རྨི་ལམ་སྟོན་པ།
འཕགས་པ་ཐུགས་རྗེ་ཆེན་པོ་རབ་ཏུ་སྣང་མཛད་ལ་ཕྱག་འཚལ་ལོ། །མ་འོངས་པ་ན་འབྱུང་བར་འགྱུར་བ་ངེས་པར་མི་ཤེས་པས་ཅི་བྱ་གཏོལ་མེད་པར་གྱུར་ཏེ་ལྡོངས་པ་རྣམས་ཀྱིས་འདིར་བཅོམ་ལྡན་འདས་འཕགས་པ་ཐུགས་རྗེ་ཆེན་པོ་རབ་ཏུ་སྣང་མཛད་ལ་རེ་བ་བསྐྱེད་ལ། ཞག་གསུམ་མམ་གཉིས་སམ་གཅིག་གི་བར་དུ་ཡིད་ལ་བྱེད་པ་གཅིག་དང་མི་འབྲལ་བས་རིག་པ་བཟླ་ཞིང་སྨྱུང་བར་གནས་པར་བྱའོ། །ཏདྱ་ཐཱ། ན་མཿཤྲཱི་ཨཱཪྻཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། དཪྴ་དཪྴ། པྲ་དཪྴ་པྲ་དཪྴ། སརྦ་བུདྡྷ་ཛྙཱ་ན་གརྦྷེ་ཏིཥྛ་ཏིཥྛ་མ་མ་ས་པཎ་ཏྭོཥྛ་པྲ་དཪྴ་ཧཱུཾ་ཧཱུཾ་སྭཱ་ཧཱ། འཇིག་རྟེན་མགོན་པོའི་མཆོད་རྟེན་ལ། །མེ་ཏོག་དཀར་པོ་སོགས་བདུག་བཅས། །མཆོད་པ་མང་པོས་ཉེར་མཆོད་ཅིང༌། །ཕྱག་འཚལ་ཀུན་ཏུ་བསྐོར་བར་བྱ། །ལུས་ཀྱི་འདབ་སྐྱེས་འདབ་བཞི་ལ། །ཇི་ལྟར་འདོད་པའི་དངོས་པོ་བཞི། །མན་ངག་བཞིན་
དུ་རི་མོར་དགོད། །གེ་སར་རང་སེམས་མེ་ལོང་ངོ༌། །དེ་ནས་ལྷག་པའི་ལྷ་དྲན་པས། །སྡིག་པ་ལ་སོགས་པ་བསལ་ནས་ནི། །འཕགས་པའི་ཞབས་ལ་མགོ་གཏུགས་ལ། །སྣང་བ་གསལ་པོས་སྙོམས་པར་འཇུག །སངས་རྒྱས་སྲས་པོ་ཐུགས་རྗེ་ཅན། །ཀུན་མཁྱེན་ལུས་ཅན་ཀུན་དོན་བསྒྲུབ། །འོད་ལྡན་ཡུལ་ལ་རྟགས་སྐུགས་ལྟར། །དུས་དྲུག་གཟིགས་དེས་མཁྱེན་པ་འཇུག །ཐོ་རངས་དགེ་སློང་དཀར་པོ་དང༌། །པདྨོའི་རྟགས་ཅན་བུད་མེད་ཀྱིས། །འདོད་པའི་དོན་གང་ཡོད་པ་དེ། །མེ་ལོང་ནང་གི་གཟུགས་ལྟར་སྟོན། །རྨི་ལམ་སྟོན་པ་རྫོགས་སོ།།