སྲིན་པོའི་གདོན་ལས་ཐར་བར་བྱེད་པའི་མན་ངག།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །སྲིན་པོའི་གདོན་ལས་ཐར་བར་འདོད་པས་སྔོན་དུ་འཇུག་དུས་དང་མཚན་ཉིད་བསྟན་པ་སྟེ། གཏུམ་ཤིང་གཟུ་ལུམས་ཆེ་བ་དང། གཏམ་སྤྱི་བརྟོལ་ལམ་བརླང་པོ་སྨྲ་ཞིང་འཐབ་པ་ལ་དགའ། རྟག་ཏུ་ཚིག་རྩུབ་པའི་མི་ལ་མར་ངོའི་ཚེས་ཉི་ཤུ་བཞི་ལ་སྲིན་པོའི་གདོན་འཇུག་སྟེ། ཞུགས་པའི་མཚན་མ་ནི་གློ་བུར་དུ་ངུ༌། རེས་འགའ་ནི་གླུ་ལེན། ཚིག་ཅོལ་འགྲུས་སུ་སྨྲ། སྐོམ་དད། ལྟོ་ཆེ། ཤ་ལ་སྲེད། རྒྱུག་ཅིང་ལག་པ་ས་ལ་རྡེབས་པའམ་སྐོར་བར་བྱེད་པའོ། །དེ་ལས་ཐར་བར་འདོད་ན་ཁུར་བ་སྣ་ཚོགས་པ་དང༌། ཤ་སྣ་ཚོགས་པ་དང༌། མ་བསད་པར་ཤི་བའི་ཁྲག་སྣ་ཚོགས་པ་དང༌། དྲི་ཞིམ་པོའི་སྤོས་སྣ་ཚོགས་པ་དང༌། འབྲས་ཆན་གྱི་གཏོར་མ་སྦྱིན་ཏེ། བདག་ཉིད་ཁྲུས་དང་གཙང་སྦྲ་ལ་གནས་པར་བྱ་སྟེ། དགེ་སློང་ངམ་བྲམ་ཟེ་ལ་སྟོན་མོ་བྱ། ལྷོ་འམ་ནུབ་ཏུ་གཏོར་མ་བཏང་ལ་དུག་མོ་ཉུང་དང༌། ཁ་དྷ་དང༌། ཏ་མ་ལའི་ལོ་མ་དང༌། མེ་ཏོག་སྐམ་པོ་དང༌། པི་པི་ལིང་དང༌། བཅའ་སྒ་དང༌། ན་ལེ་ཤམ་དང༌། སྐྱུ་རུ་ར་དང༌། ནིམ་པའི་རྩ་བ་དང༌། སྒོག་སྐྱ་དང༌། ཤིང་ཀུན་དང༌། རྒྱམ་ཚ་དང༌། ཡུངས་ཀར་རྣམས་ཆ་བསྙམས་ལ་ར་དཀར་མོའི་གཅིན་དང་རློན་བཏགས་བྱས་ལ། བའི་གཅིན་ཕུལ་བཅུ་དྲུག་མེ་ཆུང་བས་བཙོས་ལ་ནད་པ་དེ་གོས་དཀར་པོ་གོན་ཏེ་ཁྲུས་ལ་སྔར་ལྟར་བསྔགས་ནས་བྱིན་ན་སྲིན་པོའི་གདོན་ལས་ཐར་བར་ངེས་སོ། །སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།