རྒྱུ་སྐར་རྣམས་ཀྱི་ལས་སྣ་ཚོགས་པ་སྒྲུབ་པར་བྱེད་པ་དུས་འཛིན་བཟང་པོ་ཞེས་བྱ་བ།
མར་མེ་མཛད་བཟང་པོ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །སྐར་མ་རྒྱུ་བ་རྣམས་ཀྱི་ལས་སྣ་ཚོགས་ཉེ་བར་བསྒྲུབ་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས། དཔལ་རྡོ་རྗེ་རྣམ་པར་འཇོམས་པའི་རྣལ་འབྱོར་སྔོན་དུ་སོང་བས། ཞི་བའི་ལས་བྱེད་པར་འདོད་པས། མེ་བཞི་ལ་བྱའོ། །རྒྱས་པའི་ལས་ལ་རྒྱལ། དབང་གི་ལས་ལ་ཁྲུམས་སྨད་ལ། དྲལ་ཤུལ་སྣ་ཚོགས་ཀྱི་ལས་བྱེད་པར་འདོད་པས་ནག་པ་ལ་བྱའོ། །བསྐྲད་པར་འདོད་པས་ལག་ལ། དབྱེ་བར་འདོད་པས་ས་རི་ལ། བཀར་བར་འདོད་པས་གྲོ་བཞིན་ལ། རྨུགས་བར་འདོད་བས་མོན་གྲེ་ལ། རེངས་པར་འདོད་པས་ནབ་སོ་ལ། །སྐྲག་པར་འདོད་པས་སྨིན་དྲུག་ལ། འགུགས་པར་འདོད་པས་བྱི་བཞིན་ལ། འཇིལ་བར་འདོད་པས་སྣར་མ་ལ། འཁྲུག་པར་འདོད་པས་བྲ་ཉེ་ལ། རྒྱལ་བར་འདོད་པས་ལྷ་མཚམས་ལ། །དཔུང་དང་ལྡན་པར་འདོད་པས་མགོ་ལ། སའི་ལས་བྱེད་པར་འདོད་པས་ཁྲུམས་སྟོད་ལ། ཆུའི་ལས་བྱེད་པར་འདོད་པས་ཆུ་སྟོད་ལ། མེའི་ལས་བྱེད་པར་འདོད་པས་ནམ་གྲུ་ལ། རླུང་གི་ལས་བྱེད་པར་འདོད་པས་མཆུ་ལ། སའི་སྡེ་ཕམ་པར་འདོད་ན་ཁྲུམས་སྨད་ལ། ཆུའི་སྡེ་ཕམ་པར་འདོད་ན་ཆུ་སྨད་ལ། མེའི་སྡེ་ཕམ་པར་འདོད་ན་དབོ་ལ། རླུང་གི་སྡེ་ཕམ་པར་འདོད་ནས་ག་ལ། མ་གྲུབ་པ་གྲུབ་པར་འདོད་ན་མོན་གྲུ་ལ། གྲུབ་བ་ཆུད་མི་ཟ་བར་བྱེད་པ་ཐ་སྐར་ལ། འདོད་པའི་དོན་རབ་ཏུ་སྦྱིན་པར་འདོད་པས་བྲེལ་བྱའོ། །བསྒྲུབ་བྱ་ཕུང་བར་བྱེད་པར་འདོད་པས་སྐག་ལ། ནོར་
བསྒྲུབ་པར་འདོད་པས་སྣྲོན་ལ་བྱའོ། །གཞན་འཇིག་རྟེན་བའི་ལེགས་པ་སྣ་ཚོགས་སྒྲུབ་པར་འདོད་པས་རྒྱལ་ལ་བྱའོ། །ཕ་རོལ་ལ་ཉམས་པ་སྣ་ཚོགས་གཏོང་བར་འདོད་པས་བྲ་ཉེ་ལ་བྱའོ། །དེ་ལྟར་དམག་དྲང་བར་འདོད་བ་དང༌། ནོར་རྙེད་པར་འདོད་པ་དང༌། ཚོང་རྒྱལ་བར་འདོད་པས་སྣུབས་ལ་བྱའོ། །རྩ་ར་དང་རྐུན་མའི་ལས་གྲུབ་པར་འདོད་པས་ཐ་སྐར་ལ་བྱའོ། །འཇིགས་པ་བརྒྱད་ལས་ཐར་བར་འདོད་ན་མོན་གྲུ་ལ་བྱའོ། །བགེགས་བཟློག་པ་དང་མི་མཐོང་བ་དང༌། ཕ་རོལ་གྱི་དཔུང་བཟློག་པར་འདོད་པས་ལྷ་མཚམས་ལ་བྱའོ། །སྐྲ་བཀྲུ་བ་དང༌། ཁྲུས་བྱེད་པ་དང༌། དཔལ་དབང་ཕྱུག་དང༌། རྒྱལ་སར་འདོན་པ་དང༌། ཚོང་བཟང་བར་འདོད་པས་རྒྱལ་ལ། བག་མ་གཏོང་བ་དང༌། སྐྲ་བཀྲུ་བ་དང༌། ཁྲུས་བྱེད་པ་དང༌། གོས་དང་ས་བོན་འདེབས་པར་འདོད་པས་ལག་ལ། སྟོན་མོ་དང་འདུ་པ་སྦུད་པ་དང༌། འདུན་མ་དང༌། གྲོས་ལེགས་པར་འདོད་པས་ནབ་སོ་ལ་བྱའོ། །གཞན་གཉེན་སྦྱོར་དང༌། མཁར་ལེན་དང་ཉོ་བ་དང༌། འཁོར་བའི་ལས་གང་ཡང་གྲུབ་པར་འདོད་པས་མེ་བཞི་ལ་བྱའོ། །དེ་ལྟར་ན་ཉེ་བ་སྟོན་པའི་ལས་སྣ་ཚོགས་ལ་ཡང་མཁས་པར་སྤྱད་པར་བྱའོ། །དེ་ལྟར་རྒྱུ་སྐར་རྣམས་དུས་ངེས་པ་ལས་མ་འཁྲུལ་བར་བྱས་ན། གདོན་མི་ཟ་བར་འགྲུབ་པ་ལ་ཐེ་ཚོམ་མེད་དོ། །དེའི་ཕྱིར་ན་རྒྱུ་སྐར་རྣམས་ནི་བཟང་པོ་ཡིན་ཞེས་བྱའོ། །དེ་ནས་སོ་སོའི་ཕྱོགས་ཀྱི་གཟའ་རྣམས་དང་བཏུབ་པར་ངེས་པར་འགྲུབ་པ་ཡིན་ནོ། །དེ་ལྟར་རྒྱུ་སྐར་འདི་དག་གིས་ནི་ལེགས་པ་དང་ཉེས་པ་དང༌། འཇིག་རྟེན་གྱི་འཁྲུལ་འཁོར་སྣ་ཚོགས་སྟོན་པས་གཙོ་ཆེའོ། །རྒྱུ་སྐར་རྣམས་ཀྱི་ལས་སྣ་ཚོགས་པ་སྒྲུབ་པར་བྱེད་པ། དུས་འཛིན་བཟང་པོ་ཞེས་བྱ་བ། དཔལ་མར་མེ་མཛད་བཟང་པོས་མཛད་པ་རྫོགས་སོ།།