ནོར་འགྲིབ་པ་དགང་བའི་ཆོ་ག་དཔག་བསམ་ཤིང་རྒྱས་པ་ཞེས་བྱ་བ།
ཡེ་ཤེས་རྡོ་རྗེ།
དཔལ་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ནོར་འགྲིབ་པར་འགྱུར་བ་སླར་འགུགས་པར་འདོད་པའི་སྒྲུབ་པ་པོ་དམ་ཚིག་དང་ལྡན་པས། ཤིན་ཏུ་མ་ཕོངས་པའི་ཁྱིམ་ནས་བླངས་ལ་ཞིང་བཟང་པོའི་ས་དང་བསྲེས་ལ་སྟེགས་བུ་བྱ་སྟེ། ཐིག་བཏབ་ལ་ད་ནས་ཚོན་དགྱེ་བ་ནི། དབུས་སུ་པདྨ་འདབ་མ་བརྒྱད་པ་དམར་པོ་ཁྱམས་གཉིས་དང་སྒོ་དང་སྒོ་ཁྱུད་ལྡན་པར་བྱའོ། །ལྟེ་བར་རྡོ་རྗེ་རྣམ་པར་འཇོམས་པའི་མཚན་མ་གདབ་བོ། །ཤར་དུ་རིགས་ལྡན་བུམ་པ། ལྷོར་སྟོབས་བཟངས་ཀྱི་བེ་ཅོན་དང༌། ནུབ་ཏུ་མཚོན་ཆེན་གྱི་བསེ་ཁ་སྦྱོར། བྱང་དུ་རྣམ་ཐོས་སྲས་ཀྱི་དོང་ཙེ་བྲིས་ལ། གཏོར་མ་བཞི། བཤོས་གཙང་བཞི། མར་མེ་བཞི། བདུག་པ་བཞི། མེ་ཏོག་བཞི། དྲིའི་དུང་ཆོས་བཞི་བཤམ། སེང་ལྡེང་གི་ཕུར་པ་བཞི་སྒོ་བཞིར་བཙུགས་ལ་མེ་ཏོག་གི་ཕྲེང་བས་སྦྲེལ་ལོ། །མཐའ་མར་རིན་པོ་ཆེ་སྣ་ཚོགས་པ་དང༌། འབྲུ་སྣ་ཚོགས་པའི་ཚོམ་བུ་དགོད། དེའི་ཕྱི་རིམ་དུ་ཤིང་མེ་ཏོག་དང་ལོ་མ་དང་འབྲས་བུ་དང་ལྡན་པ་སྣ་ཚོགས་པ་བཙུགས་ཏེ། དཀྱིལ་འཁོར་མི་མཐོང་བར་བྱའོ། །དེའི་ཕྱི་རིམ་རྣམས་སུ་དྲི་སྣ་ཚོགས་པའི་ཆག་ཆག་གདབ་སྟེ། རྩྭ་ཀུ་ཤས་འཁོར་བར་
དགྲམ་མོ། །སྟེང་དུ་དར་སྣ་ཚོགས་པའི་ཡོལ་བ་དང༌། འཕྱང་མ་འཕྱང་གིས་ཁེབས་པར་བྱས་སོ། །ལོགས་རྣམས་སུ་དེ་བཞིན་གཤེགས་པའི་སྐུ་གཟུགས་རིས་སུ་བྲིས་པ་དང༌། འབུར་དུ་བཏོད་པ་དང་ལུགས་སུ་བླུགས་པ་ལ་སོགས་པ་འཁོར་བར་དགྲམ་མོ། །དེ་ནས་བཟའ་བ་དང༌། བཏུང་བ་དང༌། མྱོང་བ་དང༌། བལྡག་པ་ལ་སོགས་པ་ཁ་ཟས་ཀྱི་བྱེ་བྲག་ཇི་ལྟར་འབྱོར་པ་རྣམས་ཀྱིས་དཀྱིལ་འཁོར་གྱི་མཐའ་མར་བཞག་ལ། མཆོད་གཡོག་པ་གཉིས་སམ་གསུམ་གྱིས་མཆོད་པ་རྒྱུན་མ་ཆད་པར་བྱའོ། །སློབ་དཔོན་བདག་སྟོད་གཡོགས་ལ་སོགས་པའི་རྒྱན་དང༌། དབུ་རྒྱན་ལ་སོགས་པ་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་དང་དྲིལ་བུ་བཟུང་ལ་ཀུ་ཤའི་སྟེང་དུ་ཁྲུས་བྱ། རྒྱན་སྣ་ཚོགས་པས་བརྒྱན་ལ་འཁོར་དང་བཅས་ཏེ་གཞག་གོ །དེའི་ཕྱི་ལོགས་ལ་གཡས་བརྐྱང་བའི་སྟབས་ཀྱིས་གཡས་སྐོར་དུ་ཧཱུཾ་ཞེས་བགེགས་བསྐྲད། དེ་ནས་ལོག་སྟེ། བྱང་ཤར་ནས་གཡོན་བརྐྱང་བའི་སྟབས་ཀྱིས་གཡོན་སྐོར་དུ་ཨོཾ་བཛྲ་ཡཀྵ་ཧཱུཾ་ཧཱུཾ་ཞེས་བརྗོད་པས་བདག་དང་ཡོན་བདག་གི་ནོར་འགྲིབ་པར་བྱེད་པའི་བགེགས་དེ་དཔག་ཚད་བརྗོད་ཀྱིས་མི་ལང་བར་བྱེར་ཞིང་དེངས་པར་བྱའོ། །དེ་ནས་མཆོད་པ་དང་གཏོར་མའི་ཆོ་ག་ཞག་གསུམ་དུ་རྒྱུན་མ་ཆད་པར་བྱ། བདག་ཉིད་ཀྱི་སྙིང་པོ་རྒྱས་བསྡུས་གང་མོས་ལ་ཅི་ནུས་སུ་བཟླས། ཡོན་བདག་གིས་སེམས་བསྐྱེད་པ་དང༌། སྡིག་པ་བཤགས་པ་དང༌། རྗེས་སུ་ཡི་རང་བ་དང༌། འདོད་པའི་དོན་ལ་སོགས་པ་ལ་གསོལ་བ་ཅི་ནུས་སུ་བྱེད་དུ་གཞུག་གོ །དེ་ནས་ནུབ་གསུམ་གྱི་ཐ་མ་ཁ་ཟས་ལོངས་སྤྱོད་པ་དང། ཡོན་བདག་བཟའ་བྲན་འཁོར་དང་བཅས་པ་ལ་དཀྱིལ་འཁོར་གྱི་སྒོ་རྣམས་གསལ་ལ་དཀྱིལ་འཁོར་དུ་གཞུག་ཅིང་དབང་བསྐུར་རོ། །རྣམ་ཐོས་སྲས་ལ་གཏོར་མ་ཆེན་པོ་གཅིག་བྱིན་ལ་ནོར་གྱི་བདག་པོར་མངའ་གསོལ། ཡོན་བདག་འཁོར་དང་བཅས་པས་ཀྱང༌། བྱང་ཕྱོགས་ཀྱི་རྒྱལ་པོ་ཆེན་པོ་རྣམ་ཐོས་སྲས་ཀྱི་བུ་འཁོར་དང་བཅས་པས་དོ་ནུབ་ནས་བཟུང་བ་ཕན་ཆོད་ནོར་གྱི་བདག་པོ་མཛོད་ལ་བདག་ཅག་གི་ནོར་དང་ཟས་མི་འགྲིབ་པར་འཕེལ་བར་མཛད་དུ་གསོལ་ཞེས་དུས་ལ་བརྗོད་དོ། །དེ་ནས་གཏོར་མ་བཏང༌། སིལ་སྙན་སྣ་ཚོགས་པའི་སྒྲ་དང་ལྡན་པས་
གཏོང་ངོ༌། །དེ་ནས་དཀྱིལ་འཁོར་བསྡུ། བཀྲ་ཤིས་གསོལ། བསོད་ནམས་ཀྱི་ཚོགས་ཇི་ལྟར་འབྱོར་བ་བསག་ཅིང་བླ་མ་ལ་ཡོན་དབུལ་ལོ། །ནོར་འགྲིབ་པ་དགང་བའི་ཆོ་ག་དཔག་བསམ་ཤིང་རྒྱས་པ་ཞེས་བྱ་བ། སློབ་དཔོན་ཡེ་ཤེས་རྡོ་རྗེས་མཛད་པ་རྫོགས་སོ།།