ཨ་ར་པ་ཙ་ནའི་སྒྲུབ་ཐབས་ཀྱི་ཆོ་ག།
ཤདྡྷཱ་ཀ་ར་ཝརྨྨ།
རྒྱ་གར་སྐད་དུ། ཨ་ར་པ་ཙ་ན་སཱ་དྷ་ན་བི་དྷིཿ། བོད་སྐད་དུ། ཨ་ར་པ་ཙ་ནའི་སྒྲུབ་ཐབས་ཀྱི་ཆོ་ག །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྣལ་འབྱོར་པས་དང་པོར་གདོང་བཀྲུ་བ་ལ་སོགས་པ་བྱས་ལ། །བསམ་གཏན་
གྱི་ཁང་པ་དྲི་དང་བྱུག་པ་ལ་སོགས་པས་བྱུགས་ལ། སྟན་འཇམ་པོ་ལ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་དང་གཞན་ལ་ཕན་པའི་ཕྱིར། །བྱང་ཆུབ་ཀྱི་སེམས་བསྒོམ་པར་བྱས་ལ། །ཨོཾ་སྭ་བྷཱ་བ་ཤུདྡྷཿ་སརྦ་དྷརྨཱཿ་སྭ་བྷཱ་བ་ཤུདྡྷོ་ཉྟཾ། ཞེས་བརྗོད་ལ། །བདག་དང་གཞན་སྟོང་པ་ཉིད་དུ་བསྒོམ་པར་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ་ཉ྄ཧཾ། དེ་ནས་རང་གི་ལུས་ཀྱི་མགོ་ནས་རྐང་པའི་མཐར་ཐུག་པར་དང་བའི་ཤེལ་སྒོང་ལྟ་བུར་དྲི་མ་མེད་པར་བསམ་མོ། །དེ་ནས་རང་གི་སྙིང་གའི་ནམ་མཁའ་ལ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དྷཱིཿ་སྟོན་གའི་ཟླ་བའི་མདོག་འདྲ་བ་འོད་ཚོགས་འཕྲོ་བར་བསམས་ལ། དེ་ཡོངས་སུ་གྱུར་པ་ལས་ཤེས་རབ་ཀྱི་རལ་གྲི་བསམས་ཏེ། དེ་ཡོངས་སུ་གྱུར་པ་ལས་འཇམ་པའི་རྡོ་རྗེར་བདག་ཉིད་བསམ་པར་བྱ་སྟེ། ཞལ་གཅིག་ཕྱག་གཉིད་པ། །སྟོན་ཟླ་བྱེ་བ་དང་འདྲ་བར་སྣང་པ། །རྒྱན་ཐམས་ཅད་ཀྱིས་བརྒྱན་པ་བསམ་གཏན་གྱིས་འཛུམ་པའི་སྤྱན་ཅན། །པདྨ་དང་ཟླ་བའི་དཀྱིལ་འཁོར་གྱི་གདན་ལ་བཞུགས་པ། ཕྱག་གཡས་ཀྱིས་ཤེས་རབ་ཀྱི་རལ་གྲི་འཕྱར་བ། གཡོན་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་ཐུགས་ཀར་འཛིན་པ་ཞལ་ཅུང་ཟད་བཞད་པ། དེའི་ཐུགས་ཀའི་ནམ་མཁའ་ལ་ཨ་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པ། དེའི་སྟེང་དུ་དེའི་ས་བོན་གྱུར་པ་ལས་ཟླ་བ་དེ་ལ་བླ་མའི་མན་ངག་གིས་ཡི་གེ་ལྔ་བསམ་པར་བྱའོ། །དེ་ལ་མན་ངག་ནི་འདི་ཡིན་ཏེ། དེ་ལ་ཨ་ཡོངས་སུ་གྱུར་པ་ལས། བཅོམ་ལྡན་འདས་མཉྫུ་ཤྲཱི་སྐུ་མདོག་དང་དབྱིབས་སྔར་བཤད་པ་ལྟ་བུ། །ར་ལས་དྲ་བ་ཅན་གྱི་འོད་པ་ལས་ཟླ་འོད། ཙ་ལས་སྐྲ་ཅན། ན་ལས་ཉེ་སྐྲ་ཅན། ཐམས་ཅད་ཀྱང་བཅོམ་ལྡན་འདས་དང་འདྲ་བར་བསམ་པར་བྱའོ། །དེ་ནས་ལྷ་ལྔ་པོ་དེ་དག་ལས་ཡི་གེ་ལྔ་འབར་བའི་འོད་ཀྱི་ཚོགས་འཕྲོ་བའི་རང་བཞིན་དུ་བསམས་ལ། །རང་གི་སྙིང་གི་མི་ཤེས་པ་སྦྱང་བར་བྱ་ཞིང་སེམས་ཀྱི་རྒྱུད་དྲི་མ་མེད་པར་བྱའོ། །དེ་ནས་སྐད་ཅིག་གིས་འཁོར་ལོ་གཡས་སུ་འཁོར་བར་བསམ་ཞིང༌། ལྷ་རྣམས་མི་གཡོ་བར་བསམས་ལ་གཏི་མུག་གི་མུན་པ་བཟློག་པར་བྱ་བའི་ཕྱིར། །འཁོར་ལོ་དང་དེ་བཞིན་དུ་ཟླ་བའི་དཀྱིལ་འཁོར་ལས་འོད་ཀྱི་ཚོགས་མང་པོ་བྱུང་ལ། ཕྱོགས་བཅུའི་སེམས་
ཅན་ཐམས་ཅད་ཀྱི་མི་ཤེས་པའི་སྒྲིབ་བ་སྦྱངས་ལ། །རྒྱུད་དྲི་མ་མེད་པར་བྱས་ཏེ། སླར་འོངས་ནས་དེ་ཉིད་དུ་ཞུ་བར་གྱུར་པར་བསམ་པར་བྱའོ། །དེ་ནས་བསྒོམ་པ་ལ་སེམས་བརྟན་ཞིང༌། བླ་མའི་མན་ངག་གིས་སྤྲོ་བ་དང་བསྡུ་བའི་སྦྱོར་བས་བཟླས་པ་བྱ་སྟེ། ཨ་ར་པ་ཙ་ན་དྡཱིཿ་ཞེས་བྱ་བས་བཅོམ་ལྡན་འདས་ཀྱི་ཐུགས་ཀའི་ཡི་གེ་རྣམས་ལས་སྔགས་ཀྱི་ཕྲེང་བ་ཤེལ་ལྟ་བུ་བྱུང་ནས། །རང་གི་ལྟེ་བ་ལས་ཐུགས་ཀ་དེ་ཉིད་དུ་ཞུགས་པར་བསམ་མོ། །དེ་ལྟར་ཇི་སྲིད་མི་སྐྱོའི་བར་དུ་བཟླས་པར་བྱེད་ཅིང་བསྒོམས་ལ་དང་བའི་སེམས་དང་ལྡན་ནས་ས་དང་ཕ་རོལ་ཏུ་ཕྱིན་པ་མྱུར་དུ་འཐོབ་པར་འགྱུར་རོ། །དེ་ལྟར་དུས་གསུམ་དུ་རྣལ་འབྱོར་བྱས་ན་རིང་པོ་མི་ཐོགས་པར་བློ་མཆོག་ཏུ་འགྱུར་རོ། །ཨ་ར་པ་ཙ་ནའི་སྒྲུབ་ཐབས་ཀྱི་ཆོག །སློབ་དཔོན་ཤདྡྷཱ་ཀ་ར་ཝརྨྨས་མཛད་པ་རྫོགས་སོ།།