འཕགས་མ་གདུགས་དཀར་མོ་ཅན་གྱི་སཱཙྪའི་ཆོ་ག་ཞེས་བྱ་བ།
པདྨའི་ལྕགས་ཀྱུ།
རྒྱ་གར་སྐད་དུ། ཨཱཪྻཱ་ཛི་ཏ་དྷཱ་ར་སཱ་ཙྪ་བི་དྷི་ནཱ་མ། བོད་སྐད་དུ། འཕགས་མ་གདུགས་དཀར་མོ་ཅན་གྱི་སཱ་ཙྪའི་ཆོ་ག་ཞེས་བྱ་བ། འཕགས་མ་གདུགས་དཀར་མོ་ཅན་ལ་ཕྱག་འཚལ་ལོ། །དང་པོའི་ལས་ཅན་རྣལ་འབྱོར་པས། །ལུས་ངག་སྒྲིབ་པ་སྦྱང་བ་དང༌། །ཁྱད་པར་བསྒྲུབ་པའི་ལས་བརྩོན་པས། །ཚ་ཚ་བྱ་བའི་རིམ་པ་བསྟན། །དང་པོ་ཡིད་དང་མཐུན་པའི་ས་ཕྱོགས་སུ་ཐང་བུ་བསྟར་བར་བྱ་སྟེ། དེ་རུ་སྤོས་དང་བདུད་རྩི་འཁྱིལ་པའི་སྔགས་སམ། ཐམས་ཅད་འཇོམས་པའི་སྔགས་ཟློས་ཤིང༌། གཏོར་བས་མི་གཙང་བའི་ཚོགས་ཐམས་ཅད་བྱང་སྟེ་རིན་པོ་ཆེའི་ས་གཞིར་གྱུར་པར་བསམ། བགེགས་ཡོད་པ་ཀུན་རང་རང་གི་གནས་སུ་དེངས་པར་བྱ་སྟེ་བཀའ་བསྒོ་བ་ཡང་བྱའོ། །དེ་ནས་དྲི་བཟང་པོ་ལ་སོགས་པའི་ཆུས་སྐྱང་ནུ་ལ་བྱས། མེ་ཏོག་སིལ་མ་དཔག་ཏུ་མེད་པ་བཀྲམ་ལ། མཆོད་པ་ལ་སོགས་པའི་ཡོ་བྱད་ཀུན་ཚོགས་པར་བྱ་སྟེ། གནས་ཁང་དང་མཆོད་པ་ལ་སོགས་པའི་བྱ་བའོ། །དེ་ནས་བླ་མས་ཁྲུས་དང་གཙང་སྦྲ་བྱ་སྟེ། སྔོན་དུ་འགྲོ་བའི་ཆོ་ག་རྫོགས་པས་འཕགས་མ་གདུགས་དཀར་ཅན་དུ་བསམ་སྟེ། ཚ་ཚའི་ས་བརྐོ་བ་དེར་བརྟག་པ་དང༌། ཨོཾ་ཨཱཿཧཱུཾ་ཞེས་པའམ། བཀྲ་ཤིས་པའི་ཕྱག་རྒྱའི་ལྷ་མོས་གང་བར་བྱིན་གྱིས་བརླབ། ཐམས་ཅད་འཇོམས་པའི་སྔགས་ཀྱིས་བགེགས་བསྐྲད་པ་དང༌། ལྷ་མོ་ལེགས་ལྡན་ལ་གཏོར་མ་བྱིན་ལ་གསོལ་བ་གདབ་པ་དང༌། ས་བདག་ལ་གཏོར་མ་བྱིན་ལ་བཀའ་བསྒོ་བ་བྱ་སྟེ། དེ་ནས་ཇི་ཙམ་བརྐོ་བའི་ས་དེ་ལ་སེང་ལྡེང་ལ་སོགས་བའི་ཕུར་བུས་ཕྱོགས་བཞིར་བཏབ་སྟེ། དེ་ཡང་སྟོད་ལེགས་ལྡན་ནམ། ལྷ་མོ་བདུད་རྩི་འཁྱིལ་པ་ལ་སྨད་ཕུར་པར་འདུག་པར་བསྐྱེད་ལ། བྱིན་གྱིས་བརླབས་ལ་ཨོཾ་བཛྲ་ཀཱི་ལི་ཀཱི་ལ་ཡ། སརྦ་དུཥྚཱཾ་ཧཱུཾ་ཕཊ་ཅེས་ལན་གསུམ་བཟླས་ལ་གདབ་བོ། །དེ་ནས་བུ་མོ་གཙང་མས་བཀལ་བའི་ཚོན་སྐུད་རྣམ་པ་ལྔ་རིགས་ལྔའི་རྣམ་པའམ། རིན་ཆེན་ལྔའི་རང་བཞིན་དུ་བསམ་
ལ། ཨོཾ་བཛྲ་སཱུ་ཏྲ་ས་མ་ཡ་ཧཱུཾ་ཕཊ་ཅེས་བྱ་སྟེ། ཕུར་པའི་མཐའ་མ་ཚོན་སྐུད་ཀྱིས་བསྐོར་ལ་རང་གི་རྐང་པ་གར་གཞག་པར་རྡོ་རྗེར་ལམ་ལམ་སོང་བར་བསམ་མོ། །ཡང་ན་སྔགས་དེ་ཐམས་ཅད་རྩ་བའི་སྔགས་ཀྱིས་བྱའོ། །དེ་ནས་ཐམས་ཅད་འཇོམས་པའི་སྔགས་ཟློས་ཤིང་ཡུངས་ཀར་གྱིས་གཏོར་རོ། །དེ་ནས་ས་གཞི་དེ་རིན་པོ་ཆེར་གྱུར་བར་བསམས་ལ་རང་ཇི་ཙམ་འདོད་པ་བརྐོས་ཏེ། དེའི་སྔགས་ཀྱང་ཨོཾ་བཛྲ་ཁ་ན་ཁ་ན་ཡ་ཧཱུཾ་ཕཊ་ཅེས་བྱའོ། །དེ་ནས་ཕུར་བུ་དང་ཚོན་སྐུད་བསྡུས་འོ་མས་བསྐུས་ཏེ་གཞག་གོ །ས་བླང་བའི་ཆོ་གའོ། །དེ་ནས་བླངས་པ་རྣམས་སྟེགས་བུ་ལ་སོགས་པར་བཞག་ལས་བརྡུང་བའི་ལས་བྱ་སྟེ། སྔགས་ཀྱང་ཨོཾ་བཛྲ་མུངྒ་ར་ཨཱ་ཀོ་ཊ་ཡ་ཨཱ་ཀོ་ཊ་ཡ་ཧཱུཾ་ཕཊ་ཅེས་བརྗོད་ཅིང་རྡོ་རྗེའི་ཐོ་བས་བརྡུང་ངོ༌། །དེ་ནས་སྤོས་ཆུ་ལ་སོགས་པའི་ཆུ་ལ་ཨོཾ་ཨ་མྲྀ་ཏེ་ཧཱུཾ་ཕཊ་ཅེས་བཟླས་ལ། སྤོས་ཆུ་དམིགས་པ་ལས་ཨ་དཀར་པོར་བསམ། དེ་ལས་ཟླ་བའི་དཀྱིལ་འཁོར་དེའི་འོད་ཀྱིས་སྤོས་ཆུ་ཐམས་ཅད་ཁྱབ་སྟེ། བདུད་རྩིར་གྱུར་པར་བསམས་ཏེ་སྦྲུའོ། །དེའི་སྔགས་ཨོཾ་བཛྲ་པྲ་མ་རྡ་ཡ་པྲ་མརད་ཡ་ཧཱུཾ་ཕཊ་ཅེས་བྱས་ལ་སྦྲུའོ། །དེ་ནས་འཇིམ་པ་དེ་བདུད་རྩི་ཐབ་སྦྱོར་གྱི་ཕྱག་རྒྱ་བཅས་ལ་སྔགས་འདི་བརྗོད་དེ། ཨོཾ་སུཀྵྨེ་སུཀྵྨེ་མུ་ག་ཏེ། ཤཱནྟེ་དཱནྟེ། ནིར་ཀུ་ལི། ནི་ར་བ་ར་ཎེ། སརྦ་བྷཱུ་ཏ་བྷ་ཡཱ་ནུ་ག་ཏེ། ཡ་བ་དེ་ཡ་ཤོ་ཛི་ནི། དྷརྨ་དྷཱ་ཏུ་གརྦྷེ། དྷརྨ་རཱ་ཛ་ཡ་བ་ཤི་ཧེ། སརྦ་བུདྡྷཱ་ཡ། ཨ་དྷིཥྛཱ་ནཱ་ཡ། ཨ་དྷིཥྛཱ་ཏེ་སྭཱ་ཧཱ། ཞེས་བརྗོད་པས་རང་གི་ཐུགས་ལས་ཡེ་ཤེས་ལྔའི་འོད་ཟེར་འཕྲོས་པས་ཁམས་གསུམ་སེམས་ཅན་འཕགས་མ་གདུགས་དཀར་མོ་ཅན་དུ་བྱས། ཚུར་ལ་རིག་སྔགས་ལ་སོགས་སངས་རྒྱས་མཆོད་པས་འཇིམ་པ་ལ་ཐིམ། ཞུ་ནས་ཁྱབ་པས་རིན་པོ་ཆེ་རྣམ་པ་ལྔའི་རང་བཞིན་དུ་གྱུར་པར་བསམ་སྟེ་སྟེགས་བུ་ལ་གཞག་གོ །དེ་ནི་འཇིམ་པའི་བྱ་བའོ། །དེ་ནས་འབི་འབི་བྱ་སྟེ། དེ་ཡང་ཨོཾ་བཛྲ་བཛྲོད་བྷ་བ་ཡ་སྭཱ་ཧཱ། ཞེས་ཟློས་ཤིང་བྱའོ། །དེ་ནས་རང་གི་ཐུགས་ཀ་ནས་འོད་ཟེར་འཕྲོས་སེམས་ཅན་གྱི་སྒྲིབ་པ་གསུམ་སྦྱངས། འཕགས་མ་གདུགས་དཀར་ཅན་དུ་བྱས། འཕགས་པ་མཆོད། འདུས་པས་འབི་འབི་ལ་ཐིམ་པས་ཡེ་ཤེས་ལྔའི་
རང་བཞིན་གྱི་ཤེལ་སྒོང་དག་པའི་རྣམ་པའི་གཞལ་ཡས་ཁང་དུ་བསམས་ཏེ། དེའི་ནང་དུ་ཡང་གདན་པདྨ་དང་སེང་གེ་ལས་འཕགས་མ་གདུགས་དཀར་ཅན་དང་ཕྱག་རྒྱའི་ལྷ་མོ་ལ་སོགས་པ་བསྐྱེད་དེ། འདི་ཆོ་ག་གསུམ་གྱིས་བསྐྱེད་དོ། །དེ་ནས་ཨོཾ་ལས་ཡེ་ཤེས་ཀྱི་འོད་ཕྱུང་ལ་གཞལ་ཡས་ཁང་དུ་བྱས་ཏེ། གདན་ནས་ལྷ་རྫོགས་པའི་བར་གྱི་དཀྱིལ་འཁོར་བསྐྱེད། ཡེ་ཤེས་པ་གཞུག །ཛཿཧཱུཾ་བཾ་ཧོཿཞེས་པས་སོ། །དེ་ནས་རང་གིས་ཀྱང་སྦྱང་བ་ལ་སོགས་པ་བྱའོ། །དེ་ནས་འབི་འབི་རྣམས་སུ་ཨོཾ་ཨ་ན་ལེ་དང་ཕྱག་རྒྱའི་སྔགས་སམ་ས་བོན་རྣམས་ཀྱང་གཞུག། གཞན་སྲོག་ཤིང་བརྟན་པའི་གཟུངས་ལ་སོགས་པ་ཅི་རིགས་པར་གཞུག །རྟེན་འབྲེལ་དང་དྲི་མ་མེད་པ་ལ་སོགས་པ་ཡང་གཞུག་གོ །དེ་ལ་མཆོད་པ་དང་བསྟོད་པ་ལ་སོགས་པ་ཡང་རྒྱས་པར་བྱའོ། །དེ་ནས་ཨོཾ་དྷརྨ་དྷཱ་ཏུ་གརྦྷེ་ཛྭ་ལ་སྭཱ་ཧཱ་ཞེས་བརྗོད་ལ། དེ་ལས་ལྷ་མོ་རྣམས་བསྐུལ་ནས་སླར་ཡང་གཞུག་སྟེ་སངས་རྒྱས་དཔག་ཏུ་མེད་པ་རྡུལ་དང་མཉམ་པས་བདག་དང་སེམས་ཅན་སྦྱངས་ཏེ་གཞུག་པར་བྱའོ། །དེ་ནས་མར་བྱུག་པ་ནི་ཨོཾ་ཨ་ར་ཛེ་པི་ར་ཛེ་སྭཱ་ཧཱ། ཞེས་བརྗོད་ལ། བྱང་ཆུབ་ཀྱི་སེམས་ཀྱིས་བསྒོམ་པར་བསམ་མོ། །དེ་ནི་འབི་འབི་བྱ་བའོ། །ཐབས་དང་ཤེས་རབ་འབྲེལ་པ་ལས་ཆོས་ཀྱི་དབྱིངས་རྣམ་པར་དག་པར་བཞུགས་པར་བསམས་ཏེ་སྐོལ་ཕོར་དུ་བཅུག་ལ། ཨོཾ་བཛྲ་དྷརྨ་དྷཱ་ཏུ་གརྦྷེ་སྭཱ་ཧཱ་ཞེས་བྱའོ། །དེ་ནས་སྐོལ་ཕོར་ཤེས་རབ་ལག་པ་ཐབས་སུ་བསམས་ཏེ། བརྡུང་བ་ནི་དེ་ནི་གཉིས་སུ་མེད་པར་བསྲུབ་པར་བསམས་ཏེ། ཨོཾ་བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཞེས་པའམ། རྟེན་འབྲེལ་ལམ། སྙིང་པོའམ། ཉེ་སྙིང་ལ་སོགས་ཟློས་ཤིང་གདབ་བོ། །དེ་ནས་ཆོས་ཀྱི་སྐུ་ལས་སྤྲུལ་སྐུ་གཉིས་ཀྱིས་སེམས་ཅན་གྱི་དོན་བྱེད་པར་ཆོས་ཀྱི་དབྱིངས་ལས་འབྱུང་བར་བསམ་སྟེ། ཨོཾ་བཛྲ་དྷརྨཱ་དྷ་རེ་སྭཱ་ཧཱ། ཞེས་བརྗོད་ལ་འབྱུང་ངོ༌། །དེ་ནས་ཨོཾ་སརྦ་ཏ་ཐཱ་ག་ཏ་ཀཱ་ཡ་མ་ཧཱ་སུ་ཁ་བཛྲ་སུ་ར་ཏ་ས་མ་ཡ་སྟྭཾ། དེ་ལས་གཟུགས་སྐུ་གཉིས་བྱུང་བས་འགྲོ་བ་ཐམས་ཅད་ཀྱི་དོན་བསམ་གྱིས་མི་ཁྱབ་པ་བྱེད་པར་བསམ་མོ། །དེ་ནས་གཟུགས་སྐུས་ཇི་ལྟར་རིགས་པ་སྟེ། ལོངས་སྐུས་དག་པའི་སེམས་ཅན་གྱི་
དོན་བྱེད་པར་བསམ་སྟེ། ཨོཾ་སརྦ་ཏ་ཐཱ་ག་ཏ་སཾ་བྷོ་ཀ་ས་མ་ཡ་སྟྭཾ་ཞེས་བྱའོ། །སྦྲུལ་སྐུས་མ་དག་པ་དང་པོའི་ལས་ཅན་ལ་སོགས་པའི་དོན་བྱེད་པར་བསམས་ལ། ཨོཾ་སརྦ་ཏ་ཐཱ་ག་ཏ་ནི་རྨ་ཎ་ཀཱ་ཡ་ས་མ་ཡ་སྟྭཾ་ཞེས་བྱའོ། །དེ་ནི་ཚ་ཚ་གདབ་པའོ། །དེ་ནས་སྐུ་གསུམ་གྱི་ངོ་བོ་དང་རང་དོན་ནི་གཞུང་མངས་ཀྱིས་དོགས་པས་མ་བྲིས་སོ། །དེ་ལ་ཡེ་ཤེས་པ་བསྟིམ་པ་དང་མཆོད་པ་ལ་སོགས་པ་ཡང་བྱའོ། །དེ་ནས་ཨོཾ་བཛྲ་ཕྲུ་ཤི་སྭཱ་ཧཱ། ཞེས་པས་སྲོག་ཤིང་གཟུགས་པར་བྱའོ། །དེ་ནས་སེམས་ཅན་ཤེས་བཅུ་ལྡན་གྱུར་ཅིག །བསྟན་པ་ཡུན་རིངས་གནས་པར་ཤོག །སེམས་ཅན་ལྷག་བསམ་དག་པ་ཡིས། །ཀུན་བཟང་སྨོན་ལམ་འཇུག་པར་ཤོག །ཅེས་བྱའོ། །དེ་ནས་ཨོཾ་པྲ་མརད་ན་ཡེ་སྭཱ་ཧཱ། ཞེས་བྱ་སྟེ། འཁོར་ལོ་གསུམ་བསྐོན་ལ། ཁམས་གསུམ་སེམས་ཅན་མ་ལུས་པ། །སྟོབས་དང་མ་འདྲེས་ཆོས་དང་ནི། དྲན་པ་ཉེར་གཞག་རྣམ་ཐར་བརྒྱད། །ཡེ་ཤེས་བཞི་སོགས་ལྡན་གྱུར་ཤོག །ཅེས་བྱའོ། །ཨོཾ་པ་ད་ཀ་ལཾ་པ་སྭཱ་ཧཱ། ཞེས་བརྗོད་ལ་དར་གྱི་ཅོད་པན་ཕུལ་ལ། སེམས་ཅན་རྣམས་ནི་མ་ལུས་པས། །བདེ་བར་གཤེགས་པའི་སྐུ་གཟུགས་ལ། །དར་དང་ལྷབ་ལྷུབ་ལ་སོགས་པ། བྱང་ཆུབ་བར་དུ་མཆོད་པར་ཤོག །ཅེས་བྱའོ། །དེ་ནས་ཨོཾ་པ་ད་ཀ་སྭཱ་ཧཱ། ཞེས་བྱ་སྟེ། བ་དན་ཕུལ་ལ། སེམས་ཅན་རྣམས་ནི་མ་ལུས་ལས། །ཕྱོགས་བཅུར་བསྟན་པའི་བ་དན་གྱིས། །འཚེ་བ་མེད་ཅིང་ཆོས་ལྡན་པས། །གྲགས་པས་རྒྱས་པར་འགེངས་པར་ཤོག །ཅེས་བྱའོ་དེ་ནས་ཨོཾ་ཀུམྦྷི་ར་དྷྭ་ཛ་སྭཱ་ཧཱ་ཞེས་བྱ་སྟེ། ཆུ་སྲིན་གྱི་རྒྱལ་མཚན་ཕུལ་ལ། འཁོར་བ་མ་སྟོང་བར་དུ་ནི། །བདུད་བཞི་དག་ལས་ལེགས་རྒྱལ་ནས། །སྟོན་པའི་བསྟན་པ་ཟབ་མོ་དག །མི་ནུབ་རྒྱལ་མཚན་ཐོབ་པར་ཤོག །ཅེས་བྱའོ། །དེ་ནས་ཨོཾ་པྲ་མ་ན་ཡེ་སྭཱ་ཧཱ། ཞེས་པས་གདུགས་ཕུལ་ལ། ཁམས་གསུམ་སེམས་ཅན་མ་ལུས་པ། །ཉོན་མོངས་ཚད་པས་གདུང་བ་ལ། །ཐུགས་རྗེ་བྱང་ཆུབ་སེམས་ཀྱི་གདུགས། །ཕུབ་པས་བདེ་བས་ཚིམ་གྱུར་ཤོག །ཅེས་བྱའོ། །དེ་ནས་ཨོཾ་རཏྣ་མཱ་ལེ་ཏྲཾ་ཞེས་པས་མེ་ཏོག་ཕུལ་ལ། ཡང་ན་ན་མཿཤྲཱི་ཡ་དྷ་ནུ་ག་ཏ་པྲ་ཏིཥྛ་ཏ་པུཥྤ་
ཀོ་ཏ་ནོ་ཏ་ཐཱ་ག་ཏཱ་ཨརྷ་ཏེ་སམྱཀ་སཾ་བུདྡྷཱ་ཡ། ཏ་དྱ་ཐཱ། ཨོཾ་པུཥྤེ་སྭཱ་ཧཱ་ཞེས་བྱ་བ་སྟེ། འཁོར་བའི་སེམས་ཅན་མ་ལུས་ཀུན། །མཚན་དང་དཔེ་བྱད་རྫོགས་ཐོབ་ནས། །བལྟ་བས་མི་ངོམས་གཟུགས་ཀྱིས་ནི། །སེམས་ཅན་དོན་རྣམས་རྫོགས་བྱེད་ཤོག །ཅེས་བྱའོ། །དེ་ནས་ཨོཾ་སུ་ན་དྷ་རེ་ཛ་ཡེ་སྭཱ་ཧཱ། ཞེས་བྱས་ཏེ་གདན་ཕུལ་ལ། སེམས་ཅན་མ་ལུས་སངས་རྒྱས་ཏེ། །སྟོབས་བཅུ་ལྡན་པ་གླང་པོའི་གདན། །མི་འཇིགས་སེང་གེའི་གདན་དང་ལྡན། །རྫུ་འཕྲུལ་རྐང་པ་རྟ་ཡི་གདན། །དབང་བཅུ་ཐོབ་པ་རྨ་བྱའི་གདན། །ཐོགས་མེད་ཤུགས་ལྡན་མཁའ་ལྡིང་གདན། །འདོད་དགུ་འབྱུང་བ་རིན་ཆེན་གདན། །སྐྱོན་གྱིས་མ་གོས་པདྨའི་གདན། །རང་བཞིན་འོད་གསལ་ཉི་ཟླའི་གདན། །གདན་རྣམས་མྱུར་དུ་ཐོབ་པར་ཤོག །ཅེས་བྱའོ། །དེ་ནས་ཨོཾ་དྷ་ར་དྷ་ར་མི་ལི་ཛ་ལེ་སྭཱ་ཧཱ། ཞེས་གཞལ་ཡས་ཁང་དུ་གཤེགས་སུ་གསོལ་ལོ། །ཇི་ལྟར་ཆོས་དབྱིངས་དག་པ་ཡི། །གནས་སུ་བསམ་ཤེས་བཞུད་པ་ལྟར། །བདག་སོགས་སེམས་ཅན་ཐམས་ཅད་ཀྱང༌། །དག་པའི་གནས་སུ་གཤེགས་གྱུར་ཅིག །དེ་ནས་ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་བཞུགས་སུ་གསོལ་ཏེ། རིན་ཆེན་གཞལ་ཡས་ཆོས་དབྱིངས་སུ། །སེམས་ཅན་དོན་དུ་བརྩེར་དགོངས་ལ། །ཇི་སྲིད་སེམས་ཅན་བྱང་ཆུབ་བར། །དེ་སྲིད་དུ་ནི་བཞུགས་པར་མཛོད། །ཅེས་བྱའོ། །དེ་ནས་ཨོཾ་བཛྲ་དྷཱ་ཏུ་ཤ་རི་མ་ཏིཥྛི་ཧཱུཾ་ཨ་བྷི་ཥིཉྩ་མཱཾ་ཞེས་བརྗོད་ལ། དབང་བསྐུར་ཏེ་རིགས་ཀྱི་བདག་པོས་དབུ་བརྒྱན་པར་བྱའོ། །དེ་ནི་བརྟན་པར་བྱ་བའི་ཆོ་ག་ཡིན་ནོ། །དེས་ནི་ཕུན་སུམ་ཚོགས་པའི་ཆོ་གའོ། །དེ་ནས་སློབ་དཔོན་བྱང་ཆུབ་སེམས། །ལྡན་པས་ཚིགས་བཅད་བརྗོད་བྱ་སྟེ། །བླ་མེད་སངས་རྒྱས་བདག་ལ་དགོངས། །སེམས་ཅན་ཐམས་ཅད་དབུགས་དབྱུང་ཞིང༌། །བདུད་དང་ཕྱིར་རྒོལ་ལོག་འདྲེན་ཚོགས། །ཐམས་ཅད་ཕམ་བྱས་བདེ་ལ་དགོད། །སེམས་ཅན་ཉིང་མཚམས་སྦྱོར་བ་ཡི། །ཉོན་མོངས་མ་ལུས་སྦྱང་བར་བྱ། །ང་རྒྱལ་རི་ནི་གཞོམ་བྱ་ཞིང༌། །སྐྱེ་བའི་ལྗོན་ཤིང་གཅད་པར་བྱ། །འཆི་བདག་སྲིན་པོ་བརླག་བྱ་སྟེ། །མ་རིག་པ་ཡི་མུན་པ་བསལ། །ལྟ་ལོག་ཡང་དག་ལྟ་ལ་དགོད། །ལས་ཀྱི་ཆུ་
ཀླུང་བསྐམ་པར་བྱ། །སྲིད་པའི་རྒྱ་མཚོ་ཡང་བསྐམ་སྟེ། །ཆོས་སྒྲོན་སྤར་ཞིང་བྱང་ཆུབ་ལམ། །བསྟན་པར་བྱས་ཏེ་བཟོད་དེས་བྱོས། །འདོད་ཆགས་མེ་དང་ཞེ་སྡང་མཚོན། །ཕྲག་དོག་འཚུབ་མ་སེར་སྣ་བདུད། །འཇིག་ཚོགས་བདག་གིས་གཞོམ་པར་བགྱི། །སེམས་ཅན་བདེ་བ་བླ་མེད་ཀྱིས། །བྱང་ཆུབ་ལམ་ལ་རབ་དགོད་ཕྱིར། །བདག་གི་སྡིག་བྲལ་མཐུན་པ་ཡི། །དངོས་གྲུབ་སྣ་ཚོགས་བདག་ལ་སྩོལ། །དེ་ནས་དཀྱིལ་འཁོར་དུ་བྱས་པའམ། ཡང་ན་མཆོད་རྟེན་བུམ་པར་གདུགས་དཀར་ཅན་དམིགས་པ་དེ་ལས་འོད་ཟེར་འཕྲོས་པས་ཕྱག་ལ་སོགས་པའི་ལྷ་མོས་འཇིག་རྟེན་གྱི་ཁམས་ཁེངས་པར་བྱ་སྟེ། དེ་དག་གི་སྒྲིབ་པ་གསུམ་མ་ལུས་པར་དག་པར་བྱ་སྟེ་ཐམས་ཅད་ལྷ་མོའི་རང་བཞིན་དུ་བྱས་ལ། སྐུ་གསུང་ཐུགས་རྡོ་རྗེའི་ངོ་བོར་དག་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝ་ཀྩིཏྟ་མ་ཧཱ་ས་མ་ཡ་སྟྭཾ་ཞེས་བསྟན་པར་བྱའོ།། དུང་ཕོར་དུ་དྲི་ཆབ་ལ་སོགས་པ་བླུགས་ཏེ། ལག་པས་བཟུང་ལ་ཨ་ལས་ཟླ་བའི་རྣམ་པ་ལས་འོད་ཟེར་གྱིས་ཡོན་ཆབ་བདུད་རྩིར་བསམས་ལ། གཙོ་མོ་ནས་འཁོར་ལ་སོགས་པའི་སྙིང་པོ་བཟླས་ཏེ་དབུལ་ལོ། །དེའི་སྔགས། ཨོཾ་ཨ་མྲྀ་ཏ་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་ལན་གསུམ་དུ་སྤྱི་བོར་བཞག་ལ་དགང༌། དེར་ཡེ་ཤེས་སེམས་དཔའ་སྤྱན་དྲས་ཏེ་དབང་བསྐུར་བར་བསམ་མོ། །དེ་ནས་མཆོད་པ་ལྔ་ཡང་རང་རང་གི་སྔགས་ཀྱིས་དབུལ། སྒེག་མོ་ལ་སོགས་པ་བརྒྱད་ཀྱིས་ཀྱང་མཆོད་དེ། འདིར་གཞུང་མངས་ཀྱིས་དོགས་པས་མ་བྲིས་སོ། །མཆོད་པ་བསང་བ་དང་སྦྱང་བ་ནི། ཨོཾ་སརྦ་པཱུ་ཛ་པུ་ཥྤེ་སྭཱ་ཧཱ། ཞེས་པས་སྦྱང་ངོ༌། །དེ་ནས་རྡོ་རྗེ་དྲིལ་བུ་དང་ལྡན་པས་བསྟོད་པ་བྱ་སྟེ། དེ་ཡང་དང་པོ་སྤྱིར་ཡང་བསྟོད་པ་ནི། འགྲོ་བ་རྒྱུད་ལྔའི་འཁོར་ལོའི་དཀྱིལ་འཁོར་དུ། །སྡུག་བསྔལ་འཁྲུལ་འཁོར་གཟིར་བའི་འགྲོ་གཟིགས་ནས། །ཐུགས་རྗེས་སྡུག་བསྔལ་འཁྲུལ་འཁོར་འཇོམས་མཛད་པ། །ཐུགས་རྗེའི་མངའ་བདག་ཁྱོད་ལ་ཕྱག་འཚལ་ལོ། །སེམས་ཅན་སྨིན་ཅིང་གྲོལ་བར་མཛད་པའི་ཕྱིར། །སེམས་ཅན་ཁམས་ན་བཞུགས་ཤིང་སྤྱོད་གྱུར་ཀྱང༌། །ཆགས་པས་མི་གོས་པདྨ་ལྟར་དག་པ། །འདོད་ཆགས་
དག་པའི་བདག་ཉིད་ཁྱོད་ལ་འདུད། །སེམས་ཅན་འཁོར་བའི་རྒྱ་མཚོར་ནུབ་པ་ལ། །ཐུགས་རྗེས་ཐབས་དང་ཤེས་རབ་གྲུར་ཞུགས་ནས། །ཞི་བ་རིན་ཆེན་མཆོག་གླིང་སྐྱེལ་མཛད་པ། །ཀུན་གྱི་དེད་དཔོན་ལྷ་མོ་ཁྱོད་ལ་འདུད། །སེམས་ཅན་བཀྲེན་པ་ཆོས་ཀྱིས་ཕོངས་གྱུར་པས། །མ་རིག་ཐིབས་པོའི་ནང་དུ་སོང་བ་རྣམས། །འཕགས་པའི་ནོར་བདུན་དག་གིས་ཚིམ་མཛད་པ། །ཡེ་ཤེས་སྒྲོན་མའི་ལྷ་མོ་ཁྱོད་ལ་བསྟོད། །སེམས་ཅན་ལས་ཀྱི་ཆུ་བོས་འབད་པ་རྣམས། །དམ་ཆོས་བདུད་རྩིའི་ཟམ་པས་སྒྲོལ་མཛད་པ། །འཕགས་ལམ་ཡན་ལག་བརྒྱད་ལ་འགོད་མཛད་པ། །གསུང་གི་མངའ་བདག་ལྷ་མོ་ཁྱོད་ལ་བསྟོད། །ཅེས་པ་དང༌། ཡང་སློབ་དཔོན་ཙནྡྲ་གོ་མིས་བསྟོད་བའི་སྲིད་གསུམ་སྟོན་པ་ལྷ་དང་མི་ཡིས་མཆོད་འོས་ལ་སོགས་པས་ཀྱང་བསྟོད་པ་བྱ་སྟེ། དེ་ནས་ཡོན་བདག་འཁོར་དང་བཅས་པ་ལ་བསམས་པས་སྨོན་ལམ་རྒྱ་ཆེན་པོ་བཏབ་སྟེ། བདག་སོགས་སེམས་ཅན་སྐལ་ལྡན་འདི་རྣམས་ཀྱིས། །ཆོས་ཀྱི་སྐུ་ཡི་གཟུགས་བརྙན་བཞེངས་པས་ནི། །དགེ་ཚོགས་མ་ལུས་ཅི་ཡོད་མདུན་བྱས་ཏེ། །རྫོགས་པའི་སངས་རྒྱས་ལྷ་མོ་ཐོབ་པར་ཤོག །འཁོར་ལོས་སྒྱུར་རྒྱལ་མཆོག་གི་ལུས་ཐོབ་ཤོག །ཕུན་སུམ་ཚོགས་པའི་ཞིང་དུ་སྐྱེ་བར་ཤོག །ཚེ་འདི་ནད་དང་གནོད་པ་དང༌། །འབྱུང་པོ་འཁྲུགས་དང་གདོན་ཀུན་ཞི་གྱུར་ཤོག །ཅེས་བྱའོ། །ཤར་ཕྱོགས་སུ་གཟུངས་ཚར་གཅིག་གམ། གཉིས་སམ་གསུམ་ལ་སོགས་པ་ཉེ་བར་བཤད་པ་ལྟར་བཀླག །རྒྱས་པར་བྱེད་ན། དཀྱིལ་འཁོར་བཞེངས་པའི་བྱང་དུ་སློབ་མ་འདུག་ལ། བཀྲ་ཤིས་ཀྱི་དབང་ལ་སོགས་པ་བསྐུར་བར་བྱའོ། །དེ་ནས་བསྡུ་གཤེགས་གཏོར་མ་བཏང་བ་ཀུན་བྱ། ཁྱད་པར་དུ་ལེགས་ལྡན་གྱི་མཆོད་པ་བྱའོ། །དེ་ནས་དགེ་འདུན་གྱི་མཆོད་སྟོན་ལ་སོགས་བ་ཀུན་བྱའོ། །ཚ་ཚའི་ཆོ་ག་འདི་བྱས་པས། །ཁམས་གསུམ་མ་ལུས་སེམས་ཅན་ཀུན། །ལྷ་མོ་ཉིད་དང་སྐལ་མཉམ་ནས། །གདུལ་བྱའི་དོན་ལ་མྱུར་བརྩོན་ཤོག །ཚ་ཚའི་བྱ་བ་སློབ་དཔོན་པདྨའི་ལྕགས་ཀྱུས་མཛད་པ་རྫོགས་སོ།། །།ཟངས་དཀར་ལོ་ཙཱ་བས་ཐོ་ལིང་གི་གཙུག་ལག་ཁང་དུ་བསྒྱུར་བའོ།། །།