡན་ལག་ཅེས་པ་ནི་ཡི་གེ་འབྲུའོ། །པད་ཅེས་པ་ནི་ཆུད་པ་ལ་བྱའོ། །རིག་པའི་རྒྱལ་པོ་སྟོབས་ཆེན་པོ། །ཞེས་པ་ནི་དོན་དམ་པར་ཀྱང་སྟོང་པ་ཉིད་ཀྱི་རང་བཞིན་སྟོན་པར་བྱེད་པ་དང༌། ཀུན་རྫོབ་ཏུ་ཡང་སྦྲུལ་པ་ལ་སོགས་པ་བྱེད་པས་ན་མཐུ་ཆེ་བའོ། །དེ་ནས་རིམ་གྱིས་བཟླས་པར་བྱ། །ཞེས་པ་ནི་རྩ་བ་དང་སྙིང་པོ་དང་ཉེ་བའི་སྙིང་པོ་དང་ཉེ་བའི་སྙིང་པོའི་རིམ་བཞིན་བཟླས་ཞེས་པ་སྟེ་ཚིག་བཅུ་གཉིས་པོ་ཚང་བར་བཟླས་ཞེས་པའོ། །རང་གི་ཏིང་འཛིན་ལ་གནས་ཏེ། །ཞེས་པ་ནི་སློབ་དཔོན་རང་གི་རིང་ངེ་འཛིན་ལ་རིགས་གསུམ་གྱི་སྙིང་པོ་གནས་གསུམ་དུ་བཞག་པ་དང༌། དཔའ་པོ་ཆེན་པོའི་སྙིང་པོ་གནས་ལྡར་དགོད་པ་དང༌། ཡན་ལག་ཐམས་ཅད་དུ་ཡི་གེ་དགོང་པ་གང་ཡང་རུང་བའི་ཏིང་ངེ་འཛིན་ལ་གནས་ནས་བཟླས་པར་བྱའོ་ཞེས་པའོ། །ཇི་ལྟར་རིམ་པའི་ཚུལ་ཤེས་ནས། །སོ་སོའི་ལས་ལ་འདོད་བཞིན་དུའོ། །ཞེས་པ་དེ་ལྟར་རིམ་པ་དང་སྔོན་དུ་བསྙེན་པ་བྱས་ནས། བདག་དང༌། གནས་དང༌། སློབ་མ་སྲུང་བ་ལ་སོགས་པའི་སྔགས་རྣམས་ཇི་ལྟར་རིམ་པར་སྦྱར་རོ་ཞེས་པ་སྟེ། རིག་པའི་རྒྱལ་པོ་འདི་སྔོན་དུ་བསྙེན་པ་བྱ་བ་ཡང་དཀྱིལ་
འཁོར་གསུམ་དུ་སྦྱར་བར་ཤེས་པར་བྱའོ། །སློབ་དཔོན་གཉིས་སུ་ཤེས་པར་བྱ། །ཞེས་པ་ནས། སངས་རྒྱས་རྐང་གཉིས་གཙོ་བོས་སོ། །ཞེས་པའི་བར་དུ་སློབ་དཔོན་གྱི་མཚན་ཉིད་དང་བྱེ་བྲག་བཤད་པ་སྟེ། དེ་འང་སྤྱིའི་མཚན་ཉིད་དང་བྱེ་བྲག་བཤད་པ་སྟེ། དེ་ལ་སྤྱིའི་མཚན་ཉིད་ནི། ཐེག་པ་གསུམ་འབྱེད་མཁས་བ། བྱང་ཆུབ་ཀྱི་སེམས་དང་ལྡན་པ་ཞེས་པ་ལ་སོགས་པ་སྔར་བཤད་ཟིན་ཏོ། །འདིར་ནི་ཟབ་ཅིང་རྒྱ་ཆེ་བ་ལ་མོས་པ་དང༌། དམིགས་པ་ཅན་གྱི་བྱེ་བྲག་བཤད་པ་སྟེ་དེ་བས་ན། དེ་ཡི་མཚན་མ་རྟོགས་པར་བྱ། །ཟབ་མོ་དང་ཡང་བ་ཡིན་ཞེས་པ་ལ་མོས་པའོ། །ཕྱག་རྒྱ་སྔགས་རྒྱུད་རྟོགས་པ་སྟེ། །ཞེས་པ་ནི་སློབ་དཔོན་གཉིས་ཀྱི་སྤྱིའི་མཚན་ཉིད་དེ་ཕྱག་རྒྱ་དང་སྔགས་རྣམས་གཞུང་ལས་ཇི་སྐད་བཤད་པ་བཞིན་ཤེས་པ་ཞེས་པའོ། །ཟབ་སྟེ་རྒྱ་ཆེར་ཤེས་པར་བྱ། །ཞེས་པ་ནས། མཐོང་བའི་ཆོས་ནི་རྣམ་པར་སྤང་བའོ། །ཞེས་པའི་བར་དུ་ཟབ་ཅིང་རྒྱ་ཆེ་བ་ལ་མོས་པའི་སློབ་དཔོན་གྱི་བྱེ་བྲག་སྟེ་ཟབ་པ་ནི་སྟོང་པ་ཉིད་དམིགས་སུ་མེད་པ་ལ་མོས་པས། དེའི་སེམས་ཀྱི་རྒྱུད་སུས་ཀྱང་རིག་པར་མི་ནུས་ཏེ་དཔག་དཀའ་ཞེས་པའོ། །རྒྱ་ཆེན་པོའི་དོན་དམ་པར་ཆོས་ཐམས་ཅད་སྟོང་པ་ཉིད་ནམ་མཁའི་རང་བཞིན་ལྟ་བུར་ཆུད་པའོ། །ཀུན་རྫོབ་ཏུ་འང་སྒྱུ་མ་དང་སྨིག་རྒྱུ་ལྟ་བུར་ཤེས་ནས། མཆོད་པ་ལ་སོགས་པ་རྒྱ་ཆེན་པོར་སྦྱོར་བའོ། །སེམས་ཅན་རྣམས་ལ་ཡིད་མི་ཆེས་པ་ནི་སེམས་ཅན་རྣམས་དང༌། སྤྱོད་ལམ་མི་མཐུན་པས་གཅིག་ལ་གཅིག་ཡིད་མི་རྟོན་པའོ། །སངས་རྒྱས་རྣམས་ཀྱི་སྲས་མཆོག་སྟེ། །ཞེས་པ་ནི་སངས་རྒྱས་ཀྱི་སྤྱོད་པ་དང་རྗེས་སུ་མཐུན་པའི་ཕྱིར་ཏེ། འཇིག་རྟེན་ན་ཡང་བའི་སྤྱོད་པ་དང་མི་འགལ་བར་སྤྱོད་པ་ནི་བེའུ་མཆོག་ཅེས་བྱའོ། །མཐོང་བའི་ཆོས་ནི་རྣམ་པར་སྤང་བའོ། །ཞེས་པ་ནི་འཇིག་རྟེན་གྱི་ཀུན་རྫོབ་ཀྱི་ཆོས་རྣམས་ལམ་ཆགས་པའོ་ཞེས་པའོ། །གཉིས་པོ་ད་ལྟར་ཡིས་ནི་ཞེས་པ་ནས། སངས་རྒྱས་རྐང་གཉིས་གཙོ་བོས་སོ། །ཞེས་པའི་བར་དུ་དམིགས་པ་ཅན་གྱི་སློབ་དཔོན་གྱི་བྱེ་བྲག་སྟེ། མཐོང་བ་ཡི་ནི་ཆོས་ཀྱིས་སུ། །མོས་ནས་དམིགས་པར་འགྱུར་བ་སྟེ། །ཞེས་པ་ནི་ཉན་པ་དང་བསམ་པའི་ཤེས་རབ་ཀྱིས་སྔགས་ཀྱི་རྒྱུད་ལ་སོགས་པ་ཐོས་ཤིང༌། བསམ་པ་སྟོང་པའི་རང་བཞིན་
དུ་མོས་སུ་ཟིན་ཀྱང་བསྒོམ་པའི་ཤེས་རབ་ཀྱིས་གོམས་པར་བྱ་བར་མི་ནུས་པས། ཕྱི་རོལ་གྱི་སྤྱོད་པ་རྣམས་ལ་མོས་པར་འགྱུར་ཏེ། དེ་འཇིག་རྟེན་གྱི་དཀྱིལ་འཁོར་ཚོན་ལ་སོགས་པས་བྲི་བར་བཅོམ་ལྡན་འདས་ཀྱིས་དབང་བསྐུར་ཞིང་ལུང་སྩལ་ཏོ་ཞེས་པའོ། །འཇིག་རྟེན་གྱི་དཀྱིལ་འཁོར་ཞེས་པ་ནི་ཚོན་ལ་སོགས་པས་བྲིས་ནས་འཇིག་རྟེན་པ་རྣམས་ཀྱི་ལྟ་བའི་སྤྱོད་ཡུལ་དུ་གྱུར་པས་འཇིག་རྟེན་གྱི་དཀྱིལ་འཁོར་ཞེས་བྱའི་མུ་སྟེགས་པ་ལ་སོགས་པའི་དཀྱིལ་འཁོར་ལ་ནི་མི་བྱའོ། །དེ་བས་ན་སློབ་དཔོན་དམིགས་པ་ཅན་གྱིས་ཕྱི་རོལ་གྱི་ཚོན་ལ་སོགས་པས་དཀྱིལ་འཁོར་བྲི་བར་དབང་བསྐུར་གྱི། སེམས་ཀྱི་དབང་དུ་མི་འགྱུར་བས་ཡིད་ཀྱིས་དཀྱིལ་འཁོར་བྲི་བས་ནི་དབང་མི་བསྐུར་རོ། །ཟབ་ཅིང་རྒྱ་ཆེ་བ་ལ་མོས་པའི་སློབ་དཔོན་དེ་ནི་ཕྱིའི་དཀྱིལ་འཁོར་དང༌། ནང་གི་དཀྱིལ་འཁོར་གཉིས་ཀ་བྲི་བར་དབང་བསྐུར་ཏེ་ཕྱི་རོལ་གྱི་སྤྱོད་པ་རྣམས་ལ་མི་ཆགས་ཤིང༌། སེམས་ཀྱི་དབང་དུ་གྱུར་བས་ནང་གི་དཀྱིལ་འཁོར་བྲི་བར་དབང་བསྐུར་རོ། །སློབ་མ་རྣམས་ཀྱི་ཡིད་དང་སྦྱར་བའི་ཕྱིར་ཕྱི་རོལ་གྱི་དཀྱིལ་འཁོར་ཡང་བྲི་བར་གསུངས་སོ། །སློབ་མ་རྣམས་རིག་བྱ་ཞེས་པ་ནས། སློབ་མ་དེ་ནི་རྒྱལ་བའི་མཆོག །ཅེས་བྱ་བའི་བར་དུ་སློབ་མའི་བྱེ་བྲག་བཤད་པ་སྟེ་དུས་དང་དུས་མ་ཡིན་པར་དབྱེ་བ་ཞེས་པ་ནི་སྤྱིར་སློབ་མ་རྣམས་པ་བཞི་སློབ་མ་ཁ་ཅིག་སྔགས་ཀྱི་རྒྱུད་ལ་སོགས་པ་ཐོས་ཤིང་ཤེས། བྱང་ཆུབ་ཀྱི་སེམས་ཀྱང་བསྒོམས་པས་ནི་དཀྱིལ་འཁོར་དུ་བཅུག་པ་ཉིད་ཀྱི་ཚེ་ན་བསྒྲུབ་པར་དབང་བསྐུར། བྱང་ཆུབ་ཀྱི་སེམས་དང་མི་ལྡན་པས་ཀྱང་སློབ་དཔོན་དམིགས་པ་ཅན་གྱི་མཚན་ཉིད་དང་ལྡན་ན་དེ་ཉིད་ཀྱི་ཚེ་ན་སློབ་དཔོན་དུ་དབང་བསྐུར་བར་བྱ་སྟེ། དེ་དག་ནི་གཅིག་ནི་དེའི་དུས་ན་བསྒྲུབ་ཅེས་པའོ། །གཅིག་ནི་སྔགས་ཀྱི་རྒྱུད་ལ་སོགས་པ་ཐོས་ཤིང་ཤེས་ཀྱང་བྱང་ཆུབ་ཀྱི་སེམས་མ་བསྒོམས་ན་བསྒྲུབ་པར་མི་རུང་སྟེ། དེར་དཀྱིལ་འཁོར་དུ་བཅུག་ནས་བྱང་ཆུབ་ཀྱི་སེམས་བསྒོམ་པའི་ཐབས་བསྟན་ཏེ། བྱང་ཆུབ་ཀྱི་སེམས་གོམས་པར་གྱུར་ན། ཕྱིས་སྒྲུབ་པར་དབང་བསྐུར་བར་བྱ་བ་ནི་གཉིས་པོའི་དུས་ན་བསྒྲུབ་པའོ། །དེ་བཞིན་དུ་སློབ་དཔོན་དུ་དབང་བསྐུར་ན་ཡང་སྔར་སྔགས་ཀྱི་རྒྱུད་ལ་སོགས་པ་ནི་མི་ཤེས་ན། དེར་དབང་མི་བསྐུར་བར་སྔགས་ཀྱི་རྒྱུད་ལ་སོགས་པ་རྫོགས་པར་
སློབ་ཏུ་བཅུག་སྟེ་སློབ་དཔོན་གྱི་མཚན་ཉིད་དང་ལྡན་ན། སློབ་དཔོན་དུ་དབང་བསྐུར་བ་ནི་གཉིས་པོའི་དུས་ན་བསྒྲུབ་པའོ། །དེ་ཁ་ཅིག་སྔ་ནས་ཀྱང་རྒྱུད་ལ་སོགས་པ་མི་ཤེས་ཤིང་བྱང་ཆུབ་ཀྱི་སེམས་ཀྱང་མ་བསྒོམས། ཕྱིས་ཀྱང་མི་སློབ་ལ། སྒོམ་པར་མི་འགྱུར་བའི་ཕྱིར་དཀྱིལ་འཁོར་དུ་གཟུད་པ་ཙམ་ཡིན་གྱི་དུས་གཉིས་ཀར་ཡང་སློབ་དཔོན་དང༌། བསྒྲུབ་པར་དབང་མི་བསྐུར་བ་ནི་གཉིས་ཀར་མ་ཡིན་ཞེས་པའོ། །མཚན་རྣམས་ཀུན་ནི་རྫོགས་པའོ། །སློབ་མ་དེ་ནི་རྒྱལ་བའི་མཆོག །ཅེས་པ་ནི་རྒྱུད་ལ་སོགས་པ་ཡང་རྫོགས་པར་ཤེས། བྱང་ཆུབ་ཀྱི་སེམས་ཀྱང་ཚུལ་བཞིན་དུ་བསྒོམས། འགའ་ཞིག་བསོད་ནམས་སྤེལ་བའི་ཕྱིར་དཀྱིལ་འཁོར་དུ་འུགས་པ་དེ་ཡང་སློབ་མའི་གྲངས་སུ་ཡང་གཏོགས་ཏེ། དེ་ནི་དབང་ལ་སོགས་པ་བསྐུར་བས་འདིར་དབང་ལ་སོགས་པ་གདོད་བསྐུར་མི་དགོས་ཏེ། དེ་ནི་མཚན་རྣམས་ཀུན་རྫོགས་པ། །ཞེས་བྱའོ། །ད་ནི་ཐོག་མར་རིག་བྱ་བ། །ཞེས་པ་ནས། དེ་བས་རྟོག་པ་རྣམས་སྤངས་ལ། །ས་ཀུན་ཡང་ནི་སྦྱང་བར་བྱའོ། །ཞེས་པའི་བར་དུ་ས་སྦྱང་བར་བཤད་པ་སྟེ། ས་ལ་ཕྱི་ནང་གི་རྣམ་པ་གཉིས་ཏེ། དེ་ལ་ཕྱིའི་ས་སྦྱང་བ་ནི་སྔར་བཤད་ཟིན་ཏོ། །འདིར་ནི་ནང་གི་ས་སྦྱང་བར་བཤད་དེ། སེམས་ཀྱི་ས་ཞེས་བྱ་བ་ཡིན། །ཞེས་པའོ། །སྦྱང་བ་སྔོན་དུ་བཤད་པ་སྟེ། །ཞེས་པ་ནི་སྔར་བྱང་ཆུབ་ཀྱི་སེམས་རང་གི་སེམས་ཇི་ལྟ་བུ་ཉིད་དུ་ཤེས་པ་སྟེ་ཁ་དོག་ཏུ་ཡང་མ་ཡིན། དབྱིབས་སུ་ཡང་མ་ཡིན་ཞེས་པ་ནས་རྣམ་པ་ཐམས་ཅད་དུ་བཙལ་ཀྱང་མི་རྙེད་དོ་ཞེས་པ་ལ་སོགས་པའི་བར་དུ་སྟེ་དེའི་ཚུལ་དུ་ཏིང་ངེ་འཛིན་དག་པ་དང་ཇི་བཞིན་པ་ཐམས་ཅད་སྤངས་པ་དང༌། རྣམ་རྟོག་དང་བྲལ་བས་ན་སེམས་ཀྱི་དྲི་མ་དག་པ་སྟེ། དེ་ལྟར་དག་པར་བྱས་ནས་ཕྱི་རོལ་གྱི་དཀྱིལ་འཁོར་རམ་ནང་གི་དཀྱིལ་འཁོར་གང་ཡང་རུང་བ་བྲི་བར་བྱའོ་ཞེས་པའོ། །དེ་ཡིས་ནི་ཡོངས་སུ་སྦྱང་བ་ཞེས་པ་ནི་སྔར་བྱང་ཆུབ་ཀྱི་སེམས་སྦྱང་བ་བཤད་པ་སྟེ། སེམས་ཀྱིས་སྦྱང་བར་བྱའོ་ཞེས་པའོ། །ནམ་ཞིག་ཉེས་དང་བྲལ་བ་ནི། །མི་འཇིགས་པ་ནི་སེམས་ཀྱིས་ཞེས་པ་ནི་ཇི་ལྟར་ཕྱི་རོལ་གྱི་སའི་ཉེས་པ་རུས་པ་དང་རྡོ་བ་ལ་སོགས་པ་མེད་པ་བཞིན་དུ། འདིར་ནི་རྣམ་པར་རྟོག་པ་ལ་སོགས་པ་དང་འདོད་ཆགས་ལ་སོགས་
པའི་ཉོན་མོངས་པ་རྣམས་དང་བྲལ་ན་བགེགས་ལ་སོགས་པས་སྐབས་མི་རྙེད་པས་མི་འཇིགས་པ་ཞེས་བྱའོ། །དེ་བས་ན། གསུངས་པ་དེ་ནི་དག་པ་སྟེ། །ཉེས་པ་ཀུན་དང་བྲལ་བའོ། །ཞེས་པའོ། །དེ་བས་འདི་ལྟར་རིག་པར་བྱ། །ཞེས་པ་ནས། རྟོག་པ་སྡུག་བསྔལ་རྒྱུད་འགྱུར་བའོ། །ཞེས་པའི་བར་དུ་ཕྱི་རོལ་གྱི་ས་རྣམས་སྦྱང་བ་ཡང་བྱང་ཆུབ་ཀྱི་སེམས་དང་མི་ལྡན་པར་རྟོག་པ་ལ་གནས་ཏེ་སྦྱོང་བ་ནི་མི་དབང་ངོ་ཞེས་པ་སྟེ། དེ་ལས་གཞན་ཡང་ནི་ཞེས་པ་གོང་གི་སྦྱང་བ་ལས་གཞན་པ་སྟེ་ཕྱིའི་ས་ལ་བྱའོ། །སྔགས་མཁན་རྟོག་པ་ལ་གནས་ཏེ། །ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་དངོས་པོར་ཡོད་པར་རྟོགས་ཏེ་སྦྱང་བར་བྱ་བའི་ས་དང༌། རུས་པ་ལ་སོགས་པའི་ཉེས་པ་ཡང་དངོས་པོ་ཡོད་པར་རྟོག་ཅིང་ས་དེ་སྦྱང་ན། དེ་བྱང་ཆུབ་སེམས་དང་མི་ལྡན་པས་དེ་དག་པར་འགྱུར་བ་མ་ཡིན་ཞེས་པ་སྟེ། དེ་བས་ན་གསུངས་པ་དེ་བས་རྣམ་པར་སྤངས་པ་ལ་སོགས་པ་ཕྱི་རོལ་གྱི་སྦྱང་བ། རྒྱ་ཆེར་བཤད་པ་དེ་ཡང་རྟོག་པ་འབའ་ཞིག་གནས་ནས་སྦྱང་བ་ངས་བཤད་པ་ནི་བྱང་ཆུབ་ཀྱི་སེམས་སྔོན་དུ་བར་ས་དེ་སྦྱང་བར་བཤད་པ་སྟེ། བྱང་ཆུབ་ཀྱི་སེམས་སྔོན་དུ་བ་ཡང་ནི་སློབ་དཔོན་གྱི་མཚན་ཉིད་སྨོས་པ་ཉིད་ན་སློབ་དཔོན་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་མཁས་པ་ཐེག་པ་གསུམ་འབྱེད་མཁས་པ་ཞེས་པ་ལ་སོགས་པ་སྨོས་པས་བྱང་ཆུབ་ཀྱི་སེམས་སྔོན་དུ་རིག་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་མཁས་པ་ནི་སྟོང་པ་ཉིད་ཀྱི་རང་བཞིན་ལ་མཁས་པར་མངོན་ནོ། །ཐེག་པ་གསུམ་འབྱེད་མཁས་པ་ཡང་གང་ཟག་དང་ཚེས་ལ་བདག་མེད་པའི་བྱེ་བྲག་ལ་མཁས་པས་སྟོང་པ་ཉིད་ལ་མཁས་པར་མངོན་ཏེ། དཀྱིལ་འཁོར་གྱི་ལས་འདི་རྣམས་ཐམས་ཅད་ཀྱང་སློབ་དཔོན་གྱི་བྱ་བ་བྱས་པས་སློབ་དཔོན་དེ་ལྟ་བུ་དང་ལྡན་བས་ས་སྦྱང་བར་བྱ་ན་རྟོག་པ་འབའ་ཞིག་ལ་མི་གནས་ཀྱི་བྱང་ཆུབ་ཀྱི་སེམས་དང་ལྡན་པར་འཇིག་རྟེན་པ་རྣམས་ཀྱི་སེམས་དང་སྦྱར་བའི་ཕྱིར། ཕྱི་རོལ་གྱི་ས་རྣམས་སྦྱང་བར་བཅོམ་ལྡན་འདས་ཀྱིས་རྒྱ་ཆེར་བཤད་པ་དེའི་དགོངས་པ་དེ་མ་མོས་པ་རྣམས་ཀྱིས་ཤེས་པར་མི་འགྱུར་བ་ཞེས་པའོ། །གང་གིས་དེ་ལྟ་བུའི་རྟོག་པ་མ་སྤངས་པ་དེ་ནི་སངས་རྒྱས་དང་ཐམས་ཅད་མཁྱེན་པའི་རྒྱུར་མི་འགྱུར་རོ་ཞེས་བྱ་སྟེ།
དེ་བས་ན་གསུངས་པ། འཇིག་རྟེན་དུ་ན་སངས་རྒྱས་མ་ཡིན་ཞེས་པ་ལ་སོགས་པ། བྱང་ཆུབ་སེམས་ཀྱིས་སྦྱང་བ་རུ། །སློབ་མ་རྣམས་ལ་ནན་ཏན་བྱ། །ཞེས་པ་ནི་སློབ་མ་སྦྱང་བ་སྟེ། དེ་ཡང་སྨོན་ལམ་གྱི་བྱང་ཆུབ་ཀྱི་སེམས་དང་འཇུག་པ་བྱང་ཆུབ་ཀྱི་སེམས་གཉིས་ཀྱིས་སྦྱང་བར་བྱ་སྟེ། འཇུག་པའི་བྱང་ཆུབ་ཀྱི་སེམས་ཀྱིས་སྔར་བསྒོམས་ན་དེ་ཡང་སྦྱང་བ་སྟེ། ཕྱིས་དཀྱིལ་འཁོར་དུ་འཇུག་ཀར་སྨོན་ལམ་གྱི་བྱང་ཆུབ་ཀྱི་སེམས་སྦྱིན་པ་དང་གཉིས་ཀྱིས་ས་སྦྱང་བའོ། །དེ་སྟེ་སྔར་འཇུག་པའི་བྱང་ཆུབ་ཀྱི་སེམས་གོམས་པར་མ་བྱས་ན་དཀྱིལ་འཁོར་དུ་འཇུག་པའི་ཚེ་སྨོན་ལམ་གྱི་བྱང་ཆུབ་ཀྱི་སེམས་བྱིན་ལ་ཕྱིས་འཇུག་པའི་བྱང་ཆུབ་ཀྱི་སེམས་སྒོམ་དུ་གཞུག་པ་སྟེ། དེ་ནི་སློབ་མ་རྣམས་བྱང་ཆུབ་ཀྱི་སེམས་ཀྱིས་སྦྱང་བའོ། །སྲུང་བ་མི་གཡོ་མགོན་པོ་སྟེ། །ཡང་ཁམས་རྣམས་བརྟུལ་བས་ཞེས་པ་ནི་སློབ་མ་རྣམས་ཀྱི་སྲུང་བ་སྟེ། སློབ་མ་རྣམས་ཐོག་མར་ནང་དུ་འོང་བའི་ཚ་སྲུང་བ་དང་ལྷག་པར་གནས་པའི་ཚེ་སྲུང་བ་ལ་སོགས་པ་ཐམས་ཅད་འདི་གཉིས་གང་ཡང་རུང་བས་བསྲུང་ཞེས་པའོ། །སློབ་མ་ནམ་ཞིག་མི་གཡོ་བ། །དམིགས་པ་རྣམས་ཀྱིས་ནམ་ཡང་རུང༌། །དེ་ཚེ་ཡོངས་སུ་དག་པ་སྟེ། །ནམ་མཁའ་དྲི་མ་མེད་པའོ། །ཞེས་པ་ནི་སློབ་མ་དག་པའི་མཚན་ཉིད་གསུངས་པ་སྟེ། དེ་ཡང་ནམ་སློབ་མ་དེ་སྦྱོར་བ་ལ་གནས་པའི་ཚེ་ཏིང་ངེ་འཛིན་དག་པ་དང༌། རྣམ་པར་རྟོག་པ་སྤངས་པ་དང་ཇི་བཞིན་པ་ཉིད་དང་བྲལ་བ་སྟེ་དགེ་བ་དང་མི་དགེ་བ་གཉིས་ཀ་ལ་དམིགས་པས་མ་གཡོས་པ་དང༌། སྦྱོར་བ་ལས་ལངས་ནས་ཡང་མཆོད་པ་ལ་སོགས་པའི་དགེ་བ་ནི་སྤྱོད་ཀྱི། འདོད་ཆགས་ལ་སོགས་པའི་ཡུལ་ལ་དམིགས་པས་མི་གཡོ་བར་གྱུར་ན་དེ་དག་པའི་མཚན་ཉིད་ཅེས་པའོ། །དྲི་མེད་ནམ་མཁའ་འདྲའོ་ཞེས་པ་ནི། ཇི་ལྟར་ནམ་མཁའ་ཅིས་ཀྱང་མ་བསྡུས་པའི་ཚེ། རང་བཞིན་གྱིས་དངས་པ་དང༌། གློ་བུར་གྱི་སྤྲིན་ལ་སོགས་པས་ཆོད་ན་ཡང་ནམ་མཁའ་རང་བཞིན་དག་པ་སྟེ། དེ་ཉམས་པར་མི་འགྱུར་བ་བཞིན་དུ་འདི་ཡང་ཏིང་ངེ་འཛིན་ལ་གནས་པའི་ཚེ། དགེ་བ་དང་མི་དགེ་བ་གཉིས་ལ་རྟོག་པའི་དྲི་མ་མེད་པ་དང༌། ཏིང་ངེ་འཛིན་ལས་ལངས་པའི་ཚེ་མཆོད་པ་ལ་སོགས་པའི་སྤྱོད་པ་བྱེད་ཀྱང་སྒྱུ་མ་ལ་སོགས་པའི་རང་བཞིན་དུ་
བྱེད་དེ་དངོས་པོ་ཡོད་པར་རྟོག་པའི་དྲི་མས་མི་གོས་པའི་ཕྱིར་རོ། །བྱིན་གྱིས་བརླབ་པ་དང་པོ་སྟེ། །ཡོངས་སུ་དག་ཅེས་བྱ་བ་ཡིན། །གཉིས་པོས་སྨེ་སྐྱིད་བང་གིས་ཏེ། །གཞན་གྱི་སུ་ནི་མ་ཡིན་ནོ། །ཞེས་པ་ནི་སྔར་སྙིང་རྗེ་ཆེན་པོས་ས་ཡོངས་སུ་གཟུང་བའི་ཚེ་དཀྱིལ་འཁོར་གྱིས་སྦྱངས་པ་དེར། སངས་རྒྱས་ལྔ་བསམ་པ་ལ་སོགས་པ་གསུངས་པ་དེ་ཉིད་འདིར་གླེང་སྟེ། རིམ་དུ་བཤད་པ་སྟེ། དཀྱིལ་འཁོར་གྱི་ས་དེ་དང་པོར་སངས་རྒྱས་བཅོམ་ལྡན་འདས་རྣམས་དེར་བསམས་ནས་བྱིན་གྱིས་བརླབ། དེའི་འོག་ཏུ་སེམས་ཀྱིས་བདག་གི་བར་གཟུང༌། དེའི་འོག་ཏུ་སྔགས་ཀྱིས་བསྲུང་བ་སྟེ་དེ་གསུམ་གྱིས་ཡོངས་སུ་གཟུང་གི་དེ་ལས་གཞན་དུ་མ་ཡིན་ཞེས་པའོ། །སྲད་བུ་རྣམ་པ་བཞིར་བཤད་དེ། །ཞེས་པ་ནས། ལྔ་པོ་ནམ་མཁའ་འདྲ་བར་བཤད། །ཅེས་པའི་བར་དུ་ནི་སྔར་ཚོན་ལྔའི་སྲད་བུ་ཞེས་སྤྱིར་བཤད་པ་སྟེ། ཚོན་སྣ་ལྔ་གང་ཡིན་པ་འདིར་མིང་གིས་སྨོས་པ་གསལ་བར་བཤད་པའོ། །བར་སྣང་ལ་ནི་བཟུང་ནས་སུ། །དེ་ཡང་དཀྱིལ་འཁོར་བྲི་བར་བྱ། །ཞེས་པ་ནི་དཀྱིལ་འཁོར་སྔ་མ་ལ། ལྟེ་བའི་ཐད་ཀར་སྲད་བུ་གཟུང༌། །ཞེས་སྤྱིར་གསུངས་ཀྱི་དཀྱིལ་འཁོར་གར་བྲི་བར་མ་བཤད་དེ། དེ་ཉིད་གསལ་བར་གསུངས་པ། བར་སྣང་ལ་སྲད་བུ་བཟུང་ནས་བར་སྣང་དེར་དཀྱིལ་འཁོར་བྲི་ཞེས་པའོ། །སྲད་བུ་གཉིས་པ་དེ་ཡིས་ནམ། །ས་ལ་དཀྱིལ་འཁོར་བྲི་བར་བྱའོ། །ཞེས་པ་ནི་སྔར་སྲད་བུ་གཉིས་པོ་བླངས་ནས་ཁ་ཤར་ཕྱོགས་སུ་བལྟ་ཞེས་པ་ལ་སོགས་པའི་སྤྱིར་སྨོས་ཏེ། དཀྱིལ་འཁོར་ཉིད་གང་བྲིས་བཞིན་དུ་མ་བཤད་དེ། དེ་ཉིད་ལ་གསལ་བར་གསུངས་པ། བར་སྣང་ལ་བྲི་ཞེས་པའི་འོག་ཏུ་སྲད་བུ་གཉིས་པ་བླངས་པ་དེས་ས་ལ་དཀྱིལ་འཁོར་བྲིའོ་ཞེས་པའོ། །སངས་རྒྱས་ཀུན་གྱི་གདན་དང་ནི། དེའི་སྲས་དཔའ་བོ་རྣམས་ཀྱིས་ཡང༌། །པདྨོ་ཡིད་དུ་འོང་མཆོག་སྟེ། ཀྲ་ཤི་འཇིག་རྟེན་གྱིས་བསྔགས་སོ། །ཞེས་པ་ནི་གདན་པདྨོ་དཀར་པོས་བྱའོ་ཞེས་པ་སྟེ། ཡིད་ལས་བྱུང་བའི་མཆོག་ཅེས་པ་ནི་སྔར་བཟླས་པའི་ཡན་ལག་བཞི་བཤད་པའི་ཚེ། སྙིང་གར་པདྨོ་དཀར་པོ་བསམ་པར་བཤད་པར་བྱ་སྟེ། འདིར་པདྨོ་དཀར་པོ་ཞེས་མ་བཤད་པས་ཡིད་ལས་བྱུང་བའི་པདྨོ་སྨོས་པས་ཡིད་ཀྱིས་བསམས་པའི་པདྨོ་དཀར་པོ་
དེ་དང་འདྲ་བའི་གདན་བྱའོ་ཞེས་པའོ། །རང་རྒྱལ་དགྲ་བཅོམ་རྣམས་ཀྱིས་ནི། །ཕྱོགས་གཅིག་ཅེས་པར་བསྒྲགས་པས་ན། །དེ་དག་སྟན་དུ་རིག་པར་བྱའོ། །པདྨོ་རྣམས་ཀྱི་འདབ་མ་ཞེས་པ་ནི་ཉན་ཐོས་དང་རང་སངས་རྒྱས་ཡེ་ཤེས་ཕྱོགས་གཅིག་པ་དང་ལྡན་པ་རྣམས་ཀྱི་སྟན་པདྨོ་དཀར་པོ་འདབ་མ་གཅིག་གི་སྟེང་དུ་བྱ་ཞེས་པའོ། །འཇིག་རྟེན་གྱི་ལྷ་རྣམས་ལ་ཞེས་པ་ནས། རྒྱལ་པོར་བསྒྲགས་པ་དེའི་སྟན་ནོ། །ཞེས་པའི་བར་དུ་འཇིག་རྟེན་པའི་ལྷ་ཚངས་པ་ལ་སོགས་པ་རྒྱལ་པོ་ཆེན་པོའི་གཟུགས་ཅན་དེ་དག་འདོད་ཆགས་དང་བཅས་པས་པདྨོ་དཀར་པོའི་སྟན་དུ་བཤད་པའོ། །ལྷག་མ་རྣམས་ནི་གར་རིགས་པར་སའི་རིམ་པ་ལས་བསམ་པར་བྱའོ་ཞེས་པ་ནི། འཇིག་རྟེན་གྱི་འཁོར་ཕལ་བ་རྣམས་བླ་མའི་དྲུང་ན་བླ་མ་དང་འདྲ་བའི་པདྨོའི་སྟན་ནི་མི་རིགས་པས་དེ་ལས་དམའ་བའི་སྟན་རྣམས་གར་རིགས་པར་བྱའོ་ཞེས་པ་སྟེ། ཉན་ཐོས་དང་རང་སངས་རྒྱས་དང་འཇིག་རྟེན་པའི་ལྷ་རྣམས་ཀྱི་སྟན་འདིར་བཤད་པ་ཡང༌། འདི་རྣམས་དཀྱིལ་འཁོར་འདིར་མ་སྨོས་པས་ཞར་ལ་བཤད་པར་ཤེས་པར་བྱའོ། །དཀྱིལ་འཁོར་བར་མ་ལ་གཤིན་རྗེ་ལ་སོགས་པ་འཇིག་རྟེན་གྱི་ལྷ་རྣམས་སྨོས་པ་ཡང་དེ་བཞིན་གཤེགས་པའི་སྐུ་ལས་སྦྲུལ་པ་ཤ་སྟག་པས་པདྨོའི་གདན་ཉིད་དུ་ཤེས་པར་བྱའོ། །འཇིག་རྟེན་པ་རྣམས་ཀྱི་མ་ཡིན་ནོ། །མཆོད་པ་རྣམས་བ་བཞིར་ཤེས་པར་བྱའོ་ཞེས་པ་ནས། འཇིག་རྟེན་གྱི་རིམ་བཞིན་དུའོ་ཞེས་པའི་བར་དུ་མཆོད་པ་རྣམས་བཤད་པ་སྟེ། དེ་ལ་སྤྱིར་མཆོད་པ་རྣམ་བཞི་སྟེ་ཐལ་མོ་སྦྱར་བ་དང༌། བྱམས་པ་དང༌། སྙིང་རྗེ་དང༌། མེ་ཏོག་དང་བདུག་པ་ལ་སོགས་པ་དང་ཡིད་ཀྱིས་མཆོད་པའོ། །དེ་ལ་སྔགས་པ་ཟབ་ཅིང་རྒྱ་ཆེ་བ་ལས་མཆོད་པ་ནི་མཆོད་པ་འདི་བཞི་ཆར་སྤྱོད་དེ་ཡིད་ཀྱི་མཆོད་པ་ཡང་བྱེད། ཕྱི་རོལ་གྱི་མཆོད་པ་ཡང་མཐོང༌། དམིགས་པ་ཅན་གྱི་སྔགས་པ་ནི་ཕྱི་རོལ་གྱི་མཆོད་པ་རྣམས་བྱེད་ཀྱི། །ཏིང་ངེ་འཛིན་མི་འཁྲུགས་པས་ཡིད་ཀྱི་མཆོད་པ་མེད་དོ། །བྱམས་པ་དང་སྙིང་རྗེ་ནི་ནན་ཏན་གྱིས་མཆོད་པ་སྟེ་ཕྱི་དང་ནང་གི་མཆོད་པ་གང་ཡང་རུང་བ་བྱས་ནས། སེམས་ཅན་རྣམས་ལ་བྱམས་པ་དང་སྙིང་རྗེ་བསྐྱེད་ནས་མཆོད་པ་དེ་དག་ཉིད་སེམས་ཅན་རྣམས་ལ་སྔོ་བར་བྱེད་པའོ། །དེ་ལ་ཕྱི་རོལ་གྱི་མཆོད་པ་
རྣམས་ནི་སྔར་བཤད་ཟིན་ཏོ། །ད་འདིར་ནི་ཡིད་ཀྱི་མཆོད་པ་བཤད་པར་བྱ་སྟེ། དེ་ལ། ཐལ་སྦྱར་མེ་ཏོག་འགྱུར་བ་ཡིས། །ཞེས་པ་ལ་སོགས་ཏེ་དེ་ལ། ཐལ་སྦྱར་མེ་ཏོག་འགྱུར་བ་ཡིས། །ཞེས་པ་ནི་དེ་ཐལ་མོ་སྦྱར་བ་ལས་མེ་ཏོག་འབྱུང་བ་དེས་མགོན་པོ་རྣམས་ལ་གསོལ་ཞེས་པ་སྟེ། དེ་ཉིད་དགྲོལ་བ་གསུངས་པ། ཕྱག་རྒྱ་ཡན་ལག་ཀུན་འབྱུང་བས། །བྱང་ཆུབ་སེམས་ནི་རྣམ་བསྒོམས་ནས། །ཞེས་པ་སྟེ་ཡིད་ཀྱི་མཆོད་པ་བྱ་བ་ཡང་ཐོག་མར་བདག་གིས་ཕྱག་རྒྱ་འདི་བཅིངས་པས་ཇི་ལྟར་བསམས་པ་བཞིན་དུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པའི་སྤྲིན་འབྱུང་བར་ཤོག་ཅིག་ཅེས་སྨོན་ལམ་བཏབ་ནས་སྟོང་པ་ཉིད་ཀྱི་ཏིང་ངེ་འཛིན་དུ་གནས་ཏེ་བྱང་ཆུབ་ཀྱི་སེམས་དེ་མངོན་དུ་བྱའོ། །དེ་ལྟར་ཏིང་ངེ་འཛིན་ལ་གནས་པ་ཉིད་ན་ཡང་ཡིད་ལ་ནམ་མཁའ་མཛོད་ཀྱི་རིག་པ་བཟླས་ཏེ། དེ་ནས་ཕྱག་རྒྱ་དེ་ལས་མཆོད་པ་རྒྱ་ཆེན་པོ་འོག་ནས་སྨོས་པ་རྣམས་ཆར་བཞིན་བབ་པར་བསམ་མོ། །དེ་ལྟར་བསམས་ནས་ཆོས་ཀྱི་དབྱིངས་ཀྱི་བྱིན་གྱིས་བརླབ། ཏིང་ངེ་འཛིན་གྱི་དབང་དང་སྔགས་ཀྱི་མཐུས་དེའི་ཚེ་སངས་རྒྱས་ཀྱི་སྤྱན་སྔར་ཆར་བཞིན་དུ་བབ་པར་གྱུར་ཏེ། དེ་བས་ན་གསུངས་པ། དེ་ནི་ཉེས་མེད་མེ་ཏོག་སྟེ། །ཞེས་པ་ལ་སོགས་པ་རྗེས་སུ་བསྔགས་པ་དང་བཅས་པར་གསུངས་སོ། །ལྷག་མ་རྣམས་ཀྱི་ལྷ་རྣམས་ལ། །ཞེས་པ་ནས་རྣམ་པར་སོམས་ཤིག །གར་རིགས་པར་ཞེས་པའི་བར་དུ་གཟུགས་བརྙན་གྱི་དཀྱིལ་འཁོར་ཚོན་གྱིས་བྲིས་པའི་ལྷ་རྣམས་ལ་ཕྱིའི་མཆོད་པ་མེ་ཏོག་ལ་སོགས་པ་དབུལ་བའི་རིམ་པ་བསྟན་པ་སྟེ་སོ་སོའི་སྔགས་ཀྱིས་བཏབ་ནས་ཐོག་མར་བཅོམ་ལྡན་འདས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རིགས་མཆོད་དེ། དེ་ནས་པདྨོའི་རིགས་ལ་སོགས་པ་ལ་རིམ་བཞིན་དུ་མཆོད་པ་བྱས་ཏེ་དེ་བས་ན་གསུངས་པ། གང་དུ་ཇི་ལྟར་རིམ་བཞིན་དུ། །ཞེས་པ་ལ་སོགས་པའོ། །མཐེ་བོང་སྲིན་ལག་རྩེ་སྦྱར་ཏེ། །ཞེས་པ་ནས་འཇིག་རྟེན་གྱི་སྡེ་རིམ་བཞིན་དུའོ་ཞེས་པའི་བར་དུའོ། །མཆོད་པ་རྣམས་དབུལ་བའི་ཐབས་བསྟན་པ་སྟེ་མེ་ཏོག་དབུལ་བར་གསུངས་པ། མཐེ་བོང་སྲིན་ལག་རྩེ་སྦྱར་ནས། །ཞེས་པ་ལ་སོགས་པའི་འཇིག་རྟེན་གྱི་ལྷ་རྣམས་
ལས་གཞན་ནི་ལྟེ་བའི་ཐད་ཀར་རིག་པར་བྱའོ་ཞེས་པ་སྟེ། འཇིག་རྟེན་ཞེས་པ་ནི་འདིར་གཟུགས་བརྙན་གྱི་དཀྱིལ་འཁོར་གྱི་ལྷ་རྣམས་ལ་བྱ་སྟེ། དེའི་ལྷ་རྣམས་ལ་ལྟེ་བའི་ཐད་ཀ་ནས་མེ་ཏོག་དབུལ་བར་བྱའོ། །འཇིག་རྟེན་ལས་འདས་པའི་ཡིད་ཀྱི་དཀྱིལ་འཁོར་རྣམས་ལ་ནི་སྙིང་ག་ནས་དབུལ་བར་བཤད་པའོ། །བདུག་པ་ཁུ་ཚུར་རྡོ་རྗེས་སོ། །ཡང་ན་པདྨོ་ཕྲེང་གིས་ཏེ། །བར་སྣང་ལ་ནི་བཟུང་ནས་སུ། །འཇིག་རྟེན་མགོན་པོ་རྣམས་ལའོ། །ཞེས་པ་ནི་བདུག་པ་གསོལ་བ་ནི་རྡོ་རྗེ་ལྟ་བུའི་ཁུ་ཚུར་རམ། པདྨོའི་ཕྱག་རྒྱ་བཅིངས་ཏེ། པོག་སྣོད་ཅན་དུ་བྱས་ན་ནི་རྡོ་རྗེ་ཁུ་ཚུར་གྱིས་གཟུང༌། ཁམ་ཕོར་ནི་པདྨའི་ཕྱག་རྒྱས་བཟུང་སྟེ་ཡིད་ཀྱི་དཀྱིལ་འཁོར་ལྷ་རྣམས་ལ་བར་སྣང་ལ་སྟོད་དེ་བཟུང་ནས་གསོལ་ཞེས་པའོ། །གཟུགས་བརྙན་གྱི་དཀྱིལ་འཁོར་ལྷ་རྣམས་ལ་ལྟེ་བའི་ཐད་ཀ་ནས་རིམ་བཞིན་དུ་གསོལ་ཞེས་པ་སྟེ་དེ་བས་ན་གསུངས་པ། དེ་ལས་ལྷ་རྣམས་གཞན་དག་ནི། །འཇིག་རྟེན་གྱི་རིམ་བཞིན་དུ་ཞེས་པའོ། །སྦྱིན་སྲེག་གཉིས་སུ་རིག་པར་བྱ་སྟེ་ཞེས་པ་ནས། སྔགས་ཀྱི་ཤེས་པ་མེད་པའོ། །ཞེས་པའི་བར་དུ་ཕྱི་ནང་གཉིས་ཀྱི་སྦྱིན་སྲེག་བཤད་པ་སྟེ། དེ་ལ་ཕྱིའི་སྦྱིན་སྲེག་ནི་བསྲེག་པར་བྱ་སྟེ། སྲེག་པའི་མེ་ལ་སོགས་པ་ཕྱིའི་དངོས་པོ་གཟུགས་ལ་སོགས་པ་ལ་ལྟོས་པའོ།། ནང་གི་སྦྱིན་སྲེག་ནི་དེ་རྣམས་ནི་སེམས་ཉིད་ཀྱིས་བྱ་སྟེ། ཕྱི་རོལ་གྱི་གཟུགས་ལ་སོགས་པ་ལ་ལྟོས་པ་མ་ཡིན་ཏེ་དེ་བས་ན་གསུངས་པ། ལས་དང་སྐྱེ་བ་རྣམ་པར་བྲལ། །ཞེས་པ་སྟེ་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་འཇིག་པར་བྱེད་པའི་བྱང་ཆུབ་ཀྱི་སེམས་ཀྱིས་ཆོས་རྣམས་སྟོང་པ་ཞིག་སྟེ། ལས་དང་སྐྱེ་བ་ལ་སོགས་པ་དམིགས་སུ་མེད་པར་རབ་ཏུ་མི་འཕོ་བའི་ཤེས་རབ་ཀྱིས་ཆུད་དེ་ཡིད་ལ་ཕུང་པོ་ལ་སོགས་པ་དང༌། སེམས་དང་སེམས་ལས་བྱུང་བ་རྣམས་ཀྱི་རྒྱུ་དང་འབྲས་བུ་དག་དམིགས་སུ་མེད་པར་གྱུར་པ་དེ་ནི། ལས་དང་སྐྱེ་བ་རྣམ་པར་བྲལ། །ཞེས་བྱ་བ་སྟེ་དེ་ལ་སྲེག་པར་བྱེད་པའི་བར་དུ་མི་འཕོ་བའི་ཤེས་རབ་བོ། །སྲེག་པར་བྱེད་པ་ནི་ལས་དང་སྐྱེ་བ་ལ་སོགས་པའོ། །སྲེག་པའི་མེ་ནི་ཇི་བཞིན་པ་དང་བྲལ་བའི་ཡིད་ལ་བྱའོ། །ས་བོན་དུ་ནི་ཕྱིས་འགྱུར་ཞེས་པ་ནི་ལས་དང་སྐྱེ་བ་སྲེད་པའི་མཚན་ཉིད་སྟོང་པ་ཉིད་ཀྱི་ཏིང་ངེ་འཛིན་དེ་ལས་ལངས་ནས་སྙིང་རྗེའི་
དབང་གིས་ལྷའི་གཟུགས་སུ་བྱ་བ་ལ་བྱ་སྟེ། བདག་གི་ལྷ་གང་ཡིན་པའི་སྔགས་ཀྱི་ས་བོན་ལས་ལྷར་བསྒྱུར་བའི་རིམ་པ་ཇི་སྐད་དུ་གསུངས་པའི་ཚུལ་གྱིས་བདག་ཉིད་ཀྱི་ལྷའི་གཟུགས་སུ་བསྒྱུར་བ་ལ་བྱ་སྟེ། དེ་ལ་དང་པོ་ཕུང་པོ་ལ་སོགས་པ་འཇིག་པའི་བྱང་ཆུབ་ཀྱི་སེམས་ནི་འཇུག་པའི་བྱང་ཆུབ་ཀྱི་སེམས་སོ། །ཇི་ལྟར་འཇིག་ཅིང་རྟོག་པ་དེ་ཡང་སྤངས་ཏེ་རབ་ཏུ་མི་འཕྲོ་བའོ། །ཤེས་རབ་རྣམ་པར་མི་རྟོག་པ་ལས་དང་སྐྱེ་བ་སྲེག་པར་བྱེད་པ་སོ་སོ་རང་གིས་རིག་པའི་མཚན་ཉིད་དུ་གནས་པ་ནི་བྱང་ཆུབ་ཀྱི་སེམས་སོ། །སླར་རང་གི་ས་བོན་ལས་ལྷའི་གཟུགས་སུ་བསྒྱུར་བ་ནི་ལྡང་བའི་བྱང་ཆུབ་ཀྱི་སེམས་སོ། །ལས་སུ་འདོད་པས་སྦྱིན་སྲེག་བྱ། །ཞེས་པ་ནི་ཞི་བ་དང་རྒྱས་པ་ལ་སོགས་པའི་ལས་རྣམས་གྲུབ་པར་འདོད་པའི་ཕྱིར་དང་ནང་གི་སྦྱིན་སྲེག་དེ་བྱའོ་ཞེས་པ་སྟེ། མཚན་མ་ཅན་གྱིས་མཚན་མ་དང་བཅས་པར་འགྲུབ། མཚན་མ་མེད་པས་མཚན་མ་དང་བཅས་པ་གཉིས་ཀ་འགྲུབ། བྱ་བ་དང་སྦྱར་ཏེ་ནང་གི་སྦྱིན་སྲེག་ཕྱི་རོལ་གྱི་གཟུགས་ལ་སོགས་པ་ལ་ལྟོས་པར་མཚན་མ་མེད་པ་དེས་ཀྱང་ཤིང་ལ་སོགས་པ་མཚན་མ་དང་བཅས་པ་རྣམས་འབྱུང་བར་འགྱུར་རོ་ཞེས་པའོ། །ཕྱི་རོལ་གྱི་གསུམ་ལྡན་ཞིང་ཞེས་པ་ནི་ཕྱི་རོལ་གྱི་སྦྱིན་སྲེག་བྱེད་པ་ན་གསུམ་དང་ལྡན་པར་བྱ་བ་ནི་ཞི་བ་དང་རྒྱས་པ་དང་མངོན་པར་སྤྱོད་པའི་ལས་གང་ཡང་རུང་བའི་ཁ་དོག་དང་ཚུལ་དུ་ལྡན་པར་བྱ་བ་དང་རྫས་རྣམས་ཀྱང་དེའི་ཁ་དོག་དང་ལྡན་པར་བསམ་པ་དང༌། བདག་ཉིད་ཀྱང་དེའི་ཁ་དོག་དང་མཚུངས་ཤིང་ལྡན་པའི་ལྷར་བསྒྱུར་བ་སྟེ། དེ་ལྟར་མེ་དང་རྫས་དང་བདག་གསུམ་ཞིབ་ལ་སོགས་པའི་ལས་གང་ཡང་རུང་བའི་ཁ་དོག་དང་ཚུལ་དུ་ལྡན་པར་བྱ་བ་གསུམ་དང་ལྡན་པའོ། །གསུམ་དང་ལྡན་པ་ཞེས་པ་ནི་ཞི་བ་དང་རྒྱས་པ་དང་མངོན་པར་སྤྱོད་པའི་དཀྱིལ་འཁོར་དབང་ཆེན་དང་ཆུ་དང་རླུང་གི་གནས་གསུམ་དང་ལྡན་པའོ། །གསུམ་ལ་གནས་ཏེ་ཞེས་པ་ནི་ཞི་བ་ལ་སོགས་པའི་ཞུགས་ཐབ་ཟླུམ་པོ་དང་གྲུ་བཞི་དང༌། གྲུ་གསུམ་པོ་ལ་བསྲེག་པའི་རྫས་ལ་སོགས་པ་གནས་ཞེས་པའོ། །ལས་གསུམ་ནི་གནས་གྲུབ་པ་ཞེས་པ་ནི། ཞི་བ་དང་རྒྱས་པ་དང་མངོན་པར་སྤྱོད་པའི་འབྲས་བུ་གསུམ་འགྲུབ་པའོ། །ཕྱི་ནང་གང་ཡང་རུང་བའི་སྦྱིན་སྲེག་གི་ཆོ་ག་དེ་ལས་གཞན་དུ་བྱས་ན་དེ་
དག་གི་འབྲས་བུ་ཐོབ་པར་མི་འགྱུར་ཏེ། དེ་བས་ན་གཉིས་ཀའི་སྤྱིར་གསུངས་པ་གང་གིས་གཞན་དུ་བྱས་ན་ནི་ཞེས་པ་ལ་སོགས་པའོ། །དེ་བཞིན་གཤེགས་པས་གསུངས་པའི་སྔགས་དང་ཞེས་པ་ནས། ལྷ་རྣམས་ཀྱང་དེ་བཞིན་ཏེ་ཞེས་པའི་བར་དུ་སྔགས་ཀྱི་ལྷ་ལ་སོགས་པའི་ཁ་དོག་དང་དབྱིབས་དང་ཚད་རྣམས་བཤད་པ་སྟེ། དེ་བཞིན་གཤེགས་པས་བསྔགས་པ། སངས་རྒྱས་རྫོགས་པར་གསུངས་པ་ནི། །དཀར་དང་སེར་དུ་རིག་པར་བྱ། །ཞེས་པ་ནི་དེ་བཞིན་གཤེགས་པའི་རིགས་ཆོས་ཐམས་ཅད་རྣམ་པར་དག་པའི་མཚན་ཉིད་ཞི་བའི་རང་བཞིན་པས་ཁ་དོག་དཀར་པོར་རིག་པར་བྱའོ་ཞེས་སོ། །སངས་རྒྱས་རྫོགས་པར་གསུངས་ཞེས་པ་ནི་ཤཱཀྱ་ཐུབ་པ་དང་འཕགས་པ་འཇམ་དཔལ་ལ་སོགས་པ་བྱང་ཆུབ་སེམས་དཔའ་ཀུན་དུ་སངས་རྒྱས་པ་རྣམས་ཀྱི་སྟེ། དེ་དག་ནི་ཏིང་ངེ་འཛིན་ལས་བཞེངས་ནས་སེམས་ཅན་གྱི་དོན་ལ་སོགས་པ་སྤྱོད་པས་ན་ཚོགས་མཛད་དེ། རྒྱས་པའི་མཚན་ཉིད་པས་ཁ་དོག་སེར་པོར་རིག་པར་བྱའོ། །ཕྱག་ན་རྡོ་རྗེའི་ཐམས་ཅད་དུ། །ཞེས་པ་ནི་ཕྱག་ན་རྡོ་རྗེ་བྱ་བ་ནན་ཏན་གྱི་ཡེ་ཤེས་ཀྱི་རང་བཞིན་སེམས་ཅན་གྱི་དོན་སྤྱོད་པ་ཐམས་ཅད་པས་ཁ་དོག་ཐམས་ཅད་དུ་རིག་པར་བྱའོ། །འཇིག་རྟེན་དབང་པོའི་སྔགས་རྣམས་ནི། །དཀར་ཏེ་ལས་ཀྱི་རིམ་པའོ། །ཞེས་པ་ནི་སྤྱན་རས་གཟིགས་ཀྱི་དབང་པོ་སོ་སོར་རྟོག་པའི་ཡེ་ཤེས་ཀྱི་རང་བཞིན་ཆོས་ཐམས་ཅད་འཁྲུ་བར་བྱེད་པའི་བདག་ཉིད་པས་ཁ་དོག་དཀར་པོར་ཤེས་པར་བྱའོ། །གྲུ་བཞི་ལྡན་པར་གདོན་མི་ཟ། །ཟླུམ་པོར་ཡང་ནི་རིམ་བཞིན་ཏེ། །ཟླ་བ་ཁམ་འདྲ་ཁྲུ་གསུམ་དུ། དེ་འདྲ་དབྱིབས་ཞེས་སྒྲོགས་པ་ཡིན། །ཞེས་པ་ནི་ལྷ་དེ་རྣམས་ཀྱི་དཀྱིལ་འཁོར་དབང་ཆེན་ལ་སོགས་པའི་དབྱིབས་བཤད་པ་སྟེ་རིམ་བཞིན་དུ་ཤེས་པར་བྱའོ། །གཟུགས་ནི་གཉིས་སུ་རིག་པར་བྱ། །བུད་མེད་དང་ནི་སྐྱེས་པར་རོ། །ཞེས་པ་ནི་ལྷ་རྣམས་ཀྱི་གཟུགས་བཤད་པ་སྟེ། དེ་ལ་ལྷ་རྣམས་ཀྱང་རྣམ་པ་གསུམ་སྟེ། རྣམ་པར་སྨིན་པའི་གཟུགས་དང་གནས་ཡོངས་སུ་གྱུར་པ་དང་སྤྲུལ་པ་སྟེ། དེ་ལ་རྣམ་པར་སྨིན་པའི་གཟུགས་ནི་རང་གི་ལས་དང་བསོད་ནམས་ལས་སྐྱེས་པའོ། །གནས་ཡོངས་སུ་གྱུར་པ་ནི་བསྒྲུབས་པ་ལས་གྲུབ་པའི་གཟུགས་སོ། །སྤྲུལ་པ་ནི་ཏིང་ངེ་འཛིན་ལ་སོགས་པའི་དབང་གིས་ཡིད་ལ་
བསམས་པར་གྱུར་པ་སྟེ་དེ་དག་ལ་ལ་ནི་སྐྱེས་པར་སྣང༌། ལ་ལ་ནི་བུད་མེད་དུ་སྣང་བའོ། །ཡང་ན་ཀུན་དུ་ཐམས་ཅད་ཀྱང༌། །ཁ་དོག་གཟུགས་དང་དབྱིབས་རྣམས་ནི། །ཞེས་པ་ཡང་ན་གོང་དུ་ཁ་དོག་དཀར་གནག་ལ་སོགས་པ་སྨོས་པ་དང་དབྱིབས་གྲུ་བཞི་ལ་སོགས་པ་སྨོས་སོ། །གཟུགས་བུད་མེད་དང་སྐྱེས་པར་སྨོས་པ་དེ་དག་ཆད་པ་མེད་དེ། དེ་དག་ཀུན་ཀྱང་ཁ་དོག་ཐམས་ཅད་དང་དབྱིབས་ཐམས་ཅད་དང་གཟུགས་ཐམས་ཅད་དུ་ཤེས་པར་བྱའོ་ཞེས་པ་སྟེ། ཅིའི་ཕྱིར་ཞེ་ན་གསུངས་པ། བསམ་ཡས་ཡེ་ཤེས་ལས་བྱུང་བས། །དེ་བས་དེ་ཡང་བསམ་ཡས་ཏེ། །ཞེས་པ་སྟེ་དེ་ཐམས་ཅད་ཀྱང་དེ་བཞིན་ཉིད་ཀྱི་ཡེ་ཤེས་བསམ་དུ་མེད་པར་འབྱུང་བ་ཤ་སྟག་གི་ཁ་དོག་དང་དབྱིབས་ལ་སོགས་པ་ཆད་པ་མེད་པས་བསམ་དུ་མེད་དོ། །དེ་ཡང་ཅིའི་ཕྱིར་ཞེ་ན། སེམས་ཅན་དོན་བྱེད་ཐ་དད་པས། །ཡེ་ཤེས་མཁས་པས་རྟག་ཏུ་མཁྱེན། །ཞེས་པ་སྟེ་དེ་དག་ཁ་དོག་དང་དབྱིབས་ལ་སོགས་པ་སྤྱད་པ་མེད་པ་ཡང་སེམས་ཅན་གྱི་དོན་སྣ་ཚོགས་ལ་མཁས་པའི་ཡེ་ཤེས་དེས་གདུལ་བའི་འགྲོ་བ་དང་རྗེས་སུ་མཐུན་པ་གཟུགས་ལ་སོགས་པ་སྟོན་པའི་ཕྱིར་རོ། །ཇི་ཙམ་རྒྱ་ཆེར་ཡིད་གྱུར་པ། །དེ་ཡི་ཚད་དུ་ཤེས་པར་བྱའོ། །སྟན་རྣམས་དང་ནི་ཕྱག་རྒྱ་དང༌། །ལྷ་རྣམས་གོ་རིམས་ཀྱང་དེ་བཞིན། །ཞེས་པ་ནི་ལྷ་ལ་སོགས་པའི་ཚད་བཤད་པ་སྟེ་ནང་དུ་ཡིད་ལ་བསམ་པའམ་ཕྱི་རོལ་དུ་བྲི་བ་ལ་སོགས་པ་ཀུན་ཀྱང་ཡིད་ལ་ཇི་ཙམ་དུ་འདོད་པ་དེ་ཙམ་དུ་བསམ་པའམ་བྲི་བར་བྱ་ཞེས་པའོ། །ལྷ་རྣམས་རིམ་ཀྱང་དེ་བཞིན་ཏེ། །ཞེས་པ་ནི་དཀྱིལ་འཁོར་དུ་བྲི་བའི་ལྷ་རྣམས་ཀྱང་སྙིང་པོའི་དཀྱིལ་འཁོར་དུ་བྲི་བ་རྣམས་ནི་དཀྱིལ་འཁོར་སའི་ཞེང་ཆེ་བས་ལྷའི་གཟུགས་ཀྱང་ཆེ་བར་བྱ། དེའི་གོ་རིམས་ཀྱང་དེ་བཞིན་དུ་རིམ་གྱིས་ཆུད་པར་བྱ་ཞེས་པའོ། །སངས་རྒྱས་གང་ལས་བྱུང་བ་ནས། །ཕྱག་རྒྱའང་དེ་ནས་བྱུང་ཞེས་བྱ་བ་ནི་ཕྱག་རྒྱ་གང་ནས་བྱུང་བའི་ཁུངས་བཤད་པ་སྟ། སངས་རྒྱས་རྣམས་ཀྱི་ཆོས་ཀྱི་དབྱིངས་ལས་བྱུང་བའི་ཕྱག་རྒྱ་དེས་བདག་དང་སློབ་མ་ལ་སོགས་པ་ལྷའི་ལུས་བྱིན་གྱིས་བརླབ་པ་དང༌། ཕྱག་རྒྱ་དེས་སློབ་མ་ལ་སོགས་པ་བསྲུང་བ་སྟེ། དེ་བསྲུངས་ན་ཆོས་ཀྱི་དབྱིངས་ཀྱི་མཚན་ཉིད་ཀྱིས་བཏབ་པས་ཅིས་ཀྱང་མི་ཚུགས་པར་འགྱུར་བ་ནི་འཇིག་
རྟེན་རྒྱལ་པོའི་རྒྱ་དང་ལྡན་པའི་སྐྱེས་བུ་ལ་སུས་ཀྱང་གཙེ་བར་མི་འགྱུར་བ་དང་འདྲའོ་ཞེས་སྔར་ཡང་ཞིབ་ཏུ་བཤད་དོ། །དེ་བས་ཆོས་དབྱིངས་མདོ་རུ་ནི། །ཕྱག་རྒྱའི་མཚན་མ་ཞེས་ཀྱང་བྱ། །ཞེས་པ་ནི་མདོར་ན་ཕྱག་རྒྱ་རྣམས་ཆོས་ཀྱི་དབྱིངས་ཀྱི་མཚན་མ་ཡིན་པར་ཤེས་པར་བྱའོ་ཞེས་པའོ། །དབང་སྦྱིན་རྣམ་གསུམ་རིག་པར་བྱ། །ཞེས་པ་ནས། དེའི་སྔགས་བསྒྲགས་པ་ཡིན་ཞེས་པའི་བར་དུ་དབང་བསྐུར་བ་རྣམ་པ་གསུམ་བཤད་པ་སྟེ་ཕྱག་རྒྱས་དབང་བསྐུར་བ། དེ་ནི་ལས་དང་བྱ་བ་སྟེ། །ཞེས་པ་ནི་སྙིང་རྗེ་ཆེན་པོ་ལས་འབྱུང་བ་དང༌། ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་ནམ་སློབ་དཔོན་དང་སློབ་མ་རྒྱ་ཆེ་བ་ལ་མོས་པ་དག །ཕྱག་རྒྱས་དབང་བསྐུར་བར་བྱ་བར་བཤད་པ་སྟེ། དཀྱིལ་འཁོར་དེ་གཉིས་གང་ཡང་རུང་བའི་མདུན་དུ་དབང་བསྐུར་བའི་དཀྱིལ་འཁོར་དང༌། བུམ་པ་ལ་སོགས་པ་ལ་མི་ལྟོས་པར་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའི་ཕྱག་རྒྱ་དང་འོག་ནས་འབྱུང་བའི་ཕྱག་རྒྱས་དབང་བསྐུར་བའོ། །ལས་དང་བྱ་བར་བྲལ་ཞེས་པ་ནི་དབང་བསྐུར་བའི་བུམ་པ་དང་དཀྱིལ་འཁོར་དང་དུང་དང་འཁོར་ལོ་ལ་སོགས་པའི་ཆོ་ག་རྣམས་དང་བྲལ་བ་ཞེས་པའོ། །གཉིས་པོ་ཀུན་གྱི་གསུངས་པ་ནི། །ལས་དང་བྱ་བ་ལས་བྱུང་ཞེས་པ་ནི་སྙིང་རྗེ་ཆེན་པོ་འབྱུང་བ་དང༌། ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་མདུན་དུ་དབང་བསྐུར་བའི་དཀྱིལ་འཁོར་བྲིས་ནས། ཇི་སྐད་དུ་སྔར་གསུངས་པའི་ཆོ་ག་བཞིན་དུ་དབང་བསྐུར་གསུངས་པའོ། །གསུམ་པོ་ཡིད་ཀྱིས་རིག་པར་བྱ། །དུས་དང་དུས་ཡུལ་སྤངས་པའོ།། ཞེས་པ་ནི་གསང་བའི་དཀྱིལ་འཁོར་དུ་ཡིད་ཀྱིས་དབང་བསྐུར་བ་སྟེ་དངོས་ཀྱི་འོག་ནས་འབྱུང་བའོ། །བླ་མ་ཚུལ་བཞིན་རིམ་གྲོ་བྱས། །ཇི་ལྟར་ཕན་པར་བསྟན་པ་ནི། །དབང་བསྐུར་བའོ་ཞེས་སངས་རྒྱས་པ། །དེ་ནི་བསྔགས་ཤིང་བསྒྲགས་པ་ཡིན། །ཞེས་པ་ནི་དཀྱིལ་འཁོར་གོང་མ་གཉིས་སུ་ཕྱག་རྒྱས་དབང་བསྐུར་ནས་རྗེས་སུ་གནང་བའི་ཚིག་སྨྲས་པ་ལ་བྱ་སྟེ། ཕྱག་རྒྱས་དབང་བསྐུར་བའི་འོག་ཏུ་སློབ་དཔོན་སློབ་མའི་ནན་ཏན་དང་རིམ་གྲོ་ལ་སོགས་པས་མགུ་ནས། ཁྱོད་ཀྱིས་དེང་ཕན་ཆད་ཆོས་ཀྱི་འཁོར་ལོ་བསྐོར་ཅིག་ཅེས་པ་ལ་སོགས་པའི་ཚིག་ཏུ་ཤེས་པར་བྱའོ། །ཕྱག་རྒྱས་
དབང་བསྐུར་བ་དང་པོ་དང་དབང་བསྐུར་བ་གཉིས་པ་ནི་སྙིང་རྗེ་ཆེན་པོ་འབྱུང་བ་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་བྱའོ། །གསང་བའི་དཀྱིལ་འཁོར་དུ་ནི་ཡིད་ཀྱིས་དབང་བསྐུར་བ་དངོས་སུ་གསུངས་པས། གོང་མ་གཉིས་མི་བྱ་བར་ཤེས་པར་བྱའོ། །འདི་རྣམས་ཀྱང་འདིར་ཚིག་ཙམ་བཤད་ཀྱི་དོན་གཏན་ལ་དབབ་པར་བསྡུས་པའི་དོན་ཉིད་དུ་བཤད་ཟིན་ཏོ། །དམ་ཚིག་རྣམ་པ་ལྔ་རུ་ནི། །ཞེས་པ་ནས། དམ་ཚིག་ཅེས་སུ་གཞན་མི་བྱའོ། །ཞེས་པའི་བར་དུ་དམ་ཚིག་ཅན་གྱི་རིམ་པ་བཤད་པ་སྟེ། དེ་ལ་སྤྱིར་སློབ་མ་རྣམས་དཀྱིལ་འཁོར་དུ་འཇུག་པ་ཡང་ཁ་ཅིག་ནི་དམ་ཚིག་ཅན་དུ་འདོད་པའི་ཕྱིར་འཇུག །ཁ་ཅིག་ནི་སྒྲུབ་པར་བྱེད་པའི་ཕྱིར་འཇུག །ཁ་ཅིག་ནི་སློབ་དཔོན་དུ་འདོད་པའི་ཕྱིར་འཇུག་སྟེ། དེ་ལ་དམ་ཚིག་ཅན་དུ་འདོད་པའི་ཕྱིར་འཇུག་པ་ནི་དཀྱིལ་འཁོར་དུ་འདི་གསུམ་གང་ཡང་རུང་བ་ལ་ཞུགས་ཏེ། དམ་ཚིག་ཅན་དུ་གྱུར་ན་དཀྱིལ་འཁོར་ལྷག་མ་གཉིས་མི་ལྟོས། སྒྲུབ་པ་དང་སློབ་དཔོན་དུ་འདོད་པ་ནི་དཀྱིལ་འཁོར་གསུམ་ཆར་ལྟོས་པར་ཤེས་པར་བྱའོ། །དཀྱིལ་འཁོར་དེ་ཉིད་མཐོང་བ་ནི། །དམ་ཚིག་ཤེས་པ་ཅིག་ཅེས་བྱ། །ཞེས་པ་ནི་དམ་ཚིག་གི་དོན་ནི་འདིར་ཚུལ་ལས་མི་འགལ་བའི་དོན་ཏེ། དཀྱིལ་འཁོར་གསུམ་ལས་གང་ཡང་རུང་བ་ཅིག་མཐོང་ན་དམ་ཚིག་ཅན་ཅིག་ཅེས་བྱ་བ་སྟེ། དེས་སྔར་བྱང་ཆུབ་ཀྱི་སེམས་བསྒོམས་པ་ན་ནི་དེ་ལ་ཕྱག་རྒྱ་དང་སྔགས་སྦྱིན་པར་བྱ་སྟེ། སྔར་བྱང་ཆུབ་ཀྱི་སེམས་མ་བསྒོམས་ན་དེ་ལ་ཕྱག་རྒྱ་དང་སྔགས་སྦྱིན་དུ་མི་རུང་སྟེ་དེ་བས་ན་གསུངས་པ། དེ་ལ་ཕྱག་རྒྱས་བཏབ་པའང་མེད། །དེ་བཞིན་སྔགས་ཀྱང་གཟུང་དུ་མེད། །ཅེས་པའོ། །དེ་ལྟར་དཀྱིལ་འཁོར་དེར་ཞུགས་ན་ཕྱག་རྒྱ་དང་སྔགས་མི་སྦྱིན་པར་བྱང་ཆུབ་ཀྱི་སེམས་བསྒོམ་དུ་བཅུག་སྟེ། གོམས་པར་གྱུར་ནག་གདོད་ཕྱག་རྒྱ་དང་སྔགས་སྦྱིན་པར་གསུངས་པ། བྱང་ཆུབ་ཀྱི་སེམས་ཀྱི་ཁྱད་པར་ནི་ཕྱག་རྒྱ་དང་སྔགས་གཟུང་ངོ་ཞེས་པའོ། །དཀྱིལ་འཁོར་ཀྱང་མཐོང་བ་དེ་དམ་ཚིག་གཉིས་ཞེས་བྱའོ་ཞེས་པ་ནི་དེ་ལྟར་བྱང་ཆུབ་ཀྱི་སེམས་གོམས་ནས་ཡང་དཀྱིལ་འཁོར་དུ་བཅུག་སྟེ། ཕྱག་རྒྱ་དང་སྔགས་སྦྱིན་པ་དེ་ནི་དམ་ཚིག་ཅན་གཉིས་ཞེས་བྱའོ། །དཀྱིལ་འཁོར་ཕྱག་རྒྱ་མཐོང་བ་ནི། །
ལས་སུ་བྱ་བ་ལ་ཡང་འཇུག །བླ་མས་ལུང་ནི་མ་བྱིན་པ། །དེ་ཡང་དམ་ཚིག་ཤེས་ཞེས་བྱ། །ཞེས་བྱ་བ་ནི་དཀྱིལ་འཁོར་ཡང་མཐོང་ལ་རྒྱུད་དང་རྟོག་པ་ལ་སོགས་པ་ཡང་ཉན་དུ་བཅུག་ལ། སློབ་དཔོན་དུ་ལུང་མ་བསྟན་པ་དེ་ནི་དམ་ཚིག་ཤེས་པ་གསུམ་ཞེས་བྱའོ། །ཕྱག་རྒྱ་དཀྱིལ་འཁོར་བྲི་བ་རྣམས། །དེ་ཚེ་ཆོ་ག་བཞིན་དུ་བསྟན། །སྔགས་པ་དབང་ནི་མ་ཐོབ་པ། །གསང་བའི་ཡེ་ཤེས་འབྱུང་བའོ། །ཞེས་པ་ནི་སྙིང་རྗེ་ཆེན་པོ་འབྱུང་བ་དང༌། ཡི་གེ་འཁོར་ལོ་བསྐོར་བ་དཀྱིལ་འཁོར་པའི་དཀྱིལ་འཁོར་གཉིས་ཀར་དབང་བསྐུར་བའམ་གང་ཡང་རུང་བ་ཅིག་ཏུ་དབང་བསྐུར་ཏེ། ཕྱག་རྒྱ་དང་དཀྱིལ་འཁོར་ལ་སོགས་པ་བྲི་བ་དང་བཤད་པ་དེ་དག་ཆོ་ག་བཞིན་དུ་དེས་གཞན་ལ་ཡང་བསྟན་པ་གསུངས་པའི་དཀྱིལ་འཁོར་འབའ་ཞིག་ཏུ་དབང་བསྐུར་བ་དེ་ནི་དམ་ཚིག་ཤེས་པ་ཞེས་བྱའོ། །སྔགས་པ་ཚུལ་བཞིན་དབང་བསྐུར་བ། །གསང་བའི་དཀྱིལ་འཁོར་དབུས་སུ་སྟེ། །དམ་ཚིག་ཤེས་པ་ལྔར་རིག་བྱ། །ཞེས་པ་ནི་དཀྱིལ་འཁོར་གོང་མ་གཉིས་སུ་ཡང་དབང་བསྐུར་བ་ལ་གསང་བའི་དཀྱིལ་འཁོར་དུ་དབང་བསྐུར་བ་དེ་ནི་དམ་ཚིག་ཤེས་པ་ལྔ་ཞེས་བྱའོ། །དམ་ཚིག་ཅན་ཞེས་གཞན་མི་བྱ། །ཞེས་པ་ནི་དེ་ལྟར་གོང་དུ་སྨོས་པ་ལས་གཞན་དུ་ཆོ་ག་ལས་འགལ་བར་བྱས་ན་དམ་ཚིག་ཅན་ཞེས་མི་བྱའོ་ཞེས་པའོ། །གང་གིས་རྟག་ཏུ་བསྒོམས་པ་ཞེས་པ་ནས། བདེན་པ་མཐོང་ཞེས་བྱ་བ་ཡིན། །ཞེས་པའི་བར་དུ་སྔར་ཇི་ལྟར། བྱང་ཆུབ་སེམས་དཔའ་ཞེས་བགྱི་ཞེས། །ཇི་ལྟར་ཐམས་ཅད་མཁྱེན་པ་ལགས། །ཇི་ལྟར་བདེན་པ་མཐོང་བ་ལགས། །ཞེས་དྲིས་པ་དེ་དག་བཤད་པ་སྟེ། གང་གིས་རྟག་ཏུ་བསྒོམས་པ་ནི། །དཀའ་ཐུབ་བྱང་ཆུབ་སེམས་ལ་སྟེ། །གནས་གསུམ་དུ་ནི་མི་དམིགས་པ། །བྱང་ཆུབ་སེམས་དཔའ་ཞེས་ཀྱང་བྱ། །ཞེས་པ་ནི་གང་བྱང་ཆུབ་ཀྱི་སེམས་རྟག་ཏུ་བསྒོམས་ཏེ་ལུས་དང་ངག་དང་ཡིད་ཀྱི་གནས་གསུམ་མམ། འདོད་པའི་ཁམས་དང༌། གཟུགས་ཡོད་པའི་ཁམས་དང༌། གཟུགས་མེད་པའི་ཁམས་ཀྱི་གནས་གསུམ་འཇུག་པའི་བྱང་ཆུབ་ཀྱི་སེམས་ཀྱིས་བཤིག་སྟེ་དམིགས་སུ་མེད་པར་བྱེད་པ་དེ་ནི་བྱང་ཆུབ་སེམས་དཔའ་ཞེས་བྱའོ། །སེམས་ཅན་ལ་ནི་ཐབས་བསྐྱེད་ནས། །སེམས་
ཅན་དོན་ལ་རབ་འཇུག་པ། །དམིགས་པ་མེད་པའི་སྤྱོད་པ་ཡི། །རྒྱལ་བའི་མཆོག་ཏུ་རིག་པར་བྱའོ། །ཞེས་པ་ནི་དམིགས་པ་མེད་པའི་སྤྱོད་པ་ཐོབ་ནས་དེ་ལས་ལངས་ཏེ་ཆོས་རྣམས་སྒྱུ་མ་ལྟ་བུར་ཤེས་བཞིན་དུ་ཐབས་ཀྱིས་སེམས་ཅན་གྱི་དོན་དུ་སྤྱོད་པ་དེ་ནི་ཐམས་ཅད་མཁྱེན་པ་ཞེས་བྱ་སྟེ། དམིགས་པ་མེད་པའི་སྤྱོད་པ་ཐོབ། །ཅེས་པའི་མོས་པ་སྤྱོད་པའི་ཚེ་ན། འཇུག་པའི་བྱང་ཆུབ་ཀྱི་སེམས་ཀྱི་ཆོས་རྣམས་བཤིགས་ནས་གནས་པའི་བྱང་ཆུབ་ཀྱི་སེམས་ཀྱི་མཚན་ཉིད་སྟོང་པ་ཉིད་ལ་གནས་པ་ན་དོན་དམ་པར་ཡང་ཆོས་རྣམས་དམིགས་སུ་མེད་དེ། ཀུན་རྫོབ་ཏུ་ཡང་ཆོས་རྣམས་འཁྲུལ་པའམ་སྒྱུ་མ་ལྟ་བུར་ཆུད་པས་ནི་མི་དམིགས་པའི་སྤྱོད་པ་ཐོབ་ཅེས་པའོ། །རྒྱལ་བའི་མཆོག་ཅེས་པ་ནི་དེ་ལྟར་ཀུན་རྫོབ་དང་དོན་དམ་པར་ཆོས་རྣམས་དམིགས་སུ་མེད་པར་ཆུད་པ་ནི་བདུད་བཞི་དངོས་སུ་མ་བཅོམ་ཡང་བདུད་བཞི་ལས་རྒྱལ་བའི་ངང་ཚུལ་ཅན་བས་རྒྱལ་བའི་མཆོག་ཅེས་བྱའོ། །ཐོག་མ་ནས་སུ་ཞི་བའི་ཆོས། །རང་བཞིན་མེད་ལ་གང་གིས་ནི། །སེམས་ནི་རི་རབ་བཞིན་འདུག་ན། །དེ་ནི་བདེན་པ་མཐོང་ཞེས་བྱ། །ཞེས་པ་ནི་བདེན་པ་མཐོང་བ་བཤད་པ་སྟེ། དེ་རྣམས་ཆོས་རྣམས་ཐོག་མ་ནས་ཞི་ཞིང་རང་བཞིན་མེད་པར་གང་གིས་ཆུད་དེ། དེ་ཉིད་ལ་སེམས་ནི་རི་རབ་བཞིན་དུ་མི་གཡོ་བར་གྱུར་ན་དེ་ནི་བདེན་པ་མཐོང་ཞེས་བྱ་སྟེ། དེ་ལ་མདོར་ན་ཐོག་མ་ནི་འཇུག་པའི་བྱང་ཆུབ་ཀྱི་སེམས་དང་ལྡན་པའོ། །བདེན་པ་མཐོང་བ་ཞེས་པ་ནི་གནས་པའི་བྱང་ཆུབ་ཀྱི་སེམས་བཤད་པའོ། །རྒྱལ་བའི་མཆོག་ཅེས་པ་ནི་ལྡང་བའི་བྱང་ཆུབ་ཀྱི་སེམས་སུ་བསྟན་པ་སྟེ། དེ་དག་ཀྱང་མོས་པ་སྤྱོད་པའི་ས་ཉིད་ལ་གནས་པའི་ཡོན་ཏན་དུ་ཤེས་པར་བྱའོ། །འདི་བདེན་པ་ཡང་བདག་ཉིད་ཅེས་པ་ནས། སངས་རྒྱས་འགྲུབ་དང་འོག་རྣམས་སོ། །ཞེས་པའི་བར་དུ་གྲུབ་པའི་རིགས་རྣམས་བཤད་པ་སྟེ་འདི་བདེན་པ་ཡང་བདག་ཉིད་མི་འགྲུབ་པ་ཡང་དེ་བཞིན་དུ་ཡང་དག་མཐོང་བ་དེ་བཞིན་སངས་རྒྱས་ཀྱང་དེ་བཞིན་ངས་ཀྱང་མངོན་བའོ་ཞེས་པ་ནི། གང་གིས་བྱང་ཆུབ་སེམས་དཔའ་ཐོབ། །ཞེས་པ་དེ་ཉིད་ཀྱི་རྗེས་སུ་བསྔགས་པའི་ཁྱད་པར་ཏེ། གང་ཡང་བྱང་ཆུབ་ཀྱི་སེམས་ཐོབ་པ་དེ་བདེན་པ་ཡང་དག་པ་ཉིད་ཀྱི་མི་སླུ་བ་སྟེ། སྔོན་
གྱི་སངས་རྒྱས་དང་ངས་ཀྱང་ཡང་དག་པ་ཉིད་ཀྱི་སླུ་བ་ཡིན་ཞེས་པར་མཐོང་ཞེས་པའོ། །གང་གིས་བྱང་ཆུབ་སེམས་ཐོབ་པ་ཡང་བསྒྲུབས་ནས་ཀུན་དུ་བཟང་པོའམ་འཕགས་པ་འཇམ་དཔལ་ཅིག་གིས་ཀླད་པ་ལ་བྱུགས་ན་བྱང་ཆུབ་ཀྱི་སེམས་མི་བརྗེད་པ་ཞེས་བྱ་བ་འཐོབ་བོ་ཞེས་གོང་དུ་བཤད་པ་དེ་ལྟ་བུའི་གྲུབ་པ་ཐོབ་པ་ནི་བྱང་ཆུབ་ཀྱི་སེམས་ཐོབ་པ་ཞེས་བྱ་བ་སྟེ། དེ་ལྟ་བུ་གྲུབ་ན་དེ་ཉིད་གྲུབ་པ་ཡིན་གྱི་གཞན་ཅི་དགོས་པ་ཞེས་པ་ནི་བྱང་ཆུབ་ཀྱི་སེམས་དེ་གྲུབ་པ་ལ་སོགས་པ་གཞན་གྱི་རྒྱུ་ཡིན་པའི་ཕྱིར་རོ། །དེ་བས་གཞན་ཡང་གྲུབ་པ་ནི། །གྲུབ་པ་རྣམ་པ་ལྔ་ཞེས་བསྒྲགས། །ཞེས་པ་ནི་བྱང་ཆུབ་ཀྱི་སེམས་གྲུབ་པ་དེ་ལས་གཞན་པའོ། །གཞན་མིང་གིས་འབྱུང་བ་ལྔ་ལ་བྱས་ཏེ་དེ་རྣམས་ཀྱང་སྤྱོད་པའི་རྗེས་སུ་འཇུག་པ་ལ་སོགས་པའོ། །དེ་ལ་སྤྱོད་པའི་རྗེས་སུ་ཞུགས། །ཞེས་པ་ནི་མོས་པ་སྤྱོད་པའི་ས་ལས་འཕར་ཏེ་ཡེ་ཤེས་ཀྱི་ས་ལ་འཇུག་པའི་སྐབས་སུ་སྣང་བ་ཐོབ་པ་དང༌། སྣང་བ་མཆེད་པ་ཞེས་བྱ་བ་ལ་སོགས་པའི་ཏིང་ངེ་འཛིན་གྱི་ཁྱད་པར་གྲུབ་པའོ། །ས་ལས་འཕར་བའང་དེ་བཞིན་ཏེ། །ཞེས་པ་ནི་ས་རབ་ཏུ་དགའ་བ་ཐོབ་པར་གྲུབ་པའོ། །འཇིག་རྟེན་མངོན་ཤེས་ལྔ་རྣམས་དང༌། །ཞེས་པ་ནི་འཇིག་རྟེན་གྱི་ལྔ་མངོན་པར་ཤེས་པ་གྲུབ་པའོ། །སངས་རྒྱས་གྲུབ་དང་ཞེས་པ་ནི་སངས་རྒྱས་ཀྱི་གཟུགས་སུ་གྱུར་པའི་རིག་འཛིན་དུ་གྲུབ་པའོ། །ཕལ་རྣམས་ཞེས་པ་ནི་རིག་འཛིན་ཕལ་རྣམས་གྲུབ་པ་སྟེ་དེ་གཉིས་ནི་གཟུགས་ཀྱིས་གྲུབ་པའོ། །གོང་མ་གསུམ་ནི་སེམས་ཀྱིས་གྲུབ་པ་ཤེས་པར་བྱའོ། །རྒྱུད་ནས་རྒྱུད་དུ་བ་རྣམས་ཀྱིས། །ཞེས་པ་ནས། སྔགས་པ་ཡིད་ལས་བྱུང་བའོ། །ཞེས་པའི་བར་དུ་གྲུབ་པའི་དུས་བཤད་པ་སྟེ། དེ་ལས་གྲུབ་པའི་དུས་ཀྱང་ཚེ་འདི་ལ་གྲུབ་པ་དང་ཚེ་ཕྱི་མ་ལ་གྲུབ་པ་རྣམ་པ་གཉིས་ཏེ། རྒྱུད་ནས་རྒྱུད་དུ་བ་རྣམས་ཀྱི། །ལས་རྣམས་ཇི་སྲིད་མ་ཟད་ཅིང༌། །སྨིན་པ་རྣམས་པར་དེ་སྨིན་པ། །དེ་ནི་གྲུབ་པ་ཡིན་ཞེས་བསྒྲགས། །ཞེས་པ་ནི་ཚེ་འདི་ལས་གྲུབ་པ་སྟེ། རྒྱུད་ནས་རྒྱུད་དུ་བ་རྣམས་ཀྱི་ལས་རྣམས་རྒྱུད་མ་ཟད་ཅེས་པ་ནི། ཚེ་སྔ་མའི་རྒྱུད་སྒོ་དྲུག་ལ་སོགས་པ་ནས་ལས་བསགས་པའི་ཚེ་འདིའི་རྒྱུད་ལ་ཟད་པར་མ་གྱུར་ཏེ། བདག་གི་ཕུང་པོ་གསོན་ན་ཞེས་པའོ། །སྨིན་པ་རྣམ་པར་དེ་སྨིན་ན། །ཞེས་པ་ནི་ད་ལྟ་ཡང་གསོན་ལ་ཚེ་དང་
བསོད་ནམས་ལ་སོགས་པའི་རྒྱུ་བཏབ་པའི་འབྲས་བུ་ཡང་འདིར་སྨིན་པར་གྱུར་ན་སྔ་མའི་ལས་རྣམས་མ་ཟད་པས་བདག་ཚེ་རིང་སྨིན་པ་རྣམ་པར་སྨིན་པས་བདག་གི་བསོད་ནམས་ཀྱི་རྒྱུ་མཐུས་རྟག་པར་གྱུར་ཏེ། སྒྲུབ་པའི་ཚེ་དེ་ལྟར་ཚེ་དང་བསོད་ནམས་གཉིས་ཀས་བསྲུངས་ན་དེ་ཉིད་ཚེ་འདི་ཉིད་ལ་འགྲུབ་པར་བཤད་དོ། །མདོ་རུ་དུས་གཅིག་ཏུ་ཡང་ན་ནམ་ཞིག་དང༌། ཚེ་ཟད་ན་ཚེ་དེ་གྲུབ་པ་ཐོབ་པ་ནི་སྔགས་པ་ཡིད་ལས་བྱུང་བའོ་ཞེས་པ་ནི་སྒྲུབ་པ་བསྒྲུབས་པས་ལས་དང་ཚེས་མ་བསྟངས་ཏེ། དུས་གཅིག་ཏུ་ནི་ལས་དང་ཚེ་ཟད་པར་གྱུར་ན། སྒྲུབ་པ་བསྒྲུབས་པའི་འབྲས་བུ་སྔགས་པ་དེས་ཚེ་ཕྱི་མ་ལ་བསྒྲུབ་མི་དགོས་པར་རྡོ་རྗེ་ལ་སོགས་པའི་རིགས་སུ་སྐྱེ་བ་དང༌། རིག་འཛིན་ལ་སོགས་པར་སྐྱེ་བ་འཐོབ་པར་འགྱུར་རོ་ཞེས་པའོ། །སྔགས་པ་ཡིད་ལས་བྱུང་བའོ། །ཞེས་པ་ནི་རྫས་ལ་སོགས་པ་བསྒྲུབ་མི་དགོས་པར་ཚེ་འཕོས་མ་ཐག་ཏུ་ཡིད་ཉིད་ཀྱིས་གྲུབ་པ་དེ་དག་ཐོབ་པར་འགྱུར་རོ། །གྲུབ་ནས་ནམ་མཁའ་ལ་འགྲོ་བ། །ཞེས་པ་ནས། སངས་རྒྱས་གཅིག་བརྗོད་པར་མི་འགྱུར། །ཞེས་པའི་བར་དུ་གྲུབ་པའི་འབྲས་བུ་རྣམས་དྲིས་པ་བཤད་པ་སྟེ། གྲུབ་ནས་ནམ་མཁའ་ལ་འགྲོ་བ། །ཇི་ལྟར་སྒྱུ་མ་མཁས་པ་བཞིན། །སྔགས་ཀྱི་དྲ་བས་བསླུས་པ་ནི། །ཇི་ལྟར་མིག་འཕྲུལ་ཆེན་པོ་བཞིན། །ཞེས་པ་ནི་གྲུབ་ནས་ནམ་མཁའ་ལ་འགྲོ་བ་བཤད་པ་སྟེ། ཇི་ལྟར་མིག་འཕྲུལ་མཁན་དེ་ནམ་མཁའ་ལ་འགྲོ་བ་དང༌། རྫུ་འཕྲུལ་སྣ་ཚོགས་བྱེད་པ་བཞིན་དུ་སྔགས་པ་དེ་ཡང་རིག་འཛིན་ལ་སོགས་པར་གྲུབ་ནས་ནམ་མཁའ་ལ་འགྲོ་བ་དང༌། སྔགས་ཀྱི་མཐུས་རྣམ་པ་སྣ་ཚོགས་པའི་སྤྲུལ་པ་ལ་སོགས་པ་སྟོན་པར་བྱེད་དོ་ཞེས་པའོ། །གང་ན་ལུས་དང་ངག་མེད་པར་དྲི་ཟའི་གྲོང་ཁྱེར་བཞིན་དུ་དེ་བཞིན་མི་སྣང་བར་འགྱུར་ཞེས་བྱ། དེའི་གནས་ནི་དེ་ཡིན་ནོ་ཞེས་པ་ནི་རིག་འཛིན་ལ་སོགས་པ་གྲུབ་ནས་མི་སྣང་བར་འགྱུར་བའི་དཔེ་དྲི་ཟའི་གྲོང་ཁྱེར་ལས་བླངས་ཏེ་བཤད་པ་སྟེ། ཇི་ལྟར་དྲི་ཟའི་གྲོང་ཁྱེར་ལུས་ལ་སོགས་པ་དངོས་སུ་མི་སྣང་ཞིང༌། བར་སྣང་ལ་གནས་པར་བྱེད་པ་དེ་བཞིན་དུ་སྔགས་པ་དེ་ཡང་གྲུབ་ནས་ལུས་ཀྱང་མི་སྣང་ལ་ཚིག་ཏུ་བརྗོད་པ་ཡང་མི་ཐོས་པར་ནམ་མཁའ་ལ་མི་སྣང་བར་གྱུར་ཅིང་བར་སྣང་ལ་གནས་པར་བྱེད་པའོ་ཞེས་བཤད་དོ། །ཇི་ལྟར་ཉལ་བའི་རྨི་ལམ་ན་
སུམ་ཅུ་རྩ་གསུམ་གནས་སུ་ཕྱིན་ཏེ། དེའི་ལུས་དང་བྲལ་བ་ཡང་མེད། དེ་ལ་ནི་དེར་ཕྱིན་པ་ཡང་མེད། དེ་བཞིན་སྦྱོར་བ་གཉིས་ཀྱིས་ཀྱང་སྔགས་པ་སྔགས་ཀྱི་རྒྱུད་ནས། ལུས་ནི་འཇའ་ཟུག་པ་དང་འདྲ། །ལས་དང་བསོད་ནམས་ལས་རྙེད་པ། །ཞེས་པ་ནི་སྔགས་པ་དེ་རིག་འཛིན་ལ་སོགས་པ་གྲུབ་ནས་ལུས་འདི་ཡང་མི་འདོར་བར་ནམ་མཁའ་ལ་སོགས་པ་ལ་འགྲོ་བའི་དཔེ་རྨི་ལམ་ལས་བླངས་ཏེ་བཤད་པ་སྟེ། ཇི་ལྟར་སྐྱེས་བུ་ཉལ་བའི་རྨི་ལམ་ན། སུམ་ཅུ་རྩ་གསུམ་ལ་སོགས་པའི་གནས་མཐོང་བར་འགྱུར་བ་དེ་བཞིན་དུ་སྔགས་པ་དེ་ཡང་སྦྱོར་བའི་དབང་གིས་ལུས་འདི་ཉིད་མ་བོར་བར་ནམ་མཁའ་ལ་སོགས་པར་འགྲོ་བ་ཡང་རང་གིས་མཐོང་ངོ༌། །གཟུགས་རྣམ་པ་སྣ་ཚོགས་ཀྱང་སྟོན་ནུས་པར་འགྱུར་ཞེས་པའོ། །ལུས་ནི་འཇའ་ཟུག་པ་དང་འདྲ། །ཞེས་པ་ནི་གཟུགས་སྣ་ཚོགས་སྟོན་པའོ། །སྔགས་ནི་ཡིད་བཞིན་ནོར་བུ་འདྲ། །ལུས་དང་ངག་དང་ཡིད་ལས་བྱུང༌། །དེ་ལས་དོན་དུ་བརྩམས་པ་ནི། །མ་བརྟགས་བཞིན་དུ་གྲུབ་པ་ཡིན། །ཞེས་པ་ནི་སྔགས་ཀྱི་གྲུབ་པ་ཡིད་བཞིན་ནོར་བུ་ལས་དཔེ་བླངས་ཏེ་བཤད་པ་སྟེ། ཇི་ལྟར་ཡིད་བཞིན་ནོར་བུ་གང་བསམས་པའི་དོན་རྣམས་མ་བརྟགས་པར་དགོས་པ་ལྷུན་གྱིས་གྲུབ་པ་ཉིད་དུ་འབྱོར་པར་འགྱུར་བ་དེ་བཞིན་དུ་སྔགས་འགྲུབ་པའི་འབྲས་བུ་ཡང་གང་འདོད་པ་རྣམས་བརྟག་མི་དགོས་པར་ལྷུན་གྱིས་གྲུབ་པ་ཉིད་དུ་འབྱོར་པར་འགྱུར་ཞེས་པའོ། །ཇི་ལྟར་ནམ་མཁའ་ཕྱོགས་རྣམས་ལ་འདུས་བྱས་སྤྱོད་ཡུལ་ཐམས་ཅད་ཀྱིས་མི་གོས་པ་དེ་བཞིན་སྔགས་པ་ཡང་རྟོག་པའི་སྤྱོད་ཡུལ་ཀུན་གྱིས་སོ། །གྲུབ་པ་ཐོབ་པ་དེ་ཡང་གཟའ་དང་སྐར་མ་དང་ལྟས་ངན་ལ་སོགས་པས་མི་ཚུགས་པར་བཤད་པ་སྟེ། ཇི་ལྟར་ནམ་མཁའ་འདུས་བྱས་ལ་སོགས་པའི་དྲི་མས་མི་གོས་པ་བཞིན་དུ་གྲུབ་པའི་སྔགས་དེ་ཡང་གཟའ་དང་སྐར་མ་ལ་སོགས་པ་བཟང་ངན་གྱི་ལས་སུ་མི་རྟོག་སྟེ། དེ་དག་གིས་ལྟས་ངན་པ་ལ་སོགས་པས་ཀྱང་མི་ཚུགས་ཞེས་པའོ། །འདི་དག་ཐམས་ཅད་འདུ་ཤེས་ཙམ། །དེ་ལྟར་རྣམ་པར་སྒོམ་པར་བྱེད། །སྔགས་པ་དེ་ལྟར་བསྒོམས་ན་ནི། །སངས་རྒྱས་ལྷན་ཅིག་བརྗོད་འགྱུར་རོ། །ཞེས་པ་ནི་སྔགས་གྲུབ་པ་ཐོབ་ནས་སངས་རྒྱས་དང་ལྷན་ཅིག་ཏུ་འགྲོགས་པ་ཐོབ་པར་བཤད་པ་སྟེ། དེ་དག་ཐམས་ཅད་འདུ་ཤེས་ཙམ། །ཞེས་པ་ནི་
འདུས་བྱས་ལ་སོགས་པའི་ཆོས་འདི་དག་ཐམས་ཅད་དངོས་སུ་ཡོད་པ་མ་ཡིན་གྱི། འདུ་ཤེས་ཙམ་དུ་བྱང་ཆུབ་ཀྱི་སེམས་སྒོམ་པའི་ཚེ་བསྒོམ་པས་ཀུན་དུ་སངས་རྒྱས་པ་དང་ལྷན་ཅིག་ཏུ་འགྲོགས་ཤིང༌། དེ་ལ་ཆོས་ཉན་པ་ལ་སོགས་པས་དགའ་བར་འགྱུར་ཞེས་པའོ། །སྦྱིན་སྲེག་གཉིས་སུ་གསུངས་པ་ནི། །སངས་རྒྱས་རྐང་གཉིས་གཙོ་བོ་སྟེ། །ཕྱི་རོལ་གྱི་དང་ནང་གི་སྟེ། །དེ་ཡང་ཚིམ་བྱེད་བཅས་པའོ། །ཞེས་པ་ནི་སྦྱིན་སྲེག་གི་ལས་མེ་རྣམས་སུ་ཞེས་སྔར་དྲིས་པ་ལ་རྣམ་པ་གཉིས་ནི་སྔར་བཤད་ཟིན་ཏོ། །འདིར་ནི་སྦྱིན་སྲེག་རྣམ་པ་གཉིས་བཤད་པའི་ཕྱིའི་མེ་དང་ནང་གི་མེ་རྣམ་པ་གཉིས་བཤད་དེ། དེ་ཡང་མཉེས་པར་བྱ་བ་དང་བཅས་པར་བྱ་བ་དང་ཞེས་གསུངས་པའོ། །དེ་ལ་ནང་གི་སེམས་ཀྱིས་མཉེས་པར་བྱ་བ་ནི། རང་གི་ས་བོན་ལས་སླར་ལྷའི་གཟུགས་སུ་བསྒྱུར་བར་སྔར་བཤད་དོ། །ཕྱི་རོལ་གྱིས་མཉེས་པར་བྱ་བའི་བསྲེག་པའི་རྫས་གཉིས་ཀྱིས་མཉེས་བར་བྱའོ། །ལྷ་རྣམས་ཀྱི་སོ་སོའི་ཞེས་པ་ནས། ཡང་དག་སངས་རྒྱས་རྫོགས་པར་གསུངས། །ཞེས་པའི་བར་དུ་ལྷ་རྣམས་ཀྱི་རང་བཞིན་དང་གྲུབ་པའི་ཚད་རྣམས་བཤད་པ་སྟེ། ལྷ་རྣམས་ཀྱི། སོ་སོའི་ངོ་བོ་ཉིད་ཀྱང་ཤེས་ནས་སུ། །ཞེས་པ་ནི་ལྷ་རྣམས་ཀྱི་རང་བཞིན་ཤེས་བར་བྱས་ནས་དེ་དག་གི་གྲུབ་པའི་འབྲས་བུ་ཡང་ཤེས་པར་འགྱུར་ཞེས་པ་སྟེ། དེ་ལ་འཇིག་རྟེན་ལས་འདས་པའི་ལྷ་རྣམས་ཀྱི་རང་བཞིན་ནི་སྔར་བཤད་ཟིན་ཏོ། །འདིར་ནི་འཇིག་རྟེན་གྱི་ལྷ་རྣམས་ཀྱི་རང་བཞིན་བཤད་ནས། དེའི་རང་བཞིན་ནི་མཐུ་ལས་འབྲས་བུའི་ཚད་ཤེས་པ་སྟེ། དེ་བས་ན་གསུངས་པ། འཇིག་རྟེན་གྱི་སྔགས་ཀྱི་ཚད་ནི་ཀུན་དུ་གསུངས་པ་ཡང་ཞེས་པ་ལ་སོགས་པ་སྟེ། དབང་པོ་ལ་སོགས་པའི་ལྷ་མཐུ་ཆེན་པོ་དེ་དག་གིས་སྨྲས་པའི་སྔགས་དང་ཕྱག་རྒྱ་རྣམས་ནི་འབྲས་བུ་འཕྲལ་དུ་སྟེར་བ་སྟེ། དེ་དག་གི་ཚད་དུ་གསུངས་པ་སྟེ། ཚད་ཅེས་པ་ནི་དེ་དག་གི་མཐུ་ལ་བྱའོ། །དེ་རྣམས་ལ་རྟག་པ་མེད་དེ། སྐྱེ་ཞིང་འཇིག་པའི་ཆོས་ཅན་ནོ། །ཞེས་པ་ནི་དེ་དག་གི་ཁྱད་པར་གསུངས་པ་སྟེ། འཇིག་རྟེན་པའི་ལྷ་རྣམས་འབྲས་བུ་ཚེ་འདི་ལ་འཕྲལ་དུ་སྟེར་མོད་ཀྱི། དེ་རྣམས་སྐྱེ་ཞིང་འཇིག་པའི་ཆོས་ཅན་པས་མི་རྟག་པའོ། །འཇིག་རྟེན་ལས་འདས་པའི་སྔགས་རྣམས་ནི་ཞེས་པ་ནས། བྱེ་བྲག་ཀུན་ཀྱང་བཤད་པ་ཡིན་
ཞེས་པའི་བར་འཇིག་རྟེན་ལས་འདས་པའི་སྔགས་བྱང་ཆུབ་སེམས་དཔའ་དང་ཉན་ཐོས་དང༌། རང་སངས་རྒྱས་ལ་སོགས་པས་གསུངས་པའི་སྔགས་རྣམས་ཐོག་མའི་བྱེད་པ་མེད་ཅིང་ལས་དང་ཚེ་དང་འཆད་པ་སྟེ། འདོད་ཆགས་ཞེ་སྡང་དང་གཏི་མུག་གི་ཉེས་པ་གསུམ་དང་བྲལ་བས་སྐྱེ་ཞིང་འཇིག་པ་ལ་སོགས་པ་མེད་པས་སྔར་ཚད་རྣམས་བཤད་ཟིན་ཏོ་ཞེས་པའོ། །དུས་གསུམ་ལས་ནི་ཤིན་ཏུ་འདས། །རྐྱེན་ལས་སྐྱེས་པར་བྱུང་བ་སྟེ། །འབྲས་བུ་མཐོང་དང་མི་མཐོང་ལ། །ངག་ཡིད་གསུམ་ལས་བྱུང་བའོ། །ཞེས་པ་ནི་དེ་ལྟ་བས་ན་འཇིག་རྟེན་ལས་འདས་པའི་སྔགས་རྣམས་འཇིག་རྟེན་པ་ལྟར་མཐོང་བའི་ཆོས་འབའ་ཞིག་ལ། འབྲས་བུ་འཕྲལ་དུ་སྟེར་བ་འབའ་ཞིག་མ་ཡིན་གྱི་མཐོང་བའི་ཆོས་དང་མི་མཐོང་བ་གཉིས་ཀ་ལ་འབྲས་བུ་སྟེར་ཞེས་པ་སྟེ། མཐོང་བའི་ལྷ་དང་མི་ལ་སོགས་པ་འགྲུབ་པའོ། །མི་མཐོང་བ་ནི་མྱ་ངན་ལས་འདས་པའོ། །འབྲས་བུའི་ཚད་ནི་བསྐལ་པ་གཅིག་འཇིག་རྟེན་གྱི་ཞེས་གསུངས་པ་ནི། འཇིག་རྟེན་པའི་ལྷ་རྣམས་ཀྱི་གྲུབ་པའི་འབྲས་བུ་ཇི་སྲིད་ཐུབ་པ་གསུངས་པ་སྟེ། འཇིག་རྟེན་གྱི་འབྲས་བུ་ནི་བསྐལ་པ་གཅིག་གི་བར་དུ་ཐུབ་ཅེས་པའོ། །བསྐལ་པ་གཅིག་ལས་སྔགས་འབྲས་བུ། །ཡང་དག་སངས་རྒྱས་རྫོགས་བས་གསུངས། །ཞེས་པ་ནི་འཇིག་རྟེན་ལས་འདས་པའི་སྔགས་རྣམས་ཀྱི་འབྲས་བུ་བསྐལ་པ་ལས་འདས་པར་ཐུབ་ཅེས་པའོ། །ཏིང་འཛིན་རྒྱལ་བའི་སྲས་རྣམས་དང༌། །དྲང་སྲོང་ཆེན་པོ་སངས་རྒྱས་ཀྱི། །མཚན་དང་བྲལ་ཏེ་དག་པ་ཡིན། །འཇིག་རྟེན་མཚན་མར་བཅས་ཞེས་པ་ནི་སྔགས་པ་རྣམས་ཀྱི་ཏིང་ངེ་འཛིན་བཤད་པ་སྟེ། དེ་ལ་སྤྱིར་ཏིང་ངེ་འཛིན་ལ་ཡང་རྣམ་པ་གཉིས་ཏེ། དོན་དམ་པ་དང་ཀུན་རྫོབ་ཀྱིའོ། །དེ་ལ་དོན་དམ་པ་ནི་ཡི་གེ་ཨ་ལ་སོགས་པ་འབྲུ་རེའི་སྒོ་ནས་བསྟན་པའོ། །ཀུན་རྫོབ་ཀྱི་ནི་སྔགས་ཀྱི་ཕྲེང་བའི་ཚིག་ལས་སྟོབས་དང་མི་འཇིགས་པ་ལ་སོགས་པའི་ཡོན་ཏན་རྣམས་ཏེ། དེ་དག་གི་ཚིག་ཏུ་གྱུར་པའི་ཏིང་ངེ་འཛིན་གྱི་ཡི་གེ་རྣམས་ནི་སྔར་བཤད་ཟིན་ཏོ། །འདིར་ནི་ཏིང་ངེ་འཛིན་གྱི་དོན་རྣམས་བཤད་པ་སྟེ། རྒྱལ་བའི་སྲས་རྣམས་ཞེས་པ་ནི་བྱང་ཆུབ་སེམས་དཔའ་ལ་སོགས་པའོ། །དྲང་སྲོང་ཆེན་པོ་སངས་རྒྱས་ཀྱི། །ཞེས་པ་ནི་ལུས་དང་ངག་དང་ཡིད་
གསུམ་ཐུབ་པའི་མཚན་ཉིད་དྲང་སྲོང་སྟེ་མི་གནས་པའི་མྱ་ངན་ལས་འདས་པ་ཀུན་དུ་སངས་རྒྱས་པ་ལ་སོགས་པ་ལ་བྱ་སྟེ། དེ་དག་གི་ཏིང་ངེ་འཛིན་གྱི་དོན་ཆོས་ཐམས་ཅད་ཐོག་མ་ནས་མ་སྐྱེས་པ་རྣམ་པར་མི་རྟོག་པའི་མཚན་ཉིད་པས་མཚན་མ་དང་བྲལ་བ་སྟེ་དགའ་བའོ། །འཇིག་རྟེན་གྱི་མཚན་མར་བཅས་པ་ཞེས་པ་ནི་ནམ་བྱང་ཆུབ་སེམས་དཔའི་ཏིང་ངེ་འཛིན་ལས་བཞེངས་པ་ནི། སངས་རྒྱས་ཀྱི་རྣམ་པར་བརྒྱན་པ་ལ་སོགས་པ་ཇི་བཞིན་པ་དང་བཅས་པའི་སྤྱོད་པ་དང་འཇུག་པ་དང་སངས་རྒྱས་དང་མངོན་པར་བྱང་ཆུབ་ནས་སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་ཟད་པའི་འཁོར་ལོ་ལ་སོགས་པ་འབྱུང་བ་ཡང་སྦྱིན་པ་དང་བཅས་པའི་སྤྱོད་པ་སྟེ། དེ་དག་ལ་ཡང་འཇིག་རྟེན་གྱི་མཚན་མ་དང་བཅས་ཞེས་པའོ། །གཉིས་སུ་ན་མུ་སྟེགས་འཇིག་རྟེན་པའི་ལྷ་རྣམས་ཀྱི་ཏིང་ངེ་འཛིན་དངོས་པོ་ཡོད་པར་བལྟ་བས་ན་མཚན་མ་དང་བཅས་ཞེས་བྱའོ། །རྣམ་པར་སྨིན་པའང་རྣམ་སྨིན་འདིར། །ལས་ཀྱི་འབྲས་བུ་རྙེད་འགྱུར་བ། །ནམ་ཞིག་གྲུབ་པ་རྙེད་ན་ནི། །དེ་ལ་ལས་ཀྱང་ལྡོག་པར་ཤེས། །ཞེས་པ་ནི་སྔོན་གྱི་ལས་ཀྱི་རྣམ་པར་སྨིན་པ་ལྷའི་རྣམ་པར་སྨིན་པའི་གཟུགས་ཕུང་པོ་ལྔ་འདི་ལས་ལས་ཀྱི་འབྲས་བུ་སྨིན་པར་གྱུར་པ་སྟེ་ནམ་བདག་གིས་ཏིང་ངེ་འཛིན་ལ་སོགས་པའི་གྲུབ་པ་ཐོབ་ན། དེ་ན་ལས་ཀྱི་རྣམ་པར་སྨིན་པ་དེ་གྲུབ་པ་དེས་ཟིལ་གྱིས་ནོན་ནས་འབྲས་བུ་མི་སྨིན་པར་དེ་ལྡོག་པར་འགྱུར་རོ་ཞེས་པའོ། །སེམས་ནི་ངོ་བོ་ཉིད་མེད་པས། །འབྲས་བུ་རྒྱུ་ཡང་རྣམ་སྤངས་ལ། །ལས་དང་ཚེ་ལས་རྣམ་གྲོལ་བ། །ནམ་མཁའ་འདྲ་བར་སྐྱེ་བར་འགྱུར། །ཞེས་པ་ནི་གྲུབ་པའི་མཐའ་སངས་རྒྱས་སུ་འགྱུར་བ་བསྟན་པ་སྟེ། སྒྲུབ་པོས་བྱང་ཆུབ་ཀྱི་སེམས་དག་པར་བསྒོམས་པས་སེམས་ཀྱི་རང་བཞིན་མེད་པར་ཆུད་དེ། །ཆོས་ཀྱི་རྒྱུ་དང་འབྲས་བུ་དམིགས་སུ་མེད་པས་ལས་ཀྱི་རྒྱུ་ཚེ་ནི་འབྲས་བུ་སྟེ། ལས་དང་ཚེ་ལས་ཀྱང་རྣམ་པར་གྲལ་བར་གྱུར་ཏེ། དེ་ལྟར་ལས་དང་ཚེ་རྣམ་པར་གྲོལ་ན་ནམ་མཁའ་འདྲ་བར་གཟུང་བ་དང་འཛིན་པ་སྤངས་པ་དག་པའི་མཚན་ཉིད་དུ་འགྱུར་ཞེས་པའོ། །དེ་ལྟར་གསང་བའི་བདག་པོ་ཞེས་པ་ནས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྲངས་མེད་པར་འབྱུང་བ་དེ་བྲི་བའི་ཚུལ་
ཉོན་ཅིག་ཅེས་པའི་བར་དུ་གསང་བའི་དཀྱིལ་འཁོར་རང་བཞིན་དང་ཡོན་ཏན་སྨོས་ནས་ཉོན་ཅིག་ཅེས་པ་སྟེ། དེ་ལ་ཕྱག་རྒྱའི་གཟུགས་སུ་དགོད་པའི་ལེའུ་ཞེས་པ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་ལུང་བསྟན་པ་དང༌། ཚིག་གིས་གཟུགས་སུ་བཀོད་ཀྱི་འདིར་ནི་སེམས་རང་བཞིན་དངོས་སུ་གཞུག་ཏུ་མི་རུང་བའི་ཕྱག་རྒྱའི་གཟུགས་སུ་བཀོད་པ་སྟེ། དེ་ནི་ལེའུ་ཕྱག་རྒྱའི་གཟུགས་སུ་བཀོད་པའི་དཀྱིལ་འཁོར་ལ་བྱའོ། །ལྷ་རྣམས་གནས་སུ་བྱིན་གྱིས་རློབ་པ་ཞེས་པ་ནི་དཀྱིལ་འཁོར་དེར་ཕྱག་རྒྱའི་གཟུགས་སུ་ལྷ་རྣམས་དགོད་པར་བྱིན་གྱིས་རློབ་པར་འགྱུར་རོ་ཞེས་པའོ། །ཏིང་ངེ་འཛིན་གྱི་རྒྱུད་ལྔ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་ལྔ་པོ་དེ་དག་ཉིད་ཡེ་ཤེས་ཀྱི་བྱེ་བྲག་ལས་བྱིན་གྱིས་བརླབས་ཏེ། དཀྱིལ་འཁོར་དེ་ལྔ་ལས་ཡེ་ཤེས་ཀྱི་ཏིང་ངེ་འཛིན་གྱི་ཁྱད་པར་ལ་ཆུད་པར་འགྱུར་བའོ་ཞེས་པའོ། །སྔོན་གྱི་སངས་རྒྱས་རྣམས་ཀྱིས་མངོན་པར་སངས་རྒྱས་པ་ཞེས་པ་ནི་སངས་རྒྱས་ཐམས་ཅད་བྱ་བ་གཅིག་ཏུ་བསྟན་པ་སྟེ། སྔོན་གྱི་སངས་རྒྱས་ཀྱིས་ཀྱང་མཁྱེན་ནས་བཤད་ཀྱིས་དེ་ཉོན་ཅིག་ཅེས་པ་དང་སྦྱར་རོ། །ཆོས་ཀྱི་དབྱིངས་ནམ་མཁའི་སྤྱོད་ཡུལ་ཞེས་པ་ནས་ཕན་པ་དང་བདེ་བའི་ཕྱིར་ཞེས་པའི་བར་དུ་དཀྱིལ་འཁོར་དེ་བཤད་པ་ཡང་ཕྱག་ན་རྡོ་རྗེས་མི་མཁྱེན་པའི་ཕྱིར་བཤད་པ་ནི་མ་ཡིན་གྱི། མོས་པ་སྤྱོད་པའི་ས་ལ་གནས་པ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་པ་དང་བདེ་བའི་ཕྱིར་བཤད་དོ་ཞེས་པ་སྟེ། ཆོས་ཀྱི་དབྱིངས་ནམ་མཁའི་སྤྱོད་ཡུལ་ཞེས་པ་ནི། མོས་པ་སྤྱོད་པའི་ས་ལ་གནས་པ་སྟེ། དེ་རྣམས་ཀྱི་ཤེས་རབ་ཀྱི་ཡོན་ཏན་བཤད་པ་སྟེ། དེ་དག་གི་ཤེས་རབ་ཀྱི་དབྱིངས་ནམ་མཁའ་དང་འདྲ་བ་ལ་དམིགས་པའི་སྤྱོད་ཡུལ་དུ་གྱུར་ཞེས་པའོ། །དེ་དག་ཆོས་ཀྱི་དབྱིངས་ནམ་མཁའ་དང་འདྲ་བའི་སྤྱོད་ཡུལ་དུ་གྱུར་ན་སྔགས་ཀྱི་ཚུལ་བཤད་ཅི་དགོས་ཤེ་ན། དེ་དག་དེ་ལྟར་སྟོང་པ་ཉིད་ཀྱི་སྤྱོད་ཡུལ་དུ་གྱུར་ཀྱང་ཐབས་ཀྱིས་སེམས་ཅན་སྒྲོལ་བར་བྱེད་དོ། །དེ་བས་ན་གསུངས་པ། སེམས་ཅན་གྱི་ཁམས་མ་ལུས་པ་བསྒྲལ་བར་ཡིད་མཆེས་པ་ཞེས་པ་སྟེ། དེ་ལྟར་ཐབས་དང་ཤེས་རབ་ཏུ་འབྲེལ་པའི་སྔགས་ཀྱི་སྒོར་བྱང་ཆུབ་
སེམས་དཔའི་སྤྱད་པ་སྤྱོད་པ་རྣམས་ལ་ཕན་པ་དང་བདེ་བའི་ཕྱིར་དཀྱིལ་འཁོར་དེ་ཉོན་ཅིག་ཅེས་པའོ། །དེ་ལ་དོན་གྱི་ཕྱིར་ཞེས་པ་ནི་བྱང་ཆུབ་སེམས་དཔའ་རྣམས་ཀྱི་དོན་མྱ་ངན་ལས་འདས་པའམ་མ་ལུས་པའི་བདེ་བའི་ཕྱིར་རོ། །ཕན་པའི་ཕྱིར་ཞེས་པ་ནི་ཚེ་འདི་དང་ཕྱི་མ་གཉིས་ལ་ཕན་པའི་ཕྱིར་རོ། །བདེ་བའི་ཕྱིར་ཞེས་པ་ནི། ཚེ་འདི་ལ་བདེ་བའི་ཕྱིར་རོ་ཞེས་པའོ། །གསང་བའི་བདག་པོ་ཐོག་མར་ཡང་དག་པར་ཀུན་དུ་སངས་རྒྱས་པའི་དཀྱིལ་འཁོར་བྲི་བའི་ཞེས་པ་ནི་དཀྱིལ་འཁོར་སྔ་མ་དག་དང་འདྲ་བ་སྟེ། དང་པོ་སྙིང་པོའི་དཀྱིལ་འཁོར་དུ་བཅོམ་ལྡན་འདས་རྣམ་པར་སྣང་མཛད་བྲི་བའི་ཞེས་པ་སྟེ་བྲི་ཚུལ་ཉོན་ཅིག་ཅེས་པའོ། །འོག་ནས་འབྱུང་བ་དང་སྦྱར་རོ། །གསང་བའི་ཡང་གསང་བ་ཞེས་པ་ནི། གསང་བ་ནི་སེམས་ཅན་གྱི་རང་བཞིན་ཕྲ་ཞིང་དམིགས་སུ་མེད་པས་ན་གསང་བའོ། །དེའི་ཡང་གསང་བ་ནི་དམ་ཚིག་མེད་པའི་སེམས་ཅན་རྣམས་ལ་མི་བསྟན་པའི་ཕྱིར་རོ། །སྙིང་རྗེ་ཆེན་པོའི་སྙིང་པོ་འབྱུང་བ་ཞེས་པ་ནི་སྔ་མ་བཞིན་ནོ། །གང་ལས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྲངས་མེད་པ་འབྱུང་བ་ཞེས་པ་ནི་འཇིག་རྟེན་གྱི་དཀྱིལ་འཁོར་ནི་གཟུགས་བརྙན་གྱི་དཀྱིལ་འཁོར་ཚོན་གྱིས་བྲི་བ་རྣམས་སོ། །འཇིག་རྟེན་ལས་འདས་པ་ནི་རང་བཞིན་གྱི་དཀྱིལ་འཁོར་ཏེ་གཟུགས་བརྙན་གྱི་དཀྱིལ་འཁོར་རྣམས་ཀྱང་འདི་ལས་འཕྲོ་བ་དང༌། རང་བཞིན་གྱི་དཀྱིལ་འཁོར་ཀྱང་འདི་མཐོང་བ་ལས་ཤེས་པར་གྱུར་པས་ན། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་འབྱུང་བ་ཞེས་བྱའོ། །ཡང་ན་འཇིག་རྟེན་གྱི་ལྷ་རྣམས་ཀྱི་དཀྱིལ་འཁོར་དང༌། འཇིག་རྟེན་ལས་འདས་པའི་ལྷ་རྣམས་ཀྱི་དཀྱིལ་འཁོར་གྲངས་མེད་པ་རྣམས་ཀྱང་འདི་ལས་འབྱུང་བ་ཞེས་པ་སྟེ་དེ་བྲི་བའི་ཚུལ་ཉོན་ཅིག་ཅེས་པའོ། །ཀུན་དུ་གྲུ་བཞི་ལྷམ་པར་ཏེ། །ཞེས་པ་ནས། བྲི་བ་ཡང་ནི་དཔའ་བོས་སོ། །ཞེས་པའི་བར་དུ་བཅོམ་ལྡན་འདས་རྣམ་པར་སྣང་མཛད་བཞུགས་པའི་སྙིང་པོའི་དཀྱིལ་འཁོར་བྲི་བ་སྟེ། དཀྱིལ་འཁོར་གྱིས་བཅད་པ་དང་སྣམ་བུའི་རིམ་པ་དང་ཚོན་དགྱེ་བ་ལ་སོགས་པའི་ཆོ་ག་རྣམས་ཀྱི་དཀྱིལ་འཁོར་གོང་མ་རྣམས་སུ་ཇི་སྐད་གསུངས་པ་བཞིན་ནོ། །
ཀུན་དུ་གྲུ་བཞི་ལྷམ་པ་ཞེས་པ་ནི་ཚད་མེད་པ་བཞི་དང་ལྡན་པར་སྟོན་པའོ། །སྒོ་གཅིག་ཅེས་པ་ནི་སྒོ་མང་པོ་ནས་ཆོས་ཀྱི་དབྱིངས་ཀྱི་སྒོ་གཅིག་ཏུ་འདུ་བར་བསྟན་པའོ། །སྟེགས་བུར་བཅས་པ་ཞེས་པ་ནི་མཐའ་ཚོན་གྱིས་བྲི་བའི་དབུས་ཚོན་སེར་པོས་བཀང་སྟེ། བཅོམ་ལྡན་འདས་བཞུགས་པའི་གཞིར་བཅས་ཞེས་པའོ། །རྡོ་རྗེའི་མཚན་མས་བཏབ་པ་ཞེས་པ་ནི་དེའི་ནང་དུ་ནུབ་ཕྱོགས་ཀྱི་ལོགས་སུ་རྡོ་རྗེ་རྩེ་ལྔ་པ་གཅིག་པའོ། །དབུས་སུ་རྡོ་རྗེ་རྩེ་བརྒྱ་པ། །ཞེས་པ་ནི་རྒྱུའི་ཚེ་རྣམ་པར་གྲོལ་བའི་གཟུངས་ཞེས་བརྒྱ་པ་དང་བཅས་པ་བསྟན་པ་སྟེ། རྣམ་པར་གྲོལ་བའི་སྒོར་ཡེ་ཤེས་བརྒྱར་ཡང་ཡི་གེ་འཁོར་ལོ་བསྐོར་བའི་ལེའུ་ལས་ཡི་གེ་ཨས་མགོ་བཙུགས་ན། ཀའི་རིས་ནས་ཡ་དང་ར་དང་བ་དང་ལ་ཡན་ཆད་ཀྱི་བར་དུ་ཡི་གེ་ཉི་ཤུ་རྩ་བཞི་སྨོས་པ་དང༌། དང་པོ་ཨ་དང་ཉི་ཤུ་ལྔ་སྟེ། དེ་ལྟར་ཨ་དང་བཅས་པ་དེ་ཡང་ཉི་ཤུ་ལྔ། ཨ་དང་བཅས་པ་ཉི་ཤུ་ལྔ། ཨ་དང་བཅས་པ་ཉི་ཤུ་ལྔ་སྟེ། དེ་ལྟར་རྣམ་པར་ཐར་པའི་སྒོ་བརྒྱ་ལས་ཡེ་ཤེས་བརྒྱར་སྦྱར་བའི་རང་བཞིན་རྡོ་རྗེ་རྩེ་བརྒྱ་པ་དེའི་དབུས་སུ་བྲིའོ་ཞེས་པའོ། །ཤ་དང་ཥ་ཊ་ར་ས་དང༌། ཧ་རྣམས་ནི་ཆ་གཉིས་པའི་ནང་དུ་འདུས་པར་ཤེས་པའོ། །དེའི་སྟེང་དུ་པདྨོ་བྲི་བར་བྱ་བ་ནི་ས་བོན་དང་བཅས་པ་རྒྱས་པར་ཏེ་ཞེས་པ་ནི་རྡོ་རྗེ་དེའི་སྟེང་དུ་པདྨོ་འདབ་མ་བཞི་པ་རང་གི་ས་བོན་དང་བཅས་པ་བྲི་བའོ། །དེ་སྟེང་དུ་ཡང་པདྨོ་ཆེན། །ཕྱག་རྒྱ་ཀླད་ཀྱི་འཁོར་གྱིས་བརྒྱན། །འདབ་མ་བརྒྱད་ཀྱང་རྫོགས་པར་ཏེ། །གེ་སར་བཅས་པ་ཤིན་ཏུ་བཟང༌། །ཞེས་པ་ནི་པདྨོའི་སྟེང་དུ་ཡང་པདྨོ་ཆེན་པོ་འདབ་མ་བརྒྱད་པ་བྲིས་པ་སྟེ། ཕྱག་རྒྱ་ཀླད་ཀོར་གྱིས་བརྒྱན་ཞེས་པ་ནི་ཀླད་ཀོར་ནི་སྟོང་པ་ཉིད་དུ་སྟོན་པའི་ཚིག་ཡིན་པས་ཡན་ལག་བཅུ་གཉིས་ཀྱི་རིག་པའི་རྒྱལ་པོ་ལ་བྱ་སྟེ། ཡན་ལག་བཅུ་གཉིས་ཚིག་བྲི་བར། །ཞེས་པ་དང་སྦྱར་རོ། །ཕྱག་རྒྱ་ནི་གསང་བའི་ཕྱག་རྒྱ་བརྒྱད་པ་སྟེ་བརྒྱད་པ་དཀྱིལ་འཁོར་གྱི་ཞེས་པ་དང་སྦྱར་རོ། །པདྨོ་སྟེང་མཆེ་བ་དང་འདབ་མ་བརྒྱད་ཀྱི་བྱེ་བྲག་ཆེ་བས་དེའི་འོག་མ་དེ་བས་ཆུང་བར་བྱ་བར་མངོན་པ་སྟེ་འདབ་མ་བཞི་པར་ཤེས་པར་བྱའོ། །གཉིས་སུ་ན་རྒྱུའི་ཚེ་པདྨོ་བས་ཆུང་ངུ་ཤེས་པར་བྱའོ། །པདྨོ་ཆེན་པོ་འདབ་མ་བརྒྱད་པ་ནི་
ཡེ་ཤེས་བརྒྱད་ཀྱི་རང་བཞིན་དུ་སྔར་བཤད་པ་བཞིན་ནོ། །ཡན་ལག་བཅུ་གཉིས་ཚིག་བྲི་བ། །འདབ་མ་ཀུན་ལ་རྒྱས་པར་ཏེ། །ཞེས་པ་ནི་ཡན་ལག་བཅུ་གཉིས་པའི་རིག་པའི་རྒྱལ་མོའི་སྙིང་པོ་དང་ཉེ་བའི་སྙིང་པོར་བཅས་པའི་ཡི་གེ་ཟུང་བརྒྱད་པ་རྣམས་འདབ་མ་བརྒྱད་ལ་བྲ་བར་བྱའོ། །དེ་ཡི་དབུས་སུ་མགོན་པོ་བཞུགས། །ཀུན་དུ་སངས་རྒྱས་རྐང་གཉིས་གཙོ། །བརྒྱད་པ་དཀྱིལ་འཁོར་བརྒྱད་འཁོར་གྱིས། །ཀུན་དུ་ཡང་ནི་བསྐོར་བཞིན་དུ། །ཞེས་པ་ནི་པདྨོའི་དབུས་ཀྱི་སྙིང་པོ་ལ་བཅོམ་ལྡན་འདས་བཞུགས་ཏེ། ཕྱག་རྒྱ་བརྒྱུད་པོ་རྣམས་ཀྱང་བཅོམ་ལྡན་འདས་ཀྱི་ཁོར་ཁོར་ཡུག་ཏུ་རང་གི་དཀྱིལ་འཁོར་དང་ས་བོན་དུ་བཅས་པར་པདྨོའི་སྙིང་པོ་དེ་ཉིད་ལ་བྲི་བར་བྱའོ། །འདི་ནི་མཆོག་ཏུ་ཤེས་པར་བྱ། །སྙིང་རྗེ་འབྱུང་བའི་དཀྱིལ་འཁོར་ཏེ། །ཞེས་པ་ནི་མཆོག་ཅེས་པ་ནི་སྟོན་པའི་མཆོག་གོ །སྙིང་རྗེ་འབྱུང་ཞེས་པ་ནི་སྔ་མ་བཞིན་ནོ། །དེ་ལས་འབྱུང་བར་ཤེས་པར་བྱ། །དཀྱིལ་འཁོར་རྣམས་ནི་གཞུང་བཞིན་དུའོ། །ལས་དང་ལུས་ནི་ཀུན་གྲུབ་པ། །གྲུབ་པ་ཡང་ནི་དཔའ་བོས་སོ། །ཞེས་པ་ནི་ཞི་བ་དང་རྒྱས་པ་ལ་སོགས་པའི་ལས་རྣམས་ཀྱི་དཀྱིལ་འཁོར་གཟུགས་སུ་བྲིའོ། །དཀྱིལ་འཁོར་གྱི་སྔགས་ཀྱི་གཞུང་གཞན་དག་ལས་བཤད་པ་རྣམས་ཀྱང་དཀྱིལ་འཁོར་འདི་ལས་འབྱུང་བར་ཤེས་པར་བྱ་ཞེས་ཏེ་དེ་ནི་དབང་ཆེན་གྱི་དཀྱིལ་འཁོར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་གནས་སུ་ཤེས་པར་བྱའོ། །གསང་བའི་བདག་པོ་གཞན་ཡང་དེ་བཞིན་གཤེགས་པའི་དཀྱིལ་འཁོར་དུ་གྱུར་པ་ནི་ཞེས་པ་ནས། དེ་ནི་ཕྱོགས་བཅུ་ཀུན་དུ་སོང༌། །ཞེས་པའི་བར་དུ་བཅོམ་ལྡན་འདས་ཀྱི་ཤར་ཕྱོགས་སུ་མ་འདས་པའི་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་བྲི་སྟེ། ཟླ་བའི་དཀྱིལ་འཁོར་འདྲ་བ་སྟེ། །ཞེས་པ་ནི་བཅོམ་ལྡན་འདས་ཀྱི་གདན་པདྨོའི་ཁ་དོག་ཟླ་བའི་དཀྱིལ་འཁོར་ལྟར་དཀར་པོ་ཞེས་པའོ། །དབུས་ན་འོད་དཀར་དུང་འདྲ་ཞེས་པ་ནི་ཆུའི་དཀྱིལ་འཁོར་ཁ་དོག་དུང་དང་འདྲ་བར་བྱའོ། །སངས་རྒྱས་ཀུན་གྱི་གྲུ་གསུམ་པོ། །པདྨོ་དཀར་པོའི་སྟེང་ན་གནས། །ཞེས་པ་ནི་ཆུའི་དཀྱིལ་འཁོར་གྱི་སྟེང་ན་
ཕྱག་རྒྱ་གྲུ་གསུམ་པོ་པདྨ་དཀར་པོའི་སྟེང་ན་གནས་པ་བྲི་ཞེས་པའོ། །འཁོར་བཅས་བྱས་པ་རྒྱ་ཆེན་པོ། །ཞེས་པ་ནི་དེར་ཡི་གེ་ཨ་ཀླད་ཀོར་དང་བཅས་པར་བཞག་ཅེས་པའོ། །རྡོ་རྗེའི་རྒྱན་གྱིས་བརྒྱན་པ་སྟེ། །ཞེས་པ་ནི་དེར་རྡོ་རྗེ་རྩེ་ལྔ་པ་བྲི་ཞེས་པའོ། །འོད་ཀྱང་གཉིས་སུ་བྱ་བ་ནི། །ཀུན་དུ་ཐེ་ཚོམ་མེད་བཞིན་དུ། །སྔགས་ཀྱི་མགོན་ལས་བྱུང་བ་ནི། །དེ་ནི་ཕྱོགས་བཅུ་ཀུན་དུ་སོང༌། །ཞེས་པ་ནི་ཕྱག་རྒྱ་གྲུ་གསུམ་པོ་དེ་གྲུ་གཉིས་ནས་འོད་གཉིས་འབྱུང་བར་བྲིས་ཏེ། དེ་ཡང་ཆོས་ཀྱི་སྐུ་ལས་ལོངས་སྤྱོད་དང་སྤྲུལ་པའི་སྐུ་འབྱུང་བར་ཤེས་པར་བྱའོ། །དེ་ནས་གསང་བའི་བདག་པོ་འཇིག་རྟེན་གྱི་དབང་པོའི་དཀྱིལ་འཁོར་ནི་ཞེས་པ་ནས། རིག་པའི་རྒྱལ་པར་བས་པ་རུ། །མཁས་པས་སུ་ནི་བྲི་བར་བྱ། །ཞེས་པའི་བར་དུ་སྤྱན་རས་གཟིགས་ཀྱི་དབང་པོའི་དཀྱིལ་འཁོར་བཤད་པ་སྟེ། ཀུན་དུ་གྲུ་བཞི་ལྷ་མ་པར་ཏེ། །ཞེས་པ་དབང་ཆེན་གྱི་དཀྱིལ་འཁོར་དུ་བྲི་ཞེས་པའོ། །དབུས་སུ་དུང་ནི་གཉག་པར་བྱ། །ཞེས་པ་ནི་དེའི་དབུས་སུ་ཆུའི་དཀྱིལ་འཁོར་བྲི་ཞེས་པའོ། །དེ་སྟེང་པདྨོ་བྲི་བ་ནི། །ས་བོན་དུ་བཅས་རྒྱས་པ་སྟེ། །ཞེས་པ་ནི་ཆུའི་དཀྱིལ་འཁོར་དེའི་སྟེང་དུ་པདྨོ་དཀར་པོ་ས་བོན་ཨ་དང་བཅས་པ་བྲི་ཞེས་པའོ། །དེ་སྟེང་རྡོ་རྗེ་ཆེན་པོ་སྟེ། །ཞེས་པ་ནི་པདྨོའི་སྟེང་དུ་རྡོ་རྗེ་རྩེ་ལྔ་པ་བཞག་ཅེས་པའོ། །རྡོ་རྗེ་ལས་ནི་པདྨོ་རྒྱ་ཆེན་པོ། །ས་བོན་གྱིས་ནི་ཀུན་གདབ་པ། །རང་གི་ས་བོན་གྱིས་ཀྱང་གདབ། །ཅེས་པ་ནི་རྡོ་རྗེ་དེའི་སྟེང་དུ་པདྨོ་ཆེན་པོ་འདབ་མ་བརྒྱད་པ་བྲིས་ཏེ། རང་གི་ས་བོན་དང་བཅས་པ་བྲི་ཞེས་པའོ། །སྐྱོང་བ་དང་ནི་ཁྲོ་གཉེར་དང༌། །ཞེས་པ་ནི་ལེགས་པར་བྱེ་བྲག་ཏུ་ཞེས་པའི་བར་དུ་སྐྱོང་བ་ལ་སོགས་པའི་འཁོར་རྣམས་ཕྱག་རྒྱའི་གཟུགས་སུ་དཀྱིལ་འཁོར་དེར་བྲི་ཞེས་པའོ། །རྟ་མགྲིན་ཅན་གྱི་བྱ་བ་ནི། །ཞེས་པ་ནས། མཁས་པས་སུ་ནི་བྲི་ཞེས་པའོ། །ཞེས་པའི་དཀྱིལ་འཁོར་དེའི་ནུབ་ཕྱོགས་ཀྱི་མཐའ་མར་རྟ་མགྲིན་ཅན་གྱི་དཀྱིལ་འཁོར་གྲུ་གསུམ་པ་བྲིས་ཏེ། དཀྱིལ་འཁོར་འཕྲུལ་གྱི་མཚན་གྱིས་བཏབ། །ཅེས་པ་ནི་གྲུ་གསུམ་པོ་དཀྱིལ་འཁོར་གྱི་མཚན་མ་ཞེས་བྱའོ། །ཉི་མ་ཤར་བ་དང་འདྲ་སྟེ། །ཞེས་པ་ནི་དཀྱིལ་འཁོར་དེའི་ཁ་དོག་
ཉི་མ་དང་འདྲ་ཞེས་པའོ། །རིག་པའི་རྒྱལ་པོ་བཅས་པ་རུ། །མཁས་པས་སུ་ནི་བྲི་བར་བྱ། །ཞེས་པའི་དཀྱིལ་འཁོར་གྲུ་གསུམ་པོ་དེར་རིག་པའི་རྒྱལ་པོ་རྟ་མགྲིན་དང་བཅས་པ་བྲི་ཞེས་པ་སྟེ། དེའི་ཕྱག་རྒྱའི་གཟུགས་སུ་བྲི་བར་ཤེས་པར་བྱའོ། །གསང་བའི་བདག་པོ་གཞན་ཡང་ཁྱོད་ཉིད་ཀྱིས་དཀྱིལ་འཁོར་འདིར་བཤད་དོ་ཞེས་པ་ནས། རྒྱལ་བ་གཙོ་བོ་རྣམས་ཀྱིས་གསུངས་པ་ཞེས་པའི་བར་དུ་ཕྱག་ན་རྡོ་རྗེའི་དཀྱིལ་འཁོར་བཤད་པ་སྟེ། ཕྱག་ན་རྡོ་རྗེ་ནི་བྱ་བ་ནན་ཏན་གྱི་རང་བཞིན་ཏེ། ལས་ཐམས་ཅད་པས་དཀྱིལ་འཁོར་བཞི་པར་ཚད་དང་ལྡན་པར་ཤེས་པར་བྱའོ། །ཀུན་དུ་གྲུ་བཞི་ལྷམ་པར་ཏེ། །རྡོ་རྗེའི་མཚན་གྱིས་ཤིན་ཏུ་བཏབ། །ཀུན་ཀྱང་རབ་ཏུ་སེར་ལ་བཟང༌། །ཞེས་པ་ནི་དབང་ཆེན་གྱི་དཀྱིལ་འཁོར་དང་པོར་བྲིས་ཏེ་སྔ་མ་བཞིན་ནོ། །པདྨའི་དབུས་སུ་རབ་ཏུ་གནས། །དེ་ཡི་དབུས་སུ་ཡང་བྲི་བ། །བུམ་པ་ཟླ་བ་དང་འདྲ་བ། །ཞེས་པ་ནི་དབང་ཆེན་གྱི་དཀྱིལ་འཁོར་གྱི་དབུས་སུ་པདྨོ་བྲིས་ཏེ། པདྨོའི་སྟེང་དུ་ཆུའི་དཀྱིལ་འཁོར་བྲི་བ་སྟེ་བུམ་པ་ནི་ཆུའི་དཀྱིལ་འཁོར་དུ་ཤེས་པར་བྱའོ། །དེ་ནི་མཚན་གྱིས་སུ་ཡང་བཏབ། །འཁོར་གྱིས་ཀྱང་ནི་རྣམ་པར་བརྒྱན། །ཞེས་པ་ནི་དཀྱིལ་འཁོར་དེ་རང་གི་ས་བོན་ཡི་གེ་པ་ཀླད་ཀོར་དང་བཅས་པའི་མཚན་མས་བཏབ་ཅེས་པའོ། །དེ་ཡི་སྟེང་དུ་ཆུ་ཆེན་པོ། །གསལ་བར་དབྱར་གྱི་སྤྲིན་འདྲ་བར། །དཔལ་དང་གཡོ་བ་སྔགས་མཁན་གྱིས། །འཁོར་གྱིས་རྣམ་པར་བརྒྱན་པར་བྱ། །ཞེས་པ་ནི་ཆུའི་དཀྱིལ་འཁོར་དེའི་སྟེང་དུ་རླུང་གི་དཀྱིལ་འཁོར་ཁ་དོག་སྨུག་ནག་དབྱར་གྱི་སྤྲིན་དང་འདྲ་བར་བ་དན་དང་བཅས་པ་གཡོ་བཞིན་དུ་བྲིས་ཏེ། འཁོར་གྱིས་རྣམ་པར་བརྒྱན་པར་བྱ། །ཞེས་པ་ནི་རང་གི་ས་བོན་ཡི་གེ་ཧ་དང་བཅས་པར་ཤེས་པར་བྱ་ཞེས་པའོ། །དེའི་སྟེང་ན་འཇིགས་པ་ཆེན་པོ་འཇིགས་པའི་མེའི་གཟུགས་འདྲ་བ་གྲུ་གསུམ་པོ་དང་འདྲ་བར་བྱ་ཞེས་པ་ནི། རླུང་གི་དཀྱིལ་འཁོར་དེའི་སྟེང་དུ་མེའི་དཀྱིལ་འཁོར་གྲུ་གསུམ་འཕགས་པའི་བསྐལ་པའི་མེའི་ཁ་དོག་འདྲ་བ་འཇིགས་འཇིགས་ལྟར་འདུག་པ་འདྲ་བ་ཞེས་པའོ། །འབར་བས་ཀྱང་བརྒྱན་བཞིན་དུ་ཞེས་པ་ནི་དཀྱིལ་འཁོར་དེའི་མཚན་མ་གྲུ་གསུམ་
པོས་ཀྱང་གདབ་ཅེས་པའོ། །འབར་བའི་ཕྲེང་བས་འཇིགས་བཞིན་དུ། །འཁོར་ནི་ཉི་མ་ཤར་དང་འདྲ། །ཞེས་པ་ནི་འབར་བའི་ཕྲེང་བ་ཁ་དོག་ཉི་མ་ཤར་བ་དང་འདྲ་བ་འཇིགས་པས་འཁོར་བར་བྱ་ཞེས་པའོ། །དེ་ཡི་དབུས་སུ་པདྨོ་བྱ། །དུས་མཐའི་མེ་ཡི་དཀྱིལ་དང་འདྲ། །ཞེས་པ་ནི་མེའི་དཀྱིལ་འཁོར་དེའི་དབུས་སུ་པདྨོའོ་ཁ་དོག་འདྲ་བ་དམར་པོ་གཉིས་བྲི་ཞེས་པའོ། །པདྨའི་སྟེང་དུ་རྡོ་རྗེ་སྟེ། །འབར་བའི་ཕྲེང་བ་གོང་བཞིན་བྱ། །ཞེས་པ་ནི་པདྨའི་སྟེང་དུ་རྡོ་རྗེ་དམར་སྨུག་གི་ཁ་དོག་ཏུ་བྲིས་ཏེ། འབར་བ་ཞེས་པ་ནི་མེའི་ཁ་དོག་གཡོ་བ་ནི་རླུང་གི་ཤས་ཏེ། མེ་དང་རླུང་གཉིས་ཀའི་ཤས་ཡོད་པས་རྡོ་རྗེ་དམར་སྨུག་ཏུ་བྱའོ། །ཧཱུཾ་ཞེས་པ་ཡི་སྒྲས་ནོན་པའི། །ས་བོན་དམ་པས་སུ་ནི་བརྒྱན། །ཞེས་པ་ནི་རྡོ་རྗེའི་སྔོན་དུ་ཕྱག་ན་རྡོ་རྗེའི་ས་བོན་གྱི་ཡི་གེ་ཧཱུཾ་གཞག་པར་བྱ་ཞེས་པའོ། །དཔའ་བོ་ཁྱོད་ཀྱི་དཀྱིལ་འཁོར་འདི། །རྒྱལ་བ་གཙོ་བོ་རྣམས་ཀྱིས་གསུངས། །ཞེས་པ་ནི་སྔོན་གྱི་རྒྱལ་བ་རྣམས་ཀྱིས་ཀྱང་གསུངས་ཞེས་པའོ། །དཔའ་བོ་ཞེས་པ་ནི་ཕྱག་ན་རྡོ་རྗེ་ལ་བོས་པའི་ཚིག་གོ །མཱ་མ་ཀཱི་དང་ལུ་གུ་རྒྱུད། །ཅེས་པ་ནི་དེ་ལས་ཀུན་ཤིན་ཏུ་གྲུབ་པའི་ཕྱིར་རོ་ཞེས་པའི་བར་དུ། མཱ་མ་ཀཱི་ལ་སོགས་པའི་འཁོར་རྣམས་དང༌། དབང་ཆེན་གྱི་དཀྱིལ་འཁོར་གྱི་ནང་དུ་བྲི་བར་བཤད་པ་སྟེ། ཕྱག་རྒྱའི་དཀྱིལ་འཁོར་ས་བོན་གྱི། །ཁ་དོག་རིམ་པར་ཕྱེད་པ་སྟེ། །ཇི་ལྟར་རིམ་པ་བཞིན་དུ་ཤེས། །ཞེས་པ་ནི་སོ་སོའི་ཕྱག་རྒྱ་དང་ས་བོན་རྣམས་སོ་སོའི་ཁ་དོག་ཅི་འདྲ་བ་ལས་དཀྱིལ་འཁོར་ཀྱང་དེ་བཞིན་དུ་ཤེས་པར་བྱ་སྟེ། སྔར་བཤད་པའི་རིམ་པ་བཞིན་དུ་ཇི་ལྟར་རིམ་བཞིན་དུ་བྲི་ཞེས་པའོ། །དེ་ནས་གཞན་གྱིས་ཡང་བཤད་པ། །ཞེས་པ་ནས་མཐུ་ཆེན་དང་ལྡན་པའོ་ཞེས་པའི་བར་དུ་ཕྱག་ན་རྡོ་རྗེའི་དཀྱིལ་འཁོར་འོག་ལོགས་སུ་ནམ་མཁའ་དྲི་མ་མེད་པ་ལ་སོགས་པའི་རྡོ་རྗེ་འཛིན་བཅུ་གཉིས་མིང་གིས་སྨོས་པ་རྣམས་བྲིས་ཏེ། དེ་རྣམས་ཀྱི་དཀྱིལ་འཁོར་ཀྱང་དབང་ཆེན་ལ་སོགས་པ་བཞི་པོ་བྲི་བར་གསུངས་པ། དཀར་པོ་དམར་པོ་སེར་པོ་དང༌། །ནག་པོ་ཞེས་ཀྱང་གསུངས་པ་ཡིན། །ཞེས་པ་སྟེ་དཀྱིལ་འཁོར་འདི་བཞི་རྡོ་རྗེ་འཛིན་པ་བཅུ་གཉིས་ལ་ལན་གསུམ་
དུ་རིམ་བཞིན་དུ་བསྒྲེས་ཏེ་སྦྱར་རོ། །ཕྱག་རྒྱའི་གཟུགས་ཀྱང་བཤད་པ་ནི། །རྩེ་གསུམ་དང་ནི་རྩེ་གཅིག་སྟེ། །ཁ་ཅིག་གཉི་ག་ཡང་མ་ཡིན། །དེ་ལ་ཁ་ཅིག་ཕྲེང་ཅན་ནི། །དེ་རྣམས་ཀྱི་ཕྱག་རྒྱ་སྟེ་རྡོ་རྗེ་རྩེ་གསུམ་ལ་ཡང་རྣམ་པ་གཉིས་ཏེ། ཕྱོགས་གཅིག་རྩེ་གསུམ་པ་དང༌། ཕྱོགས་གཉིས་ཀ་རྩེ་གསུམ་པའོ། །དེ་བཞིན་རྩེ་གཅིག་པ་ཡང་ཤེས་པར་བྱ་སྟེ། དེ་བས་ན་ཁ་དོག་གཉི་ག་གཟུང་བའོ། །གཉི་ག་ཡང་མ་ཡིན་ཞེས་པ་ནི་རྡོ་རྗེ་ཐུ་ལུམ་དུ་ཤེས་པར་བྱའོ། །དེ་ལ་ཁ་ཅིག་ཕྲེང་བ་ཅན། །ཞེས་པ་ནི་རྡོ་རྗེ་ཕྲེང་བའི་ཕྱག་རྒྱ་སྟེ། ཕྱག་རྒྱ་དེ་ལན་དྲུག་ཏུ་བསྒྲེས་པ་བཅུ་གཉིས་སུ་ཁྱབ་པར་བྱའོ། །ཁ་དོག་རྣམ་པའང་ཤེས་པར་བྱ། །ཞེས་པ་ནི་ཕྱག་རྒྱ་དེ་རྣམས་ཀྱི་ཁ་དོག་ཤ་སྟག་ཀྱང་རྡོ་རྗེ་འཛིན་དེ་དག་ཉིད་ཀྱི་ཁ་དོག་ཇི་ལྟ་བ་བཞིན་དུའོ་ཞེས་པའོ། །ཀུན་ཀྱང་རྣམ་པར་འདུལ་བ་སྟེ། །མཐུ་ཆེན་དང་ནི་ལྡན་པའོ།། ཞེས་པ་ནི་རྡོ་རྗེ་འཛིན་པ་དེ་དག་གི་རྗེས་སུ་བསྔགས་པ་སྟེ་གདུལ་དཀའ་བ་རྣམས་འདུལ་ནས་ཞེས་པའོ། །མགོན་པོ་མི་གཡོའི་དཀྱིལ་འཁོར་ནི། །ཞེས་པ་ནས། མཁས་པས་དེར་ནི་བྲི་བར་བྱ། །ཞེས་པའི་བར་དུ་འཕགས་པའི་དཀྱིལ་འཁོར་བཤད་པ་སྟེ། རླུང་དང་མེ་ཞེས་བསྒྲགས་པ་ཡིན། །ཞེས་པ་ནི་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་བྲི། དེའི་སྟེང་དུ་འཕགས་པ་མི་གཡོ་བའི་ཕྱག་རྒྱ་རལ་གྲིའམ་ཞགས་པ་གང་ཡང་རུང་བ་ཅིག་རང་གི་ས་བོན་དང་བཅས་པར་བྲི་ཞེས་པའོ། །ཁམས་གསུམ་རྣམ་པར་འདུལ་བ་ཡང༌། །ཤིན་ཏུ་རླུང་གི་དབུས་སུ་སྟེ། །ཞེས་པ་ཡང་ཞེས་པའི་ཚིག་གིས་འཕགས་པ་མི་གཡོ་བའི་དཀྱིལ་འཁོར་ལྟར་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་བྲི་ཞེས་པའོ། །རླུང་གི་དབུས་སུ་ཞེས་པ་ནི་མེའི་དཀྱིལ་འཁོར་གྱི་སྟེང་དུ་རླུང་གི་དཀྱིལ་འཁོར་བྲིས་ཏེ། དེའི་དབུས་སུ་རྡོ་རྗེའི་ཕྱག་རྒྱ་རང་གི་མཚན་མ་དང་བཅས་པར་ཞེས་སོ། །གནས་གསུམ་ལ་ནི་འདུག་པའོ། །ཞེས་པ་ནི་རླུང་གི་དཀྱིལ་འཁོར་གཉིས་དང་མེའི་དཀྱིལ་འཁོར་གསུམ་ལ་འཇུག་ཅེས་པའོ། །གསང་བའི་བདག་པོ་གཞན་ཡང་ཞེས་པ་ནས་ས་བོན་གྱིས་གདབ་མདོ་རུ་ཞེས་པའི་བར་དུ་ནམ་མཁའ་ཅན་གྱི་
དཀྱིལ་འཁོར་བཤད་པ་སྟེ། དབང་ཆེན་གྱི་དཀྱིལ་འཁོར་ནི་སྔ་མ་བཞིན་ནོ། །ལྷ་མོ་དེའི་ཁ་དོག་ཀྱང་སེར་པོར་བྱ་སྟེ། པདྨོའི་སྟེང་དུ་བཞུགས་པར་རོ། །དེ་རུ་བྲི་བ་གཙུག་ཏོར་ཏེ། །དུམ་བུ་གསུམ་དུ་གནས་པར་ཞེས་པ་ནི་དབང་ཆེན་གྱི་དཀྱིལ་འཁོར་གྱི་སྟེང་དུ་པདྨོ་བྲིས་ཏེ། པདྨོའི་སྟེང་དུ་ཕྱག་རྒྱ་གཙུག་ཏོར་ཆ་གསུམ་དང་བཅས་པ་བྲི་ཞེས་པའོ། །དེ་ལས་དབུ་མའི་ཆ་བོར་དེ་རུའང་སྤྱན་བྲིས་ཤིག །ཅེས་པ་ནི་གཙུག་ཏོར་གྱི་ཕྱག་རྒྱ་དེ་སྨད་སུམ་གཉིས་བོར་ལ་སྟོད་ཀྱི་སུམ་ཆ་ནི་ནང་དུ་སྤྱན་གྱི་ཕྱག་རྒྱ་བྲིའོ། །འོད་འབར་དབུས་སུ་གནས་པ་སྟེ། །ཞེས་པ་ནི་གཙུག་ཏོར་གྱི་ཕྱག་རྒྱ་དེ་འོད་འབར་བའི་ནང་དུ་འདུག་པར་བྱ་ཞེས་པའོ། །ས་བོན་གྱིས་གདབ་མདོ་རུ་ཞེས་པ་ནི་ཡུམ་དེའི་ས་བོན་དང་ཡི་གེ་དང་བཅས་པར་བྱ་ཞེས་པའོ། །བྱང་ཆུབ་སེམས་དཔའ་ཀུན་གྱི་ཞེས་པ་ནས། ཀུན་གྱི་བསམ་པ་རྫོགས་བྱེད་པའོ། །ཞེས་པའི་བར་དུ་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ཡིད་བཞིན་གྱི་ནོར་བུ་ཆུའི་དཀྱིལ་འཁོར་གྱི་སྟེང་དུ་བྲི་ཞེས་པའོ། །དེ་ནས་ཤཱཀྱ་སེང་གེའི་ཞེས་པ་ནས། རིམ་བཞིན་དུ་ནི་གཞག་པར་བྱ། །ཞེས་པའི་བར་དུ་དཀྱིལ་འཁོར་སྣམ་བུ་གཉིས་པོ་ཤཱཀྱ་ཐུབ་པ་དབང་ཆེན་གྱི་དཀྱིལ་འཁོར་བཞུགས་པར་བྲི་སྟེ་གཞན་ནི་སྔ་མ་བཞིན་ནོ། །དབང་ཆེན་གྱི་དཀྱིལ་འཁོར་གྱི་སྟེང་དུ་པདྨོ་སེར་པོ་བཞག་སྟེ། པདྨོའི་སྟེང་དུ་ལྷུང་བཟེད་དམ་ཆོས་གོས་སམ་འཁར་གསིལ་གསུམ་ལས་གང་ཡང་རུང་བ་ཅིག་བཞག་སྟེ། དེ་ཡང་འབར་བ་དང་ཅས་པ་ལ་རྡོ་རྗེའི་མཚན་གྱིས་བཏབ་པར་བྱ་ཞེས་པའོ། །གཙུག་ཏོར་ལྔ་གསུངས་པ་ཞེས་པ་ནས། ཁ་དོག་རིམ་པ་རྟོགས་པར་བྱ། །ཞེས་པའི་བར་དུ་ག་ཙུག་ཏོར་ལྔ་པོ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། དེ་དག་གི་དཀྱིལ་འཁོར་ནི་སོ་སོའི་ཁ་དོག་ཅི་འདྲ་བ་དང་སྦྱར་བར་བྱ་སྟེ། ཁ་དོག་ཀྱང་དཀྱིལ་འཁོར་སྔ་མར་བཤད་ཟིན་ཏོ། །ཡིད་བཞིན་ནོར་བུ་སྤུ་མཛོད་ཀྱི། །ཞེས་པ་ནི་སྤུ་མཛོད་ཀྱི་ཕྱག་རྒྱ་ཡིད་བཞིན་གྱི་ནོར་བུ་བྲི་ཞེས་པ་སྟེ། དཀྱིལ་འཁོར་ཡང་དེ་ཉིད་ཀྱི་ཁ་དོག་ཅི་འདྲ་བ་དང་སྦྱར་རོ། །སྤྱན་རྣམས་ཀྱིས་ནི་འདི་ཉོན་ཅིག །གཙུག་ཏོར་དེ་ནི་ཀུན་སེར་པོ། །རྡོ་རྗེ་མཚན་གྱིས་གདབ་པར་བྱ། །ཞེས་པ་ནི་སངས་རྒྱས་ཀྱི་སྤྱན་ཕྱག་རྒྱ་གཙུག་ཏོར་སེར་པོ་བྲིས་
ཏེ་རྡོ་རྗེ་མཚན་མ་དང་བཅས་པ་བྲི་ཞེས་པའོ། །དེའི་ཁ་དོག་སེར་པོ་བས་དབང་ཆེན་གྱི་དཀྱིལ་འཁོར་དུ་བྲི་བར་ཤེས་པར་བྱའོ། །གཞན་གྱིས་མི་ཚུགས་ལག་པ་པདྨོར་བཅས་ཏེ་ངོ་མཚར་ཆེའོ་ཞེས་པ་ནི་ལྷ་མོ་གཞན་གྱིས་མི་ཐུབ་པའི་ཕྱག་རྒྱ་ལག་པ་ཁུ་ཚུར་བཅས་པ་འདྲ་བ་པདྨོ་ཐོགས་པ་བྲིའོ། །གཞན་གྱིས་མི་ཚུགས་དེ་ཡི་ནི། །དབང་ཆེན་པདྨ་གནས་པའོ། །ཞེས་པ་ནི་གཞན་གྱིས་མི་ཐུབ་ཅེས་བྱ་བའི་རིག་པའི་རྒྱལ་མོ་ཕྱག་རྒྱར་བྲི་སྟེ་པདྨོ་ནག་པོའི་སྟེང་ན་གནས་པར་བྱའོ། །གཙང་མ་གནས་པ་རྣམས་ཀྱི་བཤད་པ་ནི་ཞེས་པ་ནས། རྒྱས་པ་བྲིས་ཤིག་ཆོ་ག་བཞིན་དུ་ཞེས་པའི་བར་དུ་གནས་གཙང་མ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། བསམ་པའི་ལག་པ་ནི་ཐལ་མོ་འགྲམ་པ་ལ་བརྟེན་པ་སྟེ་དཀྱིལ་འཁོར་དུ་བྲི་བར་བྱ་ན། འགྲམ་པ་མི་བྲི་བར་ཐལ་མོ་འབའ་ཞིག་གྱེན་ཤོར་འདུག་པར་བྲིའོ། །ལག་བཟང་ཞེས་པ་ནི་མི་འཇིགས་པ་སྦྱིན་པའི་ལག་པ་བྲིའོ། །དགོད་པའི་ལག་པ་ནི་ཁ་འགྲམ་ནས་འདྲེན་པ་ལྟ་བུར་བྲིའོ། །ལག་ན་མེ་ཏོག་ནི་སྲིན་ལག་དང་མཐེ་བོང་གཉིས་སྤྲད་པ་བྲིའོ། །ནམ་མཁའི་ལག་པ་ནི་ལག་པ་བསྒྲེང་བ་བྲིའོ། །བུམ་པར་ཤེས་པར་བྱ་བ་བདག་གི་ཆུས་གང་རྡོ་རྗེས་བརྒྱན་བཞིན་ནོ་ཞེས་པ་ནི་ས་བདག་གི་ཕྱག་རྒྱ་བུམ་པ་ཆུས་གང་པ་རྡོ་རྗེས་བརྒྱན་པར་བྲི་ཞེས་པའོ། །མེའམ་འབུད་པའི་ཐབ་བཞིན་གྱི། །ལག་པ་བྲི་སྟེ་དྲང་སྲོང་བཅས། །ཞེས་པ་ནི་བསོད་སྐྱབས་ཞེས་པ་ལ་སོགས་པའི་དྲང་སྲོང་མིང་གིས་སྨོས་པ་རྣམས་དང་ལྷན་ཅིག་ཏུ་བྲི་ཞེས་ཏེ་ལག་པ་སྨྲང་འདོན་པ་བཞིན་དུ་བྱ་ཞེས་པ་ནི། དྲང་སྲོང་རྣམས་ཀྱི་ཕྱག་རྒྱ་སྨྲང་འདོན་པའི་ལག་པ་ལྟར་མཐེ་བོ་སོར་མོའི་ཚིགས་སུ་འཇོག་པར་བྱའོ། །གཤིན་རྗེ་ཡི་ནི་དབྱིག་པ་བྲི། །རླུང་གི་རྣང་ན་རྟག་འདུ་བར། །ཞེས་པ་ནི་གཤིན་རྗེའི་ཕྱག་རྒྱ་དབྱུག་པ་རླུང་གི་དཀྱིལ་འཁོར་དུ་བྲི་ཞེས་པའོ། །འཆི་བདག་གི་དྲིལ་བུར་ཏེ་ཞེས་པ་ནས་གྲུབ་པར་འདོད་པ་རྣམས་ཀྱིས་སོ། །ཞེས་པའི་བར་དུ་གཤིན་རྗེའི་འཁོར་འཆི་བདག་དང་དུས་མཚན་མོ་ལ་སོགས་པའི་ཕྱག་རྒྱ་མིང་གིས་སྨོས་པ་རྣམས་ཀྱི་དཀྱིལ་འཁོར་གྱི་ནང་དུ་ཐ་མར་ཁྭ་དང་བྱ་རྒོད་ལ་སོགས་པས་བསྐོར་བར་བྲིའོ། །ནི་རི་ཏི་ཡི་
རལ་གྲི་བྲི། །ཞེས་པ་ནས་ཤེས་བྱ་དཀྱིལ་འཁོར་དུ་ཞེས་པའི་བར་དུ་གཏོགས་འདོད་ལ་སོགས་པ་མིང་གིས་སྨོས་པ་རྣམས་ཀྱི་ཕྱག་རྒྱ་ཡང་ཇི་སྐད་དུ་སྨོས་པ་བཞིན་དུ་བྲི་བར་བཤད་དོ། །དེ་དག་ལ་སོགས་པའི་དཀྱིལ་འཁོར་དངོས་སུ་མ་སྨོས་པ་རྣམས་ཀྱང་ལྷ་རྣམས་སོ་སོའི་ཁ་དོག་དང་གཟུགས་དཀྱིལ་འཁོར་སྡེ་མ་བཤད་པ་དང་སྦྱར་བར་བྱའོ། །དེ་ནས་རྡོ་རྗེ་ཡོན་སྦྱིན་ཞེས་པ་ནས། ཨུཏྤལ་རྣམས་ཉིད་ཀྱིས་བྱའོ་ཞེས་པའི་བར་དུ་དཀྱིལ་འཁོར་སྣམ་བུ་གསུམ་པོ་འཕགས་པ་འཇམ་དཔལ་གྱི་དཀྱིལ་འཁོར་བྲི་བར་བཤད་པ་སྟེ། ཀུན་ཀྱང་གྲུ་བཞི་ལྷམ་པར་བྱ། །རྡོ་རྗེའི་མཚན་གྱིས་བཏབ་ཅེས་པ་ནི་དབང་ཆེན་གྱི་དཀྱིལ་འཁོར་དེ་སྔ་མ་བཞིན་ནོ། །དེ་ཡི་དབུས་སུ་ཡང་བྱ་བ། །མེ་འབྱུང་བ་ཡི་དཀྱིལ་འཁོར་ཏེ། །ཞེས་པ་ནི་དབང་ཆེན་གྱི་དཀྱིལ་འཁོར་ཏེ་དེའི་དབུས་སུ་མེའི་དཀྱིལ་འཁོར་བྲིའོ། །དེའི་དབུས་སུ་ཕྱག་རྒྱ་བྲི་བ་ནི་ཨུཏྤལ་སྟེ་ལེགས་པའོ་ཞེས་པ་ནི་མེའི་དཀྱིལ་འཁོར་དབུས་སུ་ཕྱག་རྒྱ་ཨུཏྤལ་མཛེས་པ་ཨུཏྤལའི་ཁ་དོག་ཉིད་དུ་བྲི། རང་སྔགས་ཀྱིས་ནི་འབར་བྱས་པ། །འཇམ་དབྱངས་ཏེ་བློ་ཅན་གྱིས་ཞེས་པ་ནི་ཨུཏྤལ་དེའི་སྟེང་དུ་འཇམ་དབྱངས་ཉིད་ཀྱི་སྔགས་ཀྱི་ས་བོན་བཞག་སྟེ་གཟེངས་བསྟོད་པར་བྱ་ཞེས་པའོ། །དེའི་ས་བོན་གྱིས་གདབ་པ་ཡང༌། རང་གི་ས་བོན་ཚུལ་བཞིན་ནོ། །ཞེས་པ་ནི་དབང་ཆེན་དང་མེའི་དཀྱིལ་འཁོར་ལ་སོ་སོའི་ས་བོན་ཨ་དང་ར་ཆོ་ག་བཞིན་དུ་གཞག་ཅེས་པའོ། །མཐའ་ཡང་ཀུན་དུ་བསྐོར་བ་ནི། །ཨུཏྤལ་ནི་ཉིད་ཀྱིས་བྱའོ། །ཞེས་པ་ནི་དཀྱིལ་འཁོར་དེའི་མཐའ་ཨུཏྤལས་བསྐོར་བར་བྱའོ། །དེ་ཡི་དབུས་སུ་བྲི་བ་ཞེས་པ་ནས། ཨུཏྤལ་ཁ་མ་བྱེ་བ་བྱའོ་ཞེས་པའི་བར་དུ་དྲ་བའི་འོད་ལ་སོགས་པའི་ཕྱག་རྒྱ་ཇི་སྐད་སྨོས་པ་བཞིན་དུ་བྲི་ཞེས་པའོ། །ཕོ་ཉ་དག་གིས་གསུངས་པ་ནི། །ཞེས་པ་ནས། ཨུཏྤལས་ནི་བརྒྱན་པར་རོ། །ཞེས་པའི་བར་དུ་སྒྲ་གཅན་ལ་སོགས་པའི་མངག་གཞུག་པ་རྣམས་ཀྱི་ཕྱག་རྒྱ་ཇི་སྐད་དུ་སྨོས་པ་རྣམས་ཨུཏྤལའི་མཚན་གྱིས་བཏབ་སྟེ་བྲི་བའོ། །ཅི་བགྱི་ཇི་སྐད་གསུངས་རྣམས་ཀྱི། །དེ་དག་ཕྱག་རྒྱ་ཁང་ག་རི། །ཞེས་པ་ནི་འཕགས་པ་འཇམ་དཔལ་གྱི་ཅི་བགྱི་བ་ཞེས་པ་ནི་སྔར་ཇི་སྐད་དུ་བཤད་པར་ནམས་ཀྱི་ཕྱག་རྒྱ་ཁང་ག་རི་བྱ་བ་གྲི་གུག་འདྲ་བ་
རྣམས་བྲིས་ཏེ་དེའི་ཕྱོགས་སུ་ནི་སྒྲིབ་པ་ཐམས་ཅད་རྣམ་པར་སེལ་བའི་ཕྱག་རྒྱ་བྲིས་ཏེ་ཞེས་པ་ནས། དེ་དག་ཀུན་ཀྱང་དཀྱིལ་འཁོར་གྱི་ནང་ན་པདྨོ་ལ་གནས་པར་བྱའོ་ཞེས་པའི་བར་དུ་སྒྲིབ་པ་ཐམས་ཅད་རྣམ་པར་སེལ་བ་འཁོར་དང་བཅས་པའི་ཕྱག་རྒྱ་ཇི་སྐད་དུ་སྨོས་པ་རྣམས་བྲི་བར་གསུངས་པ་སྟེ། ལག་པ་སྙིང་གར་བཞག་པ་སྟེ་ལག་པ་འབའ་ཞིག་སྙིང་གར་འཇོག་པ་འདྲ་བ་བྲིའོ། །དེ་དག་ཀྱང་དཀྱིལ་འཁོར་གྱི་ནང་ན་པདྨོ་ལ་གནས་པར་བྱའོ་ཞེས་པ་ནི་འཕགས་པ་འཇམ་དཔལ་གྱི་དྲ་བའི་འོད་མན་ཆད་དཀྱིལ་འཁོར་དངོས་སུ་མ་སྨོས་པ་རྣམས་ཐམས་ཅད་བླ་མའི་དཀྱིལ་འཁོར་གྱི་ནང་དུ་པདྨོའི་སྟེང་དུ་བྲིའོ་ཞེས་པའོ། །དེའི་བྱང་ཕྱོགས་སུ་སའི་སྙིང་པོའི་ཕྱག་རྒྱ་ཡིན་ཞེས་པ་ནས། ཕྱག་རྒྱའི་གཟུགས་སུ་དེ་བཤད་དོ། །ཞེས་པའི་བར་དུ་ས་ལྔའི་དཀྱིལ་འཁོར་བཤད་པ་སྟེ། དབང་ཆེན་གྱི་དཀྱིལ་འཁོར་གྱི་དབུས་སུ་ཞེས་པ་ནི་དབང་ཆེན་གྱི་དཀྱིལ་འཁོར་ནི་སྔ་མ་བཞིན་ཏེ། གཞན་རྣམས་སྔ་མ་བཞིན་བྲི་ཞེས་པ་ནི་དབང་ཆེན་གྱི་དཀྱིལ་འཁོར་དེའི་དབུས་སུ་སའི་སྙིང་པོའི་སྟེང་ན་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་བཤད་པ་བཞིན་དུ་བྲི་ཞེས་པའོ། །དེའི་སྟེང་དུ་པདྨོ་ཆེན་པོ་འབར་བ་བཅས། ཁ་དོག་ཀུན་ཀྱང་ལྡན་ཞེས་པ་ནི་གདན་དེའི་སྟེང་དུ་པདྨོ་འདབ་མ་བརྒྱད་པར་བྲི་སྟེ། ཁ་དོག་ཀུན་དང་ལྡན་པ་ནི། དཀར་པོ་སེར་པོ་དམར་པོ་སྔོན་པོ་ཁ་དོག་དེ་རྣམས་ལས་གཞན་དུ་སྦྱར་བ་ལྗང་གུ་ལ་སོགས་པ་གསུམ་དང་བརྒྱད་དེ་པདྨོ་འདབ་མ་བརྒྱ་པ་ཁ་དོག་དེ་རྣམས་སུ་བྱའོ་ཞེས་པའོ། །དེའི་སྟེང་བ་ངན་ཆེན་པོ་སྟེ། །རིན་ཆེན་རྩེ་ལ་གནས་པའོ། །ཞེས་པ་ནི་པདྨོའི་སྟེན་གདུ་བ་དན་རྩེ་ལ་རིན་ཆེན་བཞག་པ་བྲི་ཞེས་པའོ། །དེའི་གཟུགས་ནི་མཆོག་སྦྱིན་ཡིན་ཏེ། ཕྱག་རྒྱའི་གཟུགས་སུ་དེ་བཤད་དོ། །ཞེས་པ་ནི་སའི་སྙིང་པོ་དེའི་གཟུགས་སུ་བཤད་པ་ཞེས་པའོ། །དེ་མཐའ་ཡས་མང་པོའི་གཙོ་འཁོར་རྣམས་གྲངས་མེད་པ་སྟེ་ཞེས་པ་ནས་ཕྱག་རྒྱ་ཐམས་ཅད་ཀྱང་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའི་བར་དུ། སྙིང་པོ་འཁོར་མཐའ་ཡས་པ་གྲངས་མེད་པ་རྣམས་ཀྱི་ནང་ནས་གཙོ་བོ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། ས་འཛིན་གྱི་ནི་རིན་པོ་ཆེའི་སྟེང་ན་རྡོ་རྗེ་གཉིས་པ་འཇུག་པའོ་ཞེས་པ་ནི་རྡོ་རྗེ་ཡི་ཐོག་
མ་ཐོག་གཉི་ག་རྩེ་ཅན་ཞེས་པ་སྟེ། རྡོ་རྗེ་དེ་ལྟར་བྱེ་བྲག་ཆེ་བས་རྡོ་རྗེ་གོང་མ་གཉིས་ཕྱོགས་རེ་རེ་ནས་རྩེ་གསུམ་པ་དང་རྩེ་གཅིག་པར་ཤེས་པར་བྱའོ། །ཕྱག་རྒྱ་ཐམས་ཅད་ཀྱང་དཀྱིལ་འཁོར་འདིའི་ནང་དུ་ཆུད་པར་བྱའོ་ཞེས་པ་ནི། དཀྱིལ་འཁོར་ཕྱག་རྒྱ་དེ་དག་ཐམས་ཅད་ཀྱང་དབང་ཆེན་གྱི་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའོ། །ནུབ་ཕྱོགས་སུ་ནི་ནམ་མཁའི་སྙིང་པོ་བྲིས་ཏེ་ཞེས་པ་ནས། ལེའུ་རྫོགས་པའི་བར་དུ་ནུབ་ཕྱོགས་སུ་ནམ་མཁའི་སྙིང་པོ་དང་འཁོར་དང་བཅས་པའི་ཕྱག་རྒྱ་ཇི་སྐད་སྨོས་པའི་རྣམ་པ་བྲི་བར་བཤད་པའོ། །དེ་ལ་དཀྱིལ་འཁོར་འདིར་ལྷ་རྣམས་ཁ་དོག་དང་དབྱིབས་གསལ་བར་མ་གསུངས་པ་རྣམས་ནི་དཀྱིལ་འཁོར་གོང་མ་གཉིས་སུ་ཁ་དོག་དང་དབྱིབས་བཤད་པར་བལྟའོ། །དཀྱིལ་འཁོར་གོང་མ་དག་ཏུ་ཁ་དོག་ལ་སོགས་པ་ཞིབ་ཏུ་བཤད་པ་ཡང༌། དཀྱིལ་འཁོར་འོག་མ་འདིར་ལྷ་སོ་སོའི་དཀྱིལ་འཁོར་ཇི་སྐད་དུ་བཤད་པ་ལས་དེ་རྣམས་ཀྱི་ཁ་དོག་ཀྱང་དེ་བཞིན་དུ་ཤེས་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་གསང་བའི་དཀྱིལ་འཁོར་དུ་འཇུག་པའི་ཆོ་ག་གསུངས་པ་ཞེས་པ་ནས། དམ་ཚིག་ཅེས་སུ་གཞན་མི་བྱ། །ཞེས་པའི་བར་དུ་གསང་བའི་དཀྱིལ་འཁོར་དུ་བཅུག་ནས་དབང་བསྐུར་བའི་ཆོ་ག་བཤད་པ་སྟེ། དཀྱིལ་འཁོར་དུ་འཇུག་པའི་རིམ་པ་ལྔ་སྟེ་ནུབ་མོ་ལྷག་པར་གནས་ཤིང་སྡོམ་པ་གཟུང་བ་ལ་སོགས་པ་དང༌། དཀྱིལ་འཁོར་དུ་འཇུག་པའི་ཚེ་བསྲུང་ཞིང་ཆུས་གདབ་པ་དང༌། བྱང་ཆུབ་ཏུ་སེམས་བསྐྱེད་པ་ལ་སོགས་པ་ནི་དཀྱིལ་འཁོར་སྔ་མར་བཤད་པ་བཞིན་ནོ། །ཁྱད་པར་དུ་ནི་དཀྱིལ་འཁོར་གྱི་སྒོ་ཁྱུད་ཀྱི་ནད་དུ་སློབ་མ་སྔ་མ་བཞིན་དུ་བཞག་སྟེ། སློབ་དཔོན་ཡང་སྔ་མ་བཞིན་དུ་རང་རང་གི་ཏིང་ངེ་འཛིན་ལ་གནས་ནས། སློབ་མའི་སྙིང་གར་ཡི་གེ་ར་བསམས་ཏེ། ཡི་གེ་སྒྲ་དེ་ཁོ་ན་ཉིད་ཆོས་ཐམས་ཅད་རྡུལ་དང་བྲལ་བ་ལ་དམིགས་ནས། སློབ་མ་དེའི་ལུས་རྡུལ་ཕྲན་ལ་སོགས་པར་གཤེགས་ཏེ་རྡུལ་ཕྲན་དེ་དག་ཀྱང་མི་དམིགས་པར་བྱ་སྟེ། ཡི་གེ་རའི་སྒྲ་ལས་དོན་དམ་པར་སློབ་མའི་ལུས་སྟོང་པར་བྱའོ། །དེ་ལྟར་བསམས་ནས་ཡི་གེ་རའི་མེ་དེས་སློབ་མའི་ལུས་བསྲེགས་ཏེ་ཐལ་བར་གྱུར་པར་བསམས་ཏེ། དེ་ལྟར་སྟོང་པར་གྱུར་པ་དང་དེའི་གནས་
སུ་ཡང་ཡི་གེ་ཨ་བསམས་ཏེ། ཨ་ལས་བཅོམ་ལྡན་འདས་ཀྱི་སྐུར་གྱུར་པར་བསམ་མོ། །དེ་ནི་བསྡུས་དོན་ཏེ་ཡན་ལག་གི་དོན་དུ་གསུངས་པ་སྔགས་པ་ཀུན་དུ་བཟླས་ཏེ་ཞེས་པ་ནི་སློབ་དཔོན་སྙིང་རྗེ་ཆེན་པོ་དང་འབྱུང་བའི་ཡི་གེ་འཁོར་ལོ་བསྐོར་བའི་དཀྱིལ་འཁོར་གཉིས་ཀྱི་དཀྱིལ་འཁོར་བྲི་བ་དང༌། དབང་བསྐུར་བ་དང༌། བཟླས་པ་དང་སྒྲུབ་པ་ལ་སོགས་པའི་ཆོ་ག་བཟླས་ཏེ་ལོབས་པར་གྱུར་ཅིང་མཁས་པ་ཞེས་པའོ། །དཀྱིལ་འཁོར་མཁས་པས་ཞེས་པ་ནི་དཀྱིལ་འཁོར་གོང་མ་གཉིས་ལ་མཁས་པ་འབའ་ཞིག་མ་ཡིན་གྱི། གསང་བའི་དཀྱིལ་འཁོར་ལ་ཡང་བྲི་བ་དང་དབང་བསྐུར་བ་ལ་སོགས་པའི་ཆོ་ག་རྣམས་མཁས་པ་ཞེས་པ་སྟེ། མདོར་ན་དཀྱིལ་འཁོར་གོང་མ་གཉིས་སུ་ཡང་དབང་བསྐུར་བའི་སློབ་དཔོན་གྱི་ལས་འདི་རྣམས་བྱའོ་ཞེས་པའོ། །སྡིག་པ་མ་ལུས་ཀུན་བསྲེགས་པ། །ཆོ་ག་དེ་སློབ་མའི་ཞེས་པ་ནི་དང་པོ་གླེང་བའི་ཚིག་སྟེ་སྡིག་པ་རྣམས་ཞེས་པ་ནི་སེམས་ཀྱི་རྒྱུད་ལ་མི་དགེ་བའི་བག་ཆགས་བསགས་པ་མི་འདོད་པའི་རྣམ་པར་སྨིན་པ་ལྟ་བར་བྱེད་པ་ལ་བྱ་སྟེ། སློབ་མའི་སྡིག་པ་དེ་འོག་ནས་འབྱུང་བའི་ཆོ་གས་བསྲེག་ཅེས་པའོ། །དེའི་འཚོ་བ་བསྲེག་པ་ནི་ཕྱིན་ཆད་སླར་མི་འཁྲུངས་པར་དེ་ཤིན་ཏུ་ཚིག་ནས་ཐལ་བར་གྱུར་ཞེས་པ་ནི་གོང་དུ་སྡིག་པ་བསྲེག་ཅེས་སྨོས་པ་དེ་ཇི་ལྟར་བསྲེག་པར་གསལ་བར་གསུངས་པ་སྟེ། དེའི་འཚོ་བ་ཞེས་པ་དེ་ནི་སློབ་མ་དེའི་ལྔ་ཕུང་ལ་བྱའོ། །ཕྱིན་ཆད་སླར་མི་འཁྲུངས་པ་དེ་ཞེས་པ་ནི་ལྔ་ཕུང་དེ་ལྟར་བསྲེགས་ཏེ། སྟོང་པར་བྱས་ནས་དེ་ཉིད་ཀྱི་ཚེ་ན། སློབ་མ་དེའི་ལྔ་ཕུང་ཡོད་པར་འདུ་ཤེས་མི་སྐྱེ་བར་བྱ་ཞེས་པའོ། །ཤིན་ཏུ་ཚིག་ནས་ཐལ་བར་འགྱུར། །ཞེས་པ་ནི་བསྲེག་པ་ཡང་ལྷག་མ་ཡོད་པ་མ་ཡིན་པར་ཤིན་ཏུ་ཚིག་ནས་སྟོང་པ་ཉིད་དུ་འགྱུར་བར་བྱའོ་ཞེས་པའོ། །སླད་དུ་ཡང་ནི་དེ་གསོའོ། །ཞེས་པ་ནི་དེ་ལྟར་སྟོང་པ་ཉིད་དུ་བརྟན་པར་གྱུར་ནས། སློབ་མ་དེ་སླར་རྣམ་པར་སྣང་མཛད་ཀྱི་གཟུགས་སུ་འོག་ནས་འབྱུང་བའི་ཚིག་གིས་སྦྱར་རོ་ཞེས་པའོ། །དེ་ལྟར་སློབ་མ་དེ་དེའི་ཚེ་ཚོ་བ་བསྲེག་གོ་ཞེས་སྨོས་པ་ཙམ་དུ་ཟད་ཀྱི་ཅིས་བསྲེག །ཇི་ལྟར་བསྲེག་ཅེས་གསུངས་པ་ཡི་གེ་སུ་ནི་ཡི་གེ་བསྲེས་ཅེས་པ་སྟེ། ཡི་གེ་སུ་ནི་ཞེས་པ་ནི་ཡི་གེར་དེར་སྔར་སྨོས་
པའི་ཚུལ་དུ་སློབ་མའི་ལྔ་ཕུང་དེ་བསྲེག་ཅེས་པའོ། །ཡི་གེ་ཞེས་པའི་ཚིག་གཉིས་པ་དེ་ནི་མི་འགྱུར་བ་ཞེས་པ་སྟེ། དེ་ལྟར་བསྲེགས་ཏེ་སྟོང་པར་གྱུར་ནས་ཀྱང་སླར་ལྔ་ཕུང་མི་སྐྱེ་བར་སྟོང་པར་འགྱུར་བ་ལས་གཞན་དུ་མི་འགྱུར་བར་ཏིང་ངེ་འཛིན་གྱིས་བརྟན་པར་བྱའོ་ཞེས་པའོ། །འཚོ་བ་ཡང་ནི་ཕྱིར་གསོ་བ། །འཚོ་བ་ཡིས་ནི་འཚོ་བ་སྟེ། །ཞེས་པ་ནི་སླད་དུ་ཡང་ནི་གསོའོ་ཞེས་པའི་ཚིག་སྔ་མ་དེའི་འགྲེལ་པ་སྟེ་སློབ་མའི་འཚོ་བ་ལྔ་ཕུང་སྟེ། སྟོང་པར་གྱུར་པ་ལས་ཡི་གེ་ཨ་འཚོ་བར་གྱུར་པ་དེས་སླར་སངས་རྒྱས་ཀྱི་སྐུར་གོང་དུ་སྨོས་པའི་ཚུལ་དུ་བསྒྱུར་ཞེས་པའོ། །ཀུན་དུ་དག་པ་ཞེས་པ་ནི་དཀར་པོའོ། །དྲི་མ་མེད་པ་ཞེས་པ་ནི་གསལ་བ་ཞེས་པ་སྟེ་སངས་རྒྱས་ཀྱི་སྐུར་བསྒྱུར་བ་དཀར་ཞིག་གསལ་བར་བྱ་ཞེས་པའོ། །ཡན་ལག་བཅུ་གཉིས་ཚིག་གིས་བཏབ། །དེ་ཡི་སྣོད་དུ་གྱུར་པར་བྱ། །ཞེས་པ་ནི་དེའི་གདན་པདྨོ་ལ་ཡན་ལག་བཅུ་གཉིས་ཀྱི་ཚིག་རྣམས་དགོད་པར་བྱ་ཞེས་པའོ། །ས་མ་ཡ་འདིས་སངས་རྒྱས་ཀུན། །ཞེས་པ་ནས། འཇིག་རྟེན་རྣམས་ཀྱང་ཐར་པར་རོ། །ཞེས་པའི་བར་དུ་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་འཇིག་རྟེན་པ་རྣམས་ཀྱང་དམ་ཚིག་འདི་ལ་མོས་ཤིང་འཐད་ཅེས་པའོ། །དམ་ཚིག་འདི་ནི་སུས་རིག་པ། །གསང་བའི་དཀྱིལ་འཁོར་དབུས་སུ་སྟེ། །རྒྱུད་ཀུན་དུ་ཡང་བཞུགས་པ་ཡིན། །དཀྱིལ་འཁོར་ཐམས་ཅད་ལ་ཡང་དབང༌། །ཞེས་པ་ནི་གསང་བའི་དཀྱིལ་འཁོར་གྱི་དབུས་སུ་འདི་ལྟ་བུའི་ཏིང་ངེ་འཛིན་གྱི་ཚུལ་བསྟན་པ་ནི། རྒྱུད་ཐམས་ཅད་ཀྱི་དཀྱིལ་འཁོར་དུ་ཞུགས་པ་དང་འདྲ་བ་སྟེ། ཐམས་ཅད་ཀྱི་དམ་ཚིག་ཅན་དུ་གྱུར་པ་དང༌། དཀྱིལ་འཁོར་ཐམས་ཅད་ཀྱང་འདིར་དབང་ཞེས་པའོ། །སྔགས་པ་དེ་ནི་ང་དང་འདྲའོ། །ཞེས་པ་ནི་གོང་དུ་སླར་གསོས་ནས་དཀར་ཞིང་གསལ་བར་བྱ་ཞེས་པ་ནི་སྤྱིར་སྨོས་པ་ཙམ་དུ་ཟད་ཀྱི་ཚིག་འདིས་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཟུགས་ཉིད་དུ་བྱ་ཞེས་པའོ། །དམ་ཚིག་ཅེས་སུ་གཞན་མི་བྱ། །ཞེས་པ་ནི་ཏིང་ངེ་འཛིན་དེ་ལྟ་བུར་མ་བྱས་ཏེ་ལོག་པར་གཞན་དུ་བྱས་ན་དམ་ཚིག་ཏུ་མི་བྱ་ཞེས་པའོ། །དམ་ཚིག་ཅེས་པ་ནི་སྐབས་འདིར་སྟོང་པ་ཉིད་ཀྱི་ཏིང་ངེ་འཛིན་པས་ཆུད་པ་ལ་བྱའོ། །ཏིང་
དེ་འཛིན་དེ་ཡང་དང་པོ་སྲེག་པ་ནི་འཇུག་པའི་སེམས་སོ། །བསྲེགས་ནས་སྟོང་པའི་རང་བཞིན་དུ་གནས་ཏེ་མི་འགྱུར་བ་ནི་གནས་པའི་སེམས་སོ། །དེ་ནས་སླར་གསོས་ཏེ་བཅོམ་ལྡན་འདས་ཀྱི་སྐུར་བསྒྱུར་བ་ནི་ལྡང་བའི་སེམས་སུ་ཤེས་པར་བྱའོ། །བཅོམ་ལྡན་འདས་ཀྱི་སྐུར་བསྒྱུར་པའི་ཚེ་ཡང་གསང་བའི་ཕྱག་རྒྱ་འོག་ནས་འབྱུང་བ་རྣམས་ཀྱི་གདན་དང༌། ཡན་ལག་འོད་ལ་སོགས་པ་འོག་ནས་ཇི་སྐད་དུ་བྱུང་བའི་རིམ་བཞིན་དུ་བྱའོ། །བྱང་ཆུབ་སེམས་དཔའ་ལ་སོགས་པ་གཞན་གྱི་གཟུགས་སུ་བསྒྱུར་ན་ཕྱག་རྒྱ་དེ་རྣམས་ཀྱིས་བྱིན་གྱིས་བརླབས་ན་བརྟན་པར་འགྱུར་རོ། །ད་ནི་ནང་གི་ཡིད་ཀྱི་དཀྱིལ་འཁོར་བྲི་བའི་སྐབས་འཆད་དེ། ཡིད་ཀྱི་དཀྱིལ་འཁོར་བྲི་བ་ཡང་སྤྱིར་དཀྱིལ་འཁོར་གཉིས་ཏེ། རང་གི་གཟུགས་ཀྱི་དཀྱིལ་འཁོར་དང་གཟུགས་བརྙན་གྱི་དཀྱིལ་འཁོར་རོ། །དེ་ལ་རང་གི་གཟུགས་ཀྱི་དཀྱིལ་འཁོར་ནི་རྒྱ་ཆེ་ཞིང་བསམ་གྱིས་མི་ཁྱབ་སྟེ་མདོར་བསྡུས་པ་བསྟན་པ་ནི་ཡིད་ཀྱི་དཀྱིལ་འཁོར་དུ་ཤེས་པར་བྱའོ། །གཟུགས་བརྙན་གྱི་དཀྱིལ་འཁོར་ཀྱང་ཇི་སྐད་དུ་གསུངས་པ་བཞིན་དུ་རྫོགས་པར་དཀའ་སྟེ། དེ་ནི་མདོར་བསྡུས་པ་ནི་ཕྱི་མའི་རྒྱུད་ལས་དཀྱིལ་འཁོར་བཤད་པའོ། །དེ་བས་ན་ཡིད་ཀྱི་དཀྱིལ་འཁོར་འདིའི་སྒོ་ནས་སེམས་ཀྱི་རང་བཞིན་གྱི་གསང་བའི་དཀྱིལ་འཁོར་ཇི་འདྲ་བའི་ཚུལ་ཤེས་པར་འགྱུར་ཏེ་འདི་ནི་འཇུག་པ་ལྟ་བུར་བལྟའོ། །ཡིད་ཀྱི་དཀྱིལ་འཁོར་དེ་བྲི་བའི་ཐབས་བསྟན་པའི་ཕྱིར་བཅོམ་ལྡན་འདས་ཏིང་ངེ་འཛིན་དུ་ཞུགས་ནས། སངས་རྒྱས་ཀྱི་ཞིང་དེ་ཐམས་ཅད་ལག་མཐིལ་དང་མཉམ་པར་གྱུར་པ་དང་རིན་པོ་ཆེ་སྣ་ལྔའི་རྟ་བབས་དང་སྒོ་ཁྱུད་ལ་སོགས་པ་རྣམ་པ་མང་པོས་བརྒྱན་པར་བསྟན་པ་སྟེ། དེ་དག་ཐམས་ཅད་ཀྱང་དངོས་པོ་ཡོད་པ་མ་ཡིན་པ་ལས། སེམས་ཀྱི་དབང་ཙམ་ལས་ཇི་ལྟར་བསམས་པ་བཞིན་དུ་འབྱུང་བར་བསྟན་པའོ། །དེ་བས་ན་ཡིད་ཀྱི་དཀྱིལ་འཁོར་ལ་སོགས་པའི་ཡིད་ཀྱིས་བསྐྱེད་པ་ཐམས་ཅད་སྦྱོར་བས་ཐོག་མར་སེམས་མཉམ་པར་གཞག་པ་ལ་དགོད་པའི་མགོན་ཇི་ལྟར་གྱུར་ཅིག་ཅེས་བསམས་ཤིང༌། སྨོན་ལམ་བཏབ་ལ་ཏིང་ངེ་འཛིན་ལ་ཞུགས་ན་ཇི་ལྟར་སྨོན་པ་དེ་ལྟར་འགྱུར་བར་ཤེས་པར་བྱའོ། །དེ་ལྟར་ཡིད་ཀྱི་དཀྱིལ་འཁོར་བྲི་བའི་ཐབས་བསྟན་
པ་ཡང༌། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེའི་ཚེ་མ་འོངས་པའི་འགྲོ་བ་ལ་གཟིགས་ནས་ཀུན་རྗེས་སུ་ཆུད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ལ་སོགས་པ་སྟེ། བཅོམ་ལྡན་འདས་སྔོན་གྱི་སྨོན་ལམ་གྱི་ཤུགས་ཀྱིས་སེམས་ཅན་གྱི་དོན་བྱ་བ་ལ། སོགས་པ་ལྷུན་གྱིས་གྲུབ་པ་ཉིད་དུ་འབྱུང་བས་ཏིང་ངེ་འཛིན་དུ་འཇུག་མི་དགོས་མོད་ཀྱི། འོན་ཀྱང་དངོས་པོ་གང་བསྟན་པར་བྱ་བའི་ཏིང་ངེ་འཛིན་དུ་ཞུགས་ནས་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་འདུལ་བའི་འགྲོ་བ་རྣམས་ཀྱིས་བཅོམ་ལྡན་འདས་ཅིའི་ཕྱིར་ཏིང་ངེ་འཛིན་དུ་ཞུགས་པ་དང་ཞུགས་ནས་ཇི་ལྟར་སྟོན་པར་འགྱུར་བ་ལ་སོགས་པ་ཤེས་པར་འགྱུར་ཏེ། དེ་ཅིའི་ཕྱིར་བཅོམ་ལྡན་འདས་ཏིང་ངེ་འཛིན་དུ་འཇུག་གོ །ཀུན་དུ་རྗེས་སུ་ཆུད་པ་ཞེས་པ་ནི། བཅོམ་ལྡན་འདས་ཏིང་ངེ་འཛིན་ལ་ཞུགས་ནས་དོན་དམ་པར་ཆོས་ཀྱི་དབྱིངས་ཀུན་དུ་ཁྱབ་པར་ཆུད་པ་དང༌། ཀུན་རྫོབ་ཏུ་ཡང་སངས་རྒྱས་ཀྱི་ཞིང་ཐམས་ཅད་ལག་མཐིལ་བཞིན་དུ་མཉམ་པར་འགྱུར་བ་ལ་སོགས་པའོ། །གནས་བརྟན་པ་རྣམས་ཀྱིས་ཁྱད་པར་དུ་ཆུད་པ་སྟེ་བཅོམ་ལྡན་འདས་ཏིང་ངེ་འཛིན་ལ་ཞུགས་ན་དོན་དམ་པ་དང་ཀུན་རྫོབ་ཏུ་ཆུད་པ་དེ་དག་འབྱུང་བའི་ཕྱིར་ཏིང་ངེ་འཛིན་དེའི་མིང་ཀུན་དུ་ཆུད་པ་ཞེས་པའོ། །མ་འོངས་པའི་འགྲོ་བ་ལ་གཟིགས་ནས་ཞེས་པ་ནི་ཀུན་དུ་བཟང་པོ་དང་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་ཡོངས་སུ་དག་པ་རྣམས་ཀྱིས་ནི། དེ་དག་ཇི་ལྟ་བ་ཉིད་དུ་མཁྱེན་གྱི་མ་འོངས་པའི་འགྲོ་བ་རྣམས་ཀྱི་དོན་དུ་དངོས་པོ་ཡོད་པ་མ་ཡིན་པ་ལས། སེམས་ཀྱི་དབང་ཙམ་གྱིས་རྣམ་པ་སྣ་ཚོགས་འབྱུང་བ་བསྟན་པ་ཞེས་པའོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། དེ་ནས་དེའི་ཚེ་ཉིད་ན་སངས་རྒྱས་ཀྱི་ཞིང་འདི་ལག་མཐིལ་བཞིན་དུ་མཉམ་པར་འདུག་པར་གྱུར་ཏེ་ཞེས་པ་ནི། དཀྱིལ་འཁོར་བྲི་བ་ན་སྔར་ས་མཐོན་དམན་ལ་སོགས་པ་བསྙམས་ཤིང་སྦྱང་དགོས་ཏེ། དེའི་ཐབས་བསྟན་པས་སངས་རྒྱས་ཀྱི་ཞིང་འདི་ཞེས་པ་ནི་མི་མཇེད་ཀྱི་སྟོང་གསུམ་གྱི་སྟོང་ཆེན་པོའི་ཁམས་སོ། །ལག་མཐིལ་བཞིན་དུ་མཉམ་པར་འགྱུར། །ཞེས་པ་ནི་སངས་རྒྱས་ཀྱི་ཞིང་དེ་རི་དང་གཅོང་རོང་ལ་སོགས་པ་མེད་པར་མཉམ་པར་གྱུར་
ཅེས་པ་སྟེ། ཚིག་དེས་མ་འོངས་པའི་དུས་ཀྱི་འགྲོ་བ་རྣམས་ནམ་དཀྱིལ་འཁོར་བྲིན་དཀྱིལ་འཁོར་གྱིས་དེ་ལྟར་ལག་མཐིལ་བཞིན་དུ་མཉམ་པར་སྦྱང་བར་བྱ་བ་བསྟན་པའོ། །སྒོ་ཁྱུད་དང་རྟ་བབས་རིན་པོ་ཆེ་སྣ་ལྔས་སོ་སོར་བརྒྱན་པ་ཞེས་པ་ནས་སིལ་སྙན་དུ་མའི་སྒྲ་འཇམ་པོ་ཡིད་དུ་འོང་བ་ནི་རབ་ཏུ་གྲག་པའོ་ཞེས་པ་ནི་སངས་རྒྱས་ཀྱི་ཞིང་དེ་མཉམ་པར་གྱུར་ནས་ཀྱང་རྒྱན་དེ་དག་གིས་བརྒྱན་པ་བསྟན་པ་སྟེ། དེས་ནི་དཀྱིལ་འཁོར་གྱི་ས་དེ་དག་བརྟན་ནས་རྟ་བབས་དང་སྒོ་ཁྱུད་དང་གདུགས་དང་བ་དན་ལ་སོགས་པས་བརྒྱན་པ་དང༌། རི་མོ་རྣམས་ཀྱིས་བརྒྱན་པར་བྱ་བའི་ཐབས་བསྟན་པའོ། །དྲི་ཞིམ་པོ་ཡན་ལག་བརྒྱད་དང་ལྡན་པའི་རྫིང་བུ་སྨོས་པ་ནི་རྫིང་བུ་ལ་སོགས་པ་ཆུ་དང་ཉེ་གནས་སུ་དཀྱིལ་འཁོར་བྲི་བ་བསྟན་པའོ། །ཡན་ལག་བརྒྱད་ཀྱི་རྫིང་བུ་དེ་ནི་ཆུ་བསིལ་བ་དང༌། དང་བ་དང་མངར་བ་ལ་སོགས་པའི་བྱང་ཆུབ་སེམས་དཔའི་བསོད་ནམས་ཀྱི་ཇི་ལྟར་བསགས་པའི་ཡིད་ཀྱིས་བསྟེན་པ་དང༌། ཁང་པ་དང་གཞལ་མེད་ཁང་དུ་མ་དང་ལྡན་ཞེས་པ་ནི་སངས་རྒྱས་ཀྱི་ཞིང་ཕ་རོལ་ཏུ་ཕྱིན་པ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་སོ་སོའི་བསོད་ནམས་ཇི་ཙམ་ལས་སོ་སོ་ནས་སྟན་དང་ཁང་པ་དང་ལྡིང་ཁང་ལ་སོགས་པ་དང་ལྡན་པ་ཞེས་པ་སྟེ། དེས་ཀྱང་དཀྱིལ་འཁོར་གྱིས་དེར་བྱང་ཆུབ་སེམས་དཔའ་ལ་སོགས་པ་ལྷ་རྣམས་སོ་སོའི་གནས་དང་བཅས་པར་བྱ་བ་བསྟན་པའོ། །དེ་བཞིན་གཤེགས་པའི་མོས་པ་ལས་བྱུང་བ་ཞེས་པ་ནས་བསོད་ནམས་རྣམ་པར་བསྐྱེད་པའི་སྐུ་རྣམས་འབྱུང་ཞེས་པའི་བར་དུ་སངས་རྒྱས་ཀྱི་ཞིང་དེའི་དབུས་ན་པདྨོའི་རྒྱལ་པོ་ལ་དེ་བཞིན་གཤེགས་པ་བཞུགས་ཏེ། དེ་བཞིན་གཤེགས་པའི་སྐུ་ལ་ཡེ་ཤེས་ཀྱིས་སེམས་ཅན་ཆོས་ཀྱི་ཚིག་སྟོན་པ་ཤ་སྟག་འབྱུང་ངོ་ཞེས་པ་སྟེ། དེ་ཡང་དཀྱིལ་འཁོར་གྱི་དབུས་སུ་བཅོམ་ལྡན་འདས་རྣམ་པར་སྣང་མཛད་བཞུགས་པ་དེ་བཞིན་གཤེགས་པའི་སྐུ་ལས་གྱུར་པའི་ལྷ་རྣམས་ཀྱིས་བསྐོར་ཞིང་བཞུགས་པར་བྱ་བ་བསྟན་པའོ། །དེས་ན་དེ་བཞིན་གཤེགས་པའི་མོས་པ་ལས་བྱུང་བ་ཆོས་ཀྱི་དབྱིངས་རྟོགས་པའི་མཚན་མས་བཏབ་ཅེས་པ་ནི། པདྨོའི་རྒྱལ་པོ་དེའི་བྱེ་བྲག་སྟེ་དེ་བཞིན་གཤེགས་པའི་མོས་པ་ལས་འབྱུང་བ་ནི་སྔར་བཤད་པ་བཞིན་ནོ། །ཆོས་ཀྱི་དབྱིངས་
རྟོགས་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་དག་པ་ལ་བྱ་སྟེ་དེའི་མཚན་མས་བཏབ་པ་ནི། ཡེ་ཤེས་དག་པ་དེའི་མཚན་མས་དཀར་བར་ཤེས་པར་བྱ་སྟེ། མདོར་ན་དེ་བཞིན་གཤེགས་པ་ཉིད་ཡེ་ཤེས་དག་པ་དེ་པདྨོ་ཆེན་པོའི་རྒྱལ་པོ་རྒྱལ་པོར་སྣང་བར་བྱིན་གྱིས་བརླབ་ཅེས་པའོ། །དེའི་དབུས་ན་དེ་བཞིན་གཤེགས་པའི་སྐུ་བཞུགས་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་ཆོས་ཀྱི་དབྱིངས་ཀྱི་མཚན་ཉིད་དེ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་འབྱུང་བར་བསྟན་པའོ། །ཆོས་ཀྱི་དབྱིངས་ལ་སྟོན་པ་ཞེས་པ་ནི་སྟོང་པ་ཉིད་ཀྱི་རང་བཞིན་དུ་གྱུར་པ་ཞེས་པའོ། །དེ་ལྟར་བཅོམ་ལྡན་འདས་སྟོང་པ་ཉིད་ཀྱི་རང་བཞིན་དུ་གྱུར་ཀྱང་ཕུང་པོ་ལྷག་མ་མ་ལུས་པའི་མྱ་ངན་ལས་འདས་བཞིན་པ་ནི་མ་ཡིན་གྱི། སྔོན་གྱི་སྨོན་ལམ་གྱི་ཤུགས་ཀྱིས་རྣམ་པར་མི་རྟོག་བཞིན་དུ་ཀུན་རྫོབ་ཀྱི་བྱ་བ་ཐམས་ཅད་འབྱུང་བར་བསྟན་པའོ། །སེམས་ཅན་རྣམས་ཀྱི་བསམ་པ་དང་དད་པ་ཇི་ལྟ་བ་བཞིན་དུ་མགུ་བར་བྱེད་པ་ཞེས་པའོ། །མི་ཚུགས་པའི་སྟོབས་དང་སྟོབས་བཅུའི་མོས་པ་ལས་འབྱུང་ཞེས་པ་ནི་བཅོམ་ལྡན་འདས་ཀྱི་སྐུ་ལས་འབྱུང་བའི་སྐུ་དེ་རྣམས་ཀྱི་མཐུས་ཅིས་ཀྱང་མི་ཚུགས་པ་ཤ་སྟག་སྟེ། དེ་ཡང་བཅོམ་ལྡན་འདས་ཉིད་ཀྱི་རྒྱུ་དེའི་ཚེ་ཀུན་དུ་སངས་རྒྱས་པའི་མཚན་ཉིད་སྟོབས་བཅུ་ལ་མོས་པ་བསྐྱེད་པ་དེ་ནི་འབྲས་བུ་སྟོབས་བཅུ་རྫོགས་པར་འགྱུར་བ་ལས་བྱུང་བ་ཞེས་པའོ། །ཁ་དོག་དང་དབྱིབས་སུ་སྣ་ཚོགས་དུ་མར་ལྡན་པའི་བདག་ཉིད་ཀྱི་ངོ་བོ་ཞེས་པ་ནི་སྐུ་མང་པོ་འབྱུང་བ་དག་གི་ཁྱད་པར་ཏེ། དེ་དག་གི་ཁ་དོག་དང་གཟུགས་སྣ་ཚོགས་སུ་བཅས་པ་ཞེས་པའོ། །སྐུ་མང་པོ་དེ་རྣམས་ཀྱང་བཅོམ་ལྡན་འདས་ཉིད་བྱང་ཆུབ་སེམས་དཔའི་སྤྱད་པ་སྤྱོད་ཚེ་བསྐལ་པ་གྲངས་མེད་པར་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་ལ་སོགས་པའི་བསོད་ནམས་ཀྱི་ཚོགས་བསགས་པའི་རྒྱུ་ལས་བྱུང་བ་བསྟན་པ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་ཞེས་པ་ལ་སོགས་པའོ། །དེ་བྱུང་ནས་འཇིག་རྟེན་པའི་ཁམས་ཐམས་ཅད་དུ་གླེང་བའི་ཚིག་འདི་སྐད་དུ་དབྱངས་གཅིག་གིས་ཀུན་དུ་བསྒོའོ་ཞེས་པ་དེ་ལྟར་གོང་དུ་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་ལག་མཐིལ་ལྟ་བུ་མཉམ་པ་ལ་སོགས་པ་དངོས་སུ་སྣང་བར་ཆུད་པའི་ཆོས་རྣམས་བསྟན་པ་དེ་ཉིད་གཞུང་གི་ཆོས་སུ་
འོག་ནས་འབྱུང་བའི་ཚིགས་སུ་བཅད་པ་རྣམས་ཀྱི་ཚིག་གིས་བསྟན་པ་སྟེ་དེ་ཡང༌། ཨེ་མའོ་སངས་རྒྱས་ཀུན་གྱི་ནི། །ཞེས་པ་ནས། མགོན་པོ་ཀུན་གྱིས་གང་རྙེད་པའོ། །ཞེས་པའི་བར་དུའོ། །དེ་ལ་ཨེ་མའོ་ཞེས་པ་ནི་ངོ་མཚར་དུ་གྱུར་པའོ། །སངས་རྒྱས་ཀུན་གྱི་ནི་ཤེས་རབ་དང་ཐབས་རྣམས་བསམ་གྱིས་མི་ཁྱབ་པ་ཞེས་པ་དང་སྦྱར་ཏེ་ཤེས་རབ་ནི་ཆོས་ཐམས་ཅད་བདག་མེད་པར་ཆུད་པའི་རང་བཞིན་ནོ། །ཐབས་དེ་ནི་དེ་ལྟར་ཆོས་ཐམས་ཅད་སྟོང་པར་ཆུད་ཀྱང་སེམས་ཅན་གྱི་དོན་དུ་དངོས་པོ་རྣམ་པ་སྣ་ཚོགས་ཡོད་པར་སྟོན་ཏེ། དེ་དག་ངོ་མཚར་ཆེ་སྟེ་བསམ་གྱིས་མི་ཁྱབ་ཅེས་པའོ། །ཚིག་དེ་དག་གྲོལ་བར་གསུངས་པ། གནས་མེད་པ་རུ་ཤེས་ནས་སུ། །གནས་དང་བཅས་པའི་ཆོས་རྣམས་འཆད། །ཅེས་པ་སྟེ་གནས་མེད་པར་ནི་ཤེས་ནས་ཞེས་པ་ནི་ཤེས་རབ་ཀྱིས་ཆོས་ཐམས་ཅད་གཟུང་བ་དང་འཛིན་པའི་གནས་མེད་དེ་སྟོང་པ་ཉིད་དུ་ཤེས་ཞེས་པའོ། །གནས་དང་བཅས་པའི་ཆོས་རྣམས་འཆད། །ཅེས་པ་ནི་དེ་ལྟར་ཤེས་རབ་ཀྱིས་ཆོས་ཐམས་ཅད་དངོས་པོ་མེད་པར་ཆུད་ཀྱང་ཐབས་ཀྱིས་སེམས་ཅན་རྣམས་ལ་ཕན་གདགས་པའི་ཕྱིར་གཟུང་བ་དང་འཛིན་པའི་གནས་ལ་སོགས་པའི་ཆོས་རྣམས་དངོས་པོ་ཡོད་པར་སྣང་བ་དངོས་སུ་སྟོན་ཞེས་པའོ། །མི་ཤེས་པ་ནི་གང་ཤེས་པ། །ཆོས་རྣམས་ཆོས་ཀྱི་མཚན་ཉིད་དེ། །ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་ཀྱི་མཚན་ཉིད་གང་གིས་མི་དམིགས་པར་ཤེས་ཞེས་པའོ། །དེས་ནི་རྙེད་པ་འཐོབ་འགྱུར་བ། །མགོན་པོ་ཀུན་གྱིས་གང་རྙེད་པ། །ཞེས་པའོ། །དེ་ལྟར་ཆོས་རྣམས་དམིགས་སུ་མེད་པར་གང་གིས་ཆུད་པ་དེ་མགོན་པོ་སངས་རྒྱས་བཅོམ་ལྡན་འདས་ཀྱིས་འཐོབ་པ་སངས་རྒྱས་ཀྱི་འབྲས་བུ་ཐོབ་པར་འགྱུར་ཞེས་པ་སྟེ། མདོར་ན་ཆོས་རྣམས་སྟོང་པ་ཉིད་དུ་ཆུད་པ་དེ་སངས་རྒྱས་པར་འགྱུར་རོ་ཞེས་བསྟན་པའོ། །གླེང་བའི་ཚིག་དེ་སྐད་ཅེས་སྨྲས་ནས། སྐུ་དེ་དག་སླར་དེ་བཞིན་གཤེགས་པའི་ཆོས་ཀྱི་སྐུ་བསམ་གྱིས་མི་ཁྱབ་པ་ལ་བཞུགས་སོ་ཞེས་པ་ནི་དེ་དག་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་དུ་འགྱུར་ཏེ་མི་སྣང་བར་འགྱུར་བའོ། །དེ་ལྟར་གསང་བའི་དཀྱིལ་འཁོར་བྲི་བའི་ཐབས་བཅོམ་ལྡན་འདས་ཀྱིས་
སྔར་བསྟན་ནས། ད་ནི་གསང་བའི་དཀྱིལ་འཁོར་ཉིད་བྲི་བའི་ཐབས་བཤད་དེ། དེ་ཡང་དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་ལ་བཀའ་སྩལ་པ། རིགས་ཀྱི་བུ་ནང་གི་དཀྱིལ་འཁོར་དེ་ཉོན་ཅིག་ཅེས་པ་ལ་སོགས་ཏེ་འདིར་ཡང་སློབ་མ་ལྷག་པར་གནས་པ་དེ་ཉིད་ཀྱི་ནུབ་མོ་བྱ་བ་ཤེས་པར་བྱའོ། །དེའི་རིམ་པ་ཡང་དེ་ལ་ཐོག་མར་སློབ་དཔོན་གྱིས་མཆོད་པའི་ཡོ་བྱད་འདི་དག་ལ་སོགས་པ་ཉིད་གཞུང་ལས་འབྱུང་བ་བཞིན་དུ་སྟ་གོན་བྱས་ནས་སློབ་མ་རྣམས་ཀྱང་བསོགས་ཏེ། ཕྱི་རོལ་དུ་བཀོད་ལ་དེ་ནས་སློབ་དཔོན་དེ་དཀྱིལ་འཁོར་གྱི་གནས་སུ་ཞུགས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ནས་དམ་ཚིག་གི་ཕྱག་རྒྱ་བཅིངས་ཏེ། མདུན་དུ་རང་བཞིན་གྱི་དཀྱིལ་འཁོར་སྙིང་རྗེ་ཆེན་པོའི་དཀྱིལ་འཁོར་དུ་བསྟན་པ་རང་བཞིན་དུ་སོ་སོའི་སྔགས་འབྲུ་རེའམ་སྤྱིའི་སྙིང་པོ་དེར་བསམས་ཏེ། དེ་ནས་བདག་ཉིད་ཆོས་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབ་པ་དང་ཆོས་ཀྱི་འཁོར་ལོ་བསྐོར་བའི་སྔགས་དང་ཕྱག་རྒྱས་རྡོ་རྗེ་སེམས་དཔར་བྱིན་གྱིས་བརླབ་པ་དང༌། རྡོ་རྗེ་གོ་ཆའི་ཕྱག་རྒྱ་དང་སྔགས་ཀྱིས་བསྲུང་བར་བྱ་སྟེ། དེ་ནས་ལས་ཀྱི་རྡོ་རྗེར་བསྒྱུར་ཏེ་དེ་རྣམས་ལ་དམ་ཚིག་གི་ཕྱག་རྒྱ་བསྟན་ཏོ། །ཡོན་ཆབ་དབུལ་བ་དང་དྲི་དང་མེ་ཏོག་ལ་སོགས་པའི་མཆོད་པ་རྣམས་སོ་སོའི་སྔགས་ཀྱིས་བཏབ་སྟེ་དབུལ་བ་དང་ཡིད་ཀྱི་མཆོད་པ་ཡང་བྱའོ། །དེ་ལྟར་ཕྱི་ནང་གི་མཆོད་པ་ལ་སོགས་པ་བྱས་ནས་སློབ་དཔོན་དེའི་ཕྱིར་བྱུང་ལ་སློབ་མ་རྣམས་ལ་དྲི་དང་མེ་ཏོག་བྱིན་ཏེ། ལས་ཐམས་ཅད་པའི་སྔགས་ཀྱིས་བསྲུང་བར་བྱ་བ་དང་ལས་ཐམས་ཅད་པའི་སྔགས་ཀྱིས་བཏབ་པའི་སྐུད་པ་དཔུང་པར་བཅིང་བ་དང་སོ་ཤིང་སྦྱིན་པ་རྣམས་བྱས་ཏེ། དེ་ནས་སྡིག་པ་བཤགས་པ་དང༌། ལུས་དབུལ་བ་དང༌། སྡོམ་པ་འཛིན་དུ་གཞུག་སྟེ། དེ་དག་ནི་ལྷག་པར་གནས་པའི་ཆོ་གའོ། །དཀྱིལ་འཁོར་དུ་གཞུག་པའི་ཆོ་ག་ཡང་གྲོགས་པོ་བསྒྲུབ་པའི་ཕྱི་མ་ཡོད་ན་ཡང་དེས་རིམ་བཞིན་དུ་བྱ་སྟེ། མེད་ན་སློབ་དཔོན་གྱིས་དེ་ཉིད་དུ་སློབ་མ་དམ་ཚིག་གི་ཕྱག་རྒྱ་འཆིང་དུ་གཞུག་པ་དང་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབ་པ་དང༌། ཆོས་ཀྱི་འཁོར་ལོའི་ཕྱག་
རྒྱ་དང་སྔགས་ཀྱིས་བྱིན་གྱིས་བརླབ་པ་དང༌། བྱང་ཆུབ་ཏུ་སེམས་བསྐྱེད་པ་ལ་སོགས་པ་རིམ་བཞིན་དུ་བྱ་སྟེ། དེ་ནས་སློབ་དཔོན་དེས་སླར་མཆོད་པའི་གནས་སུ་ཞུགས་ཏེ། སེམས་མཉམ་པར་གཞག་ལ་སྙིང་གར་ཟླ་བའི་དཀྱིལ་འཁོར་གྱི་སྟེང་དུ། ཡི་གེ་ར་ཁ་དོག་དཀར་པོ་ཡིད་ཙམ་དམར་བ་བསམས་ཏེ། ཡི་གེ་དེའི་སྒྲའི་ཁ་དེ་ཁོ་ན་ཉིད་ཆོས་ཐམས་ཅད་རྡུལ་དང་བྲལ་བ་བསྒོམ་པ་ནི། བདག་གི་ལུས་ཉིད་རྡུལ་ལ་སོགས་པའི་ཚུལ་དུ་བཤིགས་ཏེ། རྡུལ་ཕྲན་དེ་ཡང་ཕྱོགས་དང་ཆ་ཕྲལ་ན་དམིགས་སུ་མེད། དེ་བཞིན་དུ་རྣམ་པར་ཤེས་པ་ལ་སོགས་པ་དངོས་པོ་མེད་པར་བསྒོམས་ཏེ། ཟླ་བའི་དཀྱིལ་འཁོར་དང་ཡི་གེ་ར་ཡང་སྟོང་པར་བསམས་ཏེ་ཐ་མར་སྒྲའི་དེ་ཁོ་ན་ཉིད་དེ་ཡང་དམིགས་སུ་མེད་པར་བསྒོམས་ཏེ་སྟོང་པ་ཉིད་དུ་ཇི་སྲིད་འདོད་པར་གནས་ཏེ། དེའི་འོག་ཏུ་ཐོག་མར་རླུང་གི་དཀྱིལ་འཁོར་དེ་ནས་ཆུའི་དཀྱིལ་འཁོར་དེ་ནས་གསེར་གྱི་དཀྱིལ་འཁོར་བསམས་ཏེ། གསེར་གྱི་དཀྱིལ་འཁོར་དེའི་སྟེང་དུ་བདག་གི་ལུས་ལྟེ་བ་མན་ཆད་ཀྱང་གསེར་གྱི་དཀྱིལ་འཁོར་གྲུ་བཞི་པར་བསམས་ཏེ། དེའི་སྟེང་དུ་པདྨོ་རྩ་བ་དང་བཅས་པ་སྙིང་གའི་བར་དུ་ཕྱིན་པར་བསམས་ཏེ། དེའི་དབུས་ན་བཅོམ་ལྡན་འདས་རྣམ་པར་སྣང་མཛད་བཞུགས་ཏེ། དེའི་ཤར་ཕྱོགས་ཀྱི་པདྨོའི་འདབ་མ་ལ་རིན་པོ་ཆེ་དཔལ་དེ་བཞིན་གཤེགས་པ། ལྷོ་ཕྱོགས་ཀྱི་འདབ་མ་ལ་ཀུན་དུ་རྒྱས་པའི་དབང་པོ་ཞེས་བྱ་བ་དེ་བཞིན་གཤེགས་པ། ནུབ་ཕྱོགས་ཀྱི་འདབ་མ་ལ་སྣང་བ་མཐའ་ཡས་དེ་བཞིན་གཤེགས་པ། བྱང་ཕྱོགས་ཀྱི་འདབ་མ་ལ་རྔ་དབྱངས་དེ་བཞིན་གཤེགས་པ་བསམ་མོ། །ཤར་ལྷོའི་འདབ་མ་ལ་ཀུན་དུ་བཟང་པོ་བྱང་ཆུབ་སེམས་དཔའ། བྱང་ཤར་གྱི་འདབ་མ་ལ་སྤྱན་རས་གཟིགས་ཀྱི་དབང་པོ། ལྷོ་ནུབ་ཀྱི་འདབ་མ་ལ་འཇམ་དཔལ་གཞོན་ནུར་གྱུར་པ། ནུབ་བྱང་གི་འདབ་མ་ལ་བྱམས་པ་བྱང་ཆུབ་སེམས་དཔའ་བསམས་ཏེ། བཅོམ་ལྡན་འདས་རྣམ་པར་སྣང་མཛད་ལ་སོགས་པ་བྱང་ཆུབ་སེམས་དཔའ་དེ་རྣམས་ཀྱང་མེ་ཏོག་དོར་བ་ལ་བདེ་བའི་ཕྱིར། དེ་རྣམས་ཀུན་གྱི་སྐུ་བདག་གི །ཀླད་པའི་བར་དུ་ཕྱིན་པར་བསམ། །པདྨོའི་གེ་སར་ཀུན་ལ་ནི་བྱང་ཆུབ་སེམས་དཔའ་རྣམས་ཀྱི་ཡུམ་རྣམས་དང༌། ས་བཅུ་དང་ཕ་རོལ་ཏུ་ཕྱིན་པ་དྲུག་
དང་ཏིང་ངེ་འཛིན་རྣམས་ལྷ་མོའི་གཟུགས་སུ་བསམ་མོ། །པདྨོའི་རྩ་བ་ལ་ཕྱག་ན་རྡོ་རྗེ་བྱང་ཆུབ་སེམས་དཔའ་བསམ་མོ། །དེའི་དྲུང་གཡས་གཡོན་དུ་སྤྱན་རས་གཟིགས་ཀྱི་དབང་པོ་འཁོར་རྣམས་དང༌། ཕྱག་ན་རྡོ་རྗེའི་རིག་པ་ཁྲོ་བོ་རྣམས་དང༌། སྐྱོང་བ་དང་ཁྲོ་གཉེར་ལ་སོགས་པ་རིམ་བཞིན་དུ་བསམ་མོ། །དེའི་ཕྱི་རིམ་དུ་ལྷ་དང་ཀླུ་ལ་སོགས་པ་མང་པོ་བསམས་ཏེ། དེ་ལྟར་བརྟན་པར་བྱས་ནས་ཡིད་ཀྱིས་མཆོད་པ་ཚུལ་བཞིན་དུ་བྱའོ། །དེ་ནས་དེ་དག་ཀུན་ཟིན་པ་དང་སེ་གོལ་བརྡབ་པར་བྱ་སྟེ། སློབ་མ་རྣམས་མགོན་པོ་ལ་མེ་ཏོག་འདོར་དུ་གཞུག་གོ །མེ་ཏོག་དེ་དག་ཀྱང་ཡིད་ལ་བསམས་པའི་ལྷ་གང་གི་སྟེང་དུ་བབ་པ་དེ་སློབ་མ་དེ་ལ་སྦྱིན་པར་བྱའོ། །དེ་དག་ནི་བསྡུ་བའི་དོན་དུ་ཚིག་གི་དོན་ལ་གསང་བའི་བདག་པོ་དེ་ནི་རང་བཞིན་གྱིས་རྣམ་པར་དག་པའི་ཕྱིར་ལུས་ཀྱིས་གང་བ་དེ་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་སྔགས་དང་ཕྱག་རྒྱའི་བྱིན་གྱི་རླབས་ཀྱིས་བྱིན་གྱིས་རློབས་ཤིག་ཅེས་པ་ནི་མཆོད་པ་ལ་སོགས་པ་སྔར་སྨོས་པའི་རིམ་བཞིན་དུ་བྱས་ནས། བདག་གི་ལུས་ལ་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབས་པ་སྟོང་པ་ཉིད་དུ་བྱོས་ཤིག་ཅེས་པའོ། །དེ་ནས་བདག་ལས་ཀྱི་ལྷ་རྡོ་རྗེ་སེམས་དཔར་བྱིན་གྱིས་བརླབས་ལ་ཞེས་པ་ནི། སྔ་མའི་རིམ་བཞིན་དུ་ཆོས་ཀྱི་འཁོར་ལོའི་ཕྱག་རྒྱས་བྱིན་གྱིས་བརླབ་པ་དག་བྱས་ནས་ལས་ཀྱི་རྡོ་རྗེ་སེམས་དཔར་བསྒྱུར་ཏེ། མཆོད་པ་དང་སློབ་མའི་ཆོ་ག་བྱ་བ་ལ་སོགས་པ་ཐམས་ཅད་གོང་དུ་སྨོས་པའི་རིམ་བཞིན་དུ་བྱའོ། །རྡུལ་དང་ཞེས་པ་ནི་དེ་ནས་སླར་བདག་ནང་དུ་ཞུགས་ནས་ཡི་གེར་སྙིང་གར་བསམས་ཏེ། ཆོས་ཐམས་ཅད་རྡུལ་དང་བྲལ་བའི་བར་བསྒོམ་པའི་རིམ་པ་སྔ་མ་བཞིན་དུ་བྱའོ། །བདག་དང་སེམས་ཅན་དང་སྲོག་དང་འགྲོ་བ་དང་ཤེད་ལས་སྐྱེས་དང་ཤེད་ཅན་དང༌། བྱེད་པ་པོ་ལ་སོགས་པའི་ཉེས་པ་དང༌། ཟུག་རྡུར་བྲལ་ཞེས་པ་ནི་མུ་སྟེགས་གཞན་རྣམས་ཀྱི་བདག་ལ་སོགས་པའི་དངོས་པོ་དེ་རྣམས་ཀྱང་དམིགས་སུ་མེད་པར་སྒོམ་ཞེས་པ་སྟེ། དེ་དག་ནི་ཇི་ལྟར་ཕྱི་རོལ་གྱི་དཀྱིལ་འཁོར་གྱིས་སྦྱང་བ་རྡོ་ཤིང་ལ་སོགས་པའི་ཟུག་རྡུ་དང་ཉེས་པ་བསལ་བ་བཞིན་དུ་གང་གིས་སྦྱང་བ་ཡང་ཐབས་ཇི་ལྟར་སྦྱང་ངོ་ཞེས་བཤད་པའོ། །གྲུ་བཞི་སྒོ་བཞི་ལས་ནུབ་ཕྱོགས་ཀྱི་སྒོ་རྟག་
པར་ཕྱེ་བ་སྒོ་ཁྱུད་དང་སྟེགས་བུ་རབ་ཏུ་བརྒྱན་པ་ཞེས་པ་དེ་ནི་དེ་ལྟར་སྟོང་པ་ཉིད་ལ་སོགས་པའི་ཏིང་ངེ་འཛིན་བྱས་ལ། དེ་ནས་རླུང་དང་ཆུའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསམས་ཏེ། དེའི་སྟེང་དུ་དབང་ཆེན་གྱི་དཀྱིལ་འཁོར་གྱི་སྟེང་དུ་བདག་གི་རྐེད་པ་མན་ཆད་འགྱུར་བར་བསམས་ཏེ། སྟེགས་བུ་ཞེས་པ་ནི་དབུས་ཀྱི་གཞིའི་གདན་དེ་ཉིད་ལ་བྱ་སྟེ་དེ་ཡང་གསེར་གྱི་ཁ་དོག་ཏུ་བསམ་མོ། །དབུས་ན་ཡིད་བཞིན་གྱི་པདྨོའི་རྒྱལ་པོ་ཆེན་པོ་དང༌། གེ་སར་རྒྱས་པ་དང་བཅས་ཤིང་ཤིན་ཏུ་རྣམ་པར་བརྒྱན་པ་ཡིད་ཀྱིས་ཞེས་པ་ནི་ཡིད་ལས་བྱུང་བའི་པདྨོ་ཞེས་པ་སྟེ་སྔར་བཤད་ཟིན་ཏོ། །ཤིན་ཏུ་རྣམ་པར་བརྒྱན་པའི་ཡིད་ལ་ཞེས་པ་ནི། འདབ་མ་བརྒྱད་ལ་སངས་རྒྱས་བཞི་དང་བྱང་ཆུབ་སེམས་དཔའ་བཞི་རྣམས་ཀྱི་ཁ་དོག་ཅི་འདྲ་བ་དང་མཐུན་པར་ཁ་དོག་སྣ་ཚོགས་སུ་བྱ་བ་སྟེ། རིན་ཆེན་རྒྱལ་མཚན་གྱི་ཁ་དོག་དཀར་པོ། ཀུན་དུ་རྒྱས་པའི་རྒྱལ་པོའི་ཁ་དོག་སེར་པོ། རྔ་དབྱངས་ཀྱི་ཁ་དོག་སྨུག་ནག །སྣང་བ་མཐའ་ཡས་ཀྱི་ཁ་དོག་དམར་པོ། དེ་བཞིན་དུ་ཀུན་དུ་བཟང་པོ་ནི་སེར་པོ། སྤྱན་རས་གཟིགས་ཀྱི་དབང་པོ་ནི་དཀར་པོ། འཇམ་དཔལ་གཞོན་ནུར་གྱུར་པ་ནི་སེར་པོ། བྱམས་པ་ནི་དམར་པོ་བྱའོ། །ཡང་ན་ཐམས་ཅད་ཀྱང་ཁ་དོག་ཐམས་ཅད་དོ་ཞེས་པ་དང་སྦྱར་ཏེ་ཆད་པ་མེད་པར་ཤེས་པར་བྱའོ། །དེའི་དབུས་སུ་ཡང་ལུས་དང་ངག་ཡིད་འཇིག་རྟེན་ཐམས་ཅད་ལས་འདས་པའི་དེ་བཞིན་གཤེགས་པའི་སྐུ་ཞེས་པ་ནི། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་པདྨོའི་དབུས་སུ་བསམ་པ་སྟེ་མཆོག་ཏུ་བཟང་བ་འཇིག་རྟེན་ཐམས་ཅད་ལས་འདས་པ་ཞེས་པའོ། །སེམས་ཀྱི་ས་ལས་འདས་ཞེས་པ་ནི་གཟུང་བ་དང་འཛིན་པའི་ཆ་སེམས་ཀྱི་ཡུལ་སྤངས་པ་ཞེས་པའོ། །སེམས་ཀྱིས་ཤིན་ཏུ་ཐོབ་ཅེས་པ་ནི་སྟོང་པ་ཉིད་ཀྱི་མཚན་ཉིད་དེ་སོ་སོར་རང་གིས་རིག་པ་ཐོབ་པ་ཞེས་པ་སྟེ། དེས་ནི་རང་གི་དོན་ཕུན་སུམ་ཚོགས་པ་བསྟན་པའོ། །འབྲས་བུ་དམ་པ་ཡིད་དུ་འོང་བ་སྦྱིན་པ་ཞེས་པ་ནི་ཕ་རོལ་གྱི་དོན་ཕུན་སུམ་ཚོགས་པ་བསྟན་པ་སྟེ་སེམས་ཅན་རྣམས་ལ་མཐོ་རིས་དང་མྱ་ངན་ལས་འདས་པའི་འབྲས་བུ་རྣམས་སྦྱིན་ཞེས་པའོ། །དེའི་ཤར་དུ་ཞེས་པ་ནི་དེའི་དྲུང་དུ་རིག་པ་དང༌། ཁྲོ་བོ་རྣམས་ཞེས་པའི་བར་དུ་
སངས་རྒྱས་དང་བྱང་ཆུབ་སེམས་དཔའ་རྣམས་པདྨོའི་འདབ་མ་དང་གེ་སར་དག་ལ་བསམ་པ་སྔར་སྨོས་པའི་རིམ་བཞིན་དུ་བྱའོ། །གཞན་ནི་མཚོ་ཆེན་པོར་ཞེས་པའི་བར་དུ་དཀྱིལ་འཁོར་དེའི་འོག་ཏུ་ཆུའི་དཀྱིལ་འཁོར་རྒྱ་མཚོ་བསམ་ཞེས་པའོ། །མར་མེ་དང༌། དྲི་དང༌། མེ་ཏོག་དང། བཤོས་དང་བདུག་པ་ཡིད་དུ་འོང་བ་རྣམས་སྔགས་པས་ཀུན་བསམ་ཞེས་པ་ནི། ཡིད་ཀྱིས་དྲི་དང་མེ་ཏོག་ལ་སོགས་པ་དེ་དག་ཐམས་ཅད་སྔགས་པས་བསམ་ཞེས་པའོ། །སེམས་ཅན་ཀུན་གྱི་དམ་ཚིག་ཕྱིར། །ཞེས་པ་ནི་དཀྱིལ་འཁོར་དེ་སེམས་ཅན་རྣམས་དམ་ཚིག་ལ་ཞུགས་པའི་ཕྱིར། གཟུགས་བརྙན་གྱི་དཀྱིལ་འཁོར་རྣམས་རྫོགས་པ་རྒྱས་པར་བྲི་མི་ནུས་ཤིང་ཟབ་ཅིང་རྒྱ་ཆེ་བ་ལ་མོས་པས་དཀྱིལ་འཁོར་འདི་བྱ་ཞེས་པའོ། །དྲུང་གི་ས་གཞི་ཀུན་དུ་ནི། །ལྷ་རྣམས་གྲངས་མེད་པ་ཡང་ནི། །སྔགས་མཁན་གྱིས་ནི་ནན་ཏན་བྲི། །དཀྱིལ་འཁོར་མཐུ་ཆེན་འདི་རུ་སྟེ། །ཞེས་པ་ནི་བཅོམ་ལྡན་འདས་མཐུ་ཆེན་པོ་དཀྱིལ་འཁོར་འདིའི་དབུས་ཀྱི་སྟེགས་བུའི་འོག་ཕྱི་རིམ་གྱི་ས་གཞི་ཐམས་ཅད་དུ་ལྷ་དང་ཀླུ་ལ་སོགས་པ་གྲངས་མེད་པ་བྲི་ཞེས་པའོ། །རང་ལུས་རང་གིས་བྱ་བ་ནི། །རས་ཀྱི་རྣམ་པ་སྦྱངས་ནས་སུ། །སྔགས་པ་སྦྱར་སྟན་དེར་འདུག་ནས། །དེ་བཞིན་གཤེགས་རྣམས་རྗེས་མོས་པས། །ཞེས་པ་ནི་སྦྱོར་བ་དེ་རྣམས་བྱ་བ་ཡང་བདག་ཉིད་ཡི་གེ་རཾ་སྙིང་པོ་ཉིད་དུ་སྦྱང་བ་ལ་སོགས་པ་གོང་དུ་སྨོས་པའི་ཚུལ་བཞིན་དུ་བྱས་ནས་གདོད་ལས་ནི་འདི་རྣམས་བྱ་ཞེས་པའོ། །སློབ་མ་རྣམས་ཀྱི་སྤྱི་བོ་རུ། །ཨ་ནི་འཁོར་དང་བཅས་ཏེ་གཞག །ཅེས་པ་ནི་སློབ་མ་དཀྱིལ་འཁོར་དུ་འཇུག་པའི་ཚེ་ཆོས་ཀྱི་དབྱིངས་སུ་བྱིན་གྱིས་བརླབ་པ་ལ་སོགས་པ་བྱས་ནས་དེ་དག་བརྟན་པར་བྱ་བའི་ཕྱིར། ཀུན་དུ་སངས་རྒྱས་པའི་སྙིང་པོ་ཨོཾ་སྤྱི་བོར་བསམ་ཞེས་པའོ། །དེ་ནས་མེ་ཏོག་འདོར་དུ་གཞུག །ཅེས་པ་ནས། རིག་པ་ཡང་ནི་དེ་ལ་བྱིན། །ཞེས་པའི་བར་དུ་སློབ་མ་རྣམས་བདག་གི་ལུས་ལ་མེ་ཏོག་བོར་ནས་གང་ལ་བབ་པའི་རིག་པ་དེ་སྦྱིན་པའོ། །དེ་ལ་བསྒོམ་པར་ཞེས་པའི་དཀྱིལ་འཁོར་བར་ཞེས་པ་ནི་དཀྱིལ་འཁོར་གྱི་ཚུལ་རྣམས་སློབ་མ་ལ་བསྟན་པའོ། །འདི་ནི་དཀྱིལ་འཁོར་དམ་པ་སྟེ། །ཞེས་པ་ནི་
སྟོང་པ་ཉིད་ཀྱི་ཏིང་ངེ་འཛིན་བསྒོམས་པ་ལས་བྱུང་བའི་ཕ་རོལ་གྱི་མཚན་མ་རྣམས་ལ་མི་རྟོག་པས་དམ་པ་ཞེས་པའོ། །ལུས་ཅན་རྣམས་ཀྱི་དམ་ཚིག་ཕྱི་རུ་གསུངས། །ཞེས་པ་ནི་དཀྱིལ་འཁོར་འདི་དམ་ཚིག་ཅན་དུ་བྱ་བའི་ཕྱིར་རོ་ཞེས་པ་སྔར་བཤད་པ་བཞིན་ནོ། །གསང་བའི་དཀྱིལ་འཁོར་དུ་འཇུག་པའི་ཐབས་ཞེས་པ་ནི་མགོན་ན་གོང་མའི་ནང་དུ་བཤད་ཟིན་ཏོ།། །།ད་ནི་རིག་པའི་དཀའ་ཐུབ་ཀྱི་ལེའུ་འཆད་དེ། རིག་པ་ཞེས་བྱ་བ་ནི་ཡང་དག་པ་ཉིད་དོན་ཇི་ལྟ་བ་བཞིན་བ་ཉིད་རིག་པས་ན་དེ་བཞིན་ཉིད་ཀྱི་ཡེ་ཤེས་དང༌། དེ་ལས་བྱུང་བའི་སྔགས་དང་ཕྱག་རྒྱ་ལ་ཡང་བྱ་སྟེ། དེའི་དཀའ་ཐུབ་ནི་དེ་དང་རྗེས་སུ་མཐུན་པར་སྤྱོད་པ་སྟེ། ཇི་ལྟར་བཅོམ་ལྡན་འདས་ཤཱཀྱ་ཐུབ་པ་དང་རྗེས་སུ་མཐུན་པའི་སྤྱོད་པ་སྐྲ་དང་ཁ་སྤུ་བྲེགས་པ་དང་ཆོས་གོས་བགོ་བ་ལ་སོགས་པ་དགེ་སློང་གི་གཟུགས་སུ་སྤྱོད་པ་དང༌། འཇིག་རྟེན་པ་རྣམས་ཀྱི་ཡང་ལྷ་ཆེན་པོ་ལ་དད་པ་ལ་སོགས་པ་ཉིད་ཀྱི་སྤྱོད་པ་དང༌། ཚུལ་འཇིག་རྟེན་དུ་རིག་པའི་བརྟུལ་ཞུགས་འདི་ཡང་བདག་ཉིད་ཀྱི་ལྷའི་གཟུགས་ཅི་འདྲ་བ་དང༌། རྗེས་སུ་མཐུན་པར་སྤྱོད་པ་དང་ཏིང་ངེ་འཛིན་སྟོང་པ་ཉིད་ཀྱི་རང་བཞིན་དང་རྗེས་སུ་མཐུན་པར་སྤྱོད་པ་དང༌། ཏིང་ངེ་འཛིན་ལས་ལངས་ནས་ཀྱང་ཆོས་ཐམས་ཅད་སྒྱུ་མ་ལྟ་བུའི་རང་བཞིན་རྟོགས་པ་དང༌། རྗེས་སུ་སྤྱོད་པར་མཐུན་པར་སྤྱོད་པ་དང༌། དེའི་སྔགས་སློབ་པར་བྱེད་པ་རྣམས་ཏེ་ཡན་ལག་དེ་བཞི་དང་ལྡན་པ་ནི་རིག་པའི་བརྟུལ་ཞུགས་ཞེས་པའོ། །དེ་ལ་ཁ་ཅིག་ནི་བརྟུལ་ཞུགས་འདི་སྤྱོད་ཅིང་སྔོན་དུ་བསྙེན་པའི་གྲངས་སུམ་འབུམ་ལ་སོགས་པ་ཇི་སྐད་དུ་གཞུང་ལས་འབྱུང་བ་བཞིན་དུ་བྱས་ནས་སྒྲུབ་པ་ལ་འཇུག་པར་བྱའོ། །དེ་སྟེ་དེ་བས་ཀྱང་ལྷག་པར་བསྟན་པར་འདོད་པས། དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང༌། ཟླ་བ་དྲུག་ཏུ་རིག་པའི་བརྟུལ་ཞུགས་སྤྱོད་པར་ཤེས་པར་བྱ་སྟེ། དེ་བས་ན་བརྟུལ་ཞུགས་འདི་ནི་དབང་ཆེན་ལ་སོགས་པ་ལ་གནས། བརྟུལ་ཞུགས་ཀྱི་རྒྱུ་ལྟ་བུར་བལྟས་ཏེ་རིག་པའི་བརྟུལ་ཞུགས་འདི་ལས་བྱུང་བའི་དབང་ཆེན་ལ་སོགས་པའི་དཀྱིལ་འཁོར་ལ་གནས་པའི་བརྟུལ་ཞུགས་ནི་བརྟུལ་ཞུགས་གོང་མ་འདི་ལས་བྱུང་བར་བལྟ་སྟེ། དེ་བས་ན་བརྟུལ་ཞུགས་འདིས་སྔར་སེམས་
ཡོངས་སུ་སྦྱངས་ནས་ཕྱིས་བརྟུལ་ཞུགས་འོག་མ་ལ་འཇུག་སྟེ་བརྟུལ་ཞུགས་འོག་མ་སྤྱོད་པ་དང༌། ལྷའི་གཟུགས་སུ་བསྐྱེད་པ་སྟོང་པ་ཉིད་ཀྱི་ཏིང་ངེ་འཛིན་ལ་གནས་པ་དང༌། ཏིང་ངེ་འཛིན་ལས་ལངས་ནས་སྤྱོད་པའི་ཚེ་ཡང་ཆོས་རྣམས་སྒྱུ་མ་ལྟ་བུར་རྟོགས་ཤིང་ཆགས་པར་སྤྱོད་པ་དང༌། སྔགས་སློབ་པར་བྱེད་པའི་རིམ་བཞིན་དུ་སྤྱད་པར་བྱ་སྟེ། ལྷག་པ་ནི་དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང་དེའི་རང་བཞིན་ལ་བྱ་བ་དང༌། དབང་ཆེན་ལ་སོགས་པ་སོ་སོའི་ཕྱག་རྒྱ་འཆིང་བའོ། །རིག་པའི་བརྟུལ་ཞུགས་དེ་དྲིས་པ་ཡང༌། དེ་ནས་བཅོམ་ལྡན་འདས་རྣམ་པར་སྣང་མཛད་ལ་ཕྱག་ན་རྡོ་རྗེས་ཚིགས་སུ་བཅད་པའི་དབྱངས་ཀྱིས་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་དོན་གྱི་ཕྱིར་རིག་པའི་དཀའ་ཐུབ་ཀུན་དྲིས་པ་ཞེས་པ་ལ་སོགས་པ་སྟེ། ཕྱག་ན་རྡོ་རྗེ་རིག་པའི་དཀའ་ཐུབ་དྲིས་པ་ཡང་དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང༌། རིག་པའི་དཀའ་ཐུབ་སྤྱོད་པ་དེ་གཙོར་དྲིས་པར་ཤེས་པར་བྱའོ། །ཚིགས་སུ་བཅད་པའི་དབྱངས་ཀྱིས་དྲིས་པ་ནི་དོན་དཀའ་ཞིང་ཞེས་པས་དོན་གྱི་ཚིག་དང་འབྲུ་རྣམས་མི་ཉམས་པར་བྱ་བའི་ཕྱིར་རོ། །སྔགས་ཀྱི་སྒོར་བྱང་ཆུབ་སེམས་དཔའི་སྤྱོད་པ་སྤྱོད་པ་རྣམས་ཀྱི་སྤྱིར་ཞེས་པ་ནི་ཕྱག་ན་རྡོ་རྗེ་ཉིད་དམིགས་མི་མཁྱེན་ཏེ། འདྲི་བ་མ་ཡིན་གྱི་མ་འོངས་པའི་འགྲོ་བ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་གདགས་པའི་ཕྱིར་ཞེས་པའོ། །འདི་ལྟར་དཀའ་ཐུབ་སྤྱད་པ་ལགས། །ཞེས་པ་ནས་རྒྱལ་པོ་གཙོ་ཉིད་དབང་དུ་ཞེས་པའི་བར་དུ་ཕྱག་ན་རྡོ་རྗེས་དྲིས་པའི་ཚིག་སྟེ། དེ་ལ་སྔོན་གྱི་སངས་རྒྱས་ཀྱིས་གསུངས་ཞེས་པ་ལས་འདི་ལྟར་སྔོན་གྱི་སངས་རྒྱས་ཀྱིས་ཟིན་ན་ད་དྲི་ཅི་དགོས་ཤེ་ན། བདག་ཉིད་སྔོན་གྱི་སངས་རྒྱས་ཀྱིས་བཤད་པས་དེའི་དོན་འཚལ་མོད་ཀྱིས། མ་འོངས་པའི་འགྲོ་བ་རྣམས་ཀྱི་དོན་དུ་བཤད་ན། བཅོམ་ལྡན་འདས་ཀྱིས་མངོན་སུམ་དུ་བསྟན་ན། དེ་རྣམས་ཡིད་ཆེས་པར་འགྱུར་བ་དང༌། བཅོམ་ལྡན་འདས་ཉིད་དུ་དབང་དུ་བགྱིས་པའི་ཕྱིར་ཞེས་པ་སྟེ་དེ་བས་ན་གསུངས་པ། མ་འོངས་པའི་འགྲོ་བ་རྣམས་ཀྱི་དོན་དུ་བཤད་དེ། རྒྱལ་བ་གཙོ་ཉིད་དབང་དུ་བྱ། །ཞེས་པའོ། །དྲིས་པའི་ཚིག་གཞན་རྣམས་ནི་
འོག་ནས་ལན་ལྡོན་པ་དང་སྦྱར་རོ། །རིག་པའི་དཀའ་ཐུབ་ལས་བྱུང་བའི། །དཀའ་ཐུབ་གནས་པ་སངས་རྒྱས་བཞིན། །ཞེས་པ་ནི། རིག་པའི་དཀའ་ཐུབ་ལས་བྱུང་བ། །ཞེས་པ་ནི་སེམས་སུ་སྦྱོར་བའི་མཚན་མ་ཉིད་ཡན་ལག་བཞི་དང་ལྡན་པའི་རིག་པའི་དཀའ་ཐུབ་དེ་ལས་བྱུང་བ་དབང་ཆེན་ལ་སོགས་པའི་དཀྱིལ་འཁོར་ལ་གནས་ཏེ་སྤྱོད་པ་དེ་བཤད་དོ་ཞེས་པ་དང་སྦྱར་རོ། །དཀའ་ཐུབ་གནས་པ་སངས་རྒྱས་བཞིན། །ཞེས་པ་ནི་ཇི་ལྟར་སངས་རྒྱས་བཅོམ་ལྡན་འདས་ཀུན་དུ་སངས་རྒྱས་པ་དོན་དམ་པར་ཡང་ཏིང་ངེ་འཛིན་ལ་ཞུགས་པའི་ཚེ་ཡང་ཆོས་ཐམས་ཅད་སྟོང་པ་ཉིད་དེ་མཚན་ཉིད་གཅིག་ཏུ་ཆུད། ཀུན་རྫོབ་ཏུ་སྤྱོད་པའི་ཚེ་ཡང་ཆོས་རྣམས་སྒྱུ་མ་ལྟ་བུར་མཁྱེན་པས་ཇི་ལྟར་ཡང་མི་ཆགས་པར་སྤྱོད་པ་དེ་བཞིན་དུ་རིག་པའི་བརྟུལ་ཞུགས་ལ་གནས་པ་དེ་ཡང་ཏིང་ངེ་འཛིན་ལ་ཞུགས་པའི་ཚེ་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་གནས། ཏིང་ངེ་འཛིན་ལས་ལངས་ཏེ་སྤྱོད་པའི་ཚེ་ཡང་ཆོས་རྣམས་སྒྱུ་མ་ལྟ་བུར་རྟོགས་ཤིང་གང་ལ་ཡང་མི་ཆགས་པས་སྤྱོད་པས་ན། ཀུན་དུ་སངས་རྒྱས་པ་དང་འདྲ། །ཞེས་པའོ། །ཡང་དག་འདི་བྱས་ནས་ཞེས་པ་ནས། ནམ་ཞིག་རྟག་ཏུ་སེམས་ཐུབ་ན། །ཞེས་པའི་བར་དུ་ཇི་ལྟར་དཀའ་ཐུབ་སྤྱད་པ་ལ་གནས་ཞེས་ཞུས་ཏེ་བཤད་པ་སྟེ། ཡང་དག་ཉིད་དུ་བདག་བྱས་ནས། །ཞེས་པ་ནི་བདག་གི་དེ་ཁོ་ན་ཉིད་ཇི་སྐད་བཤད་པ་བཞིན་དུ་བྱས་ནས་ཞེས་པའོ། །རྟག་ཏུ་ཐེ་ཚོམ་མེད་ན་ནི། །ཞེས་པ་ནི་དེ་ལྟར་བདག་གི་དེ་ཁོ་ན་ཉིད་བདག་ནི་ལྷ་གང་ཡིན་པའི་གཟུགས་སུ་བསྒྱུར་བ་ཏིང་ངེ་འཛིན་འཁྲུགས་པ་དང་ལྷ་ཇི་བཞིན་པའི་བར་སྣང་བ་རྣམ་པར་རྟོག་པ་གཞན་མེད་པར་ལྷའི་གཟུགས་ཉིད་ཡིད་ལ་ཐེ་ཚོམ་མེད་པར་སྣང་ན་དེ། དཀའ་ཐུབ་སྤྱད་པ་སྤྱོད་པ་ཡིན། །ཞེས་པ་དང་སྦྱར་རོ། །དེ་བས་ན་གསུངས་པ། ནམ་ཞིག་རྟག་ཏུ་སེམས་ཐུབ་ན། །ཞེས་པ་སྟེ་མདོར་ན་རྟག་ཏུ་སེམས་ཐུབ་པར་བྱ་སྟེ། ལྷའི་གཟུགས་དེ་ཉིད་ལ་བརྟན་པ་སྣང་བར་མ་བྱས་ན། སྔགས་དང་ཕྱག་རྒྱ་སྦྱར་བ་ཙམ་དང༌། གང་ལྟ་བ་དེ་དག་བདག་གོ་ཙམ་དུ་བསམ་པ་ཙམ་གྱིས་རིག་པའི་བརྟུལ་ཞུགས་མི་ཆུད་ཅེས་པའོ། །དེ་ནི་རིག་པ་དང་མཐུན་པའི་གཟུགས་སུ་སྤྱོད་པའོ། །བྱང་ཆུབ་སེམས་དཔའ་དང་ཆོས་རྣམས་
དང། གཞན་གྱི་ཚུལ་ཁྲིམས་ཅན་མ་ཡིན་ཞེས་པའི་བར་དུ། ཇི་ལྟར་ཚུལ་ཁྲིམས་ལ་ཡང་གནས། །ཞེས་ཞུས་པ་དེ་བཤད་པ་སྟེ་འཇུག་པའི་བྱང་ཆུབ་ཀྱི་སེམས་ཆོས་སུན་འབྱིན་པའི་མཚན་ཉིད་རྣམ་པར་རྟོག་པ་དང་བཅས་པ་དང༌། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་རྣམ་པ་དང༌། དགེ་བ་བཅུའི་རང་བཞིན་ལ་བསླབ་པ་དང༌། འདུས་བྱས་ཀྱི་ལས་དང་འབྲས་བུ་རྣམས་སྟོང་པ་ཉིད་ཀྱི་མཚན་ཉིད་གཅིག་ཏུ་ལྡན་པར་ཆུད་ན། ཚུལ་ཁྲིམས་དེ་ལས་དང་བྲལ་བ་ཟག་པ་མེད་པའི་ཚུལ་ཁྲིམས་སྟོང་པ་ཉིད་ཀྱི་མཚན་ཉིད་དེ་དེ་བས་ན་གསུངས་པ། ཚུལ་ཁྲིམས་སངས་རྒྱས་བཞིན་རིག་བྱ། །ཞེས་པ་སྟེ་ཇི་ལྟར་སངས་རྒྱས་བཅོམ་ལྡན་འདས་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་མཚན་ཉིད་གཅིག་ཏུ་ཆུད་པ་བཞིན་དུ་ཞེས་པ་སྟེ། དེ་ནི་རིག་པ་དང་རྗེས་སུ་མཐུན་པའི་སྟོང་པ་ཉིད་ཀྱི་ཏིང་ངེ་འཛིན་སྤྱོད་པ་དེ་སྔར་བདག་གིས་ལྷའི་གཟུགས་སུ་བསྒྱུར་ནས། དེའི་འོག་ཏུ་རང་གི་སེམས་ཡོངས་སུ་སྦྱང་བའི་ཕྱིར་ལྷའི་གཟུགས་སུ་བསྒྱུར་བ་དེ་སོ་སོ་ནས་མི་ཞིག་པར་ཡིད་ལ་མི་བྱ་བའི་ཚུལ་གྱིས་སྟོང་པ་ཉིད་ཀྱི་ཏིང་ངེ་འཛིན་ལ་གནས་པར་བྱའོ། །ཆོས་ཀུན་དབང་ཐོབ་ཅེས་པ་ནས་གསེར་དང་རྡོ་བར་བསྙམས་ནས་ཞེས་པའི་བར་དུ། མི་ཆགས་པ་ནི་ཇི་ལྟར་སྤྱོད། །གང་ན་ཇི་ལྟར་གནས་ནས་སོ། །ཞེས་བཤད་པ་སྟེ། ཆོས་ཀུན་ལ་ཡང་དབང་ཐོབ་ཅིང༌། །ཞེས་པ་ནི་ཆོས་ཐམས་ཅད་སྟོང་པའི་རང་བཞིན་དུ་ཆུད་དེ། འདོད་ཆགས་ལ་སོགས་པ་ཉོན་མོངས་པ་རྣམས་ཀྱི་དབང་དུ་མི་འགྲོ་ཞེས་པའོ། །སེམས་ཅན་དོན་ཕྱིར་དེར་ཞུགས་པ། །མི་ཆགས་བཞིན་དུ་སྤྱོད་པ་ནི། །གསེར་དང་རྡོ་བར་སྙོམས་ནའོ། །ཞེས་པ་ནི་སྟོང་པ་ཉིད་ཀྱི་ཏིང་ངེ་འཛིན་ལས་ལངས་ནས། སྦྱིན་པ་ལ་སོགས་པ་སེམས་ཅན་གྱི་དོན་དུ་ཀུན་རྫོབ་སྤྱོད་ན། འདུས་བྱས་ཀྱི་ཆོས་རྣམས་སྒྱུ་མ་ལྟ་བུར་རྟོགས་ཤིང་དེ་རྣམས་ལ་ཆགས་པ་མི་འབྱུང་བ་ནི་ཇི་ལྟར་རྡོ་བ་དང་བོང་བ་ལ་ཆགས་པའི་སེམས་མི་སྐྱེ་བཞིན་དུ་གསེར་ལ་ཡང་ཆགས་པའི་སེམས་མི་སྐྱེ་ན་གང་ན་གནས་ཀྱང་མི་ཆགས་པ་སྤྱོད་པ་ཞེས་པ་སྟེ་དེ་ནི་ཀུན་རྫོབ་ཏུ་ཡང་སྤྱོད་ན་རིག་པ་དང་རྗེས་སུ་མཐུན་པར་སྤྱོད་པའོ། །ཇི་སྲིད་མཚན་མར་བཤད་པ་ནི་སྔགས་ཀྱི་གྲངས་
སུ་བྱ་བ་རྣམས་དེ་སྲིད་དུ་སྒྲུབ་པ་དང༌། དཀའ་ཐུབ་ཡོངས་སུ་རྫོགས་པར་འགྱུར། །ཞེས་པ་ནི་ཇི་སྲིད་དུ་བསྒྲུབས་ན། དཀའ་ཐུབ་ཡོངས་སུ་རྫོགས་པར་འགྱུར། །ཞེས་དེ་བཤད་པ་སྟེ། སྔགས་བཟླས་པའི་གྲངས་སུམ་འབུམ་ལ་སོགས་པ་ཇི་སྲིད་དུ་གཞུང་ལས་བཤད་པ། ཇི་སྲིད་ཀྱི་བར་དུ་དཀའ་ཐུབ་དེ་གོང་དུ་བཤད་པའི་ཚུལ་བཞིན་དུ་སྤྱད་ན་ཡོངས་སུ་རྫོགས་པར་འགྱུར་ཞེས་པ་སྟེ། དེ་ཡང་དབང་ཆེན་ལ་སོགས་པའི་དཀྱིལ་འཁོར་ལ་གནས་པའི་དཀའ་ཐུབ་ཀྱི་སྔོན་རོལ་དུ་སེམས་ཡོངས་སུ་སྦྱོང་པའི་མཚན་ཉིད་ཡན་ལག་བཞི་དང་ལྡན་པའི་དཀའ་ཐུབ་དེ་ལ་བྱའོ། །དབང་ཆེན་གྱི་ནི་ལྷ་ལྟ་བུར། །ཞེས་པ་ནས། རྙེད་དང་མི་རྙེད་རྣམ་པར་སྤངས། །ཞེས་པའི་བར་དུ་དེའི་གནས་གང་དུ་བགྱི་ཞེས་པའི་ལན་ཏེ། དབང་ཆེན་ལ་སོགས་པའི་དཀྱིལ་འཁོར་ལ་གནས་ནས་རིག་པའི་དཀའ་ཐུབ་སྤྱད་པ་བཤད་པ་དེ་ལ། དབང་ཆེན་གྱི་ནི་ལྷ་ལྟ་བུར། །ཞེས་པ་ནས། སྲོག་དང་རྩོལ་བ་ནན་ཏན་དུ། །ཞེས་པའི་བར་དུ་དབང་ཆེན་ལ་སོགས་པའི་དཀྱིལ་འཁོར་ལ་གནས་ནས་བདག་ཉིད་རང་གི་ལྷའི་གཟུགས་སུ་བསྒྱུར་ཏེ། ཇི་ལྟར་སའི་རང་བཞིན་སྲ་ཞིང་མཁྲང་བ་ལྟར་བདག་གི་ལུས་ཀྱང་དེ་ལྟ་བུར་སེམས་ལ་ཞར་ལ་བསྒོམ་ཞིང་ཟླ་བ་གཅིག་ཏུ་བཟླས་ཤིང་གནས་པར་བྱ་བ་བཤད་དེ། དབང་ཆེན་གྱི་ནི་ལྷ་ལྟ་བུར། །དབང་ཆེན་དཀྱིལ་འཁོར་ལ་འདུག་ནས། །ཞེས་པ་ནི་དབང་ཆེན་གྱི་སྙིང་པོ་ཡི་གེ་ཨ་ཆོས་ཐམས་ཅད་ཐོག་མ་ནས་མ་སྐྱེས་པར་སྟོན་པའི་སྒྲའི་དེ་ཁོ་ན་ཉིད་བསྒོམས་ནས་ཡི་གེ་དེ་ཉིད་ལས་དབང་ཆེན་གྱི་དཀྱིལ་འཁོར་དུ་གྱུར་པ་སྔ་མ་བཞིན་དུ་བསམས་ཏེ། དེའི་སྟེང་དུ་བདག་རང་གི་ལྷའི་གཟུགས་སུ་བསྒྱུར་ནས་རྡོ་རྗེའི་ཕྱག་རྒྱ་བཅིངས་ཏེ་དབང་ཆེན་གྱི་རང་བཞིན་ལྟ་བུ་སྲ་ཞིང་བརྟན་པར་བསྒོམ་ཞེས་པའོ། །རྡོ་རྗེའི་ཕྱག་རྒྱ་བཅིངས་ནས་སུ། །ཞེས་པ་ནི་སྲ་ཞིང་བརྟན་པའི་རྗེས་སུ་མཐུན་པའི་ཕྱིར་རྡོ་རྗེའི་ཕྱག་རྒྱ་བཅིང་བའོ། །ཟས་སུ་རྟག་པར་འོ་མ་བཏུང༌།། ཞེས་པ་ནི་ཟས་ཀྱང་རྗེས་སུ་མཐུན་པར་ཞེས་པ་སྟེ། འོ་མ་འཐུངས་ནས་ལུས་བརྟས་ཤིང་མཁྲང་བར་འགྱུར་བའི་ཕྱིར་རོ། །འཇིག་རྟེན་ན་ཡང་སེམས་དང་ཁ་ཟས་གཉིས་ཀྱིས་ལུས་འཛིན་པར་འགྱུར་བ་དེ་བཞིན་དུ། འདིར་ཡང་སེམས་མཁྲང་བར་འགྱུར་བའི་ཁ་ཟས་ཟོས་ན་དབང་ཆེན་གྱི་ཏིང་ངེ་
འཛིན་དང་མཐུན་པར་འགྱུར་བའི་ཕྱིར་རོ། །སྔགས་མཁན་གྱིས་ནི་ཟླ་གཅིག་བཟླས། །སྲོག་དང་རྩོལ་བས་ནན་ཏན་དུའོ། །ཞེས་པ་ནི་སྔར་བཤད་པའི་ཚུལ་བཞིན་དུ་སྲོག་དང་རྩོལ་བ་བསྡམས་ནས། རང་གི་སྙིང་པོ་ཟླ་གཅིག་བཟླས། །ཞེས་པའོ། །དེ་ནས་ཟླ་བ་གཉིས་པའི་ཚེ། །ཞེས་པ་ནས། དེའི་ཚེ་ཟས་སུ་ཆུ་བཏུང་ངོ༌། །ཞེས་པའི་བར་དུ་ཆུའི་དཀྱིལ་འཁོར་ལ་གནས་པར་བཤད་པ་སྟེ། ཆུའི་དཀྱིལ་འཁོར་གྱི་ས་བོན་གྱི་སྒྲའི་དེ་ཁོ་ན་ཉིད་བསྒོམ་པ་དང༌། ས་བོན་དེ་ལས་ཆུའི་དཀྱིལ་འཁོར་དུ་བསྒོམས་པས་རིམ་པ་བཞིན་དུ་བྱ་སྟེ། བདག་གི་ལུས་ཀྱང་ཆུའི་རང་བཞིན་ལྟར་སྔོ་བར་བསྒོམ་ཞིང་པདྨོའི་ཕྱག་རྒྱ་བཅིངས་ལ་ཟླ་བ་གཅིག་ཏུ་བཟླས་པ་བྱ་སྟེ། པདྨོའི་ཕྱག་རྒྱ་བཅིངས་པ་དང་ཟས་སུ་ཆུ་བཏུང་བ་ཡང་དེ་དང་རྗེས་སུ་མཐུན་པར་བྱ་བའི་ཕྱིར་རོ། །དེ་ནས་ཟླ་བ་གསུམ་པའི་ཚེ། །ཞེས་པ་ནས། ལུས་ངག་ཡིད་ལས་བྱུང་བའོ། །ཞེས་པའི་བར་དུ། མེ་ཡི་དཀྱིལ་འཁོར་ལ་གནས་པའི། །བཤད་པའི་ཟས་བཟའ་སྟེ་ཞེས་པ་ནི་མེ་དང་རྗེས་སུ་མཐུན་པར་བྱ་བའི་ཕྱིར། ཇི་ལྟར་མེ་སྐམ་གཤེར་དང་བཟང་ངན་ལ་སོགས་པ་མི་རྟོག་པར་སྲེག་པ་བཞིན་དུ་ཞིམ་པོ་ལ་སོགས་པའམ། འདོད་པའི་དངོས་པོ་རྣམས་ལ་མི་རྟོག་ཅིང་སློང་བར་བཟའ་ཞེས་པའོ། །རལ་གྲིའི་ཕྱག་རྒྱ་དང་ལྡན་པ། །ཞེས་པ་ཡང་མེ་དང་རྗེས་སུ་མཐུན་པ་སྟེ། ཇི་ལྟར་མེས་ཐམས་ཅད་འཚིག་ཅིང་གཅོད་པ་བཞིན་དུ་རལ་གྲིས་ཀྱང་དངོས་པོ་ཐམས་ཅད་གཅོད་ཅིང་མེད་པར་བྱེད་པའོ། །སྡིག་པ་ཀུན་དུ་བསྲེག་པ་ནི། །ལུས་པོ་ཉིད་ལས་བྱུང་བའོ། །ཞེས་པ་ནི་དེ་ལྟ་བུའི་ཏིང་ངེ་འཛིན་ལ་གནས་ཤིང་སྔགས་བཟླས་ན། ལུས་དང་ངག་ཡིད་གསུམ་གྱི་སྒོ་ནས་སྡིག་པ་སྦྱང་བའི་ལས་ཀྱི་བག་ཆགས་ལས་བསམས་ཏེ་འབྱུང་བར་འགྱུར་ཞེས་པའོ། །བཞི་ལ་རླུང་གི་ལྡན་པར་ཏེ། །ཞེས་པ་ནས། སེམས་ཐུབ་པར་ནི་སྔགས་ཟློས་ཤིག །ཅེས་པའི་བར་དུ་ཟླ་བ་གཅིག་རླུང་གི་དཀྱིལ་འཁོར་ལ་གནས་པ་སྟེ། རླུང་གི་དཀྱིལ་འཁོར་ཏིང་ངེ་འཛིན་དུ་སྦྱར་བ་ནི་སྔར་བཤད་པ་བཞིན་ཏེ། ཁྱད་པར་དུ་བདག་གི་ལུས་རླུང་གིས་རེག་པར་ལྡན་པར་ཡིད་ལ་བསྒོམ་མོ། །ཟས་སུ་རྟག་པར་རླུང་བཟའོ། །ཞེས་ཁ་ཟས་ཀྱང་དེའི་རྗེས་
སུ་མཐུན་པར་སྦྱར་བ་སྟེ། རླུང་ནི་ནང་དུ་རྒྱུ་བ་ལྐོག་མར་བགས་ཀྱིས་བགགས་པར་བསམས་ན་བྲུ་བ་ཚ་བ་དང་སྐོམ་པ་མེད་པར་འགྱུར་ཏེ་རླུང་ཟ་བ་ཞེས་བྱའོ། །དེ་ལ་འཁོར་ལོའི་ཕྱག་རྒྱ་བཅིངས། །ཞེས་པ་ནི་འཁོར་ལོས་འཁོར་ཞིང་གཡོ་བའི་མཚན་ཉིད་པས་རླུང་དང་རྗེས་སུ་མཐུན་པར་བྱ་བའི་ཕྱིར་རོ། །སེམས་ཐུབ་པར་ནི་སྔགས་ཟློས་ཤིག་པ་ནི་སྲོག་དང་རྩོལ་བ་བསྡམས་པ་ལ་སོགས་པ་སྔར་བཤད་པའི་རིམ་པ་བཞིན་དུ་བཟླས་པའོ། །དབང་ཆེན་གྱི་དང་ཆུ་དངོས་ལས། །ཞེས་པ་ནས། རྫོགས་པའི་སངས་རྒྱས་རྫོགས་འགྱུར་རོ། །ཞེས་པའི་བར་དུ་དབང་ཆེན་གྱི་དཀྱིལ་འཁོར་དང་ཆུའི་དཀྱིལ་འཁོར་གཉིས་ལ་གནས་ཏེ། རིག་པའི་བརྟུལ་ཞུགས་སྤྱད་པ་སྟེ། དབང་ཆེན་དང་ཆུའི་དཀྱིལ་འཁོར་སོ་སོའི་སྙིང་པོ་ལས་སྔ་མ་བཞིན་དུ་བསམས་ཏེ། རོ་སྨད་ནི་དབང་ཆེན་གྱི་རང་བཞིན་དུ་སྔ་མ་བཞིན་དུ་བསམ་མོ། །རོ་སྟོད་ནི་ཆུའི་རང་བཞིན་དུ་བསམས་ཏེ། ཟས་སུ་ཡང་འོ་མ་དང་ཆུ་གཉིས་བཏུང་ཞིང་ཟླ་བ་གཅིག་ཏུ་བཟླས་པར་བྱའོ། །རྙེད་དང་མི་རྙེད་རྣམ་པར་སྤངས། །ཞེས་པ་ནི་རྙེད་ན་ཡང་དགའ་བ་མེད་མ་རྙེད་ན་ཡང་མི་དགའ་བ་མེད་པའོ། །རླུང་དང་མེ་ཡི་ལྡན་པ་སྟེ། །ཞེས་པ་ནས་རྙེད་པ་དང་མི་རྙེད་པ་རྣམ་པར་སྤངས་སོ་ཞེས་པར་རླུང་དང་མེ་གཉིས་ཀའི་དཀྱིལ་འཁོར་ལ་གནས་ནས་རིག་པའི་དཀའ་ཐུབ་སྤྱོད་པ་སྟེ། རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་དང༌། རཾ་གྱི་ས་བོན་ལས་བསམས་ཏེ། བདག་གི་ལུས་རོ་སྟོད་མེའི་རང་བཞིན་དུ་འབར་བ་བཞིན་དུ་བསམ། རོ་སྨད་ཀྱང་སྔ་མ་བཞིན་དུ་རླུང་གི་རང་བཞིན་དུ་བསམས་ཏེ། ཟས་སུ་ཡང་རླུང་གི་ཟས་ཀྱི་སྦྱོར་བ་སྣར་སྨོས་པ་བཞིན་དུ་ཅུང་ཟད་བྱ། མེའི་ཟས་མ་བླངས་པར་ཡང་ཅུང་ཟད་བྱ་སྟེ། ཟླ་བ་གཅིག་ཏུ་ཟླས་པར་བྱ། །ཞེས་པ་དེ་དག་ཐམས་ཅད་ཀྱང་རང་གི་ལྷའི་གཟུགས་སུ་སྦྱོར་བ་ནི་སོ་སོའི་དཀྱིལ་འཁོར་ཁ་དོག་ཅི་འདྲ་བ་བཞིན་དུ་ལྷའི་གཟུགས་ཀྱི་ཁ་དོག་ཀྱང་དེ་བཞིན་དུ་ཤེས་པར་བྱའོ། །ཟླ་བ་གཅིག་ཏུ་སྲོག་དང་རྩོལ་བ་བསྣམས་ཏེ་བཟླས་པ་ཡང་དབང་ཆེན་གྱི་དཀྱིལ་འཁོར་གྱི་སྐབས་སུ་བཤད་པའི་རིམ་བཞིན་དུ་བཤད་པར་བྱའོ། །བརྒྱ་བྱིན་ཚངས་པ་ལ་སོགས་པའི། །ལྷ་རྣམས་ཞེས་པ་ནས་སེམས་ཅན་
ཀུན་ལ་ཕན་བྱེད་པའི་བར་དུ་དེའི་མཐའ་ཇི་ལྟར་རིག་པར་བགྱི་ཞེས་ཞུས་པའི་ལན་ཏེ་མཐུ་བཤད་པ་སྟེ། བརྒྱ་བྱིན་དང་ཚུངས་པ་ལ་སོགས་པའི་ལྷ་རྣམས་དང༌། ཤ་ཟ་དང་ལྟོ་འཕྱེ་ལ་སོགས་པའི་རིག་པའི་དཀའ་ཐུབ་དེ་ལྟ་བུ་དང་ལྡན་པའི་སྔགས་པ་དེ་ལྟ་བུ་མཐོང་ན། རྒྱང་རིང་པོ་ནས་ཕྱག་འཚལ་ཞིང་སྔགས་པ་དེ་ལ་སྲུང་བར་བྱེད། སྔགས་བ་དེས་ནི་ཅི་དགོས་པ་རྣམས་ཀྱང་བྱེད་པར་འགྱུར་བ་དང༌། ལྷའི་སྨན་རྣམས་ཀྱང་སྔགས་པ་དེའི་དྲུང་ན་འཁོད་ཅིང་བཀའ་མཉན་ཞིང་སྨན་བཙལ་གྱིས་མི་རྙེད་པ་དག་ཀྱང་དེའི་དྲུང་ན་འདུག་པ་མཐོང་ངོ༌། །བགེགས་དང་མ་བདུན་པོ་ལ་སོགས་པའི་འཇིགས་པར་བྱེད་པ་རྣམས་ཀྱང་རྒྱང་རིང་པོ་ནས་ཕྱག་འཚལ་བར་བྱེད་པ་དང༌། སྔགས་པའི་གནས་ཀྱང་མེ་འབར་བ་ལྟར་སྣང་བ་སངས་རྒྱས་བཅོམ་ལྡན་འདས་ལྟར་འཇིག་རྟེན་དང་འཇིག་རྟེན་ལས་འདས་པ་རྣམས་ལ་དབང་ཐོབ་པ་དང༌། དབང་བར་འགྱུར་བ་དང་མི་མཐུན་པ་འདུམ་པ་ནི་ཕྱག་ན་རྡོ་རྗེ་ལྟ་བུ། སྙིང་རྗེ་ཆེན་པོ་སྤྱན་རས་གཟིགས་ཀྱི་དབང་པོ་ལྟ་བུར་གྱུར་ཞེས་པའོ། །དེ་ནི་ཟླ་དྲུག་བཟླས་རྣམས་ལ། །དངོས་གྲུབ་འདོད་བཞིན་འབྲས་བུ་སྨིན། །བདག་རང་དང་ནི་གཞན་རྣམས་ལའང༌། །རྟག་ཏུ་སྐྱོང་བར་བྱེ་དཔའོ། །ཞེས་པ་ནི། དུས་དང་ཡུལ་དང་བྱ་བ་ལས་ཆོས་དང༌། །ཆོས་མིན་རྣམ་པར་སྤོང་བར་བྱེད་པ་འདིས། །ཇི་ལྟར་མྱུར་དུ་འགྱུར་བའི་ཚད་ཀྱང་མགོན་པོས་བཀའ་སྩོལ་ཅིག །ཅེས་པ་དེ་བཤད་པ་སྟེ་དབང་ཆེན་ལ་སོགས་པའི་དཀྱིལ་འཁོར་ལ་བསྒོམ་པའི་རིམ་གྱིས་ཟླ་བ་དྲུག་ན་དུས་ལ་སོགས་པ་ལ་མི་ལྟོས་ཤིང་བདག་དང་གཞན་ལ་ཕན་པའི་གྲུབ་པ་ཐོབ་པར་འགྱུར་ཏེ། དེ་ལྟ་བུ་ཐོབ་པའི་ཚད་ནི་ཟླ་བ་དྲུག་གོ་ཞེས་པའོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་སྔགས་རྣམས་དང་དཀྱིལ་འཁོར་ཡང་དྲིས་པ་ཞེས་པ་ལ་སོགས་པ་ནི། སློབ་དཔོན་གྱི་དེ་ཁོ་ན་ཉིད་བཤད་པ་སྟེ། སློབ་དཔོན་གྱིས་དྲི་བ་དེ་ཁོ་ན་ཡང་སྔགས་རྣམས་དང་དཀྱིལ་འཁོར་གྱི་སྙིང་པོ་གང་ཡིན་པ་ལ་སོགས་པ་ཇི་ལྟ་བུ་ཉིད་དུ་ཤེས་ན་སློབ་དཔོན་དུ་འགྱུར་ཏེ། དེ་བས་ན་སྔགས་རྣམས་འབྱུང་བའི་གནས་སྙིང་པོ་དེ་བཤད་པ། སྔོན་དུ་སློབ་དཔོན་གྱི་དེ་ཁོ་ན་ཉིད་བསྟན་ཏེ། དེ་བས་ན་ཕྱག་ན་རྡོ་རྗེས་ཀྱང༌། སྔགས་ཀུན་གྱི་ནི་སྙིང་པོ་གང༌། །སློབ་
དཔོན་ཞེས་བགྱི་ཅི་ཞེ་ན། །ཞེས་པ་ཞུས་སོ། །དེ་ལ། སྔགས་ཀུན་གྱི་ནི་སྙིང་པོ་གང༌། །ཞེས་པ་ནི་ཨ་ཨ་ཞེས་པ་ནི་སྔགས་རྣམས། སྙིང་པོ་རུ་ནི་གསུངས་པ་ཡིན། །ཞེས་པ་ལ་སོགས་པ་དང་སྦྱར་རོ། །སློབ་དཔོན་ཞེས་པ་ནི། སྙིང་ག་རུ་ནི་སྙིང་པོ་གཞག །ཡན་ལག་ཏུ་ནི་ཡན་ལག་གཞག །ཅེས་པ་དང་སྦྱར་ཏེ། དེ་རྣམས་ཀྱང་བཀོད་པ་ཙམ་གྱིས་ཆོག་པ་མ་ཡིན་གྱི། དེ་དག་སྒྲའི་དེ་ཁོ་ན་ཉིད་ལ་སོགས་པ་ཤེས་ན་སློབ་དཔོན་ཞེས་བྱའོ། །གསང་བའི་ཡེ་ཤེས་དེ་ཞེས་པ་ནི་སྔགས་སྤྱད་པའི་ཚུལ་རང་བཞིན་གྱིས་གསང་བའི་སྟེང་དུ་སྔགས་ཀྱི་སྙིང་པོ་ཡི་གེ་ཨ་ཞེས་ཐམས་ཅད་ཐོག་མ་མ་སྐྱེས་པར་ཆུད་པའི་ཡེ་ཤེས་འབྱུང་བའི་སྒོ་སྟེ། ཤིན་ཏུ་ཟབ་སྟེ་སྣོད་མ་ཡིན་ཞིང་དམ་ཚིག་མེད་པ་ལ་མི་བསྟན་པས་ན་གསང་བའི་གསང་བ་ཞེས་བྱའོ། །སྔགས་ཀྱི་ཡི་གེས་འབྱུང་ཆེན་པོ། །ཞེས་པ་ནི་སྙིང་པོའི་སྒོ་ནས་ཆོས་ཐམས་ཅད་སྟོང་པ་ཉིད་དུ་ཆུད་པར་འགྱུར་བས་དེ་ཉིད་ཡི་གེ་ཞེས་བྱ་སྟེ། ཡེ་ཤེས་དེ་ལས་བླ་ན་མེད་པའི་འབྲས་བུ་ཐོབ་པ་ཆེན་པོ་འབྱུང་བས་ན་འབྱུང་ཆེན་པོ་ཞེས་བྱའོ། །ཕ་རོལ་ཏུ་ཕྱིན་པ་ལ་སོགས་པའི་སྒོ་ནས་ཡེ་ཤེས་འབྱུང་བ་ཡང་འབྲས་བུ་ཆེན་པོ་འབྱུང་བ་ཡིན་མོད་ཀྱི། དེ་ལས་ཁྱད་པར་དུ་གསུངས་པ། སྔགས་ཀྱི་ཡེ་ཤེས་འབྱུང་ཆེན་པོ། །ཞེས་པ་སྟེ་དེ་ལྟ་བུར་དྲིས་པ་དགེ་བའི་ཚིག་དང་སྦྱར་རོ། །ཨ་ཞེས་བྱ་བ་སྔགས་ཀུན་གྱི། །སྙིང་པོ་རུ་ནི་གསུངས་པ་ཡིན། །དེ་ལས་བྱུང་བ་སྔགས་རྣམས་ནི། །གྲངས་མེད་པ་རུ་སྐྱེས་པ་སྟེ། །ཞེས་པ་ནི། སྔགས་ཀུན་གྱི་ནི་སྙིང་པོ་གང༌། །ཞེས་ཞུས་པའི་ལན་ཏེ། དེ་ལ་ཡི་གེ་ཨ་ཞེས་པ་ནི་སྔགས་ཐམས་ཅད་ཀྱི་སྙིང་པོ། སྙིང་པོ་ཞེས་པ་ནི་འབྱུང་བའི་གནས་སོ། །དེ་བས་ན་ཀུན་རྫོབ་དང་དོན་དམ་པ་གཉིས་ཀ་འབྱུང་བའི་གནས་ཏེ། དེ་ལ་ཀ་ལ་སོགས་པ་ཡི་གེ་འབྲུ་ཐམས་ཅད་ཀྱང་ཨ་དང་མི་ལྡན་ན་མི་སྨྲ་སྟེ། དེ་བས་ན་ཡི་གེ་ཀ་ལ་སོགས་པ་ཐམས་ཅད་ཀྱང་ཨ་ལས་བྱུང་བར་ཤེས་པར་བྱ་སྟེ། དེ་ནི་ཀུན་རྫོབ་ཏུ་འབྱུང་བའི་གནས་སོ། །དོན་དམ་པ་ནི་ཡི་གེ་ཨ་དེ་ལས་ཆོས་ཐམས་ཅད་ཐོག་མ་ནས་མ་བྱུང་མ་སྐྱེས་པར་ཆུད་པའི་ཡེ་ཤེས་འབྱུང་སྟེ་འདི་ནི་དོན་དམ་པའི་གནས་སོ། །དེ་ལ། དེ་ལས་འབྱུང་བའི་སྔགས་རྣམས་ནི། །གྲངས་མེད་བར་དུ་སྐྱེས་པ་སྟེ། །
ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་སྔགས་ཇི་སྙེད་དུ་གསུངས་པ་དེ་ཐམས་ཅད་ཡི་གེ་འབྲུའི་ངོ་བོ་སྟེ། འབྲུ་དེ་རྣམས་ཀྱང་ཨ་ལས་གྱུར་བས་སྔགས་གྲངས་མེད་དེ། དེ་དག་ཐམས་ཅད་ཨ་ལས་འབྱུང༌། །ཞེས་པ་སྟེ་དེས་ནི་ཀུན་རྫོབ་ཏུ་ཐམས་ཅད་འབྱུང་བའི་གནས་སུ་སྟོན་པའོ། །འཕྲོ་བ་ཐམས་ཅད་ཞི་བར་བྱེད། །མ་ལུས་ཡེ་ཤེས་ཀྱང་འབྱུང་ཞེས་པ་སྟེ། ཨ་དེ་ཏིང་ངེ་འཛིན་གྱི་སྒོ་ནས་ཆོས་ཐམས་ཅད་ཐོག་མ་ནས་མ་བྱུང་བ་སྟོང་པ་ཉིད་ཀྱི་རང་བཞིན་དུ་ཆུད་པས་གཟུང་བ་དང་འཛིན་པ་ལ་སོགས་པ་རྣམ་པར་མི་རྟོག་པའི་འཕྲོ་བ་དང་བྲལ་བའི་ཡེ་ཤེས་ཀྱང་ཨ་དེ་ལས་འབྱུང་ངོ་ཞེས་བསྟན་པ་སྟེ་དེས་ནི་དོན་དམ་པར་འབྱུང་བའི་གནས་སུ་བསྟན་པའོ། །དེ་ལྟ་བུར་ན་གསང་བའི་བདག་པོ་ཞེས་པ་ནས། སྣ་ཚོགས་པའི་ལུས་ལས་བྱུང་བའོ། །ཞེས་པའི་བར་དུ་གོང་མའི་ཚིགས་སུ་བཅད་པ་མདོར་གསུངས་པ་དེ་ཉིད་ནི་འབྲེལ་པ་སྟེ། དེ་ལ་སྤྱིར་རྣམ་པ་ལྔ་སྟེ། ཨ་དང་ཨཾ་དང་ཨི་དང་ཨུ་རྣམས་སོ། །དེ་དག་ཡི་གེ་ཐམས་ཅད་སྤྱིའི་རང་བཞིན་ནོ། །ཨོཾ་ཀླད་ཀོར་གྱི་ང་དང་ཉ་དང་ན་དང་ཎ་དང་མ་རྣམས་ཀྱི་རང་བཞིན་ཏེ། ངའི་ནང་དུ་ཀའི་འཁོར་རྣམས་འདུས། ཉའི་ནང་དུ་ཙའི་འཁོར་རྣམས་འདུས། ཎའི་ནང་དུ་ཊའི་འཁོར་རྣམས་འདུས། ནའི་ནང་དུ་ཏའི་འཁོར་རྣམས་འདུས། མའི་ནང་དུ་པའི་འཁོར་རྣམས་འདུས་པར་བལྟའོ། །ཨ་དང་ཨིའི་ནང་དུ་ཡ་འདུས་པར་བལྟའོ། །ར་དང་ལ་ནི་རྀ་རཱྀ་དང་ལྀ་ལཱྀའི་ནང་དུ་འདུས། ཤ་ཥ་དང་ས་ཧ་རྣམས་ནི་ཡི་གེ་ཞེས་པའི་ཚིག་གཉིས་པོའི་ནང་དུ་འདུས་ཏེ། ཨ་དེ་རྣམས་ལས་ཀ་ལ་སོགས་པའི་ཡན་ལག་ཐམས་ཅད་འབྱུང་བར་ཤེས་པར་བྱའོ། །དེ་ལ་ཨ་དེ་ནི་སྲོག་ཏུ་གསུངས་པ་སྟེ། སངས་རྒྱས་རྐང་གཉིས་མཆོག་གིས་ཞེས་པ་ནི། ཡི་གེ་ཨ་དེ་ཀུན་རྫོབ་དང་དོན་དམ་པ་གཉིས་ཀ་རུ་ཐམས་ཅད་ཀྱི་སྲོག་སྟེ། ཀུན་རྫོབ་ཏུ་ཡང་གོང་དུ་བཤད་པའི་ཚུལ་གྱིས་ཨ་དེ་མེད་ན་ཀ་ལ་སོགས་པ་སྨྲས་པ་ཐམས་ཅད་ཀྱི་སྲོག་ཅེས་བྱའོ། །ཆོས་ཐམས་ཅད་ཐོག་མ་ནས་མ་སྐྱེས་པར་ཆུད་པའི་ཡེ་ཤེས་འབྱུང་བས་སྲོག་ཅེས་བྱ་སྟེ། དེ་ལྟ་བུར་སྲོག་ཡིན་པར་འགའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་བཤད་པའོ། །དེ་བས་འདི་ཀུན་ཐམས་ཅད་དེ། །ཞེས་པ་ནི་ཨ་དེ་ལྟར་དེ་སྲོག་ཡིན་པས་
ཀ་ལ་སོགས་པའི་དངོས་པོ་ཐམས་ཅད་འདི་ཇི་ལྟར་ཡིན་ཞེས་གསུངས་པ། ཡན་ལག་ཀུན་རྣམ་པར་ཞེས་པ་སྟེ། ཨ་དེ་རྣམས་ཀ་ལ་སོགས་པའི་འབྲུ་རྣམས་ལ་གནས་ཞེས་པའོ། །ཡན་ལག་རྣམས་ཀྱང་ཅི་རིགས་པར། །རྟག་པར་ཀུན་ལའང་ཤེས་པར་བྱོས། །ཞེས་པ་ནི་ཀ་ལ་སོགས་པའི་ཡན་ལག་ཇི་ལྟར་རིགས་པར་སྔགས་ཀུན་ལ་རྟག་ཏུ་གནས་པར་ཤེས་པར་བྱའོ་ཞེས་པའོ། །ཡི་གེ་རྣམས་ཀྱིས་ཐམས་ཅད་ཁྱབ། །ཅེས་པ་དང་དེ་ཉིད་ཀྱི་དོན་དུ་གསུངས་པ་སྟེ། ཀ་ལ་སོགས་པའི་ཡི་གེ་རྣམས་ཀྱིས་སྔགས་ཀྱི་ཚིག་ཐམས་ཅད་དུ་ཁྱབ་ཅེས་པའོ། །ཡི་གེ་རྣམས་ཀྱང་དེ་ཡིས་སོ། །ཞེས་པ་ནི་ཀ་ལ་སོགས་པའི་ཡི་གེ་རྣམས་ལ་ཨ་དེས་ཁྱབ་ཅེས་པའོ། །ཡི་གེ་ལས་ནི་སྒྲ་འབྱུང་བ་དང༌། ཆ་རུ་ཀུན་དུ་འབྱུང་ངོ་ཞེས་པ་ནི་ཀ་ལ་སོགས་པའི་ཡི་གེའི་སྒྲ་རྣམས་ལས་ཆོས་ཐམས་ཅད་དགོས་པ་དང་བྲལ་བའོ་ཞེས་པ་ལ་སོགས་པའི་སྒྲའི་ཕྱོགས་གཅིག་པ་རྣམས་འབྱུང་ཞེས་པའོ། །དེ་བས་ན་དེ་ཀུན་ཐམས་ཅད་དེ་སྣ་ཚོགས་པའི་ལུས་འབྱུང་བའོ་ཞེས་པ་ནི། དེ་བས་ན་ཨ་དེ་ནི་ཀ་ལ་སོགས་པའི་དངོས་པོ་ཐམས་ཅད་དེ། ཀ་ལ་སོགས་པ་དེ་རྣམས་ཀྱང་ལྷ་རྣམས་ཐམས་ཅད་ཀྱི་ས་བོན་བས་ལྷ་རྣམས་ཀྱི་གཟུགས་རྣམས་ཚོགས་པའི་ཡི་གེ་དེ་རྣམས་ལས་ཇི་ལྟར་རིགས་པར་སྦྱར་ན་འབྱུང་ཞེས་པའོ། །དེ་ཡིས་གཞན་པ་བཤད་པ་ཡིན། །ཞེས་པ་ནས། སློབ་དཔོན་གྱིས་སུ་དེ་བསྒྲགས་པ། །མཐུ་ཆེན་སངས་རྒྱས་རྣམས་ཀྱིས་སོ། །ཞེས་པའི་བར་དུ་ཡི་གེ་སུམ་ཅུ་རྩ་གཉིས་སོ། །དེ་དག་ཐམས་ཅད་འོག་ནས་འབྱུང་བའི་ཚུལ་གྱིས་སློབ་དཔོན་གྱི་ལུས་ལ་དགོད་པ་བཤད་དེ། དེའི་གཞག་པ་ཡིན་ཞེས་པ་ནི་ཡི་གེ་དེ་སྙིང་གར་གཞག་གོ །སྔར་བཤད་ཟིན་ཏོ་ཞེས་པའོ། །དཔའ་བོ་སྙིང་པོ་དེ་ཉིད་ཚིག །ཅེས་པ་སྙིང་པོ་ཞེས་པའི་ཚིག་ནི་ཨ་འབའ་ཞིག་ལ་མི་བྱའི། སེམས་མགུ་བ་ནི་སྙིང་ཡིན་ཏེ། །རིགས་ནས་སྔགས་རྣམས་གྲུབ་སྡེར་ཞེས་བཤད་པའི་ཚུལ་དུ་རིག་པར་བྱ་སྟེ། ཡི་གེ་འདི་རྣམས་ལུས་ལ་བཀོད་པ་ཙམ་གྱིས་ཆོག་པ་མ་ཡིན་གྱི། སོ་སོའི་སྒྲ་དེ་ཁོ་ན་ཉིད་སེམས་ཚིམ་ཞིང་མགུ་བའི་བར་དུ་བསྒོམ་པར་བྱ་བ་ཉོན་ཅིག་ཅེས་པའོ། །སྙིང་ག་རུ་ནི་སྙིང་པོ་གཞག །ཡན་ལག་རྣམས་སུ་ཡན་ལག་གཞག །ཅེས་པ་སྙིང་
གར་ཡི་གེ་ཨ། ལུས་ཀྱི་ཡན་ལག་རྣམས་སུ་ཀ་ལ་སོགས་པའི་འབྲུ་རྣམས་ཀ་དེ་ལྷག་མར་རིག་པར་བྱའོ་ཞེས་པ་ལ་སོགས་པ་འོག་ནས་འབྱུང་བའི་རིམ་བཞིན་དུ་བཀོད་ཅེས་པའོ། །དེ་ལྟར་འདི་ཀུན་བྱ་བ་ནི། །བདག་གི་ལུས་ནི་ཀུན་དུ་སངས་རྒྱས་སུ། །ཞེས་སློབ་དཔོན་བདག་གི་ལུས་ཀུན་སངས་རྒྱས་པའི་སྐུར་བསྒྱུར་ཏེ་ཡི་གེ་འདི་ཐམས་ཅད་དགོད་པར་བྱའོ་ཞེས་པའོ། །སྦྱོར་བའི་སྟན་གནས་བློ་ཅན་གྱིས། །དེ་བཞིན་གཤེགས་པ་རྗེས་དྲན་ནས། །ཞེས་པ་ནི་དེ་བཞིན་གཤེགས་པ་བསམས་ཏེ། ཕྱག་བྱས་ལ་སྦྱོར་བའི་སྐྱིལ་མོ་ཀྲུང་དུ་བཅས་ཏེ་སེམས་དང་ལུས་མཉམ་པར་བཞག་ནས་གོང་དུ་སྨོས་པ་རྣམས་ཞེས་པའོ། །རྒྱལ་ཆེན་ཡེ་ཤེས་སྲས་འདི་ལ། །ཆོ་ག་བཞིན་དུ་ཤེས་ནས་དགོད། །སློབ་དཔོན་ཞེས་སུ་དེ་བསྒྲགས་པ། །མཐུ་ཆེན་སངས་རྒྱས་རྣམས་ཀྱིས་སོ། །ཞེས་པ་སྟེ། དེ་ལྟར་ཡི་གེ་རྣམས་བཀོད་ཅིང་དེ་རྣམས་ཀྱི་སྒྲའི་དེ་ཁོ་ན་ཉིད་སྟོང་པ་ཉིད་དུ་ཆུད་པའི་ཡེ་ཤེས་རྒྱ་ཆེན་པོ་དེ་དག་ཆོ་ག་བཞིན་དུ་བགྱིས་ནས་ཤེ་ན་ཀུན་དུ་སངས་རྒྱས་པ་རྣམས་ཀྱིས་སློབ་དཔོན་ཞེས་གསུངས་སོ། །དེ་བས་ན་དེ་བཞིན་གཤེགས་པ་ཞེས་པ་ནས། ཡི་གེ་འཁོར་ལོ་མ་ལུས་པར། །རང་གི་ལུས་ལ་གནས་པའོ། །ཞེས་པའི་བར་དུ་དེའི་རྗེས་སུ་བསྔགས་པ་བཤད་པ་སྟེ། དེ་ལ་སངས་རྒྱས་ལ་སོགས་པ་གྲུབ་པ་ཡང་རྒྱུ་རྣམ་པ་གཉིས་ཏེ་བསོད་ནམས་དང་ཡེ་ཤེས་ཀྱིས་སོ། །དེ་ལ་སྦྱིན་པ་ལ་སོགས་པའི་བསོད་ནམས་ནི་དེ་བཞིན་གཤེགས་པའི་རྒྱུའོ། །ཡེ་ཤེས་ནི་མངོན་སུམ་པའི་རྒྱུ་སྟེ། དེ་ལ་འདིར་སྔགས་ཀྱི་ཡི་གེ་རྣམས་ཀྱི་སྒྲ་དེ་ཁོ་ན་ཉིད་སྟོང་པ་ཉིད་ཆུད་པར་བྱེད་པའི་ཡེ་ཤེས་མངོན་དུ་བྱས་ནས། འདི་ནི་མངོན་སུམ་པའི་རྒྱ་སྟེ། དེ་བཞིན་གཤེགས་པའོ་ཞེས་པ་ལ་སོགས་པས་བསྟོད་པ་ནི། སློབ་དཔོན་དེ་མོས་པ་སྤྱོད་པའི་ས་ལ་གནས་ཏེ་དེ་བཞིན་གཤེགས་པ་མ་ཡིན། དེ་བཞིན་གཤེགས་པ་ལ་སོགས་པར་འགྱུར་བའི་རྒྱུ་བྱེད་པས་རྒྱུ་ལས་འབྲས་བུ་བསྟན་པར་ཤེས་པར་བྱའོ། །དེ་བཞིན་དུ་འཇིག་རྟེན་ན་སྣང་བ་ཆར་ཆུ་མོད་ཅིང༌། མྱུ་གུ་བཟང་ན་འབྲས་བུ་མ་གྱུར་ཀྱང་ལོ་ལེགས་སོ་ཞེས་པ་ལ་སོགས་པའོ། །རྗེས་སུ་བསྔགས་པ་ཡང་རྣམ་པ་བཞིའི་སྒོ་ནས་ཏེ། འཇིག་རྟེན་ལས་འདས་པའི་ལྷ་རྣམས་དང༌། འཇིག་རྟེན་གྱི་ལྷ་
དང། འཇིག་རྟེན་ལས་འདས་པའི་མི་ནི་འཇིག་རྟེན་གྱི་མི་རྣམས་ཏེ། འཇིག་རྟེན་ལས་འདས་པའི་ལྷ་ནི་དེ་བས་དེ་ནི། དེ་བཞིན་གཤེགས་པ་དེ་ནི་སངས་རྒྱས་རྫོགས། །ཞེས་བྱ་བ་ལ་སོགས་པའོ། །འཇིག་རྟེན་གྱི་ལྷ་རྣམས་ནི། ཚངས་པ་གཏོགས་འདོད་དབང་ཆེན་དང༌། །ཞེས་བ་ལ་སོགས་པའོ། །འཇིག་རྟེན་གྱི་མི་ནི་བྲམ་ཟེ་ཁྲུ་གང༌། །ཚངས་པར་སྤྱོད་པ་ཞེས་ཀྱང་བྱ། །ཞེས་པའོ། །འཇིག་རྟེན་ལས་འདས་པའི་མི་ནི། དགེ་སློང་ཟག་ཟད་དཔལ་ཆེན་དང༌། །ཞེས་པའོ། །གསང་བ་ཐམས་ཅད་འཆང་ཞེས་པ་ནི་བདག་ལུས་ལྷའི་གཟུགས་སུ་བསྒྱུར་བ་དང༌། དག་གི་རང་བཞིན་གྱི་ཡི་གེ་རྣམས་བདག་གི་ལུས་ལ་ཚང་བ་དང༌། ཡི་གེ་དེ་རྣམས་ཀྱི་སྒྲའི་དེ་ཁོ་ན་ཉིད་ལ་དམིགས་པའི་ཡེ་ཤེས་དང་ལྡན་པས་ལུས་དང་ངག་ཡིད་གསུམ་གྱི་གསང་བ་འཆང་བ་ཞེས་པའི་ཆོས་ཀུན་གྱི་དབང་ཕྱུག་གཙོ་བོ་སྟེ་ཞེས་པ་ནི། ཆུད་པའི་ཆོས་གཞུང་གི་ཆོས་གཉིས་ཀ་ལ་དབང་དུ་གྱུར་པ་ཞེས་པའོ། །གང་གིས་བྱང་ཆུབ་བརྟན་པ་ལ། །སྒྲ་ཡི་ཡེ་ཤེས་ལ་ཡང་བསྟུན། །ཞེས་པ་དེ་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་དང་འདྲ་བར་འགྱུར་བ་ཡང༌། ཡི་གེ་ལུས་ལ་བཀོད་པ་ཙམ་གྱིས་འགྱུར་བ་ནི་མ་ཡིན་གྱི། བྱང་ཆུབ་ཀྱི་སེམས་བརྟན་ཞིང་ཡི་གེ་རྣམས་ཀྱི་སྒྲའི་དེ་ཁོ་ན་ཉིད་ཀྱི་ཡེ་ཤེས་བསྒོམ་པ་ལ་བརྩོན་ན་འདི་སྐད་སྨོས་པ་དེ་རྣམས་སུ་འགྱུར་ཞེས་པའོ། །དེ་ནི་སློབ་དཔོན་གྱི་ཏིང་ངེ་འཛིན་གྱི་སྟེ་དང་པོའོ། །སྨིན་མ་གཉིས་ཀྱི་མཚམས་སུ་ཞེས་པ་ནི་འགྲོ་བ་དང་མི་འགྲོ་བ་མ་ལུས་པའོ་ཞེས་པའི་བར་དུ་སློབ་དཔོན་གྱི་ཏིང་ངེ་འཛིན་གཉིས་པ་སྟེ། རིགས་གསུམ་གྱི་སྟེང་དུ་དགོད་པའོ། །སྨིན་མ་གཉིས་ཀྱི་མཚམས་སུ་ནི་ཧཱུཾ་ཞེས་པ་སྟེ། སྙིང་རྗེའི་གནས་ཞེས་པ་ནི་སློབ་དཔོན་ཡང་སྔ་མ་བཞིན་དུ་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསྒྱུར་ཏེ། སྨིན་མཚམས་སུ་ཕྱག་ན་རྡོ་རྗེའི་སྙིང་པོའི་ཡི་གེ་ཧཱུཾ་རང་གི་དཀྱིལ་འཁོར་ལ་བཞག་པར་བསམས་ཏེ་བྲར་ཁར་ཤེས་པར་བྱ། ཕྱག་ན་པདྨོའི་གནས་ཞེས་བྱ། །ཞེས་པ་ནི་སྤྱན་རས་གཟིགས་ཀྱི་དབང་པོའི་སྙིང་པོ་སྟེ་ཟླ་བའི་དཀྱིལ་འཁོར་དང་བཅས་ཏེ། བྲང་ཁར་བསམ་ཞེས་པའོ། །ད་ནི་སྙིང་གར་གནས་པ་ནི། །ཞེས་པ་ནི་བཅོམ་ལྡན་འདས་ཉིད་ཀྱི་སྙིང་པོ་ཨ་དེ་རང་གི་སྙིང་གར་དཀྱིལ་འཁོར་
བསམ་ཞེས་པའོ། །ཀུན་གྱི་གཙོ་བོ་དབང་པོ་ཡིན། །ང་ཡིས་སུ་ནི་ཀུན་ཁྱབ་པ། །འགྲོ་དང་མི་འགྲོ་མ་ལུས་པའོ། །ཞེས་པ་ནི་སྙིང་པོ་དེའི་ཡོན་ཏན་བསྔགས་པ་སྟེ། འགྲོ་བ་ནི་མི་ལ་སོགས་པའི་སེམས་ཅན་ནོ། །མི་འགྲོ་བ་ནི་ས་དང་ཤིང་ལ་སོགས་པ་སྟེ་དེ་དག་ཀུན་ཁྱབ་ཅེས་པའོ། །ཨ་ཞེས་པ་ནི་སྲོག་གི་མཆོག །ཅེས་པ་ནས། འཆི་བ་མེད་པའི་གནས་མཆོག་ཐོབ། །ཅེས་པའོ། །བར་དུ་སློབ་དཔོན་གྱི་ཏིང་ངེ་འཛིན་གསུམ་པ་སྟེ། དཔའ་པོ་ཆེན་པོའི་སྙིང་པོ་རྣམས་ལས། ཡི་གེ་ཨ་སྲོག་གི་མཆོག་པས་བདག་གི་ཁོང་དུ་དབུགས་ཡན་མན་དུ་ལྷན་ཅིག་ཏུ་སྔར་བཤད་པ་བཞིན་དུ་བསམ་མོ་ཞེས་པ་ཚིག་ཅེས་བྱ་ཞེས་པ་ནི་ཡི་གེའི་ཚིག་རང་བཞིན་པས་ཁར་བསམ་མོ་ཞེས་པའོ། །ར་ཞེས་པ་ནི་མེ་རུ་བསྒྲགས། །ཞེས་པ་ནི་ཡི་གེར་དེ་རང་བཞིན་གྱིས་དཀྱིལ་འཁོར་དང་བཅས་པར་བསམས་ལ་འོད་ཀྱི་དཀྱིལ་འཁོར་བསམ་མོ། །ཧཱུཾ་ནི་ཁྲོ་བོ་ཞེས་སུ་བྱ། །ཞེས་པ་ནི་སྨིན་མཚམས་སུ་ཡི་གེ་ཧཱུཾ་གི་དཀྱིལ་འཁོར་དང་བཅས་པར་བསམ་མོ། །ཁ་ནི་ནམ་མཁའ་རིག་པར་བྱ། །འཁོར་ནི་སྟོང་པ་མཆོག་ཅེས་པ་ནི། ཡི་གེ་ཁ་ཀླད་ཀོར་དང་བཅས་པ་ཀླད་པའི་སྟེང་དུ་བསམས་ཏེ། ཁ་ནི་ཆོས་ཐམས་ཅད་ནམ་མཁའ་ལྟ་བུའི་མཚན་ཉིད་པར་སྟོན་པའོ། །འཁོར་ནི་སྟོང་པ་ཡང་སྟོང་པའི་རང་བཞིན་ཞེས་པའོ། །ཡང་དག་པའི་མཆོག་དེ་རྣམས་སློབ་དཔོན་ཞེས་བྱ། བསྡུས་ཤེ་ནའོ་ཞེས་པ་ནི་གོང་དུ་སྨོས་པའི་ཡི་གེ་རྣམས་ཀྱི་སྒྲའི་དེ་ཁོ་ན་ཉིད་དང༌། དགོས་པ་རྣམས་ཀྱིས་ཞེས་པ་ནི་དེ་སློབ་དཔོན་ཞེས་བྱ་ཞེས་པའོ། །དེ་བས་རྣམ་པ་ཐམས་ཅད་དུའང༌། །སངས་རྒྱས་རྣམས་ཀྱིས་གསུངས་ཡེ་ཤེས། །རྟག་ཏུ་ནན་ཏན་མངོན་བྱས་ནས། །འཆི་འཕོ་མེད་པའི་གནས་ཐོབ་བོ། །ཞེས་པ་ནི་དེ་དག་གི་རྗེས་སུ་བསམ་པ་སྟེ། སྙིང་པོ་དེ་རྣམས་ང་འབའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་ཀྱང་གསུངས་པ་སྟེ། དེ་བས་ན་རྣམ་པ་ཐམས་ཅད་དུ་དེ་དག་གི་སྒྲ་དེ་ཁོ་ན་ཉིད་དུ་སྟོང་པ་ལ་བསྒོམ་པ་ལ་སོགས་པ་རྟག་ཏུ་ནན་ཏན་བྱས་ན་སངས་རྒྱས་པའི་གནས་ཐོབ་པ་ཞེས་པའོ། །ཀ་དེ་ལྐོག་མར་རིག་པར་བྱ། །ཞེས་པ་ལ་སོགས་པ་ནས། དཔའ་བོ་ཐམས་ཅད་མཁྱེན་བཞིན་ནོ། །ཞེས་པའི་བར་དུ་ཡི་གེ་དགོད་པའི་ལེའུ་གསུངས་
པ་ནི་གོང་དུ། ཡན་ལག་རྣམས་སུ་ཡན་ལག་བཞག །ཅེས་སྨོས་པ་དེ་ཀ་ལ་སོགས་པའི་ཡན་ལག་གང་རྣམས་ལུས་ཀྱི་ཡན་ལག་གཞག་པའི་གནས་འཆད་པར་གསུངས་པ་སྟེ། ཡི་གེ་སུམ་ཅུ་རྩ་གཉིས་པོ་འདི་རྣམས་བཀོད་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་སུ་སྦྱར་བའོ། །དེ་ལ་སློབ་དཔོན་གྱི་ཏིང་ངེ་འཛིན་དང་པོ་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་ཚེ་སྦྱར། གཉིས་པ་ནི་ཡི་གེ་འཁོར་ལོ་བསྐོར་བའི་ཚེ་སྦྱར། གསུམ་པ་ནི་གསང་བའི་དཀྱིལ་འཁོར་གྱི་ཚེ་སྦྱར་བར་ཤེས་པར་བྱེད་པའོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་འདི་སྐད་ཅེས་གསོལ་ཏོ་ཞེས་བྱ་བ་ལ་སོགས་པ་ནི་དགེ་བ་བཅུའི་ལས་ཀྱི་ལམ་བྱང་ཆུབ་སེམས་དཔའི་བསླབ་པ་ཐམས་ཅད་དང་ལྡན་པ་བཤད་དོ། །དེ་ལ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་བསླབ་པ་ཐུན་མོང་མ་ཡིན་པ་དམ་ཚིག་གི་མཚན་ཉིད་ནི་སྔར་བཤད་ཟིན་ཏེ། འདི་ནི་ཕ་རོལ་ཏུ་ཕྱིན་པ་སྤྱོད་པའི་ས་བྱང་ཆུབ་སེམས་དཔའ་དང་སྔགས་པའི་བྱང་ཆུབ་སེམས་དཔའ་གཉིས་ཀ་སྤྱིའི་བསླབ་པ་ཐམས་ཅད་དང་ལྡན་པར་ཤེས་པར་བྱ་སྟེ། དེ་ལ་བྱང་ཆུབ་སེམས་དཔའ་རྣམས་ཞེས་པ་བྱང་ཆུབ་ནི་དེ་བཞིན་ཉིད་ཀྱི་མཚན་ཉིད་དེ་ཆུད་པར་འདོད་པའོ། །བསམ་པ་དང་ལྡན་པ་ལ་ནི་བྱང་ཆུབ་སེམས་དཔའ་ཞེས་བྱ། སེམས་དཔའ་ཆེན་པོ་ནི་ཆོས་ཐམས་ཅད་སྒྱུ་མ་ལྟ་བུར་ཤེས་ཏེ། གང་ཡང་དངོས་པོ་ཡོད་པ་མ་ཡིན་གྱི། འོན་ཀྱང་ཀུན་རྫོབ་ཏུ་རྒྱུ་དང་འབྲས་བུ་ངེས་པའི་ཚུལ་གྱིས་ཀུན་རྫོབ་ཉིད་དུ་དོན་བྱེད་པ་སྒྱུ་མའི་ཚུལ་དུ་རྟོགས། སེམས་ཅན་ཡོངས་སུ་བསྒྲུབ་པའི་ཕྱིར་བདག་དང་བཅས་པའི་བསླབ་པ་སློབ་པ་ནི་སེམས་དཔའ་ཆེན་པོ་ཞེས་བྱ། སྐབས་འདིར་ཡང་བསླབ་པ་དེ་ལྟ་བུ་ལ་སོགས་པ་བཤད་པ་ལ་དགོངས་ནས་བྱང་ཆུབ་སེམས་དཔའ་ཆེན་པོ་ཁྱད་པར་དུ་སྨོས་སོ། །བསླབ་པའི་གནས་ཞེས་པ་ནི་འོག་ནས་འབྱུང་བ་དགེ་བ་བཅུའི་ཚུལ་ལ་འཇུག་པ་དང༌། མི་དགེ་བ་བཅུ་ལས་ལྡོག་པའི་མཚན་ཉིད་ལ་བྱའོ། །ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་ཤེས་རབ་ནི་ཆོས་ཐམས་ཅད་ཐོག་མ་ནས་མ་སྐྱེས་པར་ཆུད་པའི་མཚན་ཉིད་དོ། །ཐབས་ནི་ཆོས་ཐམས་ཅད་ཐོག་མ་ནས་མ་སྐྱེས་ཏེ། དངོས་པོ་མེད་པར་ཆུད་ཀྱང་སྒྱུ་མ་ལྟ་
བུའི་ཚུལ་དུ་ཐབས་ཀྱི་སྒོ་ནས་ཀུན་རྫོབ་ཏུ་སློབ་པ་འདི་ལྟ་བུ་དང༌། འཁོར་གསུམ་ཡོངས་སུ་དག་པའི་སྦྱིན་པ་ལ་སོགས་པ་ཀུན་དུ་སྤྱོད་པ་ལ་བྱའོ། །ཡང་ན་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་མི་དགེ་བ་བཅུའི་དངོས་པོ་མི་སྤྱོད་པར་བྱ་བ་ལ་འཕགས་པ་ཉན་ཐོས་རྣམས་ལྟར་ཐབས་མེད་པ་མ་ཡིན་གྱི་ཤེས་རབ་ཀྱི་དོན་ཆེན་པོ་མཐོང་ན། སེམས་ལ་སྒྱུ་མེད་པར་བདག་ཉིད་སེམས་ཅན་ལྟ་བུར་སྦྱིན་པར་ངན་སོང་དུ་འགྱུར་བའི་ལས་ཁས་བླངས་ཏེ། མི་སྤྱད་པར་བྱ་བའི་དངོས་པོ་སྤྱད་པ་ལ་ཡང་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བསླབ་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡིད་མི་ཆེས་པ་དང་བྲལ་ཞིང་ཐེ་ཚོམ་མེད་པ་རྣམས་འཁོར་བ་ན་འཁོར་ཀྱང་ཉམས་པར་མི་འགྱུར་བར་བཤད་དུ་གསོལ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྔ་མ་བཞིན་ཡིད་མི་ཆེས་པ་དང་བྲལ་ཞིང༌། ཐེ་ཚོམ་མེད་པ་ཞེས་པའི་བཅོམ་ལྡན་འདས་ཀྱིས་ཇི་སྐད་དུ་བཤད་པའི་གཞུང་ལས་མ་ཡིན་ནོ་སྙམ་པའི་ཡིད་མི་ཆེས་པ་མེད་པ་དང༌། ཡིན་ནམ་གཏོལ་མེད་པའི་ཐེ་ཚོམ་སྐྱེ་བའི་བྱང་ཆུབ་སེམས་དཔའ་དེ་ལ་ཡང་བསླབ་པ་དེ་དང་ལྡན་པའི་འཁོར་བ་ན་འཁོར་ཀྱང༌། ངན་སོང་ལ་སོགས་པར་ལྟུང་ཞིང་ཉོན་མོངས་པར་མི་འགྱུར་བ་དེ་བཤད་དུ་གསོལ་ཞེས་པའོ། །དེ་བཞིན་གཤེགས་པའི་སྤྱན་གྱིས་ཆོས་ཀྱི་དབྱིངས་ཐམས་ཅད་དུ་གཟིགས་ནས་ཞེས་པ་ནི། དེ་བཞིན་གཤེགས་པའི་སྤྱན་ནི་སངས་རྒྱས་ཀྱི་ཡེ་ཤེས་ལ་བྱའོ། །ཆོས་དབྱིངས་ནི་སེམས་ཅན་གྱི་ཁམས་ལ་བྱ་སྟེ། སངས་རྒྱས་ཀྱི་ཡེ་ཤེས་དེས་སེམས་ཅན་གྱི་ཁམས་ཐམས་ཅད་དུ་སེམས་ཅན་འདི་རྣམས་གང་སྡུག་བསྔལ་བ་གང༌། བདེ་བ་དང་ལྡན་ཞེས་གཟིགས་པའམ་སེམས་ཅན་འདི་རྣམས་ལས་ལེགས་ཉེས་དང་གང་གང་གི་རྒྱུས་བདེ་བ་དང་སྡུག་བསྔལ་འདི་དང་འདི་ལྟ་བུར་འགྱུར་ཞེས་གཟིགས་པའོ། །ཕྱག་ན་རྡོ་རྗེས་བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚུལ་དེ་བསྟན་པ་མཁས་པ་ཞེས། བྱང་ཆུབ་སེམས་དཔའ་རྣམས་ཀྱི་སྤྱད་པ་ནི། སྐབས་འདིར་ཐབས་དང་བཅས་པའི་བསླབ་པ་ལ་བྱའོ། །ཚུལ་ཞེས་པ་ནི་ཐོབ་པ་ལ་བྱ་སྟེ། བསླབ་པ་འདིས་ཇི་ལྟར་འདོད་པའི་དོན་ཐོབ་པར་བྱེད་པའི་ཕྱིར་རོ། །མཁས་པ་ཞེས་པ་ནི་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཉན་ཐོས་ལྟར་མ་ཡིན་
པ་གོང་དུ་བཤད་པའི་ཚུལ་ལྟ་བུ་བསླབ་པས་སོ། །དེ་ལ་རབ་ཏུ་གནས་ན་ཐེག་པ་ཆེན་པོའི་རྒྱུད་དུ་ཞུགས་པར་འགྱུར་ཞེས་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚུལ་མཁས་པའི་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བསླབ་པ་དེ་ལ་རབ་ཏུ་གནས་པ་ནི་དེ་བསླབ་པར་ཞུགས་པ་ཞེས་བྱ་སྟེ། དེ་སློབ་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐེག་པ་ཆེན་པོ་ལ་རབ་ཏུ་ཞུགས་པར་འགྱུར་བ་དེ་ཉོན་ཅིག་ཅེས་པའོ། །གསང་བའི་བདག་པོ་བྱང་ཆུབ་སེམས་དཔའ་དེ་སྲོག་གཅོད་པ་སྤང་བར་བྱའོ་ཞེས་པ་ནས་ལོག་པར་ལྟ་བ་རབ་ཏུ་སྤང་བར་བྱའོ་ཞེས་པའི་བར་དུ་མི་དགེ་བ་བཅུ་ལས་ལྡོག་པར་བྱ་བའི་མིང་རྣམས་སྨོས་པ་དེ་བཤད་པ་ནི་འོག་ནས་འབྱུང་ངོ༌། །གསང་བའི་བདག་པོ་བྱང་ཆུབ་སེམས་དཔའི་བསླབ་པའི་གནས་དེ་རྣམས་བསླབས་ན་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་རྣམས་དང་མཚུངས་པར་སྤྱད་པ་དེ་རྣམས་བསླབས་པ་ཡིན་ནོ་ཞེས་པ་ནི་གོང་དུ་སྨོས་པའི་བསླབ་པ་དེ་རྣམས་ལ་བསླབས་ན་སངས་རྒྱས་དང་བྱང་ཆུབ་སེམས་དཔའི་སྤྱད་པ་བསླབས་ནས་སངས་རྒྱས་དང་བྱང་ཆུབ་སེམས་དཔའི་གནས་ཐོབ་སྟེ། དེ་བས་ན་བསླབ་པ་འདི་ལ་བསླབས་ན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་སྤྱད་པ་གཅིག་ལ་མཚུངས་པར་བསླབས་ཞེས་པའོ། །དེ་བས་ན་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། ཇི་ལྟར་ཐ་དད་པ་ལགས་ཞེས་པའི་བར་ཕྱག་ན་རྡོ་རྗེས་བྱང་ཆུབ་སེམས་དཔའ་རྣམས་དང༌། ཉན་ཐོས་དང་འཇིག་རྟེན་པ་རྣམ་པ་ཐམས་ཅད་ཡང་བསླབ་པ་འདི་བཤད་ན། དེ་ལ་ཁྱད་པར་ཅི་མཆིས་ཞེས་ཞུས་པ་སྟེ། འཇིག་རྟེན་པ་མུར་འདུག་བྱེད་པ་ཞེས་པ་ནི། འཇིག་རྟེན་པ་ཕལ་ལ་མི་བྱའི། དངོས་པོ་ལ་སོགས་པ་བསྟན་པ་འདི་ལ་འཇུག་པའི་སྒོ་བྱེད་པ་རྣམས་ལ་བྱའོ། །ཁྱད་པར་ཅི་མཆིས་ཞེས་པ་ནི་བསླབ་པ་དེའི་རང་བཞིན་གྱི་ཁྱད་པར་དྲིས་པའོ། །ཇི་ལྟར་ན་ཐ་དད་པ་ལགས་ཞེས་པ་ནི་རྒྱུ་དྲིས་པ་སྟེ་འོག་ནས་འཆད་པ་དང་སྦྱར་རོ། །གསང་བའི་བདག་པོ་ཐ་དད་པ་ཚུལ་དང་ཚུལ་དུ་བཤད་པའི་ཆོས་ཀྱི་གཞུང་བཤད་ཀྱིས་ཉོན་ཅིག་ཅེས་པ་ཐ་དད་པ་ནི་འཇིག་རྟེན་ཞེས་པ་དང་ཉན་ཐོས་དང་བྱང་ཆུབ་སེམས་དཔའ་རྣམས་ཀྱི་
བསམ་པའི་ཚུལ་གྱི་བྱེ་བྲག་འོག་ནས་བསྟན་པའི་ཚུལ་གྱིས་ཐ་དད་པའོ། །ཚུལ་གཅིག་པ་ནི་དགེ་བ་བཅུའི་རང་བཞིན་དུ་མཚུངས་པར་བསྟན་པའི་ཕྱིར་རོ། །གསང་བའི་བདག་པོ་འདི་ལྟར་ཉན་ཐོས་རྣམས་བསླབ་པ་གང་བསྟན་པ་དེ་ནི་ཤེས་རབ་དང་ཐབས་སུ་འབྲེལ་པ་སྟེ། བཀའ་ལུང་གྲུབ་པའི་ཞེས་པ་ཕྱོགས་གཅིག་ཏུ་རིག་པ་མ་ཡིན་ཏེ། དེ་བས་ན་དེ་དག་གི་དགེ་བའི་ལས་བཅུ་དང་མཉམ་པར་མི་འགྱུར་རོ་ཞེས་པ་ནི། འཕགས་པ་ཉན་ཐོས་རྣམས་སྟོན་པས་ཇི་སྐད་བསྟན་པའི་བཀའ་ལུང་བཞིན་དུ་གྲུབ་པ་སྟེ། བྱང་ཆུབ་སེམས་དཔའ་ལྟར་རང་གི་ཤེས་རབ་ཀྱིས་རིག་པའི་གཞུང་དང་སྦྱར་ཞིང་འཕྲལ་ལ་ཅི་རིགས་པར་མི་བྱེད་པས། ཐབས་དང་ཤེས་རབ་མེད་ཅིང་གང་ཟག་བདག་མེད་པར་ཆུད་པའི་ཤེས་པ་དེས་ཕྱོགས་གཅིག་ལ་གནས་པས་མཚུངས་པར་མི་འགྱུར་རོ། །འཇིག་རྟེན་པ་རྣམས་བདག་གི་དངོས་པོ་ལ་ཆགས་ཤིང་གཞན་གྱི་རྐྱེན་གྱིས་འགྱུར་རོ་ཞེས་པ་ནི་འཇིག་རྟེན་པ་རྣམས་སྐྱེ་བ་དང་འཇིག་པ་དང་བདེ་བ་དང་སྡུག་བསྔལ་བ་དང་བསླབ་པའི་དངོས་པོ་ལ་སོགས་པ་ཐམས་ཅད་བདག་ཅེས་པའི་དངོས་པོ་དེས་བྱའོ་ཞེས་པ་ནས། བདག་ཅེས་དེ་བཞིན་གྱི་རྐྱེན་གྱིས་བསླབ་པ་ལ་འཇུག་པས་ཏེ། བདག་ཅེས་པའི་དངོས་པོ་ལ་བརྟེན་པས་མཉམ་པར་མི་འགྱུར་ཞེས་དང༌། བྱང་ཆུབ་སེམས་དཔའ་ཐེག་པ་ཆེན་པོ་དག་ལ་འགྲོ་བ་རྣམས་ཆོས་ཐམས་ཅད་ལ་སྙོམས་པར་ཞུགས་ཤིང༌། ཤེས་པ་ནི་དོན་དམ་པར་སེམས་ཅན་ཐམས་ཅད་སྟོང་པ་ཉིད་ཀྱི་རང་བཞིན་དུ་མཉམ་པ་ཉིད་དུ་ཞུགས་པའོ། །ཀུན་རྫོབ་ཏུ་ཆོས་ཐམས་ཅད་སྒྱུ་མ་ལྟ་བུའི་རང་བཞིན་དུ་མཉམ་པ་ཉིད་དུ་ཞུགས་པའོ། །གཞན་གྱི་རྐྱེན་གྱིས་མི་འཇུག་པ་ཞེས་པ་ནི། འཇིག་རྟེན་པ་ལྟར་བདག་ཏུ་རྟོག་པའི་གཞན་གྱི་རྐྱེན་གྱིས་མི་འཇུག་པ་ཞེས་བྱའོ། །ཐབས་དང་ཤེས་རབ་ཡོངས་སུ་ཟིན་པ་ཞེས་པ་ནི་གོང་དུ་བཤད་ཟིན་ཏོ། །བདག་དང་ཕ་རོལ་གཉིས་ཀའི་དོན་དུ་བྱེད་པ་ལ་འཇུག་གོ་ཞེས་པ་ནི་ཐབས་དང་ཤེས་རབ་ཀྱིས་ཡོངས་སུ་ཟིན་པ་ནི་བསླབ་པ་དེ་ལྟ་བུལ་བདག་ཀྱང་སྤྱོད་ལ། གཞན་ལ་ཡང་བསྡུ་བ་རྣམ་བཞིའི་སྒོ་ནས་བསྡུ་ཞིང་སྤྱོད་དུ་གཞུག་པ་ཞེས་པ་སྟེ། དེ་བས་ན་འཇིག་རྟེན་པ་དང་ཉན་ཐོས་དང་བྱང་ཆུབ་སེམས་དཔའ་རྣམས་
ཀྱི་བསླབ་པ་དང་མཉམ་པར་མི་འགྱུར་རོ་ཞེས་པ་དང་སྦྱར་རོ། །དེ་ལྟ་བས་ན་གསང་བའི་བདག་པོ་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་དང་ཐབས་ཡོངས་སུ་ཟིན་པ་བཞིན་དུ་ཆོས་ཐམས་ཅད་ལ་ནན་ཏན་བྱའོ་ཞེས་པ་ནི། གོང་དུ་བཤད་པ་རྣམས་བསྡུས་པའི་ཚིག་སྟེ། འཇིག་རྟེན་དང་ཉན་ཐོས་པ་རྣམས་ཀྱི་བསླབ་པ་ཐབས་དང་ཤེས་རབ་མེད་པ་མ་ཡིན་ལ། ཤེས་རབ་དང་ཐབས་སུ་ལྡན་པའི་ཚུལ་ཇི་སྐད་བཤད་པ་སྟེ། དེ་ལྟ་བུར་ཆོས་ཐམས་ཅད་ལ་སྦྱར་བར་བྱའོ་ཞེས་པའོ། །དེ་ནས་བཅོམ་ལྡན་འདས་ཀྱིས་བྱམས་པ་དང་སྙིང་རྗེ་ཆེན་པོའི་སྤྱན་གཉིས་ཀྱིས་སེམས་ཅན་གྱི་ཁམས་ལ་གཟིགས་ནས། ཕྱག་ན་རྡོ་རྗེ་བྱང་ཆུབ་སེམས་དཔའ་ལ་བཀའ་སྩལ་པ་ཞེས་པ་ནི། གོང་དུ་བྱང་ཆུབ་སེམས་དཔའི་བསླབ་པ་མིང་ཙམ་དུ་སྨོས་པ་རྣམས་རེ་རེ་ནས་ཞིབ་ཏུ་བཤད་པའི་ཕྱིར་བཀའ་སྩལ་པ་སྟེ། བྱམས་པ་ནི་སེམས་ཅན་ཐམས་ཅད་བདེ་བར་འཇོག་པ་སྙིང་རྗེའི་སྡུག་བསྔལ་བ་ལས་བྲལ་བའི་མཚན་ཉིད་དེ། བྱམས་པ་དང་སྙིང་རྗེ་དེ་ཉིད་བཅོམ་ལྡན་འདས་ཀྱི་སྤྱན་ཏེ་བྱམས་པ་ནི་སེམས་ཅན་གྱི་ཁམས་རྣམས་ལ་ཡང་བདེ་བ་ལ་གཞག་པར་འོས། སྙིང་རྗེ་ནི་གང་སྡུག་བསྔལ་བ་ལས་གཞོལ་བར་འོས་པ་གཟིགས་པའི་ཕྱིར། སྐབས་གཞན་དུ་ཕྱག་ན་རྡོ་རྗེ་གསང་བའི་བདག་པོ་ཞེས་སྨོས་པས། ཕྱག་ན་རྡོ་རྗེ་བྱང་ཆུབ་སེམས་དཔའ་ཞེས་སྨོས་པ་ཡང་བསླབ་པ་འདི་བྱང་ཆུབ་སེམས་དཔའ་རྣམས་སྤྱིའི་ཡིན་པའི་ཕྱིར། འདི་ལྟར་བྱང་ཆུབ་སེམས་དཔའ་རྣམས་བསམས་བཞིན་དུ་སྲོག་གཅོད་པ་རབ་ཏུ་སྤང་པར་བྱའོ་ཞེས་པ་ནི། འདུལ་བ་ལ་སོགས་པའི་གཞུང་ལས་ཇི་སྐད་དུ་གྲགས་པ་རྣམས་ལྔ་དང་ལྡན་པའི་མཚན་ཉིད་སྤང་བར་བྱའོ། །དབྱུག་པ་སྤང་བར་བྱའོ་ཞེས་པའོ། །ཇི་ལྟར་བདག་རང་ལ་ཇི་ལྟ་བ་བཞིན་དུ་ཕ་རོལ་པོའི་སྲོག་བཙའ་བར་བྱའོ་ཞེས་པ་ནི། མཚོན་ཆ་འཆང་བ་དང་ཁོན་དུ་འཛིན་ཏེ་དགྲར་བྱེད་པ་ནི་སྲོག་གཅོད་པའི་ཡན་ལག་པས་དེ་དག་སྤང་བ་ནི་ཡན་ལག་ཡོངས་སུ་རྫོགས་པར་བྱ་བའི་ཕྱིར་རོ། །དེ་བཞིན་དུ་མ་བྱིན་པར་ལེན་པ་སོགས་ལྷག་མ་རྣམས་ཀྱང་གསལ་བས་ཇི་སྐད་དུ་འབྱུང་བ་ལས་ཟད་དེ། སྐབས་སྐབས་ནས་མི་སྤྱད་པར་བྱ་བ་
རྣམས་ལ་བཀྲོལ་ཡང་ཁྱིམ་པའི་ཕྱོགས་སུ་གཏོགས་པའི་བྱང་ཆུབ་སེམས་དཔའ་རྣམས་ལ་བྱའི། རབ་ཏུ་བྱུང་བ་རྣམས་ནི་འདུལ་བའི་གཞུང་དང་འགལ་བས་མ་ཡིན་ནོ་ཞེས་བྱང་ཆུབ་སེམས་དཔའི་ཚུལ་ཁྲིམས་ཀྱི་ལེའུ་ལས་བྱུང་ངོ༌། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་འདི་སྐད་ཅེས་གསོལ་ཏོ་ཞེས་པ་ནས་འཕྲལ་གྱི་བདེ་བ་ལ་སྤྱོད་ཅིང༌། འཕྲལ་གྱི་རྒྱལ་པོ་བྱེད་ཀྱང་ལྟུང་བར་མི་འགྱུར་བ་བཤད་དུ་གསོལ་ཞེས་པའི་བར་དུ། གོང་དུ་དགེ་བ་བཅུའི་དངོས་པོ་རྣམས་བཤད་པ་སྟེ། རྩ་བ་ཉམས་པ་དང་མི་ཉམས་པར་འགྱུར་བའི་བྱེ་བྲག་དྲིས་པ་སྟེ། དེ་ལ་རབ་ཏུ་བྱུང་བ་རྣམས་ཀྱི་སྡོམ་པ་ནི་སོ་སོར་ཐར་པའི་སྐབས་སུ་བཤད་པས་འདིར་མི་གླིང༌། སྐབས་འདིར་ཁྱིམ་ལ་གནས་པའི་བྱང་ཆུབ་སེམས་དཔའ་ལ་བྱ་སྟེ། དེ་ཡང་རྣམ་པ་གཉིས་ཏེ་ཁྲིམས་ལྔའི་སྡོམ་པ་བླངས་པ་དང༌། སྡོམ་པ་མནོས་པ་ཡི་དམ་དུ་བསྲུང་བའོ། །དེ་ལ་དགེ་བ་བཅུའི་ལས་ཀྱི་ལམ་འདི་རྣམས་ཀྱི་སྡོམ་པ་ཉམས་པ་དང་ཞེས་པ་ནི། ཁྲིམས་ལྔའི་སྡོམ་པ་མནོས་པའི་བྱང་ཆུབ་སེམས་དཔའ་དགེ་བ་བཅུའི་ལས་ཀྱི་ལམ་རྣམས་ཀྱི་སྡོམ་པ་ཇི་ཙམ་གྱིས་མེད་པར་འགྱུར་ཞེས་པ་དེ་བཤད་དུ་གསོལ་ཞེས་པའོ། །ཤིན་ཏུ་རྩ་བ་ནས་འཆད་ཅེས་པ་ནི་ཁྲིམས་ལྔ་མ་མནོས་པར་བདག་ཉིད་ཀྱི་ཡི་དམ་དུ་བསྲུང་བ་དེ་ཇི་ཙམ་མེད་པར་འགྱུར་ཞེས་པ་དེ་བཤད་དུ་གསོལ་ཞེས་པའོ། །ཇི་ལྟར་བཅོམ་ལྡན་འདས་བྱང་ཆུབ་སེམས་དཔའ་ཁྱིམ་ན་བུད་མེད་དད་བུ་མོ་དང་ཕྱུགས་འཁོར་རྣམས་ཀྱིས་བསྐོར་ཅིང་འཕྲལ་གྱི་བདེ་བ་ལ་སྤྱོད་ཅིང་ཕྱུག་ལ། རྒྱལ་པོ་བྱེད་ཀྱང་ལྟུང་བར་མི་འགྱུར་ཞེས་པ་ནི་གོང་མའི་ཚིག་གཉིས་དཀྱུས་ནས་བཀྲོལ་ཏེ། བྱང་ཆུབ་སེམས་དཔའ་ཁྱིམ་ན་གནས་པ་ལ་བྱེ་བྲག་ཏུ་ཞུས་པ་སྟེ། ཁྱིམ་ན་གནས་པའི་བྱང་ཆུབ་སེམས་དཔའ་བུ་སྨད་དང་འཁོར་གྱིས་བསྐོར་ཞིང་ལྷ་དང་མིའི་ལོངས་སྤྱོད་ལ་སྤྱོད་ཅིང་དབང་བྱེད་ཀྱང་དེ་རྣམས་ཀྱི་དབང་དུ་མི་འགྱུར་བས། ཐབས་མཁས་བས་དགེ་བ་བཅུའི་སྡོམ་པ་ལས་མི་ཉམས་ཤིང་ལྟུང་བར་མི་འགྱུར་བ་བཤད་དུ་གསོལ་ཞེས་ཞུས་པ་སྟེ། འོག་ནས་བཅོམ་ལྡན་འདས་ཀྱིས་སླར་བཤད་པ་དང་སྦྱར་རོ། །དེ་ལ་ཁྱིམ་ན་གནས་པའི་བྱང་ཆུབ་སེམས་དཔའ་རྣམས་ལ་བྱེ་བྲག་ཏུ་ཕྱེ་སྟེ་བཤད་པ་སྟེ། རྣམ་པ་མང་པོ་ལ་རྒྱལ་པོའི་དབང་བྱེད་
ཅེས་པ་ནི་ཐབས་ཀྱིས་ཡོངས་སུ་ཟིན་པས་རྩེད་མོ་དད་གར་དང་མིག་འཕྲུལ་དང་བཟོ་སྣ་མང་པོ་ལ་སོགས་པ་རབ་ཏུ་སྟོན་ཏོ་ཞེས་ཡུལ་དད་དུས་ཀྱི་དབང་གིས་ཐམས་ཅད་མཁྱེན་པ་རྩོལ་ལོ་ཞེས་པ་ནི། རབ་ཏུ་འབྱུང་བ་ནི་འདི་ཉིད་ཀྱིས་འབད་ཅིང་རྩོལ་གྱིས་ཁྱིམ་པའི་བྱང་ཆུབ་སེམས་དཔའི་ནི་དུས་དང་ཡུལ་ཆད་པ་མེད་དེ། ཚེ་འདི་འབའ་ཞིག་མ་ཡིན་གྱི་ཚེ་རབས་དུ་མར་རྟོག་ཅིང་རྩོལ་པ་དང༌། ཐབས་སྣ་དུ་མའི་སྒོ་ནས་སངས་རྒྱས་ཀྱི་ཞིང་ལ་སོགས་པའི་ཡུལ་གང་དུ་སྐྱེས་ཀྱང་རུང་བར་རྩོལ་བའོ། །དེ་བས་ན་གསུངས་པ། འདི་ལྟར་ཐབས་ཀྱིས་ཡོངས་སུ་ཟིན་པས་ཞེས་པ་ལ་སོགས་པ་སྟེ། རོལ་མོ་ལ་སོགས་པ་བཟོ་རྣམ་པ་མང་པོ་སྟོན་པ་ཡང༌། སེམས་ཅན་རྣམས་སོ་སོའི་རྗེས་སུ་མཐུན་པར་སྦྱར་ནས་བསྡུ་བ་རྣམ་བཞིའི་སྒོ་ནས་བསྡུས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གདོན་པའི་ཕྱིར་རོ། །དེ་ནི་སྲོག་གཅོད་པ་རབ་ཏུ་སྤངས་པ་ཡིན་ཞེས་པ་ན་ལོག་པར་ལྟ་བ་རབ་ཏུ་ཡང་སྤངས་ཤེས་པ་ཡིན་ཞེས་པའི་བར་བྱང་ཆུབ་སེམས་དཔའི་ཁྲིམས་ལྔ་པོའི་དངོས་པོ་སྨོས་པའོ། །བསླབ་པའི་གནས་འདི་ལྔ་བཟུང་ནས་ཞེས་པ་ནས། ཐབས་དང་ཤེས་རབ་ཀྱིས་ཟིན་པས་བསླབ་པའི་བར་དུ་བསླབ་པ་དེ་རྣམས་ཀྱིས་རྗེས་སུ་བསྔགས་པ་དང༌། དེ་ལྟ་བུར་སློབ་པས་ལྟུང་པའི་རྩ་བ་འདི་བཞི་སྲོག་གི་ཕྱིར་ཡང་ཉམས་པར་མི་བྱའོ་ཞེས་པ་དང་སྦྱར་ཏེ། ཁྱིམ་པའི་བྱང་ཆུབ་སེམས་དཔའ་འདི་སྐད་སྨོས་པའི་བསླབ་པའི་འདི་ལྔ་ལ་དད་པས་བསླབས་ནས་སྣོད་ཀྱི་དེ་བཞིན་གཤེགས་པའི་བསླབ་པ་བླ་ན་མེད་པ་དེ་བཞིན་གཤེགས་པས་བསྔགས་པས་བསྔགས་པ་བསླབ་པ་དང་རྗེས་སུ་མཐུན་པར་བསླབ་པ་ཡིན་ནོ་ཞེས་སོ། །དེ་ཅིའི་ཕྱིར་ཞེ་ན། སྔོན་གྱི་དེ་བཞིན་གཤེགས་པས་ཀྱང་འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་ལ་གནས་ནས། འདུས་བྱས་པའི་ཚུལ་ཁྲིམས་ཐབས་དང་ཤེས་རབ་ཡོངས་སུ་ཟིན་པས་བསླབས་ནས་བླ་ན་མེད་པ་བརྙེས་ཏེ། དེ་ལྟ་བས་ན་འདི་ལྟར་བསླབ་པ་ནི། དེ་དག་གི་རྗེས་སུ་སློབ་པ་ཞེས་བྱའོ། །འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་ལ་གནས་ནས་ཞེས་པ་ནི་ཆོས་ཐམས་ཅད་ཐོག་མ་ནས་མ་བྱུང་མ་སྐྱེས་པ་སྟོང་པ་ཉིད་ཀྱི་རང་བཞིན་ལ་ཆུད་པར་གནས་ནས་ཞེས་པའོ། །འདུས་བྱས་པའི་ཚུལ་ཁྲིམས་ཀྱི་ཞེས་པ་ནི་སྲོག་གཅོད་པ་
རབ་ཏུ་སྤང་བ་ཡིན་ཞེས་པ་ལ་སོགས་པ་མིང་གིས་སྨོས་པ་རྣམས་ཏེ། དེ་བས་ན་ཐགས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་སྔ་མ་བཞིན་ནོ། །དེ་ལྟར་སློབ་མ་དེས་འོག་ནས་མིང་གིས་འབྱུང་བའི་རྩ་བ་འདི་བཞི་སྲོག་གི་ཕྱིར་ཡང་ཉམས་པར་མི་བྱ་སྟེ། འདི་བཞི་བཤད་པ་ཡང་དམ་ཚིག་གི་སྐབས་སུ་སྔར་བཤད་ཟིན་ཏོ། །དེ་ཅིའི་ཕྱིར་ཞེ་ན། དེ་ནི་སླར་འབྱུང་དུ་མེད་པ་ཞེས་པ་ནི་འདི་བཞི་དང་མི་ལྡན་ན་བྱང་ཆུབ་སེམས་དཔའ་ཞེས་ཀྱང་མི་བྱ་སྟེ་སླར་གསོར་མི་རུང་ངོ་ཞེས་པའོ། །ཐབས་དང་ཤེས་རབ་ཏུ་བྲལ་བ། །ཞེས་པ་ནི་དེ་བཞིན་ནི་འཇིགས་པར་བྱེད་པའི་ཐབས་དང་ཤེས་རབ་ཏུ་སྦྱར་བར་རང་བཞིན་གྱིས་ཉོན་མོངས་པ་ཡིན་ཏེ་སླར་དབྱུང་དུ་མེད་པ་ཞེས་པ་དང་སྦྱར་རོ། །དེ་བས་ན་གསུངས་པ་དེ་ཅིའི་ཕྱིར་ཞེ་ན། འདས་པའི་སངས་རྒྱས་རྣམས་དང༌། གང་མ་བྱོན་པའི་སངས་རྒྱས་རྣམས་དང༌། ད་ལྟར་བཞུགས་པའི་མགོན་པོ་ཡང་ཤེས་རབ་དང་ཐབས་ཡོངས་སུ་ཟིན་པར་བསླབས་ནས་བླ་ན་མེད་པའི་བྱང་ཆུབ་འཐོབ་བོ་ཞེས་པ་སྟེ། དེ་བས་ན་འདི་བཞི་དང་མི་ལྡན་ཞིང་ཐབས་དང་ཤེས་རབ་མེད་ན་བླ་ན་མེད་པའི་བྱང་ཆུབ་འདུས་མ་བྱས་པ་ཐོབ་པར་མི་འགྱུར་བས་སླར་དབྱུང་དུ་མེད་དོ་ཞེས་པའོ། །དེ་ལྟར་ཐབས་དང་ཤེས་རབ་ཏུ་མི་ལྡན་པས་ན་སླར་དབྱུང་དུ་མེད་ན། ཉན་ཐོས་པ་རྣམས་ལ་ངས་ཐབས་དང་ཤེས་རབ་ཏུ་མི་ལྡན་པའི་བསླབ་པ་བཤད་ཅེ་ན། ཐབས་དང་མི་ལྡན་པའི་ཡེ་ཤེས་ཉན་ཐོས་རྣམས་ལ་བསླབ་པ་བཤད་པ་ནི། དཔའ་བོ་ཆེན་པོ་དེ་དག་གཟུང་བའི་ཕྱིར་རོ་ཞེས་པ་སྟེ། ཉན་ཐོས་རྣམས་ལ་ངས་ཐབས་དང་ཤེས་རབ་ཏུ་མི་ལྡན་པའི་བསླབ་པ་བསྟན་པ་ཡང་ངེས་པའི་དོན་དུ་བསྟན་པ་མ་ཡིན་གྱི། དེ་དག་སྣོད་དང་སྦྱར་ཞིང་བཀྲི་བའི་ཕྱིར་རོ་ཞེས་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གྱི་འཁོར་ལོ་འདིར་བྱིན་གྱིས་བརླབས་པ་ལས་སྔགས་བཟླས་པའི་སྐབས་ལ་ཐོག་མར་སྤྱིར་ཕྱི་ནང་གི་བཟླས་པ་ཡན་ལག་བཞི་བསྟན་ཏེ། དེའི་འོག་ཏུ་དེ་བཞིན་གཤེགས་པའི་སྙིང་པོ་བཞིའི་སྐབས་སུ་ནང་གི་བཟླས་པའི་ཡན་ལག་བཞི་བསྟན། དེའི་འོག་ཏུ་དཔའ་བོ་ཆེན་པོ་སྙིང་པོའི་སྐབས་སུ་ནང་གི་བཟླས་པའི་ཡན་ལག་གསུམ་བསྟན་ཏེ་དེ་རྣམས་ཀྱང་བཟླས་པའི་གྲངས་སུ་དུས་ངེས་པའི་བསྙེན་པར་བྱས་པ་གསུངས་སོ། །ད་ནི་ཡི་གེ་བརྒྱ་
པའི་སྐབས་སུ་འདིར་ཡང་བཟླས་པའི་ཡན་ལག་གཅིག་དང་གྲངས་དང་དུས་ངེས་པའི་བསྙེན་པ་མ་ཡིན། ཀུན་དུ་སངས་རྒྱས་ཀྱི་སྐུར་བསྒྲུབ་པའི་གནས་ཡོངས་སུ་གྱུར་པའི་བར་དུ་བཟླས་པའི་མཚན་མ་འཆད་དེ། དེ་བས་ན་བཟླས་པ་དེ་རྣམས་ཀྱང་སྒོམ་རིམ་ཙམ་ཡང་བཤད་པར་ཤེས་པར་བྱ་སྟེ། དང་པོ་ཉིད་དུ་ཕྱི་ནང་གི་བཟླས་པའི་ཡན་ལག་བཞི་ཕྱི་དང་ནང་གཉིས་ཀ་ལ་དམིགས་པས་སྤོམ་མོ། །དེའི་འོག་ཏུ་ནང་གི་བཟླས་པའི་ཡན་ལག་བཞི་ཕྱི་རོལ་དུ་སངས་རྒྱས་ཀྱི་སྐུལ་མི་དམིགས་པར་ནང་དུ་རང་གི་ཉིང་གར་དེ་བཞིན་གཤེགས་པའི་སྐུ་བསམས་ནས་སློབ་པ་དེ་བས་ཕྲའོ། །དེའི་འོག་ཏུ་དཔའ་བོ་ཆེན་པོའི་སྐབས་སུ་སྙིང་གར་དེ་བཞིན་གཤེགས་པའི་སྐུར་བསམས་པ་ཡང་བཏང་སྟེ། དབང་ཆེན་ལ་སོགས་པའི་དཀྱིལ་འཁོར་གང་རུང་བ་བསམས་ནས་ཡན་ལག་གསུམ་དུ་བྱ་སྟེ་ཟློས་བས་དེ་བས་ཀྱང་ཕྲའོ། །ཡི་གེ་བརྒྱ་བའི་སྐབས་འདིར་ནི་བདག་སྟོང་པ་ཉིད་ཀྱི་ཏིང་ངེ་འཛིན་ལ་གནས་ནས་སྙིང་པོའི་སྒྲ་ཙམ་ལ་ཡན་ལག་གཅིག་པུར་བྱ་སྟེ། ཟློས་པས་གོང་མ་ཀུན་ཕྲ་པར་རིག་པར་བྱའོ། །དེ་ལ་ཡི་གེ་བརྒྱ་པ་ཡང་ཀུན་དུ་སངས་རྒྱས་པ་ཡིན་ཡང༌། ཡི་གེ་ཨཾ་གིས་བྱིན་གྱི་བརླབ་པ་སྟེ། དེ་ཡང་ལེའུ་ལྔས་ཡི་གེ་བརྒྱ་བའི་བཤད་པའི་ཡན་ལག་རྫོགས་པར་ཤེས་པར་བྱ་བ་ནི། ཡི་གེ་བརྒྱ་པ་འབྱུང་བའི་ལེའུ་དང༌། སྒྲའི་འབྲས་བུའི་སྦྱོར་བ་བསྟན་པའི་ལེའུ་དང༌། ཡི་གེ་བརྒྱ་པའི་ལེའུ་པ་སྒྲགས་པའི་ལེའུ་དང༌། བདག་བསྒྲུབ་པའི་ལེའུ་དང་ཀུན་དུ་བྱང་ཆུབ་པའི་རང་བཞིན་བསྟན་པའི་དེའུ་རྣམས་ཏེ། དེ་ལ་འདིར་དང་པོར་ཡི་གེ་བརྒྱ་བ་འབྱུང་བའི་ལེའུ་བཤད་དེ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་འཁོར་འདུས་པ་ཐམས་ཅད་ལ་གཟིགས་ནས་ཞེས་པ་ལ་སོགས་པ་སྟེ། དེ་ལ་ཡི་གེ་བརྒྱ་པ་ནི་ཨཾ་ཞེས་པ་ཉིད་ཀྱི་ནང་དུ་འདུས་པར་ཤེས་པར་བྱ་བ་སྟེ། དེ་ནི་ཀླད་ཀོར་ནི་ང་དང༌། ཉ་དང༌། ཎ་དང༌། ན་དང་མ་རྣམས་ཀྱི་རང་བཞིན་ཏེ། ངའི་ནང་དུ་ཀའི་རིས་འདུས། ཉའི་ནང་དུ་ཚའི་རིས་འདུས། ཎའི་ནང་དུ་ཊའི་རིས་འདུས། ནའི་ནང་དུ་ཏའི་རིས་འདུས། མའི་ནང་དུ་པའི་རིས་འདུས་ཏེ། ཡི་གེ་དེ་ཉི་ཤུ་དང་རྣམ་པར་ཤེས་པའི་ལེའུ་ལས་བཤད་པ་དང་སྦྱར་ནས། ཨ་དང་ཨོཾ་ནང་དུ་ཡང་འདུས། རྀ་རཱྀ་དང་ལྀ་ལཱྀ་ནི་ར་དང་ལ་དངོས་སོ། །ཨི་
ཨཱིའི་ནང་དུ་བྷ་འདུས་ཏེ། དེ་ལྟར་ས་ར་ལ་བ་རྣམས་ཀྱང་དེར་འདུས་ཏེ། ཨཾ་ལ་སོགས་པ་གང་དང་ལྡན་པ་དང༌། ཡི་གེ་ཉི་ཤུ་ལྔ་རྣམས་བྱང་ཆུབ་པ་དང༌། སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པ་བཞི་རེ་རེ་ལ་ཡི་གེ་ཉི་ཤུ་ལྔ་ལྔར་སྦྱར་ནས་བརྒྱ་པར་འགྱུར་ཏེ། ཡི་གེ་དེ་རྣམས་གཅིག་ཏུ་བསྡུས་པ་ནི་ཨ་ཞེས་པ་སྟེ། ཨ་ནི་ཤེས་བྱ་དང་ཡེ་ཤེས་གཉིས་ཀ་སྟོང་པའི་མཚན་ཉིད་དེ། ཀླད་ཀོར་ནི་སྟོང་པའི་མཚན་ཉིད་དོ། །ཡི་གེ་ཨ་བཞི་ཆར་ཡང་དེའི་ནང་དུ་འདུས་པས། ཨཾ་དེ་ཉིད་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་ཡི་གེ་བརྒྱ་པ་ཞེས་བྱའོ། །ད་དང༌། ཉ་དང༌། ཎ་དང༌། ན་དང་མ་རྣམས། ཤ་དང༌། པ་དང༌། ཨཾ་དང་ཨ་རྣམས་ནི་ཏིང་ངེ་འཛིན་ཐམས་ཅད་ཀྱི་དབང་པོ་པས་འདིར་ཡི་གེ་མི་བགྲང༌། འཁོར་འདུས་པ་ཐམས་ཅད་ལ་གཞིགས་ནས་ཞེས་པ་ནི་སྔར་བཤད་པ་བཞིན་ནོ། །བསྟན་པ་གདོན་མི་ཟ་བར་དངོས་གྲུབ་པར་བཞེད་ནས། བསྟན་པ་ཞེས་པའི་ཚིག་ནི་འདུལ་བའི་འགྲོ་བ་རྣམས་ལ་བསླབ་པའི་ཕྱིར་བསྟན་པ་ཞེས་བྱ་སྟེ། མདོ་སྡེ་ལ་སོགས་པ་ཐམས་ཅད་ལ་ཡང་བྱ་མོད་ཀྱི། སྐབས་འདིར་ནི་སྔགས་བསྟན་པ་ལ་བྱ་སྟེ་དེ་ཡང་བཟླས་པའི་གྲངས་དང༌། དུས་ཏེ་དེས་པ་སྔོན་དུ་བསྟན་པ་བྱས་ནས་བསྒྲུབ་པར་བྱ་བ་གོང་དུ་བཤད་པ་རྣམས་བཟླས་པའི་གྲངས་སུམ་འབུམ་ལ་སོགས་པ་བྱས་ནས་བསྒྲུབ་བོ་ཞེས། ཡང་བཤད་པ་རྒྱུད་ཡོངས་སུ་དག་པའི་སེམས་ཅན་རྣམས་ལ་ཡང་གསུངས་ཀྱི། །ཐམས་ཅད་ལམ་ཡིན་ནོ་ཞེས་འབྱུང་བས་གྲངས་དང་དུས་ངེས་པའི་སྔོན་དུ་བསྙེན་པ་བྱས་ཀྱང་རྒྱུད་མ་དག་པའི་སེམས་ཅན་རྣམས་ཀྱིས་མི་འགྲུབ་ཀྱང་སྲིད་དེ་དེ་དག་ནི་གདོན་མི་ཟ་བའོ། །འདིར་ནི་གནས་ཡོངས་སུ་འགྱུར་པའི་མཚན་མ་བྱུང་གི་བར་དུ་བཟླས་པ་གསུངས་པས་མཚན་མ་བྱུང་བ་དེ་ཉིད་འགྲུབ་པ་སྟེ། མཚན་མ་དེ་བྱུང་ནས་མི་འགྲུབ་པར་མི་སྲིད་པས་གདོན་མི་ཟ་བ་ཞེས་བྱ་སྟེ། བཅོམ་ལྡན་འདས་བསྟན་པ་དེ་གྲུབ་པར་བཞེད་ནས་སྔགས་ཀྱི་མགོན་པོ་ཤིན་ཏུ་འབར་བ་གསུངས་སོ་ཞེས་པ་དང་སྦྱར་རོ། །སྔགས་ཐམས་ཅད་ཀྱི་དབང་པོ་སྔགས་ཀྱི་རྒྱལ་པོ་མགོན་པོ་ཤིན་ཏུ་འབར་བ་ཞེས་པ་ནི་ཀུན་དུ་སངས་རྒྱས་པའི་རང་བཞིན་ཨཾ་ཞེས་པ་དེ་ཉིད་བྱེ་བྲག་ལ་བྱ། དེའི་རང་བཞིན་ཀྱང་རྣམ་པ་གསུམ་
དུ་རིག་པར་ཤེས་པར་བྱ་སྟེ། ཆུད་པའི་མཚན་ཉིད་དང་གཞུང་གི་མཚན་ཉིད་དེ། གཞུང་གི་མཚན་ཉིད་ལ་ཡང་དོན་དམ་པ་དང་ཀུན་རྫོབ་ཀྱི་མཚན་ཉིད་དེ་དེ་ལྟར་རྣམ་པ་གསུམ་མོ། །དེ་ལ་ཆུད་པའི་དོན་དམ་པའི་རང་བཞིན་ནི་ཡི་གེ་ཨ་དང་ཞེས་པ་དང༌། དེ་ལ་སོགས་པའི་སྔགས་ཀྱི་ཡི་གེ་རྣམས་སོ། །དེ་ལ་སྔགས་ཐམས་ཅད་ཀྱི་དངོས་པོ་ཞེས་པ་སྔགས་ཐམས་ཅད་ཅེས་པ་ནི་འཇམ་དཔལ་གཞོན་ནུར་གྱུར་པ་ལ་སོགས་པའི་ཏིང་ངེ་འཛིན་གྱི་རང་བཞིན་རྣམ་པར་ཐར་པའི་ཡེ་ཤེས་ཕྱོགས་གཅིག་པ། ཆོས་ཐམས་ཅད་པ་དང་ཞེས་བྲལ་ལོ་ཞེས་པ་ལ་སོགས་པ་དང༌། ཀུན་རྫོབ་ཏུ་དེ་དག་ཉིད་ཀྱི་སྐུར་སྣང་བ་དང༌། གཞུག་གི་ཆོས་སུ་ཡི་གེ་ཨཾ་ལ་སོགས་པ་ནི་སྔགས་ཐམས་ཅད་དེ། དེ་དག་གི་དབང་པོ་ནི་བཅོམ་ལྡན་འདས་ཀུན་དུ་སངས་རྒྱས་པའི་ཡི་གེ་བརྒྱ་པ་སྟེ་ཕྱོགས་གཅིག་པ་རྣམས་ཀུན་དུ་འདུས། ཀུན་རྫོབ་ཏུ་ཡང་བཅོམ་ལྡན་འདས་ཀྱི་སྐུ་ལས་སྔགས་ཕལ་གྱི་གཟུགས་རྣམས་འབྱུང༌། གཞུང་གི་ཆོས་ཀྱང་ཡི་གེ་ཨཾ་ལ་སོགས་པ་ནི་ཡི་གེ་ཐམས་ཅད་འབྱུང་སྟེ། ཀུན་རྫོབ་དང་དོན་དམ་པ་ཀུན་དུ་ཡང་སྔགས་ཐམས་ཅད་དེར་གཏོགས་ཤིང་གེའི་དབང་གིས་གྱུར་པས་ན་ཨཾ་དེ་སྔགས་ཐམས་ཅད་ཀྱི་དབང་པོ་ཞེས་པའོ། །སྔགས་ཀྱི་རྒྱལ་པོ་ཞེས་པ་ནི་ཀུན་རྫོབ་དང་དོན་དམ་པ་གཉིས་ཀར་ཡང་སྔགས་ཕལ་ལས་ཡོན་ཏན་ཐམས་ཅད་ཀྱིས་འཕགས་པའི་ཕྱིར་རོ། །སྔགས་ཀྱི་མགོན་པོ་ཞེས་པ་ནི་སྐྱབས་ཞེས་པའི་དོན་ཏེ། སྔགས་ཐམས་ཅད་ཀྱི་གོང་དུ་བཤད་པའི་ཚུལ་གྱིས་དེ་ལས་བྱུང་ཞིང་དེར་འདུ་བའི་ཕྱིར་ཤིན་ཏུ་འབར་བ་ཞེས་པ་ནི་མཐུ་ཕུན་སུམ་ཚོགས་པ་བསྟན་པ་སྟེ། མཐུ་ཆེན་དང་ལྡན་ཞེས་པ་སྟེ་དེ་ལྟ་བུའི་སྙིང་པོ་འཇམ་པའི་ཚིག་གི་ཕྱག་ན་རྡོ་རྗེས་གསུངས་པ་ཞེས་པ་དང་སྦྱར་ཏེ། ཕྱག་ན་རྡོ་རྗེ་ཡང་ཅི་འདྲ་ཞིག་ཅེ་ན་གསུངས་པ། ས་མ་ཡ་ནི་གསུམ་པ་གནས་དང་ལམ་གསུམ་ཡོངས་སུ་རྫོགས་པར་བྱེད་པ་ཞེས་པ་སྟེ། དམ་ཚིག་གསུམ་པ་ཞེས་པ་ནི་བཅོམ་ལྡན་འདས་ཀྱི་ལུས་དང་ངག་དང་ཡིད་མི་ཟད་པའི་རྡོ་རྗེའི་རྒྱན་ལ་བྱ་སྟེ། རྡོ་རྗེ་ལ་སོགས་པའི་བྱང་ཆུབ་སེམས་དཔའ་ས་བཅུ་ཡོངས་སུ་རྫོགས་ཏེ་ཡེ་ཤེས་ཆེན་པོ་དང་ལྡན་པའི་དབང་བསྐུར་བ་ན་བཅོམ་ལྡན་འདས་ཀྱི་སྐུ་ལས་འོད་ཟེར་བཏང་བའི་བྱིན་གྱི་རླབས་
ཀྱིས་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་ཏེ། གསུམ་པ་མཐོང་བ་ལ་ཞུགས་པ་ནི་དམ་ཚིག་གསུམ་ལ་གནས་པ་ཞེས་པའོ། །ལམ་གསུམ་ཡོངས་སུ་རྫོགས་པར་བྱེད་ཅེས་པ་སྟེ། དམ་ཚིག་གསུམ་ཐོབ་པར་བྱེད་པའི་ལམ་ཕྱག་ན་རྡོ་རྗེ་ཐོབ་པར་བྱེད་པའོ། །སྔགས་ཀྱི་མགོན་པོ་ཞེས་པ་ནི་སྔ་མ་བཞིན་ནོ། །དེའི་ཡེ་ཤེས་དམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་པ་ནི། བཅོམ་ལྡན་འདས་ཏིང་ངེ་འཛིན་དེ་ལ་ཞུགས་ནས། ཀུན་དུ་སངས་རྒྱས་པའི་ཡེ་ཤེས་དམ་པ་ཐམས་ཅད་ཐོག་མ་ནས་མ་བྱུང་མ་སྐྱེས་བ་སྟེ། མཁྱེན་པའི་རང་བཞིན་གྱི་ཡི་གེ་འཆད་པས་ཏིང་ངེ་འཛིན་གྱི་མིང་ཡེ་ཤེས་དམ་པ་ཞེས་བྱའོ། །དེ་བས་ན་ཡི་གེ་ཨཾ་དེ་ཁྱད་པར་གསུངས་པ། རྣམ་པ་མང་པོའི་ཡེ་ཤེས་འབྱུང༌། །ཞེས་པ་སྟེ་རྣམ་པ་མང་པོའི་ཡེ་ཤེས་ནི་ཆུང་པའི་ཆོས་དང༌། གཞུང་གི་ཆོས་རྣམ་པ་མང་པོ་ཀུན་རྫོབ་དང་དོན་དམ་པའི་ཚུལ་གཉིས་ཀར་མཁྱེན་པ་ལ་བྱ་སྟེ། དེ་ལྟ་བུའི་ཡེ་ཤེས་ཡི་གེ་ཨཾ་ཞེས་པའི་ཡི་གེ་འདི་ལས་ཡེ་ཤེས་དེ་འབྱུང་བ་ལ་བྱའོ། །འོད་ཟེར་བརྒྱས་ཁྱབ་པ་ཞེས་པ་ནི། དོན་དམ་པར་ཡང་དེ་བཞིན་ཉིད་ཀྱི་ཡེ་ཤེས་རྒྱ་མཚོ་དང་འདྲ་བ་དེ་ལས་སྔགས་གཞན་པའི་ཡེ་ཤེས་ཕྱོགས་གཅིག་པ་རྣམས་འབྱུང་བ་དང༌། ཀུན་རྫོབ་ཏུ་དེ་བཞིན་གཤེགས་པའི་སྐུ་ལས་སྔགས་ཀྱི་སྐུ་མང་པོ་འབྱུང་བས་ཁམས་གསུམ་ཀུན་དུ་ཁྱབ་པ་དང༌། གཞུང་གི་ཆོས་སུ་ཡང་ཡི་གེ་ཨ་ལས་གོང་དུ་འཆད་པའི་ཚུལ་གྱིས་ཡི་གེ་བརྒྱ་རྣམས་འབྱུང་ཞིང་སྔགས་ཐམས་ཅད་དུ་ཁྱབ་པའི་ཕྱིར་རོ། །ཕྱག་ན་རྡོ་རྗེ་འདི་ནི་སྔགས་ཐམས་ཅད་ཀྱི་སྔགས་ཀྱི་མགོན་པོ་ཤིན་ཏུ་འབར་བ་ཞེས་པ་ནི་གོང་དུ་བཤད་པའི་ཚུལ་བཞིན་ནོ། །འདི་ནི་ཀུན་དུ་སངས་རྒྱས་པ་ཉིད་དོ་ཞེས་པ་ནི་ཡེ་གེ་ཨཾ་ཞེས་པ་ནི་བཅོམ་ལྡན་འདས་ཀུན་དུ་སངས་རྒྱས་པའི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་རང་བཞིན་ཉིད་ཡིན་ནོ་ཞེས་པའོ། །ཆོས་ཐམས་ཅད་ཀྱི་དབང་ཕྱུག་ཅེས་པ་ནི་ཆུད་པའི་ཆོས་དང་གཞུང་གི་ཆོས་ཐམས་ཅད་མཁྱེན་པས་ན་ཆོས་ཐམས་ཅད་ཀྱི་དབང་ཕྱུག་ཅེས་པའོ། །ཐུབ་པ་ཞེས་པ་ནི་ལུས་དང་ངག་དང་ཡོད་གསུམ་ཐུབ་པའི་མཚན་ཉིད་དེ་ཤཱ་ཀྱ་ཐུབ་པ་ཉིད་ལ་བྱའོ། །མི་ཤེས་པའི་མུན་པ་ཐམས་ཅད་མེད་པར་བྱེད་པས་ཉི་མ་ཤར་བ་བཞིན་ནོ་ཞེས་པ་ནི་ཆུད་པའི་ཆོས་དང༌།
གཞུང་གི་ཆོས་གཉིས་ཀ་ལ་སྒྲིབ་པ་སྤངས་ཏེ། ཇི་ལྟར་ཆུད་པ་ན་འདུག་པའི་རྫས་རྣམས་དངོས་པོ་གང་ཡིན་མི་ཤེས་པ་ཉི་མ་ཤར་བ་ན་རྫས་དག་གསལ་བར་མཐོང་བ་བཞིན་དུ་ཐམས་ཅད་མཁྱེན་པའི་ཡེ་ཤེས་དེས་ཀྱང་མ་རིག་པའི་མུན་པ་བསལ་ནས་ཀུན་རྫོབ་དང་དོན་དམ་པའི་དངོས་པོ་རྣམས་གསལ་བར་མཁྱེན་པ་སྟེ། དེས་ནི་སྤོང་པ་ཕུན་སུམ་ཚོགས་པ་བསྟན་པའོ། །ཚིག་གོང་མས་ནི་ཡེ་ཤེས་ཕུན་སུམ་ཚོགས་པ་བསྟན་པའོ། །བདག་ཉིད་ཀྱང་འདི་ལྟར་ཐུབ་པ་ཆེན་པོར་བྱིན་གྱིས་བརླབས་པ་སྟེ་ཞེས་པ་ནི་ཀུན་དུ་སངས་རྒྱས་པ་སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་དེ་ཉིད་ཤཱཀྱ་ཐུག་པའི་སྐུར་བྱིན་གྱིས་བརླབས་ཏེ་ཞེས་པའོ། །དེ་ལྟར་བྱིན་གྱིས་བརླབས་ནས་ཀྱང་ཅི་བྱ་ཞེ་ན་གསུངས་པ། རྣམ་པར་འཕྲུལ་པའི་སྤྲུལ་པ་སྟེ། །སེམས་ཅན་རྣམས་ལ་ཕན་འདོད་ཕྱིར། །ཞེས་པ་སྟེ་ཤཱཀྱ་ཐུབ་པའི་སྐུར་བྱིན་གྱིས་བརླབས་ནས་སེམས་ཅན་རྣམས་ཀྱི་དོན་དུ། རྣམ་པར་སྤྲུལ་པ་སྣ་ཚོགས་སྤྲུལ། །ཞེས་པའོ། །རྣམ་པར་སྤྲུལ་པ་དེ་ཡང་ཇི་སྙེད་དུ་སྤྲུལ་ཞེ་ན་གསུངས་པ། ཇི་སྙེད་སེམས་ཅན་རྣམས་ཀྱི་ནི། །སེམས་སུ་མངོན་པར་གྱུར་རྣམས་ཏེ། །དེ་སྙེད་དུ་ནི་དེ་བྱས་པ། །རྣམ་པར་སྤྲུལ་པ་གནས་མཆོག་གོ །ཞེས་པ་སྟེ། སེམས་ཅན་ཇི་སྙེད་དུ་འཇུག་ཅིང་ཇི་སྙིད་འདོད་པ་དེ་སྙེད་ཀྱི་སྐུ་རྣམས་སུ་རྣམ་པར་སྤྲུལ་པ་བྱེད་ཅེས་པའོ། །དེ་ནི་སྟོང་པ་ཉིད་ལས་ལྡང་པར་བསྟན་པ་སྟེ། དེ་ལྟ་བས་ན་དོན་དམ་པ་བསྟན་པ་སྟོང་པ་ཉིད་ཡི་ཏིང་ངེ་འཛིན་ལ་གནས་ནས། ཕྱིས་ཀུན་རྫོབ་ཏུ་སངས་རྒྱས་པའི་སྐུ་ལ་སོགས་པར་བསྒྱུར་པའི་སྤྱོད་པ་རྣམས་བྱའོ་ཞེས་དགོངས་སོ།། དེ་ལྟ་བས་ན་ཀུན་དུ་སངས་རྒྱས་པའི་གནས་འདོད་ནས། རྟག་ཏུ་ནན་ཏན་མངོན་བྱ་བ། །བདག་གི་ནང་ཉིད་དག་པས་སོ། །ཞེས་པ་ནི་སྡུད་པའི་ཚིག་སྟེ་ཀུན་དུས་སངས་རྒྱས་པའི་རང་བཞིན་དེ་ལྟ་བུས་ན་གང་ཀུན་དུ་སངས་རྒྱས་པའི་སྐུ་ཐོབ་པར་འདོད་པས། ཡི་གེ་བརྒྱ་པའི་རང་བཞིན་དུ་ཀུན་དུ་སངས་རྒྱས་པའི་སྐུ་བསྒོམ་པ་ལ་བརྩོན་པར་བྱའོ་ཞེས་པ་སྟེ། དེ་ལྟ་བས་ན་ཀུན་དུ་ཡང་ཞེས་པ་ནི་ལུས་དང་ངག་དང་ཡིད་ཀུན་གྱི་སྒོ་ནས་ཞེས་པའོ། །རྟག་ཏུ་ཞེས་པ་ནི་དུས་ཐམས་ཅད་དུའོ། །བདག་གི་ནང་ཉིད་དག་པས་སོ། །ཞེས་པ་ནི་སེམས་གཙོ་བོར་བཤད་པ་སྟེ། བདག་གི་ལྟ་བས་བཅོམ་ལྡན་
འདས་ཀྱི་སྐུར་བསྒྱུར་བ་ཙམ་གྱིས་ཆོག་པ་མ་ཡིན་གྱི། ནང་གི་སེམས་ཀྱི་ཏིང་ངེ་འཛིན་རྣམ་པར་དག་པས་ནན་ཏན་མངོན་པར་བྱའོ་ཞེས་པའོ། །ཡི་གེ་བརྒྱ་པའི་རང་བཞིན་གསུམ་ལ་ཆུད་པའི་རང་བཞིན་དོན་དམ་པ་དེ་བཞིན་ཉིད་ཀྱི་ཡེ་ཤེས་དང་ཀུན་རྫོབ་ཏུ་བཅོམ་ལྡན་འདས་ཀྱི་སྐུའི་རང་བཞིན་ཡི་གེ་ཨཾ་དོན་དུ་ལྟ། ཡི་གེ་ཨཾ་གི་ཚིག་གི་རང་བཞིན་དུ་བལྟ་སྟེ། དེ་ལ་ཡི་གེ་ཨཾ་ཀུན་སངས་རྒྱས་པའི་རང་བཞིན་འདི་ནི་བཅོམ་ལྡན་འདས་ཀྱི་གསུང་གི་རྒྱན་སྣ་ཚོགས་སུ་འབྱུང་བའི་སྡུད་པའི་སྒོར་གྱུར་པ་སྟེ། དེ་ཡང་འདི་ལྟར་དོན་དང་ཚིག་གི་བྱེ་བྲག་རང་བཞིན་གསུམ་དུ་དབྱེ་མོད་ཀྱི། སངས་རྒྱས་ཀྱི་བྱ་བ་བྱེད་པའི་སྒོ་ཐ་མི་དད་དེ། གང་གིས་བྱ་བའི་ལས་ཀྱང་གཟུགས་དང་སེམས་ཀྱིས་བྱེད་པའི་གཟུགས་ཀྱིས་བྱ་བའི་ལས་ཀྱང་ངག་དང་སེམས་ཀྱིས་བྱ་བའི་ལས་ཀྱང་ལུས་དང་ངག་གིས་བྱེད། དེ་བས་ན་སྐབས་འདིར་ཀུན་དུས་སངས་རྒྱས་པའི་གསུང་མི་ཟད་པ་དེ། ཡི་གེ་བརྒྱ་བའི་འབྲས་བུའི་སྦྱོར་བ་སྟོན་ཏེ། དེ་ལས་ཀུན་དུ་སངས་རྒྱས་པའི་ཡི་གེའི་འབྲས་བུ་ནི། སེམས་ཅན་ཡོངས་སུ་སྨིན་པ་དང༌། མ་སྨིན་པ་རྣམས་ཡོངས་སུ་གྲོལ་བ་དང་སྨིན་པར་བྱེད་པ་སྟེ། དེ་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་གསང་བའི་བདག་པོ་ལ་བཀའ་སྩལ་པ་ཞེས་པ་ལ་སོགས་པའོ། །དེ་ལ་གསང་བའི་བདག་པོ་ནམ་སངས་རྒྱས་བཅོམ་ལྡན་འདས་རྣམས་ཞེས་པ་ནས་དམ་ཚིག་གསུམ་ལ་བདག་ཉིད་གནས་པར་མཐོང་ཞེས་པའི་བར་དུ་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་ས་བཅུས་ཡོངས་སུ་ཕྱུག་པ་རྣམས་རང་རང་གི་མཐུ་དང་སྤྱོད་ཡུལ་ཡི་རྫུ་འཕྲུལ་སྣ་ཚོགས་དང༌། སངས་རྒྱས་ཀྱི་ཞིང་རྣམ་པ་སྣ་ཚོགས་ཀྱིས་བརྒྱན་པའི་མཐུས་མགུ་ཞིང་འཁོད་པ་ལ། བཅོམ་ལྡན་འདས་མངོན་པར་བྱང་ཆུབ་པའི་སྐུ་ལས་དཔལ་གྱི་ཆོ་གའི་རྒྱན་གྱི་འོད་ཟེར་བྱུང་བས་བྱང་ཆུབ་སེམས་དཔའ་དེ་རྣམས་ཀྱི་གཙུག་ཏུ་ཕོག་སྟེ། འོད་ཟེར་དེའི་བྱིན་གྱི་རླབས་ཀྱིས་བྱང་ཆུབ་སེམས་དཔའ་དེ་རྣམས་ཡེ་ཤེས་ཆེན་པོར་མངོན་པར་ཤེས་པར་དབང་བསྐུར་བ་དང་ལྡན་པས་རབ་ཏུ་ཐོབ་སྟེ། དེའི་ཚེ་བྱང་ཆུབ་སེམས་དཔའ་དེ་རྣམས་ཀྱིས་བཅོམ་ལྡན་འདས་ཀྱི་ལུས་དང་ངག་ཡིད་མི་ཟད་པའི་རྡོ་རྗེའི་རྒྱན། དམ་ཚིག་གསུམ་གྱི་རང་བཞིན་ཆུད་ཅིང་མངོན་པར་གྱུར་ཅེས་པའོ། །སངས་
རྒྱས་བཅོམ་ལྡན་འདས་ཞེས་པ་ནི་སྐབས་འདིར་ས་བཅུ་ལ་གནས་ཡོངས་སུ་རྫོགས་ཤིང་དབང་བཅུ་ལ་དབང་དུ་གྱུར་པ། ཆོས་རྣམས་སྒྱུ་མ་ལྟ་བུར་རྣམ་པ་ཐམས་ཅད་ཆུད་པའི་བྱང་ཆུབ་སེམས་དཔའ་དེ་རྣམས་ཉིད་ལ་སངས་རྒྱས་ཞེས་བྱའོ། །ཡེ་ཤེས་ཆེན་པོ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་ལ་བྱ་སྟེ། ཡེ་ཤེས་དེ་བྱང་ཆུབ་སེམས་དཔའ་དེ་རྣམས་ཀྱིས་མངོན་པར་ཤེས་པར་བྱ་བའི་ཕྱིར། འོད་ཟེར་གྱིས་དབང་བསྐུར་བ་ལས་ཡེ་ཤེས་ཆེན་པོར་མངོན་པར་དབང་བསྐུར་བ་ཞེས་བྱའོ། །ཡང་ན་ཡེ་ཤེས་ཆེན་པོ་ཡང་དེ་མངོན་པར་ཤེས་པ་ཡང་དེ་སྟེ། ཡེ་ཤེས་ཆེན་པོ་ནི་སྔ་མ་བཞིན་ཏེ་དོན་དམ་པར་ཆོས་ཐམས་ཅད་སྟོང་པར་ཆུད་པའོ། །མངོན་པར་ཤེས་པ་དྲུག་ནི་མངོན་པར་ཤེས་པ་སྟེ་ཀུན་རྫོབ་ཀྱི་ཡེ་ཤེས་སོ། །དེ་ལྟར་དོན་དམ་པ་དང་ཀུན་རྫོབ་ཀྱི་ཡེ་ཤེས་དེ་བྱང་ཆུབ་སེམས་དཔའ་དེ་རྣམས་ཀྱིས་ཐོབ་པར་བྱ་བའི་ཕྱིར། དབང་བསྐུར་བ་ནི་ཡེ་ཤེས་ཆེན་པོ་མངོན་པར་དབང་བསྐུར་བ་ཞེས་བྱ་སྟེ། དབང་བསྐུར་བ་དེ་དང་ལྡན་པ་ནི་དབང་བསྐུར་བ་དང་ལྡན་པའི་ས་རབ་ཏུ་ཐོབ་པོ་ཞེས་བྱ་བ་སྟེ་ཞེས་པ་ནི་སེམས་ཀྱི་ཁྱད་པར་ཉིད་ལ་བྱའོ། །དེ་ནས་སངས་རྒྱས་བཅོམ་ལྡན་འདས་དེ་དག་ཅེས་པ་ནི་བྱང་ཆུབ་སེམས་དཔའ་དེ་དག་ཉིད་ལ་བྱའོ།།དམ་ཚིག་གསུམ་ཞེས་པ་ནི་བཅོམ་ལྡན་འདས་ཀྱི་ལུས་དང་ངག་ཡིད་མི་ཟད་པའི་རྡོ་རྗེའི་རྒྱན་གྱི་ཁས་གསུམ་ཐམས་ཅད་དུ་ཁྱབ་པ་ལ་བྱ་སྟེ། དམ་ཚིག་ཅེས་པ་ནི་ཚིག་གི་དོན་ནི་སྐབས་འདིར་ཀུན་དུ་ཆུད་པའམ་ཐོབ་པ་ལ་བྱ་སྟེ། སྐུ་མི་ཟད་པའི་རྒྱན་ལ་སོགས་པ་ཁམས་གསུམ་དུ་ཁྱབ་པར་འབྱུང་བ་བྱང་ཆུབ་སེམས་དཔའ་དེ་རྣམས་ཀྱིས་དེའི་ཚེ་མཐོང་ཞིང་ཡེ་ཤེས་ཀྱིས་ཆུད་པའི་ཕྱིར་རོ། །ལམ་ཞེས་པ་ནི་ཚིག་དེ་དག་ཆུད་པར་ཞུགས་པ་ལ་བྱ། བདག་ཉིད་གནས་པར་མཐོང་ངོ་ཞེས་པ་ནི་བཅོམ་ལྡན་འདས་ཀྱི་སྤྱོད་ཡུལ་དམ་ཚིག་གསུམ་གྱི་རང་བཞིན་ལ་བྱ། བྱང་ཆུབ་སེམས་དཔའ་དེ་རྣམས་ཀྱང་སྤྱོད་ཡུལ་དུ་གྱུར་ཏེ་མཐོང་ཞིང་ཆུད་པར་བདག་ཅག་ཉིད་ཀྱིས་མཐོང་ངོ་ཞེས་པའོ། །དེ་བས་ན་གསང་བའི་བདག་པོ་བཅོམ་ལྡན་འདས་དེ་ཞེས་པ་ནི། སངས་རྒྱས་ཀྱི་བྱ་བ་མངོན་དུ་སྟོན་པའོ་ཞེས་པའི་བར་དུས་བཅུ་ལ་གནས་པའི་བྱང་ཆུབ་སེམས་དཔའ་སངས་རྒྱས་ཀྱི་བྱ་བ་དེ་རྣམས་ཀྱི་དམ་ཚིག་གསུམ་ལ་ཞུགས་པར་གྱུར་པ་དེའི་ཚེ་ན།
སངས་རྒྱས་ཀྱི་གསུང་སྣ་ཚོགས་སུ་སྡུད་པའི་སྒོར་གྱུར་པའི་ཡི་གེ་བརྒྱ་པའི་རང་བཞིན་བཅོམ་ལྡན་འདས་ཀུན་དུ་སངས་རྒྱས་པ་གཟུངས་ཀྱི་གཟུངས་སུ་གྱུར་ནས། སངས་རྒྱས་པ་ཞེས་ཡ་བའི་བྱང་ཆུབ་སེམས་དཔའ་དེ་རྣམས་ལ་སངས་རྒྱས་ཀྱི་བྱ་བ་ཉེ་བར་སྟོན་པ་སྟེ། གསང་བའི་བདག་པོ་བཅོམ་ལྡན་འདས་ཞེས་པ་ནི་ཀུན་དུ་སངས་རྒྱས་པ་ཉིད་ལ་བྱའོ། །ཡེ་ཤེས་ཆེན་པོ་མངོན་པར་དབང་བསྐུར་བ་དང་ལྡན་པ་ཞེས་པ་ནི་ཀུན་དུ་སངས་རྒྱས་པ་དེ་ཉིད་ཀྱི་བྱེ་བྲག་ལ་བྱ་སྟེ་ཡེ་ཤེས་ཆེན་པོ་ནི་སྔ་མ་བཞིན་ནོ། །མངོན་པར་ཤེས་བ་ཞེས་པ་ནི་ཡེ་ཤེས་ཆེན་པོ་དེ་མངོན་དུ་ཆུད་པ་ཞེས་པའོ།། དབང་བསྐུར་བ་དང་ལྡན་པ་ཞེས་པ་ནི། ཡེ་ཤེས་ཆེན་པོ་དེ་མངོན་པར་ཆུད་པར་ལྡན་པ་ཞེས་པའོ། །གཟུད་ཀྱི་གཟུངས་ཞེས་པ་ནི། དོན་གྱི་གཟུངས་དང་ཚིག་གི་གཟུངས་དེ་རྣམ་པར་མི་རྟོག་པར་འཇུག་པའི་དབང་དང་གཟུངས་ལ་སོགས་པ་སྟེ། བཅོམ་ལྡན་འདས་ཀུན་དུ་སངས་རྒྱས་པའི་ཡེ་ཤེས་ཆེན་པོ་མངོན་པར་ཆུད་པའི་དབང་དང་ལྡན་པ་དེ་ཉིད་གཟུངས་སུ་གྱུར་ནས། སངས་རྒྱས་ཀྱི་བྱ་བ་སེམས་ཅན་ཡོངས་སུ་སྨིན་པ་དང་གྲོལ་བར་གྱུར་པའི་ཐབས་སྣ་ཚོགས་བྱང་ཆུབ་སེམས་དཔའ་དེ་རྣམས་ལ་སྟོན་ཏེ། དེ་བས་ན་གསུངས་པ། སངས་རྒྱས་བྱ་བ་མངོན་པར་སྟོན། །ཞེས་པའོ། །སངས་རྒྱས་བཅོམ་ལྡན་འདས་དེ་ཉིད། །ཅེས་པ་ནས། དམ་ཚིག་གསུམ་གྱི་ལམ་སྟོན་པར། །སོ་སོར་ཉེ་བར་གནས་པར་གྱུར། །ཞེས་པ་ནི་དེ་ལྟར་བཅོམ་ལྡན་འདས་ཀུན་དུ་སངས་རྒྱས་པ་དེ་བྱང་ཆུབ་སེམས་དཔའ་སངས་རྒྱས་ཞེས་པ་བྱ་བ་དེ་རྣམས་ལ་སངས་རྒྱས་ཀྱི་བྱ་བ་བསྟན་པ་ངང༌། བྱང་ཆུབ་སེམས་དཔའ་དེ་རྣམས་ཀྱང་རང་གི་དམ་ཚིག་གསུམ་པ་རང་བཞིན་ཇི་ལྟར་མཐོང་ཞིང་ཆུད་པ་དང༌། སངས་རྒྱས་ཀྱི་བྱ་བའི་ཚུལ་གྱིས་དམ་ཚིག་གསུམ་པོ་དེ་རྣམས་ཀྱི་ལམ་སྟོན་པར་ཞུགས་སོ་ཞེས་ཏེ། དེ་ལ་སངས་རྒྱས་བཅོམ་ལྡན་འདས་དེ་དག་ཉིད་ཅེས་པ་ནི་གོང་དུ་སྨོས་པའི་བྱང་ཆུབ་སེམས་དཔའ་དེ་དག་ཉིད་ལ་བྱའོ། །སེམས་ཅན་ཐམས་ཅད་ཅེས་པ་ནི་ཡོངས་སུ་དག་པ་དང༌། མ་དག་པའི་སེམས་ཅན་ཇི་ལྟར་སྣོད་དུ་གྱུར་པ་རྣམས་སོ། །སངས་རྒྱས་ཀྱི་བྱ་བ་ཞེས་པ་ནི་སྔ་མ་བཞིན་ནོ། །དམ་ཚིག་གསུམ་གྱི་ལམ་ཞེས་ང་ནི་སྐུ་མི་ཟད་པའི་རྡོ་རྗེའི་རྒྱན་
ལ་སོགས་པ་ཐོབ་པར་འགྱུར་བའི་ལམ་དེ་སྟོན་པར་རབ་ཏུ་ཉེ་བར་གནས་པར་འགྱུར་རོ་ཞེས་པ་ནི། བྱང་ཆུབ་སེམས་དཔའ་དེ་རྣམས་ཇི་ལྟར་སྣོད་དུ་གྱུར་པའི་སེམས་ཅན་རྣམས་ལ་དམ་ཚིག་གསུམ་ཐོབ་པར་བྱེད་པའི་ལམ་དེ་སོ་སོར་སྟོན་པར་ཞུགས་པ་སྟེ། ལམ་དེ་བསྟན་པས་སེམས་ཅན་དེ་རྣམས་ཀྱི་སྐུ་མི་ཟད་པ་ལ་སོགས་པའི་རྒྱན་དམ་ཚིག་གསུམ་གྱི་རང་བཞིན་ཏེ་ཐོབ་པར་འགྱུར་བའི་ཕྱིར་རོ། །གསང་བའི་བདག་པོ་ངའི་ངག་གི་འཁོར་ལོ་ཞེས་པ་ནས། རབ་ཏུ་བྱུང་བར་མི་ཤེས་སོ། །ཞེས་པའི་བར་དུ་དེ་བཞིན་གཤེགས་པའི་དག་གི་འཁོར་ལོ་སངས་རྒྱས་ཀྱི་དབྱིངས་ཀྱི་རྒྱན་སྣ་ཚོགས་ལས་ཤཱཀྱ་ཐུབ་པའི་སྐུར་སྤྲུལ་ཏེ། འཇིག་རྟེན་གྱི་ཁམས་ཐམས་ཅད་དུ་ཁྱབ་པར་ཡོངས་སུ་སྨིན་པ་དང་མ་སྨིན་པའི་སེམས་ཅན་ཇི་ལྟར་སྣོད་དུ་གྱུར་པ་རྣམས་ལ་སངས་རྒྱས་ཀྱི་བྱ་བ་བྱེད་པར་འགྱུར་བ་བཤད་པ་སྟེ། གསང་བའི་བདག་པོ་ངག་གི་འཁོར་ལོ་ཞེས་པ་ནི་དེ་བཞིན་གཤེགས་པའི་སངས་རྒྱས་ཀྱི་གསུང་རྣམ་པ་སྣ་ཚོགས་སུ་འབྱུང་བའོ། །སེམས་ཅན་རྣམས་ཀྱི་རྒྱུད་དུ་གྲོལ་བས་ན་འཁོར་ལོ་ཞེས་བྱ་བ་སྟེ། འཁོར་ལོ་དེ་ཉིད་འཁོར་གྱི་འཁོར་ལོ་སྤྲུལ་པ་རྒྱ་ཆེན་པོ་ཞེས་པ་ནི། ངག་གི་འཁོར་ལོ་དེ་ལས་ཤཱཀྱ་ཐུབ་པའི་སྐུར་སྤྲུལ་པ་དེ་དག་འཇིག་རྟེན་གྱི་ཁམས་ནམ་མཁའི་དབྱིངས་མ་ལུས་པ་དེ་སྙེད་དུ་ཁྱབ་པ་སངས་རྒྱས་ཀྱི་བྱ་བ་སྟོན་པས་ན་རྒྱ་ཆེན་པོ་ཞེས་བྱའོ། །མཐའ་ཡས་བའི་འཇིག་རྟེན་དུ་ཁྱབ་པ་ཞེས་པ་ནི། ཆོས་ཀྱི་དབྱིངས་རབ་ཏུ་སྟོན་པ་ཞེས་པ་དང་འབྲེལ་པ་སྟེ། སྤྲུལ་པའི་སྐུ་སྟེ་ཆོས་ཀྱི་དབྱིངས་ཀྱི་ཚིག་དང་དོན་རྣམས་འཇིག་རྟེན་གྱི་ཁམས་སུ་ཁྱབ་པར་སེམས་ཅན་ཐམས་ཅད་ལ་སྟོན་པ་སྟེ། དེ་ཡང་རྣམ་པར་དག་པའི་སྒོ་ཤ་སྟག་གོ །རྣམ་པར་དག་པའི་སྒོ་ཞེས་པ་ནི་ཆོས་ཀྱི་དབྱིངས་རྣམ་པར་དག་པ་ལ་འཇུག་པའི་ཐབས་ཞེས་བྱའོ། །སེམས་ཅན་ཐམས་ཅད་ཇི་ལྟ་བུར་བསམས་པ་བཞིན་མགུ་བར་བྱེད་པ་ཆོས་ཀྱི་དབྱིངས་རབ་ཏུ་སྟོན་པའི་སྒོ་མོ་ཞེས་པ་ནི་དེ་ལྟ་བུར་ཆོས་ཐམས་ཅད་སྟོན་པ་དེ་ཡང་སེམས་ཅན་རྣམས་སོ་སོའི་དད་པ་དང་རྗེས་སུ་མཐུན་པ་སྟེ། སངས་རྒྱས་ཀྱིས་འདུལ་བ་ལ་སངས་རྒྱས་ཀྱི་ཆོས་སྟོན། དེ་བཞིན་དུ་ཉན་ཐོས་དང༌། རང་སངས་རྒྱས་དང༌། བརྒྱ་བྱིན་དང་ཚངས་པ་
ལ་སོགས་པ་སོ་སོར་བསྟན་པ་དང༌། རྗེས་སུ་མཐུན་པའི་ཆོས་ཐམས་ཅད་དུ་སྟོན་ཏེ་དེ་ཡང་ཆོས་ཀྱི་དབྱིངས་སུ་འཇུག་པའི་ཐབས་ཤ་སྟག་གོ །དེ་འདི་ལྟ་སྟེ། ཤཱཀྱ་ཐུབ་པས་ནམ་མཁའི་དབྱིངས་སུ་རྒྱས་པ་མ་ལུས་པའི་འཇིག་རྟེན་གྱི་ཁམས་སུ་ཞེས་པ་ནི་དེ་ལྟ་བུའི་ཆོས་སྟོན་པ་དང༌། ཤཱཀྱ་ཐུབ་པའི་སྐུ་གཅིག་གམ་གཉིས་མ་ཡིན་གྱི། ནམ་མཁའི་ཁམས་རྒྱས་པར་ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་མ་ལུས་པར་ཁྱབ་པའི་ཤཱཀྱ་ཐུབ་པའི་སྐུས་སེམས་ཅན་ཐམས་ཅད་ལ་ཇི་ལྟར་བསམས་པ་བཞིན་དུ་མགུ་བར་བྱེད་པའི་ཆོས་ཀྱི་དབྱིངས་རབ་ཏུ་སྟོན་ཞེས་པའོ། །དེ་བས་ན་གསུངས་པ་སངས་རྒྱས་ཀྱི་བྱ་བ་ལ་རབ་ཏུ་ཞུགས་པ་ཞེས་པ་སྟེ། ཤཱཀྱ་ཐུབ་པའི་སྐུ་དེ་རྣམས་འཇིག་རྟེན་གྱི་ཁམས་དེ་སྙེད་དུ་སེམས་ཅན་དེ་ལྟར་སྣོད་དུ་གྱུར་པ་རྣམས་མ་སྨིན་པ་ནི་ཡོངས་སུ་སྨིན་པར་བྱེད། སྨིན་པ་རྣམས་ནི་གྲོལ་པར་བྱེད་པའི་སངས་རྒྱས་ཀྱི་བྱ་བ་རབ་ཏུ་ཞུགས་ཞེས་པའོ། །སངས་རྒྱས་ཀྱི་བྱ་བ་བྱེད་པ་ཤཱཀྱ་ཐུབ་པའི་སྐུ་དེ་རྣམས་སངས་རྒྱས་ཀྱི་དབྱིངས་སུ་མང་པོའི་རྒྱན་གྱི་སྙིང་པོ་ལས་འབྱུང་བ། བཅོམ་ལྡན་འདས་ཀྱི་ངག་གི་འཁོར་ལོ་ལས་སྤྲུལ་པའི་སངས་རྒྱས་ཀྱི་གཟུགས་སུ་ནི་སེམས་ཅན་རྣམས་ཀྱིས་མི་ཤེས་ཀྱི། ཤཱཀྱའི་རིགས་ཀྱི་རྒྱལ་པོ་ཟས་གཙང་མའི་རིགས་འདི་ལྟར་གྱུར་ཏོ་ཞེས་འཛིན་ཏེ་དེའི་ཕྱིར་གསུངས་པ། གསང་བའི་བདག་པོ་སེམས་ཅན་རྣམས་ཀྱིས་ནི་ཞེས་པ་ལ་སོགས་པ་འོན་ཀྱང་འཇིག་རྟེན་གྱི་ཁམས་མཐའ་ཡས་པ་རྒྱ་མཚོའི་སྒོ་ནས་ཞེས་པ་ལ་སོགས་པ་ནི། དེ་ལྟར་ངག་གི་འཁོར་ལོ་ལས་སྤྲུལ་པའི་སྐུ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་སངས་རྒྱས་ཀྱི་བྱ་བ་བྱེད་པའི་ཤཱཀྱ་ཐུབ་པའི་སྐུ་རྣམས་བསྟན་ཀྱང༌། སེམས་ཅན་རྣམས་ཀྱིས་སྤྲུལ་པ་དེ་དག་གི་འཁོར་ལོ་ལས་བྱུང་བར་མི་ཤེས་མོད་ཀྱི་འོན་ཀྱང་ཀུན་དུ་བཟང་པོའི་སྤྱོད་པ་ལས་བྱུང་བའི་བྱང་ཆུབ་སེམས་དཔའ་ཆོས་ཀྱི་དབྱིངས་མངོན་པར་ཆུད་པར་བྱེད་པ་རྣམས་འཇིག་རྟེན་གྱི་ཁམས་མཐའ་ཡས་པ་ནས་བྱུང་པའི་བྱང་ཆུབ་སེམས་དཔའ་མེ་ཏོག་གི་གཞི་སྙིང་པོ་རྒྱན་གྱིས་འཇིག་རྟེན་གྱི་ཁམས་འདི་སངས་རྒྱས་ཀྱི་ཞིང་འདི་རྣམ་པ་སྣ་ཚོགས་ཀྱིས་བརྒྱན་པར་བྱེད་པ་དང༌། བྱང་ཆུབ་ཀྱི་སྙིང་པོ་མངོན་པར་སྒྲུབ་
པ་དང༌། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་ལ་སོགས་པ་ཡང་བྱང་ཆུབ་སེམས་དཔའ་དེ་རྣམས་ཀྱི་རང་རང་གི་མཐུ་འབའ་ཞིག་མ་ཡིན་གྱི། ངའི་མཐུས་སངས་རྒྱས་ཀྱི་ཞིང་བརྒྱན་པར་བྱེད་པ་ལ་སོགས་པ་དེ་རྣམས་བྱེད་དོ་ཞེས་པ་སྟེ། དེ་ལྟ་བུར་མཛད་པ་ཡང་ཤཱཀྱ་ཐུབ་པའི་སྐུ་ཉིད་མོད་ཀྱི་འདུལ་བའི་འགྲོ་བ་དེ་དག་ཀྱང་བྱང་ཆུབ་སེམས་དཔའ་ཡོངས་སུ་དག་པ་དེ་དག་གིས་ནི་ཤཱཀྱ་ཐུབ་པའི་སྐུ་ཡང་རྫོགས་ལོངས་སྤྱོད་པའི་སྐུར་མཐོང་བར་འགྱུར་ཏེ། དེ་བས་ན་སྐབས་མཐའ་མ་འདི་ནི་རྫོགས་ལོངས་སྤྱོད་པའི་སྐུས་བྱང་ཆུབ་སེམས་དཔའ་དེ་རྣམས་ཀྱི་དོན་མཛད་པར་བསྟན་པར་ཤེས་པར་བྱའོ། །དེ་དག་གི་བསྡུས་པའི་དོན་དུ་ཚིག་གི་དོན་ལ་འོན་ཀྱང་ཞེས་པ་ནི། དེ་བཞིན་གཤེགས་པའི་སྤྲུལ་པས་སེམས་ཅན་རྣམས་ལ་སངས་རྒྱས་ཀྱི་བྱ་བ་བསྟན་པ་དེ་ཤཱཀྱ་ཐུབ་པའི་སྐུ་འཇིག་རྟེན་པ་རྣམས་ཀྱིས་དེ་བཞིན་གཤེགས་པའི་སྤྲུལ་པར་མི་ཤེས་མོད་ཀྱི། འོན་ཀྱང་ཤཱཀྱ་ཐུབ་པ་དེས་འོག་ནས་འབྱུང་བའི་འདོན་དེ་རྣམས་ཀྱང་བྱས་སོ་ཞེས་པའོ། །འཇིག་རྟེན་གྱི་ཁམས་མཁའ་ཡས་རྒྱ་མཚོའི་སྒོ་ནས་སྨོས་པའི་བྱང་ཆུབ་སེམས་དཔའ་དེ་རྣམས་འབྱུང་བའི་གནས་ལ་བྱ་སྟེ། འཇིག་རྟེན་གྱི་ཁམས་དེ་དག་མཐའ་ཡས་པར་ཤེས་ཤིང་བརྟག་པར་དཀའ་སྟེ། རྒྱ་མཚོ་དང་འདྲ་བས་ན་རྒྱ་མཚོ་ཞེས་བྱའོ། །སྒོ་ཞེས་པ་ནི་བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་དག་ནས་འབྱུང་བའི་ཕྱིར་རོ། །ཆོས་ཀྱི་དབྱིངས་སུ་མངོན་པར་བྱང་ཆུབ་པར་ནན་ཏན་བྱེད་པ་ཀུན་དུ་བཟང་པོའི་སྤྱོད་པ་ལས་བྱུང་ཞེས་པ་ནི་སངས་རྒྱས་ཀྱི་ཞིང་བརྒྱན་པ་ལ་སོགས་པ་བྱེད་པའི་བྱང་ཆུབ་སེམས་དཔའ་དེ་དག་གི་བྱེ་བྲག་སྟེ། ཆོས་ཀྱི་དབྱིངས་སུ་ནི་དེ་བཞིན་གཤེགས་པ་ཉིད་ཀྱི་ཡེ་ཤེས་ལ་བྱའོ། །མངོན་པར་རྫོགས་པར་བྱང་ཆུབ་པར་ནན་ཏན་བྱེད་ཅེས་པ་ནི་དེ་བཞིན་གཤེགས་པའི་ཡེ་ཤེས་ཆོས་ཀྱི་དབྱིངས་དེ་མངོན་པར་ཆུད་པར་བརྩོན་པ་ཞེས་པའོ། །ཀུན་དུ་བཟང་པོའི་བྱང་ཆུབ་སེམས་དཔའི་སྤྱོད་པ་ལས་འབྱུང་བ་ཞེས་པ་ནི། ཀུན་དུ་བཟང་པོ་བྱང་ཆུབ་སེམས་དཔའི་སྨོན་ལམ་ལས་སྐྱེས་པའོ། །མེ་ཏོག་གཞིའི་སྙིང་པོ་རྒྱན་གྱི་འཇིག་རྟེན་གྱི་ཁམས་འདི་ཞེས་པ་ནི་མི་མཇེད་ཀྱི་འཇིག་རྟེན་གྱི་ཁམས་ལ་བྱ་སྟེ། མེ་ཏོག་གི་གཞི་ཞེས་པ་ནི་འཇིག་རྟེན་གྱི་ཁམས་དེ་མེ་ཏོག་
གིས་བརྒྱན་པའོ། །སྙིང་པོ་ཞེས་པ་ནི་འབྱུང་བའི་གནས་སོ། །རྒྱན་ཞེས་པ་ནི་འཇིག་རྟེན་གྱི་ཁམས་མེ་ཏོག་གིས་བརྒྱན་པ་སྟེ། སེམས་ཅན་གང་བསོད་ནམས་སྤྱད་པ་རྣམས་ཀྱི་རྒྱུ་ལས་བྱུང་བས་ན། བསོད་ནམས་ཀྱི་འབྲས་བུ་འཇིག་རྟེན་གྱི་ཁམས་དེ་ལྟ་བུར་སྐྱེ་བར་འགྱུར་ཏེ། སེམས་ཅན་དེ་དག་གི་རྒྱན་ཞེས་བྱའོ། །རིགས་ས་མུ་དྲ་སྙེད་ཅེས་པ་ནི། སངས་རྒྱས་ཀྱི་ཞིང་དེ་ཡང་འཇིག་རྟེན་གྱི་ཁམས་འབའ་ཞིག་ཅས་བྱ་བ་དང༌། ས་མུ་དྲ་ཞེས་བྱ་བ་དེ་སྙེད་དང་ལྡན་པའི་སངས་རྒྱས་ཀྱི་ཞེས་པའོ། །ངས་ཡོངས་སུ་ཟིན་པས་ཞེས་པ་ནི་རྫོགས་ལོངས་སྤྱོད་པའི་སྐུའི་མཐུས་ཞེས་པ་སྟེ། སངས་རྒྱས་ཀྱི་ཞིང་རྣམས་ཡོངས་སུ་སྦྱོང་བ་ཞེས་པ་ལ་སོགས་པ་དང་སྦྱར་ཞེས་པའོ། །སོ་སོའི་བསམ་པ་རྣམ་པར་དག་པའི་སྒོ་ནས་སངས་རྒྱས་ཀྱི་ཞིང་ཞེས་ཡོངས་སུ་སྤྱོད་ངོ་ཞེས་པ་ནི་བྱང་ཆུབ་སེམས་དཔའ་དེ་དག་གི་བསམ་པ་རྣམ་པར་དག་པས་སྣ་ཚོགས་པའི་སྒོ་ནས་སངས་རྒྱས་ཀྱི་ཞིང་ཡོངས་སུ་སྤྱོད་དོ་ཞེས་པ་སྟེ། དེ་ཡང་བཅོམ་ལྡན་འདས་ཀྱི་མཐུས་སྦྱངས་ཏེ་ངས་ཡོངས་སུ་ཟིན་པ་ཞེས་པ་དང་སྦྱར་རོ། །བྱང་ཆུབ་ཀྱི་དཀྱིལ་འཁོར་མངོན་པར་བསྒྲུབ་ཅེས་པ་ནི་བྱང་ཆུབ་ཀྱི་སྙིང་པོ་འོག་མིན་གནས་སུ་མངོན་པར་བྱང་ཆུབ་པའི་ས་དང༌། མིའི་གནས་སུ་བྱང་ཆུབ་ཆེན་པོར་མངོན་པར་བྱང་ཆུབ་པའི་གནས་ངག་ལ་བྱང་ཆུབ་ཀྱི་སྙིང་པོ་ཞེས་བྱ་སྟེ། དེ་དག་བྱང་ཆུབ་སེམས་དཔའ་འདི་རྣམས་ཡོངས་སུ་རྫོགས་པར་བྱེད་ཅེས་པའོ། །བྱང་ཆུབ་མངོན་པར་འཚང་རྒྱ་ཞེས་པ་ནི་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་ཡོངས་སུ་བྱང་པའི་བྱང་ཆུབ་ནམ་མཁའི་མཚན་ཉིད་ལྟ་བུའོ།། མངོན་པར་ཆུད་པར་ཅི་བྱེད་ཅེས་པའོ། །ཆོས་ཀྱི་འཁོར་ལོ་བསྐོར་ཞེས་པ་ནི་གཞུང་ལས་ཇི་སྐད་དུ་གྲགས་པའི་ཆོས་ཀྱི་འཁོར་ལོ་བསྐོར་བའོ། །སངས་རྒྱས་ཀྱི་དོན་ལ་ཤིན་ཏུ་གནས་ཞེས་པ་ནི། སེམས་ཅན་ཡོངས་སུ་སྨིན་པ་དང་གྲོལ་བར་བྱེད་པའི་མཚན་ཉིད་སངས་རྒྱས་ཀྱི་བྱ་བར་བྱིན་གྱིས་རློབས་ཞེས་པའོ། །དེ་ནས་གྱེན་དུ་ཡང་དག་པར་རྫོགས་པའི་སངས་རྒྱས་ཀྱི་གནས་རབ་འདོད་པ་ཞེས་པ་ནི། དེ་ལྟར་སངས་རྒྱས་ཀྱི་ཞིང་ཡོངས་སུ་སྦྱོང་པ་ལ་སོགས་བྱས་ནས་ཀུན་དུ་སངས་རྒྱས་པའི་གནས་སུ་འཕར་བར་བྱེད་པ་སྟེ། དེའི་ཚེ་དེ་བཞིན་ཉིད་ཀྱི་ཡེ་ཤེས་ཆོས་ཐམས་ཅད་སྟོང་པ་ཉིད་དུ་
ཆུད་པའི་མཚན་ཉིད་མངོན་དུ་ཆུད་དེ། དེ་ལྟར་མངོན་དུ་བྱེད་པ་ནི་སེམས་མེད་པ་ལ་སོགས་པ་འོག་ནས་འབྱུང་བ་རྣམས་ཀྱི་ཡོན་ཏན་ཐོབ་པར་འགྱུར་པ་སྟེ། དེ་ཡང་སེམས་ཚད་མེད་པ་ཞེས་པ་ནས། ཚད་མེད་པ་རབ་ཏུ་ཐོབ་བོ་ཞེས་པའི་བར་དུའོ། །དེ་ལ་སེམས་མེད་པ་ཞེས་པ་ནི་སེམས་ལ་རྣམ་པར་རྟོག་པ་ལ་སོགས་པ་ཇི་བཞིན་པ་ཐམས་ཅད་དང་བྲལ་ཏེ། ཆོས་ཐམས་ཅད་སྟོང་པ་ཉིད་དུ་ཆུད་པའི་སེམས་བཞིན་དུ་གྱུར་པ་ན། ནམ་མཁའི་རང་བཞིན་ལྟ་བུར་གྱུར་ཏེ། སྟོང་པའི་མཚན་ཉིད་ཀྱིས་ཀྱང་མ་གོས་ཤིང་ཐམས་ཅད་དུ་མ་ཁྱབ་པ་ཡང་མེད་དེ་ཚད་གཟུང་དུ་མེད་པའོ། །དེ་བཞིན་དུ་སྟོང་པ་ཉིད་ཀྱི་རང་བཞིན་གྱི་སེམས་དེས་ཐམས་ཅད་དུ་ཁྱབ་པར་འགྱུར་པས། དེ་བས་སེམས་ཚད་གཟུང་དུ་མེད་པ་ཞེས་བྱའོ། །ལུས་ཚད་མེད་པ་ཞེས་པ་ནི། དེ་ལྟར་སེམས་ཚད་མེད་པ་ཐོབ་པས། དེ་དག་གི་ལུས་ཀྱང་སེམས་ཇི་སྙེད་པ་དེ་ཉིད་ཀྱི་ལུས་ཁྱབ་པར་འགྱུར་ཏེ། དེ་བས་ན་ལུས་ཚད་མེད་པའོ། །ལུས་ཚད་མེད་པས་ཡེ་ཤེས་ཚད་མེད་པ་ཞེས་པ་ནི་དེ་ལྟར་ལུས་ཚད་མེད་པར་འགྱུར་ན། ལུས་ཇི་བརླབས་པ་དང་བཅས་པར་འགྱུར་ཏེ། ལུས་ཇི་སྙེད་པ་དེ་དག་གི་ཡེ་བརླབས་པ་དང་བཅས་པར་འགྱུར་ཏེ། ལུས་ཇི་སྙེད་པ་དེ་དག་གི་ཡེ་ཤེས་སུ་གྱུར་པས་ན་ཡེ་ཤེས་ཚད་མེད་པ་ཞེས་བྱའོ། །ཡེ་ཤེས་ཚད་མེད་པས་སེམས་ཚད་མེད་པ་ཞེས་པ་ནི། སྐུ་དང་ཡེ་ཤེས་དེ་དག་ཀྱང་སེམས་ཅན་ཇི་སྙེད་པ་དེ་སྙེད་དུ་འབྱུང་སྟེ། དེ་དག་ཚད་མེད་པས་སེམས་ཅན་ཚད་མེད་པའོ། །སེམས་ཅན་ཚད་མེད་པས་ནམ་མཁའི་ཁམས་ཚད་མེད་པ་རབ་ཏུ་ཐོབ་བོ་ཞེས་པ་ནི་ནམ་མཁའི་ཁམས་ཇི་སྙེད་པ་སེམས་ཅན་གྱི་ཁམས་ཀྱང་དེ་སྙད་དེ་སེམས་ཅན་གྱི་ཁམས་ཚད་མེད་པར་ཆུད་ན། ནམ་མཁའི་ཁམས་ཀྱང་ཚད་མེད་པར་འགྱུར་པ་རབ་ཏུ་ཐོབ་པར་རིག་པར་བྱའོ། །དེ་ལྟར་གསང་བའི་བདག་པོ་སེམས་ཅན་ཚད་མེད་པས་ན་ཚད་མེད་པའི་གཞི་རབ་ཏུ་ཐོབ་བོ་ཞེས་པ་ནི། ནམ་སེམས་ཅན་ཉིད་སྟོང་པ་ཉིད་ཀྱི་རང་བཞིན་ནམ་མཁའི་མཚན་ཉིད་ལྟ་བུར་གྱུར་པ་རབ་ཏུ་ཐོབ་ན། ལུས་དང་ཡེ་ཤེས་དང་སེམས་དང་ནམ་མཁའི་ཁམས་ཀྱང་དེ་བཞིན་དུ་གྱུར་པ་ཐོབ་བོ་ཞེས་པའོ། །ཐོབ་ནས་ཀྱང་ཡང་དག་པར་རྫོགས་པའི་སངས་རྒྱས་པར་འགྱུར་ཏེ་ཞེས་པ་ནི་དེ་ལྟར་དེ་བཞིན་ཉིད་ཀྱི་ཡེ་ཤེས་མངོན་དུ་
བྱས་ནས། དེ་མ་ཐག་ཏུ་ཀུན་དུ་སངས་རྒྱས་པ་ཕུང་པོ་ལྷག་མ་དང་བཅས་པ་མྱ་ངན་ལས་འདས་པའི་རང་བཞིན་གནས་ཐོབ་པར་འགྱུར་རོ་ཞེས་པའོ། །སྟོབས་བཅུའི་སྟོབས་དང་ལྡན་པར་བདུད་བཞི་རབ་ཏུ་འདུལ་བ་ཞེས་པ་ནི། ཀུན་དུ་སངས་རྒྱས་པའི་དེ་བཞིན་ཉིད་ཀྱི་བྱེ་བྲག་སྟེ། གཞུང་ལས་ཇི་སྐད་གྲགས་པའོ། །ཆོས་ཀྱི་སེང་གེའི་སྒྲ་སྒྲོགས་པ། །ཞེས་པ་ནི་ཇི་ལྟར་སེང་གེའི་སྒྲས་བྱོལ་སོང་ཐམས་ཅད་ཟིལ་གྱིས་གནོན་པར་འགྱུར་བ་བཞིན་དུ་བཅོམ་ལྡན་འདས་ཀུན་དུ་སངས་རྒྱས་པ་དེ་ཡང་འདུས་བྱས་ཐམས་ཅད་མི་རྟག་པ་དང་སྡུག་བསྔལ་བ་ལ་སོགས་པའི་ཆོས་ཀྱི་སྒྲ་སྒྲོགས་པས་རྟག་པ་དང་བདེ་བ་ལ་སོགས་པར་ལྟ་བའི་མུར་འདུག་པ་རྣམས་ཟིལ་གྱིས་གནོན་པར་འགྱུར་བའོ། འདི་དག་ཐམས་ཅད་དཔའ་བོ་དག་གིས། དམ་པའི་གནས་སུ་འཚང་ཡང་རྒྱ། །ཞེས་པ་ནི་གོང་དུ་སྨོས་པའི་ཡོན་ཏན་ཐམས་ཅད་བྱང་ཆུབ་སེམས་དཔའ་དཔའ་བོ་དེ་རྣམས་ཀྱིས་ཐོབ་ནས་ཀུན་དུ་སངས་རྒྱས་པའི་གནས་དམ་པ་དེར་འཚར་རྒྱ་ཞེས་པའོ། །སྒོ་བཞི་འདི་རུ་བཟླས་པ་སྟེ། དེ་ཡང་ཀུན་དུ་སངས་རྒྱས་ཀྱིས་གསུངས་པའི་སྙིང་པོ་ལའོ། །དེ་ལྟར་ཀུན་དུ་འཚང་རྒྱ་བའི་གནས་དམ་པ་དེར་འཚང་རྒྱ་བ་ཡང་ཀུན་དུ་སངས་རྒྱས་པའི་སྙིང་པོ་ཡི་གེ་བརྒྱ་པ་དེ་བཟླས་ཤིང་བསྒོམས་ནས་ཐོབ་པར་འགྱུར་ཞེས་པའོ། །ཡི་གེ་བརྒྱ་པའི་འབྲས་བུའི་སྦྱོར་བ་རྣམས་གསུམ་གྱི་བྱེ་བྲག་གིས་བསྟན་པ་ཡང་རིམ་གྱིས་འཕར་བའི་ཚུལ་དུ་ཤེས་པར་བྱ་སྟེ། ས་བཅུ་གཅིག་པའི་བྱང་ཆུབ་སེམས་དཔའ་སངས་རྒྱས་ཞེས་བྱ་བ་དེ་དག་ས་བཅུ་གཉིས་ལ་གནས་པ་ལས་བཅོམ་ལྡན་འདས་ཀྱི་འོད་ཀྱིས་བསྐུལ་ཏེ། དམ་ཚིག་གསུམ་གྱི་གནས་ལ་ཞུགས་པ་ནས་ས་བཅུ་དེ་ལས་འཕར་ཏེ། ཡེ་ཤེས་ཆེན་པོ་མངོན་པར་ཤེས་པ་དབང་བསྐུར་བ་དང་ལྡན་པའི་ས་ལ་གནས་པར་ཤེས་པར་བྱའོ། །དེ་ནས་ཀུན་དུ་སངས་རྒྱས་གཟུགས་ཀྱི་གཟུགས་སུ་གྱུར་ཅིང༌། སངས་རྒྱས་ཀྱི་བྱ་བ་བསྟན་པ་དང་དེ་བཞིན་གཤེགས་པའི་སྤྲུལ་བའི་སྐུ་ཤཱཀྱ་ཐུབ་པས་སྤྱིར་སངས་རྒྱས་ཀྱི་བྱ་བ་བསྟན་པ་ན་བྱང་ཆུབ་སེམས་དཔའ་དེ་དག་ཀུན་དུ་བཟང་པོའི་ས་ལ་གནས་པར་ཤེས་པར་བྱའོ། །ཀུན་དུ་བཟང་པོ་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་བྱུང་ཞིང་རྫོགས་ལོངས་སྤྱོད་པའི་སྐུས་བཏང་སྟེ། སངས་རྒྱས་ཀྱི་ཞིང་
སྤྱོད་པས་ན། ཀུན་དུ་སངས་རྒྱས་པའི་ས་མ་ཐོབ་ཀྱི་བར་དུ་ཀུན་དུ་བཟང་པོའི་ས་ལས་ནི་འཕར། ཀུན་དུ་སངས་རྒྱས་པའི་ས་ལ་ནི་འཇུག་པའི་སྟེགས་བུ་ལྟ་བུའི་ས་ལ་གནས་པར་ཤེས་པར་བྱའོ། །སྤྱིར་གདུལ་བའི་འགྲོ་བ་ཆུད་པའི་གཙོ་བོར་གྱུར་པ་ཡོངས་སུ་དག་བ་དང༌། གཞུང་གི་ཆོས་ལ་བསྟན་པ་ཡོངས་སུ་མ་དག་པ་རྣམ་པ་གཉིས་ཏེ། དེ་ལ་ཡི་གེ་བརྒྱ་བའི་འབྲས་བུ་སྦྱོར་བ་བསྟན་པའི་ལེའུ་ནི་ཡོངས་སུ་དག་པའི་གདུལ་བྱའི་འགྲོ་བ་རྣམས་ཀྱི་དོན་མཛད་པ་བསྟན་པའོ། །ལེའུ་འདིར་ནི་ཡོངས་སུ་མ་དག་པའི་འགྲོ་བ་རྣམས་ཀྱི་དོན་མཛད་པ་སྟེ། གང་གི་ཕྱིར་བཅོམ་ལྡན་འདས་ཀྱིས་རྒྱུ་དང་འབྲས་བུའི་ཡོན་ཏན་རྣམས་ཀུན་དུ་སངས་རྒྱས་པའི་སྙིང་པོ་ཡི་གེ་བརྒྱ་བའི་མཚན་ཉིད་ཨཾ་ཞེས་པའི་གཟུགས་སུ་བྱིན་གྱིས་བརླབས་པ་དེ་འོག་ནས་འབྱུང་བའི་རིམ་གྱིས་བསྒྲུབ་པ་བོས་རང་གི་སྙིང་གར་བསམས་ཏེ། ཀུན་དུ་སངས་རྒྱས་པའི་སྐུར་བསྒྲུབ་པའི་ཕྱིར་རོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ་ཞེས་པ་ལ་སོགས་པའོ། །དེ་ལ་བཅོམ་ལྡན་འདས་ཀྱི་སྔགས་ཀྱི་མགོན་པོ་འདི་སྔགས་རྣམས་ཀྱི་འབྱུང་བ་དེ་ངོ་མཚར་ཆེའོ་ཞེས་པ་ནི་ཡི་གེ་བརྒྱ་བའི་རང་བཞིན་གོང་དུ་བཤད་པ་དེ་ཡོན་ཏན་དང་མཐུ་ཆེ་པས་ངོ་མཚར་ཆེ་ཞེས་པའོ། །སྔགས་ཀྱི་མགོན་པོ་ཞེས་པ་དང༌། སྔགས་རྣམས་འབྱུང་ཞེས་པ་ཡང༌། སྙིང་པོ་དེ་དག་གི་བྱེ་བྲག་སྔར་བཤད་པ་བཞིན་ནོ། །གང་གིས་ཇི་ལྟར་རིག་པར་བགྱི། །ཐུབ་པ་ཆེན་པོ་གནས་ན་གང༌། །ཞེས་པ་ནི་ཡི་གེ་བརྒྱ་པའི་སྔགས་བསྒྲུབ་པའི་ལེའུ་ཞེས་པ་སྟེ། གང་གིས་ཞེས་པ་ནི་བསྒྲུབ་ཅིང་འདྲ་བས་ཤེས་པར་བགྱི་ཞེས་པ་སྟེ། ཐེག་ཆེན་དུ་ནི་དབང་བསྐུར་ཞེས་པ་ལ་སོགས་པ་བསྒྲུབ་པའི་མཚན་ཉིད་འོག་ནས་བཤད་པ་དང་སྦྱར་རོ། །ཇི་ལྟར་ཞེས་པ་ནི་སྙིང་པོ་ཅི་འདྲ་བར་རིག་པར་བགྱི་ཞེས་པ་ནི་སྟེ། གསེར་གྱི་ཁ་དོག་འབར་བ་དང་བཅས་པར་ཤེས་པ་ལ་སོགས་པ་འོག་ནས་འཆད་པ་དང་སྦྱར་རོ། །ཐུབ་པ་ཆེན་པོ་གནས་ནི་གང༌། །ཞེས་པ་ནི་སྙིང་པོ་དེ་གནས་གང་དུ་བཞག་པར་བགྱི་ཞེས་པ་སྟེ་དེའི་གནས་ནི་སྙིང་པོ་ཞེས་པ་སྟེ་ཞེས་པ་དང་སྦྱར་རོ། །སྔགས་རྣམས་དེ་ལས་འབྱུང་བ་ཡང༌། །ཇི་ལྟར་གང་གིས་བདག་ལ་གསུངས། །ཞེས་པ་ནི་
བདག་ཀུན་དུ་བསྒྲུབས་པའི་ལེའུ་དྲིས་པ་སྟེ། སྙིང་པོ་ཡི་གེ་བརྒྱ་པ་དེ་ལས་སྔགས་ཕལ་རྣམས་འབྱུང་བ་ཐབས་ཇི་ལྟར་འབྱུང་རྒྱུ་གང་གིས་འབྱུང་ཞེས་པ་སྟེ། འོད་རྣམས་ཡན་ལག་ལས་འབྱུང་བ་ཞེས་པ་ལ་སོགས་པ་བདག་བསྒྲུབ་པའི་ལས་འཆད་པ་དང་སྦྱར་རོ། །བདག་ལ་དེ་ཀུན་མགོན་གྱིས་སུ།། དམ་པའི་གསུང་གིས་བཀའ་སྩོལ་ཅིག །ཅེས་པ་ནི་གོང་དུ་ཞུས་པ་དེ་རྣམས་བཀའ་སྩོལ་ཞེས་པའོ། །དམ་པའི་གསུང་ཞེས་པ་ནི་སྟོང་པའི་ཚིག་སྟེ། སྨྲ་བ་རྣམས་ཀྱི་ནང་ནང་མ་པ་ཞེས་པའོ། །དེ་སྐད་གསོལ་ནས་བཅོམ་ལྡན་འདས་ཞེས་པ་ལ་སོགས་པའི་གོང་དུ་ཞུས་པ་དེ་རྣམས་སླར་འཆད་པ་སྟེ། ཆོས་ཕྱུག་ཆེན་པོ་ཐུབ་པ་ཡིས། །ཞེས་པ་ནི་བཅོམ་ལྡན་འདས་ཀྱི་བྱེ་བྲག་སྟེ་ཆུད་པ་དང་གཟུང་གི་ཆོས་ལ་དབང་དུ་གྱུར་པ་ལུས་དང་ངག་ཡིད་གསུམ་ཐུབ་ཅེས་པའོ། །ཀུན་དུ་ཁྱབ་པར་བསྒྲགས་པ་ནི། །ཐམས་ཅད་འཇིག་རྟེན་ཁམས་གསུམ་སྟེ། །ཐམས་ཅད་མཁྱེན་གྱིས་ཚིག་གསུངས་པ། །སྣང་མཛད་བཅོམ་ལྡན་འདས་ཀྱིས་སོ། །ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཐམས་ཅད་མཁྱེན་པའི་ཚིག་གསུངས་པ་དེས་འཇིག་རྟེན་གྱི་ཁམས་མ་ལུས་པ་ཐམས་ཅད་ཅེས་པ་སྟེ། ཚིག་དེ་ཡང་དགེའོ། །དགེའོ་སེམས་དཔའ་ཞེས་པ་ལ་སོགས་པའོ། །གསང་བ་ཞེས་པ་ནི་སེམས་ལས་བྱུང་བའི་མཚན་ཉིད་ཤིན་ཏུ་ཕྲ་བ་ཞེས་པའོ། །ཤིན་ཏུ་ངོ་མཚར་ཞེས་པ་ནི། །སེམས་ཀྱིས་ཡི་གེ་འབྲུ་བསམ་པ་ལས་ཀུན་དུ་སངས་རྒྱས་པའི་སྐུ་ལ་སོགས་པར་གྱུར་པས་ངོ་མཚར་ཆེ་ཞེས་པའོ། །སངས་རྒྱས་རྣམས་ཀྱི་གསང་མཆོག་ཅེས་པ་ནི་སྙིང་པོ་དེའི་དོན་དང༌། ཀུན་རྫོབ་ཀྱི་རང་བཞིན་རྟོག་པ་ཅན་གྱི་སེམས་ཅན་རྣམས་ཀྱི་རྗེས་སུ་དཔག་པ་ལ་སོགས་པའི་སྒོ་ནས་བརྟག་པ་མི་རྟོག་པས། སངས་རྒྱས་རྣམས་ཀྱིས་གསང་བའི་མཆོག །ཅེས་པ་སྟེ་དེ་བས་ན་གསུངས་པའི་རྟོག་པ་ཀུན་གྱིས་མི་རྟོག་པས་ཞེས་པའོ། །སུ་ཞིག་ཐེག་ཆེན་དབང་བསྐུར་བ། །ཞེས་པ་ནས། མཐུ་ཆེན་གྱི་ནི་སྙིང་པོའོ། །ཞེས་པའི་བར་དུ་གང་གིས་རིག་པར་བགྱི་ཞེས་པ་ཞུས་པ་འཆད་པ་སྟེ། སྤྱིའི་དོན་དུ་ཐེག་པ་ཆེན་པོའི་དཀྱིལ་འཁོར་སྙིང་རྗེ་ཆེན་པོ་འབྱུང་ཞེས་བྱ་བ་དེར་དབང་བསྐུར་བའི་བསྒྲུབ་པ་ཞིག་གནས་དང་ལྷག་མཐོང་དུ་ལྡན་པས་སྙིང་པོ་འདི་ཤེས་
པར་འགྱུར་ཞེས་པ་སྟེ། སུ་ཞིག་ཐེག་ཆེན་དབང་བསྐུར་བ། དཀྱིལ་འཁོར་སྙིང་རྗེ་ཆེན་པོ་འབྱུང་བ་དེར་ཞུགས་པ་ནི། བསྒྲུབ་པ་གང་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་དབང་བསྐུར་བ་དེས་སྙིང་པོ་འདི་ཤེས་པར་འགྱུར་ཞེས་པ་སྟེ། ཐེག་པ་ཞེས་པ་ནི་འགྲོ་བའི་ཚིག་སྟེ། རང་བཞིན་གྱི་དཀྱིལ་འཁོར་སྐུ་མི་ཟད་པའི་མཚན་ཉིད་དེར་འགྲོ་བར་བྱ་བའམ། གཟུགས་བརྙན་གྱི་དཀྱིལ་འཁོར་འདིའི་སྒོ་ནས་དེར་འགྲོ་བར་འགྱུར་པ་སྟེ། སྙིང་རྗེ་འབྱུང་བའི་དཀྱིལ་འཁོར་འདི་ལ་བྱའོ། །ཆེན་པོ་ཞེས་པའི་ཚིག་ནི་སྤྱིར་གསུངས་མོད་ཀྱི། འོན་ཀྱང་སྐབས་འདིར་ནི་ལུས་ཀྱི་དཀྱིལ་འཁོར་དང་ངག་གི་དཀྱིལ་འཁོར་གཉིས་ཀུན་རྫོབ་ཀྱི་མཚན་ཉིད་པས་ཆེན་པོ་ཞེས་མི་བྱ་བའི་སེམས་ཀྱི་དཀྱིལ་འཁོར་དེ་དོན་དམ་པའི་རང་བཞིན་པས་དེ་ལ་ཆེན་པོ་ཞེས་བྱ་སྟེ། མདོར་ན་གསང་བའི་དཀྱིལ་འཁོར་དུ་དབང་བསྐུར་བ་ཞེས་པ་སྟེ། གསང་བའི་དཀྱིལ་འཁོར་དེར་དབང་བསྐུར་ན་སྔར་བཤད་པའི་ཚུལ་གྱིས་དམ་ཚིག་ལྔ་ཆར་དང་ལྡན་ཞིང་དབང་གསུམ་ཆར་དང་ལྡན་པར་འགྱུར་ཏེ། དེ་ལྟར་དཀྱིལ་འཁོར་གསུམ་ཆར་ལ་རིམ་བཞིན་དུ་བསླབ་པའི་བསྒྲུབ་པ་དེ་ཡོངས་སུ་རྫོགས་པར་འགྱུར་བའི་ཕྱིར་རོ། །དྲང་ཞིང་མཉེན་པ་སུ་ཡིན་དང༌། བསྒྲུབ་པ་དེ་གསང་བའི་དཀྱིལ་འཁོར་དུ་དབང་བསྐུར་བ་འབའ་ཞིག་ཏུ་ཆོག་པ་མ་ཡིན་གྱི། སྐབས་འདིར་ནི་བསྒྲུབ་པ་གོང་མ་དག་ལྟར་བཟླས་པ་ལས་བྱུང་བའི་སྒྲུབ་བ་པོའི་སྤྱོད་ཡུལ་དེ་དྲང་ཞེས་པ་ནི། སེམས་ལ་སྒྱུ་དང་གྱ་གྱུ་མེད་པ་ཞེས་པའོ། །མཉེན་པ་ཞེས་པ་ནི་ཁེངས་པ་དང་ཞེས་སྡང་མེད་པ་ཞེས་པ་སྟེ། གང་དྲང་ཞིང་མཉེན་པ་ཏིང་ངེ་འཛིན་དང་རྗེས་སུ་མཐུན་པ་སྟེ། ཞི་གནས་དང་ལྡན་པར་བསྟན་པའོ། །སྙིང་རྗེ་རྟག་ཏུ་ལྡན་པ་སུ་ཞིག་བྱང་ཆུབ་དམིགས་པ་རུ་ནམ་ཀྱང་མི་ལྟ་ཞེས་པ་སྟེ། ཤེས་རབ་མེད་པར་ཞི་གནས་འབའ་ཞིག་ཏུ་འབྱུང་ན་ཡང་མི་དམིགས་པར་འགྱུར་ཏེ། ལྷག་མ་ཐོང་དང་ལྡན་པར་གསུངས་པ་སྟེ། སྙིང་རྗེ་སེམས་ཅན་ཐམས་ཅད་སྡུག་བསྔལ་དང་བྲལ་བར་བྱེད་ཅིང་དེ་བཞིན་ཉིད་ཀྱི་རང་བཞིན་གྱི་བྱང་ཆུབ་སེམས་དཔའ་དངོས་པོར་དམིགས་པར་མི་ལྟ་ཞིང༌། སྟོང་པ་ཉིད་ན་ལྷག་མཐོང་དང་ལྡན་པ་སྟེ། དེ་ལྟར་ལྷག་མཐོང་དང་ཞི་གནས་སུ་ལྡན་པ་དེ་དག་གིས་སྙིང་པོ་མཐུ་
ཆེན་པོ་འདི་ཤེས་པར་འགྱུར་རོ་ཞེས་པའོ། །གནས་ནི་དེའི་སྙིང་པོ་ལ་སྟེ་ཞེས་པ་ནས། སྔགས་ཀྱི་མགོན་པོ་མཐུ་ཆེན་པོ། །ཞེས་པའི་བར། ཐུབ་པ་ཆེན་པོ་གནས་ནི་གང༌། །ཞེས་ཞུས་པ་ལས་དེ་བཤད་པ་སྟེ། སྒྲུབ་པ་པོ་དང་པོར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མངོན་དུ་བསམས་ཏེ་ཕྱག་འཚལ་ནས། དེ་དག་གི་སྤྱན་སྔར་སྡིག་པ་བཤགས་པ་ལ་སོགས་པ་དང༌། དམ་ཚིག་གི་ཕྱག་རྒྱ་བཅིངས་པ་ལ་སོགས་པ་རིམ་པ་བཞིན་དུ་བྱ་སྟེ། རང་གི་སྙིང་གར་པདྨོ་དཀར་པོ་འདབ་མ་བརྒྱད་པ་བསམས་ལ། དེའི་སྟེང་དུ་རླུང་གི་དཀྱིལ་འཁོར་མེ་ལོང་ལྟ་བུར་གསལ་བར་བསམས་ཏེ། དེའི་དབུས་སུ་བཅོམ་ལྡན་འདས་ཡི་གེ་བརྒྱ་པ་ཨཾ་ཞེས་པ་བསམས་ཏེ། དེ་ཡང་མེ་ལོང་གི་གཟུགས་བརྙན་སྣང་བ་བཞིན་དུ་དེ་ཉིད་དུ་ཞི་བར་བལྟ་སྟེ། དེའི་གནས་བཤད་པའི་བསྡུ་པའི་དོན་ཏོ། །ཚིག་གི་དོན་ལ་གནས་ཉིད་དེའི་སྙིང་ལ་མེད་དེ། མགོན་པོ་གང་དུ་བཞུགས་པའོ། །ཞེས་པ་ནི་མགོན་པོ་དེའི་གནས་སྒྲུབ་པོའི་སྙིང་གར་བྱའོ་ཞེས་པའོ། །ཡིད་ལས་བྱུང་བ་འདབ་མ་བརྒྱད། །པདྨོ་ཤིན་ཏུ་བཟང་མོ་ལ། །ཞེས་པ་ནི་མགོན་པོ་དེའི་སྙིང་གར་ཞེས་བྱ་བ་དེ་ཡང་ཡིད་ཀྱིས་བསམས་པའི་པདྨོ་འདབ་མ་བརྒྱད་ཤིན་ཏུ་གསལ་ཞིང་དཀར་པ་སྙིང་གར་བསམས་ལ། དེའི་སྟེང་དུ་ཟླ་བའི་དཀྱིལ་འཁོར་བསམས་ཏེ་དེའི་དབུས་སུ་མགོན་པོ་དེ་བསམས་ཞེས་པ་སྟེ། དེ་བས་ན་གསུངས་པའི་དཀྱིལ་འཁོར་ཟླ་བ་ངང་འདྲ་བ་ཞེས་པའོ། །དྲི་མ་མེད་པ་མེ་ལོང་དང་འདྲ་ཞེས་པ་ནི་ཟླ་བ་ཡང་དཀར་མོད་ཀྱི། དྲི་མ་རབ་རིབ་ཡོད་ཅིང་མི་སྣང་བས་དེ་ཉིད་གསལ་བར་བསམ་པར་བྱ་བའི་ཕྱིར་རོ། །མེ་ལོང་ལྟར་ཤིན་ཏུ་དྲི་མ་མེད་ཅིང་གཟུགས་བརྙན་སྣང་བ་སྙིང་པོ་དེ་བསམ་ཞེས་པའོ། །དེ་ལ་རྟག་ཏུ་གནས་པ་ནི། །ཞེས་པ་ནི་མེ་ལོང་ལ་སྙིང་པོ་རྟག་པར་གནས་པ་དེ་ཞུགས་པར་བྱའོ་ཞེས་པ་སྟེ། རྟག་པར་གནས་ཞེས་པའི་དོན་དམ་པའི་རང་བཞིན་དང༌། ཀུན་རྫོབ་ཀྱི་སྐུའི་རང་བཞིན་ལས་སྟོང་པ་སྟེ། དོན་དམ་པའི་རང་བཞིན་དེ་བཞིན་ཉིད་ཀྱི་ཡེ་ཤེས་དེ་མི་འགྱུར་པ་ཡོངས་སུ་རྫོགས་པའི་ཚུལ་གྱིས་རྟག་པར་གནས་པ་ཞེས་བྱའོ། །ཀུན་རྫོབ་ཏུ་སྐུའི་ཚུལ་དུ་ཡང་བཅོམ་ལྡན་འདས་ཀྱི་སྐུ་མི་ཟད་པའི་རྒྱན་དེ་སྔོན་གྱི་ཤུགས་ཀྱིས་འཁོར་
བའི་མཐའ་ཇི་ཙམ་པ་དེ་སྲིད་དུ། སེམས་ཅན་རྣམས་ཀྱི་དོན་གྱི་ཕྱིར་ཕྱིན་ཅི་མ་ལོག་པ་ཡོངས་སུ་རྫོགས་པའི་ཚུལ་གྱིས་རྟག་པར་བཞུགས་པའོ། །ཡང་ན་སྒྲུབ་པོ་ཇི་ཙམ་དུ་ཏིང་ངེ་འཛིན་དུ་གནས་པ་དེ་ཙམ་དུ་སྙིང་པོ་དེ་ཡང་མི་གཡོ་བར་རྟག་པར་གནས་པ་ལ་ཡང་བྱའོ། །སྔགས་ཀྱི་མགོན་ཆེན་ཞེས་པ་ནི་སྔ་མ་བཞིན་དུ་ཁ་དོག་གསེར་འདྲ་བར་འབར་བཅས་དྲི་མེད་ཏིང་འཛིན་གནས་པ་སྟེ། ཉི་མ་བཞིན་དུ་བལྟར་མི་བཟོད། །ཅེས་པ་ནི་ཇི་ལྟར་རིག་པར་བགྱི་ཞེས་བཤད་པ་སྟེ། ཁ་དོག་གསེར་འདྲ་བར་བཅས་ཞེས་པ་ནི་སྙིང་པོ་ཁ་དོག་གསེར་འདྲ་བ་ལ་འོད་འཕྲོ་བ་དང་བཅས་ཞེས་པའོ། །དྲི་མེད་ཅེས་པ་ནི་འབྲས་བུའི་རང་བཞིན་ལས་སྟོང་པ་སྟེ། ཤེས་བྱ་དང་ཉོན་མོངས་པ་ལ་སོགས་པ་སྒྲིབ་པའི་རྟོག་པ་དང་བྲལ་ཞེས་པའོ། །ཏིང་ངེ་འཛིན་གནས་ཞེས་པ་ནི་ཡི་གེའི་འབྲུ་ལ་ཏིང་ངེ་འཛིན་གྱི་དབྱི་བས་མི་སྲིད་དེ། དེ་བས་ན་སྒྲུབ་པོ་ཏིང་ངེ་འཛིན་དུ་འདུག་པ་ལ་སྙིང་པོ་དེ་གནས་ཞེས་བྱའོ། །ཉི་མ་བཞིན་དུ་བལྟར་མི་བཟོད། །ཅེས་པ་ནི་གཟི་བརྗིད་དང་ལྡན་པར་བསམ་པར་གསུངས་པ་སྟེ། ཇི་ལྟར་ཉི་མའི་འོད་ཟེར་གྱིས་བསྐོར་ལ། མིག་མི་ཆགས་ཤིང་བལྟར་མི་བཟོད་པ་བཞིན་དུ་སྙིང་པོ་འདི་ཡང་རང་གི་འོད་འཕྲོ་བ་འཁོར་ཞིང་བལྟ་དཀའ་བར་བསམ་ཞེས་པ་སྟེ། དོན་མདོར་ན་སྙིང་གར་མེ་ལོང་གི་དཀྱིལ་འཁོར་བསམས་པ་དེའི་དབུས་སུ་སྙིང་པོ་ཁ་དོག་གསེར་འདྲ་བ་དང་བཅས་པར་བསམས་པ་སྟེ་འོད་འཕྲོ་བས་སྒྲུབ་པོའི་ལུས་ཁྱབ་པར་བསམས་ཏེ། འོད་འཕྲོ་བ་དེ་ཉིད་འདུས་པ་ལས་རང་གི་ལུས་ཤེལ་བཞིན་དུ་སངས་རྒྱས་པའི་སྐུར་གྱུར་པར་བསམས་ཏེ། དེ་ལྟར་གྱུར་ན་ཡང་ཟླ་པའི་དཀྱིལ་འཁོར་ལ་གནས་པའི་སྙིང་པོ་ཡང་སྔ་མ་བཞིན་དུ་སྙིང་ག་ན་གནས་པར་བསམ་ཞེས་པའོ། །དེ་བས་ན་གསུངས་པ། དེ་ཡིས་འགྲོ་བ་འདི་ཀུན་ནི། །བྱིན་གྱིས་སུ་ནི་ཁྱབ་པར་བརླབས། །ཕྱི་དང་ནང་དུ་འཇུག་པ་རུ། །ཞེས་པ་སྟེ་འགྲོ་བ་འདི་ཀུན་ཞེས་པ་ནི་བསྒྲུབ་པའི་ཕུང་པོ་ལྔ་པོ་དེ་ཀུན་སྙིང་པོ་འདིས་ཀུན་ཁྱབ་པར་བྱིན་གྱིས་བརླབས་ཞེས་པའོ། །དེ་ལ་ཕྱི་རོལ་གྱི་བྱིན་གྱིས་བརླབས་པས་ནི་ཕྱིའི་ལུས་ཀུན་དུ་སངས་རྒྱས་པའི་སྐུར་གྱུར་པའོ། །ནང་གི་བྱིན་གྱིས་བརླབས་པས་ནི་སྙིང་ག་ན་ཟླ་བའི་དཀྱིལ་འཁོར་ལ་
གནས་པའོ། །ཡང་ན་འགྲོ་བ་འདི་ཀུན་ཞེས་པ་ནི་འཕགས་པ་འཇམ་དཔལ་དང༌། སྤྱན་རས་གཟིགས་ཀྱི་དབང་པོ་ལ་སོགས་པ་སྔགས་ཀྱི་ལྷ་རྣམས་ལ་བྱ་སྟེ་དེ་དག་ཐམས་ཅད་འདིས་ཁྱབ་པ་སྟེ། དེ་དག་གི་གཟུགས་སྤྱིའི་གཟུགས་སུ་བསྒྱུར་བ་དང༌། ནང་གི་ཡི་གེ་ཨ་ལ་སོགས་པ་ཟླ་བའི་དཀྱིལ་འཁོར་ལ་བསམ་པར་བྱ་བ་ཡང༌། སྙིང་པོ་འདིས་བྱིན་གྱིས་བརླབས་པ་ལས་བྱུང་བའི་ཕྱིར་རོ། །དེ་ལྟར་རང་གི་ལུས་ཀུན་དུ་སངས་རྒྱས་པའི་སྐུར་བསྒྱུར་བ་སྙིང་གར་ཟླ་བའི་དཀྱིལ་འཁོར་ལ་སྙིང་པོ་བསམ་པ་བཅས་པ་བསྒོམས་ན་ཀུན་དུ་སངས་རྒྱས་པའི་སྐུ་དང་ལྡན་པའི་རིག་པ་འཛིན་པར་འགྱུར་རོ། །དེ་ལྟར་གྱུར་ནས་ལུས་མཐོང་བ་དང་དེས་སྨྲས་པ་དང་བསམས་པའི་སེམས་ཅན་སྐལ་བ་དང་ལྡན་པ་རྣམས་ཇི་ལྟར་བསམས་པའི་དོན་རྣམས་འགྲུབ་པར་འགྱུར་རོ་ཞེས་འོག་ནས་འབྱུང་བ་དང་སྦྱར་རོ། །མེ་ལོང་ཉིད་དུ་བྱོས་ཞེས་པ་ནས། རང་གི་ལུས་ཀྱིས་བཟང་པོ་སྟེ། །ཞེས་པའི་བར་དུ་སྙིང་གར་ཟླ་བའི་དཀྱིལ་འཁོར་དང་མེ་ལོང་ཉིད་དུ་ཤེས་པར་བྱའོ་ཞེས་པ་ནས་ཡི་གེ་བསམས་པ་ཡང་དེ་ལས་ཀུན་དུ་སངས་རྒྱས་པའི་སྐུར་བསྒྱུར་བར་བྱ་བའི་ཐབས་བསྟན་པ་སྟེ་མེ་ལོང་ཉིད་དུ་ཤེས་པར་བྱོས་ཞེས་པ་ནི་སྙིང་གར་མེ་ལོང་བསམ་པ་དེ་མེ་ལོང་གི་དངོས་པོ་གཞན་མ་ཡིན་གྱི། ཇི་བཞིན་པ་དང་བཅས་པ་སེམས་ནི་ཡིད་ཅེས་བྱ་སྟེ། ཡིད་དེ་ཉིད་ཀྱི་མེ་ལོང་གི་དཀྱིལ་འཁོར་ཇི་བཞིན་པར་འགྱུར་བར་ཤེས་པར་བྱོས་ཤིག་ཅེས་པའོ། །ཤེས་རབ་ཀྱང་དེ་དག་ཉིད་ཀྱི་དེ་ཞེས་པ་ནི། ཡིད་མེ་ལོང་གི་དཀྱིལ་འཁོར་དུ་གྱུར་པའི་སྐད་ཅིག་ཕྱི་མ་ལ་གསལ་བར་རྟོག་ཅིང་ཡོངས་སུ་མཆོད་པའི་ངང་ཚུལ་གྱི་སེམས་འབྱུང་བ་ནི་ཤེས་རབ་ཅེས་བྱ་སྟེ། ཤེས་རབ་དེ་སྙིང་པོ་ལ་རྟོགས་པས་ན་ཡིད་ཅེས་བྱའོ། །སྔགས་མཁན་ཤེས་རབ་མིག་གིས་ནི། །མེ་ལོང་ལ་ནི་བལྟས་ནས་སུ། །རང་གི་གཟུགས་སུ་རབ་ཞི་བ། །སངས་རྒྱས་མཚན་ཉིད་དེ་ལྟར་ཏེ། །ཞེས་པ་སྐད་ཅིག་མ་ཕྱི་མའི་ཤེས་རབ་ཀྱིས་སྙིང་པོ་དང་བཅས་པའི་ཟླ་བའི་དཀྱིལ་འཁོར་ལ་རྩེ་གཅིག་ཏུ་རྟོགས་པའི་ཚེ་གོང་དུ་བཤད་པའི་ཚུལ་དུ་སྙིང་པོ་དེའི་འོད་འཕྲོས་འདུས་པ་ལས་རང་གི་གཟུགས་ཀུན་དུ་སངས་རྒྱས་པའི་སྐུའི་མཚན་ཉིད་དུ་གྱུར་པར་མཐོང་བ་ཞེས་བའོ། །དེ་བས་ན་གསུངས་
པ་ལུས་ལ་ལུས་ཀྱི་གཟུགས་སུ་ཞེས་པ་སྟེ་བདག་གི་ལུས་ལ་བཅོམ་ལྡན་འདས་ཀྱི་སྐུའི་གཟུགས་སུ་བྱའོ་ཞེས་པ་སྟེ་དེའི་ཕྱི་རོལ་གྱི་ལུས་སངས་རྒྱས་ཀྱི་སྐུར་བསམ་པའི་ཐབས་སོ། །ཡིད་ལས་བྱུང་ངོ་ཞེས་པ་ནི་བདག་གི་ཡིད་ལས་བྱུང་བའི་མེ་ལོང་གི་དཀྱིལ་འཁོར་སྙིང་པོ་དང་བཅས་པ་བསམ་ཞེས་པ་སྟེ། དེ་ནི་ཕྱི་རོལ་ལས་སངས་རྒྱས་ཀྱི་སྐུར་བསྒྱུར་བའི་ཚེ་ནང་དུ་ཡང་སྙིང་པོ་དང་བཅས་པའི་ཟླ་བའི་དཀྱིལ་འཁོར་བསམ་ཞེས་པའོ། །དེ་ན་དག་པ་འབྱུང་བ་ནི་རང་གི་བཟང་པོ་སྟེ་ཞེས་པ་ནི་ཕྱི་དང་ནང་གཉིས་ཀ་དེ་ལྟར་བསྒོམས་ན་ཕྱིའི་ལུས་ཀུན་སངས་རྒྱས་པའི་སྐུར་མཛེས་པར་དག་པར་འགྱུར་བ་དང༌། ནང་གི་ཡིད་ལ་ཡང་སྙིང་པོ་དང་བཅས་པའི་ཟླ་བའི་དཀྱིལ་འཁོར་གསལ་ཞིང་དག་པའི་ཕྱིར་སྐུར་བསམ་པའི་བདག་གི་ལུས་དང་ནང་གི་སྙིང་པོར་བསམ་པའི་བདག་གི་ལས་བྱས་པ་ལས་དག་པ་དེ་དག་ཀྱང་འབྱུང་ཞེས་པའོ། །དག་པ་ཞེས་པ་ཡང་སྐབས་འདིར་ཡེ་ཤེས་ལ་སོགས་པ་དག་པའི་མཚན་ཉིད་ལ་མི་བྱའི། ཕྱི་དང་ནང་གི་གཟུགས་དེ་དག་གསལ་བའི་སྒོ་ནས་དག་པའོ། །རང་གི་ལས་ཤེས་པ་དེ་ཡང་ཚེ་རབས་སྔ་མའི་དགེ་བ་ལ་སོགས་པ་ལ་མི་བྱའི། ཕྱི་དང་ནང་གི་གཟུགས་འདི་ལྟར་བསྐྱེད་པའི་སྦྱོར་བའི་ལས་ལ་བྱའོ། །དེ་ནས་དེའི་ཚེ་འོད་ཀྱང་ནི། །ཡི་གེ་ཀུན་དུ་འབར་འགྱུར་བ། །གཅིག་གིས་སྔགས་པར་བྱེད་པ་ནི། །ཀུན་ཀྱང་སངས་རྒྱས་སྤྱོད་པའོ། །ཞེས་པ་ནི་སྒྲུབ་པ་པོ་ཀུན་དུ་སངས་རྒྱས་པའི་སྐུར་གྱུར་པ་དེའི་ཚེ་དེ་ལ་འོད་འཕྲོ་བ་བྱུང་བ་རྣམས་ཀྱི་མཐུས་སྔགས་པ་དེ་ཀུན་སངས་རྒྱས་པའི་སྤྱོད་པ་སྣ་ཚོགས་བྱེད་ནུས་པར་འགྱུར་རོ་ཞེས་པའོ། །ཡང་ན་སྙིང་པོ་དེ་ལས་འོད་འཕྲོ་བ་འབྱུང་བ་ནི་ཨ་ལས་ཡི་གེ་ཨའི་རིས་རྣམས་འབྱུང་བ་དང༌། ཀླད་ཀོར་ཀ་ལ་སོགས་པ་འབྱུང་བ་སྟེ། དེ་རྣམས་ཀྱང་འཕགས་པ་འཇམ་དཔལ་ལ་སོགས་པ་སྔགས་ཀྱི་ལྷ་རྣམས་ཀྱི་སྙིང་པོ་སྟེ་དེ་དག་ཐམས་ཅད་ཀྱང་འོག་ནས་བདག་བསྒྲུབ་པའི་ལེའུ་ལས་འབྱུང་བའི་རིམ་གྱིས། ཡིད་ཀྱིས་སུ་ནི་བསམས་ན་ཡང༌། །ཞེས་པ་ནི་ཀུན་དུ་སངས་རྒྱས་པའི་སྐུར་གྱུར་པའི་རྗེས་སུ་བསྔགས་པ་གསུངས་པ་སྟེ། དེ་བཞིན་དག་བ་མཐོང་བ་དང༌། །ཞེས་པ་ནི་ཀུན་དུ་སངས་རྒྱས་པའི་སྐུར་
འགྱུར་བའི་རིག་འཛིན་ཏེ། གང་གིས་མཐོང་བའི་སེམས་ཅན་དེ་ཇི་ལྟར་བསམས་པའི་དོན་རྣམས་འགྲུབ་པར་འགྱུར་ཞེས་པ་སྟེ། མ་ལུས་པའི་དོན་ནི་ཀུན་བྱེད་པ་ཞེས་པ་དང་སྦྱར་རོ། །དེ་བཞིན་དུ་གང་རིག་འཛིན་དེ་དང་ལྷན་ཅིག་ཏུ་སྨྲས་པ་ཡང་དོན་ཀུན་ཤེས་པར་འགྱུར་ཞེས་པའོ། །དེ་བཞིན་རིག་འཛིན་དེས་སེམས་ཅན་དེ་འདི་ལྟར་གྱུར་ཅིག་ཅེས་བསམས་ན། ཡང་དེའི་དོན་ཀུན་དུ་བྱེད་པར་འགྱུར་ཞེས་པའོ། །རིག་འཛིན་དེ་མཐོང་བ་ལ་སོགས་པའི་སྤྱོད་ཡུལ་དུ་གྱུར་བའི་སེམས་ཅན་དེ་དག་ཀུན་བསོད་ནམས་བསགས་པ་སྐལ་བ་དང་ལྡན་པར་ཤེས་པར་བྱ་སྟེ། སེམས་ཅན་དེ་དག་གི་དོན་བྱེད་པར་འགྱུར་གྱི་ཕལ་རྣམས་ཀྱིས་ནི་དེ་མཐོང་བ་ལ་སོགས་པའི་སྤྱོད་ཡུལ་དུ་མི་འགྱུར་རོ། །གསང་བའི་བདག་པོ་འོན་ཀྱང་ཞེས་པ་ནས། དེ་ཉིད་ཕན་ཚུན་བྱེད་པ་དང་ལས་ལ་གནས་པར་འགྱུར་བ་མ་ཡིན་ནོ་ཞེས་པའི་བར་དུ་སངས་རྒྱས་པའི་སྐུར་ང་རྒྱལ་བསྐྱེད་པའི་ཕྱིར་དེ་ཇི་ལྟར་འགྱུར་བའི་རྒྱུ་ཀུན་རྫོབ་ཏུ་རྐྱེན་དང་འདུ་བ་ཚོགས་ཏེ། འབྱུང་བའི་རྒྱུ་དང་འབྲས་བུ་ངེས་པའི་སྒོ་ནས་བསྟན་པ་སྟེ། དེ་ལྟར་ཕུལ་ལུས་ལ་ལུས་ཀྱི་གཟུགས་བསྐྱེད་པར་བྱའོ་ཞེས་པ་ནི་གོང་དུ་གསུངས་པའི་ཚུལ་དུ། བདག་གི་ལུས་ལ་ཀུན་དུ་སངས་རྒྱས་པའི་སྐུར་བསྐྱེད་པར་བྱའོ་ཞེས་པའོ། །རྫོགས་པའི་སངས་རྒྱས་འདྲ་བར་གཞན་ཅུང་ཟད་མེད་དོ་ཞེས་པ་ནི། ཀུན་དུ་སངས་རྒྱས་པའི་སྐུ་ལ་ཤིན་ཏུ་ཞེས་པའི་ཕྱིར་གསུངས་པ་སྟེ། ཀུན་དུ་སངས་རྒྱས་པའི་སྐུ་ལས་ཁྱད་པར་འཕགས་ཤིང་གཞན་དག་གི་སྐུ་ཡང་མེད་པས་ན་ཀུན་དུ་སངས་རྒྱས་པའི་སྐུ་འདི་ཉིད་རང་གི་ལུས་ལ་བསྐྱེད་པར་བྱའོ་ཞེས་པའོ། །ཀུན་དུ་སངས་རྒྱས་པའི་སྐུར་བསྐྱེད་པ་དེ་ཡང་དོན་དམ་པར་གཟུགས་ཀྱི་དངོས་པོ་མེད་མོད་ཀྱི། ཀུན་རྫོབ་ཏུ་རྒྱུ་དང་འབྲས་བུ་ངེས་པའི་ཆོས་ཉིད་མེད་པ་མ་ཡིན་ཏེ། དཔེར་ན་མིག་དང་རྣ་བ་ལ་སོགས་པའི་དངོས་པོ་ཆེན་པོ་བཞིའི་རང་བཞིན་དུ་རྟོགས་པ་དེ་དག་གདོན་དམ་པར་མ་ཡིན་པ་སྟོང་པ་ཉིད་དུ་སངས་རྒྱས་བཅོམ་ལྡན་འདས་རྣམས་ཀྱང་མཁྱེན་མོད་ཀྱི། འོན་ཀྱང་རྒྱུ་དང་རྐྱེན་འདུས་པ་ལས་དེ་དག་ཀྱང་འབྱུང་བར་སྣང་སྟེ། མེད་པ་ལ་མ་ཡིན་ནོ་ཞེས་གསུངས་པ་ཇི་ལྟར་བདག་གི་མིག་དང་རྣ་བ་ལ་སོགས་པའོ། །དེ་དག་ཀྱང་རང་བཞིན་གྱིས་སྟོང་པ་ཞེས་པ་ནི་
མིག་དང་རྣ་བ་ལ་སོགས་པ་འབྱུང་བ་ཆེན་པོ་བཞིར་གཏོགས་པའི་ཆོས་དེ་དག་ཐོག་མ་ནས་མ་བྱུང་མ་སྐྱེས་པའམ། རྡུལ་ཕྲན་ཕྱོགས་དང་ཆ་ལ་སོགས་པ་བཤིག་ན། དེ་དག་རང་བཞིན་ཡོད་པར་མི་འགྲུབ་ཅེས་པའོ། །མིང་ཙམ་གྱིས་ཟིན་པ་ཞེས་པ་ནི་དངོས་པོ་སྟོང་པ་སྟེ་མིང་དུ་གདགས་པ་ཙམ་ཞེས་པའོ། །དངོས་པོ་མེད་ན་ཡང་མིང་དུ་གདགས་པ་ཇི་ལྟར་ཡོད་ཅེ་ན་གསུངས་པ་ནམ་མཁའ་དང་འདྲ་ཞེས་པ་ནམ་མཁའ་ཡང་མེད་མོད་ཀྱི། ནམ་མཁའ་ཞེས་པའི་མིང་དུ་བརྗོད་དོ། །དེ་བཞིན་དུ་འདི་དག་ཀྱང་དངོས་པོ་མེད་མོད་ཀྱི། མིག་དང་རྣ་བ་ཞེས་མིང་ཙམ་དུ་བརྗོད་དོ། །གཟུགས་མེད་པའོ་ཞེས་པ་ནི་དེ་ལྟར་དེ་དག་རང་བཞིན་གྱིས་སྟོང་པ་བས་གང་གིས་གཟུང་བའི་ཆམ་ཡིན་ནོ་ཞེས་པ་སྟེ། ཚིག་དེ་དག་གིས་མིག་ལ་སོགས་པའི་དངོས་པོ་དེ་རྣམས་སྟོང་པའི་རང་བཞིན་ནམ་མཁའ་ལྟར་བསྟན་པའོ། །ལས་དང་རྒྱུ་ལས་བྱུང་ཞེས་པའི་ཉོན་མོངས་པའི་ཕྱོགས་སུ་བསྟན་པ་སྟེ། རྒྱུ་མ་རིག་པ་ལ་སོགས་པའི་ཉོན་མོངས་པའོ། །ལས་ནི་འཕྲལ་གྱི་དགེ་བ་དང་མི་དགེ་བ་ལ་སོགས་པ་ལུས་དང་ངག་ཡིད་གསུམ་གྱི་སྤྱོད་པ་སྟེ། དོན་དམ་པར་དེ་དག་དངོས་པོ་མེད་ཀྱང་ཀུན་རྫོབ་ཏུ་ལས་དང་རྒྱུ་ལས་སྐྱེས་པར་སྣང་ངོ་ཞེས་པའོ། །གཟུགས་བརྙན་དང་འདྲ་ཞེས་པ་ནི་ཀུན་རྫོབ་ཏུ་སྣང་བ་ཡང་གཟུགས་བརྙན་ལྟར་མ་བརྟགས་པའི་སྒོ་ནས་སྣང་བར་ཟད་ཀྱི། གཟུགས་བརྙན་དེ་རིགས་པ་དང་གཞུང་གི་སྒོ་ནས་བརྟགས་པ་དང༌། བརྟག་མི་བཟོད་དེ་ཡོད་པར་མི་འགྲུབ་པ་བཞིན་ནོ་ཞེས་པའོ། །དེ་བཞིན་གཤེགས་པས་མངོན་པར་སངས་རྒྱས་སོ་ཞེས་པ་ནི། ཆོས་དེ་རྣམས་སྔོན་གྱི་དེ་བཞིན་གཤེགས་པ་རྣམས་ཀྱིས་ཀྱང་འདི་ལྟ་བུའི་ཚུལ་དུ་མངོན་པར་མཁྱེན་ཏོ་ཞེས་པའོ། །དེ་དག་ཀྱང་ཕན་ཚུན་རྟེན་ཅིང་འབྲེལ་པར་འབྱུང་བའི་རྒྱུན་མི་འཆད་པར་སོ་སོར་ཟིན་པ་ཞེས་པ་ནི། གང་དུ་གཟུགས་བརྙན་དང་འདྲ་ཞེས་པ་ལ་གལ་ཏེ་དེ་ལྟར་གཟུགས་བརྙན་དང་འདྲ་ན། གཟུགས་བརྙན་ནི་གཟུགས་མེད་ན་མི་འབྱུང་བ་བཞིན་དུ་རྒྱུན་ཆད་དམ་ཞེ་ན། གཟུགས་བརྙན་བཞིན་ཆད་པ་མ་ཡིན་གྱི་ཉོན་མོངས་པ་སྔ་མའི་སྐད་ཅིག་པའི་ཆ་མེད་ཀྱང༌། ཉོན་མོངས་པས་བསྐྱེད་པའི་ལས་དང་ཚེ་དག་ཀྱང་འབྲས་བུ་སྐྱེད་པར་བྱེད་དེ། གཟུགས་
བརྙན་ལྟར་གཟུགས་མེད་ན་མི་འབྱུང་བ་མ་ཡིན་གྱི། ཕན་ཚུན་རྟེན་ཅིང་འབྲེལ་པར་འབྱུང་བའི་རྒྱུན་མི་འཆད་པར་འབྱུང་ང་ཞེས་པའོ། །གང་རྐྱེན་ལས་འབྱུང་བ་དེ་ནི་གཟུགས་བརྙན་ལྟ་བུ་ཞེས་པ་ནི། དེ་ལྟ་བུའི་རྐྱེན་ལས་བྱུང་བའི་ཆོས་དེ་རྣམས་བརྟག་མི་བཟོད་ཅིང་དོན་དམ་པར་ཡོད་པ་མ་ཡིན་པ་དཔེར་ན་གཟུགས་བརྙན་དང་འདྲ་ཞེས་པའོ། །རྟེན་ཅིང་འབྲེལ་པ་ལས་བྱུང་བས་ན་གང་ལྷ་ནི་བདག །གང་བདག་ནི་ལྷའོ་ཞེས་པ་ནི་དེ་ལྟར་དོན་དམ་པར་ཆོས་ཡོད་པ་མ་ཡིན་ཀྱང་ཀུན་རྫོབ་ཏུ་རྟེན་ཅིང་འབྲེལ་པར་འབྱུང་བ་ལས་ཆོས་རྣམས་ཀུན་རྫོབ་ཏུ་སྣང་བས་ན། བདག་གི་རྐྱེན་གྱིས་ལྷ་བསྐྱེད་ལྷའི་རྐྱེན་གྱིས་བདག་བསྐྱེད་པ་བས་བདག་བསྐྱེད་དོ་ཞེས་པའོ། །གང་ལྷ་ནི་བདག་ཅེས་པ་ནི་ཡི་གེ་བརྒྱ་པའི་རང་བཞིན་ཨཾ་ཞེས་པ་སྙིང་ག་ན་གནས་པ་དེ་དག་གི་བསམས་པ་ལས་བྱུང་བའི་ཕྱིར་རོ་ཞེས་པའོ། །གང་བདག་གི་ལྷའོ་ཞེས་པ་ནི་སྙིང་པོ་དེས་བདག་ཀུན་དུ་སངས་རྒྱས་པའི་སྐུར་བསྐྱེད་པའི་ཕྱིར་རོ་ཞེས་པའོ། །དེ་བཞིན་དུ་ལུས་ལ་ལུས་ཀྱི་གཟུགས་བསྐྱེད་པར་ཞེས་པ་ནི་དེ་ལྟར་ཕན་ཚུན་རྐྱེན་དང་འདུ་བ་ཚོགས་ཏེ་བྱུང་བས་བདག་གི་གཟུགས་ཀུན་དུ་སངས་རྒྱས་པའི་སྐུར་བསྐྱེད་པར་བྱའོ། །གསང་བའི་བདག་པོ་ཆོས་ཀྱི་རྐྱེན་གྱིས་ནི་ཁོང་དུ་ཆུད་པར་རྟོགས། ཁོང་དུ་ཆུད་པའི་རྐྱེན་གྱིས་རྟོགས་པའམ་ལྟོས་པ་ཞེས་བ་ནི་གང་ལྷ་ནི་བདག །གང་བདག་པོ་ནི་ལྷའོ་ཞེས་པའི་ཚིག་དེ་ཉིད་གཞུང་གཞན་གྱིས་བསྟན་པ་སྟེ། ཆོས་ཞེས་པ་ནི་ཨཾ་ཞེས་པའི་ཡིག་འབྲུའོ། །ཁོང་དུ་ཆུད་པ་ཞེས་པ་ནི་ཀུན་དུ་སངས་རྒྱས་པའི་སྐུ་སྟེ། ཡི་གེའི་རྐྱེན་གྱིས་ཀུན་དུ་སངས་རྒྱས་པར་འགྱུར། ཀུན་དུ་སངས་རྒྱས་པར་གྱུར་ནས་སླར་སྙིང་གའི་ཡི་གེ་བསམ་པར་བྱ་བ་ནི། གཅིག་གི་རྐྱེན་གྱིས་གཅིག་འབྱུང་བར་བྱ་སྟེ་དེ་ལྟར་ལྟོས་པའོ། །རང་བཞིན་གྱིས་སྟོང་པ་ཉིད་ཀྱི་ཕྱིར་དེ་གཉིས་ཕན་ཚུན་དུ་བྱེད་པ་དང༌། ལས་ལ་གནས་པར་འགྱུར་བ་ཡིན། །ཞེས་པ་ནི་ཡི་གེ་དང་གཟུགས་དེ་གཉིས་རང་བཞིན་སྟོང་པ་ལས་ཡི་གེ་དང་གཟུགས་བསྐྱེད་པའི་བྱ་བ་མི་བྱེད། གཟུགས་ཀྱང་ཡི་གེ་བསྐྱེད་བའི་བྱ་བ་མི་བྱེད་ཅེས་པའོ། །གསང་བའི་བདག་པོ་ཇི་ལྟར་ཡིད་ལ་ཡིད་ཀྱི་གཟུགས་འབྱུང་བར་བྱ་ཞེན་ཞེས་པ་ལ་སོགས་པ་ནི། ཡིད་ལ་ཟླ་བའི་
དཀྱིལ་འཁོར་ལ་གནས་པའི་སྔགས་ཀྱི་འབྲུ་བསྐྱེད་བ་དེ་བསྟན་པར་བྱ་བའི་ཕྱིར་ཡིད་ལས་ཇི་ལྟར་འབྱུང་བའི་རྒྱུས་བཤད་པ་སྟེ། འདི་ལྟར་གསང་བའི་བདག་པོ་ཡིད་ལ་དཀར་པོའམ་སེར་པོའམ་དམར་པོ་བསམས་པ་ནི་དེ་འདྲ་བར་ཡིད་ཉེ་བར་ཞེན་པར་འགྱུར་རོ་ཞེས་པ་ནི། ཆུའི་དཀྱིལ་འཁོར་དང་དབང་ཆེན་གྱི་དཀྱིལ་འཁོར་དང་མེའི་དཀྱིལ་འཁོར་བསམས་ན། ཡིད་ཀྱང་ཇི་བཞིན་པར་འགྱུར་རོ། །ཞེས་བའོ། །དེ་ལྟ་བ་ནས་དེ་འདྲ་བའི་དོན་ཀྱང་དེ་འདྲ་བར་བྱེད་པར་འགྱུར་རོ་ཞེས་པ་སྟེ། དབང་ཆེན་ལ་སོགས་པའི་དཀྱིལ་འཁོར་ཇི་བཞིན་པར་འགྱུར་བའི་ཡིད་དེས་དབང་ཆེན་ལ་སོགས་པའི་བྱ་བ་བྱེད་པར་འགྱུར་རོ་ཞེས་པ་སྟེ་དེ་བས་ན་གསུངས་པ་འདི་ལྟ་སྟེ། གསང་བའི་བདག་པོ། ཡིད་ལ་དཀྱིལ་འཁོར་བསམས་ནས་སུ། །རིམས་ནད་ཅན་ལ་བཞག་ན་ནི། །འགྲོ་བ་རིམས་ནད་ལས་ཐར་བ། །དེ་མ་ཐག་ཏུ་གདོན་མི་ཟའོ། །ཞེས་པ་སྟེ་ཚ་བའི་རིམས་ཀྱིས་བཏབ་པ་ལ་ནད་པའི་ཀླད་པའི་སྟེང་དུ་ཆུའི་དཀྱིལ་འཁོར་ཇི་སྐད་དུ་བསྒྲགས་པ་སྟེ། བུམ་པ་ཁ་བུབ་ཏུ་སོམས་ལ་དེ་ལ་བདུད་རྩའི་ཆུ་དཀར་པོ་བྱུང་བས་ནད་པའི་སྤྱི་བོ་ནས་མཐར་གྱིས་ཕྱི་ནང་བཅས་པར་ཁྱབ་པར་རྟིང་པའི་བར་བསམས་ཏེ། དེའི་ཚེ་བྱ་བ་ཅིང་དེའི་གདོང་ལ་རིམས་ནད་ཐམས་ཅད་ཕྱིར་འབྱུང་བ་བསམས་ཏེ། དེ་ལྟར་ལན་གཉིས་ལན་གསུམ་དུ་བྱས་ན་རིམས་ནད་ལས་ཐར་བར་འགྱུར་ཏེ་དོགས་པ་མེད་དོ། །དེ་བཞིན་དུ་དབང་ཆེན་གྱི་དཀྱིལ་འཁོར་ཡང་བྱའོ། །གྲང་ཞིང་འདྲ་བའི་རི་མས་ཀྱིས་བཏབ་པ་ལ་མེའི་དཀྱིལ་འཁོར་ཇི་སྐད་དུ་གྲགས་པ་དེ་བསམས་ཏེ། དེའི་སྟེང་དུ་ནད་པ་བཞག་ལ། མེ་དེས་མས་ཡར་གྱེན་དུ་ལུས་ཕྱི་ནང་ཁྱབ་པར་བསམས་ན་གྲང་བའི་རིམས་ལས་ཐར་བར་འགྱུར་རོ་ཞེས་པའོ། །ཡིད་ལས་དཀྱིལ་འཁོར་གཞན་མ་ཡིན། དཀྱིལ་འཁོར་ལས་ཡིད་གཞན་མ་ཡིན་ཏེ་མི་གཞན་ཅིའི་ཕྱིར་ཞེ་ན། དཀྱིལ་འཁོར་གྱི་མཚན་ཉིད་གཅིག་པའི་ཕྱིར་རོ་ཞེས་པའོ། །དབང་ཆེན་ལ་སོགས་པའི་དཀྱིལ་འཁོར་དེ་དག་དངོས་པོ་གཞན་ཡོད་པ་ལ་ཡིད་ཀྱིས་དེ་ཇི་བཞིན་བསམས་པ་མ་ཡིན་གྱི། ཡིད་ཀྱི་དཀྱིལ་འཁོར་དེ་དག་ཇི་བཞིན་པར་གྱུར་པས་མཚན་ཉིད་གཅིག་པ་སྟེ། ཡིད་དང་དཀྱིལ་འཁོར་གཉིས་དབྱེར་མེད་པ་སྟེ་དེ་དག་གཉིས་ཀ་དོན་དམ་པར་ཡོད་པ་མ་ཡིན་པ་
ལས། ཀུན་རྫོབ་ཏུ་ཇི་སྲིད་དུ་ཇི་བཞིན་པ་དང་བཅས་པའི་སེམས་ཀྱིས་བརྟགས་པའི་ཕྱིར་ཏེ། དེ་བས་ན་དེ་ཉིད་སྒྱུ་མར་སྤྲུལ་པའི་དཔེས་བསྒྲུབ་པར་གསུངས་པ། འདི་ལྟ་སྟེ་གསང་བའི་བདག་པོ་ཞེས་པ་ལ་སོགས་བ་སྟེ། མདོར་ན་གང་ཡིད་ལ་ཟླ་བའི་དཀྱིལ་འཁོར་དང་སྙིང་པོ་བསྐྱེད་པ་དེ་ཡང་དོན་དམ་པར་རང་བཞིན་གྱིས་སྟོང་པ་སྟེ་ཡོད་པ་མ་ཡིན་མོད་ཀྱི། འོན་ཀྱང་ཀུན་རྫོབ་ཏུ་རྒྱུ་དང་རྐྱེན་ངེས་པའི་དབང་གིས་དོན་གྱི་བྱ་བ་བྱེད་པས་ན། ཡིད་ལ་ཟླ་བའི་དཀྱིལ་འཁོར་དང་བཅས་པའི་བསམས་པ་ནན་ཏན་དུ་བྱའོ་ཞེས་པའོ། །ད་ནི་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་ཡི་གེ་བརྒྱ་པ་ཨཾ་ལས་འཕགས་པ་འཇམ་དཔལ་དད་སྤྱན་རས་གཟིགས་ཀྱི་དབང་པོ་ལ་སོགས་པ་ལ་སྔགས་ཀྱི་སྐུ་དང་ཡི་གེ་འབྲུ་རྣམས་འབྱུང་བར་བསྟན་པ་སྟེ། དེ་ནས་ཡང་བཅོམ་ལྡན་འདས་ཀྱིས་ཕྱག་ན་རྡོ་རྗེ་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ་ཞེས་པ་ལ་སོགས་པ་སྟེ། དེ་ལ་གསང་བའི་བདག་པོ་སྔགས་ཀྱི་མགོན་པོའི་སྐུ་དབྱེར་མེད་པ་ཞེས་པ་ནི། ཀུན་དུ་སངས་རྒྱས་པའི་སྐུ་ལས་སྔགས་ཀྱི་ལྷ་གཞན་རྣམས་འབྱུང་བ་སྐུ་དེ་དང་དབྱེར་མེད་པ་ཉོན་ཅིག་ཅེས་པ་དང་འབྲེལ་ཏོ། །ཡིད་ལས་ཀུན་དུ་འབྱུང་བའི་ཞེས་པའི་སྐུ་དེ་རྣམས་ཀྱང༌། བཅོམ་ལྡན་འདས་ཀྱི་གསུང་མི་ཟད་པ་སྡུད་པའི་སྒོར་གྱུར་པ་མཾ་ཞེས་ཟླ་བའི་དཀྱིལ་འཁོར་ལ་གནས་པ་དེ་དག་སྙིང་གར་བསམས་པ་དེ་ནི་ཡིད་ལས་འབྱུང་བ་ཞེས་བྱ་སྟེ། དེ་ལས་ཀུན་དུ་སངས་རྒྱས་པའི་སྐུའམ་སྔགས་ཀྱི་ལྷ་གཞན་རྣམས་ཀྱི་སྐུར་འགྱུར་བས་ན་ཡིད་ལས་བྱུང་བ་ལས་ཀུན་དུ་འབྱུང་བ་ཞེས་པའོ། །ཡིད་ཀྱང་ཤིན་ཏུ་སྦྱངས་ན་ཞེས་པ་ནི། སྐུ་དག་ཡིད་ལས་འབྱུང་བ་ཡང་བསམས་པ་ཙམ་གྱིས་ཆོག་པ་མ་ཡིན་གྱི། ཞི་གནས་དང་ལྷག་མཐོང་ཟུང་དུ་འབྲེལ་པར་སྦྱངས་པ་ལས་འབྱུང་པའི་སྐུ་ཞེས་པའོ། །དེར་གནས་པའི་མགོན་བོ་ཀུན་རྣམ་པར་འབར་བ་ཞེས་པ་ནི། ཡིད་ཤིན་ཏུ་སྦྱངས་བ་དེ་ལ་གནས་པའི་སྙིང་པོ་དེ་ལས་སྔགས་ཀྱི་ལྷ་རྣམས་ཀྱི་སྙིང་པོ་འབྱུང་བ་དེ་ཉོན་ཅིག་ཅེས་པའོ། །སྐུ་འོད་རྣམས་མངོན་དུ་འབྱུང་བ་ཞེས་པ་ནི། སྙིང་པོ་དེ་ལས་ཀ་ལ་སོགས་པའི་ཡི་གེ་རྣམས་འབྱུང་ཞེས་པའོ། །ཡན་ལག་གི་ནི་ཡན་ལག་དང༌། །གནས་དང་རྟག་ཏུ་ཞེས་པ་ནི་ཡན་ལག་ཅེས་པ་ནི་ཨ་ཉིད་ལ་བྱ། ཡན་ལག་དེའི་ཡན་ལག་ནི་ཀླད་ཀོར་དང་ཨི་དང་
ཨུ་ལ་སོགས་པ་སྟེ། དེ་རྣམས་ལས་སྔགས་རྣམས་འབྱུང་བ་ནི། ཡན་ལག་འདི་ནི་ཡན་ལག་གནས། །རྟག་ཏུ་ཞེས་པ་སྟེ་མདོར་ན་འཕགས་པ་འཇམ་པ་དཔལ་ལམ་སྤྱན་རས་གཟིགས་ཀྱི་དབང་པོའི་སྐུར་བསྒྱུར་ན་གཞན་ནི་སྔ་མ་རིམ་བཞིན་ཏེ། ཡི་གེ་ཨ་ནི་ཀླད་ཀོར་དེ་ལས། ཡི་གེ་མཾ་ལ་སོགས་པ་གང་ཡང་རུང་བ་འབྱུང་བར་བསམས་ཏེ་དེ་འོད་འཕྲོས་འདུས་པ་ལས། འཇམ་དཔལ་ལ་སོགས་པའི་སྐུར་བསྒྱུར་རོ། །ཡང་ན་ཨིའི་གནས་ཉིད་དུ་བསམས་ཏེ་སྔ་མ་བཞིན་དུ་སྐུར་བསྒྱུར་བར་བྱའོ། །སྨྲས་པ་རྣམས་ཀྱིས་མི་ཤེས་པ་ཚུལ་འདི་མི་ཤེས་པ་སུ་སྟེ་ཞེས་པ་ནས་ཀུན་དུ་སངས་རྒྱས་པའི་སྐུ་གཅིག་པོ་དེ་ལས་སྔགས་རྣམས་ཀྱིས་སྐུ་རྣམ་པ་མང་པོ་འབྱུང་བ་དེ་དག་ཇི་ལྟར་འགྱུར་སྙམ་དུ་ཡིད་མི་ཆེས་ཤིང༌། མི་ཤེས་པ་ནི་འོག་ནས་འབྱུང་བའི་ཚུལ་འདི་མི་ཤེས་པའི་ཕྱིར་རོ་ཞེས་པ་སྟེ། ལུས་ཀྱི་བྱེ་བྲག་ཇི་སྙེད་པ། །ཚིག་ལས་རྣམ་པ་མང་གནས་ཏེ། །དེ་བཞིན་སྔགས་ཀྱི་མགོན་པོ་ཡི། །བྱེ་བྲག་གསུངས་པ་གྲངས་མེད་དོ། །ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་ལུས་ཀྱི་བྱེ་བྲག་མང་པོའི་ཚིག་གི་རང་བཞིན་ཏེ། ཡི་གེའི་འབྲུ་ལས་རྣམ་པ་དུ་མར་འབྱུང་བཞིན་དུ་སྔགས་ཀྱི་མགོན་པོ་ཀུན་དུ་སངས་རྒྱས་པ་ལས་སྔགས་ཀྱི་ལྷའི་བྱེ་བྲག་གྲངས་མེད་པ་འབྱུང་ངོ་ཞེས་པའོ། །ཀུན་དུ་སངས་རྒྱས་པའི་རང་བཞིན་ཏེ། དེ་རྣམ་པར་རྟོག་པ་ལས་ཤིན་ཏུ་འདས་པ་ལས། སྐུ་རྣམ་པ་མང་པོ་འདི་རྣམས་ཇི་ལྟར་སྐྱེད་པར་བྱེད་ཅེ་ན་གསུངས་པ། ཇི་ལྟར་ཡིད་བཞིན་ནོར་བུ་དཔལ་ལྡན་པ། །འདོད་པའི་དོན་ནི་རབ་ཏུ་སྒྲུབ་པ་བཞིན། །འཇིག་རྟེན་སྒྲོན་མའི་སྐུ་ཡང་དོན་ཀུན་སྒྲུབ་པའོ། །ཞེས་པ་སྟེ་ཇི་ལྟར་ཡིད་བཞིན་ནོར་བུ་དེ་རྣམ་པར་མི་རྟོག་ཀྱང་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱེད་དེ། དོན་ཐམས་ཅད་སྒྲུབ་པ་དེ་བཞིན་དུ་སྔགས་ཀྱི་མགོན་པོ་འཇིག་རྟེན་གྱི་སྒྲོན་མ་དེ་ཡང་རྣམ་པར་མི་རྟོག་པ་བཞིན་དུ་སྔོན་གྱི་སྨོན་ལམ་གྱི་ཤུགས་ཀྱིས་བསྐུལ་བ་ལ་སོགས་པ་རྣམ་པ་སྣ་ཚོགས་འབྱུང་ཞིང་དོན་རྣམས་རབ་ཏུ་བྱེད་དོ་ཞེས་པའོ། །དེ་ཉིད་ཀྱང་ནམ་མཁའི་དཔེས་གསུངས་པ། །གསང་བའི་བདག་པོ་ཆོས་ཀྱི་དབྱིངས་རྣམ་པར་མི་རྟོག་པར་དོན་ཐམས་ཅད་སྒྲུབ་པར་བྱེད་པ་ཞེས་པ་ལ་སོགས་པའོ། །དེ་དག་ནི་ཨཾ་ཞེས་
པ་ཡི་གེ་བརྒྱ་པ་དེ་ལས་བཅོམ་ལྡན་འདས་ཀུན་དུ་སངས་རྒྱས་པ་དང༌། སྔགས་ཀྱི་ལྷ་རྣམས་ཀྱི་སྐུར་བསྒྱུར་ནས་ཀྱང་ཡིད་ལ་ཟླ་བའི་དཀྱིལ་འཁོར་ལ་གནས་པར་བསམ་པའི་སྦྱོར་བ་བཤད་དོ། །འདིར་ནི་དེ་ལྟར་ཀུན་དུ་སངས་རྒྱས་པའི་སྐུ་ལ་སོགས་པའི་བདག་གི་ལུས་ཡོངས་སུ་བསྒྱུར་ནས་ཀུན་དུ་སངས་རྒྱས་པ་དང་རྗེས་སུ་མཐུན་པའི་སེམས་ཀྱི་ཡོན་ཏན་བསྐྱེད་པའི་ཕྱིར། སེམས་ཡོངས་སུ་སྦྱང་བར་བྱ་བར་འཆད་དེ། དེ་ཡང་དེ་ནས་བཅོམ་ལྡན་འདས་ཀྱིས་སེམས་ཅན་གྱི་ཁམས་མ་ལུས་པ་རྣམ་པར་སྦྱང་བར་བྱ་བའི་ཚིག་གིས་ཞེས་པ་ལ་སོགས་པ་སྟེ། སེམས་ཅན་གྱི་ཁམས་མ་ལུས་པར་སྦྱོང་བའི་ཚིག་ཅེས་པ་ནི་ཏིང་ངེ་འཛིན་མངོན་པར་སྒྲུབ་ཅེས་པ་ལ་སོགས་པའི་ཚིག་ནི་འོག་ནས་འབྱུང་བ་ལ་བྱ་སྟེ། ཚིག་དེ་དག་གིས་སེམས་ཅན་རྣམས་ཉོན་མོངས་པའི་སྒྲིབ་པ་ལ་སོགས་པ་ནི་སེལ། ཡེ་ཤེས་ཁྱད་པར་ཅན་སྐྱེད་པར་བྱེད་པའི་སྒོ་ནས་རྣམ་པར་སྦྱོང་བའི་ཕྱིར་རོ། །སྒྲུབ་པའི་སེམས་ཡོངས་སུ་སྤྱང་བར་བྱ་བ་ཡང་འཇུག་པའི་སེམས་དང་གནས་པའི་སེམས་དང་ལྡང་བའི་སེམས་སུ་ལྡན་པ་སྟེ། དེ་ལ་འདུག་པའི་སེམས་ནི་ཏིང་ངེ་འཛིན་མངོན་པར་སྒྲུབ་པའི་ཚིག་ཅེས་པ་སྟེ། ནམ་ཞིག་ཐོག་མ་ནས་ཀྱང་ཅུང་ཟད་ནི་སྐྱེ་ཞིང་འཆི་འཕོ་བ་ཡང་མེད་ན། དེ་ནི་སྟོང་པའི་ཡེ་ཤེས་ཇི་ལྟ་བུར་སྦྱོར་པ་ནི་སྐྱེ་བར་འགྱུར་ཞེས་པ་དང་འབྲེལ་ཏོ། །བསམ་གྱིས་མི་ཁྱབ་པའི་ཚིག་ཅེས་པ་ནི། གནས་པའི་སེམས་འཆད་པ་སྟེ། ནམ་ཞིག་ངོ་བོ་ཉིད་ཀྱིས་སུ། །ཆོས་རྣམས་འདི་ནི་དམིགས་མེད་ན། །དེ་ནི་ནམ་མཁའ་དང་འདྲ་བའི། །སེམས་སྐྱེ་བ་བྱང་ཆུབ་འབྱུང་བའི། །ཞེས་པ་དང་འབྲེལ་ཏོ། །སླར་ལྡོག་པའི་སྒོའི་ཚིག་ཅེས་པ་ནི་ལྡང་བའི་སེམས་འཆད་པ་སྟེ། དེ་ནི་སྙིང་རྗེ་འབྱུང་བ་ནི། །འཇིག་རྟེན་ཀུན་གྱི་རྗེས་བཞིན་འཇུག །ཅེས་པ་སྟེ་དེ་ལ་ཏིང་ངེ་འཛིན་མངོན་པར་སྒྲུབ་པའི་ཚིག་ཅེས་པ་ནི་ཚིག་དེས་ཆོས་ཐམས་ཅད་ཐོག་མ་ནས་མ་སྐྱེས་ཤིང་མི་འགོག་པར་ཆུད་བའི་ཏིང་ངེ་འཛིན་འབྱུང་བའི་ཕྱིར་རོ། །བསམ་གྱིས་མི་ཁྱབ་པའི་ཚིག་ཅེས་པ་ནི་ཚིག་དེ་ལས་ཆོས་ཐམས་ཅད་དམིགས་སུ་མེད་པ་ནམ་མཁའ་དང་འདྲ་བའི་སེམས་སྟོན་པའི་ཕྱིར་རོ། །སླར་ལྡོག་པའི་སྒོའི་ཚིག་ཅེས་པ་ནི་དེས་ཏིང་ངེ་འཛིན་ལས་ལྡོག་སྟེ་ལངས་ནས་སྙིང་རྗེའི་དབང་
གིས་སེམས་ཅན་གྱི་དོན་བྱ་བ་ལ་སོགས་པ་སྟོན་པའི་ཕྱིར་རོ། །ནམ་ཞིག་ཐོག་མ་ནས་ཅུང་ཟད་ནི་སྐྱེ་ཞིང་འཆི་འཕོ་བ་ཡང་མེད་ན་དེ་ན་སྟོང་པའི་ཡེ་ཤེས་ཇི་ལྟ་བུར་སྦྱོར་བ་ནི་སྐྱེ་བར་འགྱུར་ཞེས་པ་ནི་ནམ་ཕུང་པོ་དང་ཁམས་ལ་སོགས་པའི་ཆོས་ཐོག་མ་ནས་མ་སྐྱེས་པ་མ་བྱུང་བས་འཆི་འཕོ་བ་ཡང་མེད་དེ། དེ་ལྟར་ཕྱིའི་གཟུང་བའི་ཆོས་རྣམས་མེད་ན་དེ་ལ་འཛིན་པར་བྱེད་པའི་རྣམ་པར་ཤེས་པ་སྐྱེ་བའི་གནས་མེད་པར་མི་སྐྱེ་སྟེ། དེ་ལྟར་གཟུང་བ་དང་འཛིན་པའི་ཆ་གཉིས་ཀ་མེད་དེ། སྟོང་པ་ན་དེ་ན་སྦྱོར་བའི་ཡེ་ཤེས་སྟོང་པར་སྐྱེ་བར་མི་འགྱུར་རོ་ཞེས་པའོ། །ནམ་ཞིག་ངོ་བོ་ཉིད་ཀྱིས་ཆོས་རྣམས་འདི་ནི་དམིགས་མེད་ན་དེ་ནམ་མཁའ་དང་འདྲ་བའི་སེམས་སྐྱེ་བྱང་ཆུབ་འབྱུང་ངོ་ཞེས་པ་ནི་གོང་དུ་བཤད་པའི་རིམ་གྱིས་ཕྱིའི་ཆོས་རྣམས་དང༌། ནང་གི་རྣམ་པར་ཤེས་པ་གཉིས་ཀྱང་མེད་པར་བཤིག་ནས། དེ་ཕུང་པོ་ལ་སོགས་པའི་ཆོས་འདི་དག་ཐམས་ཅད་དམིགས་སུ་མེད་པར་ཆུད་པ་ལ་གནས་པའི་སེམས་ནམ་མཁའ་དང་འདྲ་བར་རྟོག་པ་ཐམས་ཅད་དང་བྲལ་བར་འགྱུར་ཞེས་པའོ། །རྣམ་པར་མི་རྟོག་པ་སེམས་དེ་ལས་དེ་བཞིན་ཉིད་ཀྱི་བྱང་ཆུབ་ཀྱི་མཚན་ཉིད་དུ་འབྱུང་བས་ན་དེ་བྱང་ཆུབ་འབྱུང་ཞེས་པའོ། །དེ་ནས་སྙིང་རྗེ་འབྱུང་བ་ནི་འཇིག་རྟེན་ཀུན་གྱི་རྗེས་སུ་ཇི་བཞིན་དུ་འཇུག་ཅེས་པའི་ཏིང་ངེ་འཛིན་དེ་ལས་ལངས་ནས་སྙིང་རྗེའི་དབང་གིས་སྦྱིན་པ་ལ་སོགས་པ་དང༌། སྤྱོད་པ་དང་ལྷའི་སྐུར་བསྒྱུར་བ་ལ་སོགས་པའི་སེམས་ཅན་གྱི་དོན་དུ་བྱ་བ་དང་ལྡན་པའི་སེམས་བསྐྱེད་དོ་ཞེས་པའོ། །དེ་ནི་མདོར་ན་དང་པོར་འཇུག་པའི་སེམས་རྟོག་པ་བཅས་བས་ཆོས་རྣམས་སྟོང་པའི་རང་བཞིན་དུ་བཤིག་སྟེ། དེ་ནས་སྟོང་པ་ཉིད་ཆུད་པ་རྣམ་པར་མི་རྟོག་པའི་སེམས་ལ་ཇི་སྲིད་འདོད་པས་གནས་ནས་དེའི་འོག་ཏུ་སྙིང་རྗེའི་དབང་གིས་ལྷའི་གཟུགས་མངོན་པར་སྟོན་ཏེ། སྦྱིན་པ་ལ་སོགས་པ་སེམས་ཅན་གྱི་དོན་རྣམས་བྱའོ་ཞེས་པར་དགོངས་པའོ། །འདུ་ཤེས་ཙམ་དུ་རྟོགས་པའི་གནས། །ཞེས་པ་ནི་སྤྱོང་པ་དེ་དག་ཀྱང་དོན་དམ་པར་ཡོང་པ་མ་ཡིན་ཏེ། འདུ་ཤེས་ཙམ་དུ་རྟོགས་པའི་གནས་སོ་ཞེས་པའོ། །དེ་ལྟར་ཐམས་ཅད་འདུ་ཤེས་ཙམ་ན་སྔར་ཀུན་དུ་སངས་རྒྱས་སྐུར་བསྒྱུར་བ་ནན་ཏན་ཆེར་བྱས་པ་ཡང་ཇི་ལྟར་དགོས་ཤེ་ན། འདུ་ཤེས་འདི་རུ་ཀུན་ནས་
སངས་རྒྱས་ཞེས་བྱ་བ་སྟེ་ཀུན་དུ་སངས་རྒྱས་པ་ཡང་འདིར་དོན་དམ་པར་ཡོད་པ་མ་ཡིན་གྱི་འདུ་ཤེས་ཙམ་དུ་ཟད་དོ་ཞེས་པའོ། །དེ་ནས་འདུ་ཤེས་བྱ་བ་སྟོང་དང་མི་སྟོང་ངོ་བོ་ཞེས་པ་ནི། དེའི་ཚེ་ནམ་མཁའ་ལ་སོགས་པ་སྟོང་པའོ་ཞེས་བྱ་བ་དང༌། བུམ་པ་ལ་སོགས་པ་ཆོས་རྣམས་ཀུན་རྫོབ་ཏུ་སྟོད་པ་མ་ཡིན་ནོ་ཞེས་པ་ཡང་འདུ་ཤེས་ཙམ་དུ་བྱའོ་ཞེས་པའོ། །དེ་ལ་གྲངས་སུ་འདུག་པ་གཅིག་གཉིས་གསུམ་ལ་སོགས་པ་བྱེད་པ་ཞེས་པ་ནི་ཡི་གེ་ཨ་ཞེས་པ་གཅིག་པོ་དེ་ལས་ཀྱང་འདུ་ཤེས་ཙམ་དུ་བྱ་བའི་སྒོ་ནས་ཨི་ལ་སོགས་པའི་ཡི་གེ་མང་པོ་རྣམས་ཀྱི་བྱེ་བྲག་ཏུ་འགྱུར་རོ་ཞེས་པའོ། །དེ་ལྟར་དཔའ་བོ་སྙིང་པོ་དེ་ལས་རིམ་བཞིན་དུ་རྣམ་པར་འཕེལ་ཨ་ཨི་ལ་སོགས་པ་འདུས་རང་བྱུང་ཡིད་བྱིན་གྱིས་བརླབས་པའོ་ཞེས་པ་ནི་དེ་ལྟར་སྟོང་བ་ཉིད་ཀྱི་ངོ་བོ་ལས་ཨ་དང་ཨི་ལ་སོགས་པའི་ཡི་གེ་རྣམས་ཨ་ཞེས་པ་ཡིད་ལ་གནས་པའི་སྙིང་པོ་ལས་བྱེ་བྲག་རྣམས་མང་པོར་འཕེལ་བར་འགྱུར་རོ་ཞེས་པའོ།། རང་བྱུང་ཞེས་པ་ནི་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་ལ་བྱ་སྟེ། སུས་ཀྱང་མ་བསྐྱེད་པའི་ཕྱིར་རོ། །ད་ནི་དེ་བཞིན་གཤེགས་པའི་ཀུན་དུ་བྱང་ཆུབ་པའི་རང་བཞིན་བསྟན་ཏེ། ཕྱོགས་བཅུ་ནམ་མཁའི་ཇི་ལྟ་བུར། །ཀུན་དུ་རྟོག་པ་མི་དམིགས་པ། །དེ་བཞིན་ཆོས་ཀུན་ལ་ཡང་ནི། །སྔགས་ཀྱི་མགོན་པོ་གནས་པ་མིན། །ཞེས་པ་ནས། ཇི་ལྟར་ནམ་མཁའི་ལྷོ་བྱང་ཤར་ནུབ་ལ་སོགས་པའི་ཕྱོགས་ལ་མི་གནས་པ་བཞིན་དུ་དོན་དམ་པའི་མཚན་ཉིད་ཀྱི་སྔགས་ཀྱི་མགོན་པོ་དེ་ཡང་གཟུགས་ལ་སོགས་པའི་ཆོས་རྣམས་ལ་དམིགས་པ་དང་མི་དམིགས་པར་བྱ་བའི་སྒོ་ནས་མི་གནས་སོ་ཞེས་པའོ། །དེ་ལྟར་ནམ་མཁའི་ངོ་བོ་རྣམས་གནས་པ་རྟག་པར་སྣང་བ་ཡང་དེ་ནི་གནས་སུ་འབྱུང་བའང་མིན་སྔགས་ཀྱི་མགོན་པོ་དེ་ཡང་དེ་བཞིན་ནོ་ཞེས་པ་ནི་ཇི་ལྟར་ནམ་མཁའ་ལ་གཟུགས་ཀྱི་དངོས་པོ་རྣམས་གནས་པར་སྣང་ཡང་དངོས་པོ་དེ་རྣམས་ལ་ནམ་མཁའ་གནས་པར་མི་འགྱུར་བ་བཞིན་དུ་དེ་བཞིན་གཤེགས་པ་ཡང་མངོན་པར་བྱང་ཆུབ་པའི་ཚེ། སྐུ་མི་ཟད་པའི་རྡོ་རྗེའི་རྒྱན་ལ་སོགས་པ་རྣམ་པ་སྣ་ཚོགས་དེའི་དབང་གིས་འབྱུང་བ་ཡང་བྱང་ཆུབ་ཀྱི་རང་བཞིན་ཏེ། སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་དེ་རྣམས་ལ་དམིགས་པའི་སྒོ་ནས་མི་གནས་པ་ཞེས་པའོ། །དུས་གསུམ་ལ་
སོགས་པ་དང་བྲལ་བར་ནམ་མཁའ་ཇི་ལྟར་བསྒྲགས་པ་བཞིན་ཏེ། དེ་ལྟར་དུས་གསུམ་བྲལ་བ་ནི། །སྔགས་ཀྱི་མགོན་པོ་རྣམ་པར་སྣང༌། །ཞེས་པ་ནི་ཇི་ལྟར་ནམ་མཁའ་ནི་རང་བཞིན་གཅིག་སྟེ། མི་འགྱུར་བས་ན་དུས་གསུམ་ལས་འདས་པ་བཞིན་དུ་དེ་བཞིན་ཉིད་ཀྱི་རང་བཞིན་སྔགས་ཀྱི་མགོན་པོ་དེ་ཡང་མི་འགྱུར་བ་ཡོངས་སུ་རྫོགས་པ་བས་དུས་གསུམ་ལ་མི་གནས་པར་སྟོབས་དང་མི་འཇིགས་པ་ལ་སོགས་པའི་ཡོན་ཏན་རྣམས་སྣང་ངོ་ཞེས་པའོ། །མིང་གིས་རྟོགས་པ་ཙམ་ལ་གནས། །བྱེད་པ་ལ་སོགས་རྣམ་པར་བྲལ། །ནམ་མཁའ་དེ་ནི་བརྔོད་པ་རུ། །མཁས་པ་ཡིས་ནི་བཤད་པ་ཡིན། །མིང་ནི་རྟོགས་པར་ཅི་ཡང་ནི། །ཡོད་པ་མ་ཡིན་ནམ་མཁའ་བཞིན། །དེ་ལྟར་གསང་སྔགས་ཀྱིས་ཕྱུག་པ། །དེ་ཡང་བརྗོད་པ་རུ་ནི་སྣང༌། །ཞེས་པ་ནི་དེ་བཞིན་གཤེགས་པའི་གསུང་མི་ཟད་པའི་རྡོ་རྗེའི་རྒྱན་ཡི་གེ་འབྲུར་བྱིན་གྱིས་བརླབས་པའི་རང་བཞིན་དེ་དོན་དམ་པར་དངོས་པོ་ཡོད་པ་མ་ཡིན་པར་བསྟན་པ་སྟེ། ཇི་ལྟར་ནམ་མཁའ་མིང་དུ་གདགས་པ་ཙམ་ལ་གནས་ཀྱི། ནམ་མཁའ་དེ་ཉིད་མེད་པའི་རང་བཞིན་ནམ་གཞན་གྱིས་བྱས་པའི་དངོས་པོ་ཡོད་པ་མ་ཡིན་ཏེ། ནམ་མཁའ་ཞེས་བརྗོད་པ་ཙམ་དུ་ཟད་ཀྱི་མིང་ལས་ལྷག་པར་ནམ་མཁའ་ཞེས་པའི་དངོས་པོ་ཡོད་པ་མ་ཡིན་པ་དེ་བཞིན་དུ་སྔགས་ཀྱི་དབང་པོའི་སྙིང་པོ་དེ་ཡང་ཀུན་རྫོབ་པ་ཙམ་སྣང་བར་ཟད་ཀྱི། དངོས་པོར་ཡོད་པ་མ་ཡིན་ནོ་ཞེས་པའོ། །མེ་དང་རླུང་དང་ཆུ་མ་ཡིན། །ཞེས་པ་ལ་སོགས་པ་ནི་དེ་བཞིན་གཤེགས་པའི་བྱང་ཆུབ་ཀྱི་རང་བཞིན་ཏེ། མེ་དང་ཆུ་ལ་སོགས་པ་ཆེན་པོ་བཞི་དང༌། ཉི་མ་དང་ཟླ་བ་ལ་སོགས་པ་ཆེན་པོ་བཞི་ལ་གནས་པ་དང༌། ཉིན་པར་མཚན་མོ་ལ་སོགས་པའི་དུས་ལ་སོགས་པ་མིང་གིས་སྨོས་པ་རྣམས་ཀྱི་རང་བཞིན་མ་ཡིན་ཏེ། གང་ཐམས་ཅད་མཁྱེན་གྱི་གནས་ཐོབ་པར་འདོད་པ་དེ་ནི། ཇི་སྐད་དུ་སྨོས་པའི་དངོས་བོ་འདི་རྣམས་དང་བྲལ་བའི་བྱང་ཆུབ་ཀྱི་རང་བཞིན་དེ་ལ་ནན་ཏན་བྱའོ་ཞེས་པའོ། །ད་ནི་དམ་ཚིག་གསུམ་བཤད་དེ། དེ་ཡང་རྣམ་པ་གཉིས་ཏེ། རྒྱུའི་དམ་ཚིག་གསུམ་དང༌། འབྲས་བུའི་དམ་ཚིག་གསུམ་མོ། །དེ་ལ་རྒྱུའི་དམ་ཚིག་གསུམ་ནི་འཇུག་པའི་སེམས་དང༌། གནས་པའི་སེམས་དང་ལྡང་བའི་སེམས་སོ། །འབྲས་བུའི་དམ་ཚིག་གསུམ་ནི་
བཅོམ་ལྡན་འདས་ཀྱི་སྐུ་མི་ཟད་པ་ལ་སོགས་པ་རྣམ་པ་གསུམ་མོ། །དེ་ལ་དམ་ཚིག་ཅེས་པའི་ཚིག་གི་དོན་ནི་ཀུན་དུ་འགྲོ་བ་ཞེས་ཀྱང་བྱ་སྟེ། འཇུག་པ་དང་གནས་པ་དང་ལྡང་བའི་སེམས་སོ། །འདིས་འགྲོའོ་ཞེས་པའི་དོན་ཏོ། །ཀུན་དུ་ཐོབ་པའམ་ཆུད་པར་བྱ་བ་ཞེས་ཀྱང་བྱ་སྟེ། སྐུ་མི་ཟད་པའི་རྡོ་རྗེའི་རྒྱན་ལ་སོགས་པ་རྣམ་པ་གསུམ་པོ་དེ་དག་ཐོབ་པའམ་ཆུད་པར་བྱ་བས་དེ་དག་ཉིད་ལ་བྱ་སྟེ། སྐབས་འདིར་ནི་རྒྱུའི་དམ་ཚིག་བཤད་དེ། དེ་ཡང་དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་འདི་སྐད་ཅེས་གསོལ་ཏོ་ཞེས་པ་ལ་སོགས་པའོ། །དེ་ལ་ཆོས་གཞན་པ་རྣམ་པ་གསུམ་སྟེ་ཞེས་པ་ནི་འཇུག་པ་དང༌། གནས་པ་དང་ལྡང་བའི་སེམས་གསུམ་ཐ་དད་པས་ཆོས་གཞན་པ་གསུམ་ཞེས་བྱའོ། །གང་ཆོས་གཞན་པ་ལས་སྒྲིབ་པ་མེད་པའི་ཚུལ་གྱིས་དམ་ཚིག་གསུམ་འབྱུང་བའོ་ཞེས་པ་ནི་འཇུག་པ་ལ་སོགས་པའི་སེམས་གསུམ་པོ་དེ་སྤྱད་པ་ལས་ཐོགས་པ་མེད་པར་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་དམ་ཚིག་གསུམ་གྱི་མཚན་ཉིད་དེ་འབྱུང་ངོ་ཞེས་པ་སྟེ། དེ་ཉོན་ཅིག་བཤད་དོ་ཞེས་པའི་ཚིག་གོང་མ་དང་འབྲེལ་ཏོ། །ཆོས་གཞན་པ་ཞེས་བྱ་བ་དེ་ཡང་གང་ཞེ་ན་ཞེས་པ་ནི་འཇུག་པ་ལ་སོགས་པའི་སེམས་དེ་གསུམ་པོ་སོ་སོར་བྱེ་བྲག་ཕྱེ་སྟེ་བཤད་པའི་ཕྱིར་གསུངས་པའོ། །དེ་ལ་འཇུག་པའི་སེམས་ནི་དང་པོ་སེམས་མ་བསྒོམས་པའི་རང་བཞིན་ཞེས་པ་ནས་བྱང་ཆུབ་ཀྱི་མཚན་ཉིད་དོ་ཞེས་པའི་བར་དུ་མ་བསྒོམས་པའི་རང་བཞིན་ཞེས་པ་ནི་ཕུང་པོ་དང་ཁམས་ལ་སོགས་པའི་ཆོས་རྣམས་ཤེས་རབ་ཀྱིས་མ་བཤིག་པའོ་ཞེས་པའོ། །དེའི་རྗེས་བཞིན་འབྱུང་བའི་ཤེས་རབ་ཅེས་པ་ནི་མ་བསྒོམས་ཀྱི་དེ་མ་ཐག་ཏུ་ཆོས་ལ་བདག་མེད་པའི་ཤེས་རབ་བོ། །དེས་ཀྱང་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་བསྐྱེད་པ་ཞེས་པ་ནི་ཤེས་རབ་དེ་ཆོས་ཐམས་ཅད་ཕྱིན་ཅི་མ་ལོག་པར་ཤེས་པ་བསྐྱེད་པ་ཞེས་པ་སྟེ། དེ་བས་ན་གསུངས་པ། རྟོག་པའི་དྲ་བ་ཐམས་ཅད་མེད་པའི་སེམས་བྱང་ཆུབ་ཀྱི་མཚན་ཉིད་ཅེས་པ་སྟེ། ཕུང་པོ་དང་ཁམས་ལ་སོགས་པའི་ཆོས་རྣམས་ཀྱི་མཚན་ཉིད་ལ་ཡོད་ཅིང་ཆགས་པར་རྟོག་པ་ནི་གྲོལ་བའི་བགེགས་སུ་འགྱུར་བ་སྟེ་རྟོག་པ་དེ་ཉིད་དྲ་བ་ཞེས་བྱ་བའོ། །གང་རྟོག་པའི་དྲ་བ་མེད་པའི་སེམས་ནི་སྟོང་
པ་ཉིད་དུ་ཆུད་པའི་སེམས་ཏེ། བྱང་ཆུབ་ཀྱི་མཚན་ཉིད་དེ། དེ་ནི་དང་པོའི་སེམས་ཞེས་པའི་ཚིག་གོང་མ་དང་འབྲེལ་ཏེ་འཇུག་པའི་སེམས་སོ། །གཉིས་པར་ནི་རྣམ་པར་མི་རྟོག་པའི་ཀུན་དུ་སངས་རྒྱས་པའི་གནས་སོ་ཞེས་པ་ནི་གནས་པའི་སེམས་ཏེ། རྟོག་པའི་དྲ་བ་ཐམས་ཅད་མེད་པ་བྱང་ཆུབ་ཀྱི་མཚན་ཉིད་ཀྱི་ཤེས་རབ་དེ་ཉིད་ལུས་ཐམས་ཅད་སྟོང་པའི་རང་བཞིན་དུ་ཆུད་ནས་རྣམ་པར་མི་རྟོག་པ་ཉིད་ལ་གནས་ཏེ། དེ་ཉིད་ཀུན་དུ་སངས་རྒྱས་པའི་གནས་ཞེས་བྱའོ། །ཡང་དག་པ་དེ་བཞིན་དུ་མཐོང་ནས་ཀྱང་ཞེས་པ་ནས་དེའི་དམ་ཚིག་གསུམ་པོ་ཞེས་པའི་བར་དུ་ལྡང་བའི་སེམས་བཤད་པ་སྟེ། ཡང་དག་པ་ཇི་བཞིན་དུ་མཐོང་ནས་ཀྱང་ཞེས་པ་ནི་འཇུག་པ་དང་གནས་པའི་སེམས་ཀྱིས་དེ་བཞིན་ཉིད་ལ་ཕྱིན་ཅི་མ་ལོག་པར་ཆུད་ནས་ཀྱང་ཞེས་བ་སྟེ། དེ་ལྟར་དེ་བཞིན་པ་ཉིད་དུ་ཆུད་ནས་ཀྱང་རྣམ་པར་མི་རྟོག་པ་དེ་བཞིན་པ་ཉིད་ལ་མི་གནས་པའི་སེམས་ཅན་གྱི་དོན་དུ་སྤྱད་དེ། དེ་བས་ན་གསུངས་པ་སེམས་ཅན་གྱི་ཁམས་མ་ལུས་པ་ལ་བལྟས་ནས་ཞེས་པ་ལ་སོགས་པའོ། །སེམས་ཅན་གྱི་ཁམས་ལ་བལྟ་བ་དེ་ཡང་དམིགས་པ་དང་བཅས་ཤིང་ཁེ་དང་བཀུར་སྟིའི་ཕྱིར་བལྟ་བ་མ་ཡིན་ཏེ། དེ་བས་ན་གསུངས་པ་གསང་པའི་བདག་པོ་སྙིང་རྗེའི་དབང་དུ་གྱུར་ཅིང་མི་དམིགས་པ་ཉིད་དུ་བྱང་ཆུབ་ཀྱི་སེམས་སྐྱེའོ་ཞེས་པ་སྟེ། བྱང་ཆུབ་ཀྱི་སེམས་དེ་གང་ཞེ་ན། གསུངས་པ་འདི་ལྟ་སྟེ་སྤྲོས་པ་ཐམས་ཅད་དང་བྲལ་བ་མཚན་ཉིད་མེད་པའི་བྱང་ཆུབ་ཏུ་སེམས་ཅན་ཐམས་ཅད་རབ་ཏུ་ད་གོད་པར་བྱའོ་ཞེས་པ་སྟེ། མདོར་ན་དེ་བཞིན་ཉིད་ཀྱི་རྣམ་པར་མི་རྟོག་པ་ལ་གནས་ནས་ཀྱང་སྔོན་གྱི་སྨོན་ལམ་གྱི་ཤུགས་ཀྱིས་སྙིང་རྗེའི་དབད་དུ་གྱུར་ཅིང་དམིགས་པ་ཉིད་དུ་སེམས་ཅན་ཐམས་ཅད་ཇི་ལྟར་བདག་གིས་ཆུད་པའི་བྱང་ཆུབ་ཏུ་རྟོག་པ་ལས་བྱུང་བའི་སྤྲོས་པ་ཐམས་ཅད་དང་བྲལ་བ་མཚན་ཉིད་མེད་པ་དེ་ལ་དགོད་པར་བྱའོ་ཞེས་པའི་བྱང་ཆུབ་ཀྱི་སེམས་སྐྱེའོ་ཞེས་པའོ། །འདི་ནི་དམ་ཚིག་གསུམ་པོ་ཞེས་པ་ནི་ཇི་སྐད་དུ་སྨྲས་པའི་འཇུག་པ་དང༌། གནས་པ་དང་ལྡང་བའི་སེམས་ཏེ་གསུམ་ནི་དམ་ཚིག་གསུམ་ཞེས་པའོ། །ཇི་ལྟར་ན་གསང་བའི་བདག་པོ་དམ་ཚིག་གསུམ་ཞེ་ན་ཞེས་པ་ལ་སོགས་པ་ནི་འཇུག་པ་ལ་སོགས་པའི་སེམས་དེ་
དག་ཉིད་ཀྱི་གཞུང་བཤད་པ་སྟེ། དང་པོའི་སེམས་སངས་རྒྱས་སོ་ཞེས་པ་ནི་དང་པོའོ། །འཇུག་པའི་སེམས་ཏེ་ཕུང་པོ་ལ་སོགས་བའི་ཆོས་རྣམས་བདག་མེད་པར་ཆུད་པས་ན་སངས་རྒྱས་ཞེས་བྱ་སྟེ། སངས་རྒྱས་ཞེས་པའི་ཚིག་ནི་ཆུད་པ་ཞེས་པའི་གཞུང་ཡིན་པའི་ཕྱིར་རོ། །གཉིས་པོ་ནི་ཆོས་ཞེས་བྱའོ་ཞེས་པ་ནི་གནས་པའི་སེམས་དེ་བཞིན་པ་ཉིད་ཀྱི་རང་བཞིན་པའི་མཚན་མ་འཛིན་པའི་ཆོས་ཞེས་པའོ། །དེ་དང་ལྷན་ཅིག་ཏུ་འབྱུང་བའི་སེམས་ནི་དགེ་འདུན་ནོ་ཞེས་བསྒྲགས་སོ་ཞེས་པ་ནི་ཆོས་ཐམས་ཅད་སྟོང་པར་ཆུད་པའི་ཚེ་ཉིད་ན། སྙིང་རྗེའི་དབང་གིས་ཕྱིར་མི་ལྡོག་པ་བྱང་ཆུབ་སེམས་དཔའི་དགེ་འདུན་གྱི་མཚན་ཉིད་ལྷ་རྣམས་ཀྱི་སྐུར་བསྒྱུར་བ་ལ་བྱའོ། །དཔའ་བོ་དམ་ཚིག་འདི་གསུམ་བཤད་པ་ཁྱོད་ལ་མགོན་པོ་རྣམས་ཀྱིས་ཞེས་པ་ནི། ཇི་སྐད་སྨོས་པ་འདི་དམ་ཚིག་འདི་གསུམ་དཔའ་བོ་ཁྱོད་ལ་ངས་བཤད་པ་འབའ་ཞིག་མ་ཡིན་གྱི། སྔོན་གྱི་སངས་རྒྱས་བཅོམ་ལྡན་འདས་མགོན་པོ་རྣམས་ཀྱིས་ཀྱང་བཤད་དོ་ཞེས་པ་སྟེ། སངས་རྒྱས་བཅོམ་ལྡན་འདས་རྣམས་ཀྱི་སྤྱོད་པ་གཅིག་པུ་བསྟན་པའོ། །དམ་ཚིག་གསུམ་པོ་འདི་གནས་ནས་སྤྱོད་པ་བྱང་ཆུབ་སྤྱོད་པ་དེ་ཚེ་ཚུལ་ཡང་སྒོའི་སྟེ། དཔའ་བོའི་སེམས་ཅན་ཕན་དོན་ཕྱིར། །ཞེས་པ་ནི་བྱང་ཆུབ་སེམས་དཔའ་བྱང་ཆུབ་ཀྱི་སྤྱད་པ་སྤྱོད་པ་རྣམས་དམ་ཚིག་འདི་གསུམ་ལ་གནས་ནས་འཇིག་རྟེན་པ་རྣམས་ཀྱི་ཚུལ་མང་པོ་དང་འཇིག་རྟེན་ལས་འདས་པ་ཉན་ཐོས་དང་རང་སངས་རྒྱས་ལ་སོགས་པའི་ཚུལ་སྣ་ཚོགས་ཀྱི་སྒོ་ནས་སེམས་ཅན་གྱི་དོན་གྱི་ཕྱིར་སྤྱོད་དོ་ཞེས་པའོ། །ནམ་ཞིག་གྱུར་པ་ཀུན་སངས་རྒྱས། །སྐུ་གསུམ་ལ་ནི་དབང་ཐོབ་པ། དེ་ནས་གསང་བའི་བདག་པོ་དེ་ཡང་དག་པར་ཀུན་དུ་སངས་རྒྱས་པ་སྟོན་པར་བྱེད་དོ་ཞེས་པ་ལ་སོགས་པ་ནི་འབྲས་བུའི་དམ་ཚིག་གསུམ་བསྟན་པ་སྟེ། ནམ་ཀུན་དུ་སངས་རྒྱས་པར་གྱུར་པ་དེ་ན་སྤྲུལ་པའི་སྐུས་སངས་རྒྱས་ཀྱི་ཡབ་ཟས་གཙང་མའི་སྲས་སུ་སྟོན་པ་ནས་མྱ་ངན་ལས་འདས་པའི་བར་དུ་སྟོན་པ་སྟེ་དེ་ལ། སྐུ་གསུམ་ལ་ནི་དབང་ཐོབ་པ། །ཞེས་པ་ནི་ནམ་འོག་མིན་གནས་སུ་ཀུན་དུ་སངས་རྒྱས་པར་གྱུར་པ་དེ་ཉིད་ན་ཆོས་ཐམས་ཅད་སྟོང་པ་ཉིད་དུ་ཆུད་པ་དེ་བཞིན་པ་ཉིད་ཀྱི་རང་བཞིན་དུ་གྱུར་པ་ནི་ཆོས་ཀྱི་སྐུ་ལ་དབང་ཐོབ་པའོ། །དེའི་ཚེ་རྫོགས་ལོངས་སྤྱོད་པའི་སྐུར་སྣང་བས་ན། རྫོགས་ལོངས་སྤྱོད་པའི་སྐུའི་དབང་
ཐོབ་པའོ། །དེ་ནས་སྤྲུལ་པའི་སྐུ་འཇིག་རྟེན་དུ་སྣང་བས་ན་སྤྲུལ་པའི་སྐུའི་དབང་ཐོབ་པའོ། །ལུས་གཅིག་བྱིན་གྱིས་བརླབས་པ་ནི་འདི་ལྟ་སྟེ། ཐོག་མར་སྤྲུལ་པའི་སྐུའོ་ཞེས་པ་ནི་ཡང་དག་པར་ཀུན་དུ་སངས་རྒྱས་པའི་བསྟན་པ་སྟོན་པར་བྱེད་དོ་ཞེས་པ་དང་འབྲེལ་ཏེ། ཐོག་མར་འོག་མིན་གནས་སུ་ཀུན་དུ་སངས་རྒྱས་ནས་སྤྲུལ་པའི་སྐུར་བྱིན་གྱིས་བརླབས་ཏེ་རྒྱལ་པོ་ཟས་གཙང་མའི་སྲས་སུ་སྟོན་པ་དང༌། གཞོན་ནུ་རོལ་པ་དང༌། རབ་ཏུ་བྱུང་བ་དང༌། དཀའ་བ་སྤྱོད་པ་དང༌། བྱང་ཆུབ་ཀྱི་སྙིང་པོར་ཉེ་བར་འགྲོ་བ་ལ་སོགས་པའི་བསྟན་པ་རྣམས་སྟོན་པར་བྱེད་དོ་ཞེས་པའོ། །གཞན་ཡང་གསང་བའི་བདག་པོ་ལུས་གཅིག་པོ་དེ་ཉིད་ལ་རྣམ་པ་གསུམ་དུ་སྟོན་ཏེ། འདི་ལྟར་སངས་རྒྱས་པ་དང་ཆོས་དང་དགེ་འདུན་ནོ་ཞེས་པ་ཡང༌། ཡང་དག་པར་ཀུན་དུ་སངས་རྒྱས་པའི་བསྟན་པ་སྟོན་པར་བྱེད་དོ་ཞེས་པ་དང་འབྲེལ་ཏེ་སངས་རྒྱས་ནི་སྤྲུལ་པའི་སྐུ་ཉིད་ལ་བྱའོ། །ཆོས་ནི་གསུང་རབ་ཡན་ལག་བཅུ་གཉིས་གསུང་མི་ཟད་པའི་སྒོ་ནས་འཆད་པའོ། །དགེ་འདུན་འཕགས་པའི་གང་ཟག་བརྒྱད་ཀྱི་དགེ་འདུན་ཏེ། སྤྲུལ་པའི་སྐུ་གཅིག་པུ་དེ་འདི་རྣམས་སུ་བྱིན་གྱིས་བརླབ་ཅིང་ཀུན་དུ་སངས་རྒྱས་པའི་བསྟན་པ་སྟོན་པར་བྱེད་དོ་ཞེས་པའོ། །གཞན་ཡང་གསང་བའི་བདག་པོ་དེ་ཉིད་ཐེག་པ་གསུམ་དུ་བརྟགས་པ་འཆད་དོ་ཞེས་པ་ནི་སྤྲུལ་པའི་སྐུ་དེ་ཉིད་གང་ཟག་ལ་བདག་མེད་པར་ཆུད་པ་ལ་མོས་པའི་འགྲོ་བ་ཉན་ཐོས་རྣམས་ལ་ནི་ཉན་ཐོས་པའི་ཐེག་པར་བརྟགས་ཤིང་འཆད། ཆོས་རྣམས་རྟེན་ཅིང་འབྲེལ་པར་འབྱུང་བའི་ཚུལ་དུ་བཤིག་སྟེ། མི་རྟག་པར་མཐོང་ནས་གྲོལ་བར་བྱེད་པར་མོས་པའི་འགྲོ་བ་རྣམས་ལ་ནི་རང་སངས་རྒྱས་ཀྱི་ཐེག་པར་བརྟགས་ཤིང་འཆད། ཆོས་དང་གང་ཟག་གཉིས་ཀ་བདག་མེད་པར་ཆུད་པ་ལ་མོས་པའི་འགྲོ་བ་རྣམས་ལ་ཐེག་པ་ཆེན་པོར་བརྟགས་ཤིང་འཆད་དོ་ཞེས་པའོ། །དེ་ནས་སངས་རྒྱས་ཀྱི་བྱ་བ་ཐམས་ཅད་བྱས་ནས་ཡོངས་སུ་མྱ་ངན་ལས་འདས་པ་སྟོན་ཅིང་སེམས་ཅན་ཀུན་སྨིན་པར་བྱེད་དོ་ཞེས་པ་ནི། མི་རྟག་པར་མཐོང་ནས་འཁོར་བ་ལས་ཐར་པར་ནན་ཏན་བྱེད་པའི་སེམས་ཅན་རྣམས་སྨིན་པར་བྱ་བའི་ཕྱིར་མྱ་ངན་ལས་འདས་པ་སྟོན་ཏེ། མྱ་ངན་ལས་འདས་པ་དེ་སེམས་ཅན་རྣམས་ཀྱིས་མཐོང་ནས་སངས་རྒྱས་བཅོམ་ལྡན་འདས་
ལྷ་དང་མིའི་བདག་པོ་བསོད་ནམས་དང་ཡེ་ཤེས་ཀྱི་ཚོགས་ལ་ཡང་མི་རྟག་ན་གཞན་ལྟ་ཅི་སྨོས་སྙམ་ནས་འཕགས་པའི་ལམ་ལ་ནན་ཏན་བྱེད་ཅིང་སྨིན་པར་འགྱུར་རོ་ཞེས་པའོ། །འདི་དག་ནི་རྒྱུ་དང་འབྲས་བུའི་དམ་ཚིག་གསུམ་ཕ་རོལ་ཏུ་ཕྱིན་པ་ལ་སྤྱོད་པ་དང༌། སྔགས་སྤྱོད་པའི་བྱང་ཆུབ་སེམས་དཔའ་གཉིས་ཀའི་ཕྱིར་བསྟན་པ་སྟེ། རྒྱུའི་དམ་ཚིག་གསུམ་ནི་མོས་པ་སྤྱོད་པའི་སེམས་ཀུན་དུ་བཟང་པོའི་སའི་བར་དུ་སྟེ། དེའི་བར་དུ་འཇུག་པ་ལ་སོགས་པའི་སེམས་གསུམ་དང་ལྡན་པའི་ཕྱིར་རོ། །འབྲས་བུ་དམ་ཚིག་གསུམ་ནི་སྔ་མ་བཞིན་ཏེ། དེ་ལྟར་སྔགས་སྤྱོད་པའི་བྱང་ཆུབ་སེམས་དཔའ་མོས་པ་སྤྱོད་པའི་ས་ལ་གནས་པ་རྣམས་ལ་གང་དམ་ཚིག་གསུམ་པོ་འདི་ཤེས་ཤིང་དེ་ལ་གནས་པ་དེའི་རྗེས་སུ་བསྔགས་པ་བཤད་པ་དེ་གསུངས་པ། གསང་བའི་བདག་པོ་ཞེས་པ་ནས་རྟོག་པ་ཐམས་ཅད་ལས་བྱུང་བའི་བགེགས་མེད་དོ་ཞེས་པ་སྟེ། སྤྱིར་བགེགས་ལ་རྣམ་པ་གསུམ་སྟེ། རྣམ་པར་རྟོག་པ་ལས་འབྱུང་བ་དང༌། ལས་ལས་འབྱུང་བ་དང༌། གང་བག་མེད་པ་མ་སྤངས་པ་ལས་འབྱུང་བ་སྟེ། ལས་ལས་འབྱུང་བ་བགེགས་ནད་མང་པོ་ལ་སོགས་པ་དང༌། བག་མེད་པ་མ་སྤངས་པ་ལས་འབྱུང་བའི་བགེགས་དུག་དང༌། མཚོན་དང་གཡང་ས་ལ་སོགས་པར་འགྲོ་བ་དང༌། དེ་དག་རྣམ་པར་རྟོག་པ་སྔོན་དུ་སོང་བ་ལས་གྱུར་པས་རྟོག་པ་ཐམས་ཅད་ལས་བྱུང་བའི་བགེགས་ཞེས་བྱ་སྟེ། བགེགས་དེ་དག་མེད་པར་འགྱུར་རོ་ཞེས་པའོ། །མི་འདོད་པ་དང་ལེ་ལོ་ཅན་དང་འདུ་འཛི་ཅན་ཡིད་མི་ཆེས་པ་དང༌། ཡོ་བྱད་མང་པོ་ལ་སོགས་པ་རྣམས་ནི་མ་གཏོགས་སོ་ཞེས་པ་ནི། དམ་ཚིག་གསུམ་པོ་ད་དག་དང་ལྡན་དུ་ཟིན་ཀྱང་སྒྲུབ་པ་མི་འདོད་པ་དང༌། ལེ་ལོ་ལ་སོགས་པའི་མིང་གིས་སྨོས་པ་འདི་རྣམས་དང་ལྡན་པ་ནི་བགེགས་མེད་པ་ནི་ནང་དུ་མ་གཏོགས་ཏེ་སྒྲུབ་པ་མི་འདོད་པ་དང༌། ལེ་ལོ་ལ་སོགས་པ་དེ་དག་ཉིད་བགེགས་ཡིན་པའི་ཕྱིར་རོ། །དེས་ན་རྣམ་གཉིས་མི་བྱ་སྟེ་མྱོས་པའི་བཏུང་བ་དང་ཉལ་བའི་ཁྲིའོ་ཞེས་པ་ནི་མྱོས་པའི་བཏུང་བ་ནི་མ་རུངས་པར་འགྱུར་བ་ཐམས་ཅད་ཀྱི་རྩ་བས་སྤང་ངོ༌། །ཇི་ལྟར་དེ་བཞིན་གཤེགས་པ་ལགས། །ཞེས་པ་ལ་སོགས་པའི་ཚིགས་སུ་བཅད་བས་བཅོམ་ལྡན་འདས་ཕྱག་ན་རྡོ་རྗེས་ཞུས་པ་ནི་སྡར་སངས་རྒྱས་དང་བྱང་ཆུབ་སེམས་དཔའ་
རྣམས་ཀྱིས་སྔགས་གསུངས་པ་ནི། འདི་ནི་དེ་བཞིན་གཤེགས་པའི་སྔགས་འདི་ནི་བྱང་ཆུབ་སེམས་དཔའ་རྣམས་ཀྱི་སྔགས་སོ་ཞེས་པ་ལ་སོགས་པ་གསུངས་བ་དེ་ལ་དེ་བཞིན་གཤེགས་པ་དང༌། ཀུན་དུ་སངས་རྒྱས་པ་དང་བྱང་ཆུབ་སེམས་དཔའ་རྣམས་ཀྱི་མཚན་ཉིད་བྱེ་བྲག་ཅི་མཆིས་གང་ལགས་པ་མ་འཚལ་ན། ཐེ་ཚོམ་དེ་བསལ་བར་གསོལ་ཞེས་པའོ། །དེ་བས་ན་ཕྱག་ན་རྡོ་རྗེ་ཉིད་ཀྱིས་མི་མཁྱེན་པ་མ་ཡིན་གྱི་མ་འོངས་པའི་འགྲོ་བ་རྣམས་ཐེ་ཚོམ་བསལ་བའི་ཕྱིར་རོ། །ཞུས་པའི་ཚིག་དེ་བཞི་ཡང༌། བྱང་ཆུབ་ནམ་མཁའི་མཚན་ཉིད་དོ། །ཞེས་པ་ལ་སོགས་པ་ཞེས་པའི་ཚིགས་སུ་བཅད་པས་རིམ་བཞིན་དུ་གཉིས་གསོལ་ཏོ། །ཐེ་ཚོམ་ཡིད་མི་ཆེས་སྤངས་ནས། །བྱང་ཆུབ་སེམས་དཔའ་གྲགས་ཆེན་རྣམས། །ཐེག་ཆེན་ལ་ནི་སྤྱོད་འགྱུར་བ། །སྤྱོད་པའི་རྒྱལ་པོ་བླ་ན་མེད་པའོ། །ཞེས་པ་ནི་བྱང་ཆུབ་སེམས་དཔའ་གྲགས་པ་ཆེན་པོ་རྣམས་ཐེག་ཆེན་སྔགས་ཀྱི་སྤྱོད་པ་ལ་སྤྱོད་པ་ནི་ཡང་ཐེ་ཚོམ་དང་ཡིད་མི་ཆེས་པ་སྤངས་ནས་དེ་བས་ན་ཐེག་པ་ཆེན་པོ་སྔགས་ཀྱི་སྤྱོད་པ་ལ་སྤྱོད་པའི་ཕྱིར་བདག་གི་ཐེ་ཚོམ་དེ་བསལ་དུ་གསོལ་ཞེས་པ་དང་སྦྱར་རོ། །སྤྱོད་པའི་རྒྱལ་པོ་བླ་ན་མེད། །ཅེས་པ་ནི་སྔགས་ཀྱི་སྤྱོད་པ་ཉིད་ལ་བྱའོ། །བྱང་ཆུབ་ནམ་མཁའི་མཚན་ཉིད་དེ། རྟོག་པ་ཐམས་ཅད་སྤངས་པ་ཡིན་ཏེ། བདག་གིས་དེ་འདྲའོ་རྟོགས་འདོད་པ། །དེ་ནི་བྱང་ཆུབ་སེམས་དཔའོ། །ཞེས་པ་ནི། ཇི་ལྟར་བྱང་ཆུབ་སེམས་དཔའ་ལགས། །ཞེས་ཞུས་པའི་ལན་ཏེ་འདི་སྐད་གསུངས་པ། ཆོས་ཐམས་ཅད་སྟོང་པ་ཉིད་དུ་ཆུད་པ། དེ་བཞིན་པ་ཉིད་ཀྱི་ཡེ་ཤེས་གཟུང་བ་དང་འཛིན་པ་ལ་སོགས་པའི་རྟོག་པ་ཐམས་ཅད་སྤངས་པ་ནམ་མཁའ་ལྟ་བུར་ཉོན་མོངས་པ་དང་ཤེས་བྱའི་སྒྲིབ་པ་མེད་པ་དེ་ནི་བྱང་ཆུབ་སྟེ། བྱད་ཆུབ་དེ་ལྟ་བུར་གང་ཆུད་པར་འདོད་པ་དེ་ནི་བྱང་ཆུབ་སེམས་དཔའ་ཞེས་བྱ་སྟེ། དེ་ཡང་ས་དང་པོ་ལ་ཞུགས་ནས་ས་དགུ་མན་ཆད་ཀྱི་བྱང་ཆུབ་སེམས་དཔའ་རྣམས་ལ་བྱའོ། །ས་བཅུ་མངོན་པར་བསྒྲུབས་ནས་སུ། །སངས་རྒྱས་ཞེས་སུ་དེ་བསྒྲགས་སོ། །ཞེས་པའི་བར་དུ་ཇི་ལྟར་སངས་རྒྱས་ཞེས་སུ་དེ་བགྱི་ཞེས་ཞུས་པའི་ལན་ཏེ། ས་བཅུ་ཡོངས་སུ་རྫོགས་པའི་བྱང་ཆུབ་སེམས་དཔའ་ཇི་སྐད་དུ་གྲགས་པའི་དབང་བཅུ་ལ་ཡང་དབང་དུ་གྱུར་
པའི་ཏིང་ངེ་འཛིན་ལ་གནས་པ་དང༌། ལངས་པ་གཉིས་ཀའི་ཚེ་ན་ཡང་ཕུང་པོ་ལ་སོགས་པའི་ཆོས་རྣམས་སྒྱུ་མ་ལྟ་བུར་རྟོགས་པ་འཇིག་རྟེན་པ་རྣམས་ཀྱི་རྒྱུད་ཀུན་རྫོབ་དང་དོན་དམ་པའི་མཚན་ཉིད་དུ་སྟོང་བ་ཉིད་དང་སྒྱུ་མ་ལྟ་བུར་ཤེས་པ་དེ་ནི་སངས་རྒྱས་ཞེས་བྱ་སྟེ་བྱང་ཆུབ་སེམས་དཔའ་ཕལ་རྣམས་ཀྱིས་ཀྱང་ཆོས་རྣམས་སྟོང་པ་སྒྱུ་མ་ལྟ་བུར་རྟོགས་པ་དང༌། འཇིག་རྟེན་ཀུན་གྱི་རྒྱུད་དུ་ཤེས་མོད་ཀྱི་མི་མཐུན་པའི་ཕྱོགས་ཐམས་ཅད་མ་སྤངས་པས། ཆོས་རྣམས་སྟོད་པ་དང་སྒྱུ་མར་རྟོག་པ་ཡང་མཉམ་པར་གཞག་པ་ལས་ལངས་པའི་ཚེ་མི་མཐུན་པའི་ཕྱོགས་ཀྱི་སྒྲིབ་པར་གྱུར་ཏེ། དེ་བས་ན་ཁྱད་པར་དུ་གསུངས་པ། ས་བཅུ་དང་ས་བཅུ་ལ་རྫོགས་པར་སངས་རྒྱས་པ་ཞེས་བྱ་སྟེ། སངས་རྒྱས་པ་ཞེས་བྱ་བ་ནི་ལོག་པའི་གཉེན་པོ་ལ་སོགས་པ་སྤངས་ནས་ཕྱིན་ཅི་མ་ལོག་པར་ཆུད་པ་ལ་བྱའོ། །ཆོས་རྣམས་ནམ་མཁའི་མཚན་ཉིད་དེ། །གཉིས་སུ་མེད་དེ་མཚན་ཉིད་གཅིག །སྟོབས་བཅུ་ཀུན་དུ་སངས་རྒྱས་པ། །དེ་ནི་ཀུན་དུ་སངས་རྒྱས་སོ། །ཞེས་པ་ནི་ཇི་ལྟར་རྒྱལ་བ་མཆོག་ཅེས་ཞུས་པའི་ལན་ཏེ། ས་བཅུའི་བྱང་ཆུབ་སེམས་དཔར་སངས་རྒྱས་ཞེས་བྱ་བ་རྣམས་ཀྱིས་ཆོས་རྣམས་སྟོད་པར་ཆུད་པ་ཡང་སོ་སོར་མཚན་ཉིད་དུ་ཆུད་དེ། དེ་ལས་ལྷག་པར་གང་སོ་སོར་མཚན་ཉིད་དུ་སྟོང་པར་ཆུད་པ་དེ་རྣམས་གང་གཟུགས་ཀྱི་སྟོང་པ་དེ་ཚོར་བའི་སྟོང་པ་སྟེ། གཟུགས་ཀྱི་སྟོང་པ་དང་ཚོར་བའི་སྟོང་པ་ཉིད་གཉིས་གཉིས་སུ་དབྱེར་མེད་ཅེས་པ་ལ་སོགས་པའི་ཚུལ་དུ་ཆོས་ཐམས་ཅད་ནམ་མཁའི་མཚན་ཉིད་ལྟར་གཉིས་སུ་མེད་དེ། མཚན་ཉིད་གཅིག་ཏུ་སྟོབས་བཅུ་ཡོངས་སུ་རྫོགས་ནས་ཀུན་དུ་ཆུད་པ་དེ་ནི་ཀུན་དུ་སངས་རྒྱས་ཞེས་བྱ་བ་སྟེ། དེ་ཡང་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་ཀུན་དུ་བཟད་པོའི་ས་ལ་གནས་བའི་བྱང་ཆུབ་སེམས་དཔའ་ལ་བྱའོ། །རྒྱལ་བའི་མཆོག་ཅེས་པ་ནི་བདུད་བཞི་ལས་རྒྱལ་བའི་ཕྱིར་རོ། །འདུ་ཤེས་ཙམ་དུ་སྤངས་པ་སུ། །རང་བཞིན་བསྟན་དུ་མེད་ན་ནི། །གང་གིས་རིག་པའི་ཡེ་ཤེས་ཀྱིས། །ཀུན་དུ་སངས་རྒྱས་པའི་ཚེ་ཆོས་ཐམས་ཅད་སྟོང་པའི་མཚན་ཉིད་གཅིག་ཏུ་ཆུད་པའི་འདུ་ཤེས་ཙམ་པ་དེ་ཡང་སྤངས་ཏེ། རང་གིས་རིག་པ་རང་བཞིན་དུ་བསྟན་པ་མེད་པ་ལྷག་མ་མ་ལུས་པའི་མྱ་ངན་ལས་འདས་པ་དེ་ནི་དེ་བཞིན་གཤེགས་པ་ཞེས་བྱའོ། །ད་
ནི་གསང་བའི་ཕྱག་རྒྱ་བརྒྱད་པོ་བཤད་པར་བྱ་སྟེ། ཕྱག་རྒྱ་འདི་རྣམས་ཀྱང་སྔགས་པ་ལྷའི་གཟུགས་སུ་བསྒྱུར་བ་དེ་བརྟན་པར་བྱ་བའི་ཕྱིར་སྦྱར་ཏེ། ལྷའི་གཟུགས་སུ་བསྒྱུར་བ་ཡང་རྣམ་པ་གཉིས་ཏེ་དེ་བཞིན་གཤེགས་པའི་སྐུར་བསྒྱུར་བ་དང༌། བྱང་ཆུབ་སེམས་དཔའི་སྐུར་བསྒྱུར་བའོ། །དེ་བཞིན་གཤེགས་པའི་སྐུར་བསྒྱུར་ལ་ཕྱག་རྒྱ་འདི་རྣམས་ཀྱིས་བྱིན་གྱིས་བརླབས་ན་ཕྱག་རྒྱ་འདི་རྣམས་དེ་བཞིན་གཤེགས་པའི་ཕྱག་རྒྱ་བས་དེ་བཞིན་གཤེགས་པ་ཉིད་ཀྱི་རང་བཞིན་དུ་འགྱུར་རོ། །དེ་ལ་ལྷའི་སྐུ་ཡོངས་སུ་རྫོགས་པར་བྱ་བ་ཡང་རྣམ་པ་གཉིས་ཏེ། གནས་རྫོགས་པར་བྱ་བ་དང་ལུས་རྫོགས་པར་བྱ་བའོ། །གནས་རྫོགས་པར་བྱ་བ་ནི་རྡོ་རྗེ་མི་ཕྱེད་པའི་ཕྱག་རྒྱ་དང༌། པདྨོ་མཛོད་ཀྱི་ཕྱག་རྒྱ་གཉིས་སོ། །ལྷག་མ་དྲུག་གིས་ནི་ལུས་རྫོགས་པར་བྱའོ། །ད་རྣམས་ལ་རྣམ་པ་གསུམ་དུ་དབྱེ་སྟེ། ལུས་དང་ངག་དང་ཡིད་རྫོགས་པར་བྱའོ། །དེ་ལ་ལུས་རྫོགས་པར་བྱེད་པ་ནི་ཡན་ལག་ཐམས་ཅད་འབྱུང་བའི་ཕྱག་རྒྱ་དང་འོད་ཀྱི་ཕྱག་རྒྱའོ། །གཟུངས་ཀྱི་ཕྱག་རྒྱ་དང་ཆོས་གནས་པ་གཉིས་ནི་སེམས་རྫོགས་པར་བྱེད་པའོ། །སངས་རྒྱས་ཀྱི་དབྱངས་ཀྱི་རྒྱན་མང་པོའི་ཕྱག་རྒྱ་ནི་ངག་རྫོགས་པར་བྱེད་པའི་ཕྱག་རྒྱའོ། །སྦྱོར་བ་ཆེན་པོའི་ཕྱག་རྒྱ་ནི་ཏིང་དེ་འཛིན་སྦྱོར་བ་རྫོགས་པར་བྱེད་པའོ། །དེ་རྣམས་སྦྱར་བར་བྱ་བའི་རིམ་པ་ཡང་ཐོག་མར་རྡོ་རྗེ་མི་ཕྱེད་པའི་ཕྱག་རྒྱས་བདག་གནས་པའི་གཞི་དང་དབང་ཆེན་གྱི་དཀྱིལ་འཁོར་རྡོ་རྗེའི་གདན་དུ་བྱིན་གྱིས་བརླབས་ཏེ། དེ་ནས་དམ་ཚིག་གི་ཕྱག་རྒྱ་བཅིངས་ནས་བདག་དང་གནས་བསྲུང་བ་དང༌། མཆོད་པ་བྱ་བ་དང༌། རྡོ་རྗེ་སེམས་དཔར་བྱིན་གྱིས་བརླབ་པ་ལ་སོགས་པ་ཇི་སྐད་གསུངས་པའི་རིམ་བཞིན་དུ་བྱས་ལ་དེ་ནས་དེའི་འོག་ཏུ་ཇི་སྐད་བཤད་པའི་རིམ་གྱིས་བདག་ཉིད་ལྷའི་སྐུར་བསྒྱུར་ཏེ། དང་པོར་པདྨོ་ཕྱག་རྒྱས་པདྨའི་གདན་བྱིན་གྱིས་བརླབ། ཡན་ལག་ཐམས་ཅད་འབྱུང་བའི་ཕྱག་རྒྱས་ལྷའི་སྐུར་བརྟན་པར་བྱིན་གྱིས་བརླབ། དེ་ནས་འོད་འབྱུང་བའི་ཕྱག་རྒྱས་འོད་ཀྱི་དཀྱིལ་འཁོར་བྱིན་གྱིས་བརླབས་ཏེ། དེ་ནས་གཟུངས་ཀྱི་ཕྱག་རྒྱས་ཆོས་མི་བརྗེད་པའི་དྲན་པ་བརྟན་པར་བྱིན་གྱིས་བརླབ། དེ་ནས་སངས་རྒྱས་ཀྱི་དབྱངས་ཀྱི་རྒྱན་མང་པོར་ངག་བྱིན་གྱིས་བརླབ། དེ་ནས་ཆོས་གནས་པའི་ཕྱག་རྒྱས་དེ་བཞིན་ཉིད་ཀྱི་ཆོས་ཉིད་བརྟན་པར་བྱིན་གྱིས་བརླབ། དེའི་
འོག་ཏུ་སྦྱོར་བ་ཆེན་པོའི་ཕྱག་རྒྱས་ཏིང་ངེ་འཛིན་བརྟན་པར་བྱིན་གྱིས་བརླབ་སྟེ་དེ་དག་ནི་བསྡུས་པའི་དོན་ཏོ། །འཁོར་གྱི་དཀྱིལ་འཁོར་འདུས་པ་ཐམས་ཅད་གཟིགས་ནས་ཞེས་པ་ནི་སྔ་མ་བཞིན་ནོ། །ཕྱག་ན་རྡོ་རྗེ་བྱང་ཆུབ་སེམས་དཔའི་ཞེས་པ་ཕྱག་ན་རྡོ་རྗེས་ཀྱང་མ་གསོལ་བར་བཅོམ་ལྡན་འདས་ཉིད་འཆད་པ་ནི་ཕྱག་རྒྱ་དེ་ཆེ་བའི་བདག་ཉིད་དུ་བསྟན་པའི་ཕྱིར་ཏེ། དེ་ནས་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་གྱིས་བྱང་ཆུབ་སེམས་དཔའ་ལ་སོགས་པ་གཞན་རྣམས་ཀྱི་སྤྱོད་ཡུལ་དུ་མ་གྱུར་པས་ཕྱག་ན་རྡོ་རྗེས་ཀྱང་དེ་བཤད་དུ་གསོལ་ཞེས་མ་གསོལ་ཏོ། །གསང་བའི་ཕྱག་རྒྱ་ཞེས་པ་ནི་དམ་ཚིག་མེད་པ་དང་དབང་མ་བསྐུར་བ་ལ་སོགས་པ་ཀུན་ལ་མི་བསྟན་པའི་ཕྱིར་རོ། །གསང་བ་དང་བཅས་པའི་ཞེས་པ་ནི་རྡོ་རྗེའི་གདན་དང་པདྨོ་དང་འོད་ཀྱི་དཀྱིལ་འཁོར་ལ་སོགས་པ་ལྷ་རང་གི་གཟུགས་སུ་མི་བསྟན་པར་ལག་པའི་ཕྱག་རྒྱར་བསྟན་པའི་ཕྱིར་རོ། །ལྷ་ཡི་གནས་སུ་བྱིན་གྱིས་བརླབ། །ཅེས་པ་ནི་ལྷའི་གནས་ནི་རྡོ་རྗེའི་གདན་དང་པདྨོ་སྟེ། དེ་ལྟར་ལྷ་རྣམས་གནས་པར་འགྱུར་བས་ན་རྡོ་རྗེ་མི་ཕྱེད་པའི་ཕྱག་རྒྱ་དང་པདྨོའི་ཕྱག་རྒྱ་གཉིས་ལ་བྱའོ། །གཉིས་སུ་ན་ཕྱག་རྒྱ་བརྒྱད་ཅ་ར་ལ་བྱ་སྟེ། ཕྱག་རྒྱ་དེ་རྣམས་ཀྱིས་བྱིན་གྱིས་བརླབས་ན། རང་གི་ལུས་ལ་ལྷ་གནས་པར་འགྱུར་བའི་ཕྱིར་རོ།། རང་གི་སྔགས་ཀྱི་མཚན་ཉིད་ཀྱིས་བཏབ་ཅེས་པ་ནི་ཕྱག་རྒྱ་དེ་དག་སོ་སོའི་སྔགས་འོག་ནས་འབྱུང་བ་རྣམས་མཚན་ཉིད་ཀྱིས་བཏབ་སྟེ་ཕྱག་རྒྱ་དེ་བཅིངས་ནས་སྔགས་ཀྱང་དེར་བསམ་མོ་ཞེས་པའི་དོན་ཏོ། །དཀྱིལ་འཁོར་དང་ལྡན་པ་ཞེས་པ་ནི་ཕྱག་རྒྱ་དེ་དག་སོ་སོའི་དཀྱིལ་འཁོར་དབང་ཆེན་ལ་སོགས་པ་ཇི་ལྟར་འོག་ནས་འབྱུང་བ་དང་ལྡན་པ་ཞེས་པ་སྟེ། རང་རང་གི་དཀྱིལ་འཁོར་རྣམས་ཕྱག་རྒྱ་ཉིད་ཀྱི་ནང་དུ་བསམ། རྡོ་རྗེ་དང་པདྨོའི་གདན་དང༌། འོད་ཀྱི་དཀྱིལ་འཁོར་ལ་སོགས་པ་སོ་སོའི་གནས་སུ་ཡང་ལྡན་པར་བསམ་མོ་ཞེས་པའི་དོན་ཏོ། །རང་གི་ལས་ལ་ལྷར་སྦྱོར་བ། །ཞེས་པ་ནི་ཞི་བ་དང་རྒྱས་པ་དང་རབ་དང་འབྲིང་ལ་སོགས་པའི་སྒྲུབ་པའི་ལས་རྣམས་ལ་རང་གི་ལྷ་ཉིད་དུ་སྦྱོར་བ་ཕྱག་རྒྱ་འདི་རྣམས་ལྡན་ཞེས་པའོ། །གང་གི་སྔགས་ཀྱི་སྒོ་ནས་བྱང་ཆུབ་སེམས་དཔའ་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་བདག་དང་ལྷའི་གཟུགས་སུ་རིག་པ་བསྟན་པར་འགྱུར་རོ་ཞེས་པ་ནི་བདག་གི་
ལྷའི་གཟུགས་བསྒྱུར་བ་ཕྱག་རྒྱ་འདི་རྣམས་ཀྱིས་ཇི་སྐད་དུ་བཤད་པའི་རིམ་པ་བཞིན་དུ་སོ་སོར་བྱིན་གྱིས་བརླབས་ན་ལྷའི་གཟུགས་སུ་བསྟན་པར་འགྱུར་རོ་ཞེས་པའོ། །རིག་ནས་ཀྱང་ལྷའི་རང་གི་བྱ་བ་ལ་གནས་ན་གྲུབ་པ་ཐོབ་པར་འགྱུར་རོ་ཞེས་པ་ནི། །དེའི་སྐུར་བསྒྱུར་ཏེ། ཕྱག་རྒྱ་དེ་རྣམས་ཀྱིས་བྱིན་གྱིས་བརླབས་ནས་བསྟན་པར་བྱ་བ་ཙམ་གྱིས་ཆོག་པ་མ་ཡིན་གྱི། རང་གི་ལྷའི་བྱ་བཞི་བ་དང་རྒྱས་པ་དང་རབ་དང་འབྲིང་ལ་སོགས་པའི་གྲུབ་བ་དང་ལས་རྣམས་བསྒྲུབས་ན་འགྲུབ་པར་འགྱུར་རོ་ཞེས་པ་སྟེ། དེ་ལྟ་བུའི་ཡོད་དོ་ཞེས་པ་འབྲེལ་ཏོ། །རྡོ་རྗེ་མི་ཕྱེད་པའི་ཕྱག་རྒྱ་དང༌། པདྨོ་མཛོད་ཀྱི་ཕྱག་རྒྱ་དང༌། སངས་རྒྱས་ཀྱི་དབྱིངས་ཀྱི་རྒྱན་མང་པོའི་ཕྱག་རྒྱ་བཅིངས་པ་ལ་ཕྱག་རྒྱ་སྔ་མ་ལས་ཞེས་པ་ནི་དེ་དག་གསུམ་ཆར་གྱིས་ཀྱང་འོད་འབྱུང་བའི་ཕྱག་རྒྱ་ལས་ཤེས་པར་བསྙེག་གོ །དེ་བཞིན་དུ་གཟུངས་ཀྱི་ཕྱག་རྒྱ་ལ་སོགས་པ་ཕྱག་རྒྱ་གསུམ་པོ་ལ་ཕྱག་རྒྱ་སྔ་མ་ལས་ཤེས་པ་ནི་ཡན་ལག་ཐམས་ཅད་དུ་འབྱུང་བའི་ཕྱག་རྒྱ་ལས་ཤེས་པར་རིག་པར་བྱའོ། །གཟུངས་ཀྱི་ཕྱག་རྒྱའི་དཀྱིལ་འཁོར་འཇའ་ལྟ་བུ་ལ་མཚན་མ་ཐམས་ཅད་དང་ལྡན་ཞིང་རྡོ་རྗེ་དང་བ་དན་གྱིས་བརྒྱན་པ་ཞེས་པ་ནི་གཟུངས་ཏེ་རྡོ་རྗེའི་གདན་དང་པདྨོ་དང་འོད་ཀྱིས་བསྐོར་བ་ལ་སོགས་པའི་དངོས་པོ་ཇི་ལྟར་བསམས་པ་རྣམས་མི་བརྗེད་པར་བྱ་སྟེ། མཐུ་ཐམས་ཅད་དང་ལྡན་པར་དགོངས་པས་འཇའ་ལྟ་བུའི་དཀྱིལ་འཁོར་བཞི་ཆར་གྱི་དཀྱིལ་འཁོར་ཁ་དོག་དང་ལྡན་པའོ། །མཚན་མ་ཐམས་ཅད་དང་ལྡན་པའི་དཀྱིལ་འཁོར་སོ་སོའི་མཚན་ཉིད་རྡོ་རྗེ་དང༌། པདྨོ་ལ་སོགས་པ་དང་ལྡན་པའོ་ཞེས་པའོ། །རྡོ་རྗེ་དང་བ་དན་གྱིས་བརྒྱན་པ་ཞེས་པ་ནི་དཀྱིལ་འཁོར་དེའི་དབྱིབས་དང་འཇའ་འདྲ་བས་རླུང་གི་དཀྱིལ་འཁོར་དེ་རླུང་གི་དཀྱིལ་འཁོར་གྱི་མཚན་མ་བ་དན་རབ་ཏུ་མི་གཡོ་བར་བྱ་བའི་ཕྱིར་རྡོ་རྗེ་ཅན་གྱི་བ་དན་ཆོས་གནས་པའི་ཕྱག་རྒྱའི་དཀྱིལ་འཁོར་གཉིས་ཞེས་པ་ནི་སྟོང་པ་དང་སྟོང་པའི་ཡང་སྟོང་པའི་མཚན་མ་སྦྱོར་བ་ཆེན་པོ་ཕྱག་རྒྱའི་དཀྱིལ་འཁོར་ནམ་མཁའི་ཁ་དོག་ལས་ཁྱད་པར་དུ་སྔོ་བར་བྱ་བ་ནི་ཏིང་ངེ་འཛིན་གྱི་མཐུ་ཐམས་ཅད་དང་ལྡན་པའི་ཕྱིར་རླུང་གི་དཀྱིལ་འཁོར་གྱི་ཤས་ཆེ་བར་དགོངས་པའོ། །གསང་བའི་བདག་པོ་གསང་བའི་ཕྱག་རྒྱ་འདི་རྣམས་ནི་དེ་བཞིན་གཤེགས་པ་
རྣམས་ཀྱི་ཤིན་ཏུ་གསང་བ་སྟེ། སུ་ལ་ཡང་མི་སྦྱིན་ནོ་ཞེས་པ་ནི་དམ་ཚིག་མེད་པ་དང་དབང་མ་བསྐུར་བ་ལ་སོགས་པ་འོག་གནས་འབྱུང་བའི་ཡོན་ཏན་མིང་གིས་སྨོས་པ་རྣམས་དང་མི་ལྡན་པ་སུ་ལ་ཡང་མི་སྦྱིན་གྱི་ཡོན་ཏན་དེ་རྣམས་དང་ལྡན་པ་ལ་ནི་སྦྱིན་ནོ་ཞེས་པའོ། །དབང་སྦྱིན་ཞེས་པ་ནི་གསང་བའི་དཀྱིལ་འཁོར་དུ་དབང་བསྐུར་བ་ཞེས་པའོ། །རིགས་དང་ལྡན་པ་ཞེས་པ་ནི་བྲམ་ཟེ་དང་རྒྱལ་རིགས་རྣམས་ལ་སྦྱིན་གྱི། །ཉ་པ་ལ་སོགས་རིགས་ངན་པ་རྣམས་ལ་མི་སྤྱོན་ནོ་ཞེས་པའོ། །གཉིས་སུ་རིགས་དང་ལྡན་ཞེས་པ་ནི་དེ་བཞིན་གཤེགས་པའི་རིགས་དང་པདྨོའི་རིགས་ཀྱི་ལྷ་རྣམས་ལ་བརྟེན་ཅིང་དེ་ལ་གནས་པའོ་ཞེས་པའོ། །གསུམ་དུ་ན་དེ་བཞིན་གཤེགས་པའི་རིགས་ལ་སོགས་པའི་སྔགས་པའི་སྤྱོད་པ་ལ་བརྩོན་ཞིང་འབད་པ་རྣམས་ལ་ཞེས་པའོ། །སྤྲོ་བ་ཞེས་པ་ནི་སྔགས་སྤྱོད་པ་ལ་བརྩོན་ཞེས་པའོ། །ཡིད་དམ་བརྟན་པ་ཞེས་པ་ནི་ཇི་ལྟར་བསམས་པའི་དོན་མ་གྲུབ་ཀྱི་བར་དུ་མི་གཏོང་བ་ཞེས་པའོ། །བླ་མ་ལ་རིམ་གྲོ་ཆེ་བ་ཞེས་པ་ནི་བླ་མ་ལ་དང་ཅིང་གུས་ན་ཇི་ལྟར་བསྟན་པ་བཞིན་དུ་ཡང་དག་པར་སྦྱོར་ཞིང་ནན་ཏན་བྱེད་པའི་ཕྱིར་རོ། །གཙང་ཞེས་པ་ནི་ལུས་གཙང་ན་སེམས་འདུ་བར་འགྱུར་བའི་ཕྱིར་རོ། །རང་གི་ལུས་དང་སྲོག་ལ་མི་བལྟའོ་ཞེས་པ་ནི་ལས་དང་སྒྲུབ་པ་ལ་སོགས་པའི་སྔགས་ཀྱི་སྤྱོད་པ་ལ་ལུས་དང་སྲོག་ཀྱང་མི་ཕངས་ཏེ། དེ་ལྟ་བུ་ལ་ཕྱག་རྒྱ་དེ་རྣམས་མི་སྦྱིན་ནོ་ཞེས་པའོ། །ད་ནི་ལྷའི་རང་བཞིན་གྱི་ཏིང་ངེ་འཛིན་བཤད་དོ། །དེ་ལ་ལྷའི་རང་བཞིན་ཀྱང་འོག་ནས་འབྱུང་བའི་ཚུལ་རྣམ་པ་དྲུག་ཏུ་རིག་པར་བྱས་ཏེ། རྣམ་པ་དྲུག་པོ་དེ་ལས་ཀྱང་གང་ཡང་གཟུགས་དང་ཕྱག་རྒྱ་ལ་སོགས་པའོ། །ལྷའི་རང་བཞིན་གྱི་རྣམ་པ་ལ་ནི་སྔར་བཤད་པའི་ཡན་ལག་རྣམ་པ་བཞི་ལ་སོགས་པར་བཤད་ཟིན་ཏོ། །དེ་ཡང་ཕྱི་རོལ་དུ་དེ་བཞིན་གཤེགས་པའི་སྐུ་ལ་དམིགས་པ་དང༌། བདག་རང་ལྷའི་གཟུགས་སུ་བསྒྱུར་བ་ནི་གཟུགས་ཀྱི་རང་བཞིན་ཟླ་བའི་དཀྱིལ་འཁོར་ནི་བྱང་ཆུབ་ཀྱི་སེམས་ཀྱི་ཕྱག་རྒྱར་གྱུར་པའི་ལྷའི་རང་བཞིན་ཟླ་བའི་དཀྱིལ་འཁོར་ལ་ཡིག་འབྲུ་དགོད་པ་ནི་སྒྲའི་རང་བཞིན་བདག་དང་ལྷའི་རང་བཞིན་བདག་ལྷར་བསྒྱུར་བ་ན་ཨུཏྤལ་ལ་སོགས་པའི་ལྷའི་རྣམ་པར་གྲོལ་བའི་ཕྱག་རྒྱ་ནི། རང་གི་གཟུགས་ཀྱི་ཕྱག་རྒྱ་ལྷའི་རང་བཞིན་ཕྱག་རྒྱ་
དེ་ཉིད་ལག་པའི་ཕྱག་རྒྱ་ར་བསྒྱུར་ཏེ་ལྷའི་སྐུར་བྱིན་གྱིས་བརླབ་པ་དང་སྲུང་བ་ལ་སོགས་པ་བྱ་བ་ནི་རང་གི་གཟུགས་མ་ཡིན་པའི་ཕྱག་རྒྱའི་རང་བཞིན་ནོ། །དྲུག་པོ་ནི་ཡོངས་སུ་བདག་པའི་ལྷའི་རང་བཞིན་མཚན་མེད་པའི་ཏིང་ངེ་འཛིན་ལ་གནས་ཏེ། ལྷའི་རང་བཞིན་དེ་སྔར་མ་བཤད་པས་དེ་སྐབས་འདིར་བཤད་པར་བྱ་བ་དང༌། ལྷའི་རང་བཞིན་ལྔ་པོ་སྔར་བཤད་པ་རྣམས་ཀྱང་བསླབ་པའི་ཡན་ལག་ཙམ་དུ་ཤེས་ཀྱི་ལྷའི་རང་བཞིན་ཡིན་པར་མི་ཤེས་ཏེ་ཕྱག་རྒྱ་ལ་སོགས་པ་དེ་རྣམས་ཀྱང་ལྷའི་རང་བཞིན་ཡིན་པར་བསྟན་ཏེ། དེ་ཡང་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་འདི་སྐད་ཅེས་གསོལ་ཏོ་ཞེས་པ་ལ་སོགས་པའོ། །དེ་ལྷའི་གཟུགས་བྱིན་གྱིས་བརླབས་པར་འགྱུར་བའི་ལྷའི་གཟུགས་བཤད་དུ་གསོལ་ཞེས་པ་ནི། འོག་ནས་འབྱུང་བའི་ལྷའི་གཟུགས་ལ་བྱིན་གྱིས་བརླབ་པར་འགྱུར་བ་དེ་བཤད་དུ་གསོལ་ཞེས་པ་སྟེ་གཟུགས་ཞེས་པའི་ཚིག་ནི་ལྷའི་རང་བཞིན་ཞེས་པའི་དོན་ཏོ། །ལྷའི་རང་བཞིན་དེ་བཤད་པར་གསོལ་བ་དེ་ཇི་ལྟར་དགོས་ཤེ་ན་གསུངས་པ། གང་གི་སྔགས་ཀྱི་སྒོར་བྱང་ཆུབ་སེམས་དཔའ་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ལྷའི་གཟུགས་ལ་དམིགས་ནས་རང་གི་བྱ་བའི་ལྷའི་གཟུགས་སུ་བདག་ཉིད་བྱས་ནས་ཐེ་ཚོམ་མེད་པར་གྲུབ་པ་རབ་ཏུ་ཐོབ་པར་འགྱུར་བའོ། །དེ་ལ་ལྷའི་གཟུགས་ལ་དམིགས་ནས་ཞེས་པ་ནི་ཕྱི་རོལ་གྱི་དེ་བཞིན་གཤེགས་པའི་སྐུ་དང༌། དེ་ལ་ཟླ་བའི་དཀྱིལ་འཁོར་སྔགས་དང་བཅས་པའི་ལྷའི་རང་བཞིན་ལ་དམིགས་ནས་ཞེས་པའོ། །རང་གི་བྱ་བའི་ལྷའི་གཟུགས་སུ་བྱ་བ་དག་བྱས་ནས་ཞེས་པ་ནི། ཞི་བ་དང་རྒྱས་པ་དང་རབ་དང་འབྲིང་ལ་སོགས་པའི་གྲུབ་པ་དང་ལས་ལ་ལྷའི་གཟུགས་སུ་བསྒྱུར་བ་ཞེས་པའོ། །ཐེ་ཚོམ་མེད་པར་གྲུབ་པ་ཐོབ་པར་འགྱུར་ཞེས་པ་ནི་ལྷའི་རང་བཞིན་དེ་རྣམས་བཤད་དེ། དེ་ཤེས་པར་གྱུར་ན་ཐེ་ཚོམ་མེད་དོ། །ཇི་ལྟར་བསམས་པའི་དོན་གྲུབ་པར་འགྱུར་བའི་ཕྱིར་ལྷའི་རང་བཞིན་དེ་རྣམས་བཤད་དུ་གསོལ་ཞེས་པ་དང་སྦྱར་རོ། །དེ་ལ་གསང་བའི་བདག་པོ་ལྷའི་གཟུགས་རྣམ་པ་གསུམ་སྟེ། ཡི་གེ་དང་ཕྱག་རྒྱ་དང་གཟུགས་སོ་ཞེས་པ་ལ་ལྷའི་གཟུགས་རྣམ་པ་གསུམ་ཞེས་པ་ལ་ལྷའི་རང་བཞིན་
རྣམ་པ་གསུམ་ཞེས་པའོ། །ཡི་གེ་ཞེས་པ་ནི་རང་བཞིན་མི་འགྱུར་བའི་ཕྱིར་ཞེས་པའི་ཚིག་སྟེ། དེ་ཡང་གང་ཞེ་ན་གསུངས་པ། ཡི་གེ་ལ་ཡང་རྣམ་པ་གཉིས་ཏེ། སྒྲ་དང་བྱང་ཆུབ་ཀྱི་སེམས་སོ་ཞེས་པའོ། །དེ་ལ་སྒྲ་ནི་སྔགས་ཀྱི་ཡིག་འབྲུ་སྟེ། དེའི་སྒྲས་ཀུན་རྫོབ་དང་དོན་དམ་པའི་ལྷ་རྣམས་གྲོལ་བ་སྟོན་པ་ལ་རང་བཞིན་གཞན་དུ་མི་འགྱུར་བས་ན་ནམ་ཡང་མི་འགྱུར་ཞེས་པ་སྟེ། ཇི་སྐད་དུ་གསུངས་པ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་རྣམས་ཀྱི་ཆོས་ཉིད་ཡེ་ནས་གནས་པ་ནི་འདི་ལྟ་སྟེ། སྔགས་ཀྱི་ཆོས་ཉིད་དོ་ཞེས་པའི་ཕྱིར་རོ། །བྱང་ཆུབ་ཀྱི་སེམས་ཞེས་པ་ནི་ཟླ་བའི་དཀྱིལ་འཁོར་ལ་བྱ་སྟེ། དེ་བཞིན་པ་ཉིད་ཀྱི་རང་བཞིན་བྱང་ཆུབ་ཀྱི་སེམས་དེ་ལ་ཟླ་བའི་དཀྱིལ་འཁོར་དུ་བྱིན་གྱིས་བརླབས་ཏེ། ཟླ་བའི་དཀྱིལ་འཁོར་དེ་བྱང་ཆུབ་ཀྱི་སེམས་ཀྱི་ཕྱག་རྒྱས་བཏབ་པའི་ཕྱིར། བྱང་ཆུབ་ཀྱི་སེམས་དེ་མི་འགྱུར་བ་ནི་ཕྱིན་ཅི་མ་ལོག་པ་ཡོངས་སུ་རྫོགས་པས་སྟོང་པ་ཉིད་ཀྱི་རང་བཞིན་ལ་གཟུང་བ་དང་འཛིན་པ་ལ་སོགས་པའི་ཇི་བཞིན་རྣམ་པར་རྟོག་པ་ཅན་དུ་མི་འགྱུར་བའི་ཕྱིར་རོ། །ཕྱག་རྒྱའི་གཟུགས་ལ་ཡང་རྣམ་པ་གཉིས་ཏེ། གཟུགས་འདྲ་བ་གཟུགས་མི་འདྲ་བའོ་ཞེས་གཟུགས་འདྲ་བ་ཞེས་པ་ནི་ལྷ་རྣམས་སོ་སོར་གྲོལ་བའི་ཕྱག་རྒྱ་པདྨོ་དང་ཨུཏྤལ་ལ་སོགས་པའོ། །གཟུགས་མི་འབྲ་བཟ་ཞེས་པ་ནི་པདྨོ་ལ་སོགས་པའི་ཕྱག་རྒྱ་དེ་དག་ཉིད་ལག་པའི་ཕྱག་རྒྱར་བསྒྱུར་བའོ། །ལྷའི་གཟུགས་ལ་ཡང་རྣམ་པ་གཉིས་ཏེ། ཡོངས་སུ་དག་པ་དང་མ་དག་པ་ཞེས་པའོ། །ལྷའི་གཟུགས་ཞེས་པ་ནི་ལྷའི་རང་བཞིན་ཞེས་པ་སྟེ་དེ་ཡང་གང་ཞེ་ན་གསུངས་པ། དེ་ཡོངས་སུ་དག་པ་ནི་ལྷག་པར་ཆུད་པའི་གཟུགས་མཚན་མ་ཐམས་ཅད་དང་བྲལ་བའོ་ཞེས་པ་སྟེ། སྟོང་པ་ཉིད་ཀྱི་ཏིང་ངེ་འཛིན་ཁ་དོག་དང་དབྱིབས་ལ་སོགས་པ་ཇི་བཞིན་པའི་མཚན་མ་ཐམས་ཅད་སྤངས་པ་དེ་བཞིན་ཉིད་ཀྱི་ཡེ་ཤེས་ཀྱི་ལྷའི་རང་བཞིན་ཞེས་པའོ། །ཡོངས་སུ་མ་དག་པ་ནི་མཚན་མ་དང་བཅས་པ་སྟེ། གཟུགས་ཁ་དོག་དབྱིབས་སོ་ཞེས་པ་ནི་འཕགས་པ་འཇམ་དཔལ་དང་སྤྱན་རས་གཟིགས་ཀྱི་དབང་པོ་ལ་སོགས་པ་ཆ་ལུགས་ཏེ། ཁ་དོག་དང་དབྱིབས་ལ་སོགས་པའི་མཚན་མ་ལ་དམིགས་པས་ཡོངས་སུ་མ་དག་པ་ཞེས་
བྱ་བའི་དོན་བྱ་བ་བྱེད་པའི་སྒོ་ནས་ཡོངས་སུ་མ་དག་པ་ནི་མ་ཡིན་ནོ། །དེ་ལ་ལྷའི་གཟུགས་རྣམ་པ་གཉིས་ཀྱིས་དོན་རྣམ་པ་གཉིས་འགྲུབ་པར་འགྱུར་ཏེ་ཞེས་པ་ནི་ཡོངས་སུ་དག་པ་དང༌། ཡོངས་སུ་མ་དག་པའི་ལྷའི་གཟུགས་རྣམ་པ་དེ་གཉིས་ཀྱིས་འགྲུབ་པར་འགྱུར་རོ་ཞེས་པའོ། །དེ་ཡང་གང་ཞེ་ན་གསུངས་པ། མཚན་མ་དང་བཅས་པ་ཞེས་ཏེ་ཁ་དོག་དང་དབྱིབས་སུ་ལྡན་པའི་མཚན་མ་དང་ལྷའི་གཟུགས་སུ་བསྒྱུར་བའི་ཏིང་ངེ་འཛིན་གྱི་རལ་གྲི་དང་རྡོ་རྗེ་ལ་སོགས་པའི་གྲུབ་པའི་རྫས་མཚན་མ་དང་བཅས་པ་ཞེས་པ་སྟེ། ཁ་དོག་དང་དབྱིབས་སུ་ལྡན་པའི་མཚན་མ་དང་ལྷའི་གཟུགས་སུ་བསྒྱུར་བའི་ཏིང་ངེ་འཛིན་གྱི་རལ་གྲི་དང་རྡོ་རྗེ་ལ་སོགས་པའི་གྲུབ་པའི་རྫས་མཚན་མ་དང་བཅས་པ་འགྲུབ་པ་ཞེས་པའོ། །མཚན་མ་མེད་པ་ནི་འགྲུབ་པ་ཉེར་བར་སྐྱེའོ་ཞེས་པ་ནི་སྟོང་པ་ཉིད་ཀྱི་ལྷའི་རང་བཞིན་མཚན་མ་མེད་པའི་ཏིང་ངེ་འཛིན་གྱིས་ནི་ལྔ་མངོན་པར་ཤེས་པ་དང་གཟུངས་དང་རྣམ་པར་གྲོལ་བས་ལ་སོགས་པའི་རལ་གྲི་དང་རྡོ་རྗེ་ལ་སོགས་པའི་རྫས་ཀྱི་མཚན་མ་ལ་མི་རྟོག་པ་འགྲུབ་པ་ནི་རྣམ་པར་འཐོབ་བོ་ཞེས་པའོ། །སྐབས་འདིར་མཚན་མ་མེད་པ་ཞེས་པ་ནི་ལྔ་མངོན་པར་ཤེས་པ་ལ་སོགས་པ་དམིགས་པ་དང་བཅས་པའི་གྲུབ་པས་མི་དམིགས་པའི་མཚན་མ་མེད་པ་ལ་ནི་མི་བྱའི་སྒྲུབ་པའི་རྫས་གྲི་ལ་སོགས་པའི་མཚན་མ་མེད་པའོ། །མཚན་མ་ཡོད་པས་མཚན་མ་ཡོད་པའི་གྲུབ་པ་ལ་རྒྱལ་མཆོག་རྣམས་རྟག་ཏུ་དགྱེས་སོ་ཞེས་པ་ལ་སོགས་པ་ནི་ཡོངས་སུ་དག་པ་དང་ཡོངས་སུ་མ་དག་པའི་ལྷའི་ཏིང་ངེ་འཛིན་ལས་མཚན་མ་ཡོད་པའི་གྲུབ་པ་དང་མཚན་མ་མེད་པའི་གྲུབ་པ་སོ་སོར་གྱུར་པ་ལས་ཀྱང་ངེས་པར་བཤད་པ་སྟེ། མཚན་མ་ཡོད་པའི་ལྷའི་རང་བཞིན་ལས་གྲུབ་པ་ཡང་མཚན་མ་ཡོད་པ་ཉིད་འབྱུང་བའི་མཚན་མ་མེད་པའི་གྲུབ་པ་མི་འབྱུང་ངོ་ཞེས་པའོ། །རྒྱལ་བ་མཆོག་རྣམས་ཀྱང་རྟག་ཏུ་དགྱེས་སོ་ཞེས་པ་ནི་དེ་ལྟ་བུ་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱང་དགོངས་པའམ་བཞེད་དེ་ཞེས་པའོ། །མཚན་མ་མེད་པ་ལ་གནས་ནས་མཚན་མ་ཡོད་པར་རབ་ཏུ་འབྱུང་ངོ་ཞེས་པ་ནི་མཚན་མ་མེད་པའི་ལྷའི་ཏིང་ངེ་འཛིན་དེ་ལས་ལྔ་མངོན་པར་ཤེས་པ་ལ་སོགས་པ་རྫས་ལ་མི་རྟོག་པ་མཚན་མ་
མེད་པའི་གྲུབ་པ་འབའ་ཞིག་མ་ཡིན་གྱི། རལ་གྲི་ལ་སོགས་པའི་རྫས་ཀྱི་མཚན་མ་དང་བཅས་པ་ཡང་འགྲུབ་བོ་ཞེས་པའོ། །དེ་བས་ན་རྣམ་པ་ཐམས་ཅད་ལ་མཚན་མ་མེད་པ་བསྙེན་པར་བྱའོ་ཞེས་པ་ནི། །མཚན་མ་མེད་པའི་ཏིང་ངེ་འཛིན་དེ་ལས་མཚན་མ་ཡོད་པ་དང་མེད་པ་གཉིས་ཀ་འགྲུབ་པས་རྣམ་པ་ཐམས་ཅད་དུ་མཚན་མ་མེད་པ་དེ་བསྙེན་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་ཕྱག་ན་རྡོ་རྗེ་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ། །དེ་ལ་གསང་བའི་བདག་པོ་མཚན་མ་མེད་པའི་ཏིང་ངེ་འཛིན་སྒྲུབ་པར་འདོད་པའི་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ཀྱིས་འདི་ལྟར་བསམ་པར་བྱའོ་ཞེས་པ་ལ་སོགས་པ་ནི་གོང་དུ་ཡོངས་སུ་དག་པ་དང་ཡོངས་སུ་མ་དག་པའི་ལྷ་རྣམ་པ་གཉིས་ཀྱི་ཏིང་ངེ་འཛིན་སྒོམ་པའི་ཐབས་ནི་བཟླས་པའི་ཡན་ལག་བཞི་ལ་སོགས་པ་སྔར་བཤད་པའི་སྐབས་སུ་བསྟན་ཟིན་ཏོ། །དེ་ཡོངས་སུ་དག་པའི་ལྷའི་རང་བཞིན་གྱི་ཏིང་ངེ་འཛིན་བསྒོམ་པའི་རིམ་པ་བསྟན་པས་ད་འདིར་ན་མཚན་མ་མེད་པའི་ཏིང་ངེ་འཛིན་དེ་བསྒོམས་ན་སླར་ལུས་དང་སེམས་དང་ཡིད་གསུམ་ལ་མཚན་མ་འབྱུང་བ་སོ་སོར་བཤིག་སྟེ། མཚན་མ་འབྱུང་བ་མེད་པར་སུན་ཕྱིན་པར་བྱ་བའི་ཐབས་བསྟན་ཏེ་དེ་ལ་མཚན་མ་དེ་གང་ལས་འབྱུང༌། རང་གི་ལུས་ལས་སམ་སེམས་ལས་སམ་ཡིད་ལས་སམ་ཞེས་པ་ནི། འདི་གང་ལས་མཚན་མ་འབྱུང་ཞེས་པ་ནི་དང་པོར་དམ་བཅས་པའོ། །ལུས་ལས་སམ་ཞེས་པ་ནི་སེམས་དང་ཡིད་གཉིས་མ་གཏོགས་པར་འབྱུང་བ་ཆེན་པོའི་རང་བཞིན་གྱི་ལུས་དེ་ལས་སྔོན་པོ་དང་སེར་པོ་ལ་སོགས་པའི་མཚན་མ་འབྱུང་ངམ་ཞེས་བརྟགས་པའོ། །སེམས་ལས་མ་ཡིན་ཞེས་པ་ནི་ཡིད་ཀྱི་རྣམ་པར་ཤེས་པ་དེ་ལས་མཚན་མ་འབྱུང་ངམ་ཞེས་བརྟགས་པའོ། །ཡིད་ལས་སམ་ཞེས་པ་ནི་སྒྲོ་དྲུག་གི་རྣམ་པར་ཤེས་པ་ལས་མཚན་མ་དེ་འབྱུང་ངམ་ཞེས་བརྟགས་པ་སྟེ་ཡིད་ཅེས་པ་ནི་ཇི་བཞིན་པ་དང་བཅས་པའི་བསམ་པ་ལ་ལ་བྱ་སྟེ། གཟུགས་ལ་སོགས་པ་ཇི་བཞིན་པར་སྣང་བའི་སྒོ་དྲུག་གི་རྣམ་པར་ཤེས་པ་ཉིད་ལ་བྱའོ། །དེ་ལ་ཐོག་མར་ལུས་ལས་མཚན་མར་མི་འབྱུང་བར་བརྟག་པ་ནི་དེ་ལ་ལུས་དེ་ནི་ལས་ལས་སྐྱེས་པ་ནས་དེ་ལྟར་གསང་
བའི་བདག་པོ་ལུས་ལས་སུ་དྲན་པ་ཡིན་ཏེ་རང་བཞིན་གྱིས་སྟོང་པར་སྒོམས་ཤིག་ཅས་པའི་བར་དུ་སྟེ། མདོར་ན་ལས་ལས་སྐྱེས་པའི་ལུས་དེ་ནི་རང་བཞིན་གྱིས་བླུན་པ་སྟེ་རྩྭ་དང་ཤིང་དང་པོར་བ་ལྟ་བུ་སྟེ། ཇི་ལྟར་རྩྭ་དང་ཤིང་དང་བོང་བ་དེ་སྔོན་པོ་དང་སེར་པོ་ལ་སོགས་པའི་མཚན་མ་འབྱུང་བའི་བྱ་བ་མི་བྱེད་པ་བཞིན་དུ་ལུས་དེ་ཡང་མཚན་མ་རྣམས་འབྱུང་བའི་བྱ་བ་མི་བྱེད་དོ་ཞེས་པའོ། །དེ་ཉིད་ཀྱི་དཔེ་ཡང་གསུངས་པ། ཕྱི་རོལ་གྱི་ཇི་བཞིན་པའི་གཟུགས་ལས་སྐྱེས་པ་བཞིན་དུ་བརྟག་གོ་ཞེས་པ་སྟེ། ཇི་ལྟར་གཟུགས་མཁན་གྱིས་རྡོ་དང་ས་ལ་སོགས་པ་ལ་ལྷ་དང་མིའི་ཇི་བཞིན་པའི་གཟུགས་བྱས་པ་དེ་ལ་སྐྱེས་བུ་འགའ་ཞེས་སྡང་དང་བཅས་པས་མཚོན་དང་མེ་ལ་སོགས་པས་གཏུབ་པ་དང་བསྲེག་པ་ལ་སོགས་པ་བྱས་ཀྱང་གཟུགས་དེ་ལ་ཞེ་སྡང་མི་སྐྱེ་སྟེ། དེ་བཞིན་དུ་སྐྱེས་བུའི་འགའ་ཞིག་གིས་བྱམས་པའི་སེམས་དང་བཅས་པས་བཟའ་བ་དང་བཏུང་བ་ལ་སོགས་པ་དང་གོས་དང་རྒྱན་ལ་སོགས་པ་ལྷ་དང་མིའི་ཡོ་བྱད་ཇི་སྐད་དུན་སྨོས་པ་རྣམས་ཀྱི་མཆོད་ཀྱང་གཟུགས་དེ་ལ་དྲིན་དུ་གཟོ་བ་དང༌། བྱམས་པའི་སེམས་མི་སྐྱེ་བ་དེ་བཞིན་དུ་བདག་གིས་ལུས་འདི་ཡང་རང་བཞིན་གྱིས་བླུན་པ་སྟེ་མཚན་མ་ལ་སོགས་པ་བསྐྱེད་པའི་བྱ་བ་བྱེད་པ་མ་ཡིན་ནོ་ཞེས་ལུས་དེ་ལྟར་བཤིག་ནས། མཚན་མ་མེད་པའི་ཏིང་ངེ་འཛིན་དུ་འཇུག་པར་བྱའོ་ཞེས་དགོངས་པའོ། །གཞན་ཡང་གས་གསང་བའི་བདག་པོ་སེམས་ནི་ངོ་བོ་ཉིད་མེད་པའོ་ཞེས་པ་ནས་རང་བཞིན་གྱིས་མཚན་མ་དང་བྲལ་བར་སེམས་ཤིག་ཅེས་པའི་བར་དུ་སེམས་ལས་བྱུང་བའི། མཚན་མ་མི་འབྱུང་བར་བྱ་བའི་བསྒོམ་པའི་ཐབས་བསྟན་པ་སྟེ། སེམས་དེ་ནི་དོན་དམ་པར་གཟུང་བ་དང་འཛིན་པའི་རང་བཞིན་སྔོན་པོ་དང་སེར་པོ་ལ་སོགས་པའི་མཚན་མ་ཐམས་ཅད་དང་བྲལ་བ་དང་རང་བཞིན་གྱིས་སྟོང་པ་བས་དུས་གསུམ་པ་ཡང་འདས་པ་སྟེ། གང་དུས་གསུམ་མེད་ཅིང་རང་བཞིན་གྱིས་སྟོང་པ་དེ་ནི་དེ་བཞིན་ཉིད་ཀྱི་མཚན་ཉིད་རྣམ་པར་མི་རྟོག་པས་མཚན་མ་འབྱུང་བ་མ་ཡིན་པར་རིག་པར་བྱས་ནས་མཚན་མ་མེད་པའི་ཏིང་ངེ་འཛིན་ལ་གནས་པར་བྱའོ་ཞེས་དགོངས་པའོ། །གཞན་ཡང་གསང་བའི་བདག་པོ་ཡིད་ནི་མཚན་མ་དང་བཅས་པའོ་ཞེས་བྱིས་པ་སོ་སོའི་འགྲོ་བ་
རྣམས་རྟོག་པ་ཡང་དག་པ་མ་ཡིན་པར་ཀུན་དུ་བརྟགས་པའི་ཚིག་བླ་དགས་པར་ནི་མི་ཤེས་སོ་ཞེས་པ་ནི་ཡིད་ལས་མཚན་མ་མི་འབྱུང་བའི་རྟོག་པ་བསྟན་པ་སྟེ། མིག་ལ་སོགས་པའི་སྒོ་དྲུག་གི་རྣམ་པར་ཤེས་པ་གཟུགས་ལ་སོགས་པ་ཇི་བཞིན་པར་སྣང་བར་འབྱུང་བ་ནི་བྱིས་པ་རྣམས་ཀྱིས་འཁྲུལ་པར་རྟོགས་པ་སྟེ། བྱིས་པ་དེ་རྣམས་ཀྱིས་ནི་འཁྲུལ་པ་ཡིན་པར་མི་ཤེས་སོ་ཞེས་པ་གང་ཡང་དག་པར་མ་ཡིན་པ་དེ་ནི་མ་སྐྱེས་པའོ་ཞེས་པའི་གོང་དུ་སྒོ་དྲུག་གི་རྣམ་པར་ཤེས་པ་དེ་ཡང་དག་པར་ཡོད་པ་མ་ཡིན་པས་དེ་ཡང་དོན་དམ་པའི་མཚན་མ་འབྱུང་བའི་རྒྱུ་མ་ཡིན་ནོ་ཞེས་པའོ། །དེ་ལྟར་བསམས་ན་གསང་བའི་བདག་པོ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔའ་མཚན་མེད་པའི་ཏིང་ངེ་འཛིན་ཐོབ་བོ་ཞེས་པ་ནི་ཇི་ལྟར་ཡོངས་སུ་མ་དག་པའི་ལྷར་བདག་གི་ལུས་བསྒྱུར་བ་ན། ལྷ་དེའི་ཁ་དོག་དང་དང་དབྱིབས་ཅི་འདྲ་བར་བསྒྱུར་བ་བཞིན་དུ་མཚན་མ་མེད་པའི་ལྷའི་རང་བཞིན་དུ་བསྒྱུར་བ་ཡང་མཚན་མ་མེད་པའི་ཏིང་ངེ་འཛིན་དུ་ཞུགས་ན་ཡོངས་སུ་དག་པའི་ལྷའི་རང་བཞིན་དུ་བསྒྱུར་བ་མ་ཡིན་ཏེ། མཚན་མ་མེད་པའི་ཏིང་ངེ་འཛིན་རབ་ཏུ་ཐོབ་པོ་ཞེས་པ་ནི་ཡོངས་སུ་དག་པའི་ལྷའི་རང་བཞིན་དུ་གནས་པར་འགྱུར་རོ་ཞེས་པའོ། །ནམ་མཚན་མ་མེད་པའི་ཏིང་ངེ་འཛིན་ལ་གནས་པར་གྱུར་པ་དེ་ནི་གསང་བའི་བདག་པོ་དེ་ལ་དེ་བཞིན་གཤེགས་པས་གསུངས་པའི་སྔགས་མངོན་དུ་ཕྱོགས་པར་གནས་སོ་ཞེས་པ་ནི་ནམ་ཡོངས་སུ་དག་པའི་ལྷའི་རང་བཞིན་ལ་གནས་ན་དེ་བཞིན་གཤེགས་པས་གསུངས་པའི་ཐབས་ཀྱིས་ལྷ་རྣམས་འགྲུབ་པར་འགྱུར་རོ་ཞེས་པའོ། །དེ་ལ་གཞོལ་བ་ཞེས་པ་ནི་སྔགས་པ་དེ་ལ་ལྷ་དེ་རྣམས་གཞོལ་ལོ་ཞེས་པའོ། །གཞན་ཡང་གས་པའི་དག་པོ་བཟླས་པ་བཤད་དོ་ཞེས་པ་ལ་སོགས་པ་ནི་བཟླས་པའི་དེ་ཁོ་ན་ཉིད་ཀྱི་ལེའུ་བཤད་པ་སྟེ། བཟླས་པ་དེ་ཡང་ལྷའི་སྦྱོར་བ་རྣམ་པར་གཉིས་ལ་གནས་ནས་བཟླས་པ་ནི་གོང་དུ་ཡོངས་སུ་དག་པ་དང་མ་དག་པའི་ལྷའི་རང་བཞིན་བཤད་པ་ལ་གནས་ན་སྟེ། དེ་ཡང་ཡོངས་སུ་མ་དག་པའི་ལྷའི་རང་བཞིན་ལ་གནས་ནས་བཟླས་པའི་ཡན་ལག་བཞིར་ལྡན་པ་ནི་སྔར་ཡང་བཤད་ཟིན་ཏེ། འདིར་བཤད་པ་ནི་ནང་གི་མཚན་མ་མེད་པའི་བཟླས་པའི་འདིར་བཤད་པ་དང༌།
འཇིག་རྟེན་དང་འཇིག་རྟེན་ལས་འདས་པའི་བྱེ་བྲག་ཏུ་དབྱེ་བའི་ཕྱིར་རོ། །དེ་ལ་གཅིག་གིས་གཅིག་ཏུ་ཞེས་པ་ནི་ཡོངས་སུ་དག་པའི་ལྷའི་སྦྱོར་བ་གཅིག་ལ་གནས་ནས་ཡིད་ཀྱིས་བཟླས་པ་གཅིག་པུ་བྱའོ་ཞེས་པའོ། །གཅིག་པུ་ཡང་ན་གཅིག་གིས་སོ་ཞེས་པ་ནི་ཡོངས་སུ་མ་དག་པ་ནི་ལྷའི་སྦྱོར་བས་ཡིད་ཀྱིས་བཟླས་པ་བྱའོ་ཞེས་པའོ། །རང་ཐོས་རྣམ་པ་གཉིས་ཀྱིས་བྱའོ་ཞེས་པ་ནི་ཡོངས་སུ་དག་པ་དང་མ་དག་པའི་ལྷའི་སྦྱོར་བ་གཉིས་ཀས་རང་ཐོས་ཀྱི་བཟླས་པ་བྱའོ་ཞེས་པ་སྟེ་དེ་བས་ན་གསུངས་པ། རྟག་ཏུ་སྦྱོར་མཆོག་གཉིས་སུ་བྱའོ། །ཞེས་པ་སྟེ་ཡོངས་སུ་དག་པ་དང་ཡོངས་སུ་མ་དག་པའི་ལྷའི་སྦྱོར་བ་ལ་རྟག་ཏུ་བརྩོན་པར་བྱའོ་ཞེས་པའོ། །བཟླས་པ་གཞན་དུ་མི་བྱའོ། །ཡན་ལག་འགལ་བར་སྔགས་མཁན་གྱིས། །ཞེས་པ་ནི་ཕྱི་ནང་གི་ཡན་ལག་བཞི་བཟླས་པ་དང༌། ནང་གི་དོན་དམ་པའི་བཟླས་པ་འདི་གཉིས་ལས་གཞན་པ་བཟླས་པའི་ཆོ་ག་ལས་འགལ་བ་དང་ཡན་ལག་མ་ཚང་བ་མི་བྱའོ་ཞེས་པའོ། །ཕྱི་དང་ནང་གི་སྦྱོར་བས་སུ། །ཡན་ལག་བཞི་རུ་ངས་བཤད་པ། །ཞེས་པ་ནས། རང་ཐོས་བཟླས་པ་དམ་པའོ། །ཞེས་པའི་བར་དུ་གོང་དུ་དོན་དམ་པ་དང་ཀུན་རྫོབ་ཀྱི་རང་བཞིན་རྣམ་པ་གཉིས་མདོར་གླེངས་པ་ལས་ཀུན་རྫོབ་ཀྱི་བཟླས་པ་ཕྱིའི་ཡན་ལག་གསུམ་དང༌། །ནང་གི་ཡན་ལག་གཅིག་དང་བཞིར་ངས་བཤད་པ་དེ་ནི་འཇིག་རྟེན་གྱི་བཟླས་པ་ནི་ཡིན་ཏེ། དེ་ཡང་དམིགས་པ་དང་བཅས་པའི་བཟླས་པའི་ནང་ནས་མཆོག་གོ་ཞེས་པའོ། །སླར་སྡུད་པ་ཡི་ཤེས་གནས་ཉོན། །ཞེས་པ་ནི་སྔ་མ་བཞིན་ནོ། །ལྷ་ལ་སོང་བའི་ཡིད་ཀྱིས་སོ། །ཞེས་པ་ནི་འདི་ལ་སེམས་རྩེ་གཅིག་ཏུ་དམིགས་པར་བྱའོ་ཞེས་པའོ། །འཇིག་རྟེན་འདས་པའི་ཡིད་ཀྱིས་བྱའོ། །ཞེས་པ་ནས། གཞན་དུ་བར་ནི་བཤད་པ་མེད། །ཅེས་པའི་བར་དུ་དོན་དམ་པའི་བཟླས་པ་གོང་དུ་བཤད་པ་དེ་ཞིབ་ཏུ་འགྲེལ་པ་སྟེ། དེ་ལ་སླར་སྡུད་པའི་རྣམ་པ་སྤངས་ཞེས་པ་ནི་འཇིག་རྟེན་ལས་འདས་པའི་བཟླས་པ་དེ་ཡོངས་སུ་མ་དག་པའི་ལྷའི་རང་བཞིན་མི་དམིགས་པས་ཕྱི་རོལ་གྱི་བཟླས་པའི་ཡན་ལག་ལས་ནང་གི་ཡན་ལག་ཏུ་བསྡུ་བ་མེད་དོ་ཞེས་པའོ། །ལྷ་དང་གཅིག་ཏུ་བྱ་བ་དང༌། །ཞེས་པ་ནི་ལྷའི་གཟུགས་དང་བདག་གི་གཟུགས་གཅིག་ཏུ་
བྱའོ་ཞེས་པའོ། །ཐ་དད་མ་ཡིན་པར་ནི་གཟུང༌། །ཞེས་པ་ནི་གཟུགས་ལྷ་དང་བདག་གཉིས་གཅིག་ཏུ་བྱ་བ་དང་གཟུགས་ཐ་དད་པ་གནས་གཅིག་འདུག་པ་ཡང་སྲིད་དེ་དེ་ལྟ་བུ་མ་ཡིན་གྱི། །ལྷ་དང་བདག་གཉིས་ཐ་མི་དད་པར་བྱའོ་ཞེས་པའོ། །ལྷ་དང་བདག་ཉིད་ཐ་མི་དད་པར་ཡང་གཟུགས་ཀྱི་རང་བཞིན་དུ་ཐ་མི་དད་པ་སྲིད་དེ། དེ་ལས་གསལ་བར་གསུངས་པ། ཡིད་ལ་རང་བཞིན་འབྱེད་མེད་པར། །ཞེས་པ་སྟེ་གཟུགས་ལ་སོགས་པ་གཅིག་ཏུ་བྱ་བ་ནི་མ་ཡིན་གྱི། ཡིད་ཉིད་ལ་སྟོང་པ་ཉིད་ཀྱི་མཚན་མ་ཉིད་དུ་དབྱེར་མེད་པར་ཞེས་པའོ། །གཞན་དུ་བར་མི་བྱའོ་ཞེས་པ་ནི་འཇིག་རྟེན་ལས་འདས་པའི་བཟླས་པ་དེ་ཚུལ་འདི་འདྲ་བ་ལས་གཞན་དུ་མི་བྱའོ་ཞེས་པ་སྟེ། མདོར་ན་བདག་ཉིད་ཀྱི་གཟུགས་རང་གི་སྙིང་པོ་གང་ཡིན་པའི་སྒྲའི་དེ་ཁོ་ན་ཉིད་ལ་དམིགས་ནས་སྟོང་པ་ཉིད་དུ་བཤིག་སྟེ། བཤིག་ནས་ཀྱང་ཇི་ལྟར་ཡང་བདག་གི་གཟུགས་སྟོང་པའི་རང་བཞིན་དུ་ཕྱི་ནང་གི་ཆོས་ཐམས་ཅད་ཀྱང་སྟོང་པའི་རང་བཞིན་དུ་གཅིག་ཏུ་ཆུད་པར་བྱ་སྟེ། དེ་ལྟར་ཆོས་ཐམས་ཅད་སྟོང་པའི་རང་བཞིན་ཏེ། དབྱེར་མེད་པ་བདག་དང་ལྷའི་རང་བཞིན་ཀྱང་སྟོང་པའི་མཚན་ཉིད་དུ་དབྱེར་མེད་པར་ཆུད་པར་བྱས་ལ། སྟོང་པའི་ཏིང་ངེ་འཛིན་རྩེ་གཅིག་པ་ལ་གནས་ནས་ཡིད་ལ་བཟླས་པར་བྱའོ་ཞེས་པའོ། །འབུམ་ཕྲག་གསུམ་དུ་གྲངས་བཅད་པ། །སྔགས་ནི་མང་དུ་ངུ་ང་ཡི་སྟེ། །དེ་ནི་སྔགས་པ་དག་པ་སྟེ། །སྡིག་དང་བྲལ་བའི་ལུས་ཅན་ལ། །བཟླས་པའི་གྲངས་སུ་བསྟན་པ་སྟེ། །གཞན་དུ་བཤད་པ་མ་ཡིན་ནོ། །ཞེས་པའི་གྲངས་སུམ་འབུམ་སྔོན་དུ་བསྙེན་པ་བྱས་ནས་སྒྲུབ་པོ་ཞེས་ངས་རྣམ་པ་མང་དུ་བཤད་པ་དེ་དག་ནི་སྡིག་དང་བྲལ་བ་ཡང་ཚེ་རབས་སྔ་མཚུན་ཆད་དུ་བསོད་ནམས་དང་ཡེ་ཤེས་ཀྱི་ཚོགས་བསགས་པའམ། ཚེ་འདི་ལ་བྱང་ཆུབ་ཀྱི་སེམས་སྒོམ་པའི་ཐབས་སྔར་བཤད་པའི་རིམ་བཞིན་དུ་བསྒོམས་ནས་མཚན་མ་འབྱུང་བ་ལ་བྱའོ། །ད་ནི་དེ་རྣམས་ཀྱི་རབས་བཤད་དེ། ཡང་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྲམ་ཟེ་ལ་སོགས་པའི་མུར་འདུག་པ་རྣམས་ལོག་པ་ལ་ཕྱོགས་ཤིང་སེམས་ཅན་རྒྱུན་དུ་གསོད་པ་ལ་སོགས་པའི་སྡིག་པའི་ལས་སྤྱོད་པ་རྣམས་སེམས་ཅན་རྒྱུན་དུ་གསོད་པ་ལ་གྲངས་བསྙུང་
བའི་ཕྱིར་ལྷ་ལ་གཏོར་མ་དབུལ་བའི་ཚེ་སེམས་ཅན་གསོད་པ་མ་གཏོགས་པར་དུས་གཞན་དུ་སེམས་ཅན་མི་གསོད་དོ་ཞེས་པ་ལ་སོགས་པ་མུར་འདུག་གི་གཞུང་ལས་དགེ་བའི་ཕྱོགས་སུ་འཆད་པ་དང༌། བྲམ་ཟེའི་སྨྲང་ལས་མེ་བཤད་པ་རྣམས་དང༌། བཅོམ་ལྡན་འདས་ཉིད་ཀྱིས་བསྟན་པ་ཤེས་པར་བྱ་སྟེ། རེ་ཅི་མངོན་ཞེ་ན། འཕགས་པ་འཇམ་དཔལ་གྱི་རྒྱུད་ལས་ཇི་སྐད་དུ་དགེ་བར་སྨྲས་པ། ཆུང་ཟད་དུ་ཞིང་གི་རྣམས་ཡན་ཆད་ཀྱང་ངས་བསྟན་ཏོ་ཞེས་འབྱུང་བའི་ཕྱིར་རོ། །དེ་བས་ན་གསུངས་པ། གཞན་ཡང་ཕྱག་ན་རྡོ་རྗེ་དུས་གཅིག་གི་ཚེ་ང་མཁན་པོར་གྱུར། བྱང་ཆུབ་སེམས་དཔར་གྱུར་ཅིང༌། བྱང་ཆུབ་སེམས་དཔའི་སྤྱད་པ་སྤྱོད་པ་ཚངས་པའི་འཇིག་རྟེན་ལ་གནས་ཏེ། ཚངས་པས་ང་ལ་དྲིས་པ་ལ་སོགས་པ་སྟེ། དེ་ལ་ཀྱེ་ཚངས་པ་ཆེན་པོ། །མེ་ལ་རྣམ་པ་དུ་མར་ཤེས་པར་བྱ། ཞེས་པ་ནི་བཅོམ་ལྡན་འདས་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཚངས་པའི་འཇིག་རྟེན་ན་ཚངས་པའི་གཟུགས་སུ་གྱུར་ཅིང་བཞུགས་ཏེ། དེ་ན་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ལ་དབང་བ་ཚངས་པའི་རྒྱལ་པོས་ང་ལ་འདི་སྐད་ཅེས་དྲིས་སོ་ཞེས་པའོ། །དེ་ལ་ངས་འདི་སྐད་ཅེས་སྨྲས་སོ་ཞེས་པ་ནི་ཚངས་པ་དེ་ལངས་འོག་ནས་འབྱུང་བའི་ཚིག་རྣམས་སྨྲས་སོ་ཞེས་པའོ། །དེ་ལ་གང་མེ་དེ་ང་རྒྱལ་ཅན་དེ་རང་འབྱུང་བ་ཞེས་པ་ནི་བསྐལ་པ་དང་པོའི་ཚེ་འཇིག་རྟེན་ཐམས་ཅད་སུས་ཀྱང་མ་བྱས་པར་རང་བྱུང་ནས་ནམ་མཁའ་ལ་འགྲོ་ཞིང་དགའ་བའི་ཟས་ཟ་སྟེ། དེའི་ཚེ་ཡང་མེ་ཚངས་པའི་འཇིག་རྟེན་དུ་རང་བྱུང་སྟེ། ད་ནི་རང་སྟེ་སུས་ཀྱང་མ་བྱས་པའི་ང་རྒྱལ་ཡོད་པས་ང་རྒྱལ་ཅན་རང་འབྱུང་བ་ཞེས་པ་སྟེ་མེ་དང་པོར་དེ་ལྟར་བུར་འབྱུང་ཞེས་པའོ། །དེའི་འོག་ཏུ་ཚངས་པའི་བུ་ཀུན་དུ་སྐྱེས་པར་གྱུར་པ་ནི་ཀ་བ་སྟེ་འཇིག་རྟེན་མེ་ནི་ཚངས་པའི་བུ་དང་པོའིའོ་ཞེས་པ་ནི་རང་བྱུང་བའི་མེ་དེའི་འོག་ཏུ་བབ་ཀ་ཞེས་བྱ་བ་འཇིག་རྟེན་པ་བཙོ་ཞིང་སྲེག་པར་བྱེད་པའི་མེ་ཆངས་པ་ལས་བྱུང་སྟེ། དེ་ཡང་ཚངས་པའི་བུ་དེ་རྣམས་ཀྱི་ནང་ན་དང་པོའི་ཞེས་པའོ། །བྲ་མ་ད་ན་དེ་ཡི་བུ། །ཞེས་པ་ནི་བྲ་མ་ད་ན་ཞེས་བྱ་བའི་མེ་དེ་ནི་འཇིག་རྟེན་པའི་མེ་པ་བ་ཀ་ཞེས་བྱ་བ་དེའི་བུའོ། །དེ་ཡི་ཡང་ནི་བྷ་ར་ཧ། །ཞེས་བྱ་བ་ནི་བྷ་མོ་ད་ན་ཞེས་བྱ་བ་དེའི་བུ་
ཕ་ར་དེ་བ་ཞེས་བྱ་བའོ་ཞེས་པའོ། །དེའི་བུ་ནི་བྷའི་ཤྭ་ན་ར་ཧ་བ་ན་དང༌། ཧ་བྷྱ་པ་ཧའོ་ཞེས་པ་ནི་བྷེ་ཤྭ་ན་ར་ན་དང༌། ཧ་བྱ་ན་ཞེས་བྱ་བའི་མེ་དེ་རྣམས་ནི་བྷ་ར་ད་ཞེས་བྱ་བ་དེའི་བུའོ་ཞེས་པའོ། །པ་ཤྭ་བ་སམྦྷི་ད་ནི། ཨ་དུར་པའི་བུ་ཨ་ཀ་རའི་རྒྱ་མཚོ་ན་གནས་པར་གྲགས་ཞེས་པ་ནི། པ་ར་ཤྭ་སམྦྷི་ད་ཞེས་བྱ་བའི་མེ་ནི་ཨ་དར་པ་ཞེས་བྱ་བའི་མེའི་བུ་སྟེ། དེ་ཡང་ཨ་སྐ་ར་ཞེས་བྱ་བའི་རྒྱ་མཚོ་ན་གནས་པར་གྲགས་པའོ། །རླུང་བྱ་བའི་མེ་ཡང་ནི་མངལ་དུ་འཇུག་པ་ལ་བཤད་པའོ་ཞེས་པ་ནི་བྲམ་ཟེའི་ཆོ་ག་ལ་མངལ་དུ་འཇུག་པར་བྱ་བའི་ཚེ་སྦྱིན་སྲེག་བྱ་བའི་མེ་ནི་རླུང་ཞེས་བྱ་བའི་ཞེས་པའོ། །དེ་ནས་བུ་བཀྲུ་བ་ལ་ཞེས་བྱ་བ། པ་བ་མ་ན་ཡང་ནི་དེ་བཞིན་ནོ། །ཞེས་པ་ནི་མངལ་དུ་ཞུགས་ནས་སྦྲུམ་པར་གྱུར་པ་ན་བུ་དེའི་ཕྱིར་ཁྲུས་བྱ་བའི་ཚེ་སྦྱིན་སྲེག་བྱ་བའི་མེ་ནི་པ་བ་མ་ན་ཞེས་བྱའོ་ཞེས་པའོ། །མཚམས་ཀྱི་མཐའ་མར་བཀྲ་ཤིས་ཞེས་བྱ་བ་ནི་བུ་བྱུང་བའི་ཚེ་སྦྱིན་སྲེག་བྱ་བའི་མེ་ནི་བཀྲ་ཤིས་བྱ་བ་ཞེས་པའོ། །ཕྲག་ལ་བྷོ་ནི་སྐྱས་པའི་ལས་ལའོ་ཞེས་པ་ནི་བུ་བཙས་ཟིན་པའི་འོག་ཏུ་སྦྱིན་སྲེག་བྱ་བའི་མེ་ནི། སུ་གྷ་བྷི་ཞེས་བྱ་བ་ཡི། །ཞེས་པའོ། །མིང་ལ་ནི་བ་རྟི་བ་ཞེས་པ་ནི་བུའི་མིང་དོགས་པའི་ཚེ་སྦྱིན་སྲེག་བྱ་བའི་མེ་ནི་བ་རྟི་བ་ཞེས་བྱ་བའོ་ཞེས་པའོ། །དཀན་འབབ་པ་ལ་དེ་བཞིན་གཙང་པའོ་ཞེས་པ་ནི་བུ་དཀན་འབབ་པའི་ཚེ་སྦྱིན་སྲེག་བྱ་བའི་མེ་ནི་གཙང་མའོ་ཞེས་བྱ་བའོ། །ཤདྦྷི་ཞེས་ཕུད་བུ་ལའོ་ཞེས་པ་ནི་ཕུད་བུ་འཇོག་པའི་ཚེ་སྦྱིན་སྲེག་བྱ་བའི་མེ་ནི་ཤད་བྷི་ཞེས་བྱ་བའོ། །བརྟུལ་ཞུགས་སྦྱིན་ལ་ཀུན་འབྱུང་བའོ། །ཞེས་པ་ནི་བུ་ལོ་བརྒྱད་ལོན་ནས་བག་མ་བླངས་ཀྱི་བར་དུ་བརྟུལ་ཞུགས་འཛིན་དུ་ཞུགས་པའི་ཚེ་སྦྱིན་སྲེག་བྱ་བའི་མེ་ནི་ཀུན་དུ་འབྱུང་བ་ཞེས་པའོ། །ཕྱུགས་སྤྱིན་པ་ཉི་མའོ་ཞེས་བྱ་བ་ནི་བག་མ་ལེན་པའི་ཚེ་སྦྱིན་སྲེག་བྱ་བ་ནི། སྦྱིན་སྲེག་བྱ་བའི་མེ་ནི་ཉི་མ་ཞེས་བྱའོ། །བག་མ་ལེན་པའི་ཚེ་སྤྲོད་པའོ་ཞེས་པ་ནི་བག་མ་ལེན་པའི་ཚེ་བསྐོར་བར་བྱ་བའི་མེ་ནི་སྤྲོད་པའི་ཞེས་བྱ་བའོ་ཞེས་པའོ། །ཁྱིམ་པ་ཁ་བསྲོ་བ་ཞེས་པ་ནི་ཁྱིམ་པ་ཁ་བསྲོ་བའི་ཚེ། སྦྱིན་སྲེག་བྱ་བའི་མེ་ནི་མེ་ཞེས་པའོ། །མེ་ཉིད་ཀྱང་ཞེས་པ་ནི་ཨུཏྤལ་ནི་ཀ་ཞེས་པ་ནི་ཨ་པ་ནི་ཀ་ཞེས་བྱ་བའི་ཆོ་ག་ལ་སྦྱིན་སྲེག་བྱ་བའི་མེ་ནི་མེ་ཉིད་ཅེས་བྱ་བའོ་ཞེས་པའོ། །པ་བ་ཀ་ནི་སྣ་ཚོགས་རྣམས་མེ་ཀུན་དུ་བཤད་པ་ལའོ་ཞེས་པ་ནི་གཟའ་སྐར་
ལ་སོགས་པའི་ལྷ་སྣ་ཚོགས་པ་ལ་སྦྱིན་སྲེག་བྱ་བའི་མེ་ནི་པ་བ་ཀ་ཞེས་བྱ་བ་ཞེས་པའོ། །ཚངས་པའི་མེ་ནི་ཁྱིམ་བདག་ལའོ་ཞེས་པ་ནི་ཁྱི་མ་བདག་གི་ཆོ་ག་སྦྱིན་སྲེག་བྱ་བའི་ཚེ་ན་ཚངས་པའི་མེ་ཞེས་བྱ་བའོ། །ཞི་བའི་མེ་ནི་སྦྱིན་པ་ལའོ་ཞེས་བྱ་བ་ནི་སྦྱིན་པའི་ཚེ་སྦྱིན་སྲེག་བྱ་བའི་མེ་ཞེས་བའོ། །གཉིས་སུ་དཀྵི་ན་ཞེས་བྱ་བ་ནི་ལྷོ་ཕྱོགས་ལ་ཡང་བྱ་སྟེ། ཚངས་པའི་མེ་དང་ཞི་བའི་མེ་གཉིས་ནི་ལྷོ་ཕྱོགས་ལོགས་སུ་བཞག་ནས་རྟག་ཏུ་གསོ་བའི་མེ་ཞེས་པའོ། །ཨ་བ་ནི་ཀ་ཞེས་བྱ་བའི་མེ་ཕྱུགས་བཅིངས་པ་ལ་ཡང་དེ་བཞིན་ནོ་ཞེས་པ་ནི་ཕྱུགས་གསད་དེ་ལྷ་ལ་ཡོན་འབུལ་བའི་སྦྱིན་སྲེག་བྱ་བའི་མེ་ཨ་བ་ཀ་ནི་ཀ་ཞེས་བྱའོ་ཞེས་པའོ། །འགྱོད་ཚངས་ལ་ཡང་དབྱེར་བྱེ་རི། །ཞེས་སྨོས་པ་ལ་སོགས་པར་འགྱུར་ཏེ། འགྱོད་ནས་མྱོས་པ་དེ་ལས་ཚངས་བར་བྱ་བའི་སྦྱིན་སྲེག་བྱ་བའི་མེ་ནི་པེ་ཙི་ཞེས་བྱ་བའོ། །བཙོས་པ་སྦྱིན་པ་ལ་ནི་ས་ཧ་ས་ཞེས་པ་ནི་ཟས་བཙོས་པ་སྦྱིན་པའི་ཆོ་ག་སྦྱིན་སྲེག་བྱ་བའི་མེ་ནི་ས་ཧ་ས་ཞེས་བྱའོ། །ཨདྱ་ས་དྷྱན་ལ་ཧ་བྷི་ར་ཞེས་པར་བྱ་ཞེས་པ་ནི་ཨིད་དི་སནྡྷྱ་ཞེས་བྱ་བའི་ཆོ་ག་ཧ་བི་ཞེས་བྱ་བའི་མེར་ཤེས་པར་བྱའོ། །སོ་བྷ་སཾ་སྟ་ལ་ཡང་དེ་བཞིན་ནོ། །ཞེས་པ་ནི་སོ་སཾ་སྟ་ཞེས་པ་ནི་བྱ་བའི་ཆོ་ག་ལ་བསྲེག་པས་མིན་ན་ནི་དེ་ཞེས་བྱ་བའོ་ཞེས་པའོ།། གང་སྦྱིན་པ་སྨྲྀ་ཌ་ཞེས་བྱ་བའོ་ཞེས་པ་ནི་སྦྱིན་སྲེག་གི་སྔོན་རོལ་དུ་རྫས་ལས་གང་བའི་སྦྱིན་སྲེག་གསུམ་བྱ་བའི་མེ་སྨྲྀ་སྟ་ཞེས་བྱ་བའོ་ཞེས་པའོ། །ཞི་བ་ལ་ད་རུ་ན་ནི་ཐར་ཞེས་པ་ནི་ཞི་བའི་སྦྱིན་སྲེག་ད་རུ་ན་ཞེས་བྱ་བའི་མེ་མཐར་རོ་ཞེས་པའོ། །བས་མཐའི་མེ་གཤིན་རྗེ་ཞེས་པ་ནི་མེ་ཤི་བའི་ཚེ་སྦྱིན་སྲེག་བྱ་བའི་ཚེ་མེའི་གཤིན་རྗེ་ཞེས་བྱའོ་ཞེས་པའོ། །རྒྱས་ལ་སྟོབས་སྦྱིན་དེ་བཞིན་ནོ། །ཞེས་པ་ནི་རྒྱས་པའི་སྦྱིན་སྲེག་གི་མེ་ནི་སྟོབས་སྦྱིན་པའོ་ཞེས་པའོ། །མངོན་པར་སྤྱད་པ་ཐམས་ཅད་ལས་ཁྲོ་བོའི་མེ་མངོན་དུ་བསྒྲགས་པ་ཞེས་པ་ནི་མངོན་པར་སྤྱད་པའི་སྦྱིན་སྲེག་ལ་ནི་ཁྲོ་བོའི་མེའོ་ཞེས་པའོ། །མེ་ནི་འདོད་སྐྱེས་ཞེས་བྱ་བ་ལ་དབང་གི་དོན་དེ་ལ་དེ་ལ་དེ་བཤད་དོ་ཞེས་བྱ་བ་ནི་དབང་དུ་བྱ་བའི་སྦྱིན་སྲེག་ལ་འདོད་སྐྱེས་ཞེས་པ་ནི་མེ་དེ་བཤད་དོ་ཞེས་པའོ། །ནགས་བསྲེགས་པའི་མེ་ནི་ཕོ་ཉའི་མེ་ཞེས་པ་ནི། གང་ནགས་སྲེག་པར་བྱེད་པའི་མེ་ནི་ཕོ་ཉ་ཞེས་བྱའོ་ཞེས་པའོ།།
ཁོང་པའི་མེ་ནི་ཛ་ཏི་ཏ་ར་ཞེས་པ་ནི་ཁོང་ནད་པ་ཁ་ཟས་ལ་སོགས་པ་འཇུ་བར་བྱེད་པའི་མེ་ནི་ཛ་ཏིར་ཞེས་བྱའོ། །ཤ་ཟ་ནི་བྷཀྵ་ཡིན་ཞེས་པ་ནི་ཤ་ཟའི་མེ་ནི་བྷཀྵ་ཞེས་བྱའོ་ཞེས་པའོ། །རྒྱ་མཚོ་ན་ནི་བྷ་ང་བ་ཡི་ཁ། །ཞེས་པ་ནི་བྷ་ཌ་པ་ཞེས་བྱ་བའི་མེ་ནི་རྒྱ་མཚོ་ན་གནས་པའི་ཞེས་པའོ། །འཇིག་ཚེ་འབྱུང་བའི་ཞེས་བྱ་བ་ནི། དུས་མཐའི་མེ་ཞེས་པ་སྒྲས་པའོ། །ཞེས་པ་ནི་བསྐལ་པ་ལ་སོགས་པས་འཇིག་རྟེན་འཇིག་པའི་ཚེ་མེ་ནི་འབྱུང་བ་ཞེས་བྱ་སྟེ་དེ་ཡང་དུས་མཐའི་མེ་ཞེས་བསྒྲགས་པའོ། །འདི་རྣམས་མདོ་རུ་སྨྲས་པ་ནི། དཔའ་བོ་ཁྱོད་ལ་མེ་རྣམས་ཏེ། །སྒྲ་དང་ཐོས་པ་ཀུན་སྤྱོད་པས། །སྨྲས་པ་ཚངས་པའི་བུ་རྣམས་ཏེ། །བཞི་བཅུ་རྩ་བཞི་འདི་རྣམས་ནི། །ང་ཡིས་དེ་ཚེ་བསྒྲགས་པ་ཡིན། །ཞེས་པ་ནི་འདི་རྣམས་མདོར་ངས་ཁྱོད་ལ་སྨྲས་ཏེ། ང་འབའ་ཞིག་གིས་བཤད་པ་མ་ཡིན་གྱི་སྨྲང་ཐོས་པས་སྤྱད་བ་རྣམས་ཀྱིས་ཀྱང་ཚངས་པའི་བུ་མེ་འདི་རྣམས་བཤད་དེ་ཚངས་པ་ང་ལ་དྲིས་པ་དེའི་ཚེ་ངས་མེ་འདི་རྣམས་བསྟན་ཏོ་ཞེས་པའོ། །དེ་ལ་གང་མེ་ནི་ང་རྒྱལ་ཅན་རང་བྱུང་ཞེས་པ་ནས་པར་ཤ་སམྦྷི་དོ་ནི་ཨ་ཐར་པ་ནིའི་བུ་སྟེ། པུསྐ་རིའི་རྒྱ་མཚོ་ན་བར་གྲགས་པ་ཞེས་པ་ནི་བར་དུ་མེ་འདི་རྣམས་སྐྱེས་པའི་རབས་བསྟན་པའོ། །རླུང་ཞེས་བྱ་བའི་མེ་ཡང་ནི།། མངལ་དུ་འཇུག་པ་བཤད་པའོ། །ཞེས་པ་ནས། འདོད་སྐྱེས་ཞེས་པའི་མེ་ཡང་ནི། །དབང་གི་དོན་ལ་དེ་བཤད་དོ། །ཞེས་པའི་བར་དུ་ལས་རྣམས་ལ་མེའི་རྒྱུས་བསྟན་པའོ། །ནགས་སྲེག་པ་ནི་ཕོ་ཉའི་མེ། །ཞེས་པ་ནས། འཇིག་ཚེ་ཀུན་འབྱུང་ཞེས་པ། དུས་མཐའི་མེ་ཞེས་ཀུན་དུ་བསྒྲགས།། ཞེས་པའི་བར་དུ་མེ་རྣམས་ཀྱི་ངང་ཚུལ་ལས་རྒྱུས་བསྟན་པ་སྟེ་དེ་རྣམས་བྲམ་ཟེ་ལ་སོགས་པ་འཇིག་རྟེན་པའི་གཞུང་ལས་གྲགས་ཤིང་འཇིག་རྟེན་པའི་ལས་བྱེད་པའོ། །དེ་ལ་གསང་བའི་བདག་པོ་མེ་རྣམས་ཀྱི་རང་བཞིན་མི་ཤེས་པར་གང་སྦྱིན་སྲེག་བྱེད་པ་ནི་གང་སྦྱིན་སྲེག་བྱས་པ་ཡང་མ་ཡིན་ནོ་ཞེས་བ་ནི་མེ་རྣམས་ཀྱི་རྒྱུས་མི་ཤེས་ན་ཆོ་ག་དང་འགལ་བས་སྦྱིན་སྲེག་བྱས་པར་མི་ཆུད་དོ་ཞེས་པའོ། །འདུས་བྱས་པ་ཡང་མ་ཡིན་ནོ། །ཞེས་པ་ནི་སྦྱིན་སྲེག་གི་ཆོ་ག་འཇག་མ་བཏིང་བ་ལ་སོགས་པའི་འདུས་བྱས་པ་རྣམས་ཀྱང་བྱས་པར་མི་ཆུད་དོ་ཞེས་པའོ། །ལས་ཀྱི་འབྲས་བུར་ཡང་མི་འགྱུར། །
ཞེས་པ་ནི་གང་གི་ཕྱིར་སྦྱིན་སྲེག་བརྩམས་པའི་ལས་དེའི་འབྲས་བུར་མི་འགྱུར་རོ་ཞེས་པའོ། །རང་བྱང་ཆུབ་ཏུ་མངོན་པར་སངས་རྒྱས་ནས་ནི་མེ་རྣམ་པ་བཅུ་གཉིས་སྨྲས་སོ་ཞེས་པ་ནི་བཅོམ་ལྡན་འདས་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྲམ་ཟེའི་སྨྲང་ལས་བྱུང་བའི་མེ་གོང་དུ་སྨོས་པ་རྣམས་བསྟན། མངོན་པར་སངས་རྒྱས་ནི་འཇིག་རྟེན་ལས་འདས་པའི་སྦྱིན་སྲེག་ལ་སོགས་པ་བྱ་བའི་ཕྱིར་མེ་རྣམ་པ་བཅུ་གཉིས་པོ་འདི་སྨྲས་སོ་ཞེས་པའོ། །དེ་ཡང་གང་ཞེ་ན་ཞེས་པ་ལས་ཡེ་ཤེས་རྫོགས་པའི་ཤེས་བྱའི་ཞེས་པའི་བར་དུ་རྒྱས་པའི་སྦྱིན་སྲེག་གི་མེའི་མཚན་ཉིད་གསུངས་པ་སྟེ། ཡེ་ཤེས་ཀྱི་མེ་ཞེས་པ་ནི་ཡེ་ཤེས་ཀྱི་སེམས་ཅན་ཡིན་པའི་ཕྱིར་རོ། །འཛིན་ཞེས་པ་ནི་བྱ་བ་གཉིས་པོ་དེ་ཞེས་བྱ་བ་ནས། བགྲང་ཕྲེང་དང་ནི་སྤྱི་བླུགས་འཆང༌། །ཞེས་པའི་བར་དུ་ཞི་བའི་སྦྱིན་སྲེག་གི་མེའི་མཚན་ཉིད་གསུངས་པའོ། །གསུམ་པོ་དེ་ནི་རླུང་ཞེས་བྱ། །ཁ་དོག་གནག་ལ་སྣུམ་མེད་པའོ། །ཞེས་པ་ནི་རླུང་ཞེས་པའི་མེ་དེ་དང་པོ་ཞུགས་མ་ཐག་ཏུ་མེ་སྤར་བའི་ཚེ་གཉེར་བའོ། །བཞི་པོ་དམར་པོ་ཞེས་བྱ་སྟེ་ནང་ཕན་ཚུན་འོད་དང་འདྲ་ཞེས་པ་ནི་དབང་གི་སྦྱིན་སྲེག་གི་མེའོ། །ལྔ་པོ་མི་ཏ་ཞེས་པ་ཁམ་པ་ལ་བྱ་སྟེ། སྐྲ་ཅན་དེ་བཞིན་ཏེ། མགྲིན་པ་རིང་ལ་མདངས་པོ་ཆེ། །ཀུན་དུ་རྗེས་སུ་བརྩེ་བ་ཡིན། །ཞེས་པ་ནི་གང་བའི་སྦྱིན་སྲེག་བྱ་བའི་མེའོ། །དྲུག་པོ་ཁྲོ་ཅན་ཞེས་སུ་བྱ། །ཞེས་པ་ནས། མཆེ་བ་བཞི་ལྡན་མཐུ་ཚེ་བའོ། །ཞེས་པའི་བར་དུ་མངོན་པར་སྤྱད་པའི་སྦྱིན་སྲེག་གི་མེའི་མཚན་ཉིད་དུ་གསུངས་པའོ། །བདུན་པོ་ལྟ་བ་ཞེས་བྱ་བ་སྟེ། སྡུག་པའི་ཁ་དོག་ཀུན་དང་ལྡན་པ་ཞས་བྱ་བ་ནས། བཅུ་གཉིས་སྨྲས་བྱེད་པ་ཞེས་བྱ་བ་སེམས་ཅན་ཀུན་གྱི་སྨྲས་བྱེད་པའོ་ཞེས་པའི་བར་དུ་མེ་ལྷག་མ་ལྔ་པོ་རྣམས་ཀྱི་མཚན་ཉིད་ཉི་ཚེ་སྨོས་པའོ། །དེ་ལྟར་ན་གསང་བའི་བདག་པོ་མེའི་གཟུགས་སུ་བྱིན་གྱིས་བརླབས་ཏེ་ཞེས་པ་ལ་སོགས་པ་ནི་མེ་རྣམས་བཤད་པའི་ཞར་ལ་སྦྱིན་སྲེག་བཤད་པ་ནི་མེའི་གཟུགས་སུ་བདག་བྱིན་གྱིས་བརླབས་ལ་ཞེས་པ་ནི་ཞི་བ་དང་རྒྱས་པ་གང་ཡང་རུང་བའི་མེ་ལས་བྱེད་པ་དེའི་ཕྱིར་ཁ་དོག་གཉིས་ཀར་བསྒྱུར་རོ་ཞེས་པ་སྟེ། དེ་བས་ན་གསུངས་པ་བདག་དང་རྫས་ཀྱང་མེའི་རང་བཞིན་དུ་སྦྱར་རོ་ཞེས་པའོ། །འདི་ནི་ཕྱི་རོལ་སྦྱིན་སྲེག་གོ །ཞེས་བ་ནི་དེ་ལྟར་བདག་དང་
མེ་དང་རྫས་གསུམ་ཆར་དུ་ལྡན་པ་དེ་ནི་ཕྱི་རོལ་གྱི་སྦྱིན་སྲེག་གོ་ཞེས་པའོ། །ནང་གི་སྦྱིན་སྲེག་ཀྱང་གསང་བའི་བདག་པོ་རང་བཞིན་གཅིག་པ་ཞེས་པ་ནི་སྟོང་པ་ཉིད་ཀྱི་རང་བཞིན་གཅིག་པུའོ་ཞེས་པ་སྟེ་གནས་རྣམ་གཅིག་ཏུ་བསྡུ་ཞེ་ན། གསུངས་པ་རྣམ་པ་གསུམ་དུ་ལྡན་པ་གནས་གསུམ་གཅིག་ཏུ་བྱ་བའི་སྦྱོར་བ་ནི་ནང་གི་སྦྱིན་སྲེག་གོ་ཞེས་པ་སྟེ། བདག་དང་མེ་དང་རྫས་གསུམ་གཅིག་ཏུ་ལྡན་པའི་གནས་གསུམ་པོ་དེ་སྟོང་པ་ཉིད་ཀྱི་རང་བཞིན་གཅིག་ཏུ་བྱའོ་ཞེས་པ་སྟེ། དེ་ཡང་འོག་ནས་འགྲེལ་ཏོ། །བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པ་དེ་ནི་གསང་བའི་བདག་པོ་ཞི་བའོ་ཞེས་པ་ནི་ཞི་བའི་སྦྱིན་སྲེག་བྱ་བ་ལ་བྱམས་པ་དང་སྙིང་རྗེ་ལྷག་པར་བསྐྱེད་དོ་ཞེས་པའོ། །དགའ་བ་དང་ལྷན་ཅིག་ཏུ་ལྡན་ཞེས་པ་རྒྱས་པའོ་ཞེས་པ་ནི་རྒྱས་པའི་སྦྱིན་སྲེག་ལ་དགའ་བ་ལྷག་པར་བསྐྱེད་དོ་ཞེས་པའོ། །ཁྲོས་པའོ་དབང་དུ་བྱས་ཏེ་ཞེས་པ་ནས་ཁོར་བ་ཐུལ་བས་བྱའོ་ཞེས་པའི་བར་དུ་མངོན་པར་སྤྱོད་པའི་སྦྱིན་སྲེག་གསུངས་པ་སྟེ། ཁྲོས་པར་བྱ་བ་ཡང་ལྡང་བར་བྱ་བ་དང་བཅས་པ་མ་ཡིན་ཏེ། དེ་བས་ན་གསུངས་པ་ཁྲོས་པ་ཐུལ་བས་བྱའོ་ཞེས་པའོ། །རླུང་གི་མེ་ནི་ཞབས་སུ་གཞག་པར་བྱའོ་ཞེས་པ་ནི་དང་པོར་ཞུགས་ཐབ་ཏུ་མེ་སྤར་བའི་ཚེ་རླུང་གི་མེ་གཉེར་ནས་རླུང་གཡབ་ཀྱིས་མེ་སྦར་བར་བྱའོ་ཞེས་པའོ།། དེ་ལྟར་ན་གསང་བའི་བདག་པོ་ཇི་ལྟར་ཡོངས་སུ་བསྒྲགས་པའི་གནས་དེ་དང་དེ་དག་ཏུ་གང་རིགས་པ་དང་ཇི་ལྟར་རིགས་པར་སྦྱིན་རིགས་པར་སྦྱིན་སྲེག་བྱའོ་ཞེས་པ་ནི་ཞི་བ་དང་རྒྱས་པ་ལ་སོགས་པའི་གནས་ཇི་སྐད་དུ་གསུངས་པ་དེ་དག་གར་རིགས་པར་ཞི་བ་ལ་སོགས་པའི་སྦྱིན་སྲེག་རྣམས་བྱའོ་ཞེས་པའོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ་ཞེས་པ་ནས། ཇི་ལྟར་བསམས་པ་བཀའ་སྩལ་དུ་གསོལ་ཞེས་པའི་བར་དུ་གོང་དུ་སྦྱིན་སྲེག་མདོར་སྨྲས་པ་དེ་ཞུགས་ཐབ་ཇི་ལྟར་བྱ་བ་དང༌། མེ་བསང་བའི་ཕྱིར་ཆུས་གཏོར་བ་ཇི་ལྟར་གཏོར་བ་དང་ཞུགས་ཐབ་ཀྱི་མཐའ་འཇག་མ་ཇི་ལྟར་གདིང་བ་དང་ཞུགས་ཐབ་ཏུ་མེ་ཇི་ལྟར་གཞུག་པ་ཞུས་པའོ། །དེ་ལ་གསང་བའི་བདག་པོ་ཞུགས་ཐབ་ནི། །ཀུན་དུ་ཁྲུ་གང་ཙམ་ལ་ནི། །ཁ་ཁྱེར་སོར་བཞི་ཙམ་པ་སྟེ། །རྡོ་རྗེའི་མཚན་གྱིས་གདབ་པའོ། །ཞེས་པ་ནི། ཇི་ལྟར་ཞུགས་ཐབ་བསམ་པར་བགྱི།།
ཞེས་ཞུས་པའི་ལན་ཏེ་ཞུགས་ཐབ་ཁོ་ར་ཁོར་ཡུག་ཏུ་ཁྲུ་གང་ཙམ་ལ་ཁ་ཁྱེར་ཡང་ཆུ་ཞེང་དུ་བཅས་པར་སོར་བཞི་པར་བྱ་སྟེ། ཞབས་སུ་རྡོ་རྗེའི་མཚན་མས་བཏབ་པར་བྱའོ་ཞེས་པའོ། །འཇག་མ་རློན་བ་གདིང་བྱ་བ། །ཞུགས་ཐ་བ་དག་ཀྱང་བསྐོར་བ་སྟེ། །རྩེ་མོ་རྩ་བས་ནོན་པར་བྱ།། རྩ་བ་རྩེ་མོ་དཀྲི་བར་བྱ། །ཞེས་པ་ནི། འཇག་མ་ཇི་ལྟར་གདིང་བར་བགྱི། །ཞེས་ཞུས་པའི་ལན་ཏེ། གཏོར་མ་འདི་རུ་གཡས་ཕྱོགས་ནས། །འཇག་མ་བསྐོར་བ་བཞིན་དུ་བཤད། །ཅེས་པ་ནི། ཇི་ལྟར་མེ་ལས་གཏོར་བར་བགྱི། །ཞེས་པའི་ལན་ཏེ་མེ་བསང་བའི་ཕྱིར་ཆུས་གཏོར་བ་ཡང་འཇག་མ་བསྐོར་བའི་ཐབས་སུ་གཡས་ཕྱོགས་ནས་བསྐོར་ཞིང་གདབ་བོ་ཞེས་པའོ། །དྲི་དང་མེ་ཏོག་བདུག་པ་དག །སྨྲྀ་ཌའི་མེ་ལ་རབ་ཏུ་སྦྱིན། །ཞེས་པ་ནས། མཁས་པས་དེ་ལ་སྦྱིན་པར་བྱ། །ཞེས་པའི་བར་དུ་ཇི་ལྟར་བསམས་པ་བཀའ་སྩལ་དུ་གསོལ་ཞེས་ཞུས་པའི་ལན་ཏེ་ཞུགས་ཐབ་དེར་ཐོག་མར་མེ་ཏོག་ཅིག་བཞག་སྟེ། སྨྲྀ་ཌའི་མེ་གཉེར་བ་ལ་དྲི་དང་མེ་ཏོག་ལ་སོགས་པས་མཆོད་དེ། དེ་ནས་ཡང་ཆུས་གཏོར་ལ་གང་བའི་སྦྱིན་སྲེག་ལན་གསུམ་མེ་དེ་ཉིད་ཀྱི་སྔགས་ཀྱིས་བཏབ་སྟེ་སྦྱིན་ནོ་ཞེས་པའོ། །དེ་ནས་ཞི་བའི་སྦྱིན་སྲེག་གམ་རྒྱས་པའི་ཡང་ནི་རྣམ་པར་བྱའོ།། འདི་ནི་འཇིག་རྟེན་སྦྱིན་སྲེག་སྟེ་ཕྱི་རོལ་དུ་བཤད་པའོ་ཞེས་པ་ནི་ཇི་སྐད་དུ་སྨོས་པའི་རིམ་བཞིན་དུ་ཞུགས་ཐབ་ཀྱི་ཆོ་ག་བྱ་བ་དང༌། སྨྲྀ་ཌའི་མེ་ལ་གང་བའི་སྦྱིན་སྲེག་བྱིན་ཏེ་མེ་དེ་རང་གི་གནས་སུ་བཞག་ལ་དེ་ལས་ཞི་བའམ་རྒྱས་པའི་མེ་གང་ཡང་རུང་བ་གཉེར་ཏེ། ཞི་བ་ལ་སོགས་པའི་སྦྱིན་སྲེག་གམ་ཅི་འདོད་པ་བྱ་སྟེ། དེ་ནི་ཞུགས་ཐབ་དང་མེ་ལ་སོགས་པ་ཕྱི་རོལ་གྱི་དངོས་པོ་རྣམས་ལ་དམིགས་པས་འཇིག་རྟེན་པའི་སྦྱིན་སྲེག་ཅེས་གསུངས་པའོ། །ནང་གི་སྦྱིན་སྲེག་ནི་ཞེས་པ་ནས། དེའི་ནང་གི་སྦྱིན་སྲེག་ཅེས་དཔའ་བོ་ལ་བཤད་པའོ་ཞེས་པའི་བར་དུ་ནང་གི་སྦྱིན་སྲེག་བཤད་པ་སྟེ། དེ་ཡང་བདག་ཉིད་ཀྱི་ལྔ་ཕུང་སྟོང་པ་ཉིད་དུ་བཤིག་སྟེ། ཕྱི་རོལ་གྱི་ཞུགས་ཐབས་ལ་སོགས་པ་ཡུལ་གྱི་གཟུགས་རྣམས་སྟོང་པར་བཤད་དེ། དེ་བཞིན་སྒོ་དྲུག་གི་ས་རྣམ་པར་ཤེས་པ་འཕྲོ་བ་རྣམས་ཀྱང་སོ་སོར་བཤིག་ནས། མི་འཕྲོ་བར་བཀག་ནས་དེ་ལྟར་འཇིག་
ཅིང་འགོག་པར་བྱེད་པའི་བྱང་ཆུབ་ཀྱི་སེམས་དེ་ཡང་མི་འཕྲོ་བའི་ཤེས་རབ་ཀྱིས་བཀག་པ་རྣམ་པར་མི་རྟོག་པའི་ཏིང་ངེ་འཛིན་ལ་གནས་པར་བྱ་བ་ནི་ནང་གི་སྦྱིན་སྲེག་སྟེ། དེ་བས་ན་གསུངས་པ། མི་འཕྲོ་བའི་ཤེས་རབ་ཀྱི་རླུང་གིས་མེ་གོགས་ལ་ཡིད་མེ་ལ་བསྲེགས་ཤིང་བཤིགས་ཏེ། རླུང་གིས་མེ་གོགས་ལ་ཞེས་བ་ནི་སྲོག་དང་རྩོལ་བས་རབ་ཏུ་བསྡམས་པ་ལ་ཞེས་པའོ། །ཡིད་མེ་ལ་སྲེགས་ཤིག་ཅེས་པ་ནི་སེམས་མི་གཡོ་བར་སྲེག་གོ་ཞེས་པའོ། །དེ་ནས་བཅོམ་ལྡན་འདས་ཀྱིས་འཁོར་འདུས་པ་ཐམས་ཅད་ལ་བཀའ་སྩལ་བ། བདག་ཡོད་པར་སྤྱད་པས་ཁྱེད་ཀྱིས་ཆོས་ཀྱི་གཞུང་འདི་ལ་སྤྱད་པར་བྱའོ་ཞེས་པ་ནི་ཆོས་ཀྱི་གཞུང་འདི་ནི་སྣོད་དུ་མ་གྱུར་པའི་སེམས་ཅན་རྣམས་ལས་གྱ་ཚོམ་དུ་མི་སྦྱིན་པར་བྱ་སྟེ། དེ་པས་ན་གསུངས་པ་དབང་པོ་ཡོངས་སུ་མ་རྟོགས་པར་སུ་ལ་ཡང་མི་སྦྱིན་པར་ངའི་བུ་རྣམས་མ་བརྟགས་པ་ལ་ཞེས་པ་སྟེ། ངའི་བུ་རྣམས་ཀྱི་མཚན་ཉིད་འོག་ནས་ཇི་སྐད་དུ་སྨོས་པ་རྣམས་ལ་ནི་དབང་པོ་བརྟག་མི་དགོས་པར་སྦྱིན་གྱིས། དེ་ལས་གཞན་པ་རྣམས་ལ་ཆོས་ཀྱི་གཞུང་ཟབ་མོ་འདི་ཤེས་རབ་དང་ལྡན་ནམ་མི་ལྡན་པ་དང༌། དབང་པོ་རྣམས་འདོད་ཆགས་ལ་སོགས་པའི་ཡུལ་རྣམས་ལ་འཕྲོ་བ་ཡིན་ནམ་མ་ཡིན་བརྟགས་ཏེ་ཤེས་པར་བྱས་ནས་དེ་ལ་སོགས་པའི་སྐྱོན་རྣམས་མེད་ཅིང་སྣོད་དུ་གྱུར་ན་གདོད་བྱིན་ཅིག་ཅེས་པ་སྟེ། བློ་ཆུང་ཞིང་མ་དད་པ་ལ་ཟབ་ཅིང་རྒྱ་ཆེ་བའི་ཆོས་བཤད་ན་བྱང་ཆུབ་སེམས་དཔའི་འཁྲུལ་པའོ་ཞེས་འབྱུང་བའི་ཕྱིར་རོ། །དེ་ནས་དེའི་ཚེ་ཀུན་གྱིས་མཆོད་དེ་དེ་བཞིན་གཤེགས་པ་ལ་ཕྱག་བྱས་ནས་ཞེས་པ་ནས། ཆོས་ཀྱི་མིག་འདི་འཇིག་རྟེན་ན་ཡུན་རིང་ཀུན་དུ་གནས་པའི་ཕྱིར་རོ་ཞེས་པའི་བར་དུ་ཕྱག་ན་རྡོ་རྗེ་ལ་སོགས་པའི་འཁོར་དེ་རྣམས་ཀྱིས་རྣམ་པར་སྣང་མཛད་མངོན་པར་བྱང་ཆུབ་པ་རྣམ་པར་སྤྲུལ་པའི་བྱིན་གྱི་རླབས་ཀྱིས་ཆོས་ཀྱི་གཞུང་འདི་འཇིག་རྟེན་གསུམ་ན་མི་ཉམས་ཤིང་ཡུན་རིང་དུ་གནས་པའི་ཕྱིར། བཅོམ་ལྡན་འདས་ལ་བྱིན་གྱིས་བརླབ་པའི་སྔགས་ཀྱིས་བརླབ་བར་གསོལ་བ་སྟེ། སྔགས་ཀྱིས་འདི་བྱིན་གྱིས་བརླབས་ན་ཆོས་ཀྱི་གཞུང་འདི་བསྲུང་བར་འགྱུར་བའི་ཕྱིར་རོ། །རྣམ་པར་སྣང་མཛད་མངོན་པར་བྱང་ཆུབ་བ་རྣམ་པར་སྤྲུལ་པའི་བྱིན་གྱི་རླབས་ཀྱིས་རྒྱུད་ཆེན་པོ་སློབ་དཔོན་སངས་རྒྱས་གསང་བས་ཕྱིན་ཅི་མ་ལོག་པར་བཤད་པ་རྫོགས་སོ།། །།