རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཀྱི་ཚིག་འགྲེལ།
གཞོན་ནུ་དཔལ།
རྒྱ་གར་སྐད་དུ། བཻ་རོ་ཙ་ནཱ་བྷི་སཾ་བོ་དྷི་ཏནྟྲ་སྱ་སད་བྲྀཏྟི་ནཱ་མ། བོད་སྐད་དུ། རྣམ་པར་སྣང་མཛད་མངོན་པར་རྫོགས་པ་བྱང་ཆུབ་པའི་རྒྱུད་ཀྱི་ཚིག་འགྲེལ་ཞེས་བྱ་བ། བཅོམ་ལྡན་འདས་ཀྱིས་ཐོག་མ་ཐམས་ཅད་མཁྱེན་པའི་ཡེ་ཤེས་བརྙེས་ནས། ཐམས་ཅད་མཁྱེན་པའི་ཡེ་ཤེས་དེས་འདུལ་བའི་འགྲོ་བ་རྣམ་པ་གཉིས་སུ་གཟིགས་ཏེ། དམིགས་པ་དང་བཅས་པ་ལ་མོས་པ་གཙོ་བོར་གྱུར་པ་དང༌། ཟབ་ཅིང་རྒྱ་ཆེ་བ་ལ་མོས་པ་གཙོ་བོར་གྱུར་པའོ། །འདུལ་བའི་འགྲོ་བ་དེ་རྣམས་ལ་ཡང་སྤྱོད་པ་རྣམ་པ་གཉིས་ཏེ། ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པ་དང༌། སྔགས་ཀྱི་སྒོ་ནས་འཇུག་ཅིང་སྤྱོད་པའོ། །དེ་ལ་ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པ་ལ་ཡང་རྣམ་པ་གཉིས་ཏེ། དམིགས་པ་དང་བཅས་པ་ལ་མོས་པ་གཙོ་བོར་གྱུར་པ་དང༌། ཟབ་ཅིང་རྒྱ་ཆེ་བ་ལ་མོས་པ་གཙོ་བོར་གྱུར་པ་སྟེ། དེ་ལ་ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པའི་གདུལ་བའི་འགྲོ་བ་དམིགས་པ་དང་བཅས་པ་ལ་མོས་པ་གཙོ་བོར་གྱུར་པ་རྣམས་ཀྱི་དོན་དུ་འདུལ་བ་དང༌། མདོ་སྡེ་དང༌། མངོན་པའི་ཆོས་རྣམས་དང༌། དེ་བཞིན་དུ་གཞན་ཡང་ཐེག་པ་ཆེན་པོའི་མདོ་སྡེ་ཁྱིམ་བདག་དཔའ་བོ་ལ་སོགས་པ་བསྟན་ཏོ། །དེ་བཞིན་དུ་ཟབ་ཅིང་རྒྱ་ཆེ་ལ་མོས་པའི་འདུལ་བའི་འགྲོ་བ་རྣམས་ཀྱི་དོན་དུ་ཟབ་ཅིང་རྒྱ་ཆེ་བའི་མདོ་སྡེ་སྡོང་པོ་བཀོད་པ་དང༌། ས་བཅུ་དང་ཏིང་ངེ་འཛིན་གྱི་རྒྱལ་པོ་ལ་སོགས་པ་རྣམས་བསྟན་ཏོ། །དེ་བཞིན་དུ་སྔགས་ཀྱི་སྒོ་ནས་འཇུག་ཅིང་སྤྱོད་པའི་གདུལ་བའི་འགྲོ་བ་རྣམས་ལ་ཡང་རྣམ་པ་གཉིས་ཏེ། དམིགས་པ་ངང་བཅས་པ་ལ་མོས་པ་གཙོ་བོར་གྱུར་པ་དང༌། ཟབ་ཅིང་རྒྱ་ཆེ་བ་ལ་མོས་པ་གཙོ་བོར་གྱུར་པ་སྟེ། དེ་ལ་དམིགས་པ་དང་བཅས་པ་ལ་མོས་པ་གཙོ་བོར་གྱུར་པ་རྣམས་ཀྱི་དོན་དུ། འཕགས་པ་ལེགས་པར་གྲུབ་པའི་རྒྱུད་དང༌། རིག་འཛིན་གྱི་སྡེ་སྣོད་ལ་སོགས་པ་བྱ་བའི་རྒྱུད་རྣམས་བསྟན་ཏོ། །དེ་བཞིན་དུ་ཟབ་ཅིང་རྒྱ་ཆེ་བས་འདུལ་བའི་འགྲོ་བ་རྣམས་ཀྱི་དོན་དུ་འཕགས་པ་དེ་ཁོ་ན་ཉིད་བསྡུས་པའི་རྒྱུད་ལ་སོགས་པ་བསྟན་ཏེ། དམིགས་པ་དང་བཅས་པ་ལ་གཙོ་བོར་གྱུར་པ་ཞེས་པ་ཡང་ཟབ་ཅིང་རྒྱ་ཆེ་བ་ལ་མ་མོས་ཤིང་མི་སྤྱོད་པ་མ་ཡིན་མོད་ཀྱི། དམིགས་པ་དང་བཅས་པ་ལ་སྤྱོད་པར་མོས་པའི་ཤས་ཆེ་བ་ལ་བྱའོ། །ཟབ་ཅིང་རྒྱ་ཆེ་བ་ལ་མོས་པ་
གཙོ་བོར་གྱུར་པ་རྣམས་ལ་ཡང་དམིགས་པ་དང་བཅས་པའི་སྤྱོད་པ་མ་ཡིན་མོད་ཀྱི། ཟབ་ཅིང་རྒྱ་ཆེ་བ་ལ་སྤྱོད་པའི་ཤས་ཆེ་བ་སྟེ། དེ་ལྟ་བུ་ཡིན་པར་ནི་གསལ་པོར་འཕགས་པ་དེ་ཉིད་བསྡུས་པ་ལ་སོགས་པ་ནང་གི་རྣལ་འབྱོར་གཙོ་བོར་གྱུར་པ་མ་ཡིན་མོད་ཀྱི། ཕྱིའི་སྤྱོད་པ་རྣམས་ཀྱང་མེད་པ་མ་ཡིན་ནོ། །དེ་བཞིན་དུ་བྱ་བའི་རྒྱུད་རྣམས་ཀྱང་ཕྱིའི་སྤྱོད་པ་གཙོ་བོར་གྱུར་པ་ཡིན་མོད་ཀྱི། ནང་གི་སྤྱོད་པ་ཡང་མེད་པ་མ་ཡིན་ཏེ། རིག་འཛིན་གྱི་སྡེ་སྣོད་ལ་སོགས་པར་རྣམ་པར་ཐར་པའི་སྒོ་རྣམ་པ་གསུམ་ལ་གཞོལ་བ་ལ་སོགས་པ་གསུངས་པ་དང༌། དེ་བཞིན་དུ་ཕ་རོལ་ཏུ་ཕྱིན་པའི་སྒོ་ནས་འཇུག་ཅིང་སྤྱོད་པ་རྣམས་ལ་ཡང་ཇི་ལྟར་རིགས་པར་སྦྱར་བར་ཤེས་པར་བྱའོ། །དེ་བཞིན་དུ་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པའི་རྒྱུད་འདི་ཡང་ཐབས་དང་ཤེས་རབ་གཙེ་བོར་གྱུར་པ་རྣལ་འབྱོར་གྱི་རྒྱུད་ཡིན་མོད་ཀྱི། བྱ་བ་ལ་མོས་པའི་གདུལ་བྱའི་འགྲོ་བ་རྣམས་གཟུང་བའི་ཕྱིར་བྱ་བའི་རྒྱུད་ཀྱི་རྗེས་སུ་མཐུན་པའི་སྤྱོད་པ་དག་ཀྱང་བསྟན་པས་བྱ་བའི་རྒྱུད་དམ། གཉིས་ཀའི་རྒྱུད་ལྟ་བུར་སོ་སོར་བརྟགས་ཤིང་གྲགས་སོ། །དེ་ལ་བཅོམ་ལྡན་འདས་ཀྱི་རྒྱུད་འདི་ཡང་གདུལ་བའི་འགྲོ་བ་རབ་དང་འབྲིང་དང་ཐ་མ་སྟེ་རྣམ་པ་གསུམ་གྱི་དོན་དུ་བསྟན་ཏེ། མགོ་སྨོས་པས་གོ་བ་དང༌། དོན་རྣམ་པར་ཕྱེ་བས་གོ་བ་དང༌། ཚིག་ལྷུར་ལེན་པའི་གདུལ་བའི་འགྲོ་བ་རྣམས་སོ། །དེ་ལ་མགོ་སྨོས་པས་གོ་བ་ནི་ཤེས་རབ་མཆོག་ཏུ་རྣོ་ཞིང་ཐོས་པ་མང་བ་དང་ལྡན་པས་རྒྱུད་འདིའི་མཚན་དོན་དང་རྗེས་སུ་མཐུན་པ་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཞེས་བྱ་བའི་མཚན་ཙམ་ཐོས་པས་རྒྱུད་འདིའི་དོན་ཐམས་ཅད་གོ་བར་འགྱུར་ཏེ། རྣམ་པར་སྣང་མཛད་ཅེས་བྱ་བའི་ཚིག་གིས་བཅོམ་ལྡན་འདས་རྣམ་པར་སྣང་མཛད་ལོངས་སྤྱོད་རྫོགས་པའི་སྐུ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ཐམས་ཅད་མཁྱེན་པའི་རང་བཞིན་དུ་ཤེས་སོ། །མངོན་པར་རྫོགས་པར་བྱང་ཆུབ་པ་ཞེས་པ་ལ་མངོན་པར་བྱང་ཆུབ་པ་ནི་རང་གི་སེམས་ཡང་དག་པ་ཇི་ལྟ་བ་བཞིན་དུ་ཤེས་པ་སྟེ། དེ་ཡང་ཆོས་ཐམས་ཅད་སྟོང་པ་ཉིད་ནམ་མཁའ་ལྟ་བུའི་མཚན་ཉིད་དུ་ཐུགས་སུ་ཆུང་
པའོ། །རྣམ་པར་སྤྲུལ་པ་ཞེས་བྱ་བའི་ཚིག་གིས་ཀྱང་དེ་ལྟར་མངོན་བར་རྫོགས་པར་བྱང་ཆུབ་པ་ཉིད་ཀྱི་ཚེ་ན། སྔོན་གྱི་སྨོན་ལམ་གྱི་ཤུགས་ཀྱིས་ཆོས་ཉིད་ཀྱིས་ཐོབ་པ་ལྷུན་གྱིས་གྲུབ་པ་ཉིད་དུ་སྐུ་མི་ཟད་པའི་རྒྱན་གྱིས་སུས་ཀྱང་ཟིལ་གྱིས་མི་ནོན་པ་ཉིད་དུ་ཁམས་གསུམ་ཐམས་ཅད་དུ་ཁྱབ་པ་ལོངས་སྤྱོད་རྫོགས་པ་དང་སྤྲུལ་པའི་སྐུ་ལ་སོགས་པས་ཇི་ལྟར་སྣོད་དུ་གྱུར་པའི་སེམས་ཅན་གང་གིས་འདུལ་བའི་སྐུས་དོན་མཛད་པ་སྟེ། སངས་རྒྱས་ཀྱི་སྐུས་འདུལ་བའི་སེམས་ཅན་རྣམས་ལ་སངས་རྒྱས་ཀྱི་སྐུར་སྟོན་པ་ནས་ཉན་ཐོས་དང་རང་སངས་རྒྱས་དང་བརྒྱ་བྱིན་དང་ཚངས་པ་ལ་སོགས་པའི་གཟུགས་ཀྱིས་འདུལ་བའི་སེམས་ཅན་རྣམས་ལ་དེ་རྣམས་ཀྱི་ཚུལ་བསྟན་ཅིང་དོན་མཛད་པ་དང༌། དེ་བཞིན་དུ་གསུང་མི་ཟད་པའི་རྒྱན་གྱིས་ཀྱང་ཁམས་གསུམ་ཐམས་ཅད་དུ་སངས་རྒྱས་ཀྱི་གསུང་དམ་པས་ཁྱབ་པར་ཆོས་སྟོན་པ་དང༌། དེ་བཞིན་དུ་ཐུགས་མི་ཟད་པའི་རྒྱན་གྱིས་ཀྱང་རྣམ་པ་དང་བཅས་པའི་ཡིད་ལས་བྱུང་བའི་དབང་ཆེན་དང་ཆུའི་དཀྱིལ་འཁོར་ལ་སོགས་པའི་རྣམ་པར་བསྟན་པར་གོ་བའོ། །དེ་བཞིན་དུ་བྱིན་གྱིས་རློབ་པ་ཞེས་བྱ་བའི་ཚིག་གིས་ཀྱང་དེ་ལྟར་རྣམ་པར་སྤྲུལ་པ་སྐུ་གསུང་ཐུགས་མི་ཟད་པའི་རྒྱན་གྱིས་ཁམས་གསུམ་ཐམས་ཅད་དུ་ཁྱབ་པར་བསྟན་པ་དེ་ནི་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའི་ཡོངས་སུ་དག་པ་རྣམས་ཀྱི་སྤྱོད་ཡུལ་དུ་གྱུར་གྱི། གདུལ་བའི་འགྲོ་བ་འོག་མ་རྣམས་ཀྱི་སྤྱོད་ཡུལ་དུ་མ་གྱུར་པས། སྐུ་ལ་སོགས་པ་མི་ཟད་པའི་རྒྱན་དེ་ཉིད་གདུལ་བའི་འགྲོ་བ་དེ་རྣམས་ཀྱི་དོན་དུ་རྒྱུད་འདིར་དཀྱིལ་འཁོར་དང་སྔགས་དང་ཕྱག་རྒྱའི་སྒོ་ནས་ལུས་ངག་ཡིད་ཀྱི་མཚན་མར་གྱུར་པ་བསྟན་པ་སྟེ། བྱིན་གྱིས་རློབ་པ་ཞེས་པ་ནི་དཀྱིལ་འཁོར་དང་སྔགས་དང་ཕྱག་རྒྱའི་སྒོ་ནས་ལུས་ངག་ཡིད་གསུམ་གྱི་ཆ་ལུགས་དང་རང་བཞིན་དུ་ལྷག་པར་གཞག་ཅེས་པའི་དོན་ཏོ། །དེ་ལྟར་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཞེས་པ་དོན་དང་རྗེས་སུ་མཐུན་པའི་མཚན་ཙམ་གྱིས་མགོ་སྨོས་པས་གོ་བའི་གདུལ་བྱ་རྣམས་ཀྱིས་དོན་འདི་ལྟ་བུར་གོ་སྟེ། དེ་དག་གི་དོན་དུ་རྒྱུད་འདིའི་མཚན་ཙམ་སྨོས་པར་ཤེས་པར་བྱའོ། །དེ་ལྟར་ཤེས་པ་འབའ་ཞིག་མ་ཡིན་གྱི།
གཞན་ཡང་རྒྱུད་འདིའི་འབྲེལ་པ་དང༌། བརྗོད་བར་བྱ་བ་བསྟན་པ་དང་དགོས་པ་ཡང་བསྟན་པར་ཤེས་པར་བྱ་སྟེ། རྒྱུད་འདི་ནི་བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་གྱི་དཀྱིལ་འཁོར་སྐུ་མི་ཟད་པ་ལ་སོགས་པའི་རྒྱུད་དང་འབྲེལ་པར་བལྟ་སྟེ། རང་བཞིན་གྱི་དཀྱིལ་འཁོར་འདི་ནི་རྒྱུད་འདིའི་རྒྱུ་ཡིན་ལ་རྒྱུད་འདི་ནི་དེའི་འབྲས་བུར་ཤེས་པར་བྱ་སྟེ་དེ་ནི་འབྲེལ་པའོ། །དེ་བཞིན་དུ་རྒྱུད་འདིར་དཀྱིལ་འཁོར་དང་སྔགས་དང་ཕྱག་རྒྱའི་སྒོ་ནས་ལུས་དང་ངག་དང་ཡིད་ཇི་ལྟབ་བཞིན་དུ་བསྟན་པས་རང་བཞིན་གྱི་དཀྱིལ་འཁོར་གྱི་ཚུལ་ཇི་ལྟ་བུ་ཡིན་པ་རྒྱུད་འདིས་མཚོན་པར་ཤེས་པར་བྱ་སྟེ། དེ་བས་ན་རྒྱུད་འདི་ནི་རྗོད་པར་བྱེད་པ་དང༌། བཅོམ་ལྡན་འདས་ཀྱི་རང་བཞིན་གྱི་དཀྱིལ་འཁོར་ནི་བརྗོད་པར་བྱ་བའོ། །དེ་ལ་དགོས་པ་ནི་རྒྱུད་འདིར་ཇི་སྐད་དུ་བཤད་པའི་རིམ་གྱིས་སྒྲུབ་པའི་སྤྱོད་པས་རང་གི་ལྷག་པའི་ལྷ་མཉེས་པར་བྱས་ནས་ལྷ་དང་མིའི་ལོངས་སྤྱོད་དང༌། རལ་གྲི་དང་རིག་འཛིན་ལ་སོགས་པ་མངོན་པར་མཐོ་བའི་མཚན་ཉིད་ཐོབ་པ་ནི་དངོས་དང་བརྒྱུད་ནས་བཅོམ་ལྡན་འདས་རྣམ་པར་སྣང་མཛད་ཀྱི་མཁྱེན་རབ་དམ་པས་བླ་ན་མེད་པའི་ཐམས་ཅད་མཁྱེན་པར་གྱུར་པ་ནི་དགོས་པ་དེའི་ཡང་དགོས་པར་ཤེས་པར་བྱའོ། །དོན་རྣམ་པར་ཕྱེ་བས་གོ་བའི་གདུལ་བ་རྣམས་ཀྱིས་ནི། དོན་དེ་དང་རྗེས་སུ་མཐུན་པའི་མཚན་ཙམ་སྨོས་པས་རྒྱུད་ཀྱི་དོན་ཤེས་པར་མི་ནུས་ཏེ། དེ་བས་ན་དེ་དག་གི་དོན་དུ་རྒྱུད་ཀྱི་དོན་རྣམས་རྣམ་པར་ཕྱེ་སྟེ་བཤད་པ་ནི་རྣམ་པར་སྣང་མཛད་ཀྱི་རྒྱུད་དང༌། རང་བཞིན་དང་འབྲས་བུ་དང་དེའི་མངོན་པར་བྱང་ཆུབ་པའི་རྒྱུ་དང་རང་བཞིན་དང་འབྲས་བུ་ལ་སོགས་པ་བཤད་པ་སྟེ། དེ་ལ་རྣམ་པར་སྣང་མཛད་ཀྱི་རྒྱུ་བཤད་པ་ནི། འཇིག་རྟེན་པའི་སེམས་ཀྱི་རིམ་པ་བརྒྱད་ལ་སོགས་པ་དང༌། མོས་པས་སྤྱོད་པ་ལ་སོགས་པ་འཇིག་རྟེན་ལས་འདས་པའི་སའི་རིམ་པས་ཀུན་དུ་སངས་རྒྱས་པའི་སའི་བར་དུ་ནི་རྣམ་པར་སྣང་མཛད་ཀྱི་རྒྱུ་བཤད་པའོ། །རང་བཞིན་བཤད་པ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་རྣམ་པ་བཞིའི་མཚན་ཉིད་ནི། བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་བཤད་པ་སྟེ། གང་གི་ཕྱིར་རྒྱུད་འདིར་སྤྲུལ་པའི་སྐུ་རྣམ་པ་གཉིས་སུ་བརྟགས་ནས་སྐུ་བཞིར་བཤད་པ་ཡིན་ནོ། །ལུས་དང་ངག་དང་ཡིད་མི་ཟད་པའི་རྒྱན་རྣམ་པར་སྤྲུལ་པས་ཁམས་གསུམ་ཐམས་ཅད་ཁྱབ་པ། སེམས་ཅན་དང་སེམས་
ཅན་མ་ཡིན་པའི་ལུས་ལ་སོགས་པར་སྣོད་དུ་གྱུར་པ་ཇི་ལྟར་སྣང་བ་དེ་ནི་དེའི་འབྲས་བུ་བཤད་པའོ། །མངོན་པར་བྱང་ཆུབ་པའི་རྒྱུ་ཡང་རྒྱུ་ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེ་ཆེན་པོའོ། །མཐར་ཐུག་པ་ནི་ཐབས་སོ་ཞེས་པ་ལ་སོགས་པའོ། །རང་བཞིན་ཡང་དེ་ལ་བྱང་ཆུབ་གང་ཞེ་ན། གང་རང་གི་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་སྟེ་ཞེས་པ་ལ་སོགས་པ་ཇི་སྐད་དུ་གསུངས་པའོ། །དེ་བཞིན་དུ་དེའི་རྣམ་པར་སྤྲུལ་པ་དང༌། བྱིན་གྱིས་རློབ་པ་དག་ཀྱང་བཤད་པར་བྱ་སྟེ་ཞིབ་ཏུ་ནི་བསྡུས་པའི་དོན་ཉིད་དུ་བཤད་པས་འདིར་མ་སྨོས་སོ། །ཚིག་ལྷུར་ལེན་པའི་གདུལ་བའི་འགྲོ་བ་རྣམས་ཀྱིས་དེ་ལྟར་རྒྱུ་དང་རང་བཞིན་དང་འབྲས་བུ་ལ་སོགས་པ་རྣམ་པར་ཕྱེ་སྟེ། བཤད་ཀྱང་ཚིག་དང་དོན་རྣམས་ཞིབ་ཏུ་མི་གོ་སྟེ། དེ་བས་ན་དེ་དག་གི་དོན་དུ་ཚིག་རེ་རེ་ནས་སྤྲོས་ཤིང་རྒྱས་པར་བཤད་པའི་ཕྱིར། བཅོམ་ལྡན་འདས་དེ་བཞིན་གཤེགས་པ་བྱིན་གྱིས་རློབ་པ་ཞེས་པ་ལ་སོགས་པ་རྒྱུད་འདིའི་ཐོག་མ་ནས་མཇུག་གི་བར་དུ་སྤྲོས་ཏེ་བཤད་པ་ཡིན་ནོ། །དེ་ལ་བཅོམ་ལྡན་འདས་དེ་བཞིན་གཤེགས་པ་བྱིན་གྱིས་རློབ་པ་རྡོ་རྗེ་ཆེན་པོ་རྒྱ་ཆེ་བ་ལ་སོགས་པ་རྒྱུད་འདི་ཐམས་ཅད་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་ཕུན་སུམ་ཚོགས་པ་རྣམ་པ་བཅུ་གཅིག་བསྟན་པ་འདི་ལྟ་སྟེ། སྤོང་བ་ཕུན་སུམ་ཚོགས་པ་དང༌། གནས་ཕུན་སུམ་ཚོགས་པ་དང༌། འཁོར་ཕུན་སུམ་ཚོགས་པ་དང༌། སྟོན་པ་ཕུན་སུམ་ཚོགས་པ་དང༌། མཐུ་ཕུན་སུམ་ཚོགས་པ་དང༌། གཞན་གྱི་དོན་གྱི་ཐབས་ཕུན་སུམ་ཚོགས་པ་དང༌། བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས། པ་དང༌། བྱང་ཆུབ་ཀྱི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། བྱང་ཆུབ་ཀྱི་རྣམ་པར་སྤྲུལ་པ་བྱིན་གྱིས་རློབ་པ་ཕུན་སུམ་ཚོགས་པའོ། །དེ་ལ་བཅོམ་ལྡན་འདས་ཞེས་པའི་ཚིག་གིས་སྤོང་བ་ཕུན་སུམ་ཚོགས་པ་སྟེ། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་སྤངས་པའི་མཚན་ཉིད་དོ།། གནས་ཕུན་སུམ་ཚོགས་པ་ནི་ཡོན་ཏན་རྣམ་པ་བརྒྱད་དང་ལྡན་པ་སྟེ། དེ་ལ་འདིར་གནས་ཕུན་སུམ་ཚོགས་པ་བརྒྱད་ནི་འདི་ལྟ་སྟེ། དེ་བཞིན་གཤེགས་པ་ཐམས་ཅད་ལྷག་པར་གནས་པ་ཕུན་སུམ་ཚོགས་པ་དང༌། སྲ་ཞིང་རྒྱ་ཆེ་བ་ཕུན་སུམ་ཚོགས་པ་དང༌། བྱང་ཆུབ་ཆེན་པོ་ཐུགས་སུ་ཆུད་པའི་གནས་ཕུན་སུམ་ཚོགས་
པ་དང༌། རྡོ་རྗེ་འཛིན་པའི་བྱང་ཆུབ་སེམས་དཔའ་ཆེན་པོ་རྣམས་མངོན་པར་འདུ་བ་ཕུན་སུམ་ཚོགས་པ་དང༌། སྔ་ཁང་གི་རྩེ་མོ་རྒྱ་ཆེ་བ་ཕུན་སུམ་ཚོགས་པ་དང༌། ཁ་དོག་ཕུན་སུམ་ཚོགས་པ་དང༌། དབྱིབས་ཕུན་སུམ་ཚོགས་པ་དང༌། གདན་ཕུན་སུམ་ཚོགས་པ་རྣམས་སོ། །དེ་ལ་དེ་བཞིན་གཤེགས་པ་བྱིན་གྱིས་རློབ་པ་ཞེས་པའི་ཚིག་གིས་དེ་བཞིན་གཤེགས་པ་ཐམས་ཅད་ལྷག་པར་གནས་པ་ཕུན་སུམ་ཚོགས་པ་བསྟན་ཏོ། །རྡོ་རྗེ་ཆེན་པོ་བརྒྱ་ཆེ་བ། །ཞེས་པའི་ཚིག་གིས་སྲ་ཞིང་རྒྱ་ཆེ་བ་ཕུན་སུམ་ཚོགས་པའོ། །ཆོས་ཀྱི་དབྱིངས་ཀྱི་ཕོ་བྲང་ཞེས་པས་ནི་བྱང་ཆུབ་ཆེན་པོ་ཐུགས་སུ་ཆུད་པའི་གནས་ཕུན་སུམ་ཚོགས་པའོ། །རྡོ་རྗེ་འཛིན་ཐམས་ཅད་འདུ་བ། །ཞེས་པས་ནི་རྡོ་རྗེ་འཛིན་པའི་བྱང་ཆུབ་སེམས་དཔའ་རྣམས་མངོན་པར་འདུ་བ་ཕུན་སུམ་ཚོགས་པའོ། །དེ་བཞིན་གཤེགས་པའི་མོས་པས་རྣམ་པར་རོལ་པ་མཐའ་དང་དབུང་མེད་ཅིང་རྩེ་མོ་མཐོ་བ་ཞེས་པས་ནི་སྔ་ཁང་གི་རྩེ་མོ་རྒྱ་ཆེ་བ་ཕུན་སུམ་ཚོགས་པའོ། །རིན་པོ་ཆེའི་རྒྱལ་པོས་ཤིན་ཏུ་ལེགས་པར་བརྒྱན་པ་འབྱུང་བ་ཞེས་པས་ནི་ཁ་དོག་ཕུན་སུམ་ཚོགས་པའོ། །ཁང་བཟངས་ཆེན་པོ་རིན་པོ་ཆེའི་རྒྱལ་པོའི་ཞེས་པས་ནི་དབྱིབས་ཕུན་སུམ་ཚོགས་པའོ། །བྱང་ཆུབ་སེམས་དཔའི་ལུས་ཀྱི་སེང་གེའི་ཁྲི་ལ་བཞུགས་ཞེས་པས་ནི་གདན་ཕུན་སུམ་ཚོགས་པ་སྟེ། དེ་དག་ནི་ཕུན་སུམ་ཚོགས་པ་རྣམ་པ་བརྒྱད་དང་ལྡན་པ་སྟེ་གཉིས་པའོ། །འཁོར་ཕུན་སུམ་ཚོགས་པ་ནི་རྡོ་རྗེ་འཛིན་ནམ་མཁའ་དྲི་མ་མེད་པ་ཞེས་པ་ནས་ཀུན་དུ་བཟང་པོ་དང༌། བྱམས་པ་དང༌། འཇམ་དཔལ་དང་སྒྲིབ་པ་ཐམས་ཅད་རྣམ་པར་སེལ་བ་ཞེས་པ་ལ་སོགས་པས་རིག་པར་བྱ་སྟེ་དེ་དག་གིས་བསྐོར་ཞིང་མདུན་དུ་བྱས་པའོ། །སྟོན་པ་ཕུན་སུམ་ཚོགས་པ་ནི་ལུང་དང་རྟོགས་པའི་ཆོས་སྟོན་པ་སྟེ། དེ་ཡང་དེ་བཞིན་གཤེགས་པའི་ཉི་མ་དུས་གསུམ་ལས་འདས་པར་བྱིན་གྱིས་བརླབས་ནས། སྐུ་དང་གསུང་དང་ཐུགས་མཉམ་པ་ཉིད་ཀྱི་གཞི་ཞེས་བྱ་བའི་ཆོས་ཀྱི་སྒོའི་ཆོས་སྟོན་ཏོ་ཞེས་པའི་ཚིག་གིས་སོ། །མཐུ་ཕུན་སུམ་ཚོགས་པ་ནི་འཇིག་རྟེན་དང་འཇིག་རྟེན་ལས་འདས་པའི་རྣལ་འབྱོར་པའི་གཙོ་བོ་རྣམས་ཀྱིས་མ་ཐོབ་པའི་རྣལ་འབྱོར་གྱི་སྦྲུལ་པ་ཐོབ་པ་སྟེ་སྐབས་དེར། དེ་ནས་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་དེ་དག་དང༌། གསང་བ་པའི་བདག་པོ་ལ་སོགས་
པ་རྡོ་རྗེ་འཛིན་པ་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱི་རླབས་ཀྱིས་སྐུ་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་སོ། །དེ་བཞིན་དུ་གསུང་དང་ཐུགས་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་ཏེ་ཞེས་བྱ་བ་གསུངས་སོ། །གཞན་གྱི་དོན་གྱི་ཐབས་ཕུན་སུམ་ཚོགས་པ་ནི་སྐབས་དེ་ཐམས་ཅད་དུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ཕྲིན་ལས་ཐམས་ཅད་དང༌། གསུང་གི་ཕྲིན་ལས་ཐམས་ཅད་དང༌། ཐུགས་ཀྱི་ཕྲིན་ལས་ཐམས་ཅད་སེམས་ཅན་གྱི་ཁམས་ཐམས་ཅད་ལ་ཀུན་དུ་གསང་སྔགས་ཀྱི་ཚུལ་གྱི་ཚིག་དག་གིས་ཆོས་སྟོན་པར་མཐོང་བ་ཞེས་པ་ནས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་ལྷ་དང་བཅས་པའི་འཇིག་རྟེན་རབ་ཏུ་སིམ་པར་བགྱིད་པ་ལགས་ན་ཞེས་བྱ་བའི་བར་གྱིས་གསུངས་སོ། །གཞན་ཡང་རྒྱུད་འདིར་བཤད་པ་ཐམས་ཅད་ཀྱིས་ཇི་ལྟར་རིགས་པར་བཅོམ་ལྡན་འདས་རྣམ་པར་སྣང་མཛད་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། དེའི་བྱང་ཆུབ་ཀྱི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། བྱང་ཆུབ་ཀྱི་རྣམ་པར་སྤྲུལ་པ་བྱིན་གྱིས་རློབ་པའི་རང་བཞིན་ཕུན་སུམ་ཚོགས་པ་སྟེ། སྔར་བཤད་ཟིན་པས་འདིར་མ་བཤད་དོ། །དེ་ལྟ་བས་ན་བཅོམ་ལྡན་འདས་རྣམ་པར་སྣང་མཛད་ཀྱི་ཕུན་སུམ་ཚོགས་པ་རྣམ་པ་བཅུ་གཅིག་གིས་ནི་རྒྱུ་འདི་ཐམས་ཅད་བསྡུས་པར་བལྟའོ། །མདོ་སྡེ་དང་རྒྱུད་གཞན་དག་ཏུ་འདི་སྐད་བདག་གིས་ཐོས་པ་འབྱུང་ལ། རྒྱུད་འདིར་མ་སྨོས་པ་ནི་སྟོན་པ་དང་དུས་དང་གནས་དེས་པ་དང་ཉན་པ་དང་སྡུད་པར་མཛད་པའི་བྱང་ཆུབ་སེམས་དཔའ་ཀུན་དུ་བཟང་པོ་དང༌། ཕྱག་ན་རྡོ་རྗེ་ལ་སོགས་པ་རྟོགས་པ་གཙོ་བོར་གྱུར་པའི་ཕྱིར་འདི་སྐད་བདག་གིས་ཐོས་པ་མ་སྨོས་ཏེ། རྒྱུད་འདི་བཤད་པ་ཡང་བཅོམ་ལྡན་འདས་རྣམ་པར་སྣང་མཛད་ལོངས་སྤྱོད་རྫོགས་པའི་སྐུ་མངོན་པར་བྱང་ཆུབ་པའི་སྐུའི་བྱིན་གྱི་རླབས་ཀྱིས་བྱང་ཆུབ་ཀྱི་སྙིང་པོར་རྟག་ཏུ་བཞུགས་པས་བཤད་དེ། དུས་དང་གནས་དེ་ཉིད་ན་ངེས་པར་བཞུགས་པས་དུས་གཅིག་གི་ཚེ་ཞེས་པ་མ་སྨོས་སོ། །ཉན་པ་པོ་ཡང་ཀུན་དུ་བཟང་པོ་ལ་སོགས་པ་དེ་རྣམས་ཐོས་པ་སྙིང་པོར་གྱུར་པ་མ་ཡིན་གྱི། རྟོགས་པ་གཙོ་
བོར་གྱུར་པས་འདི་སྐད་བདག་གིས་ཐོས་ཞེས་མ་སྨོས་སོ། །མདོ་སྡེ་དང་གཞུང་གཞན་དག་ཏུ་སྨོས་པ་ནི་བཅོམ་ལྡན་འདས་ལོངས་སྤྱོད་རྫོགས་པའི་སྐུ་དུས་དང་གནས་མ་ངེས་པ་ན་ཡང་བཞུགས་ཏེ། བར་བར་ནི་འོག་མིན་གྱི་གནས་ན་བཞུགས་ཤིང་ཆོས་འཆད། རེས་འགའ་ནི་རི་རབ་ཀྱི་རྩེ་མོ་ན་བཞུགས་ཤིང་ཆོས་འཆད་པ་དང༌། དེ་བཞིན་དུ་སྤྲུལ་པ་ཡང་རེས་འགའ་ནི་རྒྱལ་པོའི་ཁབ་ན་བཞུགས་རེས་འགའ་ནི་མཉན་དུ་ཡོད་པ་ལ་སོགས་པའི་གནས་ན་བཞུགས་ཤིང་ཆོས་འཆད་པ་དེ་དེ་ལྟར་གནས་དང་དུས་མ་ངེས་པས་དུས་གཅིག་གི་ཚེ་ན་ཞེས་སྨོས་ལ། ཉན་པ་པོ་ཡང་འཕགས་པ་ཉན་ཐོས་ལ་སོགས་པ་ཐོས་པ་སྙིང་པོར་གྱུར་པ་སྟེ། རྟོགས་པ་གཙོ་བོར་གྱུར་པ་མ་ཡིན་པས་ན་འདི་སྐད་བདག་གིས་ཐོས་པ་ཞེས་མ་སྨོས་སོ། །བཅོམ་ལྡན་འདས་རྣམ་པར་སྣང་མཛད་ཀྱི་ཕུན་སུམ་ཚོགས་པ་རྣམ་པ་བཅུ་གཅིག་ཀྱང་རྣམ་པ་བཞིར་བསྡུས་ཏེ། བཞི་གང་ཞེ་ན། སྐྱེས་བུ་དང་གནས་དང་འཁོར་དང་དགོས་པའོ། །དེ་ལ་བཅོམ་ལྡན་འདས་ཞེས་པ་ནི་ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་ཡན་ཆད་དཔྱིས་ཕྱིན་པར་ཤེས་རབ་ཀྱིས་བཤིག་སྟེ་མེད་པར་བྱས་པ་ནི་བཅོམ་པའོ། །གཉིས་སུ་ན་བདུད་རྣམས་བཅོམ་པ་ལ་ཡང་བྱ་སྟེ། མདོར་ན་ཉོན་མོངས་པ་དང་ཤེས་བྱའི་སྒྲིབ་པ་སྤངས་པ་ཡང་མངོན་པར་བྱང་ཆུབ་པའི་སྐུ་ལ་བྱ་སྟེ། དེས་ནི་སྐྱེས་བུའི་ཆེ་བའི་བདག་ཉིད་བསྟན་པ་སྟེ། སྐྱེས་བུའི་ཆེ་བ་བསྟན་པ་དེ་ཡང་ཆོས་ཉན་པའི་སེམས་ཅན་ཆོས་ཀྱི་རྗེས་སུ་འབྲང་བ་དང༌། དད་པའི་རྗེས་སུ་འབྲང་བ་རྣམ་པ་གཉིས་ལས་ཆོས་ཀྱི་རྗེས་སུ་འབྲང་བ་ནི་འཆད་པའི་སྐྱེས་བུ་ལ་མི་རྟོག་པར་ཆོས་བཟང་ངན་རྟོག་པས་དེར་ཟད་ལ། དད་པའི་རྗེས་སུ་འབྲང་བ་ནི་འཆད་པའི་སྐྱེས་བུ་བཙན་པས་དེ་འདི་ལ་ཡིད་ཆེས་པའི་ཕྱིར་དགོས་པའི་དགོས་པར་གྱུར་པའི་སྐྱེས་བུ་བཙན་པ་དེ་བསྟན་ཏོ། །གནས་ཕུན་སུམ་ཚོགས་པ་ཡང་དད་པའི་རྗེས་སུ་འབྲང་བའི་འགྲོ་བ་གཟུང་བའི་ཕྱིར་ཏེ། གནས་དེ་ལྟ་བུ་ན་བཞུགས་པས་བཅོམ་ལྡན་འདས་ཀྱི་ཆེ་བའམ་བཙུན་པ་བསྟན་པས་སོ། །འཁོར་ཕུན་སུམ་ཚོགས་པ་ཡང་གཅིག་པུར་མི་བཞུགས་ཀྱི་འཁོར་དེ་ལྟ་བུས་བསྐོར་ཅིང་བཞུགས་སོ་ཞེས་པས་བཅོམ་ལྡན་འདས་ཀྱི་ཆེ་བའམ་བཙུན་པར་བསྟན་པ་ཡིན་ནོ། །དེའི་སྐྱེས་བུ་བཙན་པར་
བསྟན་པ་ན། དད་པས་རྗེས་སུ་འབྲང་བའི་འགྲོ་བ་དོགས་པ་མེད་པར་སྐྱེས་བུ་དེ་ལྟ་བུ་ལ་མཉམ་པར་སྤྲོ་བས་དད་པའི་རྗེས་སུ་འབྲང་བའི་སེམས་ཅན་གཟུང་པའི་ཕྱིར་བསྟན་ཏོ། །གནས་བཤད་པ་ཡང་རྣམ་པ་གསུམ་གྱི་ཕྱིར་ཏེ་སྐྱེས་བུ་བཙན་པ་དང༌། གནས་དེ་ལྟ་བུའི་ཡོན་ཏན་སྒྲུབ་པ་པོས་རྗེས་སུ་དྲན་པར་བྱས་ན་འགྲུབ་པའི་ཕྱིར་དང༌། སངས་རྒྱས་དང་བྱང་ཆུབ་སེམས་དཔས་བཅགས་པའི་གནས་དེ་མཆོད་རྟེན་དུ་འགྱུར་བའི་ཕྱིར་རོ། །སྐྱེས་བུ་བཙན་པ་ནི་གོང་དུ་བཤད་ཟིན་ཏོ། །འཁོར་ཕུན་སུམ་ཚོགས་པ་ཡང་རྣམ་པ་གསུམ་སྟེ། སྐྱེས་བུ་བཙན་པ་དང་དེ་ལྟ་བུའི་བྱང་ཆུབ་སེམས་དཔའ་དང་རྡོ་རྗེ་འཛིན་པ་ནམ་མཁའ་དྲི་མ་མེད་པ་ལ་སོགས་པ་ཆོས་ཉན་པ་དང་འཛིན་པའི་མཆོག་ཏུ་བསྟན་པ་དང༌། ཉན་པའི་མཆོག་དེ་དག་བཞུགས་པས་སྡུད་པར་མཛད་པའི་བྱང་ཆུབ་སེམས་དཔའི་དབང་དུ་གྱུར་པར་བསྟན་པའོ། །སྐྱེས་བུ་ནི་སྔར་བཤད་ཟིན་ཏོ། །དགོས་པ་ནི་རྒྱུད་འདིར་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་དང༌། རང་བཞིན་དབང་ཆེན་དང་ཆུ་ལ་སོགས་པའི་དཀྱིལ་འཁོར་སྒྲུབ་པ་དང༌། ལས་བཤད་པའི་རིམ་པ་བཞིན་དུ་བསྒྲུབས་ནས་མངོན་པར་མཐོ་བ་དང་ངེས་པར་ལེགས་པའི་བདེ་བ་ཐོབ་པར་དགོངས་པའི་ཕྱིར་རོ། །དེ་ལྟར་ཕུན་སུམ་ཚོགས་པ་རྣམ་པ་བཅུ་གཅིག་པོ་བཞི་པོ་འདིར་བསྡུས་སོ། །དེ་ལ་བཅོམ་ལྡན་འདས་དེ་བཞིན་གཤེགས་པ་བྱིན་གྱིས་རློབ་པ་ཞེས་པ་ནི་འདས་པ་དང་མ་འོངས་པ་དང་ད་ལྟར་གྱི་དེ་བཞིན་གཤེགས་པ་ཐམས་ཅད་བྱང་ཆུབ་ཀྱི་སྙིང་པོ་ན་གནས་པ་ལ་བྱ་སྟེ། བྱིན་གྱིས་རློབ་པ་ཞེས་པའི་ཚིག་ནི་གནས་པའི་དོན་ཏོ། །སྐབས་འདིར་བྱང་ཆུབ་ཀྱི་སྙིང་པོ་ན་འདས་པ་དང་མ་འོངས་པ་དང་ད་ལྟར་གྱི་སངས་རྒྱས་ཐམས་ཅད་གནས་པས་སངས་རྒྱས་མང་པོ་གནས་པར་འགྱུར་བའི་དོགས་པ་བསལ་བ་ལ་སོགས་པ་ནི་བསྡུས་པའི་དོན་ཉིད་དུ་ཞིབ་ཏུ་བཤད་པས་འདིར་མ་སྨོས་སོ། །རྡོ་རྗེ་ཆེན་པོ་ནི་རྡོ་རྗེ་དེ་ཉིད་ཕལ་པ་མ་ཡིན་གྱི་མཆོག་གམ་དམ་པ་ལ་ཆེན་པོ་ཞེས་བྱའོ། །རྒྱ་ཆེ་བ་ནི་རྡོ་རྗེ་དང་ལྡན་པའི་ཁང་པ་དེ་ནི་ཡངས་ཤིང་རྒྱ་ཆེ་བའམ་རྡོ་རྗེ་དེ་དག་ཉིད་གྲངས་མང་བ་ལ་བྱའོ། །ཆོས་ཀྱི་དབྱིངས་ཀྱི་ཕོ་བྲང་ཞེས་བྱ་བ་ནི་དེ་ལ་ཆོས་ནི་ཕུང་པོ་དང་ཁམས་དང་སྐྱེ་མཆེད་དོ། །དབྱིངས་ནི་རང་བཞིན་ཏེ་ཕུང་པོ་ལ་སོགས་པའི་ཆོས་ཀུན་རྫོབ་པའི་མཚན་ཉིད་རིགས་པས་བརྟག་མི་བཟོད་པ་སྟེ།
སྟོང་པ་ཉིད་ནི་དེ་དག་གི་རང་བཞིན་ཏེ། སྟོང་པའི་རང་བཞིན་ཁོང་དུ་ཆུད་པ་ནི་ཕོ་བྲང་ངམ་འབྱུང་བ་ཞེས་བྱའོ། །རྡོ་རྗེ་འཛིན་ཐམས་ཅད་འདུ་བ་ཞེས་པ་དེ་ལ་རྡོ་རྗེ་ནི་ཡང་དག་པ་མ་ཡིན་པའི་ལྟ་བ་འཇོམས་པའི་ཤེས་རབ་སྟེ། ཤེས་རབ་དེ་དང་ལྡན་པའི་བྱང་ཆུབ་སེམས་དཔའ་ནི་རྡོ་རྗེ་འཛིན་པའོ། །འདུ་བའི་ཚིག་ནི་གནས་ཕུན་སུམ་ཚོགས་པའི་སྐབས་སུ་བཤད་ཟིན་ཏོ། །རྡོ་རྗེ་འཛིན་མ་ཡིན་པའི་བྱང་ཆུབ་སེམས་དཔའ་ཡང་དེར་མི་འདུ་བ་ནི་མ་ཡིན་མོད་ཀྱི། འདིར་སྔགས་བཤད་པའི་སྐབས་ཡིན་པས་རྡོ་རྗེ་འཛིན་པ་གཙོ་བོར་སྨོས་སོ། །རྡོ་རྗེ་འཛིན་པ་ཡང་རྣམ་པ་གསུམ་གྱི་ཕྱིར་འཛིན་ཏེ། སོ་སོའི་རྣམ་པར་ཐར་པའི་སྒོ་སྟོན་པ་དང༌། རིག་པའི་བརྟུལ་ཞུགས་དང་མཆོད་པའི་ཡན་ལག་ཏུ་འགྱུར་བའི་ཕྱིར་འཛིན་པའོ། །ཕ་རོལ་ཏུ་ཕྱིན་པ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ཨུཏྤལ་དང་པདྨོ་ལ་སོགས་པ་འཛིན་པ་ཡང་སོ་སོའི་རྣམ་པར་ཐར་པའི་སྟོན་པར་རིག་པར་བྱའོ། །དེ་བཞིན་གཤེགས་པའི་མོས་པས་རྣམ་པར་རོལ་པ་ཞེས་པ་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་ལྟ་བུའི་གནས་ལ་སོགས་པར་མོས་ཤིང་སྨོན་པ་ལས་ཇི་ལྟར་སྨོན་པ་བཞིན་དུ་ཐོབ་ནས་སྤྱོད་པ་ནི་རོལ་བའོ། །མཐའ་དང་དབུང་མེད་ཅིང་རྩེ་མོ་མཐོ་བ་ཞེས་པ་ནི་མཐའ་གཉིས་དམིགས་སུ་མེད་པས་ན་དབུས་ཀྱང་དམིགས་སུ་མེད་པའོ། །རྩེ་མོ་མཐོ་བ་ནི་དེ་བཞིན་གཤེགས་པའི་དབུའི་གཙུག་ཏོར་དང་འདྲ་སྟེ་རྩེ་མོ་ལྟར་མི་སྣང་བ་ལ་བྱའོ། །རིན་པོ་ཆེའི་རྒྱལ་པོས་ཤིན་ཏུ་ལེགས་པར་བརྒྱན་པ་འབྱུང་བ་ཞེས་པ་ནི་ཁ་དོག་ཕུན་སུམ་ཚོགས་པ་སྟེ་སྔ་ཁང་དེ་ཉིད་རིན་པོ་ཆེས་སྤྲས་པ་ལ་བྱའོ། །ཁང་བཟངས་ཆེན་པོ་རིན་པོ་ཆེའི་རྒྱལ་པོའི་ནང་ན་ཞེས་པ་ནི་དབྱིབས་བཤད་པའོ། །བྱང་ཆུབ་སེམས་དཔའི་ལུས་ཀྱི་སེང་གེའི་ཁྲི་ལ་བཞུགས་ཞེས་པ་ནི་སྔོན་གྱི་སྨོན་ལམ་གྱིས་སེང་གེའི་ལུས་སུ་གྱུར་ཅིང་སེང་གེའི་ཁྲི་བྱེད་པའམ། བྱང་ཆུབ་སེམས་དཔའི་ལུས་ཉིད་ཀྱིས་བཅོམ་ལྡན་འདས་ཀྱི་གདན་དུ་བྱེད་དེ་སེང་གེའི་བྱ་བ་བྱེད་པ་ལ་བྱའོ། །བཅོམ་ལྡན་འདས་གནས་དེ་ལྟ་བུ་ན་བཞུགས་པ་ཡང་འཁོར་བྱང་ཆུབ་སེམས་དཔའ་རྡོ་རྗེ་འཛིན་ནམ་མཁའ་འདྲི་མ་མེད་པ་ལ་སོགས་པ་འདི་རྣམས་དང་བཞུགས་ཏེ། བྱང་ཆུབ་སེམས་དཔའ་རྣམས་ཀྱང་དོན་དང་རྗེས་སུ་མཐུན་པའི་མཚན་ཅན་ཤ་སྟག་གཞུང་ལས་འབྱུང་བས་བསྐོར་ཞིང་མདུན་གྱིས་བལྟས་པ་ལ་ཆོས་འཆད་
དོ། །འདི་ལྟ་སྟེ། དེ་བཞིན་གཤེགས་པའི་ཉི་མ་དུས་གསུམ་ལས་འདས་པར་བྱིན་གྱིས་བརླབས་ནས་སྐུ་དང་གསུང་དང་ཐུགས་མཉམ་པ་ཉིད་ཀྱི་གཞི་ཞེས་བྱ་བའི་ཆོས་ཀྱི་སྒོའི་ཆོས་སྟོན་ཏོ་ཞེས་པ་ཆོས་ཀྱང་རྣམ་པ་གཉིས་ཏེ། རྟོགས་པའི་ཆོས་དང་ལུང་གི་ཆོས་སོ། །དེ་ལ་རྟོགས་པའི་ཆོས་ཀྱང་རྣམ་པ་གཉིས་ཏེ། དོན་དམ་པ་དང་ཀུན་རྫོབ་པའོ། །དོན་དམ་པ་ནི་དེ་བཞིན་ཉིད་ཀྱི་མཚན་ཉིད་སྟོང་པའི་རང་བཞིན་ནོ། །ཀུན་རྫོབ་ཀྱི་ཆོས་ནི་དེ་བཞིན་གཤེགས་པའི་སྐུ་དང་གསུང་དང་ཐུགས་མི་ཟད་པའི་རྒྱན་གྱིས་ཁམས་གསུམ་ཁྱབ་པར་སྟོན་པའོ། །ལུང་གི་ཆོས་ནི་མདོ་སྡེ་དང་ཚིགས་སུ་བཅད་པ་ལ་སོགས་པ་གསུང་རབ་ཡན་ལག་བཅུ་གཉིས་སོ། །དེ་རྣམས་ལས་གང་བཤད་ཅེ་ན། སྐབས་འདིར་ལུང་གི་ཆོས་རྒྱུད་འདི་ཉིད་བཤད་པ་སྟེ། དེ་ཡང་གང་ཞེ་ན། སྐུ་དང་གསུང་དང་ཐུགས་མཉམ་པ་ཉིད་ཀྱི་གཞི་ཞེས་བྱ་བའི་ཆོས་ཀྱི་སྒོའི་ཆོས་སྟོན་ཏོ་ཞེས་གསུངས་ཏེ། དེ་ལ་སྐུ་དང་གསུང་དང་ཐུགས་མཉམ་པ་ཉིད་ཅེས་པ་མཉམ་པ་གསུམ་གྱིས་རིག་པར་བྱ་སྟེ། བཅོམ་ལྡན་འདས་ཀྱི་སྐུ་དང་གསུང་དང་ཐུགས་ཀྱི་འཁོར་ལོས་སེམས་ཅན་གྱི་ལུས་དང་ངག་དང་ཡིད་ཇི་སྙེད་པ་དེ་སྙེད་དུ་ཁྱབ་པས་མཉམ་པ་ཉིད་དོ། །གཉིས་སུ་ན་བཅོམ་ལྡན་འདས་ཀྱི་སྐུ་དང་གསུང་དང་ཐུགས་ཀྱི་འཁོར་ལོས་སེམས་ཅན་གྱི་དོན་དུ་སྦྱོར་བ་ན། དེ་བཞིན་གཤེགས་པའི་སྐུའི་འཁོར་ལོས་གསུང་དང་ཐུགས་ཀྱི་བྱ་བ་ཡང་བྱེད། གསུང་གི་འཁོར་ལོས་ཀྱང་སྐུ་དང་ཐུགས་ཀྱི་བྱ་བ་ཡང་བྱེད། ཐུགས་ཀྱི་འཁོར་ལོས་ཀྱང་སྐུ་དང་གསུང་གི་བྱ་བ་ཡང་བྱེད་དེ། དེ་ལྟར་མཚུངས་པར་བྱེད་པས་ན་མཉམ་པ་ཉིད་དོ། །གསུམ་དུ་ན་དེ་བཞིན་གཤེགས་པའི་སྐུ་ལ་སོགས་པ་དང། སེམས་ཅན་གྱི་ལུས་དང་ངག་དང་ཡིད་སྟོང་པ་ཉིད་ཀྱི་རང་བཞིན་དུ་དབྱེར་མེད་ཅིང་རོ་གཅིག་པས་ན་མཉམ་པ་ཉིད་དོ། །ཆོས་ཀྱི་སྒོ་ཞེས་པ་ནི་དེ་ལྟ་བུའི་སྐུ་དང་གསུང་དང་ཐུགས་མཉམ་པ་ཉིད་ཀྱི་གཞི་དེ་བཤད་པས་རྟོགས་པའི་ཆོས་ལ་འཇུག་པར་གྱུར་པའི་སྒོ་ཡིན་པས་སྒོ་ཞེས་གསུངས་སོ། །དེ་བཞིན་དུ་ལུང་གི་ཆོས་གཞན་རྣམས་ཀྱང་རྟོགས་པའི་ཆོས་ལ་འཇུག་པའི་སྒོ་ལྟ་བུར་རིག་པར་བྱའོ། །དེ་ལ་ཆོས་འཆད་པ་ཡང་སྐུ་བཞི་གང་གིས་འཆད་ཅེ་ན། ཆོས་ཀྱི་སྐུ་དང་བྱང་ཆུབ་ཀྱི་སྙིང་པོ་ན་བཞུགས་པའི་སྐུ་ནི་མི་གཡོ་བ་ཉིད་ཚིག་ཏུ་བརྗོད་པ་ལས་འདས་པས་ན་ཚིག་གིས་ཆོས་མི་འཆད་དེ། དེའི་བྱིན་རླབས་ཀྱིས་ལོངས་སྤྱོད་རྫོགས་པ་
དང་སྤྲུལ་པའི་སྐུས་འཆད་དོ། །དེ་ལ་སྐབས་འདིར་ཡང་བཅོམ་ལྡན་འདས་རྣམ་པར་སྣང་མཛད་ལོངས་སྤྱོད་རྫོགས་པའི་སྐུས་སྐུ་དང་གསུང་དང་ཐུགས་མཉམ་པ་ཉིད་ཀྱི་གཞི་ཞེས་བྱ་བའི་ཆོས་ཀྱི་སྒོ་འཆད་དེ། དེ་ཡང་འདི་ལྟ་སྟེ། དེ་བཞིན་གཤེགས་པའི་ཉི་མ་དུས་གསུམ་ལས་འདས་པར་བྱིན་གྱིས་བརླབས་ནས་འཆད་དེ། ཆོས་ཀྱི་སྐུ་དེ་ཉི་མ་ལྟ་བུར་སྣང་བའི་རང་བཞིན་ཡིན་པས་ན་དེ་བཞིན་གཤེགས་པའི་ཉི་མ་ཞེས་བྱ་ལ། ཆོས་ཀྱི་སྐུ་ཉི་མ་དང་ཟླ་བ་ལ་སོགས་པའི་དུས་ལས་འདས་ཏེ། དེ་བས་ན་དུས་གསུམ་ལས་འདས་པ་ཞེས་གསུངས་པ་ཡིན་ནོ། །དུས་གསུམ་ལས་འདས་པ་ནི་འདས་པའི་དུས་དང༌། ད་ལྟར་གྱི་དུས་དང་མ་འོངས་པའི་དུས་ལས་འདས་པའོ། །དེ་དག་གིས་ནི་སྟོན་པ་ཕུན་སུམ་ཚོགས་པ་བཤད་པ་ཡིན་ནོ། །མཐུ་ཕུན་སུམ་ཚོགས་པ་བཤད་པ་ནི་གཞུང་ལས་དེ་ནས་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་དེ་དག་དང༌། གསང་བ་པའི་བདག་པོ་ལ་སོགས་པ་རྡོ་རྗེ་འཛིན་དེ་དག་ཅེས་པ་ནས་གསང་སྔགས་ཀྱི་ཚུལ་གྱི་ཚིག་རྣམ་པར་དག་པའི་ཚིག་དག་གིས་ཆོས་སྟོན་པ་དག་ཀྱང་མཐོང་ངོ་ཞེས་པའི་བར་དུ་འབྱུང་བ་སྟེ། དེ་ལ་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱི་རླབས་ཀྱིས་སྐུ་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་སོ་ཞེས་པ་དེ་ལ་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་རྣམས་ས་བཅུ་ལ་སོགས་པ་རབ་ཏུ་ཐོབ་པ་ན་རང་གི་ཏིང་ངེ་འཛིན་དང་རྣམ་པར་ཐར་པའི་སྒོ་ནས་མཐུ་དང་རྫུ་འཕྲུལ་འབྱིན་པ་དང༌། སངས་རྒྱས་ཀྱི་ཞིང་རྣམ་པར་བརྒྱན་པ་ལ་སོགས་པ་བྱས་པས་མགུ་ཞིང་དེ་ལས་གཞན་པའི་བྱ་བ་མེད་དོ་སྙམ་པའི་བློ་སྐྱེ་བ་ལ། བཅོམ་ལྡན་འདས་རྣམ་པར་སྣང་མཛད་ཀྱི་དཔལ་བེའུའི་འོད་མཆོག་བཀྱེ་བས་བྱང་ཆུབ་སེམས་དཔའ་དེ་རྣམས་ཀྱི་གཙུག་ཏུ་ཕོག་སྟེ། དེའི་བྱིན་གྱི་རླབས་ཀྱིས་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་དེ་རྣམས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་སོ། །དེ་བཞིན་དུ་གསུང་དང་ཐུགས་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཡང་ཞུགས་ཏེ། དེ་ལ་མཉམ་པ་ཉིད་ནི་གོང་དུ་བཤད་པ་རྣམ་པ་གསུམ་མོ། །བཀོད་པ་ནི་སྐབས་འདིར་རྣམ་པ་སྣ་ཚོགས་སུ་བལྟའོ། །མི་ཟད་པ་ནི་ཆོས་ཀྱི་སྐུའི་བྱིན་གྱི་རླབས་ཀྱིས་སྐུ་ལ་སོགས་པ་དེ་དག་ནམ་འཁོར་བ་ཡོད་
ཀྱི་བར་དུ་གནས་པའོ། །མཛོད་ནི་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དེ་ཉིད་ལ་བྱ་སྟེ། སྐུ་དེ་ལས་ཇི་ལྟར་འདུལ་བ་དང་རྗེས་སུ་མཐུན་པའི་སྐུ་ལ་སོགས་པའི་འཁོར་ལོ་ཟད་མི་ཤེས་པ་འབྱུང་བའི་ཕྱིར་ལ། སྐུ་ལ་སོགས་པའི་འཁོར་ལོ་དེ་དག་ཉིད་སུས་ཀྱང་ཟིལ་གྱིས་མི་ནོན་པར་རང་གི་བྱ་བ་ལ་འཇུག་པས་ནི་རྣམ་པར་བསྒྱིངས་པའོ། །འོན་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའམ་གསུང་ངམ་ཐུགས་ལ་ནི་འཇུག་པའམ་ལྡོག་པ་ཡང་མི་དམིགས་སོ་ཞེས་པ་ལ་འགའ་ཞིག་རྟོག་པ་སྐྱེ་སྟེ། གདུལ་བྱའི་འགྲོ་བ་ནི་རྣམ་པ་བཞི་སྟེ། ཤེས་བྱ་དང་ཉོན་མོངས་པའི་སྒྲིབ་པ་སྤངས་པའི་རྣམ་པར་རྟོག་པ་དར་ལ་ཙམ་གྱིས་བསྒྲིབས་པའི་ལྷག་མ་ལུས་པའི་བྱང་ཆུབ་སེམས་དཔའ་རྣམས་དང༌། མོས་པ་རྣམ་པར་དག་པ་སྤྱོད་པའི་ས་མངོན་དུ་བྱས་པ་རྣམས་དང༌། ཉན་ཐོས་དང་རང་སངས་རྒྱས་ཉོན་མོངས་པའི་སྒྲིབ་པ་སྤངས་ལ། ཤེས་བྱའི་སྒྲིབ་པ་མ་སྤངས་པ་ཕྱོགས་གཅིག་པ་རྣམས་དང། ཉོན་མོངས་པ་དང་ཤེས་བྱའི་སྒྲིབ་པ་མ་སྤངས་པའི་འགྲོ་བ་སྣ་ཚོགས་པ་རྣམས་སོ། །དེ་བས་ན་བཅོམ་ལྡན་འདས་ཀྱི་སྐུ་ལ་འཇུག་པ་དང་ལྡོག་པ་མི་དམིགས་ཏེ། རྣམ་པར་མི་རྟོག་ན་ཡོངས་སུ་དག་པའི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་དུ་འགྱུར་གྱི། འོག་མ་རྣམས་ཀྱི་སྤྱོད་ཡུལ་དུ་འགྱུར་རམ་མི་འགྱུར་སྙམ་དུ་དོགས་པ་སྐྱེན། དེའི་ལན་ནི་བཅོམ་ལྡན་འདས་མངོན་པར་བྱང་ཆུབ་པ་ཉིད་ཀྱི་ཚེ་ན་རྣམ་པར་མི་རྟོག་པར་སྔོན་གྱི་སྨོན་ལམ་གྱི་ཤུགས་དང༌། ཆོས་ཉིད་ཀྱི་ལྷུན་གྱིས་གྲུབ་པ་ཉིད་དུ་ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུས་ཇི་ལྟར་སྣོད་དུ་གྱུར་པའི་སེམས་ཅན་གྱི་དོན་ཐམས་ཅད་དུ་མཛད་དེ། དེ་བས་ན་གཞུང་ལས་ཐམས་ཅད་དུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ཕྲིན་ལས་ཐམས་ཅད་དང༌། གསུང་གི་ཕྲིན་ལས་ཐམས་ཅད་དང༌། ཐུགས་ཀྱི་ཕྲིན་ལས་ཐམས་ཅད་སེམས་ཅན་གྱི་ཁམས་ཐམས་ཅད་ལ་ཀུན་དུ་གསང་སྔགས་ཀྱི་ཚུལ་གྱི་ཚིག་འདི་དག་གིས་ཆོས་སྟོན་པར་མཐོང་ཞེས་གསུངས་པ་ཡིན་ཏེ། དེ་ལ་མཐོང་བ་ནི་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པའི་སྤྱོད་ཡུལ་དུ་གྱུར་པ་སྟེ། དེ་ཡང་རྣམ་པ་ཐམས་ཅད་དུ་མཐོང་བ་ནི་མ་ཡིན་མོད་ཀྱི། རང་གི་མཐུ་དང་སྤྱོད་ཡུལ་ཤས་ཆེ་ཆུང་གིས་བཅོམ་ལྡན་འདས་ཀྱི་སྐུ་ལ་སོགས་པའི་འཁོར་ལོ་མཐོང་བའམ་རྟོགས་པ་
ལ་བྱ་སྟེ། རྣམ་པ་ཐམས་ཅད་དུ་རྟོགས་ཤིང་མཐོང་ན་དེ་བཞིན་གཤེགས་པ་དང་བྱེ་བྲག་མེད་པར་གྱུར་པའི་ཕྱིར་རོ། །དེས་ན་འཕགས་པ་ཀུན་དུ་བཟང་པོ་ལ་སོགས་པ་དེ་རྣམས་ཉིད་བཤད་པའི་ཆོས་སུ་འཇུག་པའི་ཞར་ལ་སྔགས་རྒྱུད་དང་རྟོག་པ་ལ་སོགས་པའི་ཆོས་ཀྱི་བདག་ཉིད་རྣམས་ལ་ཞུགས་ནས་བཤད་པའི་ཆོས་ཀྱི་རིམ་པར་བསྡུ་བར་མཛད་པས་ཇི་ལྟར་རྗེས་སུ་རྟོགས་པ་དེ་བསྟན་པར་ཡང་གསུངས་པ་ཡིན་ཏེ། ཐམས་ཅད་དུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ཕྲིན་ལས་ཐམས་ཅད་དང༌། གསུང་གི་ཕྲིན་ལས་ཐམས་ཅད་དང་ཐུགས་ཀྱི་ཕྲིན་ལས་ཐམས་ཅད་སེམས་ཅན་གྱི་ཁམས་ཐམས་ཅད་ལ་ཀུན་དུ་གསང་སྔགས་བཤད་པར་བྱ་བ་སྟེ། ཐམས་ཅད་དུ་ཞེས་པ་ལ་དུས་ཞེས་ཁོང་ནས་དབྱུང་ངོ༌། །དེས་ན་ཚིག་གི་དོན་ནི་འདི་ལྟ་སྟེ། ས་དང་ཕ་རོལ་ཏུ་ཕྱིན་པ་རྫོགས་པའི་དུས་དབང་བྱང་ཆུབ་ཐོབ་པའི་དུས་སུ་ཤེས་པའོ། །དེ་ཅི་འདྲ་བ་ཞིག་གིས་ཤེ་ན། བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ཕྲིན་ལས་ཐམས་ཅད་དང༌། གསུང་གི་ཕྲིན་ལས་ཐམས་ཅད་དང༌། ཐུགས་ཀྱི་ཕྲིན་ལས་ཐམས་ཅད་ཅེས་གསུངས་པ་ཡིན་ཏེ། དེ་ལ་འདིར་སྐུའི་ཕྲིན་ལས་ལ་སོགས་པའི་ཚིག་གིས་བཅོམ་ལྡན་འདས་ཀྱི་ས་དང་ཕ་རོལ་ཏུ་ཕྱིན་པ་རྫོགས་པར་བྱེད་པ་དང༌། དེ་བཞིན་དུ་བྱང་ཆུབ་ཐོབ་པའི་རྒྱུར་གྱུར་པ་སྐུ་དང་གསུང་དང་ཐུགས་ཀྱི་བྱ་བ་སྟེ་ནན་ཏན་ནོ། །དེས་བཅོམ་ལྡན་འདས་ཀྱིས་ཡེ་ཤེས་ལ་མཐུའི་ཁྱད་པར་བསགས་པ་གང་ཡིན་པ་དེ་ལ་ཕྲིན་ལས་ཞེས་བརྗོད་དོ། །དེ་ལྟ་བུའི་མཐུའི་མཚན་ཉིད་ལས་ཀྱི་དཀྱིལ་འཁོར་གྱི་ལྷའི་གཟུགས་སུ་གྱུར་པའི་སྤྱོད་པ་སྟེ། སེམས་ཅན་གྱི་ཁམས་ཐམས་ཅད་ལ་ཀུན་དུ་གསང་སྔགས་ཀྱི་ཚུལ་གྱི་ཚིག་དག་གིས་ཆོས་སྟོན་པར་མཐོང་ཞེས་གསུངས་པ་ཡིན་ནོ། །དེ་ལ་སེམས་ཅན་གྱི་ཁམས་ཐམས་ཅད་ལ་ཞེས་པ་ནི། འཇིག་རྟེན་གྱི་ཁམས་རབ་འབྱམས་ན་འགྲོ་བ་རིགས་དྲུག་ཏུ་གཏོགས་པའི་སེམས་ཅན་ལས་དང་ཉོན་མོངས་པའི་དབང་གིས་ཚེ་ཐོབ་པ་རྣམས་ལ་ཞེས་དགོངས་སོ། །ཀུན་དུ་ཞེས་པ་ནི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་ཤེས་པར་བྱའོ། །གསང་སྔགས་ཀྱི་ཚུལ་གྱི་ཚིག་དག་གིས་ཆོས་སྟོན་པ་ཞེས་པ་དེ་ལ་ཤེས་པ་དང་སྐྱོབ་པར་ལྡན་པའི་ཕྱིར་སངས་རྒྱས་དང་བྱང་ཆུབ་སེམས་དཔའ་རྣམས་ནི་སྔགས་སུ་གསུངས་ལ། དེ་དག་གི་རྣམ་པར་ཐར་པའི་སྒོ་ལ་སོགས་པའི་ཚིག་རྣམས་དང༌། དེར་བྱིན་
གྱིས་བརླབ་པའི་ཡི་གེ་དང་ཚིག་རྣམས་ཀྱང་སྔགས་ཀྱི་ཚིག་ཏུ་གསུངས་སོ། །སྔགས་དེ་རྣམས་ཀྱི་རྒྱུ་དང་རང་བཞིན་དང་འབྲས་བུ་ཐོབ་པའི་ཐབས་ལམ་ནི་ཚུལ་ཏེ། དེ་གོ་ཞིང་རྟོགས་པར་བྱེད་པའི་ཆོས་ཀྱི་ཚིག་གོ །དེ་ཉིད་ལ་སྔགས་ཀྱི་ཚིག་ཅེས་ཀྱང་གསུངས་སོ། །བཅོམ་ལྡན་འདས་ཀྱི་ཕྲིན་ལས་སྔགས་ལ་སོགས་པའི་ལྷར་སྣང་བར་གྱུར་པ་དེ་རྣམས་ཀྱིས་གསང་སྔགས་ཀྱི་ཚུལ་གྱི་མཚན་ཉིད་བཤད་པའི་ཆོས་སྟོན་པར་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་དེ་རྣམས་ཀྱིས་མཐོང་ངོ་ཞེས་པའོ། །འདིས་ནི་དོན་རྣམ་པ་གསུམ་གསུངས་པ་ཡིན་ཏེ། དེ་བཞིན་གཤེགས་པའི་སྐུ་ལ་སོགས་པའི་ཕྲིན་ལས་རྣམས་ཀྱི་ལས་ཀྱི་དཀྱིལ་འཁོར་གྱི་ལྷའི་གཟུགས་སུ་གྱུར་པ་དང༌། དེ་ཡང་ཇི་ལྟར་སྣོད་དུ་གྱུར་པའི་གདུལ་བྱའི་འགྲོ་བ་འདུལ་ནུས་པས་རྗེས་སུ་མཐུན་པ་དང༌། དེ་སྟོན་པའི་ཆོས་སྔགས་ཀྱི་ཚིག་ཏུའོ། །དོན་འདི་ཡང་བཅོམ་ལྡན་འདས་ཀྱིས་རྒྱུད་འདིར་གཞུང་འདི་གསལ་བར་བསྟན་ཏེ། དེ་གསུངས་པ། བཅོམ་ལྡན་འདས་ཀྱི་རང་གི་སྐུ་ལ་སོགས་པ་ལས་ཀྱི་ལྷའི་གཟུགས་སུ་གྱུར་པའི་ཕྱིར་དེ་བཞིན་གཤེགས་པའི་ཐོགས་པ་མེད་པའི་སྟོབས་བཅུའི་མོས་པ་ལས་དུ་མའི་ཁ་དོག་དང་དབྱིབས་སུ་བཀོད་པའི་བདག་གི་ངོ་བོ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་སྦྱིན་པ་དང༌། ཚུལ་ཁྲིམས་དང། བཟོད་པ་དང༌། བརྩོན་འགྲུས་དང༌། བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པའི་བསོད་ནམས་ལས་གྲུབ་པའི་ལུས་འབྱུང་ངོ་ཞེས་པ་ལ་སོགས་པའོ། །དེ་ཡང་བཅོམ་ལྡན་འདས་ཀྱི་སྐུ་ལ་སོགས་པའི་ལས་རྣམས་ལྷ་ལ་སོགས་པའི་གཟུགས་སུ་གྱུར་པ་དེ་ནི་ཅི་ཡང་རུང་བ་མ་ཡིན་གྱི། སེམས་ཅན་འདུལ་ནུས་པར་སྣང་བའི་རང་བཞིན་ཁོ་ན་སྟེ། གང་གསུངས་པ། བཅོམ་ལྡན་འདས་སྙོམས་པར་ཞུགས་མ་ཐག་ཏུ་དེ་ནས་དེ་ཉིད་ཀྱི་ཚེ། སེམས་ཅན་གྱི་ཁམས་མ་ལུས་པ་ངེས་པར་འབྱུང་བར་བྱེད་པའི་སྒོ་སྤུའི་བུ་ག་ཐམས་ཅད་ནས་བསམ་པ་ཇི་ལྟ་བ་བཞིན་ལས་དང་ཚེ་དང་རྣམ་པར་སྨིན་པའི་འབྲས་བུ་ཟ་བ་དང་ཟར་འཇུག་པའི་གཟུགས་དང༌། ཁ་དོག་དང༌། དབྱིབས་དང༌། ང་རོ་དང༌། འགྲོ་བ་དང༌། སྤྱོད་པ་དང་ངེས་པའི་ཚིག་བརྗོད་པ་སེམས་ཅན་ཐམས་ཅད་སོ་སོ་སོ་སོར་ཡང་དག་པར་མགུ་བར་བྱེད་པ་ཆོས་ཀྱི་དབྱིངས་ཀྱིས་རྣམ་པར་བསྐྱེད་པའི་སྐུ་རྣམས་བྱུང་བར་གྱུར་ཏོ། །བྱུང་ནས་ཀྱང་ནམ་མཁའ་དང་མཉམ་པའི་འཇིག་རྟེན་གྱི་
ཁམས་རབ་འབྱམ་རྣམས་སུ་སྒྲ་དབྱངས་གཅིག་གིས་ཆོས་ཀྱི་དབྱིངས་ཁྱབ་པར་རྣམ་པར་རིག་པར་བྱེད་པ། དེ་བཞིན་གཤེགས་པ་འབྱུང་བར་འགྱུར་བའི་ཚིགས་སུ་བཅད་པ་འདི་སྒྲོགས་པར་གྱུར་ཏོ་ཞེས་པ་ལ་སོགས་པ་དང༌། དེ་བཞིན་དུ་དེ་དག་གིས་བཤད་པའི་ཚིག་སྔགས་ལ་སོགས་པར་བྱ་བའི་ཕྱིར་དང། དེར་བྱིན་གྱིས་བརླབ་པའི་ཕྱིར་གསུངས་པ། ཇི་ལྟར་ན་དེ་བཞིན་གཤེགས་པ་རྣམས་གསང་སྔགས་ཀྱི་ཚུལ་ཡིག་འབྲུ་དག་ཏུ་བྱིན་གྱིས་བརླབ་ཅེ་ན། གསང་བ་པའི་བདག་པོ་དེ་ལ་དེ་བཞིན་གཤེགས་པ་རྣམས་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་ཡང་དག་པར་བསྒྲུབ་པའི་བདེན་པའི་ཚིག་གང་ཡིན་པ་དང༌། འཕགས་པའི་བདེན་པ་བཞི་དང༌། དྲན་པ་ཉེ་བར་གཞག་པ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དེ་བཞིན་གཤེགས་པའི་སྟོབས་བཅུ་དང༌། ཕ་རོལ་ཏུ་ཕྱིན་པ་དྲུག་དང༌། བྱང་ཆུབ་ཀྱི་ཡན་ལག་རིན་པོ་ཆེ་བདུན་དང༌། ཚངས་པའི་གནས་པ་བཞི་དང༌། སངས་རྒྱས་ཀྱི་ཆོས་མ་འདྲེས་བ་བཅོ་བརྒྱད་གང་ངག་ཡིན་པ་དང༌། གསང་བ་པའི་བདག་པོ་མདོར་ན་དེ་བཞིན་གཤེགས་པ་རྣམས་ཀྱི་ཐམས་ཅད་མཁྱེན་པའི་ཡེ་ཤེས་གང་ཡིན་པ་དེ་ཐམས་ཅད་དེ་བཞིན་གཤེགས་པ་རྣམས་ཉིད་བསོད་ནམས་དང་ཡེ་ཤེས་ཀྱི་སྟོབས་དང༌། སྔོན་གྱི་སྨོན་ལམ་མཁྱེན་པའི་སྟོབས་དང༌། ཆོས་ཀྱི་དབྱིངས་ཀྱི་བྱིན་གྱིས་བརླབས་ནས་སེམས་ཅན་རྣམས་ལ་སྐལ་བ་ཇི་ལྟ་བ་བཞིན་དུ་གསང་སྔགས་ཀྱི་ཆོ་ག་ཡང་དག་པར་རབ་ཏུ་སྟོན་ཏོ་ཞེས་པ་ལ་སོགས་པའོ། །དེ་ལ་ཆོས་ཀྱི་སྐུ་རྟོག་པ་ཐམས་ཅད་རབ་ཏུ་མེད་པར་གནས་པ་ལས་ཇི་ལྟར་ན་དེ་བཞིན་གཤེགས་པ་དེ་ལྟ་བུའི་སྔགས་ཀྱི་ལྷ་ཚོགས་འབྱུང་བར་འགྱུར་ཞེས་འགའ་ཞིག་སྨྲ་ན་དེའི་ཕྱིར་བཅོམ་ལྡན་འདས་ཀྱིས་འདི་གསུངས་ཏེ། ལུས་ཀྱི་བྱེ་བྲག་ཇི་སྙེད་པ། །བརྗོད་པ་ལས་ནི་མང་དུ་འགྱུར། །དེ་བཞིན་སྔགས་ཀྱི་མགོན་པོ་ཡེ། །བྱེ་བྲག་དག་ཀྱང་གྲངས་མེད་གསུངས། །ཇི་ལྟར་ཡིད་བཞིན་ནོར་བུ་ནི། །དཔལ་ལྡན་འདོད་པའི་དོན་སྒྲུབ་པ། །དེ་བཞིན་འཇིག་རྟེན་སྒྲོན་མ་ཡི། །སྐུ་ཡང་དོན་རྣམས་ཐམས་ཅད་སྒྲུབ། །གསང་བ་པའི་བདག་པོ་ཆོས་ཀྱི་དབྱིངས་རྣམ་པར་མི་རྟོག་པ་ཇི་ལྟར་དགོས་པ་ཐམས་ཅད་མངོན་པར་སྒྲུབ་ཅེ་ན། གསང་བ་པའི་བདག་པོ་འདི་ལྟ་སྟེ། དཔེར་ན་ནམ་མཁའི་ཁམས་ནི་སེམས་ཅན་ཡང་མ་ཡིན། སྲོག་ཀྱང་མ་ཡིན། ཤེད་ལས་སྐྱེས་པ་ཡང་མ་ཡིན། བྱེད་པ་པོ་
ཡང་མ་ཡིན། ཚོར་བ་པོ་ཡང་མ་ཡིན། གཟུང་བ་ཡང་མ་ཡིན། འཛིན་པ་ཡང་མ་ཡིན་ཞིང་རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་མོད་ཀྱི། འོན་ཀྱང་སེམས་ཅན་གྱི་ཁམས་མ་ལུས་པ་རྣམ་པར་འགྲོ་བ་དང་འོང་བ་ལ་སོགས་པ་ཐམས་ཅད་བྱེད་དེ། འདི་ལ་ནི་དོགས་པ་མེད་དོ། །དེ་བཞིན་རྣམ་པར་མི་རྟོག་པའོ། །ཐམས་ཅད་མཁྱེན་པ་གནས་མེད་འདི། །འགྲོ་བ་རྣམས་ཀྱི་ཕྱི་དང་ནང༌། །ཐམས་ཅད་ངེས་པ་ཉིད་དུ་སྒྲུབ། །ཅེས་སོ། །གསུང་འདི་ལ་ཡང་བཅོམ་ལྡན་འདས་ཀྱི་དགོངས་པ་འདི་ལྟ་བུ་ཡིན་པར་ཁོང་དུ་ཆུད་དེ། དེ་བཞིན་གཤེགས་པ་ཆོས་ཀྱི་སྐུ་ལ་རྣམ་པར་གནས་པ་ལ་རྣམ་པར་རྟོག་པ་མེད་ཀྱང་སྔོན་གྱི་སྨོན་ལམ་གྱི་ཤུགས་ཀྱིས་ལྷའི་ལུས་ལ་སོགས་པ་ཐམས་ཅད་དུ་རབ་ཏུ་སྣང་ན། དེ་ལ་རྣམ་པར་རྟོག་པའི་གོ་སྐབས་ག་ལ་ཡོད་ཅེས་སོ། །སེམས་ཅན་ལས་ཀྱི་ཚེ་རྣམ་པར་བསྐྱེད་པ་རྣམས་ཞེས་པ་ནས། རྣམ་པར་དག་པའི་ཚིག་དག་གིས་ཆོས་སྟོན་པ་དག་ཀྱང་མཐོང་ངོ་ཞེས་པའི་བར་བཤད་པར་བྱ་སྟེ། དེ་ལ་རྡོ་རྗེ་འཛིན་པ་དང༌། ཀུན་དུ་བཟང་པོ་དང༌། ཕྱག་ན་པདྨོའི་ལུས་དང་འདྲ་བ་ཞེས་པ་ནི་བཅོམ་ལྡན་འདས་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་བྱིན་གྱི་རླབས་སེམས་ཅན་ལས་ཀྱི་ཚེ་བསྐྱེད་པ་རྣམས་དང༌། ལས་ཀྱི་ཚེ་བཀག་བ་རྣམས་ཡང་སྲིད་པའི་མྱུ་གུ་མངོན་པར་བསྐྱེད་པའི་ཕྱིར་ཆོས་འཆད་དོ། །དེ་ལ་ལས་ཀྱིས་རྣམ་པར་བསྐྱེད་པ་ནི། མོས་པས་སྤྱོད་པའི་ས་གནས་པ་ན་སེམས་གསུམ་སྦྱོང་བ་དང་ས་བཅུ་ལ་སོགས་པའི་ཡོན་ཏན་ཇི་ལྟ་བུ་ཡིན་པ་དེ་ངེས་པར་ཤེས་ཤིང་དེ་ལ་མོས་པས་ཉོན་མོངས་པ་ཀུན་ནས་མི་ལྡང་བར་རྣམ་པར་མནན་ཏེ། སེམས་སྦྱང་བ་ལ་སོགས་པའི་དགེ་བའི་ལས་ཀྱི་དབང་གིས་ཇི་ལྟར་སྨོན་པ་བཞིན་དུ་བརྒྱ་བྱིན་དང་ཚངས་པ་ལ་སོགས་པ་གང་འདོད་པར་སྐྱེ་བ་ནི་ལས་ཀྱི་ཚེ་རྣམ་པར་སྐྱེད་པ་ཡིན་ལ། དེ་ཡང་སེམས་དང་པོ་བསྐྱེད་པ་ནས་ས་བཅུ་པའི་བར་དུའོ། །དེ་ལ་སེམས་དང་པོ་བསྐྱེད་པ་ནི་ས་དང་པོ་རབ་ཏུ་དགའ་བ་ལ་བྱའོ། །ལས་ཀྱི་ཚེ་བཀག་པ་ནི་འཕགས་པ་ཉན་ཐོས་ཉོན་མོངས་པའི་སྒྲིབ་པ་སྤངས་པ་རྣམས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་ཚེ། པདྨོ་དམ་པའི་སྙིང་པོ་ལ་བསྐལ་པ་བརྒྱད་ཅུར་གནས་ནས། ཚེ་འགོག་པར་བྱེད་པ་དེ་ལ་བྱང་ཆུབ་སེམས་དཔའ་དེ་རྣམས་ཀྱི་ཚེ་འགོག་པ་དེ་ལས་
བཟློག་སྟེ། ཡང་སྲིད་པའི་མྱུ་གུ་བསྐྱེད་ནས་ས་བཅུ་ལ་འཇུག་པ་དང་རྫོགས་པར་བྱ་བའི་ཕྱིར་ཆོས་འཆད་དོ། །འདི་ཉིད་ལ་ཡོངས་སུ་རྫོགས་པར་བྱ་བ་ཞེས་པ་ནི། སྔགས་ཀྱི་ཚིག་རྣམ་པར་དག་པ་འདི་ཉིད་ཀྱིས་ཞེས་བྱ་བར་དགོངས་ཏེ། སྔགས་ཀྱི་ཚིག་རྣམ་པར་དག་པ་ཞེས་པ་ནི་ཕྱག་ན་པདྨོ་དང་ཕྱག་ན་རྡོ་རྗེ་ལ་སོགས་པའི་སྲས་སུ་གྱུར་པའི་སེམས་ཅན་རྣམས་དང༌། ལས་ཀྱི་ཚེ་བཀག་པའི་སེམས་ཅན་རྣམས་ནི་སེམས་ཅན་ཕལ་བ་བཞིན་དུ་ཉོན་མོངས་པའི་དབང་དུ་མི་འགྲོ་ལ། དེ་རྣམས་ལ་ཆོས་བཤད་པ་ཡང་ས་དང་པོ་ནས་བརྩམས་ནས་ས་བཅུ་རྫོགས་པར་བྱ་བའི་ཕྱིར་རྣམ་པར་དཀར་བའི་ཆོས་ཤ་སྟག་ཡིན་པས་སྔགས་ཀྱི་ཚིག་རྣམ་པར་དག་པའོ། །གཞུང་ལས། དེ་ནས་ཡང་བཅོམ་ལྡན་འདས་གསང་བ་པའི་བདག་པོ་ཕྱག་ན་རྡོ་རྗེ་འཁོར་འདུས་པ་དེ་ཉིད་ན་འདུག་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པ་ནས། བཅོམ་ལྡན་འདས་ཡེ་ཤེས་འདིའི་རྒྱུ་ནི་གང༌། རྩ་བ་ནི་གང༌། མཐར་ཐུག་པ་ནི་གང་ལགས་ཞེས་པའི་བར་དུ་འབྱུང་བ་ལ། བཅོམ་ལྡན་འདས་ཀྱི་སྐུ་དང་གསུང་དང་ཐུགས་ཀྱི་ཕྲིན་ལས་ལས་བྱུང་བ་ཐམས་ཅད་མཁྱེན་པའི་ཡེ་ཤེས་དེ་སེམས་ཅན་རྣམས་ལ་རྣམ་པར་ཕྱེ་སྟེ་ཚུལ་སྣ་ཚོགས་དང༌། ཐབས་སྣ་ཚོགས་ཀྱིས་བཤད་པ་དེ་དག་ཇི་ལྟར་མཐོང་བ་བཅོམ་ལྡན་འདས་ལ་སླར་བཟླས་ནས་ཐམས་ཅད་མཁྱེན་པའི་ཡེ་ཤེས་དེའི་རྒྱུ་དང་རྩ་བ་དང་མཐར་ཐུག་པ་དྲིས་པ་ཡིན་གྱི། ཇི་ལྟར་ཞེས་པ་དང་འོག་ནས་འབྱུང་བའི་ཚིག་རྣམས་ནི་དྲི་བ་མ་ཡིན་ཏེ། དེ་རྣམས་བདག་གིས་ཇི་ལྟར་རྟོགས་པ་རྣམས་གསོལ་ནས། ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་དང་རྩ་བ་དང་མཐར་ཐུག་པ་དྲི་བའི་སྤྱིར་སྨོས་པའོ། །དེ་ལ་བཅོམ་ལྡན་འདས་དང་དེ་བཞིན་གཤེགས་པ་ནི་གོང་དུ་བཤད་ལ། དགྲ་བཅོམ་པ་ནི་ཉོན་མོངས་པའི་དགྲ་བཅོམ་པའམ་མཆོད་པར་འོས་པའོ། །ཡང་དག་པར་རྫོགས་པའི་སངས་རྒྱས་རྣམས་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཞེས་པ་ནི་སྙིང་པོ་བྱང་ཆུབ་ན་ཡང་དག་པར་བཞུགས་པའོ། །རྣམ་པ་ཐམས་ཅད་མཁྱེན་པའི་ཡེ་ཤེས་ནི་ཀུན་རྫོབ་དང་དོན་དམ་པ་རྣམ་པ་གཉིས་ཏེ། ཀུན་རྫོབ་ནི་སྟོབས་བཅུ་དང་མི་འཇིགས་པ་བཞི་དང་སངས་རྒྱས་ཀྱི་ཆོས་མ་འདྲེས་བཅོ་བརྒྱད་ལ་སོགས་
པ་རྣམ་པ་ཐམས་ཅད་མཁྱེན་པའོ། །དོན་དམ་པ་ནི་སྟོང་པ་ཉིད་དུ་མཁྱེན་པའོ། །རྣམ་པར་ཕྱེ་སྟེ་ཞེས་པ་ནི་སོ་སོར་བཤགས་པའི་དོན་ཏེ་ཐམས་ཅད་མཁྱེན་པར་རོ་གཅིག་ཏུ་གྱུར་ཅིང་རྫོགས་པའི་མཚན་ཉིད་ནི་འོག་ནས་འཆད་དོ། །མི་དང་ལྷར་སྐྱེ་བ་ལ་སོགས་པ་འཇིག་རྟེན་པའི་དགེ་བ་བཅུ་གྲུབ་པ་དང༌། ཉན་ཐོས་ལ་སོགས་པ་ཐམས་ཅད་ཀྱང་ཐམས་ཅད་མཁྱེན་པའི་ཆའོ། །ཇི་ལྟར་ཞེ་ན། འཇིག་རྟེན་པའི་བསོད་ནམས་ཀྱང་ཐམས་ཅད་མཁྱེན་པར་འགྱུར་བའི་བརྒྱུད་པའི་རྒྱུ་སྟེ། ཐམས་ཅད་མཁྱེན་པའི་ཆ་ཤས་ཡོད་པས་ན་རྒྱུར་འགྱུར་ལ། གཞན་ཡང་དངོས་དང་བརྒྱུད་པ་ནས་བརྒྱུད་པའི་རང་བཞིན་ཡིན་པར་རིག་པར་བྱའོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་ཚོགས་རྣམས་ཐམས་ཅད་མཁྱེན་པའི་ཡེ་ཤེས་ལ་བསགས་པ་དེ་ལྷུན་གྱིས་གྲུབ་པ་ཉིད་དུ་སེམས་ཅན་རྣམས་ལ་རྣམ་པར་ཕྱེ་བ་ནི་ཚུལ་ལ་སོགས་པ་སྣ་ཚོགས་སུ་བསྟན་པ་སྟེ། དེ་ལ་ཚུལ་སྣ་ཚོགས་ཞེས་པ་ནི། ཁ་ཅིག་ལ་ནི་ཉན་ཐོས་ཀྱི་ཐེག་པའི་ཚུལ་ཞེས་པ་ནས་མངོན་པར་ཤེས་པ་ལྔའི་ཚུལ་གྱི་བར་ཏེ། དེ་རྣམས་སོ་སོའི་རྣམ་པར་གྲོལ་བའི་ལམ་ལ་བྱའོ། །བསམ་པ་སྣ་ཚོགས་ཤེས་པ་ནི་ཁ་ཅིག་ལ་ནི་ལྟར་སྐྱེ་བར་བྱ་བ་ཞེས་པ་ནས་མིའམ་ཅིའི་བར་དུ་སྐྱེ་བར་བྱ་བའི་ཕྱིར་ཆོས་སྟོན་ཞེས་པའི་བར་ཏེ། དེ་རྣམས་སུ་སྐྱེ་བར་འདོད་པའི་བསམ་པ་དང་རྗེས་སུ་མཐུན་པར་ཆོས་འཆད་པ་ལ་བྱའོ། །ཐབས་སྣ་ཚོགས་ཀྱི་ཚུལ་གྱིས་ཆོས་སྟོན་ཞེས་པ་ནི། དེ་ལ་སེམས་ཅན་ལ་ལ་སངས་རྒྱས་ཀྱིས་གདུལ་བར་བྱ་བ་དག་གིས་ནི་སངས་རྒྱས་ཀྱི་གཟུགས་སུ་མཐོང་ཞེས་པ་ནས་སྤྱོད་ལམ་རྣམ་པ་སྣ་ཚོགས་སུ་བཞུགས་པར་མཐོང་ལ་ཞེས་པའི་བར་ཏེ། ཚུལ་སྣ་ཚོགས་དང་བསམ་པ་སྣ་ཚོགས་འཆད་པ་ཡང་ཐབས་ཡིན་མོད་ཀྱི། དེ་དག་ཉིད་སངས་རྒྱས་ལ་སོགས་པའི་སྐུས་སེམས་ཅན་དེ་དག་གི་རང་རང་གི་སྐད་ཀྱི་ཚུལ་དུ་སྨྲ་ཞིང༌། སོ་སོའི་སྤྱོད་ལམ་དུ་རྣམ་པར་གནས་པར་སྟོན་པས་ན་ཐབས་ཀྱི་ཡང་ཐབས་སུ་བལྟའོ། །སྤྱོད་ལམ་རྣམ་པ་སྣ་ཚོགས་སུ་ཞེས་པ་ནི་སངས་རྒྱས་དང་ཉན་ཐོས་ལ་སོགས་པས་འདུལ་བའི་སེམས་ཅན་དེ་དག་གི་སྤྱོད་ལམ་དང་རྗེས་སུ་མཐུན་པའི་གཟུགས་སུ་འགྱུར་ཞིང་སྟོན་པ་ལ་བྱའོ། །ཐམས་ཅད་མཁྱེན་པའི་ཡེ་ཤེས་དེ་ཡང་འདི་ལྟར། དེ་བཞིན་གཤེགས་པའི་རྣམ་པར་གྲོལ་
བའི་རོར་རོ་གཅིག་པ་ལེགས་སོ་ཞེས་པ་ནི་དེ་ལྟར་ཚུལ་སྣ་ཚོགས་དང༌། བསམ་པ་དང་ཐབས་སྣ་ཚོགས་ཀྱི་སྒོ་ནས་རྣམ་པ་ཐ་དད་པ་དུ་མར་སྤྲོས་པ་ཡང་ཐུན་མོང་དུ་དེ་བཞིན་གཤེགས་པའི་རྣམ་པར་གྲོལ་བ་ཉོན་མོངས་པ་དང་ཤེས་བྱའི་སྒྲིབ་པ་སྤངས་པ། རྟོག་པའི་བག་ཆགས་ཀྱི་གནས་ལས་ཤིན་ཏུ་འདས་པའི་མཚན་ཉིད་དུ་རོ་གཅིག་ཏུ་འགྱུར་བ་ནི། དཔེར་ན་བུ་རམ་ཤིང་རྣམ་པ་མང་པོའི་ཁུ་བ་ལས་བུ་རམ་དུ་བྱས་ན་བུ་རམ་ཤིང་དེ་རྣམས་ཀྱི་སོ་སོའི་རོར་དབྱེར་མེད་དེ་རོ་གཅིག་པ་དང་འདྲའོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། ནམ་མཁའི་ཁམས་ནི་རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བ་སྟེ་ཞེས་པ་ནས་ལྷ་དང་བཅས་པའི་འཇིག་རྟེན་རབ་ཏུ་སིམ་པར་བགྱིད་པ་ལགས་ཞེས་པའི་བར་གྱི་ནི་ཐམས་ཅད་མཁྱེན་པའི་ཡེ་ཤེས་དེའི་རང་བཞིན་ཕུན་སུམ་ཚོགས་པ་དང་མངོན་པར་མཐོ་བའི་གཞན་གྱི་དོན་ཕུན་སུམ་ཚོགས་པ་དང་སྤོང་བ་ཕུན་སུམ་ཚོགས་པ་དང༌། ངེས་པར་ལེགས་པ་ཐོབ་པའི་གཞན་གྱི་དོན་ཕུན་སུམ་ཚོགས་པ་ཐོབ་པར་དཔེ་དག་གིས་བསྟན་ཏེ། དཔེ་དག་གིས་ཐམས་ཅད་མཁྱེན་པའི་ཡེ་ཤེས་དེ་སྔོན་གྱི་སྨོན་ལམ་གྱི་ཤུགས་ཀྱིས་ལྷུན་གྱིས་གྲུབ་པ་ཉིད་དུ་རྣམ་པར་མི་རྟོག་མི་དཔྱོད་པར་ཚུལ་སྣ་ཚོགས་ལ་སོགས་པའི་སྒོ་ནས་སེམས་ཅན་གྱི་དོན་བྱེད་པར་ཡང་བསྟན་ཏོ། །དེ་ལ་ནམ་མཁའི་དཔེས་ནི་རང་བཞིན་ཕུན་སུམ་ཚོགས་པ་བསྟན་ཏེ། ནམ་མཁའ་ཇི་ལྟར་རྟོག་པ་དང་དཔྱོད་པའི་བག་ཆགས་ཀྱི་གནས་མེད་པ་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ལ་རྟོག་པ་དང་རྣམ་པར་རྟོག་པ་མེད་དེ། རྣམ་པར་རྟོག་པ་དང་རྣམ་པར་དཔྱོད་པ་མེད་ཅེས་པའི་དོན་ཏོ། །དེ་ལ་དེ་ལྟར་ཐམས་ཅད་མཁྱེན་པའི་ཡེ་ཤེས་རྣམ་པར་མི་རྟོག་ཅིང་སེམས་པ་མེད་པ་ཡིན་ན། སེམས་པ་མེད་པར་ཇི་ལྟར་ལུས་ལ་སོགས་པའི་རྒྱུན་འབྱུང་ཞིང་སེམས་ཅན་གྱི་དོན་བྱེད་སྙམ་དུ་དོགས་པ་ལ་སའི་དཔེས་རྣམ་པར་མི་རྟོག་བཞིན་དུ་མངོན་པར་མཐོ་བའི་གཞན་གྱི་དོན་ཕུན་སུམ་ཚོགས་པ་བྱེད་པར་བསྟན་ཏེ། དེ་ལ་ས་ནི་རྟོག་པ་དང་རྣམ་པར་རྟོག་པ་མེད་བཞིན་དུ་རྩ་བ་དང་འབྲས་བུ་དང༌། མེ་ཏོག་ལ་སོགས་པས་སེམས་ཅན་ཐམས་ཅད་ཀྱི་གསོས་སུ་འགྱུར་བར་བྱེད་དོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ཡང་རྟོག་པ་དང་རྣམ་པར་རྟོག་པ་མེད་བཞིན་དུ་སྔགས་ཀྱི་ལྷ་ལ་སོགས་པའི་སྒོར་སྟོན་ཏེ། སེམས་ཅན་རྣམས་ཀྱིས་ཀྱང་སྔགས་ཀྱི་ལྷ་
ལ་སོགས་པ་བསྙེན་ཅིང་བ་ཟླས་པ་ལ་སོགས་པའི་སྒོ་ནས་མཉེས་པར་བྱས་པས་མངོན་པར་མཐོ་བའི་མཚན་ཉིད་མི་དང་ལྷའི་ལོངས་སྤྱོད་ལ་སོགས་པ་ཐོབ་པར་འགྱུར་རོ། །མེའི་དཔེས་ནི་སྤོང་བ་ཕུན་སུམ་ཚོགས་པ་བསྟན་ཏེ། ཇི་ལྟར་མེས་རྩི་ཤིང་ལ་སོགས་པ་ཐམས་ཅད་བསྲེགས་ཀྱང་སྲེག་པར་འགྱུར་བའི་མཐུ་མི་ཟད་དོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ཡང་མི་ཤེས་པའི་བུད་ཤིང་ཐམས་ཅད་སྲེག་སྟེ། རྒྱུའི་ཚེ་བྱང་ཆུབ་སེམས་དཔའི་སྤྱོད་པ་ས་དང་ཕ་རོལ་ཏུ་ཕྱིན་པ་ལ་སོགས་པའི་རིམ་གྱིས་མི་ཤེས་པ་ལ་སོགས་པ་ཉོན་མོངས་པ་མི་མཐུན་པའི་ཕྱོགས་རྣམས་སེལ་ཞིང་མེད་པར་བྱེད་པ་ནི་བུད་ཤིང་སྲེག་པའོ། །གཉིས་སུ་ན་འབྲས་བུའི་ཚེ་ཐམས་ཅད་མཁྱེན་པ་ཉིད་ནི་མི་ཤེས་པ་མེད་པའི་མཚན་ཉིད་ཡིན་པས་ན་མི་ཤེས་པའི་བུད་ཤིང་སྲེག་པའི་རང་བཞིན་ནོ། །དེས་གོང་མའི་སྤོང་བ་ཕུན་སུམ་ཚོགས་པ་དེ་ཉིད་ཀྱང་དེས་བག་ཆགས་ཐམས་ཅད་མ་ལུས་པར་སྤོང་ངོ༌། །ཞེས་རླུང་གི་དཔེ་འོག་མས་བསྟན་ཏེ། དེ་བས་ན་རླུང་གི་ཁམས་ནི་རྡུལ་ཐམས་ཅད་སེལ་བར་བགྱིད་པ་ལགས་སོ་ཞེས་གསུངས་སོ། །དེ་ལ་རྡུལ་ནི་ཕྲ་བའི་མཚན་ཉིད་དེ། དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱིས་མི་ཤེས་པའི་བག་ཆགས་ཕྲ་མོའི་མཐར་ཐུག་པ་སྤངས་པ་ལ་བྱའོ། །ཆུའི་དཔེས་ནི་ངེས་པར་ལེགས་པའི་གཞན་གྱི་དོན་ཕུན་སུམ་ཚོགས་པ་བསྟན་ཏེ། ཇི་ལྟར་ཆུ་དེས་ཚ་བ་ལ་སོགས་པས་གདུངས་པའི་སེམས་ཅན་གྱི་ལུས་སིམ་པར་བྱེད་པ་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་དེ་ཡང་སེམས་ཅན་ཐམས་ཅད་ཀྱི་སྡུག་བསྔལ་དང༌། འདོད་ཆགས་ལ་སོགས་པའི་ཉོན་མོངས་པ་རྣམས་ཀྱིས་གདུངས་པ་ཞི་བར་བྱེད་པ་ངེས་པར་ལེགས་པའི་མཚན་ཉིད་མྱ་ངན་ལས་འདས་པ་ལ་སྦྱོར་ཞིང་རྫོགས་པར་བྱེད་པས་ན། ལྷ་དང་བཅས་པའི་འཇིག་རྟེན་རབ་ཏུ་སིམ་པར་བགྱིད་པ་ལགས་ཞེས་པའོ། །དེ་དག་ནི་ཐམས་ཅད་མཁྱེན་པའི་ཚུལ་སྔོན་ཆད་བཅོམ་ལྡན་འདས་ཀྱིས་བཀའ་སྩལ་པ་ལས། ཕྱག་ན་རྡོ་རྗེ་བདག་ཉིད་ཀྱིས་འདི་ལྟར་རྟོགས་སོ་ཞེས་གསོལ་བ་སྟེ་བདག་ཉིད་ཀྱིས་རྟོགས་པར་བསྟན་པ་ཡང་ཆོས་གསུང་བ་པོ་སྤྲོ་བ་བསྐྱེད་པའི་ཕྱིར་ཡིན་ནོ། །དེ་དག་གི་རང་བཞིན་དེ་ལྟར་རྟོགས་མོད་ཀྱི་དེ་དག་གི་རྒྱུ་གཙོ་བོའི་རྒྱུ་དང༌། རྒྱུའི་རྒྱུ་དང་མཐར་ཕྱིན་པར་བྱེད་པའི་རྒྱུ་གང་ལགས་ཞེས་དྲིས་པ་ནི་འདིའི་རྒྱུ་ནི་གང༌། རྩ་བ་ནི་གང༌། མཐར་
ཐུག་པ་ནི་གང་ལགས་ཞེས་བྱ་བ་ཡིན་ནོ། །དེ་ལ་འཕགས་པ་ཕྱག་ན་རྡོ་རྗེས་ཚུལ་སྣ་ཚོགས་ལ་སོགས་པ་དང་དེ་བཞིན་གཤེགས་པའི་རྣམ་པར་གྲོལ་བའི་རོར་རོ་གཅིག་པར་རྟོགས་པ་དེ་ཅི་རྟོགས་པའི་ཤེས་རབ་ཀྱིས་སམ། ཐོས་པའི་ཤེས་རབ་ཀྱིས་ཤེས། གལ་ཏེ་རྟོགས་པའི་ཤེས་རབ་ཀྱིས་ཤེས་ན་ནི་དེ་བཞིན་གཤེགས་པ་དང་ཁྱད་པར་མེད་ལ། ཐོས་པའི་ཤེས་རབ་ཀྱིས་ཤེས་ན་ཡང་སེམས་ཅན་ཐ་མལ་པ་དང་འདྲ་བར་འགྱུར་རོ་སྙམ་དུ་དོགས་ན། ལན་ནི་ཤེས་རབ་དེ་གཉི་གས་ཤེས་པ་ལ་ཉེས་པ་མེད་དེ། བཅོམ་ལྡན་འདས་ཀྱི་སྐུ་མི་ཟད་པའི་རྒྱན་ལ་སོགས་པ་ལ་འཇུག་པ་ན་རང་གི་མཐུ་དང་འཚམ་པའི་སྤྱོད་ཡུལ་གྱིས་ཤེས་ཀྱི། བཅོམ་ལྡན་འདས་ལྟར་རྣམ་པ་ཐམས་ཅད་དུ་ཤེས་པ་ནི་མ་ཡིན་པས་ཁྱད་པར་མེད་པར་མི་འགྱུར་ལ་ཐོས་པ་ཡང་རྟོགས་པ་གཙོ་བོར་གྱུར་པ་ཡིན་གྱི། སེམས་ཅན་ཐ་མལ་པ་ལྟར་ཐོས་པ་ཙམ་གཙོ་བོར་གྱུར་པ་མ་ཡིན་པས་སེམས་ཅན་ཐ་མལ་པ་དང་ཁྱད་པར་མེད་པར་མི་འགྱུར་རོ། །གཉིས་སུ་ན་རྟོགས་པའི་ཤེས་རབ་ཀྱིས་རྣམ་པ་ཐམས་ཅད་དུ་ཤེས་ན་ཡང་ཉེས་པ་མེད་དེ་བཅོམ་ལྡན་འདས་ཀྱི་བྱིན་གྱི་རླབས་ཀྱིས་ཕ་རོལ་གྱི་སེམས་ཤེས་པ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་ཡུལ་རྣམ་པ་ཐམས་ཅད་དུ་ཤེས་པར་འགྱུར་རོ། །དེ་ལ་བཅོམ་ལྡན་འདས་ལ་ཕྱག་ན་རྡོ་རྗེས་ཐམས་ཅད་མཁྱེན་པའི་ཡེ་ཤེས་དེའི་རྒྱུ་དང་རྩ་བ་དང་མཐར་ཐུག་པ་དྲིས་པ་ལ་ལེགས་སོ་ཞེས་བྱ་བའི་ཚིག་ལན་གསུམ་གསུངས་པ་ལས་སྔ་མ་ནི་དོན་བཟང་པོ་དྲིས་པས་མཉེས་ཤིང་བསྟོད་པའི་ཚིག་ཡིན་ལ། གཉིས་པ་ནི་དྲི་བའི་ཚིག་དེ་ཉིད་ལེགས་པ་ལ་བྱ་ཞིང༌། ཐ་མ་གཅིག་ནི་ཕྱག་ན་རྡོ་རྗེ་ལ་བྱ་སྟེ། དེ་ལྟ་བུའི་དོན་བཟང་པོ་འདྲི་ཞིང་སེམས་ཅན་ལ་ཕན་གདགས་པའི་ཕྱིར་དྲིས་པ་ལེགས་སོ་ཞེས་གསུངས་པའོ། །ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་ཅེས་བྱ་བས་ནི་སྣོད་བཞི་ལས་བཟློག་པར་གསུངས་ཏེ། ཉོན་ཅིག་ཅེས་པ་ནི་སྣོད་ཁ་སྦུབ་པ་ལས་བཟློག་པའོ། །ལེགས་པར་ཞེས་པ་ནི་སྣོད་གློ་རྡོལ་ཅན་ལས་བཟློག་པའོ། །ཤིན་ཏུ་ཞེས་པ་ནི་སྣོད་མི་གཙང་བ་ལས་བཟློག་པའོ། །ཡིད་ལ་ཟུང་ཤིག་ཅེས་པས་ནི་སྣོད་ཞབས་རྡོལ་ལས་བཟློག་པའོ། །རྒྱུ་ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེ་ཆེན་པོའོ། །མཐར་ཐུག་པ་ནི་ཐབས་སོ་ཞེས་པ་དེ་ལ་བྱང་ཆུབ་ཀྱི་སེམས་ལ་ཡང་རྣམ་པ་གཉིས་ཏེ། བྱང་ཆུབ་ཀྱི་ཕྱིར་སེམས་
པ་དང། བྱང་ཆུབ་ཀྱི་རང་བཞིན་གྱི་སེམས་སོ། །བྱང་ཆུབ་ཀྱི་ཕྱིར་སེམས་པ་ནི་སྨོན་པ་དང་འཇུག་པའི་སེམས་དག་ཀྱང་ཡིན་མོད་ཀྱི་སྐབས་འདིར་དང་པོའི་བྱང་ཆུབ་ཀྱི་སེམས་ལ་བྱ་སྟེ། ས་དང་པོའི་སེམས་དེ་མངོན་པར་བྱང་ཆུབ་པའི་སྙིང་པོར་སྦྱོར་བའི་ཕྱིར་རོ། །བྱང་ཆུབ་ཀྱི་རང་བཞིན་གྱི་སེམས་ཀྱང་འདི་ལྟ་སྟེ། ས་དང་པོའི་བྱང་ཆུབ་ཀྱི་སེམས་དེ་ནི་ཆོས་ཐམས་ཅད་མཉམ་པ་ཉིད་དུ་རྟོགས་པའི་རང་བཞིན་ཡིན་པས་མངོན་པར་བྱང་ཆུབ་པའི་སེམས་དང་རང་བཞིན་གཅིག་པའི་ཕྱིར་རོ། །དེ་ལྟ་བུའི་བྱང་ཆུབ་ཀྱི་སེམས་ནི་ཐམས་ཅད་མཁྱེན་པའི་ཡེ་ཤེས་ཀྱི་རྒྱུའི་གཙོ་བོར་རིག་པར་བྱའོ། །སྙིང་རྗེ་ནི་རྩ་བ་སྟེ། སེམས་ཅན་སྡུག་བསྔལ་བས་གདུངས་པ་ལས་བྲལ་བའི་ཕྱིར་སྙིང་རྗེའི་སྒོ་ནས་སྨོན་ལམ་ལ་སོགས་པའི་བྱང་ཆུབ་ཀྱི་སེམས་སྐྱེ་སྟེ། དེ་བས་ན་སྙིང་རྗེ་དེ་བྱང་ཆུབ་ཀྱི་སེམས་ཀྱི་རྩ་བར་གྱུར་པས་ན་རྒྱུའི་ཡང་རྒྱུར་བལྟའོ། །གཉིས་སུ་ན་ཐམས་ཅད་མཁྱེན་པའི་ཡེ་ཤེས་བསྟན་པར་གནས་པར་བྱེད་པའི་ཕྱིར་རྩ་བ་ཞེས་བྱ་སྟེ། ཐུགས་རྗེའི་གཟུངས་ཀྱིས་ལྷག་མ་ལུས་པའི་མྱ་ངན་ལས་མི་འདའ་བར་དུས་ཐམས་ཅད་དུ་མི་གནས་པའི་མྱ་ངན་ལས་འདས་པར་གནས་ཤིང་ཀུན་རྫོབ་དང་དོན་དམ་པའི་ཡེ་ཤེས་བརྟེན་པ་སྟེ་སྡོང་པོའི་རྩ་བ་ལྟར་བརྟེན་པར་བྱེད་པས་ན་ཐམས་ཅད་མཁྱེན་པའི་ཡེ་ཤེས་ཀྱི་རྩ་བའོ། །མཐར་ཐུག་པ་ནི་ཐབས་སོ་ཞེས་པ་ལ། ཐབས་ནི་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་སྟེ། ཐམས་ཅད་མཁྱེན་པའི་ཡེ་ཤེས་རྫོགས་པར་སྦྱོར་བའི་མཐར་ཐུག་པར་དེ་དག་གིས་སྟོན་པས་ན་མཐར་ཐུག་པར་བལྟའོ། །དེ་ལ་ཐམས་ཅད་མཁྱེན་པའི་རྒྱུ་བྱང་ཆུབ་ཀྱི་སེམས་སོ་ཞེས་བྱ་ན། བྱང་ཆུབ་ཉིད་གང་ཡིན་མི་ཤེས་པ་བསྟན་པའི་ཕྱིར། གསང་བ་པའི་བདག་པོ་དེ་ལ་བྱང་ཆུབ་གང་ཞེ་ན་ཞེས་བྱ་བ་ནས་འདི་ལྟ་སྟེ་ནམ་མཁའི་མཚན་ཉིད་དོ་ཞེས་བྱ་བའི་བར་དུ་གསུངས་པ་ཡིན་ནོ། །གོང་དུ་བྱང་ཆུབ་ཀྱི་སེམས་ཐམས་ཅད་མཁྱེན་པའི་ཡེ་ཤེས་ཀྱི་རྒྱུར་བཤད་པ་དེའི་བྱང་ཆུབ་ཀྱི་རང་བཞིན་བཤད་པ་ལ་བྱའོ། །གསང་བ་པའི་བདག་པོ་དེ་ལ་བྱང་ཆུབ་གང་ཞེ་ན། གང་གི་རང་གི་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་སྟེ་ཞེས་པ་ལ་གང་ཞེ་ན་ཞེས་པ་ནི་ཉན་ཐོས་དང་རང་སངས་རྒྱས་དང་ཐེག་པ་ཆེན་པོའི་བྱང་ཆུབ་རྣམས་ལས་གང་ཡིན་ཞེས་པ་ལ་མི་བྱའི་བྱང་ཆུབ་དེ་ཅི་འདྲ་བ་ཡིན་ཞེས་པ་ལ་བྱའོ། །རང་གི་སེམས་ཡང་དག་པ་ཇི་
ལྟ་བ་བཞིན་དུ་ཡོངས་སུ་ཤེས་པ་ནི་སྦྱོར་བའི་སེམས་ཀྱིས་བུམ་པ་ལ་སོགས་པའི་རྣམ་པར་མཐོང་བ་དེ་སེམས་ཀྱི་སྐད་ཅིག་མ་ཕྱི་མས་བུམ་པ་ལ་སོགས་པའི་རྣམ་པ་དེ་ཡང་དག་པ་མ་ཡིན་པར་སུན་ཕྱུང་ནས་དེ་ལྟར་གཟུང་བའི་ཆ་སུན་ཕྱུང་སྟེ་མེད་ན་འཛིན་པའི་ཆ་ཡང་ཡོད་པ་མ་ཡིན་ཏེ། དེ་ལྟར་གཟུང་བ་དང་འཛིན་པའི་རང་བཞིན་དང་བྲལ་བ་ཡོངས་སུ་དག་པ་རྣམ་པ་མེད་པ་རང་བཞིན་གྱིས་དག་པར་ཤེས་པ་ནི་རང་གི་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པའོ། །དེ་བཞིན་དུ་གཞུང་གཞན་ལས་ཀྱང༌། ཡེ་ཤེས་བཞི་ལས་མཉམ་པ་ཉིད་ཀྱི་ཡེ་ཤེས་ནི་བྱང་ཆུབ་ཏུ་བཤད། མེ་ལོང་ལྟ་བུའི་ཡེ་ཤེས་དང་སོ་སོར་རྟོག་པ་དང༌། བྱ་བ་ནན་ཏན་གྱི་ཡེ་ཤེས་ནི་ཐམས་ཅད་མཁྱེན་པའི་ཡེ་ཤེས་སུ་བཤད་པར་རིག་པར་བྱའོ། །དེ་ལ་ཡང་བླ་ན་མེད་པ་ཡང་དག་རྫོགས་པའི་བྱང་ཆུབ་པོ་ཞེས་པ་ལ་བླ་ན་མེད་པ་ནི་བྱང་ཆུབ་དེའི་གོང་ན་དེ་ལས་ལྷག་པའི་བྱང་ཆུབ་གཞན་མེད་པའོ། །ཡང་དག་པར་བྱང་ཆུབ་པ་ནི་ཕྱིན་ཅི་མ་ལོག་པར་བྱང་ཆུབ་པ་ལ་བྱ་སྟེ། ཉན་ཐོས་དང་རང་སངས་རྒྱས་དག་ནི་ཉོན་མོངས་པའི་སྒྲིབ་པ་སྤངས་ཀྱང་ཤེས་བྱའི་སྒྲིབ་པ་མ་སྤངས་པས་ཕྱོགས་གཅིག་ཕྱིན་ཅི་ལོག་པ་ནི་མ་ཡིན་གྱི། ཉོན་མོངས་པ་དང་ཤེས་བྱའི་སྒྲིབ་པ་གཉིས་ཀ་སྤངས་པས་ཡང་དག་པར་བྱང་ཆུབ་པའོ། །རྫོགས་པར་བྱང་ཆུབ་པ་ནི་ཀུན་ཏུ་བྱང་ཆུབ་པ་ཞེས་བྱ་སྟེ་ཤེས་བྱ་དང་ཉོན་མོངས་པའི་སྒྲིབ་པའི་བག་ཆགས་ཀྱི་མཐར་ཐུག་པ་མ་ལུས་པར་སྤངས་པས་ན་ཀུན་དུ་བྱང་ཆུབ་པ་ཞེས་བྱའོ། །གཉིས་སུ་ན་རང་གི་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་ནི་ཀུན་རྫོབ་དང་དོན་དམ་པའི་ཆོས་རྣམས་རྣམ་པ་ཐམས་ཅད་དུ་སྟོང་པར་ཤེས་པ་ལ་བྱའོ། །གསང་བ་པའི་བདག་པོ་དེ་ལ་ཆོས་ནི་རྡུལ་ཙམ་ཡང་མེད་ཅིང་མི་དམིགས་སོ་ཞེས་པ་ནི། བྱང་ཆུབ་དེ་ལ་ཕུང་པོ་དང་ཁམས་དང་སྐྱེ་མཆེད་དང༌། གཟུང་བ་དང་འཛིན་པའི་ཆོས་ཀྱི་རང་བཞིན་བག་ཆགས་ཙམ་ཡང་མེད་པས་བྱང་ཆུབ་དེ་ཉིད་འཛིན་པའི་རང་བཞིན་དུ་མེད་ཅིང་དམིགས་སུ་མེད་དོ་ཞེས་པ་ནི་དམིགས་པའི་ཡུལ་མ་ཡིན་པས་གཟུང་བའི་རང་བཞིན་ཡང་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་དེ་ནི་ནམ་མཁའི་མཚན་ཉིད་དེ། །ཞེས་པ་ནི་དེ་ལ་ནམ་མཁའི་མཚན་ཉིད་ནི་རྟག་པ་དང་མི་འགྱུར་བ་དང་སྟོང་པ་ལ་སོགས་པའི་མཚན་ཉིད་ཀྱང་ཡིན་མོད་ཀྱི། སྐབས་འདིར་གཟུང་བ་དང་འཛིན་པ་རང་བཞིན་མེད་པ་ལ་བྱ་སྟེ། དེ་བས་
ན་དེ་བསྟན་པའི་ཕྱིར་དེ་ལ་བྱང་ཆུབ་པར་བྱེད་པ་ཡང་མེད་ལ། བྱང་ཆུབ་པར་བྱ་བ་འགའ་ཡང་མེད་དོ་ཞེས་གསུངས་ཏེ། བྱང་ཆུབ་པར་བྱེད་པ་ནི་འཛིན་པའོ། །བྱང་ཆུབ་བར་བྱ་བ་ནི་གཟུང་བ་སྟེ། བྱང་ཆུབ་དེ་ལ་གཟུང་བ་དང་འཛིན་པ་གང་ཡང་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། བྱང་ཆུབ་ལ་མཚན་ཉིད་མེད་པའི་ཕྱིར་ཏེ་ཞེས་པ་ནི་བྱང་ཆུབ་དེ་སྔོན་པོ་དང་སེར་པོ་ལ་སོགས་པའི་ཁ་དོག་དང་དབྱིབས་ལ་སོགས་པའི་རྣམ་པའི་མཚན་མ་མེད་པའི་ཕྱིར་རོ། །ཆོས་ཐམས་ཅད་ཀྱང་མཚན་ཉིད་མེད་ཅེས་པ་ལ་སོགས་པ་ལ་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པ་དེ་བྱང་ཆུབ་པོ་ཞེས་བཤད་ན། སེམས་ལས་གཞན་པའི་ཆོས་དེ་དག་ཡང་དག་པ་ཇི་ལྟ་བ་བཞིན་དུ་ཤེས་པ་མ་ཡིན་ནམ་ཞེ་ན། ཇི་ལྟར་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་ཤིང་མཚན་ཉིད་མེད་པ་ལ་སོགས་པར་བཤད་པ་བཞིན་དུ་ཆོས་ཐམས་ཅད་ཀྱང་མཚན་ཉིད་མེད་དེ་ནམ་མཁའ་བཞིན་ཞེས་པའོ། །ཡང་ན་ཆོས་ཐམས་ཅད་མཚན་ཉིད་མེད་པ་ནམ་མཁའི་མཚན་ཉིད་དེ་ཉིད་བྱང་ཆུབ་མཚན་ཉིད་མེད་པའོ་ཞེས་བཤད་དོ། །དེ་ལ་ཆོས་ནི་སེམས་ལས་གཞན་པའི་ཕུང་པོ་ལ་སོགས་པའོ། །འདི་ལྟ་སྟེ་ནམ་མཁའི་མཚན་ཉིད་དོ་ཞེས་པ་ནི་ནམ་མཁའ་ལ་མཚན་ཉིད་མེད་པའི་ཕྱིར་རོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མཁྱེན་པ་ཉིད་ནི་གང་ནས་ཡོངས་སུ་བཙལ་བར་བགྱི། གང་གིས་ནི་བྱང་ཆུབ་མངོན་པར་རྫོགས་པར་སངས་རྒྱས་པར་བགྱི་ལགས་ཞེས་པ་ནས། གསང་བ་པའི་བདག་པོ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་བྱ་བའི་ཆོས་སྣང་བའི་སྒོ་ཆོས་སྣང་བའི་ཚུལ་དང་པོ་སྟེ་ཞེས་པའི་བར་དུ་ཐམས་ཅད་མཁྱེན་པའི་ཡེ་ཤེས་དང༌། བྱང་ཆུབ་མངོན་པར་རྫོགས་པར་བྱ་བའི་ཕྱིར་འཇུག་པའི་ཐབས་དྲིས་པ་དང༌། དེ་གཉིས་རང་གི་སེམས་ལས་བཙལ་བའི་ཐབས་བསྟན་པ་ལ་བྱའོ། །དེ་ལ་ཐམས་ཅད་མཁྱེན་པ་གང་ནས་བཙལ་བ་དང༌། གང་གིས་བྱང་ཆུབ་མངོན་པར་རྫོགས་པར་འཚང་རྒྱ་ཞེས་པ་ནི་དེ་ལ་ཇི་ལྟར་འཇུག་ཅེས་དྲིས་པའོ། །བྱང་ཆུབ་དང་ཐམས་ཅད་མཁྱེན་པ་ཉིད་ནི་རང་གི་སེམས་ལས་ཡོངས་སུ་བཙལ་བར་བྱའོ་ཞེས་པ་ནི་ནམ་རང་གི་སེམས་
ཉིད་གཟུང་བ་དང་འཛིན་པའི་རང་བཞིན་གྱི་རྣམ་པར་རྟོག་པ་འཕྲོ་བའི་བག་ཆགས་སྤངས་ཏེ་རྣམ་པར་དག་པ་ན། རང་བཞིན་གྱིས་འོད་གསལ་བ་སོ་སོ་རང་གིས་རིག་པ་མི་གཡོ་བ་ཡེ་ཤེས་ཀྱི་སྣང་བའི་མཚན་ཉིད་བྱང་ཆུབ་དང་ཐམས་ཅད་མཁྱེན་པའི་རང་བཞིན་དུ་འགྱུར་ཞེས་པའི་དོན་ཏོ། །སེམས་ལ་ཇི་ལྟར་བརྟགས་པས་དོན་དེ་ཤེས་པར་འགྱུར་ཞེ་ན། དེ་ལ་རྟོག་པའི་གང་ཟག་ཀྱང་རྣམ་པ་གཉིས་ཏེ། དབང་པོ་ལས་འདས་པའི་ཡེ་ཤེས་དང་ལྡན་པ་སངས་རྒྱས་དང་བྱང་ཆུབ་སེམས་དཔའ་དང༌། འོག་མའི་ལྟ་བ་ཅན་འགྲོ་བ་ཐ་དད་པ་རྣམས་སོ། །དེ་ལ་འགྲོ་བ་ཐ་དད་པས་བརྟགས་པ་ནི་དེའི་ནང་ན་ཡང་མེད་ཕྱི་རོལ་ན་ཡང་མེད་གཉིས་ཀའི་བར་ན་ཡང་མི་དམིགས་སོ་ཞེས་གསུངས་ཏེ། ཕྱི་ནི་གཟུང་བ། ནང་ནི་འཛིན་པ། བར་ནི་དེ་གཉིས་ཀའི་བར་དེ་ན་ཡང་སེམས་མི་དམིགས་སོ་ཞེས་པའོ། །དབང་པོ་ལས་འདས་པའི་ཡེ་ཤེས་དང་ལྡན་པ་རྣམས་ཀྱིས་ཀྱང་སེམས་ཁ་དོག་དང༌། དབྱིབས་དང༌། ཁམས་དང༌། རྒྱུད་དང། གནས་པ་སྟེ་རྣམ་པ་ལྔའི་དངོས་པོར་མི་དམིགས་ཏེ་དེ་བས་ན་སྔོན་པོར་མ་ཡིན་ཞེས་པ་ནས་ལུས་ལ་མ་ཡིན་ཡིད་ལ་མི་གནས་སོ་ཞེས་པའི་བར་དུ་གསུངས་ཏེ། མ་གཟིགས་ཞེས་པ་ནི་འདས་པ་དང༌། མི་དམིགས་ཞེས་པ་ནི་ད་ལྟར་གྱི་དུས་ན་ཡང་མ་གཟིགས་པའོ། །གཟིགས་པར་མི་འགྱུར་ཞེས་པ་ནི་མ་འོངས་པའི་དུས་ན་ཡང་གཟིགས་པར་མི་འགྱུར་བའོ། །སྔོན་པོར་མ་ཡིན་ཞེས་པ་ནས་ཤེལ་གྱི་ཁ་དོག་ཏུ་མ་ཡིན་ཞེས་པའི་བར་དུ་ནི་སེམས་དེ་ཁ་དོག་གི་རྣམ་པར་མཐོང་བའི་ཡུལ་མ་ཡིན་པ་ལ་བྱའོ། །ཐུང་ངུར་མ་ཡིན་ཞེས་པ་ནས། སྐྱེས་པར་མ་ཡིན་མ་ནིང་དུ་མ་ཡིན་ནོ་ཞེས་པའི་བར་དུ་དབྱིབས་ཀྱི་རྣམ་པར་མཐོང་བ་མ་ཡིན་པ་ལ་བྱའོ། །འདོད་པའི་ཁམས་ཀྱི་རང་བཞིན་མ་ཡིན། གཟུགས་ཀྱི་ཁམས་ཀྱི་རང་བཞིན་མ་ཡིན། གཟུགས་མེད་པའི་ཁམས་ཀྱི་རང་བཞིན་མ་ཡིན་ཞེས་པ་ནི་ཁམས་ཀྱི་རྣམ་པར་མཐོང་བ་མེད་པ་ལ་བྱའོ། །ལྷ་དང་ཀླུ་དང་གནོད་སྦྱིན་དང་ཞེས་པ་ནས། སེམས་ཅན་རིས་མཐུན་པའི་རང་བཞིན་ཡང་མ་ཡིན་ནོ་ཞེས་པའི་བར་དུ་རྒྱུད་ཀྱི་མཐོང་བ་མེད་པ་ལ་བྱའོ། །སེམས་དེ་ནི་མིག་ལ་མི་གནས་ཞེས་པ་ནས་ཡིད་ལ་མི་གནས་སོ་ཞེས་པའི་བར་དུ་དབང་པོ་དྲུག་ལ་སེམས་གནས་པར་མཐོང་བ་མེད་པ་ལ་བྱའོ། །ཁ་དོག་དང་དབྱིབས་ལ་སོགས་པ་དེ་རྣམས་ཀྱི་རྣམ་པར་སྣང་བ་ན་སེམས་དེ་གཟུང་བ་དང་འཛིན་པའི་
རང་བཞིན་དང་མ་བྲལ་བས་དྲི་མ་དང་བཅས་པ་ཡིན་ཏེ། དེ་ལྟར་དྲི་མ་དང་བཅས་པས་ན་ཐམས་ཅད་མཁྱེན་པའི་ཡེ་ཤེས་མ་ཡིན་ནོ། །དེ་བས་ན་དྲི་མ་དེ་དག་ཐམས་ཅད་ཡོངས་སུ་དག་པའི་སེམས་དེ་ནི་ཐམས་ཅད་མཁྱེན་པ་སྟེ་དེའི་ཕྱིར། དེ་ཅིའི་ཕྱིར་ཞེ་ན། སེམས་དེ་ནི་ནམ་མཁའི་མཚན་ཉིད་དེ་ཞེས་གསུངས་ཏེ། ནམ་མཁའི་མཚན་ཉིད་ནི་རྟོག་པ་དང་རྣམ་པར་རྟོག་པ་སྤངས་པ་སྟེ་ནམ་མཁའི་མཚན་ཉིད་དེ་དང་འདྲ་བས་ན། དེའི་ཕྱིར་རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བའོ་ཞེས་གསུངས་པ་ཡིན་ཏེ། རྣམ་པར་རྟོག་པ་དང་རྣམ་པར་དཔྱོད་པ་སྤངས་པ་ཞེས་པའི་དོན་ཏོ། །དེ་ལྟར་ན་སེམས་ནི་ནམ་མཁའི་མཚན་ཉིད་དང་འདྲ་བའི་ཕྱིར་བྱང་ཆུབ་ཀྱང་དེ་ཉིད་ཡིན་ཏེ། ནམ་མཁའི་རང་བཞིན་གང་ཡིན་པ་དེ་ནི་སེམས་ཀྱི་རང་བཞིན་ནོ། །སེམས་ཀྱི་རང་བཞིན་གང་ཡིན་པ་དེ་ནི་བྱང་ཆུབ་ཀྱི་རང་བཞིན་ཏེ་ཞེས་གསུངས་པ་ཡིན་ནོ། །དེ་ལྟར་སེམས་དང་བྱང་ཆུབ་རྣམས་གཟུང་བ་དང་འཛིན་པའི་རང་བཞིན་གཉིས་སུ་མེད་དེ། གསང་བ་པའི་བདག་པོ་དེ་ལྟར་ན་སེམས་དང་ནམ་མཁའི་དབྱིངས་དང་བྱང་ཆུབ་འདི་ནི་གཉིས་སུ་མེད་དེ་གཉིས་སུ་བྱར་མེད་དོ་ཞེས་གསུངས་པ་ཡིན་ནོ། །དེ་ཡང་སྙིང་རྗེའི་རྩ་བ་ཅན་ཐབས་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བ་སྟེ་ཞེས་པ་ནི་དེ་ལྟ་བུའི་སེམས་ཀྱི་རང་བཞིན་གཟུང་བ་དང་འཛིན་པའི་བག་ཆགས་ཀྱང་མེད་པ། བྱང་ཆུབ་དང་ཐམས་ཅད་མཁྱེན་པའི་མཚན་ཉིད་དེའི་རྩ་བ་ནི་སྙིང་རྗེ་སྟེ་བརྟན་པར་བྱེད་པའོ། །དེ་ལ་སྦྱོར་བར་བྱེད་པའི་ཐབས་ནི་ཕ་རོལ་ཏུ་ཕྱིན་པ་སྟེ་ཡོངས་སུ་གཟུང་བ་ནི་ཐམས་ཅད་མཁྱེན་པའི་ཡེ་ཤེས་དེ་སྐྱོང་བའི་རྒྱུར་ཤེས་པར་བྱའོ། །གསང་བ་པའི་བདག་པོ་དེ་བས་ན་རྣམ་གྲངས་འདིས་ཀྱང་ཞེས་པ་ནས་རིག་པར་བྱའོ་ཞེས་པའི་བར་ནི་གོང་དུ་བྱང་ཆུབ་གང་ཞེ་ན། གང་རང་གི་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པའོ་ཞེས་པ་དང༌། བྱང་ཆུབ་དང་ཐམས་ཅད་མཁྱེན་པ་ཉིད་ནི་རང་གི་སེམས་ལས་ཡོངས་སུ་བཙལ་བར་བྱའོ་ཞེས་གསུངས་པ་དང༌། སེམས་དེ་ནི་རང་བཞིན་གྱིས་ཡོངས་སུ་དག་པ་ཡིན་ཏེ་ཞེས་པ་ལ་སོགས་པ་གསུངས་པ་དེ་རྣམ་གྲངས་གཅིག་སྟེ། གཉིས་ཀ་ཡང་བྱང་ཆུབ་དང་ཐམས་ཅད་མཁྱེན་པའི་རྒྱུ་སྟོན་པའི་ཚིག་གི་རྣམ་གྲངས་སུ་རིག་པར་བྱའོ། །།
སངས་རྒྱས་བཅོམ་ལྡན་འདས་ཀྱིས་རྟོགས་པའི་ཆོས་དང་ལུང་གི་ཆོས་བྱང་ཆུབ་སེམས་དཔའི་འཁོར་ལ་གང་དང་གང་བཤད་པ་རྣམས་ནི་ཚིག་ལ་སོགས་པའི་སྒོ་ཐ་དད་ཀྱང་བྱང་ཆུབ་ཀྱི་སེམས་རྣམ་པར་དག་པ་དང༌། རང་གི་སེམས་ཡོངས་སུ་ཤེས་པར་བྱ་བའི་དོན་རྣམ་པ་གཉིས་ཀྱི་ཕྱིར་ཏེ་གཞན་གྱི་ཕྱིར་དུ་ནི་མ་ཡིན་ནོ། །དེ་བས་ན་བྱང་ཆུབ་སེམས་དཔའི་འཁོར་གྱི་ནང་དུ་ཆོས་གང་དང་གང་སྟོན་པ་དེ་དག་ཐམས་ཅད་ནི་བྱང་ཆུབ་ཀྱི་སེམས་ཡོངས་སུ་དག་པར་བྱ་བ་དང༌། སེམས་ཡོངས་སུ་ཤེས་པར་བྱ་བའི་ཕྱིར་ཡིན་པར་རིག་པར་བྱའོ་ཞེས་གསུངས་པ་ཡིན་ནོ། །དེ་ལ་བྱང་ཆུབ་ཀྱི་སེམས་རྣམ་པར་དག་པ་ནི་བྱང་ཆུབ་སེམས་དཔའི་ས་དང་པོ་ཐོབ་པའི་བྱང་ཆུབ་ཀྱི་སེམས་དེ་གཟུང་བ་དང་འཛིན་པ་ལས་རྣམ་པར་གྲོལ་བའི་ཕྱིར་དག་པའོ། །སེམས་ཡོངས་སུ་ཤེས་པ་ནི་གང་སེམས་ཀྱི་ངོ་བོ་ཤེས་པ་དེའི་རྒྱུས་ས་དང་པོ་ཐོབ་པར་བྱེད་པ་མོས་པས་སྤྱོད་པའི་དུས་ཀྱི་སེམས་བསྐྱེད་པ་དེ་ལ་བྱ་སྟེ་དེ་དག་གི་ཕྱིར་ཆོས་བཤད་ཅེས་པའི་དོན་ཏེ། བྱང་ཆུབ་ཀྱི་སེམས་ཉིད་ལ་སྦྱོར་བར་བྱེད་པའོ། །དེ་ལྟར་སེམས་ཡོངས་སུ་གཟུང་བར་བྱ་བ་ཡང་ཁ་དོག་ལ་སོགས་པའི་རྣམ་པར་ཤེས་པར་བྱ་བ་མ་ཡིན་གྱི། རྣམ་པའི་རང་བཞིན་ཐམས་ཅད་ལས་འདས་པའི་རང་བཞིན་དུ་སྟེ། བྱང་ཆུབ་ནི་གཟུང་བ་དང་འཛིན་པའི་ཆ་དང་བྲལ་བ་རྣམ་པར་དག་པ་ཙམ་གྱི་རང་བཞིན་དུ་ཡང་མ་ཡིན་ཏེ། ཇི་ཙམ་དུ་མཚན་མར་གྱུར་པ་དེ་དག་ཐམས་ཅད་དུ་རང་གི་སེམས་དེ་ཤེས་པར་མི་བྱ་ཞིང་བཙལ་དུ་མི་རྙེད་པར་འདི་ལྟ་སྟེ། རྣམ་པར་རམ། ཁ་དོག་ཏུ་འམ་ཞེས་པ་ནས་རྣམ་པ་ཐམས་ཅད་ཀྱི་བར་དུ་ཡོངས་སུ་བཙལ་ཀྱང་མི་དམིགས་པ་ཡིན་ཏེ་ཞེས་པའི་བར་གྱིས་གསུངས་ཏེ། ཁ་དོག་དང་དབྱིབས་ལ་སོགས་པའི་རྣམ་པར་དེ་དག་རེ་རེ་ནས་སྨོས་པ་ཡང་གང་དང་གང་ལ་ཆགས་པའི་གནས་རྣམས་ལ་རིག་པའི་གཞུང་གིས་བརྟགས་ན་དངོས་པོ་ཡོད་པ་མ་ཡིན་ཏེ། ཁ་དོག་དང་གཟུགས་ལ་སོགས་པ་དེ་དག་བརྟག་པ་ཡང་ཁ་དོག་དང་གཟུགས་ལ་སོགས་པ་དེ་དག་སེམས་ལ་ཐ་མི་དད་དེ། སེམས་ཀྱི་སྣང་བ་ཡིན་ན་ནི་སེམས་ཉིད་ཀྱང་གཟུགས་ཅན་དུ་འགྱུར་ལ། ཇི་ཙམ་དུ་གཟུགས་དང་ལྡན་པ་དེ་དག་ཐམས་ཅད་ནི་རྡུལ་ཕྲན་གྱི་ཆས་གཞིག་ན་ཡོད་པར་མི་འགྱུར་རོ། །ཁ་དོག་ལ་སོགས་པ་དེ་
དག་སེམས་ལས་ཐ་དད་ན་ཡང་དེ་དག་རྡུལ་ཕྲན་གྱི་ཆས་གཞིག་ན་ཡོད་པར་མ་གྲུབ་པས་གཟུགས་མེད་ན་གཟུགས་ཀྱི་རྣམ་པར་སྐྱེ་བའི་རྣམ་པར་ཤེས་པ་མི་སྐྱེ་སྟེ་ཡོད་པ་མ་ཡིན་ནོ། །དེ་བཞིན་དུ་ཚོར་བ་ལ་སོགས་པ་གཞན་ཡང་ཕྱི་རོལ་གྱི་ཡུལ་སུན་ཕྱུང་སྟེ་དམིགས་སུ་མེད་པས་ན། ཡུལ་མེད་པར་སེམས་དང་སེམས་ལས་བྱུང་བ་མི་སྲིད་པས་མི་དམིགས་སོ། །གསར་བ་པའི་བདག་པོ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་བྱ་བའི་ཆོས་སྣང་བའི་ཚུལ་དང་པོ་སྟེ་ཞེས་པ་ནི། མོས་པས་སྤྱོད་པའི་ས་ན་སེམས་དེ་ལྟ་བུའི་ཚུལ་དུ་ཡོངས་སུ་ཤེས་པ་དེ་ནི་ས་དང་པོའི་བྱང་ཆུབ་ཀྱི་སེམས་དང༌། མངོན་པར་བྱང་ཆུབ་པ་དང་ཐམས་ཅད་མཁྱེན་པ་སྟེ་རྣམ་པ་གསུམ་གྱི་རྒྱུར་བཤད་པ་ཡིན་ནོ། །དེ་ལས་དང་པོའི་བྱང་ཆུབ་ཀྱི་སེམས་རྣམ་པར་དག་པའི་མཚན་ཉིད་ལ་འཇུག་པའི་སྒོ་ཡིན་པས་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་གསུངས་སོ། །ཆོས་སྣང་པའི་སྒོ་ཞེས་བྱ་བ་ལ་ཆོས་ནི་མྱ་ངན་ལས་འདས་པ་གཟུང་བ་དང་འཛིན་པ་དང་བྲལ་བ་སྟེ། སྣང་བ་ནི་མཁྱེན་ཞེས་པའི་དོན་ཏེ་སྙིང་པོ་བྱང་ཆུབ་ཉིད་ཡིན་ལ། དེ་འཐོབ་པའི་རྒྱུ་འམ་སྒོ་ཡང་སེམས་ཡིན་ཞེས་པའོ། །ཆོས་སྣང་བའི་ཚུལ་ཞེས་པ་ལ་ཆོས་ནི་མྱ་ངན་ལས་འདས་པ་སྟེ་སྐད་ཅིག་མ་དང་པོ་ལ་མཉམ་པ་ཉིད་ཀྱི་ཡེ་ཤེས་ཀྱི་མཚན་ཉིད་མངོན་པར་བྱང་ཆུབ་ནས་སྐད་ཅིག་མ་གཉིས་པ་ལ་མེ་ལོང་ལྟ་བུ་དང༌། སོ་སོར་རྟོག་པ་དང༌། བྱ་བ་ནན་ཏན་གྱི་ཡེ་ཤེས་ཐམས་ཅད་མཁྱེན་པའི་མཚན་ཉིད་ཐོབ་སྟེ་ཀུན་རྫོབ་དང་དོན་དམ་པའི་ཚུལ་དུ་ཐམས་ཅད་མཁྱེན་པའོ། །དང་པོ་ཞེས་པ་ནི་སྐད་ཅིག་མ་དང་པོ་ལ་བྱང་ཆུབ་ཐོབ་པ་ལ་བྱའོ། །གང་ལ་གནས་ན་བྱང་ཆུབ་སེམས་དཔའ་རྣམས་ཚེགས་ཆུང་དུས་སྒོམ་པ་ཐམས་སྤོང་ཏིང་འཛིན་འཐོབ་ཅིང་ཞེས་པ་ལ་སོགས་པ་ནི་དེ་ལྟ་བུར་རང་གི་སེམས་ཡང་དག་བ་ཇི་ལྟ་བ་བཞིན་དུ་ཡོངས་སུ་ཤེས་པ་ལ་གནས་པའི་རྗེས་སུ་བསྔགས་པ་གསུངས་པ་ཡིན་ཏེ། གང་ལ་གནས་ན་བྱང་ཆུབ་སེམས་དཔའ་རྣམས་ཞེས་པ་ནི་རང་གི་སེམས་གཟུང་བ་དང་འཛིན་པ་ལ་སོགས་པའི་རྣམ་པར་མི་མཐོང་བས་གནས་པ་ལ་བྱ་སྟེ། དེ་ལྟར་གཟུང་བ་དང་འཛིན་པའི་རང་བཞིན་དུ་མ་མཐོང་བའི་
སེམས་ནི་རྣམ་པར་དག་པ་སྟེ། དེ་ལྟར་སེམས་རྣམ་པར་དག་ན་ལྷུན་གྱིས་གྲུབ་པ་ཉིད་དུ་ཉོན་མོངས་པའི་སྒྲིབ་པ་དང་ལས་ཀྱི་སྒྲིབ་པ་དང༌། སྐྱེ་བའི་སྒྲིབ་པ་ལ་སོགས་པ་ཐམས་ཅད་སྤོང་བའི་གཉེན་པོར་གྱུར་པའི་ཏིང་ངེ་འཛིན་རབ་ཏུ་འཐོབ་པར་འགྱུར་ཏེ། དེ་བས་ན་ཚེགས་ཆུང་དུས་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་འཐོབ་ཅིང་ཞེས་གསུངས་པ་ཡིན་ནོ། །དེ་ལྟ་བུའི་སེམས་རྣམ་པར་དག་པ་ལ་རབ་ཏུ་གནས་པར་གྱུར་ན་སྒྲིབ་པ་ཐམས་ཅད་བསལ་བས་སངས་རྒྱས་ཐམས་ཅད་ལ་མངོན་སུམ་དུ་ཆོས་ཉན་ཞིང་བསྙེན་བཀུར་བྱེད་པ་དང་མངོན་པར་ཤེས་པ་ལྔ་ཐོབ་པ་སྟེ་ལྷའི་མིག་གིས་ལམ་རིང་བོ་ན་འདུག་པའི་གཟུགས་ཀྱང་རི་དང་རྩིག་པ་ལ་སོགས་པ་ལ་ཐོགས་པ་མེད་པར་མཐོང་ལ། ལྷའི་རྣབས་ལམ་རིང་པོ་ན་འདུག་པའི་སྒྲ་ཡང་རི་དང་རྩིག་པ་ལ་སོགས་པས་མི་སྒྲིབ་པར་ཐོས་ཤིང༌། གཞན་གྱི་སེམས་འདོད་ཆགས་དང་བཅས་པའམ་འདོད་ཆགས་དང་བྲལ་བ་ལ་སོགས་པ་ཤེས་པ་དང༌། ཚེ་རབས་སྔ་མ་ལ་ཡང་ཅི་བྱེད་པ་དང་གནས་གང་དུ་གནས་པ་རྗེས་སུ་དྲན་ཞིང་རྫུ་འཕྲུལ་གྱི་རྐང་པ་ལ་སོགས་པ་འཐོབ་པའོ། །མཐའ་ཡས་པའི་མི་དང་ལྷ་ལ་སོགས་པའི་ཚིག་ཤེས་པའི་གཟུགས་ཀྱིས་མཐའ་ཡས་པའི་བྱ་ལ་སོགས་པའི་དབྱངས་ཀྱི་ང་རོ་ལས་དོན་སྟོན་པའི་གཟུངས་དང་འབྲུག་གི་སྒྲ་དང༌། སེམས་ཅན་མ་ཡིན་པའི་སྒྲ་ས་གཡོ་བ་དང་ཆུ་ལ་སོགས་པ་མཐའ་ཡས་པའི་སྒྲ་ལས་སྒྲ་དེ་དག་གིས་དོན་ཅི་སྟོན་པ་རྟོགས་པའི་གཟུངས་ཐོབ་སྟེ། སེམས་ཅན་གྱི་བསམ་པ་རྗེས་སུ་ཤེས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས་ཁམས་གསུམ་དུ་འཁོར་བ་ན་ཡང་ཐོབ་པའི་ཆོས་ལས་ཉམས་པར་མི་འགྱུར་བ་དང༌། མ་ཐོབ་པ་ཡང་ཐོབ་པར་འགྱུར་ཞིང་འཁོར་བ་ཇི་སྲིད་བར་སེམས་ཅན་གྱི་དོན་བྱ་བ་དག་ལ་ཡོངས་སུ་སྐྱོ་བར་མི་འགྱུར་རོ། །དེའི་ཕྱིར་སངས་རྒྱས་ཐམས་ཅད་དང་ལྷན་ཅིག་འགྲོགས་པ་འཐོབ་པར་འགྱུར། མངོན་པར་ཤེས་པ་ལྔ་དག་ཀྱང་འཐོབ་པར་འགྱུར། སྐད་དང་སྒྲ་དང་དབྱངས་མཐའ་ཡས་པའི་གཟུངས་ཀྱང་འཐོབ་པར་འགྱུར། སེམས་ཅན་གྱི་བསམ་པ་རྗེས་སུ་ཤེས་པ་དང༌། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་བས་འཁོར་བ་ན་
ཡོངས་སུ་མི་ཉམས་པའི་ཆོས་ཅན་དུ་འགྱུར། སེམས་ཅན་གྱི་དོན་བྱ་བ་དག་ལ་ཡོངས་སུ་སྐྱོ་བར་མི་འགྱུར་རོ་ཞེས་གསུངས་པ་ཡིན་ནོ། །འདུས་མ་བྱས་པའི་ཚུལ་ཁྲིམས་ལ་རབ་ཏུ་གནས་པ་ཞེས་པ་ནི་སྟོང་པ་ཉིད་རབ་ཏུ་རྟོགས་པ་ལ་གནས་པས་སྟོང་པ་ཉིད་ཀྱི་ངང་ཚུལ་དུ་གྱུར་པ་ཡིན་གྱི་སེམས་ཅན་དོན་བྱེད་ཀྱང་ཚུལ་ཁྲིམས་དང༌། དགེ་བའི་ཚུལ་ཁྲིམས་དང༌། སྡོམ་པ་ལ་སོགས་པ་ཀུན་རྫོབ་ཀྱི་ཚུལ་ཁྲིམས་ལ་ནི་མི་བྱའོ། །ལོག་པར་ལྟ་བ་རྣམ་པར་སྤངས་བ་ནི་མུ་སྟེགས་ལ་སོགས་པའི་ལྟ་བ་རྣམས་དང་བྲལ་བ་ལ་བྱ་ལ། ཡང་དག་པར་ལྟ་བ་རྟོགས་པ་ཁོང་དུ་ཆུད་པ་ནི་དེ་ལྟར་ལོག་པའི་ལྟ་བ་སྤངས་པས་ཡང་དག་པའི་ལྟ་བ་རྟོགས་པ་ཞེས་བྱའོ། །གསང་བ་པའི་བདག་པོ་གཞན་ཡང་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཞེས་པ་ནི་དེ་ལྟ་བུའི་ཏིང་ངེ་འཛིན་སྔར་ཐོབ་ནས་ཐོས་པ་ཙམ་དུ་མ་ཟད་ཀྱི་ཏིང་ངེ་འཛིན་ཉིད་དང་ལྡན་པར་གནས་པ་ལ་བྱའོ། །མོས་པའི་སྟོབས་བསྐྱེད་པས་ཚེགས་ཆུང་དུས་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དེ་ཞེས་པ་ནི། གཟུང་བ་དང་འཛིན་པ་རབ་ཏུ་སྤང་བ་རང་བཞིན་གྱིས་འོད་གསལ་བའི་སེམས་བྱང་ཆུབ་ཀྱི་མཚན་ཉིད་ད་ལྟ་བུ་ལྷག་པར་མོས་པའི་མཐུ་བསགས་པས་སངས་རྒྱས་ཀྱི་ཆོས་རྟོགས་པ་དང་ལུང་གི་མཚན་ཉིད་དང་ཕ་རོལ་ཏུ་ཕྱིན་པ་ལ་སོགས་པ་དང༌། སྐུའི་འཁོར་ལོ་ལ་སོགས་པའི་ཆོས་རྣམས་མ་བསྒྲུབས་ཀྱང་ཐོབ་པར་འགྱུར་བའོ། །གསང་བ་པའི་བདག་པོ་མདོར་ན་རིགས་ཀྱི་བུ་འམ། རིགས་ཀྱི་བུ་མོ་དེ་ནི་ཡོན་ཏན་དཔག་ཏུ་མེད་པ་དང་ལྡན་པར་འགྱུར་རོ་ཞེས་བ་ནི་དེ་ལྟ་བུའི་ཏིང་ངེ་འཛིན་དང་ལྡན་པའི་རིགས་ཀྱི་བུ་འམ་རིགས་ཀྱི་བུ་མོ་དེ་དག་གི་ཡོན་ཏན་སོ་སོ་ནས་བརྗོད་ན་སྐལ་བར་ཡང་མི་རྫོགས་ཏེ། བརྗོད་ཀྱིས་མི་ལང་བས་ཚད་འདི་ཙམ་མོ་ཞེས་གཟུང་དུ་མེད་དེ། མདོར་ན་ཡོན་ཏན་དཔག་ཏུ་མེད་པ་དང་ལྡན་ནོ་ཞེས་གསུངས་པ་ཡིན་ནོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་ཞུས་པ་ཞེས་པ་ནས། ཐུབ་པ་ཆེན་པོས་བསྟན་དུ་གསོལ། ཞེས་པའི་བར་གྱིས་ནི་གོང་དུ་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་དང༌། བྱང་ཆུབ་ཀྱི་སེམས་ཀྱི་
མཚན་ཉིད་ཞིབ་དུ་བཤད་དེ། བྱང་ཆུབ་ཀྱི་སེམས་དེ་ལྟ་བུ་ལ་གནས་པའི་ཏིང་ངེ་འཛིན་ཐོབ་པའི་ཡོན་ཏན་གྱི་ཚད་ཀྱང་ཡོན་ཏན་དཔག་ཏུ་མེད་པ་དང་ལྡན་པ་ཞེས་གསུངས་ནས། དེ་ལྟ་བུའི་བྱང་ཆུབ་ཀྱི་སེམས་ཇི་ལྟར་སྐྱེ་བར་འགྱུར་བ་དང༌། བྱང་ཆུབ་ཀྱི་སེམས་དེའི་མཚན་ཉིད་ཅི་འདྲ་བར་ཤེས་པར་བྱ་བ་ལ་སོགས་པ་དྲིས་པ་སྟེ་དེ་ཡང་ཇི་ལྟ་བུ་སྙམ་ན། བཅོམ་ལྡན་འདས་ཇི་ལྟར་བྱང་ཆུབ་ཏུ་སེམས་སྐྱེས་པ་ཞེས་བགྱི་བ་ལགས་ཞེས་པ་ལ་སོགས་པ་སྟེ་སྤྱིར་ན་སྐྱེས་པ་དང་སྐྱེ་བ་ཞེས་བྱ་བ་གཉིས་ཏེ། དེ་ལ་སྐྱེ་བ་ཞེས་བྱ་བ་ནི་མིང་ཙམ་སྟེ་བུ་མངལ་དུ་ཞུགས་པ་ལྟ་བུའོ། །སྐྱེས་ཞེས་བྱ་བ་ནི་སྐྱེས་པར་བཏགས་པའི་དོན་ཏེ་དཔེར་ན་བུ་བཙས་པ་དངོས་ལྟ་བུའོ། །དེ་བས་ན་བྱང་ཆུབ་ཀྱི་སེམས་སྐྱེ་བ་ཙམ་དྲིས་པ་མ་ཡིན་གྱི། ས་དང་པོའི་སེམས་བྱང་ཆུབ་ཀྱི་མཚན་ཉིད་དུ་ཡོངས་སུ་རྫོགས་པར་སྐྱེས་པ་དྲིས་པ་ལ་བྱའོ། །བྱང་ཆུབ་ཏུ་ཞེས་པ་ནི་བླ་ན་མེད་པའི་བྱང་ཆུབ་ཀྱི་ཕྱིར་སྐྱེ་བ་ལ་བྱ་སྟེ། དེ་ཡང་ས་དང་པོའི་སེམས་ཀྱི་མཚན་ཉིད་བླ་ན་མེད་པའི་བྱང་ཆུབ་དང་རང་བཞིན་གཅིག་པའོ། །ས་གོང་མ་ལ་སོགས་པས་རིམ་གྱིས་རྫོགས་པར་བྱེད་པ་ཡང་རང་བཞིན་དེ་ལས་ཐ་དད་པ་མ་ཡིན་གྱི། རང་བཞིན་དེ་ཉིད་ལས་མི་མཐུན་པ་དང་གཉེན་པོ་ལ་སོགས་པ་ལྡོག་པའི་སྒོ་ནས་མིང་གཞན་དུ་བཏགས་པ་ཙམ་དུ་ཟད་དེ། དཔེར་ན་གསེར་ཉིད་ལས་རྒྱན་ལ་སོགས་པར་བྱས་ན་རང་བཞིན་གཅིག་ཀྱང་མིང་གི་རྣམ་གྲངས་མང་པོར་ཐོགས་པ་དང་འདྲའོ། །དེ་བས་ན་བྱང་ཆུབ་ཀྱི་རང་བཞིན་ས་དང་པོའི་བྱང་ཆུབ་ཀྱི་སེམས་དེ་ལ་བྱ་བ་ཡིན་གྱི། སྨོན་པ་དང་འཇུག་པའི་སེམས་ཀྱང་བྱང་ཆུབ་ཀྱི་ཕྱིར་སེམས་པ་ཡིན་མོད་ཀྱི། ས་དང་པོའི་བྱང་ཆུབ་ཀྱི་སེམས་ལྟར་བླ་ན་མེད་པའི་བྱང་ཆུབ་དང་རང་བཞིན་མི་གཅིག་པས་དེ་དག་ལ་ནི་མི་བྱའོ། །ཡང་རྣམ་པ་གཅིག་ཏུ་ན་ལན་བཀའ་སྩལ་པ་ནས་དང་པོའི་མཚན་ཉིད་ཀྱི་བྱང་ཆུབ་གསུངས་པས་ན་གཞན་མ་ཡིན་པར་མངོན་ནོ། །བྱང་ཆུབ་འབྱུང་བའི་སེམས་སྐྱེས་པའི། །མཚན་ཉིད་ཇི་ལྟར་འཚལ་བར་བགྱི། །ཞེས་པ་ནི་ས་དང་པོའི་བྱང་ཆུབ་ཀྱི་སེམས་དེ་ལས་བླ་ན་མེད་པའི་བྱང་ཆུབ་འབྱུང་བས་དེ་ནི་བྱང་ཆུབ་འབྱུང་བ་ཞེས་བྱ་སྟེ། བྱང་ཆུབ་འབྱུང་བའི་སེམས་དེ་སྐྱེ་བའི་མཚན་ཉིད་བསོད་ནམས་ཆེན་པོའི་སྙིང་པོ་ནས་ནམ་མཁའ་
བཞིན་དུ་ཚད་མེད་པ་ལ་སོགས་པ་ལ་དྲིས་པ་ལ་བྱའོ། །སེམས་མཁྱེན་པ་ནི་རྣམས་ཀྱི་མཆོག །དཔའ་ཆེན་ཡེ་ཤེས་ལས་བྱུང་བ། །ཞེས་པ་ནི་བཅོམ་ལྡན་འདས་ལ་ཡོན་ཏན་གྱི་སྒོ་ནས་བསྟོད་པ་སྟེ་བཅོམ་ལྡན་འདས་ནི་འཇིག་རྟེན་དང༌། ཉན་ཐོས་དང་རང་སངས་རྒྱས་རྣམས་ཀྱི་སེམས་མཁྱེན་པའི་མཆོག་ཡིན་པའི་ཕྱིར་དང༌། ལོངས་སྤྱོད་རྫོགས་པའི་སྐུ་དེ་ཐམས་ཅད་མཁྱེན་པའི་ཡེ་ཤེས་དེ་ལས་བྱུང་བས་ན་ཡེ་ཤེས་ལས་བྱུང་བ་ཞེས་གསུངས་སོ། །ཇི་སྙེད་ཅིག་ལས་འདས་ནས་ནི། །སྐྱེ་བར་འགྱུར་བ་བསྟན་དུ་གསོལ། །ཞེས་པ་ནི་འཇིག་རྟེན་པའི་སེམས་གྲངས་དུ་ཞིག་འདས་ནས་བྱང་ཆུབ་ཀྱི་སེམས་དེ་སྐྱེ་ཞེས་དྲིས་པ་སྟེ། སེམས་བརྒྱ་དྲུག་ཅུ་པོ་ལས་འདས་ནས་སྐྱེ་བ་ལ་བྱ་སྟེ། སེམས་སྐྱེས་ཞེས་པ་མ་ཡིན་གྱི་སྐྱེ་བ་ཙམ་ལ་བྱའོ། །མགོན་པོས་སེམས་ཀྱི་མཚན་ཉིད་དང༌། །དུས་ཀྱང་རྒྱ་ཆེར་བཤད་དུ་གསོལ། །ཞེས་པ་ནི་སེམས་བརྒྱ་དྲུག་ཅུ་པོ་དེ་དག་གི་མཚན་ཉིད་འདོད་ཆགས་ཀྱི་སེམས་དང༌། ཞེ་སྡང་གི་སེམས་དང་ཞེས་པ་ལ་སོགས་པ་དང༌། སེམས་བརྒྱ་དྲུག་ཅུ་པོ་དེ་དག་ལས་འདས་ནས་ཀྱང་བསྐལ་པ་ལ་སོགས་པ་ཇི་སྲིད་ཅིག་ན་བྱང་ཆུབ་ཀྱི་སེམས་དེ་སྐྱེ་བར་འགྱུར་ཞེས་དུས་དྲིས་པའོ། །དེ་དག་བསོད་ནམས་ཅི་འདྲ་དང༌། །སྤྱོད་པ་ཅི་འདྲར་འགྱུར་བ་དང༌། །ཞེས་པ་ནི་དེ་ལྟ་བུའི་བྱང་ཆུབ་ཀྱི་སེམས་སྐྱེས་པ་དེའི་བསོད་ནམས་ཇི་ལྟ་བུ་དང༌། སྤྱོད་པ་ཅི་འདྲ་བ་ཞིག་སྤྱད་པས་ན་བྱང་ཆུབ་ཀྱི་སེམས་དེ་ཐོབ་ཅེས་པའོ། །སེམས་ལ་སེམས་ཀྱི་ཁྱད་པར་ཡང༌། །ཐུབ་པ་ཆེན་པོས་བསྟན་དུ་གསོལ། །ཞེས་པ་ནི་སེམས་ཅན་དབང་པོ་རྣོན་པོས་ཆོས་ལ་བདག་མེད་པར་རྟོགས་ནས་འཇུག་པ་དང༌། འཕགས་པ་ཉན་ཐོས་ལ་སོགས་པ་དབང་པོ་རྟུལ་པོ་རྒྱུན་དུ་ཞུགས་པ་ལ་སོགས་པའི་ས་བརྒྱད་བསྒོམས་ནས་འཇུག་པའི་ཁྱད་པར་དྲིས་པ་ལ་བྱའོ། །དེ་ལ་སེམས་ཞས་བྱ་བ་ནི་བྱང་ཆུབ་ཀྱི་སེམས་སྤྱི་ལ་བྱའོ། །བཅོམ་ལྡན་རྣམ་སྣང་མཛད་ཆེན་གྱིས། །ཞེས་པ་ནས། བྱང་ཆུབ་ཕྱིར་ནི་དང་པོར་འདོད། །ཅེས་པའི་བར་གྱིས་གོང་དུ་ཕྱག་ན་རྡོ་རྗེས་དྲིས་པའི་ལན་བཀའ་སྩལ་པ་སྟེ། བུ་ཞེས་པ་ནི་ཕྱག་ན་རྡོ་རྗེ་ཆོས་ཀྱི་དབྱིངས་ལས་སྐྱེས་པས་ན་བཅོམ་ལྡན་འདས་ཀྱི་སྲས་སོ། །ཆེར་འབྱུང་ཞེས་པ་ནི་སེམས་རྒྱུད་ཀྱི་མཚན་ཉིད་དེ། སེམས་ཀྱི་རྒྱུད་དེ་ལས་བྱང་
ཆུབ་དང་ཐམས་ཅད་མཁྱེན་པའི་ཡེ་ཤེས་ཆེན་པོ་འབྱུང་བའི་ཕྱིར་རོ། །ལེགས་སོ་ཞེས་པ་ནི་དེ་ལྟ་བུའི་དོན་བཟང་པོ་དྲིས་པ་ཉིད་ལེགས་པ་དང༌། ཕྱག་ན་རྡོ་རྗེ་དགའ་བ་སྐྱེད་པའི་ཕྱིར་གསུངས་སོ། །ཐེག་པ་ཆེན་པོའི་གོ་འཕང་མཆོག །ཅེས་པ་ནི་སེམས་ཀྱི་རྒྱུད་དེ་ཐེག་པ་གསུམ་གྱི་ནང་ན་མཆོག་སྟེ་དམ་པའོ། །སེམས་ཀྱི་རྒྱུད་ཀྱི་མཚན་ཉིད་ནི། །ཞེས་པ་ནི་ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པའི་སེམས་ཀྱི་མཚན་ཉིད་བཤད་ཀྱིས་ཉོན་ཅིག་ཅེས་སྦྱར་རོ། །རྫོགས་སངས་རྒྱས་ཀྱི་གསང་བའི་མཆོག །ཅེས་པ་ནི་དེ་ལྟ་བུའི་སེམས་རྣམ་པར་དག་པ་ཐམས་ཅད་མཁྱེན་པ་དང་མངོན་པར་བྱང་ཆུབ་པའི་རང་བཞིན་དེ་སེམས་ཅན་ཕལ་ཆེར་གྱི་སྤྱོད་ཡུལ་མ་ཡིན་པ་དང༌། སྣོད་མ་ཡིན་པ་ལ་མི་བསྟན་པའི་ཕྱིར་གསང་བ་ཞེས་བྱའོ། །རྟོག་གེ་ཀུན་གྱིས་མི་ཤེས་པ། །ཞེས་པ་ནི་སྟོང་པའི་མཚན་ཉིད་ཀྱི་སེམས་དེ་མངོན་སུམ་དང་རྗེས་སུ་དཔག་པའི་རིགས་པའི་སྒོ་ནས་ཇི་ལྟ་བ་བཞིན་དུ་མི་རྟོགས་པའོ། །ཡིད་གཅིག་བསྡུས་ལ་མཉེན་པར་གྱིས། །ཞེས་པ་ནི་མ་ཡེངས་པར་ཉོན་ཅིག་པའོ། །སེམས་ནི་བརྒྱ་རྩ་དྲུག་ཅུ་ལས། །འདས་ནས་སྐྱེ་བར་འགྱུར་ཞེས་སྦྱར་ཏེ། འཇིག་རྟེན་པའི་སེམས་བརྒྱ་དྲུག་ཅུ་ལས་འདས་ནས་ཆོས་ལ་བདག་མེད་པར་རྟོགས་ཏེ་མོས་པས་སྤྱོད་པའི་ས་ལ་སེམས་གསུམ་རྣམ་པར་བསྒོམ་པ་དང༌། ཕ་རོལ་ཏུ་ཕྱིན་པ་རྣམས་རྣམ་པར་སྤྱོད་པ་དང༌། བསྡུ་བའི་དངོས་པོ་རྣམ་པ་བཞི་བྱས་ནས་མོས་པས་སྤྱོད་པའི་ས་ལས་འཕར་ཏེ། ས་རབ་ཏུ་དགའ་བའི་སེམས་ཡེ་ཤེས་ཀྱི་ས་ལ་ཞུགས་པ་ལ་བྱ་སྟེ། ཇི་སྙེད་ཅིག་ལས་འདས་ནས་ནི། སྐྱེ་བར་འགྱུར་ཞེས་དྲིས་པའི་ལན་ནོ། །བསོད་ནམས་ཆེས་ཞེས་པ་ནི་ཕ་རོལ་ཏུ་ཕྱིན་པ་ལ་སོགས་པའི་བསོད་ནམས་ཆེན་པོའི་རྒྱུ་ལས་སྐྱེས་པའོ། །སྙིང་པོ་ནི་ཕྱིན་ཅི་མ་ལོག་པར་ཡོངས་སུ་གྲུབ་པ་སྟེ། དཔེར་ན་ཙནྡན་དང་སེང་ལྡེང་གི་སྙིང་པོ་ལྟར་མཆོག་དམ་པ་ལ་བྱའོ། །བྱང་ཆུབ་ཉིད་ཀྱི་ཕྱིར་བྱང་ཆུབ་འབྱུང་བ་ཞེས་སྦྱར་ཏེ། བླ་ན་མེད་པའི་བྱང་ཆུབ་ཐོབ་པའི་ཕྱིར་ན་བྱང་ཆུབ་ཀྱི་སེམས་དེ་ལས་སེམས་འབྱུང་བ་ལ་བྱའོ། །ནམ་མཁའ་ལྟ་བུར་དཔག་མེད་ཅིང༌། །ཞེས་པ་ནི་བྱང་ཆུབ་ཀྱི་སེམས་དེའི་ཡོན་ཏན་ལ་སོགས་པ་ཚད་བཟུང་ཞིང་དཔག་ཏུ་མེད་པའམ་རྣམ་པ་མེད་པས་འདི་ཙམ་མོ་ཞེས་ཚད་གཟུང་དུ་མེད་དེ་ནམ་མཁའ་དང་འདྲ་བ་ལ་བྱའོ། །གོས་པ་མེད་པར་ཇི་བཞིན་གནས། །ཞེས་པ་ནི་དེ་ལྟ་བུའི་སེམས་ནམ་མཁའི་མཚན་ཉིད་ལ་གློ་བུར་གྱི་ཉོན་མོངས་པའི་བག་ཆགས་ཀྱིས་མ་གོས་པ་སྟེ། །
དེ་ལྟར་གློ་བུར་གྱི་ཉོན་མོངས་པའི་མཚན་མའི་དབང་དུ་མ་གྱུར་པས་ཤིན་ཏུ་རྣམ་པར་དག་པའི་རང་བཞིན་དུ་གནས་པ་ལ་བྱའོ། །ཆོས་ཀུན་གྱིས་ནི་མི་བསྒུལ་ཏེ། །དཔག་མེད་ཡེ་ཤེས་ཀྱིས་བསྒྲུབས་པ། །ཞེས་པ་ནི་བྱང་ཆུབ་ཀྱི་སེམས་དེ་ཚད་མེད་པའི་ཡེ་ཤེས་ལས་བྱུང་བ་ལ་བྱའོ། །ཡང་དག་རྫོགས་སངས་རྒྱས་སྟོན་པ། །ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་ལ་མཆོད་པ་བྱས་པ་དང༌། ས་དང་ཕ་རོལ་ཏུ་ཕྱིན་པ་ལ་སོགས་པ་སྤྱད་པ་ལས་བྱུང་སྟེ། དེའི་སྤྱོད་པ་ཅི་འདྲར་འགྱུར་བ་དང་ཞེས་དྲིས་པའི་ལན་ནོ། །བྱང་ཆུབ་ཕྱིར་ནི་དང་པོར་འདོད། །ཅེས་པ་ནི་ས་དང་པོའི་བྱང་ཆུབ་ཀྱི་སེམས་ལ་བྱ་སྟེ། དེ་རྣམས་ནི་བྱང་ཆུབ་ཀྱི་སེམས་ཀྱི་རྒྱུ་དང་རང་བཞིན་བཤད་པའོ། །གསང་བ་པའི་བདག་པོ་དེ་ལ། འཁོར་བ་ཐོག་མ་མེད་པ་ནས། །བྱིས་པ་སོ་སོའི་སྐྱེ་བོ་རྣམས། །ཞེས་པ་ནས། འཇིག་པས་སྟོང་ཉིད་ཤེས་པར་བྱ། །ཞེས་པའི་བར་གྱིས་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་བཤད་པ་ཡིན་ཏེ་རྒྱུ་དེ་ཡང་རྣམ་པ་གཉིས་སོ། །དེ་ལ་འཇིག་རྟེན་པའི་སེམས་བརྒྱ་དྲུག་ཅུ་ལ་སོགས་པ་ནི་རྣམ་པར་སྣང་མཛད་ཀྱི་ཉེ་བར་ལེན་པའི་རྒྱུའོ། །གཞན་ས་དང་ཕ་རོལ་ཏུ་ཕྱིན་པ་ནི་ལྷན་ཅིག་བྱེད་པའི་རྒྱུའོ། །དེ་ལྟ་བས་ན་སོ་སོའི་སྐྱེ་བོ་ལ་ཡང་རྣམ་པ་གཉིས་ཏེ། འཇིག་རྟེན་པའི་གཞུང་ལུགས་ཤེས་པ་དང་མི་ཤེས་པའོ། །དེ་ལ་བྱིས་པ་ནི་ངན་པར་སྨྲ་བ་དང༌། ངན་པར་བྱེད་པ་དང། ངན་པར་སེམས་པ་སྟེ། དེ་དག་ནི་རང་གི་གཞུང་ལུགས་ཀྱང་མི་ཤེས་པའོ། །དེ་ལས་གཞན་པ་ནི་རང་རང་གི་གཞུང་ལུགས་ཤེས་པ་འཕགས་པའི་ལམ་ཐོབ་པ་ལ་བྱ་སྟེ། དེ་དག་འཁོར་བ་ན་སྡུག་བསྔལ་གསུམ་གྱིས་གདུངས་ནས་གདུངས་པ་དེ་ལས་ཐར་པའི་ཕྱིར་བདག་དང་བདག་གིར་བརྟགས་པ་དེ་དག་ལ་བརྟེན་ནས་སྦྱིན་པ་ལ་སོགས་པ་བྱས་ཏེ་ཐར་བར་རེ་བའོ། །བདག་དང་བདག་གི་བ་ལ་མངོན་པར་ཆགས་ནས་བདག་ཏུ་འཛིན་པ་གྲངས་མེད་པ་ལ་རྟོག་པ་དེ་དག་ཀྱང་བདག་ཅེས་པའི་རང་བཞིན་ཅི་འདྲ་བ་མ་དཔྱད་པར་ཆགས་པ་སྐྱེ་བ་ནི་རང་རང་གི་གཞུང་ལུགས་མི་ཤེས་པའི་བྱིས་པ་རྣམས་སོ། །རང་རང་གི་གཞུང་ལུགས་ཤེས་པ་དེ་རྣམས་ཀྱང་སོ་སོའི་བདག་ཏུ་བརྟགས་པ་དེ་ལ་བརྟེན་པ་ནི་གཞན་དག་ནི་དུས་ལས་བྱུང་བ་དང་ཞེས་པ་ནས་བརྗོད་པར་བྱ་བ་དང༌། བརྗོད་པར་བྱ་བ་མ་ཡིན་པར་རྟོག་སྟེ་ཞེས་པའི་བར་དུའོ། །དེ་དག་ནི་འཇིག་རྟེན་པ་རྣམས་ཀྱི་སོ་སོའི་བདག་ཏུ་བརྟགས་པ་སྟེ། ཇི་སྐད་དུ་སྨོས་པའི་བདག་དང་བདག་གི་ངོ་བོ་དེ་དག་གི་ས་བདག་ཅག་འགྲོ་བ་རྣམས་བསྐྱེད་དེ། །
དེ་དག་ཉིད་ཀྱིས་འཇིག་པར་ཡང་བྱེད་པར་རྟོག་གོ །གསང་བ་པའི་བདག་པོ་བདག་གི་ཁྱད་པར་དེ་ལྟ་བུ་ལ་སོགས་པ་ཞེས་པ་ནི་གོང་དུ་སྨོས་པའི་བདག་གི་དངོས་པོ་རྣམས་ལ་བྱའོ། །ཐར་པ་འདོད་པས་ཞེས་པ་དེ་ལྟ་བུར་བདག་ཏུ་བརྟགས་པ་ཉིད་ལ་བརྟེན་ནས་ཐར་བ་རེ་བའོ། །རྣལ་འབྱོར་འདོད་པའི་རྣལ་འབྱོར་བདག་གིས་ཞེས་པ་ནི་འཇིག་རྟེན་པའི་ཚུལ་དུ་ལུས་ངག་ཡིད་གསུམ་ཡུལ་ལ་འཇུག་པ་ལས་འགོག་པ་དང༌། དངོས་པོ་གང་ལ་དམིགས་པ་དེ་ལ་སེམས་རྩེ་གཅིག་ཏུ་དམིགས་པ་འཛག་པ་ནི་རྣལ་འབྱོར་ཏེ། ལུས་ངག་ཡིད་གསུམ་ཡུལ་ལ་མི་འཇུག་པར་འགོག་པའི་རྣལ་འབྱོར་འདོད་པ་རྣམས་ཀྱིས་དེ་ལྟ་བུའི་བདག་རྣམས་རབ་ཏུ་རྟོག་པ་ལ་བྱའོ། །བྱིས་པ་སོ་སོའི་སྐྱེ་བོ་ཕྱུགས་དང་མཚུངས་པ་རྣམས་ཞེས་པ་ནི་རང་གི་གཞུང་ལུགས་མི་ཤེས་པ་ལ་བྱ་སྟེ། བྱུགས་དང་མཚུངས་པ་ཞེས་པ་ནི་ངན་པར་སྨྲ་བ་དང༌། ངན་པར་སེམས་པ་དང༌། ངན་པར་བྱེད་པའི་དཔེ་སྟེ་ཕྱུགས་ནི་ཟ་པ་དང༌། གཡེམ་པ་དང་འཇིགས་པ་ལས་བསམ་པ་གཞན་མེད་དེ། བྱིས་པ་རྣམས་ཀྱང་དེ་ལྟ་བུའི་མཚན་ཉིད་དང་ལྡན་པས་ཕྱུགས་དང་མཚུངས་ཞེས་པའོ། །བརྒྱ་ལམ་ན་རེས་འགའ་ཞིག་ལ་ཞེས་པ་དེ་ལྟ་བུའི་བྱིས་པ་ཕྱུགས་དང་མཚུངས་པ་འཁོར་བ་ན་འཁྱམས་པ་ན་ཆོས་ཀྱི་འདུ་ཤེས་འབྱུང་བ་ནི་དཀོན་པའི་མཆོག་སྟེ། ཆོས་ཀྱི་འདུ་ཤེས་སྐྱེ་བ་ཡང་སྨྱུང་བར་གནས་ནས་བསོད་ནམས་སུ་འགྱུར་བ་ལ་བྱ་སྟེ། སྨྱུང་བར་གནས་པ་དེ་ཙམ་གྱིས་སེམས་མགུ་སྟེ་སྨྱུང་བར་གནས་པ་ཉིད་ལ་ཡང་དུ་དུས་དུས་སུ་སྒོམ་པར་བྱེད་དེ། དེ་བས་ན་སྨྱུང་བར་གནས་པ་ལ་གནས་པར་བྱའོ་ཞེས་དེ་ཙམ་ཞིག་སེམས་ལ་བྱས་ནས་མགུ་བ་བསྐྱེད་ཅིང་ཕྱི་ཕྱིར་དེ་ཉིད་ལ་གོམས་པར་བྱེད་དེ་ཞེས་གསུངས་པ་ཡིན་ནོ། །གསང་བ་པའི་བདག་པོ་དེ་ནི་དགེ་བའི་ལས་སྐྱེ་བའི་ས་བོན་ལྟ་བུ་སྟེ། སེམས་དང་པོའི་ཞེས་པ་ནི་སེམས་བདུན་པའི་ཚེ་ཚུལ་ཁྲིམས་བསྲུངས་པའི་དགེ་བ་འབྱུང་བའི་ས་བོན་དུ་གྱུར་པ་ལ་བྱའོ། །དེ་ལ་འགའ་ཞིག་སྨྱུང་བར་གནས་པ་ནི་བརྟུལ་ཞུགས་ཀྱི་མཚན་ཉིད་དེ་ཉོན་མོངས་པའི་ཕྱོགས་གཅིག་ཡིན་ན་ཇི་ལྟར་དགེ་བའི་ས་བོན་དུ་འགྱུར་སྙམ་དུ་དོགས་པ་སྐྱེ་བ་ལ། དོགས་པ་བསལ་བ་ནི་སྨྱུང་བར་བྱས་པའི་འོག་ཏུ་མཆོད་པ་དང་སྦྱིན་པའི་སེམས་འབྱུང་བ་སྟེ། སྨྱུང་བ་དེ་ནི་སྦྱིན་པ་ལ་སོགས་པའི་དགེ་བའི་དེ་མ་ཐག་པའི་རྐྱེན་བྱེད་པས་ཉེས་པ་མེད་དོ། །སྦྱིན་པ་ལ་སོགས་པ་དེ་དག་ཀྱང་ཟག་པ་དང་བཅས་
པའི་དགེ་བ་ལ་བྱའོ། །དེའི་རྒྱུ་ཉིད་ཀྱིས་སྦྱིན་པ་སྦྱིན་པར་བྱེད་དེ་ཞེས་སྦྱར་ཏེ། མཚན་མ་དང་བཅས་པའི་ཉི་མ་ཞེས་པ་སྨྱུང་བར་བྱད་པ་དེ་ཉིད་ལ་གོམས་པར་བྱེད་པའི་རྒྱུས་ཟླ་བ་དང་སྐར་མ་དང་ཉི་མ་ལ་སོགས་པ་བཟང་པོའི་ཉིན་པར་ཕ་མ་ལ་སོགས་པའི་གཉེན་རྣམས་ལ་སྦྱིན་པར་བྱེད་པ་ནི་ཚུལ་ཁྲིམས་བསྲུངས་བའི་དགེ་བ་ལས་འབྱུང་བའི་མྱུ་གུར་བལྟའོ། །དེ་ནས་གཞན་ཡང་སྦྱིན་པ་དེ་ཉིད་མི་ཤེས་པ་དག་ལ་ཡང་སྦྱིན་པར་བྱེད་ཅེས་པ་ནི་སྦྱིན་པ་སྟེ་མ་ལ་གོམས་པའི་མཐུས་གཉེན་མ་ཡིན་པ་གཞན་ལ་ཡང་སྦྱིན་པ་སྟེ། དེ་ཡང་དགེ་བ་བཅུའི་ལས་འབྱུང་བའི་སྡོང་བུ་ལྟ་བུར་བལྟའོ། །དེ་ནས་གཞན་ཡང་སྦྱིན་པ་དེ་ཉིད་སྣོད་དུ་དུང་བ་ཡོངས་སུ་ཚོལ་ཞིང་པར་བྱེད་དེ་ཞེས་པ་ནི་པ་དང་མ་དང༌། མཁན་པོ་དང་སློབ་དཔོན་དང་བྲམ་ཟེ་རིག་བྱེད་བཞི་པ་རྫོགས་པར་ཤེས་པ་ལ་སྦྱིན་ན་དེ་དག་ནི་སྦྱིན་གནས་ཏེ། བསོད་ནམས་མཐའ་མེད་པར་འགྱུར་བས་སྦྱིན་པའི་སྣོས་དོ་སྙམ་ནས་སྦྱིན་པར་བྱེད་པ་དེ་ཡང་དགེ་བའི་ལས་འབྱུང་བའི་རྒྱུ་སྟེ་ལོ་མ་ལྟ་བུར་བལྟའོ། །དེ་ནས་གཞན་ཡང་སྦྱིན་པ་དེ་ཉིད་བླ་མའམ་རོལ་མོ་མཁན་དག་ལ་དགའ་བཞིན་དུ་སྦྱིན་པར་བྱེད་དེ་ཞེས་པ་ནི་སྦྱིན་པ་དེ་ནི་སྔ་མ་ལས་རྒྱ་ཆེ་སྟེ། སྣོད་ལ་ཡང་མི་རྟོག་པར་བླ་མ་དང་རོལ་མོ་མཁན་ལ་སོགས་པ་ལ་སེམས་དགའ་བར་སྦྱིན་པས་དངོས་པོ་ལ་མ་ཆགས་པར་སྦྱིན་པ་སྟེ། དེ་ཡང་དགེ་བའི་ལས་འབྱུང་བའི་རྒྱུ་སྟེ་མེ་ཏོག་ལྟ་བུར་བལྟའོ། །དེ་ནས་གཞན་ཡང་སྦྱིན་པ་དེ་ཉིད་ཡིད་དགའ་བ་དག་ལ་སྦྱིན་པར་བྱེད་དེ་ཞེས་པ་ནི་ཟས་འདོད་པ་ལ་ཟས། གོས་འདོད་པ་ལ་གོས་ལ་སོགས་པ་ཅི་འདོད་པ་རྣམས་སྦྱིན་པ་ལ་བྱ་སྟེ། །དེ་ཡང་དགེ་བའི་ལས་འབྱུང་བའི་འབྲས་བུར་བལྟའོ། །དེ་ནས་གསང་བ་པའི་བདག་པོ། །གཞན་ཡང་མཐོ་རིས་སུ་སྐྱེ་བར་བྱ་བའི་ཕྱིར་ཚུལ་ཁྲིམས་བསྲུང་སྟེ་ཞེས་པ་ནི་དེ་ལྟ་བུའི་སྦྱིན་པ་རྣམས་བྱས་ནས་ལུས་ཀྱི་ལས་གསུམ་དང༌། ངག་གི་ལས་བཞི་དང༌། ཡིད་ཀྱི་ལས་གསུམ་གྱི་སྒོ་ནས་མི་དགེ་བ་འབྱུང་བ་སྤོང་བའི་མཚན་ཉིད་ཀྱི་ཚུལ་ཁྲིམས་བསྲུངས་ནས་དེའི་འབྲས་བུ་མངོན་པར་མཐོ་བའི་མཚན་ཉིད་ལྷ་ལ་སོགས་པའི་ལོངས་སྤྱོད་མཐོ་རིས་སུ་སྐྱེ་བའི་ཕྱིར་ཏེ་ལོངས་སྤྱོད་དེ་ཉིད་ག་སོས་སུ་འགྱུར་བ་ལ་བྱའོ། །དེ་ནས་ཡང་གསང་བ་པའི་བདག་པོ། །གཞན་ཡང་སེམས་དེ་ལྟ་བུ་ཉིད་
ཀྱིས་འཁོར་བར་རྒྱུ་བ་ནི་དགེ་བའི་བཤེས་གཉེན་ལ་ལ་ཞིག་ལས་ཚིག་འདི་སྐད་ཐོས་ཏེ་ཞེས་པ་དེ་ལྟ་བུར་སྦྱིན་པ་བྱེད་ཅིང་ཚུལ་ཁྲིམས་བསྲུང་བ་ལ་མཁན་པོ་འཇིག་རྟེན་པའི་གཞུང་ལུགས་ཤེས་པ་འགའ་ཞིག་གིས་དགེ་བའི་བཤེས་གཉེན་བྱས་ཏེ། རང་གི་སྟོན་པའི་ལྷ་ལ་བརྟེན་དུ་བཅུག་པ་སྟེ། །དགེ་བའི་བཤེས་གཉེན་དེས་ཀྱང་ལྷ་རྣམས་ཀྱི་རང་བཞིན་བསྟན་པ་ནི། ལྷ་འདི་དག་ནི་ལྷ་ཆེན་ཏེ། །ཐམས་ཅད་ལ་ནི་བདེ་བ་སྟེར། །དེ་ལ་ཁྱོད་ཀྱིས་གུས་མཆོད་དང༌། །ཐམས་ཅད་གྲུབ་པ་ཉིད་དུ་འགྱུར། །ཞེས་པ་ནས། དེ་བཞིན་ལྷ་དང་དྲང་སྲོང་མཆོག །རིག་བྱེད་རིག་བྱེད་སྐྱེས་བུ་ཡིན། །ཞེས་པའི་བར་དུའོ། །མཁས་པའི་མཆོད་པ་གྱིས་ཤིག་ཅེས། །ཞེས་པ་ནི་དེ་ལྟར་གོང་དུ་མིང་གིས་སྨོས་པའི་ལྷ་དེ་རྣམས་གང་ལ་དད་པ་ལ་སྟོན་པ་དང་མཆོད་པའི་གནས་སུ་བྱས་ན་ལྷ་དེ་རྣམས་ཀྱིས་བདེ་བ་སྟེར་བ་དང་བསམ་པ་ཐམས་ཅད་འགྲུབ་བར་བྱེད་དོ་ཞེས་བསྟེན་པའོ། །དེ་ལས་དེ་འདྲའི་ཚིག་ཐོས་ནས། །ཡིད་ནི་ཡང་དག་མགུ་གྱུར་ཏེ། །དེའི་ཆེ་རབ་ཏུ་གུས་ལྡན་པས། །དེ་དག་ལ་ནི་ནན་ཏན་བྱེད། །ཅེས་པ་ནི་དེ་ལྟར་དགེ་བའི་བཤེས་གཉེན་གྱིས་ལྷ་རྣམས་བསྟན་པ་ཐོས་ནས་བྱིས་པ་དེ་ལ་ཡིད་མགུ་བ་སྐྱེས་ཏེ། དེ་ནས་ལྷ་དེ་དག་ལ་བརྟེན་པ་དང་མཆོད་པ་ནན་ཏན་བྱེད་ཅིང་ལྷ་དེ་རྣམས་ལ་རབ་ཏུ་དད་པ་དང་ལྡན་པར་འགྱུར་བའོ། །གསང་བ་པའི་བདག་པོ་འདི་ནི་བྱིས་པ་སོ་སོའི་སྐྱེ་བོ་འཁོར་བ་ནི་ཀུན་དུ་འཁྱམས་པ་རྣམས་ཀྱི་དབུགས་ཕྱིན་པའི་མཆོག་ཡིན་ཏེ། འདི་ནི་སྟོབས་སུ་གྱུར་པ་སྟེ་སེམས་བརྒྱད་པར་རྒྱལ་བ་རྣམས་ཀྱིས་བཤད་དོ་ཞེས་པ་ནི་དེ་ལྟ་བུའི་བྱིས་པ་སོ་སོའི་སྐྱེ་བོ་ཐ་དད་པ་རྣམས་འཁོར་བ་ནས་སྐྱབས་དང་མགོན་མེད་པར་འཁྱམས་པ་ལས་དགེ་བའི་བཤེས་གཉེན་རྣམས་ཀྱིས་སྐྱབས་དང་མགོན་དེ་དག་བསྟན་པས་བྱིས་པ་དེ་རྣམས་ཀྱིས་སྐྱབས་དང་མགོན་རྙེད་དེ་དབུགས་ཕྱིན་པ་ནི་བརྟན་པོར་གྱུར་པས་དགེ་བའི་སྟོབས་སུ་གྱུར་པའོ་ཞེས་པའོ། །དེ་ནས་གསང་བའི་བདག་པོ་གཞན་ཡང་ཁྱད་པར་རྟོགས་པ་ཇི་སྐད་དུ་ཡོངས་སུ་གྲགས་པའི་ཁྱད་པར་དེ་དང་དེ་དག་ལ་ཁྱད་པར་དུ་གནས་པ་རྣམས་ལ་འབའ་ཞིག་པ་ཉིད་ཀྱི་དོན་དུ་བློ་སྐྱེ་ཤིང་དེ་ཡང་ཡོད་དོ་ཞེས་སྟོང་པ་ཉིད་ཁོ་ན་ལ་དངོས་པོར་སེམས་ཏེ། སྔར་བདག་
གི་ངོ་བོ་སྨོས་པ་རྣམས་དང་སྟོན་པའི་ལྷ་རྣམས་ཀྱི་རང་བཞིན་ཇི་སྐད་སྨོས་པ་བཞིན་དུ་ཤེས་ནས་བདག་ཏུ་བརྟགས་པ་དང་ལྟ་དེ་རྣམས་ལ་བརྟེན་ཏེ། ལྷ་དེ་རྣམས་ཀྱིས་བསྟན་པའི་གཞུང་གིས་ལས་དང་ཉོན་མོངས་པ་སྤངས་ནས་དག་པའི་བདག་ཏུ་རྟོག་པ་ཡིན་ཏེ། དག་པ་དེ་ཡང་སྟོང་པ་ཉིད་མྱ་ངན་ལས་འདས་པ་ཡིན་ནོ་སྙམ་པའི་བློ་སྐྱེ་བ་སྟེ། སྟོང་པ་ཉིད་ལ་བདེ་བ་དང་སྡུག་བསྔལ་མྱོང་བར་བྱེད་པའི་རང་བཞིན་གྱི་བདག་ཅེས་པའི་དངོས་པོ་ཉུངས་འབྲུ་ཙམ་མམ། སྤུའི་ཉག་མ་ལ་སོགས་པ་ཙམ་དུ་ཡོད་པར་རྟོག་སྟེ་དེ་དག་ནི་བྱིས་པ་སོ་སོའི་སྐྱེ་བོ་རྣམས་ཀྱིས་བདག་དང་ལྷ་རྣམས་ལ་བརྟེན་ནས་རང་གི་རྣམ་པར་གྲོལ་བ་ཚོལ་བ་སྟེ། རྣམ་པར་གྲོལ་བར་ཚོལ་བའི་བདེ་བ་དེ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་བརྒྱུད་པའི་རྒྱུར་བལྟའོ། །དབང་ཕྱུག་ཆེན་པོ་དང་ཚངས་པ་ལ་སོགས་པའི་ལྷ་དེ་རྣམས་ཀྱང་སྤྱིར་སེམས་ཅན་རྣམ་པ་གཉིས་ཏེ། ལས་ལས་སྐྱེས་པ་དང༌། ཡེ་ཤེས་ཀྱི་སེམས་ཅན་ནོ། །དེ་ལ་སྐབས་འདིར་ནི་ལྷ་དེ་རྣམས་ཀྱང་བྱིས་པ་སོ་སོའི་སྐྱེ་བོ་འཁྱམས་པ་རྣམས་ལ་སོ་སོའི་མྱ་ངན་ལས་འདས་པའི་ལམ་སྟོན་པ་སྟེ། ལམ་དེ་སྟོན་པ་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་མཁྱེན་ནས་ཐོབ་པའི་རྒྱུར་སྦྱོར་བ་ཡིན་པས་དབང་པོ་དང་བརྒྱ་བྱིན་ལ་སོགས་པའི་ལྷ་དེ་རྣམས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལས་སྤྲུལ་པའི་ཡེ་ཤེས་ཀྱི་སེམས་ཅན་དུ་བལྟའོ། །གསང་བ་བའི་བདག་པོ། །དེ་དག་གིས་ནི་སྟོང་པ་ཉིད་རབ་ཏུ་མི་ཤེས་སོ་ཞེས་པ་ནི་སྟོང་པ་ཉིད་ལ་འབའ་ཞིག་པ་ཞེས་བྱ་བའི་བདག་གི་ངོ་བོར་བརྟགས་པས་སྟོང་པར་མི་འགྱུར་ཏེ། །ཇི་ཙམ་དུ་དངོས་པོར་བརྟགས་པ་དེ་ཙམ་དུ་ཡོད་པའི་མཐའ་འཛིན་པས་སྟོང་པ་ཉིད་ཤེས་པར་མི་འགྱུར་རོ་ཞེས་པའོ། །དེ་བས་ན་སྟོང་པ་ཉིད་ནི་དངོས་པོ་ཅན་ཡང་མ་ཡིན། དངོས་པོ་མེད་པ་ཡང་མ་ཡིན། ཡོད་པ་ཡང་མ་ཡིན་པ་ཡང་མ་ཡིན་གཉིས་ཀ་ཡང་མ་ཡིན་ཏེ། དེ་ལ་རྟོག་པའམ་མི་རྟོག་པ་ཡང་མེད་ན་དེ་ལ་ཇི་ལྟར་སྟོང་པ་ཞེས་བཏགས་པར་བྱ་ཞེས་སྟོང་པའི་མཚན་ཉིད་ཕྱིན་ཅི་མ་ལོག་པར་གསུངས་པ་ཡིན་ནོ། །དེ་ལ་དངོས་པོ་ཡང་མ་ཡིན་ཞེས་པ་ནི་བྱིས་པ་རྣམས་ཀྱིས་ཇི་ལྟར་བདག་ཏུ་བརྟགས་པའི་དངོས་པོ་མ་ཡིན་པའོ། །དངོས་པོ་མེད་པ་ཡང་མ་ཡིན་ཞེས་པ་ནི་དེ་ལྟ་བུ་ཡོད་
པའི་དངོས་པོ་སྤངས་པའི་གཞན་ཞིག་ཀྱང་མ་ཡིན་པའོ། །ཡོད་པ་ཡང་མ་ཡིན་ཞེས་པ་ནི་སྟོང་པ་ཉིད་ལ་དེ་ལྟ་བུའི་དངོས་པོ་མེད་པའོ། །མེད་པ་ཡང་མ་ཡིན་ཞེས་པ་ནི་སྟོང་པ་ཉིད་ཀྱི་རང་བཞིན་དུ་མེད་པ་མ་ཡིན་པའོ། །གཉིས་ཀ་ཡང་མ་ཡིན་ཞེས་པ་ནི་ཡོད་མེད་གཉིས་ལས་གཞན་ན་ཡང་མེད་པའོ། །དེ་ལ་རྟོག་པའམ་མི་རྟོག་པ་ཡང་མེད་ན། དེ་ལ་ཇི་ལྟར་སྟོང་པ་ཞེས་བཏགས་པར་བྱ་ཞེས་པ་ནི་དེ་ལྟར་ཡོད་པ་དང་མེད་པ་མ་ཡིན་པས་སྟོང་པ་ཉིད་ལ་དངོས་པོར་གདག་ཏུ་མེད་ཅེས་པའོ། །དོན་འདི་ཉིད་ཚིགས་སུ་བཅད་པས་གསུངས་པ། གང་དག་སྟོང་ཉིད་མི་ཤེས་པ། །དེ་དག་མྱ་ངན་འདས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པས་སྟོང་ཉིད་ཤེས་པར་བྱ། །ཞེས་པ་སྟེ། གང་དག་སྟོང་ཉིད་མི་ཤེས་པ། །ཞེས་པ་ནི་སྟོང་པ་ཉིད་ལ་དངོས་པོར་བརྟགས་པ་ན་སྟོང་པ་ཉིད་ཀྱི་རང་བཞིན་ཕྱིན་ཅི་མ་ལོག་པར་མི་ཤེས་པ་སྟེ། དེ་དག་གིས་ནི་ཆོས་ཀྱི་དབྱིངས་ཞི་བ་མྱ་ངན་ལས་འདས་པ་རྣམས་ཀྱང་ཤེས་པར་མི་ནུས་པ་ལ་བྱའོ། །སྟོང་པ་ཉིད་ཇི་ལྟར་ཤེས་པར་བྱ་ཞེ་ན། དངོས་པོ་དང་དངོས་པོ་མེད་པས་བསྡུས་པའི་དངོས་པོ་དང་བྲལ་བས་ཤེས་པར་ནུས་ཏེ། དེ་བས་ན་དངོས་དང་དངོས་མེད་པ། འཇིག་པས་ཞེས་གསུངས་པ་ཡིན་ནོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེ་ས་གསོལ་བ་བཏབ་པ། བཅོམ་ལྡན་འདས་སེམས་ཀྱི་ཁྱད་པར་དེ་དག་བཤད་དུ་གསོལ་ཞེས་པ་ནི་སྔར་སེམས་ཀྱི་ཁྱད་པར་བརྒྱ་དྲུག་ཅུ་ལས་འདས་ནས་བྱང་ཆུབ་ཀྱི་སེམས་སྐྱེའོ་ཞེས་གསུངས་ན། སེམས་ཀྱི་ཁྱད་པར་དེ་རྣམས་ཀྱི་མཚན་ཉིད་ཇི་ལྟ་བུ་ཡིན་པ་བཤད་དུ་གསོལ་ཞེས་པ་ལ་བྱའོ། །དེ་སྐད་ཅེས་གསོལ་པ་ཞེས་པ་ནས། ཉོན་ཅིག་ཅེས་པའི་བར་དུ་གསོལ་བའི་ལེན་བཤད་པར་གནང་བའོ། །དེ་དག་བཤད་པ་ཡང་གསང་པའི་བཤད་པོ། །དེ་ལ་སེམས་ནི་འདོད་ཆགས་ཀྱི་སེམས་དང༌། འདོད་ཆགས་དང་བྲལ་བའི་སེམས་དང་ཞེས་པ་ནས་བུ་ག་ལྟ་བུའི་སེམས་དང་སྐྱེ་བར་གྱུར་པའི་སེམས་སོ་ཞེས་པའི་བར་རོ། །སེམས་དེ་རྣམས་བཤད་པ་ཡང་མིང་དང༌། མཚན་ཉིད་དང་སྤོང་བ་དང་ལམ་གྱི་སྒོ་ནས་བཤད་པར་ཤེས་པར་བྱ་ལ། སེམས་དེ་རྣམས་ཀྱི་རང་བཞིན་ཡང་རྣམ་པ་བཞི་སྟེ། ཉོན་མོངས་པ་ཅན་དང༌། དགེ་བ་དང༌། མི་དགེ་བ་དང༌། །
ལུང་དུ་མ་བསྟན་པའོ། །དེ་ལ་སེམས་དེ་རྣམས་ལས་འདའ་བར་བྱ་བ་ཡང་སྤྱིར་ན་སྔགས་ཀྱི་སྒོ་ནས་སྤྱོད་པ་ལ་རྣམ་པ་གཉིས་ཏེ། གྲུབ་པ་དང༌། དམ་ཚིག་ཅན་ནོ། །དེ་ལ་གྲུབ་པ་ནི་མོས་བས་སྤྱོད་པའི་ས་ནས་ཡིད་ཀྱི་རང་བཞིན་གྱི་ལུས་ཀྱིས་གང་དུ་འདོད་པར་འཕར་བས་རིམ་པ་དང་བསྐལ་པའི་ཚིགས་ཀྱང་མེད་དོ། །དམ་ཚིག་ཅན་ལ་ཡང་རྣམ་པ་གཉིས་ཏེ། དབང་པོ་རྟུལ་པོ་དང་རྣོན་པོའོ། །དེ་ལ་དབང་པོ་རྟུལ་པོ་ནི་ཐོག་མར་འཇིག་རྟེན་པའི་ལམ་སྟོང་པ་ཉིད་འབའ་ཞིག་པར་བློ་སྐྱེས་པ་ལས་འཕར་ནས་གང་ཟག་ལ་བདག་མེད་པར་རྟོགས་ཏེ་སེམས་འདི་རྣམས་ཀྱང་སྡུག་བསྔལ་བ་ཉིད་དང༌། མི་རྟག་པ་ཉིད་དང༌། སྟོང་པ་ཉིད་དང༌། བདག་མེད་པར་རྟོགས་ཏེ། སྤོང་བ་གོམས་པར་བྱེད་ན་འཇིག་རྟེན་པའི་ལམ་ནས་བརྩམས་ཏེ་བསྐལ་བ་གསུམ་གྱི་བར་དུ་གང་ཟག་ལ་བདག་མེད་པར་བསྒོམས་ཏེ། དེ་ནས་ཕུང་པོ་ལ་ཡོད་དོ་སྙམ་པའི་བློ་སྐྱེ་བ་དེ་ཡང་སུན་ཕྱུང་ནས་ཕུང་པ་ལ་སོགས་པ་སྒྱུ་མ་དང་སྨིག་རྒྱུ་ལྟ་བུར་ཆོས་ལ་བདག་མེད་པར་རྟོགས་ཏེ། སེམས་གསུམ་སྒོམ་པ་དང་ཕ་རོལ་ཏུ་ཕྱིན་པ་ལ་སོགས་པ་རྣམ་པར་སྤྱོད་པའི་མཚན་ཉིད་མོས་པས་སྤྱོད་པའི་ས་ལ་འཇུག་གོ །དབང་པོ་རྣོན་པོ་ནི་ཐོག་མ་ཉིད་ནས་གང་ཟག་དང་ཆོས་གཉི་ག་ལ་བདག་མེད་པར་རྟོགས་པས་སེམས་དེ་རྣམས་ཀྱང་སྒྱུ་མ་དང་སྨིག་རྒྱུའི་ཚུལ་གྱིས་སྤོང་ཞིང་སེམས་གསུམ་པོ་སྒོམ་པ་དང༌། ཕ་རོལ་ཏུ་ཕྱིན་པ་རྣམས་རྣམ་པར་སྤྱོད་པའི་རིམ་གྱིས་མོས་པས་སྤྱོད་པའི་ས་དེ་བསྐལ་པ་གཅིག་གིས་རྫོགས་ནས་བསྐལ་པ་དེའི་བཞི་ཆ་གཅིག་གིས་ཡེ་ཤེས་ཀྱི་ས་ལ་འཇུག་གོ །མོས་པས་སྤྱོད་པའི་ས་ལ་ཞུགས་ནས་ནི་དབང་པོ་རྣོ་རྟུལ་གཉིས་ཀ་ཡང་མོས་པས་སྤྱོད་པའི་ས་དེ་བསྐལ་པ་གཅིག་གིས་རྫོགས་པར་བྱེད་པ་དང༌། ཡེ་ཤེས་ཀྱི་ས་ལ་བསྐལ་པ་བཞི་ཆ་གཅིག་གིས་འཇུག་པར་འདྲའོ། །སེམས་ཀྱི་དངོས་པོ་དྲུག་ཅུ་རྣམས་ལས་བརྒྱ་དྲུག་ཅུར་འཕེལ་བ་ཡང་སྒྲིབ་པའི་ཆ་ཕྲ་ཆགས་གསུམ་དུ་ཕྱེ་སྟེ་གསུམ་པོ་དེ་རྣམས་རེ་རེ་ཞིང་ཡང་གསུམ་གསུམ་དུ་ཕྱེ་བས་རྣམ་པ་དགུར་བལྟའོ། །དེ་ལ་སྒྲིབ་པ་ཆེན་པོའི་ཆེན་པོ་ལ་སེམས་གཅིག་སྤོང་ལ་ཆེན་པོའི་འབྲིང་པོ་ལ་ནི་གཉིས་སྤོང༌། ཆེན་པོའི་ཆུང་ངུ་ལ་ནི་གསུམ་སྤོང༌། འབྲིང་གི་ཆེན་པོ་ལ་ནི་བཞི་སྤོང༌།
འབྲིང་གི་འབྲིང་ལ་ནི་ལྔ་སྤོང༌། འབྲིང་གི་ཆུང་དུ་ལ་ནི་དྲུག་སྤོང༌། ཆུང་ངུའི་ཆེན་པོ་ལ་བདུན་སྤོང༌། ཆུང་ངུའི་འབྲིང་ལ་བརྒྱད་སྤོང༌། འོག་ནས་འབྱུང་བའི་ཚུལ་གྱིས་དེ་ལྟར་སེམས་བརྒྱ་དྲུག་ཅུ་མོས་པས་སྤྱོད་པའི་ས་ནས་བསྐྱོད་ཅིང་མོས་པས་སྤྱོད་པའི་ས་དེ་རྫོགས་པར་བྱེད་དོ། །དེ་ལ་དགུ་པོ་རྣམས་ཀྱི་ཐ་མ་ཆུང་ངུའི་ཡང་ཆུང་དུ་ནི་མོས་པས་སྤྱོད་པའི་ས་ནས་འཕར་ནས་སྤོང་སྟེ་ཡེ་ཤེས་ཀྱི་ས་ལ་འཇུག་པར་ཤེས་པར་བྱའོ། །དེ་ལ་འདོད་ཆགས་ཀྱི་སེམས་གང་ཞེ་ན་ཆགས་པ་ཅན་ཆོས་ཀུན་དུ་བསྟེན་པའོ་ཞེས་པ་ནི་འདོད་ཆགས་དང་ལྡན་པའི་སེམས་ལ་བྱ་སྟེ། དེ་ཡང་དགེ་བ་དང༌། མི་དགེ་བ་དང༌། ཉོན་མོངས་པ་ཅན་དང༌། ལུང་དུ་མ་བསྟེན་པའི་ཆོས་རྣམ་པ་བཞི་ལས་ཇི་ལྟར་རིགས་པར་ཆགས་ནས་བསྙེན་པ་ལ་ཤེས་པར་བྱ་སྟེ། ལྷ་ལ་སོགས་པ་ལ་དད་ཅིང་མཆོད་པར་བྱ་བ་ལ་ཞེན་ནས་མཆོད་པ་ལ་སོགས་པའི་ལས་དེ་དག་བྱེད་པ་ནི་ཆགས་པ་ཅན་ཆོས་ཀུན་དུ་བསྟེན་པ་ཞེས་བྱ་སྟེ་དགེ་བའོ། །དེ་བཞིན་དུ་བུད་མེད་ལ་སོགས་པ་ལ་ཞེན་ནས་དེའི་བྱ་བ་བྱེད་པ་ནི་ཆགས་བ་ཅན་ཆོས་བསྟེན་པ་སྟེ་ཉོན་མོངས་པ་ཅན་གྱི་སེམས་སོ། །མ་བྱིན་པར་ལེན་པ་དང་བརྫུན་དུ་སྨྲ་བ་ལ་ཆོས་སུ་ཞེན་ནས་དེ་དག་གི་བྱ་བ་བྱེད་པ་ནི་ཆགས་པ་ཅན་ཆོས་བསྟེན་པ་སྟེ་མི་དགེ་བའི་སེམས་སོ། །བཟོ་ལ་སོགས་པའི་ཆོས་ལ་ཞེན་ནས་དེ་དག་གི་བྱ་བ་བྱེད་པ་ནི་ཆགས་པ་ཅན་ཆོས་བསྟེན་པ་སྟེ་ལུང་དུ་མ་བསྟན་པའོ། །དེ་ལྟར་ཚུལ་འདིས་སེམས་གཞན་རྣམས་ལ་ཡང་ཇི་ལྟར་རིགས་པར་དགེ་བ་དང་མི་དགེ་བ་དང༌། ཉོན་མོངས་པ་ཅན་དང་ལུང་མ་བསྟན་པར་སྦྱར་བར་བྱའོ། །འདོད་ཆགས་དང་བྲལ་བའི་སེམས་གང་ཞེ་ན། འདོད་ཆགས་དང་བྲལ་བའི་ཆོས་ཀུན་དུ་བསྟེན་པའོ་ཞེས་པ་ནི་གོང་དུ་སྨོས་པའི་ཆོས་རྣམ་པ་བཞི་ལ་མ་ཆགས་པའམ་མ་མོས་ཀྱང་ཆོས་ཉིད་ཀྱི་སྤྱོད་པའམ། གཞན་གྱི་དབང་དུ་མི་སྤྱོད་བཞིན་དུ་དེ་དག་གི་བྱ་བ་བྱེད་པ་ནི་འདོད་ཆགས་དང་བྲལ་བའི་ཆོས་ཀུན་དུ་བསྟེན་པའོ།། ཞེ་སྡང་གི་སེམས་གང་ཞེ་ན། སྡང་བས་ཆོས་ཀུན་དུ་བསྟེན་པའོ་ཞེས་པ་ནི་ཞེ་སྡང་དང་ལྡན་པའི་སེམས་ཏེ་གོང་དུ་སྨོས་པའི་ཚུལ་གྱིས་དགེ་བ་དང་མི་དགེ་བ་ལ་སོགས་པར་རིག་པར་བྱའོ། །བྱམས་པའི་སེམས་གང་ཞེ་ན། བྱམས་པ་དང་ལྡན་པའི་ཆོས་ཀུན་དུ་བསྟེན་པའོ་ཞེས་པ་ནི་བྱམས་པ་དང་
ལྡན་པའི་སེམས་ཏེ་དགེ་བ་དང་མི་དགེ་བ་ལ་སོགས་པ་ནི་སྔ་མ་བཞིན་ནོ། །གཏི་མུག་གི་སེམས་གང་ཞེ་ན་གང་མི་དཔྱོད་པར་ཆོས་བསྟེན་པའོ་ཞེས་པ་ནི་གཏི་མུག་དང་ལྡན་པའི་སེམས་སོ། །ཤེས་རབ་ཀྱི་སེམས་གང་ཞེ་ན། ཁྱད་པར་ལས་ཁྱད་པར་གཞན་རྟོགས་པར་བྱ་སྟེ་ཆོས་བསྟེན་པའོ་ཞེས་པ་ནི་ཤེས་རབ་དང་ལྡན་པའི་སེམས་ཏེ་ཁྱད་པར་ལས་ཞེས་པ་ནི་ཤེས་རབ་མ་ཐོབ་པ་ལས་ཤེས་རབ་ཐོབ་པ་ལ་བྱའོ། །ཁྱད་པར་གཞན་ཞེས་པ་ནི་ཤེས་རབ་དེ་ཐོབ་པ་ལས་ཤེས་རབ་མཆོག་ཁྱད་པར་དུ་རྟོགས་པ་ལ་བྱའོ། །གཏན་ལ་ཕབ་པའི་སེམས་གང་ཞེ་ན། བཀའ་དང་བླ་མའི་ཚིག་བཞིན་བྱེད་པ་ཉིད་དོ་ཞེས་པ་ནི། རྒྱལ་པོ་ལ་སོགས་པའི་བཀའ་དང༌། སློབ་དཔོན་ལ་སོགས་པའི་ལུང་མི་བྱར་མི་རུང་སྟེ། ངེས་པར་བྱ་བའི་ཆོས་དེ་བྱེད་པའོ། །ཐེ་ཚོམ་གྱི་སེམས་གང་ཞེ་ན། ཇི་ལྟར་ཡོངས་སུ་གཟུང་བ་དེས་པ་ངག་ལ་སོམ་ཉི་བསྟེན་པ་དག་གོ་ཞེས་པ་ནི་ཐེ་ཚོམ་དང་ལྡན་པའི་སེམས་ཏེ་སྔར་ཕྱིན་ཅི་མ་ལོག་པར་ཟིན་པ་ལ་ཕྱིས་བདག་ཉིད་ཀྱིས་ཐེ་ཚོམ་བསླང་སྟེ་དོགས་པ་སྐྱེ་པར་བྱེད་པ་ནི་དེའི་ཆོས་ལ་བརྟེན་པའོ་ཞེས་བྱའོ། །མུན་པར་འགྱུར་བའི་སེམས་གང་ཞེ་ན་སོམ་ཉི་མེད་པ་ལ་སོམ་ཉིར་ཤེས་པའོ་ཞེས་པ་ནི་མུན་པ་ལྟ་བུའི་སེམས་ཏེ་ཇི་ལྟར་མུན་པའི་ནང་ན་བུམ་པ་ལ་སོགས་པ་ཡོད་ཀྱང་གསལ་བར་མི་སྣང་བས་ཡོད་དམ་མེད་ཐེ་ཚོམ་ཟ་བ་སྟེ། དེ་བཞིན་དུ་དངོས་པོ་ཕྱིན་ཅི་མ་ལོག་པ་ལ་མ་རིག་པའི་མུན་པས་བསྒྲིབས་པས་ཐེ་ཚོམ་སྐྱེ་བའི་སེམས་ནི་མུན་པ་དང་འདྲའོ། །སྣང་བར་གྱུར་པའི་སེམས་གང་ཞེ་ན། སོམ་ཉི་མེད་པ་ལ་སོམ་ཉི་མེད་པར་བསྟེན་པའོ་ཞེས་པ་ནི་སྣང་བའི་རང་བཞིན་དུ་གྱུར་པའི་སེམས་ཏེ་ཇི་ལྟར་ནམ་མཁའ་སྣང་བ་ལ་རྫས་ཀྱི་དངོས་པོ་གསལ་བར་སྣང་བ་བཞིན་དུ་སྣང་བའི་རང་བཞིན་གྱི་གཟུགས་དེ་ཡང་དེས་ཤེས་པར་བྱ་བའི་དངོས་པོ་ཐེ་ཚོམ་མེད་བཞིན་དུ་སྤྱོད་པ་ནི་སོམ་ཉི་མེད་པར་ཆོས་བསྟེན་པའོ། །སྡུད་པའི་སེམས་གང་ཞེ་ན། དུ་མ་གཅིག་ཏུ་བྱེད་པའོ་ཞེས་པ་ནི་སྡུད་པའི་རང་བཞིན་གྱི་སེམས་ཏེ་ཕུང་པོ་དང་ཁམས་དང་སྐྱེ་མཆེད་ལ་སོགས་པ་རང་གི་མཚན་ཉིད་སོ་སོ་བ་ལས་སྟོང་པ་དང་བདག་མེད་པ་ལ་སོགས་པ་སྤྱིའི་མཚན་ཉིད་གཅིག་ཏུ་སྡུད་པའོ། །འཐབ་
པའི་སེམས་གང་ཞེ་ན། ཕན་ཚུན་རྩོད་པ་ཉིད་དོ་ཞེས་པ་ནི་འཐབ་མོ་ཅན་གྱི་སེམས་ཏེ། མི་མཐུན་པའི་མུ་རེ་རེ་གཟུང་ཞིང་རྩོད་པའི་ཆོས་རེ་རེ་བསྟེན་པའོ། །རྩོད་པའི་གང་ཞེན་གང་བདག་ཉིད་དང་བདག་ཉིད་དུ་རྩོད་པའོ་ཞེས་པ་ནི་རྩོད་པའི་རང་བཞིན་གྱི་སེམས་ཏེ་གཞན་དང་ཕན་ཚུན་དུ་མི་མཐུན་པའི་ཕྱོགས་གཟུང་ཞིང་མི་རྩོད་པར་བདག་རང་གི་སེམས་ལ་སུན་འབྱིན་པའམ་དཔྱོད་པ་ལྟ་བུའོ། །མི་རྩོད་པའི་སེམས་གང་ཞེ་ན། མཉམ་པས་མཚུངས་པར་བལྟ་བའོ་ཞེས་པ་ནི་རྩོད་པ་མེད་པའི་རང་བཞིན་གྱི་སེམས་ཏེ་དངོས་པོ་གང་ཡང་རུང་བ་ལ་གཞན་དང་ལྟ་བ་མཐུན་པས་མཚུངས་པར་སྤྱོད་དེ་རྩོད་པ་མེད་པའི་ཆོས་བསྟེན་པར་བྱེད་པའོ། །ལྷའི་སེམས་གང་ཞེ་ན། ཡིད་ཀྱིས་བདག་ཉིད་ལ་རློམ་སེམས་སུ་བྱེད་པའོ་ཞེས་པ་ནི་ལྷ་ལྟ་བུའི་སེམས་སམ། ལྷའི་ཕྱིར་སེམས་པ་སྟེ། ལྷ་ལྟ་བུར་སེམས་པ་ནི་ཇི་ལྟར་ལྷ་རྣམས་བདག་ནི་ལྷ་ཡིན་ནོ་སྙམ་དུ་སེམས་པ་བཞིན་དུ་སེམས་དེ་ཡང་བདག་ཉིད་གང་ཡིན་པ་དེ་ཡིན་ནོ་སྙམ་དུ་སེམས་པའོ། །ལྷའི་ཕྱིར་སེམས་པ་ནི་བདག་གིས་ལྷར་འགྱུར་བར་བྱའོ་སྙམ་དུ་སེམས་པའོ། །ལྷ་མ་ཡིན་གྱི་སེམས་གང་ཞེ་ན་གང་འཁོར་བ་ཉིད་ལ་སྨོད་པའོ་ཞེས་པ་ནི་ལྷ་མ་ཡིན་ལྟ་བུའི་སེམས་ཏེ། དེ་ལྟར་ལྷ་མ་ཡིན་དེ་ལ་སོགས་པའི་དངོས་པོ་ཐམས་ཅད་ལ་སྨོད་པར་བྱེད་པ་དེ་བཞིན་དུ་སེམས་དེ་ཡང་འཁོར་བ་ལ་སྨོད་པར་བྱེད་པའི་ཆོས་བསྟེན་པའོ། །ཀླུའི་སེམས་གང་ཞེ་ན། གང་ལོངས་སྤྱོད་ཆེན་པོ་ཉིད་དུ་བྱ་བའི་ཕྱིར་སེམས་པའོ་ཞེས་པ་ནི་ཀླུ་ལྟ་བུའི་སེམས་ཏེ་ཇི་ལྟར་ཀླུ་ཕྱུག་པོ་ལ་མགོ་མང་པོ་ཡོད་དེ། མགོ་མང་པོ་ལོངས་སྤྱོད་ཆེ་བར་ཤེས་པ་དེ་བཞིན་དུ་སེམས་དེ་ཡང་ལོངས་སྤྱོད་ཆེན་པོ་ལ་སྤྱོད་པའི་ཆོས་བསྟན་པའོ། །དེ་ལ་ཀླུའི་མགོ་མང་པོ་ལོངས་སྤྱོད་ཀྱི་དཔེར་ཇི་ལྟར་འགྱུར་ཞེ་ན། རྒྱ་གར་སྐད་དུ་ལོངས་སྤྱོད་ལ་བྷོ་ག །ཀླུའི་མགོ་ལ་ཡང་བྷོ་ག་ཞེས་བྱ་སྟེ། སྐད་ཀྱང་མཐུན་ལ་དོན་དུ་ཡང་ཀླུ་མགོ་མང་པོ་དེ་ཕྱུག་པས་ལོངས་སྤྱོད་ཆེན་པོ་ལ་ལོངས་སྤྱོད་དོ། །དེ་བཞིན་དུ་སེམས་དེ་ཡང་ལོངས་སྤྱོད་ཆེན་པོའི་ཆོས་ལ་བསྟེན་པར་བྱེད་པས་ཀླུ་ལྟ་བུའི་སེམས་ཞེས་བྱའོ། །མིའི་སེམས་གང་ཡིན་ཞེ་ན། དེ་ཉིད་ཀྱི་དོན་དུ་སེམས་པའོ་ཞེས་པ་ནི་མིའི་ལོངས་སྤྱོད་འདོད་པའི་ཡོན་ཏན་གྱི་ཆོས་
ལ་བསྟེན་པར་བྱེད་པའོ། །བུད་མེད་ཀྱི་སེམས་གང་ཞེ་ན། འདོད་པ་ཁོ་ནའི་ཕྱིར་ཆོས་བསྟེན་པའོ་ཞེས་པ་ནི་བུད་མེད་ལྟ་བུའི་སེམས་ཏེ། བུད་མེད་ནི་འདོད་ཆགས་ཀྱི་ཡུལ་དུ་གྱུར་པའི་ཆོས་རྣམས་འཐོབ་པར་བྱ་བའི་ཕྱིར་ཆོས་དེ་དག་གི་བྱ་བ་བྱེད་དེ། དེ་བཞིན་དུ་སེམས་དེ་ཡང་འདོད་པའི་ཡུལ་རྣམས་ཐོབ་པར་བྱ་བའི་ཕྱིར་ཆོས་དེ་དག་ལ་བསྟེན་པར་བྱེད་དོ། །དབང་ཕྱུག་གི་སེམས་གང་ཞེ་ན། གང་བདག་གིས་ཐམས་ཅད་བསམ་མོ་སྙམ་དུ་རློམ་སེམས་སུ་བྱེད་པའོ་ཞེས་པ་ནི་དབང་ཕྱུག་ལྟ་བུའི་སེམས་ཏེ། དབང་ཕྱུག་ནི་འཇིག་རྟེན་ཐམས་ཅད་ཀྱི་སྐྱེ་བ་དང་འཇིག་པ་ནི་བདག་གིས་བྱས་སོ་བར་སེམས་སོ། །དེ་བཞིན་སེམས་དེ་ཡང་བདག་གིས་མ་བྱས་པ་རྣམས་ཀྱང་བདག་གིས་བྱས་སོ་བའི་ཆོས་བསྟེན་པར་བྱེད་པའོ། །དབང་ཕྱུག་ནི་ལྷ་ཆེན་པོ་ལ་བྱའོ། །ཚོང་པའི་སེམས་གང་ཞེ་ན་གང་བསྡུ་བ་བྱས་ཏེ་རྣམ་པར་སྤེལ་ནས་ཕྱིས་བསྟན་བའོ་ཞེས་པ་ནི་ཚོང་བལྟ་བུའི་སེམས་ཏེ། ཚོང་བ་ནི་འཚོང་ཞིང་ཉོ་བའི་ཆོས་རྣམས་རིན་ཆུང་བའི་དུས་ན་ཀུན་བསྡུས་ནས་ནམ་རིན་ཆེ་བ་ན་དེ་དག་ཐམས་ཅད་སླར་སྤེལ་ཞིང་འཚོང་བར་བྱེད་དོ། །དེ་བཞིན་དུ་སེམས་དེ་ཡང་སྔར་ཕུང་པོ་དང་ཁམས་དང་སྐྱེ་མཆེད་ཀྱི་ཆོས་རྣམས་མི་རྟག་པ་དང༌། སྡུག་བསྔལ་ལ་སོགས་པའི་ཆོས་ཀྱིས་དེ་རྣམས་ཉིད་ཇི་ལྟར་རིགས་པར་སློད་པའི་ཆོས་བསྟེན་པར་བྱེད་པའོ། །ཞིང་པའི་སེམས་གང་ཞེ་ན། གང་ཐོས་པ་རྣམ་པ་དུ་མ་ཚོལ་ཞིང་ཕྱིས་བསྟེན་པའོ་ཞེས་པ་ནི་ཞིང་པ་ལྟ་བུའི་སེམས་ཏེ། སྔར་ཞིང་ཐོག་རྣམས་བསྡུས་ནས་ཕྱིས་ཞིང་ཐོག་དེ་རྣམས་ཉིད་ལ་བཟའ་བ་དང་བཏུང་བ་ལ་སོགས་པའི་བྱ་བ་བྱེད་དོ། །དེ་བཞིན་དུ་སེམས་དེ་ཡང་སྔར་ཆོས་རྣམས་མང་དུ་ཐོས་པར་བྱས་ཏེ་བསགས་ནས་ཕྱིས་ཇི་ལྟར་ཐོས་པའི་ཆོས་དེ་རྣམས་སེམས་པ་དང་བསྒོམ་པ་ལ་སོགས་པའི་ཆོས་བསྟེན་པར་བྱེད་པའོ། །ཆུ་བོའི་སེམས་གང་ཞེ་ན། གང་མཐའ་གཉིས་ལ་མི་ལྟོས་ཤིང་བསྟེན་པའོ་ཞེས་པ་ནི་ཆུ་བོ་ལྟ་བུའི་སེམས་ཏེ། ཆུ་བོ་ནི་མཐའ་གཉིས་མི་མཐོ་བར་དབུས་ཀྱི་གཞུང་བཞིན་ལས་འབབ་པའོ། །དེ་བཞིན་དུ་སེམས་དེ་ཡང་རྟག་པ་དང་ཆད་པའི་མཐའ་གཉིས་སྤོང་པར་བྱེད་པའི་ཆོས་བསྟེན་པའོ། །ཡང་ན་ཆུ་བོ་མཐའ་གཉིས་ལ་ལྟོས་ཤིང་འབབ་པ་དེ་བཞིན་དུ།
སེམས་དེ་ཡང་རྟག་པ་དང་ཆད་པའི་མཐའ་བཟུང་ཞིང་དེའི་ཆོས་བསྟེན་པར་བྱེད་པ་ལ་ཡང་བྱའོ། །ལྟེང་ཀའི་སེམས་གང་ཞེ་ན། གང་སྲིད་པས་བསྟེན་པའོ་ཞེས་པ་ནི་ལྟེང་ཀ་ལྟ་བུའི་སེམས་ཏེ། ལྟེང་ཀ་དེ་ནི་གཞན་ལས་འབབ་པའི་ཆུ་རྣམས་པ་སོགས་ལ་བདག་ལས་གར་ཡང་མི་འཛག་སྟེ། དེ་བཞིན་དུ་སེམས་དེ་ཡང་གཞན་གྱི་ཐམས་ཅད་ནི་སྡུད་ལ། བདག་ལས་གང་ཅི་ཡང་མི་གཏོང་བའི་ཆོས་བསྟེན་པའོ། །ཁྲོན་པའི་སེམས་གང་ཞེ་ན། གང་མ་ཟབ་པ་ལ་ཟབ་པར་སེམས་པའོ་ཞེས་པ་ནི་ཁྲོན་པ་ལྟ་བུའི་སེམས་ཏེ། ཁྲོན་པ་ཆུས་གང་བ་ནི་མི་ཟབ་ཀྱང་གཏིང་དཔག་ཏུ་མི་མངོན་པས་ཟབ་པ་དང་འདྲ་སྟེ། དེ་བཞིན་དུ་སེམས་དེ་ཡང་ཟབ་མོའི་བློ་མ་ཡིན་པ་ལ་ཟབ་སྙམ་དུ་སེམས་པའི་ཆོས་བསྟེན་པའོ། །ཀུན་དུ་བསྲུང་བའི་སེམས་གང་ཞེ་ན། འདི་ཉིད་བདེན་གྱི་གཞན་ནི་གཏི་མུག་སྙམ་དུ་སེམས་བའོ་ཞེས་པ་ནི་བསྲུང་བར་གྱུར་པའི་སེམས་ཏེ། བདག་གིས་ཇི་ལྟར་ཐོས་ཤིང་ཟིན་བདེ་ཉིད་མ་ནོར་བའོ་སྙ་ནས་བརྟན་པར་བཟུང་སྟེ་གཞན་གྱིས་ཟིན་ཅིང་རྟོགས་པ་དེ་མ་ཡིན་པ་སྙམ་དུ་ཆོས་བསྟེན་པའོ། །སེར་སྣའི་སེམས་གང་ཞེ་ན། བདག་ཉིད་བསྟེན་ཅིང་གཞན་ལ་མི་སྟེར་བའོ་ཞེས་པ་ནི་སེར་སྣ་ཅན་གྱི་སེམས་ལ་བྱ་སྟེ་ཇི་ལྟར་གྲགས་པའོ། །བྱི་བའི་སེམས་གང་ཞེ་ན། གང་མཆོད་པ་ལ་ལྟོས་ཏེ་བསྟེན་པའོ་ཞེས་པ་ནི་བྱི་བ་ལྟ་བུའི་སེམས་ཏེ་བྱི་བ་ལ་སོགས་པ་འཛིན་པ་ན་མཆོད་ཞིང་འཛིན་ཏེ། དེ་བཞིན་དུ་སེམས་དེ་ཡང་འཕགས་པའི་ལམ་ལ་སོགས་པ་ཐོབ་པར་བྱེད་པ་ནི་འཇུག་པའི་དུས་ལས་འཕར་བ་སྟེ།། རིམ་པ་དེས་འཕར་བའོ། །ཁྱིའི་སེམས་གང་ཞེ་ན་གང་ཆུང་དུས་ཀྱང་མགུ་བར་འགྱུར་བའོ་ཞེས་པ་ནི་ཁྱི་ལྟ་བུའི་སེམས་ཏེ། ཁྱི་ནི་ཆུང་དུས་ཀྱང་མགུ་བའོ། །དེ་བཞིན་དུ་སེམས་དེ་ཡང་གང་ཡང་རུང་བའི་དངོས་པོ་ཆུང་དུས་མགུ་བར་བྱེད་པའི་ཆོས་བསྟེན་པར་བྱེད་པའོ། །ནམ་མཁའ་ལྡིང་གི་སེམས་གང་ཞེ་ན། གང་ཕྱོགས་འཛིན་པས་ཆོས་ལ་བརྟེན་པའོ་ཞེས་པ་ནི་ནམ་མཁའ་ལྡིང་ལྟ་བུའི་སེམས་ཏེ། ནམ་མཁའ་ལྡེང་ནི་ཀླུ་ལ་སོགས་པ་འཛིན་པ་ན་འདབ་མས་རྡོབ་ཅིང་འཛིན་ཏེ། དེ་བཞིན་དུ་སེམས་དེ་ཡང་གང་བདག་གི་ཡིན་པ་དེའི་ཕྱོགས་འཛིན་པའི་ཆོས་བསྟེན་
པར་བྱེད་དོ། །ནམ་མཁའ་ལྡིང་གི་འདབ་མས་རྡོབ་ཅིང་སྦྲུལ་འཛིན་པ་དེ་ཇི་ལྟར་ཕྱོགས་འཛིན་པའི་དཔེར་འགྱུར་ཞེ་ན། རྒྱ་གར་སྐད་དུ་འདབ་མ་ལ་པཀྵ་ཞེས་བྱ། ཕྱོགས་ལ་ཡང་པཀྵ་ཞེས་བྱ་སྟེ། དེ་ལྟར་སྐད་གཅིག་ལ་དོན་དུ་ཡང་ནམ་མཁའ་ལྡིང་གིས་ཀླུ་དེ་བདག་གིར་བྱེད་པའི་ཕྱིར་འཛིན་ལ། ཕྱོགས་སུ་གྱུར་པ་ཡང་བདག་གིར་བྱ་བའི་དངོས་པོའི་དོན་ལ་ཕྱོགས་འཛིན་པས་མཐུན་ནོ། །བྱི་བའི་སེམས་གང་ཞེ་ན། བཅིངས་པ་ཐམས་ཅད་བཅད་པའི་ཕྱིར་སེམས་པའོ་ཞེས་པ་ནི་བྱི་བ་ལྟ་བུའི་སེམས་ཏེ་བྱི་བ་ནི་བཅིངས་པ་ཐམས་ཅད་གཅོད་ཅིང་གྲོལ་བར་བྱེད་པའོ། །དེ་བཞིན་དུ་སེམས་དེ་ཡང་འདོད་ཆགས་དང་ཞེ་སྡང་དང་གཏི་མུག་གི་ཆིངས་མ་དགྲོལ་བའི་ཆོས་བསྟེན་པར་བྱེད་པའོ། །གླུའི་སེམས་གང་ཞེ་ན། བདག་གི་དབྱངས་སྒྲ་སྣ་ཚོགས་ཀྱི་གླུས་སེམས་ཅན་རྣམས་གཟུད་པར་བྱའོ་སྙམ་པའོ་ཞེས་པ་ནི་གླུ་ལྟ་བུའི་སེམས་ཏེ། ཇི་ལྟར་གླུ་དེས་སེམས་ཅན་རྣམས་དགའ་ཞིང་འདུ་བ་དེ་བཞིན་དུ་སེམས་དེ་ཡང་བདག་གིས་གང་དང་རྗེས་སུ་མཐུན་པའི་སྒྲ་སྐད་ཀྱི་དབྱངས་མང་པོས་སེམས་ཅན་རྣམས་གང་ལ་དང་པ་ལ་གཟུད་དོ་སྙམ་པའི་ཆོས་བསྟེན་པར་བྱེད་པའོ། །གར་གྱི་སེམས་གང་ཞེ་ན། བདག་གིས་རྫུ་འཕྲུལ་སྣ་ཚོགས་ཀྱིས་གཞན་དག་ཡང་དག་པར་འཛིན་དུ་གཞུག་གོ་སྙམ་དུ་སེམས་པའོ་ཞེས་པ་ནི་གར་བྱ་བའི་སེམས་ཏེ། གར་ཞེས་བྱའི་ཚིག་ནི་ལུས་གཡོ་བའི་དོན་ཡིན་ལ། གར་གཅིག་པུར་མ་ཟད་ནམ་མཁའ་ལ་འགྲོ་བ་ལ་སོགས་པའི་ལུས་ཀྱི་རྫུ་འཕྲུལ་ཐམས་ཅད་ཀྱང་ལུས་གཡོ་བ་ཡིན་ཏེ། དེ་ལྟ་བས་ན་ལུས་ཀྱི་རྫུ་འཕྲུལ་དེ་དག་གིས་སེམས་ཅན་རྣམས་རྫུ་འཕྲུལ་སྣ་ཚོགས་སྦྱོར་བར་བྱེད་པའི་ཆོས་བསྟེན་པའོ། །སིལ་སྙན་གྱི་སེམས་གང་ཞེ་ན། བདག་གིས་ཆོས་ཀྱི་རྔ་བརྡུང་ངོ་སྙམ་པའོ་ཞེས་པ་ནི་སིལ་སྙན་གྱི་ཕྱིར་སེམས་པ་སྟེ། ཆོས་རྔ་བསྒྲགས་ཤིང་འཆད་པར་བྱ་བའི་ཆོས་བསྟེན་པར་བྱེད་པའི་སེམས་སོ། །ཁྱིམ་གྱི་སེམས་གང་ཞེ་ན། བདག་གིས་ལུས་ཀུན་དུ་བསྲུང་བའི་ཕྱིར་བསྟེན་པའོ་ཞེས་པ་ནི་ཁྱིམ་ལྟ་བུའི་སེམས་ཏེ། ཁྱིམ་ནི་རྫས་ལ་སོགས་པ་ཆུད་མི་ཟ་བར་བཟུང་ཞིང་སྐྱོང་བར་བྱེད་དེ། དེ་བཞིན་དུ་སེམས་དེ་ཡང་བདག་གི་ལུས་བསྲུང་བའི་ཆོས་བསྟེན་
པར་བྱེད་པའོ། །སེང་གེའི་སེམས་གང་ཞེ་ན་གང་ཐམས་ཅད་ཟིལ་གྱིས་གནོན་པས་བསྟེན་པའོ་ཞེས་པ་ནི་སེང་གེ་ལྟ་བུའི་སེམས་ཏེ། སེང་གེ་ནི་བདག་གི་སྒྱུ་རྩལ་གྱིས་བྱོལ་སོང་ཐམས་ཅད་ཟིལ་གྱིས་གནོན་པ་དེ་བཞིན་དུ་སེམས་དེ་ཡང་བདག་གིས་ཡང་ཤེས་ཤིང་གྲགས་པའི་ཕྱོགས་ཀྱིས་གཞན་རྣམས་ཟིལ་གྱིས་གནོན་པའི་ཆོས་བསྟེན་པའོ། །འུག་པའི་སེམས་གང་ཞེ་ན། གང་མཚན་མོ་སེམས་པའོ་ཞེས་པ་ནི་འུག་པ་ལྟ་བུའི་སེམས་ཏེ། འུག་པ་ནི་བདག་གི་ཟས་ཚོལ་བ་ལ་སོགས་པ་བྱ་བ་ཐམས་ཅད་མཚན་མོ་བྱེད་དོ། །དེ་བཞིན་དུ་སེམས་དེ་ཡང་བདག་གི་བྱ་བ་རྣམས་མཚན་མོ་བྱེད་པའི་ཆོས་བསྟེན་པའོ། །བྱ་རོག་གི་སེམས་གང་ཞེ་ན། གང་ཐམས་ཅད་དུ་སྐྲག་པས་སེམས་པའོ་ཞེས་པ་ནི་བྱ་རོག་ལྟ་བུའི་སེམས་ཏེ་བྱ་རོག་ནི་ཀུན་གྱིས་འཇིགས་ཤིང་བརྟབས་བཞིན་དུ་རང་གི་བྱ་བ་བྱེད་དོ། །དེ་བཞིན་དུ་སེམས་དེ་ཡང་གང་གིས་དངོས་པོ་སྤྱད་པ་ཐམས་ཅད་ལ་བག་ཚ་ཞིང་བརྟབས་པའི་ཆོས་བསྟེན་པར་བྱེད་པའོ། །སྲིན་པོའི་སེམས་གང་ཞེ་ན། གང་དགེ་བ་དང་མི་དགེ་བ་རྣམས་སྒྲུབ་པའོ་ཞེས་པ་ནི་སྲིན་པོ་ལྟ་བུའི་སེམས་ཏེ། སྲིན་པོ་ནི་སྔོན་དགེ་བ་ལ་སོགས་པ་སྤྱད་པའི་རྒྱུས་བདག་མཐུ་དང་ལྡན་པར་གྱུར་ལ། མཐུ་དེས་གསོད་པ་ལ་སོགས་པ་མི་དགེ་བའི་ཆོས་རྣམས་སྤྱད་དེ་སེམས་དེ་ཡང་དེ་ལྟ་བུའི་ཆོས་བསྟེན་པར་བྱེད་པའོ། །ཚེར་མའི་སེམས་གང་ཞེ་ན། གང་ཐམས་ཅད་དུ་འགྱོད་པ་སེམས་པའོ་ཞེས་པ་ནི་ཚེར་མ་ལྟ་བུའི་སེམས་ཏེ། ཚེར་མ་ནི་འཛུགས་ཤིང་གནོད་པར་བྱེད་པའོ། །དེ་བཞིན་དུ་སེམས་དེ་ཡང་བྱས་པའི་དངོས་པོ་ལ་འགྱོད་པ་སྐྱེ་སྟེ་འགྱོད་པ་དེ་ཉིད་ཡང་དང་ཡང་དུ་ཡིད་ལ་བྱེད་ཅིང་ཟུག་རྡུར་གྱུར་པའི་ཆོས་བསྟེན་པའོ། །ས་འོག་གི་སེམས་གང་ཞེ་ན། ས་འོག་གི་དོན་དུ་སེམས་པའོ་ཞེས་པ་ནི་ས་འོག་གི་ཕྱིར་སེམས་པ་སྟེ་ས་འོག་ཏུ་སོང་ནས་དེའི་བྱ་བ་བྱེད་པའི་ཆོས་བསྟེན་པའོ། །རླུང་གི་སེམས་གང་ཞེ་ན། གང་ཐམས་ཅད་དུ་ཐམས་ཅད་སྒྲུབ་པའོ་ཞེས་པ་ནི་རླུང་ལྟ་བུའི་སེམས་ཏེ། རླུང་ནི་རེས་འགའ་མེའི་ནང་དུ་ཞུགས། རེས་འགའ་ཆུ་ལ་སོགས་པའི་ནང་དུ་ཞུགས་པ་དེ་བཞིན་དུ། སེམས་དེ་ཡང་རེས་འགའ་དགེ་བའི་ནང་དུ་ཞུགས་ནས་དཀྲུགས་ཏེ་མི་དགེ་བར་བྱེད། རེས་འགའ་ནི་མི་དགེ་བའི་ནང་དུ་ཞུགས་ཏེ་དགེ་པར་བྱེད་དེ།
མདོར་ན་ཀུན་གྱི་ནང་དུ་འཇུག་ལ་ཀུན་ལ་ཡང་མི་གནས་པར་བྱེད་པའི་ཆོས་བསྟེན་པར་བྱེད་པའོ། །ཆུའི་སེམས་གང་ཞེ་ན། གད་མི་དགེ་བའི་སེམས་ཐམས་ཅད་བཀྲུ་བའི་ཕྱིར་བསྟེན་པའོ། །མེའི་སེམས་གང་ཞེ་ན། གང་དཀའ་ཐུབ་ཉིད་ཀྱིས་གདུང་བར་བྱེད་བའོ་ཞེས་པ་ནི་མེ་ལྟ་བུའི་སེམས་ཏེ། མེ་ནི་རང་གི་ཚ་བས་གདུང་བར་བྱེད་དེ་དེ་བཞིན་དུ་སེམས་དེ་ཡང་རང་གི་དཀའ་ཐུབ་ཀྱིས་ལུས་དང་སེམས་གདུངས་ཤིང་སྨ་འབབ་པར་བྱེད་པའི་ཆོས་བསྟེན་པའོ། །མེ་དཀའ་ཐུབ་ཀྱི་དཔེར་ཇི་ལྟར་འགྱུར་ཞེ་ན། རྒྱ་གར་སྐད་དུ་ཚ་བ་ལ་ཏ་པ་ཞེས་བྱ། དཀའ་ཐུབ་ལ་ཡང་ཏ་པ་ཞེས་བྱ་སྟེ་སྐད་མཐུན་པས་དཔེར་བྱའོ། །འདམ་གྱི་སེམས་གང་ཞེ་ན་གང་བདག་གི་ཉེས་པས་གཞན་ལ་སྐུད་བའོ་ཞེས་པ་ནི་འདམ་ལྟ་བུའི་སེམས་ཏེ་འདམ་ནི་བདག་གི་ངོ་བོ་ངན་པ་དེ་གཞན་ལ་བསྒོས་ནས་ཆགས་པར་བྱེད་དོ། །དེ་བཞིན་དུ་སེམས་དེ་ཡང་རང་གི་ཉེས་པ་གཞན་ལ་གོས་པར་བྱེད་པའི་ཆོས་བསྟན་པར་བྱེད་པའོ། །རྙོག་པའི་སེམས་གང་ཞེ་ན། གང་ཕ་རོལ་གྱི་ཉེས་པ་འཛིན་པས་སེམས་ལ་རྙོག་པ་སྐྱེས་པའོ་ཞེས་པ་ནི་རྙོག་པ་ལྟ་བུའི་སེམས་ཏེ། གཞན་གྱི་ཉེས་པས་བདག་གི་སེམས་འཁྲུགས་པར་བྱེད་པའོ། །ཚོན་རྩིའི་སེམས་གང་ཞེ་ན། གང་དེ་ལ་ཆགས་པ་ཉིད་དུ་བསྟེན་པའོ་ཞེས་པ་ནི་ཚོན་རྩི་ལྟ་བུའི་སེམས་ཏེ། ཚོན་དཀར་པོའམ་དམར་པོ་ལ་སོགས་པའི་ཁ་དོག་ནི་གང་ལ་བསྐུས་པ་དེ་ཚོན་དེ་ཉིད་ཀྱི་རང་བཞིན་དུ་འགྱུར་ཏེ། དེ་བཞིན་དུ་སེམས་དེ་ཡང་དངོས་པོ་གང་བསམས་པ་དེ་ལ་ཞེན་ནས་ཇི་ལྟར་བསམས་པ་དེའི་རང་བཞིན་དུ་འགྱུར་བའི་ཆོས་བསྟེན་པའོ། །ཤིང་ལེབ་ཀྱི་སེམས་གང་ཞེ་ན། གང་དགེ་བ་གཞན་སྤོང་བས་བསྟེན་པའོ་ཞེས་པ་ནི་ཤིང་ལེབ་ལྟ་བུའི་སེམས་ཏེ། ཤིང་ལེབ་ནི་མཚོན་ལ་སོགས་པ་གཞན་རྣམས་ཀྱིས་མི་ཕིགས་པར་སྐྱོབ་པའི་བྱ་བ་བྱེད་དོ། །དེ་བཞིན་དུ་སེམས་དེ་ཡང་དགེ་བ་གཅིག་སྤྱད་པས་དགེ་བ་གཞན་སྒྲིབ་པར་བྱེད་པའི་ཆོས་བསྟེན་པར་བྱེད་པའོ། །ནོར་བའི་སེམས་གང་ཞེ་ན། གཞན་གཟུང་ཞིང་གཞན་ཁོ་ནར་སེམས་པའོ་ཞེས་པ་ནི་ནོར་བའི་རང་བཞིན་གྱི་སེམས་ཏེ་གང་གི་དངོས་པོ་ཟིན་ཏེ་ནོར་ནས་གཞན་ཡིན་སྙམ་དུ་སེམས་པའོ། །དུག་གི་སེམས་གང་ཞེ་ན། གང་ཤིན་ཏུ་དངོས་པོ་མེད་བ་ཉིད་
སེམས་པའོ་ཞེས་པ་ནི་དུག་ལྟ་བུའི་སེམས་ཏེ། དུག་ནི་གང་གིས་ཟིན་ན་ཤི་སྟེ་མེད་པར་འགྱུར་བའོ། །དེ་བཞིན་དུ་སེམས་དེ་ཡང་གང་ལྟ་བ་ལ་སོགས་པའི་ཉོན་མོངས་རྣམས་སྤངས་ནས་སླར་མི་སྐྱེ་བས་མེད་པར་བྱེད་པའོ། །ཞགས་པའི་སེམས་གང་ཞེན་གང་ཐམས་ཅད་དུ་བདག་ཉིད་བཅིངས་ཤིང་འདུག་པའོ་ཞེས་པ་ནི་ཞགས་པ་ལྟ་བུའི་སེམས་ཏེ། ཞགས་པ་ནི་འཆིང་བའི་བྱ་བ་བྱེད་དོ། །དེ་བཞིན་དུ་སེམས་དེ་ཡང་བདག་ཉིད་འཆིང་བར་བྱེད་པའི་ཆོས་བསྟེན་པར་བྱེད་པའོ། །ལྕགས་སྒྲོག་གི་སེམས་གང་ཞེ་ན། གང་རྐང་པ་གཉིས་ལ་འདུག་སྟེ་སེམས་པའོ་ཞེས་པ་ནི་ལྕགས་སྒྲོག་ལྟ་བུའི་སེམས་ཏེ་ལྕགས་སྒྲོག་ནི་རྐང་པ་གཉིས་འཛིན་པར་བྱེད་དེ། དེ་བཞིན་དུ་སེམས་དེ་ཡང་ཡོད་པ་དང་མེད་པའི་ཚིག་གི་མཐའ་གཉིས་འཛིན་པའི་ཆོས་བསྟེན་པའོ། །དེ་ལྕགས་སྒྲོག་གིས་རྐང་པ་གཉིས་འཛིན་པ་སེམས་ཀྱིས་མཐའ་གཉིས་སུ་འཛིན་པའི་དཔེར་ཇི་ལྟར་འགྱུར་ཞེ་ན། རྒྱ་གར་སྐད་དུ་རྐང་པ་ལ་པཱ་ད་ཞེས་བྱ། ཚིག་ལ་ཡང་པཱ་ད་ཞེས་བྱ་སྟེ་མཐུན་ནོ། །སྤྲིན་གྱི་སེམས་གང་ཞེ་ན། གང་ཆུ་དག་ལ་སེམས་པའོ་ཞེས་པ་ནི་སྤྲིན་ལྟ་བུའི་སེམས་ཏེ། སྤྲིན་ནི་ཆུ་འདུ་ཞིང་ཆུའི་བྱ་བ་བྱེད་དེ་དེ་བཞིན་དུ་སེམས་དེ་ཡང་ཆུའི་བྱ་བ་བྱེད་པའི་ཆོས་བསྟེན་པའོ། །ཞིང་གི་སེམས་གང་ཞེ་ན་རང་གི་ལུས་ཉིད་ཡོངས་སུ་སྦྱོང་བར་བྱེད་པའོ་ཞེས་པ་ནི་ཞིང་ལྟ་བུའི་སེམས་ཏེ། ཞིང་ནི་འབྲུ་ལ་སོགས་པ་སྐྱེ་བར་བྱ་བའི་ཕྱིར་རྨོས་པ་ལ་སོགས་པའི་བྱི་དོར་གྱི་ལས་བྱེད་དོ། །དེ་བཞིན་དུ་སེམས་དེ་ཡང་བདག་གི་ལུས་བཟང་པོར་བྱ་བའི་ཕྱིར་ཁྲུས་དང་བྱུག་པ་དང༌། རྒྱན་ལ་སོགས་པས་བདག་གི་ལུས་བརྒྱན་པར་བྱེད་པའི་ཆོས་བསྟེན་པའོ། །ལན་ཚྭའི་སེམས་གང་ཞེ་ན། གང་ཞིག་གང་གིས་སེམས་པར་བྱེད་པ་དེ་ལ་ཡང་སེམས་པར་བྱེད་པའོ་ཞེས་པ་ནི་ལན་ཚྭ་ལྟ་བུའི་སེམས་ཏེ། བུམ་པ་ལ་སོགས་པའི་སྣོད་ཀྱི་ནང་དུ་ལན་ཚྭ་གཞན་ན་སྣོད་དེ་ཡང་ལན་ཚྭས་ཟོས་ནས་བྱང་སྟེ་རྡོལ་པ་དང་ལན་ཚྭའི་རོར་འགྱུར་རོ། །དེ་བཞིན་དུ་སེམས་དེས་ཀྱང་གང་གི་དངོས་པོ་ལ་དམིགས་ཤིང་རྟོག་ལ། རྟོག་པའི་སེམས་དེ་ཉིད་ཡིས་སྐད་ཅིག་མ་ཕྱི་མའི་ཆ་ལ་རྟོག་པ་དེས་སུན་ཕུང་ནས་མེད་པར་བྱེད་པའི་ཆོས་
བསྟེན་པར་བྱེད་པའོ། །སྤུ་གྲིའི་སེམས་གང་ཞེ་ན། གང་རབ་ཏུ་བྱུང་བ་ཙམ་ལ་བསྟེན་པའོ་ཞེས་པ་ནི་སྤུ་གྲི་ལྟ་བུའི་སེམས་ཏེ། སྤུ་གྲི་ནི་རབ་ཏུ་བྱུང་བའི་སྐྲ་འདྲེག་པ་ཙམ་གྱི་བྱ་བ་བྱེད་དེ། རབ་ཏུ་བྱུང་བ་ལས་གཞན་ནན་ཏན་ནི་མི་བྱེད་དོ། །དེ་བཞིན་དུ་སེམས་དེ་ཡང་རབ་ཏུ་བྱུང་ཏེ། སྐྲ་བྲེགས་ནས་རབ་ཏུ་བྱུང་བ་ཙམ་ལ་གནས་ཀྱི་རབ་ཏུ་བྱུང་བའི་བསླབ་པའི་ནན་ཏན་ཚུལ་ཁྲིམས་བསྲུང་པ་ལ་སོགས་པ་མི་བྱེད་པའོ། །རི་རབ་ལྟ་བུའི་སེམས་གང་ཞེ་ན། གང་མཐོ་བར་གྱུར་ནས་སེམས་པའོ་ཞེས་པ་ནི་རི་རབ་ལྟ་བུའི་སེམས་ཏེ། རི་རབ་ནི་དཔག་ཚད་སྟོང་ཕྲག་བརྒྱད་བཅུར་གྱེན་དུ་མཐོ་ཞིང་འཕགས་ཏེ། དེ་བཞིན་དུ་སེམས་དེ་ཡང་བདག་གི་ཡོན་ཏན་གྱིས་ཀུན་ནས་འཕགས་སོ་སྙམ་ནས་འགྱིང་ཞིང་ཆེ་བར་བྱེད་པའི་ཆོས་བསྟེན་པར་བྱེད་དོ། །རྒྱ་མཚོ་ལྟ་བུའི་སེམས་གང་ཞེ་ན། གང་རང་གི་ལུས་ཉིད་ལ་མཆོག་ཏུ་འཛིན་ཅིང་འདུག་པའོ་ཞེས་པ་ནི་རྒྱ་མཚོ་ལྟ་བུའི་སེམས་ཏེ། རྒྱ་མཚོ་ནི་རང་གི་རླབས་ཀྱིས་བདག་ཉིད་ལ་རློབ་ཅིང་རེག་པར་བྱེད་པའོ། །དེ་བཞིན་དུ་སེམས་དེ་ཡང་བདག་ཉིད་ཀྱི་ལུས་ལ་མི་རྟག་པ་དང་སྟོང་པ་ལ་སོགས་པར་རྟོག་གོ །ཕུག་ལྟ་བུའི་སེམས་གང་ཞེ་ན། གང་སྔར་ངེས་པར་གྱུར་པ་ལ་གྱིས་དེ་ཉིད་ཀྱིས་འགྱུར་བར་བསྟེན་པའོ་ཞེས་པ་ནི་ཕུག་ལྟ་བུའི་སེམས་ཏེ། ཕུག་ནི་སྒོ་ན་ཆུང་ངུར་ངེས་པ་ལས་ཕུག་གི་ནང་ནི་སྒོ་ལས་རྣམ་པ་དུ་མར་ཆེ་བར་འགྱུར་རོ། །དེ་བཞིན་དུ་སེམས་དེ་ཡང་སྔར་བདག་ཉིད་ཚུལ་ཁྲིམས་དང༌། ཡོན་ཏན་དང་ལྡན་པ་ངེས་པར་གནས་པ་ལས་ཚུལ་ཁྲིམས་དང་ཡོན་ཏན་དེ་ཉིད་ཀྱིས་དྲེགས་ནས་དེའི་གཞིས་ང་རྒྱལ་བྱེད་ཅིང་འགྱུར་བའོ། །དེ་ལ་སྐྱེ་བ་གྱུར་པའི་སེམས་གང་ཞེ་ན། གང་གི་སེམས་གང་ཁོ་ན་དང་སྐྱེས་པ་དེ་ཁོ་ན་དང་ལྷན་ཅིག་འགྲོ་བའོ་ཞེས་པ་ནི་སྐྱེ་བར་གྱུར་པའི་རང་བཞིན་གྱི་སེམས་ཏེ། སྔོན་དགེ་བ་དང་མི་དགེ་བ་གང་ཡང་རུང་བ་ལ་སྤྱད་པའི་བག་ཆགས་ཡོད་པས་གང་དུ་སྐྱེས་ན་ཡང་བག་ཆགས་དེ་ཉིད་དང་ལྷན་ཅིག་ཏུ་སྐྱེའོ། །ཡང་ན་སྔོན་གྱི་དགེ་བ་དང་མི་དགེ་བའི་ལས་གང་ཡང་རུང་བའི་རྣམ་པར་སྨིན་པའི་འབྲས་བུ་མི་འདྲ་བའི་སྐྱེ་བ་རྙེད་ནས་དེ་ལྟ་བུ་དང་ལྷན་ཅིག་ཏུ་སྐྱེ་བ་སྟེ། དཔེར་ན་ཚེ་རབས་སྔ་མ་ལ་སྲོག་
གཅོད་པ་གོམས་ཤིང་མང་དུ་བྱས་པས་ཚེ་ཕྱི་མ་ལ་ནད་མང་ཞིང་ཚེ་ཐུང་བར་འགྱུར་བ་སྟེ་དེ་བཞིན་དུ་དགེ་བ་ལ་ཡང་ཇི་ལྟར་རིགས་པར་སྦྱར་བར་བྱའོ། །འཇིག་རྟེན་པའི་སེམས་བརྒྱ་དྲུག་ཅུ་བསྐལ་པ་གསུམ་གྱིས་འདས་ནས་འཇིག་རྟེན་ལས་འདས་པའི་སེམས་སྐྱེ་སྟེ་ཞེས་པ་ལ། འཇིག་རྟེན་ལས་འདས་པའི་སེམས་ཀྱང་རྣམ་པ་གཉིས་ཏེ། གང་ཟག་ལ་བདག་མེད་པར་རྟོགས་པའི་སེམས་ཟག་པ་མེད་པ་རྣམ་པ་དང་བཅས་པའི་སེམས་དང་ཆོས་ལ་བདག་མེད་པར་རྟོགས་པའི་སེམས་ཟག་པ་མེད་པ་རྣམ་པ་མེད་པ་རང་བཞིན་གྱིས་འོད་གསལ་བ་སྟེ། དེ་ལ་སྐབས་འདིར་འཇིག་རྟེན་ལས་འདས་པའི་ཤེས་པ་ནི་གང་ཟག་རྣམས་ཀྱིས་ཤེས་པར་ནུས་སམ་ཞེ་ན། དེ་ནི་རྟོག་གེ་པ་དེ་དག་གིས་ནི་མི་ནུས་ཏེ་དེ་བས་ན། རྟོག་གེ་ཀུན་གྱིས་ཤེས་པར་དཀའ། །ཞེས་གསུངས་པ་ཡིན་ནོ། །སངས་རྒྱས་རྣམས་ཀྱིས་སྔོན་བསྟན་པའོ། །ཞེས་པ་ནི་དེ་ལྟར་རྟོག་གེ་པ་རྣམས་ཀྱིས་ཀྱང་ཤེས་པར་མི་ནུས་ན་སུས་ཤེས་པར་ནུས་ཤེ་ན། རྟོག་གེ་པ་རྣམས་ཀྱི་སྤྱོད་ཡུལ་མ་ཡིན་གྱི། །སངས་རྒྱས་བཅོམ་ལྡན་འདས་རྣམས་ཀྱིས་མཁྱེན་ཏེ་གསུངས་པའོ་ཞེས་པའོ། །སངས་རྒྱས་རྣམས་ཀྱིས་སྔོན་ཞེས་པ་ནི་ད་ལྟར་འབའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་ཀྱང་ཚུལ་འདི་ལྟར་མཁྱེན་ནས་བཤད་པའོ་ཞེས་པ་སྟེ་སངས་རྒྱས་བཅོམ་ལྡན་འདས་རྣམས་མཁྱེན་བ་གཅིག་པར་བསྟན་པའོ། །དེ་ཅིའི་ཕྱིར་ཞེ་ན། བསོད་ནམས་དང་ཡེ་ཤེས་ཀྱི་ཚོགས་དང༌། ཆོས་ཀྱི་སྐུ་དང་འགྲོ་བའི་དོན་མཛད་པར་གཅིག་པས་མཉམ་པ་ཉིད་ཀྱི་ཕྱིར་རོ། །ཉེས་པ་ཐམས་ཅད་རྣམ་སྤངས་པ། །ཞེས་པ་ནི་དེ་ལྟར་ཟབ་ཅིང་ཞི་བའི་གང་ཟག་ལ་བདག་མེད་པར་རྟོགས་དེ་ཉོན་མོངས་པ་ཉེ་བའི་ཉོན་མོངས་པ་དང་བྲལ་བའོ་ཞེས་པའོ། །གསང་བ་པའི་བདག་པོ། །དེ་ལ་འཇིག་རྟེན་ལས་འདས་པའི་སེམས་ལ་གནས་པ་རྣམས་ལ་ཡང་ཕུང་པོ་ལ་ཡོད་དོ་སྙམ་པའི་བློ་ཉེ་བར་སྐྱེའོ་ཞེས་པ་ནི་དེ་ལྟར་གང་ཟག་ལ་བདག་མེད་པ་རྣམ་པ་དང་བཅས་པ་ཟབ་ཅིང་ཞི་བ་འཇིག་རྟེན་ལས་འདས་པའི་སེམས་ལ་གནས་པ་ན་གོང་དུ་སྨོས་པའི་ཚུལ་གྱིས་ཕུང་པོ་ཙམ་ཞིག་ཡོད་པར་རྟོག་གི །གང་ཟག་ལ་ནི་བདག་མེད་པར་རྟོགས་ཏེ་དེ་ནི་བསྐལ་པ་
གསུམ་གྱིས་རྫོགས་པར་འགྱུར་རོ། །ཕུང་པོ་དག་ལ་འདོད་ཆགས་དང་བྲལ་བ་བསྐྱེད་པ་ཞེས་པ་ནས་རྣལ་འབྱོར་པ་དག་བཤལ་པ་གཅིག་གིས་འདའ་བར་བྱེད་དོ་ཞེས་པའི་བར་ནི་དེ་ལྟར་ཕུང་པོ་ལ་སྤྱིར་བརྟགས་ཏེ། བརྟགས་པ་ན་དེ་ལ་དངོས་པོ་ཡོད་དོ་སྙམ་དུ་བློ་སྐྱེས་པ་དེ་ཕུང་པོ་སོ་སོར་ཕྱེ་སྟེ་སུན་ཕྱུང་བ་ན་གཟུགས་ཀྱི་ཕུང་པོ་ནི་དབུ་བ་རྡོས་པ་འདྲ་སྟེ་ཇི་ལྟར་དབུ་བ་ལ་སོ་སོར་གཞིགས་ན་དབུ་བ་ལ་སྙིང་པོ་མེད་པ་བཞིན་དུ་ཕུང་པོ་དེ་ཡང་བཤིག་སྟེ་སོ་སོར་བརྟགས་ན་ཁ་དོག་དང་དབྱིབས་ལ་སོགས་པ་ཆོས་སོ་སོ་བ་རྣམས་ཀྱི་རང་གི་མཚན་ཉིད་ཙམ་དུ་ཟད་ཀྱི་ཕུང་པོ་ཞེས་བྱ་བའི་དངོས་པོ་གང་ཡང་མེད་པར་ཤེས་སོ། །དེ་བཞིན་དུ་ཚོར་བ་ནི་ཆུའི་ཆུ་བུར་དང་འདྲ་སྟེ། བྱུང་མ་ཐག་ཏུ་ཞིག་ཅིང་མེད་པར་འགྱུར་བ་མི་རྟག་པས་འདུག་པའི་གནས་མེད་པ་ལ་ཕུང་པོར་བརྟགས་པའི་དངོས་པོ་གང་ཡང་མེད་པར་ཤེས་སོ། །དེ་བཞིན་དུ་རྣམ་པར་ཤེས་པའི་ཕུང་པོ་ཡང་སོ་སོར་གཤིག་ན་རྣམ་པར་ཤེས་པ་ནི་སྒྱུ་མ་དང་འདྲ་སྟེ། ཇི་ལྟར་སྒྱུ་མའི་བལ་གླང་ལ་སོགས་ཏེ། དེ་དག་ལ་བལ་གླང་ཡོད་པ་མ་ཡིན་གྱི། དེ་དག་གི་རང་བཞིན་ནི་སྨན་དང་ཤིང་བུ་ལ་སོགས་པར་ཟད་དོ། །རྣམ་པར་ཤེས་པའི་ཕུང་པོ་ཡང་དེ་དང་འདྲ་སྟེ། ཕུང་པོར་བ་རྟགས་པའོ། །དངོས་པོ་ཡོད་པ་མ་ཡིན་གྱི་དེ་ནི་རྣམ་པར་ཤེས་པའི་རང་བཞིན་ཙམ་དུ་ཟད་དོ། །འདུ་ཤེས་ཀྱི་ཕུང་པོ་ཡང་སོ་སོར་གཞིགས་ན་སྨིག་རྒྱུ་དང་འདྲ་སྟེ་ཇི་ལྟར་སྐོམ་པས་གདུངས་པའི་སྐྱེས་བུས་སྨིག་རྒྱུ་ལ་ཆུར་མཐོང་མོད་ཀྱི། དེ་ལ་ཆུའི་དངོས་པོ་ཡོད་པ་མ་ཡིན་ཏེ། སྨིག་རྒྱུའི་རང་བཞིན་ཙམ་དུ་ཟད་དོ། །འདུ་ཤེས་ཀྱི་ཕུང་པོ་ཡང་དེ་དང་འདྲ་སྟེ། འདུ་ཤེས་ཀྱི་ཕུང་པོར་བརྟགས་པའི་དངོས་པོ་ཡོད་པ་མ་ཡིན་པ་མ་ཡིན་གྱི། དེ་ནི་མཚན་མར་འཛིན་པའི་རང་བཞིན་ཙམ་དུ་ཟད་དོ། །དེ་བཞིན་དུ་འདུ་བྱེད་ཀྱི་ཕུང་པོ་ཡང་ཆུ་ཤིང་གི་སྙིང་པོ་དང་འདྲ་སྟེ། ཀུན་དུ་གྲགས་པས་འདིར་མ་སྨོས་སོ། །དེ་ལྟར་ཕུང་པོ་དེ་ཡང་དབུ་བལ་སོགས་པའི་དཔེས་སུན་ཕྱུང་ནས་ཕུང་པོར་བརྟགས་པའི་དངོས་པོ་ཡོད་པར་མི་འགྱུར་ཏེ་སོ་སོའི་མཚན་ཉིད་དུ་ཟད་དོ། །དེ་ལྟར་ཕུང་པོར་ཡོད་པར་མ་གྲུབ་ན་ཁམས་དང་སྐྱེ་མཆེད་རྣམས་ཀྱང་དངོས་པོ་ལས་གཞན་མ་ཡིན་པས་ཁམས་དང་
སྐྱེ་མཆེད་དུ་བརྟགས་པའི་དངོས་པོ་ཡོད་པོ་མ་ཡིན་གྱི་དེ་རྣམས་ཆོས་སོ་སོ་པའི་རང་བཞིན་ཙམ་དུ་ཟད་དོ། །གཟུང་བ་དང་འཛིན་པ་ཡང་སྟེ། གཟུགས་ཀྱི་ཕུང་པོ་ནི་གཟུང་པའི་དངོས་པོར་བརྟགས། ཚོར་བ་ལ་སོགས་པ་ཕུང་པོ་བཞི་ནི་འཛིན་པར་བརྟགས་པའི་དངོས་པོ་ཡོད་པ་མ་ཡིན་ཏེ། ཆོས་སོ་སོ་བའི་རང་བཞིན་ཙམ་དུ་ཟད་དོ། །དེ་ལྟར་ཕུང་པོ་ལ་འདོད་ཆགས་དང་བྲལ་བའི་སེམས་བསྐྱེད་ནས་དབུ་བ་ལ་སོགས་པའི་རང་བཞིན་དུ་བཤིག་ཅིང་བསྒོམས་པས་ཕུང་པོ་ལ་ཡོད་དོ་སྙམ་པའི་ཕུང་པོར་འཛིན་པའི་བློ་སྐྱེས་པ་དེ་ལས་ཀྱང་གྲོལ་བར་འགྱུར་ཏེ་དེ་བས་ན་ནམ་ཕུང་པོ་དག་ལ་འདོད་ཆགས་དང་བྲལ་བ་བསྐྱེད་པ་དེའི་ཚེ་དབུ་བ་དང་ཆུའི་ཆུ་བུར་དང༌། སྒྱུ་མ་དང་སྨིག་རྒྱུ་དང་མཚུངས་པར་བསྒོམས་པས་རྣམ་པར་གྲོལ་བར་འགྱུར་ཏེ་ཞེས་གསུངས་པ་ཡིན་ནོ། །དེ་ལྟར་ཕུང་པོ་ལས་རྣམ་པར་གྲོལ་ནས་ཕུང་པོ་ལ་སོགས་པར་བརྟགས་པའི་མཚན་ཉིད་ཆོས་རྣམས་ཀྱི་ངོ་བོའི་རང་བཞིན་ཙམ་འབའ་ཞིག་ཡོད་པར་རྟོག་པ་གཞུང་ལས་གསུངས་པ་འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ་ཆོས་ཉིད་ཀྱི་རང་གི་ངོ་བོ་ཞི་བའི་དབྱིངས་རྟོགས་པར་འགྱུར་རོ་ཞེས་པ་སྟེ། དེ་ལ་ཕུང་པོ་དང་ཁམས་དང་སྐྱེ་མཆེད་དང། །གཟུང་བ་དང་འཛིན་པ་རྣམ་པར་སྤངས་པ་ཞེས་པ་ནི་གོང་དུ་ཕུང་པོ་ལ་སོགས་པར་བརྟགས་པའི་དངོས་པོ་སུན་ཕྱུང་བའི་ཚུལ་གྱིས་ཆོས་ཉིད་ཀྱི་རང་གི་ངོ་བོ་སྔོན་པོ་ལ་སོགས་པའི་རྣམ་པ་ལ་བརྟགས་པའི་དངོས་པོར་ཡོད་པ་མ་ཡིན་པས་རྣམ་པར་སྤངས་པའོ། །དེ་བས་ན་གཟུང་བ་དང་འཛིན་པ་རྣམ་པར་སྤངས་པ་ཞེས་པ་ཡང་གཟུགས་ཀྱི་ཕུང་པོ་ལ་གཟུང་བར་བརྟགས་པ་དང༌། ཚོར་བ་ལ་སོགས་པའི་ཕུང་པོ་བཞི་ལ་འཛིན་པའི་དངོས་པོར་རྣམ་པར་བརྟགས་པ་དེ་རྣམ་པར་སྤངས་པ་ལ་བྱའི། ཆོས་ལ་བདག་མེད་པར་རྟོག་བའི་མཚན་ཉིད་གཟུང་བ་དང་འཛིན་པའི་རྣམ་པར་སྤངས་བ་ལ་ནི་མི་བྱའོ། །ཆོས་ཉིད་ཀྱི་རང་གི་ངོ་བོ་ཞེས་པ་དེ་ལ་ཆོས་ནི་ཕུང་པོ་ལ་སོགས་པའོ། །དེ་རྣམས་ཀྱི་ངོ་བོ་ཆོས་ཉིད་ཀྱི་རང་གི་ངོ་བོ་སྟེ། དེ་ཡང་སྔོན་པོ་དང་དམར་པོ་ལ་སོགས་པའི་རང་བཞིན་རྣམས་སོ། །དེ་ལྟར་སྔོན་པོ་དང་དམར་པོ་ལ་སོགས་པའི་རང་བཞིན་ཙམ་
འབའ་ཞིག་ཡོད་ཀྱི་ཕུང་པོ་ལ་སོགས་པའི་དངོས་པོར་བརྟགས་པའི་དངོས་པོ་མེད་པར་རྟོག་པ་ནི་ཞི་བའི་དབྱིངས་རྟོགས་པ་ཞེས་བྱ་སྟེ། ཞི་བ་ཞེས་པ་ནི་སེམས་ཀྱི་རྒྱུད་དེ་ལ་ཕུང་པོ་ལ་སོགས་པར་བརྟགས་པའི་འཁྲུལ་པ་མེད་པས་ཞི་བའོ། །དབྱིངས་ནི་རང་བཞིན་ནོ། །རྟོགས་པ་ནི་དེ་ལྟ་བུའི་ཚུལ་དུ་ཁོང་དུ་ཆུད་པའོ། །གསང་བ་པའི་བདག་པོ། །འཇིག་རྟེན་ལས་འདས་པའི་སེམས་ཕྱིན་ཅི་ལོག་དང༌། ཕྱིན་ཅི་མ་ལོག་པའི་སེམས་ཀྱིས་ཁྱད་པར་བརྒྱད་དང་འབྲེལ་པ། ལས་དང་ཉོན་མོངས་པའི་དྲ་བ་དང་བྲལ་བ་འདི་ནི་རྣལ་འབྱོར་པ་དག་བསྐལ་པ་གཅིག་གིས་འདའ་བར་བྱེད་དོ་ཞེས་པ་ནི་ཕུང་པོར་བརྟགས་པའི་དངོས་པོ་ཡོད་པར་འཛིན་པ་ལས་གྲོལ་ནས་ཆོས་རྣམས་ཀྱི་སོ་སོའི་རང་བཞིན་ཙམ་འབའ་ཞིག་ཡོད་པར་རྟོག་པའི་སེམས་ཞི་བ་དེ། ཕུང་པོ་ལ་དངོས་པོ་མེད་པ་ནས་བརྩམས་ཏེ་ཆོས་རྣམས་ཀྱི་སོ་སོའི་རང་བཞིན་སྔོན་པོ་ལ་སོགས་པ་འབའ་ཞིག་ཏུ་ཟད་པར་རྟོག་པ་ལ་ཞུགས་ནས་བསྐལ་པ་གཅིག་གིས་སེམས་དེ་ཉིད་ལས་འདས་ཏེ་ཆོས་ལ་བདག་མེད་པར་རྟོགས་པ་མོས་པས་སྤྱོད་པའི་ས་ལ་འཇུག་པར་འགྱུར་རོ། །དེ་ལ་འཇིག་རྟེན་ལས་འདས་པའི་སེམས་ཕྱིན་ཅི་ལོག་དང་ཕྱིན་ཅི་མ་ལོག་པའི་ཁྱད་པར་བརྒྱད་དང་ཞེས་བ་ནི་རྒྱུན་དུ་ཞུགས་པ་ལ་ཞུགས་པ་ནས་དགྲ་བཅོམ་པའི་བར་གྱི་སེམས་བརྒྱད་ལ་བྱ་སྟེ། སེམས་དེ་དག་ཕྱིན་ཅི་ལོག་དང་ཕྱིན་ཅི་མ་ལོག་པ་ཡང་ཕུང་པོ་ལ་སོགས་པར་བརྟགས་པའི་དངོས་པོ་ཡོད་བར་འཛིན་པས་ཕྱིན་ཅི་ལོག་པའོ། །ཉོན་མོངས་སྤངས་པས་ཕྱིན་ཅི་མ་ལོག་པའོ།། ཉོན་མོངས་པའི་བག་ཆགས་དང་བཅས་པས་ན་ལོག་པའོ། །འབྲེལ་པ་ཞེས་པ་ནི་ཕུང་པོ་ལ་བདག་མེད་པར་རྟོགས་པའི་སེམས་ཞི་བ་དེ་ཕུང་པོ་ལ་ཡོད་པར་འཛིན་པའི་སེམས་ཀྱི་རིམ་པ་བརྒྱད་པོ་དེས་བསྐྱེད་པ་ལ་བྱ་སྟེ་དེ་ལྟ་བས་ན། འཇིག་རྟེན་ལས་འདས་པའི་སེམས་དེ་ཕྱིན་ཅི་ལོག་དང་ཕྱིན་ཅི་མ་ལོག་པའི་སེམས་ཀྱི་ཁྱད་པར་བརྒྱད་དང་འབྲེལ་པ་ཞེས་གསུངས་སོ། །དེ་དག་ནི་སྔགས་ཀྱི་སྤྱད་པ་སྤྱོད་པའི་བྱང་ཆུབ་སེམས་དཔའ་དབང་པོ་རྟུལ་པོ་རྣམས་གང་ཟག་ལ་བདག་མེད་པར་རྟོགས་པའི་རིམ་གྱིས་སེམས་བརྒྱ་དྲུག་ཅུ་ལ་སོགས་པའི་ཉོན་མོངས་པ་རྣམ་སྤོང་
བའི་རིམ་པའོ། །ད་ནི་སྔགས་ཀྱི་སྒོར་སྤྱད་པ་སྤྱོད་པའི་བྱང་ཆུབ་སེམས་དཔའ་ཐེག་པ་ཆེན་པོས་བགྲོད་པ་གཞན་གྱི་དྲིང་མི་འཇོག་པ་ཤེས་རབ་རྣོན་པོ་རྣམས་ཆོས་དང་གང་ཟག་གཉིས་ཀ་ལ་བདག་མེད་པར་སྒོམ་ཞིང་མོས་པས་སྤྱོད་པའི་ས་ལ་འཇུག་པའི་རིམ་པ་བཤད་དེ། དེ་ཡང་གསད་བ་པའི་བདག་པོ་ཐེག་པ་ཆེན་པོས་བགྲོད་པ་གཞན་གྱི་དྲིང་མི་འཇོག་པ་རྣམས་ལ་ཆོས་ལ་བདག་མེད་པའི་སེམས་སྐྱེའོ་ཞེས་པ་ནི་བྱང་ཆུབ་སེམས་དཔའ་ཐེག་པ་ཆེན་པོ་ལ་ཞུགས་པ་ཐོས་པ་རབ་ཏུ་མང་ཤིང་ཤེས་རབ་མཆོག་ཏུ་རྣོ་བ་གཞན་གྱི་དྲིང་མི་འཇོག་པར་རང་གི་བློས་ཆོས་རྣམས་སྒྱུ་མ་དང་སྨིག་རྒྱུ་ལ་སོགས་པའི་མཚན་ཉིད་དུ་ཤེས་ནས་ཆོས་ལ་བདག་མེད་པར་རྟོགས་པར་འགྱུར་བ་ལ་བྱའོ། །དེ་ལ་གང་ཟག་ལ་བདག་མེད་པར་རྟོགས་པའི་རིམ་པ་བསྐལ་པ་གསུམ་གྱིས་འདའ་བར་བྱ་བ་དང༌། གང་ཟག་ལ་བདག་མེད་ཀྱང་ཕུང་པོ་ཙམ་ཡོད་པར་འདུ་ཤེས་པ་ཡང་བསྐལ་པ་གཅིག་གིས་སྤང་པར་བྱ་དགོས་ན། དེ་དག་གི་བྱ་བ་མ་བྱས་པར་ཇི་ལྟར་ཆོས་ལ་བདག་མེད་པ་རྟོགས་པར་འགྱུར་ཞེ་ན། ལན་ནི། དེ་ཅིའི་ཕྱིར་ཞེ་ན། འདི་ལྟར་དེ་དག་སྔོན་སྤྱད་པ་སྤྱོད་ཅིང་ཕུང་པོའི་གནས་རྣམ་པར་འཇིག་པ་ན་ངོ་བོ་ཉིད་ཡོངས་སུ་ཤེས་པའི་ཕྱིར་སྒྱུ་མ་དང༌། སྨིག་རྒྱུ་དང༌། གཟུགས་བརྙན་དང༌། བྲག་ཅ་དང༌། མགལ་མེའི་འཁོར་ལོ་དང༌། དྲི་ཟའི་གྲོང་ཁྱེར་ལྟ་བུའི་འདུ་ཤེས་སྐྱེས་སོ་ཞེས་པ་ནི་སྔོན་སྤྱད་པ་སྤྱོད་ཅིང་ཕུང་པོའི་གནས་རྣམ་པར་བཤིག་ནས་སྒྱུ་མ་དང་སྨིག་རྒྱུ་ཞེས་པ་ནི་དང་པོར་དད་པས་རྩོལ་ཞིང་འཇུག་པའི་སྤྱོད་པ་སྤྱད་པ་ན་ཕུང་པོའི་རང་བཞིན་སྒྱུ་མ་ལ་སོགས་པ་ལྟ་བུར་ཤེས་ཤིང་གོ་མས་པར་བྱས་པས་གང་ཟག་ལ་བདག་མེད་པར་རྟོགས་པའི་རིམ་པ་མ་སྤྱད་ཀྱང་ཆོས་ལ་བདག་མེད་པར་རྟོགས་པར་འགྱུར་རོ་ཞེས་པའོ། །དེ་ལ་སྒྱུ་མ་ཞེས་པ་ནི་ཆོས་རྣམས་ལ་སྒྱུ་མ་ལྟ་བུར་འདུ་ཤེས་སྐྱེས་ཏེ་སྒྱུ་མའི་བལ་གླང་དང་རྟ་ལ་སོགས་བ་རྡོ་དང་ཤིང་ལ་སོགས་པ་ལས་བྱས་ཀྱང་རྡོ་ཤིང་རྣམས་སུ་མི་མངོན་པར་བལ་གླང་དང་རྟ་ལ་སོགས་པའི་གཟུགས་སུ་སྣང་མོད་ཀྱི་ཡང་དག་པར་ན་བལ་གླང་དང་རྟ་ལ་སོགས་པའི་དངོས་པོ་ཡོད་པ་མ་མིན་ཏེ་རྡོ་ཤིང་ལ་སོགས་པ་ཙམ་དུ་ཟད་དོ། །དེ་བཞིན་དུ་ཕུང་པོ་ལ་སོགས་པའི་ཆོས་རྣམས་སྣང་ཡང་རྣམ་
པར་ཤེས་པར་འཁྲུལ་པའི་དབང་གིས་སྣང་སྟེ། ཡང་དག་པར་ན་ཆོས་ཀྱི་ངོ་བོ་སྒྱུ་མའི་བལ་གླང་དང་འདྲ་སྟེ་སྣང་དུ་ཟིན་ཀྱང་ཡོད་པ་མ་ཡིན་ནོ། །རྣམ་པར་ཤེས་པ་དེ་ནི་རྡོ་དང་ཤིང་ལ་སོགས་པ་དང་འདྲ་སྟེ་མི་མངོན་ཡང་གཟུགས་ལ་སོགས་པར་སྣང་བའི་ཆོས་རྣམས་ནི་ཡོད་བ་མ་ཡིན་གྱི་རྣམ་པར་ཤེས་པ་འཁྲུལ་པའི་རྣམ་པ་ཙམ་དུ་ཟད་དོ། །དེ་བཞིན་དུ་སྨིག་རྒྱུ་ཡང་འབྲོག་དགོན་པ་ན་སྐྱེས་བུ་སྐོམ་གྱིས་གདུངས་པས་སྨིག་རྒྱུ་ལ་ཆུར་མཐོང་སྟེ་ཆུའི་དངོས་པོ་ཡོད་པ་མ་ཡིན་ན་སྨིག་རྒྱུ་ཙམ་དུ་ཟད་དོ། །དེ་བཞིན་དུ་ཕུང་པོ་ལ་སོགས་པའི་ཆོས་རྣམས་སང་ཡང་ཡོད་པ་ནི་མ་ཡིན་གྱི་རྣམ་པད་ཤེས་པ་འཁྲུལ་པའི་རྣམ་པ་ཙམ་དུ་ཟད་དོ། །དེ་བཞིན་དུ་གཟུགས་བརྙན་དང༌། བྲག་ཅ་དང༌། མགལ་མེ་བསྐོར་བ་དང༌། དྲི་ཟའི་གྲོང་ཁྱེར་རྣམས་ཀྱང་གོང་དུ་སྒྱུ་མ་ལ་སོགས་པ་བཤད་པའི་ཚུལ་དུ་རིག་པར་བྱ་སྟེ། མདོར་ན་ཕུང་པོ་ལ་སོགས་པའི་ཆོས་རྣམས་སྣང་བ་ནི་རྣམ་པར་ཤེས་པ་འཁྲུལ་པའི་སྣང་བ་ཙམ་དུ་ཟད་དོ། །རྨི་ལམ་ན་གཟུགས་ལ་སོགས་པའི་ཡུལ་མེད་ན་ཡང་གཟུགས་ལ་སོགས་པར་མཐོང་བ་དེ་དག་གི་བྱ་བ་བྱེད་མོད་ཀྱི། རྨི་ལམ་གྱི་ཚེ་ན་གཟུགས་ལ་སོགས་པ་མེད་པར་གསལ་བར་མངོན་ཏེ། །དེ་དག་ཐམས་ཅད་རྣམ་པར་ཤེས་པའི་དབང་གིས་གྱུར་པ་ཙམ་དུ་ཟད་དོ་སྙམ་ནས་དེ་ལྟར་མོས་པས་སྤྱོད་པའི་ས་ལ་ཞུགས་ནས་ཕུང་པོ་ལ་སོགས་པའི་ཆོས་རྣམས་ལ་བདག་མེད་པར་རྟོགས་པ་ནི་སྒྱུ་མ་ལ་སོགས་པ་ནས་དྲི་ཟའི་གྲོང་ཁྱེར་ལ་སོགས་པ་ལྟ་བུའི་འདུ་ཤེས་སྐྱེས་ཏེ། ཆོས་རྣམས་ནི་ཡང་དག་པར་ཡོད་པ་མ་ཡིན་མོད་ཀྱི་རྣམ་པར་ཤེས་པ་ཙམ་ཡོད་པར་འཛིན་ཏེ། དེ་ལྟ་བུར་ཆོས་ལ་བདག་མེད་པར་རྟོགས་པ་མོས་པས་སྤྱོད་པའི་ས་དེ་ལ་ཡང་དེ་ལྟ་བུར་ཆོས་རྣམས་སྒྱུ་མ་དང་སྨིག་རྒྱུ་ལ་སོགས་པའི་ཚུལ་དུ་འཇིག་ཅིང་འཇུག་པའི་སེམས་དང༌། ཆོས་རྣམས་དེ་ལྟ་བུར་བཤིག་ནས་དེའི་ཏིང་ངེ་འཛིན་རྣམ་པར་མི་རྟོག་པ་ལ་གནས་པའི་སེམས་དང། དེ་ནས་སྙིང་རྗེའི་དབང་གིས་ཕ་རོལ་ཏུ་ཕྱིན་པ་ལ་སོགས་པ་རྣམ་པར་སྤྱོད་ཅིང་ས་བཅུ་ལ་སོགས་པའི་ཡོན་ཏན་ཐོས་པ་དང་བསམ་པ་དང་བསྒོམ་པའི་ཤེས་རབ་ཀྱིས་ཤེས་ནས་དེ་དག་ལ་རབ་ཏུ་མོས་པར་བྱེད་ཅིང་འཇུག་པ་དང་གནས་པ་དང་ལྡང་བའི་སེམས་དེ་གསུམ་རྣམ་པར་
བསྒོམས་པས་ས་དང་ཕ་རོལ་ཏུ་ཕྱིན་པའི་ཡོན་ཏན་ལ་སོགས་པ་རྣམས་ཡོངས་སུ་མེ་ཤེས་པ་ནི་ཡོངས་སུ་མི་ཤེས་ཤིང་མངོན་དུ་མ་བྱས་པ་མཉན་པ་དང་བསམས་པ་དང་བསྒོམས་པའི་ཤེས་རབ་ཀྱིས་ཆོས་ལ་བདག་མེད་པར་རྟོགས་ཤིང་རྣམ་པར་ཤེས་པ་ཙམ་ཡོད་པར་འཛིན་པ་དེ་ནི་མོས་པས་སྤྱོད་པའི་སའི་མཚན་ཉིད་དེ་མོས་པས་སྤྱོད་པའི་ས་དེ་བསྐལ་པ་གཅིག་གིས་རྫོགས་པར་འགྱུར་རོ། །དེ་ནས་བསྐལ་པའི་བཞི་ཆ་གཅིག་གིས་མོས་པས་སྤྱོད་པའི་ས་དེ་ནས་འཕར་ཏེ། ཡེ་ཤེས་ཀྱི་ས་དེ་ལ་འཇུག་པའི་རིམ་པ་གསུངས་པ། གསང་བ་པའི་བདག་པོ་དེའི་ཕྱིར་དེ་དག་གི་སེམས་ཀྱི་དབང་དུ་བྱས་པས་ཆོས་ལ་བདག་མེད་པ་ཉིད་ཀྱང་སྤང་བར་བྱ་བ་སྟེ། རང་གི་སེམས་ནི་གཟོད་མ་ནས་མ་སྐྱེས་པའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་ངོ་བོ་ཉིད་ཡོངས་སུ་ཤེས་པའི་ཕྱིར་སེམས་ལ་སྔོན་གྱི་མཐའ་དང་ཕྱི་མའི་མཐའ་མི་དམིགས་ཏེ་རྣལ་འབྱོར་པ་དག་འདི་ཡང་བསྐལ་པ་གཉིས་ཀྱིས་འདའ་བར་བྱེད་དོ་ཞེས་པའོ། །དེ་ལ་དེ་དག་གི་སེམས་ཀྱི་དབང་དུ་བྱས་པས་ཆོས་ལ་བདག་མེད་པ་ཉིད་ཀྱང་སྤང་བར་བྱ་བ་སྟེ་རང་གི་སེམས་ནི་གཟོད་མ་ནས་མ་སྐྱེས་པའོ་ཞེས་པ་ནི་སྔར་ཆོས་ལ་བདག་མེད་པར་རྟོགས་ཏེ་རྣམ་པར་ཤེས་པ་འབའ་ཞིག་གཟུང་བ་དང་འཛིན་པའི་རྣམ་པ་ཡོད་པར་སེམས་པ་དེ་ཡང་རང་གི་དབང་དུ་གྱུར་པས་རྣམ་པར་ཤེས་པ་དེ་གཟོད་མ་ནས་མ་སྐྱེས་པར་རྟོགས་པས་རྣམ་པར་ཤེས་པ་ཙམ་དུ་ཡོད་པར་འདུ་ཤེས་པ་དེ་ཡང་སྤངས་པས་ཆོས་ལ་བདག་མེད་པ་ཉིད་ཀྱང་སྤངས་སོ། །ཅིའི་ཕྱིར་རྣམ་པར་ཤེས་པ་ཙམ་དུ་འདུ་ཤེས་པ་དེ་སྤངས་པས་ཆོས་ལ་བདག་མེད་པ་སྤངས་ཞེས་བྱ་ཞེ་ན་ཕུང་པོ་ལ་སོགས་པ་རྣམས་བདག་མེད་པར་རྟོགས་པའི་རྒྱུས་རྣམ་པར་ཤེས་པ་ཙམ་དུ་ཡོད་པར་འདུ་ཤེས་སྐྱེས་ཏེ། དེ་བས་ན་རྣམ་པར་ཤེས་པ་ཙམ་ཡོད་པར་འདུ་ཤེས་པ་དེ་སྤངས་ན་ཆོས་ལ་བདག་མེད་པ་ཉིད་སྤངས་བ་ཡིན་ཏེ་འབྲས་བུ་ལ་རྒྱུས་བཏགས་པའོ། །རྣམ་པར་ཤེས་པ་ཙམ་ཡོད་པར་འདུ་ཤེས་པ་དེ་ཡང་ཇི་ལྟར་སྤོང་ཞེ་ན། དེ་ཅིའི་ཕྱིར་ཞེ་ན་གསང་བ་པའི་བདག་པོ། །ངོ་བོ་ཉིད་ཡོངས་སུ་ཤེས་པའི་ཕྱིར་སེམས་ལ་སྔོན་གྱི་མཐའ་དང་ཕྱི་མའི་མཐའ་མི་དམིགས་ཏེ་ཞེས་གསུངས་པ་ཡིན་
ཏེ། །དེ་ལྟར་རང་གི་སེམས་དེ་ཐོག་མ་གང་ནས་སྐྱེས་པའི་མཐའ་བཅལ་ན་མཐའ་དེ་མི་རྙེད་ལ། དེ་ལྟར་ཐོག་མའི་མཐའ་མེད་པས་ཐ་མ་འགག་པའི་མཐའ་ཡང་རྙེད་པར་མི་འགྱུར་ཏེ་ཐོག་མ་དང་ཐ་མའི་མཐའ་མི་རྙེད་དོ། །དེ་ལྟར་ཐོག་མའི་མཐའ་མེད་པས་སེམས་དེ་མ་སྐྱེས་པར་མངོན་ཏེ་དེ་ལྟར་ཐོག་མ་ནས་མ་སྐྱེས་ན་གཟུང་བ་དང་འཛིན་པའི་རྣམ་པར་སྣང་བའི་ཤེས་པ་དེ་གང་ན་ཅི་ཞིག་ཡོད་སྙམ་ནས་རྣམ་པར་ཤེས་པ་ཙམ་ཡོད་པར་འདུ་ཤེས་པ་དེ་སྤངས་པས་ཆོས་ལ་བདག་མེད་པ་ཡང་སྤངས་ཞེས་བྱའོ། །དེ་ལྟ་བུའི་ཚུལ་དུ་སྒོམ་ཞིང་ཆོས་ལ་བདག་མེད་པ་སྤོང་པ་ཡང་བསྐལ་པ་གཉིས་ཀྱིས་ཡོངས་སུ་རྫོགས་པར་འགྱུར་རོ། །ད་ནི་རབ་ཏུ་དགའ་བའི་ས་བྱང་ཆུབ་ཀྱི་སེམས་སྐྱེ་བའི་རིམ་པ་བཤད་པར་བྱ་སྟེ། དེ་ཡང་གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའ་སྤྱད་པ་སྤྱོད་པ་བསྐལ་པ་བྱེ་བ་ཁྲིག་ཁྲིག་བརྒྱ་སྟོང་དཔག་ཏུ་མེད་པར་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མད་པ་བསགས་པ་ཞེས་པ་ནས་ཤིན་ཏུ་ངོ་བོ་ཉིད་མེད་པའི་སེམས་སྐྱེ་སྟེ། གསང་བ་པའི་བདག་པོ་འདི་ནི་བྱང་ཆུབ་ཀྱི་སེམས་དང་པོའོ་ཞེས་རྒྱལ་བ་རྣམས་ཀྱིས་གསུངས་སོ་ཞེས་པའི་བར་གྱིས་ས་དང་པོའི་བྱང་ཆུབ་ཀྱི་སེམས་དེའི་རྒྱུ་ཕུན་སུམ་ཚོགས་པ་དང༌། རང་བཞིན་ཕུན་སུམ་ཚོགས་པ་དང༌། མཚན་ཉིད་ཕུན་སུམ་ཚོགས་པ་དང༌། མཚན་ཉིད་དེའི་སྒྲུབ་པ་ཕུན་སུམ་ཚོགས་པ་རྣམས་བཤད་པར་རིག་པར་བྱ་སྟེ་དེ་ལ་རྒྱུ་ཕུན་སུམ་ཚོགས་པ་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་བསགས་པ་ཞེས་བྱའོ། །རང་བཞིན་ཕུན་སུམ་ཚོགས་པ་ནི་ཤེས་རབ་དང་ཐབས་དཔག་ཏུ་མེད་པས་ཡོངས་སུ་གཟུང་བ་ཞེས་པ་ནས་དབང་པོ་དང་ཉེ་བའི་དབང་པོ་ལ་སོགས་པས་ཕྱག་བྱས་པ་ཞེས་པའི་བར་ཏེ། རང་བཞིན་ཕུན་སུམ་ཚོགས་པ་དེས་སྤོང་བ་ཕུན་སུམ་ཚོགས་པ་དང་མཐུ་ཕུན་སུམ་ཚོགས་པ་ཡང་བསྡུས་ཏེ་སྤོང་བ་ཕུན་སུམ་ཚོགས་པ་ནི་ཤེས་རབ་དང་ཐབས་དཔག་ཏུ་མེད་པས་ཡོངས་སུ་གཟུང་བ་ཞེས་དང༌། ཉན་ཐོས་དང་རང་སངས་རྒྱས་ཐམས་ཅད་ཀྱིས་ལས་ཡང་དག་པར་འདས་པ་ཞེས་པའོ། །མཐུ་ཕུན་
སུམ་ཚོགས་པ་ནི་ལྷ་དང་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱས་པ་ཞེས་དང༌། བརྒྱ་བྱིན་དང་ཚངས་པ་དང་དབང་པོ་དང་ཉེ་བའི་དབང་པོ་ལ་སོགས་པས་ཕྱག་བྱས་པ་ཞེས་པའོ། །མཚན་ཉིད་ཕུན་སུམ་ཚོགས་པ་ནི་ཤིན་ཏུ་ངོ་བོ་ཉིད་མེད་པའི་སེམས་སྐྱེ་ཞེས་པའོ། །མཚན་ཉིད་དེའི་སྒྲུབ་པ་ཕུན་སུམ་ཚོགས་པ་ནི་འདི་ལྟ་སྟེ། སྟོང་པ་ཉིད་ཀྱི་ངོ་བོ་རྫས་མེད་པ་ཞེས་པ་ནས་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དང་བྲལ་བ་ཞེས་པའི་བར་རོ། །དེ་ལ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་བསགས་པ་ཞེས་པ་ལ། བསྐལ་པ་བྱེ་བ་ནི་འབུམ་ཕྲག་བརྒྱ་ལ་བྱའོ། །བརྒྱ་སྟོང་ནི་བསྐལ་པ་བྱེ་བ་ཁྲིག་ཕྲག་འབུམ་ལ་བྱ་སྟེ་དཔག་ཏུ་མེད་ཅེས་པ་ནི་བསྐལ་པ་བྱེ་བ་ཕྲག་འབུམ་དེ་ཡང་ཚད་ཀྱི་ས་གཞལ་དུ་མེད་གྲངས་ཀྱིས་བགྲང་དུ་མེད་པར་སེམས་དང་པོ་བསྐྱེད་པའམ། གང་ཟག་ལ་བདག་མེད་པར་བསྒོམ་པ་ནས་བརྩམས་ཏེ། བསོད་ནམས་དང་ཡེ་ཤེས་ཀྱི་ཚོགས་བསགས་པའི་རྒྱུས། ས་དང་པོ་རབ་ཏུ་དགའ་བའི་སེམས་ཤིན་ཏུ་དགའ་བའི་ངོ་བོ་ཉིད་མེད་པའི་མཚན་ཉིད་ཡོངས་སུ་རྫོགས་པར་འགྱུར་རོ། །ཤེས་རབ་དང་ཐབས་དཔག་ཏུ་མེད་པས་ཡོངས་སུ་གཟུང་བ་ཞེས་པ། ཤེས་རབ་ནི་ཆོས་ཐམས་ཅད་ཀྱི་རང་བཞིན་ཀུན་ཆུབ་པར་བྱེད་པ་ཡིན་ལ། ཐབས་ནི་སྙིང་རྗེ་ཆེན་པོའི་དབང་གིས་སེམས་ཅན་རྣམས་ཡོངས་སུ་སྨིན་པ་དང་གྲོལ་བར་བྱེད་པ་སྟེ། དཔག་ཏུ་མེད་པ་ནི་ཤེས་རབ་དང་ཐབས་དེ་དག་ཉིད་འདི་ཙམ་ཞེས་དཔག་ཏུ་མེད་དོ། །དེ་ལྟར་ཤེས་རབ་ཀྱིས་ཆོས་ཐམས་ཅད་རང་བཞིན་མེད་པར་རྟོགས་པས་ཉོན་མོངས་པ་ལ་སོགས་པ་སྤངས་པ་དང་ཐབས་ཀྱིས་སེམས་ཅན་སྨིན་ཅིང་གྲོལ་བར་བྱས་པས་ངན་སོང་ལ་སོགས་པ་སྤངས་པའི་ཡོན་ཏན་དང་ལྡན་པས་དེའི་སྤོང་བ་ཕུན་སུམ་ཚོགས་པའོ། །ཡོངས་སུ་གཟུང་བ་ཞེས་པ་ནི་བྱང་ཆུབ་ཀྱི་སེམས་དེ་དེ་ལྟ་བུའི་ཤེས་རབ་ཐབས་དཔག་ཏུ་མེད་པ་སྤོང་པ་ཕུན་སུམ་ཚོགས་པ་དེས་ཡོངས་སུ་གཟུང་བ་ལ་བྱའོ། །ཉན་ཐོས་དང་རང་སངས་རྒྱས་ཐམས་ཅད་ཀྱིས་ལས་ཤིན་ཏུ་འདས་པ་དང་ཞེས་པ་ཡང་དེ་ལྟ་བུའི་ཤེས་རབ་དང་དཔག་ཏུ་མེད་པ་དང་ལྡན་
པས་ཉན་ཐོས་དང་རང་སངས་རྒྱས་ཀྱི་ལྟ་བ་ལས་འདས་ཏེ་འཕགས་པའམ་དེ་དག་གི་སྤྱོད་ཡུལ་མ་ཡིན་པ་ལ་བྱ་སྟེ། དེ་ཡང་སྤོང་བ་ཕུན་སུམ་ཚོགས་པའོ། །ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱས་པ། བརྒྱ་བྱིན་དང་ཚངས་པ་དང་དབང་པོ་དང་ཉེ་བའི་དབང་པོ་ལ་སོགས་པས་ཕྱག་བྱས་པ་ཞེས་པ་ནི་དེ་ལྟ་བུའི་འཇིག་རྟེན་གྱི་དབང་པོ་ལ་སོགས་པ་སེམས་ཅན་མཐུ་ཆེན་རྣམས་ཀྱི་མཆོད་ཅིང་ཕྱག་བྱས་པའི་མཐུ་དང་ལྡན་པས་མཐུ་ཕུན་སུམ་ཚོགས་པའོ། །བྱང་ཆུབ་ཀྱི་སེམས་དེ་ལ་གཟུགས་མེད་ན་ཇི་ལྟར་དེ་དག་གིས་ཕྱག་བྱ་ཞེ་ན་གཟུགས་མེད་ཀྱང་དེའི་ཡོན་ཏན་དང་རྫུ་འཕྲུལ་ཆེན་པོ་དག་ཐོས་ནས་འདུད་ཅིང་ཕྱག་འཚལ་བར་འགྱུར་རོ། །ཡང་ན་དེ་ལྟ་བུའི་སེམས་དང་ལྡན་པའི་བྱང་ཆུབ་སེམས་དཔའ་ལ་ཕྱག་འཚལ་བ་ལ་ཡང་བྱའོ། །འདི་ལྟ་སྟེ་སྟོང་པ་ཉིད་ཀྱི་ངོ་བོ་ཉིད་ཅེས་པ་ནི་བྱང་ཆུབ་ཀྱི་སེམས་དེ་གཟུང་བ་དང་འཛིན་པའི་རང་བཞིན་མེད་དེ། ནམ་མཁའ་དང་འདྲ་བས་སྟོང་པའི་རང་བཞིན་ནོ། །རྫས་མེད་པ་ཞེས་པ་ནི་དེ་ལྟར་སྟོང་པའི་རང་བཞིན་ཡིན་པས་རྡུལ་ཕྲ་མོ་ལ་སོགས་པའི་རྫས་ཀྱི་རང་བཞིན་མ་ཡིན་པའོ། །མཚན་ཉིད་མེད་པ་ཞེས་བ་ནི་མུ་སྟེགས་ཅན་ལ་སོགས་པས་བརྟགས་པའི་བདག་ལ་སོགས་བ་ཁམས་གསུམ་ཐམས་ཅད་སྐྱེ་བ་དང་འཇིག་པའི་རྒྱུར་གྱུར་པའི་མཚན་ཉིད་མ་ཡིན་པའོ། །མཚན་མ་མེད་པ་ཞེས་པ་ནི་བྱང་ཆུབ་ཀྱི་སེམས་དེ་ལ་སྔོན་པོ་དང་སེར་པོ་ལ་སོགས་པའི་རྣམ་པའི་མཚན་མ་མེད་པའོ། །སྤྲོས་པ་ཐམས་ཅད་ལས་འདས་པ་ཞེས་པ་ནི་སྤྲོས་པ་ནི་རྣམ་པར་རྟོག་པ་ལ་བྱ་སྟེ་རྣམ་པར་རྟོག་པ་མེད་པའོ། །ནམ་མཁའ་ལྟར་དཔག་ཏུ་མེད་པ་ཞེས་པ་ནི་དེ་ལྟར་རྣམ་པར་རྟོག་པ་མེད་པས་ན་ནམ་མཁའ་དང་འདྲ་སྟེ། ནམ་མཁའ་ནི་ཚད་འདི་ཙམ་ཞེས་དཔག་ཏུ་མེད་དོ། །དེ་བཞིན་དུ་བྱང་ཆུབ་ཀྱི་སེམས་དེའི་ཡོན། ཏན་ཡང་ཚད་གཟུང་དུ་མེད་དོ། །ཆོས་ཐམས་ཅད་ཀྱི་གོ་སྐབས་སུ་གྱུར་པ་ཞེས་པ་ལས་ཆོས་ཐམས་ཅད་ནི་འདུས་བྱས་ཀྱི་ཆོས་ལ་བྱ་སྟེ། འདུས་བྱས་ཀྱི་ཆོས་དེ་རྣམས་རྡུལ་ཕྲན་གྱི་ཕྱོགས་ཆ་ལ་སོགས་པར་བཤིག་གམ། སྒྱུ་མ་དང་སྨིག་རྒྱུ་ལ་སོགས་པའི་ཚུལ་དུ་བཤིག་ན་
སྟོང་པ་ཉིད་ཀྱི་རང་བཞིན་དུ་འགྱུར་ཏེ། དེ་དང་བྱང་ཆུབ་ཀྱི་སེམས་རོ་གཅིག་པས་ཆོས་དེ་དག་ཐམས་ཅད་ཀྱི་གོ་སྐབས་སུ་གྱུར་པའོ། །གཉིས་སུ་ཆོས་ཐམས་ཅད་ཅེས་བྱ་བ་ནི་སྟོབས་བཅུ་དང༌། མི་འཇིགས་པ་བཞི་དང་མ་འདྲེས་པ་བཅོ་བརྒྱད་ལ་སོགས་པ་སངས་རྒྱས་བཅོམ་ལྡན་འདས་ཀྱི་ཡོན་ཏན་གྱི་ཆོས་རྣམས་བྱང་ཆུབ་ཀྱི་སེམས་དེ་ལ་གནས་པས་ན་ཆོས་ཐམས་ཅད་ཀྱི་གོ་སྐབས་སུ་གྱུར་བའོ་འདུས་བྱས་དང་འདུས་མ་བྱས་ཀྱི་ཁམས་དང་བྲལ་བ་ཞེས་པ་ལ། འདུས་བྱས་དང་བྲལ་བ་ནི་ས་དང་པོའི་སེམས་ཐོབ་པའི་མི་མཐུན་པའི་གཉེན་པོར་གྱུར་པས་དེ་རྣམས་དང་བྲལ་བའོ། །འདུས་མ་བྱས་དང་བྲལ་བ་ནི་ཉོན་མོངས་པ་དང་ཤེས་བྱའི་སྒྲིབ་པའི་བག་ཆགས་མ་སྤངས་པས་མྱ་ངན་ལས་འདས་པའི་ཁམས་ལ་མི་གནས་པའོ། །མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དང་བྲལ་བ་ཞེས་པ་ནི་མིག་ལ་སོགས་པའི་རྣམ་པར་ཤེས་པ་ལྟར་མིག་ལ་སོགས་པས་རྒྱུ་བྱས་ནས་སྐྱེད་པ་མ་ཡིན་པས་དེ་རྣམས་དང་བྲལ་བའོ། །ཤིན་ཏུ་ངོ་བོ་ཉིད་མེད་པའི་སེམས་ཞེས་པ་ནི་དེ་ལྟར་གོང་དུ་སྨོས་པའི་ཆོས་རྣམས་གང་དང་ཡང་མི་ལྡན་པས་དེ་རྣམས་ཀྱི་རྣམ་པའམ་རང་བཞིན་མེད་པ་སྟེ། དེ་བས་ན་ཤིན་ཏུ་ངོ་བོ་ཉིད་མེད་པའི་སེམས་སོ། །སྐྱེ་སྟེ་ཞེས་པ་ནི་དེ་ལྟར་ངོ་བོ་ཉིད་མེད་པའི་སེམས་ཀྱི་མཚན་ཉིད་དེ་གོང་དུ་སྨོས་པའི་བསྐལ་བ་སྙེད་དུ་བསོང་ནམས་དང་ཡེ་ཤེས་ཀྱི་ཚོགས་བསགས་པའི་རྒྱུས་ས་དང་པོའི་ཡོན་ཏན་རྣམས་རྫོགས་ནས་བླ་ན་མེད་པའི་བྱང་ཆུབ་ཀྱི་ཕྱིར་སེམས་དེ་སྐྱེ་བར་རིག་པར་བྱའོ། །དེ་དག་ཉོན་མོངས་ལས་ལས་གྲོལ། །ལས་དང་ཉོན་མོངས་ལྡན་པའང་ཡིན། །དེ་དག་འཇིག་རྟེན་སྦྱིན་གནས་ཏེ། །དེ་དག་རྟག་མཆོད་རི་མོར་བྱ། །ཞེས་པ་ལ། ཉོན་མོངས་ལས་ལས་གྲོལ་ཞེས་པ་ནི་ངན་སོང་ལ་སོགས་པའི་ལས་དང་ས་དང་པོའི་མི་མཐུན་པའི་ཕྱོགས་དང་བྲལ་བའོ། །ལས་དང་ཉོན་མོངས་ལྡན་པའང་ཡིན། །ཞེས་པ་ལ་གོང་མ་རྣམས་ཐོབ་པར་བྱེད་པའི་ལས་དང་དེ་དག་ལས་སྒྲིབ་པའི་ཉོན་མོངས་པ་དང་ལྡན་པའོ། །དེ་དག་འཇིག་རྟེན་སྦྱིན་གནས་ཏེ། །ཞེས་པ་ནི། དེ་ལྟ་བུའི་སེམས་དང་ལྡན་པའི་བྱང་ཆུབ་སེམས་དཔའ་ནོར་
དང་འབྲུ་དང་རིན་པོ་ཆེ་ལ་སོགས་པ་ཡོན་དབུལ་བའི་སྣོད་དུ་གྱུར་པའོ། །མཆོད་ཅེས་པ་ནི་དྲི་དང་མེ་ཏོག་ལ་སོགས་པས་མཆོད་པའི་གནས་སོ། །རི་མོར་བྱ་ཞེས་པ་ནི་ཕྱག་བྱ་ཞིང་ཐལ་མོ་སྦྱར་བ་དང༌། བསུ་ཞིང་བསྐྱལ་བ་ལ་སོགས་པའི་བཀུར་སྟིའི་གནས་སོ། །དེ་ལ་རྟག་མཆོད་ནི་དེ་ལྟ་བུའི་བྱང་ཆུབ་སེམས་དཔའ་ལ་འཇིག་རྟེན་པ་རྣམས་ཀྱིས་མཆོད་པ་དང་བཀུར་སྟི་ལ་སོགས་བ་བྱའོ། །ད་ནི་ཉོན་མོངས་པས་སྤྱོད་པའི་སའི་མཚན་ཉིད་དང་ཡོན་ཏན་ཡང་བཤད་དེ་གསང་བ་པའི་བདག་པོ་གཞན་ཡང༌། མོས་པ་ཡིས་ནི་སྤྱོད་པའི་ས། །ཞེས་པ་ནས། བློ་ལྡན་བསྐལ་བ་གཅིག་གིས་ནི། །ས་ལས་ཡང་དག་འདའ་བར་འགྱུར། །ཞེས་པའི་བར་རོ། །དེ་ལ་མོས་པ་ཡིས་ནི་ཞེས་པ་མཉན་པ་དང༌། བསམས་པ་དང༌། བསྒོམས་པའི་ཤེས་རབ་ཀྱིས་ས་དང་ཕ་རོལ་ཏུ་ཕྱིན་པ་ལ་སོགས་པ་སངས་རྒྱས་ཀྱི་ཡོན་ཏན་རྣམས་ཤེས་ན་དེ་ཉིད་ཡིན་གྱི་གཞན་ནི་མ་ཡིན་ནོ་སྙམ་དུ་དེ་ལ་ཤིན་ཏུ་མོས་པ་སྐྱེ་བའོ། །དེ་ལ། སེམས་གསུམ་རྣམ་པར་སྒོམ་པ་སྟེ། །ཞེས་པ་ནི་འཇུག་པ་དང༌། གནས་པ་དང༌། ལྡང་བའི་སེམས་ཏེ་དེ་དག་རྣམ་པར་སྒོམ་པའི་ཐབས་ནི་སྔར་ཆོས་ལ་བདག་མེད་པའི་སྐབས་སུ་བཤད་ཟིན་ཏོ། །མོས་པས་སྤྱོད་པ་ཞེས་པ་ནི་ཆོས་དེ་ལ་མོས་པ་ཙམ་མ་ཡིན་གྱི། དེ་རྣམས་ཀྱི་ཡོན་ཏན་གོམས་པར་བྱ་བ་ལ་ནན་ཏན་བྱེད་པ་སྟེ། དེ་བས་ན། ཕ་རོལ་ཕྱིན་རྣམས་སྤྱོད་པ་དང༌། །བསྡུ་བ་དག་ནི་བཞི་པོ་ཡིས། །ཞེས་གསུངས་པ་ཡིན་ནོ། །དེ་ལ། ཕ་རོལ་ཕྱིན་རྣམས་སྤྱོད་པ་དང༌། །ཞེས་པ་ནི་ས་དང་པོ་ནས་བརྩམས་ཏེ་བཅུ་པའི་བར་དུ་ས་རེ་རེ་ལ་ཕྱིན་པ་ལ་སོགས་པའི་ཕ་རོལ་ཏུ་ཕྱིན་པ་རེ་རེ་སྤྱོད་དེ། བདག་ཇི་ལྟར་ཕ་རོལ་ཏུ་ཕྱིན་པ་ལ་སྤྱོད་པ་དེ་བཞིན་དུ། སེམས་ཅན་གཞན་རྣམས་ཀྱང་བསྡུ་བ་རྣམ་པ་བཞིའི་སྒོ་ནས་བསྡུས་ཏེ་སྤྱོད་དུ་འཇུག་གོ །དེ་ལ་རབ་ཏུ་དགའ་བའི་ཡོན་ཏན་སེམས་དགའ་བཞིན་དུ་ཆོས་དང་ཟང་ཟིང་གིས་སྦྱིན་པའི་ཕ་རོལ་ཏུ་ཕྱིན་པ་སྤྱོད་པ་སྟེ། མོས་པས་སྤྱོད་པའི་ས་ལ་གནས་པ་ན་བདག་ཀྱང་སྤྱོད་ལ། སེམས་ཅན་གཞན་རྣམས་ཀྱང་བསྡུ་བ་རྣམས་པ་བཞིའི་སྒོ་ནས་བསྡུས་ཏེ་སྤྱོད་དུ་འཇུག་གོ །ས་གཉིས་པ་དྲི་མ་
མེད་པ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དྲི་མ་མེད་པ་ལ་སྤྱོད་པ་ཡང༌། མོས་པས་སྤྱོད་པའི་ཚེ་བདག་ཀྱང་སྤྱོད་ལ་གཞན་རྣམས་ཀྱང་སྤྱོད་དུ་འཇུག་གོ །ས་གསུམ་པ་འོད་བྱེད་པ་ལ་མི་སྐྱེ་བའི་ཆོས་ལ་བཟོད་དེ། བཟོད་པའི་ཕ་རོལ་ཏུ་ཕྱིན་པ་སྤྱོད་པ་ཡང་མོས་པས་སྤྱོད་པའི་ཚེ་བདག་ཀྱང་སྤྱོད་ལ་གཞན་ཡད་སྤྱོད་དུ་འཇུག་གོ །ས་བཞི་པ་འོད་འཕྲོ་བ་ཅན་ལ་ཡེ་ཤེས་ཀྱི་འོད་འཕྲོ་བས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྤྱོད་པ་དང༌། ས་ལྔ་པ་སྦྱང་དཀའ་བ་ལ་བདུད་ལ་སོགས་པས་ཤིན་ཏུ་རྒྱལ་བར་དཀའ་བའི་བསམ་གཏན་གྱི་ཕ་རོལ་ཏུ་ཕྱིན་པ་སྤྱོད་པ་དང༌། །ས་དྲུག་པ་མངོན་དུ་གྱུར་པ་ཤེས་རབ་མངོན་དུ་གྱུར་པས་ཤེས་རབ་ཀྱི་ཕ་རོལ་ཏུ་ཕྱིན་པ་སྤྱོད་པ་དང༌། ས་བདུན་པ་རིང་དུ་སོང་བ་ལ་སེམས་ཅན་རྣམས་སྨིན་པ་དང་གྲོལ་བར་བྱེད་པའི་ཐབས་ཀྱི་ཕ་རོལ་ཏུ་ཕྱིན་པ་དང༌། ས་བརྒྱད་པ་མི་གཡོ་བ་ལ་སྨོན་ལམ་གྱི་དབང་ཐོབ་ནས་ས་གོང་མ་རྣམས་ཐོབ་པའི་ཕྱིར་སྨོན་ལམ་གྱི་ཕ་རོལ་ཏུ་ཕྱིན་པ་སྤྱོད་པ་དང༌། ས་དགུ་པ་ལེགས་པའི་བློ་གྲོས་ལ་སྟོབས་ཀྱི་ཕ་རོལ་ཏུ་ཕྱིན་པ་སྤྱོད་པ་དང༌། ས་བཅུ་པ་ཆོས་ཀྱི་སྤྲིན་ལ་ཕྱོགས་བཅུའི་དེ་བཞིན་གཤེགས་པ་རྣམས་ལ་མངོན་སུམ་དུ་ཡེ་ཤེས་ཀྱི་ཆོས་འདྲི་ཞིང༌། སྤྱོད་ཡུལ་དུ་གྱུར་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྤྱོད་པ་རྣམས་མོས་པས་སྤྱོད་པའི་ཚེ་ཉིད་ན་བདག་ཀྱང་སྤྱོད་པ་ལ་གོམས་པར་བྱེད་ལ་སེམས་ཅན་གཞན་རྣམས་ཀྱང་བསྡུ་བ་རྣམས་བཞིའི་སྒོ་ནས་བསྡུས་ཏེ་སྤྱོད་དུ་འཇུག་པའོ། །བསྡུ་བ་རྣམ་པ་བཞི་ཞེས་པ་ནི་སྦྱིན་པ་དང་སྙན་པར་སྨྲ་བ་དང༌། དོན་སྤྱོད་པ་དང། །དོན་མཐུན་པའི་སྒོ་ནས་ཕ་རོལ་ཏུ་ཕྱིན་པ་རྣམས་ལ་སྤྱོད་དུ་འཇུག་པའོ། །ས་དེ་རྣམས་ཀྱི་མཚན་ཉིད་དང་ཡོན་ཏན་རྒྱ་ཆེར་ནི་ས་བཅུ་པའི་མདོ་སྡེ་ལ་སོགས་པར་ཤེས་པར་བྱའོ། །མོས་པའི་ས་ནི་མཚུངས་པ་མེད། །ཅེས་པ་ནི་མོས་པས་སྤྱོད་པའི་ས་དེ་འཇིག་རྟེན་ཕལ་པ་རྣམས་དད་མི་མཉམ་པའོ། །དཔག་ཏུ་མེད་ཅིང་ཞེས་པ་དེའི་ཡོན་ཏན་གྱི་སྤྱི་གྲངས་ཀྱིས་གཞལ་བ་ལས་འདས་པའོ། །བསམ་མི་ཁྱབ་ཅེས་པ་ནི་སེམས་ཀྱིས་བསམས་ཤིང་དཔག་པ་ལས་འདས་པའོ། །དཔག་མེད་ཡེ་ཤེས་འབྱུང་བ་ཞེས་པ་ནི་མོས་པས་སྤྱོད་པའི་ས་དེ་ལ་བྱ་སྟེ། དཔག་མེད་ནི་ཐམས་ཅད་མཁྱེན་པའི་ཡེ་ཤེས་སོ། །
སེམས་བཅུ་དག་གིས་ཐོབ་པར་འགྱུར། །ཞེས་པ་ནི་ཕ་རོལ་ཏུ་ཕྱིན་པ་བཅུ་པོ་སྤྱོད་པའི་སེམས་ཀྱི་རིམ་པས་སོ། །ངས་གང་ཅུང་ཟད་བརྗོད་པ་ནི། །ཐམས་ཅད་འདི་ཡིས་ཐོབ་པར་འགྱུར། །ཞེས་པ་ནི་སྟོབས་བཅུ་དང་མི་འཇིགས་པ་བཞི་དང་མ་འདྲེས་པ་བཅོ་བརྒྱད་ལ་སོགས་པའི་ཆོས་གང་ཅུང་ཟད་བཅོམ་ལྡན་འདས་ཀྱིས་གསུངས་པ་དེ་ཐམས་ཅད་ནི་མོས་པས་སྤྱོད་པ་དེས་འཐོབ་པར་འགྱུར་རོ། །དེ་ཕྱིར་ཐམས་ཅད་མཁྱེན་པའི་ས། །མོས་པ་ཞེས་ནི་བྱ་བར་བཤད། །ཅེས་པ་ནི་དེ་ལྟར་དེ་བཞིན་གཤེགས་པའི་ཆོས་ཐམས་ཅད་མོས་པས་འཐོབ་པས་ན་མོས་པས་སྤྱོད་པའི་ས་དེ་ཐམས་ཅད་མཁྱེན་པའི་ས་དེའི་རྒྱུ་སྟེ་ངེ་བས་ན་རྒྱུ་ལ་འབྲས་བུར་བཏགས་ཏེ། མོས་པ་ཞེས་ནི་བྱ་བར་བཤད། །ཅེས་གསུངས་པ་ཡིན་ནོ། །བློ་ལྡན་བསྐལ་པ་གཅིག་གིས་ནི། །ས་ལས་ཡང་དག་འདའ་བར་འགྱུར། །ཞེས་པ་ནི་ཤེས་རབ་ཅན་གྱིས་མོས་པས་སྤྱོད་པའི་ས་དེ་བསྐལ་པ་གཅིག་གིས་ཡོངས་སུ་རྫོགས་པར་འགྱུར་ཞེས་པའོ། །འདི་ཡི་ཡང་ནི་བཞི་ཆ་ཡིས། །མོས་པའི་ས་ལས་འདའ་བར་འགྱུར། །ཞེས་པ་ནི་བསྐལ་བ་དེའི་བཞི་ཆ་གཅིག་གིས་མོས་པས་སྤྱོད་པའི་ཆོས་བདག་མེད་པར་ཆུད་པའི་ས་དེ་ལས་འཕར་ཏེ་ཡེ་ཤེས་ཀྱི་ས་ལ་འཇུག་པའི་སྟེགས་སུ་གྱུར་པའི་ཆོས་ལ་བདག་མེད་པ་ཡང་སྤངས་ནས་རང་གི་སེམས་གཟོད་མ་ནས་མ་སྐྱེས་ཤིང་མ་བྱུང་བར་བསྒོམ་པར་ཞུགས་པ་ལ་བྱའོ། །མོས་པས་སྤྱོད་པའི་སའི་རིམ་པ་དང༌། ཡོན་ཏན་དེ་དག་སྔར་མོས་པས་སྤྱོད་པའི་ས་བདག་མེད་པ་ལ་འཇུག་པའི་སྐབས་སུ་མི་བཤད་པར་རབ་ཏུ་དགའ་བའི་ས་བཤད་པའི་འོག་ཏུ་ཅིའི་ཕྱིར་བཤད་ཅེ་ན། རབ་ཏུ་དགའ་བའི་ས་ནི་མོས་པས་སྤྱོད་པའི་སའི་འབྲས་བུ་སྟེ། དེ་ལྟར་འབྲས་བུ་དེ་ཅི་འདྲ་བཤེས་ནས་དེའི་རྒྱུ་གང་ཡིན་པ་དེ་གདོད་བརྟག་པར་བྱ་སྟེ། དེ་བས་ན་མོས་པས་སྤྱོད་པའི་ས་དེའི་རྗེས་སུ་བཤད་དོ། །དེ་དག་གིས་ནི་རྣམ་པར་སྣང་མཛད་ཀྱི་རྒྱུ་སྦྱིན་པ་ལ་སོགས་པ་སེམས་བརྒྱད་པོ་བཤད་པ་དང༌། སོ་སོའི་བདག་ཏུ་བརྟག་པ་ལ་བརྟེན་ནས་འབའ་ཞིག་པའི་བློ་སྐྱེ་བཤད་པ་དང༌། དེ་ནས་འཇིག་རྟེན་ལས་འདས་པའི་སེམས་སྐྱེས་ཏེ། བདག་ཏུ་བརྟགས་པ་རྣམས་མེད་པར་རྟོགས་ནས་ཕུང་པོ་ཙམ་དུ་
འཛིན་པ་གང་ཟག་ལ་བདག་མེད་པར་རྟོགས་པ་བཤད་པ་དང༌། ཕུང་པོ་ཙམ་པོ་དེ་ལ་ཡང་དབུ་བ་དང་ཆུའི་ཆུ་བུར་ལ་སོགས་པའི་ཚུལ་དུ་བཤིག་ནས་ཆོས་རྣམས་སོ་སོའི་རང་བཞིན་སྔོན་པོ་ལ་སོགས་པ་ཙམ་དུ་ཟད་པར་རྟོགས་པ་བཤད་པ་དང༌། ཆོས་ལ་བདག་མེད་པར་རྟོགས་ནས་རང་གི་སེམས་གཟོད་མ་ནས་མ་སྐྱེས་པ་སྟོང་པ་ཉིད་དུ་རྟོགས་པར་བཤད་པ་དང༌། ས་དང་པོའི་སེམས་ཀྱི་རང་བཞིན་སྟོང་པ་ཉིད་ཀྱི་རང་བཞིན་དེ་ཡང་ངོ་བོ་ཉིད་མེད་པར་མཉམ་པ་ཉིད་དུ་རྟོགས་པ་རྣམས་རྒྱ་ཆེར་བཤད་དོ། །ད་ནི་འདིར་དེ་རྣམས་ཉིད་དབུགས་པའི་སྒོ་ནས་མདོར་བསྡུས་ཏེ་ཕྱག་ན་རྡོ་རྗེས་གསོལ་པ་དང་བཅོམ་ལྡན་འདས་རྣམ་པར་སྣང་མཛད་ཀྱིས་ཀྱང་མདོར་བསྡུས་ཏེ་གསུངས་པ་དེ་བཤད་པར་བྱ་སྟེ། དེ་རྣམས་ལན་གཉིས་སུ་འདས་ཏེ་བཤད་ཅིང་དགོས་ཤེ་ན། སྔར་བཤད་པས་གསལ་བར་མ་གོ་ན་ཕྱིས་བཟླས་ཏེ་བཤད་པས་གསལ་ཞིང་བརྟན་པར་འགྱུར་བའི་ཕྱིར་ཏེ། དེ་བས་ན་ཕལ་ཆེར་ཡང་སྔར་རྒྱ་ཆེར་བཤད་པ་དེ་མ་གོ་ན་ཕྱིས་མདོར་བསྡུས་ཏེ་བཤད་པས་གོ་བ་ཡང་ཡོད་ལ། སྔར་ཚིག་རྐྱང་བས་བཤད་པ་དེ་མ་གོ་བ་ལ་ཕྱིས་ཚིགས་སུ་བཤད་དེ་གོ་བ་ཡང་སྲིད་པའི་ཕྱིར་རོ། །མདོ་སྡེ་ལ་སོགས་པ་གཞན་དག་ནས་ཀྱང་སྔར་སྤྲོས་ཏེ་བཤད་པའི་དོན་དེ་ཉིད་ཚིགས་སུ་བཅད་པས་བསྡུས་ཏེ་བཤད་པ་དེ་དག་སྲིད་དེ། དེ་བས་ན་འདིར་ཡང་སྔར་རྒྱས་པར་བཤད་པའི་དོན་དེ་ཉིད་ཕྱིས་བསྡུས་ཏེ་བཤད་དོ། །དེ་ཡང་དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། མཆོག་སྐྱེས་དེ་དག་དབུགས་ཕྱིན་འགྱུར། །ཞེས་པའི་བར་དུ་ཕྱག་ན་རྡོ་རྗེས་གསོལ་བའི་ཚིག་སྟེ། མགོན་པོ་ཁྱབ་བདག་ཁྱོད་ཀྱིས་ནི། །སེམས་ཀྱི་མཚན་ཉིད་བསྟན་ལགས་ན། །ཞེས་པ་ནི་སྔར་སེམས་རྣམས་ཀྱི་མཚན་ཉིད་བཤད་པ་དེ་དབུགས་དབྱུང་བ་རྣམ་པ་དུས་ཐོབ་པར་འགྱུར་ཞེས་ཞུས་པའོ། །དབུགས་འབྱིན་རྣམ་པ་དུ་ཐོབ་ནས། །ཞེས་པ་ལ་ཕྱི་ནས་དབུགས་དབྱུང་བ་ཞེས་པ་ནི། ཇི་ལྟར་འཇིག་རྟེན་ན་གྲགས་པ་ལམ་འཕྲང་འཇིགས་པའི་ས་ནས་རྐུན་པོ་ལ་སོགས་པའི་འཚེ་བ་ལས་ཐར་ན་དབུགས་དབྱུང་བ་ཞེས་བྱ་བ་དེ་བཞིན་དུ། འདིར་ཡང་འཁོར་བའི་དགོན་པ་ན་རྣམ་པར་འཁྱམས་པའི་སེམས་ཅན་
ལས་དང་ཉོན་མོངས་པའི་རྐུན་པོས་འཚེ་བའི་འཇིགས་པ་ལས་ཐར་བ་ན་དབུགས་དབྱུང་བ་ཞེས་བྱའོ། །དེ་ལས་ཐར་ན་གཞན་དབུགས་དབྱུང་བར་བྱ་བའི་ས་མེད་དེ་དབུགས་དབྱུང་བ་གཅིག་ཏུ་ཟད་ན། ཅིའི་ཕྱིར་དབུགས་དབྱུང་བ་དུས་ཐོབ་ཅེས་མང་པོའི་ཚིག་ཏུ་སྨོས་ཤེ་ན། ཇི་ལྟར་འཇིག་རྟེན་པ་རྣམས་འཇིགས་པ་གཅིག་ལ་ཐར་ནས་འཇིགས་པ་དེ་ལས་དབྱུགས་ཕྱུང་མོད་ཀྱི། དེ་ལས་གཞན་པའི་འཇིགས་པ་རྣམས་ལས་མཐར་ན་དབུགས་མ་ཕྱུང་བའོ། །དེ་བཞིན་དུ་འདིར་ཡང་མི་དགེ་བ་གང་མི་མཐུན་པ་གེགས་སུ་གྱུར་པ་དེ་ལས་ཐར་ཏེ་དབུགས་ཕྱུང་ཡང་དེ་ལས་གཞན་པའི་གེགས་སུ་གྱུར་པ་རྣམས་མ་ཐར་ན་དེ་ལ་དབུགས་མ་ཕྱུང་བ་ཞེས་བྱ་སྟེ། དེ་བས་ན་དབུགས་དབྱུང་རྣམ་པ་དུས་ཞེས་སྨོས་སོ། །མཆོག་སྐྱེས་ནི་སྲས་རྣམས་ཏེ། མཆོག་ནི་ཆོས་ཀྱི་དབྱིངས་ཏེ་དེ་བཞིན་ཉིད་ཡིན་ལ་དེ་ལས་སྐྱེས་པ་ནི་བྱང་ཆུབ་སེམས་དཔའ་སྟེ། དེ་དག་དབུགས་ཕྱིན་པར་གྱུར་པའོ། །དེ་སྐད་གསོལ་ནས་བཅོམ་ལྡན་འདས། །རྣམ་པར་སྣང་མཛད་ཆེན་པོ་ཡིས། །དེ་ཚེ་ཕྱག་ན་རྡོ་རྗེ་ལ། །ཡིད་བསྡུས་དེ་ནི་ཉོན་ཞེས་གསུངས། །ཞེས་པ་ནས་སྟོང་པ་ཉིད་ཀྱི་ངོ་བོ་ཉིད་མེད་དོ་ཞེས་སྟོང་པའི་ཡེ་ཤེས་སྐྱེས་པ་དེའི་ཚེ་ཆོས་ཐམས་ཅད་ཀྱི་ངོ་བོ་ཉིད་མཉམ་པ་ཉིད་ཀྱིས་དབུགས་ཕྱིན་པ་ཡིན་ནོ་ཞེས་པའི་བར་དུ་ཕྱག་ན་རྡོ་རྗེས་གསོལ་པ་རྣམས་ཀྱི་ལན་བཅོམ་ལྡན་འདས་རྣམ་པར་སྣང་མཛད་ཀྱིས་བཀའ་སྩལ་བ་ཡིན་ནོ། །ཡིད་བསྡུས་དེ་ནི་ཉོན་ཞེས་པ་ནི་སྣོད་རྣམ་པ་བཞིའི་གཉེན་པོར་གསུངས་པ་སྟེ་སྔར་བཤད་དོ། །ནམ་བྱིས་པ་སོ་སོའི་སྐྱེ་བོ་དེ་དག་མི་དགེ་བའི་ལས་སྤངས་ཏེ་དགེ་བའི་ལས་བྱེད་པ་དེའི་ཚེ་དགེ་བས་དབུགས་ཕྱིན་པ་ཡིན་ནོ་ཞེས་པ་ནི་བྱིས་པ་ཕྱུགས་དང་འདྲ་བ་རྣམས་འཁོར་བ་ན་འཁྱམས་པ་ལས་འཁོར་བ་ལས་སྐྱོ་སྟེ་བསོད་ནམས་ཀྱི་འདུ་ཤེས་སྐྱེས་ན་སྨྱུང་བར་འདུག་ཅིང་སྦྱིན་པ་ལ་སོགས་པ་བྱེད་པ་ནི་དགེ་བས་དབུགས་ཕྱིན་བ་ཞེས་བྱའོ། །དེ་ལ་དགེ་བ་ཞེས་པ་ནི་དབུགས་དབྱུང་བ་གཞན་ཡང་དགེ་བ་ཡིན་ན། ཅིའི་ཕྱིར་འབའ་ཞིག་ལ་དགེ་བ་ཞེས་བྱ་ཞེ་ན། གཞན་ཡང་དགེ་བ་ཡིན་མོད་ཀྱི་འོན་ཀྱང་གཞན་རྣམས་ལ་སོ་སོའི་མིང་ཡོད་པས་འདི་ལ་དགེ་བ་ཞེས་བྱའོ། །ནམ་བདག་གི་ཁོ་ན་ཉིད་ཡང་དག་པ་ཇི་ལྟ་བ་བཞིན་རབ་ཏུ་ཤེས་པ་དེའི་ཚེ་བདག་ལ་
བརྟེན་ནས་དབུགས་ཕྱིན་པ་ཡིན་ནོ་ཞེས་པ་ནི། སྦྱིན་པ་ལ་སོགས་པའི་སེམས་བརྒྱད་སྤྱོད་པ་ན་དགེ་བའི་བཤེས་གཉེན་དང་ཕྲད་དེ་འཇིག་རྟེན་པ་རྣམས་ཀྱིས་བདག་ཏུ་བརྟགས་པའི་དངོས་པོ་ཇི་ལྟ་བུ་ཉིད་དུ་ཤེས་ནས། བདག་ལ་བརྟེན་ཞིང་འཇིག་རྟེན་པའི་ལས་རྣམས་གོམས་པར་བྱེད་པ་ནི་བདག་ལ་བརྟེན་ནས་དབུགས་ཕྱིན་པ་ཞེས་བྱའོ། །བདག་གི་དེ་ཁོ་ན་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་ཞེས་པ་ནི། སྟོང་པ་ཉིད་ཀྱི་རང་བཞིན་དུ་ཤེས་རབ་ཀྱིས་ཇི་ལྟ་བ་བཞིན་ཤེས་པ་ལ་ནི་མི་བྱའི་འཇིག་རྟེན་པའི་གཞུང་བཞིན་དུ་བདག་གིས་ངོ་བོར་བརྟགས་པ་དེ་ཕྱིན་ཅི་མ་ལོག་པར་ཤེས་པ་ལ་བྱའོ། །ནམ་ཕུང་པོ་ཡོངས་སུ་གཟུང་བ་བྱས་ཏེ། རང་གི་ངོ་བོ་ལ་རྣམ་པར་དཔྱད་ནས་བདག་ལ་བརྟེན་པ་ཡོངས་སུ་གཏོང་བ་དེའི་ཚེ་བདག་མེད་པས་དབུགས་ཕྱིན་པ་ཡིན་ནོ་ཞེས་པ་ནི། གང་ཟག་གི་བདག་མེད་པར་རྟོགས་ལ་ཕུང་པོར་བརྟགས་པ་ཡོད་པར་འཛིན་པ་དེ་ནི་བདག་མེད་པས་དབུགས་ཕྱིན་པ་ཞེས་བྱའོ། །ནམ་ཕུང་པོ་རྣམས་སྤངས་ནས་ཆོས་ཀྱི་དམིགས་པ་ལ་གནས་པ་དེའི་ཚེ་ཆོས་ཀྱིས་དབུགས་ཕྱིན་པ་ཡིན་ནོ་ཞེས་པ་ནི། ཕུང་པོར་བརྟགས་པ་ཡོད་པར་འཛིན་པ་དེ་ནི་དབུ་བ་དང་ཆུ་བུར་ལ་སོགས་པའི་ཚུལ་དུ་བཤིག་ན། ཕུང་པོར་བརྟགས་པའི་དངོས་པོ་ཡོད་པ་མ་ཡིན་གྱི་ཆོས་རྣམས་སོ་སོའི་མཚན་ཉིད་ཙམ་འབའ་ཞིག་ཡོད་པར་རྟོགས་པ་ནི་ཆོས་ཀྱི་དབུགས་ཕྱིན་པ་ཞེས་བྱའོ། །ནམ་ཆོས་རྣམས་སྤངས་མི་སྐྱེ་བ་ལ་གནས་པ་དེའི་ཚེ་ཆོས་ལ་བདག་མེད་པས་དབུགས་ཕྱིན་པ་ཡིན་ནོ་ཞེས་པ་ནི། ཕུང་པོ་ལ་སོགས་པའི་ཆོས་རྣམས་སྒྱུ་མ་དང་སྨིག་རྒྱུའི་ཚུལ་དུ་བཤིག་ན་ཡོད་པ་མ་ཡིན་ཏེ། རྣམ་པར་ཤེས་པ་ཙམ་དུ་ཟད་པར་རྟོགས་ལ་རྣམ་པར་ཤེས་པ་དེ་ཉིད་ཀྱང་ཐོག་མ་དང་ཐ་མའི་མཐའ་རྙེད་དེ་རང་བཞིན་མེད་པ་གཟོད་མ་ནས་མ་སྐྱེས་པར་རྟོགས་པ་དེ་ནི་ཆོས་ལ་བདག་མེད་པས་དབུགས་ཕྱིན་པ་ཞེས་བྱའོ། །ནམ་ཕུང་པོ་དང༌། ཁམས་དང༌། སྐྱེ་མཆེད་ཐམས་ཅད་དང༌། གཟུང་བ་དང༌། འཛིན་པ་དང༌། བདག་དང༌། སྲོག་ལ་སོགས་པ་དང༌། ཆོས་དང༌། མི་སྐྱེ་བ་དག་ཀྱང་སྟོང་པ་ཉིད་ཀྱི་ངོ་བོ་ཉིད་ཀྱི་
ཡང་ངོ་བོ་ཉིད་མེད་དོ་ཞེས་སྟོང་པའི་ཡེ་ཤེས་སྐྱེས་པ་དེའི་ཚེ་ཆོས་ཐམས་ཅད་ཀྱི་ངོ་བོ་ཉིད་མཉམ་པ་ཉིད་ཀྱིས་དབུགས་ཕྱིན་པ་ཡིན་ནོ་ཞེས་པ་ནི། ཕུང་པོ་ལ་སོགས་པའི་ཆོས་རྣམས་བདག་མེད་པར་རྟོགས་ཏེ་རྣམ་པར་ཤེས་པ་ཙམ་དུ་ཟད་པར་ཤེས་པ་དང༌། རྣམ་པར་ཤེས་པ་དེ་ཡང་གཟོད་མ་ནས་མ་སྐྱེས་པར་རྟོགས་ཏེ་སྟོང་པ་ཉིད་ཀྱི་རང་བཞིན་དུ་ཤེས་པའི་སྟོང་པའི་རང་བཞིན་དེ་ཡང་ངོ་བོ་ཉིད་མེད་པར་རྟོགས་པ་ནི་སྟོང་པ་ས་དང་པོའི་སེམས་ཀྱི་མཚན་ཉིད་སྟོང་པའི་ཡང་སྟོང་པ་སྟེ་མཉམ་པ་ཉིད་ཀྱིས་དབུགས་ཕྱིན་པ་ཞེས་བྱའོ། །དེ་རྣམས་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་ཕུན་སུམ་ཚོགས་པ་བཤད་པ་ལ་བྱ་སྟེ། རྒྱུ་ཕུན་སུམ་ཐོགས་པ་བཤད་པ་ཡང་དེ་འབའ་ཞིག་ཏུ་མ་ཟད་ཀྱི་གཞན་ཡང་རྒྱུའི་གནས་སྐབས་ནས་འབྱུང་བ། བྱང་ཆུབ་ནམ་མཁའི་མཚན་ཉིད་དེ། །རྟོག་པ་ཐམས་ཅད་སྤངས་པ་ཡིན། །གང་ཞིག་དེ་རྟོགས་འདོད་པ་དེས། །བྱང་ཆུབ་སེམས་དཔའ་ཞེས་བྱའོ། །ཞེས་པ་སྟེ་བླ་ན་མེད་པའི་བྱང་ཆུབ་དེ་རྟོགས་པར་འདོད་པ་དེ་ནི། ས་དང་པོ་མན་ཆད་རྣམས་འབའ་ཞིག་ལ་མི་བྱའི། ས་བཅུ་དང་ཀུན་དུ་བཟང་པོའི་ས་ལ་གནས་པའི་བྱང་ཆུབ་སེམས་དཔའ་ཡང་བླ་ན་མེད་པའི་བྱང་ཆུབ་རྟོགས་པར་འདོད་པ་སྟེ། དེ་བས་ན་བྱང་ཆུབ་སེམས་དཔའ་དེ་རྣམས་ཀྱི་སྤྱོད་པ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུར་རིག་པར་བྱའོ། །ད་ནི་འདི་དཔྱད་པར་བྱ་སྟེ། སྔགས་རྣམས་ཀྱི་སྤྱིའི་མཚན་ཉིད་ནི་བྱང་ཆུབ་ཀྱི་སེམས་སོ་ཞེས་གཞུང་ལས་གསུངས་ན། བྱང་ཆུབ་ཀྱི་སེམས་ནི། ཕུང་པོ་དང༌། ཁམས་དང༌། སྐྱེ་མཆེད་དང༌། གཟུང་བ་དང༌། འཛིན་པ་དང༌། ལས་དང༌། བྱ་བའི་རྣམ་པ་དང་བྲལ་བ་སྟོང་པ་ཉིད་ཀྱི་རང་བཞིན་དུ་ཡང་ངོ་བོ་ཉིད་མེད་པ་ཡིན་ལ། སྔགས་ནི་སངས་རྒྱས་དང༌། བྱང་ཆུབ་སེམས་དཔའ་རྣམས་དང༌། དེ་སྟོན་པར་བྱེད་པའི་སྒྲ་དང་ཡིག་འབྲུ་རྣམས་ཏེ། དེ་རྣམས་ཀྱང་མཆོག་དང༌། འབྲིང་དང༌། ཐ་མའི་ཐ་གྲུབ་པ་དང༌། ཞི་བ་
དང། རྒྱས་པ་དང༌། མངོན་སྤྱོད་ལ་སོགས་པའི་ལས་རྣམས་ཀྱི་བྱ་བ་བྱེད་དེ། དེ་ལྟར་མི་མཐུན་ན་དེ་རྣམས་ཇི་ལྟར་རིག་པར་བྱ་ཞེ་ན། དེའི་ཕྱིར་དེ་ནི། གསང་བ་པའི་བདག་པོ། །དེའི་ཚེ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་བཞི་བཅུས་རྟེན་ཅིང་འབྲེལ་བར་འབྱུང་བ་རྣམས་བསྒོམས་ཏེ་གསང་སྔགས་ཀྱི་ཚུལ་རྟོགས་པར་ཁོང་དུ་ཆུད་པར་འགྱུར་རོ་ཞེས་གསུངས་པ་སྟེ། ཡོང་ཀྱང་ཀུན་རྫོབ་ཀྱི་ཆོས་རྣམས་ནི་རིགས་པས་བརྟག་མི་བཟོད་དེ། དོན་དམ་པར་ན་སྟོང་པའི་རང་བཞིན་ཡིན་མོད་ཀྱི་འོན་ཀྱང་ཀུན་རྫོབ་ཏུ་སོ་སོའི་རྒྱུ་དང་འབྲས་བུ་ངེས་པའི་བྱ་བ་རྣམས་ཀྱང་བྱེད་པར་འགྱུར་ཏེ་མེད་ཅེས་བྱར་མི་རུང་ངོ༌། །དེ་ལྟར་སྟོང་པའི་རང་བཞིན་ལས་ཀུན་རྫོབ་ཏུ་ཡོད་པར་སྣང་བ་ནི་སྒྱུ་མ་ལ་སོགས་པ་དང་འདྲའོ། །དེ་བཞིན་དུ་སྔགས་ཀྱི་རང་བཞིན་བྱང་ཆུབ་ཀྱི་སེམས་དེ་ཡང་དོན་དམ་པར་སྟོང་པ་ཡིན་མོད་ཀྱི་ཆོས་ཀྱི་དབྱིངས་ཀྱི་བྱིན་གྱི་རླབས་དང༌། སྒྲུབ་པ་པོའི་སྦྱོར་བའི་མཐུས་གྲུབ་པའི་འབྲས་བུ་རྣམ་པ་སྣ་ཚོགས་ཀུན་རྫོབ་ཏུ་སྣང་ཞིང་མྱོང་བར་འགྱུར་ཏེ། དེ་རྣམས་ཀྱང་སྒྱུ་མ་ལ་སོགས་པའི་དཔེས་བཤད་པ་ནི། འདི་ལྟ་སྟེ། སྒྱུ་མ་དང༌། སྨིག་རྒྱུ་དང༌། རྨི་ལམ་དང་ཞེས་པ་ལ་སོགས་པ་ནས། གསང་བ་པའི་བདག་པོ་གཞན་ཡང༌། །ཇི་ལྟར་འགའ་ཞིག་བདག་ཉིད་ཀྱི། །ལག་ན་མགལ་མེ་ཐོགས་ནས་ནི། །བསྐོར་ན་འཁོར་ལོ་ལྟར་སྣང་བ། །དེ་བཞིན་སྟོང་པ་དག་ལས་འབྱུང༌། །ཞེས་པའི་བར་དུའོ། །དེ་ལ་སྒྱུ་མ་གང་ཞེ་ན། འདི་ལྟ་སྟེ། སྨན་དང་སྔགས་ཀྱིས་སྦྱོར་བ་བྱེད་པ་དག་གི་སྦྱོར་བ་ལས་དངོས་པོ་རྣམ་པ་ཐ་དད་པ་སྣ་ཚོགས་མིག་དང་ཡིད་འཕྲོག་པ་སྔོན་མ་མཐོང་བ་དག་ཀྱང་སྟོན་ཏེ། དེ་དག་ནི་ཕན་ཚུན་ཕྱོགས་བཅུར་འགྲོ་བ་དང་འོང་བ་མེད་དོ། །དེ་ཅིའི་ཕྱིར་ཞེ་ན། སྒྱུ་མ་ནི་རང་བཞིན་གྱིས་སྟོང་པའི་ཕྱིར་ཏེ། དེ་བཞིན་དུ་གསང་སྔགས་སྦྱོར་བ་བྱེད་པ་དག་གི་སྦྱོར་བ་ལས་ཐམས་ཅད་འབྱུང་ངོ་ཞེས་པ་ནི། ཇི་ལྟར་སྒྱུ་མ་མཁན་གྱིས་གསང་སྔགས་དང་སྨན་གྱི་སྦྱོར་བ་ལས་བ་ལང་དང་རྟ་ལ་སོགས་པའི་དངོས་པོ་རྣམ་པ་མང་པོས་ཡིད་དང་མི་ཆགས་པར་བྱེད་པར་སྣང་སྟེ།
དེ་རྣམས་ཀྱང་བ་གླང་རྟ་ལ་སོགས་པའི་རང་བཞིན་དུ་ཡོད་པ་མ་ཡིན་པས་ན་ཕྱོགས་བཅུར་འགྲོ་བ་དང་འོང་བ་མེད་དེ། འོན་ཀྱང་དེ་དག་བ་གླང་ལ་སོགས་པའི་བྱ་བ་ཡང་བྱེད་དོ། །དེ་བཞིན་དུ་སྔགས་ཀྱི་རང་བཞིན་བྱང་ཆུབ་ཀྱི་སེམས་དེ་སྟོང་པ་ཉིད་ཡིན་ཀྱང་སྦྱོར་བ་ལས་སྔགས་ཀྱི་དངོས་གྲུབ་ཀྱི་སྦྱོར་བ་སྦྱར་ན་རབ་དང་འབྲིང་ལ་སོགས་པའི་གྲུབ་པའི་འབྲས་བུ་རིག་འཛིན་དང༌། ནམ་མཁའ་ལ་འགྲོ་བ་དང་མི་སྣང་བར་འགྲོ་བ་ལ་སོགས་པ་རྣམ་པ་སྣ་ཚོགས་སུ་སྣང་ཞིང་མྱོང་པར་བྱེད་དོ། །གསང་བ་པའི་བདག་པོ་གཞན་ཡང༌། སྨིག་རྒྱུ་ནི་རང་བཞིན་གྱིས་སྟོང་པ་སྟེ་དེ་ཡང་འདུ་ཤེས་ཀྱིས་ཐ་སྙད་ཙམ་དུ་འདོགས་ཤིང་ཐ་སྙད་སྒྲུབ་པར་བྱེད་དོ། །དེ་བཞིན་དུ་འདུ་ཤེས་འདི་ཡང་གསང་སྔགས་སོ་ཞེས་ཐ་སྙད་དུ་འདོགས་ཤིང་ཐ་སྙད་ཀྱང་སྒྲུབ་པར་བྱེད་དོ་ཞེས་པ་ནི། དེ་ལྟར་སྔགས་ཀྱི་འབྲས་བུ་སྒྱུ་མ་དང་འདྲ་ན་སྔགས་ཀྱི་དངོས་པོ་ཅི་ཞིག་ཅེ་ན། སྨིག་རྒྱུ་ལྟ་བུ་སྟེ། ཇི་ལྟར་འབྲོག་དགོན་པར་སྨིག་རྒྱུ་ལ་མིའམ། རི་དགས་རྣམས་ཀྱིས་ཆུར་འདུ་ཤེས་ཏེ། དེ་ན་ཆུ་ཡོད་པ་མ་ཡིན་ཡང་སྨིག་རྒྱུ་དེའི་རྣམ་པའི་རྣམ་པར་ཤེས་པ་བསྐྱེད་ཅིང་སྐོམ་པ་ཡང་ཆུས་ངོམས་པའི་བྱ་བ་བྱེད་དེ་དེ་བཞིན་དུ་སྔགས་དེ་ཡང་དངོས་པོ་ཡོད་པ་མ་ཡིན་པས་འདུ་ཤེས་ཙམ་དུ་ཟད་མོད་ཀྱི། འོན་ཀྱང་སྔགས་ཀྱི་དངོས་གྲུབ་ཀྱི་འབྲས་བུ་བསྐྲུན་པའི་བྱ་བ་བྱེད་དོ། །དེ་བཞིན་དུ་ཡང༌། གསང་བ་པའི་བདག་པོ་གཞན་ཡང༌། རྨི་ལམ་ན་བདག་ཉིད་ཉིན་གཅིག་དང༌། ཐང་ཅིག་དང༌། སྐད་ཅིག་དང༌། ཡུད་ཙམ་དང༌། ལོ་ལ་སོགས་པར་འདུག་ཅིང་བདེ་བ་དང་སྡུག་བསྔལ་རྣམ་པ་མང་པོ་མྱོང་བར་མཐོང་ལ། སད་ན་ཅི་ཡང་མི་མཐོང་བ་དེ་བཞིན་དུ་གསང་སྔགས་ཀྱི་ཚུལ་འདི་ཡང་རྨི་ལམ་ལྟ་བུར་ཁོང་དུ་ཆུད་པར་བྱའོ་ཞེས་པ་ནི། སྔར་སྔགས་བསྒྲུབས་པའི་འབྲས་བུའི་དཔེ་སྒྱུ་མ་ལས་བླངས་པ་དེ་སྒྱུ་མ་ནི་ཡུན་རིང་དུ་འདུག་པ་མ་ཡིན་གྱི་སྐད་ཅིག་ཡུད་ཙམ་དག་ཏུ་ཟད་ལ་སྔགས་ཀྱི་འབྲས་བུ་ནི་བསྐལ་བ་ལ་སོགས་པར་ཡུན་རིང་དུ་འདུག་ན་ཇི་ལྟར་དཔེར་རུང་ཞེ་ན། རྨི་ལམ་གྱི་དཔེས་ཡུན་རིང་དུ་གནས་པར་བསྟན་པ་སྟེ། ཇི་ལྟར་རྨི་ལམ་ན་ཡུལ་གྱི་དངོས་པོ་མེད་པར་སྐད་ཅིག་དང༌། ཉི་མ་དང༌། ཞག་དང༌། ལོ་ལ་
སོགས་པར་ཡུལ་རྣམས་སྤྱོད་ཅིང་བདེ་བ་དང་སྡུག་བསྔལ་རྣམ་པ་མང་པོ་མྱོང་ཞིང་རིགས་པར་མཐོང་སྟེ་དེ་ལས་སད་ན་དངོས་པོ་གང་ཡང་མེད་དོ། །དེ་ལྟར་ཡང་ཅིས་མངོན་ཞེ་ན། ཏིང་ངེ་འཛིན་གྱི་རྒྱལ་པའི་མདོ་ལས་ཀྱང་གསུངས་པ། ཇི་ལྟར་བུ་མོ་གཞན་ནུའི་རྨི་ལམ་ན། །བུ་ཕོ་བྱུང་ཞིང་ཤི་བ་དེ་མཐོང་ནས། །བྱུང་ན་དགའ་ཞིང་ཤི་ན་མི་དགའ་ལྟར། །ཞེས་པ་སྟེ་དེ་ལྟར་རྨི་ལམ་ན་ཡུན་རིང་པོར་སྲིད་དོ། །དེ་བཞིན་དུ་སྔགས་བསྒྲུབས་པའི་འབྲས་བུ་ཡང་རང་བཞིན་མེད་པ་ལས་རྣལ་འབྱོར་པས་བསྒྲུབས་ན་གྲུབ་པའི་འབྲས་བུ་རྣམ་པ་སྣ་ཚོགས་ཚེ་རབས་དང་བསྐལ་པ་ལ་སོགས་པར་གནས་པར་འགྱུར་རོ། །གསང་བ་པའི་བདག་པོ་གཞན་ཡང༌། །གསང་སྔགས་ཀྱི་དངོས་གྲུབ་འབྱུང་བ་ནི་གཟུགས་བརྙན་ལྟ་བུར་འགྱུར་པར་རིག་པར་བྱ་སྟེ་ཞེས་པ་ནི། དེ་ལྟར་སྔགས་གྲུབ་པ་དེ་རྣམས་དངོས་པོ་མེད་པར་ཡང་རྟེན་ཅིང་འབྲེལ་པར་འབྱུང་པ་ལས་བྱུང་ན་སྒྲུབ་པ་པོ་ཐམས་ཅད་ཀྱིས་གྲུབ་པ་ཅིའི་ཕྱིར་མི་འཐོབ་ཅེ་ན། ཇི་ལྟར་གཟུགས་བརྙན་དེ་རྡོ་དང་ཤིང་གཞན་ལས་མི་འབྱུང་གི །མེ་ལོང་གི་དཀྱིལ་འཁོར་དག་པ་ལས་འབྱུང་པར་འགྱུར་རོ། །དེ་བཞིན་དུ་སྔགས་ཀྱི་གྲུབ་པ་དེ་ཡང་སྒྲུབ་པ་པོ་ཐམས་ཅད་ལ་མི་འབྱུང་གི །གང་བྱང་ཆུབ་ཀྱི་སེམས་བསྒོམས་ཤིང་རྒྱུད་དག་པར་གྱུར་པ་དེ་ལ་འབྱུང་པར་བསྟན་པའོ། །གསང་བ་པའི་བདག་པོ་གཞན་ཡང༌། གྲུབ་པའི་གྲུབ་གནས་ནི་དྲི་ཟའི་གྲོང་ཁྱེར་ལྟ་བུར་བལྟའོ་ཞེས་པ་ནི། ཇི་ལྟར་དྲི་ཟ་རྣམས་ཀྱི་གྲོང་ཁྱེར་དྲི་ཟ་དེ་རྣམས་ཀྱིས་གང་དུ་བསམས་པ་དེར་གྲོང་ཐལ་བྱུང་དུ་འབྱུང་བར་འགྱུར་ཏེ། དེ་བཞིན་དུ་གསང་སྔགས་གྲུབ་པ་དེ་ཡང་བདག་ཉིད་ཀྱི་ལུས་རིག་འཛིན་ལ་སོགས་པར་གྲུབ་པའི་ཕྱིར་བསྒྲུབས་ཀྱི་གཞན་གྱི་ཕྱིར་མ་བསྒྲུབས་ཀྱང་ནམ་རིག་འཛིན་ལ་སོགས་པ་གྲུབ་ན་ལྷའི་གཞལ་མེད་ཁང་དཔག་བསམ་གྱི་ཤིང་དང༌། གྲིབ་མ་དང༌། ཤེལ་གྱི་བྲག་ལས་བདུད་རྩིའི་ཆུ་འབབ་པ་དང༌། རིན་པོ་ཆེའི་གསིང་མལ་སོགས་པའི་གནས་རྣམས་བསམས་པ་ཙམ་གྱིས་འགྲུབ་པར་འགྱུར་བ་བསྟན་པའོ། །གསང་བ་པའི་བདག་པོ་གཞན་ཡང་གསང་སྔགས་ཀྱི་སྒྲ་ནི་བྲག་ཅ་ལྟ་བུར་རིག་པར་བྱ་སྟེ། དཔེར་ན་སྒྲ་ལ་བརྟེན་ནས་བྲག་ཅ་འབྱུང་པ་ལྟར་གསང་སྔགས་
ཀྱི་ཚུལ་འདི་ཡང་དེ་དང་འདྲ་པར་རིག་པར་བྱའོ་ཞེས་པ་ནི། ཇི་ལྟར་སྒྲའི་རྐྱེན་གྱིས་བྲག་ཅ་འབྱུང་བས་དངོས་པོ་ཡོད་པ་མ་ཡིན་ཡང་སྒྲར་འབྱུང་བ་དེ་བཞིན་དུ་གསང་སྔགས་ཀྱི་སྒྲ་ཡང་སྔགས་ཀྱི་རང་བཞིན་གྱིས་སྟོང་མོད་ཀྱི། སྒྲུབ་པའི་རྐྱེན་གྱིས་སྒྲ་དེ་འབྱུང་བ་ནི་དཔེར་ན་བྲག་ཅ་དང་འདྲ་བར་བསྟན་པའོ། །གསང་བ་པའི་བདག་པོ་གཞན་ཡང༌། ཟླ་བ་ཤར་ན་ཆུའི་ནང་དུ་གཟུགས་བརྙན་མཐོང་ནས་ཆུ་ཟླ་ཞེས་བརྗོད་པ་དེ་བཞིན་དུ། སྔགས་པ་དེ་ཉིད་ཀྱང་ཆུ་ཟླ་བཞིན་དུ་རིག་སྔགས་འཆང་ཞེས་བརྗོད་དོ་ཞེས་པ་ནི། ཟླ་བ་ཤར་བའི་གཟུགས་བརྙན་ཆུའི་ནང་དུ་འབྱུང་པ་དེ་ནི་ཟླ་བའི་རང་བཞིན་དེ་ལས་མི་གཞན་ནོ། །དེ་བཞིན་དུ་སྔགས་གྲུབ་པའི་རིག་འཛིན་དེ་ཡང་རིག་འཛིན་གྱི་ལུས་བཟང་པོ་ལ་སོགས་པ་ནི་སྒྲུབ་པའི་གཟུགས་དེ་ལས་གཞན་མ་ཡིན་ཏེ། གཟུགས་དེ་ཉིད་ལས་འགྱུར་མོད་ཀྱི། །འོན་ཀྱང་རིག་འཛིན་ཞེས་བརྗོད་དོ་ཞེས་པའོ། །གསང་བ་པའི་བདག་པོ་གཞན་ཡང༌། །ཇི་ལྟར་ཆར་པ་བབ་པ་ན། །ཆུ་ཡི་ཆུ་བུར་རྣམས་འབྱུང་བ། །དེ་བཞིན་གསང་སྔགས་གྲུབ་པ་ཡི། །སྤྲུལ་པ་རྣམ་པ་སྣ་ཚོགས་འདོད། །ཅེས་པ་ནི་སྔགས་གཅིག་པུ་ལས་གྲུབ་པའི་འབྲས་བུ་རྣམ་པ་མང་པོར་ཇི་ལྟར་འགྱུར་ཞེ་ན། ཆུའི་ཆུ་བུར་གྱི་དཔེས་སྔགས་དེ་གཅིག་པུ་ཡིན་ཡང་གྲུབ་པའི་འབྲས་བུ་རྣམ་པ་མང་པོ་འབྱུང་པར་བསྟན་པ་སྟེ། ཇི་ལྟར་ཆར་པ་བབ་པ་ན་ཆུ་གཅིག་པུ་དེ་ལས་ཆུའི་ཆུ་བུར་ཆེ་ཕྲ་ལ་སོགས་པ་རྣམས་པ་མང་པོ་འབྱུང་བ་དེ་བཞིན་དུ་སྔགས་གཅིག་པུ་ལས་ཀྱང་གྲུབ་པའི་འབྲས་བུ་རྣམ་པ་དུ་མ་འབྱུང་ངོ༌། །གསང་བ་པའི་བདག་པོ་གཞན་ཡང༌། སེམས་ཅན་མེད་ཅིང་སྲོག་དང་ནི། །བྱེད་པ་པོ་ཡང་མེད་པ་སྟེ། །དངོས་པོ་ཐམས་ཅད་སྟོང་ཉིད་ལ། །འཁྲུལ་པ་ཁོ་ན་སྣང་བར་ཟད། །ཅེས་པ་ནི། དེ་ལྟར་སྔགས་ཀྱི་རང་བཞིན་སྟོང་པ་ཉིད་དེ་སེམས་ཅན་ནམ་སྲོག་གམ་བྱེད་པའི་མཁན་པོ་མེད་དེ། སྟོང་པ་ཉིད་ཡིན་ཀྱང་གྲུབ་པའི་འབྲས་བུ་ལ་སོགས་པ་ཀུན་དུ་སྣང་བ་ནི་འཁྲུལ་པ་སྣང་བར་བསྟན་པའོ། །གསང་བ་པའི་བདག་པོ་གཞན་ཡང༌། ཇི་ལྟར་འགའ་ཞིག་བདག་ཉིད་ཀྱི། །ལག་ན་མགལ་མེ་ཐོགས་ནས་ནི། །བསྐོར་ན་འཁོར་ལོ་ལྟར་སྣང་བ། །དེ་བཞིན་སྟོང་པ་དག་ལས་འབྱུང༌། །ཞེས་པ་ནི་འཁྲུལ་པ་ལ་སྣང་
བའི་དཔེའོ། །གསང་བ་པའི་བདག་པོ། འདི་ནི་ཐེག་པ་ཆེན་པོའི་གཞི། །ཞེས་པ་ནས། ཡེ་ཤེས་སྣ་ཚོགས་ཆེར་འབྱུང་བ། །ནོར་གྱི་དབྱིག་འདི་ཤེས་ན་ནི། །ཀུན་གྱི་སེམས་ཀྱི་བྱེ་བྲག་ཀྱང༌། །ཇི་བཞིན་ཡང་དག་རབ་ཏུ་ཤེས། །ཞེས་པའི་བར་དུ་ས་དང་པོའི་བྱང་ཆུབ་ཀྱི་སེམས་མཉམ་པ་ཉིད་རྟོགས། པ་དེའི་རྗེས་སུ་སྔགས་པ་བཤད་པ་སྟེ། ཐེག་པ་ཆེན་པོའི་གཞི་ཞེས་པ་ནི་བྱང་ཆུབ་ཀྱི་སེམས་དེ་ཇི་ལྟ་བ་བཞིན་དུ་ཤེས་པ་སྟེ། ཐེག་པ་ཆེན་པོ་ནི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའོ། །བྱང་ཆུབ་ཀྱི་སེམས་དེ་ཤེས་ན་འཇིགས་རྟེན་པའི་སེམས་བརྒྱད་ནས་ས་རབ་ཏུ་དགའ་བའི་བར་གྱི་རིམ་པ་དེ་རྣམས་རབ་ཏུ་ཤེས་པས་ན་དེའི་གནས་སོ་ཞེས་པའོ། །མི་མཉམ་པ་དང་མཉམ་པའི་གཞི། །ཞེས་པ་ལ་མི་མཉམ་པ་ནི་ནམ་མཁའ་སྟེ་ནམ་མཁའ་ལ་མཐའ་མེད་པས་གང་དང་ཡང་མི་མཉམ་ལ་དེ་དང་མཉམ་པ་ནི་ཆོས་ཀྱི་དབྱིངས་སྟོང་པ་ཉིད་དེ། སྟོང་པ་ཉིད་ཀྱི་རང་བཞིན་དེ་ཤེས་པ་ནི་མི་མཉམ་པ་དང་མཉམ་པའི་གནས་སོ། །ངེས་པའི་གཞི་ཞེས་པ་ནི་ཆོས་རྣམས་སྟོང་པ་ཉིད་ཀྱི་རང་བཞིན་དུ་ཕྱིན་ཅི་མ་ལོག་པར་ངེས་པར་ཤེས་པའོ། །ཡང་དག་པར་རྫོགས་པའི་སངས་རྒྱས་ཀྱི་གཞི་ཞེས་པ་ནི་ས་དང་པོའི་བྱང་ཆུབ་ཀྱི་སེམས་ཆོས་ཐམས་ཅད་མཉམ་པ་ཉིད་དུ་རྟོགས་པ་དེ་བླ་ན་མེད་པའི་བྱང་ཆུབ་དང་ཐ་མི་དད་དེ་རོ་གཅིག་པས་ན་ཡང་དག་པར་རྫོགས་པའི་སངས་རྒྱས་སོ་ཞེས་པའོ། །མཐར་གྱིས་ཐེག་པ་ཆེན་པོ་ལ་འཛེག་པའི་གཞི་སྟེ་ཞེས་པ་ནི། བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་འཇིག་རྟེན་པ་དང་འཇིགས་རྟེན་ལས་འདས་པའི་སེམས་འོག་མ་རྣམས་ཀྱང་ས་དང་པོའི་བྱང་ཆུབ་ཀྱི་སེམས་འདིའི་ནང་དུ་འདུས་ལ་ས་དང་པོ་ནས་ཀུན་དུ་བཟང་པོའི་ས་མན་ཆད་ཀྱི་སེམས་ཀྱང་འདི་ལས་ཐ་མི་དད་པའི་ཕྱིར་དེ་རྣམས་ཀྱི་གནས་སུ་གྱུར་པས་ན་མཐར་གྱིས་ཐེག་པ་ཆེན་པོ་ལ་འཛེག་པའི་གཞི་ཞེས་པའོ། །ཡེ་ཤེས་སྣ་ཚོགས་ཆེར་འབྱུང་བ། །ནོར་གྱི་དབྱིག་འདི་ཤེས་ན་ནི། །ཀུན་གྱི་སེམས་ཀྱི་བྱེ་བྲག་ཀྱང༌། །ཇི་བཞིན་ཡང་དག་རབ་ཏུ་ཤེས། །ཞེས་པ་ནི་ས་དང་པོའི་བྱང་ཆུབ་ཀྱི་སེམས་དེ་ཐམས་ཅད་མཁྱེན་པའི་ཡེ་ཤེས་འབྱུང་བའི་གཙོ་བོ་ཡིན་པས་ཡེ་ཤེས་ནས་ཚོགས་ཆེ་འབྱུང་བ་ཡིན་ལ། དེ་ལེགས་པར་ཤེས་ན་རྣམ་པ་རྣམས་མཛད་ཀྱི་རྒྱུ་དང་འཇིགས་རྟེན་དང་འཇིགས་རྟེན་ལས་འདས་པའི་སེམས་ཀྱི་ཁྱད་པར་ཐམས་
ཅད་རབ་ཏུ་ཤེས་པར་གྱུར་པ་བསྟན་པའོ། །བཅོམ་ལྡན་འདས་རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས་སེམས་ཀྱི་ཁྱད་པར་རིམ་པར་ཕྱེ་བ་དང་པོའོ།། །།ད་ནི་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཐམས་ཅད་མཁྱེན་པའི་ཡེ་ཤེས་དེས་མཐའ་ཡས་པའི་སེམས་ཅན་གྱི་ཁམས་རྣམས་ཚུལ་ནས་ཚོགས་དང་བསམ་པ་སྣ་ཚོགས་དང་ཐབས་སྣ་ཚོགས་ཀྱིས་བླ་ན་མེད་པར་བསྒྲལ་བའི་ཕྱིར་སྔོན་གྱི་སྨོན་ལམ་གྱི་ཤུགས་ཀྱིས་ལྷུན་གྱིས་གྲུབ་པ་ཉིད་དུ་སྐུ་མཉམ་པ་ཉིད་མི་ཟད་པའི་རྒྱན་གྱི་འཁོར་ལོས་ཁམས་གསུམ་ཐམས་ཅད་དུ་ཁྱབ་པར་མཛད་པ། བཅོམ་ལྡན་འདས་ཀྱི་རང་བཞིན་གྱི་དཀྱིལ་འཁོར་དེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་ཀུན་དུ་བཟང་པོ་དང༌། ཕྱག་ན་རྡོ་རྗེ་ལ་སོགས་པའི་ཡོངས་སུ་དག་པ་རྣམས་ཀྱིས་མངོན་སུམ་དུ་མཐོང་ཞིང་སྤྱོད་ཡུལ་དུ་འགྱུར་ན། འགྲོ་བ་འོག་མ་རྣམས་ཀྱིས་བཅོམ་ལྡན་འདས་ཀྱི་སྐུ་ལ་སོགས་པའི་འཁོར་ལོ་དེ་སྤྱོད་ཡུལ་དུ་མ་གྱུར་ཏེ། སེམས་ཅན་དེ་རྣམས་ཀྱི་དོན་དུ་སྐུ་ལ་སོགས་པའི་འཁོར་རྣམས་དཀྱིལ་འཁོར་དང་སྔགས་དང་ཕྱག་རྒྱ་ལ་སོགས་པར་བྱིན་བརླབ་པར་བཅོམ་ལྡན་འདས་ལ་ཕྱག་ན་རྡོ་རྗེས་གསོལ་པ་འཆད་དེ། གསོལ་བ་དེ་ཡང་དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། བཅོ་ལྡན་འདས་གསང་སྔགས་སྤྱོད་པའི་ཚུལ་སྙིང་རྗེ་ཆེན་པོའི་སྙིང་པོ་འབྱུང་བ་དཀྱིལ་འཁོར་གྱི་རྒྱལ་པོ་ཆེན་པོ་ཡོངས་སུ་རྫོགས་པར་བགྱི་པའི་སླད་དུ་བཤད་དུ་གསོལ། དེ་ནི་མ་འོངས་པའི་དུས་ན་སེམས་ཅན་མང་པོ་དག་གི་དོན་དང་ཕན་པ་དང་བདེ་པར་འགྱུར་ལགས་སོ་ཞེས་པའི་བར་དུ་སྟེ། བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་ནས་ཆོས་ཀྱི་དབྱིངས་བསམ་གྱིས་མི་ཁྱབ་པ་སེམས་ཀྱི་ས་ལས་འདས་པ་དེ་ཐུགས་སུ་ཆུད་ནས་སེམས་ཅན་རྣམས་སོ་སོའི་དད་པ་དང་རྗེས་སུ་མཐུན་ལ། སོ་སོའི་བསམ་པ་ཡོངས་སུ་རྫོགས་པར་བྱེད་པའི་སྐུ་ལ་སོགས་པའི་འཁོར་ལོས་སེམས་ཅན་གྱི་ཁམས་ཐམས་ཅད་དུ་ཁྱབ་པར་རྣམ་པར་སྤྲུལ་པ་ཕྱག་ན་རྡོ་རྗེས་ཇི་
ལྟར་མཐོང་ཞིང་རྟོགས་པ་དེ་བཅོམ་ལྡན་འདས་ལ་སླར་བཟླས་ཏེ་གསོལ་པ་ཡིན་ནོ། །དེ་ལྟར་སླར་གསོལ་པ་ཡང་སྟོན་པས་ཅི་བཤད་པ་རྣམས་ཉན་པ་པོས་ཁོང་དུ་ཆུད་པའི་ཚུལ་གྱིས་སླར་མཉན་ན་སྟོན་པ་པོ་སྤྲོ་བ་དང་སྐབས་འོག་མན་དང་མཚམས་སྦྱར་པ་ལ་ཡང་བདེ་བའི་ཕྱིར་རོ། །ངོ་མཚར་ལགས་སོ་ཞེས་པ་ནི་དེ་ལྟར་སྟོང་པ་ཉིད་བརྗོད་པ་དང་རྟོགས་པ་ལས་འདས་པ་ཐུགས་སུ་ཆུད་ཀྱང་སྐུ་ལ་སོགས་པའི་རྒྱན་གྱིས་ཚུལ་སྣ་ཚོགས་དང་བསམ་པ་སྣ་ཚོགས་དང་ཐབས་སྣ་ཚོགས་ཀྱིས་སྤྲུལ་པ་དེ་ངོ་མཚར་ཆེའོ། །བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་པའི་ཞེས་པ་ནི་ཆོས་ཀྱི་དབྱིངས་བསམ་གྱིས་མི་ཁྱབ་པ་དེ་གཞན་ལས་མཉན་ནས་ཐུགས་སུ་ཆུད་པ་མ་ཡིན་གྱི་བཅོམ་ལྡན་འདས་ཉིད་ཀྱི་ཐུགས་སུ་ཆུད་པ་ལ་བྱའོ། །བཅོམ་ལྡན་འདས་ཀྱང་གསང་སྔགས་ཀྱི་སྤྱོད་པའི་ཚུལ་སྙིང་རྗེ་ཆེན་པོ་སྙིང་པོ་འབྱུང་བའི་དཀྱིལ་འཁོར་གྱི་རྒྱལ་པོ་ཆེན་པོ་ཡོངས་སུ་རྫོགས་པར་བགྱི་བའི་སླད་དུ་བཤད་དུ་གསོལ་དེ་ནི་མ་འོངས་པའི་དུས་ན་སེམས་ཅན་མང་པོ་དག་གི་དོན་དང་ཕན་པ་དང་བདེ་པར་འགྱུར་ལགས་སོ་ཞེས་པ་ནི་རང་བཞིན་གྱི་དཀྱིལ་འཁོར་སྐུ་ལ་སོགས་པའི་འཁོར་ལོ་དེ་བདག་ཅག་གིས་རྟོགས་ཤིང་སྤྱོད་ཡུལ་དུ་གྱུར་ན་ཡང་མ་འོངས་པའི་འགྲོ་བ་རྣམས་ཀྱི་དོན་དུ་སྐུ་ལ་སོགས་པའི་འཁོར་ལོ་དེ་རྣམས་དཀྱིལ་འཁོར་དང་སྔགས་དང་ཕྱག་རྒྱའི་སྒོ་ནས་འགྲོ་བ་དེ་རྣམས་ཀྱི་སྤྱོད་ཡུལ་དུ་འགྱུར་པར་བྱིན་གྱིས་བརླབ་ཏུ་གསོལ་བའོ། །སྙིང་རྗེ་ཆེན་པོ་འབྱུང་བ་ཞེས་པ་ནི་དཀྱིལ་འཁོར་དེ་སྙིང་རྗེ་ཆེན་པོ་ལས་འབྱུང་བ་ལ་བྱའོ། །དཀྱིལ་འཁོར་ཞེས་པ་ནི་འོག་ནས་གཞུང་ཉིད་ལས་འཆད་དོ། །རྒྱལ་པོ་ཞེས་པ་ནི་དེ་ལས་གཞན་པའི་བྱང་ཆུབ་སེམས་དཔའ་ལ་སོགས་པའི་དཀྱིལ་འཁོར་ཀུན་ཀྱང་དཀྱིལ་འཁོར་ཆེན་པོ་འདིའི་ནང་དུ་འདུས་པས་ན་རྒྱལ་པོ་ཞེས་བྱའོ། །ཡོངས་སུ་རྫོགས་པར་བགྱི་བའི་སླད་དུ་ཞེས་པ་ནི་དཀྱིལ་འཁོར་གྱི་སྒོ་ནས་སྒྲུབ་ཅིང་ལྷ་མཉེས་པར་བྱའི་སྤྱོད་པ་རྣམ་པ་བཅུ་དྲུག་གིས་ལྷ་མཉེས་པར་བྱ་བ་ཡང་སྒྲུབ་པའི་སྒོ་ནས་བཟླས་པའི་ཡན་ལག་བཞི་དང་རང་གི་སེམས་ཡོངས་སུ་སྦྱང་བ་ལ་སོགས་པའི་སྤྱོད་པས་ལྷ་མཉེས་པར་བྱས་ཏེ། རིག་འཛིན་ལ་སོགས་པའི་གྲུབ་པ་ཐོབ་ནས་རིམ་གྱིས་སང་རྒྱས་སུ་འགྲུབ་པ་དང༌། རང་གི་སེམས་ཡོངས་
སུ་སྦྱངས་པས་མངོན་པར་ཤེས་པ་དང་ཕ་རོལ་ཏུ་ཕྱིན་པ་ལ་སོགས་པའི་སྤྱོད་པ་རྫོགས་ནས་ཐམས་ཅད་མཁྱེན་པའི་ཡེ་ཤེས་རྙེད་པར་གྱུར་པ་ནི་དཀྱིལ་འཁོར་ཡོངས་སུ་རྫོགས་པའོ། །མ་འོངས་པའི་དུས་ན་སེམས་ཅན་མང་པོ་དག་གི་དོན་དང་ཕན་པ་དང་བདེ་པར་འགྱུར་པའི་ཕྱིར་གསང་སྔགས་སྤྱོད་པའི་ཚུལ་དེ་བཤད་དུ་གསོལ་ཞེས་སྤྱར་ཏེ་མ་འོངས་པའི་སེམས་ཅན་དེ་རྣམས་ཀྱིས་དཀྱིལ་འཁོར་ཡོངས་སུ་རྫོགས་པའི་མཚན་ཉིད་ཅན་ཐམས་ཅད་མཁྱེན་པའི་ཡེ་ཤེས་དེ་ཐོབ་པར་བྱ་བའི་ཕྱིར་དཀྱིལ་འཁོར་དེ་བཤད་དུ་གསོལ་ཞེས་པ་སྟེ་དོན་དང་ཞེས་པ་ནི། ཐམས་ཅད་མཁྱེན་པའི་ཡེ་ཤེས་ཐོབ་པའི་དོན་གྱི་ཕྱིར་རོ། །ཕན་པ་དང་ཞེས་པ་ནི་ཚེ་ཕྱི་མ་ལ་ཕན་པའི་ཕྱིར་རོ། །བདེ་བར་འགྱུར་ཞེས་པ་ནི་ཚེ་འདི་ལ་བདེ་བའི་ཕྱིར་རོ། །ཡང་ན་དོན་དང་ཞེས་པ་ནི་ཕན་པ་དང་བདེ་པའི་དོན་ལ་བྱའོ། །གསང་སྔགས་སྤྱོད་པའི་ཚུལ་ཞེས་པ་ལ་གསང་སྔགས་ཀྱི་སྤྱོད་པ་ནི་དཀྱིལ་འཁོར་དང་བསྒྲུབ་པ་ལ་སོགས་པའོ། །དེ་དག་ཉིད་ཚུལ་ཏེ་ཚུལ་ཞེས་པ་ནི་རྒྱ་གར་སྐད་ཀྱི་གཞུང་དང་སྦྱར་ན་འགྲོ་བའམ་ཐོབ་པ་ལ་བྱ་སྟེ་གསང་སྔགས་ཀྱི་སྤྱོད་པ་དེས་བླ་ན་མེད་པའི་སང་རྒྱས་སུ་འགྲོ་བའམ་ཐོབ་པ་དེ་བཤད་དུ་གསོལ་ཞེས་པའོ། །དེ་ནས་བཅོམ་ལྡན་འདས་རྣམ་པར་སང་མཛད་ཀྱི་ཐམས་ཅད་དང་ལྡན་པའི་འཁོར་གྱི་དཀྱིལ་ནག་པ་ཞེས་པ་ལ་ནི་ནི་ངེས་པ་ཨ་ཡ་ཐོབ་པའམ་འགྲོ་བའོ། །འཁོར་ལ་གཟིགས་ནས་ཞེས་པ་ནི་བྱང་ཆུབ་སེམས་དཔའི་འཁོར་དེ་དག་གི་ནང་ན་གཡེང་བ་ཡོད་དམ་མེད་པ་དང༌། ཉན་པ་པོ་སྣོད་དུ་མ་གྱུར་པ་ཡོད་དམ་མེད་བརྟགས་པའི་ཕྱིར་གཟིགས་པ་ལ་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་འཁོར་ནི་ཡོངས་སུ་དག་པ་ཤ་སྟག་ཡིན་ན་ཅིའི་ཕྱིར་གཡེང་བ་དང་སྣོད་དུ་མ་གྱུར་པ་སྲིད་ཅེ་ན། དེའི་དགོངས་པ་ནི་འདི་ཡིན་ཏེ། བཅོམ་ལྡན་འདས་ཀྱིས་འཁོར་བྱང་ཆུབ་སེམས་དཔའ་དེ་རྣམས་ལ་གཡེང་པ་དང་སྣོད་དུ་མ་གྱུར་པ་མེད་མོད་ཀྱི། མ་འོངས་པའི་དུས་ན་ཉན་པ་རྣམས་ལ་དེ་ལྟ་བུ་སྲིད་པས་དེ་དག་ལ་བརྟག་པའི་ཚུལ་བསྟན་པའི་ཕྱིར་རོ། །ལག་ན་རྡོ་རྗེ་དཀྱིལ་འཁོར་སྤྱད་པའི་ཚུལ་བསྟན་པའི་ཆོས་ཀྱི་རྣམ་གྲངས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པ་ཉོན་ཅིག་ཅེས་པ་ནི་དཀྱིལ་འཁོར་གྱི་སྒོ་ནས་ལྷ་མཉེས་པར་བྱ་བའི་སྤྱོད་པ་རྣམ་པ་
བཅུ་དྲུག་བཤད་པ་དང༌། དེ་བཞིན་དུ་རིམ་གྱིས་གྲུབ་པའི་སྒོ་ནས་ལྷ་མཉེས་པར་བྱ་བའི་སྤྱོད་པ་བཟླས་པ་ཡན་ལག་བཞི་དང་རང་གི་སེམས་ཡོངས་སུ་སྦྱང་བར་བྱས་པས་ལྷ་མཉེས་པར་འགྱུར་ཏེ། རིག་འཛིན་ལ་སོགས་པའི་གྲུབ་པ་མངོན་དུ་ཐོབ་ནས་རིམ་གྱིས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་གྱུར་པས་ན་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོག་པའི་དཀྱིལ་འཁོར་ཞེས་བྱའོ། །དཀྱིལ་འཁོར་སྤྱད་པ་ཞེས་པ་ནི་དཀྱིལ་འཁོར་བྲི་བ་ལ་སོགས་པ་སྤྱོད་པ་རྣམ་པ་བཅུ་དྲུག་ལ་སོགས་པའོ། །ཚུལ་ནི་སྔར་བཤད་དོ། །ཆོས་ཀྱི་རྣམ་གྲངས་ཞེས་པ་ནི་དོན་གྱི་དངོས་པོ་གཅིག་ལ་ཚིག་མང་པོའི་སྒོ་ནས་དོན་གྱི་དམིགས་བསྟན་བ་ལ་བྱ་སྟེ་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བ་ནི་ཕ་རོལ་ཏུ་ཕྱིན་པ་ལ་སོགས་པའི་སྒོ་ནས་ཀྱང་འགྱུར། སྔགས་སྤྱད་པའི་སྒོ་ནས་ཀྱང་འགྱུར་ཏེ། དེ་ཡང་སྐབས་འདིར་སྔགས་ཀྱི་སྟེ། དེ་བས་ན་དཀྱིལ་འཁོར་སྤྱད་པའི་ཚུལ་བསྟན་པའི་ཆོས་ཀྱི་རྣམ་གྲངས་ཞེས་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆོས་ཀྱི་དབྱིངས་ཀྱི་དགོངས་པ་མ་རྫོགས་ཤིང་སེམས་ཅན་གྱི་ཁམས་མ་ལུས་པ་བསྒྲལ་པར་དམ་བཅའ་བ་མཛད་པས་ཞེས་པ་བྱུང་ནས་ཀྱང་ཕྱོགས་བཅུ་ཀུན་དུ་བསྐོར་ཏེ་སླར་ལོག་ནས་བཅོམ་ལྡན་འདས་ཀྱི་སྐུའི་ནང་རང་གི་གནས་རྣམས་སུ་ཞུགས་སོ་ཞེས་པའི་བར་དུ་མ་འོངས་པའི་འགྲོ་བ་རྣམས་ཀྱི་དོན་དུ་སྙིང་རྗེ་ཆེན་པོ་འབྱུང་བའི་དཀྱིལ་འཁོར་བྲི་བའི་ཕྱིར་རང་བཞིན་གྱི་དཀྱིལ་འཁོར་འབྱུང་བའི་ཏིང་ངེ་འཛིན་བསྟན་པ་ལ་བྱ་སྟེ། ཏིང་ངེ་འཛིན་བསྟན་པ་ཡང་སྙིང་རྗེ་ཆེན་པོ་འབྱུང་བའི་དཀྱིལ་འཁོར་བྲི་བའི་སློབ་དཔོན་གྱིས་ཏིང་ངེ་འཛིན་འདི་ལྟ་བུ་མངོན་དུ་བྱས་ཏེ། དེ་ནས་ས་ཚོན་གྱིས་སྐུའི་ཆ་ལུགས་ལ་སོགས་པའི་དཀྱིལ་འཁོར་བྲི་བའི་ཚུལ་བསྟན་པའོ། །དེ་ལ་བཅོམ་ལྡན་འདས་རྣམ་པར་སྣང་མཛད་ཆོས་ཀྱི་དབྱངས་ཀྱི་དོངས་པ་མ་རྫོགས་པ་ཆོས་ཀྱི་དབྱིངས་ནི། སྟོང་པ་ཉིད་དང། དེ་བཞིན་ཉིད་དང༌། ཡང་དག་པའི་མཐའ་སྟེ། དེའི་དགོས་པའི་སྐུ་ལ་སོགས་པས་མི་ཟ་དཔའི་རྒྱན་གྱིས་སེམས་ཅན་གྱི་ཁམས་གཏམས་ཅད་ཀུན་དུ་ཁྱབ་པར་བསྟན་ནས་སེམས་ཅན་དེ་རྣམས་བླ་ན་མེད་པའི་བྱང་ཆུབ་ཏུ་བསྒྲལ་བ་ལ་བྱ་སྟེ། སེམས་ཅན་དེ་རྣམས་
ཀྱང་ད་དུང་མ་ལུས་པར་མ་བསྒྲལ་བས་དགོས་པ་མ་རྫོགས་ཞེས་བྱའོ། །སེམས་ཅན་གྱི་ཁམས་མ་ལུས་པ་བསྒྲལ་པར་དམ་བཅའ་པ་མཛད་པས་ཞེས་པ་ནི། དེ་ལྟར་ཆོས་ཀྱི་དགོས་པ་དེ་མ་རྫོགས་པ་ཡང་རྫོགས་ཤིང་ཟད་པ་མ་ཡིན་གྱི་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཐུགས་ཀྱི་ཡི་དམ་མཛད་པ་ནི། བདག་གིས་བྱང་ཆུབ་ཐོབ་ནས་སེམས་ཅན་མ་ལུས་པ་ཡང་བསྒྲལ་བར་བྱའོ་ཞེས་པའོ། །དེ་བས་ན་སེམས་ཅན་གྱི་ཁམས་མ་ལུས་པ་བསྒྲལ་བར་དམ་བཅའ་བ་མཛད་ཅེས་སོ། །དེ་བཞིན་གཤེགས་པ་ཐམས་ཅད་དང་ཐབས་ཅིག་ཡང་དག་པར་མོལ་ནས་ཞེས་པ་ནི། འདས་པ་དང་མ་འོངས་པ་དང་ད་ལྟར་བཞུགས་པའི་སངས་རྒྱས་ཐམས་ཅད་ཚོགས་དང་ཆོས་ཀྱི་སྐུ་དང་འགྲོ་བའི་དོན་མཛད་པས་མཉམ་པ་ཉིད་དེ། དེ་བས་ན་སངས་རྒྱས་ཐམས་ཅད་གསུང་གཅིག་ཏུ་འཆད་པར་བསྟན་པའོ། །གཉིས་སུ་ན་དེ་བཞིན་གཤེགས་པ་ཐམས་ཅད་དང་ཐབས་ཅིག་ཡང་དག་པར་མོལ་ནས་ཞེས་པ་ནི། ཆོས་ཀྱི་དབྱིངས་དེ་བཞིན་ཉིད་མངོན་དུ་བྱས་ནས་ཞེས་པའོ། །ཡང་ན་དེ་བཞིན་གཤེགས་པ་ཐམས་ཅད་དང་ཐབས་ཅིག་མོལ་སྣ་ཞེས་པ་ནི། མ་འོངས་པའི་འགྲོ་བ་ང་རྒྱལ་ཅན་རྣམས་ང་རྒྱལ་གཅག་པ་དང་ཞུ་གཏུག་མི་བྱེད་པ་རྣམས་བླ་མ་དང་གྲོགས་པོ་ལ་དྲི་ཞིང་ཞུ་གཏུག་བྱེད་པ་ལ་བརྩོན་པ་བསྐྱེད་པའི་ཕྱིར་ཏེ། དེ་བཞིན་གཤེགས་པ་ཐམས་ཅད་མཁྱེན་པ་ཡང་གཞན་དང་བཀའ་གྲོས་མཛད་ཅིང་ཆོས་སྟོན་ན། བདག་ཅག་ཆོད་ལྟ་ཅི་ཞིག་སྙམ་ནས་གཞན་ལ་འདྲི་བ་ལ་བརྩོན་པར་འགྱུར་རོ། །སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི། ཏིང་ངེ་འཛིན་དེ་ལས་སྙིང་རྗེ་ཆེན་པོའི་སྙིང་པོ་འབྱུང་བའམ། སྙིང་རྗེ་ཆེན་པོ་ལས་ཏིང་ངེ་འཛིན་འབྱུང་བ་ལ་བྱའོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་སྐུའི་ཡན་ལག་ཐམས་ཅད་ནས་དེ་བཞིན་གཤེགས་པའི་སྐུ་སེམས་དང་པོ་བསྐྱེད་པ་ནས་བཟུང་སྟེ། ས་བཅུའི་བར་དུ་སེམས་ཅན་ལ་ཕན་བའི་དོན་མཛད་པ་རྣམས་བྱུང་ངོ༌། །བྱུང་ནས་ཀྱང་ཕྱོགས་བཅུ་ཀུན་དུ་བསྐོར་ཏེ་སླར་ལོག་ནས་བཅོམ་ལྡན་འདས་ཀྱི་སྐུའི་ནང་རང་གི་གནས་རྣམས་སུ་ཞུགས་སོ་ཞེས་པ་ནི་
བཅོམ་ལྡན་འདས་ཏིང་ངེ་འཛིན་དུ་ཞུགས་པ་དེའི་ཚེ་བ་སྤུའི་བུ་ག་རེ་རེ་ནས་ཀྱང་དེ་བཞིན་གཤེགས་པའི་སྐུ་འདྲ་བ་རྣམ་པར་སྤྲུལ་པ་བྱུང་སྟེ་སེམས་ཅན་གྱི་དོན་བྱེད་པ་ནི་ས་དང་པོ་ནས་བརྩམས་ནས་ས་བཅུ་ཡོངས་སུ་རྫོགས་པར་འགྱུར་པའི་ཕྱིར་རོ། །དེ་དག་སླར་བཅོམ་ལྡན་འདས་ཀྱི་སྐུ་ལ་སོ་སོའི་གནས་སུ་ཞུགས་པ་ཡང་ཏིང་ངེ་འཛིན་བརྟན་པའི་མཐུས་པ་སྤུའི་བུ་ག་གང་ནས་བྱུང་བ་དེ་ཉིད་དུ་སླར་མ་འཁྲུལ་བར་ཞུགས་པའོ། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྗེ་དཀྱིལ་འཁོར་རྣམ་པར་དགོད་པ་ཉོན་ཅིག་ཅེས་པ་ནི། ཏིང་ངེ་འཛིན་དེ་ལས་བཞེངས་ནས་ཕྱག་ན་རྡོ་རྗེ་ལ་དཀྱིལ་འཁོར་བཤད་པ་ལ་བྱ་སྟེ། དཀྱིལ་འཁོར་བྲི་བ་བཤད་པ་དེ་ཡང་རྒྱུ་དང་རང་བཞིན་དང་འབྲས་བུ་རྣམ་པ་གསུམ་དུ་བལྟ་སྟེ། དེ་ལ་རྒྱུ་ནི་སློབ་དཔོན་ནོ། །རང་བཞིན་ནི་དཀྱིལ་འཁོར་ས་བཅད་ཅིང་བྲི་བ་ལ་སོགས་པའོ། །འབྲས་བུ་ནི་སློབ་མ་འཇུག་ཅིང་དབང་བསྐུར་བ་ལ་སོགས་པའོ། །དེ་ལ་དཀྱིལ་འཁོར་བྲི་བའི་རྒྱུའི་གཙོ་བོ་ནི་སློབ་དཔོན་ཡིན་ཏེ། དེ་བས་ན་སློབ་དཔོན་གྱི་མཚན་ཉིད་ཐོག་མར་བཤད་དོ། །སློབ་དཔོན་གྱི་མཚན་ཉིད་བཤད་པ་ཡང་སློབ་དཔོན་དུ་འཇུག་པའི་ཡོན་ཏན་གྱི་མཚན་ཉིད་དང༌། སློབ་དཔོན་དུ་གྲུབ་པའི་ཡོན་ཏན་གྱི་མཚན་ཉིད་དང་དེའི་རབ་ཏུ་དབྱེ་བའི་མཚན་ཉིད་དོ། །དེ་ལ་སློབ་དཔོན་དུ་འཇུག་པའི་མཚན་ཉིད་ནི་ཡིད་བྱང་ཆུབ་ཀྱི་སེམས་ལ་ཞུགས་པ་ལ་སོགས་པའོ། །སློབ་དཔོན་དུ་གྲུབ་པའི་མཚན་ཉིད་ནི་དཀྱིལ་འཁོར་འདྲི་བའི་ལས་བྱེད་པར་གནང་ཞིང་དབང་བསྐུར་བ་ཞེས་བྱའོ། །རབ་ཏུ་དབྱེ་བའི་མཚན་ཉིད་ནི། །བྱང་ཆུབ་སེམས་ལ་རྣམ་པར་གནས། །ཞེས་པའོ། །དེ་དག་ཀྱང་ལུས་ཀྱི་ཡོན་ཏན་དང་ངག་གི་ཡོན་ཏན་དང་ཡིད་ཀྱི་ཡོན་ཏན་གསུམ་སྟེ། ཇི་ལྟར་རིགས་པར་སྤྱར་བར་བྱའོ། །ཡིད་བྱང་ཆུབ་ཀྱི་སེམས་ལ་ཞུགས་པ་ཞེས་པ་ནི། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམ་པ་སྟོང་པར་འཇིགས་པ་དང་འཇུག་པ་དང་ལྡན་པའོ། །ཤེས་རབ་དང་ལྡན་པ་ཞེས་པ་ལ་ཤེས་རབ་རྣམ་པ་གཉིས་ཏེ། རང་བཞིན་གྱིས་ཤེས་རབ་རྣོ་བ་དང་ཐོས་པ་དང་བསམ་པ་ལ་སོགས་པའི་ཤེས་རབ་སྟེ། དེ་དག་གང་ཡང་རུང་བ་དང་ལྡན་པའོ།།
སྙིང་རྗེ་ཅན་ཞེས་པ་སྙིང་རྗེ་ནི་སེམས་ཅན་སྡུག་བསྔལ་ལས་འདོན་པར་འདོད་པ་སྟེ། དེ་ཡང་རང་བཞིན་གྱི་སྙིང་རྗེ་ཅན་དང་མངོན་པར་འདུས་བྱས་པའི་སྙིང་རྗེ་སྟེ་དེ་དག་དང་ལྡན་པའོ། །སྒྱུ་རྩལ་དག་ལ་མཁས་པ་ཞེས་པ་ནི་སྤྱིར་འཇིག་རྟེན་གྱི་དགྲ་ཐབས་ལ་སོགས་པ་རྣམ་པ་མང་མོད་ཀྱི་སྐབས་འདིར་ནི་དཀྱིལ་འཁོར་བྲི་བ་དང་མཆོད་པའི་ཡན་ལག་རྣམས་ལ་མཁས་པ་ལ་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་རྟག་ཏུ་མཁས་པ་ཞེས་པ་ནི་དོན་དམ་པ་དང་ཀུན་རྫོབ་རྣམ་པ་གཉིས་ཀྱི་ཚུལ་གྱིས་མཁས་པ་སྟེ། དོན་དམ་པར་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཆོས་ཐམས་ཅད་གཟོད་མ་ནས་མ་བྱུང་མ་སྐྱེས་པ་སྟོང་པ་ཉིད་ཀྱི་རང་བཞིན་དུ་བསྒོམ་པ་ལ་མཁས་པའོ། །ཀུན་རྫོབ་ཏུ་ནི་དེ་ལྟར་སྟོང་པ་ཉིད་བསྒོམ་པ་ལས་ལངས་ནས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་སྤྱད་ནས་དེ་ལ་ཡང་མི་ཆགས་པར་འཁོར་གསུམ་ཡོངས་སུ་དག་པའི་ཚུལ་དུ་སྦྱོར་བ་ལ་མཁས་པའོ། །ཐེག་པ་གསུམ་གྱི་ཁྱད་པར་ཤེས་པ་ཞེས་པ་ནི་ཉན་ཐོས་ཀྱི་ཐེག་པ་གང་ཟག་ལ་བདག་མེད་པར་རྟོགས་ནས་ཕུང་པོ་དང་ཁམས་ལ་སོགས་པ་ལ་མི་རྟག་པ་དང་སྡུག་བསྔལ་བ་དང་བདག་མེད་པར་རྟོགས་པ་དང༌། རང་སངས་རྒྱས་ཀྱི་ཐེག་པ་ཕུང་པོ་ལ་སོགས་པ་དེ་རྣམས་ཀྱང་རྟེན་ཅིང་འབྲེལ་པར་འབྱུང་བའི་རང་བཞིན་དུ་རྟོགས་པ་དང༌། ཐེག་པ་ཆེན་པོ་ཆོས་ཐམས་ཅད་གཟོད་མ་ནས་མ་བྱུང་མ་སྐྱེས་པར་རྟོག་པ་རྣམས་ཀྱི་མཚན་ཉིད་བྱེ་བྲག་ཏུ་འབྱེད་མཁས་པ་ལ་བྱའོ། །དེ་ལ་ཅིར་ཐེག་པ་གཅིག་ལ་གསུམ་དུ་དབྱེ་ཅི་ཡོད་ཅེ་ན་ཐེག་པ་ཉིད་གསུམ་དུ་དབྱེ་བ་ལ་ནི་མི་བྱའོ། །ཉན་ཐོས་དང་རང་སངས་རྒྱས་རྣམས་ཀྱི་སོ་སོའི་ཇི་ལྟར་རྟོགས་པའི་མཚན་ཉིད་འབྱེད་མཁས་པ་ལ་བྱའོ། །གསང་སྔགས་ཀྱི་དེ་ཁོ་ན་ཉིད་ཀྱི་དོན་ལ་མཁས་ཞེས་པ་ནི་སྔགས་རྣམས་ཀྱི་སྤྱིའི་དེ་ཁོ་ན་ཉིད་ཀྱི་མཚན་ཉིད་ནི་བྱང་ཆུབ་ཀྱི་སེམས་ཏེ། དེ་ལ་མཁས་པ་དང༌། སྔགས་དང༌། ཡི་གེ་ས་བོན་དང༌། ཏིང་ངེ་འཛིན་རྣམས་ལ་མཁས་པ་སྟེ། སྔགས་ལ་མཁས་པ་ནི་སྔགས་ཀྱི་ཚིག་རྣམས་བསྐུལ་བ་དང་ཕྱག་རྒྱའི་རང་བཞིན་འབྱེད་མཁས་པའོ། །ཡི་གེ་ས་བོན་ལ་མཁས་པ་ནི་ལྷ་རྣམས་སོ་སོའི་ས་བོན་སྙིང་པོ་གང་ཡིན་པ་དང༌། དེ་རྣམས་ཀྱི་ཏིང་ངེ་འཛིན་གྱི་
སྒོ་དང༌། ལས་གང་ཡིན་པ་ལ་མཁས་པའོ། །ཏིང་ངེ་འཛིན་ལ་མཁས་པ་ནི་ཏིང་ངེ་འཛིན་དུ་ཞུགས་པ་ལས་དབང་ཆེན་དང་ཆུ་ལ་སོགས་པའི་དཀྱིལ་འཁོར་བཀོད་ཅིང་དེ་རྣམས་ཀྱི་ལས་སྒྲུབ་པ་ལ་མཁས་པའོ། །བསམ་པ་ཤེས་པ་ནི་སློབ་མ་རྣམས་ཀྱི་བསམ་པ་ཤེས་པ་སྟེ་དེ་ཡང་གཞན་གྱི་སེམས་ཤེས་པའི་ཚུལ་གྱིས་ཤེས་པ་ལ་ནི་མི་བྱའོ། །སྔགས་ཀྱི་ཆ་བརྟག་པའི་ཚུལ་གྱིས་སློབ་མ་རྣམས་ཀྱི་སྤྱོད་པ་དང་ཚུལ་ལ་བརྟགས་ནས་ལྷ་ཞི་བ་དང་ཁྲོ་བོ་རྣམས་གང་བསྙེན་པར་འོས་པ་དང༌། གྲུབ་པ་རབ་འབྲིང་གསུམ་ལས་གང་བསྒྲུབ་པར་འོས་པ་ལ་སོགས་པའི་ཚུལ་ལ་མཁས་པའོ། །སངས་རྒྱས་དང་བྱང་ཆུབ་སེམས་དཔའི་རྣམས་ལ་དད་པ་ཞེས་པ་ནི་དེ་རྣམས་ཀྱི་ཡོན་ཏན་བཤད་པ་ལ་ཡིད་ཆེས་པའོ། །དཀྱིལ་འཁོར་བྲི་བའི་ལས་བྱེད་པར་གནང་ཞིང་དབང་བསྐུར་བ་ཞེས་པ་ལ་དབང་བསྐུར་བ་ནི་དབང་བསྐུར་བའི་དཀྱིལ་འཁོར་དུ་དྲི་དང་མེ་ཏོག་དང་སྨན་དང་རིན་པོ་ཆེ་ལ་སོགས་པས་བརྒྱན་པའི་བུམ་པར་ཆུ་བླུགས་ཏེ་དབང་བསྐུར་བ་ལ་བྱའོ། །གནང་བ་ནི་དེ་ལྟར་དབང་བསྐུར་ནས་ཁྱོད་ཀྱིས་དཀྱིལ་འཁོར་བྲི་བ་དང་སྒྲུབ་པ་ལ་སྤྱོད་པར་གྱིས་ཤིག་ཅེས་ཚིག་གིས་གནང་བའོ། །དེ་ལ་གནང་ཞིང་དབང་བསྐུར་བ་ཞེས་པ་དབང་མ་བསྐུར་བར་ནི་གནང་བ་མི་འཐོབ་སྟེ། གནང་བ་སྨོས་པས་དབང་བསྐུར་བ་མ་སྨོས་ཀྱང་ཞར་ལ་གོ་བར་འགྱུར་ན་གཉིས་ཀ་ཅིའི་ཕྱིར་སྨོས་ཤེ་ན། གདོན་སེལ་བ་ལ་སོགས་པའི་ལས་ཕྲན་ཚེགས་ལ་དབང་མ་བསྐུར་ཀྱང་བྱོས་ཤིག་པའི་གནང་བ་ཐོབ་པ་སྲིད་དེ། དེ་བས་ན་གནང་བ་ཐོབ་ཅིང་དབང་བསྐུར་བ་ཞེས་སྨོས་སོ།། བརྟན་པ་ནི་ཤེས་པ་དང་ལོངས་སྤྱོད་ལ་སོགས་པ་དང་ལྡན་པ་ཡང་དེ་དག་གིས་དྲེགས་པར་མི་འགྱུར་ལ་དེ་དག་དང་མི་ལྡན་ན་ཡང་ཞུམ་པར་མི་འགྱུར་བའོ། །སྦྱོར་བ་ལ་མཁས་ཞེས་པ་ནི་སྒྲུབ་པ་དང་ཞི་བ་ལ་སོགས་པའི་ལས་ཀྱི་སྦྱོར་བ་ལ་མཁས་པའོ། །བྱང་ཆུབ་སེམས་ལ་རྣམ་པར་གནས། །ཞེས་པ་ནི་སྟོང་བ་ཉིད་རྣམ་པར་མི་རྟོག་པའི་ཏིང་ངེ་འཛིན་ལ་གནས་ནུས་པའོ། །གསང་བ་པའི་བདག་པོ་སློབ་དཔོན་དེ་ལྟ་བུ་རྒྱལ་བའི་སྲས་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་སོ་ཞེས་པ་ལ་སློབ་དཔོན་དེ་ལྟ་བུ་ནི་གོང་དུ་སྨོས་པའི་ཡོན་ཏན་རྣམས་དང་ལྡན་
པའོ། །རྒྱལ་བའི་སྲས་ཞེས་པ་ནི་རྒྱལ་བའི་བདག་ཉིད་ལས་སྐྱེས་པ་སྟེ་རྒྱལ་བ་ནི་སངས་རྒྱས་བཅོམ་ལྡན་འདས་ཡིན་ལ། དེའི་བདག་ཉིད་ནི་ཆོས་ཀྱི་དབྱིངས་ཏེ། ཆོས་ཀྱི་དབྱིངས་སྟོང་པ་ཉིད་ལ་མོས་པ་ལས་བྱུང་བ་ནི་རྒྱལ་བའི་བདག་ཉིད་ལས་སྐྱེས་པ་ཞེས་བྱའོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་སོ་ཞེས་པ་ནི་དེ་ལྟ་བུའི་ཡོན་ཏན་དང་ལྡན་པའི་སློབ་དཔོན་དེ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་སོ། །དེ་ལྟ་བུའི་སློབ་དཔོན་དེ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་ན། མི་བསྔགས་པའི་སློབ་དཔོན་ཡང་ཡོད་དམ་ཞེ་ན་ཡོད་དེ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་སོ་ཞེས་པའི་ཚིག་དེས་སློབ་དཔོན་རྣམ་པ་གཉིས་སུ་ཤེས་པར་བྱ་སྟེ་ཟབ་ཅིང་རྒྱ་ཆེ་བ་ལ་མོས་པ་དང་དམིགས་པ་ཅན་ནོ། །དེ་ལ་སྐབས་འདིར་སློབ་དཔོན་ཡོན་ཏན་དེ་ལྟ་བུ་དང་ལྡན་པ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྔགས་པ་ནི་ཟབ་ཅིང་རྒྱ་ཆེ་བའི་སློབ་དཔོན་ལ་བྱའོ། །དམིགས་པ་ཅན་གྱི་སློབ་དཔོན་གྱི་མཚན་ཉིད་ནི་འོག་ནས་སློབ་དཔོན་གཉི་གའི་མཚན་ཉིད་བཤད་པའི་སྐབས་སུ་ཤེས་པར་བྱའོ། །ད་ནི་སློབ་དཔོན་དེ་ལྟ་བུས་དཀྱིལ་འཁོར་དུ་གཟུང་བའི་སློབ་མ་རྣམས་བརྟག་པར་བྱ་སྟེ། སློབ་མ་དེ་རྣམས་བརྟག་པ་ཡང་རང་བཞིན་གྱི་ཡོན་ཏན་དང༌། མངོན་པར་འདུས་བྱས་པའི་ཡོན་ཏན་གྱི་སྒོ་ནས་སོ། །དེ་ལྟ་བས་ན་གསང་བ་པའི་བདག་པོ་དེ་ལ་སློབ་དཔོན་ལ་གཞན་གྱིས་གསོལ་བ་བཏབ་ཀྱང་རུང་ཞེས་པ་ནི་འོག་ནས་འབྱུང་བའི་མཚན་ཉིད་དང་ལྡན་པའི་སློབ་མ་རྣམས་ཀྱིས་གསོལ་བ་བཏབ་ཀྱང་རུང་ཞེས་པའོ། །ཡང་ན་བདག་གིས་སེམས་ཅན་དག །སྣོད་དུ་རུང་ཞིང་ཉེས་བྲལ་བ། །དེ་མཐོང་ནས་ནི་བདག་ཉིད་ཀྱིས། །མ་གསོལ་བར་ནི་དེ་བོས་ཏེ། །ཞེས་སྦྱར་ཏེ་སྣོད་དུ་རུང་ཞིང་ཞེས་པ་ནི་སྔགས་བཤད་པའི་སྣོད་དུ་འགྱུར་བའོ། །ཉེས་བྲལ་བ་ཞེས་པ་ནི་སྡིག་པ་མེད་པ་སྟེ་དེ་ལ་སྡིག་པ་ནི་སེམས་ཀྱི་རྒྱུད་ལ་ཡོད་ན་ཇི་ལྟར་སློབ་དཔོན་དེས་མཐོང་བར་འགྱུར་ཞན། སེམས་ཀྱི་རྒྱུད་ལ་གཞན་པའི་སྡིག་པ་མེད་པར་མཐོང་བ་ལ་ནི་མི་བྱའི། སྡིག་པའི་རྒྱུ་མི་དགེ་བ་བཅུའི་ལས་ཀྱི་ལམ་མི་སྤྱོད་པར་མཐོང་བ་ནི་སྡིག་པ་མེད་པར་
མཐོང་བའོ། །དེ་ལྟ་བུའི་སློབ་མ་མཐོང་ན་ཕས་མ་གསོལ་ཀྱང་སློབ་མ་དེ་སྣོད་དུ་འགྱུར་བ་ཡིན་པས་འོག་ནས་འབྱུང་བའི་ཚིགས་སུ་བཅད་པས་ཆོས་བཤད་ཅིང་སྔགས་ཀྱི་ཚུལ་ལ་གཞག་པར་བྱའོ། །མོས་མང་ཞེས་པ་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་སངས་རྒྱས་བཅོམ་ལྡན་འདས་ཀྱི་ཡོན་ཏན་གྱི་ཆོས་རྣམས་མ་རྟོགས་ཤིང་མངོན་དུ་བྱས་ཀྱང་ཐོས་པ་དང་བསམ་པ་དང་སྒོམ་པའི་སྒོ་ནས་འདི་ཉིད་ཡིན་གྱི་གཞན་ནི་མ་ཡིན་ནོ་ཞེས་པ་ནི་མོས་པ་མང་བའོ། །བརྟན་ཞེས་པ་ནི་གོང་དུ་སློབ་དཔོན་གྱི་བརྟན་པ་ཉིད་བཤད་པ་དང་མཐུན་ནོ། །དད་པ་ཞེས་པ་ནི་དཀོན་མཆོག་གསུམ་ལ་ཡིད་ཆེས་པའི་རྣམ་པ་དང་སྔགས་ཀྱི་ཚུལ་ལ་ཡིད་ཆེས་པའི་དད་པའོ། །གཞན་ལ་ཕན་དགའ་ཞེས་པ་ནི་སྙིང་རྗེ་ཆེན་པོ་དང་ལྡན་པ་སྟེ། གཞན་སྡུག་བསྔལ་དང་བྲལ་བར་དགའ་བའོ། །སློབ་མ་དེ་ལྟ་བུ་དང་ལྡན་པར་ཤེས་ཤིང་མཐོང་ནས་བདག་ཉིད་ཀྱིས་མ་གསོལ་བར་ནི་དེ་བོས་ཏེ་ཞེས་གོང་དུ་སྨོས་པའི་ཡོན་ཏན་གྱི་མཚན་ཉིད་དང་ལྡན་པར་མཐོང་ནས་ཤེས་པའོ། །འདི་སྐད་བྱ་ཞེས་པ་ནི་གལ་ཏེ་སློབ་མ་དེ་བདག་ཅག་སྔགས་གྲུབ་པའི་འབྲས་བུ་རིག་འཛིན་ལ་སོགས་པ་འདོད་པ་མ་ཡིན་གྱི་བླ་ན་མེད་པའི་བྱང་ཆུབ་ཐོབ་པར་འདོད་དོ་སྙམ་དུ་སེམས་པ་ལ། སྔགས་ཀྱི་སྒོ་ནས་བླ་ན་མེད་པའི་བྱང་ཆུབ་ཐོབ་པའི་མཚན་ཉིད་ཀྱི་ཆོས་ཤོད་ཅིག་ཅེས་པའོ། །ཁྱོད་ནི་ཚུལ་ཆེན་སྣོད་ཡིན་གྱིས། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཞེས་པ་ནི་སྔགས་སྤྱད་པའི་ཚུལ་འདི་ཐེག་པ་ཆེན་པོ་ཡིན་ལ། དེ་ཡང་སློབ་མ་སྣོད་དུ་གྱུར་པའི་ཕྱིར་བཤད་པས་ན་ཡང་དག་པར་བཤད་པ་ཡིན་གྱི། ཁེ་དང་བཀུར་སྟིའི་ཕྱིར་བཤད་པ་ནི་མ་ཡིན་ནོ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བའི་མགོན་པོ་རྣམས། །འགྲོ་པན་ཕྱིར་བཞུགས་པ་དག །ཅེས་པ་ནི་འདས་པ་དང་ད་ལྟར་དང་མ་བྱོན་པའི་ཡང་དག་པར་རྫོགས་པའི་སངས་རྒྱས་རྣམས་ཀྱང་གསང་སྔགས་ཀྱི་སྤྱད་པའི་ཆོ་ག་མཆོག་འདི་ལས་བྱང་ཆུབ་ཀྱི་ཤིང་དྲུང་དུ་བདུད་རྣམ་པ་བཞི་བཅོམ་ནས་ཐམས་ཅད་མཁྱེན་པའི་ཡེ་ཤེས་བརྙེས་ཏེ། དེ་བས་ན་སློབ་མ་ཁྱེད་རྣམས་ཀྱིས་ཀྱང་ཆོ་ག་མཆོག་འདི་ལས་
ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ་ཞེས་བསྟན་བ་སྟེ་དེ་བས་ན། དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་གསུངས་པ་ཡིན་ནོ། །དེ་དག་ཀུན་གྱིས་ཞེས་པ་ནི་འདས་པ་དད་ད་ལྟར་དང་མ་བྱོན་པའི་སངས་རྒྱས་ཀུན་གྱིས་ཞེས་པའོ། །བྱང་ཆུབ་ཤིང་དྲུང་དུ་ཐམས་ཅད་མཁྱེན་པ་མཚན་མེད་བརྙེས། །ཞེས་པ་ནི་བྱང་ཆུབ་ཀྱི་ཤིང་གི་དྲུང་དུ་ཐམས་ཅད་མཁྱེན་པ་མཚན་མ་མེད་པ་ཐོབ་པའོ། །སྔགས་ཀྱི་སྦྱོར་བ་མཉམ་མེད་དེ། །ཞེས་པ་ནི་གང་དང་ཡང་མི་མཉམ་པའི་སྔགས་ཀྱི་སྦྱོར་བ་དེས་ཐམས་ཅད་མཁྱེན་པ་ཐོབ་པར་ཤེས་པར་བྱའོ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་པ་ནི་དེ་ལྟར་ཤཱཀྱ་སེང་གེས་ཀྱང་སྔགས་ཀྱི་སྤྱོད་པའི་སྒོ་ནས་ཐམས་ཅད་མཁྱེན་པ་བརྙེས་པས་ན་ཁྱོད་ཀྱིས་ཀྱང་འདིའི་སྒོ་ནས་ཐམས་ཅད་མཁྱེན་པ་ཐོབ་པར་གྱིས་ཤིག་ཅེས་བཤད་པའོ། །དེ་ལྟར་ཐམས་ཅད་མཁྱེན་པ་ཐོབ་པ་ཡང་བཅོམ་ལྡན་འདས་ཀྱིས་འོག་མིན་གྱི་གནས་ལ་སོགས་པར་མངོན་པར་བྱང་ཆུབ་པའི་རིམ་པ་གཞན་ཡང་ཡོད་མོད་ཀྱི། སྐབས་འདིར་མི་རྣམས་ལ་བཤད་པའི་ཕྱིར་སྤྲུལ་པའི་སྐུས་བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་པའི་རིམ་པ་བསྟན་ཏོ། །དེ་ལྟར་ལན་མང་གཟེངས་བསྟོད་དེ། ཞེས་པ་ནི་གོང་དུ་སྨོས་པའི་ཚུལ་གྱིས་སློབ་མ་དེ་མང་དུ་སྤྲོ་བ་བསྐྱེད་ཅིག་ཅེས་པའོ།། སྙིང་རྗེར་གྱུར་པའི་ཡིད་ཀྱིས་ནི། ཞེས་པ་ཁེ་དང་བཀུར་སྟིའི་ཕྱིར་མ་ཡིན་གྱི་སློབ་མ་དེ་དག་ལ་སྙིང་རྗེ་བའི་ཕྱིར་རོ། །སློབ་མ་དེ་བརྟན་ཤེས་ནས་ནི། །ཞེས་པ་ནི་སློབ་མ་དེ་རྣམས་དེ་ལྟར་གོང་དུ་སྨོས་པའི་ཚུལ་གྱིས་ཡིད་ཆེས་ཏེ་གཞན་དུ་མི་འགྱུར་བར་གྱུར་ན་སློབ་མ་དེ་དག་གི་ཆེད་དུ་དཀྱིལ་འཁོར་བྲི་བའི་ས་རྣམས་བརྟག་པར་བྱ་སྟེ། དེ་ཡང་ས་ཉིད་ཀྱི་ཡོན་ཏན་གྱིས་དགའ་བ་དང༌། །འཕགས་པ་རྣམས་ཀྱིས་བཅགས་པས་དང༌། ལྷ་དང་མི་རྣམས་ཀྱིས་བསྙེན་པས་དགའ་བ་དང༌། སྔགས་མཁན་ཉིད་གང་དུ་དད་པས་དགའ་བའོ།།
དེ་ལས་ཉིད་ཀྱི་ཡོན་ཏན་གྱིས་དགའ་བའི་གནས་ནི། །མེ་ཏོག་འབྲས་བུ་ལྡན་པའི་རི། །གཙང་ཞིང་ཡིད་འོང་ཆུ་ཡི་གནས། །ཞེས་པ་ནས། གང་ན་འབབ་ཆུ་མང་པོ་དག །ངང་པ་བཞད་ཀྱིས་བརྒྱན་ཡོད་པ། །དེར་ནི་སྔགས་པ་བློ་ཅན་གྱིས། །སྙིང་རྗེ་འབྱུང་བའི་དཀྱིལ་འཁོར་བྲི། །ཞེས་པའི་བར་དུའོ། །སངས་རྒྱས་རྣམས་དང་རང་མགོན་དང༌། །དེ་བཞིན་རྒྱལ་བའི་ན་ཡན་ཐོས་ཀྱིས། །ས་ཕྱོགས་གང་དག་བསྟེན་པ་ནི། །དེ་དག་ཐུབ་པས་རྟག་ཏུ་བསྔགས། །ཞེས་པའི་བར་གྱིས་ནི་འཕགས་པ་རྣམས་ཀྱིས་ཞབས་ཀྱིས་བཅགས་པས་དགའ་བའོ། །ཕྱོགས་གཞན་རྣམ་པ་སྣ་ཚོགས་པ།། ལྷ་ཁང་ཀུན་དགའ་བཟང་པོ་དང༌། །ཁྱིམ་དང་ཡང་ཏོག་ཉམས་དགའ་དང༌། །ཞེས་པ་ནས། ལྷ་ཡི་གནས་རྣམས་ཐམས་ཅད་དང༌། །དེ་བཞིན་ཁང་པ་སྟོང་པར་ཡང༌། །སློབ་མ་དག་ལ་ཕན་འདོད་ཕྱིར། །ནན་ཏན་དུ་ནི་དཀྱིལ་འཁོར་བྲི། །ཞེས་པའི་བར་གྱིས་ནི་ལྷ་དང་མི་རྣམས་ཀྱིས་བསྙེན་པས་དགའ་བའོ། །ཡང་ན་ཡིད་དུ་འོང་བའི་ས། །གང་ཡང་རུང་བར་བྲི་བར་བྱ། །ཞེས་པ་ནི་གོང་དུ་སྨོས་པ་རྣམ་པ་གསུམ་ལས་གཞན་སྔགས་པ་ཉིད་གང་དུ་དད་པའི་ས་དེར་དཀྱིལ་འཁོར་བྲི་བ་གསུངས་པ་ཡིན་ནོ། །དེ་ལ་ས་གཞི་ཡོངས་སུ་སྦྱང་བར་བྱ་བ་ནི་ཞེས་པ་སྦྱང་བ་རྣམ་པ་གཉིས་ཏེ་ཕྱི་དང་ནང་གིའོ། །དེ་བས་ན་སློབ་དཔོན་ཡང་རྣམ་པ་གཉིས་ཏེ། ཟང་ཅིང་རྒྱ་ཆེ་བ་ལ་མོས་པ་དང་དམིགས་པ་ཅན་ནོ། །དེ་ལ་ཟབ་ཅིང་རྒྱ་ཆེ་བ་ལ་མོས་པའི་སློབ་དཔོན་གྱིས་ནི་བྱང་ཆུབ་ཀྱི་སེམས་བསྒོམས་པས་ཕྱིའི་ཉེས་པ་རྣམས་ཀྱི་དངོས་པོ་གཟོད་མ་ནས་མ་བྱུང་མ་སྐྱེས་པར་རྟོགས་ཏེ་ནང་གི་སེམས་སྦྱངས་པས་དག་པར་འགྱུར་བའི་ཕྱིར་ཕྱིའི་ཟུག་རྡུ་བསལ་བ་ལ་སོགས་པ་མི་དགོས་མོད་ཀྱི་སློབ་མ་རྣམས་ཀྱི་ཡིད་དང་སྦྱར་བའི་ཕྱིར་ཕྱིའི་ས་རྣམས་བརྟག་པ་ཡང་དེ་རྣམས་ལ་མ་ཞེན་པར་བྱ་སྟེ། དེ་བས་ན་སློབ་དཔོན་ཟབ་ཅིང་རྒྱ་ཆེ་བ་ལ་མོས་པས་ནི་ཕྱི་ནང་གཉིས་ཀའི་ས་སྦྱར་བར་བྱའོ། །དམིགས་པ་ཅན་གྱི་སློབ་དཔོན་གྱིས་ནི་བྱང་ཆུབ་ཀྱི་སེམས་གོམས་པར་མ་བྱས་པས་ཕྱིའི་ས་རྣམས་སྦྱང་བར་བྱའོ། །དེ་ལ་ནང་གིས་སྦྱང་བ་ནི་བྱང་ཆུབ་ཀྱི་སེམས་གོམས་པར་བྱེད་པའོ། །ཕྱིའི་ས་སྦྱང་བ་ནི་རྡོ་དང་བོང་བ་དང༌། གྱོ་མོ་དང་གསེག་མ་མེད་ཅིང་ཞེས་པ་ནས་ཉེས་པ་ཐམས་ཅད་སྤངས་པའི་
གནས་ནི་ལྷ་རྣམས་ལ་རབ་ཏུ་ཤིས་སོ་ཞེས་པའི་བར་དུའོ། །དེ་ལ་ཚེས་གྲངས་དང་ཞེས་པ་ནས་སྔ་དྲོའི་དུས་ཀྱི་ཆེས་ལྟས་བཟང་པོས་མཚོན་པ་ལ་ཞེས་པའི་བར་དུ་ནི་དཀྱིལ་འཁོར་བྲི་བའི་ས་བརྟག་པ་ཚར་ནས། ཡོངས་སུ་གཟུང་བ་རྩོམ་པའི་ཚེས་གྲངས་དང་སྐར་མ་བརྟག་པ་ལ་བྱ་སྟེ། རྒྱུ་སྐར་ཤིས་པ་ནི་སྐར་མ་འབའ་ཞིག་ཤིས་པ་ལ་མི་བྱའི། ཉི་མ་དང་ཚེས་གྲངས་ཀུན་ཀྱང་སྟེ་ཤིས་པ་ཞེས་པ་སོ་སོལ་སྦྱར་བར་བྱའོ། །སྔ་དྲོའི་དུས་ཀྱི་ཚེ་ལྟས་བཟང་པོས་མཚོན་པ་ལ་ཞེས་པ་ལྟས་བཟང་པོ་བརྟགས་པ་རབ་འབྲིང་རྣམ་པ་གསུམ་སྟེ། ལྷའི་དང་བར་སྣང་གི་དང་ས་ལས་བྱུང་བའོ། །དེ་ལ་ལྷའི་ནི་ནམ་མཁའ་ལས་སྒྲ་སྙན་པ་ལ་སོགས་པ་འབྱུང་བ་སྟེ་མཆོག་གོ །བར་སྣང་གི་ནི་བཀྲ་ཤིས་པའི་ཚིག་དང་བྲམ་ཟེའི་རིག་བྱེད་ལ་སོགས་པ་ཐོབ་པ་སྟེ་འབྲིང་ངོ༌། །ས་ལས་བྱུང་བ་ནི་ས་ལ་དུང་ལ་སོགས་པ་འདུག་པར་མཐོང་བ་མཐོང་བ་སྟེ་ཐ་མའོ། །དེ་ལྟར་ཐོག་རྩོམ་པའི་སྔ་དྲོའི་དུས་ན་ལྟས་དེ་རྣམས་ལས་གང་ཡང་རུང་བ་ཞིག་བྱུང་ན་བཟང་སྟེ། ས་ཡོངས་སུ་གཟུང་བ་ལ་སོགས་པའི་ལས་རྣམས་བརྩམ་པར་བྱའོ། །སའི་ལྷ་མོ་སྦྲན་པའི་ཚིག་སུ་བཅད་པ་གཉིས་བསྒྲག་པར་བྱའོ་ཞེས་པ་ནི་སྔ་དྲོའི་དུས་ན་ལྟས་བཟང་པོ་དང་ལྡན་ན་དཀྱིལ་འཁོར་གང་དུ་བྲི་བར་བྱ་བའི་ས་གཞི་དེར་སའི་ལྷ་མོ་ལ་ཁྱོད་ཀྱི་སྟེང་དུ་དཀྱིལ་འཁོར་བྲིའི་ཞེས་གསོལ་བ་བཏབ་སྟེ། བསྟོད་པའི་ཚིག་སུ་བཅད་པའི་སྒོ་ནས་སོ། །སངས་རྒྱས་ཐོབ་པ་ཐམས་ཅད་ཀྱི། །སྤྱོད་པའི་ཚུལ་གྱིས་ཁྱད་པར་ནི། །ཞེས་པ་ལ་སོགས་པ་སྟེ། སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའི་སྤྱད་པ་སྤྱོད་པ་ན་ས་དང་ཕ་རོལ་ཏུ་ཕྱིན་པ་རྣམས་ཀྱི་ཚུལ་ཁྱད་པར་དུ་སྤྱད་པ་དང༌། དེ་ལྟར་སྤྱད་ནས་བྱང་ཆུབ་ཀྱི་ཤིང་དྲུང་དུ་བདུད་རྣམ་པ་བཞི་བཅོམ་སྟེ་མངོན་པར་སངས་རྒྱས་པ་ཡངས་ཁྱོད་ཀྱི་སྟེང་དུ་ཡིན་པས་ན་ལྷ་མོ་ཁྱོད་ཀྱིས་ཇི་ལྟ་བ་བཞིན་དུ་ཤེས་ཏེ་དབང་དུ་གྱུར་ཏོ་ཞེས་པ་སྟེ། དེ་བས་ན། སྤྱོད་པའི་ཚུལ་གྱི་ཁྱད་པར་ནི། །ས་དང་ཕ་རོལ་ཕྱིན་དག་ལ། །ཞེས་དང༌། ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །ཞེས་གསུངས་སོ། །དེ་བཞིན་བདག་གིས་བདུད་ལས་ནི། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་པ་ནི་བཅོམ་ལྡན་འདས་ཤཱཀྱ་ཐུབ་པས་ས་
དང་ཕ་རོལ་ཏུ་ཕྱིན་པ་རྣམས་སྤྱད་དེ། བྱང་ཆུབ་ཀྱི་ཤིང་དྲུང་དུ་བདུད་རྣམ་པ་བཞི་བཏུལ་ནས་མངོན་པར་བྱང་ཆུབ་པར་བྱས་པ་དེ་བཞིན་དུ་བདག་ཀྱང་མ་ལུས་པའི་སེམས་ཅན་གྱི་ཁམས་རྣམས་བསྒྲལ་བའི་ཕྱིར་ས་ཁྱོད་ཀྱི་སྟེང་དུ་དཀྱིལ་འཁོར་བྲི་སྟེ། རིམ་གྱིས་བླ་ན་མེད་པའི་བྱང་ཆུབ་ཏུ་མངོན་པར་འཚང་རྒྱ་བར་བགྱིའོ་ཞེས་པའོ། །ས་ལ་ལག་པ་རེག་བྱས་ཤིང༌། །དེ་ལྟང་ལན་མང་སྦྲན་ནས་ནི། །པུས་མོ་གཉིས་ནི་དེར་བཙུགས་ནས། །མེ་ཏོག་སྤོས་ཀྱིས་མཆོད་པར་བྱ། །མཆོད་ནས་སྔགས་པས་དེ་ནས་དེ། །དེ་བཞིན་གཤེགས་ལ་ཕྱག་འཚལ་ཏེ། །ཞེས་པ་སའི་ལྷ་མོ་ལ་ཚིགས་སུ་བཅད་པས་བསྐུལ་ཏེ་གསོལ་བ་གདབ་པ་ལ་ཡང་སྔར་དེ་བཞིན་གཤེགས་པ་རྣམས་དང་ལྷ་མོ་དེ་ལ་མཆོད་ཅིང་ཕྱག་བྱས་ལ་ལག་པ་ས་ལ་བཞག་ནས། གདོད་གོང་དུ་སྨོས་པའི་ཚིགས་སུ་བཅད་པས་བསྐུལ་ཏེ་གསོལ་བ་གདབ་པོ། དེ་ནས་ཆོ་ག་འདི་དག་གིས། །མཁས་པས་ས་གཞི་སྦྱང་བར་བྱ། །ཞེས་པ་ནི་འོག་ནས་འབྱུང་བའི་ཚུལ་གྱིས་ས་སྦྱང་བར་བྱའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་གཏུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པ་ནས། འདི་ལྟའི་ཚུལ་ནི་མི་ཤེས་པས། །ཡུལ་དང་དུས་དང་བྱ་བ་ལས། །དགེ་དང་མི་དགེའི་མཚན་མ་ཡིས། །རྨོངས་པ་འབྲས་བུ་འདོད་བྱེད་དེ། །སེམས་དཔའ་ཆེན་པོ་དེ་དག་ཕྱིར། །ཆོ་ག་འདི་ནི་བརྗོད་པ་ཡིན། །ཞེས་པའི་བར་ནི་གོང་དུ་ཉི་མ་དང་ཚེས་གྲངས་དང༌། སྐར་མ་ལ་སོགས་པའི་ལྟས་རྣམས་ནི་བཤད་ན་སྔགས་རྣམས་ཀྱི་རང་བཞིན་ནི་དོན་དམ་པར་བྱང་ཆུབ་ཀྱི་སེམས་ཡིན་ཏེ། མཚན་མ་མེད་པ་དེ་དག་ལས་འདས་པའོ། །ཀུན་རྫོབ་ཏུ་ཡང་དཀྱིལ་འཁོར་དང་སྒྲུབ་པ་དང་སྔགས་སྤྱད་པའི་ཡན་ལག་རྣམས་མཚན་མ་ཅན་ཡིན་མོད་ཀྱི། དོན་གྱི་བྱ་བ་བྱེད་ལ་སྐར་མ་དང་ཚེས་གྲངས་ལ་སོགས་པའི་མཚན་མ་འདི་རྣམས་ནི་དོན་དམ་པ་དང་ཡང་འགལ་ལ་ཀུན་རྫོབ་ཏུ་ཡང་དོན་གྱི་བྱ་བ་བྱེད་མ་ཡིན་ན། ཅིའི་ཕྱིར་བཅོམ་ལྡན་འདས་ཀྱིས་མཚན་མ་དེ་དག་བཤད་ཅེས་གསོལ་བ་དང༌། བཅོམ་ལྡན་འདས་ཀྱིས་ཀྱང་དོན་དམ་པའི་མཚན་ཉིད་བསྟན་ནས་དོན་དམ་པའི་མཚན་ཉིད་དེ་ལྟ་བུ་ཡིན་མོད་ཀྱི་མ་འོངས་པའི་འགྲོ་བ་རྣམས་ཀྱི་དོན་དམ་པའི་ཚུལ་དེ་མི་ཤེས་
པས་འགྲོ་བ་དེ་རྣམས་དྲང་བའི་ཕྱིར་མཚན་མ་རྣམས་བཤད་པའི་རིགས་པ་བསྟན་པ་སྟེ། །འགྲོ་བ་དེ་རྣམས་ཀྱང་རྣམ་པ་གཉིས་ཏེ། །དངོས་པོ་ལ་ཆགས་པ་དང༌། དངོས་པོ་མེད་པ་ལ་ཆགས་པའོ། །དངོས་པོ་ལ་ཆགས་པ་རྣམས་ལ་ཡང་ཚེས་གྲངས་དང་དུས་དང་ཡུལ་ལ་སོགས་པ་དངོས་པོ་དང་རྗེས་སུ་མཐུན་པར་བཤད་ཅིང་དྲང་བ་དང་དངོས་པོ་མེད་པ་ལ་ཆགས་པ་རྣམས་ཀྱང་དེ་ལས་བཟློག་སྟེ་དངོས་པོའི་སྒོ་ནས་དྲང་བའི་ཕྱིར་རོ། །སངས་རྒྱས་མཚན་མ་མི་མངའ་སྟེ། །ཞེས་པ་ནི་གཟུང་བ་དང་འཛིན་པའི་མཚན་མ་མི་མངའ་བའོ། །ཆོས་ཀྱི་སྐུ་ལ་རྣམ་པར་བཞུགས། །ཞེས་པ་ནི་དེ་ལྟར་གཟུང་བ་དང་འཛིན་པའི་མཚན་མ་མི་མངའ་བས་དམིགས་སུ་མེད་པ་སྟེ། དམིགས་སུ་མེད་པའི་སྐུའོ། །དེ་ལྟར་སངས་རྒྱས་བཅོམ་ལྡན་འདས་ཆོས་ཀྱི་སྐུའི་རང་བཞིན་དུ་གྱུར་པ་ནི་ཆོས་ཀྱི་སྐུ་ལ་རྣམ་པར་བཞུགས་པ་ཤེས་པའོ། །གསང་བ་བའི་བདག་པོ་དེ་ལ་ཇི་སྐད་བསྟན་པའི་གནས་གང་ཡང་རུང་བར་ས་གཞི་རབ་ཏུ་འཐས་པར་བཅགས་ཏེ་ཞེས་ནས། བདག་ཉེད་ལ་ན་འདི་སྐད་དུ། སེམས་ཅན་ཆེན་པོ་བུ་ཁྱོད་ལེགས། །དཀྱིལ་འཁོར་མྱུར་དུ་བྲིས་ཤིག་ཅེས། །སྤྲོ་བ་བསྐྱེད་པ་མཐོང་ཡང་རུང༌། །ཞེས་པའི་བར་ཞག་བདུན་གྱི་སྔོན་རོལ་དུ་སྣང་བ་དང༌། མི་སྣང་བ་ལ་དཀྱིལ་འཁོར་ས་བླང་སྟེ་དེ་ལ་སྣང་བ་ནི་རྒྱལ་པོ་ལ་སོགས་པིའི་མ་རྣམས་སོ། །མི་སྣང་བ་ནི་འཇིག་རྟེན་པའི་ལྷ་དང་གནོད་སྤྱིན་དང་ཤ་ཟ་ལ་སོགས་པ་སྟེ། ལྷ་ལ་སོགས་པ་ལ་མ་བླངས་པར་དཀྱིལ་འཁོར་བྲིས་ན་དཀྱིལ་འཁོར་གྱི་ལྷ་ཁྲོ་བོ་ལ་སོགས་པའི་ཟེར་གྱིས་འཇིག་རྟེན་པའི་ལྷ་དེ་རྣམས་ལ་གནོད་པར་འགྱུར་ཏེ། དེ་ལྟར་གནོད་པར་འགྱུར་ན་ལྷ་དེ་དག་སྒྲུབ་པ་ལ་བགེགས་ཀྱིས་སྐབས་འཚོལ་བར་འགྱུར་རོ། །གཉིས་སུ་ན་དེ་དག་ལ་གནོད་བཞིན་དུ་དཀྱིལ་འཁོར་བྲིས་ན་སྒྲུབ་པ་པོ་སྙིང་རྗེ་མེད་པར་འགྱུར་ཏེ། དེ་བས་ན་དེ་དག་གིས་སྦྱིན་པའི་ཆེད་དུ་སྡར་ལྷ་ལ་སོགས་པ་རྣམས་སྦྲན་ཞིང་ས་བསླངས་ན་ལྷ་ལ་སོགས་པ་དེ་རྣམས་ཀྱང་བག་བྱེད་ཅིང་དེ་ནས་གཞན་དུ་འདོང་སྟེ་ཉེས་པ་མེད་པར་འགྱུར་ལ། རྒྱལ་པོ་ལ་སོགས་པ་མི་རྣམས་ལ་ཡང་སྔར་ས་སྔར་ས་བླངས་ན་ཕྱིས་བརྩད་པ་མི་འགྱུར་པའི་ཕྱིར་རོ། །དེར་སྡར་བསླངས་
ནས་ཕྱིས་དཀྱིལ་འཁོར་བྲི་བ་ལས་ཞག་གསུམ་གྱི་སྔོན་རོལ་དུ་ཇི་སྐད་དུ་སྨོས་པའི་ས་དེར་ཇི་ལྟར་རིགས་པར་བརྟགས་ནས་ས་ཡོངས་སུ་གཟུང་བའི་རིམ་པ་འདི་ལྟར་བྱའོ། །ཐོག་མར་བའི་ལྕི་བས་ལ་མ་ལྷུང་བ་དང་བའི་གཅིན་དུ་བསྲེས་པས་དཀྱིལ་འཁོར་བྱའོ། །དེ་ནས་ས་དེ་སྔགས་ཀྱིས་བསྲུང་བར་བྱའོ། །དེ་ནས་ཕྱོགས་མཚམས་ཀུན་དུ་བགེགས་བསལ་བར་བྱའོ། །དེའི་འོག་ཏུ་དྲིའི་དཀྱིལ་འཁོར་སོར་བཅུ་གཉིས་པ་གྲུ་བཞི་རྣམས་བྱའོ། །དེ་ནས་སྔགས་པ་འགྲེངས་ཏེ་དཀྱིལ་འཁོར་དེའི་དབུས་ཀྱི་ནམ་མཁའ་ལ་སངས་རྒྱས་རྣམས་བསམ་པར་བྱ་སྟེ། དེ་ཡང་རང་བཞིན་གྱི་དཀྱིལ་འཁོར་རྣམས་སྡུད་པར་གྱུར་པ་དམ་ཚིག་གསུམ་གྱི་ཕྱག་རྒྱ་བཅིངས་ནས་བསམ་མོ། །སྔགས་པ་འགྲེངས་ཏེ་སངས་རྒྱས་ལྔ་པོ་རྣམས་ནམ་མཁའ་ལ་བསམ་པ་ནི་མི་གནས་པའི་སྟོན་པ་ཡིན་པའི་ཕྱིར་རོ། །དེ་ནས་དེར་དྲི་དང་མེ་ཏོག་ལ་སོགས་པས་མཆོད་དེ་སངས་རྒྱས་ཀྱི་སྤྱན་སྡར་འཕགས་པ་མི་གཡོ་བ་འམ། ཁམས་གསུམ་རྣམ་པར་རྒྱལ་བའམ། གང་ཡང་རུང་བའི་སྔགས་ཀྱིས་ས་དེ་ཡོངས་སུ་གཟུང་བར་བྱའོ། །དེས་ན་སངས་རྒྱས་སྲས་དང་བཅས་པ་སློབ་མ་རྣམས་དཀྱིལ་འཁོར་དུ་གཟུད་པའི་ནུབ་མོ་གཤེགས་སུ་གསོལ་ལོ། །དེ་ནས་སྔགས་པ་དེ་ནུབ་ཕྱོགས་ཀྱི་ངོས་སུ་ཉལ་ལ་བྱང་ཆུབ་ཀྱི་སེམས་དང་སྙིང་རྗེ་དང་ལྡན་པར་བྱ་སྟེ་རྨི་ལམ་བལྟ་བར་བྱའོ། །དེ་ཡང་རབ་འབྲིང་གསུམ་དུ་ཤེས་པར་བྱ་སྟེ། དེ་ལ་བྱང་ཆུབ་སེམས་དཔའ་རྣམས་མཐོང་ནི་རྨི་ལམ་ཐ་མའོ། །སངས་རྒྱས་རྣམས་མཐོང་ན་འབྲིང་ངོ༌། །སངས་རྒྱས་དེ་རྣམས་ཤིན་ཏུ་དགྱེས་ཤིང་སྔགས་པ་ལ་བུ་ཁྱོད་ལེགས་སོ་དཀྱིལ་འཁོར་མྱུར་དུ་བྲིས་ཤིག་ཅེས་བསྐུལ་མ་འདེབས་པར་མཐོང་ན་རྨི་ལམ་རབ་ཏུ་ཤེས་པར་བྱའོ། །འདི་རྣམས་རྒྱུད་ཉིད་ཀྱི་ནང་ནས་ཞིབ་ཏུ་འབྱུང་སྟེ། རྒྱུད་ཀྱི་ནང་ན་ལྟག་འོག་འཁྲུགས་པར་འབྱུང་བས་འདིར་ལས་སུ་བྱ་བའི་རིམ་པ་བཞིན་དུ་བཀོད་དོ། །དེ་ནས་དེ་ཡི་ཕྱི་དེའི་ཉིན། །ཞེས་པ་ནས། གཅིག་གཉིས་བཞི་ལས་ལྷག་ཀྱང་རུང། དཔྱད་མི་དགོས་པར་གཟུང་བར་བྱ། །ཤེས་པའི་བར་དུ་སློབ་མ་རྣམས་བརྟག་པ་སྟེ། །དེ་ཡང་བྱེ་བྲག་གི་མཚན་ཉིད་དང་རབ་ཏུ་དབྱེ་བའི་མཚན་ཉིད་དང༌། །ཕལ་པའི་མཚན་ཉིད་དོ། །དེ་ལ་འདིར། སློབ་མ་དང་ཅིང་རིགས་བཙུན་པ། །ཞེས་པ་ལ་སོགས་པའི་མཚན་ཉིད་ཇི་སྐད་དུ་
བཤད་པ་རྣམས་ནི་བྱེ་བྲག་གི་མཚན་ཉིད་དོ། །རབ་ཏུ་དབྱེ་བའི་མཚན་ཉིད་ནི་འོག་ནས་འཆད་ལ། །ཕལ་པའི་མཚན་ཉིད་དེ་སྔར་ཇི་སྐད་དུ་བཤད་པ་དང་གྲངས་སུ་བཅད་པ་གཞན་པ་སྟེ། འོག་ནས་འོན་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པ་བསྒྲལ་བར་ཡི་དམ་བཅའ་བ་ཁོ་ནར་བྱ་སྟེ། དེས་བྱང་ཆུབ་ཀྱི་སེམས་ཀྱི་རྒྱུར་འགྱུར་བར་བྱ་བའི་ཕྱིར་སེམས་ཅན་ཚད་མེད་པ་རྣམས་ཡོངས་སུ་གཟུང་བར་བྱའོ་ཞེས་འབྱུང་བ་ཡིན་ནོ། །སློབ་མ་དེ་རྣམས་ལས་ཀྱང་རྒྱུད་ལ་སོགས་པ་ལ་མཁས་ཤིང་བྱང་ཆུབ་ཀྱི་སེམས་གོམས་པ་ནི་དཀྱིལ་འཁོར་དུ་བཅུག་པ་དེ་ཉིད་ཀྱི་ཚེ་ན་དེ་སློབ་དཔོན་ནམ་སྒྲུབ་པར་དབང་བསྐུར་བར་བྱའོ། །རྒྱུད་ལ་སོགས་པ་རྣམས་ལ་ནི་མཁས་ཀྱང་བྱང་ཆུབ་ཀྱི་སེམས་མ་བསྒོམས་ན་བྱང་ཆུབ་ཀྱི་སེམས་སྒོམ་དུ་བཅུག་སྟེ་ཕྱིས་དབང་བསྐུར་བར་བྱའོ། །དེ་ལས་གཞན་སྔ་ནས་ཀྱང་རྒྱུད་མི་ཤེས་བྱང་ཆུབ་ཀྱི་སེམས་ཀྱང་མ་བསྒོམས། །ཕྱིས་ཀྱང་རྒྱུད་ཤེས་པར་མི་འགྱུར་ལ་བྱང་ཆུབ་ཀྱི་སེམས་ཀྱང་སྒོམ་པར་མི་འགྱུར་བ་ནི་ཕལ་པ་སྟེ། དུས་གཉིས་གར་ཡང་དབང་མི་བསྐུར་གྱི། །བྱང་ཆུབ་ཀྱི་ས་བོན་དུ་འགྱུར་བའི་ཕྱིར་དཀྱིལ་འཁོར་དུ་གཟུད་དོ། །དེ་ལ། སློབ་མ་དད་ཅིང་རིགས་བཙུན་པ། །ཞེས་པ་ལ་སོགས་པའི་མཚན་ཉིད་ནི་གང་དུ་སློབ་མའི་མཚན་ཉིད་བརྗོད་པ་ནི་བཤད་ཟིན་པས་འདིར་མ་བཤད་དོ། །བཅུ་འམ་བརྒྱད་དམ་བདུན་ནམ་ལྔ། །གཅིག་གཉིས་བཞི་ལས་ལྷག་ཀྱང་རུང༌། །ཞེས་པ་ནི་ཇི་སྐད་དུ་བཤད་པའི་མཚན་ཉིད་དང་ལྡན་པའི་སློབ་མ་ནི་ཤིན་ཏུ་དཀོན་པས་གྲངས་ཉུང་ངུ་གསུངས་པ་ཡིན་ལ། ལྷག་ཀྱང་རུང་ཞེས་པ་ནི་མཚན་ཉིད་དེ་ལྟ་བུ་དང་ལྡན་པ་མང་བ་དཀོན་པ་སྟེ། བརྒྱ་ལ་དེ་ལྟ་བུའི་མཚན་ཉིད་དང་ལྡན་ན་དེ་ལས་ལྷག་སྟེ་གྲངས་མེད་པ་ཡོད་ན་ཡང་ཉེས་བ་མེད་དོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་ཞུས་པ་ཞེས་པ་ནས། བྱང་ཆུབ་ཀྱི་སེམས་ཀྱི་རྒྱུར་གྱུར་པར་བྱ་བའི་ཕྱིར་སེམས་ཅན་ཚད་མེད་པ་རྣམས་ཡོངས་སུ་གཟུང་བར་བྱའོ་ཞེས་པའི་བར་ནི་གོང་དུ་སློབ་མའི་གྲངས་ངེས་པར་གསུངས་ན་ཅི་ལས་ཡིན་ཞེས་བཅོམ་ལྡན་འདས་ལ་ཕྱག་ན་རྡོ་རྗེས་གསོལ་པ་དང༌། དེའི་ལན་བཅོམ་ལྡན་འདས་ཀྱིས་གསུངས་པ་ཡིན་ཏེ། སློབ་མ་རྣམས་ཀྱི་གྲངས་ངེས་པར་གསུངས་པ་ཅི་ལས་ཡིན་
ཞེས་དྲི་དགོས་པ་ལས། །དཀྱིལ་འཁོར་འདིའི་མིང་ཅི་ལགས་ཅིའི་སླད་དུ་དཀྱིལ་འཁོར་ཞེས་བགྱི་ཞེས་བྱ་བ་དྲིས་ཤེ་ན། དེའི་དགོངས་པ་ནི་འདི་ལྟ་སྟེ། དེ་སྐད་དྲིས་ན་དཀྱིལ་འཁོར་གྱི་ངེས་པའི་ཚིག་དང་དམིགས་སུ་བབ་བར་བྱ་བ་དང༌། སློབ་མའི་གྲངས་ངེས་པ་གསུམ་ཆར་དྲིས་པར་འགྱུར་ཏེ། དེ་ལ་དཀྱིལ་འཁོར་འདིའི་མིང་ཅི་ལགས་ཞེས་པ་ནི་དམིགས་སུ་བབ་ཅིང་བསྟན་པར་བྱ་བའི་དཀྱིལ་འཁོར་དྲིས་པའོ། །ཅིའི་སླད་དུ་དཀྱིལ་འཁོར་ཞེས་བགྱི་ཞེས་པ་ནི་ངེས་པའི་ཚིག་དྲིས་པའོ། །དཀྱིལ་འཁོར་འདི་ནི་སངས་རྒྱས་འབྱུང་བ་སྟེ། །ཞེས་པ་ནི་དཀྱིལ་འཁོར་འདི་སངས་རྒྱས་འབྱུང་བ་དང་འདྲ་བའི་ཕྱིར་ཏེ། སངས་རྒྱས་བྱུང་ན་སངས་རྒྱས་ཀྱི་ཡོན་ཏན་གྱི་ཆོས་རྣམས་ཀྱང་འབྱུང་ལ། སེམས་ཅན་གྱི་དོན་མཛད་པ་ཡང་ཡོད་དོ། དེ་བཞིན་དུ་དཀྱིལ་འཁོར་འདི་ལས་ཀྱང་སངས་རྒྱས་ཀྱི་ཆོས་རྣམས་འབྱུང་ཞིང་སེམས་ཅན་གྱི་དོན་བྱ་བ་ཡང་ཡོད་དེ། འཕྲལ་དུ་བྱང་ཆུབ་ཀྱི་སེམས་བསྐྱེད་པ་དང་རིམ་གྱིས་མཆོག་ལ་སོགས་པའི་གྲུབ་པ་དང་ཞིབ་ལ་སོགས་པའི་ལས་རྣམས་བྱེད་པ་ཡོད་ཅིང༌། མཐར་སངས་རྒྱས་སུ་འགྱུར་བར་བྱེད་པའི་ཕྱིར་རོ། །དཀྱིལ་ནི་སྙིང་པོ་ཞེས་བྱའོ། །འཁོར་ནི་རྫོགས་པ་སྟེ་ཞེས་པ་ནི་མར་གྱི་སྙིང་པོའམ། ཙནྡན་གྱི་སྙིང་པོ་དང་འདྲ་སྟེ་མཆོག་གམ་དམ་པ་ལ་བྱའོ། །མར་དང་ཙནྡན་གྱི་སྙིང་པོ་དག་ལ་ནི་མི་ཆོག་པ་དང་མ་རྫོགས་པ་ཡང་སྲིད་ན་དེ་དག་དང་འདྲ་བ་ཡིན་ནམ་ཞེ་ན། །སྙིང་པོར་འདྲ་མོད་ཀྱང་དེ་ལས་ཁྱད་པར་དུ་ཁྱབ་པ་ཞེས་གསུངས་ཏེ། ཁྱབ་པ་ནི་ཆོག་པ་དང༌། ཡོངས་སུ་རྫོགས་པའི་དོན་ཏོ། །དཀྱིལ་འཁོར་འདིའི་སྙིང་པོ་ནི་ཇི་ལྟར་ཆོག་པ་དང་རྫོགས་པ་ཡིན་ཞེ་ན། སངས་རྒྱས་བཅོམ་ལྡན་འདས་བསྐལ་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་ནས་སྟོབས་དང་མི་འཇིགས་པ་ལ་སོགས་པ་སངས་རྒྱས་ཀྱི་ཡོན་ཏན་རྣམས་ཡོངས་སུ་རྫོགས་ཏེ་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་པ་ནི་སྙིང་པོར་གྱུར་པ་ཆོག་པ་དང་དམ་པ་སྟེ། ཆོག་པ་ནི་དེ་ལས་གཞན་པ་བཙལ་མི་དགོས་པར་དེས་ཆོག་པས་མི་འགྱུར་བར་ཡོངས་སུ་གྲུབ་པའོ། །གང་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་པ་མི་འགྱུར་བར་ཡོངས་སུ་གྲུབ་པ་དེ་ཉིད་སྔོན་གྱི་སྨོན་ལམ་གྱི་ཤུགས་ཀྱིས་སྐུ་ལ་སོགས་
པ་མི་ཟད་པའི་རྒྱན་གྱི་འཁོར་ལོར་གྱུར་པ་ནི་དཀྱིལ་འཁོར་འདིར་བྱིན་གྱིས་བརླབས་པས་ན་དཀྱིལ་འཁོར་འདིའི་སྙིང་པོས་ཆོག་པ་ཞེས་བྱའོ། །གསང་བ་པའི་བདག་པོ་འོན་ཀྱང་དཀྱིལ་འཁོར་རྒྱས་པ་འདི་ནི་སེམས་ཅན་གྱི་ཁམས་མ་ངེས་པ་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་བ་ཞེས་པ་ལ། སེམས་ཅན་གྱི་ཁམས་མ་ངེས་པ་ཡོངས་སུ་བསྐྱབ་པའི་ཕྱིར་ཞེས་པ་ནི་སྙིང་རྗེ་ཆེན་པོའི་དབང་གིས་ཚད་མེད་པའི་སེམས་ཅན་གྱི་ཁམས་རྣམས་དཀྱིལ་འཁོར་འདིར་བཙུད་པ་བླ་ན་མེད་པའི་བྱང་ཆུབ་ཀྱི་རྒྱུར་འགྱུར་བས་ཡོངས་སུ་བསྐྱབ་པའི་ཕྱིར་ཞེས་གསུངས་སོ། །སྙིང་རྗེ་ཆེན་པོའི་སྙིང་པོ་འབྱུང་བ་ཞེས་པ་ན་དཀྱིལ་འཁོར་འདི་སྙིང་རྗེ་ཆེན་པོ་ལས་འབྱུང་བ་སྟེ་བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་བརྙེས་ནས་སྙིང་རྗེ་ཆེན་པོའི་དབང་གིས་སྐུ་ལ་སོགས་པ་མི་ཟད་པའི་རྒྱན་གྱི་དཀྱིལ་འཁོར་འདི་འབྱུང་བས་ན་སྙིང་རྗེ་ཆེན་པོ་ལས་འབྱུང་བ་ཞེས་བྱའོ། །སྙིང་པོ་ཞེས་པ་ནི་འབྱུང་ཁུངས་ཏེ་སྙིང་རྗེ་ཆེན་པོའི་དཀྱིལ་འཁོར་འདི་འབྱུང་བའི་གནས་སོ། །ཡང་ན་དཀྱིལ་འཁོར་འདི་ལས་སྙིང་རྗེ་ཆེན་པོ་འབྱུང་བ་ལ་ཡང་བྱ་སྟེ། དཀྱིལ་འཁོར་འདིའི་སྒོ་ནས་དེ་བཞིན་གཤེགས་པའི་ཡོན་ཏན་གྱི་ཆོས་སྙིང་རྗེ་ཆེན་པོ་ལ་སོགས་པ་འབྱུང་སྟེ་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་བའི་ཕྱིར་རོ། དཀྱིལ་འཁོར་རྒྱས་པ་ཞེས་པ་ནི་དཀྱིལ་འཁོར་འདིར་བཙུད་པའི་སེམས་ཅན་རྣམས་བསོད་ནམས་རྒྱས་པའི་ཕྱིར་རོ། །གཉིས་སུ་ན་དཀྱིལ་འཁོར་ཉིད་ཀྱི་སྣམ་བུ་ལ་སོགས་པའི་རིམ་པ་འཕེལ་བའམ། རྒྱས་པ་ལ་ཡང་བྱའོ། །འོན་ཀྱང་ཞེས་པ་ནི་སངས་རྒྱས་འབྱུང་བས་དཀྱིལ་འཁོར་ཞེས་བྱ་མོད་ཀྱི། འདི་རྣམས་དང་ལྡན་པའི་ཕྱིར་མིང་ཡང་འདི་སྐད་ཅེས་བྱའོ། །དེར་ནི་དེ་བཞིན་གཤེགས་པ་རྣམས་ཀྱིས་བསྐལ་པ་གྲངས་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་བྱིན་གྱིས་བརླབས་སོ་ཞེས་པ་ནི་དཀྱིལ་འཁོར་འདི་ནི་གཞན་མ་ཡིན་གྱི། གང་དེ་བཞིན་གཤེགས་པས་བསྐལ་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་ནས་བླ་ན་མེད་པའི་བྱང་ཆུབ་ཐོབ་པ་དེ་ཉིད་སྔགས་ཀྱི་ལྟ་དང་ཕྱག་རྒྱ་དང་སྔགས་ཀྱི་ཡི་གེ་རྣམས་སུ་ལྷག་པར་བཀོད་དེ་བྱིན་གྱིས་བརླབས་སོ་ཞེས་བསྟན་པའོ། །གསང་བ་པའི་བདག་
པོ། དེ་ལྟ་བས་ན་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ་ཞེས་སྦྱར་ཏེ། དེ་བཞིན་གཤེགས་པ་རྣམས་བསྐལ་པ་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་པས་ཐམས་ཅད་མཁྱེན་པ་བརྙེས་ནས་སྔོན་གྱི་སྨོན་ལམ་གྱི་ཤུགས་ཀྱིས་སྐུ་ལ་སོགས་པ་མི་ཟད་པའི་རྒྱན་སེམས་ཅན་གྱི་ཁམས་མ་ལུས་པའི་ཕྱིར་བྱིན་གྱིས་རློབ་སྟེ་སེམས་ཅན་གྱི་ཁམས་གཅིག་གམ། གཉིས་ཀྱི་ཕྱིར་མ་ཡིན་ཏེ་རྣམ་གྲངས་དེས་ན་དེ་བཞིན་གཤེགས་པ་གང་དུ་འཚང་རྒྱ་བ་ནི་སེམས་ཅན་གཅིག་གམ་གཉིས་ཀྱི་ཕྱིར་མ་ཡིན་ཏེ། མཐའ་ཡས་པའི་སེམས་ཅན་གྱི་དོན་གྱི་ཕྱིར་མངོན་པར་འཚང་རྒྱ་བར་རིག་པར་བྱ་སྟེ། དེ་བས་ན་དེ་བཞིན་གཤེགས་པ་རྣམས་ནི་སེམས་ཅན་གཅིག་གི་ཕྱིར་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་མ་ཡིན། གཉིས་ཀྱི་ཕྱིར་མ་ཡིན། གསུམ་གྱི་ཕྱིར་མ་ཡིན་གྱི་འོན་ཀྱང་ཐུགས་རྗེ་ཆེན་པོའི་དབང་དུ་གྱུར་པ་དག་སེམས་ཅན་གྱི་ཁམས་མ་ལུས་པ་ཡོངས་སུ་བསྐྱབ་པའི་ཕྱིར་བྱང་ཆུབ་མངོན་པར་རྫོགས་པར་སངས་རྒྱས་ཏེ་ཞེས་གསུངས་པ་ཡིན་ནོ། །བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་འཆད་ཅེས་པ་ནི་དེ་ལྟར་དེ་བཞིན་གཤེགས་པ་མ་ལུས་པའི་སེམས་ཅན་རྣམས་ཀྱི་དོན་དུ་མངོན་པར་སངས་རྒྱས་མོད་ཀྱི། མ་ལུས་པའི་སེམས་ཅན་ཐམས་ཅད་དེ་བཞིན་གཤེགས་པས་ཆོས་བཤད་པའི་སྣོད་དུ་མི་འགྱུར་ཏེ། སོ་སོའི་དད་པ་དང་རྗེས་སུ་མཐུན་པར་དེ་བཞིན་གཤེགས་པས་ཆོས་འཆད་པ་ནི་བསམ་པ་ཇི་ལྟ་བ་བཞིན་དུ་ཆོས་འཆད་པའོ་ཞེས་སོ། །གསང་བ་པའི་བདག་པོ་ཐེག་པ་ཆེན་པོ་ལ་སྔོན་གོམས་པར་མ་བྱས་པ་རྣམས་ནི་གསང་སྔགས་སྤྱད་པའི་ཚུལ་མཐོང་ངམ་ཐོས་ན་སེམས་ལ་དགའ་བ་འམ་དད་པ་ཅུང་ཟད་ཀྱང་ཡང་དག་པར་མི་སྐྱེའི། གསང་བ་པའི་བདག་པོ་གང་དག་གིས་སྔོན་ཐེག་པ་ཆེན་པོའི་གསང་སྔགས་སྤྱོད་པའི་ཚུལ་སྒོ་མཐའ་ཡས་པ་སྒྲུབ་པ་ལ་གོམས་པར་བྱས་པ་ཞེས་པ་ལ་བྱང་ཆུབ་སེམས་དཔའ་ལའང་རྣམ་པ་གཉིས་ཏེ། ཕ་རོལ་ཏུ་ཕྱིན་པའི་སྤྱད་པ་སྤྱོད་པ་དང་སྔགས་ཀྱི་སྒོར་སྤྱད་པ་སྤྱོད་པའོ། །དེ་ལ་ཕ་རོལ་ཏུ་ཕྱིན་པའི་སྤྱད་པ་སྤྱོད་པའི་བྱང་ཆུབ་སེམས་དཔའ་ཡང་སྔགས་ཀྱི་སྤྱད་པ་སྤྱོད། སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་ཡང་ཕ་རོལ་ཏུ་ཕྱིན་པ་ལ་སྤྱོད་དེ། དེ་ལ་ཡང་ཁྱད་བར་ནི་གཅིག་ནི་
སྔགས་གཙོ་བོར་སྒྲུབ་ཅིང་ཕ་རོལ་ཏུ་ཕྱིན་པ་ཞར་ལ་སྤྱོད་ལ། གཅིག་ནི་ཕ་རོལ་ཏུ་ཕྱིན་པ་གཙོ་བོ་བསྒྲུབ་ཅིང་སྔགས་ཞར་ལ་སྤྱོད་དེ། དེ་ལྟར་སྤྱོད་པ་གཉིས་ཀ་ཡང་ཆེན་པོའི་མཚན་ཉིད་དུ་གཅིག་སྟེ། སེམས་ཅན་གང་དེ་ལྟ་བུའི་ཐེག་པ་ཆེན་པོ་ལ་ཚེ་རབས་སྔ་མ་རྣམས་སུ་ཐོས་པ་དང་བསམ་པ་དང་བསྒོམ་པའི་སྒོ་ནས་མ་ཞུགས་ཤིང་ནན་ཏན་དུ་མ་བྱས་པས་ནི་གསང་སྔགས་སྤྱད་པའི་ཚུལ་གྱིས་ཆོས་རྣམས་ཐོས་སམ། དཀྱིལ་འཁོར་ལ་སོགས་པ་མཐོང་ན་ཡང་དད་པ་དང་དགའ་བ་མི་སྐྱེ་བའོ། །སྔགས་ཀྱི་སྤྱོད་པ་དང་ཕ་རོལ་ཏུ་ཕྱིན་པའི་སྤྱོད་པ་དག་སྔོན་གོམས་པར་བྱས་པ་ནི་གཉིས་ཀ་ལ་ཡང་དད་བ་སྐྱེ་སྟེ་སྔགས་སྤྱོད་པ་ལ་གོམས་པར་བྱས་པས་ཀྱང་ཕ་རོལ་ཕྱིན་པ་མཐོང་ངམ་མ་ཐོས་ན་དགའ་ཞིང་དད་པ་སྐྱེ་ལ། ཕ་རོལ་ཏུ་ཕྱིན་པའི་སྤྱོད་པ་ལ་གོམས་པས་ཀྱང་སྔགས་ཀྱི་སྤྱོད་པ་མཐོང་ངམ་ཐོས་ན་དགའ་ཞིང་དད་པ་སྐྱེའོ། །དེ་བས་ན་གང་དག་གིས་ཐེག་པ་ཆེན་པོའི་གསང་སྔགས་སྤྱོད་པའི་ཚུལ་སྒོ་མཐའ་ཡས་པ་སྒྲུབ་པ་ལ་གོམས་པར་བྱས་པ་ཞེས་གསུངས་པ་ཡིན་ཏེ། དེ་བས་ན། ཐེག་པ་ཆེན་པོ་གསང་སྔགས་སྤྱོད་པའི་ཚུལ་འདི་ལྟ་བུ་ལ་གོམས་པར་བྱས་པ་ནི་གསང་སྔགས་སྤྱད་པའི་ཚུལ་འདི་ལ་དང་ཅིང་སྣོད་དུ་འགྱུར་གྱི་གཞན་རྣམས་ནི་མ་ཡིན་ན་ཞེས་པའོ། །སྒོ་མཐའ་ཡས་པ་སྒྲུབ་པ་ཞེས་པ་ནི་ཐེག་པ་ཆེན་པོ་དེ་ཉིད་ཀྱི་ཡོན་ཏན་ཏེ། སྟོབས་དང་མི་འཇིགས་པ་ལ་སོགས་པ་སངས་རྒྱས་ཀྱི་ཡོན་ཏན་གྱི་ཆོས་རྣམས་སྒྲུབ་པ་དང༌། རིག་པའི་རྒྱལ་པོ་དང༌། ཁྲོ་བོ་དང༌། ཕོ་ཉ་ལ་སོགས་པའི་སྒོ་རྣམ་པ་མང་པོ་སྒྲུབ་པའི་ཕྱིར་རོ། །དེ་དག་ནི་རྡོ་རྗེ་སེམས་དཔའ་ཡིན་ཏེ་ཞེས་པ་ནི་དེ་ལྟ་བུའི་ཐེག་པ་ཆེན་པོ་ལ་གོམས་པར་བྱས་པའི་སེམས་ཅན་དེ་དག་གི་སེམས་ཤིན་ཏུ་བརྟན་ཏེ། མུ་སྟེགས་དང་བདུད་ལ་སོགས་པས་མི་བཟློག་པས་དེ་དག་གི་སེམས་རྡོ་རྗེ་དང་འདྲ་བའི་ཕྱིར་རྡོ་རྗེ་སེམས་དཔའ་ཞེས་པའོ།། དེ་རྣམས་ཉིད་ཀྱི་དོན་གྱི་ཕྱིར་གྲངས་ཀྱི་ཚད་འདི་བྱས་སོ་ཞེས་པ་ནི་དེ་ལྟ་བུའི་སེམས་ཅན་ཤིན་ཏུ་དཀོན་པས་ན་གྲངས་ཀྱི་ཚད་མཛད་པ་ཡིན་ནོ། །འོན་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པ་བསྒྲལ་བར་ཡི་དམ་བཅའ་བ་ཁོ་ནར་བྱ་སྟེ། དེས་བྱང་
ཆུབ་ཀྱི་སེམས་ཀྱི་རྒྱུར་འགྱུར་བར་བྱ་བའི་ཕྱིར་སེམས་ཅན་ཚད་མེད་པ་རྣམས་ཡོངས་སུ་གཟུང་བར་བྱའོ་ཞེས་པ་ནི་གོང་དུ་གྲངས་སུ་བཅས་པ་ནི་སྒྲུབ་པའམ་སློབ་དཔོན་དུ་སྨིན་པར་བྱ་བའི་སློབ་མ་སྟེ། དེ་ལས་གཞན་པའི་སེམས་ཅན་རྣམས་ལ་ཡང་སྙིང་རྗེ་ཆེན་པོ་བསྐྱེད་དེ་དཀྱིལ་འཁོར་དེར་བཙུད་ན་སློབ་དཔོན་ནམ་སྒྲུབ་པ་པོར་མི་འགྱུར་ཡང་དཀྱིལ་འཁོར་དུ་བཙུད་ཅིང་བྱང་ཆུབ་ཏུ་སེམས་བསྐྱེད་ན་བྱང་ཆུབ་ཀྱི་རྒྱུ་ས་བོན་དུ་འགྱུར་བའི་ཕྱིར་ཚད་དང་གྲངས་ཚད་མེད་པར་གཟུང་ངོ༌། །དེ་ནས་དེ་དག་བོས་ལ་དཀོན་མཆོག་གསུམ་ལ་སྐྱབས་སུ་གཏང་བར་ཡང་བྱའོ། །སྡིག་པ་མི་བྱ་བ་རྣམས་ཀྱང་བསྒོ་བར་བྱའི་ཞེས་པ་ནས། བདེན་པ་གཉིས་ལ་གནས་པ་ཡི། །ཐེག་པ་རབ་ཀྱི་མཆོག་འདི་ནི། །ཚུལ་ལ་གནས་ན་ཐོབ་པར་འགྱུར། །ཞེས་པའི་བར་དུ་དཀྱིལ་འཁོར་བྲི་བའི་སྔ་དེ་ནུབ་སློབ་མ་རྣམས་ཡོངས་སུ་གཟུང་བའི་རིམ་པ་བཤད་པ་སྟེ་དེ་ཡང་རྣམ་པ་དགུའོ། །དགུ་གང་ཞེ་ན། སྡིག་པ་བཤགས་པ་དང༌། སྐྱབས་སུ་གཏོང་བ་དང༌། དུས་གསུམ་གྱི་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་འཛིན་དུ་གཞུག་པ་དང༌། དྲི་དང་མེ་ཏོག་སྦྱིན་པ་དང༌། སོ་ཤིང་འཆར་གཞུག་པ་དང༌། སྐུད་པས་དཔུང་པ་བཅིངས་ཏེ་སྲུང་བ་དང༌། སྤྲོ་བ་སྐྱེད་པ་དང༌། རྨི་ལམ་བལྟར་གཞུག་པ་དང་ཆོས་བཤད་པ་རྣམས་སོ། །དེ་རྣམས་ཀྱང་རྒྱུད་ལས་ནི་ཁ་ཅིག་ལྟག་འོག་ཏུ་འབྱུང་མོད་ཀྱི་ལས་སུ་བྱ་བའི་རིམ་པ་ལྟ་བུར་བལྟའོ། །དེ་ལས་གསུམ་ལ་སྐྱབས་སུ་འགྲོ་བ་སྦྱིན་པ་སྟོན་ཏེ། གསུམ་ནི་སངས་རྒྱས་དང་ཆོས་དང་འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་སོ། །བརྒྱ་ལ་སྔོན་སོ་སོར་ཐར་པ་ལ་སོགས་པའི་སྡོམ་པའི་སྐབས་སུ་སོང་ཟིན་པ་ཡང་སླར་ཡང་འདིར་སྐྱབས་སུ་གཏང་བར་བྱའོ། །སྔོན་སོང་བ་ན་དགེ་འདུན་འཕགས་པའི་གང་ཟག་བརྒྱད་ལ་སྐྱབས་སུ་སོང་གི་འདིར་སངས་རྒྱས་དང་ཆོས་ལ་སྐྱབས་སུ་སོང་བ་སྔ་མ་དང་མཐུན་དུ་ཟིན་ཀྱང་དགེ་འདུན་ལ་མི་མཐུན་ཏེ། འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ལ་བྱེ་བྲག་ཏུ་སྐྱབས་སུ་སོང་བའི་ཕྱིར་དང༌། དེ་ལས་གཞན་པ་སྐྱབས་སུ་མ་སོང་བ་རྣམས་ནི་གདོང་སྐྱབས་སུ་གཏང་བར་བྱ་བའི་ཕྱིར་རོ། །དེ་སྟེ་འདིར་སྔོན་སྐྱབས་སུ་སོང་ཟིན་པ་ཡང་བརྟན་པར་བྱ་བའི་ཕྱིར་
སླར་ཡང་འདིར་སྐྱབས་སུ་གཏང་བར་བྱའོ། །སྡིག་པ་མི་བྱ་བ་རྣམས་ཀྱང་བསྒོ་བར་བྱའོ་ཞེས་པ་ནི་སྔོན་ཆད་བྱས་པའི་སྡིག་པ་སྔར་བཤགས་པ་དང་ད་ལྟར་མི་བྱད་ཅིང་ཕྱིས་མི་བྱ་བར་ཁས་བླང་བའི་ཕྱིར་རོ། །དེ་ལ་ད་ལྟར་མི་བྱེད་ཅིང་ཕྱིས་མི་བྱ་བར་ཁས་བླང་བ་ནི་རིགས་ན་སྔོན་བྱས་ཟིན་པ་སླར་བཤགས་པ་ལ་དོན་ཅི་ཡོད་ཅེ་ན། སྡིག་པ་སྔོན་བྱས་པ་ལ་ཡོན་ཏན་དུ་མི་བལྟ་ཞིང༌། འཆགས་ན་འཆི་འཕོ་བའི་ཚེ་སྡིག་པ་བྱས་པའི་དངོས་པོ་དེ་མངོན་དུ་མི་འགྱུར་བར་བྱ་བའི་ཕྱིར་རོ། །ད་ལ་སྡིག་པ་བཤགས་པ་ཡང་གསུམ་ལ་སྐྱབས་སུ་འགྲོ་བའི་སྔོན་རོལ་དུ་བྱ་སྟེ་དེ་ཅིའི་ཕྱིར་ཞེ་ན། སྡིག་པ་བཤགས་ཤིང་གཙང་མར་བྱས་པའི་ལུས་ཅན་དེ་སྐྱབས་སུ་གཏང་བའི་འོས་ཡིན་པའི་ཕྱིར་རོ། །དེ་ནས་དེ་དག་ལ་སྤོས་དང་མེ་ཏོག་ལ་སོགས་པ་སྤྱིན་ནོ་ཞེས་པ་ནི། དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་གཟུང་ཟིན་པའི་འོག་ཏུ་བྱ་སྟེ་དེ་ཅིའི་ཕྱིར་ཞེ་ན། དེ་ལ་སྡིག་པ་བཤགས་ཤིང་སྐྱབས་སུ་སོང་ལ་སྡོམ་པ་བཟུང་བས་སློབ་མ་དེ་སྣོད་དུ་གྱུར་ཅིང་སྦྱིན་པའི་གནས་ཡིན་པས་དྲི་དང་མེ་ཏོག་སྦྱིན་ནོ། །དེ་དག་དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་ཡང་འཛིན་དུ་གཞུག་གོ་ཞེས་པ་ལ་དུས་གསུམ་དུ་སྒྲིབ་པ་མེད་པའི་ཡེ་ཤེས་ནི་ཐམས་ཅད་མཁྱེན་པའི་ཡེ་ཤེས་ཏེ། ཐམས་ཅད་མཁྱེན་པའི་ཡེ་ཤེས་དེ་ནི་ཤེས་བྱ་དང་ཉོན་མོངས་པའི་སྒྲིབ་པ་སྤངས་པའི་མཚན་ཉིད་ཡིན་པས་འདས་པ་དང་ད་ལྟར་དང་མ་འོངས་པའི་དུས་ཐམས་ཅད་དུ་ཡང་དག་པ་ཉིད་ཀྱི་དངོས་པོ་སྒྲིབ་པ་མེད་ཅིང་ཐོགས་པ་མེད་པར་མཐོང་བས་ན་དུས་གསུམ་དུ་སྒྲིབ་པ་མེད་པའི་ཡེ་ཤེས་སོ། །ཡེ་ཤེས་དེ་ཐོབ་པར་བྱ་བའི་ཕྱིར། མི་དགེ་བའི་ལས་ཀྱི་ལམ་བཅུ་སྤོང་བའི་སྡོམ་པ་ནི། །དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་ཞེས་བྱ་ལ་སྔོམ་པ་དེ་ཡང་ཀུན་རྫོབ་དང་དོན་དམ་པའི་བྱེ་བྲག་གིས་ཞིབ་ཏུ་འོག་ནས་འཆད་དོ། །འཛིན་དུ་བཅུག་ནས་སྔགས་པ་ཡིས། །དེ་ནས་སོ་ཤིང་དག་ཀྱང་སྦྱིན། །རྩེ་གཅིག་མཉམ་པར་གཞག་པ་དག །ཤར་རམ་བྱང་དུ་ཁ་བསྟན་ཏེ། །ཨུ་དུ་མྦ་ར་ཨ་ཤྭཏྠ། །ཤིན་ཏུ་བཟང་པོ་བསྲུང་བྱས་ཤིང༌། །མེ་ཏོག་དྲི་ལ་སོགས་བསྐུས་པའི། །སོ་ཤིང་དག་ནི་འཆར་གཞུག་གོ །སེམས་ཅན་སྣོད་རུང་སྣོད་མི་རུང༌། །བོར་བ་ཉིད་
ལས་བརྟག་པར་བྱ། །ཞེས་པ་ནི་གཙང་ཞིང་དག་པར་བྱ་བའི་ཕྱིར་དང༌། འཇིག་རྟེན་པའི་ཚུལ་དུ་ཡང་སང་ལྟ་བུ་ནས་སྨྱུང་བར་འདུག་པར་བྱ་ན་དོ་ནུབ་སོ་ཤིང་བཅའ་བར་སྲིད་དེ། དེ་དག་དང་མཐུན་པར་བྱ་ཞིང་གཟུད་པའི་ཕྱིར་དང༌། སོ་ཤིང་དེ་བོར་ནས་ཁ་གང་དུ་བལྟས་པ་ལས་སློབ་མ་རྣམས་གྲུབ་པ་ལ་སོགས་པ་གང་གི་སྣོད་དུ་གྱུར་པའི་ལྟས་བལྟ་བའི་ཕྱིར་རོ། །རྩེ་གཅིག་མཉམ་པར་གཞག་པ་དག །ཤར་རམ་བྱང་དུ་ཁ་བསྟན་ཏེ། །ཞེས་བྱ་བ་དག་སོ་ཤིང་དག་ནི་འཆར་བཞུག་གོ །སེམས་ཅན་སྣོད་རུང་སྣོད་མི་རུང༌། །བོར་བ་ཉིད་ལས་བརྟག་པར་བྱ། །ཞེས་པ་ནི་ཁ་ཕྱོགས་སུ་བལྟས་པ་ལས་སོ་ཤིང་གི་ཁ་བདག་ལ་བལྟས་པར་གྱུར་པ་གྲུབ་པ་མཆོག་མྱུར་དུ་འཐོབ་པའི་སྣོད་དུ་ཡང་འགྱུར་ཞིང༌། སོ་ཤིང་གི་ཁ་ནུབ་ཕྱོགས་སུ་བལྟས་པའི་ཞར་གྱིས་དབང་དུ་བྱས་བའི་ལས་ཀྱང་འགྲུབ་པར་འགྱུར་རོ། །སོ་ཤིང་གི་རྩེ་མོ་ཤར་ཕྱོགས་སུ་བལྟས་ན་གྲུབ་པ་མཆོག་དང་རྒྱས་པའི་ལས་ཀྱི་སྣོད་དུ་འགྱུར་རོ། །སོ་ཤིང་གི་ཁ་ལྷོ་ཕྱོགས་སུ་བལྟས་ན་མངོན་པར་སྤྱོད་པའི་ལས་གྲུབ་པའི་སྣོད་དུ་འགྱུར་རོ། །བདག་ཉིད་ཁ་བྱང་ཕྱོགས་སུ་བལྟས་ལ་སོ་ཤིང་གི་ཁ་བདག་ལ་བལྟས་ན་གྲུབ་བ་འབྲིང་པོ་མྱུར་དུ་འཐོབ་པའི་སྣོད་དུ་འགྱུར་རོ། །སོ་ཤིང་གི་ཁ་བྱད་ཕྱོགས་སུ་བལྟས་ན་ཞི་བའི་ལས་འགྲུབ་པར་འགྱུར་ལ། བྱང་ཤར་གྱི་མཚམས་སུ་བལྟས་ན་ཞི་དང་རྒྱས་པ་གཉིས་ཀ་འགྲུབ་པར་འགྱུར་ཞིང་ཤར་ལྷོའི་མཚམས་སུ་བལྟས་ན་མངོན་པར་སྤྱོད་པ་འགྲུབ་ལ། ལྷོ་ནུབ་ཀྱི་མཚམས་སུ་བལྟས་ན་བསྐྲད་པ་དང་སྐམ་པ་ལ་སོགས་པའི་ལས་འགྲུབ་ཅིང་ནུབ་བྱང་གི་མཚམས་སུ་བལྟས་ན་གནོད་སྦྱིན་མོ་ལ་སོགས་པ་འགྲུབ་པོ། །སོ་ཤིང་འོག་གཞི་ལ་ཟུགས་ཏེ་རྩེ་མོ་བར་སྣང་ལ་བལྟས་ན་བར་སྣང་ལ་འགྲོ་བ་འགྲུབ་པར་འགྱུར་ལ། གྱེན་དུ་བལྟས་ན་རིག་པ་འཛིན་པ་ལ་སོགས་པ་འགྲུབ་ཅིང་ཁ་ཐུར་དུ་བལྟས་ནས་འོག་ཏུ་འགྲོ་པ་གྲུབ་པའི་སྣོད་དུ་འགྱུར་ཏེ་ཞིབ་ཏུ་ནི་གསང་བ་སྤྱིའི་རྒྱུད་ལ་སོགས་པར་བལྟའོ། །སོ་ཤིང་གི་ལྟས་བལྟ་བ་ཡང་བཤད་པའི་མཚན་ཉིད་དང་ལྡན་པའི་སློབ་མ་རྣམས་ལ་བལྟ་བར་བྱ་བ་ཡིན་གྱི། སློབ་མ་ཕལ་པ་རྣམས་ལ་ནི་སོ་ཤིང་གི་ལས་དེ་དག་དང་ལྡན་དུ་ཟིན་ཀྱང་གྲུབ་པ་ལ་
སོགས་པ་ལ་དེ་ལྟ་བུའི་ནན་ཏན་མི་བྱེད་པས་ལྟས་དེ་རྣམས་ཅི་ནས་ཀྱང་བརྟག་དགོས་པ་མ་ཡིན་ནོ། །དེ་ནས་ལག་པ་གཡོན་པ་ལ། །སྐུད་པ་མདུད་པ་གསུམ་ལྡན་པ། །བདག་ཉིད་མཉམ་པར་གཞག་པ་ཡིས། །ལེགས་པ་རུ་ནི་བཅིང་བར་བྱ། །ཞེས་པ་ནི་འཕགས་པ་མི་གཡོ་བ་འམ། ཁམས་གསུམ་རྣམ་པར་རྒྱལ་བ་གང་ཡང་རུང་བའི་སྔགས་ཀྱིས་མདུད་པ་རེ་རེ་ཞིང་ལན་རེ་གདབ་སྟེ། སློབ་མ་དེ་རྣམས་བསྲུང་བའི་ཕྱིར་དཔུང་པ་གཡོན་པ་ལ་སློབ་དཔོན་ཉིད་ཀྱིས་བཅིང་ངོ༌། །དེ་ལྟར་ཡོངས་སུ་གཟུང་ལྡན་པའི། །སློབ་མ་ཉེས་པ་མེད་རྣམས་ལ། །བསམ་པ་བརྟན་པར་བྱ་བའི་ཕྱིར། །འདི་ལྟར་སྤྲོ་བ་བསྐྱེད་པར་བྱ། །ཞེས་པ་ནི་འོག་ནས་འབྱུང་བའི་ཚིགས་སུ་བཅད་པས་གཟེངས་བསྟོད་ན་སློབ་མ་རྣམས་དགའ་ཞིང་སྤྲོ་བས་སེམས་བརྟན་པར་འགྱུར་རོ། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཞེས་པ་སྟེ། དེ་ལྟར་ཁྱེད་ཀྱིས་སྡིག་པ་བཤགས་ཤིང་སྐྱབས་སུ་འགྲོ་བ་དང་སྡོམ་པ་བཟུང་བས་མཉམ་པ་མེད་པའི་རྙེད་པ་བླ་ན་མེད་པའི་བྱང་ཆུབ་དེ་ཡང་རྙེད་དོ་ཞེས་པ་སྟེ་དེ་ཅིའི་ཕྱིར་ཞེ་ན། རྒྱལ་བ་སྲས་དང་བཅས་པས་བསྟན་པ་འདི་ལ་ཁྱེད་རྣམས་ཡོངས་སུ་བཟུང་བའི་ཕྱིར་རོ། །དེ་བས་ན་ཁྱེད་རྣམས་དེ་རིང་ནི་ཐེག་པ་ཆེན་པོ་ལ་སྐྱེ་བཞིན་པ་ཡིན་ལ་སང་ནི་ཐེག་པ་ཆེན་པོ་ལ་སྐྱེ་བར་འགྱུར་རོ་ཞེས་པའོ། །དེ་ལ་རྙེད་པ་མཉམ་མེ་ཅེས་པ་པ་ནི་སྔགས་ཀྱི་ཚུལ་ལ་སྤྱོད་པ་དག་ཉན་ཐོས་དང་རང་སངས་རྒྱས་ཐམས་ཅད་ཀྱི་ཐེག་པ་ཆེན་པོ་ཕ་རོལ་ཏུ་ཕྱིན་པ་ལ་སོགས་པ་དང་ཡང་མི་མཉམ་པ་ཡིན་ནམ་ཞེ་ན། ཕ་རོལ་ཏུ་ཕྱིན་པ་ལ་སོགས་པ་ལ་སྤྱོད་པར་འདྲ་ཡང་འདིར་སྔགས་ཀྱི་བཟླས་པ་ལ་སོགས་པ་ལ་ཁྱད་པར་དུ་ལྷག་པར་སྤྱོད་པས་རྙེད་པ་མཉམ་པར་མེད་པ་སྟེ་རྙེད་ཅེས་པ་དེ་ལྟ་བུ་ཐོབ་ཅེས་པའོ། །བདག་ཉིད་ཆེན་པོ་ཁྱེད་རྣམས་ཀྱིས། །ཞེས་པ་ནི་སློབ་མ་རྣམས་ལ་བསྟོད་པའི་ཚིག་སྟེ། དེ་ལྟ་བུའི་མཐུ་ཆེན་པོ་ཞུགས་པས་བཙུན་པ་ཞེས་པའི་དོན་ཏོ། །རྒྱལ་
བ་སྲས་བཅས་པ་ཞེས་པ་ནི་སངས་རྒྱས་བཅོམ་ལྡན་འདས་བྱང་ཆུབ་སེམས་དཔའི་སྲས་དང་བཅས་པ་སྟེ། གང་ཕྱིར་རྒྱལ་བ་ཀུན་གྱིས་ཁྱེད་རྣམས་ཞེས་སྦྲེལ་ལོ། །བསྟན་པ་འདི་ལ་ཀུན་ཡོངས་སུ་གཟུང་ཞེས་ཀྱང་སྦྱར་ཏེ། རྒྱལ་བ་སྲས་དང་བཅས་པས་སྔགས་སྤྱད་པའི་བསྟན་པ་འདིར་ཡོངས་སུ་བཟུང་བས་ན་ཁྱེད་རྣམས་ཀྱིས་མཉམ་པ་མེད་པའི་རྙེད་པ་ཐོབ་པོ་ཞེས་པར་འབྲེལ་ལོ། །སྐྱེ་བཞེན་པ་ནི་ཐེག་པ་ཆེན་པོ་སྐྱེ་བཞིན་པ་སྟེ། དེ་བས་ན། དེ་ཕྱིར་དེ་རྣམས་ཐེག་ཆེན་ལ། །སངས་ནི་རབ་ཏུ་སྐྱེ་བར་འགྱུར། །ཞེས་པ་སྟེ་སང་ལྟ་བུ་དཀྱིལ་འཁོར་དུ་འཇུག་པའི་ཚེ་ཐེག་པ་ཆེན་པོའི་བྱང་ཆུབ་ཏུ་སེམས་བསྐྱེད་པ་སྐྱེས་ཟིན་ཞེས་པའི་དོན་ཏོ། །གལ་ཏེ་རྨི་ལམ་དག་ཏུ། །གཙུག་ལག་ཁང་དང་ཀུན་དགའ་བཟང༌། །ཞེས་པ་ནས། །བརྟུལ་ཞུགས་བཟང་པོ་ཁྱེད་རྣམས་ཀྱིས། །ནང་པར་ཐམས་ཅད་ལ་ཟློས། །སློབ་མ་དེ་དག་རྣམས་ལ་ནི། །དེ་སྐད་བསྒོ་ནས་ཆོས་ཀྱང་བཤད། །ཅེས་པའི་བར་དག་གིས་ནི་དེ་ལྟར་སྤྲོ་བ་བསྐྱེད་པ་ལ་སོགས་པ་བྱས་ནས་སློབ་མ་རྣམས་ལ་རྨི་ལམ་གྱི་ལྟས་འདི་རྣམས་བསྟན་ཏེ་འདི་རྣམས་ལས་གང་མཐོང་བ་དེ་སློབ་དཔོན་ལ་ཟློས་སུ་གཞུག་པ་སྟེ། །རྨི་ལམ་གྱི་ལྟས་དེ་རྣམས་ཀྱང་ས་ལས་བྱུང་བ་དང་བར་སྣང་གི་དང་འཕགས་པའི་དང་རྣམ་པ་གསུམ་སྟེར་བ་དང་འབྲིང་དང་ཐ་མར་བལྟའོ། །གསུམ་པོ་དེ་རེ་རེ་ལ་ཡང༌། རབ་དང་འབྲིང་དང་ཐ་མ་སྟེ་གསུམ་དུ་དབྱེ་བར་བྱའོ། །དེ་ལ་གཙུག་ལག་ཁང་ཞེས་པ་ནས་བྲམ་ཟེ་དང་ཞེས་པའི་བར་ནི་ས་ལས་བྱུང་བའོ།། སངས་རྒྱས་དང་ནི་རང་སངས་རྒྱས། །དེ་བཞིན་རྒྱལ་བའི་ཉན་ཐོས་དང༌། བྱང་ཆུབ་སེམས་དཔའ་བདག་ཉིད་ཆེ། །ཞེས་པ་ནི་འཕགས་པའིའོ། །གལ་ཏེ་འབྲས་བུ་ཐོབ་པ་དང༌། །ཞེས་པ་ནས། བཀྲ་ཤིས་ཡིད་དུ་འོང་བའི་ཚིག །འདོད་པའི་འབྲས་བུ་འབྱུང་བར་གྲགས། །ཞེས་པའི་བར་ནི་སྣང་ལས་བྱུང་བའི་ལྟས་སོ། །དེ་ལ་གཙུག་ལག་ཁང་ནས་ཡང་ཐོག་ཅས་པའི་བར་དུ་ཐ་མའོ། །རལ་གྲི་དང་ཡིད་བཞིན་ནོར་བུ་ནི་ས་ལས་བྱུང་བའི་རབ་བོ། གདུགས་དང་མེ་ཏོག་སྣ་ཚོགས་དང༌། བུད་མེད་བཟང་མོ་གོས་དཀར་ཅན། །སྡུག་པའི་གཉེན་དང་བཤེས་དག་དང༌། །གླེགས་བམ་དེ་བཞིན་བྲམ་ཟེ་དང༌། །ཞེས་པ་ནི་ས་ལས་བྱུང་བའི་ལྟས་འབྲིང་ངོ༌། །
སངས་རྒྱས་ནི་འཕགས་པའི་ལྟས་རབ་པོ། །བྱང་ཆུབ་སེམས་དཔའ་བདག་ཉིད་ཆེ་དང༌། རང་སངས་རྒྱས་ནི་འཕགས་པའི་འབྲིང་ངོ༌། །ཉན་ཐོས་ནི་འཕགས་པའི་ཐ་མའོ། །འབྲས་བུ་ཐོབ་པ་ནི་བར་སྣང་གི་ཐ་མའོ། །མཚོ་དང་རྒྱ་མཚོ་ལ་བརྒྱལ་ཞིང་བརྒལ་བ་ནི་བར་སྣང་གི་འབྲིང་ངོ༌། །དེ་བཞིན་དུ་བཀྲ་ཤིས་ཡིད་དུ་འོང་བའི་ཚིག་འདོད་བའི་འབྲས་བུ་འབྱུང་བ་གང་ལས་ཐོས་ན་བར་སྣང་གི་རྨི་ལམ་གྱི་ལྟས་རབ་ཏུ་ཤེས་པར་བྱ་སྟེ། རྨི་ལམ་དེ་རྣམས་བལྟ་བ་ཡང་ཁྱད་པར་གྱི་སློབ་མ་རྣམས་གང་དུ་དཀྱིལ་འཁོར་བྲི་བའི་ས་དེའི་ཉེ་འཁོར་དུ་ཉལ་བར་རིགས་སོ། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཞེས་པ་ནས། ཐེག་པ་རབ་ཀྱི་མཆོག་འདི་ནི། །ཚུལ་ལ་གནས་ན་ཐོབ་པར་འགྱུར། །ཞེས་པའི་བར་གྱིས་ནི་སློབ་མ་དེ་རྣམས་སྤྲོ་བ་བྱ་བའི་ཕྱིར་ཐེག་པ་ཆེན་པོ་ལ་སྐྱེ་བར་འགྱུར་རོ་ཞེས་བཤད་པའི་ཐེག་པ་ཆེན་པོ་ཉིད་རྒྱུ་དང་འབྲས་བུའི་ཡོན་ཏན་གྱི་ཡང་འདིར་བཤད་དེ། དེ་ལྟ་བུའི་ཐེག་པ་ཁྱེད་ཀྱིས་ཐོབ་པ་ཡིན་ནོ་ཞེས་པ་བསྟན་ཏོ། །ལམ་མཆོག་འདི་ནི་དཔལ་དང་ལྡན། །ཞེས་པ་ནི་བླ་ན་མེད་པའི་བྱང་ཆུབ་ཏུ་འགྲོ་བའི་ལམ་སྟེ་དེ་ཡང་སྔགས་ཀྱི་ཚུལ་ལ་སྤྱོད་པའི་ལམ་མོ། །ལམ་མཆོག་ཅེས་པ་ནི་ཉན་ཐོས་དང་རང་སངས་རྒྱས་ཀྱི་ཐེག་པ་དང་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་ལམ་ལས་འཕགས་པའི་ཕྱིར་རོ། །ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའི་ལམ་ལས་ཅིའི་ཕྱིར་འཕགས་ཤེ་ན། ཕ་རོལ་ཏུ་ཕྱིན་པ་ལ་སོགས་པ་ལ་སྤྱོད་པར་འདྲ་ཡང་ལྷ་རྣམས་མཉེས་པར་བྱ་བའི་ཕྱིར་ཡན་ལག་བཞི་ལ་སོགས་པའི་སྔགས་བཟླས་པ་དང་མཆོད་པ་དང་སྦྱིན་སྲེག་ལ་སོགས་པའི་སྒོ་ནས་སྦྱིན་པ་ལ་སོགས་པ་ལ་ཕ་རོལ་ཏུ་ཕྱིན་པ་རྒྱུན་མི་འཆད་པར་སྤྱོད་པས་འབྲས་བུ་མྱུར་དུ་ཐོབ་པར་འགྱུར་བའི་ཕྱིར་མཆོག་གོ །དཔལ་དང་ལྡན་ཞེས་པ་ནི་མངོན་པར་མཐོ་བའི་མཚན་ཉིད་ལྷ་དང་མིའི་ལོངས་སྤྱོད་ཀྱི་བདེ་བ་དང་རིག་འཛིན་ལ་སོགས་པའི་གྲུབ་པ་ཐོབ་པ་དང༌། ངེས་པར་ལེགས་པའི་མཚན་ཉིད་མི་གནས་པའི་མྱ་ངན་ལས་འདས་པའི་རིམ་གྱིས་ཐོབ་པར་འགྱུར་པས་ན་དཔལ་དང་ལྡན་པའོ། །ཐེག་པ་ཆེན་པོ་ཆེར་འགྱུར་བའི། །ཞེས་པ་ནི་
སྔགས་སྤྱོད་པའི་ཚུལ་གྱི་ཐེག་པ་ཆེན་པོ་ནི་བླ་ན་མེད་པའི་བྱང་ཆུབ་འབྱུང་བའི་རྒྱུའི་གཙོ་བོ་ཡིན་པས་ན་ཆེར་འབྱུང་བ་ཞེས་བྱའོ། །གང་གི་ཕྱིར། ཁྱེད་རྣམས་དེར་ནི་དོང་བས་ན། །དེ་བཞིན་གཤེགས་པ་རྣམས་སུ་འགྱུར་པར་འོས་སོ་ཞེས་པ་སྟེ། དེ་ལྟར་ཐེག་པ་ཆེན་པོ་ལ་ཞུགས་ན་དེ་ཡི་འབྲས་བུ་ཐམས་ཅད་མཁྱེན་པའི་ཡེ་ཤེས་ཀྱི་རང་བཞིན་ཆོས་ཀྱི་སྐུ་ཐོབ་པར་འགྱུར་རོ་ཞེས་པའོ། །དེ་ནས་བཅོམ་ལྡན་འདས་ལ་རྡོ་རྗེ་འཛིན་པ་སྤྲོས་པ་མེད་པར་གནས་པས་འདི་སྐད་ཅེས་གསོལ་ཏོ་ཞེས་པ་ནས་དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ལུས་དང་ངག་དང་ཡིད་ཡོངས་སུ་མ་བཏང་བར་བསླབ་པ་འཛིན་པར་མི་བྱེད་དོ་ཞེས་པའི་བར་གྱིས་ནི་སྔར་དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྔོམ་པ་གསུངས་པ་དེ་ཉིད་ཞིབ་ཏུ་བཤད་པ་སྟེ། བཅོམ་ལྡན་འདས་དུས་གསུམ་དུ་སྒྲིབ་པ་མ་མཆིས་པའི་ཡེ་ཤེས་ཀྱི་སྡོམ་པ་གང་ལ་བྱང་ཆུབ་སེམས་དཔའ་རྣམས་གནས་ན་སངས་རྒྱས་དང་བྱང་ཆུབ་སེམས་དཔའ་རྣམས་མཉེས་པར་འགྱུར་བར་བཤད་དུ་གསོལ་ཞེས་པ་ནི། དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྔོམ་པ་དེ་ལ་གནས་ན་སངས་རྒྱས་དང་བྱང་ཆུབ་སེམས་དཔའ་རྣམས་མཉེས་ཏ། མངོན་པར་མཐོ་བ་དང་ངེས་པར་ལེགས་པར་ཐོབ་པར་འགྱུར་བ་དེ་ལྟ་བུ་བཤད་དུ་གསོལ་ཞས་པའོ། །དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་ནི་བཤད་ཟིན་ཏོ། །ལུས་དང་ངག་དང་ཡིད་གཅིག་ཏུ་འཇུག་ཅིང་ཞེས་པ་ནི་ལུས་དང་ངག་དང་ཡིད་གསུམ་དུས་གཅིག་ཏུ་སྟོང་པ་ཉིད་ལ་འཇུག་པ་སྟེ། དེ་ལྟར་ལུས་དང་ངག་དང་ཡིད་གསུམ་སྟོང་པ་ཉིད་ཀྱི་རང་བཞིན་དུ་གྱུར་ཅིང་དམིགས་སུ་མེད་པས་ཆགས་པར་བྱ་དང་ཆགས་པ་ཉིད་དང་ཆགས་པར་བྱེད་པ་ལ་སོགས་པ་ཡང་དམིགས་སུ་མེད་དེ། དེ་ལྟར་དམིགས་སུ་མེད་པ་ན་ལུས་དང་ངག་དང་ཡིད་རྣམས་སྡིག་པ་ལ་སོགས་པ་མི་བྱེད་པ་དེ་ནི་སྡོམ་པའོ། །ཆོས་ཐམས་ཅད་ལ་རྩོམ་པ་མེད་ཅེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་ཐམས་ཅད་སྐྱེ་བར་བྱེད་པའི་རྒྱུ་ལུས་དང་ངག་དང་ཡིད་གསུམ་གྱིས་མི་བྱེད་པ་སྟེ། དེ་ལྟར་དེ་དག་སྐྱེད་པའི་རྒྱུ་མ་བྱས་པས་ན་སྡོམ་པ་ཡིན་ཏེ། དེ་དག་གིས་ནི་དོན་དམ་པའི་སྡོམ་པ་བསྟན་པའོ། །དེ་ཡང་གང་ཞེ་ན། སངས་རྒྱས་
དང་བྱང་ཆུབ་སེམས་དཔའ་རྣམས་ལ་བདག་གིས་ལུས་ཡོངས་སུ་གཏོང་བ་གང་ཡིན་པའོ་ཞེས་པ་ནི་དུས་གསུམ་སྒྲིབ་པ་མེད་པའི་སྔོམ་པ་དེ་གཞན་མ་ཡིན་གྱི་བདག་གི་ལུས་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕུལ་བ་ལུས་དེ་སངས་རྒྱས་དང་བྱང་ཆུབ་སེམས་དཔའ་རྣམས་དབང་བ་ཡིན་གྱི་བདག་ལ་དབང་མེད་དོ། །དེ་ལྟར་བདག་ལ་དབང་མེད་དེ་སངས་རྒྱས་དང་བྱང་ཆུབ་སེམས་དཔའ་རྣམས་དབང་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་ནི་མི་དག་བ་བཅུའི་ལས་ཀྱི་ལམ་མི་སྤྱོད་དོ། །དེ་བས་ན་གང་གིས་ལུས་ཕུལ་བ་དེས་ཀྱང་ཆོས་བཞིན་དུ་བྱ་དགོས་ཏེ། ལུས་ངག་ཡིད་གསུམ་གྱི་སྒོ་ནས་མི་དགེ་བའི་ལས་ཀྱི་ལམ་བཅུ་མི་སྤྱོད་པས་ན་སྡོམ་པ་ཞེས་བྱའོ། །དེ་བས་ན་དེ་ཅིའི་ཕྱིར་ཞེན། གང་གིས་བདག་གི་ལུས་ཡོངས་སུ་གཏང་བ་དེས་ནི་དངོས་པོ་གསུམ་ཡོངས་སུ་བཏང་བ་ཡིན་ཏེ། དངོས་པོ་གསུམ་ཡོངས་སུ་གཏང་བ་དེ་ཡང་གང་ཞེ་ན་འདི་ལྟ་སྟེ་ལུས་དང་ངག་དང་ཡིད་དོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་ལུས་དང་ངག་དང་ཡིད་གསུམ་གྱི་སྔོམ་པས་བསྡམ་པར་བྱའོ་ཞེས་གསུངས་པ་ཡིན་ནོ། །དེ་ཅིའི་ཕྱིར་ཞེས་ན། བྱང་ཆུབ་སེམས་དཔའ་རྣམས་ནི་ལུས་དང་ངག་དང་ཡིད་ཡོངས་སུ་མ་བཏང་བར་བསླབ་པ་འཛིན་པ་མི་བྱེད་དོ་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ལ་ལུས་ཕུལ་བས་ལུས་དང་ངག་དང་ཡིད་གསུམ་ཆར་ཕུལ་བར་འགྱུར་ཏེ། ལུས་དང་ངག་དང་ཡིད་གསུམ་ལ་བདག་མི་དབང་ན་ལུས་དང་ངག་དང་ཡིད་གསུམ་གྱི་སྒོ་ནས་མི་དགེ་བའི་ལས་ཀྱི་ལམ་བཅུ་མི་སྤྱོད་པས་དེ་ཉིད་སྔོམ་པ་སྟེ། ལུས་དང་ངག་དང་ཡིད་གསུམ་ལྷས་ལྷག་པའི་སྔོམ་པ་གཞན་ཡོད་པ་མ་ཡིན་ནོ་ཞེས་པའི་དོན་ཏོ། །མདོར་ན་གང་གིས་སངས་རྒྱས་དང་བྱང་ཆུབ་སེམས་དཔའ་རྣམས་ལ་བདག་གི་ལུས་ཕུལ་བ་དེས་ལུས་དང་ངག་དང་ཡིད་གསུམ་ཆར་ཕུལ་བས་ན་གསུམ་པོ་དེ་དག་གི་སྒོ་ནས་མི་དགེ་བ་བཅུའི་ལས་ཀྱི་ལམ་མི་སྤྱོད་པ་དེ་དག་ཐམས་ཅད་མཁྱེན་པའི་ཡེ་ཤེས་སྒྲིབ་པ་མེད་པ་ཐོབ་པར་བྱེད་པའི་རྒྱུར་འགྱུར་བར་བསྟན་པ་ཡིན་ནོ། །དེ་ནས་ཕྱིས་དེ་ཉིན་པར་བཅོམ་ལྡན་འདས་རྣམ་པར་སྣང་མཛད་ལ་ཕྱག་བྱས་ཏེ་བདག་ཉིད་རྡོ་རྗེ་སེམས་དཔར་བྱིན་གྱིས་
བརླབས་ལ་ཞེས་པ་ནས། དེ་ནས་སེམས་སྦྱང་བའི་ཕྱིར་སྤོས་ཆུ་གཙང་མ་བླུད་དོ་ཞེས་པའི་བར་གྱིས་ནང་བར་དཀྱིལ་འཁོར་འདྲི་བའི་སློབ་དཔོན་གྱི་ལས་སུ་བྱ་བ་རྣམས་བཤད་པ་སྟེ། ནང་པར་ཉི་མ་འཆར་ཀར་བརྟགས་ན་ལྷོ་བྱང་དང་ཤར་ནུབ་ལ་སོགས་པ་གསལ་བར་མངོན་ཏེ། དེ་བས་ན་ནང་པར་ཁྲུས་ལ་སོགས་པ་བྱས་ནས་དཀྱིལ་འཁོར་བྲི་བའི་ས་དེའི་དབུས་ས་ཞུགས་ཏེ་བཅོམ་ལྡན་འདས་རྣམ་པར་སྣང་མཛད་ཡིད་ལ་བྱས་ནས་ཕྱག་བྱས་ལ་དམ་ཚིག་གསུམ་གྱི་ཕྱག་རྒྱ་བཅིངས་ཏེ་ཆོས་ཀྱི་དབྱིངས་ཀྱི་ཕྱག་རྒྱས་བདག་ཉིད་སྟོང་པར་བྱིན་གྱིས་བརླབས་ལ། ཆོས་ཀྱི་འཁོར་ལོའི་ཕྱག་རྒྱ་བཅིངས་ནས་རྡོ་རྗེ་སེམས་དཔར་བྱིན་གྱིས་བརླབ་པོ། །དེ་ནས་རྡོ་རྗེ་གོ་ཆའི་ཕྱག་རྒྱ་བཅིངས་ནས་གོ་ཆ་བགོ་བ་དེ་ནི་རྡོ་རྗེ་སེམས་དཔར་བྱིན་གྱིས་བརླབ་པ་སྟེ་རྡོ་རྗེ་སེམས་དཔའ་ཞེས་བྱ་བ་ནི་སེམས་ཤིན་ཏུ་བརྟན་པ་རྡོ་རྗེ་དང་འདྲ་བ་ལ་བྱ་སྟེ། དེ་ཡང་གང་ཞེ་ན་ཕྱིན་ཅི་མ་ལོག་པར་ཡོངས་སུ་གྲུབ་པའི་མཚན་ཉིད་བྱང་ཆུབ་ཀྱི་སྙིང་པོའི་སེམས་ཏེ། དེ་ཉིད་དཔལ་རྡོ་རྗེ་སེམས་དཔའི་བྱང་ཆུབ་སེམས་དཔའི་སྐུར་བྱིན་གྱིས་བརླབ་པའོ། །དེ་ལྟར་སློབ་དཔོན་དེ་རྡོ་རྗེ་སེམས་པའི་སྐུར་བྱིན་གྱིས་བརླབས་ལ་དཀྱིལ་འཁོར་གྱི་སའི་ལྷོ་བྱང་དང་ཤར་ནུབ་ལ་སོགས་པ་བརྟགས་ཏེ་གཏན་ལ་དབབ་པ་དང་ལྷ་རྣམས་གང་དུ་འགོད་པའི་གནས་ཀྱང་ཡིད་ཀྱིས་གཏན་ལ་དབབ་པར་བྱའོ། །ཡང་བུམ་པ་སྤོས་ཆུས་བཀང་བ་ལ་འཇིག་རྟེན་གསུམ་ལས་རྣམ་པར་རྒྱལ་བས་མངོན་བར་བསྔགས་ཏེ་སྒོ་དང་པོར་གཞག་ལ་མཁས་པས་སྐྱེ་བོ་ཀུན་ལ་དེས་བསང་གཏོར་བྱའོ་ཞེས་པ་ནི་གཞུང་ལས་འབྱུང་བའི་མཚན་ཉིད་དང་ལྡན་པའི་བུམ་པ་སྤོས་ཆུས་བཀང་བ་ལ་རིན་པོ་ཆེ་དང་སྨན་དང༌། འབྲུ་ལྔ་རྣམས་བླུགས་ཏེ་དཀྱིལ་འཁོར་གྱི་ཁང་བའི་སྒོར་བཞག་སྟེ་སློབ་མ་རྣམས་ནང་དུ་འོང་བའི་ཚེ་བགེགས་བསལ་བའི་ཕྱིར་གཏོར་རོ། །ཁམས་གསུམ་རྣམ་པར་རྒྱལ་བའི་སྔགས་ཀྱིས་བུམ་པ་དེ་ལ་གདབ་པ་དེ་ཡང་སྙིང་པོའི་སྔགས་ཀྱིས་གདབ་ན་བརྒྱ་རྩ་བརྒྱད་དུ་གདབ་ལ། རྩ་བའི་སྔགས་ཀྱིས་གདབ་ན་བདུན་ནམ་ཉི་ཤུ་རྩ་གཅིག་གདབ་བོ། །དེ་ནས་སེམས་སྦྱང་བའི་ཕྱིར་སྤོས་ཆུ་གཙང་མ་བླུད་པ་ནི་སློབ་མ་རྣམས་ཀྱི་སྔགས་སྤྱོད་པ་དང་འགལ་བའི་ཁ་ཟས་ཟོས་པའི་རྣམ་པར་རྟོག་པ་མེད་ན་ཡང་སྤོས་ཀྱི་
ཆུ་གཙང་མ་དེ་བླུད་དོ། །གཙང་མ་ཞེས་པ་ནི་སྲོག་ཆགས་ཀྱི་ཡན་ལག་ལ་སོགས་པ་མེད་པའོ། །སྔགས་དང་འགལ་བའི་ཁ་ཟས་ཟོས་བའི་རྣམ་པར་རྟོག་པ་མེད་ན་ཡང་སྤོས་ཀྱི་ཆུ་གཙང་མ་འཐུངས་པས་བདག་གི་རྒྱུད་གཙང་མར་གྱུར་ཏོ་སྙམ་པའི་འདུ་ཤེས་སྐྱེ་སྟེ་མི་གཙང་བ་ལ་སོགས་པའི་དོགས་པ་མེད་པར་འགྱུར་བའི་ཕྱིར་སྤོས་ཆུ་བླུད་དོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅས་གསོལ་ཏོ་ཞེས་པ་ནས་། རྟག་ཏུ་མཚན་མོ་བྲི་བར་བྱ། །ཞེས་པའི་བར་གྱིས་དུས་ཇི་ཙམ་ན་དཀྱིལ་འཁོར་དྲི་བ་ཞུས་ཤིང་བཤད་པ་ཡིན་ཏེ། དུས་དང་ཚོད་ཅེས་པ་ནི་དཀྱིལ་འཁོར་འདྲི་བའི་དུས་ནམ་ཉིད་ཀྱི་ཚེ་ན་ཡིན་པ་དེ་བཤད་དུ་གསོལ་ཞེས་པའོ། །ཀུན་མཁྱེན་པ་ནི་བཅོམ་ལྡན་འདས་ཐམས་ཅད་མཁྱེན་པའོ། །སྨྲ་བའི་མཆོག་གིས་བཀའ་སྩོལ་ཅིག །ཅེས་པ་ནི་སྨྲ་བ་ཐམས་ཅད་ཀྱི་མཆོག་ནི་སངས་རྒྱས་བཅོམ་ལྡན་འདས་སོ། །དཀྱིལ་འཁོར་གྱི་ནི་སློབ་དཔོན་དག །གསང་སྔགས་སྒྲུབ་ལ་འབད་པ་ན། །གང་གི་དུས་སུ་དཀྱིལ་འཁོར་དུ། །སེམས་དཔའ་ཆེན་པོར་བྱིན་རློབ་པའི། །ཞེས་པ་ནི་དཀྱིལ་འཁོར་གྱི་སློབ་དཔོན་དམ་ཚིག་གི་དཀྱིལ་འཁོར་འདྲི་བ་དང༌། སྒྲུབ་པའི་དཀྱིལ་འཁོར་འདྲི་བ་ན་བྱང་ཆུབ་སེམས་དཔའ་རྣམས་དེར་གཤེགས་ནས་བྱིན་གྱིས་རློབ་པར་འགྱུར་བའི་དུས་གང་ལ་གས་ཞེས་ཞུས་པ་སྟེ། སེམས་དཔའ་ཆེན་པོ་ཞེས་པ་ནི་སངས་རྒྱས་བཅོམ་ལྡན་འདས་ལ་མི་བྱའི་ཕ་རོལ་ཏུ་ཕྱིན་པའི་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ལ་བྱའོ། །དེ་ཅིའི་ཕྱིར་ཞེ་ན་སངས་རྒྱས་བཅོམ་ལྡན་འདས་ནི་དུས་ཐམས་ཅད་དུ་བྱིན་གྱིས་རློབ་པས་ཞུ་མི་དགོས་ལ། །བྱང་ཆུབ་སེམས་དཔའ་རྣམས་ནི་ཏིང་ངེ་འཛིན་ལས་བཞེངས་ནས་སེམས་ཅན་ཐམས་ཅད་ཀྱི་དོན་ལ་རྟོག་པ་སྔོན་དུ་བཏང་སྟེ་གཤེགས་བས་དུས་ཐམས་ཅད་དུ་བྱིན་གྱིས་མི་རློབ་པོ། །དེ་བས་ན་དཀྱིལ་འཁོར་འདྲི་བ་ལ་བྱང་ཆུབ་སེམས་དཔའ་རྣམས་གཤེགས་པར་འགྱུར་བའི་དུས་གང་ཡིན་ཞེས་ཞུས་པའོ། །གཉིས་སུ་ན་སངས་རྒྱས་བཅོམ་ལྡན་འདས་ལ་སེམས་དཔའ་ཆེན་པོ་ཞེས་ནམ་ཡང་མི་བརྗོད་དེ། བྱང་ཆུབ་སེམས་དཔའ་རྣམས་སེམས་དཔའ་ཆེན་པོ་ཞེས་བརྗོད་པར་གྲགས་སོ། །དེ་བས་ན་སེམས་དཔའ་ཆེན་པོ་ཞེས་པ་ནི་བྱང་ཆུབ་སེམས་
དཔའ་ཆེན་པོ་རྣམས་ལ་བྱའོ། །དཀྱིལ་འཁོར་དོན་དུ་གཉེར་བ་ལ། །རྟག་ཏུ་མཚན་མོ་བྲི་བར་བྱ། །ཞེས་པ་ནི་དཀྱིལ་འཁོར་འདྲི་བར་འདོད་པ་རྣམས་ཀྱིས་དུས་ཐམས་ཅད་དུ་དཀྱིལ་འཁོར་ཐམས་ཅད་མཚན་མོ་བྲིའོ་ཞེས་བཀའ་སྩལ་པ་སྟེ། བྱང་ཆུབ་སེམས་དཔའ་དེ་རྣམས་ཀྱང་མཚན་མོའི་དུས་དེར་གཤེགས་པར་འགྱུར་རོ་ཞེས་གསུངས་པ་ཡིན་ནོ། །དེ་བས་ན་འདིས་ནི་དམ་ཚིག་གི་དཀྱིལ་འཁོར་དང་སྒྲུབ་པའི་དཀྱིལ་འཁོར་གཉི་ག་ཡང་དུས་ཐམས་ཅད་དུ་མཚན་མོ་བྲི་བར་ཤེས་པར་བྱའོ། །དེ་ལ་གསང་བའི་རྒྱུད་ལ་སོགས་པར་སྒྲུབ་པའི་དཀྱིལ་འཁོར་མ་གཏོགས་པར་གཞན་ཐམས་ཅད་མཚན་མོ་བྲིའོ་ཞེས་འབྱུང་སྟེ་དེ་བས་ན་སྒྲུབ་པའི་དཀྱིལ་འཁོར་ནི་ཉིན་པར་བྲི་བར་གསུངས་སོ། །དེ་ཅིའི་ཕྱིར་ཞེ་ན། སྒྲུབ་པ་ནི་ནམ་སྲོད་ནས་ནམ་ལངས་ཀྱི་བར་ཚན་རངས་པར་བསྒྲུབ་དགོས་ཏེ། དེ་བས་ན་སྒྲུབ་པའི་དཀྱིལ་འཁོར་མཚན་མོ་བྲི་བའི་སྐབས་མེད་དེ་ཉིན་པར་བྲི་བར་གསུངས་སོ། །འདིར་ནི་གཉི་ག་ཡང་མཚན་མོ་བྲི་བར་གསུངས་པས་དམ་ཚིག་གི་དཀྱིལ་འཁོར་ནི་དེ་ཉིད་ཀྱི་མཚན་མོ་བྲི་བར་བྱ་ལ། སྒྲུབ་པའི་དཀྱིལ་འཁོར་ནི་རྒྱུད་འདི་ལས་མཚན་མོ་བྲི་བར་གསུངས་པས་གསང་བའི་རྒྱུད་ལས་འབྱུང་བ་ལྟར་ཉིན་པར་བྲི་ར་མེད་ལ། སྒྲུབ་པ་ཉིད་ཀྱི་མཚན་མོ་ཡང་བྲི་བའི་སྐབས་མེད་དེ་ནུབ་དེ་ཉིད་ལ་བྲིས་ན་མཚན་མོའི་མེལ་ཚེ་ཐུན་འགའ་དཀྱིལ་འཁོར་བྲི་བ་ལ་ཟད་པས་སྒྲུབ་པ་མཚན་རངས་པར་མི་འགྱུར་རོ། །དེ་བས་ན་སྔ་དེ་ནུབ་མོ་དཀྱིལ་འཁོར་བྲིས་ལ་ཕྱི་དེ་ནུབ་མོ་བསྒྲུབ་པར་ཤེས་པར་བྱའོ། །དཀྱིལ་འཁོར་ཆེན་པོ་དག་ནུབ་གཅིག་གིས་མི་རྫོགས་པ་ཡང་གཞུང་དེ་ལྟར་ཤེས་པར་བྱའོ། །ད་ནི་དཀྱིལ་འཁོར་བའི་དོན་དུ་སྲད་བུ་བྲེ་བ་ལ་སོགས་པ་བཤད་པར་བྱ་སྟེ། དཀྱིལ་འཁོར་བྲི་བ་དེ་ཡང་དོན་རྣམ་པ་དྲུག་གིས་ཡོངས་སུ་རྫོགས་པར་འགྱུར་རོ། །དྲུག་གང་ཞེ་ན། དཀྱིལ་འཁོར་གྱི་སྲད་བུ་བྲེ་བའི་ཏིང་ངེ་འཛིན་བཤད་པ་དང༌། སྲད་བུ་བྲེ་བ་བཤད་པ་དང༌། དཀྱིལ་འཁོར་གྱི་ཚད་བཤད་པ་དང༌། སྣམ་བུའི་རིམ་པ་དབྱེ་བ་དང༌། སྒོ་ཁྱུད་དང་རྟ་བབས་རྣམས་རྣམ་པར་དབྱེ་བ་དང༌། ལྷ་རྣམས་ཀྱི་གནས་ཀྱི་ངེས་པ་བཤད་པའོ། །དེ་ལ་སློབ་དཔོན་གྱིས་སངས་རྒྱས་ཐམས་ཅད་ལ་ཕྱག་བྱས་ལ་ཚོན་
སྣ་ལྔའི་སྲད་བུ་ཐོགས་ཏེ་བདག་ཉིད་བཅོམ་ལྡན་འདས་རྣམ་པར་སྣང་མཛད་དུ་བྱིན་གྱིས་བརླབས་ལ་ཞེས་པ་ནི་སྲང་བུ་བྲེ་བའི་ཏིང་ངེ་འཛིན་བཤད་པ་སྟེ། སངས་རྒྱས་ཐམས་ཅད་ལ་ཕྱག་བྱས་ལ་ཞེས་པ་ནི་ཏིང་ངེ་འཛིན་ལ་འཇུག་པར་བྱེད་པ་ན་ཐོག་མར་སངས་རྒྱས་རྗེས་སུ་དྲན་ཞིང་ཕྱག་བྱ་བར་རིགས་སོ། །ཚོན་སྣ་ལྔའི་སྲད་བུ་ཞེས་པ་ནི་ཡེ་ཤེས་ལྔའི་རང་བཞིན་དུ་བསམ་པ་སྟེ་བདག་རྣམ་པར་སྣང་མཛད་ཀྱི་སྐུ་ཡེ་ཤེས་ལྔ་པོ་དེ་དག་དང་ལྡན་པར་བྱིན་གྱིས་བརླབ་པོ། བདག་ཉིད་བཅོམ་ལྡན་འདས་རྣམ་པར་སྣང་མཛད་དུ་བྱིན་གྱིས་བརླབས་ལ་ཞེས་པ་ནི་དཀྱིལ་འཁོར་རྣམ་པ་གསུམ་ལ་ཏིང་ངེ་འཛིན་དུ་གནས་པ་ཡང་བྱེ་བྲག་རྣམ་པ་གསུམ་སྟེ། སྙིང་རྗེ་ཆེན་པོའི་དཀྱིལ་འཁོར་ལ་སློབ་དཔོན་རྣམ་པར་སྣང་མཛད་ཀྱི་སྐུར་བྱིན་གྱིས་བརླབས་ནས་སྲད་བུ་བྲེ་བ་ལ་སོགས་པ་དཀྱིལ་འཁོར་གྱི་ལས་རྣམས་བྱའོ། །ཡི་གེ་འཁོར་ལོ་བསྐོར་བའི་དཀྱིལ་འཁོར་ལ་ཆོས་ཀྱི་སྐུར་བྱིན་གྱིས་བརླབས་ནས་དཀྱིལ་འཁོར་གྱི་ལས་རྣམས་བྱའོ། །གསང་བའི་དཀྱིལ་འཁོར་ལ་དབང་ཆེན་ལ་སོགས་པའི་དཀྱིལ་འཁོར་ལྔ་དང་ལྡན་པའི་སྐུར་བྱིན་གྱིས་བརླབས་ནས་དཀྱིལ་འཁོར་གྱི་ལས་རྣམས་བྱ་སྟེ། དེ་དག་ཀྱང་ཞིབ་ཏུ་ནི་བསྡུས་པའི་དོན་ལས་བཤད་ཅིང་རྒྱུད་ཉིད་ལས་ཀྱང་སོ་སོའི་སྐབས་སུ་འཆད་དོ། །ཚོན་སྣ་ལྔའི་སྐུད་པ་རྣམས་ཡེ་ཤེས་ལྔར་བསམ་པ་ནི་འོག་ནས་རྡུལ་ཚོན་སྣ་ལྔ་ལ་སངས་རྒྱས་ལྔར་བསམ་པ་ངང་སྦྱར་རོ། །ཤར་དུ་སྲད་བུ་བྲེ་བ་ནི། །ལྟེ་བའི་ཐད་ཀར་བཟུང་ནས་སུ། །བར་སྣང་ལ་ནི་གཟུང་བར་བྱ། །དེ་ནས་ལྷོ་ཕྱོགས་སོང་ནས་སུ། །བྱང་ཕྱོགས་སུ་ནི་བྲེ་བར་བྱ། །ཞེས་པ་ནི་ཐོག་མར་སློབ་དཔོན་དེ་དཀྱིལ་འཁོར་གྱི་ནུབ་ཕྱོགས་སུ་གནས་ནས་ཁ་ཤར་ཕྱོགས་སུ་བལྟས་ཏེ་འགྲེངས་ལ་ནམ་མཁའ་ལ་རང་བཞིན་གྱི་དཀྱིལ་འཁོར་དམིགས་པའི་ཚུལ་བཅོམ་ལྡན་འདས་རྣམས་པར་སྣང་མཛད་ཀྱི་སྐུ་ལ་སོགས་པ་མི་ཟད་པའི་རྒྱན་གྱི་འཁོར་ལོ་དང་བཅས་པ་མངོན་དུ་བསམས་ཏེ་སྲད་བུའི་ཐོག་མ་གྲོགས་ཀྱིས་འཛིན་དུ་བཅུག་ལ་ཤར་ཕྱོགས་སུ་བརྐྱང་ངོ༌། །དེ་བཞིན་དུ་ལྷོ་ཕྱོགས་ནས་བྱང་ཕྱོགས་སུ་བརྐྱང་སྟེ་དེ་ནི་ནམ་མཁའ་ལ་རང་བཞིན་གྱི་དཀྱིལ་འཁོར་བསམ་པའོ། །དེ་ལྟར་ནམ་མཁའ་ལ་རང་བཞིན་གྱི་དཀྱིལ་འཁོར་སེམས་ཀྱིས་བསམས་ནས་ཕྱིས་སལ་
དཀྱིལ་འཁོར་བྲི་བ་ན་རང་བཞིན་གྱི་དཀྱིལ་འཁོར་དེའི་གཟུགས་བརྙན་ལྟ་བུར་ཤེས་པར་བྱའོ། །དེ་ལྟར་ནམ་མཁའ་ལ་དཀྱིལ་འཁོར་སེམས་ཀྱིས་བསམས་པ་ལ་སྲད་བུ་བྲེ་ཅིང་གོས་ཤེ་ན། ནམ་མཁའ་ལ་རང་བཞིན་གྱི་དཀྱིལ་འཁོར་བསམ་པའི་མཚན་མར་བརྟག་པའི་ཕྱིར་རོ། །དེ་ནས་སྲད་བུ་གཉིས་པ་ནི། རང་གིས་བླངས་ནས་ཞེས་པ་ནི་སྲད་དུ་དང་པོ་དེ་དཀྱིལ་འཁོར་སྔ་མའི་དམན་མ་ཡིན་པས་བྲེར་མི་རུང་བའི་ཕྱིར་ཚོན་སྣ་ལྔའི་སྐུད་པ་གཞན་ཞིག་བླངས་ནས་དཀྱིལ་འཁོར་ཕྱི་མ་བྲི་བའི་དོན་ཏོ། །དེ་ཉིད་དུ། དེ་བཞིན་གཤེགས་པ་རྗེས་དྲན་ཞིང༌། །ཤར་ཕྱོགས་བལྟས་ཏེ་བྲེ་བར་བྱ། །ཞེས་པ་ནི་དཀྱིལ་འཁོར་མི་འཁྲུལ་བར་གཏན་ལ་དབབ་པའི་ཕྱིར་དབུས་ནས་རྒྱ་གྲམ་དུ་ཐིག་བཏབ་སྟེ་དཀྱིལ་འཁོར་གྱི་དབུས་སུ་བབ་པར་ཕུར་བུས་བཙུགས་ལ་དེ་ནས་སྲད་བུ་དེ་བལྟ་བ་སྟེ་དབུས་ཀྱི་ཕུར་བུ་ལ་བརྟོད་ལ་གྲྭ་བཞི་གཏན་ལ་དབབ་པར་བྱའོ། །དེ་ལྟར་གཏན་ལ་ཕབ་ནས་གྲྭ་བཞིའི་མཚན་མར་ཡང་ཕུར་བུ་བཞི་གཟུགས་སྲད་བུ་ཡང་མདུད་པ་མི་པོར་བར་སྐུད་པ་ལ་སོགས་པའི་མཚན་མ་གདགས་པར་བྱའོ། །དེ་བཞིན་གཤེགས་པ་རྗེས་དྲན་ཞིང༌། །ཞེས་པ་ནི་དེ་བཞིན་གཤེགས་པ་རྣམས་ཡིད་ལ་བྱས་ནས་ཞས་པའོ། །དེ་ནས་ལྷོ་ཕྱོགས་སོང་ནས་ནི། །བྱང་ཕྱོགས་སུ་ནི་བྲེ་བར་བྱ། །ཞེས་པ་ཡང་རྒྱ་གྲམ་ཉིད་གདབ་པ་ལ་བྱའོ། །བློ་ཅན་དེ་ནས་སླར་ལོག་ནས། །བདེན་བྲལ་ཕྱོགས་སུ་གནས་ནས་ནི། །བྱང་ཕྱོགས་སུ་ནི་བྲེ་བར་བྱ། །ཞེས་པ་ནི་སློབ་དཔོན་དེ་ལྷོ་ནུབ་ཀྱི་མཚམས་སུ་འདུག་ནས་ཁ་བྱང་ཕྱོགས་སུ་བལྟས་ཏེ་ནུབ་ཀྱི་ངོས་སུ་ཐིག་གདབ་པར་བྱའོ། །དེ་ནས་གཡས་སུ་བསྒྱུར་བར་བྱ། །བསྒྱུར་ཏེ་དེ་རུ་འདུག་ནས་ནི། །ལྷོ་ཕྱོགས་སུ་ནི་བྲེ་བར་བྱ། །ཞེས་པ་ནི་སློབ་དཔོན་ལྷོ་ནུབ་ཀྱི་མཚམས་དེ་ཉིད་དུ་འདུག་ཅིང་ཁ་བྱང་ཕྱོགས་སུ་བལྟས་པ་ལས་ཁ་ཤར་ཕྱོགས་སུ་བསྒྱུར་ཏེ་སྲད་བུ་འཛིན་པའི་གྲོགས་པོ་དཀྱིལ་འཁོར་བསྐོར་ནས་ཤར་ལྷོའི་མཚམས་སུ་སོང་སྟེ་ལྷོ་ཕྱོགས་ཀྱི་ངོས་སུ་ཐིག་གདབ་པར་བྱའོ། །དེ་ནས་གནས་དེ་བཏང་ནས་སུ། །མེ་ཡི་ཕྱོགས་སུ་གནས་ནས་ནི། །སྔགས་པ་གསང་སྔགས་ཆོ་གར་གནས། །ཤར་དུ་སྲད་བུ་བྲེ་བར་བྱ། །ཞེས་པ་ནི་སློབ་དཔོན་དེས་ལྷོ་ནུབ་ཀྱི་མཚམས་དེ་བོར་ནས་ཤར་ལྷོ་མཚམས་སུ་འདུག་སྟེ་ཤར་ཕྱོགས་ཀྱི་ངོས་ཐིག་གདབ་པར་
བྱའོ། །སྔགས་པ་གསང་སྔགས་ཆོ་གར་གནས། །ཞེས་པ་ནི་རྣམ་པར་སྣང་མཛད་ཀྱི་ཏིང་ངེ་འཛིན་ལ་གནས་ཞེས་པའི་དོན་ཏོ། །དེ་ནས་དེ་བཞིན་དབང་ལྡན་ཕྱོགས། །སོང་ནས་ནུབ་ཏུ་ཁ་བལྟས་ཏེ། །རླུང་གི་ཕྱོགས་ཀྱི་བར་དུ་ནི། །བྱང་གི་ཕྱོགས་སུ་བྲེ་བར་བྱ། །ཞེས་པ་ན་སློབ་དཔོན་བྱང་ཤར་གྱི་མཚམས་སུ་འདུག་ནས་བྱང་ཕྱོགས་ཀྱི་ངོས་ཐིག་གདབ་བར་བྱའོ། །སྔགས་པ་ཡིས་ནི་དེ་ལྟ་བུར། །ཀུན་ནས་གྲྭ་བཞི་ལྷམ་པར་བྱ། །ཞེས་པ་ནི་དེ་ལྟར་གོང་དུ་གསུངས་པའི་མཚན་ཉིད་ཀྱིས་དཀྱིལ་འཁོར་དེ་ཀུན་ནས་གྲུ་བཞིར་བྱའོ་ཞེས་པའོ། །དེ་ལྟར་དཀྱིལ་འཁོར་གྱི་ཐིག་གདབ་པ་ན་ཐོག་མར་ནུབ་ཕྱོགས་དང་དེ་ནས་ལྷོ་ཕྱོགས་དང༌། དེའི་འོག་ཏུ་ཤར་ཕྱོགས་དང་དེ་ནས་བྱང་ཕྱོགས་སུ་བྱ་བ་ཅི་ལས་ཡིན་ཞེ་ན། ནུབ་ཕྱོགས་ཀྱི་ངོས་ནི་སོ་སོར་རྟོག་པའི་ཡེ་ཤེས་སུ་བརྟགས་ལ། ལྷོ་ཕྱོགས་ནི་མཉམ་པ་ཉིད་ཀྱི་ཡེ་ཤེས་སུ་བརྟགས་ཤིང་ཤར་ཕྱོགས་ནི་མེ་ལོང་ལྟ་བུའི་ཡེ་ཤེས་སུ་བརྟགས་ལ་བྱང་ཕྱོགས་ནི་བྱ་བ་སྒྲུབ་པའི་ཡེ་ཤེས་སུ་བརྟགས་ཏེ་དེ་བས་ན་ཐོག་མར་སོ་སོར་རྟོག་པའི་ཡེ་ཤེས་སུ་འགྱུར་ལ་དེ་རྫོགས་པ་ལས་མཉམ་པ་ཉིད་ཀྱི་ཡེ་ཤེས་རྫོགས་པར་འགྱུར་ཞིང༌། མཉམ་པ་ཉིད་ཀྱི་ཡེ་ཤེས་ལས་མེ་ལོང་ལྟ་བུའི་ཡེ་ཤེས་རྫོགས་པར་འགྱུར་ལ། མེ་ལོང་ལྟ་བུའི་ཡེ་ཤེས་ལས་ལུས་དང་ལོངས་སྤྱོད་དང་གནས་ཀྱི་མཚན་ཉིད་བྱ་བ་སྒྲུབ་པའི་ཡེ་ཤེས་འབྱུང་སྟེ་དེ་བས་ན་རིམ་པ་དེ་ལྟར་སྨོས་སོ། །ཡེ་ཤེས་བཞིའི་དམིགས་པའི་ཡུལ་ཡང་ཆོས་ཀྱི་དབྱིངས་རྣམ་པར་དག་པ་སྟེ། དེ་བས་ན་སྲད་བུ་རྒྱ་གྲམ་དུ་བྲེས་པའི་རི་མོ་ངོས་བཞི་ནས་རེ་རེ་འབྱུང་བ་ནི་ཆོས་ཀྱི་དབྱིངས་ལ་འདུ་བའོ། །རྒྱ་གྲམ་གཅིག་ཏུ་འདུས་པ་ནི་ཆོས་ཀྱི་དབྱིངས་ཀྱི་མཚན་ཉིད་དོ། །དེ་ལྟར་ཐིག་བཏབ་སྟེ་ས་བཅད་ནས་ཚོན་སྣ་གཅིག་པའི་སྐུད་པ་གཅིག་ཆལ་ལ་བསྒྲེས་ཏེ་ངོས་ཀྱི་རི་མོ་མ་བྱི་བར་གསལ་བར་བྱ་བའི་ཕྱིར་གདབ་པོ། དེ་ནས་དབུས་སུ་ཞུགས་ནས་སུ། །དེ་ལ་ཆ་ནི་གསུམ་དུ་བཏག །ཅེས་པ་ནི་སློབ་དཔོན་དཀྱིལ་འཁོར་དེའི་ནང་དུ་ཞུགས་ནས་སྣམ་བུ་གསུམ་དུ་བཅད་དེ། སྣམ་བུ་གསུམ་པ་དེ་ལས་ཆ་བཞིར་བགོས་ཏེ་ཆ་རེ་རེ་ཡང་ངོས་རེ་རེར་སྦྱར་བའོ། །དེ་བཞིན་དུ་སྣམ་བུ་གཉིས་ལ་ཡང་ཤེས་པར་བྱའོ། །སྣམ་བུ་གསུམ་
དུ་བྱ་བ་ནི། །ས་རྣམས་ཐམས་ཅད་ཀུན་དུ་ཡང༌། །ཆ་གསུམ་དག་ཏུ་བརྟགས་ནས་ནི། །ཞེས་པས་དེ་ལྟར་དཀྱིལ་འཁོར་དེ་ཁོ་ར་ཁོར་ཡུག་ཏུ་རིམ་པ་གསུམ་དུ་བྱའོ་ཞེས་པའོ། །ཆ་རྣམས་ཀྱང་ནི་རེ་རེ་ལ། །ཆ་གསུམ་དུ་ནི་རབ་ཏུ་བརྟག །ཅེས་པ་ནི་སྣམ་བུ་གསུམ་པ་རེ་རེ་ལ་ཡང་ཆ་གསུམ་དུ་བགོས་པ་ལ་ཆ་གཅིག་ནི་བསྐོར་བའི་སྣམ་བུར་བཞག་ཆ་གཉིས་ནི་ལྷ་རྣམས་ཀྱི་གནས་སུ་བྱ་བ་སྟེ་དེ་བས་ན། ཆ་གཅིག་གིས་ནི་བསྐོར་བ་ཡིས། །འཁོར་སར་བྱས་ཏེ་ལྷག་པ་ཡི། །ཆ་གཉིས་པོ་ནི་ལྷ་ཉིད་ཡི། །གནས་སུ་ངེས་པར་བྱ་བ་ཡིན། །ཞེས་གསུངས་པ་ཡིན་ཏེ་དེ་དག་ནི་སྣམ་བུའི་དབྱེ་བའོ། །བློ་དང་ལྡན་པས་ཕྱོགས་བཞི་རུ། །སོ་སོའི་ཕྱོགས་ཆར་སྒོ་ཁྱུད་ནི། །སྡོམ་བརྩོན་ཅན་གྱིས་ནན་ཏན་དུ། །ལྷ་རྣམས་གཙོ་བོའི་གནས་སུ་བྱ། །ཞེས་པ་ནི་སྒོ་ཁྱུད་རྣམས་རྣམ་པར་དབྱེ་བ་སྟེ་སྒོ་ཁྱུད་དེ་རྣམས་ཀྱི་ཚད་ཀྱང་དཀྱིལ་འཁོར་སྣམ་བུའི་དགུ་ཆ་གཅིག་ཏུ་བརྟག་གོ ། ནང་གི་སྙིང་པོའི་དཀྱིལ་གྱི་སྒོ་ཁྱུད་རྣམས་ལས་ཤར་ཕྱོགས་ཀྱི་སྒོ་ཁྱུད་ཀྱི་ནང་དུ་ཆོས་ཀྱི་སྐུའི་ཕྱག་རྒྱ་གཞག་པར་བྱའོ། །བྱང་ཕྱོགས་ཀྱི་ནང་དུ་སྤྱན་རས་གཟིགས་ཀྱི་དབང་པོ་བཞག་ལ་ལྷོ་ཕྱོགས་ཀྱི་ནང་དུ་ཕྱག་ན་རྡོ་རྗེ་གཞག་གོ །དེའི་ཕྱིར་རིམ་གྱི་སྒོ་ཁྱུད་རྣམས་ལས་ཤར་ཕྱོགས་ཀྱི་སྒོ་ཁྱུད་ཀྱི་ནང་དུ་ཤཱཀྱ་ཐུབ་པ་སྤྲུལ་པའི་སྐུ་བཞག་ཅིང་ལྷོ་ཕྱོགས་ཀྱི་ནང་དུ་གཤིན་རྗེ་བཞག་ལ་བྱང་ཕྱོགས་ཀྱི་ནང་དུ་དབང་པོ་བཞག་སྟེ་གཤིན་རྗེ་དང་དབང་པོ་ལ་སོགས་པ་དེ་རྣམས་ཀྱང་དཀྱིལ་འཁོར་བར་མའི་སྣམ་བུ་ལ་སྒོ་ཁྱུད་ཀྱི་ནང་དུ་འདུག་པ་ཡང་བཅོམ་ལྡན་འདས་ཀྱི་སྤྲུལ་པའི་སྐུ་ཉིད་དུ་རིག་པར་བྱ་སྟེ། གཤིན་རྗེ་ལ་སོགས་པས་འདུལ་བའི་སེམས་ཅན་རྣམས་གདུལ་བའི་ཕྱིར་ཡི་དགས་རྣམས་ཀྱི་རྒྱལ་པོ་གཤིན་རྗེའི་གཟུགས་གཙོ་བོར་བྱས་ནས་སྒོ་ཁྱུད་ན་གནས་སོ། །དབང་པོ་ཡང་ལྷ་རྣམས་ཀྱི་རྒྱལ་པོ་སྟེ་གཙོ་བོར་བྱ་ཞིང་སྒོ་ཁྱུད་ན་གནས་སོ། །བཅོམ་ལྡན་འདས་ཤཱཀྱ་ཐུབ་པ་ཡང་མི་རྣམས་ཀྱི་གཙོ་བོར་གྱུར་ཅིང་སྒོ་ཁྱུད་ན་བཞུགས་སོ། །སྙིང་པོའི་དཀྱིལ་འཁོར་གཞུགས་པའི་གཙོ་བོ་རྣམས་ནི་ཡེ་ཤེས་བཞིའི་རང་བཞིན་དུ་ཤེས་པར་བྱ་སྟེ་བཅོམ་ལྡན་འདས་རྣམ་པར་སྣང་མཛད་མངོན་པར་བྱང་ཆུབ་པའི་མཚན་ཉིད་དབུས་ན་བཞུགས་པ་ནི་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ནོ། །ཆོས་
ཀྱི་སྐུའི་ཕྱག་རྒྱ་ཤར་ན་གནས་པ་ནི་མེ་ལོང་ལྟ་བུའི་ཡེ་ཤེས་ཀྱི་རང་བཞིན་ནོ། །སྤྱན་རས་གཟིགས་ཀྱི་དབང་པོ་བྱང་ཕྱོགས་ན་གནས་པ་ནི་སོ་སོར་ཀུན་དུ་རྟོག་པའི་ཡེ་ཤེས་ཀྱི་རང་བཞིན་ནོ། །ཕྱག་ན་རྡོ་རྗེ་ལྷོ་ཕྱོགས་ན་གནས་པ་ནི་བྱ་བ་གྲུབ་པའི་ཡེ་ཤེས་ཀྱི་རང་བཞིན་དུ་རིག་པར་བྱའོ། །དཀྱིལ་འཁོར་གྱི་སྣམ་བུ་གསུམ་པ་ལ་ཤར་ཕྱོགས་ཀྱི་སྒོ་ཁྱུད་ཀྱི་ནང་ན་འཕགས་པ་འཇམ་དབྱངས་གཙོ་བོའི་གཟུགས་སུ་བཞུགས་སོ། །ལྷོ་ཕྱོགས་ཀྱི་སྒོ་ཁྱུད་ན་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་བཞུགས་ཏེ། དེ་བཞིན་དུ་ནུབ་དང་བྱར་ན་ཡང་ནམ་མཁའི་སྙིང་པོ་དང་སའི་སྙིང་པོ་དག་གཙོ་བོའི་གཟུགས་ཀྱིས་སྒོ་ཁྱུད་ན་བཞུགས་པར་ཤེས་པར་བྱའོ། །དེ་ལྟར་རིམ་པར་ལེགས་ཕྱེ་བ། །འདི་དག་ཐམས་ཅད་བྱས་ནས་ནི། །ཞེས་པ་གང་དུ་སྨོས་པ་ལྟར་དཀྱིལ་འཁོར་གྱི་སྣམ་བུ་བགོ་བ་དང༌། སྒོ་ཁྱུད་རྣམས་རྣམ་པར་དབྱེ་བ་དང་སྒོ་ཁྱུད་རྣམས་སུ་ལྷ་གཙོ་བོ་རྣམས། ཤིན་དུ་བྱེ་བྲག་ཕྱེད་པས་དགོད། །ཅེས་པའོ། །དབུས་སུ་པདྨ་དཀར་པོ་མཆོག །དེ་ནི་སྙིང་པོ་ཞེས་སུ་བསྒྲགས། །དཀྱིལ་འཁོར་སྙིང་རྗེ་འབྱུང་བ་ཀུན། །དེས་ནི་སྙིང་པོ་ཅན་དུ་བྱས། །ཞེས་པ་ནི་དབུས་ཀྱི་པདྨ་དཀར་པོ་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱུ་བསོད་ནམས་ཀྱི་ཚོགས་ལ་བྱ་སྟེ། དཀར་བ་ནི་ཚོགས་དེ་ཉིད་རྣམ་པར་དག་པའོ། །སྙིང་པོ་ནི་འབྱུང་བའི་གནས་ཏེ་བསོད་ནམས་ཀྱི་ཚོགས་དེ་བཅོམ་ལྡན་འདས་ཀྱི་སྙིང་རྗེ་ཆེན་པོའི་བདག་ཉིད་འབྱུང་བའི་གནས་ཡིན་ལ། སྙིང་རྗེ་ཆེན་པོ་དེ་ལས་དཀྱིལ་འཁོར་འདི་འབྱུང་སྟེ། དེས་ནི་སྙིང་པོ་ཅན་དུ་བྱས། །ཞེས་པའོ། །དེ་ཡི་ཚད་ཀྱང་སོར་བཅུ་དྲུག །ཡན་ཆད་དུ་ནི་བཤད་པ་ཡིན། །ཞེས་པ་ནི་དབུས་ཀྱི་པདྨའི་ཚད་སོར་བཅུ་དྲུག་སྟེ། ཡན་ཆད་དུ་ཞེས་པ་ནི་དེ་ལས་ལྷག་པར་བྱས་ཀྱང་རུང་ཞེས་པའོ། །དེའི་དགོས་པ་ཡང་འདི་ལྟ་སྟེ། བཅུ་དྲུག་ནི་ས་བཅུ་དང་ཕ་རོལ་ཏུ་ཕྱིན་པ་དྲུག་དང་ལྡན་པ་ཡིན་ལ། ཡན་ཆད་དུ་ནི་ཞེས་པ་དེ་དག་ལས་ལྷག་པ་ཀུན་དུ་བཟང་པོའི་ས་ལ་སོགས་པ་དང་ལྡན་པ་ཞེས་པ་སྟེ་མདོར་ན་པདྨ་དེ་བཅོམ་ལྡན་འདས་ཀྱི་རྒྱུ་བསོད་ནམས་དང་ཡེ་ཤེས་ཀྱི་ཚོགས་ཀྱི་རང་བཞིན་གྱི་མཚོན་
པར་བྱེད་པ་ལྟ་བུར་བལྟ་བར་བྱའོ། །འདབ་མ་བརྒྱད་པ་ལེགས་པར་རྫོགས། །ཞེས་པ་ནི་བསོད་ནམས་ཀྱི་ཚོགས་དེ་ཡེ་ཤེས་བརྒྱད་དང་ལྡན་པས་འདབ་མ་བརྒྱད་དུ་གསུངས་སོ། །དེ་ལ་ཡེ་ཤེས་བརྒྱད་ནི་མེ་ལོང་ལྟ་བུའི་ཡེ་ཤེས་དང༌། །མཉམ་པ་ཉིད་ཀྱི་ཡེ་ཤེས་དང་སོ་སོར་རྟོག་པའི་ཡེ་ཤེས་དང་བྱ་བ་གྲུབ་པའི་ཡེ་ཤེས་ནི་སྒོ་ལྔའི་རྣམ་པར་ཤེས་པ་ལྔར་འགྱུར་པས་རྣམ་པ་ལྔར་ཕྱེ་སྟེ་ཡེ་ཤེས་རྣམ་པ་དེ་བརྒྱད་དང་ལྡན་པས་འདབ་མ་བརྒྱད་དུ་གྱེས་པའོ། །ཡེ་ཤེས་རྣམས་ཀྱང་ཆོས་ཐམས་ཅད་དམིགས་སུ་མེད་པའི་རང་བཞིན་དུ་རྟོགས་པ་སྟེ་དེ་ལྟར་ཐམས་ཅད་དམིགས་སུ་མེད་པར་རྟོགས་པས་སྦྱིན་པར་བྱ་བ་དང་སྦྱིན་པའི་དངོས་པོ་དང་སྦྱིན་པར་བྱེད་པ་གསུམ་ཆར་ཡང་དམིགས་སུ་མེད་པར་རྟོགས་སོ། །དེ་བས་ན་སྦྱིན་པ་ལ་སོགས་པའི་བསོད་ནམས་ཀྱི་ཚོགས་ནི་ཡེ་ཤེས་དེ་ལྟ་བུ་དང་ལྡན་པས་འཁོར་གསུམ་ཡོངས་སུ་དག་པའི་རང་བཞིན་དུ་ཤེས་པར་བྱའོ། །ཟེ་བར་ལྡན་ལ་ཤིན་ཏུ་བཟང༌། །ཞེས་པ་ཟེ་བ་རྣམས་ནི་སངས་རྒྱས་བཅོམ་ལྡན་འདས་ཀྱི་རྒྱུའི་ཡོན་ཏན་ཏིང་ངེ་འཛིན་དང་གཟུངས་དང་རྣམ་པར་ཐར་པ་དང༌། སྟོབས་དང་མི་འཇིགས་པ་ལ་སོགས་པའི་མཚན་མར་བརྟགས་པ་ཡིན་ལ་བསོད་ནམས་ཀྱི་ཚོགས་དེ་ཡོན་ཏན་དེ་རྣམས་དང་ལྡན་པའོ། །འདབ་མའི་བར་ནི་ཐམས་ཅད་དུ། །ཀུན་ནས་རྡོ་རྗེ་བྲི་བར་བྱ། །ཞེས་པ་ནི་རྡོ་རྗེ་ནི་ཡེ་ཤེས་ཀྱི་མཚན་མ་སྟེ་གོང་དུ་བཤད་པའི་ཡེ་ཤེས་བརྒྱད་པོ་དེ་དང་ལྡན་པ་ཞེས་བྱའོ། །དེ་ཡི་སྙིང་པོའི་དབུས་སུ་ནི། །རྒྱལ་མཆོག་གཙོ་བོ་ཞེས་པ་བཅོམ་ལྡན་འདས་མངོན་པར་བྱང་ཆུབ་པའི་རང་བཞིན་པདྨའི་སྙིང་པོའི་སྟེང་དུ་བྲི་བའོ། །རྒྱལ་མཆོག་གཙོ་བོ་ཞེས་པ་ནི་བདུད་རྣམས་ལས་རྒྱལ་བ་སྟེ་དེ་རྣམས་ཀྱི་ནང་ན་ཡང་མཆོག་ཅེས་བྱའོ། །གསེར་གྱི་མདོག །འབར་བཅས་ཐོར་ཚུགས་དབུ་རྒྱན་ཅན། །འོད་ཟེར་དག་གིས་ཀུན་ནས་བསྐོར། །མགོན་པོ་ནད་དང་བྲལ་བ་ནི། །ཏིང་ངེ་འཛིན་དུ་གནས་པར་བྲི། །ཞེས་པ་ལ་འབར་བཅས་ནི་འབར་ཞིང་སྲེག་པའི་རང་བཞིན་ཏེ། ཉོན་མོངས་པ་དང་ཤེས་བྱའི་སྒྲིབ་པ་སྲེག་པའི་རང་བཞིན་གྱི་ཡེ་ཤེས་དང་ལྡན་པའོ། །གསེར་གྱི་མདོག་ནི་རྒྱས་པའི་རང་བཞིན་ནོ། །ཐོར་ཚུགས་ནི་འོག་མིན་གྱི་
གནས་ན་བཞུགས་པ་ཡིན་ཏེ་འོག་མིན་གྱི་ལྷ་རྣམས་ནི་ཐོར་ཚུགས་དང་བཅས་པ་ཡིན་ལ། དེ་དག་དང་མཐུན་པར་བྱ་བའི་ཕྱིར་ཐོར་ཚུགས་དང་ལྡན་པའོ། །དབུ་རྒྱན་ཅན་ཞེས་པ་ནི་ཆོས་ཀྱི་རྒྱལ་པོའམ་དབང་པོར་དབང་བསྐུར་བས་རིན་པོ་ཆེའི་ཅོད་པན་གསོལ་བའོ། །འོད་ཟེར་དག་གིས་ཀུན་ནས་བསྐོར། །ཞེས་པ་ནི་ཡོངས་སུ་དག་པའི་ཡེ་ཤེས་ཀྱི་རང་བཞིན་གྱི་འོད་དང་འོད་ཀྱི་དཀྱིལ་འཁོར་འཕྲོ་བ་རྣམས་ཀྱིས་བསྐོར་ཞེས་པའོ། །ནད་དང་བྲལ་བ་ཞེས་པ་ནི་ཉོན་མོངས་པ་དང་ཤེས་བྱའི་སྒྲིབ་པའི་གདོན་དང་བྲལ་བའོ། ཏིང་ངེ་འཛིན་དུ་གནས་པ་ཞེས་པ་ནི་སོ་སོ་རང་གིས་རིག་པའི་ཡེ་ཤེས་ལས་མི་གཡོ་ཞིང་རྩེ་གཅིག་ཏུ་གནས་ལ་གཟུགས་ཀྱང་ཏིང་ངེ་འཛིན་གྱི་ཚུལ་དུ་གནས་པའོ། །དེ་ཡི་ཤར་དུ་བློ་ལྡན་གྱིས། །སངས་རྒྱས་རྣམས་ཀྱི་ཕྱག་རྒྱ་ནེ། །གྲུ་གསུམ་ཐམས་ཅད་དཀར་པོ་ཉིད། །པདྨའི་སྟེང་གནས་ཁོར་ཡུག་ཏུ། །འོད་ཟེར་དཀར་པོས་ཡོངས་བསྐོར་བ། །རབ་ཏུ་བསྒྲིམས་ཏེ་བྲི་བར་བྱ། །ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཤར་ཕྱོགས་སུ་སྔོན་མངོན་པར་སངས་རྒྱས་པ་འདས་པའི་དེ་བཞིན་གཤེགས་པ་རྣམས་ཕྱག་རྒྱ་གྲུ་གསུམ་པའི་མཚན་ཉིད་དུ་བྲི་སྟེ་ཤར་ཕྱོགས་སུ་གཞག་པ་ནི་རྒྱ་གར་གྱི་སྐད་དུ་ཤར་ལ་པཱུ་རྦ་ཞེས་བྱ་བ་ལ། འདས་པ་ལ་ཡང་པཱུརྦ་ཞེས་བྱ་སྟེ་དེ་བས་ན་སྔོན་འདས་པའོ་ཞེས་གླེང་བའི་ཕྱིར་ཤར་ཕྱོགས་སུ་གཞག་གོ །པདྨའི་སྟེང་དུ་གྲུ་གསུམ་བྲི་བ་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་སྟེ་རྣམ་པར་ཐར་པའི་སྒོ་གསུམ་ཡོངས་སུ་རྫོགས་པའི་མཚན་ཉིད་དོ། །ཕྱག་རྒྱ་དེའི་དབུས་སུ་རྡོ་རྗེ་རྩེ་ལྔ་པ་དགོད་པ་དང་གྲྭ་གཉིས་ནས་འོད་གཉིས་འབྱུང་བར་བྱའོ་ཞེས་གསང་བའི་དཀྱིལ་འཁོར་ནས་འབྱུང་བ་ལ་རྡོ་རྗེ་རྩེ་ལྔ་པ་དགོད་པ་ནི་ཡེ་ཤེས་ལྔའི་མཚན་མའོ། །འོད་གཉིས་འབྱུང་བ་བྱ་བ་ནི་ཕྱག་རྒྱ་དེ་ཆོས་སྐུའི་མཚན་ཉིད་དོ། །ཆོས་ཀྱི་སྐུ་ལས་ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུ་གཉིས་འབྱུང་བའོ། །པདྨ་ནི་སྔར་བཤད་ལ་དཀར་པོ་ནི་ཉོན་མོངས་པ་དང་ཤེས་བྱའི་སྒྲིབ་པ་དག་པ་སྟེ་པདྨོ་ཉིད་ལ་བྱའོ། །འོད་ཟེར་གྱིས་བསྐོར་བ་ནི་ཡེ་ཤེས་ཀྱི་འོད་འཕྲོ་བས་བསྐོར་བའོ། །ཐམས་ཅད་དཀར་པོ་ཉིད་ཅེས་པ་ནི་ཕྱག་
རྒྱ་དེ་ཉིད་དཀར་པོར་བྱ་སྟེ་ཡོངས་སུ་དག་པའི་ཕྱིར་རོ། །དེའི་བྱང་དུ་མཁས་རྣམས་ཀྱིས། །སྐྱོབ་པ་དག་ནི་ཀུན་གྱི་ཡུམ། །གསེར་གྱི་མདོག་ཅན་འབར་དང་བཅས། །ན་བཟའ་དག་ནི་དཀར་པོ་མནབས། །ཀུན་དུ་རྣམ་པར་སྣང་མཛད་པ། །ཏིང་ངེ་འཛིན་དུ་གནས་པར་བྲི། །ཞེས་པ་ནི་ཕྱག་རྒྱ་གྲུ་གསུམ་པའི་བྱང་ཕྱོགས་སུ་བཅོམ་ལྡན་འདས་ནམ་མཁའི་སྤྱན་བྲི་བ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་མངོན་པར་བྱང་ཆུབ་པ་དང་ལྡན་པའི་ཤེས་རབ་པོ། །སྐྱོབ་པ་ནི་སངས་རྒྱས་བཅོམ་ལྡན་འདས་རྣམས་ཏེ་ཤེས་རབ་དེ་ལས་བྱུང་བས་ན་དེ་སྐྱོབ་པ་རྣམས་ཀྱི་ཡུམ་མོ། །འབར་དང་བཅས་ནི་ཤེས་བྱ་དང་ཉོན་མོངས་པའི་སྒྲིབ་པ་སྲེག་པའི་རང་བཞིན་གྱི་འབར་བ་དང་བཅས་པའོ། །གསེར་མདོག་ཅན་ནི་རྒྱས་པའི་རང་བཞིན་ནོ། །ན་བཟའ་དཀར་པོ་མནབས་པ་ནི་ན་བཟའ་ནི་གཡོགས་པར་བྱེད་པ་སྟེ་དེ་ཉིད་དག་པས་དཀར་པོའོ། །དེ་བས་ན་ཤེས་བྱ་དང་ཉོན་མོངས་པའི་སྒྲིབ་པའི་གཡོགས་མ་དག་པའི་མཚན་མ་ནི་ན་བཟའ་དཀར་པོའོ། །ཀུན་དུ་རྣམ་པར་སྣང་མཛད་པ་ནི་ཤིན་ཏུ་དག་ཅིང་རང་བཞིན་གྱིས་འོད་གསལ་བའི་ཡེ་ཤེས་ཀྱི་རང་བཞིན་གྱིས་ཁྱབ་པའོ། །ཏིང་ངེ་འཛིན་དུ་གནས་ཞེས་པ་ནི་གཡོ་བ་མེད་པའི་གཟུགས་སུ་གནས་པའོ། །མགོན་པོ་ཡི་ནི་བྱང་ཕྱོགས་སུ། །སྤྱན་རས་གཟིགས་དབང་དཔའ་བོ་ནི། །པདྨ་དཀར་པོའི་སྟན་ལ་འདུག །དུང་དང་ཀུན་ད་ཟླ་བ་འདྲ། །དབུལ་འོད་དཔག་མེད་བཞུགས་པ། །བཞིན་ནི་བག་ཙམ་འཛུམ་པར་བྲི། །ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཡས་རོལ་བྱང་ཕྱོགས་ཀྱི་ངོས་སུ་པདྨའི་རིགས་ཀྱི་བདག་པོ་སྤྱན་རས་གཟིགས་ཀྱི་དབང་པོ་བྲི་བ་སྟེ་སྤྱན་རས་གཟིགས་ཞེས་པ་ནི་སོ་སོར་ཀུན་དུ་རྟོག་པའི་ཡེ་ཤེས་ཀྱི་རང་བཞིན་གྱིས་སེམས་ཅན་རྣམས་ཡོངས་སུ་སྨིན་པ་དང་གྲོལ་བར་བྱ་བའི་ཕྱིར་གཟིགས་པ་དང་ཆོས་ཀྱི་དབྱིངས་རྣམ་པར་དག་པ་ལ་གཟིགས་པའོ། །དཔའ་བོ་ནི་ཤེས་བྱ་དང་ཉོན་མོངས་པའི་སྒྲིབ་པའི་ཆོམ་རྐུན་འཇོམས་པ་ལ་དཔའ་བའོ། །པདྨ་དཀར་པོའི་སྟན་ལ་འདུག་པ་ནི་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་དག་པའི་རང་བཞིན་ནོ། །རྣལ་འབྱོར་གྱི་རྒྱུད་ལས་པདྨ་དམར་པོར་གསུངས་ལ། འདིར་དཀར་པོར་གསུངས་པ་དེ་
ཡང་རྣལ་འབྱོར་གྱི་རྒྱུད་ནི་ཐབས་གཙོ་བོར་གྱུར་པ་སྟེ། ཐབས་ཀྱིས་སེམས་ཅན་རྣམས་ཡོངས་སུ་སྨིན་པ་དང་གྲོལ་བར་བྱ་བའི་དོན་ལ་ཞེན་བར་བསྟན་པའི་ཕྱིར་དམར་པོར་བསྟན་པའོ། །རྒྱུད་འདི་ནི་ཤེས་རབ་གཙོ་བོར་གྱུར་པའི་སྒོ་ནས་ཤེས་རབ་ཀྱིས་ཆོས་ཐམས་ཅད་ཤིན་ཏུ་དག་པར་རྟོགས་པའི་མཚོན་བྱེད་དུ་དཀར་པོར་བསྟན་ཏོ། །དུང་དང་ཀུན་ད་ཟླ་བ་འདྲ། །ཞེས་པ་ནི་སྐུའི་ཁ་དོག་དུང་དང་མེ་ཏོག་ཀུན་ད་དང་ཟླ་བ་ལྟར་དཀར་བར་ཤེས་པར་བྱའོ། །དབུ་ལ་འོད་དཔག་མེད་བཞུགས་པ། །ཞེས་པ་ནི་སྣང་བ་མཐའ་ཡས་ནི་སོ་སོར་རྟོག་པའི་ཡེ་ཤེས་ཀྱི་རང་བཞིན་ཡིན་པས་དེའི་མཚན་མར་བསྟན་པའོ། །གཉིས་སུ་ནི་རྣལ་འབྱོར་གྱི་རྒྱུད་ལས་རིགས་སོ་སོ་ལས་དབང་བསྐུར་བ་སོ་སོ་སྟེ། པདྨའི་རིགས་ལ་སྣང་བ་མཐའ་ཡས་ཀྱིས་དབང་བསྐུར་བའི་ཕྱིར་རོ། །བཞིན་ནི་བག་ཙམ་འཛུམ་པ་ཞེས་པ་ནི་ཏིང་ངེ་འཛིན་ལ་མི་གནས་པར་སེམས་ཅན་ཆོས་བཤད་པ་ལ་སོགས་པའི་ཕྱིར་དུ་འཛུམ་ཞིང་ཞལ་མ་བཙུམས་པའི་དོན་ཏོ། །དེ་ཡི་གཡས་སུ་ལྷ་མོ་ནི། །སྒྲོལ་མ་གྲགས་པ་ཆེན་མོ་དེ། །དགེ་ཞིང་འཇིགས་པ་སེལ་བ་སྟེ། །སྔོ་བསངས་མ་ལ་སྣ་ཚོགས་གཟུགས། །བུད་མེད་དར་ལ་བབ་པའི་ཚད། །ཐལ་སྦྱར་མེ་ཏོག་ཨུཏྤལ་ཐོགས། །འོད་ཟེར་དག་གིས་ཀུན་བསྐོར་ཞིང༌། །གོས་ནི་དཀར་པོ་གྱོན་པར་བྲི། །ཞེས་པ་ནི་སྤྱན་རས་གཟིགས་ཀྱི་དབང་པོས་སེམས་ཅན་གྱི་ཁམས་ལ་གཟིགས་ནས་བདག་གིས་བསོད་ནམས་དང་ཡེ་ཤེས་ཀྱི་ཚོགས་ལ་སོགས་པ་ཐམས་ཅད་མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་བསྔོས་ཏེ་བསྒྲལ་ཀྱང་སེམས་ཅན་དེ་དག་མ་ལུས་པར་འཁོར་བ་ལས་རྒལ་བར་མ་གྱུར་པ་གཟིགས་ནས་ཐུགས་རྗེ་ཆེན་པོའི་ཤུགས་ཀྱིས་བྱུང་བའི་སྤྱན་ཆབ་ལས་སྒྲོལ་མའི་ལྷ་མོ་མང་པོ་བྱུང་ནས་སེམས་ཅན་ཐམས་ཅད་སྒྲོལ་བར་བྱེད་བའི་གཟུགས་སུ་གྱུར་པ་སྟེ་དེ་བས་ན་ལྷ་མོ་སྒྲོལ་མའོ། །གཞན་རྣམ་པ་དུ་མ་ཡང་རྒྱུད་གཞན་ལས་ཤེས་པར་བྱའོ། །གྲགས་ཆེན་ནི་ཡོན་ཏན་གྱི་ཚིག་གོ །དགེ་ཞིང་འཇིགས་པ་སེལ་བ་ཞེས་པ་ནི་རྒྱལ་པོ་དང་ཆོམ་རྐུན་ལ་སོགས་པའི་འཇིགས་པ་བརྒྱད་སེལ་བར་བྱེད་པའོ། །སྔོ་བསངས་ནི་ཁ་དོག་དཀར་
པོ་དང་སྔོན་པོ་དང་སེར་པོ་ལ་སོགས་པ་བསྡུས་པ་ལས་ལྗང་གུར་འགྱུར་ཏེ་ཁ་དོག་དཀར་པོ་དང་སེར་པོ་དང་སྔོན་པོ་ལ་སོགས་པ་ནི་ཞི་བ་དང་རྒྱས་པ་དང་མངོན་སྤྱོད་ཀྱི་ལས་ཀྱི་མཚན་མ་སྟེ་དེ་དག་གཅིག་ཏུ་བསྡུས་པ་ནི་ལས་ཐམས་ཅད་བྱེད་པའོ། །སྣ་ཚོགས་གཟུགས་ཞེས་པ་ནི་སེམས་ཅན་རྣམ་པ་མང་པོའི་དོན་དུ་རེས་འགའ་ནི་ཕོའི་གཟུགས་དང༌། རེས་འགའ་ནི་མོའི་གཟུགས་ལ་སོགས་པ་རྣམ་པ་དུ་མར་འགྱུར་བའི་ཕྱིར་རོ། །བུད་མེད་དར་ལ་བབ་བའི་ཚད། །ཅེས་པ་ནི་གཞོན་ཏེ་ཡོན་ཏན་རྫོགས་པ་ཡང་མ་ཡིན། ཡོན་ཏན་རྣམས་ལས་འདས་པའི་བྱང་ཆུབ་ཀྱི་མྱ་ངན་ལས་འདས་པར་འགྱུར་བའི་ཚུལ་གྱིས་རྒས་པ་ཡང་མ་ཡིན་ཏེ། བསོད་ནམས་དང་ཡེ་ཤེས་ཀྱི་ཚོགས་རྒྱས་པའི་མཚན་ཉིད་ཀྱི་ཚད་ལ་བབ་པའོ། །ཐལ་སྦྱར་མེ་ཏོག་ཨུཏྤལ་ཐོགས། །ཞེས་པ་ནི་རྣམ་པར་ཐར་པའི་སྒོ་སྣ་ཚོགས་འཛིན་པ་སྟེ་དེ་བས་ན་ཨུཏྤལའི་འདབ་མ་རལ་གྲི་ལྟ་བུ་ནི་ཤེས་རབ་ཀྱི་རྣམ་པར་ཐར་པའི་སྒོ་ལྟ་བུར་ཤེས་པར་བྱའོ། །འོད་ཟེར་དག་གིས་ཀུན་བསྐོར་ཞིང༌། །ཞེས་པ་ནི་ཡེ་ཤེས་ཀྱི་འོད་འཕྲོ་བས་བསྐོར་བའོ། །གོས་ནི་དཀར་པོ་གྱོན་པ་ནི་ངོ་ཚ་དང་ལྡན་པའི་མཚན་མ་སྟེ། ཇི་ལྟར་གོས་ཀྱིས་གཡོགས་ཤིང་མི་སྣང་བར་བྱ་བ་བཞིན་དུ་ངོ་ཚ་བ་ཡང་འཆབ་ཅིང་སྦ་བའི་མཚན་མ་སྟེ་ངོ་ཚ་དེ་དང་ལྡན་པའོ། །དཀར་པོ་ནི་ངོ་ཚ་ཉིད་རྣམ་པར་དག་པའི་མཚན་མའོ། །ཅིའི་ཕྱིར་ངོ་ཚ་དང་ལྡན་ཞེ་ན། ངོ་ཚ་ནི་བྱང་ཆུབ་སེམས་དཔའི་ཡོན་ཏན་དེ་དེ་ལྟར་ནི་འོག་ནས་འཆད་དོ། །གཡོན་དུ་ལྷ་མོ་ཁྲོ་གཉེར་ཅན། །སྔགས་ཟློའི་ཕྲེང་བ་ལག་ན་དབྱངས། །མིག་གསུམ་པ་ལ་ཐོར་ཚུགས་ཅན། །ཁ་དོག་མདོག་ནི་དཀར་མོ་ལ། །འོད་ཟེར་དཀར་པོ་སེར་པོ་དང༌། །དམར་པོ་རྣམས་ཀྱིས་བསྐོར་བར་བྲི། །ཞེས་པ་ནི་སྤྱན་རས་གཟིགས་ཀྱི་གཡོན་རོལ་དུ་ཁྲོ་གཉེར་མ་བྲི་བ་སྟེ། ཁྲོ་གཉེར་མ་ཞེས་པ་ནི་རྒྱུའི་མིང་འབྲས་བུ་ལ་བཏགས་བའི་མཚན་ཏེ། སྤྱན་རས་གཟིགས་ཀྱི་དབང་པོའི་སྨིན་མཚམས་ཀྱི་ནང་ནས་ལྷ་མོ་དེ་བྱུང་སྟེ་ཁྲོ་གཉེར་གྱི་རྒྱུ་ལས་བྱུང་བས་ན་ཁྲོ་གཉེར་མ་ཞེས་བྱའོ། །ལྷ་མོ་ཁྲོ་བོའི་བདག་ཉིད་འབའ་ཞིག་མ་ཡིན་གྱི། ཕ་རོལ་ཏུ་ཕྱིན་པ་ལ་སོགས་པ་དང་ལྡན་པར་བསྟན་པ་སྟེ། སྔགས་ཀྱི་ནོར་བུ་ནི་ཕ་རོལ་
ཏུ་ཕྱིན་པའི་མཚན་མའོ། །མིག་གསུམ་པ་ནི་ཁྲོ་བོའི་བདག་ཉིད་དོ། །ཐོར་ཚུགས་ཅན་ནི་འོག་མིན་གྱི་ལྷ་རྣམས་དང་རིགས་མཐུན་པའོ། །ཁ་དོག་མདོག་ནི་དཀར་མོ་ལ། །ཞེས་པ་ནི་ཡོངས་སུ་དག་པའི་མཚན་ཉིད་དོ། །འོད་ཟེར་དཀར་པོ་སེར་པོ་དང༌། །དམར་པོ་རྣམས་ཀྱིས་བསྐོར་བ་ཞེས་པ་ནི་ཡེ་ཤེས་ཀྱི་འོད་འཕྲོ་བ་དང་ལྡན་པ་སྟེ་འོད་ཉིད་དཀར་པོ་དང་སེར་པོ་དང་དམར་པོའི་ཁ་དོག་དེ་རྣམས་དང་ལྡན་པ་ཞི་བ་དང་རྒྱས་པ་ལ་སོགས་པའི་ལས་ཐམས་ཅད་བྱད་པའི་མཚན་མའོ། །ཁྲོ་གཉེར་ཅན་དང་ཉེ་བར་ནི། །མཐུ་ཆེན་ལག་ན་པདྨ་ཐོགས། །བརྩེ་བ་ཆེན་པོ་གོས་དཀར་གྱོན། །འོད་ཟེར་དག་གིས་བསྐོར་བ་ཡི། །དཔའ་བོ་ཡང་དག་བྲི་བྱ་སྟེ། །དེ་ཡི་པདྨ་ཁ་མ་བྱེ། །ཞེས་པ་ནི་ཁྲོ་གཉེར་མ་དང་ཉེ་བར་འཕགས་པ་མཐུ་ཆེན་ཐོབ་བྲི་བ་སྟེ། ཁྲོ་གཉེར་མ་དང་ཉེ་བར་བྲི་བ་ནི་མཐུ་ཆེན་དེ་དཔུང་བྱ་བའི་ཕྱིར་རོ། །ལག་ན་པདྨ་ཐོགས་ཞེས་པ་དང༌། དེ་ཡི་པདྨ་ཁམ་བྱེ། །ཞེས་པ་ནི་དེའི་ཕྱག་རྒྱ་པདྨའོ། །བརྩེ་བ་ཆེན་པོ་ནི་སྙིང་རྗེ་ཆེན་པོ་དང་ལྡན་པའོ། །པདྨ་ཁ་མ་བྱེ་བ་ནི་སྤྱན་རས་གཟིགས་ཀྱི་དབང་པོ་དང་ཁྱད་པར་བསྟན་པའོ། །གོས་དཀར་གྱོན་པ་ནི་ཡོངས་སུ་དག་པའི་མཚན་ཉིད་དོ། །འོད་ཟེར་ངག་གིས་བསྐོར་བ་ཡི། །ཞེས་པ་ནི་ཡེ་ཤེས་ཀྱི་འོད་འཕྲོ་བ་དང་ལྡན་པའོ། །དཔའ་བོ་ནི་སུས་ཀྱང་ཟིལ་གྱིས་མི་ནོན་པའོ། །དེ་ཡེ་དྲུང་དུ་བློ་ཅན་གྱིས། །རིག་སྔགས་ལྷ་མོ་དྲགས་ལྡན་མ། །གསེར་གྱི་ཁ་དོག་ལྟ་བུ་ཅན། །རྒྱན་རྣམས་ཀུན་གྱིས་བརྒྱན་པ་སྟེ། །ལག་པ་གཡོན་པས་པྲི་ཡང་ཀུའི། །སྙེ་མ་ཡིད་འོང་མཛེས་པར་བྲི། །ཞེས་པ་ནི་མཐུ་ཆེན་ཐོབ་ཀྱི་དྲུང་དུ་ལྷ་མོ་གྲགས་འཛིན་ཞེས་བྱ་བ་བྲི་བ་སྟེ། དེ་ལ་གྲགས་འཛིན་ཞེས་པ་ནི་སངས་རྒྱས་བཅོམ་ལྡན་འདས་ཀྱི་ཡོན་ཏན་གྱི་གྲགས་པ་རྣམས་འཛིན་པའོ། །དེའི་གསེར་གྱི་ཁ་དོག་ལྟ་བུ་ནི་མཚན་ཉིད་དོ། །ལག་པ་གཡོན་པས་པྲི་ཡང་ཀུའི། །སྙེ་མ་ཡིད་འོང་འཛིན་པ་ཞེས་པ་ནི་ལྷ་མོ་དེའི་ཕྱག་རྒྱའོ། །སྒྲོལ་མ་ཡི་ནི་ཉེ་འཁོར་དུ། །བློ་དང་ལྡན་པ་གོས་དཀར་མོ། །ཞེས་བྱ་བ་ནི་གོས་དཀར་མོའམ་དཀར་བར་གནས་པ་ཞེས་བྱ་བའི་ལྷ་མོ་དེར་བྲི་བ་སྟེ་དཀར་བར་གནས་པ་ནི་ཆོས་ཀྱི་དབྱིངས་རྣམ་པར་དག་པ་ལ་གནས་པའོ། །སྒྲོལ་མའི་ཉེ་འཁོར་དུ་བྲི་བའི་ལྷ་མོ་སྒྲོལ་མ་དེ་སེམས་ཅན་རྣམས་སྒྲོལ་ཞིང་ལས་ཐམས་ཅད་བྱེད་པ་འབའ་ཞིག་མ་ཡིན་གྱི། ཆོས་ཀྱི་དབྱིངས་
རྣམ་པར་དག་པ་ལ་བསྙེན་པར་བྱེད་པར་བསྟན་པའི་ཕྱིར་རོ། །ཐོར་ཚུགས་ཅན་ལ་གོས་དཀར་གྱོན། །ལག་ན་པདྨ་ཐོགས་པར་བྲི། །ཞེས་པ་ནི་གོས་དཀར་པོ་ནི་ཡོངས་སུ་དག་པའི་མཚན་མའོ། །ལག་ན་པདྨ་ནི་ཕྱག་རྒྱ་པདྨ་ཐོགས་པའོ། །ཐོར་ཚུགས་ནི་སྔར་བཤད་པ་བཞིན་ནོ། །བློ་དང་ལྡན་པས་ཞེས་པ་ནི་སྔགས་པ་བློ་དང་ལྡན་པས་དེ་ལྟར་བྲི་ཞེས་པའོ། །དེ་ཡི་འོག་ཏུ་སྔགས་པ་ཡིས། །རིག་སྔགས་རྒྱལ་པོ་སྟོབས་པོ་ཆེ། །ཁ་དོག་ཉི་མ་འཆར་ཀ་བཞིན། །པདྨ་དཀར་པོས་རྣམ་པར་བརྒྱན། །འབར་བའི་ཕྲེང་ཅན་མི་བཟད་ཅིང༌། །སྤུ་དག་སེང་གེ་ལྟར་འདུག་པ། །སྤྱན་རས་གཟིགས་དབང་བློ་ལྡན་གྱི། །རྟ་མགྲིན་ཅན་ཞེས་གྲགས་པ་བྲི། །ཞེས་པ་ནི་ལྷ་མོ་གོས་དཀར་མོའི་འོག་ལོགས་སུ་འཕགས་བ་རྟ་མགྲིན་བྲི་བར་བྱ་སྟེ། རིག་སྔགས་རྒྱལ་པོ་ནི་པདྨའི་རིག་པའི་རྒྱལ་པོའོ། །སྟོབས་པོ་ཆེན་ནི་མཐུ་ཆེ་བའི་ཡོན་ཏན་ཅན་ནོ། །ཁ་དོག་ཉི་མ་འཆར་ཀ་བཞིན། །ཞེས་པ་ནི་སྐུ་མདོག་དམར་བོར་བསྟན་པའོ། །པདྨ་དཀར་པོས་རྣམ་པར་བརྒྱན། །ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་རྣམ་པར་དཀར་བས་བརྒྱན་པའོ། །འབར་བའི་ཕྲེང་ཅན་ནི་ཤེས་བྱ་དང་ཉོན་མོངས་པའི་སྒྲིབ་པ་སྲེག་པར་བྱེད་པའི་ཡེ་ཤེས་ཅན་ཏེ་དེས་བསྲེགས་ན་ཆོས་ཀྱི་དབྱིངས་རྣམ་པར་དག་པ་ཐོབ་པར་འགྱུར་བ་སྟེ། དེ་བས་ན་ཆོས་ཀྱི་དབྱིངས་རྣམ་པར་དག་པའི་རང་བཞིན་ལྷ་མོ་གོས་དཀར་མོའི་འོག་མ་ཟད་དུ་བྲི་བ་ནི་དེའི་བར་ཆད་མེད་པའི་ལམ་གྱི་རང་བཞིན་དུ་ཤེས་པར་བྱའོ། །མི་བཟའ་བ་ཞེས་པ་ནི་ཁྲོ་བས་འཇིགས་པའི་གཟུགས་སོ། །སྤུ་དག་སེང་གེ་ལྟར་འདུག་པ། །ཞེས་པ་ནི་སེང་གེ་ལྟར་འདུག་པ་ཞེས་པ་ནི་སེང་གེ་ལྟར་སུས་ཀྱང་ཟིལ་གྱིས་མི་ནོན་པའི་མཚན་མའོ། །རྟ་མགྲིན་ཅན་ཞེས་གྲགས་པ་ནི་ཆོས་ལ་འབིགས་པའི་ཡེ་ཤེས་མྱུར་ཞིང་མགྱོགས་པ་རྟ་དང་འདྲ་བ་དང༌། སེམས་ཅན་གྱི་དོན་བྱ་བ་ལ་མགྱོགས་པ་རྟ་དང་འདྲ་བའི་ཕྱིར་རྟ་མགྲིན་ཞེས་བྱའོ། །སྤྱན་རས་གཟིགས་དབང་བློ་ལྡན་གྱིས། །ཞེས་པ་ནི་དེ་དག་སྤྱན་རས་གཟིགས་ཀྱི་དཀྱིལ་འཁོར་བར་ཤེས་པར་བྱ་སྟེ་དེ་དག་ནི་པདྨའི་རིགས་ཀྱི་རང་བཞིན་གྱི་དཀྱིལ་འཁོར་གྱི་གཟུགས་བརྙན་དུ་བྲིས་པ་སྟེ། རང་བཞིན་གྱི་དཀྱིལ་འཁོར་ཐམས་ཅད་ནི་མཐའ་ཡས་ཏེ་བྲིར་ཡང་མི་ལང་བས་དཀྱིལ་
འཁོར་འདི་དག་ཐམས་ཅད་ནི་རང་བཞིན་གྱི་དཀྱིལ་འཁོར་སྡུད་པའི་སྒོར་གྱུར་པར་ཤེས་པར་བྱའོ། །སངས་རྒྱས་རྣམས་ཀྱི་ལྷོ་ཕྱོགས་སུ། །བྱང་ཆུབ་སེམས་དཔའ་སྐྱོབ་རྣམས་ཀྱི། །ཕྱག་རྒྱ་ཡིད་བཞིན་ནོར་བུ་ཞེས། །གྲགས་པ་བསྐལ་པ་ཆེན་པོ་ཅན། །རེ་བ་ཐམས་ཅད་རྫོགས་བྱེད་པ། །པདྨ་དཀར་ལ་འདུག་པར་བྲི། །ཞེས་པ་ནི་འདས་པའི་སངས་རྒྱས་རྣམས་ཀྱི་ཕྱག་རྒྱ་གྲུག་གསུམ་པའི་ལྷོ་ཕྱོགས་སུ་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ཡིད་བཞིན་གྱི་ནོར་བུ་འདྲ་བ་བྲི་སྟེ། བྱང་ཆུབ་སེམས་དཔའ་རྣམས་བྲིས་ན་གྲངས་མེད་མཐའ་མེད་པས་དེ་རྣམས་སྡུད་པའི་སྒོར་གྱུར་བའི་ཕྱག་རྒྱ་ཐམས་ཅད་བྲི་བར་ཤེས་པར་བྱའོ། །སྐལ་བ་ཆེན་པོ་ནི་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པ་ལ་བྱའོ། །གཉིས་སུ་ན་བསྙེན་པ་ཆེན་པོ་ཞེས་ཀྱང་བྱ་སྟེ་སེམས་ཅན་མང་པོས་བསྙེན་པའི་ཕྱིར་རོ། །རེ་བ་ཐམས་ཅད་རྫོགས་བྱེད་པ། །ཞེས་པ་ནི་སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་དོན་བྱེད་པས་རེ་བ་ཐམས་ཅད་ཡོངས་སུ་རྫོགས་པར་བྱེད་པའི་ཡིད་བཞིན་གྱི་ནོར་བུ་དང་འདྲ་བའི་ཕྱིར་ཡིད་བཞིན་ནོར་བུ་ཞེས་གྲགས་སོ། །ཡང་ན་ཕྱག་རྒྱ་ཉིད་ཡིད་བཞིན་ནོར་བུ་ལྟ་བུར་བྲི་ཞེས་པའོ། །པདྨ་དཀར་ལ་འདུག་པ་ནི་བསོད་ནམས་དང་ཡེ་ཤེས་ཀྱི་ཚོགས་རྣམ་པར་དཀར་བ་ལས་བྱུང་བའོ། །མགོན་པོ་རྣམ་སྣང་མཛད་ཆེན་གྱིས། །ལྷོ་ཡི་ཕྱོགས་སུ་དོ་རྗེ་འཛིན། །རེ་བ་ཐམས་ཅད་སྐོང་བྱེད་པ། །མདོག་ནི་པྲི་ཡང་ཀུ་ལྟ་བུར། །ལྗང་སེར་རམ་ནི་མརྒད་ལྟར། །སྔོ་བསངས་མགོན་པོ་དབུ་རྒྱན་ཅན། །སེམས་དཔའ་ཆེན་པོ་རྒྱན་ཀུན་གྱིས། །རྣམ་པར་བརྒྱན་ཞིང་མཐའ་ཡས་བར། །འཇུག་པ་རྒྱ་ཆེན་རྡོ་རྗེར་བཅས། །འོད་ཟེར་དག་གིས་བསྐོར་བར་བྲི། །ཞེས་པ་ནི་ཕྱག་རྒྱ་རྡོ་རྗེའི་ཁྱད་པར་ཏེ་བཅོམ་ལྡན་འདས་རྣམ་པར་སྣང་མཛད་ཀྱི་ལྷོ་ཕྱོགས་སུ་བྲི་སྟེ་དེ་ཡང་བྱ་བ་གྲུབ་པའི་ཡེ་ཤེས་ཀྱི་མཚན་ཉིད་དོ། །བཅོམ་ལྡན་འདས་ཀྱི་གཡོན་ཕྱོགས་སུ་བྲི་བ་ནི་རྒྱན་སྣ་ཚོགས་ཀྱི་བརྒྱན་ལ་འགྱིང་བའི་ཚུལ་དུ་གནས་པས་བཅོམ་ལྡན་འདས་ཞི་བ་དང་རྗེས་སུ་མཐུན་པའི་ཕྱིར་གཡོན་དུ་བྲི་བ་ཡིན་ནོ། །རེ་བ་ཐམས་ཅད་སྐོང་བྱེད་པ། །ཞེས་པ་ནི་སེམས་ཅན་གྱི་དོན་བྱེད་པ་ལ་ནན་ཏན་བྱེད་པས་ན་སེམས་ཅན་ཐམས་ཅད་ཀྱི་བསམ་པ་ཡོངས་
སུ་རྫོགས་པར་བྱེད་པའོ། །མཐའ་ཡས་འཇུག་པ་རྒྱ་ཆེན་ཞེས་པ་ནི་སེམས་ཅན་གྱི་དོན་དུ་མཐའ་ཡས་པར་རྒྱུ་བ་སྟེ་དེ་ཡང་རྒྱ་ཆེ་བའི་རྒྱུའོ། །རྡོ་རྗེར་བཅས་ཞེས་པ་ནི་ཡེ་ཤེས་ལྔའི་རང་བཞིན་གྱི་རྡོ་རྗེ་འཆང་བའོ། །འོད་གཟེར་དག་གིས་བསྐོར་བ་ནི་ཡེ་ཤེས་ཀྱི་འོད་འཕྲོ་བས་བསྐོར་བའོ། །དེ་ཡི་གཡས་སུ་ལྷ་མོའི་མིང༌། །མཱ་མ་ཀཱི་ཞེས་བྱ་བ་དེ། །རྡོ་རྗེའི་རྒྱན་གྱིས་བརྒྱན་པ་སྟེ། །ལག་ན་རྡོ་རྗེ་ཐོགས་པར་བྲི། །ཞེས་པ་ནི་ཕྱག་ན་རྡོ་རྗེའི་ཡུམ་བྱ་བ་གྲུབ་པའི་ཡེ་ཤེས་དང་ལྡན་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །མཱ་མ་ཀ་ཞེས་པ་ལ་མཱ་མ་ཀ་ནི་ཕྱག་ན་རྡོ་རྗེའོ། །མཱ་མ་ཀཱི་མོ་ཡིན་པས་མཱ་མ་ཀཱི་ཞེས་བྱའོ། །ཕྱག་ན་རྡོ་རྗེ་ཇི་ལྟར་མཱ་མ་ཀ་ཡིན་ཞེ་ན། གདུག་པ་དང་མ་རུངས་པ་རྣམས་གདུག་པའི་བྱ་བ་བྱེད་པ་ན་མ་བྱེད་མ་བྱེད་ཅེས་འགོག་པ་སྟེ་མ་བྱེད་པ་ཞེས་བྱའོ། །མ་བྱེད་པ་དེའི་ཡུམ་ཡིན་པས་ན་མ་བྱེད་མ་ཞེས་བྱའོ། །རྡོ་རྗེའི་རྒྱན་གྱིས་བརྒྱན་ཞེས་པ་ནི་རྒྱན་རྣམས་ལ་རྡོ་རྗེའི་མཚན་མས་བཏབ་པ་སྟེ་རྡོ་རྗེ་རིགས་ཀྱི་མཚན་མའོ། །རྡོ་རྗེ་ཐོགས་པ་ནི་ཡེ་ཤེས་ཀྱི་རང་བཞིན་གྱི་ཕྱག་རྒྱ་རྡོ་རྗེ་རྩེ་གསུམ་པ་འཆང་བའོ། །དེ་ཡི་འོག་ཏུ་ལྷ་མོ་ནི། །རྡོ་རྗེ་རྩེ་མོ་སྟོབས་ཆེན་དེ། །ཕོ་ཉ་རྣམས་ཀྱིས་ཡོངས་བསྐོར་ཞིང༌། །བཞིན་ནི་བག་ཙམ་འཛུམ་པར་བྲི། །ཞེས་པ་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་དེའི་བར་ཆད་མེད་པའི་ལམ་གྱི་རང་བཞིན་ཡིན་པས་དེའི་འོག་ཏུ་བྲི་བ་སྟེ་རྡོ་རྗེ་རྩེ་མོ་ཞེས་པ་ནི་ཆོས་ཉིད་ལ་འབིགས་པར་བྱེད་པའི་དང་ཚུལ་ཅན་ནོ། །སྟོབས་ཆེན་ཞེས་པ་ནི་དེའི་ཡོན་ཏན་ནོ། །ཕོ་ཉ་རྣམས་ཀྱིས་ཡོངས་བསྐོར་ཞིང༌། །ཞེས་པ་ནི་བར་ཆད་མེད་པའི་ལམ་གྱི་ཡན་ལག་རྣམས་དང་ལྡན་པའོ། །ཡང་ན་རྒྱལ་པོའི་འཁོར་ཡིན་པས་ན་མང་ག་གཞུག་ལ་སོགས་པ་སྲིང་པའི་ཕྱིར་རོ། །བཞིན་བག་ཙམ་འཛུམ་པ་ནི་ཏིང་ངེ་འཛིན་ལ་མ་བཞུགས་པར་སེམས་ཅན་གྱི་དོན་མཛད་པའི་ཕྱིར་རོ། །གཡོན་རོལ་དུ་ནི་སྔགས་པ་ཡིས། །རྡོ་རྗེ་ལུ་གུ་རྒྱུད་ཅེས་བྱ། །ལག་ན་རྡོ་རྗེ་ལུ་གུ་རྒྱུད། །རང་གི་ཕོ་ཉ་རྣམས་ཀྱིས་བསྐོར། །པྲི་ཡང་ཀུ་ལྟར་ལྗང་སེར་མདོག །རྡོ་རྗེའི་མཚན་མས་ལེགས་མཚན་བྲི། །ཞེས་པ་ནི་ཕྱག་ན་རྡོ་རྗེའི་གཡོན་དུ་རྡོ་རྗེ་ལུ་གུ་རྒྱུད་ཅེས་པ་ནི་བྲི་བ་སྟེ། ལུ་གུ་རྒྱུད་མ་ནི་འཕགས་པའི་ལམ་གྱི་རང་བཞིན་ཡིན་ལ། །སེམས་ཅན་རྣམས་ལམ་དེར་
འདྲེན་ཅིང་འཛུད་པར་བྱེད་པའི་མཚན་མ་ཅན་ནོ། །ཡང་ན་རྒྱལ་པོའི་འཁོར་གྱི་ཕུལ་ཡིན་པས་གདུག་པ་དང་མ་རུངས་པ་རྣམས་གཟུང་ཞིང་འདོགས་པའི་མཚན་ཉིད་དོ། །རང་གི་ཕོ་ཉ་རྣམས་ཀྱིས་བསྐོར། །ཞེས་པ་ནི་རྡོ་རྗེ་ལུ་གུ་རྒྱུད་མ་དེ་ཉིད་ཀྱི་འཁོར་མང་ག་གཞུག་པ་ལ་སོགས་པ་རྣམས་ཀྱིས་བསྐོར་བའོ། །རྡོ་རྗེ་མཚན་མས་ལེགས་མཚན་བྲི། །ཞེས་པ་ནི་རྒྱན་རྣམས་ལ་རྡོ་རྗེའི་མཚན་མས་བཏབ་པའོ། །ལག་ན་རྡོ་རྗེའི་འོག་ལོགས་སུ། །ཞེས་པ་ནས། ཁྲོ་བོ་ཆེན་པོ་འདི་འདྲ་བ། །པདྨའི་སྟེང་དུ་འདུག་པ་བྲི། །ཞེས་པའི་བར་གྱིས་ནི་བྱ་བ་གྲུབ་པའི་ཡེ་ཤེས་ཕྱག་ན་རྡོ་རྗེའི་བར་ཆད་མེད་པའི་ལམ་གྱི་མཚན་ཉིད་དུ་གྱུར་པ་ཁྲོ་བོ་ཟླ་གཙོ་ཞེས་བྱ་བའི་ཁྱད་པར་ཏེ་འོག་ལོགས་སུ་བྲི་བ་ནི་བྱ་བ་གྲུབ་པའི་ཡེ་ཤེས་ཀྱི་སྦྱོར་བ་བར་ཆད་མེད་པའི་ལམ་གྱི་རང་བཞིན་ཡིན་པས་བྱ་བ་གྲུབ་པའི་ཡེ་ཤེས་ཀྱིས་རམ་ཕྱིན་པའི་ཕྱིར་འོག་ཏུ་བྲིའོ། །དེ་ནི་ཟླ་བ་ཐིག་ལེ་འམ་ཟླ་གཙོ་ཞེས་བྱ་སྟེ་ཟླ་བ་ལྟར་ཡོངས་སུ་དག་ཅིང་སེམས་ཅན་ཐམས་ཅད་ཀྱི་རྒྱུད་ཚིམ་པར་བྱེད་པའི་རང་བཞིན་ནོ། །ཐིག་ལེ་ནི་ཐིག་ལེའུ་མཚན་མ་དང་ལྡན་པའོ། །ཡང་ན་རྒྱ་གར་སྐད་དུ་ཏི་ལ་ཀ་ཞེས་པ་གཙོ་བོའི་རྣམ་པ་ལ་བྱའོ། །བགེགས་ཆེན་དགྲ་ནི་ཞི་བྱེད་པ། །ཞེས་པ་ནི་ལྷ་དང་གནོད་སྤྱིན་ལས་གྱུར་པའི་བགེགས་རྣམས་དང་མི་ལ་སོགས་པའི་དགྲ་སེལ་བར་བྱེད་པའོ། །ཁྲོ་བོ་འཇིག་རྟེན་གསུམ་དུ་གྲགས། །ཞེས་པ་ནི་ཡོན་ཏན་གྱིས་འཇིག་རྟེན་གསུམ་དུ་གྲགས་པའོ། །མིག་གསུམ་པ་ནི་ཡེ་ཤེས་ཀྱི་སྤྱན་ལྷག་པར་མངའ་བ་འམ། ཁྲོ་བའི་མཚན་མའོ། །མཆེ་བ་བཞི་པ་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང་རང་བཞིན་གྱིས་འོད་གསལ་བའི་རྣམ་པར་ཐང་བའི་སྒོ་དང་ལྡན་པའོ། །ཁ་དོག་དབྱར་གྱི་སྤྲིན་འདྲ་བ། །ཞེས་པ་ནི་དབྱར་གྱི་སྤྲིན་ལ་རླུང་དང་ཆར་པར་བཅས་པའི་བག་གནས་པས་དེ་དང་འདྲ་བར་ལས་ཐམས་ཅད་བྱེད་པའི་མཚན་མའོ། །རབ་ཏུ་དགོད་པའི་སྒྲ་ཡང་འབྱིན། །ཞེས་པ་ནི་གད་མོའི་སྒྲས་ཐམས་ཅད་འགེངས་ཤིང་གནོད་པར་འགྱུར་བའི་སྒྲ་འབྱིན་པའོ། །རྡོ་རྗེའི་རྒྱན་གྱིས་རྣམ་པར་བརྒྱན། །ཞེས་པ་ནི་རྒྱན་རྣམས་ལ་རྡོ་རྗེའི་མཚན་མས་བཏབ་པའོ། །འཁོར་ནི་མཐའ་ཡས་ཁྲོ་བོ་ཡི། །དབང་ཕྱུག་རྣམས་ཀྱིས་ཡངས་བསྐོར་བ། །
ཞེས་པ་ནི་འཁོར་ཕལ་པ་དང་ཁྲོ་བོ་གྲངས་མེད་པས་བསྐོར་བའོ། །ལག་པ་སྟོང་ཕྲག་བརྒྱ་དག་ནི། །ཞེས་པ་ལམ་གྱི་ཡན་ལག་བརྒྱ་སྟང་དུ་མས་སེམས་ཅན་རྣམས་འཕགས་པའི་ལམ་ལ་འཛུད་པའམ། ཡན་ལག་དེ་རྣམས་ཀྱིས་ལམ་གྱི་སྒྲིབ་པ་མང་པོ་སེལ་བའི་མཚན་མའོ། །མཚོན་ཆ་སྣ་ཚོགས་ཐོགས་ཤིང་གདེངས། །ཞེས་པ་ནི་ལམ་གྱི་ཡན་ལག་གི་ཡོན་ཏན་དེ་རྣམས་རྡོ་རྗེ་ལ་སོགས་པའི་མཚོན་ཆར་གྱུར་པའོ། །ཁྲོ་བོ་ཆེན་པོ་འདི་འདྲ་བ། །པདྨའི་སྟེང་དུ་འདུག་པ་བྲི། །ཞེས་པ་ནི་གོང་དུ་སྨོས་པའི་ཚུལ་དུ་བྲི་བ་སྟེ་འཁོར་དང་ཡན་ལག་མང་པོ་རྣམས་ནི་ཡིད་ཀྱིས་བསམ་པར་བྱ་སྟེ་ཉུང་ཟད་ཅི་འོས་ཤིག་བྲི་བར་བྱའོ། །དེ་ཡི་ནུབ་ཏུ་སོང་ནས་ནི། །རྡོ་རྗེ་འཛིན་པ་མང་པོ་དག །ལག་ན་མཚོན་ཆ་སྣ་ཚོགས་ཐོགས། །ཁ་དོག་སྣ་ཚོགས་སྟོབས་པོ་ཆེ། །འོད་གཟེར་དག་གིས་ཡོངས་བསྐོར་བ། །སེམས་ཅན་ཀུན་དོན་བྱེད་པ་བྲི། །ཞེས་པ་ནི་ཕྱག་ན་རྡོ་རྗེའི་འཁོར་རྡོ་རྗེ་འཛིན་པ་རྣམས་བྲི་བ་སྟེ་མིང་དང་ཆ་ལུགས་དག་ནི་གསང་བའི་དཀྱེལ་འཁོར་ལས་འབྱུང་བ་དང་སྦྱར་བར་བྱའོ། །གསང་སྔགས་མགོན་པོའི་འོག་ལོགས་སུ། །བདེན་བྲལ་གྱི་ནི་ཕྱོགས་ཀྱི་ཆར། །མི་གཡོ་ཞེས་བྱ་ལག་ན་ནི། །རལ་གྲི་ཞགས་པ་ལེགས་པར་ཐོགས། །ཟུར་ཕུད་སྤྱི་བོའི་གཡོན་དུ་འཆང༌། །རབ་ཏུ་བརྒྱན་ཞིང་མིག་གཅིག་ཡོ། །རང་གི་འོད་ཀྱི་ནང་ན་གནས། །ཁྲོ་དང་བཅས་པ་བྲག་ལ་འདུག །བཞིན་ནི་ཁྲོ་གཉེར་རབ་ཏུ་བསྙེར། །བྱིས་པའི་གཟུགས་ཅན་མཁྲང་བག་བྲི། །ཞེས་པའི་བར་གྱིས་བཅོམ་ལྡན་འདས་རྣམ་པར་སྣང་མཛད་མཉམ་པ་ཉིད་ཀྱི་ཡེ་ཤེས་ཀྱི་བར་ཆད་མེད་པའི་ལམ་དུ་གྱུར་པ་བཅོམ་ལྡན་འདས་ཀྱི་འོག་མ་ཟད་དུ་འཕགས་པ་མི་གཡོ་མགོན་བྲི་བའི་བྱེ་བྲག་གསུངས་པ་སྟེ། ལག་ན་རལ་གྲི་ཐོགས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་གཅོད་པའི་ཤེས་རབ་ཀྱི་མཚན་ཉིད་དོ། །ཞགས་པ་ནི་ལམ་གྱི་མཚན་ཉིད་དེ་ལམ་དེར་སེམས་ཅན་ཐམས་ཅད་འདྲེན་ཅིང་འཛུད་པའོ། །མིག་གཅིག་ཡོ་བ་ནི་བར་ཆད་མེད་པའི་ལམ་གྱི་རང་བཞིན་ཡིན་པས་ཆོས་ཀྱི་དབྱིངས་རྣམ་པ་ཐམས་ཅད་མ་རྟོགས་ཤིང་མཉམ་པ་ཉིད་ཀྱི་ཡེ་ཤེས་ཡོངས་སུ་མ་རྫོགས་པའི་མཚན་མའོ། །རང་གི་འོད་ཀྱི་ནང་ན་གནས། །ཞེས་པ་ནི་
སྒྲིབ་པ་སེལ་བའི་ཡེ་ཤེས་དང་ལྡན་པའོ། །མཁྲང་བག་ཕྱིན་ཅི་མ་ལོག་པར་ཡོངས་སུ་གྲུབ་པའི་ལམ་གྱི་རང་བཞིན་ཡིན་པས་བརྟན་ཞིང་མི་འགྱུར་བའོ། །གཞོན་ནུའི་གཟུགས་ནི་བར་ཆད་མེད་པའི་ལམ་ལ་དང་པོར་ཞུགས་པས་ལམ་རྒྱས་པའི་མཚན་མ་སྟེ་དེ་བས་ན་བར་ཆད་མེད་པའི་ལམ་རྒྱས་པའི་མཚན་ཉིད་ཁམས་གསུམ་རྣམ་པར་རྒྱལ་བ་རླུང་གི་ཕྱོགས་སུ་གཞག་གོ །བྲིས་ནས་བློ་ལྡན་རླུང་ཕྱོགས་སུ། །ཞེས་པ་ནས། ཟད་པའི་དུས་དང་འདྲར་གནས་པ། །ནན་ཏན་དུ་ནི་བྲི་བར་བྱ། །ཞེས་པའི་བར་གྱིས་ནི་བཅོམ་ལྡན་འདས་རྣམ་པར་སྣང་མཛད་མཉམ་པ་ཉིད་ཀྱི་ཡེ་ཤེས་ཀྱི་བར་ཆད་མེད་པའི་ལམ་རྫོགས་པའི་རང་བཞིན་ཁམས་གསུམ་རྣམ་པར་རྒྱལ་བ་བྲི་བའི་བྱེ་བྲག་གསུངས་པ་སྟེ། ཟད་པའི་དུས་དང་འདྲར་གནས་ཞེས་པ་ནི་ཟད་པའི་ཚེ་ཉི་མ་དང་ཟླ་བ་མེད་པས་དེ་མུན་ནག་ཏུ་གྱུར་ཏེ་ཁྲོ་བོ་དེའི་ཁ་དོག་མུན་པ་དང་འདྲ་བ་ནག་པོར་བྲི་ཞེས་པའི་དོན་ཏོ། །དེ་ལྟར་ནང་དུ་བྲི་བ་ནི། །རྒྱས་དང་བཅས་པར་བཤད་པ་ཡིན། །ཞེས་པ་ནི་སྙིང་པོའི་དཀྱིལ་འཁོར་དུ་སྐུ་མི་ཟད་པ་ལ་སོགས་པའི་རྒྱན་རང་བཞིན་གྱི་དཀྱིལ་འཁོར་རྣམས་སྡུད་པར་བྱེད་པ་ཡེ་ཤེས་ལྔའི་མཚན་མ་རྣམས་འཁོར་དང་བཅས་པར་བཤད་ཅེས་པའོ། །ད་ནི་དཀྱིལ་འཁོར་གཉིས་པའི་སྣམ་བུ་ལ་སྐུ་མི་ཟད་པའི་རྒྱན་སྡུད་པར་བྱེད་པ་སྤྲུལ་པའི་སྐུ་ཤཱཀྱ་ཐུབ་པ་དང༌། དབང་པོ་དང་གཤིན་རྗེ་ལ་སོགས་པའི་ཚུལ་དུ་བསྟན་པ་རྣམས་འཁོར་དང་བཅས་པར་བྲི་བ་བཤད་པར་བྱ་སྟེ། དེ་ནས་སྔགས་པ་ཕྱིར་བྱུང་ནས། །ངེས་པར་གཉིས་པའི་ཆ་དག་ལ། །ཤར་གྱི་ཕྱོགས་ཀྱི་ནང་དུ་ནི། །ཆ་ནི་གཉིས་སུ་ཕྱེ་བ་ལ། །སྒོ་ཁྱུད་ཀྱི་ནི་ནང་རོལ་དུ། །སྔགས་པས་རྒྱལ་བ་ཤཱཀྱ་ཐུབ། །གསེར་གྱི་ཁ་དོག་འབར་དང་བཅས། །མཚན་མཆོག་སུམ་ཅུ་རྩ་གཉིས་ལྡན། །མགོན་པོ་ན་བཟའ་དུར་སྨྲིག་མནབས། །ཁྱབ་བདག་བསྟན་པའི་དོན་མཛད་པ། །པདྨ་དཀར་པོའི་གདན་ལ་བཞུགས། །ཆོས་འཆད་ཚུལ་དུ་བཞུགས་པར་བྲི། །ཞེས་པ་ནི་དཀྱིལ་འཁོར་རིམ་པ་གཉིས་པའི་ཤར་གྱི་ངོས་ཆ་གཉིས་སུ་བགོས་པའི་དབུས་སུ་བབ་པའི་སྒོ་ཁྱུད་ཀྱི་ནང་དུ་བཅོམ་ལྡན་འདས་ཤཱཀྱ་ཐུབ་པ་བྲི་སྟེ། ཤཱཀྱ་ཐུབ་པ་ཞེས་པ་ནི་ཤཱཀྱའི་རིགས་ལས་བྱུང་ཞིང་ལུས་དང་ངག་དང་ཡིད་གསུམ་ཐུབ་པའི་ངང་ཚུལ་ཅན་
ནོ། །ཤར་ཕྱོགས་སུ་བྲི་བ་ནི་བཅོམ་ལྡན་འདས་རྣམ་པར་སྣང་མཛད་པས་སྔར་བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་པར་བསྟན་པའོ། །གསེར་གྱི་ཁ་དོག་ནི་རྒྱས་པའི་མཚན་མ་སྟེ་བསོད་ནམས་དང་ཡེ་ཤེས་ཀྱི་ཚོགས་རྒྱས་པའི་རང་བཞིན་གྱི་ཕྱིར་རོ། །འབར་དང་བཅས་པ་ནི་ཀུན་དུ་སངས་རྒྱས་པས་སྒྲིབ་པ་སྲེག་པའི་རང་བཞིན་གྱི་ཡེ་ཤེས་དང་ལྡན་པའོ། །མཚན་མཆོག་སུམ་ཅུ་རྩ་གཉིས་ལྡན། །ཞེས་པ་ནི་སྤྱི་གཙུག་བ་ལྟར་མི་མངོན་པ་ལ་སོགས་པ་སྐྱེས་བུ་ཆེན་པོའི་མཚན་གཞུང་ལས་གྲགས་པ་དག་གོ །ན་བཟའ་ངུར་སྨྲིག་མནབས་པ་ནི་འཁོར་བ་ལ་མ་ཆགས་པ་དང་སྙིང་རྗེའི་དབང་གིས་སེམས་ཅན་ལ་ཆགས་པར་བསྟན་པ་སྟེ་ཆོས་གོས་ཚོན་ཅན་གྱིས་ནི་སྙིང་རྗེས་སེམས་ཅན་ལ་ཆགས་པར་བསྟན་པ་ཡིན་ལ། དམར་པོ་འབའ་ཞིག་པར་མི་གསལ་བར་དུར་སྨྲིག་ཏུ་གྱུར་པ་ནི་འཁོར་བ་ལ་མ་ཆགས་པར་བསྟན་པའོ། །ཁྱབ་བདག་བསྟན་པའི་དོན་མཛད་པ། །ཞེས་པ་ནི་འཁོར་རྣམས་ལ་སློབ་ཅིང་སྟོན་པའི་དོན་བྱེད་པའོ། །པདྨ་དཀར་པོའི་གདན་ནི་བསོད་ནམས་ཀྱི་ཚོགས་ཡོངས་སུ་དག་པའི་མཚན་མ་སྟེ་སྔ་མ་བཞིན་ནོ། །ཆོས་འཆད་ཚུལ་དུ་བཞུགས་པ་ནི་གཞུང་ལས་གྲགས་པའོ། །དེ་ཡིག་ཡས་སུ་ལྷ་མོ་ནི། །སངས་རྒྱས་སྤྱན་ཞེས་བྱ་བ་སྟེ། །ལྷ་མོ་ཅུང་ཟད་འཛུམ་པའི་ཞལ། །འོད་ཀྱི་དཀྱིལ་འཁོར་འདོམ་གང་བ། །མཚུངས་མེད་སྐུ་ནི་རབ་ཏུ་དངས། །དེ་ནི་ཤཱཀྱ་ཐུབ་པའི་ཡུམ། །ཞེས་པ་ནི་སངས་རྒྱས་ཀྱི་ཡུམ་གྱི་གཟུགས་སུ་གྱུར་པ་ནི་ཤཱཀྱ་ཐུབ་པའི་གཡས་རོལ་གྱི་བྱང་ཕྱོགས་ལོགས་སུ་བྲི་སྟེ། སངས་རྒྱས་ཤཱཀྱ་ཐུབ་པ་ཤེས་རབ་དེ་ལས་བྱུང་བའི་ཕྱིར་སངས་རྒྱས་ཀྱི་ཡུམ་ཞེས་བྱའོ། །སངས་རྒྱས་སྤྱན་ཞེས་པ་ནི་གཟིགས་པའི་རང་བཞིན་ཡིན་པས་ཤེས་རབ་ལ་བྱའོ། །ཅུང་ཟད་འཛུམ་པའི་ཞལ་ཞེས་པ་ཅུང་ཟད་ནི་ཤེས་བྱ་དང་ཉོན་མོངས་པའི་སྒྲིབ་པ་དག་པའོ། །ཅུང་ཟད་འཛུམ་པ་ནི་ཆོས་སྟོན་པའི་མཚན་མའོ། །འོད་ཀྱི་དཀྱིལ་འཁོར་འདོམ་གང་བ་ནི་ཀུན་དུ་སངས་རྒྱས་པ་ལ་ཤེས་བྱ་དང་ཉོན་མོངས་པ་སྲེག་པའི་ཡེ་ཤེས་དང་ལྡན་པའོ། །མཚུངས་མེད་ནི་རྣམ་པ་མེད་པའི་ཡེ་ཤེས་ཀྱི་རང་བཞིན་ཡིན་པས་ཚད་འདི་ཙམ་མོ་ཞེས་གཟུང་ཞིང་གཞལ་དུ་མེད་པའོ། །དེ་ཡི་གཡས་སུ་ལྷ་མོ་ནི། །རིག་སྔགས་མཛོད་སྤུ་ཞེས་གྲགས་པ། །
པདྨའི་སྟེང་ན་འདུག་པ་སྟེ། །དུང་ཟླ་ཀུན་ད་ལྟ་བུའི་མདོག །ལག་ན་ཡིད་བཞིན་ནོར་བུ་ཐོགས། །རེ་བ་ཀུན་རྫོགས་བྱེད་པ་བྲི། །ཞེས་པ་ནི་སངས་རྒྱས་སྤྱན་གྱི་གཡས་རོལ་བྱང་ཕྱོགས་སུ་མཛོད་སྤུ་ཞེས་བྱ་བའི་རིག་མ་བྲི་བ་སྟེ། སངས་རྒྱས་ཀྱི་སྨིན་མཚམས་ན་སྐྱེས་བུ་ཆེན་པོའི་མཚན་ཐིག་ལེ་འདྲ་བ་དེ་ཏིང་ངེ་འཛིན་གྱི་གཟུགས་སུ་གྱུར་པའི་ལྷ་མོ་ནི་མཛོད་སྤུ་ཞེས་བྱའོ། །དེ་ནས་སྔགས་པས་གཡོན་རོལ་དུ། །ཤཱཀྱ་སེང་གེ་སྐྱོབ་པ་ཡི། །ཞེས་པ་ནས། གནས་ནི་ལྔ་རྣམས་ཉིད་དུ་ནི། །རབ་ཏུ་བསྒྲིམས་ཏེ་བྲི་བར་བྱ། །ཞེས་པའི་བར་གྱིས་ནི་བཅོམ་ལྡན་འདས་ཀྱི་གཡོན་རོལ་ལྷོ་ཕྱོགས་སུ་གཙུག་ཏོར་ལྔ་བྲི་བ་སྟེ། གཙུག་ཏོར་ཞེས་པ་ནི་བཅོམ་ལྡན་འདས་ཀྱི་གཙུག་ཏོར་ནས་བྱུང་བརྒྱུས་འབྲས་བུ་ལ་བཏགས་པའོ། །འདི་རྣམས་ཀྱི་ཕྱག་རྒྱ་ལ་སོགས་པ་ནི་གསང་བའི་དཀྱིལ་འཁོར་ལས་ཞིབ་ཏུ་སྨོས་པས་འདིར་མ་བཤད་དོ། །དེའི་བྱང་དུ་སོང་ནས་སུ། །ཞེས་པ་ནས། །དེ་དག་ཐམས་ཅད་ལེགས་པར་བྲི། །ཞེས་པའི་བར་གྱིས་ནི་གཙུག་ཏོར་ལྔའི་གཡོན་རོལ་ལྷོ་ཕྱོགས་སུ་གཟུགས་ཁམས་ཀྱི་ལྷ་རྣམས་ལ་སྐུ་མི་ཟད་པའི་རྒྱན་གྱིས་ཁྱབ་པར་མཛད་པའི་སྒོང་གྱུར་པ་གནས་གཙང་མའི་རིས་ཀྱི་ལྷ་རྣམས་བྲི་བ་སྟེ། གཞུང་ལས་བྱང་ཕྱོགས་སུ་སྨོས་ན་ཅིའི་ཕྱིར་ལྷོ་ཕྱོགས་སུ་བྲི་ཞེ་ན། གཙུག་ཏོར་ལྔའི་བྱང་ཕྱོགས་ན་ཤཱཀྱ་ཐུབ་པ་ལ་སོགས་པ་བཞུགས་ཕས་བྲི་བའི་སྐབས་མེད་དེ་ལྷོ་ཕྱོགས་སུ་བྲི་བར་མངོན་ནོ། །གཉིས་སུ་ན་ཨུཏྟ་ར་ནི་བྱང་དང་གཡོན་ལ་འཇུག་པ་སྐད་ཀྱི་གཞུང་དང་ཡང་མཐུན་ནོ། །མཛོད་སྤུ་ཡི་ནི་གཡས་ལོགས་སུ། །གཙུག་ཏོར་ཆེན་པོ་ཆེར་འབྱུང་བ། །དེ་བཞིན་གྱེན་དུ་འབྱུང་ཉིད་དང༌། །སྒྲ་དབྱངས་མཐའ་ཡས་པ་ཡང་སྟེ། །གཙུག་ཏོར་གསུམ་པོ་ཁོ་ན་ནི། །བསྒྲིམས་ཏེ་ཡང་དག་བྲི་བར་བྱ། །ཞེས་པ་ནི་མཛོད་སྤུའི་གཡས་རོལ་བྱང་ཕྱོགས་སུ་གཙུག་ཏོར་གསུམ་རྣམས་བྲིའོ། །དཀར་པོ་སེར་སྐྱ་སེར་པོར་བྱ། །ཞེས་པ་ནི་གཙུག་ཏོར་གསུམ་པོ་དེ་དག་ཉིད་ཀྱི་ཁ་དོག་སྟེ། སེར་སྐྱ་ནི་ཡུངས་ཀར་གྱི་ཁ་དོག་ལྟ་བུའོ། །སེར་པོ་ནི་གསེར་གྱི་ཁ་དོག་ལྟ་བུའོ། །མཐུ་ཆེན་གཙུག་ཏོར་ལྔ་པོ་ཡི། །གསུམ་པོ་ལས་གཞན་བྱ་བ་ནི། །དཀར་པོ་དམར་པོ་སེར་པོའོ། །ཞེས་པ་གཙུག་ཏོར་གསུམ་པོ་
ལས་གཞན་པ་གཙུག་ཏོར་ལྔ་པོ་སྔར་བཤད་པ་རྣམས་ཁ་དོག་གསུམ་དུ་བྱ་ལ། ཁ་དོག་གསུམ་ཡང་དཀར་པོ་དང་དམར་པོ་དང་སེར་པོའོ། །གཙུག་ཏོར་ལྔ་ལས་གཙུག་ཏོར་གསུམ་ནི་ཁ་དོག་གསུམ་དང་སྦྱར་ལ་གཙུག་ཏོར་གཉིས་ནི་ཁ་དོག་དེ་དག་ཉིད་ལས་དཀར་པོ་དང་དམར་པོ་གཉིས་དང་སྦྱར་རོ། །དེ་དག་སྨོན་ལམ་སྟོབས་ཅན་ཏེ། ཞེས་པ་ནི་དེ་དག་ཀུན་ཀྱང་བཅོམ་ལྡན་འདས་ཤཱཀྱ་ཐུབ་པའི་སྨོན་ལམ་གྱི་སྟོབས་ཀྱིས་བྱུང་བའོ་ཞེས་པའོ། །དེ་ནས་སྔགས་པས་མེ་ལོགས་སུ། །མེ་ནི་དྲང་སྲོང་ཆེ་རྣམས་དང༌། །ཞེས་པ་ནས། བགྲང་ཕྲེང་གུནྡྷེ་ཐོགས་པར་བྲི། །ཞེས་པའི་བར་གྱིས་ནི་ཤར་ལྷོའི་མཚམས་སུ་མེའི་དྲང་སྲོང་འཁོར་མེའི་དྲང་སྲོང་རྣམས་དང་བཅས་པ་བྲི་བའི་བྱེ་བྲག་སྟེ་དེ་རྣམས་ཀྱང་སྐུ་མི་ཟད་པའི་རྒྱན་ཉིད་མེའི་དྲང་སྲོང་ལ་སོགས་པ་གདུལ་བའི་ཕྱིར་མེའི་གཟུགས་སུ་གྱུར་པའོ། །དེ་ནས་ལྷོ་ཡི་ཕྱོགས་ཀྱི་ཆར། །གཤིན་རྗེ་གཙོ་བོའི་ལག་པ་ན། །དབྱུག་པ་ཐོགས་ཤིང་མ་ཧེ་ཞོན། །ཁ་དོག་དབྱར་གྱི་ཆར་སྤྲིན་འདྲ། །མ་མོ་རྣམས་དང་དུས་མཚན་དང༌། །འཆི་བདག་རྣམས་ཀྱིས་བསྐོར་བ་བྲི། །ཞེས་པ་ནི་སྐུ་མི་ཟད་པའི་རྒྱན་དེ་ཉིད་གཤིན་རྗེ་ལ་སོགས་པའི་དུལ་བའི་ཡི་དགས་ཀྱི་རྒྱལ་པོ་གཤིན་རྗེའི་གཟུགས་སུ་གྱུར་པ་དེ་དེ་ཡང་ལྷོ་ཕྱོགས་ཀྱི་སྒོ་ཁྱུད་ཀྱི་ནང་དུ་བྲིའོ། །མ་ཧེ་ཞོན་པ་ནི་དེའི་ཐེག་པ་སྟེ་འཇིག་རྟེན་པའི་ཐེག་པ་ཡིན་པས་ན་མ་ཧེ་ལྟར་དཀར་པོ་མ་ཡིན་པའོ། །དབྱུག་པ་ཐོགས་པ་ནི་ཤེས་རབ་ཀྱི་མཚན་མ་སྟེ་དབྱུག་པ་ཟླུམ་པོ་བཅད་པའི་རང་བཞིན་མ་ཡིན་པ་ནི་འཁོར་བའི་རྒྱུད་ཀྱི་ལས་ལེགས་ཉེས་ཀྱི་འབྲས་བུ་ལ་སོགས་པ་སྟོན་ཅིང་འཆད་པས་འཁོར་བའི་རྒྱུད་གཅོད་པ་མ་ཡིན་པའོ། །བདེན་བྲལ་ཕྱོགས་སུ་བདེན་བྲལ་ནི། །ལག་ན་རལ་གྲི་ཐོགས་པར་བྲི། །ཞེས་པ་ནི་ལྷོ་ནུབ་ཀྱི་མཚམས་སུ་སྲིན་པོ་རྣམས་གདུལ་བའི་ཕྱིར་སྐུ་མི་ཟད་པའི་རྒྱན་དེ་ཉིད་སྲིན་པོའི་རྒྱལ་པོ་བདེན་བྲལ་གྱི་གཟུགས་སུ་གྱུར་པའོ། །དེ་ནས་ཀྱང་ནི་བློ་ལྡན་པ། །མྱུར་དུ་བྱང་གི་ཕྱོགས་སོང་སྟེ། །ལྷ་ཡི་རྒྱལ་པོ་རི་རབ་ལ། །འདུག་ཅིང་ལྷ་རྣམས་ཀྱིས་བསྐོར་བ། །ལག་ན་རྡོ་རྗེ་ཅོད་པན་ཅན། །རྒྱན་ཀུན་གྱིས་ནི་བརྒྱན་པར་བྲི། །ཞེས་པ་ནི་འདོད་པའི་ལྷ་རྣམས་གདུལ་བའི་ཕྱིར་སྐུ་མི་ཟད་པའི་རྒྱན་དེ་ཉིད་ལྷ་རྣམས་ཀྱི་རྒྱལ་པོ་དབང་པོ་དབང་པོའི་གཟུགས་སུ་གྱུར་པ་སྟེ་དེ་ཡང་བྱང་ཕྱོགས་ཀྱི་ངོས་སྒོ་ཁྱུད་
ཀྱི་ནང་དུ་བྲིའོ། །དེ་ཡང་རི་རབ་ཀྱི་རྩེ་མོ་ལ་གནས་ཤིང་འཁོར་ལྷ་རྣམས་ཀྱིས་བསྐོར་བ་བྲི་སྟེ་ཅོད་བན་ནི་རྒྱལ་པོའི་ཚུལ་འཛིན་པས་སོ། །རྡོ་རྗེ་ནི་དེའི་ཡེ་ཤེས་ཀྱི་མཚན་མ་སྟེ་གཉིས་སུ་ན་ལག་ཆའོ། །དེ་ནས་དེ་ཡི་ཤར་དུ་ནི། །ཆུ་ལྷ་ལག་ན་ཞགས་ཐོགས་བྲི། །ཞེས་པ་ནི་ཤར་ཕྱོགས་སུ་ཆུའི་དབང་པོ་བྲི་བ་སྟེ་ཞགས་པ་ནི་དེ་ཉིད་ཀྱི་ལམ་གྱི་རང་བཞིན་ནོ། །ཤར་ཕྱོགས་སུ་བྲི་བ་ནི་པུར་བ་ཞེས་བ་སྔོན་གྱི་ཚིག་སྟེ་བསྐལ་བ་འབྱུང་བའི་འོག་ཏུ་ཆུའི་དཀྱིལ་འཁོར་གྱིས་ཐོག་མར་གཞི་བཙུགས་པའི་ཕྱིར་རོ། །ཉི་མ་ཤིང་རྟའི་སྟེང་འདུག་བྲི། །ཞེས་པ་ནི་ཆུའི་རྒྱལ་པོའི་ཤར་ཕྱོགས་སུ་ཉི་མ་བྲི་སྟེ་ཤིང་རྟ་ནི་ཉི་མའི་བཞོན་པའོ། །ཤར་ཕྱོགས་སུ་བྲི་བ་ནི་སྔོན་གྱི་ཚིག་སྟེ་བསྐལ་པ་འབྱུང་བའི་འོག་ཏུ་འཇིག་རྟེན་པ་རྣམས་ཀྱི་ནང་ན་ཉི་མ་དང་ཟླ་བ་དང་པོར་བྱུང་བའི་ཕྱིར་རོ། །དེ་ཡི་གཡས་དང་གཡོན་དུ་ནི། །རྒྱལ་དང་རྣམ་པར་རྒྱལ་བ་བྲི། །ཞེས་པ་ནི་ཉི་མའི་ཆུང་མ་གཉིས་སོ། །དེའི་གཡས་སུ་ཚངས་པ་ནི། །གདོང་བཞི་པ་ལ་ཐོར་ཚུགས་ཅན། །ཨོཾ་ཞེས་བྱ་བ་ལྷུར་ལེན་པ། །ངང་པ་པདྨའི་སྟན་འདུག་བྲི། །ཞེས་པ་ནི་དབང་པོའི་གཡས་ལོགས་སུ་ནུབ་ཀྱི་ཕྱོགས་སུ་ཚངས་པ་བྲི་བ་སྟེ། གདོང་བཞི་བ་ནི་རིག་བྱེད་བཞིའི་སོ་སོ་ནས་འབྱུང་བའོ། །ངང་པ་པདྨའི་སྟན་འདུག་བྲི། །ཞེས་པ་ནི་ཚངས་པའི་བཞོན་པ་ངང་པའི་སྟེ་ངང་པའི་སྟེང་དུ་པདྨོ་གཞག་པ་ལ་འདུག་པར་བྲིའོ། །ཨོཾ་གྱི་སྒྲ་འབྱིན་པའི་ཚུལ་དང་ཕྱག་རྒྱ་ནི་གསང་བའི་དཀྱིལ་འཁོར་དུ་བཤད་པ་དང་སྦྱར་རོ། །དེ་ཡི་ནུབ་ཏུ་བྲི་བ་ནི། །ས་ཡི་ལྷ་དང་དབྱངས་ཅན་དང༌། །ཁྱབ་འཇུག་སྐེམ་བྱེད་དེ་བཞིན་རླུང༌། །བདེ་བྱེད་དེ་བཞིན་ཟླ་བ་སྟེ། །ནུབ་ཀྱི་ཕྱོགས་སུ་གནས་ནས་ནི། །རབ་ཏུ་ནན་ཏན་བྱས་ཏེ་བྲི། །ཞེས་པ་ནི་ནུབ་ཕྱོགས་ཀྱི་ངོས་སུ་ཁྱབ་འཇུག་ལ་སོགས་པའི་ལྷ་དེ་དག་ལྷོ་ཕྱོགས་ནས་བརྩམས་ཏེ་རིམ་པ་ཇི་ལྟ་བ་བཞིན་དུ་བྲིའོ། །ནུབ་ཕྱོགས་སུ་བྲི་བ་ནི་སྒོ་ནུབ་ཏུ་བཏོད་པས་སྒོ་གར་བྲི་བ་སྟེ་དབང་པོ་དང་ཁྱབ་འཇུག་ལ་སོགས་པའི་ལྷ་དེ་རྣམས་འཇིག་རྟེན་ལས་འདས་པའི་ལམ་དུ་འཇུག་པའི་སྒོར་གྱུར་པའི་ཕྱིར་རོ། །དེ་རྣམས་ཀྱང་སྐུ་མི་ཟད་པའི་རྒྱན་དེ་ཉིད་དེ་ལྷ་དེ་དག་འདུལ་བའི་ཕྱིར་དེ་དག་ཉིད་ཀྱི་གཟུགས་སུ་གྱུར་པའོ། །སྐུ་མི་ཟད་རྒྱན་དེ་དབང་པོ་ལ་སོགས་པ་དེ་དག་གི་གཟུགས་སུ་གྱུར་པ་ཡང་ཆ་ལུགས་དེ་དག་
དང་འདྲ་མོད་ཀྱི་དེ་དག་འདུལ་བའི་ཕྱིར་མཐུ་དང་རྫུ་འཕྲུལ་ལ་སོགས་པ་དེ་དག་ལས་ལྷག་པར་ཤེས་པར་བྱའོ། །དེ་བཞིན་དུ་གཤིན་རྗེ་ལ་སོགས་པ་གཞན་ལ་ཡང་སྦྱར་རོ། །བྲིས་ནས་བསྔགས་པས་དེ་ནས་ནི། །ཡིད་ལ་འཁྲུལ་བ་མེད་པ་རུ། །གསང་སྔགས་མགོན་པོའི་འོག་ལོགས་སུ། །ཁྲོ་ཆེན་གཞན་གྱིས་མི་ཐུབ་ཅེས། །བྱ་བ་ཉིད་དང་ལྷ་མོ་ནི། །གཞན་གྱིས་མི་ཐུབ་མ་དང་ནི། །ས་བདག་ལག་ན་བུམ་པ་ཐོགས། །གུས་པར་ཡང་དག་གནས་པར་བྲི། །ཞེས་པ་ལ་ཁྲོ་བོ་གཞན་གྱིས་མི་ཐུབ་པ་ནི་བཅོམ་ལྡན་འདས་ཤཱཀྱ་ཐུབ་པ་འབར་ཆད་མེད་པའི་ལམ་གྱི་རང་བཞིན་ནོ། །ལྷ་མོ་གཞན་གྱིས་མི་ཐུབ་མ་ནི་བཅོམ་ལྡན་འདས་ཤཱཀྱ་ཐུབ་པའི་མཐུ་བརྟན་པར་འགྱུར་བའོ། །སའི་ལྷ་མོ་ལག་ན་བུམ་པ་ཐོགས་པ་ནི་བཅོམ་ལྡན་འདས་ཀྱི་དབང་དུ་གྱུར་པ་སྟེ་དེ་དག་ཀྱང་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་འོག་མ་ཟད་བུ་པྲིའོ། །ཀླུ་ཆེན་དགའ་བོ་བསྙེན་དགའ་དང༌། །ཤཱཀྱ་སེང་གེ་སྐྱོབ་པ་ཡི། །སྒོ་དྲུང་གཉིས་སུ་མངོན་ཕྱོགས་པར། །རབ་ཏུ་བསྒྲིམས་ཏེ་བྲི་བར་བྱ། །ཞེས་པ་ནི་སྒོའི་ཕ་རོལ་ཚུ་རོལ་ནས་ཕན་ཚུན་གདོང་ཕྱོགས་པར་བྲི་སྟེ་ཆབ་སྒོ་བར་ཤེས་བར་བྱའོ། །གཞན་ཡང་ཤཱཀྱ་ཐུབ་པ་ཡི། །རྒྱུད་རྣམས་ཀུན་ལས་དཀྱིལ་འཁོར་དུ། །སྔགས་དང་ཕྱག་རྒྱ་གང་བཤད་པ། །དེ་དག་ཀྱང་ནི་མཁས་པས་བྲི། །ཞེས་པ་ནི་བཅོམ་ལྡན་འདས་ཤཱཀྱ་ཐུབ་པའི་ཕྱག་རྒྱ་ལྷུང་བཟེད་དང་འཁར་གསིལ་ལ་སོགས་པ་རྒྱུད་ལས་འབྱུང་བ་རྣམས་ཇི་ལྟར་རིག་པར་བྱའོ་ཞེས་གློད་ནི་འཕགས་པ་འཇམ་པའི་དབྱངས་ལ་སོགས་པ་བྱང་ཆུབ་སེམས་དཔའ་ཆེན་པོ་རྣམས་ཆོས་ཉན་པའི་ཚུལ་དུ་བཞུགས་པར་བྲི་བ་བཤད་དེ། དེ་ལ་ཆོས་ཉན་པ་ནི་ལུང་གི་ཆོས་དང་རྟོགས་པའི་ཆོས་ཏེ། ལུང་གི་ཆོས་ཞལ་ནས་གསུངས་པ་རྣམས་སོ། །རྟོགས་པའི་ཆོས་ནི་སྐུ་མི་ཟད་པའི་རྒྱན་གྱི་དཀྱིལ་འཁོར་ནང་མ་གཉིས་ཀྱི་ནང་ན་སྐུ་བཞི་པོ་འཁོར་དང་བཅས་པ་སྟེ་དེ་བས་ན་དེ་དག་རྟོགས་པར་བྱ་བའི་ཕྱིར་བྱང་ཆུབ་སེམས་དཔའ་དེ་རྣམས་ཀྱིས་ཡོངས་སུ་བསྐོར་ཞིང་མདུན་དུ་བྱས་པའི་ཚུལ་དུ་བྲི་བར་བསྟན་ཏེ། བྱང་ཆུབ་སེམས་དཔའ་དེ་རྣམས་ཀྱང་ཕ་རོལ་ཏུ་ཕྱིན་པ་ལས་སྐྱེས་པ་ཤ་སྟག་ཏུ་ཤེས་པར་བྱའོ། །སྔགས་པ་དེ་ནས་ཕྱིར་བྱུང་ནས། །ཆ་གསུམ་པ་ནི་ངེས་པ་ལ།
རྡོ་རྗེ་དམ་པ་སྦྱིན་པ་ནི། ཞེས་པ་ནས། འོད་ཟེར་མཚན་ཉིད་བཟང་པོ་ཡིས། །ཀུན་དུ་འཁོར་བར་སྔགས་པས་བྲི། །ཞེས་པའི་བར་གྱིས་ནི་ཤར་ཕྱོགས་ཀྱི་ངོས་ཀྱི་སྒོ་ཁྱུད་ནང་དུ་འཕགས་པ་འཇམ་པའི་དབྱངས་བྲི་བར་བྱ་སྟེ། དེ་ཡང་སྒྲའི་རྗེས་སུ་འགྲོ་བའི་ཤེས་རབ་ཀྱི་རང་བཞིན་གྱིས་ཆོས་ཐམས་ཅད་ཀྱི་སྤྱི་དང་རང་གི་མཚན་ཉིད་བློས་བརྟགས་ཤིང་དཔྱད་ནས་རྟོགས་པར་བྱེད་པའོ། །དེ་བས་ན་དེ་ལྟར་རྟོགས་ནས་སྒྲིབ་པ་ཐམས་ཅད་སྤོད་བར་བྱེད་པའི་བྱང་ཆུབ་སེམས་དཔའ་ཕྱི་ནས་ལྷོ་ཕྱོགས་སུ་བྲིའོ། །དེ་ལྟར་སྒྲིབ་པ་སྤངས་ནས་བཟོད་པ་དང་དགའ་བར་ལྡན་པའི་རང་བཞིན་སའི་སྙིང་པོ་བྱང་ཕྱོགས་སུ་བྲིའོ། །དེ་ལྟར་བཟོད་པ་དང་དགའ་བ་དང་ལྡན་པ་ཐོབ་ནས་ཆོས་ཐམས་ཅད་སྟོང་པ་ཉིད་ནམ་མཁའ་ལྟ་བུར་རྟོགས་པའི་རང་བཞིན་ནམ་མཁའི་སྙིང་པོ་ནུབ་ཕྱོགས་སུ་བྲིའོ། །རྣམ་པར་ཐར་པའི་རིམ་པ་དེ་ལྟ་བས་ན་དང་པོ་ཉིད་དུ་ཤར་ཕྱོགས་སུ་ཤེས་རབ་ཀྱི་རང་བཞིན་འཕགས་བ་འཇམ་དཔལ་བྲིའོ། །རྡོ་རྗེ་དམ་པ་སྦྱིན་པ་ནི་འཕགས་པ་འཇམ་དཔལ་ལ་ཕྱག་ན་རྡོ་རྗེས་སྔགས་ཀྱི་རྒྱུད་འཆད་པར་དབང་བསྐུར་ཏེ། དེ་ལྟར་ན་རྡོ་རྗེས་དམ་པ་སྦྱིན་པས་རྡོ་རྗེ་དམ་པ་སྦྱིན་ཞེས་པའོ། །ཟུར་ཕུད་ལྔ་དང་ལྡན་ཞེས་པ་ནི་ཡེ་ཤེས་ལྔའི་རང་བཞིན་ནོ། །བྱིས་པ་གཞོན་ནུའི་གཟུགས་ཅན་ནི་གཞོན་ནུའི་ས་ལ་གནས་པ་སྟེ་ཆོས་ཀྱི་རྒྱལ་བོའི་སྲས་ཀྱི་གཟུགས་སུ་བཞུགས་པའོ། །ཨུཏྤལ་སྔོན་པོ་རྡོ་རྗེ་ཅན། །ལག་པ་གཡོན་ན་ཐོགས་པ་སྟེ། །ཞེས་པ་ནི་ཡེ་ཤེས་ལྔའི་མཚན་མའི་རྡོ་རྗེ་ཨུཏྤལའི་སྟེང་དུ་བཞག་པ་ལག་པ་གཡོན་ན་ཐོགས་པ་སྟེ་རྡོ་རྗེ་ནི་མཆོག་སྦྱིན་པའོ། །ཨུཏྤལ་ནི་ཤེས་རབ་ཀྱི་རལ་གྲིའི་མཚན་མའོ། །རབ་ཏུ་འཛུམ་པའི་བཞིན་དུ་གནས། །ཞེས་པ་ནི་ཤེས་རབ་ཀྱིས་ཆོས་སྟོན་པའི་མཚན་མའོ། །འོད་ཟེར་མཚན་ཉིད་བཟང་པོ་ཡིས། །ཞེས་པ་ནི་སེར་པོ་དང་དཀར་པོ་ལ་སོགས་པ་དང་ལྡན་པའི་འོད་འཕྲོ་བ་སྟེ་ནག་བོ་ལ་སོགས་པའི་འོད་མེད་པའོ། །དེ་ཡི་བྱང་དུ་གཞོན་ནུ་ནི། །དྲ་བའི་འོད་ཅན་ལག་པ་ན། །རིན་ཆེན་དྲ་བ་ཐོགས་པ་སྟེ། །སྣ་ཚོགས་པ་ཡི་རྒྱན་གྱིས་བརྒྱན། །པདྨ་དཀར་པོའི་སྟན་ལ་འདུག །རྒྱལ་བའི་སྲས་ལ་བལྟ་བར་བྲི། །ཞེས་པ་ནི་འཕགས་པ་འཇམ་དཔལ་གྱི་འཁོར་བའི་འོད་ཅེས་བྱ་བ་དེ་གཡས་རོལ་བྱང་ཕྱོགས་
སུ་བྲི་སྟེ། དྲ་བའི་འོད་ཅེས་པ་ནི་འོད་རྣམས་རྒྱུན་མི་འཆད་པར་ཕན་ཆུན་དུ་འབྲེལ་པར་གྱུར་པས་དྲ་བའི་འོད་ཅེས་བྱའོ། །ལག་པ་ནི་རིན་པོ་ཆེའི་དྲ་བ་ཐོགས་པ་ནི་ཕྱག་དྲ་བ་འདྲ་བ་ལ་རིན་པོ་ཆེས་སྤྲས་པ་ཐོགས་པའོ། །པདྨ་དཀར་བོའི་སྟན་ལ་འདུག་པ་ནི་བླ་མ་དང་བྱེ་བྲག་ཡོད་བར་བྱ་བའི་ཕྱིར་རོ། །རྒྱལ་བའི་སྲས་ལ་བལྟ་བར་བྲི། །ཞེས་པ་ནི་འཕགས་པ་འཇམ་དཔལ་ཉིད་ལ་བལྟ་བར་བྲིའོ། །རྡོ་རྗེ་དམ་པ་སྦྱིན་པ་ཡི། །གཡོན་དུ་ཕོ་ཉ་མོ་ལྔ་བྲི། །སྐྲ་ཅན་དང་ནི་ཉེ་སྐྲ་ཅན། །སྣ་ཚོགས་མ་དང་ནོར་ཅན་མ། །དེ་བཞིན་འགུགས་མ་ཞེས་བྱ་བ། །འདི་དག་བློ་ལྡན་ཕོ་ཉ་མོའོ། །ཞེས་པ་ནི་འཕགས་པ་འཇམ་དཔལ་གྱི་འཁོར་མངག་གཞུག་མ་མིང་སྨོས་པ་ལྔ་པོ་རྣམས་གཡོན་རོལ་དུ་བྲི་བར་བྱའོ། །དེ་དག་གི་ནི་འོག་ཟད་དུ། །ཕྱག་བརྙན་མ་ནི་ལྔ་རྣམས་དང༌། །གཞོན་ནུ་དྲ་བའི་འོད་ཅན་གྱི། །འཁོར་གཉིས་པོ་ཡང་བྲི་བར་བྱ། །ཞེས་པ་ནི་མངག་གཞུག་མ་དེ་ལྔའི་གཡོག་ཅི་བགྱི་མ་ལྔ་ཡང་མངག་གཞུག་མ་རྣམས་ཀྱི་འོག་མ་ཟད་དུ་བྲི་བར་བྱ་ལ། དྲ་བའི་འོད་ཅན་གྱི་དྲུང་དུ་ཡང་དེའི་གཡོག་གཉིས་པོ་བྲི་བར་བྱའོ། །དེ་རྣམས་ནི་འཕགས་པ་འཇམ་དཔལ་གྱི་འཁོར་དེ་ཁ་དོག་དང་ཕྱག་རྒྱལ་སོགས་པ་ནི་གསང་བའི་དཀྱིལ་འཁོར་དུ་བལྟ་བར་བྱའོ། །དེ་ནས་སྔགས་པས་ལྷོ་ཕྱོགས་སུ། །བྱང་ཆུབ་སེམས་དཔའ་གྲགས་ཆེན་པོ། །སྒྲིབ་པ་ཐམས་ཅད་རྣམ་སེལ་གཙོ། །ཡིད་བཞིན་ནོར་བུ་ཐོགས་པར་བྲི། །ཞེས་པ་ནི་ལྷོ་ཕྱོགས་ཀྱི་སྒོ་ཁྱུད་ཀྱི་ནང་དུ་སྒྲིབ་པ་ཐམས་ཅད་རྣམ་པར་སེལ་བ་བྲི་སྟེ་སྒྲིབ་པ་ཐམས་ཅད་རྣམ་པར་སེལ་ཞེས་པ་ནི་ཤེས་བྱ་དང་ཉོན་མོངས་པའི་སྒྲིབ་པ་ཐམས་ཅད་སྤངས་ཞེས་པའི་དོན་ཏོ། །གཉིས་སུ་ན་རྒྱུའི་ཚེ་འདོད་པ་ལ་འདུན་པ་དང་གནོད་སེམས་ལ་སོགས་པའི་སྒྲིབ་པ་ལྔ་བསལ་ཏེ་དེ་རྣམས་མི་བསྐྱོད་པ་ལས་བྱུང་བས་ན་རྒྱུས་འབྲས་བུལ་བཏགས་པའོ། །དེ་ཡི་ཆ་གཉིས་པོར་ནས་ནི། །ཞེས་པ་ནས། དེ་བཞིན་བློ་གྲོས་བསམ་ཡས་ཏེ། །མཁས་པས་བརྒྱད་པོ་བྲི་བར་བྱ། །ཞེས་བའི་པར་གྱིས་ནི་གཙོ་བོ་དེའི་འཁོར་བརྒྱད་པོ་རྣམས་གཡས་སུ་བཞི་དང་གཡོན་དུ་བཞི་རིམ་པ་བཞིན་དུ་བྲི་སྟེ། ཆ་གཉིས་བོར་བ་ནི་དཔོན་གཡོག་གི་མཚམས་ཀྱི་གྲལ་དཔག་པའི་ཕྱིར་རོ། །བྱང་ཆུབ་སེམས་དཔའ་དེ་རྣམས་ཀྱི་མིང་ནི་དོན་དང་རྗེས་སུ་
མཐུན་པར་ཤེས་པར་བྱའོ། །བྱང་གི་ཕྱོགས་སུ་སོང་ནས་ནི། །ཞེས་པ་ནས། དེ་ཡི་སྟེང་ན་འདུག་པར་བྲི། །ཞེས་པའི་བར་གྱིས་ནི་བྱང་ཆུབ་སེམས་དཔའ་སའི་སྙིང་པོ་བྱང་ཕྱོགས་ཀྱི་ངོས་ཀྱི་སྒོ་ཁྱུད་ཀྱི་ནང་དུ་བྲི་བ་སྟེ། བཟོད་དང་དེས་པ་ཕུན་སུམ་ཚོགས། །ཞེས་པ་ལ་བཟོད་པ་རྣམ་པ་གསུམ་དང་ལྡན་པ་སྟེ་ཆོས་ཟབ་མོ་ལ་བཟོད་པ་དང༌། སྡུག་བསྔལ་ལ་བཟོད་པ་དང༌། ཕ་རོལ་གྱི་གནོད་པ་བྱས་པ་ལ་བཟོད་བའོ། །དེས་པ་ཕུན་སུམ་ཚོགས་པ་ནི་རང་གི་རྣམ་པར་ཐར་པའི་སྒོས་རངས་ཤིང་དགའ་བའོ། །སའི་སྙིང་པོ་ཞེས་པ་ནི་དེ་ལྟར་བཟོད་པ་དང་ལྡན་པས་ས་དང་འདྲ་བའི་ཕྱིར་རོ། །འབར་བ་ནི་སྔར་བཤད་པ་བཞིན་ནོ། །དེ་ཡི་སྟན་ནི་མཁས་པ་ཡིས། །འབྱུང་ཁུངས་ཀུན་དང་ལྡན་པའི་ས། །རིན་ཆེན་ཀུན་གྱིས་ཉེར་བརྒྱན་པ། །ཞེས་པ་ནི་བྱང་ཆུབ་སེམས་དཔའ་དེའི་ཁྱད་པར་ཏེས་དེ་ཡང་དཀར་དམར་ལ་སོགས་པའི་ཁ་དོག་དང་ལྡན་པ་རིན་པོ་ཆེས་སྦྲས་ཤིང་བརྒྱན་པར་བྲིའོ། །དེ་ཡི་སྟེང་ན་རིན་ཆེན་བཞིའི། །པདྨ་ཡང་དག་གནས་པ་ནི། །ཡིད་དུ་འོང་བ་བསམ་བྱ་སྟེ། །བྱང་ཆུབ་སེམས་དཔའ་གྲགས་ཆེན་པོ། །དེ་ཡི་སྟེང་ན་འདུག་པར་བྲི། །ཞེས་པ་ནི་སའི་སྟེང་དུ་པདྨོ་རིན་པོ་ཆེ་བཞིའི་རང་བཞིན་བྲིས་ཏེ། རིན་པོ་ཆེ་བཞི་ནི་གོང་དུ་བྱང་ཆུབ་སེམས་དཔའི་ཡོན་ཏན་བཟོད་པ་རྣམ་པ་གསུམ་དང༌། དེས་པ་དེ་ཉིད་རིན་པོ་ཆེའི་མཚན་མར་གྱུར་པས་པདྨོ་དེ་བརྒྱན་པ་སྟེ་དེའི་སྟེང་དུ་བྱང་ཆུབ་སེམས་དཔའ་དེ་བཞུགས་པར་བྲིའོ། །དེ་ཡི་འཁོར་ནི་ཡོན་ཏན་གཙོ། །མཐའ་ཡས་ཤིང་ནི་གྲངས་མེད་དེ། །ཞེས་པ་ནས། གྲགས་ཆེན་འདི་དག་བྲི་བར་བྱ། །ཞེས་པའི་བར་གྱིས་ནི་བྱང་ཆུབ་སེམས་དཔའ་དེའི་འཁོར་ཡོན་ཏན་མཐའ་ཡས་པ་དང་ལྡན་པ་གྲངས་མེད་པ་རྣམས་ཡོད་དེ། དེ་དག་ལས་དོན་དང་རྗེས་སུ་མཐུན་པའི་མིང་དང་ལྡན་པའི་བྱང་ཆུབ་སེམས་དཔའ་ཁ་ཅིག་སྟེ་འདི་རྣམས་རིམ་པ་བཞིན་དུ་བྲི་བར་བྱའོ། །དེ་བཞིན་སྔགས་པས་ནུབ་ཕྱོགས་སུ། །དཔའ་བོ་ནམ་མཁའི་སྙིང་པོ་ནི། །གཟི་བརྗིད་ཆེན་པོ་གོས་དཀར་གྱོན། །ལག་ན་རལ་གྲི་ཐོགས་བསམ་སྟེ། །རྒྱལ་སྲས་པདྨའི་སྟན་སྟེང་ན། །ལེགས་པར་འདུག་པ་བྲི་བར་བྱ། །ཞེས་པ་ནི་བྱང་ཆུབ་སེམས་དཔའ་ནམ་མཁའི་སྙིང་པོ་ཞེས་པ་ནི་བྱང་ཆུབ་
སེམས་དཔའ་དེ་ཆོས་ཐམས་ཅད་སྟོང་པ་ཉིད་ཀྱི་མཚན་ཉིད་ནམ་མཁའ་ལྟ་བུར་གྱུར་བ་ལས་བྱུང་བས་ན་ནམ་མཁའི་སྙིང་པོ་ཞེས་བྱའོ། །གོས་དཀར་གྱོན་པ་ནི་མཛེམ་པ་དང་ངོ་ཚ་བ་དང་ལྡན་པའི་མཚན་མ་སྟེ་སྔར་བཤད་པ་ལྟ་བུའོ། །རལ་གྲི་ནི་དེའི་རྣམ་པར་ཐར་པའི་ཤེས་རབ་ཀྱི་མཚན་མའོ། །བདག་ཉིད་ཆེན་པོ་དེ་འཁོར་དུ། །ཞེས་པ་ནས། དེ་དག་རབ་ཏུ་བསྒྲིམས་བྲི་ཞིང༌། །ཞེས་པའི་བར་གྱིས་ནི་ནམ་མཁའི་སྙིང་པོའི་འཁོར་བྱང་ཆུབ་སེམས་དཔའ་དོན་དང་རྗེས་སུ་མཐུན་པའི་མིང་ཅན་འདི་རྣམས་གོ་རིམས་བཞིན་དུ་གཡས་དང་གཡོན་དུ་བྲི་བར་བྱའོ། །རྟག་ཏུ་དཔའ་བོ་འདི་རྣམས་དང༌། ལྷན་ཅིག་གོ་རིམས་བཞིན་དུ་བསམ། །ཞེས་པ་ནི་བཅོམ་ལྡན་འདས་ཀྱི་སྐུ་མི་ཟད་པའི་རྒྱན་དེ་དག་ཆོས་ཉན་པའི་བྱང་ཆུབ་སེམས་དཔའ་ཆེན་པོ་འདི་རྣམས་ཀྱིས་ཡོངས་སུ་བསྐོར་ཞིང་མདུན་དུ་བྱས་པ་དག་རྟག་པར་ལྷན་ཅིག་ཏུ་སོམས་ཤིག་ཅེས་བྱའོ། །བྱང་ཆུབ་སེམས་དཔའ་དེ་རྣམས་ཀྱི་སྐུ་མདོག་དང་ཕྱག་རྒྱ་ལ་སོགས་པ་འདིར་གསལ་བར་མ་སྨོས་པ་རྣམས་གསང་བའི་དཀྱིལ་འཁོར་དུ་བལྟ་བར་བྱའོ། །དེ་ནས་གསང་བའི་བདག་པོ་ཕྱག་ན་རྡོ་རྗེས་ཐམས་ཅད་དང་ལྡན་པའི་འཁོར་རྣམས་ལ་བལྟས་ནས་ཞེས་པ་ནས། དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅང༌། །ཞེས་པའི་བར་གྱིས་ནི་ཕྱག་ན་རྡོ་རྗེས་གོང་དུ་དཀྱིལ་འཁོར་བཤད་པ་དང་ལྷ་རྣམས་སོ་སོར་དགོད་པ་ལ་སོགས་པ་ཁོང་དུ་ཆུད་ནས་དེ་དག་གི་ཚུལ་དང་ཡོན་ཏན་ལ་སོགས་པ་རྣམས་ལ་སེམས་ཤིན་ཏུ་དང་བར་འགྱུར། དང་བ་དེའི་ཤུགས་ཀྱིས་སྔགས་ཀྱི་ཚུལ་དཀོན་ཞིང་མཐུ་ཆེ་བར་བསྟན་པ་དང་དཀྱིལ་འཁོར་མཐོང་པ་མཐུ་ཆེ་བར་བསྟན་པ་དང༌། སྔགས་ཟློས་པ་ཡང་མཐུ་ཆེ་བར་བསྟན་པ་དང༌། སྔགས་ཉན་ཞིང་སེམས་པའི་སྒོ་ནས་དང་བ་མཐུ་ཆེ་བར་བསྟན་པའི་ཚིགས་སུ་བཅད་པ་རྣམས་སྨྲས་པ་སྟེ་དེ་ལ་སེམས་དང་པ་རྣམ་པ་གསུམ་སྟེ་པགས་པར་སོངས་པ་དང༌། རུས་པར་སོང་བ་དང༌། རྐང་དུ་སོང་བའོ། །དེ་ལ་པགས་པར་སོང་བ་ནི་བ་སྤུ་ལངས་པ་ལ་སོགས་པའོ། །རུས་པར་སོང་བ་ནི་མཆི་མ་འབྱུང་བ་ལ་སོགས་པའོ། །རྐང་དུ་སོང་བ་ནི་ཚིག་ཏུ་སྨྲ་བ་ལ་སོགས་པ་སྟེ་དེ་བས་ན་ཕྱག་ན་རྡོ་རྗེ་སེམས་ཤིན་ཏུ་དང་བ་རྐང་དུ་སོང་བ་དང་ལྡན་པས་ཚིག་ཏུ་སྨྲས་སོ། །དེ་ནས་གསང་བ་བའི་བདག་པོ་ཕྱག་ན་རྡོ་རྗེས་
ཐམས་ཅད་དང་ལྡན་པའི་འཁོར་རྣམས་ལ་བལྟས་ནས་ཞེས་པ་ནི་འཁོར་དེན་བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་ཡོངས་སུ་དག་པ་ཤ་སྟག་བཞུགས་པས་གཡེངས་མ་གཡེངས་དང་སྣོད་དུ་གྱུར་མ་གྱུར་བརྟག་པ་ལ་ནི་མི་བྱའི། དད་པའི་ཤུགས་ཉིད་ཀྱིས་འཁོར་དེ་རྣམས་ལ་བལྟས་པའོ། །བཅོམ་ལྡན་འདས་རྣམ་པར་སྣང་མཛད་ལ་རིང་ཞིག་ཏུ་མིག་མི་འཛུམས་པར་བལྟས་ཏེ་ཞེས་པ་ཡང་དད་པའི་ཤུགས་ཀྱིས་བཅོམ་ལྡན་འདས་ལ་སྙིང་ཚིམ་ཚིམ་དུ་རིང་དུ་བལྟས་པའོ། །ཆེད་དུ་གླེང་པ་འདི་ཆེད་དུ་གླེང་ཞིང་ཚིག་ཏུ་སྨྲས་པ་ཞེས་པ་ནི་གཞན་གྱིས་མ་བྲིས་པར་བདག་ཉིད་ཀྱིས་སེམས་དང་བའི་ཤུགས་ཀྱིས་ཚིག་ཏུ་བཏོན་ཏེ་སྨྲས་པའོ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ན་མི་འབྱུང་ངོ༌། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །ཞེས་པ་ནི་སྔགས་ཀྱི་སྤྱོད་པ་ཤིན་ཏུ་དཀོན་པར་བསྟན་པ་སྟེ། དེ་བཞིན་གཤེགས་པ་འཇིག་རྟེན་དུ་འབྱུང་བ་ཡང་ཨུ་དུམ་ཝཱ་རའི་མེ་ཏོག་དང་འདྲ་བར་དཀོན་ལ། །བརྒྱ་ལ་དེ་བཞིན་གཤེགས་པ་འཇིག་རྟེན་དུ་བྱུང་ན་ཡང་སྔགས་ཀྱི་ཚུལ་གསུངས་པ་ནི་སྔགས་སྤྱོད་པའི་སྣོད་དུ་གྱུར་པའི་གདུལ་བ་གཟིགས་ནས་གཟོད་སྔགས་ཀྱི་ཚུལ་སྟོན་པས་ན་བརྒྱ་ལམ་བརྒྱ་ལམ་ན་སྔགས་སྤྱོད་པའི་ཚུལ་འབྱུང་བས་ན་དཀོན་ནོ་ཞེས་པ་སྟེ། ཚིག་དེ་སྐད་དུ་སྨྲས་པ་ཡང་ཕྱག་ན་རྡོ་རྗེ་ཉིད་དེ་ལྟར་ཐུགས་སུ་ཆུད་ནས་སེམས་དང་བའི་ཤུགས་ཀྱིས་སྨྲས་པ་དང་མ་འོངས་པའི་འགྲོ་བ་རྣམས་ལ་སྔགས་ཀྱི་ཚུལ་དེ་ལྟར་དཀོན་ཞིང་མཐུ་ཆེ་བར་བསྟན་པའི་ཕྱིར་རོ། །ཐམས་ཅད་མཁྱེན་པ་འཇིག་རྟེན་དུ་སྐྱེ་ཞིང་འབྱུང་བའི་དུས་ངེས་པ་ནི་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་བྱང་ཆུབ་ཀྱི་ཤིང་དྲུང་དུ་མངོན་པར་སངས་རྒྱས་ཏེ་འཇིག་རྟེན་དུ་བྱུང་ནས་ཀྱང་བསྐལ་པ་དང་ལོ་གྲངས་ལ་སོགས་པ་ཇི་ཙམ་ལོན་པ་དང་འཕགས་པ་བྱམས་པ་འཇིག་རྟེན་དུ་གདོད་འབྱུང་པ་ཡང་དུས་འདི་ཙམ་ན་འབྱུང་ངེ་ཞེས་ངེས་པར་བཤད་ན། ཅིའི་ཕྱིར་བརྒྱ་ལམ་བརྒྱ་ལམ་ན་ཞེས་པ་ངེས་པར་བརྗོད་ཅེ་ན། དེ་བཞིན་གཤེགས་པ་འཇིག་རྟེན་དུ་བྱུང་བའི་དུས་དེས་ཀྱང་
དེ་བཞིན་གཤེགས་པ་འཇིག་རྟེན་དུ་འབྱུང་བའི་ཚེ་སེམས་ཅན་རྣམས་སྐལ་བ་དང་མི་ལྡན་པས་དེ་བཞིན་གཤེགས་པ་མངོན་པར་འབྱུང་བ་ནི་བརྒྱ་ལམ་བརྒྱ་ལམ་ན་སྟེ་དུས་ངེས་པ་མེད་དོ། །དེ་བས་ན་དེ་བཞིན་གཤེགས་པ་འཇིག་རྟེན་དུ་མངོན་པར་འཚང་རྒྱ་བ་འབའ་ཞིག་ལ་འཇིག་རྟེན་དུ་འབྱུང་ཞེས་མི་བྱའི། སེམས་ཅན་རྣམས་ཀྱི་སྤྱོད་ཡུལ་དུ་གྱུར་ཅིང་མཐོང་བ་ལ་ཡང་བྱ་བས་ན་བརྒྱས་ལམ་ན་ཞེས་སྨོས་སོ། །བསྐལ་བ་བྱེ་བ་དུ་མ་རུ། །སྡིག་པ་བགྱིས་པར་གྱུར་པ་གང༌། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་འབྱུང་བར་འགྱུར་ལགས་ན། །ཞེས་པ་ནི་དཀྱིལ་འཁོར་མཐོང་བ་ཤིན་ཏུ་མཐུ་ཆེ་བར་བསྟན་པ་སྟེ་དེ་བཞིན་གཤེགས་པའི་སྐུ་མི་ཟད་པའི་རྒྱན་ལ་སོགས་པའི་བྱིན་གྱི་རླབས་ཀྱིས་དཀྱིལ་འཁོར་འདི་མཐོང་བས་བསྐལ་བ་དུ་མར་མི་དགེ་བ་བཅུ་ལ་སྤྱད་པའི་སྡིག་བ་བསགས་པ་དེ་ཐམས་ཅད་འབྱང་བར་འགྱུར་ཞེས་པའོ། །དེ་འབྱང་བར་འགྱུར་པ་ཡང་དཀྱིལ་འཁོར་མཐོང་བ་ཙམ་འབའ་ཞིག་གིས་འབྱུང་བར་འགྱུར་བ་ནི་མ་ཡིན་གྱི། སྦྱོར་བ་དང་དངོས་གཞི་དང་རྗེས་གསུམ་དང་ལྡན་ན་འབྱང་བར་འགྱུར་བ་ཡིན་ནོ། །དེ་ལ་སྦྱོར་བ་ནི་དཀྱིལ་འཁོར་དུ་འཇུག་པའི་ཕྱིར་སྡིག་པ་བཤགས་པ་དང༌། གསུམ་ལ་སྐྱབས་སུ་འགྲོ་བ་དང༌། དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་འཛིན་པའོ། །དངོས་གཞི་ནི་དཀྱིལ་འཁོར་དུ་འཇུག་པ་ཉིད་ཀྱི་ཚེ་ན་བྱང་ཆུབ་ཏུ་སེམས་བསྐྱེད་པ་དང་དཀྱིལ་འཁོར་དུ་ཞུགས་པ་ན་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་སྐུ་གཟུགས་དང་ཕྱག་རྒྱ་ལ་སོགས་པ་དང༌། དཀྱིལ་འཁོར་གྱི་རྒྱན་དང་ལྡ་ལྡི་ལ་སོགས་པ་མཐོང་ནས་སེམས་དང་བ་སྐྱེས་པའོ། །རྗེས་ནི་དཀྱིལ་འཁོར་དུ་ཞུགས་པའི་འོག་ཏུ་དམ་པའི་ཆོས་དང་བྱང་ཆུབ་ཀྱི་སེམས་ཡོངས་སུ་མི་གཏོང་བ་ལ་སོགས་པའི་དམ་ཚིག་མནོས་པའོ། །རྣམ་པ་དེ་དག་དང་ལྡན་པར་དཀྱིལ་འཁོར་མཐོང་ན་བསྐལ་པ་དུ་མར་བསགས་པའི་སྡིག་ཡང་འབྱང་བར་འགྱུར་བ་ནི་དཔེར་ན་ལོ་དུ་མར་འདུག་པའི་མུན་ནག་སྒྲོན་མ་ལན་ཅིག་བྱུང་བས་མེད་པ་དང་འདྲའོ། །གྲགས་བ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་འཚལ། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །
ཞེས་པ་ནི་སྔགས་ཟློས་པ་མཐུ་ཆེ་བར་བསྟན་པ་སྟེ། དཀྱིལ་འཁོར་མཐོང་བ་ཙམ་གྱིས་ཀྱང་བསྐལ་པ་དུ་མར་བསགས་པའི་སྡིག་པ་འབྱང་བར་འགྱུར་ན་སངས་རྒྱས་དང་བྱང་ཆུབ་སེམས་དཔའི་སྔགས་ཡོན་ཏན་མཐའ་ཡས་པར་གྲགས་པ་ཇི་སྐད་དུ་གསུངས་པའི་ཆོག་དང༌། ལྡན་པར་བཟླས་ཤིང་གོམས་པར་བྱས་ན་བླ་ན་མེད་པའི་གནས་ཐོབ་པ་ལྟ་སྨོས་ཀྱང་ཅི་དགོས་ཞེས་པའོ། །གང་དག་སྤྱད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅད། །ཅེས་པ་ནི་སྔགས་སྤྱོད་པའི་ཚུལ་ཉན་ཞིང་སེམས་དཔའི་སྒོ་ནས་དད་པ་མཐུ་ཆེ་བར་བསྟན་པ་སྟེ། སྔགས་སྤྱོད་པའི་ཚུལ་མཆོག་འདི་ལ་ཉན་པ་དང་བསམས་པ་འདི་ཉིད་ཡིན་གྱི་གཞན་མ་ཡིན་ནོ་སྙམ་ནས་བློ་གཞན་དུ་མི་གཡོ་བར་མོས་ན་སྡུག་བསྔལ་ཅན་གྱི་ངན་སོང་དུ་སྐྱེ་བར་མི་འགྱུར་རོ་ཞེས་པའོ། །སྔགས་སྤྱད་པ་དང་སྔགས་སྤྱོད་པའི་ཚུལ་ཞེས་པ་དང་མཆོག་ཅེས་པ་ལ་སོགས་པའི་ཚིག་རྣམས་ནི་སྔར་ལན་མི་ཉུང་བར་བཤད་ཟིན་པས་ན་འདིར་མ་བཤད་དོ། །ཚིགས་སུ་བཅད་པ་འདི་རྣམས་ཀྱང་ཕྱག་ན་རྡོ་རྗེ་ཉིད་ཀྱིས་དོན་འདི་ལྟ་བུར་ཐུགས་སུ་ཆུད་པས་སེམས་དང་བའི་ཤུགས་ཀྱིས་སྨྲས་ལ། ཞར་ལ་མ་འོངས་པའི་སེམས་ཅན་རྣམས་སྤྲོ་བ་བསྐྱེད་པའི་ཕྱིར་སྨྲས་སོ། །དེའི་ཚེ་ཐམས་ཅད་དང་ལྡན་པའི་འཁོར་དེ་དག་དང་རྡོ་རྗེ་འཛིན་དེ་དག་གིས་མགྲིན་གཅིག་ཏུ་མཐུན་པར་ཚིག་སྨྲས་པ་ཞེས་པ་ནས། སྔགས་སྤྱད་འབྲས་བུ་ལ་གནས་པ། །བདག་ཅག་ཐམས་ཅད་དཔང་དུ་འགྱུར། །ཞེས་པའི་བར་གྱིས་ཕྱག་ན་རྡོ་རྗེས་བཅོམ་ལྡན་འདས་ལ་ཚིགས་སུ་བཅད་པ་འདི་སྐད་གསོལ་པ་དང་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པའི་འཁོར་དེ་རྣམས་དང་རྡོ་རྗེ་འཛིན་པ་དེ་རྣམས་ཀྱིས་ཕྱག་ནི་རྡོ་རྗེའི་དགོངས་པ་འདི་ལྟར་རིག་སྟེ། དཀྱིལ་འཁོར་བཤད་པའི་སྐབས་སུ་བབ་པ་ལ་དཀྱིལ་འཁོར་གྱི་ཐིག་བྲེ་པ་དང་ལྷ་རྣམས་སོ་སོར་དགོད་པ་ལ་སོགས་པ་ནི་བཤད་ཟིན་ན་ཚོན་བྱིན་གྱིས་རློབ་པའི་ཏིང་ངེ་འཛིན་དང་ཚོན་སོ་སོ་ལ་སངས་རྒྱས་ཀྱི་སྐུ་བསམ་ཞིང་བྱིན་གྱིས་རློབ་བ་དང༌། ཚོན་གང་ཡིན་པ་དང༌། ཚོན་འགྱེས་པའི་ཐབས་དང༌། ཚོན་གང་སྔོན་དུ་གཏང་བ་དང༌། རྟ་བབས་དང་སྒོ་ཁྱུད་ཀྱི་ཚད་ལ་སོགས་
པ་མ་བཤད་པས་དེ་དག་བྲི་བའི་ཕྱིར་ཕྱག་ན་རྡོ་རྗེས་ཚིགས་སུ་བཅད་པ་འདི་དག་སྨྲའོ་སྙམ་དུ་རིག་ནས་ཚིག་འདི་སྐད་སྨྲས་པའོ། །དེའི་ཚེ་ཐམས་ཅད་དང་ལྡན་པའི་འཁོར་དེ་དག་དང་རྡོ་རྗེ་འཛིན་དེ་དག་གིས་མགྲིན་གཅིག་ཏུ་མཐུན་པར་ཚིག་སྨས་པ་ཞེས་པ་ནི་ཕ་རོལ་ཏུ་ཕྱི་ན་པ་ལ་སྤྱོད་པ་ལས་བྱུང་བའི་བྱང་ཆུབ་སེམས་དཔའ་ཀུན་དུ་བཟང་པོ་དང་འཇམ་དཔལ་ལ་སོགས་པ་དང་སྔགས་ཀྱི་སྤྱོད་པ་ལས་བྱུང་པའི་བྱང་ཆུབ་སེམས་དཔའ་རྡོ་རྗེ་འཛིན་པ་དེ་དག་དགོངས་པ་མཐུན་པས་ཚིག་དང་དོན་མཐུན་པར་སྨྲས་པའོ། །ལེགས་སོ་ལེགས་ཞེས་པ་ནི་ཕྱག་ན་རྡོ་རྗེ་དོན་དེ་ལྟ་བུར་སེམས་ཤིང་བཅོམ་ལྡན་འདས་ལ་འདྲི་བས་ཕྱག་ན་རྡོ་རྗེ་དེ་ཉིད་ལེགས་སོ་ཞེས་པའོ། །ལེགས་ཞེས་པ་གཉིས་པ་ནི་དྲི་བར་བྱ་བའི་དོན་བཟང་བས་ལེགས་ཞེས་པའོ། །གསང་སྔགས་སྤྱོད་པའི་དབང་གྱུར་པ། །དཔའ་བོ་ཆེན་པོ་དང་སྔགས་ཀྱི་སྤྱོད་པ་ལས་བྱུང་པའི་བྱང་ཆུབ་སེམས་དཔའ་པའོ། །ཁྱོད་ཀྱིས་ཡིད་ལ་གང་བསམས་པ། །མཉམ་མེད་ཐམས་ཅད་མཁྱེན་ལ་ཞུས། །ཞེས་པ་ནི་བྲི་བར་བྱ་བའི་དངོས་པོ་སྟེ་ལེགས་སོ་ལེགས་ཞེས་པ་དང་སྦྱར་རོ། །ཚིག་ཏུ་མ་སྨྲས་ན་ཕྱག་ན་རྡོ་རྗེའི་ཡིད་ལ་བསམས་བ་དེ་བྱང་ཆུབ་སེམས་དཔའ་དེ་དག་གིས་ཇི་ལྟར་རིག་ཅེ་ན། །ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་རྣམས་ནི་མཐུ་ཆེན་པོ་ཤ་སྟག་པས་ཕ་རོལ་གྱི་སེམས་རིག་པ་དང་འདྲ་བར་ཕྱག་ན་རྡོ་རྗེས་ཅི་བསམས་པ་རྣམས་ཤེས་སོ། །གཉིས་སུ་ན་དེ་ལྟ་བུར་དྲི་བའི་སྐབས་ཡིན་པས་ཕྱག་ན་རྡོ་རྗེས་ཚིགས་སུ་བཅད་པ་ལ་གཞན་གླེངས་ཀྱང་བྲི་བྲ་བྱ་བའི་དངོས་པོ་འདི་དག་ཡིན་པར་ཤེས་སོ། །དེ་ལྟར་ཕྱག་ན་རྡོ་རྗེའི་དགོངས་པ་ཤེས་པས་ན་བདག་ཅག་ཐམས་ཅད་དེ་དཔང་དུ་གྱུར་པ་ཞེས་པ་སྟེ། དཔང་དུ་གྱུར་བའི་དོན་ནི་ཁྱོད་ཀྱིས་ཅི་བསམས་པ་དེ་ངེད་ཀྱིས་ཤེས་ཏེ་ངེད་ཀྱང་དེ་བཞིན་དུ་སེམས་སོ་ཞེས་པའོ། །སྔགས་སྤྱད་འབྲས་བུ་ལ་གནས་པ། །ཞེས་པ་ནི་བྱང་ཆུབ་སེམས་དཔའ་དེ་དག་ཉིན་བཙན་པར་བསྟན་པ་སྟེ་དེད་ཀྱང་ངན་དོན་མ་ཡིན་གྱི་སྔགས་སྤྱད་པའི་འབྲས་བུ་ཐོབ་པ་དག་གོ་ཞེས་པའོ། །སྔགས་རྒྱུད་རྟོགས་པར་ཤེས་པ་ཡི། །བྱང་ཆུབ་སེམས་དཔའ་གཞན་རྣམས་དང༌། །ཞེས་པ་ནི་བྱང་ཆུབ་སེམས་དཔའ་དེ་རྣམས་འབའ་ཞིག་མ་ཡིན་གྱི། ཕ་རོལ་ཏུ་ཕྱིན་
པ་ལས་བྱུང་བའི་བྱང་ཆུབ་སེམས་དཔའ་གཞན་རྣམས་ཀྱིས་ཀྱང་ངེ་བཞིན་དུ་མཁྱེན་ཏོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །ཞེས་པ་ནས། གསང་སྔགས་མཚན་ཉིད་ཅི་འདྲ་ལགས། །ཏིང་ངེ་འཛིན་དུ་བཞེད་པ་གང༌། །ཞེས་པའི་པར་གྱིས་ནི་གོང་དུ་ཞུ་བར་བསམས་པའི་དངོས་པོ་རྣམས་ཞུས་པ་སྟེ་ཚོན་བྱིན་གྱིས་བརླབ་པ་ལ་སོགས་པ་འདིར་ཞུས་ཀྱང་བཤད་པའི་ནང་དུ་མ་བྱུང་བ་རྣམས་ནི་གསང་བའི་དཀྱིལ་འཁོར་གྱི་སྐབས་སུ་བལྟ་བར་བྱའོ། །དེ་སྐད་གསོལ་ནས་བཅོམ་ལྡན་འདས། །ཆོས་ཀུན་དབང་ཕྱུག་ཐུབ་པ་ཡིས།། རྡོ་རྗེ་འཛིན་ལ་འདི་སྐད་གསུངས། །ཞེས་པ་ནས། དེ་བས་རྣམ་པ་ཐམས་ཅད་དུ། །སྟོང་ཉིད་རྟག་ཏུ་དྲན་པར་བྱའོ། །ཞེས་པའི་བར་ནི་ཕྱག་ན་རྡོ་རྗེས་ཞུས་པ་རྣམས་ཀྱིས་ན་བཅོམ་ལྡན་འདས་ཀྱིས་བཀའ་སྩལ་པ་སྟེ། སེམས་ཅན་ཁམས་ནི་ཞེན་བྱེད་ཅིང༌། །འདི་ནི་ཆོས་དབྱིངས་རོ་ཡིན་པར། །སངས་རྒྱས་རྣམས་ཀྱིས་སྔོན་གསུངས་ཏེ། །དེ་ཕྱིར་འདི་ནི་ཚོན་ཞེས་བྱ། །ཞེས་པ་ནི། ཅི་སླད་འདིར་ནི་ཚོན་ཞེས་བགྱི། །ཞེས་ཞུས་པའི་ལན་ཏེ། སེམས་ཅན་ཁམས་ནི་ཞེན་བྱེད་ཅིང༌། །ཞེས་པ་ནི་ཚོན་ཞེས་བྱ་བའི་ཚིག་གི་དོན་ཏེ་ཚོན་ནི་ཞེན་པར་བྱེད་པའི་རང་བཞིན་ཡིན་ལ། དེ་བཞིན་དུ་འདིར་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཁ་དོག་དང་ཆ་ལུགས་དང་དཀྱིལ་འཁོར་གྱི་རི་མོར་སྣང་བས་སེམས་ཅན་རྣམས་དད་པ་སྐྱེས་ཏེ། མགུ་ཞིང་ཞེན་པར་བྱེད་པས་ན་ཚོན་ཞས་བྱའོ། །འདི་ནི་ཆོས་དབྱིངས་རོ་ཡིན་པར། །ཞེས་པ་ནི་ཚོན་འདི་རྣམས་ལ་ཆོས་ཀྱི་དབྱིངས་དང་ལྡན་པའི་སངས་རྒྱས་ཀྱི་སྐུའི་རང་བཞིན་ཡི་གེ་རྣམས་ཀྱི་བྱིན་གྱིས་བརླབས་པས་ཚོན་འདིས་ཆོས་ཀྱི་དབྱིངས་མཚོན་པར་འགྱུར་ཏེ་རོ་གཅིག་པས་ན་ཆོས་ཀྱི་དབྱིངས་ཀྱི་རོ་ཞེས་བྱའོ། །དེ་ལྟར་ཡི་གེ་རྣམས་ཀྱི་བྱིན་གྱིས་བརླབ་པ་ཡང་ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་སྐབས་སུ་བལྟ་བར་བྱའོ། །ཚོན་ནི་ནང་ནས་དགྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །ཞེས་པ་ནི། ཚོན་ནི་ཇི་ལྟར་དགྱེ་བར་བགྱི། །ཞེས་ཞུས་པའི་ལན་ཏེ་སྔགས་པ་དཀྱིལ་འཁོར་གྱི་ནང་དུ་ཞུགས་ནས་ནང་དུ་བསྣུར་ཞིང་ཚོན་རྣམས་དགྱེའོ་ཞེས་པའོ། །དཀར་པོ་ཐོག་མར་
གཏང་བར་བྱ། །དེ་ཡི་འོག་ཏུ་དམར་པོ་སྟེ། །དེ་ནས་སེར་པོ་གཏང་བར་བྱ། །དེ་ཡི་འོག་ཏུ་ལྗང་གུ་གཏང༌། །ཀུན་གྱི་ནང་རོལ་ནག་པོ་སྟེ། །ཚོན་གྱི་ཆོ་ག་དེ་ལྟར་བཤད། །ཅེས་པ་ནི། གང་ཞིག་ཐོག་མར་གཏང་བར་བགྱི། །ཞེས་བྱ་བ་དང༌། ཚོན་ཞེས་བགྱི་བ་དེ་གང་ལགས། །ཞེས་དང་པོར་ཞུས་པའི་ལན་གཉིས་ཀ་ཅིག་ཅར་དུ་བཀའ་སྩལ་པ་སྟེ། ཚོན་རྣམས་དེ་ལྟར་དགྱེ་པའི་དགོངས་པ་ཡང་འདི་ལྟ་སྟེ་ཆོན་དཀར་པོ་ནི་ཆོས་ཀྱི་དབྱིངས་ཀྱི་རང་བཞིན་ནོ། །དེ་ལྟར་ཆོས་ཀྱི་དབྱིངས་སུ་གྱུར་པའི་འོག་ཏུ་ཐབས་ཀྱི་སྒོ་སེམས་ཅན་གྱི་དོན་བྱེད་པའི་སྙིང་རྗེས་སེམས་ཅན་ལ་ཞེན་པའི་རང་བཞིན་དམར་པོ་གཏང་ངོ༌། །དེའི་འོག་ཏུ་སེམས་ཅན་གྱི་དོན་དེ་ཉིད་རྒྱས་པར་འགྱུར་ཏེ་རྒྱས་པའི་མཚན་ཉིད་སེར་པོ་གཏང་ངོ༌། །དེ་ལྟར་རྒྱས་པའི་འོག་ཏུ་ཐམས་ཅད་བྱེད་ནུས་པར་འགྱུར་ཏེ། དེ་བས་ན་དེའི་འོག་ཏུ་ཚོན་ལྗང་གུ་ཁ་དོག་ཐམས་ཅད་པ་གཏང་ངོ༌། །དེ་ལྟར་ལས་ཐམས་ཅད་ནུས་ན་གདུག་པ་དང་མ་རུངས་པ་རྣམས་འདུལ་བ་མངོན་སྤྱོད་ཀྱི་མཚན་ཉིད་ཁ་དོག་ནག་པོ་བཏང་སྟེ་ཐམས་ཅད་ཀྱི་ནང་རོལ་དུ་བཏང་བ་ནི་གསང་བའི་ཕྱིར་རོ། །གཞན་ཡང་དེ་བཞིན་གཤེགས་པའི་སྐུར་བྱིན་གྱིས་བརླབ་པ་ལ་སོགས་པའི་རིམ་པ་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་བལྟ་བར་བྱའོ། །རྟ་བབས་རྣམས་ཀྱི་ཚད་ཀྱང་ནི། །ཞེས་པ་ནས། འཇིགས་མེད་དག་གིས་རིམ་གྱིས་ནི། །བསྐྱེད་དེ་དེ་ལས་ལྷག་ཤེས་བྱ། །ཞེས་པའི་བར་ནི། རྟ་བབས་རྣམས་དང་དེ་བཞིན་དུ། །སྒོ་ཁྱུད་རྣམས་ཀྱི་ཚད་དང་ནི། །སྒོ་ཡི་ཚད་ཀྱང་ཅི་འདྲར་བགྱི། །མགོན་པོ་ཡིས་ནི་བཤད་དུ་གསོལ། །ཞེས་ཞུས་པའི་ལན་ཏེ། །རྟ་བབས་རྣམས་ཀྱི་ཚད་ཀྱང་ནི། །དཀྱིལ་འཁོར་དབུ་མ་དང་མཉམ་མོ། །ཞེས་པ་ནི་རྟ་བབས་ཀྱི་ཞིང་གི་ཚང་ནི་སྙིང་པོའི་དཀྱིལ་འཁོར་གྱི་ངོས་དང་མཉམ་པར་བྱ་ཞེས་པའོ། །སྒོ་ཁྱུད་དག་ཀྱང་དེ་དང་མཉམ། །པདྨོ་སོར་བཅུ་དྲུག་ཏུ་བཤད། །ཅེས་པ་ནི་སྒོ་ཁྱུད་ཀྱང་རྟ་བབས་ཀྱི་ཚད་དེ་དང་མཉམ་པར་བྱའོ། །དང་པོའི་སྒོ་ནི་སྙིང་པོ་ཡི། །དཀྱིལ་འཁོར་དང་ནི་མཉམ་ཞེས་བྱ། །འཇིགས་མེད་ངག་གིས་རིམ་གྱིས་ནི། །བསྐྱེད་དེ་དེ་ལས་ལྷག་ཤེས་བྱ། །ཞེས་པ་ནི་ནང་གི་དཀྱིལ་འཁོར་གྱི་སྒོ་ནི་སྙིང་པོའི་པདྨ་སོར་བཅུ་དྲུག་པ་དང་མཉམ་པར་
བྱ་ལ། དེའི་ཕྱི་མ་དེ་ལས་སོར་བཞི་བསྐྱེད་དེ། དེའི་ཡང་ཕྱི་མ་སོར་བཞིས་བསྐྱེད་དེ་དེ་ལྟར་རིམ་པ་རིམ་པས་ཆེ་བར་བྱ་ཞེས་པའོ། །སྒོ་རྣམས་ཀྱི་ནི་བར་བར་དུ། །སྒོ་སྲུང་རྣམས་ནི་གཞག་བར་བྱ། །ཞེས་པ་ནི་དཀྱིལ་འཁོར་གྱི་སྒོའི་ཕན་ཚུན་གྱི་འགྲམ་དུ་འོག་ནས་སྨོས་པའི་སྒོ་སྲུང་རྣམས་བཞག་སྟེ། ཤཱཀྱ་ཐུབ་པའི་སྒོ་སྲུང་ནི་སྔར་གསལ་བར་གསུངས་ཟིན་པས་འོག་ནས་འབྱུང་བ་ལ་མི་བསྙག་ལ། བཅོམ་ལྡན་འདས་རྣམ་པར་སྣང་མཛད་ཀྱི་སྒོ་སྲུང་ཡང་གདུལ་དཀའ་དང་མངོན་ཕྱོགས་ཞེས་པ་གཉིས་གསལ་བར་གསུངས་པས་འོག་ནས་འབྱུང་བ་རྣམས་ལས་འདིར་མིང་གིས་སྨོས་པ་མེད་པ་གཉིས་རེ་གཞག་པར་བྱའོ། །ཏིང་ངེ་འཛིན་ནི་མདོར་ན་སེམས། །ཡང་དག་མགུ་བ་ཡིན་པར་བཤད། །ཅེས་པ་ནི། ཏིང་ངེ་འཛིན་དུ་བཞེད་པ་གང༌། །ཞེས་ཞུས་པའི་ལན་ཏེ། དེ་ལ་ཏིང་དེ་འཛིན་ཞེས་བྱ་བ་ནི་སེམས་རྩེ་གཅིག་པའི་མཚན་ཉིད་དེ་དེ་ཡང་ཀུན་རྫོབ་དང་དོན་དམ་པ་ལ་རྩེ་གཅིག་པའོ།། ཀུན་རྫོབ་ལ་རྩེ་གཅིག་པ་ནི་ཆུ་དང་དབང་ཆེན་གྱི་དཀྱིལ་འཁོར་ལ་སོགས་པ་ལ་སེམས་རྩེ་གཅིག་པར་གནས་པའོ། །དོན་དམ་པ་ནི་གཟུང་བ་དང་འཛིན་པ་སྤངས་པ་སྟོང་པའི་རང་བཞིན་ལ་སེམས་རྩེ་གཅིག་པ་སྟེ་གཉིས་པོ་གང་ཡང་རུང་བ་ལ་སེམས་རྩེ་གཅིག་ཏུ་གྱུར་པས་སེམས་གུད་དུ་མི་འགྱུར་བར་ཞེན་ཅིང་ཚིམ་པར་བྱེད་པ་ནི་སེམས་མགུ་བ་ཞེས་བྱ་སྟེ་དེ་ནི་ཏིང་ངེ་འཛིན་སྤྱིའི་མཚན་ཉིད་དོ། །སེམས་དཔའ་ཆེན་པོ་ཁྱད་པ་རིན། །ཡིད་གཅིག་བསྡུས་ལ་མཉན་པར་གྱིས། །ཞེས་པ་ནས། དེ་བས་རྣམ་པར་ཐམས་ཅད་དུ། །སྟོང་ཉིད་རྟག་ཏུ་དྲན་པར་བྱའོ། །ཞེས་པའི་བར་གྱིས་ནི་དོན་དམ་པའི་ཏིང་ངེ་འཛིན་གྱི་ཁྱད་པར་བཤད་པ་ཡིན་ཏེ་དེ་སངས་རྒྱས་ཀྱི་ཏིང་ངེ་འཛིན་དང་ཀུན་དུ་སངས་རྒྱས་པའི་ཏིང་ངེ་འཛིན་ནོ། །དེ་ལ་སངས་རྒྱས་ཀྱི་ཏིང་ངེ་འཛིན་ནི། སངས་རྒྱས་ཀུན་གྱི་ཏིང་འཛིན་ནོ། །སྟོང་པ་ཉིད་ཅེས་རྒྱས་བས་གསུངས། །ཞེས་པ་སྟེ་དེ་ལ་སྟོང་པ་ཉིད་ཅེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་གདོད་མ་ནས་མ་སྐྱེས་མ་བྱུང་བའི་ཚུལ་གྱིས་བཤིག་གམ། རྡུལ་ཕྲ་མོ་ལ་སོགས་པའི་ཚུལ་གྱིས་བཤིག་ན་ཡོད་པ་མ་ཡིན་ལ། དེ་རྣམས་ཀྱི་རྣམ་པར་སྣང་བ་ཡང་ཡོད་པ་མ་ཡིན་ཏེ། དེ་ལྟར་གཟུང་བ་དང་འཛིན་པའི་མཚན་ཉིད་མེད་པར་རྟོགས་པ་ནི་སྟོང་
བ་ཉིད་དོ། །དེ་ལྟར་ཆོས་རྣམས་རང་རང་གི་མཚན་ཉིད་སྟོང་པ་ཉིད་ཀྱི་རྣག་བཞིན་དུ་རྟོགས་ཏེ་སྟོང་པའི་རང་བཞིན་དེ་ལས་སེམས་གཞན་དུ་མི་འགྱུར་ཞིང་དེ་ཉིད་ལ་རྩེ་གཅིག་པར་གྱུར་པ་ནི་ས་བཅུ་རྫོགས་པའི་བྱང་ཆུབ་སེམས་དཔའ་རྣམས་ཀྱིས་ཏིང་ངེ་འཛིན་དེ་ཐོབ་སྟེ་དའི་ཚེ་སངས་རྒྱས་ཞེས་བྱའོ། །དེ་ལྟར་གཟུང་བ་དང་འཛིན་པའི་ཆ་ཡོངས་སུ་སྤངས་པའི་སྟོང་པ་ཉིད་ནི་ས་རབ་ཏུ་དགའ་བའི་ཚེ་ན་ཡང་མ་ཐོབ་པ་ནི་མ་ཡིན་མོད་ཀྱི། ས་རབ་ཏུ་དགའ་བ་ནས་ས་བརྒྱད་པའི་བར་དུ་ལོག་པའི་གཉེན་པོ་ཡོངས་སུམ་སྤངས་པས་ལྷུན་གྱིས་གྲུབ་པ་ཉིད་དུ་མི་འཇུག་པའི་ཕྱིར་དེ་དག་ལ་མི་བྱ་ལ། ས་བརྒྱད་པ་ཡན་ཆད་ལོག་པའི་གཉེན་པོ་རྣམས་སྤངས་ཏེ་ལྷུན་གྱིས་གྲུབ་པར་འཇུག་པས་ན་ས་བརྒྱད་པ་དང༌། ས་དགུ་པ་དང༌། ས་བཅུ་པ་རྣམས་དང་འབྲེལ་ལོ། །ས་བཅུ་ཡོངས་སུ་རྫོགས་པའི་ཚེ་ཏིང་ང་འཛིན་འདི་རབ་ཏུ་ཐོབ་པར་འགྱུར་ཏེ། ཏིང་ངེ་འཛིན་དེ་རབ་ཏུ་ཐོབ་པ་ཡང་གཞན་གྱིས་ཐོབ་པ་མ་ཡིན་གྱི་རང་གི་སེམས་ཡོངས་སུ་ཤེས་པ་ལས་ཐོབ་པ་ཡིན་ནོ། །དེ་བས་ན། དེའི་སེམས་ཡོངས་སུ་ཤེས་པ་ལས། །ཐོབ་པར་འགྱུར་གྱི་གཞན་ལས་མིན། །ཞེས་གསུངས་པ་ཡིན་ནོ། །དེ་ལ་སེམས་ཡོངས་སུ་ཤེས་པ་ཡང་གསང་བ་པའི་བདག་པོ་སེམས་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མ་གཟིགས་གཟིགས་པར་མི་འགྱུར་ཏེ་སྔོན་པོར་མ་ཡིན། སེར་པོར་མ་ཡིན་ཞེས་པ་ནས་རྣམ་པ་ཐམས་ཅད་ཀྱི་བར་དུ་ཡོངས་སུ་བཙལ་ཀྱང་མི་དམིགས་པ་ཡིན་ཏེ་ཞེས་པའི་བར་སྔར་བྱང་ཆུབ་ཀྱི་སེམས་བཤད་པའི་སྐབས་སུ་བཤད་ཟིན་ཏོ། །དེ་གཉིས་ཡོངས་སུ་སྤངས་པ་ནི། །རྫོགས་སངས་རྒྱས་ཀྱི་ཡིན་པར་འདོད། །སྟོང་པ་ཆེན་པོ་ཞེས་བྱ་སྟེ། །ཀུན་མཁྱེན་ཡེ་ཤེས་རྫོགས་བྱེད་པའོ། །ཞེས་པ་ནི་ཀུན་དུ་སངས་རྒྱས་པའི་ཏིང་ངེ་འཛིན་ཏེ། དེ་གཉིས་ཡོངས་སུ་སྤངས་པ་ཞེས་པ་ནི་གཟུང་བ་དང་འཇིག་པ་སྔགས་པ་དང་སྟོང་པའི་རང་བཞིན་དུ་འདུ་ཞེས་པ་གཉིས་པོ་སྤངས་པ་སྟེ་ས་བཅུ་གཅིག་པ་ཀུན་དུ་བཟང་པོའི་ས་ལ་གནས་པའི་ཚེ་ཆོས་ཐམས་ཅད་སྟོང་པའི་རང་བཞིན་ནོ་སྙམ་ནས་སྟོང་པར་འདུ་ཤེས་པ་དེ་ཡང་སྤངས་ཏེ་སྟོང་པའི་རང་བཞིན་དུ་ཡང་ཡོད་པ་མ་ཡིན་ནོ་སྙམ་པའི་འདུ་ཤེས་ཅམ་ལ་གནས་སོ། །དེ་བས་ན་སྟོང་པར་འདུ་ཤེས་པ་ཡང་སྤངས་
པས་སྟོང་པ་ཆེན་པོ་ཞེས་བྱའོ། །ཀུན་མཁྱེན་ཡེ་ཤེས་རྫོགས་བྱེད་པའོ། །ཞེས་པ་ནི་ཀུན་དུ་སངས་རྒྱས་པའི་དེ་མ་ཐག་ཏུ་འདུ་ཤེས་ཙམ་ཡང་སྤངས་པའི་མཚན་ཉིད་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་ཏེ། ཀུན་དུ་སངས་རྒྱས་པ་དེ་ཐམས་ཅད་མཁྱེན་པའི་ཡེ་ཤེས་ལ་སྦྱོར་པར་བྱེད་པས་ན། །ཀུན་མཁྱེན་ཡེ་ཤེས་རྫོགས་བྱེད་པའོ། །ཞེས་སོ། །དེ་བས་རྣམ་པ་ཐམས་ཅད་དུ། །སྟོང་ཉིད་རྟག་ཏུ་དྲན་པར་བྱའོ། །ཞེས་པ་ནི་དེ་ལྟར་སྟོང་པ་ཉིད་ཀྱི་ཏིང་ངེ་འཛིན་དེས་ཐམས་ཅད་མཁྱེན་པ་རྫོགས་པར་བྱེད་པས་ན་ཡན་ལག་བཞིའི་བཟླས་བརྗོད་དང་བདག་གི་ལྷར་སྦྱོར་བ་དང༌། དབང་ཆེན་དང་ཆུའི་དཀྱིལ་འཁོར་གྱི་ཏིང་ངེ་འཛིན་ལ་སོགས་པ་ཐམས་ཅད་ལ་འདི་ལྟ་བུའི་སྟོང་པ་ཉིད་རྟག་ཏུ་གོམས་པར་བྱའོ་ཞེས་པའོ། །ད་ནི་བྱང་ཆུབ་སེམས་དཔའ་དང་ཉན་ཐོས་དང་རང་སང་རྒྱས་རྣམས་ཀྱི་སོ་སོའི་ཏིང་ངེ་འཛིན་རྣམས་བསྟན་པའི་ཕྱིར། བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་པ་དང༌། ཏིང་ངེ་འཛིན་དེ་ལས་བཞེངས་ནས་བྱང་ཆུབ་སེམས་དཔའི་ལ་སོགས་པའི་ཏིང་ངེ་འཛིན་ན་དེ་རྣམས་བསྟན་པའི་སྐབས་བཤད་དེ། དེ་ནས་བཅོམ་ལྔ་འདས་རྣམ་པར་སྣང་མཛད་སངས་རྒྱ་ཐམས་ཅད་ཐབས་ཅིག་ཡང་དག་པར་མོལ་ནས་ཤེས་པ་ནས། སེམས་ཅན་རྣམས་ལ་སྙིང་བརྩེའི་ཕྱིར། །ངས་ནི་ཐམས་ཅད་རབ་ཏུ་བཤད། །ཅེས་པའི་བར་གྱིས་བྱང་ཆུབ་སེམས་དཔའི་ཏིང་ངེ་འཛིན་ཀུན་དུ་སངས་རྒྱས་པའི་མཚན་ཉིད་དཔའ་བོ་ཆེན་པོའི་ཏིང་ངེ་འཛིན་ལ་གནས་ནས་བདུད་བཞི་བཅོམ་པའི་རང་བཞིན་འཆད་དེ། སངས་རྒྱས་ཐམས་ཅད་དང་ཐབས་ཅིག་ཡང་དག་པར་མོལ་ནས་ཤེས་པ་ནི་སངས་རྒྱས་ཐམས་ཅད་དགོངས་པ་མཐུན་པས་བྱ་བ་གཅིག་ཏུ་བསྟན་པ་སྟེ་བསོད་ནམས་དང་ཡེ་ཤེས་ཀྱི་ཚོགས་དང་ཆོས་ཀྱི་སྐུ་དང་སེམས་ཅན་གྱི་དོན་བྱེད་པར་མཉམ་པ་ཉིད་ཀྱི་ཕྱིར་རོ། །སངས་རྒྱས་ཐམས་ཅད་དང་རྒྱུད་གཅིག་པའི་སྟོབས་ཀྱི་ཤུགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི། ཏིང་ངེ་འཛིན་དེའི་མིང་སྟེ་སངས་རྒྱས་ཐམས་ཅད་དང་རྒྱུད་གཅིག་པ་ཞེས་པ་ནི་སེམས་ཅན་གྱི་དོན་དུ་སྤྱོད་པ་སྣ་ཚོགས་འབྱུང་ཡང་སངས་རྒྱས་ཐམས་ཅད་རྒྱུད་གཅིག་པ་ལས་
འབྱུང་ཞིང་ཆོས་ཀྱི་སྐུར་རོ་གཅིག་པ་ལས་འབྱུང་བ་ཡིན་ཏེ། དཔེ་ན་མར་མེ་མང་པོ་འོད་འདྲེས་པར་གྱུར་ན་གཅིག་སྟེ་དབྱེར་མེད་པ་དང་འདྲའོ། །སྟོབས་ཞེས་པ་ནི་ཐོགས་པ་མེད་པའི་མཐུའོ། ཤུགས་ཞེས་པ་ནི་མཐུ་སྟེ་སེམས་ཅན་གྱི་དོན་ལ་མྱུར་བའོ། །བྱང་ཆུབ་སྙིང་པོར་འདུག་ནས་སུ། །བདུད་ནི་རྣམ་པ་བཞི་བཅོམ་པས། ཞེས་པ་ནས། སེམས་ཅན་རྣམས་ལ་སྙིང་བརྩེའི་ཕྱིར། །ངས་ནི་ཐམས་ཅད་རབ་ཏུ་བཤད། །ཅེས་པའི་བར་གྱིས་ཀུན་དུ་སངས་རྒྱས་པའི་ཏིང་ངེ་འཛིན་གོང་དུ་བཤད་དེ། ཉིད་དཔའ་བོ་ཆེན་པོའི་ཏིང་ངེ་འཛིན་ལ་གནས་ནས་སྟོང་པ་ཡིད་ཀྱི་ཏིང་ངེ་འཛིན་དེས་བདུད་བཞི་བཅོམ་པར་བསྟན་པ་སྟེ་དེ་ལ། བདུད་ནི་རྣམ་པ་བཞི་བཅོམ་པས། །ཞེས་པ་ནི་ཕུང་པོའི་བདུད་དང༌། །ཉོན་མོངས་པའི་བདུད་དང༌། འཆི་བདག་གི་བདུད་དང༌། ལྷའི་བུའི་བདུད་རྣམས་བཅོམ་པ་སྟེ་དེ་ཡང་ཀུན་རྫོབ་དང་དོན་དམ་པ་གཉིས་སུ་རིང་པར་བྱའོ། །དེ་ལ་ཀུན་རྫོབ་ཏུ་བདུད་བཞི་བཅོམ་པ་ནི་བྱང་ཆུབ་ཆེན་པོར་ལྷའི་བུའི་བདུད་དང་ཉོན་མོངས་པའི་བདུད་གཉིས་ཀ་བཅོམ་ལ། ཕུག་པོའི་བདུད་དང་འཆི་བདག་གི་བདུད་གཉིས་ནི་དེའི་ཞར་ལ་བཅོམ་པ་སྟེ་ཐེག་པ་ཆུང་དུའི་ལུགས་ལས་གྲགས་པའོ། །སྐབས་འདིར་ཆོས་ཐམས་ཅད་མ་བྱུང་མ་སྐྱེས་པར་རྟོགས་ནས་བདུད་རྣམ་པ་བཞི་ཆར་ཡང་དམིགས་སུ་མེད་པའི་ཚུལ་གྱིས་བཅོམ་སྟེ། སྐྱེ་བ་མེད་པར་གནས་རྟོགས་པ། །ཞེས་པ་ལ་སོགས་པའི་ཚིགས་སུ་བཅད་པ་དང་སྦྱར་རོ། །དེ་ནད་དཔའ་བོ་ཆེན་པོ་ཞེས། །ཞེས་པ་ནས། དཔའ་པོ་ཞེས་སུ་གྲགས། །ཞེས་པའི་བར་གྱིས་དེ་ལྟར་བདུད་རྣམ་པ་བཞི་བཅོམ་ནས་ཚངས་པ་ལ་སོགས་པའི་འཇིག་རྟེན་པའི་ལྷ་རྣམས་བཅོམ་ལྡན་འདས་ལ་ཁྱོད་ནི་དཔའ་པོ་ཆེན་པོ་འཇིགས་པ་དང་བྲལ་བའོ་ཞེས་དགའ་བཞིན་དུ་ཚིག་ཏུ་འདོན་པས་ནང་ནི་དཔའ་པོ་ཆེན་པོ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་པའོ། །སྐྱེ་བ་མེད་པར་གནས་རྟོགས་པ། །ཞེས་པ་ནི་དེ་ལྟར་བདུད་རྣམ་པ་བཞི་བཅོམ་པ་དེ་དམིགས་པ་དང་བཅས་པས་བཅོམ་པ་མ་ཡིན་གྱི་ཆོས་ཐམས་ཅད་མ་སྐྱེས་མ་བྱུང་བ་རྔས་ཐུགས་སུ་ཆུད་ནས་དམིགས་སུ་མེད་པའི་ཚུལ་གྱིས་བཅོམ་མོ་ཞེས་འབྲེལ་ཏོ། །སྐྱེ་བ་མེད་པར་ངས་རྟོགས་པ། །ཞེས་པ་ནི་དངོས་སུན་ཆོས་ཐམས་ཅད་གདོད་མ་ནས་མ་སྐྱེས་པར་རྟོགས་པས་ཕུང་པོ་ཡང་
དམིགས་སུ་མེད་པའི་ཕྱིར་ཕུང་པོའི་བདུད་བཅོམ་པའོ། །ཚིག་གི་སྦྱོར་ཡུལ་རྣམ་སྤངས་ཤིག །ཞེས་པ་ནི་རྨ་པར་རྟོག་བ་དང་བྲལ་ཞེས་པ་སྟེ་རྟོག་པའི་སྤྱོད་ཡུལ་ལས་འདས་པས་དངོས་སུ་ལྷའི་བུའི་བདུད་བཅོམ་པའོ། །ཉེས་པ་ཐམས་ཅད་མེད་པ་སྟེ། །ཞེས་པ་ནི་ཉོན་མོངས་པ་ལས་རྣམ་པར་གྲོལ་པས་ན་དངོས་སུ་ཉོན་མོ་སོགས་པའི་བདུད་བཅོམ་པའོ། །རྒྱུ་དང་རྐྱེན་དང་བྲལ་བ་ཡིན། །ཞེས་པ་ནི་རྒྱུ་དང་རྐྱན་མེད་པ་སྣམ་སྐྱེས་པ་སྟེ་མ་སྐྱེས་པ་སྣ་འཆི་བ་མེད་དེ་དངོས་སུ་འཆི་བདག་གི་བདུད་བཅོམ་པའོ། །སྟོང་པའི་ཡེ་ཤེས་མཁའ་འདྲ་བ། །ཞེས་པ་ནི་དེ་ལྟར་རྣམ་པ་བཞི་ཆར་ལས་གྲོལ་བས་ན་རྣམ་པ་མེད་པའི་ཡེ་ཤེས་རང་བཞིན་གྱིས་འོད་གསལ་བ་སྟོང་པའི་མཚན་ཉིད་ནམ་མཁའ་དང་འདྲ་བར་མ་སྐྱེས་པ་ཤེས་པའོ། །ཇི་ལྟར་བྱུང་བ་ང་ལ་བྱུང༌། །ཞེས་པ་ནི། ཇི་ལྟར་གྱུར་པ་ང་ལ་བྱུང༌། །ཞེས་བཏོན་ཏེ་སྟོང་པ་ཉིད་ཀྱི་ཡེ་ཤེས་དེ་ལྟར་བུར་ཕྱིན་ཅི་མ་ལོག་པ་ཉིད་དུ་ངས་ཐོབ་ཅེས་པའོ། །ཤིན་ཏུ་དྲི་མེད་ཅེས་པ་ནི་ཡེ་ཤེས་དེ་ཤེས་བྱ་དང་ཉོན་མོངས་པའི་སྒྲིབ་པ་ཡོངས་སུ་སྤངས་པ་ཤེས་པའོ། །དེ་ཁོ་ན་ཞེས་པ་ནི་ཕྱིན་ཅི་མ་ལོག་པར་ཡོངས་སུ་གྲུ་པའི་མཚན་ཉིད་ཡིན་པས་རིགས་པ་དང་ལུང་གིས་སུན་དབྱུང་པར་མི་ནུས་པས་ན་སྟོན་པ་ཉིད་ཀྱི་ཡེ་ཤེས་ལ་དེ་ཁོ་ན་ཞེས་བྱའོ། །ཀུན་མཁྱེན་ཙམ་གྱི་ཚུལ་དུ་གནས། །ཀུན་མཁྱེན་སངས་རྒྱས་མཚན་ཉིད་དོ། །ཞེས་པ་ནི་ཀུན་དུ་སང་རྒྱས་པ་ཞེས་བྱ་བ་དེ་སྟོང་པའི་རང་བཞིན་དུ་འདུ་ཤེས་པ་ཡང་སྤངས་ནས་སྟོང་པ་ཉིད་ཀྱི་རང་བཞིན་དུ་ཡང་ཡོད་པ་མ་ཡིན་པར་ཤེས་པ་དེ་ཙམ་ལ་གནས་ཞེས་པའོ། །ད་ཡི་དེ་ཉིད་དམ་པ་འདི། །འཇིག་རྟེན་སྣང་བར་བྱེད་པ་སྟེ། །བྱིན་གྱི་རླབས་ཀྱི་སྟོབས་ཀྱིས་ནི། །ཡིག་འབྲུ་རྣམས་སུ་བསྟན་ནས་སུ། །སེམས་ཅན་རྣམས་ལ་སྙིང་བརྩེའི་ཕྱིར། །ངས་ནི་ཐམས་ཅད་རབ་ཏུ་བཤད། །ཅེས་པ་ནི་དེ་ལྟར་ངས་ཐམས་ཅད་གདོད་མ་ནས་མ་སྐྱེས་མ་བྱུང་བར་རྟོགས་ཀྱང་སེམས་ཅན་རྣམས་ལ་སྙིང་བརྩེ་བའི་ཕྱིར་ཡང་དག་པ་ཉིད་ཆོས་དེ་ཚིག་ཏུ་བརྗོད་པའི་ཕྱིར་ཡི་གེའི་འབྲུ་རྣམས་སུ་བྱིན་གྱིས་བརླབས་ཏེ། ཡི་གེའི་འབྲུ་རྣམས་ཀྱང་དཔའ་པོ་ཆེན་པོའི་ཏིང་ངེ་འཛིན་གྱི་སྐབས་སུ་བལྟ་བར་བྱའོ། །འདི་རྣམས་ཀྱི་རིམ་པ་ཡང་བསྡུས་པའི་དོན་གྱི་ནང་དུ་བཤད་པས་ཤིན་ཏུ་མ་
བཤད་དོ། །དེ་ནས་དཔལ་ལྡན་རྡོ་རྗེ་འཛིན། །ངོ་མཚར་གྱུར་ནས་མིག་གདངས་ཏེ། །ཐམས་ཅད་མཁྱེན་ལ་མགོ་པོ་ཡིས། །ཕྱག་འཚལ་ནས་ནི་ཚིག་འདི་སྨྲས། །ཞེས་པ་ནི་གོང་དུ་སངས་རྒྱས་དང་ཀུན་དུ་སངས་རྒྱས་པའི་ཏིང་ངེ་འཛིན་སྟོང་པ་ཉིད་སྤྲོས་པ་མེད་པའི་ཆོས་སངས་རྒྱས་རྣམས་ཀྱིས་ཐུགས་སུ་ཆུད་ནས་ཡིག་འབྲུ་ལ་སོགས་པའི་སྒོ་ནས་སྤྲོས་པ་དང་བཅས་པའི་ཆོས་རྣམས་བསྟན་ཞིང་བཤད་པ་དེ་ངོ་མཚར་ཆེ་བར་གྱུར་པ་ཡིན་ནོ། །དེ་བས་ན། སངས་རྒྱས་ཀུན་གྱི་ཐབས་དང་ནི། །ཤེས་རབ་བསམ་ཡས་ངོ་མཚར་ཆེ། ཞེས་པ་ནས། འཇིག་རྟེན་གྱི་ནི་མཆོད་གནས་འགྱུར། །ཞེས་པའི་བ་རྡུ་གསུངས་པ་ཡིན་ཏེ། །དེ་ལ་སངས་རྒྱས་ཀུན་གྱི་ངོ་མཚར་ཆེ་ཞེས་སྤྱར་ཏེ་སངས་རྒྱས་དང་ཀུན་དུ་སངས་རྒྱས་དང་ཡང་དག་པར་རྫོགས་པའི་སངས་རྒྱས་ཀུན་ཀྱང་སྤྲོས་པ་མེད་པའི་ཆོས་ཐུགས་སུ་ཆུད་ནས་སྤྲོས་པ་དང་བཅས་པའི་ཆོས་འཆད་པ་ནི་ངོ་མཚར་ཆེའོ། །ཐབས་དང་ཤེས་རབ་བསམ་ཡས་ཞེས་པ་ལ་ཤེས་རབ་ནི་ཆོས་ཐམས་ཅད་སྟོང་པ་ཉིད་དུ་རྟོགས་པ་དང་ཐབས་ནི་སྟོང་པ་ཉིད་ཀྱི་ཆོས་དེ་ཡི་གེའི་འབྲུ་ལ་སོགས་པར་བསྟན་ནས་གྲུབ་པ་རབ་འབྲིང་ཐ་མ་ལ་སོགས་པ་དང་ཞི་བ་ལ་སོགས་པའི་ལས་རྣམས་བྱེ་དཔའི་སྒོ་ནས་སེམས་ཅན་རྣམས་འཛུད་པར་བྱེད་པ་དེ་ནི་ཐབས་དང་ཤེས་རབ་བསམ་གྱིས་མི་ཁྱབ་པའོ། །སྤྲོས་བ་ཀུན་དང་བལ་བ་ཡི། །ཆོས་རྟོགས་ནས་ནི་རབ་བྱུང་རྣམས། །ཞེས་པ་ནི་དེ་ལྟར་སངས་རྒྱས་རྣམས་ཀྱིས་སྤྲོས་པ་མེད་པའི་ཆོས་ཐུགས་སུ་ཆུད་ནས་སངས་རྒྱས་པས་ཏེ་རྟོགས་པའི་དོན་ཏོ། །དེ་ལྟར། སྤྲོས་པ་མེད་པའི་དོན་རྟོགས་ནས། །འཇིག་རྟེན་གྱི་ནི་རེ་བ་ཀུན། །ཡོངས་སུ་རྫོགས་པར་བྱེད་པ་སྟོན། །པ་ནི་ངོ་མཚར་ཆེའོ་ཞེས་སྤྱར་རོ། །རང་བྱུང་རྣམས་ཞེས་པ་ནི་ས་བརྒྱད་པ་ཡན་ཆད་ཀྱི་བྱད་ཆུབ་སེམས་དཔའ་རྣམས་ཏེ་གཞན་གྱིས་མི་དཀྲི་བའི་ཕྱིར་རང་བུང་ཞེས་བྱའོ། །སྔགས་ཀྱི་མཚན་ཉིད་དེ་ལྟ་བུ། །ཞེས་པ་ནི་སྤྲོས་པ་མེད་པའི་ཆོས་རྟོགས་ནས་སྤྲོས་པ་དང་བཅས་པའི་ཆོས་འཆད་པ་དེ་ལྟ་བུ་ནི་སྔགས་ཀྱི་མཚན་ཉིད་དེ། སྔགས་ཀྱི་མཚན་ཉིད་འདི་ཡང་ཀུན་རྫོབ་དང་དོན་དམ་པའི་བདེན་པ་གཉི་ག་ལ་ལེགས་པར་གནས་པས་ཏེ། དོན་དམ་པའི་བདེན་པ་ནི་སྟོང་པ་ཉིད་ཀྱི་རང་བཞིན་དང་ཀུན་རྫོབ་ཀྱི་བདེན་
པ་ནི་གྲུབ་པ་མཆོག་ལ་སོགས་པ་དང་ཞི་བ་ལ་སོག་པའི་ལས་རྣམས་བྱེད་པའོ། །སེམས་ཅན་ཀུན་གྱིས་ཤེས་ནས་ནི། །འཇིག་རྟེན་གྱི་ནི་མཆོད་གནས་འགྱུར། །ཞེས་པ་ནི་གྲུབ་པ་ལ་སོགས་པར་མ་གྱུར་ཀྱང་སྔགས་ཀྱི་ཚུལ་དེ་ལྟ་བུ་སེམས་ཅན་རྣམས་ཀྱིས་ཐོས་པ་དང་བསམ་པའི་སྒོ་ནས་ཤེས་པ་ཙམ་གྱིས་ཀྱང་འཇིག་རྟེན་པ་རྣམས་ཀྱི་མཆོད་པའི་གནས་སུ་འགྱུར་རོ་ཞེས་པའོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པར་ཞེས་པ་ནས། དགོས་པའི་ས་ལ་གནས་དེ་རྣམས། །སངས་རྒྱས་ས་ལ་གནས་པ་ཡིན། །ཞེས་པའི་བར་གྱིས་ནི་ས་བཅུ་ཡོངས་སུ་རྫོགས་པའི་བྱང་ཆུབ་སེམས་དཔའ་སང་རྒྱས་ཀྱི་ས་ལ་གནས་པ་དེ་རྣམས་མ་སྐྱེས་ཤིང་མ་བྱུང་བ་སྟོང་པ་ཉིད་ཀྱི་རང་བཞིན་དུ་རྟོགས་ནས་སེམས་ཅན་གྱི་དོན་དུ་ཐབས་ཀྱི་འཁོར་ལོས་འབྲས་བུ་ཡོད་པའི་ས་ལ་གནས་པའི་ཏིང་ངེ་འཛིན་བཤད་པ་སྟེ། སྐྱེ་བ་གཅིག་གིས་ཐོགས་པ་ཞེས་པ་ནི་ས་བཅུ་པའི་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ས་ལ་སྐྱེ་བ་གཅིག་གིས་ཐོགས་པ་སྟེ་ཆོས་ཀྱི་རྒྱལ་ཚབ་བོ། །གཉིས་སུ་ན་ས་བཅུ་པའི་བྱང་ཆུབ་སེམས་དཔའ་རྣམས་ས་བཅུ་པ་ཉིད་དུ་རིས་མཐུན་པར་གྱུར་པས་ནས་བཅུ་པ་རྣམས་རིགས་གཅིག་པ་ཞེས་པའོ། །དགོས་པ་དང་ནི་བྲལ་བ་རུ། །འཇིག་རྟེན་མཚན་ཉིད་ཤེས་ནས་ནི། །དགོས་པའི་ལ་གནས་དེ་རྣམས། །སངས་རྒྱས་ལ་གནས་པ་ཡིན། །ཞེས་པ་ནི་འཇིག་རྟེན་རྣམས་ནི་གང་གི་ཡང་འབྲས་བུ་མ་ཡིན་ལ། རྒྱུར་གང་ལས་ཀྱང་མ་བྱུང་བས་གདོད་མ་ནས་སྐྱེ་བ་མེད་པར་རྟོགས་ཀྱང་འབྲས་བུའི་ས་ལ་གནས་ཏེ་སེམས་ཅན་གྱི་དོན་དུ་སྒྱོར་ཞིང་སངས་རྒྱས་ཀྱི་ཞིང་རྣམ་པ་སྣ་ཚོགས་ཀྱིས་བརྒྱན་པ་ལ་སོགས་པ་མཛད་པས་ན་སངས་རྒྱས་ཀྱིས་ལ་གནས་པའི་བྱང་ཆུབ་སེམས་དཔའ་དེ་རྣམས་འབྲས་བུའི་ས་ལ་གནས་པ་སྟེ། དེ་ནི་བྱང་ཆུབ་སེམས་དཔའ་ས་བཅུ་པ་སངས་རྒྱས་ཀྱིས་ལ་གནས་པ་རྣམས་ཀྱི་ཏིང་ངེ་འཛིན་གྱི་ཚུལ་ལོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་ས་བརྒྱད་པའི་ཞེས་པ་ནས། འཇིག་རྟེན་སྒྱུ་མ་ལྟར་ཤེས་ནས། །འཇིག་རྟེན་
འཇིག་རྟེན་དབང་དུ་འདོད། །ཅེས་པའི་བར་གྱིས་ནི་ས་བརྒྱ་དཔའི་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་བཤད་པ་སྟེ་དེ་ལ། ཆོས་རྣམས་ཐམས་ཅད་མ་དམིགས་ཤིང༌། །ཞེས་པ་ནི་ཆོས་ཐམས་ཅད་རང་བཞིན་གྱིས་དངོས་མེད་ཅིང་དམིགས་སུ་མེད་པར་རྟོགས་བའོ། །ཆོས་རྣམས་དངོས་པོ་མེད་པ་སྟེ་སྔོན་དུ་ཡོད་པ་ལས་ཞིག་ཅིང་མེད་པར་གྱུར་ཏེ་དངོས་སྤོ་མེད་པའམ། འོན་ཏེ་གདོད་མ་ནས་མ་བྱུང་མ་སྐྱེས་པས་དངོས་པོ་མེད་པ་ཡིན་ཞེ་ན་དེའི་ཕྱིར། སྲིད་དང་སྐྱེ་བ་རྣམ་སྤངས་པའི། །ཞེས་བྱ་བ་གསུང་སྟེ་གདོད་མ་ནས་མ་སྐྱེས་པས་སླར་འབྱུང་བར་ཡག་མི་འགྱུར་ཏེ་གདོད་མ་ནས་མ་བྱུང་མ་སྐྱས་པས་དངོས་པོ་མེད་པར་ཤེས་པ་ཡིན་ནོ། །འཇིག་རྟེན་སྒྱུ་མ་ལྟར་ཤེས་ནས། །ཞེས་པ་ནི་ཆོས་རྣམས་དེ་ལྟར་དངོས་པོ་མེད་པར་རྟོགས་པས་འཇིག་རྟེན་གྱི་ཆོས་ས་ཀུན་རྫོབ་ཏུ་སྣང་བར་འགྱུར་པ་ཡང་དངོས་པོ་མེད་པ་ལས་སྣང་པ་སྟེ་ཇི་ལྟར་སྒྱུ་མ་དངོས་པོ་མེད་པ་ལས་སྣང་བ་ལྟར་ཤེས་སོ་ཞེས་པའོ། །འཇིག་རྟེན་འཇིག་རྟེན་དབང་དུ་འདོང༌། །ཅེས་པ་ནི་དེ་ལྟར་ཆོས་ཐམས་ཅད་སྒྱུ་མ་ལྟ་བུར་ཤེས་པས་བྱང་ཆུབ་སེམས་དཔའ་འདེ་འཇིག་རྟེན་པའི་ནང་ན་གཙོ་བོ་དམ་པར་འགྱུར་པ་ཞེས་པའོ། །གསང་བ་པའི་བདག་པོ་གཞན་ཡང་ཉན་ཐོས་ཞེས་པ་ནས་ཤིན་ཏུ་དངོས་པོ་མེད་པའི་ཡེ་ཤེས་མི་སྤྱོད་དེ་འདི་ནི་ཉན་ཐོས་རྣམས་ཀྱི་ཏིང་ངེ་འཛིན་གྱི་ཚུལ་ལ་ཞེས་པའི་བར་གྱིས་ནི་འཕགས་པ་ཉན་ཐོས་རྣམས་ཀྱི་ཏིང་ངེ་འཛིན་བཤད་པ་སྟེ། འཕགས་པ་ཉན་ཐོས་རྣམས་ནི་ཕུང་པོ་ལ་སོགས་པའི་ཆོས་རྣམས་རྒྱུ་དང་འབྲས་བུའི་ངོ་བོ་སྐྱེ་བ་དང་འཇིག་པར་ལྟ་སྟེ་དམིགས་པ་དང་བཅས་པ་རྣམས་སོ། །དེ་ལྟར་སྐྱེ་པ་དང་འཇིག་པ་ཡོད་པས་རྟག་པ་དང་ཆད་པའི་མཐའ་གཉིས་བཤིག་སྟེ། སྐྱེ་པ་ཡོང་པར་མཐོང་པས་ནི་ཆད་པའི་མཐའ་བཤིག་ལ་འཇིག་པ་ཡོད་པར་མཐོང་པས་རྟག་པའི་མཐའ་བཤིག་གོ །དེ་ལྟར་སྐྱེ་པ་དང་འཇིག་པ་ཡོད་པར་མཐོང་པས་ཆོས་རྣམས་ཤིན་ཏུ་དངོས་པོ་མེད་པར་མཐོང་པའི་ཡེ་ཤེས་མི་སྐྱེ་སྟེ་ཤིན་ཏུ་དངོས་པོ་མེད་ན་ཡེ་ཤེས་སྐྱེ་བའི་རྒྱུ་མི་དམིགས་པའི་ཕྱིར་རོ། །གསང་བ་པའི་བདག་པོ། རང་སངས་རྒྱས་ཞེས་པ་ནས་འདི་ནི་རང་སངས་རྒྱས་རྣམས་ཀྱི་ཏིང་ངེ་འཛིན་གྱི་ཚུལ་ལོ་ཞེས་པའི་བར་གྱིས་ནི་འཕགས་པ་རང་སངས་རྒྱས་རྣམས་ཀྱི་ཏིང་ངེ་འཛིན་གྱི་ཚུལ་བཤད་པ་སྟེ། རྒྱུ་དང་འབྲས་བུ་རྣམ་པར་བཤིག་
ནས་ཞེས་པ་ནི་རྒྱུ་དང་འབྲས་བུ་སུན་འབྱིན་པའི་ཚུལ་གྱིས་རྣམ་པར་བཤིག་ཅེས་པ་སྟེ་ཆོས་རྣམས་ཀྱི་རྒྱུ་དང་རྐྱེན་རྣམས་ཀྱི་ངོ་བོ་སྐད་ཅིག་མའི་ཆ་མི་རྟག་པ་གནས་པ་ནི་ཁབ་ཀྱི་རྟེན་ལ་ཡུངས་ཀར་གྱི་འབྲས་བུ་མི་ཆགས་པ་དང་འདྲ་སྟེ་བརྟག་མི་བཟོད་པས་རྒྱུ་དང་འབྲས་བུ་དངོས་པོ་མེད་པར་རྟོགས་སོ། །བརྗོད་དུ་མེད་པའི་ཆོས་ཀྱི་ཚུལ་ལ་གནས་པ་རྣམས་ནི་ཆོས་ཐམས་ཅད་བརྗོད་དུ་མེད་དོ་སྙམ་པའི་ཡེ་ཤེས་འཇུག་སྟེ་ཞེས་པ་ནི་དེ་ལྟར་ཆོས་རྣམས་ཡོད་པ་མ་ཡི་པས་ཚིག་གི་བརྗོད་དུ་མེད་པར་མཐོང་པའི་ཡེ་ཤེས་སྐྱེས་ནས་ཚིག་ཏུ་བརྗོད་པ་ཡག་འགོག་པར་བྱེད་དེ་དེ་བས་ན་ཆོད་ཐམས་ཅད་བརྗོད་དུ་མེད་དོ་སྙམ་པའི་ཡེ་ཤེས་འཇུག་སྟེ་དག་ཤིན་ཏུ་འགོག་པའི་ཏིང་ངེ་འཛིན་ལ་ཡང་དག་པར་རེག་པར་བྱེད་ཅེ་གསུང་པ་ཡིན་ནོ། །མདོར་ན་འཕགས་པ་རང་སངས་རྒྱས་རྣམས་རྒྱུ་དང་འབྲས་བུའི་དངོས་པོ་བཤིག་ནས་རང་བཞིན་མེད་པར་མཐོང་བས་ཆོས་ལ་བདག་མེད་པར་རྟོགས་ཀྱང་ངག་དགག་པ་ཙམ་ལ་གནས་པས་བྱང་ཆུབ་སེམས་དཔའ་ལྟར་རྣམ་པ་མེད་པའི་ཡེ་ཤེས་ཀྱི་སྣང་བ་ལ་མི་གནས་ལ། ཉན་ཐོས་ལྟར་གནག་ཟག་ལ་བདག་མེད་པར་རྟོགས་པ་ཙམ་ཡང་མ་ཡིན་ནོ། །གསང་བ་པའི་བདག་པོ་གཞན་ཡང་འཇིག་རྟེན་པ་རྣམས་རྒྱུ་ལས་འབྲས་བུ་དང་ལས་འབྱུང་བའམ། ལྡོག་པར་རྟོགས་ཤིང་གཞན་གྱི་དབང་གིས་སྟོང་པ་ཉིད་ཀྱི་ཏིང་ངེ་འཛིན་ཀུན་དུ་སྐྱེ་པར་འགྱུར་ཏེ་འདི་ནི་འཇིག་རྟེན་པ་རྣམས་ཀྱི་ཏིང་ངེ་འཛིན་གྱི་ཚུལ་ལོ་ཞེས་པ་ནི་འཇིག་རྟེན་པ་རྣམས་ཀྱི་ཏིང་ངེ་འཛིན་གྱི་ཚུལ་ཏེ་འཇིག་རྟེན་པ་རྣམས་ནི་ལས་དང་འབྲས་བུ་ལ་སོགས་པ་རྒྱུ་ལས་སྐྱེས་ཀྱང་དེད་ཀྱི་བདག་ཅེས་བྱ་བ་དབང་པོ་དང་ཚངས་པ་ལ་སོགས་པས་བསྐྱེད་པར་རྟོགས་ལ། ཆོས་རྣམས་དངོས་པོ་མེད་དེ་སྟོང་པ་ཉིད་དུ་མཐོང་པ་དེ་ཡང་རང་བཞིན་གྱིས་སྟོང་པ་མ་ཡིན་གྱི་དབང་པོ་ལ་སོགས་པས་སྟོང་པར་བྱས་སོ་སྙམ་ནས་སྟོང་པ་ཉིད་ཀྱི་ཏིང་ངེ་འཛིན་ལ་གནས་པར་བྱེད་དོ། །གནས་བ་པའི་བདག་པོ་འདི་ནི་ཏིང་ངེ་འཛིན་གྱི་ཚུལ་ཡིན་ཏེ་ཞེས་པ་ནས། །འཇིག་རྟེན་པ་ཡི་ལྷ་གང་ཡིན། །གསང་སྔགས་སྤྱད་པའི་ཆོ་གའི་ཚུལ། །སེམས་ཅན་རྣམ་ལ་ཕན་འདོགས་པས། །དཔའ་པོ་དེ་ཚེ་འཆད་པར་བྱེད། །ཅེས་པའི་བར་གྱིས་ནི་སྔར་བཤད་པ་རྣམས་བསྡུས་ནས་བཤད་པ་ཡིན་ཏེ་དེ་དག་གིས་སོ་སོའི་ཏིང་ངེ་འཛིན་སྟོང་པ་ཉིད་
ཀྱི་ཚུལ་དུ་རྟོགས་པའི་སྟོང་པ་དེ་ལ་གནས་ཏེ་སྟོང་པའི་ཆོས་ད་ཉིད་ཚིག་དང་ཡིག་འབྲུ་ལ་སོགས་པ་ས་སེམས་ཅན་རྣམས་ཀྱི་དོན་དུ་སྟོན་ཅིང་འཆད་དོ་ཞེས་པའོ། །དེ་ནས་ཡང་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་སྔགས་རྣམས་ཀྱི་གསང་སྔགས་ཀྱི་མཚན་ཉིད་ཉོན་ཅིག་ཅེས་པ་ནས། རང་སངས་རྒྱས་ཀྱི་འང་དེ་བཞིན་ཏེ། ཁྱད་པར་དག་ནི་བཤད་བྱ་ན། །ཏིང་ངེ་འཛིན་གྱི་ཁྱད་པར་ལས། །ལས་ཚེ་རྣམ་པར་སྦྱོང་ཞེས་བྱ། །ཞེས་པའི་བར་གྱིས་དེ་བཞི་གཤེགས་པ་དང༌། ཀུན་དུ་སངས་རྒྱས་པ་དང༌། སངས་རྒྱས་དང་བྱང་ཆུབ་སེམས་དཔའ་དང༌། ཉོན་ཐོས་དང་རང་སངས་རྒྱས་རྣམས་ཀྱི་སོ་སོའི་སྔགས་ཀྱི་མཚན་ཉིད་བཤད་པ་སྟེ། སྔགས་ཀྱི་མཚན་ཉིད་དེ་ཡང་རྣམ་པ་གསུམ་དུ་རིག་པར་བྱ་སྟེ། སྔགས་ཀྱི་ལྷ་དང༌། སྔགས་ཀྱི་དོན་དང༌། སྔགས་ཀྱི་རང་བཞིན་ནོ། །དེ་ལ་སྔགས་ཀྱི་ལྷ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་བཤད་ཟིན་ཏེ། དེ་ཡང་དེ་བཞིན་གཤེགས་པ་དང་ཀུན་དུ་སངས་རྒྱས་པ་དང་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ལ་སོགས་པ་རྣམས་ཉིད་དེ། སོང་རྗེ་ཆེན་པོའི་དཀྱིལ་འཁོར་དུ་རིགས་གསུམ་བཀོད་པ་རྣམས་ནི་དེ་བཞིན་གཤེགས་པའོ། །དཀྱིལ་འཁོར་བར་མ་ན་ཤཱཀྱ་ཐུབ་པ་འཁོར་དང་བཅས་པ་བཞུགས་པ་ནི་ཀུན་དུ་སངས་རྒྱས་སོ། །དཀྱིལ་འཁོར་ཐ་མན་འཕགས་པ་འཇམ་དཔལ་ལ་སོགས་པ་ས་བཅུ་ཡོངས་སུ་རྫོགས་པའི་བྱང་ཆུབ་སེམས་དཔའ་གཙོ་བོ་དག་བཞུགས་པ་རྣམས་ནི་སངས་རྒྱས་རྣམས་སོ། །དེ་ལས་གཞན་པའི་བྱང་ཆུབ་སེམས་དཔའ་ཕྱག་ན་རིན་ཆེན་ལ་སོགས་པ་ནི་བྱང་ཆུབ་སེམས་དཔའོ། །ཉན་ཐོས་དང་རང་སངས་རྒྱས་ཡོངས་སུ་མ་སྨོས་ཀྱང་སྤྲུལ་པའི་སྐུས་གདུལ་བའི་ནང་དུ་བདོག་པས་ན་དཀྱིལ་འཁོར་བར་མའི་ནན་གདུ་འདུས་པར་རིག་པར་བྱའོ། །འཇིག་རྟེན་པ་རྣམས་ཀྱང་དཀྱིལ་འཁོར་བར་མ་དེ་ཉིད་ཀྱི་ནང་ན་དངོས་སུ་འཁོད་པའོ། །སྔགས་ཀྱི་དོན་ནི་ཀུན་དུ་སངས་རྒྱས་པ་ནས་འཇིག་རྟེན་པའི་ལྷ་རྣམས་ཀྱི་བར་གྱི་ཏིང་ངེ་འཛིན་སྔར་བཤད་པ་དག་གོ །དེ་ཡང་ཀུན་རྫོབ་དང་དོན་དམ་པ་གཉིས་སུ་ཤེས་པར་བྱའོ། །དོན་དམ་པ་ནི་རྣམ་
པར་ཐར་པའི་སྒོ་སྟོང་པའི་རང་བཞིན་ནོ། །ཀུན་རྫོབ་ནི། དགོས་པའི་ས་ལ་གནས་དེ་རྣམས། །ཞེས་པ་ལ་སོགས་པ་སེམས་ཅན་གྱི་དོན་དུ་ཆོས་འཆད་པ་དང༌། བཅོམ་ལྡན་འདས་ཀྱི་ཡོན་ཏན་སྟོབས་དང་མི་འཇིགས་པ་ལ་སོགས་པའི་ཆོས་རྣམས་སོ། །སྔགས་ཀྱི་རང་བཞིན་རྣམ་པ་བཞིར་ཤེས་པར་བྱ་སྟེ་ཚིག་དང་འབྲུ་དང་དབྱངས་དང་ཡུལ་གྱི་སྐད་རྣམས་སོ། །དེ་ལ་ཚིག་ནི་ཡི་གེའི་འབྲུ་མང་པོ་འདུས་པ་ལས་ཚིག་ཏུ་ལོངས་པར་སྨྲ་བའོ། །འབྲུ་ནི་ཡི་གེ་ཀ་ལ་སོགས་པ་སྔགས་ཀྱི་ཡི་གེ་འབྲུ་རེ་རེའོ། །དབྱངས་ནི་ཨ་དང་ཨི་ལ་སོགས་པ་གུག་སྐྱེད་ཀྱི་རིགས་སུ་གཏོགས་བའོ། །ཡུལ་གྱི་སྐད་ནི་ཡུལ་སོ་སོ་ན་སྐད་གང་གིས་སྤྱོད་པ་དེ་ཉིད་དང་མཐུན་པར་གསུངས་པའོ། །སྔགས་རྣམས་ཀྱི་གསང་སྔགས་ཀྱི་མཚན་ཉིད་ཉོན་ཅིག་ཅེས་པ་ནི་སྔར། གསང་སྔགས་མཚན་ཉིད་ཇི་འདྲ་ལགས། །ཞེས་བཅོམ་ལྡན་འདས་ལ་གསོལ་བ་དེང་ངས་བཤད་ཀྱིས་ཉོན་ཅིག་པ་སྟེ་སྔགས་རྣམས་ཀྱི་མཚན་ཉིད་ཅེས་སྨོས་པ་ནི་སྔགས་རྣམས་ཀྱི་མཚན་ཉིད་སྔགས་ཀྱི་ལྷ་དང་སྔགས་ཀྱི་དོན་གོང་དུ་བཤད་པས་ན་ད་འདིར་སྔགས་རྣམས་ཀྱི་མཚན་ཉིད་གསང་བར་སྨྲ་བའི་རང་བཞིན་གྱི་ཚིག་རྣམས་ཉོན་ཅིག་ཅེས་པའོ། །རྫོགས་སངས་རྒྱས་ཀྱི་གསང་སྔགས་ནི། །ཚིག་དང་མིང་དང་བརྡ་ཡིས་མཚན། །ཞེས་པ་ཛིན་ཛིཀ་ཅེས་པ་ལ་སོགས་པའི་ཚིག་སྨོས་པས་འདི་ནི་སངས་རྒྱས་ཀྱི་མིང་གི་མཚན་མ་སྟེ་སངས་རྒྱས་ཀྱི་སྔགས་སུ་བྱེད་པར་ཤེས་པའོ། །ཚིག་དེ་དབང་དུ་གྱུར་པས་ན། །གསང་སྔགས་དོན་རྣམས་ཐམས་ཅད་སྒྲུབ། །ཅེས་པ་ནི་ཀུན་དུ་སངས་རྒྱས་པའི་སྔགས་ཀྱི་ཚིག་སྨོས་པ་ཡང་དབང་ཆེན་གྱི་ཏིང་ངེ་འཛིན་གྱི་མཚན་མ་སྟེ་རྒྱས་པའི་དོན་ཐམས་ཅད་འགྲུབ་པར་འགྱུར་ཞེས་པའོ། །ཁ་ཅིག་སྐུལ་བ་ཚིག་དང་ལྡན། །ཁ་ཅིག་རང་མིང་ཐོག་མར་སྨོས། །ཞེས་པ་ནི་སྔགས་ཀྱི་ཚིག་ལས་སྔགས་ཀྱི་ལྷ་ཡི་མཐུ་དང་ཡོན་ཏན་རྣམས་སྨོས་པ་དང། ཤཱིནྟཾ་ཀུ་རུ་ཞེས་པ་ལ་སོགས་པའི་ལས་རྣམས་ལ་བསྐུལ་བ་སྨོས་པ་དང་འཛིན་ཛིཀ་ཅེས་པ་ལ་སོགས་པ་ལྷའི་མཚན་སྨོས་པས་ལྷ་གང་གི་སྔགས་ཡིན་བར་རིག་བར་འགྱུར་པའོ། །ཧཱུཾ་ཕཊ་ཅེས་པ་ལ་སོགས་པ་དང་ལྡན་པའི་ཚིག་རྣམས་ནི་གོང་དུ་གཙུག་ཏོར་བརྒྱད་སྨོས་པ་ལ་སོགས་པའི་
སྔགས་སུ་ཤེས་པར་བྱ་སྟེ། གཙུག་ཏོར་གྱི་སྔགས་རྣམས་གཞུང་གཞན་ལས་ཧཱུཾ་དང་ཕཊ་མེད་པ་ཡང་འབྱུང༌། གཙུག་ཏོར་མ་ཡིན་པའི་ལྷ་རྣམས་ཀྱི་སྔགས་ཧཱུཾ་དང་ཕཊ་དུ་བཅས་པ་ཡང་འབྱུང་བ་སྣ་ཧཱུཾ་དང་ཕཊ་དུ་བཅས་པའི་གཙུག་ཏོར་གྱི་སྔགས་འདི་རྣམས་ནི་རྒྱུད་འདི་ཉིད་དུ་སྨོས་པའི་གཙུག་ཏོར་གྱི་སྔགས་སུ་ཤེས་པར་བྱའོ། །ཟུང་ཟོ་ཆོམ་ས་ཤིག་ཅེས་པ་དང༌། །སྣུན་སོད་དྲོལ་ཅིག་ཅེས་པ་ནི། །ཕྱག་བརྙན་རྣམས་དང་ཁྲོ་བོ་ཡི། །གསང་སྔགས་ཡིན་པར་འདྲེན་པས་གསུངས། །ཞེས་པ་ནི་ཚིག་དེ་ལྟ་བུ་དྲག་ཤུལ་ཅན་དང་ལྡན་པའི་སྔགས་ནི་ཁྲོ་བོ་རྣམས་དང་ཅི་བགྱི་རྣམས་ཀྱི་སྔགས་སུ་ཤེས་པར་བྱའོ། །ན་མཿསྭཱ་ཧཱ་ལ་སོགས་ལྡན། ཞེས་པ་ནས། བྱང་ཆུབ་སེམས་དཔའ་སྐྱོབ་བའི་ཡིན། །ཞེས་པའི་བར་ནི་ས་བཅུ་པ་ལ་གནས་པའི་བྱང་ཆུབ་སེམས་དཔའ་སངས་རྒྱ་ཤེས་བྱ་བ་དང༌། དེ་ལས་གཞན་པའི་བྱང་ཆུབ་སེམས་དཔའ་རྣམས་ཀྱི་སྔགས་ཏེ་མགོ་ན་ཕྱག་འཚལ་བ་དང་ལྡན་ཞིང་ཚིག་གི་མཇུག་ན་སྭཱ་ཧཱ་དང་བཅས་པ་དང༌། བྱང་ཆུབ་སེམས་དཔའ་སོ་སོའི་ཏིང་ངེ་འཛིན་གྱི་རང་བཞིན་གྱི་ཚིག་རྣམས་སྨོས་པ་དང༌། ཟུང་ཤིག་ཆོམ་ས་ཤིག་ལ་སོགས་པའི་ཚིག་དྲག་ཤུལ་ཅན་རྣམས་མེད་ཅིང་ཞི་བའི་ཚིག་རྣམ་པར་དག་པའི་མཚན་ཉིད་ཀྱི་ཚིག་དང་ལྡན་པའི་སྔགས་ནི་སངས་རྒྱས་བྱང་ཆུབ་སེམས་དཔའ་རྣམས་ཀྱི་ཡིན་པར་ཤེས་པར་བྱའོ། །ཉན་ཐོས་རྣམས་ཀྱི་གསང་སྔགས་ནི། །གཅིག་པུ་གཞི་ནི་གཅིག་ལ་གནས། །ཞེས་པ་ནི་འཕགས་པ་ཉན་ཐོས་ཀྱི་གསང་སྔགས་རྣམས་ནི་སྤྱི་པོ་སྤྱི་གཙུག་ལ་སོགས་པ་ཡན་ལག་གི་སྔགས་རྣམས་མེད་པས་ན་གཅིག་པའོ། །བྱང་ཆུབ་སེམས་དཔའ་ལྟར་གཟུགས་སྣ་ཚོགས་སུ་མི་འགྱུར་གྱི། དགེ་སློང་གི་ཚུལ་གཅིག་པུ་འཛིན་པའམ། གང་ཟག་ལ་བདག་མེད་པ་གཅིག་པུ་རྟོགས་པས་ན་གཅིག་ལ་གནས་ཞེས་པའོ། །རང་སངས་རྒྱས་ཀྱིའང་དེ་བཞིན་ཏེ། །ཁྱད་བར་དག་ནི་བཤད་བྱ་ན། །ཏིང་ངེ་འཛིན་གྱི་ཁྱད་པར་ལས། །ལས་ཚེ་རྣམ་པར་སྦྱོང་ཞེས་བྱ། །ཞེས་པ་ནི་རང་སངས་རྒྱས་ཀྱི་སྔགས་རྣམས་ཀྱང་མཚན་ཉིད་གཞན་ནི་ཉན་ཐོས་དང་མཐུན་ལ། སྤྱད་པར་ནི་རྒྱུ་དང་འབྲས་བུ་བཤིག་ནས་ཆོས་རྣམས་སྟོང་པར་རྟོགས་པའི་ཏིང་ངེ་འཛིན་དང་ལྡན་པར་
ཤེས་པར་བྱའོ། །དེ་ལ་འདིར་ཀུན་དུ་སངས་རྒྱས་པ་ལ་སོགས་པའི་གསང་སྔགས་ཀྱི་མཚན་ཉིད་ནི་བཤད་ན། དེ་བཞིན་གཤེགས་པའི་གསང་སྔགས་ཀྱི་མཚན་ཉིད་ཅིའི་ཕྱིར་དངོས་སུ་མ་སྨོས་ཤེ་ན། ཀུན་དུ་སངས་རྒྱས་པའི་སྔགས་དེ་ཉིད་དེ་བཞིན་གཤེགས་པ་ཡིན་ཏེ་ཅིའི་ཕྱིར་ཞེ་ན། ཀུན་དུ་སངས་རྒྱས་པ་ལ་སོགས་པ་དེ་རྣམས་ཕ་རོལ་ཏུ་ཕྱིན་པ་སྤྱོད་པ་ལས་འབྱུང་བ་ཡིན་ན་ཡང་དེ་བཞིན་གཤེགས་པའི་རྒྱུ་ཡིན་པས་དེ་བཞིན་གཤེགས་པ་དང་ཐ་མི་དད་ལ། འོན་ཏེ་ཡེ་ཤེས་ཀྱི་སེམས་ཅན་ཡིན་ན་ཡང་དེ་ཉིད་དེ་བཞིན་གཤེགས་པའི་འབྲས་བུ་ཡིན་པས་ཐ་མི་དད་པའི་ཕྱིར་དེ་དག་དེ་བཞིན་གཤེགས་པའི་སྔགས་སོ། །དོན་དམ་པར་བྱང་ཆུབ་སེམས་དཔའ་ཡང་དེ་བཞིན་གཤེགས་པའི་སྔགས་ཀྱི་ཡི་གེ་འབྲུ་རེ་རེ་པ་རྣམས་ཀྱིས་ཏིང་ངེ་འཛིན་གྱི་སྒོ་སྟོང་པ་ཉིད་ཀྱི་རང་བཞིན་དུ་སྟོན་པར་གཅིག་པས་ན་ཐ་མི་དད་དོ། །ཡང་ན་འོག་ནས་བཤད་པའི་ཡི་གེ་ཨ་རྣམ་པ་བཞི་པོ་རྣམས་དེ་བཞིན་གཤེགས་པའི་སྔགས་སོ། །གསང་བ་པའི་བདག་པོ་གཞན་ཡང་གསང་སྔགས་རྣམས་ཀྱི་མཚན་ཉིད་ནི་སངས་རྒྱས་ཐམས་ཅད་ཀྱིས་མ་བྱས་བྱེད་དུ་མ་བཅུག །རྗེས་སུ་ཡི་རང་བ་མ་ཡིན་ནོ་ཞེས་པ་ནས་གསང་སྔགས་ཀྱི་ཚུལ་འཆད་དོ་ཞེས་པའི་བར་གྱིས་ནི་གསང་སྔགས་རྣམས་ཀྱི་རང་བཞིན་བཤད་པ་སྟེ། ཚིག་དང་མིང་དང་བརྡས་མཚན་པའི་མཚན་ཉིད་ཀྱི་གསང་སྔགས་བསྐུང་པ་ལ་སོགས་པ་དང་ལྡན་པའི་ཚིག་གིས་དོན་གང་བསྐུལ་བ་དེ་གྲུབ་པར་བྱེད་པའི་མཐུའི་རང་བཞིན་རྣམས་མཐུ་འདིས་དོན་འདི་འགྲུབ་པར་བྱའོ་ཞེས་དེ་བཞིན་གཤེགས་པས་སྔགས་ཀྱི་རང་བཞིན་དེ་བྱས་སམ། དེ་བཞིན་དུ་གཞན་ལ་བྱེད་དུ་བཅུག་གམ། གཞན་བྱེད་པ་ལ་རྗེས་སུ་ཡི་རང་ན་ཡང་དེ་བཞིན་གཤེགས་པ་ཉིད་མཚན་མ་དང་བྲལ་བས་བྱས་པའམ་བྱེད་དུ་བཅུག་པ་འམ། རྗེས་སུ་ཡི་རང་བ་མ་ཡིན་ནོ། །ཅིའི་ཕྱིར་ཞེ་ན། སྔགས་ཀྱི་རང་བཞིན་དེ་བཞིན་གཤེགས་པས་མཛད་པར་གྱུར་ན་ནི་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་དོན་མཛད་པས་ན་སྒྲུབ་པར་བརྩམས་པ་ཐམས་ཅད་ཀྱིས་ངེས་པར་འགྲུབ་པར་འགྱུར་ཏེ། དེ་ལྟར་སྒྲུབ་པོ་ཐམས་ཅད་ཀྱིས་འགྲུབ་པ་མ་ཡིན་པས་དེ་བཞིན་གཤེགས་པས་མཛད་པ་མ་ཡིན་ནོ། །དེ་སྟེ་སྔགས་ཀྱི་མཐུའི་དོན་དང་
མཐུ་གཉིས་རྟག་ཏུ་ཕན་ཚུན་འགྲེལ་པ་ཡིན་ཚིག་བརྗོད་པ་ཙམ་གྱིས་དོན་དེ་ཉིད་འགྲུབ་པར་འགྱུར་ཏེ། དཔེར་ན་མེ་ཞེས་ཚིག་ཏུ་བརྗོད་པ་ན་མེའི་རང་བཞིན་སྲེད་པར་བྱེད་པ་ཡིན་ཡང་ཚིག་ཏུ་བརྗོད་པས་ཁ་ཚིག་པར་མི་འགྱུར་བ་དང་འདྲའོ། །དེ་བས་ན་སྔགས་ཀྱི་མཐུ་ནི་དེ་བཞིན་གཤེགས་པས་མཛད་པ་ཡང་མ་ཡིན། གཞན་བྱེད་དུ་བཅུག་པའམ། གཞན་བྱེད་པ་ལ་རྗེས་སུ་ཡི་རང་བ་མ་ཡིན་ཞེས་པའོ། །དེ་ཅིའི་ཕྱིར་ཞེ་ན། འདི་ནི་ཆོས་རྣམས་ཀྱི་ཆོས་ཉིད་དེ། འདི་ལྟར་དེ་བཞིན་གཤེགས་པ་རྣམས་ཀྱང་བྱུང་ཡང་རུང་མ་བྱུང་ཡང་རུང་ཆོས་ཉིད་དེ་ནི་ཡེ་ནས་གནས་པ་སྟེ། དེ་ཡང་འདི་ལྟར་གསང་སྔགས་རྣམས་ཀྱི་གསང་སྔགས་ཀྱི་ཆོས་ཉིད་དོ་ཞེས་པ་ནི། མིང་དང་ཚིག་དང་བརྡས་མཚན་པའི་སྔགས་དེ་བསྐུལ་བ་ལ་སོགས་པའི་ཚིག་དང་དོན་དུ་ལྡན་ན་གང་བསྐུལ་བའི་དོན་དེ་ཉིད་སུས་ཀྱང་བྱས་པ་མ་ཡིན་ཏེ། རྒྱུ་གཞན་ལ་མི་ལྟོས་པར་ཆོས་དེ་དེ་ལྟར་ཡེ་ནས་གནས་པ་ཡིན་ཏེ། དཔེར་ན་བུ་རམ་གྱི་རོ་མངར་བ་དང་ལན་ཚྭའི་རོ་བྲོ་བའི་རང་བཞིན་རྣམས་རྒྱུ་གང་གིས་ཀྱང་འདུས་མ་བྱས་པར་མངར་བའི་རང་བཞིན་དུ་ཡེ་ནས་གནས་པ་ཡིན་ནོ། །དེ་ལྟར་དེ་བཞིན་གཤེགས་པས་བྱས་པ་ཡིན་ན་དེ་བཞིན་གཤེགས་པ་བྱུང་བ་ན་སྔགས་ཀྱི་རང་བཞིན་དེ་ཡང་ཡོད་ལ། མ་བྱུང་ན་ནི་མེད་པར་འགྱུར་ཏེ་དེ་ལྟར་ཡང་མ་ཡིན་པས་ན་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་རྣམས་ཀྱི་ཆོས་ཉིད་དེ་ནི་ཡེ་ནས་གནས་པ་སྟེ། དེ་ཡང་འདི་ལྟར་གསང་སྔགས་རྣམས་ཀྱི་གསང་སྔགས་ཀྱི་ཆོས་ཉིད་དོ་ཞེས་པའོ། །གསང་བ་པའི་བདག་པོ་དེ་ལ་གང་གི་ཚེ་ཡང་དག་པར་རྫོགས་པའི་སངས་རྒྱས་ཐམས་ཅད་གཟིགས་པ་འཇིག་རྟེན་དུ་འབྱུང་བ་དེའི་ཚེ་ཞེས་པ་ནས། དབྱངས་སྣ་ཚོགས་སུ་གོ་བ་རྣམས་སུ་བྱིན་གྱིས་བརླབས་ཏེ་དེ་ལྟར་གསང་སྔགས་ཀྱི་ཚུལ་འཆད་དོ་ཞེས་པའི་བར་གྱིས་ནི། གསང་སྔགས་ཀྱི་ཆོས་ཉིད་ཡེ་ནས་དེ་ལྟར་གནས་པ་ལ། ཚིག་དང་ཡིག་འབྲུ་དང་དབྱངས་རྣམས་སུ་ཇི་ལྟར་རིགས་པར་རྣམ་པར་དགོད་པ་ཙམ་ཞིག་དེ་བཞིན་གཤེགས་པས་མཛད་པར་བསྟན་པ་སྟེ། ཡང་དག་པར་རྫོགས་པའི་སངས་རྒྱས་ཞེས་པ་ནི་མཉམ་པ་ཉིད་ཀྱི་ཡེ་ཤེས་ཀྱིས་ཕྱིན་ཅི་མ་ལོག་པ་ཉིད་དུ་མངོན་པར་བྱང་ཆུབ་པའོ། །ཐམས་ཅད་མཁྱེན་པའི་ཞེས་པ་ནི་སོ་སོར་རྟོག་པའི་
ཡེ་ཤེས་ཀྱིས་ཀུན་རྫོབ་དང་དོན་དམ་པའི་ཚུལ་དུ་ཐམས་ཅད་མཁྱེན་པའོ། །ཐམས་ཅད་གཟིགས་པ་ཞེས་པ་ནི་མེ་ལོང་ལྟ་བུའི་ཡེ་ཤེས་དང་བྱ་བ་སྒྲུབ་པའི་ཡེ་ཤེས་ཀྱི་ཡུལ་དུ་གཟིགས་པའོ། །དེ་ལྟ་བུའི་ཐམས་ཅད་མཁྱེན་པ་ཉིད་འཇིག་རྟེན་དུ་བྱུང་བ་ན་ཚུལ་སྣ་ཚོགས་དང་ཞེས་བ་ནི་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་འཇིག་རྟེན་པ་ལ་སོགས་པའི་ཚུལ་རྣམ་པ་མང་པོ་དང་རྗེས་སུ་མཐུན་པར་གསང་སྔགས་ཀྱི་ཆོས་ཉིད་ཡེ་ནས་གནས་པ་དེ་ཡིག་འབྲུ་རྣམས་སུ་འཆད་པ་ནི་ཚིག་དང་ཡིག་འབྲུ་རྣམས་དང་དབྱངས་རྣམ་པ་སྣ་ཚོགས་སུ་སྟོན་པའོ། །གཉིས་སུ་ན་དེ་བཞིན་གཤེགས་པའི་རིགས་དང་པདྨའི་རིགས་དང༌། རྡོ་རྗེའི་རིགས་ལ་སོགས་པའི་ཚུལ་སྣ་ཚོགས་པའོ། །དགོངས་པ་སྣ་ཚོགས་ཤེས་པ་ནི་སྔགས་ཀྱི་ཚིག་དེ་རྣམས་ཀྱང་ལ་ལ་ནི་སྒྲ་ཇི་བཞིན་པར་འཆད། ལ་ལ་ནི་ལྡེམ་པོ་ངག་ཏུ་སྟོན་པ་ཞེས་པའོ། །སེམས་ཅན་བསམ་པ་སྣ་ཚོགས་པ་རྣམས་ལ་ཞེས་པ་ནི་སེམས་ཅན་ལ་ལ་ཞི་བར་འདོད། ལ་ལ་རྒྱས་པར་འདོད། ལ་ལ་གྲུབ་པ་མཆོག་འདོད། ལ་ལ་འབྲིང་འདོད་པ་ལ་སོགས་པའི་སེམས་ཅན་རྣམས་ཀྱི་ཇི་ལྟར་འདོད་པ་དང་རྗེས་སུ་མཐུན་པར་སྟོན་པའོ། །ཚིག་སྣ་ཚོགས་དང་ཡིག་འབྲུ་སྣ་ཚོགས་དང་ཡུལ་གྱི་ངེས་པའི་ཚིག་ཏུ་བརྗོད་པ་སྣ་ཚོགས་ཤེས་པ་ནི་གསང་སྔགས་ཀྱི་ཆོས་ཉིད་དེ་ཛིན་ཛིན་ལ་སོགས་པའི་ཚིག་རྣམ་པ་དུ་མ་དང༌། དྲི་མ་མེད་པ་ལ་སོགས་པའི་སྐད་དུ་སྨྲ་བ་རྣམ་པ་དུ་མའི་མཆན་མར་བཀོད་དེ་སྟོན་ཞེས་པའོ། །དབྱངས་སྣ་ཚོགས་སུ་གོ་བ་རྣམས་སུ་བྱིན་གྱིས་བརླབས་ཏེ་ཞེས་པ་ནི་ཨ་ཨི་ལ་སོགས་པའི་གུག་སྐྱེད་ཀྱི་ཚུལ་རྣམ་པ་དུ་མའམ། ས་འཛིན་ལ་སོགས་པའི་དབྱངས་སྣ་ཚོགས་སུ་སྟོན་ཞེས་པའོ། །ཇི་ལྟར་ན་དེ་བཞིན་གཤེགས་པ་རྣམས་གསང་སྔགས་ཀྱི་ཚུལ་ཡིག་འབྲུ་དག་ཏུ་བྱིན་གྱིས་རློབ་ཅེ་ན་ཞེས་པ་ནས་སྐལ་པ་ཇི་ལྟ་བ་བཞིན་དུ་གསང་སྔགས་ཀྱི་ཆོ་ག་ཡང་དག་པར་སྟོན་ཏོ་ཞེས་པའི་བར་གྱིས་ནི་གསང་སྔགས་ཀྱི་ཆོས་ཉིད་ཡིག་འབྲུ་ལ་སོགས་པར་བྱིན་གྱིས་བརླབས་ཏེ་སྟོན་པ་ཡང་དེ་བཞིན་གཤེགས་པའི་ཡོན་ཏན་སྟོབས་དང་མི་འཇིགས་པ་ལ་སོགས་པ་དེ་དག་སྔགས་ཀྱི་ཡིག་འབྲུར་བྱིན་གྱིས་བརླབས་ནས་སྟོན་པར་
བཤད་དེ། ཚིག་དང་ཡིག་འབྲུ་རྣམས་སུ་བྱིན་གྱིས་རློབ་པ་ཡང་ཀུན་རྫོབ་དང་དོན་དམ་པ་གཉིས་སུ་རིག་པར་བྱ་སྟེ། དེ་ལ་ཀུན་རྫོབ་ཏུ་སྟོན་པ་ནི་སྟོབས་དང་མི་འཇིགས་པ་ལ་སོགས་པ་རྣམས་ཚིག་དང་ཡིག་འབྲུ་ལ་སོགས་པར་བྱིན་གྱིས་བརླབས་ཏེ་སྟོན་པའོ། །དོན་དམ་པར་སྟོན་པ་ནི་ཆོས་ཐམས་ཅད་གདོད་མ་ནས་མ་སྐྱེས་མ་བྱུང་བ་སྟོང་པ་ཉིད་ཀྱི་རང་བཞིན་ཡི་གེ་ལ་སོགས་པའི་འབྲུར་སྟོན་པ་སྟེ། དེ་བས་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་ཡང་དག་པར་བསྒྲུབས་པའི་བདེན་པའི་ཚིག་གང་ཡིན་པ་དང་འཕགས་པའི་བདེན་པ་བཞི་དང་ཞེས་བྱ་བ་ལ་སོགས་པ་གསུངས་པ་ཡིན་ནོ། །བསྐལ་པ་བྱེ་པ་ཁྲག་ཁྲིག་བརྒྱ་སྟོང་དུ་མ་ཞེས་པ་ནི་མང་པོའི་མཚོན་བྱེད་དེ་འཕགས་པའི་བདེན་པ་ལ་སོགས་པ་ཐམས་ཅད་ལ་སྦྱར་བར་བྱའོ། །དེ་བཞིན་གཤེགས་པས་བསྐལ་པ་དུ་མར་བདེན་པའི་ཚིག་བསགས་པ་དེ་སྔགས་ཀྱི་ཡིག་འབྲུ་བྱིན་གྱིས་བརླབས་པས་ན་སུ་བསྒྲུབ་པར་འདོད་པ་དེས་བདེན་པའི་ཚིག་རྗེས་སུ་བསྲུང་བར་ཤེས་པར་བྱ་སྟེ། བརྫུན་དུ་སྨྲ་བས་སྔགས་རྣམས་མི་འགྲུབ་པོ། །ཞེས་རྒྱུད་གཞན་ལས་ཀྱང་འབྱུང་ངོ༌། །འཕགས་པའི་བདེན་པ་བཞི་དང༌། དྲན་པ་ཉེ་བར་གཞག་པ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དེ་བཞིན་གཤེགས་པའི་སྟོབས་བཅུ་དང༌། ཕ་རོལ་ཏུ་ཕྱིན་པ་དྲུག་དང༌། བྱང་ཆུབ་ཀྱི་ཡན་ལག་རིན་པོ་ཆེ་བདུན་དང་ཚངས་པའི་གནས་པ་བཞི་དང༌། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་གང་དག་ཡིན་པ་རྣམས་ནི་གཞུང་གཞན་ལས་གྲགས་པ་ཉིད་དོ། །གསང་བ་པའི་བདག་པོ་མདོར་ན་དེ་བཞིན་གཤེགས་པ་རྣམས་ཀྱི་ཐམས་ཅད་མཁྱེན་པའི་ཡེ་ཤེས་གང་ཡིན་པ་དེ་ཐམས་ཅད་དེ་བཞིན་གཤེགས་པ་རྣམས་ཉིད་ཀྱི་བསོད་ནམས་དང་ཡེ་ཤེས་ཀྱི་སྟོབས་དང་སྔོན་གྱི་སྨོན་ལམ་མཁྱེན་པའི་སྟོབས་དང་ཆོས་ཀྱི་དབྱིངས་ཀྱི་བྱིན་རླབས་ཀྱི་སྟོབས་ཀྱི་བྱིན་གྱིས་བརླབས་ནས་སེམས་ཅན་རྣམས་ལ་སྐལ་བ་ཇི་ལྟ་བ་བཞིན་དུ་གསང་སྔགས་ཀྱི་ཆོ་ག་ཡང་དག་པར་སྟོན་ཏོ་ཞེས་པ་ནི་དེ་བཞིན་གཤེགས་པའི་ཡོན་ཏན་གྱི་མཐུ་རྣམས་ཀྱི་བྱིན་གྱིས་བརླབས་ནས་ཡིག་འབྲུ་རྣམས་སུ་སྟོན་པ་སྟེ། ཉིད་ཀྱི་བསོད་ནམས་དང་ཡེ་ཤེས་སྟོབས་ཞེས་པ་ནི་བསོད་ནམས་ཀྱི་སྟོབས་ནི་སྦྱིན་པ་དང་ཚུལ་ཁྲིམས་དང་བཟོད་
པའི་ཕ་རོལ་ཏུ་ཕྱིན་པ་སྤྱོད་པའོ། །ཡེ་ཤེས་ཀྱི་སྟོབས་ནི་ཤེས་རབ་དང་བསམ་གཏན་གྱི་ཕ་རོལ་ཏུ་ཕྱིན་པ་སྤྱོད་པ་སྟེ། སྟོབས་ནི་དེ་དག་གི་མཐུ་ཐོགས་པ་མེད་པའོ། །སྔོན་གྱི་སྨོན་ལམ་མཁྱེན་པའི་སྟོབས་དང་ཞེས་པ་སྔོན་གྱི་སྨོན་ལམ་གྱི་ཤུགས་ཀྱིས་གསང་སྔགས་རྣམས་ཀྱི་རང་བཞིན་ཇི་ལྟ་བ་ཇི་བཞིན་དུ་རྟོགས་པའོ། །ཆོས་ཀྱི་དབྱིངས་ཀྱི་བྱིན་གྱིས་བརླབས་ཞེས་པ་ནི་ཆོས་ཀྱི་དབྱིངས་ལ་གནས་ནས་ཞེས་པ་སྟེ་ཆོས་ཀྱི་དབྱིངས་ལ་གནས་པའི་མཐུ་དེས་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་གསང་སྔགས་ཀྱི་ཆོས་ཉིད་ཡི་གེའི་འབྲུ་ལ་སོགས་པར་སྟོན་ཏོ་ཞེས་པའོ། །སྐལ་བ་ཇི་ལྟ་བ་བཞིན་དུ་ཞེས་པ་ནི་ཇི་ལྟར་སྣོད་དུ་འགྱུར་བའི་སེམས་ཅན་རྣམས་ལའོ། །གསང་སྔགས་ཀྱི་ཆོ་ག་དེ་ཡང་གང་ཞེ་ན། གཟོད་མ་ནས་མ་སྐྱེས་པའི་ཕྱིར་ཨ་ནི་ཆོས་ཐམས་ཅད་ཀྱི་སྒོའོ་ཞེས་པ་ནས་གསང་བ་པའི་བདག་པོ། ང་དང་ཉ་དང་ཎ་དང་ན་ནི་ཏིང་ངེ་འཛིན་ཐམས་ཅད་ལ་དབང་བསྒྱུར་བ་སྟེ། མཐུ་ཐམས་ཅད་དང་ལྡན་པ་རབ་ཏུ་མྱུར་བར་དགོས་པའི་དོན་ཐམས་ཅད་རབ་ཏུ་སྒྲུབ་པར་བྱེད་པ་ཡིན་ནོ་ཞེས་པའི་བར་གྱིས། གསང་སྔགས་རྣམས་ཀྱི་མཚན་ཉིད་ནི། །ཚིག་དང་མིང་དང་བརྡ་ཡིས་མཚན། །ཞེས་བཤད་པ་དེ་དག་ཉིད་ཡི་གེའི་འབྲུ་དང་ཚིག་རྣམས་སུ་བཅོམ་ལྡན་འདས་ཀྱིས་བཤད་པ་དེ་རྣམས་ཏིང་ངེ་འཛིན་གྱི་སྒོར་གྱུར་པ་འཆད་དེ། ཚིག་དང་ཡི་གེ་འབྲུ་རེ་རེ་ལས་ཏིང་ངེ་འཛིན་གྱི་སྒོར་གྱུར་པ་དེ་ཡང་དོན་རྣམ་པ་གཉིས་སྟོན་ཏེ་ཀུན་རྫོབ་དང་དོན་དམ་པའོ། །དེ་ལ་ཀུན་རྫོབ་ཏུ་སྟོན་པ་ནི་ཡིག་འབྲུ་དང་ཚིག་རྣམས་ལས་སངས་རྒྱས་བཅོམ་ལྡན་འདས་ཀྱི་ཡོན་ཏན་སྟོབས་དང་མི་འཇིགས་པ་ལ་སོགས་པ་སྟོན་པའོ། །དོན་དམ་པ་སྟོན་པ་ནི་ཡི་གེ་དེ་ཉིད་ཀྱི་སྒོ་ནས་ཆོས་ཐམས་ཅད་གཟོད་མ་ནས་མ་སྐྱེས་པ་སྟོང་པ་ཉིད་དུ་སྟོན་པ་སྟེ། དེ་བས་ན་ཡིག་འབྲུ་དང་ཚིག་གི་སྒོ་ནས་ཀུན་རྫོབ་དང་དོན་དམ་པའི་དོན་བསྟན་པའི་ཕྱིར་བཅོམ་ལྡན་འདས་ཀྱིས་གསང་སྔགས་ཀྱི་མཚན་ཉིད་ཕྱག་རྒྱལ་སོགས་པའི་སྒོ་ནས་ཚིག་དང་མིང་དང་བརྡ་ཡིས་མཚན་པར་བསྟན་ཏེ་ཡིག་འབྲུ་དང་ཚིག་རྣམས་སུ་བྱིན་གྱིས་བརླབས་ཏེ་བསྟན་ཏོ། །དེ་བས་ན་ང་འདིར་ཡི་གེ་ཨ་ལ་སོགས་པའི་ཡིག་འབྲུ་རྣམས་ཀྱི་སྒོ་ནས་ཆོས་ཐམས་ཅད་སྟོང་པ་ཉིད་རང་བཞིན་དུ་བསྟན་པར་བཤད་དེ་དེ་ཡང་ཡི་གེ་ཀ་ལ་སོགས་པ་སུམ་ཅུ་རྩ་གཉིས་པོ་རྣམས་སྟོང་པ་ཉིད་ཀྱི་ཏིང་ངེ་
འཛིན་གྱི་སྒོར་གྱུར་པ་སྟེ། དེ་རྣམས་ལས་ཀྱང་ཁ་ཅིག་ནི་ཆོས་ཐམས་ཅད་སྟོང་པ་ཉིད་དུ་སྟོན། ཁ་ཅིག་ནི་ཕྱོགས་གཅིག་སྟོང་པ་ཉིད་དུ་སྟོན། ཁ་ཅིག་ནི་སྟོང་པར་འཇུག་པའི་སྒོ་ནས་སྟོང་པ་ཉིད་ཀྱི་ཏིང་ངེ་འཛིན་གྱི་སྒོར་གྱུར་པ་ཇི་ལྟར་རིགས་པར་བལྟའོ། །དེ་ལ་ཡི་གེ་ཨ་ལ་སོགས་པ་གང་ཡང་རུང་བ་ཞིག་གིས་ཐམས་ཅད་སྟོང་པ་ཉིད་དུ་སྟོན་པ་ལས་ལྷག་པར་ཡི་གེ་གཞན་རྣམས་ཀྱིས་སྟོང་པ་ཉིད་དུ་སྟོན་པ་མེད་དེ། གང་ཡི་གེ་ཨ་ལ་སོགས་པས་བསྟན་པ་དེ་ཉིད་ཡི་གེ་གཞན་རྣམས་ཀྱིས་ཀྱང་སྟོན་པས་སྟོང་པ་ཉིད་དུ་སྟོན་པར་གཅིག་སྟེ། ཡི་གེ་ཨའི་སྒོ་ནས་ཆོས་ཐམས་ཅད་སྟོང་པ་ཉིད་དུ་རྟོགས་ན་ཡི་གེ་གཞན་ཅི་དགོས་ཤེ་ན། སྟོང་པར་སྟོན་པ་ནི་ཡི་གེ་གཅིག་གིས་ཀྱང་ཆོག་མོད་ཀྱི། ཡིག་འབྲུ་དང་ཚིག་རྣམས་ལས་སྔགས་སུ་བསྟན་ཏེ་སྔགས་དེའི་སྒོ་ནས་ཆོས་ཐམས་ཅད་སྟོང་པ་ཉིད་དུ་སྟོན་པར་དགོངས་པའི་ཕྱིར་ཡི་གེ་ཐམས་ཅད་སྨོས་སོ། །དེ་བས་ན་སྔགས་ཐམས་ཅད་ཀྱི་རང་བཞིན་ནི་བྱང་ཆུབ་ཀྱི་སེམས་སོ་ཞེས་རྒྱུད་གཞན་ལས་གསུངས་སོ། །གཟོད་མ་ནས་མ་སྐྱེས་པའི་ཕྱིར་ཨ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་ཆོས་ཐམས་ཅད་གཟོད་མ་ནས་མ་སྐྱེས་པས་སྟོང་པ་ཉིད་དུ་རྟོགས་པ་ནི་དེ་བཞིན་གཤེགས་པ་སྟེ། དེ་བས་ན་ཡི་གེ་ཨ་དེ་སྟོང་པ་ཉིད་རྟོགས་པའི་ཏིང་ངེ་འཛིན་གྱི་སྒོར་གྱུར་པར་བྱིན་གྱིས་བརླབས་ཤིང་གཞག་པའོ། །དེ་བས་ན་ཡི་གེ་ཨའི་སྒོ་ནས་ཆོས་ཐམས་ཅད་གཟོད་མ་ནས་མ་སྐྱེས་ཤིང་མ་བྱུང་བར་བསྟན་ཏོ། །དགོས་པ་དང་བྲལ་བའི་ཕྱིར་ཀ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་རྒྱ་གར་སྐད་དུ་དགོས་པ་ལ་ཀར་ཡ་ཞེས་བྱ་ལ། ཡི་གེ་ཀ་དེ་ཆོས་ཐམས་ཅད་སྟོང་པའི་ཏིང་ངེ་འཛིན་གྱི་སྒོར་གྱུར་པས་ཡི་གེ་ཀའི་སྒོ་ནས་ཆོས་ཐམས་ཅད་དགོས་པ་མེད་པར་ཤེས་ཞེས་བྱའོ། །དགོས་པ་ཞེས་པ་ནི་འབྲས་བུ་སྟེ། །སྐྱེད་པར་བྱེད་པ་མ་ཡིན་ན། །རྒྱུ་ཉིད་འཐད་པར་མི་འགྱུར་རོ། །རྒྱུ་ཉིད་འཐད་པ་ཡོད་མིན་ན། །འབྲས་བུ་གང་གི་ཡིན་པར་འགྱུར། །ཞེས་འབྱུང་བས་འབྲས་བུ་རྒྱུས་མ་སྐྱེས་པས་མེད་ཀྱི། རྒྱུ་དེ་འབྲས་བུ་སྐྱེས་པའི་རང་བཞིན་དུ་ཡོད་མོད་ཅེ་ན། རྒྱུ་ཉིད་འབྲས་བུ་ལས་གྱུར་པ་སྟེ་དེ་བས་ན་ཆོས་ཐམས་ཅད་མ་བྱུང་མ་སྐྱེས་པའི་དོན་དུ་རིག་པར་བྱའོ། །ནམ་མཁའ་དང་འདྲ་བར་དམིགས་སུ་མེད་པའི་ཕྱིར་ཁ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་ནམ་མཁའ་དང་འདྲ་བ་ལ་རྒྱ་གར་སྐད་དུ་ཁ་ས་མ་ཞེས་བྱ་སྟེ། ཡི་གེ་ཁ་དེ་ཆོས་ཐམས་ཅད་སྟོང་པར་སྟོན་པའི་ཏིང་ངེ་འཛིན་
གྱི་སྒོར་ཞུགས་ཏེ་ཐམས་ཅད་ནམ་མཁའ་ལྟ་བུའི་རང་བཞིན་ཡིན་པས་ཡོད་པ་མ་ཡིན་པའོ། །འགྲོ་བ་ཐམས་ཅད་དམིགས་སུ་མེད་པའི་ཕྱིར་ག་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་ག་ཏི་ཞེས་པ་འགྲོ་བ་ལ་ཡང་བྱ། རྒྱུད་ལ་ཡང་བྱ། རྟོགས་པ་ལ་ཡང་བྱ་སྟེ་ཡི་གེ་ག་ནི་ཆོས་ཐམས་ཅད་སྟོང་པ་ཉིད་དུ་སྟོན་པའི་ཏིང་ངེ་འཛིན་གྱི་སྒོ་སྟེ་གྱུར་པ་ཡིན་པས་འགྲོ་བར་དྲང་ན་ནི། ཤར་དང་ནུབ་ལ་སོགས་པར་འགྲོ་བར་བྱ་བ་དང་འགྲོ་བར་བྱེད་པ་དམིགས་སུ་མེད་པའོ། །རྒྱུད་དུ་དྲང་ན་ནི་མི་དང་ལྷ་ལ་སོགས་པའི་རྒྱུད་དྲུག་དམིགས་སུ་མེད་པའོ། །རྟོགས་པར་དྲང་ན་ནི་ཆོས་ཐམས་ཅད་གཟོད་མ་ནས་མ་སྐྱེས་པར་རྟོགས་པར་བྱ་བའི་དངོས་པོ་དང་རྟོགས་པར་བྱེད་པ་ལ་དམིགས་སུ་མེད་པའོ། །གཅིག་ཏུ་འཕུངས་པ་དམིགས་སུ་མེད་པའི་ཕྱིར་གྷ་ནི་ཆོས་ཐམས་ཅད་ཀྱི་སྒོའི་ཞེས་པ་ནི་གཅིག་ཏུ་འཕུངས་པ་ལ་རྒྱ་གར་སྐད་དུ་བྷ་ག་ཞེས་བྱ་ལ། །ཡི་གེ་བྷ་ནི་ཆོས་ཐམས་ཅད་སྟོང་པ་ཉིད་དུ་སྟོན་པའི་ཏིང་ངེ་འཛིན་གྱི་སྒོ་སྟེ་རྡུལ་ཕྲ་མོ་རྣམས་གཅིག་འཕུངས་པའི་དངོས་པོ་དམིགས་སུ་མེད་ཅེས་པའོ། །འཆི་འཕོ་ཐམས་ཅད་དང་བྲལ་བའི་ཕྱིར་ཙ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་འཆི་འཕོ་ལ་རྒྱ་གར་སྐད་དུ་ཙྱུ་ཏི་ཞེས་བྱ་སྟེ། ཡི་གེ་ཙ་ནི་ཆོས་ཐམས་ཅད་སྟོང་པར་སྟོན་པའི་ཏིང་ངེ་འཛིན་གྱི་སྒོ་ཡིན་པས་ཆོས་ཐམས་ཅད་མ་སྐྱེས་པའི་ཕྱིར་འཆི་འཕོ་ཡང་དམིགས་སུ་མེད་ཅེས་པའོ། །གྲིབ་མ་དང་མཚུངས་པའི་ཕྱིར་ཚ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་གྲིབ་མ་ལ་ཚ་ཡ་ཞེས་བྱ་སྟེ། ཚ་དེ་ཆོས་ཐམས་ཅད་སྟོང་པར་སྟོན་པའི་ཏིང་ངེ་འཛིན་གྱི་སྒོ་སྟེ་དེ་ལ་གྲིབ་མ་དེ་ལུས་ལས་གཞན་ཡིན་ན་ནི་ལུས་མེད་ཀྱང་གྲིབ་མ་འབྱུང་བར་རིགས་ལ། ལུས་ལས་གཞན་མ་ཡིན་ན་གྲིབ་མ་ལོགས་ཤིག་ཏུ་འབྱུང་བ་ཡང་མི་རིགས་པ་ལས་དེ་ལྟ་བུ་འབྱུང་བས་ན་ཡང་དག་པ་མ་ཡིན་ཏེ་འཁྲུལ་པའམ་སྒྱུ་མ་ལྟ་བུའོ། །འཁྲུལ་པ་འམ་སྒྱུ་མ་ནི་དངོས་པོ་ཡོད་པ་མ་ཡིན་ཏེ་ཆོས་ཐམས་ཅད་ཀྱང་གྲིབ་མ་དེ་དང་འདྲ་བས་སྟོང་པ་ཉིད་དོ་ཞེས་པའོ། །སྐྱེ་བ་དམིགས་སུ་མེད་པའི་ཕྱིར་ཛ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་སྐྱེ་བ་ལ་ཛཱ་ཏི་ཞེས་བྱ་སྟེ་སྐྱེ་བར་བྱ་བའམ་སྐྱེ་བཞིན་པའི་དངོས་པོ་མེད་པས་སྐྱེ་བ་དམིགས་སུ་མེད་པའོ་ཞེས་པའོ། །དྲ་མི་དམིགས་སུ་མེད་པའི་ཕྱིར་ཛྷ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་དྲི་མ་ལ་ཛྷ་མ་ར་ཞེས་བྱ་སྟེ་དྲི་མར་གྱུར་པའི་ཆོས་རྣམས་དམིགས་སུ་མེད་པའོ། །ང་རྒྱལ་དམིགས་སུ་མེད་པའི་ཕྱིར་ཊ་ནི་ཆོས་ཐམས་ཅད་
ཀྱི་སྒོའོ་ཞེས་པ་ནི་ང་རྒྱལ་ལ་ཌ་ཀཱ་རཱ་ཞེས་བྱ་སྟེ། ཆོས་ཐམས་ཅད་སྟོང་པ་ཉིད་པས་ང་རྒྱལ་གྱི་དངོས་པོ་མེད་ཅེས་པའོ། །བསྐྱེད་པ་དམིགས་སུ་མེད་པའི་ཕྱིར་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་བསྐྱེད་པ་ལ་བི་ཊཱ་པ་ན་ཞེས་བྱ་སྟེ། ཆོས་ཐམས་ཅད་སྟོང་པ་ཉིད་པས་བསྐྱེད་པའི་དངོས་པོ་དམིགས་སུ་མེད་པའོ། །འཁྲུག་པ་དམིགས་སུ་མེད་པའི་ཕྱིར་ཌ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་འཁྲུག་པ་ལ་ཌ་མ་ར་ཞེས་བྱ་སྟེ། འཁྲུག་པར་བྱ་བའི་དངོས་པོ་རྣམས་མེད་པས་འཁྲུག་པར་བྱེད་པའི་དངོས་པོ་ཡང་དམིགས་སུ་མེད་པའོ་ཞེས་པའོ། །སླུ་བ་དམིགས་སུ་མེད་པའི་ཕྱིར་ཌྷ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་སླུ་བ་ལ་ཌྷཾ་ག་ཞེས་བྱ་སྟེ་ཆོས་རྣམས་སྟོང་པ་ཉིད་ཡིན་པས་སླུ་བའི་དངོས་པོ་མེད་པའོ། །དེ་བཞིན་ཉིད་དམིགས་སུ་མེད་པའི་ཕྱིར་ཏ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་དེ་བཞིན་ཉིད་ལ་ཏ་ཐ་ཏཱ་ཞེས་བྱ་སྟེ་དེ་བཞིན་ཉིད་དང་ཡང་དག་པའི་མཐའ་དང༌། སྟོང་པ་ཉིད་ཅེས་པ་ནི་གཅིག་གི་རྣམ་གྲངས་ཏེ་དེ་བཞིན་ཉིད་ཀྱི་རང་བཞིན་དུ་དམིགས་སུ་མེད་པའོ། །གནས་དམིགས་སུ་མེད་པའི་ཕྱིར་ཐ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་གནས་ལ་སྠཱ་ན་ཞེས་བྱ་སྟེ་སྣོད་ཀྱི་འཇིག་རྟེན་གྱི་རང་བཞིན་གྱི་གནས་སམ་ཆོས་རྣམས་སྐད་ཅིག་པའི་མཚན་ཉིད་ཡིན་པས་མི་གནས་པའི་ཕྱིར་གནས་དམིགས་སུ་མེད་ཅེས་པའོ། །འདུལ་བ་དམིགས་སུ་མེད་པའི་ཕྱིར་ད་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་འདུལ་བ་ལ་དམན་ཞེས་བྱ་བ་སྟེ་འདུལ་བའི་དངོས་པོའམ་གདུལ་བར་བྱ་བ་དམིགས་སུ་མེད་ཅེས་པའོ། །ཁམས་དམིགས་སུ་མེད་པའི་ཕྱིར་དྷ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་ཁམས་ལ་དྷཱ་ཏུ་ཞེས་བྱ་སྟེ། འདོད་པའི་ཁམས་དང་གཟུགས་ཀྱི་ཁམས་དང་གཟུགས་མེད་པའི་ཁམས་ལ་སོགས་པ་དམིགས་སུ་མེད་ཅེས་པའོ། །དོན་དམ་པའི་བདེན་པ་དམིགས་སུ་མེད་པའི་ཕྱིར་བ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་དོན་དམ་པ་ལ་པར་མཱརྠ་ཞེས་བྱ་སྟེ། ཡི་གེ་པ་ནི་དེ་དོན་དམ་པའི་རང་བཞིན་དུ་ཡང་དམིགས་སུ་མེད་པར་བསྟན་པའོ། །དབུ་བ་དང་འདྲ་བར་སྙིང་པོ་མེད་པའི་ཕྱིར་ཕ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་དབུ་བ་ལ་ཕེ་ཎ་ཞེས་བྱ་སྟེ་ཕུང་པོ་ལ་སོགས་པའི་ཆོས་རྣམས་དབུ་བ་དང་འདྲ་བར་སྙིང་པོ་མེད་པར་བཤིག་པ་དེ་ཡང་སྙིང་པོ་མེད་པར་ཡི་གེ་ཕའི་སྒོ་ནས་བསྟན་ཏོ། །ངག་གི་ལམ་དང་བྲལ་བའི་
ཕྱིང་བ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་ངག་གི་ལམ་ལ་བཱཀྦ་ཐ་ཞེས་བྱ་སྟེ་རྣམ་པར་མ་བརྟགས་མ་དཔྱད་པར་ཚིག་ཏུ་མི་སྨྲའི། བརྟག་པར་བྱ་བ་དང་རྟོག་པར་བྱེད་པས་ཚག་ཏུ་སྨྲ་བ་ཡང་དམིགས་སུ་མེད་པ་ཡིག་བའི་སྒོ་ནས་བསྟན་པའོ། །སྲིད་པ་ཐམས་ཅད་དམིགས་སུ་མེད་པའི་ཕྱིར་བྷ་ནི་ཆོས་ཐམས་ཅད་ཀྱི་སྒོའོ་ཞེས་བ་ནི་སྲིད་པ་ལ་བྷ་བ་ཞེས་བྱ་སྟེ། དེ་ཡང་འདོད་བའི་ཁམས་དང་གཟུགས་ཀྱི་ཁམས་དང་གཟུགས་མེད་པའི་ཁམས་སུ་འབྱུང་བས་ན་སྲིད་པ་ཞེས་བྱ་སྟེ་ཕུང་པོ་ལྔ་ཉིད་ལ་བྱའོ། །ཕུང་པོ་ལྔ་པོ་དེ་དག་དམིགས་སུ་མེད་པར་ཡི་གེ་བྷའི་སྒོ་ནས་སྟོན་ཏོ། །འཆིབ་དམིགས་སུ་མེད་པའི་ཕྱིར་མ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་འཆི་བ་ལ་པར་ཎ་ཞེས་བྱ་སྟེ་ཆོས་རྣམས་མ་སྐྱེས་པར་འཆི་བ་ཡང་དམིགས་སུ་མེད་པར་ཡི་གེ་མའི་སྒོ་ནས་བསྟན་ཏོ། །ཐེག་པ་ཐམས་ཅད་དམིགས་སུ་མེད་པའི་ཕྱིར་ཡ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་ཐེག་པ་ལ་ཡཱ་ན་ཞེས་བྱ་སྟེ་ཆོས་རྣམས་ཀྱི་དོན་ཤེས་ན་ཆོས་ཀྱང་གཟིངས་དང་འདྲ་བར་བོར་བས་ན་ཆོས་རྣམས་སྟོང་པར་རྟོགས་པས་ན་ཐེག་པ་གང་ལ་ཞུགས་ཏེ་རྟོགས་པའི་ཐེག་པ་དེ་ཉིད་ཀྱང་དམིགས་སུ་མེད་པར་ཡི་གེ་ཡའི་སྒོ་ནས་བསྟན་ཏོ། །རྡུལ་ཐམས་ཅད་དང་བྲལ་བའི་ཕྱིར་ར་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་རྡུལ་ལ་ར་ཛ་ཞེས་བྱ་སྟེ་རྡུལ་ཞེས་བྱ་བརྡུལ་ཕྲ་མོ་རྣམས་ལ་ཡང་བྱ་ལ་ཉོན་མོངས་པ་རྣམས་ལ་ཡང་བྱ་སྟེ་དེ་གཉིས་གང་ཡང་རུང་བ་དམིགས་སུ་མེད་པར་ཡི་གེ་རའི་སྒོ་ནས་བསྟན་པའོ། །མཚན་ཉིད་དམིགས་སུ་མེད་པའི་ཕྱིར་ལ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་མཚན་ཉིད་ལ་ལ་ཀྵ་ཎ་ཞེས་བྱ་སྟེ། འདུས་བྱས་དང་འདུས་མ་བྱས་ཀྱི་མཚན་ཉིད་ལ་སོགས་པ་དམིགས་སུ་མེད་པར་ཡི་གེ་ལའི་སྒོ་ནས་བསྟན་ཏོ། །རང་བཞིན་གྱིས་ཞི་བའི་ཕྱིར་ཤ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་རང་བཞིན་གྱིས་ཞི་བ་ལ་པྲ་ཀྲིཏ་ཤཱནྟི་ན་ཞེས་བྱ་བ་སྟེ། ཆོས་ཐམས་ཅད་སྟོང་པ་ཉིད་དང་རང་བཞིན་གྱིས་ཞི་བར་ཡི་གེ་ཤའི་སྒོ་ནས་བསྟན་ཏོ། །རང་བཞིན་གྱི་བེམས་པོའི་ཕྱིར་ཥ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་བེམས་པོ་ལ་ཥཊ་ཞེས་བྱ་སྟེ་མིག་དང་རྣ་བ་ལ་སོགས་པའི་དབང་པོས་ཟིན་པའི་ཆོས་རྣམས་ནི་ཡང་དག་པར་ན་ཟིན་པ་ཡིན་ཏེ་མིག་ལ་སོགས་པའི་དབང་པོ་རྣམས་བླུན་པས་ཚད་མ་མ་ཡིན་པའི་ཕྱིར་དེ་
དག་གིས་ཟིན་པའི་ཆོས་རྣམས་ཡོད་པ་མ་ཡིན་པར་ཥའི་སྒོ་ནས་སྟོན་པའོ། །ཥ་ཌའི་སྒོར་བ་ཏང་བ་ནི་ཌ་དང་ཥ་གཉིས་གནས་གཅིག་ནས་བྱུང་བ་དང་ཌའི་ལས་བྱེད་པའི་ཕྱིར་རོ། །བདེན་པ་ཐམས་ཅད་དམིགས་སུ་མེད་པའི་ཕྱིར་ས་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་བདེན་པ་ལ་ས་ཏྱ་ཞེས་བྱ་སྟེ་ཀུན་རྫོབ་དང་དོན་དམ་པའི་བདེན་པ་དམིགས་སུ་མེད་པར་ཡི་གེ་སའི་སྒོ་ནས་བསྟན་ཏོ། །རྒྱུ་དམིགས་སུ་མེད་པའི་ཕྱིར་ཧ་ནི་ཆོས་ཐམས་ཅད་ཀྱི་སྒོའོ་ཞེས་པ་ནི་རྒྱུ་ལ་ཧེ་ཏུ་ཞེས་བྱ་སྟེ་ཆོས་ཐམས་ཅད་ཀྱི་རྒྱུ་དམིགས་སུ་མེད་པར་ཡི་གེ་ཧའི་སྒོ་ནས་བསྟན་པ་སྟེ་མདོར་ན་ཡི་གེ་དེ་རྣམས་ཀྱིས་སྟོང་པ་ཉིད་ཀྱི་ཏིང་འཛིན་རྣམས་ཀྱི་སྒོ་སྟོན་པར་རིག་པར་བྱའོ། །གསང་བ་པའི་བདག་པོ་ང་དང་ཉ་དང་ཎ་དང་ན་ནི་ཏིང་ངེ་འཛིན་ཐམས་ཅད་ལ་དབང་བསྒྱུར་བ་སྟེ་ཞེས་པ་ནི་ཡི་གེ་དེ་རྣམས་ལ་ཀླད་ཀོར་གྱི་འཁོར་བཏགས་པས་སྟོང་བ་ཉིད་ཀྱི་མཚན་མ་ཡིན་པའི་ཕྱིར་ང་ནི་ཀ་ལ་སོགས་པའི་འཁོར་ཀུན་དབང་ངོ༌། །ཉ་ནི་ཙལ་སོགས་པའི་འཁོར་ཀུན་དུ་གཏོགས་སོ། །ཎ་ནི་ཌ་ལ་སོགས་པའི་འཁོར་ཀུན་དུ་གཏོགས་སོ། །ན་ནི་ཏ་ལ་སོགས་པའི་འཁོར་ཀུན་དུ་གཏོགས་སོ། །དེ་བཞིན་དུ་ཡི་གེ་དེ་རྣམས་ཡ་རལ་སོགས་པའི་སྟོང་པར་གཏོགས་ཏེ་སྟོང་པ་ཐམས་ཅད་ཀྱི་མཚན་ཉིད་ཡིན་པས་མཐུ་ཐམས་ཅད་དང་ལྡན་ལ། ཀུན་རྫོབ་ཏུ་སྒྲུབ་པའི་དགོས་པ་རྣམས་ཀྱང་མྱུར་དུ་འགྲུབ་པར་འགྱུར་ཏེ། དེ་བས་ན་མཐུ་ཐམས་ཅད་དང་ལྡན་པ་རབ་ཏུ་མྱུར་བར་དགོས་པའི་དོན་ཐམས་ཅད་རབ་ཏུ་སྒྲུབ་པར་བྱེད་པ་ཡིན་ནོ་ཞེས་གསུངས་པ་ཡིན་ནོ། །གསང་པ་པའི་བདག་པོའོ། །གསང་སྔགས་ཀྱི་ཚུལ་ངེ་འཛིན་གྱི་སྒོ་འདི་ནི་ཞེས་པ་ནས། སྔགས་པས་ཡིད་ལ་སེམས་ན་ནི། །འཆི་འཕོ་མེད་པའི་གནས་འཐོབ་བོ། །ཞེས་པའི་བར་གྱིས་སྔགས་ཀྱི་ཚུལ་ཀ་ལ་སོགས་པའི་ཡིག་འབྲུ་དེ་བཞིན་ཉིད་ལ་དམིགས་པའི་ཏིང་ངེ་འཛིན་གྱི་སྒོར་གྱུར་པར་བཤད་པ་རྣམས་ཀྱི་རྗེས་སུ་བསྔགས་པ་དང་རང་བཞིན་བསྟན་པ་སྟེ། དེ་ཡང་འཇུག་པའི་ཡོན་ཏན་དང་གནས་པའི་ཡོན་ཏན་དང་སྡང་བའི་རང་བཞིན་དུ་ཤེས་པར་བྱའོ། །དེ་ལ་རེ་བ་ཐམས་ཅད་ཡོངས་སུ་རྫོགས་པར་བྱེད་པ་དེ་བཞིན་གཤེགས་པ་ཐམས་ཅད་ཀྱི་རྣམ་པར་སྨིན་པའི་འབྲས་བུ་བསམ་གྱིས་མི་ཁྱབ་པ་ཞེས་པ་ནི་དེ་བཞིན་
།གཤེགས་པའི་རྒྱུའི་ཡོན་ཏན་དང་སྟོབས་དང་མི་འཇིགས་པ་ལ་སོགས་པ་ལས་གྱུར་པའོ་ཞེས་པའོ། །རྣམ་པ་ཐམས་ཅད་ཀྱི་མཆོག་དང་ལྡན་པ་གསང་སྔགས་ཀྱི་དེ་ཁོ་ན་ཉིད་ཀྱི་དོན་ངེས་པ་ཞེས་པ་ནི་འཇུག་པའི་རང་བཞིན་ཏེ། རྣམ་པ་ཐམས་ཅད་ཀྱི་མཆོག་དང་ལྡན་པ་ཞེས་པ་ནི་ཡི་གེ་ཨ་དང་ཀ་ལ་སོགས་པ་དེ་བཞིན་ཉིད་ལ་དམིགས་ནས་འཇུག་པའི་ཏིང་ངེ་འཛིན་གྱི་སྒོར་གྱུར་པའི་ཆོག་རྣམས་དང་ལྡན་པ་ཞེས་པའོ། །གསང་སྔགས་ཀྱི་དེ་ཁོ་ན་ཉིད་ཀྱི་དོན་ངེས་པ་ཞེས་པ་ནི་ཕྱིན་ཅི་མ་ལོག་པས་རིགས་པ་དང་ལུང་གིས་སུན་ཕྱིན་པའོ། །དུས་གསུམ་དུས་ལས་ཤིན་ཏུ་འདས། །མཁའ་ལྟར་དྲི་མ་མེད་པ་སྟེ། །བསམ་ཡས་སེམས་ཀྱི་ས་ལ་གནས། །ཞེས་པ་ནི་གནས་པའི་རང་བཞིན་དེ་དུས་གསུམ་ལས་ཤིན་ཏུ་འདས་པ་ནི་འདས་པ་དང་ལྔ་ལྟར་དང་མ་འོངས་པའི་དུས་དེ་ཡང་ཕུང་པོ་ལྔ་ལ་བྱ་བས་ན། ཕུང་པོ་ལྔ་ལས་ཤིན་ཏུ་འདས། །ཞེས་པའོ། །མཁའ་ལྟར་དྲི་མ་མེད་པ་སྟེ། །ཞེས་པ་ནི་ཤེས་བྱ་དང་ཉོན་མོངས་པའི་སྒྲིབ་པའི་དྲི་མ་རྣམས་དང་བྲལ་བ་ཞེས་པའོ། །བསམ་ཡས་སེམས་ཀྱི་ས་ལ་གནས། །ཞེས་པ་ནི་བསམ་པ་མེད་པ་ལས་སེམས་ཀྱིས་ལ་གནས་པས་ཏེ་སོ་སོ་རང་གིས་རིག་པའི་རང་བཞིན་ཞེས་པའོ། །ལས་དང་བྱ་བ་དག་ལས་བྱུང༌། །སྤྱད་པའི་ས་ནི་རྗེས་ཐོབ་ནས། །བསམ་ཡས་འབྲས་བུ་སྦྱིན་པར་བྱེད། །ཅེས་པ་ནི་ལངས་པའི་རང་བཞིན་ཏེ། ལས་དང་བྱ་བ་དག་ལས་བྱུང༌། །ཞེས་པ་ནི་སྟོང་པ་ཉིད་ལས་ལངས་ནས་སེམས་ཅན་རྣམས་ལ་ཕན་པའི་ཕྱིར། ཀུན་དུ་བཟླས་པའི་ཡན་ལག་བཞི་ལ་སོགས་པ་ལུས་དང་ངག་གི་ལས་རྣམས་ཀྱང་སྟོན་ཞེས་པའོ། །སྤྱད་པའི་ས་ནི་རྗེས་ཐོབ་ནས། །བསམ་ཡས་འབྲས་བུ་སྦྱིན་པར་བྱེད། །ཅེས་པའི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པའི་སྤྱད་པ་རྣམས་བག་ཀྱིས་སྤྱད་ན་མངོན་པར་མཐོ་བ་དང་ངེས་པར་ལེགས་པ་བསམ་གྱིས་མི་ཁྱབ་པ་སྦྱིན་པར་བྱེད་དོ་ཞེས་པའོ། །འདི་ནི་དེ་ཉིད་དམ་པ་སྟེ། །སངས་རྒྱས་རྣམས་ཀྱིས་རབ་ཏུ་བསྟན། །ཞེས་པ་ནི་གོང་དུ་བཤད་པ་རྣམས་བསྡུས་པའི་ཚིག་སྟེ། །སངས་རྒྱས་རྣམས་ཀྱིས་རབ་ཏུ་བསྟན། །ཞེས་པའོ། །གསང་སྔགས་ཆོ་ག་འདི་ཤེས་ན། །སྔགས་པ་དངོས་གྲུབ་ཐོབ་པར་འགྱུར། །ཞེས་པ་ནི་སྔགས་ཀྱི་རང་བཞིན་སྟོང་པ་
ཉིད་བྱང་ཆུབ་ཀྱི་སེམས་སྒོམ་པ་ཞེས་པ་དང་སྔགས་ཀྱི་ཡི་གེ་ལས་ལྷའི་གཟུགས་སུ་སྦྱར་ཞིང་ཡན་ལག་བཞི་པའི་བཟླས་པ་ལ་སོགས་པའི་ཆོ་ག་ཤེས་ན་གྲུབ་པ་ཐོབ་པར་འགྱུར་ཞེས་པའོ། །སྒྲ་ཞེས་བྱ་བ་དེ་ཉིད་མཆོག །གསང་སྔགས་རྣམས་ཀྱི་གསང་སྔགས་མཚན། །སྔགས་པས་ཡིད་ལ་སེམས་ན་ནི། །འཆི་འཕོ་མེད་པའི་གནས་འཐོབ་བོ། །ཞེས་པ་ནི་སྔགས་ཀྱི་ཡི་གེའི་སྒྲའི་སྒོ་ནས་བསྟན་པའི་དོན་དེ་བཟླས་པ་ལ་སོགས་པ་ལ་མི་ལྟོས་པར་བསྒོམས་པས་མྱ་ངན་ལས་འདས་པ་འཆི་འཕོ་མེད་པའི་གནས་འཐོབ་ཅེས་པའོ། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། ཐུན་མོང་མ་ལགས་པའི་ཡོན་ཏན་དང་ལྡན་པར་འགྱུར་རོ་ཞེས་པའི་བར་གྱིས་གོང་དུ་བཤད་པའི་དོན་རྣམས་ཕྱག་ན་རྡོ་རྗེས་གོ་བར་བསྟན་པ་དང༌། མ་འོངས་པའི་འགྲོ་བ་རྣམས་སྤྲོ་བ་སྐྱེད་པ་དང༌། དཀྱིལ་འཁོར་གྱི་ཡོ་བྱད་བཤད་པའི་ལྷག་མ་རྣམས་བཤད་པར་གསོལ་བའོ། །བཅོམ་ལྡན་འདས་ཀྱིས་གསང་སྔགས་ཀྱི་མཚན་ཉིད་ཀྱི་ཚུལ་བསམ་གྱིས་མི་ཁྱབ་པའི་ཆོས་ཀྱི་རྣམ་གྲངས་བསྟན་པ་བཅོམ་ལྡན་འདས་ངོ་མཚར་ལགས་སོ་ཞེས་པ་ནི་ཡི་ག་ཀ་ལ་སོགས་པ་སྟོང་པ་ཉིད་ཀྱི་ཏིང་ངེ་འཛིན་དེ་དག་གི་དོན་བསམ་དུ་མེད་པ་དེ་བདག་གིས་གོ་སྟེ་ངོ་མཚར་ཆེའོ་ཞེས་པའོ། །དེ་ནི་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ལགས་ཏེ་ཞེས་པ་ནི་ཉན་ཐོས་གང་ཟག་ལ་བདག་མེད་པ་རྟོགས་པ་ཙམ་དང་རང་སངས་རྒྱས་རྒྱུ་དང་འབྲས་བུ་བཤིག་ནས་ངག་དགག་པ་ཙམ་ཡིན་པས་དེ་བཞིན་ཉིད་པ་དམིགས་པའི་ཏིང་ངེ་འཛིན་གྱི་སྤྱོད་ཡུལ་ཅན་མ་ཡིན་ཞེས་པའོ། །གང་དག་གསང་སྔགས་ཀྱི་ཚུལ་འདི་ལ་དད་པའི་སེམས་ཅན་དེ་དག་ཀྱང་ཐུན་མོང་མ་ལགས་པའི་ཡོན་ཏན་དང་ལྡན་པར་འགྱུར་རོ་ཞེས་པ་རྣམས་ནི་མ་འོངས་པའི་འགྲོ་བ་རྣམས་སྤྲོ་བ་སྐྱེད་པའོ། །བཅོམ་ལྡན་འདས་གཞན་ཡང་དཀྱིལ་འཁོར་གྱི་ཡོ་བྱད་ཀྱི་ཆོ་ག་བཤད་དུ་གསོལ་ཞེས་པ་ནི་དཀྱིལ་འཁོར་བྲིས་ཟིན་ནས་མཆོད་པ་ལ་སོགས་པ་བྱ་བར་རིགས་ཏེ། དེ་བས་ན་མཆོད་པའི་ཏིང་ངེ་འཛིན་དང་ཡིད་ཀྱི་མཆོད་པ་དང་ཐལ་མོ་སྦྱར་བའི་མཆོད་པ་དང༌། བྱམས་པ་དང་སྙིང་རྗེའི་མཆོད་པ་དང༌། འཇིག་རྟེན་གྱི་དྲི་དང་མེ་ཏོག་ལ་སོགས་པའི་མཆོད་པས་ཏེ། མཆོད་པ་རྣམ་པ་བཞི་པོ་དེ་དང་དཀྱིལ་འཁོར་
བསྲུང་བ་དང༌། དཀྱིལ་འཁོར་གྱི་ལྷ་རྣམས་བཞུགས་སུ་གསོལ་བ་རྣམས་བཤད་དུ་གསོལ་ཞེས་པའོ། །དེ་རྣམས་ལས་ཀྱང་མ་ལ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་སྐབས་ནས་འབྱུང༌། ལ་ལ་ནི་ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་སྐབས་ནས་འབྱུང༌། །ལ་ལ་ནི་གསང་བ་པའི་དཀྱིལ་འཁོར་ལས་འབྱུང་སྟེ། འདི་ནས་མི་འབྱུང་བ་འོག་མ་གཉིས་ཀྱི་སྐབས་ནས་འབྱུང་བ་དེ་ཡང་སྐབས་འདིར་སྦྱར་བར་བྱ་ལ། འདི་ནས་འབྱུང་ལ་འོག་མ་གཉིས་ཀྱི་ནང་ནས་མི་འབྱུང་བ་དེ་ཡང་དེ་བཞིན་དུ་སྦྱར་བར་བྱའོ། །དེ་དག་གི་རིམ་པ་ཡང་ལྷ་རྣམས་དཀྱིལ་འཁོར་དུ་བྱིན་གྱིས་བརླབ་པ་ལ་སྤྱན་དྲང་མི་དགོས་པའི་རིགས་པ་ལ་སོགས་པ་བསྡུས་པའི་དོན་གྱི་ནང་དུབ་ཤད་པས་འདིར་མ་སྨོས་སོ། །དེ་ནས་སྔགས་པ་དེ་ཡིས་སུ། །ཞེས་པ་ནས། སེམས་དཔའ་ཆེན་པོ་ཕལ་རྣམས་ལ། །ཡ་རེ་དབུལ་བར་རབ་ཏུ་བསྒྲགས། །ཞེས་པའི་བར་གྱིས་དྲི་ལ་སོགས་པ་ཕྱིའི་མཆོད་པ་རྣམས་བཤད་པ་སྟེ་ཕྱིའི་མཆོད་པ་དེ་རྣམས་ཀྱང་སྔགས་པ་དམིགས་པ་ཅན་གྱིས་ཚུལ་བཞིན་མ་བྱས་ན་འཕགས་པའི་ལྷ་རྣམས་འཁྲུག་པ་རིམ་འགྱུར་ན་ཡང་དེའི་འཁོར་ཕལ་པ་རྣམས་འཁྲུགས་པར་འགྱུར་ཏེ་འཕྲལ་དུ་གནོད་མི་བྱེད་ཀྱང་ཇི་ལྟར་བསམས་པའི་དོན་རྣམས་འགྲུབ་པར་མི་བྱེད་ཅིང་ཕན་འདོགས་པར་མི་འགྱུར་རོ་ཞེས་རྒྱུད་གཞན་ལས་འབྱུང་བས་མཆོད་པ་དེ་རྣམས་ནན་ཏན་དུ་བྱའོ། །སློབ་དཔོན་ཟབ་ཅིང་རྒྱ་ཆེ་བ་ལ་མོས་པས་ཀྱང་གཙོ་བོར་ཡིད་ཀྱི་མཆོད་པ་བྱ་སྟེ། སློབ་མ་དམིགས་པ་ཅན་རྣམས་ཀྱི་ཡིད་དང་སྦྱར་བའི་ཕྱིར་ཕྱིའི་མཆོད་པ་འདི་རྣམས་ཀྱང་མ་ཆགས་པ་བཞིན་དུ་བྱའོ། །མཆོད་པའི་ཏིང་ངེ་འཛིན་དང་ཡིད་ཀྱི་མཆོད་པ་དེ་དག་ནི་ཡི་གེ་འཁོར་ལོ་བསྐོར་བའི་དཀྱིལ་འཁོར་དང་གསང་བའི་དཀྱིལ་འཁོར་དག་ཏུ་བལྟའོ། །མེ་ཏོག་སེར་པོ་དཀར་པོ་དམར། །ཡིད་དུ་འོང་བས་ནན་ཏན་དུ། །ལྷ་ནམས་ལ་ནི་མཆོད་པར་བྱ། །ཞེས་པ་ནས། ཡིད་དུ་འོང་ཞིང་བལྟ་ན་སྡུག །བཀྲ་ཤིས་པ་ལ་སྔགས་པ་ཡིས། །མཁས་པས་ནན་ཏན་མཆོད་པར་བྱ། །ཞེས་པའི་བར་གྱིས་མེ་ཏོག་གི་མཆོད་པ་རྣམས་བཤད་དེ། མེ་ཏོག་སེར་པོ་དཀར་པོ་དམར། །ཞེས་པ་ནི་མེ་ཏོག་གི་རིགས་སྤྱིར་སྨོས་པ་ཡིན་ལ། པདྨའམ་ཡང་ན་ཨུཏྤལ། །ཞེས་པ་ལ་སོགས་པ་
ནི་སྤྱིར་སྨོས་པ་དེ་དག་ཉིད་ལས་སོ་སོའི་མིང་སྨོས་པའོ། །ཡིད་དུ་འོང་ཞིང་ནི་དྲི་ཞིམ་པའོ། །བལྟ་ན་སྡུག་ཅེས་པ་ནི་ཁ་དོག་དང་དབྱིབས་མཛེས་པའོ། །བཀྲ་ཤིས་པ་ནི་ལྷ་རྣམས་མཆོད་པ་དང་མི་འགལ་བ་སྟེ་འདིར་ནི་མདོ་ཙམ་དུ་སྨོས་ཀྱི་མིང་གིས་སྨོས་པ་ལས་གཞན་པ་ཡང་ཡིད་དུ་འོང་ཞིང་བཀྲ་ཤིས་པས་མཆོད་པར་བྱའོ། །ཙནྡན་ན་ཏ་ཀ་ར་ཞེས་པ་ནས། །སྣ་ཚོགས་ཡིད་དུ་འོང་བ་འབུལ། །ཞེས་པའི་བར་གྱིས་དྲི་ཆབ་ཀྱི་མཆོད་པ་རྣམས་ཏེ་ཡིད་འོང་ཞེས་པ་ནི་འདིར་མིང་གིས་སྨོས་པ་ལས་གཞན་ཡང་ཡིད་དུ་འོང་བ་དྲི་ཞིམ་པའི་དྲིའི་རིགས་རྣམས་གང་ཡང་རུང་བ་དབུལ་ལོ་ཞེས་པ་སྟེ་དེ་རྣམས་ལས་ཀྱང་ལ་ལ་ནི་གཅིག་པུ་སྦྱར། ལ་ལ་ནི་བསྡུས་ཏེ་སྦྱར་བར་ཤེས་པར་བྱའོ། །དྲིའི་མཆོད་པ་དབུལ་བའི་སྔོན་དུ་ཡང་མེ་ཏོག་གི་མཆོད་པ་རྣམས་དབུལ་བར་བྱའོ། །ཨ་ག་རུའམ་སྒྲོན་ཤིང་ངམ། །ཞེས་པ་ནས། གཞན་ཡང་བདུག་སྤོས་སྣ་ཚོགས་པ། །བཀྲ་ཤིས་འཇིག་རྟེན་རྣམ་པར་གྲགས། །ཡིད་འོང་སྔགས་པས་ཆོ་ག་བཞིན། །ལྷ་རྣམས་ལ་ནི་འབུལ་བར་བྱ། །ཞེས་པའི་བར་གྱིས་བདུག་པའི་མཆོད་པ་རྣམས་བཤད་དེ། དེ་རྣམས་ཀྱང་ལ་ལ་ནི་གཅིག་པུ་སྦྱར། ལ་ལ་ནི་བསྡུས་ཏེ་སྦྱར་བར་ཤེས་པར་བྱའོ། །གཞན་ཡང་བདུག་སྤོས་སྣ་ཚོགས་པ། །བཀྲ་ཤིས་འཇིག་རྟེན་རྣམ་པར་གྲགས། །ཡིད་འོང་སྔགས་པས་ཆོ་ག་བཞིན། །ལྷ་རྣམས་ལ་ནི་དབུལ་བར་བྱ། །ཞེས་པ་ནི་འདིར་མིང་གིས་སྨོས་པ་ལས་གཞན་ཡང་འཇིག་རྟེན་དུ་གྲགས་པའི་བདུག་པ་སྣ་ཚོགས་པ་ལྷ་རྣམས་མཆོད་པ་དང་མི་འགལ་ཞིང་རུང་བ་ཡང་དབུལ་བར་བྱ་ཞེས་པའོ། །དེ་ནས་གཞན་ཡང་སེམས་དཔའ་ཆེ། །ལྷ་བཤོས་ལས་ཀྱི་ཆོ་ག་ཉོན། །ཞེས་པ་ནས། ཞོ་དང་འོ་མ་རྒྱས་པར་དབུལ། །ཞེས་པའི་བར་གྱིས་ལྷ་བཤོས་ཀྱི་མཆོད་པ་རྣམས་བཤད་པ་སྟེ། དེ་རྣམས་ཀྱང་ཟས་དང་བཟའ་བ་དང་བཅའ་བ་དང་བཏུང་བའི་དངོས་པོར་ཤེས་པར་བྱ་སྟེ། དེ་ལ་ཟས་ནི་འོ་ཐུག་དང་འབྲས་ཆན་ལ་སོགས་པའོ། །བཟའ་བ་ནི་ལ་དུ་ལ་སོགས་པའོ། །བཅའ་བ་ནི་ཤིང་ཐོག་ལ་སོགས་པའོ། །བཏུང་བ་ནི་ཞོ་དང་འོ་མ་ལ་སོགས་པའོ། །རྒྱས་པར་ཞེས་པ་ནི་དེ་རྣམས་བཟང་ཞིང་མང་དུ་དབུལ་བའོ། །མར་མེ་རྣམ་པ་སྣ་ཚོགས་པ། །ཞེས་པ་ནས། རབ་ཏུ་བཀང་སྟེ་དབུལ་བར་བྱ། །ཞེས་པའི་བར་གྱིས་མར་མེའི་མཆོད་པ་བཤད་པ་སྟེ་
གཙང་ཞིང་ཞེས་པ་ནི་ཉ་ཚིལ་ལ་སོགས་པ་མི་གཙང་བ་མེད་པ་དང་རས་ཀྱི་སྡོང་བུ་དྲི་མ་མེད་པ་ཞེས་པའོ། །ཕྱོགས་སུ་གདུགས་དང་བ་དན་རྣམས། །ཁ་དོག་སྣ་ཚོགས་རབ་ཏུ་བསྒྲགས། །ཞེས་པ་ནི་དཀྱིལ་འཁོར་གྱི་ཕྱིའི་སྒོ་ཁར་གདུགས་དཀར་པོ་གཅིག་གཞག་གོ །ངོས་བཞི་དང་གྲྭ་བཞིའི་ཕྱོགས་སོ་སོར་ཁ་དོག་དང་མཐུན་པའི་བ་དན་རྣམས་ང་སྒྲེང་བར་བྱའོ་ཞེས་པའོ། །རྟ་བབས་བཟང་པོ་རྣམས་ཀྱང་ནི། །དྲིལ་བུ་དང་བཅས་རབ་ཏུ་དབུལ། །ཞེས་པ་ནི་ཕྱིའི་སྒོ་ཁར་ནི་ཤིང་ལ་སོགས་པ་ལས་བྱས་པའི་རྟ་བབས་བཟང་པོ་དྲིལ་བུ་དག་གིས་བརྒྱན་པ་ཞེས་པའོ། །དེ་ནས་བུམ་པ་བརྒྱད་དམ་ནི། ཞེས་པ་ནས། མགྲིན་པ་རས་ཀྱིས་བཅིངས་པ་རྣམས། །མཁས་པས་རྣམ་པར་དགོད་པར་བྱ། །ཞེས་པའི་བར་གྱིས་བུམ་པ་རྣམས་དབུལ་བ་སྟེ། ནག་པོ་ལ་སོགས་པའི་སྐྱོན་མེད་ཅིང་གཞུང་ལས་བྱུང་བའི་མཚན་ཉིད་དང་ལྡན་པ་རྣམས་དབུལ་ལོ། །དེ་རྣམས་གསང་བ་སྤྱིའི་རྒྱུད་ལས་འབྱུང་བ་བཞིན་དུ་ལྷ་རྣམས་སོ་སོ་ལ་བསྔོས་པར་མི་བྱ་བར་སྤྱིར་དགོད་པ་ནི་བྱང་ཆུབ་སེམས་དཔའི་སྔགས་ཀྱིས་བཏབ་སྟེ་སློབ་མ་རྣམས་དབང་བསྐུར་བའི་ཚེ་བླུགས་པར་བྱ་བའི་ཕྱིར་རོ། །ལྷ་ཡི་གཙོ་བོ་རྣམས་ལ་ནི། །རས་ནི་ཟུང་ར་རུང་རེ་དབུལ། །ཞེས་པ་ནི་དཀྱིལ་འཁོར་རིམ་པ་གསུམ་ཆར་གྱི་སྒོ་ཁྱུད་རྣམས་ཀྱི་ནང་ན་བཞུགས་པའི་གཙོ་བོ་རྣམས་དང་དབུས་ན་བདུན་པ་ཞུགས་པའི་བཅོམ་ལྡན་འདས་རྣམ་པར་སྣང་མཛད་ལ་རས་ཟུང་རེ་རེ་དབུལ་ལོ་ཞེས་པའོ། །ཐམས་ཅད་ལ་ཟུང་རེ་མི་འབྱོར་ན་སྤྱིར་ཟུང་གཅིག་དབུལ་བར་ཤེས་པར་བྱའོ། །སེམས་དཔའ་ཆེན་པོ་ཕལ་རྣམས་ལ། །ཡ་རེ་དབུལ་བར་རབ་ཏུ་བསྒྲགས། །ཞེས་པ་ནི་དཀྱིལ་འཁོར་གྱི་ལྷ་ཕལ་པ་རྣམས་ལ་ཡ་རེ་རེ་དབུལ་ཞེས་པ་སྟེ། ཐམས་ཅད་ལ་ཡ་རེ་མ་འབྱོར་ན་སྤྱིར་ཡ་གཅིག་དབུལ་བར་ཤེས་པར་བྱའོ། །དེ་རྣམས་ཀྱང་བུམ་པའི་མགྲིན་པ་དཀྲི་བ་མ་གཏོགས་པའི་རས་གཞན་ཡིན་པར་ཤེས་པར་བྱའོ། །སློབ་མ་དཀྱིལ་འཁོར་དྲུང་བཀུག་སྟེ། །སྔགས་པས་ཆུ་ཡི་བསང་གཏོང་བྱས། །ཞེས་པ་ནས། སློབ་མ་སྡིག་དང་བརླ་བ་ཀུན། །དེ་ལྟར་ལེགས་པར་བཙུད་ནས་ནི། །ཞེས་པའི་བར་གྱིས་སློབ་མ་རྣམས་དཀྱིལ་འཁོར་དུ་གཟུང་བའི་ཆོག་ཤད་དེ། དེ་ཡང་སྔར་མཆོད་པའི་ཚེ་སློབ་དཔོན་ལས་ཀྱི་རྡོ་རྗེ་སེམས་
དཔར་བསྒྱུར་བ་ལས་སློབ་མ་དཀྱིལ་འཁོར་དུ་འཛུད་པའི་ཚེ་འོག་ནས་འབྱུང་བའི་སློབ་དཔོན་གྱི་ཏིང་ངེ་འཛིན་དུ་བསྒྱུར་ཏེ། ཐོག་མ་ཉིད་དུ་དཀྱིལ་འཁོར་གྱི་ཕྱིར་རའི་སྒོར་སློབ་མ་རྣམས་ཀྱི་བགེགས་བསལ་བའི་ཕྱིར་ཁམས་གསུམ་རྣམ་པར་རྒྱལ་བས་བསྔགས་པའི་བུམ་པའི་ཆུས་གཏོར་ཏེ། སློབ་མ་རྣམས་ཀྱི་གདོང་གཡོགས་ཀྱི་རས་ལ་དམ་ཚིག་གསུམ་གྱི་ཕྱག་རྒྱ་བཅིངས་ནས་དམ་ཚིག་གསུམ་གྱི་སྔགས་ལན་གསུམ་བཟླས་པས་སློབ་མའི་གདོང་གཡོགས་པར་བྱའོ། །དེ་ནས་སློབ་མའི་ལག་པར་དྲི་དང་མེ་ཏོག་བྱིན་ལ་བྱང་ཆུབ་ཀྱི་སེམས་བསྐྱེད་དེ། དེ་ནས་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་ཆོས་ཀྱི་དབྱིངས་སུ་བྱིན་གྱིས་རློབ་བོ། དེ་ནས་ཆོས་ཀྱི་འཁོར་ལོའི་ཕྱག་རྒྱ་དང་སྔགས་དང་རྡོ་རྗེ་གོ་ཆའི་སྔགས་ཀྱིས་སློབ་མ་དེ་རྡོ་རྗེ་སེམས་དཔར་བྱིན་གྱིས་བརླབས་ལ། སྤྱི་བོར་ཆོས་ཀྱི་དབྱིངས་ཀྱི་ཡི་གེ་རཾ་ཁ་དོག་དཀར་པོ་ཀླད་ཀོར་དང་བཅས་པ་འབར་བ་ཅན་བསམས་ཏེ། དེ་ནས་དམ་ཚིག་གསུམ་གྱི་ཕྱག་རྒྱ་བཅིངས་ནས་དེའི་སྔགས་ཟློས་སུ་བཅུག་ལ་མེ་ཏོག་འདོར་དུ་གཞུག་གོ །དེ་ནས་མེ་ཏོག་གང་དུ་བབ་པའི་ལྷ་དེ་སྔགས་པས་སློབ་མ་དེ་ལ་སྦྱིན་ཏེ། དེ་ནས་དཀྱིལ་འཁོར་ལན་གསུམ་དུ་བསྐོར་དུ་གཞུག་གོ །དེ་རྣམས་ནི་དཀྱིལ་འཁོར་དུ་གཟུད་པའི་ཆོ་གའི་རིམ་པ་མདོར་བཤད་པའོ། །ཡན་ལག་སོ་སོར་བཤད་པ་ནི། བྱང་ཆུབ་སེམས་ཀྱང་འཛིན་དུ་གཞུག །ཅེས་པ་སྟོན་པ་བྱང་ཆུབ་ཀྱི་སེམས་འཛིན་དུ་གཞུག་པའོ། །དེ་བཞིན་གཤེགས་པ་དྲན་བྱས་ནས། །ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་བདག་ལ་དགོངས་སུ་གསོལ་ཞེས་སྨྲ་བར་བྱའོ། །སྨོན་པ་བྱང་ཆུབ་ཏུ་སེམས་བསྐྱེད་པ་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མེད་འདི་ཞེས་བགྱི་བས་དུས་འདི་ནས་བཟུང་སྟེ་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་ཇི་ལྟར་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་རྣམས་ཀྱིས་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ་རང་གི་སེམས་གདོང་མ་ནས་མ་སྐྱེས་པ་སྟོང་པ་ཉིད་ཀྱི་རང་བཞིན་གྱི་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་བདག་གིས་ཀྱང་བྱང་ཆུབ་ཏུ་སེམས་བསྐྱེད་པར་བགྱིའོ་ཞེས་པའོ། །དེ་ནས་
རྒྱལ་བའི་རིགས་དགེ་ལ། །ཐམས་ཅད་རབ་ཏུ་བསྐྱེད་པར་འགྱུར། །ཞེས་པ་ནི་དེ་ལྟར་སྨོན་པ་བྱང་ཆུབ་ཀྱི་སེམས་བསྐྱེད་པས་ས་བོན་བཏབ་པའི་སྒོ་ནས་རྒྱལ་བའི་རིགས་དགེ་བར་སྐྱེ་བར་འགྱུར་རོ། །རྒྱལ་བའི་རིགས་ཞེས་པ་ནི་ཐབས་དང་ཤེས་རབ་དང་ལྡན་པ་སྟེ། དེ་ལ་ཤེས་རབ་ནི་ཆོས་ཐམས་ཅད་སྟོང་པ་ཉིད་ཀྱི་རང་བཞིན་གྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཐབས་ནི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་རྣམས་ཏེ། དེ་བཞིན་གཤེགས་པ་རྣམས་ཀྱང་དེ་ལས་བྱུང་བས་ན་དེ་ནི་རྒྱལ་བའི་རིགས་ཞེས་བྱའོ། །ཆོས་ཀྱི་དབྱིངས་ལས་བྱུང་བ་ཡི། །ཕྱག་རྒྱ་དེ་དག་རྣམས་ལ་བཅིང༌། །ཞེས་པ་ནི་འཇུག་པའི་བྱང་ཆུབ་ཀྱི་སེམས་དང་གནས་པའི་བྱང་ཆུབ་ཀྱི་སེམས་བསྐྱེད་པ་སྟེ། ཆོས་ཀྱི་དབྱིངས་སྟོང་པ་ཉིད་ཀྱི་སྔགས་དང་ཕྱག་རྒྱ་དེས་སློབ་མ་དེ་སྟོང་པ་ཉིད་དུ་བྱིན་གྱིས་བརླབ་པོ། །ཆོས་ཀྱི་འཁོར་ལོ་འང་བཅིངས་ནས་ནི། །རྡོ་རྗེ་སེམས་དཔར་བྱིན་གྱིས་བརླབ། །ཅེས་པ་ནི་དེ་ལྟར་སྟོང་པ་ཉིད་ཀྱི་རང་བཞིན་དུ་རྟོགས་ནས་སླར་ཀུན་རྫོབ་ཀྱིས་གོ་ནས་སེམས་ཅན་རྣམས་ལ་ཆོས་ཀྱི་འཁོར་ལོ་བསྐོར་བའི་ཕྱིར་ཆོས་ཀྱི་འཁོར་ལོའི་སྔགས་དང་ཕྱག་རྒྱས་རྡོ་རྗེ་སེམས་དཔའི་སྐུར་བསྒྱུར་རོ། །རྡོ་རྗེ་སེམས་དཔའ་ཞེས་པ་ནི་རང་གི་སེམས་རྡོ་རྗེ་དང་འདྲ་བར་བརྟན་པ་ཅིས་ཀྱང་ཟིལ་གྱིས་མི་ནོན་པ་སྟེ། དེ་ཡང་ཟླ་བའི་དཀྱིལ་འཁོར་གྱི་ནང་ན་བཞུགས་པ་ཟླ་བའི་དཀྱིལ་འཁོར་ཡང་འོད་ཀྱི་དཀྱིལ་འཁོར་དང་ལྡན་པ་དབུ་རྒྱན་དང་ལྡན་ཞིང་རྒྱན་སྣ་ཚོགས་ཀྱིས་བརྒྱན་པའི་སྐུའོ། །དེའི་སྙིང་གར་ཡང་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་རྩེ་ལྔ་པ་ཡེ་ཤེས་ལྔའི་རང་བཞིན་ཅན་བསམ་པར་བྱའོ། །དེ་ནས་སངས་རྒྱས་ཀུན་གྱི་ནི། །དམ་ཚིག་སྡོམ་བརྩོན་ཅན་གྱིས་བཅིང༌། །དེ་ནས་སྔགས་ཀྱི་ཆོ་ག་བཞིན། །རས་ལ་ལན་གསུམ་གདབ་པར་བྱ། །ཞེས་པ་ནི་སློབ་དཔོན་གྱིས་གདོང་དགབ་པའི་རས་ལ་དམ་ཚིག་གསུམ་གྱི་ཕྱག་རྒྱ་དང་སྔགས་ཀྱིས་གདབ་སྟེ། དེ་ཡང་སྐབས་འདིར་བཤད་མོད་ཀྱི་ལས་འདི་རྣམས་དང་པོར་ཤེས་པར་བྱའོ། །དེ་དག་གི་གདོང་ཡང་དག་པ། །ཅེས་པ་ནི་དམ་ཚིག་གིས་བཏབ་པའི་རས་དེས་སློབ་མ་དེ་རྣམས་ཀྱི་གདོང་དག་པར་བྱ་སྟེ། གདོང་དགབ་པ་དེ་ཡང་དེ་དག་སྔར་ཐ་མལ་གྱི་མིག་ཏུ་འདུག་པ་ལས་དམ་ཚིག་གི་སྔགས་དང་
ཕྱག་རྒྱས་བྱིན་གྱིས་བརླབས་པས་བཀག་ནས་ཡེ་ཤེས་ཀྱི་མིག་ཏུ་བསྒྱུར་བར་གྱུར་ཏེ་ཡེ་ཤེས་ཀྱི་མིག་དེ་ཕྱེ་ནས་བཅོམ་ལྡན་འདས་ཀྱི་སྐུ་མི་ཟད་པའི་རྡོ་རྗེའི་རྒྱན་གྱི་དཀྱིལ་འཁོར་དེ་བསྟན་པའི་ཕྱིར་རོ། །སྙིང་རྗེར་གྱུར་པའི་ཡིད་ཀྱིས་སུ། །ཞེས་པ་ནི་སྙིང་རྗེ་དང་ལྡན་པས་བྱ་བ་ཡིན་གྱིས་དེ་ཁེ་དང་བཀུར་སྟིའི་ཕྱིར་མ་ཡིན་ནོ་ཞེས་པའོ། །དམ་ཚིག་ལན་གསུམ་བཟླས་ནས་ནི། །ཞེས་པ་ནི་མེ་ཏོག་འདོར་དུ་གཞུག་ཅེས་པ་དང་སྦྱར་ཏེ་དམ་ཚིག་གསུམ་གྱི་ཕྱག་རྒྱ་བཅིངས་པ་སྔགས་ཀྱང་ལན་གསུམ་བཟླས་ཏེ་མེ་ཏོག་འདོར་དུ་གཞུག་གོ །དམ་ཚིག་གསུམ་ཞེས་པ་ནི་བཅོམ་ལྡན་འདས་ཀྱི་སྐུ་མི་ཟད་པ་དང་གསུང་མི་ཟད་པ་དང་ཐུགས་མི་ཟད་པའི་རྡོ་རྗེའི་རྒྱན་གྱི་དཀྱིལ་འཁོར་ཏེ། དེའི་བྱིན་གྱི་རླབས་སུ་གྱུར་པ་ནི་དམ་ཚིག་གི་སྔགས་དང་ཕྱག་རྒྱ་སྟེ། ཕྱག་རྒྱ་བཅིངས་ཤིང་དེའི་སྔགས་ལན་གསུམ་བཟླས་ན་སྐུ་ལ་སོགས་པ་མི་ཟད་པའི་རྡོ་རྗེའི་རྒྱན་དེ་མཐོང་བར་འགྱུར་རོ། །དེ་བས་ན་སྔགས་པ་རྟག་ཏུ་ཟློས་པ་ལ་སོགས་པ་བྱེད་པའི་ཚེ་ཡང་དམ་ཚིག་གསུམ་གྱི་ཕྱག་རྒྱ་བཅིང་བ་དེའི་ཕྱིར་དུ་ཡིན་ལ། དམ་ཚིག་གསུམ་གྱི་ཕྱག་རྒྱ་བཅིངས་ཏེ་སྔགས་ལན་གསུམ་དུ་བཟླས་ན་དམ་ཚིག་ཉམས་པ་ལ་སྒོས་པ་སླར་འཚོ་བར་འགྱུར་རོ། །སྤྱི་བོར་ཡི་གེ་ར་ཞེས་པ། ཀླད་ཀྱི་འཁོར་བཅས་བརྗིད་དང་ལྡན། །འབར་བའི་ཕྲེང་བ་རྣམ་པར་འཕྲོ། །ཟླ་བ་འཆར་ཀ་ལྟ་བུ་ཡི། །ཁ་དོག་དཀར་པོ་གཞག་པར་བྱ། །ཞེས་པ་ནི་སློབ་མའི་སྤྱི་བོར་ཡི་གེ་ར་ཆོས་ཀྱི་དབྱིངས་ཀྱི་ཡེ་ཤེས་བསམ་སྟེ་ར་ནི་ཤེས་བྱ་དང་ཉོན་མོངས་པའི་སྒྲིབ་པ་དང་བྲལ་བའི་རང་བཞིན་ནོ། །ཀླད་ཀོར་གཞག་པ་ནི་སྟོང་པ་ཉིད་ཀྱི་རང་བཞིན་ནོ། །འབར་བའི་ཕྲེང་བ་དང་བཅས་པ་ནི་རྒྱུའི་ཡེ་ཤེས་ཀྱི་རང་བཞིན་ནོ། །ཟླ་བ་འཆར་ཀ་ལྟ་བུ་ནི་ཟླ་བ་འཆར་བའི་ཚེ་རང་བཞིན་དཀར་བ་ལ་ཅུང་ཟད་རྩ་དམར་བར་བསྟན་པ་སྟེ། དཀར་བ་ནི་རང་བཞིན་གྱིས་དག་པའོ། །རྩ་དམར་བ་ནི་སེམས་ཅང་ཡི་དོན་ལ་ཆགས་པའོ། །སྐྱོབ་པ་ཀུན་གྱི་སྤྱན་སྔར་ནི། །དེ་ནས་མེ་ཏོག་འདོར་དུ་གཞུག །མེ་ཏོག་གང་ལ་བབ་པ་དེ། །སྔགས་པས་དེ་ལ་སྦྱིན་པར་བྱ། །ཞེས་པ་ནི་སྔོན་དཀྱིལ་འཁོར་དུ་མ་ཞུགས་ཤིང་ལྷ་མ་མནོས་པའམ། དཀྱིལ་འཁོར་དུ་ཞུགས་ཤིང་ལྷམ་མནོས་སམ། ལྷ་མནོས་ཏེ་བཏང་བ་རྣམས་གདོད་ལྷ་མནོས་
པར་བྱ་ན་མེ་ཏོག་གདོད་དེ་ལྟར་དོར་བར་བྱ་ལ། དེ་ལྟར་ལྷ་མནོས་ཟིན་ཏེ་གདོད་ནོད་མི་དགོས་ན་གདོང་གཡོགས་བཀྲོལ་ལ་མེ་ཏོག་དེ་དག་གི་ལྷའམ་བཅོམ་ལྡན་འདས་རྣམ་པར་སྣང་མཛད་ལ་བུལ་བར་བྱ་སྟེ། དེ་དག་ཀྱང་ཞིབ་ཏུ་ནི་བསྡུས་པའི་དོན་དུ་བཤད་ཟིན་ཏོ། །མེ་ཏོག་དོར་ནས་ལྷ་གང་ལ་བབ་པ་དེའི་ཆ་བརྟག་པ་ཡང་གསང་བ་སྤྱིའི་རྒྱུད་ཀྱི་ནང་དུ་བལྟ་བར་བྱའོ། །དཀྱིལ་འཁོར་དང་པོའི་སྒོ་དྲུང་དུ། །སྒོ་ཁྱུད་ཀྱི་ནི་དབུས་ཀྱི་ཆ། །དཀྱིལ་འཁོར་གྱི་ནི་སྒོ་གཉིས་ཀྱི། །བར་དུ་སློབ་མ་གཟུང་བར་བྱ། །དེར་གནས་པ་ལ་ཆོ་ག་ཀུན། །རིམ་པ་བཞིན་དུ་ལེགས་པར་བྱ། །ཞེས་པ་ནི་དཀྱིལ་འཁོར་གསུམ་པའི་སྒོ་ཁྱུད་ཀྱི་དབུས་སུ་སློབ་མ་དེར་གཟུང་དེ་དེར་གནས་ནས་གོང་དུ་སྨོས་པའི་ལས་ཐམས་ཅད་བྱ་སྟེ། སྒོ་ཁར་སློབ་མ་ལ་ཆུས་གདབ་པ་འབའ་ཞིག་མ་གཏོགས་སོ། །དཀྱིལ་འཁོར་གྱི་ནང་དུ་མ་ཞུགས་པར་སྒོ་གནས་ལས་དེ་རྣམས་བྱ་བ་དང་ལྷ་རྣམས་ལ་མེ་ཏོག་འདོར་བ་ཡང་སྒོ་ནས་བོར་བ་ན་ནང་དུ་འབབ་པར་འགྱུར་གྱི། ནང་དུ་ཞུགས་ཏེ་བོར་ན་ལྷ་ཁ་ཅིག་རྒྱབ་ཏུ་ལས་པར་འགྱུར་ལ། བདག་དབུས་སུ་ཞུགས་ཏེ་བོར་ན་མེ་ཏོག་ཕྱི་རོལ་དུ་བབ་པར་འགྱུར་བའི་ཕྱིར་རོ། །གཉིས་སུ་ན་གོང་དུ། སྐྱོབ་པ་ཀུན་གྱི་སྤྱན་སྔར་ནི། །ཞེས་ཀྱང་འབྱུང་བས་བདག་ནང་དུ་ཞུགས་ནས་ཁ་ཅིག་གི་སྤྱན་སྔར་ཡང་མི་འགྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཁ་ཅིག་ལ་རྒྱབ་ཀྱིས་བལྟ་བ་མི་རིགས་པའི་ཕྱིར་རོ། །གསུམ་དུ་ན་འདི་ནི་ཆོས་ཀྱིར་གྱལ་པོའི་འཁོར་ཡིན་པས་ཐོག་མ་ནས་ནང་དུ་ཞུགས་ན་ཀོ་ལོང་དུ་འགྱུར་ཏེ་རྒྱལ་ཆོས་དང་འགལ་བའི་ཕྱིར་རོ། །སློབ་མ་སྡིག་དང་བྲལ་བ་ཀུན། །དེ་ལྟར་ལེགས་པར་བཙུན་ནས་ནི། །དེ་དག་ཞི་བར་བྱ་བའི་ཕྱིར། །ཞེས་པ་ནས། སྦྱིན་སྲེག་རྗེས་ལ་སྔགས་པ་ཡིས། །ཞེས་པའི་བར་གྱིས་དཀྱིལ་འཁོར་དུ་བཙུད་པའི་སློབ་མ་དེ་དག་ཞི་བར་བྱ་བའི་སྦྱིན་སྲེག་བྱ་སྟེ་སློབ་མ་རྣམས་དཀྱིལ་འཁོར་དུ་ཞུགས་པས་སྡིག་པ་རྣམས་བྱང་ཞིང་རྒྱུད་དག་པ་དེས་བཅོམ་ལྡན་འདས་ཀྱིས་ཀུ་མི་ཟད་པའི་རྡོ་རྗེའི་རྒྱན་ལ་སོགས་པ་ལ་སྦྱིན་སྲེག་གི་སྒོ་ནས་ཡོན་ཕུལ་ན་བསོད་ནམས་འཕེལ་ཏེ་སྡིག་པ་འབྱང་བས་ཞི་བར་འགྱུར་རོ། །དེའི་རིམ་པ་ཡང་ཐོག་མར་སྙིང་པོའི་དཀྱིལ་འཁོར་གྱི་མདུན་རོལ། དཀྱིལ་འཁོར་བར་མའི་སྒོའི་ཕྱི་རིམ།
གསུམ་པའི་ནང་རོལ་དུ་མེ་ཐབ་ཁྲུ་གང་བ་བྱའོ། །དེ་སྟེ་དཀྱིལ་འཁོར་ཆུང་ནས་ནང་དུ་མི་ཤོང་ན་དཀྱིལ་འཁོར་གྱི་ཕྱི་རིམ་གྱི་སྒོ་གར་བྱའོ། །ཁང་ཐོག་ལ་སོགས་པར་བརྐོར་མི་རུང་ན་ཚོན་དམར་པོས་ཐབ་བྲི་བར་བྱ་ལ། དེ་ནས་ཐབ་དེའི་ཐ་མར་ལྷོ་ཕྱོགས་ནས་བརྩམས་ཏེ་ཀུ་ཤ་གཡས་སྐོར་དུ་དགྲས་ཞིང་གཅིག་གི་རྩ་བས་གཅིག་གི་རྩེ་མོ་ནོན་པར་བྱས་ཏེ་བསྐོར་རོ། །དེ་ནས་ཁམས་གསུམ་རྣམ་པར་རྒྱལ་བའི་སྔགས་ཀྱིས་བཏབ་པའི་དྲིའི་ཆུ་གཏོར་ལ། དེ་ནས་ཐབ་དེར་འཇིག་རྟེན་པའི་མི་མྲྀ་ཏ་ཞེས་བྱ་བ་ལས་ཐམས་ཅད་བྱེད་པ་མགྲིན་པ་རིང་ལ་སྤུ་ཅན་ཁ་དོག་ཁམ་པར་འདུག་པ་མེ་ཏོག་གཅིག་ཐབ་དེར་བོར་ལ་མེ་དེ་བྱིན་གྱིས་བརླབ་པར་བྱའོ། །དེ་ནས་མེ་ལྷ་དེ་ལ་ཞལ་བསིལ་དང་གང་བའི་སྦྱིན་སྲེག་གཞུང་ལས་འབྱུང་བ་བཞིན་དུ་བྱིན་ནས་དེ་ཉིད་དུ་འདར་བའི་རང་བཞིན་དུབ་ཞག་ལ། དེ་ནས་ཐབ་དེར་མེ་ཏོག་གཅིག་བོར་ནས་འཇིག་རྟེན་ལས་འདས་པའི་ཞི་བའི་མེར་བྱིན་གྱིས་བརླབས་ཏེ། ཞལ་བསིལ་དང་གང་བའི་སྦྱིན་སྲེག་ལ་སོགས་པ་སྔ་མ་བཞིན་དུ་བྱས་ནས་སློབ་མ་རེ་རེའི་ཕྱིར་ཡང་སྦྱིན་སྲེག་ལན་ཉི་ཤུ་རྩག་ཅིག་རེ་སློབ་མའི་ལག་པ་གཡས་པའི་མཐེ་བོན་ནས་སློབ་དཔོན་གྱི་ལག་པ་གཡོན་པས་བཟུང་སྟེ་བྱའོ། །འདི་ནི་བསྡུས་པའི་དོན་ཏོ། །ཡན་ལག་གི་དོན་བཤད་པར་བྱ་སྟེ་སྡིག་དང་བྲལ་བ་ཀུན་ཞེས་པ་ནི་སློབ་མ་དེ་རྣམས་དཀྱིལ་འཁོར་དུ་གཞུག་པར་རྩོམ་པ་ན་གསུམ་ལ་སྐྱབས་སུ་འགྲོ་བ་ལ་སྒོས་པ་དང༌། དཀྱིལ་འཁོར་དུ་འཇུག་པ་ན་བྱང་ཆུབ་ཏུ་སེམས་བསྐྱེད་པ་དང༌། ཞུགས་ནས་ཀྱང་ཕྱིས་སྔགས་ཀྱི་སྤྱད་པ་སྤྱོད་པ་ན་སྦྱོར་བ་དང་དངོས་གཞི་དང་རྗེས་གསུམ་ག་དགེ་སྟེ་སྡིག་པ་དང་བྲལ་བའོ། །སྦྱིན་སྲེག་ཆོ་ག་བཞིན་དུ་བྱ། །ཞེས་པ་ནི་སྦྱིན་སྲེག་གི་ཆོ་ག་གཞུང་ལས་ཇི་སྐད་གསུངས་པ་བཞིན་དུ་བྱ་བ་སྟེ་འོག་ནས་འབྱུང་བར་བལྟའོ། །སྙིང་པོའི་དཀྱིལ་འཁོར་གྱི་ནི་མདུན། །དཀྱིལ་འཁོར་གཉིས་པའི་རྒྱབ་རོལ་གྱི། །དཀྱིལ་འཁོར་གྱི་ནི་དབུས་ཀྱི་ཆར། །མ་གཡེངས་པ་ཡི་སེམས་ཀྱིས་བྱ། །མེ་ཐབ་ཁྲུ་གང་ཙམ་གྱི་ནི། །ཚད་དུ་རབ་ཏུ་བསྒྲགས་པ་ཡིན། །ཞེས་པ་ནི་གོང་དུ་བཤད་ཟིན་ཏོ། །འདིར་ཁྲུ་གང་པ་འབའ་ཞིག་གསུངས་ཀྱི་ཟླུམ་པོའམ་གྲུ་བཞིར་བྱ་བ་མ་སྨོས་ཀྱང་ཞི་བ་དང་རྒྱས་པའི་ཐབ་ཇི་ལྟར་གྲགས་པ་ལ་བྱ་སྟེ། སྐབས་འདིར་ནི་ཞི་བའི་ལས་ཡིན་
པས་ཟླུམ་པོར་འོས་སོ། །ཡང་ན་ཞི་བ་དང་རྒྱས་པ་གཉིས་ཀའི་བཞི་མཐུན་ན་གྲུ་བཞི་ཡང་ཉེས་པ་མེད་དོ། །ཁ་རན་སོ་བཞིའི་ཚད་དུབ་ཡ། །ཞེས་པ་ནི་ཐབ་གྲུ་བཞིའི་ནི་ཁ་རན་ཡང་གྲུ་བཞིར་བྱ་ལ། ཐབ་ཟླུམ་པོ་ལ་ཁ་རན་ཡང་ཟླུམ་པོར་བྱའོ། །དབུས་སུ་རྡོ་རྗེ་རབ་ཏུ་བརྟག །ཅེས་པ་ནི་ཡེ་ཤེས་ལྔའི་ཕྱག་རྒྱར་གྱུར་པ་རྡོ་རྗེ་རྩེ་ལྔ་པ་བྲིའོ། །དེ་ནས་སྔགས་པའི་གཡས་ལོགས་སུ། །སྦྱིན་སྲེག་གི་ཉོ་བྱད་གཞག །གཡོན་གྱི་ཕྱོགས་སུ་སློབ་མ་རྣམས། །ཞེས་པ་ནི་བསྲེག་པར་བྱ་བའི་རྫས་རྣམས་སྔགས་པའི་གཡས་སུ་གཞག་གོ །གཡོན་དུ་སློབ་མ་བཀོད་པ་ན་སློབ་དཔོན་སློབ་མའི་གཡས་སུ་འབབ་སྟེ། སློབ་དཔོན་དེས་སློབ་མ་ལ་ཕན་འདོགས་པ་དང་རྗེས་སུ་མཐུན་པར་བསྟན་པའོ། །ཙོག་ཙོག་པོར་ནི་འཁོད་དུ་གཞུག །ཅེས་པ་ནི་ཆོ་གའི་ལས་རྣམས་མ་ཟིན་གྱི་བར་དུ་བག་ཕག་སྟེ་མི་འདུག་པའམ་གུས་པ་བསྟན་པའོ། །སྡོམ་བརྩོན་བདག་ཉིད་ས་སྟེང་དུ། །ཀུ་ཤ་བཏིང་བའི་སྟན་ལ་འདུག །ཅེས་པ་ནི་སློབ་དཔོན་རྩྭ་ཀུ་ཤ་སྟེང་དུ་འདུག་པའོ། །ཡང་ན་ཚོན་རྩི་དམར་པོ་མཆོག །ཅེས་པ་ནས། ཉི་ཤུ་རྩ་གཅིག་སྦྱིན་སྲེག་བྱ། །ཞེས་པའི་བར་ནི་གོ་རིམས་བཞིན་དུ་གོང་དུབ་ཤད་ཟིན་ལ། ཡིད་ནི་མཉམ་པར་བཞག་ནས་སུ། །ཞེས་པ་ནི་ཞི་བའི་ལས་ལ་བྱམས་པའི་དང་ཚུལ་བྱའོ། །སྦྱིན་སྲེག་རྗེས་ལ་སྔགས་པ་ཡིས། །སློབ་མ་རྣམས་ལ་ཡོན་བསླང་བ། །ཞེས་པ་ནས། སངས་རྒྱས་བསྔགས་པའི་དགེ་འདུན་ལ། །ཅི་ནུས་པར་ནི་མཆོད་བསྟོད་བྱ། །ཞེས་པའི་བར་ནི་སྡིག་པ་དང་བྲལ་བའི་སློབ་མ་དེ་དག་སློབ་དཔོན་གྱིས་བསོད་ནམས་ཀྱི་ཞིང་དམ་པ་ལ་སྦྱིན་པ་བྱེད་དུ་གཞུག་སྟེ། མཆོག་ཏུ་ཕན་འདོགས་པའི་སློབ་དཔོན་དེ་ལ་སློབ་མ་རྣམས་ཀྱིས་གུས་པར་ཡོན་ཕུལ་ན་བསོད་ནམས་མཆོག་ཏུ་འགྱུར་བའི་ཕྱིར་གསེར་དང་དངུལ་དང་རིན་པོ་ཆེ་ལ་སོགས་པ་དབུལ་བར་བྱའོ་ཞེས་བསྐུལ་མ་བཏབ་བོ། །དེ་ལྟར་སློབ་དཔོན་ལ་ཡོན་ཕུལ་ནས་ཀྱང་འཕགས་པའི་དགེ་འདུན་ནི་སྦྱིན་པའི་གནས་དམ་པ་ཡིན་པས་འཕགས་པའི་དགེ་འདུན་ལ་ཡོན་འབུལ་བ་དང་ཆོས་སྟོན་གསོལ་བར་བྱ་བ་ཡང༌། འདི་ནི་བསོད་ནམས་ཞིག་ཡིན་ཞེས། །སེམས་ཅན་ཀུན་གྱི་དོང་ཡི་ཕྱིར། །སྐྱོབ་པ་རྣམས་ནི་ནན་གྱིས་གསུངས། །ཞེས་བྱ་བ་ལ་སོགས་
པས་བསྟན་པ་ཡིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ནར་དོ་རྗེ་ལ་བཀའ་སྩལ་པ། སེམས་དཔའ་ཆེན་པོ་དབང་བསྐུར་བ། །སྔོན་གྱི་སངས་རྒྱས་ཀྱིས་བཤད་པ། །རྒྱས་པ་རུ་ནི་བཤད་པར་བྱ། །ཡིད་གཅིག་བསྡུས་ཏེ་ལེགས་པར་ཉོན། །ཞེས་པ་ནས། རྡོ་རྗེ་འཛིན་པ་དེ་ཀུན་ཡང༌། །ཁྱོད་ལ་རྣམ་པ་ཀུན་དུ་སྲུང༌། །ཞེས་པའི་བར་གྱིས་སློབ་མ་རྣམས་དབང་བསྐུར་བའི་སྐབས་འཆད་དེ། དེ་ལ་མངོན་པར་དབང་བསྐུར་བ་ཞེས་པ་ནི་བཅོམ་ལྡན་འདས་ཀྱི་སྐུ་དང་གསུང་དང་ཐུགས་མཉམ་པ་ཉིད་མི་ཟད་པའི་རྒྱན་རང་བཞིན་གྱི་དཀྱིལ་འཁོར་གྱི་བྱིན་གྱིས་བརླབས་པར་གྱུར་པའི་སྤྱན་སྔར་རིན་པོ་ཆེ་ལ་སོགས་པའི་བུམ་པས་ཆུ་བླུགས་པས་ཆུ་བླུགས་པ་སྟེ་མངོན་པར་བླུགས་ཞེས་པའི་ཚིག་གི་དོན་ཏོ། །དེ་ཡང་རྣམ་པ་གསུམ་དུ་བརྟག་པར་བྱ་སྟེ། དབང་བསྐུར་བའི་མིང་ཇི་ལྟ་བུ་ཡིན་པ་དང༌། སུ་ལ་དབང་བསྐུར་བ་དང༌། ཅིའི་ཕྱིར་དབང་བསྐུར་བའོ། །དེ་ལ་དབང་བསྐུར་བའི་མིང་ཇི་ལྟ་བུ་ཡིན་པ་ནི་སྤྱིར་དབང་བསྐུར་བའི་རྣམ་པ་མང་སྟེ། སྔགས་པ་ཉིད་དུ་བྱ་བའི་ཕྱིར་རིག་པ་སྦྱིན་པ་དང༌། ལས་ཀྱི་དབང་བསྐུར་བ་ནི་ཞི་བ་དང་རྒྱས་པ་དང་མངོན་སྤྱོད་ཀྱི་ལས་བྱ་བའི་ཕྱིར་དང༌། གདོན་བསམ་པ་ལ་སོགས་པ་བྱ་བའི་ཕྱིར་དབང་བསྐུར་བའོ། །དེ་དག་ལས་སྐབས་འདིར་ནི་སློབ་དཔོན་དུ་དབང་བསྐུར་བག་ཞེས་བྱ་སྟེ་དེ་ནི་མིང་ངོ༌། །སུ་ལ་དབང་བསྐུར་བ་ནི་སློབ་མ་ཕལ་པ་ཐམས་ཅད་ལ་དབང་བསྐུར་བར་བྱ་བ་མ་ཡིན་གྱི་དམ་ཚིག་ཅན་ལྔའི་སྐབས་ནས། དཀྱིལ་འཁོར་དང་ནི་ཕྱག་རྒྱ་མཐོང༌། །ལས་དང་བྱ་བ་ལ་ཡང་སྦྱར། །ཞེས་སྔགས་ཀྱི་རྒྱུད་རྣམས་ཐོས་ཤིང་དཀྱིལ་འཁོར་ལ་སོགས་པ་འདྲི་བར་ནུས་པ་ཁྱད་པར་ཅན་གྱི་སློབ་མ་དང༌། ཡོངས་སུ་གྲུབ་པའི་སློབ་མ་རྣམས་ལ་དབང་བསྐུར་ཏེ། སུ་ལ་དབང་བསྐུར་བ་ཞེས་པ་ནི་དེ་རྣམས་ལ་དབང་བསྐུར་བའོ། །ཅིའི་ཕྱིར་དབང་བསྐུར་ཞེས་པ་ནི་ཆོས་ཀྱི་མིག་མི་འཚུབ་པར་བྱ་བའི་ཕྱིར་ཏེ། འཇིག་རྟེན་ན་ཡང་འཇིག་རྟེན་གྱི་གཙུག་ལག་ལུང་བསྟན་པ་དང་རྟོག་པ་དང༌། སྨན་ལ་སོག་པ་རྣམས་ཀྱང་སློབ་མས་རྫོགས་པ་རློབས་ནས་སློབ་དཔོན་གྱིས་དབང་བསྐུར་བའི་ཆོ་ག་འཇིག་རྟེན་པ་རྣམས་ལ་ཇི་ལྟར་སྲིད་པ་བཞིན་དུ་བྱས་ན་བཤད་པ་ལ་སོགས་པ་བྱ་བར་
སློབ་མ་ལ་ལུང་སྦྱིན་པ་སྲིད་དོ། །དེ་དག་ཀྱང་སོ་སོའི་གཙུག་ལག་རྫོགས་པར་མི་ཤེས་ཤིང་དབང་མ་བསྐུར་བར་བཤད་པ་ལ་སོགས་པ་བྱས་ན་གཙུག་ལག་དེ་དག་ཇི་ལྟ་བ་བཞིན་དུ་བཤད་མི་ནུས་པས་དེ་དག་གིས་མི་འཚུབ་པར་འགྱུར་བའི་ཕྱིར་རོ། །དེ་བཞིན་དུ་འདིར་ཡང་སློབ་མ་རྣམས་རྒྱུད་ལ་སོགས་པ་རྫོགས་པར་ཤེས་པར་བྱ་སྟེ། དེ་དག་ཉིད་སློབ་དཔོན་གྱི་མདོ་མངོན་སུམ་དུ་བཟླས་ནས་རྒྱུད་བཤད་པ་དང་དཀྱིལ་འཁོར་བྲི་བ་ལ་སོགས་པ་ཇི་ལྟ་བ་བཞིན་དུ་ཤེས་པར་སློབ་དཔོན་ཉིད་ཡིད་ཆེས་ཏེ། སེམས་ཅན་གྱི་དོན་བྱེད་ནུས་པར་གྱུར་པ་རྣམས་ལ་དབང་བསྐུར་ན་ཆོས་ཀྱི་མིག་མི་འཚུབ་པར་འགྱུར་བའི་ཕྱིར་རོ། །གཉིས་སུ་ན་དེ་ལྟར་མངོན་པར་འདུས་བྱས་པའི་སློབ་མ་དེ་སློབ་དཔོན་དུ་གྱུར་ན་འཇིག་རྟེན་པ་རྣམས་ཀྱང་ཁུངས་དེ་ལྟ་བུ་ལས་བྱུང་བའི་སློབ་དཔོན་དེ་ལ་ཡིད་ཆེས་ཤིང་བཙུན་པར་བྱེད་དོ། །རིམ་པ་འདི་ལྟ་བུས་དབང་མ་བསྐུར་ལ་རྒྱུད་ལ་སོགས་པ་མི་ཤེས་པར་བཙན་ཐབས་སུ་སྔགས་ཀྱི་རྒྱུད་ལ་སོགས་པ་འཆད་ཅིང་དཀྱིལ་འཁོར་འདྲིན་ཇི་ལྟ་བ་ཉིད་དུ་མི་ཤེས་ཏེ། དོན་ལོག་པར་འགྱུར་པས་སྔགས་ཀྱི་ལྷ་ལ་སོགས་པས་ཀྱང་བྱིན་གྱིས་མི་རློབ་པའི་ཕྱིར་ཅི་བསམས་པའི་དོན་མི་འགྲུབ་ལ། གདུལ་བའི་འགྲོ་བ་རྣམས་ཡིད་མི་ཆེས་ཤིང་མི་ཕྱོགས་པས་ཆོས་ཀྱི་མིག་འཚུབ་པར་འགྱུར་རོ། །ཅིའི་ཕྱིར་དབང་བསྐུར་བ་ཞེས་པ་ནི་དེའི་ཕྱིར་རོ། །དེ་ལ་དབང་བསྐུར་བ་ཡང་ཇི་ལྟར་འཇིག་རྟེན་གྱི་རྒྱལ་པོ་དགེ་བ་བཅུའི་ལས་ཀྱི་ལམ་གྱི་བཀའ་ཁྲིམས་སྟོན་པ། མངོན་པར་མཐོ་བའི་འབྲས་བུ་སྦྱིན་པར་བྱེད་པ་དེ་ཇི་ལྟར་རྒྱལ་ཐབས་སུ་དབང་བསྐུར་བར་བྱ་བ་དེ་བཞིན་བྱ་བ་སྟེ། འདིར་ཡང་མངོན་པར་མཐོ་བ་དང་ངེས་པར་ལེགས་པའི་འབྲས་བུ་སྦྱིན་པར་བྱེད་པའི་ཆོས་ཀྱི་རྒྱལ་པོར་དབང་བསྐུར་བའི་ཕྱིར་ཏེ། དེ་ཡང་རིམ་པ་འདི་ལྟར་བྱའོ། །ཐོག་མར་རྩ་བའི་དཀྱིལ་འཁོར་གྱི་མདུན་དུ་བར་ཁྲུ་དོས་བཅད་དེ་དེར་དབང་བསྐུར་བའི་དཀྱིལ་འཁོར་རིམ་པ་གཅིག་པ་སྒོ་གཅིག་པ་བྲིས་ལ། དེའི་ནང་དུ་པདྨ་འདབ་མ་བརྒྱད་པ་བྲིས་ཏེ། དཀྱིལ་འཁོར་གྱི་གྲྭ་བཞིར་རྡོ་རྗེ་འཛིན་པ་བྲི་ཞིང་པདྨའི་འདབ་མ་བརྒྱད་པོ་ལ་ཡང་བྱང་ཆུབ་སེམས་དཔའ་བཞི་དང་ཕྱག་བརྙན་བཞི་སྟེ་བརྒྱད་བྲིའོ། །པདྨའི་དབུས་སུ་ཆོས་ཀྱི་དབྱིངས་ཀྱི་ཡི་གེ་རཾ་བྲིས་ལ་དེར་སློབ་མ་བཞག་སྟེ། དྲི་དང་མེ་ཏོག་ལ་
སོགས་པའི་མཆོད་པ་དང༌། བཀྲ་ཤིས་པའི་ཚིགས་སུ་བཅད་པ་དང༌། གླེང་གཞི་རྒྱ་ཆེན་པོ་སྙན་པ་རྣམས་བསྒྲགས་ཤིང་ཀུན་དུ་བཟང་པོ་ལ་སོགས་པའི་སེམས་དཔའ་རྣམས་ཀྱིས་བྱིན་གྱིས་བརླབས་པའི་རིན་པོ་ཆེ་བཞིའི་བུམ་པ་དཀྱིལ་འཁོར་ཆེན་པོ་ལན་རེ་བསྐོར་ནས་སློབ་མ་དེའི་སྤྱི་བོ་ནས་བླུགས་སོ། །དེའི་འོག་ཏུ་འདིར་དངོས་སུ་མ་སྨོས་ཀྱང་དེ་བཞིན་གཤེགས་པའི་གཏུག་ཏོར་དང་སྤྱན་དང་ལྗགས་དང་གོ་ཆ་རྣམས་ཀྱི་ཕྱག་རྒྱ་དང༌། སྔགས་ཀྱིས་ཀྱང་སློབ་མ་དེ་ལ་པདྨའི་སྟེང་ན་འདུག་པ་ཉིད་ནས་རིམ་པ་བཞིན་དུ་བྱིན་གྱིས་བརླབ་པར་བྱའོ། །དེ་ནས་གནས་དེ་བསླབ་སྟེ་དཀྱིལ་འཁོར་དེའི་ཉི་འཁོར་དུ་དྲི་བཟང་པོ་གཅིག་བཞག་སྟེ་གོས་གསར་པ་བརྗེས་ནས་གོས་གསར་པ་ཕྲུགས་ཅིག་གོན་ནས་ཁྲིའི་སྟེང་དུ་བཞག་གོ །དྲི་དང་མེ་ཏོག་ལ་སོགས་པས་མཆོད་ནས། སློབ་དཔོན་ཉིད་མིག་དབྱེ་བའི་ཐུར་མ་ཐོགས་ནས་མདུན་དུ་འདུག་སྟེ། དེ་བཞིན་གཤེགས་པ་རྣམས་ཀྱིས་བུ་ཁྱོད་ཀྱིས་མི་ཤེས་པའི་རབ་རིབ་རྣམས་བསལ་ཏོ་ཞེས་པ་ལ་སོགས་པའི་ཚིག་བརྗོད་དོ། །དེ་ནས་མེ་ལོང་ཐོགས་ལ་ཆོས་རྣམས་གཟུགས་བརྙན་དང་འདྲ་བར་རང་བཞིན་མེད་པའི་སྟོང་པ་ཉིད་ཀྱི་ཚུལ་དུ་སྒོམས་ཤིག་ཅེས་པའི་ཚིག་བརྗོད་དོ། །དེ་ནས་དེ་ལྟར་བདག་གི་དོན་ཡོངས་སུ་རྫོགས་ནས་གཞན་གྱི་དོན་ཕུན་སུམ་ཚོགས་པར་བྱ་བའི་ཕྱིར་རྐང་པའི་འོག་ཏུ་གསེར་གྱི་འཁོར་ལོ་བཞག་སྟེ། ཆོས་ཀྱི་འཁོར་ལོ་སྐོར་ཅིག་ཅེས་བསྒྲག་གོ །དེ་ནས་ཆོས་ཀྱི་འཁོར་ལོ་བསྐོར་བ་དེ་ཡང་སངས་རྒྱས་ཀྱི་གསུང་མཆོག་འཇིག་རྟེན་གྱི་ཁམས་ཐམས་ཅད་དུ་གྲགས་པར་བསྐོར་བར་བྱ་སྟེ། གསུང་མཆོག་དེའི་ཕྱག་རྒྱར་གྱུར་པ་དུང་བཟང་པོ་ཅིག་ལག་པ་གཡས་པར་བྱིན་ལ། ཁྱོད་ཀྱི་ཆོས་ཀྱི་དུང་བུས་ཤིག །ཅེས་བརྗོད་དོ། །དེ་ལྟར་སེམས་ཅན་གྱི་དོན་བྱས་ནས་སངས་རྒྱས་རྣམས་ལ་བྱས་པ་གཟོ་བ་ལ་སོགས་པའི་ཚིག་དེའི་འོག་ཏུ་བརྗོད་པར་བྱ་སྟེ། དེ་རྣམས་ནི་ལས་སུ་བྱ་བའི་རིམ་པ་བསྡུས་ཏེ་བཤད་པའོ། །ཡན་ལག་གི་དོན་བཤད་པར་བྱ་སྟེ། སེམས་དཔའ་ཆན་པོ་དབང་བསྐུར་བ། །རྒྱས་པ་རུ་ནི་བཤད་པར་བྱས། །ཡིད་གཅིག་བསྡུས་ཏེ་ལེགས་པར་ཉོན། །ཞེས་པ་ལ་དབང་བསྐུར་བའི་ཚིག་གི་དོན་གོང་དུ་བཤད་ཟིན་ལ། རྒྱས་པ་རུ་ནི་བཤད་པར་བྱས། །ཞེས་པ་ནི་དབང་བསྐུར་བའི་ཆོ་ག་
འོག་ནས་འབྱུང་བ་རྣམས་དང་ལྡན་པར་འཆད་པས་ཤེས་པའོ། །སྔོན་གྱི་སངས་རྒྱས་ཀྱིས་བཤད་ཅེས་པ་ནི་སངས་རྒྱས་ཐམས་ཅད་མཉམ་པ་ཉིད་པས་བྱ་བ་གཅིག་དུ་བསྟན་པའོ། །གསང་བའི་པའི་བདག་པོ་སློབ་དཔོན་གྱིས་རྩ་བའི་དཀྱིལ་འཁོར་གྱི་མདུན་དུ་བར་ཁྲུ་དོ་བོར་ནས་ཕྱི་རོལ་གྱི་ས་ལ་དཀྱིལ་འཁོར་གཉིས་པ་གྲུ་བཞི་ལ་སྒོ་གཅིག་པ་བྲི་བར་བྱའི་ཞེས་པ་ལ་དོན་གཞན་ནི་སྔར་བཤད་ཟིན་ཏེ། འདིར་དངོས་སུ་མ་སྨོས་ཀྱང་སྤྱིའི་མཚན་ཉིད་ལྟར་བྱས་ན་ནང་གི་དཀྱིལ་འཁོར་གྱིས་ཤར་ཕྱོགས་སུ་གཞོལ་ན་དབང་བསྐུར་བའི་དཀྱིལ་འཁོར་བྱང་ཕྱོགས་སུ་བྲི་བར་བྱ། ནང་གི་དཀྱིལ་འཁོར་བྱང་ཕྱོགས་སུ་གཞོལ་ན་དབང་བསྐུར་བའི་དཀྱིལ་འཁོར་ནུབ་ཕྱོགས་སུ་བྲི་བར་བྱ་སྟེ། འདིར་ནི་ནང་གི་དཀྱིལ་འཁོར་གྱི་མདུན་དུ་དབང་བསྐུར་བའི་དཀྱིལ་འཁོར་བྲི་བ་མཐའ་གཅིག་ཏུ་གསུངས་པས་ནང་གི་དཀྱིལ་འཁོར་ལ་དབང་བསྐུར་བའི་ཚུ་མི་འབྱུང་བར་བྱ་བའི་ཕྱིར་ནང་གི་དཀྱིལ་འཁོར་གྱི་ས་བྱང་ཕྱོགས་སུ་གཞོལ་བར་བྱའོ། །འོན་ཏེ་ཤར་ཕྱོགས་སུ་གཞོལ་ན་ཡང་བར་ས་རྒལ་གྱིས་བཅད་པར་བྱའོ། །གྲྭ་བཞིར་རྡོ་རྗེ་འཛིན་སྔར་བཞིན་དགོད་དེ་ཞེས་པ་ནི། རྡོ་རྗེ་འཛིན་པ་དེ་རྣམས་དང་འོག་ནས་བྱང་ཆུབ་སེམས་དཔའ་བཞི་དང་ཕྱག་བརྙན་བཞི་འབྱུང་བ་རྣམས་ཀྱང་དེ་བཞིན་གཤེགས་པའི་ཡོན་ཏན་ལས་གྱུར་པ་སྟེ་དེ་རྣམ་པར་རྟོག་པ་མེད་པའི་ཕྱིར་སྤྲོས་པ་མེད་པར་གནས་པ་ཞེས་པའོ། །ནམ་མཁའ་དྲི་མ་མེད་པ་ནི་སྟོང་པ་ཉིད་ཀྱི་སྤྱོད་ཡུལ་ནམ་མཁའ་དང་འདྲ་བ་སྟེ་ཤེས་བྱ་དང་ཉོན་མོངས་པའི་དྲི་མ་སྤངས་པའོ། །དྲི་མ་མེད་པའི་མིག་ནི་གཟུང་བ་དང་འཛིན་པའམ། ཤེས་བྱ་དང་ཉོན་མོངས་པའི་སྒྲིབ་པ་སྤངས་པའི་ཤེས་རབ་ཅན་ཞེས་པའོ། །གོས་སྣ་ཚོགས་གྱོན་པ་ནི་ངོ་ཚབ་སྒྲིབ་པར་བྱེད་པས་གོས་ཏེ། གང་ཞིག་ངོ་ཚ་བ་ཡོད་ན་མི་བྱེད་པ་དང༌། བྱ་བའི་རིགས་པ་རྣམས་བྱེད་པ་དང༌། དམ་པ་རྣམས་ཀྱིས་བསྔགས་པ་སྟེ་དེ་ལྟ་བུའི་ངོ་ཚ་དང་ལྡན་པ་ཞེས་པའོ། །དབུས་སུ་པདྨ་ཆེན་པོ་འདབ་མ་བརྒྱད་པ་ཟེ་བ་དང་བཅས་པ་གཞག་པ་སྟེ་ཞེས་པ་ནི། ཡེ་ཤེས་བརྒྱད་ཀྱི་ཕྱག་རྒྱར་གྱུར་པའོ། །ཟེ་བ་ནི་ཡོན་ཏན་རྣམས་སོ། །འདབ་མ་བཞི་ལ་བྱང་ཆུབ་སེམས་དཔའ་གྲོགས་སུ་གྱུར་པ་སྔོན་
གྱི་སྨོན་ལམ་གྱི་མཐུ་ཅན་དུ་གྱུར་པ་བཞི་བྲི་བར་བྱ་སྟེ་ཞེས་པ་ནི། བྱང་ཆུབ་སེམས་དཔའ་དེ་རྣམས་དེ་བཞིན་ཉིད་ཀྱི་ཡོན་ཏན་ལས་གྱུར་པ་སྟེ་གཉིས་ནི་རང་གི་དོན་ཕུན་སུམ་ཚོགས་པ། གཉིས་ནི་གཞན་གྱི་དོན་དུ་ཕུན་སུམ་ཚོགས་པའི་རང་བཞིན་ཏེ་སྨོན་ལམ་གྱི་དབང་གིས་ཆོས་ཀྱི་རྒྱལ་པོར་དབང་སྐུར་བ་དེའི་པདྨའི་གདན་གྱི་གནས་སུ་གྱུར་པའོ། །དེ་ལ་གཟུངས་ཀྱི་དབང་ཕྱུག་རྒྱལ་པོ་ཞེས་པ་ལ་གཟུངས་ནི་ཤེས་རབ་སྟེ་དེའི་རྒྱལ་པོར་གྱུར་པའོ། །དྲན་པ་དང་ཤེས་བཞིན་ཅན་ནི་ཤེས་རབ་དེ་ཉིད་མི་གནས་པའི་མྱ་ངན་ལས་འདས་པའི་རང་བཞིན་སེམས་ཅན་རྣམས་ལ་རྒྱུན་མི་འཆད་དོ། །ཕན་པ་ནི་ལྷག་པའི་བསམ་པ་ཅན་རྣམས་ལ་ཕན་པར་སེམས་པའོ། །སྙིང་རྗེ་ཅན་ནི་སྙིང་རྗེའི་དཔང་གིས་སེམས་ཅན་རྣམས་ལ་ཕན་པར་སེམས་པ་སྟེ་དེ་གཉིས་ནི། གཞན་གྱི་དོན་ཕུན་སུམ་ཚོགས་པའི་རང་བཞིན་ཡིན་ལ། སྔ་མ་གཉིས་ནི་རང་གི་དོན་ཕུན་སུམ་ཚོགས་པའི་རང་བཞིན་ནོ། །འདབ་མ་གཞན་རྣམས་ལ་ནི་ཕྱག་བརྒྱན་བཞི་བྲིས་ཏེ་ཞེས་པ་ཡང་དེ་བཞིན་ཉིད་ཡོན་ཏན་དུ་ཤེས་པར་བྱ་སྟེ་སྨོན་ལམ་གྱི་དབང་གིས་གྱུར་པ་ནི་གོང་མ་བཞིན་ནོ། །སེམས་ཅན་གྱི་ཁྱད་པར་ལ་སྤྱོད་པ་ནི་གཞན་གྱི་སེམས་ཤེས་པའི་རང་བཞིན་ནོ། །འདོད་པ་ཡོངས་སུ་རྫོགས་པར་བྱེད་པ་ནི། སེམས་ཅན་རྣམས་ཀྱི་རེ་བ་ཡོངས་སུ་རྫོགས་པར་བྱེད་པར་ཤེས་པའོ། །མ་ཆགས་པ་དང་རྣམ་པར་གྲོལ་བ་ཞེས་པ་ནི་འབྲས་བུའི་ཡོན་ཏན་ཏེ་སྟོང་པ་ཉིད་ཀྱི་རང་བཞིན་ནི་ཆགས་པ་མེད་པ་ཡིན་ལ་ཆགས་པ་མེད་པས་ན་རྣམ་པར་གྲོལ་བའོ། །གོང་མ་གཉིས་ནི་རྒྱུའི་རང་བཞིན་ནོ། །དབུས་སུ་ནི་ཆོས་ཀྱི་དབྱིངས་བསམ་གྱིས་མི་ཁྱབ་པའི་གཟུགས་གཞག་གོ་ཞེས་པ་ནི། ཆོས་ཀྱི་དབྱིངས་ཀྱི་ཡི་གེ་ར་ཁ་དོག་དཀར་པོ་པདྨའི་སྙིང་པོ་ལ་གཞག་གོ །རིན་པོ་ཆེའི་བུམ་པ་བཞི་ཞེས་པ་ནི། གསེར་དང༌། དངུལ་དང༌། པདྨ་རཱ་ག་དང༌། མ་ར་ཀ་ཏིའི་བུམ་པ་གསེར་དང༌། དབུལ་ལ་སོགས་པ་དེ་དག་གིས་བརྒྱན་པའི་བུམ་པ་བྱའོ། །དེ་ལྟར་ཡང་མ་འབྱོར་ན། དེ་རྣམས་ཀྱི་ཁ་དོག་དང་མཐུན་པའི་སའི་བུམ་པ་བྱ་སྟེ། དེ་དག་ལ་སོགས་པའི་ཡོ་བྱད་རྣམས་
འབྱོར་བཞིན་དུ་ཇི་སྐད་དུ་འབྱུང་བ་བཞིན་མ་སྦྱར་ན། འཇུངས་པའི་སེམས་དང་ལྡན་ཏེ་སེམས་མ་དག་པས་ལྷ་རྣམས་ཀྱང་བྱིན་གྱིས་མི་རློབ་ཅེས་གཞུང་ལས་འབྱུང་ངོ༌། །སྙིང་ནས་མེད་ཀྱང་མི་འབྱོར་དུ་མི་རུང་སྙམ་ནས་མི་སྤོབས་ཏེ་མི་བྱེད་དམ། འཚོ་བའི་ཡོ་བྱད་དང༌། ནད་ཀྱི་རྐྱེན་སྨན་གྱི་ཟོང་ཡང་མི་འཇོག་པར་བྱེད་ན། ཡང་དགོངས་པའམ་ཆོ་ག་མི་ཤེས་པ་ཡིན་ལ། འཚོ་བའི་ཡོ་བྱད་དང༌། ནད་ཀྱི་རྐྱེན་སྨན་གྱི་ཟོང་དུ་སྙད་བཏགས་ནས་ལྷག་པར་ཡོད་པ་གཏོང་མི་ཕོད་ན་གོང་དུ་སྨོས་པ་དང་འདྲ་སྟེ། མདོར་ན་སེམས་ལ་སྒྱུ་མེད་པའི་གཙང་སྤྲ་ཤེས་པར་བྱའོ། །ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་རྣམས་ཀྱིས་བུན་གྱིས་བརླབས་པ་ཡང་སློབ་མ་དེ་ངན་སོང་སྤང་བར་བསྟན་པའི་ཕྱིར་ཐོག་མ་ཉིད་དུ་ངན་སོང་ཐམས་ཅད་སྤོང་བའི་བྱང་ཆུབ་སེམས་དཔའི་སྔགས་ཀྱིས་བཏབ་པའི་བུམ་པས་བཀྲུའོ། །ངན་སོང་སྤངས་ནས་ཤེས་བྱ་དང༌། ཉོན་མོངས་པའི་སྒྲིབ་པ་དང་བྲལ་བར་གྱུར་ཅིག་པའི་དོན་དུ། དེ་ནས་སྒྲིབ་པ་ཐམས་ཅད་རྣམ་པར་སེལ་བའི་སྔགས་ཀྱིས་བཏབ་ལ་བཀྲུའོ། །དེ་ནས་ཀུན་དུ་བཟང་པོའི་ས་ཐོབ་པར་གྱུར་ཅིག་པའི་དོན་དུ་ཀུན་དུ་བཟང་པོའི་སྔགས་ཀྱིས་བཏབ་པའི་བུམ་པས་བཀྲུའོ། །དེ་ནས་ཆོས་ཀྱི་རྒྱལ་ཚབ་ཏུ་གྱུར་ཅིག་པའི་དོན་དུ་བྱམས་པའི་སྔགས་ཀྱིས་བཏབ་པའི་བུམ་པས་བཀྲུའོ། །པདྨ་དམ་པ་དེ་ལ་ནི། །སྔགས་པ་དག་གིས་དེ་བཞག་ནས། །ཞེས་པ་ནས། སྤོས་དང་མེ་ཏོག་བཟང་པོ་ཡིས། །དེ་ལ་ཡང་ནི་མཆོད་པར་བྱ། །ཞེས་པའི་བར་དུ་དོན་གཞན་ནི་གོང་དུ་བཤད་ཟིན་ལ། སློབ་མ་དེ་དབང་བསྐུར་བར་བྱ་བའི་ཚེ། འདིར་དངོས་སུ་མ་གསུངས་ཀྱང་དཀྱིལ་འཁོར་དུ་འཇུག་པའི་ཚེ་ན་རྡོ་རྗེ་སེམས་དཔའི་སྐུར་བསྒྱུར་ཏེ། དེ་ལས་གཞན་པའི་སྐུར་བསྒྱུར་བ་མ་གསུངས་པས་རྡོ་རྗེ་སེམས་དཔའི་སྐུར་བསྒྱུར་ཏེ་དབང་བསྐུར་བར་བྱའོ། །དབང་བསྐུར་བའི་ཚེ་པདྨའི་གདན་ལ་བཞག་པ་ཡང་འཁོར་ལོས་སྒྱུར་བའི་རྒྱལ་པོའི་འདུག་ཐབས་སུ་བཞག་སྟེ། རྐང་པ་གཡོན་པ་ཁྲིའི་སྟེང་དུ་བཞག་ལ་གཡས་པ་ས་ལ་
གཞག་ཅིང༌། ལག་པ་གཡོན་པ་ཁྲི་ལ་བརྟེན་ལ། གཡས་པ་པུས་མོ་ལ་བཞག་སྟེ་གདོང་ཡང་མི་མཐོ་མི་དམའ་བར་དྲང་པོར་བལྟ་བར་བྱའོ། །དེ་ནས་གསེར་གྱི་ཐུར་མ་ནི། །ཞེས་པ་ནས། །ལིང་ཏོག་རྒྱལ་བ་རྣམས་ཀྱིས་བསལ། །ཞེས་པའི་བར་དུ་རིམ་པ་གཞན་ནི་གོང་དུ་བཤད་ལ། །བུ་ཁྱོད་ཀྱིས་ནི་མི་ཤེས་པའི། །ལིང་ཏོག་རྒྱལ་བ་རྣམས་ཀྱིས་བསལ། །ཞེས་པ་ནི། སྔོན་ཐོས་པ་དང་བསམས་པའི་ཤེས་རབ་ཀྱིས་རྒྱུད་ལ་སོགས་པ་མི་ཤེས་པ་རྒྱལ་བའི་ལུང་སློབ་དཔོན་གྱིས་བཤད་པས་མི་ཤེས་པ་བསལ་ཏོ་ཞེས་པའོ། །སྔོན་གྱི་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་བཞིན། །ཞེས་པ་ནི། དཔེ་སྟེ། དེ་ལྟར་མིག་གི་སྨན་པའི་རྒྱལ་པོས་འཇིག་རྟེན་པ་རྣམས་ཀྱི་མིག་གི་རབ་རིབ་བསལ་ཏེ་གཟུགས་ལ་སོགས་པའི་རང་དངོས་ཇི་ལྟ་བ་ཉིད་དུ་འདུག་པ་མི་མཐོང་བ་ལས་མཐོང་བར་བྱས་པ་བཞིན་དུ། རྒྱལ་བ་རྣམས་ཀྱིས་ཀྱང་བུ་ཁྱོད་ཀྱི་མ་རིག་པ་ཆོས་རྣམས་ཀྱི་མཚན་ཉིད་ཇི་ལྟ་བ་བཞིན་དུ་འདུག་པ་མི་ཤེས་པ་ལས་ཤེས་པར་བྱའོ་ཞེས་པའོ། །དེ་ནས་མེ་ལོང་བླངས་ནས་སུ། །ཆོས་ཀྱི་མཚན་ཉིད་བཤད་པར་བྱ། །ཆོས་རྣམས་གཟུགས་བརྙན་ལྟ་བུ་སྟེ། །ཞེས་པ་སྟེ། ཕུང་པོ་དང༌། ཁམས་དང༌། སྱེ་མཆེད་ལ་སོགས་པའི་ཆོས་རྣམས་གཟུགས་བརྙན་དང་འདྲ་སྟེ། བལྟར་ཡང་སྣང་ལ་ཡང་དག་པར་བརྟགས་ན་དངོས་པོ་ཡོད་པ་མ་ཡིན་པའོ། །དང་ཞིང་ཞེས་པ་ནི། འདི་ལྟར་ཕུང་པོ་ལ་སོགས་པའི་ཆོས་རྣམས་ཕུང་པོའི་རང་བཞིན་དུ་དམིགས་སུ་མེད་པས་དང་བ་ཞེས་པའོ། །དག་པ་ཞེས་པ་ནི། ཤེས་བྱ་དང་ཉོན་མོངས་པའི་སྒྲིབ་པ་དང་བྲལ་བའོ། །རྙོག་པ་མེད་པའི་སྒྲིབ་པ་དང་དེ་དག་གི་བག་ཆགས་ཀྱང་མེད་ཅེས་པའོ། །གཟུང་དུ་མེད་ཅིང་བརྗོད་དུ་མེད། །ཅེས་པ་ནི། དེ་ལྟ་བུའི་སྟོང་པའི་རང་བཞིན་ལ་རྣམ་པར་ཤེས་པ་དྲུག་གིས་གཟུང་དུ་མེད་ཅིང་ཚིག་གིས་བརྗོད་པ་ལས་འདས་པའོ། །རྒྱུ་དང་ལས་ལས་བྱུང་བ་སྟེ། ཞེས་པ་ནི། ཕུང་
པོ་ལ་སོགས་པའི་ཆོས་རྣམས་རང་བཞིན་གྱིས་ཡོད་པའི་རང་བཞིན་མ་ཡིན་གྱི། རྒྱུ་དང་ལས་ལས་བྱུང་བ་སྣ་གཟུགས་བརྙན་དང་འདྲ་སྟེ། ཡོད་པ་མ་ཡིན་པས་བརྗོད་དུ་མེད་པ་ལ་སོགས་པའི་ཚིག་གོང་མ་རྣམས་དང་སྦྱར་རོ། །ངོ་བོ་ཉིད་མེད་གནས་མེད་པ། །དེ་ལྟར་ཆོས་འདི་ཤེས་ནས་སུ། །ཞེས་པ་ནི། གཟུགས་བརྙན་དང་འདྲ་བས་རང་བཞིན་མེད་པའོ། །རྒྱུ་དང་རྐྱེན་ལས་བྱུང་བས་སྐད་ཅིག་མའི་ཆར་མི་གནས་པར་ཤེས་པས་ཏེ། ཆོས་རྣམས་ཀྱི་མཚན་ཉིད་དེ་ལྟར་ཤེས་ནས་དེ་ལྟ་བུའི་ཚུལ་དུ་སྒོམ་པའི་ཤེས་རབ་ཀྱིས་སྒོམས་ཤིག་ཅེས་པའོ། །སེམས་ཅན་དོན་ནི་མཉམ་མེད་བྱོས། །ཞེས་པ་ནས། ཆོས་ཀྱི་དུང་བ་ནི་བླ་མེད་པ། །ཞེས་པའི་བར་ནི། དེ་ལྟར་བདག་གི་དོན་ཕུན་སུམ་ཚོགས་ནས་གཞན་གྱི་དོན་ཕུན་སུམ་ཚོགས་པར་བྱོས་ཤིག་ཅེས་པ་སྟེ་གོང་དུ་བཤད་ཟིན་ཏོ། །སངས་རྒྱས་སྲས་སུ་སྐྱེ་ཞེས་པ་ནི། ཁྱོད་དེ་བཞིན་གཤེགས་པའི་ཡེ་ཤེས་ལས་སྐྱེས་སོ་ཞེས་པའོ། །སོམ་ཉི་ཡིད་གཉིས་མི་བྱ་ཞིང༌། །དོག་པ་མེད་པའི་སེམས་ཀྱིས་ཁྱོད། །ཅེས་པ་ནི། ཆོས་ཀྱི་འཁོར་ལོ་བསྐོར་ཞིང་སེམས་ཅན་གྱི་དོན་བྱ་བ་དེ་ལྟར་ཡིན་ནམ་མ་ཡིན་སྙམ་པའི་ཐེ་ཚོམ་དང་ཡིད་གཉིས་མི་སྐྱེ་བ་དང༌། འཁོར་རྣམས་ལ་བག་ཚབ་མེད་པར་འཇིག་རྟེན་པ་རྣམས་ལ་གསང་སྔགས་སྤྲད་པའི་ཚུལ་གྱི་ཆོས་རབ་ཏུ་སྒྲོགས་ཤིག་ཅེས་པའོ། །དེ་ལྟར་བྱས་ན་སངས་རྒྱས་ལ། །ཕན་ཐོགས་བྱས་པ་གཟོ་ཞེས་བྱ། །ཞེས་པ་ནི། དེ་ལྟར་སེམས་ཅན་གྱི་དོན་བྱས་ན་སངས་རྒྱས་རྣམས་ཀྱི་བྱ་བ་བྱས་པས་བྱས་པ་དྲན་ཞིང་སངས་རྒྱས་ལ་ལན་ལྡོན་པར་བཤད་དོ་ཞེས་པའོ། །རྡོ་རྗེ་འཛིན་པ་དེ་ཀུན་ཡང༌། །ཁྱོད་ལ་རྣམ་པ་ཀུན་དུ་སྲུང། །ཞེས་པ་ནི། དབང་བསྐུར་བའི་དཀྱིལ་འཁོར་གྲྭ་བཞིར་རྡོ་རྗེ་འཛིན་པ་བཞི་བཀོད་པ་དང༌། པདྨའི་འདབ་མ་ལ་བཞུགས་པའི་བྱང་ཆུབ་སེམས་དཔའ་དེ་རྣམས་ཀྱང་ལས་བྱས་པ་དོན་ཡོད་དོ་སྙམ་ནས་སྲུང་བར་བྱེད་དོ་ཞེས་པའོ། །དེ་ནས་སློབ་མ་དེ་
བསླངས་ལ། །སྔགས་པ་སྙིང་རྗེར་གྱུར་པ་ཡི། །ཞེས་པ་ནས། །ཤིན་ཏུ་ངེས་པ་ཡིད་ཀྱིས་ནི། །དེ་དག་ཐམས་ཅད་ཁས་བླང་ངོ༌། །ཞེས་པའི་བར་གྱིས་སློབ་མ་ལ་དམ་ཚིག་བསྟན་པ་སྟེ། དེ་ཡང་སྔོན་དམ་ཚིག་མནོས་པ་དང་མ་མནོས་པ་གཉིས་ཀ་ལ་བསྟན་ནོ། །དེ་ལ་སློབ་དཔོན་དམ་ཚིག་བཞི་དང་ལྔ་དག་ཏུ་ལྡན་ལ། ལས་དང་བྱ་བ་དག་སྦྱར་བ་རྒྱུད་ལ་སོགས་པ་དང་དམ་ཚིག་ཤེས་ཤིང་མནོས་ཟིན་པ་ལ་བསྟན་ཅི་དགོས་ཤེ་ན། འཇིག་རྟེན་ན་རྒྱལ་པོར་ནམས་ཀྱང་རྒྱལ་ཆོས་སུ་བྱ་བ་རྣམས་སྔ་ནས་ཀྱང་ཤེས་ཤིང་སྲུང་མོད་ཀྱི། ནམ་རྒྱལ་པོར་དབང་བསྐུར་བའི་ཚེ་ན། ཡང་སློབ་དཔོན་ལ་སོགས་པས་བསྟན་ཞིང་གསོལ་བར་བྱེད་དོ། །དེ་བཞིན་དུ་འདིར་ཡང་སྔ་ནས་ཀྱང་དམ་ཚིག་འདི་རྣམས་སྲུང་མོད་ཀྱི། ཆོས་ཀྱི་རྒྱལ་པོར་དབང་བསྐུར་བའི་ཆོས་ཀྱིས་བསྟན་པར་བྱའོ། །གཉིས་སུ་ན་ཡང་དང་ཡང་དུ་བསྟན་ན་བརྟན་པར་འགྱུར་བའི་ཕྱིར་རོ། །དེ་ནས་སློབ་མ་དེ་བསླངས་ལ། །སྔགས་པ་སྙིང་རྗེར་གྱུར་པ་ཡི། །ཡིད་ཀྱིས་ནང་དུ་བཅུག་ནས་ནི། །དེ་ལ་དམ་ཚིག་བསྟན་པར་བྱ། །ཞེས་པ་ནི། མེ་ལོང་དང་འཁོར་ལོ་ལ་སོགས་པ་བསྟན་པའི་གནས་དེ་ནས་སློབ་མ་དེ་བསླང་སྟེ་སློབ་དཔོན་གྱིས་སློབ་མའི་གདུགས་བཟུང་ནས་དཀྱིལ་འཁོར་དང་པོའི་སྒོ་ཁྱུད་ཀྱི་ནང་དུ་ཁྱུད་ཀྱི་ནང་དེར་བཞག་ནས་འོག་ནས་འབྱུང་བའི་དམ་ཚིག་རྣམས་བསྟན་པར་བྱ་ཞེས་པའོ། །དེ་རིང་ཕན་ཆད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ད་ཕྱིན་ཆད། །ཡོངས་སུ་གཏང་བར་མི་བྱའོ། །ཞེས་པ་ནི། དམ་པའི་ཆོས་བཏང་བ་ཡང་རྣམ་པ་གསུམ་གྱིས་འགྱུར་ཏེ། ཐེག་པ་ཆེན་པོ་ལས་ལོག་པར་ལྟ་བ་དང༌། ཆོས་སྨྲ་བ་ལ་མངོན་དུ་དབང་ཟ་ཞིང་སྐུར་པ་འདེབས་པ་དང༌། ཉིན་རེ་ཞིང་དམ་པའི་ཆོས་ཉན་པ་དང༌། སེམས་པ་དང༌། སྒོམ་པ་དང༌། འདྲི་བ་དང༌། ཀློག་པ་དང༌། མཆོད་པ་ལ་སོགས་པའི་བྱ་བ་ལས་གང་ཡང་རུང་བ་ཞིག་མ་བྱས་ན་
དམ་པའི་ཆོས་གཏད་པ་ཞེས་བྱ་སྟེ། དེ་རྣམས་ཁྱོད་ཀྱིས་སྲོག་གི་ཕྱིར་ཡང་མི་གཏོང་ངོ་ཞེས་པའོ། །དེ་ནས་གཞན་ཡང་བྱང་ཆུབ་ཀྱི་སེམས་གཏང་བར་མི་བྱའོ་ཞེས་སྦྱར་ཏེ། བྱང་ཆུབ་ཀྱི་སེམས་རྣམ་པ་བཞི་ལས་སེམས་ཅན་རྣམས་ལ་ཕན་པའི་ཕྱིར་བདག་སངས་རྒྱས་སུ་གྱུར་ཅིག་ཅེས་པའི་སྨོན་ལམ་གྱི་སེམས་དང་ཆོས་ཐམས་ཅད་སྟོང་པ་ཉིད་དུ་རྟག་ཏུ་བསྒོམ་པར་བྱའོ་ཞེས་པའི་འཇུག་པའི་སེམས་མི་གཏོང་བ་ལ་བྱའོ། །ཁྱོད་ཀྱིས་སེར་སྣ་མི་བྱའོ་ཞེས་སྦྱར་ཏེ་ཆོས་དང་ནོར་བདག་ལ་བདོག་ཅིང་གཞན་ལ་བྱིན་པར་རིགས་པ་ལས་མི་སྦྱིན་པར་མི་བྱའོ། །གང་སེམས་ཅན་ལ་གནོད་པ་མི་བྱའོ་ཞེས་ཏེ། ལུས་དང༌། ངག་དང༌། ཡིད་གསུམ་གྱི་སྒོ་ནས་སེམས་ཅན་རྣམས་ལ་འཕྲལ་གྱི་གནོད་པ་དང་ཡུན་གྱི་གནོད་པ་མི་བྱ་ཞེས་པའོ། །སློབ་མས་བླ་མའི་རྐང་པ་ལ། །དད་ཅིང་གུས་པར་ཕྱག་བྱས་ནས། །ཤིན་ཏུ་ངེས་པའི་ཡིད་ཀྱི་ནི། །དེ་དག་ཐམས་ཅད་ཁས་བླང་ངོ༌། །ཞེས་པ་ནི། གོང་དུ་སློབ་དཔོན་གྱིས་དམ་ཚིག་བསྒོ་བ་དེ་རྣམས་ལུས་དང༌། ངག་དང༌། ཡིད་གསུམ་གྱི་སྒོ་ནས་སྒྱུ་མེད་པར་ཁས་བླང་ངོ་ཞེས་པ་སྟེ་ལུས་ཀྱིས། སློབ་མས་བླ་མའི་རྐང་པ་ལ། །དད་ཅིང་གུས་པར་ཕྱག་བྱས་ནས། །ཞེས་པའོ། །ངག་གིས། དེ་དག་ཐམས་ཅད་ཁས་བླང་ངོ༌། །ཞེས་པ་སྟེ་བཀལ་སྩལ་པ་བཞིན་དུ་བགྱིའོ་ཞེས་སྨྲ་བར་བྱའོ། །སེམས་ཀྱིས། ཤིན་ཏུ་ངེས་པའི་ཡིད་ཀྱིས་ནི། །ཞེས་པ་སྟེ་སློབ་དཔོན་གྱི་ངོ་ཙམ་ཁས་བླང་བ་མ་ཡིན་གྱི། སེམས་ཐག་པ་ནས་སོ་ཞེས་པའོ། །དེ་ཡན་ཆད་ཀྱིས་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་ཆོ་ག་རྣམས་རྫོགས་སོ།། །། །།