བསིལ་བའི་ཚལ་ཆེན་མོའི་སྒྲུབ་ཐབས།
༈། །བསིལ་བའི་ཚལ་ཆེན་མོའི་སྒྲུབ་ཐབས་བཞུགས། བསིལ་བའི་ཚལ་ཆེན་མོ་ནི། ཕྱག་བཞི་ཞལ་གཅིག་པ། ཁ་དོག་དམར་མོ། གཡས་པའི་ཕྱག་གཉིས་ན་ཕྲེང་བ་དང་མཆོག་སྦྱིན། གཡོན་པའི་ཕྱག་གཉིས་ན་རྡོ་རྗེ་ལྕགས་ཀྱུ་དང༌། སྙིང་གར་གནས་པའི་པོ་ཏིའི་ཕྱག་མཚན་ནོ། །ཛྲཾ་གི་ས་བོན་ཅན། སྣང་བ་མཐའ་ཡས་ཀྱི་དབུ་རྒྱན་ཅན། ན་བཟའ་དང་རྒྱན་དང་ལྡན་པ། ཉི་མའི་འོད་དང་གདན་ཅན་ཏེ་སྔར་བཞིན་ནོ། །བསིལ་བའི་ཚལ་གྱི་སྒྲུབ་ཐབས་རྫོགས་སོ།། །།ཨོཾ་ཨཱཿཔྲཾ་མ་ཧཱ་པྲ་ཏི་སཱ་རེ་ཧཱུཾ། ཨོཾ་ཨཱཿམཾ་མ་ཧཱ་མཱ་ཡཱུ་རི་ཧཱུཾ། ཨོཾ་དྷཱུཾ་མ་ཧཱ་ས་ཧ་སྲ་པྲ་མརད་ནི་ཧཱུཾ། ཨོཾ་ཨཱཿཧཱུཾ་མ་ཧཱ་མནྟྲ་ཨ་ནུ་ས་རི་ཧཱུཾ། ཨོཾ་ཨཱཿཧཱུཾ་མ་ཧཱ་ཤཱི་ཏ་བ་ནི་ཧཱུཾ། སློབ་དཔོན་ཆེན་པོ་ཛེ་ཏ་རི་དགྲ་ལས་རྣམ་པར་རྒྱལ་བས་མཛད་པ་རྫོགས་སོ།། དང་པོ་དབུས་སུ་ལྔས་མཆོད། དེ་ནས་ཕྱོགས་བཞིར། ཡང་ཕྱོགས་མཚམས་ཀྱི་དབུས་སུ་མཆོད། དེ་ནས་གཟུངས་ལ། དེ་ནས་འཁོར་ལོ་ལ། ཐ་མར་ཡང་དབུས་ཕྱོགས་བཞིར་གཏང་རག་གི་མཆོད་པ་བྱ། དེ་རྣམས་ལ་འབྱོར་པ་ཡོད་ན་མཆོད་པ་ལྔ་ཆན་བཅུ་གསུམ་གྱིས་མཆོད་དོ།། དེ་ལྟར་བྱས་པས་ནི་བེ་ཏེ་བཅུ་གསུམ་དགོས་སོ། །ནས་ལ་སོགས་པ་བཞི་པོས་བསྐོར་ཞིང་བསྲེག་པ་ལན་གཉིས་ཀྱིས་ཆོ་ག་སྟེ། གཡས་གཡོན་གྱིས་ལན་རེའོ།།