མཆོད་རྟེན་ཙྪ་གདབ་པ།
མཆོད་རྟེན་དང་ཚ་ཚ་གདབ་པ་ཡན་ཆད་ནས་བྱེ་བ་གདབ་པ་ལ་སོགས་ཀུན་ཀྱང༌། བསམ་པའི་རྒྱུད་དང་སྔགས་ནི་འདྲ་སྟེ། དང་པོར་རྡོ་རྗེ་གནོད་སྦྱིན་གྱི་ཆ་བྱད། ཕྱག་རྒྱ་དང་སྔགས་སུ་ལྡན་པས་བདུན་ཡན་ཆད་ཉི་ཤུ་རྩ་གཅིག་མན་ཆད་དུ་ཆུ་ལ་བསྔགས་ཏེ། འཇིམ་པ་དང་ཡོ་བྱད་ཡན་ཆད་ལ་གདབ་བོ། །དེ་ལ་རྡོ་རྗེ་གནོད་སྦྱིན་གྱི་ཕྱག་རྒྱ་ནི། རྡོ་རྗེ་བཅིངས་པ་བསྡོམས་ཏེ་མཐེ་བོང་གཉིས་གཤིབས་པ་བསྒྲེང༌། མཐེའུ་ཆུང་གཉིས་ཀྱང་གཞིབས་ཏེ་ཅུང་ཟད་ཀྱིས་མི་སྦྱར་བར་བྱས་ལ། མཛུབ་མོ་གཉིས་བརྐྱང་བ་ལས་མཆེ་བའི་ཚུལ་དུ་བྱ་བ་འདི་ནི་རྡོ་རྗེ་གནོད་སྦྱིན་གྱི་ལས་ཐམས་ཅད་ཀྱི་ཕྱག་རྒྱའོ། །དེའི་སྔགས་ལ། བཛྲ་ཡཀྵ་ཧཱུཾ། འདིས་བཏབ་པས་ཐམས་ཅད་གཙང་མར་བསམས་པ་དང༌། བགེགས་ལ་སོགས་པས་མི་ཚུགས་པར་འགྱུར་རོ། །ཨོཾ་ཤུདྡྷེ་ན་དུ་ཤོ་དྷ་ཡ། ཞེས་འདིས་བཏབ་པས། ཐམས་ཅད་གཙང་མར་བསངས་པར་འགྱུར་རོ། །དེའི་འོག་ཏུ་ལན་ཉི་ཤུ་རྩ་གཅིག་བཟླས་པར་བྱ་བའི་སྔགས་ལ། ན་མ་སྟྲཻ་ཡ་དྷྭི་ཡ་དྷྭི་ཀཱ་ནཱཾ། ཛི་ནཱ་ནཱཾ། བནྡྷེ་རཾ་དྲ་ཡཱ་ན། ཤུ་བྷ་ན་ཨཀྵོ་བྷྱ་མྲྀ་ཏ་པཉྩ་བནྡེ་ཨ་ཧཾ། ཨ་བ་ལོ་ཀི་ཏཾ། ན་མ་སྟྲཻ་ཡ་དྷྭི། ནུགྟཱ་ནཱཾ། སརྦ་ཏ་ཐཱ་ག་ཏཱ་ནཱཾ། ཏ་ཏྱ་ཐཱ། ཨོཾ་སུཀྵྨེ་སུཀྵྨེ་ནུཀྟེ། ཤནྟེ་དཱནྟེ། ཤི་ཤི་བི་ནི། ར་ཀུ་ལེ། ཡ་ཤོ་ཡ་ཤོ་བ་ཏི། ཏེ་ཛ་ཏེ་ཛོ་བ་ཏི་སརྦ་བུདྡྷཱ་ཥྛི་ཏེ་སྭཱ་ཧཱ། མུ་དྲ་གདབ་པའི་འཇིམ་པའམ་སྔགས་བྲི་བའི་ཚེ་སྔགས་ལན་བདུན་གདབ་པའི་སྔགས་ལ། ན་མཿས་མནྟ་བུདྡྷཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཨོཾ་བཛྲ་ཨཱ་ཡུཥེ་སྭཱ་ཧཱ། འབི་འབི་བྱ་བའི་སྔགས་ལ། ཨོཾ་བཛྲོད་བྷ་བ་སྭཱ་ཧཱ། ཙཻ་ཏྱ་ཕོར་བུ་དང༌། སཱཙྪའི་སྐོལ་ཕོར་གྱི་ནང་དུ་བྱེ་མས་གདབ་པའམ། སྣུམ་གྱིས་བསྐུ་བའི་སྔགས་ལ་ཨོཾ་བཛྲ་དྷཱ་ཏུ་གརྦྷེ་
སྭཱ་ཧཱ། ཐོ་བས་བརྡེག་ཅིང་གདབ་པའི་སྔགས་ལ། ཨོཾ་བཛྲ་མུདྒཱ་ར་ཨཱ་ཀོ་ཊ་ཡ་ཧཱུཾ། ཙཻ་ཏྱ་ཕོར་བུ་ནས་དབྱུང་བའི་སྔགས་ལ། ཨོཾ་དྷརྨ་རཏྣེ་སྭཱ་ཧཱ། འཁོར་ལོ་དང་དབུ་ཞུ་གསོལ་བའི་སྔགས་ལ། ཨོཾ་པྲ་མཱརད་ན་ཡེ་སྭཱ་ཧཱ། ཙཻ་ཏྱ་དཀྱིལ་འཁོར་དུ་བཞག་པའི་སྔགས་ལ། ཨོཾ་སུ་ཕྲ་ཏིཥྛ་བཛྲེ་སྭཱ་ཧཱ། ཆོ་ག་དེ་ལྟར་བྱས་ན་ཙཻ་ཏྱ་གཅིག་བཏབ་པས་བྱེ་བ་སྙེད་བཏབ་པར་འགྱུར་རོ། །སྐྱེ་བ་ཐམས་ཅད་དུ་སྐྱེ་བ་དྲན་པར་འགྱུར་རོ། །དཀྱིལ་འཁོར་བྱས་པའི་ལག་པ་འཇིམ་པ་ཅན་གྱིས་གང་ན་བསྐུས་ན་ནད་མཛེའི་རྣམ་པ་བཅོ་བརྒྱད་ལ་སོགས་པ་ནད་ཐམས་ཅད་མ་ལུས་པ་ཞི་བར་འགྱུར་རོ། །