འཕགས་པ་འཇམ་དཔལ་གྱི་སྒྲུབ་པའི་ཐབས།
མ་ཏི།
རྒྱ་གར་སྐད་དུ། །ཨཱཪྻ་མཉྫུ་ཤྲཱི་སཱ་དྷ་ནཾ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་པའི་ཐབས། །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཚད་མེད་པ་དང་བྱང་ཆུབ་སེམས་བསྐྱེད་དེ། །སྔགས་འདི་བརྗོད་ཅིང་མི་དམིགས་སྟོང་པར་བསྒོམ། ཨོཾ་སྭ་བྷཱ་བ་བི་ཤུདྡྷཿ་སརྦ་དྷརྨྨཿསྭ་བྷཱ་བ་བི་ཤུདྡྷོཉ྄ ཧཾ། སྟོང་ཉིང་ངང་ལས་བཾ་པཾ་ཨ་དཀར་ལས། །རྒྱ་མཚོའི་སྟེང་དུ་པདྨ་ཟླ་བ་བསམ། །དེ་སྟེང་རང་སེམས་ཨ་དཀར་ཉིད་གྱུར་ལས། །འོད་འཕྲོས་དོན་བྱས་འདུས་པར་ལྟར་གྱུར་ཏེ། །ཞལ་གཅིག་ཕྱག་གཉིས་མཆོག་སྦྱིན་ཨུཏྤལ་བསྣམས།། རྡོ་རྗེའི་སྐྱིལ་ཀྲུང་འོད་ཟེར་རབ་འཕྲོ་བ། །དར་དཀར་ན་བཟའ་རིན་ཆེན་རྒྱན་གྱིས་སྤྲས། །སྟོན་ཟླའི་མདོག་ཅན་ལང་ཚོ་ལྡན་པ་བསྒོམ། །ཨོཾ་བཱ་ཀྱཻ་དཾ་ན་མཿརིག་སྔགས་རྒྱལ་པོ་འབུམ་ཕྲག་གཅིག་གིས་འགྲུབ། །ཟླ་བ་གཅིག་གིས་བློ་འཕེལ་རིག་པ་འཛིན། །དངོས་སམ་རྨི་ལམ་ཉིད་དུ་མཐོང་ཐོས་འགྱུར། །གྲུབ་པའི་མཚན་མ་གཞན་ཡང་སྣང་བར་འགྱུར། །ཉི་ཟླ་གཟས་ཟིན་དུས་སུ་མ་ཤ་ཉིད། །དར་དཀར་གྱིས་དྲིལ་ལྕེ་འོག་བཅུག་ལ་བཟླས། །མྱུ་གུ་བྱུང་གྱུར་འདི་ནི་གྲུབ་པ་ཡིན། །ཡང་ན་རལ་གྲི་ཉིད་བཟུང་རིག་འཛིན་འགྱུར། །གྲེ་ཕུགས་ཨ་དཀར་དག་ལས་འོད་འཕྲོས་པས།།
རྒྱལ་བ་ཀུན་གྱི་བློ་གྲོས་དཔག་མེད་དག །འདུས་ནས་ཁོང་དུ་ཐིམ་པས་ལུས་ཀུན་ཁེངས། །མི་བརྗེད་དྲན་པའི་གཟུངས་ནི་ཐོབ་པར་འགྱུར། །སྙིང་དབུས་ཟླ་བའི་དཀྱིལ་འཁོར་རྩིབས་དྲུག་ལ། །འབྲུ་དྲུག་ཡི་གེ་བཀོད་ལ་གཡས་གཡོན་བསྐོར། །ཤུགས་དྲག་རྩེ་མོ་རྣོ་ཞིང་རབ་དཀར་བས། །ཉེས་འཇོམས་སྟོབས་ལྡན་མྱུར་འཛིན་རབ་གསལ་འགྱུར། །ཕ་རོལ་ཕྱིན་དང་བསྟོད་པ་མང་པོ་དང༌། །མཚན་ནས་བརྗོད་དང་མཆོད་པ་སྣ་ཚོགས་དང༌། མཎྜལ་དབུལ་ཞིང་གསོལ་བ་གདབ་པར་བྱ། །འདི་ནི་མྱུར་དུ་འགྲུབ་པར་འགྱུར་བ་ཡིན། །འཇམ་པའི་དབྱངས་ཀྱིས་བྱིན་གྱིས་བརླབས་པའི་པཎྜི་ཏ་ཆེན་པོ་མ་ཏིས་མཛད་པ་རྫོགས་སོ།། ཤིན་གར་ཤར་ཕྱོགས་ཛ་ག་ཏཱ་ལའི་པཎྜི་ཏ་ཆེན་པོ་དཱ་ན་ཤཱི་ལས་བོད་ཡུལ་གྱི་དབུས་དྲང་སྲོང་སྲིན་པོའི་རིར་ལྷའི་སྐད་ལས་བོད་ཀྱི་བརྡར་འཁྲུལ་པ་མེད་པར་བསྒྱུར་བའོ།།