རབ་ཏུ་གནས་པའི་ཆོ་ག།
རྒྱ་གར་སྐད་དུ། པྲ་ཏིཥྛ་པི་དྷིཿ། བོད་སྐད་དུ། རབ་ཏུ་གནས་པའི་ཆོ་ག །ཐམས་ཅད་མཁྱེན་པ་ལ་ཕྱག་འཚལ་ལོ། །དེ་ལ་རེ་ཞིག་ཕ་རོལ་ཏུ་ཕྱིན་པའི་ཐེག་པའི་སྒོར་བྱང་ཆུབ་མཆོག་ཏུ་སེམས་བསྐྱེད་ཐོབ་པའི་དགེ་བསྙེན་ནམ། དགེ་ཚུལ་ལམ། དགེ་སློང་གི་དགེ་འདུན་ནམ། གང་ཟག་གི་མཆོད་རྟེན་ནམ། བྲིས་སྐུ་ལ་སོགས་པ་རབ་ཏུ་གནས་པ་བྱེད་པས་གང་རབ་ཏུ་གནས་པར་བྱ་བ་མཚན་ཉིད་དང་ལྡན་པ་དེའི་ཉེ་འཁོར་ཅིག་སྐྱང་ནུལ་བྱས་ཏེ། མཐར་ཙནྡན་ལ་སོགས་པའི་དྲི་ཞིམ་པོའི་ཆུས་བྱུགས་ནས། མདུན་དུ་མཎྜལ་གྲུ་བཞི་པ་ཁྲུ་གང་ཡན་ཆོད་ནས་ཇི་ཙམ་ནུས་པར་བྱུགས་ནས།
དེར་པདྨ་འདབ་མ་བརྒྱད་པ་ཚོན་གྱིས་བྲི་བར་བྱའོ། །དེའི་སྟེང་དུ་མཚན་ཉིད་དང་ལྡན་པའི་བུམ་པ་གསེར་ལ་སོགས་པའི་རྒྱུ་ལས་བྱས་པ་ཁ་རྒྱན་དང༌། མགུལ་དཀྲིས་དང་བཅས་པར་རིན་པོ་ཆེ་དང༌། སྨན་དང༌། འབྲུ་རྣམས་གཞུག་ཅིང་ཙནྡན་དང༌། ག་བུར་ལ་སོགས་པ་དྲི་ཞིམ་པོ་དང་སྦྱོར་བའི་ཆུ་ཀླུང་གི་ཆུ་གཙང་མས་དགང་ཞིང༌། གྲངས་ཀྱང་གཅིག་ནས་བརྩམས་ཏེ་ཇི་སྙེད་འབྱོར་པ་གཞག་པར་བྱའོ། །མེ་ཏོག་ལ་སོགས་པའི་ཡོ་བྱད་ཅི་འབྱོར་པ་རྣམས་ཀྱང་མདུན་དུ་སྟ་གོན་དུ་བྱས་ལ། ནང་པར་སྔ་དྲོའི་དུས་སུ་ཡིད་དུ་འོང་བའི་བླ་རེ་བྲེས་པས་མཛེས་པའི་གནས་སུ་སྒྲུབ་པ་པོས་སྟན་བདེ་བ་ལ་སྐྱིལ་མོ་ཀྲུང་ལ་སོགས་པ་མཉམ་པར་གཞག་པའི་སྤྱོད་ལམ་གྱིས་གནས་ཏེ། འཇིག་རྟེན་སྐྱོང་བ་རྣམས་ལ་གཏོར་མ་བྱིན་ལ། གསེར་རམ་དངུལ་གྱི་གཞིའམ་གྲོག་ལ་འང་རུང༌། ཙནྡན་དཀར་པོས། ཡེ་དྷརྨཱ་ཧེ་ཏུ་པྲ་བྷཱ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་ད་ཏ། ཏེ་ཥཱ་ཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ་ཞེས་པ་ཚར་བདུན་དུ་བྲིས་ལ། ཚར་རེ་རེ་ཞིང་ལན་བདུན་བདུན་བཀླགས་ཏེ། བུམ་པའི་ཆུས་བཀྲུས་ལ་བུམ་པ་དེ་ཉིད་དུ་བཞུགས་པར་བྱའོ། །དེ་ནས་བུམ་པའི་སྟེང་དུ་ཟླ་བ་ལ་སྔགས་ཀྱི་ཕྲེང་བ་དཀར་པོ་འོད་དང་བཅས་པ་སྐད་ཅིག་གིས་བསམས་ཏེ། དེའི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་ནས་ལྷའི་བདུད་རྩིའི་རྒྱུན་རྣམས་བཀུག་ལ་བུམ་པའི་ཆུ་དེ་སྔགས་ཀྱི་ཕྲེང་བཞུ་བ་དང་ལྷན་ཅིག་རོ་གཅིག་ཏུ་གྱུར་པས་བུམ་པ་གང་བར་དམིགས་ནས། དེ་ལག་པས་རེག་ནས་བརྒྱ་རྩ་བརྒྱད་བཟླས་པར་བྱའོ། །དེའི་རྗེས་ལ་མཆོད་རྟེན་ལ་སོགས་པའི་ནང་ངམ་སྙིང་གར་ཟླ་བ་ལ་སྔ་མ་ལྟར་སྔགས་ཀྱི་ཕྲེང་བ་དམིགས་ལ། དེའི་འོད་ཀྱིས་འཇིག་རྟེན་ཁྱབ་པར་བལྟས་ཏེ། དེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྐུལ་ནས། གང་ཞིག་རབ་ཏུ་གནས་པར་བྱ་བ་མཆོད་རྟེན་ལ་སོགས་པ་དེའི་གཟུགས་ཀྱིས་བྱོན་ནས་དེ་དང་དེ་ལ་ཐིམ་པ་དང༌། སྔགས་ལ་སོགས་པ་ཐམས་ཅད་རོ་གཅིག་ཏུ་གྱུར་བར་བསམས་ནས། ལུགས་སུ་བླུགས་པ་རྣམས་ལ་ནི་དངོས་སུ་ཁྲུས་བྱའོ། །གླེགས་བམ་ལ་སོགས་པ་རྣམས་ལ་ནི་མ་
ལོང་ལ་བཀྲ་ཤིས་ཀྱི་ཚིགས་སུ་བཅད་པ་དང༌། གླུ་དང༌། སྒྲ་དང་བཅས་པས་སྔགས་བཟླས་བཞིན་དུ་སྔར་གྱི་བུམ་པའི་ཆུས་ཁྲུས་གསོལ་བར་བྱའོ། །དེ་ནས་དྲི་ཞིམ་པོས་བསྒོས་པའི་གོས་ཀྱི་སྐུ་ཕྱི་བ་བྱས་པའི་རྗེས་ལ་ཅི་འབྱོར་པའི་ན་བཟའ་དང་རྒྱན་རྣམས་དབུལ་བར་བྱའོ། །དེ་ནས་མེ་ཏོག་ལ་སོགས་པའི་མཆོད་པ་ཅི་འབྱོར་པ་རྣམས་དབུལ་ལོ། །དེའི་རྗེས་ལ་ལག་པས་རེག་ནས་སྙིང་པོ་བརྒྱ་རྩ་བརྒྱད་བཟླས་པར་བྱའོ། །དེ་ནས་མཆོད་རྟེན་ནམ་ལུགས་སྐུའི་ནང་དུ་གྲོ་ག་ལ་སྙིང་པོ་བྲིས་ཏེ་གཞུག་གོ །གླེགས་བམ་བྲིས་སྐུའི་ནི་མཐའ་མར་བྲིའོ། །དེ་ལྟར་བྱས་ནས་སླར་ཡང་མེ་ཏོག་ལ་སོགས་པའི་མཆོད་པ་རྣམས་ཀྱིས་མཆོད་ཅིང་རོལ་མོའི་སྒྲ་ཡང་བསྒྲགས་ཏེ། འབྱུང་པོ་གང་དག་འདིར་ནི་ལྷགས་གྱུར་ཅིང༌། །སའམ་འོན་ཏེ་བར་སྣང་འཁོད་པ་དག །སྐྱེ་དགུ་ཀུན་ལ་རྟག་ཏུ་བྱམས་བྱེད་ཅིང༌། །ཉིན་དང་མཚན་དུ་ཆོས་ཀྱང་སྤྱོད་གྱུར་ཅིག །རྒྱལ་བ་དགྲ་རྒྱལ་བདེན་པའི་བྱིན་གང་གིས། །བདེན་འདི་གསུངས་པ་འདི་ལ་སྡིག་མེད་ཅིང༌། །ལྷར་བཅས་ལྷ་མིན་གྱིས་རྟག་མཆོད་འོས་པའི། །བདེན་པ་དེས་ནི་དེང་འདིར་བདེ་ལེགས་ཤོག །དམ་ཆོས་བདུད་རྩི་ཐམས་ཅད་མཁྱེན་པ་ཡིས། །ཞལ་ནས་གསུངས་པ་བསིལ་བའི་རོ་འདི་ཡི། །ཉོན་མོངས་འབར་བའི་མེ་ཡིས་གདུངས་པ་ཡི། །འགྲོ་ཀུན་སྡུག་བསྔལ་རྟག་ཏུ་ཞི་བྱེད་ཤོག །ཅེས་བརྗོད་ཅིང་སྔར་གྱི་བུམ་པའི་ཆུའི་ལྷག་མས་རབ་ཏུ་གནས་པའི་ས་གཞི་དང༌། གནས་ཁང་དག་ཏུ་ཉུང་ཟད་གཏོར་བར་བྱའོ། །བྱ་བ་རྣམས་རྫོགས་པ་ན་རྡུལ་ཚོན་ལ་སོགས་པ་རྣམས་ཆུ་བོ་ཆེན་པོའམ། ཁྲོན་པ་རྙིང་པར་དོར་ནས་ས་གཞི་ལྕི་བ་སར་པར་བྱུགས་ཏེ། རབ་གནས་བྱེད་པའི་སློབ་དཔོན་དང༌། དགེ་སློང་ལ་མཆོད་སྟོན་དང༌། ཡོན་དབུལ་བ་ལ་སོགས་པ་བྱའོ། །དེ་ནས་རྟེན་དེ་ལ་མཆོད་པ་ཕུལ་ཏེ། ཡོན་བདག་འདིའི་ཆེད་དུ་བཞུགས་ལ་སེམས་ཅན་གྱི་དོན་མཛད་པར་གསོལ་བ་གདབ་བོ། །རབ་ཏུ་གནས་པའི་ཆོ་ག་ཐུན་མོང་པ་པཎྜི་ཏ་དཔལ་སུ་མ་ཏི་ཀཱིརྟིས་མཛད་པ་རྫོགས་སོ།། །།མཁས་པ་དེ་ཉིད་དང་ལོ་ཙཱ་བ་པྲཛྙཱ་ཀཱིརྟིས་བསྒྱུར་བའོ།། །།