འཕགས་པ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་གཞན་གྱིས་མི་ཐུབ་མ་ཕྱིར་བཟློག་པ་ཞེས་བྱ་བའི་གཟུངས་ཀྱི་སྒྲུབ་ཐབས།
ཙནྡྲགོམིན།
རྒྱ་གར་སྐད་དུ། ཨཱཪྻ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་ཏྲེ་ནཱ་མ་ཨ་པ་རཱ་ཛི་ཏ་དྷཱ་ར་ཎི་སཱ་དྷ་ནམ། བོད་སྐད་དུ། འཕགས་པ་དེ་བཞིན་གཤེགས་བའི་གཙུག་ཏོར་ནས་བྱུང་བའི་གདུགས་དཀར་མོ་ཅན་གཞན་གྱིས་མི་ཐུབ་མ་ཕྱིར་བཟློག་པ་ཞེས་བྱ་བའི་གཟུངས་ཀྱི་སྒྲུབ་ཐབས། དཀོན་མཆོག་གསུམ་ལ་ཕྱག་འཚལ་ལོ། །མཐོང་དང་མ་མཐོང་ལ་སྒྲོལ་བའི། །གདུགས་དཀར་ཡུམ་ལ་ཕྱག་འཚལ་ཏེ། །བདག་གཞན་དོན་དེ་ཐོབ་བྱའི་ཕྱིར། །ལོ་འདབ་ཙམ་ཅིག་གསལ་བར་བྱ། །དེ་ལ་འཕགས་པ་གདུགས་དཀར་མོ་ཅན་བསྒྲུབ་པར་འདོད་པའི་རྣལ་འབྱོར་པས། གནས་དབེན་ཞིང་ཡིད་དང་མཐུན་པར་དང་པོ་མཎྜལ་དང་མཆོད་པ་བཤམས་ལ་ཁྲུས་བྱ་སྟེ། ལུས་ལ་དེས་བྱུགས་ནས་གོས་གཙང་མ་བགོས་ཏེ། སྟན་བདེ་བ་ལ་གནས་པར་བྱའོ། །དེ་ནས་རང་གི་སྙིང་གར་ཟླ་བའི་སྟེང་དུ་ཨོཾ་དཀར་པོ་བསམས་ཏེ། དེ་ལས་འོད་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་
འཕགས་པ་གདུགས་དཀར་མོ་ཅན་དམིགས་ཏེ། ཕྱག་འཚལ་བ་ལ་སོགས་པ་རིམ་པ་བཞིན་དུ་བྱའོ། །དེ་ནས་ཆད་མེད་པ་བཞི་བསྒོམས་ཏེ་སྟོང་བ་ཉིད་དུ་བསྒོམ་པར་བྱའོ། །དེ་ལྟར་སྟོང་པ་ཉིད་ལས་ཟླ་བའི་དཀྱིལ་འཁོར་ལ་གནས་པའི་ཨོཾ་དཀར་པོ་བསམས་ཏེ། དེ་ཉིད་ལས་འོད་ཟེར་ཕྱོགས་བཅུར་འཕྲོས་པས་འགྲོ་བའི་དོན་བྱས་ཏེ། ཚུར་འདུས་པ་ལས་གདུགས་དཀར་པོ་ཨོཾ་གྱིས་མཚན་པར་གྱུར་ཏེ། དེ་ལས་འོད་ཟེར་ལྷ་མོའི་སྐུ་དང་བཅས་པ་འཕྲོས་པས་འཇིག་རྟེན་ཐམས་ཅད་དུ་ནད་དང་སྡུག་བསྔལ་ཐམས་ཅད་ལས་དགྲོལ་ཏེ་ཚུར་འདུས་པས་འཕགས་པ་གདུགས་དཀར་མོ་ཅན་སྐུ་མདོག་དཀར་མོ་རྒྱན་ཐམས་ཅད་ཀྱིས་བརྒྱན་པ། ཕྱག་དང་པོ་གཉིས་ཀྱིས་གདུགས་དཀར་པོ་འཛིན་པ། སྤྲུལ་པའི་དབུ་སྟོང་ཕྱག་སྟོང་མངའ་བ། སྤྱན་བྱེ་བ་ཕྲག་བརྒྱ་སྟོང་མངའ་བ་ཆེན་མོ། དབུ་ལ་མི་ཕྱེད་རྡོ་རྗེ་འབར་བའི་མཚན་རྟགས་ཅན། ས་གསུམ་གྱི་དཀྱིལ་འཁོར་ལ་མངའ་མཛད་པ། བདག་དང་གཞན་འཇིགས་པ་ཐམས་ཅད་ལས་སྐྱོབ་པ། ཕྱག་རྒྱའི་ཚོགས་ཀྱིས་ཀུན་ནས་ཡོངས་སུ་བསྐོར་ཏེ་གནས་པར་བསམས་ཏེ། མཆོད་པའི་ཚོགས་རྣམས་བྱིན་གྱིས་བརླབ་པ་ལ་སོགས་པ་བྱའོ། །དེ་ནས་མདུན་གྱི་ནམ་མཁར་བྷྲཱུཾ་ལས་ཡེ་ཤེས་ཀྱི་གཞལ་ཡས་ཁང་སེམས་ཀྱི་འབྱོར་པའི་རྒྱན་དང་ལྡན་པར་བསྒོམས་པའི་ནང་དུ་སེང་གེ་ལ་སོགས་པའི་གདན་རྣམས་བསྐྱེད་པ་ལ། སྤྱན་དྲང་བ་ནི་སྙིང་གའི་ཨོཾ་གྱི་འོད་ཀྱིས་བསྐུལ་ཏེ་དམིགས་པ་རྣམས་མཆོད་ཡོན་གྱིས་བཞུགས་སུ་གསོལ་བར་བྱའོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་དང༌། འཕགས་པ་གདུགས་དཀར་མོ་ཅན་ཕྱག་རྒྱའི་ཚོགས་ཀྱིས་བསྐོར་བ་དང༌། སྤྲུལ་པའི་ཚོགས་རྣམས་གསལ་བར་དམིགས་ཏེ། གཞུང་ལས་བྱུང་བའི་ཕྱག་རྒྱ་དང་བསྟོད་པ་སྔོན་དུ་འགྲོ་བས་མཆོད་པའི་ཚོགས་ཀྱིས་མཆོད་དོ། །དེ་ནས་གསོལ་བ་བཏབ་སྟེ་བཟླས་པ་ནི་བདག་དང་ཡེ་ཤེས་ཀྱི་ཐུགས་ཀར་ཟླ་བའི་དཀྱིལ་འཁོར་ལ་བཟླས་བའི་ཡི་གེ་མུ་ཏིག་གི་རྡོག་པོ་ལྟ་བུར་བསམས་ཏེ། སྤྲོ་བ་དང་བསྡུ་པའི་སྦྱོར་བས་བཟླས་པའི་སྐྱོན་སྤངས་ཏེ་བཟླས་བ་བྱའོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བར་
དམིགས་ཤིང་སེམས་ཅན་གྱི་དོན་དྲན་པས་བཟླས་པ་བྱའོ། །དེ་ནས་ངལ་ལམ་གཏོང་བར་འདོད་ན་བཟླས་པ་ཡིད་ཀྱིས་འཕགས་པ་གདུགས་དཀར་མོ་ཅན་ལ་ཕུལ་ཏ། བདག་ལས་ཀྱི་ལྷ་མོས་འཕགས་པ་རྣམས་ལ་མཆོད་པ་དང་བསྟོད་པ་བྱ་སྟེ། བཟོད་པར་གསོལ་ཞིང་དགེ་བའི་རྩ་བ་བསྔོས་ནས་གཤེགས་སུ་གསོལ་ལོ། །དེ་ནས་ལུས་བསྲུང་བར་བྱ་སྟེ་ལྡང་བར་བྱའོ། །ལངས་ནས་ཀྱང་མདོ་སྡེ་ཟབ་མོ་བཀླག་པ་ལ་སོགས་པ་བྱའོ། །རྟག་ཏུ་འཕགས་པ་གདུགས་དཀར་མོ་དྲན་པར་བྱའོ། །ཕྱག་འཚལ་བར་དམིགས་ཤིང་འབྱུང་པོའི་ཁ་ཟས་སྤངས་ཏེ་བསྒྲུབ་པར་བྱའོ། །སྲུང་བ་དང༌། འཁྲུལ་འཁོར་དང༌། བཟློག་པ་དང༌། སྦྱིན་སྲེག་དང༌། བགེགས་བཟློག་ཅིང་གཟིར་བ་དང༌། དམག་དཔུང་གཞོམ་པ་དང༌། དངོས་གྲུབ་བསྒྲུབ་པ་དང༌། སེར་བ་སྲུང་བ་དང༌། སྲིའུ་གསོ་བ་དང༌། གཏོར་མ་བཏང་བ་དང༌། མཛེ་ནད་གསོ་བ་དང༌། འཇིགས་པ་སྐྱོབ་པ་ཀུན་དང་པོའི་ཕན་ཡོན་ལས་འབྱུང་བ་ལྟར་ཐམས་ཅད་བྱའོ། །བདག་འདྲ་བློ་དམན་སོ་སོའི་སྐྱེ་བོ་ཡིས། །འཕགས་མ་མཆོག་ལ་ཆུ་ཡི་ཐིགས་ཙམ་བསྟོད། །འདི་ལས་སྐྱེས་པའི་བསོད་ནམས་གང་བྱུང་བས། །བདག་དང་སེམས་ཅན་ཀུན་གྱིས་མཆོག་ཐོབ་ཤོག །འཕགས་པ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་གཞན་གྱིས་མི་ཐུབ་པ་ཕྱིར་བཟློག་པ་ཞེས་བྱ་བའི་གཟུངས་ཀྱི་སྒྲུབ་ཐབས་སློབ་དཔོན་ཙནྡྲ་གོ་མིས་མཛད་པ་རྫོགས་སོ།།