གཟུངས་སྔགས་ཀྱི་ལས་མ་གྲུབ་པ་རྣམས་གྲུབ་པར་བྱེད་པ་རྡོ་རྗེ་བེ་ཅོན་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་ཅན་ལ་ཕྱག་འཚལ་ལོ། །གཟུངས་སྔགས་ཀྱི་སྦྱོར་བ་མ་གྲུབ་པ་རྣམས་གྲུབ་པར་བྱེད་པའི་ལས་ཀྱི་མཐའ་རྫོགས་པར་བྱེད་པའི་སྒྲུབ་པ་པོ་དམ་ཚིག་དང་ལྡན་པས་དཀྱིལ་འཁོར་དཔའ་བོ་གཅིག་པ་བཞེངས་ལ་རིན་པོ་ཆེའི་བུམ་པའི་ནང་དུ་འདོད་པའི་ལྷའི་གཟུགས་ར་གན་ལ་བསྒར་བ་ས་ལ་གཞུག་གོ །ཆུ་སྣ་སུམ་
ཅུ་རྩ་ལྔ་དང༌། སྨན་སྣ་དང་རིན་པོ་ཆེའི་གྲངས་ཀྱང་དེ་ཙམ་གཅིག་བཙལ་ལ་གཙོ་བོའི་བསྙེན་པ་ཇི་ཙམ་རིགས་པ་བྱས་ལ་རྒྱུད་ཀླག་པ་དང༌། མཆོད་པའི་བྱེ་བྲག་ཇི་ལྟར་རིགས་པ་དང་བསྟོད་པ་བྱའོ། །དེ་ནས་རང་གིས་གང་འདོད་པའི་སྒྲུབ་པ་ཅི་རིགས་པར་བྱས་ལ་ལས་ལ་སྦྱར་བའི་ཆོ་ག་ལན་བརྒྱ་རྩ་བརྒྱད་དང་སྟོང་ཕྲག་གཅིག་བྱས་ལ། འདོད་པའི་ལྷའི་སྐུའི་ཐུགས་ཀར་རྡོ་རྗེ་རྣམ་འཇོམས་ཀྱི་མཛོད་སྤུ་ནས་འོད་འཕྲོས་པས་ཁ་དོག་ཇི་ལྟར་མོས་པ་ལྕགས་ཀྱུའི་རྣམ་པ་དང་འདྲ་བ་བྱུང་ལ་ཡི་དམ་ཅི་འདྲ་བ་དེ་གྲངས་མེད་པ་དེའི་ཐུགས་ཀར་གཞུག་གོ ། དེ་ནས་ལྷ་ཨར་ལ་གཏད་པའི་ཆོ་ག་བྱའོ། །མཎྜལ་དམར་པོའི་སྟེང་དུ་གཏོར་མ་ལྔ་བྱས་ཏེ། དེ་དག་རེ་རེའི་ནང་དུ་སྙིང་པོ་གང་ཡང་རུང་བ་བོང་བུའི་ཁྲག་གིས་གྲོ་ག་ལ་བྲིས་ལ་གཏོར་མའི་འོག་ཏུ་བཅུག་ལ་ཁྲག་དང་འོ་མ་བསྲེས་ལ་སྦྲེང་ཞིང༌། ཡི་དམ་གྱི་སྙིང་པོ་གང་ཡིན་པ་དེ་མས་བཟློག་ལ་སྟོང་ཕྲག་བདུན་བཟླས་ཏེ། ལས་མ་གྲུབ་པ་ནི་མཆོག་ཡིན་ནོ་ཞེས་ལན་བདུན་བརྗོད་པས་གཏོར་མ་དེ་དག་དུར་ཁྲོད་དུ་ཁྱེར་ལ་དོང་བྲུས་ལ་དོང་དུ་བླུགས་ལ་དུར་ཁྲོད་ཀྱི་སོལ་བས་བཅད། དེ་དག་ཀུན་གྱི་འོག་ཏུ་ཅི་འདོད་པའི་དོན་དེ་ལས་ལ་སྦྱར་ལ་གཞག་གོ །དེ་ནས་བུམ་པའི་ནང་གི་ཡི་དམ་གྱི་གཟུགས་ལ་ཡེ་ཤེས་སེམས་དཔའ་ལན་བརྒྱ་རྩ་བརྒྱད་བཅུག་ལ་རང་གི་འདོད་པའི་དོན་ལ་གསོལ་བ་བཏབ་སྟེ། སྙིང་པོ་སྟོང་ཕྲག་གཅིག་བཟླས་ལ་སྤྱན་དྲང་པ་དང་མཆོད་པ་དང་བསྟོད་པ་རང་གི་གཞུང་དང་མཐུན་པར་བྱས་ལ། མཆོད་པ་དང་བསྟོད་པ་གཏོར་མ་བརྒྱ་རྩ་བརྒྱད་བྱས་ན་སྔར་སྔགས་ཀྱི་ལན་གྲངས་དང་དུས་ལས་སྐྱོལ་ནམ་གྲུབ་པ་རྣམས་གྲུབ་སྟེ། དེ་ལྟར་བྱས་ན་བདག་ཉིད་བུམ་པའི་ཆུས་ཁྲུས་བྱས་ཏེ། བདག་གི་ལུས་ཁྲོ་བོ་གྲངས་མེད་པར་སྤྲུལ་ལ་དེ་དག་རྣམས་ཀྱི་ལུས་ལ་སྤྲུལ་པའི་ཁྲོ་ཆུང་གྲངས་མེད་པ་སྤྲོས་ནས་སྣང་པ་ཐམས་ཅད་ཁྲོ་བོར་དམིགས་ལ། ཁྲོ་བོ་དེ་དག་གིས་འདོད་པའི་དོན་གང་ཡིན་པ་ངེས་པར་སྟེར་བ་དང༌། བདག་ཉིད་ཀྱི་ལས་དང་བག་ཆགས་ཐམས་ཅད་རྒྱུན་གཅད་དེ། ཉེས་སྐྱོན་དང་དྲི་མ་ཐམས་ཅད་དག་པར་དམིགས་སོ། །དེའི་རྗེས་ལ་ཁམས་གསུམ་གྱིས་བསྡུས་པའི་
སེམས་ཅན་རྣམས་ཀྱི་ལས་དང་ཉོན་མོངས་པ་ཐམས་ཅད་ཀྱང་རྒྱུན་གཅད་དེ། ཏིལ་གྱི་འབྲུ་ཙམ་ཡང་མ་ལུས་པར་དག་པར་དམིགས། འདོད་པའི་དོན་ཇི་ལྟར་དམིགས་པ་བཞིན་དུ་ཁམས་གསུམ་དུ་གཏོགས་པའི་གཟུགས་དང་གཟུགས་མེད་པ་རྣམས་ཀྱིས་ཀྱང་ཁྱོད་ཀྱི་སྔགས་ངེས་པར་འགྲུབ་པར་ལྷ་ཆེ་གེ་མོས་གྱིས་ཤིག་པར་འདོད་པའི་དོན་ལ་གསོལ་བ་གདབ་པར་དམིགས་སོ། །དེ་ནས་ཁམས་གསུམ་དུ་གཏོགས་པའི་སེམས་ཅན་རྣམས་ལ་གཏོར་མ་རོ་མཆོག་བརྒྱ་དང་ལྡན་པ་སྦྱིན་པར་བྱའོ། །དེ་ནས་སྨོན་ལམ་གདབ། དཀྱིལ་འཁོར་བསྡུ། བཀྲ་ཤིས་གསོལ། ཡི་གེ་བརྒྱ་པ་ཡང་འབུམ་ཕྲག་གཅིག་གིས་བཤགས་སོ། །གཟུངས་སྔགས་ཀྱི་ལས་མ་གྲུབ་པ་རྣམས་གྲུབ་པར་བྱེད་པ་རྡོ་རྗེ་བེ་ཅོན་ཞེས་བྱ་བ། སློབ་དཔོན་ཡེ་ཤེས་རྡོ་རྗེ་མཛད་པ་རྫོགས་སོ།།