མན་ངག་གི་བསྒྲུབ་པའི་རྣལ་འབྱོར་པའི་ཚེ་དང་སྟོབས་བསྒྲུབ་པ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་ཕ་ལ་ཕྱག་འཚལ་ལོ། །གཞན་གྱིས་བཤིག་པར་དཀའ་བའི་རིག་སྔགས་ཀྱི་ལས་འགྲུབ་པར་འདོད་ན། སྒྲུབ་པ་པོ་དམ་ཚིག་དང་ལྡན་པས་གནས་
ཁང་ཡིད་དང་མཐུན་པར་མཎྜལ་སྔོན་པོ་ཁྲུ་དོའི་ཚད་དང་ལྡན་པར་བྱ་སྟེ་མེ་ཏོག་དམར་པོ་དང་སྔོན་པོ་རབ་ཏུ་ཡིད་དུ་འོང་བའི་ཚོམ་བུ་ལྔའམ། བདུན་ནམ་བཅུ་གཅིག་བཀྲམ་ལ་བླ་མ་དང་ཡི་དམ་མདུན་གྱི་བར་སྣང་ལ་སྤྱན་དྲངས་ཏེ། ཕྱི་ནང་གི་མཆོད་པ་རྫོགས་པར་ཕུལ་ཏེ་འདོད་པའི་དོན་ལ་གསོལ་པ་གདབ་པར་བྱའོ། །དེ་ནས་སྒྲུབ་པ་པོས་གོས་དམར་པོ་དྲི་མ་མེད་པ་བགོས་ཏེ། ཁྲུས་བྱས་ལ་སྡིག་པ་མ་ལུས་པར་བཤགས་པར་བྱའོ། །སེམས་བསྐྱེད་པ་དང་བསྲུང་བ་དང་ཚད་མེད་པ་བསྒོམ་པར་མོས་པ་བྱས་ལ། སྟོང་པ་ཉིད་དང་གཞལ་ཡས་ཁང་བསྒོམ་པ་རྣམས་བྱ་སྟེ། ཁྲོ་བོའི་རྒྱལ་པོ་རྟ་མགྲིན་སྐུ་མདོག་དམར་པོ་ཞལ་དམར་པོ་ཞལ་གཅིག་ཕྱག་བཞི་པ་རྟ་མགོ་ལྗང་གུའི་སྟེང་ན་རྡོ་རྗེ་རྣམ་པར་འཇོམས་པས་དབུ་བརྒྱན་པ། པདྨ་དང་བེ་ཅོན་དང་ལྕགས་ཀྱུ་དང་སྡིགས་མཛུབ་ལ་སྦྱར་བའོ། །དེ་ལ་ཡེ་ཤེས་སེམས་དཔའ་སྤྱན་དྲངས་ཏེ། དབང་བསྐུར་བ་ལ་སོགས་ཏེ་དེའི་རྗེས་ལ་བདག་ཉིད་ཀྱི་ལུས་ཀྱང་པདྨའི་སྡོང་པོ་ཟེ་འབྲུ་ལེགས་པར་བརྒྱན་པའི་སྟེང་དུ། བདག་གི་ལུས་རྡོ་རྗེ་ཆེན་པོར་རང་བྱུང་བ་གཅིག་ཏུ་དམིགས་པ་བྱས་ལ། ཕ་རོལ་གྱི་གནོད་པ་གང་གིས་ཀྱང་བཤིག་པར་དཀའ་བ་བསྒོམ་པར་བྱའོ། །དེ་ནས་དེ་ཉིད་ལས་འོད་འཕྲོས་པས་འཕགས་པ་མཆོད་པ་དང༌། སེམས་ཅན་གྱི་དོན་བྱ་བ་ལ་སོགས་པ་བྱས་ལ། འོད་ཟེར་དེ་དག་རྡོ་རྗེ་ཉིད་ལ་ཐིམ་པས་སྒྲུབ་པ་པོའི་ལུས་ངག་ལ་ཕ་རོལ་གྱི་གནོད་པའི་ཚོགས་གང་གིས་ཀྱང་མི་ཤིགས་པར་བསྒོམ་མོ། །དེ་ནས་རྡོ་རྗེ་དེ་ཉིད་ལས་རང་སྒྲ་ཆེན་པོ་འདི་དག་རྣམས་རང་བཞིན་གྱིས་འབྱུང་པར་མོས་པར་བྱ་ཞིང་ཡིད་ཀྱིས་སྔགས་འདི་ཉིད་ལ་ཉི་མ་རེ་ལ་སུམ་བརྒྱ་བཟླས་ཏེ་མཎྜལ་རེ་དབུལ་བར་བྱའོ། །ཨོཾ་སྥོ་ཊ་བཛྲ་བཛྲ། མ་ཊ་བཛྲ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་སྔགས་བརྗོད་པ་ལ་མཎྜལ་རེ་དབུལ་བར་བྱའོ། །དེ་ལྟར་ཟླ་བ་གཅིག་ལ་དུས་གསུམ་གྱི་ཉི་མ་རེ་རེ་དེ་ལྟར་ཆོ་ག་རྫོགས་པར་བྱ་ཞིང་མ་འཁྲུལ་བར་བྱས་ན་བདག་ཉིད་ཀྱི་ལུས་རྡོ་རྗེ་ལྟ་བུར་གྱུར་པ་ལ་ཐེ་ཚོམ་མེད་དོ། །མི་ཤིགས་པ་ཞེས་བྱ་བའི་རྒྱུད་ཀྱི་ཚིག་ལག་ཏུ་བླང་བ་མན་ངག་གིས་བསྒྲུབ་པའི་རྣལ་འབྱོར་པའི་ཚེ་དང་སྟོབས་བསྒྲུབ་པ་ཞེས་བྱ་བ་སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།