ཁྲོ་བོ་རྣམ་པར་རྒྱལ་བའི་རྟོག་པ་གསང་བའི་རྒྱུད་ཀྱི་རྒྱ་ཆེར་བཤད་པ།
རྒྱ་གར་སྐད་དུ། ཀྲོ་དྷ་བི་ཛ་ཡ་ཀ་ལྤ་གུ་ཧྱ་ཏནྟྲ་སྱ་ཊཱི་ཀཱ། །བོད་སྐད་དུ། ཁྲོ་བོ་རྣམ་པར་གྱལ་བའི་རྟོག་པ་གསང་བའི་རྒྱུད་ཀྱི་རྒྱ་ཆེར་བཤད་པ། བཅོམ་ལྡན་འདས་ངག་གི་དབང་པོ་ལ་ཕྱག་འཚལ་ལོ། །བཅོམ་ལྡན་འདས་ཁྲོ་བོ་རྣམ་པར་རྒྱལ་བའི་རྒྱུད་སྟོང་ཕྲག་བཅུ་གཉིས་བཞུགས་པ་ལས་མ་འོངས་པའི་སེམས་ཅན་རྣམས་ཀྱི་དོན་དུ་སློབ་དཔོན་པྲ་ཏི་ཝརྞ་ཙནྡྲ་ས་རྒྱུད་ཆེན་པོ་སྟོང་ཕྲག་བཅུ་གཉིས་ཀྱི་ནང་ནས་བཏུས་ཏེ། ཤློ་ཀ་སུམ་སྟོང་པ་གཅིག་ཀྱང་མཛད། ཁྲོ་བོ་རྣམ་པར་རྒྱལ་བའི་རྒྱུད་ཀྱི་ཆོ་ག་ཤླཽ་ཀ་སྟོང་བཞུགས་པ་འདི་ལས་སློབ་དཔོན་པྲ་ཏི་ཝརྞ་ཙནྡྲས་བཏུས་ནས་མཛད་པ་སྟེ། དེ་ཡང་རྒྱུད་གང་གི་ནང་ནས་བཏུས་ནས་མཛད་ཅེ་ན། སློབ་དཔོན་འཆད་པ་དག་མི་མཐུན་ཏེ། ཁ་ཅིག་ན་རེ་ཁྲོ་བོ་རྣམ་པར་རྒྱལ་བའི་རྒྱུད་སློབ་དཔོན་པྲ་ཏི་ཝརྞ་ཙནྡྲ་ཉིད་ཀྱིས་བཏུས་ཏེ་མཛད་པ་ཤླཽ་ཀ་སུམ་སྟོང་བཞུགས་པའི་ནང་ནས་བཏུས་ཏེ། རྒྱུད་འདི་མཛད་དོ་ཞེས་ཀྱང་འཆད། ཁ་ཅིག་ན་རེ་མ་ཉྫུ་ཤྲཱིའི་ཏནྟྲ་ཤློ་ཀ་ཁྲི་དྲུག་སྟོང་བཞུགས་པའི་ནང་ནས་རྒྱུད་འདི་མཛད་དོ་ཞེས་ཀྱང་འཆད་དེ། དེ་ལ་མཉྫུ་ཤྲཱི་ཏནྟྲའི་ནང་ནས་སྤྱིར་ཁྲོ་བོའི་ཆོ་ག་དག་ནི་འབྱུང་ན། །ཁྲོ་བོ་རྣམ་པར་རྒྱལ་བའི་ཆོ་གའི་ཚིག་འདི་དང་མཐུན་པ་ཁོ་ནར་མི་འབྱུང་སྟེ། དེ་བས་ན་རྒྱུད་ཆེན་པོ་དད་ཤློ་ཀ་སུམ་སྟོང་པའི་ནང་ནས་བཏུས་ཏེ། རྒྱུད་འདི་མཛད་པར་ཤེས་པར་བྱའོ། །རྒྱུད་ཀྱི་མིང་ཉིད་ཀྱང་ཁྲོ་བོ་རྣམ་པར་རྒྱལ་བའི་རྒྱུད་ཅེས་བྱ་སྟེ། ཅིའི་ཕྱིར་ཞེ་ན། ཁྲོ་བོས་མ་རུངས་པ་རྣམས་བཏུལ་ནས་དེ་ལས་རྣམ་པར་རྒྱལ་བས་ན། རྒྱུད་ཀྱི་མིང་ཁྲོ་བོ་རྣམ་པར་རྒྱལ་བའི་རྒྱུད་ཅེས་བྱ་སྟེ། རྒྱུད་ཀྲི་ཡའི་རྒྱུད་དུ་གཏོགས་སོ། །རིགས་
ནི་དེ་བཞིན་གཤེགས་པའི་རིགས་ཀྱི་ནང་དུ་གཏོགས་སོ། །དེ་ལ་དང་པོ་རྒྱུད་ཀྱི་གླེང་གཞི་བསྟན་དགོས་ཏེ། དེ་ཡང་གནས་གཙང་མ་རིགས་ཀྱི་གཞལ་མེད་ཁང་གི་ནང་ན། བཅོམ་ལྡན་འདས་ཤཱཀྱ་ཐུབ་པ་འཁོར་དང་བཅས་པ་བཞུགས་སོ། །དེའི་ཚེ་ན་བཅོམ་ལྡན་འདས་ཤཱཀྱ་ཐུབ་པ་མེ་ཏོག་རབ་ཏུ་འབྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྦུ་ནས་འོད་ཟེར་བྱུང་བས། ལྷོ་ཕྱོགས་ཀྱི་ངོས་ཆུ་བོ་གང་གཱའི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་ཕ་རོལ་ན་འཇིག་རྟེན་གྱི་ཁམས་མེ་ཏོག་ཅན་ཞེས་བྱ་བ་ན་བཅོམ་ལྡན་འདས་མེ་ཏོག་ཀུན་དུ་རྒྱས་པའི་དབང་པོ་དང༌། འཕགས་པ་འཇམ་དཔལ་ལ་སོགས་པ་འཁོར་དང་བཅས་པ་བཞུགས་པའི་ཐད་དུ་ཕྱིན་ནས། འཕགས་པ་འཇམ་དཔལ་གྱིས་བཅོམ་ལྡན་འདས་མེ་ཏོག་ཀུན་དུ་རྒྱས་པའི་དབང་པོ་ལ་ཞུས་པ། བཅོམ་ལྡན་འདས་འོད་ཟེར་འདི་གང་ནས་བྱུང༌། སུའི་ལགས། ཅིའི་སླད་དུ་འདི་བྱུང་ཞེས་ཞུས་པ་དང༌། བཀའ་སྩལ་པ། འཇམ་དཔལ་གཞོན་ནུར་གྱུར་པ་ཉོན་ཅིག །འདི་ནས་བྱང་ཕྱོགས་ལོགས་སུ་ཆུ་བོ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པའི་ཕ་རོལ་ན་མི་མཇེད་ཀྱི་འཇིག་རྟེན་གྱི་ཁམས་ཞེས་བྱ་བ་ན། བཅོམ་ལྡན་འདས་ཤཱ་ཀྱ་ཐུབ་པ་བཞུགས་པའི་འོད་ཟེར་ཡིན་ཏེ། །འོད་ཟེར་འདིས་ཁྱོད་མི་མཇེད་ཀྱི་ཁམས་སུ་བཅོམ་ལྡན་འདས་ཤཱཀྱ་ཐུབ་པ་དེས་འགུགས་པའི་བསྐུལ་མ་ཡིན་ནོ་ཞེས་བཀའ་སྩལ་པ་དང༌། སླར་ཡང་གསོལ་པ། དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་བཅོམ་ལྡན་འདས་ཤཱཀྱ་ཐུབ་པའི་ཞིང་དེར་མཆི་བར་འཚལ་ལོ་ཞེས་ཞུས་པ་ལས། བཀའ་སྩལ་པ། ལེགས་སོ་ལེགས་སོ་ཞེས་ནས། འཕགས་པ་འཇམ་དཔལ་མི་མཇེད་ཀྱི་འཇིག་རྟེན་གྱི་ཁམས་ཀྱི་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་ཕྱིན་ནས། བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། རིགས་ཀྱི་བུ་རང་གི་གསང་སྔགས་ཀྱི་སྤྱོད་པ་རྗེས་སུ་དྲན་པར་གྱིས་ཤིག་ཅེས་བཀའ་སྩལ་པ་དང༌། དེའི་ཚེ་འཕགས་པ་འཇམ་དཔལ་གྱིས་ཐམས་ཅད་ཟིལ་གྱིས་གནོན་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་སོ། །སྙོམས་པར་ཞུགས་མ་ཐག་ཏུ་ཁྲོ་བོ་གཤིན་རྗེ་གཤེད་ཅེས་བྱ་བ་བྱུང་སྟེ། མ་རུངས་པ་ཐམས་ཅད་བཏུལ་ནས་སླར་ལོག་སྟེ། ཞུས་པ། བཅོམ་ལྡན་འདས་ཁྲོ་བོའི་རྒྱུད་ཆེན་པོ་འཆད་པར་འཚལ་ན། བདག་བྱིན་གྱིས་བརླབ་ཏུ་གསོལ་ཞེས་ནས། དེ་ནས་ཁྲོ་བོ་རྣམ་པར་རྒྱལ་བའི་སྐུར་གྱུར་ནས་ཁྲོ་བོ་རྣམ་པར་རྒྱལ་པའི་རྒྱུད་ཆེན་པོ་སྟོང་ཕྲག་བཅུ་གཉིས་བཤད་དེ། །དེ་ལ་རྒྱུད་ཆེན་པོ་སྟོང་ཕྲག་བཅུ་གཉིས་པ་གསུངས་པ་ཡང་རྩ་བ་ལྔ་རྣམས་ཀྱི་རྒྱས་པར་བཤད་དོ། །དེ་ཡང་གང་ཞེ་ན། དེ་ཡང་རྩ་བའི་ཆོ་ག་རྒྱས་པ་དང༌། ཆོ་ག་རྒྱས་པའི་ཕྱི་མ་དང་ཆོ་ག་རྒྱས་པའི་ཕྱི་མའི་ཡང་ཕྱི་མ་དང༌། ཆོ་ག་རྒྱས་པའི་ཕྱི་མའི་ཕྱི་མ་བྱེ་བྲག་དང༌། ཆོ་ག་རྒྱས་པའི་ཕྱི་མའི་ཕྱི་མའི་གསང་བའི་ཆོ་ག་དང༌། འདི་ལྔས་རྒྱས་པར་བཤད་པ་ལས་ལྔ་པོ་དེ་རྣམས་ལ་བརྟེན་ནས་ཡོངས་སུ་སྡུད་པར་མཛད་པའི་བྱང་ཆུབ་སེམས་དཔའ་རྣམས་ཀྱི་སྐབས་ནི་མི་མཐུན་པ་ཡང་ཞིག་ཏུ་ཕྱེ་ནས་ལེའུ་སྟོང་ཕྲག་བཅུ་གཉིས་པོར་གསུངས་པ་དེ་བསྡུས་སོ། །དེ་ལ་སློབ་དཔོན་པྲ་ཏི་ཝརྞ་ཙནྡྲས་རྒྱུད་ཆེན་པོ་སྟོང་ཕྲག་བཅུ་གཉིས་པོ་གསུངས་པའི་ནང་ནས་རྩ་བ་ལྔ་འབྱུང་བའི་ཆོ་ག་རྩ་བ་ལྔ་པོ་ཉི་ཚེ་ཙམ་ཞིག་དང༌། དེའི་ནང་ནས་ལེའུའམ། སྐབས་ཉི་ཤུ་རྩ་གཅིག་བཏུས་ནས་རྒྱུད་འདི་མཛད་དོ་ཞེས་པའོ། །ཁྲོ་བོ་རྣམ་པར་རྒྱལ་བའི་རྒྱུད་ཤླཽ་ཀ་སྟོང་བཞུགས་པ་འདི་ལ་རྩ་བ་ལྔ་པོའི་བཤད་པའི་ནང་ནས་རྩ་བའི་ཆོ་ག་རྒྱས་པའི་ནང་དུ་གཏོགས་པའི་སྐབས་སམ། ལེའུ་རྒྱུད་འབྱུང་བ་ཞེས་བྱ་བ་དེ་དང་པོར་བཤད་དོ། །དེ་བས་ན་དང་པོ་རྒྱུད་འབྱུང་བ་ཞེས་བྱ་བའི་ལེའུ་འམ། སྐབས་སྟོན་པ་དེ་ཡང་ས་བཅད་རྣམ་པ་དགུས་བཤད་དོ། །དགུ་གང་ཞེ་ན། རང་གི་མཐུ་ཉེ་བར་བསྟན་པ་དགུར་བྱས་ཏེ། ལྷ་རྣམས་གཟུད་པ་དང༌། བསྟོད་པ་སྔར་བྱས་ནས་གསོལ་བ་འདེབས་པ་དང༌། ཞུ་བར་གྱུར་པ་དང༌། ཞུ་བ་དང༌། ཞུ་བ་པོའི་ལེན་འདེབས་པ་དང༌། སྙིང་པོ་མཐུ་ཆེ་བར་བསྟན་པ་དང༌། རང་གི་ཆོ་ག་རྒྱས་པར་བསྟན་པ་དང༌། ལྷ་རྣམས་ཀྱི་ཆོ་ག་རྒྱས་པར་བཤད་པ་དང༌། བྱང་ཆུབ་སེམས་དཔའ་རྣམས་ཀྱིས་བྱིན་གྱིས་རློབ་པར་བསྟན་པ་དང༌། རྣམ་པ་འདི་དགུས་བཤད་དོ། །དེ་ལ་དེ་ནས་འཇམ་དཔལ་དབྱངས་ཀྱི་ནི་ཞེས་པ་ནི། དེ་བཞིན་དུ་ནི་འཇིག་རྟེན་
པའི། །ལྷ་རྣམས་ཀུན་གྱིས་འདུད་པར་བྱེད། །ཅེས་པའི་བར་དུ་རང་གི་མཐུ་ཉེ་བར་བསྟན་པ་རྒྱུར་བྱས་ཏེ་ལྷ་རྣམས་གཟུད་ཅེས་བྱ་བའི་དོན་སྟོན་ཏོ། །དེ་ལ་དེ་ནས་འཇམ་པའི་དབྱངས་ཀྱི་ནི་ཞེས་བྱ་བ་ལ། དེ་ནས་ཞེས་བྱ་བ་ནི་རྒྱུད་འདི་རྩ་བའམ། ཕྱི་མོ་སྟོང་ཕྲག་བཅུ་གཉིས་བཞུགས་པའི་ནང་ནས་གོང་དུ་སྐབས་མི་འདྲ་བ་མང་པོ་གསུངས་པའི་དེ་མ་ཐག་འདས་པའི་འཕྲོ་ཡིན་པས་ན། དེ་ནས་ཞེས་ཀྱང་བྱ། གོ་སྐབས་འབྱེད་པའམ། བཀྲ་ཤིས་པའམ། ཚིག་གི་རྒྱན་ལ་ཡང་དེ་ནས་ཞེས་བྱ། རྣམ་པ་གཅིག་ཏུ་ཁྲོ་བོ་མ་རུངས་པ་ཐམས་ཅད་བཏུལ་ནས། དེའི་འོག་ཏུ་རྒྱུད་འདི་དག་བཤད་པས་ན། ཡང་དེ་ནས་ཞེས་བྱ་བ། དབྱངས་ཀྱི་སྒྲ་ནི་སྐད་ཀྱི་གདངས་ལ་བྱ་སྟེ། འཕགས་པ་འཇམ་དཔལ་གྱི་གསུང་གི་གདངས་དེ་ཐམས་ཅད་ཀྱི་ཡིད་དུ་འོང་ཞིང་སྙན་པ་ལ་བྱ་སྟེ། ཡོན་ཏན་གྱི་སྒོ་ནས་མཚན་དུ་གསོལ་བའི་འཕགས་པ་འཇམ་དཔལ་དེ་ཏིང་ངེ་འཛིན་གང་ལ་བཞུགས་ན། ཁྲོ་བོ་འབྱུང་བར་བྱེད་པའི་ཏིང་ངེ་འཛིན་དེ་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཁྲོ་བོ་བྱུང་སྟེ། གསུངས་པ། ཁྲོ་བོ་འདི་མིང་གཤིན་རྗེ་གཤེད་ཅེས་བྱ་བ་སྟེ། དེ་ལ་ཁྲོ་བོ་ལ་ཡང་རྣམ་པ་གཉིས་ཏེ། ཉོན་མོངས་པས་དཀྲིས་པས་འདོད་ཆགས་དང༌། ཞེ་སྡང་གཏི་མུག་ལས་བྱུང་བའི་ཁྲོ་བོ་དང༌། མ་རུངས་པ་རྣམས་འདུལ་བའི་ཕྱིར་སྔོན་གྱི་སྨོན་ལམ་དང་ཐུགས་རྗེ་ཆེན་པོའི་དབང་གིས་ཁྲོ་བོའི་ཚུལ་དུ་བསྟན་ནས་བྱུང་བ་སྟེ། དེ་ལ་འདིར་ནི་སྔོན་གྱི་སྨོན་ལམ་དང༌། ཐུགས་རྗེའི་དབང་གིས་ཁྲོ་བོར་སྤྲུལ་ཏེ་བྱུང་བ་ལ་བྱའོ། །འཕགས་པ་འཇམ་དཔལ་གྱི་ཁྲོ་བོ་ཡང་མཉྫུ་ར་བ་དང༌། ཤང་མུ་ཀ་ལ་སོགས་པ་གྲངས་མེད་པར་བྱུང་བ་དེ་དག་ལ་མི་བྱ་ཞིང་དེ་དག་ལ་གོལ་དུ་དོགས་པའི་ཕྱིར་ཁྲོ་བོའི་མིང་སྨོས་པ་ཏེ། ཁྲོ་བོ་འདིའི་མིང་གཤིན་རྗེའི་གཤེད་ཅེས་བྱ་བ་འབྱུང་ངོ་ཞེས་པའོ། །དེ་ལ་གཤིན་རྗེའི་གཤེད་ཅེས་བྱ་བའི་སྒྲ་ནི་ཚིག་ཐང་ལོག་ཏུ་ན་དཀའ་བཟློག་ཅེས་ཀྱང་སྟེ། སེམས་ཅན་རྣམས་ཚེ་དང༌། ལོངས་སྤྱོད་དང་བྲལ་ནས་མཐར་མེད་པར་བྱེད་པས་དེ་དག་གདུལ་བའི་ཕྱིར་དེ་དང་རྗེས་སུ་མཐུན་པའི་ཆ་ལུགས་སུ་གཙོ་བོའི་ཚུལ་འཛིན་པར་སྤྲུལ་ཏེ་བསྟན་པ་ན་གཤིན་རྗེ་གཤེད་ཅེས་
བྱའོ། །ཁྲོ་བོ་གཤིན་རྗེ་གཤེད་དེའི་ཕྱག་མཚན་དང༌། ཡུལ་ཡང་གསུངས་པ། མཚོན་ཆ་མེ་ལྕེ་འབར་བས་འཁྲུགས། །ཞེས་བསྟན་ཏེ། ཕྱག་མཚན་ཡང་ཏྲི་ཤཱུ་ལ་དང༌། རལ་གྲི་ལ་སོགས་པ་བསྟན་པ་ཡང་མེ་ལྕེ་བཞིན་དུ་འབར་བ་ཅན་ལ། ཁྲོ་བོ་ཉིད་ཀྱང་འབར་བའི་ནང་ན་བཞུགས་པས་མ་རུངས་པ་རྣམས་ཚར་གཅོད་པའི་ཚུལ་དུ་ཁྲོས་པ་ལ་བྱའོ། །འཁྲུགས་པ་ནི་ཁྲོས་པ་ལ་བྱའོ། །དེ་ཡང་ཅི་འདྲ་བའི་ཚུལ་ཞིག་ཏུ་ཁྲོས་ཤེ་ན། གསུངས་པ། དྲག་ལ་མཐུ་རྩལ་དྲག་ལྡན་པ། །ཞེས་པས་བསྟན་ཏེ། དེ་ལ་དྲག་པ་ཞེས་པ་ནི་ཁྲོ་བོ་དེ་རླུང་དང་མེའི་དཀྱིལ་འཁོར་ནས་འབྱུང་བས་ན་དྲག་པོའོ། །ཁྲོ་བོ་དེས་ཕ་རོལ་པོ་མ་རུངས་པ་རྣམས་ཚར་གཅོད་ཅིང་འདུལ་ནུས་པའི་མཐུ་དང་ལྡན་པས་ན་མཐུ་རྩལ་དྲག་པོ་ཞེས་བྱའོ། །དེ་མཐོང་ནས་ནི་ཁྲོ་བོ་གཞན། །ཐམས་ཅད་ཀྱི་ནི་ལག་ཆ་ཤོར། །ཞེས་པ་ནི་ཁྲོ་བོ་དེའི་མཐུ་རྩལ་ཆེན་པོའི་ཡོན་ཏན་བསྟན་པ་སྟེ། འཇིག་རྟེན་ལས་འདས་པའི་ཁྲོ་བོ་གཞན་རྣམས་ཀྱིས་ཁྲོ་བོ་གཤིན་རྗེ་གཤེད་པོ་མཐོང་ནས། ཐམས་ཅད་སྐྲག་སྡངས་ཏེ་བརྒྱལ་ནས་ལག་ཆ་ཤོར་ཏོ་ཞེས་པ་དེ་ཡང་སེམས་ཅན་འདུལ་བའི་དོན་གཤིན་རྗེའི་གཤེད་མཐུ་ཆེ་བར་བསྟན་པའི་ཕྱིར་རོ། །དེ་བཞིན་དུ་ནི་འཇིག་རྟེན་པའི། །ལྷ་རྣམས་ལུས་ཀྱིས་འདུད་པར་བྱེད། །ཅེས་པ་ནི་དེ་ལ་དེ་བཞིན་ཞེས་བྱ་བའི་དོན་ནི་གོང་དུ་འཇིག་རྟེན་ལས་འདས་པའི་ལྷ་ཁྲོ་བོ་གཞན་རྣམས་སྐྲག་ནས་བརྒྱལ་ཏེ། ལག་ཆ་ཤོར་བ་དེ་བཞིན་དུ་འཇིག་རྟེན་པའི་ལྷ་རྣམས་ཀྱང་སྐྲག་སྟེ་སྡངས་ནས་ཐམས་ཅད་གནས་ནས་འདུས་ཏེ། ཕྱག་བཙལ་ནས་བསྟན་པ་ལ་སྐྱབས་སུ་དོང་ངོ་ཞེས་བྱ་བའི་ཐ་ཚིག་གོ །གཞན་ཡང་ཐལ་མོ་སྦྱར་བྱས་ཏེ། །ཞེས་པ་ནས། གཟི་བརྗིད་འབར་བར་ཕྱོགས་ཁྱབ་པ། །ཁམས་གསུམ་འཁྲུགས་པར་མཛད་པ་མཐོང༌། །ཞེས་པའི་བར་དུ་བསྟོད་པ་སྔར་བྱས་ནས་གསོལ་བ་འདེབས་པ་ཞེས་པའི་དོན་ཏོ། །གཞན་ཡང་ཐལ་མོ་སྦྱར་བྱས་ཏེ། །སྐྲག་ནས་བསྟོད་པ་མང་པོ་བྱེད། །ཅེས་བྱ་བ་ལ། དེ་ལ་གཞན་ཡང་ཞེས་བྱ་བ་ནི་གོང་དུ་ལྷ་རྣམས་ཐམས་ཅད་འདུད་ཅིང་ཕྱག་འཚལ་བར་མ་ཟད་ཀྱི། །ལྷ་དེ་དག་སྐྲག་ནས་ཐལ་མོ་སྦྱར་ཏེ་ཁྲོ་བོ་དེ་ལ་བསྟོད་པ་མང་པོ་བྱེད་དོ་ཞེས་པའོ། །དེ་ཡང་ཇི་སྐད་བསྟོད་པ་ནི་རྩ་བའི་རྒྱུད་སྟོང་ཕྲག་བཅུ་གཉིས་པ་ལས་གསུངས་ཏེ། རྒྱུད་འདིར་ནི། རྒྱུད་
མང་དུ་དོགས་ནས་སློབ་དཔོན་གྱིས་མ་གསུངས་སོ། །བསྟོད་པ་དེ་ཡང་ཚིག་ཅི་འདྲ་བ་ཞིག་གིས་བསྟོད་ཅེ་ན། དེ་ཡང་རང་གི་དོན་ཕུན་སུམ་ཚོགས་པ་དང༌། གཞན་གྱི་དོན་ཕུན་སུམ་ཚོགས་པའི་སྒོ་ནས་ཁྲོ་བོ་དེ་ལ་བསྟོད་ཅེས་པའི་དོན་ཏོ། །ལྷ་རྣམས་དེ་ཡི་གཟི་བརྗིད་ཀྱིས། །གཟིར་བཞིན་དུ་ནི་རབ་སྨྲས་པ། །ཞེས་བྱ་བ་ནི་འཇིག་རྟེན་པའི་ལྷ་དེ་རྣམས་ཀྱང་ཁྲོ་བོ་དེའི་གཟི་བརྗིད་ཀྱིས་གཟིར་བཞིན་དུ་གསལ་བ་ཞེས་པ་སྟེ། དེ་ཡང་གང་ཞེ་ན་གསུངས་པ་ཞེས་པའི་དོན་ཏོ། །བཅོམ་ལྡན་བདག་ཅག་སངས་རྒྱས་དང༌། །ཆོས་དང་དགེ་འདུན་ལ་སྐྱབས་མཆི།། ཞེས་བྱ་བ་ལ་སོགས་པ་གཞན་ནི་འཇལ་པར་བྱས། རབ་ཏུ་མི་བཟད་འཇིགས་པའི་གཟུགས། །གཟི་བརྗིད་འབར་བས་ཕྱོགས་ཁྱབ་པས། །ཁམས་གསུམ་འཁྲུགས་པར་མཛད་པ་མཐོང༌། །ཞེས་བྱ་བ་ནི་ཁྲོ་བོའི་གཟུགས་ཀྱི་བྱེ་བྲག་ལ་བྱ་སྟེ། དེ་ལྟ་བུའི་གཟུགས་དེ་བརྟུལ་ཞེས་བྱ་བའམ་མཛད་པར་མཐོང་ཞེས་བྱ་བའི་དོན་ཏོ། །གང་ཚེ་ལྷ་དང་ལྷ་མིན་རྣམས། །ཞེས་བྱ་བ་ནས། ཁྲོ་བོ་སླར་ཡང་ཞི་བར་འགྱུར། །ཞེས་པའི་བར་དུ་ཞི་བར་གྱུར་ཏོ་ཞེས་པའི་དོན་ཏོ། །དེ་ཡང་ལྷ་དང་ལྷ་མིན་ལ་སོགས་པ་མ་རུངས་པ་རྣམས་བཏུལ་ནས། སྐྲག་ནས་དཀོན་མཆོག་གསུམ་ལ་སྐྱབས་སུ་སོང་བས། འཕགས་པ་འཇམ་དཔལ་གྱི་ཁྲོ་བོ་དེ་ཡང་སླར་ཞི་བར་གྱུར་རོ་ཞེས་པའི་དོན་ཏོ། །གཤིན་རྗེ་གཤེད་ཅེས་བྱ་བའི་ཁྲོ་བོ་ཆེན་པོ་ཞི་བ་དང་ཞེས་པ་ནས། བདག་ཅག་ཐེ་ཚོམ་ཆེན་པོ་མཆིས། །ཞེས་བྱ་བའི་བར་དུ་ནི་ཞུ་བ་ཞེས་བྱ་བའི་དོན་ཏོ། །དེ་ལ་གཞན་ནི་ཚིག་གཉེར་གྱིས་འཇལ་བར་བྱས། ཁྱོད་ཀྱིས་བརྩོན་འགྲུས་མཆོག་འཚལ་བས། །ཇི་ལྟ་བུར་ནི་མཉེས་པར་བགྱིད། །ཇི་ལྟར་ཡང་ནི་དང་བར་འགྱུར། །ཞེས་པ་ནི། ཁྱོད་ལྟ་བུ་དྲག་ཅིང་མཐུ་རྩལ་ཆེ་བ། དངོས་གྲུབ་རབ་འབྲིང་རྣམ་གསུམ་སྩོལ་ཅིང་བླ་ན་མེད་པའི་གོ་འཕང་མཆོག་འཚལ་བའི་སྒྲུབ་པ་པོས་ཐབས་ཇི་ལྟར་བགྱི་ན། ལྷ་མཉེས་པར་འགྱུར་བ་དང༌། ཇི་ལྟར་ནི་བྱིན་གྱིས་རློབ་ཅིང་ལྷ་མངོན་དུ་ཕྱོགས་པར་འགྱུར་བའི་སྒྲུབ་པའི་ཐབས་དེ་འཚལ་ཏེ། བདག་ཅག་ཐེ་ཚོམ་ཆེན་པོ་མཆིས། །ཞེས་པ་ནི་ཞུ་བའི་དོན་ཏོ། །ཁྲོ་བོས་ལྷ་རྣམས་ཚིག་གསན་ནས། །གཤིན་ཇེ་གཤེད་
ཀྱིས་བཀའ་སྩལ་པ། །ཞེས་བྱ་བ་ནས། གཤིན་རྗེ་གཤེད་པོ་ཁྲོ་བོ་ཡི། །གཙོ་པོའི་སྙིང་པོ་དེ་གཟུང་ངོ༌། །ཞེས་བྱ་བའི་བར་དུ་ཞུས་པའི་ལན་འདེབས་ཞེས་བྱ་བའི་དོན་སྟོན་ཏོ། །དེ་ལ། ཁྲོ་བོས་ལྷ་རྣམས་ཚིག་གསན་ནས། །གཤིན་རྗེ་གཤེད་ཀྱིས་བཀའ་སྩལ་ནས། །ཞེས་པ་ནི། གོང་དུ་ལྷ་རྣམས་ཀྱིས་ཞུས་པའི་ཚིག་ཁྲོ་བོས་གསན་ནས། སླར་བཀའ་ལན་སྩོལ་པའོ། །གཟི་བརྗིད་ཆེན་པོ་ཁྱེད་རྣམས་ཀུན། །ཞེས་བྱ་བ་ནི་དེ་ལྟར་ལྷ་མ་སྲིན་མ་རུངས་པ་དེ་དག་བཀའ་ཉན་པས་ཁྲོ་བོ་ཞི་བར་གྱུར་ཏོ། །སླར་བཀའ་ལན་འདེབས་པའི་ཚེ་དང་པོར་ལྷ་མ་སྲིན་དེ་དག་གིས་ཡོན་ཏན་གྱི་སྒོ་ནས་བོས་པའི་ཚིག་ཏུ། ཀྱེ་གཟི་བརྗིད་ཆེན་པོ་ཁྱེད་རྣམས་ཀུན། །ཞེས་བོས་སོ། །གང་ཚེ་གསུམ་ལ་སྐྱབས་སོང་བ། །དེ་ཡི་ཚེ་ནི་མི་བཟད་པ། །ཁྲོ་བོ་ཡིད་ལ་གནས་པར་གྱིས། །ཞེས་པ་ནས། སེམས་ཅན་ཀུན་ལ་སྙིང་བརྩེའི་ཕྱིར། །ང་ཡི་ཡིད་ནི་ཞི་བར་གྱུར། །ཞེས་བྱ་བའི་བར་དུ་གོང་དུ། ཁྱོད་ཀྱི་བརྩོན་འགྲུས་མཆོག་འཚལ་བས། །ཇི་ལྟ་བུར་ན་མཉེས་པར་བགྱིས། །ཞེས་ཞུས་པའི་ལན་འདེབས་པའི་ཚིག་སྟེ། དཀོན་མཆོག་གསུམ་ལ་སྐྱབས་སུ་སོང་བ་རྣམས་ཀྱིས་དེའི་ཚེ། ངའི་སྐུ་གཟུགས་འབར་ཞིང་མི་བཟད་པའི་ཁྲོ་བོ་དེ་སེམས་ལ་སྒོམ་པར་གྱིས་ཤིག་ཅེས་པའོ། །དེ་ཡང་ཅིའི་ཕྱིར་ཞེ་ན། དཀོན་མཆོག་ཡུན་རིང་དུ་གནས་པར་བྱ་བ་དང༌། དེའི་བཀའ་སྲུང་བ་དང༌། །སྡུག་བསྔལ་ཅན་གྱི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཏུ་བསྒྲལ་བར་བྱ་བའི་ཕྱིར་རོལ། །ང་ཡི་ཡིད་ནི་ཞི་འགྱུར་གྱིས། བྱ་བ་ནི་དོན་དེ་ལྟ་བུའི་ཕྱིར་ན་ངའི་ཡིད་ཞི་བར་འགྱུར་ཞེས་གོང་དུ་སྦྱར། འོག་ཏུ་ཡང་སྦྱར་བར་ཤེས་པར་བྱའོ། །ཁྱེད་རྣམས་སྐྱབས་སུ་དོང་བ་དང༌། །བྱང་ཆུབ་སེམས་དང་ལྡན་པ་ཡིས། །ཞེས་བྱ་བ་ནས། ང་ཡི་སྙིང་པོ་ཡིད་ལས་བྱུང༌། །ལྷ་རྣམས་ཀུན་གྱིས་གཟུང་བར་གྱིས། །ཞེས་བྱ་བའི་བར་དུ། ཇི་ལྟར་ཡང་ནི་དང་བར་འགྱུར། །ཞེས་ཞུས་པའི་ལན་འདེབས་པའི་ཚིག་སྟེ། དེ་ལ་ཁྱེད་རྣམས་སྐྱབས་དོང་སྟེ། བྱང་ཆུབ་ཀྱི་སེམས་དང་ལྡན་པ་རྣམས་ཀྱིས་དངོས་གྲུབ་རབ་འབྲིང་རྣམ་པ་གསུམ་དང༌། བླ་ན་མེད་པའི་གོ་འཕང་མཆོག་མན་ཆད་བསྒྲུབ་པའི་
མཆོག་ཏུ་གྱུར་པའི་ཡི་གེ་འབྲུ་བཅུ་བདུན་པོ་ཁྲོ་བོའི་ཐུགས་ཀ་ནས་བྱུང་བ་དེ་ལྷ་རྣམས་ཀུན་གྱིས་བཟུང་བར་གྱིས་ཤིག་ཅེས་བྱ་བའོ། །གཤིན་རྗེ་གཤེད་པོ་བདག་ཉིད་ཀྱིས། །སྙིང་པོ་རབ་ཏུ་གསུངས་པས་ན། །ཞེས་བྱ་བ་ནས། གཤིན་རྗེ་གཤེད་པོ་ཁྲོ་བོ་ཡི། །གཙོ་བོའི་སྙིང་པོ་དེ་བཟུང་ངོ༌། །ཞེས་བྱ་བའི་བར་དུ་ནི་སྙིང་པོ་མཐུ་ཆེ་བར་བསྟན་པའི་དོན་སྟོན་ཏེ། གཞན་ནི་དཀྱུས་ཉིད་ཀྱིས་འཇལ་བར་བས། །ཡན་ལག་ཀུན་ནས་སྤུ་ལངས་ནས། །ཞེས་པ་ནི་སྙིང་པོ་འབྲུ་བཅུ་བདུན་པོ་གསུངས་པས། ལྷ་རྣམས་ཀུན་དགའ་མགུ་རངས་ནས་ཡན་ལག་གི་བ་སྤུ་རྣམས་གཡོས་ཤིང་ལངས་སོ་ཞེས་སོ། །གཤིན་རྗེ་གཤེད་པོ་ཁྲོ་བོ་ཡི། །གཙོ་བོའི་སྙིང་པོ་དེ་བཟུང་ངོ༌། །ཞེས་པ་ནི། གཤིན་རྗེའི་གཤེད་པོའི་ཁྲོ་བོ་རྣམས་ཀྱི་ནང་ནས་གཙོ་བོ་དེའི་སྙིང་པོ་ལྷས་མནོས་སོ་ཞེས་པའོ། །དེས་ནི་མཁན་པོ་དང་སློབ་མའི་ཚུལ་བསྟན་པའོ།། སྐབས་འདིར་སྙིང་པོ་མཐུ་ཆེ་བར་བསྟན་པའི་དོན་སྟོན་པ་འདི་གང་དུ་སྔར་བཤད་པ་ལྟར་ཞུས་པའི་ལན་འདེབས་པ་ཞེས་པའི་དོང་ཡི་ནང་དུ་གཅིག་ཏུ་བསྡུས་ན་ཡང་མི་རུང་བ་མེད་ལ། སྙིང་པོ་མཐུ་ཆེ་བར་བསྟན་པའི་དོན་གཅིག་གིས་སྐབས་འདིར་ས་བཅད་དེ་བཤད་ན། ཡང་ཉེས་པ་མེད་པས་དེ་གཉིས་ཀ་ཡང་རུང་བར་གཟུང་ངོ༌། །དེ་ནས་དམ་ཆོས་བསྲུང་བའི་ཕྱིར། །ཁྲོ་བོ་རྣམ་པར་རྒྱལ་བ་ཡི། །རྟོག་པ་འདི་ནི་དེ་དག་ལ། །གཤིན་རྗེ་གཤེད་ཀྱིས་རྒྱས་པར་གསུངས། །ཞེས་བྱ་བ་ནི་རང་གི་ཆོ་ག་རྒྱས་པར་བཤད་པའི་ཞེས་བྱ་བའི་དོན་ཏེ། དེ་ལ་དམ་ཆོས་བསྲུང་ཞིང་བསྐྱང་བའི་ཕྱིར་ཁྲོ་བོ་རྣམ་པར་རྒྱལ་བའི་རྒྱུད་སྟོང་ཕྲག་བཅུ་གཉིས་པོ་ལྷ་དེ་རྣམས་ལ་ཆོ་ག་རྒྱས་པར་བསྡུས་སོ་ཞེས་པའོ། །དེ་ནས་ཁྲོ་བོ་རྣམ་རྒྱལ་གྱི། །རྟོག་པ་ཁྲོ་བོ་ཉིད་ཀྱིས་གསུངས། །ཞེས་པ་ནས། དཀོན་མཆོག་གསུམ་ནི་བསྲུང་བའི་ཕྱིར། །སོ་སོ་ཡི་ནི་རྟོག་པ་བཤད། །ཅེས་པའི་བར་དུ་ལྷ་རྣམས་ཀྱི་ཆོ་ག་རྒྱས་པར་བཤད་པ་བསྟན་པ་ཞེས་བྱ་བའི་དོན་སྟོན་ཏེ། །དེ་ལ་ཁྲོ་བོ་རྣམ་པར་རྒྱལ་བའི་རྒྱུད་ཆེན་པོ་ཁྲོ་བོ་ཉིད་ཀྱིས་གསུངས་པ་སྟེ། སྙིང་རྗེ་དང་བྱང་ཆུབ་སེམས་དང་ལྡན་པའི་ལྷ་རྣམས་ཀྱིས་ཐོས་ནས་ཡིད་རབ་ཏུ་དགའ་བར་གྱུར་ཏེ། ལྷ་དེ་དག་གིས་ཀྱང་དྲིན་ལན་ལན་གྱིས་
གླན་པའི་ཚུལ་གྱིས་སོ་སོ་རྟོག་པ་དག་གི་ཆོ་ག་སྨྲས་སོ་ཞེས་པའོ། །ཅིའི་ཕྱིར། སོ་སོ་རང་རང་གི་རྟོག་པ་དག་སྨྲས་ཤེ་ན། དེ་ཡང་དཀོན་མཆོག་གསུམ་བསྲུང་བའི་ཕྱིར་ཏེ། དེ་ལ་འཇིག་རྟེན་པའི་ལྷ་སོ་སོའི་སྙིང་པོ་ལ་སོགས་པའི་ཆོ་ག་རྒྱས་པར་ཁྲོ་བོ་རྣམ་པར་རྒྱལ་པའི་རྒྱུད་དུ་སྨྲས་པ་ན། ཁྲོ་བོའི་རྒྱུད་དེ་ནི་མུ་སྟེགས་ཅན་གྱིས་མཐོང་བ་ན་རང་རང་གི་ལྷ་གཙོ་བོའི་སྔགས་དང་ཕྱག་རྒྱ་དང༌། དེ་བསྒྲུབ་པའི་ཆོ་ག་རྒྱས་པར་གསུངས་པ་ན། དེ་དག་ཀྱང་བསྟན་པ་ལ་འཇུག་པར་འགྱུར་ཏེ། དེ་ཉིད་ཀྱི་དཀོན་མཆོག་གསུམ་བསྲུང་བར་འགྱུར་བ་དང༌། དཀོན་མཆོག་གསུམ་གྱི་རྟེན་འཇིག་པ་ཞིག་ན། ལྷ་དེ་དག་ཕྱག་རྒྱ་དང་སྔགས་ལ་སོགས་པའི་ཆོ་ག་སྦྱར་བ་ལས། ཕ་རོལ་པོ་མ་རུངས་པ་དེ་དག་རྣམས་ཐུལ་བར་འགྱུར་པའི་ཕྱིར་ཡང་དཀོན་མཆོག་གསུམ་བསྲུང་བར་འགྱུར་བ་དང༌། དེ་དག་གི་དོན་དུ་འཇིག་རྟེན་པའི་ལྷ་སོ་སོ་རང་རང་གི་ཆོ་ག་རྒྱས་པ་དག་ཀྱང་ཁྲོ་བོ་རྣམ་པར་རྒྱལ་བའི་རྒྱུད་ཆེན་པོར་སྨྲས་ཤིང་བཤད་དོ་ཞེས་པའོ། །དེ་དག་གི་ནི་རྩ་བའི་རྒྱུད། །ཁྲོ་བོ་ཉིད་ཀྱིས་རབ་གསུངས་པ། །ཞེས་པ་ནས། སྙིང་རྗེ་དེ་བཞིན་རྒྱས་པ་དང༌། །རྣམ་པ་མང་པོར་བྱིན་གྱིས་རློབས། །ཞེས་བྱ་བའི་བར་དུ་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་བརླབས་པའི་དོན་ཏེ། དེ་ལ་བདག་གི་རྩ་བའི་རྒྱུད་ཅེས་བྱ་བ་ནི་འཇིག་རྟེན་པའི་ལྷ་དེ་དག་རྩ་བའི་རྒྱུད་དུ་གྱུར་པའི་ཁྲོ་བོ་རྣམ་པར་རྒྱལ་པའི་རྒྱུད་འདི་ཉིད་ལ་བྱའོ། །ཅིའི་ཕྱིར་དེ་དག་གི་རྩ་བའི་རྒྱུད་དུ་གྱུར་པ་ཞེས་བྱ་ཞེ་ན། དང་པོར་ལྷ་དེ་རྣམས་བཏུལ་ནས་སོ་སོའི་སྙིང་པོ་དང༌། ཕྱག་རྒྱ་ལ་སོགས་པའི་ཆོ་གའི་རྟོག་པ་རྣམས་ལྷ་སོ་སོས་ཕུལ་ཞིང་སྨྲས་ཏེ། ཁྲོ་བོ་འི་རྒྱུད་དུ་བཤད་པས་ན་ཁྲོ་བོ་རྣམ་པར་རྒྱལ་བའི་རྒྱུད་ཉིད་ལྷ་དེ་དག་གི་རྩ་བའི་རྒྱུད་ཅེས་བྱའོ། །ལྷ་དེ་དག་གི་རྟོག་པ་ནི་དངོས་ནི་རྒྱུད་ཆེན་པོ་ལས་འབྱུང་སྟེ་ལེའུ་སྟོང་པ་འདི་ལས་མི་འབྱུང་ངོ༌། །ཁྲོ་བོ་རྣམ་རྒྱལ་ཞེས་བྱ་འདི། །འཇིག་རྟེན་འདས་དང་འཇིག་རྟེན་པས། །ཁྲོས་པ་ཞེས་པ་ནི། ཁྲོ་བོ་རྣམ་པར་རྒྱལ་ཆེན་པོ་དེ། བྱང་ཆུབ་སེམས་དཔའ་ས་ལ་གནས་པ་དང༌། ཕྱག་ན་རྡོ་རྗེ་ལ་སོགས་པ་དང༌། འཇིག་རྟེན་པའི་ལྷ་མ་སྲིན་མཐུ་བོ་ཆེ་རྣམས་ཁྲོ་བོའི་འཁོར་ན་བཞུགས་པ་རྣམས་ཀྱིས་
སྔོན་ཡང་ཁྲོ་བོ་རྣམས་ཕྱག་བྱས་ཤིང་ཁྲོ་བོ་དེའི་ཞལ་ནས། ཇི་སྐད་གསུངས་པ་བཞིན་དུ་ཕྱིན་ཅི་མ་ལོག་པར་ཐོས་ནས་ཀྱང་ཞེས་པ་སྟེ། དེ་གསུངས་པ། སྔོན་ནི་ཕྱག་བྱས་ཁྲོ་བོ་ཡི། །ཞལ་ནས་ཇི་བཞིན་ཐོས་ནས་ཀྱང༌། །ཞེས་གསུངས་སོ། །ཁྲོ་བོ་ཉིད་ཀྱིས་གསུངས་པའི་རྒྱུད་དང༌། བྱང་ཆུབ་སེམས་འདི་རྟོགས་རྣམས་ཀྱིས། །སྙིང་རྗེས་དེ་བཞིན་རྒྱས་པ་དང༌། རྣམ་པ་མང་པོས་བྱིན་གྱིས་བརླབས། །ཞེས་པ་ནི་ཁྲོ་བོ་རྣམ་པར་རྒྱལ་བའི་རྒྱུད་ཆེན་པོ་གསུངས་པ་དང༌། ཡང་ཁྲོ་བོའི་ཆོ་ག་རྒྱས་པ་དང༌། རྣམ་པ་ཐ་དད་པ་མང་པོར་བཤད་པ་བཞིན་དུ། སེམས་ཅན་གྱི་དོན་དུ་འགྱུར་བར་འཁོར་བྱང་ཆུབ་སེམས་དཔའ་རྣམས་ཀྱིས་ཀྱང་དེ་བཞིན་དུ་བྱིན་གྱིས་བརླབས་སོ། །རྒྱུད་འབྱུང་བ་ཞེས་བྱ་བའི་སྐབས་དང་པོ་ལ། དེ་ལྟར་བསྡུས་པའི་དོན་རྣམ་པ་དགུར་ཕྱེ་སྟེ་བསྟན་པ་བཤད་ཟིན་ཏོ། །ད་ནི་ཡི་དགས་ཕལ་པོ་ཆེའི་སྐབས་ལ་ལ་བསྡུས་པའི་དོན་རྣམ་པ་བཅོ་ལྔས་བཤད་པ་ལ། མགོ་གླེང་བ་དང༌། ས་བརྟག་པ་དང༌། ས་སྦྱང་བ་དང༌། ཐིག་གདབ་པའི་རིམ་པ་དང༌། ཕྱག་རྒྱ་ལ་སོགས་པ་དགོད་པ་དང༌། ལས་ཀྱི་བྱེ་བྲག་གིས་དཀྱིལ་འཁོར་གྱི་ཚད་ངེས་པར་བྱ་བ་དང༌། མཆོད་པའི་ཡོ་བྱད་བ་སོགས་པ་དང༌། ཕྱག་རྒྱ་ལ་སོགས་པ་བསམ་པ་དང༌། སྤྱན་དྲངས་པ་སྔར་བྱས་ནས་དད་པའི་ལྷའི་རང་བཞིན་བསྒོམ་པ་དང༌། མཆོད་པ་དང་སློབ་མ་སྔར་བཙུད་ནས་ཕྱག་རྒྱ་དང༌། དམ་ཚིག་བསྟན་པ་དང༌། སྔར་དབང་བསྐུར་ནས་གསང་སྔགས་སྦྱིན་པ་དང༌། བླ་མ་ལ་མཆོད་པ་དང༌། སླར་མཆོད་པ་བྱས་ནས་ལྷ་སླར་བཏང་བ་དང༌། དེ་ལ་མཆོད་པའོ། །དེ་ནས་ཁྲོ་བོ་རྣམ་པར་རྒྱལ། །འཇམ་དཔལ་ཁྲོ་བོས་བཤད་པ་ཡི། །ཞེས་པ་ནས། འཇིག་རྟེན་གསུམ་པོར་འཁྲུག་པར་མཛད། །ཡི་དགས་མང་པོ་ཞེས་བྱ་བའི། །ཞེས་བྱ་བའི་བར་དུ་མགོ་གླེང་བའི་ཞེས་བྱ་བའི་དོན་སྟོན་ཏེ། དེ་ལ་ཡང་གཉིས་ཏེ། སྤྱིར་གླེང་བ་དང༌། བྱེ་བྲག་ཏུ་གླེང་པ་རྣམ་པ་གཉིས་སོ། །དེ་ལ་དང་པོ་སྤྱིར་གླེང་བ་སྟོན་ཏེ། དེ་ནས་ཁྲོ་བོ་རྣམ་པར་རྒྱལ། །འཇམ་དཔལ་ཁྲོ་བོས་བཤད་པ་ཡི། །རྟོག་པ་རྨད་དུ་བྱུང་པའི་མཆོག །མདོར་ན་རབ་ཏུ་བཤད་པར་བྱ། །ཞེས་བྱ་བ་ནི། སྤྱིར་གླེང་བ་ཞེས་བྱ་བ་བསྟན་ཏེ།
དེ་ལ་ཁྲོ་བོ་རྣམ་པར་རྒྱལ་བའི་རྒྱུད་འཕགས་པ་འཇམ་དཔལ་ཁྲོ་བོས་བཤད་པ་འདི་ནི་རྟོག་པ་རྨད་དུ་བྱུང་བའི་མཆོག་ཅེས་བྱ་སྟེ། ཅིའི་ཕྱིར་རྨད་དུ་བྱུང་བ་ཞེས་བྱ་ཞེ་ན། སྔགས་དང་ཕྱག་རྒྱ་དང༌། རྫས་དག་ཏུ་སྦྱོར་བ་བྱས་པ་ལ་དངོས་གྲུབ་རབ་འབྲིང་རྣམ་གསུམ་དང༌། ལས་རྣམ་བཞི་དང༌། སྒྱུ་མ་ལ་སོགས་པའི་ལས་ངོ་མཚར་གྱི་ཡ་མཚན་དག་སྟོན་པས་རྨད་དུ་བྱུང་བ་ཞེས་བྱའོ། །དེ་ལ་འཇིག་རྟེན་པའི་ལྷ་སོ་སོའི་སྙིང་པོ་དང་ཕྱག་རྒྱ་ལ་སོགས་པ་སྦྱོར་བ་བྱས་པ་ལས་ཀྱང་རྨད་དུ་བྱུང་བའི་ཡ་མཚན་དག་སྟོན་པར་བྱེད། དེ་དག་ལས་ཀྱང་ཁྱད་པར་དུ་བསྟན་པས་ན་མཆོག་ཅེས་བྱའོ། །མ་འོངས་པའི་སེམས་ཅན་སྤྱོད་པ་དམན་ཞིང་བློ་ཞན་པ་རྣམས་ལ་ཁྲོ་བོ་རྣམ་པར་རྒྱལ་བའི་རྒྱུད་ཆེན་པོ་སྟོང་ཕྲག་བཅུ་གཉིས་པོ་དང༌། ཤློ་ཀ་སྟོང་ཕྲག་བཞུགས་པ་ཟབ་ཅིང་རྒྱ་ཆེ་བ་སྟེ། ཤེས་རབ་རྣམ་གསུམ་གྱི་སྒོ་ནས་དེ་དག་སྤྱོད་པར་མི་ནུས་པས་དེ་ནས་མདོ་ཉུང་ངུར་བཏུས་ནས། སེམས་ཅན་སྤྲོ་ཞིང་དེ་ལ་འཇུག་པར་འགྱུར་བའི་དོན་དུ་ཁྲོ་བོ་རྣམ་པར་རྒྱལ་བའི་རྒྱུད་ཀྱི་ཆོ་ག་ཉི་ཚེ་ཙམ་ཞིག་མདོར་བསྡུས་ནས་བཤད་དོ་ཞེས་པའོ། །དེ་ལ་འདི་ཡི་དཀྱིལ་འཁོར་ནི། །ཞེས་བྱ་བ་ནས། ཡི་དགས་མང་པོ་ཞེས་བྱའོ། །ཞེས་བྱ་བའི་བར་དུ་བྱེ་བྲག་ཏུ་གླེང་བ་ཞེས་བྱ་བའི་དོན་ཏོ། །དེ་ལ་འདི་ཡི་དཀྱིལ་འཁོར་ནི། །ཞེས་བྱ་བ་ནི་འདི་ཞེས་བྱ་བ་ནི་རྒྱུད་འདི་ཉིད་ཀྱི་དཀྱིལ་འཁོར་ལ་བྱ་བའམ། ཡང་ན་ཁྲོ་བོ་རྣམ་པར་རྒྱལ་བའི་དཀྱིལ་འཁོར་ཞེས་བྱ་བའི་དོན་ཏོ། །དཀྱིལ་འཁོར་དེ་ཡང་ཇི་ལྟ་བུ་ཞིག་ཅེ་ན། གསུངས་པ། དངོས་གྲུབ་ཐམས་ཅད་སྦྱིན་མཛད་པ། །ཞེས་པ་སྟེ། འོ་ན་དཀྱིལ་འཁོར་དེ་བྲིས་པ་ཙམ་གྱིས་དངོས་གྲུབ་སྩོལ་བར་འགྱུར་རམ་ཞེ་ན། མ་ཡིན་ཏེ་ཇི་སྐད་དུ་གསུངས་པ་བཞིན་དུ་དཀྱིལ་འཁོར་བྲིས་ནས་དེ་ལྟར་སྤྱན་དྲངས་ཏེ་ཚུལ་བཞིན་བསྒྲུབས་ན་དངོས་གྲུབ་སྩོལ་བར་འགྱུར་བ་ལ་བྱའོ།། དེར་ཡང་མ་ཟད་དེ། འཇིག་རྟེན་གསུམ་པོ་འཁྲུག་པར་མཛད། །ཅེས་པ་སྟེ། དངོས་གྲུབ་བསྒྲུབ་པའི་ཚེ་ས་འོག་གི་འཇིག་རྟེན་དང༌། མིའི་འཇིག་རྟེན་དང༌། ལྷའི་འཇིག་རྟེན་དང༌། འཇིག་རྟེན་གསུམ་པོ་དག་ཀྱང་འཁྲུག་པར་མཛད་དོ་ཞེས་པ་སྟེ། དེ་དག་ནི་དཀྱིལ་འཁོར་
གྱི་ཡོན་ཏན་ནོ། །ཡི་དགས་མང་པོ་ཞེས་བྱ་བའི། །ཞེས་བྱ་བ་ནི་དཀྱིལ་འཁོར་དེ་ཡི་དགས་མང་པོའི་དཀྱིལ་འཁོར་ཞེས་བྱ་སྟེ། དེ་ལ་ཅིའི་ཕྱིར་ཡི་དགས་མང་པོ་ཞེས་བྱ་ཞེ་ན། དཀྱིལ་འཁོར་འདིར་ཡི་དགས་མང་པོ་འབྱུང་བས་ན་ཡི་དགས་མང་པོ་སྨོས་ཏེ། དཀྱིལ་འཁོར་ཉིད་དུ་ཡང་བེ་ཅོན་ཕྱག་རྒྱ་འདྲི་བ་ནི་ཉུང་ཡི་དགས་ནི་མང་དུ་འདྲི་བས་ན་ཉུང་ངུའི་བཟླས་པ་མང་པོ་སྨོས་ཏེ། དེ་བས་ན་ཡི་དགས་མང་པོའི་དཀྱིལ་འཁོར་ཞེས་བྱའོ། །ཡི་དགས་དེས་ཀྱང་སེམས་ཅན་འདུལ་བའི་དབང་གི་སླད་དུ་ཡེ་ཤེས་ཀྱི་སྤྲུལ་བ་ཡིན་པར་བཤད་དོ། །ཐམས་ཅད་དུ་ནི་དཀྱིལ་འཁོར་འདི། །གནས་ནི་གང་དུ་འགྲུབ་འགྱུར་བ། །ཞེས་བྱ་བ་ནས། གང་དུ་ཡིད་ནི་དགའ་བར་ཡང༌། །དེར་ནི་དཀྱིལ་འཁོར་རབ་ཏུ་བྱ། །ཞེས་བྱ་བའི་བར་དུ་ས་བརྟག་པའི་དོན་བསྟན་ཏེ། དེ་ལ། ཐམས་ཅད་དུ་ནི་དཀྱིལ་འཁོར་འདི། །གནས་འདི་གང་དུ་འགྲུབ་འགྱུར་བ། །ཞེས་པ་ནི་དུས་ཐམས་ཅད་དུ་དཀྱིལ་འཁོར་གནས་གང་དུ་བྱས་ན་འགྲུབ་པར་འགྱུར་བའི་དཀྱིལ་འཁོར་གྱི་གནས་དེ་སྔགས་པས་ཐོག་མ་ཉིད་དུ་ས་བརྟག་པར་བྱའོ་ཞེས་པ་སྟེ། དེ་བས་ན་གསུངས་པ། སྔགས་པས་ཐོག་མ་ཉིད་དུ་ནི། །དེ་ཡི་གནས་ནི་བརྟག་པར་བྱ། །ཞེས་གསུངས་སོ། །དེ་ལ་ཐམས་ཅད་དུ་ནི་ཞེས་པ་དུས་ཐམས་ཅད་དུ་ཞེས་བྱ་བ་སྟེ། དངོས་གྲུབ་བསྒྲུབ་པའི་གནས་ཐམས་ཅད་ལ་བྱའོ། །དེ་ལ་ཤིང་གཅིག་ཅེས་བྱ་བ་ནི་ཤིང་རིགས་ཆེ་བ་ཨ་ཤྭཏྠ་ལ་སོགས་པ་དང༌། བོད་ན་ཤུག་པ་དག་ལ་བྱ་སྟེ། དེ་ལྟ་བུའི་ཤིང་གཅིག་ཏུ་སྐྱེས་པ་ལ་བྱ་སྟེ། དེ་ཡང་ཤིང་སྐམ་པོ་དང༌། བཀྲ་མི་ཤིས་པའི་སྐྱོན་མེད་པ་ཤིང་གཞན་གྱི་ལོ་མ་དང་མ་འདྲེས་པ་སྔ་དྲོ་ཤིང་གཞན་གྱི་གྲིབ་མས་མ་ཕོག་པའི་ཤིང་གཅིག་འགྲེད་ལོ་མ་མང་པོ་མགོ་ཟླུམ་པོར་སྐྱེས་པ་ལ་བྱའོ། །བཞི་མདོ་དང་ཞེས་པ་ནི། རྒྱུན་ལུགས་ཀྱི་ལམ་པོ་ཆེ་བཞིན་རྒྱ་གྲམ་དུ་ཡོད་པ་ལ་བྱའོ།། མུ་གཉིས་དང་ཞེས་པ་ནི། ཆུ་རླུང་འབབ་པའི་ཕ་རོལ་ཚུ་རོལ་གྱི་འགྲམ་གཉིས་ལས་གང་ཡང་རུང་བའི་འགྲམ་དུ་བསྒྲུབ་པ་ལ་བྱའོ། །རྣམ་པ་གཅིག་ཏུ་ན་ཆུ་བོ་གཉིས་འབབ་བའི་བར་གྱི་མདོ་ལ་བྱ་སྟེ། དེ་ཡང་གཡས་གཡོན་ནས་འབབ་པའི་འགྲམ་དང་ཉེ་བའི་བར་གྱི་མདོར་གནས་ཏེ་
བསྒྲུབ་པར་བྱའོ་ཞེས་པའོ། །ཐིབས་པོ་སྟོང་པ་ལམ་སྲང་རྙིང༌། །ཞེས་པ་ནི་ནགས་ཚལ་སྟུག་པོ་མི་ལ་སོགས་བས་མི་ཐར་བ་ཙམ་གྱི་ཚོད་ཀྱི་ནགས་ཚལ་ལ་བྱ་སྟེ། ཐིབས་པོ་ལ་ཡང་བྱ་སྟེ་དེར་གནས་ཏེ། བསྒྲུབ་པ་དང༌། དེ་ལྟ་བུའི་གནས་ན་ཡང་མི་དག་མེད་པར་གནས་པ་ལ་བྱའོ།། སྔོན་གྱི་ལམ་སྲང་རྙིང་བའི་བཞི་མདོ་དེ་དག་དུ་ཡང་བསྒྲུབ་ཅིང་གནས་པ་ལ་བྱའོ། །ལྷ་ཆེན་གྱི་ནི་གནས་ཀྱང་རུང༌། །ཞེས་པ་ནི། མ་ཧཱ་དེ་བའི་རྟེན་གྱི་གནས་ཀྱང་རུང༌། །སྔོན་མཆོད་པའི་རྟེན་རྙིང་པ་དག་ཀྱང་རུང་བའི་གནས་སུ་བསྒྲུབ་ཅིང་གནས་པར་བྱའོ། །ཁྱད་པར་དུ་ཡང་ཡུལ་གཙང་མར། །གང་དུ་ཡིད་ནི་དགའ་བར་ཡང༌། །ཞེས་བྱ་བ་ལ་གནས་མིང་གིས་བཤད་པ་རྣམས་ལ་ཁྱད་པར་དུ་ཡུལ་སྨེ་བག་མེད་པའི་ཡུལ་གཙང་མ་གང་དུ་སྔགས་པ་ཡིད་དགའ་ཞིང་དང་པའི་གནས་དེར་དཀྱིལ་འཁོར་བྲིའོ་ཞེས་པའོ། །དེ་ནས་རིག་འཛིན་ནན་ཏན་གྱིས། །ས་ནི་རབ་ཏུ་སྦྱང་བྱས་ཏེ། །ཞེས་པ་ནས། བ་ཡི་ལྔ་དང་ལྡན་པ་ཡི། །བ་ཡི་ལྕི་བས་བྱུག་པར་བྱ། །ཞེས་པའི་བར་དུ་ས་སྦྱང་བ་ཞེས་བྱ་བའི་དོན་སྟོན་ཏོ། །དེ་ནས་རིག་འཛིན་ནན་ཏན་གྱིས་ས་ཞེས་བྱ་བ་ནི་སྔགས་པ་དེས་ས་གཞི་བ་ཚྭ་མེད་པ་དང་མ་གས་པ་དང༌། ཐག་ཐུག་དང༌། ཝང་ཝུང་མེད་ཅིང་མཉམ་པ་དང༌། སྡོང་དུ་མ་ལ་སོགས་པའི་ཟུག་རྔུ་མེད་པའི་གནས་བཟང་པོ་དག་ཏུ་ཇི་སྐད་དུ་གསུངས་པ་བཞིན་དུ་ས་བརྐོས་ཏེ་སླར་ས་མཉན་བཟང་པོས་བླུགས་པ་ལ་སོགས་པ་ཚུལ་བཞིན་དུ་བྱའོ་ཞེས་པའོ། །ཁ་དོག་སྣུམ་པ་ལྷག་པར་བཟང༌། །ཞེས་བྱ་བ་ནི་མཎྜལ་གྱི་ས་གཞི་བསྙམས་ཏེ། ཤར་དང་བྱང་མཐོ་བར་བྱས་པའི་ས་གཞི་དེ་ལྟ་བུའི་ཁ་དོག་སྡུག་ཅིང་མཛེས་པར་བྱས་ན་ལྷག་པར་བཟང་ངོ་ཞེས་པའོ། །བ་ཡི་ལྔ་དང་ལྡན་པ་ཡི། །བ་ཡི་ལྕི་བས་བྱུག་པར་བྱ། །ཞེས་པ་ནི། བ་སེར་མོའི་ལྕི་བ་གཤེར་བ་བཙིར་བའི་ཁུ་བ་དང༌། འོ་མ་དང༌། གཅིན་དང༌། མར་དང༌། ཞོ་དང༌། འདི་རྣམས་ལྔ་ཆ་བསྙམས་ཏེ། བའི་ལྕི་བ་དང་བསྲེས་པས་མཎྜལ་ལ་བྱུག་པར་བྱའོ་ཞེས་པའོ། །ཅི་རིགས་པར་ནི་བྱུག་པར་བྱ། །སློབ་དཔོན་གྱིས་ནི་ཁྲུས་བྱས་ལ། །ཞེས་བྱ་བ་ནས། ཉེ་བ་ཡི་ནི་མཛེས་བྱེད་ཀྱང༌། །མཛེས་བྱེད་དང་ནི་འདྲ་
བར་བྱ། །ཞེས་བྱ་བས་ཐིག་གདབ་པའི་རིམ་པའི་དོན་སྟོན་ཏོ། །དེ་ལ། ཅི་རིགས་པར་ནི་བྱུགས་ནས་ཀྱང༌། །སློབ་དཔོན་གྱིས་ནི་ཁྲུས་བྱས་ལ། །སྨྱུང་བ་བྱས་ཏེ་མཉམ་བཞག་ནས། །ཁྲོ་བོའི་སྲུང་བ་བྱིན་གྱིས་བརླབ། །ཅེས་བྱ་བ་ནི་དེ་ལ་ཅི་རིགས་པར་ནི་ཞེས་བྱ་བ་འོག་ནས་འབྱུང་བའི་ཚིག་གིས་དཀྱིལ་འཁོར་ནུབ་མོ་བྲི་ཞེས་འབྱུང་བ་ལ་ཡང་སྦྱར་ཏེ། དེ་ཡང་དུས་ཚད་མེད་དེ་གང་དུ་བྲི་ཡང་རུང་ངོ༌། །དེ་ལ་སློབ་དཔོན་ཉིད་ཀྱིས་ཁྲུས་བྱས་ལ། དཀྱིལ་འཁོར་བྲི་ཞིང་སློབ་མ་དཀྱིལ་འཁོར་དུ་འཛུད་པའི་ཚེ་ན་ཞག་གཅིག་སྨྱུང་བར་འདུག་ནས་འདོད། ཆགས་དང་ཞེ་སྡང་གཏི་མུག་ལ་སོགས་ཏེ། དེའི་ཕྱི་རོལ་གྱི་ཡུལ་ལ་རྟོག་པ་མི་བཏང་བར་སེམས་རྩེ་གཅིག་པར་མཉམ་པར་བཞག་ནས་ཁྲོ་བོ་ཆེན་པོའི་སྐུར་བསྒྱུར་ཏེ། ཡན་ལག་ལྔ་ལ་སོགས་པའི་སྔགས་ཀྱིས་ཀྱང་སྐུའི་ཡན་ལག་རྣམས་སུ་བྱིན་གྱིས་བརླབ་བོ་ཞེས་པས་སོ། །ཡི་དགས་ཕལ་ཞེས་བྱ་བ་ཡི། །དཀྱིལ་འཁོར་གསང་མཆོག་ནུབ་མོ་བྲི། །ཞེས་བྱ་བ་ནི། ཡི་དགས་མང་པོའི་དཀྱིལ་འཁོར་གསང་བའི་མཆོག་དེ་དུས་གང་དུ་བྲི་ཞེ་ན། ནུབ་མོ་བྲི་ཞེས་པའོ། །ཅིའི་ཕྱིར་ནུབ་མོ་བྲི་ཞེ་ན། ཐམས་ཅད་ཀྱིས་མཐོང་བར་མི་བྱ་བའི་ཕྱིར་ཡང་ནུབ་མོ་བྲི་བ་དང༌། བྱང་ཆུབ་སེམས་དཔའ་རྣམས་ཀྱི་ནུབ་མོ་ལྷག་པར་བྱིན་གྱིས་རློབ་པའི་ཕྱིར་ནུབ་མོ་བྲིའོ་ཞེས་པའོ། །ཟར་མའི་རས་སམ་རས་བལ་ལམ། ཐིག་སྐུད་སུམ་སྒྲིལ་མཛེས་པ་ཡིས། །ཞེས་བྱ་བ་ནི་དཀྱིལ་འཁོར་ཐིག་སྐུད་སྨོས་པ་སྟེ། དེ་ཡང་རྒྱུ་གང་ལས་བྱ་ཞེ་ན། ཟར་མའི་རས་སམ་རས་བལ་གྱི་སྐུད་པ་སུམ་སྒྲིལ་དུ་བྱས་ལ་ཐིག་སྐུད་བྱའོ་ཞེས་པའོ། །གྲྭ་བཞི་དང་ནི་སྒྲོ་བཞི་པར། །མཁས་པས་དཀྱིལ་འཁོར་ཐིག་གདབ་བྱ། །ཞེས་བྱ་བ་ནི། གྲུ་བཞི་པ་སྒོ་བཞི་ཡོད་པར་དཀྱིལ་འཁོར་ཐིག་གདབ་པར་བྱའོ་ཞེས་པ་སྟེ། དེ་ཡང་ཇི་ལྟར་ཐིག་གདབ་པར་བྱ་ཞེ་ན། གསུངས་པ། ཐོག་མར་ཤར་དང་བྱང་ནས་ནི། །ལྷོ་དང་ནུབ་ཀྱི་བར་དུའོ། །ཞེས་གསུངས་པ་འདི་ནི་དཀྱིལ་འཁོར་གྱི་ཐིག་འདེབས་པའི་ཚེ་སློབ་མ་འདུག་པའི་གནས་བསྟན་པ་སྟེ། དེ་ཡང་གནས་གང་དུ་འདུག་པར་བྱ་ཞེ་ན། ཤར་
དང་བྱང་གི་མཚམས་སུ་སྟེ། ཨ་ཤ་ནར་སློབ་མ་འདུག་པར་བྱ་བ་དང༌། ལྷོ་དང་ནུབ་ཀྱི་མཚམས་ཏེ་བདེན་བྲལ་ཕྱོགས་སུ་སློབ་མ་འདུག་པར་བྱ་བ་སྟེ། ངོས་གཉིས་སུ་སློབ་མ་འདུག་སྟེ་ཐིག་གདབ་པར་བྱའོ། །འོ་ན་སློབ་དཔོན་གནས་གང་དུ་འདུག་པར་བྱ་ཞེ་ན། ཤར་དང་ལྷོ་ཡི་མཚམས་དང་ནི། །ནུབ་དང་བྱང་གི་མཚམས་དག་ཏུ། །ཞེས་པ་ནི་སློབ་དཔོན་དེ་ཤར་དང་ལྷོའི་མཚམས་སུ་སྟེ། མེའི་ཕྱོགས་སུ་འདུག་པར་བྱ་བ་དང༌། ནུབ་དང་བྱང་གི་མཚམས་སུ་སྟེ། རླུང་གི་ཕྱོགས་སུ་འདུག་པར་བྱ་སྟེ། དཀྱིལ་འཁོར་གྱི་ཐིག་གདབ་བོ་ཞེས་གསུངས་སོ། །དེ་ལྟར་སློབ་དཔོན་དང་སློབ་མའི་གནས་ངེས་པར་གསུངས་པ་ལས། སློབ་དཔོན་གྱི་གནས་གུད་དུ་འདུག་པར་མི་བྱའོ་ཞེས་པའོ། །དེ་ལྟར་སློབ་དཔོན་དང་སློབ་མ་གནས་སོ་སོར་འཆད་པར་གསུངས་ནས། དེ་ནས་ཕྱོགས་དང་མཚམས་ཀྱི་ཐིག་གདབ་པར་བྱ་བར་གསུངས་པར་ཤེས་པར་བྱའོ། །དེ་ཡང་གསུངས་པ། ཐིག་སྐུད་དེ་ནི་ཕྱོགས་མཚམས་གནས། དེ་ནས་ཀྱང་ནི་དྲང་བར་བྱ། །ཞེས་གསུངས་ཏེ། དེ་བས་ན་ཕྱོགས་བཞིར་རྒྱ་གྲམ་དུ་ཐིག་གཉིས་གདབ་པ་དང༌། མཚམས་བཞི་ནས་ཐིག་གཉིས་གདབ་པར་བྱ་བ་སྟེ། དེ་ལྟར་རྒྱ་གྲམ་དུ་སྔར་ཐིག་བཏབ་ནས་དེའི་འོག་ཏུ་དཀྱིལ་འཁོར་ཆེ་ཆུང་ཚད་དང་གནས་འགྲས་འགྲུས་མེད་པར་ཐིག་གདབ་པའི་ཕྱིར། ཐིག་གི་ཚད་བྱས་ནས་གྲུ་བཞི་པོར་གདབ་པར་བྱ་སྟེ། དེ་བས་ན་གསུངས་པ། ཐིག་གིས་རབ་ཏུ་ཚད་བྱས་ཏེ། །གྲུ་བཞི་པོར་ནི་ཐིག་གདབ་བོ། །ཞེས་གསུངས་སོ། །ཐིག་གདབ་པའི་ཐབས་འདི་ནི་སེང་གེ་ལྟ་འོག་ཡན་མན་བསྣོར་ཏེ་དཀྲུགས་ནས་བསྡུས་ཏེ། ཐིག་གདབ་པའི་རིམ་པ་འདི་ལྟར་བྱའོ་ཞེས་བྱ་བ་ལ། སློབ་དཔོན་ཁ་ཅིག་འཆད་པ་ཡོད་དེ་དེ་ལྟར་ཡང་བྱའོ། །ཡང་ཁ་ཅིག་འདི་ལྟར་ཡང་འཆད་པ་ཡོད་དེ། དེ་ལ། ཐོག་མར་ཤར་དང་བྱང་ནས་ནི། །ལྷོ་དང་ནུབ་ཀྱི་བར་དུའོ། །ཞེས་པ་ནི་དང་པོར་ཐིག་གདབ་པའི་གོ་རིམས་བསྟན་པ་སྟེ། དེ་ལ་དང་པོ་ཤར་ཕྱོགས་ངོས་ཀྱི་ཐིག་གདབ་བོ། །དེ་ནས་ལྷོ་ཕྱོགས་ངོས་ཀྱི་ཐིག་གདབ། དེ་ནས་ནུབ་ཕྱོགས་ངོས་ཀྱི་ཐིག་གདབ་པོ་ཞེས་པའོ། །དེ་ནས་དེའི་འོག་ཏུ་ཕྱོགས་བཞིའི་ཐིག་གཉིས་གདབ་པ་དང༌། མཚམས་བཞིར་ཐིག་གཉིས་གདབ་པར་བྱ་སྟེ། དེ་
བས་ན་གསུངས་པ། ཐིག་སྐུད་དེ་ནི་ཕྱོགས་མཚམས་ནས། །དེ་ནས་ཀྱང་ནི་དྲང་བར་བྱ། །ཞེས་གསུངས་པས་སོ། །ཤར་དང་ལྷོ་ཡི་མཚམས་དང་ནི། །ནུབ་དང་བྱང་གི་མཚམས་དག་ཏུ། །ཞེས་བྱ་བ་དེ་ལྟར་ཐིག་འདེབས་པའི་ཚེ་སློབ་དཔོན་གནས་གང་དུ་འདུག་པར་བྱ་བའི་གནས་བསྟན་པ་སྟེ། ཤར་དང་ལྷོའི་མཚམས་ཏེ་མེ་ལྷའི་ཕྱོགས་སུ་འདུག་པ་དང༌། ནུབ་དང་བྱང་གི་མཚམས་ཏེ་རླུང་གི་ཕྱོགས་སུ་སློབ་དཔོན་འདུག་ལ་ཐིག་གདབ་པར་བྱའོ་ཞེས་པའོ། །སློབ་མའི་གནས་ནི་འཆད་པ་མེད་དེ། བསྐོར་ཞིང་འདེབས་པར་ཟད་དོ། །དཀྱིལ་འཁོར་ཆེ་ཆུང་མེད་པ་དང༌། ཡ་ཡོ་དང་འགྲས་འགྲུས་མེད་པར་ཐིག་གིས་ཚད་བྱས་ཏེ། དེ་ལྟར་ཐིག་མ་འགྲུས་པར་གདབ་པར་བྱའོ་ཞེས་པ་སྟེ། དེ་བས་ན་གསུངས་པ། ཐིག་གིས་རབ་ཏུ་ཚད་བྱས་ཏེ། །གྲུ་བཞི་པོར་ནི་ཐིག་གདབ་པོ། །ཞེས་གསུངས་སོ། །དེ་ལ་ཁ་ཅིག་བཤད་པ། ཐོག་མར་ཤར་དང་བྱང་ནས་ནི། །ལྷོ་དང་ནུབ་ཀྱི་བར་དུའོ། །ཞེས་པ་ནི། སྤྱིར་ཐིག་ཇི་ལྟར་གདབ་པའི་རྩིས་མགོ་སྟེ། ཐོག་མར་ཤར་གྱི་ངོས་ཐིག་གདབ། དེ་ནས་ལྷོའི་ངོས་ཀྱི་ཐིག་གདབ། དེ་ནས་ནུབ་ཀྱི་ངོས་ཀྱི་ཐིག་གདབ་པ་སྟེ། དེ་ལྟར་ཐིག་གདབ་པོ་དགོས་པ་ཡང་གསུངས་པ། ཐིག་སྐུད་དེ་ནི་ཕྱོགས་མཚམས་ནས། །དེ་བཞིན་དུ་ནི་དྲང་བར་བྱ། །ཤར་དང་ལྷོ་ཡི་མཚམས་དག་ཏུ། ཐིག་གིས་རབ་ཏུ་ཚད་བྱས་ཏེ། །གྲུ་བཞི་པོར་ནི་ཐིག་གདབ་པོ། །ཞེས་གསུངས་ཏེ། དེ་ལ་ཤར་ལྷོའི་མཚམས་སུ་འདུག་པ་དང༌། ནུབ་བྱང་གི་མཚམས་རླུང་གི་ཕྱོགས་སུ་འདུག་པ་དང༌། ཤར་ཕྱོགས་དང་བྱང་ཕྱོགས་ཀྱི་ངོས་ཐིག་སྔར་གདབ་པའོ། །ལྷོ་དང་ནུབ་གཉིས་སུ་སྨོས་སུ་ཟིན་ཀྱང་གོང་དུ་སྨོས་པའི་སྤྱིའི་རྩིས་མགོ་གདབ་པར་མངོན་པས་ལྷོ་དང་ནུབ་གཉིས་ཀྱང་ཐིག་གདབ་པར་བྱའོ། །ཐིག་གདབ་པའི་ཐབས་དག་ནི་གོང་དུ་གནས་པ་དག་དང་མཐུན་བར་ཟད་དོ། །དཀྱིལ་འཁོར་གྱི་ངོས་གཅིག་གི་ཚད་ཇི་ཙམ་ཡོད་པ་ལས་དགུ་ཆར་བགོས་ལ། དེའི་ཆ་གཅིག་སྒོར་བགོས། སྒོ་དེའི་ཕྱེད་ཀྱི་ཚད་ཀྱིས་སྒོ་ཁྱུད་ཀྱི་མར་འདྲེན་པ་དང༌། ཐད་ཀར་འདྲེན་པ་དག་གི་ཚད་ཀྱང་དེ་དང་འདྲ་བར་བྱའོ་ཞེས་པའོ། །རིམ་པ་གཅིག་པ་མཛེས་
པ་ལ། །ཞེས་བྱ་བ་ནས། ལྷག་མ་རྣམས་ནི་བཅད་པར་བྱ། །ཞེས་པའི་བར་དུ་ནི་དེ་ལྟར་གོང་དུ་དཀྱིལ་འཁོར་ཐིག་གདབ་པ་དེ་ཡང་རིམ་པ་གཅིག་པ་སྒོ་བཞི་བཏོད་པ་ལ་ལྷོ་ཕྱོགས་ཀྱི་སྒོ་ཕྱེ་ལ། སྒོ་ལྷག་མ་གསུམ་པོ་རྣམས་བཅད་པའོ། །དེ་ལ་ལྷོ་ཕྱོགས་ཀྱི་སྒོ་དབྱེ་བ་ཡང་སློབ་མ་རྣམས་དེ་ནས་བཟུང་བའི་ཕྱིར་སྒོ་དབྱེ་སྟེ། ལྷོ་ཕྱོགས་ཀྱི་སྒོ་ཚོན་གྱིས་བཅད་ལ་སྔགས་དང་ཕྱག་རྒྱས་ཕྱེ་སྟེ། སློབ་མ་བཅུག་ཀྱང་རུང༌། ཡང་ན་ཚོན་མི་འབྱེད་པར་སྒོ་ཕྱེ་ལ་བྱ་སྟེ། དེ་གཉི་ག་ལྟར་སྒོ་ཕྱེ་ཡང་རུང་སྟེ། སློབ་མ་གཟུང་བར་བྱའོ། །གོང་དུ་སྨོས་པའི་ལས་བརྒྱད་པ་གང་བྱེད་ཀྱང་རུང་སྟེ། ལྷོ་ཕྱོགས་ཀྱི་སྒོར་འདུག་ལ་ལས་བྱའོ། །དཀྱིལ་འཁོར་དང་ནི་འཚམ་པ་ཡི། །དབུས་སུ་པདྨ་འདྲི་བར་བྱ། །པདྨོ་དང་ནི་ཕྱོགས་བཞིའི་སྒོ། །ཐེ་ཚོམ་མེད་པར་མཉམ་པར་བྱ། །ཞེས་པ་ནི་ཡ་ཡོ་འགྲས་འགྲུས་མེད་པར་དཀྱིལ་འཁོར་དེ་རེའུ་མིག་དགུར་བགོས་ལ། དབུས་ཀྱི་རེའུ་མིག་ལ་པདྨ་འདབ་བརྒྱད་པ་བྲིའོ་ཞེས་པའོ། །དེ་ལྟར་རེའུ་མིག་དགུར་བགོས་པའི་ངོས་བཞི་དབུས་ཆ་གཅིག་གི་ཚད་དུ་བྱའོ། །དབུས་ཀྱི་པདྨོ་དེ་དང་ཕྱོགས་བཞི་སྒོ་བྱང་ཐད་སྒོར་ཁར་དྲང་དུ་འབབ་པར་འགྲས་འགྲུས་དང༌། ཡ་ཡོ་མེད་པར་མཉམ་པར་བྱའོ་ཞེས་པའོ། །མཛེས་བྱེད་སྒོ་ཡི་ཕྱེད་དུ་བྱ། །འགྲམ་པ་འདབ་མའི་ཚད་དང་མཉམ། །ཉེ་བ་ཡི་ནི་མཛེས་བྱེད་ཀྱང༌། །མཛེས་བྱེད་ཀྱང་ནི་འདྲ་བར་བྱའོ། །ཞེས་པ་ནི་དེ་ལྟར་དཀྱིལ་འཁོར་གྲུ་བཞི་ལ་སྒོ་བཞི་བཏོད་པ་སྒོ་ཁྱུད་བཅད་པ་དང་བཅས་པར་བྱས་ལ། །སྒོ་གཏོད་པ་ནི་ཁ་དྲང་དུ་སྒོའི་བྱང་ཐད་ཀྱིས་མ་འགྲུས་པ་དེའི་ས་སྟོང་པ་ལ་མཛེས་བྱེད་ཅེས་བྱའོ། །ཅིའི་ཕྱིར་མཛེས་བྱེད་ཅེས་བྱ་ཞེ་ན། སྒོའི་ས་སྟོང་བ་དེས་དཀྱིལ་འཁོར་མཛེས་པར་བྱེད་པའམ། དཀྱིལ་འཁོར་ཀྱི་རྒྱན་དུ་གྱུར་པས་ན་མཛེས་བྱེད་ཅེས་བྱའོ། །མཛེས་བྱེད་དེའི་ཚད་ཇི་ཙམ་དུ་བྱ་ཞེ་ན། སྒོའི་ཕྱེད་དུ་བྱ་ཞེས་གསུངས་ཏེ། སྒོའི་ཕྱེད་ཀྱི་ཆ་གཅིག་གི་ཞིང་གིས་མཛེས་བྱེད་ཀྱང་དེ་ཙམ་དུ་བྱའོ་ཞེས་པའོ། །འགྲམ་པ་ནི་སྒོ་ཁྱུད་དུ་མར་འདྲེན་པ་ལ་བྱའོ། །འདབ་མ་ནི་པདྨའི་འདབ་མ་སྟེ། སྒོ་ཁྱུད་ཀྱི་འགྲམ་པ་གཉིས་དང་པདྨ་གཅིག་ཞིང་མཉམ་པར་བྱ་སྟེ། སྒོ་ཁྱུད་དུ་ཐད་ཀར་དྲངས་པ་དང༌། སྒོ་ཁྱུད་དུ་
བྱ་བར་མར་དྲངས་པ་གཉིས་ཀྱི་ཚད་ཀྱང་སྒོ་ཕྱེད་དུ་ཞེས་པའོ། །དེ་བས་ན་གསུངས་པ། འགྲམ་པ་འདབ་མའི་ཚད་དང་མཉམ། །ཞེས་གསུངས་པ། རྟ་བབས་ལ་ཉེ་བར་མཛེས་བྱེད་ཅེས་བྱ་སྟེ། དེའི་ཚད་ནི་ཇི་ཙམ་དུ་བྱ་ཞེ་ན། དེ་ཡང་སྒོའི་བྱང་ཐད་དུ་མཛེས་བྱེད་དེའི་ཚད་དང་མཉམ་པར་བྱའོ། །རྟ་བབས་ཀྱི་རྒྱན་དུ་ཆུ་སྲིན་གྱིས་བརྒྱན་པར་བྱ་སྟེ། རྒྱན་དེ་དག་ཀྱང་སྒོ་དབབ་པའི་ཚད་དང་མཉམ་པར་ཆུ་སྲིན་གྱི་རྒྱན་རྣམས་ཀྱི་རྟ་བབས་ཀྱིས་བརྒྱན་པར་བྱའོ། །དེ་བས་ན་གསུངས་པ། ཉེ་བ་ཡི་ནི་མཛེས་བྱེད་ཀྱང༌། །མཛེས་བྱེད་དང་ནི་འདྲ་བར་བྱ། །ཞེས་གསུངས་སོ། །ཆོ་ག་བཞིན་དུ་དཀྱིལ་འཁོར་དེ། །ཀུན་དུ་ཐིག་ནི་གདབ་ནས་ཀྱང༌། །ཞེས་གསུངས་པ་ནས། དུར་ཁྲོད་ཐལ་བས་དངར་ཏེ་བྲི། །དེ་ཕྱིར་ཡི་དགས་ཕལ་ཆེན་ཡིན། །ཞེས་བྱ་བའི་བར་དུ་ཕྱག་རྒྱ་ལ་སོགས་པའི་དགོད་པའི་དོན་སྟོན་ཏེ། དེ་ལ། ཆོ་ག་བཞིན་དུ་དཀྱིལ་འཁོར་དེ། ཀུན་དུ་ཐིག་ནི་བཏབ་ནས་ཀྱང༌། །ཞེས་པ་ནི། སློབ་དཔོན་ཉིད་ཁྲུས་བྱ་བ་དང་ལྷའི་སྐུར་བསྒྱུར་བ་ལ་སོགས་པ་ཆོ་ག་བཞིན་དུ་བྱས་པས་དཀྱིལ་འཁོར་དེ་གོང་དུ་སྨོས་པའི་ཚུལ་དུ་ཐིག་བཏབ་ནས་སུ་ཞེས་བྱའོ། །དེ་ནས། དེ་འོག་སྔགས་པས་དུར་ཁྲོད་ཀྱི། །ཐལ་བ་གཅིག་པུས་དཀྱིལ་འཁོར་བྲི། །ཞེས་པ་སྟེ། དེ་བས་ན་གསུངས་པ། ཕྱི་ནས་ཚུལ་བཞིན་རིག་འཛིན་གྱིས། །དུར་ཁྲོད་ཐལ་བས་བྲི་བ་ནི། །ཞེས་གསུངས་ཏེ། དེ་ལ་དུར་ཁྲོད་ཀྱི་ཐལ་བ་ནི་མི་རོ་བསྲེགས་པའི་ཐལ་བ་ལ་བྱའོ། །རྟག་ཏུ་ཤར་བྱང་ལ་སོགས་པ། །གྲུ་བཞིའི་ནང་ནི་དེ་དག་ཏུ། །མཁས་པས་བེ་ཅོན་ཕྱག་རྒྱ་བྲི། །ཞེས་པ་ནི་བསྒྲུབ་པའམ་ལས་གང་བྱེད་ཀྱང་རུང་སྟེ། ལས་དེ་དག་བྱེད་པའི་ཚེ་རྟག་ཏུ་དཀྱིལ་འཁོར་དེའི་ནང་གི་ཤར་བྱང་གི་མཚམས་དང༌། ཤར་ལྷོ་ལ་སོགས་པའི་མཚམས་ལ་ནང་རོལ་གྱི་གྲྭ་བཞིར་སྔགས་པས་བེ་ཅོན་གྱི་ཕྱག་རྒྱ་བཞི་དུར་ཁྲོད་ཀྱི་ཐལ་བས་བྲི་པར་བྱ་སྟེ། དེ་ཡང་ཇི་ལྟ་བུ་བཞི་བྲི་ཞེ་ན། དབྱུག་པའི་མགོ་ལ་སྐྱུ་རུ་རའི་འབྲས་བུ་རྒྱས་པ། ཤུན་པ་ཤུས་པ་ལྟ་བུའི་སུལ་ཅན་ཟླུམ་པོས་བརྒྱན་པའི་སྟེང་ན་མིའི་ཐོད་པ་ཅན་གྱི་དབྱུག་པ་བཞི་ཆད་ཟུངས་ཅན་པདྨའི་སྟེང་ན་བཞུགས་པ་བཞི་ཆར་ཡང་ཁ་ནང་དུ་བལྟས་པར་བྲིའོ། །
དབྱུག་པ་འདི་བཞི་ཡང་ཨཱཪྻ་མཉྫཱུ་ཤྲཱི་ཡ་མཱནྟ་ཀའི་ཕྱག་རྒྱ་སྟེ། དེ་ལྟར་བྲིས་ནས་བསྒྲུབ་པའམ་ལས་བྱེད་པའི་ཚེ་ཕྱོགས་བཞི་ནས་བྱིན་གྱིས་བརླབ་ཅིང་གདོན་བགེགས་ཀྱིས་མི་ཚུགས་པའི་ཕྱིར་རོ། །ཕྱོགས་ཀྱི་སྒོར་ནི་ཡི་དགས་གཞག །ཅེས་པ་ནི་ཕྱོགས་ཀྱི་སྒོ་བཞིར་ཡི་དགས་རེ་རེ་སྟེ་བཞི་བྲིའོ་ཞེས་པ་སྟེ། དེ་དག་ཀུན་ཀྱང་ཁ་ནང་དུ་བལྟས་པར་བྲིའོ། །གཞན་ཡང་ཡི་དགས་ལྔ་པ་ནི། །པདྨའི་སྟེང་དུ་བསམ་པར་བྱ། །ཞེས་པ་ནི་གོང་དུ་སྒོའི་ཡི་དགས་བཞི་པོ་མ་གཏོགས་པའི་ཡི་དགས་ལྔ་པ་དེའི་དབུས་ཀྱི་པདྨ་འདབ་མ་བརྒྱད་པའི་སྟེང་དུ་བསམ་པར་བྱའོ་ཞེས་པ་སྟེ་ཡི་དགས་དེ་ཡང་གློ་གཡོན་པ་པདྨ་ལ་ཕབ་པ་སྟེ། མགོ་ཤར་དུ་བསྟན་པ། གདོང་ལྷོ་ཕྱོགས་སུ་ལྟ་བར་བྲིའོ། །དེ་ལ་བསམ་པ་ནི་རི་མོ་བྲིས་ལ་བྱས་པས་ན། བསམ་པ་གཅིག་པུ་མི་བྱ་བར་དུར་ཁྲོད་དུ་ཐལ་བས་ཕྱིའི་རི་མོ་ཡང་བྱའོ་ཞེས་པ་སྟེ། ཕྱག་རྒྱའི་མཚན་མ་ཀུན་ལ་དེ་བཞིན་དུ་སྦྱར་བར་བྱའོ། །དེ་བཞིན་ཕྱི་སྒོའི་ནང་དག་ཏུ། །ཕྱོགས་རྣམས་དེ་དག་ཐམས་ཅད་དུ། །ཞེས་པ་ནི་གོང་དུ་ཡི་དགས་བྲི་བ་དེར་ཡང་མ་ཟད་དེ། དེ་བཞིན་དུ་དཀྱིལ་འཁོར་དུ་སྒོའི་ནང་བེ་ཅོན་བཞིའི་བར་བར་དུ་ཕྱོགས་བཞིའི་གནས་སུ་དེ་དག་ཐམས་ཅད་དུ་བེ་ཅོན་ལ་ཐུག་ཐུག་ཏུ་མི་རོ་མགོ་མེད་པ་དང༌། ཡི་དགས་གཉིས་སྤེལ་ཞིང་དུར་ཁྲོད་ཀྱི་ཐལ་བས་ཇི་ཙམ་ཤོང་ཤོང་དུ་དངར་ཏེ་བྲིའོ་ཞེས་པ་སྟེ། དེ་བས་ན་གསུངས་པ། །མི་རོ་མགོ་མེད་ཡི་དགས་རྣམས། །དུར་ཁྲོད་ཐལ་པས་དངར་ཏེ་བྲི། །ཞེས་གསུངས་སོ། །དཀྱིལ་འཁོར་དེའི་མིང་ཡང་དེའི་ཕྱིར་ན་ཡི་དགས་ཕལ་བོ་ཆེའི་དཀྱིལ་འཁོར་ཡིན་ཞེས་པ་སྟེ། དེ་བས་གསུངས་པ་སྟེ། དེའི་ཕྱིར་ཡི་དགས་ཕལ་ཆེན་ཡིན། །ཞེས་གསུངས་སོ། །ཁྲུ་གང་ལ་སོགས་རིམ་པ་ནས། །ཁྲུ་བརྒྱད་པ་ཡི་རིམ་པ་སྟེ། །དེ་ལས་ལྷག་པར་ཡོངས་མ་གསུངས། །ཞེས་པ་སྟེ། ཁྲུ་བརྒྱད་པ་ནི་དངོས་གྲུབ་ཀུན། །སྦྱིན་བྱེད་མཆོག་ཏུ་ཤེས་པར་བྱ། །ཞེས་བྱ་བའི་ཕྱིར་དུ་ལས་ཀྱི་བྱེ་བྲག་གི་དཀྱིལ་འཁོར་གྱི་ཚད་ངེས་པར་བྱ་ཞེས་པའི་དོན་ཏེ། དེ་ལ། ཁྲུ་གང་ལ་སོགས་རིམ་པ་ནས། །ཁྲུ་བརྒྱད་པ་ཡི་བར་དུ་སྟེ། །དགུ་པའི་དཀྱིལ་འཁོར་ཡང་མི་བྲི། །ཞེས་པ་ནི་འོག་ནས་
འབྱུང་བའི་ལས་རྣམས་ལ་དཀྱིལ་འཁོར་སོ་སོར་བྱ་བའི་ཚད་ཀྱང་ཁྲུ་གང་ནས་ཁྲུ་གསུམ་པ་ལ་སོགས་པ་ཡན་ཆད་བྲི་བར་བྱ་སྟེ། དེ་ལས་ལྷག་པར་ཡང་མི་བྲི་ཞེས་པའོ། །རྟག་ཏུ་བདག་ཉིད་མཆོད་པ་ནི། །ཁྲུ་གང་བར་ནི་བྲི་བར་བྱ། །ཞེས་པ་ནི། བདག་སྔོན་དུ་སྔར་བསྙེན་པའི་ཚེའམ་མཆོད་པ་དག་བྱེད་འདོད་པའི་ཚེ་གོང་དུ་བཤད་པ་བཞིན་དུ་དཀྱིལ་འཁོར་བྲིས་ལ། ངོས་བཞི་ལ་ངོས་གཅིག་གི་ཚད་ཁྲུ་གང་བར་བྲི་ཞེས་པའོ། །ལས་རྣམས་སོ་སོ་ལ་དཀྱིལ་འཁོར་གྱི་ཚད་མི་མཐུན་པར་གསུངས་པ་ཡང༌། ལས་གཅེས་པའི་རིམ་པས་སམ། ཆེ་རིམ་ཀྱི་དཀྱིལ་འཁོར་གྱི་ཚད་ཀྱང་དེ་བཞིན་དུ་ཤེས་པར་བྱའོ། །ཞི་བ་དང་ནི་རྒྱས་པ་དང༌། །མི་སྐྱོང་བསྒྲུབ་པ་ཁྲུ་དོར་བྱ། །ཞེས་པ་ནི་ཞི་བ་དང༌། རྒྱས་པ་དང༌། རྒྱལ་པོ་དབང་དུ་བྱ་བའི་ཕྱིར། དེ་དག་བསྒྲུབ་པའི་དཀྱིལ་འཁོར་གྲུ་བཞི་ངོས་གཅིག་གི་ཚད་ལ་ཁྲུ་དོ་བར་བྱའོ་ཞེས་པའོ། །ཁྲུ་དོ་མན་ཆད་ཁྲུ་བརྒྱད་ཡན་ཆད་གང་ཡང་རུང་སྟེ། །གཅིག་གི་ནང་དུ་སློབ་མ་རྣམས་གཟུད་པར་བྱའོ། །དེ་ལྟར་ཡང་གང་ཡང་རུང་མོད་ཀྱི། ཁྲུ་བརྒྱད་པའི་དཀྱིལ་འཁོར་ཉིད་དུ་སློབ་མ་རྣམས་གཟུད་བར་བསྟན་ཏོ། །སེམས་ཅན་ཀུན་གྱི་བསྐྲད་པ་དང༌། །དེ་བཞིན་བཞི་ལ་ཁྲུ་གསུམ་པ། །ཞེས་བྱ་བ་དེ་ལྷ་འདྲེ་དང་མི་ལ་སོགས་པ་རྣམས་གནས་ནས་བསྐྲད་པར་བྱ་བ་དང༌། གནས་དེ་ནས་གཏན་མེད་པར་བྱ་བའམ། ཕུང་བར་བྱ་བའི་ཕྱིར་དཀྱིལ་འཁོར་ཁྲུ་གསུམ་པར་བྱའོ་ཞེས་པའོ། །ཁྲུ་བཞི་དབང་དང་དགུག་པ་ལ། །ལས་རྣམས་ཀྱི་ནི་མཆོག་ཏུ་གསུངས།། ཞེས་བྱ་བ་ནི་དབང་དུ་བྱ་བ་དང༌། དགུག་པའི་ཕྱིར་དཀྱིལ་འཁོར་གྲུ་བཞི་པར་བྲི་བ་ནི་ལས་རྣམས་ཀྱི་མཆོག་ཏུ་གསུངས་ཞེས་བྱའོ། །ཁྲུ་ལྔ་ནད་དང་མི་ནད་དང༌། དགྲ་རྣམས་མེད་པར་གསད་པའི་མཆོག །ཅེས་བྱ་བ་ནི། ནད་ཕྲན་ཚེགས་དང༌། མི་ནད་ཆེན་པོ་ཀླུང་བ་བྱུང་བ་དང༌། དགྲ་རྣམས་མེད་པར་གསད་པར་བྱ་བའི་ཕྱིར་དཀྱིལ་འཁོར་ཁྲུ་ལྔ་པར་བྱ་བ་ནི་མཆོག་ཅེས་བྱའོ། །ཁྲུ་དྲུག་བགེགས་རྣམས་ཐམས་ཅད་དང༌། །གདོན་བགེགས་ངེས་པར་ཟློག་པར་བྱེད། །ཅེས་བྱ་བ་ནི། གདོན་བགེགས་རྣམས་ངེས་པ་བཟློག་པར་བྱ་བའི་ཕྱིར། དཀྱིལ་འཁོར་
ཁྲུ་དྲུག་པར་བྲི་བར་བྱ་ཞེས་པའོ། །ཁྲུ་བདུན་པ་ནི་ལྷ་ཡི་རྣམས། །དབང་དུ་དགུག་པའི་ལས་རྣམས་བྱེད། །ཅེས་བྱ་བ་ནི་འཇིག་རྟེན་པའི་ལྷ་རྣམས་དགུག་པ་དང༌། དབང་དུ་བྱ་བའི་ཕྱིར་དཀྱིལ་འཁོར་ཁྲུ་བདུན་པར་བྱའོ་ཞེས་པའོ། །ཁྲུ་བརྒྱད་པ་ནི་དངོས་གྲུབ་ཀུན། །སྦྱིན་བྱེད་མཆོག་ཏུ་ཤེས་པར་བྱའོ། །ཞེས་པ་ནི་དངོས་གྲུབ་རབ་འབྲིང་རྣམ་པ་གསུམ་ལ་སོགས་པ་ཀུན་སྦྱིན་པར་བྱེད་པའི་མཆོག་ཏུ་གྱུར་པ་ནི་དཀྱིལ་འཁོར་ཁྲུ་བརྒྱད་པར་བྲིའོ་ཞེས་པའོ། །ལས་འདི་རྣམས་སོ་སོར་བྱེད་པའི་ཚེ། དང་པོར་དཀྱིལ་འཁོར་ལན་ཅིག་བྲིས་ནས་ལས་དེ་གྲུབ་གྲུབ་ཏུ་གཞག་པའམ། ཡང་ན་རི་མོ་དེ་མི་མངོན་ཞིང་རྙིང་པོར་གྱུར་ན་སྐབས་སྐབས་སུ་བརྗེ་བར་བྱ་བ་ནི་སྤྱིའི་རྒྱུད་དང་སྦྱར་ཞིང་གར་ལེགས་པར་བྱའོ། །དེ་ལྟར་ཅི་རིགས་བྲིས་ནས་ནི། །དེ་ནས་གཙང་མས་ཉེ་རེག་བྱ། །ཞེས་པ་ནས། གཏོར་མ་ཉ་དང་ཤ་ལ་སོགས། སྦྱར་ཐུག་ལ་སོགས་ལྷག་མ་དབུལ། །ཞེས་བྱ་བའི་བར་དུ་མཆོད་པའི་ཡོ་བྱད་ལ་སོགས་པ་ཞེས་བྱ་བའི་དོན་ཏོ། །དེ་ལྟར། ཅི་རིགས་པར་ནི་བྲིས་ནས་ནི། །དེ་ནས་གཙང་མས་ཉེ་རེག་བྱ། །ཞེས་པ་ནི་དེ་ལྟར་གོང་དུ་སྨོས་པའི་དཀྱིལ་འཁོར་རྣམས་ལས་གང་ཡང་རུང་བ་ཅིག་ཅི་རིགས་པར་བྲིས་ནས། དེའི་འོག་ཏུ་ཕྱི་ནང་བཅས་པར་གཙང་མའི་སློབ་དཔོན་དེ་ཡང་སྔགས་དང་ཕྱག་རྒྱས་ཉེ་རེག་བྱ་སྟེ། འོག་ནས་འབྱུང་བའི་མཆོད་པའི་ཡོ་བྱད་ཀྱི་ཚོགས་རྣམས་བསགས་པར་བྱའོ་ཞེས་པའོ། །མཆོད་པའི་ཡོ་བྱད་དེ་དག་ཀྱང་དཀྱིལ་འཁོར་བྲིས་པའི་འོག་ཏུ་གདོད་འཕྲལ་ལ་བཙལ་ཞིང་བསོགས་པ་ལ་མི་བྱའོ། །མཆོད་པའི་ཡོ་བྱད་ལ་སོགས་པ་འདི་དག་ཀྱང་དཀྱིལ་འཁོར་མ་བྲིས་པའི་སྔོན་རོལ་ནས་བཙལ་ཞིང་བསོགས་པ་ལ་བྱའོ། །ཆུ་ཡི་ཕྱིར་ནི་ཆུ་ཡི་སྣོད། །ཆུས་ནི་རབ་ཏུ་དགང་བར་བྱ། །ཞེས་པ་ནི་སློབ་མ་དབང་བསྐུར་བའི་བུམ་པ་ཆུ་དང༌། ཨ་རྒྷ་དང་བསང་གཏོར་བྱ་བ་ལ་སོགས་པ་སྟེ། ཇི་ཙམ་དུ་ཆུའི་སྣོད་དུ་བྱ་བ་དེ་དག་སོ་སོ་གང་རིགས་པ་སྣོད་གཙང་མའི་སྣོད་དུ་དྲིའི་ཆུ་ལ་སོགས་པས་རབ་ཏུ་དགང་བར་བྱའོ་ཞེས་པའོ། །དེ་བཞིན་མེ་ཏོག་དོན་དུ་ཡང༌། །མེ་ཏོག་སྡུ་གུ་དྲི་ཞི་མ་དང༌། །མེ་ཏོག་ཕྲེང་བས་སྣོད་མཆོག་གཞན། ལེགས་
པར་གང་ཞིང་མཛེས་པར་བྱ། །ཞེས་པ་ནི། མེ་ཏོག་གི་ངོན་དུ་མེ་ཏོག་ཁ་དོག་སྡུག་ཅིང་དྲི་ཞིམ་པའི་སིལ་མས་མཆོད་པ་དང༌། སློབ་མ་དབང་བསྐུར་བ་ལ་དགོས་པའི་ཕྱིར་མེ་ཏོག་དེ་ལྟ་བུ་ལས་མེ་ཏོག་གི་ཕྲེང་བ་བྱས་པ་དག །གོང་དུ་སྨོས་པའི་མཆོད་ཡོན་གྱི་སྣོད་ལས་གཞན་པ་རིན་པོ་ཆེ་ལ་སོགས་པ་ལས་བྱས་པའི་སྣོད་མཆོག་གི་ནང་དུ་མཛེས་ཤིང་སྡུག་པར་ལེགས་པར་དགང་བར་བྱའོ་ཞེས་པའོ། །གོང་དུ་བཤད་པའི་དཀྱིལ་འཁོར་དང་ལས་ཀྱི་ཁྱད་པར་ལས་མེ་ཏོག་རིགས་ཕྱེ་བ་མེད་དེ། མེ་ཏོག་འདི་ལྟ་བུ་ཞིག་ནི་དཀྱིལ་འཁོར་ཐམས་ཅད་ལ་མཆོད་པའི་ཚེ་དབུལ་བར་བྱའོ། །དྲི་ཡི་སྣོད་དུ་ཙནྡན་མཆོག །ཙནྡན་དཀར་པོ་དམར་པོ་བླང༌། །ཞེས་པ་ནི་དྲིའི་སྣོད་དུ་ཙནྡན་ཏེ། དེ་ཡང་དྲི་ཆུང་ཞིང་ངན་པ་དང༌། རུལ་པ་ལ་སོགས་པ་སྐྱོན་མེད་པ་ཙནྡན་བཟང་པོ་མཆོག་ཅེས་སྨོས་ཏེ། དེས་ནི་ཙནྡན་གྱི་མཚན་ཉིད་བསྟན་ཏོ། །ཙནྡན་དཀར་པོ་དང་དམར་པོ་གཉིས་བླང་ཞིང་བ་སོགས་པར་བྱའོ། །དེ་ཡང་ཙནྡན་དཀར་པོ་ནི་ཞི་བ་དང༌། རྒྱས་པ་དག་གི་ཚེ་སྦྱར། དམར་པོ་ནི་དབང་དང་དྲག་ཤུལ་སྤྱོད་པ་དག་ལ་སྦྱར་བར་བྱའོ། །ཨ་ཀ་རུ་དང་སྦྱར་བ་ཡི། །གུ་གུལ་བདུག་པའང་དེ་བཞིན་ནོ། །ཞེས་པ་ནི་ཨ་ཀ་རུ་དང་གུ་གུལ་དུ་སྦྱར་བའི་བདུག་པའང་དེ་བཞིན་དུ་དབུལ་བར་བྱའོ་ཞེས་པའོ། །མར་མེ་མར་གྱི་མར་མེ་དང༌། །ཞེས་པ་ནི་དེ་ལ་མར་མེ་གང་གིས་བྱ་ཞེ་ན། མར་གྱི་མར་མེ་དང་ཞེས་པ་སྟེ། དེ་ཡང་བ་མར་ལས་མར་མེ་བྱའོ་ཞེས་པ་སྟེ། མཁས་པས་སྙིང་པོ་འཇམ་པའོ། །ཞེས་པ་ནི་སྙིང་པོ་དེ་ཡང་འཇར་འཇུར་མེད་ཅིང་ཐག་ཐུག་མེད་པར་རས་གཙང་མ་ལས་བྱས་པ་སྙིང་པོ་དེ་ཡང་འཇམ་ཞིང་མཉེན་པ་དང༌། ལེགས་པར་བཀལ་བར་སྔགས་པས་བྱའོ་ཞེས་པ་ནི། དྲག་པོ་ཡི་ནི་ལས་དག་ལ། །མི་ཡི་ཚིལ་གྱིས་བྱ་བར་བཤད། །ཅེས་བྱ་བ་ནི་དྲག་ཤུལ་སྤྱོད་པའི་མེ་མར་གྱི་སྙིང་པོ་དང་དུར་ཁྲོད་ཀྱི་རས་ལ་བྱའོ། །དྲག་ཤུལ་སྤྱོད་པའི་ལས་ལ་མར་མེ་ཡང་མིའི་ཚིལ་བུ་བཞུ་བས་མར་མེ་བྱའོ་ཞེས་པའོ། །དབང་ལ་ཏིལ་མར་བྱ་བར་བཤད། །གཏོར་མ་ཉ་དང་ཤ་ལ་སོགས། །སྦྱར་ཐུག་ལ་སོགས་ཁྱད་པར་དབུལ། །ཞེས་པ་ནི། གོང་དུ་བཤད་
པའི་ལས་གང་བྱེད་ཀྱང་རུང་སྟེ། མཆོད་པའི་བཤོས་དག་དང༌། གཏོར་མ་ལ་སོགས་པ་བྱ་སྟེ། དེ་ལ་གཏོར་མ་ཞེས་བྱ་བ་ནི་ལྷ་བཤོས་ལ་ཡང་བྱ། གཏོར་མ་དངོས་ལ་བྱ་བས་ན། ད་འདིར་ཡང་ལྷ་བཤོས་སུ་འབྱོར་པ་དཀྱིལ་འཁོར་དུ་དབུལ་བ་དང༌། ཕྱེ་ཟན་གྱི་གཏོར་མ་ཡང་བྱའོ། །ཉ་དང་ཤ་ལ་སོགས་པ་ནི་ཤ་དང་ཉ་བཅོས་པ་དང༌། མ་བཙོས་པ་དག་ལས་མཆོད་པར་དབུལ་གཏོར་མ་ཡང་བྱའོ། །དེ་ལ་སོགས་པའི་ཚིག་གིས་ནི། བཤོས་དང་གཏོར་མ་དང༌། ཤ་དང་སྦྱར་ཐུག་མེད་དུ་མི་རུང་བ་ལ་གཙོར་སྨོས་སུ་ཟད་དོ། །དེ་ལས་གཞན་པའི་འབྱོར་པའི་གཏོར་མ་ཡང་བྱའོ། །སྦྱར་ཏེ་དབུལ་ཞིང་གཏོར་མ་ཡང་བྱ་བར་བཤད་དོ། །འབྲས་དང་མོན་སྲན་གྲེའུ་དང༌། ཏིལ་དང༌། གསུམ་བཞིའོ་མ་ལས་བླངས་པའི་སྦྱར་ཐུག་ཡང་ཁྱད་དམ་ལྷག་པར་ཡང་དབུལ་བར་བྱའོ་ཞེས་པ་སྟེ། དེ་བས་ན། སྦྱར་ཐུག་ལ་སོགས་ལྷག་པར་དབུལ། །ཞེས་བྱ་བ་གསུངས་སོ། །དེ་ལྟར་དེ་ནི་ཚོགས་སོགས་ནས། །དེ་ནས་རིག་སྔགས་འཆང་བ་ཡི། །ཞེས་བྱ་བ་ནས། དེའི་འོག་ཏུ་རང་གི་སྔགས་རྣམས་ཀྱི། བྱིན་གྱིས་རློབ་ཏུ་གཞུག་པར་བྱ། །ཞེས་བྱ་བའི་བར་དུ་ཕྱག་རྒྱལ་སོགས་པ་བསམ་པ་ཞེས་བྱ་བའི་དོན་ཏོ། །དེ་ལ། དེ་ལྟར་དེར་ནི་ཚོགས་བསགས་ནས། །ཞེས་བྱ་བ་ལ་གོང་མ་དང་འཕྲོ་སྦྱར་བའི་ཚིག་སྟེ། གོང་དུ་སྨོས་ཤིང་བཤད་པ་ལྟར་དཀྱིལ་འཁོར་དེའི་ཉེ་འཁོར་དུ་མཆོད་པའི་ཡོ་བྱད་ཀྱི་ཚོགས་རྣམས་བསོགས་ནས་ཞེས་པའོ། །བྱང་ཆུབ་སེམས་ལ་དམིགས་ནས་ནི། །ཞེས་པ་ནི་བྱང་ཆུབ་སེམས་དང་ལྡན་པར་བྱས་ནས་ཞེས་བྱ་བའི་དོན་ཏོ། །རི་མོ་ཡི་ནི་ལས་རྣམས་དག །གལ་ཏེ་འདྲི་བར་མི་ནུས་ན། །ཞེས་པ་ནི་གོང་དུ་བཤད་པའི་དཀྱིལ་འཁོར་དེར་དབུས་ཀྱི་ཡི་དགས་དག་སྒོ་བཞིའི་ཡི་དགས་དང༌། བེ་ཅོན་གྱི་ནང་གི་ཕྱོགས་བཞིའི་མགོན་མེད་པའི་ལུས་དང༌། ཡི་དགས་སྤེལ་ཞིང་བྲི་བར་བཤད་པ་རྣམས་རི་མོ་དག་མ་ཤེས་ཏེ་བྲི་བར་མ་ནུས་ན་ཕྱག་རྒྱ་བཀོད་ལ་བསམ་པར་བྱ་བའི་ཐབས་བཤད་དོ། །དེ་ལ་བསམ་པར་བྱ་ན་དང་པོར་དཀྱིལ་འཁོར་ཐིག་གདབ་པ་དང༌། སྒོ་བཞི་གདོད་པ་དང༌། དབུས་སུ་པདྨ་འདབ་མ་བརྒྱད་བྲི་བ་ལ་སོགས་པའི་ཆོ་ག་
སྔ་མ་བཞིན་དུ་བྱ་སྟེ། སྔགས་པ་ཉིད་ལྷོ་ཕྱོགས་ཀྱི་སྒོར་འདུག་སྟེ། ཕྱོགས་བཅུར་སངས་རྒྱས་དང་བྱང་ཆུབ་སེམས་དཔའ་རྣམས་བཞུགས་པ་ལ་ཕྱག་འཚལ་ཏེ། བྱང་ཆུབ་ཀྱི་སེམས་དང་ལྡན་པར་བྱས་ཏེ། ཡི་དགས་དགོད་པ་རྣམས་འོག་ནས་འབྱུང་བའི་ཚུལ་དུ་སེམས་ཀྱིས་བསམ་པར་བྱའོ་ཞེས་པའོ། །ཡི་དགས་ཕལ་ཆེན་དབུས་དག་ཏུ། །པདྨ་སྔར་བྲིས་གང་ཡིན་ལ། །ཞེས་བྱ་བ་ནི་དཀྱིལ་འཁོར་དེའི་མིང་ཡི་དགས་ཕལ་ཆེན་ཞེས་བྱ་བའི་དཀྱིལ་འཁོར་གྱི་དབུས་སུ་པདྨ་འདབ་མ་བརྒྱད་པ་སྔར་བྲིས་པ་གང་ཡིན་པ་དེའི་སྟེང་དུ་སྔགས་པས་ཡི་དགས་ཡིད་ཀྱིས་བསམ་པར་བྱའོ་ཞེས་པ་སྟེ། དེ་བས་ན་གསུངས་པ། དེ་ཡི་སྟེང་དུ་ཡི་དགས་ནི། །མཁས་པས་ཡིད་ཀྱིས་བསམ་པར་བྱའོ། །ཞེས་གསུངས་སོ། །དེ་ལ་དབུས་ཀྱི་ཡི་དགས་ནི་གློ་གཡོན་པ་འོག་ཏུ་གཅུག་ལ། མགོ་ཤར་ཕྱོགས་སུ་བསྟན་ཏེ་ཁ་ལྷོ་ཕྱོགས་སུ་ལྟ་བའི་ཚུལ་དུ་བསམ་མོ། །དེ་ལྟར་ཡིད་ཀྱིས་བསམས་པ་འབའ་ཞིག་གིས་མི་ཆོག་སྟེ། དབུས་ཀྱི་ཡི་དགས་ཀྱི་སྔགས་འོག་ནས་འབྱུང་བས་ཡི་དགས་དེའི་སྙིང་གར་གསལ་བར་བསམས་ལ། བདག་གིས་ཀྱང་སྔགས་བརྗོད་དེ་ཡི་དགས་བསམ་པར་བྱའོ། །དེ་ལྟར་བྱས་ན་ཡི་དགས་ཉིད་དེར་འོངས་པ་དང་འདྲ་བར་འགྱུར་རོ་ཞེས་པ་སྟེ། དེ་བས་ན་གསུངས་པ། ཡི་དགས་ཀྱི་ནི་སྔགས་མཆོག་གིས། །བསམ་པ་དག་ནི་བྱས་ནས་ཀྱང༌། །ཞེས་གསུངས་སོ། །གྲྭའི་དབྱུག་པ་སྐྱུ་རུ་ར་འདྲ་བའི་ཡིད་ཀྱིས་བརྒྱན་པའི་མིའི་ཐོད་པ་ཅན་བཞི་བསམ་པའི་སྔགས། འོག་ནས་འབྱུང་བ་རྣམས་དབྱུག་པ་ཐོད་པ་ཅན་བསམས་པའི་སྟེང་དུ་གསལ་བར་ཡང་བསམ་ཞིང༌། སྔགས་དེ་དག་ཀྱང་བདག་གིས་བརྗོད་ཅིང་བསམས་ན། ཕྱག་རྒྱའི་མཚན་མ་དབྱུག་པ་ཐོད་པ་ཅན་དེ་ཡང་དག་པར་གནས་པར་འགྱུར་ཞིང་བྱིན་གྱིས་རློབ་པར་འགྱུར་རོ་ཞེས་ཏེ། དེ་བས་ན་གསུངས་པ། གྲྭ་ཡི་དབྱུག་པ་བཞི་པོ་ཡང༌། །སྔགས་ཉིད་ཀྱིས་ནི་བསམ་པར་བྱ། །ཞེས་གསུངས་སོ། །དབུས་ཀྱི་ཡི་དགས་དང་གྲྭའི་དབྱུག་པ་བཞི་པོ་དག་དངོས་སུ་རི་མོ་འདྲི་ནུས་ཏེ་བྲིས་ན་ཡང་བྲིས་པ་དེ་སྙིང་ག་དང༌། སྟེང་དུ་གོང་དུ་བཤད་པ་བཞིན་
དུ་སོ་སོའི་སྔགས་བསམ་ཞིང༌། བདག་གིས་ཀྱང་སྔགས་བརྗོད་དེ་བསམ་པར་བྱའོ་ཞེས་པ་སྟེ། དེ་བས་ན་གསུངས་པ། གལ་ཏེ་འདྲི་བར་ནུས་ན་ནི། །སྔགས་ཉིད་སྟེང་དུ་གཞག་པར་བྱ། །ཞེས་གསུངས་སོ། །དེ་ཡང་དག་པར་གནས་པར་བྱ་བའི་ཕྱིར་དེ་ལྟར་བྱའོ་ཞེས་པའོ། །སྒོ་བཞིར་ཡི་དགས་བཞི་པོ་ཡང༌། །གལ་ཏེ་དངོས་སུ་འདྲི་ནུས་ན། །ཡི་དགས་དངོས་དེར་འོང་ཞིང་གནས་པར་འགྱུར་བ་དང༌། བྱིན་གྱིས་རློབ་པར་བྱེད་པའི་སོ་སོའི་སྔགས་བཞི་པོ་འོག་ནས་འབྱུང་བས་ཡི་དགས་དེ་དག་སོ་སོའི་སྙིང་ཁར་ཡང་བསམ། བདག་གིས་སྔགས། བརྗོད་དེ་བསམས་ན་ཡི་དགས་དེ་དག་ཀྱང་ཡང་དག་པར་གནས་པར་འགྱུར་རོ་ཞེས་པ་སྟེ། དེ་བས་ན་གསུངས་པ། སྒོ་ཡི་ཡི་དགས་བཞི་པོ་ཡང༌། །དབུས་སུ་འདྲི་བར་མ་ནུས་ན། །དེ་བཞིན་ཡི་དགས་འཛིན་སྔགས་གྱིས། །བྱིན་གྱིས་རློབ་པར་བྱེད་པར་གསུངས། །ཞེས་བྱའོ། །སྒོའི་ཡི་དགས་དངོས་སུ་འདྲི་ནུས་སུ་ཟིན་ཀྱང་སོ་སོའི་སྔགས་ཀྱིས་བྱིན་གྱིས་བརླབ་པར་བྱའོ། །ད་ནི་སྤྱན་དྲངས་པ་སྔར་བྱས་ནས། །དད་པ་ལྷའི་རང་བཞིན་བསྒོམ་པ་ཞེས་བྱ་བ་བསྟན་པའི་ཕྱིར། དེ་ལྟར་ཆོ་ག་བཞིན་བསམས་ནས། །ཞེས་པ་ནས། ཁ་ཅིག་དག་ནི་མཆེ་བ་གཙིགས། །ཞེས་པའི་བར་དུ་གསུངས་པ་སྟེ། །དེ་ལྟར་ཆོ་ག་བཞི་བསམས་ནས། །ཞེས་པ་ནི། དཀྱིལ་འཁོར་བྲི་བའི་ཡི་དགས་དངོས་སུ་འདྲི་ནུས་སམ་མི་ནུས་ཀྱང་རུང་སྟེ། །སྔགས་བརྗོད་དེ་བསམས་ཞེས་པ་སྟེ། དཀྱིལ་འཁོར་གྱི་ཆོ་ག་བཞིན་བྲིས་ནས་ཞེས་པའི་ཐ་ཚིག་གོ །མཇུག་ཏུ་ཁྲོ་བོ་གཤིན་རྗེ་གཤེད། །ཅེས་བྱ་བ་ལ་སོགས་པ་ནི་རི་མོ་ལ་སོགས་པའི་འོག་ཏུ་ཁྲོ་བོ་ཉིད་ཀྱི་སྔགས་ཀྱི་ལེའུ་གསུངས་པའི་སྤྱན་དྲང་པའི་སྔགས་བརྗོད་དེ། པདྨའི་སྙིང་པོར་བཞུགས་སུ་གསོལ་ཞེས་པའོ། །ཡང་ན་མཇུག་ཏུ་ཞེས་པ་ནི་རིག་སྔགས་འཆང་དང་པོར་ཁྲོ་བོ་ཉིད་དུ་བསྒོམས་ནས་ཡན་ལག་ལྔ་པའི་སྔགས་ཀྱིས་བསྲུང་བའི་འོག་ཏུ་ཞེས་པའོ། །དད་པའི་ལྷའི་རང་བཞིན་བསྒོམ་པ་ཡང་མདོག་དང༌། མཚན་མ་དང༌། ཞལ་གྱི་དབྱིབས་ཀྱི་དབྱེ་བ་དང༌། གསུངས་ཏེ་གོ་སླ་བས་མ་བཤད་དོ། །དེ་
ལ་ཁྱད་པར་ནི་ཁ་ཅིག་བཞད་པ་ཞེས་པ་རྩ་བའི་ཞལ་ཏེ། གང་རྒྱངས་ཆེན་པོ་སྒྲོགས་པའོ། །ཁ་ཅིག་ཞི་ཞེས་པ་སྟེ་སྟེང་གི་ཞལ་ཏེ་རང་བཞིན་ཐ་མལ་གནས་པའོ། །ཁ་ཅིག་འཇིགས་པར་བགྲད་ཅེས་པ་གཡས་པ་དང་པོ་སྟེ་ཞལ་གྱི་དབྱིབས་ཕྱིར་བགྲད་པའོ། །དེའི་གཉིས་པའི་ཞལ་གདངས་པའོ། །ལྗགས་རྐྱོང་བ་ནི་གཡོན་དང་པོའོ། །མཆེ་བ་གཙིགས་པ་ནི་གཡོན་གཉིས་པའོ། །དེ་ལྟར་སྙིང་པོ་ལེགས་པར་ནི། །ཞེས་པ་ནས། མེ་ཏོག་གིས་ནི་བཀད་སྟེ་གཞུག །ཅེས་པའི་བར་དུ་མཆོད་པ་ཞེས་པ་སྟོན་ཏེ་སྔགས་ཀྱིས་སྤྱན་དྲངས་པ་མཆོད་ཡོན། ཞབས་བསིལ། དྲི་དང་སྦྱར་བའི་ཆུས་ཡ་མཱནྟ་ཀའི་ས་ར་བརྗོད་པའི་ཆོ་གས་ཞབས་བསིལ་དབུལ་ལོ། །དེ་ནས་དཀྱིལ་འཁོར་དབུས་སུ་ཡི་དགས་ཀྱི་སྤྱི་བོར་དབུས་ཀྱི་ཡི་དགས་དགུག་པའི་སྔགས་བརྗོད་དེ། མེ་ཏོག་དམར་པོ་གཏོར་ཏེ་བཞུགས་སུ་གསོལ་ལོ། །དེ་ནས་སྔགས་ཀྱི་ལེའུ་གསུངས་པའི་མཆོད་པའི་སྔགས་རྣམས་ཀྱི་དྲིལ་སོགས་པ་དབུལ་ཞེས་པའི་ཐ་ཚིག་གོ །རང་གི་སྙིང་པོའི་སྔགས་ཀྱིས་ཀྱང༌། །ཞེས་པ་ནས། མེ་ཏོག་དང་དག་གིས་དགོད་པར་བྱ། །ཞེས་པའི་བར་དུ་ནི་བསྲུང་བའི་ཆོ་ག་དག་བསྟན་ཏེ། སྐབས་འདི་ཚིག་ལྷག་མ་དག་གིས་སྔར་གྱི་དོན་བསྟན་ཏོ། །དེ་ལྟར་ཅི་རིགས་མཆོད་ནས་ཀྱང༌། །ཞེས་པའི་འབྲེལ་བ་ནི། མེ་ཏོག་ཆོ་ག་བཞིན་ཕུལ་ནས། །ཞེས་པའི་ཚིག་དང་འབྲེལ་པར་ཤེས་པར་བྱའོ། །དེ་ནས་མར་མེ་རབ་འབར་བ། །ཕྱོགས་བརྒྱད་དུ་ཡང་དགོད་པར་བྱ། །ཞེས་པ་ནི་སྔར་གྱི་དཀྱིལ་འཁོར་གྱི་ཕྱོགས་མཚམས་སུ་མར་མེ་འབར་བ་བརྒྱད་བཀོད་པར་བྱ་བ་དེ་བདུག་པའི་རྗེས་ལ་དབུལ་ལོ་ཞེས་པའི་ཐ་ཚིག་གོ །དེ་ནས་གཏོར་མ་དབུལ་ཏེ། འབྱུང་པོ་གཏོར་མ་ཁྲོ་བོ་ལ། །ཞེས་པའི་གོང་དུ་སྔར་བཤད་པའོ། །ཁྲོ་བོ་ལ་ཕུལ་ནས་ཞེས་པ་དཀྱིལ་འཁོར་གྱི་དབུས་ཀྱི་ཁྲོ་བོ་ལ་འབྱུང་པོའི་གཏོར་མ་ཕུལ་ནས་སོ། །ཡི་དགས་ཕལ་ཆེན་གྱིས་ཞེས་པ་ལ་སོགས་པ་ནི་གྲྭའི་དབྱུག་པ་བཞི་ལ་གཏོར་མ་དབུལ་བ་དང༌། དཀྱིལ་འཁོར་གྱི་ཕྱོགས་བཞིར་ཡི་དགས་ཀྱི་ཕྲེང་བ་བཀོད་པ་ལ་གཏོར་མ་
དབུལ་བའོ། །ཁྲོ་བོ་གཙོ་བོ་ལ་ཕྱོགས་ཏེ། །དེ་ནས་ཡང་ནི་བདུག་པ་དབུལ། །ཞེས་པ་ནི། གོང་དུ་སྨོས་པའི་དཀྱིལ་འཁོར་རྣམས་ལས་གང་ཡང་རུང་བ་ཅིག་ཏུ་བེ་ཅོན་ལ་སོགས་པའི་མཚན་མའི་ཕྱག་རྒྱ་དག་བྲིས་ཤིང་མཆོད་པའི་ཡོ་བྱད་ལ་སོགས་པས་ཀྱང༌། དེ་ལྟར་མཆོད་པའི་དཀྱིལ་འཁོར་དེ་ཡང་ཁྲོ་བོ་རྣམས་ཀྱི་བདག་པོ་གཙོ་བོའི་དཀྱིལ་འཁོར་དེ་ལ་སློབ་མ་རྣམས་དལ་དུ་གཞུག་པའི་ཕྱིར། དང་པོར་སྣ་འདྲེན་དུ་ལྷ་ལ་རྒྱབ་ཀྱིས་མ་ཕྱོགས་པར་དང་པོར་ཐད་ཀར་སྔོན་དུ་བལྟས་ནས་བདུག་པ་དབུལ་བར་བྱ། ཞེས་པའི་དོན་ཏོ། དེ་ཡི་ཕྱི་རོལ་ཆུ་བཅས་སྣོད། །ཅེས་བྱ་བ་ནི་དཀྱིལ་འཁོར་གྱི་ཕྱི་རོལ་བདག་གི་གཡོན་རོལ་དུ་དྲིའི་ཆུ་དང་ལྡན་པའི་མཆོད་ཡོན་གྱི་སྣོད་མེ་ཏོག་དང་ལྡན་པ་ཡང་གཞག་པར་བྱའོ་ཞེས་པའི་དོན་ཏོ། །མེ་ཏོག་གིས་ནི་བཀང་སྟེ་བཞག །ཅེས་པ་ལ་རྣམ་པ་གཅིག་ཏུ་མཆོད་པ་བྱ་བའི་ཕྱིར། མེ་ཏོག་གིས་སྣོད་བཀང་བ་ཡང་གཞག་པར་བྱའོ་ཞེས་པའི་ཐ་ཚིག་གོ །འདི་མན་ཆད་ནི་སློབ་མ་སྔར་བཅུག་ནས་ཕྱག་རྒྱ་དང་དམ་ཚིག་བསྟན་པ་ཞེས་བྱ་བའི་དོན་ཏོ། །ཆོ་གས་ཁྲུས་བྱས་སྨྱུང་བ་ཡི། །ཞེས་བྱ་བ་ལ་སོགས་པ་ནི་ཆོ་ག་བཞིན་དུ་ཁྲུས་བྱས་ཤིང༌། སྨྱུང་བ་བྱས་པའི་སློབ་མ་གཅིག་དཀྱིལ་འཁོར་གྱི་དྲུང་དུ་བཀུག་ནས། དེ་ནས་ཁྲོ་བོའི་ཡན་ལག་སྔགས་རྣམས་ཀྱིས་སློབ་མ་དེ་དག་གནས་ལྔ་ལ་སོགས་པ་བསམས་ཏེ། སློབ་མ་དེ་གཟི་བྱིན་དུ་བྱའོ་ཞེས་པའི་ཐ་ཚིག་གོ །ཁྲོ་བོ་ཡི་ནི་སྙིང་པོ་ཡིས། །ཞེས་བྱ་བ་ལ་སོགས་པ་ནི་དེ་ལྟར་སློབ་མ་བསྲུངས་ཤིང་གཟི་བྱིན་ཅན་དུ་བྱས་པའི་འོག་ཏུ་སྙིང་པོ་འབྲུ་བཅུ་བདུན་པའམ། འབྲུ་བདུན་པ་གང་ཡང་རུང་བ་ཅིག་བརྗོད་ནས། ལག་པ་གཉིས་ཐལ་མོ་སྦྱོར་ཏེ་དམ་ཚིག་གི་ཕྱག་རྒྱ་འཆིང་དུ་བཅུག་ནས་དཀྱིལ་འཁོར་དུ་འཇུག་པའི་མེ་ཏོག་ལག་ཏུ་སྦྱིན་ནོ། །སློབ་མ་དེར་དར་རམ་རས་དམར་པོས་མིག་དགབ་པར་བྱའོ། །དཀོན་མཆོག་གསུམ་ནི་དྲན་བྱས་ཏེ། །སློབ་དཔོན་གྱིས་ནི་གཞུག་པར་བྱ། །ཞེས་བྱ་བ་སློབ་དཔོན་གྱིས་སློབ་མ་དེ་དཀྱིལ་འཁོར་དུ་འཛུད་པའི་ཚེ་སློབ་མ་དེ་དག་དཀོན་མཆོག་གསུམ་གྱི་མཚན་ཡང་བརྗོད་དུ་བཅུག་ལ། དེ་དག་གི་
ཡོན་ཏན་ཡང་རྗེས་སུ་དྲན་པར་བྱེད་པར་བཅུག་སྟེ། དཀྱིལ་འཁོར་དུ་གཞུག་པར་བྱའོ་ཞེས་པའི་ཐ་ཚིག་གོ །རང་གི་སྙིང་པོས་མེ་ཏོག་ཉིད། །དཀྱིལ་འཁོར་ལ་ནི་དོར་དུ་གཞུག །ཅེས་བྱ་བ་ནི་དཀྱིལ་འཁོར་དུ་དོར་བའི་སྔགས་ཀྱང་ཡི་གེ་བཅུ་བདུན་པོ་བརྗོད་དུ་བཅུག་ནས་མེ་ཏོག་དོར་དུ་གཞུག་གོ་ཞེས་བྱ་བའི་དོན་ཏོ། །དེ་ནས་དབྱུག་པ་ཞེས་བྱ་ཡི། །ཞེས་བྱ་བ་ལ་སོགས་པ་ནི་དེ་ལྟར་དཀྱིལ་འཁོར་དུ་བཅུག་ཟིན་ནས། དེའི་འོག་ཏུ་མིག་ཕྱེ་སྟེ་སློབ་དཔོན་གྱིས་དབྱུག་པའི་ཕྱག་རྒྱ་སློབ་མ་ལ་བསྟན་པར་བྱའོ། །དགོན་མཆོག་གསུམ་ནི་ནམ་ཡང་མི་བཏང་ངོ༌། །སྣོད་མ་ཡིན་པ་དང༌། ཕྱི་རོལ་པ་རྣམས་ལ་གསང་པ་ལྟ་བུ་དམ་ཚིག་སློབ་མ་ལ་སྦྱིན་པར་བྱའོ། །ད་ནི་སྔར་དབང་བསྐུར་ནས་གསང་སྔགས་སྦྱིན་པ་ཞེས་པའི་དོན་སྟོན་ཏོ། །ཁྲོ་བོ་གཙོ་བོའི་སྔགས་ཀྱིས་ནི། །ཞེས་བྱ་བ་ལ་སོགས་པ་ནི་དེའི་འོག་ཏུ་སློབ་དཔོན་ཉིད་ཀྱིས་སློབ་མ་ལ་དབང་བསྐུར་བར་བྱ་སྟེ། དེ་ཡང་སྔགས་གང་གིས་དབང་བསྐུར་བྱ་ཞེ་ན། ཁྲོ་བོ་གཙོ་བོའི་སྔགས་ཡི་གེ་བཅུ་བདུན་པས་དབང་བསྐུར་བར་བྱའོ། །ཡོ་བྱད་ཅི་འདྲ་བ་དག་གིས་དབང་བསྐུར་བར་བྱ་ཞེ་ན། དྲིའི་ཆུའི་བུམ་པ་མེ་ཏོག་གིས་བརྒྱན་པ་དང༌། མེ་ཏོག་གི་ཕྲེང་བ་དག་གིས་དབང་བསྐུར་བར་བྱའོ། །ཅིའི་ཕྱིར་དབང་བསྐུར་བར་བྱ་ཞེ་ན། འགྲུབ་པར་འགྱུར་པར་བྱ་བའི་ཕྱིར་དབང་བསྐུར་ཏེ། དངོས་སུ་བསྒྲུབ་པའི་དབང་བསྐུར་བ་ལ་ཡང་བྱ་མོད་ཀྱི། སྐབས་འདིར་ནི་དམ་ཚིག་གི་དབང་བསྐུར་བར་བྱའོ། །ཁྲོ་བོའི་སྙིང་པོས་ཆོ་ག་བཞིན་དུ་དེ་ལྟར་དབང་བསྐུར་ནས། དེའི་འོག་ཏུ་རིག་པའི་དབང་བསྐུར་བར་བྱའོ། །དེ་ཡང་སློབ་མ་དག་ལ་མེ་ཏོག་དང༌། བདུག་པ་དག་གིས་ཀྱང་མཆོད་དོ། །སློབ་མའི་ལག་པ་མི་སྟོངས་ཤིང༌། བཀྲ་ཤིས་པར་བྱ་བའི་ཕྱིར་མེ་ཏོག་གི་ཕྲེང་བ་ལག་ཏུ་བྱིན་ནས། རིག་པའི་དབང་ཇི་སྐད་དུ་གསུངས་པའི་ཚུལ་དུ་སྦྱིན་པར་བྱའོ། །དེ་ཡང་ཡི་གེ་འབྲུ་བཅུ་བདུན་གྱི་སྔགས་སྦྱིན་པ་ལ་བྱའོ། །ད་ནི་བླ་མ་ལ་མཆོད་པ་ཞེས་བྱ་བའི་དོན་སྟོན་ཏོ། །ཁྲོ་བོ་ཡི་ནི་སྙིང་པོ་མཆོག །འདི་ནི་འོག་མའི་ཚིག་འོག་མ་དང་འཕྲོ་སྦྱོར་བ་ཙམ་དུ་སྨོས་པར་ཟད་དོ། །དེ་ནས་དེ་ལྟར་
མནོས་ནས་ནི། །ཞེས་བྱ་བ་ལ་སོགས་པ་ནི་སློབ་མ་གོང་དུ་སྨོས་པ་ལྟར་རིག་པའི་དབང་བསྐུར་ཏེ། དེའི་འོག་ཏུ་སློབ་མ་དེས་བླ་མ་ལ་ཕྱག་བྱས་ནས་བདག་གིས་ཉམས་ཀྱིས་ཅི་ནུས་ཅི་འབྱོར་བའི་མཆོད་ཡོན་དབུལ་ཞིང་མཆོད་པར་བྱའོ་ཞེས་བྱ་བའི་ཐ་ཚིག་གོ །སྔགས་པས་བླ་མ་མཆོད་བྱས་ན། །དངོས་གྲུབ་ཐོབ་འགྱུར་གཞན་དུ་མིན། །ཞེས་བྱ་བ་སྟེ། དེ་ལྟར་བླ་མ་ལ་མཆོད་པ་བྱས་ནས་ནི་དེའི་དགོས་པ་བསྟན་ཏེ། སློབ་མས་སློབ་དཔོན་ལ་སྦྱིན་པའི་སྒོ་ནས་མཆོད་པ་བྱས་ན་དངོས་གྲུབ་ཐོབ་པར་འགྱུར་གྱི། །དེ་ལྟར་མ་བྱས་ན་དངོས་གྲུབ་མི་ཐོབ་པའི་ཞེས་པའོ། །སློབ་མ་སྙིང་པོ་བྱིན་ནས་ཀྱང༌། །ཞེས་བྱ་བ་ལ་སོགས་པ་ནི་དེ་ལྟར་སློབ་དཔོན་གྱིས་སློབ་མ་དེ་རིག་པའི་དབང་བསྐུར་ནས། དེའི་འོག་ཏུ་སློབ་དཔོན་གྱིས་མེ་ཏོག་དང་མེ་ཏོག་གི་ཕྲེང་བ་དང༌། ཙནྡན་དང༌། བདུག་པ་ལ་སོགས་པའི་མཆོད་པའི་ཡོ་བྱད་རྣམས་ཀྱིས་དཀྱིལ་འཁོར་གྱི་ལྷ་མཆོད་ནས་དྲིའི་ཆུས་མེ་ཏོག་ལ་སོགས་པ་དང་ལྡན་པའི་མཆོད་ཡོན་སློབ་དཔོན་གྱིས་དཀྱིལ་འཁོར་གྱི་ཕྱི་རོལ་དུ་སྔར་བཞག་པའི་སྣོད་དེ་བླངས་ཏེ་མཆོད་ཡོན་ཏིལ་དང༌། འོ་མ་དང༌། ག་བུར་དང༌། མེ་ཏོག་ཏུ་ལྡན་པ་དབུལ་བར་བྱའོ། །སྔགས་དང་ཕྱག་རྒྱས་སླར་ཡང་བཏང༌། །ཞེས་བྱ་བའི་དོན་ཏོ། །བཏང་ནས་དེ་ཡི་འོག་ཏུ་ནི། །དཀྱིལ་འཁོར་དུ་ཡང་མཆོད་ཡོན་དབུལ། །ཞེས་བྱ་བ་ལ་སོགས་པ་ནི་སླར་བཏང་བའི་འོག་ཏུ་གཤིན་རྗེའི་དབྱུག་པ་དང༌། ཡི་དགས་ཀྱི་ཕྱག་རྒྱའི་མཚན་མ་ལ་ཡང་མཆོད་ཡོན་དབུལ་ཞེས་བྱ་བའི་དོན་ཏོ། །རྒྱ་ཆེན་ས་ཡི་དཀྱིལ་འཁོར་ནི། །ཞེས་བྱ་བ་ལ་སོགས་པ་ནི་དཀྱིལ་འཁོར་ཡངས་པ་རྒྱ་ཆེན་པོ་འདིའི་སྟེང་ན་མཉམ་པ་མེད་པ་དངོས་གྲུབ་འདོད་པའི་རིག་སྔགས་འཆང་གིས་ཚུལ་དེ་ལྟར་རྟག་ཏུ་མཆོད་པ་ལེགས་པར་བྱའོ་ཞེས་པའོ། །དེ་ལྟར་མཆོད་པ་བྱ་བ་ཡང་དཀྱིལ་འཁོར་དེ་ཉིད་དུ་མཆོད་པ་དེ་ལྟར་བྱ་བ་དང༌། གོང་དུ་མཆོད་པའི་དཀྱིལ་འཁོར་འབྱུང་བ་དེའི་སྔོན་དུ་བསྙེན་པ་བྱེད་པའི་ཚེ་བྲིས་ཏེ་མཆོད་པ་དང༌། སྐབས་སྐབས་སུ་མཆོད་པའི་དཀྱིལ་འཁོར་དེའི་སྟེང་དུ་མཆོད་པ་བྱའོ་ཞེས་པའོ། །གོང་དུ་
རྒྱུད་འབྱུང་བ་ཞེས་བྱ་བའི་སྐབས་སུ་གཏོགས་པར་སྐབས་གཉིས་པ་རྫོགས་སོ།། །།ད་ནི་གོང་དུ་སྨོས་པ་ཡི་དགས་ཕལ་པོ་ཆེ་དང༌། ཕྲེང་པའམ་དེའི་ཡན་ལག་ཏུ་གཏོགས་པའི་སྔགས་རྣམས་འབྱུང་ངོ༌། །དེ་ནས་གཞན་ཡང་སྔགས་འབྱུང་སྟེ། ཞེས་བྱ་བ་ནི་གོང་མ་ལས་གཞན་པའི་སྐབས་འབྱུང་བ་ལ་བྱའོ། །དབུས་ཀྱི་ཡི་དགས་ཀྱིའོ་ཞེས་བྱ་བ་ནི་དཀྱིལ་འཁོར་གྱི་དབུས་མ་ཡི་དགས་དགུག་པའི་སྔགས་ཀྱང་ཡིན་ཏེ། ཡི་དགས་ཀྱི་མགོར་མེ་ཏོག་དོར་བའི་སྔགས་ཉིད་དོ། །ཡི་དགས་གདོང་ཟ་བའོ། །འདི་ནི་གྲྭའི་བེ་ཅོན་བཞིའི་སྔགས་སོ་ཞེས་པ་ནི་ཡི་དགས་ཀྱི་མགོར་མེ་འབར་བ་ཅན་ནོ། །ཨོཾ་པྲེ་ཏོ་ལ་ཀ་ཡ་ཧཱུཾ་ཕཊ་ཅེས་པ་ནི་ཡི་དགས་གསལ་བའི་སྔགས་སོ། །ཨོཾ་པྲེ་ཏ་བྷི་བ་མ་ན་ཧ་ཀ་ཧཱུཾ་ཕཊ་ཅེས་པ་ནི་ཡི་དགས་འཇིགས་པ་གསོད་པའི་སྔགས་སོ། །ཨོཾ་པྲེ་ཏ་ཛྭ་ལ་ཧཱུཾ་ཕཊ་ཅེས་པ་ནི་ཡི་དགས་སོ། །ཀྵི་ཕྲ་ཕྲེ་ཏོ་ཏྐ་ཏ་ཧཱུཾ་ཕཊ་ཅེས་པ་ནི་མྱུར་བའི་ཡི་དགས་ཕལ་པོ་ཆེའི་སྔགས་སོ། །ཡི་དགས་ཕྲེང་བའི་ཞེས་པ་ན། ཡི་དགས་ཕྲེང་བ་མི་སྡུག་བ་གསང་བ་སྲིན་བྱ་གདོན་བསྲུང་བའི་ཆོ་ག་ལ་དགའ་བ་ཞེས་བྱ་བའི་དོན་ཏོ། །དེ་དག་ནི་ཡི་དགས་ཀྱི་དཀྱིལ་འཁོར་གྱི་སྔགས་ཀྱི་ཚོགས་སོ་ཞེས་པ་ནི་དབུས་ཀྱི་ཡི་དགས་ཀྱི་སྔགས་དང་བེ་ཅོན་བཞིའི་སྔགས་ལ་སོགས་ཏེ་ཡི་དགས་ཀྱི་དཀྱིལ་འཁོར་གྱི་སྔགས་ཐམས་ཅད་དོ། །སྔགས་རྣམས་འབྱུང་ངོ་ཞེས་བ་ནི་ཡི་གེ་འབྲུ་བཅུ་བདུན་པོ་དང༌། །མཚོག་མ་ལ་སོགས་པའི་སྔགས་འབྱུང་བ་ལ་བྱའོ། །ཀྲོ་དྷ་བ་ར་བི་ར་ཞེས་པ་ནི་ཁྲོ་བོའི་མཆོག་དཔའ་བོ་ཞེས་བྱའོ། །སྭ་ས་མ་ཡེ་ན་ཨཱ་གཙྪ་ཨཱ་གཙྪ། ཞེས་པ་ནི། རང་གི་དམ་ཚིག་གིས་གཤེགས་སུ་གསོལ་ཞེས་བྱའོ། །ཨོཾ་ཨཱཿ་ཧཱུཾ་སྙིང་པོའི། །ཨི་དཾ་ཕྲེ་ཏ་ཨ་ས་ནན། ཡི་དགས་ཀྱི་གདན་དང༌། ཡི་དགས་ཕལ་ཆེན་འདི་བསྲུང་དུ་གསོལ་བསྲུང་དུ་གསོལ་ཞེས་པའོ། །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ །ཁྲོ་བོ་གཅིག་ཏུ་གཤིན་རྗེ་གཤེད་པོ་ཞེས་པའོ། །ཧ་ན་མ་ཐ་བྷཉྫ་ཧཱུཾ་ཕཊ། རྒྱོབ་ཅིག །ཆོམ་ཅིག་སྲེགས་ཤིག་ཅེས་པའོ། །འདི་ནི་ཁྲོ་བོའི་རྒྱལ་
པོ་གང་གི་རྟོག་པ་ཡིན་པ་འདིའི་སྔགས་ཡི་གེ་བཅུ་བདུན་པའོ་ཞེས་པ་ནི་ཡི་གེ་འབྲུ་གྲངས་ལྷག་ཆད་དུ་འགྱུར་དུ་དོགས་པའི་ཕྱིར་ཡི་གེ་འབྲུ་གྲངས་ཀྱི་ཚད་ངེས་པ་སྨོས་སོ། །ཨོཾ་ཨཱཿ་ཧཱུཾ་ཞེས་པ་ནི་ཁྲོ་བོ་ཉིད་ཀྱི་སྙིང་པོ་འབྲུ་གསུམ་པའི་སྔགས་སོ། །ཨོཾ་ཀ་ལ་ཧཱུཾ་ཕཊ་ཅེས་པ་ལ་སོགས་པ་ནི་སྙིང་ག་དང༌། མཚོག་མ་དང༌། སྤྱི་གཙུག་དང་མཚོན་ཆ་ལ་སོགས་པའི་སྔགས་ཡན་ལག་ལྔ་པའི་སྡུད་པའི་ཚིག་གོ་ཞེས་པའོ། །ཨོཾ་ཛྭ་ལ་ཛྭ་ལ་ནི་ཞེས་པ་ནི་ནུ་མཇིང་གཉིས་སུ་བསམས་པས་གོ་བགོས་པར་འགྱུར་རོ། །ཨོཾ་བེ་བས་སྭ་ཞེས་པ་ནི་ལག་མཐིལ་གཉིས་སུ་བསམ་ཞེས་པའོ། །ཨོཾ་སྭ་ཡ་མི་ཤ་བྱ་བ་ཧ་རི་ཡ་སྭཱ་ཧཱ་ཞེས་པ་ནི་དབུས་ཀྱིས་ཁྲོ་བོ་ཆེན་པོ་ལ་སྨེ་གཏོར་དབུལ་བའི་སྔགས་སོ། །གཏོར་མ་སྔར་བཤད་པའི་ཉ་དང་ཤ་ལ་སོགས་པ་དང་སྦྱར་ཐུག་གི་གཏོར་མ་ཡང་སྔར་བཤད་པ་ལ་བྱའོ། །ཨོཾ་དི་བ་བྱན་ན་བྷྱོ་ཛ་ནི་ཞེས་པ་ནི། གྲྭ་བཞིའི་བེ་ཅོན་བཞི་ལ་ལྷ་བཤོས་དབུལ་བའི་སྔགས་སོ། །སྨེ་གཏོར་ལ་སོགས་ཏེ། གཏོར་མ་ཕྲ་མོ་དག་ལ་སྔགས་ཀྱིས་གདབ་པ་ཡང་སྔགས་འདིས་བྱའོ། །དབུལ་བའི་སྔགས་སོ་ཞེས་པ་ནི་ལྷ་བཤོས་ཏེ། སྔར་བཤད་པ་ཡང་བྱའོ། །ལ་ལི་ནི་ཞེས་པ་ནི་དཀྱིལ་འཁོར་ཀྱི་ནང་གི་ཕྱོགས་བཞིར་ཡི་དགས་ཕྲེང་བར་བཀོད་པ་རྣམས་ལ་གཏོར་མ་དབུལ་བའི་སྔགས་སོ། །གསུམ་པའོ་ཞེས་པ་ནི་འདི་ཡན་ཆད་ལེའུ་འམ་སྐབས་གསུམ་པ་རྫོགས་པ་ལ་བྱའོ།། །།ད་ནི་གསང་བའི་མཆོད་པར་གཏོགས་པའི་སྐབས་སམ། ལེའུ་འཆད་དེ་གསང་བའི་མཆོད་པར་གཏོགས་པ་ལ་དོན་རྣམ་པ་བཅུ་གཉིས་ཀྱིས་བསྟན་ཏེ། གླེང་བསླང་བ་སྔར་བྱས་ནས་ཕྱག་རྒྱ་བཅིང་བའི་རིམ་པ་དང༌། ཕྱག་རྒྱའི་མཚན་མ་དང་ཕྱག་རྒྱ་བཅིང་བའི་ངེས་པ་དང༌། ཕྱག་རྒྱ་བཅིང་བའི་གསང་སྔགས་དང༌། ཕྱག་རྒྱ་འདི་ཕན་ཡོན་དང་རི་མོ་བྲི་བའི་ཕྱག་རྒྱའི་མཚན་ཉིད་དང༌། རི་མོ་བྲི་བའི་ངེས་པ་དང༌། ཕྱག་རྒྱ་བསྒྲུབ་པའི་དཀྱིལ་འཁོར་དང༌། གསང་བའི་མཆོད་པ་དང༌། སྔོན་དུ་བསྙེན་པའི་ཆོ་ག་དང༌། །གསང་བའི་མཆོད་པའི་སྒོ་ནས་ལམ་མང་པོ་བསྒྲུབ་པ་དང༌། ཕྱིའི་མཆོད་པའི་སྒོ་ནས་མཇུག་བསྡུ་ཞིང་ཕན་ཡོན་སྨོས་པའོ།།
དེ་དག་ཀྱང་རིམ་བཞིན་དུ་སྦྱར་ཏེ་བཤད་དོ། །གསང་བའི་མཆོད་པའི་ལེའུའམ། སྐབས་སུ་གཏོགས་ན། དང་པོར་བེ་ཅོན་གྱི་ཕྱག་རྒྱ་བཤད་པ་འབྱུང་བའི་ཕྱིར་གསང་བའི་མཆོད་པའི་ཞར་ལ་བེ་ཅོན་གྱི་ཕྱག་རྒྱ་སྔར་བཤད་པ་དེ་ཉིད་དང་པོར་བཤད་ནས་དེའི་རྗེས་ལ་གསང་བའི་མཆོད་པ་བཤད་དེ་སྐབས་སམ། ལེའུ་འདིར་གསང་བའི་མཆོད་པ་གཙོར་བཤད་པའི་ཕྱིར་རོ། །ད་ནི་གླེང་བསླང་བ་སྔོན་དུ་བྱས་ནས་ཕྱག་རྒྱ་བཅིང་བའི་རིམ་པ་ཞེས་བྱ་བའི་དོན་བསྟན་ཏོ། །དེ་ནས་ཞེས་པ་ནི་དེ་མ་ཐག་ཏུ་འདས་པའི་ཚིག་བཤད་ཟིན་ནས་དེ་ལས་གཞན་པའི་ཚིག་གམ་དོན་འཆད་པ་ལ་བྱ་ཞེས་པའོ། །གཞན་ཡང་འཇམ་པའི་དབྱངས་ཀྱིས་ནི། །ཞེས་པ་ནི་ཁྲོ་བོ་ཉིད་འཇམ་དབྱངས་ཡིན་ཏེ་ཐ་མི་དད་ཅེས་པའོ། །ཁྲོ་བོ་དཔའ་བོ་གཅིག་པུ་ནི། །ཞེས་པ་ལ་ཁྲོ་བོ་ཉག་གཅིག་འཁོར་རམ་ལྷ་ཕལ་པ་གཞན་དང་མ་འདྲེས་ཤིང་བཙན་པར་བཞུགས་པ་ལ་བྱའོ། །ཚད་མེད་གཟི་བརྗིད་བདག་ཉིད་ཆེ། །གཟི་བརྗིད་ཚད་མེད་པ་ནི་ཚད་མེད་མཐུ་སྟོབས་ཆེ་བ་ལ་བྱའོ། །དེ་ཡི་ཕྱག་རྒྱ་བཤད་པར་བྱ། །ཞེས་པ་ནི་ཡོན་ཏན་དེ་ལྟ་བུ་དང་ལྡན་པའི་བདག་ཉིད་ཆེན་པོ་ཁྲོ་བོ་དེ་ཕྱག་རྒྱ་བཤད་པར་བྱའོ་ཞེས་པའོ། །དཀོན་མཆོག་གསུམ་གྱི་དམ་ཚིག་ནི། །ཞེས་པ་ནི་དཀོན་མཆོག་གསུམ་ཡང་དེ་ལས་མི་འདའ་བའམ། དེའི་བཀའ་འམ་དེས་བྱིན་གྱིས་བརླབས་པས་ན་ཁྲོ་བོ་ཉིད་ཀྱང་བྱིན་གྱིས་རློབ་ཅིང་དེ་ལས་འདའ་བར་མི་མཛད་དོ། །ཕྱག་རྒྱ་དེ་ཡང་ཐབས་དང་གོ་རིམས་ཇི་ལྟར་བྱས་ཏེ་བཅིང་ཞེ་ན། དང་པོར་སྔར་ཐལ་མོ་སྦྱར་ཏེ། དབུལ་བར་བཞག་སྟེ་ལྷ་ལ་མངོན་པར་བསྟན་ནས། ཨོཾ་ན་མོ་བུདྡྷ་དྷརྨ་སཾ་གྷ་བྷྱཿ་ཞེས་པའི་སྔགས་བརྗོད་དེ་དགྲོལ་ལོ། །དེའི་འོག་ཏུ་ཕྱག་རྒྱ་བཅིང་བར་བྱ་སྟེ། སྔར་བྱས་ནས་ཞེས་བྱ་བའི་ཚིག་དེས་ལག་པ་མདུན་དུ་བཞག་ལ་ཕྱག་རྒྱ་བཅིང་བ་ཡང་བྱ་སྟེ། ལག་པ་གཡས་པ་བདག་གི་སྙིང་གའི་ཐད་ཀར་བཞག་ལ་འོག་ནས་འབྱུང་བའི་ཆོ་ག་བཞིན་དུ་ཕྱག་རྒྱ་བཅིང་བར་བྱའོ། །ཕྱག་རྒྱ་བཅིང་བའི་མཚན་ཉིད་བསྟན་པ་ཡང༌། རིག་འཛིན་དག་གིས་རྟག་པར་ནི། །ཞེས་པ་ནས། བཟང་པོ་བཅིང་ཞེས་
པའི་བར་གྱིས་བསྟན་ཏོ། །རིག་འཛིན་དག་གིས་རྟག་པར་ནི། །ཞེས་པ་ནི་རིག་པ་འཛིན་པའི་སྔགས་པ་དག་གིས་བེ་ཅོན་གྱི་ཕྱག་རྒྱ་བསྒྲུབ་པའམ། བེ་ཅོན་གྱི་ཕྱག་རྒྱ་ལས་བྱེད་པ་དེ་དག་གིས་རྟག་པར་བཅིང་སྟེ། བསྒྲུབ་ཅིང་ལས་བྱའོ། །མཐོ་བོང་ལེགས་པར་སྦས་པ་ནི། ཞེས་པ་ནི་ནང་དུ་བཅུག་སྟེ་སྦས་པ་ཞེས་པའོ། །རབ་ཏུ་བསྡམས་པ་བཟང་པོ་བཅིང༌། །ཞེས་པ་ནི་རབ་ཏུ་བསྡམས་པ་བཅིང་ཞེས་པ་དེ་ཡང་གང་ཞེ་ན་ལྷོད་ལྷོད་པོ་མི་བྱ་བར་བསྡམ་མོ། །དེ་ཉིད་ཡོན་ཏན་དང་ལྡན་པའི་ཕྱིར་བཟང་པོ་ཞེས་པའི་ཐ་ཚིག་གོ །ད་ནི་ཕྱག་རྒྱ་བཅིང་བའི་ངེས་པ་བཤད་པ་ཡང༌། །ཆོ་ག་ཞེས་པ་བེ་ཅོན་རྒྱ། །ཞེས་པ་ནས། གཞན་དུ་ནམ་ཡང་མི་འཆིང་ངོ༌། །ཞེས་པའི་བར་གྱིས་བསྟན། ཆོ་ག་ཞེས་པ་བེ་ཅོན་རྒྱ། །ཞེས་པ་ལ་སོགས་པ་ནི་སྔགས་པས་བེ་ཅོན་གྱི་ཕྱག་རྒྱ་དེ་ལྟར་བཅིངས་པའི་སྔགས་གང་དང་སྦྱར་ཏེ་བཅིང་བར་བྱ་ཞེ་ན། སྙིང་པོ་འབྲུ་གསུམ་པོའམ། རྩ་བའི་སྔགས་འབྲུ་བཅུ་བདུན་པོའམ། དེ་གཉིས་གང་རུང་བཞིག་བརྗོད་ཅིང༌། བེ་ཅོན་གྱི་ཕྱག་རྒྱ་དེ་བཅིང་བར་མི་བྱའོ། །ཡང་ན་དེ་གཉིས་མ་གཏོགས་པར་ལོགས་ཤིག་ཏུ་སྔགས་པས་བེ་ཅོན་གྱི་ཕྱག་རྒྱའི་གསང་སྔགས་འོག་ནས་འབྱུང་བ་བཞིན་བརྗོད་ཅིང་ཕྱག་རྒྱ་བཅིང་བར་བྱའོ། །སྔགས་དེ་མ་གཏོགས་པར་གཞན་གང་གིས་ཀྱང་བེ་ཅོན་གྱི་ཕྱག་རྒྱ་དེ་བཅིང་བར་མི་བྱའོ་ཞེས་པའི་ཐ་ཚིག་གོ །ད་ནི་ཕྱག་རྒྱ་བཅིང་བའི་གསང་སྔགས་བཤད་དེ། དེ་ཡང་ཨོཾ་ཞེས་པ་ནས་ཕཊ་ཅེས་པའི་བར་གྱིས་བསྟན་ཏོ། །ན་མ་སརྦ་ཏ་ཐཱ་ག་ཏོ་ཞེས་པ་ནི། དེ་བཞིན་གཤེགས་པ་ཐམས་ཅད་ཀྱི་ཁྲོ་བོ་རྣམ་པར་རྒྱལ་བའི་ཡི་དགས་ཀྱི་མགོ་བོའི་རྩེ་ལ་མེ་འབར་བ་ཞེས་བྱ་བའི་དོན་ཏོ། །ད་ནི་ཕྱག་རྒྱའི་ཕན་ཡོན་བཤད་པ་ཡང༌། ཕྱག་རྒྱ་གཅིག་ཕུར་གྱུར་པ་འདི། །ཞེས་པ་ནས། བདུད་རྣམས་ཐམས་ཅད་ཞི་བར་བྱེད། །ཅེས་པའི་བར་གྱིས་བསྟན་ཏོ། །ཕྱག་རྒྱ་གཅིག་པུར་གྱུར་པ་ནི། །ཞེས་པ་ནི་ཕྱག་རྒྱ་གྲངས་ཉུང་དུ་གཅིག་པུ་ཡིན་པ་ལ་མི་བྱའོ། །བེ་ཅོན་གྱི་ཕྱག་རྒྱ་ཐམས་ཅད་ཀྱི་གཙོ་བོའམ། མཆོག་གམ་བཙན་པར་གྱུར་པ་གཅིག་པུ་ལ་བྱའོ་ཞེས་བྱ་བའི་དོན་ཏོ། །ཁྲོ་བོའི་སྙིང་
པོ་སྔགས་འབར་བྱེད། །ཅེས་པ་ནི་ཕྱག་རྒྱ་དེ་དང་ལྡན་ན་ཁྲོ་བོ་ཉིད་དང་སྙིང་པོ་འབྲུ་གསུམ་པ་དང་རྩ་བའི་སྔགས་ཡི་གེ་འབྲུ་བཅུ་བདུན་པ་ཡང་གཟི་བྱིན་དང་ལྡན་ཞིང་མཐུ་ཅན་དུ་གྱུར་ཏེ་ལས་གང་བརྩམས་པ་བྱེད་ནུས་པར་འགྱུར་རོ། །ཡང་རྣམ་པ་གཅིག་ཏུ་ཕྱག་རྒྱ་དེ་དང་ལྡན་པར་བྱས་ནས་ཁྲོ་བོའི་སྙིང་པོ་དག་འབྲུ་གསུམ་པོའི་བྱིན་ཅན་དང་ལྡན་པ་མཐུ་ཅན་དུ་གྱུར་པ་ལ་བྱའོ། །མཚོན་ཆ་མ་ལུས་པ་ཡི་གཙོ། །ཞེས་པ་ནི་ཕྱག་རྒྱ་དེས་མཚོན་ཆའི་ཕྱག་རྒྱ་ཐམས་ཅད་ཀྱི་ལས་ཐམས་ཅད་ཀྱང་དེས་མཛད་པས་ན་མཚོན་ཆའི་ཕྱག་རྒྱ་ཐམས་ཅད་ཀྱི་གཙོ་བོ་འམ། མཆོག་དམ་པར་གྱུར་པ་ནི་བེ་ཅོན་ཕྱག་རྒྱའོ། །ཡང་གཅིག་ཏུ་ན་མཚོན་ཆ་མ་ལུས་པར་གདེངས་པར་བྱེད་པའམ། འདེབས་པར་བྱེད་པ་ཞེས་ཀྱང་དྲང་དུ་རུང་སྟེ། བེ་ཅོན་གྱི་ཕྱག་རྒྱ་དེས་མཚོན་ཆའི་ཕྱག་རྒྱ་རྣམས་འདེབས་པ་ལྟ་བུ་དང༌། གདེངས་པ་ལྟ་བུའམ། འཕེན་པ་ལྟ་བུར་འགྱུར་བའི་ཕྱིར་རོ། །བདུད་རྣམས་ཐམས་ཅད་ཞི་བར་བྱེད། །ཅེས་པ་ནི་ནད་དང་བགེགས་ལ་སོགས་པར་ཞི་བར་བྱེད་པའི་ཐ་ཚིག་གོ །ད་ནི་རི་མོ་བྲི་བའི་ཕྱག་རྒྱའི་མཚན་མ་ཉིད་བཤད་པ་ཡང༌། ཇི་ལྟར་དཀྱིལ་འཁོར་དུ་བྲི་བ། །ཞེས་པ་ནས། རང་གི་དཀྱིལ་འཁོར་དུ་བྲིའོ།། ཞེས་བྱ་བའི་བར་གྱིས་བསྟན་ཏོ། །ཇི་ལྟར་དཀྱིལ་འཁོར་དུ་བྲི་བ། །ཞེས་པ་བེ་ཅོན་གྱི་ཕྱག་རྒྱ་དེ་དག་དཀྱིལ་འཁོར་དུ་ཇི་ལྟར་བྲི་བར་བྱ་བ་དེའི་ཆོ་ག་བཤད་པར་བྱའོ་ཞེས་པའོ། །བེ་ཅོན་དབྱུག་པ་ལྟ་བུའི་ཚུལ། །ཞེས་བྱ་བ་ལ་སོགས་པ་ནི་རྒྱ་གར་སྐད་དུ་དཎྜ་ཞེས་བྱ་སྟེ། མདུང་ཤིང་དང་དབྱུག་པ་ཐ་མལ་ལ་སོགས་པ་ལ་ཡང་དཎྜ་ཞེས་བྱ་སྟེ། དཎྜ་དེ་ནི་གཞན་ལ་མི་བྱའི་དབྱུག་པ་ལྟ་བུའི་རྩེ་ཡིད་ཀྱིས་ཕྲ་ལ་དབུས་སྦོམ་པ་ལ་འཇུག་ཀྱང་ཡིད་ཀྱིས་ཟླུམ་པ་ལ་ཕྲ་བ་ཚང་ཟུངས་ཅན་དུ་བྱས་པ་ལ་བེ་ཅོན་ཞེས་བྱའོ། །བེ་ཅོན་གྱི་མགོར་མི་ཐོང་བྲིའོ། །ཡི་དགས་མང་པོ་རྟག་ཏུ་བྲི། །ཞེས་པ་ནི་བེ་ཅོན་གྱི་མི་མགོ་ཅན་གྱི་རི་མོ་བྲི་བའི་ངེས་པ་བཤད་དེ། དེ་ཡང་ཕྱག་རྒྱ་གང་དུ་བྲི་ཞེ་ན། གོང་དུ་སྔར་བཤད་པའི་ཡི་དགས་ཕལ་པོ་ཆེའི་དཀྱིལ་འཁོར་དུ་རྟག་ཏུ་བྲི་བར་བྱ་ཞེས་པའོ། །དེ་ལས་གཞན་དུ་ནམས་ཀྱང་མིན། །ཞེས་
བྱ་བ་ནི་ཡི་དགས་ཕལ་པོ་ཆེའི་དཀྱིལ་འཁོར་དུ་མ་གཏོགས་པ་གཞན་གང་ཡང་བེ་ཅོན་གྱི་ཕྱག་རྒྱ་སྟེ་བྲི་བར་མི་བྱའོ། །རིག་འཛིན་གྱི་ནི་ཆོ་ག་བཞིན། །རྒྱ་འདི་དུར་ཁྲོད་ཐལ་བས་སོ། །ཞེས་པ་ནི་སྔགས་པས་ཆོ་ག་བཞིན་དུ་བེ་ཅོན་གྱི་ཕྱག་རྒྱ་བསྒྲུབ་པ་ནི་མི་རོ་བསྲེགས་པའི་ཐལ་བས་བྲི་བར་བྱའོ། །ཡང་ན་འདི་ཉིད་ལོགས་ཤིག་ཏུ། །ཞེས་པ་ལ་སོགས་པས་ནི་ཡང་ན་བེ་ཅོན་གྱི་ཕྱག་རྒྱ་དེའི་ཡི་དགས་ཕལ་པོ་ཆེའི་དཀྱིལ་འཁོར་ལས་ལོགས་ཤིག་ཏུ་ནམ་གྱི་ཚེ་སྒྲུབ་པར་འདོད་པའི་སྒྲུབ་པ་པོས་བེ་ཅོན་གྱི་ཕྱག་རྒྱ་སྒྲུབ་པར་འདོད་པས་བསྒྲུབ་པའི་དཀྱིལ་འཁོར་གྱི་བེ་ཅོན་གྱི་ཕྱག་རྒྱ་བྲིས་ཏེ་བསྒྲུབ་པར་བྱའོ། །དེ་ནས་ཕྱག་རྒྱ་བསྒྲུབ་པའི་དཀྱིལ་འཁོར་བཤད་པ་ཡང༌། དེ་ནས་ཕྱག་རྒྱ་བསྒྲུབ་པ་ཡི། །ཞེས་པ་ནས། ཕྱེ་སྟེ་དེ་ནས་མཆོད་པ་བྱའོ། །ཞེས་པའི་བར་གྱིས་བསྟན་ཏོ། །དེ་ནས་ཕྱག་རྒྱ་བསྒྲུབ་པ་ཡི། །དཀྱིལ་འཁོར་འདིར་ནི་བཤད་བར་བྱ། །ཞེས་པ་ནི་བེ་ཅོན་གྱི་ཕྱག་རྒྱ་བསྒྲུབ་པའི་དཀྱིལ་འཁོར་བཤད་པར་བྱའོ། །གྲུ་བཞི་སྔ་མ་བཞིན་དུ་སྟེ། །ཞེས་པ་སྔར་བཤད་པའི་དཀྱིལ་འཁོར་རྣམས་ལས་གྲུ་བཞི་གང་ཡང་རུང་བ་ཅིག་བྱའོ། །ཡི་དགས་ཕལ་ཆེན་འདིར་ཡང་བྲི། །ཞེས་པ་ནི་སྒྲུབ་པའི་དཀྱིལ་འཁོར་འདིའི་སྐབས་སུ་གྲྭ་བཞི་དང་ཕྱོགས་བཞི་རྣམས་སུ་བེ་ཅོན་གྱི་ཕྱག་རྒྱ་བྲི་བར་བྱ་སྟེ། ཡི་དགས་ཕལ་ཆེན་མ་བྲིས་ཀྱང༌། །བེ་ཅོན་གྱི་ཕྱག་རྒྱ་བསྒྲུབ་པའི་དཀྱིལ་འཁོར་འདིའི་རྩ་བའི་ཕྱི་མོར་གྱུར་པ་ཡི་དགས་ཕལ་པོ་ཆེའི་དཀྱིལ་འཁོར་ཡིན་པས་ན་བེ་ཅོན་གྱི་ཕྱག་རྒྱ་བསྒྲུབ་པའི་དཀྱིལ་འཁོར་ལ་ཡང་མིང་འདི་སྐད་ཅེས་བྱ་སྟེ། དཀྱིལ་འཁོར་དེ་འདིར་བྲིའོ་ཞེས་པའོ། །དེ་ཡི་དབུས་སུ་བེ་ཅོན་གཞག །ཅེས་པ་ནི་བེ་ཅོན་གྱི་ཕྱག་རྒྱ་དངོས་སུ་རྫས་ལ་བྱས་ཏེ་གཞག་གོ །དཀྱིལ་འཁོར་གྱི་དབུས་སུ་པདྨ་འདབ་མ་བརྒྱད་པ་གཅིག་དུར་ཁྲོད་ཀྱི་ཐལ་བས་བྲིས་ལ་དེའི་སྙིང་པོའི་དབུས་སུ་བེ་ཅོན་མི་ཐོད་ཅན་མགོ་བྱང་དུ་ཆད་ཟུངས་བདག་ལ་བལྟས་པར་བྲིའོ། །ཕྱོགས་བརྒྱད་རྣམས་སུ་འང་དེ་བཞིན་ནོ། །ཞེས་པ་ནི་ཕྱོགས་མཚམས་བརྒྱད་དང་དབུས་སུ་སྙིང་པོ་ལ་བེ་ཅོན་གྱི་ཕྱག་རྒྱ་དགུ་བྲིས་པས་ན། བེ་ཅོན་གྱི་ཕྱག་
རྒྱའི་དཀྱིལ་འཁོར་ཞེས་བྱ་སྟེ། དེ་ལྟ་བུའི་ཚུལ་དུ་གནས་པས་བསྒྲུབ་པར་བྱའོ། །བེ་ཅོན་གྱི་ཕྱག་རྒྱ་དེ་དག་ཀྱང་པདྨོའི་གདན་ལ་བཞུགས་པར་བྲིའོ། །དེ་བཞིན་དུ་ནི་ལྷོ་ཕྱོགས་སྒོ། །ཕྱེ་སྟེ་དེ་ནས་མཆོད་པར་བྱ། །ཞེས་པ་ནི་དེ་དཀྱིལ་འཁོར་དེ་ལྟར་བྲིས་ལ་སྒོ་ལྷག་མ་རྣམས་བཅད་དེ་ལྷོ་ཕྱོགས་སྒོ་ཕྱེ་བའི་ལོགས་ནས། ཕྱི་ནང་གི་མཆོད་པ་བྱ་ཞེས་པའི་ཐ་ཚིག་གོ །ད་ནི་གསང་བའི་མཆོད་པ་བཤད་པ་ཡང༌། ཕྱག་རྒྱ་རྒྱའི་སྔགས་ནི་མ་ལུས་པ། །ཞེས་པ་ནས། འདི་ལས་ཐམས་ཅད་འགྲུབ་པར་བྱའོ། །ཞེས་པའི་བར་གྱིས་བསྟན། ཕྱག་རྒྱའི་སྔགས་ནི་མ་ལུས་པ། །ཞེས་བྱ་བ་ལ་སོགས་པ་ནི་བེ་ཅོན་གྱི་ཕྱག་རྒྱའི་སྔགས་ཐམས་ཅད་ཁྲོ་བོའི་རྒྱལ་པོའི་སྔགས་ཀྱི་བར་དུ་བཅུག་སྟེ། དེ་ལྟ་བུའི་ཚུལ་གྱིས་བཟླས་བརྗོད་བྱས་ན་ལྷ་རྣམས་མཉེས་པར་འགྱུར་ཏེ་འགྲུབ་པས་ན་དེ་ཉིད་མཆོད་པར་འགྱུར་བ་ཡིན་ནོ། །ད་ནི་གསང་བའི་མཆོད་པ་བཤད་དེ། མཆོད་པ་རྣམ་པ་གཉིས་ཏེ་ཕྱི་དང་ནང་གིའོ། །དེ་ལ་ཕྱིའི་མཆོད་པ་ནི་ཐམས་ཅད་ཀྱི་སྤྱོད་ཡུལ་དུ་གྱུར་པའོ། །ནང་གི་མཆོད་པ་ཐམས་ཅད་ཀྱི་སྤྱོད་ཡུལ་དུ་མི་འགྱུར་བས་དེ་ཉིད་ལས་གསང་བའི་མཆོད་པ་ཞེས་བྱ་སྟེ། སྔགས་རིམ་པར་འགྱུར་བ་ཉིད་ལས་མཆོད་པའི་རིམ་གྱིས་སོ་ཞེས་བྱ་བ་སྨོས་སོ། །ཨོཾ་ན་མོ་བུདྡྷ་བྱ་བ་དང༌། ཧཱུཾ་ཕཊ་ཧཱུཾ་ཞེས་པ་ནི་ཁྲོ་བོའི་རྒྱལ་པོའི་སྔགས་སོ། །འདི་དག་ཀྱང་བེ་ཅན་གྱི་ཕྱག་རྒྱའི་སྔགས་དཀྱུས་མ་ཉིད་ཡིན་ཏེ་སྤེལ་ཟིན་ཏོ། །བེ་ཅོན་གྱི་ཕྱག་རྒྱའི་སྔགས་དཀྱུས་མ་ཉིད་ཡིན་ཏེ། འདི་དག་ནི་ཁྲོ་བོའི་རྒྱལ་པོའི་སྔགས་ཡི་གེ་འབྲུ་གསུམ་པོའི་བར་དུ་བེ་ཅོན་གྱི་ཕྱག་རྒྱའི་སྔགས་བཅུག་སྟེ་བཟླས་སོ། །འདི་ནི་ཁྲོ་བོ་རྣམ་པར་རྒྱལ་བའི་གོང་དུ་བཅུག་པའི་བེ་ཅོན་གྱི་ཕྱག་རྒྱའི་སྔགས་སོ་ཞེས་པ་ནི་འདི་ནི་ཁྲོ་བོའི་རྒྱལ་པོའི་སྔགས་ཀྱི་བར་དུ་བེ་ཅོན་གྱི་ཕྱག་རྒྱའི་སྔགས་བཅུག། སྟེ། བཟླས་བརྗོད་བྱ་བའི་གསང་སྔགས་ཡིན་ནོ། །འདི་ལས་ཐམས་ཅད་བསྒྲུབ་པར་བྱའོ་ཞེས་པ་ནི་།སྔགས་འདིའི་འོག་ནས་འབྱུང་བའི་ལས་རྣམ་བཞི་ལ་སོགས་པ་བསྒྲུབ་པར་བྱའོ། །ད་ནི་སྔོན་དུ་བསྙེན་པའི་ཚེའི་ཆོ་ག་བཤད་པ་ཡང༌། དེ་ནས་དངོས་གྲུབ་ཀུན་གྱི་
མཆོག །ཅེས་པ་ནས། ཧཱུཾ་དང་ལྡན་པས་བསྐུལ་བ་གཞན། །ཞེས་པའི་བར་གྱིས་བསྟན་ཏོ། །དེ་ནས་དངོས་གྲུབ་ཀུན་གྱི་མཆོག །ཅེས་པ་ནི། དངོས་གྲུབ་བསྒྲུབ་པའི་མཆོག་ཏུ་གསུངས་པ་ནི། སྔོན་དུ་བསྙེན་པ་བྱེད་པའོ། །ཁྲོ་བོའི་གཙོ་བོའི་དེ་ཁོ་ན། །ཞེས་པ་ནི་ཁྲོ་བོའི་རྒྱལ་པོ་དེ་ཁོ་ན་ཉིད་མཆོད་པའི་གསང་བའི་མཆོད་པ་དང་ལྡན་པས་བེ་ཅོན་གྱི་ཕྱག་རྒྱ་བསྒྲུབ་པའི་དཀྱིལ་འཁོར་དུ་བསྙེན་པ་བྱའོ་ཞེས་པའོ། །བསྙེན་པའི་སྔགས་ཁྲོ་བོའི་རྒྱལ་པོའི་བར་དུ་བཅུག་པའི་བེ་ཅོན་གྱི་ཕྱག་རྒྱའི་སྔགས་ཉིད་ཀྱིས་བྱའོ། །གསང་བའི་མཆོད་པ་དང་ལྡན་པའི་ཞེས་བྱ་བ་ལ་སོགས་པ་ནི་སྔོན་དུ་བསྙེན་པ་བྱས་ལ་སྔོན་དུ་བསྙེན་པ་དེ་ཡང་ཐབས་ཇི་ལྟར་བྱ་ཞེ་ན། སྔར་གོང་དུ་བཤད་པའི་གནས་དབེན་པ་ཅིག་ཏུ་ཙནྡན་དམར་པོས་པདྨ་འདབ་མ་བརྒྱད་བ་ཅིག་བྲིས་ལ། འདབ་མའི་རྩེ་མོ་བརྒྱད་དུ་བེ་ཅོན་མིའི་ཐོད་པ་ཅན་བརྒྱད་བྲིས་ལ་རི་མོ་མི་ཤེས་ན་དེ་ལྟར་སེམས་ཀྱིས་བསམ་མོ། །བེ་ཅོན་ཁྲོ་བོའི་བར་བཅུག་བྲི། །ཞེས་པ་ནི་པདྨའི་རྩེ་མོའི་བརྒྱད་པར་བེ་ཅོན་བརྒྱད་པ་བྲི་བ་དང༌། དབུས་སུ་བེ་ཅོན་གཅིག་སྟེ་བེ་ཅོན་དགུ་བྲི་བ་ནི་བེ་ཅོན་གྱི་མགོ་ལ་མི་ཐོད་བྲིས་པའི་སྟེང་དུ་ཡི་གེ་ཧཱུཾ་བསམ་པའང་བྲིའོ། །འབར་དུ་བཅུག་གམ་སྲེག་ཅེས་བྱ། །ཞེས་ཀྱང་དྲང་དུ་རུང་སྟེ། དངོས་སུ་ན་ཡི་གེ་ཧཱུཾ་ཐོད་པའི་སྟེང་དུ་བྲི་ཞིང་བསམ་པར་བྱའོ། །དབུས་སུ་དགུ་པ་གཞག་ནས་ནི། །ཞེས་བྱ་བ་ལ་སོགས་པ་ནི་དབུས་སུ་བེ་ཅོན་གྱི་ཕྱག་རྒྱ་བྲི་བ་ནི་གོ་རིམས་བསྟན་ཏེ། དེ་ལ་དང་པོ་དབུས་ཀྱི་སྙིང་པོ་ལ་བེ་ཅོན་གྱི་ཕྱག་རྒྱ་དགུ་བ་གཅིག་བྲི། དེའི་འོག་ཏུ་ཤར་ཕྱོགས་ནས་ལྷོ་ཕྱོགས་ལོགས་སུ་ལྷ་ཁང་བསྐོར་བའི་ཚུལ་དུ་བསྐོར་ནས། ཕྱག་རྒྱ་དེ་ཉིད་བསམས་ཀྱང་རུང་རི་མོ་བྲིས་ཀྱང་རུང་སྟེ། མེ་ཏོག་རེ་རེ་བླངས་ཏེ་དེ་ལས་ས་བོན་ཧཱུཾ་གིས་བཏབ་སྟེ། བེ་ཅོན་གྱི་ཕྱག་རྒྱའི་གནས་སུ་དོར་ཞིང༌། བེ་ཅོན་གྱི་ཕྱག་རྒྱ་རྣམས་མེ་ཏོག་གིས་དགོད་པར་བྱའོ། །བེ་ཅོན་ཀུན་གྱི་ས་བོན་ཧཱུཾ། །ཡི་དགས་སྤྱི་བོར་གཞག་པར་བྱ། །ཞེས་པ་ནི་བེ་ཅོན་དགུ་ཆར་གྱིས་བོན་ཡི་གེ་ཧཱུཾ་ཡིན་ཏེ། ས་བོན་འདི་བེ་ཅོན་རྣམས་ཀྱི་མགོ་ལ་མི་ཐོད་ཡོད་པར་བསམ་པར་བྱའོ། །ས་བོན་ནི་ཐམས་ཅད་སྐྱེད་པར་བྱེད་པས་ནི་ཧཱུཾ་འདི་ལས་ཀྱང་
ལྷའི་སྐུར་བསྒྱུར་བ་དང༌། དངོས་གྲུབ་རྣམ་གསུམ་ལ་སོགས་པ་མཐར་བླ་ན་མེད་པའི་བྱང་ཆུབ་མན་ཆད་འགྲུབ་པར་བྱེད་པ་ཡིན་ན་ས་བོན་ཞེས་པའོ། །ཁྲོ་བོའི་རྒྱལ་པོའི་བར་དུ་གཞུག་པའི་སྔགས་འབྱུང་བ། ཅིའི་ཕྱིར་བར་དུ་གཞུག་པ་དང༌། བར་དུ་གཞུག་པའི་ཕན་ཡོན་རྣམས་སྨོས་ཏེ། ཐོག་མར་ཨོཾ་དང་ལྡན་བྱས་ཏེ། །ཞེས་པ་ནི་ཁྲོ་བོའི་རྒྱལ་པོའི་སྔགས་འབྲུ་གསུམ་པ་ལས་བེ་ཅོན་གྱི་སྔགས་ཀྱི་མགོ་ལ་ཨོཾ་དང་པོར་སྨོས་པ་ནི་མཐུ་ཅན་ནམ་གཟི་བྱིན་ཅན་དུ་འགྱུར་བ་ཡིན་པའི་ཕྱིར་ཁྲོ་བོའི་རྒྱལ་པོའི་སྔགས་ཨོཾ་དང་པོར་སྨོས་སོ། །ཨོཾ་ན་མོ་མཆོད་པར་འགྱུར་ཞེས་པ་ནི་བེ་ཅོན་གྱི་སྔགས་དཀྱུས་མ་ཉིད་ཡིན་ཏེ། སྔགས་འདིས་ནི་འཕགས་པ་མཉེས་པའམ་མཆོད་པར་འགྱུར་རོ། །ཨ་ནི་ཁྲོ་བོ་རྣམ་རྒྱལ་གྱི། །ཞེས་པ་ཨ་འདི་ནི་ཁྲོ་བོ་རྣམ་པར་རྒྱལ་བའི་སྔགས་ཡིན་ཏེ། བར་དང་པོར་འབྱུང་བའི་ཨ་ལ་བྱ་སྟེ། འདིས་ནི་ཁྲོ་བོའི་རྒྱལ་པོའི་ས་བོན་ལ་སྐུལ་བར་བྱེད་པའམ། སྤྱན་ཐབས་སུ་གཟིགས་པའམ། བཀའ་ནན་མཛད་པའི་ས་བོན་གྱི་དམ་ཚིག་ཡིན་པར་བཤད་དོ། །ཡང་ཨ་དེ་ནི་རྒྱལ་པོ་ལྟ་བུའི་བཀའ་སྩལ་པའམ་སྤྱན་ཐམས་ཅད་སུ་གཟིགས་པའོ། །ཨ་དེ་མི་འདའ་བར་མཛད་པ་ཡང་ཡིན་ནོ། །ཨོཾ་ན་མོ་བུདྡྷ་དྷ་རྨཱ་སཾ་གེ་བྷྱཿ། །སངས་རྒྱས་ཀུན་གྱིས་མངོན་པར་བསྟོད། །ཅེས་པ་ཁྲོ་བོའི་རྒྱལ་པོའི་སྔགས་ཨོཾ་དང་ཨ་གཉིས་ཀྱི་བར་ན་སྔགས་འདི་འབྱུང་བ་ནི་བེ་ཅོན་གྱི་ཕྱག་རྒྱའི་སྔགས་ཉིད་ཡིན་ཏེ། སྔགས་འདིས་ནི་སངས་རྒྱས་ཀུན་བསྙེན་ནས་ལེགས་སོ་ཞེས་བྱ་བ་ལ་སོགས་པས་བསྟོད་པར་མཛད་དོ། །བེ་ཅོན་རྣམས་ནི་ཐམས་ཅད་ཀྱང༌། །ཞེས་པ་བེ་ཅོན་བྱ་བ་རྣམ་པ་མང་དུ་འདྲེན་ཏེ། ཡི་གེ་ཕྲེང་བ་ལ་ཡང་བེ་ཅོན་ཞེས་བྱ་བེ་ཅོན་གྱི་ཕྱག་རྒྱ་ཉིད་ལ་ཡང་བེ་ཅོན་ཞེས་བྱ་སྟེ། འདིའི་སྐབས་སུ་ནི་བེ་ཅོན་གྱི་ཕྱག་རྒྱའི་སྔགས་ཉིད་ལ་བྱའོ། །རང་གི་དམ་ཚིག་བསྐུལ་བར་ལྡན། །ཞེས་པ་ཧཱུཾ་ནི་བེ་ཅོན་གྱི་སྔགས་ཀྱིས་བསྐུལ་བའམ་གཞན་འདེབས་པའོ། །བེ་ཅོན་གྱི་སྔགས་ཉིད་གྱི་དོན་ཁྲོ་བོ་ཆེན་པོའི་གཟི་བརྗིད་འབར་བ་ཅན་ཞེས་པ་དག་ཀྱང་འབྱུང་བ་ལ་བྱའོ། །ཐམས་ཅད་རང་གི་
དམ་ཚིག་ལྡན། །ཞེས་པ་བེ་ཅོན་གྱི་སྔགས་ཏེ་རྒྱང་བ་མ་ཡིན་ཏེ་རང་གི་དམ་ཚིག་ཧཱུཾ་དང་ཡང་ལྡན་ནོ། །དེ་ལྟར་ལྡན་པ་དེ་རྡོ་རྗེ་དང༌། པདྨའི་སྔགས་སམ་ཞེ་ན། མ་ཡིན་ཏེ། དེ་བཞིན་གཤེགས་པའི་རིགས་ལས་བྱུང༌། །ཞེས་སྨོས་སོ། །བེ་ཅོན་གྱི་སྔགས་རྣམས་ལ་ཁྲོ་བོའི་རྒྱལ་པོའི་དམ་ཚིག་གི་སྔགས་ཨ་ལྡན་པར་བྱས་ན་དེ་ནི་དེ་བཞིན་གཤེགས་པའི་རིགས་ལས་བྱུང་བའི་གསང་སྔགས་ཡིན་ནོ། །བསྐུལ་བའི་ཚིག་དང་རབ་ལྡན་ཞིང༌། །ཞེས་པ་བེ་ཅོན་གྱི་སྔགས་དེ་ཁྲོ་བོའི་སྙིང་པོས་སྐུལ་བར་བྱེད་པ་ཧཱུཾ་དང་ལྡན་ན་བེ་ཅོན་གྱི་ཕྱག་རྒྱ་ཉིད་ཀྱི་སྔགས་བསྐུལ་བའི་ཚིག་དང་ལྡན་པར་འབྱུང་བ་ཉིད་ལ་བྱ་སྟེ། དེ་ཡང་སརྦ་ཏ་ཐཱ་ག་ཏོ་ཀྲོ་དྷ་བི་ཛཱ་ཡ་ཨ་ངེ་ར་ལ་སོགས་པའི་སྔགས་འབྱུང་བ་ཉིད་ལ་བྱ་སྟེ། དེ་ཡང་ཁྱོད་ནི་དེ་བཞིན་གཤེགས་པ་ཐམས་ཅད་ཀྱི་ཁྲོ་བོའི་རྒྱལ་པོ་ཡི་དགས་ཀྱི་མགོ་ལ་མེ་འབར་བ་ཅན་ཞེས་བྱ་བ་ལ་སོགས་པའི་བསྐུལ་བའི་ཚིག་དང་ལྡན་པ་འབྱུང་བའི་ཐ་ཚིག་གོ །ཁྲོ་བོའི་ལྟ་བས་བརྟགས་པ་དང༌། ཞེས་པ་ཁྲོ་བོ་རྒྱལ་པོའི་སྔགས་ཨ་དེ་ཁྲོ་བོ་དང་ས་བོན་ཧཱུཾ་ལ་གཟིགས་པའམ། དེ་མཛད་པའི་སྤྱན་ཐབས་འདྲ་བར་བཞུགས་པ་དེ་ལྟར་བཤད་པ་བཞིན་དུ་དེ་དང་ལྡན་པར་བྱའོ། །དེ་ལྟར་བཤད་པ་ཅི་མངོན་ཞེ་ན། འོག་ནས་འབྱུང་བ་བཞིན་དུ་བྱས་ན་མངོན་ནོ། །ཁ་ཅིག་ན་རེ། ཨ་དང་པོ་ལྡན་ཏེ་ཁྲོ་བོའི་ལྟ་བ་དང་ཡང་ལྡན་པར་བྱ་བ་ཡིན་ཟེར་རོ། །རང་རང་བསྐུལ་མས་བསྐུལ་ནས་ནི། །ཞེས་པ་ལས་རྣམ་བཞི་ལ་སོགས་པའི་བསྐུལ་ཚིག་ལ་བྱའོ། །ཁྲོ་བོའི་རྒྱལ་པོའི་སྔགས་དང་བེ་ཅོན་ཕྱག་རྒྱའི་སྔགས་དི་ལྟར་སྤེལ་བ་དང་ལྡན་ཞིང་ལས་རྣམ་བཞི་ལ་སོགས་པའི་བསྐུལ་པའི་ཆོ་ག་དང་ཡང་ལྡན་པར་བྱ་བ་ཞེས་པའི་ཐ་ཚིག་གོ །དེ་མ་ཐག་ཏུ་འགྲུབ་པར་འགྱུར། །ཞེས་པ་བེ་ཅོན་གྱི་ཕྱག་རྒྱའི་སྔགས་ཟློས་པའི་ཚེ་ན་ཡང་དོན་དེ་ལྟ་བུ་ཡིན་ལ་མངོན་དུ་བྱས་ཏེ་བཟླས་ན་ལས་མྱུར་དུ་འགྲུབ་པོ། །ཨ་འདི་ཁྲོ་བོ་རྣམ་རྒྱལ་གྱིས། །ཁྲོ་བོ་ལྟ་བས་བལྟས་པའོ། །ཞེས་པ་བེ་ཅོན་གྱི་སྔགས་དག་པའོ། །ཨ་འདི་ནི་ཁྲོ་རྣམ་པར་རྒྱལ་བས་ལྟ་བ་ཡིན་ནོ། །གོང་མ་བཤད་པ་ཁྲོ་བོའི་ལྟ་བས་བརྟགས་ཏེ། ཨ་དེ་དང་ལྡན་པས་ན་ཨ་དེ་སྤྱན་ཐབས་སུ་མཛད་
པས་ན། རང་གི་དམ་ཚིག་དང་ལྡན་པས། །ཞེས་པ་གོང་གི་ཧཱུཾ་ཐུང་དུ་ཤོས་ནི་རང་གི་བེ་ཅོན་གྱི་ཕྱག་རྒྱའི་སྔགས་ལ་སྐུལ་བར་བྱེད་པ་ཡིན་པས་དམ་ཚིག་དང་ལྡན་པ་ཞེས་བྱའོ། །ཧཱུཾ་དང་ལྡན་པས་བསྐུལ་བ་གཞན། །ཞེས་པ་བེ་ཅོན་གྱི་སྔགས་ཀྱི་མཇུག་གི་ཧཱུཾ་རིང་པོ་ཤོས་ནི་གོང་མའི་ཧཱུཾ་ཐུང་དུ་ཤོས་ལ་བསྐུལ་བ་གཞན་པར་ཞེས་པའོ། །ཞི་བ་རྒྱས་པ་དབང་དང་དགུག །ཅེས་པ་ནས་གསང་བའི་མཆོད་པར་གྲགས་ཞེས་པའི་བར་དུ་ནི་གསང་བའི་མཆོད་པའི་སྒོ་ནས་ལས་མང་པོ་བསྒྲུབ་པའི་ཞེས་བྱ་བ་བཤད་དོ། །ཞི་བ་ལ་སོགས་པའི་ལས་འདི་དག་བེ་ཅོན་གྱི་སྔགས་ལ་ལྟ་བ་དང༌། བསྐུལ་མར་ལྡན་ན་ལས་འདི་དག་བྱེད་དོ། །དབྱེ་བ་ཡི་ནི་བསྐྲད་པ་རྣམས། །ཞེས་དབེན་བྱས་ཤིང་བསྐྲད་པའོ། །གསང་བའི་མཆོད་པའི་སྦྱོར་བ་ཡིས། །བདག་གིས་མདོར་ནི་བཤད་པར་བྱ། །ཞེས་པ་བེ་ཅོན་ཅན་གྱི་སྔགས་དང༌། ཁྲོ་བོའི་སྔགས་སྤེལ་ཏེ་བཟླས་ན་ལས་དྲུག་པ་འདི་དག་གསང་བའི་མཆོད་པའི་ཆོ་ག་དང་ལྡན་པར་བསྒྲུབས་ན་དེ་དག་འགྲུབ་པར་འགྱུར་བ་དེ་ཤློ་ཀ་སུ་མ་སྟོང་ལས་མདོ་ཙམ་ཞིག་བཤད་པར་བྱའོ། །སྔགས་འདི་དག་ནི་སྔར་ཡང་སྤེལ་བ་བཤད་ན་ཡང་ཅིའི་ཕྱིར་བཤད་ཅེ་ན། ལས་དྲུག་པོ་དེ་དག་བྱེད་ན་སོ་སོའི་བསྐུལ་བའི་ཚིག་གི་ཁྱད་པར་མི་འདྲ་བ་རྣམས་བཤད་དགོས་པའི་ཕྱིར་སྔར་གོང་དུ་བཤད་མོད་ཀྱི། སྔགས་དེ་དག་སྤེལ་ཞིང་བར་དུ་གཞུག་པའི་དགོས་པ་ཙམ་ཞིག་བཤད་དོ། །དེ་ཡི་ཐོག་མར་ཡི་གེ་ཨོཾ། །ཞེས་པ་བེ་ཅོན་གྱི་ཕྱག་རྒྱའི་སྔགས་ཀྱི་ཐོག་མ་ལ་ཡི་གེ་ཨོཾ་ཡོད་བ་ནི་ཁྲོ་བོའི་རྒྱལ་པོའི་སྔགས་ཏེ་མཐུ་ཅན་ནམ་གཟི་བྱིན་ཅན་དུ་འགྱུར་རོ། །དེ་ནས་གཞན་པའི་སྔགས་སྤེལ་བྱེད། །ཅེས་པ། ན་མོ་བུདྡྷ། དྷརྨཱ། སཾ་གེ་བྷྱཿ། ཞེས་པ་ནི་སྔགས་སྤེལ་ཞིང་རྒྱས་པར་བྱེད་པའོ། །དེ་བཞིན་གཤེགས་པའི་དམ་ཚིག་ཉིད། །གསུམ་པ་ཡིན་པར་ཡོངས་སུ་བསྒྲགས། །ཞེས་པ་བར་གྱི་ཨ་གཉིས་ལས་དང་པོའི་ཤོས་ནི་གོང་དུ་སྔགས་རྣམ་གཉིས་ལས་འདས་པ་གཏོགས་པ་དེ་དང་གསུམ་སྟེ། དེ་བཞིན་གཤེགས་པའི་དམ་ཚིག་གི་སྔགས་ཡིན་པར་བསྟན་ཏོ། །སུ་ཡང་མི་འདའ་བའོ།།
སྔགས་ཀྱིས་བསྐུལ་པའི་ཚིག་དག་འདིར། །ཞེས་པ་ཁྲོ་བོ་ཆེན་པོ་འབར་བ་ཞེས་བྱ་བ་དག་འབྱུང་བའི་བེ་ཅོན་གྱི་སྔགས་ལ་བྱའོ། །དངོས་གྲུབ་སྟེར་བ་བཞི་པ་སྟེ། སརྦ་ཏ་ཐཱ་ག་ཏ་ཞེས་པ། དེ་ནས་སྔགས་ཀྱི་རང་དངོས་སོ། །ཞེས་བ་བར་གྱི་ཨ་གཉིས་ལ་བེ་ཅོན་གྱི་ཕྱག་རྒྱའི་སྔགས་ལ། སརྦ་ཏ་ཐཱ་ག་ཏ་ཀྲོ་དྷ་བྷི་ཛ་ཡ་ཞེས་པ་ལ་སོགས་པས་བསྐུལ་ནས། དངོས་གྲུབ་སྟེར་བར་མཛད་པར་གཏོགས་པར་གཞག་པའོ། །དེའི་འོག་ཏུ་འདི་ལ་སོགས་པའི་སྔགས་གོང་མ་རྣམས་ནི་བེ་ཅོན་གྱི་ཕྱག་རྒྱ་ཉིད་ཀྱི་སྔགས་སོ། །མཇུག་གི་ཧཱུཾ་ནི་ཁྲོ་བོ་ཡི། །སྔགས་ནི་འཕེལ་བར་བྱེད་པར་བཤད། །ཅེས་པ་མཇུག་གི་ཧཱུཾ་ཐུང་དུ་ཤོས་ནི་སྔགས་རྣམས་འཕེལ་ཞིང་རྒྱས་པ་དང་གཟི་ཅན་དུ་བྱེད་དོ། །དེ་ལས་གཞན་ནི་ཁྱད་པར་དུ། །རང་གི་བསྐུལ་བའི་ཚིག་གིས་བྱེད། །ཅེས་པ་ལ་ཧཱུཾ་ཐུང་དུ་ཤོས་ནི་དེ་ལས་གཞན་པ་ལ་མཇུག་གི་ཧཱུཾ་རིང་པོ་ཤོས་ཀྱི་ནི་དབང་དང་ཞི་རྒྱས་ལ་སོགས་པའི་ལས་འོག་ནས་འབྱུང་བ་རྣམས་ཀྱི་བསྐུལ་བའི་ཚིག་དང་ལྡན་པར་བྱས་ན། སྔགས་རྣམས་འཕེལ་ཞིང་རྒྱས་པ་དང༌། གཟི་ཅན་དུ་འགྱུར་རོ་ཞེས་པའི་ཐ་ཚིག་གོ །དབང་གི་ངོ་བོ་སྨོས་པ་ནི། །ཞེས་པ་ནི་དབང་དུ་བྱ་བ་ལྷ་ལ་སོགས་པའི་གང་དང་གང་དེའི་མིང་ནས་བརྗོད་དེ་དེའི་བསྐུལ་ཚིག་དང༌། མཐའ་མར་སྭཱ་ཧཱ་མཐར་སྦྱར་ཏེ་བཟླས་ཏེ་ཞེས་པའོ། །ཕཊ་བྱུང་ན་བེ་ཅོན་གྱི་སྔགས་ཉམས་པར་འགྱུར་བས་མི་འབྱུང་བར་ཧཱུཾ་རིང་པོའི་འོག་ཏུ་སོ་སོའི་བསྐུལ་ཚིག་བཅུག་སྟེ་ངེས་པར་བྱའོ། །མི་མཐུན་པར་བཤད་པ་ནི་འོག་མ་ལྟར་མི་རུང་ངོ༌། །གོང་དུ་སྨོས་པའི་བེ་ཅོན་གྱི་ཕྱག་རྒྱའི་སྔགས་ཀྱི་མཇུག་ལ་ཧཱུཾ་གཉིས་ཀྱི་བར་ན་ཕཊ་ཡོད་པ་ནི་དྲག་ཤུལ་གྱི་ཡིན་པས་ཞི་བ་དང༌། རྒྱས་པ་དང༌། དབང་གི་ལས་རྣམས་ལ་ནི་མི་སྦྱོར་རོ། །དེ་ལྟར་མ་སྦྱོར་ན་ཡང་བེ་ཅོན་གྱི་སྔགས་བཅད་པའི་ཁ་མ་བསྐོངས་པའི་སྐྱོན་དུ་མི་འགྱུར་ཞེས་ཟེར་རོ། །ཞི་བའི་ཕྱིར་ནི་བསྐུལ་བ་ཉིད། །མཇུག་ཏུ་བཽ་ཥཊ་བཏགས་པར་བྱ། །ཞེས་པ་སུ་ལ་བྱ་བའི་མིང་ཧཱུཾ་གི་འོག་ཏུ་བཅུག་ལ་དེ་ནས་བསྐུལ་བའི་ཚིག་གཞུག་གོ །དེ་བས་ན་དྲག་ཤུལ་ལ་
སོགས་པ་གང་ལ་སྦྱར་བ་ལ་འབྱུང་བ་དེ་བཞིན་དུ་སྦྱོར་ཏེ་ལས་བྱའོ། །དེ་བཞིན་གཤེགས་པའི་རིགས་ལས་བྱུང༌། །ཞེས་བྱ་བ་ལ་སོགས་པ་ནི་རྒྱས་པ་ནི་རྒྱས་པ་རྣམ་པ་གཉིས་ཏེ། འཇིག་རྟེན་དང་འཇིག་རྟེན་ལས་འདས་པའི་རྒྱས་པའོ། །དེ་ལ་འཇིག་རྟེན་ལས་འདས་པའི་རྒྱས་པ་བསྒྲུབ་པར་འདོད་པས། ས་དང་ཕ་རོལ་ཏུ་ཕྱིན་པ་དང་མཐར་བླ་ན་མེད་པའི་སངས་རྒྱས་སུ་བསྒྲུབ་པ་མན་ཆད་དང༌། འབྱོར་པ་ཕུན་སུམ་ཚོགས་པ་དེ་ལས་གོང་མ་མེད་པའི་རྒྱས་པ་ནི། དེ་བཞིན་གཤེགས་པའི་རིགས་ལས་བྱུང་བ་སྟེ། དེ་བསྒྲུབ་པར་འདོད་པས་སྔགས་འདི་བཟླས་སོ། །རྒྱས་པའི་ཕྱིར་ནི་སྔོན་བཞིན་དུ། །ཞེས་པ་འདི་ནི་འཇིག་རྟེན་པའི་རྒྱས་པའོ། །རྒྱས་ཕྱིར་བསྐུལ་བའི་ཐོག་མ་དང༌། །ཞེས་པ་གཡུལ་ལས་རྒྱལ་བར་བྱེད་འདོད་དམ། ཤགས་ལས་རྒྱལ་བར་བྱེད་པར་འདོད་ན་ཞེས་པའོ། །ཁྲོ་བོ་ཧཱུཾ་ནི་ཐ་མར་སྦྱར། །ཞེས་པ་ལ་སོགས་པ་ནི་དྲག་པོའི་ཚིག་ཏུ་ཟད་དོ། །གསང་བའི་མཆོད་པའི་ཆོ་གར་གྲགས། །ཞེས་པ་ནི་གོང་དུ་བཤད་པའི་ཚུལ་དེ་ལྟ་བུ་དག་གི་གསང་བའི་མཆོད་པར་གྲགས་པ་ཡིན་ནོ། །ད་ནི་ཕྱིའི་མཆོད་པའི་སྒོ་ནས་མཇུག་སྡུད་ཅིང་ཕན་ཡོན་སྨོས་པ་ཞེས་པ་བཤད་དེ། དེ་ལྟར་མཆོད་པའི་རིམ་པ་དེར། །བེ་ཅོན་དག་ནི་བྱས་པར་འགྱུར། །ཞེས་སྨོས་ཏེ། འདི་ནི་གོང་དུ་སྨོས་པ་རྣམས་ཀྱི་མཇུག་སྡུད་པ་རྣམས་ཀྱི་ཚིག་སྟེ། དེ་ལྟར་ནི་བེ་ཅོན་གྱི་ཕྱག་རྒྱ་མཎྜལ་དེར་གསང་བའི་མཆོད་པའི་རིམ་པ་དེ་བྱས་པར་རྫོགས་པར་འགྱུར་བ་ཡིན་ནོ་ཞེས་མཇུག་སྡུད་དེ། བེ་ཅོན་གྱི་མཎྜལ་དག་གིས་རྫོགས་སོ། །གསང་བའི་མཆོད་པའི་སྦྱོར་བ་ཡིས། །ཞེས་པ་ལ་སོགས་པ་ནི་གསང་བའི་སྦྱོར་བ་དང༌། ལྡན་པ་དེས་ན་ཇི་ལྟར་འདོད་པ་ལས་དང༌། བྱེད་ཅེས་པ་དང་སྦྱར་ཏེ། དེ་བཞིན་དུ་ཕྱིའི་མཆོད་པ་མེ་ཏོག་ལ་སོགས་པ་ལས་སོ་སོའི་ཁ་དོག་དང་རོ་ཙམ་གྱིས་ན་མཆོད་པ་སྦྱར་བས་ལས་བྱེད་དོ། །བཟླས་པ་བྱེད་ཀྱང་འགྲུབ་པར་འགྱུར། །ཞེས་པ་ལ་སོགས་པ་ནི་བཟླས་པའི་གྲངས་དང༌། དུས་ཆད་པ་བཞིན་དུ་མ་བཟླས་ཀྱང་གསང་བའི་མཆོད་པ་དང་ལྡན་ན། འཕྲལ་ལ་བྱས་ཀྱང་འགྲུབ་པར་འགྱུར་རོ། །བསྙེན་པ་ལ་མི་བྱའི། འཕྲལ་
ཀྱི་ལས་ལ་བྱའོ། །ཇི་སྐད་བཤད་པའི་ཚུལ་དག་དང༌། །ཞེས་པ་ལ་སོགས་པ་ནི་དབང་དུ་བྱ་བ་ལ་སོགས་པའི་ལས་དེ་རྣམས་ཇི་སྐད་བཤད་པའི་ཚུལ་བཞིན་དུ་གསང་བའི་མཆོད་པའི་སྦྱོར་བ་དེ་འདྲ་བ་དང་ལྡན་པ་དེས་ནི། ཚེས་གྲངས་དང༌། སྐར་མ་དང༌། ནད་ཀྱི་དུས་དང་སྨྱུང་བ་དག་ཀྱང་མི་དགོས་པར་བསྒྲུབ་པ་དེས་ཤེས་པར་བྱའོ། །ཕྱག་རྒྱའི་དཀྱིལ་འཁོར་ལེགས་བྱས་པ། །ཞེས་པ་ལ་སོགས་པ་སྒྲུབ་པ་པོ་དེ་གསང་བའི་མཆོད་པའི་ཆོ་ག་ཡང་ཞེས་བེ་ཅོན་གྱི་དཀྱིལ་འཁོར་དུ་ལེགས་པར་དབང་བསྐུར་བས་ཁྲུས་ལ་སོགས་པ་མ་བྱས་པ་དང༌། ཅི་འདོད་དགུ་རང་ཉམས་སུ་སྤྱོད་ཅེས་པའི་དོན་ཏོ། །ཅི་ཡང་རུང་བར་གཏོར་མ་དང༌། །ཞེས་པ་ལྷ་བཤོས་དང་གཏོར་མ་མཆོད་པའི་ཡོ་བྱད་འདི་རུང་འདི་མི་རུང་འདམ་ཀ་མེད་དོ། །གང་གིས་ཞེས་པ་བསྒྲུབ་པ་གང་གིས་བསྒྲུབ་པའི་ཚིག་དང་ལྡན་པའི་སོ་སོའི་ལས་བྱའོ་ཞེས་པའི། །མཆོད་པ་བྱེད་པ་ཞེས་པ་སྔགས་དང་གསུམ་ཀས་མཆོད་དོ་ཞེས་བྱའོ། །བྱང་ཆུབ་ཅེས་པ་བསྒྲུབ་པའོ། །ཞེས་པའོ། །རབ་ཏུ་གུས་པའི་ཟླ་བ་དྲུག་གིས་ཞེས་པ་དེ་འདྲ་བའི་ཚུལ་དུ་ཟླ་བ་དྲུག་ཏུ་གུས་པའི་སེམས་ཀྱིས་བཟླས་པ་བྱ་བའི་དོན་ཏོ། །དེ་ནི་ཅི་འདོད་དགོས་པ་རྙེད། །ཅེས་བྱ་དབང་དུ་བྱ་བའི་ལས་ལ་སོགས་པ་འདི་དག་བྱེད་པའི་ཆོ་ག་གོང་དུ་སྨོས་པའི་ལས་ཀྱི་དཀྱིལ་འཁོར་དེ་རྣམས་ལས་གང་ཡང་རུང་བ་བསྒྲུབ་པའི་དཀྱིལ་འཁོར་དེ་བྲིས་པ་ལས་བསྒྲུབ་པ་ནི་བེ་ཅོན་གྱི་དཀྱིལ་འཁོར་དུ་དབང་བསྐུར་བའི་སྒྲུབ་པ་པོས་ལས་ཀྱི་དཀྱིལ་འཁོར་མ་བྱས་ཀྱང་བསྐུར་བའི་ཚིག་དང་ལྡན་པར་སོ་སོའི་ལས་བྱའོ། །བཞི་པའི་ལས་བཤད་པ་རྫོགས་སོ།། །།ད་ནི་བེ་ཅོན་གྱི་ཕྱག་རྒྱར་གཏོགས་པའི་སྤྱིའི་རྒྱུད་ལས་སྒྲུབ་ཐབས་གོང་མ་ལས་འབྱུང་བའི་ཆོ་ག་དེ་དག་འདིར་བསྒྲུབ་པར་བྱའོ། །བསྒྲུབ་པ་ལ་རྣམ་པ་གཉིས་ཏེ། བསྒྲུབ་པ་སྔགས་སྤེལ་བ་དང༌། སྔགས་མ་སྤེལ་བར་ཐ་མལ་བར་བསྒྲུབ་པའོ། །དེ་ལ་དང་པོར་ནི་སྔགས་མ་སྤེལ་བར་ཐ་མལ་བར་བསྒྲུབ་པར་བྱའོ། །དེ་ལ་དཀྱིལ་འཁོར་གྱི་ཆོ་ག་བཤད་དེ། །དེ་ནས་བེ་ཅོན་ཕྱག་རྒྱ་ཡི། །ཞེས་པ་ནས། སྔགས་དེས་བསྲུངས་ཏེ་
དབུལ་བར་བྱ། །ཞེས་པའི་བར་གྱིས་དེ་ལ་དཀྱིལ་འཁོར་གྱི་ཆོ་ག་བཤད་དོ་ཞེས་པ་བསྟན་ཏོ། །དེ་ཡི་དཀྱིལ་འཁོར་གཉིས་པ་གཞན། །ཞེས་པ་ལ་སོགས་པ་ནི་བེ་ཅོན་གྱི་ཕྱག་རྒྱའི་དཀྱིལ་འཁོར་གོང་མ་ལས་གཞན་པའི་དཀྱིལ་འཁོར་གཉིས་པ་དེ་བཤད་དོ། །དཀྱིལ་ན་ཡི་དགས་ཞེས་བྱ་ལ། བེ་ཅོན་གྱི་ཕྱག་རྒྱ་བསྒྲུབ་པའི་དཀྱིལ་འཁོར་དེའི་མིང་ཡང་དཀྱིལ་ན་ཡི་དགས་ཞེས་བྱ་བའི་དཀྱིལ་འཁོར་རོ། །སྒྲུབ་པ་མཚན་མོ་དུར་ཁྲོད་དུ། །ཞེས་སྒྲུབ་པ་པོས་མཚན་མོ་དུར་ཁྲོད་ཀྱི་གནས་སུ་དུར་ཁྲོད་ཀྱི་ཐལ་བ་སྔར་སྨོས་པའི་བསྒྲུབ་པའི་དཀྱིལ་འཁོར་བྲིའོ། །སྒོ་གཞན་བཅད་ལ་ལྷོ་ཕྱོགས་ཀྱི་སྒོ་ཕྱེ་སྟེ་བསྒྲུབ་པ་དང་མཆོད་པ་དག་བྱའོ། །དུར་ཁྲོད་དག་གི་ཐ་བ་ཡིས། །གྲུ་བཞི་པ་ལ་སྒོ་བཞི་པར། །ཞེས་བ་དུར་ཁྲོད་རྣམ་པ་གཉིས་ཏེ། རོ་བསྲེགས་པའི་དུར་ཁྲོད་དང༌། རོ་མ་བསྲེགས་པའི་དུར་ཁྲོད་དེ། དེ་ལྟ་བུའི་གནས་སུ་ཕྱིན་ཏེ། ཉི་མ་མ་ནུབ་པར་དཀྱིལ་འཁོར་བྲིས་ལ། ཉི་མ་ནུབ་ནས་བསྒྲུབ་པ་ལ་འཇུག་པར་བྱའོ། །མི་རོ་དང་ཐོད་པ་འདི་དག་ཀྱང་ཕྱག་རྒྱའི་མཚན་མ་ཡིན་པར་ཤེས་པར་བྱའོ། །མི་རོ་རོ་སྨད་དག་དང་ལྡན། །ཞེས་པ་དཀྱིལ་འཁོར་གྱི་དབུས་སུ་པདྨ་འདབ་མ་བརྒྱད་པ་བྲིས་ལ་དེའི་དབུས་སུ་མི་རོ་མགོ་མེད་པའི་རོ་སྟོད་ཤར་ཕྱོགས་སུ་བསྟན་པ་རྐང་པ་ནུབ་ཕྱོགས་སུ་འདུག་པར་གཞག་པར་བྱའོ། །མི་རོ་ལ་ཡང་ཐལ་བས་རི་མོ་བྱའོ། །བླ་རེ་རྔ་ཡབ་མེ་ལོང་དྲིལ། །ཞེས་པ་ཟླ་བ་དང་ཟླ་བ་ཕྱེད་པ་ལ་བྱའོ། །མེ་ཏོག་ཕྲེང་བས་མཛེས་པར་བྱས། །ཞེས་པ་ལ་སོགས་པ་ནི་དཀྱིལ་འཁོར་དེ་ཉིད་ལྷ་རྫས་ཞེས་བྱ་སྟེ། བཟང་པོ་ཞེས་བྱ་བའི་དོན་ཏོ། །དཀྱིལ་འཁོར་བཟང་པོའི་ནང་རིམ་གྱིས། ཕྱོགས་བཞིར་མགོ་ལུས་ཚང་བའི་ཡི་དགས་གཅིག་ལ་གཅིག་འབྲེལ་བར་ཆུར་འཁོར་བར་བྲིའོ། །ནང་གི་ངོས་བཞི་དང་གྲྭ་བཞིར་ཡི་དགས་ཐོད་པ་བརྒྱད་བྲི་སྟེ། དེས་དཀྱིལ་འཁོར་བྲིས་པའི་འོག་ཏུ་དབུས་ཀྱི་ཡི་དགས་ཀྱི་དུར་ཁྲོད་ཀྱི་ཐལ་བས་བེ་ཅོན་གྱི་ཆད་ཟུངས་ཀྱིས་བདག་ལ་ལྟ་བར་བྲིའོ། །དཀྱིལ་འཁོར་གྱི་ཆོ་ག་དེ་དག་ཀྱང་སྔར་
བསྙེན་པར་བྱེད་པའི་ཚེ་ནི་ཆོ་ག་འདི་བཞིན་དུ་དུར་ཁྲོད་ཀྱི་ཐལ་བས་བྲིའོ། །བསྒྲུབ་པའི་ཚེ་ནི་དཀྱིལ་འཁོར་དུ་དུར་ཁྲོད་ཀྱི་ཐལ་བས་བྲིས་ལ་ཡི་དགས་དང༌། ཐོད་པ་རྣམས་རྙེད་ན་ཆོ་ག་བཞིན་དུ་དངོས་སུ་གཞག་གོ །བེ་ཅོན་གྱི་ཕྱག་རྒྱ་ཡང་གསེར་དངུལ་དང༌། ཟངས་དང༌། ལྕགས་དང༌། སེང་ལྡེང་ལས་ལེགས་པར་བྱས་པ་དོངས་སུ་གཞག་ལ་བསྒྲུབ་པོ། །དཀྱིལ་ན་ཡི་དགས་ཞེས་བྱ་བའི། །ཞེས་བྱ་བ་ལ་སོགས་པ་ནི་ཡི་དགས་ལྟེ་བ་ཞེས་བྱ་བའི་དཀྱིལ་འཁོར་ཐམས་ཅད་འགྲུབ་པར་བྱེད་པའི་དཀྱིལ་འཁོར་དེར་ཁྲོ་བོའི་རྣལ་འབྱོར་དང་ལྡན་པས་མཆོད་པ་བྱའོ་ཞེས་འོག་ནས་འབྱུང་བའི་ཚིག་དང་སྦྱར་རོ། །ཁྲོ་བོ་གཙོ་བོའི་ཕྱག་རྒྱ་ཡིས། །མཆོད་པ་ཇི་སྐད་གསུངས་པ་བྱས། །ཞེས་པ་སྒྲུབ་པ་པོའི་བདག་ཉིད་ཁྲོ་བོའི་རྣལ་འབྱོར་དང་ལྡན་པས་དཀྱིལ་ན་ཡི་དགས་ཞེས་བྱའོ། །དཀྱིལ་འཁོར་དེ་ལ་མཆོད་པ་ཇི་སྐད་གསུངས་པ་དག་གིས་མཆོད་པར་བྱའོ། །མཆོད་པ་ལ་སོགས་པ་བསྙེན་པ་སྔར་བྱས་ནས་ད་ནི་ཡོ་བྱད་ལ་སོགས་པ་ཞེས་བྱ་བ་བཤད་དོ། །སྨེ་གཏོར་ཐམས་ཅད་སྦྱིན་ནས་ནི། །ཞེས་པ་ཤ་ཁྲག་ལ་སོགས་པའི་སྨེ་གཏོར་གྱིས་དཀྱིལ་འཁོར་ཁོ་ར་ཁོར་ཡུག་ཕབ་སྟེ། མཆོད་པར་བྱའོ། །བཙང་མའི་ཆོ་ག་བགོས་ནས་ཀྱང༌། །ཞེས་པ་སྒྲུབ་པ་པོས་ཕྱི་ནང་གི་གཙང་སྦྲ་དང་ལན་པ་དེས་ཁྲོ་བོའི་སྐུར་བསྒྱུར་ལ་ཆོ་ག་ལ་སོགས་པའི་སྔགས་ཀྱིས་ཀྱང་ཆོ་ག་བཞིན་དུ་བསྲུངས་ལ་སྒྲུབ་པ་བོས་སྔར་བསྙེན་པ་འབུམ་བྱའོ། །བསྙེན་པ་བྱ་བའི་སྔགས་ཀྱང་བེ་ཅོན་གྱི་ཕྱག་རྒྱའི་སྔགས་ཁྲོ་བོའི་རྒྱལ་པོའི་བར་དུ་བཅུག་སྟེ། སྔགས་སྤེལ་བ་མ་ཡིན་བ་སྔར་གོང་དུ་ཕྱག་རྒྱ་བཅིང་པའི་སྐབས་སུ་བེ་ཅོན་གྱི་ཕྱག་རྒྱའི་སྔགས་མ་སྤེལ་བ་དེ་ཉིད་བཟླས་པར་བྱའོ། །བསྙེན་བའི་ས་ནི་གང་ཡང་རུང་བའི་གནས་དབེན་པ་གཅིག་ཏུ་བྱའོ། །བྱས་ནས་འདི་དག་བརྩམ་པར་བྱ། །ཞེས་བསྔར་བསྙེན་པ་འབུམ་བྱས་ནས། དེའི་འོག་ཏུ་ཡོ་བྱད་འདི་དག་ལ་སོགས་པ་བྱའོ། །ཤིས་པའི་ཐོད་པས་བཀབ་ནས་ནི། །ཞེས་བ་ལ་སོགས་པ་ནི་རིགས་མཐོན་པོའི་ཐོད་པ་མ་ཆག་པ། མ་གས་པ། དུང་གི་མདོག་འདྲ་བ་ཕྱི་བྱད་བྱས་ལ་བཀྲ་ཤིས་པའི་ཐོད་པ་ཁྲག་གིས་བཀང་བ་
དང་མི་ཤ་དག་ཀྱང་བསག་པར་བྱའོ། །ཕྱུགས་ཆེན་དག་གི་ཚིལ་བུ་ལས། །ཞེས་པ་ལ་སོགས་པ་ནི་མིའི་ཚིལ་བཞུ་བའི་མར་མེ་དག་ཀྱང་དཀྱིལ་འཁོར་གྱི་ཕྱི་རིམ་གྱི་ཕྱོགས་བཞི་དང་མཚམས་བཞིར་བཀོད་བ་བྱས་ཏེ། དེ་ཡང་རྩ་བའི་སྔགས་ཀྱིས་བཏབ་སྟེ། དབུལ་བར་བྱའོ། །ཆོ་ག་ཞེས་པ་དེ་ལྟ་བུར། །ཞེས་པ་ནས། མི་འགྲུབ་པ་མི་ལས་རྣམས་ཀྱང༌། །ཞེས་པ་ལ་སོགས་པའི་བར་གྱིས་སྒྲུབ་པ་པོས་བསྒྲུབ་པའི་མཚན་ཉིད་དང་ལྡན་ཞིང༌། སྔགས་པ་སྒྲུབ་པའི་ཆོ་ག་དེ་ལྟར་བརྩམས་ནས་གྲོགས་དང་ལྡན་པས་བསྒྲུབ་པ་འཇུག་པ་ཞེས་བྱ་བ་བཤད་དོ། །བྱས་ནས་བསྒྲུབ་ལ་འཇུག་པར་བྱ། །དཔལ་ལྡན་གོས་ནི་དམར་པོ་གྱོན། །ཞེས་པ་སྒྲུབ་པ་པོས་རས་སམ་དར་ལ་སོགས་པ་དམར་པོའི་གོས་གྱོན་པའི་དབང་དུ་བྱ་བའི་དོན་ཏོ། །ཙནྡན་དམར་པོ་བསྐུས་ནས་ནི། །ཞེས་པ་སྒྲུབ་པ་པོས་ཁྲུས་བྱས་ནས། ལུས་ལ་ཙནྡན་དམར་པོས་བསྐུའོ། །ཅུང་ཟད་དག་ཀྱང་མི་བྱེད་པར་སྒྲུབ་པ་པོས་དངོས་གྲུབ་བསྒྲུབ་པའི་ལས་གཞན་ཅི་ཡང་མི་བྱེད་པར་རོ། །མར་གྱི་བརྒྱད་ལ་གཅིག་པུས་སོ། །ཞེས་མར་གྱི་ཚེས་ཉི་ཤུ་གསུམ་གྱི་ནུབ་མོ་མཚན་གཅིག་དཀྱིལ་འཁོར་གྱི་མདུན་དུ་བསྒྲུབ་པོ། །ཚེས་གྲངས་ཀྱི་དྲག་པོ་དང་སྦྱར་རོ། །དཔའ་ལ་སེམས་དྲག་མཐུ་དང་ལྡན་པ་ཡིས། །གྲོགས་ནི་གསུམ་དང་ལྡན་པར་བསྒྲུབ་པར་བྱ། །ཞེས་པ་གྲོགས་པོ་གསུམ་དང་ལྡན་པར་བསྒྲུབ་པར་བྱ་སྟེ། གྲོགས་པོའི་མཚན་ཉིད་ཀྱང་འདི་དག་གྲོགས་པོར་གཟུང་ངོ༌། །བློ་དང་ལྡན་པ་སེམས་དྲག་ཅིང༌། །དབང་པོ་བསྡམས་པའི་སྒྲུབ་བ་པོ། །ཞེས་བ་སྒྲུབ་པ་པོ་དག་མཚན་ཉིད་འདི་འདྲ་བ་དང་ལྡན་ཞིང་སེམས་ཡུལ་ལ་སྤྲོ་བར་བསྡམས་པ། ཡི་དགས་ཀྱི་ནི་དཀྱིལ་འཁོར་དུ། །སྒྲུབ་པ་ལ་ནི་འཇུག་པར་བྱ། །གྲོགས་པོ་གསུམ་གྱི་མཚན་ཉིད་དེ་འདྲ་བ་དང༌། སྒྲུབ་པ་པོ་ཉིད་ཀྱི་མཚན་ཉིད་དེ་ལྟ་བུ་དང་ལྡན་པས་ཡི་དགས་ལྟེ་བ་ཞེས་བྱ་བའི་དཀྱིལ་འཁོར་དུ་སྒྲུབ་པ་ལ་འཇུག་པར་བྱའོ་ཞེས་པའོ། །དེ་ནས་མཚན་མོ་ཕྱག་རྒྱ་བཅིང༌། །ཞེས་པ་ལ་སོགས་པ་ནི་བསྒྲུབ་པའི་མཚན་མོ་ཁྲོ་བོའི་རྣལ་འབྱོར་དང་ལྡན་པར་བྱས་ནས། སྟན་
གྱི་སྟེང་དུ་དང་པོ་སྐྱིལ་མོ་ཀྲུང་དུ་འདུག་པ་ལ་མི་གཡོ་མི་འགུལ་བརྟན་པར་འདུག་པ་ལས་བེ་ཅོན་གྱི་ཕྱག་རྒྱའི་སྔགས་ལྷག་ཆད་དུ་མི་འགྱུར་བར་བཟླས། །ལེགས་པར་བཟླས་སོ། །རྒྱལ་ན་ཕྱག་རྒྱ་འགྲུབ་པར་འགྱུར། །ཞེས་པ་བེ་ཅོན་གྱི་ཕྱག་རྒྱ་འགྲུབ་པར་འགྱུར་རོ། །མི་འགྲུབ་པ་ཡི་ལས་རྣམས་གྱང༌། །ཞེས་པ་བེ་ཅོན་གྱི་ཕྱག་རྒྱ་གྲུབ་ཟིན་ཕན་ཆད་བསྒྲུབ་པར་དཀའ་བའི་ལས་རྣམས་ཀྱང༌། དེ་ཕན་ཆད་ཐོགས་པ་མེད་པར་གྲུབ་པར་འགྱུར་རོ། །དེ་ནས་ཐོགས་པ་མེད་པར་བྱེད། །ཅེས་པ་ནས། དེ་ནས་བཟླས་བརྗོད་འབུམ་བྱས་ན། །ཞེས་པའི་བར་གྱིས་འདི་མན་ཆད་བསྒྲུབས་ནས་ལས་མང་པོ་བྱ་བར་བཤད་དོ། །དེ་ནས་ཐོགས་པ་མེད་པར་བྱེད། །འཇམ་དཔལ་དབྱངས་ཀྱི་ཁྲོ་བོ་ཡིས། །ཞེས་པ་ཁྲོ་བོའི་རྣལ་འབྱོར་དང་ཡང་ལྡན་ལ་སོ་སོའི་ལས་ཀྱི་ཚིག་དང་ལྡན་པར་བྱས་ཏེ། ལས་བྱས་ན་ཐེ་ཚོམ་མེད་པར་འགྲུབ་པར་འགྱུར་རོ། །ཧ་ན་བི་སྥོ་ཊ་བྷ་ཉྫ་བྷཉྫ། ཞེས་བསྐུལ་བའི་ཐ་མར་ཧཱུཾ་བརྗོད་ཅིང་ཞེས་པ་རྒྱ་གར་གྱི་ཡི་གེ་ལ་ཧཱུཾ། བསྐུལ་བའི་ཚིག་གི་མགོར་བཞག་པར་དྲང་དུའང་རུང༌། བསྐུལ་ཚིག་གི་ཐ་མར་བཞག་པ་སྐད་དུ་དྲང་དུའང་རུང་སྟེ། ཁ་ཅིག་གིས་ནི་བསྐུལ་ཚིག་མཇུག་ཏུ་ཕྱུང་ངོ༌། །ཁ་ཅིག་གིས་ནི་བསྐུལ་བའི་ཐོག་མར་ཧཱུཾ་ཕྱུང་ངོ༌། །གཡོན་བརྐྱང་བ་ཡི་ཚུལ་གནས་ལ། །ཞེས་པ་ཕྱག་རྒྱ་བསྒྲུབ་པ་དེས་ཁྲོ་བོའི་རྣལ་འབྱོར་དང་ལྡན་པས་ཁྲོས་པས་རྐང་པ་གཡོན་བརྐྱང་ལ། གཡས་པས་བསྐུམ་པར་བྱ་བ་ནི་ལས་འོག་མ་ལ་ཡང་སྦྱར་བར་བྱའོ། །ཁྲོས་བས་རི་རྩེ་བགྲོད་དཀའ་དང༌། །ཞེས་པ་ལ་སོགས་པ་ནི་རྣལ་འབྱོར་བ་རིའི་རྩེ་སུས་ཀྱང་མ་མཐོང་བ་བགྲོད་དཀའ་བ་རྣམས་དང༌། མཁར་ཡང་བྱ་ཞེས་པའོ། །པུ་ཤུའི་ཁང་བ་དང་བ་དབང༌། །སྐད་ཅིག་བདག་གིས་རྙིལ་བར་བྱེད། །ཅེས་པ་དེ་ལྟ་བུ་གཅིག་གཉིས་མ་ཡིན་ན་མང་པོ་ཡོད་པ་རྣམས་ཀྱང་ཐང་ཅིག་གིས་རྙིལ་བར་བྱེད་དོ། །ད་ར་བི་སྥོ་ཊ་བྷ་ཉྫ་བྷཉྫ། ཞེས་པ་འདི་དག་རིའམ། ར་བའམ། གང་ལ་བྱ་བ་དེ་བེ་ཅོན་གྱི་སྔགས་ཀྱི་མཇུག་ལ་སྨོས་པ་དེའི་མཇུག་ཏུ་བསྐུལ་ཚིག་གཞུག་སྟེ་ཀུན་ལ་ཡང་དེ་དང་འགྲེའོ། །ལྷ་མ་ཡིན་
གྱི་སྒོ། དེ་བཞིན་གཞན་དང་ས་དག་ཀྱང༌། །ཞེས་པ་དེ་བཞིན་དུ་གནས་པ་གང་ཡང་རུང་བ་དང༌། ས་དག་ཀྱང་སྔགས་པ་ཇི་ལྟར་འདོད་པ་བཞིན་དུ་འགས་པར་བྱེད་དོ། །བསྐུལ་ནས་ཐ་མར་ཧཱུཾ་བརྗོད་ན། །ཞེས་པ་ལ་སོགས་པ་ནི་བེ་ཅོན་གྱི་ཕྱག་རྒྱའི་སྔགས་ཐ་མལ་པའི་དཀྱིལ་ན་ཡང་ཧཱུཾ་འབྱུང་ལ་བསྐུལ་པའི་ཚིག་གི་སྐབས་འདིར་ཡང་ཧཱུཾ་འབྱུང་བ་དང་སྦྱར་བ་དང་སྦྱར་ན། སོ་སོའི་ལས་སུ་སྦྱོར་བའི་ཚེ་ན་ཧཱུཾ་གཉིས་དགོས་པ་དང་འདྲ་ཞེ་ན། ཧཱུཾ་ཞེས་བྱ་བ་ནི་སྔགས་ལ་བྱ་སྟེ། སྔགས་ཀྱི་མཇུག་ཏུ་བསྐུལ་ཚིག་གཞུག །ཅེས་པའི་དོན་ཏོ། །མདོར་ན་ཧཱུཾ་གཅིག་བརྗོད་ནས་དེའི་ཐ་མར་བསྐུལ་བའི་ཚིག་གཞུག་པར་ཟད་དོ་ཞེས་བཤད་དེ་ཧཱུཾ་གཅིག་ཏུ་ཟད་དོ། །ཁ་ཅིག་ན་རེ་དེ་ལྟར་མ་ཡིན་ཏེ། ཧཱུཾ་གཉིས་དགོས་ཏེ་ཧཱུཾ་གཅིག་བསྐུལ་བའི་དང་པོར་གཞག །ཧཱུཾ་གཅིག་ནི་བསྐུལ་བའི་ཚིག་མཇུག་སྡུད་དུ་གཞུག་གོ་ཞེས་བཤད་དོ། །རི་མོ་ལ་ནི་གནས་པ་བཞིན། །ངེས་པར་མྱུར་དུ་གནོན་པར་འགྱུར། །ཞེས་པ་ནི་རི་མོ་ལ་བྲིས་བཞིན་དུ་ཕ་རོལ་པོའི་སྡེ་རྣམས་གནོན་པར་འགྱུར་རོ། །དཔུང་རྣམས་འཁྲུག་པར་འགྱུར་བ་ལ། ཁྲོས་ན་ངོ་མཚར་ཅི་ཞིག་ཆེ། །ཞེས་པ་ཕ་རོལ་པོའི་སྡེ་འཁྲུག་པར་འགྱུར་ནས་སོ་སོ་དགྱེས་པར་བྱེད་དོ། །ཕྱག་རྒྱ་བསྒྲུབ་པའི་རྣལ་འབྱོར་པས་ལས་དེ་དག་བྱས་ན་དངོས་གྲུབ་ཐོབ་པར་ལས་དེ་དག་ངོ་མཚར་ཅི་ཞིག་ཆེ། ཆོ་ག་འདི་ནི་གླང་པོའི་འདོན། །ཞེས་གླང་པོ་ཆེ་མྱོས་པ་གནོན་པའོ། །དཔུང་དག་རབ་ཏུ་འཆི་བར་འགྱུར། །ཞེས་པ་ཕ་རོལ་པོའི་དཔུང་རྣམས་ཞེས་པའོ། །གལ་ཏེ་དེ་ནི་མ་གྲུབ་ན། །ཞེས་པ་སྟེ་གོང་དུ་བཤད་པ་སྔགས་མ་སྤེལ་བས་ལས་འགྲུབ་པར་མ་གྱུར་ན་ཞེས་པའི་དོན། འདི་ནི་སྔོན་དུ་བསྙེན་པ་ནི། །ཞེས་པ་ལ་སོགས་པ་ནི་གོང་དུ་བཤད་པ་དེ་ལྟར་སྔགས་མ་སྤེལ་བའི་ཚུལ་གྱིས་ལས་རྣམས་བསྒྲུབས་ཏེ། མ་གྲུབ་པར་གྱུར་ན་སྔགས་པས་ལེགས་པར་ལས་རྣམས་བསྒྲུབ་པར་བྱ་བ་དེ་འཆད་དེ། དེ་ལ་སྔགས་པ་འདིའི་སྔོན་དུ་བསྙེན་པ་བྱ་བ་ཡང་སྔར་བཤད་པ་བཞིན་དུ་དཀྱིལ་འཁོར་བྲིས་ལ་སྔགས་སྤེལ་བ་འདི་ཉིད་སྔོན་དུ་བསྙེན་པ་འབུམ་བྱའོ། །དེ་ནས་བསྙེན་པ་བྱས་ནས་སྔགས་པ་དེས་བསྒྲུབ་པ་ལ་འཇུག་
གོ །བསྒྲུབ་བའི་དཀྱིལ་འཁོར་འདི་ཉིད་དོ། །དེ་ལྟར་བྱ་བ་ནས་བསྒྲུབ་པ་ཞེས་བྱ་བ་བཤད་དོ། །སྤོགས་ན་མགོ་ནས་བསྙེན་པ་བརྩམ། །དེ་ཚེ་དེ་བཞིན་གཤེགས་པ་ཡི། །སྔ་མའི་དམ་ཚིག་བསྐུལ་བ་བཞིན། །གོང་མ་བཤད་པ་ལྟར་ལས་མ་གྲུབ་ན་དེའི་ཚེ་དེ་བཞིན་གཤེགས་པའི་སྔགས་ཀྱི་བར་དུ་གཞུག་ཅིང་བསྐུལ་པ་སྔ་མ་འདྲ་བའི་ཚུལ་གྱིས་བྱ་ན་ཞེས་བྱ་བའི་དོན་ཏོ། །དེ་ནས་སླར་ཡང་སྔགས་རྣམས་ལ། །ཐོགས་པ་མེད་པར་དེ་བཞིན་སྦྱར། །ཞེས་པ་གོང་མ་ལྟར་བྱས་ཏེ། མ་གྲུབ་ན་སྔགས་རྣམས་ཀྱི་བར་དུ་གཞུག་པ་དང་བསྐུལ་བའི་ཚིག་གཞུག་པ་ལ་ཐོགས་པ་མེད་པ་དེ་བཞིན་དུ་སྦྱར་བར་བྱའོ། །ཕྱག་འཚལ་བ་དང་ཀུན་དུ་ལྡན། །ཞེས་པ་ཕྱག་བཙལ་བའི་སྔགས་ལ་བྱ་སྟེ། དེ་ཡང་ན་མོ་བུདྡྷ། དྷརྨ། སཾ་གྷ་ལ་བྱའོ། །དེ་ཡི་ཐོག་མར་ཨོཾ་བཞག་ལ། །ཞེས་པ་ཕྱག་བཙལ་བའི་མགོ་ལ་ཨོཾ་བཞག་གོ །ཨོཾ་ཞེས་བྱ་བ་གཞན་ཡང་གཞག །ཅེས་པ་ཕྱག་འཚལ་བའི་གཞུག་ལ་ཨོཾ་ཞེས་བྱ་བ་གོང་མ་ལས་གཞན་པའི་ཨོཾ་གཞག་པ་ལ་བྱའོ། །ཨཱཿ་ཞེས་བྱ་བ་གཉིས་པའི་ཞེས་པ་དེ་ལྟར། ཨཱཿ་བཞག་པ་མ་གཏོགས་པར་དེའི་འོག་ཏུ་ཨཱཿ་ཞེས་བྱ་བ་བཞག་གོ ། དེ་ཡི་དམ་ཚིག་མཇུག་ཏུ་ཧཱུཾ། །ཅེས་པ་དེ་ལྟར་ཨཱཿ་བཞག་པའི་འོག་ཏུ་ཧཱུཾ་བཞག་གོ །འདི་ནི་ཁྲོ་བོའི་རྒྱལ་པོའི་རྣམ་པར་རྒྱལ་བའི་ཡི་གེ་འབྲུ་གསུམ་པོ་དེ་སྟེ་འདི་ནི་དྲག་པོའི་ཚུལ་གྱི་ཡི་གེ་འབྲུ་གསུམ་པའོ། །བཞག་སྟེ་དེ་ནས་ཚིག་རྣམས་ཀུན། །དེ་ལྟར་ཀྲོ་དྷ་བི་ཛ་ཡ་ཨགྣི། ཚིག་རྣམས་གཞན་ནི་བརྗོད་པར་བྱ། །ཞེས་བ་དེ་ལྟར་བཞག་པའི་འོག་ཏུ་སརྦ་ཏ་ཐཱ་ག་ཏ་ཞེས་པ་ལ་སོགས་པ་མཇུག་གི །སྔགས་ཤི་ར་ཞེས་བྱ་བ་ལ་ཐུག་གི་བར་གྱི་སྔགས་རྣམས་ཚང་བར་བཞག་གོ །དེ་ནས་དེ་ཡི་ཐ་མར་ཧཱུཾ། །ཞེས་པ་དེ་ལྟར་བཞག་པའི་འོག་ཏུ་ཧཱུཾ་གཞག་གོ།། དེ་བཞིན་ཚིག་གི་ཐ་མ་ཨོཾ། །ཞེས་པ་དེ་ལྟར་ཧཱུཾ་བཞག་པའི་ཨོཾ་བཞག་གོ །ཐ་མ་ར་ཨཱཿ་བཞག་དེ་ཡི་མཐར། །ཞེས་པ་དེ་ལྟར་ཨོཾ་བཞག་པའི་འོག་ཏུ་ཨཱཿ་བཞག་གོ །དེ་ནི་ཞི་བའི་ཚུལ་གྱི་ཡི་གེ་འབྲུ་གསུམ་བའོ། །ཧཱུཾ་དང་ས་ཏི་ལན་གཉིས་བསྒོམ། །ཞེས་པ་
དེ་ལྟར་ཨཱཿ་བཞག་པའི་འོག་ཏུ་ཧཱུཾ་བཞག་གོ །དེ་ལྟར་ཧཱུཾ་བཞག་པའི་འོག་ཏུ་སི་ཏ་ས་ཏི་ཞེས་བྱ་བ་བཞག་ལ་བརྗོད་ཅེས་བྱ་བའི་དོན་ཏོ། །པྲ་པུད་ཏ་ཞེས་བྱ་བ་ལན་གཉིས་བསྒོམ་ཞེས་པ་འདི་ལྟར་སི་ཏི་ཞེས་བྱ་བའི་འོག་ཏུ་པྲ་བུད་ཏ་ཞེས་བྱ་བའོ། །དེ་ནས་དེ་བཞིན་གཤེགས་པ་ཡི། །ཞེས་བྱ་བ་ལ་སོགས་པ་ནི་དེ་བཞིན་གཤེགས་པས་བསྐུལ་མཛད་ཅིང་བཀའ་སྩོལ་བ་ནི་ཡི་གེ་ཨཱཿ་སྟེ། དེ་ཡང་ཁྲོ་བོའི་རྒྱལ་པོ་ཡི་གེ་འབྲུ་གསུམ་པོ་དྲག་ཤུལ་དུ་བསྲུངས་པའི་འོག་ཏུ་བཞག་ལ་བཟླས་ན། དེ་བཞིན་གཤེགས་པས་ཁྲོ་བོ་ལ་བསྐུལ་བར་མཛད་པ་ཡིན་ནོ་ཞེས་བཤད་དོ། །ཁ་ཅིག་ན་རེ་དེ་ལྟར་གོང་དུ་སྔགས་སྤེལ་བ་ཉིད་དེ་བཞིན་གཤེགས་པའི་བཀའ་སྩལ་པས་ནི་གོང་མའི་འཇུག་སྡུད་པའི་ཚིག་ཏུ་ཟད་དོ་ཞེས་ཀྱང་ཁ་ཅིག་འཆད་དོ། །དེ་ནས་བཟླས་བརྗོད་འབུམ་བྱས་ནས། །ཞེས་པ་དེ་ལྟར་སྤེལ་བ་གོང་དུ་བསྙེན་པ་འབུམ་བྱས་ནས་ཞེས་བྱ་བ་སྟེ། ཚིག་གཉིས་སླར་བཟླས་ཏེ་གསུངས་པར་ཟད་དོ། །ཁྲོ་བོ་ཆེན་པོ་དེ་ཡིས་ནི། །ཞེས་པ་དེའི་འོག་ཏུ་སྔགས་པ་ཁྲོ་བོའི་རྒྱལ་པོ་ཆེན་པོའི་རྣལ་འབྱོར་དང་ལྡན་པ་ཇི་སྐད་གསུངས་པའི་ལས་མ་གྲུབ་པ་དེ་དག་ལ་བྱའོ། །ཇི་སྐད་བསྐུལ་བ་ཐམས་ཅད་ཀྱིས། མ་གྲུབ་ན་ནི་ངེས་པར་བྱ། །ཞེས་པའི་བར་གྱིས་འདི་མན་ཆད་ནས་ལས་མང་པོ་བྱ་བ་བསྟན་པའོ། །ཇི་སྐད་བསྐུལ་བ་ཐམས་ཅད་ཀྱིས། །ཞེས་པ་ལ་སོགས་པ་ནི་བསྐུལ་པའི་ཚིག་ཇི་སྐད་བཅུག་སྟེ་དེ་ལས་བྱ་ཞེ་ན། སྔགས་འདི་ཉིད་ཀྱི་མཇུག་ལས་སརྦ་བུདྡྷ་ཞེས་འབྱུང་བའི་འོག་ཏུ་ཆེ་གོ་མོ་ཞིག་བ་ཤ་མ་སྭཱ་ཧཱ། ཆེ་གོ་མོ་ཞིག་ཤཱིནྟཾ་ཀུ་རུ་བཽ་ཥཊ་ཅེས་བྱ་བ་ལ་སོགས་པ་ཇི་སྐད་བསྐུལ་བ་རྣམས་ཀྱིས་ལས་ཐམས་ཅད་འགྲུབ་པར་བྱའོ། །བཀའ་བཞིན་བྱེད་དེ་གཞན་དུ་མིན། །དེ་ལྟར་བྱས་ན་དེ་བཞིན་དུ། །འགྱུར་གྱི་གཞན་དུ་མི་འགྱུར་རོ། །གང་གིས་སྔོན་དུ་བསྙེན་བྱས་པ། །ཞེས་བྱ་བ་ལ་སོགས་པ་ནི་སྔགས་གང་གིས་སྤེལ་བའི་སྔགས་པ་འདི་བསྙེན་པ་འབུམ་བྱས་ལ། དེ་ནས་སྔགས་པ་དེས་སྔགས་སྤེལ་བ་དེ་ཉིད་ཀྱི་མཇུག་ལ་ལས་སོ་སོའི་བསྐུལ་ཚིག་དང་ལྡན་པའི་ཆོ་ག་དང་ལྡན་
པས་འདིས་སྔར་མ་གྲུབ་པའི་ལས་རྣམས་ཐེ་ཚོམ་མེད་པར་བྱའོ་ཞེས་པའི་དོན་ཏོ། །ད་ནི་མཚན་ཉིད་ཡོངས་སུ་རྫོགས་པར་བྱས་ནས་ཉེས་པའི་དམིགས་སུ་འགྱུར་བ་ཞེས་བྱ་བ་བཤད་དོ། །གཞན་དུ་སྔགས་ནི་གཟིར་བྱས་ན། །ཞེས་པ་ལ་སོགས་པ་ནི་གོང་དུ་བསྙེན་པ་མ་བྱས་པར་ཐོག་མར་སྔགས་སྤེལ་བ་འདིས་ལས་བྱས་སམ། ཡང་ན་སྔགས་སྤེལ་བ་ཐ་མལ་བས་སྔར་ཡོད་ལས་མ་བསྒྲུབས་པར་ཐལ་བྱུང་དུ་སྔགས་སྤེལ་བ་འདིས་བྱས་ན་སྔགས་པ་ཉིད་འཆི་བར་འགྱུར་རོ། །ཁྱད་པར་དུའང་དཔའ་བོ་ནི། །ཁྲོ་བོ་གཙོ་བོ་སྙིང་པོ་འདི། །ཞེས་པ་སྔགས་པ་དེ་ལྟ་བུར་སྔགས་སྤེལ་འདི་བཟླས་ཏེ། ལས་བྱས་པར་གྱུར་ན་ཁྱད་པར་དུ་ཉེས་པ་དེ་ལྟ་བུ་འབྱུང་ངོ༌། །ཕྱག་རྒྱ་འདི་དག་གཟིར་བྱས་ན། འགྲོ་བ་མ་ལུས་འཁྲུག་པར་འགྱུར། །ཞེས་པ་གཟིར་ཞེས་བྱ་བ་ནི་ཁྲོ་བོའི་རྒྱལ་པོའི་སྔགས་ཀྱི་བར་དུ་བེ་ཅོན་གྱི་སྔགས་བཅུག་སྟེ་བཟླས་པ་བྱའོ། །འདི་ནི་གང་ལ་བཟླས་པ་ཡི། །དེ་ཡི་མོད་ལ་སྲོག་ཀྱང་འཕྲོག །ཅེས་པའི་བར་གྱིས་ནི། ད་ནི་ཕྱག་རྒྱའི་མཐུས་ཡོན་ཏན་ཞེས་པ་བཤད་དོ། །འདི་ནི་གང་ལ་བཟླས་པ་ཡིས། །ཞེས་པ་ལ་སོགས་པ་ནི་སྔགས་སྤེལ་བ་འདི་ཉིད་ཡུལ་གང་དུ་བཟླས་ཏེ་ལས་བྱས་ན། ཐེ་ཚོམ་མེད་བར་འཇིག་རྟེན་དང་འཇིག་རྟེན་ལས་འདས་པ་དེ་དག་ཀུན་གྱི་ལུས་ཀྱང་ཞིག་ཅིང་འཆིང་བར་འགྱུར་རོ་ཞེས་པའི་ཐ་ཚིག་གོ །ཕྱག་རྒྱ་འདིས་ནི་གཟིར་ན་ནི། །ཞེས་པ་ལ་སོགས་པ་ནི་གཞན་ཡང་སྔགས་སྤེལ་བ་འདི་བཟླས་ན་ནི། །ཁོ་ར་ཁོར་ཡུག་ཚུན་ཆད་ཀྱི་སྔགས་གཞན་གྱི་ཡོད་པ་དེ་དག་ཀྱང་མཐུ་སྟོབས་ཆུང་ཞིང་མེད་པར་བྱེད་དོ། །དེར་ཡང་མ་ཟད་དེ་དགྲ་རྣམས་དྲེགས་པ་ཡང་མེད་པར་བྱེད་དོ། །འབྱུང་པོ་ཞེས་པ་སྟེ་འདྲེ་དང་གཞན་ཡང་ཡི་དགས་སྐྲག་པར་བྱེད་དོ། །དགའ་བར་བྱེད་ཅེས་པ་ཁྲོ་བོའི་རྒྱལ་པོ་ཆེན་པོ་ཡང་མཉེས་པར་འགྱུར་རོ། །མཐུ་ཡང་སྐྱེད་ཅེས་པ་མཐུ་བྱིན་ཡང་སྐྱེད་པར་བྱེད་དོ། །ཡི་དགས་རོ་ལངས་ཡི་དགས་ནི། །ཞེས་པ་རོ་ལངས་ཀྱི་གཏོར་མ་དང༌། ཡི་དགས་ཀྱི་གྲོགས་ཀུན་ལ་ཡང་ཞེས་པའོ། །དེ་བཞིན་ཞེས་པ་གོང་མ་བཞིན་དུའོ། །བྱད་དང་གནོད་པ་བསྐྲད་པ་ཡང༌། །ཞེས་པ་བྱད་སྟེ་མས་ལ་
བྱས་པར་ཟད་དོ། །རྒྱལ་པོ་དག་ནི་སྐྲག་པ་ཞེས་པའོ། །འཇིག་པར་བྱེད་ཅེས་པ་བསྐུལ་བའི་ཚིག་དང་ལྡན་པར་བཟླས་པས་ན་དེ་དག་ཀུན་འཇིག་པར་བྱེད་དོ། །བགེགས་རྣམས་ཐམས་ཅད་ཞི་བར་བྱེད། །འཚེ་བ་ཐམས་ཅད་མེད་པར་བྱེད། །ཅེས་པ་ལ་སོགས་པ་ནི་ནང་དུ་སྡུག་བསྔལ་ཐམས་ཅད་ཀྱིས་ཕོངས་པ་མེད་པར་བྱེད་པ་ལ་ཡང་བེ་ཅོན་གྱི་ཕྱག་རྒྱ་སྔགས་དང་བཅས་པ་དེ་དག་ལ་དྲག་པོར་བསྒྲགས་སོ། །སྐྱེ་བོ་དག་ལ་ཞེས་པ། བེ་ཅོན་གྱི་ཕྱག་རྒྱའི་སྔགས་དང་ལྡན་པས་བསྟན་ལ་ཞེས་བྱའོ། །གཤིན་རྗེ་གཤེད་པོ་སྦྱོར་ན་ནི། །ཞེས་པ་ཁྲོ་བོའི་རྒྱལ་པོའི་སྦྱོར་བ་དང་ལྡན་པ་བྱས་ན་ཞེས་པའོ། །འཕྲོག་ཅེས་པ་བསྟན་པ་དེའི་ཚེའོ། །མདོར་ན་སྙིང་པོ་ཕྱག་རྒྱ་ཡི། །ཞེས་པ་ནས། སྙིང་པོ་དག་གིས་སྦྱར་བར་བྱ། །ཞེས་པའི་བར་གྱིས་ད་ནི་མཇུག་བསྡུ་བ་བཤད་དོ། །མདོར་ན་སྙིང་པོ་ཕྱག་རྒྱ་ཡི། །ཞེས་པ་གོང་མའི་དོན་བསྡུ་བའོ། །རྟོག་པ་རང་གི་དམ་ཚིག་ལྡན། །ཁྲོ་བོའི་ཞལ་ནས་གསུངས་པ་འདི། །ཞེས་པ་འདི་གསལ་བོ་འདི་བེ་ཅོན་དང་ཁྲོ་བོའི་སྔགས་དང་ལྡན་པར་ཞལ་ནས་གསུངས་པ་འདི་ཞེས་པའོ། །གསང་པ་ཞེས་པ་སྣོད་མ་ཡིན་པ་དང་དམ་ཚིག་མེད་པ་ལ་ཞེས་པའི་དོན་ཏོ། གཅིག་པུའི་ཞེས་པ་འཁོར་མེད་པའོ་ཞེས་པའོ། །བེ་ཅོན་དང་ཞེས་པས། ཕྱག་རྒྱ་དང་ཞེས་པའོ། །སྙིང་པོ་དག་ཅེས་པ་སྙིང་པོ་འབྲུ་གསུམ་པོ་ཞེས་པའོ། །ལྔ་པའི་བཤད་པ་ཟིན་ཏོ།། །།ད་ནི་རོ་ལངས་མར་གཏོགས་པའི་ལེའུ་འདི་ལ་སྙིང་སྟོབས་ཅན་གྱིས་བསྒྲུབ་པ་དང༌། སྙིང་སྟོབས་ཅན་འབྲིང་གིས་བསྒྲུབ་པ་འབྲིང་དང༌། སྙིང་སྟོབས་ཅན་མ་ཡིན་པ་ཐམས་ཅད་བསྒྲུབ་པ་དང༌། ལས་བསྒྲུབ་པ་དང་རྣམ་བཞིའོ། །དེ་ལ་སྙིང་སྟོབས་ཅན་གྱིས་བསྒྲུབ་པ་ལ་བཅུ་སྟེ། སྐབས་དབྱེ་བ་སྔར་བྱས་ཏེ་ཕྱག་རྒྱའི་མཚན་ཉིད་བཤད་པ་དང༌། ཕྱག་རྒྱ་སྦྱར་བའི་ངེས་པ་དང༌། དཀྱིལ་འཁོར་གྱི་ཆོ་ག་དང༌། མཆོད་པའི་ཆོ་ག་དང༌། མེའི་ཆོ་ག་སྔར་བྱས་ནས་སྦྱིན་སྲེག་བྱ་བ་དང༌། དངོས་གྲུབ་བཤད་པ་དང༌། སྙིང་སྟོབས་ཅན་མ་ཡིན་པས་བསྒྲུབས་ན་ཉེས་དམིགས་སྨོས་པ་དང༌། སྙིང་སྟོབས་ཅན་གྱིས་བསྒྲུབས་པའི་ཕན་ཡོན་སྔགས་པ་དང༌།
སྔགས་པ་དད་པ་དང༌། སྙིང་སྟོབས་ཅན་གྱིས་སྒྲུབ་པའི་ཕན་ཡོན་མཇུག་བསྡུ་བའོ། །སྙིང་སྟོབས་ཅན་མ་ཡིན་པའི་སྒྲུབ་པ་འབྲིང་ལ་ཡང་དབང་དང་རིམ་པ་ནོད་པ་དང༌། སྔོན་དུ་བསྙེན་པ་བྱ་བ་དང༌། དངོས་གྲུབ་བསྒྲུབ་པ་དང༌། ལས་ལ་སྦྱར་བ་དང་བཞིའོ། །སྙིང་སྟོབས་ཅན་མ་ཡིན་པ་ཐམས་བསྒྲུབ་པ་ལ་ཡང་དཀྱིལ་འཁོར་བྲི་བ་དང༌། སྙིང་པོའི་ཕྱག་རྒྱ་སྦྱར་བ་དང༌། སྔོན་དུ་བསྙེན་པའི་ཆོ་ག་དང༌། ལས་ལ་སྦྱར་བ་རྣམ་པ་བཞིའོ། །ལས་སྒྲུབ་པ་ལ་ཡང་རྣམ་པ་བཅུ་བཞིས་བཤད་དོ། །དེ་ལ་སོ་སོའི་དམིགས་ཀྱིས་བཤད་པར་བྱའོ། །དེ་ནས་ཡི་གེ་བཅུ་བདུན་པོ་ཞེས་པ་ནས། གང་ལ་རྟག་ཏུ་རག་ལུས་པའི། །ཞེས་པའི་སྐབས་དབྱེ་བ་སྔར་བྱས་ཏེ་བྱ་བ་བསྟན་པའོ། །དེ་ནས་ཡི་གེ་བཅུ་བདུན་པ་ཞེས་པ་ལ་སོགས་པ་ནི་རྟོག་པ་འདིའི་རྩ་བ་སྔགས་ཡི་གེ་བཅུ་བདུན་ཡིན་ཏེ། དེའི་ཕྱག་རྒྱར་གཏོགས་པས་བེ་ཅོན་ཡང་སྔར་བཤད་ཟིན་ནས། དེ་ལས་གཞན་པའི་དེའི་ཕྱག་རྒྱར་གཏོགས་པ་རོ་ལངས་ཞེས་བྱ་བ་ཡང་གཞན་དུ་བྱས་ལ་མོད་ལ་ནི་ཞེས་པ་སླར་ཐར་པར་བྱ་བའི་ཆོ་ག་དེ་ལྟར་མ་བྱས་ན་འཆི་བར་འགྱུར་ཞེས་པའོ། །གནོད་པ་བྱེད་པ་ཐམས་ཅད་ལ། །ཞེས་པ་དཀོན་མཆོག་གསུམ་ལ་གནོད་པ་བྱེད་པའོ། །འདི་བཤད་དོ་ཞེས་པ་དེ་ལྟ་བུའི་ཕྱིར་ཆོ་ག་འདི་དག་སྦྱར་བར་བྱ་བ་བཤད་དོ་ཞེས་པའོ། །གལ་ཏེ་བྱས་ན་བདག་ཉིད་འཆི། །ཞེས་པ་སྔགས་བརྒྱ་ལའམ་གལ་ཏེ་དེ་ལྟ་བུ་ལ་བྱས་པར་གྱུར་ན། སྔགས་པ་བདག་ཉིད་དམ་ཚིག་ལས་འགལ་བར་འཆི་བར་འགྱུར་རོ་ཞེས་པའོ། །འདི་མན་ཆོད་ནི་དཀའ་བར་བྱ་བའི་ཆོ་ག་བཤད་དོ། །བསྐྲད་པར་བྱ་བའི་ཆོ་ག་ཡང༌། །ཁྲོ་བོ་ཉིད་ཀྱིས་ཇི་སྐད་དུ། །གསུངས་པ་དག་ནི་བཤད་པར་བྱ། །ཞེས་པ་དགར་བར་བྱ་བའི་ཆོ་ག་ཁྲོ་བོས་ཇི་སྐད་གསུངས་པ་དེ་འདིར་བཤད་པར་བྱའོ་ཞེས་པའོ། །སེང་ལྡིང་ལས་བྱས་ཕུར་བུ་ནི། །ཞེས་པ་ཕུར་བུའི་ལས་བྱ་བ་ལ། ཞི་བ་དང་རྒྱས་པ་དང༌། དྲག་པོ་དག་སྲིད་དུ་སོར་བརྒྱད་པར་བྱས་ཏེ། ཞི་བའི་ལས་བྱེད་པའི་ཚེ་ཕུར་བུ་བྱ་བ་ཡང་ཟླུམ་པོ་ལ་མགོ་ཡང་ཟླུམ་པོར་བྱའོ། །རྒྱས་པའི་ལས་བྱེད་པའི་ཚེ་ཕུར་
བུ་ཡང་གྲུ་བཞི་ལ་མགོ་ཡང་གྲུ་བཞི་བྱའོ། །དྲག་པོའི་ལས་བྱེད་པའི་ཚེ་ཕུར་བུ་ཡང་ཟུར་གསུམ་ལ་མགོ་ཡང་ཟུར་གསུམ་རྒྱ་མདུད་ཅན་དུ་བྱའོ། །ཕུར་བུ་དེ་དག་གི་མགོའི་སྟེང་དུ་འཁོར་ལོ་དང་པདྨ་རྡོ་རྗེ་དག་བྲི་བར་བྱའོ་ཞེས་བྱ་བ་ནི་ལས་ཀྱི་རིམ་པ་བཞིན་ནོ། །སོར་བརྒྱད་ཙམ་དུ་བྱས་པ་ལ། །ཞེས་པ་སྲིད་སོར་བརྒྱད་བྱ་བ། ཟུར་གསུམ་པ་ལ་མགོ་ཡང་ཟུར་གསུམ་རྒྱ་མདུད་ཅན་བྱས་པའི་མགོའི་སྟེང་དུ་རྡོ་རྗེ་བྲིས་པ་དེ་ལྟ་བུའི་ཕུར་བུ་ལ་བྱའོ་ཞེས་པའི་དོན་ཏོ། །དུར་ཁྲོད་ཐལ་བ་ཞེས་པ་མི་རོ་བསྲེགས་པའི་ཐལ་བས་ཕུར་བུ་ལ་གདབ་པར་བྱའོ་ཞེས་པའོ། །པགས་པ་དག་གིས་དཀྲི་བར་བྱ། །ཞེས་པ་དེ་ལྟ་བུའི་པགས་པའི་རས་སམ། དངོས་པོས་ཕུར་བུ་དེ་ཉིད་དཀྲི་བར་བྱ་ཞེས་པའོ། །སྒྲུབ་པ་པོ་དག་མཚན་ཕུར་བུ་དེ་སྐུད་པ་དམར་པོས་བཅིངས་ནས་ནི་ཞེས་པ་ནི། དགར་བསྒྲུབ་པའི་སྔགས་པས་དེའི་མཚན་མོ་རས་དཀར་པོས་ཕུར་བུ་དེའི་མགྲིན་པར་བཅིང་བར་བའོ་ཞེས་པའོ། །དེ་ནས་རོ་ལངས་ཕྱག་རྒྱ་ནི། །ཞེས་པ་ལ་སོགས་པ་ནི་དེ་ནས་རོ་ལངས་ཕྱག་རྒྱ་བཅིངས་ལ་རོ་ལངས་སྔགས་ཀྱང་བཟླས་ལ། བསྐུལ་པའི་ཚིག་ཆེ་གེ་མོ་ཞིག་ཨུ་ཙ་ཏ་ཡ་ཞེས་བྱ་བ་དང༌། ལྡན་པར་མཚན་མོ་སྟོང་རྩ་བརྒྱད་དུ་བཟླས་སོ། །དེ་ལྟར་ཟློས་པར་བྱེད་པའི་ཚེ་ཡི་དགས་ཕལ་པོ་ཆེའི་དཀྱིལ་འཁོར་དུ་བྲིས་ནས་བཟླས་པ་བྱའོ། །དེ་ནས་སྔགས་པ་གང་དགར་བའི་ལས་བྱེད་པར་འདོད་ནས་གང་དུ་དགར་བར་བྱ་བའི་སྒོ་གར་མ་ཚོར་བར་ཕུར་བུས་གདབ་བར་བྱའོ། །ལྷ་འདྲེ་དང༌། གདོན་དང༌། ཡི་དགས་ལ་སོགས་པ་དགར་ན་ཡང་ལྷ་འདྲེ་ལ་སོགས་པ་གང་དགར་བར་བྱ་བའི་གནས་དེ་ཉིད་དུ་ཕུར་བུ་བཏབ་པས་དགར་བར་འགྱུར་རོ་ཞེས་བྱ་བའི་ཐ་ཚིག་གོ །འདི་ནི་སྐྲོད་པའི་མཆོག་འགྱུར་རོ། །ཞེས་པ་འདི་ནི་དགར་བར་བྱ་བའི་ཆོ་གའི་ནང་ན་མཆོག་ཏུ་གསུངས་པ་ཞེས་པའོ། །འོ་ན་དང་བརྒྱ་བྱིན་སྟོབས་ལྡན་པའི། །ཞེས་པའི་ཆོ་ག་དེ་ལྟར་བྱས་ན། བརྒྱ་བྱིན་འདྲ་བའི་མཐུ་དང་ལྡན་པའི་འདྲ་བ་ཡང་དགར་བའི་སྒྲུབ་པ་དེ་ལྟར་བྱས་ན་གནས་དེ་ནས་བསྐྲད་པར་འགྱུར་རོ་ཞེས་པའོ། །འདི་མན་ཆད་ནི་གཅིག་ལ་གཅིག་བསད་པར་འགྱུར་བ་ཞེས་བྱ་བའི་ཆོ་ག་བཤད་དོ། །དེ་ནས་གཞན་ཡང་གཅིག་ལ་གཅིག །ཅེས་པ། དཀོན་
མཆོག་གསུམ་ལ་གནོད་བྱེད་པར། །ཞེས་པ་མི་འདི་ལྟ་བུ་ལ་ཆོ་ག་འདི་བྱའོ་ཞེས་པའོ། །རིག་ནས་ཇི་ལྟར་འདོད་པ་ནི། །ཞེས་པ་ལ་སོགས་པ་འདི་དཀོན་མཆོག་གསུམ་ལ་གནོད་པར་བྱེད་པར་རིག་ནས་གནོད་པར་བྱེད་པའོ། །མི་དག་གི་ཕྱོགས་འཁྲུག་པར་བྱ་བསྔགས་པས་ཇི་སྐད་གསུངས་པ་བཞིན་ཏེ་བྱའོ་ཞེས་པའོ། །བར་ཧི་ཏ་ཞེས་པ་ཏཱ་མ་ལའི་ལོ་མ་འདྲ་བ་བཟང་པོ་ཞེས་པའོ། །རུ་ཙི་ར་བཟང་པོ་ལ་བྱ་སྟེ་དེ་ཉིད་སྲིན་གྱིས་མ་ཟོས་པ་བཟང་པོ་ལ་བྱའོ་ཞེས་པའོ། །བ་དྲ་ད་ནི་ཞེས་པ་བཟང་པོ་ལ་བྱ། རྩ་བ་སྦྱིན་པོ་ཅིག་ཡོད་ཅེས་པའོ། །ཀེ་ཤི་ནི་ཞེས་པ་ཀེ་ཤི་ནི་ཡང་བཟང་བ་ལ་བྱའོ་ཞེས་སོ། །ཡང་དག་བྱང་ཆུབ་བཞུགས་བཞུགས་པ། །ཞེས་པ་ལ་སོགས་པ་ནི་སྨན་དེ་རྣམས་འཕགས་པ་རྣམས་ཀྱི་བྱིན་གྱིས་བརླབས་པ་ལ་བྱ་སྟེ། དེ་བས་ན་མཐུ་ཆེ་བའི་སྨན་འདི་རྣམས་ལ་གང་ཡང་རུང་བ་ཅིག་བླངས་ནས་ཞེས་པ་སྟེ། ལོ་མའམ་གང་ཡང་རུང་ངོ་ཞེས་པའོ། །ལོ་མ་རླུང་གིས་བཏབ་པར་སྦྱར། །ཞེས་པ་རླུང་ངམ་ཚུབ་བ་མས་བསྐོར་བའི་ལོ་མ་བླངས་ཏེ་ཆ་བསྙམས་ཏེ་སྦྱར་ཞེས་སོ། །བྷ་ལ་ཏ་ག་ད་ཞེས་པ་ཤིང་ཐོག་ནག་པོ་ཞེས་བྱའོ། །འདི་དག་བཏགས་ཏེ་ཕྱེ་མར་བྱས། །ཞེས་པ། འདི་དག་ཆ་སྙམས་ཏེ་བཏགས་ཏེ་ཕྱེ་མར་བྱས་ཞེས་པའོ། །མི་ཡི་ཚིལ་གྱིས་སྦྲུས་ནས་སུ། །ཞེས་པ་མིའི་ཚིལ་གྱིས་སྦྲ་སྦྲུར་བྱས་ཏེ། ཧ་ཅང་སླ་བ་ཡང་མ་ཡིན་པར་དུད་པ་འབྱུང་ཙམ་བྱ་བ་སྟེ། བདུག་པ་བསྲེག་ཏུ་རུང་ཙམ་དུ་བྱས་ཏེ། མི་ཐོད་ཀྱི་ནང་དུ་བཞག་སྟེ། ཡི་དགས་ཕལ་པོ་ཆེའི་དཀྱིལ་འཁོར་བྲིས་ནས། དེ་སྟོང་རྩ་བརྒྱད་དུ་བཟླས་སོ། །དེ་ལྟར་བཟླས་པ་དེའི་བདུག་པའི་མིང་འཁྲུག་པར་བྱེད་ཅེས་བྱ་སྟེ། གཅིག་ལ་གཅིག་འཐབ་པར་བྱ་བ་གོང་གིས་བདུག་པ་བདུགས་ཏེ། བསྒྲུབ་བར་བྱ་བ་གང་གིས་བསྣམས་པས་དྲི་མནམ་པ་ཚོར་བ་དེ་དག་ན་ཕན་ཆུན་འཁྲུག་པར་འགྱུར་རོ་ཞེས་པའི་ཐ་ཚིག་གོ །གྲོང་ཁྱེར་ཞེས་པ་ནི་ཡུལ་གྲུ་དང་ཞེས་པའོ། །དཔུང་པ་ཞེས་པ་ཕ་རོལ་པོའི་དཔུང་ངོ་ཞེས་པའོ། །ཕན་ཚུན་གནོད་པར་བྱེད་པ་ཡི། །ཞེས་པ་དེ་ལྟ་བུ་དག་བྱ་བའི་ཕྱིར་བདུག་པ་འདི་དག་སྦྱར་བར་བྱའོ་ཞེས་པའི་ཐ་ཚིག་གོ །འདི་མན་ཆད་མིག་འཕྲུལ་གྱི་ཆོ་ག་བཤད་དེ། དེ་ནས་གཞན་
ཡང་མིག་འཕྲུལ་གྱིས། །ཞེས་པ་ལ་སོགས་པའོ། །དེ་ནས་གཞན་ཡང་མིག་འཕྲུལ་གྱིས། །ཞེས་པ་ཕ་རོལ་པོའི་དཔུང་སླུ་བར་བྱེད་པས་ན་མིག་འཕྲུལ་ལོ། །དུར་ཁྲོད་དག་གི་ཐལ་བ་ཡིས། །མིག་འཕྲུལ་དངོས་གྲུབ་འགྲུབ་པར་འགྱུར། །ཞེས་པ་དུར་ཁྲོད་ཐལ་བའི་རྫས་ཀྱིས་མིག་འཕྲུལ་གྱི་དངོས་གྲུབ་དག་འགྲུབ་པར་འགྱུར་རོ་ཞེས་པའོ། །མི་ཐོད་བཟང་པོ་ཐལ་བ་དང༌། །ཞེས་པ་ལ་སོགས་པ་མིག་འཕྲུལ་བྱ་བའི་ཆོ་ག་དེ་ཡང༌། མི་ཐོད་ལེགས་པ་མ་གས་པ་བཟང་པོའི་ནང་དུ་དུར་ཁྲོད་ཀྱི་ཐལ་བས་བླུགས་ཏེ་སྐྱོ་མ་སྐ་བ་ཙམ་དུ་སྦྱར་རོ། །རི་བོང་གི་ཁྲག་བྱུགས་ཏེ་སྦྱར་ནས་དེ་ནས་ཡི་དགས་ཕལ་པོ་ཆེའི་དཀྱིལ་འཁོར་ཇི་སྐད་གསུངས་པ་བཞིན་དུ་བྲིས་ནས། དཀྱིལ་འཁོར་དེའི་དབུས་སུ་ཐོད་པ་གཞག་པར་བྱའོ་ཞེས་པའི་ཐ་ཚིག་གོ །དེ་ཡི་ནང་དུ་རོ་ལངས་མ། །མཆོད་པ་ཆེན་པོ་བྱས་ནས་ནི། །ཞེས་པ་དཀྱིལ་འཁོར་དེའི་ནང་དུ་རོ་ལངས་མ་སྤྱན་དྲངས་ཏེ་དེ་ལ་མེ་ཏོག་དང༌། བདུག་པ་ལ་སོགས་པའི་མཆོད་པས་མཆོད་པར་བྱའོ། །དེ་ཡང་ལྷོ་ཕྱོགས་སྒོ་དག་ཏུ། །ཞེས་པ་ལ་སོགས་པ་ནི་ལྷོ་ཕྱོགས་ཀྱི་སྒོར་རྒྱས་པའི་ཐབ་ཁུང་བརྐོས་ཏེ། མེ་བུས་ནས་བསྒྲུབ་པའི་རྫས་ཐོད་པའི་ནང་ན་བསྒྲུབ་པ་ལས་མར་བཞུས་པ་ལས་གཟར་བུ་ཆུང་དུས་བཅུས་པ་བླུགས་ཏེ། དེ་ལྟ་བུ་ལན་བརྒྱ་རྩ་བརྒྱད་དམ་སྟོང་རྩ་བརྒྱད་གྱི་བར་དུ་བསྲེག་པར་བྱའོ། །དེ་ལྟར་བྱ་བ་ནི་རྫས་གཟེངས་བསྟོད་ཅིང༌། གཟི་བྱིན་དང་ལྡན་པར་འགྱུར་བ་ལ་བྱའོ། །ཁ་ཅིག་ན་རེ་མར་གྱི་སྦྱིན་སྲེག་ཀུན་སྦྱིན་ཙམ་དུ་ཕུལ་ཏེ། དེའི་འོག་ཏུ་ཐོད་པའི་ནང་ནས་ཐལ་བ་དང༌། ཁྲག་སྦྱར་བའི་རྫས་དེ་ཟད་ཟད་པར་སྦྱིན་སྲེག་བྱས་པའི་ཐལ་བ་དེ་ཡང་ཐོད་པའི་ནང་དུ་བཞག་སྟེ། སྟོང་རྩ་བརྒྱད་དུ་བཟླས་བརྗོད་བྱའོ་ཞེས་པའི་ཐ་ཚིག་གོ །དེ་ནས་ཐལ་བ་ཞེས་པ་ཐོད་པའི་ནང་དུ་བཞག་པའི་ཁྲག་དང༌། སྦྱར་བའི་ཐལ་བ་སྦྱིན་སྲེག་ཏུ་བྱས་པའི་ཐལ་བ་སྟོང་རྩ་བརྒྱད་ཅེས་པ་བཟླས་པའི་མཐུས་མཁས་པ་སྔགས་པ་ཞེས་པའོ། །ཐལ་བ་དེས་ནི་བྱེད་པར་འགྱུར། །ཞེས་པ་འཆད་པ་མ་མཐུན་པ་རྣམ་པ་གཉིས་ཀྱིས་ཐལ་བ་ཞེས་པའོ། །འདི་མན་ཆད་ཇི་ལྟར་བྱ་བའི་ཐབས་
བཤད་པའོ། །མེ་ཏོག་དཀར་ལ་ཐལ་ཞེས་པ་ལ་སོགས་པ་ལ། མེ་ཏོག་དཀར་ལ་ཐལ་ཞེས་པ་མེ་ཏོག་དཀར་པོ་གང་ཡང་རུང་ཞེས་པའོ། །ནམ་མཁར་གཏོར་ཞེས་པ་ཐལ་བ་སྐམ་པོས་བསྐུས་ཏེ་ཞེས་སོ། །མེ་ཏོག་སེར་པོ་ལ་བསྐུས་ཏེ་ཞེས་པ་གང་ཡང་རུང་ཞེས་པའོ། །འདོད་ཆགས་ཞེས་པ་འཕགས་པ་ཉན་ཐོས་ཞེས་སོ། །ཉིད་ཀྱི་གནས་བཅས་སངས་རྒྱས་ཀུན། །ཞེས་པ་ཉིད་ཀྱི་གཞལ་མེད་ཁང་དང་བཅས་པར་སངས་རྒྱས་འཁོར་དང་བཅས་པ་ཀུན་སྟོན་པར་བྱེད་དོ་ཞེས་པའོ། །མེ་ཏོག་དམར་པོ་ཞེས་པ་ནི་གང་ཡང་རུང་སྟེ་ཞེས་པའོ། །ལྷ་རྣམས་ཀུན་ཀྱང་སྔ་མ་བཞིན། །ཞེས་པ་ལ་སོགས་པ་ཚངས་པ་དང༌། བརྒྱ་བྱིན་ལ་སོགས་པ་འཇིག་རྟེན་གྱི་ལྷ་གང་འདོད་པ་ཡིད་ལ་བསམས་ཏེ། མེ་ཏོག་གཏོར་ན་འཇིག་རྟེན་གྱི་ལྷ་དེ་དག་སྟོན་པར་བྱེད་པའོ། །ཡིད་ཀྱི་བསམ་པ་ནི་ཀུན་ལ་སྦྱར་ཞེས་པའོ། །མེ་ཏོག་སྔོན་ཞེས་པ་གང་ཡང་རུང་ངོ༌། །གནོད་སྦྱིན་ཕོ་མོ་གང་ཡང་རུང༌། །ཡི་དགས་མཁའ་འགྲོ་གྲུལ་བུམ་དང༌། །ཞེས་པ་མེ་ཏོག་སྔོན་པོ་ལ་སྔ་མ་བཞིན་དུ་ཐལ་བས་བསྐུས་ཏེ་ནམ་མཁའ་ལ་གཏོར་ན་གནོད་སྦྱིན་དང་སྲིན་པོ་དག་སྔ་མ་བཞིན་དུ་སྟོན་པར་བྱེད་པའོ་ཞེས་སོ། །ཁ་ཅིག་ན་རེ་ཡི་དགས་ལ་སོགས་པ་གཟུགས་ཀྱང་ཆོ་ག་དེས་སྦྱར་ན་སྣང་བར་འགྱུར་རོ། །མིག་འཕྲུལ་སླད་དུ་བསྡུ་བར་བྱ། །ཞེས་པ་ལ་སོགས་པ་མིག་འཕྲུལ་དེ་དག་ཀྱང་ཆུ་ལ་ལན་བདུན་བཟླས་པའི་ཆུས་གྱེན་དུ་གཏོར་བ་ལས་མི་འཕྲུལ་དེ་དག་གདོན་མི་ཟ་བར་སླར་བསྡུས་པར་འགྱུར་རོ། །ཡང་ན་ཁུ་ཚུར་གྱིས་སླར་བསྡུ་བར་བྱའོ། །ཁྭ་ཡི་འདབ་མ་བདུན་དག་ལ། །ཞེས་པ་ལ་སོགས་པ་ཁའི་འདབ་མ་བདུན་བླངས་ནས་མིའི་རུས་པ་རྐང་པའི་རྗེ་ངར་རམ་ལག་ངར་ཡུ་བའང་རུང་བར་བ་མ་བུར་བསམ་ནས་བཅིང་བར་བྱ་བ་ནི་རྨ་བྱའི་མཇུག་མ་དང་འདྲའོ་ཞེས་སོ། །དེ་དག་ཐམས་ཅད་ཅེས་བྱའོ། །ཁྭའི་འདབ་མ་བམ་བུར་སྦམས་ཏེའོ། །དེ་དག་འཕྲུལ་བསམ་ཅི་འདོད་པར། །ཞེས་པ་ལ་སོགས་པ་འོག་ནས་འབྱུང་བའི་མིག་འཕྲུལ་རྣམས་ལས་གང་འདོད་པས་ཡིད་ཀྱིས་བསམས་ཏེ། མིག་འཕྲུལ་ལ་ལྟ་བ་ཚོགས་ཀྱི་ནང་དུ་བདག་གི་ཀླད་པ་གཡས་ལོགས་སུ་བསྐོར་ན་འདི་འདྲ་
བ་གང་དང་གང་འདོད་དེ་དག་སྟོན་པར་བྱེད་དོ་ཞེས་པའོ། །གཡུལ་དག་འཁྲུག་ཅིང་འཆིང་བ་དང༌། །ཞེས་པ་ནང་འཁྲུག་པ་བྱུང་ན་གཅིག་གིས་གཅིག་གསོད་པར་བྱེད་ཅེས་པའོ། །ལྟད་མོ་ཆེན་པོ་མཆོག་རྣམས་ནི། །ཞེས་པ་གཞན་ཡང་འདི་འདྲ་བ་དག་སྟོན་པར་བྱེད་དོ། །རབ་ཏུ་སྦྱར་བས་སྟོན་པར་འགྱུར། །ཞེས་པ་དེ་ལྟ་བུ་ལ་སོགས་པའི་མིག་འཕྲུལ་ཁྭའི་འདབ་མའི་ཆོ་ག་སྔར་བཤད་པ་དེ་ལྟར་སྦྱར་བ་ཙམ་གྱིས་སྟོན་པར་བྱེད་པའོ་ཞེས་པའོ། །ཁུ་ཚུར་བཅངས་པས་དེ་བཞིན་དུ། །ཞེས་པ་མིག་འཕྲུལ་དེ་དག་སླར་བསྡུ་བ་ན་ཡང་ལག་པ་གཡས་པའི་སོར་མོ་རྣམས་ཀྱིས་བྱ་བ་པའི་ཚུལ་དུ་བྱ་ཞིང་ཁུར་ཚུར་བཅངས་པས་སླར་བསྡུ་བར་བྱའོ་ཞེས་པའོ། །དེ་ཡི་འོག་ཀྱང་སྟོན་པ་དང༌། །ཞེས་པ་འོག་གི་ལྷ་མ་ཡིན་རྣམས་ཀྱང་སྟོན་པར་བྱེད་དོ། །ཁྭའི་འདབ་མའི་ཆོ་ག་དེས་གཞན་ཡང་མིག་འཕྲུལ་འདི་འདྲ་པ་དག་སྟོན་པར་བྱེད་དོ་ཞེས་པའོ།། འདུས་པ་ཞེས་པ་འགྲོ་བ་མང་པོ་འདུས་པ་དག་ཀྱང་སྟོན་ཞེས་པའོ། །གྱེན་དུ་འགྲོ་དང་དེ་བཞིན་འཁྲུག །ཅེས་པ་དེ་དག་ཀྱང་ནམ་མཁའ་ལ་གྱེན་དུ་འགྲོ་བ་དང༌། དེ་ནང་འཁྲུག་པ་དག་ཀྱང་སྟོན་པར་འགྱུར་རོ་ཞེས་པའོ། །མཇུག་མ་དག་དང་ཐལ་བ་ཡིས། །ཞེས་པ་མིའི་རུས་པ་ལ་ཁྭའི་འདབ་མ་བམ་བུར་སྦམས་པ་ལ་ཐལ་བས་བསྐུས་པས་གཞན་ཡང་མིག་འཕྲུལ་གང་དང་གང་སྟོན་པར་འདོད་པ་དེ་དག་དེས་པར་བྱེད་པར་འགྱུར་རོ་ཞེས་པའོ། །ཁུར་ཚུར་བཅངས་པས་དེ་བཞིན་སྡུད། །ཅེས་པ་མིག་འཕྲུལ་དེ་ལྟར་བསྟན་ནས་སླར་ཡང་བསྡུ་བ་ནི་སྔར་བཤད་པ་བཞིན་བྱའོ་ཞེས་པའོ། །དེ་ལྟར་མིག་འཕྲུལ་མདོར་བསྡུ་སང༌། །ཇི་སྐད་གསུངས་པ་བཤད་པ་ཡིན། །ཞེས་པ་རྒྱུད་ཆེན་པོའི་ནང་ནས་མིག་འཕྲུལ་ཕལ་པོ་ཆེ་བཤད་པ་ལས་ཇི་སྐད་གསུངས་པ་མདོར་བྱས་ནས་འདིར་བཤད་པ་ཡིན་ནོ་ཞེས་པའི་ཐ་ཚིག་གོ །འདི་མན་ཆད་ཞི་བའི་ལས་བཤད་དོ། །དེ་ནས་ཞི་བའི་ལས་རྣམས་ཀྱང༌། །ཞེས་པ་ནས་བསྟན་ཏེ། མདོར་བསྡུས་ནས་ནི་བཤད་པར་བྱ། །ཞེས་བ་རྒྱུད་ཆེན་པོ་ལས་གསུངས་པ་དེ་མདོར་བསྡུས་ནས་ནི་རྒྱུད་འདི་བཤད་དོ་ཞེས་པའི་ཐ་ཚིག་གོ ། །རོ་ལངས་དེ་ཡི་ངོ་བོ་ཉིད། །ཞི་བའི་ཕྱིར་ནི་ཚུལ་བཞིན་བཟླས། །ཞེས་པ་
རོ་ལངས་ཀྱི་སྔགས་མ་སྤེལ་ཞིང་བསྐུལ་པའི་ཚིག་མ་བཅུག་པར་རོ་ལངས་ཀྱི་སྔགས་ཞི་བའི་རང་བཞིན་དུ་གསུངས་པ་དེའི་ཚུལ་བཞིན་དུ་བཟླས་སོ། །བདག་གམ་འོན་ཏེ་གཞན་ཡང་རུང༌། །ཞེས་པ་བདག་གམ་གཞན་ཞི་བ་ལ་ཡང་རུང་སྟེ་ཞེས་སོ། །བསྒྲུབ་བྱ་ཞི་བའི་ཚིག་སྨོས་ཏེ། །ཞེས་པ་ཆེ་གེ་མོ་ཞིག་ཤཱནྟིཾ་ཀུ་རུ་སྭཱ་ཧཱ་ཞེས་སྨོས་ཏེ། སྟོང་རྩ་བརྒྱད་བཟླས་པར་བྱ་བ་ནི་ཡི་དགས་ཕལ་པོ་ཆེའི་དཀྱིལ་འཁོར་བྲིས་ནས་བཟླས་སོ་ཞེས་པའོ། །མེ་ཏོག་དཀར་པོ་བཟང་པོ་ནི། །ཞེས་པ་སྲི་ཤིང་སྣ་མའི་མེ་ཏོག་ཀྱང་རུང་ཞེས་པའོ། །བསྲུང་ཞིང་ཡིད་དུ་འོང་བ་དག །ཅེས་པ་མེ་ཏོག་དཀར་པོ་དེ་ཡོན་ཏན་འདི་ལྟ་བུ་དང་ལྡན་ཕལ་བྱ་ཞེས་པའོ། །ཆུས་བཏབ་ནས་ཞེས་པ་མེ་ཏོག་དཀར་པོ་དེ་ལ་ཞེས་པའོ། །རྒྱ་མཚོར་ཞེས་པ་ཆུ་བོའི་ཀླུང་གང་ཡང་རུང་བའོ་ཞེས་པའོ། །ཞུགས་ནས་རེ་རེ་ནས་བཟླས་ཤིང༌། །བརྒྱ་རྩ་བརྒྱད་ནི་དོར་བར་བྱ། །ཞེས་པ་རྐེད་པ་མན་ཆོད་ཆུར་ཞུགས་ནས་མེ་ཏོག་རེ་རེ་ཞིང་སྔགས་རེ་རེ་བཟླས། དེའི་མདུན་དུ་ལྷ་མོ་བེ་ཏ་ལཱི་བཞུགས་པ་ལ་མཆོད་པ་བྱ་ཞིང༌། བསྐུལ་ཚིག་དང་ལྡན་པས་སྔགས་བརྗོད་ནས་མེ་ཏོག་གཏོར་པར་བྱའོ། །མེ་ཏོག་ཀྱང་བརྒྱ་རྩ་བརྒྱད་དགོས་སོ། །འོན་ཏམ་ཞེས་པ་ཆོ་ག་དེ་ལྟར་བྱས་པ་དང་ཞེས་པའོ། །རྒྱལ་པོ་ཞེས་པ་ཡུལ་ཕྱོགས་ཆེན་པོ་ཞེས་པའོ། །གྲོང་ངམ་ཞེས་པ་གྲོང་ཁྱེར་གཅིག་པ་ཞེས་པའོ། །གྲོང་ཁྱེར་དག་ཅེས་པ་མང་པོ་ཞེས་པའོ། །ཞི་བའི་ལས་བྱས་པ་དེ་ཡིས། །ཞི་བར་འགྱུར་བར་གདོན་མི་ཟ། །ཞེས་པ་ཞི་བའི་ཆོ་ག་ལས་དེ་ལྟར་བྱས་པ་དེས་ཐེ་ཚོམ་མེད་པར་ཞི་བར་གྱུར་ཞེས་བྱ་བའི་ཐ་ཚིག་གོ །འདི་མན་ཆད་རྒྱས་པའི་ལས་བཤད་དོ། །དེ་ནས་རྒྱས་པའི་ལས་རྣམས་ཀྱང༌། །ཚུལ་བཞིན་དུ་ནི་བཤད་པར་བྱ། །ཞེས་པ་ནས་བསྟན་ཏེ། མཆོད་རྟེན་མཆོད་པ་སྣ་ཚོགས་པས། །བྱས་ནས་དེ་ཡི་མདུན་འདུག་སྟེ། །ཞེས་པ་རྒྱས་པའི་ལས་བྱེད་པར་འདོད་པའི་སྔགས་པ་དེས་ཐོག་མར་མཆོད་རྟེན་ལ་མཆོད་པ་སྣ་ཚོགས་པས་མཆོད་བ་བྱས་ནས། སྔགས་པ་དེས་མཆོད་རྟེན་དེའི་མདུན་དུ་འདུག་སྟེ། རོ་ལངས་མའི་ཕྱག་རྒྱའི་བཟླས་བརྗོད་བྱའོ་ཞེས་པའོ། །རྫོགས་སངས་རྒྱས་ཀྱིས་མཆོད་པ་བཟླས། ཞེས་པ་རོ་ལངས་ཀྱི་ལྷ་མོ་དེ་སངས་རྒྱས་
རྣམས་ཀྱིས་ཀྱང་ཕུ་དུད་དང༌། རིམ་གྲོ་དང༌། བཀུར་སྟི་བྱས་ལ་བཟླས་པ་བྱའོ་ཞེས་པའི་དོན་ཏོ། །གལ་ཏེ་མཆོད་རྟེན་རིང་བསྲེལ་ཅན། །ཡིན་ན་དེ་མ་ཐག་ཏུ་འགྱུར། །ཞེས་པ་གལ་ཏེ་མཆོད་རྟེན་རིང་བསྲེལ་ཅན་གྱི་མདུན་དུ་རྒྱས་པའི་ལས་བྱས་ཏེ། བཟླས་བརྗོད་བྱས་ན་མི་ཐོགས་པར་ཆོ་ག་རྒྱས་པའི་ལས་འགྲུབ་པར་འགྱུར་ཞེས་པའོ། །སྒྲུབ་པའི་མིང་སྨོས་བཟླས་ན་ནི། །སྐྱེས་པའམ་བུད་མེད་རྒྱས་པར་འགྱུར། །ཞེས་པ་ཆོ་ག་ལྟར་བཟླས་པ་གང་ཡང་རྒྱས་པར་བྱ་བའི་མི་དེ་མིང་གི་བསྐུལ་ཚིག་དང་ལྡན་པར་བཟླས་ན་དེ་དག་རྒྱས་པར་འགྱུར་ཞེས་པའོ། །དམ་ཆོས་མཆོད་རྟེན་མདུན་དུ་ནི། །ཞེས་པ། པྲཛྙཱ་པཱ་ར་མི་ཏའི་གླེགས་བམ་ཡང་རུང༌། མཆོད་རྟེན་ཡང་རུང་སྟེ། དེ་གཉིས་གཅིག་ལ་མདུན་ཞེས་པའོ། །ཆོ་ག་བཞིན་དུ་ཁྲི་བཟླས་ཏེ། །ཞེས་པ་ལ་སོགས་པ་དེ་ལྟར་སྔར་བསྒྲུབ་པ་ཁྲི་བྱས་ནས་དེའི་འོག་ཏུ་མཆོད་རྟེན་གྱི་མདུན་དུ་ཇི་སྲིད་རྒྱས་པར་འགྱུར་གྱི་བར་དེ་སྲིད་དུ་བཟླས་བརྗོད་བྱའོ་ཞེས་པའོ། །དེ་བཞིན་གཤེགས་པའི་མཆོད་པ་དག །ཅེས་པ་ལ་སོགས་པ་རྒྱས་པའི་ལས་བྱེད་འདོད་པའི་སྔགས་པ་དེས། མཆོད་རྟེན་དག་ལ་དང་པོར་དེ་བཞིན་གཤེགས་པའི་མཆོད་པར་འོས་པ་གདུགས་དང༌། རྒྱལ་མཚན་དང༌། བླ་རེ་དང༌། མེ་ཏོག་བདུག་སྤོས་ལ་སོགས་པ་མཆོད་པ་རྒྱ་ཆེན་པོ་དག་མཆོད་པར་བྱའོ་ཞེས་པའོ། །རིང་བསྲེལ་ཅན་ལ་ཆོ་ག་བཞིན། །ཞེས་པ་ཁྱད་པར་དུ་མཆོད་རྟེན་རིང་བསྲེལ་ཅན་གྱི་དྲུང་དུ་རྒྱས་པའི་ལས་བྱ་བའི་ཆོ་ག་དེ་བཤད་པར་བྱ་ཞེས་སོ། །ཐོག་མར་མཆོད་རྟེན་དྲུང་དུ་ནི། །ཞེས་པ་དང་པོ་མཆོད་རྟེན་རིང་བསྲེལ་ཅན་གྱི་དྲུང་དུ་སྔགས་པ་དེས་དཀྱིལ་འཁོར་གྱི་ཚད་ཀྱང་གྲུ་བཞི་པ་ཅིག་བྱའོ་ཞེས་པའོ། །དེ་ནས་དེར་ནི་མེ་ཏོག་དག །ཤིན་ཏུ་ཡིད་འོང་དགྲམ་པར་བྱ། །ཞེས་པ་དཀྱིལ་འཁོར་བྱས་པ་དེའི་སྟེང་དུ། མེ་ཏོག་སྡུ་གུ་དྲི་ཞིམ་པོ་ཡིད་དུ་འོང་བ་དག་དགྲམ་པར་བྱའོ་ཞེས་པའོ། །མེ་མར་རབ་ཏུ་འབར་བ་བརྒྱད། །ཅེས་པ་ཕྱོགས་བཞི་མཚམས་བརྒྱད་དུ་བདག་གིས་མར་མེ་ཁ་བརྒྱད་དབུལ་བར་བྱའོ་ཞེས་པའོ། །མཁས་བས་དེ་ལ་དབུལ་བར་བྱ། །ཞེས་པ་སྔགས་པས་མཆོད་རྟེན་དང༌། བེ་ཏ་ལཱི་གཉིས་ལ་དབུལ་བར་བྱ་ཞེས་པའོ། །ཤིན་
ཏུ་ཡིད་འོང་ཆུ་དང་བཅས། །ཞེས་པ་ཉ་ཕྱིས་དང༌། དུང་ཕོར་དག་གི་ནང་དུ་དྲི་ཆུ་བཟང་པོ་ཡིད་དུ་འོང་བ་དང་བཅས་པ་དག་དབུལ་ལོ། །སྣ་ཚོགས་པ་ཡི་བཤོས་ཕུལ་ནས། །ཞེས་པ་རྒྱས་པའི་ལས་བྱེད་པའི་ཚེ་བཤོས་ཅི་དང་ཅི་དབུལ་བ་སྤྱི་རྒྱུད་དག་ལས་ཇི་སྐད་འབྱུང་བ་བཞིན་དུ་དབུལ་ལོ་ཞེ་སར་བཅས་ཞེས་པ་ཕུ་དུད་དང༌། རིམ་གྲོར་བཅས་པ་ཞེས་པའོ། །མཆོད་རྟེན་ལ་ནི་མངོན་ཕྱོགས་ཏེ། །ཞེས་པ་རྒྱབ་ཀྱིས་མ་འབབ་པར་མངོན་དུ་བལྟས་ཏེ་ཞེས་པའོ། །ཞི་དང་རྒྱས་ཕྱིར་བཟླས་པ་བྱ། །ཞེས་པ་ཞི་བ་དང༌། རྒྱས་པའི་ལས་བྱ་བའི་ཕྱིར་ཚུལ་དེ་ལྟར་བཟླས་པར་བྱའོ། །ལས་སྤྱིའི་མཚན་ཉིད་གཅིག་པས་རྒྱས་པའི་ཚུལ་བཞིན་དུ་ཞི་བའི་ལས་བྱས་ན་ཡང་ཞི་བར་འགྱུར་རོ་ཞེས་པའོ། །དེ་ལྟར་ཉིན་མཚན་ཕྱེད་ན་ནི། །ཞེས་པ་ཚུལ་དེ་ལྟར་ཉིན་ལན་གསུམ་མཚན་ལན་གསུམ་སྟེ། ལན་དྲུག་དུ་ཆོ་ག་བྱས་ཏེ་ཉིན་མཚན་ཕྱེད་ནས་ཞི་བ་དང་རྒྱས་པའི་ལས་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ །འདི་མན་ཆད་ནི་དགའ་བར་འགྱུར་བ་བཤད་དོ། །གཞན་ཡང་སྒྲུབ་བ་པོ་ལ་ནི། །ཞེས་པ་ནས་བསྟན་ཏེ། ངེས་པར་འགྱུར་བ་བཤད་པར་བྱ། །སྒྲུབ་པ་པོ་ལ་གདོན་མི་ཟ་བར་དགའ་བར་འགྱུར་བའི་ཆོ་ག་དེ་བཤད་པར་བྱའོ་ཞེས་པའོ། །ཇི་ལྟར་མ་ལ་བུ་སྡུག་པ། །དེ་འདིར་དེ་བཞིན་གཞན་དུ་མིན། །ཞེས་པ་ཇི་ལྟར་མའི་སྙིང་དུ་བུ་སྡུག་པ་དེ་བཞིན་དུ་ཆོ་ག་འདི་བྱས་ན། འཇིག་རྟེན་ཐམས་ཅད་བདག་ལ་དགའ་བར་འགྱུར་གྱི་གཞན་དུ་ནི་མི་འགྱུར་རོ་ཞེས་པའོ། །ངེས་བར་བདག་གི་ཁྲག་དང་སྦྱར། །ཞེས་པ་ཚད་ཆེ་ཆུང་ཇི་ཙམ་ཡང་རུང་བ་དང་བདག་གི་ཁྲག་དང་ལན་མང་དུ་སྦྱར་ཏེ་ཐོད་པར་བཅུག་ལ་བསྒྲུབས་ཏེ། གྲུབ་ནས་དཔྲལ་བར་ཐིག་ལེ་བྱས་ན་བུ་སྡུག་བཞིན་དུ་དགའ་བར་འགྱུར་རོ་ཞེས་པའོ། །ལན་གྲངས་མང་དུ་སྦྱར་ནས་ཀྱང༌། །ཞེས་པ་དེ་ལྟར་སྦྱར་བ་ཡང་ལན་ཅིག་སྦྱར་ཏེ་སྐམས་ནས་ཡང་ལན་ཅིག་སྦྱར་ཏེ། དེ་ལྟར་སྦྱར་བའི་བར་ཞག་དེ་ཙམ་གྱིས་ཆོད་པར་བྱའོ། །ཡང་ན་ཉིན་གཅིག་ལ་ལན་བདུན་ཚང་བར་བྱས་ཀྱང་རུང་ངོ༌། །ལན་གྲངས་ཉི་ཤུ་རྩ་གཅིག་ཅིག་ཅར་ཡང་རུང་ངོ་ཞེས་སོ། །གཞག་ཅེས་པ་དེ་ལྟར་བྱས་པའི་རྫས་ཐོད་པར་གཞུག་གོ་ཞེས་སོ། །
ཟླ་བ་ལ་ནི་མིག་བལྟས་ཤིང༌། །བཏང་གི་བར་དུ་ལེགས་པར་བཟླས། །ཞེས་པ་ཁ་ཅིག་བཤད་པ་ནི་ཟླ་བ་ནི་མིག་བལྟ་ཞིང་བཟླས་སོ་ཞེས་བའོ། །ཁ་ཅིག་གི་གཞུང་ལས་ནི་ཟླ་བ་སྒྲ་གཅན་གྱིས་ཟིན་པ་ལ་བལྟ་ཞིང་ན་མ་ཞིག་བཏང་གི་བར་དུ་བཟླས་སོ་ཞེའོ། །དེ་ནས་རྒྱལ་པོ་འཁོར་དུ་འགྲོ། །ཞེས་པ་རྒྱལ་པོའི་ཕོ་བྲང་ནང་དུ་འགྲོ་ཞེས་པའོ། །མདོར་བསྡུས་ཞེས་པ་རྒྱུད་ཆེན་པོ་ལས་ཞེས་སོ། །རྒྱུ་དང་མི་རྒྱུ་འཇིག་རྟེན་དག །ཅེས་པ་སེམས་ཅན་རྣམས་དང་ཆུ་དང་རིལ་སོགས་པའི་ལྷ་རྣམས་ལ་བྱ་སྟེ། རྟེན་པའི་གནས་ཀྱི་རྒྱུ་མི་འགྲོ་བ་ལ་གནས་པའི་ལྷ་རྣམས་ནི་རྒྱུ་དང་མི་རྒྱུ་ཞེས་པའོ། །མཐོ་བ་ཡིས་ནི་ཞེས་པ་ལྷ་དང་མི་དེ་དག་གིས་ཞེས་སོ། །དགའ་བར་འགྱུར་ཞེས་པ་སྔགས་པ་ལ་ཞེས་པའོ། །འདི་ནི་ཞེས་པ་ཆོ་ག་འདི་ཞེས་པའོ། །གསུངས་བ་དག་ཅེས་རྒྱུད་ཆེན་པོ་ལས་ཞེས་སོ། །འདི་མན་ཆད་དགུག་པའི་ཆོ་ག་བཤད་པའོ་ཞེས་པའོ། །བུད་མེད་བུ་མོ་ཤི་བའི་སྐྲ། །ཞེས་པ་ནི་སྤྱིའི་མིང་ཡིན་ཏེ། བུད་མེད་ཀྱི་མི་རུང་གི །བུ་མོ་གཞོན་ནུ་གཙང་མའི་སྐྲ་ལས་བྱ་ཞེས་པའོ། །མར་གྱི་བརྒྱད་ལ་ནན་ཏན་དུ། །ཞེས་པ་བུད་མེད་གཞོན་ནུ་གཙང་མའི་སྐྲ་ཚེས་ཉི་ཤུ་གསུམ་ལ་བླངས་ལ་ནན་ཏན་དུ་སྲིད་དུ་ཁྲུ་གང་ཙམ་སྦོམས་སུ་མཐེའུ་ཆུང་སུམ་སྒྲིལ་འཇར་འཇུར་དང་སྦན་སྦུན་མེད་པའི་ལིག་རི་དང་འདྲ་བའི་ལེགས་པར་བཀལ་བའོ། །དེ་ཡང་གཟུང་ལ་རག་པ་ལྟར་ཞགས་པ་མིག་ཅན་དུ་བྱའོ་ཞེས་པའོ། །ཟླ་བ་གཟས་ཟིན་པར་འགྱུར་བའི་བར་དུ་ཉིན་རེ་བཟླས་ཞེས་པ་དེ་ནས་ཟླ་བ་གཟས་ཟིན་བར་འགྱུར་བའི་བར་དུ་ཉིན་རེ་ཞིང་ཡང་དུས་གསུམ་དུ་བཟླས་སོ་ཞེས་བྱ་བའི་དོན་ཏོ། །ཟླ་བ་གཟས་ཟིན་གྱུར་པ་དང༌། །ཞེས་པ་ནམ་ཟླ་བ་གཟས་ཟིན་པའི་དུས་ཀྱི་ནུབ་མོ་དཀྱིལ་འཁོར་བྲིའོ་ཞེས་པའོ། །ཆུ་འགྲམ་ཞེས་པ་གནས་གཙང་མ་དག་ཏུ་ནི་ཞེས་པའོ། །དཀྱིལ་འཁོར་དེར་བྲིས་མཆོད་པ་བྱས། །ཞེས་པ་སྔར་བཤད་པ་བཞིན་དུ་མཆོད་པ་བྱའོ་ཞེས་སོ། །རོ་ལངས་ཁྲོ་བོ་ལྡན་པ་ལས། །ཞེས་པ་རོ་ལངས་ཁྲོ་བོ་དང་ལྡན་པའི་སྔགས་མང་པོ་དང༌། བེ་ཏ་ལཱི་ལ་མཆོད་པ་དབུལ་ལོ་ཞེས་བྱ་བའི་དོན་ཏོ། །གཏོར་མ་རྒྱ་ཆེར་བྱས་ནས་ནི། །ཞེས་པ་སྔར་ཡི་དགས་ཕལ་པོ་ཆེའི་སྐབས་སུ་བཤད་པ་
བཞིན་དུ་མཆོད་པ་དེ་དག་གིས་མཆོད་པར་བྱ་ཞིང་དཀྱིལ་འཁོར་ནང་དུ་དབུལ་ཞེས་པའོ། །འབྱུང་པོ་ལའོ་ཞེས་པ་དབབ་བོ་ཞེས་པའོ། །དེ་ནས་དེ་ལ་ལག་གིས་མནན། །ཞེས་པ་དེ་ཐོད་པ་དེ་ལག་པ་གཡས་པས་མནན་ཞེས་བྱའོ། །ཟླ་བ་བལྟས་བཟླས་པར་བྱ། །ཞེས་པ་བཤད་པ་རྣམ་གཉིས་མི་མཐུན་ཏེ། གཅིག་ནི་ཟླ་བ་ལ་མི་བལྟ་བར་བཟླས་ཞེས་སོ། །གཡོའི་བར་ཞེས་བསྒྲུབ་པའི་ཞགས་པ་གཡོན་པའམ་ཞེས་པའོ། །འཕར་ན་ནི་ཞེས་པ་ཐོད་པའི་ནང་ནས་ཞགས་པ་འཕར་བར་གྱུར་ན་ཞེས་སོ། །གྲུབ་པ་ན་ནི་གྲུབ་ཅེས་བྱ། །ཞེས་པ་གྲུབ་པར་བྱའོ་ཞེས་པ་ནི་དེའི་ཚེ་ཞེས་བསྒྲུབ་པ་དེའི་ཚེ་ཞགས་པ་བླངས་ནས་ཞེས་པའོ། །འཇིག་རྟེན་ལྷ་རྣམས་སྐད་ཅིག་གིས། །ཞེས་པ་ལ་སོགས་པ་འཇིག་རྟེན་པའི་ལྷ་གང་བསྡམ་སྟེ་ཡིད་ལ་བསམས་ནས་འགྲུབ་པའི་ཞགས་པ་དེས་དྲངས་པའི་ཚུལ་དུ་བྱས་ཏེ་དྲངས་ནས་སྐད་ཅིག་གིས་ཁུགས་པར་འགྱུར་རོ་ཞེས་པའི་ཐ་ཚིག་གོ །སྔགས་པས་ཡིད་ཀྱིས་བསམ་པའམ། །སྔགས་པའི་ཚིག་གིས་ཀྱང་ཞེས་པའོ། །གང་དང་གང་འདོད་ལེགས་པར་བྱེད། །ཅེས་པ་སྒྲུབ་པ་པོ་ཅི་འདོད་པ་དེ་ལ་དེས་ལེགས་པར་བྱེད་དོ། །སོགས་ཞེས་པ་ཚངས་པ་དག་གོ །དེའི་བཀའ་བཞིན་ཞེས་པ་སྒྲུབ་པ་པོ་དེའི་ཞེས་སོ། །དེས་པར་བྱེད་ཅེས་པ་གདོན་མི་ཟ་བར་ཞེས་སོ། །སྐད་ཅིག་གིས་ནི་ནམ་མཁའ་ལས། །ཞེས་པ་ལ་སོགས་པ་རྫུ་འཕྲུལ་དང་ལྡན་པའི་འཇིག་རྟེན་གྱི་ལྷ་དག་ནམ་མཁའ་ལ་ཞགས་པ་དེས་དྲངས་ན། ཐང་ཅིག་གིས་ཁུགས་པར་འགྱུར་ཏེ། བདག་གང་འདོད་པའི་མཆོག་དབུལ་བར་བྱེད་དོ་ཞེས་པའི་ཐ་ཚིག་གོ །གནོད་སྦྱིན་མོ་ཞེས་པ་གླུ་མཁན་མོ་ཞེས་སོ། །བདག་གི་དྲུང་དུ་ཞེས་པ་གྲུབ་པ་དེའི་དྲུང་དུ་ཞེས་པའོ། །ཡིད་དུ་འོང་བའི་ལས་རྣམས་བྱེད། །ཅེས་པ་གྲུབ་པ་བདག་གི་ཡིད་དུ་གང་འཐད་ཅིང་མོས་པའི་ལས་རྣམས་བྱེད་ཅེས་པའོ། །དམན་པ་དག་ཅེས་པ་སྨད་པ་ཞེས་པའོ། །བསྟེན་པར་བྱ་ཞེས་པ་ཐེ་ཚོམ་མེད་པར་བྱའོ་ཞེས་སོ། །འདོད་པས་གདུངས་པ་མི་ཆོས་མིན། །ཞེས་པ་འདོད་པས་གདུངས་ན་ལྷའི་བུ་མོ་དག་བཀུག་ལ་དེ་དང་ལྷན་ཅིག་བསྟེན་པར་བྱའི་མིའི་བུད་མེད་ནི་ཅི་ལྟར་
གདུངས་ཀྱང་བསྟེན་པར་མི་བྱའོ། །རྒ་དང་མྱ་ངན་གྱིས་གདུངས་དམན། །ཞེས་པ་མིའི་བུད་མེད་ཅིའི་ཕྱིར་བསྟེན་པར་མི་བྱ་ཞེ་ན། རྣམ་གྲངས་འདི་ལྟ་བུའི་ཕྱིར་བསྟེན་པར་མི་བྱའོ། །སེར་སྣ་ཅན་འདོད་ཆེན་ཆེར་ཞེས་སོ། །ནད་དང་འཚེ་བས་སྨ་ཕབ་པ། །ཞེས་སོ། །དེར་ཡང་མ་ཟད་དེ་འདི་ལྟ་བུ་དག་ཡོད་པའི་ཕྱིར། གཅིན་དང་རྡུལ་དང་དྲི་མ་ཅན། །ཞེས་པའོ། །མི་ཡི་བུད་མེད་རྟག་ཏུ་སྤང༌། །ཞེས་པ་རྣམ་གྲངས་དེ་ལྟ་བུའི་ཕྱིར་ན། མིའི་བུད་མེད་དུས་ཐམས་ཅད་དུ་སྤང་བར་བྱའོ། །འོ་ན་ཏེ་སེམས་དཔའ་ཆེན་པོ་དེ། །ཞེས་པ་ལ་སོགས་པ་ཆེན་པོ་འགྲུབ་པ་དང་ཡོན་ཏན་དང་ལྡན་པའི་བདག་ཉིད་ཆེན་པོ་ཞིག་ཡིན་དེ་གྲུབ་པ་དེའི་ཚེ་འདོད་པ་ལ་ཆགས་པ་མ་ཡིན་པ་ཞིག་ན་ལྷའི་ལོངས་སྤྱོད་དང་ལྡན་ཡང་ལྷའི་ལོངས་སྤྱོད་ཀྱི་ནང་ན་དགེ་བའོ་ཞེས་པའོ། །གནོད་སྦྱིན་བཀུ་ག་པའི་ཚོགས་རྣམས་ཀྱིས་ཀྱང་བསྐོར་བའོ་ཞེས་སོ། །རང་གི་གཞལ་ཡས་ཁང་བཟངས་ན། །ཞེས་པ་གནོད་སྦྱིན་དང༌། ལྷ་དང༌། རང་རང་གི་ཞེས་སོ། །གདུག་ཅིང་གྲུབ་པ་དེ་གང་དུ་འདོད་པར་འགྲོ་ཞེས་པའོ། །ལྷ་རྣམས་ཀྱིས་སྒྲུབ་པ་པོ་དེ་ལ་རབ་ཏུ་དབུལ་ལོ་ཞེས་པའོ། །ར་ས་ཡ་ན་དུ་མ་ཞེས་པ་ནི་བཅུད་ཀྱིས་ལེན་མང་པོ་ཞེས་པའོ། །དཔག་བསམ་ཤིང་གི་འབྲས་བུ་ཡང༌། །ཞེས་པ་ཅི་འདོད་པ་འབྱུང་བར་འགྱུར་བ་ལྷའི་ལོངས་སྤྱོད་མཉམ་པར་ལྡན་པར་འགྱུར་བའི་འབྲས་བུ་ཐེ་ཚོམ་མེད་པར་འཐོབ་པར་འགྱུར་རོ། །རིག་པ་འཛིན་པ་ཀུན་གྱི་མཆོག །ཅེས་པའོ། །དངོས་གྲུབ་གོང་དུ་སྨོས་པའི་འདི་འདྲ་བ་ཐོབ་པར་འགྱུར་ཞེས་པའོ། །འགུལ་ཏམ་གཡོས་པར་བཤད་པ་དག །ཅེས་པ་དངོས་གྲུབ་ཀྱི་ལས་གོང་དུ་བཤད་པ་དག་ཞགས་པ་གཡོས་པས་འགུལ་བར་འགྱུར་བས་དངོས་གྲུབ་ཐོབ་པར་འགྱུར་པ་བཤད་པ་དེ་དག་ཅེས་པའི་ཐ་ཚིག་གོ །གལ་ཏེ་འགྲུབ་པར་མ་གྱུར་ན། །ཞེས་པ་ཞགས་པ་འགྲུབ་པར་མ་གྱུར་ན་ཞེས་སོ། །མ་གྲུབ་པའི་ཞགས་པས་ཀྱང་ཞེས་པ་དེ་ལྟར་སྒྲུབ་པའི་ཞགས་པས་མ་གྲུབ་ཀྱང་ཞེས་སོ། །ཡིད་ལ་འདོད་པ་ཞེས་པ། ཡིད་ལ་གང་འདོད་པ་དེ་བསམས་ནས་ཞེས་སོ། །དེ་ནི་དེ་ལ་ཕྱོགས་ནས་བཟླས། །ཞེས་པ་བསྒྲུབ་པ་དེ་ནི་གང་དགུག་པར་བྱ་བ་
དེ་ལ་ཁ་བལྟས་ཏེ། དེ་ལ་ཕྱོགས་སམ་ཞགས་པ་དེ་ལ་བལྟས་ནས་བཟླས་པར་བྱའོ། །བསྒྲུབ་བྱའི་མིང་དང་ཚིག་དང་བཅས། །ཞེས་པ་ཆེ་གེ་མོ་ཞིག་ཨཱ་ཀཪྵ་ཡ་ཨཱ་ཀཪྵ་ཡ་སྭཱ་ཧཱ་ཧྲཱི་ཞེས་དེ་ལྟར་སྦྱར་ཏེ་བཟླས་སོ། །ནམ་མཁའ་ནི་གང་དགུག་པར་བྱ་བ་དེ་བཞིན་དུ་ཞེས་པའོ། །བདག་གི་དྲུང་དུ་ཞེས་པ་བསྒྲུབ་པའི་དྲུང་དུ་ཐང་ཅིག་གིས་ཞེས་པའོ། །མི་དབང་ཞེས་པ་རྒྱལ་པོའོ། །བ་ལང་དང་ནི་ཤིང་རྟའམ། །ཞེས་པ་ནོར་དང་ལྡན་པ་ཞེས་སོ། །དེ་བཞིན་འདོད་པའི་རྫས་དག་ཀྱང༌། །ཞེས་པ་བདག་གང་འདོད་པའི་རྫས་ཞེས་སོ། །མཐོང་ངམ་ཡང་ན་ཐོས་ཀྱང་རུང༌། །ཞེས་བ་རྫས་དེ་དག་མ་མཐོང་ངམ་མ་ཐོས་ཀྱང་རུང་སྟེ། ཆེ་གེ་མོ་ཞིག་ཨཱ་ཀཪྵ་ཡ་ཞེས་པའི་ཚིག་དང་ལྡན་པས་སྔགས་བརྗོད་ན་འགུགས་པར་འགྱུར་རོ། །ཡུལ་གཞན་དག་ན་གནས་པ་ནི། །ཞེས་པ་ཉེ་འཁོར་ན་མི་འདུག་སྟེ། གོང་དུ་སྨོས་པ་དང་འདྲ་ཞེས་པའོ། །དམ་ཚིག་དག་གིས་བསྐུལ་ན་ནི། །ཞེས་པ་བསྐུལ་བའི་ཚིག་དང་ལྡན་པའི་སྔགས་ཉིད་ཀྱིས་བསྐུལ་ན་ཁུགས་པར་འགྱུར་རོ། །གང་དང་གང་དགུག་པ་དེ་དག་གདོན་མི་ཟ་བར་ཁུགས་པར་འགྱུར་རོ། །གྲུབ་པ་དང་ནི་མ་གྲུབ་པ། །ཁྲོ་བོ་རྣམ་རྒྱལ་རྟོག་འདི་ལ། །ཞེས་པ་གོང་དུ་སྨོས་པའི་ལས་འདི་དག་ནི་ཞགས་པའི་ལས་གང་གྲུབ་པ་དང་མ་གྲུབ་པ་དག་ཁྲོ་བོ་རྣམ་པར་རྒྱལ་བའི་རྟོག་པ་འདི་ལས་ཞེས་པའོ། །ཁྲོ་བོས་གསུངས་པའི་ལས་ཀྱིས་ཞེས་པ་བེ་ཏ་ལཱི་ཡིས་ལྷ་དང་མི་གཉིས་འགུགས་པའི་ཆོ་ག་གསུངས་པའོ། །རོ་ལངས་རྟོག་པ་འདི་དག་ནི། །ཞེས་པ་རོ་ལངས་ཀྱི་ལེའུར་གཏོགས་པ་འདི་དག་ནི་ཚུལ་བཞིན་རིམ་གྱིས་བཤད་པ་ཡིན་ནོ། །རོ་ལངས་ཞེས་བྱ་བའི་སྒྲ་ནི་ལྷ་ཉིད་རོའི་ནང་དུ་གཤེགས་པ་ལས་རོ་ལངས་པར་གྱུར་པས་ན། རོ་ལངས་ཞེས་བྱའོ། །རོ་ལངས་ཀྱི་རྟོག་པར་གཏོགས་པ་སྟེ། དྲུག་པའི་བཤད་པ་རྫོགས་སོ།། །། བརྟུལ་ཞུགས་ཀྱི་ལེའུ་འདི་རྣམ་པ་བརྒྱད་ཀྱིས་བཤད་དེ། དེ་ཡང་དང་པོ་སྐབས་དབྱེ་བ་དང༌། སྔོན་དུ་བསྙེན་པའི་གྲངས་དང༌། ཆོ་ག་བཤད་པ་དང༌། སྐུ་གསུམ་གྱི་མཚན་ཉིད་དང༌། རི་མོའི་གཟུགས་ཀྱི་མཚན་ཉིད་དང༌། བཟླས་བརྗོད་ཀྱི་ཆོ་གའི་མཚན་ཉིད་དང༌། བརྟུལ་
ཞུགས་དང་བརྟུལ་ཞུགས་སྤྱད་ཟིན་པའི་བསྒྲུབ་པ་ལ་འཇུག་པ་རྣམས་བཤད་དོ། །འདི་ནི་ཞེས་པ་གོང་དུ་གསུངས་པའི་ཆོ་གའོ། །རིག་པ་འཛིན་པ་རྣམས་ལ་ནི། །ཞེས་པ་སྔགས་པ་རྣམས་ལ་ཞེས་སོ། །དངོས་གྲུབ་ཞི་བ་མཆོག་སྟེར་བ། ཚུལ་བཞིན་མདོར་བསྡུས་བཤད་པ་བཞིན། །ཞེས་པ་དངོས་གྲུབ་མཆོག་གསོལ་བར་མཛད་པའི་ཆོ་ག་འདི་རྒྱུད་ཆེན་པོ་ལས་ཚུལ་བཞིན་དུ་མདོར་བསྡུས་ནས་བཤད་པ་ཡིན་ནོ་ཞེས་པའི་དོན་ཏེ་འཕྲོ་སྦྱར་བའི་ཚིག་ཏུ་ཟད་དོ། །འདི་མན་ཆད་བརྟུལ་ཞུགས་སུ་གཏོགས་པའི་ལེའུ་སྟེ་དེ་དོན་བརྒྱད་ཀྱིས་བསྟན་པའི་དེ་ལ། དང་པོ་སྐབས་དབྱེ་བ་ཞེས་བྱ་བའི་དོན་བཤད་དོ། །དེ་ནས་ཁྲོ་བོའི་གཙོ་བོ་ཡི། །ཞེས་པ་ནས། བསྟན་ཏེ་ཁྲོ་བོའི་གཙོ་བོ་ཡི། །ཞེས་པ། ཀྲོ་དྷ་བི་ཛ་ཡ་ཉིད་ལ། །ཞེས་སོ། །རྟོག་པར་རྨད་དུ་བྱུང་བའི་མཆོག །ཅེས་པ་ཡང་མཚན་ཕལ་པོ་ཆེ་འབྱུང་བ་ལ་བྱའོ། །ཁྲོ་བོའི་པདྨོའི་ཞལ་ནས་བྱུང་བ་དེ་ཡང་དག་པར་རྒྱས་པར་བཤད་པར་བྱའོ་ཞེས་པའི་དོན་ཏོ། །འདི་མན་ཆད་སྔོན་དུ་བསྙེན་པའི་གྲངས་ཞེས་བྱ་བ་བཤད་དོ། །སྔགས་ཀྱི་གྲངས་ནི་བཅུ་བདུན་པོ། །ཞེས་བྱ་བ་ནས་བསྟན་ཏོ། །བཅུ་བདུན་པོ་ཞེས་པ་ལ་རྩ་བའི་སྔགས་ཡི་གེ་བཅུ་བདུན་པོ་ཉིད་དོ། །ཐོས་པ་ཙམ་གྱི་མདོ་ལ་ཡང༌། །ཞེས་པ་ལྷ་མ་ཡིན་རྣམས་སོ། །རྨོངས་པར་འགྱུར་བ་ཞེས་པ་འཐོམ་པར་འགྱུར་རོ་ཞེས་པའོ། །འཇམ་དཔལ་དབྱངས་ཀྱིས་རབ་བསྐུལ་བ། །ཞེས་པ་དེ་ལྟར་རྨོངས་པར་འགྱུར་བ་ཡང༌། །འཇམ་དཔལ་གྱི་མཐུས་བསྐུལ་བར་དེ་ལྟར་འགྱུར་བའོ། །ཁྲོ་བོ་དེ་ཉིད་འབར་བ་དེའི། །ཞེས་པ་ཀྲོདྷ་བིཛ་ཡ་ཉིད་ལ་བྱ་སྟེ། དེ་ཉིད་འབར་བ་དང་བཅས་པ་དེའི་ཆོ་ག་འདིར་ལེགས་པར་བཟླས་པའི་གྲངས་བཤད་པར་བྱའོ་ཞེས་སོ། །ཐོག་མར་དྲུག་འབུམ་བཟླས་པ་ནི། །ཞེས་པ་གོང་དུ་རྩ་བའི་སྔགས་ཡི་གེ་བཅུ་བདུན་པོ་དྲུག་འབུམ་བསྙེན་པ་བྱས་ནས། དེའི་འོག་ཏུ་སྐུ་གཟུགས་བྲི་བར་བྱ་སྟེ། འདི་ནི་སྐུ་གཟུགས་བྲི་བའི་སྔོན་དུ་བསྙེན་པའོ། །དེ་ནས་བུ་དོན་ཆོ་ག་ཡིས། །ཕྱིས་ཀྱང་སུམ་འབུམ་བཟླས་པར་བྱ། །ཞེས་པ་དེ་ལྟར་སྐུ་གཟུགས་བྲིས་པའི་འོག་ཏུ་སྐུ་གཟུགས་ཀྱི་སྤྱན་སྔར་སུམ་འབུམ་བཟླས་པར་བྱའོ། །དེ་བཞིན་རི་རྩེར་འབུམ་བཟླས་ན། །འགྲུབ་པར་
འགྱུར་ཏེ་གཞན་དུ་མེད། །ཅེས་པ་དེ་ནས་དེ་བཞིན་དུ་རི་རྩེར་འབུམ་བཟླས་པར་བྱ་སྟེ། དེ་ལྟར་འབུམ་ཕྲག་བཅུ་བཟླས་པས་དངོས་གྲུབ་གང་འདོད་པ་འགྲུབ་པར་འགྱུར་ཏེ་ཐེ་ཚོམ་མེད་དོ། །ཕྱིས་ནི་མཁས་པས་ཅི་འདོད་པར། །ཞེས་པ་ཆོ་ག་དེ་ལྟར་བཟླས་པའི་འོག་ཏུ་སྔགས་པས་དངོས་གྲུབ་གང་དང་གང་འདོད་པའི་དངོས་གྲུབ་བསྒྲུབ་པ་ལ་འཇུག་པར་བྱའོ། །ཆོ་ག་མདོར་བཤད་པར་བྱ་ཞེས་པ་བསྒྲུབ་པ་ལ་ཕན་པའི་ཕྱིར་ཀྲོ་དྷ་བི་ཛའི་སྔོན་དུ་བསྙེན་པ་བྱེད་པའི་བསྒོམ་པའི་ཆོ་ག་ལ་སོགས་པའི་རིམ་པ་མདོར་བཤད་པར་བྱའོ་ཞེས་པའི་དོན་ཏོ། །གཅིག་པུ་དཔའ་བོའི་ཁྲོ་བོ་ཉིད། །ཅེས་པ་འཁོར་མེད་པའམ། གྲངས་ཉུང་བ་ལ་མི་བྱའི། །ཁྲོ་བོའི་ཡོན་ཏན་ལ་བྱའོ། །བདུན་རྣམས་ཞེས་པ་ཁྲོ་བོའི་ཡོན་ཏན་བཤད་དོ། །ཁྲུས་ཀྱི་ཆོ་ག་ཉིན་རེ་བྱ། །ཞེས་པ་ལ་སོགས་པ་ཁྲུས་བྱས་པ་ལ་ཡང་རྣམ་པ་གཉིས་ཏེ། ཕྱི་ནང་གི་ཁྲུས་སུ་ཉིན་གཅིག་ཀྱང་དུས་གསུམ་དུ་ཁྲུས་བྱས་ཏེ། ས་ཕུང་དང༌། ཆུ་ལ་བགེགས་བསལ་བའི་ཕྱིར་རྩ་བའི་སྔགས་བརྗོད་ལ་སྤྱིའི་ཆོ་ག་དང་སྦྱར་ལ་ཁྲུས་བྱའོ། །ཁྲུས་བྱས་ནས་ཀྱང་བསྲུང་བ་དག་བྱའོ། ཕྱག་རྒྱ་དང་སྔགས་དག་གིས་བསྲུང༌། །བཾ་གི་ས་བོན་ལས་བྱུང་བའི། །ཞེས་པ་བདག་ཉིད་དང་པོ་ཡི་གེ་ཧཱུཾ་གི་སྒོ་ནས་བཤིག་སྟེ། སྟོང་བར་བསམས་ནས་འོག་གི་རླུང་གི་དཀྱིལ་འཁོར་བསམ། དེ་ནས་དེའི་སྟེང་དུ་མེའི་དཀྱིལ་འཁོར་བསམ། དེ་ནས་དེའི་སྟེང་དུ་ཆུའི་དཀྱིལ་འཁོར་བསམ། དེའི་སྟེང་དུ་ཡི་གེ་བཾ་ལས་བསྐྱེད་པའི་ཡིད་ཀྱི་པདྨོའི་སྟེང་དུ་ཉི་མའི་དཀྱིལ་འཁོར་གྱི་སྟེང་དུ་ས་བོན་ཧཱུཾ་ལས་བྱུང་བའི་བེ་ཅོན་བསྒོམས་པས། དེ་ནས་དེ་ལས་རིམ་གྱིས་ཁྲོ་བོའི་བསྐུར་བསྒྱུར་ཏེ། དེ་ལས་སྐུར་བསྒྱུར་ཟིན་པའི་འོག་ཏུ་ཁྲོ་བོའི་སྐུ་ལ་སྔགས་འདི་རྣམས་སོ་སོར་བཀོད་བས་བསྲུང་བ་དང༌། བྱིན་གྱིས་རློབ་པར་འགྱུར་རོ། །ཡི་གེ་འདི་ཀུན་ཀྱང་ཉི་མའི་དཀྱིལ་འཁོར་ལ་བསམ་མོ། །ཡིད་ཀྱི་པདྨའི་གདན་ལ་འདུག །ཅེས་པ་ཀྲོ་དྷ་བི་ཛ་ཡ་དང་བེ་ཏ་ལཱིར་སྐུར་བསྒོམས་ནས་ཆོ་ག་ལ་བྱའོ། །དེ་ལ་ཁྱད་པར་དུ་སྐུའི་ཆ་ལུགས་དང༌། ཕོ་མོའི་བྱེ་བྲག་ཙམ་ཞིག་ཡོད་དོ་ཞེས་པའོ། །བརྟག་པར་བྱ་སྟ་བསྒོམ་མོ། །བརྟགས་ནས་ཀྱང་
བསྒོམ་ཞེས་སོ། །ཡི་གེ་ཨོཾ་ཞེས་པ་སྐུར་བསྒྱུར་བ་ལ་ཞེས་སོ། །མིག་གཉིས་ལ་ཡི་གེ་ཨ་ཞེས་པ་དབུ་དྲུག་ཡོད་པའི་སྤྱན་གཉིས་པོ་ལ་ཡི་གེ་ཨ་བསམ་མོ། །གཉིས་ནི་མིག་ལ་བལྟས་ཏེ་དེ་སྐད་ཅེས་བྱའོ། །དངོས་ནི་ལྷའི་སྐུར་བསྒྱུར་ནས་སྤྱན་གསུམ་ལ་ཨ་དགོད། སྔགས་ནི་ཡི་གེ་བཅུ་བདུན་པོ། །ཞེས་པ་དེ་ལྟར་བྱས་པའི་འོག་ཏུ་རྩ་བའི་སྔགས་བཟླས་ཤིང་ཁྲོ་བོའི་རྒྱལ་པོ་ཡང་དྲན་པར་བྱའོ། །དྲན་ནས་ཞེས་པ་ཏིང་ངེ་འཛིན་གྱིས་སོ། །རང་གི་ལུས་ལ་སྔར་བཞག་པ། སྙིང་གར་སྙིང་པོ་གཞག་པར་བྱ། །ཞེས་པ་སྔར་ཁྲོ་བོའི་སྐུར་བསྒྱུར་བའི་སྙིང་པོ་ཧཱུཾ་དེ་དག་ལྷར་བསྒྱུར་བའི་སྙིང་གར་ཡང་གཞག་པར་བྱའོ། །དེ་ནས་ཁྲོ་བོའི་མཆོག་མ་ཡིས། །ཞེས་པ་དེ་ནས་ཁྲོ་བོའི་མཚོག་མའི་སྔགས་ཀྱིས་བདག་གི་མཚོག་མར་ཡང་བསམ་པར་བྱ་བ་ནི་བདག་གི་ལག་གིས་མཚོག་མར་རེག་པར་བྱས་ནས་མཆོག་མའི་སྔགས་དགོད་པར་བྱའོ། །ཕྱིས་ནི་གཙུག་ཏུ་གཞག་པར་བྱ། །ཞེས་པ་སྔར་མཚོག་མའི་སྔགས་བཀོད་ནས་དེའི་འོག་ཏུ་སྤྱི་གཙུག་གི་སྔགས་ཀྱང་བདག་གི་སྤྱི་གཙུག་སྔར་གཞག་པ་བཞིན་དུ་དགོད་པར་བྱའོ། །དེ་ནས་ལུས་ལ་ཆོ་ག་ཡང༌། །ཞེས་པ་ཆོ་གའི་སྔགས་ཀྱིས་གནས་ལྔར་དགོད་པ་ནི་བདག་གི་ལག་པས་གནས་གནས་སུ་རེག་པར་བྱ་ཞིང་སྔགས་དགོད་དོ། །མཚོན་ཆའི་སྔགས་ལག་མཐིལ་གཉིས་སུ་དགོད་དེ། ཕྱག་མང་པོ་ཀུན་ལ་ཡང་བསམ་ཞེས་བྱའོ། །རང་གི་དམ་ཚིག་ལྡན་པའི་རྒྱ། །ཞེས་པ་རང་གི་དམ་ཚིག་ལྡན་པའི་ཕྱག་རྒྱ་སྔར་བཅིངས་ནས། དེའི་འོག་ཏུ་རོ་ལངས་ཀྱི་ཕྱག་རྒྱ་བཅིང་བར་བྱ་སྟེ། དེ་ཡང་ཐལ་མོ་སྦྱར་བ་སྤྱི་བོར་བཞག་སྟེ། ན་མོ་བུདྡྷ། དྷརྨ། སཾ་གྷ་བྱ་བའི་སྔགས་བརྗོད་པ་ནི། རང་གི་དམ་ཚིག་སྔར་བསྟན་ནས། །ཞེས་པའི་དོན་ཏོ། །དེའི་འོག་ཏུ་རོ་ལངས་ཀྱི་ཕྱག་རྒྱ་དག་བཅིང་བར་བྱའོ་ཞེས་བ་ཁ་ཅིག་འཆད་དོ། །སྔགས་དང་ཕྱག་རྒྱ་ལྡན་པར་བཅིང་བར་བྱའོ། །རང་གི་དམ་ཚིག་དང་ལྡན་པའི་ཕྱག་རྒྱ་ཞེས་བྱ་སྟེ། དེ་ཡང་བེ་ཅོན་གྱི་ཕྱག་རྒྱ་དང༌། བེ་ཏ་ལཱིའི་ཕྱག་རྒྱ་གཉིས་ཆོག་བཞིན་དུ་བཅིང་བར་བྱའོ་ཞེས་པའོ། །ཁྲོ་བོའི་གཙོ་བོ་རོ་ལངས་མ། །ཞེས་པ་རོ་ལངས་ཀྱི་ཕྱག་རྒྱ་དེ་ཡང་རང་གི་
སྙིང་གར་བཅིང་བར་བྱའོ། །དེ་ནས་གནས་ལྔར་གཏུགས་ཏེ་དགྲོལ་ལོ། །དེ་བཞིན་བེ་ཅོན་ཕྱག་རྒྱ་ཡང༌། །ཞེས་པ་ལ་སོགས་པ་བེ་ཅོན་གྱི་ཕྱག་རྒྱ་ལས་མཚོན་ཆའི་ཕྱག་རྒྱ་ཐམས་ཅད་ཀྱི་འབྱུང་བ་ཕྱག་རྒྱ་དེ་ཐམས་ཅད་ཀྱི་རྩ་བའམ་གནས་སུ་གྱུར་པ་ནི་བེ་ཅོན་གྱི་ཕྱག་རྒྱ་ལ་བྱའོ། །ཕྱག་རྒྱ་དེ་ཡང་ལག་པ་གཡས་པས་བཅིང་བར་བྱའོ། །བེ་ཅོན་གྱི་ཕྱག་རྒྱ་འདིས་ལས་ཐམས་ཅད་བྱའོ། །ཁྲོ་བོའི་སྐུ་གཟུགས་ལ་མཆོད་པ་བྱ་བ་དག་ལ་འཇུག་པར་བྱའོ། །མཆོད་པ་བྱ་བ་ལ་ཡང་སྔར་བཤད་པ་དང༌། ད་འདིར་བཤད་པའི་མཆོད་པའི་རྫས་དག་གིས་མཆོད་པར་བྱའོ། །གཟུགས་དེ་ལ་དེ་ལྟར་མཆོད་པར་བྱས་པས་ན། ཡིད་ལ་གང་འདོད་པའི་དངོས་གྲུབ་ཐམས་ཅད་གང་སྩོལ་བར་མཛད་དོ། །དེ་ལྟར་མཆོད་པ་བྱ་བ་ཡང་གང་དུ་བྱ་ཞེ་ན་གསུངས་པ། ཡི་དགས་ཕལ་པོ་ཆེའི་དཀྱིལ་འཁོར་དུ་མཆོད་པ་བྱ་བ་དང༌། གཞན་དུ་ཡང་རིན་པོ་ཆེའམ། ཤིང་དག་ལ་སོགས་པ་ལ་གཟུགས་སམ་རི་མོ་ལ་ཕྱིའི་མཆོད་པ་འབྱོར་ན་བྱའོ། །གཟུགས་དེ་དག་ལ་ཡང་ཡིད་ཀྱིས་མཆོད་བ་རྒྱ་ཆེན་པོ་དག་བྱའོ། །དྲི་ཞིམ་དང་ཞེས་པ་མེ་ཏོག་གི་ཡོན་ཏན་ཏེ་མཆོད་པའི་རྫས་ལ་མཆོད་པར་བྱའོ། །སྤོས་ཆུ་དག་གི་ས་ལའམ། །ཞེས་པ་ལ་སོགས་པ་གུར་གུམ་དང༌། ཙནྡན་བསྲེས་པ་དག་གི་ཆུས་ས་ལ་དཀྱིལ་འཁོར་བྱས་ཏེ་མཆོད་དམ་ཡང་ན་གཟུགས་དག་ལ། དེ་དག་གིས་གཏོར་བས་མཆོད་པ་བྱའོ་ཞེས་པའི་ཐ་ཚིག་གོ །འདི་མན་ཆད་སྐུ་གཟུགས་ཀྱི་མཚན་ཉིད་བཤད་དོ། །སྐུ་གཟུགས་མཚན་ཉིད་བཤད་པར་བྱ། །ཞེས་པ་འདོད་པ་ཐམས་ཅད་ཀྱི་དོན་བསྒྲུབ་པའི་སྐུ་གཟུགས་ཀྱི་མཚན་ཉིད་དེ། དེ་ལྟར་སྐུ་གཟུགས་དག་ལ་མཆོད་པར་བྱ་བའི་མཚན་ཉིད་བཤད་པར་བྱའོ་ཞེས་པའོ། །སྔར་བསྙེན་ཆོ་ག་བཞིན་བྱས་ནས། །ཞེས་པ་སྔར་བཤད་པ་བཞིན་དུ་སྔོན་དུ་བསྙེན་པའི་ཆོ་ག་བཞིན་དུ་བྱས་ནས་དེའི་འོག་ཏུ་བཟོ་བོ་མཁས་པ་ལ་སྐུ་གཟུགས་བྱེད་དུ་གཞུག་གོ །བཟོ་བོ་ཡང་ཁྲིམས་འཛིན་དུ་བཅུག་ལ། །ཁྲུས་བྱས་ལ་འཇུག་པར་བྱའོ། །རྒྱུ་གང་ལས་གཟུགས་བྱ་བའི་རྒྱུ་དེ་ལས་སྤྱན་དྲངས་ཏེ། བྱིན་གྱིས་
རློབ་བར་གསོལ་བ་གདབ་པོ་ཞེས་སོ། །གསེར་རམ་ཞེས་པ་སྐུ་གཟུགས་ཀྱི་རྒྱུ་དག་ལ་བྱའོ། །མཆིང་བུ་ཤེལ་དང་རིན་ཆེན་དང༌། །ཞེས་པ་ཨིནྡྲ་ནཱི་ལ་མ་གཏོགས་པའི་རིན་ཆེན་རྣམས་ལ་བྱའོ། །རྒྱལ་སྲིད་འདོད་པས་གསེར་ལས་བྱས། །ཞེས་བ་རྒྱུ་གང་དང་གང་དག་ལས་གཟུགས་བྱས་ན། ལས་དེ་དག་འགྲུབ་པར་བཤད་དོ། །ལོངས་སྤྱོད་འདོད་པས་དངུལ་ལ་བྱ། །ཞེས་པ་ཕ་རོལ་པོ་གཞན་ཞེས་སོ། །འཁར་བས་བྱས་ཞེས་པ་ཞི་ཞེས་སོ། །མཆིང་བུ་རྣམ་པ་སྣ་ཚོགས་པ། །ཞེས་བ་མཆིང་བུ་མི་འདྲ་བ་རྣམ་པ་སྣ་ཚོགས་པ་གང་ཡང་རུང་བ་ལས་ཞེས་སོ། །རིན་ཆེན་ལས་བྱས་ཞེས་པ་རིག་པ་འཛིན་པ་ཐོབ་པའི་ལས་ཞེས་པའོ། །ས་འོག་ཅེས་པ་ཨ་རུ་ར་ཞེས་པའོ། །དངོས་གྲུབ་ཐམས་ཅད་གྲུབ་པར་བྱ་བའི་ཕྱིར་སྐུ་གཟུགས་ཆེ་ཆུང་གི་ཚད་རྣམས་བཤད་པར་བྱའོ་ཞེས་པ་ནི། གསེར་ལ་སོར་བརྒྱད་ཙམ་དུ་བྱ། །ཞེས་པ་ཞབས་ཡན་ཆད་དབུ་མན་ཆད་ཀྱི་བར་དུ་ཚད་ལ་བྱ་སྟེ། སོར་མོའི་སོར་ལ་བྱ་ཞེས་པའོ། །མཆོད་ན་ཞེས་པ་མཆོད་ཅིང་བསྒྲུབས་ན་ཞེས་སོ། །མི་གཡོ་ཞེས་པ་བརྟན་པའོ། །ར་གན་གྱིའམ། ཟངས་ཀྱི་ཚད་ལས་སོར་གཉིས་ལྷག་པར་བྱ་ཞེས་པའོ།། མཆིང་བུ་ལས་ནི་སོར་བརྒྱད་ཤེས། །ཞེས་པ་མཆིང་བུ་གང་ཡང་རུང་བ་ལ་བྱས་པའི་ཚད་ཅེས་སོ། །ཤེལ་ནི་སོར་གྲངས་བཅུ་གཉིས་སོ། །ཞེས་པ་ཨིནྡྲ་ནཱི་ལ་མ་གཏོགས་པ་རིན་པོ་ཆེ་གང་ཡང་རུང་བ་ལ་བྱའོ། །དེ་ལྟར་ཇི་སྐད་གསུངས་པའི་ཚད་ཀྱི་སྐུ་གཟུགས་འདོད་པ་ཐམས་ཅད་གསོལ་བར་མཛད་པ་དེ་དག་ཅེས་སོ། །དངོས་གྲུབ་འདོད་པའི་སྔགས་པས་ལེགས་པར་བསྒྲུབ་ཅིང་མཆོད་པར་བྱའོ། །ཡན་ལག་མ་ཉམས་གསལ་ལ་བཟང༌། །ཞེས་པ་སྐུ་གཟུགས་དེ་དག་གི་སྤྱིའི་མཚན་ཉིད་འདྲ་བ་བྱས་ཏེ་ཀུན་ལ་སྦྱར་རོ། །བརྟག་པ་བཟོ་བོ་མཁས་པས་བྱས། །ཞེས་པ་བཟོ་བོ་མཁས་པ་བྱེད་དུ་གཞུག་གོ །མཚན་ཉིད་སྔ་མ་དག་དང་ལྡན། །ཞེས་པ་སྐུ་གཟུགས་དེ་དག་ཀྱང་ཡི་དགས་ཕལ་པོ་ཆེའི་སྐབས་སུ་གཟུགས་བཤད་པའི་མཚན་ཉིད་དང་ལྡན་པར་བྱ་ཞེས་ཇི་ལྟར་བྱ་བའི་ཐབས་བསྟན་པའོ། །མཚོན་ཆ་བཟང་པོས་རྒྱས་
པར་བྱས། ཞེས་པ་ཕྱག་ན་མཚོན་ཆ་བཟང་པོ་དག་གིས་རྒྱས་པར་བྱའོ། །ཡི་དགས་ལ་བཅིངས་ཞལ་ཡང་དྲུག །ཅེས་པ་ཡི་དགས་ཀྱི་སྟེང་ན་བཞུགས་ཏེ། ཡི་དགས་བརྐྱང་བསྐུམ་དེ་དག་ཉིད་ལ་བྱའོ། །སྤྱན་གསུམ་འཇིགས་པར་ཞེས་པ་དབུ་མ་དང་གསུམ། ཁྲོ་བོའི་སྤྱན་དུ་བྱ་ཞེས་པའོ། །མི་མགོ་ཡི་དགས་མགོ་བོ་རྣམས། །ཞེས་པ་མི་མགོ་བོ་ཅན་དང་ལྡན་པའི་ཡི་དགས་ཕྲེང་བ་རྣམས་སེ་རལ་ཁར་ཐོགས་པའོ། །ན་བཟའ་སྟག་ལྤགས་ཤམ་ཐབས་སོ། །ཞེས་པའོ། །སྔ་མའི་ཚུལ་དུ་ཡོངས་རྫོགས་པར། །ཞེས་པ་སྐུ་གཟུགས་ཀྱི་མཚན་ཉིད་སྔར་བཤད་པའི་ཚུལ་དུ་ཞེས་སོ། །སྔགས་པས་བཟོ་བོ་བྱེད་དུ་གཞུག །ཅེས་པ་དེ་ལྟ་བུའི་སྐུ་གཟུགས་དག་སྔགས་པས་བཟོ་མཁས་པ་དག་བྱེད་དུ་གཞུག །དེ་ཡན་ཆད་ནི་ཁམ་ལས་བྱུང་བའི་རྫས་ལས་སྐུ་གཟུགས་བྱའོ་ཞེས་པའི་ཐ་ཚིག་གོ །འདི་མན་ཆད་ནི་ཤིང་ལས་བྱ་བ་བཤད་དོ། །ཡང་ན་ཤིང་གི་སྙིང་པོ་ལ། །ཞེས་པ་ཡང་ཤིང་གི་སྙིང་པོ་དག་ལས་ཀྱང་སྐུ་གཟུགས་བྱ་སྟེ། དེ་ལ་ཤིང་གི་སྙིང་པོ་ཞེས་བྱ་བ་ནི་ཤིང་སྤྱི་ལ་བྱ་སྟེ། ཤིང་ཡོན་ཏན་ལྡན་པ་མཚན་མ་བཟང་པོ་ལ་བྱ་བའི་དོན་ཏོ། །བྱས་ནས་རྟག་པར་མཆོད་པར་འགྱུར། །ཞེས་པ་ཤིང་མཆོག་ཏུ་བཟང་པོ་ལས་སྐུ་གཟུགས་བྱས་ནས་རྟག་ཏུ་མཆོད་ཅིང་བསྒྲུབ་པར་བྱའོ། །དེ་ནས་ཤིང་ལས་བྱས་པ་ཡི། །སྐུ་གཟུགས་ཚུལ་བཞིན་བཤད་པར་བྱ། །ཞེས་པ་དེ་ནས་ཤིང་ལས་བྱས་པའི་སྐུ་གཟུགས་ཚུལ་བཞིན་དུ་བཤད་པར་བྱའོ། །གཙང་མ་འདོད་པ་ཀུན་སྟེར་བ། །ཞེས་པ་ཤིང་ལས་བྱས་པ་དེ་དག་གཙང་མ་འདོད་པ་ཐམས་ཅད་སྟེར་བར་མཛད་པའི་སྐུ་གཟུགས་དེ་ཡང་གོང་མ་བཞིན་དུ་སྦྱར་བར་བྱའོ། །རིག་འཛིན་ཀུན་གྱི་མཆོག་འདོད་ན། །ཞེས་པ་རིག་འཛིན་གྱི་རྒྱལ་པོར་འདོད་ན་ཞེས་སོ། །ཙནྡན་ཞེས་པ་དཀར་པོ་ཞེས་སོ། །ར་ཙ་ཨ་རྐའི་ཞེས་པ་ཤིང་གི་མིང་ངོ༌། །བྱས་པའང་ཞེས་པ་སྐུ་གཟུགས་བྱས་པ་ཡང་འདོད་པའི་དོན་རྣམས་སྟེར་ཞེས་སོ། །སར་པ་ཞེས་པ་ནི། རྙིང་པ་མ་ཡིན་ཞེས་པའོ། །དེ་བཞིན་ཏཱ་ལ་ཤིང་དག་ལས། །ཞེས་པ་ཨ་ཏི་མུག་ཏ་ཀའི་ཤིང་ལ་བྱ་ཞེས་པའོ། །དེ་བཞིན་ཀླུ་རྣམས་འགུགས་
པར་བྱེད། །ཅེས་པ་འདི་རྣམས་ཀྱང་འགུགས་ན། གཞན་ལྟ་ཅི་སྨོས་ཞེས་སོ། །སྔར་བསྙེན་པ་ལ་སོགས་མ་བྱས་པར། །ཞེས་པ་བསྒྲུབ་པའི་སྔོན་དུ་བསྙེན་པའོ། །འདི་ནི་སྐུ་གཟུགས་མཚན་ཉིད་དག །བཟང་པོ་རྒྱས་པར་གསུངས་པ་བཞིན། །ཞེས་པ་སྐུ་གཟུགས་ཆེ་ཆུང་གི་ཚད་འདི་བཞིན་དུ་སྔགས་པས་མི་བསྒོམ་དུ་མི་རུང་ཞེས་བྱ་བ་མེད་དེ་ཇི་ཙམ་འདོད་པའི་ཚུལ་དུ་བསྒོམ་མོ། །འདི་མན་ཆད་རི་མོའི་སྐུ་གཟུགས་ཀྱི་མཚན་ཉིད་བཤད་དོ། །རི་མོའི་མཚན་ཉིད་བཤད་པར་བྱ། །ཞེས་བྱ་བ། རས་དག་ལ་རི་མོ་བྲིས་པ་ཙམ་མཚན་ཉིད་བཤད་པར་བྱའོ། །མི་རོའི་གོས་བཟང་བཀྲུས་ནས་ནི། །ཞེས་པ་ལ་སོགས་པ་མི་རོ་ལ་གཡོགས་པའི་རས་བཟང་པོ་བཀྲུས་ཏེ་སྔགས་པས་ཁྲུ་གང་གི་ཚད་དུ་བྱས་པའི་རས་ལ་ཞེས་པའོ། །ཚོན་གྱི་ཁ་དོག་ཀུན་མེད་པར། །རི་བོང་ཁྲག་གིས་བྲི་བར་བྱ། །ཞེས་པ་ཚོན་རྩི་གཞན་མེད་པར་མ་འདྲེས་པ་དང༌། རི་བོང་གི་ཁྲག་དང་བཙག་གིས་བྲི་བར་བྱའོ། །ཡང་ན་དེ་ཡི་སྐུ་གཟུགས་ནི། །སྔ་མ་བཞིན་དུ་བཙག་གིས་བྲི། །ཞེས་པ་ཡང་ཁྲོ་བོའི་གཟུགས་ནི་རི་བོང་གི་ཁྲག་ལས་བྲིས་བ་བཞིན་དུ་བཙག་གིས་བྲི་བར་བྱའོ། །རི་མོ་འདི་ཡང་ཚུལ་འདི་བཞིན་དུ་བྲི་བར་བྱ་བ་སྟེ། ཞལ་དྲུག་དབུ་ཡང་གྱེན་དུ་བརྫེས། །ཞེས་པ་དབུ་སྐྲ་ཁམ་པ་གྱེན་དུ་བྱས་པའོ། །སྨིན་མ་སེར་ཞིང་སྤྱན་ཡང་སེར། །ཞེས་པ་སེར་པོར་བྱ་བ་འདི་དག་ཚོན་སེར་པོར་ཁ་དོག་ཅུང་ཟད་གཅིག་པས་བྱའོ། །སྦྱན་ནི་ཟླུམ་པོ་གསུམ་དང་ལྡན། །ཞེས་པ། ཁྲོ་བོའི་སྤྱན་ནི་ཚུལ་དུ་བྲི། །ཞེས་པའོ། །གཡས་པའི་ཕྱག་ནི་མཆོག་སྦྱིན་དང་ཏྲི་ཤཱུལ་དང་རལ་གྲི་དང་དགྲ་སྟ་དང་བེ་ཅོན་དང་ལྕགས་ཀྱུ་བསྣམས་པའོ། །ཁྲོས་པའི་ཕྱག་གཡོན་བསྡིགས་པར་མཛད། །ཅེས་པའི་ཕྱག་གཡོན་པ་དྲུག་ལ་སྡིགས་མཛུབ་དང་མདུང་དང་མདའ་ཆེན་པོ་དང་དབྱུག་ཐོ་དང་ཐོད་པ་དང་ཞགས་པ་སྟེ་ཕྱག་མཚན་འདི་རྣམས་ཐོགས་ཞེས་བྱ་བའི་ཐ་ཚིག་གོ །གཡོན་པའི་ཞལ་ཞེས་བ་ཞལ་གདངས་པའི་ཚད་དམ་ཞེས་པའོ། །མཁས་པས་རི་མོ་བྲི་བར་བྱ། །ཞེས་པ་སྔགས་པས་དེ་ལྟ་བུའི་ཚུལ་དུ་རི་མོ་བྲི་བར་བྱའོ། །མཁས་པས་རི་མོ་དེ་ལྟར་གློ་གཉིས་དག་ཏུ་ཡང༌། །ཞེས་པ་
རི་མོ་སྐུ་གཟུགས་དེའི་གློ་ཕ་རོལ་ཚུ་རོལ་གཉིས་སུ་ཡང༌། ཕྱག་རྒྱའི་གཟུགས་ཀྱི་ལྷ་གཉིས་བྲི་བར་བྱའོ། །གཡས་སུ་སྐྱེས་པ་ཁྲོ་བོའི་གཟུགས། །ཞེས་པ་དབུས་ཀྱི་སྐུ་གཟུགས་ལས་གཡས་རོལ་དུ་ཞེས་པའོ། །བསྡིགས་ཤིང་ཞལ་ནི་ཁྲོ་གཉེར་ཅན། །ཞེས་པ་ཕྱག་གཡོན་པ་ཁྲོ་བོའི་མཛུབ་མོ་བསྡིགས་པ་བྲང་དུ་འཛིན་ཞེས་པའོ། །ཞལ་དང་སྤྱན་ནི་ཁྲོས་པའི་ཚུལ། །ཞེས་པ་ཁྲོ་བོ་དེ་ལྟ་བུའི་ཚུལ་དུ་པདྨའི་སྟེང་ན་བཞུགས་པར་བྲི་ཞེས་པའོ། །གཡོན་དུ་རོ་ལངས་མ་བྲི་བ། །ཞེས་པ་དབུས་སུ་སྐུ་གཟུགས་ལས་གཡོན་རོལ་དུ་ལྷ་མོ་བེ་ཏ་ལཱི་བྲི་བར་བྱའོ་ཞེས་སོ། །འབར་བའི་ཁ་ལ་གཟི་མདངས་ཆེ། །ཞེས་པ་མེ་ཏོག་འབར་བའི་འོད་གཟི་བརྗིད་ཆེ་ཞེས་སོ། །གཏུམ་མོ་དུ་གུལ་གོས་གྱོན་མ། །ཞེས་པ་གསོ་མ་འདྲ་བའི་ཤིང་ཤུན་པ་ཅན་ལས་དུ་གུལ་གྱི་རས་བྱེད་དེ་སླེའུ་རས་དཀར་པོ་འདྲ་བའི་ཁ་དོག་ཅིག་ཡོད་དོ། །ཡང་ན་ཤིང་ཤུན་གྱི་རས་ཁ་དོག་དཀར་པོ་ཅིག་ཡོད་དོ། །དེས་སྟོད་གཡོགས་དང༌། སྨད་གཡོགས་བྱས་པའི་རས་ལས་ཀྱང་དུ་གུལ་གྱི་རས་བྱེད་དེ། དེ་ནི་ཚོན་རྩི་དཀར་པོས་བྲི་བའི་རིགས་སོ། །གཟི་བྱིན་རབ་ཏུ་སྡིགས་པར་བྱེད། །ཅེས་པ་ཕྱག་གཡས་པ་ཁྲོ་བོའི་ཁུ་ཚུར་གྱིས་བསྡིགས་པ་བྲང་དུ་འཛིན་པ་གཡས་བརྐྱང་བའི་ཚུལ་དུ་བཞུགས་པ་བྲི་སྟེ། སྐུ་མདོག་ཉི་ཚེ་དམར་པོ་བྲི། །ཁྲོས་པའི་ཚུལ་ཞེས་པ་ཁྲོ་བོའི་མིག་ཅེས་པའོ། །བདེ་གཤེགས་སྲས་ཀྱི་བཀའ་ནོད་མ། །ཞེས་པ། བཀའ་བཞིན་དུ་བྱེད་པ་སྐུ་གཟུགས་གཉིས་ཀ་ཁྲོ་བོ་ལ་བལྟས་པར་བྲི། །དེ་ཡང་བཀའ་བཞིན་བྱེད་པའི་ཚུལ་དུ་བྲི་སྟེ་པདྨའི་སྟེང་ན་བཞུགས་པར་བྲིའོ་ཞེས་སོ། །གསང་བའི་ཕྱག་རྒྱ་རི་མོ་འདི། །ཞེས་པ་སྣོད་མ་ཡིན་པ་ལ་གསང་བའི་སྐུ་གཟུགས་འདི་གཉིས་རི་བོང་གི་ཁྲག་གམ་བཙག་གིས་བྲི་བར་བྱའོ། །དབེན་པའི་གནས་སུ་གཞག་པར་བྱ། །ཞེས་པ་མི་མི་འདུ་བའི་ཕྱོགས་སུ་དབེན་པར་གཞག་གོ ། ཆོ་ག་ཤེས་པས་བེ་ཅོན་རྒྱ། །སྐུ་གཟུགས་ལ་ནི་བཟླས་པར་བྱ། །ཞེས་པ་སྐྱེས་བུ་ཁྲོ་བོའི་གཟུགས་དེ་ལ་བེ་ཅོན་གྱི་ཕྱག་རྒྱ་དང་ལྡན་པའི་སྔགས་བཟླས་ན་བེ་ཅོན་གྱི་ཕྱག་རྒྱ་འགྲུབ་པར་འགྱུར་རོ། །ཡང་ན་རོ་ལངས་ཕྱག་རྒྱ་ནི། །ཞེས་པ་རོ་ལངས་ཀྱི་ལྷ་མོའི་གཟུགས་ལ་བཟླས་ན། རོ་
ལངས་ཀྱི་ཕྱག་རྒྱ་འགྲུབ་པར་འགྱུར་རོ། །དབེན་ཞིང་འདུ་འཛི་མེད་པར་ནི། །བཞག་ནས་ཉིན་རེ་མཆོད་པར་བྱ། །ཞེས་སྐུ་གཟུགས་དེ་ཡང་མི་མི་འདུ་བའི་གནས་སུ་ཉིན་རེ་ཞིང་རྟག་ཏུ་མཆོད་པ་དུས་གསུམ་དུ་བྱའོ་ཞེས་སོ། །ཡང་ན་ཕྱག་རྒྱའི་དཀྱིལ་འཁོར་དུ། །ཞེས་པ་ཡང་ན་ཡི་དགས་ཕལ་པོ་ཆེའི་དཀྱིལ་འཁོར་དུ་ཞེས་སོ། །མཉམ་གཞག་དངོས་གྲུབ་འདོད་པ་ཡི། །ཞེས་པ་སེམས་རྩེ་གཅིག་ཏུ་བཞུགས་པས་ཞེས་སོ། །མཆོད་པ་དང་ནི་བཟླས་པ་བྱ། །ཞེས་པ་རི་མོའི་སྐུ་གཟུགས་དེ་ལ་ཞེས་པའོ། །བདག་གི་ཕྱག་རྒྱ་བསྒྲུབ་པ་ལ། །ཞེས་པ་ལ་སོགས་པ་ཕྱག་རྒྱ་དེ་གཉིས་གང་བསྒྲུབ་པ་ལ་བདག་གིས་ཕྱག་རྒྱ་བསྒྲུབ་པ་ཞེས་བྱ་སྟེ། ཕྱག་རྒྱ་དེ་བསྒྲུབ་པ་རི་མོའི་ཚུལ་དུ་བཤད་པ་ཡིན་ནོ། །འདི་མན་ཆད་ཁྲོ་བོའི་རྒྱལ་པོ་གཅིག་པུ་བྲི་བའི་ཆོ་ག་བཤད་པར་བྱའོ། །རི་མོ་རས་བཟང་བརྐུས་ནས་ནི། །ཁྲུ་གང་ཚད་དུ་བྱས་པ་ལ། །ཞེས་པ་མི་ཤི་མ་ཐག་ཏུ་ཁྲུས་བྱས་ཏེ། རས་ཡུག་གཅིག་གིས་རོ་ལ་གཡོགས་པ་དེ་བཀྲུས་ལ། རས་དེ་ཁྲུ་གང་ཚད་དུ་བཅད་ལ་ཞེས་སོ། །ཚོན་རྩི་སྦྱིན་མེད་བཟང་པོས་བྲི། །ཞེས་པ་སྤྱིན་མེད་པའི་ཚོན་རྩི་བཟང་པོས་རི་མོ་བྲི་བར་བྱའོ། །སྤྱིན་ནི་ནག་པོ་འདྲ་བ་ཡིས། །ཞེས་པ་སྐུ་མདོག་སྔོན་པོར་བྲི་ཞེས་པའོ། །སྔ་མ་བཞིན་དུ་བྲི་བར་བྱ། །ཞེས་པ་ལ་སོགས་པ་ཆ་ལུགས་དང༌། ཕྱག་མཚན་སྔར་བཤད་པ་བཞིན་དུ་བྲིས་ཏེ། དེ་ནི་རི་མོ་སྐུ་གཟུགས་བྲིས་པ་ཡང་སྔར་བཤད་པ་བཞིན་དུ་ཐོག་མར་བསྙེན་པ་དྲུག་འབུམ་བྱས་ནས་དེའི་འོག་ཏུ་རི་མོ་བྲི་བར་བྱའོ། །ཉིན་རེ་རྟག་ཏུ་མཆོད་ནས་ཀྱང༌། །ཞེས་པ་ཉིན་རེ་ཞིང་དུས་གསུམ་དུ་མཆོད་པ་བྱ་ཞེས་སོ། །རབ་ཏུ་དབེན་པར་བཞག་ནས་ཀྱང༌། །ཞེས་པ་མི་དག་མི་འདུ་བ་དབེན་པའི་གནས་སུ་ཕྱོགས་སུ་བཞག་ནས་དེའི་མདུན་དུ་བཟླས་པར་བྱ་ཞེས་པའོ། །འདི་མན་ཆད་བཟླས་བརྗོད་ཀྱི་ཆོ་གའི་མཚན་ཉིད་བཤད་དོ། །དེ་ལྟར་བཟླས་བརྗོད་བྱ་པའི་ཐབས་བཤད་དེ། རི་མོ་བཀྲམ་ནས་མཆོད་པ་བྱས་ཏེ། །ཞེས་པ་མདུན་དུ་རི་མོ་བཀྲམ་ནས་མཆོད་པ་བྱས་ནས་ཞེས་པའོ། །ཀུ་ཤའི་སྟན་ལ་ཟློས་པ་པོ་འདུག་ནས་ནི་ཞེས་པའོ། །མཉམ་པར་གཞག་ཅེས་པ་སེམས་རྩེ་གཅིག་ཏུ་ཞེས་སོ། །མགོ་ནི་རྨ་བྱ་བཞིན་བཀུག་སྟེ། །ཞེས་
པ་ལུས་དྲང་པོར་བསྲང་སྟེ་མགྲིན་པ་ཡིད་ཙམ་བཀུག་ལ་ཞེས་སོ། །རྩེ་གཅིག་སེམས་ཀྱིས་བཟླས་བྱས་ཏེ། །ཞེས་པ་དུས་གསུམ་དུ་ཟློས་པའི་ཚེ་མཚན་ཉིད་དེ་དང་སྦྱར་ཞེས་སོ། །དེ་ལྟར་འབུམ་ཕྲག་གསུམ་བཟླས་ནས། །བསྙེན་པ་བྱ་བའི་འོག་ཏུ་ནི། །ཞེས་པ་དེ་ལྟར་རི་མོ་བྲིས་པའི་འོག་ཏུ་རི་མོའི་མདུན་དུ་སུམ་འབུམ་བཟླས་ཏེ་བསྙེན་པ་བྱས་པའི་འོག་ཏུ་ཞེས་པའོ། །དེ་ནས་རི་ཁར་གནས་བཅས་ཏེ། །ཞེས་པ་དེ་ལྟར་བཟླས་པའི་འོག་ཏུ་རིའི་རྩེ་མོར་གནས་བཅས་ཏེ་ཟས་མི་བཟའ་བར་བསྙེན་པ་འབུམ་བྱའོ། །དེ་ལྟར་འབུམ་ཕྲག་བཅུའི་བཟླས་པ་བྱའོ། །འདི་མན་ཆད་བརྟུལ་ཞུགས་ཀྱི་ཆོ་ག་བཤད་དེ། དངོས་གྲུབ་མཆོག་དག་འདོད་པ་ཡིས། །ཞེས་དེ་ལྟར་བཟླས་པ་བྱས་པའི་འོག་ཏུ་ཁྲོ་བོའི་རྒྱལ་པོའི་དངོས་གྲུབ་མཆོག་འདོད་པའི་སྒྲུབ་པ་པོས་དེའི་འོག་ཏུ་ཁྲོ་བོའི་བརྟུལ་ཞུགས་སྤྱད་པར་བྱའོ་ཞེས་པའོ། །རྟོག་པ་ལས་གསུངས་མི་འདོད་ན། །ཞེས་པ་རྟོག་པ་ལས་གསུངས་པའི་དངོས་གྲུབ་མཆོག་མི་འདོད་པའི་སྒྲུབ་པ་པོས་ནི་སྤར་གསུངས་པའི་ཚུལ་དུ་སྔོན་དུ་བསྙེན་པ་འབུམ་ཕྲག་བཅུར་བཟླས་ནས། རྟོག་པ་འདི་ལས་གསུངས་པའི་དངོས་གྲུབ་འབྲིང་དང༌། ཐ་མ་བསྒྲུབ་པར་གསུངས་སོ། །འབྲིང་དང་ཐ་མའི་དངོས་གྲུབ་དག །ཅེས་པ་འོག་ནས་བཤད་པའི་གཞུང་དང་སྦྱར་ན་བསྙེན་པ་སུམ་འབུམ་བཟླས་ཏེ་འབྱུང་བ་བཟླས་པ་བྱའོ། །བརྟུལ་ཞུགས་མེད་ཀྱང་ལེགས་པར་ནི། །བསྒྲུབ་ན་དངོས་གྲུབ་ཐོབ་པར་འགྱུར། །ཞེས་པ་དངོས་གྲུབ་འབྲིང་དང༌། ཐ་མ་གཉིས་ནི་ཁྲོ་བོའི་བརྟུལ་ཞུགས་མ་སྤྱད་ཀྱང་སྔོན་དུ་བསྙེན་པ་བྱས་ནས་ཆོ་ག་བཞིན་དུ་བསྒྲུབས་ན་དངོས་གྲུབ་ཐོབ་པར་འགྱུར་རོ། །བརྟུལ་ཞུགས་དེས་ནི་མཆོག་ཀྱང་འགྲུབ། །ཅེས་པ་ཁྲོ་བོའི་བརྟུལ་ཞུགས་སྤྱད་པའི་སྒྲུབ་བ་བོས་ནི་དངོས་གྲུབ་མཆོག་ཐོབ་པར་འགྱུར་རོ་ཞེས་སོ། །འདི་མན་ཆད་དཔའ་བོའི་བརྟུལ་ཞུགས་སྤྱད་པ་བསྟན་ཏེ། ལམ་མི་བཟུར་དང་མི་སྨྲ་བ། །ཞེས་པ་བགྲོད་དཀའ་བ་དང༌། མི་བདེ་བའི་ལམ་ནས་འགྲོ་བའི་ཚེ། མི་དང༌། རྟ་དང༌། གླང་པོ་ཆེ་ལ་སོགས་པ་གང་ཡང་རུང་བ་ཅིག་ལམ་དུ་ཕྲད་ན། བདག་ཁྲོ་བོའི་རྣལ་འབྱོར་དང་ལྡན་པས་བདག་ལམ་མི་བཟུར་བར་མི་འབྱོལ་ལ་དེའི་ཚེ་མི་སྨྲ་བར་བྱའོ་ཞེས་སོ། །སློང་མོ་ཟ་ཞིང་དབང་པོ་
བསྡམས། །ཞེས་པ་སློང་མོའི་ཟས་ཟ་ཞིང་འགྲོ་བའི་ཚེ་ཡང་ཡུལ་ལ་མི་གཡེང་བར་དབང་པོ་བསྡམ་མོ་ཞེས་པའོ། །སེང་ལྡེང་དབྱུག་བ་འདོམ་གང་པ། །ཞེས་པ་སེང་ལྡེང་ལས་བཞོགས་པ་ཐ་ལམ་པ་སྲ་བ་བཟང་པོ་སྡུ་གུ་འདོམ་གང་པ་བདག་གི་ལག་ཏུ་ཐོགས་སོ།། དེ་ནི་དཔའ་བོའི་རྐྱེན་དུ་ཡོངས་སྐྱིས་སྲིད་པའི་ཕྱིར་རོ། །འགྲོ་བའི་ཚེ་རྩ་བའི་སྔགས་བཟླས་སོ། །བགྲོད་དཀའ་བ་ཡི་ལམ་ནས་འགྲོ། །ཞེས་པ་ལམ་ཐམས་ཅད་ཐ་ལམ་དང་ལམ་པོ་ཆེ་དང་ཐང་བུ་ས་བདེ་བ་དག་ལ་འགྲོ་བར་མི་བྱ་སྟེ། །གལ་ཏེ་དེ་དག་ཏུ་སོང་ན་བདག་གམ་ཕ་རོལ་པོ་རྣམས་མ་རུང་བར་འགྱུར་བས་ནི་མི་དག་མི་འདུ་བ་དང་བགྲོད་དཀའ་བ་ནས་འགྲོ་སྟེ། བརྒྱ་ལ་མི་དང༌། རྟ་དང༌། གླང་པོ་ཆེ་དང༌། གང་ཡང་རུང་བ་དང་ཕྲད་པར་གྱུར་ན་ལམ་མི་བཟུར་བར་དྲང་ཐད་དུ་འགྲོ་བའོ་ཞེས་སོ། །བརྟུལ་ཞུགས་དག་ཅེས་པ་ཁྲོ་བོའི་རྒྱལ་པོ་ཞེས་སོ། ཁྲོ་བོའི་གཟུགས་ཀྱིས་ཟླ་དྲུག་ཏུ། །ཞེས་པ་ཁྲོ་བོའི་སྦྱོར་བ་དང་ལྡན་པའི་གཟུགས་ཀྱིས་ཟླ་བ་དྲུག་ཏུ་སྒྲུབ་པ་པོ་གང་གིས་ཡང་དག་པར་སྤྱོད་ན་སྒྲུབ་པ་པོ་དེས་ནི་མཆོག་ཀྱང་ཐོབ་པོ་ཞེས་སོ། །འདི་མན་ཆད་བརྟུལ་ཞུགས་སྤྱད་ཟིན་ནས་བསྒྲུབ་པ་ལ་འཇུག་པ་ཞེས་བཤད་དོ། །དེ་ནས་བསྒྲུབ་པ་ལ་འཇུག་ན། །ཞེས་པ་དེ་ལྟར་སྔགས་པས་སྔར་བརྟུལ་ཞུགས་སྤྱད་ནས་དེའི་འོག་ཏུ་བསྒྲུབ་པ་ལ་ཞུགས་ཏེ། བསྒྲུབ་ན་ཐེ་ཚོམ་མེད་པར་དངོས་གྲུབ་དམ་པ་ཐོབ་པར་འགྱུར་རོ། །དེ་ལྟར་སྤྱད་པ་དེའི་དངོས་གྲུབ་དམ་པ་མྱུར་དུ་འགྲུབ་བོ་ཞེས་པའོ། །བསྒྲུབ་པ་ལ་ནི་བདུད་ཀྱི་རིས། །ཞེས་པ་སྔགས་བ་བརྟུལ་ཞུགས་སྤྱོད་པའི་ཚེ་དག་ན་བགེགས་འདི་དག་འབྱུང་ངོ་ཞེས་སོ། །གཟུགས་དག་དང་ཞེས་པ་ལྷ་མོ་བཟང་མོ་ཞེས་སོ། །དེ་བཞིན་གཞན་གྱིས་ལུས་སུ་ནི། །ཞེས་པ་གཞན་དྲ་བའི་གཟུགས་སུ་སྟོན་ཞེས་པའོ། །དབང་པོ་བསྡམས་ལ་འཚེ་བར་བྱེད། །ཅེས་པ་བརྟུལ་ཞུགས་སྤྱོད་པའི་སྔགས་པ་དས་ཞེས་སོ། །དེ་དག་ལྷན་ཅིག་སྨྲ་མི་བྱ། །ཞེས་པ་དེ་ལྟ་བུའི་གཟུགས་སུ་སྟོན་པ་དེ་དག་དང་ཅུང་ཟད་ཙམ་ཡང་ཆགས་པ་མི་སྐྱེད་དོ། །བྱང་ཆུབ་སེམས་དང་མཉམ་ལྡན་པས། །ཞེས་པ་བརྟུལ་ཞུགས་སྤྱད་པའི་བདག་ཉིད་བྱང་ཆུབ་སེམས་དང་ལྡན་པར་བྱས་ནས་ཁྲོ་བོ་དེའི་སྡགས་བརྗོད་པར་བྱའོ། །
སྤྱོད་ཅིང་དེ་ལྟར་འགྲོ་བ་ན། །ཞེས་སོ། །གཞན་ཡང་ཤིན་ཏུ་མཚར་བ། །ཞེས་པ་གཞན་ཡང་ཤིན་དུ་ངོ་མཚར་ཆེ་བའི་གཟུགས་དག་ཅེས་པའོ། །བདེ་གཤེགས་བསམ་པ་མཐོང་ན་ནི། །ཞེས་པ་བརྟུལ་ཞུགས་གང་སྤྱོད་པའི་ཞེས་སོ། །དེ་དག་གིས་ནི་འཇིགས་མི་བྱ། །ཞེས་པ་བགེགས་དེ་དག་གིས་ཞེས་སོ། །གནོད་ཅིང་སྐྲག་པར་བྱེད་ན་ནི། །ཞེས་པ་བརྟུལ་ཞུགས་སྤྱོད་པ་དེ་དག་ཉིད་ལ། བགེགས་དེ་དག་གིས་ཞེས་པའོ། །བདེ་གཤེགས་ཀྱི་ནི་བཀའ་གཅོག་པ། །ཞེས་པ་དེ་ལྟར་བགེགས་བྱེད་པ་ཉིད་བཀའ་གཅོག་པ་ཡིན་ན་ཞེས་པའོ། །ཁྲོ་བོ་བདག་ཉིད་ནི་རྣམ་པར་འཇིག་ཅེ་སྤ་བགེགས་ཉིད་ཅེས་སོ། །བདེ་གཤེགས་བསམ་པ་ཡིད་བསྒོམས་པའི། །ཞེས་པ་བྱང་ཆུབ་ཀྱི་སེམས་ཞེས་པའོ། །དཔའ་བོ་དཔའ་བོ་གཞན་དུ་མིན། །ཞེས་པ་སེམས་ཅན་དཔའ་བོས་བརྟུལ་ཞུགས་འདི་སྤྱད་པར་བྱའི་ངན་སོང་ཕལ་པ་གཞན་གྱིས་ནི་སྤྱད་པར་མི་བྱའོ། །བསྒྲུབ་པའི་མཆོག་རྣམས་འདོད་པ་ཡིས། །ཞེས་པ་ལ་སོགས་པ་དངོས་གྲུབ་མཆོག་འདོད་པའི་སྒྲུབ་པ་པོས་ཁྲོ་བོའི་བརྟུལ་ཞུགས་གསུངས་པ་འདི་ནན་ཏན་གྱིས་ཁྲོ་བོའི་བརྟུལ་ཞུགས་སྤྱད་ལ་བརྟན་པར་བསྒྲུབ་པར་བྱའོ། །ཁྲོ་བོའི་བརྟུལ་ཞུགས་སུ་གཏོགས་པ་བདུན་པའོ། །བདུན་པའི་བཤད་པ་ཟིན་ཏེ།། །།འདི་མན་ཆད་རྩ་བའི་རྟོག་པར་གཏོགས་པའི་ལེའུ་འཆད་དོ། །དེ་ལ་དང་པོར་སྔོན་དུ་བསྙེན་པ་དང༌། བརྟུལ་ཞུགས་མ་སྤྱད་པ་བཟླས་པ་དང༌། མཆོད་པ་འབའ་ཞིག་བྱས་པས་དངོས་གྲུབ་འབྲིང་དང་ཐ་མ་གཉིས་འགྲུབ་པར་འགྱུར་བ་དེ་བཤད། རྩ་བའི་རྟོག་པར་གཏོགས་པའི་ལེའུ་འདི་དངོས་གྲུབ་གསུམ་འབྱུང་སྟེ། འབྲིང་དང་ཐ་མ་གཉིས་ནི་སྔོན་དུ་བསྙེན་པ་དང་བརྟུལ་ཞུགས་མ་སྤྱད་པར་བཟླས་བརྗོད་དང་མཆོད་པ་འབའ་ཞིག་བྱས་བས་འགྲུབ། དངོས་གྲུབ་མཆོག་རྣམས་ལ་ནི་སྔོན་དུ་བསྙེན་པ་བརྟུལ་ཞུགས་སྤྱོད་པས་འགྲུབ་སྟེ། དེ་ཡང་དངོས་གྲུབ་རྣམ་པ་བཅོ་ལྔ། ལྷའི་མཚོན་ཆའི་དངོས་གྲུབ་དང༌། རོ་ལངས་ཀྱི་དངོས་གྲུབ་དང༌། ཨན་ཛ་ན་ལ་སོགས་པའི་མིག་བསྐུལ་བའི་དངོས་གྲུབ་དང༌། མི་རོའི་གོས་བསྒྲུབ་པ་དང༌། གནོད་སྦྱིན་མོའི་དངོས་གྲུབ་དང༌།
ཤ་ཟ་མོ་སྒྲུབ་པའི་དངོས་གྲུབ་དང༌། ཀླུའི་བུ་མོའི་དངོས་གྲུབ་དང༌། ལྷ་མ་ཡིན་གྱི་བུ་མོའི་དངོས་གྲུབ་དང༌། ཤ་ཆེན་པོ་བཙོང་བ་དང༌། བ་དན་ལ་བསྒྲུབ་པ་དང༌། ཐལ་བ་ལ་བསྒྲུབ་པ་དང༌། སྣག་ཚ་ལ་བསྒྲུབ་པ་དང༌། བཙག་ལ་བསྒྲུབ་པ་དང༌། སོར་གདུབ་ལ་བསྒྲུབ་པ་དང༌། ཡུངས་ཀར་ལ་བསྒྲུབ་པ་འདི་རྣམས་ཀྱིས་བཤད་དོ། །ཇི་སྐད་གསུངས་པའི་གཟུགས་རྣམས་ནི། །ཞེས་པ་གོང་དུ་བཤད་པའི་སྐུ་གཟུགས་རྣམས་ཞེས་སོ། །མེ་ཏོག་ཇི་སྐད་གསུངས་དེ་བཞིན། །ཞེས་པ་འོག་ནས་གསུངས་པའི་མཆོད་པའི་མེ་ཏོག་ཅེས་སོ་རྟག་ཏུ་གང་དུ་མཆོད་བྱེད་ན། །ཞེས་པ་ལ་སོགས་པ་སྔགས་པ་གང་ཞིག་མཆོད་པ་བྱེད་ན་ལྷའི་བརྟུལ་ཞུགས་གོང་དུ་བཤད་པ་དེ་དང༌། སྐུ་གཟུགས་ཀྱི་སྤྱན་སྔར་སུམ་འབུམ་བཟླས་པ་དང༌། རི་རྩེར་འབུམ་བཟླས་པ་ཞེས་བྱ་བའི་བསྙེན་པ་དེ་བྱ་མི་དགོས་སོ། །དྲན་པ་ཅམ་ནི་འབའ་ཞིག་གིས། །ཞེས་པ་དུས་གསུམ་དུ་མཆོད་པ་བྱེད་པ་དང༌། བཟླས་པ་བྱེད་པའི་སྒོ་ནས་གང་དང་གང་བསྒྲུབ་པར་འདོད་པ་དེ་དག་ཡིད་བཟླས་པ་མཆོད་པ་བྱེད་པ་འབའ་ཞིག་གིས་ཞེས་སོ། །རྒྱལ་སྲིད་སྦྱིན་པའི་གཟུགས་ལ་ནི། །ཞེས་པ་ནས། གསེར་གྱི་སྐུ་གཟུགས་ལ་ཞེས་པའོ། །ཙནྡན་གུར་ཀུམ་ཨ་ཀ་རུ། །ཞེས་པ་དེ་ལྟར་ཀུན་བྱུག་པའི་ཚེ་ཡང་བྱུག་སྤོས་ཀྱི་སྔགས་ཀྱིས་བརྗོད་ཅིང་བསྐུ་བར་བྱའོ། །འདི་གསུམ་གྱི་ལྡེ་གུ་ལ་བྱུག་སྤོས་ཀྱི་སྔགས་ཀྱིས་གདབ་བོ་ཞེས་སོ། །ཅི་རིགས་པར་ནི་བྱུགས་ནས་ཀྱང༌། །ཞེས་དབུ་དང་སྤྱན་དག་ཏུ་མི་བསྐུ་བར་གཞན་ནི་ཅི་རིགས་པར་བསྐུའོ། །རིག་མཛེས་ཞེས་པ་པདྨ་དཀར་པོ་ཞེས་སོ། །ཀེ་སར་ནི་མེ་ཏོག་ཅེས་སོ། །མཆོད་གནས་དུས་གསུམ་དུ་ཞེས་སོ། །བདུག་པ་མར་བཅས་པའི་ཞེས་པ་མར་དང་གུ་གུལ་དུ་བཅས་པའི་བདུག་པ་ཞེས་པའོ། །དེ་ལྟར་བྱས་ན་ཁྱིམ་པ་དང༌། །ཞེས་པ་རབ་ཏུ་བྱུང་པས་བྱས་པ་ལྟ་སྨོས་ཀྱང་ཅི་དགོས་ཞེས་སོ། །ཁྲོ་བོའི་རྒྱལ་པོའི། །དེ་ལས་སེམས་ནི་བརྒྱ་བརྗོད་དེ་།ཞེས་པ་དུས་གསུམ་དུ་རྩ་བའི་སྔགས་ཞེས་པའོ། །ཅི་འབྱོར་པ་ཡི་མཆོད་པའི་བཤོས། །ཞེས་པ་སྤྱིའི་གཞུང་སུ་སི་ཏི་ཀ་རའི་ནང་ནས་འབྱུང་བའི་བཤོས་ཅི་འབྱོར་པས་ཞེས་པའོ། །དེ་ཡི་སྤྱན་སྔར་
དབུལ་བར་བྱ། །ཞེས་པ་ཁྲོ་བོའི་སྐུ་གཟུགས་དེའི་སྤྱན་སྔར་ཞེས་སོ། །སྔར་བསྙེན་ལ་སོགས་མེད་ཀྱང་སླ། །ཞེས་པ་བརྟུལ་ཞུགས་བྱས་ཏེ་སྐུ་གཟུགས་སྤྱན་སྔར་སུམ་འབུམ་དུ་བཟླས་པ་དང༌། རིའི་རྩེར་འབུམ་བཟླས་ཞེས་བྱ་བ་མི་དགོས་ཞེས་པའོ། །དེ་ལྟར་སྦྱོར་བ་ཟླ་བ་དྲུག་གིས་ཞེས་པ་ཚུལ་དེ་ལྟར་ཉིན་རེ་དུས་གསུམ་དུ་རྒྱུན་དུ་བྱེད་པའི་ཟླ་བ་དྲུག་གི་བར་དུ་བྱས་ན། རྐུན་པོ་དང༌། དགྲ་དང༌། རྒོལ་བ་མེད་པའི་རྒྱལ་སྲིད་ཀྱང་ཐེ་ཚོམ་མེད་པར་ཐོབ་པར་འགྱུར་རོ། །འདི་ནི་དངོས་གྲུབ་འབྲིང་ངོ༌། །ཉིན་གཅིག་བཞིན་དུ་མཆོད་པ་ཐོབ་པར་འགྱུར། །ཞེས་པ་གོང་དུ་བཤད་པའི་ཚུལ་དེ་ལྟར་མཆོད་ཅིང་བཟླས་པ་བྱས་ཀྱང་རྒྱལ་སྲིད་མ་གྲུབ་པར་གྱུར་ན། ཉིན་གཅིག་བཞིན་མཆོད་ཅིང་བཟླས་ན་ཡུལ་ཐོབ་པར་འགྱུར་རོ། །འདི་དག་དངོས་གྲུབ་ཐ་མའོ། །ལས་འདི་གདོན་མི་ཟ་བར་ནི། །ཞེས་པ་ཚུལ་དེ་ལྟར་བྱས་པའི་ལས་དེ་ནས་གདོན་མི་ཟ་བར་ཞེས་བྱའོ། །རྙེད་པར་འགྱུར་ཞེས་པ་གསེར་གྱི་དོང་ཙེ་འབུམ་ཞེས་པའོ། །ལོངས་སྤྱོད་སྦྱིན་པའི་གཟུགས་ལ་ནི། །ཞེས་པ་དངུལ་གྱི་སྐུ་གཟུགས་ལ་ཞེས་སོ། །ཙནྡན་གུར་ཀུམ་ཨ་ཀ་རུས། །ཞེས་པ་འདི་གསུམ་གྱི་འདེ་གུས་སྔགས་པས་སྐུ་གཟུགས་ལ་ལེགས་པར་བསྐུས་ནས་ནི་ཞེས་པའོ། །མེ་ཏོག་དཀར་པོའི་ཕྲེང་བས་རབ་ཏུ་མཆོད། །ཅེས་པའོ། །མེ་ཏོག་དཀར་པོའི་ཕྲེང་བ་ཡིས། །ཞེས་པ་ཡོན་ཏན་དང་ལྡན་པའི་མེ་ཏོག་དཀར་པོ་གང་ཡང་རུང་བ་ཞེས་པའོ། །དུས་གསུམ་དུ་ཉིན་གཅིག་བཞིན་དུ་མཆོད་པ་བྱས་ནས་ཞེས་པའོ། །མར་དང་ལྡན་པའི་གུ་གུལ་ལམ། །ཞེས་པ་མར་དང་གུ་གུལ་སྦྱར་བའི་བདུག་པས་ཞེས་པའོ། །ཀུན་དུ་རའི་ཅེ་པོག་དཀར་པོས་བདུག་པའང་དབུལ། །ཞེས་སོ། །མེ་ཏོག་ཨ་ཏི་མུག་ཏ་ཀ །ཞེས་པ་ཚུལ་དེ་ལྟར་ཟླ་བ་དྲུག་གི་བར་དུ་མཆོད་པ་དང༌། བཟླས་པ་བྱས་ནས་དེའི་འོག་ཏུ་མཇུག་ཏུ་མེ་ཏོག་ཨ་ཏི་མུག་ཏ་ཀ་རེ་རེ་ལ་སྔགས་ལན་རེ་རེ་བསྐུལ་ཚིག་དང་ལྡན་པར་བཟླས་པའི་མེ་ཏོག་འབུམ་སྐུ་གཟུགས་དེ་ལ་དབུལ་བར་བྱའོ། །དེ་ཡི་མཇུག་ཏུ་འབྱུང་གྱུར་ཏེ། །ཞེས་པ་དེ་ལྟར་ཆོ་ག་བྱས་པའི་འོག་ཏུ་ལོངས་སྤྱོད་ཅེས་སོ། །འདི་ལ་དཔྱད་པ་དགོས་པ་མེད། །ཅེས་པ་ཆོ་ག་འདི་ལྟར་བྱས་ན་དཔྱད་ཅིང་ཐེ་ཚོམ་མེད། །ཐེ་ཚོམ་མི་དགོས་པར་ལོངས་
སྤྱོད་ཐོབ་པར་འགྱུར་ཞེས་པའོ། །ནད་སེལ་བ་ཡི་གཟུགས་ལ་ནི། །ཞེས་པ་འཁར་བའི་སྐུ་གཟུགས་ལ་ཞེས་པའོ། །ཙནྡན་དམར་པོའི་འདེ་གུས་བསྐུས་ནས་ཀྱང་ཞེས་པའོ། །ཐང་ཤིང་གི་ནི་བདུག་པ་དག །ཕུལ་ནས་མེ་ཏག་གཙང་མ་དག །ཅེས་པ་ཇི་སྙེད་པའི་མེ་ཏོག་གཙང་མ་ཡོན་ཏན་ལྡན་པས་ཆོ་ག་འདི་ལྟར་དུས་གསུམ་དུ་མཆོད་པར་བྱའོ། །བདུག་པའམ་ཐང་ཤིང་གི་ཐང་ཆུ་ལས་བདུག་པར་བྱའོ། །ལ་ལ་ན་རེ་ཐང་ཤིང་ཉིད་ཆུ་ཐགས་སུ་བཏགས་པའི་ཕྱེ་མ་ལས་བདུག་པར་བྱའོ་ཞེས་སོ། །མཆོད་པ་བྱས་ནས་ཅི་འབྱོར་པའི། །ཞེས་པ་ལ་སོགས་དེ་ལྟར་ཉིན་རེ་ཞིང་དུས་གསུམ་དུ་ཟླ་བ་དྲུག་གི་བར་དུ་བཟླས་པ་དང༌། མཆོད་པ་བྱས་ནས་དེའི་མཇུག་ཏུ་བདག་གམ་གཞན་གྱི་ནད་ཆེན་པོ་ཞི་བ་དང་ནད་མེད་པར་གྱུར་ཅིག་པའི་ཚུལ་དུ་བསྐུལ་ཚིག་དང་ལྡན་པས་ཟླ་བ་གཅིག་གི་བར་དུ་བྱས་ན་སུ་ཡང་རུང་ནད་ཆེན་པོ་དེ་བྱང་བར་འགྱུར་རོ་ཞེས་པའོ། །འདོད་དགུ་སྦྱིན་པའི་གཟུགས་ལ་ནི། །ཞེས་པ་ཟངས་དང་ར་གན་གྱི་སྐུ་གཟུགས་དག་ལ་ཞེས་སོ། །དེ་ལྟར་ཡང་ནི་མཆོད་བྱས་ན། །ཞེས་པ་ལ་སོགས་པ་ལས་གང་དང་གང་དུ་བསྒྲུབ་པ་ལ་མཆོད་པ་གང་དང་གང་གིས་མཆོད་པར་རིག་པ་དེ་དག་གོང་དུ་སྔར་བཤད་པའི་ཚུལ་བཞིན་དུ་སོ་སོར་མཆོད་པས་ཉིན་རེ་དུས་གསུམ་དུ་མཆོད་ཅིང་བཟླས་པ་ཟླ་བ་དྲུག་གི་བར་དུ་བྱའོ། །སྔགས་བཟླས་བརྗོད་བྱེད་པས་སྔགས་པ་གང་དང་གང་བྱ་བ་དེ་དང་དེའི་བསྐུལ་ཚིག་བཅུག་ལ་ལས་བསྒྲུབས་ན་ཞི་བ་དང༌། རྒྱས་པ་ལ་སོགས་པ་ལས་གང་བསྒྲུབས་པ་དེ་འགྲུབ་པར་འགྱུར་ཞེས་པའི་ཐ་ཚིག་གོ ། སྔགས་པའི་ཡིད་དང་མཐུན་པའི་འདོད་པའི་དོན། དེ་ཡང་དེ་ལྟར་ཡང་དག་བསྒྲུབ། །ཅེས་པ་དེ་ཡང་གོང་དུ་བཤད་པའི་ཚུལ་བཞིན་དུ་བསྒྲུབ་པོ་ཞེས་སོ། །སྐུ་གཟུགས་རབ་ཏུ་མཆོད་བྱས་ནས། ཞེས་པ་གནས་གང་ཡང་རུང་བར་སྐུ་གཟུགས་ལ་མཆོད་པ་བྱ་ཞིང་བཟླས་པ་ཟླ་བ་དྲུག་གི་བར་དུ་བྱའོ། །སྐུ་གཟུགས་ཉིན་གཅིག་བཞིན་དུ་ནི། །དུས་གསུམ་དུ་ཞེས་པའོ། །དེ་ལྟར་ཀུན་དུ་རབ་མཆོད་ནས། །ཞེས་པ་ཟླ་བ་དྲུག་གི་ནང་ཚུན་ཆད་དུ་ཁྲོ་བོའི་སྔགས་ཞེས་པའོ། །སྔགས་པ་བློ་དང་ལྡན་པས་མཆོད་པ་དང་བཟླས་པ་དང་ཀུན་བྱས་ན་ཞེས་པའོ། །བསྒྲུབ་པ་ཉིད་ནི་མ་ཐོབ་ཀྱང༌། །
ཞེས་པ་དངོས་གྲུབ་འབྲིང་ཞེས་པའོ། །དངོས་གྲུབ་ཕྲ་མོ་ཐོབ་པར་འགྱུར། །ཞེས་པ་ཞི་བ་དང༌། རྒྱས་པ་དག་གིས་ལས་ནུས་པའི་དངོས་གྲུབ་ཐོབ་པར་འགྱུར་རོ་ཞེས་པའི་ཐ་ཚིག་གོ །འདི་མན་ཆད་དངོས་གྲུབ་མཆོག་བསྒྲུབ་པ་བཤད་དེ། །དེ་ལ་དངོས་གྲུབ་མཆོག་ནི་སྔོན་དུ་བསྙེན་པ་དང༌། བརྟུལ་ཞུགས་སྤྱད་པས་འགྲུབ་སྟེ། དེ་ཡང་དངོས་གྲུབ་རྣམ་པ་བཅོ་ལྔའོ། །དེ་ལ་དང་པོ་ལྷའི་མཚོན་ཆ་ཞེས་པའི་དངོས་གྲུབ་བཤད་དོ། །ཡང་ན་ཁྲོ་བོའམ་ཕྱག་རྒྱ་རུང༌། །ཞེས་པ་ཁྲོ་བོའི་རྒྱལ་པོའི་རི་མོ་དང༌། ཕྱག་རྒྱའི་གཟུགས་ཀྱི་རི་མོ་གཉིས་དང༌། རི་མོ་གསུམ་ལས་གང་ཡང་རུང་བ་ཅིག་ཅེས་པའོ། །ལྷ་ཡི་བརྟུལ་ཞུགས་དེས་ཀྱང་བསྒྲུབ། །ཅེས་པ་ལྷའི་བརྟུལ་ཞུགས་སྤྱད་པས་དངོས་གྲུབ་མཆོག་བསྒྲུབ་པར་བྱའོ་ཞེས་པའོ། །དེ་ནས་གཞན་ཡང་བརྟུལ་ཞུགས་ཀྱིས། །ཞེས་པ་བརྟུལ་ཞུགས་སྤྱད་པ་གང་དངོས་གྲུབ་མཆོག་བསྒྲུབ་པར་འདོད་པ་དེའི་ཆོ་ག་རྒྱུད་ཆེན་པོ་ལས་མདོར་བསྡུས་ནས་བཤད་པར་བྱའོ་ཞེས་པའི་དོན་ཏོ། །འདི་མན་ཆད་མཚོན་ཆའི་དངོས་གྲུབ་འཆད་དེ། དེ་ནས་ཁྲོ་བོའི་གཙོ་བོ་ཡི། །ཞེས་པ་ནས་བསྟན་ཏེ། དེ་ནས་ཁྲོ་བོའི་གཙོ་བོ་ཡི། །ཞེས་པ་ཁྲོ་བོའི་རྒྱལ་པོ་དེའི་ཕྱག་རྒྱའི་མཚོན་ཆར་གཏོགས་པའི་ཏྲི་ཤཱུལ་དེ་བསྒྲུབ་ན་ཞེས་པའོ། །ཏྲི་ཤཱུལ་ཤིན་ཏུ་གསལ་བསྒྲུབ་ན། །ཞེས་པ་དངོས་གྲུབ་བསྒྲུབ་པའི་རྫས་མཚན་ཉིད་དང་ལྡན་པ་སྐྱོན་མེད་པ་ལ་བྱའོ་ཞེས་པའོ། །ཨུར་མོའི་ལྕགས་ལས་བྱས་པ་ཡི། །ཞེས་པ་པུ་ཤ་ར་ལོ་ཧི་ཞེས་བྱ་བ་སྟེ། ལྕགས་ཞུན་མ་ལས་བྱས་པའམ། ལྕགས་ཁུང་ནས་བྱུང་བའི་པུ་ཤ་ར་ལོ་ཧི་ལས་བྱས་ཏེ་དཔེར་ན་ཟེ་སྨུག་གུའམ་རུ་ཤལ་ལྟ་བུ། ལྕགས་ཁུང་ནས་བྱུང་བའི་པུ་ཤ་ར་ལོ་ཧིའི་ལྕགས་ལས་བྱའོ། །ཏྲི་ཤཱུལ་སོར་ནི་བཅུ་གསུམ་བ། །རྣོ་ལ་བཟང་ཞིང་རབ་ལེགས་པ། །ཞེས་པ་ཏྲི་ཤཱུལ་དེ་ཡང་རྩེ་མོ་དང་ཡུ་བའི་བར་སྲིད་དུ་སོར་བཅུ་ཕྱིན་པར་བྱའོ། །རྩེ་གསུམ་གདེངས་པོ་དང་གཉིས་ཏེ་སོར་བརྒྱད་ཙམ་དུ་བྱའོ་ཞེས་སོ། །རིའི་རྩེ་ཞེས་པ་གནས་སོ། །རི་མོ་བཟང་པོ་དེ་བྲིས་ནས། །ཞེས་པ་རི་མོའི་སྐུ་གཟུགས་གང་ཡང་རུང་བ་ཅིག་ཅེས་པའོ། །རྣོ་ལ་བཟང་ཞེས་པ་ཏྲི་ཤཱུལ་དེ་ལ་ཡང་ཐོག་མར་དང་པོར་ཏྲི་ཤཱུ་ལའི་མཚན་ཉིད་བཤད་པ་བཞིན་བྱས་ནས་རིའི་རྩེ་ཞེས་
པ་བསྒྲུབ་པའི་གནས་དེར་འདུག་ཅེས་པའོ། །དེ་ནས་མཆོད་པ་རྒྱ་ཆེན་དང༌། །ཞེས་པ་སྔར་ཡི་དགས་ཕལ་པོ་ཆེའི་དཀྱིལ་འཁོར་དུ་མཆོད་པ་བཤད་པ་བཞིན་དུ་རྒྱས་པར་བྱ་ཞེས་པའོ། །ཕྱོགས་ཀྱི་གཏོར་མ་ཀུན་དུ་བྱ། །ཞེས་པ་དཀྱིལ་འཁོར་གྱི་ཕྱི་རིམ་དུ་དགོད། ཕྱི་རོལ་ཕྱོགས་སུ་ཡང་གཏོར་རོ། །ཞེས་སོ། །ཏྲི་ཤཱུལ་མེ་ཏོག་དཀྱིལ་འཁོར་ལ། གཞན་ནས་མེ་ཏོག་དག་གིས་མཆོད། །ཅེས་པ་ཡི་དགས་ཕལ་པོ་ཆེའི་དཀྱིལ་འཁོར་གྱི་དབུས་སུ་མེ་ཏོག་བཀྲམ་པ་དེའི་སྟེང་དུ་ཏྲི་ཤཱུལ་བཞག་ལ། ཏྲི་ཤཱུལ་ཡང་མེ་ཏོག་གིས་མཆོད་དོ་ཞེས་པའོ། །ཙནྡན་དམར་པོས་ཀུན་བསྐུས་ཤིང༌། །ཞེས་པ། ཏྲི་ཤཱུལ་ཙནྡན་དམར་པོའི་འདེ་གུས་ཞེས་སོ། །མེ་ཏོག་དག་གིས་ཐམས་ཅད་བརྒྱན། །ཞེས་པ་མེ་ཏོག་གི་ཕྲེང་བས་བརྒྱན་ཞེས་སོ། །ཆོ་ག་བཞིན་དུ་ལག་གིས་བཟུང༌། །ཞེས་པ་ཏྲི་ཤཱུ་ལའི་ཡུ་བ་ལག་པ་གཡས་པས་བཟུང་ཞེས་པའོ། །སྒྲུབ་པ་པོ། །རི་མོ་ལ་ནི་མངོན་ཕྱོགས་འདུག །ཅེས་པའོ། །ཁྲོ་བོའི་མཆོག་གི་སྔགས་དག་གིས། །ཏྲི་ཤཱུ་ལ་ནི་མཁས་པས་བཟླས། །ཞེས་པ་སྒྲུབ་པ་པོས་ལྷ་གང་བསྒོམ་པར་ཟད་དོ། །ཁྲོ་བོའི་རྒྱལ་པོ་བསྒོམ་ན་རྩ་བའི་ཡི་གེ་བཅུ་བདུན་པ་བཟླས་སོ། །བེ་ཏ་ལཱི་བསྐོམ་ན་ཁྲོ་བོའི་རྒྱལ་པོ་རོ་ལངས་ཀྱི་བཀའ་བརྒྱན་པའི་སྔགས་མང་པོ་བཟླས་སོ། །བེ་ཅོན་ཕྱག་རྒྱའི་གཟུགས་བསྒོམ་ན། བེ་ཅོན་གྱི་ཕྱག་རྒྱའི་སྔགས་བཟླས་སོ། །ཞེས་པའོ། །དེ་ཡི་ཉེས་པ་སྦྱང་བའི་ཕྱིར། །ཏྲི་ཤཱུ་ལས་ཉེས་པ་དང་སྐྱོན་སྦྱང་བའི་ཕྱིར་ཞེས་པའོ། །བརྒྱ་རྩ་བརྒྱད་དུ་བཟླས་ནས་སུ། །ཞེས་པ་བདག་ཉིད་ལྷ་གང་བསྒོམ་པའི་སྔགས་ཀྱིས་ཞེས་པའོ། །ཁྲོ་བོ་མཆོག་གི་སྔགས་དག་གིས། །ཞེས་པ་ལ་སོགས་པ་དཀྱིལ་འཁོར་གྱི་མདུན་དུ་རྒྱས་པའི་ཞུགས་ཐབ་བྱས་ནས། ཐབ་དེར་མི་སྦར་ཏེ་གཟར་བུ་ཆུང་དུས་མར་ཁུ་བཅུས་ཤིང༌། ཏྲི་ཤཱུལ་ལ་གཏུགས་ནས་སྦྱིན་སྲེག་བྱའོ། །ཚུལ་དེ་ལྟར་སྦྱིན་སྲེག་སྟོང་བྱ་བ་ཡང༌། སྒྲུབ་པའི་རྫས་ཏྲི་ཤཱུ་ལ་དེ་གཟེངས་བསྟོད་ཅིང་བྱིན་དང་ལྡན་པར་བྱིན་གྱིས་བརླབ་པའི་ཕྱིར་རོ། །བདུག་སྲེག་སྦྱིན་སྲེག་སྟོང་བྱས་ནས། །ཞེས་པ་ཁ་ཅིག་ནི་སྒྲུབ་པའི་རྫས་ལ་མི་བདུག་པར་སྦྱིན་སྲེག་བྱ་བ་བཤད་དོ། །ལག་པས་བསྒྲེང་
སྟེ་བཟུང་ནས་སུ། །ཞེས་པ་དེའི་འོག་ཏུ་ཏྲི་ཤཱུ་ལ་ལག་པ་གཡོན་པས་བཟུང་ནས་བསྒྲེང་སྟེ་ཞེས་པའོ། །དཔའ་ཞིང་བརྟན་པའི་ཚུལ་འདུག་ནས། ཞེས་པ་ལ་སོགས་པ་མི་འཇིགས་པའི་ཚུལ་དུ་འདུག་ནས་ཞེས་བྱ་བའི་དོན་ཏོ། །ཁ་ཅིག་ནི་བསྒྲེང་སྟེ་སྒྲུབ་པར་བཤད། ཏྲི་ཤཱུ་ལ་མེ་འབར་བ་བྱུང་གི་བར་དུ་སྒྲུབ་པ་པོས་བཟླས་བརྗོད་བྱའོ། །ཏྲི་ཤཱུ་ལ་ཞེས་པ་དེ་འབར་བར་གྱུར་ན་ཞེས་སོ། །སྒྲུབ་པ་པོ་དེ་ནས་གྱེན་དུ་འཕར་བར་འགྱུར་ཞེས་པའོ། །སྔགས་ཀྱི་མཐུ་ཡིས་མིག་གསུམ་ལ། །ཞེས་པ་སྒྲུབ་པ་པོའི་མཐུས་ནི་སྒྲུབ་པ་པོའི་ལུས་ལྷའི་སྐུ་འདི་འདྲ་བར་འགྱུར་རོ། །རིག་འཛིན་གཞན་རྣམས་ཐམས་ཅད་ཀྱང༌། །ཞེས་པ་རིག་འཛིན་གྱི་རྒྱལ་པོར་གྱུར་པ་ལ་བྱའོ་ཞེས་སོ། །དེ་ལ་ཞེས་པ་གྲུབ་པ་དེ་ལ་ཞེས་སོ། །དབང་ཕྱུག་ཅེས་པ་ལོངས་སྤྱོད་ཅེས་པའོ། །འདོད་པའི་གཟུགས་ཅན་ཡིན་བཞིན་མྱུར། །ཞེས་པ་བདག་ཉིད་གང་འདོད་པའི་གཟུགས་སུ་བསྒྱུར་ལ་ཡིད་ལ་བསམ་པ་ཙམ་དུ་མགྱོགས་པར་འགྱུར་རོ། །དུ་བ་འབྱུང་ཞེས་པ་ཏྲི་ཤཱུ་ལ་དུ་བ་བྱུང་ན་ཞེས་པའོ། །དེ་ནས་སྒྲུབ་པ་པོ་དེ་ལུས་མི་སྣང་བར་འགྱུར་ཞེས་སོ། །འོན་ཏེ་ཏྲི་ཤཱུལ་དེ་ནི་ཚ་གྱུར་ན། །ཞེས་པའོ། །དཔུང་དང་ལྡན་ཞེས་པ་དམག་གི་དཔུང་དག་ལ་བྱ་ཞེས་པའོ། །གཡུལ་ངོ་ཆེན་པོ་ལ་སོགས་པར། །འཇིགས་ཤིང་སྐྲག་པ་སྐྱེད་པར་བྱེད། །ཅེས་བ་གདན་དེ་ལྟར་བུ་དག་ཏུ་བདག་སོང་ནས་དམག་གི་དཔུང་དང༌། ལྷ་མ་ཡིན་དང༌། གཡུལ་ངོ་ཆེན་པོའི་གནས་དེ་དག་ཐམས་ཅད་འཇིགས་ཤིང་སྐྲག་པར་བྱེད་དོ་ཞེས་པའོ། །དེ་ལྟར་དང་པོ་སྒྲུབ་པའི་མཆོག་ཅེས་བསྒྲུབ་པ་པོ་དངོས་གྲུབ་མཆོག་བསྒྲུབ་པ་དེ་ལྟར་དང་པོའི་ཚུལ་བཞིན་དུ་བཤད་པ་ཡིན་ནོ། །འོག་ནས་འབྱུང་བ་དང་སྦྱར་རོ། །རལ་གྲི་སྒྲུབ་པ་དག་བཤད་དེ། །ཨུར་མོའི་ལྕགས་ལས་བྱས་པའི་ཞེས་པ་སྔར་བཤད་པའི་ལྕགས་ལས་བྱས་པའི་རལ་གྲི་ཞེས་པའོ། །སྲིད་དུ་རལ་གྲི་སོར་ནི་བཅུ་གཉིས་པ། །ཞེས་པའོ། །ལེགས་པར་བྱས་ཤིང་འཕན་མེད་པ། །ཞེས་པ་མཚན་ཉིད་དང་ལྡན་པ་སྟེ་སྐྱོན་མེད་པ་ཞེས་པའོ། །མཆོད་པ་ལ་སོགས་སྔོན་བཞིན་དུ། །ཞེས་པ་ཡི་དགས་ཕལ་པོ་ཆེའི་དཀྱིལ་འཁོར་དུར་ཁྲོད་ཐལ་བས་བྲི་བ་དང༌། མཎྜལ་གྱི་སྟེང་དུ་མེ་ཏོག་བཀྲམ་པའི་
སྟེང་དུ་རལ་གྲི་བཞག་ནས་མཆོད་པ་བྱ་བ་ལ་སོགས་པ་སྔར་བཤད་པ་བཞིན་ནོ་ཞེས་པའོ། །བདུག་པའི་སྦྱིན་སྲེག་བྱས་ནས་སུ། །ཞེས་པ་དཀྱིལ་འཁོར་གྱི་མདུན་དུ་རྒྱས་པའི་ཐབ་ཏུ་བསྒྲུབ་པའི་རྫས་གཟེངས་བསྟོད་པའི་ཕྱིར་སྔ་མ་བཞིན་དུ་སྦྱིན་སྲེག་བྱའོ། །བཟུང་སྟེ་ཞེས་པ་ལག་པ་གཡས་པར་བཟུང་ཞེས་སོ། །འབར་བ་འབྱིན་ཞེས་པ་རལ་གྲི་ལས་ཞེས་པའོ། །སྒྲུབ་པ་པོས་འབར་བ་དེ་ནི་མཐོང་ནས་སུ་ཞེས་པའོ། །རིག་འཛིན་མཆོག་ཏུ་དེ་འགྱུར་རོ། །ཞེས་པ་རིག་འཛིན་གྱི་རྒྱལ་པོར་འགྱུར་རོ། །དུ་བ་འབྱུང་ཞེས་བ་རལ་གྲི་ཞེས་པའོ། །སྒྲུབ་པ་པོ་དེ་ནས་མི་སྣང་འགྱུར་ཞེས་པའོ། །རལ་གྲི་དེ་ཚ་བར་གྱུར་པ་ན་དེ་བཞིན་དུ། །སྟོབས་ཆེན་རྐང་པ་འགྱོགས་པར་འགྱུར། །ཞེས་པའོ། །ལོ་བརྒྱ་ཞེས་པ་ལྷའི་ལོ་ཞེས་པའོ། །དཔྱད་མི་དགོས་ཞེས་པ་ཐེ་ཚོམ་མེད་དོ་ཞེས་པའོ། །གལ་ཏེ་འདི་ལས་མ་བསྟེན་ནས། །ཞེས་པ་དངོས་གྲུབ་བསྒྲུབ་པ་འདི་ལ་ཞེས་པའོ། །དངོས་གྲུབ་ཐོབ་པར་མ་གྱུར་ན། །ཞེས་དངོས་གྲུབ་གསུམ་ལས་འགའ་ཡང་ཐོབ་པར་མ་གྱུར་ན་ཞེས་སོ། །རལ་གྲི་བརྩོན་འགྲུས་མཆོག་ལྡན་པས། །ཞེས་པ་རལ་གྲི་མཐུ་དང་ལྡན་ཏེ་ཞེས་སོ། །མྱུར་ཞིང་མི་ངལ་ཉོན་མི་མོངས། །ཞེས་པ་བདག་ཉིད་མི་ངལ་ཉོན་མི་མོངས་པར་ལོ་སྟོང་དག་ཐུབ་པར་འགྱུར་རོ་ཞེས་སོ། །ད་ནི་བེ་ཅོན་བསྒྲུབ་པ་བཤད། །ཤིང་ཀོ་ཕྱི་དང་ཅ་རའི་བེ་ཅོན་ནམ། །ཞེས་པའོ། །བེ་ཅོན་ཡང་ན་སེང་ལྡེང་དག་ལས་བྱ། །ཞེས་པའོ། །གཤིན་རྗེའི་བེ་ཅོན་ལྟ་བུ་བཟང༌། །ཞེས་པ་གཤིན་རྗེའི་བེ་ཅོན་གྱི་མཚན་ཉིད་ལྟ་བུར་བྱས་ཞེས་པའོ། །བེ་ཅོན་གྱི་སྲིད་དུ་སོར་ནི་བཞི་བཅུ་རྩ་གཉིས་པའོ། །དེ་ནས་བློ་ཅན་དུར་ཁྲོད་དུ། །ཞེས་པ་བསྒྲུབ་པའི་གནས་དུར་ཁྲོད་དུ་བྱ་སྟེ་ཞེས་པའོ། །གཏོར་མ་སྨེ་གཏོར་ཞེས་པའོ། །ཆོ་ག་རྒྱ་ཆེར་བྱས་ཞེས་པ་དཀྱིལ་འཁོར་རི་མོ་དགོས་པར་བཤད་དོ། །བེ་ཅོན་མཆོག་ལ་སྔོན་བཞིན་དུ། །ཞེས་པ་སྒྲུབ་པའི་རྫས་བེ་ཅོན་གཟེངས་བསྟོད་པའི་ཕྱིར་སྦྱིན་སྲེག་བྱ་བ་དག་ནི་སྔར་བཤད་པ་བཞིན་དུ་བྱའོ། །སྒྲུབ་པ་པོ་གོས་ནི་དམར་པོ་དག་ནི་བགོས་ཞེས་པའོ། །མེ་ཏོག་དམར་པོ་དང་ཐལ་བས་བརྒྱན་ཞེས་པ་འདི་དག་གིས་ལུས་བརྒྱན་ཅིང༌། ཐལ་བས་བསྐུའོ་ཞེས་པའོ། །བེ་ཅོན་ནི་བསྲེག་གཞིར་གཞག་ཅེས་པ། བེ་
ཅོན་རི་མོ་བསྲེགས་པའི་ས་གཞིར་གཞག་གོ །ཡུ་བ་ནས་ལག་པ་གཡས་པས་བཟུང་ཞེས་པའི། །བེ་ཅོན་ལག་ན་འགུལ་བའི་བར། །ཞེས་པ་བེ་ཅོན་འགུལ་འགུལ་དུ་བཟླས་བརྗོད་བྱའོ། །དེ་ནས་དྲག་པོའི་ཁྲོ་བོའི་བདག །ཅེས་པ་དེ་ནས་བེ་ཅོན་དེ་གྲུབ་ན། སྒྲུབ་པ་པོ་དེ་འདི་འདྲ་བར་འགྱུར་རོ། །འགྲོ་བར་འགྱུར་ཞེས་པ་ནམ་མཁའ་ལ་འགྲོ་ཞེས་པའོ། །ཁ་དོག་འདྲ་ཞེས་པ་སྔོན་པོའི་མདོག་ལ་བྱ་ཞེས་པའོ། །གལ་ཏེ་ཁྲོ་བོ་དེ་འདོད་ན། །ཞེས་པ་ཁྲོ་བོ་དེས་ཕ་རོལ་པོ་གསོད་པར་འདོད་ན། བེ་ཅོན་གྱིས་ལྷ་རྣམས་ཀྱང་གསོད་ན་གཞན་ལྟ་ཅི་སྨོས་ཞེས་པའོ། །ད་ནི་དགྲ་སྟ་བསྒྲུབ་པ་བཤད་དོ། །དགྲ་སྟ་དེ་ནི་སོར་དྲུག་པ། །ཞེས་པ་དགྲ་སྟ་དེ་ཉིད་ཀྱི་སྲིད་དུ་སོར་དྲུག་པ་ཞེས་པའོ། །ཆོ་ག་སྔ་མ་བཞིན་བསྒྲུབས་ན། །ཞེས་པ་དཀྱིལ་འཁོར་བྲི་བ་དང་མཆོད་པ་བྱ་བ་དང༌། རྫས་གཟེངས་བསྟོད་པའི་ཕྱིར་སྦྱིན་སྲེག་དང༌། བཟུང་བའི་ཐབས་དང༌། ཐམས་ཅད་ཆོ་ག་སྔར་བཤད་པ་བཞིན་ནོ། །དངོས་གྲུབ་དེ་དག་དེ་ཡིས་ཐོབ། །ཅེས་པ་དངོས་གྲུབ་རྣམ་གསུམ་སྒྲུབ་པ་པོས་ཐོབ་ཅེས་པའོ། །དེ་ནས་གཞན་ཡང་ལྕགས་ཀྱུའམ་མཆོག་ཅེས་པ་ལྕག་སྐྱུ་ལས་དངོས་གྲུབ་མཆོག་འགྲུབ་པར་འགྱུར་བས་ན་མཆོག་ཅེས་པའོ། །ཨུ་ར་མོའི་ཞེས་པ་སྔར་བཤད་པའི་ལྕགས་ལས་ཞེས་པའོ། །ལྕགས་ཀྱུའི་ཞེས་པ་ནི་ལྕགས་ཀྱུ་ཆེ་ཆུང་གི་སྲིད་དུ་སོར་བཞིའི་ཚད་དུ་སྟེ་ཞེས་པའོ། །དེའི་ཡུ་བ་ཡང་ལྕགས་ཀྱུ་དེའི་ཡུ་བ་ཞེས་པའོ། །ཡུ་བའི་སྲིད་དུ་མཉམ་པའི་སོར་ནི་བཅོ་བརྒྱད་པ་ཞེས་པ་སྦོམ་ཕྲ་མེད་པ་ལྕགས་ཀྱུ་ཙམ་གྱི་སྦོམ་དུ་བྱའོ་ཞེས་པའོ། །ནུབ་མོ་མཆོད་པ་གཏོར་མ་བྱ། །རི་ཡི་རྩེ་ལ་འདུག་ནས་སུ། །ཞེས་པ་རིའི་རྩེ་མོར་དཀྱིལ་འཁོར་བྲིས་ལ་དེར་མཆོད་པ་དང༌། གཏོར་མ་དག་སྔར་བཤད་པ་བཞིན་དུ་བྱ་ཞེས་པའོ། །ལྕགས་ཀྱུ་ཆེན་པོ་བསྒྲུབ་པར་བྱ། །ཞེས་པ་ཡོན་ཏན་ཆེ་བས་ན་ཞེས་པས་སོ། །སེར་སྐྱ་ཞེས་པའི་ཁ་དོག་ཅེས་པའོ། །བདུག་པའི་སྦྱིན་སྲེག་བྱས་ནས་སུ། །ཞེས་པ་ལྕགས་ཀྱུ་ལ་རེག་པར་བྱ་ཞིང་སྦྱིན་སྲེག་བསྒྲུབ་པའི་རྫས་གཟེངས་བསྟོད་པའི་ཕྱིར་སྦྱིན་སྲེག་སྔར་བཤད་པ་བཞིན་དུ་བྱ་ཞེས་པའོ། །བཟུང་སྟེ་བཟླས་པ་ཞེས་པ་ལག་པ་གཡས་པས་བཟུང་སྟེ་ཞེས་པའོ། །དེ་
ནས་དེ་ནི་ཐོགས་པ་ཡིས། །ཞེས་པ་འབར་བར་གྱུར་ཏེ་ཐོགས་པས་ཞེས་པའོ། །གྱེན་དུ་འཕར་ཞེས་པ་ནམ་མཁའ་ལ་འགྲོ་བར་འགྱུར་ཞེས་པའོ། །བསྒྲུབ་པའི་སྔགས་པ་དེའི་བཀའ་ཡང་རབ་ཏུ་ཉན་པར་འགྱུར་ཞེས་པའོ། །ལྕགས་ཀྱུ་མཆོག་ཅེས་པ་ཡོན་ཏན་ལ་བྱ་སྟེ་ཞེས་པའོ། །དུ་བ་འབྱུང་བར་འགྱུར་ན་ནི། །ཞེས་པ་སྒྲུབ་པ་པོ་དེའི་མཐུ་སྟོབས་ཀྱང་ཆེ་ལ་ལུས་མི་སྣང་བར་འགྱུར་ཞིང་འདིའི་གྲི་བ་མ་ཡང་མི་སྣང་བར་འགྱུར་རོ་ཞེས་སོ། །སྔགས་པ་བྱེ་བ་གསུམ་དུ་གསོན། །ཞེས་པ་སྔགས་པ་དེའི་ཚེ་བྱེ་བ་ཕྲག་གསུམ་དུ་འཚོའི་ཞེས་སོ། །གྲུབ་པ་དེ་ལ་གནོད་སྦྱིན་རིག་འཛིན་རྣམས་ཀྱིས་མཆོད་ཅེས་སོ། །བདེ་བ་ཞེས་པ་ལོངས་སྤྱོད་ཀུན་དང་རབ་ཏུ་ལྡན་ཞེས་པའོ། །འདོད་པར་འགྲོ་ཞིང་སྟོབས་ཀྱང་ཆེ། །ཞེས་པ་འདོད་དགུར་འགྲོ་ཞིང་མཐུ་སྟོབས་ཀྱང་ཆེའོ་ཞེས་པའོ། །གལ་ཏེ་ལྕགས་ཀྱུ་དེ་ནི་ཆེར་གྱུར་ན། །ཞེས་པའོ་ནང་པར་བཀྲ་ཤིས་བྱས་ནས་སུ། །ལྕགས་ཀྱུ་བཟང་པོ་དེ་ཐོགས་ནས། །ཞེས་པ་ནུབ་གཅིག་སྒྲུབ་པ་པོ་ལས་དངོས་གྲུབ་རྣམ་གསུམ་ལས་གང་འགྲུབ་ཀྱང་རུང་སྟེ། སྒྲུབ་པའི་ཚེ་ནང་བར་བདག་ཉིད་ཁྲུས་བྱས་ནས་མཆོད་པ་ཡང་བྱ། །ལུས་བསྲུང་བ་ཡང་བྱས་ལ་འགྲུབ་པའི་རྫས་དེ་དག་ཐོགས་པར་བྱའོ། །གྲུབ་པ་ཀུན་ལ་འདི་བཞིན་སྦྱར་རོ་ཞེས་སོ། །བཟླས་ནས་བརྒྱ་བྱིན་ལ་སོགས་པའི། །ཞེས་པ་ལ་སོགས་པ་ལྕགས་ཀྱུ་ལག་པ་གཡས་ཀྱིས་ཐོགས་ནས། བརྒྱ་བྱིན་ལ་སོགས་པ་ལྷ་རྣམས་འགུགས་པར་འདོད་ན་སྔགས་ཡི་གེ་བཅུ་བདུན་པ་མཇུག་ན་ཕཊ་ཅེས་བྱ་བའི་གོང་དུ་ཧཱུཾ་ཞེས་བྱ་བའི་འོག་ཏུ་ཆེ་གེ་མོ་ཞིག་ཨཱ་ཀཪྵ་ཡ་ཕཊ་ཅེས་བྱ་བ་ལ་སོགས་པའི་ཚུལ་དུ་བསྐུལ་ཚིག་བཅུག་སྟེ་བཟླས་སོ་ཞེས་པའོ། །སོགས་པ་ཞེས་བྱ་བ་འོག་ནས་འབྱུང་བ་ལ་བྱ་སྟེ། ལྷ་རྣམས་ཞེས་པ་ཚུལ་དེ་ལྟར་བྱས་ནས་བཀུག་ན་གདོན་མི་ཟ་བར་ཁུགས་ཞེས་པའི་དོན་ཏོ། །ཡི་དགས་ཞེས་བྱ་བ་འདྲེ་ལ་བྱའོ་ཞེས་པ་འོ། །རོ་ལངས་ཀྱི་རིགས་ཀྱི་འདྲེ་རྣམས་དང་ཞེས་པའོ། །ཇི་ལྟར་འདོད་པར་བྱེད་དུ་འཇུག །ཅེས་པ་བདག་གི་འདོད་པའི་ལས་རྣམས་བྱེད་དུ་གཞུག་གོ་ཞེས་པའོ། །ཁུ་བ་ཞེས་པ་གསེར་སྒྱུར་རྩི་ཞེས་པའོ། །རས་ཡ་ན་དང༌། ཞེས་པ་བོང་རྡོ་ལ་སོགས་པ་ལ་
བསྒྲུབས་ན། གསེར་ལ་སོགས་པར་འགྱུར་བའི་ཁུ་བའམ། དངུལ་ཆུ་འདྲ་བའི་སྦྱོར་སྨན་རྣམས་རྫས་དག་ཏུ་སྒྱུར་དུ་རུང་བ་ཡང་དབུལ་བར་བྱེད་ཅེས་པའོ། །གཞན་ཡང་སྒྲུབ་པའི་རྫས་རྣམས་དང༌། །ཞེས་སོ། །གཞན་ཡང༌། སྔགས་པ་ཡིད་ལ་གང་འདོད་པ། །ཞེས་པའོ། །དེ་དག་ཐམས་ཅད་དེ་ལ་ནི། །ཞེས་པ་ཁུ་བར་ས་ཡན་ལ་སོགས་པ་གྲུབ་པ་དེ་སྔགས་པ་དེ་ལ་ནི་ཞེས་པའོ། །ལྷ་དང་གནོད་སྦྱིན་ཚོགས་ལ་སོགས། །ཞེས་པ་ལྷ་དེ་དག་གིས་ཇི་སྙེད་པ་སྔགས་པ་དེ་ལ་དབུལ་བར་བྱེད་དོ་ཞེས་སོ། །དེ་ཡི་བཀའ་ནི་ཐམས་ཅད་ཀྱང༌། །ཞེས་པ་སྔགས་པ་སྒྲུབ་པ་པོ་དེའི་དཀའ་ཞེས་སོ། །འཇིགས་པས་ངེས་པར་ཉན་པར་འགྱུར། །ཞེས་པ་སྔགས་པ་དེས་ལྷ་དང་གནོད་སྦྱིན་ལ་སོགས་པ་རྣམས་ཤེས་པའོ། །ངོ་མཚར་ཀུན་གྱིས་བརྒྱན་པ་ཡི། །ཞེས་པ་ལྷ་དང་གནོད་སྦྱིན་ལ་སོགས་པ་རྣམས་སོ་སོའི་ཆས་ངོ་མཚར་ཅན་གྱིས་བརྒྱན་ཅིང་ཞེས་པའོ། །བདག་གིས་བཞོན་པས་ཡོངས་བསྐོར་ཞིང༌། །ཞེས་པ་ལྷ་དང་གནོད་སྦྱིན་ལ་སོགས་པ་དེ་དག་རང་རང་གི་བཞོན་པ་ལ་ཞོན་ཏེ་རང་རང་གི་འཁོར་རྣམས་ཀྱིས་ཀྱང་སོ་སོའི་གནས་བསྐོར་ཅིང་ཞེས་པའོ། །ངོ་མཚར་ཀུན་དང་རབ་ལྡན་པ། །ཞེས་ལྷ་དེ་དག་སོ་སོ་རང་རང་གི་ལོངས་སྤྱོད་ཅེས་པའོ། །འཇིག་རྟེན་མ་ལུས་སྟོན་བར་བྱེད། །ཅེས་པ་ཁམས་གསུམ་དག་ཀྱང་སྟོན་པར་བྱེད་དོ་ཞེས་སོ། །རྫུ་འཕྲུལ་ལོངས་སྤྱོད་ཡོན་ཏན་གྱིས། །ཞེས་པ་ལྷ་དང་གནོད་སྦྱིན་དེ་དག་གིས་ཞེས་པའོ། །དགའ་བར་བྱེད་ཅེས་པ་འགྲུབ་པའི་སྔགས་པས་དེ་ལ་ཞེས་པའོ། །ཇི་སྲིད་ལྕགས་ཀྱུ་འཆང་བའི་མི། །ཞེས་པ་ཇི་སྲིད་གྲུབ་བའི་ལྕགས་ཀྱུ་ལག་ན་འཆང་བ་དེ་ལ་ཞེས་སོ། །དེ་ཡི་དཀའ་ཡིས་ངེས་པ་རུ། །ཞེས་པ་ལྕགས་ཀྱུ་ལག་ན་ཐོགས་ཏེ་བཅིང་བའི་བཀའ་ཞེས་པའོ། །གནོད་སྦྱིན་མོ་དག་རང་རང་གིས། །ཞེས་པ། གནོད་སྦྱིན་མོ་རང་རང་གི་ལོངས་སྤྱོད་དང་འདོད་པའི་ལོངས་སྤྱོད་ཀྱང་ཉེ་བར་སྦྱོར་རོ་ཞེས་སོ། །དེ་སྟེ་ལས་ཀྱི་སྐྱོན་དག་གིས། །ཞེས་པ་སྔོན་གྱི་ལས་ཀྱིས་སྒྲུབ་ཞེས་པའོ། །ལྕགས་ཀྱུ་དེ། ཚབ་ཙམ་དུ་མ་གྱུར་ན། །ཞེས་པ་གྲུབ་པར་མ་གྱུར་པའི་ལྕགས་ཀྱུ་དེ་ཞེས་སོ། །ལྕགས་ཀྱུ་དེ་ཉིད་འདིར་བཟུང་སྟེ། །ཞེས་པ་སྒྲུབ་པ་པོས་མཚན་གཅིག་ཏུ་ལག་པ་གཡས་ཀྱིས་བཟུང༌། །
སྟེ་ཞེས་པའོ། །ནང་བར་དབེན་པར་འདུག་ནས་ནི། །ཞེས་པ་སྒྲུབ་པ་དེ་མ་གྲུབ་པའི་ནང་མི་ལ་བྱ་ཞེས་པའོ། །ནུ་མོ་ངག་གི་མིང་བཅུག་སྟེ། །ཞེས་པ་རྩ་བའི་སྔགས་ཀྱི་མཇུག་ཏུ་ཆེ་གེ་མོ་ཞིག་ཨཱ་ཀ་ར་ཥ་ཡ་ཞེས་པའི་བསྐུལ་ཚིག་བཅུག་སྟེ་བཟླས་སོ། །འདི་ལ་མཎྜལ་བྲི་མི་དགོས་སོ། །དེ་ནས་ཆོ་ག་དེས་མྱུར་དུ་འོང་བར་འགྱུར་ཞེས་པའོ། །མེ་ཏོག་འབྲས་བུ་དེ་བཞིན་གྲུབ། །ཅེས་བ་གཞན་ཡང་འདི་དག་འགུགས་པར་བྱེད་དོ་ཞེས་སོ། །མ་གྲུབ་ན་ཡང་རྟག་པ་རུ། །ཞེས་པ་དངོས་གྲུབ་རྣམ་གསུམ་ཞེས་པའོ། །དེ་ལྟར་ལྕགས་ཀྱུ་དམ་པ་འདི། །ཞེས་པ་ལྕགས་ཀྱུ་དེས་དངོས་གྲུབ་དམ་པ་འགྲུབ་ཅིང་ཡོན་ཏན་ཆེ་བས་ན། དམ་པའི་ལྕགས་ཀྱུ་དངོས་གྲུབ་ཅེས་པ་བཤད་ཟིན་ཏོ། །འདི་མན་ཆད་ཐོད་པ་ལ་དངོས་གྲུབ་བསྒྲུབ་པ་བཤད་དེ། ཐོད་པའི་དངོས་གྲུབ་གང་ཡིན་པ། །ཞེས་པ་ནས་བསྟན་ཏེ། སྒྲུབ་པ་གང་དག་བཤད་པ་ནི། ལག་པ་གཡས་པས་གཟུང་བར་བྱ། །ཞེས་པ་སྔར་བཤད་པ་དངོས་གྲུབ་བསྒྲུབ་པའི་རྫས་དེ་དག་ནི་ལག་པ་གཡས་པས་བཟུང་སྟེ་བསྒྲུབ་པར་བྱའོ། །ཅིའི་ཕྱིར་ཞེ་ན། མཚོན་ཆ་དེ་དག་ཕྱག་གཡས་པ་ན་བསྣམས་པས་སྒྲུབ་པའི་ཚེ་ན་ཡང་ལག་པ་གཡས་ཀྱིས་བཟུང་སྟེ་བསྒྲུབ་པ་ཞེས་པའོ། །ཐོད་པ་ལ་སོགས་པ་ཞེས་པ་ཤཀྟི་དང་ཐོ་མར་དག་བསྡུ་ཞེས་པའོ། །ལག་པ་གཡས་པས་བཟུང་བསྒྲུབས་ན། །ཞེས་པ་ཕྱག་གཡོན་པས་བསྣམས་པའི་ཕྱིར་སྒྲུབ་པའི་ཚེ་ཡང་རྫས་དེ་དག་ལག་པ་གཡོན་པས་བཟུང་སྟེ་བསྒྲུབས་ན་ཇི་ལྟར་བཤད་པ་བཞིན་དུ་དངོས་གྲུབ་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ །ཤིང་ལ་ལེགས་པར་བྱ་བ་ནི། །ཞེས་པ་ཧོཾ་གཟར་བྱེད་པའི་ཚེ་ཤིང་གི་མཚན་ཉིད་འདི་ལ་བྱའོ། །ཐོད་པའི་སོར་ནི་ཉི་ཤུ་ལ། །ཞེས་པ་གདོང་གི་ཞེང་གི་ཚད་ཅེས་པའོ། །མཉམ་ལ་རབ་ཏུ་ལེགས་པར་བྱས། །ཞེས་པ་ཆེ་ཆུང་མེད་ཅིང་ཐག་ཐུག་མེད་པ་ཞེས་པའོ། །ཉེས་པ་ཐམས་ཅད་རྣམ་སྤངས་པ། །ཞེས་པ་མཛེར་པ་ལ་སོགས་པའི་ཤིང་སྐྱོན་དེ་དག་ཅེས་པའོ། །རི་ཡི་རྩེ་མོར་འདུག་ནས་སུ། །མཆོད་དང་གཏོར་མའི་རིམ་པ་བྱས། །ཞེས་པ་རིའི་རྩེ་མོར་དཀྱིལ་འཁོར་བྲིས་ལ་དེར་མཆོད་པ་དང༌། གཏོར་མ་ལ་སོགས་པ་ཆོ་ག་བཞིན་
དུ་བྱ་ཞེས་པའོ། །བདུག་པའི་སྦྱིན་སྲེག་བྱས་ནས་སུ། །ཞེས་པ་རྫས་གཟེངས་བསྟོད་པའི་ཕྱིར་སྦྱིན་སྲེག་བྱའོ། །སྔགས་ཀྱི་བསྲུང་བས་མཐུ་བསྐྱེད་དོ། །ཞེས་པ་ལ་སོགས་པ་སྒྲུབ་པའི་རྫས་ལ་སྔགས་ཀྱིས་མཐུ་བསྐྱེད་དོ། །དེའི་ཕྱིར་སྔགས་ཀྱིས་བསྲུང་བསྒྲུབ་པའི་རྫས་ཀུན་ལ་སྦྱར་རོ། །ཐོད་པ་ལག་པ་གཡོན་པས་བཟུང༌། །ཞེས་པ་གྲུབ་པའི་ཚེ་ན་ལྷུང་བཟེད་འཛིན་པའི་ཐབས་སུ་ལག་པ་གཡོན་པས་ཞགས་པས་བཟུང་ནས་ལག་པ་གཡས་པས་ཐོད་པའི་སྟེང་ནས་ཁ་དག་པ་པའི་ཚུལ་དུ་བཀབ་ལ་ཕང་བར་བླངས་ཏེ་སྒྲུབ་པོ་ཞེས་པའི་དོན་ཏོ། །དུ་བའམ་ཚ་བར་འབྱུང་གི་བར། །ཞེས་པ་དེ་ལྟར་དངོས་གྲུབ་རྣམ་གསུམ་འབྱུང་གི་བར་དུ་རྩ་བའི་སྔགས་བཟླས་པར་བྱ་ཞེས་པའོ། །དེ་ལ་རྣམ་པར་དཔྱད་མི་དགོས། །ཞེས་པ། དེ་ལྟར་གྱུར་པ་ཐེ་ཚོམ་མེད། །ཅེས་པའོ། །འོན་ཏེ་དེ་འདིར་མ་གྲུབ་ན། །ཞེས་པ་ཐོད་པ་དེ་དེ་ལྟར་བསྒྲུབས་པ་ལས་སྐབས་འདིར་མ་གྲུབ་ན་ཞེས་པའོ། །དེ་ནས་ས་ལ་མི་བཞག་པར། །ཞེས་པ་ཐོད་པ་དེ་ཞེས་པའོ། །སྔགས་པ་དེས་དེའི་ཐོད་པ་དེ་བླངས་ནས་ཞེས་པའོ། །ཤིང་གི་ཁྲི་ལ་ཞེས་པ། ཨ་ནི་ཁྲིའུའི་སྟེང་དུ་གཞག །ཅེས་པའོ། །རས་ཀྱིས་ཞེས་པ་ནི་མི་དག་གིས་མ་མཐོང་བར་རས་དཀར་པོ་དུ་མ་གཅིག་གིས་གཡོག་གོ །ཡིད་ལ་ཅི་འདོད་ཅེས་པ་ལ་ཟན་ལ་སོགས་པ་གང་ཡང་རུང་བའི་ཁ་ཟས་འབྱུང་བར་འགྱུར་པའི་ཐབས་འདི་ལྟར་བྱས་ན་ཁ་ཟས་འདི་དག་འབྱུང་བར་འགྱུར་རོ་ཞེས་པའོ། །ལག་གིས་བཟུང་ཞེས་པ་ཐོད་པ་ལག་པ་གཡོན་པས་བཟུང༌། །སྟོང་རྩ་བརྒྱད་ཅེས་པ་རྩ་བའི་སྔགས་སྒྲུབ་པ་པོ་ལ་ཉིན་རེ་ཞིང་ཞེས་པ་ཉིན་རི་མི་འཆད་པར་ཐོད་པ་དེ་ལས་གང་ཡང་རུང་བའི་བཟའ་བ་འདོད་པ་དེ་དག་འབྱུང་བར་འགྱུར་རོ་ཞེས་སོ། །བྱ་ནར་བཅས་པ་ངེས་པ་རུ། །ཞེས་པ་ཟན་དང་མར་དུ་བཅས་པའམ། ཟན་དང་ཚོད་མར་བཅས་པ་ཞེས་པའོ། །བདུད་རྩི་ཟས་ནི་སྦྱིན་པར་བྱ། །ཞེས་པ་དེ་ཡང་བསྟི་སྟང་དང་གུས་པའི་སེམས་ཀྱིས་སྦྱིན་ཞེས་པའོ། །ཚུལ་བཞིན་བྱིན་པའི་འོག་ཏུ་ནི། །ཞེས་པ་སེམས་ཅན་ལ་དེ་ལྟར་སྦྱིན་པའི་འོག་ཏུ་སྒྲུབ་པ་པོ་བདག་ཉིད་ཁྲུས་བྱས་གཙང་སྒྲ་བྱས་ཏེ་ཚུལ་བཞིན་དུ་བཟླས་པའོ། །ཐོད་པ་བསྒྲུབ་པ་བཤད་པ་འདི། །ལག་པ་གཡོན་
བས་གཟུང་བར་བྱ། །ཞེས་པ་ཐོད་པ་ཕྱག་གཡོན་ན་བསྣམས་པས་ལག་པ་གཡོན་པས་བཟུང་སྟེ་བསྒྲུབ་པར་བྱའོ། །འདི་མན་ཆད་ཤཀྟི་སྒྲུབ་པ་བཤད་དེ། ཤཀྟི་རྣོན་པོ་ཞེས་པ་མདུང་ཐུང་ཞེས་པའོ། །ལེགས་བྱས་པ་ཞེས་པ་མཚན་ཉིད་དང་ལྡན་པའོ། །བཤོལ་བ་མེད་པར་བསྒྲུབ་པར་བྱ། །ཨུར་མོ་ལྕགས་ལས་བྱས་པའི་མཆོག །ཅེས་པ་སྔར་བཤད་པ་ལྟ་བུའི་ལྕགས་ལ་བྱ་ཞེས་པའོ། །བཀྲ་ཤིས་སོར་ནི་ཉི་ཤུ་གཉིས། །ཞེས་པ་ཅི་སྲིད་དུ་སོར་སུམ་ཅུ་གཉིས་ཤཀྟི་རྩེ་ལ་ནི་སྲིད་དུ་སོར་བཞི་སྔར་གསུངས་པ་སྟེ། བཤད་པའི་ཆོ་ག་བཞིན་དུ་ཆུ་འགྲམ་གཙང་མར་དཀྱིལ་འཁོར་བྲིས་ལ་གཟེངས་བསྟོད་པ་དང༌། བསྲུང་བ་དང༌། མཆོད་པ་ལ་སོགས་པ་ཚུལ་བཞིན་དུ་བྱས་ཏེ་མཚན་མོ་བསྒྲུབ་པོ། །ཚུལ་དེ་ལྟར་བསྒྲུབས་ན་དངོས་གྲུབ་རྣམ་གསུམ་ལས་གཅིག་འགྲུབ་ཅེས་བྱ་བའི་ཐ་ཚིག་གོ །འདི་མན་ཆད་མདའ་བོ་ཆེ་བསྒྲུབ་པ་བཤད་དེ། ཏོ་མ་ར་ཡ་མཁས་པས་བསྒྲུབ། །ཅེས་པ་གོང་དུ་ཇི་སྐད་བཤད་པའི་ཚུལ་བཞིན་དུ་ཏོ་མ་ར་སྒྲུབ་པ་ནི་སྔགས་པས་མདའ་བོ་ཆེ་བསྒྲུབ་ཅེས་པའོ། །ཨུང་མོའི་ལྕགས་ལས་བྱས་པའི་མཆོག །ཅེས་པ་སྔར་བཤད་པ་ལྟ་བུའི་ལྕགས་ལ་བྱ་ཞེས་པའོ། །རབ་ཏུ་རྣོ་བ་སྔ་མ་བཞིན། །ཞེས་པ་ཏོ་མ་ར་ཡ་མཚན་ཉིད་ལྡན་པ་བཟང་པོ་ལ་བྱའོ། །ཚད་ནི་ཤཀྟི་འདྲའོ་ཞེས་པའོ། །བདུག་པའི་སྦྱིན་སྲེག་བྱས་ནས་སུ། །ཞེས་པ་གཟེངས་བསྟོད་པའི་སྦྱིན་སྲེག་ཀྱང་བྱའོ། །ཙནྡན་དམར་པོས་གདབ་པར་བྱ། །ཞེས་པ་ཏོ་མ་ར་ཙནྡན་དམར་པོའི་འདེ་གུས་བྱུག་གོ་ཞེས་པའོ། །རི་ཡི་རྩེ་མོར་གནས་ནས་ནི། །ཞེས་པ་ཞིབ་ཏུ་སྔར་བཤད་པའི་ཚུལ་དུ་བསྒྲུབ་པོ་ཞེས་པའོ། །གྲུབ་ན་འབྲས་བུ་སྔ་མ་བཞིན། །ཞེས་པ་དངོས་གྲུབ་རྣམ་གསུམ་ལས་འགྱུར་བ་སྔ་མ་བཞིན་ནོ། །འདི་མན་ཆད་སྡིགས་མཛུབ་བཤད་པ། ལག་པ་གཡོན་པའི་མཛུབ་མོ་ནི། །ཞེས་པ་ལག་པ་གཡས་པའི་ཆང་པའི་ནང་དུ་སྦས་ལ་སྙེང་ག་ཙམ་དུ་བྱའོ་ཞེས་པའོ། །ཆོ་ག་སྔ་མ་བཞིན་བྱས་ན། །ཞེས་པ་ཆོ་ག་སྔར་བཤད་པའི་ཚུལ་བཞིན་དུ་བསྒྲུབ་པོ། །ཟླ་བ་གཟའ་ཡིས་ཟིན་པའི་ཚེ། །ཞེས་པ་དུས་དང་སྦྱར་ཏེ་དངོས་གྲུབ་བསྒྲུབ་པ་འདིའི་ཐད་ཀར་འཇུག་པར་
བྱའོ། །སྟན་གཅིག་ལ་ནི་ལེགས་འདུག་ནས། །ཞེས་པ་མི་གཡོ་མི་འཁྲུག་པ་འདུག་པའི་དོན་དུའོ། །གདོན་མི་ཟ་བར་ཞེས་པ་ཐེ་ཚོམ་མེད་པར་ཞེས་སོ། །མཛུབ་མོ་དེ་ནི་ཚ་བར་འགྱུར་ཡང་སྲིད་ཅེས་པའོ། །རིག་འཛིན་གོ་འཕང་ཐོབ་པར་འགྱུར། །ཞེས་པ་རིག་འཛིན་དུ་འགྱུར་རོ་ཞེས་པའོ། །མཛུབ་མོ་འགྲུབ་པར་མ་གྱུར་ན། །ཞེས་པ་དངོས་གྲུབ་རྣམ་གསུམ་ཞེས་པའོ། །དངོས་གྲུབ་ཉམས་ཀྱང་ངེས་པར་ནི། །ཞེས་པ་གྲུབ་པར་མ་གྱུར་ཀྱང༌། ལས་རྣམས་ཚོགས་ནི་བྱེད་པར་འགྱུར། །ཞེས་པའོ། །ཁྲོས་ནས་དེ་ཡིས་བསྡིགས་ན་ནི། །ཞེས་པ་ཕ་རོལ་ལ་མཛུབ་མོ་དེ་ཡིས་བསྡིགས་ན། མི་དེ་ཇི་ལྟར་འདོད་པ་རུ། །དེ་མ་ཐག་ཏུ་འགྱེལ་བར་འགྱུར། །ཞེས་བྱ་བའི་དོན་ཏོ། །དེ་ནི་ལག་པ་གཡས་པ་ཡིས། །ཇི་སྲིད་འདོད་པ་སློང་བར་བྱེད། །ཅེས་པ་སྔགས་དང་བཅས་པར་ལག་པ་གཡས་པས་བླང་ངོ་ཞེས་པའོ། །བསྡིགས་པར་ནུས་ཞེས་པ་མཛུབ་མོ་ངེས་ཞེས་པའོ། །ལྗོན་ཤིང་དང་ནི་ནགས་ཚལ་རྣམས། །ཞེས་པ་ཤིང་གཤེར་བ་ཞེས་པའོ། །དེ་ནས་དེ་ནི་མཛུབ་མོ་དེས། །ཞེས་པ་ཚུལ་དེ་ལྟར་བསྒྲུབས་པ་དེ་ཡིས་རིང་པོ་མི་ཐོགས་པར་རྙི་ལ་བར་བྱེད་ཅེས་པའི་དོན་ཏོ། །ཀུན་སྦྱིན་པའི་ཞེས་པ་གོང་དུ་བཤད་པ་རྣམས་ཞེས་པའོ། །བསྒྲུབ་པ་མཆོག་ཅེས་པ། མཛུབ་མོའི་དངོས་གྲུབ་མཆོག་ཅེས་སོ། །ད་ནི་ཞགས་པ་བསྒྲུབ་པ་བཤད་དེ། ཤི་བའི་སྐྲ་ལས་ཞགས་པ་ནི། །ཞེས་པ་སྐྱེས་པའམ་བུད་མེད་གང་ཡང་རུང་བའི་སྐྲ་ལས་ཞགས་པ་བྱ་ཞེས་པ་ཁ་ཅིག་གིས་བཤད་ནས་སྔར་བཤད་པ་དང་སྦྱར་ན། བུ་མོའི་སྐྲ་ལས་བྱ་བར་རིགས་སོ། །མི་གཅིག་ཤི་བའི་སྐྲ་ལས་ཅི་ལངས་པའི་ཞགས་པ་བྱའོ། །སྦོམ་ཞིང་ཡིད་དུ་འོང་བ་དང༌། །ཞེས་པ་འཇར་འཇུར་དང་ཕྲ་སྦོམ་མེད་པའི་མཐེ་བོང་ཙམ་མམ། མཛུབ་མོ་ཙམ་དུ་བྱའོ། །ཆོ་ག་སྔ་མ་བཞིན་བྱས་ན། །ཞེས་པ་སྔར་བྱས་ཞགས་པ་བཞིན་དུ་བསྒྲུབ་པོ། །དེ་ནས་དངོས་གྲུབ་ཐོབ་ཅེས་པ་ཞགས་པ་དེ་ཡིས་དངོས་གྲུབ་རྣམ་གསུམ་ཐོབ་པོ་ཞེས་པའི་ཐ་ཚིག་གོ །འདི་མན་ཆད་གཎྜཱིའི་བསྒྲུབ་པ་བསྟན་ཏེ། ཤིང་ནི་རབ་ཏུ་བཟང་པོ་ལས། །ཞེས་པ་ཨ་ཤྭཏྠ་ལ་སོགས་པ་ལ་བྱ་ཞེས་པའོ། །གཎྜཱི་
སོར་ནི་བཅུ་དྲུག་བྱ། །ཞེས་པ་བོང་ཚད་ལ་བྱ་སྟེ། དབྱུག་ཏོ་ལ་ཡང་ཡིན་ཞེས་པའོ། །ལེགས་པར་བཞོགས་ཤིང་ལེགས་བྲིས་པ། །ཞེས་པ་མགོ་མཇུག་གཉིས་སུ་རི་མོ་དག་བྲི་ཞེས་པའོ། །བཟང་པོ་ཡིད་དུ་འོང་བྱས་ནས། གསེར་བཟང་པོ་ཁྱིམ་བདག་གིས་བཀྲི། །ཞེས་པའོ། །དེ་ཡི་རྩེ་ལ་ནོར་བུ་ནི། །ཞེས་པ་གཎྜཱི་དེའི་རྩེ་མོར་ཞེས་པའི་ཆོ་ག་སྔོན་དུ་བཤད་པ་བཞིན་ཞེས་ཞིབ་ཏུ་བཤད་པའི་ཆོ་ག་བཞིན་དུ་བསྒྲུབ་པོ་ཞེས་པའོ། །ནུབ་སྒྲུབ་ཅེས་པ་མཚན་གཅིག་ཏུ་བསྒྲུབ་པོ། །སྔ་མ་བཞིན་དུ་གྲུབ་རྣམས་སུ། །ཞེས་པ་རིག་འཛིན་གྱི་རྒྱལ་པོར་འགྱུར་རོ་ཞེས་པའོ། །འདོད་གཟུགས་ཅན་ཞེས་པ་འདོད་དགུར་སྒྱུར་བའི་གཟུགས་ཅན་དུ་ཡང་འགྱུར་རོ་ཞེས་པའོ། །དུ་བ་ཚ་ལ་སོགས་པས་ཀྱང༌། །ཞེས་པ། དངོས་གྲུབ་རྣམ་གསུམ་ཉིད་ལ་བྱ། །ཞེས་པའོ། །དེ་ཡི་འབྲས་བུ་སྔོན་བཞིན་དུ། །ཞེས་པ་སྔར་བཤད་པ་བཞིན་དུ་ཐོབ་བོ། །དེ་ལྟར་མདོ་རུ་བཤད་པ་ཡིན། །ཞེས་པ་འདི་ཡན་ཆད་ལྷའི་མཚོན་ཆ་ཞེས་བྱ་བ་བཤད་དོ། །འདི་མན་ཆད་རོ་ལངས་ཀྱི་དངོས་གྲུབ་བཤད་དོ། །དེ་ལས་རྟོག་ལས་འབྱུང་བ་ཡི། །ཞེས་པ་ནས་བསྟན་ཏེ། དངོས་གྲུབ་གཞན་ཡང་བཤད་པར་བྱ། །ཞེས་པ་རྒྱུད་ཆེན་པོ་ལས་འབྱུང་བའི་དངོས་གྲུབ་གཞན་ཡང་བཤད་པར་བྱའོ་ཞེས་སོ། །དེ་ལྟར་ཁྲོ་བོའི་མཆོག་གིས་ནི། །ཉིད་ཀྱི་མདོ་རུ་བཤད་པའོ། །ཞེས་པ་དེ་ཡང་ཨཱཪྻ་མཉྫུ་ཤྲཱི་ཡ་མཱནྟ་ཀ་ཉིད་ཀྱིས་ཇི་ལྟར་མདོར་བཤད་པའི་དངོས་གྲུབ་དེ་དག་བཤད་པར་བྱའོ། །ཡི་དགས་མང་པོ་ཞེས་བྱ་བའི། །དཀྱིལ་འཁོར་ཐོག་མར་བྲིས་ནས་སུ། །ཞེས་པ། ཡི་དགས་ཕལ་པོ་ཆེའི་དཀྱིལ་འཁོར་དེ། དུར་ཁྲོད་ཐལ་བས་དང་པོར་བྲི་བར་བྱའོ། །རྨ་མེད་བ་ཡི་རོ་བླངས་ནས། །ཞེས་པ་ནད་ཀྱིས་ཤི་བ་དང་རུལ་བ་དང༌། མཚོན་གྱིས་བསད་པ་མ་ཡིན་པ་མ་གོད་པ་མ་ཉམས་པའི་རོ་སར་པ་བླང་ངོ་ཞེས་མཁས་པས་ཤེས་པ་སྔགས་པས་རོ་དེ་ཁྲུས་བྱས་ཞེས་པའོ། །ལེགས་པར་བརྒྱན་ཞེས་པ་མེ་ཏོག་ཕྲེང་བས་བརྒྱན་ཞེས་པའོ། །མི་རོ་དེ་ལ། མེ་ཏོག་སྤོས་ཀྱིས་མཆོད་ནས་སུ། །ཞེས་པའོ། །གཏོར་མ་སྦྱིན་ཞེས་པ་ཤ་དང་ཁྲག་ཏུ་བཅས་པའི་གཏོར་
མ་སྦྱིན་ཞེས་པའོ། །ལས་ནི་དུར་ཁྲོད་དག་ཏུ་བྱ། །ཞེས་པ་དཀྱིལ་འཁོར་དེ་ཡང་དུར་ཁྲོད་དུ་བྲིའོ་ཞེས་པའོ། །འདི་ནི་གཞན་དུ་ཡོང་མི་བྱ། །ཞེས་པ་གནས་འདི་ལས་གཞན་དུ་དཀྱིལ་འཁོར་མི་བྲི་ཞེས་པའོ། །མེ་ཏོག་བཀྲམ་པའི་གནས་མལ་དུ། །དེ་ནི་ལྷོ་ཕྱོགས་མགོ་བསྟན་བཞག །ཅེས་པ་དཀྱིལ་འཁོར་གྱི་ལྷོ་ཕྱོགས་ཀྱི་སྒོ་ཀར་མལ་ཐབས་སུ་མེ་ཏོག་བཀྲམ་པ་དེའི་སྟིང་དུ་མི་རོ་དེ་མགོ་ལྷོ་ཕྱོགས་སུ་བསྟན། རྐང་པ་གཉིས་དཀྱིལ་འཁོར་ལོགས་སུ་བྱང་ཕྱོགས་སུ་བསྟན་ཏེ་བཞག་གོ་ཞེས་པའོ། །ཐོད་པ་བཟང་པོ་ཟས་མཆོག་གིས། །ཞེས་པ་ཁ་ཅིག་བཤད་པ་ནི་འབྲས་བཟང་པོ་བཙོས་པའི་ནང་དུ་བླུགས་པ་ཡིན་ནོ་ཞེས་བཤད་པ་ཡིན་ནོ། །འབྲས་དང་འོ་མ་བཅས་པའི་ཟས་མཆོག་བཙོས་པ་དག་གིས་མིའི་ཐོད་པ་བཀང་བ་དེ་བླངས་ནས་ཞེས་པའོ། །ཟས་མཆོག་དེ་ཡི་ནང་དུ་ཡང༌། །ཚིལ་ཆེན་དག་གིས་བླུགས་པར་བྱ། །ཞེས་པ་མིའི་ཐོད་པར་བླུགས་པའི་ཟས་མཆོག་དེའི་ནང་དུ་ཡང་མིའི་ཚིལ་བཞུ་བ་དག་གིས་བླུགས་པར་བྱའོ་ཞེས་པའོ། །མཁས་པས་དེ་དག་དེ་ཡི་ཚེ། །ཞེས་པ་སྔགས་པས་ཟས་མཆོག་སྦྱར་བ་དེ་དག་བསྒྲུབ་པའི་ཚེ། གཟར་བུ་མི་རོའི་ཁར་བླུགས་ལ། །ཞེས་པ་སེང་ལྡེང་གི་གཟར་བུ་ཆུང་ངུས་ཟས་མཆོག་བཞག་པ་དེ་ལས་བཅུས་ཤིང་མི་རོ་དེའི་ཁར་བླུགས་སོ། །དེ་ཡང་ཁྲོ་བོའི་སྔགས་བཟླས་ཤིང་མི་རོའི་ཁར་སྦྱིན་ལུགས་བརྒྱ་བྱའོ། །དེ་ཡི་ལྕེ་ཡང་དབྱུང་བར་འགྱུར། མི་རོ་དེ་ཡང་ལྕེ་འབྱུང་བར་འགྱུར་རོ་ཞེས་པའོ། །དེ་ནས་མཚོན་གྱིས་བཅད་པར་བྱ། །ཞེས་པ་ལྕེ་དེའི་རྩ་བ་ནས་མཚོན་རལ་གྲིས་བཅད་པར་བྱའོ། །ལྕེ་ནི་རྩ་བར་བཅད་པ་ལས། །ཞེས་པ་རལ་གྲི་དེ་དག་གིས་བླངས་ནས་གྲོགས་པོ་དུ་ཡོད་པ་ལ་རེ་རེ་སྦྱིན་ནོ་ཞེས་སོ། །སྒྲུབ་བ་པོ་ཡིས་བླངས་ནས་སུ། །ཞེས་པ་དེ་ལྟར་གྲོགས་པོ་རྣམས་ལ་ཡང་རལ་གྲི་རེ་རེ་སྦྱིན་པའི་འོག་ཏུ་སྒྲུབ་པ་པོས་བདག་གི་རལ་གྲི་གཅིག་བླངས་ནས་དེ་མ་ཐག་ཏུ་འགྲུབ་བར་འགྱུར་རོ། །གྲོགས་པོ་རལ་གྲི་བྱིན་པ་དེ་རྣམས་དང་སྒྲུབ་པ་པོ་བདག་ཉིད་ཀྱང་རིག་འཛིན་ཐམས་ཅད་ཀྱི་རྒྱལ་པོར་འགྱུར་རོ། །གྲོགས་པོ་དེ་དང་རྣམ་བཅས་པར། །ཞེས་པ་རལ་གྲི་སྦྱིན་པའི་གྲོགས་པོ་དེ་
རྣམས་དང་སྒྲུབ་པ་པོ་བདག་ཉིད་དང་བཅས་ཏེ། བསྐུལ་བ་བདུན་དུ་གནས་པར་འགྱུར་རོ་ཞེས་པའི་ཐ་ཚིག་གོ །ཡང་ན་མཁས་པས་ཞེས་བསྔགས་པས་ཞེས་པའོ། །དཀྱིལ་འཁོར་དེ་ནི་བྲེ་བར་བྱ། །ཞེས་པ་སྔ་མ་བཞིན་དུ་དཀྱིལ་འཁོར་དེ་དུར་ཁྲོད་དུ་བྲི་ཞེས་པའོ། །མཆོད་པ་ཇི་སྐད་གསུངས་པ་བྱ། །ཞེས་པ་གོང་དུ་བཤད་པ་བཞིན་དུ་བྱ་ཞེས་པའོ། །སྐྱེས་བུ་ནད་མེད་འབྱིན་པ་ཡི། །ཞེས་པ་ནད་ཀྱིས་མ་བཏབ་པར་ཤི་བའི་ཞེས་པའོ། །རྨ་མེད་པ་ཡི་རོ་བླངས་ནས། །ཞེས་པ་རོ་སར་པ་མ་ཉམས་པ་ཞེས་པའོ། །བརྒྱན་ཞེས་གོང་དུ་བཤད་པ་བཞིན་དུ་ཞེས་པའོ། །དཀྱིལ་འཁོར་དེ་ཡི་སྒོར་བཞག་སྟེ། །ཞེས་པ་དཀྱིལ་འཁོར་གྱི་ལྷོ་ཕྱོགས་ཀྱི་སྒོ་སྔ་མ་བཞིན་དུ་བཞག་ནས་ཞེས་སོ། །དེ་ཡི་སྙིང་གར་དེ་འདུག་ནས། །ཞེས་པ་གཡོན་བརྐྱང་པའི་ཚུལ་དུ་འདུག་ནས་ཞེས་པའོ། །ཡི་གེ་བཅུ་བདུན་དེ་བཟླས་ནས། །ཞེས་པ་ལྷ་འོག་ནས་དངོས་གྲུབ་འབྱུང་བ་ཀུན་ལ་སྔགས་འདི་བཟླས་སོ། །ཨརྒྷ་ལེགས་པར་དབུལ་བར་བྱ། །ཞེས་པ་བདག་གི་ལུས་ལས་བཅད་པའི་ཁྲག་དང་ཤ་བསྲེས་པའི་ཨརྒྷ་མི་རོ་དེ་ལ་དབུལ་བར་བྱའོ། །དེའི་མགོ་ལ་ཞེས་པ་མི་རོ་དེའི་ཞེས་སོ། །སྔགས་པའི་ལག་པ་གཡོན་གྱིས་ཞེས་པའོ། །དེ་ནས་བདག་ཉིད་ཆེན་པོ་དེའི། །ཞེས་པ་མཐུ་དང་ལྡན་བའི་མི་རོ་དེའི་ཁ་ནས་མྱུར་དུ་འབྱུང་བར་འགྱུར་ཞེས་པ་ལྡོང་རོས་དེ་འདྲ་བ་ཞེས་པའོ། །སྒྲུབ་པ་པོ་དེས་དེ་བླངས་ནས། །ཞེས་པ་སྔགས་པས་ལྡོང་རོས་དེས། ཡན་ལག་ཐམས་ཅད་བསྐུས་ནས་ནི། །ཞེས་སྒྲུབ་པ་པོའི་ལུས་ཞེས་པའོ། །གྲོགས་པོ་རྣམས་ལའང་དེ་བཞིན་སྦྱིན། །ཞེས་པ་ལྡོང་རོས་གྲོགས་རྣམས་ལའང་སྦྱིན་ནོ། །དེ་མ་ཐག་ཏུ་དེ་དག་ཀུན། །ཞེས་པ་བསྐུས་མ་ཐག་ཏུ་དེ་དག་ཀུན་ཀྱང་བཙོ་མའི་གསེར་གྱི་མཆོག་ཏུ་འགྱུར་ཞེས་པ་རིག་འཛིན་ཀྱི་རྒྱལ་པོར་འགྱུར་ཞེས་པའོ། །ལས་རྣམས་ཐམས་ཅད་འགྲུབ་པར་ནི། །ཞེས་པ་གྲུབ་པའི་རྫས་རྣམས་ལས་འགྲུབ་པར་འགྱུར་ན། བགོར་རུང་དང་མི་རུང་བ་རྣམས་ལ་ཇི་ལྟར་སྤྱད་པའི་མཚན་ཉིད་བཤད་དོ། །དཀོན་མཆོག་གསུམ་ལ་ཆ་གཅིག་དབུལ། །ཞེས་པ་རལ་གྲི་མང་པོ་དང་ལྡོང་རོས་
ལྟ་བུ་དག་གིས་རྫས་བགོར་རུང་བར་གྱུར་ན་གྲུབ་པའི་རྫས་ལ་ཆ་གཅིག་དཀོན་མཆོག་གསུམ་ལ་བསྔོས་ཏེ་དབུལ། དེའི་འོག་མ་ཆ་གཅིག་སྒྲུབ་པ་པོ་བདག་ཉིད་བསྐུར་རོ། །དེ་ལ་ཆ་གཅིག་གྲོགས་པོ་རྣམས་ལ་སྦྱིན་ནོ་ཞེས་པའོ། །བྱིན་ནས་འདི་ལ་ནམ་མཁར་འཕར། །ཞེས་པ་དེ་ལྟར་ཆ་གསུམ་པོ་སོ་སོར་བགོས་ནས་དེའི་འོག་ཏུ་སྒྲུབ་པ་པོས་བདག་ཉིད་གྲུབ་པའི་རྫས་དེ་དག་ཐོགས་ནས་ནམ་མཁར་འཕར་བར་འགྱུར་རོ་ཞེས་བྱའོ། །རྫས་གཅིག་གྱུར་པ་གྱུར་པ་ལས། །ཆོ་ག་གཞན་ནི་བཤད་པར་བྱ། །ཞེས་པ་དེ་ལ་རྫས་བགོར་མི་རུང་བའི་རལ་གྲི་ལྟ་བུ་གཅིག་པུ་ཞིག་གྲུབ་པར་གྱུར་ན་གོང་མ་ལས་གཞན་པའི་ཆོ་ག་དང༌། དཔྱད་ན་སྒྲུབ་པ་པོ་བདག་ཉིད་བསྐུར་བར་བྱ་བ་དེ་བཤད་དོ། །རྫས་གཅིག་གྲུབ་པར་གྱུར་ན་ནི། །ཞེས་པ་ལ་སོགས་པ་དངོས་གྲུབ་པའི་རྫས་བགོར་མི་རུང་བ་གང་ཡང་རུང་བ་གཅིག་གྲུབ་པར་གྱུར་ན། རྫས་དེ་དག་བགོར་མེད་པར་དང་པོར་དཀོན་མཆོག་གསུམ་ལ་ཕྱག་འཚལ་ནས། དཀོན་མཆོག་གསུམ་ལ་ཆོ་ག་བཞིན་ལུས་དབུལ་བར་བྱའོ། །དེ་ཡི་གོང་དུ་རྫས་དེ་བླང༌། །ཞེས་པ་ལ་སོགས་པ་དེ་ལྟར་ལུས་ཕུལ་བའི་འོག་ཏུ་བགོར་མི་རུང་བའི་གྲུབ་པའི་རྫས་དེ་བདག་གིས་བླང་བར་བྱའོ། །གྲོགས་པོ་རྣམས་ལ་གཅེས་རིགས་སུ་གྲུབ་པའི་རྫས་མི་རོ་གསེར་དུ་འགྱུར་བའི་རྫས་ལ་སོ་སོར་ཅི་རིགས་པར་སྦྱིན་ནོ། །བསྒྲུབ་པའི་རྫས་དེ་ལྟ་བུ་མེད་པར་གྱུར་ན་བདག་གིས་ནོར་རྫས་ཅི་བདོག་པའི་ལས་གྲོགས་རྣམས་ལ་སྦྱིན་ནོ། །དེའི་འོག་ཏུ་གྲུབ་པའི་རྫས་དེ་བདག་གིས་ཁྱེར་ན་གྲུབ་པར་འགྱུར་ཏེ། ནམ་མཁའ་ལ་འཕར་རོ་ཞེས་པའི་ཐ་ཚིག་གོ །ཕྱི་ནས་ཆོ་ག་འདི་དག་སྤྱད། །ཅེས་པ་གང་ཡང་རུང་བའི་གྲུབ་པའི་རྫས་དེ་ཆ་གསུམ་ལ་སོགས་པའི་ཚུལ་དུ་སོ་སོར་བགོས་ཏེ་དེའི་འོག་ཏུ་གྲུབ་པའི་རྫས་དེ་བདག་གིས་སྤྱད་དོ། །དེ་ལྟར་མ་བྱས་གྲུབ་ན་ཡང༌། །ཞེས་པ་གང་ཡང་རུང་བའི་གྲུབ་པའི་རྫས་དེ་བགོ་བ་ལ་སོགས་པའི་ཚུལ་དུ་དེ་ལྟར་མ་བྱས་ན་ཡང་དམ་ཚིག་ཉམས་པས་དེ་ཡི་རྫས་དེ་ཕྲོག་པར་འགྱུར་ཞེས་པའོ། །དེ་བས་དངོས་གྲུབ་མཆོག་རྣམས་ལ། །ཀུན་དུ་ཇི་སྐད་བཤད་བཞིན་བྱ། །ཞེས་
པ་འདི་སྐབས་སུ་དངོས་གྲུབ་རྣམ་པ་གསུམ་ཆར་དངོས་གྲུབ་མཆོག་གོ །འབྲིང་དང་ཐ་མ་དངོས་གྲུབ་ནི་ལུགས་མའི་དངོས་གྲུབ་ཀྱི་སྐབས་སུ་སྔར་བཤད་པ་ཡིན་ནོ། །དེ་བས་ན་དངོས་གྲུབ་རྣམས་གྲུབ་བའི་རྫས་རྣམས་ལ་ཇི་སྐད་བཤད་པ་བཞིན་དུ་བགོ་བ་ལ་སོགས་པ་ལ་བྱའོ་ཞེས་བྱ་བའི་ཐ་ཚིག་གོ །འདི་མན་ཆད་ཨན་ཛ་ལ་སོགས་པས་མིག་བསྐུ་བའི་དངོས་གྲུབ་བཤད་དོ། །དེ་ནས་གཞན་ཡང་ཨན་ཛ་ན། །ཞེས་པ་ནས་བསྟན་ཏེ། དེ་ནས་གཞན་ཡང་ཨན་ཛ་ན། །ཞེས་བ་ཨན་ཛ་ན་མིག་སྨན་ལ་བྱ་སྟེ། སྔོན་པོ་གཅིག་ཡོད་ཅེས་པའོ། །བཟང་པོ་བསྒྲུབ་པ་བཤད་བཞིན་པ། །ཞེས་པ་ཨན་ཛ་ན་འགྲུབ་པ་ཁྲོ་བོ་ཆེན་པོས་བཤད་པ་བཞིན་ཞེས་པའོ། །སྒྲུབ་པའི་དགོས་པ་ཐམས་ཅད་འགྲུབ་པར་འགྱུར་ཞེས་པའོ། །སྒྲུབ་བ་དེ་ཞག་གསུམ་བསྒྲུབ་པར་བྱས་ནས་སུ་ཞེས་པའོ། །དུར་ཁྲོད་དག་ཏུ་དཀྱིལ་འཁོར་བྱ། །ཞེས་པ་དུར་ཁྲོད་ཀྱི་གནས་སུ་ཡི་དགས་ཕལ་པོ་ཆེའི་དཀྱིལ་འཁོར་བྲི་ཞེས་སོ། །དེ་ནས་ཆོ་ག་སྔ་མ་བཞིན། །ཞེས་པ་སྔར་བཤད་པའི་ཆོ་ག་བཞིན་ནོ་ཞེས་སོ། །ཐལ་བས་བདག་ཉིད་བསྲུང་བར་བྱ། །ཞེས་པ་དུར་ཁྲོད་ཀྱི་ཐལ་བ་ལ་སྔགས་ཀྱིས་བཏབ་སྟེ་བདག་གིས་ལུས་ལ་གཏོར་ཏེ་བསྲུང་ངོ་ཞེས་པའོ། །དེ་ཡིས་བདག་ཉིད་བྱུགས་ནས་སུ། །ཞེས་པ་ཐལ་བ་དེ་ཡིས་སྔགས་པའི་ལུས་ལ་ཐལ་བ་སྐམ་པོས་གཏོར་བ་ལ་བྱ་ཞེས་པའོ། །གྲོགས་པོ་མཆོག་ལྡན་དཔའ་བ་དེས། །ཞེས་པ་སྒྲུབ་པ་པོའི་གྲོགས་མཆོག་དང་ལྡན་པའི་སྒྲུབ་པ་པོ་ཉིད་སེམས་དཔའོ་ཞེས་པའོ། །གསལ་ཤིང་གིས་ནི་མགོ་ལ་བཞག །ཅེས་པ་གསལ་ཤིང་གསད་པའི་མི་རོའི་མགོ་བོ་བཅད་པ་དཀྱིལ་འཁོར་གྱི་སྒོའི་མདུན་དུ་བཞག་པ་དེའི་སྟེང་དུ་ཨན་ཛ་ན་བཟང་པོ་བཞག་པའོ། །ཤི་བའི་གོས་ཀྱིས་གཡོགས་ནས་སུ། །ཞེས་པ་རས་ཀྱིས་ཨན་ཛ་ན་དང་མགོ་གཉིས་ཀ་གཡོགས་ནས་ཞེས་པའོ། །ལག་པ་གཡོན་པས་བཟུང་སྟེ་བཟླས་བྱས་པ། །ཞེས་པའོ། །སྔགས་པ་བློ་ཅན་གྱིས་ནི་ཇི་སྲིད་བཟླས། །ཞེས་པའོ། །དེ་ཡང་མིག་དག་བསྐུས་ནས་ནི། །ཞེས་པ་ཨན་ཛ་ན་གྲུབ་པ་དེ་སྐམ་ཐགས་སུ་ཅུང་ཞིག་
བདར་ཏེ་དེས་མིག་བསྐུའོ། །དེ་བཞིན་དུ་ལྡང་རོས་དང་ཡང་སྦྱར་ཞེས་པའོ། །དུ་བ་འབྱུང་ན་མིག་བསྐུས་པས། ལུས་ནི་མི་སྣང་བར་འགྱུར་བར་བཤད་ཅེས་པའོ། །ཚ་བར་གྱུར་ན་མིག་བསྐུས་ན་བལྟས་པ་ཡིས། འགྲོ་བ་དག་ནི་གསོད་པར་འགྱུར། །ཞེས་པའོ། །སླར་ཡང་ལེགས་པར་གསོ་བ་ནི། །ཞེས་པ་མིག་བསྐུས་སམ་ཕྱིས་པ་ཡིས་སོས་པར་འགྱུར་ཞེས་པའོ། །འདི་ལ་གྲུབ་པར་མ་གྱུར་ནའང༌། །ཞེས་པ་ཨན་ཛ་ན་དེ་དེ་ལྟར་དངོས་གྲུབ་རྣམ་པ་གསུམ་ལས་འགའ་ཡང་གྲུབ་པར་མ་གྱུར་ན། མིག་དག་ལེགས་པར་བསྐུས་ནས་ནི། བལྟས་པས་འགྲོ་བ་དབང་དུ་འགྱུར། །ཞེས་པའོ། །པུས་མོ་བཙུགས་ཤིང་མགོ་བོ་དུད། །ཅེས་པ་དེ་ལྟ་བུའི་ཚུལ་དུ་དབང་དུ་འགྱུར་རོ་ཞེས་པའོ། །འདི་མན་ཆད་ནི་གི་ཝང་བསྒྲུབ་པ་བསྟན་ཏེ། ཨན་ཛ་ན་ཡི་རྟོག་པ་བཞིན། །ཞེས་པ་ནས་བསྟན་ཏེ། ཨན་ཛ་ན་ཡི་རྟོག་པ་བཞིན། །ཞེས་པ། ཨན་ཛ་ན་ཇི་ལྟར་བསྒྲུབ་པ་བཞིན་དུ་སྔགས་པས་གི་ཝང་ཚུལ་དེ་དང་འདྲ་བར་བསྒྲུབ་པོ། །དངོས་གྲུབ་དག་ཀྱང་དེ་བཞིན་བསྟན། །ཞེས་པ་གི་ཝང་ལས་དངོས་གྲུབ་རྣམ་པ་གསུམ་དུ་ཡང་ཨན་ཛ་ནའི་དངོས་གྲུབ་རྣམ་གསུམ་བཞིན་དུ་འགྱུར་རོ། །གི་ཝང་མ་གྲུབ་པར་གྱུར་ན་ཡང་མིག་གི་བསྐུས་ན། མ་གྲུབ་འགྲོ་བ་དབང་དུ་འགྱུར། །ཞེས་པའོ། །འདི་མན་ཆད་ལི་ཁྲི་དང་བ་བླ་ལྡོང་རོས་ཀྱི་བསྒྲུབ་པ་བཤད་དེ། །ལི་ཁྲི་དང་ཞེས་པ་ནས་བསྟན་ཏེ། ལི་ཁྲི་དང་ནི་བ་བླ་དང༌། །ཞེས་པ་ལི་ཁྲི་ལ་སོགས་པའི་བསྒྲུབ་པའི་ཆོ་ག་ཡང་ཨན་ཛ་ནའི་ཚུལ་བཞིན་དུ་བསྒྲུབ་པར་བྱའོ་ཞེས་པའི་དོན་ཏོ། །སྔགས་པ་མཁས་པ་དག་གིས་བསྒྲུབ་པར་བྱ་ཞེས་པའི་ཐ་ཚིག་གོ །འདི་མན་ཆད་རོའི་གོས་ལ་བསྒྲུབ་པ་བཤད་དེ། ཤི་བའི་གོས་ཀྱང་ཆོ་ག་བཞིན། །ཞེས་པ་ནས་བསྟན་ཏེ། མི་ཤི་མ་ཐག་ཏུ་ཁྲུས་བྱས་ནས་རས་ཀྱིས་རོ་བཀབ་སྟེ། དུར་ཁྲོད་དུ་བསྐྱལ་ནས་རོ་ལ་རྫས་ཡོད་པ་དེ་རོ་བསྐྱལ་བའི་མི་རྣམས་ཀྱིས་ཁྱེར་བ་ལ་སོགས་པ་དག་གིས་ཉོ་བར་བྱའོ། །བསྒྲུབ་པ་གཞན་དང་ཞེས་པ་གོང་མ་ལས་གཞན་ཞེས་པའོ། །ཁྲོ་བོ་ཉིད་ཀྱིས་
གསུངས་པའི་སྔགས། །མདོར་ན་རབ་ཏུ་བཤད་པར་བྱའོ། །ཞེས་པ་ཁྲོ་བོས་གསུངས་པའི་སྔགས་བཟླས་པས་མི་རོའི་གོས་ཏེ་སྒྲུབ་པའི་ཆོ་ག་མདོར་བཤད་པར་བྱའོ་ཞེས་པའོ། །དུར་ཁྲོད་དག་ཏུ་དཀྱིལ་འཁོར་བྲི། །ཞེས་བ་དུར་ཁྲོད་ཀྱི་གནས་སུ་ཡི་དགས་ཕལ་པོ་ཆེའི་དཀྱིལ་འཁོར་དུར་ཁྲོད་ཀྱི་ཐལ་བས་བྲི་ཞེས་པའོ། །མཆོད་པ་དང་ནི་གཏོར་མ་བྱ། །ཞེས་པ་སྔར་བཤད་པ་བཞིན་དུ་བྱ་ཞེས་པའོ། །ཤི་བའི་གོས་ནི་བགོས་ནས་སུ། །ཞེས་པ་ཤི་བའི་གོས་རས་དེ་སྔགས་པས་ཞེས་པའོ། །ཆོ་ག་ཤེས་པས་མཚན་མོ་བཟླས། །ཞེས་པ་ཆོ་ག་ཤེས་པའི་སྔགས་པས་མཚན་མོ་བསྒྲུབ་པོ། །དེ་ནས་གོས་དེ་དང་བཅས་པར་ཤེས་པར་རས་དེ་དང་བདག་གི་ལུས་དང་ཞེས་པའོ། །བདག་ཉིད་ཀྱི་ལུས། འབར་ཞིང་འབར་བས་ཡོངས་བསྐོར་ནས། །ཞེས་པ་ཕན་ཚུན་ཉེ་འཁོར་གྱིས་བསྐོར་ཡང་ཞེས་པའོ། །ལེགས་པར་འབར་ཞེས་པ་དེ་ལྟ་བུའི་མཚན་མ་བྱུང་ནས་ཞེས་སོ། །སྒྲུབ་པ་པོ་དེ། གད་མོར་རབ་ཏུ་དགོད་པའི་སྒྲ། །འཇིག་རྟེན་སྐྲག་པར་བྱེད་པ་སྦྱིན། །ཞེས་བྱ་བའི་དོན་ཏོ། །རྟག་ཏུ་འདོད་ལྷའི་གཟུགས་དང་ལྡན། །ཞེས་པ་འདོད་པའི་གཟུགས་དང་འདྲ་བ་བཟང་པོ་ཞེས་པའོ། །བདག་གིས་ལུས་ལ། དེ་བཞིན་དུ་བ་བྱུང་ན་ཡང༌། །ཞེས་པའོ། །གདོན་མི་ཟ་བར་མི་སྣང་བའི། །མཆོག་ཏུ་འགྱུར་བར་རབ་ཏུ་བཤད། །ཅེས་པ་ལུས་མི་སྣང་བ་རྣམས་ཀྱིས་རྒྱལ་བོར་འགྱུར་རོ་ཞེས་པའོ། །དེ་ལྟར་འགྲུབ་པར་མ་གྱུར་ནའང༌། །ཞེས་པ་དངོས་གྲུབ་རྣམ་གསུམ་ལས་གཅིག་ཙམ་ཡང་འགྲུབ་པར་མ་གྱུར་ན། རྐང་པ་མགྱོགས་ཤིང་སྟོབས་ཆེན་འགྱུར། །ཞེས་པའོ། །སྒྲུབ་པ་པོས། གང་རྣམས་མཐོང་ཞིང་གང་གིས་དེ། །ཕ་རོལ་བོས་གྲུབ་པ་དེ། མཐོང་བས་དེ་དག་བྲན་བཞིན་འགྱུར། །ཞེས་པའོ། །འདི་མན་ཆད་གནོད་སྦྱིན་མོ་བསྒྲུབ་པ་བཤད་དེ། གལ་ཏེ་འདི་ལ་གནས་བཞིན་དུ། །ཞེས་པ་ནས་བསྟན་ཏེ། མིའི་གནོད་སྦྱིན་མོ་བསྒྲུབ་པ་བསྟན་ཞེས་པའོ། །འབའ་ཏའི་ཤིང་དྲུང་ཉམས་དགའ་བར། །ཞེས་པ་ཤིང་ཉ་གྲོ་དྷའི་དྲུང་དུ་སྔགས་བ་ཉམས་དགའ་བར་ཞེས་པའོ། །དེའི་ཚེ་དཀྱིལ་འཁོར་བྲིས་ནས་སུ། །ཞེས་པ་དངོས་གྲུབ་
བསྒྲུབ་པའི་ཚེ། ཡི་དགས་ཕལ་བོ་ཆེའི་དཀྱིལ་འཁོར་བྲིས་ནས་སྒྲུབ་པ་པ་ཉིད། སྐྲ་བཤིག་གོས་ཀྱང་མེད་བར་བྱས། །ཞེས་པའོ། །ཟས་མཆོག་ལེགས་པར་བཙོས་ནས་ནི། །ལྷུང་བཟེད་བཟང་པོ་ཡོངས་བཀང་ནས། །ཞེས་པ་འབྲས་དང་འོ་མ་སྦྱར་བ་ལེགས་པར་བཙོས་བའི་ཟས་འདི་ལྷུང་བཟེད་བཟང་པོ་བཀང་ནས་འབྲས་དང༌། སཱ་ལུ་ཞོ་དང་སྦྱར་བས་ལྷུང་བཟེད་ནས་ཞེས་པའོ། །དེ་ནས་ཆང་བུ་བདུན་ཕྱུང་སྟེ། །ཞེས་པ་ནས་ལྷུང་བཟེད་ཀྱི་ནང་དུ་བླུགས་པའི་ཟས་མཆོག་དེ་ལ་ཞེས་སོ། །སྔགས་ཀྱིས་ལན་བདུན་བཏབ་ནས་སུ། །ཞེས་པ། ཆང་བུ་དེ་སྔགས་ལན་རེ་བཏབ་ནས་སུ། ལྷ་ཡི་བཟང་མོའི་འདི་བཤོས་པ་ཞེས་བྱས་ནས་ཞེས་པའོ། །དེ་ནི་རྒྱབ་ཏུ་འདོར་ཞེས་པ་བདག་གིས་རྒྱབ་ཏུ་འདོར་ཞེས་པའོ། །དེ་ནས་ཆང་བུ་གཞན་ཡང་བདུན། །སྔགས་ཀྱིས་བཏབ་ནས་བཟའ་བར་བྱ། །ཞེས་བ་དེའི་འོག་ཏུ་ཟས་མཆོག་དེ་ལས་ཆང་བུ་བདུན་བྱུང་སྟེ། སྔགས་ཀྱིས་བཏབ་ནས་བདག་ཉིད་བཟའ་བར་བྱའོ། །གྲུབ་པ་གནོད་སྦྱིན་ཀུན་གྱི་རྗེ། །ཞེས་པ་གནོད་སྦྱིན་མོ་རྣམས་ཀྱི་ནང་ན་རྒྱལ་མོ་དེ་ཡང༌། འཁོར་རྣམས་མང་པོས་ཀུན་བསྐོར་ནས། །ཞེས་བྱ་བའི་དོན་ཏོ། །དེ་ནི་དེ་ནས་འོང་བར་འགྱུར། །ཞེས་པ་ལྷའི་བཟང་མོ་དེའོ་ཞེས་པའོ། །དེ་ནས་ཁ་བཀྲུས་དེ་ལ་ནི། །ཞེས་པ་འོངས་ནས་བདག་ཉིད་ཀྱི་ཁ་ལག་བཀྲུས་ཏེ། ལྷའི་བཟང་མོ་དེ་ལ། སྤོས་དང་མེ་ཏོག་མཆོག་ལྡན་པའི། །ཆུ་ཡི་ཨརྒྷ་དབུལ་བར་བྱ། །ཞེས་པ་འདི་ལྟར་ལྡན་པའི་ཆུའི་མཆོད་ཡོན་དབུལ་བར་བྱའོ་ཞེས་པའི་དོན་ཏོ། །ལེགས་འོངས་མེ་ཏོག་དག་ཀྱང་དབུལ། །ཞེས་པ་ལེགས་པར་བརྗོད་ནས་མེ་ཏོག་དག་གིས་ཀྱང་མཆོད་པར་བྱའོ། །དེ་ནས་ཉམས་དགའ་སྟན་བཟང་བ། །ཞེས་པ་ཟ་འུག་ལ་སོགས་པ་ཉམས་དགའ་བའི་སྟན་བཟང་པོ་བཏིང་བའི་སྟེང་དུ་མེ་ཏོག་བཀྲམ་པ་དང་ལྡན་པའི་སྟིང་ན་བཟང་པོ་ཕུལ་ནས་ཞེས་པའོ། །དེ་ནི་ཁྱོད་ཀྱིས་བདག་འགྲུབ་སྟེ། །ཞེས་པ་ལྷའི་བཟང་མོས་བཀའ་སྩལ་བ། བཀའ་བཞིན་བྱེད་པ་དེ་བཞིན་དུ། །གཞན་དུ་མི་འགྱུར་དེ་བཞིན་དུ། །ཞེས་པ་ཚིག་འདི་སྐད་ཅེས་སྒྲུབ་པ་པོ་ལ་སྨྲ་བར་བྱའོ་ཞེས་
སོ། །བཀའ་སྩོལ་ཅིག་ཅེས་དེ་ལ་སྨྲ། སྒྲུབ་པོ་པོས་ནི་རྣམ་པ་གཅིག་ཏུ་གསོལ་བ་གདབ་པོ། །མའམ་ཡང་ན་སྲིང་མོའམ། མཛའ་མོའམ་ཡང་ན་ཆུང་མར་འགྱུར། །ཞེས་པའོ། །གྲུབ་བའི་རྫས་ནི་མང་པོ་དག །མ་ཞེས་སྨྲས་ན་མི་འགྱུར་བར། །ཞེས་པ་ལྡོང་རོས་ལ་སོགས་པ་གྲུབ་པའི་རྫས་མང་པོ་རྣམས་ནི་མར་གསོལ་བ་གདབ་སྟེ། བཟུང་བ་དེ་ལྟར་ཏེ། དེ་ལས་གུང་དུ་མི་རུང་བ། །ཐེ་ཚོམ་མེད་པར་འགྱུར་རོ་ཞེས་པའོ། །འབྲས་བུ་དང་ཞེས་པ་སྲིང་མོར་བཟུང་ན་ཞེས་པ་སྟེ། ཡིད་དུ་འོང་བ་གཞན་རྣམས་དང༌། །ཞེས་པ་གང་དང་གང་འདོད་པ་གཞན་རྣམས་ཞེས་པའོ། །མྱུར་དུ་ཆུང་མ་སྡུག་པར་ཡང་ནི་བྱས་ན། དཔག་ཚད་བརྒྱ་ནས་ཁྲིད་དེ་འོང༌། །ཞེས་པའོ། །དེ་ལ་ཆུང་མར་སྨྲས་ཞེས་པ་ཆུང་མར་བཟུང་ན་ཞེས་པའོ། །རྣམ་པར་མཛེས་ཞེས་པ་ལྷའི་བཟང་མོ་ཞེས་པའོ། །དགའ་བར་བྱེད་ཅེས་བ་སྲུང་མ་ངེས་པར་བྱེད་ཅེས་པའོ། །དེས་མ་འདོད་པ་དག་པར་ཞེས་པ་བདག་གང་འདོད་ཅེས་པའོ། །སྒྲུབ་པ་ཇི་སྲིད་འདོད་པར་སྦྱོར་རོ་ཞེས་པ་ལྷའི་བཟང་མོ་དེ་སྦྱོར་རོ་ཞེས་པའི་ཐ་ཚིག་གོ །འདི་མན་ཆད་ཤ་ཟ་མོ་སྒྲུབ་བའི་དངོས་གྲུབ་བཤད་དེ། གལ་ཏེ་མངལ་གནས་མ་སྐྱེས་པའི། །ཞེས་པ་ཤ་ཟ་མོ་རྫུས་ཏེ་སྐྱེས་པ་ལ་བྱ་ཞེས་སོ། །ཤ་ཟ་མོ་ངག་སྒྲུབ་འདོད་ན། །ཞེས་པ་འདྲེ་མོ་ལ་བྱ་སྟེ། ཟས་སུ་ཤ་ཟ་བ་ལ་བྱ་ཞེས་པའོ། །སྒྲུབ་པ་པོ་ལ་དེ་ཡི་ལས། །ཞེས་བ་ཤ་ཟ་བ་དེའི་དངོས་གྲུབ་ཀྱི་ལས་དེ་དག་འདིར་ནི་བཤད་པར་བྱ་ཞེས་པའོ། །གཙང་མར་དཀྱིལ་འཁོར་བྲི་བར་བྱ། །ཞེས་པ་ས་སྦྱང་ཞིང་ཕྱག་དར་བྱས་པར་ཡི་དགས་ཕལ་པོ་ཆེའི་དཀྱིལ་འཁོར་བྲི་བར་བྱ་ཞེས་པའོ། །མཆོད་པ་ཆེན་པོ་བྱས་ནས་སུ། །ཞེས་པ་སྔ་མ་བཞིན་དུ་བྱ་ཞེས་པའོ། །གཏོར་མ་ལས་ཀྱང་སྔོན་བཞིན་བྱ། །ཞེས་པའི་དཀྱིལ་འཁོར་གྱི་མདུན་དུ་སྒོའི་ཁ་དྲང་དུ་ཧོམ་བྱའོ། །དེར་ནི་དུར་ཁྲོད་ཤིང་དག་གིས། །ཞེས་པ་དུར་ཁྲོད་ཀྱི་མགལ་དུམ་ཞེས་པའོ། །སྔགས་པས་མེ་ནི་རབ་སྦར་ནས། །ཞེས་པ་རྒྱས་པའི་ཐབ་ཏུ་བྱའོ། །དེར་ནི་གཟེགས་མའི་སྦྱིན་སྲེག་རྣམས། །ཞེས་བ་འབྲས་གྲུས་པའི་བཅག་འཕྲོ་དང་དུམ་བུ་གྲུགས་པ་ལ་བྱ་སྟེ། དེ་ལ་ཕོ་
ཚུམས་ཀྱིས་བླང་ཞིང་སྔགས་དང་སྦྱར་ཞིང་བསྲེག་གོ །མི་འཇིགས་མདུན་དུ་ཨརྒྷ་དབུལ། །ཞེས་པ་ཤ་ཟ་མོ་དེ་ལ་ཁྲག་དང་བཅས་པའི་ཨརྒྷ་དབུལ་ཞེས་པའོ། །དེ་ཡི་འོག་ཏུ་དེ་ལ་ནི། །ཞེས་པ་ཨརྒྷ་དབུལ་བའི་འོག་ཏུ་སྒྲུབ་པ་དེ་ལ། བདག་ཉིད་གཟུགས་ནི་བཟང་བར་སྟོན། །ཞེས་པ་ཤ་ཟ་མོ་དེ་ལ་ཐ་མལ་པའི་གཟུགས་བཟང་བར་སྟོན་ཞེས་པའོ། །དེ་ཡི་མིང་ནི་ཀ་རང་གི །ཞེས་པ་ལ་སོགས་པ་སྔགས་ཀྱི་མཇུག་ལ་བི་ཤ་ཙ་ཀ་རང་གི་ནི་ཞེས་བྱ་བ་བཅུག་སྟེ། ཧོམ་བྱས་ནས་གདོན་མི་ཟ་བར་ཁུགས་པར་འགྱུར་ཏེ། ལངས་ནས་སྒྲུབ་པ་པོས་གང་བསམས་པའི་འདོད་པའི་ནོར་དེ་རྣམས་རིང་པོ་མི་ཐོགས་པར་གདོན་མི་ཟ་བར་དབུལ་བར་བྱེད་ཅེས་པའོ། །ཀ་རང་ག་ནི་ཞེས་བྱ་བ་ཤ་ཟ་མོའི་མིང་ཞེས་སོ། །ཤ་ཟ་མོ་ནི་ཀུན་གྱི་མཆོག །ཅེས་པ་ཤ་ཟ་མོའི་གཙོ་མོའི་རྒྱལ་མོ་ཞེས་པའོ། །སྒྲུབ་པ་པོ་ནི་སེམས་དཔའ་ཞིང༌། །ཞེས་པ་སྒྲུབ་པ་པོའི་མཚན་ཉིད་འདི་ལྟ་བུ་ལྡན་པ་ལ་བྱའོ། །དེ་ནི་དོན་རྣམས་ཐམས་ཅད་བསྒྲུབ། །ཅེས་པ་ཤ་ཟ་མོ་དེ་དོན་ཐམས་ཅད་གྲུབ་པར་བྱེད་དོ། །དེ་ལྟ་མིན་ན་མྱུར་བར་ནི། །སྒྲུབ་པ་པོ་ཡང་གསོད་པར་བྱེད། །ཅེས་སྒྲུབ་པ་པོ་མཚན་ཉིད་དེ་ལྟ་བུ་དང་མི་ལྡན་ན་ཤ་ཟ་དེས་སྒྲུབ་པ་པོ་དེ་དག་གསོད་པར་བྱེད་དོ་ཞེས་པའི་ཐ་ཚིག་གོ །འདི་མན་ཆད་ནི་ཀླུའི་བུ་མོ་བསྒྲུབ་པའི་དངོས་གྲུབ་བཤད་དེ། དེ་སྟེ་ཀླུ་ཡི་བུ་མོ་དག །ཅེས་པ་ནས་བསྟན་ཏེ། དེ་ལ་རིག་འཛིན་ལ་ལ་དག །ཅེས་པ་སྔགས་པ་ལ་ལ་ཞིག་ཀླུའི་བུ་མོ་བསྒྲུབ་པར་འདོད་ན། དེ་སྒྲུབ་པའི་ཆོ་ག་བཤད་དོ། །པདྨོ་དཀར་པོའི་མཚོ་འགྲམ་དུ། །ཞེས་པ་པདྨོ་དཀར་པོའི་མཚོ་ཡང་ཡོད་པའི་པདྨ་དམར་པོ་དཀར་པོ་དང་འདྲེས་པའི་མཚོ་ཡང་ཡོད་པས་དེ་དག་ཏུ་མི་བྱ་བར་པདྨ་དཀར་པོའི་མཚོ་འགྲམ་དུ་བྱའོ། །མཁས་པས་གཏོར་མའང་ཆོ་ག་བཞིན། །ཞེས་པ་ཞི་བའི་གཏོར་མ་སྤྱི་རྒྱུད་ནས་འབྱུང་བ་བཞིན་དུ་བྱ་ཞེས་པའོ། །ཨུ་དུམ་བཱ་རའི་ཡམ་ཤིང་གིས། །ཞེས་པ་ཨུ་དུམ་བཱ་རའི་ཡམ་སྲེག་གི་ཤིང་གི་རིགས་སུ་གཏོགས་པའི་ཤིང་གིས་མེ་སྦར་རོ་ཞེས་པའོ། །ཐོག་མར་མེ་ནི་རབ་སྦར་ནས། །ཞེས་པ་རྒྱས་པའི་ཐབ་ཁུང་དུ་བྱའོ། །མཁས་པས་
སྟོང་རྩ་བརྒྱད་དུ་བསྲེག །ཅེས་པ་གཟར་བུ་ཆུང་དུས་སྔགས་དང་སྦྱར་ཏེ་བསྲེག་ཅེས་པའོ། །སྒྲུབ་པ་བོ་ནི་གང་འདོད་པ། །ཞེས་པ་ཀླུའི་བུ་མོས་སྒྲུབ་བ་བོ་ལ་གང་འདོད་པ་ཐེ་ཚོམ་མེད་པར་སྟེར་བར་འགྱུར་རོ་ཞེས་པའོ། །དེའི་ཚེ་སྔགས་པ་ལྷ་མིན་གྱི། །ཞེས་པ་འདི་མན་ཆད་ནི་ལྷ་མ་ཡིན་གྱི་བུ་མོ་སྒྲུབ་པར་བཤད་དེ། ལས་འདི་དག་གིས་ངེས་པར་སྒྲུབ། །ཅེས་པ་ཆོ་ག་འོག་ནས་འབྱུང་བ་དག་གིས་ལྷ་མ་ཡིན་གྱི་བུ་མོ་སྒྲུབ་པོ་ཞེས་སོ། །སྔ་མ་བཞིན་བྲིས་ནས་ཞེས་པ་ལྷ་མ་ཡིན་གྱི་ཕུག་ཏུ་ཡི་དགས་ཕལ་པོ་ཆེའི་དཀྱིལ་འཁོར་བྲིའོ་ཞེས་པའོ། །ཞུགས་ཐབ་རྒྱས་པའི་ཐབ་ཏུ་ནི། །པྲི་ཡང་ཀུ་ཡི་ཤིང་ལས་མེ་སྦར་ནས། །ཞེས་པའོ། །ཡུངས་ཀར་དཀར་པོ་གུར་ཀུམ་ལ། །ཞེས་པ་གཟར་བུ་ཆུང་དུན་གྱིས་སྦྱིན་སྲེག་བྱ། ཡང་ན་ཕོགས་གསུམ་བླང་ཞིང་སྔགས་དང་སྦྱར་ཏེ་སྟོང་རྩ་བརྒྱད་དུ་སྦྱིན་སྲེག་བྱའོ་ཞེས་པའོ། །བདེ་བའི་ལམ་ནས་འཇུག་པར་བྱེད། །ཅེས་པ་ཉོན་མོངས་པའི་ལམ་མ་ཡིན་པར་ཁྲིད་པར་བྱེད་ཅེས་སོ། །ལྡན་པར་ནི་ཞེས་པ་ལོངས་སྤྱོད་ཅེས་པའོ། །དེ་ནས་དེ་ནི་དགའ་བར་བྱེད། །ཅེས་པ་ལྷ་མ་ཡིན་གྱི་གནས་དེ་ན་སྒྲུབ་པ་བོ་དེ་དགའ་བར་བྱེད་དོ། །འདི་མན་ཆད་ཤ་ཆེན་པོ་བཙོང་བའི་དངོས་གྲུབ་སྒྲུབ་པ་བཤད་དེ། ཤ་ཆེན་ནི་མི་ཤ་ལ་ཞེས་པའོ། །དཔའ་བའི་སེམས་ཀྱིས་མི་ཤ་བླང༌། །ཞེས་པ། ཆུ་གྲིས་མི་རོ་སར་པ་མཚན་ཉིད་དང་ལྡན་པའི་ཤ་ལས་སྣ་དགུ་དང་བཟང་དགུ་གདམས་ཏེ་བཅད་ལ་ཞིབ་པའམ། སྐོན་བུ་བཟང་པོའི་ནང་དུ་གཞུག་གོ །གཡས་ན་ཤ་ཆེན་སྐྱོན་མེད་གཟུང༌། །ཞེས་པ་མཚན་ཉིད་དང་ལྡན་པའི་མི་རོ་སར་པའི་ཤ་སྐྱོན་མེད་པ་གཟུང་བར་བྱའོ། །དུར་ཁྲོད་ཅེས་བ་དུར་ཁྲོད་ཆེན་པོ་རོ་ལྡན་ཞེས་པར་སྒྲུབ་པ་པོས་སོ། །ཤ་འཚོང་བ་ཡི་སྒྲ་སྒྲོགས་སོ། །ཞེས་པ་སྐབས་སུ་འདི་སྐད་ཀྱི་སྒྲ་བསྒྲག་པར་བྱའོ། །ཚིག་ཅེས་པ་སྒྲུབ་པ་པོ་དེའི་ཚིག་ཅེས་པའོ། །སྲིན་པོ་ཞེས་པ་སྲིན་པོ་ངན་ཕེའུ་ཕལ་བ་ཞེས་པའོ། །ཤ་ཆེན་དེ་ལ་སྔགས་ཀྱིས་བསྲུང་ངོ༌། །ཡི་དགས་ཕྲོ་མོ་ཁ་ཅིག་གིས། །ཐོས་ནས་རབ་ཏུ་འཇིགས་པར་འགྱུར། །ཞེས་པ་སྒྲུབ་པ་པོ་དེའི་སྒྲ་ཐོས་ནས་འབྲོས་བར་
ཡང་འགྱུར་རོ་ཞེས་བྱ་བའི་དོན་ཏོ། །གང་གཞན་ལྷག་པའི་སེམས་ཡོད་ཅིང༌། །ཞེས་པ་ཡི་དགས་གོང་མ་ལས་ལྷག་པའི་ཞེས་པའོ། །དང་པོར་དུར་ཁྲོད་ཞིང་སྐྱོང་བའི། །ཞེས་བ་དུར་ཁྲོད་དེ་ནས་དངོས་གྲུབ་འབུམ་འབྱུང་ཞིང་སྩོལ་བར་མཛད་པས་ན་ཞིང་སྐྱོང་བ་ཞེས་པའོ། །སྟོབས་པོ་ཆེ་ཞེས་པ་ཡི་དགས་ཕལ་པོ་ཆེ་ཞེས་པ་ཡི་དགས་ཕལ་ལོ། །སྒྲུབ་པ་པོ་ཞེས་པ་ཤ་བཙོང་བ་ཞེས་སོ། །དེ་ནས་སེམས་དཔའ་དྲག་པོ་དེར། །ཞེས་པ་སྒྲུབ་པ་པོ་སེམས་དྲག་པོ་དེས་ཞེས་པའོ། །དེ་དག་ཞིང་སྐྱོང་དེ་དག་ནི། །ཞི་བའི་གཟུགས་སུ་གནས་ནས་སུ། །ཞེས་པ་དེ་ནས་མཐུ་དང་ལྡན་པའི་དྲག་པོ་ཆེན་པོ་དེ་དག་སོ་སོའི་ཆ་ལུགས་ཐ་མལ་བར་ཞི་བའི་ཚུལ་དུ་གནས་ཞེས་སོ། །སྟོབས་ཆེན་ཁྱོད་ཀྱིས་ཤ་ཆེན་འདི། །ཞེས་བ་ཞིང་སྐྱོན་བ་དེ་དག་གིས། སྒྲུབ་པ་པོ་ལ་སྨྲ་བར་བྱེད། །ཅེས་པའོ། །འདོད་པའི་དོན་ནི་རབ་བསྒྲུབ་ཕྱིར། །ཞེས་པ་བདག་གང་འདོད་པའི་དོན་བསྒྲུབ་པར་བྱ་བའི་ཕྱིར། །ཡང་ན་ཨན་ཛ་དག་དང༌། ཡང༌། རྫས་ནི་གང་དག་འདོད་པ་དེ། ཞེས་པ་ཨན་ཛ་ན་ལ་སོགས་པ་སྒྲུབ་པའི་རྫས་གང་འདོད་པ་དེ་ཤ་སྦྱིན་པར་བྱོས་ཤིག་ཅེས་ཞིང་སྐྱོང་བ་དེ་དག་ལ་སྨྲ་བར་བྱའོ། །སྒྲུབ་པ་པོས་ཀྱང་སྨྲ་བར་བྱ། །ཞེས་པ་དེ་ལས་ལྷག་པའི་ཚིག་གཞན་སྨྲ་བར་མི་བྱ་བའོ་ཞེས་པའོ། །སེམས་ནི་དཔའ་བར་ཤེས་ནས་ནི། །སྦྱིན་པར་བྱེད་ཅིང་གཞན་ལ་མིན། །ཞེས་པ་ཞིང་སྐྱོང་དེ་དག་གིས་སྒྲུབ་པ་པོའི་སེམས་དཔའ་བར་ཤེས་ནས་གྲུབ་པའི་རྫས་བྱིན་པར་བྱེད་ཀྱི་སྒྲུབ་པ་པོ་སེམས་མི་དཔའ་བ་ཕལ་གཞན་ལས་མི་འགྲུབ་པོ་ཞེས་པའི་ཐ་ཚིག་གོ །འདི་མན་ཆད་བ་དན་སྒྲུབ་པ་ཞེས་བྱ་བ་བཤད་དེ། དེ་ནས་གཞན་ཡང་འདི་ཡི་ལས། །ཞེས་པ། ཁྲོ་བོའི་རྒྱལ་པོའི་ལས་གཞན་ཡང༌། །དཔུང་རྣམས་མནན་པར་བྱ་བ་གང༌། །ཞེས་པ་མི་གཡོ་བར་ངེས་པའི་བྱ་བ་གང་ཞེས་པ་ནི། ཁྲོ་བོ་མཆོག་གིས་གསུངས་པ་ནི། །ཞེས་པ་ཁྲོ་བོའི་རྒྱལ་པོས་གསུངས་པ་དེ། དེ་དག་འདིར་ནི་བཤད་པར་བྱ། །ཞེས་པའོ། །དེ་ནི་མཐིང་ཀ་ལེགས་བྱ་བ། །ཞེས་པ་རས་ཁ་དོག་ཅེས་པའོ། །སྲིད་དུ་སོར་བཅུ་དྲུག་གི་ཚད་དུ་བྱ། །ཞེས་པ་ཇི་ཙམ་རན་པར་བྱ་ཞེས་པའོ། །བཏགས་ཏེ་དེ་ནས་བསྒྲངས་ནས་སུ།།
ཞེས་པ་འཕན་འདྲ་བར་གདགས་པ་ལ་བྱ་ཞེས་པའོ། །དུར་ཁྲོད་དུ་ནི་མཚན་མོ་བསྒྲུབ། །ཅེས་པ་ཡི་དགས་ཕལ་པོ་ཆེའི་དཀྱིལ་འཁོར་བྲིས་ནས་བསྒྲུབ་ཅེས་པའི་ཐ་ཚིག་གོ །གཡོན་པས་ཐོགས་ཏེ་ཞེས་པའོ། །བ་དན་ལག་ན་ཐོགས་ནས་ནི། །ཞེས་པ་མིང་གིས་གསལ་བར་མ་བྱུང་བ་རྣམས་ནི་ལག་པ་གཡས་པས་ཐོགས་པ་སྲིད་པའི་ཕྱིར་རོ། །དེ་ཚེ་དགྲ་ནི་དཔུང་འཁྲུག་ཅིང༌། །ཅེས་པ་བདག་ལ་འཁྲུགས་ཏེ་རྔམ་པ་ཞེས་པའོ། །ཐེ་ཚོམ་མེད་ཅེས་པ་མི་གཡོ་བར་ཞེས་བའོ། །ལག་ན་མཚོན་ཆ་ཐོགས་ནས་ནི། །ཞེས་པ་མིང་གི་མཚོན་ཆ་ཐོགས་ཤིང༌། བདག་ལ་རྒོལ་ཞིང་གནོད་པར་བྱེད་པ་གཞན་དག་གིས་ཀྱང་བདག་མཐོང་བ་ཡིན་ཞེས་པའོ། །རྒོལ་ཞིང་གནོད་པར་བྱེད་པ་དེ་དག་ཐམས་ཅད་མཐོང་མ་ཐག་ཏུ་སྒྲུབ་པ་པོས། མནན་ཏེ་རི་བཞིན་མི་གཡོར་འགྱུར། །ཞེས་པ་མི་གཡོ་ཞིང་འགུལ་མི་ནུས་པར་ངེས་པར་བྱེད་དོ་ཞེས་པའི་དོན་ཏོ། །མྱོས་པ་དང་ཞེས་པ་གླང་བོ་ཆེའི་རྒྱལ་པོ་ཞེས་པའོ། །རྐང་ཐང་འཁྲུགས་པ་མ་བཅས་པའི། །ཞེས་པ་བདག་ལ་འཁྲུགས་ཏེ་རྔམ་པ་དག་ལའོ། །སྒྲུབ་པ་པོས་མཐོང་བ་ཙམ་གྱིས་ཉིད་ཀྱིས་སུ། རེངས་ཤིང་མི་གཡོ་བ་བཞིན་དུ་སྣང་བར་འགྱུར་རོ་ཞེས་པའི་ཐ་ཚིག་གོ །འདི་མན་ཆད་ཐལ་བ་བསྒྲུབ་པ་ཞེས་བྱ་བ་བཤད། དེ་ནས་གཞན་ཡང་དུར་ཁྲོད་ཀྱིས། །ཞེས་པ་ནས་བསྟན་ཏེ། སྦྱོར་བ་བཀྲ་ཤིས་དགེ་བདག །ཅེས་རྫས་དངོས་གྲུབ་དུར་ཁྲོད་ལས་ཕྱུང་སྟེ། བཀྲ་ཤིས་པ་མ་ཡིན་གྱི་འོན་ཀྱང་དེ་བསྒྲུབ་པའི་ཚེ། ཁྲོ་བོའི་སྦྱོར་བ་དང་ལྡན་ལ་གྲུབ་ནས་ཀྱང་སེམས་ཅན་མང་པོའི་དོན་སྣ་ཚོགས་བྱེད་པས་ན་ཡང་སྒྱོར་བ་བཀྲ་ཤིས་པ་ཞེས་བྱའོ། །སྦྱོར་བ་དགེ་བའི་རྒྱུད་ཆེན་པོ་ལས། །མཚན་མོ་འབར་བ་བལྟས་ནས་སུ། །ཞེས་པ་མི་ཤི་མ་ཐག་ཏུ་དུར་ཁྲོད་དུ་བསྐྱལ་ནས་དེར་བསྲེགས་པ་བལྟས་ནས་བདག་ཉིད་སྐྲ་བཤིག་གོས་ཀྱང་མེད་པར་བྱས་ཞེས་པའོ། །བཟླས་པ་དག་ཀྱང་བསྐོར་ཞིང་བྱ། །ཞེས་པ་རོ་བསྲེགས་པའི་མི་རོ་དེ་ལ་ཁྲོ་བོའི་སྔགས་ཟློས་ཤིང་གཡས་ཕྱོགས་ནས་བསྐོར་ཏེ་བཟླས་པ་བྱས་ནས། མེ་མདག་ཤི་ཤིའི་བར་དུ་
བྱ། །རོ་བསྲེགས་པའི་མེ་ཤི་བ་དེར་ཞེས་པའོ། །ལན་ཅིག་ཐལ་བ་སྦར་གང་ལ། །ཞེས་པ་ཐལ་བ་སྔར་སྤར་གང་ལན་ཅིག་བླང་ངོ༌། །ཐལ་བ་དེ་ཡང༌། ལག་བ་གཡོན་གྱིས་བླངས་ནས་སུ། །ཞེས་པའོ། །མཁས་པས་ཁྱིམ་དུ་འགྲོ་བར་བྱ། །ཞེས་པ་སྔགས་པས་ཁང་བ་སྟོང་བར་འགྲོ། །ཡང་ན་ལྷ་ཁང་སྟོང་པར་འགྲོ། །ཞེས་པ་ལ་མ་ཧཱ་དེ་བ་ལ་སོགས་པ་འཇིག་རྟེན་པའི་ལྷ་ཁང་སྟོང་པའི་གནས་སུ་འགྲོ་བར་བྱའོ། །ཕྱིར་ཡང་ལྟ་བར་ཡོང་མི་བྱ། །ཞེས་པ་དེ་ལྟར་གནས་དེ་དག་ཏུ་འགྲོ་བའི་ཚེ་སྔར་ཐལ་བ་བླངས་པའི་གནས་སུ་ཕྱིར་ཡང་མི་ལྟ་བར་བྱའོ་ཞེས་པའོ། །ཡང་ཐལ་བ་དེ་ཞེས་པ་གནས་དེར་ཡང་ཞེས་པའོ། །ནམ་ལངས་བར་དུ་བཟླས་པ་བྱ། །ཞེས་པ་ཁམ་ཕོར་གྱི་ནང་དུ་ཞེས་པའོ། །སྔགས་ཀྱིས་ཐལ་བ་དེ་ནི་བསྲུངས་ནས་སུ་ཞེས་པའོ། །ཁམ་ཕོར་སར་བའི་སྣོད་དུ་གཞག་པར་བྱ། །ཞེས་པའོ། ཐལ་བ་དེ་ནི་དགྲ་ཡི་དཔུང་དག་གནས་པའི་ཕྱིར་ཞེས་པའོ། །དགྲའི་དཔུང་ལ། ཐལ་བ་དེ་ནི་གཏོར་བྱས་ན། དགྲའི་མཚོན་ཆ་ཐམས་ཅད་འཁྲུགས་པ་དང་ཞེས་པའོ། །ཐལ་བ་དེ་ནི་བསྲུངས་ནས་སུ། །ཞེས་པ་དགྲ་ལ་ཐལ་བ་དེ། ལན་ཅིག་གཏོར་བ་ཙམ་གྱིས་ཀྱང༌། །ཞེས་བའོ། །ལུས་རྣམས་མི་འགུལ་གདོན་མི་ཟ། །ཞེས་པ་དགྲའི་དཔུང་གི་ལུས་རྣམས་ཞེས་པའོ། །འདི་ནི་མཚོན་རྣམས་གནོན་པ་དང༌། །ཞེས་པ་ཐབས་འདི་ལྟར་དབུང་གི་ལག་ནས་མཚོན་ཆ་ཐོགས་པ་དག་མི་གཡོ་བ་གནོན་པའམ་རེངས་པར་འགྱུར་རོ་ཞེས་པའོ། །དཔུང་ཡང་གནོན་བྱེད་དགེ་བའོ། །ཞེས་པ་དཀོན་མཆོག་གསུམ་ལ་གནོད་པ་རྣམས་གནོན་པར་བྱེད་པས་དགེ་བའོ། །དེ་བཞིན་ཉིད་ཀྱིས་ལོག་པ་དང༌། །ཞེས་པ་ཕ་རོལ་པོའི་དཔུང་རྣམས་ཐམས་ཅད་དོ། །མྱོས་པར་བྱེད་པ་སྦྱར་བ་ཡང༌། །རླུང་ཕྱོགས་དག་ཏུ་སྦྱར་བའམ། །ཞེས་པ་ཕ་རོལ་པོའི་དཔུང་གི་རླུང་ཕྱོགས་སུ་འདུག་ལ་ཐལ་བ་དེ་གཏོར་བ་རླུང་གིས་ཁྱེར་ཏེ། ཕ་རོལ་པོའི་དཔུང་རྣམས་ལ་རེག་པར་བྱའོ། །ཡང་ན་བསྙེན་ཏེ་བྱས་ཀྱང་རུང༌། །ཞེས་པ་ཕ་རོལ་པོའི་དཔུང་གི་དྲུང་དུ་བསྙེན་ཏེ་ཐལ་བས་གཏོར་རོ། །བགྲོད་དཀའི་དགྲ་ནི་མཚོན་འཁྲུག་ལ། །ཞེས་པ་ཐུབ་པར་དཀའ་
བའི་དགྲ་དེ་དག་མཚོན་ཆ་ཐོགས་ཏེ་རྔམ་ནས་འབྱུང་བ་དག་ལས་བྱས་ནས་འགྲོ་བ་མི་འགུལ་འགྱུར་ཞེས་པ་ཐལ་བས་གཏོར་ན་པ་རོལ་ཕོའི་དཔུང་རྣམས་མི་གཡོ་མི་འགུལ་བར་འགྱུར་རོ་ཞེས་པའི་ཐག་ཚིག་གོ །འདི་མན་ཆད་སྣག་ཚ་སྦྱར་བ་བསྒྲུབ་པ་བཤད་དེ། འགྲོ་བ་དབང་བྱེད་སྦྱོར་བ་ན། །ཞེས་པ་ནས་བསྟན་ཏེ། གོང་མ་ལས། རྣམ་པ་གཞན་དག་བཤད་པ་ནི། །ཞེས་པའོ། །དུར་ཁྲོད་དཀྱིལ་འཁོར་བྲིས་ཞེས་པ་ཡི་དགས་ཕལ་པོ་ཆེའི་དཀྱིལ་འཁོར་བྲིས་ཞེས་པའོ། །མཆོད་པ་ཞེས་པ་སྔར་བཤད་པ་བཞིན་དུ་བྱ་ཞེས་པའོ། །མི་ཡི་ཚིལ་གྱི་སྣུམ་དག་ལས། །ཞེས་པ་མིའི་ཚིལ་བུ་བཞུ་བ་ཐོད་པའི་ནང་དུ་བླུགས་ཏེ། སྟེང་ནས་ཀྱང་ཐོག་བ་གཅིག་གིས་བཀབ་སྟེ་མར་མེ་བུས་ལ་དེའི་དུད་བ་བསག་གོ །སྙིང་པོ་ནི་དུར་ཁྲོད་ཀྱི་རས་ལ་བྱའོ། །མཁས་བ་དག་གིས་སྣག་ཚ་སྦྱར། །ཞེས་པ་སྣག་ཚ་སྦྱར་བའི་ཐབས་འདྲ་བར་མར་མེ་དུད་པ་སྦྱོར་རོ་ཞེས་པའོ། །དུ་བའི་སྣག་ཚས་མིག་བསྐུས་ན། །ཞེས་པ་ཀ་ལ་ཤ་ཞེས་བྱ་བ་མིག་བསྐུ་བའི་ཐུར་མ་དེས་མིག་བསྐུའོ་ཞེས་པའོ། །གང་མཐོང་བ་དེ་སྔགས་པ་དེའི་དབང་དུ་འགྱུར་ཞེས་པའོ། །དང་པོར་ཅི་བགྱི་ཞེས་པར་འགྱུར། །ཞེས་པ་དབང་དུ་གྱུར་པ་དེ་དག་ཀྱང་དང་པོར་སྔགས་པ་ལ་ཅི་བགྱི་ཞེས་པའི་ཐ་ཚིག་གོ །འདི་མན་ཆད་བཙག་བསྒྲུབ་པ་ཞེས་བྱ་བ་བསྟན་ཏེ། བཙག་གི་སྦྱོར་བའི་དངོས་གྲུབ་ཀྱང༌། །ཞེས་པ་གསེར་གྱི་བཙག་ཅེས་བྱ་སྟེ། བཙག་ཡུག་སྣམ་བཟང་པོ་ལ་བྱ་བར་འབྱུང་ངོ༌། །དགེ་བ་དག་ནི་ད་བཤད་དོ། །ཞེས་པ་འགྲུབ་པའི་འབྲས་བུ་ཐོབ་པ་ལ་བྱ་སྟེ་གོང་དུ་བཤད་པ་དང་འདྲའོ། །ཡུག་སྣམ་བཙག་ནི་དགེ་བ་དག །ཅེས་པ་བཙག་ཡུག་སྣམ་བཟང་པོ་འདེ་གུ་གཅིག་མི་ཤི་བ་དེའི་ཁྱིམ་ནས་ཕྱུང་སྟེ། བསྲེག་པའི་གནས་སུ་ཁྱེར་ཏེ་དེའི་ཚེའམ་ཡང་ན་བསྲེག་པ་ཉིད་ཀྱི་ཚེ། མི་རོའི་ཁར་ཁྱེར་དུ་བཅུག་ནས། །དེ་ནས་མི་རོ་མེས་ཕྱེད་ཚིག་ཕྱེད་མ་ཚིག་ཙམ་གྱི་ཚེ་མཚན་མོ་གྲོགས་མེད་པར་གཅིག་བུ་མི་རོའི་ཁ་ནས་བཙག་རྡོག་དེ་བླང་བར་བྱའོ། །མཚན་མོ་བླང་ཞེས་པ་འདི་དང་སྦྱར་ན་དེ་དག་བདག་ཉིད་ཀྱིས་བསྲེག་པ་ཁས་བླང་དགོས་སོ། །བླངས་ནས་ལྷ་ཡི་ཁང་སྟོང་དུ། །ཞེས་པ་འཇིག་
རྟེན་པའི་ལྷ་ཁང་སྟོང་བ་ཞེས་པའོ། །སྔགས་པ་མཁས་པ་དག་གིས་བཟླས་པར་བྱ། །ཞེས་པ་རས་དམར་པོའི་ནང་དུ་བཞག་ལ་བསྒྲུབ་པོ། །བྱ་ཞེས་བ་བསྒྲུབ་པར་བྱའོ་ཞེས་པའོ། །དེ་ནས་འདུག་ཅིང་ཞེས་པ་འཇིག་རྟེན་པའི་ལྷ་ཁང་དེ་ན་འདུག་ཅེས་པའོ། །དེ་ལ་བཟླས་ཞེས་པ་བཙག་རྡོག་ལ་བཟླས་ཞེས་པའོ། །མཆོད་ཅིང་ཞེས་པ་སྒྲུབ་པ་པོའི་རྫས་ཞེས་པའོ། །དེ་ནས་གང་ཡང་རུང་བའི་མིང༌། །དེ་ནས་བདག་གི་སྔགས་སར་སྐྱང་ནུལ་བཟང་པོ་རབ་ཏུ་བྱས་པའི་སྟེང་དུ་བཙག་རྡོག་དེས་གང་དགུག་པར་བྱ་བའི་མིང་བྲི་བར་བྱའོ། །དེ་ཡི་མིང་ནས་སྒྲུབ་པ་པོས། །བསྐུལ་ནས་དོགས་པ་མེད་པར་ཡང༌། །ཞེས་པ་དེའི་མིང་ནས་བསྐུལ་ཞིང་ཁྲོ་བོའི་སྔགས་དང་ལྡན་པར་བསྐུལ་ན་ཐེ་ཚོམ་མེད་པར་གང་དགུག་པར་བྱ་བ་དེ་མྱུར་དུ་ཁུགས་པར་འགྱུར་རོ་ཞེས་པའོ། །འདི་མན་ཆད་སོར་གདུབ་བསྒྲུབ་པ་བཤད་དེ། ཆོ་ག་བཞིན་དུ་གསུངས་པ་དག །ཅེས་པ་ཁྲོ་བོའི་རྒྱལ་པོའི་རྒྱུད་ཆེན་ལས་ཞེས་པའོ། །མི་རོ་ཁྱེར་ཏེ་འགྲོ་བ་ན། །ཞེས་པ་མི་ཤི་བའི་རོ་བསྲེག་པའི་གནས་སུ་ཁྱེར་ཏེ་འགྲོ་བའི་ཚེ་ན་ཞེས་པའོ། །དེའི་ཁར་ཞེས་པ་རོ་དེའི་ཁར་ཞེས་པའོ། །དེར་སོང་ནས་ནི་གཞུག་པར་བྱ། །ཞེས་པ་མི་རོ་བསྲེགས་པ་ཁྱེར་ཏེ་འགྲོ་བའི་སར་བདག་སོང་ནས་སོར་གདུབ་མི་རོའི་ཁང་གཞུག་གོ་ཞེས་པའོ། །མཁས་པས་གཅིག་པུ་ཁྲོ་བོའི་སྔགས། །ཞེས་པ་སྔགས་པ་དེ་གྲོགས་མེད་པ་གཅིག་པུ་ཞེས་པའོ། །ཟློས་པ་བྱེད་པ་འདུག་པ་ན། །ཞེས་པ་མི་རོ་བསྲེགས་པའི་དྲུང་དུ་ན་ཞེས་པའོ། །རོ་ཡི་ཁ་རུ་འདུག་པ་ནི། །ཞེས་པ་མི་རོ་དེའི་སྔར་ཁར་བཅུག་པའི་སོར་གདུབ་ལག་པ་གཡོན་པས་བླང་ཞེས་པའོ། །ནམ་ལངས་བར་དུ་བཟླས་པ་བྱས། །ཞེས་པ་རོ་བསྲེགས་པའི་གནས་དེ་ཉིད་དུ་བཟླས་པ་བྱའོ། །སྔགས་པ་མཁས་པ་ཡིས་ནི་གཞུག་པར་བྱ། །ཞེས་པའོ་ཞེས་པ་སྒྲུབ་པ་པོའི་དེའི་ལས་བྱེད་པ་ཙམ་དུ་མ་ཟད་ཀྱི། ཕྱི་བཞིན་དུ་འང་འབྲང་བར་འགྱུར་ཞེས་པའོ། །འདི་མན་ཆད་ནི་ཡུངས་ཀར་བསྒྲུབ་པ་བཤད་དེ། དེ་ནས་གཞན་ཡང་ཡུངས་ཀར་དག །ཅེས་པ་ནས་བསྟན་ཏེ། ཤིན་ཏུ་ངོ་མཚར་དང་ལྡན་པ། །དེ་ཀུན་དེ་ཡི་ལས་བྱེད་འགྱུར།
ཞེས་པ་ཡུངས་ཀར་གྲུབ་པ་ནི་ངོ་མཚར་ཡ་མཚན་དག་སྟོན་ནུས་པ་ལ་བྱའོ་ཞེས་པའོ། །ཁྲོ་བོ་ཉིད་ཀྱིས་ཇི་ལྟ་བར། །སྒྲུབ་པའི་སྦྱོར་བ་གསུངས་པ་བཤད། །ཅེས་པ་ཁྲོ་བོ་ཉིད་ཀྱིས་རྒྱུད་ཆེན་པོ་ལས་ཇི་སྐད་གསུངས་པ་དེ་བཤད་པར་བྱའོ། །སིདྡྷའི་ཤིང་ཞེས་པ་ཤིང་གི་མིང་ཞེས་པའོ། །བཟང་པོ་སོར་ནི་བརྒྱད་པར་བྱ། །ཞེས་པ་དབང་དང་ཞིང་གི་ཚད་ཅེས་པའོ། །ཡུངས་ཀར་དཀར་ཞེས་པ་དཀར་པོ་ཉི་ཚེ་ཞེས་པའོ། །དངོས་གྲུབ་མཆོག་ནི་སྟེར་བ་བླུགས། །ཞེས་པ་ཡུངས་ཀར་དེ་གབ་ཙེའི་ནང་གང་བར་བླུགས་ཞེས་པའོ། །ཉི་མ་རེ་རེ་བཟླས་པ་ཡིས། །ཟླ་བ་གཟས་ཟིན་བར་དུ་བྱ། །ཞེས་པ་དེ་ལ་ལོ་གཅིག་གམ། ཟླ་བ་དྲུག་ཙམ་གྱི་སྔོན་ནས་ཉི་མ་རེ་རེ་དུས་གསུམ་དུ་རྒྱུན་མི་འཆད་པར་ནམ་ཟླ་བ་གཟས་ཟིན་དུས་བཟླས་སོ་ཞེས་པ་སྟེ། འདི་ཡང་སྤྱི་རྒྱུད་ལས་གསུངས་པའི་མཚན་མ་འགའ་ཞིག་བྱུང་བྱུང་དུ་བཟླས་སོ། །དེ་ནས་འདོད་པ་བསྒྲུབ་པར་བྱའོ། །དཀྱིལ་འཁོར་ཞེས་པ་ལ་དེ་ནས་ཟླ་བ་གཟས་ཟིན་པའི་དགོངས་ཀ་ཡི་དགས་ཕལ་པོ་ཆེའི་དཀྱིལ་འཁོར་བྲིས་ནས། དཀྱིལ་འཁོར་མདུན་དུ་བསྒྲུབ་བོ། །ཡུངས་ཀར་ཙེག་ཙེག་ཟེར་གྱི་བར་དུ་བཟླས་སོ་ཞེས་པའོ། །དེ་ཚེ་ཡུངས་ཀར་གྲུབ་དེ་དག །ཅེས་པ་ཡུངས་ཀར་ལ་སྒྲ་དེ་དག་བྱུང་ནས་ཞེས་པའོ། །བླངས་ནས་གང་ཡང་རུང་བ་རུ། །ཞེས་པ་སྔགས་དང་ལྡན་པས་ཡུངས་ཀར་དེ་གཏོར་ན་དེས་ཞེས་པའོ། །དེའི་ཡུངས་ཀར་དེས་མི་ནུས་ཅི་ཡང་མེད་ཅེས་པའོ། །རི་མཐོང་ཞེས་པ་རིན་པོ་ཆེའི་རྣམ་པ་མང་པོ་དག་ཅེས་པའོ། །ཕྱི་མ་ཞེས་པ་རྨེག་མེད་པར་བྱེད་ཅེས་པའོ། །སྤྲིན་འགོག་བའང་ཞེས་པ་སྤྲིན་རྣམ་པར་བྱ་བ་དང་ཞེས་པའོ། །རིག་འཛིན་ཞེས་པ། སྔགས་པ་བདག་གིས་སྦྱར་ན་ནི། །ཞེས་པའོ། །གློ་བུར་དག་ཏུ་ཐོགས་མེད་བྱེད། །ཅེས་པ་ཐོགས་པ་མེད་པར་གློ་བུར་དུ་ཡང་ལས་དེ་དག་བྱེད་དོ་ཞེས་པའོ། །གསུངས་དང་མ་གསུངས་པ་དག་ཀྱང༌། །ཞེས་པ་གོང་ནས་གསུངས་པའི་ལས་དང་རྟགས་འོག་ནས་བཤད་པའི་ལས་དག་ཀྱང་སྔགས་པ་རང་གི་བློས་བརྟགས་པའི་ལས་དེ་དག་ཐམས་ཅད་ཀྱང་ཞེས་པའོ། །གཏོར་མ་ཙམ་གྱིས་ཐོགས་མེད་བྱེད། །
ཅེས་པ་གཏོར་མ་ཙམ་གྱིས་ཐགས་ཐོགས་མེད་པར་ལས་དེ་དག་བྱེད་པར་རོ། །དེ་ལ་སོགས་པ་སྣ་ཚོགས་པ། །ཞེས་པ་དེ་ལ་སོགས་པའི་དངོས་གྲུབ་སྣ་ཚོགས་གོང་དུ་བཤད་པ་རྣམས་ཞེས་པའོ། །དཔའ་བོ་བརྟུལ་ཞུགས་སྤྱོད་པ་ཡིས། །ཞེས་དཔའ་བོ་བརྟུལ་ཞུགས་སྤྱོད་པའོ། །སྔགས་པ་ཡིས། སྔ་མ་བཞིན་དུ་མཆོག་རྣམས་དང༌། །ཞེས་པ་གོང་དུ་བཤད་པའི་དངོས་གྲུབ་མཆོག་རྣམས་ཞེས་པའོ། །འབྲིང་དག་ཀྱང་ནི་བསྒྲུབ་པར་བྱ། །ཞེས་པ་དངོས་གྲུབ་མཆོག་གི་འབྲས་བུ་དང༌། ཐ་མའི་དངོས་གྲུབ་དག་ཀྱང་བསྒྲུབ་པར་བྱའོ། །དེ་དག་ཀྱང་བརྟུལ་ཞུགས་ནི་མེད་པར་བྱས་ནས་འབྲས་བུ་མེད་ཅེས་བ་དཔའ་བོ་བརྟུལ་ཞུགས་མ་སྤྱད་པར་དངོས་གྲུབ་ཀྱང་བསྒྲུབས་ཀྱང་འགྲུབ་པར་མི་འགྱུར་རོ། འབྲས་བུ་མེ་དར་འགྱུར་རོ་ཞེས་སོ། །ཕྱག་རྒྱ་གཉིས་ཀྱི་གཉིས་རྣམས་ནི། །ཞེས་པ་ཕྱག་རྒྱའི་ལྷག་གཉིས་གང་བསྒོམས་ཀྱང་རུང་སྟེ། དེ་དག་གསུམ་སྤྱན་དྲངས་ཏེ་མདུན་དུ་བསམ་ཞིང་བསྒོམ་མོ། །གང་དག་འདིར་ནི་བཤད་པ་རྣམས། །ཞེས་པ་ལ་སོགས་པ་འདིར་ནི་གོང་དུ་བཤད་པ་རྣམས་ཀྱི་ལས་དེ་སླར་དགྲོལ་བར་བཤད་དེ་གསེར་དངུལ་ལ་སོགས་ཏེ། རིན་པོ་ཆེའི་ལྷའི་སྐུ་གཟུགས་རྣམས་ཀྱིས་འབྲིང་དང་ཐ་མའི་དངོས་གྲུབ་བསྒྲུབ་པ་དང༌། ལས་རྣམས་སྒྲུབ་པ་ཇི་སྐད་བཤད་པ་བཞིན་དུ་བེ་ཏ་ལཱི་དང༌། བེ་ཅོན་ཕྱག་རྒྱའི་གཟུགས་གཉིས་ལ་ཡང་བརྟུལ་ཞུགས་མ་སྤྱོད་པར་ཡང་བཟླས་བརྗོད་མཆོད་པ་འབའ་ཞིག་བྱས་པས་ཀྱང་དངོས་གྲུབ་འབྲིང་དང་ཐ་མ་དག་འགྲུབ་པར་འགྱུར་རོ། །འདིའི་སྐབས་སུ་བྱུག་སྤོས་ཀྱི་འདེ་གུས་གཟུགས་ལ་བསྐུ་བར་མི་བྱ་སྟེ། མཆོད་པར་བྱ་བ་ཙམ་ཉིད་དུ་ཟད་དོ་ཞེས་པའོ། །ཇི་སྐད་བཟླས་པས་འཐོབ་པར་བྱེད། །ཅེས་པ་ལ་སོགས་པ་དེ་བས་ན་སྔོན་དུ་བསྙེན་པ་དང་བཟླས་བརྗོད་བྱས་པ་དང༌། མཆོད་པ་འབའ་ཞིག་བྱས་པས་ལུགས་ཀྱི་སྐུ་གཟུགས་སྐབས་ཀྱི་དངོས་གྲུབ་འབྲིང་དང་ཐ་མ་དག་འགྲུབ་པར་འགྱུར་རོ་ཞེས་པའོ། །རྟག་ཏུ་བདེ་གཤེགས་སེམས་དཔའ་དེ། །ཞེས་པ་བྱང་ཆུབ་ཀྱི་སེམས་དང་ལྡན་པར་དེ་ཞེས་པའོ། །ཉིན་རེ་ཟློས་པའི་སྦྱོར་བ་ཡིས། །ཞེས་
པ་ཉིན་གཅིག་ཀྱང་དུས་གསུམ་རྟག་ཏུ་ཟློས་པའི་སྦྱོར་ཞེས་པའོ། །རྟག་ཏུ་བརྟུལ་ཞུགས་མ་བྱས་པ། །ཞེས་པ་དཔའ་བོ་བརྟུལ་ཞུགས་ཞེས་པའོ། །འདོད་པའི་དོན་ཞེས་པ་བདག་ཉིད་འདོད་པའི་དོན་ཞེས་པའོ། །བརྟུལ་ཞུགས་ཀྱིས་འགྲུབ་པ་ཞེས་པ་གོང་མའི་འཕྲོ་སྦྱོར་བའི་ཚིག་སྟེ། མཇུག་སྡུད་པ་ཞེས་པའོ། །ཁྲོ་བོ་མཆོག་གིས་ཅི་གསུངས་པ། །ཞེས་པ་རྩ་བའི་རྒྱུད་ཆེན་པོ་ལས་བཤད་པ་ཡིན་ཞེས་པའོ། །བརྒྱད་པའོ། །བརྒྱད་པའི་བཤད་པ་རྫོགས་སོ།། །།རྟོག་པ་ཕྱི་མ་འདི་ལ་དོན་རྣམ་པ་ལྔས་བཤད་དོ། །དེ་ལ་སྐབས་དབྱེ་བ་དང༌། སྔོན་དུ་བསྙེན་པའི་ཆོ་ག་དང༌། །མཆོད་པ་སྔར་བྱས་པའི་ལས་རྣམས་བཤད་པ་དང༌། དེ་བཞིན་གཤེགས་པའི་དམ་ཚིག་སྔར་བྱས་ནས་ཞི་བ་ལ་སོགས་པའི་ལས་བྱ་བ་དང༌། དཔལ་ལ་སོགས་པ་སྒྲུབ་པའོ། །དེ་ཡང་དང་པོ་སྐབས་དབྱེ་བ་ཞེས་བྱ་བ་བཤད་དེ། དེ་ཡང་རྟོག་པ་ཕྱི་མ་ཡི། །ཞེས་པ་ཁྲོ་བོའི་རྒྱལ་པོ་དེའི་རྟོག་པ་བཤད་དེ། ཕྱི་མ་ཞེས་བྱ་བ་ནི་སྔར་གོང་དུ་བཤད་པ་འཆད་ཅིང་མ་ཆུད་པ་རྣམས་འདི་མན་ཆད་དུ་བཤད་པས་ནི་རྟོག་པ་ཕྱི་མ་ཞེས་བྱ་སྟེ། མདོར་ན་གོང་མའི་ལས་རྣམས་ཀྱི་མཇུག་སྡུད་བ་ཐུན་བུ་ཐུ་བ་ཞེས་བྱ་བའི་ཐ་ཚིག་གོ །ཇི་ལྟར་བརྟུལ་ཞུགས་མེད་ཀྱང་རུང༌། །ཞེས་པ་རིག་པ་ཕྱི་མའི་ཆོ་ག་འོག་ནས་འབྱུང་བ་འདི་རྣམས་ལ་ནི་བརྟུལ་ཞུགས་སྤྱད་མི་དགོས་ཞེས་པའོ། །དེའི་ཕྱིར་ཁྲོ་བོ་བདག་ཉིད་ཀྱིས། །ཞེས་པ་བརྟུལ་ཞུགས་དག་སྤྱད་མི་དགོས་པ་དེའི་ཕྱིར། གསུངས་པ་དེ་ཡི་ཆོ་ག་བརྗོད། །ཞེས་པ་བཤད་པ་ཞེས་བྱ་བའི་དོན་ཏོ། །བཅུ་བདུན་པ་ཞེས་བ་རྩ་བའི་སྔགས་སོ། །རྩ་བའི་སྔགས་ལ། ཁྲོ་བོ་ཞེས་ནི་གང་བརྗོད་པ། །ཞེས་པའོ། །འདི་མན་ཆད་ནི་སྔོན་དུ་བསྙེན་པ་བྱ་བའི་ཆོ་ག་བཤད་དེ། དེ་ལ་ཐོག་མར་སྔོན་བཞིན་དུ། །ཞེས་པ་ལ་སོགས་པ་འདིའི་སྐབས་སུ་སྐུ་གཟུགས་བྲི་བ་ནི་སྔོན་དུ་བསྙེན་པ་སྔར་བཤད་པ་དག་བྱ་མི་དགོས་པར་བཤད་དོ། །དེའི་རི་མོའི་སྐུ་གཟུགས་དང་པོར་སྔར་བཤད་པའི་མཚན་ཉིད་བཞིན་དུ་བྲི་བར་བྱའོ། །དེ་ལྟར་རི་མོའི་མདུན་དུ་སྔར་བཤད་བ་བཞིན་དུ་མཆོད་པར་བྱའོ། །
ཡང་ན་སྔགས་པས་བརྡུངས་སམ་བླུགས་པའི་སྐུ་གཟུགས་བྱས་ཀྱང་རུང་སྟེ། བཟོ་བོ་བྱེད་དུ་གཞུག་གོ་ཞེས་པའོ། །མཁས་པས་བརྒྱད་འབུམ་བཟླས་པར་བྱ། །ཞེས་པ་བརྡུངས་སམ་རི་མོའི་སྐུ་གཟུགས་གང་ཡང་རུང་བ་བྱེད་དུ་བཅུག་ནས་ཟིན་པའི་འོག་ཏུ་སྐུ་གཟུགས་ཀྱི་སྤྱན་སྔར་མཆོད་པ་ཆེན་པོ་བྱས་ལ་དུས་གསུམ་དུ་བརྒྱད་འབུམ་ཚང་བར་སྔོན་དུ་བསྙེན་པ་བྱའོ། །རྩ་བའི་སྔགས་བཟླས་སོ་ཞེས་པའི་དོན་ཏོ། །འདི་མན་ཆད་མཆོད་པ་སྔར་བྱས་ནས་ལས་རྣམས་སྒྲུབ་པ་ཞེས་བྱ་བ་བསྟན་པའི་ཕྱིར། དེ་ཡི་ཐོག་མར་དཀོན་མཆོག་ནི། །ཞེས་པ་ལ་སོགས་པ་སྨོས་ཏེ། དེའི་ཐོག་མར་དཀོན་མཆོག་ནི། །ཞེས་པ་དེ་ལྟར་བརྒྱད་འབུམ་བཟླས་པ་བྱས་པའི་འོག་ཏུ་སངས་རྒྱས་དང་ཆོས་ལ་མཆོད་པ་ཆེན་པོ་བྱས་ཤིང་དགེ་འདུན་ལ་མཆོད་སྟོན་བྱ་ཞིང་མཆོད་དེ། དེ་ལྟར་དཀོན་མཆོག་གསུམ་ལ་མཆོད་པའི་འོག་ཏུ་ཁྲོ་བོའི་རྒྱལ་པོ་ལ་ཁྱད་པར་དུ་མཆོད་པ་ཇི་སྐད་བཤད་པ་བཞིན་དུ་མཆོད་པར་བྱའོ་ཞེས་པའི་དོན་ཏོ། །འོན་ཀྱང་འགྲུབ་སྟེ་དེ་ཡི་ཚེ། །ཞེས་པ་ཆོ་ག་དེ་ལྟར་བྱས་པས་འགྲུབ་པར་འགྱུར་ཏེ། དེའི་ཚེ་ན་ལས་འདི་དག་བྱེད་ནུས་པར་འགྱུར་རོ་ཞེས་པའོ། །འབྱུང་བོའི་གདོན་དང་ཞེས་པ་འབྱུང་བོའི་གདོན་ལ་ཡང་བྱའོ། །འབྱུང་པོ་དང་གདོན་ཞེས་སོ་སོར་ཡང་བཤད་ཅེས་སོ། །དུག་རྣམས་དང་ཞེས་པ་ལ་སོགས་པའི་ལས་རྣམས་སྒྲུབ་པ་པོ་གང་དང་གང་འདོད་པའི་ལས་རྣམས་ཡིད་ལ་བསམས་པ་ཙམ་གྱིས་ལས་དེ་དག་འགྲུབ་པར་འགྱུར་རོ་ཞེས་བྱ་བའི་དོན་ཏོ། །ཡིད་ལ་ཞེས་པ་འགྲོ་བ་དང་མི་འགྲོ་བའི་ཞེས་པའོ། །དེ་ཡིད་བསམས་པའི་ལས་ཀྱང་ཞེས་པ་འབྱུང་པོ་ལ་སོགས་པ་དང་དུག་དང་ནད་ཀྱིས་བཏབ་པའི་ལས་གང་དུ་བཤད་པའི་ལས་རྣམས་ཀྱང་ཁེ་དང༌། བཀུར་སྟི་དང༌། རྙེད་པ་འཐོབ་པར་བྱ་བའི་ཕྱིར་ནི་ལས་དེ་དག་སྤྱད་པར་མི་བྱ་སྟེ། གཞན་དུ་ན་དཀོན་མཆོག་གསུམ་གྱི་དོན་དམ་ཆེད་དུ་ལས་དེ་དག་བྱའོ་ཞེས་པའོ། །དུག་ལ་སོགས་པ་གང་བརྗོད་པ། །ལས་རྣམས་ཀྱི་ནི་ཚིག་གིས་བྱ། །ཞེས་པ་འབྱུང་པོ་ལས་གདོན་དག་གིས་ལས་གོང་དུ་བཤད་པ་རྣམས་གྲུབ་པ་དེས་ཚིག་གིས་བསྒོ་བ་ཙམ་གྱིས་ལས་དེ་དག་འགྲུབ་པར་འགྱུར་རོ། །གཞན་དུ་ཡེངས་
པའི་ཚིག་གིས་ཀྱང༌། །ཞེས་པའི་སྒྲུབ་པ་པོ་དེ་གུང་དུ་དགེ་བའམ། ལས་ལ་ཡེངས་ལ་དེའི་ཚིག་གིས་ཀྱང་ཞེས་པའོ། །བདག་ཉིད་ཇི་ལྟར་འདོད་བཞིན་དུ། །ཞེས་པ་བསྒོ་བ་ཙམ་གྱིས་ཀྱང་འགྲུབ་སྟེ། ཇི་ལྟར་འདོད་པའི་ལས་རྣམས་འགྲུབ་པར་འགྱུར་ཞེས་པའོ། །ད་བདུག་པ་ཡི་སེམས་ཅན་རྣམས། །ཞེས་པ་གྲུབ་པའི་དེས་དེ་བཞིན། ཚར་བཅད་པ་དང་ཕན་འདོགས་ནུས་ཞེས་པའོ། །གང་གི་ནག་པོས་ཟིན་པ་ཡིས། །ལས་རྣམས་ཀྱང་ནི་བྱེད་འགྱུར་བ། །ཞེས་པ་ཀ་ལ་ན་ཏ་ཞེས་པ་དུས་ཀྱིས་ཟིན་པ་ལ་ཡང་བྱ། ནག་པོས་ཟིན་པ་ལ་ཡང་བྱའོ། །དེ་ལ་དུས་ཀྱིས་ཟིན་པ་ལ་རྣམ་པ་གཉིས་ཏེ། ཉི་མའི་གུང་ལ་ཟིན་པ་དང༌། འཆི་བའི་དུས་ཀྱི་ཚེ་ན་ཟིན་པའོ། །དུས་དེར་ཟིན་ཕན་ཆད་འཚོ་མི་སྲིད་དེ་དག་ཏུ་ཚོགས་ཀྱང་མི་སློན་ནོ། །དངོས་གྲུབ་སྦྲུལ་གྱིས་ཟིན་པ་ལ་བྱ་སྟེ། སྦྲུལ་གྱི་དུག་དེས་ཟིན་པ་ལས་སླར་གསོ་བའི་ལས་རྣམས་ཀྱང་ལས་འདི་དག་གིས་བྱའོ་ཞེས་བྱ་བའི་དོན་ཏོ། །ལྕག་གམ་ཞེས་པ་ཟིན་པ་དེ་ལ་ཞུ་འམ། ཡང་རྐང་པ་ཡིས་ཞེས་པ་ཟིན་པ་དེ་རྐང་པས་མནན་པའམ་ཞེས་པའོ། །སོས་བར་འགྱུར་ཞེས་པ་ནད་དེ་དག་ལས་ཐར་བར་འགྱུར་རོ་ཞེས་པའོ། །དེ་ལྟར་ཀུན་དུ་ཡིད་ཀྱིས་སམ། །ཞེས་པ་དེ་ལྟར་ལས་ཐམས་ཅད་ལ་ཡིད་ཀྱིས་བྱ་བའམ། ཡང་ན་ཚིག་གི་བསྒོ་བས་ལས་དེ་དག་ཐམས་ཅད་བྱའོ། །ཇི་ལྟར་ཁྲོས་པ་མེད་པ་ཡང༌། །ཞེས་པ་ཆེད་དུ་བརྟབ་པ་དང་ཁྲོས་པའི་ཚུལ་མེད་པར་ཡང་ཕྲན་ཚེགས་ཀྱི་ལས་རྣམས་ཚིག་གིས་ཀྱང་བརྗོད་པ་ཙམ་གྱིས་འགྲུབ་པར་འགྱུར་ཏེ། དེ་ཡང་ཡིད་ལ་ཁྲོ་བོ་དྲན་པ་འབའ་ཞིག་གིས་ཞེས་པའོ། །ཕྲན་ཚེགས་ལས་བརྗོད་འགྲུབ་འགྱུར་ཏེ། །དྲན་པ་ཙམ་ནི་འབའ་ཞིག་གིས། །ཞེས་པ་ཕྲན་ཚེགས་ཀྱི་ལས་བཤད་པ་དེ་རྣམས་འགྲུབ་པར་འགྱུར་ཏེ། དེ་ཡང་ལས་གང་འདོད་པ་དེ་ཡིད་ལ་བསམས་པ་ཙམ་འབའ་ཞིག་གིས་སྒྲུབ་པ་པོ་དེའི་ལས་དེ་ཡང་འགྲུབ་པར་འགྱུར་རོ། །དེ་ནས་སྣོད་ལ་དབབ་པ་ཡི། །ཞེས་པ་བྱིས་པ་གཞོན་ནུ་མ་ཁྲུས་བྱས་ཏེ། གཙང་མ་ཁྲོ་བོ་གཤེགས་སུ་རུང་བར་དེ་ལ་བྱ་བ་ལ་སྣོད་ཅེས་བྱའོ། །ལས་གཞན་དུ་ནི་རབ་ཏུ་བྱ། །ཞེས་པ་གོང་མ་
ལས་གཞན་པའི་ལས་ཞེས་པའོ། །གཞོན་ནུ་མཚན་དང་ལྡན་གྱུར་ཅིང༌། །ཞེས་པ་སྤྱིའི་མཚན་ཉིད་བཟང་པོ་དང་ལྡན་པ་ལ་བྱའོ། །སྣོད་ལ་དབབ་པའི་བྱིས་པ་གཞོན་ནུའི་མཚན་ཉིད་འདི་འདྲ་བ་དང་ལྡན་པ་ལ་བྱའོ། །ཡན་ལག་ཚང་ཞེས་པ་གཞོན་ནུ་དེ་བཞེས་པའོ། །བཀྲུས་ཏེ་བརྒྱན་ཞེས་པ་གོས་དང་མེ་ཏོག་གིས་སོ། །བ་ལས་བྱུང་བའི་ལྔ་ཡང་བླུད། །ཅེས་པ་སྔགས་ཀྱིས་བཏབ་སྟེ་གཞོན་ནུ་དེ་ལ་བླུད་ཅེས་པའོ། །དེ་ཡི་འོག་ཏུ་སྨྱུང་བྱས་ཏེ། །ཞེས་པ་ལ་སོགས་པ་དེ་ལྟ་བས་ན་ཆོ་ག་དེ་ལྟར་བྱས་ཏེ། ཞག་གཅིག་གི་སྔོན་རོལ་ནས་གཞོན་ནུ་དེ་སྨྱུང་བ་བྱེད་དུ་བཅུག་ལ། སང་ནང་ཕར་ལྟ་བུ་གཞོན་ནུ་དེ་ཁྲུས་བྱས་ལ། ཙནྡན་དཀར་པོ་དང༌། གུར་གུམ་དུ་སྦྱར་བའི་བྱུག་སྤོས་ཀྱི་རི་ལུས་བྱུགས་ལ་གོས་བཟང་པོ་དང་མེ་ཏོག་ལ་སོགས་པའི་རྒྱན་སྡུག་གུ་བཟང་པོས་བརྒྱན་པར་བྱའོ། །དེ་ལྟར་མཆོད་པ་བྱས་པ་ནི། །ཞེས་པ་དེ་ལྟར་གཞོན་ནུ་དེ་ལ་མཆོད་པ་བྱས་ནས་ཞེས་པའོ། །ཁྲོ་བོ་ལ་ཡང་མཆོད་པ་བྱས་ནས་ཞེས་པར་སྦྱར་རོ། །གཞོན་ནུ་དེ་ཤར་ཕྱོགས་སུ་ཁ་བསྟན་ཏེ་ཞེས་པའོ། །ཆོ་ག་བཞིན་དུ་ཞེས་པ་ཀུ་ཤའི་སྟན་ལ་གཞོན་ནུ་དེ་བཞག་ལ་ཞེས་པའོ། །དེ་ཡི་ལག་པ་གཉིས་ཀར་ཡང༌། །ཞེས་པ་གཞོན་ནུ་དེ་ལག་པ་གཉིས་སྙིམ་པ་ཟེད་དུ་བཅུག་ལ་མེ་ཏོག་བཟང་པོ་ལ་ཙནྡན་དཀར་པོས་གཏོར་བའི་མེ་ཏོག་སྙིམ་པར་སྦྱིན་ནོ་ཞེས་པའོ། །ཨ་ག་རུ་ནག་པོའི་བདུག་པ་སྦྱིན། དེས་ནི་མྱུར་དུ་སྔགས་བརྗོད་དེ། །ཞེས་པ་གཞོན་ནུ་དེ་ལ་ཨ་ག་རུ་ནག་པོའི་བདུག་པས་བདུག་གོ །དེ་ལྟར་བྱས་པའི་འོག་ཏུ་བར་གཞན་གྱིས་མཆོད་པར་མྱུར་དུ་སྔགས་པ་དེ་རྩ་བའི་སྔགས་བྷཉྫ་ཧཱུཾ་ཞེས་པ་དང༌། ཕཊ་ཅེས་བྱ་བའི་བར་དུ་ཆེ་གེ་མོ་ཞིག་གྲྀ་ཧ་དེ་ཤ་ཧཱུཾ་ཕཊ་བཟླས་ཤིང་གང་བ་ཅེས་པའོ། །སྒྲུབ་པས་ཆོ་ག་འདི་ཡིས་ནི། །ཞེས་པ་སྒྲུབ་པ་པོས་གོང་དུ་གསུངས་པའི་ཆོ་ག་སྣོད་ལ་དབབ་པའི་ཆོ་ག་བྱས་ཏེ་སྣོད་ལ་དབབ་པའི་ལས་བྱའོ་ཞེས་པའོ། །སྣོད་ལ་དབབ་གྱུར་དེ་ནས་ནི། །དགེ་དང་མི་དགེ་དྲི་བར་བྱ། །ཞེས་པ་གཞོན་ནུ་དེ་ལ་འབབ་བར་འགྱུར་ཏེ། ལྷ་འདྲེ་གང་འབབ་པའི་མཚན་མ་དེ་བརྟགས་པ་ནི་སྤྱིའི་གཞུང་སྦྱར་ཞིང་ལས་བྱའོ་ཞེས་པའོ།།
དེ་ལྟར་བྱུང་དང་ཞེས་སྔ་མ་ནས་འདས་ཕྱི་མ་སྣོད་དེ་མ་ཕུང་དེ་ལྟར་སྡོད་དེ་སྨྲ་བར་བྱེད་དེ། སེམས་ཅན་ཆེན་པོ་འདི་གྱིས་ལ། །ཞེས་པའོ། །འདི་ནི་མིན་ཞེས་ཟློག་པར་བྱེད། །ཅེས་པ་མི་རུང་གིས་མ་བྱེད་ཅིག་ཅེས་ཟློག་པར་བྱེད་ཅེས་པའོ། །ཚང་བར་བྱེད་ཅེས་པ་ལྷག་ཆད་སྐད་བར་བྱེད་ཅེས་པའོ། །དེ་ནས་ཁྲོ་བོ་མཆོག་དེ་ལ། །ཞེས་པ་གང་འདྲི་བ་རྣམས་བྲི་ཟིན་ནས་དེའི་འོག་ཏུ་ཁྲོ་བོའི་རྒྱལ་པོ་དེ་ལ་ཨརྒྷ་དབུལ་ཞེས་པའི་དོན་ཏོ། །མེ་ཏོག་ལྡན་པའི་ཨརྒྷ་དབུལ། །ཞེས་པ་དེ་ཡང་སྣོད་ཉིད་ཁྲོ་བོའི་རྒྱལ་པོ་ཡིན་པས་སྣོད་ནས་ཨརྒྷ་དབུལ་བར་བྱའོ། །དེ་ནས་བདེ་གཤེགས་བསྟན་པ་ཡིས། །དམ་ཚིག་དག་ཅེས་པ་དེའི་འོག་ཏུ་དེ་བཞིན་གཤེགས་པས་གསུངས་པའི་དམ་ཚིག་གི་སྔགས་ཡི་གེ་བཅུ་བདུན་པ་བརྗོད་པར་བྱའོ། །དེའི་འོག་ཏུ་ག་ཛ་ག་ཛ་ཞེས་བརྗོད་པར་བྱའོ། །ཁྲོ་བོའི་རྒྱལ་པོ་དེ། དེ་བཏང་ནས་ནི་ས་ལ་འགྱེལ། །ཞེས་པའོ། །བཞུད་པར་འགྱུར་ཞེས་པ་ཁྲོ་བོའི་རྒྱལ་པོ་དེ་ཡང་ཞེས་པའོ། །དེ་ནས་སྣོད་ནི་བསླང་ནས་སུ། །ཞེས་པ་གཞོན་ནུ་ས་ལ་འགྱེལ་པ་དེ་བསླང་ནས་ཁྲུས་བྱའོ། །ཟན་ཟ་བར་བཅུག་ཅེས་པ་གཞོན་ནུ་དེ་ཁ་ཟས་ཟོས་ནས་ཀྱང་ཞེས་པའོ། །མཆོད་པ་བྱས་ཞེས་པ་ཁ་ཟས་ཀྱིས་མཆོད་ཅེས་པའོ། །སླར་བཏང་ངོ་ཞེས་པ་ཇི་སྐད་བཤད་པའི་ཆོ་ག་རྣམས་ཀྱིས་ཞེས་པའོ། །སྣོད་ལ་དབབ་པར་བྱས་ནས་ནི། །ཞེས་པ་ལ་སོགས་པ་གཞོན་ནུ་ལ་སྔར་ཕབ་ནས། འོག་ནས་འབྱུང་བའི་ལས་རྣམས་ལས་གང་དང་གང་བྱས་ན་ལས་དེ་དག་གྲུབ་པར་འགྱུར་བའི་ལས་ཟིན་པ་དེ་ནས་ལས་དེ་བྱ་བར་རུང་ན་གདོད་ལས་བྱའོ། །ནད་པ་ལ་སྔགས་གདབ་པ་ལ་སོགས་པ་སྔགས་ཀྱི་ཆོ་ག་བྱའོ། །ཆོ་ག་ལ་ཡང་ཆོ་ག་འདི་སྦྱར་བར་བྱའོ། །རྒྱལ་པོ་དབང་དུ་བྱེད་པར་འདོད་ན། །དེ་ཚེ་རི་མོའི་སྤྱན་སྔ་རུ། །ཞེས་པ་དབང་དུ་བྱ་བའི་ཚེ་རི་མོའི་སྤྱན་སྔར་སྐྱང་ནུལ་བྱ་སྟེ་བསྟར་བའི་སྟེང་དུ་དུར་ཁྲོད་ཀྱི་ཐལ་བ་སྐམ་པོ་དེའི་ཕྱེ་མས་རྒྱལ་པོ་དེའི་སྐུ་གཟུགས་བྲིས་ལ་སྔགས་དང་ཕྱག་རྒྱས་བཀུག་སྟེ། གཅིག་ཏུ་བྱས་པ་དེའི་སྙིང་གར་སྐྱིལ་མོ་ཀྲུང་དུ་འདུག་སྟེ་ཡིད་ཀྱིས་མ་ཡེངས་པར་ཁྲི་བྱའོ། །འདིར་ཡང་
དེར་སྔགས་བཟླས་པའི་བསྐུལ་ཚིག་ཀྱང་འདི་ལྟར་བཅུག་སྟེ་བཟླས་སོ། །དེ་ཡི་མིང་ནི་ཆོ་ག་བཞིན། །ཞེས་པ་ལ་སོགས་པ་རྩ་བའི་སྔགས་ཀྱི་མཐའ་བྷཉྫ་ཧཱུཾ་ཞེས་བྱ་བའི་མིང་བཅུག་སྟེ། མ་ཤ་མ་ན་ཡ་སྭཱ་ཧཱ། ཞེས་བརྗོད་དོ། །ཕཊ་ཀྱི་སྐྱིན་པར་ཡང་སྭཱ་ཧཱ་བྱིན་ཏེ་བཟླས་པའོ། །འདི་ནི་ཁྲོ་བོས་དབང་དུ་བྱ་བའི་སྦྱོར་བ་བཤད། དེ་ནས་མཛའ་སྡུག་སྐྱེ་བོ་བཏང༌། །ཞེས་པ་ལ་སོགས་པ་དེ་ནས་རྒྱལ་བོ་དེ་དབང་དུ་འགྱུར་ཏེ། དབང་དུ་བྱས་ནས་ཀྱང་རྒྱལ་པོ་དེ་རང་གི་སྣ་ཆེན་དང་ཕལ་པ་དག་ལ་མི་ཕྱོགས་པར་རྒྱལ་པོ་ཉིད་ནོར་དག་གིས་ཐེ་ཚོམ་མེད་པར་བྲན་བཞིན་དུ་ལེགས་པར་བྱེད་དོ་ཞེས་པའོ། །དེ་བཞིན་བཟླས་པ་ཁྲི་བྱས་ན། །བྲམ་ཟེ་དག་ཀྱང་དབང་དུ་འགྱུར། །ཞེས་པ་གོང་དུ་བཤད་པའི་ཆོ་ག་བཞིན་དུ་བྱས་ནས་བསྐུལ་ཚིག་དང་ལྡན་པར་བཟླས་པ་ཁྲི་བྱས་ན་བྲམ་ཟེ་དབང་དུ་འགྱུར་རོ། །བྲམ་ཟེ་དག་ཀྱང་བདག་ཀྱང་སྨྲང་འདོན་པ་གཞན་ཡང་འདོན་དུ་འཇུག་པ་ལ་སོགས་པའི་ཆོ་ག་དྲུག་དང་ལྡན་པས་བྲམ་ཟེའོ། །དེ་བཞིན་རིགས་གསུམ་ལ་ཡང་ཆོ་ག་བཞི་དང་གཉིས་དང༌། གཅིག་དང་ལྡན་པར་སྤྱོད་པ་དང་ལྡན་པའི་རིགས་འོག་མ་གསུམ་མོ། །དམངས་རིགས་ལྟ་བུ་ནི་ཕན་ཆད་ན་ཡང་ཞང་བློན་ཚོང་པ་ཡི་གེ་པ་དག་ལ་བྱ་སྟེ། འདི་དང་སྦྱར་ན་བོད་ཡུལ་ན་རྒྱལ་པོ་མན་ཆད་ཀུན་ཀྱང་དམངས་རིགས་སུ་ཉེའོ། །རྗེའུ་རིགས་དམངས་རིགས་མ་ལུས་པ། །ཞེས་པ་རྒྱལ་རིགས་ཀྱང་ཞེས་འབྱུང་སྟེ། ཕལ་པ་མ་ལུས་པ་ཐམས་ཅད་ལ་བྱ་ཞེས་པའོ། །དྲུག་སྟོང་དག་གིས་ངེས་པར་འགྱུར། །ཞེས་པ་བསྐུལ་ཚིག་དང་ལྡན་པ་དག་དྲུག་སྟོང་དུ་བཟླས་ན་ཐེ་ཚོམ་མེད་པར་དབང་དུ་འགྱུར་རོ། །བུད་མེད་རྣམས་དང་བུ་མོ་ལ། །ཞེས་པ་སྔར་བཤད་པའི་ཆོ་ག་བཞིན་དུ་ཞེས་པའོ། །དེ་ནས་གཅིག་གི་གཟུགས་བརྙན་ནི། །ཞེས་པ་མཛའ་བོ་གཉིས་ལས་གང་ཡང་རུང་བའི་གཟུགས་བྲིའོ། །སྙིང་ག་རུ་ཞེས་པ་སྔ་མ་བཞིན་དུ་བྱ་ཞེས་པའོ། །རྐང་པ་གཅིག་བཞག་ཙོག་པུར་འདུག །ཅེས་པ་རྐང་པ་གཡོན་པས་སྙིང་གར་མནན་ནས་སྔགས་པ་ཉིད་ཀྱང་ཅོག་ཙོག་པོར་འདུག་གོ་ཞེས་
པའོ། །དེ་ཡི་མིང་མཐར་སྦྱར་ནས་ཞེས་པ་རྩ་བའི་སྔགས་ཀྱི་མཇུག་ཏུ་ཞེས་པ། ཁྲོ་བོ་གཤིན་རྗེ་གཤེད་བཟླས་པས། །ཞེས་པ་རྩ་བའི་སྔགས་ལ་བྱའོ། །འདི་ལ་སྔར་འགྱུར་ཕཊ་ཅེས་བྱ། །ཞེས་པ་རྩ་བའི་སྔགས་ཀྱི་མཇུག་ཏུ་གཞུག་པར་བྱའོ། །དེ་ལྟར་སྡང་བར་བྱ་བ་འདི། །ཞེས་པ་དེ་ལྟར་སྡང་བར་བྱ་བ་འདི་ལ་འབུམ་བཟླས་པར་བྱའོ། །དེ་ནས་སེམས་ཅན་རབ་འཇུག་པར། །ཞེས་པ་དཀོན་མཆོག་གསུམ་ལ་གནོད་པ་བྱེད་པའོ། །དགྲ་ཡི་གཟུགས་བརྙན་མིང་སྨོས་ན། །དུར་ཁྲོད་ཐལ་བས་བྲིས་ནས་སུ། །ཞེས་པ་སྔར་བཤད་པ་བཞིན་དུ་དགྲའི་གཟུགས་དུར་ཁྲོད་ཀྱི་ཐལ་བ་སྐམ་པོས་བྲི་བར་བྱའོ། །དེ་ལྟར་གཟུགས་བརྙན་བྲི་བའི་ཚེ་ཡང་དགྲ་དེའི་མིང་ནས་སྨོས་ཤིང་བྲིའོ། །དེ་ནས་སེང་ལྡེང་ཕུར་ཕུལ། །ཞེས་པ་ཕུར་བུ་ཟུར་གསུམ་པ་ཞེས་སོ། །དེ་ཡི་སྙིང་གར་བཏབ་ནས་སུ། །ཞེས་པ་དགྲའི་གཟུགས་བརྙན། དེའི་སྙིང་གར་གདབ་ཅེས་པའོ། །རྩ་བའི་སྔགས་ཀྱི་ཐ་མར་མིང་བཅུག་སྟེ་ཞེས་པའོ། །ཆེ་གེ་མོ་ཞིག་སོད་ཅིག་ཅེས། །ཞེས་པ་ལ་སོགས་པ་རྩ་བའི་སྔགས་བྷཉྫ་ཧཱུཾ་ཞེས་པའི་འོག་ཏུ་ཆེ་གེ་མོ་ཞིག་གྷ་ཏ་ཡ་ཧཱུཾ་ཕཊ་ཅེས་བྱ་བའི་ཚུལ་དུ་བསྐུལ་ཚིག་བཅུག་སྟེ་ཁྲི་བཟླས་ཏེའོ། །གལ་ཏེ་དེ་ལྟར་བཟླས་བྱས་ན། །བྱ་བ་ནི་ཆོ་ག་དེ་ཡིས་ཞེས་པའོ། །འདི་ལ་རྣམ་པར་དཔྱད་མི་དགོས། །ཞེས་པ་འདི་ལ་འགྲུབ་མི་འགྲུབ་ཐེ་ཚོམ་ཟ་མི་དགོས་སོ་ཞེས་བྱ་བའི་ཐ་ཚིག་གོ །རྟག་ཏུ་བདེ་གཤེགས་བསམ་པར་བྱ། །ཞེས་པ་སྔགས་པ་རྟག་ཏུ་བྱང་ཆུབ་སེམས་དང་ལྡན་པ་ལ་བྱའོ། །བསམ་པ་གདུག་པར་ཡོང་མི་བྱ། །ཞེས་པ་གོང་དུ་བཤད་པ་ལྟ་བུའི་ཁྲོ་བོ་ལ་ཡང་མི་བྱའོ། །དེ་ཡི་སྙིང་ལ་སྡུག་བསྔལ་དང༌། །བསྐྱེད་ནས་གདུལ་བ་མ་གཏོགས་ཏེ། །ཞེས་པ་འོ་ན་དེ་དག་ཡང་མི་བྱའམ་ཞེ་ན་མ་ཡིན་ཏེ། དཀོན་མཆོག་གསུམ་ལ་གནོད་པ་དེ་གདུལ་བའི་ཕྱིར་ཆོ་ག་དྲག་པོ་དེ་དག་བྱ་བ་ནི་མ་གཏོགས་ཏེ། དེ་ལྟ་བུ་དག་ལ་རེ་ཞིག་ནད་ལ་སོགས་པའི་སྡུག་བསྔལ་འདུལ་བའི་ཕྱིར་དྲག་པོ་བྱའོ་ཞེས་སོ། །ཞི་བ་དག་གི་ཆོ་ག་ཡིས། །དེ་ནས་ཞི་བ་དགེ་བར་བྱ། །ཞེས་པ་དེ་ལྟར་དྲག་ཤུལ་སྤྱད་པའི་ལས་གོང་དུ་བཤད་པ་རྣམས་ཀྱི་ཆོ་ག་དེ་ལྟ་བུ་
སྔར་བརྟུལ་ནས་ཕྱིས་ཞི་བའི་ཆོ་ག་བྱའོ། །ཞི་བའི་ཆོ་ག་བྱ་ན་ཡང་ཐལ་བའི་གཟུགས་བརྙན་དེ་ཕྱིས་ལ་ཕུར་བུ་ཡང་ཕྱུང་སྟེ་འོ་མས་བཀྲུའོ། །ཞི་བའི་བསྐུལ་ཚིག་དང་ལྡན་པར་སྔགས་བརྒྱ་རྩ་བརྒྱད་ཙམ་དུ་བཟླས་པ་བྱའོ་ཞེས་པའི་ཐ་ཚིག་གོ །མངོན་པར་སྤྱོད་པ་སྤང་མི་བྱ། །ཞེས་པ་སྔགས་པས་དྲག་ཤུལ་སྤྱོད་པའི་ལས་དེ་སྤོང་མི་བྱའོ་ཞེས་པའི་ཐ་ཚིག་གོ །སེམས་ཅན་རྣམས་ལ་བརྩེ་བའི་ཕྱིར། །བདེ་གཤེགས་བསམ་པས་བྱ་བར་བསྟན། །སེམས་ཅན་སྡིག་པ་ཆེ་བ་རྣམས་ལ་སྙིང་རྗེ་སྐྱེད་པ་ནི་བདག་ཉིད་ངན་སོང་སོང་ཡང་བླའི། སེམས་ཅན་སྡིག་པོ་ཆེ་ངེ་མི་བཏང་ངོ་ཞེས་སྙིང་རྗེ་ཆེན་པོ་བསྐྱེད་ཅིང་བྱང་ཆུབ་ཀྱི་སེམས་དང་ལྡན་པར་བྱས་ནས་སེམས་ཅན་མ་རུངས་པ་དེ་ལྟ་བུ་དག་གི་ཕྱིར་དྲག་ཤུལ་སྤྱོད་པའི་ལས་བྱ་བར་བསྟན་ཏོ། །དེ་བཞིན་གཤེགས་པས་ཅི་གསུངས་པའི། །ཞེས་པ་དེ་བཞིན་གཤེགས་པས་ཇི་སྐད་གསུངས་པའི་དངོས་གྲུབ་རྣམས་ཞེས་པའོ། །དེ་བཞིན་དངོས་གྲུབ་མེད་པ་ཡི། །ཞེས་པ་ཡོན་ཏན་ལ་བྱ་ཞེས་པའོ། །དངོས་གྲུབ་འདོད་པ་ཐོབ་འདོད་ན། །ཞེས་པ་སྒྲུབ་པ་པོས་དངོས་གྲུབ་དེ་དག་ཐོབ་པར་འདོད་ན་དེ་ལྟར་དྲག་ཤུལ་སྤྱོད་པའི་ལས་མི་བྱའོ་ཞེས་སོ། བདེ་གཤེགས་བསམ་པ་གང་མེད་པ། །ཞེས་བྱང་ཆུབ་ཀྱི་སེམས་དང་མི་ལྡན་ན། དངོས་གྲུབ་ཐོབ་པར་མི་འགྱུར་རོ། །ཐོབ་ན་ཡང་ཉམས་པར་འགྱུར་རོ། །དེ་ནི་དངོས་གྲུབ་ཉམས་པར་འགྱུར། །ཞེས་པའོ། །མདོར་ན་བྱང་ཆུབ་སེམས་མེད་པར། །ཞེས་པ་ལ་སོགས་པར་བྱང་ཆུབ་སེམས་དང་མི་ལྡན་ན། བརྟུལ་ཞུགས་དང་བཅས་པའི་དངོས་གྲུབ་མཆོག་ཇི་སྐད་གསུངས་པ་རྣམས་འགྲུབ་པར་མི་འགྱུར་རོ་ཞེས་པའོ། །གང་ཞིག་བདེ་གཤེགས་སེམས་ལྡན་པ། །ཞེས་པ་སྒྲུབ་པ་པོ་གང་ཞིག་བྱང་ཆུབ་སེམས་དང་ལྡན་ན་ཞེས་པའོ། །བརྟུལ་ཞུགས་བཟང་པོ་མེད་པ་དང༌། །ཞེས་པ་ལྷའི་བརྟུལ་ཞུགས་དང་ཞེས་པའོ། །དེ་བཞིན་དུ་གཟུགས་ལ་སོགས་པ་མེད་ཀྱང༌། དངོས་གྲུབ་མཆོག་རྣམས་འདིས་ཐོབ་ཅིང་ཞེས་པ་རི་མོ་དང་ལུགས་མ་དག་མེད་ཀྱང་ཁྲུས་ལ་སོགས་ཕྱི་རོལ་གྱི་ཡོ་བྱད་རྣམས་མ་བྱས་ཤིང་
མ་སྤྱད་ཀྱང་དངོས་གྲུབ་མཆོག་རྣམས་སྒྲུབ་པ་པོ་དེ་ལྟ་བུ་དང་ལྡན་པས་ཐོབ་པར་འགྱུར་རོ་ཞེས་པའོ། །ཉོན་མོངས་མེད་པར་ཅི་འདོད་པར། །ཞེས་པ་དཀའ་བ་དག་མ་སྤྱད་པར་ཞེས་པའོ། །འདོད་པ་ཐམས་ཅད་རྙེད་པར་འགྱུར། །ཞེས་པ་སྔགས་པ་དེ་ལྟ་བུ་དེས་རྙེད་པར་འགྱུར་ཞེས་པའོ། །སྔགས་པ་གང་ཞིག་བདེ་གཤེགས་བསམ་ལྡན་ཞིང༌། །ཞེས་པ་བྱང་ཆུབ་ཀྱི་སེམས་དང་ལྡན་ཞིང་ཞེས་པའོ། །བློ་ནི་མ་རྨོངས་བརྟན་པ་ཡིས། །ཞེས་པ་སེམས་མི་འགྱུར་ཞིང་བརྟན་པའི་སྔགས་པ་དེ་ལྟ་བུ་འདི་འདྲ་བའི་ཡོན་ཏན་དང་ལྡན་པའི་བླ་ན་མེད་པའི་དེ་བཞིན་གཤེགས་པ་ཐམས་ཅད་ལ་ཕྱག་བྱ་ཞིང་བྱང་ཆུབ་ཀྱི་སེམས་དང་ལྡན་པའི་སྒྲུབ་པ་པོས་དངོས་གྲུབ་མཆོག་རྣམས་བསྒྲུབས་ན་ཐོབ་པར་འགྱུར་རོ་ཞེས་པའོ། །དེ་ལྟར་ཤེས་ནས་དེ་ཡི་ཚེ། །ཞེས་པ་ཚུལ་དེ་ལྟར་ཤེས་ནས་དེའི་ཚེ་ཞེས་པའོ། །བདེ་གཤེགས་ལམ་མཆོག་བསྟན་པར་བྱ། །ཞེས་པ་བྱང་ཆུབ་ཀྱི་སེམས་དེ་བསྟན་པར་བྱ་ཞེས་པའོ། །ཉོན་མོངས་སྡུག་བསྔལ་འཇིག་འགྱུར་བ། །ཞེས་པ་འཇིག་རྟེན་པའི་དངོས་གྲུབ་དང་མཚན་མ་ལ་ཞེན་པ་དག་ཅེས་པའོ། །དེ་ལྟར་སེམས་ཅན་གདུལ་བ་ཡི། །ལས་རྣམས་ཇི་སྐད་གསུངས་པ་ཡིས། །ཞེས་པ་ལ་སོགས་པ་དེ་ལྟར་སེམས་ཅན་མ་རུངས་པ་རྣམས་གདུལ་བའི་རེ་ཞིག་འདུལ་བར་གསུངས་པའི་ལས་བྱ་བའི་ཆོ་ག་རྣམས་ཀྱང་ཉེས་པ་ཕྲན་ཚེགས་ཀྱི་ཕྱིར་སྤྱར་བར་མི་བྱའོ། །དགོན་མཆོག་བསྲུང་བའི་དོན་དུ་ལས་དེ་དག་ལ་སྦྱར་བར་བྱའོ། །དེ་བས་ན་ཉེས་པ་ཕྲན་ཚེགས་དང་ཞེས་འཁོན་བྱུང་བ་དང་ལ་སོགས་པ་ཙམ་གྱི་ཕྱིར་དྲག་ཤུལ་སྤྱད་པའི་ལས་དེ་དག་སྦྱར་བར་ཡང་ཡང་མི་བྱའོ། །འདི་དག་གང་ཡང་རུང་བར་ནི། །ཞེས་པ་ལས་འདི་དག་གནས་གང་ཡང་རུང་བར་དགར་ཞེས་པའོ། །དེ་བཞིན་འདོད་པ་བྱེད་པ་ལ། །ཞེས་པ་ཆོ་ག་བཞིན་སྔགས་པས་ཇི་སྐད་གསུངས་པ་བཞིན་དུ་བཤད་པར་བྱའོ་ཞེས་པའོ། །དེར་ནི་དུར་ཁྲོད་ཐལ་བ་ཡིས། །མཁས་པས་དགྲ་ཡི་གཟུགས་བརྙན་བྲིས། །ཞེས་པ་སྔར་གོང་དུ་བཤད་པ་བཞིན་དུ་ཐལ་ཕྱེས་དགྲ་དགར་བ་གང་ཡིན་པ་དེའི་གཟུགས་
བརྙན་དེ་ཁྲོ་བོའི་སྤྱན་སྔར་བྲིའོ། །དེ་སྟེང་རྐང་གཉིས་འདུག་ནས་སུ། །ཞེས་པ་གཟུགས་བརྙན་བྲིས་པ་དེའི་སྟེང་དུ་རྐང་པ་གཉིས་ཀྱིས་མནན་ཏེ་ཙོག་པུར་འདུག་པ་ལ་བྱའོ། །སྐུ་གཟུགས་ཀྱི་སྤྱན་སྔར་གང་དགར་བར་བྱ་བའི་དགྲ་དེའི་མིང་བཅུག་སྟེ་ཨུ་ཙ་ཏ་ཡ་ཞེས་བྱ་བའི་རྩ་བའི་སྔགས་ཀྱི་མཇུག་ཏུ་ཧཱུ༵་ཕཊ་ཅེས་བྱའོ། །གདོན་མི་ཟ་བར་བསྐྲད་པར་འགྱུར། །ཞེས་པ་ཐེ་ཚོམ་མེད་པར་བསྐྲད་པར་འགྱུར་རོ། །ཡང་ཐལ་བ་དེ་ཉིད་ཀྱིས་ཞེས་པ་དུར་ཁྲོད་ཀྱི་ཐལ་བ་དེ་ཉིད་ཀྱིས་སོ། །དགྲ་ཡི་གཟུགས་བརྙན་བྲིས་ནས་སུ། །སྔར་བཤད་པ་བཞིན་དུ་ཞེས་པའོ། །དེ་ཡི་སྙིང་གར་རྐང་གཡོན་གྱིས། །ཞེས་པ་གཟུགས་བརྙན་དེའི་སྒྲུབ་པ་པོ་ཡིས་ཞེས་པའོ། །གདོན་མི་ཟ་བར་བརྫིས་ནས་སུ། །ཞེས་པ་ཐེ་ཚོམ་མེད་པར་ཞེས་པའོ། །ཉི་མ་ལ་ནི་ཁ་བལྟས་ལ། །ཞེས་པ་ཉི་མ་འཆར་ཀར་ཉི་མ་ལ་ཁ་བལྟས་ནས་རྩ་བའི་སྔགས་ཀྱི་མཇུག་ཏུ་བྷཉྫ་ཧཱུ༵་ཞེས་བྱ་བའི་འོག་ཏུ་ཆེ་གེ་མོ་ཞིག་ལ་ཏ་པྲ་ཛྭ་རེ་གྲྀ་ཧ་ན་ཧཱུ༵་ཞེས་བཟླས་སོ་ཞེས་པའོ། །ཆོ་ག་སྔ་མ་བཞིན་བྱའོ། །ཞི་བར་མ་བྱས་ན། དེ་ལྟར་མ་བྱས་ཞག་བདུན་གྱིས། །གདོན་མི་ཟ་བར་འཆི་བར་འགྱུར། །ཞེས་པའོ། །དེ་ལ་སོགས་པའི་ལས་རྣམས་ནི། །ཞེས་པ་དེ་ལ་སོགས་པ་དྲག་ཤུལ་གྱི་ལས་རྣམས་ཞེས་པའོ། །བདེ་གཤེགས་སེམས་དཔའ་སྤང་མི་བྱ། །ཞེས་པ་བྱང་ཆུབ་ཀྱི་སེམས་དང་ལྡན་པས་སོ། །འོ་ན་ཅི་ཞེ་ན། སེམས་ཅན་རྣམས་ནི་ཐམས་ཅད་ལ། །ཞི་བ་དང་ནི་རྒྱས་པ་བྱ། །ཞེས་པའི་དོན་ཏོ། །ཅིའི་ཕྱིར་ཞེ་ན། བྱང་ཆུབ་སེམས་ཀྱི་བདག་ཉིད་ཅན། །རིང་པོར་མི་ཐོགས་འགྲུབ་པར་འགྱུར། །ཞེས་པ་བྱང་ཆུབ་སེམས་ཀྱི་བདག་ཉིད་ཅན་གྱི་སྔགས་བས་ལས་བྱས་ན་ཞི་བ་དང་རྒྱས་པ་དག་མྱུར་དུ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ །འདི་མན་ཆད་དེ་བཞིན་གཤེགས་པའི་དམ་ཚིག་སྔར་བཤད་ནས་ཞི་བ་ལ་སོགས་པའི་ལས་བྱ་བ་བཤད་པའི་ཕྱིར། དེ་ནས་སེམས་ཅན་ཐམས་ཅད་ནི། །ཞེས་པ་ལ་སོགས་པ་སྨོས་ཏེ། །བདེ་ཕྱིར་ཞི་བའི་ལས་རྣམས་ནི། །ཞེས་པ་བདེ་བ་ལ་དགོད་པའི་དོན་དུ་ཞི་བ་བྱ་ཞེས་པའོ། །ཇི་སྐད་གསུངས་པ་བཤད་པར་བྱ། །
ཞེས་ཁྲོ་བོས་ཇི་སྐད་གསུངས་པ་དེ་དག་འདིར་བཤད་པར་བྱའོ་ཞེས་བྱ་བའི་དོན་ཏོ། །མཆོད་རྟེན་འགྲམ་གྱི་དཀྱིལ་འཁོར་དུ། །ཞེས་པ། ཡི་དགས་ཕལ་པོ་ཆེའི་དཀྱིལ་འཁོར་དུ་མཆོད་པ་གཙང་མ་ཚུལ་བཞིན་དུ་མཆོད་པར་བྱའོ། །ཡང་དང་ཡང་དུ་ཕྱག་བྱས་ནས། །ཞེས་པ་དུས་གསུམ་དག་ཏུ་དགེ་བ་ལའོ། །ཉིན་པར་དང་ནི་མཚན་མོ་ཡང༌། །ཞེས་པ་སྲོད་དང་ཐོ་རངས་ཀྱི་དགེ་བ་ལ་ཡང་བྱ་ཞེས་པའི་དོན་ཏོ། །དཀོན་མཆོག་གསུམ་ལ་དེ་བརྟེན་ནས། །ཞེས་པ་ལྷག་པར་མོས་ཤིང་དེར་ཕྱོགས་པས་བརྟེན་ཞེས་པའོ། །བདེ་བར་གཤེགས་པའི་བསམ་པ་བྱ། །ཞེས་པ་བྱང་ཆུབ་ཀྱི་སེམས་དང་ལྡན་པར་བྱ་ཞེས་པའོ། །འདི་ཡིས་སེམས་ཅན་ཐམས་ཅད་ནི། །ཤིན་ཏུ་སྡུག་བསྔལ་བདེར་གྱུར་ཅིག །ཅེས་པ་ཕྱག་བྱ་བ་དེ་དང༌། ཉིན་མཚན་གྱི་དགེ་བ་སྤྱད་པ་ལ་སོགས་པས་འདི་སེམས་ཅན་ཐམས་ཅད་སྡུག་བསྔལ་དང་བྲལ་བར་བདེ་བར་གྱུར་ཅིག་ཅེས་ཡོངས་སུ་བསྔོ་བར་བྱའོ། །འདི་དག་ནི་སྔོན་དུ་སྤྱད་པའི་དགེ་བའི་ཚེ་བྱའོ་ཞེས་པའོ། །དེ་ཡི་དངོས་གྲུབ་ཅུང་ཟད་གང༌། །ཞེས་པ་དེ་ལྟར་དགེ་བ་སྤྱོད་པ་དེ་ཡིས་ཕྲ་མོ་དག་ཀྱང་ཐོབ་པར་འགྱུར་ཞེས་པའོ། །མཁས་པ་དག་གིས་ཕན་པར་བྱ། །ཞེས་པ་དེ་ལྟར་ཡི་དམ་དུ་བཅའ་བར་བྱའོ་ཞེས་པའོ། །མཁས་པས་མཆོད་རྟེན་ལས་བྱས་ཤིང༌། །ཞེས་པ་འཛབ་ལས་འབྱུང་ཀར་དགེ་བ་འདི་དག་བྱའོ་ཞེས་པའོ། །དགེ་བ་ཆུང་དུ་ཟིན་ཀྱང་སྐབས་འདི་དག་ཏུ། དངོས་གྲུབ་མཆོག་ནི་ཐོབ་འདོད་པའི། །སྒྲུབ་པ་པོ་དེས་དགེ་བ་དེ་དག་གིས་ཀྱང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཕུན་སུམ་ཚོགས་པར་བསྔོ་བ་ནི། རྟག་ཏུ་སེམས་ཅན་རྣམས་ལ་བསྔོའོ་ཞེས་པའི་དོན་ཏོ། །འདི་ལྟར་དེ་ནི་བྱང་ཆུབ་སེམས། །ཆོས་ཀྱི་དོན་དུ་ཡུལ་དུ་གྱུར། །ཞེས་པ་ཚུལ་དེ་ལྟར་སྤྱོད་པ་དེ་ནི་བྱང་ཆུབ་ཀྱི་སེམས་དང་ལྡན་པར་བྱས་ཏེ། སྒྲུབ་པ་པོ་དེས་ཆོས་ཉིད་ཁོང་དུ་ཆུད་ཅིང་རྟོགས་ཞེས་པའི་དོན་ཏོ། །བྱང་ཆུབ་སེམས་རྣམས་ཉེར་བསྟན་པའི། །མཚན་ཉིད་རབ་ཏུ་བསྟན་པ་ཡིན། །ཞེས་པ་སྔོན་བྱང་ཆུབ་སེམས་དཔའ་རྣམས་ཀྱིས་ཀྱང་སྤྱད་
ཅིང་ཉེ་བར་བསྟན་པའི་བྱང་ཆུབ་སེམས་ཀྱི་མཚན་ཉིད་དེ་ལྟར་བསྟན་ཏེ། དེ་ལྟར་བློ་གྲོས་བསྟན་བྱས་ནས། །ཞེས་པ་སྒྲུབ་པ་པོས་ཞེས་པའོ། །དགེ་བ་དག་ནི་སྤེལ་བར་བྱ། །ཞེས་པ་གོང་དུ་བཤད་པའི་ཚུལ་དེ་ལྟར་དགེ་བ་རྒྱ་ཆེར་སྤེལ་ལོ་ཞེས་པའོ། །སེམས་ཅན་རྣམས་ལ་ཡོངས་སུ་བསྔོ། །ཞེས་པ་བདག་གི་དགེ་བ་ཅུང་ཟད་ཅི་སྤྱད་པ་ཐམས་ཅད་ཀྱང་སེམས་ཅན་གྱི་དོན་གྱི་ཕྱིར་བསྔོ་ཞེས་པའོ། །སྔགས་པས་བདེ་གཤེགས་སེམས་ལྡན་གང༌། །ཞེས་པ་བྱང་ཆུབ་སེམས་དང་ལྡན་པའི་སྔགས་པ་གང་གིས་གོང་དུ་བཤད་པའི་ཚུལ་དེ་ལྟ་བུར་དུས་ཐམས་ཅད་དུ་སེམས་ཅན་རྣམས་ཀྱི་དོན་གྱི་ཕྱིར་ཞེས་པའོ། །ཞི་བ་དང་ནི་རྒྱས་པ་འཕེལ། །ཞེས་པ་ཞི་བ་དང་ནི་རྒྱས་པ་འཕེལ་བར་འགྱུར་རོ་ཞེས་པའོ། །ཐོག་མར་དཀོན་མཆོག་གསུམ་པོ་ལ། །གདོད་ནས་བཤད་དོ་ཞེས་པའོ། །དཀར་པོ་མཆོག་གིས་མཆོད་པར་བྱ། །ཞེས་པ་ཡོན་ཏན་དང་ལྡན་པའི་མེ་ཏོག་དཀར་པོས་མཆོད་ཅེས་པའོ། །མཆོད་པ་བྱས་ནས་འདི་དག་ཏུ། །ཞེས་པ་སྐབས་འདིར་ལས་བྱ་བའི་བཟླས་བརྗོད་ཆོ་ག་བཞིན་དུ་བྱའོ། །བདེ་ཞིང་སྟན་ལ་བདེ་བར་འདུག །ཅེས་པ་སེམས་ཉམས་པར་མི་འགྱུར་བ་དང་ཉམས་པར་མི་འགྱུར་བ་ལ་བྱ་ཞེས་པའོ། །རབ་ཏུ་དང་ཞིང་བདེ་གཤེགས་སེམས། །ཞེས་པ་སེམས་རབ་ཏུ་དང་ཞིང་བྱང་ཆུབ་སེམས་དང་ལྡན་པར་ཞེས་པའོ། །དེ་མིང་སྨོས་ཤིང་ཞིར་འགྱུར་ཞེས། །ཞེས་པ་གང་ཞི་བར་བྱ་བ་དེའི་མིང་སྨོས་ཤིང་ཤཱིནྟིཾ་ཀུ་རུ་སྭཱ་ཧཱ། ཞེས་པའོ། །ཁྲོ་བོའི་ཚིག་གིས་མཐའ་སྦྱར་ཏེ། །ཞེས་པ་རྩ་བའི་སྔགས་ལ་བྷཉྫ་ཧཱུཾ་ཞེས་བྱ་བའི་འོག་ཏུ་སྦྱར་ཏེ། ཐ་མར་བཽ་ཥ་ཊ་བཅུག་སྟེ་བཟླས་སོ་ཞེས་པའོ། །གང་ཡང་རུང་བ་ཅིག་ལ་ནི། །ཞེས་པ་གང་རུང་བ་ཅིག་ཞི་བར་བྱ་བ་ལ་ཞེས་པའོ། །དེ་ལྟར་ཚུལ་དེ་ལྟར་བཟླས་ཞེས་པའོ། །ཡུལ་ཞེས་པ་ལྗོངས་གཅིག་ལ་བྱའོ། །ཡུལ་གྱི་ཕྱོགས་དག་ཅེས་པ་ཡུལ་ཕྱོགས་གཅིག་པ་ཞེས་པའོ། །རྒྱལ་པོ་དག་ལ་ཉིས་འགྱུར་བྱ། །ཞེས་པ་དེ་དག་ཉིས་སྟོང་དུ་བྱ་ཞེས་པའོ། །འདི་དག་ཞི་བར་བྱ་བའི་ཕྱིར། །བ་ལང་དག་ལ་སྟོང་དུ་བཟླས། །ཞེས་པའོ། །ར་ལུག་
དང་ནི་མ་ཧེ་ལ། འདི་དག་ཞི་བར་བྱ་བའི་ཕྱིར། །རྟག་པར་སྟོང་དུ་བཟླས་པར་གསུངས། །ཞེས་པའོ། །ཡང་ན་ལུས་ཅན་ཐམས་ཅད་ལ། །ཞེས་སེམས་ཅན་ཐམས་ཅད་ལ་ཞེས་པའོ། །བྱང་ཆུབ་སེམས་དང་ལྡན་པ་ལ། །ཞི་བའི་མཆོག་ཏུ་ངེས་པར་འགྱུར།། ཞེས་བྱང་ཆུབ་ཀྱི་སེམས་དང་ལྡན་པའི་སྔགས་པས་ཞི་བའི་ལས་དེ་དག་བྱས་ན། ཞི་བའི་མཆོག་ཏུ་འགྱུར་བར་ཐེ་ཚོམ་མེད་དོ་ཞེས་བྱ་བའི་ཐ་ཚིག་གོ །ད་ནི་རྒྱས་པའི་ལས་བཤད་པའི་ཕྱིར། །དེ་བཞིན་དུ་ནི་རྒྱས་འགྱུར་བ། །ཞེས་པ་ལ་སོགས་པ་སྨོས་ཏེ། དེ་བཞིན་དུ་ནི་རྒྱས་འགྱུར་བ། །ཞེས་པ་ལ་སོགས་པ་ཆོ་ག་འདི་བྱ་བའི་རིམ་པ་ནི་མདུན་གྱི་སྣོད་ཀྱི་ནང་ན་འོ་མ་ཡོད་པ་ལ་འོ་མའི་རྒྱ་མཚོ་ཆེན་པོར་བྱིན་གྱིས་བརླབ་པོ། །ཆུ་ལྷ་སྤྱན་དྲངས་པའི་ཀུན་སྦྱིན་ནི། །བ་རུ་ཎ་འཁོར་དང་བཅས་པ་ཉིད་ཀྱི་ཕྱག་རྒྱ་དང་སྔགས་ཀྱིས་སྤྱན་དྲངས་ནས། མཆོད་པ་ལ་སོགས་པ་དང༌། བསང་གཏོར་བྱ་བ་དག་ཚུལ་བཞིན་དུ་བྱས་ནས་དང་པོར་མངར་གསུམ་གྱིས་དགང་བླུགས་ཚུལ་བཞིན་དུ་གསུམ་མམ་བདུན་དུ་དབུལ་ལོ། །དེའི་འོག་ཏུ་མེ་ཏོག་ལས་ཀྱང་གྲངས་དེ་དག་དང་འདྲ་བ་དབུལ་ལོ། །དེ་ནས་བསང་གཏོར་བྱས་ཏེ་ཆུ་ལྷ་ནུབ་ཕྱོགས་སུ་བཞུགས་སུ་གསོལ་ལོ། །ཆུའི་ཀུན་སྦྱིན་དང་མེ་ཏོག་དག་སྦྱིན་པའི་ཚེ། ཆུ་ལྷ་བ་རུ་ཎ་སྤྱན་དྲངས་ཏེ་འདི་ལྟར་བྱ་བ་པདྨ་བྱཱུ་ཧ་ཞེས་བྱ་བའི་རྒྱུད་ལས་འབྱུང་ངོ༌། །དེའི་འོག་ཏུ་འོ་མའི་རྒྱ་མཚོ་ཆེན་པོ་དེའི་དབུས་སུ་པདྨ་ཆེན་པོ་བསམས་ཏེ། དེའི་དབུས་སུ་ཁྲོ་བོ་བསམས་ཏེ། སྤྱན་དྲངས་ཏེ་ཁྲོ་བོ་དེ་ལ་དང་པོར་མངར་གསུམ་གྱི་དགང་བླུགས་ཕུལ་ཏེ། དེའི་འོག་ཏུ་མེ་ཏོག་རྣམས་ཚུལ་བཞིན་དུ་དབུལ་ལོ་ཞེས་བཤད་དོ། །ཁ་དོག་ནི་ལས་རྣམ་བཞི་སྦྱར་རོ། །སྤྱན་སྔར་ཞེས་པ་མདུན་དུ་རི་མོ་བྲི་སྣོད་དུ་དབུལ་ཞེས་པ་མེ་ཏོག་གོ ། རྒྱས་པ་ལ་ཡང་མེ་ཏོག་དཀར་པོ་ཡོན་ཏན་ལྡན་པ་བཟང་པོ་ཙནྡན་དཀར་པོའི་འདི་གུས་བསྒོས་པའི་མེ་ཏོག་སྟེ་ཁྲོ་བོའི་སྤྱན་སྔར་གསེར་དང་དངུལ་དང་ཟངས་ཀྱི་སྣོད་གང་འབྱོར་བར་འོ་མ་བླུགས་པའི་སྟེང་དུ་མེ་ཏོག་རེ་རེ་ལ་སྔགས་ལན་རེ་རེ་སྦྱར་ཏེ། སྔགས་བརྗོད་ཅིང་འོ་མས་
བཀང་བའི་སྣོད་དུ་བླུགས་སོ། །སྟོང་གིས་རབ་ཏུ་རྒྱས་པར་འགྱུར། །སྙིང་ལ་རབ་ཏུ་དགའ་གྱུར་བའི། །ཞེས་པའི་ཚུལ་དེ་ལྟར་མེ་ཏོག་སྟོང་ཕུལ་ན་གང་རྒྱས་པར་བྱ་བ་དེ་རྒྱས་པར་འགྱུར་རོ། །སྙིང་ལ་རབ་ཏུ་དགའ་བའི་ཚུལ་གྱིས་རྒྱས་པ་འགྱུར་བའི་རྒྱས་པའི་ལས་བྱེད་འདོད་ན་ཞེས་པའོ། །གང་ཡང་རུང་བ་དེ་ཡི་མིང༌། །ཞེས་པ་གང་རྒྱས་པར་བྱ་བ་དེའི་མིང་སྨོས་པ་ནི། ཆོ་ག་བཞིན་དུ་མཐའ་མར་སྦྱར། །ཞེས་པ་དེ་པུཥྚིཾ་ཀུ་རུ་བཽ་ཥ་ཊ་ཅེས་སྦྱར། རྩ་བའི་སྔགས་ཀྱི་ཧཱུ༵་ཞེས་པའི་འོག་ཏུ་སྦྱར་བ་བསྐུལ་ཚིག་གཞུག་པའི་ཐབས་ནི་ཚུལ་དེ་བཞིན་དུ་ལས་གཉིས་ཀ་ལ་འདྲ་བར་སྦྱོར་རོ་ཞེས་པའི་དོན་ཏོ། །མེ་ཏོག་ཡིད་དུ་འོང་བ་རྣམས། །འོ་མར་བླུགས་པར་བྱས་པ་གང༌། །ཞེས་པ་གསུམ་པ་ནི་ཞེས་བྱ་སྟེ་མེ་ཏོག་གི་མིང་ཡིད་དུ་འོང་བའི་མེ་ཏོག་ལ་སྟོང་སྔ་མ་བཞིན་དུ་འོ་མས་བཀང་བའི་སྣོད་ཀྱི་ནང་དུ་དབུལ་ལོ། །ཚུལ་དེ་ལྟར་བྱས་ན་རྒྱས་པར་འགྱུར་རོ། །ཡང་སྤྱིར་མེ་ཏོག་དཀར་པོའམ། །སེར་པོ་ཡིད་དུ་འོང་བ་བཟང་པོ་ཡོན་ཏན་དང་ལྡན་པ་དབུལ་པར་བྱ་སྟེ། མེ་ཏོག་ཙམ་གྱིས་ཁྱད་པར་གྱི་སྒོ་ནས་རྒྱས་པའི་ལས་གཉིས་སུ་ཡང་བཤད་པ་ཡང་རུང་བ་དེ་གཉིས་སུ་གཅིག་ཏུ་ཡང་རུང་ངོ་ཞེས་བྱ་བའི་དོན་ཏོ། །ད་ནི་དཔལ་ལ་སོགས་པ་སྒྲུབ་པ་བཤད་པའི་ཕྱིར། དེ་ནས་གཞན་ཡང་དཔལ་འདོད་ན། །ཞེས་པ་ལ་སོགས་པ་སྨོས་སོ། །དེ་ནས་གཞན་ཡང་དཔལ་འདོད་ན། །ཞེས་པ་ལ་སོགས་པ་ལ་རྒྱལ་པོ་དང་ལོངས་སྤྱོད་སྒྲུབ་འདོད་ན་སྔར་བཤད་པ་བཞིན་དུ་སྐུ་གཟུགས་བཀྲམ་ལ་མེ་ཏོག་ཡིད་དུ་འོང་བ་ཞེས་བྱ་བའི་མེ་ཏོག་ཙནྡན་དཀར་པོས་གཏོར་ཏེ་བསྒོས་པའི་མེ་ཏོག་གིས་མཆོད་དོ། །སྤྱིར་མེ་ཏོག་ཡིད་དུ་འོང་བ་བཟང་པོ་ལ་ཡང་བྱ་ཞེས་པའོ། །བདུག་པ་དག་གི་སྔགས་ཀྱིས་དབུལ། །ཞེས་པ་བདུག་པའི་སྔགས་ཀྱིས་ཞེས་པའོ། །ཉིན་རེ་དེ་ལྟར་བྱས་ནས་སུ། །ཞེས་པ་དུས་གསུམ་དུ་ཚུལ་དེ་ལྟར་མཆོད་པ་བྱས་ནས་མཆོད་པ་དེ་ལྟ་བུའི་བཟླས་པ་བྱའོ་ཞེས་སོ། །མཐའ་མ་དག་ཏུ་སྦྱར་ནས་སུ། །དེ་ནས་ནཱ་མ་སྭཱ་ཧཱ་ར་ལྡན། །ཞེས་པ་རྩ་བའི་སྔགས་བྷཉྫ་ཧཱུ༵་ཞེས་བྱ་བའི་འོག་ཏུ་ཤྲཱི་རི་ཕྲ་མ་མེས་པྲ་པ་ཡཙྪ་ནཱ་མ་སྭཱ་ཧཱ། ཞེས་བྱ་བའི་
ཚུལ་དུ་བསྐུལ་ཚིག་བཅུག་སྟེ་སྔོན་དུ་བསྙེན་པ་ཁྲི་བྱའོ་ཞེས་པའོ། །དེ་ནས་རྒྱ་མཚོར་འབབ་པའི་ཆུ་ཀླུང་གི་ནང་དུ་སོང་ནས་ནི། ལྟེ་བ་ནུབ་པར་ཆུར་འདུག་ནས། །ཞེས་པ་དེ་ནས་བསྒྲུབས་ཏེ་རྒྱ་མཚོར་འབབ་པའི་ཆུ་ཀླུང་དུ་སོང་ནས་བདག་ཉིད་ཁྲུས་བྱས་ཏེ་སྦྱོར་བ་བྱས་ཏེ་སྦྱོར་བ་བྱས་ནས་ལྟེ་བ་ནུབ་ཙམ་དུ་ཆུར་ཞུགས་ཏེ་འགྲེང་པ་ལ་བྱ་ཞེས་པའོ། །མེ་ཏོག་པུཎྜ་རཱི་ཀ་དང༌། །ཞེས་པ་པདྨ་དཀར་པོ་ཞེས་པའོ། །ཙནྡན་དཀར་པོས་བསྐུས་ནས་སུ། །ཞེས་པ་གཏོར་ཏེ་བསྒོས་ཏེ་ཞེས་པའོ། །བཟླས་ཤིང་བཟླས་ཤིང་ཆུར་དབུལ་བ། །བློ་དང་ལྡན་པས་འབུམ་བྱས་ནས། །ཞེས་པ་མདུན་དུ་ལྷ་སྤྱན་དྲངས་ཏེ་དེ་ལ་མེ་ཏོག་དབུལ་ལོ། །ལན་ཅིག་གིས་མ་རྫོགས་ན་དུས་གསུམ་དུ་ཡང་དབུལ་ལོ། །མེ་ཏོག་པདྨ་དཀར་པོ་ཡང་སྔགས་བརྗོད་ཅིང་དབུལ་ལོ། །དེ་ཡི་མཇུག་ཏུ་དཔལ་ཆེན་ཐོབ། །ཅེས་པ་རྒྱལ་རིགས་ཅན་ལ་རྒྱལ་པོ་ཐོབ་པར་མོས་པ་ཞིག་གིས་དེ་ལྟར་བྱས་ན་རྒྱལ་པོ་ཐོབ་པོ། །ལོངས་སྤྱོད་ཐོབ་པར་འདོད་ན། །མཆོད་པ་བྱས་ནས་བསྙེན་པ་ཁྲི་བྱས་པ་ལ་སོགས་པ་སྔར་བཤད་པ་བཞིན་དུ་བྱས་ནས་ཆུ་ཀླུང་གི་ནང་དུ་ཞུགས་ཏེ། པདྨོ་དབུལ་བ་ཆུ་ཀླུང་གི་ནང་དུ་པདྨོ་དམར་པོ་འབུམ་དབུལ་ལོ། །དེ་ལྟ་བུ་ཟིན་པའི་འོག་ཏུ་ཆོ་ག་དེ་ལྟར་བྱས་ན་ཐེ་ཚོམ་མེད་པར་ཐོབ་པར་འགྱུར་རོ། །རྩ་བའི་སྔགས་བྷཉྫ་ཧཱུ༵་ཞེས་བྱ་བའི་འོག་ཏུ་ཧི་མ་མེ་པྲ་ཡཙྪ་ནཱ་མ་སྭཱ་ཧཱ་ཞེས་བཟླས་སོ་ཞེས་བྱ་བའི་དོན་ཏོ། །ཆོ་ག་འདི་དག་འདི་ཉིད་ཀྱིས། །ཞེས་པ་སྔར་བཤད་པ་བཞིན་དུ་བྱ་ཞེས་པའོ། །བཟླས་ཤིང་བཟླས་ཤིང་སྔ་མ་བཞིན། །ཞེས་པ་སྔ་མ་བཞིན་དུ་ཆུ་ཀླུང་དུ་དབུལ་ལོ་ཞེས་པའོ། །ཆོ་ག་གསུངས་པ་བཞིན་གནས་པའི། །སྔགས་པ་ངེས་པར་དེ་ཡི་མཐར། །ཞེས་པ་ཇི་སྐད་གསུངས་པའི་ཚུལ་བཞིན་གནས་པའི་སྔགས་པས་ཆོ་ག་དེ་ཟིན་པའི་འོག་ཏུ་དེ་ནས་ཐེ་ཚོམ་མེད་པར་བྱེད་ན། རང་འབུམ་ཐོབ་པར་འགྱུར་རོ། །རྩ་བའི་སྔགས་ཧཱུ༵་ཞེས་བྱ་བའི་འོག་ཏུ་ད་ནི་རྨཱ་མེ་པྲ་ཡཙྪ་ན་སྭཱ་ཧཱ་ཞེས་བཟླས་སོ་ཞེས་སོ། །འདི་ལ་རྣམ་པར་དཔྱད་མི་བྱ། །ཞེས་པ་འགྲུབ་པའམ་མི་འགྲུབ་ཅེས་ཐེ་ཚོམ་མི་བྱའོ་ཞེས་པའོ། །དེ་སྟེང་དེ་ཡི་སྔ་མ་བཞིན་
ཞེས་པ་ཆོ་ག་སྔ་མ་བཞིན་དུ་ཨ་ཏི་མུ་ག་ཏ་ཀའི་མེ་ཏོག་ཅེས་སོ། །འབུམ་ནི་དབུལ་བར་བྱས་ནས་སུ། །ཞེས་པ་ཆུ་ཀླུང་དུ་དབུལ་བར་བྱ་ཞེས་པའོ། །གདོན་མི་ཟ་བར་གནོད་སྦྱིན་མ། །ཞེས་པ་ཐེ་ཚོམ་མེད་པར་དེའི་དབང་དུ་འགྱུར་ཞེས་པའོ། །ཆོ་ག་གང་འདིས་སྒྲུབ་པ་པོས། ནོར་ཆེན་དག་ཀྱང་འཐོབ་པར་འགྱུར། །ཞེས་པ་ཆོ་ག་འདི་བྱས་པས་གནོད་སྦྱིན་མོ་དབང་དུ་འགྱུར་བར་མ་ཟད་ཀྱི་ནོར་ཆེན་དག་ཀྱང་ཐོབ་པོ། །སྔ་མ་བཞིན་དུ་ཡཀྵ་ནི་མ་མེ་པཱ་ཤཾ་ཀུ་རུ་ནཱ་མ་སྭཱ་ཧཱ་ཞེས་བཟླས་སོ། །དེ་སྟེ་སྔ་མ་བཤད་པ་བཞིན། །ཞེས་པ། ཆོ་ག་སྔ་མ་བཞིན་དུ་བྱ། །ཞེས་པའོ། །མེ་ཏོག་ཛཱ་ཏི་བཟང་པོ་ནི། །ཞེས་པ་སྲི་ཤིང་སྣ་མའི་མེ་ཏོག་ཅེས་པའོ། །ཙནྡན་ཞེས་པ་དཀར་པོ་ཙནྡན་གྱིས་བསྐུས་པ་རྣམས་ཞེས་པའོ། །ཆུ་ཡི་ནང་དུ་ཕུལ་ན་ནི། །ཞེས་པ་སྔ་མ་བཞིན་དུ་དབུལ་ཞེས་པའོ། །ས་ཡི་སྟེང་ན་འདོད་པ་ཐོབ། །ཅེས་པ་སའི་སྟེང་ན་གང་འདོད་པའི་ཚུལ་དེ་ལྟར་སྒྲུབ་པ་ན་ཐོབ་པར་འགྱུར་ཞེས་བྱ་བའི་དོན་ཏོ། །ཡང་ན་པདྨ་དཀར་པོ་ནི། །ཞེས་པ་སྔར་བཤད་པ་བཞིན་དུ་སྔོན་དུ་བསྙེན་པ་ཁྲི་བྱས། དེའི་འོག་ཏུ་ཆོ་ག་འདི་བརྩམས་ཏེ། སྔ་མ་བཞིན་དུ་རྒྱས་པའི་ཞུགས་ཐབ་བརྐོས་ཏེ་བྱས་ལ་དེར་མེ་ལྷ་གཉེར་ཏེ་ཀུན་སྦྱིན་དབུལ་པ་དང༌། པདྨ་ཉིད་ཡང་གསུམ་མམ་བདུན་དབུལ་ལོ། །དེ་ནས་མེ་ལྟ་བསངས་ནས་ཤར་ལྷོའི་མཚམས་སུ་བཞག་ལ་ལྷ་སྤྱན་དྲངས་ཏེ་ཀུན་སྦྱིན་སྲེག་ལ་སོགས་པ་དབུལ་བ་བྱས་ནས། དེའི་འོག་ཏུ་གཟོད་པདྨ་དཀར་པོ་མངར་གསུམ་ལ་སྦགས་པ་འབུམ་དབུལ་ལོ། །ཆོ་ག་འདི་ལྟར་སྦྱར་བར་བྱ་བ་འོག་ནས་འབྱུང་བ་ཀུན་ལ་ཡང་སྦྱར་རོ་ཞེས་པའི་ཐ་ཚིག་གོ །མངར་གསུམ་ཞེས་པ་འོ་མ་སྦྲང་རྩི་མར་ཞེས་སོ། །མེ་འབར་ནང་དུ་ལེགས་པར་བསྲེག །ཞེས་པ་ཚུལ་བཞིན་དུ་སྦྱིན་སྲེག་བྱ་བ་ལ་སོགས་པ་ཆོ་ག་དེས་ན་ལྷ་མོ་བཟང་མོ་ཞིག་མཐོང་བར་འགྱུར་རོ་ཞེས་པའོ། །དེ་ཡིས་དེ་ལ་འདོད་མཆོག་དང༌། །ནོར་དག་ཀྱང་ནི་སྟེར་བར་འགྱུར། །ཞེས་པ་ལྷ་མོ་དེ་ཡིས་སྒྲུབ་པ་པོ་དེ་ལ་འདོད་པའི་མཆོག་སྩོལ་བ་དང་ནོར་དག་ཀྱང་སོགས་པར་མཛད་དོ་ཞེས་པའོ། །བློ་དང་ལྡན་པའི་ཟས་ཀྱི་མཆོག །ཅེས་པ་འོ་མ་དང་
འབྲས་སཱ་ལུ་སྦྱར་བའི་ཟས་ཀྱི་ནང་དུ་མར་དང་སྦྲང་རྩི་བླུགས་ལ་བྱའོ་ཞེས་པའོ། །ཞག་བདུན་དུ་ནི་གཟར་བུ་ཡིས། །ཞེས་པ་ཟས་དེ་ལས་ཞག་བདུན་དུ་གཟར་བུ་ཆུང་དུས་སྦྱིན་སྲེག་འབུམ་བྱའོ། །ཡང་ན་འབྲུ་རྣམས་ཐམས་ཅད་ཀྱིས། །ཞེས་པ་ཡང་ན་འབྲུ་སྣ་ལྔ་ལ་སོགས་པ་འབྲུ་ཐམས་ཅད་ལ་བྱའོ། །སྦྱིན་སྲེག་དོན་རྣམས་ཐམས་ཅད་སྒྲུབ། །ཅེས་པ་འབྲུའི་སྦྱིན་སྲེག་བྱས་པས་གང་འདོད་པའི་ནོར་ཐམས་ཅད་འགྲུབ་པར་འགྱུར་རོ་ཞེས་པའོ། །སྦྱིན་སྲེག་ཚིག་འབུམ་བྱས་པ་ཡིས། །ཞེས་པ། འབྲུ་རྣམས་ལས་གང་ཡང་རུང་བ་སྣ་གཅིག་གིས་ཞེས་པའོ། །དེ་དག་ཉིད་ཀྱིས་མི་ཟད་འགྱུར། །ཞེས་པ་འབྲུ་གང་སྦྱིན་སྲེག་བྱས་པ་དེ་ཉིད་མི་ཟད་པར་འགྱུར་བ་ལ་བྱ། དོན་དེ་ནོར་འགྲུབ་པ་ལ་ཡང་བྱ་ཞེས་པའོ། །བིལ་བ་མར་ལ་ཞེས་པ། བིལ་བའི་འབྲས་བུ་མེར་བསྲེགས་པ་འབར་བ་ལ་ཞེས་པ། གཟར་བུ་ཆུང་དུས། བསྲེགས་ནས་ས་ཡི་བདག་པོ་ལས། ནོར་ཆེན་དག་ནི་ཐོབ་པར་འགྱུར། །ཞེས་པའོ། །དཱུར་བ་འཇག་མ་མ་གྲུགས་པས། །ཞེས་པ་ལ་སོགས་པ་བོད་ཡུལ་ན་ཡོད་པར་གྲགས་པ་ལ་བྱ་བ་སྐད་དུ་བཤད་དེ། རྩྭ་དཱུར་བའི་འཇག་མ་སྐམ་པོ་མ་ཡིན་པ། རློན་པ་ལས་མ་ཆག་པ་མ་གྲུགས་པ་མ་གོད་པ་བཟང་པོ་ལས་རིང་ཐུང་ཇི་ཙམ་ཡང་རུང་བ་ལས། འོ་མ་ལས་སྦྲགས་ཤིང་སྦྱིན་སྲེག་འབུམ་བྱས་ན་ཚེ་རིང་པོར་འགྱུར་རོ། །སྔ་མ་བཞིན་དུ་རྩ་བའི་སྔགས་ཀྱི་མཇུག་ལ་ཨཱ་ཡུ་བརྟ་ཡ་ནཱ་མ་སྭཱ་ཧཱ་ཞེས་བཟླས་ན་ཚེ་རིང་བར་འགྱུར་རོ་ཞེས་པའོ། །རྒྱ་སྐྱེགས་ཤིང་གི་མེ་དག་ལ། །དེ་བཞིན་ལན་རེ་མར་གྱི་ཧོ་མ། །ཞེས་པ་དུས་གསུམ་དུ་འབུམ་བྱས་ན་ཚེ་རིང་བ་དང་ཡིད་གཞུངས་པ་དང་གྲགས་པ་ཆེན་པོ་ལ་སོགས་པ་ཐོབ་པར་འགྱུར་ཞེས་བྱ་བའི་དོན་ཏོ། །དེ་བཞིན་ཟས་རྣམས་ཀུན་བསྲེགས་ནས། །ཞེས་པ། འབྲས་སྣ་མང་པོ་ཡོད་པ་དེ་དག་ལ་ཟས་རྣམས་ཀུན་ཞེས་བྱའོ། །གཟར་བུ་ཆུང་དུས་སྦྱིན་སྲེག་བྱའོ་ཞེས་པའོ། །དགུ་པའི་བཤད་པ་རྫོགས་སོ།། །།ཕྱི་མའི་ཡང་ཕྱི་མ་རྟོག་པ་འདི་ལ་རྣམ་པ་ལྔ་བཤད་དོ། གླེང་བསླང་བ་དང༌། སྔོན་དུ་བསྙེན་པའི་ཆོ་ག་དང༌། རི་མོའི་སྐུ་གཟུགས་
ཀྱི་ཆོ་ག་དང༌། སྒྲུབ་པ་ལ་འཇུག་པ་དང༌། བསྒྲུབས་ནས་སྦྱིན་སྲེག་བྱ་བའོ། །དེ་ལ་དང་པོ་གླེང་བསླང་བ་བཤད་དེ། དེ་ནས་རྟོག་པ་ཐམས་ཅད་ཀྱི། །ཕྱི་མའི་ཕྱི་མ་ཞེས་བྱ་བ། །ཞེས་པ་གོང་དུ་བཤད་པ་རྣམས་ཀྱིས་ཆོ་ག་གོང་དུ་མ་བཤད་པ་རྣམས་ལེའུ་འདི་ལ་བཤད་པས་ཕྱི་མ་ཞེས་བྱའོ། །སྦྱོར་བར་བཅས་པས་རྒྱས་པ་ཡི། །རྟོག་པ་འདི་ནི་བཤད་པར་བྱ། །ཞེས་པ་དེ་ཡང་སྦྱོར་བ་ཐབས་དང་བཅས་པར་རྒྱ་ཆེར་འགྲེལ་ཅིང་བཤད་པའི་རྟོག་པ་དེ་དང་དེ་འདིར་བཤད་ཅེས་པའོ། །འདི་དག་ནི་སྔར་གོང་དུ་བཤད་པའི་འཕྲོ་སྦྱོར་བའི་ཚིག་གོ །དེ་བཞིན་བསྙེན་པ་སྔོན་དུ་རྫོགས། །ཞེས་པ་ཕྱིའི་ཡོ་བྱད་རྣམས་ཞེས་པའོ། །རྟོག་པ་དག་ནི་འདི་ལྟར་ཟིན། །ཞེས་པ་ཆོ་ག་དེ་དག་གི་རྟོག་པ་དག་ནི་སྔར་བཤད་ཟིན་ཏོ། །སྔགས་མཆོག་དག་ནི་གང་གསུངས་པ། །ཞེས་པ་རྒྱུད་ཆེན་པོ་ལས་གསུངས་ཞེས་པའོ། །ད་ནི་སྔོན་དུ་བསྙེན་པ་ཞེས་བྱ་བའི་ཆོ་ག་བཤད་དེ་དེའི་ཕྱིར། དེ་ཡི་ལས་ནི་ཆོ་ག་བཤད། །ཅེས་པ་གསུངས་ཏེ། ཐོག་མར་ཨོཾ་བཞག་ཆོ་ག་བཞིན། །ཞེས་པ་ཨོཾ་ཐོག་མར་བཞག་པ་ནི་ཡོངས་ཀྱིས་སྲིད་དེ་བཀྲ་ཤིས་པ་དང་གཟི་བྱིན་དང་ལྡན་པའམ་ཕྱག་འཚལ་པའི་དོན་ཏོ། །རི་མོའི་སྤྱན་སྔར་འདུག་ནས་སུ། །ཞེས་པ་མདུན་དུ་རི་མོའི་སྐུ་གཟུགས་བཀྲམ་པའི་སྤྱན་སྔར་འདུག་ནས་འབུམ་ཕྲག་བཅུར་བཟླས་པ་བྱ་ཞེས་པའོ། །ད་ནི་རི་མོའི་སྐུ་གཟུགས་ཀྱི་ཆོ་ག་བཤད་དེ། དེའི་ཕྱིར། དེ་ནས་དེ་ཡི་རི་མོ་མཆོག །ཅེས་པ་སྨོས་སོ། །གང་གིས་དངོས་གྲུབ་རབ་ཐོབ་པ། །ཞེས་པ་རི་མོའི་སྐུ་གཟུགས་གང་གིས་དངོས་གྲུབ་རབ་ཏུ་ཐོབ་པ་ཞེས་པ་དེ། ཚུལ་བཞིན་དུ་ནི་རབ་ཏུ་བཤད། །ཅེས་པའོ། །རས་ནི་སར་པ་ཁྲུ་གང་ཙམ། །ཞེས་པ་ཆེད་དུ་བཏགས་པའི་རས་ཞེས་པའོ། །ཞལ་གཅིག་པོ་ལ་མདངས་གསལ་བ། །ཞེས་པ་མོག་མོག་མ་ཡིན་པ་གསལ་བར་བྱ་ཞེས་པའོ། །མ་ཧེ་ལ་ནི་བཅིབས་པར་བྱ། །ཞེས་པ་གཡོན་བརྐྱང་པའི་ཚུལ་དུ་བཞུགས་པར་ཞེས་པའོ། །སྟག་ལྤགས་ཞེས་པ་སྨད་གཡོགས་བྱས། །ཞེས་པའོ། །འཁྲུག་ཅིང་འཇིགས་པ་ཞེས་པ་བདུད་དང་བགེགས་ཀྱི་སྡེ་འཇིགས་པ་བྲི་ཞེས་པའོ། །གང་དུ་ཡང་ཞེས་པ་གསུང་འབྱིན་འབྱིན་ལྟ་
བུའི་ཚུལ་དུ་བྱའོ་ཞེས་པའོ། །ཡན་ལག་ཐམས་ཅད་ཡོངས་རྫོགས་པ། །ཞེས་པ་སྐུ་གཟུགས་དེ་ཞེས་པའོ། །དེ་ནས་དེ་ལ་མཁས་པ་ཡིས། །མཆོད་པའི་ཡན་ལག་མཆོག་གིས་མཆོད། །ཅེས་པ་དེ་ལྟར་གཟུགས་བྲིས་ཟིན་ནས་སྔགས་པས་སྔར་བཤད་པའི་ཡོ་བྱད་རྣམས་མཆོད་པར་བྱའོ། །རི་མོའི་སྐུ་གཟུགས་ཀྱི་སྤྱན་སྔར་གཟུགས་པའི་བསྙེན་པ་འབུམ་ཕྲག་བཅུ་བྱའོ་ཞེས་པའི་ཐ་ཚིག་གོ །ད་ནི་བསྒྲུབ་པ་ལ་འཇུག་པ་ཞེས་བྱ་བ་བཤད་པ་ཡང༌། སྔགས་པ་བརྟུལ་ཞུགས་བརྟན་པ་ཡིས། །ཞེས་སྨོས་ཏེ། སྔགས་པ་བརྟུལ་ཞུགས་བརྟན་པ་ཡིས། །དེ་ཡི་འོག་ཏུ་བྲག་ཕུག་ཞུགས། །ཞེས་པ་ཇི་སྐད་གསུངས་པའི་ཚུལ་བཞིན་དུ་མི་འགྱུར་བར་བརྟན་པར་གནས་པར་བྱའོ། །སྔར་བསྙེན་པ་འབུམ་ཕྲག་བཅུ་བྱས་པའི་འོག་ཏུ་སྔགས་པ་དེ་བྲག་ཕུག་ཏུ་གནས་པར་བྱའོ་ཞེས་པའོ། །ཁ་ཟས་ཞེས་པ་སྨྱུང་བ་བྱ། །རི་རབ་རི་ནི་ཇི་ཙམ་པར། །ཞེས་པ་བདག་གནས་པའི་རི་གཡོ་བར་འགྱུར་གྱི་བར་དུ་བཟླས་ཞེས་པའོ། །ཡང་ན་རི་མོ་བཞད་ཀྱི་བར་དུ་བཟླས་ཞེས་པའོ། །ཡང་ན་རི་མོ་འབར་གྱི་བར་དུ་བཟླས་ཞེས་པའོ། །བཟླས་ན་དེའི་ཚེ་དངོས་གྲུབ་ཐོབ། །ཅེས་པ་དེ་ལྟར་མཚན་མ་བྱུང་བྱུང་དུ་བཟླས་ན་དངོས་གྲུབ་འཐོབ་པོ་ཞེས་བྱ་བའི་དོན་ཏོ། །དེ་ལྟར་ལྷ་འདི་བཟླས་པ་ཡི། །ཞེས་པ་ལ་སོགས་པའི་རི་མོའི་ལྷའི་སྐུ་གཟུགས་འདི་ལ་དངོས་གྲུབ་ཀྱི་མཚན་མ་བྱུང་པ་དང་བསྟན་པ་དེ་དག་ཡིན་ནོ། །མཚན་མ་དེ་དག་བྱུང་ནས་རིག་འཛིན་དུ་འགྱུར་རོ། །དེ་ལྟར་རིག་འཛིན་གྲུབ་ནས་འབྲས་བུའི་དོན་ཐམས་ཅད་སྒྲུབ་ནུས་པར་འགྱུར་རོ། །དེ་ཡང་ཡིད་ལ་གང་འདོད་པ་བསམས་པ་ཙམ་གྱིས་དེ་དག་ཐམས་ཅད་རིང་པོར་མི་ཐོགས་པར་འགྲུབ་པར་འགྱུར་རོ་ཞེས་པའོ། །ཁྲོས་ནས་ཡང་འགས་པར་འགྱུར། །ཞེས་པ་ལ་སོགས་པའི་ལས་འདི་དག་ཀྱང་དེ་བཞིན་དུ་བྱེད་ནུས་པར་འགྱུར་རོ་ཞེས་བྱ་བའི་ཐ་ཚིག་གོ །ཆུ་དག་ཅེས་པ་ཆུ་ཀླུང་དག་སྐེམས་ཞེས་པའོ། །དེ་ལ་སོགས་པའི་ལས་རྣམས་ནི། །ཞེས་པ། དེ་ལ་སོགས་པའི་ཡ་མཚན་ལས། །ངོ་མཚར་ཆེན་པོ་གཞན་དག་ཀྱང་བྱེད་དེ། ཡ་མཚན་ཆེན་པོ་ཐམས་ཅད་དང༌། །ཞེས་པའོ། །སེམས་ཅན་རྣམས་ནི་ཐམས་ཅད་
ལ། །ཞེས་པ་ལ་སོགས་པ་ཡི་དགས་ཕལ་པོ་ཆེའི་དཀྱིལ་འཁོར་དང་རྩ་བའི་རྟོག་པ་ལ་སོགས་པའི་ཆོ་ག་སྔར་གསུངས་པ་དེ་དག་གི་དངོས་གྲུབ་དང་ལས་རྣམས་འབྱུང་བ་ཡང་ཇི་སྐད་གསུངས་པའི་ཆོ་ག་བཞིན་དུ་བསྒྲུབས་ན་ཡང་འགྲུབ་པར་འགྱུར་རོ་ཞེས་བྱ་བའི་དོན་ཏོ། །ད་ནི་བསྒྲུབས་ནས་སྦྱིན་པ་ཞེས་བྱ་བ་བཤད་དེ། དེའི་ཕྱིར་བསྒྲུབས་ནས་སེམས་ཅན་ཐམས་ཅད་ལ་ཞེས་གསུངས་ཏེ། འབྲས་བུ་མཆོག་རྣམས་བསྒྲུབ་པར་བྱ། །ཞེས་པ་གོང་དུ་བཤད་པའི་དངོས་གྲུབ་གྲུབ་པའི་འབྲས་བུ་སེམས་ཅན་ཐམས་ཅད་ལ་སྦྱིན་པར་བྱའོ་ཞེས་པའི་དོན་ཏོ། །གྲུབ་པའི་མཐུ་ནི་གང་ཡོད་པ། །ཞེས་པ་དངོས་གྲུབ་གྲུབ་པའི་མཐུ་གང་ཡོད་པ་དེ་དག་ཐམས་ཅད་ཅེས་པའོ། །བདེ་གཤེགས་བསམ་པས་དེ་དག་ཀུན། །ཞེས་པ་ལས་སོགས་པ་བྱང་ཆུབ་ཀྱི་སེམས་དང་ལྡན་པས་མཐུ་གྲུབ་པ་དེ་དག་ཀུན་ཀྱང་སེར་སྣ་མེད་པའི་སེམས་ཀྱིས་སྐྱེ་བོ་ཕོངས་པ་རྣམས་ལ་སྦྱིན་ཞིང་སོ་སོའི་ལས་རེ་བ་ཡོངས་སུ་བསྐང་བར་བྱའོ་ཞེས་པའི་ཐ་ཚིག་གོ །སྙིང་རྗེ་ཅན་གྱིས་བདག་གི་ལུས། །ཞེས་པ་བདག་གི་ལུས་ཀྱང་སྦྱིན་པར་བྱའོ་ཞེས་པའོ། །དྲི་མ་མེད་པར་བསྒྲུབས་ནས་སུ། །དགེ་བ་འདི་ཡིས་སེམས་ཅན་ཀུན། །བདེ་གཤེགས་སེམས་ཅན་བདེ་བར་འགྱུར། །ཞེས་པ་སྐྱོན་མེད་པའི་སྦྱིན་པ་སྔོན་དུ་བཤད་པ་བཞིན་སྤྱད་པའི་དགེ་བ་འདི་ཡིས་དེ་ལྟར་དགེ་བ་སྤྱད་པ་སེམས་ཅན་ཐམས་ཅད་ལ་བསྔོའོ། །བྱང་ཆུབ་སེམས་དང་ལྡན་ཞིང་བདེ་བར་གྱུར་ཅིག་ཅེས་པའི་དོན་ཏོ། །རེ་བ་ཐམས་ཅད་ཡོངས་རྫོགས་ཤིང༌། །ཞེས་པ་འཇིག་རྟེན་དང་འཇིག་རྟེན་ལས་འདས་པའི་དགེ་བའི་འདོད་པ་ཕུན་སུམ་ཚོགས་པའི་ལོངས་སྤྱོད་དང་ལྡན་པར་གྱུར་ཅིག་ཅེས་པའི་དོན་ཏོ། །དགེ་བ་ཀུན་གྱི་སྣོད་གྱུར་ཅེས། །ཞེས་པ་དེ་དག་དང་ཡང་ལྡན་ཞིང་དགེ་བ་སྤྱོད་པའི་སྐབས་དན་ལྡན་པའོ། །ཡིད་ཀྱིས་ཡོངས་སུ་བསྔོ་བར་བྱ། །ཞེས་པ་སྤྱོད་པའི་སྐལ་བ་ཅན་དུ་གྱུར་ཅིག་ཅེས་པའོ། །གང་ཞིག་དེ་ལྟར་སྔགས་གྲུབ་ཀྱང༌། །ཞེས་པ་ཕལ་ཆེར་སྔགས་གྲུབ་ན་སྦྱིན་པའི་དགེ་བ་དེ་ལྟར་མི་སྤྱོད་པ་སྟེ། འགའ་ཞིག་སྔགས་གྲུབ་ནས་ཀྱང་སྦྱིན་པའི་དགེ་བ་དག་དེ་ལྟར་སྤྱད་པ་དེས་སྐྱོན་མེད་པའི་སྦྱིན་པ་ནི། དྲི་མ་མེད་པའི་
བྱང་ཆུབ་སེམས་ཞེས་པའི་དོན་ཏོ། །དགེ་བ་རྟག་ཏུ་སྤྱོད་པའི་དེ། །ཞེས་པ་སྦྱིན་པའི་དགེ་བ་དག་སྤྱོད་པ་ཞེས་པའོ། །དངོས་གྲུབ་རྟོག་ལས་གང་གསུངས་པ། །ཞེས་པ་རྟོག་པ་དག་ལས་དངོས་གྲུབ་གང་གསུངས་པ་དེ་བཞིན་གཤེགས་པའི་ཞལ་ནས་བྱུང་བ་དེ་ཞེས་བྱ་བའི་དོན་ཏོ། །ཐམས་ཅད་དེ་ལ་ཉེ་བར་གནས། །ཞེས་པ་དངོས་གྲུབ་ཐམས་ཅད་ཀྱང་སྔགས་པ་གྲུབ་པ་དེ་ལྟ་བུ་ལ་འགྲུབ་པར་འགྱུར་བས་ནི་ཉེ་བར་གནས་ཞེས་བྱའོ། །སྔགས་བ་སྒྲུབ་པ་པོ་ཡི་རྫུ་འཕྲུལ་གྱི། །ཡོན་ཏན་ཀུན་དང་ལྡན་པར་འགྱུར། །ཞེས་བྱ་བའི་དོན་ཏོ། །རྒྱ་ཆེར་བསྟན་ཞེས་པ་དེ་ལྟར་རྒྱ་ཆེར་བསྟན་ཏོ་ཞེས་པའོ། །རྟོག་པ་ཐམས་ཅད་འདུས་པའོ། །ཞེས་པ་དེ་དག་ནི་རྟོག་པ་ཐམས་ཅད་འདུས་པ་ཡིན་ནོ་ཞེས་པའི་དོན་ཏོ། །འཇམ་དཔལ་གཤིན་རྗེ་གཤེད་ཀྱི་རྟོག་པར་གཏོགས་པ་བཅུ་པའི་འགྲེལ་པ་ཞེས་པ་རྫོགས་སོ།། །།དུར་ཁྲོད་གནས་ཀྱི་དཀྱིལ་འཁོར་དུ་གཏོགས་པའི་ལེའུ་འདི་ལ་དོན་རྣམ་པ་བདུན་གྱིས་བཤད་དོ། །དེ་ལ་སྙིང་པོ་ཁྱད་པ་ཅན་བསྟན་པ་དང༌། དཀྱིལ་འཁོར་གྱི་ཆོ་ག་དང༌། མཆོད་པ་སྔར་བྱས་ནས་སློབ་མ་བཟུང་བ་ལ་སོགས་པའི་ལས་བྱ་བ་དང༌། ལྷ་སླར་གཤེགས་སུ་གསོལ་བ་ལ་སོགས་པའི་ལས་བྱ་བ་དང༌། ཕྱག་རྒྱའི་མཚན་ཉིད་དང༌། དཀྱིལ་འཁོར་དུ་དགོད་པའི་སྔགས་ཀྱི་ལེའུ་དང༌། མཆོད་པའི་ཆོ་ག་རྣམས་ཀྱིས་བསྟན་ཏོ། །དེ་ལ་སྙིང་པོའི་ཁྱད་པར་བསྟན་པའི་ཕྱིར། འཇམ་པའི་དབྱངས་ཀྱི་ཁྲོ་བོ་ཡི། །ཞེས་གསུངས་ཏེ། འཇམ་པའི་དབྱངས་ཀྱི་ཁྲོ་བོ་ཡི། །ཞེས་པ་ཧཱུ༵་རིང་པོ་འབྲུ་གཅིག་པོ་སྔར་བཤད་ཟིན་ཏེ་ཞེས་འཕྲོ་སྦྱོར་པའི་ཚིག་ཏུ་ཟད་དོ་ཞེས་པའོ། །དེ་ནས་གཞན་ཡང་དེ་ཡི་ནི། །ཞེས་པ་འཇམ་པའི་དབྱངས་དེའི་གཞན་ཡང་རྟོག་པ་བསྡུས་ཞེས་བྱ་བའི་དོན་ཏོ། །རྟོག་པ་བསྡུས་པ་རྒྱ་ཆེར་བཤད། །གཤིན་རྗེ་རབ་ཏུ་འཇོམས་པ་འདི། །ཞེས་པ་རྩ་བའི་རྟོག་པ་ལས་གསུངས་པའི་དངོས་གྲུབ་དང༌། ལས་རྣམས་ལེའུ་འདིར་མདོར་བསྡུས་ནས་ཡི་གེ་འབྲུ་གཅིག་པའི་སྒོ་ནས་རྒྱས་པར་བཤད་པའོ། །ཞལ་ནི་ཧཱུཾ་ཞེས་བྱ་བར་བཤད། །ཅེས་པ་ཞལ་དྲུག་པ་ལས་ཧཱུ༵་བྱུང་བས་ན་ཞལ་ཉིད་ཧཱུ༵་ཡིན་ཏེ་ཧཱུ༵་ཉིད་ཁྲོ་བོ་ཡིན་པར་བཤད་དོ། །
ཧཱུ༵་ཞེས་བྱ་བ་མཆོག་རིག་བྱ། །ཞེས་པ་ཧཱུ༵་དེ་ཉིད་ཁྲོ་བོ་ཡིན་པར་བཤད་པར་བྱའོ། །དེ་ཡི་དཀྱིལ་འཁོར་གཞན་ཡིན་ཏེ། །ཞེས་པ་འཇམ་དབྱངས་ཀྱི་ཁྲོ་བོ་དཀྱིལ་འཁོར་སྔར་གོང་དུ་བཤད་པ་ལས་གཞན་པའི་དཀྱིལ་འཁོར་འོག་ནས་འབྱུང་བ་ལ་བྱའོ། །འོག་ནས་འབྱུང་བའི་དཀྱིལ་འཁོར་དེ་བྲིས་ནས་བསྒྲུབས་ན་དཀྱིལ་འཁོར་དེ་ལས་དངོས་གྲུབ་ཀུན་འགྲུབ་པར་ཤེས་པར་བྱའོ་ཞེས་པའི་དོན་ཏོ། །དུར་ཁྲོད་གནས་ཞེས་བྱ་བ་སྟེ་ཞེས་པ་དཀྱིལ་འཁོར་དེའི་ནང་དུ་དུར་ཁྲོད་གནས་པས་ན་ཡང་དུར་ཁྲོད་གནས་ཞེས་བྱ་སྟེ། དེ་ལྟར་དཀྱིལ་འཁོར་དེ་ལ་མིང་དེ་སྐད་ཅེས་བྱ་སྟེ། མི་རོ་དེ་ཉིད་ལ་དུར་ཁྲོད་ཅེས་བྱ་བའི་ཕྱིར་ཞེས་བྱ་བའི་དོན་ཏོ། །དུར་ཁྲོད་གནས་པའི་གང་ཡིན་པའོ། །ཞེས་པ་དེ་ལ་དུར་ཁྲོད་གནས་ཞེས་ཅིའི་ཕྱིར་ཞེ་ན། མཎྜལ་གྱི་གནས་སུ་དུར་ཁྲོད་དུ་བྲིས་ན་ཡང་དུར་ཁྲོད་གནས་ཞེས་བྱ་བའི་དོན་ཏོ། །ཁྲུ་བརྒྱད་པ་ལ་སྒོ་བཞི་པ། །ཞེས་པ་ངོས་བཞི་ངོས་གཅིག་གི་ཚད་ཅེས་པའོ། །ཡང་ན་གྲུ་བཞི་པ་ཡང་རུང༌། །ཞེས་པ་ཕྱོགས་བཞིར་ཡང་ངོས་བཞི་བའི་ངོས་གཅིག་གི་ཚད་ཅེས་བྱའོ། །དུར་ཁྲོད་གནས་པ་བཟད་པོ་སྟེ། །ཞེས་པ་དཀྱིལ་འཁོར་ཉིད་ཀྱི་ཡོན་ཏན་ལ་བྱ་བའི་དོན་ཏོ། །དུར་ཁྲོད་ཐལ་བས་བྲི་བར་བྱ། །ཞེས་པ་དཀྱིལ་འཁོར་དེ་ཡང་དུར་ཁྲོད་ཀྱི་ཐལ་བས་བྲི་བར་བྱའོ་ཞེས་པའོ། །དེ་ཡི་དབུས་སུ་ཡི་དགས་བྲི། །ཡི་དགས་ཕྲེང་བ་དག་གིས་བརྒྱན། །ཞེས་པ་དཀྱིལ་འཁོར་དེའི་དབུས་སུ་པདྨ་འདབ་མ་བརྒྱད་པ་གཅིག་ཐལ་བས་བྲིས་པ་དེའི་སྟེང་དུ་མི་རོ་གཅིག་བྲིའོ། །དཀྱིལ་འཁོར་དེའི་ནང་རོལ་གྱི་ངོས་བཞིར་མི་རོ་གཉིས་གཉིས་ཙམ་བྲིའོ། །ཡི་དགས་འདི་དག་ཐམས་ཅད་ཀྱང་ཕྱག་རྒྱ་ཡིན་པས་ན་ཀུན་ཀྱང་པདྨའི་སྟེང་དུ་བཞག་གོ་ཞེས་པའི་དོན་ཏོ། །སྒོར་ནི་ཡི་དགས་རོ་སྨད་བཞག །ཅེས་སྒོ་བཞིར་མི་རོ་རེ་རེ་བྲི་བ་ནི་མགོ་མེད་པའི་རོ་ལ་བྱའོ། །མཐའ་མ་དག་ཏུ་མགོ་བོ་བཞག །ཅེས་པ་དཀྱིལ་འཁོར་དེའི་ནང་རོལ་གྱི་ངོས་བཞིར་མི་རོ་གཉིས་གཉིས་ཙམ་བྲིས་པའི་བར་དུ་མིའི་མགོ་བོ་བྲི་བར་བྱའོ། །ཚུལ་དེ་ལྟར་འདྲི་ནུས་ན་ནི་སྔགས་པས་དེ་དག་ཐམས་ཅད་དུར་ཁྲོད་ཐལ་བས་བྲིའོ་ཞེས་པའི་དོན་ཏོ། །གྲྭ་བཞིར་ཤཱུ་ལ་བཞི་རྣམས་དང༌། ཐོད་པ་
དག་ཀྱང་བྲི་བར་བྱ། །ཞེས་པ་འདིར་ཤཱུ་ལ་ཞེས་པ་ནི་ཏྲི་ཤཱུ་ལ་བྱའོ། །གྲྭ་བཞིར་ཤཱུ་ལ་རྩེ་གསུམ་པ་རེ་རེ་བཞི་ཡིས་ནང་རོལ་ནས་ཁ་ཕྱིར་བལྟས་པ་བྲི་སྟེ། ཤཱུ་ལ་རེ་རེའི་གློ་ཕ་རོལ་ཚུ་རོལ་དུ་ཐོད་པ་རེ་རེ་སྟེ་གཉིས་གཉིས་བྲིའོ། །དེ་ལྟར་ཤཱུ་ལ་བྲིས་པའི་ཚེ་རྩ་བ་དག་ཏུ་ཐོད་པ་རེ་རེ་བཞི་བྲི་ཞེས་པ་ཁ་ཅིག་འཆད་དོ། །གལ་ཏེ་འདྲི་བར་མི་ནུས་ན། །མཁས་པས་དེ་དག་ཐལ་བས་བྲི། །ཞེས་པ་ལ་སོགས་པ་ཚུལ་དེ་ལྟར་རི་མོ་འདྲི་བར་མི་ནུས་ན་ས་གཞི་སྐྱང་ནུལ་གྱིས་བྱུགས་ཏེ། ས་བསྟར་བ་བཟང་པོ་ལ་ཙནྡན་དམར་པོའི་འདེ་གུས་བསྐུས་ནས་ཐིག་ཙམ་བཏབ་ཀྱང་རུང་ངོ༌། །དཀྱིལ་འཁོར་ཚད་ཀྱང་གོང་དུ་གསུངས་པ་དང་སྦྱར་ཞེས་པའོ། །དུར་ཁྲོད་གནས་སུ་དང་པོར་ནི། །ཞེས་པ་དཀྱིལ་འཁོར་དང་པོར་ཡི་དགས་ལ་སོགས་པའི་སྔགས་རྣམས་གནས་སུ་དགོད་པའོ། །སྔགས་པས་ཡི་གེ་དགོད་པར་བྱ། །ཞེས་པ་ཡི་གེ་རྣམས་སོ་སོར་བཀོད་ཟིན་ནས་དཀྱིལ་འཁོར་དེར་ཁྲོ་བོའི་རྒྱལ་པོ་སྤྱན་དྲངས་ཏེ་མཆོད་པ་བྱའོ་ཞེས་པའི་ཐ་ཚིག་གོ །འདི་མན་ཆད་མཆོད་པ་སྔར་བྱས་ནས་སློབ་མ་བཟུང་བ་ལ་སོགས་པའི་ལས་ཞེས་བྱ་བ་བཤད་དེ། འཇིགས་པའི་ཞལ་ནི་འབར་བ་དྲུག །ཅེས་གསུངས་ཏེ། དེ་ཡང་ཁྲོ་བོའི་རྒྱལ་པོ་དེ་ནི་ཅི་འདྲ་བ་ཞིག་ཅེ་ན། དེ་བཞིན་ཞབས་ཀྱང་དྲུག་དང་ལྡན། །ཞེས་པ་ལ་སོགས་པ་བཞིན་ཞེས་པར་བྱའོ། །གཟིག་ལྤགས་ནི་སྨད་གཡོགས་ཞེས་སོ། །མཚོན་ཆ་བཟང་པོ་དུ་མ་བསྣམས། །ཞེས་པ་རི་མོ་འདྲི་བའི་སྐབས་འོག་ནས་ཀྱང་འབྱུང་ངོ་ཞེས་པའོ། །ཡི་དགས་སྟེང་དུ་མཆོད་པ་བྱ། །ཞེས་པ་དེ་ལྟ་བུའི་ལྷ་དེ་དཀྱིལ་འཁོར་གྱི་དབུས་སུ་མི་རོ་བྲིས་པའི་སྟེང་དུ་སྤྱན་དྲངས་ཏེ་མཆོད་པ་བྱའོ་ཞེས་པའི་དོན་ཏོ། །འོ་མའི་འབྲས་ཐུག་གཏོར་མར་དབུལ། །ཞེས་པ་ལྷ་བཤོས་དབུལ་བའི་དོན་ཏོ། །མར་མེ་དག་ནི་མར་ལས་བྱ། །ཞེས་པ་མར་མེ་བརྒྱད་དང་བཅུ་དྲུག་ཏུ་སྦྱར་ཞེས་པའོ། །ས་བོན་ཡི་གེ་གཅིག་པ་འདི། །ཞེས་པ། ཨོཾ་ཨཱཿ་ཧཱུ༵་སྭཱ་ཧཱ། ཞེས་བཟླས་པར་རིགས་སོ་ཞེས་ཁ་ཅིག་འཆད་དོ། །དེ་ནས་སྟོང་དུ་བཟླས་པ་བྱ། །དེ་ཡི་འོག་ཏུ་མཁས་པ་ཡིས། །ཞེས་པ་དེ་ལྟར་སྔར་
མཆོད་པ་དང༌། བཟླས་བརྗོད་བྱས་ནས་དེའི་འོག་ཏུ་སྔགས་པས་དཀྱིལ་འཁོར་དུ་སློབ་མ་གཟུང་བར་བྱའོ་ཞེས་པའོ། །དུར་ཁྲོད་གནས་སུ་ཞེས་པ་དཀྱིལ་འཁོར་གྱི་མིང་ཞེས་པའོ། །ཧཱུ༵་གི་ཞལ་ནི་ཟློས་ཤིང་གཟུང༌། །ཅེས་པ་དཀྱིལ་འཁོར་དུ་མེ་ཏོག་གཏོར་བའི་སྔགས་ཀྱང་འདི་ཉིད་དོ། །སློབ་དཔོན་གྱིས་ཧཱུ༵་ཞེས་བྱ་བ་བཟླས་ཤིང་སློབ་མ་གཟུང་བར་བྱ་ཞེས་པའི་དོན་ཏོ། །བཙུད་ནས་དེ་ཡི་སྙིང་གར་ནི། །ཞེས་པ་སློབ་མ་དཀྱིལ་འཁོར་དུ་བཙུད་ནས་དེའི་འོག་ཏུ་སློབ་མའི་སྙིང་གར་སྙིང་པོ་ཧཱུ༵་ཞེས་པ་བསམས་ལ་ལྷའི་སྐུར་བསྒྱུར་ཏེ། ཧཱུ༵་ཞེས་པ་གཞག་པར་བྱ་ཞེས་པའི་དོན་ཏོ། །དེ་ནས་ཤཱུ་ལའམ་ཕྱག་རྒྱ་ནི། །རས་ཀྱིས་གཡོགས་ཏེ་བཅིང་བར་བྱ། །ཞེས་པ་ཤཱུ་ལའི་ཕྱག་རྒྱ་ནི་བདག་གིས་ཀྱང་བཅིང༌། སློབ་མས་ཀྱང་འཆིང་དུ་གཞུག་གོ །མེ་ཏོག་དཀྱིལ་འཁོར་དུ་དོར་དུ་གཞུག་གོ །འདི་ནི་དཀྱིལ་འཁོར་དུ་གཞུག་པའི་ཕྱག་རྒྱའོ། །ཕྱག་རྒྱ་འདི་བཅིང་བའི་ཚེ་གཞན་གྱིས་མ་མཐོང་བར་རས་ཀྱིས་གཡོགས་ལ་ཕྱག་རྒྱ་བཅིང་བར་བྱའོ་ཞེས་པའི་ཐ་ཚིག་གོ །སློབ་མ་དག་ལ་ལེགས་བསྟན་ན། །དེ་ཡང་མཆོད་པ་བྱེད་དུ་གཞུག །ཅེས་པ་དེ་ནས་གདོང་གི་རས་ཕྱེ་ལ་དཀྱིལ་འཁོར་བསྟན་ནས་སློབ་མ་དེ་དཀྱིལ་འཁོར་ལ་མཆོད་པ་བྱེད་དུ་གཞུག་གོ་ཞེས་བྱ་བའི་དོན་ཏོ། །དེ་ནས་གཤིན་རྗེ་རབ་འཇོམས་པའི། །ཞེས་པ་ལ་སོགས་པ་དེ་ནས་དེའི་འོག་ཏུ་སློབ་མ་དེ་ལ་དབང་རྣམ་པ་བཞི་ལས་རིག་པའི་དབང་བསྐུར་བར་བྱའོ། །དབང་བསྐུར་བའི་བུམ་པ་ལ་ཡང་སྙིང་པོ་འབྲུ་གཅིག་པ་བཟླས་སོ། །དེ་ཡི་གེ་འབྲུ་གསུམ་སྦྱིན་པ་བཟླས་སོ་ཞེས་པ། ཨོཾ་ཨཱཿ་ཧཱུ༵་ཞེས་བྱ་བའི་ཡི་གེ་འབྲུ་གཅིག་པོ་སློབ་མ་ལ་ཚུལ་བཞིན་དུ་སྦྱིན་པར་བྱ་བའི་རིག་པའི་དབང་བསྐུར་བར་བྱའོ་ཞེས་པའི་ཐ་ཚིག་གོ །འདི་མན་ཆད་ནི་ལྷ་སླར་གཤེགས་སུ་གསོལ་བ་ལ་སོགས་པའི་ལས་བཤད་དེ། དེ་ནས་མཆོད་པ་ཡང་བྱས་ནས་ཞེས་པ་ནས་བསྟན་ཏེ། དེ་ནས་མཆོད་པ་ཡང་བྱས་ནས། ཞེས་པ་ལ་སོགས་པ་དེ་ནས་ཡང་དཀྱིལ་འཁོར་དུ་མཆོད་པ་བྱས་ནས་ཁྲོ་བོ་སླར་གཤེགས་སུ་གསོལ་ལོ། །ཤཱུ་ལའི་ཕྱག་རྒྱ་བཅིངས་ནས་སུ། །དེ་བཞིན་རྟག་པར་གཤེགས་སུ་གསོལ། །ཞེས་
པ་དེ་ལྟར་གཤེགས་སུ་གསོལ་བ་དང་ཐབས་གང་གིས་གཤེགས་སུ་གསོལ་ཞེ་ན། ཤཱུ་ལའི་ཕྱག་རྒྱ་བཅིངས་ནས་མཐེ་བོང་ཕྱིར་བསྐྱེད་པས་སླར་གཤེགས་སུ་གསོལ། །ཁྲོ་བོ་སྤྱན་དྲངས་པ་ཡང་ཤཱུ་ལའི་ཕྱག་རྒྱ་བཅིངས་ཏེ། མཐེ་བོང་གཉིས་ནང་དུ་གཡབ་ཅིང་སྔགས་དང་ལྡན་པས་སྤྱན་དྲང་བར་བྱའོ་ཞེས་པའི་དོན་ཏོ། །ཁྲོ་བོ་སྤྱན་དྲངས་པ་དག་ཀྱང༌། ཤཱུ་ལའི་ཕྱག་རྒྱ་ལྡན་པར་བྱ། །ཞེས་པ་ཁྲོ་བོ་སྤྱན་དྲངས་པ་དང་སླར་གཤེགས་སུ་གསོལ་བའི་མཛུབ་མོ་གཉིས་ནང་དུ་གཡབ་པར་འོས་ཏེ་དེ་ལྟར་བྱ་བ་ཡང་ཤཱུ་ལའི་ཕྱག་རྒྱ་བཅིངས་ཏེ་བྱའོ་ཞེས་ཁ་ཅིག་འཆད་དོ། །འདི་མན་ཆད་ཕྱག་རྒྱའི་མཚན་ཉིད་བཤད་དོ། །དཀོན་མཆོག་གསུམ་ལ་ཕྱག་བཙལ་ནས། །ཞེས་པ་ཐོག་མར་ལག་པ་གཉིས་ཐལ་མོ་སྦྱར་ཏེ་དཔྲལ་བར་བཞག་ལ། ཨོཾ་ན་མོ་བུདྡྷ་དྷརྨ་སཾ་གྷེ་བྷྱཿ་ཞེས་པ་བརྗོད་ནས་དེའི་འོག་ཏུ་ཤཱུ་ལའི་ཕྱག་རྒྱ་བཅིང་བར་བྱའོ། །དེ་ནི་དམ་ཚིག་སྔར་བྱས་ནས་གདོང་ཕྱག་རྒྱ་བཅིང་ཞེས་བྱ་བའི་དོན་ཏོ། །འདི་མན་ཆད་ནི་ཕྱག་རྒྱའི་མཚན་ཉིད་ཅེས་བྱ་བ་བཤད་དོ། །ཤཱུ་ལ་རབ་ཏུ་བསྟན་པར་བྱ། །ཞེས་པ་ནས་བསྟན་ཏེ། མཁས་པས་ཞེས་པ་སྔགས་པས་ཞེས་པའོ། །སོར་མོ་ཕན་ཚུན་བསྣོལ་ནས་སུ། །ཞེས་པ་ལག་པའི་རྒྱབ་ཏུ་བསྣོལ་ཞེས་པའོ། །གུང་མོར་སོར་མོ་མཆོག་གཉིས་ནི། །ཞེས་པ་རྩེ་སྤྲད་དེ་བསྒྲེང་བ་དབུས་ནས་གྱེན་དུ་བསྒྲེད་སྟེ་བཞག་ཅེས་པའི་དོན་ཏོ། །སྲིན་ལག་གཉིས་ནི་ནང་དུ་བཞག །མཛུབ་མོ་གཉིས་ཀྱི་དྲུང་དུ་བཞག །ཅེས་པ་སྲིན་ལག་གཉིས་ནང་དུ་བཞག་པ་ཡང་མཛུབ་མོ་དང་གུང་མོ་གཉིས་ཀྱི་བར་བར་དུ་བཞག་པའི་སྐད་དུ་ཁ་ཅིག་གིས་གསུངས་སོ། །བསྣོལ་མར་ནང་དུ་བཅུག་སྟེ་ཕ་རོལ་ཚུ་རོལ་རྩ་བ་ལ་གཏང་ལ་བཞག་གོ །དེ་ལྟར་དེ་གཉིས་བསྒྲེང་ནས་སུ། །ཞེས་པ་མཛུབ་མོ་གཉིས་ཀྱང་གུང་མོ་བསྒྲེང་པའི་སོ་སོའི་ངོས་ལ་སྦྱར་བ་ལ་ཡང་བསྒྲེང་ངོ་ཞེས་པའོ། །ལྷག་མ་རྣམས་ནི་ངེས་པར་སྦ། །ཞེས་པ་མཐེ་བོ་མཐེའུ་ཆུང་གཉིས་ཀྱང་བསྣོལ་མར་ནང་དུ་གཞུག་གོ །འདི་ཡི་ལས་རྣམས་ཐམས་ཅད་ནི། །ཞེས་པ་ཕྱག་རྒྱ་འདིས་བདག་བསྲུང་བ་དང༌། གཞན་བསྲུང་བ་ལ་སོགས་པའི་ལས་ཐམས་ཅད་བྱ་བའི་ཐ་ཚིག་གོ །འདི་
མན་ཆད་ནི་དཀྱིལ་འཁོར་དུ་དགོད་པའི་སྔགས་ཀྱི་ལེའུ་བཤད་དེ། །དེ་ནས་གཞན་ཡང་བཤད་པ་བཞིན། །ཞེས་པ་ནས་བསྟན་ཏེ། ཨོཾ་ཧཱུ༵་ལཾ་ལཾ་ཧ་ཞེས་པ་དཀྱིལ་འཁོར་གྱི་ནང་གི་ཕྱོགས་བཞིར་ཡི་དགས་དགོད་པའི་སྔགས་སོ། །ཨོཾ་ཧཱུ༵་དྲིང་ཛ་ཞེས་པ་སྒོ་བཞིན་ཡི་དགས་ཀྱི་རོ་སྨད་ཡོད་པའི་སྔགས་སོ། །ཨོཾ་ཧཱུ༵་ཧ་ཞེས་པ་དཀྱིལ་འཁོར་གྱི་ནང་གི་ཕྱོགས་བཞིར་ཡི་དགས་ཕྲེང་བ་བཀོད་པའི་བར་བར་དུ་མགོ་བཞག་པའི་སྔགས་སོ། །ཨོཾ་ཧཱུ༵་ཧྲཱིཿ་ཥྚྲིར་ཁ་ཤཱུ་ལ་བཞི་ཆར་གྱིའོ་ཞེས་པ་དཀྱིལ་འཁོར་མཐའ་བཞིར་ཏྲི་ཤཱུ་ལ་བཞི་བཞག་པའི་སྔགས་སོ། །ཨོཾ་ཧཱུ༵་ཏྲི་ཧ་ཞེས་ཏྲི་ཤཱུ་ལའི་རྩ་བའི་གྲྭ་བཞིར་ཐོད་པ་བཞི་བྲི་བའི་སྔགས་སོ། །ཏྲི་ཤཱུ་ལའི་གཡས་གཡོན་དུ་ཐོད་པ་རེ་རེ་གཉིས་གཉིས་བཞག་པ་རྣམས་ཀྱི་སྔགས་སོ། །ལྷོ་ཕྱོགས་ཀྱི་ནི་སྒོ་ཕྱེ་ནས། །ལྷག་མ་གཞན་ནི་གཅད་པར་བྱ། །ཞེས་པ་ལྷོ་ཕྱོགས་སྒོ་ནི་ཕྱེ་སྟེ། །སྒོ་ལྷག་མ་གསུམ་ནི་བཅད་དོ། །དུར་ཁྲོད་ཅེས་པ་དཀྱིལ་འཁོར་ལ་ཡང་བྱའོ། །རྟག་ཏུ་བྲི་བའི་སྔགས་ཞེས་པའོ། །སྔགས་འདི་རྣམས་ཀྱིས་རབ་སྦྱར་ན། །ཞེས་པ་སྔགས་དེ་རྣམས་ཀྱིས་དཀྱིལ་འཁོར་དེར་སྦྱར་ནས། དུར་ཁྲོད་ཀྱི་ནི་གནས་སུ་འགྱུར། །ཞེས་པ་སྔར་བཤད་པ་བཞིན་དུ་དུར་ཁྲོད་ཀྱི་གནས་ཀྱི་དཀྱིལ་འཁོར་དུ་འགྱུར་རོ་ཞེས་པའི་དོན་ཏོ། །ཙནྡན་དམར་པོས་བསྐུས་པ་ཡི། །ཞེས་པ་ཡང་ན་ཙནྡན་དམར་པོས་བསྐུས་པའི་ས་གཞི་ཁྲུ་གང་ཙམ་གྱི་ཚད་དུ་དཀྱིལ་འཁོར་བྲིས་ཀྱང་རུང་ཞེས་པའི་དོན་ཏོ། །ས་གཞི་ཁྲུ་གང་ཙམ་ལ་ནི། །ཞེས་པ་ངོས་གཅིག་ཚད་དུ་བྱ་ཞེས་པའོ། །དཀྱིལ་འཁོར་གྱི་ཚད་དང་གནས་ནི་ཇི་ལྟ་བུར་ཡང་གང་ཡང་རུང་ཞེས་པའི་དོན་ཏོ། །དཀྱིལ་འཁོར་དག་ནི་བྲིས་ནས་སུ། །དེ་ནས་ཆོ་ག་ཞེས་པ་ཡིས། །ཞེས་པ་དེ་ལྟར་དཀྱིལ་འཁོར་བྲིས་པ་ནས་དེའི་འོག་ཏུ་ལྷ་སྤྱན་དྲངས་པ་ལ་སོགས་པ་བྱའོ་ཞེས་པའི་ཐ་ཚིག་གོ །འདི་མན་ཆད་ནི་མཆོད་པའི་ཆོ་ག་ཞེས་བྱ་བ་བཤད་དེ། སྔགས་ཀྱི་མཆོད་པ་རིམ་བཞིན་བཤད། །ཅེས་པ་འོག་ནས་འབྱུང་བ་བཞིན་བྱ་ཞེས་པའོ། །སྤྱན་དྲངས་པའོ་ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་ལྷ་སྤྱན་དྲངས་པའོ། །ཨོཾ་ཧཱུ༵་སྭཱ་ཧཱ་ཞེས་པ། ཨོཾ་ཧཱུ༵་སྭཱ་ཧཱ་ཞེས་
བཟླས་སོ། །སྭཱ་ཧཱ་ནི་ཞི་བ་དང༌། རྒྱས་པ་ལ་སྦྱར་བར་ཟད་ཅེས་ཁ་ཅིག་ཀྱང་འཆད་དེ། སྔགས་འདིས་ཁྲོ་བོ་བཞུགས་སུ་གསོལ་ལོ། །ཁྲོ་བོ་ཉིད་ཀྱི་སྙིང་པོ་འབྲུ་གཅིག་པའི་སྔགས་ཡིན་ཏེ། བཟླས་པའི་ཚེ་འདི་བཞིན་དུ་བཟླས་སོ། །གོང་མའི་ལེའུ་ལས་ཡང་ཚུལ་འདི་བཞིན་དུ་བཟླས་སོ། །ཁྱད་པར་དུ་ནི་ཧཱུཾ་རིང་ཐུང་ཙམ་ཞིག་ཡོད་དོ་ཞེས་པའི་དོན་ཏོ། །ཁྲོ་བོ་རྣམ་པར་རྒྱལ་བའི་འཇམ་དཔལ་གྱི་རྩ་བའི་རྟོག་པ་ཕྱི་མའི་ཕྱི་མ་ལས་ཞེས་པ་དུར་ཁྲོད་གནས་ཀྱི་དཀྱིལ་འཁོར་འདིར་སྔགས་ཀྱི་ལེའུ་སྔགས་བཤད་པ་རྣམས་ཡི་དགས་ཕལ་པོ་ཆེའི་དཀྱིལ་འཁོར་དུ་སྔགས་མ་གསུངས་པ་རྣམས་སམ་དེར་མ་ཚང་བ་རྣམས་ཀྱང་སྔགས་འདི་རྣམས་ཀྱིས་སྦྱར་བར་བྱའོ། །བསྒོམ་པའི་ཡན་ལག་གང་དུ་ཡང་སྔགས་དགོས་པ་རྣམས་ཀྱང་ལེའུ་ལྟག་འོག་ཏུ་དེ་བཞིན་དུ་སྦྱར་རོ་ཞེས་པའི་དོན་ཏོ། །རྟོག་པ་སྟེ་དང་པོའོ་ཞེས་པ་དུར་ཁྲོད་གནས་ཀྱི་དཀྱིལ་འཁོར་གནས་སུ་གཏོགས་པའི་ནང་ནས་ལེའུ་འདི་དང་པོའོ་ཞེས་བྱ་བའི་དོན་ཏོ།། །།སྐུ་གཟུགས་དེའི་སྤྱན་སྔར་ཇི་སྐད་གསུངས་པའི་བཟླས་པའི་ཆོ་གའི་ལས་རྣམས་ཀྱི་བཟླས་བརྗོད་བྱའོ་ཞེས་བྱ་བའི་ཐ་ཚིག་གོ །དུར་ཁྲོད་གནས་ཀྱི་དཀྱིལ་འཁོར་དུ་གཏོགས་པའི་རི་མོའི་སྐུ་གཟུགས་ཀྱི་མཚན་ཉིད་བཤད་པའི་ལེའུ་འདི་ལ་དོན་རྣམ་པ་གསུམ་གྱིས་བསྟན་ཏེ། རི་མོའི་སྐུ་གཟུགས་ཀྱི་མཚན་ཉིད་དང༌། བཟླས་བརྗོད་བྱ་བའི་མཚན་ཉིད་དང་སྔགས་རྣམས་བསྟན་པའོ། །དེ་ལ་དང་པོར་རི་མོའི་སྐུ་གཟུགས་ཀྱི་མཚན་ཉིད་བཤད་པའི་ཕྱིར། དེ་ནས་འདི་ནི་རི་མོའི་མཆོག །ཅེས་བྱ་བ་ལ་སོགས་པ་སྨོས་སོ། །བཟླས་པའི་ལས་ནི་རབ་ཏུ་བྱ། །ཞེས་བྱ་བ་ལ་དེ་ལྟར་སྐུ་གཟུགས་བྲིས་ནས་དེ་ནས་ཞེས་པ། ཁྲོ་བོ་འདི་ཡི་མཆོག་ཏུ་འགྱུར། །ཞེས་པའོ། །རས་ཕྲན་ཁྲུ་གང་ཙམ་དུ་ནི། །ཞེས་པ་ཆེད་དུ་བཏགས་པའོ། །བཟང་པོ་སར་པ་བཀྲུས་པ་ལ། །ཞེས་པ་ཐག་ཐུག་ཅན་མ་ཡིན་པར་ཕྲ་མོར་བྱས་པའི་དོན་ཏོ། །ན་བཟར་གསོལ་ཞེས་པ་སྨད་གཡོགས་བྱས་པའོ། །ཚུལ་བཞིན་ཡི་དགས་སྟེང་དུ་བཞུགས། །ཞེས་པ་གཡོན་བརྐྱང་པའི་ཚུལ་དུ་བཞུགས་པའོ། །ཤཱུ་ལ་རལ་གྲི་འཁོར་ལོ་དང༌། །དགྲ་སྟྭ་མཆོག་
སྦྱིན་པ་ཡི་ཕྱག །ཅེས་པ་འདིའི་སྐབས་སུ་ཤཱུ་ལ་ཞེས་བྱ་བ་ནི་ཏྲི་ཤཱུ་ལ་ལ་བྱ་སྟེ་རྩེ་གསུམ་ལ་དྲང་པོར་འདུག་པའོ། །ཁ་ཅིག་གིས་རྩེ་གསུམ་ལ་ཁ་གདེངས་པོར་འདུག་པ་ཡིན་ཞེས་བཤད་དོ། །ལྕགས་མདའ་བེ་ཅོན་རྡོ་རྗེ་དང༌། །ཞེས་པ་ནང་ཡང་ཞེས་བྱ་སྟེ་ལྕགས་དང་ཤིང་ལས་ཕྱེད་ཕྱེད་བའི་མདའ་བྱས་ཏེ། འདི་ནི་མི་ལས་བྱའོ། །མདའ་དང་མདེའུ་ལྕགས་དང་སྒྲོ་ཡན་ཆད་ཀུན་ལྕགས་ལས་བྱས་པའོ། །འགའ་འང་ཞགས་པ་ཞེས་པ་དབྱུག་ཏོའམ་མཐོ་བ་ལ་ཡང་བྱའོ་ཞེས་པའོ། །ཤཀྟི་ཞེས་པ་མདུང་ཐུང་ཞེས་པའོ། །བ་ཏི་ས་དང་དེ་བཞིན་སྡིགས། །ཞེས་པ་ལ་གཅིག་ནི་རྩེ་གདེངས་པོར་ཡིན་པར་བཤད་དོ། །ཁ་ཅིག་ནི་བྲེ་བའི་སོ་འདྲ་བ་རྩེ་གསུམ་དྲང་པོར་འདུག་པ་ཡིན་ནོ་ཞེས་འཆད་དོ། །བུང་བ་ཞེས་བ་སྔོན་པོ་བྲིས་ནས་དེ་ཡང་སྦ་ཞེས་པ་གནས་དབེན་པར་བཞག་པའི་དོན་ཏོ། །འདི་མན་ཆད་བཟླས་བརྗོད་བྱ་བའི་ཆོ་ག་བཤད་དེ། ཡིད་དུ་འོང་བའི་གནས་དག་ཏུ། །ཞེས་པ་ལ་སོགས་པ་སྨོས་སོ། །བཞག་ནས་བཟླས་པ་དག་ཀྱང་བྱ། །ཞེས་པ་རི་མོའི་སྐུ་གཟུགས་དེ་ཡང༌། གནས་ཡིད་དུ་འོང་བའི་གནས་དབེན་པར་བཞག་ནས་བཟླས་བརྗོད་བྱའོ་ཞེས་པའོ། །བཟླས་པའི་ཆོ་ག་འདིར་བཤད་དོ། །ཞེས་པ་ཁྲུས་ལ་སོགས་པ་ཡང་བཟླས་པའི་ཡན་ལག་ཏུ་གཏོགས་པའི་ཕྱིར་ཞེས་པའི་དོན་ཏོ། །རིག་པ་འཛིན་པའི་སྔགས་པས་རྟག་པ་རུ་ཁྲུས་བྱའོ། །འབར་བའི་སྔགས་ཀྱིས་ཁྲུས་བྱའོ། །ཞེས་པ་མཐུ་ཆེ་བ་གཟི་བརྗིད་ཅན་གྱིས་ཁྲུས་བྱས་ཏེ། སྔགས་ཉིད་འོག་ནས་འབྱུང་ངོ་ཞེས་པའོ། །བདུད་རྩི་འབྱུང་བའི་སྔགས་ཀྱིས་ནི། །ཞེས་འོག་ནས་འབྱུང་བ་ཞེས་པའོ། །ཐོག་མར་ཁ་ནི་བཀྲུས་ནས་སུ། །ཞེས་པ་ཁྲུས་བྱས་པའི་འོག་ཏུ་ཉེ་རེག་གི་ཕྱག་རྒྱ་དང་ལྡན་པའི་ཚུལ་བཞིན་དུ་ཁ་བཀྲུའོ། །དེའི་འོག་ཏུ་ཤཱུ་ལའི་ཕྱག་རྒྱ་དང་ལྡན་པའི་ཚུལ་བཞིན་དུ་བསྲུང་ཞེས་པའོ། །དེ་ནས་བསྲུང་བ་ལེགས་པར་བྱ། །ཞེས་པ་དེའི་འོག་ཏུ་ཤཱུ་ལའི་ཕྱག་རྒྱ་དང་ལྡན་པས་བསྲུང་བར་བྱ་བའི་སྔགས་ཀྱང་འོག་ནས་འབྱུང་ངོ༌། །དེ་ཡི་འོག་ཏུ་ཆོ་ག་བཞིན། །ཞེས་པ་དེའི་འོག་ཏུ་འཛབ་སར་འགྲོ་བར་བྱས་ཏེ། དེའི་སྔགས་ཀྱང་འོག་ནས་འབྱུང་ངོ༌། །མཁས་པས་ཁྲོ་བོའི་ཁང་པར་འཇུག །
ཅེས་པའི་དོན་ཏོ། །ཞུགས་ནས་ཀུ་ཤའི་ལས་བྱའོ། །ཞེས་པ་འཛབ་སའི་ཁང་བའི་ནང་དུ་ཞུགས་ནས། སྟན་བ་ཟང་དེ་ལ་སྔགས་བ་འདུག་ནས་སུ། །ཞེས་པའི་དོན་ཏོ། །དེ་ནས་ཆོ་ག་སྔོན་གསུངས་པ། །ཞེས་པ་གོང་དུ་བཤད་བའི་མཆོད་པའི་ཡོ་བྱད་རྣམས་ཀྱིས་མཆོད་པར་བྱའོ། །སྔགས་པའི་ལག་པ་གཉིས་ནི་ཙནྡན་དྲིས་བསྐུས་པས་ཞེས་པའི་དོན་ཏོ། །སྔགས་ཀྱི་ནོར་བུ་བླངས་ནས་སུ། །ཉེས་པའི་སྐྱོན་རྣམས་སྦྱང་བའི་ཕྱིར། །ཞེས་པ་སྔགས་ཀྱི་ནོར་བུ་བླངས་པའི་སྔགས་འོག་ནས་འབྱུང་བ་བརྗོད་ཅིང་སྔགས་ཀྱི་ནོར་བུ་བླང་ངོ༌། །ནོར་བུའི་སྐྱོན་སྦྱང་ཞེས་པའི་དོན་ཏོ། །ཁྲོ་བོ་བདུད་རྩི་ལན་གསུམ་བཟླས། །ཞེས་པ་ཁྱོར་བའི་ནང་དུ་བཅུག་སྟེ་བཟླས་པའི་སྔགས་འོག་ནས་འབྱུང་ངོ་ཞེས་པའི་དོན་ཏོ། །མངོན་པར་ཕྱོགས་འདུག་བཟླས་པར་བྱ། །ཞེས་པ་སྔགས་པས་བཟླས་ཞེས་པའོ། །སེམས་རབ་དང་ཞིང་རྩེ་གཅིག་ཡིད། །སེམས་མི་གཡེང་བར་བྱ་བའི་དོན་ཏོ། །ཡིད་ནི་མི་སྐྱོ་བར་དུ་བྱ། །ཞེས་པ་དུས་གསུམ་དུ་བཟླས་པ་དེ་ཡིད་ལ་སྐྱོ་བའི་མཚམས་ཀྱིས་བཟུང་སྟེ་བཟླས་པར་བྱའོ་ཞེས་པའི་དོན་ཏོ། །བཟླས་པའི་མཐར་ཞེས་པ་བཟླས་བརྗོད་ཟིན་པའི་མཐར་ཁྲོ་བོ་སླར་གཤེགས་སུ་གསོལ་ལོ། །ཤཱུ་ལའི་རྒྱ་བཅིངས་གཤེགས་སུ་གསོལ། །ཞེས་པ་ཤཱུ་ལའི་ཕྱག་རྒྱ་དང་སླར་གཤེགས་སུ་གསོལ་བའི་སྔགས་རྣམས་སྦྱར་ཏེ་སླར་གཤེགས་སུ་གསོལ་ལོ། །དེ་ལྟར་ལེགས་པར་ཉིན་རེ་ཞིང༌། །ཡི་གེ་གཉིས་པའི་སྔགས་འདི་ནི། །རྣམ་པ་ཀུན་དུ་ཆོ་ག་བཞིན། །ཞེས་པ་གོང་དུ་བཤད་པ་དེ་ལྟར་ལེགས་པར་ཉིན་རེ་བཞིན་དུས་གསུམ་དུ་ཡི་གེ་གཅིག་པའི་སྔགས་འདི་བཟླས་པའི་དུས་ཐམས་ཅད་དུ་ཆོ་ག་བཞིན་དུ་བཟླས་པར་བྱའོ། །གང་ཞིག་བྱེ་བ་གཅིག་ཟློས་པ། །ཞེས་པ་འབུམ་ཕྲག་བརྒྱར་བཟླས་པ་བྱའོ། །དེ་ཡི་དངོས་གྲུབ་དམ་པ་ཐོབ། །ཅེས་པ་དེ་ལྟར་སྔགས་བཟླས་པ་བྱས་ནས་དེའི་འོག་ཏུ་བསྒྲུབས་ན་དངོས་གྲུབ་མཆོག་འཐོབ་བོ་ཞེས་པའི་ཐ་ཚིག་གོ །འདི་མན་ཆད་ནི་སྔགས་རྣམས་བསྟན་ཏེ། དེ་ནས་གཞན་ཡང་ཅི་བསྟན་པ། །ཞེས་པ་ལ་སོགས་པ་ཁྲོ་བོ་ཆེན་པོ་ཉིད་ཀྱིས་གསུངས་པའི་རྒྱུད་ཆེན་པོ་ལས་ཇི་སྐད་བསྟེན་པའི་སྔགས་རྣམས་བསྒྲུབ་ལ་ཕན་པའི་ཕྱིར་བཤད་དོ། །
ཨོཾ་ཧཱུ༵་དེ་བ་ཏ་ཏེ་ཙ་སྭཱ་ཧཱ་ཞེས་པ་ཁྲུས་བྱེད་པའི་ཚེ་ཆུ་ལ་གདབ་པ་དང༌། ས་ལ་གདབ་བ་དང༌། སྔགས་ཀྱི་ཆུས་ལུས་ལ་གཏོར་བར་བྱ་བའི་སྔགས་སོ། །ཨོཾ་ཧཱུ༵་ཨ་མྲྀ་ཏ་སྲ་བ་བཱ་མ་བ་ཞེས་ཉེ་རེག་གི་ཕྱག་རྒྱ་སྦྱར་ཏེ། ཁར་ལན་གསུམ་དུ་སྦྱར་ཏེ། ཁར་ལན་གསུམ་དུ་ཆུ་བཏུང་བ་དང༌། ཁ་ལན་གསུམ་དུ་ཕྱི་བའི་སྔགས་སོ། །ཨོཾ་ཧཱུ༵་སརྦ་ཏོ་ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་བདག་ཉིད་བསྲུང་ངོ༌། །ཨོཾ་ནཱ་མ་སརྦ་ཏ་ཐཱ་ག་ཏོ་ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་ཁྲུས་བྱ་བའི་ཚེ་དང༌། བསྲུང་བའི་ཚེ་མཚམས་བཅད་པའི་སྔགས་སོ། །ར་བའི་སྔགས་སོ། །ཞེས་པ་རྡོ་རྗེ་འབར་བ་བསམ་ཞེས་པའི་དོན་ཏོ། །ཧཱུ༵་ཧཱུ༵་ཧཱུ༵་ཧཱུ༵་ཧཱུ༵་ཧཱུ༵། ཞེས་པ་ཤཱུ་ལའི་ཕྱག་རྒྱ་དང་སྦྱར་ཏེ་གནས་ལྔར་གཏུག་ཅིང་བདག་བསྲུང་དང་ཕ་རོལ་ཡང་བསྲུང་བའི་སྔགས་སོ། །ཨོཾ་ཧཱུ༵་སི་ཏི་ཀཱ་ལ་མ་ཐ་ན་ཕཊ། ཅེས་པ་འཛབ་སར་ནང་དུ་འགྲོ་བའི་ཚེ་སྔགས་འདི་ཟློས་ཤིང་འགྲོ་བར་བྱའོ། །སྔགས་འདི་ཆུ་ལ་ཟློས་ཤིང་ཆུར་གཏོར་ཞིང་འགྲོ་བར་བྱའོ་ཞེས་པའི་དོན་ཏོ། །ཨོཾ་ཧཱུ༵་རཀྵ་རཀྵ་མན་སྭཱ་ཧཱ་ཞེས་པ་བདག་ཉིད་ཀྱི་སྟན་ལ་གདབ་པའི་སྔགས་སོ། །ཨོཾ་ཧཱུ༵་སིདྡྷི་དྷ་ཧཱུ༵་ཛ་ཛ་ཞེས་པ་སྔགས་འདི་བཟླས་ཤིང་སྔགས་ཀྱི་ནོར་བུ་བླང་ངོ་ཞེས་སོ། །ཨོཾ་ཧཱུ༵་ཀྲོ་ཏ་ཨ་མྲྀ་ཏ་ཞེས་བ་སྙིམ་པ་བསྣོལ་བའི་ནང་དུ་ནོར་བུ་བཅུག་སྟེ། སྔགས་འདི་བཟླས་སོ། །བཟླས་པའི་ཆོ་གར་གཏོགས་པ་སྟེ། །ཞེས་པ་དུར་ཁྲོད་གནས་ཀྱི་དཀྱིལ་འཁོར་ལེའུར་གཏོགས་པ་ལས་གཉིས་པའོ།། །།བརྟུལ་ཞུགས་སུ་གཏོགས་པའི་ལེའུར་འདི་ལ་དོན་རྣམ་པ་བཞིས་བསྟན་ཏེ། དེ་ལ་སྔོན་དུ་བསྙེན་པ་བྱས་ནས་བརྟུལ་ཞུགས་སྤྱོད་པ་དང༌། བརྟུལ་ཞུགས་མ་ནུས་ན་སྔོན་དུ་བསྙེན་པ་ལྷག་པར་བྱས་ཏེ་བསྒྲུབ་པ་དང༌། སྤྱིར་བསྟན་པ་དང༌། དངོས་གྲུབ་མཆོག་དང་འབྲིང་མི་འདོད་ན་དངོས་གྲུབ་ཕལ་བསྒྲུབ་པ་བསྟན་པའོ། །དེ་ལ་དང་པོར་སྔོན་དུ་བསྙེན་པ་བྱས་ནས་བརྟུལ་ཞུགས་སྤྱད་པ་ཞེས་བྱ་བ་བཤད་པའོ། །འདི་ཡི་སྔོན་དུ་བསྙེན་པ་ནི། །བྱེ་བ་གཅིག་ཏུ་ངེས་པར་བཤད། །ཅེས་ཁྲོ་བོའི་རྒྱལ་པོ་འདིའི་སྔོན་དུ་བསྙེན་པ་བྱ་བ་ནི་སྔར་བཤད་པ་བཞིན་དུ་འབུམ་ཕྲག་བརྒྱ་བྱའོ། །ཁྲོ་བོ་བརྟུལ་ཞུགས་ཕྱིས་སྤྱོད་པ་ན་ཞེས་
པ་དེ་ལྟར་བསྙེན་པ་བྱས་པའི་འོག་ཏུ་ཁྲོ་བོའི་བརྟུལ་ཞུགས་སྦྱད་ན་དངོས་གྲུབ་མཆོག་ཐོབ་པོ་ཞེས་པའི་དོན་ཏོ། །ཤིང་ལས་བྱས་པའི་ཐོད་པ་ནི། །ཞེས་པ་ཐང་ཤིང་ལས་བྱས་པའི་ཐོད་པ་ཞེས་པའོ། །ཉི་ཤུ་རྩ་དྲུག་སོར་ཚད་བྱས། །ཞེས་པ་ཐོང་པའི་ཁ་ཤིང་གི་ཚད་བྱ་ཞེས་པའོ། །མཁས་པས་ཏྲི་ཤཱུ་ལ་རྣོན་པོ་ནི། །སྔགས་པས་ཏྲི་ཤཱུལ་རྣོན་པོ་ལེགས་པ་ཞེས་པའོ། །ལག་པ་གཡས་པས་ཏྲི་ཤཱུ་ལ་བཟུང༌། །གཡོན་དུ་ཐོད་པ་བཟུང་ཞེས་པའོ། །གཟིག་ལྤགས་ཞེས་པ་སྨད་གཡོགས་ཞེས་པའོ། །ལུས་ནི་ཐལ་བ་དག་གིས་བསྐུ། །ཞེས་པ་ཐལ་བས་བྱུག་པར་བྱ་བའི་དོན་ཏོ། །རུས་པ་དག་གི་ཕྲེང་བ་ཡིས། །ཞེས་པ་མི་རུས་དག་གིས་ལྷའི་རྒྱན་བཞིན་དུ་གདགས་སོ། །རྒྱན་དུ་བྱས་ནས་བརྟུལ་ཞུགས་སྤྱད། །ཅེས་པ་ཚུལ་དེ་ལྟར་དེ་བརྟུལ་ཞུགས་སྤྱད་དོ་ཞེས་པའི་དོན་ཏོ། །སྔགས་པ་དེ་གད་མོ་སྒྲ་ཆེན་དག་ཀྱང་འབྱིན་ཞེས་པའོ། །དུར་ཁྲོད་དམ་ནི་ཤིང་གཅིག་གམ། །རིའམ་ཡང་ན་ཚལ་ཡང་རུང༌། །ཞེས་པ་སྔགས་པ་དེ་ལྟ་བུ་དེ་གྲོང་དུ་འགྲོ་ཞིང་དེར་གནས་པར་མི་བྱ་སྟེ། མིང་གིས་སྨོས་པའི་གནས་འདི་དག་ཏུ་གནས་པར་བྱའོ། །མཁས་པས་ཞེས་པ་སྔགས་པས་ཞེས་པའོ། །ལྕི་བ་ཟ་ཞེས་པ་ཟས་སུ་ལྕི་བ་ཟ་བའོ། །བློ་ལྡན་གྲོང་དུ་ཡོང་མི་འཇུག །ཅེས་པ་སྔགས་པ་དེ་གྲོང་དུ་འགྲོ་ཞིང་དེར་ཡང་གནས་པར་མི་བྱའོ། །མཉམ་པར་གཞག་ཅེས་པ་སེམས་རྩེ་གཅིག་ཏུ་གནས་ཞེས་པའོ། །ཚིག་མི་སྨྲ་ཞེས་པ་གཞན་གང་ཡང་མི་སྨྲའོ། །གཙང་ཞིང་ཚངས་པར་སྤྱོད་ལ་དུལ། །ཞེས་ཕྱི་ནང་གི་ཁྱིམ་པ་ཞིག་ཡིན་ན་མི་ཚངས་པར་མི་སྤྱད་ཅེས་པའི་དོན་ཏོ། །རྟག་ཏུ་བདེ་གཤེགས་སེམས་དང་ལྡན། །ཞེས་པ་བྱང་ཆུབ་སེམས་དང་ལྡན་ཞེས་པའོ། །བྱང་ཆུབ་སེམས་དང་ཀུན་ལྡན་ཞིང༌། །ཞེས་པ་གོང་མ་ཉིད་ཀྱི་འགྲེལ་པ་གཤིན་རྗེས་རབ་ཏུ་འཇོམས་པ་འདི་ཞེས་པ་དེ་ལྟར་སྤྱད་ན་དངོས་གྲུབ་མཆོག་འགྲུབ་པར་འགྱུར་གྱི་མི་འགྲུབ་པར་མི་འགྱུར་རོ་ཞེས་པའི་དོན་ཏོ། །དུས་ཐམས་ཅད་དུ་བྱང་ཆུབ་ཀྱི་སེམས་ལྡན་པར་བྱ་ཞིང་ཁྲོ་བོའི་བརྟུལ་ཞུགས་གང་གསུངས་པ་ཡང་སྤྱོད་ཅིང་རྟག་ཏུ་དུས་གསུམ་དུ་ཟློས་པ་བྱད་པ་ནི་དངོས་
གྲུབ་མཆོག་ཐོབ་པར་འགྱུར་རོ་ཞེས་པའི་དོན་ཏོ། །འདི་མན་ཆད་ནི་བརྟུལ་ཞུགས་མ་གྲུབ་ན་བསྙེན་པ་ལྷག་པར་བྱ་སྟེ། །སྒྲུབ་པ་ཞེས་བྱ་བ་བཤད་དོ། གང་ཚེ་འདི་ཡི་བརྟུལ་ཞུགས་ནི། །བསྙེན་པ་བྱ་བར་མི་ནུས་ན། །ཞེས་བྱ་བ་གོང་དུ་བཤད་པ་བཞིན་དུ་བརྟུལ་ཞུགས་སྤྱོད་མི་ནུས་ན། གནས་གང་ཡང་རུང་བར་གནས་ཤིང་ཟས་སུ་ལྕི་བ་ཟ་ཞིང་འབུམ་ཕྲག་བརྒྱད་བཟླས་པའི་བསྙེན་པ་བྱའོ་ཞེས་པའི་དོན་ཏོ། །དེ་ནས་བཟླས་པའི་ཐ་མར་ཡང༌། །མཁས་པས་མཆོད་པ་རྒྱ་ཆེར་བྱ། །ཞེས་པ་དེ་ལྟར་སྔོན་དུ་བསྙེན་པ་བྱས་པའི་བཟླས་པ་ཟིན་ནས། ཐ་མར་ཡང་སྔགས་པས་སྐུ་གཟུགས་དེ་ལ་མཆོད་པ་རྒྱ་ཆེན་པོ་བྱའོ། །དེ་ནས་མེ་ཏོག་ཛཱ་ཏི་སྟོང༌། །རི་མོ་དག་ལ་ཕོག་པར་དབུལ། །ཞེས་པ་དྲི་ཤིང་སྣ་མའི་མེ་ཏོག་ལ་བྱ་སྟེ། སྔགས་བཟླས་ཤིང་སྐུ་གཟུགས་པ་ཕོག་པར་དབུལ་ལོ། །རིག་པ་འཛིན་ཞེས་པ་སྔགས་པས་ཞེས་པའོ། །དེ་ཡིས་ཕོག་པར་ཕུལ་ན་ནི། །ཞེས་པ་སྲི་ཤིང་སྣ་མའི་མེ་ཏོག་ཕུལ་ཞེས་པའོ། །གང་ཚེ་རབ་ཏུ་འབར་འགྱུར་བ། །ཞེས་པ་རི་མོའི་སྐུ་གཟུགས་འབར་བར་གྱུར་ན་ཞེས་པའི་དོན་ཏོ། །དེའི་ཚེ་རི་མོ་དེ་ཡིས་ནི། །ཞེས་པ་རི་མོའི་སྐུ་གཟུགས་འབར་པར་གྱུར་པ་དེའི་མཐུས་ནི་སྔགས་པ་ཉིད་ནམ་མཁའ་ལ་འཕར་བར་གདོན་མི་ཟ་བར་ཞེས་པའི་དོན་ཏོ། །མཆོག་ཏུ་གྱུར་ཏེ་ཐོག་མར་འགྲོ། །ཞེས་པ་རིག་འཛིན་གྱི་རྒྱལ་པོར་འགྱུར་ཞེས་པའི་དོན་ཏོ། །འོན་ཏེ་ཕོག་པར་ཕུལ་བ་ན། །ཞེས་པ་མེ་ཏོག་སྔ་མ་དེ་ཉིད་ཀྱིས་སྐུ་གཟུགས་ལ་ཕུལ་ཞེས་པའི་དོན་ཏོ། །གཟུགས་དེ་རབ་ཏུ་གཡོ་བར་གྱུར་ན་ནི། །ཞེས་པའོ། །རྟོག་ལ་ཇི་སྐད་གསུངས་པ་ཡི། །ཞེས་པ་ཇི་སྐད་གསུངས་པའི་དངོས་གྲུབ་འབྲིང༌། ལུས་མི་སྣང་བ་འཐོབ་པར་འགྱུར་རོ་ཞེས་པའི་དོན་ཏོ། །དེ་ལ་དངོས་གྲུབ་འབྲིང་དུ་སྒྲུབ་པ་པོ་དེ་ལ་འགྱུར་ཞེས་པའི་དོན་ཏོ། །དེ་སྟེ་རབ་ཏུ་མི་གཡོ་བར་རི་མོ་རང་བཞིན་དུ་འདུག་པ། དངོས་གྲུབ་ཐ་མ་ཐོབ་པར་འགྱུར། །ཞེས་པ་དེ་ལྟར་བྱས་པ་ལས་ཀྱང་སྐུ་གཟུགས་མི་འགུལ་ཞིང་མི་གཡོ་བར་གྱུར་ཏེ། སྐུ་གཟུགས་ཐ་མ་ལ་པར་འདུག་ན་ཆོ་ག་དེ་ལྟར་བྱས་པའི་དངོས་གྲུབ་ཐ་མ་རྐང་མགྱོགས་ཙམ་དུ་འགྱུར་རོ། །དེ་ལྟ་བུའི་འབྲས་བུ་རྣམ་པ་གསུམ་
གསུམ་བཤད་ཅེས་པ་དེ་ལྟར་དངོས་གྲུབ་རབ་འབྲིང་ཐ་མ་གསུམ་དུ་བཤད་དོ་ཞེས་བྱ་བའི་ཐ་ཚིག་གོ །འདི་མན་ཆད་ནི་སྤྱིར་བསྙེན་པ་ཞེས་བྱ་བ་བཤད་དོ། །ལུས་ནི་ཉོན་མོངས་སྤྱད་པ་ལས། །དངོས་གྲུབ་རྣམ་གསུམ་ཐོབ་པར་འགྱུར། །ཞེས་པ་གོང་དུ་བཤད་པའི་བརྟུལ་ཞུགས་དག་མ་ཡིན་པར་སྤྱིར་ཡང་ལུས་ཉོན་མོངས་པའི་དཀའ་ཐུབ་སྤྱད་པ་ལས་དངོས་གྲུབ་རྣམ་གསུམ་ཐབ་པར་འགྱུར་རོ་ཞེས་པའི་དོན་ཏོ། །བརྟུལ་ཞུགས་སྨྱུང་བར་འདུག་ལ་འབད། །ཅེས་པ་ལུས་ལ་ཉོན་མོངས་པར་བྱ་བའི་དཀའ་ཐུབ་དེ་དག་ཀྱང་གང་ཞེ་ན། འདི་དག་གོ་ཡང་ན་ཆུའམ། །རླུང་དག་བཟའ་ཞེས་པ་ཆུ་འབའ་ཞིག་བཏུང་བའམ་རླུང་ཆེན་རྔུབ་ཅིང་བཟའ་བར་བྱའོ། །ཅི་ལའང་མ་ཆགས་ཕྱུགས་གཅིན་བཏུང༌། །ཞེས་པ་འདོད་པའི་ལོངས་སྤྱོད་ལ་སོགས་ཏེ། གང་ལ་ཡང་ཆགས་པར་མི་བྱའོ། །ཕྱུགས་གཅིན་ཞེས་པ་ཕྱུགས་གཅིན་འབའ་ཞིག་བཏུང་ཞེས་པའོ། །བྱང་ཆུབ་སེམས་དང་ཀུན་ལྡན་ན། །ཞེས་པ་དེ་ལྟར་དཀའ་ཐུབ་སྤྱོད་པ་དང་ལྡན་ཞིང་བྱང་ཆུབ་ཀྱི་སེམས་དང་ཡང་ལྡན་ན། དེའི་ཚེ་དངོས་གྲུབ་དམ་པ་འཐོབ་ཅེས་པའི་དོན་ཏོ། །རིག་པ་མཆོག་ཀུན་བསྒྲུབ་པ་ལ། །ཞེས་པ་ཁྲོ་བོའི་རྒྱལ་པོ་ལ་བྱ་སྟེ། དེའི་སྔགས་སྒྲུབ་པ་ལ་བྱ་ཞེས་པའི་དོན་ཏོ། །འདི་དག་སྤྱིར་ན་བསྟན་པ་ཡིས། །ཞེས་པ་ཆོ་ག་དེ་ལྟར་སྤྱད་ན་དངོས་གྲུབ་རྣམ་གསུམ་ཐོབ་པར་འགྱུར་རོ་ཞེས་སྤྱིར་བསྟན་པ་ཡིན་ནོ་ཞེས་བྱ་བའི་དོན་ཏོ། །འདི་མན་ཆད་དངོས་གྲུབ་མཆོག་འབྲིང་མི་འདོད་ན། དངོས་གྲུབ་ཕལ་པ་སྒྲུབ་པ་བསྟན་ཏེ། གང་ཚེ་དངོས་གྲུབ་མཆོག་རྣམས་དང༌། །འབྲིང་ཡང་གལ་ཏེ་མི་འདོད་ན། །ལོངས་སྤྱོད་རྟག་ཏུ་འདོད་ན་ནི། །ཞེས་པ་ལ་འོག་ནས་འབྱུང་བའི་ལོངས་སྤྱོད་དག་ནི་དངོས་གྲུབ་ཕལ་པ་འདོད་ན་ཞེས་པའི་དོན་ཏོ། །དེ་ཚེ་རྟག་ཏུ་བཟླས་པར་བྱ། །ཞེས་པ་དུས་གསུམ་དུ་བཟླས་པ་རྒྱུན་དུ་བྱའོ། ཞེས་པའོ། །འདི་ཡི་ཆོ་ག་གཞན་དག་ཀྱང༌། །དེ་ནས་མདོར་ནི་བཤད་པར་བྱ། །ཞེས་པ་དངོས་གྲུབ་ཕལ་པ་སྒྲུབ་པའི་ཆོ་ག་གཞན་དག་ཀྱང་མདོར་བཤད་པར་བྱའོ་ཞེས་པའོ། །ས་གཞི་རབ་ཏུ་མདངས་དགའ་བ། །ཞེས་པ་ཉམས་དགའ་བའི་ས་གཞི་
བཟང་པོ་ལ་བྱའོ་ཞེས་པའོ། །དེར་ནི་ཙནྡན་དམར་པོ་ཡིས། །ཞེས་པ་དེའི་སྟེང་དུ་ཙནྡན་དམར་པོའི་འདེ་གུས་བསྐུ་བར་བྱའོ་ཞེས་པའི་དོན་ཏོ། །མཁས་པས་བྱ་ཞེས་སྔགས་པས་བྱའོ། །དེ་ཡང་བཟང་པོ་ཁྲུ་གང་ཙམ། །ཞེས་པ་དེ་ལྟར་ཡིད་ཀྱི་དཀྱིལ་འཁོར་བྱ་བ་དེ་ཡང་ཆེ་ཆུང་གི་ཚད་ཁྲུ་གང་ཙམ་དུ་བྱའོ། །རབ་ཏུ་མཉམ་ཞིང་ཡིད་དུ་འོང༌། །ཞེས་པ་དཀྱིལ་འཁོར་གྱི་ཡོན་ཏན་ལ་བྱའོ། །གཤིན་རྗེས་རབ་ཏུ་འཇོམས་པ་གང༌། །ཞེས་པ་ལ་སོགས་པ་གཤིན་རྗེ་རབ་ཏུ་འཇོམས་ཞེས་བྱ་བའི་དཀྱིལ་འཁོར་དུར་ཁྲོད་གནས་ཞེས་བྱ་བ་གང་གསུངས་པ་དེ་དག་གི་སྔགས་རྣམས་ཀྱིས་མེ་ཏོག་ལ་བསྔགས་ཏེ། སོ་སོའི་གནས་གནས་སུ་བཀོད་པས་དཀྱིལ་འཁོར་དེ་བྱས་ནས་ཞེས་བྱ་བའི་དོན་ཏོ། །དེ་ཡི་འོག་ན་སྔགས་རིག་པས། །ཞེས་པ་དེ་ལྟར་ཡིད་ཀྱིས་དཀྱིལ་འཁོར་ལེགས་པར་བཀོད་ནས་དེའི་འོག་ཏུ་སྔགས་པས་ཇི་སྐད་གསུངས་པའི་ལས་དག་གིས་ཞེས་པ་མཆོད་པ་བྱ་བའི་ལས་དག་གིས་ཅི་འབྱོར་པ་དང༌། །ཅི་ནུས་པར་ཁྲོ་བོའི་རྒྱལ་པོའི་གཙོ་བོ་ལ་མཆོད་པར་བྱ་ཞེས་པའི་དོན་ཏོ། །ཉི་མ་རེ་རེ་ཆོ་ག་བཞིན། །བཟླས་པ་དག་ཀྱང་སྟོང་དུ་བྱ། །ཞེས་པ་ཉི་མ་རེ་རེ་ཞིང་དུས་གསུམ་དུ་ཟློས་པ་ཡང་དུས་གཅིག་གི་ཚེས་གྲངས་སྟོང་སྟོང་དུ་བཟླས་བརྗོད་བྱས་པའི་དུས་གསུམ་ཆར་ཡང་མཆོད་པའི་ཆོ་ག་དང་དཀྱིལ་འཁོར་ཚུལ་དེ་ལྟར་བཀོད་ནས་བཟླས་པ་བྱའོ། །དེ་ལྟར་རྟག་ཏུ་བྱས་པ་ཡིས། །ཞེས་པ་ཚུལ་དེ་ལྟར་རྟག་ཏུ་བྱས་པས་བདག་ཉིད་གང་འདོད་པའི་འབྲས་བུ་ཐོབ་པར་འགྱུར་རོ་ཞེས་པའི་དོན་ཏོ། །གདོན་མི་ཟ་ཞེས་པ་ཐེ་ཚོམ་མེད་པར་དགའ་བར་འགྱུར། །དེའི་ཞེས་པ་སྔགས་པ་དེའི་དགྲ་ཡང་མེད་པར་འགྱུར་བའི་དོན་ཏོ། །ནད་མེད་རང་གིས་ཞེས་པའོ། །སའི་དབང་པོ་དང་ཞེས་པ་རྒྱལ་པོ་དང་ཞེས་པའོ། །གཡོ་དང་མི་གཡོ་འཇིག་རྟེན་རྣམས། །ཞེས་ལྷ་ཀླུ་ལ་སོགས་པ་རི་དང་མཚོ་ལ་སོགས་པ་མི་གཡོ་བ་ལ་གནས་པའི་ལྷ་ཀླུ་རྣམས་ཞེས་པའི་དོན་ཏོ། །བྱང་ཆུབ་སེམས་ལྡན་པ་དེ་ནི། །ཞེས་པ་སྔགས་པ་བྱང་ཆུབ་ཀྱི་སེམས་དང་ལྡན་པ་དེའི་དབང་དུ་གྱུར་པ་གདོན་མི་ཟ་ཞེས་པའི་དོན་ཏོ། །རིག་པའི་བརྟུལ་ཞུགས་
སུ་གཏོགས་བ་སྟེ། གསུམ་པའི་བཤད་པ་རྫོགས་སོ།། །།རྩ་བའི་རྟོག་པར་སྡུད་པར་གཏོགས་པའི་ལེའུ་འདི་ལ་དོན་རྣམ་པ་གཉིས་ཀྱིས་སྟོན་ཏོ། །དེ་ལ་སྐབས་དབྱེ་བ་དང༌། དངོས་གྲུབ་དང་ལས་ཐམས་ཅད་སྦྱར་བར་བྱའོ། །དེ་ལ་རྩ་བའི་རྟོག་པ་སྡུད་པར་གཏོགས་པ་ཞེས་བྱ་བ་ཅིའི་ཕྱིར་བྱ་ཞེ་ན། སྔར་བཤད་པའི་རྩ་བའི་རྟོག་པ་ཐམས་ཅད་ཀྱི་དངོས་གྲུབ་དང་ལས་རྣམས་ལེའུ་འདིར་སྡུད་པར་གྱུར་པས་ན་ཡང་ལེའུ་འདི་ལ་རྩ་བའི་རྟོག་པ་སྡུད་པར་གཏོགས་པའི་ལེའུ་ཞེས་བྱའོ། །དེ་ལ་དང་པོ་སྐབས་དབྱེ་བ་ཞེས་བྱ་བ་བཤད་དེ། དེ་ནས་གཞན་ཡང་བརྟུལ་ཞུགས་ཀྱིས། བསྒྲུབ་པའི་ལས་རྣམས་བཤད་པར་བྱ། །ཞེས་པ་ཁྲོ་བོའི་བརྟུལ་ཞུགས་སྤྱད་པས་འགྲུབ་པར་འགྱུར་བའི་ལས་རྣམས་བཤད་དོ། །དངོས་གྲུབ་མཆོག་རྣམས་ཐམས་ཅད་ཀྱི། །ཞེས་པ་དངོས་གྲུབ་མཆོག་རྣམས་ཐམས་ཅད་ཁྲོ་བོའི་བརྟུལ་ཞུགས་སྤྱད་པས་བསྒྲུབ་པར་བྱའོ། །བརྟུལ་ཞུགས་མེད་པས་མི་འགྲུབ་སྟེ། །ཞེས་པ་ཁྲོ་བོའི་བརྟུལ་ཞུགས་མེད་པར་ཕལ་ཆེར་དངོས་གྲུབ་མཆོག་རྣམས་མི་འགྲུབ་སྟེ། བརྟུལ་ཞུགས་སྤྱད་པ་བྱས་ནས་སུ། །དངོས་གྲུབ་མཆོག་རྣམས་ལེགས་པར་འགྲུབ། ཅེས་པ་ཁྲོ་བོའི་བརྟུལ་ཞུགས་སྔར་སྤྱད་ནས་དེའི་འོག་ཏུ་དངོས་གྲུབ་མཆོག་རྣམས་འགྲུབ་པོ་ཞེས་པའི་དོན་ཏོ། །མཁས་པས་གཞན་ཡང་མ་ཡིན་ནོ། །ཞེས་པ་བརྟུལ་ཞུགས་མ་སྤྱད་པར་དངོས་གྲུབ་མཆོག་རྣམས་བསྒྲུབ་ཀྱང་འགྲུབ་པར་མི་འགྱུར་རོ་ཞེས་པའི་དོན་ཏོ། །འདི་མན་ཆད་ནི་དངོས་གྲུབ་དང་ལས་ཐམས་ཅད་ལ་སྦྱར་བ་ཞེས་བྱ་བ་བསྟན་ཏོ། །ཇི་སྐད་བསྟན་པའི་མཚོན་ཆ་རྣམས། །རྩ་བའི་རྟོག་པའི་ཆོ་ག་བཞིན། །ཞེས་པ་སྔར་རྩ་བའི་རྟོག་པ་རྣམས་ལས་རལ་གྲི་དང༌། བེ་ཅོན་དང༌། དགྲ་སྟ་དང༌། ཤཱུལ་ལ་སོགས་པའི་ལྷའི་མཚོན་ཆ་རྣམས་སྒྲུབ་པའི་སྦྱོར་བ་སྔར་གསུངས་པ་རྣམས་བཞིན་དུ་འདིས་བསྒྲུབས་ན། དེ་བཞིན་དུ་འགྲུབ་པར་འགྱུར་རོ་ཞེས་སོ། །དེ་ལ་འདི་ནི་རྟག་པ་རུ། །དུར་ཁྲོད་གནས་པའི་དཀྱིལ་འཁོར་ནི། །ཞེས་པ་དེ་ལ་རྩ་བའི་རྟོག་པ་ལས་ཁྱད་པར་དུ་འདིར་རལ་གྲི་ལ་སོགས་པ་བསྒྲུབ་པའི་ཚེ། དུར་
ཁྲོད་ཀྱི་གནས་སུ་དཀྱིལ་འཁོར་བྲིས་ལ་སྒྲུབ་པོ་ཞེས་པའི་དོན་ཏོ། །དངོས་གྲུབ་མཆོག་རྣམས་རབ་སྦྱིན་པའི། །ཞེས་པ་དཀྱིལ་འཁོར་གྱི་ཡོན་ཏན་ལ་བྱའོ། །བྱེ་བྲག་ཏུ་ནི་ལོགས་ཤིག་གསུངས། །ཞེས་པ་རལ་གྲི་ལ་སོགས་པའི་དངོས་གྲུབ་བསྒྲུབ་པའི་ཚེ། རྩ་བའི་རྟོག་པ་ལས་བྱེ་བྲག་ཏུ་འདིར་དུར་ཁྲོད་ཀྱི་དཀྱིལ་འཁོར་བྲིས་ཏེ་བསྒྲུབ་པར་གསུངས་སོ། །རལ་གྲི་ས་འོག་རོ་ལངས་དང༌། །ཞེས་པ་རྩ་བའི་རྟོག་པ་ལས་གསུངས་པའི་དངོས་གྲུབ་འདི་དག་གིས་ཞེས་པའོ། །གཞན་ཡང་ལས་དག་ཅི་འདོད་དང༌། །ཞེས་པ་མི་རོའི་རས་བསྒྲུབ་པ་དག་ཅེས་པའོ། །བུད་མེད་དམ་པ་སྤྱད་བསྒྲུབ་པ། །ཞེས་པ་འདོད་པའི་ཕྱིར་བསྒྲུབ་ཅེས་པའོ། །རྩ་བའི་རྟོག་པ་ཆོ་ག་ཡིས། །ཞེས་པ་སྔར་རྩ་བའི་རྟོག་པའི་ལེའུ་ལས་དངོས་གྲུབ་སྒྲུབ་པའི་མཚན་ཉིད་བཤད་པའི་རྣམ་གྲངས་འདི་རྣམས་རྩ་བའི་རྟོག་པ་ལས་གསང་བའི་ཆོ་ག་བཞིན་དུ་འདི་ཡང་སྐབས་སུ་ཡང་བསྒྲུབ་པར་བྱའོ། །དེ་ལས་རྩ་བའི་རྟོག་པ་ལས་ཁྱད་པར་དུ་ན་འདིའི་སྐབས་སུ་དངོས་གྲུབ་དེ་དག་བསྒྲུབ་པའི་ཚེ། ཁྲོ་བོའི་རྒྱལ་པོའི་ཡི་གེ་བཅུ་གཅིག་པའི་སྙིང་པོ་སྒྲུབ་པར་གསུངས་སོ། །དེ་ནས་ཇི་སྐད་བསྟན་པ་ཀུན། །མ་སྨོས་པ་ཡང་བསྒྲུབ་པ་བྱ། །ཞེས་པ་དེ་བས་ན་རྩ་བའི་རྟོག་པ་ལས་དངོས་གྲུབ་བཤད་པ་རྣམས་ལས། མིང་གིས་སྨོས་པ་འདི་རྣམས་མ་གཏོགས་པར་དངོས་གྲུབ་འབྱུང་བ་རྣམས་ཀྱང་ཚུལ་བཞིན་དུ་བསྒྲུབ་པར་བྱའོ། །འཇམ་དཔལ་ཁྲོ་པོའི་སྙིང་པོ་འདི། །ཧཱུ༵་ཞེས་བྱ་བ་རྒྱས་པ་སྟེ། །ཞེས་པ་ཧཱུ༵་ཞེས་བྱ་བའི་སྙིང་པོ་འབྲུ་གཅིག་པའི་ཆོ་ག་རྒྱས་པའི་ཡི་གེ་སྟེ། ཧཱུ༵་འདི་ནི་རྩ་བའི་རྟོག་པ་སྡུད་པར་ཡོངས་སུ་གྲགས། །ཡི་གེ་ཧཱུ༵་རྩ་བའི་རྟོག་པ་གསུངས་པ། དངོས་གྲུབ་ཐམས་ཅད་བསྒྲུབ་པའི་ཕྱིར། །ཞེས་བྱ་བའི་དོན་ཏོ། །འདི་ནི་རྩ་བའི་རྟོག་པ་ཡི། །བསྡུས་པའི་ཡོངས་སུ་བསྒྲགས་པའོ། །ཞེས་པ་སྔར་རྩ་བའི་རྟོག་པར་གཏོགས་པའི་དངོས་གྲུབ་རྣམས་ལས་ལེའུ་འདིར་མདོར་བསྡུས་ནས་ཡི་གེ་འབྲུ་གཅིག་པའི་སྒོ་ནས་དེ་རྒྱས་པར་བཤད་པར་བྱའོ། །རྩ་བའི་རྟོག་པ་ལས་གསུངས་པའི་དངོས་གྲུབ་ལས་རྣམས་ལེའུ་འདིར་མདོར་
བསྡུས་ནས་བཤད་པ་དང༌། དངོས་གྲུབ་དེ་དག་ཀྱང་ཡི་གེ་འབྲུ་གཅིག་པོས་དངོས་གྲུབ་སྒྲུབ་ཅིང་ལས་སྤྱར་རུང་བར་རྒྱས་པར་བཤད་པའོ། །རྩ་བའི་རྟོག་པར་གཏོགས་པ་སྟེ་བཞི་པའོ། །བཞི་པའི་བཤད་པ་རྫོགས་སོ།། །།ཕྱི་མའི་ཕྱི་མ་རྟོག་པ་ལྔ་པ་འདི་ལ་དོན་རྣམ་པ་ལྔས་སྟོན་ཏེ། དེ་ལ་མཚམས་སྦྱོར་བ་དང༌། སྔགས་བསྟན་པ་དང༌། སྔགས་ཀྱི་མཐུ་བསྟན་པ་དང༌། སྔོན་དུ་བསྙེན་པ་བྱས་ནས་སྒྲུབ་པ་དང༌། སྦྱོར་བ་བསྟན་པའོ། །དེ་ལ་དང་པོ་འདི་ལ་མཚམས་སྦྱོར་བ་ཞེས་བྱ་བ་བཤད་དོ། །རྟོག་པ་མདོ་རུ་བསྡུས་པ་དང༌། རྒྱས་པ་དག་ཏུ་བཤད་པ་དང༌། །ཞེས་པ་རྩ་བའི་རྟོག་པར་གསུངས་པའི་དངོས་གྲུབ་རྣམས་དང༌། ལས་དང་ལེའུ་འདིར་བསྡུས་ནས་ཡི་གེ་འབྲུ་གཅིག་པའི་སྒོ་ནས་དེ་དག་རྒྱས་པར་བཤད་པར་བྱའོ། །རྩ་བའི་རྟོག་པ་ལས་གསུངས་པའི་དངོས་གྲུབ་དང་ལས་རྣམས་ལེའུ་འདིར་མདོར་བསྡུས་ཏེ་བཤད་པ་དང༌། །དངོས་གྲུབ་དེ་དག་ཀྱང་ཡི་གེ་འབྲུ་གཅིག་པོས་དངོས་གྲུབ་ཅི་ལས་བྱར་རུང་བས་རྒྱས་པར་བཤད་པའོ། །བརྟུལ་ཞུགས་དང་ནི་ངེས་པ་ཡིས། །ཞེས་པ་བསྡམ་པར་བྱས་ཏེ་སྨྱུང་བ་བྱས་པ་ལ་བྱའོ། །སྒྲུབ་པ་ཅི་བསྟན་བཤད་པ་ཡིན། །ཞེས་པ་ཚུལ་དེ་དག་གིས་སྒྲུབ་པ་ལ་དེ་ཡན་ཆད་ཀྱིས་བཤད་ཟིན་ཏོ། །དེ་ནས་ཁྲོ་བོ་གཟི་ཆེན་གྱིས། །ཞལ་དྲུག་ཧཱུ༵་ཞེས་བྱ་བའི་སྔགས། །ཞེས་བྱ་བ་ལ་སོགས་པ་ཁྲོ་བོ་ཆེན་པོ་གཟི་བྱིན་ཆེན་པོའི་ཞལ་དྲུག་ནས་ཧཱུ༵་དྲུག་འབྱུང་བའི་ཧཱུ༵་ཞེས་བྱ་བའི་སྔགས་དངོས་གྲུབ་ཇི་ལྟར་བསྒྲུབ་པ་རྣམས་བཤད་པ་ཡིན་ནོ་ཞེས་གོང་མ་དང་ཆིག་གི་འཕྲོ་སྤྱར་རོ། །ཧཱུ༵་གི་སྔགས་དེ་སྔོན་དུ་བསྙེན་པ་བྱས་ནས་དེའི་འོག་ཏུ་བཟླས་པ་ཙམ་གྱིས་ལས་དེ་དག་འགྲུབ་པར་འགྱུར་རོ། །གསང་བ་དེ་མདོར་བཤད་པར་བྱའོ་ཞེས་པའོ། །བརྟུལ་ཞུགས་སྤྱད་དང་བརྟུལ་ཞུགས་དཀའ། །དེ་དག་འདི་ལ་ཡོད་མེད་དེ། །ཞེས་བརྟུལ་ཞུགས་སྤྱད་པ་དང༌། ཁྱད་པར་གྱི་བརྟུལ་ཞུགས་དགའ་བ་དེ་དག་ཧཱུ༵་ཞེས་བྱ་བའི་སྔགས་ཀྱིས་ལས་སྒྲུབ་པ་འདི་དག་ལ་དཀའ་ཐུབ་དང་བརྟུལ་ཞུགས་སྤྱད་མི་དགོས་སོ་ཞེས་པའི་དོན་ཏོ། །ལན་ཅིག་
ཀླགས་པ་ཙམ་གྱིས་ཀྱང༌། །ལས་རྣམས་ཐམས་ཅད་བྱེད་པར་འགྱུར། །ཞེས་པ་གོང་དུ་བསྙེན་པ་བྱས་ནས་དེའི་འོག་ཏུ་ལས་བྱས་པ་འགྲུབ་པར་འགྱུར་བ་ལ་བྱའོ་ཞེས་པའོ། །འདི་མན་ཆད་སྔགས་བསྟན་པ་ཞེས་བྱ་བ་བཤད་དེ། ཨོཾ་ན་མ་ཞེས་བྱ་བ་རྣམས་བསྟན་ཏེ། ཨོཾ་ན་མཿ་ཞེས་པ་ནས་སྭཱ་ཧཱ། ཞེས་པའི་བར་གྱི་སྔགས་ནི་ཞལ་རེ་རེ་ནས་ཧཱུཾ་དྲུག་དྲུག་འབྱུང་བ་དང་སྦྱར་རོ། །འོག་ནས་སྦྱོར་བ་བསྟན་པའི་སྐབས་ནས་ལས་རྣམས་འབྱུང་བའི་བསྐུལ་ཚིག་རེ་རེའི་ཧཱུཾ་དྲུག་གི་སྐབས་སྐབས་སུ་བཅུག་སྟེ། ཆེ་གེ་མོ་ཞིག་གིས་རི་རྣམས་ཁོས་ཤིག་གཡོས་པར་གྱུར་ཅིག་ཅེས་པའི་སོ་སོའི་ཚིག་ཀྱང་བཅུག་སྟེ་སྔགས་རིམ་གྱིས་བཟླས་སོ། །ཡི་གེ་བཞི་བཅུ་རྩ་གསུམ་འདི། །ཁྲོ་བོས་ཀླགས་པ་ཙམ་གྱིས་འགྲུབ། །ཅེས་པའི་ཡི་གེ་བཞི་བཅུ་རྩ་གསུམ་འབྱུང་སྟེ་བགྲང་བར་བྱ་བའི་ལུགས་ལགས་སོ། །ཧཱུཾ་གི་སྔགས་ཉིད་ཁྲོ་བོའི་རང་བཞིན་ཏེ་འགྲུབ་པར་འགྱུར་བན་སྔར་བཤད་ཟིན་ཏོ། །སངས་རྒྱས་ཀུན་གྱིས་མངོན་པར་བསྟོད། །ཅེས་པ་ཧཱུཾ་གི་སྔགས་ཀྱི་ཡོན་ཏན་ལ་བྱའོ་ཞེས་པའི་དོན་ཏོ། །དེ་ནི་རྟག་པར་བཟླས་པ་ནི། །ཞེས་པ་ཧཱུཾ་གི་སྔགས་ཏེ་རྟག་པར་བཟླས་པར་བྱས་ན་དངོས་གྲུབ་སྩོལ་བར་མཛད་དོ། །འདི་མན་ཆད་ནི་སྔགས་ཀྱི་མཐུ་བསྟན་པ་ཞེས་བྱ་བ་བཤད་དོ། །དངོས་གྲུབ་ཐམས་ཅད་སྟེར་བར་བཤད། །ཅེས་པ་ནས་བསྟན་ཏེ། དུར་ཁྲོད་གནས་སུ་རྟག་པར་ནི། །རྟག་ཏུ་ཟློས་པའི་ཆོ་ག་ཡིས། །ཞེས་པ་དེ་ལྟར་རྟག་ཏུ་བཟླས་པ་བྱ་བ་ཡང་སྔར་བཤད་པའི་དུར་ཁྲོད་ཀྱི་དཀྱིལ་འཁོར་སྔ་མའི་ཚུལ་བཞིན་དུ་དཀྱིལ་འཁོར་བྲིས་སམ་བསམས་ཏེ། དཀྱིལ་འཁོར་འདིར་རྟག་ཏུ་བཟླས་བ་བྱ་ཞེས་པའི་དོན་ཏོ། །ལྷ་དང་ལྷ་མིན་དྲི་ཟ་དང༌། །ཞེས་པ་དེ་ལྟར་བཟླས་པ་བྱས་པ་དེའི་མཐུས། །དེ་ཡི་གཟིས་ནི་འབྱེར་བར་འགྱུར། །ཞེས་པ་སྔགས་དེའི་གཟི་བྱིན་དང་མཐུས་ཞེས་པའོ། །འགྲོ་དང་མི་འགྲོ་འཇིག་རྟེན་ན། །དེ་ལ་དཀའ་བ་ཅུང་ཟད་མེད། །ཅེས་པ་སྣོད་ཀྱི་འཇིག་རྟེན་དང༌། གཡོ་བའི་འཇིག་རྟེན་ཏེ་བཅུད་ཀྱི་འཇིག་རྟེན་ལ་བྱའོ། །ཧཱུཾ་གེ་སྔགས་དེ་ལས་བྱ་བ་ལ་ཞེས་པའོ། །ཞལ་དྲུག་ཧཱུཾ་ཞེས་བྱ་བའི་སྔགས། །ཞེས་བྱ་བ་ལ་
སོགས་པ་སྔོན་དུ་བསྙེན་པ་བྱས་པའི་འོག་ནས་ཧཱུཾ་གི་སྔགས་དེ་དག་དང༌། ཤཱུ་ལའི་ཕྱག་རྒྱ་དང་ལྡན་པར་སྦྱར་ན་རྒྱུད་འདིའི་ཆོ་གའི་ལས་རྣམས་འགྲུབ་པར་འགྱུར་རོ་ཞེས་པའི་དོན་ཏོ། །འདི་མན་ཆད་ནི་སྔོན་དུ་བསྙེན་པ་བྱས་ནས་སྒྲུབ་པ་ཞེས་བྱ་བ་བཤད་དེ། དུར་ཁྲོད་གནས་སུ་ཆོ་ག་བཞིན། །ཞེས་པ་སྔོན་དུ་བསྙེན་པ་བྱ་བ་ཡང་དུར་ཁྲོད་ཀྱི་དཀྱིལ་འཁོར་གྱི་ཆོ་ག་བཞིན་དུ་བྲིས་སམ་བསམས་ཏེ། དཀྱིལ་འཁོར་དེས་སྔོན་དུ་བསྙེན་པ་བྱའོ། །ཐོག་མ་ཉིད་དུ་ཆིག་འབུམ་བྱ། །ཞེས་པ་ཧཱུཾ་གི་སྔགས་དེ་ཐོག་མར་བསྙེན་པ་འབུམ་བཟླས་པར་བྱ་ཞེས་པའི་དོན་ཏོ། །དེ་ནས་རྟག་པའི་ཆོ་ག་བཤད། །ཅེས་པ་དེ་ལྟར་སྔོན་དུ་བསྙེན་པ་བྱས་ནས་དེ་ཕན་ཆད་ཀྱང་ཡལ་བར་མི་འདོར་བར་དུས་གསུམ་དུ་བཟླས་པར་བྱའོ། །རྟག་པར་སྤྱོད་པའི་ཆོ་ག་ཡིས། །དེ་ནས་ཆིག་འབུམ་བཟླས་ནས་ཀྱང༌། །ཞེས་པ་དེ་ལྟར་རྟག་པར་བཟླས་པ་སྤྱོད་པའི་ཆོ་གས་སྔོན་དུ་བསྙེན་པ་འབུམ་བྱས་པའི་འོག་ཏུ་ཡང་འབུམ་བཟླས་ཏེ་སྤྱོར་བ་ཉིད་འབུམ་སྔོན་དུ་བསྙེན་པ་བྱའོ། །ཁ་ཅིག་གིས་བཤད་པ་ནི་འདི་ནི་སྔར་བསྙེན་པ་བྱ་བ་ཟློས་བུར་བཤད་པར་ཟད་དེ་བསྙེན་པའི་ཆིག་འབུམ་བྱ་བར་ངེས་སོ་ཞེས་བཤད་དོ། །ཇི་སྐད་གསུངས་པའི་ལས་རྣམས་ཀྱིས། །དེ་ཡི་འོག་ཏུ་སྒྲུབ་ལ་འཇུག །ཅེས་པ་དེ་ལྟར་བསྙེན་པ་བྱས་པའི་འོག་ཏུ་སྔར་རྩ་བའི་རྟོག་པ་ལས་གསུངས་པའི་ལས་དང༌། འོག་ནས་འབྱུང་བའི་ལས་རྣམས་སྒྲུབ་པ་ལ་འཇུག་པའོ་ཞེས་བྱ་བའི་དོན་ཏོ། །རྩ་བའི་རྟོག་པའི་ཆོ་ག་ཡིས། །དེ་ནས་ཐམས་ཅད་བསྒྲུབ་པར་བྱ། །ཞེས་བ་རྩ་བའི་རྟོག་པ་ལས་གསུངས་པའི་ལས་ཐམས་ཅད་ཀྱང་རྩ་པའི་རྟོག་པའི་ཆོ་ག་བཞིན་དུ་ལས་ཐམས་ཅད་བསྒྲུབ་པར་བྱའོ། །འདི་ལ་དཀའ་བ་ཅི་ཡང་མེད། །ཅེས་པ་ཧཱུཾ་གི་སྔགས་དེ་ལས་བྱ་བ་འདི་ལ་དཀའ་བ་མེད་དོ། །ཆོ་ག་བཟང་པོ་ཅི་གསུངས་པའི། །ཞེས་པའོ། །རྟོག་པ་དེ་བཞིན་བདག་གིས་བཤད། །ཅེས་པ་འོག་ནས་འབྱུང་བ་ལ་བྱའོ། །ཞལ་དྲུག་ཧཱུ༵་ཞེས་བྱ་བ་འདི། །ཞེས་པ་ཞལ་དྲུག་ནས་ཧཱུ༵་ཞེས་བྱ་བ་རེ་རེ་འབྱུང་བས་ཞལ་དྲུག་ཏུ་བཤད་དོ་ཞེས་པའོ། །འདི་མན་ཆད་ནི་སྦྱོར་བ་བསྟན་པ་ཞེས་བྱ་བ་
བཤད་དོ། །ཁྲོ་བོའི་ཞལ་ནས་མདོ་རུ་ནི། །ཆོ་ག་བཟང་པོ་ཞེས་བྱ་བ་ལ་སོགས་པ་སྨོས་སོ། །ཧཱུ༵་གི་མཐར་ནི་བསྐུལ་བར་བྱ། །ཞེས་པ་ལ་སོགས་པ་ཧཱུཾ་དྲུག་གི་འོག་ཡ་མ་པྲ་མ་ཞེས་བྱ་བའི་གོང་གི་བར་དེར་ཏྲ་ཞེས་བྱ་བའི་བསྐུལ་ཚིག་བཅུག་སྟེ། །ཡི་གེ་བཞི་བཅུ་རྩ་གསུམ་རིལ་གྱིས་བཟླས་ཏེ། ཤཱུ་ལའི་ཕྱག་རྒྱ་དང་ལྡན་པར་སྔགས་བརྗོད་པས་ལས་བྱ་སྟེ་ཚུལ་འདི་བཞིན་དུ་སྦྱར་ཏེ། ལས་བྱ་བ་ལས་གང་དང་གང་བྱས་པས་དེ་དང་དེ་བཞིན་དུ་འགྲུབ་པར་འགྱུར་རོ། །ཧཱུ༵་ནི་བསྐུལ་བའི་ཚིག་གི་བརྡས་འཛིན་ཙམ་དུ་ཟད་པས་འདིའི་ཧཱུ༵་ཉིད་དཀྱུས་སུ་གཞུག་མི་དགོས་ཏེ། ཧཱུ༵་དྲུག་གི་མཇུག་ལ་སོ་སོའི་བསྐུལ་བའི་ཚིག་གཞུག་པར་ཟད་དེ། འོག་མ་ཀུན་ལ་འདི་སྦྱར་རོ་ཞེས་པའི་དོན་ཏོ། །ཧཱུཾ་ཚིག་རིག་སྔགས་ཐམས་ཅད་དང༌། །ཞེས་པ་ཕ་རོལ་པོའི་རིག་སྔགས་བཅད་པ་དང་ཞེས་པའོ། །རི་བཀས་པར་བྱ་བ་དང་ས་གཡོ་བར་བྱའི་ཚིག་གཞུག་མི་དགོས་ཏེ། སོ་སོའི་བསྐུལ་བའི་ཚིག་ཡི་གེ་འབྲུ་རེ་རེ་པོ་དང་བསམ་པའི་ཁྱད་པར་ཙམ་གྱིས་ལས་རྣམས་བྱའོ་ཞེས་ཁ་ཅིག་འཆད་དོ། །མཚོན་ཆ་རྣམས་ནི་མཆོད་པར་བཤད། །ཅེས་པ་ཕ་རོལ་གྱི་མཚོན་ཆ་རྣམས་ནི་གཅོད་དོ། །ཤཱུ་ལའི་ཕྱག་རྒྱ་དང་ལྡན་པར། །ཧཱུ༵་ཁ་རྟག་པར་རབ་སྦྱར་ན། །ཞེས་པ་ཤཱུ་ལའི་ཕྱག་རྒྱ་ནི་ལས་འདི་དག་ཐམས་ཅད་ལ་སྦྱར་བར་བྱའོ། །གདུག་པ་རྣམས་ནི་ཟ་དང་འཆི། །དགྲ་ཡི་དཔུང་དག་རབ་ཏུ་འཇིག །ཅེས་པ་གདུག་པ་རྣམས་ཟ་བ་དང༌། དགྲའི་དཔུང་རྣམས་འཆི་བར་འགྱུར་རོ། །ཧཱུ༵་ཐར་མཚོན་ཆ་ཀུན་འཕེན་ཆེ། །ཞེས་པ་ཕ་རོལ་པོའི་དཔུང་ལ་མཚོན་ཆ་འཕེན་པའི་ཚེ་སྔགས་འདི་བརྗོད་ན་ཕ་རོལ་པོའི་སྡེའི་ལྷ་མ་ཡིན་རྣམས་འཇིག་པར་བྱེད་ཅིང་ཕ་རོལ་པོའི་མཚོན་ལས་ཐར་བར་འགྱུར་རོ། །རྨོངས་པ་ཞེས་པ་འཐོམ་པར་འགྱུར། །ཞེས་པའོ། །ཧཱུ༵་དག་རབ་ཏུ་སྦྱར་ན་ནི། །ཞེས་པ་ཕ་རོལ་པོའི་སྡེའི་ནང་ན་གཅིག་ལ་གཅིག་མཚོན་ཆ་འཁྲུགས་པར་བྱེད་དོ། །སླར་ཡང་ཐར་བར་བྱེད་པ་ཡིན། །ཞེས་པ་གོང་མ་དེ་དག་སླར་ཡང་ཐར་བར་འགྱུར་རོ་ཞེས་པའི་དོན་ཏོ། །གནོན་པར་བྱེད་པའི་མཆོག་ཡིན་ནོ། །ཞེས་པ་མི་གཡོ་བར་འགྱུར་ཏེ་ངེས་པར་གྱུར་ཏེ་ཞེས་པའོ། །ཧཱུ༵་མུ་རབ་ཏུ་སྦྱར་ན་ནི། །ཞེས་པ་རྒྱ་གར་གྱི་ཡི་གེ་གཉིས་
ལས་གཅིག་ལ་ནི་མ་ཞེས་འབྱུང༌། གཅིག་ལ་ནི་ས་ཞེས་འབྱུང་ངོ༌། །མནན་པ་རྟག་ཏུ་ཐར་བར་བྱེད། །ཅེས་པ་གོང་དུ་རེངས་པར་བྱེད་པ་དེ་དག་ལས་ཐར་པར་བྱེད་དོ་ཞེས་པའོ། །ལྷ་དང་ལྷ་མིན་གཞན་ཡང་འགུགས། །ཞེས་པ་སེམས་ཅན་གཞན་ཞེས་པའོ། །དངོས་གྲུབ་ཕྲ་མོ་ཐམས་ཅད་ལ། །ཞེས་པ་སྦྱོར་བ་བསྟན་པ་དེ་དག་ཐམས་ཅད་ནི་དངོས་གྲུབ་ཕྲ་མོའོ་ཞེས་པའོ། །ཧཱུ༵་བ་ཀུན་དུ་དབང་བྱེད་པ། །ཞེས་པ་སྔ་མ་བཞིན་དུ་སྦྱར་ན་ཞེས་པའོ། །ཐ་མར་རབ་བཞག་བསྡུ་བར་བྱེད། །ཅེས་པ་སྔ་མ་བཞིན་དུ་སྦྱར་ནས་ཞེས་པའོ། །མ་དང་སྦྱར་ན་གསོད་བར་བྱེད། །ཅེས་པ་སྔ་མ་བཞིན་དུ་སྦྱར་ནས་ཞེས་པའོ། །ཞི་དང་སྦྱར་ལ་འབའ་ཞིག་གོ །ཞེས་པ་ཞི་བ་དང་རྒྱས་པ་ལ་སོགས་པའི་ལས་རྣམ་པ་བཞི་དག་ལ་ནི་ཡི་གེ་བཞི་བཅུ་རྩ་གསུམ་པའི་སྔགས་བཟླས་པ་ཆེ་གེ་མོ་ཞིག་ཤཱནྟིཾ་ཀུ་རུ་བཽཥྚ་ཅེས་བྱ་བའི་ཚུལ་དུ་བསྐུལ་ཚིག་བཅུག་སྟེ་དེ་ལ་བྱའོ། །དེ་དག་གི་བསྐུལ་ཚིག་ཀྱང་ཧཱུཾ་དྲུག་གི་འོག་ཏུ་གཞུག་གམ་སྭཱ་ཧཱའི་འོག་ཏུ་འམ་དེ་གཉིས་གཅིག་ཏུ་བཅུག་སྟེ་ལས་བྱའོ་ཞེས་པའི་དོན་ཏོ། །དེ་ལ་སོགས་པ་གཞན་རྣམས་ཀྱང་ཞེས་པ་དེ་ལ་སོགས་པའི་རྩ་བའི་རྟོག་པ་ལས་གསུངས་པའི་ལས་གཞན་རྣམས་ཀྱང་རྩ་བའི་རྟོག་པ་ལས་གསུངས་པ་བཞིན་དུ་འདིར་ཡང་སྦྱར་བར་བྱ་ཞེས་པའོ། །ཡི་གེ་གཅིག་པའི་ཆོ་ག་བཞིན། །འཇམ་དཔལ་ཁྲོ་བོ་གཙོ་བོ་ཡིས། །ཞེས་པ་འཇམ་དཔལ་གྱི་རྟོག་པ་གང་ཡི་གེ་འབྲུ་གཅིག་པ་གསང་བ་གཞན་དག་བཤད་ཟིན་ཏོ། །ཁྲོ་བོ་གཤིན་རྗེའི་རྒྱལ་པོ་ཞལ་དྲུག་ཧཱུཾ་ཞེས་བྱ་བ་ལས་བྱུང་བའི་རྟོག་པར་གཏོགས་པ་སྟེ་ཞེས་པ་དུར་ཁྲོད་གནས་ཀྱི་དཀྱིལ་འཁོར་དུ་གཏོགས་པའི་ལེའུ་ལྔ་པ་འདི་ཡན་ཆད་དུ་རྫོགས་ཏེ། འདི་ཡང་སྔར་རྩ་བའི་རྟོག་པར་གསུངས་པའི་དངོས་གྲུབ་དང་ལས་རྣམས་འདིར་བསྡུས་ནས་ཡི་གེ་ཧཱུ༵་གཅིག་གི་སྒོ་ནས་རྒྱས་པར་བཤད་དོ། །ལྔ་པའི་བཤད་པ་རྫོགས་སོ།། །།དོན་གྲུབ་ཀྱི་རྟོག་པ་འདི་ལ་དོན་རྣམ་པ་ལྔས་བཤད་དེ། དེ་ལ་སྐབས་དབྱེ་བ་དང༌། དཀྱིལ་འཁོར་བྱས་པའི་ཆོ་ག་དང༌། དཀྱིལ་འཁོར་གྱི་ལས་དང༌། ལྷ་བསྟན་པ་དང༌། སྤྱན་དྲང་བ་བྱས་ནས་སློབ་མ་བཟུང་བལ་སོགས་པ་ལས་
བྱའོ། །དེ་ལ་དང་པོ་སྐབས་དབྱེ་བ་ཞེས་བྱ་བ་བསྟན་ཏོ། །དེ་ནས་རྟོག་པ་རབ་རྒྱས་པ། །ཞེས་པ་ལ་སོགས་པ་ལས་དང༌། དངོས་གྲུབ་དག་ལེའུ་འདིར་རྒྱས་པར་བཤད་པས་ན་རབ་ཏུ་རྒྱས་ཞེས་བྱའོ། །སྔར་གོང་དུ་གཏོགས་པའི་ཕྱི་མའི་ཡང་ཕྱི་མ་ཞེས་བྱ་བའི་ལེའུ་བཅུ་པ་དང་འཕྲོ་སྦྱོར་བའི་ལེའུ་བཅུ་གཅིག་པ་དང་འདི་མན་ཆད་བཤད་དོ། །དོན་བསྒྲུབ་པའི་ལེའུ་འདིར་སྔར་གསུངས་པའི་རྟོག་པ་རྣམས་ཀྱི་ནང་ནས་མ་བཤད་པ་ཡང་འདིར་བཤད་པ་དང༌། རྟོག་པ་སྔ་མ་རྣམས་ལས་ཀྱང་འདི་མཆོག་ཏུ་གྱུར་ཅིང་དོན་ཐམས་ཅད་འགྲུབ་པར་བྱེད་པས་ན་ཡང་དངོས་གྲུབ་ཅེས་བྱ་སྟེ། དེ་བཤད་པར་བྱའོ་ཞེས་པའི་དོན་ཏོ། །འདི་མན་ཆད་ནི་དཀྱིལ་འཁོར་བྲི་བའི་ཆོ་ག་བཤད་དེ། དེ་ནས་རིག་འཛིན་དཔལ་ལྡན་པས། །ཞེས་པ་སྔགས་པ་མཚན་ཉིད་ཀྱི་ཡོན་ཏན་དང་ལྡན་པ་ཞེས་པའོ། །ལས་རྣམས་ཐམས་ཅད་འགྲུབ་པའི་ཕྱིར། །ཞེས་པ་ལ་སོགས་པའོ་གནས་བཤད་པའི་ལས་ཐམས་ཅད་འགྲུབ་པར་བྱ་བའི་ཕྱིར་སེམས་རྩེ་གཅིག་ཏུ་བྱང་ཆུབ་ཀྱི་སེམས་དང་ལྡན་པར་བྱས་ནས་ཐོག་མར་དཀྱིལ་འཁོར་བྲི་བར་བྱའོ། །དེ་ལྟར་ཐོག་མར་དཀྱིལ་འཁོར་བྲི་བར་བྱ་བ་ན། གནས་གང་དུ་དཀྱིལ་འཁོར་བྲི་བར་བྱ་ཞེ་ན་གསུངས་པ། བགྲོད་དཀའ་བ་ལ་བྱ་སྟེ། མི་དག་མི་འགྲུལ་བའི་གནས་སོ། །གཅོང་རོང་དུར་ཁྲོད་དུ་ཡང་རུང༌། །ཞེས་པ་དུར་ཁྲོད་རྣམ་གཉིས་ལྷ་བུ་ལ་བྱའོ། །དེ་ནས་དེར་ནི་ཞལ་ཞལ་བྱས། །ཞེས་པ་གནས་དེ་དག་ཏུ་འོག་ནས་བཤད་པའི་ཚུལ་བཞིན་དུ་སྦྱངས་ཏེ། སླར་ས་བརྙན་བཟང་པོ་བླུགས་ནས་བཅགས་ཏེ། དེའི་སྟེང་དུ་བའི་ལྕི་བས་སྐྱང་ནུལ་བྱ་བ་དག་གོ །མེ་ཏོག་སིལ་མ་དག་གིས་བརྒྱན། །ཞེས་པ་དེ་ལྟར་སྐྱང་ནུལ་བྱས་ཏེ། ས་གཏོར་བའི་སྟེང་དུ་ཞེས་པའོ། །དཔའ་བོ་གཅིག་པའི་སྔགས་འབར་བ། །ཞེས་པ་ཡི་གེ་བཅུ་གཅིག་པའི་སྔགས་འོག་ནས་འབྱུང་བ་ལ་བྱའོ། །མེ་ལྕེ་འཕྲོ་བས་ཁྲུས་བྱས་པ། །ས་དང་སྐྱུ་རུ་ར་ལ་སོགས་པ་ཞེས་པ་སྔགས་འདི་མཐུ་དང་གཟི་ལ་བྱ་སྟེ། སྔགས་དེས་ཁྲུས་བྱ་བའི་འདག་རྩི་དང་སྐྱུ་རུ་ར་དག་ལ་བཏབ་སྟེ་འདག་རྩིའི་ཆལ་དེ་དག་དེ་ལྟར་སྔགས་ཀྱིས་
བསངས་ནས་ཆལ་དེས་ཁྲུས་བྱའོ། །རིག་ཁྲུས་ཁྲུས་བྱས་གཙང་མ་ཡིས། །ཞེས་པ་དེ་ལྟར་ཁྲུས་བྱས་པའི་སྔགས་པ་ཕྱི་ནང་གི་གཙང་སྦྲ་དང་ལྡན་ཞེས་པའོ། །དེ་ནས་སྔགས་དེ་ཐམས་ཅད་ཀྱིས། །ཞེས་པ་ལ་སོགས་པ་དེ་ལྟར་ཁྲུས་བྱས་པའི་འོག་ཏུ་བདག་གི་ལུས་ལ་འོག་ནས་འབྱུང་བ་བཞིན་དུ་ཡི་གེ་བཅུ་གཅིག་པ་དཀོང་ནས་བདག་ཉིད་ཁྲོ་བོའི་སྐུར་བསྒྱུར་ནས་བདག་གི་ལུས་ལ་སྔགས་དགོད་ཅེས་བྱ་བ་ཡང་སྤྱི་བོར་ཨོཾ་བསམ། ཨཱཿ་མིག་ཏུ་བསམ། ཧཱུ༵་སྙིང་གར་བསམ་ཞིང་དགོད་པའོ། །སྐུར་བསྒྱུར་པའི་སྙིང་པོ་ནི་ཡི་གེ་ཧཱུ༵་གིས་སོ། །ཕྱག་དང་ཟང་ཟིང་ཡོངས་སྤངས་ལ། །ཞེས་པ་ལ་སོགས་པ་ལུགས་ཀྱི་ཡི་གེ་ལས་རྣམ་གཉིས་ལྟར་བཤད་དུ་རུང་སྟེ། དཀྱིལ་འཁོར་གྱི་ས་གཞི་དེ་ཉིད་ཀྱི་གྱོ་མོ་དང་སྐྲ་ཤད་དང་ཕུབ་མ་ལ་སོགས་པའི་སྐྱོན་མེད་པར་བརྐོས་ནས་བསལ་ཏེ། སྔར་ས་བཟང་པོས་བཀང་ནས་བཅགས་ཏེ་ལྕི་བའི་སྐྱང་ནུལ་བྱུགས་ཏེ་ས་གཞི་བཟང་པོ་བསྟར་བ་ལ་ཡང་བྱའོ། །རྣམ་པ་གཅིག་ཏུ་ན་དཀྱིལ་འཁོར་དེ་ལྟ་བུར་བགེགས་ཞི་བར་བྱ་བའི་ཆོ་ག་དེ་ལྟ་བུ་བྱེད་པའི་ཚེ་སྔགས་པ་དེ་འདོད་པའི་ཡོན་ཏན་ལ་སོགས་པ་ཟང་ཟིང་ལ་ཆགས་པའི་སེམས་སྤངས་ནས་ལས་དེ་དག་བྱའོ་ཞེས་པའི་ཐ་ཚིག་གོ །རང་སྔགས་ཟློས་ཤིང་བལྟ་བར་བྱ། །ཞེས་པ་ཕྱོགས་བཅུར་བལྟ་བ་དང༌། ཡི་གེ་གཅིག་པ་བཟླས་ཞེས་པའོ། །གཅིག་བུ་ཡི་གེ་བཅུ་གཅིག་པ་དཔའ་བོའི་སྔགས་ཟློས་ཤིང་ཞེས་པའོ། །དཀྱིལ་འཁོར་བཟང་པོ་གྲུ་བཞི་པར། དུར་ཁྲོད་ཐལ་བས་བྲི་བར་བྱ།། ཞེས་པ་དཀྱིལ་འཁོར་ཚད་གོང་དུ་བཤད་པ་བཞིན་དུ་ཁྲུ་བརྒྱད་པའམ། ཁྲུ་བཞི་པའམ། ཁྲུ་གང་ཡང་རུང་བའམ། ཡང་ན་འོག་ནས་འབྱུང་བའི་ལས་དང་སྦྱར་ཏེ། དེ་ཡང་གྲུ་བཞི་པོར་དུར་ཁྲོད་ཀྱི་དཀྱིལ་འཁོར་གྱི་ཚད་ཅི་ཙམ་གྱིས་བྱ་བར་འབྱུང་བ་དང་སྦྱར་ཏེ། དེ་ཡང་གྲུ་བཞི་པོར་དུར་ཁྲོད་ཀྱི་ཐལ་བས་བྲིའོ་ཞེས་པའི་དོན་ཏོ། །ནུབ་ཕྱོགས་ཞེས་པ་འདིའི་སྐབས་སུ་ནི་ནུབ་ཕྱོགས་སུ་སྒོ་བཏོད་སྒོ་ལྷག་མ་བཅད་ཅེས་པའོ། །དེ་ཡི་དབུས་སུ་པདྨོ་བྲི། །ཞེས་པ་དཀྱིལ་འཁོར་གྱི་དབུས་སུ་པདྨོ་བྲི་བ་ནི་འོག་ནས་ལྷ་བསྟན་པ་བཤད་པ་དང་སྦྱར་རོ། །བེ་ཅོན་ཕྱག་རྒྱ་
རྩེ་འབར་བ། གྲྭ་བཞི་དག་ཏུ་བྲི་བར་བྱ། །འདི་ནི་བེ་ཅོན་མང་པོ་ཡིན། །ཞེས་པ་བེ་ཅོན་གྱི་མགོ་ཐོད་པ་ཅན་ལ་དེ་ཉིད་འབར་བའི་བེ་ཅོན་གྱི་ཕྱག་རྒྱ་བཞི་དཀྱིལ་འཁོར་གྱི་གྲྭ་བཞིར་རེ་རེ་པདྨོའི་སྟེང་དུ་བྲིས་པ་འདི་ནི་བེ་ཅོན་མང་པོའི་དཀྱིལ་འཁོར་ཞེས་བྱའོ། །ཤཱུ་ལ་ཅན་ནི་ཤཱུ་ལ་མང༌། །ཞེས་པ་དཀྱིལ་འཁོར་གྲྭ་བཞིའི་པདྨོའི་སྟེང་དུ་ཤཱུ་ལ་རེ་རེ་བྲིས་པ་ནི་ཤཱུ་ལ་མང་པོ་ཞེས་བྱ་བའི་དཀྱིལ་འཁོར་རོ། །ཤཀྟི་རྣམས་ཀྱིས་ཡོངས་བསྐོར་བ། །དེ་བཞིན་ཤཀྟི་མང་ཞེས་བྱ། །ཞེས་པ་དཀྱིལ་འཁོར་གྱི་གྲྭ་བཞིར་ཤཀྟི་བཞི་པདྨོའི་སྟེང་དུ་སྔ་མ་བཞིན་དུ་བྲིས་པ་ནི་ཤཀྟི་མང་པོ་ཞེས་བྱ་བའི་དཀྱིལ་འཁོར་བྲི། །ཤཀྟི་ངེས་པར་བྱིན་གྱིས་བརླབ་པའི་སྔགས་ནི་མཚོན་ཆའི་སྔགས་ཀྱིས་དགོད་པར་བྱའོ། །དེ་བཞིན་མི་ཐོད་མང་པོ་ཡིན། །ཞེས་པ་དཀྱིལ་འཁོར་གྱི་གྲྭ་བཞིར་ཐོད་པ་བཞི་སྔ་མ་བཞིན་དུ་བྲིས་ནས་ཐོད་པ་མང་པོ་ཞེས་བྱ་བའི་དཀྱིལ་འཁོར་རོ། །མི་རོར་ལྡན་པའི་མི་རོ་མང༌། །ཞེས་པ་ལ་སོགས་པའི་དཀྱིལ་འཁོར་གྱི་གྲྭ་བཞིར་མི་རོ་རེ་རེ་སྟེ་བཞི་བྲི་བ་ནི་མི་རོ་མང་པོའི་དཀྱིལ་འཁོར་རོ། །དཀྱིལ་འཁོར་གྱི་གྲྭ་བཞིར་མགོ་མེད་པའི་མི་རོ་མི་སྡུག་པ་བཞི་སྔ་མ་བཞིན་དུ་བྲི་བ་དང༌། དཀྱིལ་འཁོར་གྱི་ནང་གི་ངོས་བཞིར་ཡི་དགས་རངས་པ་དང༌། སྲིན་པོའི་གཟུགས་ལྟོ་བ་ཆེ་བ། སྐྲ་གྱེན་དུ་ལྷུགས་པར་འདུག་ཅིང་གཟུགས་མི་སྡུག་པ་དག་གིས་སྤེལ་ཞིང་བྲིས་པའི་དཀྱིལ་འཁོར་འདི་ནི་དུར་ཁྲོར་མང་པོ་ཞེས་བྱ་བའི་དཀྱིལ་འཁོར་ཞེས་བྱའོ། །ཕྱོགས་བཅུ་ཀུན་ན་འཇིགས་པ་ཅན། །ཞེས་པ་དཀྱིལ་འཁོར་གྱི་ཕྱོགས་བཞི་དང༌། མཚམས་བཞི་དང༌། བླ་འོག་རྣམས་སུ་མི་རོ་མགོ་མེད་པའི་མི་སྡུག་པ་དང༌། ཡི་དགས་འབར་བ་དང༌། སྲིན་པོ་ལྡན་པར་བྲིས་པ་ནི་ཕྱོགས་བཅུའི་འཇིགས་པ་ཅན་ཞེས་བྱའོ། །གཤིན་རྗེ་གཤེད་པོ་དཔའ་བོ་ཡི། །དཀྱིལ་འཁོར་རྣམ་པ་དྲུག་དུ་བཤད། །ཅེས་པ་དཀྱིལ་འཁོར་དྲུག་ཅར་གྱི་མཚན་མ་ངེས་པར་བྱིན་གྱིས་བརླབ་པ་དགོད་པར་བྱ་བ་ནི་ལེའུ་སྟེ། འོག་ནས་སྔགས་ཀྱི་ལེའུ་གཉིས་འབྱུང་བ་ལ་བརྟགས་ཏེ། གང་རིགས་མཐུན་མཐུན་དུ་སྦྱར་ཏེ། དེ་དག་གི་སྔགས་ཀྱིས་བྱིན་གྱིས་བརླབ་པར་བྱའོ། །དེ་ལྟར་དཀྱིལ་འཁོར་རྣམ་པ་དྲུག་ཏུ་བཤད་དོ། །ད་ནི་
དཀྱིལ་འཁོར་གྱི་ལས་སོ་སོའི་བྱ་བ་བཤད་དོ། །དེ་ལ་བེ་ཅོན་མང་པོ་ནི། །ཞེས་པ་དེ་ལ་དང་པོར་བེ་ཅོན་མང་པོའི་དཀྱིལ་འཁོར་གྱིས་ནི་དངོས་གྲུབ་ཕྲ་མོ་སྟེར་ཞེས་པའོ། །ཤཱུ་ལ་མང་པོ་སྲིན་པོ་རྣམས། །འཇོམས་པར་རབ་ཏུ་བསྒྲགས་པ་ཡིན། །ཞེས་པ་ཤཱུ་ལ་མང་པོའི་དཀྱིལ་འཁོར་གྱིས་ནི་སྲིན་པོ་འབར་བ་རྣམས་འཇོམས་པར་མཛད་དོ། །དེ་བཞིན་དུ་ཤཀྟི་མང་པོ་ནི། །ཞེས་པ་ཤཀྟི་མང་པོའི་དཀྱིལ་འཁོར་གྱིས་ནི་བགེགས་རྣམས་ཐམས་ཅད་ཚར་བཅད་པའོ། །ཐོད་པ་མང་པོ་ཞེས་བྱ་བ། འཁྲུལ་འཁོར་ཐམས་ཅད་རབ་ཏུ་འཇིག །ཅེས་པ་ཐོད་པ་མང་པོའི་དཀྱིལ་འཁོར་གྱིས་ནི་ལྷ་མ་ཡིན་གྱི་འཁྲུལ་འཁོར་འཇིག་པར་མཛད་དོ་ཞེས་པའི་དོན་ཏོ། །མི་རོ་མང་པོ་ཞེས་བྱ་བ། །ཞེས་པ་མི་རོ་མང་པོའི་དཀྱིལ་འཁོར་གྱིས་ནི་རོ་ལངས་ཐམས་ཅད་བསྒྲུབ་པའོ། །དུར་ཁྲོད་མང་པོར་རབ་གྲགས་པ། །ཞེས་པ་དུར་ཁྲོད་མང་པོའི་དཀྱིལ་འཁོར་གྱིས་ནི་དངོས་གྲུབ་ཐམས་ཅད་རབ་ཏུ་སྦྱིན་པའོ། །འདི་མན་ཆད་ལྷ་བསྟན་པ་ཞེས་བྱ་བ་བཤད་དོ། །དེ་ལ་པདྨའི་དབུས་སུ་ནི། །ཞེས་པ་ལྷ་བསྟན་པ་ཞེས་བྱ་བ་བཤད་དོ། །དེ་ལ་པདྨོའི་དབུས་སུ་ནི་ཞེས་པ་སྔར་དཀྱིལ་འཁོར་གྱི་དབུས་སུ་པདྨོ་བྲིས་པ་དེའི་དབུས་སུ་ཞེས་པའོ། །ཆོ་ག་བཞིན་དུ་བཞུགས་པར་བསམ། །ཞེས་པ་སྤྱན་དྲངས་ཏེ་པདྨོའི་དབུས་སུ་བཞུགས་ཞེས་པའོ། །ཨིནྡྲ་ནཱི་ལ་ཞེས་པ་ནི་མཐིང་ག་འཚེར་བའི་མདོག་ཅེས་པའོ། །འཇིགས་འཇིགས་ལྟ་ལ་འཇིགས་པའི་གདོན། །ཞེས་པ་ཁྲོ་བོ་ཉིད་ཕ་རོལ་འཇིགས་པའི་གཟུགས་ཅན་ནམ་ཡང་གདོན་ཞེས་པའི་དོན་ཏོ། །དྲིལ་བུ་དང་ཞེས་པ་གཡེར་ཀའི་དྲིལ་བུ་ལ་བྱའོ། །ཐོང་པ་སྐམ་པོ་ཞེས་པའོ། །མི་མགོ་རློན་དང་མི་རུས་དང༌། ཞེས་པ་ཁྲག་དང༌། སྐྲ་དང་བཅས་པ་དང༌། རྗེ་ངར་དང༌། དཔུང་བ་དང༌། ལག་པ་རྣམས་ལས་གཅིག་བསྣམས་ཞེས་པའོ། །འཇིགས་པའི་མི་རོ་དབྱུག་ཏོ་འབར། །ཞེས་པ་ཁྲག་དང་བཅས་པའི་དཎྜ་འབར་ཞེས་པའི་དོན་ཏོ། །འབར་ཞེས་པ་མེ་ལྕེ་ཁ་གསུམ་ཙམ་དུ་འབར་བའི་མེ་ལྕེ་བསྣམས་སོ། །ཤི་བའི་རོ་ཡི་སྟེང་ན་བཞུགས། །ཞེས་པ་མཎྜལ་གྱི་དབུས་སུ་པདྨོ་བྲིས་པ་དེའི་དབུས་སུ་མི་རོ་བྲིས་པ་ལ་
རོའི་སྟེང་དུ་ལྷ་བཞུགས་པར་བྱའོ་ཞེས་པའི་དོན་ཏོ། །འཇིགས་པའི་མཚོན་ཆ་གདེངས་འཇིགས་ལྟ། །ཞེས་པ་མཚོན་ཆའི་ཕྱག་མཚན་ཀུན་འཇིགས་ཞེས་པའི་དོན་ཏོ། །དུར་ཁྲོད་ན་ནི་རྟག་ཏུ་བཞུགས། །ཞེས་པ་ལྷ་ཉིད་དཀྱིལ་འཁོར་དེ་ལྟ་བུའི་ཚུལ་དུ་རྟག་ཏུ་ཞུགས་པ་ཞེས་པའི་དོན་ཏོ། །ཐམས་ཅད་འཇོམས་ཞེས་པ་ལྷ་དེའི་ཡོན་ཏན་ལ་བྱའོ། །ལྷ་རྣམས་ཀུན་གྱིས་ཕྱག་བྱས་ཤིང༌། །ཞེས་པ་འཇིག་རྟེན་པའི་ལྷ་རྣམས་ཞེས་པའོ། །ཁྲོ་བོ་ཐམས་ཅད་ལེགས་པར་འདུད། །ཅེས་པ། འཇིག་རྟེན་པ་ཡི་ཁྲོ་བོས་འདུད། །ཅེས་པའི་དོན་ཏོ། །སྐུ་ནི་རབ་ཏུ་འབར་བ་ཅན། །ཞེས་པ་སྐུ་མེ་ལྕེ་འབར་བ་ཅན་ནོ་ཞེས་པའི་དོན་ཏོ། །འཁྲུག་པས་དཀྲུགས་ཤིང་རབ་ཏུ་ཟབ། །ཅེས་པ་ལྷ་དེ་ཉིད་ལ་བྱ། སྤྱིར་ན་ཁྲོ་བོའི་ཚུལ་དུ་ཕ་རོལ་པོ་ལ་སྦྱར་ཞེས་པའོ། །སྟག་ལྤགས་ན་བཟའ་བསྣམས་པར་དགྱེས། །ཞེས་པ་དེ་ཉིད་ཀྱི་ཚུལ་ལམ་ཉམས་སུས་ཀྱང་མི་རྟོགས་པའོ། །རྗེས་སུ་འབྲངས་ཤིང་ཕྱག་རྒྱ་བྱས་པའོ། །ཞེས་པ་ཁྲོ་བོ་དེའི་རྗེས་སུ་འབྲངས་ཤིང་ཁྲོ་བོ་དེ་ལ་ཕྱག་བྱས་ཞེས་པའོ། །ཁྲོ་བོ་གཤིན་རྗེ་གཤེད་དྲན་བྱ། །ཞེས་པ་དེ་ལྟ་བུའི་ཁྲོ་བོ་ཆེན་པོ་འདི་དྲན་པར་བྱའོ། །བདག་གིས་དྲན་བྱས་ནས་ཞེས་པ་སྙིང་པོས་དེ་ལྟ་བུའི་ལྷ་སྤྱན་དྲང་བར་བྱའོ་ཞེས་པའོ། །འདི་མན་ཆད་ནི་སྤྱན་དྲང་པར་བྱས་ནས་སློབ་མ་གཟུད་པ་ལ་སོགས་པའི་ལས་བྱའོ་ཞེས་པ་བསྟན་པ་བཤད་དེ། །སྤྱན་དྲངས་ན་ལྷ་དེ་ལྟ་བུ་དྲང་ཞེས་པའོ། །ཙནྡན་གྱིས་བསྐུས་ཞེས་པ་དཀར་པོས་བསྐུས་ཞེས་པའོ། །རིམ་པ་བཞིན་དུ་མཆོད་ནས་ནི། །སློབ་མ་ཁྲོ་བོའི་སྔགས་དག་དང༌། །སངས་རྒྱས་སྤྱན་གྱི་སྔགས་དག་གིས། །ཞེས་པ་མེ་ཏོག་ལ་སོགས་པས་རིམ་པ་བཞིན་དུ་མཆོད་ནས་སློབ་མ་ལ་བདུད་རྩི་འཁྱིལ་བའི་སྔགས་ཀྱིས་བསྔགས་པའི་ཚུལ་གྱིས་བསང་བ་དང༌། སངས་རྒྱས་སྤྱན་གྱིས་ཀྱང་བསྲུང་ངོ༌། །གོང་དུ་དཀྱིལ་འཁོར་དྲུག་བཤད་པ་ལས་བེ་ཅོན་གྱི་ཕྱག་རྒྱའི་དཀྱིལ་འཁོར་བྲིས་ན་བེ་ཅོན་གྱི་ཕྱག་རྒྱ་བཅིངས་པས་མེ་ཏོག་དོར་བར་བྱའོ། །ཡང་ན་ཤཱུ་ལའི་ཕྱག་རྒྱའི་དཀྱིལ་འཁོར་བྲིས་ནས། ཤཱུ་ལའི་ཕྱག་རྒྱ་བཅིངས་ལ་མེ་ཏོག་དོར་བར་བྱའོ། །མིང་གིས་སྨོས་པའི་དཀྱིལ་འཁོར་འདི་རྣམས་ལས་མ་གཏོགས་པར་
གཞན་ཞིག་བྲིས་ན་བེ་ཅོན་གྱི་ཕྱག་རྒྱའམ་ཤཱུ་ལའི་ཕྱག་རྒྱ་གཉིས་ལས་གང་ཡང་རུང་བ་ཅིག་བཅིངས་ཏེ་མེ་ཏོག་དབུལ་བར་བྱའོ། །དཀྱིལ་འཁོར་དྲུག་ཅར་དུ་ཡང་དེ་ལྟར་ཤེས་པར་བྱའོ། །བཙུད་ནས་མེ་ཏོག་དོར་དུ་གཞུག །ཅེས་པ་སྔགས་ཡི་གེ་བཅུ་གཅིག་པ་བརྗོད་ནས་མེ་ཏོག་དཀྱིལ་འཁོར་དུ་དོར་དུ་གཞུག་གོ་ཞེས་པའི་དོན་ཏོ། །དེ་ནས་རིག་འཛིན་དཔལ་དང་ལྡན། །ཞེས་པ་སྔགས་པས་སློབ་མ་རྣམས་བསྲུང་བའི་ཕྱིར་ཡང་སྔགས་བཟླས་ནས་སློབ་མ་དང༌། སློབ་དཔོན་གྱིས་དཀྱིལ་འཁོར་ལ་མཆོད་པ་འདི་དག་ལ་སོགས་པས་མཆོད་པར་བྱའོ། །མཆོད་པ་བྱས་ནས་སློབ་མ་ལ། །ཞེས་པའི་དོན་ཏོ། །དེ་ནས་སངས་རྒྱས་སྤྱན་ཡང་བཟླས། །ཞེས་པ་ཁ་ཅིག་གིས་བཤད་པ་ནི་དེ་ལྟར་མཆོད་པ་བྱས་པའི་འོག་ཏུ་མེ་ཏོག་ལ་བུདྡྷ་ལོ་ཚ་ན་དང་ཁྲོ་བོའི་སྔགས་བཟླས་པས་བཏབ་ལ་སློབ་མའི་ལག་ཏུ་སྦྱིན་ཏེ། དེ་ནི་དེ་བཞིན་གཤེགས་པ་དང༌། །རྡོ་རྗེའི་རིགས་ཀྱིས་བྱིན་གྱིས་བརླབ་པའི་ཕྱིར་རོ། །དེ་ནས་དབང་རྣམ་བཞི་ལས་གཅིག་སྦྱིན་ནོ། །འདིའི་སྐབས་སུ་རིག་པའི་དབང་བསྐུར་བར་བྱའོ། །དབང་བསྐུར་བ་འདི་དག་ཀྱང་སྤྱིའི་ཆོ་ག་དང་སྦྱར་ཏེ་བྱའོ་ཞེས་པའི་དོན་ཏོ། །ལྷ་ཁྱོད་བདག་གིས་མནོས་ཞེས་པ་སློབ་མས་དེ་སྐད་སྨྲ་བར་བྱའོ། །དེ་ནས་སྔགས་རིག་ཆོ་ག་བཞིན། །ཞེས་པའི་དེའི་འོག་ཏུ་སློབ་མས་བླ་མ་སློབ་དཔོན་ལ་ཕྱག་བྱའོ། །ཆོ་ག་བཞིན་དུ་དབང་བསྐུར་བས། །ཞེས་པའི་སྤྱིའི་ཆོ་ག་དང་སྦྱར་ཏེ། དབང་བསྐུར་བ་ལ་བྱ་ཞེས་བྱ་བའི་དོན་ཏོ། །ཁྲོ་བོ་གཤིན་རྗེ་གཤེད་པོ་བཟླས། །ཞེས་པ་དེ་ཡང་ཆད་ཁྲོ་བོའི་བཟླས་བརྗོད་རྒྱུན་དུ་བྱའོ། །གཤིན་རྗེ་གཤེད་དུ་གཏོགས་པར་བཅུ་གཅིག་པའི་བཤད་པ་རྫོགས་སོ།། །།གསང་བའི་ཕྱི་མའི་ཡང་ཕྱི་མར་གཏོགས་པ་འདི་ལ་དོན་རྣམ་པ་བཅུས་སྟོན་ཏེ། དེ་ལ་རི་མོའི་སྐུ་གཟུགས་ཀྱི་ཆོ་ག་དང༌། སྔོན་དུ་བསྙེན་པ་བྱས་ནས་སྒྲུབ་པ་ལ་འཇུག་པའི་གླེང་བསླང་བ་དང༌། སྔགས་བསྟན་པ་དང༌། གནས་སྔར་བསྟན་ནས་བཟླས་པའི་མཚན་ཉིད་སྔར་བསྟན་པ་དང༌། སྒྲུབ་པ་ལ་འཇུག་པ་དང༌། གྲུབ་ནས་ལས་རྣམས་སྒྲུབ་པ་དང༌། མ་གྲུབ་པའི་ལས་བྱ་བ་དང༌། རྟོག་པ་ཕྱི་མ་དང༌། རྟོག་པ་ཕྱི་མའི་ཡང་ཕྱི་མ་དང༌། ཕྱག་རྒྱའི་མཚན་ཉིད་དོ། །གསང་བའི་ཕྱི་མར་གཏོགས་
པའི་ལེའུ་འདི་ནི་གོང་དུ་སྔར་བཤད་པའི་ཕྱི་མའི་ཡང་ཕྱི་མ་ཞེས་བྱ་བའི་སྔར་གསུངས་པ་རྣམས་ཀྱི་མ་ཆུད་པ་རྣམས་རྒྱས་པར་བཤད་པའོ། །དེ་ལ་རི་མོའི་སྐུ་གཟུགས་ཀྱི་ཆོ་ག་ཞེས་བྱ་བ་དང་པོར་བཤད་དོ། །དེ་ནས་གཞན་ཡང་གཤིན་རྗེ་ཡི། །བཤད་པའི་སྔགས་ནི་མནོས་ནས་སུ། །མི་ཡི་རོ་གོས་བླངས་ནས་སུ། །ཞེས་པ་རས་བླངས་པ་དེ་ལ་ཁྲོ་བོ་དེའི་སྐུ་གཟུགས་བྲི་ཞེས་པའོ། །བཟང་པོ་ཁྲུ་གང་ཞེས་པ་རས་བཟང་པོ་ཁྲུ་གང་ཚད་དུ་བྱ་ཞེས་པའོ། །གང་ཚེ་སྔགས་པ་བདག་ཉིད་ཀྱིས། །ཞེས་པ་སྔགས་པ་བདག་ཉིད་རི་མོ་འདྲི་མི་ཤེས་པ་དེའི་ཚེ། བཟོ་བོ་སྨྱུང་བ་བྱས་པ་ནི།། ཞེས་པ་རི་མོ་བཟོ་བོ་སྨྱུང་བ་བྱེད་དུ་བཅུག་ལ་ཁྲིམས་མནོས་པར་འདྲིར་གཞུག་གོ །ཤི་བའི་རོ་ཡི་སྟེང་ན་བཞུགས། །ཞེས་པ་འདོད་པའི་ཁམས་ཀྱི་ལྷའི་བུའི་བདུད་ཀྱི་རོའི་སྟེང་ན་བཞུགས་ཞེས་བཤད་དེ། མདོར་ན་མི་རོའི་སྟེང་ན་བཞུགས་པ་བྲིའོ། །འཇིགས་པ་གནོན་ཞེས་པ་ཕ་རོལ་པོ་རྣམས་གནོན་ཞེས་པའོ། །འཇིགས་འཇིགས་ལྟ་ཞེས་པ་ཁྲོ་བོ་ཉིད་ཀྱིས་ཀྱང་ལྟ་ཞེས་པའོ། །ཁ་ཅིག་བཤད་ཅེས་པ་ཞལ་དབུ་མའི་སྟེང་མ་ལའོ། །ལྗགས་འདྲིལ་ཁ་ཅིག་མཆེ་བ་གཙིགས། །ཞེས་པ་གཡས་པའི་ཞལ་དང་པོའོ། །ཁ་ཅིག་ཞལ་གདངས་པ་གཡོན་དང་པོའོ། །ཁ་ཅིག་ཁྲོས་ཞེས་པ་གཡས་པའི་ཞལ་གཉིས་པའོ། །ཁ་ཅིག་འཇིགས་པ་ཞེས་པ་གཡོན་གཉིས་པའོ། །ཇི་སྐད་གསུངས་པའི་མཚན་ཆ་རྣམས། །ཞེས་པ་སྔར་དོན་གྲུབ་ཀྱི་རྟོག་པར་བཤད་པའི་མཚོན་ཆ་རྣམས་ཕྱག་ན་བསྣམས་པའོ། །དབེན་ཞིང་འདུ་འཛི་མེད་པ་རུ། །ཞེས་པ་གནས་འདི་ལྟ་བུར་རི་མོ་མཁན་མཁས་པས་འདྲིར་གཞུག་གོ །འདི་མན་ཆད་སྔོན་དུ་བསྙེན་པ་བྱས་ནས་སྒྲུབ་པ་ལ་འཇུག་པ་གླེང་བསླང་བ་ཞེས་བྱ་བ་བཤད་དེ། དེ་ལྟར་བྲིས་ན་སྔགས་མཁན་དེ་ཞེས་པ་ལ་སོགས་པ་སྨོས་ཏེ། རི་མོ་བྲིས་ནས་དེ་ཉིད་ཀྱིས། །ཞེས་པ་དེའི་འོག་ཏུ་སྒྲུབ་པ་ལ་འཇུག་པའི་ཚེ་ཡང་རི་མོ་ཉིད་ཀྱང་མདུན་དུ་བཀྲམ་སྟེ་བསྒྲུབ་པར་བྱའོ་ཞེས་པའི་དོན་ཏོ། །དེ་ལྟར་གོང་དུ་བཤད་པའི་ཚུལ་བཞིན་དུ་བྲིས་ནས་མདུན་དུ་བཀྲམ་སྟེ། རི་མོ་དེ་ལ་མངོན་དུ་ཕྱོགས་ནས་ཚུལ་བཞིན་དུ་བསྙེན་པ་འབུམ་བྱའོ། །འདི་མན་ཆད་ནི་སྔགས་
བསྟན་པ་ཞེས་བྱ་བ་བཤད་དེ། གཤིན་རྗེ་གཤེད་པོ་འདི་ཡི་སྔགས། །ཞེས་བྱ་བ་ལ་སོགས་པ་སྨོས་ཏེ། གཤིན་རྗེ་གཤེད་པོ་འདི་ཡི་སྔགས། །ཞེས་པ་དྲག་པོ་གང་ཡིན་དེ་བཤད་དོ་ཞེས་པ་ཁྲོ་བོ་དེའི་མཐུ་རྩལ་ཆེ་བའི་སྔགས་དེ་ཡང་འབྲུ་ལྷག་ཆད་དུ་འགྱུར་བ་དང༌། ལྷག་འོག་གི་གོ་རིམས་ཤོར་དུ་དོགས་པའི་ཕྱིར་འབྲུ་རེ་རེ་ནས་བཤད་དོ། །ཨོཾ་ནི་དེ་ཡི་དང་པོ་ཡིན། །ཞེས་པ་ཁྲོ་བོ་དེའི་སྔགས་ཀྱི་དང་པོར་ཨོཾ་འབྱུང་ངོ༌། །དེ་བཞིན་ཕཊ་ནི་ལྷག་མ་སྟེ། །ཞེས་པ་འབྲུ་བཅུ་ལས་ལྷག་པ་ལའོ། །མི་མཉམ་སྔགས་ནི་བཅུ་གཅིག་པའོ། །ཞེས་པ་ཡི་གེ་འབྲུ་དེ་ཉིད་ཟུང་དུ་འབྲེལ་བ་མ་ཡིན་ཏེ། ཡན་གར་བྱུང་བའི་ཐ་ཚིག་གོ །འཇམ་དཔལ་གྱི་ནི་ཁྲོ་བོ་མཆོག །ཅེས་པ་དེ་ཉིད་མཐུ་སྟོབས་སམ། །ཡོན་ཏན་གཞན་ལས་ཆེ་བར་གྱུར་བའོ། །རྟོག་པ་ཕྱི་མའི་ཡང་ཕྱི་མ་སྟེ། །སངས་རྒྱས་ཀུན་གྱིས་མངོན་བསྟོད་པས། །ཞེས་པ་རྟོག་པ་ཕྱི་མའི་ཡང་ཕྱི་མར་གསུངས་པའི་སྔགས་འདི་ནི་སངས་རྒྱས་ཀུན་གྱིས་ཀྱང་བསྟོད་པའོ། །སྔགས་དེ་དེ་ལྟར་མནོས་ནས་སུ། །ཞེས་པ་སྔར་གོང་དུ་བཤད་པའི་ཚུལ་དེ་ལྟར་མནོས་ནས་ཞེས་བྱ་བའི་དོན་ཏོ། །གོ་ཆ་བགོས་ནས་བཟླས་བྱས་ནས། །ཞེས་པ་བརྩོན་འགྲུས་གྱི་གོ་ཆ་བགོས་ནས་བཟླས་པ་བྱས་ན། རིག་འཛིན་གོ་འཕང་ཐོབ་པར་འགྱུར། །ཞེས་པའི་དོན་ཏོ། །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧཱུ༵་ཕཊ། །ཅེས་པ་ཡི་གེ་འབྲུ་བཅུ་གཅིག་པའི་སྔགས་སོ། །སྔགས་འདི་ལས་བྱ་བའི་བསྐུལ་ཚིག་ནི་ཧཱུ༵་ཕཊ་གཉིས་ཀྱི་བར་དུ་བཅུག་སྟེ་ལས་བྱའོ། །ཨོཾ་ཨ་མྀ་ཏ་ཀུ་ཎྜ་ལི་ཞེས་པ་སློབ་མ་པ་སང་བ་བསྲུང་པའི་སྔགས་སོ། །འདི་མན་ཆད་ནི་གནས་སྔར་བསྟན་ནས་བཟླས་པའི་ཚུལ་མཚན་ཉིད་བསྟན་པ་ཞེས་བྱ་བ་བཤད་དོ། །དེ་ནས་གཞན་ཡང་བཟླས་པ་ཡི། །གནས་ངག་ཇི་ལྟར་ཡིན་པ་བཤད། །ཅེས་བྱ་བ་ལ་བཟླས་པའི་གནས་ནི་ཇི་སྐད་གསུངས་པ་ཡིན་པ་དེ་བཤད་པར་བྱའོ། །ཚང་ཚིང་པདྨའི་མཚོ་འགྲམ་དུ། །ཞེས་པ་ནགས་ཚལ་སྟུག་པོ་བགྲོད་དཀའ་བའི་གནས་ལ་བྱའོ། །གཤིན་རྗེ་གཤེད་པོ་ནི་ཞེས་པ་ལྷའི་སྐུའི་ཚུལ་དུ་བྱ་བའོ། །ཀུ་ཤ་ཞེས་པ་བཟླས་པའི་མཚན་ཉིད་འདི་དག་གོ །རི་མོ་ལ་ནི་ཕྱོགས་འདུག་པ། །
ཞེས་པ་མདུན་དུ་རི་མོའི་སྐུ་གཟུགས་བྲིས་པ་ལ་ཕྱོགས་པར་བྱ་སྟེའོ། །རུ་རཀྴ་ཡི་ཕྲེང་བ་ཐོགས། ཞེས་པ་སྔགས་ཀྱི་ནོར་བུ་ཞེས་པའོ། །སྔགས་པས་རྟག་ཏུ་བཟླས་པ་བྱས། །ཞེས་པ་མཚན་ཉིད་དེ་ལྟར་བཟླས་པ་བྱའོ། །མྱུར་བ་དང་ནི་བུལ་བ་དང༌། །ཞེས་པ་ཟུར་མི་ཕྱིན་པའི་སྐྱོན་དང་བར་ཆད་བའི་སྐྱོན་ནོ། །དེ་བཞིན་ཡི་གེ་འདྲེས་པ་ནི། །ཞེས་པ་གོ་རིམས་འཆོལ་བར་ཏེ། ནམ་ཡང་སྨྲ་བར་ཡོང་མི་བྱ། །ཞེས་པ་དེ་ལྟ་བུའི་སྐྱོན་གྱི་ཚུལ་དུ་སྔགས་བཟླས་པ་ཡང་མི་བྱའོ། །བཟླས་པའི་མཚན་ཉིད་འདི་དག་གོ །རྟག་ཏུ་རབ་ཏུ་གསལ་བར་སྨྲ། །ཞེས་པ་མྱུར་བའང་མ་ཡིན་བུལ་བ་ཡང་མ་ཡིན། འཆོལ་བ་ཡང་མ་ཡིན་པར་དྲག་དལ་སྙོམས་པར་ཟུར་ཕྱིན་པར་གསལ་བར་སྔགས་བཟླས་པར་བྱའོ། །ཡིང་སྙོམས་ནས་ཞེས་པ་དེ་ལྟར་བཟླས་པ་བྱེད་པའི་ཚེ་བསྡམ་ཞེས་པའོ། །བུ་དོན་ལ་ནི་སེམས་བཞག་སྟེ། ཞེས་པ་སེམས་རྩེ་གཅིག་ཏུ་སེམས་ཤིང་ཞེས་པའོ། །སྐྱོ་བ་མེད་པའི་སེམས་ཀྱིས་ནི། །ཞེས་པ་མི་སྐྱོ་བའི་བར་གྱིས་སྔགས་ཀྱི་རིམ་པ་བཞིན་དུ་བཟླས་སོ། །འབུམ་གཅིག་བཟླས་པའི་ཐ་མར་ནི། །བསྒྲུབ་པར་བྱ་བ་བཤད་ཀྱིས་ཉོན། །ཞེས་པ་དེ་ལྟར་སྔར་བསྙེན་པ་འབུམ་བྱས་ནས་དེའི་འོག་ཏུ་བསྒྲུབ་པ་ལ་འཇུག་པ་བསྟན་ཏོ། །མཚོ་ཡི་འགྲམ་དུ་དཀྱིལ་འཁོར་ནི། །ཞེས་པ་ཆུ་ཀླུང་དག་ལ་ཡང་བྱའོ། །དུར་ཁྲོད་མང་པོ་བྲི་བར་བྱ། །ཞེས་པ་དུར་ཁྲོད་ཅེས་བྱ་བའི་ལེའུ་དུར་ཁྲོད་མང་པོའི་དཀྱིལ་འཁོར་འབྱུང་བ་དེ་འདིར་འདྲི་བར་བྱའོ། །དེ་ཡི་ནང་དུ་རི་མོ་བཀྲམ། །ཞེས་པ་མདུན་དུ་རི་མོ་བྲིས་པ་བཀྲམ་ཞེས་པའོ། །སེམས་དཔའ་མཚན་མོ་བཞུགས་ནས་ནི། །བསྒྲུབ་པ་ལ་འཇུག་གོ་ཞེས་པའི་དོན་ཏོ། །སེམས་ཀྱིས་ཀྱང་མ་རྨོངས་པར་ཞེས་པ་སྔགས་ཀྱི་ཆོ་ག་རྣམས་ཤེས་པར་བྱ་བ་ལ་མ་རྨོངས་པ་ཞེས་པའོ། །གུ་གུལ་བདུག་པ་དེ་ཡིས་བསྲེག །ཅེས་པ་དེ་ལྟར་ནུབ་མོ་སྒྲུབ་པའི་ཚེ། གུ་གུལ་བདུག་པས་བསྲེག་གོ །ཟློས་ཤིང་མེ་ཏོག་ཛྭ་ཏི་སྟོང༌། །ཞེས་པ་སྔགས་ཟློས་ཤིང༌། སྲི་ཤིང་སྣ་མའི་མེ་ཏོག་སྟོང་མདུན་གྱི་རི་མོའི་ཐུགས་ཀར་ཕོག་པར་བྱ་ཞིང་དབུལ་ལོ། །རི་མོ་ལ་བཞུགས་ཁྲོ་བོའི་སྤྱན། །ཞེས་པ་རི་མོ་དང་གཅིག་ཏུ་
བྱས་པའི་ཁྲོ་བོའི་སྤྱན་དང་བཅས་པ་ཞེས་བྱ་བའི་དོན་ཏོ། །གཡོ་འམ་ཡང་ན་འགུལ་ཡང་རུང༌། །ཞེས་པ་རིལ་གྱིས་གཡོ་འམ་ཆའམ་ཕྱོགས་འགའ་འགུལ་པའོ། །དེ་ནས་ལྷ་དེ་འགྲུབ་གྱུར་ནས། །གང་འདོད་པ་ཡི་ལས་རྣམས་བྱེད། །ཅེས་པ་རི་མོའི་སྐུ་གཟུགས་དེ་ལ་མཚན་མ་འདི་ལྟ་བུ་བྱུང་བ་ལ་གྲུབ་པ་ཞེས་བྱ་སྟེ། དེས་ནི་གང་འདོད་པའི་ལས་རྣམས་དེ་བཞིན་དུ་བྱེད་ནུས་པར་འགྱུར་རོ། །དེ་སྟེ་གྲུབ་པར་མ་གྱུར་ན། །གཞན་ཡང་ཚིག་འབུམ་བཟླས་པར་བྱ། །ཞེས་པ་སྟེ་མཚན་མ་དེ་ལྟ་བུ་དག་བྱུང་བར་མ་གྱུར་ན་ཡང་ལ་ན་ཅིག་སྤོགས་ཏེ་བསྙེན་པ་འབུམ་བྱའོ། །དེ་ནས་དེ་ཡི་ཐ་མར་སྒྲུབ། །ཅེས་པ་དེའི་འོག་ཏུ་མཚན་གཅིག་སྔ་མ་བཞིན་དུ་སྒྲུབ་པོ། །དེས་ཀྱང་མ་གྲུབ་གསུམ་པ་ལ། །མཚམས་མེད་ལྔ་རྣམས་བྱེད་པ་ཡང༌། །གདོན་མི་ཟ་བར་འགྲུབ་པར་འགྱུར། །ཞེས་པ་དེ་ལྟར་བསྒྲུབས་ཏེ་མ་གྲུབ་པར་གྱུར་ན་ལན་གསུམ་དུ་བསྒྲུབས་ཏེ། ཡང་དང་པོར་བསྙེན་པ་འབུམ་བྱས་ལ་དེའི་འོག་ཏུ་མཚན་གཅིག་སྔ་མ་བཞིན་དུ་བསྒྲུབས་ཏེ། དེ་ལྟར་བསྒྲུབས་ན་མཚམས་མེད་པ་ལྔ་བྱས་པའི་སེམས་ཅན་གྱིས་ཀྱང་འགྲུབ་པར་འགྱུར་ཏེ། ཐེ་ཚོམ་མེད་པར་ལས་རྣམས་དེ་བཞིན་དུ་ནུས་པར་འགྱུར་རོ་ཞེས་པའི་ཐ་ཚིག་གོ །འདི་མན་ཆད་ནི་དེ་ལྟར་གོང་དུ་བཤད་པ་ལྟར་བསྒྲུབས་ཏེ་གྲུབ་པར་གྱུར་ན། གྲུབ་པ་དེས་ལས་རྣམས་བྱ་བ་ན་དེ་བཞིན་དུ་འགྲུབ་པར་འགྱུར་པའི་ལས་བཤད་དོ། །གྲུབ་པའི་ལས་རྣམས་གང་དག་འདིར། །ཞེས་པ་ལ་སོགས་པ་སྨོས་ཏེ། དེ་དག་ཕྱིན་ཆད་སྙོམས་པར་ནི། །ཞེས་པ་དེ་ལྟར་གྲུབ་ཟིན་ཕན་ཆད་ལས་རྣམས་བྱེད་པར་འགྱུར་རོ་ཞེས་པའི་དོན་ཏོ། །དཔུང་རྣམས་རེངས་པར་བྱེད་ཅེས་པའོ། །སྟོང་ངམ་ཡང་ན་འབུམ་ཡང་རུང༌། །ཞེས་པ་ཕ་རོལ་པོའི་དཔུང་ངོ༌། །གནོན་པ་རེངས་པ་ཞེས་པའོ། །རྨོངས་པ་འཐོམ་པ་ཞེས་པའོ། །དེ་མ་ཐག་ཏུ་འབེབས་པར་བྱེད། །ཅེས་པ་སྣོད་ལ་དབབ་པའི་ལས་དེ་ནུས་པར་འགྱུར་པའོ། །ཕ་རོལ་དཔུང་དག་རབ་ཏུ་འཁྲུག་པར་བྱེད། །ཅེས་པ་ནང་འཁྲུག་དག་བྱེད་དོ། །རྨོངས་པར་ནུས་ཞེས་པ་སེམས་ཅན་དག་རྨོངས་ནུས་ཞེས་སོ། །སྤྲིན་ཡང་
ལེགས་པར་གནོན་པར་ནུས། །ཞེས་པ་སྤྲིན་མི་གཡོ་བར་གནས་ཤིང་འདུག་ནུས་པར་བྱེད་ནུས་སོ། །ཆར་བ་དག་ཀྱང་འབེབས་པར་བྱེད། །ཅེས་པ་དུས་ཀྱི་ཆར་མི་འབབ་པ་དག་ཀྱང་འབེབས་ནུས་སོ། །དེ་ནི་ནག་པོས་ཟིན་པ་ཡང༌། །མཐོང་བའམ་སྦྱིན་པ་ཙམ་གྱིས་གྲུབ། །ཅེས་པ་ཀ་ལ་དུ་ཧཱུ༵་ཞེས་བྱ་སྟེ། དུས་སུ་ཟིན་པ་ལ་ཡང་བྱ་སྟེ། སྤྲུལ་གྱིས་ཉི་མའི་གུང་དང་འཆི་བའི་དུས་ཀྱི་ཚེ་ཟིན་པ་ཡང་སྔགས་པས་མཐོང་བའམ་ཡང་ན་སྔགས་མཁན་གྱིས་སྤྲིང་བ་ཙམ་གྱིས་སོས་པར་འགྱུར་རོ་ཞེས་པའི་དོན་ཏོ། །དེ་ནི་སྦྱོར་བཙམ་གྱིས་སུ། །ཞེས་པ་སྔགས་པ་དེས་སྦྱོར་བ་ཙམ་གྱིས་སའི་འོག་ཀྱང་འཁྲུགས་པར་བྱེད་ཅེས་པའོ། །དེ་བཞིན་ལྷ་དང་མི་རྣམས་ལ། །གནོད་པ་ཆེན་པོ་འབྱུང་བར་བྱེད། །ཅེས་པ་གནོད་པ་ཆེན་པོ་འབྱུང་བ་དང་སྦྱར་ན་ཡང་དེ་བཞིན་དུ་བྱེད་ནུས་པར་འགྱུར་རོ་ཞེས་པའི་དོན་ཏོ། །ཕྱིས་འབྱུང་བ་དག་གང་ཡང་མེད། །ཅེས་པ་མདོར་ན་དུས་གསུམ་གྱི་ལས་གང་ཡང་བྱེད་མི་ནུས་པ་མེད་དོ། །འདི་མན་ཆད་ནི་མ་གྲུབ་པའི་ལས་བཤད་དེ། ལྷ་དེ་གྲུབ་པར་མ་གྱུར་ཀྱང༌། །ཞེས་བྱ་བ་ལ་སོགས་པ་སྨོས་སོ། །ལྷ་དེ་གྲུབ་པར་མ་གྱུར་ཀྱང༌། །ཞེས་པ་སྔ་མ་བཞིན་དུ་བསྒྲུབས་ཀྱང་མ་གྲུབ་པར་གྱུར་ན་ཡང་ལས་འདི་ངག་བྱེད་ནུས་པར་འགྱུར་རོ། །མཐོང་བ་ཙམ་ཞེས་པ་སྔགས་པས་སོ། །ཚིག་གིས་ཀྱང་ཞེས་པ་བསྒོ་པ་ཙམ་གྱིས་སོ། །དུག་དང་རིམས་དང་གདོན་ལ་སོགས། །ཞེས་པ་འགྲོ་བ་དང་མི་འགྲོ་བའི་དུག་ལ་བྱའོ། །བདུག་པ་དང་ཞེས་པ་བདུག་པའི་སྦྱོར་བས་སོ། །སྦྱོར་བ་ཡིས་ཞེས་པ་འདི་དག་སྔར་གོང་དུ་བཤད་པའི་ལས་དེ་དག་རྣམས་ཞེས་པའོ། །ལས་རྣམས་འདི་དག་ཐམས་ཅད་ནི། །བཟླས་པ་བརྒྱ་བྱས་བསྒྲུབ་པར་བྱ། །ཞེས་མིང་གིས་སྨོས་པའི་ལས་དེ་དག་གང་བྱེད་ཀྱང་རུང་སྟེ་ལས་དེ་དག་ལ་སྔགས་བརྒྱ་རྩ་བརྒྱད་བཟླས་པས་ལས་དེ་དག་འགྲུབ་པར་འགྱུར་རོ་ཞེས་པའི་དོན་ཏོ། །སོང་སྟེ་བསྒྲུབ་པ་བྱས་ནས་སུ། །བགེགས་རྣམས་ཀུན་གྱིས་མི་འཇིགས་པར། །ཞེས་པ་གཏེར་གང་ལ་ཡོད་པའི་གནས་སུ་སོང་སྟེ་བདག་ཉིད་བསྲུང་བ་དང༌། མཚམས་བཅད་དེ་བསྲུང་བ་བྱས་ན་བགེགས་དང་འབྱུང་པོས་མི་འཇིགས་པས་
ཞེས་པའོ། །ནོར་དེ་བཟླས་པ་སྟོང་བྱས་པས། །བདག་གི་ཁྱིམ་ནས་ལེན་པ་བཞིན། །ཞེས་པ་གཏེར་ཆེན་པོ་ལས་བཟླས་པ་སྟོང་བྱས་པས་བདག་གི་ཁྱིམ་ནས་ནོར་བླང་བ་བཞིན་དུ་ཡོད་དོ་ཞེས་པའི་དོན་ཏོ། །ཕྲ་མོ་རྣམས་ལ་བརྒྱ་ཡིས་འཐོབ། །ཅེས་པ་གཏེར་ཕྲ་མོ་རྣམས་ལ་བཟླས་པ་བརྒྱ་ཡིས་འཐོབ་པོ། །ཧོམ་དང་བཟླས་པ་མ་བྱས་ཀྱང༌། །ཞེས་པ་ལྷ་རྣམས་སྐྲག་པར་བྱ་བ་ནི། ཧོམ་དང་བཟླས་པ་མ་བྱས་པར་ཡང་ཁྲོ་བོའི་མཚན་བརྗོད་པ་ཙམ་གྱིས་རིང་པོར་མི་ཐོགས་པར་ལྷ་རྣམས་སྐྲག་པར་འགྱུར་པར་ཐེ་ཚོམ་མེད་དོ། །མ་རུངས་པར་ནི་བྱ་བ་ཡང༌། །ཞེས་པ་གང་ཡང་རུང་བར་གཟུགས་བྱས་པ་ལ་སྔར་བཤད་པ་ལྟ་བུའོ། །དངོས་གྲུབ་རྣམས་ཞེས་པ་དེ་ལྟ་བུ་ལ་སོགས་པའི་ལས་བྱའོ་ཞེས་པའི་དོན་ཏོ། །བལྟས་པ་རྣམ་པ་དུ་མ་ཡང༌། །རྟོག་པ་གཞན་གྱི་ཆོ་ག་ཡིས། །རིང་པོར་མི་ཐོགས་བསྒྲུབ་པར་ནུས། །ཞེས་པ་གང་ལ་བྱ་བ་དེ་དག་ལ་བལྟས་ཏེ་བསམ་པའི་ཁྱད་པར་ཙམ་གྱིས་ཀྱང༌། ལས་དེ་དག་འགྲུབ་པར་འགྱུར་ལ། རྟོག་པ་གཞན་གྱི་ཆོ་ག་ལས། དེ་དག་ཇི་ལྟར་སྒྲུབ་པར་འབྱུང་བའི་ཆོ་ག་བཞིན་དུ་བསྒྲུབས་ན། །དེ་བཞིན་དུ་འགྲུབ་པོ། །རྨོངས་པ་དང་ཞེས་པ་ལ་ལོང་བ་དང་ཞེས་པའོ། །སྐྱོ་ཞིང་སླར་ཡང་གཡོ་བ་དང༌། །ཞེས་པ་གནས་ནས་སྐྱོ་ཞིང་འགྲོ་འདོད་པའོ། །ནོར་འགུགས་དེ་བཞིན་མནོད་པ་དང༌། །ཞེས་པ་སླར་ཡང་གནས་དེ་ཉིད་དུ་འོང་འདོད་ལྟ་བུའོ། །སྐྱེ་བོ་དག་གིས་འགུགས་པ་དང༌། །ཞེས་པ་ཕ་རོལ་པོ་རེངས་པར་བྱའོ། །ཡུལ་དུ་འཚེ་ཞིང་འཇིགས་པ་དང༌། །ཞེས་པ་ལོ་ཏོག་ལ་སོགས་པ་ལ་གནོད་པའོ། །འཁྲུག་དང་ཞེས་པ་ཕ་རོལ་པོ་འཁྲུག་ཅེས་པའོ། །བྲུ་བ་ཉིད་ཅེས་པ་བཀྲེས་པའོ། །གང་དག་གཞན་དག་དེ་འདོད་པ། །སྔགས་པ་གཤིན་རྗེ་གཤེད་དྲན་པས། །ཞེས་པ་དེ་ལ་སོགས་པའི་ལས་དེ་དག་བྱེད་འདོད་པས་སྔགས་པ་ཁྲོ་བོ་ཆེན་པོའི་སྦྱོར་བ་བྱས་པས་ལས་དེ་དག་ཐམས་ཅད་བྱེད་པར་འགྱུར་རོ་ཞེས་པའི་དོན་ཏོ། །འདི་མན་ཆད་ནི་རྟོག་པ་ཕྱི་མ་ཞེས་བྱ་བ་བཤད་དོ། །དེ་ནས་རྟོག་པ་ཕྱི་མ་འདི། །ཇི་ལྟ་ཡིན་པ་དེ་བཤད་དོ། །ཞེས་པ་ལེའུ་འདི་ཉིད་དུ་གཏོགས་པ་ཕྱི་མའི་ཕྱི་མ་བཤད་
པ་ལ་བྱ་སྟེ། དེ་ཡང་ཇི་སྐད་གསུངས་པའི་དེ་བཞིན་དུ་བཤད་པར་བྱའོ། །སྔོན་དུ་བསྙེན་པ་བྱས་པའི་འོག་ཏུ་ལྷ་མ་ཡིན་གྱི་ཕུག་སྒོར་སོང་སྟེ། སྒྲུབ་པ་པོའི་རི་མོའི་སྐུ་གཟུགས་མདུན་དུ་བཀྲམ་ནས་སྨྱུང་བ་བྱས་ཏེ་སྟན་ལ་འདུག་ཅེས་པའི་དོན་ཏོ། །ཁྲི་ཡི་གྲངས་ཙམ་བཟླས་བྱས་ན། །ཞེས་པ། དཀྱིལ་འཁོར་བྲི་བ་དུར་ཁྲོད་མང༌། །སྔར་བཤད་མཚན་གཅིག་གིས་སྔགས་བཟླས་ཞེས་པའོ། །དེ་ནས་བུད་མེད་གཟུགས་མཆོག་ལྡན། །ཞེས་པ་དེ་ནས་ལྷ་མ་ཡིན་གྱི་བུ་མོ་སྒོར་འབྱུང་ངོ་ཞེས་པའོ། །སྒྲུབ་པ་པོ་དེའི་མདུན་དུ་ནི། །ཞེས་པ་འོངས་ནས་ལྷ་མ་ཡིན་གྱི་ཕུག་ཏུ་གཤེགས་ཤིང་དགའ་བར་བྱེད་དོ། །དེ་དག་གྲོགས་པོ་ཡིད་གཅུགས་ནས། །ཞེས་པ་ལ་སོགས་པ་གྲོགས་པོ་དང་ལྷན་ཅིག་ཏུ་དེའི་ཚེ། ལྷ་མ་ཡིན་གྱི་བུ་མོས་སྔགས་པ་ལ་བསྒོ་བ་ཁྱོད་ཀྱིས་འདི་དང་འདི་བྱར་རུང་གིས་དེ་བཞིན་དུ་བྱར་མི་རུང་གིས་མ་བྱེད་ཅིག་བསྒོ་བ་ལྟ་བུའམ། ཡང་ན་ཆོག་དེ་ལྟར་བསྒྲུབས་པས་ན་དམ་ཚིག་གིས་ལྷ་མ་ཡིན་གྱི་བུ་མོའི་གནས་སུ་འཇུག་པར་བྱེད་དོ་ཞེས་པའི་དོན་ཏོ། །ཡང་ན་གང་འདོད་པའི་ལྷ་ཡི། །ཞེས་པ་ལ་སོགས་པ་གནས་གང་ཡང་རུང་པའི་གནས་གཙང་མར་ལྕི་པའི་སྐྱང་ནུལ་བྱས་ཏེ་ས་བསྟར་བའི་བསང་པོ་བྱས་ལ་མདུན་དུས་གཞི་བསྟར་བ་བཟང་པོར་བྱས་པར་སྲ་ནས་གང་འདོད་པའི་མིང་བྱའོ། །བཙག་གམ་ལྡོང་རོས་ཀྱིས་ཀྱང་འདྲིར་རུང་ཞེས་པའོ། །མི་སྐྱོ་བར་དུ་འབུམ་བཟླས་ན། །ཞེས་པ་གནོད་སྦྱིན་ལ་སོགས་པ་གང་འགུགས་པ་འོང་བར་འགྱུར་ཞེས་པའོ། །སྒྲུབ་པར་ཇི་སྲིད་འདོད་པར་ནི། །ཞེས་པ་སྒྲུབ་པ་པོ་ཇི་སྲིད་འདོད་པ་དེ་དག་གི་ལས་རྣམས་བྱེད་པར་འགྱུར་རོ། །ལྷ་རྣམས་དག་ནི་ཐམས་ཅད་དང༌། །ཞེས་པ་འདིར་ནི་མཇུག་སྡུད་པའི་ཚིག་གོ །གནོད་སྦྱིན་ལ་སོགས་བསྒྲུབ་པ་སྤངས། །ཞེས་པ་ཤ་ཟ་དང་བྲི་ཟ་མོ་དག་ཅེས་པའོ། །ཕྱི་མའི་ཕྱི་མ་ཞེས་བྱ་བ་སྔ་མ་རྣམས་ཀྱིས་ནི་རྩ་བའི་རྟོག་པར་གསུངས་པ་རྣམས་ཀྱི་མཇུག་སྡུད་ཐུན་བུ་ཐུ་བ་ཡིན་པར་བཤད་དོ། །གསང་བ་ཕྱི་མར་གཏོགས་པའི་ལེའུ་འདི་ན་གོང་དུ་བཤད་པའི་ཕྱི་མའི་ཕྱི་མ་ཞེས་བྱ་བ་གསུངས་པ་རྣམས་ཀྱི་མཇུག་སྡུད་པ་དང་ཐུན་བུ་ཐུ་བ་ཡིན་ནོ། །མདོར་ན་སྔར་
གོང་དུ་གསུངས་པ་རྣམས་ཀྱི་ཆོག་རྒྱས་པར་བཤད་པ་ལ་བྱའོ། །འདི་མན་ཆད་ལེའུ་འདིར་གཏོགས་པའི་རྟོག་པ་ཕྱི་མའི་ཡང་ཕྱི་མ་འདི་ལ་ཞེས་བྱ་བ་བཤད་དོ། །དེ་འདིར་རྟོག་པ་ཕྱི་མ་ཡི། །ཕྱི་མ་དག་ཀྱང་བཤད་པར་བྱ། །ཞེས་བྱ་ལ་སོགས་པའོ། །རིའི་མཆོག་དག་གི་རྩེ་མོ་ལ། །ཞེས་པ་རི་བཙན་པོ་བཟང་པོའི་མཆོག་གི་རྩེ་མོ་ལ་ཞེས་པའོ། །ཡི་དགས་མང་པོའི་དཀྱིལ་འཁོར་བྲི། །ཞེས་པ་དོན་གྲུབ་ཅེས་བྱ་བའི་ལེའུ་རུ་གསུངས་པའི་ནང་ནས་ཡི་དགས་མང་པོ་ཞེས་བྱ་བའི་དཀྱིལ་འཁོར་འབྱུང་སྟེ་བྲི་བར་བྱའོ། །ཐམས་ཅད་ཤ་ཡི་གཏོར་མ་བྱ། །ཞེས་པ་ཐམས་ཅད་ཀྱི་གཏོར་མ་དཀྱིལ་འཁོར་དུ་དབུལ་བར་བྱའོ། །གྲོགས་པོ་སེམས་ནི་དཔའ་བ་དང༌། །ཡོན་ཏན་ལྡན་པ་བཟོ་བོ་དང༌། །ཞེས་པ་མཚན་ཉིད་ཀྱི་ཡོན་ཏན་དང་ལྡན་པ་ལ་བྱའོ། །མི་རོའི་གསོལ་སྔོན་བྲིས་པའི། །རི་མོ་གཞག་ནས་དེ་ནས་སུ། །ཞེས་པ་ལ་སོགས་པ་དཀྱིལ་འཁོར་དེའི་དབུས་སུ་མི་རོའི་རས་དེའི་སྟེང་དུ་རི་མོའི་གཟུགས་སྔར་བྲིས་པ་དེ་བཀྲམ་ལ་དེ་ནས་བདག་གི་ལུས་ལ་ཡན་ལག་ལ་སོགས་པ་དང༌། དེ་ངག་གི་ཡང་ཡན་ལག་ཏུ་གཏོགས་པ་ཐམས་ཅད་ལས་མི་རུས་སྦོམ་ཕྲ་ཁབ་ཙམ་གྱི་རྣོན་པོ་བྱས་པས་ཡན་ལག་དེ་དག་གི་ཁྲག་ཆ་ཤས་ཀྱིས་ཕྱུང་ནས་མི་ཐོད་ཀྱི་ནང་དུ་གཞག་ལ། དེ་ནས་མི་རོ་དེའི་བར་གྱི་བདག་གམ། །གྲོགས་པོ་གཉིས་ལས་གང་བཟེ་བོ་གཅིག་གིས་རི་མོ་བྲིས་ཟིན་པ་དེའི་སྐྲའི་པིར་གྱིས་གཟུགས་དེའི་ཡན་ལག་དང༌། ཉིད་ལག་ཐམས་ཅད་ཨུན་མི་ལན་ཞེས་བྱ་བའི་ཚུལ་དུ་རི་མོ་བྲི་བར་བྱ་སྟེ། མདོར་ན་བྱེ་བྲག་གམ་ཁྱད་པར་ཅན་དུ་བྲི་བར་བྱའོ་ཞེས་པའི་དོན་ཏོ། །དེ་ནས་དེ་ཡི་ལུས་དག་དང༌། །མིང་ཀྱང་རབ་ཏུ་གསལ་བར་བྱ། །ཞེས་པ་དེ་ནས་རི་མོའི་དེའི་སྐུ་གཟུགས་ཀྱི་ཡན་ལག་དག་ཏུ་སྔགས་པ་དག་ལས་བྱེད་པའི་ཚེ་ལུས་དག་ལ་ཙནྡན་དང༌། ཁྲག་དག་གིས་ཇི་ལྟར་བསྐུ་བར་གྲགས་པ་དེ་ལྟ་བུའི་ཚུལ་དུ་སྐུ་གཟུགས་ལ་ཡང་བྲི་བ་ཡིན་པར་ཤེས་པར་བྱ་སྟེ། ཁྲོ་བོའི་སྤྱན་དག་ཀྱང་དམར་པོར་བྲིའོ་ཞེས་པའི་དོན་ཏོ། །དེ་ལ་བགེགས་ཀྱང་མང་དུ་འབྱུང༌། །ཞེས་པ་དེ་ལྟར་བྱས་པ་དེ་ལའོ། །དེར་ནི་དཔའ་བོས་སྤྱད་པར་གསུངས། །ཞེས་པ་ཆོ་ག་
འདི་ནི་སྒྲུབ་པ་པོ་སེམས་སྟོབས་ཅན་གྱིས་བསྒྲུབ་པོ། །དཔའ་བོ་དག་གི་ལས་ཀྱང་བྱ། །ཞེས་པ་དེ་ལྟར་བྱེད་ཅིང་སྒྲུབ་པ་ཉིད་དཔའ་པོའི་ལས་ཡིན་པར་བཤད་པའི་རིགས་སོ། །ཤ་ཆེན་པོའི་བཅིངས་པའི་ལས་ཀྱང་དེ་དག་གིས་བྱའོ། །དེ་ཡི་འོག་ཏུ་བཟོ་བོ་ལ། །ཞེས་པ་དེ་ལྟར་རི་མོ་འདྲི་བའི་གྲོགས་པོ་བཟང་པོ་དེ་ལ་དཔའ་བོ་དག་གིས་ཡོན་ཡང་དབུལ། །ཞེས་པ་རིན་ཐང་མེད་པའི་ཡོན་དབུལ་པ་ལ་བྱའོ། །དེ་ཉིད་ཡོངས་སུ་རྫོགས་པར་ནི། །ཞེས་པ་རི་མོའི་དེའི་སྐུ་གཟུགས་ཀྱི་ཡན་ལག་དང༌། ཉིད་ལག་ཐམས་ཅད་དུ་བྱེ་བྲག་གམ། ཁྱད་པར་ཅན་དུ་བྱ་བ་དེ་ཡོངས་སུ་རྫོགས་པར་གྱུར་གྱི་བར་དུ་ཚུལ་བཞིན་དུ་བྲིའོ། །དེ་ལྟར་བྲིས་པའི་འོག་ཏུ་གནས་དེ་ཉིད་དུ་མདུན་དུ་བཀྲམ་སྟེ་མཚན་གཅིག་བསྒྲུབ་པོ། །རི་མོའི་སྐུ་གཟུགས་དེ་ཡང་ན་དགོད་དམ། གཡོ་ཡང་རུང་བའི་མཚན་མ་དེ་དག་བྱུང་ན་ཞེས་པའོ། །དེ་ནས་དངོས་གྲུབ་ཐོབ་པར་བཤད། །ཅེས་པ་དེ་ལྟར་མཚན་མ་བྱུང་བའི་རི་མོ་དེ། སྐུ་གཟུགས་དེ་ཡིས་དངོས་གྲུབ་ཐོབ་པར་འགྱུར་ཞེས་པའོ། །མཚན་མ་ཉི་མ་བཞིན་དུ་འབར། །ཞེས་པ་སྒྲུབ་པ་པོ་དེའི་འབར་ཞེས་པའོ། །སྒྲུབ་པ་དེ་ལ་ལྷ་རྣམས་ཀྱང༌། །ཞེས་པ་དེ་ལྟར་བསྒྲུབ་པའི་སྒྲུབ་པ་པོ་དེ་ལ་གདོན་མི་ཟ་བར་ཕྱག་འཚལ་པར་འགྱུར་ཞེས་པའི་དོན་ཏོ། །ཀུན་དུ་བཀུར་བ་རྒྱལ་པོར་འགྱུར། །ཞེས་པ་རིག་འཛིན་གྱི་རྒྱལ་པོར་འགྱུར་ཞེས་པའོ། །ཡང་ན་ཆོག་ཤེས་པ་ཡིས། །ཞེས་སྒྲུབ་པ་པོས་ཞེས་པའོ། །རི་མོ་ཞི་བ་སྔོན་བཞིན་དུ། །བླངས་ཏེ་བསྲེགས་པའི་སྟེང་དུ་གཞག །དེ་ནས་བསྲེགས་པ་དེར་འདུག་ནས། །གཅིག་པུ་རལ་གྲི་བླངས་ནས་སུ། །ཞེས་པ་ཁྲག་དང་སྐྲའི་པིར་གྱིས་མ་བྲིས་པའི་རི་མོའི་སྐུ་གཟུགས་ལ་བྱ་སྟེ། སྐུ་གཟུགས་དེ་བླངས་ལ་མི་རོ་བསྲེགས་པའི་མདུན་གྱི་ནམ་མཁའ་ལ་བྲིས་ཏེ་གཞག་གོ །མི་རོ་བསྲེགས་པའི་གནས་དེར་སྔགས་པ་ཉིད་ཀྱང་འདུག་ནས་གྲོགས་མེད་པས་སྒྲུབ་པའི་རལ་གྲི་བླངས་ནས་བསྒྲུབ་ཅེས་པའོ། །མཚན་མོ་གཤིན་རྗེ་གཤེད་བཟླས་པ། །ཞེས་པ་མཚན་མོ་བསྒྲུབ་ཅེས་པའོ། །འབར་བར་འགྱུར་གྱི་བར་དུའམ། །ཞེས་པ་རི་མོའི་སྐུ་གཟུགས་ལ་དངོས་གྲུབ་རྣམ་གསུམ་མ་བྱུང་གི་བར་དུ་
བཟླས་བརྗོད་བྱའོ། །རལ་གྲི་མཆོག་དེ་བྱ་བ་ཡང༌། །ཞེས་པ་དེ་ལྟར་སྒྲུབ་པའི་རལ་གྲིའི་ཚད་གསུངས་སོ། །སྲིད་དུ་སོར་ནི་སུམ་ཅུ་རྩ་གཉིས་ཀྱིས་ཞེས་པའོ། །ཡན་ལག་ཐམས་ཅད་ཡོངས་རྫོགས་པ། །ཞེས་པ་ལ་སྦོམ་ཕྲག་མེད་པ་ཞེས་པའོ། །སྒྲུབ་ཅིང་སྒྲ་ཡི་སོའི་དེ་ཅན། །ཞེས་པ་རལ་གྲི་རྣོན་པོའི་སོ་ལ་བྱའོ། །དེ་ལྟར་རྟོག་པ་ཕྱི་མ་ཡང༌། །ཞེས་པ་མཇུག་སྡུད་པའི་ཚིག་ལ་བྱའོ། །འདི་མན་ཆད་ཕྱག་རྒྱའི་མཚན་ཉིད་བཤད་དོ། །དེ་ནས་གཞན་ཡང་ཕྱག་རྒྱ་ནི། །རབ་ཏུ་འབར་བ་གཅིག་པུ་བཤད། །ཅེས་པ་གཅིག་ཅེས་བྱ་བ་ནི་མཆོག་དམ་པ་ལ་བྱ་སྟེ། དེ་ཡང་གཟི་བརྗིད་དང་ལྡན་པ་དེ་བཤད་དོ་ཞེས་པའོ། །གང་གིས་འགྲུབ་པར་འགྱུར་པ་ཡི། །ཞེས་པ་བེ་ཅོན་གྱི་ཕྱག་རྒྱ་འགྲུབ་པར་འགྱུར་པ་ལ་བྱའོ། །ལག་པ་གཡས་པའི་སོར་མོ་ཡིས། །ཞེས་པ་སྔར་བཤད་པ་དང་འདྲའོ། །མཐེ་བོང་སྦས་ཏེ་གྱེན་དུ་བསྒྲེང་བར་བྱས་པའི་ཕྱག་རྒྱ་དེ་ཞེས་པ་དེ་མཐེ་བོང་ནང་དུ་བཅུག་སྟེ་བཅིངས་ལ་གྱེན་དུ་བསྒྲེང་བའོ། །ལྷ་ཉིད་ཀྱི་ནི་སྔགས་ལྡན་པར། །བེ་ཅོན་གྱི་ཕྱག་རྒྱ་འདི་ལ་ཡང་ལས་ཐམས་ཅད་དང་སྦྱར་བར་བྱ་སྟེ། ལས་ཀུན་ལ་བཅིང་པར་བྱ་ཞེས་པ་ཡི་གེ་བཅུ་གཅིག་པའི་སྔགས་དང་ལྡན་པར་ཕྱག་རྒྱ་བཅིང་བར་བྱའོ། །སྤྱན་དྲང་བ་དང༌། མཆོད་པ་དང་ཞེས་པ་མཛུབ་མོས་ནང་དུ་གཡབ་པས་སྤྱན་དྲང་ཞེས་པའོ། །གཤེགས་སུ་གསོལ་བ་དང༌། །ཞེས་པ་མཛུབ་མོས་ཕྱིར་གཡབ་པས་གཤེགས་སུ་གསོལ་ཞེས་པའི་དོན་ཏོ། །འཇམ་དཔལ་གཤིན་རྗེ་གཤེད་རྒྱལ་པོའི་རྟོག་པ་ཕྱི་མའི་ཡང་ཕྱི་མ་གསང་པའི་བཤད་པ་རྫོགས་སོ།། །།རབ་ཏུ་གསང་བར་གཏོགས་པའི་ལེའུ་འདིའི་དོན་རྣམ་པ་དགུས་བསྟན་པའོ། །དེ་སྔགས་ཐོག་མར་བསྟན་ནས་དངོས་གྲུབ་གླེང་བ་དང༌། ཞུ་བ་ཞུས་པ་དང༌། ཞུས་པའི་ལན་བསྟན་པ་དང༌། བསམ་གཏན་པ་དང༌། དཀྱིལ་འཁོར་བསྟན་པ་དང༌། མཆོད་པ་བསྟན་པ་དང༌། ས་བོན་དགོད་པ་བསྟན་པ་དང༌། སྔགས་སྤེལ་བ་བསྟན་པ་དང༌། མཇུག་སྡུད་པ་རྣམས་ཀྱིས་བསྟན་པའོ། །སྔགས་ཐོག་མར་བསྟན་པའོ། །སྔགས་ཐོག་མར་བསྟན་ནས་དངོས་གྲུབ་གླེང་བ་ཞེས་བྱ་
བ་དང་པོར་བཤད་དེ། ཨོཾ་ཨ་ཀྲོ་ཏེ་ཀ་ཡ་མཱ་ནྟ་ཀ་ཧཱུ༵་ཧཱུ༵་ཧཱུ༵་ཕཊ་ཕཊ་ཕཊ་སྭཱ་ཧཱ། ཞེས་པ་བཅུ་གཅིག་པའི་སྔགས་དང་སྔགས་འདི་འདྲ་སྟེ། སྔགས་འདིས་ཡི་གེ་བཅུ་གཅིག་པའི་དངོས་གྲུབ་དང་ལས་ཐམས་ཅད་འདིར་འགྲུབ་ཏུ་རུང་ངོ༌། །སྔགས་གཞན་ནོ་ཞེས་པ་ཡི་གེ་བཅུ་གཅིག་པ་ལས་གཞན་ནོ་ཞེས་བྱ་བའི་དོན་ཏོ། །ཨོཾ་ཨཱཿ་ཧཱུ༵། སྙིང་པོ་ཞེས་པའོ། །འདི་ཡང་གཞན་ནོ་ཞེས་པ་གོང་མ་ལས་གཞན་ཞེས་པའོ། །ཡི་གེ་བཅུ་གཅིག་རྒྱལ་པོ་ཡིས། །ཞེས་པ་ཡི་གེ་བཅུ་གཅིག་པའི་མགོར་སྔགས་འདི་བཟླས་ན། དངོས་གྲུབ་དང་ལས་འདི་དག་འདི་བཞིན་དུ་འགྲུབ་པར་འགྱུར་རོ། །དེ་ལ་རབ་ཏུ་གསང་བ་ཞེས་ཅིའི་ཕྱིར་བྱ་ཞེ་ན། སྔགས་ཀྱི་རྒྱུད་འདི་དག་ཉན་ཐོས་དང་རང་སངས་རྒྱས་ལ་སོགས་པ་དང༌། ཕྱི་རོལ་པ་རྣམས་ལ་ཡང་གསང་བ་དང་སྔགས་པ་ཉིད་ལ་ཡང་གསང་སྟེ་དཀའ་ཐུབ་སྤྱད་མི་དགོས་པར་རྣལ་འབྱོར་བྱ་བ་འབའ་ཞིག་གིས་འགྲུབ་པར་འགྱུར་པའི་ཆོག་འདི་སྔར་ཐོག་མར་བསྟན་ན་སྔགས་པ་དཀའ་ཐུབ་དག་མི་སྤྱོད་ཅིང་ཆོ་ག་ཅན་གྱིས་སྒྲུབ་ཅིང་ལས་བྱ་བ་རྣམས་ལ་དད་ཅིང་མོས་པ་དང༌། འཇུག་པར་མི་འགྱུར་པའི་ཕྱིར་འདིར་དཀའ་ཐུབ་སྤྱད་པ་དང༌། ཆོ་ག་ཕལ་པོ་ཆེ་སྒྲུབ་ཅིང་ལས་སུ་བྱ་བ་རྣམས་སྔར་བསྟན་ཅིང་བཤད་ནས་དེའི་འོག་ཏུ་དཀའ་ཐུབ་དང་ཆོག་དག་བྱ་མི་དགོས་པར་སེམས་ཉིད་ཀྱིས་རྣལ་འབྱོར་དུ་བྱས་པ་ཙམ་གྱིས་ཐམས་ཅད་འགྲུབ་པར་འགྱུར་བའི་ཆོ་ག་འོག་ནས་འབྱུང་བ་འདི་བཤད་པས་ན། དེ་ལྟ་བུ་དག་གི་ཕྱིར་གསང་བ་ཞེས་བྱའོ། །འདི་མན་ཆད་ཞུ་བ་ཞུས་པ་ཞེས་བྱ་བ་བཤད་དོ། །ཁྲོ་བོ་རྣམ་པར་རྒྱལ་པ་ཡི། །རྩ་བ་དང་ནི་ཕྱི་མ་དང༌། །ཞེས་པ་གོང་དུ་བཤད་པ་རྣམས་ཀྱི་རྟོག་པའོ། །རྟོག་པ་མ་ལུས་རྒྱས་པ་དག །ཅེས་པ་གོང་དུ་རྒྱས་པར་བཤད་པ་དེ་དག་ཅེས་པའོ། །ལྷ་དེ་རྣམས་ཀྱིས་ལེགས་མཐོང་ནས། །ཞེས་པ་དང་པོར་བཤད་པ་ལྷའི་འཁོར་དུ་འདུས་པ་རྣམས་ལ་བྱའོ། །འཇིག་རྟེན་འཇིག་རྟེན་འདས་པ་ཀུན། །ཐལ་མོ་རབ་ཏུ་སྦྱར་ནས་སུ། །ཞེས་པ་ལྷ་ཀུན་གྱི་ས་འོག་ནས་འབྱུང་བའི་ཐེ་ཚོམ་ཞུ་བའི་ཕྱིར་ཐལ་མོ་སྦྱར་ནས་ཁྲོ་བོའི་རྒྱལ་པོ་ལ་ཞུས་པ་ཞེས་པའི་དོན་ཏོ། །གཤིན་རྗེ་གཤེད་ལ་འདི་སྐད་སྨྲས།
བཅོམ་ལྡན་ཁྱོད་ཀྱིས་རྟོག་པ་འདི། །སྒྲུབ་པ་རྣམས་ལ་ཕན་པའི་ཕྱིར། །རབ་ཏུ་ངོམ་ཚར་བཤད་ལགས་ཏེ། །ཞེས་པ་ལས་དང་དངོས་གྲུབ་དང་ངོ་མཚར་ཆེ་བ་སྔར་གོང་དུ་བཤད་པ་རྣམས་ཞེས་པའོ། །ཇི་སྐད་བཤད་པའི་སྨྱུང་བ་ཡིས། །ཞེས་པ་ལ་སོགས་པ་བཟླས་བརྗོད་དང་སྦྱིན་སྲེག་ལ་སོགས་པ་ཇི་སྐད་གོང་དུ་བཤད་པའི་ཆོ་ག་རྣམས་ཀྱི་ཚུལ་དེ་བཞིན་དུ་སྦྱད་པས་ཁྲོ་བོ་ཀཱི་ལི་ཀཱི་ལ་ལ་སོགས་པ་འགའ་ཞིག་གིས་བསྒྲུབ་ན་དཀའ་ཐུབ་ལ་སོགས་པ་སྤྱོད་པ་དེའི་རྒྱུས་གང་གི་ཚེ་མ་ཉེས་པར་འགྱུར་པ་དེའི་ཚེ་སྒྲུབ་པ་པོ་ལ་དངོས་གྲུབ་སྩོལ་བར་མཛད་ན། ཁྲོ་བོའི་རྒྱལ་པོའི་ཁྱོད་དང་བྱེ་བྲག་དང༌། ཁྱད་པར་ཅི་མཆིས་པར་འགྱུར་ཞེས་དྲིས་པའི་དོན་གོང་དུ་སྔར་བཤད་པའི་སྦྱད་པའི་ཆོ་ག་རྣམས་ལ་བྱའོ། །ཕྱིའི་ཆོ་ག་དཀའ་ཐུབ་ལ་སོགས་པ་རྣམས་མ་སྤྱད་པར་ཡང་སེམས་ཀྱི་རྣལ་འབྱོར་ཙམ་གྱིས་དབང་ཉིད་དུ་དངོས་གྲུབ་ཐོབ་པར་འགྱུར་བ་དེའི་ཆོ་ག་ཁྱོད་ཀྱིས་གསུངས་ཞེས་བྱ་བའི་ཐ་ཚིག་གོ །བཅོམ་ལྡན་འདས་ཀྱི་རྟོག་པ་དང༌། །ཞེས་པ་ཁྲོ་བོ་ཆེན་པོ་ཁྱོད་པར་གྱུར་པ་ཅི་ཞིག་མཆིས་ཞེས་པ་ཁྲོ་བོ་གཞན་ལས་ཁྱད་ཅི་མཆིས་ཞེས་པའོ། །འདི་མན་ཆད་ཞུས་པའི་ལན་བསྟན་པ་ཞེས་བྱ་བ་བཤད་དོ། །ལྷ་མཆོག་དེ་དག་ཐམས་ཅད་ཀྱིས། །ཕྱག་འཚལ་དེ་སྐད་སྨྲས་པ་དང༌། །ཁྲོ་བོ་དྲག་ཏུ་བཞད་པ་ཡིས། །ཞེས་པ་ཁྲོ་བོ་བཞད་པའི་སྒྲ་གསུངས་པའོ། །ལྷ་ཡི་ཚོགས་རྣམས་འཇིགས་རྨོངས་པ། །ཞེས་པ་བཞད་པ་ཆེན་པོས་ལྷ་རྣམས་ཐམས་ཅད་སྐྲག་པ་དང་རྨོངས་པར་གྱུར་པའོ། །མ་འཇིགས་མ་འཇིགས་ཞེས་གསུངས་པའི། །ཞེས་པ་འདི་སྐད་བཀའ་སྩལ་པ་ཉིད་ཕན་པའི་ཚིག་གིས་ལྷ་རྣམས་དབུགས་ཕྱུང་ཞེས་བྱའོ། །ཁྱེད་རྣམས་ཀྱིས་ནི་གང་སྨྲས་པ། །ཞེས་པ་ལྷ་རྣམས་ང་ལ་གང་ཞུས་པ་རྣམས་ཞེས་པའོ། །སྒྲུབ་པ་དག་ནི་མེད་པར་ཡང༌། །ཞེས་པ་ཕྱིའི་ཆོ་ག་སྤྱོད་པའི་ཆོ་ག་རྣམས་ནི་དངོས་གྲུབ་འགྲུབ་པར་འགྱུར་པའི་རྒྱུ་སྟེ། དེ་སྒྲུབ་མི་དགོས་ཞེས་བྱའོ། །སྦྱིན་སྲེག་དང་དཀའ་ཐུབ་ལ་སོགས་ཏེ་ཕྱིའི་སྤྱོད་པའི་ཆོ་ག་རྣམས་མེད་པར་ཡང༌། སྤྱོར་བ་ཤེས་པས་འགྲུབ་འགྱུར་བ། །ཞེས་པ་ནང་གི་སྦྱོར་བ་ནི་བྱང་ཆུབ་སེམས་སོ། །ཕྱིའི་སྦྱོར་བ་ནི་ཀུན་རྫོབ་བྱང་ཆུབ་
ཀྱི་སེམས་དེ་ལྷའི་སྐུ་བསྒོམས་པའོ། །དེ་ཡང་འོག་ནས་ཞིབ་ཏུ་བཤད་དོ། །ཕྱི་ནང་གི་སྦྱོར་བ་ཞེས་པས་འགྲུབ་པར་འགྱུར་བ་དེ་བཤད་པར་བྱས། ལྷ་རྣམས་ཀྱིས་མཉན་པར་གྱིས་ཞེས་པའི་དོན་ཏོ། །བདེ་གཤེགས་དངོས་གྲུབ་གཅིག་པུ་ལས། །ཞེས་པ་སྤྱིར་ནི་བླ་ན་མེད་པའི་བྱང་ཆུབ་སྒྲུབ་པའི་དངོས་གྲུབ་གཅིག་པུར་ཟད་པས་དེ་ལས་སྒྲུབ་ཏུ་མེད་མོད་ཀྱི་འོན་ཀྱང་བྱང་ཆུབ་སེམས་ཀྱི་ས་ཟིན་པའི་དངོས་གྲུབ་ཐ་དད་པ་རྣམ་པ་མང་པོ་སྒྲུབ་པའི་ཐབས་དག་བཤད་ཅིང་བསྟན་པ་རྣམས་ནི་སེམས་ཅན་ཀྱི་སྐལ་བ་དང༌། དད་པ་དང༌། བསོད་ནམས་ཀྱི་ཚད་དང༌། ལས་དང་རྣམ་པར་སྨིན་པ་ཐ་དད་པ་མི་འདྲ་བ་རྣམས་འདུལ་བའི་དབང་དང་དངོས་གྲུབ་ཐ་དད་པ་རྣམས་པ་མང་པོ་དག་གསུངས་སོ། །དེ་ནས་ཏིང་འཛིན་ཚུལ་ལས་ནི། །མཚན་མ་དེ་དང་དངོས་གྲུབ་སྟེ། །ཞེས་པ་དཀའ་ཐུབ་དང༌། བརྟུལ་ཞུགས་དང་སྨྱུ་བ་ལ་སོགས་པའི་ཆོ་ག་དག་སྤྱོད་པའི་སྒོ་ནས་ཞུགས་ཏེ་འགྲུབ་སྟེ། སེམས་ཅན་རྣམས་ཀྱིས་ཏིང་ངེ་འཛིན་གྱི་ཚུལ་དུ་བསྒོམས་པས་ལས་ཀྱང་མཚན་མ་དེ་དག་འབྱུང་བར་འགྱུར་ཞིང་དངོས་གྲུབ་དག་ཀྱང་ཐོབ་པར་འགྱུར་རོ་ཞེས་པའི་དོན་ཏོ། །འདི་མན་ཆད་བསམ་གཏན་པ་ཞེས་བྱ་བ་བཤད་དེ། ཐོག་མ་བྱང་ཆུབ་རྩ་བ་བརྟན། །ཞེས་པ་སངས་རྒྱས་རྣམས་ཀྱང་སྔོན་བྱང་ཆུབ་ཀྱི་སེམས་འདི་ལ་བརྟེན་ཏེ། དེའི་སྒོ་ནས་མངོན་པར་སངས་རྒྱས་པའོ། །མངོན་པར་སངས་རྒྱས་སུ་བསྒྲུབ་འདོད་པ་དེ་ཡང་བྱང་ཆུབ་ཀྱི་སེམས་རྩ་བར་འགྱུར་བ་དེ་ལ་བརྟེན་ནས་བླ་ན་མེད་པར་འགྱུར་བའོ་ཞེས་པའི་དོན་ཏོ། །ཤེས་རབ་དེ་ལྟ་བུ་ཡང་བསྒོམ། །ཞེས་པ་བྱང་ཆུབ་ཀྱི་སེམས་བསྒོམ་ཞེས་བྱ་བའི་དོན་ཏོ། །དེ་ཡང་ལྷག་མཐོང་དང་ཞི་གནས་དང་འབྲེལ་བར་བསྒོམ་མོ། །སེམས་ཀྱང་རྣམ་པར་མི་རྟོག་པས། །བདེ་གཤེགས་དངོས་གྲུབ་དེ་དག་ཐོབ། །ཅེས་བཞི་གནས་ཀྱི་ཚུལ་དུ་རྣམ་པར་མི་རྟོག་པའི་ཏིང་ངེ་འཛིན་བསྒོམས་ན། བླ་ན་མེད་པའི་བྱང་ཆུབ་ཀྱི་དངོས་གྲུབ་དག་ཐོབ་པར་འགྱུར་རོ། །སྔར་སྟོང་པ་ཉིད་མི་དམིགས་པའི་ཏིང་ངེ་འཛིན་བསྒོམས་ནས་དེའི་རྗེས་སུ་འབྱུང་བའི་དཀྱིལ་འཁོར་བསམ་དེའི་སྟེང་དུ་པདྨའི་དཀྱིལ་འཁོར་
བསམས་ཏེ། དེའི་སྟེང་དུ་བདག་གི་སྙིང་ག་ཙམ་དུ་ཉི་མའི་དཀྱིལ་འཁོར་བསམས་ཏེ། དེའི་སྟེང་དུ་ས་བོན་ཧཱུཾ་བསམས་པ་ལས་རིམ་གྱིས་བེ་ཅོན་ལས་ལྷའི་སྐུར་རྫོགས་པ་བསྒོམ་མོ། །དེའི་གཟུགས་སུ་བསྒྱུར་བ་བྱས་སོ། །ཞེས་པ་དེ་ལྟར་རྣམ་པར་མི་རྟོག་པའི་ཏིང་ངེ་འཛིན་བསྒོམ་པ་ལས་ལངས་ནས། ཀུན་རྫོབ་ཏུ་བྱང་ཆུབ་ཀྱི་སེམས་ལྷའི་སྐུར་བསྒྱུར་བ་བསྟན་ཏོ། །ས་བོན་མཚོན་ཆ་མང་པོར་ལྡན། །ཞེས་པ་ས་བོན་ཧཱུཾ་ལས་ལྷའི་སྐུའི་མཚོན་ཆའི་ཕྱག་རྒྱ་ཐམས་ཅད་འབྱུང་ངོ༌། །ཕྱག་མཚན་གྱི་མཚོན་ཆ་རྣམས་དང་ལྡན་པར་བསྒོམས་ཞེས་པའི་དོན་ཏོ། །ཁྲོ་བོ་ང་ཡི་ཞལ་དུ་བསྒྱུར། །ཞེས་པ་ཁྲོ་བོ་ངའི་ཞལ་དུ་བསྒྱུར་རོ། །དྲིལ་བུ་གསིལ་བའི་སྒྲ་ཡང་འབྱིན། །ཞེས་པ་ཨ་ལ་ལ་ཞེས་པ་ལྗགས་འདྲིལ་བའི་ཚུལ་དུ་སྒྲ་འབྱིན་ནོ། །ཁྲོ་བོ་ཞལ་ནི་བབས་པར་ལྡན། །ཞེས་པ་དེ་ལྟ་བུའི་ཚུལ་དུ་བསྒོམ་པ་ཡང༌། རོ་ཡོད་པའམ། ཉམས་པ་དང་ལྡན་པས་བསྒོམ་མོ། །ང་ཡི་གཟི་དང་མཐུ་ལྡན་བྱས། །ཞེས་པ་གཟི་བརྗིད་དང༌། མཐུ་དང༌། ཁྲོ་བོའི་རྒྱལ་པོའི་ཚུལ་ལྟར་བསྒོམ་པར་བྱའོ། །ཀུན་དུ་དགའ་བའི་སྙིང་པོར་ལྡན། །ཞེས་པ་ཡི་གེ་ཧཱུཾ་གི་སྒོ་ནས་ལྷའི་སྐུར་གྱུར་ཅིང་ངེས་འབྱོར་བ་ཕུན་སུམ་ཚོགས་པར་འབྱུང་བས་ན་ཡི་གེ་ཧཱུཾ་ལས་ཀུན་དུ་དགའ་བ་ཞེས་ཀྱང་བྱ་སྟེ། སྙིང་པོ་དེ་ཐུགས་ཀར་བསམ་མོ་ཞེས་བཤད་དེ། གང་གི་ཡིད་ལ་གང་བསྒོམ་པ། །དེ་ལ་ང་ཡིས་ཐུགས་དགྱེས་པ། །ཞེས་པ་སུའི་ཡིད་ལ་གོང་དུ་བཤད་པའི་ཚུལ་བཞིན་དུ་བསྒོམ་པ་དེ་ལ་ཁྲོ་བོའི་རྒྱལ་པོ་དགྱེས་ཞེས་པའོ།། ཇི་ལྟ་བའམ་གང་ཡང་རུང༌། །ཞེས་པ་ལ་སོགས་པ་ཆོ་གར་སྤྱོད་པ་རྣམས་དེ་ལྟར་བསྒོམས་པ་དེའི་མདུན་ནམ་རྒྱབ་བམ་ཕྱོགས་གང་ནས་ཀྱང་སྐྱོབ་ཅིང་སྟོང་པས་ན་སྔགས་པས་ལས་ཀུན་བྱེད་པར་འགྱུར་ཏེ། དེ་བཞིན་དུ་འགྲུབ་པར་འགྱུར་རོ་ཞེས་པའི་དོན་ཏོ། །གང་དག་ང་ཡི་ཕྱག་ལྔ་བཅུ། །ཞེས་པ་ཕྱག་གཡས་གཡོན་ལ་ཕྱག་ཉི་ཤུ་རྩ་ལྔ་ལྔ་སྟེ། སྤྱིར་ཕྱག་ལྔ་བཅུ་པར་བསྒོམ་མོ། །བེ་ཅོན་གདེངས་པས་བསྡིགས་པར་མཛད། །ཅེས་པ་འདི་ནི་མཚོན་ཆ་ཙམ་དུ་ཟད་དེ་གོང་དུ་སྨོས་པའི་ཕྱག་རྒྱའི་མཚན་མ་རྣམས་ཀྱི་སྟེང་དུ་ཅི་རིགས་པའི་མཚོན་ཆ་
རྣམས་ཀྱིས་མནན་ཏེ། སྤྱིར་ཕྱག་རྒྱའི་མཚོན་ཆ་རྣམས་ལྔ་བཅུ་ཚང་བར་ཕྱག་ན་བསྣམས་པ་ལ་བྱའོ། །ཁྲོ་གཉེར་བསྙེར་པའི་ལྟ་བ་ཅན། །ཞེས་པ་དཔྲལ་བའི་གཉེར་མ་ཉིད་དེ་དང་ལྡན་པར་བྱས་ལ་ཁྲོ་བོའི་ལྟ་བ་ཡང་བྱའོ། །འཇིགས་པའི་སྦྲུལ་གྱིས་རོ་སྟོད་དཀྲིས། །ཞེས་པ་སྦྲུལ་ཆེན་པོས་སེ་རལ་ཁ་ལ་སོགས་པའི་ཚུལ་དུ་རྒྱན་དུ་བྱས་པའོ། །ཞལ་གཅིག་སྤྱན་ཡང་གསུམ་མཉམ་པ། །ཞེས་པ་དབུ་གཅིག་ལ་སྤྱན་ཡང་གསུམ་ཞེས་པའོ། །འབྲུག་གི་སྒྲ་དབྱངས་སྒྲ་སྒྲོགས་པ། །ཞེས་པ་འབྲུག་གི་སྒྲ་སྒྲོགས་པའི་ཚུལ་དུའོ། །སྟག་ལྤགས་ཞེས་པ་ཤམ་ཐབས་སོ། །ཕྱག་ལྔ་བཅུ་ན་བསྣམས་པའི་ཕྱག་མཚན་རྣམས། །མཚོན་ཆའི་ཕྱོགས་རྣམས་འབར་ཞིང་འཁྲུགས། །ཞེས་པའོ། །སྤྱན་དང་གཙུག་ཕུད་རྩ་དམར་སེར། །ཞེས་པ་གཙུག་ཕུད་དེ་ལྟ་བུ་ལ་བྱ་ཞེས་པའོ། །ཞལ་གཉིས་གདངས་ཤིང་ཚམ་ངམ་མཛད། །ཅེས་པ་གཡོན་བརྐྱང་བའི་ཚུལ་དུ་གདངས་པ་དེ་ཉིད་ཚམ་ངམ་མཛད་པའོ། །ས་ཡི་སྟེང་དུ་ཟ་ཟ་ལྟ། །ཞེས་པ་འདི་འདྲ་བའི་གཟུགས་ཅན་དུ་གནས་སོ། །བཅིབས་པ་མ་ཧེ་ལ་བཅིབས་པ། །ཞེས་པ་འོག་ནས་བཤད་པ་འདྲ་བའི་མ་ཧེ་ལ་བཅིབས་སོ། །སེམས་པའམ་རི་མོ་ལ་བྲིས་པ་ལ་སོགས་པ་དེ་ལྟ་བུའི་གཟུགས་ཡིད་ལ་སེམས་པའམ་ཡང་ན་རི་མོའི་སྐུ་གཟུགས་བྲིས་ཤིང་སྒྲུབ་པ་པོ་མོས་ཤིང་འདུག་པས་གཟུགས་དེ་མདུན་དུ་བསམས་པ་ལའམ། རི་མོའི་སྐུ་གཟུགས་མདུན་དུ་བཀྲམ་པ་ལ་མཆོད་པ་བྱའོ། །ཚུལ་དེ་ལྟར་བྱེད་པ་དེ་ལ་རིང་པོར་མི་ཐོགས་པར་ཁྲོ་བོ་དེ་དགྱེས་ནས་སྒྲུབ་པ་པོ་ལ་འཕྲོགས་པར་འགྱུར་རོ། །ཇི་ལྟར་འདོད་པའི་དོན་རྣམས་ནི། །ཞེས་པ་དེ་ལྟར་གྱུར་ན་བདག་གང་འདོད་པའི་དོན་རྣམས་ཐེ་ཚོམ་མེད་པར་འགྲུབ་པར་འགྱུར་རོ། །གདོན་མི་ཟ་བར་སྒྲུབ་པར་བྱེད། །ཅེས་པ་ཐེ་ཚོམ་མེད་པར་འགྲུབ་པར་འགྱུར་རོ། །རྣམ་པར་གནོད་པ་ཞེས་པ་བདུད་དང༌། མུ་སྟེགས་དང༌། ལོག་འདྲེན་རྣམས་གནོད་པའི་གཟུགས་ཞེས་པའོ། །གཟུགས་དེ་ནི་ཞེས་པ་དེ་ལྟ་བུའི་རི་མོའི་གཟུགས་དེ་བདུད་ལས་རྒྱལ་བ་ཡིན་པར་བསྒྲགས་སོ། །དེ་ཡང་གཟུགས་དེའི་ཡོན་ཏན་ལ་བྱ་ཞེས་པའི་དོན་
ཏོ། །ཐོག་མར་བདག་གི་དམ་ཚིག་སྦྱིན། །ཞེས་པ་ཐོག་མར་ཁྲོ་བོའི་རྒྱལ་པོའི་གཟུགས་འདྲི་བར་འདོད་ན་དང་པོར་བཟོ་བོ་རི་མོ་མཁན་དམ་ཚིག་ཅན་དུ་བྱ་བའི་ཕྱིར་དཀྱིལ་འཁོར་དུ་གཞུག་གམ། ཡང་ན་དེ་བཞིན་གཤེགས་པའི་དམ་ཚིག་ལག་པ་གཉིས་ཐལ་མོ་སྦྱར་ནས་སྔགས་ཨོཾ་ན་མོ་བུདྡྷ་དྷ་རྨ་སཾ་གྷེ་བྷྱཿ་ཞེས་བྱ་བ་བརྗོད་ཅིང་དམ་ཚིག་བསྟན་པས་རི་མོ་མཁན་ལ་བྱིན་ཏེ་དམ་ཚིག་ཅན་དུ་འགྱུར་ཏེ། དེ་ནས་རི་མོ་འདྲི་རུ་གཞུག་གོ །བསྲུང་མཆོག་ཚུལ་བཞིན་བྱས་ནས་སུ། །ཞེས་པ་རི་མོ་མཁན་ལ་སྔགས་དང་ཕྱག་རྒྱས་བསྲུངས་ཏེ། དེ་ལ་སྔགས་མན་ཞེས་བྱ་བའི་སྐྱིན་པར་ཨོཾ་འམ་ཡང་ན་མ་ཞེས་བྱ་བ་བཟླས་པས་བསྲུང་ངོ་ཞེས་བྱ་བའི་དོན་ཏོ། །རས་ནི་སོར་བཅུའི་སོར་ཚད་ལ། །ཞེས་པ་རས་ཆེད་དུ་བཏགས་པའི་སྲིད་དུ་སོར་བཅུའི་ཚད་དུ་ཕྱིན་པ་གྲུ་བཞི་པ་ལ་བྲིའོ། །སྔགས་པ་བཟོ་བོ་ཡོན་ཏན་ཅན། ཞེས་པ་རི་མོ་མཁན་ཡོན་ཏན་ཅན་ལ་སྔགས་པས་འདིར་གཞུག་གོ །ཡིད་ནི་བརྟན་པར་བྱ་བའི་ཕྱིར། དབེན་པའི་གནས་སུ་མི་མངོན་པར། །ཞེས་པ་རི་མོའི་སྐུ་གཟུགས་དེ་ལྟར་བྲི་བར་ཡང་སེམས་གོམས་པར་བྱ་བའི་རྟེན་ཙམ་གྱི་ཕྱིར་བྲིའོ། །དེ་ལྟར་བྲི་བ་ཡང་དབེན་པའི་གནས་སུ་སུས་ཀྱང་མི་མཐོང་བར་བྲིའོ། །ཚོན་རྩི་དགེ་བ་བཟང་པོ་ཡིས། །ཞེས་པ་སྦྱིན་མེད་པ་ལ་བྱ། །རི་མོ་ཐོག་མར་བྲི་བར་བྱ། །ཞེས་པ་ཚུལ་དེ་ལྟར་རི་མོའི་སྐུ་གཟུགས་ཐོག་མར་བྲི་བར་བྱའོ། །བྲིས་ཟིན་ནས་ནི་བདེ་བར་གཞག །ཅེས་པའོ། །ང་ཡི་གཟུགས་སུ་གྱུར་པར་བྱས། །ཞེས་པ་རི་མོའི་སྐུ་གཟུགས་ཅི་འདྲ་བ་བྲི་བར་བཤད་དེ་སྔར་དེ་གོང་དུ་བཤད་པ་དང་འདྲའོ། །ཁྲོ་བོའི་ཞལ་ནི་བབས་པར་བྱས། །ཞེས་པ་བྱིན་ཅན་དུ་བཞུགས་པའི་ཚུལ་དུ་བྲི་བར་བྱ་ཞེས་པའོ། །ང་ཡི་གཟི་དང་ཞེས་པ་ཁྲོ་བོ་བཞིན་དུ་བྲི་ཞེས་པའོ། །ཀུན་དུ་དགའ་བའི་སྙིང་པོར་ལྡན། །ཞེས་པ་མདུན་གྱི་གཟུགས་དེའི་ཐུགས་ཀར་སྙིང་པོ་བསམ་ཞེས་པའོ། །གལ་ཏེ་དམ་ཚིག་མི་ལྡན་པའི། །ཞེས་པ་དམ་ཚིག་མེད་པའི་སེམས་ཅན་གྱིས་མཐོང་ན། མྱུར་དུ་རྣམ་པར་རྨོངས་པར་འགྱུར། །ཞེས་པ་མྱོས་པ་འཐོམ་པ་མི་དྲན་པར་འགྱུར་རོ་ཞེས་པའི་དོན་ཏོ། །དེ་བས་རྣམ་པ་ཐམས་ཅད་དུ། །ཞེས་པ་
རི་མོ་མཁན་བཟོ་བོས་སོ། །བསྲུང་བ་དྲག་པོ་ཀུན་དུ་བྱ། །ཞེས་པ་སྔགས་པས་སྔགས་དང་ཕྱག་རྒྱ་མཚམས་བཅད་པ་དང་བསྲུང་བ་བྱས་ཞེས་པའོ། །རྣམ་པ་གཞན་དུ་བཞག་གྱུར་ཏམ། །ཞེས་པ་གནས་གཞན་དུའོ། །གང་དུ་མཆོད་པ་མ་བྱས་ན། །ཞེས་པ་གཟུགས་དེ་ལ་མཆོད་པ་མ་བྱས་ནའོ། །མྱུར་དུ་འཇིགས་པ་སྐྱེད་པར་འགྱུར། །ཞེས་པ་ཁྱིམ་མེས་ཚིག་པའམ་དགྲའམ་ནད་ཀྱིས་འདེབས་པར་འགྱུར་རོ། །རི་མོ་ལ་གནས་པ་ཡི་གཟུགས། །དེ་ལྟར་རྟག་ཏུ་བསྒོམ་བྱས་ཤིང༌། །དེ་བསྒྱུར་དེ་ཡི་ཡིད་དུ་འགྱུར། །ཞེས་པ་སྤྱོད་ལམ་རྣམ་བཞིར་ལས་རྣམ་བཞིས་གོམས་པར་བྱེད་པ་གཟུགས་ཅི་འདྲ་བ་དེ་བཞིན་དུ་རྟག་ཏུ་གོམས་པར་བསྒོམ་ཞིང་བདག་ལུས་ལྷའི་སྐུར་བསྒྱུར་ཏེ་དེའི་ཐུགས་དང་བདག་གི་ཡིད་གཅིག་ཏུ་བསྒོམ་མོ། །དེ་ལྟར་ལྷའི་སྐུ་དང་བདག་གི་ལུས་བྱེ་བྲག་མེད་པར་བསྒོམ་མོ། །བདག་གི་ལུས་ལྷའི་སྐུར་བསྒྱུར་བ་ཉིད་གསལ་བར་བསྒོམས་ཏེ། གོང་མ་ཉིད་གསལ་བར་བསྒོམ་པ་ལ་བྱའོ། །ཇི་སྲིད་ཡང་དག་གོམས་པའི་ཕྱིར། །ཀུན་དུ་མདུན་ན་གནས་པ་རུ། །ཞེས་པ་དེ་ལྟར་ཡང་དག་པར་བསྒོམས་པས་གོམས་པའི་མཐུས་དུས་ཐམས་ཅད་དུ་མངོན་སུམ་དུ་འདྲ་བར་གནས་པ་མཐོང་གི་བར་དུ་བསྒོམ་ཞེས་པའི་དོན་ཏོ། །གང་ཚེ་མཐོང་བར་གྱུར་བ་ན། །དེ་ཚེ་རི་མོ་མེད་པར་ཡང༌། །ཞེས་པ་དེར་བསྒོམ་པ་གོམས་པར་གྱུར་པ་དེའི་ཚེ་རི་མོ་ལ་རྟོག་པར་ཡང༌། རྟག་ཏུ་སྦྱོར་བ་བྱས་ནས་ནི། །ཞེས་པ་སྐུའི་ཚུལ་ཇི་ལྟ་བ་བཞིན་དུ་དུས་ཀུན་དུ་སྦྱོར་བ་བྱས་ན་ཞེས་པའོ། །སྦྱོར་བ་ཉིད་ཀྱིས་རྟག་པ་རུ། །ཞེས་པ་དེ་ལྟར་སྦྱོར་བ་བྱས་པ་ཉིད་ཀྱིས་རྟག་པར་འགྱུར་བ་ཞེས་པའོ། །ཁྲོ་བོ་ཀུན་དུ་སྦྱོར་ན་ནི། །ཞེས་པ་སྔགས་དང་ལྡན་པར་སྦྱར་ན་སྔགས་ཡི་གེ་བཅུ་གཅིག་པའམ་ལེའུ་འདི་ཉིད་ཀྱི་མགོ་ལ་འབྱུང་བ་དང་སྦྱར་རོ་ཞེས་པའོ། །ཡང་ན་བདག་ཉིད་དེ་འདྲ་བར། །ཞེས་པ་ལ་སོགས་པ་ཡང་ན་རི་མོའི་སྐུ་གཟུགས་མེད་པར་གོང་དུ་ཇི་ལྟར་བཤད་པའི་ལྷ་ཡིན་པར་དེ་ནི་བདག་གོ །བདག་ཇི་ལྟར་ཡིན་པ་འདི་ནི་ལྷའོ། །ཞེས་པ་དེ་ལྟར་ཐ་དད་དུ་དབྱེར་མེད་པར་གཅིག་ཏུ་བསྒོམ་པར་བྱའོ། །ཁ་ཅིག་གིས་ཡི་གེ་སྐབས་དང་སྦྱར་ཏེ་ཤཱུ་ལའམ་བེ་
ཅོན་གྱི་ཕྱག་རྒྱ་གཉིས་ལས་གཅིག་གིས་མདུན་གྱི་ལྷ་དང་བདག་འདྲེས་པར་བྱས་ཏེ་བསྒོམ་དགོས་སོ། །ལྷ་འདི་ལྟར་བསྒོམ་པའི་ཚེ་ན་ཕྱག་རྒྱ་ཤཱུ་ལའམ་བེ་ཅོན་གྱི་ཕྱག་རྒྱ་གཅིག་བཅིངས་ཏེ་ཐམས་ཅད་དུ་བྱ་བའམ་སྦྱོར་བ་རིགས་སོ་ཞེས་བཤད་དོ། །དེ་ནས་དེ་ཡིས་དངོས་གནས་པས། །ཞེས་པ་ལྷའི་རང་བཞིན་དུ་གནས་པས་ཞེས་པའོ། །ཡིད་ལ་ཅུང་ཟད་གང་བསམ་པའི། །དགོས་པ་གོམས་པར་བྱས་ནས་ནི། །ཞེས་པ་བདག་གང་འདོད་པའི་དགོས་པ་བསྒྲུབས་ན། དེ་ཉིད་འབྲས་བུ་ཡོད་པར་འགྱུར། །ཞེས་པ་གང་བསྒྲུབས་པ་འགྲུབ་པར་འགྱུར་རོ་ཞེས་པའི་དོན་ཏོ། །གང་ཕྱིར་ཁྲོ་བོ་བསྒོམ་པ་ཡིན། །ཞེས་པ་དེ་ལྟ་བུའི་ཕྱིར་རོ། །ཁྲོ་བོ་ཡོང་ཡེ་བསྒོམས་ན་ནི། །ཞེས་པ་ཐམས་ཅད་དུ་བསྒོམས་ན་ཞེས་པའོ། །བཟླས་པ་ལ་སོགས་མེད་པར་ཡང༌། །དངོས་གྲུབ་དམ་པ་ཐོབ་པར་འགྱུར། ཞེས་པ་དཀའ་ཐུབ་དང་བརྟུལ་ཞུགས་དང་སྨྱུང་བ་དག་མེད་པར་ཡང་དངོས་གྲུབ་དམ་པ་ཐོབ་པར་འགྱུར་ཞེས་པའི་དོན་ཏོ། །འདི་མན་ཆད་དཀྱིལ་འཁོར་བསྟན་པ་ཞེས་བྱ་བ་བསྟན་ཏེ། བསྒྲུབ་པ་རྣམས་ལ་དམ་ཚིག་ནི། །ཞེས་པ་འོག་ནས་འབྱུང་བའི་དཀྱིལ་འཁོར་འདི་དང་བསྒྲུབ་པའི་དབང་དང་དམ་ཚིག་གིས་དབང་བསྐུར་བར་བྱའོ། །གལ་ཏེ་སྦྱིན་པར་བྱས་ན་ཡང༌། །ཞེས་པ་སྔར་བཤད་པའི་ཆོ་ག་བཞིན་སྦྱར་བར་བྱའོ། །ཐོག་མར་སྤོས་ཆུས་གདབ་པར་བྱ། །ཞེས་པ་དྲིས་ཆུས་བསང་ཞིང་གདབ་པོ། །ཀུན་དུ་ཟླུམ་པོས་ཞེས་བྱ་བའི། །དཀྱིལ་འཁོར་འདི་ནི་ལོགས་ཤིག་ཏུ། །ཞེས་པའི་གོང་དུ་དཀྱིལ་འཁོར་བཤད་པ་རྣམས་ལས་ལོགས་ཤིག་ཏུ་འདིར་མཐུན་པར་དཀྱིལ་འཁོར་ཉིད་ཀྱང་ཟླུམ་པོར་བྲིས་ལ་དཀྱིལ་འཁོར་གྱི་མིང་ཉིད་ཀྱང་ཟླུམ་པོ་ཞེས་བྱ་བའི་དཀྱིལ་འཁོར་དེ་བྲི་བར་བྱའོ། །ཀུན་དུ་ཟླུམ་པོ་བྲི་བར་བྱ།། ཞེས་པ་དཀྱིལ་འཁོར་གྱི་དབྱིབས་ཉིད་ཀྱང་ཟླུམ་པོར་བྲི་བ་ལ་བྱའོ། །ཚོན་རྩི་ནག་པོ་ཞེས་པ་དུད་པ་དང་སོལ་བ་བསྲེས་སམ་ཡང་ན་སོལ་བ་གཅིག་པུས་བྱའོ། །ནུབ་ཕྱོགས་སྒོ་བཏོད་ཁྲུ་དོ་ཙམ། །ཞེས་པ་ནུབ་ཕྱོགས་འབའ་ཞིག་ཏུ་སྒོ་དག་བཏོད་ཅིང་དཀྱིལ་འཁོར་ཟླུམ་
པོ་ཆེ་ཆུང་གི་ཚད་ནི་ཁ་ཞེང་དང་ཁྲུ་དོ་བར་བྱའོ། །དེ་ཡི་དབུས་སུ་མཆོག་བྲི་བ། །ཞེས་པ་དཀྱིལ་འཁོར་དེའི་དབུས་སུ་ཞེས་པའོ། །འགྱིང་ཞིང་ལྡེམ་བག་ཅན་གྱི་ལུས། །ཞེས་པ་མ་ཧེའི་ལུས་འདི་འདྲ་བར་བྲི་བར་བྱའོ། །ཆར་སྤྲིན་དང་ཞེས་པ་སྨུག་ནག་ཏུ་བྱའོ། །འཇམ་ཞིང་མཉམ་ལ་དཔལ་དང་ལྡན། །ཞེས་པ་ཡོན་ཏན་འདི་འདྲ་བ་དང་ལྡན་པར་བྲིའོ། །གསེར་གྱི་དྲིལ་བུའི་སྒྲ་དང་ལྡན། །གཡག་རྔའི་བསིལ་ཡབ་གཡོབ་པ་ཅན། །ཞེས་པ་འདི་འདྲ་བར་བྲི་བར་བྱའོ། །དྲིལ་བུ་བཏགས་པ་དག་རྭ་ལས་བཏགས་པའི་ཚུལ་དུ་རྣ་དྲུང་ཕ་རོལ་ཚུ་རོལ་དུ་སྦྱར་བའི་ཐབས་སུ་རི་མོ་བྲིས་ཏེ་འདི་བཞིན་དུ་བསམ་མོ། །མ་ཧེ་ཆེན་པོ་དམ་པ་བྲི། །དཀྱིལ་འཁོར་དམ་པ་བྲིས་ཏེ་ཞེས་པ་ཡོན་ཏན་ལ་བྱ་ཞེས་ཏེ། སྨུག་ནག་གི་ཚུལ་དུ་བྲིས་ཏེ་དེ་ལྟ་བུའི་ཚུལ་དུ་མ་ཧེ་བྲིའོ། །མ་ཧེ་དེའི་མགོ་བྱང་ཕྱོགས་སུ་ལྟ་བར་བྲིའོ། །མ་ཧེའི་ས་བོན་ཡི་གེ་མའོ། །མ་ཧེའི་མགོ་ལྷོར་ལྟ་བར་བྲི་བར་ཞེས་ཀྱང་བཤད་དོ། །བསྲུང་བའི་ཆོ་ག་བཞིན་བྱས་ནས། །ཞེས་པ་བདག་དང་གཞན་བསྲུང་བ་དང༌། མཚམས་བཅད་པ་དག་བྱ་བའི་དོན་ཏོ། །ད་ནི་མཆོད་པ་བསྟན་པ་ཞེས་བྱ་བ་བསྟན་པའི་ཕྱིར། སྔགས་ཤེས་པ་ཡིས་མཆོད་བྱ་བ། །ཞེས་པ་ལ་སོགས་པ་སྨོས་སོ། །སྔགས་ཤེས་པ་ཡིས་མཆོད་བྱ་བ། །ཞེས་པ་དེ་ལྟར་དཀྱིལ་འཁོར་བྲིས་ནས་དེར་མཆོད་པར་བྱ་བ་བཤད་དོ། །ཆོ་ག་བཞིན་དུ་འདིར་བཤད་དོ། །ཞེས་པ་མཆོད་པ་བྱ་བ་ཡང་ཆོ་ག་བཞིན་དུ་བཤད་པར་བྱའོ། །སྤྱན་དྲངས་གདན་དང་དགག་པ་དང༌། །ཞེས་པ་འདི་དག་ཀྱང་འོག་ནས་བཤད་པ་དང་སྦྱར་རོ། །ཨ་རྒྷ་གཏོར་མ་ལྷ་བཤོས་ཨ་རྒྷ་ཞེས་པའོ། །མཆོད་པ་ཞེས་པ་མེ་ཏོག་ཡིན་ནོ། །མར་མེ་བདུག་པར་བསྟན་པ་དང༌། །ཞེས་པ་དང་པོར་སྤྱན་དྲངས་ནས། ཐ་མར་མཆོད་པ་བྱ་སྟེ་སླར་གཤེགས་སུ་གསོལ་བའི་བར་དུ་བྱ་བ་དེ་དག་ཐམས་ཅད་མཆོད་པ་ཡིན་ནོ་ཞེས་པའོ། །གཟུགས་དགོད་པ་དག་ཐོག་མ་རུ། །ཞེས་པ་འདིར་ལྷའི་གཟུགས་དགོད་པ་དེ་དག་ཀྱང་དང་པོར་ས་བོན་གྱིས་དགོད་པར་བྱ་བ་དེ་ཚུལ་བཞིན་དུ་བཤད་པར་བྱའོ། །འདི་མན་ཆད་ནི་ས་བོན་དགོད་པ་བསྟན་པ་ཞེས་བཤད་དེ། དེ་ལ་དང་པོར་ཐམས་ཅད་ཀྱི། །ས་བོན་ཁྲོ་
བོའི་གཟུགས་ཡིན་ཏེ། །ཞེས་པ་མཚོན་ཆ་ཐམས་ཅད་ཀྱི་ས་བོན་ཡང་ཡི་གེ་ཧཱུཾ་ཉིད་ཡིན་ལ་ཧཱུཾ་ཉིད་ཀྱང་ཁྲོ་བོའི་གཟུགས་ཀྱི་ཡི་གེའོ། །དེ་ཉིད་ཕལ་ཆེར་རབ་ཏུ་གྲགས། །ཞེས་པ་ཡི་གེ་ཧཱུཾ་ཉིད་མཚོན་ཕལ་བོ་ཆེར་འབྱུང་བའོ། །གཅིག་ཏུ་ཕལ་ཆེར་དུ་མའི་མཆོག་ཅེས་པ་ཧཱུཾ་ཉིད་ལ་མཚོན་ཆ་དུ་མའི་མཆོག་བྱའོ། །དེ་ཉིད་དེར་ནི་བརྟག་བྱ་བ། །ཞེས་པ་ཧཱུཾ་དེ་ཉིད་སྔར་བཤད་པའི་མ་ཧེའི་སྟེང་དུ་བསམ་པར་བྱ་ཞེས་པའོ། །རྟག་ཏུ་མཚོན་ཆ་འབར་བར་བྱེད། །ཅེས་པ་ཧཱུཾ་གི་རང་བཞིན་ལ་བྱའོ། །དེ་ཡིག་གཟུགས་འདིར་བྱ་བ་ལ། །ས་བོན་གྱིས་སུ་བསྐུལ་བའི་ཞལ། །ཞེས་པ་ས་བོན་གྱིས་ཧཱུཾ་བསྐུལ་བས་ཧཱུཾ་ཉིད་ཞལ་དུ་བསྒྱུར་རོ། །དྲིལ་བུའི་ས་བོན་དྲུག་རྣམས་ཀྱི། །སྒྲ་རྣམས་དེ་བཞིན་སྒྲོགས་པར་བརྟག །ཅེས་པ་ཨ་ལ་ལ་ཞེས་པའི་ཚུལ་དུ་ལྗགས་འདྲི་ལ་ཞིང་སྒྲ་འབྱིན་པའི་ཚུལ་དུ་བསམ་མོ། །འདི་ནི་ཁྲོ་བོའི་ཞལ་ཡིན་གསུངས། །ཞེས་པ་དེ་ལྟར་བུར་འདི་ནི་ཁྲོ་བོའི་ཞལ་ཡིན་ནོ། །དེ་ནི་ཐོག་མ་ཉིད་ཀྱི་གཟུགས། །ཞེས་པ་དེ་ལྟ་བུའི་སྐུ་དེ་ནི་གཅེས་པའམ། །དཀོན་པར་བསྟན་པ་སྟེ་ཐོག་མ་ཉིད་ཀྱི་གཟུགས་ཞེས་བྱའོ། །གང་ཞིག་དྲན་པ་ཙམ་གྱིས་ནི། །ཞེས་པ་སྒྲུབ་པ་པོ་གང་ཞིག་གིས་སྐུ་དེ་དྲན་པ་ཙམ་གྱིས་ནི། བདུད་དང་གདུག་པའི་གདོན་ལ་སོགས། །མཐུ་རྩལ་གནོན་པ་ཉམས་ནས་སུ། །ཞེས་པ་བདུད་དེ་དག་གི་མཐུ་རྩལ་ཉམས་པའི་དོན་ཏོ། །ད་ནི་སྔགས་སྤེལ་བ་ཞེས་བྱ་བ་བསྟན་པའི་ཕྱིར། །ཟུང་ཤིག་ཅེས་པའི་ཚིག་གཉིས་ལྡན། །ཞེས་པ་ལ་སོགས་པ་སྨོས་སོ། །ཞལ་ཡང་གདངས་ཏེ་འབར་བ་ཅན། །ཞེས་པ་ལྷ་དེ་གྲ་ས་གྲ་ས་ཞེས་བྱ་བའི་སྔགས་ཀྱི་ཚིག་གཉིས་དང་ལྡན་པའི་རང་བཞིན་ཅན་དུ་བསམ་མོ། །ཞལ་གཅིག་བོ་ཞེས་སོ། །སྙིང་པོ་དགའ་བར་རྣམ་པར་གཞག །ཅེས་པ་ཐུགས་ཀར་ཡི་གེ་ཧཱུཾ་བསམ་མོ། །ཧཱུཾ་དེའི་མཚན་ཉིད་མཚོན་ཆ་འབེབས་པའི་མཐུ་རྩལ་ཅན་ཞེས་པའོ། །སྔགས་ཀྱི་དངོས་པོ་ཤེས་ན་ནི། །ཞེས་པ་ཁྲོ་བོའི་རྒྱལ་པོ་དེ་ས་བོན་ཧཱུཾ་ལས་འབྱུང་བར་སྔགས་ཀྱི་དངོས་པོར་ཤེས་ན། སྔགས་པས་དངོས་གྲུབ་ཐོབ་པར་འགྱུར། །ཞེས་པའི་དོན་ཏོ། །མཚོན་ཆ་འཕངས་པ་ཙམ་གྱིས་
ནི། །དེ་ཡིས་ཀུན་དུ་བསྲུང་བར་བྱ། །ཞེས་པ་མཚོན་ཆའི་ཕྱག་རྒྱ་བཅིངས་པ་ཙམ་མམ། ཡང་ན་མཚོན་ཆའི་ཕྱག་རྒྱ་དངོས་གདེངས་པ་ཙམ་གྱིས་བསྲུང་བར་བྱའོ། །ས་བོན་དགོད་པ་ཚུལ་བཞིན་དུ། །བདག་གི་ལུས་ལ་སྦྱར་བར་བྱ། །ཞེས་པ་བདག་གི་ལུས་ལྷའི་སྐུར་བསྒྱུར་པ་ལས་ས་བོན་དགོད་པ་ཚུལ་བཞིན་དུ་བྱའོ། །གཟུགས་ནི་གཟུགས་ལ་བཞག་ནས་སུ། །ཞེས་པ་མདུན་དུ་ལྷའི་གཟུགས་ཅི་འདྲ་བར་བསམས་པ་དེ་བཞིན་དུ། བདག་ཀྱང་དེ་འདྲ་བའི་གཟུགས་སུ་བསྒོམ་མོ། །མཚོན་ཆའི་དེ་ཉིད་ལག་ན་ཐོགས། །ཞེས་པ་མདུན་གྱི་ལྷ་ཅི་ལྟ་བུ་བཞིན་དུ་བདག་ལྷར་བསྒྱུར་པའི་ཕྱག་རྒྱ་མཚོན་ཆ་དེ་དག་ཐོགས་པར་བསྒོམ་མོ། །ས་བོན་རྣམས་ཀྱང་ཁར་བཞག་སྟེ། །ཧཱུཾ་ལྕེར་བསམས་པ་ལས་ཞལ་དུ་གྱུར་ཅིང༌། དྲུག་གིས་ལྗགས་འདྲིལ་བའི་ཚུལ་དུ་སྒྲ་འབྱིན་ཞེས་པའོ། །རྐང་བ་ཉིད་ཀྱང་ཚམ་ངམ་བྱ། །ཞེས་པ་གཡོན་བརྐྱང་བའི་ཚུལ་དུ་གནས་པ་ཉིད་ལ་བྱ། དེ་ནས་ཀུན་དུ་ཁྲོས་ནས་སུ། །རང་གི་ས་བོན་དགོད་པར་བྱ། །ཞེས་པ་ས་བོན་རྣམས་དེ་ལྟར་བཞག་པ་ཡང་བདག་ཉིད་ཁྲོ་བོར་བསྒྱུར་ནས། དེ་ནས་དགོད་པར་བྱའོ་ཞེས་བཤད་དོ། །ཐོག་མར་བདག་ལ་མ་ཡེངས་པར། །ཞེས་པ་སེམས་རྩེ་གཅིག་པར་བསམ་ཞེས་པའོ། །བསྲུང་བ་དེ་ལྟར་བྱས་ནས་སུ། །དཀྱིལ་འཁོར་དེ་ནི་སྤྱན་དྲངས་ཏེ། །དེ་ནས་མདུན་དུ་མཆོད་པ་བྱ། །ཞེས་པ་གོང་དུ་བཤད་པའི་ཚུལ་དེ་ལྟར་བསྒོམ་པ་ཉིད་བསྲུང་བའོ། །དེ་ལྟར་བྱས་པའི་འོག་ཏུ་གདོད་ལྷ་སྤྱན་དྲངས་ན་ཤའི་མདུན་དུ་འོག་ནས་བཤད་པ་རྣམས་ཀྱིས་མཆོད་པར་བྱའོ། །སྔགས་ཀྱི་སྙིང་པོ་ཐ་མ་ལ། །ཞེས་པ་དང་པོར་སྤྱན་དྲངས་ཏེ། ཨོཾ་ཨཱཿ་ཧཱུ༵་ཨཱ་གཙྪ་ཡ་ཨཱ་གཙྪ་ཡ་ཞེས་བྱ་བས་སྤྱན་དྲང་ངོ༌། །ཚུར་གཤེགས་པ་ཡི་ཚིག་གཉིས་དང༌། །རྟག་ཏུ་ལྡན་པར་བྱས་ན་ནི། །ཞེས་པ་སྤྱན་དྲང་པའི་ཆོ་ག་ཐམས་ཅད་དུ་ཚིག་འདི་སྐད་ཅེས་བྱ་བར་སྦྱར་རོ། །སྤྱན་དྲང་བ་དག་བྱ་བར་བཤད། །ཅེས་པ་སྙིང་པོས་སྐུར་བསྐྱེད་དེ་མདུན་དུ་བསམས་པ་ལ་ཡང་སྤྱན་དྲངས་པ་ཅི་དགོས་ཤེ་ན། སེམས་ཅན་རྟོག་པ་ཅན་གྱི་དོན་དུ་སྤྱན་དྲངས་བར་བྱའོ། །མེ་ཏོག་གི་གདན་འདི་ལ་ཞེས་པ་དེ་
ལྟར་མེ་ཏོག་འདོར་བའི་ཚེ་སྔགས་འདི་བརྗོད་དེ། ཨོཾ་ཨཱཿ་ཧཱུ༵་ཨི་དཾ་ཨཱ་ས་ནཾ་ཨ་དྷི་ཏི་ཥྛ་ཞེས་བརྗོད་ཅིང་གདན་གྱི་སྟེང་དུ་བཞུགས་སུ་གསོལ་ལོ། །བཞུགས་སུ་གསོལ་ཞེས་རྟག་ཏུ་བྱ། །ཞེས་པ་བཞུགས་སུ་གསོལ་བའི་དོན་ཏོ། །མེ་ཏོག་གཅིག་གིས་དབུས་ཀྱི་མ་ཧེའི་གདན་ལ་གཏོར་རོ། །དེ་ལྟ་བུར་ནི་སྤྱན་དྲངས་པ། །མེ་ཏོག་དག་གིས་སྔ་མ་བཞིན། །བཞུགས་ཤིག་ཅེས་པའི་ཚིག་གཉིས་བྱས། ཆོ་ག་བཞིན་དུ་བཞུགས་སུ་གསལ། །ཞེས་པ་དེ་ལྟར་སྤྱན་དྲངས་པ་སྟེ། དེ་གདན་གྱི་སྟེང་དུ་བཞུགས་སུ་གསོལ་ནས་དེའི་འོག་ཏུ་ཡང་མེ་ཏོག་གཅིག་སྔ་མ་བཞིན་དུ་སྐུ་གཟུགས་ཀྱི་སྟེང་དུ་དོར་ཏེ། ཨོཾ་ཨཱཿ་ཧཱུ༵་ཏི་ཥྛ་ཞེས་པའི་ཚིག་གཉིས་བརྗོད་དེ། སྔགས་མཁན་གྱིས་འཛབ་བམ། ལས་མ་ཟིན་པ་དང་རེ་བ་མ་བསྐངས་ཀྱི་བར་དུ་གུད་དུ་མི་བཞུད་པར་རྟག་པར་གནས་འདིར་བཞུགས་སུ་གསོལ་ཞེས་པའི་དོན་ཏོ། །ཁྲོ་བོའི་རྒྱལ་པོ་དེ་ལ་ནི། །དགག་པར་བྱ་བ་སྟན་པ་ཡི། །ཞེས་པ་ཚུལ་དེ་ལྟར་བྱ་བ་དེ་ཉིད་ལྷ་གུད་དུ་མི་གཤེགས་པར་བྱ་བ་བསྟན་པ་ཡིན་ནོ། །གོང་དུ་དགག་པ་བཤད་པའི་འཕྲོ་སྦྱོར་བའི་ཚིག་གོ །མེ་ཏོག་སྔགས་ཀྱིས་བཏབ་བ་ཡིས། །དེ་ལྟར་དགག་པ་བྱས་ནས་སུ། །ཞེས་པའོ། །ཨ་རྒྷ་འདི་ནི་བཞིས་ཤི་གཅེས། །ཚིག་འདི་མཇུག་ཏུ་བརྗོད་ནས་སུ། །ཞེས་པ་དེའི་འོག་ཏུ་མཆོད་ཡོན་དབུལ་བའི་ཚེ། སྔགས་འདི་བརྗོད་ཅིང་དབུལ་ལོ། །ཨོཾ་ཨཱཿ་ཧཱུ༵་ཨི་དཾ་ཨ་རྒྷ་ནཱ་མ་ཡ་ཏ་ཏྟྭ་ན་གྲྀ་ཧྞ་ཞེས་བརྗོད། །མཆོད་ཡོན་དབུལ་བར་བྱའོ། །སྤོས་ཆུ་སྨེ་གཏོར་སྦྱར་བ་ཡི། །ཞེས་པ་ལ་སོགས་པ་ཡི་གེ་འབྲུ་གསུམ་པའི་མཇུག་ཏུ་འདི་བཞིན་པའི་ཚིག་བཅུག་སྟེ་དབུལ་བར་བྱའོ། །སྦོས་ཆུ་བཟང་པོས་བཏབ་བ་ཡིས། །ཞེས་པ་མེ་ཏོག་དྲི་ཞིམ་པོ་དང་ལྡན་པ་ལ་བྱའོ། །བཞེས་སུ་གསོལ་ཞེས་བརྗོད་ནས་སུ། །ཞེས་པ་མེ་ཏོག་གི་སྔགས་འདི་བརྗོད་ཅིང་དབུལ་ལོ། །ཨོཾ་ཨཱཿ་ཧཱུ༵་ཨི་དཾ་པུ་ཥྤ་ནཱ་མ་ཡ་ཏ་ཏྟྭ་ན་གྲྀ་ཧྞ་ཞེས་བརྗོད་ཅིང་དབུལ་ལོ་ཞེས་སོ། །སྔགས་པས་རྟག་ཏུ་ཚིག་མཇུག་ལ། །ཅེས་པ་ཡི་གེ་འབྲུ་གསུམ་གྱི་ཚིག་གོ །གཏོར་མ་བདག་གིས་ཕུལ་བ་འདི། །བཞེས་སུ་གསོལ་ཞེས་བརྗོད་ནས་སུ། །ཞེས་ལྷ་བཤོས་དབུལ་པའི་སྔགས་འདི་
བརྗོད་ཅིང་དབུལ་ལོ། །ཨོཾ་ཨཱཿ་ཧཱུ༵་བ་ལི་ནཻ་ཝི་ཏྱ་ནཱ་མ་ཡ་ཏ་ཏྟྭ་ན་གྲྀ་ཧྞ་ཞེས་བརྗོད་ཅིང་དབུལ་ལོ། །གཏོར་མ་སྣ་ཚོགས་དབུལ་བར་བྱ། །མར་མེ་བདག་གིས་དབུལ་བར་བྱ། །བཞེས་སུ་གསོལ་ཞེས་མཇུག་ཏུ་བརྗོད། །ཅེས་པ་མར་མེ་དབུལ་བའི་སྔགས་འདི་བརྗོད་ཅིང་དབུལ་ལོ། །ཨོཾ་ཨཱཿ་ཧཱུ༵་ཨི་དཾ་དཱི་པ་ནཱ་མ་ཡ་ཏ་ཏྟྭ་ན་གྲྀ་ཧྞ་ཞེས་བརྗོད་ཅིང་དབུལ་ལོ་ཞེས་པའི་དོན་ཏོ། །བདུག་པ་བདག་གིས་ཕུལ་བ་འདི། །བཞེས་སུ་གསོལ་ཞེས་མཇུག་ཏུ་བརྗོད། །ཅེས་པ་བདུག་པ་དབུལ་བའི་ཏེས་ཡང༌། །ཨོཾ་ཨཱཿ་ཧཱུ༵་ཨི་དཾ་དྷཱུ་བ་ནཱ་མ་ཡ་ཏ་ཏྟྭ་ན་གྲྀ་ཧྞ་ཞེས་བརྗོད་ཅིང་དབུལ་ལོ། །བདུག་པ་ཐང་ཆུ་རྣམ་པ་ལྔ། །སྔགས་ཀྱིས་བཏབ་སྟེ་དབུལ་བར་བྱ། །ཞེས་པ་སྲ་རྩི་པོག་ཕོར་ལྕེ་པོག་ག་པུར་ཐང་ཆུ་དང་ལྡ་ལ་བྱའོ། །ཐང་ཆུ་རྣམ་པ་བདུན་ནི་སྔ་མའི་སྟེང་དུ་གནད་ས་ར་དང༌། གུ་གུལ་དང་བདུན་ནོ། །ཁ་ཅིག་གིས་བཤད་པའི་ཐང་ཆུ་རྣམ་པ་ལྔ་ལ་ག་བུར་དང༌། ས་ར་ལ་དང་ནི་ནི་ཪྻ་ལ་དང་དེ་བ་ཏི་ནི་ཪྻ་ལ་དང༌། ས་ལ་ཀི་ནི་ཪྻ་ས་དང༌། ས་ལ་ནི་ཪྻ་ས་དང་ལྡའོ་ཞེས་པའི་དོན་ཏོ། །དཀྱིལ་འཁོར་དག་གམ་རི་མོ་ལ། །ཞེས་པ་ལ་སོགས་པ་དཀྱིལ་འཁོར་དེར་རི་མོའི་སྐུ་གཟུགས་བཀྲམ་པ་དེ་ལ་གོང་དུ་བཤད་པའི་ཚུལ་དུ་ཡན་ལག་ལ་བཀོད་པ་དག་ཀྱང་བྱས་པའི་དཀྱིལ་འཁོར་དེ་སློབ་མ་དམ་ཚིག་ཅན་ལ་བསྟན་ན་དཀྱིལ་འཁོར་དེ་མཐོང་བ་ཙམ་གྱིས་དམ་ཚིག་ཅན་དུ་འགྱུར་རོ། །དཀྱིལ་འཁོར་དུ་འཇུག་པའི་ཕྱག་རྒྱ་ནི་བེ་ཅོན་གྱི་ཕྱག་རྒྱ་བྱའོ། །དམ་ཚིག་ཅན་ལ་བསྟན་ན་ནི། །ཞེས་པ་སྔར་བཤད་པའི་དཀྱིལ་འཁོར་དུ་ཞུགས་པ་ལ་བྱའོ། །སྔགས་པ་དམ་ཚིག་ཅན་དུ་འགྱུར། །ཞེས་པའོ། །སྒྲུབ་པ་པོ་ནི་མ་ཡེངས་པར། །ཞེས་པ་རྩེ་གཅིག་ཏུ་སྔགས་བརྗོད་ཅེས་པའོ། །སྔགས་བརྗོད་སླར་ཡང་གཤེགས་སུ་གསོལ། །ཞེས་པ་ཨོཾ་ཨཱཿ་ཧཱུ༵་གཙྪ་གཙྪ་བྱ་ཞིང་གཤེགས་སུ་གསོལ་ལོ། །མེ་ཏོག་སྙིམ་པ་བཀང་ནས་ནི། །ཕྱག་བཙལ་སླར་ཡང་གཤེགས་སུ་གསོལ། །ཞེས་པ་མེ་ཏོག་སྙིམ་པ་བཀང་བ་ཐོགས་ཤིང་གོང་མའི་སྔགས་བརྗོད་དོ། །ཕྱག་བཙལ་ནས་སླར་ཡང་གཤེགས་སུ་གསོལ་ལོ། །དཀྱིལ་འཁོར་དག་གམ་རི་མོ་ལ། །ཞེས་པ་ལྷ་འདི་རྟག་ཏུ་བསྒོམ་པ་ནར་
མ་ལ་ཡང་མཆོད་པའི་ཚུལ་དུ་དེ་ལྟར་སྦྱར་རོ། །རྟག་པར་མཆོད་པའི་ཆོ་ག་འདི། །ཞེས་པ་བསྒོམ་པའི་ཚེ་ཡང་རྟག་ཏུ་མཆོད་པ་འདི་དག་བྱའོ། །ད་ནི་མཇུག་བསྡུ་བ་ཞེས་བྱ་བ་བསྟན་པའི་ཕྱིར། བཟླས་པ་དང་ནི་ཧོ་མ་དག་དང༌། །ཞེས་པ་ལ་སོགས་པ་སྨོས་སོ། །རྟག་ཏུ་ཁྲོ་བོར་འདུ་ཤེས་པ། །ཞེས་པ་དུས་ཐམས་ཅད་དུ་ཁྲོ་བོའི་ང་རྒྱལ་དུ་བྱའོ། །རྩ་བའི་རྟོག་པ་ལས་གསང་བའི་རྟོག་པར་གཏོགས་པ་སྟེ་དང་པོའོ། །དང་པོའི་བཤད་པ་རྫོགས་སོ།། །།གསང་བར་གཏོགས་པའི་ལེའུ་གཉིས་པ་འདི་ལ་དོན་རྣམ་པ་ལྔས་བསྟན་ཏེ། དེ་ལ་ས་བོན་དགོད་པར་བྱས་ནས་སྦྱར་བའི་གོ་རིམས་དང༌། མ་ཤེས་ན་ཉེས་དམིགས་སུ་འགྱུར་བ་བསྟན་པ་དང༌། སྤྱིའི་ས་བོན་དགོད་པའི་རིམ་པ་དང༌། ཚམ་ངམ་དང༌། འཁོར་ལོའི་ཕན་ཡོན་བསྔགས་པའོ། །འཁོར་ལོ་དང་སྦྱར་ཏེ་དང་པོ་དང༌། ཐ་མ་དང༌། འོག་མ་དང༌། ཐ་མ་དག་ཏུ་སྦྱར་ཏེ། འོག་མ་ཡང་དེ་བཞིན་དུ་དྲུག་གིས་ཐ་མ་མུ་དང་དྲུག །འོག་མའི་དང་པོ་མུ་གཉིས་སུ་སྦྱར་ཏེ་བྱའོ། །འཁོར་ལོ་བཟླས་པ་ལ་འོག་མ་ལྟ་བུ་འབྲུ་གཉིས་ལས་དྲུག་གི་དང་པོ་དང༌། དྲུག་གི་འོག་མར་སྦྱར། དེ་ལྟར་རིམ་བཞིན་དུ་སྦྱར་ལ་དང་པོ་དང་སྦྱར་བ་ཐ་མ་སྟེ། ཡི་གེ་བཞི་བཞི་པ་ཐ་མལ་བ་དེ་ཉིད་ཡང་ལྟག་འོག་བསྣོར་ཏེ་བཀོད་པ་དེ་དེ་ལྟར་རྣམ་པ་གསུམ་གྱི་ལས་བྱའོ། །མ་མཻ་མཱ་མཱ། མུ་མཱུ། །མུ་མུ། མཱི་མཱ། མཻ་མ། ཡི་གེ་ཟུང་ཞེས་པ་དང་པོའི་ཡི་གེ་འབྲུ་དྲུག་ཏུ་ཟུང་དུ་སྦྱར་བ་སྟེ་སྔགས་ཐ་མ་ལ་པས་སྒྲུབ་པའི་དོན་ཏོ། །ཟུང་དང་ཞེས་པ་བསྣོལ་བའི་ཡི་གེ་སྟེ། །འོག་མའི་ཡི་གེ་འབྲུ་དྲུག་པོ་ཟུང་དུ་སྦྱར་བའོ། །ཡ་བྲལ་བྱེ་བྲག་གིས་ཞེས་པ་སྔགས་གོང་མའི་འབྲུ་དྲུག་ཏུ་བྱས་པ་དང༌། སྔགས་འོག་མ་འབྲུ་དྲུག་པོ་ཡང་ཟུང་དུ་སྦྱར་ལ། ཟུང་དེ་ཡང་བསྣོལ་བར་བྱའོ། །ཐོག་མ་ཐ་མ་ཟུང་གཅིག་ཏུ། །ཞེས་པ་ཡི་གེ་ཐོག་མའི་འབྲུ་དྲུག་པོ་དང༌། ཡི་གེ་ཐ་མའི་འབྲུ་དྲུག་པོ་གཉིས་ལས་རིམ་བཞིན་དུ་རེ་རེ་སྦྱར་ན་ཟུང་དེ་ཉིད་ལྟག་འོག་བསྣོལ་ལོ་ཞེས་པའི་དོན་ཏོ། །ཁྲོ་བོ་ཞེས་བྱ་ས་བོན་ནི། །ཞེས་པ་ཁྲོ་བོ་ཞེས་བྱ་བའི་ས་བོན་འཁོར་ལོའི་ལྟེ་བ་ལ་ས་བོན་བཞག་པ་དེ་དག་དེ་དབང་ལ་སོགས་
པའི་ལས་སོ་སོར་སྦྱར་བར་བྱའོ་ཞེས་ཀྱང་བཤད་དུ་རུང་ངོ༌། །རྒྱ་གར་གྱི་ཡི་གེ་ལས་ཁ་ཅིག་གིས་བཤད་པ་ལས་གསལ་བར་འདི་སྐད་དུ་འབྱུང་སྟེ། ས་བོན་ཞེས་བྱ་དཀྱིལ་འཁོར་དུ་གཞག །ཁྲོ་བོ་དག་ནི་སོ་སོ་རུ། །ཞེས་འབྱུང་བས་ཞེས་པའི་དོན་ཏོ། །དཀྱིལ་དུ་བཞག་སྟེ་སོ་སོ་རུ། །ཞེས་པ་ཨོཾ་ནི་འཁོར་ལོའི་དཀྱིལ་ལྟེ་བ་ལ་བཞག་གོ །ཨཱཿ་ནི་རྩིབས་ཀྱི་དང་པོའི་གནས་ལ་བཞག་གོ །ཧཱུཾ་དང་ལ་དྲུག་ནི་རྩིབས་གཉིས་དང་གནས་ལ་བཞག་གོ །མ་མ་དག་ནི་རྩིབས་གསུམ་པའི་གནས་ལ་བཞག་གོ །དབང་དང་ཞེས་པ་ཡི་གེ་ཁ་དོག་དམར་པོར་བསམ་མོ། །འཁོན་པ་དང་བསད་པ་ཞེས་པ་ལས་འདི་དག་བྱེད་པའི་ཚེ་ཡི་གེ་ཁ་དོག་སྔོན་པོར་བསམ་མོ། །དེ་བཞིན་བསྐྲད་དང་ཞི་བ་དང༌། །ཞེས་པ་མིང་གིས་སྨོས་པའི་ལས་འདི་དྲུག་སྔགས་པ་ཐ་མལ་པ་ཟུང་དུ་སྤེལ་བས་སྒྲུབ་པ་དང༌། དེས་མ་གྲུབ་ན་སྔགས་བཟློག་པའམ་བསྣོལ་བའི་ཚུལ་གྱིས་ལས་དེ་དག་བྱས་ན་མྱུར་དུ་འགྲུབ་པར་འགྱུར་བ་ནི། ཟུང་དང་བསྣོལ་བས་མྱུར་དུ་འགྲུབ། །ཅེས་པའོ། །ཡི་གེ་ཁ་དོག་སེར་པོར་བསམ་པ་ཡང༌། ཡང་ན་རྒྱས་པར་བྱ་བའི་ཕྱིར། །ཞེས་པ་ཡི་གེ་ཁ་དོག་སེར་པོར་བསམ་མོ། །ད་ནི་དང་པོར་ཐ་མལ་བའི་ཚུལ་གྱིས་དབང་ལ་སོགས་པའི་ལས་དྲུག་བྱ་བ་བཤད་པའི་ཕྱིར། ཟུང་ཤིག་ཚིག་གཉིས་ཐ་མར་བཞག །ཅེས་པ་ལ་སོགས་པ་སྨོས་སོ། །ཟུང་དང་བུལ་བས་མྱུར་དུ་འགྲུབ། །ཅེས་པ་ནི་ཡི་གེ་ཟུང་གིས་ལས་ཐ་མལ་པར་བྱ་བ་དང༌། ཡི་གེ་ཟུང་བསྣོལ་བས་ལས་དྲུག་པོ་དེ་དག་མྱུར་དུ་འགྲུབ་པར་འགྱུར་བ་ལ་བྱའོ། །ཟུང་ཤིག་ཚིག་ཆ་གཉིས་ཞེས་པ་གྲ་ས་གྲ་ས་བྱ་བ་གཉིས་གཞག་གོ །ཆེ་གེ་མོ་ཞེས་པ་དབང་དུ་བྱའོ་ཞེས་པ་འདི་ནི་དབང་དུ་བྱ་བའི་ལས་སོ། །ཧཱུ༵་གཞག་ཅེས་པ་ནི་པིནད་རྠའི་ནང་ནས་སློབ་དཔོན་གྱི་ལུང་ལས་འབྱུང་སྟེ་དེ་བས་ན་མཚོན་ཆ་དང་བཅས་པའི་ས་བོན་གཞག་པའི་རིགས་སོ། །བསྒྲུབ་པར་བྱ་བའི་གཟུགས་བྱས་ནས། །ཞེས་པ་གྲོག་མཁར་ལས་བྱས་པས་གཟུགས་ཞེས་བྱའོ། །དེ་ལ་རྐང་པས་བརྫི་བ་ནི། །ཞེས་པ་བརྐྱང་བསྐུམ་གྱིས་གནས་པའི་ཚུལ་གྱིས་བརྫི་བར་བྱ་ཞེས་པའོ། །རྐང་པ་སྐྱོ་བའི་བར་དུ་ཚད་ཀྱིས་བཟླས་སོ། །དེ་ཡི་དབང་དུ་མྱུར་དུ་འགྱུར། །ཞེས་པ་
དེ་ལྟར་སྒྲུབ་པ་པོ་དེའི་དབང་དུ་མྱུར་དུ་འགྲུབ་ཅེས་པའི་དོན་ཏོ། །ད་ནི་འཁོན་པར་བྱ་བ་བཤད་དེ། །གཅིག་པུ་དེ་ལ་སྤོས་ནས་སུ། །ཞེས་པ་ལ་སོགས་པ་སྨོས་སོ། །གཅིག་པུ་དེ་ལ་སྤོས་ནས་སུ། །ཞེས་པ་ལ་སྔར་ལས་བཤད་པའི་གོ་རིམས་ལ་བྱ་སྟེ། ལས་དྲུག་པོ་དེ་དག་ནི་གོ་རིམས་བཞིན་དུ་མི་སྒྲུབ་ཏུ་མི་རུང་བ་མེད་དོ། །དེ་ལས་གང་འདོད་པ་བྱའོ། །ས་བོན་གཉིས་པའི་གནས་ལ་ནི། །ཞེས་པ་ཙ་ཀྲའི་མིག་ལྔ་མ་གཏོགས་པ་དང༌། གཉིས་པ་དམིགས་ལས་བྱས་པའི་གནས་ལ་ནི་ཞེས་པའོ། །གནས་ནས་གདོང་ཡང་བསྒྱུར་ནས་སུ། །ཞེས་པ་དེའི་སྔགས་བཟླས་ཏེ་ཞེས་པའི་དོན་ཏོ། །ལྷའི་ཞལ་ཡང་སྔ་མའི་ཚུལ་ལས་ཁྲོ་བོའི་སྐུར་བསྒྱུར་རོ་ཞེས་པའི་དོན་ཏོ། །བསྒྲག་པར་བྱ་བ་ཅུང་ཟད་མེད། །ཅེས་པ་སྔ་མའི་སྭཱ་ཧཱ་མི་གཞུག་པའི་དོན་ལ་བྱ་སྟེ། དེ་ལྟར་སྭཱ་ཧཱ་མི་གཞུག་ན། ཧཱུཾ་གཞུག་པར་རིགས་ན་སློབ་དཔོན་གྱིས་པིར་དར་ཏའི་ལུང་ལས་སྭཱ་ཧཱ་གཞུག་པར་འབྱུང་ངོ༌། །བསྒྲུབ་པར་བྱ་བ་གཉིས་ཀ་ཡི། །ཞེས་པ་མཛའ་བོ་གཉིས་ཀྱང་གཟུགས་བྱའོ་ཞེས་པའོ། །གཟུགས་ནི་འཇིམ་པ་ལས་བྱས་ཏེ། །ཞེས་པ་གྲོག་མཁར་གྱིས་ལས་བྱ་ཞེས་པའོ། །གཅིག་ཏུ་དཔའ་བའི་ཉམས་ལྡན་པར། །ཞེས་པ་ཁྲོ་བོའི་ཏིང་ངེ་འཛིན་གྱི་ཉམས་དང་ལྡན་པར་བྱའོ། །གཉིས་ཀ་ལ་ཡང་རྐང་པས་མནན། །ཞེས་པ་གཟུགས་བྱས་པ་གཉིས་ཀའི་སྟེང་དུ་བརྐྱང་བསྐུམ་གྱི་ཚུལ་དུ་རྐང་བས་མནན་ཞེས་པའོ། །སྔགས་མཁན་དེ་ལ་གནས་པ་ཡིས། །ཞེས་པ་སྔགས་ཉིད་ཁྲོ་བོའི་ཏིང་ངེ་འཛིན་དང༌། སྔགས་ལ་ཡང་གནས་ཤིང་འཇིམ་པའི་གཟུགས་ཀྱི་སྟེང་དུ་ཡང་གནས་པ་ཡིས་ཞེས་པའོ། །མེལ་ཚེ་ཐུན་དེ་ཕྱེད་ཙམ་གྱི། །ཞེས་པ་བཞི་མཐུན་གྱི་ཐུན་ཕྱེད་ལ་བྱའོ། །དེ་ནས་སྒྲུབ་པར་འདོད་པ་བཞིན། །ཞེས་པ་མཛའ་བོ་གཉིས་དབྱེ་བར་བྱ་བ་དེ་གཉིས་ཕན་ཚུན་དགར་གྱུར་པ་ཞེས་པའོ། །ཁྲོ་བོ་རིམ་བཞི་བསྒོམས་པས་ནི། །ཞེས་པ་ཁྲོ་བོ་ཉིད་ཚུལ་བཞིན་དུ་བསྒོམ་པར་བྱས་པའོ། །ལན་ཅིག་བྱས་པ་ཙམ་གྱིས་འགྱུར། །ཞེས་དེ་ལྟ་བུའི་ཚུལ་དུ་ལན་ཅིག་མེལ་ཚེ་ཐུན་ཕྱེད་ཙམ་གྱིས་འགྲུབ་པར་འགྱུར་ཞེས་པའི་དོན་ཏོ། །ད་ནི་བསད་
པའི་ལས་བཤད་པའི་ཕྱིར། །ས་བོན་གཉིས་པ་དེ་ལས་ཀྱང༌། །ཞེས་པ་ལ་སོགས་པ་སྨོས་སོ། །ས་བོན་གཉིས་པ་དེ་ལས་ཀྱང༌། །ཞེས་པ་དབང་དང་འཁོན་པར་བྱ་བའི་ས་བོན་གཉིས་པའི་གནས་དེ་ལས་ལྡང་བའོ། །དྲག་པོའི་རྩལ་གྱིས་སྤོས་ནས་སུ། །ཞེས་པ་སྔགས་པ་དེ་ཁྱད་པར་དུ་འདི་ལྟ་བུའི་ཚུལ་དུ་བསྒོམ་མོ། །གནས་ཏེ་གསུམ་པ་ལ་གནས་ཏེ། །ཞེས་པ་འཁོར་ལོའི་མིག་གསུམ་པ་ལ་བྱའོ། །གཡོ་བའི་གནོན་པས་མནན་པ་ནི། །ཞེས་པ་ཚམ་ངམ་གྱི་ཚུལ་དུ་བསྒྱུར་བར་བྱ་སྟེ་འོག་མ་གཉིས་ཀྱིས་བཤད་དོ། །ཁ་དང་བརླ་དང་རྒྱབ་དང་བསྒྱུར།། ཞེས་པ་ཁ་གཅུས་ཏེ་རྐང་བ་བརྐྱང་བསྐུམ་བྱས་ཀྱང་རྒྱབ་ཀྱིས་བསྒྱུར་བར་བྱའོ། །དྲིལ་བུ་དཀྲོལ་བའི་སྒྲ་སྒྲོགས་ཤིང༌། །ཞེས་པ་ལ་དྲུག་གིས་ལྗགས་འདྲིལ་བའི་ཚུལ་དུ་སྒྲ་འབྱིན་པའོ། །ཟུང་ཞིག་ཚིག་གཉིས་ཐ་མར་གཞག །ཅེས་པ་གྲ་ས་གྲ་ས་ཞེས་བྱ་བའི་ཚིག་གཉིས་གཞག་ཅེས་པའོ། །ཆེ་གེ་མོ་ཞེས་བྱ་བའི་སྒྲ། །ཞེས་པ། ཨ་མུ་ཀ་སྟེ་གང་ལ་བྱ་བའི་མི་དེའི་མིང་གཞུག་གོ །སོད་ཅེས་བྱ་བའི་སྒྲ་ཡང་བརྗོད། །ཅེས་པས་མཱ་ར་ཡ་བྱའོ། །ས་བོན་མཚོན་ཆ་འདིར་གཞག་པ། །ཞེས་པ་ཧཱུཾ་གཞག་པར་བྱ་བ་སྟེ། དེའི་རྗེས་ཐོགས་སུ་ཕཊ་གཞག་པར་རིགས་ཞེས་བཤད་དེ། །ཁྲོ་བོའི་ལྕགས་ཀྱི་ཤཱུ་ལས་གཅོག །ཅེས་པ་ཕན་ཆད་ན་མི་གསོད་པའི་གསལ་ཤིང་རྩེ་གཅིག་པ་བྱེད་པ་དེ་འདིར་ལྕགས་ལས་གསལ་ཤིང་བྱས་པ་ནི་ཁྲོ་བོ་ཡིན་ཏེ་དེ་དག་དགྲ་བོའི་གཟུགས་སོལ་བ་ལས་བྱས་པ་དེའི་རྐུབ་ནས་གྱེན་དུ་བཙུགས་ཏེ་ཁར་ཕྱུང་ལ་གཟུགས་ཏེ། དེ་ལྟ་བུའི་ཚུལ་གྱིས་གཞིག་པར་བྱ་བ་ནི་གཅོད་པའོ་ཞེས་བྱའོ། །དུར་ཁྲོད་སོལ་བས་དགྲ་བོ་ཡི། །ཞེས་པ་དེ་ཡང་དུར་ཁྲོད་སོལ་བ་ཞིབ་ཏུ་བཏགས་པ་ལས་གཟུགས་བྱའོ། །ཕན་ཚུན་མངོན་དུ་ཕྱོགས་བྱས་ནས། །ཞེས་པ་ལག་པ་གཉིས་ཀྱི་ཐལ་མོ་གཉིས་ཞེས་པའོ། །ལག་པ་གཉིས་ཕན་ཚུན་དྲུད་པར་བྱ་ཞེས་པ་ལག་པའི་ཐལ་མོ་གཉིས་སྟོང་པར་བྱས་ཏེ། དྲུད་ཅེས་པ་སྟེ་དགྲའི་གཟུགས་གསལ་ཤིང་དང་འདྲ་བར་ལྕགས་ལས་བྱས་པས་གཟུགས་བཤིག་པ་དེ་ལག་པ་གཉིས་ཀྱིས་དྲུག་པར་བྱའོ། །དེ་ལྟར་བྱས་ན་མྱུར་
བ་རུ། །ཚེ་རིང་བ་དང་ལྡན་པ་ཡང༌། །དགྲ་དེ་རིང་པོར་མི་ཐོགས་པར། །ཞེས་པར་ཚུལ་དེ་ལྟར་བྱས་ན་རིང་པོ་མི་ཐོགས་པར་དབང་དང་འཁོན་པ་དང༌། བསད་པ་དག་ལ་གཟུགས་བརྙན་བྱས་པ་གང་ལ་བྱ་བ་དེ་ཉིད་བཀུག་ལ་དེར་བསམས་ཏེ་དེ་ལས་བྱའོ་ཞེས་པའི་དོན་ཏོ། །ཤིང་ནི་བཅད་པ་བཞིན་དུ་འགྱེལ། །ཞེས་པ་འདི་དང་འདྲ་སྟེ། འཆི་བའི་ལས་འདི་ཡང་མེལ་ཚེ་ཕྱེད་ཙམ་གྱིས་འགྲུབ་བོ། །གསུམ་པ་ལས་ནི་འཕོས་ནས་སུ། །ཞེས་པ་སྔ་མའི་གནས་བོར་ཏེ་ཞེས་པའི་དོན་ཏོ། །ད་ནི་བསྐྲད་པར་བྱ་བའི་ལས་བཤད་པའི་ཕྱིར་ཁྲོ་བོའི་རྒྱལ་པོའི་གནས་ཞེས་པ་ལ་སོགས་པ་སྨོས་ཏེ། བཞི་པ་དེ་ལ་སྒྲུབ་པ་འདུག །ཅེས་པ་འཁོར་ལོའི་མིག་བཞི་པ་ལ་སྔགས་པ་འདུག་པར་བྱའོ། །དྲག་ཤུལ་ཅན་གྱི་ལུས་སུ་གནས། །ཞེས་པ་རྩལ་ཆེ་བ་དང་ལྡན་པའི་སྐུར་བསྒྱུར་བའོ། །ཟུང་ཤིག་ཚིག་གཉིས་ཐ་མར་གཞག། ཅེས་པ་སྔགས་རྣམས་ཀྱི་ཐ་མར་གྲ་ས་གྲ་ས་ཞེས་བྱ་བའི་ཚིག་གཉིས་གཞག་པར་བྱའོ། །སྐྲོད་ཅིག་ཅེས་པའི་ཚིག་གི་མཐར། ཞེས་པ་ཨུ་ཙ་ཏ་ཡ་མཐར་ཞེས་སོ། །ཡི་གེ་ཧ་ནི་ཕུལ་བ་བཞག །ཅེས་པ་དེའི་འོག་ཏུ་ཡི་གེ་ཧ་ཚེག་དྲག་པོ་གཉིས་ཀྱིས་ཕུལ་བ་གཞག་གོ །ས་བོན་བསྟན་པ་བཀོད་པ་ལས། །བསྐྲད་པར་བྱ་བ་ཐ་དད་པའོ། །ཞེས་གྲ་ས་གྲ་ས་ཨ་མུ་ཀ་ཨུ་ཙ་ཏ་ཡ་ཧ་ཞེས་བྱ་བ་བསྐྲད་པའི་ས་བོན་བཀོད་པ་འདི་ནི་གོང་དུ་བསད་པའི་ལས་བཤད་པ་ལས་ཐ་དད་པ་སྟེ་འདི་ནི་བསྐྲད་པའི་ལས་སོ། །དགྲ་ཡི་ཕྱིར་ནི་རིགས་པ་རུ། །མེ་ལ་ཙེ་ཐུན་གཅིག་ཙམ་དུ་བསྒོམ། །ཞེས་པ་དགྲ་བསྐྲད་པའི་ཕྱིར་མྱུར་དུ་བཞི་ཐུན་གྱི་ཐུན་གཅིག་ཙམ་དུ་བསྒོམ་ཞེས་པའོ། །དགྲ་དེའི་གཟུགས་བརྙན་བྱས་ནས་སུ། །ཞེས་པའོ། །སྦྱོར་བ་ཤེས་པས་མ་ཡེངས་པར། །ཞེས་པ་སྔགས་པ་སེམས་རྩེ་གཅིག་ཏུ་བྱས་པ་ལ་བཟླས་བརྗོད་བྱའོ། །ཟློས་པ་བདག་ཉིད་དེ་སྟེང་འདུག་ཅེས་པ་སྔགས་བཟླས་བརྗོད་བྱེད་པ་དང༌། གཟུགས་བསྙེན་བྱེད་པ་དེའི་སྟེང་དུ། །གཡོན་བརྐྱང་བའི་ཚུལ་དུ་འདུག་གོ །འཁོར་གྱི་སྐྱེ་བོ་མྱུར་སྤངས་ནས། །ཞེས་པ་བསྐྲད་པར་བྱ་བའི་དགྲ་བོ་དེ། དེ་ལས་གཞན་པའི་གནས་སུ་འགྲོ། །ཞེས་པ་དགྲ་བོ་དེ་གནས་དེ་
ལས་གཞན་དུ་འགྲོ་ཞེས་པའོ། །དེ་ད་གཞི་བར་བྱ་འདོད་ན། །ཞེས་པ་འཁོར་པ་དང་བསྐྲད་པ་དང་གསད་པར་བྱ་བའི་ལས་དེ་དག་སླར་ཞི་བར་བྱ་འདོད་དམ། ཡང་ན་ཐ་མལ་བར་ཞི་བར་འདོད་ན་སྔགས་པ། སྒྲུབ་པ་པོ་ནི་མཆོག་གིས་སུ། སྙིང་རྗེ་ཞི་བར་བྱ་བ་ཡི། །ཞེས་པ་དེ་ལྟར་ཞི་བར་བྱེད་པའི་ཚེ་ལྷག་པར་སྙིང་རྗེ་བསྐྱེད་པར་བྱའོ། །ཆོ་ག་ཚུལ་བཞིན་འདིར་བཤད་དོ། །ཞེས་ཞི་བ་དང་རྒྱས་པར་བྱེད་པའི་ཚེ་སྐྱིལ་མོ་ཀྲུང་དུ་འདུག་པར་བཤད་དོ། །ཁ་ཅིག་ན་རེ། འགྲེང་སྟེ་ཞི་རྒྱས་བྱ་བར་རིགས། །ཞེས་བཤད་དོ། །ཁྲོ་བོའི་འཁོར་ལོའི་གནས་ལྔ་ལ། །ཞེས་པ་ཙཀྲའི་མིག་ལྔ་པ་ལ་སྔགས་པ་འདུག་པར་བྱའོ། །སྒྲུབ་པ་པོ་རིམ་བཞིན་འདུག་ཅེས་པ་བཤད་པའི་ཚུལ་དུ་བྱ་ཞེས་པའོ། །དེ་ནས་ཡིད་ནི་བདེར་གྱུར་ནས། །རྐང་པ་མཉམ་ཞིང་གདོང་ཡང་མཉམ། །ཞེས་པ་སེམས་བདེ་བར་གནས་ནས་སྔ་མའི་བརྐྱང་བསྐུམ་ཡང་བཏང་ནས་རྐང་པ་ཐ་མལ་པར་མཉམ་པར་གཞག་པ་དང་ཞལ་ཁྲོས་པ་ཡང་མི་ཁྲོ་བར་ཞི་བའི་མཉམ་པར་བསྒོམ་པ་ནི་ཚུལ་ཐ་མལ་བར་འདུག་ཅེས་པའོ། །ཟུང་ཤིག་ཚིག་གཉིས་ཐ་མར་གཞག །ཅེས་པ་གྲ་ས་གྲ་ས་ཉིས་ལ་བྱའོ། །སྔོན་བཞིན་ཆེ་གེ་མོ་ཞེས་བྱ། །ཞེས་པ་སྔ་མ་བཞིན་དུ་གང་ཞི་བར་བྱ་བའི་མིང་གཞུག་གོ །རབ་ཏུ་ཞི་བར་གྱུར་ཅེས་བརྗོད། །ཅེས་པ་ཤཱནྟིཾ་ཀུ་རུ་ཞེས་སྦྱར་རོ། །དེ་ཡི་མཇུག་ཏུ་ཞི་བར་འགྱུར། །རིང་པོར་མི་ཐོགས་གདོན་མི་ཟ། །ཞེས་པ་འཁོན་པ་དང༌། བསྐྲད་པ་དང༌། བསད་པ་དང་གསུམ་ལས་ཞི་བར་བྱ་དགོས་ཏེ། དེ་དག་གི་ཕྱིར་ཞི་བར་བྱེད་ན་སྔ་མའི་གཟུགས་དེའི་སྔར་འོ་མས་བཀྲུ་བ་ལ་གདོད་ཞི་བར་བྱའོ། །སྔོན་བཞིན་ཁྲོ་བོའི་འཁོར་ལོ་ཡི། །དྲུག་པའི་གནས་ལ་སོང་ནས་སུ། །ཞེས་པ་སྔ་མ་བཞིན་དུ་ཙཀྲའི་མིག་དྲུག་པ་ལ་སྔགས་པ་བདག་འདུག་ལ་སྔ་མ་དེ་དག་གི་ཕྱིར་ཡང་རྒྱས་པར་བྱེད་ན། རྐང་པ་དལ་བུས་གནོན་པ་ཡིས། །ཞེས་པ་ཞི་བའི་ཚུལ་དང་འདྲའོ། །གཅིག་པུ་དཔའ་བོའི་ཚུལ་འདུག་ནས། །ཞེས་པ་མཐུ་སྟོབས་དང༌། གཟི་བྱིན་ཅན་གྱི་ཚུལ་དུ་སྐུར་བསྒྱུར་བ་ལ་བྱའོ། །ཟུང་ཤིག་ཅེས་པ་ཚིག་གཉིས་གཞག །ཅེས་གྲ་ས་གྲ་ས་ལ་བྱའོ། །རྒྱས་
པར་འདོད་པས་དགའ་བཞིན་དུ། །ཞེས་བརྒྱས་པར་བྱེད་འདོད་པས་སེམས་དགའ་ཞིང་མོས་པ་དང་ལྡན་པས་བསྒྲུབ་ཅེས་པའོ། །མེལ་ཚེ་ཐུན་གཅིག་རྟག་ཏུ་བཟླས། །ཞེས་པ་མེ་ལ་ཚེ་ཐུན་གཅིག་གིས་རྒྱས་པ་འགྲུབ་བོ། །ཁྲོ་བོའི་འཁོར་ལོ་ལ་ནི་གནས། །ཞེས་པ་ཁྲོ་བོའི་ཙཀྲའི་མིག་དྲུག་པ་ལ་སྔགས་པ་འདུག་པ་ལ་བྱ། སྐུ་ཡི་ཚུལ་དུ་བསྒྱུར་བྱས་པས། །ལྷའི་སྐུར་བསྒྱུར་རོ་ཞེས་པའོ། །མེལ་ཚེ་ཐུན་གཅིག་བྱས་པས་ནི། །ཞེས་པ་ལ་དེ་ལྟར་མེལ་ཚེ་ཐུན་གཅིག་ཏུ་བཟླས་ན། འཁོར་ལོའི་ནང་ན་ཁྲོ་བོའི་སྔགས་བཀོད་པ་དེའི་མཐུ་འགྲུབ་ཅེས་པའོ། །གང་གསུངས་པ་ནི་མྱུར་དུ་འགྱུར། །ཞེས་པ་སྐབས་འདིར་རྒྱས་པ་གསུངས་པས་ན་རྒྱས་པ་འགྲུབ་བོ། །ཕྱིས་ཀྱང་རིམ་གྱིས་འདི་ལ་གནས། །ཞེས་པ་གོང་མ་བཞིན་དུ་རིམ་གྱིས་བསྒྲུབས་ཏེ་ལས་རྣམས་གྲུབ་པར་མ་གྱུར་ན། ཕྱིས་ཀྱང་སྔགས་བཟློག་པའམ་བསྣོལ་བའི་ཚུལ་དུ་འདི་ལ་གནས་ཏེ་ལས་རྣམས་བསྒྲུབ་བོ། །ལོགས་ཤིག་ཁྲོ་བོའི་འཁོར་ལོའི་བཀས། །ཞེས་པ་གོང་མ་བཞིན་དུ་རིམ་གྱིས་སྒྲུབ་པ་ལས་འདི་བཞིན་ནོ། །སྔགས་བཟློག་པ་འཁོར་ལོའི་རྩིབས་ལ་བཀོད་པའི་ཚིག་བཀོད་པ་འདི་ཁྲོ་བོའི་བཀའོ། །རྐང་པའི་ཚམ་ངམ་དེ་བཞིན་བྱས། །ཞེས་པ་གང་ལ་བྱ་བའི་དངོས་པོ་དེ་ལག་པའམ། དེར་ཞེན་པའི་ལས་སེམས་ཀྱིས་གཏད་པའི་ཚུལ་དུ་བྱེད་པ་ཡང་ཨ་ག་ཤེ་ཞེས་བྱ་སྟེ། འོག་ནས་བཤད་པ་དང་སྦྱར་ན་རྐང་པ་གཉིས་ཀྱི་བར་གུང་མོའི་མཐོ་གང་ཡོད་པར་བྱའོ། །གདོང་ཡང་དལ་བས་བསྒྱུར་ནས་སུ། །ཞེས་པ་རིམ་གྱིས་དལ་བུས་ཐ་མལ་བའི་སྐུའི་ཚུལ་དུ་བསྒྱུར་བའོ། །དང་པོ་ས་བོན་གང་ཡིན་པ། །ཞེས་པ་དང་པོའི་ཡི་གེ་འབྲུ་དྲུག་ལས་མ་མ་ཟུང་དུ་བྱས་པའི་ས་བོན་གང་ཡིན་པ་དང༌། གོང་མའི་ཡི་གེ་དྲུག་ཟུང་དུ་སྦྱར་བ་མུ་མཱུ་རྒྱས་པ་ལ་སྦྱར་བའི་ས་བོན་གང་ཡིན་པ་དེ་འདིར་ཟུང་ལྟག་འོག་བསྣོལ་ནས་དབང་གི་ལས་ལ་སྦྱར་རོ། །ཟུང་ལྟག་འོག་བསྣོལ་བ་ནི་འདི་ལྟར་བྱའོ། །མུ་མཱུ། མ་མ་ཞེས་བྱའོ། །དེ་ཡི་མཐའ་དང་ལྷན་ཅིག་ཏུ། །ཞེས་པ་གོང་མའི་ཡི་གེ།
འབྲུ་དྲུག་པོའི་མཐའ་ལ་རྒྱས་པར་བྱ་བའི་སྔགས་འབྱུང་བ་དེ་དབང་ལ་ཡང་སྦྱར་བར་བྱ་བ་སྔར་བཤད་པ་དང་འདྲའོ། །ཁ་ཅིག་གིས་བཤད་པ་འོག་མའི་ཡི་གེ་འབྲུ་དྲུག་པོའི་དབང་པོ་ལ་མཱུ་འབྱུང་བ་དེ་སྦྱར་བ་ཡང་རྒྱས་པ་ལ་ཡང་སྦྱར་བར་རིག་པར་བྱ་ཞེས་བཤད་དེ། ལྟག་འོག་གཉིས་ཀྱི་མཐར་ཡི་གེ་མུ་མུ་འབྱུང་བ་གང་སྦྱར་བ་ཡང་དོན་དུ་གཅིག་པར་ཟད་དེ་འདྲའི་ཞེས་པའི་དོན་ཏོ། །མེ་དང་འདྲ་བར་འབར་བ་དེ། །ཞེས་པ་ཟུང་ལྟག་འོག་བསྣོལ་བའི་ཟུང་གོང་མ་དེ་འབྲུ་གཉིས་པོ་ལ་ཚེག་དྲག་པོས་ཕུལ་བས་འོག་མའི་ཟུང་ཐ་མ་ལ་བསྐུལ་བས་གཟི་བྱིན་ཅན་དུ་བྱས་པ་ཞེས་པའི་དོན་ཏོ། །སྔོན་གྱི་ལས་ནི་གྲུབ་འདོད་ན། །ཞེས་པ་སྔར་བཤད་པ་བཞིན་དུ་རིམ་གྱིས་བསྒྲུབས་པ་ལས་མ་གྲུབ་པར་འགྱུར་ཏེ། ལས་དེ་དག་འགྲུབ་པར་འདོད་ན་ཤིན་ཏུ་ལེགས་པར་སྦྱར་བར་བྱའོ་ཞེས་པ་ཚུལ་དེ་ལྟར་ལེགས་པར་སྦྱར་ཏེ་འདིས་ནི་དབང་གི་ལས་བཤད་དེ། །དེ་ཡན་ཆད་དབང་གི་ལས་བཤད་ཅིན་ཏེ། །དེ་ནས་ཟུང་མས་བསྐུལ་བ་ལའང༌། །ཞེས་པ་དེ་ཡང་ཟུང་མས་བསྐུལ་བ་ཞེས་བྱ་སྟེ། ཡི་གེ་འོག་མ་དྲུག་པོ་དྲག་པོར་ཕུལ་པའི་ཟུང་མས་གོང་མའི་ཡི་གེ་འབྲུ་དྲུག་པོའི་ཟུང་མ་ཐ་མལ་པ་ལ་བསྐུལ་བར་བྱ་སྟེ་མུ་མུ་མ་མ་ཞེས་ཀྱང་བྱར་རུང་ངོ༌། །གཅིག་ཏུའང་རུང་བར་བཤད་ཅེས་པ་གོང་དུ་བཤད་པ་ཟུང་མས་བསྒྲུབ་པ་ལ་བྱ་བར་ཟད་དོ། །སོ་སོའམ་ཡང་ན་ཕྲལ་ཏེ་འོག་མའི་ཡི་གེ་འབྲུ་དྲུག་པའི་དང་པོ་ལ་མུ་དང༌། དང་པོའི་ཡི་གེའི་འབྲུ་དྲུག་པོའི། ཐོག་མ་ལས་མ་བྱུང་བ་དང་སྦྱར་བའི་ཚུལ་འདྲ་བར་ས་ཐམས་ཅད་སྦྱར་ཏེ་ལས་ལ་སྦྱར་དུ་ཡང་རུང་ངོ༌། །འདི་འདྲ་བའི་ལས་ལ་སྦྱར་རོ་ཞེས་པའི་དོན་ཏོ། །ད་ནི་འཁོན་པའི་ལས་བཤད་པའི་ཕྱིར། ཁྲོ་བོ་ཡི་ནི་འཁོར་ལོའི་མཐུ། །ཞེས་པ་ལ་སོགས་པ་སྨོས་སོ། །ཁྲོ་བོ་ཡི་ནི་འཁོར་ལོའི་མཐུ། །ཞེས་པ་འཁོར་ལོའི་རྩིབས་བརྒྱད་ཀྱི་སྔགས་ལ་བྱའོ། །བརྒྱད་པ་དག་ལ་མྱུར་བར་གནས། །ཞེས་པ་རྩིབས་བརྒྱད་པའི་སྔགས་ལ་གནས་པ་སྟེ། ལེ་ལོ་དང་སྙོམ་ལས་མེ་དཔར་ཞེས་པའོ། །རིམ་པ་སྔ་མའི་ཚུལ་གྱིས་ནི། །ཞེས་པ་གོང་མའི་ཡི་གེ་འབྲུ་དྲུག་པོ་ཐ་མལ་པའི་
ཟུང་མ་ལ་འོག་མའི་ཡི་གེ་འབྲུ་དྲུག་པོ་དྲག་པོས་ཕུལ་བའི་ཟུང་མས་བྱ་བྲག་ཕྱེ་སྟེ་བསྐུལ་བ་ལ་བྱའོ་ཞེས་པའོ། །ས་བོན་ཟུང་མས་ཕྱེ་བ་དང༌། །བརྒྱད་པོ་འབྱེད་པས་བསྒྲུབས་པ་ལ། །ཞེས་པ་གོང་མ་ཡི་གེ་འབྲུ་དྲུག་བོ་ཐ་མལ་ཟུང་མ་ལ་འོག་མའི་ཡི་གེ་འབྲུ་དྲུག་པོ་དྲག་པོས་ཕུལ་བའི་ཚུལ་དུ་ཟུང་མས་བསྐུལ་བའི་ཚུད་དུ་ལྟག་འོག་ཏུ་བསྣུར་ཏེ་ཕྱེ་བ་དེ་རྩིབས་བརྒྱད་པ་དབྱེ་བར་བྱ་བ་བསྒྲུབ་པ་ལ་སྦྱར་བར་བྱའོ། །མཛའ་བ་མྱུར་དུ་བཟློག་པའི་ཕྱིར། །ཞེས་པ་མདའ་བོ་གཉིས་མྱུར་དུ་དབྱེ་བའི་ཕྱིར། ཆོ་ག་བཞིན་དུ་རིམ་པར་སྦྱར། །ཞེས་པ་གོང་དུ་བཤད་པའི་ཚུལ་བཞིན་དུ་སྦྱར་བར་བྱའོ། །རིམ་པ་སྔ་མའི་ཚུལ་བཞིན་དུ། །ཞེས་པ་ཡི་གེ་དགོད་པའི་རིམ་པ་ཚུལ་བཞིན་བྱའོ། །ཁྲོ་བོའི་འཁོར་ལོར་གནས་ཞེས་པ་འཁོར་ལོའི་རྩིབས་དགུ་པའི་སྔགས་ལ་གནས་པར་བྱའོ། །འཇིག་པར་འགྱུར་ཏེ། འཆི་བར་ཞེས་བྱའོ། །ལྷ་རྣམས་ཀྱིས་ནི་སྦས་པ་ཡང༌། །ཞེས་པ་བསད་པར་བྱ་བ་དེ་ལྷས་བསྲུངས་པ་ཞིག་ཡིན་ན་ཡང་ངོ༌། །གཤེད་པོའི་དྲུང་དུ་ཁྲིད་པར་འགྱུར། །ཞེས་པ་གཤིན་རྗེའི་དྲུང་དུ་ཁྲིད་པར་འགྱུར་ཞེས་གཤིན་རྗེའི་དྲུང་དུ་འགྲོ་བར་བྱེད་དེ་འཆི་བར་འགྱུར་ཞེས་བྱ་བའི་དོན་ཏོ། །ཁྲོ་བོ་ཡིན་ནི་འཁོར་ལོའི་གནས། །ཞེས་པ་རྩིབས་བཅུ་པའི་གནས་པའོ། །དེ་ཡིས་བོན་གྱིས་ཀྱང་ཕྱེ། །ཞེས་པ་བསྐྲད་པར་བྱ་བའི་ས་བོན་གྱིས་ཕྱེ་ཞེས་པའོ། །སྔོན་གྱི་ས་བོན་འབར་བ། །ཞེས་པ་སྔ་མ་བཞིན་དུ་ཟུང་གཉིས་ལྟག་འོག་བསྣོལ་བའི་ཟུང་གོང་མས་འོག་མ་བསྐུལ་བས་མཐུ་ཅན་དུ་གྱུར་པའི་དོན་ཏོ། །སྔ་མ་བཞིན་དུ་རིམ་གྱིས་བཟླས། །ཞེས་པ་འཁོར་ལོའི་རྩིབས་ཀྱི་སྔས་རྣམས་རིམ་གྱིས་བཟླས་པའོ། །སྔར་བཤད་པ་ཡི་ལས་བསྒྲུབ་བོ། །ཞེས་པ་བསྐྲད་ཨཱི་ལས་བསྒྲུབ་པའོ། །འཁོར་ལོའི་རིམ་པ་བཅུ་གཅིག་བོ། །ཞེས་པ་རྩིབས་ཅུ་གཅིག་པའི་སྔགས་ལའོ། །གང་ཡིན་པ་ནི་དེ་བཟུང་ནས། །སྔགས་པ་དེས་ཞེས་པའོ། །སྔར་བཤད་པ་བཞིན་དུ་བསླུ་བ་དང་ཞེས་པས་བོན་ལྟག་འོག་བསྣོལ་ཞིང་དགོད་པ་དང༌། བསྐུལ་བ་དག་ཀྱང་སྔ་མ་དང་འདྲ་བར་བྱའོ། །སྔ་མའི་ལས་ནི་བྱེད་པར་
འགྱུར། །ཞེས་པ་ཞི་བའི་ལས་ཐ་མལ་བར་སྔར་བསྒྲུབས་ཏེ། མ་གྲུབ་པ་དེ་ཞི་བ་དག་ལ་གང་གསུངས་པ་ཞེས་པ་ཞི་བ་དང་རྒྱས་པ་གཉིས་སྤྱིའི་ལས་ཀྱི་མཚན་ཉིད་གཅིག་པར་ཡང་བཤད་དོ། །རྒྱས་པ་དག་ལ་འང་དེ་བཞིན་བྱ། །ཞེས་པ་ལ་ཞི་བ་དག་གི་ལས་བྱ་བ་བཞིན་དུ་རྒྱས་པ་དག་གི་ལས་ཀྱང་འོག་ནས་འབྱུང་བ་བཞིན་དུ་བྱའོ། །བཅུ་གཉིས་པ་ལ་གནས་སུ་ཞེས་པ་རྩིབས་བཅུ་གཉིས་པའི་གནས་ལའོ། །དེ་ཡི་ས་བོན་བསྐུལ་བ་བྱས། །ཞེས་པ་རྒྱས་པའི་སྔགས་ཀྱང་སྔ་མ་བཞིན་དུ་བྱ་ཞེས་པའོ། །བདག་གི་མཐུ་རྩལ་གནོན་པ་བརྟག་པ་ལ་ཞེས་པ་ལྷའི་སྐུ་བསྒོམས་པས་རྒྱས་པའི་ལས་བྱའོ། །ས་བོན་ཟུང་མར་སྦྱར་བ་ཡིས། །ཞེས་པ་ཡི་གེ་གོང་མའི་འབྲུ་དྲུག་པོའི་ཟུང་མ་ཐ་མལ་བ་དང༌། འོག་མའི་འབྲུ་དྲུག་པོ་དྲག་པོར་ཕུལ་བ་ཟུང་དུ་བྱས་པ་དེ་ཉིད་ཟུང་ལྟ་ག་འོག་བསྣོལ་ཏེ་སྦྱར་བས་བྱའོ། །ས་བོན་མཐུ་ནི་འབར་བ་ཅན། །ཞེས་པ་གོང་མའི་ཡི་གེ་དྲུག་པོའི་ཟུང་ཐ་མལ་བའི་གོང་དུ་འོག་མའི་ཡི་གེ་འབྲུ་དྲུག་དྲག་ཏུ་ཕུལ་བའི་ཟུང་མ་གཞག་པས། །ཐ་མལ་བའི་ཟུང་མས་བསྐུལ་བས་གཞི་བརྗིད་ཅན་དང་མཐུ་ཅན་དུ་འགྱུར་བའི་དོན་ཏོ། །འཁོར་ལོ་བཀོད་པའི་ལས་རྣམས་ནི། །སྔར་གསུངས་པ་དག་གྲུབ་ཕྱིར་བྱ། །ཞེས་པ་རྩིབས་བཅུ་གཉིས་པ་ལ་སྔགས་བཀོད་པའི་ལས་རྣམས་ལས་དྲུག་པོ་རྣམས་ཐ་མལ་བར་བསྒྲུབས་ཏེ། མ་གྲུབ་པར་གྱུར་ན་གདོད་ཕྱི་མིའི་བཟློག་པའི་སྔགས་ཀྱི་ཆོ་ག་འདི་ལས་དེ་དག་འགྲུབ་པར་བྱ་བའི་ཕྱིར་སྦྱར་བའི་ཐ་ཚིག་གོ །དེ་ལྟར་ཁྲོ་བོའི་འཁོར་ལོ་ནི།། ཞེས་པ་འདི་ནི་ཁྲོ་བོའི་རྒྱལ་པོ་ཉིད་ཀྱི་འཁོར་ལོ་ཡི། །ཆོ་གར་བཅས་པ་རྒྱས་པ་དག །ཅེས་པ་འཁོར་ལོའི་རྩིབས་ལ་སྔགས་བྲིས་པ་དང༌། ལས་དྲུག་པོ་དེ་དག་བྱེ་དཔའི་ཚེ་ན་སྟང་སྟབས་དང༌། གཟུགས་བརྙན་བྱ་བ་ལ་སོགས་པའོ། །གསང་བ་བསྐུལ་མར་བཅས་པ་ཡིས། །ཞེས་པ་ཟུང་ལྟག་འོག་བསྣོལ་བ་པ་ལས་བྱ་བ་ཐ་མའི་བསྐུལ་བའི་ཚིག་ལ་བྱང་བྱའོ། །ས་བོན་ཟུང་མ་བསྐུལ་བའི་གང༌། །ཞེས་པ་དང་པོའི་ཡི་གེ་འབྲུ་དྲུག་པོའི་ཟུང་མ་ཐ་མའི་སྐུལ་བར་བྱེད་པ་ཉིད་གང་ཡིན་པ་དེ་ནི། འོག་མའི་ཡི་གེ་འབྲུ་དྲུག་པོ་དྲག་པོར་
བསྐུལ་བས་ཟུང་མས་སྐུལ་བར་བྱེད་པའོ། །གཉིས་པ་རབ་ཏུ་བསྒྲགས་པ་ཡང༌། །དེ་འདིར་ས་བོན་གཉིས་པ་ཡིས། །ཞེས་པ་འོག་མའི་ཡི་གེ་འབྲུ་དྲུག་པོ་དྲག་ཏུ་ཕུལ་བའི་ཟུང་གཉིས་གཉིས་སུ་བྱས་ཏེ་སྦྱར་བ་ནི་གཉིས་པའོ། །མྱུར་དུ་འགྲུབ་པར་འགྱུར་བ་བཤད། །ཅེས་པ་དེ་ལྟར་འདིར་འོག་མའི་ཡི་གེ་འབྲུ་དྲུག་པོ་དྲག་ཏུ་ཕུལ་བའི་ཟུང་མས་གོང་མའི་ཡི་གེ་ཟུང་མ་ལ་བསྐུལ་བས་ལས་རྣམས་སྦྱར་ན་རིང་པོར་མི་ཐོགས་པར་འགྲུབ་པར་བཤད་དོ། །ཐ་མའི་ས་བོན་ཐམས་ཅད་ལ། །ཕུལ་བས་ཚིག་གཉིས་རྟག་ཏུ་སྦྱར། །ཞེས་པ་འོག་མའི་ཡི་གེ་འབྲུ་དྲུག་པོ་དྲུག་ཏུ་ཕུལ་བའི་ཚེ་ཚེག་དྲག་གཉིས་གཉིས་སྦྱར་རོ། །དེ་ལྟར་ཚེག་དྲག་པོ་གཉིས་ཕུལ་བ་ཡང་འོག་ནས་བཤད་དེ། དེ་ལ་གོང་མའི་ཡི་གེ་འབྲུ་དྲུག་པོའི་ཟུང་མ་དང༌། འོག་མའི་ཡི་གེ་འབྲུ་དྲུག་པོའི་ཟུང་མ་གཉིས་ལྟག་འོག་བསྣོལ་བའི་ཟུང་མ་གོང་མ་ཤོས་ཀྱི་ཡི་གེ་འབྲུ་གཉིས་པོ་དེའི་ཟུང་མར་མི་བྱ་བར་ཚེག་དྲག་པོ་གཉིས་གཉིས་ཀྱིས་བཅད་པས་ན་ཡང་ཆེར་འགྱུར་བའི་དོན་ཏོ། །ཟུང་མ་ཟུང་མའི་ཚིག་འདི་ལ། །ཞེས་པ་ཨཱཪྻ་ཤཱི་ལེནྡྲའི་རྒྱ་གར་གྱི་ཡི་གེ་ལས་འདི་སྐད་དུ་འབྱུང་བ་སྟེ། བསྒྱུར་བ་འདི་ནི་གོང་མའི་འབྲུ་དྲུག་པོའི་ཟུང་དང་ཡི་གེ་མའི་ཡི་གེ་འབྲུ་དྲུག་པོའི་ཟུང་དུ་བྱས་པ་དེ་ལྟག་འོག་བསྣོལ་བའི་གོང་ཟུང་དེ། ཟུང་མ་ཡིན་པར་བྱ་བའི་དོན་ཏེ། གོང་མའི་ཟུང་ནི་ཡི་གེ་འབྲུ་གཉིས་ཚེག་དྲག་པོའི་གཉིས་གཉིས་ཀྱིས་དྲག་ཏུ་ཕུལ་བས་ན་གོང་མའི་ཟུང་དེ་ཟུང་མ་ཡིན་པའི་ཚིག་ཏུ་འགྱུར་རོ། །ཐ་མ་དག་ལ་མ་ཡིན་ནོ། །ཞེས་དེ་ལྟར་ཟུང་གཉིས་པོ་དེ་ལྟར་ལྟག་འོག་བསྣོལ་ཟིན་པའི་འོག་མའི་ཟུང་ཚེག་དྲག་པོ་མི་གཞུག་ཅེས་པའོ། །ཟུང་མ་ཟུང་མའི་ཚིག་འདི་ལ། །ཞེས་པ་ལ་སོགས་པ་འདི་ཡང་དོན་དུ་ན་ཟུང་གཉིས་གཉིས་པོ་དེ་ལྟག་འོག་བསྣོལ་ཟིན་པའི་གོང་མའི་ཟུང་ལ་ཚེག་དྲག་པོ་གཉིས་གཉིས་ཀྱིས་དྲག་ཏུ་ཕུལ་ཏེ་བསྣོལ་བའི་འོག་མའི་ཟུང་ལ་ཚེག་དྲག་པོས་མཾ་དབུལ་ཞེས་པའི་དོན་ཏོ། །མཛའ་མའི་རྒྱ་གར་གྱི་ཡི་གེ་ལས་ཚིག་འདི་སྐད་དུ་འབྱུང་སྟེ་བསྒྱུར་བ་ནི་འདིའོ། །དེ་བས་ན་རྒྱ་གར་གྱི་ཡི་གེ་གསུམ་ཆར་གྱིས་མཐུན་པར་འབྱུང་བས་ན། གཅིག་
ཁོ་ན་ལྟར་འཇུག་བགྲང་སྟེ་མ་བཤད་ཀྱི། སྔར་བསྒྱུར་བའི་དཀྱུས་པས་ཀྱང༌། མ་བཅོས་པར་སོ་སོ་རུ་བཞག་གོ །རྒྱ་གར་གྱི་ཡི་གེ་གཉིས་ལས་ཅི་འབྱུང་བ་ཡང་འཕྲལ་དུ་བསྒྱུར་ནས་བཤད་པ་ཡིན་ནོ། །ཁྲོ་བོའི་རྒྱལ་པོའི་དངོས་གྲུབ་ཐོབ། །ཅེས་པ་ལས་དྲུག་པའི་དངོས་གྲུབ་ཐོབ་པར་འགྱུར་བའི་དོན་ཏོ། །ཞི་བ་དང་རྒྱས་པ་དང༌། བྱེད་པའི་ཚེ་བསྐུལ་བའི་ཚིག་ཀ་ར་ལ་བ་ད་ན་ཞེས་བྱ་བ་དག་གཞུག་པར་མི་རིགས་སོ་ཞེ་ན། སློབ་དཔོན་ཆེན་པོ་པྲ་ཏི་ཝརྞ་ཙནྡྲའི་པིནྡརྠའི་ནང་ནས་ཐམས་ཅད་ལ་སྦྱར་བར་བྱ་བ་ལུང་ལས་འབྱུང་ངོ༌། །དབང་ལ་ཡི་གེ་ཁ་དོག་དམར་པོར་བྱ་བར་བཤད་པ་དང༌། འཁོན་པ་དང༌། བསྐྲད་པ་དང༌། བསད་པ་གསུམ་འདྲ་སྟེ། སྔགས་ཀྱི་ཡི་གེ་ཁ་དོག་སྔོན་པོར་བསམ་པ་དང༌། ཞི་བ་དང་རྒྱས་པ་ཁ་དོག་སེར་བོ་དང༌། དཀར་པོར་བཤད་པའི་ལས་དྲུག་པོ་དེ་དག་སོ་སོར་འབྱེད་པའི་ཚེ། །ཡིད་ལ་སྔགས་ཀྱི་འབྲུ་ཉིད་མི་བསམ་པར་སྔགས་བརྗོད་པའི་ཚེ། སྔགས་ཀྱི་ཡི་གེའི་ཁ་དོག་དེ་འདྲ་བར་སོ་སོར་བསམས་ཏེ་ལས་བྱའོ། །ཡང་ན་ཉི་མའི་དཀྱིལ་འཁོར་དང་ཟླ་བའི་དཀྱིལ་འཁོར་དག་ལ་སྔགས་དེ་དག་ཕྲེང་བ་སོ་སོའི་ཁ་དོག་བཞིན་དུ་བཀོད་པ་ལས་སོ་སོའི་ལས་ལ་བཟླས་བརྗོད་བྱར་ཡང་རུང་ངོ༌། །ཞི་རྒྱས་དག་ལ་ཆུའི་དཀྱིལ་འཁོར་དང༌། དབང་ཆེན་གྱི་དཀྱིལ་འཁོར་ལ་སྦྱར་བར་རིགས་ན། དེའི་སྐབས་སུ་ལས་རྣམ་བཞི་དག་བྱེད་ན་ཉི་མ་དང་ཟླ་བ་ལ་སྤྱིའི་རྒྱུད་དང་མཐུན་པར་སོ་སོའི་ཁ་དོག་ཚང་བར་མ་གསུངས་པས་འདིར་ཇི་སྐད་གསུངས་པ་བཞིན་དུ་ཁྲོ་བོ་སྔོན་པའི་རང་བཞིན་དུ་གནས་པས་ལས་ཐམས་ཅད་བསྒྲུབ་པོ། །ཡང་ན་སྤྱིའི་རྒྱུད་དང་སྦྱར་ཏེ་ཁ་དོག་སོ་སོར་ཚང་བར་སྦྱར་ཏེ་ལས་བྱར་རུང་ངོ༌། །ད་ནི་མི་ཤེས་ན་ཉེས་དམིགས་སུ་འགྱུར་བ་བསྟན་པའི་ཕྱིར། ཁྲོ་བོའི་འཁོར་ལོའི་གསང་བ་འདི། །ཞེས་པ་ལ་སོགས་པ་སྨོས་སོ། །མི་ཤེས་པར་ནི་གང་སྦྱོར་བ། །ཞེས་པ་འཁོར་ལོའི་མཚན་ཉིད་མི་ཤེས་པ་ཡང༌། དེ་འདི་དངོས་གྲུབ་མི་ཐོབ་ཀྱི། །ཞེས་པ། མ་ཤེས་པ་བཞིན་དུ་མུན་སྤྲུལ་དུ་བྱེད་པ་དེ་རྒྱུད་འདི་ལས་མི་འཐོབ་བོ་ཞེས་བཤད་དེ། མྱུར་དུ་སྨྱོ་བ་ཐོབ་པར་འགྱུར། ཞེས་པ་མི་ཤེས་བཞིན་དུ་སྦྱོར་བ་འདིར་ཞེས་
པའོ། །ད་ནི་སྤྱིའི་ས་བོན་དགོད་པའི་གོ་རིམས་བཤད་དོ། །མ་མཻ། མཱ་མཻ། མུ་མཱུ། དྲུག་རྣམས་ཀྱི་ཞེས་པའོ། །གོང་དུ་བཤད་པ་རྣམས་ཀྱི་མཇུག་སྡུད་པའི་ཚིག་སྟེ། དེ་ལ་དང་པོ་ཡི་གེ་དྲུག་པོ་རྣམས་གོ་རིམས་བཞིན་དུ་ཟུང་དུ་བྱས་པ་རྣམས་ཀྱིས་ནི་དབང་ལ་སོགས་པའི་ལས་དྲུག་པོ་འདི་དག་བསྒྲུབ་པོ། །དེ་ལྟར་ཟུང་མར་བྱ་བ་ནི་གོང་དུ་བཤད་པའི་དོན་ཏོ། །བསྐྲད་དང་ཞི་དང་རྒྱས་པའི་མཐའ། །ཞེས་པ་མཇུག་རྒྱས་པའི་མཐའ་བར་ལ་ཐུག་པའི་ལས་དྲུག་པོ་དེ་དག་སྔགས་པས་དེ་ལྟར་སྤྱད་བ་དང༌། འགྲུབ་པར་བྱ་སྟེ། མཁས་པ་དག་གིས་བསྒྲུབ་པར་བྱ། །ཞེས་པའི་དོན་ཏོ། །དེ་དག་ཉིད་ལས་བཟློག་པ་ཡིས། །ཞེས་པ་གོང་མའི་ཡི་གེ་འབྲུ་དྲུག་པོ་ཟུང་དུ་བྱས་པ་དང༌། འོག་མའི་ཡི་གེ་འབྲུ་དྲུག་པོ་ཟུང་དུ་བྱས་ཏེ་དྲག་པོའི་ཚིག་གིས་ཕུལ་ནས་ཟུང་ལྟག་འོག་བསྣོལ་ཏེ་བཀོད་པ་ནི་གོང་མའི་ཡི་གེ་འབྲུ་གཉིས་པོས་འོག་མའི་ཡི་གེ་ཟུང་བསྐུལ་བས་ལས་རྣམས་མྱུར་དུ་འགྲུབ་པའི་དོན་ཏོ། །དེ་ལྟར་ཡི་གེ་བཟློག་པ་ལས་བྱ་བ་འདི་ཡང་སྔར་རིམ་བཞིན་ཡི་གེ་ཐ་མལ་བའི་ཟུང་གིས་ལས་དྲུག་པོ་དེ་དག་མ་གྲུབ་པར་གྱུར་ན་གདོད་ཡི་གེ་བཟློག་པའི་ཚུལ་འདི་ལས་དྲུག་པོ་སྔར་བསྒྲུབས་ཏེ་མ་གྲུབ་པའི་ལས་རྣམས་བྱའོ། །གྱི་ན་མྱུར་དུ་འགྲུབ་ཅེས་ཏེ། སྔར་དང་པོ་ནི་ཡི་གེ་བཟློག་པས་ལས་དྲུག་པོ་དག་བསྒྲུབ་པར་མི་བྱའོ། །ཟུང་མ་ལས་སྔར་བསྒྲུབས་ཏེ། མ་གྲུབ་ན་གདོད་ཡི་གེ་བཟློག་པ་འདིས་བསྒྲུབ་པར་བྱའི། སྔར་དང་པོར་ཡི་གེ་བཟློག་པ་འདིས་ལས་བསྒྲུབ་པར་མི་བྱ་བ་ནི་མ་གྲུབ་ན་སྟེ་གཞན་དུ་མིན་ཞེས་པའི་དོན་ཏོ། །དེ་ལ་མུ་མུ་མཱི་མཱི་མཻ་མཱ་ཞེས་འོག་མའི་ཡི་གེ་འབྲུ་དྲུག་པོ་འདི་ཟུང་དུ་བྱས་པ་དང༌། གོང་མའི་ཡི་གེ་འབྲུ་དྲུག་ཟུང་དུ་སྦྱར་བ་གཉིས་ཟུང་ལྟག་འོག་བསྣོལ་ཏེ་བཟློག་བའི་ཡི་གེ་འདིས། མཇུག་ཏུ་རྒྱས་པའི་མཐའ་བར་ལ་ཐུག་པའི་ལས་དྲུག་པོ་དེ་དག་བཟློག་པ་འདིས་བསྒྲུབ་པར་བྱའོ། །འཁོར་ལོ་རྩིབས་ཀྱི་གནས་རྣམས་ནི། །ཞེས་པ་འཁོར་ལོའི་རྩིབས་བཅུ་གཉིས་པའི་གནས་ཀྱི་མིག་མིག་རྣམས་སུ་དམ་ཚིག་དང་སྙིང་པོ་ཨཱཿ་དང་ཧཱུཾ་དགོད་པ་དང༌། ཡི་གེ་ཐ་མལ་ཟུང་དང་ཟུང་ལྟག་འོག་བསྣོལ་བ་རྣམས་
དགོད་པ་དེ་དག་རྩིབས་ཀྱི་གནས་ཀྱི་མིག་མིག་རྣམས་སུ་སྦྱར་ཏེ་དགོད་དོ། །དེ་བཞིན་འཁོར་ལོའི་ནང་དུ་ཡང༌། །ཁྲོ་བོའི་སྐུ་མཆོག་ས་བོན་ནི། །ཞེས་པ་འཁོར་ལོའི་རྩིབས་གཉིས་བ་བར་མ། ཁྲོ་བོའི་ས་བོན་ཡི་གེ་ཧཱུཾ་བཞག་ནས་དེའི་མཇུག་ཐོགས་ཉིད་དུ་ཁྲོ་བོའི་སྔགས་ཀྱི་སྙིང་པོ་ལ་དྲུག་དགོད་པར་བྱའོ། །བཞག་ནས་ཚིག་གི་ཐ་མར་ཡང༌། །ཞེས་པ་རྒྱ་གར་གྱི་ཡི་གེ་ཁ་ཅིག་ལས་ཧཱུཾ་གི་དྲུང་དུ་མ་མ་ཞེས་བྱ་བའི་སྔགས་བྲིས་ལ་ལ་དྲུག་མ་མིའི་གནས་སུ་བཞག་ལ་དེ་ནས་བསྐུལ་བའི་ཚིག་གཞུག་པའི་སྐད་དུ་འབྱུང་བ་ཡང་ཡོད་དེ། འདི་མི་རིགས་ཏེ་པྲ་ཏི་ཝརྞ་ཙནྡྲའི་པིནྡརྠའི་ལུང་ལས་སྔར་བཤད་པ་བཞིན་དུ་འབྱུང་བས་དེ་ལྟར་བྱ་བའི་རིགས་ཞེས་བཤད་དོ། །ཁྲོ་བོའི་དྲིལ་བུ་འཁྲོལ་བ་དགོད། །འཁོར་ལོའི་མུ་རན་བར་དག་ཏུ། །ཞེས་པ་ཕྱིའི་མུ་རན་གྱི་རིམ་གཅིག་བྱ་བ་རིགས་པ་འདྲ་སྟེ་ཁ་གསུམ་དུ་བྱས་པའི་འཁོར་ལོའི་རྩིབས་བཅུ་གཉིས་པའི་གནས་ཀྱི་མིག་ཏུ་ཐ་མའི་ནང་དུ་སྔགས་མ་མ་འདྲ་བ་ལྟ་བུར་ཟུང་དུ་རེ་རེ་དགོད་པའི་མཇུག་ཐོགས་སུ་བསྐུལ་བའི་གྲ་ས་གྲ་ས་ཀ་ར་ལ་བ་ད་ན་ལ་སོགས་པ་བསྐུལ་བའི་ཚིག་བཅུག་ལ་བྱའོ། །ཟུང་ཤིག་ཅེས་པ་གྲ་ས་གྲ་ས་དགོད་པའོ། །འཁོར་ལོ་རྩིབས་བཅུ་གཉིས་པའི་གནས་ཀྱི་མིག་མིག་རྣམས་སུ་དང་པོར་ཨཱཿ་དང་ཧཱུཾ་དང༌། མ་མ་ཟུང་དུ་བྱས་པ་དགོད་པའི་སྔགས་རྣམས་ལ་གནས་པར་བྱ་སྟེ། མཁས་པས་འཁོར་ལོའི་མིག་གི་ནང༌། །ས་བོན་དགོད་པ་རྣམས་ལ་གནས། །ཞེས་པའི་དོན་ཏོ། །ཁྲོ་བོ་འཁོར་ལོའི་བསྒྲགས་པ་ནི། །ཞེས་པ་འདི་ནི་ཁྲོ་བོའི་འཁོར་ལོ་བཤད་དོ། །བཤད་པའི་ཚུལ་གྱི་ཚེ་བཞི། །ཤེས་ནས་ཇི་སྐད་བཤད་པ་ཡི། །དངོས་གྲུབ་རྣམས་ནི་ཐོབ་པར་འགྱུར། །ཞེས་པ་འཁོར་ལོའི་སྔགས་བཀོད་པའི་མཚན་ཉིད་གོང་དུ་བཤད་པའི་དོན་ཀུན་ཤེས་ཏེ་བསྒྲུབ་པོ། །ཇི་སྐད་བཤད་པ་བཞིན་ཤེས་ཏེ་བསྒྲུབས་ན། །ཇི་སྐད་བཤད་པའི་ལས་དྲུག་པོ་དག་གི་དངོས་གྲུབ་རྣམས་ཐོབ་པར་འགྱུར་རོ་ཞེས་པའི་དོན་ཏོ། །ད་ནི་ཚམ་ངམ་བཤད་དེ། །དངོས་གྲུབ་ཚུལ་བཞིན་ཐོབ་འགྱུར་བ། །ཞེས་བྱ་བ་ལ་སོགས་པ་སྨོས་སོ། །དེའི་སྦྱོར་བ་འང་བཤད་པར་བྱ། །ཐོག་མར་
ཕྱག་རྒྱ་བཅིངས་ནས་སུ། །ཞེས་པ་སྔགས་རྣམས་བསྣོལ་བའམ། བཟློག་པའི་ལས་དྲུག་པ་ཇི་སྐད་བཤད་པའི་ཚུལ་བཞིན་དུ་བསྒྲུབ་པར་འགྱུར་བའི་ཚམ་ངམ་སྟེ། སྔགས་དེའི་སྦྱོར་བ་ཡང་བཤད་པར་བྱའོ་ཞེས་སོ། །ཚམ་ངམ་འདི་དྲུག་བྱེད་པའི་དང་པོར་བེ་ཅོན་གྱི་ཕྱག་རྒྱ་བཅིངས་ཏེ། གདོད་དེའི་འོག་ཏུ་ཚམ་ངམ་སྦྱོར་བ་བྱའོ། །ཚམ་ངམ་སྟང་སྟབས་སམ། འཕེན་སྟངས་སམ་ཐབས་སམ་གང་ལ་གཟས་པའི་ཚུལ་ཡང་ཨ་ཤེས་པ་ཞེས་བྱ་བ་འདི་དག་ཀྱང་སྔགས་བསྣོལ་བའམ་བཟློག་པའི་ལས་དྲུག་ལ་ཚམ་ངམ་འདི་དྲུག་ལ་རིམ་བཞིན་དུ་སྦྱར་ཏེ། ལས་བསྒྲུབས་ན་ཇི་སྐད་བཤད་པའི་ལས་དྲུག་པོ་དེ་དག་འགྲུབ་པར་འགྱུར་རོ། །རིམ་བཞིན་དུ་ཐ་མལ་བར་མ་བསྒྲུབས་པའི་ལས་དྲུག་པོ་ལས་ནི་ཨ་ཤོག་འདི་དག་ཁྲོ་བོའི་ཚུལ་ཡིན་པས་ན་མི་སྦྱོར་རོ། །དེ་བས་ན་བསྣོལ་བའི་ལས་དྲུག་པོ་ལ་སྦྱོར་ཏེ། སྐུ་ལས་སུ་ནི་སྐུ་བསྒྱུར་ཏེ། །ཞེས་པ་དང་པོར་དེ་བཞིན་གཤེགས་པའི་དམ་ཚིག་གི་ཕྱག་རྒྱ་རྣམས་བཅིངས་ཏེ། དེའི་འོག་ཏུ་དངོས་པོ་སྟོང་པར་བསྒོམ་པ་དང་ཉི་མའི་དཀྱིལ་འཁོར་ལ་སྙིང་པོ་ཧཱུཾ་བསམ་པ་ནི་སྐུའོ། །ཧཱུཾ་དེ་ལས་རིམ་གྱིས་སྐུར་བསྒྱུར་རོ་ཞེས་པའི་དོན་ཏོ། །ལས་རྣམས་ཚུལ་བཞིན་མཐོང་བ་ཡིས། །ཞེས་པ་སྔགས་བསྣོལ་བའམ་བཟློག་པའི་ལས་དྲུག་ཤེས་པའོ། །སྦྱོར་བ་དག་ནི་ལེགས་པར་བྱས། །ཞེས་པ་ཚམ་ངམ་གྱི་སྦྱོར་བ་དེ་དག་ལེགས་པར་བྱའོ་ཞེས་པའོ། །གདོང་དང་ཁ་མིག་རྐང་པ་མཉམ། །ཞེས་པ་གདོང་དང་ཁ་དང༌། མིག་དང༌། རྐང་པ་དག་ཐ་མལ་པའི་ཚུལ་དུ་བསྒྱུར་ཅིང་བསྒོམ་མོ། །རྐང་པ་གཉིས་ཀྱི་བར་དུ་གུང་མོ་མཐོ་གང་བྱའོ། །སྙིང་ཡང་དེ་བཞིན་རབ་ཏུ་དགའ། །ཞེས་བསྒྲུབ་པའི་སེམས་དེར་བྱའོ། །གང་དབང་དུ་བྱ་བ་ལ་བྱའོ། །གང་ལ་བྱ་བའི་དངོས་པོ་དེ་ལ་གཟས་པའམ་ཞེས་པའི་ལུང་དང་མན་ངག་སེམས་ཀྱིས་གཏད་པ་ལ་ཡ་ཨ་ག་ཤེ་ཞེས་བྱའོ། །ཚུལ་འདི་ལྟར་གནས་ཏེ་ལས་བྱེད་པ་ཡང་ཚམ་ངམ་ཞེས་བྱའོ། །དབང་དུ་བྱ་བའི་སྔགས་གསུང་བ་ཞེས་འཁོར་ལོའི་རྩིབས་ཀྱི་གནས་ལས་དབང་དུ་བྱ་བའི་སྔགས་གསུངས་པ་དེ་སེམས་རྩེ་གཅིག་པས་བསྒྲུབ་པོ། །དབང་དུ་
བྱེད་པའི་ཚེ་ཡང་ལག་པ་གཡས་པ་བེ་ཅོན་གྱི་ཕྱག་རྒྱ་བཅིངས་ཏེ་ཕྱར་ལ། ལག་པ་གཡོན་པས་ཁྲོ་བོའི་མཛུབ་མོ་བྲང་དུ་བསྒྲེང་སྟེ་ལས་བྱའོ། །ལས་ཟིན་པའི་འོག་ཏུ་ལག་པ་གཉིས་གར་ཐབས་སུ་སྦྱར་ཏེ། ལྟེ་བ་ཁུང་གི་ཐད་ཀར་དཀྲོལ་ལོ། །དེ་བཞིན་དུ་འཁོན་པ་དང༌། བསད་པ་གཉི་ག་ཡང་བཏང་སྟེ་ཟིན་པའི་རྗེས་ལ་གར་ཐབས་སུ་ནི་འཁོན་པའི་ནི་གཡོན་པའི་ལྟེ་ཟུར་དུ་དགྲོལ་ལོ། །བསད་པ་ནི་གཡས་པའི་ལྟེ་ཟུར་དུ་དགྲོལ་ལོ། །འདི་དག་ནི་སློབ་དཔོན་གྱི་ལུང་ངོ༌། །ཕྱག་རྒྱ་བཅིངས་ཏེ་ལས་བྱ་བ་ནི་སྔ་མ་བཞིན་འབད་པར་བྱའོ། །རྐང་པ་ཡ་གཅིག་ཐུར་དུ་བཞག །ཅེས་པ་རྐང་པ་གཉིས་སྔ་མ་བཞིན་བཞག་པ་ལས་རྐང་པ་གཡས་པའི་རྩེ་མོས་ལ་བཙུགས་ཏེ་བཏེག་གོ །གདོང་དང་ནུ་མཇིད་གཅུས་ཏེ་མནན། །ཞེས་པ། གདོང་དང་ནུ་མཇིད་གཡོན་ཕྱོགས་སུ་གཅུས་ཏེ་གནས་པ་ལ་བྱའོ། །ཁ་དང་མིག་ནི་ཡ་གཅིག་བཙུམས། །ཞེས་གཡོན་ལ་སོགས་པ་ཁ་ཕྱེད་བཙུམས་པའི་ཚུལ་དུ་བྱས་པ་དང༌། གཡོན་པའི་མིག་ཀྱང་བཙུམས་པ་ལ་བྱའོ། །ཚམ་ངམ་གནོན་པ་ཆེན་པོས་བྱ། །ཞེས་པ་མཐུ་རྩལ་དང་ལྡན་པ་དཔའ་བོ་ཆེན་པོའི་ཚུལ་དུ་གནས་པར་བྱའོ། །བེ་ཅོན་ལ་ནི་མིག་གཉིས་བལྟ། །ཞེས་པ་འཁོན་པར་བྱ་བ་འདི་ལ་ཁྲོ་བོའི་མཛུབ་མོ་དང་བེ་ཅོན་གྱི་ཕྱག་རྒྱ་བཅིངས་ཏེ། ལས་བྱ་བ་ནི་སྔ་མ་བཞིན་ནོ། །མིག་གཡས་ཕྱེ་བས་བེ་ཅོན་གྱི་ཕྱག་རྒྱ་བཅིངས་པ་ལ་བལྟ་བར་བྱའོ། །བསྒྲུབ་པར་བྱ་སྒྲུབ་པ་ལ་འབད། །ཅེས་པ་འཁོན་པར་བྱ་བ་ལ་སེམས་རྩེ་གཅིག་ཏུ་གཏད་བས་འབད་ཅེས་པའོ། །གང་དབྱེ་བར་འདོད་པ་གཉིས་ཞེས་པ་དབྱེ་བར་འདོད་པ་གཉིས་ཕན་ཚུན་དབྱེ་བར་འདོད་པ་ལས་འབད་ཅིང་བརྩོན་པར་བྱ་བ་སྟེ། དེ་དག་དབྱེ་བ་བརྩམ་པར་བྱ། །ཞེས་པའོ། །རྐང་པ་གཉིས་པ་བཏེག་པ་ཡི། །ཞེས་པ་རྐང་པ་གཡས་པ་གྱེན་དུ་བཏེག་ནས་ཚམ་ངམ་བྱས་པ་སླར་ཡང་བཞག་ཅེས་པ་གདངས་བའི་ཚུལ་དུ་ཚམ་དམ་བྱས་པ་དེས་སླར་ས་ལ་གཞག་པར་བྱ་བ་ནི་གཡས་བརྐྱང་བའི་ཚུལ་དུ་གནས་པར་བྱའོ། །ཕྱག་རྒྱ་བཅིངས་ནས་སུ། ཁྲོས་པར་ལྟ་ཞིང་ཡིད་ཀྱང་ཁྲོས། །ཞེས་པ་བཞིན་ཡང་ཁྲོ་གཉེར་ཅན་དུ་བྱའོ། །ཁྲོ་བོའི་མཛུབ་མོ་དང་བེ་
ཅོན་གྱི་ཕྱག་རྒྱ་གཉིས་བཅིངས་ཏེ་སྦྱར་ལ་བཟའོ། །ཁྲོ་བོའི་ལྟ་བ་ཡང་བྱ་ཞིང་ཡིད་ཀྱང་ཁྲོ་བོར་བྱའོ། །རབ་ཏུ་དཔའ་བ་སྲེན་དང་བཅས། །རྩལ་གྱིས་གནོན་པར་རབ་ཏུ་འདུལ། །ཞེས་པ་མཐུ་རྩལ་ཆེན་པོ་དང༌། དཔའ་བོ་ཅིས་ཀྱང་མི་བཟློག་པའི་སྲེན་དང་བཅས་པའི་ཚུལ་དུ་གནས་པར་བྱའོ། །སྔགས་སྔོན་བཞིན་དུ་སྔགས་ཚུལ་གནས། །གང་འདོད་པ་ནི་གཞོམ་པར་བྱ། །ཞེས་པ་སྔར་བཤད་པ་བཤད་དུ་ཁྲོ་བོའི་སྐུ་ཡང་བསྒྱུར་ཞིང་འཁོར་ལོའི་རྩིབས་ཀྱི་གནས་གསུམ་པོའི་སྔགས་པ་ཡང་ཚུལ་བཞིན་དུ་གནས་ཏེ་སྒྲུབ་པ་པོས་གང་འདོད་པ་དེ་གསད་པར་བྱའོ་ཞེས་པའོ། །དྲག་ཤུལ་ཅན་བརྐྱང་སྟེ་བཞག་ཅེས་པ་གཡོན་བརྐྱང་བའི་ཚུལ་དུ་གནས་པར་བྱའོ། །བཟུར་ཏེ་འདུག་པའི་ཚུལ་དུ་གནས། །ཞེས་པ་གཡས་ལོགས་སུ་བཟུར་བའི་ཚུལ་དུ་གནས་པར་བྱའོ། །གདོང་ཡང་གཡོན་པར་བསྒྱུར་པར་བྱ། །ཞེས་བ་གཡས་ལོགས་སུ་གདོང་ཡང་གཅུས་ཏེ་གནས་པར་བྱའོ། །མཛུབ་མོ་བསྒྲེངས་ཏེ་གདོངས་པ་དང༌། །ཞེས་པ་བྲང་དུ་བསྒྲེང་ཞེས་པའོ། །གཡས་པ་བེ་ཅོན་གྱི་ཕྱག་རྒྱ་དག་གིས་བསྡིགས་ཞེས་པའོ། །དེ་ནས་རྐང་པ་མཉམ་པར་གཞག །ཅེས་པ་རྐང་པ་གཉིས་ཀྱི་བར་དུ་གུང་མོ་མཐོ་གང་གི་བར་དུ་གཞག་གོ །ཡན་ལག་གཡས་པ་མཐོ་བར་བྱ། །ཞེས་པ་ལག་པ་གཡས་པ་བེ་ཅོན་གྱི་ཕྱག་རྒྱ་བཅིངས་ཏེ། མཐོ་བར་ཕྱར་ལ་དཔུང་བསྟོད་དོ། །དཔལ་དང་ལྡན་ཞིང་ཞེས་སྔགས་པའི་ཡོན་ཏན་ལ་བྱའོ། །གཡོན་པ་སྨད་ཅེས་པ་གཡོན་ལོགས་ཀྱི་དཔུང་པ་སྨད་དོ། །ཞི་པར་འདོད་ན་ཞི་བར་འགྱུར། །ཞེས་ཚུལ་དེ་ལྟར་གནས་པས་ཞི་བའི་ལས་བསྒྲུབས་པས་ཞི་བར་འགྱུར་རོ། །ཕྱེད་ནི་དམའ་བར་བཀུག་སྟེ་གནས། །ཞེས་པ་རྐང་པ་གཡས་ཚམ་དམ་བྱེད་པ་ཉིད་ཅུང་ཟད་ཙམ་པ་བཀུག་པའི་ཚུལ་དུ་གནས་པ་ནི་ཕྱེད་དམའ་བར་བཀུག་པ་སྟེ་དེ་ནི་ཚམ་དམ་མོ། །རྐང་བ་གཡས་པ་ཚམ་དམ་བྱེད། །ཅེས་པ་གཡས་ལོགས་དམའ་བར་བྱ་ཞེས་པའོ། །སྔགས་ཚུལ་གནས་པས་བསྒྲུབས་ན་ནི། །ཞེས་པ་སྔགས་བསྣོལ་བའི་འཁོར་ལོ་རྩིབས་དྲུག་པའི་གནས་ལ་སྔགས་བྲིས་པ་ལ་གནས་ཏེ་ཞེས་པའོ། །རྒྱས་པར་འདོད་ན་ཐོབ་པར་འགྱུར། །ཞེས་
བ་ཚུལ་འདི་ལྟར་གནས་པས་རྒྱས་པའི་ལས་བྱན་རྒྱས་བར་འགྱུར་རོ་ཞེས་པའོ། །སླར་ཡང་དེ་བཞིན་ཤེས་བྱ་བ། །བཟློག་སྟེ་བྱ་ཡི་གཞན་དུ་མིན། །ཞེས་པ་འདི་ནི་ཚིག་གི་རྒྱན་ཙམ་དུ་ཟད་དེ་སྔགས་བསྣོལ་བའམ། བཟློག་པའི་ལས་དྲུག་པོ་ལ་ཚམ་ངམ་འདི་དྲུག་རིམ་བཞིན་དུ་སྦྱར་བར་བྱའོ། །གཞན་ལ་ནི་མི་སྦྱོར་རོ། །ཚིགས་བཅད་གོང་མ་དང་སྦྱར་ན་སྔ་མའི་ལས་ཐ་མལ་བ་དྲུག་པོ་ལ་སྦྱར་བ་སྐད་དུ་བཤད་དོ། །ཚམ་ངམ་འདི་དག་དྲག་པོ་ལ་སྦྱར་བར་རིགས་ཞེས་ཁ་ཅིག་འཆད་དོ། །བསྒྲུབ་པ་བདག་ཉིད་ཆེན་པོ་ཡི། །ཞེས་པ་བསྒྲུབ་པའི་ཡོན་ཏན་དང་ལྡན་པ་དེའི་ཞི་བར་འགྱུར་ཞེས་བའོ། །ཚམ་དམ་རིགས་དྲུག་གསུངས་པ་ཞེས་པ་ལས་དྲུག་ལ་གོ་རིམས་བཞིན་དུ་ཚམ་ངམ་དྲུག་གསུངས་པ། དང་པོའི་མིང་ནི་ལེགས་པར་ཕྱོགས། །ཞེས་པ་དབང་གི་ལས་ཀྱི་ཚམ་ངམ་དང་པོར་གསུངས་པ་དེའི་མིང་ནི་ལེགས་པར་ཕྱོགས་ཞེས་བྱ་སྟེ་གང་དབང་དུ་བྱ་བ་དེ་བདག་ལ་ཕྱོགས་ཤིང་དགའ་བར་བྱ་བ་བསྒྲུབ་པའི་ཕྱིར་ཚམ་ངམ་དེའི་མིང་ཡང་དེ་སྐད་ཅེས་བྱ་སྟེ། ཚམ་ངམ་འདི་དྲུག་ཆར་གྱི་མིང་ལས་ཀྱི་དོན་དང༌། རྗེས་སུ་མཐུན་པའི་མཚན་ཉིད་ཅན་ཤ་སྟག་གོ །དེ་ཡི་འོག་མ་རྒྱབ་ཀྱིས་ཕྱོགས། །ཞེས་པ་འཁོན་པར་བྱ་བའི་ཚམ་ངམ་གྱི་མིང་ཁྲོ་བོ་ཅན་ཞེས་པ་གསད་པའི་ཚམ་ངམ་གྱི་མིང་ངོ༌། །བཞི་པའི་མཛུབ་མོ་བསྒྲེང་བ་ཡིན། །ཞེས་པ་བསྐྲད་པར་བྱ་བའི་ཚམ་དམ་གྱི་མིང་ངོ༌། །ལྔ་པ་ལ་ནི་སྟོབས་ཞེས་བྱ། །ཞེས་པ་བཞི་བར་བྱ་བའི་ཚམ་དམ་གྱི་མིང་ངོ༌། །དྲུག་པ་སྟོབས་པོ་ཆེ་ཞེས་བྱ། །ཞེས་པ་རྒྱས་པར་བྱ་བའི་ཚམ་དམ་གྱི་མིང་ངོ༌། །འདི་རྣམས་ཚམ་ངམ་དྲུག་ཏུ་བསྒྲགས། །ཞེས་པ་འདི་ནི་ཚམ་ངམ་དྲུག་ཏུ་བསྒྲགས་པ་ཡིན་ནོ། །ད་ནི་འཁོར་ལོའི་ཕན་ཡོན་བསྔགས། །ཞེས་བཤད་པའི་ཕྱིར། །ཚང་ངམ་གདངས་པ་བྱས་པ་ཡིན། །ཞེས་པ་ལ་སོགས་པ་སྨོས་སོ། །ཚམ་ངམ་དགངས་པ་བྱས་པ་ཡིས། །དགྲ་བོའི་འཁོར་རྣམས་གཡེན་སྤྱོ་བ། །ཞེས་པ་གང་ལ་བྱ་བའི་དོན་དེ་ལ་གཟས་པའམ་ཞེན་པའམ་ལུས་དང་སེམས་ཀྱིས་གཏད་པའི་ཚུལ་ལྟ་བུ་ལ་ཡང་ཨ་གཤེ་ཞེས་བྱ་སྟེ། །དེ་ལྟ་བུའི་ཚུལ་གྱིས་བྱས་པ་ཡིས། །ཞེས་པའོ། །འཁོར་ལོའི་ཆོ་ག་ལ་གོམས་པར་བྱེད་པས་ཞེས་
པ་འཁོར་ལོར་གསུངས་པའི་སྔགས་རྣམས་ལས་ཞེས་པའོ། །རབ་ཏུ་གསང་བའི་རྒྱུད་འདི་དཀོན། །ཞེས་བ་རྒྱུད་འདི་ཉིད་ལ་བྱའོ། །ཁྲོ་བོ་རྣམ་པར་རྒྱལ་བ་འདི། །ཞེས་པ་ཁྲོ་བོ་ཆེན་པོ་ཉིད་བྱའོ། །གསང་བའི་རྟོག་པ་བཟང་པོ་འདི། །ཀུན་དུ་དངོས་གྲུབ་ཀུན་སྦྱིན་པ། །ཞེས་པ་དཀའ་ཐུབ་དང་བརྟུལ་ཞུགས་དང༌། ཁྲུས་དང་བཟླས་བརྗོད་ལ་སོགས་པ་བྱ་མི་དགོས་པར་སེམས་ཀྱི་རྣལ་ཞིག་དེ་ཡི་མཚན་ཉི་དངོས་གྲུབ་ཀུན་སྩོལ་བར་མཛད་པའི་གསང་བའི་རྟོག་པ་དེ་བས་སོ། །འཁོར་ལོ་འདི་ནི་ཤིན་ཏུ་དཀོན། །ཞེས་པ་འཁོར་ལོ་གསུམ་པའི་ལས་འདི་ནི་ཧོམ་དང་བཟླས་པ་ཡོང་མི་དགོས་ཞེས་པའོ། །བསམ་གཏན་པའང་མི་དགོས་ཏེ། །ཞེས་པ་བསམ་གཏན་ལྷུར་བྱས་པས། གང་ལ་འཁོར་ལོ་འབའ་ཞིག་ཡོད། །གང་གསུངས་པ་ཡི་དངོས་ནས་ནི། །ཞེས་པ་འཁོར་ལོར་གསུངས་པའི་ལས་གང་བསྒྲུབ་པའི་སྔགས་ལ་གནས་ན་རིང་པོར་མི་ཐོགས་པར་དེ་འགྲུབ་པོ་ཞེས་པའི་དོན་ཏོ། །དེ་བས་འདི་ནི་གསད་བྱས་ནས། །ཞེས་པ་འཁོར་ལོ་འདི་ནི་གསང་བྱས་ན། །ཐམས་ཅད་སྒྲུབ་པའི་སྒྲུབ་པ་པོས། །ཞེས་པ་ལས་དྲུག་འགྲུབ་ཅེས་པའོ། །ཁྲོ་བོ་རྣམ་པར་རྒྱལ་བ་འཇམ་དཔལ་གྱི་རྩ་བའི་རྟོག་པ་ལས། གསང་བའི་རྟོག་པ་གཉིས་པའི་བཤད་པ་རྫོགས་སོ།། །།གོང་དུ་སྔར་ཡི་གེ་བཅུ་བདུན་པ་དང་བཅུ་གསུམ་པ་དང་ཡི་གེ་བཞི་བཅུ་རྩ་གསུམ་པ་དང་བཅུ་གཅིག་པོ་དང་འཁོར་ལོར་གསུངས་པའི་སྔགས་ལ་སོགས་པའི་ལས་བཤད་ནས་གསད་པའི་རྟོག་པར་གཏོགས་པའི་ལེའུ་གསུམ་པ་འདིར་ཡང་གོང་དུ་སྔར་བཤད་པ་རྣམས་ལས་ཐ་དད་དུ་གྱུར་བའི་ཡི་གེ་འབྲུ་གསུམ་ལ་ལས་མང་པོ་སྒྲུབ་པ་དེ་འཆད་དེ། དེ་ཡང་དོན་གྱི་དབྱེ་བ་རྣམ་པ་བཞིས་བསྟན་ཏེ། དེ་ལ་གླེང་བསླང་བའི་ཞེས་བྱ་བ་དང༌། གསང་སྔགས་བསྟན་པའི་མཚན་ཉིད་དང༌། སྔོན་དུ་བསྙེན་པ་བྱ་བའི་ཆོ་ག་དང༌། སྔོན་དུ་བསྙེན་པ་བྱས་ནས་ཕྱིར་ལས་མང་པོ་བྱ་བ་རྣམས་ཀྱིས་བསྟན་ཏོ། །ད་ནི་གླེང་བསླང་བའི་ཞེས་བྱ་བ་བཤད་པའི་ཕྱིར་ཁྲོ་བོའི་རྒྱལ་པོའི་དངོས་གྲུབ་འདི་གསུངས་སོ། །ཁྲོ་བོའི་རྒྱལ་པོའི་དངོས་གྲུབ་ནི། །ཞེས་པ་ཁྲོ་བོའི་
རྒྱལ་པོ་ཆེན་པོ་ལས་མང་པོ་སྣ་ཚོགས་པ་འོག་ནས་འབྱུང་བ་རྣམས་ཀྱང་ཡི་གེ་འབྲུ་གསུམ་པའི་མཐུས་ཐོགས་པ་མེད་པར་འགྲུབ་པར་འགྱུར་བ་དེ་ཡང་ཡི་གེ་འབྲུ་གསུམ་པས་བསྒྲུབས་ན་སྔར་གོང་དུ་བཤད་པ་རྣམས་ལས་ཐ་དད་པ་ཞེས་བྱ་སྟེ། སྔགས་པ་བསྒྲུབ་པར་འདོད་ན། དང་པོ་སྔགས་པའི་ཆོ་གའི་མཆོག་དེ་ཚུལ་བཞིན་དུ་སྔར་སྤྱད། དེའི་འོག་ནས་བཤད་པའི་ལས་མང་པོ་དེ་དག་བསྒྲུབས་ན། དེ་བཞིན་དུ་འགྲུབ་པར་འགྱུར་ཞེས་སོ། །རབ་ཏུ་གསང་བའི་སྔགས་འདི་ནི། །བཏུང་བ་གང་རྣམས་སྔར་གསུངས་པ། །རེ་ཞིག་དེ་ཡི་མཚན་ཉིད་འདི། །གཞན་དག་འདིར་ནི་བཤད་པར་བྱ། །ཞེས་པ་ཡི་གེ་འབྲུ་གསུམ་པོ་དང་འབྲེལ་བར་བྱ་བ་གྲངས་སུ་གཏོགས་པའི་ཡི་གེ་བཅུ་བདུན་པོའི་སྔགས་དང་བཅུ་གསུམ་པོའི་སྔགས་དང༌། བཞི་བཅུ་རྩ་གསུམ་པོ་ལ་སོགས་པའི་སྔགས་རྣམས་བཏུས་ཏེ་གང་གསུངས་པ། རྣམས་ཀྱི་དེའི་མཚན་ཉིད་ཀྱི་གོང་མ་ལས་གཞན་པ་དག་བཤད་པར་བྱའོ་ཞེས་པའི་དོན་ཏོ། །ད་ནི་གསང་སྔགས་བདུན་པ་ཞེས་པ་བཤད་པའི་ཕྱིར། དེ་ཡི་ལས་ནི་གང་གསུངས་པ། །ཞེས་པ་ལ་སོགས་པ་སྨོས་སོ། །དེ་ཡི་ལས་ནི་གང་གསུངས་པ། །གང་དག་ཕྱིས་ཀྱང་བསྒྲག་འགྱུར་བ། །དཔའ་བོ་གཅིག་པུ་འབའ་ཞིག་གིས། །ཞེས་པ་ཡི་གེ་འབྲུ་གསུམ་པོའི་གྲངས་སུ་གཏོགས་པའི་ཡི་གེ་འབྲུ་གསུམ་པོའི་ལས་སྔར་གོང་དུ་གསུངས་པ་རྣམས་འོག་ནས་ལས་མང་པོ་བཤད་པ་རྣམས་སོ། །དཔའ་བོ་ཞེས་པ་སྔགས་ཀྱི་ཡོན་ཏན་ཏེ། དེ་ཡང་སྔགས་གཞན་དང་མ་འདྲེས་པའི་ཡི་གེ་འབྲུ་གསུམ་པོའོ། །ཐམས་ཅད་དེ་ཉིད་དེ་གཞན་མིན། །ཞེས་པ་ཡི་གེ་འབྲུ་གསུམ་པོ་དེ་ཡང་སྦྱོར་བ་འམ་རྫོགས་པ་ཉིད་ཡིན་ཏ་མ་ཚང་བའམ་ཉམས་པ་ནི་མ་ཡིན་ནོ། །ཐམས་ཅད་དུ་ཡང་བཤད་པ་ཡིན། །ཞེས་པ་ཡི་གེ་འབྲུ་གསུམ་པོ་དེ་ཡང་འབྱོར་བའམ་རྫོགས་པར་བཤད་པར་བྱའོ་ཞེས་པའི་དོན་ཏོ། །སྔགས་དེ་ལས་རྣམས་ཀུན་བྱེད་པའོ། །ཞེས་པ་ཡི་གེ་འབྲུ་གསུམ་པོའི་སྔགས་དེའི་འོག་ནས་འབྱུང་བའི་ལས་མང་པོ་ཀུན་བྱེད་པའོ། །རྒྱུད་ལ་དངོས་གྲུབ་གང་གསུངས་པ། །ཞེས་པ་རྒྱུད་འདི་ལས་དངོས་གྲུབ་གང་གསུངས་པ་ཞེས་པའོ། །དཔའ་བོ།
གཅིག་པུའི་མཐུས་ཀྱང་འགྲུབ། །ཅེས་པ་ཡི་གེ་གཞན་དུ་མ་འབྲེལ་བའི་ཡི་གེ་འབྲུ་གསུམ་པོ་གཅིག་པུའི་མཐུས་འགྲུབ་པོ། །ད་ནི་གསང་སྔགས་བཏུ་བའི་མཚན་ཉིད་བཤད་དེ། ཨོཾ་ནི་དེ་ཡི་ཐོག་མ་སྟེ། །བདེ་བར་གཤེགས་པའི་དམ་ཚིག་ཡིན། །ཞེས་པ་ཡི་གེ་འབྲུ་གསུམ་པོ་དེའི་ཐོག་མ་ཞེས་བྱ་བའི་དོན་དེ་འབྲུ་གསུམ་པོ་དེའི་ཐོག་མ་ལ། ཨོཾ་འབྱུང་བ་ནི་དམ་ཚིག་ཡིན་ནོ། །ཐོག་མ་ཡི་ནི་གཉིས་པ་ཡིན། །དྲག་པོའི་ཚིག་གིས་ཕུལ་བའི་ལུས། །ཞེས་པ་དང་པོའི་ཨོཾ་གཏོགས་པར་གཉིས་པ་ཡང་དྲག་པོའི་ཚིག་གཉིས་ཕུལ་བའི་ཨཱཿ་གཞག་གོ་ཞེས་པའོ། །སྔགས་ཀྱི་ཡི་གེ་ཕྲེང་བཀོད་ལ། །སྔགས་རྣམས་ཐམས་ཅད་གསལ་བྱེད་པས། །ཞེས་པ་ཨཱཿ་དེའི་མཐུ་དང་གཟི་བྱིན་ལྟག་འོག་གི་སྔགས་ཕྲེང་བ་བཀོད་པའི་ཚུལ་དུ་གནས་པའི་སྔགས་ཐམས་ཅད་མཐུ་ཅན་དུ་འགྱུར་ཞིང་ཡོངས་སུ་རྫོགས་པ་དང༌། གསལ་བར་སྟོན་པ་ཡིན་ཞེས་པའོ། །ཁྲོ་བོའི་རྒྱལ་པོའི་སྙིང་པོ་ནི། །གསུམ་པོ་དེ་ནས་སྦྱར་བར་བྱ། །ཞེས་པ་གོང་མའི་གཉིས་པོ་གཏོགས་པར་གསུམ་པར་སྦྱར་ཏེ་དེ་ལྟར་ཡི་གེ་འབྲུ་གསུམ་མོ། །དེ་ནས་ཁྲོ་བོའི་རྒྱལ་པོ་ཡི། །སྐུ་ནི་དེ་ཡི་འོག་ཏུ་བརྟག །ཅེས་སྤྱི་བོར་ཡི་གེ་ཨོཾ། །མགྲིན་པར་ཡི་གེ་ཨཱཿ་སྙིང་གར་ཡི་གེ་ཧཱུ༵་བསམ་པ་ལས་ཁྲོ་བོའི་སྐུར་བསྐྱེད་དེ་བསྒོམ་མོ་ཞེས་བཤད་དོ། །སྔགས་པས་སྔགས་རྣམས་ཀུན་གྱི་མཚན། །ཞེས་པ་ཡི་གེ་འབྲུ་གསུམ་པའི་སྔགས་ཀྱི་མཚན་ཉིད་དེ་ལྟར་ཤེས་པར་བྱའོ་ཞེས་པའི་དོན་ཏོ། །ད་ནི་སྔོན་དུ་བསྙེན་པ་བྱ་བའི་ཆོ་ག་བཤད་པའི་ཕྱིར། ཐོགས་ཕ་མེད་པའི་སྔགས་རྣམས་ནི། །ཞེས་པ་ལ་སོགས་པ་སྨོས་སོ། །བདག་ཉིད་ཆེན་པོ་ཐམས་ཅད་ཀྱིས། །ཞེས་པ་སྔགས་ཀྱི་ཡོན་ཏན་ཏེ་ཡི་གེ་འབྲུ་གསུམ་པའོ། །བསྲུང་བ་ལ་སོགས་པའི་ལས་རྣམས་ཀུན་ཞེས་པ་བསྐྲད་པ་དང༌། མཚམས་བཅད་པ་དག་བྱ་ཞེས་པའོ། །གོ་རིམས་བཤད་པ་བཞིན་དུ་བྱ། །ཞེས་པ་འོག་ནས་འབྱུང་བའི་གོ་རིམས་བཞིན་དུ་ལས་བྱའོ། །ཐམས་ཅད་བདག་ཉིད་ཆེན་པོ་འདིས། །ཞེས་པ་སྔགས་ཀྱི་ཡོན་ཏན་ལ་བྱ་སྟེ། ཡི་གེ་འབྲུ་གསུམ་པོ་བེ་ཅོན་གྱི་ཕྱག་རྒྱ་དང་ལྡན་པས། བསྲུང་བ་དག་ནི་བྱས་ནས་སུ། །ཞེས་པའོ། །སྔོན་གྱི་ཚུལ་བཞིན་རབ་དབེན་པར། །རི་མོ་ཡི་ནི་མཆོག་
བཞག་ནས། །ཞེས་པ་སྔོན་དུ་བཤད་པའི་ཕྱག་ལྔ་བཅུ་པོའི་རི་མོའི་སྐུ་གཟུགས་ཉིད་དེ། དེ་ཡང་ཆོ་ག་བཞིན་དུ་བྲིས་ནས་རྒྱུན་འགྲུལ་མེད་པའི་གནས་དབེན་པའི་རི་མོ་མཆོག་སྟེ་བཞག་ནས་ཇི་སྐད་དུ་སྔར་གསུངས་པའི་ཆོ་གའི་མཆོད་པས་མཆོད་པར་བྱའོ། །ཉིན་རེ་མེ་ཏོག་ཕྲེང་བ་ལ། །ཞེས་པ་མ་ལེའི་ཕྲེང་བ་སྐུ་ལ་གསོལ་ཞིང་མཆོད་དོ། །ལན་བདུན་བཟླས་པ་རྣམས་ཀྱིས་མཆོད། །ཅེས་པ་འབྲུ་གསུམ་པོའི་སྔགས་ཀྱིས་མེ་ཏོག་ཕྲེང་བ་ལ་བཟླས་ལ་མཆོད་ཅེས་པའོ། །མེ་ཏོག་དམར་པོ་ཁ་འབུས་པ། །ཞེས་པ་ཁ་འབུས་མ་ཁད་ལ་བྱའོ། །རི་མོ་ལ་ནི་ཕོག་པར་དབུལ། །ཞེས་པ་ཡི་གེ་འབྲུ་གསུམ་པོ་ཟློས་ཤིང་དབུལ་ཞེས་པའོ། །ཆོ་ག་འདི་ཡིས་དུས་གསུམ་དུ། །ཞེས་པ་ཆོ་ག་དེ་ལྟ་བུས་ཉིན་གཅིག་ཀྱང་དུས་གསུམ་དུ་ཟླ་བ་གཅིག་ཏུ་བྱས་ན་ནི། ཁྲོ་བོ་མངོན་སུམ་མཉེས་གྱུར་ནས། །ཞེས་པ་ཉིད་ཐོར་མ་ཡིན་པར་བདག་གིས་མཉེས་པར་གྱུར་ནས་རྨི་ལམ་དུ་ནི་དངོས་གྲུབ་བདག་ལ་སྩོལ་ཅིག་བཀའ་སྩལ་ཏོ། །རྨི་ལམ་དུ་ནི་དངོས་གྲུབ་སྟེར། །ཞེས་པའོ། །ཆོ་ག་འདི་ལྟར་སྔར་བྱས་ན། །གང་འདོད་པ་ཡི་དགོས་པ་དག །དེ་ཚེ་གདོན་མི་ཟ་བར་འགྲུབ། །ཅེས་པ་གོང་དུ་སྨོས་པ་ལྟ་བུའི་ཆོ་ག་འདི་སྔར་སྤྱད་ནས། དེའི་འོག་ཏུ་གང་འདོད་པའི་ལས་རྣམས་བསྒྲུབས་ན་ཐེ་ཚོམ་མེད་པར་འགྲུབ་པར་འགྱུར་རོ། །དེ་དག་ནི་གོང་དུ་བསྙེན་པ་བྱ་བའི་ཆོ་ག་མཆོག་བཤད་པའོ། །ད་ནི་གོང་དུ་བསྙེན་པ་བྱས་ནས་ཕྱིས་ལས་མང་པོ་ཞེས་བྱ་བ་བཤད་དེ། །ད་ནི་ཆོ་ག་མཆོག་བཤད་དོ། །ཞེས་པའོ། །ད་ནི་གོང་དུ་བསྙེན་པར་བྱ་བའི་ཆོ་ག་བཤད་དོ། །དེ་ལྟར་ཟླ་གཅིག་མཉེས་བྱས་ནས། །ཞེས་པ་སྔར་བཤད་པའི་ཆོ་ག་བཞིན་དུ་བྱས་ནས་ཞེས་པའོ། །སྔགས་པས་ལས་རྣམས་གང་བྱ་བ། །དེ་ཡི་ཆོ་ག་མདོར་བསྡུས་ནས། །ཞེས་པ་རྒྱུད་ཆེན་པོ་ལས་བསྡུས་ནས་དེ་ནི་ལེགས་པར་བཤད་པར་བྱ་ཞེས་པའོ། །གནས་དང་འགྲོ་དང་སྦྱར་བ་ཡིས། །ཞེས་པ་འབྲས་བུའི་རྩ་བ་ལ་སོགས་པའི་དུག་གོ །སྦྱར་ཞེས་པ་ནི་ཆེད་དུ་སྦྱར་བའི་དུག་གོ་ཅེས་པའོ། །དུག་ནི་རྣམ་པ་གསུམ་དག་དང༌། །ཞེས་འདི་དག་ལས་ཀྱང་སོས་པར་བྱེད་ནུས་སོ། །བདག་གིས་བྱས་པའི་ཕྱག་རྒྱ་སྔགས། །ཞེས་པ་བདག་གིས་ཕྱག་རྒྱ་དང་སྔགས་ལ་སོགས་པའི་སྦྱོར་བ་བྱས་པ་དེ་དག་
གཞན་གྱིས་མི་ཤེས་ཤིང་མི་འགྱུར་བར་བསྟན་པར་བྱ་བའི་ཕྱིར་སྔགས་ལན་ཅིག་བརྗོད་པ་ཙམ་གྱིས་བསྲུང་ངོ༌། །ཡིད་ལ་བསམས་པ་ཙམ་གྱིས་ཀྱང༌། །ཞེས་པ་ལྟག་འོག་གཉི་གའི་ལས་བྱེད་དོ། །གཞན་དག་གིས་ཀྱང་གཅོད་པར་བྱེད། །ཅེས་པ་ཕ་རོལ་པོའི་རིག་སྔགས་བདག་ལ་གནོད་པར་བྱེད་པ་ཡང་གཅོད་པར་བྱེད་དོ། །བཞི་པའི་རིམས་ལ་སོགས་པ་ཡང༌། །ཞེས་པ་ལྔ་པ་དྲུག་པ་བདུན་པའི་རིམས་ལ་སོགས་པ་དག་ཅེས་པའོ། །མ་དང་བྱིས་པའི་གདོན་རྣམས་དྲག །ཅེས་པ་མ་བདུན་བྱི་ཏོ་ཏ་མ་ལའི་ནང་ནས་བྱིས་པ་ལ་གནོད་པའི་མིང་གིས་སྨོས་པ་ལྟ་བུ་ཞི་བར་བྱེད་དོ། །བདག་དགར་ཕབ་ནས་དགོས་པའི་དོན། །ཞེས་པ་གདོན་དེ་དག་ཀྱང་གང་ལ་དབབ་པའི་མི་དེའི་སྤྱི་བོར་ཐལ་བའམ། །ས་གཏོར་ཞིང་སྔགས་བརྗོད་དེ་ཕབ་དགོས་པའི་དོན་རྣམས་དྲི་བར་བྱ་ཞིང་སྔགས་བ་ཅི་འདོད་པའི་དོན་རྣམས་བསྒོ་བ་དེ་བཞིན་དུ་བྱེད་དོ། །ཡིད་ལ་བསམས་པ་དེ་ལས་ཐར། །ཞེས་པ་དེ་ལྟར་ཕབ་ནས་སླར་བཏང་བ་ཡང་ཡིད་ལ་བསམས་པ་ཙམ་གྱིས་ཐར་བར་ཡང་འགྱུར་ཞེས་པའོ། །རྡོ་ལ་ལན་གསུམ་བཟླས་པའི་ཚེ། །ཞེས་པ་ཆུ་ལས་རྒལ་བའི་ཚེ། །ཆུའི་ནང་དུ་བོར་ན་ཆུ་སྲིན་ཀུམྦྷི་ལ་སོགས་པ་ཞེས་པ་ཆུའི་ནང་གི་བགེགས་རྣམས་ཆུ་ལས་བསལ་བ་མཆོག་ཏུ་འགྱུར་ཞེས་པ་ཆུའི་བགེགས་རྣམས་ཞེས་པའོ། །ལམ་ལ་རྐུན་པོ་འཇིགས་པ་མེད། །ཅེས་པ་ལམ་དུ་ཞུགས་ཏེ་འགྲོ་བའི་ཚེ་འཇིགས་པ་མེད་ཅེས་པའོ། །སྔགས་ཀྱིས་སྤྱི་གཙུག་བཅིངས་ནས་ནི། །ཞེས་པ་ལག་པ་གཡས་པས་བདག་གི་སྤྱི་གཙུག་མདུད་པ་དོར་ཞིང་སྔགས་བརྗོད་དེ། དེ་ལྟར་བྱས་ནས་ཡང་རྒྱལ་པོ་ཁྲོས་པ་ཡང་བདག་གི་དབང་དུ་འགྱུར་ན་མ་ཁྲོས་པ་ལྟ་ཅི་སྨོས་ཏེ། རྒྱལ་པོ་ཁྲོས་པའང་མྱུར་བར་རབ་ཏུ་ཞེས་པའི་དོན་ཏོ། །ཡིད་ལ་དྲན་ཞིང་བཟླས་བྱས་ན། །ཞེས་པ་སྔགས་བཟླས་ཞེས་པའོ། །མི་བདེ་ཉམ་ཐག་གྱུར་པ་ལ། །སྔགས་ནི་མྱུར་དྲན་བརྗོད་པར་བྱ། །ཞེས་པ་འཕྲལ་དུ་མྱུར་དུ་ཉམ་ཐག་པ་ནི་བསྟུད་པ་བྱུང་བ་ལའོ། །མྱུར་བའི་ཚིག་ནི་གཉི་གར་སྦྱར། །ཞེས་པའོ། །སྤྲིན་དག་མནན་པར་བྱ་བའམ། །ཞེས་པ་སྤྲིན་གྱེས་པ་དགག་པར་བྱ་བ་ལའོ། །འདོད་བཞིན་མྱུར་དུ་སླར་ཡང་བཟློག །ཅེས་པ་ཇི་ལྟར་
འདོད་པ་བཞིན་དུ་མྱུར་དུ་ཆར་ཡང་གཅོད་པར་བྱེད་དོ། །དབྱིག་པའི་ཕྱག་རྒྱ་གྲུབ་པར་བྱེད། །ཅེས་པ་དེ་ཡང་བེ་ཅོན་གྱི་ཕྱག་རྒྱའོ། །ཡིད་ཀྱིས་སྤྲིན་རྣམས་བརྡབ་པར་བྱ། །ཞེས་པ་སྤྲིན་གང་འཁྲུག་ཅིང་འཐབ་པ་ལས་ལྕགས་དང༌། སེར་བ་དབབ་པའི་སྤྲིན་དག་ལས་སེམས་ཀྱིས། །བསྡིགས་པའམ་དྲལ་བར་བྱ་ཞིང་བསམ་ཞིང་ལས་བྱའོ། །མྱུར་དུ་རྣམ་པར་གདགས་པར་བྱ། །ཞེས་པ་གནམ་ལྕགས་དང་སེར་བ་བཅད་ཅིང་མེད་པར་བྱ་བའི་དོན་ཏོ། །རྣམ་པ་དེ་ཉིད་ཅེས་པ་གོང་དུ་བཤད་པ་དེ་དག་གིས་ཞེས་པའོ། །སྦྱོར་བ་མཁས་པས་ཅི་འདོད་པར། །ཞེས་པ་སྦྱོར་བ་མཁས་པའི་སྔགས་མཁན་དག་གིས་བདག་ཉིད་ཇི་ལྟར་འདོད་པའི་སྦྱོར་བ་དག་གིས་ཆར་བ་དག་གཅད་པར་བྱ་བ་ནི། ཆར་པ་དག་ཀྱང་གཅད་པར་བྱ། །ཞེས་པའོ། །གོས་ནི་སྔོན་པོ་བགོས་ནས་སུ། །ཞེས་པ་ཡོ་བྱད་ཐམས་ཅད་ཆར་སྤྲིན་གྱི་ཁ་དོག་དང་སྦྱར་རོ། །ཁོར་ཁོར་ཡུག་བསྲུང་བྱས་ནས། །ཞེས་པ་སྔགས་དང་ཕྱག་རྒྱས་མཚམས་བཅད་དེ་ཞེས་པའོ། །མེད་པ་ཙམ་དུ་ཆུར་འདུག་སྟེ། །ཞེས་པ་སྔགས་པ་ཉིད་འདུག་ཅེས་པའོ། །ཉིན་གསུམ་ལེགས་པར་བཟླས་པར་བྱའོ། །ཞེས་པ་ཉི་མ་གསུམ་དུས་གསུམ་དུ་བཟླས་ཞེས་པའོ། །བརྒྱ་བྱིན་གྱིས་ནི་སྤྲིན་བསྡུས་ནས། །ཞེས་པ་བརྒྱ་བྱིན་གྱིས་ཀླུ་ལ་བཀའ་སྩལ་ནས་སྤྲིན་བསྡུས་ཏེ་ཆར་འབེབས་སོ། །ཉི་མ་ལ་ནི་མངོན་ཕྱོགས་ནས། །ཞེས་པ་སྒྲུབ་པ་པོ་ནི་ཁ་ཉི་མ་ལ་བལྟས་ཏེ་ཉིན་རེ་བཞིན་རྟག་ཏུ་བཟླས་བྱས་ན་ཞེས་པ། ཉིན་གཅིག་ཀྱང་དུས་གསུམ་དུ་བཟླས་ཞེས་པའོ། །ནད་རྙིང་དེ་ནས་མེད་པར་འགྱུར། །ཞེས་པ་ནད་རྙིང་གཅོད་ཆེན་དག་ཞི་བར་ཞེས་པའོ། །རྒྱལ་པོའམ་དེའི་ཆུང་མའང་རུང༌། །ཞེས་པ་རྒྱལ་པོའི་བཙུན་མོ་ཡུངས་ཀར་དཀར་པོ་བཟང་པོ་ལས་ཞེས་པ་ཡུངས་ཀར་བཏགས་པ་ལས་སོ། །གང་གི་མིང་སྨོས་ཉིན་བདུན་དུ། །ཞེས་པ་རྒྱལ་པོའི་བཙུན་མོ་གང་དབང་དུ་བྱ་བ་དེའི་མིང་ངོ༌། །དེ་ནི་ཚེ་གང་འདིས་ཞེས་པ། གང་དབང་དུ་བྱ་བ་དེ་བྲན་བཞིན་དུ་ནི་དབང་དུ་འགྱུར་ཞེས་པའོ། །དམངས་རིགས་དག་ནི་དབང་དུ་འགྱུར། །ཞེས་པ་དབང་དུ་བྱ་བ་ཀུན་འདྲ་སྟེ་སྔ་མ་བཞིན་དུ་གཟུགས་བརྙན་བྱས་པ་གཟུགས་ཀྱི་སྟེང་དུ་འདུག་ནས་སྔགས་བཟླས་སོ། །བཟླས་ན་རྗེའུ་རིགས་འདོད་པ་བཞིན།།
ཞེས་པ་སྔ་མ་བཞིན་དུ་བཟླས་ཞེས་པའོ། །ཞག་གསུམ་ཞེས་པ་སྨྱུང་བར་གནས་པའོ། །བཟླས་པ་ཆོ་ག་བཞིན་བཤད་ན། །ཞེས་པ་རྒྱལ་པོ་དང་བཙུན་མོ་དབང་དུ་བྱ་བའི་ཆོ་ག་བཞིན་དུ་བྱས་ཏེ་ལས་བྱས་ནས་སྔགས་པ་འདོད་པ་བཞིན་དུ་གང་དབང་དུ་བྱ་བ་དེ་བདག་གི་དབང་དུ་འགྱུར་རོ། །འབྲུ་དང་ཕུབ་མ་ཐམས་ཅད་ལས། །ཞེས་པ་འབྲུ་སྣ་ལྔ་ལ་སོགས་པའི་འབྲུ་ཐམས་ཅད་དང་འབྲུ་དེ་དག་གི་ཕུབ་མ་ཐམས་ཅད་དང་བསྲེས་ཏེ་བཏགས་པ་ལས་གཟུགས་བྱའོ། །མཛའ་བོ་གཉིས་འཁོན་པར་རབ་ཏུ་སྡང་བར་བྱས་པར་འགྱུར་ཞེས་པའི་དོན་ཏོ། །རྒྱལ་རིགས་དང་ཞེས་པ་ཞག་གསུམ་འགྲུབ་ཅེས་པའོ། །བྲམ་ཟེའི་ཞེས་པ་ཞིག་བཞི་སྨྱུང་བ་བྱ་ཞེས་པའོ། །དེ་ལྟར་ཇི་སྐད་གསུངས་པ་ཡི། །ལས་ཀྱི་བྱ་ཡིས་གཞན་དུ་མིན། །ཞེས་པ་དེ་ལྟར་ཆོ་ག་ཇི་སྐད་གསུངས་པ་བཞིན་དུ་དབང་གི་ལས་བྱའི་ཆོ་ག་གཞན་གྱིས་མི་བྱའོ། །གང་ཡང་རུང་བའི་གཟུགས་བརྙན་ནི། །ཞེས་པ། བསད་པ་དག་ནི་གཟུགས་བརྙན་བྱ་ཞེས་པའོ། །སྔ་མ་བཞིན་དུ་དབེན་པར་བྲི། །ཞེས་པས། བསྟར་བའི་སྟེང་དུ་གཟུགས་བརྙན་བྲི། །རྒྱུན་འགྲུལ་མེད་པའི་སར་ཞེས་པའོ། །དེ་ནས་སེང་ལྡེང་ཕུར་བུ་ལ། །ཞེས་པ་ཕུར་བུ་ཟུར་རྡོ་རྗེས་མཚན་པ་སོར་བརྒྱད་པའོ། །སྔགས་ཀྱིས་སྟོང་དུ་བཟླས་བྱས་ན། །ཞེས་པ་འབྲུ་གསུམ་པའི་སྔགས་ཀྱིས་བཏབ་ཅེས་པའོ། །དེ་ཡི་ལུས་ལ་ཕུར་བུས་གདབ། །ཅེས་པ་བསད་པར་བྱ་བའི་གཟུགས་བརྙན་ལ་གདབ་ཅེས་སོ། །འདི་ལ་ཁྲོས་པར་བྱས་ནས་སུ། །ཞེས་པ་བསད་པར་བྱ་བ་ཡང་ཁྲོས་ཞེས་སོ། །དེ་ནས་དེ་ཡི་སྙིང་ཁར་འདུག །ཅེས་པ་སྔགས་པས་མཆོག་ཕུར་གཟུགས་བརྙན་དེའི་སྙིང་ཁར་འདུག་པར་བྱའོ། །ཕུར་བུས་བཏབ་སྟེ་བཟླས་པ་བྱ། །ཞེས་པ་གཟུགས་བརྙན་ཕུར་བུས་བཏབ་པ་དེ་ཡང་ཕུར་བུས་གདབ་ཅེས་པའོ། །དེ་ཉིད་ལག་པས་བཟུང་ནས་སུ།། ཞེས་པ་ཕུར་བུ་ལག་གི་ས་བཟུང་སྟེ། དུས་གསུམ་ཉིན་གསུམ་བཟླས་བྱས་ན། །ཞེས་པ་ཉི་མ་གསུམ་དུས་གསུམ་དུ་བཟླས་ན། དགྲ་ལ་གང་དུ་བཏབ་པ་དེར་ཞེས་པ་དགྲ་བོའི་གཟུགས་བརྙན་ལ་ཕུར་བུས་གང་དུ་བཏབ་པ་དེར། གཟེར་ཐབས་དྲག་པོས་བཏབ་ནས་སུ། །ཞེས་པ་གནས་དེ་ཉིད་དུ་གཟེར་
ཐབས་འགྱུར་ཞེས་པའོ། །འགུལ་མི་ཕོད་པར་ས་ལ་ལྟུང༌། །ཞེས་པ་དགྲ་དེ་ཡང་ས་ལ་འགྱེལ་བར་འགྱུར་ཏེ། ཞག་བདུན་ན་གདོན་མི་ཟ་བར་འཆི་བར་འགྱུར་རོ། །མ་མོའི་གནས་སུ་སོང་ནས་ནི། །ཞེས་པ་ཕན་ཆད་ནི་མ་མོ་བདུན་གྱི་མཆོད་པའི་རྟེན་ཡོད་པ་དེར་སོང་ནས། གཡས་པ་བེ་ཅོན་གྱི་ཕྱག་རྒྱ་བཅིངས་ཞེས་པའོ། །གཡོན་པའི་མཛུམ་མོ་ཡིས་ཞེས་པ་བྲང་དུ་བསྒྲེང་ནས་བཟུང་ཞེས་པའོ། །དགྲ་ལ་བསྡིགས་ཤིང་ཉི་མ་ནུབ་ཀྱི་བར་ཞེས་པའོ། །ཁྲོས་ཤིང་དགྲ་ཡི་མིང་སྨོས་བཟླས། །ཞེས་པ་ནམ་ལངས་ནས་ཉི་མ་ནུབ་ཀྱི་བར་དུ་བཟླས་སོ། །དེ་ནས་དགྲ་བོ་མ་གདོན་གྱིས། །ཞེས་པ་རྣམས་རྦད་པས་དགྲ་བོ་དེ་མའི་གདོན་གྱིས་ཟིན་ནས། ཟིན་ནས་སྤྱོད་པ་སྣ་ཚོགས་པ། །འཆི་བར་འགྱུར་བ་དག་ནི་བྱེད། །ཅེས་པ་ཆུར་མཆོང་བ་དང༌། མེར་མཆོང་བ་ལ་སོགས་པའི་སྨྱོ་བླ་ཅན་ཏེ། བབ་ཅོལ་དུ་གྱུར་ནས། སྲོག་དང་བྲལ་བར་འགྱུར་རོ། །དེ་ནས་བསྒྲུབ་བ་ཞི་བ་ཡི། །ཆོ་གས་དེ་ལས་ཞི་བར་བྱ། །ཞེས་པ་དེ་ནས་དེ་སླར་ཞི་བའི་ཆོ་ག་བྱ་སྟེ་དེ་ཡང་གཟུགས་བརྙན་སྔ་མ་དེ་ཉིད་སྤྱིའི་གཞུང་ལས་འབྱུང་བ་བཞིན་དུ་འོ་མས་བཀྲུ་བ་ལ་སོགས་པའི་ཞི་བའི་ཆོ་ག་བྱའོ། །མ་མོ་རྣམས་ཀྱི་མདུན་འདུག་ནས། །ཞེས་པ་མ་མོ་བདུན་གྱི་རྟེན་གྱི་དྲུང་དུ་འདུག་ནས་ཞེས་པའོ། །ཞི་བའི་ཆོ་ག་མཁས་པ་ཡིས། །ཞེས་པ་ཞི་བར་བྱས་ནས་སོ། །ཉིན་གཅིག་ཏུ་ནི་བཟླས་བྱས་ན། །ཞེས་པ་ཉིན་གཅིག་དུས་གསུམ་དུ་བཟླས་ཞེས་སོ། །ཉི་མ་ལ་ནི་མངོན་ཕྱོགས་ནས། །ཞེས་པ་སྒྲུབ་པ་པོ་ཁ་ཉི་མ་ལ་བལྟས་ཏེ། ལག་པ་གཡས་པས་བདག་གི་མགོ་བྱུག་ཅིང་ཞེས་པའོ། །དགྲ་བོ་མིང་སྨོས་མནན་ནས་སུ། །ཞེས་པ་གོང་དུ་བཤད་པ་བཞིན་དགྲའི་གཟུགས་བརྙན་བྲིས་ཏེ། དེའི་སྟེང་དུ་མནན་པའམ་ཡང་ན་ཁྲོ་བོ་མཐུ་རྩལ་གྱིས་དགྲ་བོ་དེ་མནན་པའི་ཚུལ་དུ་ཡང་བྱའོ། །ཉི་མ་ནུབ་ཏུ་བཟླས་བྱས་ནས། །ཞེས་པ་ནང་པར་ནམ་ལངས་ནས་ནུབ་ཀྱི་བར་དུ་བཟླས་པས་ཞེས་པའོ། །དེ་ནི་ཀླད་པ་ན་གྱུར་པ། ཞེས་པ་དགྲ་བོ་དེ། དེ་ནས་ཞི་བར་བྱས་ནས་ནི། །ཉི་མ་ལ་ནི་ཐལ་སྦྱར་བཟླས། དེ་ནས་ཞེས་པ་དེ་ནས་སླར་ཞི་བར་བྱ་ན། །སྒྲུབ་པ་པོ་ཉིད་ཉི་མ་ལ་ཁ་བལྟས་ཤིང་ཐལ་མོ་སྦྱར་ཏེ་བཟླས་པ་བྱས་ན་ཞི་བར་འགྱུར་རོ། །ས་སྟེང་
རྐང་པ་གཅིག་གིས་འདུག །ཅེས་པ་རྐང་པ་གཡོན་པ་འབའ་ཞིག་ས་ལ་བཞག་གཡས་པ་བསྐུམ་མོ། །ལག་པ་གཡས་པས་བེ་ཅོན་གྱི་ཕྱག་རྒྱ་བཅིངས་ཏེ་སྦྱར་བར་བྱའོ། །ཉིན་པར་ལག་པས་གྱེན་དུ་བརྐྱང༌། །ཞེས་པ་ཉིན་ཞག་གཅིག་ཏུ་བྱ་སྟེ། །དེ་ཡང་ནང་པར་ནམ་ལངས་ནས། ཉི་མ་ཤར་གྱི་བར་དུ་བྱའོ། །མི་དགའ་ཁྲོས་ཤིང་བཟླས་བྱ་བ། །ཞེས་སྒྲུབ་པ་པོ་མང་པོ་གནས་གཅིག་ཏུ་འདུག །མི་འདོད་པའི་སེམས་དང་ལྡན་པར་བྱས་ནས་བཟླས་པ་བྱ་ཞེས་པའོ། །ཉི་མ་ནུབ་ཀར་དེ་ནས་དགྲ། །ཞེས་པ་དེ་ལྟར་བཟླས་པ་བྱས་པའི་དགོངས་མོ་མི་དགའ་བ་དང་མྱོས་པར་འགྱུར་ཏེ་ཞེས་པ་གང་བསྐྲད་པར་བྱ་བའི་དགྲ་དེ། གཉེན་དང་མཛའ་བོ་རྣམས་བོར་ནས། །ཞེས་པའི་དོན་ཏོ། །དེ་ལས་གཞན་པའི་གནས་སུ་འགྲོ། །ཞེས་པ་སྔ་མའི་གནས་དེ་ལས་གཞན་དུ་འགྲོ་བར་བྱེད་པའོ། །དེ་ལ་འདིར་ནི་ཞི་བའམ། །ཞེས་པ་དེ་དག་སླར་ཞི་བའམ། འོན་ཏེ་རྒྱས་པར་བྱ་འདོད་ན། །ཞེས་པ་རྒྱས་པར་བྱེད་འདོད་ན་སྤྱིའི་ལས་ཀྱི་མཚན་ཉིད་གཅིག་པ་ལས་འདི་ལྟར་བྱའོ། །བདེ་ཞིང་བརྟན་ལ་མ་ཡེངས་པར། །ཞེས་པ། སྒྲུབ་པ་པོའི་ལུས་སེམས་ཀྱི་འགྱུར་བ་མེད་པར་རྩེ་གཅིག་ཏུ་བྱ་ཞེས་པའོ། །འོ་མ་འཐུང་ཞེས་པ་ཟས་སུ་ཞི་བར་འགྱུར་གྱི་བར་ཞེས་པ་ནམ་ཞི་བའམ་རྒྱས་པར་འགྱུར་གྱི་བར་དུ་བཟླས་སོ། །དེ་ལྟར་འདི་ནི་སྣ་ཚོགས་པའི། །སྦྱོར་བཅས་རྒྱས་པ་བཤད་པ་ཡིན། །ཞེས་པ་དེ་ལྟར་རྟོག་པ་འདིར་སྦྱོར་བ་དང་བཅས་པའི་ལས་རྣམས་སྣ་ཚོགས་མང་པོའི་ཆོ་ག་རྒྱས་པར་བཤད་པ་ཡིན་ནོ། །རྟོག་པའི་ཆོ་ག་བཞིན་དུ་ནི། །ཞེས་པ་ལེའུ་འདིར་ཕྱག་རྒྱ་དང༌། སྔགས་དང༌། ལྷའི་སྦྱོར་བས་རྒྱུད་འདི་ཉིད་ལས་གསུངས་པའི་ལས་དང༌། རྒྱུད་གཞན་ལས་འབྱུང་བའི་ལས་རྣམས་ཀྱང་རྒྱུད་དེ་དག་གི་ཆོ་ག་བཞིན་བསྒྲུབས་ན་འགྲུབ་པར་འགྱུར་རོ་ཞེས་བྱ་བའི་དོན་ཏོ། །གསང་བར་གཏོགས་པ་གསུམ་པའི་བཤད་པ་རྫོགས་སོ།། །།གསང་བར་གཏོགས་པའི་ལེའུ་བཞི་པ་འདི་ལ་དོན་རྣམ་པ་དྲུག་གིས་བསྟན་ཏེ། དེ་ལ་དང་པོར་སྐབས་དབྱེ་བ་ཞེས་བྱ་བའི་དོན་བཤད་དེ། དེ་ནས་གཞན་ཡང་བཟང་པོ་འདི། །ཞེས་པ་གོང་དུ་གསུངས་པ་ལས་གཞན་པ་འོག་ནས་འབྱུང་བ་སྟེ། ཙནྡྲི་ཞེས་བྱ་བ་སྟེ་ཚིག་དང༌། དོན་འབྱུང་བ་བཟང་པོ་ལ་
བྱའོ། །འོག་ནས་ལས་སྣ་ཚོགས་པ་འབྱུང་བའོ། །ཧེ་ལེའི་འཁོར་ལོ་རྒྱས་པ་ནི། །ཞེས་པ། ཧེ་ཞེས་བྱ་བ་ནི་གནས་གང་དུ་འགྲོ་བར་ལན་མང་དུ་མི་ཟློས་པར་ལན་གཅིག་གིས་ཕྱིན་ཞེས་ཏེ་མྱུར་བའི་དོན་ཏོ། །དེ་ལས་བཟང་པོའི་གཞན་མེད་པ། །ཞེས་པ་ཧེ་ལེའི་འཁོར་ལོ་དེ་ལས་གཞན་མེད་པས་བླ་ན་མེད་ཅེས་བྱ་བའི་དོན་ཏོ། །ད་ནི་ས་བོན་སྔར་བྱས་ནས་གསང་བའི་སྔགས་འབྱུང་བ་བསྟན་པ་ཞེས་བཤད་དེ། དང་པོ་ཧེ་ཞེས་གང་གསུངས་པ། །ཞེས་པ་བྱཱ་ཀ་ར་ཎའི་གཞུང་གིས་ཡི་གེ་གུག་སྐྱེད་དང་བཅས་པར་མེད་དེ། །ཡི་གེ་གང་ཡིན་པའི་གཞུང་ཉིད་པས་ཡི་གེ་ཧ་ཞེས་པ་གང་དུ་གསུངས་པ་སྟེ། འགྲེང་བུ་དང༌། གུ་གུ་དག་མ་གཏོགས་སོ། །བསྐུལ་བའི་ས་བོན་ཐམས་ཅད་པའོ། །ཞེས་པ་ཡི་གེ་ཧ་དེ་དག་གིས་བསྐུལ་བའི་ས་བོན་ཐམས་ཅད་པ་ཡིན་པས་ན་དེ་ཡང་ཡི་གེ་ཐམས་ཅད་ཀྱི་ས་བོན་ཡིན་ཏེ། །ཨོཾ་དང་ཨཱཿ་དང་ཧཱུཾ་ལ་སོགས་པའི་ས་བོན་ཡིན་ཏེ། དེས་ཐམས་ཅད་བསྐུལ་བས་ལས་ཐམས་ཅད་བྱེད་བས་ན། བསྐུལ་བའི་ས་བོན་ཐམས་ཅད་པའོ། །དེ་ནི་ལེན་དང་འཛིན་པ་སྟེ། དེ་ལྟར་བླངས་ནས་ཀྱང་ལས་སྦྱོར་བའི་ཧེ་དག་ལ་བྱ་སྟེ། དེ་ནི་ལས་བྱེད་པ་ལ་དབང་བསྐུར་བའི་ཕྱིར་བླངས་པའོ། །ལས་ལ་མྱུར་དུ་འགྲུབ་པའོ། །ཞེས་པ་པྲ་བུད་དེ་ཞེས་བྱ་སྟེ། བསྐུལ་བ་ལ་ཡང་བྱ། མཁས་པ་ལ་ཡང་བྱ་སྟེ། དེས་བསྐུལ་བ་ནི་ལས་རྣམས་མྱུར་དུ་འགྲུབ་པ་དང༌། ཧེ་ཧེ་དེ་ནི་མཁས་པས་ལས་ལ་སྦྱར་བར་བྱའོ་ཞེས་བྱ་བར་ཡང་བཤད་དོ། །དེ་བས་ཐོག་མར་བསྐུལ་བ་དང༌། །ཞེས་པ། དེ་བས་ན་ཐོག་མའི་ཡི་གེ་ཧེ་ཧེ་དག་གིས་བསྐུལ་བ་དང་ལྡན་པར་འཁོར་ལོར་སྔགས་བཀོད་པ་དག་གིས་ལས་ལ་སྦྱར་བ་ཞེས་བྱ་བའི་དོན་ཏོ། །ཁྲོ་བོའི་རྒྱལ་པོ་ཡིས་ཞེས་པ་ཁྲོ་བོའི་སྔགས་རྣམས་འབྱུང་བ་ནི་འཇམ་དཔལ་གྱི་སྔགས་ཏེ། དེའི་སྤྲུལ་པ་ཡིན་པའི་ཕྱིར་རོ། །དེའི་སྔགས་ཧ་རྣམས་འབྱུང་བ་ནི་ཐོགས་པ་མེད་པའི་ཡི་གེ་སྟེ། ལས་རྣམས་མྱུར་དུ་འགྲུབ་པར་བྱེད་པའོ། །ཧེ་ལ་འཁོར་ལོ་རིམ་བཞིན་བསྟན། །ཅེས་པ་གུག་སྐྱེད་པ་གཏོགས་པའི་ཧ་འདི་བཅུ་གཉིས་ཐོགས་པ་མེད་པ་སྟེ། སྔགས་འདིས་ནི་ལས་མྱུར་དུ་འགྲུབ་པར་བྱེད་དོ། །གོ་རིམས་བཞིན་དུ་འབྲུ་བཅུ་གཉིས་ཟུང་དུ་སྦྱར་ན། ཟུང་
དྲུག་ཏུ་གྱུར་པས་འཁོར་ལོའི་རྩིབས་ཀྱི་གནས་ཕྱེད་ལས་མཆེད་པས་ན་དེ་ལྟར་སྦྱར་དུ་མི་རུང་སྟེ། གོ་རིམས་བཞིན་དུ་ཟུང་འདྲ་བ་གཉིས་སུ་སྦྱར་ན། ཟུང་བཅུ་གཉིས་སུ་འགྱུར་བས་དེ་ལྟར་སྦྱར་བར་རིགས་སོ། །འོ་ན་ལས་ཐ་དད་པ་མི་འདྲ་བ་བཅུ་གཉིས་འབྱུང་བ་ལ་སྔགས་འདྲ་བ་ཟུང་རེ་རེར་སྦྱར་བ་འདི་འགལ་བའི་སྐྱོན་དུ་མི་འགྱུར་རམ་ཞེན་མི་འགྱུར་ཏེ། ཧེ་ཧེ་དག་ཟུང་དུ་སྦྱར་བའི་སྔགས་དི་ཡིས་ནི། ཁྲོ་བོའི་བསྐུལ་བར་མཛད་པའི་ཡོན་ཏན་ནོ། །ལས་བཅུ་གཉིས་པོ་དེ་དག་དངོས་ཁྲོ་བོ་བཅུ་གཉིས་ཀྱི་སོ་སོར་མཛད་པ་ནི། །སྔགས་འདྲ་བར་བཀོད་པའི་སྐྱོན་དུ་མི་འགྱུར་རོ། །ཧེ་ཧེ། ཧ་ཧ་ཞེས་པ་ཟླ་བ་ནི། ཧི་ཧི་གཉིས་རིང་པོ་འདྲ་བར་འོས་སོ། ཧི་ཧི་ཞེས་པ་འདི་གཉིས་དང༌། དྲུག་པའི་ཟུང་དུ་འོས་སོ། །ཁྲོ་ཆེན་ཚིག་གི་ཐོག་མར་བཅས། །ཞེས་པ་ཧེ་ཧེ་ཟུང་དུ་དྲུག་སྦྱར་བའི་སྔགས་བཅུ་གཉིས་པོ་དེ་དག་ཀྱང་གང་དུ་དགོད་པར་བྱ་ཞེ་ན། མ་ཧཱ་ཀྲོ་དྷ་ཞེས་པ་ཁྲོ་བོའི་སྔགས་ཟློས་པའི་དང་པོའི་མགོ་ལ་དགོད་པར་བྱའོ་ཞེས་སོ། །ཟུང་གཅིག་ཅེས་པའི་ཚིག་གཉིས་པོ། །ཞེས་པ་ཧེ་ཧེ་དག་ཁྲོ་བོ་ཆེན་པོའི་ཚིག་གི་ཐོག་མར་ཞེས་འབྱུང་བ། ཁྲོ་བོ་ཆེན་པོའི་ཚིག་དེ་དག་འཁོར་ལོའི་རྩིབས་ཀྱི་གནས་ཀྱི་མིག་གང་དུ་བྲི་བ་དེ་བཤད་དོ། །ཟུང་དྲུག་འཁོར་ལོའི་མཐའ་མར་བཀོད། །ཅེས་པ་འཁོར་ལོ་ཟུང་དྲུག་ཡ་ཕྲལ་ན། རྩིབས་བཅུ་གཉིས་ཏེ། གྲ་ས་གྲ་ས་ཞེས་བྱ་བའི་ཚིག་གཉིས་པོ་འདི་དག་འཁོར་ལོའི། རྩིབས་བཅུ་གཉིས་པའི་མཐར་དགོད་པར་བྱ་བ་ཡང༌། གང་དུ་དགོད་པར་བྱ་ཞེ་ན། འཁོར་ལོའི་རྩིབས་བཅུ་གཉིས་པའི་སོ་སོའི་གནས་གནས་ཀྱི་མཐའ་ལ་མུ་རན་གྱི་ནང་རོལ་མཐའི་མིག་རྣམས་སུ་དགོད་པར་བྱའོ། །མུ་རན་རྩིབས་ཀྱི་མིག་རྣམས་སུ། །སྔགས་ལས་འབྱུང་བ་རེ་རེའོ། །དོན་རྣམས་ཐམས་ཅད་གྲུབ་པར་བྱེད། །ཅེས་པ་ཡི་གེ་ཧེ་ལ་བྱ་སྟེ་དེ་ཡང་སྔགས་ཀྱི་རང་བཞིན་ལས་བྱུང་བའི་ཡི་གེ་འབྲུ་གཉིས་པའི་ཟུང་རེ་རེའོ། །འཁོར་ལོའི་རྩིབས་བཅུ་གཉིས་པོའི་གནས་ཀྱི་མིག་ཏུ་བྲིས་པ་དེ་ནི། ལས་འདི་དག་ཐམས་ཅད་འགྲུབ་པར་འགྱུར་རོ། །བཅུ་གཉིས་དག་ཏུ་གསུངས་པའི་སྔགས། ཞེས་པ་ཡི་གེ་ཧེ་ཧེ་དྲུག་ལ་བཅུ་གཉིས་ཟུང༌།། །།