ཐུགས་རྗེ་ཆེན་པོ་མཁའ་སྤྱོད་ཀྱི་སྒྲུབ་ཐབས།
― DTG073_Page_0266 ―
[མ་དཔེ་གཟིགས་ན་འདིར་གནོན།]
འཕགས་པ་སྤྱན་རས་གཟིགས་དབང་ཕྱུག་མཁའ་སྤྱོད་ལ་ཕྱག་འཚལ་ལོ། །དེ་ནས། འཕགས་པ་ནམ་མཁའི་སྤྱོད་ཡུལ་ཏེ། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །སྲིད་ལས་རིང་གྱུར་ཤིན་ཏུ་འཕགས་པའི་སྐུར་བསྟན་པ། །ཟླ་བ་ལྟར་དཀར་ཡེ་ཤེས་ཐུགས་ཀྱི་པདྨོ་ལས། །ལེགས་འཁྲུངས་ཕྱོགས་ཆར་དབྱངས་ཅན་ནོར་རྒྱུན་རྡོ་རྗེ་ཕག །སྒྲོལ་མ་རྣམ་བཞིའི་ཅོད་པན་རིན་ཆེན་གྱིས་བཏུད་རྒྱལ། །མཐའ་དང་སྟོང་ཉིད་ཆེན་པོ་ཡི། །རྣལ་འབྱོར་སྙིང་རྗེ་མཆོག་གི་ངང༌། །སྐྱེ་བ་མེད་ལས་སྐྱེ་བའི་དངོས། །འཕགས་པ་ཐུགས་རྗེ་ཆེ་བསྒོམ་བྱ། །ཏཱ་ལ་བདུན་སྲིད་ནམ་མཁའ་ཡི། །ངོས་ལ་སྣ་ཚོགས་པད་ཟླའི་སྟེང༌། །བདག་ཉིད་རྣམ་པར་ཤེས་ཀྱི་ཧྲའིཿ། །འགྲོ་བའི་དོན་སྒྲུབ་བྱེད་བལྟའོ། །རིམ་གྱིས་པདྨོ་དཀར་ཉིད་དང༌། །དེ་གྱུར་པས་ནི་མགོན་པོ་ཉིད། །གཡོན་ཞབས་འཁོར་ལོས་ཟླ་དབུས་མནན། །གཡས་ཞབས་གྱེན་དུ་ཆེར་བསྐྱོད་པའོ། །ཕྱག་གཡས་པདྨོ་མཛེས་ལྕུག་སྡུག །འདབ་སྟོང་རྣམ་པར་བྱེ་བ་ཡི། །སྡོང་བུའི་ལྕུག་མ་འཁྱུད་སྐྱོགས་ཀྱིས། །ཞབས་གཡས་མཁྲིག་མ་བཏེག་བསྣམས་ལ། །འབར་བའི་རིན་ཆེན་ལྷག་གེ་བའི། །རྒྱན་རྣམས་ཀུན་གྱིས་རབ་ཏུ་བརྒྱན། །བདེ་ཆེན་རྣམ་པར་མི་རྟོག་ངང༌། །སྦྱིན་དང་མི་འཇིགས་རྒྱུར་བཅས་པའོ། །ཛཿ་ཧཱུཾ་བཾ་ཧོཿ་ཧྲཱིཿ། འདི་དག་རང་དང་རྗེས་སུ་མཐུན་པའོ། །དོན་བསྒྲུབས་འོད་ཟེར་བསྡུ་བ་ཡི། །སྦྱོར་བས་ཤར་ལ་སོགས་པ་ཡི། །ཕྱོགས་བཞི་པོར་ནི་ལྷ་མོ་བཞི། །གངས་རི་ལྟར་དཀར་བློ་བཟངས་འོང་མཛད་རལ་གྲི་པུ་སྟི་གཡས་དང་གཡོན། །གསེར་བཟངས་ལྟར་སེར་ནོར་མང་ཡིད་འོང་ནོར་བུ་
― DTG073_Page_0267 ―
[མ་དཔེ་གཟིགས་ན་འདིར་གནོན།]
སྙེ་མ་འཛིན་པ་དང༌། །བྱི་རུ་ལྟར་དམར་འོད་མཛད་གྲི་གུག་མི་མགོ་ཕྱེད་ཁྲག་བཀང༌། །ཨིནྡྲའི་མདོག་ལྗང་གཞོན་ནུ་སྒེག་མོ་སྐྱབས་སྦྱིན་ཨུཏྤལ་ལེགས་བསྣམས་པའོ། །དེ་རྗེས་ཡེ་ཤེས་དགུག་པ་ཡི། །ཆོ་ག་མཆོད་རྒྱས་ཁྱད་པར་བཞིས། །མཆོད་བྱས་གུས་པ་གསོལ་བ་ཡི།། སྔགས་བརྗོད་དེ་ནས་སྔགས་བཟླའོ། །རྗེས་མཐུན་ཕྲིན་ལས་ལྔ་པོ་ཡིས། །མཁའ་ཁྱབ་དོན་ཀུན་བསྒྲུབས་ནས་ནི། །འོད་ཟེར་ལྕགས་ཀྱུས་འཇིག་རྟེན་ཀུན། །གྱེན་དུ་སྦར་བའི་རྣལ་འབྱོར་བྱ། །ཡང་ནི་ཕྱོགས་བསྡུ་དངོས་གྲུབ་བསླང༌། །ཐེ་ཚོམ་མེད་བཅས་ཕྲིན་ལས་བཞི། །ལྷ་བཞི་རང་གི་རིགས་བཞིན་དུ། །མཁས་པས་རྗེས་སུ་གཞུག་པར་བྱ། །ཐུགས་རྗེ་ཆེན་པོ་མཁའ་སྤྱོད་ཀྱི་སྒྲུབ་ཐབས་རྫོགས་སོ།།
| 
