ཁྲོ་གཉེར་ཅན་གྱི་སྒྲུབ་ཐབས།
རྒྱ་གར་སྐད་དུ། བྷྲྀ་ཀུ་ཊི་སཱ་དྷ་ནཾ། བོད་སྐད་དུ། ཁྲོ་གཉེར་ཅན་གྱི་སྒྲུབ་ཐབས། སྔར་བཤད་པའི་ཆོ་གའི་རིམ་པས་རང་གི་སྙིང་གའི་ཟླ་བའི་དབུས་སུ་ས་བོན་ནི་དྲུག་པའི་བཞི་པ་སྟེ། དང་པོའི་བརྒྱད་པས་རྒྱས་པར་བྱས་ཤིང་སྟོང་པ་ཉིད་ཀྱིས་ལེགས་པར་མནན་ཏེ་ཟླ་བ་ཕྱེད་པས་མགོ་བོ་བརྒྱན་པའོ། །དེ་ཉིད་ལས་གྲུབ་པའི་ཁྲོ་གཉེར་ཅན་སྐུ་མདོག་སེར་མོ་སྟེ། ཕྱག་བཞི་མ། རལ་བ་དང་ཅོད་པན་དང་ལྡན་པ་ཞི་བར་གྱུར་པ། གཡས་པས་མཆོག་སྦྱིན་པ་དང་ཕྲེང་བ་བསྣམས་པ། གཡོན་པས་དབྱུ་གུ་དང་རིལ་བ་སྤྱི་བླུགས་བསྣམས་ཤིང༌། པདྨ་དང་ཟླ་བའི་གདན་ལ་བཞུགས་པར་བསྒོམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་བརྐྱང་བར་བྱས་ལ་མཐེབ་མོ་གཉིས་ཀྱིས་མཐེའུ་ཆུང་གཉིས་ཀྱི་སེན་མོ་བཀབ་པ་སོ་སོར་བྱས་པའི་ལྷག་མ་ནི་རྡོ་རྗེའི་མཚན་ཉིད་དུ་བྱས་པ་འདི་ནི་ཁྲོ་གཉེར་ཅན་གྱི་ཕྱག་རྒྱའོ། །ཕྱི་ནས་ནི་སྔགས་བཟླ་བར་བྱ་སྟེ། ཨོཾ་བྷྲྀ་སྭཱ་ཧཱ། ཁྲོ་གཉེར་ཅན་གྱི་སྒྲུབ་ཐབས་སོ།། །།ཨ་བྷ་ཡའི་ཞལ་སྔ་ནས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །