ཐུགས་རྗེ་ཆེན་པོའི་མཎྜལ་གྱི་ཆོ་ག།
ཐུགས་རྗེ་ཆེན་པོ་རྣམ་པར་སྐྱོབ་ལ་ཕྱག་འཚལ་ལོ། །དེ་ནས། དཀྱིལ་འཁོར་བཟང་པོ་དགེས་ཕ་བོ། །ཞེས་འབྱུང་བའི་སྒྲུབ་ཐབས་བཤད་པར་བྱའོ། །དཀྱིལ་འཁོར་བཟང་པོས་ཉིད་དང༌། །རིན་ཆེན་རང་བཞིན་ངོས་མཉམ་ལ། །དྲི་ཞིམ་པ་ཡི་བྱུག་པས་བྱུགས། མུ་ཏིག་མེ་ཏོག་ནོར་བུ་དགོད། །དབུས་སུ་འདབ་བརྒྱད་འདབ་བཞི་ཡི། །མེ་ཏོག་དམར་པོ་ས་བོན་ཅན། །གཞག་ལ་དེ་སྟེང་ཐུབ་པ་བཞུགས།།
གདུགས་དཀར་གྱིས་ནི་སྟེང་ནས་དབུབ། །སྒྲུབ་པོ་པདྨའི་ཕྲེང་བ་ཡི། །ང་རྒྱལ་འཛིན་པས་རྡོ་རྗེ་ལག །གཉིས་གཤིབས་གྱེན་དུ་བསྐྱོད་པའི་རྒྱས། །ས་གསུམ་གཙོ་བོ་སྤར་བར་བྱ། །རབ་ཏུ་དབྱིབས་ལེགས་ཁ་དོག་མཛེས། །དྲི་བསུང་རོ་མཆོག་རེག་བཟང་པའི། །མེ་ཏོག་སྦུངས་པས་གོ་རིམས་བཞིན། །གླིང་སོགས་བཀོད་པ་ཇི་བཞིན་བརྟག །ཨོཾ་ཨཱཿ་བཛྲ་ཙ་ཏུར་དཱི་པ་ཧཱུཾ། ཨོཾ་ཨཱཿ་བཛྲཽ་པ་ཡཥྚ་དཱི་པ་ཧཱུཾ། ཨོཾ་ཨཱ་བཛྲ་ལཥྚ་རཏྣ་ཧཱུཾ། ཨོཾ་ཨཱཿབཛྲཱཥྚ་མཾ་གཱ་ལ་ཧཱུཾ། ཨོཾ་ཨཱཿབཛྲ་སིདྡྷཾ་བི་ཤ་ཏི་ཧཱུཾ། ཨོཾ་ཨཱཿསཱུཪྻ་ཙནྡྲ་ཧཱུཾ། རྣམ་དག་ཞིང་དུ་ཕུན་ཚོགས་གླིང་དང་རིན་ཆེན་དང༌། །བཀྲ་ཤིས་གྲུབ་པ་རིམ་གསུམ་ཕྲེང་བ་ལེགས་བཀོད་ལ། །གསལ་བྱེད་སྒྲོན་མ་འབར་བ་གཉིས་ཀྱིས་བརྒྱན་གྱུར་པ། །སྔགས་འཆད་རྡོ་རྗེ་རོལ་པའི་གར་གྱིས་བསྟབས་པས་དབུལ། །དེ་ནས་ལུས་ཅན་ཐམས་ཅད་ལ། །འཇིག་རྟེན་མགོན་པོ་ཉེར་འཁོར་གཟུགས། །དཔག་མེད་རྣམ་པར་འཕྲུལ་པ་ཡིས། །ཞིང་རྣམས་ཀུན་ཏུ་ཡོག་དོན་སྦྱོད། །ཇི་སྲིད་སྙིང་པོ་བྱང་ཆུབ་པར། །དེ་དག་ནམ་ཡང་འདྲེན་པའི་མཐུས། །ངན་འགྲོའི་སྒྲ་ཡང་མི་གྲག་ཅིང༌། །རྟག་ཏུ་དགའ་སྐྱིད་འཚོ་བར་བྱེད། །གལ་ཏེ་བློ་གསལ་སྤོབས་སྤྱོད་ན། །སྐུ་གསུམ་ལ་སོགས་གང་བཤད་པ། །ཆོ་ག་དེ་དག་བཟླས་པ་ཡང། །གདོན་མི་ཟ་བར་བྱ་བ་ཉིད། །གང་ཚེ་བསྡུ་བར་འདོད་པ་ན། །སེ་གོལ་བརྡབས་པས་སྤར་བྱས་ལ། །བཟོད་པར་གསོལ་དང་སྨོན་ལམ་གདབ། །དྲན་པའི་རྒྱ་ཡིས་གཟུང་བྱའོ། །ཐུགས་རྗེ་ཆེན་པོའི་མཎྜལ་གྱི་ཆོ་ག་རྫོགས་སོ།།