སྒོ་མ་བཞིའི་དཀྱིལ་འཁོར་དུ་དབང་བསྐུར་བའི་ཆོ་ག་རིན་པོ་ཆོ་དྲི་མ་མེད་པ་ཞེས་བྱ་བ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །སྒོ་མ་བཞིའི་དཀྱིལ་འཁོར་དུ་དབང་བསྐུར་བར་འདོད་པའི་སྒྲུབ་པ་པོ་དམ་ཚིག་དང་ལྡན་པས། གནས་ཡིད་དང་མཐུན་པར་སའི་ཆོ་ག་ལ་སོགས་པ་སྔོན་དུ་སོང་བས་སྒོ་མ་བཞིའི་དཀྱིལ་འཁོར་བཞེངས་ཏེ། ས་སྟེགས་དཀྱིལ་འཁོར་གྲུ་གསུམ་མཉམ་ཞིང་ཆགས་ཀྱིས་འཐས་པར་བྱས་ཏེ་ཐིག་བཏབ་ལ་ཚོན་བཀྱེ་སྟེ། དབུས་པདྨ་འདབ་མ་བཞི་པ་སྟེ་ལྟེ་བ་ལྗང་གུ་པདྨ་རིགས་ཀྱི་མདོག་ལྟེ་བའི་མུ་ཁྱུད་ནག་པོ་རྡོ་རྗེ་རབ་དཀར་པོས་བསྐོར་བ། གོང་རས་དམར་པོ་མུ་ཁྱུད་སེར་པོ་སྣ་ཚོགས་པདྨས་མཚན་པ། སྒོ་བཞི་རྟ་བབས་སུ་ཡོད་པ་བྲིས་ལ། མཚན་ཉིད་དང་ལྡན་པའི་བུམ་པ་ལྔ་ལ་རྒྱན་ཐམས་ཅད་ཀྱིས་བརྒྱན་པ། ལྷ་སོ་སོའི་མཚན་མ་བཏབ་ལ་སོ་སོའི་གནས་སུ་བཞག །སྒོ་བཞིར་ཕུར་བུ་བཞི་ལ་དར་ལེ་བརྒན་གྱི་ཅོན་པན་བཏགས་ལ་གཟུགས། དེ་ཡང་རས་ཀྱི་སྐུད་པ་ལ་རྨ་བྱའི་མདོངས་ཀྱིས་སྤྲེལ་ལོ། །པཱུ་ཛའི་བྱེ་བྲག་ལྔ་ལྔ་བཤམ། ཕྱོགས་སྐྱོང་བའི་གཏོར་མའི་ཚོགས་ལེགས་པར་བཤམས་ལ། དེ་ནས་དབུས་ཀྱི་བུམ་པ་ལ་རྡོ་རྗེ་རྣམ་པར་འཇོམས་པ་སྐུ་མདོག་ལྗང་གུ་རྒྱན་ཐམས་ཅད་ཀྱིས་བརྒྱན་པ། དེ་ཉིད་ཀྱི་སྔགས་དང་ཕྱག་རྒྱས་སྤྱན་དྲངས་ལ་བཞུགས་སུ་གསོལ་བ་དང༌། དེ་ནས་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུའི་ཕྱག་རྒྱ་བཅིངས་ལ། ཨོཾ་བཛྲ་ཨཾ་ཀུ་ཤ་སྭཱ་ཧཱ། ཨོཾ་བཛྲ་པཱ་ཤ་སྭཱ་ཧཱ། ཨོཾ་བཛྲ་སྥོ་ཊ་སྭཱ་ཧཱ། ཨོཾ་བཛྲ་གྷཎྜེ་སྭཱ་ཧཱ་ཞེས་སོ་སོའི་བུམ་པ་ལ་དམིགས་ཏེ། ལན་ཉི་ཤུ་རྩ་གཅིག་ཏུ་བརྗོད་པས་ཤར་ཕྱོགས་ཀྱི་བུམ་པར་པདྨ་དང་ཟླ་བའི་སྟེང་དུ། ཛཿལས་ལྷ་མོ་མདོག་དཀར་མོའི་ལག་ན་ལྕགས་ཀྱུ་ཐོགས་པ་ཞལ་བག་ཙམ་ཁྲོ་བ་རྒྱན་ཐམས་ཅད་ཀྱིས་བརྒྱན་པ། སྐྲ་སེར་པོ་གྱེན་ལ་བརྫེས་པ། སྤྱན་དམར་པོ་བསྐྱེད་དོ། །ལྷོར་ཧཱུཾ་ལས་ལྷ་མོ་སེར་མོ་རྒྱན་སྣ་ཚོགས་པས་བརྒྱན་པ། ཕྱག་ན་རྡོ་རྗེ་ཞགས་པ་རྩེ་གསུམ་པས་
མཚན་པ་ཐོགས་པ་ཐོད་པས་བརྒྱན་པ་བསྐྱེད་དོ། །ནུབ་ཏུ་བཾ་ལས་ལྷ་མོ་དམར་མོ་ཕྱག་ན་ལྕགས་སྒྲོག་ཉི་ཟླས་མཚན་པ་བསྐྱེད་དོ། །བྱང་དུ་ཧོཿལས་ལྷ་མོ་ལྗང་སེར་ལག་ན་དྲིལ་བུ་དཀྲོལ་བ་བསྐྱེད་ལ། དེ་དག་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་སོ་སོའི་ཡེ་ཤེས་སེམས་དཔའ་སྤྱན་དྲངས་ལ། ཡེ་ཤེས་སེམས་དཔའི་སྙིང་གར་སོ་སོའི་ས་བོན་ལ་སོ་སོའི་སྔགས་ཀྱི་ཕྲེང་བས་བསྐོར་བའི་སྔགས་ཀྱི་རང་སྒྲ་ལ་དམིགས་ཏེ། བདག་ཉིད་ཀྱིས་ཁྲུས་བྱས་ལ་བཟླས་པ་བྱའོ། །ཨོཾ་ཛྲ་ཡེ་སྭཱ་ཧཱ། ཨོཾ་བི་ཇ་ཡེ་སྭཱ་ཧཱ། ཨོཾ་ཨ་ཛི་ཏེ་སྭཱ་ཧཱ། ཨོཾ་ཛྭཱ་ལ་སྭཱ་ཧཱ་ཞེས་སོ་སོའི་བུམ་པ་ལ་དམིགས་ཏེ། ཁྲི་ཕྲག་རེ་བཟླས་ཏེ་སྟོང་གིས་མཆོད་པ་འབུལ། སྤྱན་དྲང་བ་དང་བཞུགས་སུ་གསོལ་བ་དང༌། ཕྱག་བཙལ་བ་དང་བསྟོད་པ་རེ་བྱ། དེ་ལྟར་བཟླས་པ་བྱས་ལ་ལྷ་སོ་སོ་འོད་དུ་ཞུ་ཆུ་བདུད་རྩིར་གྱུར་པ་ལས་ལྷ་མོ་གྲངས་མེད་པ་འཕྲོས་པ་ལས། ཕྱི་ནང་གི་དབང་བདག་ལ་བསྐུར་བར་དམིགས་ལ། དེ་ནས་སློབ་མ་བསྐྱེད་པ་ལ་སོགས་པ་བྱས་ལ་དཀྱིལ་འཁོར་དུ་གཞུག་པ་དབང་བསྐུར་བར་བྱའོ། །དེ་ནས་བ་ལིཾ་གཏང༌། བཀྲ་ཤིས་གསོལ། དཀྱིལ་འཁོར་བསྡུ། སློབ་མས་བླ་མ་ལ་ཡོན་དབུལ། སྒོ་མ་བཞིའི་དཀྱིལ་འཁོར་དུ་དབང་བསྐུར་བའི་ཆོ་ག །རིན་པོ་ཆེ་དྲི་མ་མེད་པ་ཞེས་བྱ་བ་དཔལ་མར་མེ་མཛད་ཀྱིས་མཛད་པ་རྫོགས་སོ།།